علام حتى باه ضارب الدينا بركلة وكول مع راسو .. اما واحد الضحكة عندو كتهز الدار كاملة مكاينش اللي ضحكني قدها .. سعداتهم اسرة منسجمة باينة مرتاحين فحياتهم مولفين الضحك والهزار وماشي معقد ولا فيه ديك النفخة الخاوية زعما راني راجل رجولتي متسمحش ليا نضحك مع ولدي ولا مع مرتي !.. اش جاب الرجولة للتعامل الزوين والحنان والضحك مع الاولاد .. ولاكن اللي جدورو نضيفة من السموم والامراض النفسية هاكا كيتكون شخصيتو ..
تابتة ومرتاحة ومتصالح مع نفسه ماشي بحالنا حنا .. مضارب غير مع راسنا كارهين بعضياتنا وشي حاضي شي شي حاط على شي ولاكن كولشي من تربية الاب اما مي اصلا جابوها صغيرة خاص اللي يربيها بقا غير تربي وتعلم وتقري وهي اصلا ماعارفة حتى زفتة .. عارفة غير تشقا وتولد وطيع الراجل والعائلة فجنابها كينخزوها كل شوية باش متنساش الواجب على تزوجات .. بصراحة الثقافة والوعي مهمين بززاف وحتى المحيط كيلعب دور كبير . . هادشي اللي خلا حياتنا حنا مهزوزة عندنا راعي كيرعانا بحال البهايم بلعصا ويدينا ويجيبنا كي بغا وعلى كانتو .. انا هما كل واحد طور راسو بنا شخصيتو كتشوف الاختلاف بيناتهم ومكاينش تشابه حيت كل واحد اختار كيفاش بغا يكون .. ماشي بحالنا حنا .. تعادينا من بعضياتنا كي الاب كي الام كي الاولاد ! وكيربيوك باش تكون بحالهم ويقتلو ليك الشخصية مكيخليوكش تكبر حر باخيتارك وبراحتك .. والى جلستي فشي مجمع كولشي حاضي عنننداك تهضر .. تهضر يقولو ليم سكت غتزبلها . كتبقا ديما عارف راسك غتزبلها واخا عمرك جربتي باش تعرف راسك كتزبل فالهضرة ولالا .. وكتبقا هاكاك مقموع حتى كتسرا ليك القمعة فالدم كترجع تسكت وتبقا غير تسمع وتشوف فالشخص اللي معاك هوا اللي كيهضر وهوا اللي كيعرف وهوا اللي نيفو عليك ونتا لا وديما راسك فالارض. كيبداو معاك من الصغر ومن الوسط العائلي بالقمع وحاضينك لا تحشمهم بحال هما زعما ملوك الارض كيتضاهرو بالمثالية والتربية وهما المخير فيهم مامربيش اصلا باش يربي شي واحد اخر .. كطلع قاطع النفس وتبقا فالمدرسة قاطع النفس والى وقعات ليك شي حاجة يبقاو عليك نتا كطير .. نتا تربية يدينا وحنا عارفينك .. كن مادرتيش مايوقعش ليك ويوقع ليك . حرام واش يعنقك شي واحد ويخفف عليك وتحس انك عنضك حضن . كتبقا مفتاقد للحنان ومفتاقد لبزاف ديال الحوايج وكيحساب ليك بللي راك عايش حسن من شي واحد اخر حيت هادي الفكرة اللي دخلو ليك لدماغك فاش كيشريو ليك شي شوريطة ويبقا عليك راحنا شرينا ليك فعلنا ليك تركنا .. مالابسها حتى واحد د.. مالقاوهاش الناس .. ونتا كيحساب ليك بصح بوحدك اللي واكل شارب والناس ميتين بالجوع .. حيت كيبقاو يمنو عليك داكشي اللي كيديرو ليك ويرددوه قدامك حتى كتقبلها بلا متحس . كتعيش مدلول وديما يميزو ولاد الجيران عليك .. ديما ولد فلان حسن منك .. نتا عمرك تسمع كلمة نتا حسن ولد فلان .. ديما ولاد الناس مربيين ونتا لا .. ديما ولاد الناس كيعرفو يهضرو ونتا لا .. كتبقا تشوف راسك دون المستوى قدام واحد اصلا ميسواش ونهار تزوجي يكنلو عليك الباقي ويخرج ديسك الزوج والطاعة والصبر ويجلسو عليك بالصبر الصبر الصبر تقول داخل تكوي على بوصفير فعينيك ماشي داخل على حياة زوجية سعيدة . اودي الهضرة بزاف والسكات حسن واكفس حاجة كتوقع ليك بلا متحس كتقولها مع راسك .. هي فاش كتشوف ناس مختالفين عليك كيجيب ليك الله راهم مكيحشموش ولا ماعندهمش الشخصية ولا غيرو كيخربقو ولا تشوف الولد كيهضر مع باه كما باه كيهضر معاه كتقول راه مامربيش مكيحتارمش باه .. ولا برهوش ولا مامحتارمينش ولا خابين كاع .. حيت عشتي مقموع طول حياتك كيجيب الله باللي داك الانسان كيدير شي حوايج ما هوماش
خاصو يكون جالس ومنفخ ماقاداهش بلاصتو ومكيهضرش وغير مخنزر و معصب وماخصوش يضحك ويقشب حيت داكشي بالنسبة ليك كيقلل من الشخصية ديالو وبداك التعفار والتعصار كيجيب ليك الله راه شخصية مهمة وقوية والمشكل الكبير كاع هوا ماتقدرش تقبل العكس ولا يدخل ليك لمخك وترتاح لديك الحقيقة المختالفة على الحقيقة المزيفة اللي كبرتي عليها .. تحليلات معقدة صعيب تفسرها حيت داكشي اللي كيدور فالدهن ويحس بسه الانسان فبعض الاحيان مكتلقاش ليه كلمات ومامديورينش ليه كلمات . كاين شي حوايج مكيتفسروش كنعيشوهم مع نفسنا يوميا متعلقين بطريقة تفكرينا واحساسنا والى جيتي تقرا تحليل داكشي اللي عايش بيه كيجيك يا اما تافه يا اما عطيتيه كتر من وقته وحقه يا اما مكاينش اصلا مع العلم انه كاين غير القول عندو تأثير كثر على الفعل حيت متنتابهش لراسك اصلا وكتبقا هاديك شخصيتك وداكشي كامل متعلق بشخصيتك صعيب يتفسر وشخصيتك اصلا مكتجيش من فراغ .. كتركب من الصغر حسب شنو عشتي .. حسب الذكريات اللي عندك .. حسب الناس اللي عشتي معاهم وحتى المحيط وعاد اختياراتك عي الاخيرة كتبقا جزء مهم من تركيب الشخصية .. وفاش كيتحدو اختياراتك وكيختار شخص اخر بلاصتك داكشي اللي يناسبك وتمشي على هواه هنا كتكبر مهزوز .. بدون شخصية وعندك فقط طبعة من مجموعة ديال الشخصيات عشتي معاهم وتأثرتي بيهم وكترجع تقلد اي شخصية عجباتك لمدة صغير وترجع لحالتك الطبيعية وهي غادية لانك اصلا بدون شخصية ، و قوة الشخصية بالنسبة للناس العادين اللي عندهم تركيبة صحيحة ماعندها حتى علاقة بالغضب والعصبية والتخنزير والتكبر والصرامة المستمرة .. بل قوة الشخصية كتبان فطريقة فالحوار وتشبتك فالرأي ديالك وتقبل رأي الاخر وتحتارمه والى كانت عند فكرة غالطة تصححا وتتقبلها وضيفها لقاموسك .. وكتكمل قوة شخصيتك فختيارك لشنو مناسبك ماشي لشنو مناسب غيرك بلا متتأثر بكلامو ومحاولة اقناعه ليك و حتى فلحضات الغضب كتبان فمدى صبرك وطولة بالك وقوة التحكم فنفسك .. والتصدي للازمات النفسية وعدم التأثر بالقيل والقال لان ثقتك فنفسك اكبر من انه يجي واحد يقلل من قيمتك مادام نتا عارف نفسك اش كتسوا فكيبقا كلام الغير مجرد غبار على الذهب الريح اللي جا يديه وكيبقا الجوهر لامع عمرو يتصدا الى كان المعدن ديالك مستخرج من معدن اصلي واصحيح فعمر شي سوسة تدخل حياتك تسوسها ليك و كتبقا قوي بحال الفولاد كتتصدى للهجمات وكلمتك متنزلش للارض الى كنتي متأكد انك على حق وانك مآمن بنفسك وبطريقة تفكيرك وختيارك وكتعيش مرتاح ضاحك ناشط فرحان كتعامل الناس معاملة زوينة حيت عارف راسك اشنو نتا كتسوا والمعاملة الزوينة مكتقللش من قيمة ولا الضحك مع ولادك مكيقللش من قيمة نفسك وشخصيتك قدامهم . عكس الاتجاه الاخر تماما اللي كنت انا كنشوفو قوة شخصية وكانت عندي فكرة غالطة عليها بزاف .. كنشوف المضهر فقط من برا كنتبهر ونمجد فالانسان ونقول شخصيته قوية حيت كبرت على القمع اي واحد ثمر عليا كيجيني واعر حسن مني وقوي حيت انا اصلا ضعيفة وحاذرة الراس ونضحك ونهضر وخايفة على شنو غنقول كيجيب ليا الله كاع اللي بحالي وضحك معايا وعطاني وقت راه ضعيف! .. وهاداك اللي ماعطانشي وقت هوا الواعر !.. لاكن الحقيقة اللي بزز باش تقبلتها ودخلت فصراع وحرب طويلة عشتها مع نفسي ودخل ليا الشكلي فالعكلي ومرضت بسبب التراكمات .. هوا ان ديك الشخصية اللي كنت كنشوف قوية فبا حيت كيغوت وقوية فزايد حيت مكيعطينيش وقت وحاسب راسه شنو .. هادشي كامل لا علاقة ليه بالشخصية القوية المتصالحة مع نفسها .. هادو كلهم اصحاب هاد الواجهة الصارمة هن فقط رسمو واحد الصورة لنفسه للمجتمع باش مايضسرش عليه .. وباش مايتماداش معاه ويدخل معاه فالمسكي حيت غيسكتو .. وكخلي انطباع عليه من خلال الصورة اللي رسم على برا باش يخلع بيها الناس ويضهشرهم حيت بسهولة يمكن ليك تكسرو لاكن هوا صنع لنفس باب من الفولاد صعيب عليك تتجاوزو باش توصل ليه للنخاع .. ماشي صنع ليه شخصية باختيارو هوا والى دخل معاك فنقاش يسكت يخليك حال فمك ويعطيك شرح مفصل فجملة وحدة يقنعك بيها ويبين ليك فيها انه على حق وتسكت نتا قدامو حست هاد الناس راسهم عامر ماعندهمش تخوف من الناس .. اللي عندهم تخوف هم اللي بحالي! .. وهادشي اللي وقع مع با وحتى مع زايد ... فاش كسرت الباب الفولادي لبا اللي رسم ليا ووهمني بيه طول حياتي تغلبت عليه وكسرت ليه الباب بانت حقيقته اللي ماخلاتوش يتقبل الهزيمة وطلق مي باش يقتلني بالفقصة ويسممني ويتغلب عليا زعما .. وكذلك زايد .. فاش طاح مع زينب انسانة طبيعية عايشة البساطة فكلشي ومع كولشي مانباهراتش بداك الباب الحديدي اللي فالواجهة ماكملش معاها حيت قوية وتصدات ليه هزاتو وطلقاتو عرف راسو مغاديش يأثر عليها وغتزيد غير تمرضو وطعنو وكدخل فنقاشات تقدر تسكتو بيهم تخليه يبان ضعيف قدامها وكتعرف تهضر وكتعرف شنو كتقول صعيب يجاحدها .. طلقها حيت داك النوع ميقدرش يعيش مع شي واحد كيفهم عليه وحسن منو ومتشبت باختياراتو كيبغيو يعيش مع واحد يسيرو كيف بغا ويحس بالفخر ديما وهوا كيتعالا عليه ويرفع راسو .
وانا هنا كنشوف الشخصية المتكاملة المتصالحة مع نفسها والقوية فحد داتهها فهاد العائلة .. كتشوف الام مامتأثراش بالاب ولا خايفة وانما كتحتارمو وتهضر معاه بالادب وهوا كذلك كيعاملها بنفس الشكل ويعطيها قيمة قدام الجميع وشفتو كيفاش كيدور يشوف فيها ويضحك معاها واخا ولادها كبرو وولدها قداش بلحيتو وضارب الطول فالعرض .. كتحس بالحنان بيناتهم والحب والاهتمام وكفاش هوا كيقول ليها كولي وهي كذلك قالت ليا حتى انا كولي علاش ماكليتيش .. كيحسو بالانسان حيت كاين اللي كيحس بيهم وجذورهم صافية من السموم ..كتشوف علاقة الاب مع ولادو كفاش كيضحك معاهم واخا قدام الكل .. مافيها عيب بلعكس العيب هوا اللي كان فينا با ميشوف خويا ولا يشوفني كيثمر ويزعف باش يبان كيربي .. ولاكن اللي مربي مربي باينة غير من علاقة هشام مع باه كتحس بيه بحال صاحبو جالس حداه وواخدين راحتهم وعلاقتو مع بنتو حنين معاها وحنان معاها حتى خوتها .. شفت الاب كفاش كيقشب مع ولدو ويضحك ومفتاخر بيه بطل حيت ديك البطولة ماجاتش غير هاكاك ولاكن سببها التربية الصحيحة والدعم المعنوي وعاطينو اهمية هوا والرياضة ديالو .. هادا فحد داتو فوز عضيم للواليدين جناو ثمرة تبيتهم فاحترام الابن لواليديه وسببه حتى اللمة ديالهم فبحال هاد المناسبة .. اختار يحضر ويكون معاهم على انه يمشي ومايعطي اهمية لا لخوه ولا لعائلتو .
كتشوف الام كيفاش حنينة فبنتها وكفاش كتهضر بشوية معاها وبلا متبزز عليها شي حاجة .. كتشوفها كفاش كتحن على ولدها والى جلس حداها كتكا على كتفو وتعنقو حيت طول الوقت عايشين الحب وكتصرف كما هي مرتاحة ماشيوحاطين عليها ويغمزو فيها من البعيد ويمرضوها يخليوها جالسة مهووسة .. ولا الولد يبعد مو يقول ليها وصافي ماتبقايش تبحلسي قدام الناس ويمقعها !.. ابدا مخلي ليها الحرية .. تفرح كي بغات تاخد راحتها لانها اهم ليه من دوك الناس اللي غيشوفو وراحتها اهم من اي حاجة .. وهادشي اللي خلا سليمة وجهها منور مشاعرها نابين من القلب وباينين على وجهها كتبان حنينة وضريفة ورقيقة .. ولاكن قالها داك المثل .. قال منين داك الغصين .. من ديك الشجرة .. كن خويا كبر وسط هاد العائلة حتى هوا كان غيكون بحال جاد ولا هشام .. اودي المرى مرتاحة نفسيا عندها راجل ونعم الرجل كيفاش بغيتي ولادها يكبرو .. اكيد مربياهم على داكشي باش كتحس هي وزرعات فيهم العطف والحب والحنان والهدوء وعاد الوعي والثقافة والرقي .. حلو عينيهم على يد ناعمة ورفرات ليهم السلم والسلام .. انا براسي كنهضر معاها كنحس بالراحة وفاش كتجلس حدايا كنحس بحال الى جالسة حدا شي حلوة .. منورة فوجهها فشكلها فكلامها فكولشي .. عساك ولادها اللي هزاتهم فحضنها ورضعاتهم وكبراتهم قدام عينيها . ماشي بحالي مي مسكينة ماعارفاش تربي مالقات اللي يقريها ويوعيها على التربية وبلدية واصلا تربيتها هي ماكاملاش ومخربقة وحتى اللي رباوها عجنوها وخلاوها طيب كما خرجات يا تخرج بيتزا ولا خبز ولا حريرة المهم شدو بانيو مل واحد خوا فيه المقادير اللي بغا ورونوها وخشاوها ففران بحال اللي وقع معانا تربينا راسنا وسط العائلة اللي جا كيدير حقو فتربيتنا عمرها مان عندها رأي الى درنا شي حاجة كتقول لينا يجي باك نقولها ليه ولا تقولينا تكلمو لباكم باش نتكلمو ليها هي حيت كنخافو من با وكبرنا على الخوف والرعدة حتى خرجنا مرضى تفسيين حارو فينا الاطباء
سرحت كنشوف فيهم وفرحت حيت جالسة معاهم .. حتى انا كان عندي طموح فاش بزة كنت كنحلم بزاف وباقا كنحلم ونتمنى عشت حياتي كلها فالاحلام وواخا درت الفلوس فرغت فيهم الكبت ديالي وداكشي اللي كنشوف الناس كيلبسوه ونتهد عليه لاكن ماقدرتش ننجح وندير بصمتي فالمجتمع .. كنت كنقول عندي عقدة الفرنسية وهاي تحلات .. لاكن باقا كنحس براسي خايفة ندخل فشي حاجة ونفشل .. ماعرفتش شنو باغا مزال مالقيت راسي ومزال عندي تخوف وحتى الجهد مشا ليا ضيعتو فالخوا الخاوي على ناس مايستاحقوش .. لاكن الغلط ديالي ودابا تعلمت منو وحسيت براسي تقال وليت كنميز شي حوايج ونتقل ومابقاش داك الطيران فيا وحتى الاحلام مابقاوش وليت واقعية اكثر .
كنت شاردة مع نفسي وباه باقي شاد فيه كيضحك معاه حتى فيقاتني واحد الكلمة وهوا كيضحك ديك الضحكة خارجة من قلبو قاليه غنزوجك اولدي ونطرق ليك على صبعك بقيتي ليا غير نتا
جاد غير كيتنهد ويسوط كيضحك ويشوق فينا وهز دراعه باش باه يقيلو عليه وقاليه
نوضاتو اما انا ماعرفت نضحك ولا نبكي نضت بالزربة دخلت وراهم سولت وحدة على الحمام نتخبا فيه تا دوز الموجة ومشيت يالاه غندور سمعتها كتقول ليه اوييلي تحمستي بزاف افاريح راه جالسة معانا ونتا كتقوليه طيحاتك ما طيحاتك
قلب الدورة مشا وباه بقا واقف كيدور فعينيه ويحك شعرو من اللور شويةةبدا يضحك بوحدو وجا يرجع هربت درت بناقص من الحمام رجعت بلاصتي ورجع جلس مقابل معايا شاف فيا وانا نفرفر برموشي حشمت اما هوا سكت دور وجهه بقا ساكت وبات مريم جات نوبتو تا هوا مابغاش يسكت اما باابات جاد بقا جالس وكل شوية يضور ويجلس يشووف فيا
ويلي على حشمة حشمت انا وحشم باه ولاخر زاد حشم يورينا وجهه وحتى ختو بدات كطل عليا كل شوية وتشوف فيا عرفتها ماعقلاتنيش اما باه زبلها كي خلاوها جدودنا ولاهيلا ولاكن هانيا المهم فرشتي ليا المعنطز من قبيلا وهوا يتنفخ كان غيتفركع فشيتيه فالدقيقة تسعين وعلى ديك الفرشة سالات الحفلة وناض الجميع يودعو بعضياتهم حسيت براسي عندي قيمة كبيرة خصوصا فاش بداو كيهضرو من بعد ما مشا جاد على مريم والحجاب وكفاش سلمات قالت ليهم تلاقيتها ففرنسا وتصاحبنا ودخلاتني الاسلام وبدات تعاود ليهم عجبهم الحال بزاف بقا عمو فريح كيحرك راسو ويشووف فيا وفاش نضنا نمشي بدينا نتوادعو نزل العنطيز يسلم على الناس وسولوه فيه بغاو يسلمو عليه وجا مكيضحكش غير بزز مع الناس .. اما انا سلمت على ماماه وختو من الوجه ضحكو معايا ورحبو بيا وزدت حتى وصلت لباه دار ليا واحد الضحكة مريحة وكيحرك ليا راسو وسلمت عليه من يدو ابتسمت ليه و قالي تبارك الله عليك ابنتي . حشمت منو وماتلفتش حيت جيت بعيدة وجاد واقف اللور مارجعتش نسلم عليه والفرشة تفرشت فيها انا وياه .. بقا غير واقف كيضهر هوا فخونصوا بعفوية حيت سلمو على بعضياتهم وتمو جاين ورانا هز عينو شاف فيا بلا حنى تعابير وخليتو خرجت مشيت انا اللولة للطموبيل طلعت اللور حتى جاو هما خرجو كاملين برا ودعونا وشفت خت مريم سلمات عليه من لابيز وضحك معاها وطلعات حدايا جلسات بقات كتشوف فيه ودارت ليه باي باي وانا نقلب وجهي ركبنا وزدنا خلفة رجعنا للدار ، من الساعة اللي دخلنا فيها وهما كيهضرو عجبهم الحال عجباتهم العائلة وزدت انا شكرتهم قلت ليه مزيانين وسولني فخونصي ديري لينا نشوفو المقابلات ديال جاد وشعلت التلفازة درت ليهم اليوتوب حل عينيو قالي لعب مع فلااان !! تفاجأت وجات اخت مريم ماريا جلسات قدام تلفازة .. ديك المقابلة انا براسي ماشفتهاش هي اللي كان لعب قبل ميتهرس وغلب فيها .. عجبهم الحال وعجباتهم العائلة شافو المقابلة حتى سالات سفقو ليه وبدا يهضرو بيناتهم ماقداتهم فرحة طاحو فعائلة زوينة ونقية وفالمستوى يفتاخرو بيها قدام الناس .
رتاحينا من السهرة مشيت نعست بقيت كنرجع السينتة ديال كل لحضة حتى داني النعاس والصباح صبحنا على الضايفة بحال العادة مكاين غير شهيوات والضحك .. بغاو يتبيسيناو تعراو كاملين خرجو لابيسين كانت الشمس قوية خرجنا ليهم الديسير والمشروبات .. كانت ام مريم سميتها كارولين لبسات واحد المايو وتكات عطات ضهرها للشمس هي وراجلها كيتشمسو وخليتهم مشيت انا ومريم بدينا الجرى ورا التوجاد وطلع وهبط .. كيعجبني داك الجو مكنملش منو كاع دوزنا دوك الايام كلها غير فالتوجاد وكيدوز عليا هشام يخرجها وانا تلهيت مع الضياف بزاف .. قرب العرس قلت نعرض عليهم مافيها باس يجيو يتجمعو يقدرو يكون عندهم شي حاجة يتافقو عليها وقلتها لمريم قلت ليها نعرضهم واخا غير كاسكروط وقالتها لهشام عطاها نمرة سليمة عطاتها ليا وعيطت ليها . فالاول ماعرفاتنيش قلت ليها شيماء وهي تقولي اااه صافا ماشيغي شخبارك .. شخبار عروستنا .. قلت ليها كولشي مزيان مرحبا بيكم عندنا الى عندكم شي وقيتة غدا فلعشية قالت . ااه ميغسي مكاين علاش تكلفي راسك احبيبة قلت ليها مكاين حتى تكاليف بلعكس مرحبا والف مرحبا وقالت ليا واخا صافي نعلم فاريح
درت الواجب واخا ماعرفتش واشوصحيح ولا غلط لاكن جاتني مافيها حتى عيب نعرضهم مادام جالسة عندي لافامي يقدر لو كانو كراو دار كانو غيعرضوهم ويديرو نفس الشيء ! .. المهم جات المبادرة من عندي قبل العرس .. وكما هما حاسبيني وحدة من لافامي فمن الواجب ندير بحسب الاصول .
تلفت مشيت كنجري لواحد لحمام جهة الباب وقفت شفت فراسي قاديت راسي دغيا بديت نجرب الضحكة اللي جات معايا وخرجت كنجري قلت للعساس خلي الباب محلول البارني مايجيوش الناس يلقاوه مسدود جاتني حشومة و خليت الباب ديال الدار لداخل حتى هوا محلول وجاو كانت سليمة حتى هي لابسة خت جلابتي مع الطالون كحل استقبلتها جات كضحك اول حاجة انتبهت ليها هي الجلابة سلمات عليا وقالت ليا لابسين بحال بحال وبدينا نضحكو رحبت بيها كانت دايرة نضاصر الشمس حيداتهم ودخلات وراها ميساء .. ميساء يا ميساء .. سكوتية مكتهضرش غير كضحك وصافي مرزنة ومهدنة سلمت عليها دخلات ودخل هشام ومعاهم جداتو المرى الكبيرة حتى هي .. الصراحة ماشي قبيحة جاتني ضريفة وكتهضر بشوية وتسلم بشوية كيوت واخا كبيرة حسيت بيها حنينة ماشي شريرة كما كنت واخدة عليها النضرة واصلا واقيلا ماعارفاش كاع اش واقع ولا شكون انا ولا واش انا اللي هضرت معاها فتيلي .. سلمت على هشام وباه دخل هوا اللخر بديك الابتسامة ديالو المريحة مد ليا يدو سلمت وحشمانة منو ودخلو تلمات العائلة وبقيت انا كنشوف فالباب ونتسنا .. اش كنتسنا مانعرف . سوبت العساس قلت ليه واش باقي شي واحد برا قالي لا حتى واحد .. اذا جاد ماجاش .. واخا .. على خاطرك .
رجعت لداخل خاب ضني حسابني غيجي لاكن هوا حر . هتميت بضيوفي جلستهم فأحسن بلاصة وجلست وبدات الهضرة والجموع وانا غادة جايا قلبي كيفرفر مرفوعة وغير كنضحك كنجي حتى ليهم نهضر وكنحشم كنقول ليهم مرحبا بيكم وانا كنقطر .. شكون قالي شي نهار يجي عندي باهم ومو شخصيا حتى لقلب داري !.. عائلة مريم كتصرف عادي فالدار واخدين راحتهم كيدخلو ويخرجو فين بغاو وكول مع راسهم مالقاوش معاهم مشكل فالرسميات ولا فالحوار .. عاطينها للضحك والهضرة كل واحد مع لاخر ومشيت انا لواحد الطبلة قدامي بعفوية ستفنا فينا الكيسان والماء قلبت الكاس نعمر وضرت بعفوية شفت فيهم لقيت سليمة ساكتة دايرة واحد الابتسامة على وجهها وجالسة بالجنب دايرة رجل على رجل فوق الفطوي وكتشوووف فيا .. شفت فيها وابتسمت ليا رديت ليها الابتسامة وحشمانة . حطيت ليهم الماء وجلست فالجنب شافت فيا وقالت ليا اجي جلسي حدايا
سدات عينيها تمهدات وعضات شنايفها قالت ليا غير خليها على الله وخلاص راه فاش قلنا ليه مات صاحبو دخل فواحد ديبخيسون صعيبة وكمل عليه الطبيب قاليه متقدرش تلعب برجلك .
درنا كاسكروط ضاحكين ناشطين وحطيت ليهم من بعد الحلوى واتاي وجلسنا كنتجمعو كاملين .. هما اما انا غير كنشوف .. اما مريم جالسة حدا هشام هي وياه وش وش وش غير بيناتهم
جبدو موضوع العرس بقاو كيهضرو وانا ساكتة .. تافقو على مراكش عندهم فيرمة كبيرة فيها كولشي قالو انها هي حسن من القاعة ومع الزينة ديال تريتور كطلع زوينة وفيها دار ولدهم الكبير العرس . المهم قادو امورهم وناضو بغاو يمشيو وصلت معاهم حتى لبرا مشاو ورجعنا تاني للجميع والروينة وطلع وهبط .. عرفت راسي غنمشي لمراكش مايصلاحش ليا نكري شي تكشيطة .. دخلت من تيليفون مريم للانسطا عند وحدة كانت كطلع ليا عندها داكشي هائل وهضرت معاها قلت ليها غنجي نشري شي تكشيطة ومشيت عندها جبدات ليا الهمة والشان داكشي راقي حرت شنو نشري وفالاخير ختاريت وحدة هي اللي بيناتني وزوينة مع المضمة ديالها ورجعت بحالي . وجدنا الشنط والحوايج وجمعنا كولشي باش نمشيو لمراكش وقلت لمريم انا غادي نجلس فأوتيل لاكن مابغاتش كتهزني بختي وتحطني بختي ودرت ليها خاطرها . شدينا طريق لمراكش هزيتهم فطموبيلتي وخوها هي بقا مع هشام سبقونا و تبعت جي بي اس شدينا طريق الفيرمات والفيلات وكانو قصبات واوتيلات فديك الجهة حتى وصلت كان باب كبير والشجر فديك المنطقة .. منطقة خضرا زوينة والطبيعة والهوا صافي غير الطريق ديالها غزالة فوجت فيها . دخلنا للفيرما مكان فيها لا حيوانات لا والو غير فيلا كبيرة بحال دوك الفيلات القدام ديال المغاربة كنت كنشوفهم فالمسلسلات حتى هادي طرازها قديم فيها خصة ديال الماء الوسط والنخل طالع فكل جهة وكبيرة وزادو عليها لمسات جديدة .. كتحمق .. كانت حدا الباب لداخل مساحة كبيرة كلها مزلجة بالحجر مربع لقيت بزاف ديال طموبيلات مستفين تما والدراري الصغار خارجين داخلين وزنزلنا استقبلاتنا جداتو هي اللولة وعاد خرجات سليمة وهشام والكل رحب بينا كتسمع غير مرحبا مرحبا ودخلنا كانت العائلة كبيرة مجموعة تما مخلطين رجال وعيالات وشي بزاقل كيلعبو .. عرفنا هشام على خوه الكبير ومراتو كانو ضريفين بزاف والعائلة كلها ضريفة الصراحة .. فيهم البنات فيهم الشباب وحتى الشيوخ كانو مجلسينهم فواحد الجردة قدها قداش على برا من الجهة لخرى فالضليلة . .استرحنا وجلسنا شوية حشمت بقيت غير كنشوف بعويناتي جاتني فشكل .. دازت حدايا سليمة حطات يدها على كتفي وكتهضري مع شي واحد من لهيه حتى سالات معاه وصارت عندي قالت ليا طلعو نوريكم البيوت ترتاحو مرحبا بيكم
نضنا طلعنا وراتني البيت ديالي انا ومريم شديناه كانو فيه جوج ناموسية بلاكار وبالكون صغير وجلسنا كتنهد ونعاود جاني احساس غريب ماعرفتها فرحة ولا حماس ولا معرفتش . تسارحنا غير ديك النهار وضايفونا وبتنا عندهم لغد ليه دايرين الحنة ديال لعروسة عندهم ماكنتش عارفة دايرين الحنة بوحدها جاب الله فقت بكري كنت باغا ندير حمام انا ومريم وخرجنا مشينا لواحد السبا كلنا انا وهي ومها وختها ديتهم معايا تكسلنا مزيان ودرت مساج على حقو وطريقو رخيت اعصابي حيت كنت متوثرة وصاوبت يدي ورجلي وشعري بخال كما موالفة ولبست واحد جلابة خفيفة زرقا مع البلغة وردت التقاشر رقاق باش يبقاو رجلي نقين والشال ورجعنا للفيلا لقيناهم موجدين ليها الحليب والتمر ودايرين ليها طقوس مغربية على حقها وطريقها تفاجأنا فالدخلة بداك الاستقبال والزغارت وكانت جداتو شادة البلاطو واقفة قدامنا
شربات الحليب وكلات التمر ودزنا موراها حتى حنا درنا يدينا ودخلنا لقينا الهواريات فقلب الفيلا كل وحدة والقلدة ديالها بالقوام ديالهم طاربين الدنيا .. طلعنا العروسة بالزغارت للبيت يلبسوها باش تهبط تحني ولبست معاها واحد القفطان خفيف ديال جوهرة دوغي وشال باج درت مجدول خفيف والبلغة ومشيت نزلت جلست حداها ماتحركش والعائلة مجموعة شي كلاص شي بلدي والناس هاي هاااي . نقشو ليها يديها ورجليها ودازت النقاشة عطيتها يدي نقشات ليا لفوق وصافي داكشي زوين وجلست كنتفرج ونهضر مع مريم حتى طبت بالجلتس ونضت قلت ليها نمشي للبيت ونرجع نحط تيلي يتشارجا .. نضت طالعة بالزربة هازة يدي وماكدخل غير فجاد جاي لابس تيشورط بياض نسحتها فيه تا رجع باللور
رجعت اللور شفت فيدي اللي خسرات هي اللولة وشفت فيه جر تيشورط بان ليا عاف الحنة وبلع ريقو بزز ماهضرش دور راسو جنب ورجع اللور وحتا انا ماديتهاش فيه واخا جاتني الفشلة مشيت للبيت حطيت تيلي ومسحت ديك اليد خليت غير لخرى حتى تيبس ورحع خرج تلاقيتو خارج من وواحد البيت لابس تشورط وحدة وقصتو بكتفي تلفت معاجبوش الحال قالي المرة اللولة نقولو صدفة ودابا؟
شفتو كيتخزز عليا وانا مهز فيه حاجبي قلت ليه شوف نتا فين كتحط رجلك اشمن صدفة ما صدفة !
قالي كحزي لهيه الله يحفضك
ماحملتووووش مابغيتش يهضر معايا بديك الطرقة تفكرت نهار القهوة اللي هددني يخسر ليا وجهي وانا ساكتة ماقدرتش نهضر .. ماحسيتش براسي حتى دفعتو اللور بدي بجوج رديتو لداك البيت وزدحت داك الباب قلت ليه شوف غنقول ليك جوج وغنهبط وكنت غنقول لهم ليك ديك المرة فالقهوى ماخليتيش ليا فرصة
قالي وا مابغيش نسمع .. واش غتسمعي ليا بزز !
قلت ليه داك السيد مابيني وبينو حتى حاجة هادي اللولة .. ثانيا هوا بوليسي وتلاقيت معاه حسابني المسألة قانونية لاكن كان ستدرجني بهاد الطريقة باش يقولي نرجعو ومابغيتش .. جتي فديك اللحضة الليونضت بغيت نمشي بحالي وشدني فيها .. هادشي اللي كاين ودابا ضرب الحيط ولا رمي راسك اللي عندي قلت ليك
بديت نهج سمعت واحد الصوت معكل كيقول جاااد جاااااد
حليت الباب نخرج كنلقا كاميليا فوجي شفتها تصدمت وشافتني جاتها السخفة صفار وجهها وكانت يالاه واصلة يمكن باقا بصاكها .. ضربت فكتفها ومشيت هبطت دخلت لواحد الكوزينة فيها الطياب ماعرفت كي درت دخلت ليها بالتلفة ووقفت كنرد انفاسي وقلبي كيزدح حست بيه غيسكت لاكن الهضرة اللي كانت واحلة ليا فحلقي خرجتها ومشيت بغا يصدق يصدق مابغاش هوا حر
كرهتو كرهتو خيخت منو طلع ليا فصحتي حتى هوا خصوصا فاش شفتو مع الزبل اللي ماحسابش ليا كاع واش باقا .. باشمن صفة جايا واش عرض عليها ولا جايا راسها مافهمتش انا تفقصت كنت غنتف نواضري نحلف ما نعاود نشوف جيهتو ولاكن صافي هادي اللخرة ..ياك كلمة وحدة وقلتها وهحطيت التقل من ضهري الله يجعل البراكة .
خرجت من ديك الكوزينة مسحت وجهي ونيفي ودزت قدام الناس مان كولشي مشطون حطو ليهم لغدا مع الربعة وانا ماعنديش الشهية باغا مطرطق ماقدرتش نجلس ... شافتني سليمة غادية قالت ليا اجي تغداي وشيرات ليا ابتسمت وقلت ليها واخا لاكن طلعت للبيت اللي عطاونا حيدت داك القفطان حسيت براسي عيانة والصدع كيزيد يكمل عليا بغيت الكالم . بقيت بواحد الشورط وديباردو وتكيت فالفراش باغا غير نتسنط لعضامي منسمع حس حتى حاجة .. حسيت براسي لسقةة وحتى بدا يرجع ليا الامل وشفت تعامل عاىلته معايا تيقت راسي لاكن دابا صافي .. الى مندير حجرة على صدري وندير ليك كي دارت لزايد راني بنت لحرام مانسوا حتى بصلة .. الى منخرجك فمرة من حياتي حتى نسا على وجهك راني بنت الخرام مقطرة كرهني فيه بهاد الفعايل ولا منعرف شنو واخا خاصني نلوم راسي حيت اصلا انا وياه سالينا زمان وعادي يدير علاقة .. انا اللي ماشي عادي نجلس نتسنا الاوهام . نعست راسي بزز حيت اصلا منعستش مزيان وبالليل العرس والروينة غتنوض وحتى الخاطر ماعندي .. لاكن والله تا نخرج ونفوج ومنبقاش كناكل فراسي ونتفقص على الهوا .
قلت ليها جاني الوجع طلعت نرتاح شوية ونضت جلست قلت ليها طرقي الباب حيت عريانين وجلسات قالت ليا حتى انا بغيت نتكا شوية.. تكينا رتاحينا حتى سمعنا الداق فالباب ونضت لبست عليا داك القفطان حليت الباب كانت سليمة جايبة النكافة معاها قالت ليها العروسة لداخل دخلي ودخلت هي والنكافات وشي طيافر شفتهم دخلوهم لبيت اخر حدانا ستفتو داكشي تما ودخلو التكاشط والحوايج يلبسو العروسة وجا معاهم الليو غيصاورب ليها المكياج وبداو ليها وانا حداها كنعاونها ووكل مرة دخل سليمة ولا جداتو هازين شي حاجة زربانين ولا يخرجو شي حاجة .. قالت ليا شيماء .. عفاك احبيبة طلعي اجي معايا الى مسالية
حطيت داكشي من يدي درت بلغتي فرجلي وخرج معاها هبطنا لتحت طلعنا شي تخربيق وطلعت دخلتهم لداك البيت كان بيت نعاس وحطو فالارض الطيافر كلهم . قالت ليا سليمة سيري هزي الشنطة ديال لعروسة وسيري ستفي ليها حوايجها مكاينش اللي غادي يقرب حوايجها من غيرك عطاتني الساروت دالبيت قالت ليا فاش تستفي تما الحوايج سدي عليهم باش يبقاو فالامان
خديت الساروت وطلعت جريت الشنطة ودخلت كانت واحد الشنطة فالارض محطوطة وسديت الباب بديت نستف الحوايج وليبوخدوي فالطيافر ونقاد داكشي حتى ساليت وجيت نخرج لقيت كاميليا فالباب باغا دخل قالت ليا لا خليه انا داخلةة وميعات فيا دخلات ودخلت وراها جلست على واحد الكرسيودرت رجل على رجل وتكيت على ركبتي كنتسناها تخرج باش نسد .. شافتني جلست وضحكات قالت ليا غتبقاي جالسة هنا احبيبااا!
ضحكت معاها وقلت ليها حوايج العروسة هنا احبيبة وسوارت عندي خاصني نسد عليهم ... سالي شنو بغيتي ديري باش نسد وراك
قالت ليا كضحك وانا غنبقا نبدل حداك ؟
قلت ليها وانا احبيبة منقدرش نخلي حوايج الغروسة مع شي واحد ... ولا خرجي باليزتك من هنا وتهناي
قالت ليا نو حبيبة هاد البيت ديالي انا وجاد نتي اللي هزي الطيافر ودخليهم لبيت لعروسة حيت ماشي بلاصتهم هادي واصلا كيكونو مع العروسة فبيتها ميمكنش ليك تمنعي شي واحد ميدخلش للبيت وحوايجو محطوطين هنا
قلت ليها مو بب ماشيو هاكاك فهمتي غلط هاد البيت ما ديالك ماديالي هاد البيت ديال ماليهم وهاد الدار كلها عندها ماليها قولي هادشي لمدام سليمة اللي قررتن فيم تحط الطيافر وكن بغات تحطهك فبيت العروسةوكن حطاتهم !
بقينا مني منك بحلاوة اللسان قلت ليها عفاك سربي باش نسد الباب راني مشغولة
وقت برا طلع ليا الدم والباب قدامي محلول بقيت كنتسنا شي واحد يبان حتى شفت سليمة جايا شيربت ليها قلت ليها راخ بغيت نسد الباب مابغاش واحد السيدة تخرج من البيت وانا مزروبة
قالت ليا شكون ؟ وطلات لداخل لقات كاميليا وابتسمت قالت ليها الله يخليك اجي لبسي هنايا حيت البيت فيه الحوايج
قالت ليها سليمة امم واخا ماعليش اجي هاهوا بيت لبسي فيه
ردت كاميليا قالت ليها اصلا قربت نسالي وغنبهط
حارت سليمة قالت ليا واخا تسناي هنا انا جايا ومشات هبطات حتى لشويا تم جاد جاي ملاقي دوك الحجبان دخل وانا مدورة وجهي قاليهاراه الواليدة اللي هضرات معاك اكاميليا ماشي شي واحد اخر
ابتسمت وقالت وي بي عارفة صافي ساليت واش عاد غنجر الباليزة ونخرج ؟
تعصب واصلا طلع معصب يعلم الله اش قالت ليه ساليمة كوراه تفشات عليه . ماهضرت معاها خرج الحوايج كلهم ديالو وديالها للبيت لاخر بقات غير تشوف قاليها خرجي من هنا كملي لهيه .. خرجات كتسوط هازة خنافرها وخرجت سديت الباب طرقتو ومشيت حتى عيطات ليا سليمة قالت ليا اجي حلي ليا ومشيت نحل لقيتها جمعات حوايج ولدها اللي لاح فالبيت لاخر رداتهم ليه للبيت وقالت ليا صافي سدي ماتخلي حتى واحد يدخل
حملوني مسؤولية داك البيت حيت مكاينش اللي يعرف لداكشي من حباب العروسة وبقيت حل سد حل سيد عييت وبغيت حتى انا نلبس حوايجي ونقاد مكياجي كي الناس وقلت لهاديك اللي صاوبات للعروسة تصاوب ليا حتى انا وباش منبقاش خل سد على الطيافر جبت تكشيطتي اللي نلبس وفولاريووصباطي وجينا لداك البيت تكيت صاوبات ليا وجهي وصاوبات ليا الشفار حتى دخل جاد على غفلة هزيت عيني بالزربة نشوف شكون كنت حالة الفولار وشعري محلول شفتو وبالزربة لويت الفولار لاكن مابقاش كيحنزز كان باغي غير يبدل حيت الضلام طاح والعروسة غتهبط مشا الباليزة ديالو هز حوايجو وهي تقول ليا هاديك اللي كتصاوب ليا واش جاد الهواري!
قلت ليها اه علاش
قالت ليا بصصاح!
قلت ليها كملي ليا عفاك باش نهبط مع العروسة وبدات تخدم اما هوت دخل للحمام بدل حوايجو ماشفتش فيه بقيت سادة عيني شميت غير الريحة كتعطعط وسمعت الباب تحل قلت ليها واش خرج
قالت ليا اه خرج ياختي اول مرة ننشوفو مباشرة
قلت ليها راه لا علااقة غا كيبان ليك ماشيو شي حاااجة
قالت ليا : لاا لالااا وا نكونو واقعيين اختي راه جمع حب وتبن
قلت ليها سربي سربي تا هداك يطيحو فيه الناس شو كي داير
سربات ليا شفت وجهي عجبني بزاف ماقويش وزوين زاد بيني جيت كنحمق ولبست تكشيطتي اللي شريت كانت حمرا فواحد اللون حمر نقي كيحمق والتحتية خضرا ملكية مايلة شوية اللزيتي غير شوية ومطروزة كلها بزواق المعلم وتقيلة بالحجز فالدوغي والاخضر جانتي كتسطي كتهبل
لبست معاها صباط عالي وشال بارد لونو وصبغت دفاري بالاحمر ولبست ذهبي الرومي وساعتي وتريحت بانو عيني بحال الى دايرة ليلونتي .. سمعت التعشاق وسديت الباب درت السروت فالبوشيط هوا وتيليفون وخرجت لقيت العروسة والعريس واقفين مخرجينهم شفتها ضحكت ليها وقرحت ليها حسيت براسي غنبكي تمنيت هاد اللحضة ونكون حتى انا عروسة طول عمري وانا كنحلم بيها وتكون ماما وعائلتي حدايا .. كبست الدمعة باش منخسرش كولشي ونزلت معاها كنضحك وعيني مدمعين ناضت الحيحة بالزغاريت والنكافات هزوها فالمعمارية وانا واقفة كنصورها جاني واحد الشعور غريب حسيت بلحمي تشوك عليا وباغا نبكي والرعدة فقلبي .. مع اجواء العرس والناس ودارو ديكور فالجدرة بالتواب فالسقف والخشب جا داكشي غزال كيحمق والاضواء .. لقيت فخونصي حدايا واقف قلت ليه كي جات قالي واو داكشي عندكم بحال الساطير ديال ديزني قلت ليه داكشي عندنا هماوي وبقيت كنضحك .. دفعت تكشيطتي برجلي قصت واحد الراجل شفت فيه قلت ليه سمح ليا كان طويل ومابيهش المهم كبيبر قد هشام لابس كوستيم لقيتو كيشوف فيا اصلا وقلت ليه سمح ليا تبعت العمارية كنسفق بيدي ونضحك حتى جلسات ومشيت للطبلة ديال عائلتها جلست وتلفت لقيت كاميليا جالسة فواحد الطبلة مع الحضور كتشوف فيا بنص عين وجاد حاصل مع التصاور كان بوكوص لابس كوستيم اول مرة فحياتي نشوفو بالكوستيم والقميجة والسمطة والصباط كيشعل مسيري .. مولف السبور ومشيتو سبور وكولشي فيه سبور تبدل مليون فالمية بالكلاص طلع جداب نيت والبنات مزاحمين بتكشاط ميديرو السيلفيات معاه . تنهدت .. وانا مالي اش دا عيني ليه اصلا نشوف قدامي راه خاصني نتزوج الى بغيت نولد ونضبر ليا على شي عريس يتزوجني غير ميكونش نرجسي ويكون ولد الناس اما الزين طلع ليا فراسي ماكليتش معاه طرف دالخبز من نهار عرفتو .
شفت سليمة جايا كتجر التكشيطة نعام الاللة والمشطة والمكياط .. واهانتي على سليمة الانيقة غنسمي عليها سليمة الانيقة اللي شافها يحلف ما موالدة داك العجل يهزها يلعب بيها الباسكيط .. المهم بديت نتفرج وتسرح عيني فالناس كولشي جالس كولشي كيتفرج ويبركك كما انا كنبركك وبقيت ندور عيني حتى بات ليا داك خيينا اللي زطمت عليه جالس وحاضيني حرااام واش حيد عينو عليا ابدا .. قلت مع راسي ومالو .. شنو فيه .. راجل المهم غير يكون ولد الناس .. علاش لا منجربش الى فتح الباب ولاكن هاد المرة والله لا تصاحبت حتى نهار .. بقيت كنشوف وهي تجي واحد البنت ناضت من الطبلة عندهم جايا عرفتها من الضحكة جايا قاصداني سلمات عليا وضحكت معاها قالت ليا بغيت نهضر معاك قلت ليها مرحبا .. جرات كرسي وقالت ليا انا خت عادل .. داك السيد لي لهيه .. ولد عم هشام .. عجبتيه وبغيت نسول ولش مزوجة ولالا
دورت عيني شفت فيه مطولا كان كيشوف فيا وحولت عيني عند جاد سهيت فيه فين ما يزيد خلفة صغيرة توقفو شي بنت ولا ولد بسيلفي و قلت بيني وبين راسي صافي حتى لهنا وحبس .. انا معنديش الوقت نبقا نلعب هاد اللعب وحلفت حلفة قطعية حتى نحط على قلبي حجرة .. هوا حياتو بوحدها وانا حياتي بوحدها كانت تجربة زوينة خرجت منها بأقل الاضرار ودابا جا الوقت نعطي فرصة لراسي من جديد واخا عطيت لنفسي مليون فرصة عمرني نيأس . حتى كنحلم يكون عندي بيبي وعندي اسرة ونعيش حياتي .. علاش نحرم راسي ونعطي احكام مسبقة .. تنهد وابتسمت كأنني كنودع جاد وهاد المرة للابد حيت ماشي ديالي ومنقدرش نعارض المكتوب ..شفت فيها تنهدت وابتسمت قلت ليها وشنو كيدير ؟
قالت ليا عايش فبلجيكا خدام فشركة ديال ايموبيليي .. من ناحية المادية ميسر
قلت ليها ماشي مشكل المادة غير بغيت نعرف شنو كيدير فحياتو .. الى كان ناوي المعقول . مرحبا .. ويلا كان باغي غير يدوز الوقت راه ماعندي حتى نهار خاوي نخصصو ليه
قلت ليها متشرفين .. المهم نهضر معاه ونتعرف عليه هوا الاول .. الى تفاهمنا يكون خير
ها زايد ها زينب ها رانيا ها جاد ها كاميليا .. حتى لامتى نيقا تابعة الخوى الخاوي .. غنشوف هادا الى صدق نتوكل على الله نهز مي ونمشي لبلجيكا نخوي البلاد طلعات ليا فصحتي باللي فيها ونبدلزحتى سميتي الى اقتضى الحال . شفتها كتضهر معاه السيد تبدل بالزربة جبد تيليفون عطاه ليها جابتو ليا قالت ليا كتبي ليا نمرتك يعيط ليك وشديت تيليفون كتبت النمرة ورديت ليها تيليفون ودورت وجهي كنتفرج وكنقول حتى انا غندير عرس بحال هادا ونفرح براسي ونفرح مي .. المهم نظير وليدات اما الى بقيت نفكر واش يصدق ولا مايصدق اصلا حتى واحد مكيصدق الله نربح الذرية ونعيش مع ولادي واخا مايصدقش باهم .. لاكن شفت فعادل مزيان تخيلت حنكي على حنكو واش نقدر نتعاشر معاه جاني عادي ماشي خايب حتى هوا عندو حق من الزين بلا منبقا نحقق فالتفاصيل حيت هما اللي خلاوني اللوؤ اللور .
صونا ليا تيليفون طلعت ليا نمرة جديدة عرفتو هوا وشفت فبلاصتو مالقيتوش ونضت مشيت لداخل بعدت شوية على الصدع وقالي سلام لباس بيخير داك الديسك اللولاني وقالي الى قدرتي تخرجي شوية حدا النافورة نهضرو قلت ليه واخا وقطعت وقفت شفت فكاميليا كانت حاضياني ودرت ليها واحد الضحكة ومشيت خرجت للباب لاخر اللي كندخلو منو كانو غير طموبيلات واقفين والناس قلال غير الدقايفية واقفين عاصرين ووقفت جهة الباب حدا واحد الحيط وحدايا شجرة وجا عندي ضحك معايا ومد ليا يدو سلمت عليه كانت عندو شوية كريشة ولا ماشي مشكل كاع الرجال فلاج ديالو كتكون عندهم بحالها باين بينو وبين الرياضة غير الخير والاحسان .. هادشي مكيهمش اللي كيهم هوا القلب كيفاش داير
طريقتو فالهضرة زوينة مأدب وحتى هوا جاني مرتابك واخا انا مامرتابكاش عارفة راسي شنو باغا وحشمانة شوية حيت اول مرة نهضر معاه .. قلت مع راسي واش يكون شافني شي مرة مع جاد ولا معقلش عليا مع المكياج والفولار .. متأكدة ماعقلش عليا ماعرفنيش كاع واصلا المدة طويلة اللي دازت راه نساو عليا بزاف ديال الناس من عمي فريح وجبد لهيه .
جاني من اللخر قالي انا باغي المعقول باش نجيك نيشان
قلت ليه حتى انا باغا المعقول ترافيك ماعندي مندير بيه
قالي واش كتقراي ولا خدامة ؟
قلت ليه كنت دايرة شي حاجة وبعت كولشي بغيت نبدل
قالي مزيان .. واش تقدري تمشي تعيشي فبلجيكا
قلت ليه الى كانت راحة البال .. والتفاهم راه ماشي مشكل فالبلاد
قالي كاينة .. وشحال عندك فعمرك
قلت 35 سنة
تفاجأ قالي بصح ؟ كان كيحسابني صغيرة .. تكون عندك ديك 23
قلت ليها اييوا كل واحد كي خلقو الله .. المهم هوا المعقول دابا
قالي المهم ابنت الناس .. انا راه باغيك .. والى ماخفت نكدب منك نخلاق .. تكون عندك حتى ستين عام
قلت ليه حتى انا ماقلت والو المهم تكون معقول .. داك الدخول ولخروج ماعنديش معاه
قالي شوفي .. مور العرس الوقت اللي يناسبك غنجي للدار وديك الساعة نهضرو على كولشي .. انا مغيخصك معايا حتى خير
قلت ليه الحمد لله مسك عليا الله خاص غير الراجل يكون راجل
قالي المهم غير باش تعرفي شنو كاين وصافي
حنا كنهضرو وهوا يخرج جاد لقاني واقفة معاها الطريقة باش كنهضرو ماشي ديال شي اصدقاء .. وقف علينا شاف فيا وشاف فيه ابتسم ليه عادل قاليه عادل اهلا بالبطل ديالنا
ابتسم ليه جاد وسلم عليه قاليه صافا السي عادل .. عاى سلامتكم .. اش خبارك كولشي مزيان
قلت ليه انا لعادل .. السي عادل .. نخليك دابا حتى لمن بعد
سلم عليا بيدو قالي ان شاء الله تيليفون بيناتنا
قالي جاد بلا ميشوف فيا تكلمي للواليدة حلي ليهم البيت
مشيت ضرت نص دورة وحطيت ودني كنسمع قاليه جاد شفتك اصاحبي دغيا تأقلمتي
قاليه عادل ايوا صافي الله يجعل البركة الواحد كبر صافي يجمع راسو
قاله جاد .ااممم مزيان هي عوال تجمع راسك السي عادل
قاليه عادل على الله تصدق لينا هاد بنت الناس
قاليه جاد مزيان مزيان السي الله يكمل بلخير .. هي صافي تافقتو
قاليه عادل صااافي اقتانعت
حسيت بيهم داخلين وانا نهرب هزيت تكشيطتي مشيت كنجري طلعت حليت عليهم البيت خرجو الطيافر وكان خاصني نوقف عليهم حتى نردهم ونجمعهم ونسد عليهم فالبيت فين كيبدلو العرسان عاد نتهنى لقيت لعروسة بدلات اللبسة ومشات وغيدخلو ليها طيافر تشطنت وبقيت ملهية معاهم ونزلت معاهم حتى دخلوهم ليها بعيساوة ورجعت باش باش ناخد بوشيطة ديالي من البيت وطلعت كنقرقب هازة تكشيطة دخلت بلا منحل بالساروت حيت خليتو محلول ودخلت على غفلة لقيت جاد جالس تما بوحدو على واحد الكرسي متكي على ركابيه كيشوف قدامو وفيدو واحد الخيط كيدور فيه وساهي كيخمم .. شفتو تخلعت هز عينو فيا وماعطلتوش على السهوة ديالو هزيت البوشيطة ديالي بالزربة ونزلت كنجري لحقت على الطيافر بقيت حاضياهم حتى سالاو منهم ورديناهم للبيت كان خاوي مافيه حتى واحد وسديت الباب ميلتها بديت نطوي ونجمع فداكشي ونحط فالباليزة حتى ساليت ووقفت سخفت قاديت السمطة ديالي ووقفت الباليزة باش نخرج نديها للبيت دلعروسة و هوا يدخل جاد على غفلة وسد الباب بالساروت لقاني واقفة قالي صافي قررتي تزوجي ولا كفاش؟
بقيت كنشوف فيه مافهمتش شنو بغا يقصد ومليت من هاد الحركات طلعو ليا فراسي وطلع ليا كولشي فراسي خصوصا هوا تعصبت منو بزاف وكان عزيز عليا مقطر ليا من عيني ودار بلاصتو فقلبي كبيرة لاكن انا ماشي جداد عليا هاد المشاكيل وهاد التخربيق وطالع ليا هادشي فراسي دوزت منو بزاف حتى شبعت من المراهقة وانا نجر حتى شرفت وهاد شغل الافلام مابقاش كينفع معايا.. منكدبش انني دخت فاش دخل عندي لاكن هاد المرة خليت المشاعر جانبا كانني مكنعرفوش وقلت ليه نعام؟؟
قدار يديه فجيابو قالي اياااه ... الناس ولاو كيفكرو بعيد ! .. عجباتك لافامي بغيتي دخلي ليها ؟
ضحكني بقيت غير كنشوف فيه وقلت ليه عرفتي شنو اجاد !... حسن خليني نكن ليك واحد شويييكيكة ديال المعزة بلا ماتخليني نكرهك كي كرهت اللي قبل منك ومابقيتش عاقلة عليه .. حسن ليك ديها فحياتك ماتخليناش نخرجو للعيب بهاد التبرهيش ديالك
ضحك وقالي اااه .. دابا عاديل ولد عمي هوا اللي يصلاح ليه ههه. زوينة هادي والله! ... مي مزيان مزيان .. يالاه تجيو مع بعضياتكم هوا كبير عليك بماعرفت شحال!.. واش سبع سنين ولا عشر .. سنين ! غادي تفاهمو
كنشوف ونقول ليه فخاطري زيد زيد زيد حشي الهضرة باش نزيد نكرهك يماك تا نتا .. قلت ليه وغير بشوية كتهصر معاه ونطلع فيه ونهبط حتى نتا شوف ليك وحدة قدم ولا صغر منك تبرهش نتا وياها ... اما انا كبيرة عليك ماعنديش الوقت نربيك نتا وولادك سمعتي .. باقي ناقصاك تربية اولدي وباقي باغي تنقز وتلعب ومن هضرتك باينة باقي بعلوك ماشي شي واحد ناضج .. كتعايرني بالكبر زعما ؟ ... الحمد لله اللي متزوجش بيك ونسمع هاد الهضرة الناقصة بحالك منك مور الزواج !.. قالك فايتم بليلة فايتك بحيلة .. ااه اولدي فايتاك بحيلة وعمرك كامل دوزتو انا غير فالحيلات وطيحت سناني فيهم وتجي نتا دابا تهضر ؟ راه قلت ليك خليني منخرجش معاك للعيب وكتقلب تجبد الصدع معايا باي طريقة ... وحتى داك ولد عمك بناقص منو يالاه ! مكاينش غير هوا فالدنيا ومن بعد شنو؟ نشوفوك واش غتهنا من هاد الناحية وتقلب ليك على شي حاجة تكبر ليك دماغك حسن ماتبقا تحسب ليا شحال عندي وشحال ماعنديش.. ويالاه تسحر مع البراهش تصبح فاطر!
تزيرت لواحد الدرجة متصورش كنحس بالتشنج فالفك ديالي غنبغي نهضر كطلع البكية وشاداها فعيني وفحلقي بزز .. متوقعتش يعايرني تصدمت فيه بزاف ورجعت اللور ندمت اللي سمحت لراسي ندخل معته فعلاقة ... يكون كيبان كبير ولا ماشي كبير ولا واخا نطون كبيرة عليه بعام واحد مكانش عليا نسمح لراسي ونتساهل مع نفسي ونقبل العلاقة .. بقا فيا الحال وتجرحت كنت ندوز كاع الكلمات والاهانات منردش عليهم الا هادي بالضبط قاستني وبزاف بزاف واكبر غلط ارتكبتو فحياتي هوا انني قبلت على جاد وهوا صغر مني فالسن ... واخا العدد مكيهمش نهائيا مجرد عدد وجسم الانسان يقدر يكبر يقدر يبقا صغير حسب الجسم ديالو وانا غيروشفت راسي بقا صغيرة لا علاقة لسني بسا ضسرت ونسيت انه فيوم من الايام غيبان العدد ونتعاير بيه .صافي هنا وضعت نقطة النهاية لهادشي فمرة ومستحيل نشوف فجاد ولا نعاود نفكر نشوف واحد صغر مني الله يجعلو يكون صغير بشهر .. متأكدة من نفسي علاقة تجمعني بيه للابد مابقا حوار مابقا والو وقلت ليه حيد نخرج
قالي انا برهوش دابا؟ ... ولينا فالمعيور ؟
مابغيتش نجاوبو صافي مابقاش هامني كاع نرد عليه ويقول لي بغا اصلا تقالت اتقل كلمة ضراتني مابقا من بعدها حتى شي كلام نعطيه اهمية براكة مشاعري اللي تجرحات وضني اللي خاب واخا مابغيتوش يخيب لاكن تجاوز الحدود معايا .. جرني من يدي قالي مزال مسالينا ونترت يدي شفت فيه واحد الشوفة مادرتهاش حتى فزايد وقلت ليه ويااااك .. وياااك تعاود تحط عليا يدك ولا صبعك هانا كنقول ليك كتسمع .. عرف حدودك معايا ولا مغيعجبك حال نوريك البسالة والضسارة كي دايرة ... انا ماشي قدك تشطحني كي بغيتي وهانا علمتك
حمرت فيها واحد تحميرة بقا ساكت وحيدت ليه الساروت من يدو شتو بغا يهضرو ورجع سد فمو وحليت الباب بالزعفة خليت السوارت لاسقين تما ومشيت البيت لاخر غير دخلت لييييه وسديت الباب راب على وجهي واحد الشلال ديال دموع .. الندم الندم الندم ولمت راسي على كلشي حيت ضحكت على راسي بالاوهام من جديد وتفكرت الهضرة الي قالي السن غير عدد اخر مرة نهضرو فهادشي .. فين هي اخر مرة فيين .. ماراعاش لمشاعري ولا احتارمني على الاقل لسني اللي شافو دابا كبير عليه وقال حشومة وعيب ومادوزناش قليل .. تألمت وهبطت داك المكياج كامل كحل وبكيت حتى بردت وقلت هادي اخر مرة نبكي فيها سالينا وبردنا وعمني نسمح لشي واحد مرة اخرى يبكيني .
حسيت بالراحة من مور البكا وباش نخفاف اكثر حيدت كولشي عليا والعرس قايم لتحت والشطيح والرديح .. توضيت صليت غسلت وجهي كامل طلبت ربي يهز عليا هاد المحنة ويجردني من المشاعر الى كنت غنبقا حياتي كلها معدبة وارتاحيت وطمأنيت ولبست عاوتاني تكشيطتي وقاديت كولشي من الاول ودرت مكياج خفيف غير راسي بلا رموش بلا والو قاديتو مزيان وجبدت شفاري برسيل حسيت بالراحة هاكا احسن كان قبيلا وجهي تقيل وعيني بحال الى فوق منهم مضلة . رشيت الريحة دورتها عليا وهزيت بوشيطتي ودرت صباطي ونزلت مع الدروج مشيت جلست بلاصتي درت رجل على رجل وحطيت يد على يدو بالتقالة كنتفرج فالناس كيشطحو .. شفت فعاديل حاضيني تفكرت المعقول ديالو وبلوكيت نمرتو فمرة بلا ميحس وحطيت تيليفون كنشوف فمرين كيشطحوها وسهيت فيها فرحت ليها شحال فرحانة مسكينة تستاهل كل خير الله يكمل عليها ياربي . تنهدت بابتسامة دورت وجهي بان ليا جاد جالس فواحد الطبلة اللور جهة لابيسين هوا واللي قدو وكيشووةف فيا بدوك العينين واخا كنشوف فيه مكيحردش عينيه لاكن قلبت وجهي خليتو يبقا يشوف حتى يصبح الحال .. من هاد الحفلة عمرني نشوف وجهه ولا يشوف وجهي الطريقة اللي تجمعني بيه نقكع مها انا كاع
تحط العشا وكليت شوية وجمعت انا وفخونصوا حيت هوا اللي عندو مع الجموع وكيضحكني نسيت بيه الهم والوجع وماعاودتش شفت فجاد ابدا حتى لبسات اللبسة الكسوة البيضاء ونزلات مع ديك الموسيقة تأثرت ووقفت بدات مها وباها كيبكيو تأثرو وحتى هي بكات مسكينة وقطعات الحلوى وهزات الورد تلوحوه وانا جالسة فبلاصتي كنشوف بابتسامة شكون تشدو والكل متحمس وراها كيضحكو وكاع البنات ناضو بقاو الرجال والشباب كيشوفو فيا قالو هادي مالها ماناضتش زعما قافزة ! .. بدات تحسب وتعد وهزات يديها ترميه وحبسات ضارت عندهم كضحك قالت ليه سمحو ليا حتى شفتها جايا كتجر لاغوب وهازة الورد حتى لعندي عطاتو ليا فيدي تصدمت بقيت غير كنشوف وعنقاتني تأثرنا بجوج وااكل كيسفق . شديت الورد نخليه تذكار وعلى الله ربي يسهل عليا ونتزوج حتى انا وندير وليدات
حيدت ليه يديه قلت ليه مكاين لا شيماء لا والو كتعدب راسك وانا قلت ليك صافي المسامحة كل واحد يشوف حياتو .. شوف حياتك اولدي الله يسهل عليك وخليني نشوف حياتي مع اللي قدي وكل واحد يلبس قدو .. قالك لبس قدك يواتيك عرفتيها !
عيت بالهضرة والشروحات وحتى ودنيا طابو بالهضرة و الخاطر مابقاش عندي وهاد القصص طلعو ليا فصحتي .. مابغيتش نزيد نهضر وبقا كيشوف فيا مطولا قالي اخر هضرة عندك؟
حليت الباب بلا مبالات حيت اصلا مابقاتش عندي الرغبة فهادشي كامل ويستحيل ناخد واحد صغر مني يكون كما بغا يكون وطلعت فموبيل سديت عليا وهبطت الزاج شفت فيه عيانة باغا غير نمشي بحالي قلت ليه اخر هضرة عندي .. بلا ماتحاول اجاد
قالي فكري مزيان اشيماء ماتزريش غتندمي
ضحكت واحد الضحكة مع العيا خرجتها بزز وبقيت كنشوف قدامي ونركب السمطة قلت ليه ماتخفاش عليا ... اكتسبت المناعة
بقا كيشوف فيا قالي فكري مزيان
قلت ليه قرار نهائي .. لا رجعة فيه .. شووف اجاد .. نتا واحد مشهور حياتك ماغاديش تناسب معايا ... وانا ونتا مغاديش نتفاهمو وبلا مندخلو فمشاكيل اخرى حنا فغنى عنها
قالي مكاين تا مشكل نتي اللي كتفكري فالمشاكيل
تنهدت ماعرفتش كيفاش نشرح ليه وقلت ليه شوف .. انا ونتا .. مستحيل نكون مع بعض .. مستحيل لا معاك لا مع غيرك .. لو كنتي كبر مني .. ولا قد نقدرو نديرو شي حاجة مي دابا نو ... امبوسيبل لا معاك لا مع غيرك
درت فيلم فالطموبيل كوميدي تونست بيه وتيليفون كيصوني ليا .. جاوبت كنسول شكون قالي عادل !
ماعجبتيش الحال يعيط ليا فهاد الوقت حيت ماشي ديال تعياط وماشي بلان كااع .. كن كنت ناعسة دابا! . الستة دصباح وهوا كيعيط باش يقولي واش بلوكيتي النمرة ! ماقدرش يصبر حتى يتوسط النهار زعما ... قلة الاداب كي دايرة . قلت ليه واهادا ماشي وقت نعيط فيه ونسولو بحال هاد الاسئلة ..ماعرفتي بنادم يكون ناعس ولا عيان والستة دصباح هادي !! ... خلعتني باتصالك
قالي سمحي ليا الى خلعتك غير بغيت نسول فيك واش باقا فمراكش ولا مشيتي حيت شفتك ركبتي فطموبيل
ضحكني ..بغا يقول زعما شفتك كتهضري مع جاد ودخلني هاد الدخلة وماقدرش يصبر دضرو راسو .. ولاكن ره بصح خلعني اتصالو على الصباح قلت ياك لاباس اش وقع شكون كيعيط فهاد الوقت . قلت ليه المهم دابا الصباح هادا حتى يفيق الانسان عاد يعرف يهضر .قالي اوكي سمحي ليا الى قلقتك
قلت ليه مكاين مشكل وقطعت رجعت للفيلم ديالي والنعاس قاتلني .. وقفت فسطاسيون فالطريق سخرت واحد جابليا كافي نواغ باش نقدر نكمل الطريق ومشيت كنشربها فالطريق حتى قربت نوصل كانت تمنية دالصباح تاصلت بسعاد قلت ليها قريبة نوصل وجدي ليا حوايجي نجي ندوش دغيا باش نرتاح ومشيت وصلت للفيلا سخفانة هازة تكشيطة طلعت ديريكت دوشت غسلت كولشي عليا ولبست بيجامتي وطحت نعست نرتاح يالاه نستقبل ماما اللي غتجي من العمرة بنفس جديد
فديت داك النعاس والتعب والارهاق ديال الضياف والعرس وجري من هنا جري من لهيه .. زيد عليها الدرس اللي خديت من عند جاد بدل نضرتي للحياة بشكل كبير خلاني منشوفش تحت مني وديما نهز عيني لفوق ونشوف قدي وكبر مني .. هاد الهضرة لو تقالت ليا من عند شي شخص اخر كنت نتقبلها واخا نتقلق ماعليش . لاكن من عاد جاد !!... وزعما هضرنا فهادشي وقالي مكيهمنيش العمر هه... اااودي عليك اشيماء نتي والاوهام ديالك ... تقيقتي راسك وافيقي دابا هانتي سمعتيها بودنيك باش تعرفي باللي العدد مهم ومهم جدا فهاد العصر ومع هاد القوم .. هانتي عطاتك الايام كولشي .. عطاتك الفلوس .. الزين والحياة والهم والغم والمشاكيل ... ايوا اش بغيتي كتر من هادشي؟ .. هاهيا كتعطيك من جهة وتنقص ليك من جهة باش تعرفي باللي عمرها تعطيك كولشي وماسميتهاش دنيا غير هاكاك .. راه دااانيا اسفل سافلين ونتي كتجري فيها باغا كولشي .. هانتي غادية والعمر كينقص .. كتحلمي بالاولاد وغتحماقي عليهم .. لاكن واش الحياة غادي تعطيك حتى الاولاد .. شوفي وفكري مزيان راه الدنيا هادي وكما نتي محتاجة بيبي شحال من بيبي محتاج ام .
جاتني فكرة نتبنى شي بيبي وقلت حتى نفكر مزيان ونشوف واش نقدر .. ونتشاورك مع راسي عاد نزعم واخا تمنيت نكون ام من كل اعماق قلبي وهاد الموضوع كيمرضني .. خايفة يفوت عليا لفوت ومنولدش .. وانا ماشي شي وحدة اللي عندها زايد ناقص .. بغيت نولد وعندي رغبة جياشة اتجاه الامومة . كنشوف شي بيبي ولا شي مرى جارة ولدها كنقول سعداتها .. مابقا هامني لا زواج لا والو بغيت الراجل فقط على قبل الاولاد .. ناخد منو شي بنت ولا ولد ونقلب الضورة نعيش بنتي اميرة ولا ولدي امير الامراء .. نخوي انا وياه البلاد ونمشيو .. نعيشو فسنغافور كااع .. مالها تغلبني .. اصلا ديك البلاد عجباتني نشري فيها شي برطة وندير فيها مستقبلي علاش لا .. لاش غيصالحو هاد الفلوس نبقا حاطاهم نشوف فيهم .
تنهدت من اعماق قلبي قلت نخرج نشوف بشرى نفضفض عليها شوية هي اللي كتفهمني ودرت معاها نتلاقاو فشي كافي ومشيت جلست انا وياها كنهضرو ونتجمعو قلت ليها على الهضرة اللي بيني وبين جاد وولد عمو عاودت ليها وخويت قلبي وبقات غير كتشوف فيا مصدونة قالت ليا وهانتي على السيهم جاد ! ماحسابنيش غيخرج منو هادشي كامل
قلت ليها جاب الله مادرت فطاجين مايتحرق يعايرني بيها من بعد
قالت ليا والله ماعرفت منقول ليك ولاكن راه الصراحة برهوش ... انا كان كيجيني بعقلو ومتقل ومربي .. كيهضر ويحسب اش كيقول زعما .. ويتسنط مزيان عاد يهضر .. كنت كنشوفو فدوك اللقائات ديال الرياضة وكفاش كيهضر قلت هنا نبات ... وكيتختار زعما غير الكلمات الراقية فالهضرة كتبان عليه حكيم فكلامو .. ايوا فاللخر قولي داكشي غير زواق وصافي !
قلت ليها يعاود راسو .. مادام قال هاد الهضرة الا وعندو ديك التفكير ديال كبيرة عليا وداكشي لاخر .. مالقا زعما باش يعاير غير بهاد النقطة
قلت ليها يكون كابر حتى فالهند راه عروقو مغربية مخري فمخو بحالو بحال غيرو .. انا منكدبش عليك طلعو ليا فصحتي ضربت على المغاربة فمرة .. الى بان شي واحد تركي ولا لبناني ولا كاوري حسن كاع .. هاهيا مريم شوفي كي سلمات وتزوجات وعقليتها نقية ونية
قالت ليا ومالكي محروقة على الزواج ديري بحالي وديري بناقص ويالاه نمشي انا ونتي نسافرو منخليو حتى قنت
قلت ليها داكشي كيطلع فالراس ابشرى .. انا راني مرى اصاحبتي راه عندي غريزة حتى انا عنداك يحساب ليك ثلاجة غير حيت مرى ماعندي احساس!.. الحيوانات ومكتصبرش بقا غير بنادم اللي كيربط داكشي بالدماغ ويتخيل.. دارها فيا الله ختى انا باغا نجرب وندوق ونتمتع ماشي عايشة بحال الى معايشاش
بشرى وداكشي اكثر حاجة مطلع فراس دابا تجربي وتشوفي
قلت ليها واختي نتي عايشة حياتك مااع مامسوقا للعالم من ونتي عندك عشرين عام .. اما انا راه صايمة ثلاتين عام هادي باغا نفطر .. نتي كتنوعي وتبدلي كي بغيتي وانا!!! منشوف مانتشاف
قالت ليا كضحك .. واديك الساعة كن شديتي جاد عيشي معاه تبرعي وقليه بسلامة .قلت ليها طرات ليا مع زايد وعايرني بيها ندمني على ديك الحلوة عمرني نعاود .. وانا اصلا باغا لولاد منقدرش نتخيل راسي بلا ولاد
قالت ليا انا بعدا منقدرش نربي ولا نخرق .. ماعندي ماندير بيهم لا هما لا باهم
هزيت صبعي قلت ليها لالالالالا اختي منديهش صغر مني واخا نبور . يبقا ديما يشوفني كبيرة عليه وحتى الى ماقالهاش غيحس بيها واخا تكوني بحال المونيكة .. نووو نونو جامي دلافي
كنت كنهضر مع بشرى وصونا ليا جاد .. عرفت نمرتو واخا كنت بدلتها عاود صونا حيت من نهار جيت من مراكش وهوا كل نهار كيصوني ليا غيكون خدا نمرتي الجديدة من عند مو وكنقطع عليه وسيفط مسج مخلط عربية وفرونسي كيعتاذر قريتو على بشرى قالي فيه سمحي ليا وشنو ندير باش تسمحي ليا وديك الهضرة خرجات من فمي فلحضة غضب وندمت عليها ومابغيتش نخسرك اشيماء ومرضت بسبب هادشي راه معالم بيا غا الله خلينا غير نهضرو ماشي تقطعي كلشي على الاقل خلينا بحال الاول وبلا بلا بلا قلت لبشرى شنو بغا هادا دابا مسيفط كيعتاذر وقلت ليه اللع يسامح مزال لاسق مابغاش يتفك
قالت ليا صافي جاوبيه قولي ليه هاحنا فغولاسيون ليبغ بلا مدير ليا الطيارة
قلت ليها مابغيت لا غولاسيون ليبغ لا زمر انا الى بان ليا شي واحد فيه الضو غنتزوج اشمن غولاسيون ليبغ ولا امي واش انا عندي عشرين عام نبقا نتكرطط انا وياه ويدير ليا مسمار جحا ما انا فعلاقة جدية ما انا حرة نضبر على على راسي.. صافي مابقا بيني وبينو والو ومغاديش نرجعو علاش نتقل راسي بالتخربيق . غيبكي شوية وينسا كما بكيت انا حتى طبت على زايد وتبخر مابقيتش كاع عاقلة عليه
قالت ليا واش عاد سيفك ليك مسج قلت ليها لا سيفطو شي ثلت ايام هادي وبلوكيت نمرتو تا هوا ودخل بنمرة اخرى بيها سيفط هاد المسج .. انا باغا نخرجو من حياتي صافي اختي مغاديش نتزوج بيه وصغر مني صافي الله يعاونو
قالت ليا والله تا حمقة واش غتخلي واحد بحالو وتشمي تقلبي على واحد اخر محشر
قلت ليها مابقاتش فكي داير ولا زوين ولا خايب ولا بطل .. بطل راه بطل على راسو اش غيعطيني بديك البطولة ديالو .. اش خداو هادوك اللي تصاحب معاهم ! شوفوني انا مع جاد الهواري!... من بعد ؟ شنو؟ شنو ستافدو العياقة والنخوة والتكبر زعما انا مع فلاان داها فيا!. مابغاش تفهميني ابشرى ختي راه قلت ليك صغر مني .. خاطري مابقاتش عاطياني نشوف فواحد صغر مني نهائيا .. هوا غيبان ليا برهوش وانا غنحس بيه كيشوفني بحال مو
قالت ليا لواااه لوااه لوااه اللي سمعك يقول كبيرة عليه بخمسين عام ! .. زدتي فيه راه ربع سنين ولا خمس سنين ماتزيديش فيه
قلت ليها لا .. منقدرش صافي جربت فشلات التجربة بلا متحاولي تقنعيني مغاديش ننقدر .. داابا يعيا ويضور ولا يطيح فشي وحدة تنسيه كاع خليقتي .. وحتى لهضرة طلعات ليا فصحتي نبقا نسمع ديك كبر منو ماكبر منو الله بلاش . ماجاتش
قالت ليا وعادل شنو درتي معاه . قلت ليها عاد عاود عيط ليا من واحد النمرة بغا يعرف علاش درت هاكاك قلت ليه شنو كاين نيشان .. قلت ليه انا خي فلانة فرتلانة وكنت مع جاد سمح ليا حقاا ما حقا ماديت ماجبت فديك ولد عمو ماحسابش ليا كتجيه منقدرش
قالت ليا وشنو قاليك ؟ كي جاتو؟
قالت ليها جاتو عادي وقاليا راه شفتك كتهضري معاه وانا معنديش مشكل ومكيهمني حتى واحد صافي شفتك بغيتك وغنتزوجو نمشيو لبلجيكا المهم هوا متكونيش كتبغيه ولا شي حاجة
هزات حاجبها فيا وقالت ليا وشنو قلت ليه بسلامتك
قلت ليها صافي قلت ليه مابقيتش كنبغيه ولاكن منقدرش ندخل لعائلة كانو عارفيني مع واحد من عندهم ومشيت لولد عمو
هزات يدها فيا وقالت ليا وااانوضي براكة من الفهامة نقطع ييدي تا باقا كتبغيه وتموتي على خراه
قلت ليها اه راه بصح باقا كنبغيه ! ولاكن مكافيش وانا كندير مجهود نساه .. ولفت لمحاين ابشرى غير تهناي من جيهتي راه الى قلت ليك مغنرجع صايي مغنرجعش نبغيه ولا نكروه .. واها دوزت انا وياه طون حرور وكيبقا داكشي فالذاكرة لاكن الحمد لله بعدا راه خرجت من واحد الغمة كنت فيها وبغيت نخلي الصورة مزيانة بيني وبينو الى تفكرتو نذكرو بالخير
قالت ليا ايوا وفاش صفيتيها نتي وعادل؟
قلت ليها قطعت لياس بحال جاد .. قلت ليه سمح ليا منقدرش واخا نتا تقدر انا منقدرش وسديت عليه تا هوا .. وباقي مصدع ليا راسي كيعيط ويحاول تاهوا ... اودي يمشيو بجوج يعطيني تيساع انا كيبان ليا غادي تجي مي غدا من العمرة ندير ليها صدقة ونهزها نمشيو انا وياها لشي بلاد اخرى نعيشو فيها ونهني مخي .. بيني وبينك طلع ليا المغرب فراسي كرهتو مابقيتش مرتاحة هنا ومابقات حتى حاجة شاداني هنايا
أنا وبعدي الطوفان الجزء 15
محتوى القصة
علام حتى باه ضارب الدينا بركلة وكول مع راسو .. اما واحد الضحكة عندو كتهز الدار كاملة مكاينش اللي ضحكني قدها .. سعداتهم اسرة منسجمة باينة مرتاحين فحياتهم مولفين الضحك والهزار وماشي معقد ولا فيه ديك النفخة الخاوية زعما راني راجل رجولتي متسمحش ليا نضحك مع ولدي ولا مع مرتي !.. اش جاب الرجولة للتعامل الزوين والحنان والضحك مع الاولاد .. ولاكن اللي جدورو نضيفة من السموم والامراض النفسية هاكا كيتكون شخصيتو ..
تابتة ومرتاحة ومتصالح مع نفسه ماشي بحالنا حنا .. مضارب غير مع راسنا كارهين بعضياتنا وشي حاضي شي شي حاط على شي ولاكن كولشي من تربية الاب اما مي اصلا جابوها صغيرة خاص اللي يربيها بقا غير تربي وتعلم وتقري وهي اصلا ماعارفة حتى زفتة .. عارفة غير تشقا وتولد وطيع الراجل والعائلة فجنابها كينخزوها كل شوية باش متنساش الواجب على تزوجات .. بصراحة الثقافة والوعي مهمين بززاف وحتى المحيط كيلعب دور كبير . . هادشي اللي خلا حياتنا حنا مهزوزة عندنا راعي كيرعانا بحال البهايم بلعصا ويدينا ويجيبنا كي بغا وعلى كانتو .. انا هما كل واحد طور راسو بنا شخصيتو كتشوف الاختلاف بيناتهم ومكاينش تشابه حيت كل واحد اختار كيفاش بغا يكون .. ماشي بحالنا حنا .. تعادينا من بعضياتنا كي الاب كي الام كي الاولاد ! وكيربيوك باش تكون بحالهم ويقتلو ليك الشخصية مكيخليوكش تكبر حر باخيتارك وبراحتك .. والى جلستي فشي مجمع كولشي حاضي عنننداك تهضر .. تهضر يقولو ليم سكت غتزبلها . كتبقا ديما عارف راسك غتزبلها واخا عمرك جربتي باش تعرف راسك كتزبل فالهضرة ولالا .. وكتبقا هاكاك مقموع حتى كتسرا ليك القمعة فالدم كترجع تسكت وتبقا غير تسمع وتشوف فالشخص اللي معاك هوا اللي كيهضر وهوا اللي كيعرف وهوا اللي نيفو عليك ونتا لا وديما راسك فالارض. كيبداو معاك من الصغر ومن الوسط العائلي بالقمع وحاضينك لا تحشمهم بحال هما زعما ملوك الارض كيتضاهرو بالمثالية والتربية وهما المخير فيهم مامربيش اصلا باش يربي شي واحد اخر .. كطلع قاطع النفس وتبقا فالمدرسة قاطع النفس والى وقعات ليك شي حاجة يبقاو عليك نتا كطير .. نتا تربية يدينا وحنا عارفينك .. كن مادرتيش مايوقعش ليك ويوقع ليك . حرام واش يعنقك شي واحد ويخفف عليك وتحس انك عنضك حضن . كتبقا مفتاقد للحنان ومفتاقد لبزاف ديال الحوايج وكيحساب ليك بللي راك عايش حسن من شي واحد اخر حيت هادي الفكرة اللي دخلو ليك لدماغك فاش كيشريو ليك شي شوريطة ويبقا عليك راحنا شرينا ليك فعلنا ليك تركنا .. مالابسها حتى واحد د.. مالقاوهاش الناس .. ونتا كيحساب ليك بصح بوحدك اللي واكل شارب والناس ميتين بالجوع .. حيت كيبقاو يمنو عليك داكشي اللي كيديرو ليك ويرددوه قدامك حتى كتقبلها بلا متحس . كتعيش مدلول وديما يميزو ولاد الجيران عليك .. ديما ولد فلان حسن منك .. نتا عمرك تسمع كلمة نتا حسن ولد فلان .. ديما ولاد الناس مربيين ونتا لا .. ديما ولاد الناس كيعرفو يهضرو ونتا لا .. كتبقا تشوف راسك دون المستوى قدام واحد اصلا ميسواش ونهار تزوجي يكنلو عليك الباقي ويخرج ديسك الزوج والطاعة والصبر ويجلسو عليك بالصبر الصبر الصبر تقول داخل تكوي على بوصفير فعينيك ماشي داخل على حياة زوجية سعيدة . اودي الهضرة بزاف والسكات حسن واكفس حاجة كتوقع ليك بلا متحس كتقولها مع راسك .. هي فاش كتشوف ناس مختالفين عليك كيجيب ليك الله راهم مكيحشموش ولا ماعندهمش الشخصية ولا غيرو كيخربقو ولا تشوف الولد كيهضر مع باه كما باه كيهضر معاه كتقول راه مامربيش مكيحتارمش باه .. ولا برهوش ولا مامحتارمينش ولا خابين كاع .. حيت عشتي مقموع طول حياتك كيجيب الله باللي داك الانسان كيدير شي حوايج ما هوماشخاصو يكون جالس ومنفخ ماقاداهش بلاصتو ومكيهضرش وغير مخنزر و معصب وماخصوش يضحك ويقشب حيت داكشي بالنسبة ليك كيقلل من الشخصية ديالو وبداك التعفار والتعصار كيجيب ليك الله راه شخصية مهمة وقوية والمشكل الكبير كاع هوا ماتقدرش تقبل العكس ولا يدخل ليك لمخك وترتاح لديك الحقيقة المختالفة على الحقيقة المزيفة اللي كبرتي عليها .. تحليلات معقدة صعيب تفسرها حيت داكشي اللي كيدور فالدهن ويحس بسه الانسان فبعض الاحيان مكتلقاش ليه كلمات ومامديورينش ليه كلمات . كاين شي حوايج مكيتفسروش كنعيشوهم مع نفسنا يوميا متعلقين بطريقة تفكرينا واحساسنا والى جيتي تقرا تحليل داكشي اللي عايش بيه كيجيك يا اما تافه يا اما عطيتيه كتر من وقته وحقه يا اما مكاينش اصلا مع العلم انه كاين غير القول عندو تأثير كثر على الفعل حيت متنتابهش لراسك اصلا وكتبقا هاديك شخصيتك وداكشي كامل متعلق بشخصيتك صعيب يتفسر وشخصيتك اصلا مكتجيش من فراغ .. كتركب من الصغر حسب شنو عشتي .. حسب الذكريات اللي عندك .. حسب الناس اللي عشتي معاهم وحتى المحيط وعاد اختياراتك عي الاخيرة كتبقا جزء مهم من تركيب الشخصية .. وفاش كيتحدو اختياراتك وكيختار شخص اخر بلاصتك داكشي اللي يناسبك وتمشي على هواه هنا كتكبر مهزوز .. بدون شخصية وعندك فقط طبعة من مجموعة ديال الشخصيات عشتي معاهم وتأثرتي بيهم وكترجع تقلد اي شخصية عجباتك لمدة صغير وترجع لحالتك الطبيعية وهي غادية لانك اصلا بدون شخصية ، و قوة الشخصية بالنسبة للناس العادين اللي عندهم تركيبة صحيحة ماعندها حتى علاقة بالغضب والعصبية والتخنزير والتكبر والصرامة المستمرة .. بل قوة الشخصية كتبان فطريقة فالحوار وتشبتك فالرأي ديالك وتقبل رأي الاخر وتحتارمه والى كانت عند فكرة غالطة تصححا وتتقبلها وضيفها لقاموسك .. وكتكمل قوة شخصيتك فختيارك لشنو مناسبك ماشي لشنو مناسب غيرك بلا متتأثر بكلامو ومحاولة اقناعه ليك و حتى فلحضات الغضب كتبان فمدى صبرك وطولة بالك وقوة التحكم فنفسك .. والتصدي للازمات النفسية وعدم التأثر بالقيل والقال لان ثقتك فنفسك اكبر من انه يجي واحد يقلل من قيمتك مادام نتا عارف نفسك اش كتسوا فكيبقا كلام الغير مجرد غبار على الذهب الريح اللي جا يديه وكيبقا الجوهر لامع عمرو يتصدا الى كان المعدن ديالك مستخرج من معدن اصلي واصحيح فعمر شي سوسة تدخل حياتك تسوسها ليك و كتبقا قوي بحال الفولاد كتتصدى للهجمات وكلمتك متنزلش للارض الى كنتي متأكد انك على حق وانك مآمن بنفسك وبطريقة تفكيرك وختيارك وكتعيش مرتاح ضاحك ناشط فرحان كتعامل الناس معاملة زوينة حيت عارف راسك اشنو نتا كتسوا والمعاملة الزوينة مكتقللش من قيمة ولا الضحك مع ولادك مكيقللش من قيمة نفسك وشخصيتك قدامهم . عكس الاتجاه الاخر تماما اللي كنت انا كنشوفو قوة شخصية وكانت عندي فكرة غالطة عليها بزاف .. كنشوف المضهر فقط من برا كنتبهر ونمجد فالانسان ونقول شخصيته قوية حيت كبرت على القمع اي واحد ثمر عليا كيجيني واعر حسن مني وقوي حيت انا اصلا ضعيفة وحاذرة الراس ونضحك ونهضر وخايفة على شنو غنقول كيجيب ليا الله كاع اللي بحالي وضحك معايا وعطاني وقت راه ضعيف! .. وهاداك اللي ماعطانشي وقت هوا الواعر !.. لاكن الحقيقة اللي بزز باش تقبلتها ودخلت فصراع وحرب طويلة عشتها مع نفسي ودخل ليا الشكلي فالعكلي ومرضت بسبب التراكمات .. هوا ان ديك الشخصية اللي كنت كنشوف قوية فبا حيت كيغوت وقوية فزايد حيت مكيعطينيش وقت وحاسب راسه شنو .. هادشي كامل لا علاقة ليه بالشخصية القوية المتصالحة مع نفسها .. هادو كلهم اصحاب هاد الواجهة الصارمة هن فقط رسمو واحد الصورة لنفسه للمجتمع باش مايضسرش عليه .. وباش مايتماداش معاه ويدخل معاه فالمسكي حيت غيسكتو .. وكخلي انطباع عليه من خلال الصورة اللي رسم على برا باش يخلع بيها الناس ويضهشرهم حيت بسهولة يمكن ليك تكسرو لاكن هوا صنع لنفس باب من الفولاد صعيب عليك تتجاوزو باش توصل ليه للنخاع .. ماشي صنع ليه شخصية باختيارو هوا والى دخل معاك فنقاش يسكت يخليك حال فمك ويعطيك شرح مفصل فجملة وحدة يقنعك بيها ويبين ليك فيها انه على حق وتسكت نتا قدامو حست هاد الناس راسهم عامر ماعندهمش تخوف من الناس .. اللي عندهم تخوف هم اللي بحالي! .. وهادشي اللي وقع مع با وحتى مع زايد ... فاش كسرت الباب الفولادي لبا اللي رسم ليا ووهمني بيه طول حياتي تغلبت عليه وكسرت ليه الباب بانت حقيقته اللي ماخلاتوش يتقبل الهزيمة وطلق مي باش يقتلني بالفقصة ويسممني ويتغلب عليا زعما .. وكذلك زايد .. فاش طاح مع زينب انسانة طبيعية عايشة البساطة فكلشي ومع كولشي مانباهراتش بداك الباب الحديدي اللي فالواجهة ماكملش معاها حيت قوية وتصدات ليه هزاتو وطلقاتو عرف راسو مغاديش يأثر عليها وغتزيد غير تمرضو وطعنو وكدخل فنقاشات تقدر تسكتو بيهم تخليه يبان ضعيف قدامها وكتعرف تهضر وكتعرف شنو كتقول صعيب يجاحدها .. طلقها حيت داك النوع ميقدرش يعيش مع شي واحد كيفهم عليه وحسن منو ومتشبت باختياراتو كيبغيو يعيش مع واحد يسيرو كيف بغا ويحس بالفخر ديما وهوا كيتعالا عليه ويرفع راسو .
وانا هنا كنشوف الشخصية المتكاملة المتصالحة مع نفسها والقوية فحد داتهها فهاد العائلة .. كتشوف الام مامتأثراش بالاب ولا خايفة وانما كتحتارمو وتهضر معاه بالادب وهوا كذلك كيعاملها بنفس الشكل ويعطيها قيمة قدام الجميع وشفتو كيفاش كيدور يشوف فيها ويضحك معاها واخا ولادها كبرو وولدها قداش بلحيتو وضارب الطول فالعرض .. كتحس بالحنان بيناتهم والحب والاهتمام وكفاش هوا كيقول ليها كولي وهي كذلك قالت ليا حتى انا كولي علاش ماكليتيش .. كيحسو بالانسان حيت كاين اللي كيحس بيهم وجذورهم صافية من السموم ..كتشوف علاقة الاب مع ولادو كفاش كيضحك معاهم واخا قدام الكل .. مافيها عيب بلعكس العيب هوا اللي كان فينا با ميشوف خويا ولا يشوفني كيثمر ويزعف باش يبان كيربي .. ولاكن اللي مربي مربي باينة غير من علاقة هشام مع باه كتحس بيه بحال صاحبو جالس حداه وواخدين راحتهم وعلاقتو مع بنتو حنين معاها وحنان معاها حتى خوتها .. شفت الاب كفاش كيقشب مع ولدو ويضحك ومفتاخر بيه بطل حيت ديك البطولة ماجاتش غير هاكاك ولاكن سببها التربية الصحيحة والدعم المعنوي وعاطينو اهمية هوا والرياضة ديالو .. هادا فحد داتو فوز عضيم للواليدين جناو ثمرة تبيتهم فاحترام الابن لواليديه وسببه حتى اللمة ديالهم فبحال هاد المناسبة .. اختار يحضر ويكون معاهم على انه يمشي ومايعطي اهمية لا لخوه ولا لعائلتو .
كتشوف الام كيفاش حنينة فبنتها وكفاش كتهضر بشوية معاها وبلا متبزز عليها شي حاجة .. كتشوفها كفاش كتحن على ولدها والى جلس حداها كتكا على كتفو وتعنقو حيت طول الوقت عايشين الحب وكتصرف كما هي مرتاحة ماشيوحاطين عليها ويغمزو فيها من البعيد ويمرضوها يخليوها جالسة مهووسة .. ولا الولد يبعد مو يقول ليها وصافي ماتبقايش تبحلسي قدام الناس ويمقعها !.. ابدا مخلي ليها الحرية .. تفرح كي بغات تاخد راحتها لانها اهم ليه من دوك الناس اللي غيشوفو وراحتها اهم من اي حاجة .. وهادشي اللي خلا سليمة وجهها منور مشاعرها نابين من القلب وباينين على وجهها كتبان حنينة وضريفة ورقيقة .. ولاكن قالها داك المثل .. قال منين داك الغصين .. من ديك الشجرة .. كن خويا كبر وسط هاد العائلة حتى هوا كان غيكون بحال جاد ولا هشام .. اودي المرى مرتاحة نفسيا عندها راجل ونعم الرجل كيفاش بغيتي ولادها يكبرو .. اكيد مربياهم على داكشي باش كتحس هي وزرعات فيهم العطف والحب والحنان والهدوء وعاد الوعي والثقافة والرقي .. حلو عينيهم على يد ناعمة ورفرات ليهم السلم والسلام .. انا براسي كنهضر معاها كنحس بالراحة وفاش كتجلس حدايا كنحس بحال الى جالسة حدا شي حلوة .. منورة فوجهها فشكلها فكلامها فكولشي .. عساك ولادها اللي هزاتهم فحضنها ورضعاتهم وكبراتهم قدام عينيها . ماشي بحالي مي مسكينة ماعارفاش تربي مالقات اللي يقريها ويوعيها على التربية وبلدية واصلا تربيتها هي ماكاملاش ومخربقة وحتى اللي رباوها عجنوها وخلاوها طيب كما خرجات يا تخرج بيتزا ولا خبز ولا حريرة المهم شدو بانيو مل واحد خوا فيه المقادير اللي بغا ورونوها وخشاوها ففران بحال اللي وقع معانا تربينا راسنا وسط العائلة اللي جا كيدير حقو فتربيتنا عمرها مان عندها رأي الى درنا شي حاجة كتقول لينا يجي باك نقولها ليه ولا تقولينا تكلمو لباكم باش نتكلمو ليها هي حيت كنخافو من با وكبرنا على الخوف والرعدة حتى خرجنا مرضى تفسيين حارو فينا الاطباء
سرحت كنشوف فيهم وفرحت حيت جالسة معاهم .. حتى انا كان عندي طموح فاش بزة كنت كنحلم بزاف وباقا كنحلم ونتمنى عشت حياتي كلها فالاحلام وواخا درت الفلوس فرغت فيهم الكبت ديالي وداكشي اللي كنشوف الناس كيلبسوه ونتهد عليه لاكن ماقدرتش ننجح وندير بصمتي فالمجتمع .. كنت كنقول عندي عقدة الفرنسية وهاي تحلات .. لاكن باقا كنحس براسي خايفة ندخل فشي حاجة ونفشل .. ماعرفتش شنو باغا مزال مالقيت راسي ومزال عندي تخوف وحتى الجهد مشا ليا ضيعتو فالخوا الخاوي على ناس مايستاحقوش .. لاكن الغلط ديالي ودابا تعلمت منو وحسيت براسي تقال وليت كنميز شي حوايج ونتقل ومابقاش داك الطيران فيا وحتى الاحلام مابقاوش وليت واقعية اكثر .
كنت شاردة مع نفسي وباه باقي شاد فيه كيضحك معاه حتى فيقاتني واحد الكلمة وهوا كيضحك ديك الضحكة خارجة من قلبو قاليه غنزوجك اولدي ونطرق ليك على صبعك بقيتي ليا غير نتا
جاد غير كيتنهد ويسوط كيضحك ويشوق فينا وهز دراعه باش باه يقيلو عليه وقاليه
وصافي الواليد وبرااكة عليا شد فهشام ها هوا حداك هوا اللي غيتزوج دابا
جرو صحة مخرج لسانو غامزنا قاليه وماكااينش مغنرجع لبلجيكا تا نزير ليك السمطة وضار عند بات مريم اللي كان كيضحك غمزو وقاليه هادا هوا اخر العنقود عندي ..
هز جاد راسو قاليه اشمن عنقود اصاحبي الله يهديك خلينا جالسين ولا غنمشي
حلف باه ميطلقو ودرعو قاليه شوووف اولدي .. غنزوجك هي غنزوجك صاافي قررت
قاليه جاد انا مزوج بهشام
قاليه باه هشام صافي مغيبقاش تابعك من حلبة لحلبة وغمزنا كيضحك ورجع قاليه عاصر ليه كتفو بيدو شنو هاديك اللي كنتي غتزوج بيها شاهيناز ها .. ولا شي حاجة فيها شاشا طيحاااتك اوليدي هههااااهههااااخهه
جاتني الضحكة دورت وجهي درت يدي على نيفي وجاد حل عينيه كان متكي على ركابيه وهز راسو بقا كيبقرق فينا ويتمتم قاليه اصااحبي شكتخربق سكتنااا وشاف فمو وهي كتقول ل راجلها اللي مابغاش يسكت قالت ليه ويليلي ويلي ويلي فراايح ااا فااريح اوييلي فاااريح ههه اجي اجي اجس نهضر معاك والله تا تجي
جاد ناض رجع حمر تزير قاليه عيقتي كاع اصاحبي ماشي بلان وناض دخل وباه طالق ديك الضحكة وهشام كيدور فعينيه اما سليمة مشات نوضاتو قالت ليه اجي ااجي نقول ليك
نوضاتو اما انا ماعرفت نضحك ولا نبكي نضت بالزربة دخلت وراهم سولت وحدة على الحمام نتخبا فيه تا دوز الموجة ومشيت يالاه غندور سمعتها كتقول ليه اوييلي تحمستي بزاف افاريح راه جالسة معانا ونتا كتقوليه طيحاتك ما طيحاتك
هز راسو باقي كيفرنس قاليها شكون!! مافهمتش
قالت ليه عصبتيه ناض كااع وهي جالسة كتسمع تلفتيني انا براسي
قاليها شكون هادي اللي جالسة كتسمع
قالت ليه اوييلي على شكون !!! شيماء راه جالسة حدايا دايرة لحجاب ماعقلتيش عليها شحال تصور هو اوياها جيتي حشمتيه قدامها !!
قاليها على هي هاديك!!
قالت ليه ااه هي دارت الحجاب
جمع الضحكة قاليها واايلي والله ماعرفتها فين مشا فين فيين قالت ليه راه طلع لبيتو ولا منعرف فين مشا
رجعت اللور حتى دازت سليمة وجيت ندور لقيت جاد خارج من الحمام خرج فباه نيشان غاسل وجهه وطالع ليه الدم قاليه شنو هادشي اصاحبي
قاليه باه عاد شرحات لمك ماعرفتهاش كااع اما منهضرش
قاليه درتيها خاايبة كاع
قاليه باه وصاافي كاااع ااااش فيها .. ضحكنا وصاافي دابا .. عرفتي شدير سير سير ترتاح سير باقيو رجلك كضرك راه مافيها وااالو كنضحكو
قاليه جاد ما ضحك ما والو اصاحبي شديك الهضرة طيحاتك ولا شنو وهي كتسمع
قاليه باه صاافي دابا حنا غير كنضحو وصافي ماشيو شي حااااجا تا نتا صااافي واايلي ااش قلنا كااع
زفر جاد قلب وجهه قاليه تأ بفف صافي دابا فكستيها ..
قلب الدورة مشا وباه بقا واقف كيدور فعينيه ويحك شعرو من اللور شويةةبدا يضحك بوحدو وجا يرجع هربت درت بناقص من الحمام رجعت بلاصتي ورجع جلس مقابل معايا شاف فيا وانا نفرفر برموشي حشمت اما هوا سكت دور وجهه بقا ساكت وبات مريم جات نوبتو تا هوا مابغاش يسكت اما باابات جاد بقا جالس وكل شوية يضور ويجلس يشووف فيا
ويلي على حشمة حشمت انا وحشم باه ولاخر زاد حشم يورينا وجهه وحتى ختو بدات كطل عليا كل شوية وتشوف فيا عرفتها ماعقلاتنيش اما باه زبلها كي خلاوها جدودنا ولاهيلا ولاكن هانيا المهم فرشتي ليا المعنطز من قبيلا وهوا يتنفخ كان غيتفركع فشيتيه فالدقيقة تسعين وعلى ديك الفرشة سالات الحفلة وناض الجميع يودعو بعضياتهم حسيت براسي عندي قيمة كبيرة خصوصا فاش بداو كيهضرو من بعد ما مشا جاد على مريم والحجاب وكفاش سلمات قالت ليهم تلاقيتها ففرنسا وتصاحبنا ودخلاتني الاسلام وبدات تعاود ليهم عجبهم الحال بزاف بقا عمو فريح كيحرك راسو ويشووف فيا وفاش نضنا نمشي بدينا نتوادعو نزل العنطيز يسلم على الناس وسولوه فيه بغاو يسلمو عليه وجا مكيضحكش غير بزز مع الناس .. اما انا سلمت على ماماه وختو من الوجه ضحكو معايا ورحبو بيا وزدت حتى وصلت لباه دار ليا واحد الضحكة مريحة وكيحرك ليا راسو وسلمت عليه من يدو ابتسمت ليه و قالي تبارك الله عليك ابنتي . حشمت منو وماتلفتش حيت جيت بعيدة وجاد واقف اللور مارجعتش نسلم عليه والفرشة تفرشت فيها انا وياه .. بقا غير واقف كيضهر هوا فخونصوا بعفوية حيت سلمو على بعضياتهم وتمو جاين ورانا هز عينو شاف فيا بلا حنى تعابير وخليتو خرجت مشيت انا اللولة للطموبيل طلعت اللور حتى جاو هما خرجو كاملين برا ودعونا وشفت خت مريم سلمات عليه من لابيز وضحك معاها وطلعات حدايا جلسات بقات كتشوف فيه ودارت ليه باي باي وانا نقلب وجهي ركبنا وزدنا خلفة رجعنا للدار ، من الساعة اللي دخلنا فيها وهما كيهضرو عجبهم الحال عجباتهم العائلة وزدت انا شكرتهم قلت ليه مزيانين وسولني فخونصي ديري لينا نشوفو المقابلات ديال جاد وشعلت التلفازة درت ليهم اليوتوب حل عينيو قالي لعب مع فلااان !! تفاجأت وجات اخت مريم ماريا جلسات قدام تلفازة .. ديك المقابلة انا براسي ماشفتهاش هي اللي كان لعب قبل ميتهرس وغلب فيها .. عجبهم الحال وعجباتهم العائلة شافو المقابلة حتى سالات سفقو ليه وبدا يهضرو بيناتهم ماقداتهم فرحة طاحو فعائلة زوينة ونقية وفالمستوى يفتاخرو بيها قدام الناس .
رتاحينا من السهرة مشيت نعست بقيت كنرجع السينتة ديال كل لحضة حتى داني النعاس والصباح صبحنا على الضايفة بحال العادة مكاين غير شهيوات والضحك .. بغاو يتبيسيناو تعراو كاملين خرجو لابيسين كانت الشمس قوية خرجنا ليهم الديسير والمشروبات .. كانت ام مريم سميتها كارولين لبسات واحد المايو وتكات عطات ضهرها للشمس هي وراجلها كيتشمسو وخليتهم مشيت انا ومريم بدينا الجرى ورا التوجاد وطلع وهبط .. كيعجبني داك الجو مكنملش منو كاع دوزنا دوك الايام كلها غير فالتوجاد وكيدوز عليا هشام يخرجها وانا تلهيت مع الضياف بزاف .. قرب العرس قلت نعرض عليهم مافيها باس يجيو يتجمعو يقدرو يكون عندهم شي حاجة يتافقو عليها وقلتها لمريم قلت ليها نعرضهم واخا غير كاسكروط وقالتها لهشام عطاها نمرة سليمة عطاتها ليا وعيطت ليها . فالاول ماعرفاتنيش قلت ليها شيماء وهي تقولي اااه صافا ماشيغي شخبارك .. شخبار عروستنا .. قلت ليها كولشي مزيان مرحبا بيكم عندنا الى عندكم شي وقيتة غدا فلعشية قالت . ااه ميغسي مكاين علاش تكلفي راسك احبيبة قلت ليها مكاين حتى تكاليف بلعكس مرحبا والف مرحبا وقالت ليا واخا صافي نعلم فاريح
درت الواجب واخا ماعرفتش واشوصحيح ولا غلط لاكن جاتني مافيها حتى عيب نعرضهم مادام جالسة عندي لافامي يقدر لو كانو كراو دار كانو غيعرضوهم ويديرو نفس الشيء ! .. المهم جات المبادرة من عندي قبل العرس .. وكما هما حاسبيني وحدة من لافامي فمن الواجب ندير بحسب الاصول .
تلفت مشيت كنجري لواحد لحمام جهة الباب وقفت شفت فراسي قاديت راسي دغيا بديت نجرب الضحكة اللي جات معايا وخرجت كنجري قلت للعساس خلي الباب محلول البارني مايجيوش الناس يلقاوه مسدود جاتني حشومة و خليت الباب ديال الدار لداخل حتى هوا محلول وجاو كانت سليمة حتى هي لابسة خت جلابتي مع الطالون كحل استقبلتها جات كضحك اول حاجة انتبهت ليها هي الجلابة سلمات عليا وقالت ليا لابسين بحال بحال وبدينا نضحكو رحبت بيها كانت دايرة نضاصر الشمس حيداتهم ودخلات وراها ميساء .. ميساء يا ميساء .. سكوتية مكتهضرش غير كضحك وصافي مرزنة ومهدنة سلمت عليها دخلات ودخل هشام ومعاهم جداتو المرى الكبيرة حتى هي .. الصراحة ماشي قبيحة جاتني ضريفة وكتهضر بشوية وتسلم بشوية كيوت واخا كبيرة حسيت بيها حنينة ماشي شريرة كما كنت واخدة عليها النضرة واصلا واقيلا ماعارفاش كاع اش واقع ولا شكون انا ولا واش انا اللي هضرت معاها فتيلي .. سلمت على هشام وباه دخل هوا اللخر بديك الابتسامة ديالو المريحة مد ليا يدو سلمت وحشمانة منو ودخلو تلمات العائلة وبقيت انا كنشوف فالباب ونتسنا .. اش كنتسنا مانعرف . سوبت العساس قلت ليه واش باقي شي واحد برا قالي لا حتى واحد .. اذا جاد ماجاش .. واخا .. على خاطرك .
رجعت لداخل خاب ضني حسابني غيجي لاكن هوا حر . هتميت بضيوفي جلستهم فأحسن بلاصة وجلست وبدات الهضرة والجموع وانا غادة جايا قلبي كيفرفر مرفوعة وغير كنضحك كنجي حتى ليهم نهضر وكنحشم كنقول ليهم مرحبا بيكم وانا كنقطر .. شكون قالي شي نهار يجي عندي باهم ومو شخصيا حتى لقلب داري !.. عائلة مريم كتصرف عادي فالدار واخدين راحتهم كيدخلو ويخرجو فين بغاو وكول مع راسهم مالقاوش معاهم مشكل فالرسميات ولا فالحوار .. عاطينها للضحك والهضرة كل واحد مع لاخر ومشيت انا لواحد الطبلة قدامي بعفوية ستفنا فينا الكيسان والماء قلبت الكاس نعمر وضرت بعفوية شفت فيهم لقيت سليمة ساكتة دايرة واحد الابتسامة على وجهها وجالسة بالجنب دايرة رجل على رجل فوق الفطوي وكتشوووف فيا .. شفت فيها وابتسمت ليا رديت ليها الابتسامة وحشمانة . حطيت ليهم الماء وجلست فالجنب شافت فيا وقالت ليا اجي جلسي حدايا
نضت مشيت حداها تقلبات جيهتي قالت ليا عدبناك
قلت ليها عدابكم راحة . نهار كبير هادا ..
نقزات ماريا بالفرونسي قالت ليا جاد ماجاش معاكم ؟
تلفتات سليمة قالت ليها جاد عندو رجلو كضرو وعندو غونديفو مع الطبيب ليوم
قلت ليها كي بقا من داكشي اللي وقع
سدات عينيها تمهدات وعضات شنايفها قالت ليا غير خليها على الله وخلاص راه فاش قلنا ليه مات صاحبو دخل فواحد ديبخيسون صعيبة وكمل عليه الطبيب قاليه متقدرش تلعب برجلك .
تصدمت درت يدي عاى فمي قلت ليها وشنو ؟؟ واش ميبقاش يلعب فمرة؟
قالت ليا الله يدير اللي فيها الخير وخلاص ... دازت علينا فاش قالينا هاكاك .. مرضنا ولاهيلا..حيد العكاز وقالك ميمكنش منلعبش.. قطعو ليا رجلي باش منلعبش
تأسفت ضربني قلبي قلت ليها وكيقدر يمشي عليها ؟
قالت ليا كيمشي بزز باقي مابرات مزيان .. كيدير ليها بانضة وصافي .. رجع للطبيب قاليه خصها شوية ديال الوقت وتبرا مزيان ولاكن هوا قالك منقدرش نتسنا وعندو واحد المقابلة من دابا ست شهر فآلمانيا
قلت ليها وشنو غيدير ياكما غيلعب برجلو مريضة؟
حركات ليا راسها كتنهد وقالت ليا عيينا كنهضرو قالك غنلعب وآكسيبطا الدمونط .. كيتريني بيها واخا مريضة
قلت ليها وغادي يزيد يكمل عليها خصها ترتاح باش تبرا
قالت ليا وشكون اللي غادي يسمك ؟ عيا فيه با .. خوه .. الطبيب مكيسمعش .. دارت يدها على جبهتها تنهدات وقالت ليا عمرني نسا ديك لاكسيدو اللي طرات .. غير كنتفكرها كنتعصب
دوزت يدي على يدها مسحت عليها وقلت ليها مكتاب وصافي والحمد لله خرجات سالمة
قالت ليا ولاكن صاحبو بقا فينا بزااف .. الموت ديالو ماكانتش ساهلة علينا وعلى جاد اكثر .. ماشي ساهل يتنسا هادشي
قلت ليها الله يرحمو ويوسع عليه هادا مكتاب الله .. ماتبقايش تفكري شنو وقع باش متمرضيش
قالت ليا دابا هازين هم ديك الرجل اللي باغي يلعب بيها .. هوا كيقولك الا السبور ميقدرش مايديروش .. ماعرفنا شنو اللي غيوقع ... تنهدات والتسمت قالت ليا وماماك .. كي بقات لاباس عليها شخبارها ؟
قلت ليها الحمد لله دازت العملية مزيانة .. ومشات للعمرة
قالت ليا اللللله احسن حاجة دارت ترتاح وتخفف دنوبها
ابتسمت وقلت ليها غتجي فهاد الايام ان شاء الله
قالت ليا الله يجيبها على خير .. ايوا ونتي اش خبارك .. شنو كتعاودي
ضحكت وقلت ليها انا لاباس .. الحمد لله
قالت ليا دابا نتي خاصنا نزوجوك من بعد مريم
تزنكت دورت وجههي قلت ليها ان شاء الله
ميلات راسها كتشوف فيا وقالت ليا هي كاين شي واحد فالطريق
ضحكت وقلت ليها لا لالاااا .. هاد الساعة مكاين حتى واحد .. مازال مالقيت ايون بون بيخسون
ابتسمت وقالت ليا اااه وي بصح عندك الحق
قلت ليها انا غنمش نشوف لكوزينة ونجي
ونضت مرتابكة سمعت مريم عيطات عليا كتسول فين تحط واحد البلاطو وجات عيني على سليمة لقيتها ساهية كتشوف فيا من راسي لساسي بلا متنتابه شفتها وهضرت مع مريم وريتها ومشيت لاكوزينة وقفت كنسوط جاتني السخفة والصهدة
حطينا كسكروط داكشي متول فوق الطبلة .. جيت حدا عمي فاريح حطيت الصينية وقالي تبارك الله عليك ابنتي .. ميغسي بوكو
تفكرت نهار الفرسة وليت حمرة قلت ليه مرحبا بيك ومشت بقا كيشوف فيا كل مرة ندور كنلقاه كيشوف ويضحك ليا ويحرك ليا راسو كاشارة رضى .
درنا كاسكروط ضاحكين ناشطين وحطيت ليهم من بعد الحلوى واتاي وجلسنا كنتجمعو كاملين .. هما اما انا غير كنشوف .. اما مريم جالسة حدا هشام هي وياه وش وش وش غير بيناتهم
جبدو موضوع العرس بقاو كيهضرو وانا ساكتة .. تافقو على مراكش عندهم فيرمة كبيرة فيها كولشي قالو انها هي حسن من القاعة ومع الزينة ديال تريتور كطلع زوينة وفيها دار ولدهم الكبير العرس . المهم قادو امورهم وناضو بغاو يمشيو وصلت معاهم حتى لبرا مشاو ورجعنا تاني للجميع والروينة وطلع وهبط .. عرفت راسي غنمشي لمراكش مايصلاحش ليا نكري شي تكشيطة .. دخلت من تيليفون مريم للانسطا عند وحدة كانت كطلع ليا عندها داكشي هائل وهضرت معاها قلت ليها غنجي نشري شي تكشيطة ومشيت عندها جبدات ليا الهمة والشان داكشي راقي حرت شنو نشري وفالاخير ختاريت وحدة هي اللي بيناتني وزوينة مع المضمة ديالها ورجعت بحالي . وجدنا الشنط والحوايج وجمعنا كولشي باش نمشيو لمراكش وقلت لمريم انا غادي نجلس فأوتيل لاكن مابغاتش كتهزني بختي وتحطني بختي ودرت ليها خاطرها . شدينا طريق لمراكش هزيتهم فطموبيلتي وخوها هي بقا مع هشام سبقونا و تبعت جي بي اس شدينا طريق الفيرمات والفيلات وكانو قصبات واوتيلات فديك الجهة حتى وصلت كان باب كبير والشجر فديك المنطقة .. منطقة خضرا زوينة والطبيعة والهوا صافي غير الطريق ديالها غزالة فوجت فيها . دخلنا للفيرما مكان فيها لا حيوانات لا والو غير فيلا كبيرة بحال دوك الفيلات القدام ديال المغاربة كنت كنشوفهم فالمسلسلات حتى هادي طرازها قديم فيها خصة ديال الماء الوسط والنخل طالع فكل جهة وكبيرة وزادو عليها لمسات جديدة .. كتحمق .. كانت حدا الباب لداخل مساحة كبيرة كلها مزلجة بالحجر مربع لقيت بزاف ديال طموبيلات مستفين تما والدراري الصغار خارجين داخلين وزنزلنا استقبلاتنا جداتو هي اللولة وعاد خرجات سليمة وهشام والكل رحب بينا كتسمع غير مرحبا مرحبا ودخلنا كانت العائلة كبيرة مجموعة تما مخلطين رجال وعيالات وشي بزاقل كيلعبو .. عرفنا هشام على خوه الكبير ومراتو كانو ضريفين بزاف والعائلة كلها ضريفة الصراحة .. فيهم البنات فيهم الشباب وحتى الشيوخ كانو مجلسينهم فواحد الجردة قدها قداش على برا من الجهة لخرى فالضليلة . .استرحنا وجلسنا شوية حشمت بقيت غير كنشوف بعويناتي جاتني فشكل .. دازت حدايا سليمة حطات يدها على كتفي وكتهضري مع شي واحد من لهيه حتى سالات معاه وصارت عندي قالت ليا طلعو نوريكم البيوت ترتاحو مرحبا بيكم
نضنا طلعنا وراتني البيت ديالي انا ومريم شديناه كانو فيه جوج ناموسية بلاكار وبالكون صغير وجلسنا كتنهد ونعاود جاني احساس غريب ماعرفتها فرحة ولا حماس ولا معرفتش . تسارحنا غير ديك النهار وضايفونا وبتنا عندهم لغد ليه دايرين الحنة ديال لعروسة عندهم ماكنتش عارفة دايرين الحنة بوحدها جاب الله فقت بكري كنت باغا ندير حمام انا ومريم وخرجنا مشينا لواحد السبا كلنا انا وهي ومها وختها ديتهم معايا تكسلنا مزيان ودرت مساج على حقو وطريقو رخيت اعصابي حيت كنت متوثرة وصاوبت يدي ورجلي وشعري بخال كما موالفة ولبست واحد جلابة خفيفة زرقا مع البلغة وردت التقاشر رقاق باش يبقاو رجلي نقين والشال ورجعنا للفيلا لقيناهم موجدين ليها الحليب والتمر ودايرين ليها طقوس مغربية على حقها وطريقها تفاجأنا فالدخلة بداك الاستقبال والزغارت وكانت جداتو شادة البلاطو واقفة قدامنا
شربات الحليب وكلات التمر ودزنا موراها حتى حنا درنا يدينا ودخلنا لقينا الهواريات فقلب الفيلا كل وحدة والقلدة ديالها بالقوام ديالهم طاربين الدنيا .. طلعنا العروسة بالزغارت للبيت يلبسوها باش تهبط تحني ولبست معاها واحد القفطان خفيف ديال جوهرة دوغي وشال باج درت مجدول خفيف والبلغة ومشيت نزلت جلست حداها ماتحركش والعائلة مجموعة شي كلاص شي بلدي والناس هاي هاااي . نقشو ليها يديها ورجليها ودازت النقاشة عطيتها يدي نقشات ليا لفوق وصافي داكشي زوين وجلست كنتفرج ونهضر مع مريم حتى طبت بالجلتس ونضت قلت ليها نمشي للبيت ونرجع نحط تيلي يتشارجا .. نضت طالعة بالزربة هازة يدي وماكدخل غير فجاد جاي لابس تيشورط بياض نسحتها فيه تا رجع باللور
رجعت اللور شفت فيدي اللي خسرات هي اللولة وشفت فيه جر تيشورط بان ليا عاف الحنة وبلع ريقو بزز ماهضرش دور راسو جنب ورجع اللور وحتا انا ماديتهاش فيه واخا جاتني الفشلة مشيت للبيت حطيت تيلي ومسحت ديك اليد خليت غير لخرى حتى تيبس ورحع خرج تلاقيتو خارج من وواحد البيت لابس تشورط وحدة وقصتو بكتفي تلفت معاجبوش الحال قالي المرة اللولة نقولو صدفة ودابا؟
شفتو كيتخزز عليا وانا مهز فيه حاجبي قلت ليه شوف نتا فين كتحط رجلك اشمن صدفة ما صدفة !
قالي كحزي لهيه الله يحفضك
ماحملتووووش مابغيتش يهضر معايا بديك الطرقة تفكرت نهار القهوة اللي هددني يخسر ليا وجهي وانا ساكتة ماقدرتش نهضر .. ماحسيتش براسي حتى دفعتو اللور بدي بجوج رديتو لداك البيت وزدحت داك الباب قلت ليه شوف غنقول ليك جوج وغنهبط وكنت غنقول لهم ليك ديك المرة فالقهوى ماخليتيش ليا فرصة
قالي وا مابغيش نسمع .. واش غتسمعي ليا بزز !
قلت ليه داك السيد مابيني وبينو حتى حاجة هادي اللولة .. ثانيا هوا بوليسي وتلاقيت معاه حسابني المسألة قانونية لاكن كان ستدرجني بهاد الطريقة باش يقولي نرجعو ومابغيتش .. جتي فديك اللحضة الليونضت بغيت نمشي بحالي وشدني فيها .. هادشي اللي كاين ودابا ضرب الحيط ولا رمي راسك اللي عندي قلت ليك
بديت نهج سمعت واحد الصوت معكل كيقول جاااد جاااااد
حليت الباب نخرج كنلقا كاميليا فوجي شفتها تصدمت وشافتني جاتها السخفة صفار وجهها وكانت يالاه واصلة يمكن باقا بصاكها .. ضربت فكتفها ومشيت هبطت دخلت لواحد الكوزينة فيها الطياب ماعرفت كي درت دخلت ليها بالتلفة ووقفت كنرد انفاسي وقلبي كيزدح حست بيه غيسكت لاكن الهضرة اللي كانت واحلة ليا فحلقي خرجتها ومشيت بغا يصدق يصدق مابغاش هوا حر
كرهتو كرهتو خيخت منو طلع ليا فصحتي حتى هوا خصوصا فاش شفتو مع الزبل اللي ماحسابش ليا كاع واش باقا .. باشمن صفة جايا واش عرض عليها ولا جايا راسها مافهمتش انا تفقصت كنت غنتف نواضري نحلف ما نعاود نشوف جيهتو ولاكن صافي هادي اللخرة ..ياك كلمة وحدة وقلتها وهحطيت التقل من ضهري الله يجعل البراكة .
خرجت من ديك الكوزينة مسحت وجهي ونيفي ودزت قدام الناس مان كولشي مشطون حطو ليهم لغدا مع الربعة وانا ماعنديش الشهية باغا مطرطق ماقدرتش نجلس ... شافتني سليمة غادية قالت ليا اجي تغداي وشيرات ليا ابتسمت وقلت ليها واخا لاكن طلعت للبيت اللي عطاونا حيدت داك القفطان حسيت براسي عيانة والصدع كيزيد يكمل عليا بغيت الكالم . بقيت بواحد الشورط وديباردو وتكيت فالفراش باغا غير نتسنط لعضامي منسمع حس حتى حاجة .. حسيت براسي لسقةة وحتى بدا يرجع ليا الامل وشفت تعامل عاىلته معايا تيقت راسي لاكن دابا صافي .. الى مندير حجرة على صدري وندير ليك كي دارت لزايد راني بنت لحرام مانسوا حتى بصلة .. الى منخرجك فمرة من حياتي حتى نسا على وجهك راني بنت الخرام مقطرة كرهني فيه بهاد الفعايل ولا منعرف شنو واخا خاصني نلوم راسي حيت اصلا انا وياه سالينا زمان وعادي يدير علاقة .. انا اللي ماشي عادي نجلس نتسنا الاوهام . نعست راسي بزز حيت اصلا منعستش مزيان وبالليل العرس والروينة غتنوض وحتى الخاطر ماعندي .. لاكن والله تا نخرج ونفوج ومنبقاش كناكل فراسي ونتفقص على الهوا .
فيقاتني مريم مستغربة شفت فيها قالت ليا شيماء ! مالكي ناعسة عيت نسول عليك
قلت ليها جاني الوجع طلعت نرتاح شوية ونضت جلست قلت ليها طرقي الباب حيت عريانين وجلسات قالت ليا حتى انا بغيت نتكا شوية.. تكينا رتاحينا حتى سمعنا الداق فالباب ونضت لبست عليا داك القفطان حليت الباب كانت سليمة جايبة النكافة معاها قالت ليها العروسة لداخل دخلي ودخلت هي والنكافات وشي طيافر شفتهم دخلوهم لبيت اخر حدانا ستفتو داكشي تما ودخلو التكاشط والحوايج يلبسو العروسة وجا معاهم الليو غيصاورب ليها المكياج وبداو ليها وانا حداها كنعاونها ووكل مرة دخل سليمة ولا جداتو هازين شي حاجة زربانين ولا يخرجو شي حاجة .. قالت ليا شيماء .. عفاك احبيبة طلعي اجي معايا الى مسالية
حطيت داكشي من يدي درت بلغتي فرجلي وخرج معاها هبطنا لتحت طلعنا شي تخربيق وطلعت دخلتهم لداك البيت كان بيت نعاس وحطو فالارض الطيافر كلهم . قالت ليا سليمة سيري هزي الشنطة ديال لعروسة وسيري ستفي ليها حوايجها مكاينش اللي غادي يقرب حوايجها من غيرك عطاتني الساروت دالبيت قالت ليا فاش تستفي تما الحوايج سدي عليهم باش يبقاو فالامان
خديت الساروت وطلعت جريت الشنطة ودخلت كانت واحد الشنطة فالارض محطوطة وسديت الباب بديت نستف الحوايج وليبوخدوي فالطيافر ونقاد داكشي حتى ساليت وجيت نخرج لقيت كاميليا فالباب باغا دخل قالت ليا لا خليه انا داخلةة وميعات فيا دخلات ودخلت وراها جلست على واحد الكرسيودرت رجل على رجل وتكيت على ركبتي كنتسناها تخرج باش نسد .. شافتني جلست وضحكات قالت ليا غتبقاي جالسة هنا احبيبااا!
ضحكت معاها وقلت ليها حوايج العروسة هنا احبيبة وسوارت عندي خاصني نسد عليهم ... سالي شنو بغيتي ديري باش نسد وراك
قالت ليا كضحك وانا غنبقا نبدل حداك ؟
قلت ليها وانا احبيبة منقدرش نخلي حوايج الغروسة مع شي واحد ... ولا خرجي باليزتك من هنا وتهناي
قالت ليا نو حبيبة هاد البيت ديالي انا وجاد نتي اللي هزي الطيافر ودخليهم لبيت لعروسة حيت ماشي بلاصتهم هادي واصلا كيكونو مع العروسة فبيتها ميمكنش ليك تمنعي شي واحد ميدخلش للبيت وحوايجو محطوطين هنا
قلت ليها مو بب ماشيو هاكاك فهمتي غلط هاد البيت ما ديالك ماديالي هاد البيت ديال ماليهم وهاد الدار كلها عندها ماليها قولي هادشي لمدام سليمة اللي قررتن فيم تحط الطيافر وكن بغات تحطهك فبيت العروسةوكن حطاتهم !
بقينا مني منك بحلاوة اللسان قلت ليها عفاك سربي باش نسد الباب راني مشغولة
قالت ليا ماعندي مندير ليك احبيبة تسناي نلبس ونسالي
وقت برا طلع ليا الدم والباب قدامي محلول بقيت كنتسنا شي واحد يبان حتى شفت سليمة جايا شيربت ليها قلت ليها راخ بغيت نسد الباب مابغاش واحد السيدة تخرج من البيت وانا مزروبة
قالت ليا شكون ؟ وطلات لداخل لقات كاميليا وابتسمت قالت ليها الله يخليك اجي لبسي هنايا حيت البيت فيه الحوايج
قالت ليها كاميليا جاد اللي قالي حطي حوايجك فبيتي اطاطا
قالت ليها سليمة امم واخا ماعليش اجي هاهوا بيت لبسي فيه
ردت كاميليا قالت ليها اصلا قربت نسالي وغنبهط
حارت سليمة قالت ليا واخا تسناي هنا انا جايا ومشات هبطات حتى لشويا تم جاد جاي ملاقي دوك الحجبان دخل وانا مدورة وجهي قاليهاراه الواليدة اللي هضرات معاك اكاميليا ماشي شي واحد اخر
ابتسمت وقالت وي بي عارفة صافي ساليت واش عاد غنجر الباليزة ونخرج ؟
تعصب واصلا طلع معصب يعلم الله اش قالت ليه ساليمة كوراه تفشات عليه . ماهضرت معاها خرج الحوايج كلهم ديالو وديالها للبيت لاخر بقات غير تشوف قاليها خرجي من هنا كملي لهيه .. خرجات كتسوط هازة خنافرها وخرجت سديت الباب طرقتو ومشيت حتى عيطات ليا سليمة قالت ليا اجي حلي ليا ومشيت نحل لقيتها جمعات حوايج ولدها اللي لاح فالبيت لاخر رداتهم ليه للبيت وقالت ليا صافي سدي ماتخلي حتى واحد يدخل
حملوني مسؤولية داك البيت حيت مكاينش اللي يعرف لداكشي من حباب العروسة وبقيت حل سد حل سيد عييت وبغيت حتى انا نلبس حوايجي ونقاد مكياجي كي الناس وقلت لهاديك اللي صاوبات للعروسة تصاوب ليا حتى انا وباش منبقاش خل سد على الطيافر جبت تكشيطتي اللي نلبس وفولاريووصباطي وجينا لداك البيت تكيت صاوبات ليا وجهي وصاوبات ليا الشفار حتى دخل جاد على غفلة هزيت عيني بالزربة نشوف شكون كنت حالة الفولار وشعري محلول شفتو وبالزربة لويت الفولار لاكن مابقاش كيحنزز كان باغي غير يبدل حيت الضلام طاح والعروسة غتهبط مشا الباليزة ديالو هز حوايجو وهي تقول ليا هاديك اللي كتصاوب ليا واش جاد الهواري!
قلت ليها اه علاش
قالت ليا بصصاح!
قلت ليها كملي ليا عفاك باش نهبط مع العروسة وبدات تخدم اما هوت دخل للحمام بدل حوايجو ماشفتش فيه بقيت سادة عيني شميت غير الريحة كتعطعط وسمعت الباب تحل قلت ليها واش خرج
قالت ليا اه خرج ياختي اول مرة ننشوفو مباشرة
قلت ليها راه لا علااقة غا كيبان ليك ماشيو شي حاااجة
قالت ليا : لاا لالااا وا نكونو واقعيين اختي راه جمع حب وتبن
قلت ليها سربي سربي تا هداك يطيحو فيه الناس شو كي داير
سربات ليا شفت وجهي عجبني بزاف ماقويش وزوين زاد بيني جيت كنحمق ولبست تكشيطتي اللي شريت كانت حمرا فواحد اللون حمر نقي كيحمق والتحتية خضرا ملكية مايلة شوية اللزيتي غير شوية ومطروزة كلها بزواق المعلم وتقيلة بالحجز فالدوغي والاخضر جانتي كتسطي كتهبل
لبست معاها صباط عالي وشال بارد لونو وصبغت دفاري بالاحمر ولبست ذهبي الرومي وساعتي وتريحت بانو عيني بحال الى دايرة ليلونتي .. سمعت التعشاق وسديت الباب درت السروت فالبوشيط هوا وتيليفون وخرجت لقيت العروسة والعريس واقفين مخرجينهم شفتها ضحكت ليها وقرحت ليها حسيت براسي غنبكي تمنيت هاد اللحضة ونكون حتى انا عروسة طول عمري وانا كنحلم بيها وتكون ماما وعائلتي حدايا .. كبست الدمعة باش منخسرش كولشي ونزلت معاها كنضحك وعيني مدمعين ناضت الحيحة بالزغاريت والنكافات هزوها فالمعمارية وانا واقفة كنصورها جاني واحد الشعور غريب حسيت بلحمي تشوك عليا وباغا نبكي والرعدة فقلبي .. مع اجواء العرس والناس ودارو ديكور فالجدرة بالتواب فالسقف والخشب جا داكشي غزال كيحمق والاضواء .. لقيت فخونصي حدايا واقف قلت ليه كي جات قالي واو داكشي عندكم بحال الساطير ديال ديزني قلت ليه داكشي عندنا هماوي وبقيت كنضحك .. دفعت تكشيطتي برجلي قصت واحد الراجل شفت فيه قلت ليه سمح ليا كان طويل ومابيهش المهم كبيبر قد هشام لابس كوستيم لقيتو كيشوف فيا اصلا وقلت ليه سمح ليا تبعت العمارية كنسفق بيدي ونضحك حتى جلسات ومشيت للطبلة ديال عائلتها جلست وتلفت لقيت كاميليا جالسة فواحد الطبلة مع الحضور كتشوف فيا بنص عين وجاد حاصل مع التصاور كان بوكوص لابس كوستيم اول مرة فحياتي نشوفو بالكوستيم والقميجة والسمطة والصباط كيشعل مسيري .. مولف السبور ومشيتو سبور وكولشي فيه سبور تبدل مليون فالمية بالكلاص طلع جداب نيت والبنات مزاحمين بتكشاط ميديرو السيلفيات معاه . تنهدت .. وانا مالي اش دا عيني ليه اصلا نشوف قدامي راه خاصني نتزوج الى بغيت نولد ونضبر ليا على شي عريس يتزوجني غير ميكونش نرجسي ويكون ولد الناس اما الزين طلع ليا فراسي ماكليتش معاه طرف دالخبز من نهار عرفتو .
شفت سليمة جايا كتجر التكشيطة نعام الاللة والمشطة والمكياط .. واهانتي على سليمة الانيقة غنسمي عليها سليمة الانيقة اللي شافها يحلف ما موالدة داك العجل يهزها يلعب بيها الباسكيط .. المهم بديت نتفرج وتسرح عيني فالناس كولشي جالس كولشي كيتفرج ويبركك كما انا كنبركك وبقيت ندور عيني حتى بات ليا داك خيينا اللي زطمت عليه جالس وحاضيني حرااام واش حيد عينو عليا ابدا .. قلت مع راسي ومالو .. شنو فيه .. راجل المهم غير يكون ولد الناس .. علاش لا منجربش الى فتح الباب ولاكن هاد المرة والله لا تصاحبت حتى نهار .. بقيت كنشوف وهي تجي واحد البنت ناضت من الطبلة عندهم جايا عرفتها من الضحكة جايا قاصداني سلمات عليا وضحكت معاها قالت ليا بغيت نهضر معاك قلت ليها مرحبا .. جرات كرسي وقالت ليا انا خت عادل .. داك السيد لي لهيه .. ولد عم هشام .. عجبتيه وبغيت نسول ولش مزوجة ولالا
ضحكت معاها قلت ليها لا مامزوجاش قالت ليا بصح ؟ راكي عجبتيه وراه حتى هوا مامزوجش وناوي المعقول ماشي باغي يتفلا
دورت عيني شفت فيه مطولا كان كيشوف فيا وحولت عيني عند جاد سهيت فيه فين ما يزيد خلفة صغيرة توقفو شي بنت ولا ولد بسيلفي و قلت بيني وبين راسي صافي حتى لهنا وحبس .. انا معنديش الوقت نبقا نلعب هاد اللعب وحلفت حلفة قطعية حتى نحط على قلبي حجرة .. هوا حياتو بوحدها وانا حياتي بوحدها كانت تجربة زوينة خرجت منها بأقل الاضرار ودابا جا الوقت نعطي فرصة لراسي من جديد واخا عطيت لنفسي مليون فرصة عمرني نيأس . حتى كنحلم يكون عندي بيبي وعندي اسرة ونعيش حياتي .. علاش نحرم راسي ونعطي احكام مسبقة .. تنهد وابتسمت كأنني كنودع جاد وهاد المرة للابد حيت ماشي ديالي ومنقدرش نعارض المكتوب ..شفت فيها تنهدت وابتسمت قلت ليها وشنو كيدير ؟
قالت ليا عايش فبلجيكا خدام فشركة ديال ايموبيليي .. من ناحية المادية ميسر
قلت ليها ماشي مشكل المادة غير بغيت نعرف شنو كيدير فحياتو .. الى كان ناوي المعقول . مرحبا .. ويلا كان باغي غير يدوز الوقت راه ماعندي حتى نهار خاوي نخصصو ليه
قالت ليا لالالا صافي انا غنرد عليه دابا .. شنو سميتك ؟
قات ليها شيماء
قالت ليا متشرفين سميتي نجوى .
قلت ليها متشرفين .. المهم نهضر معاه ونتعرف عليه هوا الاول .. الى تفاهمنا يكون خير
ها زايد ها زينب ها رانيا ها جاد ها كاميليا .. حتى لامتى نيقا تابعة الخوى الخاوي .. غنشوف هادا الى صدق نتوكل على الله نهز مي ونمشي لبلجيكا نخوي البلاد طلعات ليا فصحتي باللي فيها ونبدلزحتى سميتي الى اقتضى الحال . شفتها كتضهر معاه السيد تبدل بالزربة جبد تيليفون عطاه ليها جابتو ليا قالت ليا كتبي ليا نمرتك يعيط ليك وشديت تيليفون كتبت النمرة ورديت ليها تيليفون ودورت وجهي كنتفرج وكنقول حتى انا غندير عرس بحال هادا ونفرح براسي ونفرح مي .. المهم نظير وليدات اما الى بقيت نفكر واش يصدق ولا مايصدق اصلا حتى واحد مكيصدق الله نربح الذرية ونعيش مع ولادي واخا مايصدقش باهم .. لاكن شفت فعادل مزيان تخيلت حنكي على حنكو واش نقدر نتعاشر معاه جاني عادي ماشي خايب حتى هوا عندو حق من الزين بلا منبقا نحقق فالتفاصيل حيت هما اللي خلاوني اللوؤ اللور .
صونا ليا تيليفون طلعت ليا نمرة جديدة عرفتو هوا وشفت فبلاصتو مالقيتوش ونضت مشيت لداخل بعدت شوية على الصدع وقالي سلام لباس بيخير داك الديسك اللولاني وقالي الى قدرتي تخرجي شوية حدا النافورة نهضرو قلت ليه واخا وقطعت وقفت شفت فكاميليا كانت حاضياني ودرت ليها واحد الضحكة ومشيت خرجت للباب لاخر اللي كندخلو منو كانو غير طموبيلات واقفين والناس قلال غير الدقايفية واقفين عاصرين ووقفت جهة الباب حدا واحد الحيط وحدايا شجرة وجا عندي ضحك معايا ومد ليا يدو سلمت عليه كانت عندو شوية كريشة ولا ماشي مشكل كاع الرجال فلاج ديالو كتكون عندهم بحالها باين بينو وبين الرياضة غير الخير والاحسان .. هادشي مكيهمش اللي كيهم هوا القلب كيفاش داير
طريقتو فالهضرة زوينة مأدب وحتى هوا جاني مرتابك واخا انا مامرتابكاش عارفة راسي شنو باغا وحشمانة شوية حيت اول مرة نهضر معاه .. قلت مع راسي واش يكون شافني شي مرة مع جاد ولا معقلش عليا مع المكياج والفولار .. متأكدة ماعقلش عليا ماعرفنيش كاع واصلا المدة طويلة اللي دازت راه نساو عليا بزاف ديال الناس من عمي فريح وجبد لهيه .
جاني من اللخر قالي انا باغي المعقول باش نجيك نيشان
قلت ليه حتى انا باغا المعقول ترافيك ماعندي مندير بيه
قالي واش كتقراي ولا خدامة ؟
قلت ليه كنت دايرة شي حاجة وبعت كولشي بغيت نبدل
قالي مزيان .. واش تقدري تمشي تعيشي فبلجيكا
قلت ليه الى كانت راحة البال .. والتفاهم راه ماشي مشكل فالبلاد
قالي كاينة .. وشحال عندك فعمرك
قلت 35 سنة
تفاجأ قالي بصح ؟ كان كيحسابني صغيرة .. تكون عندك ديك 23
ضحكت قلت ليه لا شارفة
قالي لا حاشااا .. مادا بيا توصل لمرى لخمسينات وتبقا بحالك
قلت ليها اييوا كل واحد كي خلقو الله .. المهم هوا المعقول دابا
قالي المهم ابنت الناس .. انا راه باغيك .. والى ماخفت نكدب منك نخلاق .. تكون عندك حتى ستين عام
قلت ليه حتى انا ماقلت والو المهم تكون معقول .. داك الدخول ولخروج ماعنديش معاه
قالي شوفي .. مور العرس الوقت اللي يناسبك غنجي للدار وديك الساعة نهضرو على كولشي .. انا مغيخصك معايا حتى خير
قلت ليه الحمد لله مسك عليا الله خاص غير الراجل يكون راجل
قالي المهم غير باش تعرفي شنو كاين وصافي
حنا كنهضرو وهوا يخرج جاد لقاني واقفة معاها الطريقة باش كنهضرو ماشي ديال شي اصدقاء .. وقف علينا شاف فيا وشاف فيه ابتسم ليه عادل قاليه عادل اهلا بالبطل ديالنا
ابتسم ليه جاد وسلم عليه قاليه صافا السي عادل .. عاى سلامتكم .. اش خبارك كولشي مزيان
قلت ليه انا لعادل .. السي عادل .. نخليك دابا حتى لمن بعد
سلم عليا بيدو قالي ان شاء الله تيليفون بيناتنا
قالي جاد بلا ميشوف فيا تكلمي للواليدة حلي ليهم البيت
مشيت ضرت نص دورة وحطيت ودني كنسمع قاليه جاد شفتك اصاحبي دغيا تأقلمتي
قاليه عادل ايوا صافي الله يجعل البركة الواحد كبر صافي يجمع راسو
قاله جاد .ااممم مزيان هي عوال تجمع راسك السي عادل
قاليه عادل على الله تصدق لينا هاد بنت الناس
قاليه جاد مزيان مزيان السي الله يكمل بلخير .. هي صافي تافقتو
قاليه عادل صااافي اقتانعت
حسيت بيهم داخلين وانا نهرب هزيت تكشيطتي مشيت كنجري طلعت حليت عليهم البيت خرجو الطيافر وكان خاصني نوقف عليهم حتى نردهم ونجمعهم ونسد عليهم فالبيت فين كيبدلو العرسان عاد نتهنى لقيت لعروسة بدلات اللبسة ومشات وغيدخلو ليها طيافر تشطنت وبقيت ملهية معاهم ونزلت معاهم حتى دخلوهم ليها بعيساوة ورجعت باش باش ناخد بوشيطة ديالي من البيت وطلعت كنقرقب هازة تكشيطة دخلت بلا منحل بالساروت حيت خليتو محلول ودخلت على غفلة لقيت جاد جالس تما بوحدو على واحد الكرسي متكي على ركابيه كيشوف قدامو وفيدو واحد الخيط كيدور فيه وساهي كيخمم .. شفتو تخلعت هز عينو فيا وماعطلتوش على السهوة ديالو هزيت البوشيطة ديالي بالزربة ونزلت كنجري لحقت على الطيافر بقيت حاضياهم حتى سالاو منهم ورديناهم للبيت كان خاوي مافيه حتى واحد وسديت الباب ميلتها بديت نطوي ونجمع فداكشي ونحط فالباليزة حتى ساليت ووقفت سخفت قاديت السمطة ديالي ووقفت الباليزة باش نخرج نديها للبيت دلعروسة و هوا يدخل جاد على غفلة وسد الباب بالساروت لقاني واقفة قالي صافي قررتي تزوجي ولا كفاش؟
بقيت كنشوف فيه مافهمتش شنو بغا يقصد ومليت من هاد الحركات طلعو ليا فراسي وطلع ليا كولشي فراسي خصوصا هوا تعصبت منو بزاف وكان عزيز عليا مقطر ليا من عيني ودار بلاصتو فقلبي كبيرة لاكن انا ماشي جداد عليا هاد المشاكيل وهاد التخربيق وطالع ليا هادشي فراسي دوزت منو بزاف حتى شبعت من المراهقة وانا نجر حتى شرفت وهاد شغل الافلام مابقاش كينفع معايا.. منكدبش انني دخت فاش دخل عندي لاكن هاد المرة خليت المشاعر جانبا كانني مكنعرفوش وقلت ليه نعام؟؟
قالي سولتك جاوبي ؟
قلت ليه مازال مافهمتش السؤال ديالك وعلاش اصلا طرحتيه ؟ شنو بغيتي دابا؟
قدار يديه فجيابو قالي اياااه ... الناس ولاو كيفكرو بعيد ! .. عجباتك لافامي بغيتي دخلي ليها ؟
ضحكني بقيت غير كنشوف فيه وقلت ليه عرفتي شنو اجاد !... حسن خليني نكن ليك واحد شويييكيكة ديال المعزة بلا ماتخليني نكرهك كي كرهت اللي قبل منك ومابقيتش عاقلة عليه .. حسن ليك ديها فحياتك ماتخليناش نخرجو للعيب بهاد التبرهيش ديالك
هز حاجبو قالي اهاه ولا كيجيك هادشي تبرهيش؟ !!... اه نسيت كيقول المثل اللي فايت بليلة فايتك بحيلة .. نسيت باللي نتي مدرسة فالحياة
ماعرفتش باش نجاوبو وفعلا مابفيتش نخرج معاه للعيب بغيت صورتو تبقا نقية حيت من نهار عرفتو وهوا ماد ليا اليد الحنينة .. مارعفتش علاش تبدل رجع بحال هاكا كيهضر بهاد الطريقة وباغي يجبد الصدع معايا .. مالقيت منقول بقيت غير كنشوف فيه حيت الى جيت نهضر غادي نمرضو بهضرتي ولاكن مابغيتش نوصل لدوك المواصل .. مابغيتش نهز ذكرى خايبة عليه حيت علاقتنا كانت نقية وزوينة وعندنا ذكريات شاهدة عليها شحال من بلاد .. مابغيتش يخيب ضني فيه وقلت ليه سير اجاد خليني عليك فالتيقار واحترمني وخليني نحتارمك .. بدل الساعة باخرى وخليني عليك بعيدة
حسيت بيه كيقلب منين يجبدني لاكن ماعطيتوش فرصة .. قالي مابان ليك غير ولد عمي زعما وسط هاد الكرة الارضية كوولها؟ .. شكون اللي كيتبرهش دابا امم؟
تنهدت ودورت وجهي كنبرد راسي حيت جرحاتني هضرتو وعايرني بالكبر بطريقة فنية من اول مشكل وقع ! ماكنتش متوقعة يقولها وخليتو واقف بغيت ندوز قلت ليه حيد عفاك خليني ندوز ودار رجلو قدامي قالي مالك زربانة ؟
شفت فعينيه باش نجاوبو بان ليا داك جاد اللي سافر معايا وضار معايا وكان غزاال وداكشي اللي خلاني نبغيه ونتعلق بيه .. قلت ليه راك كدير شي حوايج ماخصهمش يدارو .. راه مغنجاوبكش غير خليني نمشي
حيد الساروت قالي مالك ماعجبكش الحال تسمعي الصراحة ؟
رجعت اللور تنهدت قلت ليه راك غيييير كتخربق .. وغيير كتزيد تكرهني فيك وانا مابغاش نكرهك .. الى عندك شي مشكل ولا عقدة سير حلها ... ولزم حدودك معايا ... بلا معيور بلا حشيان الهضرة ..راه فيا مايجاوبك ولاكن درت بحسابو العشرة ماطوعاتنيش نفسيو نرد عليك ... لاكن نتا مادرتي بحساب حتى حاجة
قالي لا نتي درتي بحساب كووولشي .. ومكملاها غادي تزوجي بولد عمي!!.. الواليد عارف شنو داز بيني وبينك .. الوالدة حتى هي عارفة !.. العائلة كاملة شافوك معايا وغادي يعرفوك من بعد شكون ... جاك هادشي عادي !
قلت ليه انا عارفة شنو يصلاح ليا وشنو مايصلاحش ليا ...
ضحك وقالي اااه .. دابا عاديل ولد عمي هوا اللي يصلاح ليه ههه. زوينة هادي والله! ... مي مزيان مزيان .. يالاه تجيو مع بعضياتكم هوا كبير عليك بماعرفت شحال!.. واش سبع سنين ولا عشر .. سنين ! غادي تفاهمو
كنشوف ونقول ليه فخاطري زيد زيد زيد حشي الهضرة باش نزيد نكرهك يماك تا نتا .. قلت ليه وغير بشوية كتهصر معاه ونطلع فيه ونهبط حتى نتا شوف ليك وحدة قدم ولا صغر منك تبرهش نتا وياها ... اما انا كبيرة عليك ماعنديش الوقت نربيك نتا وولادك سمعتي .. باقي ناقصاك تربية اولدي وباقي باغي تنقز وتلعب ومن هضرتك باينة باقي بعلوك ماشي شي واحد ناضج .. كتعايرني بالكبر زعما ؟ ... الحمد لله اللي متزوجش بيك ونسمع هاد الهضرة الناقصة بحالك منك مور الزواج !.. قالك فايتم بليلة فايتك بحيلة .. ااه اولدي فايتاك بحيلة وعمرك كامل دوزتو انا غير فالحيلات وطيحت سناني فيهم وتجي نتا دابا تهضر ؟ راه قلت ليك خليني منخرجش معاك للعيب وكتقلب تجبد الصدع معايا باي طريقة ... وحتى داك ولد عمك بناقص منو يالاه ! مكاينش غير هوا فالدنيا ومن بعد شنو؟ نشوفوك واش غتهنا من هاد الناحية وتقلب ليك على شي حاجة تكبر ليك دماغك حسن ماتبقا تحسب ليا شحال عندي وشحال ماعنديش.. ويالاه تسحر مع البراهش تصبح فاطر!
تزيرت لواحد الدرجة متصورش كنحس بالتشنج فالفك ديالي غنبغي نهضر كطلع البكية وشاداها فعيني وفحلقي بزز .. متوقعتش يعايرني تصدمت فيه بزاف ورجعت اللور ندمت اللي سمحت لراسي ندخل معته فعلاقة ... يكون كيبان كبير ولا ماشي كبير ولا واخا نطون كبيرة عليه بعام واحد مكانش عليا نسمح لراسي ونتساهل مع نفسي ونقبل العلاقة .. بقا فيا الحال وتجرحت كنت ندوز كاع الكلمات والاهانات منردش عليهم الا هادي بالضبط قاستني وبزاف بزاف واكبر غلط ارتكبتو فحياتي هوا انني قبلت على جاد وهوا صغر مني فالسن ... واخا العدد مكيهمش نهائيا مجرد عدد وجسم الانسان يقدر يكبر يقدر يبقا صغير حسب الجسم ديالو وانا غيروشفت راسي بقا صغيرة لا علاقة لسني بسا ضسرت ونسيت انه فيوم من الايام غيبان العدد ونتعاير بيه .صافي هنا وضعت نقطة النهاية لهادشي فمرة ومستحيل نشوف فجاد ولا نعاود نفكر نشوف واحد صغر مني الله يجعلو يكون صغير بشهر .. متأكدة من نفسي علاقة تجمعني بيه للابد مابقا حوار مابقا والو وقلت ليه حيد نخرج
قالي انا برهوش دابا؟ ... ولينا فالمعيور ؟
مابغيتش نجاوبو صافي مابقاش هامني كاع نرد عليه ويقول لي بغا اصلا تقالت اتقل كلمة ضراتني مابقا من بعدها حتى شي كلام نعطيه اهمية براكة مشاعري اللي تجرحات وضني اللي خاب واخا مابغيتوش يخيب لاكن تجاوز الحدود معايا .. جرني من يدي قالي مزال مسالينا ونترت يدي شفت فيه واحد الشوفة مادرتهاش حتى فزايد وقلت ليه ويااااك .. وياااك تعاود تحط عليا يدك ولا صبعك هانا كنقول ليك كتسمع .. عرف حدودك معايا ولا مغيعجبك حال نوريك البسالة والضسارة كي دايرة ... انا ماشي قدك تشطحني كي بغيتي وهانا علمتك
حمرت فيها واحد تحميرة بقا ساكت وحيدت ليه الساروت من يدو شتو بغا يهضرو ورجع سد فمو وحليت الباب بالزعفة خليت السوارت لاسقين تما ومشيت البيت لاخر غير دخلت لييييه وسديت الباب راب على وجهي واحد الشلال ديال دموع .. الندم الندم الندم ولمت راسي على كلشي حيت ضحكت على راسي بالاوهام من جديد وتفكرت الهضرة الي قالي السن غير عدد اخر مرة نهضرو فهادشي .. فين هي اخر مرة فيين .. ماراعاش لمشاعري ولا احتارمني على الاقل لسني اللي شافو دابا كبير عليه وقال حشومة وعيب ومادوزناش قليل .. تألمت وهبطت داك المكياج كامل كحل وبكيت حتى بردت وقلت هادي اخر مرة نبكي فيها سالينا وبردنا وعمني نسمح لشي واحد مرة اخرى يبكيني .
حسيت بالراحة من مور البكا وباش نخفاف اكثر حيدت كولشي عليا والعرس قايم لتحت والشطيح والرديح .. توضيت صليت غسلت وجهي كامل طلبت ربي يهز عليا هاد المحنة ويجردني من المشاعر الى كنت غنبقا حياتي كلها معدبة وارتاحيت وطمأنيت ولبست عاوتاني تكشيطتي وقاديت كولشي من الاول ودرت مكياج خفيف غير راسي بلا رموش بلا والو قاديتو مزيان وجبدت شفاري برسيل حسيت بالراحة هاكا احسن كان قبيلا وجهي تقيل وعيني بحال الى فوق منهم مضلة . رشيت الريحة دورتها عليا وهزيت بوشيطتي ودرت صباطي ونزلت مع الدروج مشيت جلست بلاصتي درت رجل على رجل وحطيت يد على يدو بالتقالة كنتفرج فالناس كيشطحو .. شفت فعاديل حاضيني تفكرت المعقول ديالو وبلوكيت نمرتو فمرة بلا ميحس وحطيت تيليفون كنشوف فمرين كيشطحوها وسهيت فيها فرحت ليها شحال فرحانة مسكينة تستاهل كل خير الله يكمل عليها ياربي . تنهدت بابتسامة دورت وجهي بان ليا جاد جالس فواحد الطبلة اللور جهة لابيسين هوا واللي قدو وكيشووةف فيا بدوك العينين واخا كنشوف فيه مكيحردش عينيه لاكن قلبت وجهي خليتو يبقا يشوف حتى يصبح الحال .. من هاد الحفلة عمرني نشوف وجهه ولا يشوف وجهي الطريقة اللي تجمعني بيه نقكع مها انا كاع
تحط العشا وكليت شوية وجمعت انا وفخونصوا حيت هوا اللي عندو مع الجموع وكيضحكني نسيت بيه الهم والوجع وماعاودتش شفت فجاد ابدا حتى لبسات اللبسة الكسوة البيضاء ونزلات مع ديك الموسيقة تأثرت ووقفت بدات مها وباها كيبكيو تأثرو وحتى هي بكات مسكينة وقطعات الحلوى وهزات الورد تلوحوه وانا جالسة فبلاصتي كنشوف بابتسامة شكون تشدو والكل متحمس وراها كيضحكو وكاع البنات ناضو بقاو الرجال والشباب كيشوفو فيا قالو هادي مالها ماناضتش زعما قافزة ! .. بدات تحسب وتعد وهزات يديها ترميه وحبسات ضارت عندهم كضحك قالت ليه سمحو ليا حتى شفتها جايا كتجر لاغوب وهازة الورد حتى لعندي عطاتو ليا فيدي تصدمت بقيت غير كنشوف وعنقاتني تأثرنا بجوج وااكل كيسفق . شديت الورد نخليه تذكار وعلى الله ربي يسهل عليا ونتزوج حتى انا وندير وليدات
خرجات ونضنا كاملين طلعت لفوق هبطت الباليزة ديالها اللي تاخد للاوتيل عطيتها اهشام داها وجريت لخرى لطموبيلتي قالت ليا مت جاد فين غادية قلت ليه الله يجعل البراكة غادي نمشي بحالي ..
قالت ليت علاش والليل فين غتمشي قلت ليها صافي خصني نرجع عندي تما شي شغل .. فاش يبغيو لافامي دمريم يجيو نعاود نرجع عندهم ماشي مشكل
عيات فيا نجلس غير حتى للصباح مابغيتش صافي قررت انها اخر مرة يشوفوني ولا نشوفهم .
مشيت لطموبيلتي بسن الطموبيلات باقا بتكشيطتي يالاه جيت نركب جرني جاد من يدي قالي اجي نهضر معاك
نترت يدي تعصبت قلت ليه راه هضرت معاك .. اخر مرة تشد فيا ولا تقيسني شنو بغيتي مني عطيني التيساع اسيدي قيلني عليك
قالي جوج كلمات نقولهم ليك وصافي
تعصبت خرجت عيني قلت ليه ماتقوليش بعد مني ... اشنو بيني وبينك باش تقوليا اسيدي واش ضحكنا معاك بغيتي تهجرو لينا
شد ليا يدي صحة حدا تلطموبيل قالي ياك !.. صافي ضربتي كولشيي فالزيرو هادا هوا كنبغيك نقتل على ودك
قلت ليه ااه نقتل كن كنتي راجل ونص ماشي دري صغير
قالي علاش انا مكمتقلقش فاش كتبداي تقولي بحال هاد الهضرة
قلت ليه حيت باقي صغير .. فهمتي .. مغتفهم هاد الهضرة حتى تولي قدي وضرب داكشي اللي ضربت انا .. واحيد يدك خليني نمشي فحالي
بقا كيشوف فيا مطولا وجرني بقوة بلا منحس عنقني وزير ليا على عضامي لاكن بقدر ما حسيت بديك التعنيقة بقدر ما كرهتها .. مابغيتش نشم ريحو ولا نقيسو وخا خشاني فصدرو سمعت ضقات قلبو لاكن كبحت المشاعر ديالي حيت حلفت عليهم حتى نقتلهم ومغاديش يتغلبو عليا
بعدت عليه كان كيشوف فيت بحزن وأسف شديد قالي سمحي ليا على ديك الهضرة وانا نضحك ... السهم فاش كيخرج من القوس مكيرجعش . قلت ليه عملتك وقلت ليك غتخرج العيب .. وهانتا خرجتيه ...دابا عفاك سمح ليا نتا وخليني نعيش حياتي
عاود جرني قالي غلطت الصراحة ماكانش عليا كان قال نقول ليك بحال هاكاك
ضحكت وقلت ليه نتا ماكدبتيش .. بلعكس فيقتيني من القلبة والاوهام ودرتي فيا خير كبير .. راه عندك ااحق راني كبيرة .. وساليت من دوران والتزنديق كنقاب نستاقر وندير ولادي .. ونتا بصحتك خليت ليك كولشي
كلاه الندم بقا كيعتاذر وباش نهي هاد التخربيق فمرا قلت ليه صافي المسامحة ماكاين حتى مشكل يالاه خليتي نمشي بحالي عفاك
قالي اا ماسامحنينيش من قلبك
ضحكت وقلت ليه سامحتك قدام االه وصافي دابا خليني نمشي بحالي
زيد على كتافي قالي شيماااء
حيدت ليه يديه قلت ليه مكاين لا شيماء لا والو كتعدب راسك وانا قلت ليك صافي المسامحة كل واحد يشوف حياتو .. شوف حياتك اولدي الله يسهل عليك وخليني نشوف حياتي مع اللي قدي وكل واحد يلبس قدو .. قالك لبس قدك يواتيك عرفتيها !
عيت بالهضرة والشروحات وحتى ودنيا طابو بالهضرة و الخاطر مابقاش عندي وهاد القصص طلعو ليا فصحتي .. مابغيتش نزيد نهضر وبقا كيشوف فيا مطولا قالي اخر هضرة عندك؟
حليت الباب بلا مبالات حيت اصلا مابقاتش عندي الرغبة فهادشي كامل ويستحيل ناخد واحد صغر مني يكون كما بغا يكون وطلعت فموبيل سديت عليا وهبطت الزاج شفت فيه عيانة باغا غير نمشي بحالي قلت ليه اخر هضرة عندي .. بلا ماتحاول اجاد
قالي فكري مزيان اشيماء ماتزريش غتندمي
ضحكت واحد الضحكة مع العيا خرجتها بزز وبقيت كنشوف قدامي ونركب السمطة قلت ليه ماتخفاش عليا ... اكتسبت المناعة
بقا كيشوف فيا قالي فكري مزيان
قلت ليه قرار نهائي .. لا رجعة فيه .. شووف اجاد .. نتا واحد مشهور حياتك ماغاديش تناسب معايا ... وانا ونتا مغاديش نتفاهمو وبلا مندخلو فمشاكيل اخرى حنا فغنى عنها
قالي مكاين تا مشكل نتي اللي كتفكري فالمشاكيل
تنهدت ماعرفتش كيفاش نشرح ليه وقلت ليه شوف .. انا ونتا .. مستحيل نكون مع بعض .. مستحيل لا معاك لا مع غيرك .. لو كنتي كبر مني .. ولا قد نقدرو نديرو شي حاجة مي دابا نو ... امبوسيبل لا معاك لا مع غيرك
قالي هاد الهشرة عاد بانت ليك فاش كنا بزوج كنتي مرتاحة
بقيت ساكتة كنشوف قدامي مافيا اللي يدخل فشي هضرة ماعندها حتى نتيجة وقلت ليه .. كانت فكرة ... وفكرة غالطة تصححات ليا ووضاحت الامور دابا
قالي الرسول صلى عليه وسلم تزوج بأمنا خديجة وهي عندها ربعين وكانت عندو هوا 25 سنة
ضحكني بقيت غير كنشوف قلت ليه واش كتقارنو راسكم بالرسول(ص) !!! ..
قالي لا حاشا ولاكن وريتك العبرة فهادشي
قاطعتو قلت ليه العبرة هي اللي كنتي تاخد قبل ماتبدا تهضر بزاف ... واش عمرو عايرها ؟ ولا قاليها نتي خاصك واحد قدك ولا منعرف شنو ؟؟؟ تنهدت وعصبني ديماريت الطموبيل قلت ليع سير بعد مني الله يعطيك الستر سير ماتبقاوش تشدو من الدين غير داكشي اللي مسلككم !.. سير ونساني عليك راه واخا تشق السما وينزل جاد اخر ماغاديش نرجع ليك وسير تعلم فالدين داكشي اللي تبغيه لراسك وتبغيه لغيرك وبقا تكمل لآية حتى للخر . بسلامة عليك
خرجت من تما خليتو واقف ومشيت بحالي والتنهيدة كترعد فصدري .. وحاطة قدام عيني طريق اللي نسلك واللي تناسبني ماشي اللي تناسب قلبي وصافي ونقطة ورجع السطر.
درت فيلم فالطموبيل كوميدي تونست بيه وتيليفون كيصوني ليا .. جاوبت كنسول شكون قالي عادل !
ماعجبتيش الحال يعيط ليا فهاد الوقت حيت ماشي ديال تعياط وماشي بلان كااع .. كن كنت ناعسة دابا! . الستة دصباح وهوا كيعيط باش يقولي واش بلوكيتي النمرة ! ماقدرش يصبر حتى يتوسط النهار زعما ... قلة الاداب كي دايرة . قلت ليه واهادا ماشي وقت نعيط فيه ونسولو بحال هاد الاسئلة ..ماعرفتي بنادم يكون ناعس ولا عيان والستة دصباح هادي !! ... خلعتني باتصالك
قالي سمحي ليا الى خلعتك غير بغيت نسول فيك واش باقا فمراكش ولا مشيتي حيت شفتك ركبتي فطموبيل
ضحكني ..بغا يقول زعما شفتك كتهضري مع جاد ودخلني هاد الدخلة وماقدرش يصبر دضرو راسو .. ولاكن ره بصح خلعني اتصالو على الصباح قلت ياك لاباس اش وقع شكون كيعيط فهاد الوقت . قلت ليه المهم دابا الصباح هادا حتى يفيق الانسان عاد يعرف يهضر .قالي اوكي سمحي ليا الى قلقتك
قلت ليه مكاين مشكل وقطعت رجعت للفيلم ديالي والنعاس قاتلني .. وقفت فسطاسيون فالطريق سخرت واحد جابليا كافي نواغ باش نقدر نكمل الطريق ومشيت كنشربها فالطريق حتى قربت نوصل كانت تمنية دالصباح تاصلت بسعاد قلت ليها قريبة نوصل وجدي ليا حوايجي نجي ندوش دغيا باش نرتاح ومشيت وصلت للفيلا سخفانة هازة تكشيطة طلعت ديريكت دوشت غسلت كولشي عليا ولبست بيجامتي وطحت نعست نرتاح يالاه نستقبل ماما اللي غتجي من العمرة بنفس جديد
فديت داك النعاس والتعب والارهاق ديال الضياف والعرس وجري من هنا جري من لهيه .. زيد عليها الدرس اللي خديت من عند جاد بدل نضرتي للحياة بشكل كبير خلاني منشوفش تحت مني وديما نهز عيني لفوق ونشوف قدي وكبر مني .. هاد الهضرة لو تقالت ليا من عند شي شخص اخر كنت نتقبلها واخا نتقلق ماعليش . لاكن من عاد جاد !!... وزعما هضرنا فهادشي وقالي مكيهمنيش العمر هه... اااودي عليك اشيماء نتي والاوهام ديالك ... تقيقتي راسك وافيقي دابا هانتي سمعتيها بودنيك باش تعرفي باللي العدد مهم ومهم جدا فهاد العصر ومع هاد القوم .. هانتي عطاتك الايام كولشي .. عطاتك الفلوس .. الزين والحياة والهم والغم والمشاكيل ... ايوا اش بغيتي كتر من هادشي؟ .. هاهيا كتعطيك من جهة وتنقص ليك من جهة باش تعرفي باللي عمرها تعطيك كولشي وماسميتهاش دنيا غير هاكاك .. راه دااانيا اسفل سافلين ونتي كتجري فيها باغا كولشي .. هانتي غادية والعمر كينقص .. كتحلمي بالاولاد وغتحماقي عليهم .. لاكن واش الحياة غادي تعطيك حتى الاولاد .. شوفي وفكري مزيان راه الدنيا هادي وكما نتي محتاجة بيبي شحال من بيبي محتاج ام .
جاتني فكرة نتبنى شي بيبي وقلت حتى نفكر مزيان ونشوف واش نقدر .. ونتشاورك مع راسي عاد نزعم واخا تمنيت نكون ام من كل اعماق قلبي وهاد الموضوع كيمرضني .. خايفة يفوت عليا لفوت ومنولدش .. وانا ماشي شي وحدة اللي عندها زايد ناقص .. بغيت نولد وعندي رغبة جياشة اتجاه الامومة . كنشوف شي بيبي ولا شي مرى جارة ولدها كنقول سعداتها .. مابقا هامني لا زواج لا والو بغيت الراجل فقط على قبل الاولاد .. ناخد منو شي بنت ولا ولد ونقلب الضورة نعيش بنتي اميرة ولا ولدي امير الامراء .. نخوي انا وياه البلاد ونمشيو .. نعيشو فسنغافور كااع .. مالها تغلبني .. اصلا ديك البلاد عجباتني نشري فيها شي برطة وندير فيها مستقبلي علاش لا .. لاش غيصالحو هاد الفلوس نبقا حاطاهم نشوف فيهم .
تنهدت من اعماق قلبي قلت نخرج نشوف بشرى نفضفض عليها شوية هي اللي كتفهمني ودرت معاها نتلاقاو فشي كافي ومشيت جلست انا وياها كنهضرو ونتجمعو قلت ليها على الهضرة اللي بيني وبين جاد وولد عمو عاودت ليها وخويت قلبي وبقات غير كتشوف فيا مصدونة قالت ليا وهانتي على السيهم جاد ! ماحسابنيش غيخرج منو هادشي كامل
قلت ليها جاب الله مادرت فطاجين مايتحرق يعايرني بيها من بعد
قالت ليا والله ماعرفت منقول ليك ولاكن راه الصراحة برهوش ... انا كان كيجيني بعقلو ومتقل ومربي .. كيهضر ويحسب اش كيقول زعما .. ويتسنط مزيان عاد يهضر .. كنت كنشوفو فدوك اللقائات ديال الرياضة وكفاش كيهضر قلت هنا نبات ... وكيتختار زعما غير الكلمات الراقية فالهضرة كتبان عليه حكيم فكلامو .. ايوا فاللخر قولي داكشي غير زواق وصافي !
قلت ليها يعاود راسو .. مادام قال هاد الهضرة الا وعندو ديك التفكير ديال كبيرة عليا وداكشي لاخر .. مالقا زعما باش يعاير غير بهاد النقطة
قالت ليا هوا الصراحة ماشي عيب يكون صغر منك ولالا ... ولاكن العيب فالعقلية .. وياحسرة كابر فبلجيكا
قلت ليها يكون كابر حتى فالهند راه عروقو مغربية مخري فمخو بحالو بحال غيرو .. انا منكدبش عليك طلعو ليا فصحتي ضربت على المغاربة فمرة .. الى بان شي واحد تركي ولا لبناني ولا كاوري حسن كاع .. هاهيا مريم شوفي كي سلمات وتزوجات وعقليتها نقية ونية
قالت ليا ومالكي محروقة على الزواج ديري بحالي وديري بناقص ويالاه نمشي انا ونتي نسافرو منخليو حتى قنت
قلت ليها داكشي كيطلع فالراس ابشرى .. انا راني مرى اصاحبتي راه عندي غريزة حتى انا عنداك يحساب ليك ثلاجة غير حيت مرى ماعندي احساس!.. الحيوانات ومكتصبرش بقا غير بنادم اللي كيربط داكشي بالدماغ ويتخيل.. دارها فيا الله ختى انا باغا نجرب وندوق ونتمتع ماشي عايشة بحال الى معايشاش
بشرى وداكشي اكثر حاجة مطلع فراس دابا تجربي وتشوفي
قلت ليها واختي نتي عايشة حياتك مااع مامسوقا للعالم من ونتي عندك عشرين عام .. اما انا راه صايمة ثلاتين عام هادي باغا نفطر .. نتي كتنوعي وتبدلي كي بغيتي وانا!!! منشوف مانتشاف
قالت ليا كضحك .. واديك الساعة كن شديتي جاد عيشي معاه تبرعي وقليه بسلامة .قلت ليها طرات ليا مع زايد وعايرني بيها ندمني على ديك الحلوة عمرني نعاود .. وانا اصلا باغا لولاد منقدرش نتخيل راسي بلا ولاد
قالت ليا انا بعدا منقدرش نربي ولا نخرق .. ماعندي ماندير بيهم لا هما لا باهم
قلت ليها وحيت عايشة لافي اللي معجبكش كتسوسيه .. فكري ليا انا وشنو باغا ماشي نتي وشنو باغا
قالت ليا الاللة الله يسهل عليك واش انا كرهت ليك ... كن عندي شي خويا مسكد كن جريتو من عنقو وجبتو ليك ولاكن نتي قلتي مابغيتيش صغر منك
هزيت صبعي قلت ليها لالالالالا اختي منديهش صغر مني واخا نبور . يبقا ديما يشوفني كبيرة عليه وحتى الى ماقالهاش غيحس بيها واخا تكوني بحال المونيكة .. نووو نونو جامي دلافي
كنت كنهضر مع بشرى وصونا ليا جاد .. عرفت نمرتو واخا كنت بدلتها عاود صونا حيت من نهار جيت من مراكش وهوا كل نهار كيصوني ليا غيكون خدا نمرتي الجديدة من عند مو وكنقطع عليه وسيفط مسج مخلط عربية وفرونسي كيعتاذر قريتو على بشرى قالي فيه سمحي ليا وشنو ندير باش تسمحي ليا وديك الهضرة خرجات من فمي فلحضة غضب وندمت عليها ومابغيتش نخسرك اشيماء ومرضت بسبب هادشي راه معالم بيا غا الله خلينا غير نهضرو ماشي تقطعي كلشي على الاقل خلينا بحال الاول وبلا بلا بلا قلت لبشرى شنو بغا هادا دابا مسيفط كيعتاذر وقلت ليه اللع يسامح مزال لاسق مابغاش يتفك
قالت ليا صافي جاوبيه قولي ليه هاحنا فغولاسيون ليبغ بلا مدير ليا الطيارة
قلت ليها مابغيت لا غولاسيون ليبغ لا زمر انا الى بان ليا شي واحد فيه الضو غنتزوج اشمن غولاسيون ليبغ ولا امي واش انا عندي عشرين عام نبقا نتكرطط انا وياه ويدير ليا مسمار جحا ما انا فعلاقة جدية ما انا حرة نضبر على على راسي.. صافي مابقا بيني وبينو والو ومغاديش نرجعو علاش نتقل راسي بالتخربيق . غيبكي شوية وينسا كما بكيت انا حتى طبت على زايد وتبخر مابقيتش كاع عاقلة عليه
قالت ليا واش عاد سيفك ليك مسج قلت ليها لا سيفطو شي ثلت ايام هادي وبلوكيت نمرتو تا هوا ودخل بنمرة اخرى بيها سيفط هاد المسج .. انا باغا نخرجو من حياتي صافي اختي مغاديش نتزوج بيه وصغر مني صافي الله يعاونو
بقات بشرى كتشوف فيا قالت ليا وابااز ليك اختي انا عطيه ليا ندوز معاه غي شي ليلة حمرا وخضرا وانا نغتاصبو ماشي هوا
ضحكاتني قلت ليها يغتاصبط نتي واللي كتعرفي كاملين هاداك ..
قالت ليا والله تا حمقة واش غتخلي واحد بحالو وتشمي تقلبي على واحد اخر محشر
قلت ليها مابقاتش فكي داير ولا زوين ولا خايب ولا بطل .. بطل راه بطل على راسو اش غيعطيني بديك البطولة ديالو .. اش خداو هادوك اللي تصاحب معاهم ! شوفوني انا مع جاد الهواري!... من بعد ؟ شنو؟ شنو ستافدو العياقة والنخوة والتكبر زعما انا مع فلاان داها فيا!. مابغاش تفهميني ابشرى ختي راه قلت ليك صغر مني .. خاطري مابقاتش عاطياني نشوف فواحد صغر مني نهائيا .. هوا غيبان ليا برهوش وانا غنحس بيه كيشوفني بحال مو
قالت ليا لواااه لوااه لوااه اللي سمعك يقول كبيرة عليه بخمسين عام ! .. زدتي فيه راه ربع سنين ولا خمس سنين ماتزيديش فيه
قلت ليها لا .. منقدرش صافي جربت فشلات التجربة بلا متحاولي تقنعيني مغاديش ننقدر .. داابا يعيا ويضور ولا يطيح فشي وحدة تنسيه كاع خليقتي .. وحتى لهضرة طلعات ليا فصحتي نبقا نسمع ديك كبر منو ماكبر منو الله بلاش . ماجاتش
قالت ليا وعادل شنو درتي معاه . قلت ليها عاد عاود عيط ليا من واحد النمرة بغا يعرف علاش درت هاكاك قلت ليه شنو كاين نيشان .. قلت ليه انا خي فلانة فرتلانة وكنت مع جاد سمح ليا حقاا ما حقا ماديت ماجبت فديك ولد عمو ماحسابش ليا كتجيه منقدرش
قالت ليا وشنو قاليك ؟ كي جاتو؟
قالت ليها جاتو عادي وقاليا راه شفتك كتهضري معاه وانا معنديش مشكل ومكيهمني حتى واحد صافي شفتك بغيتك وغنتزوجو نمشيو لبلجيكا المهم هوا متكونيش كتبغيه ولا شي حاجة
هزات حاجبها فيا وقالت ليا وشنو قلت ليه بسلامتك
قلت ليها صافي قلت ليه مابقيتش كنبغيه ولاكن منقدرش ندخل لعائلة كانو عارفيني مع واحد من عندهم ومشيت لولد عمو
هزات يدها فيا وقالت ليا وااانوضي براكة من الفهامة نقطع ييدي تا باقا كتبغيه وتموتي على خراه
قلت ليها اه راه بصح باقا كنبغيه ! ولاكن مكافيش وانا كندير مجهود نساه .. ولفت لمحاين ابشرى غير تهناي من جيهتي راه الى قلت ليك مغنرجع صايي مغنرجعش نبغيه ولا نكروه .. واها دوزت انا وياه طون حرور وكيبقا داكشي فالذاكرة لاكن الحمد لله بعدا راه خرجت من واحد الغمة كنت فيها وبغيت نخلي الصورة مزيانة بيني وبينو الى تفكرتو نذكرو بالخير
قالت ليا ايوا وفاش صفيتيها نتي وعادل؟
قلت ليها قطعت لياس بحال جاد .. قلت ليه سمح ليا منقدرش واخا نتا تقدر انا منقدرش وسديت عليه تا هوا .. وباقي مصدع ليا راسي كيعيط ويحاول تاهوا ... اودي يمشيو بجوج يعطيني تيساع انا كيبان ليا غادي تجي مي غدا من العمرة ندير ليها صدقة ونهزها نمشيو انا وياها لشي بلاد اخرى نعيشو فيها ونهني مخي .. بيني وبينك طلع ليا المغرب فراسي كرهتو مابقيتش مرتاحة هنا ومابقات حتى حاجة شاداني هنايا
يتبع...
التنقل بين الأجزاء