الزنبقة الفضية الجزء 23 والأخير

....فرحانين مع بعضياتهم كيضحكو و يتعانقو حتى من لبزوز هبطو كيتجاراو عند واليديهم و كيبسطو معاهم اما هي وصلات للقصر شافت روينة لكحلة لبوليس و ليكارد مهمهاش الامر و دخلات لداخل و فيديها باقيين لوراق كتشوف ف عائلتها فرحانة كضحك و عينيها غير عليه لباسو الاسود و القناع ديالو رجعوها لدوك الايام شاح بالنظر ديالو بعيد و لمحها قلبو نقز فلحظة عينيه كيقولولها تسالا الكابوس تعاونت مع لبوليس باش نعيشو مزيان انا رجعت احنان حبيبك الزنبقة رجع...حيد الماسك قدامها و كولشي سكت كيشوفو فيهم و هي تعابير وجهها عامرة بالحيرة و قدرات تنطق كلمة و حدة .

حنان: الزنبقة ؟ .... 

....تحرك ناحيتها شوية و هي جامدة بلاصتها كتشوف فيه بعينين متلألأتين كيبريو و كتشوف ف العائلة لي باين من وجههم كانو عارفين....قبل ما يقرب منها كثر حبساتو كتشوف فالارض و شادة فكرشي 

حنان: حبس حبس ماتقربش اووف(كتشوف فيه ) نتا حي 

يوسف: خليني نشرحلك عفاك ماديريهاش 

حنان: شنو ندييير واش نفرح ولا نبكي بغييت نتقيااا(كطلع راسها لفوق و تهبطو) شداتني سخفة 

يوسف: (شدلها فيدها) بشوية عليك تهدني و نهضرو 

حنان: قلبي كيضرب بزاف بزاف 

يوسف: مقلقة مني 

حنان : لااا مامقلقاش ماعرفتش علاش من المفروض نتقلق و نعاتبك ولكن ماتقلقتش(بعدات منو شوية) امكن باقي ماستوعبتها خاصني لوقت تعطيني لوقت؟ خص نبعد 

يوسف: اه اه خودي وقتك 

حنان: انااا انخرج دابا و نفهم مع راسي (بغات تخرج و رجعات عندو قاستو فوجهو) واش بصح نتا هادا مامتيش 

يوسف:(بدا كيشوفها ماشي حتى لتماك و شدها من يدها) حنااان رجعي لعقلك 

حنان: شكون حنان 

يوسف:(داكشي لي بقالو كملاتو ليه و بدا كيزعزها) عااارف صعيييبة ولكن هاني قداامك غوتي عليا ضربيني سبيني 

حنان: جوزيييف علاش اندير هادشي 

يوسف : انا الزنبقة 

حنان: عارفة ولكن ماعرفتش 

فهد: حنان واش نتي بيخير 

حنان: شنو واقع هنا 

حفيظة: هي ماشي مزيان 

حنان: شنو كندير هنا 

يوسف:(جمعها معاها بتصرفيقة باش تفيق ساعة سخفاتلو فيديه) حنااان 

اوسمان: واش نتا مسطي لاش ضربتيها 

كوهينور: لبنت تسوطات فعقلها و كتقولو لاش ضربتيها 

....هزها يوسف فيديه واخدها لكلينيك حيت شاف هادشي مامسلكش...نزل هازها بين يديه و دخل بيها كيعيط ليهم و دخلوها للفحص و هو معاها ...و شوية فاقت كتشوف فنقطة وحدة بطريقة عادية 

يوسف: حنااان كتسمعيني شوفي فيا (كيحركلها وجهها و هي كتشوف غير فديك النقطة) 

طبيب: لازمها طبيب نفسي كنظن دخلات فصدمة 

يوسف: (قلبو كيضرب فالتسعين و كيحركها ) حناااان حبيبتي مالك 

طبيب: هاهوا طبيب حضر نخليكم معاه (خرج)

دكتور نفسي: ممكن نفحص المريضة(بدا كيدير اختبارات ديالو ) ماعندهاش شيحاجا خطيرة هي مصدومة خاصها تفيق 

يوسف: فيقها ديير خدمتك 

د.ن :اوك انديرلها تنويم ميغناطيسي نعرفو سبب الصدمة و نفيقوها (جبد الطبيب ساعة من جيبو و بدا كيحركها قدام عينين حنان و هي متبعة معاه شوية نعسات بلاوعي ) مزياان شنو سميتك 

حنان: حنان 

د.ن: حنان عاوديلي شنو وقعلك شنو سبب الصدمة 

حنان: عييت من المشاكل كل مرة كنتصدم بشي حاجا عمرني توقعتها حتى من شخص لي كنت كنحسابو مات كان حدايا طول الوقت ضرني خاطري حيت خبا عليا و بقا كيشوفني كنبكي عليه و سكت و لكن لي ضرني كثر هو كان قلبي حاسسني بلي هو لكن كدبت كولشي فيا ماقدرتش نعرفو و انا عينيه حفظتهم كثر من سميتي قلبي كيتقطع بحال الى مكنتش كنبغيه حيت ماعرفتوش(بدأت كتبكي) اهئ اهئ توحشتو 

يوسف:(هبط لعندها شاد فيديها و هبطات دمعة يتيمة من عينو) كون تشوفي شحال تعذبت فدقيقة على بعادك و شحال كابرت و صبرت راسي باش مانعنقكش باش غير مانعرضش حياتك للخطر ضحيت مرة أخرى على قبلنا باش نعيشو مزيااان(كيبوسلها يديها) نعطيك عمري كاملو غير ماتبكيش ماتخلينيش 

د.ن: ماتجهدش على لمريضة 

يوسف: حنان (تخشا فحجرها مهبط راسو و بدا كيبكي بحرقة) بكيت عليك هاكا نهار كنتي فنفس سرير كتصارعي لموت رغبتك ماتخلينيش و طلبت من ربي ابعدني عليك الى تبقاي عايشة و هو سمعلي حياتك كانت مقابل نبعد عليك ولكن انا دفعت الثمن ماكنتش عارفكم عايشين عتقني اوسمان و مالقيتكمش تضمرت تكرفصت بزااااف ماتحرمينيش منك 

د.ن:(طرطق صبعانو قدام حنان لي كانو دموعها شلال و باين عليها تفكات من صدمة ...و هزات يديها حطاتهم على رأس الزنبقة لي غير حس بيها طلع عينيه فيها ) 

حنان: يوووسف اهئ اهئ توحشتك بزاااف انا سمحتليك على كولشي سمحلي حتى انا حيت تعطلت عليك سمحلي ماكنتش معاك نهار حتاجيتيني سمحلي اهئ اهئ ....

يوسف:(عنقها) كنبغيييك و انهبل بلا بييك 

حنان: حتى انا كنبغيييك ماتخلينيش حتى نتا مرة اخرى ماتسمحش فيا ماتخبي عليا والو انا بلا بيك مانسوا حتى حاااجا مااااتخلينيش 

يوسف: علىىى موتي 

حنان: لاااا مابغيتكش تموت بغيتك تعيش عيش معايا عيش ليا و لولادنا اهئ اهئ 

معنقها و مزير عليها كيسمع شهقاتها و كيبكي في صمت هاد اللحظة لي تمناوها بجوج من بعد سنين صفاو لخواطر تجمع شمل و توحدو لقلوب علاقتهم بالسنين لي بقاو فيها بعاد على بعضياتهم زادت قوات تعلمو صبر تعلمو يسامحو يعيشو اللحظة و مايعاتبوش و مايردوش اللومة على واحد فيهم شحال من كلمة كون تقالت شحال هادي امكن ماكانش اوصلو لهاد الحالة و شحال من كلمة ماكانش خصها تقال باش مايبعدوش على بعضياتهم شنو ربحو من هادشي كامل غير الحزن و الوجع لكن دابا ايعيشو الفرحة لأنهم دخلو علاقة جديدة مبنية على أسس متان من رف السنين حتى واحد مايقدر يهرسها حبهم كان عبرة و مثل للتضحية لحب الروح قبل الجسد لحب الافعال و باقيين هاكا هو واخا رجع زوين عينيه ماشافوش وحدة اخرى عينيه شافوها هي حيت بغات روحو ماشي وجهو و هي عمرها تشوف غيرو حيت كان اول واحد تعلمات معاه شحال من حاجا و اتبقا تبغيه حتى يرث الله الأرض ومن عليها.... 

يوسف:(طبع قبلة خفيفة على شفايفها و كيشوفلها فعينيها) نمشيو للدار اوجع قلبي 

حنان:(ضحكات بخفة) علاش كتقولي وجع قلبي 

يوسف: هه لأنك نتي قلبي و وجعي 

حنان: قنعتيني بصراحة ههه لكن نمشيو عند ديلشاه هي لولة 

يوسف: اه يالاه 

حنان: و نتا خصك ترتاح العملية دازت صعيبة 

يوسف: انرتاح غير معاك (شبك يدو من يدها و توجهو لعند ديلشاه فكلينيك آخر دخلو و بشرهم طبيب بلي فاقت و فحوصاتها مزيانين) 

حنان: دكتور طمني عليها 

يوسف:(شد الدكتور من الكول كيقادو ليه ) قبل مايطمنك بغيت نهضر معاه 

حنان: بعد منو راني عارفاك شنو اتقولو الى قربتي ليه مانتفاهمش معاك 

يوسف: (طرطق فيها عينو مصدوم ) ولكن رااااه هو لي خالف وعدو 

حنان: ماخالفش جاتني لخبار من الفرملية هو غير أكدلي و مالك باقي باغي تخبع كثر و كثر 

يوسف: لااا ماشي هكك صافي نساي واش قلت شيحاجا 

حنان: لا غير قول مابغيتينيش نعرفك 

يوسف: والله احبيبتي ماهكك(كيعنقها من لور) كونيلي على خاطرك 

حنان: هههههه منحرف 

يوسف: ثاااانكس ليدي ههه 

حنان: دكتور شنو حالة ديلشاه 

طبيب: تعافات من السرطان 

يوسف:(عنق حنان ) الحمد لله 

حنان: هههه و اخيرا 

طبيب: تقدر تجيها أعراض جانبية بحال 

التهاب في الفم أو الحلق.

استفراغ وغثيان.

الإصابة بأي عدوى بسهولة.

فقدان في الشهية 

حنان: واااش خطير؟ 

طبيب: هادو نسبة الإصابة بيهم 1% نسبة ضئيلة ماعندكمش مناش تخافو 

يوسف: اوك انشوفوها دابا و ناخدوها معانا 

طبيب: اه بالنسبة للخروج تقدرو تديوها معاكم لكن راقبوها مزيان أتكون حالتها حساسة 

حنان: واخا ان شاء الله 

طبيب: بالشفاء العاجل(ابتاسم ليهم و مشا ) 

دخلو عند ديلشاه لقاوها بابتسامتها كتسناهم و الفرحة فعينيها فيديها سيروم توجهات عندها حنان و عنقاتها 

حنان: اااي حبيبتي بنتي توحشتك اكبيدة ديالي 

ديلشاه: انا بطلة اماما هاني تشافيت 

يوسف: بطلة باباها(باسلها يدها) تشافيتي و مشا لمرض 

ديلشاه: اه انا فرحااانة بزاف ههه فين ينيس و كولشي؟ 

حنان: أممم ماجاوش 

ديلشاه:(دلات شنافتها لتحتانية) و علاش 

حنان: حيت نتي لي اتمشي عندهم 

ديلشاه:(ابتاسمات) انخرج؟ 

حنان: اااه هههه و دابا انمشيو 

ديلشاه: اخيييرا ههه انرجع للمدرسة و نبقا نلعب 

يوسف: و فاش نرجعو للدار عندنا مفاجأة كبيرة 

ديلشاه: قولي قولي عفاك منصبرش 

حنان: هههه صبري باش تسمعيها نتي و ينيس 

ديلشاه: وااااخا هه

....جالسين فرحانين باللمة ديالهم كيشربو قهوة و يهضرو على الاحداث لي وقعو كيتسمعو ضحكات و لأول مرة بعد سنين كيحسو بالامان فقلبهم ...دخل رامز هو و كاطالينا شادين فيدين بعضياتهم و كيضحكو و لقاوهم مجموعين...

رامز: شنو واقع هنا شفتكم مجموعين 

حفيظة: راامز فييين كنتي نتا و كاطالينا 

اوسمان: حنان عرفات بالحقيقة 

رامز: واااايلي 

كاطالينا: اها شنو دارت 

حورية: مانعرف كنتوقع ايكونو مخاصمين دابا 

معتصم: مكنضنش 

حورية: كولشي ممكن 

كوهينور: الاهم انها عرفات و كولشي كيتداوا مع الوقت الحمد لله حنا مجموعين و كنتمنى نبقاو هاكا كان عقلي ايخرج من بلاصتو كون تفارقنا 

اوسمان:(عنقها ) ماغاديش نعيشو شيحاجا بحال هادي مرة أخرى 

فهد: راه شدينا موحى و الزنبقة تعاون مع لبوليس حنا مابقيناش مافيوزيين 

رامز: كيييفاش 

كاطالينا: فهمني كيفاش مابقيتوش 

فهد: مقابل نسلمولهم موحى و نفضحو المنظمة خدنا حريتنا مقابلها و ديك الاعمال ماعندنا بيها غراض من ليوم 

رامز: يووووم واااحد غبرت ووقع فيه هادشي 

حورية: اواااا نتا لي غبرتي 

كوهينور: احم احم كانو كيدوزو شوية د الوقت مع بعضياتهم 

رامز: لا 

اوسمان: و فين كنتو 

رامز: تزوجنا 

كوهينور: هههههه مبروك 

معتصم: هيهات هيهات لي ماعندو هم تولدوليه حمارتو كنتي كتبانلي الشخص الوحيد لي عندو لعقل و نضتي تزوجتي غلطة حياتك

حورية: هههههه سكت امعتصم 

كاطالينا: هههه اه خطفتو و قلتلو يا تتزوجتي يا نقتلك 

رامز: اححح كديديبة انا لي كنت انخطفك كون ماتزوجناش 

ينيس: (دخل هو لولاد من جردة) لبارح دار عشاء رومانسي و عرضنا ليه 

شهد: فوقاش ايعرضني شيواحد العشاء رومانسي 

حفيظة: ههههه واش كانو حاضرين 

رامز: عاونوني بزاف بدرع قدرت نقنعها تتزوجني هههه 

فهد: حتى لهنا مامعاناش كيضيعو ليا ولادي ايتعلمو منهم السفالة 

أوس: بابا حنا اصلا تعلمنا السفالة منك بلا مانأول شنو كدير نتا و ماما فلبيت 

فهد:(حيد صباطو و شير عليك) وليني راك مكتحشمش 

حفيظة: هههههه من شبه أباه فما ظلم 

ينيس: دادا حورية انا بغيت نشوف ديلشاه 

ديلشاه: انا هنا (داخلة شادة فيد حنان و يوسف و كتمشى بشوية و كضحك ليهم جا عندها ينيس كيجري عنقها ) 

ينيس: خفت عليك بزاف 

ديلشاه: حتى انا خفت مانلعبوش مرة أخرى 

ينيس: لا انلعبو و مانتفارقوش حيت حنا خوت 

ديلشاه: توأم عمرنا نتفارقو 

ناضو كاملهم عند ديلشاه كيرحبو بيها و كيطمنو على صحتها 

حورية: هيه حنان الامور مزيان

حنان: و بزاااف 

حورية: مكاينينش مشاكل؟ 

حنان: بحالاش 

حفيظة: هي كتقصد نتي مامقلقاش من يوسف 

حنان:(عنقات يوسف) كنظن تقلقت منو بما فيه الكفاية و دابزنا بزاف و دابا (شافت فيه) بغيت نبقا معاه و نبغيه نهار على نهار 

اوسمان: لاااا هادشي مامعانااااش خصو يتعاقب 

يوسف: عقاب شنو بعد مني باغي تشريهالي ههه 

فهد: اوسمان عندو لحق دخول لحمام ماشي بحال خروجو

يوسف: اوك صاف انتعاقب و عقابي هو تكون عندي عائلة بحالكم ههه 

حورية: هههه قولو مبروك لكاطا و رامز رآهم تزوجو 

حنان: بصح؟؟ (عنقات كاطا) مبروووك 

يوسف: دخلتي حتا نتا للقفص الذهبي ههه مبروك عليك 

رامز: ماصلاحش نقولوها ليكم مع هاد الاحداث لي كانو 

حنان: شنو كتقول نتا بطبيعة الحال انفرحو ليكم و انديرو عرس زويين 

كاطالينا: لا بلاش العرس حنا قررنا نمشيو للمغرب و نتلاقاو عائلتي مع عائلتو باراكا 

يوسف: ههه نتوما تمشيو للمغرب و تخليونا هنا ولا كيفاش 

رامز: اصلا حياتنا هنا فلمكسيك 

يوسف: اشمن حياة سالينا من كولشي و انمشيو لبلادنا انخليو المكسيك مورانا مابقاش محتاجنا 

حنان: واش كدوي بصح انرجعو

يوسف: واعدتك و قلتلك انرجعو و جا لوقت انرجعو للمغرب كناس عاديين بلا ماشاكيل 

حنان: و مانسيتيش شيحاجا (كتشوف ف ولادها) 

يوسف: بداي نتي 

حنان: اوك ... ديلشاه ينيس (حنات على ركبتها) نتوما عارفين شحال كنت كنعاودلكم على باباكم 

ينيس: بابانا الزنبقة 

ديلشاه: اه 

حنان: و كنتو كتقولولي بلي ايرجع واحد نهار و انا كنت كنقولكم لي مات مكيرجعش لكن باباكم رجع 

ديلشاه: واش لي مات كيرجع؟ 

حنان: ههه لا ماشي هكك هو ماماتش هو كان بعيد علينا كيدير خدمة 

ينيس: ولكن انا مابغيتوش هو خايب كيبكيك ديما انا بغيت بابا جوزيف 

ديلشاه: هو مكيبغيناش حيت ماكانش معانا 

حنان: لا سمعوني هو كيبغينا بزاف بزاف غير كان كيحمينا باش مانموتوش 

ينيس: مابغيتش نشوفو ....

ديلشاه: حتى انا مابغيتووش 

يوسف:(تحنى عندهم) هو كيبغيكم كثر من راسو و كيحميكم و كيدير اي حاجا بغيتوها اقدر اموت على قبلكم ماكانش عارف واش نتوما حيين و بكا بزااف كيما بكات ماماكم ولكن هو رجع و ماغاديش اخليكم 

ديلشاه: اهئ اهئ انا بغيتك نتا 

ينيس: اهئ اهئ حتى اناااا 

يوسف:(عنقهم) حتى انااا بغيتكم انا قدامكم انا باباكم 

ديلشاه:(كتمسح دموعها) واش نتا بابانا الزنبقة 

يوسف: اه انا ههه 

ينيس: بدلت رأيي بغيت بابا الزنبقة 

حنان: هههه هاهوا باباكم قدامكم شنو بغيتوه ولا نجري عليه 

عنقوه بقوة...لا بغيناه بغيناااه 

يوسف: هههه حتى انااا بغيتكم و مانخليكمش 

ينيس: نتا بابانا لحقيقي 

يوسف: اه اولدي انا هو 

ديلشاه: ههه ينيس ولا عندنا بابا و ايبقا يلعب معانا و يدينا فينما بغينا 

ينيس: اه و مايبقاوش اقولو علينا دراري لاخرين بلي ماعندناش بابانا 

يوسف: لي قالها غادي نقطعلو لسانو مكاينش عندي لي يقلقلي ولادي ابدا 

حنان: هههه الحمد لله اييه دابا منين توضحات الامور شنو نديرو 

كوهينور: امممم غادي كل واحد امشي اجمع حوايجو حيت انمشيو للمغرب وييلي متحمسة مابقيتش قادرة نصبر باي نتلاقاو منهنا ساعة 

حنان: كوهينور تسناي(مشات عندها) كنعتاذر حيت تسرعت بحال كل مرة 

كوهينور: (عنقاتها) كنت خايفة ماتسمحيليش لكن كوني متأكدة بلي نتي ختي و ماعمرني نآذيك 

حنان: عارفة عارفة 

اوسمان: واايالاه زيدي اكوهينور نجمعو حوايجنا دغيا 

حنان: هههه سربيو سيرو (ضارت عند لوخرين) و نتوما شنو كتسناااو نعرض عليكم تحركو بلادنا كتسنانا 

يوسف: أممم و انا خاصني نجيب حوايجي من داري(عنقها من لور ) 

حنان: اممم و شكون قالك انخليك تمشي لا من ليوم بلاصتك حدايا ماتفارقني حتى دقيقة حتى للمغرب و شري حوايج 

يوسف: حاضر يا مولاتي ههههه 

حنان: انتوحش هاد لقصر كان جامع ذكرياتي مع ولادي 

يوسف: انجيو ليه مرة مرة فوقما بغيتي 

حنان: ههه اه (باستو ففمو و جراتو من يديه) اجي عاوني نجمع حوايجي و حوايج ينيس و ديلشاه 

معتصم: (تنهد و هو كيشوف اركان دار ) 

حورية: فاش كتفكر امعتصم 

معتصم: الوقت كيمشي بسرعة لبارح كنت باقي جون و دابا فيدي عكاز وولاو عندي حفايد كيعيطولي جدي عمرني حسيت بالراحة حتى لهاد نهار 

حورية: مابقاش عندنا علاش نخافو ولا نهربو 

معتصم: امكن حنا سالات المهمة ديالنا فهاد الحرب و خرجنا رابحين لكن تأكدي أن المنظمة داعماها ميريكان و عمرها أتضمر حنا ضمرنا وسيلة كانو ايستعملوها ضد العالم العربي وقفنا الحرب 20 عام لكن ايلقاو طريقة أخرى اطعنو فينا 

حورية: انا متأكدة كيما حنا ناس مزيانين و لقينا حل لمشاكيلنا غادي يجيو ناس من بعدنا غادي يحاربو باش الامة الاسلامية تبقا متحدة 

معتصم: كنستغرب ان جوهرة صغيرة خلاتنا نعيشو هاد الاحداث كنستغرب انها خلقات قصص حب أنا و نتي يوسف حنان كوهينور اوسمان فهد حفيظة و كاطالينا و رامز رغم انها خلاتنا نعانيو الا انها علماتنا درس كبييير 

حورية:(عنقاتو) من هاد نهار غادي نعيشو بيخير مابقيناش انعسو و الفردي تحت لوسادة مابقيناش اندخلو فمؤامرات نكونو ذياب 

معتصم: الحمد لله على كل حال نوضي نجمعو حوايجنا 

حورية: غير رتاح لخدامات كيجمعوهم 

معتصم: راه كولشي كيجمع حوايجو بيديه 

حورية: واش مكتفهمش بلي دارو سبة بلحوايج باش اسدو عليهم هههه 

معتصم: اسدو علاه اسدو؟ 

حورية: اووف منك يا هاد الراجل تبت بغيت نجلس معاك شوي 

معتصم: شنو فيها زعما حتى نتي الى خديتيني و سديتي عليا مالني انااا 

حورية: هههه حنا كبرنا امعتصم 

معتصم: نتي كبرتي انا باقي صغير 

حورية: هههه اه باينة ها عكازك اعطيك لخبار هههه 

....هبطو كلهم واحد مور واحد و لخدامات جايبين ليفاليز موراهم تفاهمات حنان مع رئيسة الخدم و تافقات تعطيهم خلصتهم و يخرجو صافي و حتى ليكارد هكك و الجاردينيي و شيفور و بقاو تماك كيتسناو كوهينور و اوسمان حتى جاو و نطالقو ركبو فطائرة كبيرة جات خصيصا ليهم متوجهة للمغرب كيشوفو لقصر تحتهم كيبعد شوية بشوية و طول طريق كيضحكو و يتعاودو و ينشطو بيناتهم كيخلقو جو زوين فاش كيكونو مجموعين مرا يتناكرو مرة يتخاصمو مرة يضحكو و يقشبو و هاكا الحياة لكن الاهم مكيتفارقوش العائلة كلمة كبيرة و رابطة لي كتجمعهم قوية ماشي لبارح و لا ليوم تبنات لا تبنات هادي سنوات و قوات بالحب و الصبر...قصتهم سالات فالمكسيك و ايكملوها فالمغرب لأنهم اعتبارا من هاد اللحظة ايعيشو حياة كلها سعادة مع بعضياتهم....

تحطات الطائرة فالمغرب مكان منعزل ارض منبسطة و مسرحة خرجو من الطائرة واحد بواحد و الريح لي كديرو لفرفارة كيطير شعرهم نتابها لطوموبيلات مع ليكارد كيتسناوهم كانو ربعة طوموبيلات نوع رانج روفر فالكحل و دازو حلو ليهم لباب و كل واحد ركب 

حنان: حبيبي قبل مانمشي لدار بغيت نمشي لواحد لبلاصة 

يوسف: اه نمشيو (حل ليها لباب و ركبات منبعد ما وصا ليكارد ياخدو العائلة للدار و ركب حداها عاطي إشارة للسائق يتحرك) فين ؟ 

حنان: المقبرة لي كاينة فطريق**** 

يوسف: شنو انديرو فالمقبرة 

حنان: شاكمة و نورة تماك بغيت نزورهم هوما لوالا(ابتاسمات ليه و عينيها فيهم بريق حزن ) 

هز يدها باسها ليها و بقاو ساكتين طول طريق حتى وصلو للمقبرة و هبطو و هي قدامو كتمشا تابعها من لور و كيشوف فين اتمشي حتى وقفات قدام قبرهم واحد حدا واحد و جلسات 

حنان:(شافت فيه ) هوما هادو 

يوسف:(غمض عينيه و شاف فيها ) 

حنان:(رجعات شافت فلقبر) محمد نورة هاني جيت توحشتكم بزاف عارفة قصرت من جيهتكم ماجيتش منهار صيفطتكم لهنا باش تدفنو(شافت فيوسف) صيفطتهم لهنا حيت كانت آخر وصية ليهم بغاو اتدفنو فبلادهم و مع بعضياتهم(طاحت دمعة من عينيها و رجعات كتشوف فلقبر و تحيد تراب) كون تشوف امحمد شحال فراقك عليا كيوجعني و كيضرني و كيفاش نصبر و حنا ولفنا نكونو بجوج من صغر كتحمي ظهري كنتي خويا معايا ديما مكتفارقنيش حتى من حفيظة ربناها بجوج و حفظتي معايا السر ديال الزوبير(ابتاسمات) شنو وقع حتى مشاو دوك ليام علاش وصلنا لهاد الحال (تنهدات) ولكن عرفتي شنو نتا و نورة مامشاش موتكم هكك قدرنا نديروها و نحميو بلدان على قدها ههه الكوهينور لي ضحيتي براسك على قبلها انورة و مرضتي بسبابها بسيدا هي معانا دابا و ماغاديش توصل ليديهم تضحيتكم مامشاتش هكك ابدا 

يوسف:(تحنى و جلس حداها ) ماتو موتى ديال لعز ايبقاو محفورين فعقلنا حيت هوما جزء من العائلة و عائلتنا اتبقى ناقصة بلا بيهم 

حنان: فاش كان كيحسابلي متي كنت كنتمنى كون مت معاك بحال نورة و محمد 

يوسف: و هاني مامتش اذن عيشي معايا 

حنان:(عنقاتو ) يكفيني نبقا غير معاك 

يوسف: ايكونو كيشوفونا و فرحانين 

حنان: زعما منين جبتي هادي 

يوسف: هاكا كيقولو شنو عرفني انا 

حنان: هههه اه 

يوسف: شنو بانلك نساليو المهمة لي بديناها 

حنان: كيفاش 

يوسف:(شدلها فيدها) اجي معايا 

حنان: ولكن فيين 

يوسف: للبحر 

حنان: ليل هادا اشمن بحر هههه 

يوسف: و المقبرة ماعليناش الليل هي ههه 

حنان: لبرد 

يوسف: انعنقك و مايجيكش (خداها من المقبرة و هي كتشوف فقبرهم و كتبتاسم و ركبو فطوموبيل توجهو للبحر و خرجو بداو كيشوفو فيه من السور و الأمواج ديالو كتلاطم مع بعضياتها) 

حنان: علاش جينا لهنا 

يوسف: امم(حاوط خصرها) جاتني فشكل ماعاتبتينيش هههه توحشت تغوتي عليا 

حنان: ياااك هههه و انا عييت مانغوت و نعاتب بغيت نجرب شيحاجا جديدة 

يوسف: (باسها فحنكها) كانت صعيبة عليا نكون حداك و مانقولك والو 

حنان: كان قلبي حاسسني و سولتك و لكن نكرتي شفتيني كنبكي قدامك و نكرتي 

يوسف: ولكن انا قلتلك كولشي عتارفتلك 

حنان: فوقاش 

يوسف: كنتي ناعسة 

حنان: هههه والا مامعاناش كان خصني نكون واعية 

يوسف: و قلتهالك و نتي واعية غنيتلك اغنيتنا هضرت معاك بالكلمات لي كنت كنقولهم و نتي حت فاش كنت كنعس معاك ماعرفتينيش 

حنان: و هادشي لي خنقني كثر انني شكيت ولكن ماعرفتكش 

يوسف: ههه بانلي عندي مستقبل فالتمثيل 

حنان: اه خدم ممثل منين مابقيتيش مافيوزي ههه

يوسف: و فنظري خدمي حتى نتي معايا حيت مانقدرش نمثل مع وحدة اخرى عارفك اتقتليني هههه

حنان: ههههه اه نقتلك 

يوسف:(حط يدو فجيبو و جبد الجوهرة) هادي كانت سباب عذابنا لكن ليها فضل علينا 

حنان: شنو انديرو بيها 

يوسف: نرميوها فلبحر 

حنان: أحسن حاجا نرميوها 

يوسف:(رجع يدو لور و رماها بعيييييد فلبحر و ضم حنان ) سالينا هه

حنان: اه و دابا اسي موقاديري خودني لداري بغيت نرتاح 

يوسف: (هزها و هي كضحك و تغوت و ناس كيشوفو فيهم) بغيتي غير ترتاحي قولي نهزك 

حنان: هههههه والا نزلني الزنبقة

يوسف: هههههه شنو زنبقة شنو مانزلكش ...

....اتاجهو للدار نيشان و هبطو شادين فيدين بعضياتهم بقات كتشوف فدار شحال و تبتاسم 

حنان: اول مرة دخلت لهاد دار كنت لابسة كسوة كحلة كنت مندهشة حيت زوينة مختالفة و عمرني شفت بحالها كانت كحلة ههه و هاني دابا كنشوفها مصبوغة كلها بالبيض 

يوسف: احم احم خرجتيني من السواد لي كنت عايش فيه 

حنان: ههه عندي فضل عليك 

يوسف: ههه بصاااح اوا(فتح يديه) تفضلي لدارك اوجع قلبي 

دخلات بخطوات بطيئة و الخدم فاستقبالها كيحييوها براسهم و كيرميو عليها الورد ضحكات من قلبها و هي كتشوف ف يوسف و كتقولو نتا لي درتي هاكا أوملها براسو بمعنى يالاه...زادت شوية و شافت عائلتها مجموعين واقفين كيتسناوها وولادها كيجرو عندها عنقوها و كيعاودولها شحال عجباتهم دار و بلي حسن من هاديك لي فالمكسيك...

معتصم: نورتي دارك ابنتي 

حنان: دار منورة بيكم ههه 

فهد: حتى لهنا و صاف ههه اتصبرو علينا علاما نلقاو دار و نرحلو ليها 

يوسف: اش كتقول هبلتي لقصر كبير اقدنا كاملين 

فهد: لا سمحلي مهمتي و ساليتها شحال و انا شاد دورك فهاد دار بغيت شوي دراحة هههه 

حنان: لااا ماعندكم فين تمشيو حفيظة دوي 

حفيظة: انا هزيت يدي هضرو نتوما معاه 

يوسف: فهد انا خوك لكبير سمع مني 

فهد: ماعرفتش اخويا حسيت بلي متقلين عليكم 

حنان: واش نتا بعقلك كيفاش متقلين كون ماكنتوش نتوما كون راه حماقيت شحال هادي 

حفيظة: انا مابغيتش نمشي شوف حتى شهد و اوس ولفو العبو مع ديلشاه و ينيس لاش انبعدوهم 

حنان: بلييز(كترغبو بعينيها) 

فهد: ههه اوا اش عندي ماندير قدام رغيبكم هاني انبقا هههه 

يوسف:(ضرب فكتفو) تبت ماعندك فين تمشي هههه 

فهد: ولكن بانتلي انرجع وسامتي كعارض أزياء تصلاح ياك 

حفيظة: و انا بانتلي نسرح صوتي ههه 

فهد: اييه منين مابقيناش مافيوزيين انخدمو لحاجات لي كنعرفوهم

اوسمان: حت انا انرجع للافاك توحشت نعطي محاضرات 

كوهينور:(مالت عندو) و انا توحشت نرجع نقرا عندك 

اوسمان: لا هادي صعيبة شوية بلاصة مانبقا نجري عليك انحبسك معايا(غمزها) 

كاطالينا: هههه و حتى انا عيطولي نرجع لخدمتي 

رامز: صبرو صبرو كل واحد كانت عندو خدمة قبل مايدخل لهاد الدومين و انا شنو نخدم 

يوسف: نتا معايا شكون ايرد لبال للشركات مانقدرش عليهم بوحدي خصني شريكي 

رامز: مناسبني هادشي ههه 

حنان: اشمن شركات هه 

معتصم: يوسف كيهضر على شركات باباه ديال التنقيب فالمناجم 

يوسف: هملت دوك الشركات و هاني وقفت عليهم دابا الحمد لله فلوسهم حلال حيت مابقيتش باغي حتى ريال دلحرام 

حنان: اييه و شنو بانلكم نديرو عراضة غدا حنا كندخلو للدار اول مرة منبعد سنين (ضارت عند اوسمان) تعيط لعائلتك اجيو من كيكو و (ضارت عند كاطالينا و رامز) و نتوما عيطو لعائلاتكم اتعرفو هنا عندنا اش بانلكم 

يوسف: ههه فكرة واعرة 

اوسمان: ههه اه انا انعيطلهم(جبد تيليفونو و خرج لبرا يهضر معاهم) 

حورية: اييه ادوك لبراهش ماتمشيوش تنعسو غدا عندنا نهار طويل (كتجري عليهم لبيوتهم و هوما كيضحكو) 

فهد: بالنسبة لدراري خاص نديرولهم انتقال 

يوسف: فكرت فيها ماتخافش كولشي مقاد 

حفيظة: اوووكي اذن تصبحو على خير هه (شدات فهد من يدو و مشاو) 

يوسف: يالاه نعسو حتى حنا عييت توحشت نعس حداك اصلا هه 

حنان: يالاه نمشيو احبيبي ...

أصبحنا و أصبح الملك لله 

هادا صباح مختالف ماشي بحال أي صباح فاقو فالهدوء و الطمأنينة و ضميرهم مرتاح ماشي خايفين من هجوم عليهم ولا انفجار فدارهم ولا صوت التيليفون منين اجاوبو عليه يقولهم شيواحد مات...ابدا هاد المرة مختالفة فقط الضحكات لي مسموعة فالقصر و ترحيباتهم بعائلة اوسمان لي يالاه وصلو لعيالات لابسين جلالب و لفولارات باينة عليهم الحشمة و جالسين فيديهم بعض الاشياء من البادية ووقفو فلباب استاقبلوهم بحرارة و تسالمو و تعانقو كيعبرو على لحب ديالهم لبعضياتهم 

حنان: مرحبااا بيكم 

ايطو: أرحب بيك الخير ابنتي تبارك الله داركم زوينة 

فاطنة: شحال هادي ماتشاوفنا و اخيرا كتاب لينا نتلاقاو مرة أخرى هههه 

لكبيرة: (عنقاتها) أرحب بيك لخير 

حنان: ههه دخلو عفاكم 

لكبيرة: بسم الله 

يوسف: كيدايرة ايت يوسي كيكو مزيان 

مبارك: مزيان اولدي راك عارف كيفاش كتكون الخدمة تماك و دابا منين خلاني اوسمان بوحدي زادت عليا 

لحسن: الله اسمحلك اعمي و حنا اش كنديرو 

سعيد: هههه عندو لحق لخدمة بزاف و بلاصة اوسمان بقات خاوية 

اوسمان: أنا عفيييوني رجعت لخدمتي و هنا نبقا ههه 

رابحة: (كتهمس)ايييه شفتي دارهم شحال زوينة 

فاطنة : تبارك الله واعرة 

كوهينور: و علاش ماجاتش مايا توحشتها 

ايطو: مايا حاصلة مع بزوزها و عائلة راجلها مابقاوش كيقدرو يخليوها ولفوها كثر من لقياس ههه 

كوهينور: اوا الحمد لله غير منين تصالحو و خالتي يامنة 

لحسن: يما ماقدراتش تجي الى خرجات من لبلاد كتبغي تحماق هه 

حفيظة: ههه و شكون كره ابقا تماك الطبيعة واعرة بزاف 

معتصم: اييه ماكانش عندنا لوقت نتساراو داك ساعة 

مبارك : مازال تجي عندنا حنا دابا نساب اسي معتصم ههه 

معتصم: لهلا اخطيك اسي مبارك ههه 

لكبيرة:(كتشوف ف حفيظة و حنان) تبارك الله تبارك الله وجهكم منور ابنياتي هههه 

فهد: الفرحة و مادير هاهوما رجعو للبلاد 

لكبيرة: و انا قصدت تنورو بشيحاجا أخرى سي معتصم لالة حورية بانلي قريب اجيو حفايد اخرين اصدعوكم فدار 

حنان:(شافت فحفيظة) لا الكبيرة ههههه كطيريها دغيا خلي غير ابانو الاعراض 

يوسف: صبرو شوية كيفاش 

حفيظة:(كتفحص كرشها و كترجف) واش انا حاملة ؟ واش شفتيها فعيني كتبان؟ 

ايطو: هههه اوا خالتي لكبيرة عمرها ماغلطات 

حنان: اه حتى فلحمل لول ديالي عرفات هههه (شافت ف يوسف مصدوم) خلي حتى نتأكدو 

يوسف:(ناس من بلاصتو كيشوف ف فهد و فهد كيشوف فيه) واش نتي حاملة ؟ 

فهد: (جلس حدا حفيظة كيفرنس) مابغيتش نفرح هكك ولكن بغيت نتأكد 

حنان: اوك اوك صافي دابا نساو شوية الى كانت شيحاجا اتبان فالمستقبل ههه (ناضت عند يوسف شداتو من يدو و جلساتو حداها) 

يوسف: (همسلها ) بغيت نوض نبوسك و نعنقك 

حنان: ششش بليييز حتى نتأكدو هههه 

لكبيرة: اوا مبروك عليكم اترباو فعزكم ان شاء الله 

حورية: معتصم غادي يوليو عندنا حفايد اخرين هههه 

معتصم: سعدااااتي بنتي كوهينور و حنان و حفيظة ايولدو هههه 

ايطو: بنتي كوهينور كيدرتي مع لحبالة 

كوهينور: اه بيخير واخا كنعيا شوية 

رابحة: ان شاء الله تولدي بخير و سلامة و تجيبيلينا ولد نفرحو بيه عمرنا دار لعمي مبارك بلبنات دابا بغينا لولاد 

اوسمان: ولد او بنت ماكاينش فرق 

مبارك: المهم هو تفكي بيخير و على خير 

حنان:(شافت ف ساعتها) تعطلو هادو 

يوسف:(شاف فلباب ) هاهوما جاو 

حنان:(ناضت كتزرب و شدها يوسف) مالك 

يوسف: بشوية و نتي نايضة كتنخضي راك حاملة 

حنان: هههه قلتلك خلي نتأكدو 

يوسف: لا انا كنتيق فلكبيرة قالتهالك المرة لولة و طلعات بصح 

حنان: (شافت فيه مطولا) و مالك متوتر و خايف هههه يوسف صافا (شداتو فيديه) 

يوسف:(دارلها لا براسو) كنحس براسي انطيح 

حنان: اوك خلي دابا حتى منبعد و نتأكدو كالما 

فهد: هههه دابا نتي حاملة لعزز درتهااا (كولشي شاف فيه و عاد جمع راسو) 

معتصم: مشوه بينا حتى هنا هههه 

حفيظة: هههه شش زيد نمشيو للبيت تحرك (جراتو و مشاو) 

فالباب كانت كاطالينا جابت ماماها و باباها و خوها من المطار و مشاو عندهم يوسف و حنان استقبلوهم 

حنان: أهلا مرحبا بيكم 

مجدة:(فوطوكوبي ديال كاطالينا غير هي رقيقة و شعرها طويل) أرحب بيكم الخير نتي خت لعريس 

كاطالينا: ههه ماما خلي غير حتى ندخلو 

حنان: لا انا ماشي ختو ولكن بحال ختو اصدقاء ههه 

خالد:(باها) ههه ماديروهاش منا قلة الصواب غير متحمسين نعرفو شكون لعريس منين قالتها لينا كاطا و حنا فرحانين 

لؤي:(خوها يالاه عندو 18 عام كيشبهلها زعر عويناتو زورق ) و اخيييرا لقات لي يقبل عليها هههه 

كاطالينا:(عطاتو دقة لراس) بطليب و رغيب باش قبلت علييه اناااا 

يوسف:(بقا كيخبع الضحكة و كيهضر مع حنان) هادشي عاد ماعرفوش الحقيقة كولها 

حنان: ششش 

يوسف: كنتسنا غير اوصل رامز هو و جدو الهربة هههه 

حنان: دخلو مرحبا بيكم ههه 

مجدة: و لعريس فينو 

حنان: هو دابا فطريق قريب اوصل هو و جدو تفضلو 

خالد: شكرا 

لؤي:(يالاه بغا يدخل و هو يوقف النظر ديالو على ديلشاه كتلعب فالجردة مع شهد و ينيس و أوس بقا كيشوف فيها ماقدرش احيد عينيه حتى طاحت فالارض و تجرحات فرجلها و مشا كيجري عندها شافو يوسف و حنان و تبعوه ) نتي بيخير (نوضها)....

ديلشاه: اي رجلييي اهئ اهئ 

حنان: ديلشاه (كتنقرلها حوايجها) حاولي على راسك راك باقا عيانة 

يوسف:فين كيضرك هنااا (باسلها رجلها) 

ديلشاه:(كتمسح دموعها) انا بيخير 

حنان: يالاه ندخلو للدار باراكا من لعب 

ديلشاه: لااا بغيت نلعب 

يوسف: ينييس اجي (شاف فيه) ياك قلتلك رد لبال لختك هاهي طاحت 

ينيس:(شدلها فيدها) صافي ابابا ماتخافش هاهي معايا انردلها لبال 

لؤي:(سهى فعويناتها لي كيبريو بدموع و شعرها الحريري لي طايح على وجهها الى كانت هاكا زوينة و هي صغيرة كيفاش اتكون فاش تكبر ) مايكون باس 

حنان: (ابتاسمات ليه) ماشي شيحاجا عادي كيلعبو 

يوسف: يالاه ندخلو خلينا ناس كيتسناو فلباب 

حنان: اه يالاه ...

رجعو عند كاطالينا و عائلتها و دخلوهم لداخل تسالمو مع العائلة و جلسو كيتعارفو بيناتهم...مادازش وقت بزاف وصل رامز هو و جدو و هبطو من طوموبيل...خرج جدو كيضحك و الكارو ففمو و لابس نظاظر كوحل و قاميجة فيها وريدات بحال الى كان فهاواي و شورط معاها و كلاكيطا و شابو و كيتمشا بلمهل 

الجد: كبرتي اولد القحبة و بغيتي تزوج 

رامز: ششش سكت اجدي هالعار بلا دوك الالفاظ ماضيعهاش 

الجد: غير كويها نتا و جيبني انا نخطب 

رامز:(حط يديه على وجهو ) كان عليا نقولهم مقطوع من الشجرة 

الجد: نتا لي جايبني لهنااا علاااش ماخليتينيش نبقا مع دوك الحوتات كيديرولي ماساج 

رامز: تعارف معاهم و منين كولشي يتقاد سير ديك ساعة فين كنتي عفاااك اجدي ماتخسرش الهضرة

الجد: ازيد القواد نخطبولك 

رامز: اشمن خطبة ولا زبي رااااه تزوجت بييها 

الجد: و انا علاش هنا 

رامز: عفاك دخل و سكت حتى نقولك هضر 

الجد: زيد الكلب باك زامل وولدك زامل 

رامز:(عض على شنايفو و كيقول بينو و بين راسو اش داني نجيبو بقا كيشوف فيه شوية و هو يضحك واخا هكك مايقدرش اعيش بلا بيه عندو عزيز عنقو و زادو دخلو للدار) الى عجبت لواليديها انصيفطك للمالديف مع شي حوتات هههه 

الجد: لا اناخدكم معايا نتوما تعيشو معايا 

رامز: اكون خير ههه 

...دخلو للداخل و تاجهو لعندهم 

الجد: واحد السلام عليكم هههه 

يوسف: اهلا جدي ههه

الجد: أهلا جوزيف ولدي (عنقو) شحال توحشتك 

يوسف: ههه حتى انا كيدرتي صحتك مزيانة 

الجد: وصلت ل ثمانين عام و باقي شباب ههه 

يوسف: هادشي باين هه (جر حنان ) هادي مراتي 

الجد: و كنقول علاااش مخبعها معذووور هاد زين اخبعوه مايوريوه لحد 

حنان: هههه شكرااا 

بقا يوسف كيعرفهم على بعضياتهم و الجد بكثرة ماهو ناشط و ضحوكي دغيا ولفو عليه و دخل ليهم للخاطر 

الجد: شوفي ابنتي الى مابغيتيش انعذرك غير هربي 

رامز: جدي جبتك باش تزوجني ماشي لعكس 

مجدة: ههه فرأيي بنتي كاطالينا ماتلقاش بحال ولدك 

كاطالينا: كيجاكم رامز 

خالد: مزيااان مانلقاش حسن منو لبنتي هه 

الجد: و نتي ابنتي واش عجبك بعدا قولي الحقيقة عنداك اكون جابرك 

كاطالينا: ههه لا اجدي ماجبرني على حتى حاجا انا كنبغيه 

رامز:(كيشوف فيها بحب ) حتى انا كنبغيك (ضرب لؤي فركبتو) افين اصاحبي انوليو عشران من ليوم 

لؤي: مرحبا ههه 

رامز: شنو عندك هاد لعام 

مجدة: كيقرا فمدرسة ديال الفيدرالية 

رامز: ااه بغيتي تكون محقق بحال كاطا 

لؤي: شيحاجا كثر ههه 

رامز: الله يوفق 

خالد: اوا اسي حميد منين لولاد تافقو حنا ماعلينا غير نباركو ليهم 

الجد: الله اكمل عليهم بلخير 

كاطالينا: بالنسبة للعرس حنا مابغيناش يكفي درنا لاكط 

الجد: كيما بغيتو بيناتكم و نتوما كتقررو انا يكفيني ناخدكم تعيشو معايا

يوسف: لا سمحلي اجدي يعيشو معاك لا هوما ايعيشو هنا رامز كيخدم معايا و محتاجو بلا بيه انتخربق 

الجد: ياك المرضي 

حنان: اه اجدي عيش معانا هنا مرحبا بيك 

رامز: علاه هو كيجلس فبلاصة وحدة كل مرة دولة 

يوسف: مكاين مشكل فاش اسالي لمسارية ديالو يبقا يجي لهنا ههه 

لخدامة: لالة حنان لغدا واجد 

حنان: شكرا (ضارت عندهم ) نوضو نتغداو مرحبا بيكم ..

تجمعو فديك طبلة طويييلة كل واحد شاد بلاصتو لا بالبزوز لا بلكبار لا بالشباب كلشي جالس حدا شي و مترأس الطبلة معتصم فواحد جهة و يوسف فواحد الجهة مقابل معاه و كل واحد حداه مراتو...بقا يوسف كيشوف فهاد العائلة لي تجمعات هادي هي النهاية لي كان باغي هادي النهاية لي يستاهل كيشوف كمية الحب لي كتجمعهم و التعاون بيناتهم...الجد كيفضح رامز قدام كاطالينا و يعاودلها على شنو داز فصغرو و هاد الأخير كيحشم و يسكتو و كيبقاو اضحكو عليه و معتصم دخل فحديث طويل مع مبارك و كيسترجعو الذكريات حتى من لعيالات كيتبادلو اطراف الحديث و كل واحد كيمد الاطعمة للاخر باش يجربها ...شاح بالنظر ديالو لجوج كراسا خاويين و تفكر شاكمة و نورة كون جلسو فدوك لكراسا بقا كيتخيلهم معاهم و كيبتاسمو ليه فلحظة دازت دمعة يتيمة من طرف عينيه دغيا مسحها و ابتاسم فاش شاف يد حنان محطوطة على يدو و بصوت جدي و مبحوح نطق 

يوسف: كنبغيك بزاف ...

...دازت تسع أشهر بضبط من هاد لعراضة كل واحد رجع لداروو حياتهم بقات عادية مافيها حتى تغيير عايشين فسلام مجموعين كيخدمو خدمتهم كانو مقررين من ديك الوقت امشيو للحج لكن تبدلات واحد الحاجا لأنهم طلعو حاملات بربعة حنان و حفيظة و كاطالينا و كوهينور ...يوسف فرح بزاف حيت حضر لكرش حنان و هي كتكبر و عاش دوك اللحظات معاها بعكسها هي لي كانت خايفة اوقعلها كيما وقع مع ولادتها اللولة لكن يوسف ديما جنبها كيعطيها القوة ...بحالو بحال اوسمان حتى هو كيتهلا فكوهينور و خايف عليها اما هي هانيااا عندها كتحس بالراحة غير كتبقا تساءل شنو اتولد بنت و لا ولد مع العلم مابغاوش اعرفو دابا ...كاطالينا لقات راسها حاملة ببنت و رامز كيفكر كل مرة فاسم زوين اسميه و كيديها و يجيبها للرياضة ديال الحوامل نصحاتها بيها طبيبة و ندوزو لأخر كوبل لي هي حفيظة حتى هي خايفة من لحريق ديال لولادة لأنها جربات انما غير كتشوف الفرحة لي فعينين فهد كتنسى كولشي و كترتاح....عرفنا احاسيسهم لكن نسينا شعور دراري صغار هههه ينيس من نهار عرف حنان حاملة و هو ماحاملش الوضع كيحس بلي اياخدلو لبيبي بلاصتو ديما مخنزر و ديلشاه كتحاول تقنعو بالعكس او والو اما أوس كيتسنى حنان تولد كثر ماكايتسنى ماماه تولد و شهد مامسوقاااش عندها عادي المهم اولدو كلهم باش تلقا معامن تلعب ...كانو جالسين فصالة فهد كيصبغ ظفار حفيظة و هي كتبردهم و يوسف كيدير ماساج لكتاف حنان و كوهينور كتاكل فشكلاط و مخشية ف اوسمان كيتفرجو اما كاطالينا كتقلب فالكاطالوغ هي و رامز على بيت نعاس لبيبي و حورية و معتصم كيتسناو احفادهم اوصلو دغيا و يفرحو بيهم..

أوس:(كيشوف ف كرش حنان) فوآش اتولدي اخالتي 

فهد: اولدي سول ماماك هاد السؤال 

أوس: و علاش انسول ماما عمرك شفتي شيواحد كيتزوج بختوو 

يوسف: حفيظة شدي ولدك 

حنان: ههههه خلي لولد صغير 

أوس: كل واحد عندو مرتو و انا انتزوج بنت خالتي 

حنان: و نقدر نولد ولد و مانولدش بنت 

أوس: الى ولدتي ولد انتقلق بزاف ولكن مكاين مشكل انا انتزوج بنت خالتي كاطالينا 

يوسف: ها شفتي غدار من صغر ههه 

فهد: هههه و يتزوج بيهم بجوج فين المشكل 

رامز: لا انا بنتي مانزوجهاش انخليها هاكا تقرا و تخدم باراكا 

ينيس: الى مشيتي حتى تزوجتي بختي انتزوج بختك 

أوس: خودها (كيشيرلو بيديه) 

ينيس: ماغاديش نخليك تزوج بختي الى شافت فيك انعميلها عينيها 

حنان: ينيس حشومة 

ينيس: لا ماخاص حتى شيواحد اشوف فيها غادي نحبسها 

يوسف: باراكا من لغيرة زايدة ههه 

كوهينور:(شدات فكرشها و غوتات) ااااي 

اوسمان: كوهينور مااالك شنو واااقع 

حورية: كتولدي؟ 

حفيظة:(ضربات ل فهد ديك صباغة و ناضت كتشد فكرشها و تعض على شنايفها بألم) حتى انا اممممم كتولد لحرييييق 

حنان: دييير شيحاجا ايوسف كيولدو(شدها لوجع حتى هي و شافت فيه) حتى اناااا 

رامز: كاطا فيييك لوجع بشوية عليك 

كاطالينا: كيضرني تحتي ولكن ماعرفتش واش وصلاتني لوقت 

يوسف: وااااش كتولدو كلكم فدقة كيدرتووولها 

حنان: اممممم يووووسف انولد عتقنييي 

معتصم: تنفسو مزيان وجدوووو طوموبييلات تنفسو مزيان

حورية: اوسماااان خودها لكلينيك سربي 

اوسمان:(هز كوهينور و مشا كيجري بيها) 

فهد:(شاداه حفيظة من القميجة و كتوجع) صبري صبري اناخدك دابا لسبيطار ولادتك مبكرة بزاااف 

حفيظة: مكيهمنييييش بغيييت نولد اهئ اهئ 

....خداوهم بسرعة لكلينيك كل واحد فطوموبيل كيتسابقو وصلو فدقة و دخلو جارينهم كيغوتو تماك دخلوهم لغرفة الولادة و ماخلاوهمش امشيو معاهم

الممرضة: عفاكم بقاااو هنا ميمكنش دخلو 

يوسف: لااا حنان كتخاف خليني نبقا معاها 

معتصم: تهدن اولدي رآها فيد الله ماتخافش اتكون مزيان 

طبيب:(خرج عندهم) الولادة اتم دابا ماتخافوش كاينين اطباء لداخل كيولدوهم 

اوسمان: خصهم اتهلاااااو فيييهم 

رامز: غادي يخرجو من داك لباب بيخير فهمتي 

الممرضة: ماعمر جاونا ربعة د لحالات فدقة وحدة هادشي فشكل 

طبيب: دخلي وصي عليهم و اي حاجا اجي عندي لبيرو علميني 

اوسمان: يااااربي عاونها ياربي 

فهد: اوووف علاش ماخلاناش ندخلو 

يوسف: صااافي ايكونو بيخير خصوصا حفيظة راه ولدات و عاودات

فهد: ايه حتى حنان ولدات 

يوسف: ماشي بحااال ماجرباتش كرشها تنفخ و تولد طبيعي 

رامز: و كاطالينا عمرها ولدات اصلا ماكانش فيها لوجع علاش دخلوها كان باقيلها 15 يوم 

فهد: حتى حفيظة اووف 

حورية: تهدنو و جلسو درتولي دوخة و نتوما غاديين جايين 

يوسف: لا حتى نسمع بلي تفكات عاد نتهدن اتكون خايفة بزاااف 

رامز: بغيت مراتي و بنتي اكونو بيخير و مابغيت حتى حاجا اخرى اسيدي ربي 

ساعات من التوتر و الانتظار حتى خرجو الاطباء من غرفة التوليد كيبتاسمو و هضر واحد فيهم 

طبيب: الولادة ديالهم بربعة كانت مزيانة و الحمد لله ماكاين حتى مشكل تمت الولادة بنجاح 

حورية: الحمد لله(عنقات معتصم) 

اوسمان: واخا نشوف مراتي

طبيب: ايه دخلو 

...دخلو للغرفة لقاو كل وحدة فجيهة و كل واحد مشا عند مرتو و كيشوف البيبي ديالهم 

اوسمان: كوهينور (باسها فراسها ) نتي بيخير الحمد لله على سلامتك خفت عليك بزاف 

كوهينور:(بتعب) بيخير الحمد لله و حتى ولدنا بيخير 

اوسمان: الحمد لله(عاد طلعات معاه) ولد ولد ؟ نتي ولدتي ولد 

كوهينور: اه هه ولد زوين بحال باباه 

اوسمان: هههه (هزو و الفرحة كتلمع من عينيه) كولشي ايفرح بيه ولا عندي ولد هههه 

يوسف:(لقا حنان مغمضة عينيها بلعيا و بقا كيبوسها فراسها ) حبيبتي كبيدة ديالي 

حنان: يوسف 

يوسف: احبيبة عييتي كضرك شيحاجا 

حنان:(شداتلو فيديه) خفت بلا بيك 

يوسف: انا هنا (كيبوس يدها) 

حنان: ولدت بنت 

يوسف:(كيشوف ف بنتو و قرب ليها لقاها ناعسة ) ما شاء الله(هز يدها بصبعو و باسها) 

حنان: شنو بغيتي تسمي بنت أزنبقتي 

يوسف: هيام (شاف فيها) اسم ايجي معاها 

حنان: هيام زوييين 

رامز: هههه ولدتي ليا بنيتة طبيبزة بحالك 

كاطالينا: ماتقولش على بنتي هكك 

رامز: انا غادي ناكل ماماها(كيبوسها فعنقها و هي كضحك) الحمد لله على سلامتك 

كاطالينا: لولادة كتوجع بزاف 

رامز: مانعاودوش نولدو مابغيتكش توجعي 

كاطالينا: لا باقي انزيدو جوج اخرين ههه 

رامز: حتى تكبر بنتنا ههه 

كاطالينا: ان شاء الله 

فهد: هههه هانتي ولدتي و تفكيتي و جبتيلي بنت فوطوكوبي عليك 

حفيظة: (هازة بنتها كتبتاسم) شعرها ماشي حمر بحال شهد و ماشي زعر بحال اوس 

فهد: كتشبهلك شعرها كحل 

حفيظة: ههه زوينة بزاف 

فهد:(باسها فراسها) بزاااف 

....منين طمنو على بعضياتهم عاد بدا كل واحد كيمشي عند واحد و يباركلو و يهز لبجاغط و يضحك معاهم و معتصم و حورية ماقداتهم فرحة ... 

اوسمان: انا الوحيد لي عندي ولد هههه 

يوسف: هههه شنو اتسميه 

اوسمان: تسميه كوهينور 

كوهينور: انسميه أنير هه 

اوسمان: سمية أمازيغية زوينة 

كوهينور: اه و اتفرح خالتي ايطو و عمي مبارك و كولشي ههه 

فهد: و انا قررت نسمي 

حفيظة: نتا سميتي شهد خليني نسمي هادي 

فهد: ولكن نتي سميتي أوس 

حفيظة: وا عاااافاك 

فهد: يالاه قولي نشوف 

حفيظة: نسميها أميرة 

فهد: (ابتاسم) أميرة زوينة نسميييو اميرة 

رامز: و انا و كاطالينا ختارينا سمية 

كاطالينا: انسميو بنتنا نورة هاد السمية كتعنيلكم بزاف 

اوسمان: نورة عمرها تخرج من بالنا 

كوهينور:(طاحت دمعة من عينها) توحشتها 

حنان: الله ارحمهم

كلهم قالو امييين 

يوسف: شحال بقا باش نمشيو للحج مرة أخرى 

اوسمان: نتسناو للعام الجاي 

فهد: مزيانة علاما يكبرو ولادنا 

حورية: يترباو فعزكم ان شاء الله 

معتصم: و ان شاء الله تولدو مرة اخرى 

حنان: باراكا اعمي شوف مع كاطالينا و كوهينور ازيدو جوج اخرين انا و حفيظة صافي عيينا 

حفيظة: كيحسابلهم لولادة ساهلة راه كنتمحنوو 

الجد:(دخل هو و لبزوز ) افينكم اعباد الله ولدتو و ماتسنيتونيش 

رامز: ياكما نشاوروك فوقاش ايولدو 

الجد: كنتي تقولي جاهم لوجع 

يوسف: جدي فين كنتي ههه 

الجد: كنت فالمنتجع كيديرولي واحد جوج حوتات المساج الله اكثر خيرهم 

رامز: جدي هو مثال حي عن المراهقة المتأخرة 

الجد: سكتنا(قرب عند بنتو كيبوسها ) تبارك الله وافية بحال ماماها(رجع عند حنان ) و هادي زوينة بحال ماماها(مشا عند حفيظة) و هادي زوينة حتى هي عينيها زورق بحال باها (و مشا عند اوسمان) و هادي 

اوسمان: هادا راني ولدت ولد 

الجد: تبارك الله نتا بوحدك ولدتي ولد 

اوسمان: لا تعاونو معايا هههههه 

أوس: (جالس كيشوف ف بنت حنان) كان ألبي حاسسني اتولدي بنت 

حفيظة: شوف ولدك كيف تزلع هههه 

فهد: خويا يوسف ماعندي مانخبي عليك بانلي انتناسبو 

يوسف: بعد على بنتي قالا نتناسبو 

فهد: اجي اولدي عندي راه رفضوك 

ديلشاه: شهد شوفي ولاو عندنا خوتنا صغار نبقاو لعبو معاهم 

شهد: هههه زوينين بزاااف 

ينيس: و انا انحميكم كلكم حيت انا لولد لكبير اووف على مسؤولية 

يوسف: ههه ولدنا كبر 

حنان: شفت شفت هههه 

الجد: (جاب كرسي و طلع عليه و جبد الكاميرا ) اجي نتصورو نخليوها ذكرى شوفو هنااا 

رامز: الله اهديك اجدي هبط دابا طيح و نتا باقيلك خطوة تمشي لقبر 

الجد: مالي هااا باقي عاطي للعين (كيضور فوق الكرسي ) و الف وحدة تمناني(رجع ضار يالاه ضحكو انصوركم ) 1 2 3 (تلتاقطات الصورة و كلهم كيضحكو خصوصا فاش طاح الجد من الكرسي و بقا شاد فيه رامز كيضحك هاديك ماكانتش مجرد صورة كانت أكثر تقدر تبان عادية لأي واحد كيشوفها لكن لي كيعرف قصتهم أيبانولو بزاف دلحاجات فيها هادي كانت قصة الزنبقة الفضية مثال للرجل القبيح لي مكترضا بيه حتى وحدة فقط لأنه مازوينش مثال للرجل الصبور لي كيضحي بكلشي باش القا السعادة فتالي...قصتي كانو فيها العبر و أتعلمكم أشياء كنتو غافلين عليها و أتزرع فيكم عدم الحكم المسبق على شخص من النظرة الأولى لأن بنادم الى ماعاشرتيهش عمرك تعرفيه ) .

النهاية