ايييه اييه هييه جمع فمك الخانز مراكش فالدرب مع الشمكايرة صحابك .. خرج عليا من هنا سير عطيني تيساع المسخ
قالي نعطيك التيساع ابنت **** خارجة مع جاد الهواري وعاااجبك الحال ماعندك عائلة ماعندك اللي يحكم
قلت ليه : اش كتخبرق واش نتا حمق سير سير خرج عليا قبل مانجيب ليك البوليس
جبد تيليفون طلع ليا واحد الصورة فديك اللحضة اللي كنا قاطعين فيها الشارع انا وجاد وكان شاد ليا فيدي وشي واحد صورو وهوا شار بيدو ابتسم وتشديت فيها حتى انا كنشوف فجيهتو ونضحك . بقيت غيروكنشوف مالقيت مانقول وقلت ليه
- نتا ماالك بااا؟ شغلك ؟ سوووقك ... انا كنتحمل مسؤولية راسي نتا مالك جاي تربيني؟ .. ديها فراسك وفالحشيش ديالك الحشايشي وعطيني التيساع .. عنداااك يحساب ليك داك الوعورية ديالك غتخلعني ولا غتغمق عليا كي كدير لختي سهام .. راه نهزك ونطلقك الى مامشيتش خرجتي عليا من هنا
بدا يتهز عليا باغي يخلعني .. عمرو ماخلعني ولا خفت منو كنت كنعطي لمو مكيدورش بيا .. ولاكن دابا باينة التصويرة تفركعات بين صحابو مارضاش جا بغا يعصبني .
- ضربت طلة فالانترنت على الدول اللي غنمشيو ليهم والبلايص السياحية اللي فيهم كاملين ودرت هاد البروغرام باش ينضم ليا الوقت وكولشي
قلت ليه علاش اختاريتي هاد الكخوازيير بالضبط واخا فيه غير 3 ديال الدول
قالي وهوا كيوريني فقوقل مابس :ماتنسايش مزال غنمشيو فرنسا من بعد .. وهادا واخا فيه 3 راه واعر غيدير ديبار من دبي وغيمشي للهند ... اول مرة نمشي للهند وجاتني مزيانة زعما ... غيبقا فالهند سيمانة .. وغيمشي للطايلند .. غيبقا تما سيمانة .. وغيمشي لاندونيسيا حتى سيمانة .. الى لاحضتي جاو كاكلين فخط واحد من دبي ونتي طالعة .. وغيرجع بحالو لدبي .. بغيتي نجلسو فيها شي يامات نوريك شي بلايص وعاد نمشي لفرنسا غنجيو مع راس العام كتكون واعرة
عجبني البروغرام اللي دار خرجو فورقة مقاد هوا هاداك .. حنا كنهضرو وجا الناس كيتصورو معاه قاطعونا وبقينا هاكا كل مرة يقاطعونا حتى وصل وقت السفر كان البزنس كلاص جهته بوحدو وقفنا فيه ودخلنا للطيارة نفس البلاصة ونفس الكراسا اللي جلسنا فيهم ديك المرة وجلست جهة النافدة وجلس حدايا بقينا كنهضرو وكانت فالشاشة واحد الكرة الارضية كدور فيها بدا كيوريني البلايص اللي غندوزو فوق منهم وقالي دبي سخونة غيجيك الصهد . قلت ليه دابا وجاني الصهد ندمت اللي لبست هاد التريكو .
هوا جاه ساهل دور يديه فالجناب طلعو وحط راسو تنفس بقا بواحد البوكسور كحل ورد واحد الباب حداه كيتطوا سدو علينا وقلت ليه غنموت صهد
حيدت ليبوط بقيت بالليبا و قالي واش لافاليز اللي طلعتي معاه فيها شي حاجة قلت ليه ماعرفتش جبدها ليا نشوف عفاك وناض حل داك الباب حط ليا الباليزة حدايا فالكرسي ديالو حليتها دار بم بليسوميج و السوتيامات بديت نعبز فيهم حشمت . قلب وجهه لجهة اخرى حتى جبدت واحد الكسوة باج باردة قصيرة لقيتها مخشية تما وسد عليا الباب بدلت وحيدت كلشي ولبستها عاد تنفست واصلا ديال الدار توبها ديال ساتان قلت نجلس فيها نرتاح حتى نقرب نوصل ونبدل فالمطار فاش نخرج البالو حيت باليزتي الصغيرة طلعت فيها غير بيجيمات وداكشي ديال النعاس والجلاس
قلت ليه غير حل الباب وحلو دار فيا شي شوفات فشكل ودغيا تشتت النضر .. عرفت راسي درتها سخونة ولاكن راه ماعندي مندير تريكو دالخيط والطيارة سخونة مي جاد ماشي شي واحد اللي مكبوت وشايف وعندو عادي داكشي علاش قلت راه مغاديش يدوخ فيا .
هز الباليزة ردها وجلس حدايا بدجين وسورفيت اللي كيلبسو دراري من لتحت وتكا راسو ورد الباب علينا وجلسنا حتى قلعات الطيارة طلعنا فااسما واستقرينا عاد طلقنا الكراسا بحال بياصات وتطلقنا درت عليا واحد شال رطب ديال لوي فيتون واخا كان الغطا تما والوسادة كلشي كيعطيوه ليك . حيد صبرديلتو وحيد معاها تقاشر طلق رجليه بقيت كنشوف فيه وقلت ليه رجليك زوينين
ضحك وميل راسو جيهتي قالي تا نتي زوينة
كان بيناتنا واحد اللعيبة بحال اللي كتكون فطموبيل كنحطو عليها مشروبات وهزيتها طلعتها دخلات بين الكرسي ديال والكرسي ديالو وتقالبت جنب جيهتو قالت ليه السفر دابا احسن من ديال الصباح بكري .
يالاه كملتها طفاف الاضواو اللي كانو شاعلين بقا غير ضو داخل من النافدة والشمس ضربات فينا هبطت السدة شوية قلت ليه واش نخليها بغيتي تبقا محلولة قالي لا غير خليها .
عنقتو زيرت عليه كانت ريحتو فننة ماسخيتش نهز راسي ولقيت حضن رتاحيت فيه وبقيت هاكاك شعري طايح عليه وجهي غارق مكيبانش كنحس بنفسو حدا حنكي وكيمسح على ضهري بلطف . بقيت هاكا مدة طويلة وبقا كيدوز يدو على ضهري حتى بدا تيليفونو كيصوني جييت نوض سكتو بلا ميشوف فيه وقالي
غير خليك
شي ساعة وانا متكية داتني عيني فقت لقيت يدو على خصري .. رتاحيت فالنعسة تبارك الله مع مكضر ماتضبرت ما تعدبت وهزيت راسي عيني ووجهي مكمش كنحس بيه عاد بدا كيتجبد . حتى هوا حل عينيه فيها وقلت ليه واش قربنا
حطيت وجههي على حنكي حلف ليه مادايراه وقلت ليه داير غير الابر دالنضارة وصافي مانقصت ما والو وواحد المرة كنت نفخت هادي شوية وصافي.. واش حيت عندي 33 قلتي غتكون مكمشة
كان حاط يدو على راسي كيلعب فشعري ودور وجهه قالي لالالااا حاشاا اصلا حسن من وحدة عندها عشرين عام
قلت ليه بلاتي نوريك تصوريتي وانا عندي عشرين عام
وبديت نقلب فتيليفون وريتو وحدة كنت فيها عند عمتي فالجديدة لابسة واحد البيجامة وشعري كاري رطب من عند الله اما دابا خرجت عليه . هز راسو شافها وكبر الصورة قالي عرفتي كنتي قطططة
عجبني الحال وقلت ليه: كنت حسن من دابا .
قالي : لالا كل لاج ولوشاغم ديالو دابا عاوتاني كتباني فشكااال على هاد الصورة واخا كنتي زوينة دابا حسن حيت وليتي فام مابقيتش برهوشة
حيدت ليه تيليفون قلت ليه كنضحك
- قلت ليه اشمن برهوشة راه كنت بعقلي على دابا
قالي: لالا دابا وااعرة اما داك اللاج كنتي صغيرة مانعطيكش فيه عشرين عام نعطيك ربعطاش ... وتا دابا مانعطيكش 33
تكيت على خدي عجبني الحال وقلت ليه كنتمايل
- علاش زعما
قالي: ماشي 33 ومشاي عشرين .. ماعرفتش كفاش نشرح ليك كاين واحد النوع ديال ليفام كيكونو واعرين كتحس براسك جالس مع مرى فيها كولشي وماحدها كتكبر كتزيد تعطي ومقبولة بزاف تقدر تعجبك بدوك التجاعيد اللي كيبداو يبانو فيها ولا بالشيب فاش كيبدا ينوض .. فين يبانو بنات العشرين ولا سطاش راه كاينين بحالو هادو كتبقا زوينة كتفهمك مكتلقاش معاها مشاكيل وداك التخربيق ديال البراهش
قالي: نتي باقا صغيرة فمتوسط العمر احسن لاج هوا هادا الوسط
قلت ليه : كنت كنطير حتى انا فواحد الوقت ولاكن تهديت
قالي: عادي
بقينا كنهضرو ماحسيناش بالوقت حتى وصلنا وناض لبس تريكو ديالو وسديت عليا لبست حوايجي ونزلنا خدينا الشنط ديالنا ومشينا لاوتيل طلعت لبيتي ومشا لبيتو نرتاحو باش الصباح مع التسعود نمشيو للباطو .
فقت بكري كان الموت ديال الصهد لبست واحد الكسوة خفيفة ضهرها عريان فوق ال كركبة وصندالة ديال زوينة من صنع الطبيعة وهزيت صاكي فيدي ونضاضر ورشيت ريحتي ونزلت لقيتو جالس لابس تيشورط بيضا وشورط كحل وسبرديلة شاد تيليفون وداير النضاضر والشنط حداه . سلمت عليه وخرجنا من الاوتيل وتلاقينا مع شي مغاربا تصورو معاها ومشينا للميناء .
شفت باطو قدو قداش كما وراه ليا فالتصاور كنبان قدامو بحال النملة بداو الركاب كيطلعو وطلعنا حتى انا وماعارفة والو شادة فجاد وغايدة تابعاه دخلنا بقيت غير كنشوف اول مرة نركب فشي باطو حسيت براسي بحال الى راني ففيلم تيطانيك!. اول حاجة درناها حنا والركاب خدينا الغرف ديالنا اللي حاجزين لقينا الغرفة جاهزة كتسنا وتبعت جاد فممر ديال الغرف من بعد ما طلعنا ليهم فالاسانسو .. بحال الى راحنا فشي اوتيل والديكور ديال الباطو كلاسيكي بزاف .. جدرانه كلها تقريبا من الخشب اللامع شفت فيه وجهي والارضية رخامية والزاج كثير بزاف تما مع الاضواء حسيت براسي بحال الى راني وسط شي ماسة . وصلنا للغرف وقف حدا واحد الغرفة فتح الباب بواحد الكارط وشاف فيا ابتسم ليا قالي ها الشومبر ديالك . ابتسمت ودخلت دخلنا الشنط ديالي ووقفت كنشوف فيها اقل مايقال عليها غزالة .. ماكبيراش بزاف لاكن الديكور ديالها راقي ومجهزة من كل شيء .. ناموسية من خشب كتبري واريضة حتى هي والجذران كيبريو والبلاكار حتى هوا من خشب والفراش لونه باج وعند راسي طابلو كلاسيكي ومرايا حدايا بالطبلة ديالها وتلفاز و كبير وكليما وحمام صغير لاكن راائع مجهز وغزال لاكن مافيهش البانير غيروالرشاشة والزليج ديالو كحل مربعات صغار وزوين وحداه حمام صغير معزول والاهم والاروع واللي والهااائل هوا واحد الذار قدامي من زجاج كيطل على وسط فالساحة الكبيرة اللي كنا فيها وطلعنا منها الباطو وقفت فيه بانو ليا الغرف مقابلين معايا واحد حدا واحد وطبقة فوق طبقة وكلهم بالزاج واكيد حتى انا جيت من بين الغرف اللي مقابلين . عجبني المنضر ومبهج تصميم رااائع بكل المقايس واخا نعيا نوصف فيه . قالي كي جاتك لاشومبغ .. كاينين بزاف من غيرو هادو مي هادو هما اللي حسن
قلت ليه شي حاجة فاقت توقعاتي عجباتني بزاف خصوصا هاد الواجهة اللي كتوريك كلشي. قالي لاشومبغ ديالي انا هي هاديك راها يمكن .. مهم وحدة من هادوك اللي مقابلة معاك لهيييه حيت بغيت ناخد وحدة حدام مالقيتش ولقيت غير فديك الجهة
قلت ليه ماشي مشكل باش نشوفك وتشوفني ههه
خرج خلاني نقاد اموري واكتيفا ليا الوفي ديالهم و قالي فاش تسالي عيطي ليا ومشا بقيت واقفة شحال كنتسناه يبان ليا من شي بيت فدوك البيوت وحاضياهم حتى شفت شي واحد دخل فواحد البيت مقابل معايا كيبانو ليا دوك البيوت بحال الرفوف مع كلشي طالع بالزاج بقيت كنحقق حتى قرب للزاج وقف وشار ليا وضحكت ليه شيرت ليه بيدي بديت ندور فالشومبر ونشوف فيه شنو كيدير بان ليا حيد تيشورط بقا عريان وقلت مع راسي يعلم الله شحال من وحدة فوق مني وحدايا وتحت مني كتشوف فيه حيت هوا الوحيد اللي واعر فدوك الناس كاملين اللي تما واخا كاينين الكور بزاف مي عاوتاني هوا ملاكم منهضرش عليه وعاد فوجهه زوين وملامحه عربية حرشة كيجدب . يعني غادي يكون لفت انتباه االبنات الى كانو شي بنات فهاد الجهة فين كاينة انا .
ستفت حوايجي فالبلاكار وحتى هوا ستفهم ورد الريدو على الزاج من لداخل يمكن بغا يبدل ورجع حيدو كان دوش وجلس كينشف شعره بالفوطة لاكن انا مابغيتش ندوش دوشت الصباح قبل منخرج .
عيط ليا قالي هبطي نتلاقاو لتحت ونزلت بنفس الكسوة خليت صاكي وهزيت تيليفوني تلاقيتو ومشينا كندورو نكتاشفو الباطو واخا خاصو يوماين باش عاد نكتاشفوه كامل حيت كبير بزاف مقسم . طلعنا لاتيراس حتى هوا مقسم تقول مدينة ! بقينا كندورو ونتمشاو واحد اللحضة جاتني بيبي قلت ليه فين طواليط عفاك وراها ليا غير تما لفوق فواحد القنت حدا واحد الكافي غيسطو مشيت وفاش رجعت قبل منوصل لقيت حداه واحد جوج بنات واقفين وهوا متكي على الحديدة كيشوف فالبحر ويتأمل وحداه دوك الجوج وحدة فيهم واقفة جيهتو زعرة فيها داك الزين ديال الغرب زوينة وباهتة حروفها باردين كل شوية دور جيهة كتفها تشوف فيه وضحك وتلوي فشعرها . حسيت بالقرصة منها ماحملتهاش الخانزة لخرى ومشيت عندو شديتو من خصره تعجب فيا وقلت ليه يالاه نمشيو ودار يدو على كتافي ومشينا وفاش ضرت ورايا لقيت ديك خيتي كدير فيا شي شوفات وطلع وتهبط فيا بحال الحنش
بقينا كندورو والباطو باقي بلاصتو ماتحركش وجلس النهار كامل تما دوزناه غير فالتسركيل كنشوفو الدنيا وتغدينا فواحد الغيسطو تما حتى للثمنية ديال الليل وبدا الباطو يدير الصوت قوي كيطوط باش نخرجو . وقفت كان النهار باقي ولاكن الشميسة هبطات . كاع الناس بداو كيطلو وبغيت نشوفو حتا انا خارج من الميناء ومشيت كنجري وقفت تبعني جاد بشوية عليه وقف حدايا . قلع الباطو كيتحرك بواحد البطئ شديد وانا عالية كنشوف البحر من لفوق جاتني واحد الرهبة من هاد الاختراع الضخم وهوا كيتحرك وانا فوق منو بحال شي حوت فوقو شي جزيرة. بدا قلبي يضرب بالجهد حسيت بواحد الاحساس غريب وزيرت على الحديدة ودخت واخا ماحسيتش بيه كيتحرك لاكن جاتني الدوخة بحال شي زلزال ضرب تحت مني دوخني .. شافني جاد هاكا جرني اللور قالي اجي من تما راه كيدوخ .. جلسي حتى يشد البحر وغتولي وتحيد منك الدوخة
مشيت جلست كنت حدا لابيسين والناس كيعومو فيه وبديت نشوف غير من بلاصتي وهوا كيطوط حتى بعدنا ودخلنا البحر وبدات الشمس تغرب والاضواء ديال الباطو كيشعلو ونضت وقفت بغيت نصور داك المنضر الراائع ديال الشمس كنشوف فيها حمرا كبيرة نصها فالبحر ونصها فاسما حسيت براسي قريبة منها . قلت لجاد صورني فيديو يبقا ليا وبدا كيصورني وانا كنشوف فيها كنتأمل وشعري كيطير فالسما مع رياح البحر . هزيت تيليفون قلت ليه اجي نتصور انا وياك وكنت واقفة قدام الحديدة . جا ورايا ووقف وشد فالحديدة وخديت تصاور واعرين اكثر من زاعرين بحال ليكارط بوسطال وتصاور اللي كيتكتب عليهم الشعر . واحد الصورة جات ناذرة حيت الشمس حمرا ورانا جينا واقفين بحال الخيال انا وياه كنبانو مضلمين غير هوا اللي شوية كيبان واقف وكيشوف جهة البحر وانا كنشوف جهة تيليفون ولا انا لا شعري لا حتى حاجة جات واضحة فيا .. بان فهاد الصورة البحر والمدينة والشمس واللور الاحمر ديال الغروب اللي طاغي واضواء الباطو الليوفجناب مضببين حومر بحال الشعلات . هاد الصورة بدات بغيت نكتب عليها شي كلمات معبرة حيت شات بحال شكل ابطال تيطانيك غير حنى عفوين ماهازين يدي ما طالقين موسيقى . وريتها لجاد قالي سيفطي ليا هادي غنحتاجها وسيفطتها ليه دخل ديك الساعة لحسابو فالانستا حطها فبوسط وكتب عليا بالفرونسي اوقات لا تعوض ... وحطها قلت ليه اويياي حطيتيها !!! فباج ديالك
قالي باش نتفادا البنات
دخلت ديرت ليها قلب من عندي و قالي عنداك تكمونطي بشي حاجة يعرفوك
قلت ليه لالا غيبداو ينبشو هادشي كيجبد غير الصداع .. ماشفتيش واحد اللاعب مسكين فين ما يحط شي صورة ولا تكون شي وحدة حاطاه فشي باش ولا هضرات عليه كيبداو يطاكيو ليها مرتو ويقولوها راجل ما راجل باز لهاد الناس مكيقولوش راه نقدرو نخلقو لسيد مشكل
قالي: مكيفهموش هما داكشي
بدينا كنهضرو ونتأملو حتى ضلام الحال وطلقو لينا موسيقى هادئة فواحد لاتيراس مشينا ليه فيه الناس بعقلهم دايرين ليهم كراسا موريحين كبار كيتكاو عليهم ويتأملو فالنجوم ومشينا جلسنا عليهم تكيت على ضهري كنشوف فااسما .. الهدوء والكالم كنت محتاجة لهاد الجو بزاف وجا فوقتو . تكينا مرة نهضرو مرة نسكتو .. تكا هوا على كرشو وقلب وجهه جيهتي فصمت كيلعب ليها فديك الكرميط اللي فيدي فصبعانو وانا راخياها . شديت تيليفوني كنصور كاع اللحضات اللي كندوز ونعيش وحدة بوحدة ونوثقهم و لحت واحد الصورة ليا وانا متكية شديتها من الجنب ولحتها فحسابي واخا ماعنديش الناس بزاف . تشدات يد جاد حدا يدي غير من المعصم كان داير ساعة فيدو وواحد جوج خيوط كوحل ديال الدراري فيهم عمارة فضية ديال كارتيي وقلت نتشاركها وماشي بزاف كنحط قليل . شوية بداو المساجات كيوصلوني والناس كيسولوني واش اختي هاداك جاد الهواري اللي معاك . عفاك جاوبينا واش هوا .. حتى ليباج دخلو عندي ماعرفت شكون وراني ليهم وكيسولوني لاكن فاش رجعت للصورة لقيت الناس فليكومونتير كيطاكيو ليباج وبالزربة مسحت الصورة لاكن كانو هزوها ولاد لحرام ولسقوها مع ديك الصورة اللي حط هوا اللي جينا فيها بحال الخيال وكان هوا كيبان غير شوية لاكن انا لا مضلمة كلشي كحل خيال وصافي..فاش قريت العناوين شفتهم كيقولو شوفو اليد .. هي ولاماشي هي . انتبهت ليدو فالصورة الاولى محطوطة على لحديدة باينة كتبري فيها الساعة وانا ندور عندو قلت ليه جاد ها شنو درت ها شنو درت وتكى على جنبو قلت ليه والله ماقصدت حيت خفت يقول دارتها بلعاني وقلت ليه راه مارديتش البال ومسحت الصورة بالزربة ولاكن هزوها قبل منمسحها وبديت كنهضر ونبرر وقالي
صافي صافي صافي .. مالك تخلعتي؟ . صافب يعاودو لمهم
مارضيتش حيت جات مع الصورة اللي حط نيشان وشكيت يقول بلعاني ما بلعاني وندمت .. بديت كنرمش ومشيت للتعاليق كل باج لايحة وحدة وهي وشنو سخاها الله فالعناوين لاكن كلشي كيهضر عليا زوين قالو عليا زوينة والدراري كيمدحو وحدة قالت عليا لا علاقة مغتكون غا شي كاورية جاوبها واحد غرتي يا شعيبية غرتي .. ردات عليه بقاو عطيني نعطيك وانا نقرا .. طلع واحد الدري قاليهم شيماء هاديك قرات معايا فلافاك توتة كبرات ولات قرطاسة
بداو الناس اللي قراو معايا وميعرفوني والبنات كيطاكيو صحاباتهم . اجي تشوفي شيماء اجي جري جري وحدة طاكات ات صاحبتها قالت ليها منتصدمش بوحدي شوفي شيماء هي وجاد الهواري . بداو البنات كيدابزو فوجو عليا بقيت مقابلاهم غير كنضحك من جد قلبي منوضينها مدابزة على والو وحدة قالت ليهم راه كبر منو راه قرات معايا ميمكنش وهوا يالاه عندو 28 عشرين . نزلو عليها الدراري قاليها واحد ورينا كمارتك نتي فالثلاثينات نتي دابا وحزق فيك الشرف
طيراتني هاد الكلمة بالضحك وبدات عليه قالت ليه بزاف عليك راه غيروفتصاور كتبان زوينة اما هي جوع . قاليها واحد اخر ماعندك ماتقوليها فيها راه كنعرفها فاص فين يبانو بنات عشرين عام وضرافات شيماء عا كتهزي الدنوب
بقيت كندور شفت الغيرة بزاف فالبنات والسم عكس الدراري نص كيقول كاورية والباقية كيشرحو ليهم قاليهم واحد . شيماء بنت بلادي بنت بوكوصة تحية لناس خنيفرة .
وحدة اخرى قالت ليه واش بصح بنت خنيفرة ماشي شي كاورية
ردات عليها وحدة اخرى قالت ليها لا اختي راه مغربية فام دافير لباس عليها
طلعو ليا المورال حسيت بالثقة فالنفس حتى طلعات وحدة قالت ليهم راه حمقا مريضة فعقلها كانت كتعالج عندنا فسبيطار
رد عليها واحد قاليها : سبيطار هوا اللي فكرك ونااااري بزاف على الحسد لعفووو
توشاني داك التعليق ديال خيتي وسكرينيتو واخا ماتيقها حتى واحد عيان تحلف لاكن سبوها ماتاقوش وبداو بالمعيور تاقلبوها بيناتهم قاليها واحد غنشدك نفرعك حيت سباتو وبداو مني منك . خليت السكرين عندي حيت مغندوزش هاداك التعليق مرور الكرام وغادي نتبعها ونوريها الحمقا كي دايرة ، لاكن بقا التعليق فبالي اثر عليا وخفت الناس يتيقوه ولا غير يشدوني منو باش يديرو البوز ولا شي حاجة . مابغيتش نقحم راسي فالصدع معاهم ورجعت لحسابي لقيتو وصل مية الف !!! عاد كان فيه غير 500 واحد دغيا طلع ! . قررت نتآكتيفا مدام علقو بيا ونحنث ديك الكدابة حيت اكيد غترجع تقول ليهم حمقا ولا طلع شي وحدة تهضر عليا خايب وبديت مرة مرة نحط السطوريات وسولت جاد غير بالضحك قلت ليه مكتقراش التعاليق قالي لا كنضرب طلة فلكونط ديالي وصافي مكنبقاش نقرا . رتاحيت حيت مكيدخلش يتابع ليباج وتهنيت دوزت ديك الليلة انا وياه حطو لينا لعشا صورتو فسطوري بالزربة والناس مكنهرفهش كيسيفطو ليا مساجات ويشكروني عجبني الحال بزاف حسيت براسي مهمة . تعشينا وقصرنا انا وياه تما جالسين قالي نبقاو هنا تشوفي الصباح كفاش كيطلع وجلست ماحسيتش بالوقت وجاني البرد فداك الصباح درت واحد الغطا خفيف عليا وبقاو شي ناس جالسين حتى للصباح بحالنا شفت شروق الشمس وصورت المنضر حطيتو فالسطوري وكنت دايرة فبالي غنتصور تصاور اخرين واعرين ونحطهم نشوفو شكون اللي حمق واش انا ولا ديك خيتي اللي كتهضر
شفنا الشروق وعيينا هبطنا هوا مشا للشومبر ديالو وانا دخلت الشومبر ديالي رديت الريدو ونعست النهار كامل فقت حتى للستة درت عليا بينوار فوق السوميج ومشيت كنتلق شعري بيدي حليت ريدو وانا ندير يدي فوق حناكي ويلي ويلي جاد نسا الريدو ماردوش ونعس مقابل مع العلم كامل .. مقلوب على وجهه وسط ليزار رمادي جاب الله ناعس فالشورط والمخدة تحت رجلو وفوق راسو .. صافي تسهط سهرنا وهبط طاح كاو ما بان ليه لا ريدو لاوريدويا .
مشيت غسلت وجهي قاديت حالتي وخرجت من الدوش من بعد مامشطت شعري طليت بان ليا الفراش خاوي دونك ناض ودخل للدوش . بقيت كندور كنت لابسة سوميج كحلة عليها بينوار وبانطوفة وخرج داير شيتة فمو كيحك هو يدو ليا رديتها ليه ومشا وقف حدا تيليفون حطو يتشارجا وكيحك سنانو ورجع دخل للحمام وخرج عيط ليا وكيشوف جيهتي قالي بون جوغ .. كي صبحتي . قلت ليه صافا الحمد لله نسيتي الريدو مجموع قالي نسيتو . بديت كنضحك معاه وجلست علىجنب الناموسية درت رجل على رجل ميلت راسي وكنحك دفر مع دفر بعفوية مني وقلت ليه غتكون عييتي .. بقينا حتى صبح الحال
بدا كيضحك قالي واش نهبطو دابا نفطرو بجوج . قلت ليه راه قلت ليهم يجيبو ليا لفطور هنا ملي شفتك ناعس مابغيتش نصدعك خليتك حتى تفيق على خاطرك
قالي : انا بغيت نفطر معاك ..
قالها لي بواحد الطريقة فشكل وبشوية دورت وجهي شفت فيه لقيتو واقف حدا الطبلة كيطقطق صبعو عليها وحاذر راسو كيهضر وهز عينو كيشوف فيا .. بقيت ساكتة وقلت ليه واخا صافي .. نلبس حوايجي ونهبطو
قالي: انا غنسبقك نتسناك لتحت
قطعت معاه ورد الريدو بدل خلاها مردود عرفتو خرج . نضت وقفت قدام المرايا تنهدت حسيت براسي بحال الى تخلقت من جديد .. كنت كنقول عمرني ننسا الامي ولا نبرا منهم وافتقدت لراحتي النفسية... فاش كنتفكر البكا والعذاب اللي داز عليا كيبقا فيا راسي .. وفاش كنتفكر البكا والدل اللي كنت فيه كنكره راسي .. مابغيتش كاع نتفكر دوك الايام كيضرني قلبي وانا عييت من هادشي مابقيتش كنتحمل وزيد السحور اللي سحرت وانا عارفا باللي الشرك بالله حرام وكنت كنصح صحاباتي ميمشيوش ليه .. فاللخر مشيت ليه كندم وكيأنبني ضميري وكنقول واش بي غيسمح ليا ... ماعرفتش فين كان عقلي .. مالقيتس اللي يضرني نفيق . بحال الى كنت واكلة شي حاجة مشعرتش براسي
. كنقول مستحيل نكون انا اللي درت داكشي كامل ودليت راسي .. جاني لبالي داك الفقيه اللي ضربت وقلت مع راسي شنو درت .. على الفلوس مشيت ضربتو وانا ماخاصنيش زعما بخيري . علاش درت هاكاك . تاصلت بسعاد ديك الساعة بغيت نعرف واش حي ولا ميت قلت ليها بغيت نشوف واحد الفقيه ها شنو سميتو هاشنو معروف واش عمرك سمعتي عليه قالت ليا اااه اه راني عرفتو .. هاداك غير كداب مكيدير واااالو غير كيشفر الناس بالعلالي ولاكن ربي نتاقم منو دار كسيدة ومشاو ليه رجليه مابقاش كاع كيوقف ومزال كيضحك على الناس
رتاحيت فاش قالت ليا باقي حي اما رجليه مابقاوش فيا سرو يستاهل قطعت ليه الرجلين الكافر بالله . قلت ليها شكون ضربو قالت ليا كاع ماعرفو شكون كل واحد شنو كيقول ..شي كيقول طموبيل شي كيقول تراكتور شي كيقول كاميو .. ماعرفوش شكون
قلت ليها صافي خليك كتخدمي الواتساب نبقا نعيط ليه فيه وقطعت تنفست شوية وجاني الخاطر نصور شي سطوري وصورت من الزاج منضر الغرف والقاع لتحت فواحد الفيدو بطيء درت ليه موسقى و لبست حوايجي بغيت نعوم شحال هادي ما عمت نرتاح شوية .. واخا كنت باغا نعوم فالشمس ولاكن حتى الليل زوين ، لبست بيكيني كحل بياسة وحدة زوين الشكل ديالو وردت عليا واحد الكاش زوين بحال العباية واسع من لتحت واسع اكثر محلول من الجناب ويديه واسعين وكيتجمع بخيوط من الصدر كياخد شكل كسوة رائحة فيه الالوان ديال البحر وهزيت صاك السباحة وفوطتي وصندالتي وجمع الكاش من لقدام حيت كيبقا محلول فالمشية ونزلت لقيتو جالس فبلاصة فين كنفطرو كيتسناني .... جلست حداه درت يدي ورا ضهرو بستو فحنكي وقالي عوالة تعومي
قلت ليه : اه صافي تشهيت نعوم لفوق
فطرت بسلاد ولا نقول كتسكروط حيت الستة ديال لعشية .. انا كناكل وجاد كيجمع ليا شعري اللور ويلعب بيه حسيت بيه كيعجبو شعري كيلعب فيه بزاف .. كملنا ماكلتنا وطلعنا كان الغروب صورتو عاوتاني وفنفس الوقت مكنجاوب حتى واحد ومكنقحمش راسي فالمشاكيل باش مايكرهني حتى واحد وينتاقم مني بشي حاجة ضرني .. خليت جاد واحد اللحضة جالس ونضت بغيت نهضر فتيايفون مع الطبيبة تاصلت بيها قلت ليها ها شنو وقع هاشنو راه وحدة من المصحة هاشنو دارت قالت ليا تابعيها من حقك هادشي مافيهش اللعب واش حنا كنعالجو المريض ولا كنزيدو ليه . قلت ليها غنتعطل قالت ليا غنهضر ليك مع المحامي سيفطي ليا داك السكرين خلي المحامي يتكلف ليك تواصلي معاه غير فتيليفون قلت ليها صافي واخا سيفطي ليا نمرتو نتواصل معاه ..
انا كنهضر معزولة حتى جا جاد من ورايا عنقني من كرشي حسيت بقلبي دار بوم والصهد وتبورشت فنفس الوقت وتخلعت مابغيتوش كااع يحس بيا عندي شي مشكل صافي ماشي ضاروري نجر معايا اثار الماضي لمستقبلي بيدي وحياتي كتخصني عشتها وتعدبت فيها بوحدي غادي نسمح فيها بوحدي بلا منعطيها قيمة وهي ماعندها قيمة ونجرها معايا .
بقا ساكت ماهضرش ماعرفتش علاش دار هاكا وعلاش جا عنقني بهاد الطريقة واش حيت خليتو بوحدو ونفاردت ؟ مافهمتش قلت لطبيبة صافي شكرا المهم الاتصال بيناتنا وقطعت .. دورت وجهو حدا حنكي وقالي معامن كنتي كتهضري
دورت راسيووقلت ليه غير مع صاحبتي وصافي
قالي: شكون صاحبتك ؟
قلت ليه: قلت ليه واحد الطبيبة ديال النفس مكتعرفهاش
. لا ماشي تقيلة.. تقلت بزاف لاحضت شي حوايج فراسي تبدلو بزاف واش حيت الانسان مع الوقت كيتبدل ولا انا بدلاتني الضروف . هبطت فالماء تسرحت ونزل معايا جاد وقف حدايا فواحد الحد ولاح راسو لاجنب نفض الماء وجلس على واحد الدرجة حدايا تحت الماء .. لاحضت شي حوايج جداد فمشاعري غير مؤخرا .. كان جاد فالايام اللولة اللي عرفتو فيها عادي واخا كيقرب مني مكان عندي حتى شعور وبحال الى كنت فعالم اخر ماشي كاع معاه ومكنلاحضش الوجود ديالو واهميته . لاكن مؤخرا من التعنيقة لي دار ليا وانا كنهضر واخا تخلعت طلعات معايا واحد التبوريشة وعرفت داك الاحساس شنو كيعني .. احساس ديال مرى فاش كيقرب ليها شي راجل كترتاح ليه لاكن ماشي اي راحة عادية .. وكتحسبو راجل يقدر يتوشيها فأي لحضة ويحسسها بأنوثتها عكس البقية .
وهادشي اللي حسيت بيه.. حسيت باللي معايا راجل وقدر يحرك فيا شي حاجة يحسسني بنفسي ويحسسني بيه هوا وكانو ناقصيني الصراحة هاد المشاعر فهاد الجو وهاد اللحضات. كنت كنحس براسي ميتة وواخا خارجة نضور مكاملاش سعادتي حيت مجردة من الاحاسيس . بديت كنحاول نقرب ليه على الله يدير شي حركة نعاود نحس داك الاحساس اللي كيجلب السعادة والراحة وافرحة وكل حاجة زوينة وبغيت نحس بيه عجبني وكيخليني نرتاعش غير بوحدي وخصوصا مع الجاد اللي كنت كنحسبو بحال خويا صغر مني واخا كيبام كبر مني حين لبوا ديالو ماشي هوا ديالي و عمرني ضنيت غادي يتبدلو المشاعر ويتحركو ويتقلبو بهاد الطريقة ونشوف فيه نضرة اعجاب لاول مرة نرد البال لشي تفاصيل فيه عمرني لاحضتهم ولا حتى تصرفاتو معاي ماكنتش كنلاحضهم كاع بحال الى كنت مبنجة . لهلا يحرم شي انسان من مشاعرو حيت فعلا الموت على قيد الحياة والمشاعر نعمة لا تعوض
شفت فيه وهوا متكي ضهرو على الحيط وهاز راسو فالسما ساد عينيه وطالق يديه بجوج وبقيت كنشوف فيه مطولا بحال داك العور اللي دارو ليه نضاضر الشوف ! شفت فصدرو اااي محلول قدامي وعنقو وبديت كنقلب على شي حركة يعنقني نعاود نحس بداك الاحساس ونعيشو وحطيت يدي على كتفو بلا منشوف فيه باش يهز راسو ودورت وجهي بانت ليا ديك خيتي عاوتاني جايت لابسة بيكيني ونازلة فالماء مع هاديك اللي كانت معاها .. زعما مابان ليها الماء غير دابا وحنا فيه ومابانت ليها غير هاد الجهة اللي فيها لابيسين . ماحملتهاش وكحزت عند جاد بقيت كنشوف فيها بنص عيني وهي كتمشي وتجي اما جاد ماتحركش واخا لسقت معاه حتى قلت ليه جاد مالك ؟ قالي وااااالو هانا معاك
هز راسو بزز شاف فيها ابتسم وشفت ليه فعينيه بحال الى اول مرة نشوفهم .. عجبوني عينيه حيت نضراتهم زوينة وجذابة والشكل ديالهم وديال حجبانو زوين فاش كيدير شي تعبير بعينيه كيجدبني وكيجيو معاه التعابير دالوجه كيعبرو اكثر من الهضرة . بقيت كنشوف فيه ودار ليا واحد نص غمرزة بعينو تعبيرية وحرك راسو شوية بمعنى شنو ؟ ولا علاش كديري فيا هاد الشوفة ولا مالكي سهيتي هادشي اللي قصد .. ضحكت وديك الزبلة طحبة البحر كتجي جيهتنا برزطاتني . عاودت شفت فيه بنفس الطريقة بغيت غير نحقق ليه فوجهه ماصلاحش ليا كيدير فيا شي شوفات حشموني وانا ندور وجهي .. قربات لينا ديك خيتي كتعوم وشفتها حاضياه كتقلب منين دوز ليه وانا نضور بقيت مترددة حيت بصراحة بصراحة كنحشم منو ووليت كنفكر لحركاتي ماشي بحال قبل شنو ما درت ماعندي غرض مهازة هم .. ترددت فالاول وحسيت بقلبي كيتخبط فبلاصتو فكل مرة كنفكر نديرها ولحمي كيشوك عليا لاكن زعمت وعنقتو وصقلت بقيت كنشوف فديك خيتي باش تمشي بحالها وهوا يعنقني حسيت الهوا تحت رجليا حسيت بلمسة يدو هاد المرة فين تحطات وفين مشات و حتى تعنيقة عندها معنى ماشي بحال قبل كنعنق ونعز بالمعزة ديالو فقلبي عادي . زدت قربت حتى وقفت بين رجليه وهوا جالس وتكيت عليه ودرت يدي على رقبته وصدري كالع نازل غيخرج من بلاصتو .. عارفة باللي هوا كيحسبني بحال ختو وكندير مع هاد الحركات وهادشي ريحني نسبيا مابغيتش يعرف باش حسيت ومشاعري اللي تقلبو فجأة ويعرف نضرتي ليه كي ولات وكفاش كنشوفو .. يكفي ننعش روحي واخا غير شوية راه اللي شفت ديال العذاب والموت والمدة اللي كانو فيها مشاعري مقتولين كافية ووافية براكة عليهم من الضغط و الالام .
عم الصمت والهدوء والضلام فالباطو جو زوين حسيت براسي بحال شي اميرة مدللة .. احساس تتمناه اي وحدة والله يعطيه ليها مانحسد حتى وحدة عليه ومانبغي حتى وحدة تحسدني عليه حيت حتى واحد ماعارف الانسان اشنو كيعيش فحياتو ومناش كيدوز .
هزيت راسي بشوية نخليه ياخد راحتو منبسلش عليه حيت واخا كيسايرين حتى هوا كيبغي يرتاح بلا مضايقات . هز وجهه حتى هوا شفت عينيه كيتلسقو بحال فاش كيشرب وقلت ليه واش شربتي
حرك راسو بالنفي وقالي لا ومسح على وجهه وحيدت من قدامو ناض طلق يديه وقلبهم اللور بجوج تكسل وغطس فالماء بقا غادي تحت الما ماهز الراس حتى وصل للجهة لاخرى وديك خيتي واقفة متكية على الحيط كتشوفيه . قالي بيدو اجي لهنا ومشيت كنعوم حتى لعندو وجلست حداه وبقيت مرة نعوم مرة نجلس حتى عييت وطلع كيقطر وعينين ديك خيتي غياكلوه وكترمش ومرة مرة تحذر عينها .. ديرونجاتني ماعرفتش شنو ندير اااف.. تكيت بيدي على الارضية وقلبت وجههي كنفخ مافهمتش كفاش نتصرف ولا فين غادي نمشيو باش ماتبعناش مابغيتهاش تبان قدامو كااع ماحملتهاش دارت ليا الستريس شفتها عوالة عليه وعييت نميك عيست ندير راسي عورة ولاكن راه هاد خيتي كتجبدني مابان ليها غير هوا راه الكور بحالها تمشي عندهم .. حالفة حتى تتديه ودوك الفعايل ديال السطاج اللخر ماشي ديال البراهش هادي نوع اخر داكشي عندها تقيل وبالتاويل وتسملل فعينيها وحركات ديال البنات من تحت لتحت . نوضات فيا العافية ماعرفتش واش جيت نفوج ولا نتفقص يخ على موصيبة سلاطت عليا
طلعت من الماء هزيت الفوطة تلويت فيها وبقا عقلي مع ديك الزبلة كل شوية ندور نشوف فيها وجاد جالس حدايا داير فوطة على كتافو وقالي شيماء؟ مالك؟
هزيت كتفي قلت ليه والو
قالي: مالك بنتي ليا ماشي هي هاديك ..
قلت ليه جاني البرد وصافي غنهبط نبدل ونرجع .
يالاه جيت نوض وهي تم جايت تكات مقابلة معانا بلا فوطة بلا والو .. انا عارفة راسي الستريس مازوينش ليا وماخاصنيش نتعصب ولاكن ماعرفت مندير كفاش نمشي ونعطيها فرصة . درت راسي تلوات ليا رجلي وطحت عليه شدني قلت ليه رجلي تلوات وجلست حداه فبلاصتو قالي هداي بلا متحركيها كتوقع
شفت ديك خيتي ناضت هبطات ونضت قلت ليه انا غنبهط نشلل عليا ونلبس ونرجع ومشيت هبطت للبيت دوشت بالزربة وخرجت نلبس شي حاجة . شفت جهة البيت ديالو بان ليا الريدو مردود وفاش دخلت كان معري .. قلت يمكن هبط وبديت كنصوني ليه مكيجاوبش .. خرجت طلعت لفوق لبلاصتنا مالقيتوش وبقيت كنقلب وندور تما ونصوني ليه والو مكيجاوبش دخلني الشك بديت كمشوف واش تبان ليا ديك خيتي حتى هي مابانتش ليا مولفة تحوم غير حدانا دابا غبرات . هبطت للبيت وجلست على واحد الفطوي صغير حد ا واحد الطبلة ماقبلة مع بيتو كنشوف فيه ونتسنا يحيد الريدو ...
شبعت جلاس كنتسنى وتيليفون فيدي كنصوني عليه . خرج لابسة واحد اللعيبة كحلة بحال الكاب كتجي كلها مربع واحد فيها شناشل من الجناب ديال كريستيان ديور فالقهوي فاتح والكحل قصيرة فوق الركبة توبها رطب ودافية شوية ديال الليل .. كيجيني هاد الستيل زوين بزاف .. ماشي ضاروري تكوني كتلبسي وعندك عرام دالحوايج .. المهم هوا يكون عندك ستيل خاص بيك يقلدوك فيه الناس وانا واخا كنشري بالنسبة ليمارك غاليين بزاف كناخد مرة فشحال بياسة من هنا وبياسة من هنا اللي نابسها وتجيني مع شحال من حاجة لبست واحد صندالة طومي فيها الشعر كلها من لداخل فالقهوي ونشفت شعري خليتو محلول ودرت واحد الفولار صغير ديال كوتشي جاكار جمعت بيها النص ديال راسي الفوقاني وعقدتو اللور جاني زوين ومشيت خرجت غادية بشوية وتيليفون حدا صدري مزيرة عليه وكنشوف هاكا وهاكا كنطلب الله تبان ليا ديك خيتي .. قلت نمشي عندو ندق عليه وداوني رجليا حتى لتما والرجال كيشوفو فيا بعين الاعجاب لاكن احسن حاجة كتريحك مكاينش اللي يدايقك بلسانو . وصلت حتى الباب وقفت كنشوف فيها ودقيت مافتحش ليا .. بقيت واقفة حداها شحال والناس كيدوزو مورايا كنتبعهم بعيني وكل شوية كندق بلا مندير الازعاج ومابغيتش نمشي حتى يفتح لي .. واحد اللحضة جيت ندق وفتح الباب لقاني واقفة وابتسمت ليه وانا قلبي كيضرب خايفة نشوف شي حاجة ومابغيتش نشوفها ويكون توقعي فمحله . كان شعرو فازك وفوطة على كتفو ولابس شورط رمادي من القطن قصير سيورو مدليين . قلت ليه ياكما صدعتك بالدقان
ضحك ليا وقالي: لا ماسمعتكش .. دخلي
فتح الباب دخلت وكنشوف فالبيت ونشم بنيفي بلا منعيق . مشا حيد الريدو على الزاج باش الضو يدخل وقالي واش دقيتي بزاف ؟
قلت ليه: لا .. غير مرة وحدة .. طلعت لفوق مالقيتكش وصونيت ليك ماجاوبتيش قلت نجي نشوف واش كاين هنا
قالي: كنت كندوش .. شدني واحد الكلاكاج فرجلي
جلس حدايا على الناموسية هز رجلي على فخدو بدا يدهنو بصبعو وقلت
ليه خاصو مساج
قالي : راه كنت تقصحت فيها ... عطيت لواحد بيها بالجهد فدوك المباريات وعطيتها الجهد رجعات معايا دابا .
ناض فتح واحد المجر جبد واحد الباندة دالرجل دارها فرجلو عاد هز راسو فيا كيشوف كي دايرة وضرب ليا نيفي بصبعو قال بوكوصة.. مافيكش الجوع
قلت ليه فيا
قالي يالاه نتعشاو
ناض دار فرجلو كلاكيطتو ولبس تيشورط وخرجنا ..مشينا نتعشاو فلغيسطو وحنا نلقاو ديك زبيلة تما جالسة وتهز وتحط فكتفها ودور فعنقها .. مابقيتش قادرة نطيقها كنحس براسي غادي ننفاجر . جلست على واحد الكرسي عالي كيدور قدام واحد الطبلة طويلة فلغيسطو انا وجاد والناس مستفين حدانا وقدامنا مطبخ راقي فيه طباخين كيطبخو قدامنا ويقدمو لينا .. جات واحد اللحضة حتى لعندنا وقفات حدا جاد وانا كنشوف قالت ليه شي كلمة قدامي وكتشوف فيه وتسملل و رد عليها مافهمتش اشنو قاليها وشنو قالت ليه بشي لغة حسيت براسي كنفقد اعصابي وكنتحمل فوق طاقتي وحتى الدوا ماقضاش فياش .. كمدتها مزيان فصدري ودورت وجههي عيني غرغرو بقيت كنشوف فالناس والضبابة على عيني وداير ما فجهدي باش ما نبينش . وحاسة براسي غنطرطق من غيضي وحتى ريحة الماكلة مابقيتش كنشمها
مشات ودورت عيني بشوية كنشوف فيها ماكرهتش نخشيها وسط ديك العافية اللي قدامي والى بقات كتحك عليا غندير فيها شي موصيبة .. تفو كتبغي تفوج كيخرج ليك شي واحد ماولداتوش ليك مك من جنبك ينكد عليك . يالاه تهنيت من قاضية الريدو رتاحيت جات بلا حشمة بلا حيا كتهضر . دور وجهه شاف فيا وانا مهبطة عيني ماضحكت ما والو غير كنشوف فديم الماكلة وقالي
- جايا كتسول على بريكة
حركت راسي بالايجاب كنشوف قدامي وبقيت ساكتة زوقتها بواحد الضحكة من حلاقمي لبرا وبقيت كنشوف فهادك اللي كيشوي فواحد اللحمة حتى شواها وقطعها وريحة الطياب طالعة وصوت التشواط والهضرة والرواج . قطعها حتى قطعها ودردر عليها ربيع ولا منعرف شداكشي وخططها بواحد لاصوص قهوية وهز منها عطاني غير شوية انا واللي حدايا غير كندوقو انوع داكشي اللي كيصاوبو .. هاد القضية كتعجبني فلعشا هنا نجلس نتفرج هما كيطيبو ويتفننو وانا متبعة وكنتشهى حتى يسالي ويعطيك شوية ويعاود يصاوب حاجة اخرى وهما غادين كيبدعو حتى كنلقا راسي شبعت ونوعت . هبطت عيني على داك الطبق اللي صاوب كليت منو وماقلت حتى كلمة بقيت مبرزطة من هادشي اللي كيوقع معايا وانا نحس بالكرسي مشا بيا .. جرني جاد منو حتى لسقت حداه عنقني وصل يدو حتى لدراعي كيمسح عليا ويشوف فيا ماقالي والو .. هز واحد اللحمة عطاها ليا كليتها وقالي واخا مكيطيبوهش كامل كيبقا زوين مكيضرش
قلت ليه براسي : اممم .. بنين
شوية بشوية نسيت ديك وجه الويل وبديت كناكل ولاكن راه غير كنشوفها كطيح ليا اليد مع الرجل تعشينا وسالينا وقالي واش تلعبي
قلت ليه كنضحك شنو نلعب؟
قالي العاب
جرني من يدي مشينا لواحد الكازينو تما فيه الناس كيلعبو ووقفنا قلت غير غادي نجرب .. وقالي هاد الدوائر هما الفلوس كتراهن بيهم . الى ربحتي كتمشي للكيشي تاخدهم . خسرتي كتخلصها شيك ولا اس بس
قلت بشحال غادي نراهنو
قالي كيبدا الرهان ب خمسالاف درهم مغربية
تخلعت قلت ليه بزاف
قالي: كاين اللي مراهن هنا باكثر
. مبليين بالقمر
قلت ليه لالا بلاش
جرني وقالي اجي والله تا نجربو
قلت ليه والى خسرنا؟ .. هاديك خمسالاف درهم راه غتشري ليا بزطام من كوتشي
راهن بيها وخسر بقات فيا قلت ليه صافي مشااات بقات فيا. قالي كاينة واحد اللعيبة ديدروها . كتراهن بالنص ديالها مرة اخرى كيعطيوك محاولة تربح الى خسرتي كتمشي ليك حتى هي
قلت ليه بلاش قالي اجي جربي حضك وراهن بخمسين الف مغربية ووقفت كنشوف فيها ونضحك وبديت نحك يدي لحت واحد اللعيبة كدور على واحد الدائرة دالارقام وبقات غادية وانا عاضة على شنايفي وجاد متكي بيديه على الطبلة كيشوف فيها ويتسنى حتى حبسات .. ماعرفتش واش ربحت ولا خسرت حتى شفت تعابير وجهه كيشوف فيها قالي اييااااه !!
ديك الساعة عطاني هاداك اللي واقف تما بالكوستيم واحد الكارطة ديال الربح وجاد كيضحك قلت واش ربحت؟
قالي: لا بزطام واحد اللي عندي شي عماين دابا .. كنت خديتو من لوي فيتون مكيبانش كاع واش لوي فيتون مافيه حتى علامة من برا عادي وهوا اللي عندي... نتوما البنات عزيييز عليكم تهزو السمية وتكون بااااينة ياك هههه
قلت ليه : لالا ماشي كولشي
قالي : كوولشي عتارفي
بديت كنضحك وخرجت من تما مشينا كندورو كنقلب على الكوتشي ودخلت طرقت مها فسمطة وبزطام وخرجت من تما طلعنا لفوق كانت شي 3 ديال الليل والدنيا عامرة . خليتهم حدايا وجلست انا وياه على فوطويات وقالي راه مابقا والو نوصلو للهند .. بقات شي 3سوايع ولا ربعة . قلت ليه بصح ووقفت كنشوف خليت الكارطونات فبلاصتي وبدينا نطلو بان لينا الضو بحال الذهب مشتت فوق الماء من بعيد فرحت حيت غنشوف الهند وبقينا واقفين كنهضرو .. فاش رجعنا بلاصتنا لقيت لكارطونة دالبزطم والسمطة طارو وبديت نقلب لتحت ولفوق انا وياه ويدي على حنكي
بدا كيضحك قالي نرفزني وماكنتش كااع باغي نتسوق ليه .. ولاكن ديك الدخلة اللي دار فيا عرفتو باغي شي حاجة
قلت ليه: انا تصدمت فيه عرفتي كيفاش طاح تفرش فالارض ... اللي شاف الفورمة والطول يقول هنا نبات
قالي : كينفخو راسهم بليباري وصافي
قلت ليه : صافي كالم توا .. راه النهار بدا يطلع .
حليت الريدو على البيت شفت جهة بيتي بان ليا البيت اللي حداه هوا اللي فيه ديك خيتي وجات ملاسقة معايا هي وصاحبتها تما وكتشوف جهتنا .. زدت تعصبت ماحملتش تتقابل معاه والبيت مافيه حتى حيط . الزاج طاع مع البيوت من لتحت حتى لفوق يعني البيت معري كاع داكشي اللي فيه كيبان . مشات تكات مقزبة فوق الناموسية وطلقات شعرها وهزات رجليها كتلعب بيهم وتشوف فتيليفون وتلعب وتشوف جهتنا .. صافي حسيت بالصهد وصل ليا لمخي وبديت نسوط مابغيتش نرجع لبيتي وفيا النعاس .. بقيت كندير السبة وندور تما قلت ليه كيبقات رجلك باقا كضحك قالي شوية ومشا جلس على واحد الكرسي طويل وعريض رطب جيهة الزاج تكا وقلت ليه واش ندير ليك مساج لرجلك قالي قالي لا حشم مني لاكن لحيت عليه وهزيت واحد الكريم كان محطوط عندو جلست حدا رجليه بقيت كندلكها ليه بشوية من ديك البلاصة اللي كضرو وعطيتها الخاطر وحنا كنتجمعو حتى ساليت جيت نوض وجرني من يدي جلسني حداه قالي فين غتمشي قلت ليه حتى بلاصة
بقيت جالسة كل مرة كنميل وكنهضرو وعيني كيتسدو بالنعاس بقوة السهير وهوا كيلعب ليا فيدي وشعري حتى تكيت على كتفو وصدور ووجههي جهة الزاج كنحس بعيني غيطيحو وداك الاحساس رجع من جديد ماسخيتش بيه والكرسي غير ضيق .. دكحزني عليه وطلق رجليه برا الكرسي على واحد الطبلة وتكاني عليه باش نقدو فيه وبقينا مرة نهضرو مرة نسكتو حتى نعست
فقت لقيت راسي ناعسة عليه ولاكن فوق الناموسية .. شفت فيه لقيتو ناعس مرتاح وبديت ندور فعيني عاد تفكرت باللي كنا نعسنا على الكرسي انا وياه حتى شد فينا نعاس مزيان وتعذبنا وناض من نعاس نوضني وجرني من يدي قالي اجي نعسو هنا وطحنا كاو . شفت فالساعة فتيليفونو كانت الثلاثة وانا ضور عندو بديت كنفيقو كيقول ليا واخا واخا ... مابغاش ينوض وجلست ربعت حداه واحد الشوية كنلعب فتيليفون ونشوف حسابي لقيتو طلع تكرع بليزابوني دغيا وليت مشهورة وحسيت براسي مهمة وعجبني الحال . شفت فجاد وهوا مقلوب للجهة لاخرى وتكيت عليه نوضو صافي باركة نعسنا بزاف وباينة وصلنا وحنا مزالين هنا غندوزو السفر غير فالنعاس ومافاق ليا غير بزز تقلب على ضهرور شاف فيا وضحك قالي babay
ضربتو لكتفو قلت ليه نوض ابيبي نوض راه وصلنا بقينا غير حنا اللي ماخرجناش .. نوض خلي الباطو يرتاح
هز راسو بزز اصلا النعسة النعسة كتهد بحال النعسة ديال مور العصر . مشا فشلان الشورط مدلي والبوكسر نصو كيبان وواقف كيقلب على الفوطة وبزز باش كيشوف .. قلت ليه علاياش كتقلب قالي واحد الفوطة كانت هنا .
جبدتها من تحت المخدة اللي نعس عليها عطيتها ليه وبقيت جالسة كنشوف فيه وهوا محني على لافابو فالحمام كيغسل وجهه ومتكي عليه بيدو مافيه اللي يتحرك . مسح وجهو وجا تسهط عاوتاني على ضهرو قلت ليه نوض راه مغنخرج من هنا حتى نخرجك
باغي نطفي الضو جا على عيني وبظا كيضحك قلت ليت وانوض واش عاد غتىجع تنعس
قالي طفيفي الله يحفضك
وانا نوض جريتو من يدو كنجر ونعاود قلت ليه راه الثلاتة هادي
قالي : سيري نتي قادي داكشي ديالك يالاه تجي مع الوقت نيشان.
بقا عليا غير سيري والله تا تلقايني واجد ومشيت طلعت لفوق للسطح بغيت نطل نشوف الدنيا والجو لقيت راسي كنطل على المدينة فالميناء تفتح صدري وشميت هوا جديد . كان واحد الصهد رهيب والباطو خوا الى شي ناس قلال اللي بقاو جالسين سعداتهم ماعندهم غرض .. ماعرفتش فين غنمشيو وشنو عندو فالبروغرام نسيت ماسولتو باش نعرف شنو نلبس .. واش غير صندالة ولا غنمشي بزاف على رجلي نلبس شي سبرديلة مريحة . المهم بقيت كنشوف فالبلاكار وجبدت دجين لونو فاتح كيجيني مزير فيه شي حكات لقدام مستل وتيشورط بيضاء واسعة خشيت واحد الطرف منها من الجنب فااسروال ودرت سبرديلة ديال اديداس بيضاء وهزيت واحد الشكارة كنت شريتها شحال هادي من زارا كحلة ديال الجلد درت فيها كاسكيطة وليكخون وداكشي اللي نحتاج ورشيت ريحتي وماحطيت لا مكياج لا والو من غير واقي الشمس و مرطب ففمي على حسب الشمس ودفرت شعري دفرة مرخوفة جمعتها بشال صغير من لتحت ويالاه غنصوني ليه طلع ليا هوا جاوبتو قالي واخرجي راني كنتسناك !
بقيت عليه لا انا مكنتزوقش انا مكنديرش وغادين حملت شكارتي عطاني شارجور ديالو وشي تويشيات كانو فيديه درتهم فشكارتي وجبدت كاسكيطتي حتى انا ومشينا ناكلو شي حاجة قبل منخرجو. خديت انا وياه ليكوفخ مع العصير وصافي حيت بغيت ندوق ماكلة الهنود وخاصني بلاصة ليها .
خرجنا من الباطو يالاه تقابلت مع الناس والعالم بديت نسمع ناهي ناهي مانيان مانيا برطي ببرطي مافهمت والو وكلهم سومر .. شديت وجاد وخرجنا من الباطو فيدو تيليفون قالي هاد المدينة سميتها chennai
غنمشيو لواحد البلاصة حطيتها هي اللولة .. دابا الثلاتة مزيان حيت بالليل كتكون حسن
قلت ليه واش زوينة هاد المدينة قالي ماشي بزاف مافيهاش شي حاجة واعرة حيت الهند كبيرة بزااااف وواعرة من ناحية السياحة فيها مايتشاف ولاكن الشعب ديالها خايب ومكرفصة وكتعاني من الاكتضاض ديال الشعب ديالها
قلت ليه اشمن بلاصة غنمشيو ليها قالي هانتي غتشوفي كي دايرة مهم شي حوايج مختالفين عمرك شفتيهم فحياتك .
تحركنا وكيتبع غير تيليفون فواحد البروغرام صاوبو كيعطيه المسافة اللي غنضربو وفاش خاصنا نركبو وكل شيء تعجبت فيه وقلت ليه زوين باشو ماندوخوش
قالي: قالي عرفتي شحال خدمت عليه .. حمقني راه من دولة لدولة واخا نكون غادي ندوز فالتلفازة منضربش هاد الخدمة اللي درت .. شحال وانا كنقلب على ترونسبور كي نديرو ليه هنا .. ضاروري بروغرام توجدو قبل وتحط فيه كاع داكشي اللي باغي دير وتقلب على البلايص وفاش تتحرك ولا غتبقا واقف دايخ ضيع الوقت وتسول.. اش غتسول اصلا كفاش غتفاهم مع شعب لغتك ماشي هي لغتو
ركبنا فطاكسي هضر معاه بلونكلي عطاه السمية وبقينا غاديين كنشوف فالمدينة .. جاتني اغرب حيت الهند اصلا غريبة ماشي بحال الدول لخرين .. حسيت براسي بحال اللى راني فشي مسلسل هندي .. المشكل هوا الوسخ .. مسخة ماشي نقية .. شوارعها ديقة وعندها الحفاري بزاف وكل مرة يخرج موطور واو شحال كثار .. خرجنا لواحد البلاصة نفية شوارعها كبار والمدينة غالبة عليها الطبيعة . نزلنا شد ليا فيدي وبقينا غادين كنشوف فدوك الناس ولباسهم شي وحدين كيمشيو بالحفى .. وصلنا واحد البلاصة بحال شي سوق وفيه واحد لبني بحال الاهرمات ثمامات قياس عمارة وطالعين بالدروج تول اهرمات مصغرة ودوك الدروج واقفين فيهم ثماثيل ديالهم ديال داكشي اللي كيعبدو بالالوان وبزاف ديال الثماثيل فدوك الاهرمات .. دخلي ليهم وطلعني من لداخل فالاسانسور طليت من لفوق كان منضر فشكل .. خديت تصاور انا وياه وهبطنا كندورو فداك السوق فيه محلات صغار بحال جامع الفنا وكيطيبو تما تفكرت عير جامع الفنا ديالنا . بقيت كندور ونشوف داكشي اللي كيطيبو ياربي ماقدرتش ناكلو ولا نقرب ليه . اليد اللي كيهز بيها المقلة ويحط البانيو ويهز شيفون يمسح بيه هي نفسها اللي كيخلط بيها .. بقينا كندورو غير كنشوفو طبيعة العيش ديالهم وحياتهم وماكلتهم .. كيهزو العطرية بيديهم كمامش ماشي غير شوية وكيخلطو ويجلطو والزربة داكشي عندهم والناس واقفين كياكلو . قالي جاد مرحبا بيك تاكلي شي حاجة
بعدت وجهي ورا ضهرو قلت ليه ياه يااع اش غناكل منقدرش .. ديك الزيت يعلم الله شحال وهوا يقلي فيها
لواحد البلاصة اخرى كان معبد ديالهم والناس كيتعبدو .. مابقيناش فيه بزاف وخرجنا عنقني قالي ماشي ي حاااجة شناي .. ندوزو غدا هنا ونمشيو نشوفو دلهي
قلت : ليه واش بعيدة بزاف
قالي: بعيدة بزااف بحال الى غتمشي من الصحرا لطنجة ..قطعت لينا فطيارة
صدمني: اويلي طيارة
حرك راسو : مغالياش راه ماشي شي حاجة غير شي 300 درهم للواحد الي وروتور ..الهند راه رخيصة والفقر ماشي غالية
كملنا طريقنا كنتجمعو للباطو باش نباتو وجاني الجوع ماقدرت لا انا ولا هوا ناكلو ديك الماكلة . وصلنا لاوتيل كنا عيانين بالمشية طحنا نعسنا كل واحد فبيتو والصباح كذلك خرجنا شفنا واحد البلاصة فيها الشلال وبلاصة اخرى فيها مآثر ديالهم وبقينا كندورو تابعين لبروغرام اللي دار صدق زوين كلشي مضبوط وكلشي فالوقت وهوا هاداك حتى للنهار الثالت ومشيت انا وياه هزيت شانطتي اللي غطلع معايا وهوا كذلك وطلعنا فالطيارة مابغينا لا بزنس كلاص لا والو بغينا عادي باش نعرفو السفر فالهند كي داير ساعة جلسنا وهي تنوض مدابزة بالهندية الطيارة كتشطح بينا فالسما والعيالات مدابزين بحال الى راكبين فالكار ومكرفسين على الطيارة مسكينة متحسابش لينا غنلقاوها مقشرة من شي بلايص .. تلفت ليا وانا حداه قالي مزالة باغا تمشي فداك التران ديالهم تجربيه ... ماقنعاتكش الطيارة
قلت ليه :ماشي مشكل كيعجبني هادشي هادا هوا السفر ديال بصح .. على الاقل نعرف الهند وطبيعتها فكلشي .. كنشوف داك التران ديالهم ديما كيبينوه فافلاهم قالي ماعنديش مشكيل انا نمشي معاك حتى فدوك لكرارص ... انا ماباغيش غير ينرفزني شي واحد ويطلع ليا الدم ونصدق ضاربو ابار هادشي نمشي معاك فين مابغيتي
قلت ليه : راه فين ماكنتي غادي تصادفوبحال داك النوع .. الباطو اللي زعما زوين هانتا ضربتي هاداك بقا كيمشي ويجي تما ماعرف الدقة منين نزلت عليه
وصلنا لنيو ديلهي نزلنا عالم اخر .. السفر زوين ولاكن كيحلى فاش كيكةن معاك شي واحد اللي يفهمك ويدير ليك خاطرك وتلقاو راسكم كتبغيو نفس الاشياء وكتفاهمو عليها ، مايقمعك ما يقلل منك الى ماعرفتيش شي حاجة .. يشرح ليك ويعطيك الخاطر .. الصراحة الفلوس زوينة ولاكن الى عرفنا كفاش نستعملوها وفين نديروها .. عاد عرفت معنى السعادة والمتعة اللي كيديروها الفلوس . السيمانة ديال دلهي دازت زينة بزاف .. كنا كل نهار كنديرو نزورو جوج ولا ثلاتة دالاماكن وكنفيقو بكري .. حجزت غرفة ليا وحجز غرفة ليه ماخليتوش يخلصها وحلفت عليه باش حتى انا نشارك باش نبقا مرتاحة . شفنا المعالم ديالها كليت ماكلتهم واخا كيديروها حارة بزاف لاكن كيعجبني الحار وحتى جاد عزيز عليه ولقينا بلاصة زوينة ناكلو فيها .. عجبوني شي اطباق عندهم بنان بزاف وكليت منهم بزاف ..خصصت يوم للشوبينغ مشيت شريت الساريات وقال جاد الى عزيز عليك عليك الذهب شريه من هنا .. هادي هي بلاصتو وعيار 24 ، مشيت لبلاصتو معاه شريت لماما وليا وختي حيت ماشريتش ليها داكشي باش واعدتها من الامرات وجات الفرصة خديت ليه الذهب نيت يشوفو بنادم مايصدقش ذهب وشكل زوين موديرن وخديت ليها داكشي كبير وخديت ليا حتى انا ودورتها فراسي قلت واش نعاود نعطي لجاد شي كادو ولالا . كان جالس فمحل كبير وانا كنشوف وخديت واحد البراسلي ديال اليد ماعرفتش واش يدير الذهب ولالا لاكن زعمت وخديت واحد ديال الدراري مستيلي حيت هوا جاني ستيلو سبور باش يقدر يلبسو ومشيت عندو محملة ومجملة كنا كرينا طموبيل لقيناها رخيصة فالكرا بيها كنتحركو . جبدت الكادو فالطموبيل وحشمت تفكرن اخر مرة وتزير وجهي .. كان سايق ومديتو ليه قلت ليه هادا ديالك .. كنتمنى يعجبك
شاف فيه استغرب ووقف فجنب الطريق حلو دار واحد الضحيكة فشكل وعينيه كانو كيقولو شي حاجة مافهمتهاش حتى دخل يدو فجيبو ديال السروال جبد واحد البواطة وقالي واهاانتي الاللة .. تانا عندي ليك واحد الكادو زويييين بحالك
فاجأني وعارفاه سخي بزاف ولاكن تفاجأت فهادي ماعرفتش وقتاش شراه حيت مكنتفرقش انا وياه .. لاكن تفكرت فاش كنت كنقلب ونجرب الذهب لماما بان ليا واقف فداك المحل نيت وكيشوف فشي فيترينة قلت راه غيروكيشوف ويدور حتى نسالي لاكن تصدمت فيه وعجبني الحال خصوصا فاش حليتها لقيتها سنسلة بحال السميطة ذهبها ابيض رقيقة وفيها حجيرات دياموند صغيورين كيبريو بخال النجوم فالسما .. الشكل ديالها كيوت وزوينة حمقاتني وعنقتو قلت ليه شكرا بزااف قالي حتى نتي شكرا بزااف الكادو زوين عجبني
حيدو ديك الساعة دارو فيدو وخبيت انا السنسلة وقررت فاش نحطها عمرني نحيدها حيت الانسان اللي عطاها ليا اغلى منها واغلى من قيمتها وعاد عرفت الفرق بين الحب .والحب.. شكيت فالاول واش كنعيش نزوة وصافي لاكن ماضنيتش حيت مابقيتش كنبغي نتفكر الماضي وحتى شي حوايج طراو تنساو ليا .. ومالي مكنبقاوش نتفكرو شنو داز كنقدرو ننساو بعض الاشياء فمرة وهادشي اللي طرا معايا لاكن اثار العذاب اللي عشت بقات فيا واخا نسيت ومابقيتش كنحس بيها لاكن فاش كنتفكر شنو داز كنقول علاش زعما درت هاكا وعلاش اصلا نبكي ومنوح وكنت كنلوم راسي زعما انا اللي ضيعت زايد من يدي ! مافكرتش فشنو كان دار ليا بسبيه نعست فالسبيطار وقالي عاين باين سالينا وبطريقة بشعة مانتمناها لحتى بنت بحالي . ومع ذلك فاش رجعنا نهضرو سامحتو بسهولة .. وفاش انا عطيتو البرا وما سبيتو ما قلت كلمة دالعيب بلعكس ماخرجت حتى كلمة من فمي وماسامحش وزاد عايرني فاش عيطت ليه وخلاني تابعاه . لهلا يردو ولا يرد ديك الايام .. بقات فقلبي نقطة كحلة وكنت فعلاقة مريييصة عيات الطبيبة تنصحني ماكنتش كنسمع كنت غايبة كنشوف غير لحوايج الزوينين وتابعة قلبي. شحال مسكينة برحات وقالت ليا شخصية نرجسية وعطاتني نبحث عليها وماديتهاش فيها ولا فحتى كلمة من اللي قالت لي عاد دابا تفكرت كلمتها وكلامها كامل اللي ماكنتش كنسمع وعرفت شنو عنات ليا بالنرجسية
أنا وبعدي الطوفان الجزء التاسع
محتوى القصة
التنقل بين الأجزاء