دوزنا جلسية ديالنا على خاطرنا ونضنا خارجين وهي تقول ليا مريم .. راه اللي طلب مني النمرة .. دورت وجهي شفت فيه من الشوفة حسيت بيه شلاهبي ماشي ديال وجهها وهي نية لاقصى درجة مافيهاش تحرميات ديال هنا . قلت ليها مارتاحيتش ليه ولاكن ماشي مشكل تلاقيه واحد النهار وهضري معاه ولاكن عداك ديرو جنس راه حرام ونتي مسلمة والزنا حرام فالدين . قلت ليا اوكي وحتى بشرى ايداتني فهضرتي قالت ليها حتى انا مارتاحيتش لداك النوع ردي بالك منو مزيان ماشي محترم عير من داك الصدر عريان وديك السنسلة وهوا كبير باين زايغ . نبهناها ومشينا فحالنا ودعنا بشرى وطلعنا فطموبيل انا وياها غادين طالقين الموسيقى كنهضرو وقلت ليها عندي واحد الشغل امريم فالمحمدية واش تبغي تمشي معايا ولا نوصلك للدار؟
قالت ليا نمشي معاك ماشي مشكل
مزيان نيت تونسني فالطريق ، مشينا شدينا الطريق للمحمدية باغا نشوف الكافي ونشوف الاحوال كيفاش دايرة وغادية كنتجمع معاها فالطريق قلت ليها زعما الى درت مشروع هنا كبير واش تبقا معايا . ترددات وقالت ليا منقدرش نخسر خدمتي وانا قريت عليها قلت ليها بلعكس غنخدم انا ونتي وانا خاصني شي واحد اللي نديرو مدير على البروجي ويعاونني .. نقدر ندير فروع مثلا .. تشدي نتي فرع وانا فرع .. ولا شي حاجة بحال هاكا غادي يكون مزيان ليا وليك وانا مكنتيق فحتى واحد . قالت ليا حتى نفكر وقلت ليها وحدة من الجوج .. يا اما تجلسي معايا هنا يا اما انا اللي غادي نمشي معاك باغي ناخد دار تما ونعيش تما . وحدة فالجوج حيت منقدرش نبقا بوحدي بلا بيك
عنقاتني فرحات قالت ليا حتى انا منقدرش تفرق عليك ولاكن غادي نشوفو شي حل ضاروري
كملنا طريقنا كنهضرو وكنحاول نشغل راسي باش نعيش وتنتعايش .. مسمار بابا تفرغت ليه دابا باش نشوف شنو واقع ونشوف شي حل لمي مسكينة اللي راه مكرفسة واخا منقدرش نشوف فبابا حيت اقبح حاجة ممكن تتعرض ليها البنت خي داك الفضيحة اللي تعرضت ليها قدام بابا غير كنتفكرها كنتمنى تشق الارض وندخل فيها . وصلنا ومابغيتش وقف حداها باش ميشوفنيش ودرت راسيوغير دايزة لقيت ديك البلاصة فين شرينا الارض تبدلات بزاف وعمرات بالحوات وصحاب الماكلة .. النهار الاول خليتها خاوية قلت مغاديش تخدم هاد البلاصة لاكن دابا كاع الحوانت تحلو والغادي والجاي وعلى الشارع مروجة بزااف . هزيت عيني فديك الشوكة اللي شريت فيها ودورت راسي.. هاي هاااااي .. مشا بعيد هاد با .. فتخ واحد القهوى كتغني يا ليل ياعين شعبية كبيرة بزاف شادة جوج واجهات الكراسا ديالعا خارجين حتى لبرا والبراصولات والطابيات خوضر برا والزاج قصير ضاير بيها من الواجهات بجوج والشجر والربيع .. الدنيا عامرة بزاف ديال الناس جالسين على برا ولداخل ماحققتش فيه مزيان .. هزيت راسي لفوق كان لاتيراس حتى هوا عامر وعندها طبقة اخرى وعاد السطح ديالها حتى هوا استغلو كامل بانو ليا الناس جالسين والزتج دضاير بيهم والبراسولات لفوق ديال لقهاوي ولعب عليها المهندس فالديكور كتبان واعرة وعاد مدخلين الماكلة يعني كافي غيسطو وحداه ملاسق معاه شواية كبيرة الدخاخن خارجين منها .. بقيت كنشوف وضرت للجهة لاخرى من اللور بان ليا الدخلة دالحمام رجال وعيالات وغيكون دار الفرناتشي لتحت كما قال .. قلت لمريم هاد البروجي هادا اللي شفتي كي جاك ؟ قالت ليا واو زوين وعامر .. قلت ليها ديالي هاد البروجي هادا درتو لبابا .. تصدنات قال اا سي فغي!! بقات غير كتشوف وقلت ليها اجي ندخلو ...
هزيت طرف من الشال ديالي درتو لثان على نيفي ومع الداخل والخارج الدنيا عامرة جالسين الناس كيتغداو تما حدا والسربايا داخلين خارجين .. كنت لابسة لبسة قهوية بحال العباية واسعة محلولة من الوسط وسروال توب .. هزيت صاكي وهزيت عيني فداكشي ودرت نضاضري ودخلنا انا وياها بحال اي كليان ..شافونا تعرضو لينا كيرحبو ويسولو فين بغينا نجلسو .. طلقت عيني لداخل كانت واسعة وقشعت بابا جالس حدا واحد الثلاجة كبيرة قدامو لاكيس ومتكي كبر واحد العديس تقول عندو 9 شهور وغلاض بزاف حناكو تنفخو .. ماخليتوش هاكا تصدمت فيه ماعقلتوش تبدل ولاكن لباسو عادي .. اصلا الرجال اللي بحالو اللي لقاوها يلبسوها كان داير عليه واحد القميجة مخططة قهوية وجدين ومتكي اللور كيلعب فتيايفون ومدلي شلاقمو .. قلت للسرباي شوف لينا بلاصة غير هنا .. فديك الجهة
شرت ليه جهة الزاج فالطرف اللي كيطل على الناس اللي جالسين برا فالبراسولات باش من تما نشوف كولشي ويبان ليا مزيان باا وهوا جالس بحال فرعون حاضي لاكيس
طلبنا كفتة وقطيبات من هاديك اللي كتشوا برا ومريم بغات دجاج شافتو كيدور فواحد اللعيبة كيتحمر بغات دوقو وحطو لينا مع الباناشي والسلاد .. تغديت ماشي ماكليتش وعجبني اللحم والكفتة بنينة والناس بزاف كياكلو تما والدجاج حتى هوا لذيذ .. عاد عرفت منين جاب ديك الكرش ... هوا جالس هنا كيضرب فالمدسم وماما مطيبة العدس فالدار والحوت مسكينة وبوحدها .. ولاكن غير بلاتي .. نشوف شنو كاين ونعجبك والله مانخليها فيك على ديك القهرة اللي معيش مي فيها ونتا مبرع ليا هنا مع راسك .. بقيت جالسة شحال غير كنشوف والسربايا غادين جايين والناس اللي تغدا كيمشي لعندو يخلص .. كانت الدنيا مخلطة بنات واولاد مخدمهم لاكن وحدة ثارت انتباهي من بين كاع اللي خدامين تما .. كلهم عاديين وبنات كيخدمو ساكتين وبالزربة الا هي جات وقفات الوسط دارت يدها على جنبها وكتشوف وشارت بصبعها لواحد الطبلة قالت لواحد سير مسح ديك الطبلة وبقات كدور وتشوف .. كانت قدي ولا منعرف صغر مني والله ماعرفت المهم باينة صغيرة ومزيرة ليها دجين وتيشورط وعندها الكرش مبطبطة وطويلة وعامرة .. مابيضة ماسمرا ولاكن كتعيف .. اللثة ديالها زرقا فاش هضرات ومعكرة بالموف والريسيل والكحول داكشي عرقات وشعرها مقزب مصبغاه بداك الصفر وليغاسين كوحل ومجبداه بالبروشينغ لاوياه شوية ومشحلف واكل الدق .. دايرة ليك واحد السنسلة فالعنق و واحد البراسلي ! مشات وقفات حدا با كتهضر معاه وهوا عينو فتيليفون .. شوية ناض هز سروالو ماعرفت اش قال ومشا دافع ديك الكرش خرج لبرا وهي توقف بلاصتو فلاكيس .. شفتو ركب فواحد طيوطا قداها قداش كاط كاط ومشا ماعرفت فين زاد وجلسات هي كتخلص من الناس ومتبعة وحاضية شنو كيوقع .. عيطت للسرباي ابتسمت قلت ليه الى كاين شي ديسير جيبو لينا وقالي واخا وانا نقول ليه واش مولات الشي ديك السيدة
قالي لا هاديك جيرونط مول الشي خرج دابا
قلت ليه : ااه بصح كنت بغيت نهضر معاه.. ماعرفتيس فين يكون مشا ؟ ولا واش غيتعطل؟
قالي غيكون مشا غا للفيرما عندو هنا قريبة يجيبو اللحم اللي كنطيبو وصافي
قلت ليه اه واخا ماشي مشكل .. وديك السيدة واش نقدر معاها تقدر تعاوني
ابتسمت وقلت ليها شكرا احبيبة باينة فيك ضريفة .. حتى نتي دخلتي ليا خاطري والصراحة اول مرة نجي لهنا وغنبقا ديما نجي عجبني الحال عندكم
قالت ليا مرحبا بيكم كولشي ديالك وحتى الى بغيتو شي حاجة للدار راه كنليفريو
قلت ليها واخا عطيني كارط فيزيت ولا شي حاجة . هزاتها من حداها عطاتها ليها وصوتها غليض وانا صوتي قدامها كيبان بحال الفلوس . قلت ليها كنت بغيت نهضر مع مول الشي ولاكن قالو ليا خرج ونتي بحالك بحالك
قالت ليا اه اختي غا هضري واش بغيتي شي خاجة
قلت ليها واحد عمي مسكين خرج التقاعد وساكن غير هنا فالمحمدية .. بغا يخدم وانا فكازا واخا عندي بروجي ديالي جاه هوا بعيد .. وهوا عندو مع هادشي ديال لقهاوي حيت خدم فيهم بزاف وقلت الى زعما يخدم عندكم هنا قريبة ليه لدارو
قلت ليها واخا عطيني نمرتك نصوني عليك ... تبقا عندك وردي عليا باش ما كان .. وحتا نتي مرحبا بيك انا عندي برا فارماسي الى بغيتي شي برودوي ولا شي حاجة مرحبا المحل ديالك حتى نتي
عجبها الحال وبدات ترحب بيا وضحكت معاها ومشيت خرجت طلعت فطموبيل وكنفكر نجيب عبد الله لعساس نخشيه هنا بأي طريقة هوا نمس ومكيهضرش بزاف كيخدم ويسكت وكيعرف لعجب ومفاهش الفهامة .. هوا اللي غادي يعرف كفاش يمص منهم الخبارات ويجيبهم ليا وحتى هاد خيتي اش سميتها قالت ليا ؟؟ ااه سميتها سميرة .. حتى هي غادي نعرف كي ندير ليها نجرها عندي تولي حبيبتي وكبديتي وصحيبتي وكولشي ستاااوييييل .. مازرباناش ومساليا قبي حتى انا مابقا تابعني والو
شدينا الطريق غادية ونعاود شنو طرا لمريم بالفرونسي .. كضحكني فتش كتبقا غير تبرق فينا وحنا كنهضرو الدارجة مكتسول شنو واقع ما والو غير كتشوف زي الاطرش في الزفة ، لاكن شرحت ليها علاش جيت وشنو كايم باش تفهم وقالت ليا مع احترامي ليك باك شفار ومك مسكينة مقهورو .قلت ليها بلا داك الاحترام خودي احتم قولي اللي بغيتي على با .
كملنا الطريق قلت ندوز عند مي نشوف شنو كدير ولاكن غادي نتلاقا داك الحمار دخويا تما يقدر يضربني الى شافني فالدار اللهم بلاش مابغيت صدع ، عيطت ليها فتيليفون سولتها شنو كدير قالت ليا راه غير ناعسة . قلت ليها لبسي جلابتك نخرجك شوية قالت ليا بلاتي نقولها لباك وانا ندير بناقص قلت ليها صافي بلاش. قالت ليا لا غادي نقول ليه خارجة نتسخر!... ايوا ايلى عيط مالقانيش هنا يقوليا كدلعي بلا خباري ينوضو لي المشاكيل !
قلت ليها يالاه قوليها ليه وبلا متقوليه رجعت خليه مابغيتوش يعرف .. انا غندوز عليك لبسي شي جليليبة زوينة وقادي الحالة شوية عنداك تخرجي بدوك الصنادل والجلابة تحت منها سروال بيجامة كيطل بحال ديما .... ديها شوية فحالتك وركزي شوية
قطعت معاها ومشيت لحقت عليها عيطت ليها نزلات عندي بقيت كنشوف اش داكشي لابسة ! كنكره نشوفها مبهدلة وحالتها حالة كنكره نشوفها فداك المنضر كنمرض وكنزيد نمرض فاش كنشوفها كتمشي مقوسة مسكينة وهادشي كيخليني نحقد على با ونكره فكل مرة اكثر. بانت ليا لابسة واحد الجلابة وهي مكدير لا سوتيامات لا والو من شحال هادي .. ملوية عليها شال كحل ولابسة واحد العباية كحلة عادية فيها شوية دسقلي وصباط .. غير شافتني جات كتجري مسكينة عندي قلت لمريم عفاك رجعي اللور خليها تجلس حدايا .. بغيتها تحس براسها عندها قيمة .
ضحكات مريم ونزلات خلات الباب محلول حتى طلعات ماما وسدات الباب عاد ركبات اللور وبقيت كنشوف فماما قلت ليها واش كيضرك ضهرك ..
ضحكات وقالت ليا هأ!... وا دينا كيضرني شغندير ليه
قلت ليها فين بغيتي تمشي ؟ مشهية شي حاجة؟
قالت ليا انا راكي كتعرفيني ههه .. ديني غير ناكل
ضحكاتني وعارفاها كتبغي الماكلة دالزنقة ولا شي واحد يطيب ويعطيها هاديك هي السعادة عندها كتموت على كرشها وحتى انا بحالها كنشبه ليها .. سوا كنت جيعانة ولا شبعانة منقولش لا على الماكلة واخا غير نضرب شوية ونوض . وكيبقا فيا الحال فاش كنكون جالسة فشي بلاصة مع انا مكنجلسش ديما كندور وناكل برا .. كنتفكر ماما كنقول كن كانت معايا كوراه طايرة بالفرحة .
كنا غاديين مابينا ماعلينا كنضحكو مع ماما ونهضرو وتلفت شفت فيها قلت ليها غادي نديك بعد غدا ان شاء الله ديري سكانير على ضهرك مغاديش نخليك هاكا. جيت ندور وجههي نشوف قدامي بانت ليا جاد فصورة كبيرة قدام عيني ما هوا فالزاج ما هوا على برا ماهوت فالهوا .. صورتو كبيرة ضربات فعيني تخلعت وشديت الفران صيك حتى رداتنا السمطة اللور ووقفت تخلعت ويدي على صدري وماما ومريم تخلعو .. بقيت كنشوف قدامي مافعرفتش شنو هادشي .. اول مرة نشوف بحال هادشي فحياتي واش جاد دابا وحنا كنهضرو ماكنت كنفكر فيه كاع حتى خرج قدامي فجأة .. تلفت عند مريم هضرت معاها ويدي كيرجفو وركابيا فشلو قلت ليها ها شنو شفت ها شنو شفت مافهمتش شنو داكشي حسابني واش دزت فيه ولا شنو ماعرفتش ولاكن شفتو هوا نيت متأكدة .
ماما مسكينة كتسول مالي علاش شديت الفران ماعرفتش كيغندير نشرح ليها وقلت ليها والو والو غير حسابني قطة دازت قدامي وصافي .. كملنا الطريق كنهضر مع مريم وهي كتهضر معايا وقلبي كيضرب بالجهد من الساعة اللي وقع ليا هاد البلان وانا مرفوعة وقلبي مهزوز ما فهمتش مالي واش الحالة رجعات ليا بلا منحس ولا شنو
جلسنا فواحد المطعم باش ماما تاكل شي حاجة وانا ومريم ماقديناش نزيدو خدينا براد اتاي وحطو لماما داكشي اللي تشهات لاكن انا جالسة بحال الى جالسة على اعصابي ماقدرتش نرتاح قدام عيني غير جاد من الساعة لي شفتو فيها . بقيت هاكاك حتى سالات ماما وصلتها ورجعت للدار طلعت لبيتي حيدت كولشي عليا حسيت براسي مخنوقة وجلست بواحد شبر ديال التوب قصيرة وبقيت على الماء كنشرب ونعاود .. والو قلبي تقضبط عليا وتزير .. جات عندي مريم لابسة بيجامة كتسول كي بقيت قلت ليها رانيو مقبوطة ماقدراش نشوف الراحة وجلسات حدايا استغرفت وبغيت نشوف صورتو ودخلت لحساب الوهمي اللي حليت نطل عليه ومع الحلة طلعو ليا بوسطات شي تحت شي فيهم صورة ديال طموبيل كاط كاط دخل فيا الطوبيس ودخلها فواحد الحيط وتبجغات وكاتبين فالعنوان جاد الهواري يتعرض لحادث سير مروع رفقة صديقه .نقل على اثره الى المستشفى في حالة مستعجلة
طحت على طولي طيحت داك تيليفون كنحس بمريم كتحركني وانا مجبدة فالارض وهي كتعيط لسعاد جاو بجوج كيشروني بالماء.. حسيت بالتنفس داق عليا وراسي تقيل ماقدرتش نهزو .. كنسمع لاكن بين الغيبوبة و الوعي .. جلسوني قلت ليهم بزز خليوين ناعسة ، مالقيتش الجهد باش نجلس وبقيت متكية وراسي بدا كيضرني والدوخة فيا .. هزيت يدي بزز شربت وبقيت هاكاك شحال وكنقول لمريم جاد دار كسيدة... غير هاد الكلمة اللي فمي ماقدرتش نحيدها وبقيت هاكاك حتى رجعت لوعيي الكامل وشديت تيليفون بالزربة مخلوعة قلت لمريم ماعرفتش فين داوه اشمن سبيطار وهي كتقول ليا غير بشوية عليك بشوية .. تلفت كنقلب ونشوف دوك لبياج وحليت حسابي بسرعة لقيت صورة الحادث طالعة عندي ودخلت عند واحد الباج كنكتب ليها بالزربة وكنتسنا تجاوبني .. بقيت نرسل ليها ونصوني حتى ردات عليا عرفاتني بغات تجمع معايا قلت ليها قولي ليا غير اشمن اوبيتال داوه قالت ليا بلاتي نسولك ونرد عليك . جلست كنتسنا وقلبي غيسكت ماقدرتش نجلس قلت لمريم جبدي ليا حوايجي غادي يسيفطو ليا العنوان نمشي ومشات جبدات ليا لحوايج حطاتهم ولبسات حتى هي قالت ليا غنمشي معاك .. لبست عليا دجينز اللي عطاتني وقميحة بيضاء طويلة على السمطة والمؤخرة وصندالة خفيفة خشيت فيها رجلي ولويت الشال على راسي بسرعة وهزيت الصاك وخرجت انا وياها كنجريو كانت لحداش ديال الليل وحتى هي لبسات بحالي دجينز وقميجة وسبرديلة اما انا الخاطر اللي يعقد السيور ماعنديش . طلعنا وخرجت من الفيلا كنجري كنتسنا غير ترد عليا ديك الصفحة ونمشي .. وصلني مسج قالت ليا راه داوه كلينيك فلان فلاني وانا نكسيري كنطير مشيت كنجري وقفت جنب حدا الطموبيلات لقيت الدنيا عامرة تما طموبيلات شي داخل شي خارج ..قشعت خوه برا خارج بالزربة كيهضر فتيليفون وشي رجال ودراري واقفين برا والصحافة .. تفوووو تفو تفو على القرص جاو يجريو ماعرفتش شنو ندير بغيت نزل ندخل كنجري خفت الصحافة تشدني تما ولا نتشوه ولا يدور فيا خوه ماعرفتش شنو ندير . . لو ماكنت سايقة مرسيديس ماع مكانو يخليوني ندخل للكلينيك لداخل حيت الناس بزاف جاو يديو الاخبار .. قلت لمريم نزلي نتي عفاك دخلي شوفي كي ديري جيبيو ليا خبارو فين واش فالانعاش ولا فين ولا غنزطم وندخل وسط هاد الناس بحال الحمقى واللي بغا يتفرج يتفرج
نزلات مريم وبقيت برا كنشوف ونتسنا .. تعطلات وشفتها كتهضر مع واحد الفرملية وجات خارجة كان هشام خو جاد داخل مع الباب دخل فيها الحلوف وزاد ماقاليها حتى سمحي ليا ولاكن عطاتو وخرجات عندي طلعات قالت ليا حمااار .. دخل فيا طيح ليا كتفي ومشا مقالي حتى سمحي ليا
قلت ليها هاداك هوا خو جاد هانتي شفتي كي داير ضربيه مانحنيش فيه
قالت ليا راه فالانعاش و كانت واحد المرى جالسة داخل شادين فيها شي عيالات وجالسة كتبكي قلت ليها متكون غير مو هاديك
قالت ليا شنو غنديرو دابا ممنوع دخلي حتى زيارة لشي واحد ختى يعرفوك عندمن جايا ومعامن جايا قلت ليها الليل اصلا نصبرو شوية .. انا حسيييييت حسييييت بيها كليتها الصباح عرفت شي حاجة وقعات احساسي مكيكدبش . بقيت فالطموبيل كل شوية كنسيفط مريم طل وترجع حتى صبح الحال ولا انا نعست ولا هادوك اللي جاو نعسو ولا حتى الصحافة قلعو من تما وهشام كيخرح ويدخل تيليفونو مكيستكش ومكيبغيش يوقف لصحافة الصرف الصحي . شعلت لاتيلي ديال طموبيل سمعت اخبارو نقلاتها دوزيم قالو باللي الملاكم فلان فرتلان تعرض لحادث سير مروع نقل في حالة حرجة الى المستشفى وندعو له بالشفاء العاحل ولاسرته الكريمة و و وو و .. وديك الهضرة زادت مرضاتني كفاش خرجة شنو وقع ليه بغيت نشوفو ماقدرتش نصبر خفت يموت .. والى مات غنموت حتى انا بالفقصة ولا نخرج نمشي فالزناقي حفيانة. بديت نبكي ونطلب الله ونشهق حتى طلعات مريم بالزربة قالت ليا راه خلاو مو تشوفو وداك خوه حتى هوا ولاكن الطبيب قاليهم مزال كومة .
شديت راسي هبطتو شربت الماء نسرط هاد الكومة هادي وبقيت نتسنا سمعت واحد الغوتة لداخل طلقاتها شي مرى لربي اللي خلقها ومشاو الصحافة كيجريو بغاو يدخلو ونزلت كنقفقف انا ومريم بلا منشعر مشيت كنجري دخلات فيا ديك الزعرة جات حتى هي عاد وصلات ومعاها شي واحد كتجري دخلوها لاكن حبسو حتى حد ميدخل وسدو الباب كنسمع الغوات لداخل وقلبي غيسكت حتى سمعت واحد الصحافي كيقول ليهم مات مات راه مات واقيلا .. طاح ليا الفك وطاحو ضلوعي دفعت داك سيكوريتي ودخلت مالقيت غير البكا والنواح وشي كيعنق شي والرجال كيبكيو واصوات اخرى لداخل صوت راجل كيغوت ويقول لااااا لااااا واالاااااااا
قالت ليا باللي الممرضة اللي قالت ليها راه صاحبو مسكين ماطولش دغيا مات حيت هوا اللي كان سايق والفولون دخل ليه فصدرو كامل وجاد باقي فالانعاش والدنيا تقلبات على صاحبو بالمعقول عائلته تشوطات عليه وهادشي زاد ركب الرعب فعائلة جاد فين ما يخرج الطبيب كيقولو هاهوا غيقول ليهم شي خبر يسكت ليهم القلب . اما انا قلبي سكت كنعندي غير بسطارطير وبغيت نخرج نشوف ماخلاتنيش مريم قالت ليا جلسي هنا رتاحي مافينا اللي يردك للمصحة .
دخلات واحد الممرضة شافتني بغيت نخرج وعرفاتني ابتسمت ليا ولقاتني باغا نخرج قالت ليا عفاك غير جلسي حتى يخرجو صاحبو راه الدنيا مقلوبة زدنا سيكيوريتي باش متوقعش الفوضة .. خليك هنا راه دابا شوية غيخرج صاحبو .. الى بغيتي تشوفي طلي من السرجم غيبان ليك كولشي برا ومن الاحسن بلا متشوفي داك المنضر وهما مخرجينو غادي تمرضي وتزيدي تخلعي ... حتى الام ديال جاد راه ناعسة هنا حداك طلع ليها السكر وسدينا عليها باش متخرجش
نضت عنقتها ولاول مرة كنحس باللي الشهرة وقفات معايا .. قرباتني من بزاف ديال الناس وخلاتهم يتعرفو عليا ويبغيوني واخا ميعرفونيش وسهلات عليا الطريق فشحال من حاجة واخا مغادي يريحو مني والو لاكن فاش يبغيك شي واحد بصح راه يدير معاك المستحيل .. قالت ليا انا كتابعك فالانستا وكنت كنتبعك بزاف نتي وجاد كنتو كتحمقوني ..
ابتسمت واحد الابتسامة بزز قلت ليها شكرا وقالت ليا فرحانة بزاف اللي شفتك وتعرفك عليك وكتعجبيني وديما متبعة الجديد .
بقيت كنشوف فيها ونبتاسم وبداو الممرضات كيجيو يطلو عليا ..عرفتهم بغاو غير يشوفوني وصافي حيت واحد كتباعو من بعيد ماشي بحال فاش كتشوفو مباشرة واخا الوضع كيقطع فالقلب لاكن كانو ضريفات بزااف معايا كل مرة يسولوني واش محتاجة شي حاجة .
جا الوقت اللي خرجو فيه صاحب جاد فسيارة الموتى من لداخل من الكلينيك وبقيت كنطل من لفوق كانو الناس بزاف والتصاور والروينة والبكا كلشي كيطيح من موراه . انا كنبكي ومريم كتبكي والممرضات حتى هما .. بقا فينا مشا صغير فعز شبابو ضحية ديال واحد كيتعاند فالطريق لا سماحة ليه حيت الغلط ماشي منو الغلط من الطوبيس وهوا دخل فيه ومشا ضحيتها داك الولد مسكين الله يرحمو ويغفر ليه ويصبر عائلته .. قاصحة بزاف وضرني خاطري بقيت غير كنشوف حتى جات ديك الممرضة حسي مسي شافت هاكا وهاكا قالت ليا اجي نديك عند جاد الهواري .. سربي قبل ميشوفنا شي واحد
قلت لمريم اجي معايا وخرجنا دوزاتنا من واحد الطريق وكتمشي كتسبقنا حتى كتشير لينا وكنتبعوها حتى لباب الانعاش بقينا واقفين حتى خرج الطبيب ومشات حتى للراس طلات كان واحد الباب فالراس ممنوع شي واح يدخل لديك البلاصة ورجعات حلات الباب بالزربة وقالت ليا دخلي يالاه دخلي دغيا .
دخلت كنجري بالزربة ويدي على قلبيو ضرباتني واحد البرودة بورشاتني وزدت تبورشت فاش شفتو قدامي ناعس على ضهرو كامل سلوكة بحال شي نسان آلي وساد عينيه ومغطي بليزار زرق ولحمو متورم وكتافو فيهم الزروقية ودايرين ليه انبوب كبير ففمو وقوة الالات دايرين بيه .. كمشت يدي على صدري تخلعت وعاد جبهته فيها دقة شاداها الفاصمة من الجناب من الودن حتى لفوق وفيه زروقية تحت عينو بزاف ورجلو معلقة مهرسة طالعة بالكبص وعنقو حتى هوا مشدود بواحد اللعيبة كبيرة ومكيتحركش .. قربت وقلبي كيزدح شديت ليه فيدو حنيت عليها بستها وطلعت لراسو دوزت يدي على شعرو بقا فيا وخفت يموت وحالته واكلة الدق مزيان .. بستو فجبهتو وبقيت كنعيط ليه بغيت نفيقو وهوا مكيسمعنيش كاع .. لحمو بارد وصدرو مافيهش بلاصة لصبعي كامل سلوكة لاسقين .. تأزمت كنشوف فيه ونقول ياربي ميستاهلش يموت .. الراجل كان بحال الجبل صحيح فصيح بين ليلة ونهار طاح طيحة وحدة بحال شي شجرة عالية تجبدات فالارض
ماشبعت من شوفتو دغيا حلات الممرضة الباب قالت ليا صافي يالا يالاه دغيا سربيييي
طلقت من يدو بغيت نخرج ورجعت عنقتو هوا وداكشي اللي لاسق عليه ومشيت كنجري دخلات من مواريا بالزربة قادات ليه داك الاكسيجسن اللي دايرين ليه ففمو تبتاتو وتبتات دوك السناطات وجراتني من يدي سدات الباب وداتني .. يالاه خرجنا رجعو الاطباء شفتهم من مور واحد الحيط وطلعت للبيت اللي انا فيه قلت ليها حاسة براسي مريضة عندي الضغط وعندي كولشي كيضرني بغيت نبقا هنا
قالت ليا قوليها للطبيب .. الى شاف حالتك تستدعي تجلسي عليها غادي يقولها ليك
قالت ليا انا غنقولها ليه ومشات خلاتني بوحدي ورجعات هي والطبيب قالي شنو عندك شنو كيضرك بقيت كنشكي دوز ليا قالي لا .. ماشي شي حاجة اللي تخليك تجلسي فلوبيتال هنا وحاليا الدنيا عامرة بزاف دالمرضى خصهم غرف
كثر عليا فالهضرة خليتو حتى خرج ومشيت خرجت شفت هاكا وهاكا كانو الدروج قدامي كيخرجو لواحد الدريجة .. بقيت كنشوف فيهم وانا نرخي راسي تكركبت معاهم حتى وصلت للارض وجا واحد الفرملي كيجري هزني .. دكدكت فعضامي وكليتها وتفلقت فراسي وبقيت شادة جنابي وطلعوني لواحد الشومبر كيشوفو واش تهرست .. كشف عليا واحد الطبيب لقاني مهدودة وعطاني نجلس عندهم واحد الليلة حتى يشوفو حالتي حيت تفكيت من يدي ورجلي وكليتها وفراسي وقلت ليه كنموت مكنقدرش نتفس باش يزيدني تما شي عشرين يوم ولا شهر لاكن مازادش وهبطوني ندير راديو دالصدر حيت كثرت عليهم الشكاوي وردوني قالي مافيك والو صدرك مزيان وخلاني تما فديك الشومبر كنبكي على مريم قلت ليها مابغيتش تخرج بغيت نبقا هنا عطيني شي حل قالت ليا ماعندكش حالة اللي تخليك تبقاي هنا . بقيت جالسة كنفكر كي ندير وانا نتفكر ماما .. ديك الساعة خطفت تيليفون عيطت ليها قلت ليها شدي طاكسي قولي ليه يحطك دااابا حدا كلينيك فلان فلاني وجمعي حوايجك غتنعسي على ضهرك حتى تبراي والى عيط با قوليه واحد الجميعة تكلفات ليا بكولشي حتى نشوفوشنو ندير انا من بعد المهم اجي دابا انا كنتسناك
ماعندي كي ندير نخرج من الغرفة ونهبط لتحت ولا حتى نمشي للطموبيل حيت وجهي معروف ونقدر نصادف اي واحد يا مو يا ختو يا خوه يا شي صحافي يلوحني واخا ماعرفتش شنو تلاح مابقيتش دخلت شفت عقلي مشطون .. غير مريم اللي كتمشي وتجي تما . بقيت جالسة فديك الشومبر اللي عطاوني دوزت فيها ديك الليلة وعطاوني الماكلة تما والصباح عاودت عيطت لماما مع النبوري قلت ليها تجي قالت ليا راني جمعت حوايجي . سولتها شنو قالت لبابا و قالت ليا راه هصرت معاه قلت ليه جارتي ختها فواحد الجمعية ودخلاتني تما غادي يعاونوني ندوز على ضهري وقالي مزياان ايوا سيري دوزي هانتي لقيتي جمعية تعطيك كولشي وقلت ليه راه غيشدوني ننعس واقيلا .قالي انا خدام ماعندي كي ندير نبقا غادي جاي عندك لسبيطار عيطي على ختك تجي تقابلك ولا تجلس معاك . قلت ليه لا راه كاين العيالات فالجمعية الى بغيت شي حاجة يجيبوها لي ..مابغيتش نبقا نهضر ابنتي بزاف خفت يعيق بيا نتي عارفاني كنبدا نتفتف قلت ليه اسيدي لاتجي شاي عندي غير ديها فشغلك .
زدت حقدت وتعصبت على با اللي هملها لهاد الدرجة عجبو الحال تكلف بيها جمعية لقاها من الجنة والناس عطاها الاوكي ديك الساعة المهم مايخسر عليها الريال وماشغلوش واش يوقف معاها شي واحد ولالا المهم هوا ميصدعو حتى واحد باش يبقا فالمحمدية مفطح .. الله يعطيه موصيبة ضربو سامح فيها ولات زايدة ناقصة قاهرها من كاع الجهات وزادها قهرة الحكام ..بزطها وجلس عليها سلبها كولشي ردها بحال شي جرو عندو فالدار ومرتاح عايش حياتو ملك الحيوان حاشا واش يكون اب .. بلحق والله هادشي مغادي يبقا هاكا حيت مي ماشي حيوان ولا مكينة يدير بيها اللي بغا ويعاملها حسب كانتو ومورالو وتبقا هي تسمع وترعد مخلوعة ولات كتخاف من جنابها غير الشانطي الى قطعاتو كتقطهو كتجري بالخلعة .
قلت لمريم راه مي جايا هنا نزلي عفاك نتي مكيعرفك حتى واحد تعرضي ليها وهاكي سوارت الطموبيل حطي ليها حوايجها تما حتى تحتاجهم ودخليها راك نتي عارفة بلا منشرح ليك حيت منقدرش انا نبان لتحت ولا نخرج من هنا يقشعني شي واحد المهم نتي دخليها وقولي ليهم مالها راك عارفة كولشي وشفتي كولشي باش يفتحو ليها ضوسي ويدوزو ليها على ضهرها نشوفو شنو عندها وانا غادي نهضر مع الطبيب اللي مسؤول هنا غير حتى نشوف فرصة ونطلع للبيرو عندو نهضر معاه عليها باش تبدا العلاج فأقرب وقت
الحقيقة المرة اللي عمرها تبدل .. هي انها الى خطاتك صحتك حتى واحد ميعقل عليك .. هادشي اللي وقع لماما مسكينة وهي كيجيها عادي مافاطناش بشنو كاين عايشة ومعايشاش .. كتاكل كتشرب ومحكومة من طرف بابا مللي حلات عينيها وهي ها لعكوزة ها الراجل وحاذرة الراس وجداتي كانت متسوا ماتصلاح كانت كتقتلها بالعصا زعما كتربيها ، اودي شي حوايج شفتهم وانا صغيرة غير كنتفكرهم كنفكر على جبد باباهم .دخلت مي مسكينة شافها الطبيب دوز ليها دار ليها السكانير قاليها ضهرك محتاج عملية . الله ياربي انا قلت يمكن غير اعوجاج بالترويض يتقاد لاكن قالينا مكتقادش بالترويض .. الترويض من بعد العملية باش تولف توقف عادي والى بقا هاكا غتزيد تكفس القضية . هي سمعات العملية تخلعات وكنت معاها فالبيت اللي عطاوها قالت ليا لا ابنتي غير خليني ماشيوشي ضرااان ... عادي خليني نمشي نرجع للدار.
عصباتني مابغاتش دير العملية وخافت وعييت نشرح ليها وعيا الطبيب يشرح ومريم واخا مكتعرفش العربية شحفات بالشرح معاها مابغيتش نخليها هاكاك مقوسة واخا ماتبغيش . بقينا معاها بشوية بشوية ليوم غدا ليوم غدا حتى قبلات . اما جاد حالتو كما هي كنشوفو من الليل لليل كتديني ديك الفرملية عندو .. حتى الاوضاع شوية تهدنات فلكلينيك مابقاتش ديك الضجة لاكن الصحافة واخا مابقاوش فالباب ماتعرف فين مخشيين . اما ديك الصفرا اللي مكنحمل مكنقبل واخا مادارت ليا والو عمرني تلاقيت بيها حيت حدي حد الغرفة دماما و جلست معاها مرافقة ليها فالغرفة . فلاو ليها ضهرها وبا كيعيط يسوا اشنو دارت غيروفتيليفون وهي مسكينة كتهضر على نيتها واخا حسيت بيها بقا فيها الحال ماجاش طل عليها وقاليها راني مشغول ماعندي كي ندير . ماعجبهاش المبرر وتبدل فيها اللون .. واي انسان بلحم ودن راه يبقا فيه الحال واش هي فاضعف لحضاتها مرمية فسبيطار ماجاش حتى يسول فيها ولا يطل عليها .. الوخيدة اللي كتجي عندنا يوميا هي ختي والعائلة قلت ليها ماتقوليها لحتى واحد حنا فالكافية .. وحتى الحمار ديال خويا عمرو جا يشوفها ! عيط فتيليفون قالت ليه ها فين انا وها شنو غندير قاليها صافي واخا فوقاش ترجعي راه كنبات بلا عشا غا كنديباني والدار ترونات!!!
مي عندها العملية غدا وبايتة حدايا كتصلي .. كنديرو النوبة انا وياها اما مريم رجعات للدار وواخا كتعرف تسوق ماعندهاش بيرمي هنا رجع عبد الله اللي كيديها ويجيبها ويسوق الطموبيل . الليل كامل وحنا سهرانين خايفة على مي وخفت على ضهرها العملية ديال العمود الفقري صعيبة وخفت عليها بزااف .. حتى ثمن العملية طالع طلبو ليا تسعود ديال المليون وحطيت ليهم الشيك المهم تنوض ليا ميميتي صحيحة وغنوقف معاها حتى ترد صحتها .
قلت ليها نعسي براكة عليك راه خصك الراحة غتصبحي مع الستة هابطة للبلوك ثالت ليا لالا غير خلينب هاكا مرتاحة . خليتها على خاطرها بقات كتصلي اما انا نعست عييت وبقات هي حتى للستة دالصباح وجاو دخلو عندها . توضات وعاودتت صلات الركعة الاخيرة وخرجات معاهم بقيت انا واقة فالبيت مخلوعة وخايفة وكنطلب الله وصليت الفجر ودعيت ترجع ليا سالمة غانمة ويرجع جاد لصحيحتو ويفيق من الغيبوبة ديالو .
خرجت من الكلينيك حيت مابقاش عندي مناش نخاف وعندي مي كتعالج هنا واللي قالي شي كلمة نعطيه عشرة خصوصا خوه . لاكن لحسن الحظ ماتلاقيت حتى واحد من غير مو يمكن حيت عمرني شفتها . وفاش شفتها تصدمت اكبر صدمة فحياتي حيت متوقعتش كاع تكون مو ومابايناش عليها عندها ولادها كبار .. تبارك الله كانت طويلة وشعرها طويل كحل بحال الضلام رطب وملوي وماغليضاش فورمتها عادية وانيقة وساامبل كانت لابسة سروال سورفيت كحل مجموع من لتحت وتيشورط كحلة كلها و واحد الصندالة فيها فرو من لفوق فالاحمر والكحل وكلاص بزاف وجالسة دايرة رجل على رجل ويدها على ركبتها وخدها وكتنهد وتسوط .. فالاول شكيت فيها حيت الطريقة باش كتهضر فشكل كتقولي فير ابنتي ابنتي .. وقلت مع راسي غتكون شي مرى كبيرة بحال ماما .. لاكن وقع العكس جاتني بحال شي اميرة وموديغن ماشيا مع الوقت ودايرة نضاضر .. مدورة وجهها مكتشوف فحتى واحد ومابغات حنى واحد يشوفها وعرفتها مه من الممرضة اللي اللي شفت جايا هازة كاس دالقهوة قلت ليها عفاك عطيه ليا ولا وريني فين نقدر ناخدها قالت ليا هادا لمدام الهواري ام جاد الهواري هي طلباتو .. تقدري تاخديها سيري نيشان غتلقايها على يدك ليمن
خديت كاس ديال القهوى وبقيت كنشوف فيها ماعرفتش واش نقرب منها ولالا ... قلت نجلس وصافي ومنها نيت نهضر معاها .. الى ربي جاب ليا فرصة باش نتعرف عليها ونشرح ليها شنو وقع واخا ماشي وقته .. لاكن الى عطاتني وقت وبغات تسمع غادي نقول ليها كولشي
مشيت جلست حداها ضرباتني ريحة افسان لوغون وحسيت براسي بحال الى جلست حدا شي كيك ناعم . بقيت ساكتة كنشرب القهوى وهزات راسها كتنهد مربعة يديها شافت جيهتي وقلت ليها ليها بأسف . ان شاء الله ينوض بيخير وعلى خير .. حنا كلنا قلبنا معاه
تنهدات وقالت ليا امين يا ربي ميغسي وحيدات نضاضر هبطات راسها مسحات عينيها من اتحت .. مسكينة بقات فيا كانت كتبكي وحداها واحد السيدة مهمومة وساهية وشادة ليها يدها .
صوتها فشكل والطريقة باش كتهضر حتى فشكل ماشي بحال السيدة اللي هضرت معاها فتيليفون! مابقيت والو دخلني الشك حيت المرة صوتها كبير تكون زعما جداه ! ... مافهمتش !
دورات وجهها عندي منهارة كتنهد وترعد فيها النهدة شافت فيا كنت لايحة عليها واحد العباى من لفوق ولابسة تحتها سروال بحال اللي لابسة هي وتيشورط وساترة بداك الفوقاني طويل باج زوينة وفرجلي صندالة خفيفة وشال باج بارد غير لايحاه عليا ولاوياه على عنقي ورامية جنابو اللور ماعندي خاطر وشي زغبات كنحس بيهم مدليه حدا حنكي كل شوية نردهم لداخل .. شافت فيها كانت غتهضر ورجعات هبطات النضاضر جات عيني فعينها .. شحال فنة وحروفها كوحل ووجها صافي نقي بلار حتى التجاعيد مافيها غير شي حاجة باهتة جهة عينيها الكبار وشفارهم الكوحل .. كتشبه لجاد بزاااف بل نسخة منو فكولشي وهي مع مرى جات كتحمق ماشي بحالو حروفو حرشة ديال الرجال لاكن فوطوكوبي لا فالرسمة دالفم ولا النيف ولا العين والحجبان وكولشي وسنانها مستفين وشعرها قوي كحل قالباه لاجنب من القدام كامل جاها طالع ومديكرادي مقلب حتى لنص ضهرها . بقات كتشوف فيا وقالت ليا ماعرفتش فين شفتك ؟ سبق ليا شفتك جوسوي سيوغ
ابتاسمت وقلت ليها وي .. غتكوني شفتيني مع جاد يمكن !
مشيت لقيتهم مرونين بقيت كنشوف من بعيد حتى طلعوه من الاسانسور بلا منحس درت يدي على قلبي طلعوه بنفس البياص لاكن حيدو ليه داكشي اللي لاسق عليه وتعرضات ليه العائلة ختو ميساء عرفتها من السمية فاش عيط ليها لتحت وحتى هاداك باها يعني بابات جاد ومشا عندو فاش طلعوه تحنا عندو كيهضر معاه ومو شادة فالبياص حتى دخلوه للشومبر وهي تبان ليا ديك خيتي الزعرة كاميليا وصلات كتجري مشات دخلات وانا نتعصب جاتني البكية..مشيت قربت للباب ووقفت كانو كلهم صايرين بيه وطلعوه على ناموسية طويلة مريحة وعريضة يالاه تجي قدو تبارك . خليتهم وهما مشطونين مانتابهوش ليا وتقابلت معاه كنشوف فيه حتى هزو ليه البياص يتقاد ضهرو وجات عيني وفعيني درت ليه واحد الابتسامة وعيني غدمع ورجعت للجنب نساحبت بهدوء ومشيت كنبكي هبطت عند مي انا ومريم لقيتها باقا مافاقت وجلست كنكمدها حتى فاقت من البنج وخرجوها لينا ناعسة على كرشها مسكينة طحنا عليها كنبكيو وهي كترضي علينا والبنج مأثر عليها كتهضر بزز ..طلعناها فالاسانسور لبيتها وهزوها ردوها على جنبها بشوية وكان ضهرها مقاد مسرح مافيهش داك التقواس تقول عمره كان . خلاوها شوية على جنبها عاد ردوها على ضهرها وبقينا كنمسحو ليها وجهها باش تفيق مزيان حتى توكضات وسولتها واش كيضهرا شي حاجة قالت ليا كنحس بصدري مزير قلت ليها هادي غير واحد البانضة قاصحة داروها ليك باش ضهرك يبقا تابت حتى تبراي ونجلسي مقادة وغادي يحيدوها ليك
طمنتها وسولاتني واش جا خويا قلت ليها حقا راه جا ومشا مابغيتش نقوليها ماجاش مابغيتش نضرها بسي حاجة مهمى كانت يغيتها ترتاح تحس بحب العاىلة وخوفهم عليها كما وقع مع جاد وشفت عاىلتو كفاش دارو عليه وباه ومو وختو وكلهم لقاهم كيتسناو على احر من الجمر .
قابلت ماما انا ومريم وسهام رجعات لدارها.
وخديت هدنة نرتاح فيها من هاد الضغوطات اللي عشت مؤخرا وبديت انا ومريم كنديرو النوبة على المبيت مع ماما كل ليلة .. بغيت ندوش ونبدل عليا ونرتاح شوية ورجعت للدار خليت مريم معاها وخديت حمام رتاحيت فيه وانا كنتفكر ديك اللقطة اللي شافني فيها .. هوا دابا كيقول راني بنت الحرام .. مكنسواش .. ونقد نكون اكثر واحد كيكره فهاد الدنيا .. كفاش غنبرر موقفي ماعرفتش .. كنحاول نفكر قبل مندير شي خطوة وحتى هادشي اللي وقع وهاد المشاكيل خلاوني ندرس خطواتي قبل مندير شي حاجة ومنتسرعش واخا بعد المرات وبعض الحالات كنتصرف بلا عقل نتيجة تأثير الصدمات .. فكرت فداكشي اللي كان وقع ورجعت الذاكرة اللور .. تفكرت فاش قاليا الواليدة موافقة وغنجي نديرو لاكط .. والسيدة اللي هضرات معايا هاديك ماشي مو وتأكدت فاش تلاقيت مو الحقيقية وغتكون غير جداه .. مانتابهتش لهاد النقطة واخا كانت كتهضر وماعارفاش شنو تقول لاكن فالاخير حتى حاجة مكتخبا وحبل لكدوب قصير مهما حاول الانسان يتستر على الكدبة مايقدرش يسترها طول الابد .. كان عليا نصدق كلام جاد ماشي كلام المرى للي هضرات معايا .. فاش قاليا الواليدة موافقة كنت نصدق.. لاكن انا قلت مع راسي هادو فعايل العاقسات .. جات قالت ليا هضرة وولدها قالت ليه موافقة باش متخسروش وضربات من تحت الدف . وانا حمارة انساحبت وخليتو لا هوا لا مو فاهمين شي حاجة بسبب خوه الله ياخد فيه الحق .. لا والزوينة هي كن طرت من المقلة وقلت ليه مك ها شنو درات وجيت نحكي ليه ونشكي وندير فيها صادقة ونواجهه زعما .. كانت غتكون هاديك هي الفصيحة والباطل اللي غنطيح على مو.. اما كن مشا عندها صعر عليها وهي اصلا عمرها هضرات معايا ووقع بيناتهم مشكل .. كنت غنكون انا السبب وكان المشكل غيكبر اكثر من دابا وكانت مو غتكرهني ويكمل حتى هوا الباقي وشكون اللي غادي يبين الحقيقة؟؟ مكاينش!..وشكون غيصدق ديك الساعة ؟ انا ولا مو !... كنتخيل كن قابحني معاها وقلت ليه اه هي وندير فيها قوية وكندافع على حقي ناااري شنو كان غيطرا وغيبقا خوه من المتفرجين عاجبو الحال .. لاكن الحمد لله درت شي حاجة زوينة فحياتي وتقلت ورزنت وماتسرعتش
الحمد لله كلشي من الخير كنقول هاد الكلمة دائما وربي غادي يبين الحق باين العربون من هادشي اللي كتاشفت وشوف للصدف ديال الدنيا فاش كتبغي تفضح شي واحد .. منقدروش نتخيلو الطريقة ولا لابداع اللي ممكن يتفضح بيه داك الانسان واخا يكون واخد جميع احتياطاتو !
جلست نرتاح فبيتي كان الجو سخون وهزيت تيليفون .. تفكرت المساج اللي سيفط ليا ودخلت نقراه حيت واخا يكون كتب ليا وسبني مغيضرنيش بحال نهار القهوى .. دابا يمكن ليا نقراه وانا مرتاحة وبديت نقرا قالي
ماعرفتش شنو غنقول ليك فهاد المسج من غير الله ينتاقم منك .. خليتيني كنحسب ونعد شنو درت ليك .. واش طلعت معاك ولد***** ..فاش طلعت معاك ولد***** ام؟ .. فاش ؟ .. فكرت تا تفركعت مالقيتش راسي ولد**** اوكي .. نتي اللي بنت **** قراي هاد المسج ولا ماتقرايهش هاد لافاصون هي اللي خاصني نهضر معاك بيها من الاول د وبيها كتفهمي مزيان اوك .. ماشي ديال لعشرة ماشيو ديال اللي يدير معاك زوين حيت ماساوياش وغير باش تعرفي شحال داز قبل منكتب ليك هاد الخراا كامل .. دازت ست شهور كل نهار كنقول غتبان نعرف شنو كاين ومالها واش ميتة ولا حية ولا شنو؟... لين ليلة ونهار طرتي وانا بحال الحمار جاي من هولندا باش نتزوج بيك هه... لا درتي فيا خير كبيير ... ماتستاهليش تا حاجة زوينة درتها معاك اشيماء .. ماتستاهيلهاش والله ينعل دوك الايام وداك السفر وداك الحبس كامل والنهار اللي شفتك فيه .. الله ينعل كل دقيقة جلستها حداك مرضتيني مغاديش نسمح ليك على هادشي اللي درتي .. واييييلى شي نهار رجعتي بلا متجي تبرري ليا حيت صافي . تسنيتك ست شهور كلها مغنزيدش نتسنا سيري موتي ولا جلسي وخدامتك بفمها قالت ليا مشات سافرات وسدات كولشي .. يعني مشيتي باغا تعيشي حياتك ولا منعرف شنو بغيتي ديري كاع.. ماعرفتش كفاش غنهضر ولا حتى شنو نقول ماخليتي ليا ماااانقول و الى قريتي هاد المسج قراي معاه تا هادي .. حسبي الله ونعم الوكيل فيك .
ضرني خاطري حسيت بيه كتب هاد المسج مفقوص غير شد وحفر الكلافيي وصافي وبغا يزيد يخرج ماعرفتش كفاش يخرجهم لاكن هادشي كافيني براكة عليا واكثر كلمة ضراتني هي ديك حسبي الله ونعم الوكيل باش يقولها ليا غيكون وصلات ليه للجدر فديك الوقت والحمد لله ماقريتش هاد المسج قبلو حيت مكانتش غنقدر ننعس .. اما دابا نقدر ننعس حيت سمعت ما كثر منو وكنت غنتضرب كاع وشفت ما اكثر .
قاطع سهوتي اتصال مريم جاوبتها قالت ليا باك جا هاد العشية طل على مك وجا هوا وخوك قلت ليه انا من الجمعية .. المهم شافوها ومشاو
قلت ليها شكرا وسمحي ليا على هاد المحنة حشمت منك من نهار جيتي ونتي معايا من مشكل لمشكل
تكيت وسديت عيني واحد الشوية .. بغيت نتعامى ومنفكرش فجاد ونقصح قلبي لاكن ماقدرتش .. حتى انا دقت الويل ودقت المرار وتعدبت والحمد لله لقيت جاد خرجني من كاع الازمات ديالي ودابا كنحس براسي كأنني فرغت ازماتي فيه وخليتو يعيش داكشي اللي عشت انا .. ويقدر يلقا اللي ينسيه فكولشي كما لقيت انا اللي ينسيني فزايد .. لاكن واش يقدر يسامحني واخا ينسا؟ حيت انا مابقيتش حاملة نشوف وجه زايد ومابغيتش يوقع ليا نفس الشيء مع جاد ويكره يشوفني .. بقيت كنفكر ووكلت امري لله دعيت ربي يفك عليا هاد الكرب وعيطت ولسعاد قصحت معاها قلت ليها واش جا جاد من بعد ما مشيت لبرا وسولك عليا
قالت واااحد المرة وصافي حيت انا بقيت هنا خدمت شي يامات عند الناس اللي كانو كاريين وصافي خرجت مابغيتش نبقا عندهم.. ديك الوقت جا سولني قالي فين هي قلت ليه مشات لبار هادشي اللي قلت وصافي.. وقلت ليها الفيلا تكرات
تنهدت شفت فيها وقلت ليها صافي سيري حيت انا ماوصيتهاش تسكت ومقالت والو ماعندي علاش نلومها وهادشي داز عليه شحال . نضت تفرغت لصلاتي تخفف عليا شوية وتكيت واخا منعستش شي نعاس لاكن غمضت شوية ودرت رجايا فالله هوا يفك ليا هاد الحبال هادي .. ماحيلتي لجاد ما حيلتي لماما ماحيلتي لبابا .. كنفكر فماما مسكينة دابا دارت العملية ماخصهاش تشقا ولا تحرك حتى ترجع ليها صحتها .. وانا مابغيتش نردها للدار وبا كيحكم فيها مايخليهاش تجي عندي وهي ماعندها ري اللي قال ليها ديري كدير . ماعرفتش شنو الحل وهوا دارو كيبغي يدير فيها صعصع وياويل شي واحد يجي يفهم عليه . واخا يكون غالط خاصنا نحدرو الراس لغلطو حيت هوا فرعون الله يعطيه شي كسيدة طويه كرهتو قد ما كرهت الزهر اللي عندي فهاد الحياة. قلت الحل الوحيد باش ماما ماترجعش للدار غنخليها فلكلينيك تما تجلس واخا تبقا عام .. وعارفاهم غيجيو يبقا عليها لا تخرجي لا مانعرف شنو حيت ماعندهمش اللي يطيب ليهم ويصبن ليهم ويعطيهم ماياكلو .. اما كن عندهم مغاديش يسولو فيها .. وداك الحمار دخويا مضسرو با كيحلها ليه بعد المرات واخا كيقمعو ويحرتف عليه لاكن كيعطيه ويمن عليه زعما انا راجل عليك ... المعاندة حتى مع ولدو تفووووو الكلب ياربي تهزو علينا .. قالك نتعراو الى خطانا الله يعطيك العرا دنيا واخرة
يوم يشبه يوم خلاها الداودي ركزت مع ماما حيت هي اللولة واهم ليا من اي واحد .. اما جاد معاودتش شفتو من اللي فاق ماقدرتش نمشي عندو .. كنشوف كاميليا كتجي تزورو بزاف وصحابو كيجيو ومو مكتحديش من حداه وباه وختو وحتى خوه هشام داخلين خارجين لاكن عمرو شافني ومكتجيبهاش الصدفة .. حدا العصارة ديال القهوى لقيت مو واقفة كتسنى قهوتها كانت لابسة كولون كحل وتيشورط كحلة هابطة عليها من اللور وبحال ديك الصندالة اللي كانت لابسة غيروهادي بيضاء وشعرها مطلوق بنفس التسريحة ووقفت حداها ابتسمت ليها قلت ليها صباح النور .. كي صبح جاد ؟ شوية ؟
ضحكات وقالت ليا هوا سولني علاش سلمت وكفاش سلمت وانا عاودت ليه الحقيقة كاملة سي تو
مريم تاهي الله ينفعني ببراكتها عايشة الكابوس وعايشة الحب بجوج .. خليتها على خاطرها كل يوم كتعاود ليا .. مرة يخرجها يساريها مرة يعرض عليها العشا .. تفكرت ايامس انا وجاد فالباطو .. احسن ايام ... ضرني قلبي فاش كتنفكر معتملتو ليا وكفاش رجع كيشوفني .. بحال حنا غرباء!!
حطيت ودني على مريم كيعجبني نسمع ليها وهي كتعاود حسيت بيها عايشة الحب بالمعقول من خلال داكشي اللي حكات ليا .. والصدمة القوية هي فاش جات واحد المرة عندنا لكلينيك وفوجهها واحد الحمورية .. سولتها مالكي وحنا واقفين لتحت فالاستقبال كنهضرو وهي توريني صبعها كان في خاتم !
تفاجأت قلت ليها شنو هادا !! نوو ماتقوليهاش !!
قالت ليا محمد طلبني للزواج
عنقتها وقلت ليها مبروك عليك فرحت ليك بزااف من قلبي وقالت ليا راني قلت ليه قريبة نمشي ولاكن قبل منمشي غادي نديرو شي غدا جماعي انا ونتي وهوا وقالي اوكي .. قلت ليه الى عندك خوك عرض عليه باش يكمل الثنائي
تنهدت وقلت ليها انا منقدرش ندخل فعلاقة وانا مزال ماخرجت من وحدة ... ولاكن غندير ليك خاطرك قبل ماتمشي لفرنسا ونمشي لهاد الغدا منها نتعرف على محمد .. لاكن مدام طلبك للزواج فراه بصح كيبغيك
وحنا كنهضرو شفت مامات جاد وباباه معاه غير هما مخرجينو من لكلينيك كان داير كبص فرجلوو مغاف ببانضة زرقا ولابس شورط كري وتيشورط بيضاء وواحد الفردة ديال بانطوفة .. غرغرت بلا منشعر ودورت وجهي عطيتو بضهري مشافنيش حيت مقنتة شوية .. جا الطبيب سلم عليه ووسلم على الاطباء تما ومشا خرج تبعتو غير بعيني حتى ركب اللور وطعو واليديه مشاو وانا نطيح دوك الدمعات ومريم كتواسيني وتعنقني قالت ليا بأسى وحزن شديد .. دابا يجي شي نهار يعرف فيه الحقيقة وغادي يندم .. وانا متأكدة مزال كيبغيك عندي احساس.. وداك الحمار ديال خوه هشام غادي يدفع الثمن غالي .. وغاااالي بزاف
فرحت لجاد حيت استعد صحتو وخرج .. وفنفس الوقت حزنت وحسيت براسي فبلاد مهجورة .. على الاقل كان طيفه كيفيني فهاد الكلينيك ماخلانيش نحس بمعاناتي مع ماما ومع العملية وحتى التعب ماكنتش كنحس بيه .. غير شوفة ماما كانت كتريحني بزاف حيت ماماه وحاملة روح من روحه . من بعد مامشا تبدل عليا الجو وانقطعت اخبارو ورجعت للسوشل ميديا نترقب اخبارو وماقلبتش على الاخبار القديمة ابدا .. لقتهم حاطين خبر باللي رجع صحتو شوية وغادر المستشفى والناس كلها كدعي معاه ومنهم انا . صافي من غير هاد الاخبار انقطعت اخبارو وحسابو عرفتو ماشي هوا اللي كيصور سطوريات ويحط البوسطات فمابقيتش متابعاهم بزاف .
الوقت داز عليا بحال الجاج وانا فلكلينيك وداكشي اللي مابغيتش طحت فيه . رجع بابا كيعيط ويسول فوقاش تخرج وخويا نفاجر وهي مسكينة بغات تخرج قالت ليا منقدرش نخلي خوك بوحدو .. قلت ليها غتمشي بشرط .. غتمشي معاك شي مرا تقصي ليك الشغل كله والى سولك قوولي ليه من الجمعية تطوعات باش تعاوني حيت مزال مابريت
قالت ليا راني بريت صافي وماخليتهاش تكمل الهضرة قلت ليها واخا بريتي ديما قولي راني مريضة .. انا غنقلب على شي مرى تمشي معاك من هنا وهضري ماتبقايش تخافي راه مغاديش يقطعو ليك الراس وداكشي اللي غديريه غديرو بلاصتك المرى نتي غير قولي ليها شنو باغا
سكتها وخليتها دوزات تما واحد السيمانة اخرى باش يعرفو بقيمتها ويوقروها شوية ونيت على بيدمن تقلب ليا سعاد على شي مرى .
خرجت ماما كتمشي على رجليها صحيحة فصيحة ودارو ليها ترويض وبرات الحمد لله ورتاحيت ولان كتمشي مزيان وضهرها مقاد .. وبالكشايف باذ وصلت لهاد النتيجة مع الحتارف اللي عندنا ومعاها هي نيت ماكانش باغا ديرها حتى سطاتني.
رجعات للدار ورجعات معاها مرى تعاونها فكلشي ووصيت ديك المرى ماتخليش ماما دير يدها فالما وكدبت عليها قلت ليها راني دايرة ليهم كامرات تما صغيورين كنشوف كاع داكشي اللي كيوقع باش ماتعرف باللي كاينة المراقبة ماشي تلقا ماما درويشة تبورد عليها حتى هي
رجعت للدار انا ومريم وتيليفون مع ماما مكيقطعش كل شوية نعيط ليها .. رجعت كنحس بيها بحال بيبي صغير خاصني نرعاه واكثر كاع فاش تقربت منها هاد الفترة ولفتها بزاف.
من بعد الضغط والعذاب اللي شفناه قلت نسافر ندي مريم تسارا شوية نضرب بيها واحد الضورة متصلة على المغرب ونردها باش تفوج ونعطيها وقت مادام تفرغت واحد الشوية واخا تابعني بزاف منقضي . جمعنا حوايجنا وشدينا طريق لآكادير نيشان ساريتها مزيان وركبتها على الجمل فالصحرا ورديتها لمراكش طلعتها لاوريكا وجامع الفنا وهبطتها للجديدة صربت بيها دورة ومشينا لافران دوزنا فيها شي يامات كان الربيع مفتح وزوين وديتها للجبل للاطلس عندنا وريتها بلادنا وبلادات العائلة وكلينا المن العسل سقينا الماء سرحنا الغنم ركبنا على لحمير .. دوزنا وقت زوين والجبل ديالنا فيه مناضر زوينة حيت ساكنين فوق الجبل والشجر والطبيعة عندنا الماء والوديان داكشي زوين .. وحتى انا كنت محتاجة بحال هاد السفر حيت بطاقتي كتجدد والباتري كيعمر وحطيت فيه التعب والارهاق كامل . مشينا للشمال ديتها لطنجة وتطوان وطلعتها للشاون حماقت على الشاون صربات فيه اسبوع والزيادة عجبها الاوتيل بلدي والجبال اللي ضايرين بالمدينة والروقية والمناضر وحتى الماكلة البلدية ماسخاتش ترجع من تما لاكن بقات ليها شي 3 يام يالاه تجمع حوايجها باش تمشي وشدينا الطريق رجعنا للدار بنفسية جديدة وزوينة وكانت طول الطريق وهي تيليفوم مع الحبيب .. كل دقيقة يعيط يسول والكامرات هي وياه .. قاليها نسافرو بجوج ساعا قالت ليه سالا الكونجي .
بقات 3 ايام ديتها دارت سبا فاعلة تاركة وحمام بالاعشاب كنت محتاجاه حتى انا وعجبها بل حمقها الحمام وقادينا الشعر والدفار وتقادينا واخا كنديرو الحجاب الشعر ديما كنصاوبوه ونطلقوه فالدار . رتاحينا ورجعنا قالت ليا دابا انا غدا غنسافر ..ليوم درت مع محمد نتغداو اونسومبل وغتمشي معايا
قلت ليها كن غير مشيتي وهي تجرني قالت ليا لا .. انتي هي كولشي فهاد الخرجة وراها مهمة كثرو من اللي كتصوري .
تنهدت وقالت ليا لبسي احسن ماعندك وجبدت احسن ماعندي قلت هادي بغات تلسق ليا شي واحد باش منبقاش بوحدي . لبست كسوة طويلة من اجمل وارقى وافخم الاثواب والموديلات فاللون الباج باليدين واسعين فيهم طبقات من الكمام جات راقية وواسعة بزاف من لتحت لاكن توبها حريري كيتجمع .. قاديت فولاري فتح منها بدرجة زيرتو على وجهي وراسيووشديتو بفنتة وكروازيت ليه الجلابل على عنقي رديتهم اللور وحطيت كلوز ومركب لبشرتي كانو حناكي حومر بالحمام .. كحلت عيني حيت كيبينهم ليا كيجيني زوين وحطيت ماسكارا وقطبت حواجبي مشطتهم وقاديتهم ورسيت ريحتي ولبست حداء لوبوتان احمر ماط وهزيت صاكي .. شافتني مريم قالت واو وحتى هي جات فنة لبسات كسوة بحالي وصباط وتعطرنا وخرجنا للموعد المشوق ديالنا وكنتخيل بيني وبين راسي كيفاش غيدوز .. المدة ديال السفر كلها وهي كتعاود ليا عليه وتعنقني قلت ليها هاحنا غنشوفو احبيبتي .
وصلنا لواحد الاوتيل عندهم مطعم ستيل جبلي زوين .. دخلنا كنقلبو بعينينا شارت ليا بصبعها كانو تما جوج شباب جالسين على كراسي خشبية كبيرة بالكنبات وطوال لاكن مدرقهم الغرس والشجر .. فقط واحد الكتف بشي قميجة زرقا اللي بان ليا والشعر كحل وهاداك اللي تما مهبط راسو وحاط صبعو على راسو متكي بيه وحداه شجرة .. بانت ليا رجلو مسرحة لابس دجينز وسبرديلة بيضا وقربنا وهي تلفت قالت ليا .. سمحي ليا .. هادي الطريقة الوحيدة باش يتحد هادشي
قلت ليها شنو كتخربقي ؟
قبل منكملها وقفنا عليهم وهزيت راسي كنت كنشوف فين كنحط رجلي مع الصباط ما هز راسو فيا غير جاد هوا نيت اللي كان مهبط راسو وكيشوف فتيلي وحداه عكاز كحل بحال ديال الرجال الكبار لاكن مكاين لت كبص لا والو لابس عادي وخوه حتى هوا كان محني على ركابيه خز عينو فينا ووقف بالزربة .. اما انا صدمتي كانت كتوازن صدمة جاد فاش هز عينو فيا
تصدمت ... كنت نتخيل ايتها حاجة طرا .. الا نقابل جاد وخوه هشام بجوج فدقة وحدة ! .. تخربقت دخت ومشيت وجيت فكرت مليون فكرة .. شنو كندير هنا شنو هوا كيدير هنا ومريم اش جابها لهادشي!... تصدمت فيه وتصدم فيا وتصدم فينا خوه وتصدمت فيه حتى انا وبقا شي كيشوف فشي وكولشي باغي يفهم وحتى واحد مافاهم وضحكتي اللي جيت بيها جمعت بالزربة فاش جا وجهي فوجهه... طول فيا النضر وشاف فمريم ورجع قلب وجهه للجنب نفخ كأنه ماحملش يشوفني وماحملش نوقف قدام وحتى انا دخت وتلفت ماعرفتش نمشي ولا نجي وشنو ندير تلخبطت ورجعت اللور كان ليسباص لي فيه عندو واحد جوجات تعكلت كن ماشديت فالشجرة كن طحت ، بغيت نمشي وجراتني مريم شفت فيها كانت كدير شيوشوفات عمرني فحياتي شفتهم .. صارمة وجدية وبانت الصلابة على وجهها قالت هازة حاجبها مغتمشيش جلسي
جراتني من يدي وكان الحوار كله بفرونسي قالت لهشام اللي مصدوم فينا هادي صاحبتي اللي عاودت ليك عليها
بقا غير كيشوف فيا ارتابك وحرك ليا راسو ومد ليا يدو بغا يسلم مابغيتش نسلم .. اما جاد جر عكازو بيدو بغا ينوض وهي تقول ليه مريم الى سمحتي عفاك خليك جالس كاين شي حاجة خصك تعرفها ضاروري
ارتبك هشام بقا غير كيرمش قاليها ماقلتيش ليا صاحبتك هي هادي
ردت عليه انا وقلت ليه : وهاد صاحبتها كي جاتك ؟؟ اا؟
قالت ليه مريم: هي هادي صاحبتي اللي دخلاتني للاسلام
بغا جاد يوقف خدات ليه العكاز قالت ليه غادي تسمع اشنو كاين ومن بعد سير مغنشدوكش وقالت لهشام هادي هي صاحبتي اللي كانت ناعسة عندنا فالسبيطار عام ونص .. هي اللي قلت ليك عندها مشاكيل وبسببهم نعسات عندنا ... هادي هي صاحبتي اللي عيطتي ليها فتيليفون نتا ومك قلت ليها بعدي من جاد خليه .. هوا عندو مستقبل خليه يبني نستقبالو وهددتيها باش الى مابعداتش منو غادي تخرج عليها ... هاااا؟ يالاه هضر علاش سكتي؟؟؟ ولا فاش كنت انا كنعاود ليك عليها وكنقول ليك صاحبتي مسكينة مريضة كنشرب الدوا وتنعس بيه وتفيق بيه وكتبغي واحد وماقدراتش تنساه وكتعاني وبسسب عائلته خلاتو حتى قربو يتزوجو .. ديك الساعة كنتي كتتأسف بقات فيك وقلتي ليا بنت النااااس ومسكييينة وماتستاهلش ... قطعات ليك قلبك .. حيت داكشي اللي سمعتي ماشي بحال داكشي اللي درتي ياك !
فشلت جلست فواحد الجنب هبطت وجهي ماكنتش منتاضرة هادشي يوقع تصدمت ونهاريت خصوصا فاش جبدات المرض ومابغيتش نجبدو ولا نخلي شي واحد يشفق عليا .. اما جاد بقا جالس غير كيشوف كيحاول يفهم من مريم داكشي اللي كتقول .. غوت عليها فاش قلت ليها صافي سكتي مابغيتش تهضر على داكشيواللي دوزت وعشت كيزيد يمرضني لاكن جات جيهتي وقالت ليا لا علاش غنسكت ؟؟ .. مالو المرض حرام ؟ .. ماقلتيش ليا راه حرام يمكن اا؟ .. خليه يعرف يعرف والى بغا يمشي الله يعاونو اصلا راه مشا وبدا حياة جديدة سوا كنتي مريضة ولا صحيحة ونتي هازة على قلبك هاد الجبال كلها!.. خليه يعرف حنا ماجيناش هنا باش نزوقو وجهنا قدامهم .. جينا نوضحو الامور وكل واحد يمشي بحال
ضارت عند هشام خرجات فيه عينيهت ولتحت عليه الخاتم قالت ليه انا مغاديش تزوج واحد بحالك شد عليا خاتمك
رمات الخاتم تكركب تحت الطبلة وهزو بقا كيشوف فيها ومشات جلسات حدا جاد شدات ليه فدراعه بيديها بجوج وقالت ليه سمعني .. انا بغيت غير تسمعني وصافي مابغينت والو .. جينا نوضحو الامور مزيان ونمشيو بحالنا اوكي .. هاد السيدة هادي مريضة عندها بزاف ديال المشاكل نفسية وعندها بزاف ديال العقد اوكي .. كتعرفها كتعرفك نويتو تزوجو تافقتو على كولشي لاكن حتى وقع داك المشكل مع باها ومشكل الاغتاصب راك عارفو وهي اصلا نفسيتها مريضة زادت كملات ودمرات نفسيتها .. هادشي كولو نقولو عادي ياك .. تافقتو تزوجو ومشبت لهولندا باش تلعب وبقات هي هنا على اساس تجمع الاوراق وفعلا كانت غتجمعهم لولا هاد الشيطاان هادا عيط ليها هوا ومك قالو ليها بعدي منووو حنا مقابلينش هاد الزواج ومك قالت ليها خلي عليك ولدي باقيو صغير باقي قدامو مستقبل انا مقابلاش بيك ابدا ماراضياش على هاد الزواج وخوك هددهااا هددها مزيان قال ليها بعيد منو والى شفتك معاه غادي نوريك وخلعها
هزيت صبعي حركتو فشلانة ماقادراش نهضر وراسي هابط على يدي قلت ليها لا امريم .. حبسي .. ماشي مو اللي عيطات ليا شي مرى اخرى دوزها ليا اما مو هصرت معاها فسبيطار ماعرافاش شنو وقع .. المرى اللي هضرت معاها صوتها مختالف وطريقة هضرتها فشكل اخر
رجعات ليه وهوا كيشوف فنقطة وحدة متحركش ماهضرش سكت ومريم جالسة جنبو كتفسر ليه اما خوه وقف بعيد شعل كارو وبفا غادي جاي
قالت ليه مك ولا ماشي مك المهم هضرات معاها واحد السيدة على اساس ماماك وهضر خوك .. وا خووووك هوا هادا نيت اللي هددها فهم خاصك تفهم هادش
رد براسو قال: زيدي ..زيدي كملي
قالت ليه البنت حالتها مستعصية راه واها نقول ليك بفمي مغتفهمش شنو كتعني مستعصية .. الضوسي ديالها مطبوع بالحمر .. وعلى داك الاتصال باعت كوولشي .. واش كاين شي واحد يبيع كولشي ممتلاكاتو غير هاكاك !!.. اه باعت كولشي ودخلات للمصحة فحالة مستعجلة السيدة بينها وبين الجنون خيط طريق ورسلوها لفرنسا على وجه السرعة وجابوها عندنا كانت حالتها يرثى لها عايشة غير فالماضي معايشاش فالحاضر ديالها وجول الوقت ساكتة وساهية بحال شي جمد ومتفاعلش نعائيا .. وانا اللي كنهضر معاك راه ماجيتش وقلت ليه هادشي .. انا ممرضة تما وكنت المسؤولة على تصرفاتها وردود افعالها ومسؤولة على الدوا ديالها وعارفة حالتها وشنو عندها واش فهمتي . عام ونص وهي فمصحة من الساعة اللي دخلات تمنعو عليها الاخبار كلها وممنوع تيليفون مننوع تتواصل مع العالم الخارجي هادشي كامل كان ممنوع عليها حيت جزء من العلاج .. تخيل راسك تحبس راسك غير نهار بلا حتى حاجة تلهيك شنو يقدر يوقع عليك !!.. مابالك عام كامل !. وفاش ردت صحتها وتعالجات نفسيتها قررات ترجع لهنا وجيت معاها حيت هي اللي نورات ليا طريقي وهي اللي دخلاتني للاسلام وحلات ليا عيني وعتقاتني من النار وعلماتني كفاش نصلي كفاش نتوضا وشنو الحلال وشنو الحرام وداتني للجامع وفضلها كبير ماعندي فين نحطو . هادا هوا السبب الرئيسي كنتمتا تفهمو .. ماخلاتش على قبل شي واحد ولا دارتها بلعاني . كانت صروف قاسية بزاف على بني ادم يستحملها .. وفاش وقع ليك الحادث هادي اكثر وحدة جلسات حداك فالانعاش ودارت المستحيل باش تبقا حداك .. ماشي باش نتا تعرف راها كانت حداك ومخلوعة .. ولاكن حيت ماطاوعهاش قلبها تنعس ونتا فالانعاش وكانت كتسهر اللي كامل حداك .. مكتسناش منك ترجع ليها ولا تقول شي كلمة زوينة ... فاش كنبغيو بصدق مكنتسناوش المقابل اجاد .. حنا بغينا ليك حياة زوينة وبغينا تكمل حياتك كما نتا باغي .. ولاكن تكملها وصافي من جهتها ماشي حاقد عليها ولا كتكرها ولا تبقا دعي فيها .. انا شرحت ليك شنو كاين كنتمنا ماتبقاش حاقد وهاز فقلبك وتكمل حياتك ونتا مرتاح وحتى حنا نكونو مرتاحين وضميرنا مهني .
قبل متكمل كلامها الاخيروهزيت صاكي .. صافي تفركعات الرمانة ومابغيتش نشوف الشفقة فعينين شي واحد ورفعت راسي مشيت حتى تبعاتني خرجنا لبرا وحسيت براحة وتحد العبئ كبير حطينو وتهنيت .. دابا مايبقاش فيا الحال حيت مكنتسناش منو يرجع .. المهم وضاحت الصورة ورتاحيت . تبعنا هشام كيجري كيعيط على مريم اما انا طلعت فطموبيل وبقات هي برا واقفة قالت ليه شنو ؟ سالينا !.. حساب ليك غنبغيك بصح هه..لا غير كنت كنضحك عليك باش نبين وجهك لحقيقي لخوك اما دابا سالينا كنتي زوين اولد الناس .بسلامة عليك .. مكاين لا حب ولا حتى حاجة كولشب غير خطة يالاه باي
شدها من يدها كيعيط وضارت عندو وقفات شافت فيه وقالت ليه شنوو ؟ شنو بغيتي تقول؟
قاليها مريم انا ااا ..ااا
ماعرفت مايقول وقالت ليه : ماعندك ماتقول نتا شيطااان فصفة انسان واخر مرة تعيط ليا مريم اوكي .. صافي نسا سميتي انا عمرني بغيتك فحياتي كنكرهك من قلبي من نهار عرفتك اشنو درتي .. ماتسواش تفوو عليك
قطعات ليا قلبي تشوطت كثر ما انا مشوطة بقات فيا عرفتها كتبغيه مسكينة بصح وكن قدرت نخفف عليها غير شوية ولا نهز عليها شوية من داك الحزن انا بعدا ولفت مابقات حتى حاجة تخلعني .
حزنت ليها وبقينا جالسين ماعرفت نبكي على راسي ونبكي عليها فاللخر تكات كل وحدة على الزاجة اللي حداه وبقينا ساهين ساكتين ماحسيناش بالوقت حتى تفشينا وقلت ليها يالاه نمشيو ناكلو شي حاجة .. من الصباح ماكلينا سخفنا .
مشينا لواحد المطعم شعبي كبير مرون بالدخاخن فيه الماكلة شعبية هي كتبغي الطواجن وتشنشيط قلت نديها باش تحل ليها الشهية لا انا لا هي ونقدرو نعتقو .. جلسنا فواحد الطبلة بحوايجنا ماشي كاع ديال ديك البلاصة ديال شي اوتيل ولا شي كافي هاي .. كولشي كيشوف فينا والناس شعبيين الدنيا عامرة الطبالي ديال التشنشيط هنا ولهيه .. قلت ليها اخر نهار عندك هنا شبعي من ماكلة المغرب مزيان مغتلقايهاش تما. قلت لهادوك اللي كيسربيو يحطو لينا شوية من الحاجة وحطو لينا لكرعين معلكين بالحمص والسمان مشوي ولكرشة مع لوبيا و لحم الراس مبخر وشاوينو شوية وصوصيط غليض قدو قداش وليصوص دماطيشة وشلاضةةوالفريت والموناضةة ... هي من النوع اللي فاش كيتعصب كيبدا ياكل ماشي بحالي انا كنبدا نرد ونتقيا .. كلات فرغات طاقتها فالماكلة اما انا غير كنقبومن هنا ومن هنا لاكن كليت شوية ونضنا رجعنا للدار عاونتها فجميع الحوايج وقلت ليها علاش ماقلتيش ليا راه هشام ..
قالت ليا مابغيتش نقولها ليه ... هوا فاش جا طلب النمرة مني ماعطلتوش جابو ربي حتى لعندي
بانت ليا مقلقة من داكشي اللي طرا ومابغاتش تهضر فالموضوع وحتى سكت طويت معاها الحوايج وجمعت كولشي وتكينا حطينا الراس على الراس بقينا كنشوفو فالسما وحنا جالسين فالجردة .. تنهدت قلت ليها رتاحيت امريم ... واخا هزيت الدقة من جهتك
تنهدات وقالت ليا ماتخافيش عليا .. انا غنمشي لفرنسا غنساه مغنبقاش كاع عاقلة عليه ... خاص غير شوية دالوقت
قلت ليها كن غير بقيتي معايا هنا
قالت ليا : الى درتي شي بروجي زوين نجي لهنا .. حتى انا صعيب عليا نعيش ففرنسا بالحجاب وصحابي حتى واحد مامسلم .. هنا لقيت راحتي
قلت ليها غنسيفط ليك فأقرب وقت ... سمحي ليا على كولشي امريم
حطات يدها على يدي وقالت : عيشي حياتك وماتفكري فحتى واحد ... راكي شفتي شنو وقع ليك فاش طحتي .. حتى واحد ماوقفك من غير صحتك
قلت ليها عندك الحق ودابا نقدر نكمل مرتاحة حتى يدير الله تاويل ديال الخير وبقينا كنهضرو ونتجمعو سهرنا ديك الليلة كلها حتى صبح الحال ووصل موعد الطيارة وخرجنا الشنط مع الخمسة باش تمشي ومشيت معاها للمطر وصلتها وفالطريق قلت ليها شكرا على اي حاجة درتيها على قبلي .. شكرا بزاف
ابتسمت وقالت ليا ماشيزغير على ودك حتى انا كنت صادقة فكل كلمة قلتها ليه .. اكتافيت بداك الوقت الزوين اللي دوزت معاه .. براكة
بقيت ساكتة مالقيت منقول حتى وصلنا للمطار ونزلنا طبعات الباسبور ديالها ودفعات الشنط وضارت عندي عنقاتني بقيت كنبكي وهي كتبكي .. ولفتها بزاف وحسيتها ختي اللي ماولدتهاش ليا مي وكان فراقها صعيب بزاف ماقدرناش نتفارقو .. دوزت انا وياها انواع كثيرة ديال المشاعر .. الم حزن فرح حب عذاب ضلم سعادة. كلشي . شافت فيا وقلت ليها فرنسا مابعيداش .. غادي نجلس شوية حتى نفك مشاكل بابا وماما ونقدر نجي نعيش تما فمرة وحدة
فرحات وعجبها الحال قالت ليا غادي نتسناك وتوادعنا مشات كدير ليا باي باي شوية داز حدايا واحد كيجري خلعني قلت ياك لباس اش واقع حتى شفت فيه عاد عرفتو هشام ومشا كيجري كعيط ليها مريم مريم وقفها شافتو حتى هي تصدمات لاكن بزربة مشات دخلات قبل ميشدها وماعندوش الحق يتجاوز داك الخط ويتبعها وبقا واقف كيعيط عليها بالجهد وانا موراه كنشوف فيه .. صافي ودعت صاحبتي دخلات مابقاتش كتبان لينا ومابقا ليا مندير تما نرجع للدار نكمل نعاسي احسن . خرجت لبرا غادية جيهة الطموبيل حتى سمعت شيماء شيماء تلفت كان هشام .. جا كيجري عندي مخطوف يدو كترعد شا تيليفون قالي على عجلة عطيني نمرت مريم عفاك . دغيا قبل متمشي عطيني نمرتها
بقيت غير كنشوف فيه وحركت ليه راسي ببرودة قلت ليه ماعندي منعطيك ... ماتستاهلش حتى ذفر من مريم
طلعتو وهبطتو وضرت باش نمشي ووقفني .. السيد بغا يسكت ليه القلب كيهضر ويتفتف ويرغب قالي عارف درت معاك لافوت .. سمحي ليا عفااك . عفاك ... وعطيني نمرة مريم على الاقل
تنهدت وربعت يدي بقيت كنشوف فيه حتى سمعت الطيارة طلعات وحلقات فوق راسنا وقلت ليه تبعها ... شدها الى قدرتي . اما انا مغانعطيك حتى رقم واخا يوقع اللي وقع .. نتا ماشي ديال مريم غير نساها عليك
خليتو كترعد وطلعت بقا كيعطيط وتبعني بطموبيلتي غادي موريا وكيضرب ليا الفار ناغبيتش نحبس حتى للدار ودخلت للقيلا قلت للعساس الى جا دق شي راجل جري عليه ودخلت مرتاحة حا سة بواحد الاحساس رائع قدرت ننعس وانا بيخير مستمتعة بلذة الانتقام .
فقت معطلة على خاطري شبعت نعاس لقيت ابيل من فرنسا عرفتها مريم وتاصلا بيها كنسول كيو وصلات وكي دازت الرحلة وقلت ليها راه هشام طلبوليا النمرة وماعطيتوش وبغا العنوان ديالك تبعني عليه حتى للدار . قالت ليا ماتعطيهش انا ودام السيد سالينا صافي مابقيتش باغاها وغادي ننساه . خليتها على راحتها وهصرنا شوية من بعد نضت دوشت ولبست حوايجي وتفرغت لشغل با . مشيت للمحمدية كان الليل ديك الساعة والناس كيتعشاو والدنيا عامرة .. طلعت لفوق حيت با كان لتحت جالس مابغيتش يشوفني بمرة وجلست فلاطيغاس سولت على سميرة قالو ليا لتحت وهبطو يكلموها ليا وطلبت العشا جلست كتسنا .. طلعات عندي لابسة واحد الدجين وواحد البودي شيبي فيه الصقلي وسبرديلة والذهب بلدي دايراه وداك المكياج والشعر بحال فاش شفتها اول مرة. جات سلمات عليا من وجهي عاجبها الحال شفتها بغات تصاحب معايا !!! ضحكت ليها وجلسات قالت ليا فين غبورك فين مشيتي وبقات كتسول قلت ليها كن برا ماكنتش هنا بغيت نيت نطيب عليها شوية غادي تزيد تتقرب مني .. عادا هوا بنادم يفضل اللي عندو على اللي معندوش واخا حتى واحد فيهم ماغيعطيه شي حاجة !. المهم بقيت كنهضر انا وياها ونسولها على الخدمة والاحوال وهزيت واحد الصاك فيه لاكام ديال الشومبوان كلها كن خديتها من البارا فاش كنت جايا على ودها باش نتصاحب معاها وعطيتها ليها قلت ليها هادي جبتها ليك .. شداتها وعجبها الحال فرحات بيها قداش طلات عليها و جبدات كتشوف قلت ليها ها ديالاش ها ديالاش . بدات كتشم قالت ليا بحال اللي عند ختي .. وااعرة
أنا وبعدي الطوفان الجزء 13
محتوى القصة
التنقل بين الأجزاء