بقينا شحال جالسين كنهضرو وقالي مغايبقاش يتلاقا بيا من غدا عندو واحد سيستيم خاصو يتبعو حيت بقا ليه اسبوع يبداو الاولامبيات . قلت ليه ماشي مشكل وقالي الى حتاجيتي شي حاجة قوليها ليا بالليل بالنهار مكنهزش معايا تيليفون ..
حنا كنهضرو وهي تصوني رانيا ابيل فيديو عاوتاني وقطع عليها كتب ليها مسج وانا عيني تما قريتو قال ليها عيقتي بهاد ابيل فيديو كل شوية صافي قلت ليك دابا نعيط ليك. هادشي اللي قشبلت وكتبات ليه شي حاجة مافهمتش ولاكن جاد تبعت معاه بالحرف وهوا كيكتب قاليها خلينا نتوحشوك شوية ..
مزال يالاه كيكتبها بدات كتصوني ابيل فيديو مصرة تشوفو حتى تعصبت وحيد الكونيكسيو من تيليفون فمرة وقلبت وجهي قبل مايهز عينيه . يالاه جا يحط تيليفون طلعات رانيا كتصوني ابيل عادي وخوا يهز تيليفون وقف قالي واحد الدقيقة اشيماء هانا جاي
حركت ليه راسي وشعلت واحد كويرو يونسي اما هوا مابقاش كيبان ليا ماعرفتو فين مشا .. انا جالسة كنتمنضر وواحد البطة .. زعما خليجي بداك اللبس ديالهم قدامي شاد تيليفون كيهزو ويحطو ويشوف فيا .. خيبت سيفتي فكمارتو ودورت وجهي حتى رجع جاد شاد تيليفون فيدو وجلس ماهضرش شعل واحد كارو وتكا على ركابيه فصمت .. بقيت كنشوف فيه وحاسة بواحد الراحة غريبة ماحاساش بالملل ولا بحتى حاجة .. هاد الولد دخل لي لخاطري بزاف لواحد الدرجة مكتصورش تقول من شحال هادي وانا كنعرفو . ابتسمت شفتو ساكت حسيت بيه تبدل غير من هاد النوضة اللي ناض ورجع ماشي هوا هاداك كنت متكية حاجة رجل على رجل كنشوف فيه وحطيت يدي عل ضهرو قلت ليه .. جاد؟ مالك تعصبتي
بديت كندوز يدي على ضهرو حتى هز راسو شاف فيها وقالي لا والو
بقيت هاكاك كنحك ليه براحة يدي وقلت ليه ماتخلي حتى حاجة تعصبك ... اللي غتعصبك سد عليها وركز على شغلك هوا اهم ليك دابا من اي واحد .. من بعد فاش ان شاء الله تربح وتاخد الشمبيونا دير اللي عجبك .... حتى انا اللي حسيتي بيا غنعصبك تجاهلني فهاد الفترة المهم هوا الحلم ليك ديالك مايضيعش
رجع اللور تكا على ضهرو وحيدت يدي قالي كتهضري بحال الى متأكدة غادي نديها
قلت ليه علاش لا : كتريني
. داير مجهودك .. عندك جمهور غتلقاه واجد يشجعك باش فايتينك هادوك ؟ .. اول مرة غتشارك ولا كفاش؟
قالي: لا ديما كنوصل للفينال من اللي عقلت على راسي ..ولاكن مكنديهاش .. مخايفش من الفنال خايف نخسرها حتى هاد المرة
قلت ليه : عادي هاكا كيبقاو عمرهم كامل حتى كيوصلو ليها ويديوها على 36 عام كاع
حسيت بيه تغير يمكن تعصب على ديك البنت .. ماكرهتش تعطيه التيساع حاليا من التعياط تخلي نفسيتو ترتاح ويركز على راسو .. شفتها كفاش كل دقيقة كتعيط راه ميمكنش دارت ليا الستريس وليت كنشوف سميتها كنتعصب.. كتقطع الحوار .. تقطع الماكلة .. تقطع الكمية.. كولشي تعصبت بلاصتو كنكره اللي يبقا كل شوية سر فر عليا واخا ميدير ليا والو كنكره كنولي نشوف سميتو نكحل بالعما .. باز ليه ! ولاهيلا بزااف مكتخليش ليه وقت فين يرتاح من تعييطة لتعييطة . كن غير دار بكلامي طفا عليه الزمر فخطرة مايشوف حتى وحدة وحتى انا منهم ويشوف غير الحلم اللي جاي على قبلو هوا والفريق ديالو وميضيعش هاد التداريب كلها فوالو .
كملنا ديك العشية جالسين طلبنا كوكتيل كما كيشربو هوا وشربت واحد الكاس حسيت بالفرق بين داك السيك وهاد الكوكتيل . وقفت فكاس واحد صافي حسيت براسي مزيانة ومعسلة فنفس الوقت وماشي كاو . قالي غادي يحبس هادشي حتى يسالي وقلت ليه حبس حتى تيليفون طفيه كيجيب غير الاخبار ديال الويل ولا عطيه لخوك يبقا عندو .. كانت شي مكالمة مهمة يقولها ليك مكانش غادي يتكلف ونتا غتبقا مرتاح
قالي داكشي اللي كندير ديما .
قلت ليه احسن حاجة
قالي نتحركو ؟
قلت ليه اه
ونضنا كان الليل داني كندور ونتسارا .. اش هاد العالم الغريب المعالم . ميمكنش للرجال يقاومو هاد الطحبات اللي كيدورو والشيشة عادي مجمعين فالقهاوي شادين ديك الشيشة الصغيرة بحال ستيلو وعايشن . ضربت دورة شفت شوية وحسينا بالعيا بغينا نرجعو بحالنا نرتاحو حيت فقنا بكري . رجعنا وطلع معايا حتى للكولوار ديالي ووقف سلم عليا من وجهي ودوز يدو على ضهري قالي سمحي ليا مغنقدرش نشوفك بالنهار ولاكن الى لقيت شي وقيتة غادي نعيط ليك بالليل نتشاوفو
مسحت على دراعو ضحكت معاه وقلت ليه ماشي مشكل الى ماكنتي مسالي غير ديها فخدمتك ورياضتك انا ماشي مشكل
عنقني بواحد اليد تعنيقة خفيفة ومشا بقيت واقفة متبعة ليه العين غادي وسط داك الكولوار داير يديه فجيابو تبارك الله على فورمة .
دخلت للبيت سديت عليا ومالقيت مندير عمرت البانيو تكيت فيه وكنتكيف وساهية كنشوف فداك الدخان فين غادي ونسوط عليه
رتاحيت بديك التحميمة ولقيت سوشوار فالحمام نشفت شعري ومع مكاين مايدار جبدت واحد الصاك فيه كاع ليبخودوي كنت باغا ندير ماسك لوجهي ولاكن لقيت غير لي كريم دالنهار ولليل وديال ليسيغن والفم واليدين والرجلين والجسم صافي مكاين لا مقشر لا مزمر نسيتو . دهنت بداكشي اللي عندي ولبست ديك السوميج الرطبة فالكحل سامبل كيعجبوني فالنعاس ولفتهم وكنرتاح فيهم . مالقيت ماندير باش ندوز الوقت ودخلت لليوتيوب كنقلب على شي حاجة نتبعها لقيت واحد المسلسل ديال ماري تشوي قديم ميكسيكي شفت غير وجه البطلة عجبني وبديتو من الحلقة اللولة تبليت بيه .. بقيت كنتفرج شوية وانا فالفراش حتى صونا ليا جاد ابيل فيديو ..فتحت الكام لقيتو جالس عريان بقيت كنشوف فدوك الهواضب الليوعندو وديك الفورمة .. كان مزغب شوية مي زغبة رطبة ماشي بحال هادوك اللي دايرين كي لقرودة ولا هادوك اللي كيحسنوه بحال المرى تفو مكيبقاش الفرق بين راجل ومرى يخ . الحاجة هي اللي تكون وسط .. ماشي بزاف وماشي مكاينش فمرة . كان متكي عينيه تقال وانا ناعسة على جنبي وموقفة التيلفون فوق الناموسية .. قالي مزال منعستي
قلت ليه يالاه تكيت ونتا شنو درتي
قالي:دوشت وصافي حيدنا العيا . غدا غنبداو لونتخيمو
سولتو واش هاد لوتيل فيه لاصال قالي فيه مي مغاديش يتريني هنا هوا .قلت ليه بغيتو ليا نتحرك شوية
قالي مزيان غيعجبك فيه كولشي . هوا غيتريني فوحد البلاصة بوحدو مامعاهش البشار . بدينا كنهضرو وداك الدوا كيسد ليا عينيا حتى مابقيتش قادرة نحلها واخا عييت نحاول ونعست خليت لا كام محلولة ماعقلتش على راسي وماحلمت حتى نص حلمة تقول تضربت بشي فاز لراسي وفقدت الوعي والذاكرة .
ماعقلتش على راسي فوقاش نعست حتى فقت لقيتها الربعة ديال لعشية.. تصدمت اواه نعست هادشي كامل .. راني توفيت ماشي غير نعست . مشيت دوشت باش نخفاف ونشفت شعري الحمد لله على نعمة البروتين كيخلي الشعر حرير . لبست واحد الكولون رطب وتيشورط وسبرديلة باغا نكتاشف النكان وجاني الجوج نيت .. وشارجيت تيليفون لقيتو الصباح طافي ونزلت كنقلب ونسول وراني المرشد فين نمشي . دخلت لغيسطو فطرت وكان اوتيل واعر ديال الفريع كبير والديكوراسيون منهضرش عليها . من بعد مافطرت سولت على لاصال رشدوني ودخلت نشوف لقبت عندهم كولشي وحتى لابسين فاش سولت عليه قالي ليا كاين . جا عندي المونيتوغ باش يوريني شنو ندير بدا عليا بلونكلي وانا فوق البيسيكليت وقلت ليه عربي لو سمعت . قالي هادي اوكرانيا خلاها جاد . المهم ترينيت ودرت حركات وجريت وماخليت مادرت نسيت الوقت وسخفت ستحليت السبور بغيت نقتل بيه الملل ساعة قتلتو بصح . سخفت ومشيت غير تما شللت وهبطت لابيسبن كان عندهم عالم اخر تحت الارض .. ماشي غير بيسين واحد عندهم عرام . كنت هازة معايا واحد المايو واعر كحل رشيتو من واحد السيت ومشيت للفيستير بدلت ونزلت غير بوحدي للماء تطلق والحمد لله كنعرف نعوم اما كن درت الضحك فراسي .. بقيت كنسبح تما حتى شبعت ما برزطني حتى واحد مابسل عليا حتى واحد من غير الغميز من بعيد وفيهم قاعدة هاد الحولا كاملين فاش كتعجبهم شي وحدة كيهزو تيليفون يبقاو يديرو ليها فالاشارات . يخ . ماعلينا استمتعت ماديتهاش فيهم .. كيحساب ليهم شي مراهقة حيت وجههي صغير مدور ومكتبانش عليا كبيرة كنبان برهوشة . دوزت العشية تما حسيت براسي اونفورم وخفيفة وطلعت بحالي للشومبر لبست واحد الكسوة خفيفة بغيت نخرج والليل عندهم زوين وبغيت نشري .. كنحماق على هاد المسطلح ديال نشري .. المهم نشري واخا نشري الصدع المهم نخرج نبقا ندور ونبدا نشري نشري نشري كنفرغ طاقتي السلبية فالمشتريات . شديت طاكسي قلت ليه ديني لبرج خليفة هوا الوحيد اللي كنعرف وداني دخلت ليه خايفة نتلف لاكن كنزعم حيت بلاد العرب واخا نتلف نلقا راسي . بديت كندور فالمول دوخني وشحال كبير اكبر من احلامي كاااع ليمارك فيه وشي حوايج ماعندناش حنا تشري تما بزز منك واللي ماعندوش الفلوس مسكين غيشبع فقصة. ماعلينا دخلت لواحد المحل ديالهم عربي ديال العطور بقيت كنشوف هوا اللي بان ليا الاول .. اشمنك يا عطور .. اشمنك يا روايح .. دوك روايح العود اللي كيبيعو عندنا غير العود ديال الشجر اللي وسط المدينة كيبول عليهم الشعب وكيحرقوه ويطروه ويقطروه ويبيعوه لينا مخلط مع ريحة البول المنوعة وكنقولو حنا حقا روايح العود خايبين مجدين .. هاديك غير ريحة البول خانز اما روايح العود هما اللي عندهم هنا وانا مع عندي علاقة وطيدة مع الروايح غير شميت واحد النوع وانا نغبر تبخرت .. خفيف وهااائل خديت منها وقالت ليا هاديك اللي تما عندك الدوق رفيع فالروايح قلت ليها شكرا واش معندكمش فهادو ديال الرجال ؟
قالت ليا كاينين وقرباتني منهم غير القرعة تعطيك الخبار . بديت كنشم وهي تجدبني وحدة فيهم طيراتني ودات ليا العقل غتجي على الرجال كتهبل واخا يكون خايب تزعطي فيه . خديتها لجاد كادو قلت حتى الى تلاقينا نعطيها ليه هوا خلص عليا الطيارة حشومة منتفكرو بحتى جمرة .
خرجت من تما لقيت واحد اخر ديال العود نيت وكبير دخلت كندور ونشم عجبوني الروايح ديالهم وبديت نقلب لماما وبابا على وخويا وختي على شي ريحات زوينين يجيو معاهم وخديت ليهم العود حيت يقدرو يلقاو اي ماركة فالمغرب لاكن بحال هادو ديال لعود لا مغيبقاوهمش وفضلت ناخد ليهم شي حا0ة سبيسيال يديروها . حتى سعاد والعساس تفكرتهم طاحو ليا فبالي هما مساكن اللي هازيني يستاهلو وخديت ليهم وخديت واحد الطرف ديال لعود اصل ليا ولماما وختي خفت يشوفوه عندي يقولو ليا علاش ماجبتيش لينا . تقباتو ليا ديك البنت وحيدت السنسلة اللي فعنقي رمباتو فيه وعطاتو ليا درتو جا زوين شفت بزاف كيديروه كيجي غزال ورشيت فيه الريحة اللي خديت كتبقا عاطية وكيشد الروايح بلا ميخلطهم هادا هوا العود الاصلي .
ضربت ضورة فداك المول وفيدي شي صيكان تقديت شي حوايج وقلت مانشريش لمالين الدار حتى نقرب نمشي ونخصص ليهم نهارهم .. منها نيت نقلب على خاطري لماما على سرتلة شحال وهي كتقولي بغيت سرتلة دابا جات الفرصة ناخد ليها شي حاجة زوينة ونقية ولاكن خليها حتى نقرب نمشي. ولايني هاد الامارات فيها مايدار وفيها شحال ديال المطارق مكيساليوش ومكينعسوش او !! ماقدرتش نتسارا داك المول كامل عييت وهازة فيدي الصيكان .. جلست نرتاح ومع كليت غيروشي حاجة خفيفة لقيت تما واحد البلاصة ديال الماكلة طلبت الباسطا فخوي دميغ والفرماج وبقيت كناكل بوحدي واخا حنيت لجاد بقات بلاصتو .. يعلم الله فين غاطس مسكين كن كوراه داير ما فجهدو باش يربح . الله يسهل عليه هاداك هوا النهار الكبير . كملت ماكلتي حسيت براسي تقلت ولاكن الاساس اللي جيت على ودو مزال ماخديتو .. بغيت ناخد شي مجموعة ديال التقشير ومع انا محترفة فالبرودويات كنقلب على واحد النوع مالقيتوش . بقيت كندور بصيكاني حتى دخلت لواحد المحل كنقلب لقيت داكشي اللي كنقلب عليه . خديت مقشر وماسك اللي نقدر ندير يوميا بلا ما يأثر ليا وجهي وخديتو كان ديال اركان نيت . وشحال غزال واركان ديالنا وكيبيعو لينا حنا ديشي ! خديت المجموعة كاملة وعجبني المحل خديت الرقم قلت لربما نتعامل معاهم من بعد . اكتفيت الله يجعل البراكة وعيت وسخفت غير مع الدفع .. كنبقا نحسب ونعاود انسطاليت واحد لابليكاسيون وراها ليا جاد باش نعرف ندفع الفاتورة ونفعاتني كنقيد فيها شحال طلبو ليا كيوريوني شحال هي بالمغربية وشحال خاصني نعطي وكيطلعو ليا صور الورقات اللي نعطي مستفين وحتى الصرف فشاشة بيضاء بلا ميقولبني شي واحد .
خرجت من تما وكنشوف فدوك ليمارك تشهيت ندخل غير نقيس ولاكن مرونة بالصيكان وغنزيد نتقل اكثر ما انا مثقلة وشوف شنو قالي لحمار ديال راسي نشري ! شريت كوفرلي دوغي رطب بالخديات ديالو سامبل فيه شي رشمات خفاف ولونو باارد ما برونز ما دوغي حيت راسي قالي داك الفراش ديال الاوتيل غيكون نعس فيه ميات واحد وماقدرتش نرتاح فيه كاع بقيت كنتخيلو موسخ وبال عليه شي واحد وصبنوه وشحال تخربيق وانا اصلا كنكره الحاجة المشروكة ودرت على كوفرلي حتى لقيتو وهزيتو بغطاه بكلشي فواحد الكارطونة وداروها ليا فصاك كحل ديال وتميت خارجة مكنبانش وسط دوك الصيكان اللي هازة . شديت اول طاكسي دايز رجعني للاوتيل تعرضو ليا تما هزوهم عليها وطلعت لبيتي نفرش داكشي اللي شريت ونقيسو و نهبش فيه
داكشي اللي درت طلعت حيدت عليا ديك الكسوة .. عمرني ندير شوبينغ فشي كسوة وصندالة هادي والتوبة كدامي طابو وكل شوية نطلع ليها الخيوط .. حيدت سوتيان . الله راحة مايحس بيها غير اللي عندو الصدر . لالا مامدليش هوا هاداك غير باش مايدلاش كنديرو الحمالات . المهم لبست السوميج ديالي الثانية على لحمي تبردت فيها غير هادي ديباردور مثلت من الصدر فيه شوية دونتيل وشورط ديالها قصير حتى هوا فيه دونتيل من رجليه ورطبة . وفرشت داكشي كامل فالارض وجلست كنعزل ديالي من اللي ماشي ديالي ونستف والدنيا مقلوبة صيكان وكراطن . صونا ليا تيليفون كانت ختي هضرت معاها ابيل فيديو بقات كتوصيتي نجيب ليها ونجيب لودلها حتى جات ابيل ديال جاد وقطعت عليها فتحت ليه الكام وحطيتو فوق واحد المخدة فالارض قدامي بان ليا هاز تيليفون كيتمشا لاوي فوطة على عنقو وشعرو فازك .. استغرب باش كيشوف فيا شنو كندير ودار واحد الابتسامة قالي كتخملي!
قلت ليه لا مشيت شريت هادشي من برج خليفة
قالي مشيتي بوحدك !
قلت ليه لا داني ابو بعر ال بعير.. معلوم مشيت راسي مشيت فطاكسي ورجعت
قالي : برافو عليك راك قادة
.قلت ليه: لالا متخافش غدا تلقاني برج العرب. اجي قولي البلايص اللي نقدر نمشي نشوف هنا زوينين
قالي شوفي .. صبري راه عندي واحد النهار وسط لاسومين خاوي نمشيو للبحر
قلت ليه : بصح !!..
شد فكتفو كتجبد وقالي: اه .. غنرتاح فيه حاس براسي مدكدك
وصلنا للباطو كان ابيض وكبير شوية زوين شد فيا طلعت وطلع ورايا ودخلنا للبحر والريح والجو مشمش وواحد الصهد رهيييب ماعمرني شفت بحالو يخليك تلاح فالماء قبل ما تيبس بالحر .
جبدت طربوشي درتو عليا وجلست فالمقدمة قلت ليه صورني وقاديت البوزيسيو جنب وشديت فالشابو تصورت وخديت وضعيات مختلفة وهوا كيصورني ونضت باش نبدل لداخل ونصل تيشورط بقيت غير حالة فمي .. ماشي داك الكراطط ديال الزبل اللي كيعيفو فالمصاراعات الحرة مضاربين غير على الموسكيلاسيو شكون يكون منفوخ اكثر ويضربو فليباري.. لالالا هادا بوحدو مخدوم و متريني على الصح اول مرة نشوف بحال هادا الفورمة مرجلة وزوينة وصحيح قلت فخاطري تباارك الله مشاء الله وشديت تيشورط وتيليفون ديالو درتهم فصاكي وبقا هوا واقف داير كاسكيط ونضاضر ومشيت بدلت عليا لبست المايو ديالي وطلقت شعري ودرت عليا واحد الكاش حشمت نخرج قلاوية عليه من الدقة اللولة وهزيت طربوشي ديال كريستيان ديور وفوطتي ومشيت طلقتها فالمقدمة وجلست عليها حشمانة
جا جلس حدايا فوق واحد طابي وتكا على ضهرو تنهد وانا مدورة وجههي مابغيتش نشوف فيه حشمت وجنابي عريانين قلت بلاتي نولف عاد نتململ . جبدت واحد الزيت ديال لبرونزاج حطيتها دهنت منها رجلي ويدي وحليت الكاش دهنت كرشي وبقا ليا ضهري درت بناقص حشمت نتعرا .. وقف الباطو الوسط والجو وااعر والماء صافي الكالم وشحال من باطو فالماء كل واحد فين واقف مديت ليه الزيت قلت ليه دير منو
جرني منها حتى هبط راس وهزني من ضهري شهقت لقيتو حدايا وشديت ليه فعنقو كنكحب قلت ليه شربت الماء
بقا ساكت غير كيضحك وبدينا نعومو غادين حتى بعدنا على الباطو وعاود رجعنا وطلعنا للباطو طاح على الطابي تكا وعطا ضهرو للشمس وتكيت حداه حتى انا عطيت ضهري للشمس وتقابلنا بالوجه .. دار كاسكيطتو على وجه ودرت الطربوش على راسي ووجهي وجلسنا كنهضرو انا وياه وكانت يدو حدا وجهه قالي زوينة البارفان كتبقا فاليد
جاوبتو قلت ليه واش كيعجبك العود وحرك ليا راسو حسيت بيه ماعندوش معاه غير دار ليا خاطري .. حنا كنهضرو وانا نسمع تيليفونو كيصوني وتقلبت على جنبي مورايا جبدتو كانت رانيا.. ومديتو ليه وهوا يتبدل عقد حجبانو ورجعت للبوزيسيون ديالي وهوا متكيه على يديه بجوك كيشوف فتيليفون . غمضت عيني مابقيتش كنشوف فيه حتى سمعت تشاك وهزيت راسي لقيتو صورني انا وياه وبغا يوريني الصورة عاود طلعات رانيا كتصوني .. جاوني الاعصاب بلاصتو وناض من حدايا مشا مور اليخت كيهضر سمعتو معصب قاليها زدتي فيييه الناس كيديرو ابيل وحدة فالنهار ماشي مية ! ... واش مساليا ارانيا ماعندك مايدار مقابلة تيليفون . غنطفيه غير تهناي حيت عيقتي بهاد فينك دير نشوفك.. فين مشيتي فين جيتي معامن جيتي .. فين ما نقول ليك غادي لشي بلاصة تبعيني بالكام شهاد المرض ...وبزااف نكون مع الدراري نكون مع البنات ومن بعد ! الى فتحت ليك الكام ولقيتيني مع ابنت اش غديري كاااع ؟ كتبغي ديري فيها مطورة بهاد الكام ...صافي هضرنا معاك ماتعيطيش حتى نعيط هي ماتعييطيش حتى نعيط متقدريش تصبري وتفهمي راسك مرضتيني
هوا كيهضر وانا كنسمع وحنكي على الفوطة بقيت فبلاصتي .. تفكرت فاش كنت كنصوني لزايد والعافية كتاكلني وهوا كيغوت عليا وكنت كنطلبو غير يسمعني ونحاولو من جديد .. حسيت بنفس الاحساس مرة اخرى ورجع معايا المشهد كامل وكفاش كنت كنحس فكل كلمة قالها ... نفس الشيء كيطرا مع هاد رانيا .. حتى زايد كان مع زينب وفين ما نعيط ليه يسبني ويقطع عليا .. رجعات ليا الحالة وحسيت بحقرقة فصدري والنفس كطلع وتبهط بالزربة وبديت كنشوف راسي فهاد رانيا اللي كيهضر معاها بهاد الطريقة وهي راها كتشوط كما كنت انا كنتشوا وماحاس بيها حتى واحد .. غير رجع نضت جلست وقات ليه مالك كتهضر معاها بهاد الطريقة ؟ شنو فيها الى سولات فيك ولا بغات تشوفك علاش كتجاوبها هاكا؟
عقد حجبانو بقا غير كيشوف فيا وقالي بواحد الطريقة دخل ليا الهضرة من لحت قالي .. شيماء... هادشي بيني وبينها نتي معارفاش شي حوايج
قلت ليه : لا انا سمعت بودني كفاش هضرتي .. شنو ما كان ماتقولش ليها هاكاك .. مادرت ليك والو غير كتصوني حيت بعيد عليها وباغا تشوفك وكن ماكانت كتبغيك مغتبقاش مقابلة تيليفون وكتفكر فيك غير نتا .. هادشي اللي درتي معاه مكيدارش ولا على الاقل ماتجاوبش ..ارحم من تقول ليها مرضتيني ولا تهضر معاها هاكا
خليتو واقف مصدوم ودخلت .. ماشي درتها بلعاني وخليتو لاكن بعد باش ناخد الدوا ديالي بزربة وبديت نقلب عليه فالصاك مالقيتوش.. نسيتو .. هزيت راسي لقيت جاد مازال واقف كما هوا يدو على جمبو وكيشوف فالارض فالبلاصة فين كنت واقفة فصمت . واحد اللحضة وعلى غفلة ضرب داك التيليفون ديالو فالهوا جابو فقاع البحر وطلع على الحديدة غطس فالماء .. عرفت راسي خشيت نيفي فشي حاجة بعيدة عليا وماسوقيش فيها .. جبدت كارو جلست نكميه وسهيت .. ماكانش عليا كااع نحشر راسي فحياتو .. صافي انا وياها بوحدنا وهوا ورانيا بوحدهم تحضيه يحضيها شغله هاداك ماكانش عليا ندخل فيه وكن سمعني شي هضرة مكانش غيبقا فيا الحال حيت نستاهل . لاكن ماهضرش ماجاوبنيش وبقا العيب عندي وجلست والندم كياكل فيا حتى طلع من الماء فازك هز واحد الفوطة مسح بيها ودخل مشافش جيهتي كيتصرف عادي وحط الفوطة وهوا عاطيني بضهرو كيخوي الماء يشرب وقالي ..نرجعو ؟
قات ليه ليه اللي بغيتي ..
بغيت نعتاذر لاكن مللي ماعطانيش وجه حشمت حتى نهضر وسديت فمي وقال للكابتن يرجعنا وخرج وقف بوحدو كيكمي وانا جالسة كل شوية نطل عليه ..راس كيقولي نوضي هضري معاه ولاكن ماعنديش الوجه حتى نعتاذر ونشوف فيه حيت صافي طبعتها فيه واخا نعتاذر واخا منعرف شنو يقدر يساوي معايا وصافي .. فنفي الوقت مابغيتش نخسرو حيت اخيرا لقيت معامن نرتاح ومعامن نهضر
. بنادم كثير ولاكن الراحة مع واحد .. والى جاد حتى هوا قلب عليا وجهه غنبقا بوحدي حيط يلوحني لحيط وغنتأزم حيت كولشي درتو بيدي .
وقف اليخت وكنت لبست حواجي ولبس حتى هوا تيشورط ديالو ودار نضاضرو وكاسكيطتو ونزل هوا الاول تم غادي وتفكرني رجع خلفة شد ليا فيدي حتى نزلت وطلق مني ... بقا غادي وساكت وانا كنخمم .. وصلنا لاوتيل فين غنتفارقو وجبدت الكادو قلت ليه جاد . لكادو ديالك
تصدمت !!!... ماحسيتش براسي حتى لقيت راسي فالبيت وشبعت بكا وكالميت بالدوا وتهدنت بقات فيا الحال بزاف وخصوصا على الكادو اللي مابغاش يشد ماعرفتش كفاش نفسرها .. حسيت بجرح من نوع اخر وجبدت الشيك حتى انا دفعت فيه ثمن الطيارة اللي خلص ليا وقطعتو حطيتو حدا راسي
هزيت ديك الدقة كنداويها بالدوا تلفاتني على كاع الدقات بقيت شادة فيها كنكمد فيها والصباح صبحت انا والشنط ديالي واجدة حدا باب الاوتيل والطاكسي واقف كيتسناني غير انا نطلع .. لاكن بقيت كنتسنا يبان ليا هوا ولا شي واحد من الفريق ديالو حتى بان ليا خوه جاي جهة الباب ووقفت واخا ماحاملاش نوقف معاه وحتى هوا حسيت بيه واقف غير بزز قلت عفاك .. واحد الامانة عطيها لجاد كيتسالها ليا ومديت ليه البرية كنت حطيت ليه فيها الشيك و اعتذار قلت ليه فيه سمح ليا ماعنديش الحق نتدخل ليك فحياتك انا غالطة.
شدها قالي واخا وخرجت من بعد ما مشا وطلعت فطاكسي مشيت بحالي شديت الطيارة لتركيا هي اللي كنعرف مزيان نقدر ندور فيها بوحدي وجلست خديت المقعد ديالي وسديت عيني .. تفكرت ديك السفرة انا وجاد وابتسمت لا اراديا لاكن جاتني الغمة .. دغيا جا ودغيا مشا ... بهاد السرعة تبخر مزال كاع ماسخن بلاصتو . ولاكن انا اللي حمارة نستاهل اي حاجة طرات ليا واي حاجة غطرا حيت انا سبب تعاستي . انا مالي ومال الزمر ندافع عليها..نشوف غير راسي وحياتي اللي دايرة بحال شي سيدية مجرحة مابغاتش كاع تقاد .. حتى كنقول رتاحيت وضحكات ليا الدنيا فوجهي وكنرجع نهجرو راسي بيدي .. وصلت لتركيا شديت اوتيل فأنطاليا ونزلت عطاوني نختار الغرفة ختاريت وحدة مهوية على الطبيعة وعلى البحر ولابيسين .. فايت ليا جيت لهاد البلاصة لاكن كنمل منها دغيا ومن النهار الاول حسيت بالملل . شديت الشومبر ديالي وسديت عليا وكانت الليلة اللي غندوز هي اسوء ليلة فحياتي . تفكرت البرية وخوه وقلت يمكن موحال واش عطاها ليه .. يمكن جاتو فرصة يبعدني عليه ويخليه يركز فمستقبلو .. ولاكن معارفنيش خويت من تما غيقول باقا هنا تلهيه على رياضتو .. صافي عطيتو السبة اللي كان كيقلب عليها وترسخات ليا فدماغي باللي ماعطاهش البرا ولا حلها قراها وبديت نتلوى ماحملتوش يقراها ولا يعرف شنو كيدور بيني وبين خوه داك الزبل حاسة بيه شوكة فحلقي كن غير مكانش خوه تفو تفو تفو . تعصبت وبقيت كندي ونجيب ونشرب الدوا باش منفكرش وبلاصة ما نشرب نص وحدة شربت حبة ودخلاتني فواحد الدوامة ديال التخبطات ونعست من بعدها اطول نعسة من الربعة دلعشية للعشرة دالصباح .. فقت عاوتاني شربت المهدىء وفطرت ورجعت نعست بالدوا حتى للغد ليه . مابقيتش باغا نحل عيني ولا تيليفون شاعل يسول فيا شي واحد لا حتى حاجة بقيت لمدة 3 ايام على نفس الحال كنعس راسي بالدواء حتى لواحد اللحضة فقت كنلقا راسي فبلاصة اخرى من غير البيت ديال لوتيل .. هزيت راسي بزز وكنحس بيه تقيل والدوخة شاداني لقيت راسي فسبيطار ولباري فيدي والاكسيجين على نيفي
دورت وجهي لقيت راسي بوحدي وكنتنفس بزز ... يمكن فات فيا الفوت كما قالت الطبيبة حيت صافي وليت كنحس براسي قريبة نموت ولا نحماق نيشان . دخلات عندب وحدة بديت نسولها بزز باش تفاهمنا وقالت ليا جابوك الناس ديال الاوتيل .. لقاوك ناعسة والرغوة خارجة من فمك ومكتجاوبيش...ودابا خمسطاش ليوم ونتي هنا ماعقلتيش على راسك !
تصدمت قلت ليها شحال!!! ميمكنش انا لبارح نعست عادي
قالت ليا : لا ماشي لبارح ... حالتك راه جات خطيرة كنتي غتموتي .. الحمد لله على سلامتك . اول حاجة فكرت فيها فاش قالت ليا خمسطاش ليوم .. هوا جاد .. غيكون بدا النزال ووصل للنص.. شنو دار واش باقي مكمل ولا خسرو؟.. قلت لديك خيتي تعطيني تيليفوني قالت ليا ماجابوش معاك .. دابا رتاحي مزال مغتخرجي حالتك صعيبة خصها شوية دالوقت
مالقيت مانقول بقيت مرفوعة غير كنشوف وحتى واحد ما معايا حتى دخل الطبيب كيهضر معايا وديك البنت كتفهم السورية بقات طرجم هضرتنا شوية قالي منين جبتي دتك الدوا قلت ليه عطاتو ليا الطبيبة ديالي عندي كاع الاوراق وكاع الشواهد .قالي صافي حتى توقفي وتمشي تجيبي الشواهد حيت الشرطة دخلات فالموضوع كتبحث فهادشي والى كانو عند الشواهد غيخصك تمشي ايغجونص للمغرب للمصحة العقليةةهما يراقبو معاك الادوية حيت حالتك اللي جيتي فيها خطيرة بزاف وهاد الدوا مينفعش تشربيه بلا مراقبة .
حركت ليه راسي واستسلمت مابقات حتى حاجة كتخلعنب صافي وليت فحال شي ميت كيتنفس
عطيت الراحة لراسي وحتى الشرطة ماشفتهمش من اللي قلت للطبيب ديك الهضرة . بقيت كنفكر غير فالمقابلة باغا نتفرج فيها ومدام غنجلس تما بزاف طلبت غرفة اخرى كانت كتعطا بالفلوس احسن من الغرفة اللي كنت فيها وفيها تلفازة حولوني ليها وسولت ديك الفرملية على اولامبيات البوكس قالت ليا هاد الليلة كاين واحد الماتش وقلت ليها واش متبعة قالت ليا لا غير الاخبار اللي كيطلعو ليا وصافي .قلت ليها ديري ليا الاداعة فين كيبدا قالت ليا خاصك بي ان سبور مكايناش هنا
. قلت ليها عفاك شوفي كي ديري ضاروري نتفرج .. شكون لاعب ليوم ؟
قالت ليا ماعرفتش ولاكن نبحث ليك فتيليفون قلت ليا عطيني تيليفونك واحد الدقيقة .. غنتهلا فيك ماتخافيش
خلاتو عندي دخلت كنقلب على شكون اللي تأهل وطلع ليا جاد من بين هادوك اللي تأهلو وحسيت بقلبي ضربب وفرحت
. كنت على انفاسي وانا كنتسنا يطلعو وخايفة لاكن الحمد لله باقي غادي ودخلت لليوتوب بغيت نتفرج فالمقابلات اللي دازو لقيت غير اللقطات بقيت كنتفرج فيهم كان لاعب مزيان مكيطولش فالماتش دغيا كيطيح بالكاو .
شوية تلفت بتيليفون البنت كانت كتخليه عندي ولاكن ماتفرجتش فالماتش ماعرفتش فين ناقلينو واكتفيت نعرف الاخبار وتاصلت بالاوتيل هضرت مع وحدة وريتها فين كاين الملف ديالي جابتو ليا هوا وتيليفوني وجابتو ليا فكيت مشكل الشرطة وتم توقيع على رسالي للمصحة من بعد ما عطاوني اذن ومرافق بالخروج نجمع حوايجي وجمعتهم كاملين ومشيت فطيارة خاصة بالمرضى وكولشي دفعتو من جيبي لاكن هانيا مابقات حتى حاجة كتهمني . وصلت للمغرب نقلوني لواحد المصحة ديال الفلوس ختاريتها انا وتاصلت بماما تخلعات فاش جات عندي مافهمو والو . شرحت ليهم باللي غير الاعصاب وغنجلس فالمصحة شي ايام على قبل الدوا . قالي بابا نتكلف ليك بالمشاريع قلت ليه بلاش عير من تيليفوني غنقدر نسير كولشي ماشي ضاروري تنفخ عليا وماديتهاش فيه ومناقصنيش وبدا عليا فين داكشي اللي درتي معايا وضارت فيه ماما قالت ليه واش هادا وقتو ماوقتو بغاو يدابزو تما خرجوهم وطلبت من ماما تبقا جنبي . عطاوني الحق نخليها معايا حيت محتاجاها وبقات معايا فالمصحة كندخل ونخرج وندور تما عادي .. كاين ناس مراض بحالي بزاف ماشي كيضربو بالحجر وانما مراض هما عارفين شنو كيحسو باش جاو لهنا . حيدو ليا داك الدوا مدام غنبقا فالمصحة واخا معارفاش شحال نقدر نبقا تما لاكن تاصلو بالطبيبة ديالي جات زارتني حكيت ليها كلشي وتأسفات وقالت ليا نبقا معاها على تواصل غنرجع نخطو الخطوة بشوارها مغنبقاش نقرر ومغنبقاش نتصرف مني راسي
هزيت راسي ماديا فالكلينيك ودخلو ليا كاع داكشي اللي بغيت . حتى تلفازة جبتها جديدة ركبوها ليا فبيتي وفيها القنوات كلها ..رتاحيت فاش لقيت الاداعة اللي ناقلة الماتش وبقيت كنتفرج من التلفازة .. فكل مرة كانت المقابلة ديال جاد كنجلس نتبع بكل جوارحي وكنخاف يخسر لاكن كان عادي بحال كل لاعب كياكل ويوكل والمهم كيربح حتى وصل للفينال وبديت نحس بقلبي كيجري وعاد كيزيد التوثر ويزيدو الاعصاب . احسن جوج بقاو فالفينال واخر مقابلة غادي يديها واحد يا اما جاد ولا واحد من هولندا وبجوج صحاح وطوال حتى واحد مت قل من لاخر . بقات ماما كتمشي وتجي وانا متبعة الدخلة والنشيد والرايا وعرام دالناس كيهتفو بسميتو . دخل لابس شورط كحل فيه علامة ديال المغرب فالجنب وهاز معاه الرايا وعينو فيها واحد الدقة بدات كتبرا . دخل للحلبة كان خوه وكاع اللي معاه دايرين بيه وشادو خوه من وجهه وحاط جبهتوه عليه وساد عينيه كيهضر معاه والكامرة مقربة المشهد وجاد كيحرك غير راسو .. جاني ماشي جاد اللي كنعرف ضريف . حسيت بيه داخل وكيزفر غير بوحدو وخوه كيعنقو ويدوز عليه يدو .. لبسو ليه القفازات وجهزوه وتقلب كنشوف غير صدرو كينهج ويطلع ويهبط معصب وخوه كل مرة يجرو عندو ويصرب ليه وجهه .. كامو كاع اللي معاه متوثرين اما الخصم مرتاح كيضحك واللي معاه مرتاحين عكس لخرين تماما .
تقابل هوا وياه وانا كنفرد يدي تقول انا اللي واقفة تما . وعلى اعصابي مابغيت يدخل عندي حتى واحد بغيت نبقا انا والتلفازة وحتى ماما ضرت فيه تسكت دوخات ليا راسي وانا مستريسية . تقابلو قدام الحكم وبدا الماتش وماحستش براسي حتى وقف قدام التلفازة وقلت يحسن عوان مو وخوتو وعائلتو تاهما كم راهم واقفين قدام التلفازة بحالي . بقيت مرة نجلس مرة نوقف بالستريس وهوا كيلعب ويهجم كثر ما يدافع وكل شوية يردو الحكم وواحد اللحضة طاح على الخصم بالضرب حتى بعد ليه الحكم يدو .. الخصم مان كيضحك شوية رجع جدي حس باللي الماتش ماشي بديك السهولة اللي كان متوقع . سالات الجولة الاولى ومشا جلس عطاه خوه يشرب ومسحو ليه وجهه وعاود شد ليه راسو كيقرا شي حاجة قلت يمكن القرآن وبدات الجولة الثانية وكانت شاخدة اكثر من اللولة كنتسنا الضربة القاضية فكل لحضة .. واحد اللحضة هجم عليه الخصم بدا كيدافع ويراوغ حتى هزو بواحد البونية طيحو نعسو ماتحركش بقا كيتمايل فبلاصتو وانا مكشمة قريبة ندخل فالتلفازة وعلن الحكم على انتهاء المبارات وهز جاد راسو كيسوط وغمض عينيه كيحمد الله وينهج بدوك القفازات اما الحلبة تقلبات خوه شد ديك الراية وطاح علي رجليه كيغوت بالفرحة والجمهو دار حالة وتقربلات.. اما انا مع تصفيرة دالحكم نقزت طلقت واحد الغوتة وعنقت مي غضبات عليا حيت غوت عليها وجلسات تركنات وبداو عيني كيدمعو بالفرحة ودرت حالة جاو كيجريو عندي جابو البرا ضربوها ليا وانا عيني فالتلفازة مابغيتش البرا بغيت نفرح بغيت نقز لاكن والو ضربوها ليا بقيت كنشوف فيهم فاش علنو على الفائز وعطاوه الحزام الذهبي لبسو ليه خوه وهوا كيحي الجمهور ويضحك معاهم وانتهت المقابلة بفراتت كيبريو من الفوق وبدا غير المنشط كيهضر والرايا فالسما والحيحا واحد الاحساس اول مرة نحس بيه تبورشت بديت كنتفرج ودموع الفرحة نازلين
فقت الصباح من بعد ديك الفرحة ديال لبارح وفقت نكمل فرحتي فخاطري بلا غوات ودخلت للتيليفون لقيت الدنيا مقلوبة عليه قلبا قلبا .. بطل جديد بان .. على سلامتو خدم عليها وشحف وداها وان شاء الله يبقا ديما يديها . تقلبات الدنيا بحال شي عرس محتافلين وتصاورو حاطينهم فيت ما دخلت نلقاه ... وكاين اللي حاط تصويرتو فوطو دبروفايل والبنات اراك للغزل ماخلاوش فيه فلاوه فلياان . لكونط ديالو مكانش فيه بزاف طلع طلعة وحدة فربعة وعشرين ساعة كنخرج وندخل فالبلاصة كنلقاه هرب طلع . بقيت كنشوف فتصاورو كلهم فيهم غي الرياضة والبوكس وتصاورو فلاصال كيتريني ولايني تبارك الله زوين مسرير طيح كاع البنات فهاد الطلعة اللي بان فيها . . ماكرهتش نعيط نشوف واش خدم نمرتو نبارك ليه لاكن تراجعت درت بناقص .. انا مكتوب عليا نعيش هاكا ممحنة فحياتي رجعات حاجة عادية ودابا تشهر وغيشوف الناس كيهتفو بيه والبنات كي داايرين بنات العشرينات غيبداو يدورو بيه .. عاد باقي يسول فيا ولا فشيماء .. صافي دابا اي وحدة هضر معاها ماتقولش ليه .. مغنية عارضة دكتورة ماعرفت كي دايرة .. يجبها كتشعل .. اما شيماء مسكينة فالمصحة كتشرب الدوا حتى لامتا وشوف واش تبرا ولالا وفوقاش تخرج من هنا .. دابا لاشيماء لا ريم لارانيا غيبانو وحدات اخرى وهوا باقي صغير فالمقابلة كتبو السن ديالو عندو 28 سنة واخا كيبان عندو اكثر حيت مكضر واللحية والشعر وفيه الزغب ماشي عاد كينبت الشعر .. غبدا حياة جديدة وانطلاقة جديدة ودابا صبح بطل عالمي مايناقشوش فيها شي واحد غيعطيو ليه يلعب فاكبر مقابلة والفلوس اللي غيدير بلا منهضر عليهم . غينفاتح على العالم اكثر ما هوا منفاتح ويعيش بالطول والعرض .. اما انا حتى خيالي موحال يبقا عاقل عليه بقا غير يسول فيا واهوا فهاد الاجواء ديال الفوز والمباركات
حطيت تيليفون وخرجت انا وماما للجردة خليت الخلق للخالق .. الفوز ديال جاد لعب ليا على نفسيتي طلع ليا المورال وكن خس كنت غنتأزم اكثر واكثر براكة غير الستريس ديال المباراة دوزها عليا ولاكن الحمد لله جاب نتيجة ودابا خليه يعيش يستاهل وفرحت ليه من اعماقي وماشفت منو غير الخير .. دابا غتلهيه الوقت مايبقاش يلقا الوقت حتى لراسو وكنتمنى حتى انا نحقق احلامي كما هوا وصل ليهم حتى انا شي نهار نوصل ليهم .. وليت كنحن بزاف لحوايج عمرني حنيت ليهم وكنت كنقول العكس .. وليت كنتمى يكون عندي شي بيبي نربيه وهاد الامنية ماكانتش عندي من قبل لاكن كنآمن بواحد الحاجة .. ماحدنا كنكبرو واحلامنا كتبدل والانسان يحقق الحلم ديالو فوقتو ماحدو متشوق ويدوق طعمه احسن مايبقا يكبر ويحلم وحلم ينسيه فحلم بلا مايحقق حتى واحد حتى يلقا راسو فالقبر .
داز عندي النهار زوين بزاف وكل شوية ندخل نشوف الجديد كنلقاهم باقين كيهتفو بيه .. دوزت اليوماين اللولة مزيانة الحمد لله فضل الفوز ديال جاد حتى للنهار الثالت ودخلت كنشوف الجديد فتيليفون لقيتهم مصورينو فالمطار دالمغرب دارو ليا استقبال حافل بالامن والورد والحالة وهوا دايز معاه خوه ومعاه الفريق ديالو وداير كاسكيطة على راسو سبورتيف وحاذر راسو مرة مرا كيشوف فالناس بابتسامة ويشير ليهم وكيوقف مع اللي بغا يتصور معاه والامن فجنابو والبنات كيدافعو باغين يتصورو .. لقيت راسي كنبتاسم بوحدي ونقلب على بحال هاد الفيدوات كنلقا لحضة وصول الملاكم جاد الهواري .. شفت واحد الفيدو اخر والامن محاوطو طلع اللور فواحد الطموبيل بيضاء والناس كيهتفو خرجوها من وسط الزحام بزز بلا الصحافة اللي مكجكجة تما بحال الناموس هادي منهضرش عليها ولاكن ماوقفش والامن ماخلاوهمش يوصلو ليه.
قلت ليه : ديك البرا خليتها ليه نهار الثاني فاش رجعنا من الباطو ماشي عاد
قالي: كفاش؟!... وقتاش خليتيها ؟
قلت ليه انا النهار الثاني خرجت من الاوتيل وتلاقيت خوك عطيتها ليه
بقا ساكت مطولا حتى بديت كنقول ليه الو الو
عاد قالي كنسمعك ... وعلاش خليتي ليا هادشي
تنهدت وقلت ليه : جاد .. شوف .. انا غلطت مكانش كاع عليا ندخل فحياتك .. نتا ماقبلتيش مني الكادو .. وحتى انا منقدرش نقبل منك تخلص الطيارة . صافي وسمح ليا كنتما ليك النجاح فحياتك وتستاهل كل خير .. انا والله ماكرهتك ولا حقدت عليك بلعكس .. عزيز وغتبقا ديما عزيز وغنبقا نتمنى ليك غير لخير
بقا ساكت شحال وقالي دابا فوقاش غترجعي بالضبط؟
تزيرت واحد التزييرة حتى صافي تقطع فيا النفس وبقاو الدموع كينزلو وكنشوف فدوك الحيوط حتى حسيت براسي غيطرطق وبعد التيليفون على ودني .. نيفي تسد ونفسي كترعد ماقدرتش نهضر ولا نطلع الصوت وبقيت هاكاك فكل مرة نرد التيلفون لودني نهضر مكنقدرش و كنرجع نبعد حتى قطع وحليت فمي خرجت ديك البكية الللي قجاتني ورجع كيصوني
قطعت معاه وعيني كيتلسقو نعست مافكرتش ونعست هاد المرة بلا دوا بلا منشرب كينة وحتى هما مافيقونيش خلاوني حتى صبح الحال وصبحت عند المدير باغا نخرج ومصرة على الخروج . تاصل بالطبيبة ديالي كانت انني نخرج لاكن اقتارحت عليهم ناخد ممرضة عندي الدار تراقب الدوا ديالي ونجلس فالدار حيت المصحة كتزيد تأزمني وبقيت كنحاول نقنع فالطبيبة ديالي هي اللي غتقدر تقنع الادارة .. بقيت فيها بديت كنبكي وقالت ليا تواعديني ماترجعيش للادمان .. وتاخدي دواك بانتضام وتبعدي على الستريس وتجي للمصحة فاش تحسي براسك ماشيوطبيعية لان هاد المرة الىةجبناك فشي حالة خطيرة مستحيل تعاودي تخرجي من هنا
عطيتها وعد باش نقاوم ونطبق كاع التعليمات ديالها وعطاوني الاذن نخرج نتعالج فالدار و مشت الشومبر كنجمع حوايجي بالجرى وفرحانة غنطير بالفرحة باغا غير فوقاش نخرج .. ديك النهار عيطت للعساس اللي هوا عياس وشيفور وجارديني فنفس الوقت جا عندي خرجني انا وماما وجوج ممرضات باش حتى الى طرات ليا شي حاجة ولا جاتني شي هستيرية يشدوني ويهزوني . خرجت لبرا كنطل فرحانة بزااف ماقادني فرحة تقول اول مرة نحط رجلي فهاد البلا. الله على نعمة الحرية شحال زوينة مابحالها حتى حاجة .
وصلت الفيلا بقيت كنشوف فيها .. الشجروالصغيرواللي زرعنا كبر والوريدات مفتحين .. كنرتاح فيها بزاف .خلت كندور ونشوف فجدرانها ولوحاتها الفنية وفراشها وطلعت لبيتي توحشتو بزاف عنقت ناموسيتي وتفنفست بعمق مرتاحة .. اخيرا خرجت ورجعت لداري وحياتي الطبيعية
فرحت وحسيت بالراحة .. اخيرا رجعت للعالم ديالي اللي كنت كنهرب منو ونهرب من الناس ومن العالم فكل مرة توقع ليا شي حاجة .. مالقيتش فين نهرب من مشاعري من عذابي فين مامشيت كنعاني . لاكن حاليا الحمد لله والشكر لله تلاشا داك العذاب اللي كنت كنعيش والبكا والهم وبقا خاصني نتعالج من هاد الآثار المحفورة ونتخلص من قديوي نشم هوا ربي . لاكن الحمد لله حالي افضل من قبل الف درجة وتفكيري تهدن
تافقت معاه وقطعت عطيتو يوماين باش يالاه نرجع فيها بنادم كيد الناس وبديت نوجد حالتي وراسي .. سبقت من الحمام حيت شحال مامشيت ليه نتكمد .. ودرت واحد المساج طويل طلق ليا عضامي كنت محتاجاه وقاديت شعري هبطو ليا ليا ليغاسين عاوتتهم وصاوبت يدس رجلي سوان لوجهي كنت محتاجاه . غيشوفني من لعد غيبة خاصني نكون مبدلة للافضل . صبغت دفاري صافي مابقا ناقصني والو كنحس بواحد الراحة النفسية وخرجت من الصالون مشيت بحالي للدار نرتاح . دوزت هاد اليوماين غير ادفدااصون
تاصلت بيه فلعشية قلت ليه بواحد صوت ناعم كندلع بعقلانية الوووو .. وسولت فيه واحواله قلت ليه راني وصلت قالي صافي خرجي نشوفك ليوم .. نجلسو فشي بلاصةو
قلت ليه واخا فلعشية نتااقاو .. يالاه بيزو مواح
قطعت وبديت نقلب شنو لبس مع البرد شوية لبست لبسة كلاص واحد لكسوة كحلة عندها دونتيل كتجي مجموعة من العنق وعندها خيوط مدلين زوينة كتجيني فنة ولبست معاها ليبة موص درت عليا مونطو خفيف القصة ديالو مريحة الكول كبير كيتطوا للجناب وليبوط شريتهم من فيندي واعرين اول مرة نلبسهم . هزيت صاكي الجديد وطلقت شعري بوكلي وحطيت مكياج خفيف ودرت داك العكر الاحمر اللي شريت كيجي مع الكحل واعر .. وريحتي وخرجت طلعت فطموبيل مشيت تلاقيت بيه فالبلاصة اللي درت معاه . وصلت كانت الارض فازكة شوية بالشتا وكان قاليا يديني معاه فطموبيل . ولقيتو واقف لابس تيشورط كحلة وداير عليها جاكيط دودون كحلة من لفوق ودجين وسبرديلة غير نزلت بديت كنضحك وجا جيهتي حتى هوا كيضحك ومشينا فرقنا الطريق وقفنا فالنص كنت غير غنسلم عليه حتى لقيت راسي معنقاه كنتجبد وعنقي زير عليا باسني فحنكي وقالي عرفتي شحال توحشتك
بعدت وجههي وقلت ليه حتى انا توحشتك بزاف كنت باغا نشوفك
عنقني بيدو داني للطموبيل كانت طموبيل اخرة جديدة لومبرغيني باقا كتلمع فالكحل وفيها شوية ديال الصفر ماشي بزاف
قلت ليه واااو عاد خديتيها
حل ليا الباب طلع لفوق قالي : اول وحدة غتركب فيها نتي
قلت ليه زوينة بالصحة تستاهل اجاد والله .. الله يدخلها عليك بزيادة في الرزق
وبقيت كندور عليها كنشوفها عجباتني فنة وطلعت حداه كان فوطوياتها فيهم الكحل والاصفر بارد الركبة فيها فننة جيت حادرة ومتيسعة بحال الى غنعس .. اول مرة نجرب الركبة فيها الصراحة شكل اخر وخطيرة من لداخل فيها شي حوايج زايدين ماكاينيش فالطمزبيلات لخرين وكتحمق معطرة بريحة جاد
طلع حدايا وقالي حاجة وحدة اللي ماحملتش فيا البيبان كيطلعو لفوق فاش كنكون جالس فيها والباب فوق راسي كيبرزطني
قلت ليه نتا لقيتي باب يبرزطك كاين اللي مالقاهش حتى يشوف فيه
قلت ليه صافي ومشينا لواحد لاوتيل كبير يالاه نزلنا من الطموبيل كانو الناس خارجين داخلين وجات واحد العائلة فرحانين فاش شافوه تصورو معاه ودخلنا للاوتيل هوا غادي والناس كيطلبو منو التصاور وكيدير ليهم خاطرهم .. حياة المشاهير صعيبة بزاف ميمكنش.. مللي دخلنا نزيدو خطوة ونوقفو وكنبعد باش يتصورو معاه الناس وماحد الناس كيشوفوه كيتصور كيزيدو حتى تجوقو عليه وبقا يتصور مع هادا ومع هادا كل مرة يوق حداه واحد حتى وصلنا للمقهى كانت دافية وجلسنا حيدت المونطو بقيت غير بديك الشبيكة ديال دونتيل كحلة وتحتها تبطينة بحال ديباردور صدرها واسع وجلست حتى هوا بقا بتيشورط ديالو والناس كل شوية يوقفو حداه يتصورو وانا كنشوف .. ها البنات ها الاولاد ها الرجال ها عيالات والدرارب الصغار .قلت ليه ماعييتش
قالي : ضاروري .. مي مجاتش تقول ليهم لا وهما اللي كيشجعوك فالمقابلات
قلت ليه: باش كتحس دابا من بعد ما خديتي البطولة .. كاين شي فرقومن دابا وبين قبل ؟
قالي كاين فرق كبير .. قبل مكانوش كيعرفوني الناس .. دابا كولشي كيعرفك .. فيها الزوين وفيها الخايب
قلت ليه شنو الزوين وشنو الخايب؟
قالي : زوين حيت كنحس براسك مختالف على كلشي والناس كيبغيوك احساس زوين . وخايب حيت مكتبقاش واخد راحتك .. كتخرج وداير فراسك غتعطل .. كتبدا تمشي لبلايص غالين كيكونو فيهم الناس قلال باش تاخد راحتك .. مكتبقاش تمشي لاي بلاصة حيت غتوحل تما غيتجمعو عليك الناس بزاف.. كتبدا تنكر شوية باش ماتبانش .. والمشكل الى عرفك غير واحد كيجمع عليك الامة كاملة. . حاجة اخرى اللي خايبة ومكنخملهاش كنلقا تصاوري منشورين .. ولا سطوريات كيبارطاجاو .. كتكون جالس ولا دايز ديما معرض للتصاور والفيديوهات كتبدا ترد البال لراسك شنو كدير حيت متعرفش الكامرة منين تقدر تشدك . والى بغيتي تسافر وتبدل الجو وترتاح وتخرج كي بغيتي خاصك تسافر خارج البلاد باش تحس براسك مرتاح شوية واخا كتلاقا بالناس كيعرفوك مي ماشي بحال هنا مكتساليش بمرة ..
هوا كيهضر وجاو واحد جوج دراري كبار طلبو منو يتصور معاهم معاهم ووقف ماكملش هضرتو وبقينا هاكاك ما هضرنا ما جلسنا ما كلينا .. نقولو كلمة يجي شي واحد سخفت انا بلاصتو والناس كيشوفو فينا من كل جهة والو ماخديناش راحتنا وهادشي راه جينا لاوتيل ياحسرا اما كن كنا فقهوى برا كوراه مشكيلة والله مانخرجو من الزحام
دوزنا داك الغدا بزز وهادشي راه جلسنا فبلاصة جهة الزاج بعيدة والضوء داخل والشتا كتصب برا .. غير سالينا الماكلة نضنا ديك الساعة خرجنا وحنا نحصلو برا مع الناس .. وقفو تجمعو عليه كيتسناو يتصورو وانا موراه واقفة كنضحك ليهم وخليت ليهم الطريق فين يتصورو والناس شادين التيلفون ولايفات والسطوريات حتى تفك حسيت ليه مل بغا يمشي و خرج من تما جرني من يدي ومشينا قاطعين الشانطي وحنا نسمعو سميتو شي حد كيعيط ليه وتلفت لقا شي دراري جاين كيجريو ويصورو هز ليهم يدو ابتسم وووقف حدا الطموبيل تصور معاهم وانا لداخل كنتسنا حتى طلع وهز واحد الكاسكيطة دارها وهبطها عى جبتهه وتحركنا قلت ليه باز ليك
قالي : ماعندك حتى حل اخر .. هادا جمهور ماعندك ماتقول ليه .. شنو غتقوليه لا ! يكرهوك ونهار تكون لاعب والنفسية محتاجة تشجيع تلقا نتا غي الانتقادات يكملو عليك
قلت ليه صعيبة واحق الله بااز ليك انا عييت بلاصتك .. غير واحد الحاجة ماعجباتني فشي وحدين .. ماشي كلشي ولاكن البعض فالبنات ماشي كتجي تصور كتجي تعنق مكتحتارمش اللي معاك !
قالي دابا داك النوع بوحدك كتحاول تفاداه ماشي غير فالتعناق وتتهرب .. حتى ديك الصورة اللي غتاخد غدير بوم وتلقاها كتقول للناس اللي كتعرف باللي كنعرفو ولا طايحة معاه ولا شي حاجة بحال هاكا تفوح عليهم
. ولا تبارطاجي تصويرة .. طرات ليا مع وحدة
قل ليه شنو طرا ليك ؟
قالي جات عنقاتني وحدة قلت ليها هبطي يديه مابغاتش وضرب الفلاش ديك الساعة ومشات ومع ديك هبطي يديك شفت ليها فوجهها ولوجيست بقا فبالي .. دازت واحد دو جوج عاودت تلاقتيها حساب ليها ماغنعقلش جات تصور عاوتاني خليتها واقفة وزدت
جلسنا فطموبيل قدام واحد الطبيعة والخصورية كنهضرو قالي باغي يسافر يرتاح شوية من الستريس اللي كان عايش ويتحرك على راحتو وقالي نمشي نسافر انا وياه . قلت ليه مانعرف .
واخا حتى انا محتاجة للسفر ونسا ديك المرضة والجلسة فالسبيطار ونبدل الجو . بغا يقنعني نسافرو وكان متكي حدايا طالق رجليه قالي فين ما بغيتي نمشي المهم عندي نخرج من هنا نرتاح شوية
مافهمتش قلت ليه شنو هوا هاد الكخوازيير اول مرة نسمع بيه
قالي معروف غير ماعرفتيهش وصافي .. كيديروه بزااف ديال الناس وزويين غيعجبك
قلت ليه كي داير واش فواياج اوغكانيزي
قالي تقريبا بحال هاكاك مي شكل اخر. قالي الكخوازيير بحال شكل ديال تيتانيك . باطو كبير بلاتي نوريه ليك
دخل جبدو ليا من قوقل وراه ليا قالي هادو هما لي كخوازيير هما هاد الباطوات الكبار اللي بحال تيطانيك .. كيكون فيهم كولشي اللي قلبتي عليه بخال شي اوتيل كيمشي فالماء
فعلا فاش بدا كيوريني كانو باطوات كبار فيهم شحال من طبقة ووراني كي كيكون من لداخل قالي فيهم مول .. كيكون كبير مول تشري منو كاع داكشي اللي بغيتي بحال ليمول اللي عندنا هنا فكازا مي هادا فيه غير ليمارك لكبار الى بغيتي تشري وحتى الاثمنة كيكونو طايحين مغاليينش بزاف بحال المطار. وكيكونو فيه ليشومبر نتا والشمبر اللي بغيتي كاين شومبر غوايال كاين موايان اللي عجبك . فيهم قاعة فين تلعب تينيس باسكيط فيهم بيسين لتحت وداكشي ديالكم ديال السبا والعيالات ولعيبات وفيه ليكافي لفوق كاع فالسطح ديالو وليغيسطو ولانيماسيون كتكون فيه بالنهار والليل وبيسين لفوق كتشبك فيه شطيح ولعب .. وكيبقا غادي فالماء
قاطعتو : وصافي كيبقا غادي غير فالماء
قالي : لااا هادا غير شكل ديالو وريتك كفاش كيكونو ليكخوازير .. هادا اللي وريتك كبير من لكبار وكاين اللي مويان ني مافيهمش الصغار .. هادا كتسافري فيه كدخلي للسيت ديالهم هما كتلقاي اللائحة ديال ليكخوازيير .. كيكونو ميمشيو لثلاتة ديال البلدان ولا اربعة .. غير هوا كيتعطل غادي فالبحر باش يوصل للبلاصة اللي باغا نتي
قلت ليه مافهمتش .زيد وضح ليا اول مرة نسمع بيه والله
قالي : راه كيمشيو بزاف ديال الناس اشيماء !..راه مشيت فيه مامرة ماجوج مع صحابي .. بلاتي وريك لاليست ديال كل واحد فيهم . هاهي لاليست .. دابا هنا كيوريوك كل باطو والدول اللي دايرين ليه يمشي ليهم فهمتي .. بحال دابا هادا داير ديبار من سبانيا حيت هاد الباطوات مكيوصلوش المغرب الى بغيتي تسافر فيهم خاصك تشري من هنا من السيت وتشوف منين غيقلع وتمشي مثلا اسبانيا فرانسا تركب من تما فيه .. بحال هادا دايرين ليه اربعة ديال الدول فهاد البرومو .. المرة اللي فاتت كانو دايرين ليه دول من غير هادي . هادا دايرين ليه اسبانيا غيدوز على بالما دمايورك هادي جزيرة ودايرين ليك هنا شحال غيبقا فيها .. 3 جوج مثلا اللي غيبقا فيها عندك الحق تنزلي كيعطيوك واحد لكرطة كدوزك كتصكانيك .. تقدري تخرجي من الباطو وتمشي تسركلي فبالما دمايوركا بغيتي ترجعي تباتي فالباطو كترجعي بغيتي تباتي فجهة اخرة باتي مهم هوا راه واقف فالميناء ديالو عندك فيه بيتك نعسي فيه ولا خليه وحوايجك كيبقا تما فاش كدوز 3 جوج ديالو كيعطيك فوقاش يدير ديبار خصك تكوني فالباطو باش يمشيو .. مثلا هنا دايرين الوجهة الثانية دولة اخرة غيمشي ليها يجلس اربع ايام . نتي خرجي دوري ديري اللي يعجبك يعرفك هوا غير فوقت الديبار باش يقلع .. وهاكا كيبقا غادي من دولة لدولة داك الشهر كامل اخر دولة ليه هي كرواتيا غيجلس سيمانة ويضرب التور يرجع يوقف فالبلاصة اللي هزك منها . بغيتي تبقاي فشي دولة نتي حرة حتى ترجعي فالطيارة المهم هوا غادي عاطيك الحرية ديالك وكوريك الدولة اللي غيشد عجبوك شري ماعجبكش كاين كخوازير اخر وكاينين وحدين اخرين كبار حتى هما كيمشيو ف آسيا ودوك النواحي مي الى بغيتي تركبي فيه خصك تركبي من تايلاند ولا من دوك الدول اللي قريبة شوية لاسيا .. شنو بان ليك دابا نشريو شي كخوازيير نمشيو .. هاخوا هاداك غيدير ديبار من مارساي .. وهادا غيقلع من دبي هادا ديال مارساي زوين غيمشي ليونان والدول اللي داير زوينين واعر فيه شهر ونص .. يالاه دوي شنو قلتي دابا
أنا وبعدي الطوفان الجزء الثامن
محتوى القصة
التنقل بين الأجزاء