أنا وبعدي الطوفان الجزء 16

ااودي يا ليام .. واتي مااالكي صكعة .. كما معاك ق ** كنتي دايرة زوين .. درنا معاك عقلنا ماعقلتيش علينا .. وفين عمرك تعقلي علينا ديما نتي تجري وحنا موراك شحفتينا .

رجعت بحالي للدار وتيليفون كيفيبري فجيبي كنقول مع راسي واش هادو ماكيعياوش!!.. ها جاد ها زمر.. ماحدهم لاسقين وانا مزيد نبرد ! واش بنت ليهم غير انا فالدنيا ..

وصلت للدار مع الدخلة سمعت الصونيت فالباب مشات سعاد حلات وبقيت واقفة كنشوف من لداخل شكون غيكون كيصوني شفتها مخرجة راسها كتهضر .. واحد اللحضة بانت ليا مدخلة بوكي دفلوغ كبر منها فالاحمر ملفوف فبابي دوغير وانا نخرج بالزربة كنت لابسة طالون وكسوة موردة باليدين قلت ليها حبسي حبسي عيطي ليه يوقف ومشيت للباب رديناه من طموبيلو كانو فيها طبعات ديال شركة دالورد رجع حتى لعندي بابتسامة قالي مدام

قلت ليه تسنا بلاتي وخليت سعاد هازة داك الورد كله فيدها وبدت نقبل بصبعاني على لكارط جبدتها من الوسط قريتها كان مكتوب فيها على الاقل حسبيني بحال خوك

قلت هادا ميكون غير جاد ولاكن كيفاش زعما تنازل كاع رجع باغي يولي اخ ! بقيت كنشوف فديك الكارط مطولا ورديتها وسط الورد وهزيتو عطيتو ليه قلت ليه دير ليه غيفوزي .

شدو بقا كيشوف فيا قالي واش متأكدة امدام قلت ليه اه .. ردو ليهم ومشا طلع رجع داك الورد لديك طموبيل .. كنت باغا نشدو ندخلو نرميه بحال شكل الافلام لاكن غنتسما قبلتو سوا لحتو ولا خليتو وفضلت نرد كجواب لمولاه باش طلع ليه بللي مرفوض ونقطع ليه الامل فمرة ميعاودش يسيفط شي حاجة ولا يقول راه باغا غير تجرجرني ولا باقا كتبغيني وكدير ليا هاد المسرحيات وانا اصلا ساليت مع المسرحيات عشت منهم مليون مسرحية من نهار عقلت على راسي . سديت الباب ودخلت قلت لسعاد نرة اخرى الى جا الورد من شي واحد بحال هاكا ماتقبليهش خلي ليهم واخا يحطوه الباب خليه تما مدخليهش

قالت ليا وابقااا فيا داك الورد كن غير خليتين ندخلو عجبني .. ولا عطيه ليا حمقني

قلت ليها راه هضرت معاك اسعاد .. بغيتي الورد ها الجردة سيري شمشمي فالورد حتى ينبت ليك الورد فنيفك

تهنيت من كحل الراس كامل ومايجي منو حسيت براسي كبرت عشرين عام من خلال التجارب اللي دوزت واللي عشت واللي شفت .. قلت مع راسي علاش منكتبش قصتي ونشارك معاها الناس ربما يستافدو من تجاربي ومن حياتي وشنو عشت .. ومنها نيت نشوف ارائهم فهادشي ونشوف كل واحد وطريقته فالتفكير .. نشوف واش الغلط فيا ولا حتى حنا مسقيين بمغرفة وحدة .. قلت علاش منكتبهاش .. جلست فالبالكون ديالي خديت بوز نرتاح فيه من التفكير ومن الحركة ومن ونرتاح شوية .. لبست عليا واحد البينوار طويل كحل وكنت لابسة كولون تحت الركبة تحت منو هوا ديباردو ودرت البينوار شفاف غير من الفوق يديه واسعين وقصار شوية حليت شعري باصابعي قلبتو للجنب وكانت عندي اريكة رمادية كيعجبني نجلس فيها رطبة مريحة عندها المخاد .. وجيت كنطل فالواجهة اللورانية ديال الفيلا على الكولف والخضورية والغابة كناخد راحتي وانا جالسة تما ولا كنعوم فبيسين حيت مامقابل معايا حتى واحد يبقا حاضيني .. فاش كنتكا فالبالكون ديالي كنبقا نتفرج فالناس لهييييه وسط ديك الارض اللي كلها خضرا كيلعبو الكولف وكنبقا مستمعة بمشاهدتهم ولا بناس راكبين دوك السيارات الصغورين كيدورو تما . الطبيعة لهوا نقي تكيت على جنبي طلق رجلي والبانطوفة فيهم كندوح بيها وبقيت نتأمل ونراجع حياتي مع كاس ديال كافي كخيم كيجيبو ليا ديما عبد الله من ديك الكافي اللي فالكولف حيت مكتعرفش سعاد تصاوبو ومكيصدق لينا بحالهم .. كل جمعة كنتدكر فيها ذكرى مرت عليا وخلات اثر باش نبقا عاقلة عليها .. تنهدت وابتسمت حيت كان كيحسابني عمرني نكبر .. عمرني نوصل لهاد اللاج .. كان كيجيني بعيد بزاف وعمرني تخيلت راسي وانا كبير زعما ... كنت فكل عيد ميلاد اللي عمرني مادرتو اصلا كنحس بطفلة عندي لداخل .. ماحدي كنكبرز وديم الطفلة كتزيد تبان اكثر .. كنزيد نفتاقد للحنان .. لحضن الام .. حضن الاب .. شوية ديال الفشوش .. ماكرهتش .. كبرت لاكن مشاعر الطفلة عندي فقلبي وكنحس بيها وسط مني محتاجة شي حاجة ... كتغضب دغيا .. كتقلق دغيا .. كتغير من اشياء تافهة .. وكأنني انسان فقلب منه انسان والعقل كيحاول يتحكم فيه .. فاش كنبكي كنحس براسي طفلة صغيرة .. كنحس براسي محتاجة للحماية .. كنحاول نحمي نفسي وندللها حيت كنحس براسي بنت راسي .. كيبقا فيا راسي وكنتأم فاش كتذكر شي ذكرى كتأثر عليا وانا صغيرة .. كنقول علاش يطرا ليا ويطرا ليا .. كنت نية .. كنحشم .. كنحدر الراس .. كنت زوينة بزاف .. وكانت فيا واحد البرائة .. كنتفكر راسي كيعجبني الحال وكنعشق نفسي ونحبها ، وكنشفق عليها فاش كتجي بين عيني شي ذكرى خايبة . ابتسمت وجبدت تيليفوني كنقلب بين تصاور لقيت واحد الصورة ليا وانا صغيرة فالعيد لكبير لابسة واحد السروال قصير وواحد تيشورط عادين وشعري مدفور كرينات من الجناب كنت يالته فقت من النعاس وشعري شوية مخبل .. حناكي حومر فيهم دوارة دوارة وحدة هنا وحدة هنا و فمي حمر وكنشوف فالكامرة حشمانة غير بالجنب وشادة فصبعي ومكمشة .. كنتي زوينة اية فالجمال .. التقطت هاد الصورةومن البوم الصور هي و وحدة اخرى ومشيت قلبت عليها فتيليفون جبدتها و بقيت كنشوف فيها كنت كنقرا فالباك... المراهقة وما ادراك ما المراهقة .. كنت كنتسلف انا وصاحاباتي الحوايج وهنا بدات شيماء كتخرج الشواري .. كنت مصورة انا وطبقة ديال البنات حدا واحد الدروج ديال واحد البنكة كانت حدا الليسي وجالسة لوسط لابسة واحد سروال دجين واسع من لتحت كان موضة ديك الساعة ولابسة معاه واحد ديباردور كحل وشعري كاري مطلوق وصندالة دصابع والبنات ضايرين بيا .. كنت انا هي الكل فالكل فين ماكان شي تيتيز كيجي عندي وكانو البنات كيتصاحبو معايا على قبل البلانات والتيتيز... اللي عجبها شي دري كتلقاني كنعرفه .. كنت بحال المقدم ومجبدة مع راسي .. ولاكن الى شفتيني تقول هادي بريئة من كل الاتهامات ..كنت كندير سنة سبعة ديال الصحاب فدقة وحدة واحد معارف لاخر .. كنت خلاطة من درجة مولينيكس .. كانو كاملين عندي فوق الشواية طايحين فيا مساكن ولاكن انا كنت طايحة فواحد فيهم .. كانت سميتو رضوان كان تيتيز ديك الساعة طياح ديال بصح .. ماعرفتش فين يكون شدها تاهو

. لاكن كنت دافعة عليه كبير حيت كان حاس براسو .. كنت ديك الساعة فاش كان رضوان مصاحبة مع خمسة ديال الدراري .. كان تخلاط كثييير كانو بزاف دالبنان والدراري كيخلطو لاكن كانو كيديرو 3 ولا جوج صافي .. ماشي بحالي انا قلبي كان كبير كان فيه تيساع .. كان واحد فيهم سميتو عادل حتى هوا .. كانت عندو كافي كان ملعق كنت دايراه غير لاقهوة نجمع فيها انا وصحاباتي فابور كانت هاديك هي بلاصتنا واحسن قهوة فداك القنت . والثاني سميتو نزار كان عندو بركمان كان كيعجبني نركب عليه ويطوطح بيا فعين الذياب .. كنت دينا كنقوب ليه مكيعجبنيشزندزر فالحي يالاه نتحركو من هنا حسن حيت كنت خايفة نحصل . الثالت كان كيصرع الكيتار كانت عندو واحد الكليكة ديال صحابو عندهم مع البلانات والزدوح كاين كيعجبني نعمر معاهم وتصحابت مع مهدي . الرابع كان صاحب صاحبتي تصاحبت معاه باش منبقاش وحدانية فاش نخرجو كاملين ولا نبقا تابعاها كي العرابة ديالها ولسقاتني ليه كانت سميتو رضى باش منطيرش ليها صاحبها حيت كانت عينو عليا واخا كنت كنقوليها راه لاعلاقة ماجاش معاك وماكنتش كنشوف فكمارتو اصلا .. والاخير حبة عيني هوا رضوان .. اخر واحد صاحبت معاه بالكشايف وكان طايح فواحد الزرقة ضد فيها طيحتو كانت شانتة بيه وانا نطيرو ليها تخاطرت عليه على ملف دالغياب كنت غارقة فالغياب قلت ليهم الى طيرتو ليها طيرو الملف من الادارة باش يمشي داك الغياب ونقدر ندخل قبل مايسيفطو ولي امري ويجي با يمسح بيا الليسي واخا سبقليه هزني بواحد الركلة لقاني عاصرة تما جاب الله هزني فالدروة ماشافني دغيا هربت . تفكرت هاد الطبقة ديال الدراري حيت طرا ليا معاهم بلا واشمن بلان عمرني ننساه .. كنت كنخلط بيناتهم وواحد معارف لاخر والى قشعت فيهم شيوواحد وانا مع لاخر كنتخبا ونقول ليه ناري خويا .. تا لواحد النهار .. كنت نتخيل اااي حاجة .. يجي لكسوف مع الخسوف مع الشتا وبالليل ولاكن باش توقع ديك الصدفة ويطرا ليا داك البلان عمرني تخيلتها فحيااتي .. مشيت للقهوى انا وصحاباتي بجوج كنتعنطز لقيت عادل لتحت سلمت عليه وطلعت مابيا ماعليا حتى كنتصدم بصحابي كلهم جالسين فطبلة وحدة الا رضوان مكانش حيت عارفة فديك الوقت كتكون عندو مراجعة مع الاستاذ ديالهم كيغبر ديك الوقيتة . شفتهم وشافو فيا بقيت كنبرق بغيت نفهم كيفاش تجمعو وكي دارو ليها ماعرفتش ! .. صدقو كيعرفو بعضياتهم وعادل تم طالع لقاني باغا نرجع قالي جلسي بلاتي وتفرشت قدامهم صعرو عليا وناض رضى كان غيضربني تجوقو صحاباتي كيدافعو عليا وهزوني بالطحبة وحطوني بالطحبة وانا هازة راسي وخنافري واخا تفرشت بقيت مقلزة ليهم حيت انا اللي خورتهم ماشي هما وبغيت نخرج ماخلاونيش نوضتها معاهم ومالقيت باش ندافع على راسيو حصلت حصلة ديال ولاد لحرام فكني منهم عادل قاليهم صافي خليوها تمشي وخرجني من تما مابغاش يخسرني لاكن نقز نزال قاليهم فين هوا رضوان .. باقي غا رضوان

قاليه عادل علاش بغيتي رضوان قاليه راه بنت ال**** مصاحبة معاه تاهوا . تفكرتها بديت نضحك جاني لفوغيغ اما فديك اللحضة كنت خايفة على راسي منهم ومن الشوهة وفرتكتها معاهم ومشيت بحالي .. يالاه جيت نضور وقفات عليا واحد ديكا بوطابل فيها الدراري مزدحين البنات بداو يتحيرو صيدني نصيدك نزل عندي مولاها عطيتو النمرة لغد ليه مشيت تقهويت معاه وديت صحاباتي تغداو على حسابي وبدلت الكليكة وتا داك رضوان قلبت عليه .

اااااربي على ذكريان واش نضحك عليهم ولا نندم عليهم ماعرفتش مندير ... وزي وزييد شي ينسيك فشي ومع ذلك بقيت خلطة حتى تخلطت حتى انا لقيت راسي مخلوطة ... تصاحبت مع واحد فلافاك كنت انا الرابعة فالبنات وكان هوا السابع فالدراري وتفرشت انا وياه دقة وحدة بقيت عطيني نعطيك بالمعيور هوا مرضاش انا مريضيتش وفرتكناها

ذكريااات ضحكاتني ماندمش حيت اللي دوزت مايدوزوش شي قرد وزيييد وزيد هادي نقطة من البحر وصافي . تنهدت على اثر هاد الذكريات وطلقت ديسك نوال الزغبي كتقول فيه.. صارو كثار يمكن صار اكثر من الف و مية .. ماحد قدك يا حبيبي صاحبتي ها الكمية ...

تمزكت ليها للاخير ورجعت الحاضر وطلقت ديسك "تعودت" كارول سماحة ... كتغني على الحاضر كنحس بيها كتقدني وهاد الغنية كتمسحني تقول كتهضر عليا لخصات كل شيء فالكلمات ديالها

و تعودت ..... على حياتي ببعدك .... انا فكرت .. راح موت من بعدك ...

وتعودت ... " " " " " "

اثاريك يا انسان ... معود على النسيان

سبحان الله كيف ... بطل حدا سألان

اثريك يا انسان " " " " " "

و تعودت ...

كنتسنط ونغني معاها .. فيدي مرايا كنشوف فيها وجههي كيحكي الف قصة وقصة .. قصة عمرها تسالي حتى يتحد العمر .. لاكن هاكا مرتاحة .. لقيت نفسي من جديد واخا مزال جروحي طرية .. تعلمت ان الجروح كتعالجها الايام .. وهانا مع الايام حتى نشوف قصتي فين غتسالي . . كاين فرق كبير فوجهي وانا كندوز يدي على حنكي .. بدا التغير كيبان بين الماضي والحاضر .. كنشوف النضج .. كنشوف مرى راشدة متكاملة .. البارح اللي هوا شحال هادي .. كنت فتاة طايشة .. كانت باينة على وجهي الفياقة .. لاكن دابا العكس ... من نضرات عيني باين على الهدوء .. الكالم والرزانة .. كنبان بعقلي وفاهمة الدنيا زعما ..

استقبلت امي باطباق ديال الثمر والورد وعنقتها وشفت فوجهها مسكينة كانت مختالفة على اللس مشات .. وجهها منور فرحانة هزان كفوفها للسما قالت ليا الله يرضي عليك ابنتي .. فين ما حطيتي رجلك ويدك تربحي .. الله يغطيك بالرضا ويفرشك بالرضا دنيا واخرة .. سيفطتيني لدام المقام .. او زرتو .. وتفاجا قلبي .. وشفت قبر النبي .. وفرحت بزاف .. الله يرضي يعطيك ما تتمناي .. ويرزقك بالذرية الصالحة يا ربي .. ويبعد عليك شر الخلق .. الله يحفضك وينجيك .. انا راضية عليك دنيا واخرة .. دنيا واخر ياربي تسهل عليها .. وترزقها .. وتغفر ليها دنوبها ... وراني دعيت معاك ابنتي منين حطيت رجلي فداك المقام وانا كندعي بيبان الخير يتخلو عليك .. وربي يحن عليك .. وتعيشيي كما كتمناي ونشوفك فرحانة وديما لفوق لفوق

بكيت وهي كدعي معايا وعنقتها بست ليها راسهل .. فرحت فاش شفتها مرتاحة وضاحكة وعاجبها الحال .. كنشوف ان هادي احسن حاجة درتها فحياتي واكثر حاجة فرحاتني . درت لماما الصداقة وجات العائلة من كل جهة

. سوا عائلتها ولا عائلة بابا حيت ماشافو منها غير الخير . درت ليها الصداقة على حقها وطريقها بالامداح والعشا ومافارقتهاش حتى دقيقة خايفة من شي واحد يجبد ليها موضوع طلاق ولا يقلق راحتها لا كن فعلا داكشي مناش خفت طحت فيه وقالت ليها وحدة من عائلة بابا ايوا اللي غلب يعف امحجوبة .. حشومة زعما حتى كبرتو ودرتو الولاد عاد طلقتو خليتو الناس يهضرو

رجع وجهي حمررررر بغيت نقتلها فديك اللحضة ضرت عندها ماعقاتش عليها قلت ليها بغيت تقصدي بهاد الناس نتي زعما .. ونتي مالك اصلا .. الخيط اللي جايبة تخيطي بيه خيطي بيه حوايجك الاللة .. ديها فراسك وفحالتك شدخلك ؟ جايا لصداقة كولشي وسيري فحالك مالنا على هاد الحلان الفم والفهامة باغا ديري فيها الله يعمرها دار وحكيمة !... هانتي ضبرتي عليها دابا وا نوضي خرجي عليا من داري باش تعلمي تبقاي تسدي فمك وتفهمي على راسك ماشي على الناس

تقلبات مية وثمانين درجة بقا فيها الحال رديت ليها احساسي فاش سمعتها وقالت ليا ماما لالا ابنتي وحشومة اش هادشي واش انا عاد باقي نرجع ولا منرجع صاف كلها الله يخلصو .. برااادت والله مابقا هامني غير ربي وصلاتي وكلها يلقا فعلو

نضت حيت ديك المرى حتى هي ناضت والعيالات كيقولو ليا نعلي الشيطان وبقا فيها الحال علاش جريت عليها لاكن انا زعما من حديد مابقاش فيا الحال نسمع هاد الهضرة.. واش انا دايرة لمي الصدقة ولا دايرة ليها جلسة؟ مشات سيفطات ولدها يعيط على باه كان جالس مع الرجال مابيه ماعليه وبقات تبكي برا وانا كنشوف فيها من بعيد وشي مرى معاها كتواسيها وتهضر معاها حتى خرج راجلها وانا نوض عندو باش ميقولش قليلة الترابي ومعيطة على الناس ومجرية عليهم والحرقة كطلع وتهبط فيا بقات تبكي عليه قالت ليه جرات عليا من دارها ديني بحالي وانا نقول ليه لاعساك .. هاشنو قالت هاشنو قالت وقلت ليها ديك الهضرة .. اش دخلها فحياتنا وطرطقاتها قدام العيالات بكل ثقة فالنفس

خزر واخد الخزرة قاليا شوفي .. سمحي لينا .. ماقلتي عيب .. ولاكن هاديي هااااد خيتي رااك عبرتي عليها وكان عليك تقلبي عليها الطبلة باش تجمع لسانها سمحي لنا والله يعاون

قاليها زيدي قدامي .. زيدي زيدي زعما راك فاهمة .. زيدي دابا نوريك الفهامة محشماني قدام الناس ..

خليتهم يعاودو لمخهم رجعت بحالي جلست مابقاش كيهمني بنادم نهائيا .. يتقلق اللي بغا يتقلق ولا يغضب اللي بغا يبغضب حتى واحد مكيحل ليا مشاكلي ولا نلقاه حدايا وقت الحزة اللي كيهمني راسي وماما وسدينا .

يالاه جلست مع الناس جات سعاد كتمص شنايفها وتشوف فيا كنعرفها فاش كدير ديك تكميشة جايبة ليا شي خبار ماهياش

ثلت ليها مالكي تانتي شنو ؟

قالت ليا تكلمي شي .. واحد فالباب برا

قلت ليها لمن ؟

قالت ليا تكلمي وتعرفي

مشيت للباب كنت لابسة واحد اللعيبة رمادية باردة من الفوق ديال المناسبات شتيل خليجي محلولة من القدام وتحتها تحتية طويلة سامبل وستيل زوين ودايرة شال ابيض وبلغة رمادية وريحة العود كتعطعط جريت سعاد حتى للباب معايا قلت ليها نطقي شكون فالباب

قالت ليا راه قالي منقولكش

قلت ليها واش هوا اللي مخدمك ولا انا؟ هضري بلا متعصبيني تا نتي راه عاد جريت على لمرى باقا معصبة

قالت ليا جاد

هزين راسي وشفت اللور فالناس قلت صافي جا فوقت غير مناسب

قلت ليها قوليه مشغولة مامسالياش ماعندي كي ندير نوض

وقفات ورا الباب ديال لحديد اللي برا سمعتها شنو قالت وقال ليها ااه مامسالياش ..

كنت حاطة ودني حتى شفت الباب تدفع وداز فعبد الله ودخل وانا نشهق وقفت قدامو بالزربة كان كيشوف فيا مدخل الحاجب فلاخر تقول محلف عليا قلت صافي شي فضيحة وسط لافامي هي اللي ناقصاني وهاد المرة غنشق الارض بيدي وندخل فيها .

وقفت ليه وهزيت راسي قلت ليه فين جاي؟ ياك لاباس شنو واقع

بقا كيشوف لداخل قلت راه محلف عليا حيت هاد الشوفات والحركات ديال شي واحد محلف على شي واحد قالي نتي اللي شنو كيوقع هنا

قلت ليه حيد من هنا . حيد عاىلتي هنا مابغيت لا شوهة لافضيحة

قالي مابغاش شوهة ؟ لا غندير ليك الشوهة قدام عاىلتك

بغا يدخل تبعتو حتى للباب كترعد قلت ليه عفاك لا .. عفاك لا مادرت ليك حتى حاجة دير ليا عليها شي شوهة .. عفاك مادخلش لداخل الناس كيعرفوك وغادي تفضحني

بغيت نجرو من يدو وهزهك قالي ماتشدينيش .. ماتقيسينيش .. هانا غنفرتك لمك هادشي كامل

سديت الباب بالزربة طرقتو ورايا قلت ليه اااش غتفرتك ليا اخويا اش درت ليك واش حنا حتى كنقولو نفرحو كيخرج لينا بلان من الجنب .. فاش ضريتك وشنو ديت ليك

قالي شنو دايرة هنا ؟ عرس؟ خطبة؟ هااا هادو معارفينكش كنتي معايا وتصاورك دايرين بم

كمشت يدي حدا فمي بغيت نطير شلاقمي بالفقصة قلت ليه اشمن خطبة ولا عرس هادي صداااقة ..صداااقة درتها لماما جات من العمرة مالنا على هاد الفضيحة التقيلة على والو وجريتو من يدو كنساوي معاه بعدنو على الباب وخرجتو من الفيلا قلت ليه واش كن كنت عروسة غنخرج عندك لهنا كم راني بارزة .. اجي نهضرو اجي وسديت الباب ومابغاش يخرج غير بزز ضرنا ورا الفيلا حدا شي طموبيلات واقفين تما وانا نتقاد معاه قلت ليه اااش هاد تبرهيش هادااا ؟ ... اش هاد المراهقة هادي اللي جاتك ...

قاطعني هز يديه فالسما قالي وااابرهووووش اناااا صافي انا برهووووش وبالرب ماتزوجي سمعتي .. والله لا تزوجتييي .. على كلمة قلناها كنا صاعرين درتي هاد الفيييلم كاااامل ... واش بنااادم ميتعصبش مايخطاش !!! يبقا ديما مشرع فمو كيضحك ... بزاااف اشيماء طلعتي لينا فشرنا بهادشي

بقا كيمشي ويجس عليا معصب قلت ليه هصرت معاك .. وفاريناها علاش باغي دمر ليا حياتي ؟ شنو بغيتي مني بالضبط شنووو شنوووشنو

ضار عندي غفلني قلت غيضربني تخلعت جيت نهرب وجههي لاكن شدني بيديه منو جات عيني على عينيه كيشوف فيا بحال الى بغا يبكي وفمو كيترعد ويديه حتى هما ونفسه كنسمعها كترعد قالي نرجعو .. نرجعو كي كنا واحسن راني مرضت صافي براكة ونساي شنو قلت ليك خلينا نرجعو توحشتك . وباسني من فمي كمش ليا ودنيا باسني بوسة حارة تزير ليا فمي وبعدت اللور مسحت شنايفي تعصبت بالمعقول حيت ساليت من البوسان والزمر لكحل شديت طريق الله وبعدت على كولشي .. حسيت بوجهي سخن وقلت ليه منسمحش ليك تقيسني ولا تبوسني واحتارم راسك واش هاد الخرقة اللي دايرة على راسي ديكور ولا شنو؟ .. شنو هادشي دابا شنو هاد الزمر بعد

رجع عندي شدني من كتافي بمعصب زعزعني قالي انا كنحتارمك .. كنحتارمك بزااف وكنبغيك واش ماباغاش تفهمي .. وا كنبغيييك راه مرضت كنقول ليك مرضت كرهت ديلمها الحياة بسببك مابقيت باغي والو ..باغي نتزوج مابغايش ندور معاك باغي نتزوج بيك

حيدت ليه يديه وقلت ليه اي كوبل فاش كيتفارقو كيوقع ليهم بحال هاكا وحتى انا كنت غنحماق بسبب..قاطعني حد يدو على ودني زير عليا و بنفس النضرات اللي كان وجهه ليا بيهم كلامو فالقهوى ديك المرة وقالي واماتجبديش ليااا شي واحد دابا واش باغا تحمقي ديلمي نمشي سبيطار تانا ولا شنوو

طلق من ودنيا وبقيت ساكتة كنشوف قدامي جا المشهد ديالي فاش كنت فنفس هاد الحالة .. احساس صعيب منقدرش نوصفو والى قال هاد الكلمة راه عارف علاش قالها ومحروق كي كنت انا وداك الشعور منتمناه لحتى واحد .. بقيت ساكتة وهوا واقف عاطيني ضهرو وهاز راسو فالسما ويديه فجنابو كيتنفس .. تهدنت وتكالميت وقلت ليه جاد .. خلي غدا ونهضرو ان شاء الله صافي؟

ضار كيتنهد ساد عينيه وصبعانو على عضمة نيفو قالي شنو الهضرة اللي باغا تقولي غدا ماقدرتيش تقوليها دابا؟

قلت ليه دابا عندي الناس والضياف .. والله مكنكدب عليك راه الصداقةة درتها لمي جات من العمرة .. سولك مك غتقول ليك شنو كاين راه قلت ليها ماما مشات العمرة .

بقا ساكت كيشوف فجهة اخرى وقالي غنتسناك غدا وفااصباح .. فيقي عيطي ليا غنتسناك تعيطي صافي

حركت ليه راسي وجا عندي كان غيعنقني وانا نهز صبعاني بجوج باش مايقيصني مانقيصو ورجع كمشي يديه بونية بقا شادهم وكيزفر ورجع نفضهم قالي واخا . واخا كما بغيتي

مشيت خليتو واقف دور وجهه فداك الشارع كان خاوي والضلام شعل كارو وانا غادية كنشوف فيه داز حداه واحد الشمكار قاليه شي نترة الله يحفضك ورد عليه جاد قاليه سير ت**** مع**** طلعتو لنا ف****

قاليه لاخر هانيا الخوا صافي غا قلتا ليك

قاليه جاد شد ت*** .. نترة ولا ز*ي ها نترة

عطاه داك الكارو جر نترة وجا يردو ليه قاليه جاد وهوا جابد واحد اخر كيشعلو واغا ديه

بقيت انا واقفة كنشوف خفت يدابز وهوا دابا سخون معصب مابغيت لا صدع لا شي مدابزة كيخلعوني المدابزات كنخاف يوقع الافات . قرب ليه داك خونا قاليه لا صافي اخاي غا شد

شفت خيال جاه من اللور وقف عليه ودوروه بجوج حطو ليه جنوية على جنبو غوت وجيت جالسة بالخلعة بقا غير صبعي متاجه جهتهم كيترعد حتى لهضرة ماقدرتش نخرجها ويدي على صدري حسيت بقلبي طاح وخفت نفس الاحساس ديال نهار كنت غنتغتاصب عمرني نسا داك النهار الكحل . دوروه ولاد لحرام بجوج ودارو ليه ديك الدخلة بحال هاكاك وهوا واقف ماعرفتش شنو قاليهم ودني كنحس بيهم كيصفرو حتى بانو تخلطو بثلاتة ماعرفتش شكون اللي ضرب لاخر وشكون اللي كلا العصا شفت الكشابكة بيناتهم .. طاحت الجنوية فالارض بانت ليا رجلو هزها فسما وصلها لداك الشكار حتى لعنقو هبطو لتحت وكان شاد لاخر بيدو والاول اللي هبط ليه راسو شدو ليه بين رجليه بقا لتحت ولاخر ماعرفت كي دار ليهم شتو تهز وردخو مع الارض ناض بالزربة مكمش يدو وكيعرج هرب وخلا صاحبو حاصل وداك الكارو اللي شعل جاد كان شادو بفمو ولا بسنانو ولا منعرف وهوا كيدابز حيدو طفاه لهاداك منعرف فيه قاليه كمي دابا .. وطلقو عطاه واحد الركلة تا جا على وجهه وناص هرب بقا كيشوف فيهم تا بعدو وضار جا عندي كيعرج برجلو اللي خز فالسما وانا سخفانة ماقدرتش نطلع النفس شد ليا يدي قالي ماطرا والو ونتي واش طرات ليك سي حاجة قلت ليه جاتني السخفة

فشلت بالخلعة وقالي ماوقع والو صافي يالاه .. نوضي حيدي من هنا

نضت وقفت بزز شاد ليا فيدي قالي بشوية عليك وصلني للباب دالفيلا عيطت على سعاد تعرضات ليا بالماء وقلت ليه واش وقع ليك شي حاجة واش ضربوك مال رجلك

قالي والو غير مقصحة وصافي .. غدا غنتسناك تعيطي يالاه ..

باس ليا يدي بزربة قدام سعاد وهي مزنكة حشمات بلاصتي ومشا دخلت فحالي وجههي صفر حتى باش نجلس مع الناس مشا ليا الجهد

دازت الصدقة على خير واخا طولات حتى لشي 2 عاد مشا كولشي ومشيت مع مي لبيتها غطيتها وطفيت عليها ومشيت نرتاح لاكن عقلي مابغاش يرتاح بقا سيناريو جاد كيتعاود فدماغي حتى داتني عيني . الصباح فقت على اتصال المصحة ... مكنبغيش نمشي ليها ونشوف فعصام باش منشفقش عليه ونمرض .. وحتى مي الى شافتو غادي تأزم وتمرض .. كدبت عليها قلت ليها راه ما لفرنسا باش تهنى عليه. كولشي هادشي لمصلاحتو ومزال يجي نهار اللي يعرف الصح من الغلط اما دابا فراه غادي يعاني ويقاصي بزاف وهادا هوا العلاج من الادمان ماعندنا مانديرو ليه . قالو ليا باللي رسلو الملف ديالو للمصحة ففرنسا وغادي يمشي ونضت باش نمشي نشوفو قبل ونشوف حالتو .. وصلت لقتو ضعيف كيموت تحت عينيه كحل ماشي زرق وسنانو ولاو خارجين حيت ضعاف .. تخلعت درت يدي على فمي وتصدمت اما هوا شافني بدا يترعد قالث خرجيني من هنا .. مابقيت باغي لا دوا لا فرنسا .. قلت ليه صبر راه هادا هوا العلاج غير صبر عفاك .. غادي تعالج وترجع احسن من اللول .. هادو غير السموم كيخرجو من داتك غير صبر وانا غنوقف معاه وحتى حاجة متخصك كون هاني .. حاولت نطمنو لاكن رفض بغا يخرج ولسقني وانا رفضت رفض قاطع نخرجو حتى يتشافا .. ماشي غير اجي وتعالج من الثرقوبي والشراب والكارو والحشيس وجميع انواع المخدرات .. لا بد من العناء والصبر والعذاب ديالهم لا يقاوم .لاكن الاهم يصفا جسم الانسان ويصفا دمو من السموم .

كانت طناش وانا باقا فالمصحة قاديت معهم الامور فالادارة وقاديت الاوراق ديالو وداكشي اللي طلبو مني حطيتو ليهم وخلصت ليه المصحة ومصاريف النقل من المصحة ل لمطار ومن المطار لباغي ومن تما للمصحة فنقل خاص بالمرضى وخرجت كنصبى راسي ونقول ناري كن جات معايا مي وشافتو كن سخفات . هوا صعيب الحوار معاه وصعيب التفاهم معاه غيكون دوزها عليهم ودوزوها عليه . طلعت فالطموبيل جلست وحليت قرعة دالماء شربت منها ورتاحيت وطليت على تيليفون لقيت شي خمسة ديال ليزابيل ديال جاد قلت ناري كوراه حماق وهزيت تيلي عيطت ليه قالي علاش مابغيتيش تجاوبيني عطيتيني الكلمة باش نتلاقاو فالصباح

قلت ليه كان عندي شي حاجة ضارورية ماخصهاش تعطل سبقتها

قالي ودابا ؟

قلت ليه غنمشي للدار لبس حوايجي ونخرج

قالي غندوز نهزك من تما من دابا نص ساعة قلت ليه لا ساعة حيت عاد غنمشي للدار

كنت باغا نبدل حيت لحت عليها غير واحد الجلابة ولويت الشال وصندالة وصافي

رجعت للدار لقيت مي جالسة شادة تسبيح كتسبح و طالقة القرآن فالدار .. مشيت عندها ابتسمت ليها وحنيت جلست قدامها بست يديها وقلت ليها واش مرتاحة؟

قالت ليا الحمد لله ابنتي

قلت ليها فاش يجي وقت الحج غنسيفط تحجي ان شاء الله

هزات كفوففها فالسما كدعي معاياحتى بغات تبكي وقلت ليها غتبقاي تمشي كل عام تجي .. وديري عمرة هادا وعد

ماقداتها فرحة وعنقاتني كتبكي وكدعي معايا ربي يسهل عليا ويحفضني .. قلت ليها دابا نتي غير فالدار اماما حيدي عليك الشال وخلي راسك يتنفس ... راه الدين ماقالش لينا خنقو راسكم وحرمو الضحك والمتعة على نفوسكم ... عيشي حياتك وغادي نديك لتركيا نحيد ليك ديك الوشمة اللي بين حجبانك ونزرع ليك الشعر ونقاد ليك سنانك كاملين

قالت ليا حيدي ليا غير هاد الوشام وغير هاكا ماعنديش مشكل

قلت ليها انا عندي مشكل .. انا بغيت نشوفك زوينة ونشوفك فنة واش حرام؟ ماتزهديش فالدنيا .. عيشي حياتك وشدي طريق الله .. بغيت نشوفك كما كنحلم نشوفك ديما ونعوضك على كولشي .. ووجدي راسك فدا غتمشي معايا لواحد لبلاصة وماتقوليش ليا .. توقعي اي حاجة اماما

فوهت ليها راسها واخا خاوي ومشيت طلعت للبيت ناضت حتى هي مشات تحركات .. دخلت توضيت وصليت الضهر وتبعت ليه صلاة استخارة .. هاد اللقاء هوا اللي غيجمع ويطوي كولشي وفيه غتوضح شحال من حاجة وتبين شحال من حاجة .

لبست دجين بوي فراند كيجي زوين حتى للتحت مع صندالة خفيفة بلا و تيشورط بيضاء خشيتها فالسروال ودرت فيست فشيبي كاجول كتجي شوية هبابطة وطويت ليها كمامها ودرت شال ابيض بالطرقة ديالي وهزيت بوشيط كبيرة شوية بلو مارين .. تعلمت نلبس ونقاد ماشي بحال الاول ماكنت معرف والو فتسيل الحجاب وغير كنركع وبغيت لبسات محتارم فنفس الوقت موديغن ومع الوقت وتتبع الفاشيونيستات ديال الحاجب رجعت كنعرف نختار وننسق .

رشيت ريحتي ومادرت لا مكياج لا والو درن واحد كلوز خفيف كيعطي لمعة وشوية دلحمورية كيجي زوين وماسكارا ومشطت حجباني لفوق عندي الحجبان علاض نيت والله يعفو عليا مزال كنتفهم باش نقاد السطر من افوق ولت وتجيني تربيعة من القدام مقادة . ودرت شوية ديال لحمورية فالحناك غير خفيفة كتبان طبيعية وايلاينر .. هاداك كنصرعو كنعجب بيه العجب جبدت عيني من الاطراف شوية ومشيت نزلت كنركب ساعتي فيدي واكسسوارتي فاليد لخرى هاد المرة حيدت الذهب درت الابيض ودرت الساعة اللي كان جاب ليا كاضو .. ماعرفتش علاش قالي راسي ديريها المهم بغيت نديرها .. كان فيها الذهب صفر وديامون من ل داخل وشوية ديال ذهب ابيض المهم غزاالة .

خرجت للباب كندور قدام الباب لكبير عيطت ليه نسول فين هوا قالي انا حدا الباب ومشيت كنضهر طليت لقيتو تما وقطعت طلعت حداه جالس مفركس عليا زعما باش نتزعط ضارب ليا واحد دجين ناضي وتيشورط عندها الكول وصدايف كحلة والستعة والروايح اييه وكيضحك شاف فيا طلعني وهبطني وجاب ليا وجهه بغا يسلم عليا ورجعت اللور قلت ليه مابقيتش كنسلم من الوجه ولا نقيس شي راجل

رجع اللور قالي سمحي ليا .. نسيت

اما انا بقيت جالسة كنقول لراسي الله يمسخك شحال شطحتي نتي وفخونصوا وسلمتي عليه عاد جاك الايمان .. ماعرفتش اصلا علاش درت ليه بحال هاكا خليتو غير كيشوف حتى يدو مامدهاش ليها

مشينا لكافي على لبرح شكلها بحال الى راك فهاواي بالقطويات فوق الرملةةضاري بيهم النخل وصوت البحر والهوار .. جلسنا وجلس حدايا عاض على شنايفو وكيحزز فيا دوك الشوفات ديال راني قاتلة هينيدي

دورت وجههي سكت وبقا كيشوف فيا شاف الساعة فيدي ودار واحد الابتاسمة وضور وجهه .. تلفت قلت ليه شنو بغيتي دابا ؟

هبط راسو كيطقطق بسوارت طموبيل فوق الطبلة وقالي راك عارفة

قلت ليه واش نتا اللي سيفطتي بوكي دفلوغ

هز حاجبو شاف فيا وقالي علاش نتي شحال عندك من واحد !

قلت ليه غير سولتك وصافي راك عارف هاد الحركات كيديروهم اخا ميكونوش كيعرفوك

قالي واخا ميكونوش كيعرفوك!!

قلت ليه دابا قولي واش نتا اللي سيفطتيه

قالي واشوفي نتي !واش دابا هادا سؤال كطرحيه عليا

قلت ليه بغيت نتأكد

قالي وشنو متكوب فيه ؟

قلت ليه اذن ماشي انت اللي سيفطتيه

بقا كيشوف فيت مطولا وقالي الله يهديك اشيماء ... هادشي ديالك مابقاش عاجبني

قلت ليه انا كنسولك ونتا كتفلى ؟

قالي وراه انا سيفطتو

قلت ليه وشنو مكتوب فيه!

قالي واشوفي نتي اللي مابقيتي باغا لا زواج لا صداقة لا تا وزة ...

عرفتو هو اللي سيفطو من كلامو حيت قال اللهم نبقاو خوت ولا والو وقلت ليه دابا شنو المطلوب مني انا ؟

قالي هضرت معاك لبارح قلت ليك الزواج .. الدوران وتزنديق انا براسي طلع ليا فشري

قلت ليه خسرتي وليتي جيب افم وقولو

قالي والصراحة هي هادي راه هادشي كيمرض

قلت ليه قلتي ليا بفمك انا كبيرة خاصني واحد قدي يالاه نتفاهمو .. شنو بغيتي دابا ؟

قالي مالقيتي فاش تشدي غا فهادي زعما !

قلت ليه هادي راه عطاتني درس .. نتا عندك عادية انا لا ..

قالي دابا نكونو واقعيين .. انا ونتي كنا فغولاسيون دوزنا فيها حب وحرب العلم ساق لينا لخبار ولافامي من الطرف تا للطرف عارفينا وتجي نتي لود عمي تزوجي بيه واش شوية لاباس!!!... شنو زعما هادي ؟ .. وتاهاداك اللي بغا هادشي خصو الحبس مكيمكرش .. ودابا كتقولي وليا قلت ليك كبيرة ماكبيرة .. ماكبيرة وااالو على هاد العقلية دالزمر اللي عندك راه باقا بنت سطاش لعام ماشي 36 عام

قلت ليه 35 اشمن 36 !

قالي وفين هوا لفرق بيناتهم كااع ... هانا دخلت فثلاتينات بحالي بحالك فين كاين الفرق فهادشي؟؟ انا ونتي فثلاتينات ! باك كيهمك العمر وهاحنا لحقنا عليك شنو بغيتي كثر من هادشي

تنهدت وجيتو نيشان غير بالهداوة قلت ليه المشكل دابا فيا انا .. انا مابقيتش قادرة نتقبل شي واحد صغر مني راه منقدرش

زيد ليا على يدي قال لي الى كنتي كتبغيني غتقبليها ... هنا غنعرف واش باقي شي حاجة ولا كولشي مشا

سكت مطولا قلت ليه مابغيتش نتعاير بيها شي نهار

قالي نهار نعايرك بيها دفلي عليا ... صافي جمعيها وحطيها ليا فوجهي .. واصلا عمرك تسمعيها وانا باغيك نتي تكون عندك ماعرفت شحال باغيك نتي

كنت مركزة كنحلو مشاكلنا حتى جاو واحد جوج بنات قاطعونا قالت ليه سمح ليا واخا نتصور معاك .. دورت وجهي تنهدت وحرك ليها راسو بان ليا ولف الوضع ديالو كيحنيو يتصورو معاه وهوا جالس كيتصرف على طبيعتو حيت اصلا شحال قدو .. مع الوقت كيتعود الانسان وكيسهل عليه الحياة اللي كيحس بيها صعيبة فالاول

جاو عندو شي دراري كل مرة يحني واحد كيدور غير وجهه لتيليفون ويرجع يكمل معايا قالي نساي الهضرة السامة خلينا نبداو من جديد راه دازت علينا فهاد العماين اللخرة .. صافي الله يجعل البركة .. قالها وهوا كيشوف جنب مع وحدة كتصور معاه ويدو على يدي فوق الطبلةووانا كنشوف قدامي ويدي على فكي كنخمم وحداه الناس كيتصورو واحد مور واحد ماديتهاش فيهم كاع .. قلت ليه هادشي خاصو يتدرس ماشيوغير يجي لواحد ويرمي راسو

تلفت عندي خلا وحدة شادة السيلفي قالي على اساس غترمي راسك فالعافية ! .. راه انا وياك ماشي شي واحد براني ورجع تنهد شاف فالكامرة خدات صورة وهز كاسو كيشرب قهوة قلت ليه انا عفا عليا الله وبريت الحمد لله باش متقولش هادي مسطية

تلفت عندي قالي انا اللي مسطي نتي مامسطياش ..

عاود دور وجهه لواحد الولد وقلت ليه غير باش نقول ليك واحد الحاجة .. الي عايرتيني بيها والله عمرك تشوف خليقتي

قالي راه بنادم كيخطا .. وعمرك تسمعيها صافي اخر مرة .. دابا مكاين مانتسناو غترجعي تهضري مع الوالدة ديالك والواليد ديالك باش نجمعو نطويو

ضحكني قلت ليه انا واليديا طلقووو

سكتنا مطولا كل واحد كيشوف فجهة وكل مرة يجي شي واحد يوقف حداه ياخد صورة ويمشي .. تنهدت وقلت ليه غدا ينشرو تصاورنا

قالي ينشرو تا سراولنا

قلت ليه حيدت الانستا وتهنيت درت واحد اخر خاوي فيه زيرو زيرو زيرو كنشوف بيه الحوايج والى بغيت نشري شي حاجة ولا للاحتياجات الخاصة

قالي مكندخلش ليه كااع هشام اللي شادو اما انا غير الى مالقيت ماندير

نرجعنا سكتنا وشاف فااساعة قالي واش تغيديتي قلت ليه مزال قالي نتغداو نيت جوج هادي وطلبنا لغدا بقينا كنتغداو ماسولنيش على الطلاق مابغاش يدخل راسو فداكشي وحتى انا ماعندي منشرح ليه .. قلت ليه واش ماما باك عارفين باغين تزوج

بيان سيوغ عارفين

قلت ليه وقابلين ؟

قالي وعلاش ميقبلوش؟

قلت ليه ديك المرة قالت ليك ماماك باقي الحال

قالي واهاديك غير هضرة واش غتدي على اي هضرة تقالت ؟ شي مرات كيبقا بنادم غير كيضهر وصافي باغي غا يهضر

تنهدت وسكت تغديت انا وياه وخرجنا فحالنا كانت لعشية دزنا على الشارع لقينا واحد الكروشة دغلالة والناس مقجقجين عليها قلت ليه وقف نزل ناخد واحد الزلافة قاليو غير نزلي .. الى نزلت انا بقيت تما

هز واحد الكاسكيطة دارها لاكن الطموبيل فارطة الديكور كولشي متبعها بعينو واخا الزاج كحل فيمي دايره لاكن التبركيك عشرة للضس ولحسن الحض ماهزش راسو كاع بقا جالس نزلت منها انا وكندور عيني بقا كولشي كيشوف فيا .. قلت لهاداك مول لكروسة عطيني جوج زلايف حطهم ليا فبلاطو وجيت نضور نمشي هازتهم سمعت وحدة قالت لصاحبتها بلهفة .. صاحبت جاد الهواري شوفي شوفي .. هوا والله تاهوا اللي فطموبيل

مشيت بزربة حل ليا الباب من لداخل طلعت كنت محتاجة فالبلول ديالو حيت قربات تجيني العادة وكتقتلني قلت نكمدها وجلس سديت الباب حطيت داك البلاطو بيني وبينو قلت ليه حصلتي عاقو بيك الناس

ديمارا الطموبيل وقف جنب فواحد القنيت وعطينا وجهنا لواحد الحيط مقابل معانا وقالي راه مشكل والله .. ماتقدرش تعيش حياتك طبيعي سيختو فالاحياء الشعبية .. وحشومة تنفخ على الناس كن ماكونوش كيبغيوك ما يجيوش عندك .

جلسنا انا وياه كنقيو الببوش ونتجمعو تا تجمع قدام الباب واحد الفرك ديال الدراري تقول جاو يشجعو المتخب وبداو ينقزو فرحانين كيعيطو ليه ويطلو عليه ضحكوني .. كانو دراري مراهقين وفيهم الكبار قلت ليه شنو غدير دابا غتهرب

بدا يضحك وكان كينقي الببوش .. دارها فمو دغيا وقالي هانا جايا ونزل عندهم بقاو كيغوتو وانا كنشوف من المرايا الناس كولشي واقف كيشوف جيهتو قلت مع راسي بصح الناس كيبغيوه وحتى هوا ضريف ماشي متكبر باش يشوفو فيه وميجيوش عندو حيت كاين بحالو ودازو قبل منو انا براسي منمشيش نتصور معاهم على عياقتهم . ضارو بيه كاملين واراك للسلفيات .. اما انا نزلت على دوك الزلافات بجوج كملتهم وكنضور كنلقا الناس مجمعين حيت البلاصة شعبية شي شوية تجمعو عليه بنات وولاد دار ليهم الخاطر ورجع طلع بقاو واقفين من بعيد حاضيينا قالي ساليتي داكشي !!!

قلت ليه حسابي مابغيتيش

قالي اييه يامبغيتش .. صافي ماشي مشكل بحال الى كليتو انا وغمزني كيضحك هز داك البلاطو طل واحد من دوك الدراري قاليه صاحبي .. عطي هاداك لداك السيد الله يحفضك

شدو داك الدري بالفرحات عليه داه وديمارا مشينا بحالنا

ردني للدار ودعتو ودخلت مشيت عندي ماما جلست حداها وجبدت ليها الموضوع قلت ليها هاشنو كاين ها شنو كاين بدات دعي معايا ربي يسهل عليا ونضت طلعت توضيت صليت داكشي اللي تجمع عليا وانا فالزنقة . عيط ليا سولني واش قلتها لماما قلت ليه اه قالي صافي غنجيو غدا

تخلعت قلت ليه ماشي بلاتي شوية

قالي علاش؟ نضربو شي كخوازيير عاد نجي نخطب!

قلت ليه لا ..غير هادشي دلمعقول كيبغي شوية دالوقت كيخلعني

قالي واخا ماشي مشكل اصلا اغير خطبة غنجمعو الوالدين نديرو تعاررف .. اما انا ونتي راه ماشي عاد تعرفنا ليوم

بقيت ساكتة حسيت بقلبي كيضرب وخايفة من زواج .. جاني احساس غريب .. متعرفتها فرحة ولا خلعة ولا شنو .. عجبني الحال غنتزوج مع جاد لاكن جاني هاد الشعور وجاتني اللقوة طمسو ليا عينيا بقيت مترددة وقلت واخا صافي وقطعن معاه تاصلت ديك الساعة بتريتور قلت ليه راه عندي الخطبة وجاتني على غفلة وجد ليا الضايفة دالخطبة كم الاول للخر انا ماغندير حتى حاجة .. وهبطت ديك الساعة قلتها لمي قالت ومزال ماوجدنا والو ..هي براسها رتابكت وشفت الفرحة فعينيها حشمانة تبينها قلت ليها وصيت على كولشي غير ماعرفتش شنو غادي نلبس ..قلتها لسعاد باش تقاد الدار وجلست حدا مي جاني واحد الحماس وواحد الارتباك كنمشي ونجي ونجري ..عيطت على سهام قلتها ليها باش تجي وقلت ليها غنوجد ليك ماتلبسي بلا متهزي الهم غير اجي وجلست كنقلب فدوك ليباج اللي كيبيعو البلدي وكنسكريني سمياتهم قلبت على دوك القفاطن البلدية اللي خرجو جداد وكومونديت ثلاتة عجبوني ليا ولختي وماما مختالفبن على بعضياتهم باش توصلني الصباح بكري هما والبلاغي ديالهم والشيلان وجلست مقفقف ديك الليلة كلها بوحدي مرة نضحك مرة نسا ماعرفت مالي ضهشرت

صبح الحال نضت بزربة حيت اصلا ماغطستش فالنعاس وبقيت دايرة بالي .. سبقت بالدوش هوا الاول وصليت وبقيت ندعي ومخلوعة ماعرافتش مالي جاني واحد احساس غريب عمرني حسيت بيه .. خرجت نشفت شعري بالزربة ومع كندير لبروتين تهنيت من سوشوار كل مرة .. هبط حرير درت ليه قراصة و نزلت لقيت ماما طالعة عندي قالت ليا راه جا تريتور جاب داكشي .. قلت ليها صافي خليه يقاد هوا عارف شغلو .. ديجا جربتو عرفت خدمتو .. صونا ليا تيليفون كان جاد كيصوني جاوبتو صابح ناشط .. بديت نضحك قلت ليه فينك شنو كدير

قالي فالدار كنتسنا الورد وداكشي يوصل

جاتني واحد الابتسامة على وجهي فشكل طلعات من الاعماق وسولني شنو كندير قلت ليه يالاه دوشت كنتسنا ختي توصل سيفطت ليها الشيفور يجيبها .

قالي غيوصل الورد ونجيو

قلت ليه فاش تقرب توصل صوني عليا وسولتو شكون غيجي معاهم قالي غيجي خوه الكبير ومرتو حيت باقيين عندهم فالدار اما هشام ومريم مشاو لبرا يفوجو وقالي باه ومو هادوك ماعليهم كلام وختو وجداتو و واحد خالتو حتى هي وغيجي شي صاحبو .. المهم الخير والبراكة فيهم يعني عائلة وانا كيحسابني غيجي غير هوا والمشكل حتى راجل ما معانا حشمت قلت ليه راه مكاين معانا حتى راجل قالي هانيا ماشي ضاروري .. تحرجت وتاصلت ببشرى صدمتها ثلت ليها ها اللي كاين ها اللي كاين ثالت ليا حتى لدابا عاد كتعرضيني ولاكن هانيا فرحت ليك اللهم يككمل عليك باخير . قلت ليها راه لبارح قالي غنجيو كولشيو مزروب وقالها ليا فلعشية يعني شنو كان خاصني نديرو انا براسي تدركت . قالت ليا بااز غا ديروها قداش وقولو كلشي جا بالزربة المهم ماعلينا انا غنخرج من الخدمة دابا نيت على قبلك ونجي

فرحت ومشيت وصيت مي قلت ليها راك نتي دابا هي الكل فالكل فيك با وفيك مي وفيك العائلة كلها وماتحشميش وتبقاي ساكتة .. راك كتعرفي تهضري وتعرفي شنو كتقولي وهضري ونتي تايقة فراسك ماشيو حاذرة راسك بحال الى جايا طلبي السماحة ولا يخلعوك تقولي هادو شي خاجة ... راه ناس بحالنا بحالهم رفعي راسك وديري ليا لعز .. نساي التقاليد وداكشي ديال ايوا يعطي اللي بغا بحال الى انا شايطة ... وريهم داكشي باش كتحسي ماشي لعكس وماتقوليش اه حقا غادي نضيع سعد بنتي .. ديك الهضرة خليها حتى نطلعو الجبل .. هادو راه ماجايينش من الجبل وماشي بحالنا وعايشين فبلجيكا الى شافوك كتهضري وخايفة وحانية الراس غيشفقو عليك ماشي يقولو الله يعمرها دار .. زيري معايا راني معولة عليك وهزي راسك لفوق راه مناقصك والو وراكي مرى ونص ماتخلي حتى خاجة تأثر عليك

زدتها الثقة فالنفس وقلت لعساس يغسل الشارع حدا الباب تنقا الدنيا مزيان ويرش الغرس على برا ومشا زرب على داكشي وبقيت نراقب شنو كيوقع حتى وصلات سهام وجا معاها راجلها .. قلت اخيرا جا واخا مابغيتوش يجي خفت يقول شي كلمة يزبلها ولا يتحل ليه الفم يبغي يهضر وهوا مكلخ عندو ديك العقلية دالحكام والنم كيعصبني بيها ولقا سهام درويشة بحال ماما كتسمع وتسكت وعاجبها الحال

حشمت نوصيه قلت لسهام وصيه نتي يجلس ويسكت راه جاد الهواري هادا اللي جاي ماشي صاحبو فالخدمة ومانرضاش قدامهم شي تحشيمة . المهم قرصت داكشي اللي خاصني نقرص ووصلو لحوايج اخيرا حليتهم فقلب الفيلا كانو 3وديال لكارطونات بديت نقلي انا وسهام .. قلت ليها هادي ديالي .. ها ديالك وها ديال ماما وفرقتهم وطلعت تبعاتني سهام لبسناهم .. كانو كناضر بلدين زوينين عندو حزامات رقاق من توبهم فين وفيهم مجادل ومطرزين مافيهم لا عقيق لا والو وكانت ديالي مختالفة عليهم جات هماوية .. صاوبت لسهام اختي وجهها وبقيت كنشوف .. عينيها خوضر فنة اية فالجمال كتشبه ليا وعندنا العينين وراثيين من ماما وبابا والعائلة كلها صبغت دفار يدي راسي حيت مابقاش ليا الوقت نمشي لشي صالون وقاديتهم مزيان ودرت مكياج خفيف وشديت ماما بزز منها ردقت ليها ديك الوشمة بفوندوتان بزز منها بقيت ندير طبقة على طبقة ونشفهم حتى تغطات وقلت ليها وجهك زوين ماكنتيش كدير المكياج بقا ليك زوين ماتكمش ما والو وعينيك بقاو هما هادوك مادخلوش .. غندير ليك غير شوية دالمكياج ومابغاتش ولاكن شديتها بزز منها قاديت ليها غير شوية ودرت ليها كحول وعكر ماط بارد نيود .. غير هيبت عليها جات كتحمق بمعنى الكلمة وحتى وجهها رتاح من المشاكيل و صغارت فالسن وعطاك داك الشعاع دعينيها لون كبري .. كانت فالاول عوالة تلبس واحد القفطان ابيض وصابو وتولي شال ابيض قلت ليها مالك شادة حق الله ! واخا درتي عمرو راه ماشي صافي بعتي الدنيا باللي فيها ! عيشي هنا كأنك غتبقاي ديما وخدمي لاخرتك كأنك غتموتي فدا ماشي طيحي على اتجاه واحد فمرة وحدة .. ايوا بزز باش لبستها الالوان وبدلتها ومع رجعات كتوقف مقادة مابقاتش مقوسة ولات كتبان همة وشان وردت ليها الريحة .. شافت وجهها فالمرايا تخلعات قالت هييييه !!! لالالالا مسحي ليا هادشي مسحي مسحي منقدرش نجلس قدام الناس هاكا وييييلي منقدرش كنحشم ومعاهم الرجال

قلت ليها واغير بلاتي تشوفي مت هادا اللي جاي نتي كتقولي كتير تسناي تشوفيه .. تقولي صاحبتو ماشي مو والله تا تصدمك

صونا ليا ديك الساعة وانا كنهضر مع ماما قالي هاحنا شوية ونخرجو

قلت ليه تعطلتو

قالي كنتسناو الوالدة تجي من الصالون .

ضحكت قلت ليه واخا وقطعت قلت لماما هاحنا باقين فيها .. مو راها فالصالون كولشي واقف حتى تجي ونتي كتقولي مسحي .. خليه راه عااادي ماشي شي حاجة وجيتي فنة بلاتي نقاد ليك الحجاب ديالك

قاديت ليها الشال وبقات تسوط كنحس بيها متوثرة وكل شوية تشوف فالمرايا ماكرهاتش تغسل وجها .. بقيت عليها انا وسهام هاك بالاك حتى اقتنعت ودرت ليها فيدها البراسليات ديالي كانو عندي وحدين زوينين روميين عمرت ليها يدها ولبستها ساعتي حيت مكانش عندها حتى حاجة وقاديتها غير شوية بان فيها الضو وبست ليها راسها قلت ليها يسالي هادشي نديك نبرعك .. والله مانخليك مخصوصة من شي حاجة .

صونا تيليفون قالي جاد انا فالضورة وقطعت عليه قبل ميكمل بديت نترعد قلت ليها جاو جاو جاو هبجو هبطو هبطو دغيا ناري جاو وبديت نترعد تلفت فالت ليا سهام بشوية عليك بشوية وعطاتني الماء شربتو وبديت ندير شهيق زفير وسيفطتهم هبطو كلهم ومشيت كنطل من لفوق لقيت بشرى داخلة كتجري جات معاهم قد قد غير شفتها رتاحيت .. وجودها كيريحني طلعات كتجري عندي شديت فيها قلت ليها غنسخف

بدات كضحك قالت ليا ضربي الحديد وسخفي وقالت ليا غنمشي لبس راه مشيت جبت مانلبس عاد بديت نسعا الحوايج بسبب هاد جا مزروب ديالك

مشات لبيت كتلبس وبقيت واقفة كنطل شقت ماما واقفة وصدرها وضهرها مقاد كتبان منخوية الحمد لله فكيت ليها داك المشكل .. كان راجل ختي حتى واحد لابس كلاص بعدا ماحشمنيش من ناحية المضهر و هاز ولدو فيدو وحداه ختي سهام دايرة الفولار حيت دارتو بعد الزواج وكيستقبلو الناس دخلو واحد مور واحد وضاحكين مع بعضياتهم جايين ناشطين دخل باه الاول مد يدو لماما وسلم وبدا ديك مرحبا مرحبا نهار كبير هادا .. شي داخل مور شي وشفت جاد هاز بوكي دفلوغ فيدو ضارب عليا الحطة والكلاص هاي هاي هاي على لعريس بديت نضحك بوحدي وعضيت شنوفتي وضاحك ناشط مع داك صاحبو اللي جاي معاهم .. كولهم كلاص عيالات ورجال وهازين الكادويات معاهم

بديت نقفقف فبلاصتي حتى جات بشرى كطل حدايا قالت ليا جاد الهواري نعام الاللة نهار كبير هادا

قلت ليها سكتي ماتزيديش تكملي عليا راه غنزبلها

قالت ليا هاداك عرام الزين اللي حاده صاحبو ولا خوه ولا شكون

قلت ليها صاحبو

قالت ليا غندور بيه الى صلاحت فيه شي دورة .. عجبني ليوم نكوغطو شغلاوها هادوك.. وا تباارك الله كتار اختي علاش ماعيطيتش لعاىلتك شفتكم قلال

قلت ليها راه كولشي جا على غفلة حتى لمن بعد ونعيط واصلا الى عيطت ليهم لبارح خصهم يوجدو ويدرو بلانهم عاد يجيو .. صافي حنا فالكافية دخلات العائلة كلها شفت مو داخلة كانت لابسة واحد الصاية حد الركبة فضفاضة ديال دونتيل فوتحد اللون بارد ماهوا باج ما هوا سومو وفاتح وواحد البودي من لفوق يديه يديه فيهم فرافر واسع عليها بحاا القميجة وفيه صدايف الوسط وفوق منو الصاية من وسط الكرش ولابسة صباط مقمقم عالي نيت غوز فاقع ماط ديال الدان وبوشيط تحت باطها وفيدها كارطونة مزوقة فيها الشكلاط وطالقة الشعر كلح بخال ديما مصاوبها وقالباه لجنب واحد جاها منفوخ وحجبانها كوحل عاليين حاطة مكياج خفيف وسنسلة رقيقة ومجموعة من الاسوار فيها مخلطين روميني وكضحك سنانها كيبانو .. قلت لبشرى ها مو هاهيا

قالت ليا واش ديك المرى اللي لابسة جلابة بيضا وصاك قهوي

قلت ليها وااهاديك راه جداااه مو هي اللي قدامو شعرها كحل لابسة صباط غوز

طرطقات عينيها قالت حلفييي بالله ... ويلي متقوليش ليا عاديك مو كضحكي

قلت ليها وا هي هاديك احبيبة

قالت ليا هي كن ولدت حتى انا كن راه ولدي قدو ... اوييييلي على مو هاديك بحال شي اميرة

قلت ليها واييه راه مو سميتها سليمة

بقات كتشوف قالت ليا لا كلااااص الاللة نحلف عليها ماولداه

شرت ليها بصبعي جيت نوريها ختو كانت لابسة واحد كومبينيزو كحل كتافها عريانين بسمطة رقيقة فالخصر وصباط عالي طايح عليه السروال وهوا يقشعني جاد كنطل عليهم ورجعت اللور هربت قلت ليها قشعني تفووو .قالت ليا تبتي راسك خفتك ديري شي فضيحة قدامهم ... شوفي هما كي جايين طالقينها وضاحكين بحال داخلين للتيران!

قلت ليها هما هاكاك بلاتي تشوفي باه وبديت نضحك قلت ليها غير باه بوحدو راه اداعة دابا تفرجي .. والى شفتيه يخلعك بديك الطولة وتجريدة تقولي شي واحد صعيب وهوا الضحك والتقشاب اللي فيه ماكاينش فدوزيم

بقينا واقفين بدلنا الاتجاه كنتفرجو من الفوق وهما وسط الدار جالسين راك للهضرة تقول جاين للثيران كي خلاتها بشرى .. حماو السوق غير بيناتهم كيضحكو على جداه ويهضرو حيت فيها السكر والحلوى كانت محطوطة قدامها هزها عمي فاريح بعدها عليها وشدوها ضحك قولها وضحك عليها وماما جالسة معاهم هي والبقية كيشوفو وحشمانين .. وكتهضر بشوية وترحب بيهم .. واخا وصيتها حسيت بيها مرتبكة كضحك ولاكن شادة يديها كتفردهم وجالسة معاهم حشمانة .. كنسمع ضحك الرجال واصل فين وفين وهضرة العيالات .. زدت طليت لقيت جاد جالس مجمع مع صاحبو ومو كيرجع اللور كيموت بالضحك ماعرفت فيمن شادين عاوتاني .. اويلي هادا هوا العريس . ولاهيلا واخد راحتو بحال لا جالس فقهوى وديك المرة لكبيرة كتهضر مع ماما بالصواب والادب نعام الاللة وختي وراجلها قطعو الحس بقاو غير كيشوفو ويفرنسو

طلعات عندي سهام كضحك لقاتنا كنطلو بحال الطوبات قلت ليها اويلي ماتخليش ماما بوحدها غتحشم قالت ليا راه كتهضر مع جداتو ناري حشمت مامتيقاش جالسة مع جاد الهواري ..

قالت ليها بشرى وشفتي مو كي دايرة

قالت ليها سهام اانا تصدمت اختي والله حسابني فالاول شي ختو ولاا .. حيت خوه راه باين كبير غتكون دايرة تجميل

قلت ليها لالا ماشي ولدها والدهم باه مع وحدة اخرى هي ولدات غير جاد وميساء صافي

قالت لينا بشرى ايوا هاااكاك ..

قالت ليها سعاد واخا اختي راه ولدها تباارك الله قداش وهي راه مابايناش عليها حتى واش مزوجة !

قلت ليهم كنضحك ايييوا الله يحفض ليا حماتي

قالت لينا سهام وباه ياختي شحال فيه ديال الضحك .. سعداتهم ياختي مامعقدينش بحالنا ..يخخ تفو على حياة عايشينها حنا لا مع واليدينا لا مع رجالنا حرام يضحكو معاك ولا غير يشوفو فيك .. زعما راني راجل

قلت ليها قوليها راسك عييت نهضر عليك شوفي غير حالتك كي دايرة .. قلت ليك شحال هادي فاش كنت حالة بارا فارماسي اجي خدمي وهاكي سوارت فيديك ونتي بقيتي عليا لااا .. مايبغيش ... بسيق مايديرك تحت الصباط ونتي اللي قالها تقولي اه واخا وكيصرف عليه راه بطبيعة الحال يتنفخ عليك ويترجل عليك راه كيشوفك خريا طلاها بوحدو كتاكل ليه رزقو وجالسة فالدار .. مصبرو عليك غير دا الشقا اللي هازة ليه فالدار كيجي يلقاها كتشعل ونقية وياكل يشرب وينعس حتى الماء كيقول ليك جيبيه ليا واخا تكوني فالفراش !.. وداك الليل اللي كيجمعكم هادشي اللي مصبرو عليك .. حساب ليك على زينك وخضورية عيونك ! ... دارك فكرشو وكلاك نتي والبغو ديالك عارفك محكومة مضلمة اش غيبغي فيك .. الملل فحياتكم باااز ليكم

قالت ليا واهاحنا غنشوفوك اشنو غديري فاش تزوجي

ضحكت وقلت ليها واش عارفة بيمن غنتزوج ! .. راه جاد الهواري هاداك حتى الى يصمت راه غنفطر بضلعة ماشي نتي قربتي تعبدي داك نص راجل عندك ومطيحة الدل على راسك كنتطعن فاش كنسمعو ضربك ! ... كتسنايه يتبدل زعما .. ها اللي غيتبدل

قالت ليا وشنو بغيتي ندير نطلق منو

قلت ليها خليه الى باغاه خليه وهزي راسك خدمي ديري شي حاجة فحياتك كوني مرى وقادة يحتارمك وهضري على راسك مالك خفتي تبقاي فالزنقة ؟ مالم ماعندك خوت ماعندك مك خايفة يلوحك للشارع .. ولا خايفة تكوني عالة علينا!... باااز ليك اختي باز انا كنتفكرك كنبغي ناكل جنابي

بقات غير كتنهد وقالت لينا وايلاه دابا نزلي عند الناس راه كيتسناو

جمعت انفاسي وستعدت باش نهبط واخا مخلوعة كنزيد خطوة لقدام ونرجع اللور كن ما بشرى وسهام الي زعموني وقاديت وقفتي ونزلت مع الدروج تقابلت معاهم كاملين جالسين غرقت فحوايجي داكشي دعرض الازياء هزو راسهم فيا كاملين وضحكو ووقفو كيسفقو ليا وانا نازلة حطيت يدي على فمي ووقفت حشمت وبقيت كنشوف فالارض ورجعت هزيت راسي شفت فيهم وفماما مسكينة حتى وقفات فالطرف كتشوف فيا .. بقا غير راجل ختي اللي جلس ماكيبانش محملتوش .. اش كيعرف هاد وجه النحس بقات ليه غير القيمة فثقافتو يعيطها للمرى .. مشيت عندهم ماعرفتش بيمن نبدا السلام تعرض ليا واحد الوليد هوا الاول ولد خوه كيضحك معايا فرحان وتحنيت بستو وضحكت معاه وجات مرتو قدامي سلمت عليها وبديت نسلم وهما واقفين كاملين ضايرين على الكنبة وعلى الرجال سلمت بدي وصلت لباه كيهضر فرونس وعربية الدعوة مخبطة حط يدو علة كتفي كيضحك معايا وانا حشمانة مامولفاش .. وصلت عند سليمة سلمت عليها من وجهي قالت ليا الف مبروك .. مبروك مبروك ان شاء الله بالحياة السعيدة نتي وجاد .. ونشوفو لوليدات ديالكم فالقريب يا رب

قلت ليها امين وكان جاد حداها مديت ليه يدي وهوا فرحان كيضحك عنقني قدامهم بقيت كندور فعيني اويلي يا ويلي هادشي ماعندناش فتريكتنا بداو اووه ما اووه بغافو مابغافو كيسفقو علينا اما انا كنضحك وحاسة بوجهي طايب تحط عليه بغريرة طيب .. سلمت على الكل شي هضر عربية شي فرونسي كيباركو ليا ودزت حدا راجل ختي ماسملتش عليه حيت كان بوحدو اللي جالس رجليه مدليين درت راسي ماشفتوش وكن بغا نسلم عليه كن وقف حتى هوا كي الناس ماشي يبقا داير رجل على رجل .. مشيت عند ماما بستها وعنقتها مسكينة حشمات وشفت فبشرى وسهام كيضحكو مخرجين عينيهم . الصراحة حتى انا متوقعتش هاد الاستقبال هادا قلت غيبقاو يبرككو فيا بحال الخطابات العادية ونجلس حدا العريس حانية راسي . لاكن ماخلاونيش نحشم خرجو مني الضحكة بزز ومكيسكتوش .. ماعندهمش دقيقة صمت دايرين لومبيونص الحيحة نوضو فالفيلا غا هما مع بعضياتهم .. جلست حدا جاد حشمانة كنشوف ونش على راسي بيدي وقلت ليه بيني وبينو حشمتيني

قالي علاش؟

قلت ليه من بعد مهم .. ماشي دابا

بقيت ساكتة وهما كيهضرو كان خوه الكبير حتى هوا بحال باه وناري صوتهم شحال قوي . جات ميسا جلسات حدانا تصورنا وبدينا ناخدو تصاور والكل كيتجمع ومسكينة ماما مكتفهمش هضرتهم كلها ومدام سليمة كتهضر معاها وتمع معاها وماما كتحشم .بقيت عليها ماتحشميش نا تحشميش عند بالي القضية ساهلة ساعا الهضرة اللي ساهلة وانا براسي حشمت ركابيا فشلو وجاد حدايا كنحس بواحد الحرارة جايا من جيهتو .. حيد لافيست بقا بالقميجة سروال توب بلو مارين حط يدي على فخدو كيهضر معايا حسيت بداك التوب ركب ملس توبو زوين ناصع ..قاليه باه كيضحك وا نهار كبير كبير هادا اللي جينا نخطبو ليك السي جاد

ضحك معاه جاد وبقا ساكت وقالت لينا سليمة وهي كتشوف فينا بصوتها الناعم وقالت لينا شحاال تسنينا هاد النهار ولاكن كل حاجة فوقتها زوينة .قاليه باه كيضحك ياك قلت ليك مغنمشي بلجيكا حنى نطرق ليك على صبعك

صار عندي جاد كيضحك قالي علام هاد الواليد ياك

قلت ليه بلعكس غزاال وحتى ماماك فنة

هز يدو اللي جيهتي ضرب ليا ذقني بصبعو وقالي تا نتي فنة

حيدت ليه يدو قلت ليه اويلي ماما كنحشم قدامها وكتحشم

شاف جهتها وقاليها خالتي .. قولي شي حاجة علاش ساكتة

ضحكات مسكينة وهضرتها على قدها لهجتها شلحة واخا كتهضر العربية قالت ليه والكل كيسمع .. تهلا ليا غير فشايما راه هي ضو عينيا اولدي

قبل ميهضر قالت ليها مو كوني هااانيا من هاد الناحية ورتااحي جاد بلا منشكرو ليك .. غزااال مغاديش تشوف معاه شي نهار كحل راه ماشي كنشكرو ليك حيت ولدي .. مي فغيمون مخلق مربي غيحطها فعويناتو

ماما حشمات بداك الصواب قالت ليها هادشي اللي كنتمناو راه حتى هي بنت الناس وبنت الاصل وحاجتها ماهياش ديالها كاع .. غير هوا دابا راكي كتعرفي البنت اللولة كتكون مفششة وعزيزة .. ايوا راكي عارفة .. ضاروري شي نهار تغلط ولا تخجا فالصواب .. لاديش عليها .. ديرو ليها عقلها بشوية وصافي

هاد مي زعما راني غير وصيتها وبحال الى كاع ماوصيتها اما جاد شافيها قاليها غير تهناي وضرب ليا على فخدي شاف فيا عض شنايفو وقالي غنتهلا فيا مزيااااان وبدا يكرر .حط التريتور الماكلة كلينا فالضحك والنشاط .. راجل ختي ضهشر تقطع ليه الحس لاكن عصبني واحد اللحضة هز راسو بغت يقول ليهم زعما راني كاين وقال لختي سهاام اجي هزي ولدك عليا نعسيه

بقيت كنشوف فيه بنص عين ومشان هي هزات الولد والحمد لله كانو مجمعين ماداوهاش، فاش سالينا لغدا جلسنا ووقرينا الفاتحة وبدات المباركات والتصافح وكلشي تحرك و خرج خوه لكبير جلس فالجردة بوحدو حطو ليه كاس دالقهوة بغا يكمي وميسا مشات حدا الباب كتهضر فتيليفون .. جاد العريس زعما بغا يشرب ناض عندو راسو كان كلشي محطوط فوق واحد الطبلة فيها الكيسان والما وكولشي .. قالت لينا مرت خوه ديرو لينا موسيقى

شعلت تلفازة طلقت ليهم اغنية عندو زين عندو الحمام وجهدت فيها بدات مرت خوه كتسفق ووتشطح مع ولادها ودورهم وبشرى حتى هي شافت فيا وقالت ليا بعينها مالنا حنا ماعليناش الله ومشات كتشطح وقلت سهام نوضي حتى نتي يالاه جات تنوض سمعت راجلها قاليها فين نايضة واش غير لي شتيهم داروها تنوضي ديري بحالها؟

قالت ليه مالها شنو فيها!

قاليها جلسي داكشي اللي بقا غير تلوزي ليا قدام الرجال

قلبت وجهي مابغيتش نسمع ليه نهاري هادا غيفقصني فيه واللي سمعو يقول راهم كيلوزو وهما غير كيتحركو فبلاصتهم مكاين لا رديح لا والو .. ناضت ختو هي اللي لوزات الصراحة مع الكموبينيزو بانت فورمتها وكتوقف جنب وتشطح كما هوا سميتو شطيح دارتو وجرات باها نوضاتو كتشطح معاه وجر مها حتى هي .. فرحانين لودهم اما ماما مسكينة غير كتشوف وساكتة ونوضوني دارومي الوسط بقيت كندور فبلاصتي حتى حسيت بيد شدات فيا ودورت وجهي لقيت جاد جرني كيضحك معايا ناض شد ليا فيدي كيشطحني وانا كندور هاكا وهاكا دارونا الوسط حشمت وكيدورني ويجرني ويرخيني شطحني نين شد لمو فيدها دخلها كضحك معانا وشوية دحل باه ولان دائرة وسط دائرة وكنشوف راسي بوحدي اللي وسطهم اما وبشرى وماما وختي جالسين غير كيشوفو .. كلهم ناضو حتى خوه دخل من الجردة شد ولادو بجوج غير هوا وياهم كيلعب معاهم ويشطحهم شطحة افتحي يا وردة ..

دوزنا وقت زوين نشطنا فرحنا ضحكنا وجلسنا رتاحينا قالينا باباه ماتعطلوش على العقد ... مابغينا نسمعو شي مشكل طرا بحال ديك المرة .. ضربو الحديد ماحدو سخون

تلفت عندي جاد قالي جمعي اوراقك عاوتاني غير يتجمعو غنديرو لاكط

قلت ليه نشاء الله وقالت لينا سليمة ولعرس ؟

قاليها جاد واش ضاروري؟

حركات صبعها مخرجة عينيها كضكح قالت ليه لااالالالالالااا ضاروري ومأكد انا باغا العرس واخا متبغيوش .. باغا نفوج ونفرح بولدي

قالها عمي فاريح خليهم على خاطرهم .. اللي رتاحو فيها يديروها

قالت ليه على خاطرهم غيديرو ليا العرس ياك اشيماء ..وبقات كضحك قلت ليها ماعنديش مشكل الى بغا جاد

قالي انا ماعنديش مشكل الى بغيتو العرس

بقينا لعرس ما لعرس كولشي ماعندوش مشكل قاليه باه على بركة الله .. نديرو العرس .. وكن حساب لينا هاكا كن جمعنا عرس واحد نتا وهشام

قالت ليه سليمة حتى دابا مكاين مشكل نوجدو ليه على خاطرنا على ما يديرو العقد

قاليهم خوه لكبير وفين ؟ فمراكش حتى هوا ؟

قاليهم جاد الى كنا غنديرو العرس غنديروه فأوتيل ... صحابي غيجيو كل واحد منين ماتصلاحش الفيلا .. وحتى لافامي شيماء كنضن بعيد عليهم الحال

قلت لماما شنو بان ليك اماما

هزات ديديها وقالت لينا اللي درتوها لا الاه الا الله عليها

قاليها جاد لا .. ضاروري رايك اخالتي .. الى كنتي باغا شي حاجة اخرى قوليها حنا دابا غير كنتناقشو وصافي

قالت ليه حشمانة .غير العائلة ديالي فخنيفرة.. وازرو غيجيهم بعيد مراكش

قالها دونك نديرو هنا فكازا فاوتيل حسن اللي غيمشي يمشي اللي غيبكي يبات يلقا لوتيل

تافقنا على العرس فالاوتيل لاكن جاد ماعارفش باللي عائلتي على قد الحال غير انا اللي مرفحة كيحساب ليه كلنا ملعقين بحال عائلته .. تافقنا على كولشي وعلى العرس نديروه وجا وقت المغادرة واخا ما لبسناش الخواتم حيت كولشي جا مزروب خصني وقت نقيس الخاتم ونقلب انا وياه .

ناضو ودعناهم خرجنا معاهم حتى للباب جات سليمة عند ماما كتسلم عليها وتبوسها فحناكها قالت ليها بسلامة عليك وتهلاي فراسك بزاف ودعي معاهم يكنل عليه الله باخير وتيسير .. راكي عارفة دابا مع السوشل ميديا فاش كيكون شي واحد معروف كيكونو العينين عليه وداكشي كيدير المشاكل . شافت فيا وشدات ليا فيدي قالت ليا بلا منوصيك .. ماديريش راسك فداكشي وفالهضرة ديال الناس راه كتسبب المشاكل .. ولو تشوفي شي حاجة بعينك ماتصدقيهاش حيت الناس غتبغي دير البوز وتركب على الموجة

قلت ليها كوني هانية وطمتها وشكيت يمكن جاد قاليها بسبب سوشل ميديا تفارفنا حيت من هصرتها هادشي الاي ستنتجت .

ودعناهم مشاو ورجعنا للفيلا تنفسنا .. الله على راحة وحاسة بواحد السعادة كبيرة .. حرجسنا تجمعنا وبدينا نراجعو الاحداث كلها من الاول لقينا فيها وت المتبعة خطيرة وحنا كنهصرو على الاحداث الاقطات اللي مانتبهناش عليه

بداو تحضيرات العرس وتوجاد الاوراق .. طلع وهبط وسير واجي دخت وحشمت وتلفت ومشات ليا الفهامة كلها .. كن ماكانتش عائلة ديال جاد غتحضر كنت غنكون مرتاحيا نفسيا مستعدة ومسيطرة على الوضع .. لاكن فاش كتفكر باللي غيكونو وغادي يحضرو والاعين كلها عليا غنكون انا هي الكل فالكل كندوخ وكتفقد الثقة فنفسي ! بغيت عرسي يكون فاامستوى مابغيتش نبان اقل منهم او تبان عائلتي قل منهم واخا عائلتي ناس دراوش لاكن بحال دون الكنيات المرموقة المعروفة عندنا المغرب كتعطي القيمة غير لفلان وفرتلان واول حاجة يسولوك عليها هي شنو كنيتكم ؟ شكون نتوما ؟ عاد يفكرو يعطيوك وقت ولالا وكيبقاو معزولين كيخليو طبقتهم معزولة مكيتخالطوش مع الناس باش يبقاو متميزين .. وانا عائلتي مساكن ناس دراوش مافينا لا اطباء ولا معندسين ولا برامانيين ولا رجال اعمال .. غير البسطاء والمخير فينا استاذ .. واحد اللي طبيب من عائلة بابا حتى هوا قلب على لافامي كلها ودار صحاب جداد وماكيمشي عند حد ماكيجي عند حد وتعزل وتزوج طبيبة ونسا العائلة كلها باللي فيها .. فالصراحة انا ماختاريتش نكبر فوسط بحال الوسط اللي كبرت فيه .. ولا حتى العائلة ديال ماختاروش يكبرو فداك الوسط ... حنا جذورنا من الجبل من الاطلس وعندنا قبائل .. كل قبيلة شنو مكنيين عليها وتزاوجو بيناتهم وماخرجوش من المحيط ديالهم باش ينتاشرو .. من غير العسكر ديالنا اللي مشاو للصحرا وفاش دخلو بخدمو فالمدن لكبيرة داو ولادهم وعائلاتهم وهاكا بدات التفرقة .. حتى انا جداتي وبا كلهم اصولهم من الجبل كنعيشو وسط الجبال فاعالي القمم فقبيلتنا .. كاين اللي كيجيه هادشي غريب يقول مايمكنش ... مابقاوش الناس عايشين فالجبال واشنن قبائل .. لاكن حنا هادي هي اصولنا وجدودنا وعروقنا .. قبيلتنا يمينة من اليمن جاو فاش بدا المغرب كيتركب ويتوحد كانو هاجرو من اليمن واستقرينا فالاطلس ولقينا قبائل اخرى وتعاشرنا وتزاوجنا وتوالدنا حتى كبرو القبائل ديالنا .. لاكن بقات حياتنا كما هي حيت ماكان عندنا لاضو لا ما .. ديورنا من الثراب و الكوارا دالبهايم من الثراب و كنسقيو من العين على لحمير .. وكناكلو من الاسواق الاسبوعية اللي كتكون فالفيلاج عندنا ولا من داكشي اللي كنزرعو . لاكن هادشي مالحقتوش انا عاشت فيه جداتي وبا فطفولتو ومي حتى هي .. اما انا تزاديت فتنغير حيت با كان عسكري وكاجا من الجبل هوا وبزاف ديال الدراري وتزوجو وبداو يتنقلو حسب الخدمة حتى صفيت فكازا فاش كنت كنقرا فالثالت . تطورنا حنا وكاع العائلة تقريبا والقبائل كلها هبطو للفيلاجات والمدن خوا الجبل وتقدمو الناس لاكن باقي لعض العائلات تما وحتى دارنا باقا تما كنت كنمشي ليها فصغري فالصيف .. كانت كلها من الثراب والجبال والشجر دايرين بينا .. كان عندنا فران ديال الطين وطواليط على برا وكنضويو باللامبا ولا الفتيلة حنا وكاع الناس .. لاكن من بعد فاش وصلت للاعدادي مابقيناش كنمشيو لتما من زمان هبطنا للفيلاج حيت جداتي استقرت تما من زمان هي وعمومي .. اما خوالي تشيرو كل واحد فمدينة خدامين على راسهم .. لاكن باقا كنلمس فعماماتي ديك النية والسلم وخوالاتي ديك روح المساعدة والحنان وباقي عندنا المحنة بيناتنا وصلة الرحم متقطعاتش ونتجمعو على الحلوة والمرة .. هاكا حنا دايرين ماقريناش شي قرايا وحتى والدينا ماقراوش الا القليل اللي كافح حيت فالجبل المدرسة بعيدة والبنت مكتمشيش تقرا والولد الى قدر يكمل كيكمل الى ماقدرش كيمشي للعكسر هادا هوا حالنا ..

بغيت عائلتي تحضر وتكون معايا ويطلقو الشلحة ونوضو نشطحو عليها بحال فكل عرس... الشلحة ديالنا زوينة وعندنا موال وعندنا شعر وعندنا موسيقى روحية ميحس بيها وبمعناها غير اللي شلح بحالي وعندو ذكريات واصول اطلسية مع داك الموال فاش كنسمعو كنسافر معاه للجبال ولخرير المياه والطبيعة ديالنا .. للنسا ديالنا وهما واشمات وشام تعبيري .. لاطفال قبيلتنا وعيونهم اللي لامثيل لها .. كنتخيل يدين النسا الكبار بالحنا الحمرا حتى للبقع الكحلة .. بالدبالج التقيلة ديال النقرة والقفاطن البلدية القديمة ديال حرير الدودة .. كنتخيل لباس عروستنا التقليدي اللي لا مثيل له بالنسبة ليا كعطي واحد الوقار والحيا والسر لكل عروسة.. كنتخيل العود والسرج عليه والنسا وهي كتسقي الماء والرجال وهما كيسرحو فالجبال .. كنتذر الطبلة الثراتية الكحلة ديالنا ديال الخشب القصيرة والفطور عليها والخبز تحط طايب من الفران ديال الثراب ... موال كيسري ليا فالدم كنطلقو من حنجرتي القوية فاش كنكون بوحدي وشي مرات كيوصل حتى لعند عبد الله لعساس ولعند سعاد فالكوزينة كأنني كنغني فشي غابة والصدى كيتردد ... حتى كطلع عندي سعاد طل عليا .. واول مرة فاش سمعاتني حساب ليها كنغني فميكرو وتفاجآت قالت ليا واش صوتك !.. قلت ليها صوتي ولاكن منعرفش نغني من غير الشلحة والمواويل ديالنا .. واخا تولدت فالمدينة وكبرت فيها لاكن مزال متأثرة بتقالدينا وغنائنا حيت طفولتي كلها دوزتها وسط هاد المحيط والسفر مان داىما للجبل وحتى الشلحة مكانتش كتخطا فالحوار بين ماما وبابا فالدار او حتى مع العائلة فاش كتجي ولا فاش كيخرجو للزنقة

قطع تفكيري اتصال جاد قالي قالت ليك الوالدة الى كنتي مساليا عيطي ليها تشوفو شكون يأوغكانيزي لعرس

قلت ليه خاصني نشوف داكشي انا وياك اولا؟

قالي واش انا غنصاوب الحلوى؟ مكنعرفش فهادشي احبيبة وعندي لوتخيمو من الصباح للعشية

قلت ليه كي بقات رجلك ؟

قالي صافا صافا راه كنروضها باش تبرا دغياقلت ليه صافي انا غنعيط لماماك دابا

قالي يالاه اكبيدة ديالي

قلت ليه بيزو وقطعت تاصلت بمدام سليمة حيت مالقيت حتى سمية نعيط ليها بيها .. ماهي باينة عليها كبيرة نقول ليها خالتي وانا كنبان بحالها وخفت ماتعجبهاش خالتي .. ولا نعكي ليها بسميتها ! لا صافي تقادو لكتاف رجع قد القب قد السطل وحشومة حماتي نعيط ليها بسميتها .. بدا عمي فاريح جات معاه عمي اما هي لقيت ليها غير مدام سليمة بعدا بعدا سمية محترمة وماقالت عليها والو

جاوباتني قلت ليها راه جاد هاشنو قال ها شنو قال قالت ليا الى ماعندك حتى شغل نتلاقاو انا ونتي باش نشوفو شكون يأوغكلنيزي العرس

قلت ليها انا مسالية ليوم الى بغيتي نتلاقاو ماعنديش مشكل

قالت ليا صافي مزيان غنخرج من عند دونتيست نيعط ليك

قطعت معاها وكنت كنشوف واحد السيت ديال الحوايج ديال العرايس وداكشي ..مكنشري ما والو غير كنحفضهم حتى نرجع ليهم ونقارن بيناتهم حتى تاصلات بيا مدام سليمة قالت ليا نتلاقاو فواحد الكافي وخرجت لابسة حوايجي وانيقة حيت هي انق من الاناقة غيبداو يقارنو بيني وبينها الناس وانا مع الحجاب كيبيني بعقلي ومرزنة اما قبل كنت كنبان جريئة بزاف . المهم خرجت كنت دايرة نضاضر الشمس لقيتها جالسة كانت لابسة سروال التوب كري بارد وقميجة كحلة مخشية فالسرواا وصباط طالون ودايرة نضاضر حيت جات حدا الجاج كطل على الشارع .. كانت شادة تيلفون والقهوى حداها مشيت عندها كنضحك سلمت عليها ورضات ليا الضحكة جلست بقينا صاف ما صافا والمقدمة وداكشي ومابغيتش نتسابق معاها فالهضرة .. كنحشم منها وكنحتارمها بزاف وحاضية راسي لا نخرج شي كلمة عوجة نندم عليها .

قالت ليا انا جوبخيفيغ فلات فرتلنا هوا يأوغكانيزي العرس .قلت ليها انا كنشوف بزاف العلوي عندو داكشي زوين هوا اللي دار لفلانة لديك المغنية لعرس

دورات وجهها ماعجبهاش وقالت ليا لاااا .. داكشي مازوينيش عندو كنشوف العراسات اللي كيدير شحال من حاجة ما زويناش .. انا جوبخيفيخ العرس يكون سامبل .. يكون كلاص .. يكون تخيتور دواق وهادا راه لعراسات اللي كيقبط عير ديال فلان وفرتلان . والصراحة عندها الحق هوا مشهور والكنية تعطيك الخبار واخا مكنشوفوش خدام بزااف مع المشاهير وقلتها ليها قلت ليها معروف مي عمرني تفرجت لشي عرس ديالو ولا شفتو خدم لشي فنان

ضحكان وحركات ليا راسها قالت ليا هادا مكيخدمش كغاتوي وهادوك لخرين راه كيخدمو كغاتوي باش يبقاو طوندوس .. هادا كيخدم غير مع شكون وشكون معروف والى بغيتي نمشيو وتشوفي وتختاري نتاصل بيه دابا ..

قلت ليها واخا صافي نشوفوه ماشي مشكل

هزات تيليفون تاصلات بيه مكاين غير نعام سيدي نعام لاللة ولفخونصي كنسمعو من تيليفون كيرحب ويعاود فاش قالت ليه مدام الهواري الام ديال جاد الهواري السيد غيكون وقف وعجبو الحال . قالت ليا نمشيو دابا نشوفو شنو عندو واخا انا كنسنيي ليك عليك من هنا بلا ميخلعوك المضاهر والبوز الخاوي وفاللخر يديرو ليم شي تحشمية

ركبت معاها كانت عندها كاط كاط كحلة كتلمع داتني لواحد الفيلا تما فكازا على الواجهة ديالها وواحد اللوكو ديال السمية على برا و قداش . غير الدخلة دالفيلا هائلة كلها وسعة وحدة فيها الانواع والاشكال ديال الطبالي شي عشرة ديال الانواع كل طبلة والشكل ديالها والكراسا ديالها .. ها المربع ها المدور ها الزاج ها منعرف شنو العجب المعجب شفناه عندو بقيت حالة فمي .. دونا حدا واحد الطبلة ديال العشا زاجة وحدة لفوق مربعة تحت منها اكواريوم فيه الحوت فالالوان واضاءة زرقا والطبلة كلها مجهزة من الفوق بالكيسان والطباسل والديكوغاسيون والشمع الزسط طويل فالابيض وسط واحد الكاس مربع ديال الماء مشعول .. المهم الخيال العلمي داكشي عمري فحياتي شفتو لا فسوشل ميديا ولا فشي عرس. قالت ليا شوفي شوفي هاد الطبلة شحال غزالة ..

قلت ليها فنة

قالت ليا ايوا كي جاك هادشي؟

قلت ليها معتبر ماعندي منقول

قالت ليا راني قلت ليك هادوك اللي فليغيزو سوسيو كيمشيو كغاتوي باش يخدمو .. هادا راه كيخدم غير لاكخيم مامحتاجش للبوز

جا عندنت كان لابس واحد تيشورط كحلة ودجين داير واحد النضاضر كوحل صغار ومتوسط الطول. كيضحك من لهيه استقبلها استقبال حااار جدادا مكاين غير نهار كبير نهتر غليض

شارت ليا بيدها قالت ليا مرت ولدي المستقبلية نشاء الله

تفاجأ قاليها البطل ديالنا جاد الهواري!!

قالت ليه تماما

حل فمو كيرحب قالينا نهار كبير هادا ... الف مبروك والله يتمم بلخير.. مرحبا بيكم والف مرحبا منقدرش نوصف ليكم الفرحة ديالي فاش جيتو عندي ليوم انا جد جد جد سعيد ونشاء الله تلقاو عندي داكشي اللي بغيتو ورتاحيتو ليه

قالت ليه ايوا هادشي علاش ختاريناك نتا بالضبط تأوغكانيزي لينا لعرس ديالنا

هبط راسو قالينا الله اودي هادا شرف كبير ليااااا تفضلو مرحبا

رحب بينا فالبيرو عندو غير البيرو قداش بعدا بحال شي وزير وتصاورو مع النخبة معلقين غير الريوس لكبار ولاكخيم خلاتها سلومة

حط لينا بلاطو داللوز وبلاطو ديال التمر معمر والعواصر وجلس كيرحب ويعاود يقرب يهزنا على راسو

‎