أنا وبعدي الطوفان الجزء 19

جاب ديك العجلة حتى لعندي للبالكو قالي حطي تيلي شوية واجي تاكلي قلت ليه مابغيتش هاكا مرتاحة .. حيد ليا تيليفون لخاطر قالي انشوف شنو كتقراي طل لقاها رواية وقالي مغتهربش كولي شوية وجلس حدايا حسيت بمعدتي كدور وكليت بالزربة باش نمشي نقرا .. قالي شنو كيضرك

قلت ليه والو غير عيانة شوية

قالي باش كنحسي قلت ليه حتى حاجة

عنقني بيدو وقالي غنمشيو بحالنا غدا ان شاء الله

حركت ليه راسي ورجعنا تصالحنا بلحق قلت ليه اخر مرة نمشي معاك لشي كومبة .. ماعجبوش الحال قالي ماتقوليهاش غتمشي معايا فين مامشيت وبقينا كنهضرو وسولني فين غبرت فاش خرجت قلت ليه مشيت لواحد الحي وها شنو هاشنو عاودت ليه قالي اخر مرة ديريها ... واخا يوقع اللي بغا يوقع جاوبي راه مكتعرفيش بنادم شنو كيتخيل ليه فراسو فديك اللحضة يقدر يرتاكب شي جريمة وبلاصة ما نصلحو الوضع نزيدو نأزموه .. بقيت عليه درتي ليا وفعلتي ليا وهوا كيطلب السماحة ويبوس ليا يدي ويعنق قالي عرفتي عاد طخوا جوع كي دوزتها ... كحلة وانا براسي ماكنتش مرتاح فهاد الخصومة وبقا كيهضر وحتى انا ماخليتش من جهدي كاع داكشي اللي ضرني فخاطري قلتو ليه وقلبناها ضحك انا وياه قلت ليه شكرا على نونوس انا عيجبوني بزاف وعلى وجهه سمحت ليك

بقا كيضحك قالي وانا على وجه من غنسمح ليك

بقيت كنضحك قلت ليه على وجهي قالي لاا .. اجي نوريك على وجه من وهزني انا وداك نونوس دخلني لداخل .. دوزنا ديك الليلة حي وغرام حتى نعسنا وصبحت الصباح جمعت البكاج انا وياه ورجعنا بحالنا للمغرب كانت بقات غير شي اسبوع صافي للعرس .. دوزت الاسبوع فالفيلا مع التوجاد وكيجي يديني كل ليلة للاوتيل وليت عارفاه كندير بحسابو والصباح نرجع بحالي .

لاحضت باللي ليغيكل تعطلات عليا بزااف وكنحس براسي ماشي طبيعية .. قلت يمكن غير الهرمونات تشقلبوو كن بعد الزواج ورجعت عاوتاني قلت ياكما نكون حاملة ؟؟!!.. هادي 3شهور وانا كنتسنا تجي ماجاتش وكنقول بللاتي نزيد واحد الشهر مابغيتش نتفائل على والو فاللخر نلفا شي كيس ولا هرمونات مخربقين !. المهم درتها فراسي ورادة البال على بيدمن دوز هاد الموجة ديال العرس والروينة ونمشي ندير تحاليل واخا عندي احساس قوي مطمني كيقول ليا راكي حاملة بلا ماديري حتى حاجة . . جاني واحد الشعور زوين واللي زاد خلاني نتأكد هي حالتي وزدت هبطت مع الدروج نفطر مع ماما والعائلة وشافتني عمتي كانت جات عندنا وتجمعو عندي فالدار قالت ليا بالشلحة شفت عينيك طايحين .. ياكما حاملة ؟

ضحكت وشفت فماما قلت مانعرف

قالت ليا ماما ويلي علاه مادرتيش زعمت الاحتياط واش غتبرزي ونتي حاملة

سهام ختي بقات كتشوف فيا وضحك قالت ليا واش ماجاتكش الدم

قلت ليها لا 3 شهور ماجات

قالت ليا عمتي ايوا صافي راكي حاملة ... باينة فوجهك .. واش مكتحسي بحتى حاجة

حسيت فديك اللحضة بوجهي سخن عليا تزنكت وقلبي فرفر قلت ليها مانعرف .. مارديتش البال ولاكن حاسة براسي فشي شكل ... مارعفتش كفاش نشرح ليك

قالت ليا راكي حاملة ابنتي سيري دوزي وشوفي شنو كاين

قلت ليه راه غنمشي غير حتى يدوز العرس ... غدا غندير الحنة هنا حيت بغيت الشلحة وفالقاعة مكايناش الشلحة كولشي غيديرو تريتور

قالت ليا ماما راه هصرت مع خالتك حليمة تجيب ليك "تابردوحت" فقبيلتنا كنسميو ديك اللبسة ديال الشلحة كولها بتابردوحت واخا كل واحد اش كيقول ليها عندنا ولاكن حنا عندنا اللبسة ديالنا مهمة وليزاكسيوار ديالها سبيسال خاص العروسة تبلسها وحتى الفرقة الموسيقية ديالنا غيجيبها عمي من البلاد وانا كنت مصرة على الطقوس والعادات ديالنا وسط عائلتي والا مغنحسش براسي لا عروسة ولا درت العرس

الدار عمرات بالعائلة لكبير والصغير حسيت بالقشعريرة فاش تجمعات عائلتي وجايبين معاهم اللباس الثراتي ديالنا وفرحانين اللي دخل مع الباب كتسمع الزغاريت والحلق منين ومنين وتبارك الله حنا عندنا الحلوق كولنا اللي طلقات داك الحلق كيتسمع بالضوبل فقلب الدار .. وحتى بابا عيطت ليه عرضت عليه وعيط ليه عمي وكاع عمامي عيطو ليه مابغاش يجي وماكحرتش على الموضوع واخا جاني احساس فشكل . كل عروسة كتبغي باها ومها يكونو معاها ماشي يتيمة وهما مازالين فالحياة . حاولت مانحزنشش وما نهزش فقلبي وندوز نهاري ونعقل عليه وخليت لعائلتي الحرية الكاملة فنهار الحنة يديرو اللي بغاو حيت العرس غيكون فيه البروطوكول والمجهر انا براسي مغنلقاش راحتي مع عائلة ووسط غريب عليا ومامولفاش بيه .. بغيت ندوز عرسي كم تمنيت وشفت فعائلتي حيت الى مادرتش التقاليد فراه مادرت والو لا بالنسبة ليا ولا بالنسبة ليهم حتى هما .

تاصلت بالليل لسليمة قلت ليها غنديرو الحنة فالدار بتقاليدنا الى بغاو يحضرو مرحبا بيهم قالت ليا راني مشغولة لواحد الدرجة مكتصورش الى لقيت كيفاش نجي نجي سينو غنسيفط مريم وميساء ومرت ولدها لكبير .. حيت مريم جات ولاكن ستاضفوها عندهم هي وعائلتها وحتى انا مابغيتش الصراحة نجيبهم عندي وانا عندي الدار عامرة وخوالي وعمومي الدعوة مخلطة والعيالات غير الشلحة مكايناش حس العربية كدور . . الوقت اللي هضرت مع ساليما كان عمي لتحت كان عمي وولد عمتي لتحت كيضربو البندير والصف مخلط عيالات ورجال كيشطحو الشلحة .. وحنا معروف علينا النشاط عندنا عيب الى مانضتيش درتي الباروك وشطحتي يحسبوك متكبرة ومافرحاناش !. سمعات سليمة الدق قالت ليا شنو هادشي قلت ليها غير لافامي خالقين الجو وقالت ليا ديري لا فيديو نشوف . هبطت كنت لابسة واحد القميص ابيض وشال وبلغة لقيت الصف تجبد حتى للباب دخلو فيه الولاد البنات كولشي والعيالات وغير بالبيجامات دوك الطوال بحال لكنادر كيهزو فالكتاف ويشطحو .. صورت ليها المنضر من الفوق كانو دايرين الفيشطة نيت بقات كتفرج عجبها الحال قالت ليا زويين هادشي غدا غنشوف كي ندير نجي ضاروري نحضر للحنة

قلت ليها غتعجبك التقاليد الى بغيتي تبدلي على المعتاد .. جات ميساء كتجري ومرت ولدها كيطلو من تيليفون قالو ليا ورينا نشوفو وبديت كنوريهم قالت ليها ميسا ماما قولي لجاد يديني عندهم ولسقاتها قالت ليا شوفي هانا غسيفط ليك ميساء بغات تجي .. خليها معاك حتى لغدا صافي

قلت ليها صافي وقطعت معاها بقيت كنطل من لفوق طلقات خالتي واحد مولاي موال وسط داك الغنا والبندير سرحاتو والعيالات كيزغرتو .. بقيت كنشووف قلت لبشرى وهي حدايا شوفي عيني غرغرو بالفرحة ماحسابنيش غيديرو ليا هادشي

قالت ليا اري ليا اختي داك الموزون نهبط ندخل تما هاوشوني واخا شحال هادي مادخلت

حيدت الموزون كان ضاير على كتافي عطيتو ليها دارتو على كتافها ونزلات بقيت كنتفرج فيها من الفوق كتشطح

وصلات ميساء وصلها هشام ودخلات جارة باليزتها صغيرة نزلت بالزربة عندها تعرضت ليها بقات كتشوف وضحك سلمت عليها وطلعتها معايا كانت داخلة بواحد الجلابة قصيرة فيها فتحة حتى لفوق الركبة بقاو دراري العائلة كيشوفو فيها وهي كاع مامسوقة .. ديتها للبيت ديالي حطات باليزتها ولبستها واحد لكندورة حتى هي وخرجنا وصيت عليها بشرى ماتفرقش عليها ونزلو للتحت كل مرة فين جالسين كيتفرجو وكل مرة يجلس فوج وينوض فوج اخر .. اما انا غادية جايا هازة داك القفطان اللي بلا حزام حاضية الناس واش كلاو واش شربو وماما كل مرة جايا عندي تقول ليا اجي .. والصراحة وقفات معايا ماتوقعتش منها ديك الوقفة وحاضية شكون كلا وشكون ماكلاش .. وحتى التقة فاالنفس رجعات ليها خصوصا مللي خليت ليها الري والشوار هي كتوري للتريتور شنو يحط وشنو ميحطش واللي خصات كتسيفط العساس يجيبها وتجي عندي تقولي اري .. طلقي الفلوس وانا غادة جايا لواحد الصندوقة حطيت فيها الفلوس ديال مصروف العرس كنهز بالضمسات ونهبط ليها .

تهلاو فالناس بالماكلة وخفت مايديروش ليهم شي حاجة تعجبهم نهار العرس واصلا تافقنا مع تريتور على بروكرام ديال لعشا داكشي ميعرفوش ليه والحوت والاطباق وحنا عندنا الى ماحطيتيش الدجاج محمر بالدغميرة وماحطيتيش اللحم وخصوصا كسكسو ديالنا ديال التقاليد ميقولوش مشينا لعرس .

خليت ماما هي تكلفات بداك كسكسو حيت التريتور ميعرفش ليه بقا غير مع الحلوى وداكشي لاخر .. طيبو خوالاتي ومراوات خوالي فالكوزينة اللي فلاكاف .. هبطت ليها نطل ضرباتني السخونية والنفس مزموتة لقيت ماما مشمرة بواحد لاستيك فيديها ومعاه العيالات والبانيوات كيفورو ككسكسو ويدورو الطناجر .. اصلا ديك ثماارة فيها كيلقاو واحد المتعة كبيرة وبعد المرات كيبداو يغنيو ووحدة كتقول للخرى .. لا ماشي هاكاك كيقولو ليه ها كفاش كيقولو ليه .. زعما داك الشعر ديالنا اللي كيتقال .

قلت لماما راه ميساء جات ديري ليا انا وبشرى وهي فشي طبسيل بوحدنا وطلعت بحالي حتى جات سعاد هازة طبسيل ديال كسكسو فيه الشريحة والتمر ومسقي بواحد المرقة سبيسال عندنا وخاترة ودارت لينا لحم الراس فيها حيت دبحو عمامي الحوالا بالنهار مابغاوش نجيبو اللحم قالك نمشيو نجيبو لحوالا باش يعيشو ديك الاجواء ويشويو الدوارة . عطيت لعمي المصروف هوا تكلف بكولشي ..وماما زعما قلت ليها راه معايا ميساء مادارت كاع اللحم حتى سيفطت ليها عاوااني مع سعاد عاد حطات ليها طبسيل ديال اللحم .. اما انا وبشرى دخلنا فالراس طول عرض حيديت حناكو خليت ليها غير اللسان والجمجمة وبقينا كنتعشاو ونتجمعو حتى صونا تيليفون لميساء وشافت فيا قالت ليا هاهي وعطاتني تيليفون كان جاد .. جاوبتو بالزربة فمي عامر قالي كنصوني ليك مكتجاوبيش قلت ليه مماسمعتوش راه الصدع ومشغولة ..

بقا غير كيسولني باغي يدوز عندي يديني كيحساب ليه راحنا ناعسين كنتسناو العرس .ضحكني قلت ليه راني فالموسم كن طل عليا تحشم تقول ليا خرجي يالاه

عيا فيا قلت ليه لا بديت كنشرح ليه الوضع ماقدرش يفهم ولا يتخيل كيحساب ليه الفيشطة كتكون غير نهار العرس مافراسوش باللي حنا عندنا سيمانة كلها فيشطة عاد نهار العرس بوحدو ، تعشاو الناس وبدات الفراجة ولقاو التيساع فين يتمرحو .. اما لابيسين طلعنا عليه واحد الخشبة ديالو كتخدم بالضوء باش ميطيحش فيه شي برهوش ولا ولدي ختي نيت كيمشي يجري ليها تما ديما .

قصرنا ديك الليلة ماحسيناش بالوقت كي داز مع المواويل والشعر ومرة مرة ينوضو يفيشطو .. شداتني عمتي كانو جالسين فالجردة مان عمي كيغني ليهم بشوية ويدقدق بالبندير صوتو غليض ومدورين الكراسا وجلسوني معاهم وجلست ميساء حدايا لقيت عمي كيدندم ليهم و اولاد عمامي .. قالت ليا عمتي طلقي الموال وشفت فجنابي قلت اويلي غنفيق الجيران قالت ليا واحد مرات عمي يفيق اللي بغا يفيق .. وبقيت ساكتة وعمي كيدور ليا راسو ويغني ومتكي على البندير كيطبل فيه بصبعانو .. درت ليهم احم احم وبديت كنضحك حطيت يدي على ودني وانا نطلق الحلق ومشيييت معاه . الحنجرة الذهبية نعام السي بقات ميساء كتشوف فيا وجبدات تيليفون كتصورني وانا غادية مع الاوتار وعمي كيدندن .. كنقطع ونرجع فرغت طاقتي فداك الموال حتى ساليت وبداو كيزغرتو وانا كنضحك .. تلفت عند مايساء قالت ليا مانيفيك .. قلت ليها يااا مانيفيك عنداك تبارطاجي مع شي واحد واخا يكون خووك راه غايحيح عليا

قالت ليا لالا منقدرش نخرج الخصوصيات وفعلا عمرها خرجات شي خصوصيات للسوشل ميديا وحتى عارف ورادة البال .

قصرت معاهم ديك الليلة حتى عييت ونضت دخلت شفت واش كولشي مرتاح واش حتى واحد مامخصوص من شي حاجة وطلعت لبيتي خليتهم قصارين حيدت حوايجي لبست واحد البيجامة خفيفة وتكيت انا وبشرى والارض تنشرنا كتجمعو ونضحكو وخليت الناموسية لميساء نعسات فيها .. بقيت كنهضر انا وبشرى على قضية الحمل قالت ليا ردي البال تمشي تزلقي ولا تاكلي شي حاجة حتى تشوفي تحليلات .. حنا كنهضرو وهوا يسيفط ليا جاد مسج واتساب قالي تبارك الله على لبوئة الاطلس

بديت كنضحك قلت ليه علاش

قالي شنو دابا ماتجيش تسمعينا صوتك غتخلينا هاكا

قلت ليه ماعنديش كي ندير

قالي خرجي غير نشوفك

قلت ليه علاه نتا فينك

قالي فالدار

قلت ليه حسابني فالباب

قالي لا راه نايض دابا نكون عندك

قلت ليه حشومة

قالي غنشوفك وصافي

قلت لبشرى ها شنو ها شنو قالت ليا تكعدي شمن حشومة سيري شوفيه اويلي مالك على حالتك .. تا نتي باينة فيك باغا تشوفيه غا نوضي تكعدي كنتي تسسناي لي ينخزك هانا نخزتك يالاه نوضي

بقيت كنضحك قلت ليها والله الصراخة مكاينش اللي كيفهمني قدك ابيبيش ونضت لحت عليا داك القفطان والشال غير لحتو من الجناب مادورتوش ودزت على البلغة وخرجت من باب الكوزينة للجردة طليت بان ليا خالي كيهضر فتيليفون ويكمي خليتو حتى ضار ومشيت خرجت من واحد الباب صغير شفت يمين يسار وكنهضر فتيلي مزال يالاه كنقول ها منين خرجت زمعت الزحير ديال الطموبيل ضرب الضورة وشد الفران عند رجلي طلعت كنضحك قلت ليه هانا شنو غتشوف .. بقا كيطلع ويهبط فيا وقالي حقي فالشلوح ولا نطيح الروح

سالا معايا قلت ليه منين جبتي هاد المثل قالي كان كيقولو واحد عمي تزوج واحد الشلحة عاد عرفت اش كيقصد

قلت ليه واصافي هانا غنزل باي باي

دار لديك الطموبيل طراق سد البيبان وزاد بيا قالي اشمن باي باي؟ مكاين لا باي باي لا هاي هاي غتباتي معايا الصباح نردك

مشيت ورادة بالي على كرشي كنضرب ونقيس فقصتو ومابغيت نقول ليه والو حتى نتأكد بقيت غير كننتشكا بكشي وصافي ولغد ليه نضت انا اللولة دوشت مع النبوري وقلت نوض وصلني ناض بزز دوش وهبطنا ردني فحالي قالي بالليل غنرجع عندك وانا نقول ليه اوييلي واش نتا متقدرش تبات شي ليلة بلا ااا...

قالي مع الاسف منقدرش .. قلت ليه اويلي واش نتا هاكا ديما!

قالي من نهار عرفت ورشق على فخدي قالي يا لبوئة الاطلس ... وراكي لبوووىة نيت .. حطيت ليه خمسة فيعينه قولت ليه تبارك الله تبااارك الله ونزلت كنضحك دخلت مع الباب اللي خرجت منو لقيت كولشي فايق ... نااري كيفيقو على النبوري لقيت الفطور كيوجد مشيت تخبيت على ماما حيت غتغسلني ايلا شافتني درت راسي هبطت من الدروج زعما حتى واحد ماشك ومشيت للبيت كنجري لقيت بشرى باقا ناعسة هي وميسا وتكيت حداهم كملت نعاسي حتى دخلات سهام فيقاتني قالت ليا نوضي شوفي شنو غنوجدو راه جات النقاشة .

شفت فااساعة لقيتها لحداش! .. ناري مشا الحال درت مع السونتر دبوتي فواحد لاوتيل نمشي ندير حمام ومساج ونقاد الحالة .. فيقت ميساء وبشرى يمشيو معايا وجريت سهام حتى هي بولدها ديتها ومشينا تفركسنا وصليت صلاتي تما وقاديت دفاري درت فرانش وصاوبو ليا حجيرات المهم داكشي ديال العرايس وطولت دفاري مزيان جاو فنين وقاديت دفار رجلي وصاوبت شعري و حتى سهام عجبها الحال صاوبات واخا دايرة الفولار . ماخرجنا حتى للثلاتة رجعت لقيت الفيشطا ودخلت لقيت الرجال حدا واحد الباربيكيو كيشويو الدوارة والحيدوس قدو قداش ستقبلوني بالتمر والحليب والطقوس ديالنا ودخلت طلعت للبيت جاو عائلتي دارو بيا وجات جداتي هازين ليها واحد الشنطة والباب محلول كولشي باغي يطل وكولشي باغي يشوف .. جاب الله البيت كبير قدو قداش دخلو عندي العيالات والبنات دورو واحد الضورة كيشطحو ويزغرتو ويغنيو على لباس العروسة وانا الوسط كنشوف فيهم ونضحك وماما حدايا ..سمحو فالشقا باش يحضرو لطقوس داك اللباس التقليدي حيت مكيتلبسش حسي مسي .. عندو غناه وعندو عادات وعندو مواويل وشعر حسيت بالبكية وجداتي مت بابا واخا كانت قبيحة وصعيبة هي اللي شرفات على اللباس ديالي وكتغني ليا ... ماقدرتش نحبس ديك البكية حيت اجواء مأثرة زائد داك الكلام اللي كيقولو شوية محزن وماما حداايا كتبكي وحانية راسها .. حيدو ليا حوايجي كاملين بقيت بواحد شورط وديباردور بيضين وطلقو ليا شعري كامل وحلو ديك الباليزة قدامي بقات عمتي كتجبد وجداتي كطلق ديك شي بالتقالة ومي فيدها حفنة ديال الملحة كل شوية ترش منها قدامي وعند راسي جوج بنات عزبات واقفين وهازين درور فيديهم ديال الشلحة ديالنا فالاحمر والاصفر وكينش بيها على كتافي .. ديك العادة وتقاليد واخا غير بدع لاكن بقات متوارثة عندنا كينشو بديك الطريقة زعما يمين يسار باش ميوقعش شي مشكل كأنهم كيطردو الجن والطاقة السلبية باش ماتقربش ليا ولا نتمس .. مجرد افكار قديمة لاكن بقاو محافضين عليها ماعرفتش مصدرها وحكايتها بالضبط وكيفاش حتى خرجات هاد العادة لاكن غتكون عندها شي اسطورة حتى هي حيت كل حاجة فتقاليدنا عندها حكاية . طلقات جداتي داك القفطان الابيض كان بحال جوهرة رطب ماعرفتش سميتو لاكن كنشوف عرايساتنا كيلبسوه هوا نيت وعندو قيمة . كان مخدوم بالراندة باقي جديد طاح عليا وعلى كتافي جاني هوا هاداك وجبدو الدرة داروها ليا على راسي ومابغيتش ندير داك الدهين ديال الشعر ولحنة واخا كيديروها لاكن مابغيتش نتعمق بزاف قلت لجداتي غير خليه ليا محلول من الجناب وصافي وحزمات ليا الشدة جا داك الهدب طايه على الدورة ديال وجهي ولبساتني الاكسسوارات النقرة دارت ليا واحد على جبهتي دارت ليا موزون دوراتو على راسي و دارت ليا حلقات وشي لعيبان اخرين حدا ودنيا ولبساتني الطقم ديالنا ديال الصدر كامل حسيت براسي تقيلة ودارت ليا النبالة قدها قداش فيها رموز منحوتة والخاتم ديال جدودنا ولباستني الخلاخل فرجايا كل خلخال قد النبالة وكنسمع جداتي كتهضر فكل مرة لبساتني شي حاجة كتقول ليا قالت ليك فلانة الله يرضي عليك ... قالت ليك فلانة اللي يسخر ليك... وكدعي وتجبد اسماء الاجداد القدام اللي خلاو دوك المجوهرات ديال الفضة كتوارث من ام لأم . جبدات ليا واحد اللبسة .. لا ماشي لبسة هي دايرة بحال شكل الزربية اللي فيها الخيوط خاارجين بزااف بحال الراسطة لاكن رقاق شوية وتقيلة حطاتها حدايا ووقفاتي كتحزم ليا .. جات تزير وهي طير عليها عمتي خشات راسها قالت ليها بالشلحة ماتزيريش ليها على كرشها راه تما واقيلا بنادم

رخفات عليا جداتي داك الحزام حشمت منها بقيت غير ساكتة وسداتو ليا ولبساتني ديك الزربية ديال عروسة كانت مخيطة بالكحل و عندها خيوط خيوط خلاض ملويين فلكحل كيهزوها من الارض حيت ماوواصلاش حتى للارض حسيت بيها تقيلة ورجعت جلست فيها عاد رتاحيت كندوز يدي عليها كنحس بيها رطبة فيها ريحة الزمان ويعلم الله شحال فعمرها .

عااد حسيت براسي عروسة ديال بصح فداك اللباس وبدات جداتي كتكحل ليا عيني وبغات دير ليا سواك قلت ليها بلاش ، غيبقا فمي ليموني لغد ليه ديال العرس قدام الألبة . كان كولشي لابس اللي عندها شي تكشيطة

جبداتها ومحرفين بالموزون وحتى ميسا لبسوها ودارو ليها واحد الخيط على جبهتها وهاداك الخيط راه عندو قيييمة كيديروه غير للي يغاو يكبرو بين واخا هي ماعارفاش قلتها ليها انا قلت ليها راه كبرو بيك فاش دارو ليك داك الخيط على جبهتك راكي مميزة منين مادزتي دابا يعرفوك مهمة وبقات كضحك عجبها الحال وكتصور وتصورني معاها ... هبطوني بالزغارت ومع انا ماعنديش السدادر فالدار عندي كل بلاصة فيها فوطويات . جاب التريتور سدادر دورهم فواحد الاصباص كبير وفرشهم ودار ليهم لمخاد وخلى على راسهم واحد الفوطوي مربع فالواجهة مقابل مع كولشي فيه فرشو ليا عائلتي الزربية بالموزون فالارض قدامو وفرشو فوق الكنبي غطا اخر مخطط ابيض وباج حتى هوا بالموزون ودارو ليه المخاد ديالو جات الجلسة معتبرة وجلست الوسط حسيت بيها مريحة احسن كاع من الجلسة على السداري .. داك احيدوس اللي هبطني من البيت تسطر قدامي والرجال ديالنا لبسو الجلاب والرزات دارو ليا احيدوس وسط احيدوس اخر كنشوف العيالات كيشطحو ويشاليو بيديهم وشي مرات كيحنيو ضهرهم .. البنادر ماسكتوش والصدا وسط الفيلا كيبان ليا الباب ديال الدخلة قدامي مباشرة وانا فالقاع جا ورايا واحد الحيط ديال الزاج كيطل على لابيسين .. تركشات كولشي ناض شي دار احيدوس اللور فالجردة شي وسط الدار وشي برا حدى الدخلة وعاد ناضت الفرقة اللي جاب عمي دارو ليا واحد الصف طويل مقابل معايا مابقاش الباب كيبان ليا وجاو معاهم الشيخات لابسين الاصفر لقاو التواسع فين ينقزو اما عيالاتنا دخلو كاملين ف أحيدوس روكشوها .. وجبت جوج ديال الكامرات كبار كيصورو ليا الحنة كل واحد شاد اتجاه وعاد الكامرة لكبيرة من لفوق ركبوها شادة كولشي .. جبدات ليا النقاشة تصاور الحنة ختاريت واحد الشكل زوين

وماكثيرش باش منبانش بلدية بزاف وبدات ليا برجليا وانا كنتفرج تلفت عند سهام ختي غمزتها جات عندي قلت ليها طلعي للبيت كاينة واحد الصندوقة صغيرة هافين هافين هزي داكشي علاش قديتي وهبطيه فرقي واحد الف درهم على الشيخات والف درهم اخرى فرقيها على الرجال اللي معاهم ومشات جابتها بدات بدوك الشيخات علقات ليهم الزرقات ومشات جابت دورة ورجعات عطات لولد عمتي مشا فرق الباقي على الرجال وهما يحميو الطرح بالمعقول ماخلاو حتى واحد قادر يجلس وكل شوية نسيفط سهام تعلق ليهم .. واحد اللحضة جالسة مابيا ماعليا كنقش حتى بان ليا عمي وراجل عمتي خرجو من مور داك الصف الطويل من جهة الدروج اللي كيطلعو لفوق وموراهم بابا حادر راسو وموراه عمي وواحد عم بابا رجل كبير جايين جيهتي ماقدرتش نتيق غير شفتو دورت وجهي بديت كنبكي والعيالات كيزغرتو وناضو عماماتي وجداتي تعرضو عليه بقاو كيقولو ليه فيك الخير فيك الخير وهوا جاي عندي ماعرفت مندير ماحسيت براسي حتى وقت ليه عنقتو وبديت كنبكي وكنسمعو كيبكي حدا ودني وقالي المسامحة ابنتي المسامحة وانا لسقت عليه حسيت براسي غنسخف رجلي فشلو عليا وبست ليه يدو حيت جا حتى لعندي وماتوقعتهاش ماقدرش دمي يبقا بارد حسيت بالدم بيناتنا كيجبد واخا كاع اللي طرا واللي وقع كيبقا بابا غير المجية ديالو ودوك الدموع اللي شفت خلاوني ننسا كولشي ونحن للأب ولحضنه ماهما بلغات قساوة تربيتو وتعاملو الا وراه غتكون عندو كبدة علينا كما حنا عندنا كبدة عليه وحسيت بحرها فاش عنقتو وقلت ماشي دنبه .. حنى كبرو فمحيط خايب وكمل عليه العسكر وشخصيتو النرجسية ولا ماشي نرجسية هادا مكيعنيش انه ماعندوش قلب يبغي ولادو واخا يكون كيبغي راسو عليهم ماشي مهم المهم يكون كيبغي ولادو .. جلست كنتنخصص وجلس حدايا شد ليا فيدي وكيشوف قدامو شفت الندم والحزن فعينيه وكاع اللي ضايرين بيا كيبكيو وديك الفرقة كتغني على الاب زادو الجو اثارة . عطاوني كاس ديال الماء شديتو ويدي كيترعد شربت منو وحطيتو بقيت كنقلب على ماما بعيني مابنتش ليا قلت غتكون غير فشي بيت مخشية كتبكي وقبت لبشرى سيري شوفي ماما فين وناضت كتقلب وناض حتى بابا قالي الله يرضي عليك ابنتي والله يكمل عليك باخير ويسخر ليك .. ومشا قلت لعمي شدو ماتخليهش يخرج يمشي شدو يبقا راه با هاداك وقالي واغير كوني هانيا مغاديش يمشي ..صافي كلمة وحدة . بردت وحسيت بواحد الراحة وواحد الفرحة وتنهدت واحد تنهيدة قدها قداش و جلست عاد بديت كنضحك ورجع ليا اللون وعماماتي كيجيو عندي عجبهم الحال تم الصلح كيقولو ليا بااك هاداك ... واخا يوقع اللي وقع باك هادا .. الله يرضي عليك . هاكا يكونو المرضيات ... اما حسن دابا واش كي كنتي بوحدك ولا معاك باك

بقيت غير كنشوف ونضحك قلت ليهم بصح حسيت بالراحة اكثر من اللول وبقات عمتي لكبيرة كتنصحني قالت ليا حنا ماخلاوه واليدينا مادارو فينا ! واش نرميوهم ؟ واش رماونا فاش كنا صغار مالهم كنبكيو بالليل والنهار ! ... مالهم ماعياو منا !... ماشي غير كبرنا صافي نلوحو واليدينا ومنسولوش عليهم حشومة راه رباك ونتي صغيرة كتبكي كتبغي تاكلي وكتبغي تبدلي وشحال وهما يراريو بيك ونتي على نكير ديالهم ماقديتي تصبري ! .. قلت ليها ماشي داكشي راه وقعو مشاكيل اخرى خايبة ولاكن الانسان كيخطا كلنا كنخطاو مكنعرفوش شنو كنا كنديرو وندمو .

بقات تنصحني وكنهضر معاها حتى جات بشرى قالت ليا راها فالبيت مع خوالك وعموك وجا باك تسامحات هي وياه وباس ليها راسها وباست ليه راسو وراهم كيهضرو ويصفيو الخواطر كلهم فالبيت غير تهناي .. راه خليت عمك لكبير جبد ليه الجلابة ومك سيفطات الشيفور يجيب ليه بلغة جديدة قدو وراهم جالسين فالبيت دابا شوية ويخرجو

صفاو الخواطر وخرج با خرجوه بالزغارت لابس الجلابة واليلغة وداير الرزة وكيضحك جا عندي جلس حدايا حتى شوية بانت ليا ماما كترحب بعائلة العريس صدقو جايين كاملين ضهشرو فاش شافو ديك الفيشطة ... كانت مريم وباها ومها وعمي فاريح وولدو لكبير و سليمة ومرت ولدها وواولادها والجدة وختها اللي تلاقيت فهولاندا ايوا و سيهم جاد الزين صافي لابس دجين وتيشورط و سبرديلة داير كاسكيطو كحلة غير دخل ضوروه الدراري كيسلمو عليه ويتصورو معاه وجري من هنا وجري من لهيه صدقات سليمة جايبة ليا العائلة وجايين يتفرجو .. حيد ديك الكاسكيطة على راسو وجاو عندي ماصلاحش ليا نوقف كنت ناقشة واللي جا عندي سلم عليا كنقوليه بابا ووقف سلم عليهم كاملين ورحب بيهم وبقيت كنشوف ردة فعل جاد مع بابا .. كل واحد حشم من لاخر وتسالمو كأن شيءا لم يحدث وقاليه بابا اجي جلس قاليه جاد لالا غير خليك انا غنجلس هنا وجا جلس جنبي من الجهة لاخرى بقا غير كيشوف فداكشي ديالنا وجلسات سليمة حداه كانت لابسة واحد اللعيبة بلدية موديغن ماهي كندورة ما هي فراشة المهم جاتها فنة فالاخضر مع البلغة ومصاوبة الشعر شفت فيها كضحك وتشوف فيا والزغارت مكاين غا الله يعطيك صحيحتك .. اما واحد الشيخة طلقات واحد الموال تعبيري على قبلهم كترحيب بيهم وعمرات الدنيا .. خواو ليهم البلايص جلسو العائلة كلها قريبة ليا وانا حشمانة جيت الوسط بين بابا وجاد كنقول ياربي مايديرش شي فرطة ولا سي حركة وحنا عندنا عيب وحشومة .. دار يدو ورا ضهري وقرب لودني كيتغزل فيا وانا كندفعو بكتفي قلت ليه تيساع ماشي حدا بابا اويلي باك ماشي هوا با ماتقيسنيش .. بغيت نهرب مالقيت جهد وبقيت نتحكك حتى جمع يدو ورا ضهري وجات جداتي كترحيب بيه بغات دير ليه الحنة .. تبدل اللحن فلحضة بداو يغنيو على العريس دوك الاغاني اللي كنديرو فالحنة ديال لعريس وتحنات جداتي قالت ليه عطيني ديك مدهم ليها بجوج حلهم دارت ليه دوارة لوسط وتلفت قالي فودني واش ضاروري من الحنة؟

قلت ليه راك عندد الشلوح دابا اللي قالو ليك قول اه وصافي وبديت نضحك وحتى حتى هوا ماعتارضش بقا راخي يديه على ركابيه ودوارات الوسط صغيورين ورجعات النقاشة هي واللي معاها دازو على عائلتو كاملين بصبع صبع دارت ليهم الفال كلهم وجابو الرزة لجاد ماعرف باش تبلا حتى لقا عمي واقف حداه شادها هوا وواحد عمي اخر كيسرحو فيها ويقادوها ولواوها ليه على راسو وانا نضور شفت فيه قلت ليه جاتك فنة .. هز حاجبو قالي ونتي فين مخبية هادشي ... عليها قاطعة الحس كنعيط مكتجاوبيش

بديت كنضحك وشفت قدامي قلت ليه اييوا شتي

اما واحد عمي فاريح اسم على مسمى دارو ليه الرزة حتى هوا وجلس حدا بابا عاد كيتعارفو ويضحكو دغيا تفاهمو . قربات ليا سليمة تكات على ركبة جاد قالت ليا هادشي غزاال كن خليتي ختى لغدا فالقاعة

قلت ليها بعفوية راه كنت غنديرها قلتها ليك عند تريرتو .. وهي تقاطعني عاد تفكرات ورجعات اللور غمزاتني على جاد قالت ليا صاي صافي صافي .. عاد فهمت . ولاكن صراحة خسارة

تنهدات واحد تنهيدة حسيت بيها طالعة من القلب وقالت وهي كتشوف فيهم .. خسارة ... كان غيجي داكشي تخاديسيونيل

قلت ليها فخاطري واشدي تخاديسيونيل د نينيني خلي التقاليد فجهة واللبس تقليدي فجهة .. وشنو غندير بلعرس الى مادرتش فيه تقاليدي يااه !! ودغيا قالت ليا صافي صافي خافت تجبد الصدع و ولدها جالس بيناتنا كيسمع ينوض يقوليها علاااااش تقولي ليها ماديرش ياك عرسها دير فيه حتى الافارقة .. انا عاارفاه هاكا غيقول ليها وحتى عارفاه غادي يدور فيها داكشي علاش قالت ليا صافي وقلبات الهضرة بزربة حيت جاد واخا ضريف ومتواضع وزوين ولاكن النوضة عندو خايبة مكنحملهاش كنرجع طالبة التعادل وصافي .

المهم فوجنا نشطنا كولشي كيصورنا عارفة تصاوري غيخرجو للعلن هادي مافيهاش شك .. لاكن اللي باغا نعرف هوا اراء الناس فيا وفتقاليدنا وباينة غنلقا القرودة كيتنمرو عليا وعلى جاد حيت خسر فالمقابلة و يقولو عليه مكانش مسالي للونتخيمو السيد كان كيوجد للعرس . اصلا لكلاب فين ماضرتي تلقاهم حتى فخيالك تلقاهم . كانت واحد الاكلة من تقاليدنا العريقة بحال باداز كيصاوبوها كتولي بحال كسكسو فاش كيتكور وكيدروها بالسمن والزيت لعود ويحطوها فطبسيل كبير ويفرقو على الناس اللي وصل عندو الطبسيل كيهز منها لقمة بيدو .. سيفطت سهام قلت ليها جرييي عنداك يجيبو الطبسيل لهنا سيري حطي داكشي فطباسل وجيبيهم لجاد وعائلتو راه ميعرفوش يهزو بيديهم . ونيت راه مايبغيش يخشيو يدهم ويهزوها يكورها وياكلوها وبقا لسليمة حتى هي غا تخشي دفرانها فالطبسيل وهي حاطة عليهم الفلوس وعاصرة عليهم الوقت دور دور وتشوف فيهم . جابت سهام بلاطو فرقات عليهم طباسل صغار بالمعالق ديالهم وعطات لجاد حتى هوا سولني شنو هادي قلت ليه اكلة داخلة فتقاليد دوقها .. هز بالمعقلة كلا منها قلت ليه كيجاتك قالي زوينة وسولني واش انا مناكلش . قلت ليه فخاطري الغروسة مسكينة كتصوم نهار العرس كنبقا غا مبندة براكة عليها تشوف النعمة كدوز حداها وتسكت .. ونيت كن غا كانت لعروسة كتصوم نهار عرسها تاخد الاجر نيت حيت ماتاكلش اصلا . عمر ليا المعلقة قالي تاكلي؟ قلت ليه اويلي شكيت عليك راه العينين علينا يبقاو يقولو هاهوا وكلها هاهوا عطاها اه حقا قلة الحيا قلة العرض .. راحنا عندنا عيب هادشي

قالي واايلي على عيب فين لعيب فهادشي

قلت ليه ارا ناكل راسي

وخديت المعلقة بقا شاد ليا الطبسيل كناكل بجوج صبعان والحنة كتفرتت وحطو لينا الماكلة نيشان كنت دايرة الدجاج مدغمر واللحم بالبرقوق .. سكت الشطيح والرديح وجات جداتي حيدات ليا الحنة بواحد الدمليج دالنقرة ومسحت يدي بالبابي باش نتغدا .. عزلو الرجال بوحدهم والعيالات بوحدهم وخلاو عائلة العريس معايا فالطبلة اللي قدامي ومعانا بابا ملهي مع عمي فرايح كيهضرو علىاكشي د لارمي . حطو لينا الدجاج حسيت بقلبي ضرب جاوني الهوايش وديك الدغميرة معلكة حمرا والزيتون .. قربو لينا الطبلة مزيان وجا حدايا الحامض فيه الحار صافي كملات الفيشطة عندي ريوكي سالو قلت بسم الله ودخلت فالطبسيل كنتغداو ونجر الكبدة من هنا ومن هنا قلت لجاد وانا كنشوف جهة ميساء . . نااااري تشهيت ديك الكبدة اللي حدا ميساء .. حاسة بالحب اتجاهها.. تلفت شاف فيها قالي كي غندير نجيبها ليك وبقينا نوشوشو سمعاتنا سليمة كنهضرو سولاتو قاليها كيضحك جاها الحماق على الكبدة اللي حدا ميسا .. حبسات المديغ بقات كتشوفيا مطولا وتلفتات عند ميسا قالت ليها سمحي ليا حبيبة غادي ناخد ليك هادي وهزاتها عطاتها ليا حشمت حسيت بالحرارة طلعات معايا وبدات كدفع ليا الكبدة وانا كنقول ليها حشمانة لالا صافي وهي كتقو ليا كوليها غير كوليها وبدات تعطيني وكتسولني واش بغيت هادي ولا هادي رجعات هي كتقطع ليا بالموس وتحط ليا

دازت العشية زوينة دوزو معانا الليلة وخرج احيدوز للجردة وخرجت جلست مع الناس كنتفرج .. اما جاد وخوه مشاو وعيا فيا ماخلا حبيبة ماخلا كبيدة باش نخرج نمشي معاه واالو حتى عييت بالجلاس وسليمة وعائلتها كولشي مشاو من بعد بقات معايا غير مريم تجمعنا شوية عاودات ليا على السفر وتكيت بقيت شحال وانا نقول مع راسي مالي انا غنبقا جالسة هنا .. نعيط لجاد ونسلت عندو نمشي انا وياه لاوتيل الراس فالراس عطا الله منتعاودو ونقصرو كوراه مشهي يجلس معايا . داكشي اللي درت عيطت ليه لقيتو ناعس قلت ليه صافي غير نعس قالي واش نجي قلت ليه ماحسابش ليا ناعس قالي انا غنجي وقطعت كنضحك قلت للبنات اللي معايا فالبيت انا غنمشي عند جاد شوفو كي ديرو ليا الى سول فيا شي واحد وبقاو كيضحكو شادين فيا . خرجت سالتة لابسة واحد السلهام كحل ماعرفوني مرة ولا راجل خليت احيدوس نايض ومشيت على طريق الكوزينة خرجت لبرا طلعت كنجري .. طير ليا واحد البوسة مع الطلعة وزاد بيا مشينا لاوتيل دوزنا ليلة واشمن ليلة طفيت تيليفون ..السيد بغا يتسطا عليا قالي مكانتش عايش قبل منعرفك دابا عاد وليت كنحس براسي عايش .. بغا يحماق وزدت حمقتو وقلت غادي نقولها ليه ..ترددت شحال وقلت ليه انا يمكن حاملة .. تفاجأ بقا كيشوف فيا قلت ليه كاع الاعراض اللولة فيا وماجاونيش ليغيكل يمكن راني حاملة .. تبدلو تعابير وجهه عجبو الحال قالي غنمشي نجيب ليك التيست من شي فرماسيان بيرمانونص قلت ليه غير خلي حتى لمن بعد بلا متخرج فهاد الليل مابغيت حنى حاجة توقع ليك . ايوا السيد شافني خفت عليه تزعط بدا كيدير ليا كي الما لقليل ويتكايس عليا ماعرف اشمن طريق يشد تجنن ودازت ليلة مجنونة باس ليا فيها اليدين والرجلين هادشي غير كيعيف الحنة ولاكن عبرو عليه حناو ليه يدو بقات نقطة حمرا الوسط . بقيت كنطلب الله غير نبقاو بحال هاكا ميجيش شي نهار يمل مني ولا نطلع ليه فراسو ولا نمل حتى انا واخا راني حال واحوال مرة ندوب مرة نجمد.

صبح الصباح صبح عليا انا اللولة ماخرجت من داك الاوتيل حتى شبت مشيت حتى للدار عاد دوشت فالبيت ولقيت ديك المنسقة جات نزلت عندها نشوف شنو واقع كانت جايبة التكاشط بغيت نطل نشوف واش جايبة داكشي زوين لعائلتي ولا جايا ضحك عليهم . لقيتها جايبة داكشي معتبر وكيوجدو للعرس كتلبسهم وتقاد ليهم هي والمساعدات ديالها .. اما انا تاصلات بيا سليمة باش نمشي للاوتيل وهزيت باليزتي وصيت ماما وجبت ليهم طموبيلات كبار واعرين يمشيو فيهم للاوتيل كلهم فدقة ومشيت بحالي غير انا وبشرى ومريم اما سهام عندها ولدها جلسات ختى تجي مع الجميع .

دخلت لواحد الشومبر كبيرة ديال لعرايسات فديك البلاصة فين كاينة القاعة اللي غنديرو فيها العرس لقيت تريتور غادي جاي بلكوستيم ومعاه شي وحدين كيعاونوه وكولشي كلاص كولشي فرونسي . جو اخر تما ..

سمعت الدقان تلفت غير بعيني بداو النكافات يعشقو على مولاي السلطان اللي دخل .. جا قدامي شفت فيه قلت مشاء الله على راجلي حبيبي جا عريس وكلاص والكاريزمة واللحية وبلا منهضر على الفورمة .. طرشوني دوك النكافات بالتعشاق ووقفات معانا النكافة خدات صورة اللي تحط فالبروفايل عندها وعينيها كيبرقو بالفرحة .. اما جاد تحنى عندي شااف فيا غير من برا وقالت ليه النكافةة كضحك شحال تستاهل عروستك

بقا كيضحك وشاف فيا قاليها راه عارفة شحال تستاهل .

جريتو كنضحك قلت ليه راه كتقلب تغرم ليها وقالي اااه ماهزيتش معايا .. خرج واحد اللحضة غير شي جوج دقايق ورجع حط ليها مليون تصدمت قلت ليه اويلي بزاف وحيد عليا داك الفوال قالي تستاهلي اكثر.. وباسني فحنكي شد لينا لفوطوغراف واحد الصورة جات ككتحمق ونوضوني باش نخرج قلت ليهم جيبو ليا ماما نشوفها ومشاو جابوها دخلات عندي بقيت مبهورة فيها .. اشمنك تكشيطة لابسة.. والشدة ديال الفولار مقادة والمكياج صرعوها تقول ماشي ماما كتبان منخوية والضحكة عندها ياسلام مع سنانها مصاوبين جات فنة .. بديت نسول واش كولشي هوا هاداك شفتها مرتاحة عاجبها الحال بقات تقرا عليا المعودات ورجعات مشات قالو ليها غير سيري حتى واحد مغيبقا معاها غدخل غير هي ولعريس ... زيرت على يد جاد قالي مالكي قلت ليه فيا الرعدة حاسة بالخلعة ... السوسبانس مارفتش كي ندير ندخل مواجع كاع دوك الناس

زير عليا يدي وكتفو حدا كتفي قالي تنفسي

قلت ليه نتا مولف طلع فالحلبة انا لا

حيد يدو من يدي مسح على ضهري باش نرتاح لاكن ماقدرتش ... جا شي واحد دار اشارة للنكافة باش نمشي وشد ليا فيدي خرجت من البيت وكان باب القاعة قدو قداش كنسمع الدق والدف والزديح والشعبي لداخل .. غير تحركت بداو يعشقو وهوما غادين فجنابي داكشي اقل ما يقال عنه رااقي ... تقليدي راقي بكل المقاييس ومنضم ومرتب وكولشي مدروس .. كانو عيسواة مصافين فباي القاعة من هنا ومن هنا بداو يدقو فالاول بشوية شي دقة فشكل متضمين حتى سكت الجوق وزدت ويدي كترعد تصافو كاملين ورايا لقيت العمارية قدامي فالدخلة .. وقفت قدامها فالباب وكانو ناس النكافات ضايرين بيا مكنشوفش شنو كاين لداخل ولا حتى لقاعة كي دايرة ... التصاور كيتكتكو عرام ديال المصورين تقول كيصورو فيلم وعرا ليا جاد على وجهي شفت فعينيه حسيت بيه تأثر وعينيه كيبرقو .. باسني فجبهتي وجلسوني فالعمارية قادو ليا كولشي الشعر القصة من الجناب والتكشيطة وكيسولوني واش مرتاحة حتى شديت بلاصتي مزيان وحركت ليهم راسي هزوني هزة وحدة مع ديك الهزة ديال عيساوة تاهما تهزو دقة وحدة لقيت راسي مقابلة مع الصويري ومول البندير بجوج واقفين فالمنصة ووالقاعة واسعة وكبيرة مجهزة بديكور خيالي والاضواء والطبالي والفوطويات والناس كلشي وقف .. تهز قلبي ماقدرتش نضحك تخلعت وجاتني الدوخة كنحس بقلبي غيسكت ولحمي تبورش وغاديين بيا لداخل وكولشي وقف فالجناب وجاد قدامي كنهبط راسي كنلقاه غادي وكيسلم على صحابو السيد نسا راسو عريس كيعنق فيهم ويزيد وهما كيتعرضو ليه ... ضربت على واحد الكوايري مشهور جا عنقو خلعني قلت مع راسي ياربي السلامة واش انا هي العروسة فهاد العرس ولا جاب ليا الله ...

شي ناس كنشوفهم غير فتلفازة بانو ليا وواحد الملاكم حتى هوا مشهور لقيتو وسط داك الاكتضاض ديال الكوستيمات .. وبلا الاجانب على الجهد كولشي زعر كولشي ابيض باينين من الطيارة وكولشي كيشوف فيها وهازين تيليفونات كيصوروني .. درت واحد الابتسامة كنقول مع راسيو ما عرفت كي جيتهم ! .. اما عائلتي انا كن ما الحجاب منعرفهمش بداكشي اللي لابسين واللي مصاوبين مابقيت نعرف عمتي من خالتي غير بابا اللي عرفتو كان فالطبلة مع الرجال واقف كيسفق ليا لابس كوستيم .. بقا ناقص غير خويا مسكين ولاكن العلاج اهم من اي حاجة اخرى .

وصلوني حتى للمنصة فين كاين الفرقة ووقفو تما عيساوة وبداو المغنيين كيغنيو والفرقة الموسيقية وعساوة وكولشي خدم والنفار كيغيط والحيحة والناس كيشيرو ليا وانا كندير بايي باي .. دغيا ولفت خلعاتني غير التضهشيرة الاولى اللي تهزيت فيها وكولشي كايتسناني ندخل .. شفت جاد مشا جلس فالبرزة وفتح الصدفة كيشوف فيا ويضحك معايا ومو مشات طق طق طق بداك الطالون والمشيطة والتكشيطة جلسات حداه وفرحانة كنشوفها جالسة بلاصتها كتجبد مكاين غير مدام ومدام .. سيلتوبلي ... هاداك طبعها ولاكن راه ضريفة ماشي عقروشة بنت الوقت ماشي قديمة ..نزلوني مع الفينال ديال الاغنية وبدا الشعبي هاك بالاك .. جلسوني حدا جاد شديت فيدو قالي فودني واش دختي ؟

قلت ليه كنضحك فواحد اللحضة كنت غنغيب

قالي كيجاك داكشي

قلت ليه زوين غير ديك الخلعة اللولة

جات مو وصلات ليه الخبار قالت ليه الصحافة فباب الاوتيل باغين يهجمو .قالي ياك زدتو الامن

قالت ليه زدناه ولاكن قالك شي واحد سلت ماعرفناش شكون

قلت ليها فخاطري صافي دابا مادام سلت مغتعرفوه لا منا ولا منكم ولا من مالين الباش غا خليوها ساكتة.. لاكن ماهي غير شي دقايق حتى جات قالت لينا راه لقاوه صافي خرجوه عاد تهنينا وبداو الناس كيجيو يتصورو معانا بالنوبة وعائلتي جالسين حشمانين ماقال ليهم حتى واحد نوضو حتى قلتت لجاد قول لماماك تهضر مع المنضم يخلي عاىلتي تصور معانا

تلفت شاف فيهم وقالي اه اه يسان سيغ وناض من حدايا مشا براسو عند داك المنضم قالها ليه اويلي! انا قلت ليه حتى تجي ماماك قولها ليها صدق ناض هوا كاع ورجع جلس بدا ينوض بالنضام سبق من بابا و ماما اللولين عاد البقية والحق يتقال ..

عائلتي الله يعمرها دار جالسين بلا فضيحة لا والو ترونكيل كيتفرجو كاين البنات اللي ناضو يشطحو هما والدراري وكاين اللي ماناضش حييتت كيحشمو وهما براسهم ضهشرو حيت ماشي نفس الطبقة نهائيا . عائلة جاد تقول غير سياسين فرنسيين فشي حفل فالخاريج باينة عليهم من الشكل والهضرة والجلسة وحتى النسا ومكاين غير لاكلاص كنسمع غير لفرونسي وتقول واش كاينة العربية . جات عندنا الكامرة وحنا جالسين باش نقولو شي كلمة حيت كيدور على الكل وكل واحد قال علينا كلمة ومباركات ووصل عندنا بقيت كنشوف فجاد قاليها بلفرونسي كنتسمى نعيش معاها طول العمر وتعيش معايا طول عمرها وماتحتاج لحتى حاجة وهي معايا و ان شاء الله تكون حياتنا كلها زوينة كلها حب كلها غرام نستقبلو ثمرة الحب ديالنا فاجمل الاحوال ...

بقيت كنشووق فيه ونتأمل وهوا كيهضر وكفاش كيهضر حتى تقلبات عندي الكامرة بقيت ساكتة مطولا وقلت ليها .. بغيت نقول بالللي النهار الاجمل فحياتي هوا النهار اللي تلاقيت بيه .. علمني معنى الحب الحقيقي... معنى الرجل الحقيقي وبغيتو بصدق وحبيتو وقررت نكمل حياتي معاه الى الابد .. بغيت نقوليه كنبغيك بزاااف ..لقيت فيك حنان الاب والاخ وكل حاجة فتادقت ليها فحياتي .. كنتي صديق واخ قبل ماتكون حبيب او زوج وقريب ان شاء الله تكون اب .. اب ليا وللطفل ديالي غيجي ان شاء الله .. كنبغيك بزاف .. اكثر من اي وقت

شفت فيه لقيتو كيشوف فيا بنفس الطريقة اللي كنت كنشوف وابتسمت وجرني من خصري باسني فجبهتي قالي كنبغيك

.. تأثرت حتى دمعو عيني وانا كنهضر حيت واخا هاكاك ماقدرتش نقول كاع داكشي اللي فقلبي ليه وخاصني حياة على قداها باش نعبر ليه حيت مقطع صغير مكافيش

مشات لكامرة لاتجاه اخر كنشوف الناس كيهضرو معاها واغلبية عائلة جا اما انا غير كتوصل عندهم كيدرو وجههم كيحشمو حيت مامولفينش ماعندهمش الجرأة حتى يشوفو فيها بقا ليهم غير يهضر . وكاين اللي ماعارفش علاش جات عندو الكامرة اصلا درق وجهه تخبا وصافي

ناضت الحيحة مغني مور مغني نوضوني شطحت انا وجاد حيحنا ومامشيتش بدلت بقيت جالسة وجاد مشا عند صحابو دوروه هزوه فالسما قدام كولشي ... ورجعو حطوه ماقدروش يكملو جاهم تقيل .. قلت ليهم بااز اش نقل انا اللي كنهزو بوحدي ! ايوا باز والله

طولنا الجلسة حتى بدا العشا كيتفرق ومشيت جلست فطبلة خاصة مع الاشخاص المقربين انا وجاد حطو لينا الماكلة اشكال انواع غير التقديم كيدوخ والنادل هوا اللي كيهز ويحط لينا فطباسلنا ماتعرض حتى واحد لاحراج .. بابا وماما كانو عارفين العائلة كفاش دايرة حتى هما تقادو مع الناس وكلاو بالفرشيطة والموس وكنشوف فيهم رادين البال حيت مامولفينش وحشمانين مساكن وبقيت كنطل عليهم كنقول ليهم بعيني كولو وهما كيحركو ليا راسهم وكلاو .. اما جاد متكي على الطبلة كيشوف فيا وياكل ويهضر معايا كل شوية يهز ويعطيني لفمي بعفوية كيعجبو ياكل ويوكلني وانا غادية معاه كنهضرو ونتجمعو ولفت .. كل واحد معامن كيهضر فطبلتنا والكل مشغول حتى واحد ماموسق للاخر ... عركتها فواحه بحر ها المسوطي ها المقلي ها المصلوق ها المبخر عا المشحر داكشي بنين بزاااف اكثر من اللي كنت كنتوقع لامن ناحية العشا ولا الخلوى ولا المشروبات ولا الديسير كلشي غزال معتبر كليت حتى شبعت وجمعنا وطوينا مشيت لبست اللبسة ديال الطيفور عاوتاني شكل اخر دارو ليا السبولة جنب وخيط الريح والتاج بلدي لبست لبسة نوازيط بالحجر نوازيط بحال الرخام وشدينا جاد كنزاوكو فيه يلبس البلدي ولبسناه ليه جا كيفتن والتحتية بالراندة من العنق دايرة عليه والفوقية بلدية والسورال والبلغة والتقاشر تبدل لاكن ماعرفش يمشي بلبلغة بقل غادي جاي قدامي حتى تطلق ودخلنا فالطيافر مع الطرب الاندلسي دوزنا ديك الوقت اللي باقي حيت مادرتش اللباس بزاف لاكن ستمتعت بالوقت بزااف وجلست وفرحت ونشطت ومرتاحة من سير واجي . وحتى اللبسة البلدية جاتني زوينة مع الشمار وجلست فيها ناض الشياط مع دداك ليهودي اللي جا كيغني شعل فيهم العافية نوض كولشي كيتهز ماجلسوش ... بقيت كنمير كل مرة شكون .. مرة ممثل .. مرة مغني مرة صحافي . مرة فاشيةنيستات . وغير النخبة .. عاد اجي لاتجاه جاد ها الملاكمين صحابو .. هاللي فلكورة صحابو ... ها ابطال الاولامبيات .. ها شي وحدين اخرين كاع مكنعرفهم .. العرب والغرب الدنيا تخلطات وفرحنا ومشينا باش نساليو الحفل لبست الكسوة البيضا .. ياسلاام كانت خيالية جات مولاتها خصيصا باش تلبسها ليا ماشي ديال النكافة عندها ماليها بوحدها اما النكافة سالات شغلها .. كانت كولها دونتيل ولبيغل داكسي واو ومأدبة وكيوت طلقت شعري كامل درت ليه تاج رقيق والورد ودخلت مع حبيب قلبي ضارب كلاص بلو مارين.. طفاو الاضواء كلها وبقا الاولان كيبرقو وانا شاعلين فيا واحد الذائرة بيضاء كنبان بوحدي جايا شادة فبابا حتى وصلت عند جاد كان حدا واحد الحلوى قدها قداش اقل مايقال عندها روعة ... عطاني بابا ليه وتسالمو وشديت فيه هز ليا لفوال باسني وشدني من خصري بقيت كنضحك درنا رقصة رومنسية انا وياه وكيعنقني قدام كولشي .. قطعنا الخلوى بالسيف والاضواء شعلات والداك السقلي بظا يهبط من السقف على كولشي والتصاور والفلاشات واحد الاخساس رائع .. من مور ما قطعت الخلوى دخل مغني لبناني هوا والفرقة ديالو فيها الرجال بداك اللبس كينقز مشادين وناضت الركشة كولشي كيشطح وعطاني ديك العصية بقيت كنضرب فالطبل ورديتو ليه بقينا محيحين ماجلسناش مرة نشطح مرة نهضر انا وجاد وكيعطي ودونو ويعنقني .. كان باين الحب بيناتنا وضوح الشمس فنهار جميل ... طولنا شحال سهرانين مع اللبسة البيضاء عائلتي حساب ليهم صافي غير نقطع الحلوى نمشي بحالي هادشي اللي مولفين ساعة شافو الفراجة عاد بدات ورجعو جلسو حتى لحت الورد جا فواحد البنت من عائلتو وسالينا السهرة خرجت انا وياه خرجو لينا الشنطة للطموبيل ومشينا .. كولشي خرج وكاين اللي بات تما شفتهم غير خرجو ورجعو دخلو اما عائلتي ترونسبور اللي جبت ليهم ردهم للفيلا كلهم يباتو ومشيت انا وحبيب القلب بوحدنا كيسرا بيا شاديناه بوسان فالطموبيل وضحك حتى للاوتيل ديالنا فين كنباتو ديما ونزلني قالي دخلي نهبط لافاليز ونجي

هزيت الكسوة مشيت كنجري يالاه وصلت للباب حسيت بشي واحد جرني لاجنب جيت نغوت سد ليا فمي وغبت ماعقلتش على راسي حتى فقت بواحد الكاس ديال الماء حليت عيني لقيت راسي فواحد الفيلا فالجردة برا جالسة على واحد الكرسي وقدامي شي كمامر خلعوني .. شديت فقلبي كنترعد شفت فواحد فيهم كان هاداك نيت اللي ضربت فالباطو قالي ممتعة ليا مع راسك

شديت صدرير وباقا بلاغوب قلت ليه شكون نتوما . .شنو بغيتو مني

قالي واحد فيهم الباليزة ديال الفلوس اللي خديتي هي اللي بغينا

نكرت قلت ليهم اشمن باليزة انا ماشفت حتى باليزة

نزلات عليا وحدة بطرشة فحنكي وجراتني من شعري اللور حتى عواج عنقي قالت جاوبي فين درتي الباليزة ديال الفلوس ولا غنشركوك هنايا سمعتي ...

بقيت كنبكي قلت ليهم ماعنديش انا ماشفت والو ...

قال واحد فيهم لواحد اخر ارا داك تيليفون .. شدو وقالي مابغيتيش تقولي فين دايرة الباليزة ديال الفلوس .. ولا يمكن صرفتيها ... حنا عارفين كفاش ناخدو فلوسنا

بدا تيليفون كيصوني والخلعة غتقتلني .. دار مكبر الصوت سمعت صوت جاد قال الو وانا نغوت درت يدي على فمي وقل ليه لالا ... لا عفاك جاد لا

قاليه مسيو جاد الهواري عندك القد والقد ديال الفلوس .. الى ماجبيهمش ف 48 ساعة عمرك تشوف العروسة ديالك وغيوصلك الفيديو ديالها مشرحة

حيت بصوت جاد كيقول الو .. شكون معايا وكيسول شكون هما ..حسيت بيه تخلع وجا داك المسخوط حط ليا تيليفون حدا فمي قالي هضري معاه ..

درت يدي علىى فمي كنبكي وهوا كيعيط ليا شيماء .. الو ..شيماء

قلت ليه وانا كنتقطع بالبكا الو جاد ... سمح ليا جاد عفاك سمح ليا

قالي علاش عنسمح ليك شنو واقع جاوبي .. هضري شنو كاين

حيد داك ولد الحرام التيليفون حدا فمي وقاليه بغيتي تعرف شنو واقع هاد السيدة هادي اللي نتا تزوجتي راه سرقات باليزة ديال الفلوس فيها القد والقد وضربو بسببي خمس سنين ديال الحبس ... قالو ليه غادي يخرجوها مني يعذبوني العذاب اللي عمرني شفتو وكل ساعة ديال الروتار غنعيشها انا تعديب .. غير سمعت داكشي بقيت كنطلب الله يهز روحي للسما قبل منشوف شي عذاب ولا يمسني شي سوء .. بقيت كنعيط يا رضات الواليدين يا خيري اللي درت فالناس يا حساناتي ويا سيدي ربي ويا وجه النبي .. فكوني وخرجوني من هاد الموصيبة غادي نحمد الله صباح وعشية ... غير نخرج من هاد الموصيبة ونضحي باللي عندي كامل ... سمعت جاد قاليهم ماتقيسوهاش ... ماتقربوش ليها عطيوني ساعتاين نجيب ليكم لفلوس ديالكم

حسيت بجاد مخلوع عليا كيقول ليا متخلعيش غادي نفكوها وانا كنبكي .. قطعو عليه وانا كنشوف فيهم شار ليها واحد براسو لديك بنت لحرام طلعاتني جراتني بزز مني كنغوت لاحتني فواحد البيت بقيت كنزحف لسقت مع الحيط ودخل عليا داك مسخوط الواليدين وسد الباب بدا يحل فالسمطة قالي علا بيدمن يجسب لفلوس اجي تترباي شوية

جاتني الدوخة عشت الرعب قلت صافي هادي اللخرة ديالي غادي نتاحر موراها . تقنت كترعد وعاضة على شنايفي حتى تقبتهم بالعضان والخلعة وداك الحيوان جا حتى لعندي يالاه جرني من شعري صونا ليه تيليفون فجيبو وناض جبدو جاوب بالسبلونية مافهمت حتى حاجة ... اللي قشبلت يمكن واللع واعلم شي واحد عيط ليه قاليه يجس عندو شي بروبليمة ما بروبليمة وخرج طرق عليا بالساورت بقيت بوحدي كنقفقف ونفكر فجاد يعلم الله فيم راه كيجري ويطير وينزل .. دازت ديك الساعتاين بالحساب ورجع عندي داك كبيرهم بوحدو هوا وديك اللفعة كان غليض بحال الفيل .. ماهضرش معايا وعيط لجاد جاوبو فالبلاصة بقيت كنغوت من بلاصتي قلت ليه عتقني .. عتقتني غيتعداو عليا غنموت .. غنمووت وبقيت كنغوت بالخلعة شدني دداك الحلوف من شعري قاليه ساعة اخرى ... الى مجبتيهش الفلوس غنسيفطوها ليك مقطعة

غوت قلت ليه فلكوفر فالدار خودهم لاكن داك الحلوف قطع وخلا معايا ديك الحية سلخاتني بالسمطة حتى مابقيتش قادرة نهز راسي ... دازت ساعة ورجع عاوتاني ماخلاونيش نرتاح يهددو جاد و هوا يصوني ليهم جاابو قاليه وجدتي لفلوس .. شوية قالي نتلاقاو فبلاصة فلانية الى بلغتي الشرطة غنقتلوها وقاليه حنا مابغيناش مشاكل مع البوليس ولا معاك بغينا لفلوس اللي مشاو يرجعو بالحبة وماتعرفنا مانعرفوك

عرفتهم انا باغيين فلوسهم والمشكل ماكاملينش عندي واخا نبغي نرد عندي غير النص خاصني النص شنو غيكون دار فيه جاد .. جراتني بديك لاغوب كنزطم فيها سدات ليا فمي وكتفات ليا يدي وخشات ليا خنشة كحلة على راسي كنحس براسي كنزطم ونتعكل ولاحوني فواحد الطموبيل حيت براسي غادية فيها وكنقرا القرآن والادعية حتى حسيت بالطموبيل وقفات وبقيت فيها شحال عاد خرجونني وقفوني كنسمع غير الهضرة قاليه واش جبتي الفلوس ..سمع صوت جاد بقيت كنين وونهز راسي قاليهم طلقوها هافلوسكم واجدة

حيدو ليا داك الخنشة كان فمي مسدود غير شفتو واقف بعيد وطموبيلتو وراه وفيدو شنطة كبيرة بديت نبكي ... وشفت فجنابي كان دام الحلوف ومعاه جوج اخرين كيشوفو فيه واحد كان غيمشي يضربو وجرو لاخر قاليه جلس فين غادي باغي ضارب مع ملاكم وجلس قالي يقدر يكون هاز معاه السلاح . قالو ليه هاهيا يالاه لوح الباليزة ودفعوني بيدي مربوطين وفمي مسدود مشيت كنجري ونتعر فديك الكسوة فوق واحد القنطرة مهجور مكايدور فيها حتى فار وكل واحد فيهم مدخل ليها كموبيلتي ومقابلين رما ليهم جاد الباليزة بالجهد دازت فوق راسي وانا كنجري عندو حتى سمعت صوت القرطاس وحسيت بشي حاجة اخترقت الجسد ديالي شنجاتو وحسيت بالبرودة دخلات معايا وطحت على ركابيا كنشوف فجاد جبد لفردي من اللور بدا كيضرب اما هما كان غرضهم بيا انا غير عطاوني ديك القرطاسة سمعت صوت الحديد كيتحد مع الارض وكان هاداك اخر صوت نسمع وطحت على وجهي فقدت الوعييالي

شنو وقع ؟ فوقاش؟ وقع ؟ فين انا؟ وشكون انا اصلا ؟ ... اسئلة كيدورو فالذهن ديالي قبل منحل عيني.. تماطلت عاد حليتها مزاال ماعارفاش راسي شكون نكون ومزال ما شركتش الاتصال مع الحواس ديالي كانت الرؤية مصببة بزاف والسمع ديالي ضعيف .. كنسمع غير تيت تيت وشيءا فشيءا بدات كتوضاح ليا الصورة وبديت كنشوف النور من جديد لاكن ماقادراش عقلي متوقف .دورت عيني مزيان لقيت واحد السقف ابيض وحدايا السيروم معلق ويدي ناعسة حدايا ... انا فين ؟ شوية بديت نسمع الزغارت وصوت البندير والمواويل .. واحد الشوية سمعت صوت الشعبي والضحك والقهقة ... شوية سمعت صوت جاد من بعدها صوت القرطاس!! تخلعت وهزيت راسي شويةة لاكن فشلت حساب ليا راسي عير حلم لاكن فاش تذكرت شمو وقع نخلعت وبديت نين ونين باش يجي عندي شي واحد حتى دخلت واحد الممرضة كتجري شهبة لابسة طابيلية غوز هضرات فرونسي كتهدني وجاوبتها قلت ليها في جاد شنو وقع ليه ..

كتحط يدهها على يدي وطمني قالت ليا كاين .. ماتخلعيش كولشي مزيان الحمد لله على سلامتك

قلت ليها فين انا وشنو اليوم

قالت ليا نتي فسويسرا .. وكنت مريضة ماشي غايبة مية فالمية حيت كتجاوبي وكتهضري وتحلي عينيك لاكن ماشي فوعيك

قلت ليها شنو كندير هنا فسويسرا انا كنت فالمغرب ..

قالت ليا الزوج ديالك جابك لهنا وكانت حالتك صعيبة. . لتكن الحمد لله القرطاسة خرجات لحمك برا ودابا ثلت شهور ونتي ماشي فوعيك الكامل .. بديتي كترجعي الوعي تدريجيا

حسيت بشي حاجة زواتني فكرشي دد وحطيت يدي عليا وشفت فيها حسيت بالحركة غريبة وقلت ليها واش انا حاملة

قالت لي غير تهدنني ماتعصبيش على قبل البييي .. عندك دابا ست شهور والبيبي غادي وكديكبر وكيزيد كيبر احساسه معاك فحاولي ماتوصليش ليه مشاعر الحزن والعصبية ولا سي حاجة بحال هاكا

يتبع...

‎