حكاية أنثى الجزء 59

من تأليف لبنى السرابي
2021طور الكتابة

محتوى القصة

رواية حكاية أنثى

شدو طريقهم لعند مينة كلسو معاها لعشية كلها داو وجابو فلهدرة حتى عيااو من وراهاا توادعو سبقات اقبال لطموبيل مخلية وراها شهيد بغا يشد ولدو من عند مينة

شهيد: لواليدة مبغيتش نسمع شي هدرة جات من جيهتك
مينة:اشمن هدرة تاني !
شهيد:ومانعرف تبدا تسول فييك مو وتقولي شي هدرة ماهيااش ...سولوك قوليي الله اعمرها دار حيت هدشي لي كاين شي حاجة خرا مبغيتش نسمعها

مينة(ميقات ) هادي هدرتك
شهيد:هدرتي الواليدة ...بردو الطرح شوية

تجاوزاتو ومشات لعند اقبال اللور مدات ليها ولدها وقالت:شديه رضعيه مسيكين جاني جيعااان ...غير سادين ليه فمو بهاد لميكة
اقبال:مكنديرهاش ليه بزااف ...عاد رضع
مينة:اشمن رضااعة شوفي مسيكين باقي ضويعين معليه حالة شهر ...رضعي ولدك ونتي باغة تشبعيه غير بسكاتة ورضاعة ..ربي راه وصا بالطبيعي

اقبال:كنرضعو
مينة:ياله بسلامة تالغدا
اقبال:ان شاء الله

سدات عليها لباب كتشوف فولدها وتبسمات ليه وقالت:هاد جداك الى مقالت شي كلمة متبردش

***

داز نهار طوييل على هيبة ولبنات تعاونو وقادو الدار ديال اقبال تسيقاات وتمسحات وليناب تغسلو ولي خاصة مشات تشرات
متكية هيبة على مخدة وحياة كتقاد ليها حجبانها بلخيط

حياة:خاصني نخدم شوافة
هيبة:علاش ههه
حياة:نهار شفتو بغيتو لييك
هيبة:هههه اي اي بشوية (تنهدات )خايفة والله
حياة: معندك مناش تخافي الى ماصدق كركربيه مالو بغا يلصق فييك

صونا تيليفونها فصدرها وناضت كتزرب دخلات لبالكون وسداتو عليهاا مخلية هيبة متبعاها بعينيها وهزات تيليفون كتسناها

حياة: حبيبيي
هود:راني نتواحشك متبقاش تمشي عليا بزااف
حياة(ضحكات بغنج ) بعد غدا ونشوفك
هود:دومان
حياة:نن منقدرش ضياف
هود؛اه بوون داكوغ ...مي متعطلش علياا
حياة:نن نسالي ونجي

دخلات كتفرنس دارت تيليفون فصدرها ورجعات لوات لخيط كلسات ورا هيبة
هيبة:شكون
حياة:لي ح*** دخلي سوق ك***

هيبة:حياة هههه نسولك ولكن نتي محرومة اصلا
حياة:سولي من تقح***
هيبة: هههه خفت غير يكون هشام بحال داك لي مكيتسماش
حياة(كتنقي فحجبانها بنتااف )فلفراش ؟ منعرف تصدقي مخورة على جوج مرات
هيبة:تخويرة سانك سانك هههههه
حياة:هههههه تخيلتك كتندبي على لح**
هيبة:هههه لا ماشي داكشي عندي عادي والله
حياة:بااينة عاادي ملي كتهرنني عليناا اه حقا ناض و خلاني
هيبة:ولكن راه بصح ...كيفما هوا باغي حتى انا باغية شنو معنيتهاا يشبع رغبتو وييخليني انا كنتشوا بوحدي

حياة:اوى شرطيها عليه ...قولييه كويني يكوييك ستر ههههه
هيبة:كنهدر بصح ونتي كطنزي يخ غير لي بغا يهدر معاك
حياة:سولي اقبال تعطيك نصاائح
هيبة:لا لا (خرجات عينيها فيها )كنحشم منها فهادشي لا احياة سكتي

حياة(ضحكاتت )نوضي تنعسي ونتي شاعلة تحت منك النعرة
هيبة(ناضت لبلاصتها )حمارة لخرا

***

ريحة لحم كيطيب ومعاه ريحة دجاج ولوز القضية مخلطة فلكوزينة عند اقبال الغالية لابسة قفطان بيتي ودايرة فواطة بيضة على نصها ..هازة نص القفطان ولابسة تحتو كلون مبيين سيكانها بيضيين حداها مينة حتى هياا بقفطان جوهرة خفيف جامعة شعرها ب زيف حياتيي وكتفرتت فدجاج

الغالية:انعاونك ؟
مينة:لا لا بلاش ...دوزي لياا شي عضم فلحم
الغالية:مالي عورة
امينة:ودوك نضاضر ديالاش تاع شمش
الغالية:عندي لبعد منشوفش ...شنو درتي فدغميرة

مينة: درت سنيدة و البيض مع دغميرة دجاج
الغالية:البيض ودغميرة تاع دجاج (كمشات وجهها)تخالط تجالط
مينة:داكشي متعرفيش لييه ...قابلي لحمك عنداك يجي قاسح
تحنات على لفورنو ف ݣاميلة متوسطة عامرة لحم

الغالية(طفات علييه وهزات لحيمة ) هانتيي فتيي وهشيش ...تعسل
مينة: جاني ميدم لاا ؟
الغالية:اويليي هيا هبرة نااشفة (ميقات ) تبوزييق الخاوي

مينة:واحد امعلقة ندوق هاد لاصوص
عطاتها لمعلقة داقت لاصوص جابت طبسييل حطات فيه اللوز من طحانة ...جاها صغير خواتو فطبسيل اخوور كبير والغالية كلسات وشادة حنكهاا كتوشف فيها ...حطات زبدة فطبسيل تشحيرة فطبسيل دجاج فطبسييل


ديك لكوزينة جبدات مااعنهاا كلهم على جوج بسطيلات متوسطين

الغالية:ساليتي
مينة:صافي بقاا غير نديرهم فلفران ..تيدخلو كاع
الغالية(كتشوف فلكوزينة )الله يامينة الله اختي هاد لمااعن علاامن عارهم ؟
مينة:ودار عامرة بلعزباات ...عيطي لوحدة من لبناات تغسلهم
الغالية: انصاف فيها لوجع اقبال ملهية مع ولدهاا غيثة هيبة وحياة مشاو لصالون شكون بقا
مينة:بقات غير ملاك مع انصااف ...كتاار عليها لماعن معندها صحتهم
الغالية :ضهريي ولا عاطيني لحرييق خاصني نمشي لطبييب
مينة:هداك غير لحم لي هازة تقل عليك
الغالية:ممم ندير الريجيم ان شاء الله ...ربي دوزي دوك لميعناات اميينة على وقفتك تيجيو لبنات

مشات تغسلهم بلهلا يطريه ليهاا ...دخلات هيبة بوجه منور شعر مقاد ومكياج خفيف مكيبان كاع من غير كحل وماسكارا
اقبال: فين غيثة طلع دوا لانصاف
حياة:ارا نطلعو نمشي نبدل

الغالية:تبارك الله وصلاة على نبي (بافتخار )انا ليي والدة الزين

مينة: اوى الزين كيطير وكيبقا لفعل ا الغالية ...هيبة الله اتبت الغرس وديري عقلك وشدي دارك هاد الناس رااه دغرييين

هيبة:علاش اخالتي بنت لييك خفيفة ! ولا حيت مطلقة تا هوا راه مطلق

اقباال: الى هوا دغري تاحنا راه عندنا غير نيشاان هوا لمبارك لي غيدي درويشة والحنينة فيناا الى دارها فعينيه عمر لكلمة الخايبة يسمعها من فموو

هيبة (تبسمات من بعدما بركات ليها مينة على جرحة وحسساتها بنقص
مينة:اوى معلانا حنى غير داوين
اقبال:دخلي لبيت اهيبة لبسي ...راه مبقا والو وبجيو

دخلات اقبال لكوزينة بقففطان باش تستقبل ضيوف فلاسوور مطروز فصدر بدهبي بشكل راقي وشعر شداه اللور بمقبط صغير دايرة ساعة جلدية فايدها خاتم ماريااج وبراصلي تاع دهب لا غير ...كتستف فلحلوة وكتمسح لكيسان والغالية معاوناهاا

حياة:فيين غيثة

غيتة:اشنو تاني عاد دخلت طلع هبط طلع هبط سخفت بدروج
عطاتها سوارت طموبيل : نزلي جيبي لكندورة تاع هيبة من طموبيل نسيناهاا ودغياا ناس جايين

اقبال(ساست ايدها )شهيد تعطل
ميينة:هدشي كاع سخرة
الغالية(بهمس)جابر شتو مجاش ...مغيجيش !
اقباال(سكتات شوية ونطقات ) لي تسلكو غيديريهاا (تنهدات ) ارايي النعناع نغسلوو ينشف

شدات غيتة سوارت كتنفخ لابسة سروال سورفيت بيتي السمطة تاعو حد السرة لاصق وتيشورت عريض قصير إلى هزات ايدها تباان كرشها وقفات كدندن كتسناا السانسوور متكية على لباب كتمضغ فلمسكة

تحل لباب هزات عينيها فيه حتى توقفو بجوج على لحركة ملي شافو فبعضياتهمم ...خفق قلبها بشدة حتى ولات داتها كترعد بحالا تخلعات سكاناها بعينو برمشة عين وتجاوزهاا بهدوء مخليها جامدة فبلاصتها متبعاه بطرف عينيها تميلات راسها معااه من ورا متجاوزها كأنها غير مرئية بالنسبة لييه ...

جابر من النوع لي ميكوضعش الريحة الا فالقليل فقط ...ليوم كانت ريحة تسللات مع جيوبها الانفية خلفها وراه

إن كان هناك من يحبك فأنت إنسان محظوظ، وإذا كان صادقاً في حبه فأنت أكثر الناس حظاً.

***

حياة:صلاااة وسلااام على رسوول الله (كتقاد فشعر هيبة )ههه سرورات علييك الزيين
هيبة (مسحات شوية لعكر )معيق بزااف
حياة:بدينا تااني !
هيبة:وصافي
حياة:نهار اللول يموت لمش

تقابلات مع لمراية بقفطان مطروز من صدر وليدين بلموف شعرها طايح على كتاافهاا مكياج بارد على وجهها رشات رييحتهاا

في حين شهيد وجابر فالصالون كيهدرو ومعاهم لغالية

صونا تيليفون هيبة وناضت قافزة جاوبات

هيبة:الو
هشام:هيبة صافاا
هيبة(كيضرب قلبهاا )حم الحمد لله
هشام:حنا لتحت
هيبة(بدات كترعد ) ص صافي طاج 3 رقم دار 105
هشام:ماشي لكاطريام !
هيبة:لاا عند ختيي
هشام:واخة
قطعات معاه ومشات كتجري بطالونهاا لصالون وقالت:هاهوما جايين

لقات شهيد وجابر عاد جمعو السجادة تاع صلااة ناضت لغالية قاافزة لكوزينة

حياة:سيري نتي حلي عليهم
هيبة(حشمات )لا منقدرش لاا

اقبال:غيحل شهيد غير سيري رتااحي

دخلات انصاف او غيثة وملاك مشاو نيشان لبييت تا قبال رجعوه قاعة الانتضار

غيثة: مهدرنيش
انصاف: يخ منو وعيني فيه
غيثة:معينيش فييه تشكيت عليك ! انا غير شفتو مطمر (تكات كتلعب بشعرها ساكتة )تصيبيه تصااحب مع كويريمة
ملاك: رجال هوما هادووك
غيثة:اش عرفكم فرجال ! هيا لي كدور بيه (بتعالي )كان كيموت علياا ...انا لي مبغيتوش...حتى دابا الى بغيتو بكلمة مني يرجع
انصاف:اوى رجعي ليه

غيتة:متقلة عليك !
انصاف:هانتي ديما كنبغي نهدر معاك كترجعينيني خايبة ...شهدي ا ملاك
ملاك:دابا بيناتناا ا غيثة ...مكتبغيهش
جاوبات كداعب وجها بشعرهاا :لاااء سي با مون ستيل

شافو لبنات فبعضياتهم وسكتو تلاحت التيليفون لانصاف وقالت:انصاف ...صوريني هناا ...عنداك تشدي معايا لكونة

كلسات فوق سرير على ركابيهاا هزات ايدها وبانت كرشها وسرتهاا مع لبسة ولفورمة جات هيا هاديك شعر مسبسب بشكل مهمل على كتافها وضهرها

انصاف:اوى حلي عينيك
ملاك:صوريي وسكتي باغة دير الاغراء فبيت خويا ههه
غيثة:او ختي الله اخلييك الصراحة فرشاتو زوين غير تاع تصاور الانستاغرام

انصاف(حلات فمها )واش نتي مريضة باغة تلوحي هاد تصويرة فانسطاا ؟
غيثة:يسس ماالهاا (شافت التيليفون )وااعرة نموديفيها ونحطهاا

انصاف: غيثة والله ت(سكتات )ضبري لراسك معرفت علاشش حارقاني نفسي عليك
غيثة (بلامبالات )برديي الزين اتشرفي بكري

سمعو الصوت فلباب انصاف خرجات لكوزينة تعاونهم خلات لبناات فلبيت شادين تيليفونات عصباتها غيثة

ناض شهيد يحل دار معطرة ومجموعة ونقية ...حل لباب بابتساامة عريضة مرحب بلجميع
شهيد:نهار كبيير هدا دخلوو مرحباا
الحاج لي كان فلمقدمة بجلابة مخزاانية وطربوش على راسو من طياارة تقلعو فاسيي قح بنضارات تشوف مهبطهم شوي تبسم فوجه شهيد وقال:الله اغضا علييك كيف نتا لبااس
شهيد:الحمد لله اسيد الحاج ...دخلوو مرحباا (مد ايدو لهشاام ليي كيف العادة الانااقة وتبااثة ولبشاشة فلوجه محمل ومجمل ب بوكي ديال لورد فلحمر ..باس ايد لمرا وقال:خالتي لبااس !
نزهة:شهيييد هههه لبااس اوليدي كيف عاامل
مينة (جاية كتمسح فايديها )مرحبااا مرحبااا دخلوو لالة نزهة كيف دايرة (شدات من عندهاا لكادوات حطوهم فوق طبلة تاع لفوطوي وتسالموو الغالية حيدات لفواطة قادات قفطانها ودارت شاالهاا خرجو سلمو عليهم من غير هيبة لي كتفتف فبيت لكلااس

هشام:الله اكبر بييكم اسي شهيد
بغا يمد ليه لبوكي تاع لورد وقال:جاي تخطبني انا ولا ههههه عطيه لمولاتو هههه هيبة هيبة

هيبة(ضربات حنوكهاا )اويليي على شهيييد

الحاج فالصالون غير سمع هيبة طلع نضاضر تبان ليه فلكولوار الزين كيتشااير ها الزعورية ها لعمورية ها طااي حوتة القفااطن ولمفاتن

الحاج؛اغبيي (ربي ) الحبيب اشماااشي نعمل اياامي بخ بخ بخ ديامانض او لكغيستاال فطبااأ الجوهغ
نزهة (كلسات حداه )قلتي شي حاجة الحاج
الحاج :الالة مأولت شااي نتا خاصك تغكب الصنااطي باش ماشي فاين منطأ تأوليي اش تأول الحاج

نزهة:وصافي صافي سكت

جاية هيبة فلكولوار كتعتر فجلايلها وفلبليغة لي لابسة حيدات الطالون تحسبا تجيب شي ربحة وتحشيمة

سيليا (طلقات من ايد هشام ومشات كتجري لعند هيبة )طاطا هيباا
هيبة(تحنات بااستهاا )حبيبة دياليي (هزات عينيها فهشام لي تبسم ليهاا حتى تزنݣات قربات تحت نضراتهمم ...مدات ليه ايدها كيترعدو تشدهم طلق في سااع ومد ليها لورد

هيبة(بخجل )شكرا
سيليا:انا ختارتو اطاطا
هيبة(هبطات راسها )شكرااا

دخلات لصالون والعينين تيسكانيوها من تحتها لراسهاا مشات لنزهة هيا اللولة تحنات سلمات عليها من وجهاا
نزهة:الله ارضي على بنتي

مدات ايدها لحاج وبدورو مد ليها ايدو سلمات عليه ومششاات هازة لبوكي

الحاج(قرب لجيهة نزهة لي غير كتفرنس باينة فيها فرحانة وسيليا كلستت جنبها )هادي هيا لعرووسة
نزهة:ممم
الحاج؛ومالها متبوس لياا ايدي تاخد غضى ؟
نزهة(نغزاتو )لبنت حشمانة
الحاجة:اخياار ...حشم غا نتاا اماا عويتأت ليوم كيعرفو طريأ لباغ على طريأ دار الالة نزهة ...فاين هيا مهاا
نزهة:(عيات تنزغز فيه )لي لابسة قفطان كحل
الحاج:ماا حأأتشاي مزياان (بعد عليهاا ) شهيد...كيف عامل مع لخدمة الحبيب ...هدا جابغ نجاغ نتاعناا
جابر:الله اكبر بيك الحاج
الحاج:شنو تأرب لعروسسة اسيدي جابر
عتقو هشام فهاد لموقف وقال: نسيبهوم
الحاج(هبط نضاضر وششاف فيه من لتحت ) خيااغ نتوما كاع نسااب ! نسوبية زينة هادي
شهيد:ههه داكشي لي كاين
الحاج:اوى يشغفنا نتناسو معاكم ...شهيد..فاين سيدي باك
مزال مكملهاش حتى تحل لباب من طرف ناصر كان فجامع تسالم معاهم وكلس كيسول على الحال والاحوال

الحاج (بهمس لنزهة )نتاا متحشمشااي ! اوى نوض نوض الحبيب نوض ...وداك المسخووط شتو تعطل
نزهة (بهمس )صبر دابا يجي

**
صينية واجدة اقبال قدات كلشي باش يمشيو يكلسو مع النااس

اقبال:انصاف
انصاف:نعام اختي
اقباال: اتمشي لطموبيل ديالي ...جيبي ليا لحليب تاع اسماعيل نسيتو ايفيق دابا مبقاش ليه
انصاف:واخة خاصة شي حاجة مزال !
اقبال :لا لا مخاص والو

زادت على السورفيت كاش كيتلاح لفوق ...خرجات حانية راسهاا بزربة وهوما لهدرة والضحك

نزلات فالسانسور مشات لطموبيل اقبال خدات الصاك تاع اسماعيل سدات وطالعة لعمارة تكتسمع : سس سس

مضارتش دخلات كتزرب لعمارة بغات تبرك على السانسور تاتحطات ايد على ايدها وحسات بقبلة على خدهاا تلجات ليها ركاابيي ...تحل السانسور وهيا لاصقة هزات عينيها فلمرراية تاع لداخل بان ليها ادريس محني وراهاا وقال:حصلتي داباا انسيبة

ملحق 26/10/2021

شاف فمها يبس تسقطرات من دم دوز ايدو من حداها متحركاتش جا قدامها محني لطولها وقال:واش غيبتي ...انصاف
هزات ايدها زاعمة بغا طرشو تشدهاا بايدو كيضحك ...طارت على ايدو بعضة شدها من وسطهاا كيموت بالضحك وهيا كتجبد ليه بحال شي بنت صغيرة تطاحت لبانطوفة ديالهاا خرجات من السنسور مخلية ليه بانطوفتهاا وطلعات كتجري فدرووج

كلسات فدوزيام كتنهج وتمسح فحنكها الى دخلات هكاك غيعيقو كاينة شي حاجة خصوصا اقبال كترد لبال لكلشي
محسات تسمعات باق حداها وناضت غوتات وسدات فمها ملي شافت لبانطوفة حداها طلات من لفوق بان ليها واقف ورسل ليها بوسة من لفووق ميت بالضحك

تكات على لحيط رجليها مهازينهاش بلخلعة كلسات فدرجة كلها كترعد كل مرة تزيد درجة وطل يكما كاين فشي قنت

وصلات لباب دار ودارت ليها طن كيفاش نسيبة ! اش بغا يقصد مزال واقفة كتفكر تاتحل لباب من طرف اقباال
اقبال:عاد لقيتيني هابطة ...تعطلتي ...مال وجهك صفر

انصاف(كتفتف ) اا ل لقيت كلب فباب لعمارة خلعني
اقبال:ديال السيدة لي لتحت تاني ؟
انصاف:معرفتش
اقبال:واخة دخلي حتى نهدرو مع السانديك
انصاف:اقبال ...طبيب حم طبيب تاع سنان لي متبعة معاه شفتو طلع

اقبال:ادريس ...راه خو هشاام علاه مقلتهاش ليك
انصاف:لاا
اقبال:ودخلي
انصاف:دار عاامرة نمشي لدار !
اقبال(حمرات فيها )انصااف
انصاف:وخة حمم


دخلات مهبطة راسهاا كتسمع فصوتوو فالصالون موقفات تالبييت

شاف فيه بااه مطلعو وهبطو بعينيه وقال: مولاي إدريس ...فاين كنتي دالح اسيدي
دريس(هز كاس لما شرب راشقة ليه تقول هوا لعريس ) غير هناا الوالييد

شهيد:انا هشام نهار شتو والله معقلت عليه بليي خوك
هشام:حتى انا منتابهتش

تحطات الصينية من طرف الغالية وكلسات حدا نزهة بفرحة كتقاد فالشال وكترحب وتعاود: مرحبا بييكم
الحاج:تغحب بييك جنة ونعايمهاا ...فاين مول داغ !
هشام (خرج فيه عينوو ترجع اللور )حم

الحاج (عض لسانو متدارك الوضع نسا شنو قاليه هشام بلي مطلقين من زمان ) احم ...اوى نتوما عغفتو علاش جيناا نخطبوو لالة لعغوسة لسيدي هشاام حفضه الله
ضحك دريس حابس الضحكة تخرجات بلهمس مربع ايدو وحاط ايد على فمو خنزر فيه باه من تحت نضاضر

الحاج؛بنتكم غتدي المغضي فولادي الالة !
الغالية:الغالية
الغالية :الالة الغالية

كلسات اقبال جنب شهيد من بعدما حطوو الطبلة بمالد وطاب من حلاوي مشكلة وفاكية ...ومينة حتى هييا كلساات حد ناصر

ناصر:حتى نتوما راكم اختاريتو دار اكبيرة اسيد الحاج ...مربيات ومأصلات

الحاج؛داكشي علاش كنألبو اسيدي نااصغ ...الاصل ولا شيء غير الاصل

دريس (تحنا لجيهة هشام )غير لبارح كيقول بغا الزين
هشام:هنيناا ا دريس
دريس:دير معايا بليزير ...دي وحدة ويعطيوك وحدة كادو لياا انا

الحاج:حمم

شي كيهدر مع شي قرب الحاج لدريس لي ملي دخل كيشوف فيه غير ضلام وقال: جااي لخطبة خااك كي الشمكاغ ...الله تعالى يفأصك كي فا أصني
دريس(كيمضغ لحلوة ) بصحتي

رجع لبلاصتو كيضحك وقال:فينها لعغوسة نتاعناا الالة الغالية
الغالية:هيبة ! هيبة اجي ابنتي تشربي اتااي...
دخلات عليهم لصالون عينيها فلارض قلبها قريب يخرج عكلها لقفطان بين رجليهاا تمشات وجات

الحاج:اغسووول (رسول)الله...شفنااك بعين الغحمة
شداتها اقبال والاخيرة كون لقات لارض تخشا فيهاا

ام هشام غي كتشووف حشمانة بدورها من كترت رجال ومتقدرش تنفنف غحضرة ولادها او الحاج حداها مرة مرة تهدر مع مينة لي جات حداهاا

الحاج:اوى لولد بااغي ...ولبنت غاه باغة ...نقغاو الفاتحة ؟
ناصر:على بركة الله

هز الحاج كفوفو ومعاه كل لحاضريين وبدا بقراءة سورة الفاتحة بصوت خلاهم كلهم ادان صاغية لييه جودها احسن تجويد تخشعو معااه
هزات هيبة عينيها فهشام تخطف الشوفة فيه سهات فيه حتى هز عينو فيها وتبسم ليهاا وبادلاتو ابتسامة خجولة وهبطات راسهاا

الكل :اااميين
كلسات حياة معااهم ولعيون على جيهة لباب واحد فرحان لي مبانتش قدامو والتااني باغي يشوفها برييق
هز هشام تيليفونوو خربق فيه وشاف فهيبة ميل راسو لتيليفون وناضت مشات لبيت لتيليفونها لقاتو كاتب

هشام: بغيت نهدر معاك
هيبة:واخة
استئدن منهم باش يهدر معاها وفعلا ناض مخلي سيلياا عند ادريس
دخلاتو لبيت لكلاس فين حطات لورد فوق الطبلة فوق لفاز وقال:جيتي زوينة
كلمة قدما هيا بسيطة قدما خلات داتها يسرح فيها نمل كتافات بابتسامة قبل ميكمل كلاموو وقال: امتا نديرو لعقد ؟

هيبة:نوجد راسيي بعداا
هشام:شحال تاع لوقت
هيبة:حم شهر
هشام؛شهر ؟ بزااف (بابتسامة )نقصي شوية
هيبة(ضحكات)ههههه هداك هوا لقياس
هشام:غير زيدي تقادي معاناا ههه سيمانة كافيياك
هيبة:ااويلي سيمانة !
هشام:نزيدك سيمانة خرا ومتقسحيش راسك
هيبة:متكفانيش
هشام:شنو خاصك ...شوية بشوية ...هيبة شنو كطلبي فصداقك !
هيبة: لي بغيتي
هشام:هداك صداقك ومن حقك وانا لي علياا نعطيه ليك ..
هيبة: انا مغاديش نتشرط لي عطيتيه كافي ...انا مبغاش لفلوس اهشاام ...بغيت غير راحت لبال معاك
هشام:حتى اناا هداك مرادي ...معندك مناش تخافي ...مرادنا واحد

من جيب السروال جبد لبواطة تاع لخاتم حيدو من بواطتو كتشوفيه ومد ايدو بلا متردد عطاتو ايدها ...وضع لخاتم فايدهاا

هشام:دابا كملات الصورة
هبطات راسها بخجل حتى كمل كلامو : قلت ليك داك نهار لواليدة مغاتبغيش تكلس معانا

هيبة:اه شوية وينوضو غير يشربو اتااي
هشام(بابتسامة )وااخة ...فكري وردي علياا ...خير البر عاجله
هيبة:ان شاء الله
وقفوو بجوج تحبسات عليه طريق وبعدات كضحك باش يدوز وقال:ردي بالك لياا الالة هيبة
كتفرنس حتى خرج ورجعات كلساات الفرحة دارت فيها مبغات

فرقو لعيالاات على رجال كلسات نزهة فلبييت صغير كتحتت هيا ومينة لي شادة حفيدها

نزهة:تبارك تباارك الله غير ماماه

مينة:هههه لا لا غير شهيد الالة نزهة
نزهة:اوى بحال بحال هههه تكون غير صحة
سيليا :طاطا ...نهزو شوية
مينة:لاااء طيحييه ابنتيي اجي غي بوسييه
سيليا (كلسات حداها باست ليه ايديه ورجلييه حمقها بغات تهزوو

**
فبيت اقبال كان الحوار بينهم بتلاتا وغيثة متكية كتسمع وتخربق فتيليفونها

حياة:وباش جاوبتيه
هيبة:منهنا واحد 15 ليوم
حياة:اويليي علاش خمسطااش ليوم اختي
اقباال: مزياانة ديك الزربة لااش
حياة:انا راه غنمشي قبل ...محمد فرعني بتعيااط
شافت فيها اقبال وقالت: بقا فيك
حياة:كيفاش !
هيبة:شحال بقا ليك كاع
حياة:على حسب حتى جميلة كتعيط باش نمشيو نبداو لخدمة
اقبال :ياك عاد كانت معاك فطنجة
حياة(حكات عنقهاا )رجعااات

حركة متخفاش على اقباال من صغرها فيهاا حركة تقدر طيرها بلي كتكدب وخة ملامحها تبين لعكس ...فينما بغات تختارع شي كدبة بلا متحس كتحك عنقهاا

اقبال:ان شاء الله ..لمهيم لي مسلكك ا هيبة ...مرتاحة ليه ؟
هيبة:مرتااحة ليه ومزال خاايفة (تنهدات ) خايفة نزرب

حياة:هدا بعدا جاب عائيلتوو معندو ميخبي كلشي باين ...خوه صاحب شهيد جابر كيعرفهم ... بقات دابا ف نتي واش مرتاحة لهاد زواج

هيبة:مرتااحة
اقبال(داعبات كتفهاا )اوى لي بان ليك اختي حنا معاك فييه ...ياله نحطو لعشاا

تحط لعشاا رجال طاحو فييه كيشكرو ويعاودو فليدين لي صاوبووه ..كلسات هيبة حدا نزهة شادة سيليا كتوكل فيهاا حاطين طبسيل تاع لحم بلبرقوق وحدا سيليا مزال طبسيل ديالها تاع لبسطيلة

سيليا:ممم بسطيلة زوينة اطاطا نتي مصايباهاا
هيبة:لااء ماشي اناا طاطا امينة
سيليا:كتعرفي نتي ديريها
هيبة:ممم كتعجبك
سيليا (شهقات )بزااف كنحماق عليهاا تبقاي تصاوبيها لياا اطاطا ؟
هيبة:نصابها لكبيدة ياله كملي طرف ديالك (شاف فحياة لي كتغمز فيها على نزهة )حمم ...خالتي مكليتي والو
نزهة:لاا الحبيبة كلييت الله اخلف
الغالية:حنى ولينا عائلة الالة نزهة منحتاجوشش نعرضو
نزهة:الخير قداامي اختي ...شوية لمعدة مشكيت عليكم ملي كنعطيهاا لماكلة بزاف كضرني
الغالية:واا ديك لمعدة طريقها بوحدها والله العظيم
مينة (كتاكل مامعاتقاش )نتي كلشي ضارك خاصك سبيطار غا وحدك
غيثة :كخخخم
بداو لبنات كيضحكوو
نزهة:ههه وراه كبرناا الالة مينة
مينة:لا يختي كتكبرو راسكم بزز مزاال صغيرة ومزال ندك وندردك
الغالية: مينة كتبغي تمازح معاياا ..نتي داخلة فلخمسيين ومزاال صغيرة وباز
مينة:ريااضة (دفعات ليها عظم )ومكنكددش لعضاام
الغالية (هزاتو كتكدد )البنة فلعظام

عند رجاال شهيد او جابر مكلفيين هزو طباسل مسحو الطبلة وجابوو طبسيل تاع الديسير مخلط

ناصر:سيد الحااج زيد مرحباا
الحاج:تغحب جنة اسدي ناصغ ....(هز تفاحة كيقطع وياكل ) الله اخلف ويأوي لخير

ناصر:كان عندك شي ولد اخور ولا كدبت مع موودة مشفناك
الحاج؛كااين ...سيدي مولاي مغوان كاين فاس بأ تما مع مغاتو او ولدو
ناصر:تبارك الله لحفايد زوينين الحاج

الحاج:حفايضي هوما عويناتي اسيد لحاج
شهيد:عقبة لولاد مولاي حتى هوا
الحاج(وجه لجيهتو لموس حيت كالس فجنبو وقال باستهزاء ) هداا عألو مزال متلفوو بألو غير لولاد

ناصر:لاا لا دريس الله اعمى ليه الدار
الحاج:مطغطأ لياا لمغااااغة نتاعي اسيدي ناصغ

دريس:كول الحاج تفااح راه مزيان لهضم
الحاج(شاف فيه )وباااز
هشام :لواليد واش حتى هناا
الحاج: استغفغ الله العظيم

***
تعشااو وفرقو اتااي وكل تيسر فحالوو بقات غير العائلة كيداكرو فالصالون

شهيد:الله اعمر ليهم دار ..من ديك الناحية ...لواليدة ديالو راه هكاك دروييشة وغير ساكتة من ديما
ناصر:حتى هيبة تبارك الله بعقلهاا
هيبة(بابتسامة )الله اكبر بيك اعمي
جابر: لمعقول هوا كلشي
ناصر:جابر نهدر معاك اولدي
جابر:ايه مرحباا

خرجو من دار وقف معاه وقال:بغينا ندخلو بخيط بييض بينك وبين غيثة
جابر(حك لحيتو كيتنهد ) عمي انا زواجي غسلت عليه ايدي فمرة صبرت وصبرت واحد نهار كيتقادا صبر..اللهم نساليو قبل منوصلو فلولاد ولحوايج كبر

ملحق 27/10/2021

ناصر:ولو فكر وفكر ...طلاق خليه حل اخير ...طيش صغر وقلة العقل هيا هادي دابا دير عقلها
جابر:العقل مجا لا بصغر لا بكبر صغر منها وعندهم لعقل وكبر منها ميكسابوهش

ناصر:اوى اولدي نتاا تعرف مكيعرف بين الراجل ولمرا غير الله سبحانه ...الله يدير لي فيها الخير

رجعوا دخلوا للدار هزات اقبال عينيها في جابر وشافت فيه بامتنان
جابر: نخليكم هذا هو الوقت تصبحوا على خير هيبة الله يكمل كل شيء بخير

شهيد: بلاتي نهبط معك اصاحبي باقي الحال فين غادي
جابر: لا لا هذه هي الوقت يلا نوصل حتى انا

هبط مع الشهيد حتى لتحت وقال: فكرتي مزيان ابا جابر؟
جابر: الله يدير اللي فيها الخير هذا ما نقوله بغات الطلاق الله يجعل البركه حتى حد ما كيهز اكثر من طاقته (تنهد) نخليك ابا شهيد تصبح على خير تهلا!

مشى في اتجاه طوموبيلته وهو مهموم هاز حمل فوق كتافه
**
داز اسبوع كيجيري في انصاف دوزات الامتحان غيثة مسجونه في الدار لا خروج لادروج ملات وكعات وتعصبات ومصورات والوو ...كتسنا فققط النتيجة تاع البااك باش يحيدو عليها الحصاار

هيبة اخر اسبوع فلكونجي دوزاتو مع لبنات مرة شهيوات مرة خارجين مغدين برا مرة جايبين دورة على لمدينة ...

ملابس أنيقة داخلة لبيرو وهي كتشوف جنابهاا لابسة شوميز لارج بشيبي مع دجين ملاصقش دايرة نظاراتها الشمسية وقلبها كيضرب بجهد ...لخاتم مزين صبيعاتهاا لقات السيكيريتي تبدل مهتماتش دخلات لداخل مبغات تواحد يجبد معاها الحادثة طلعات نيشان لبيرو او وقفات...مكانتش عاقلة واش زاج تهرس..لقات كلشي فبلاصتو مقاد حطات لقرعة تاع القهوة ديالها تما ودخلات لبيرو بروح جديدة عكس الروح باش جات هادي عام لخدمة

لبيرو تاع هشام مقابل معاها مسدود مزال مجاش ...بدات لخدمة بنشااط هبطات لتحت تاخد لميلفات لي تكلفو بيهم فغيابها طول هاد 20 يوم وهشام كيتشكاا وكيشكر خدمتها المتقونة

هيبة:حم صباح لخيير
معاد:اهلا اهلا ختي هبة صافا اش خبارك
هيبة:صافا الحمد لله اخويا لهلا يخطييك ...سمعت تزادت عندك بنية ...مبرووك تربا فعزك
معاد:الله ايبارك فيك اختيي
هيبة:فين حسن ؟
معاد:حسن هادي سيمانة تقريبا باش ترومبلاصا فلبيرو لي كاين ف مراكش
هيبة:وايليي مبقاش هناا
معاد:لا لا مشاا خاصو شوية لl'expérience خدمتو معجباتش سي هشام وسيفطو يتدريسا شوية هههه
هيبة:ههه مزيان وخة عطيني لي ضوسيي
معاد:هااك اختي ...هدشي فيه تماارة ..امتا يدوز الصالير
هيبة:وصبر بعدا نقادو الصالير عاد يدوز ههه
معاد:تهلاي فياا راه ليكوش او لحليب

ضحكات وطلعات بنشاط تام لمحالها هزات تيليفونهاا كتصوني لحياة

هيبة:الو حياة فدار
حياة ؛كااينة
هيبة:شنو دارت غيثة ...لاحو النتائج
حياة:هاهيا مقلزة حداياا كتشووف (سولات غيثة )بان شي
غيثة:مزال
هيبة:ايكون خير ان شاء الله
حياة:هدرتي مع هشام
هيبة:واش نتي بغيتي تمشي وانا تكركبيني بزز
حياة:مبغيت نمششي تدوزيي نهارك باش لمكانش هوا هداك نجيي نجرك من شعرك مناقصنا تهرنين

هيبة:هههه وصافي قطعي قطعي علميني لبانو النتائج

*

الغالية(بتوتر )واش كاينة شي حاجة ؟ من صبااح ونتي مريحة تما بانو
غيثة:ماما راه ياله غيلوحو فجيهة مكنااس صبرو شوية رعدتوني ففف

حياة(كتشوف فتيليفونها كتميساجا مع هوود وكضحك واقبال مقابلة معااها ) انوض ندوش غنخرج
اقبال:فين غادية ...مجاكش راسك قويتي دوران !
حياة:بقات ليا سيمانة ابب ونمشي نديفولا شوية...لعشية نمشيو نشوفو واحد لمحال مبعيدش عليك بزااف
الغالية:علاش بغيتيه

حياة: بغيت نديرو صالون امي ... نشري الساروت ديك الساع لكرا ايجيني رخيص
اقبال:لعشية ونشوفوو هدشي ديالك

دخلات لدوش مخلية تيليفون كيتشارجا ناضت اقبال سدات لبيت عليهاا لقات تيليفونها محطوط تما ..ديما حاضناه معاهاا تحل لباب عليها ودخلات انصاف اشارت ليها اقبال باش تسكت ورجعات خرجات
بدات كتقلب وتشقلب فجيهتها فلماريوو هزات صاكهاا كترون فيه ملي لقات تيليفون بلكود ..طاح من الصاك فنييد منع الحملل ...مشروب منو نص البكية ...ايديها ترعدو عليهاا لارض ضارت بيهااا ولات كتجمع فالصاك ودوخة شداهاا

سمعات صرخة من الصالون بصوت غيثة كتغوت
غيثة:ونجااااحت واااااع ونجاااااحت اقبااال
خرجات اقبال لعندها مسقووطة من دم بحالا شافت شي شبح حسات بحضن غيثة كتنقز عليهاا فيقها من الغريق فاش طاحت خرجات حياة فلبينوار عاد بدات كتزغرت وتغوت

غيتثة:جبت 13 وااااع مامتيقااااش
الغالية(بزغاريد)للولوولولولوي اجييي نعنقك المعزة اجييي
غيثة(بفرحة كتنقز وتعنق فلبناات بفرحة

فرحة الباك لا تقدر ...ديما كتبقاا من اجمل اللحظات من بعد سهر وتعب وارهاق وخوف من السقوط

مكفاتهاش لارض بلفرحة اقبال مبتااسمة وفنفس لوقت قلبها غيبكي دم وهيا كتشوف فحيااة بانكسار

غيثة:عقبة لييك ا انصااف هههه
انصاف:امين اختي ...مبروك عليك
غيثة:احح الله ايبارك فييك ففف حمل وتحيد عليااا (كتنقز )وداباا ديبلوم ياك واعدتيني ابيلوو عفاااك (تلاحت عنقاتهاا
الاخيرة جاوبات مرفوعة وقالت:واخة ..ان شاء الله
غيثة:الامتحانات ايبداو سيمانة جاية

الغالية:اقبال وجهك صفر مالك !
اقبال(حسات بالردة ودوخة وقلبهاا كيضرب ودنيها كيصفروو تمالكات رااسهاا بزز وجاوبات بزز )والوو
حياة:اقبال واش طاح ليك الطونسيون....انصاف جيبي لما والسكر جيبي
مشات الاخيرة كتجري لكوزينة واقبال كلسات ترد النفس قلبها غيخرج تصونا لباب مشات غيثة تحل وبان ليها شخص بلكارطابل ديالو وقال:السلامو عليكم
غيثة (بابتسامة )السلاام
_ غيثة ***
غيثة:اه هيا اناا
_لكارط ناصيونال ديالك الالة
غيثة:علاش (شافت فاقبال ناضت )ش شكون نتا ولاش بغيتيها

هز الشكارة كيجبد فبرا ودفتر وقال :عَوْنْ قضائي من محكمة الاسرة
اقبال:علاش ...جيبي لكارط
مشات بجري جابتهااا مداتها ليه قيد لمعلومات بالاستلام وعطاها تمضي تماا مد ليها لورقة وقال :هادي دعوة طلاق رفعها عليك جابر ** ...مع السلامة

ملحق 29/10/2021

سدات اقبال لباب بصدمة تانية، غير هادي كانت متوقعاهاا ولكن ماشي فنهار بحال هدا ..لي صدمة حياة حشات ليها ركابيي

حلات غيثة لورقة بصدمة متيقاتش اش وقع قلبها غيخرج من بلاصتو وهيا كتحل فلورقة وايديها كيرجفوو

الغالية:تعاشش لورقة. .واش طلااق
حياة:استديعاا ...جابر رفع دعوة تاع طلاق
اقبال:غيثة

مجاوباتش حسات بلعرق تصبب بارد على جسمهاا معرفات باش تبلات عاد كانت فعز نشااطها وفرحتها متعطيها لحد ...تجاوزاتهم ومشات لبيت سدات عليهاا بالسااروت وكلسات شادة لورقة

كان خاصها تفرح بهاد لورقة كترر من لبااك ...ياك بغات الحرية واحلامها ...علاش ضرها خاطرها وحسات بقلبها تزير عليهاا...طاح فبالهاا وسهات كتخيلو وعات على راسهاا وسرحات الغصة لي فحلقها وقالت وعينيها فيهم لمعة دموع لي عاد تكونو فعينيها كانها التاوبات وبداو عروق حمرين كيبرزو:لخلا وجلاا

الغالية:شنو كاتبين فلورقة
اقباال :منهنا 15 ليوم الجلسة اللولة
عم الهدوء فدار كلشي سكت من غير صوت اسماعيل فايق كيلعب بايدياتو فالرولاكس حداهم

***
دخل لبيرو سمعات لخطوات وهزات عيينيها فلباب ...تبسمات لييه وبقات فبلاصتها توصل عندها داير ايدو فجيابو وقال: مرحباا بمادموزيل هيبة

هيبة (بضحكة )ترحب بيك الجنة اسي هششاام ولا نقول مولاي هشاام
هشام(ضضحك بخفوت ) هششام كافية من فمك ...فين وصلتي فلخدمة !
هيبة:كنقاد الرابور لي قلتي ليا لباارح او غنبوانتي سوايع والصالير
هشام:ڤيريفي معاك ضوسي تاع السيمانة جاية ...معاد و محمد خربقو كلشي
هيبة:كون هاني ...حم قالو لياا مشا حسن لمراكش
هشام(هز حاجبو فيها ) علاش كتسولي ؟
هيبة؛ااه ...ههه لاا غير سولت وصافي حمم

هشام: كان خاصصو يمشي ...بلاصتو ماشي هناا
تبسمات لييه وسكتات ..تحنا بايدو على لبييرو وهزات عينيها فايدو وهيا طالعة ...طاوي كمام القميجة تالمرفق ...بشرتو ما سمراش وفنفس الوقت ما بيضش زغب اسود رطب كاسي ايديه بشكل جميل مامعيقش ...باينين زغيبات من صدرو شوية لا غير ...شافت فيه باببتسامة ورجعات هبطات عينيها

هشام؛شنو قلتي !
هيبة:فاش !
هشام ؛ فلعقد امتا تبغي نديروه
هيبة:نسولك وتجاوبني
جر كرسي من وراها وكلس جنبها وقال:مرحبا بسؤالك
هيبة:...دابا انا وياك غنعيشو فدارك
هشام:بطبيعة لحال
هيبة:احمم ودارك ديجاا (سكتات معارفة اش تقول غتبدا غير تخربق وترون

تبسم ليها وقال:بغيتي تبدليي شي حاجة فيها ! نورمالمون انا لي فرشتها مؤخرا ولكن بيت نعاس دابا راه خاوي ...كيتسنا فيك تبدليه كي بغيتي

تزنكات ومتملكاتش الضحكة وقالت: ايكون خير
هشام: اش بان ليك نجيبو دويرة تالدار مع طناش ! شوفي بععينيك وديك الساع نتقداو شنو خااص

هيبة:نقولها لماما وختي ونجاوبك
هشام (تبسم ليها حتى وثرها)غتبقاي تشاوري معايا حتى انا هكاا !

هيبة(رجعات شعرها اللور كتفرنس لبرد قدامهاا ونطقات بانثوية )ضروري الى مشاورتك شكون غنشاور
هشام: هدري معاهم وردي علياا لخبار وخة !

حركات ليه راسهاا باه ومشا مخليها متبعااه تدخل لبيرو ديالو خلا بابو محللول وبابها كدالك محلول مقابلين مع بعض

باشرات بخدمتهاا ..كتبعد لكرسي شوية بشوية لجيهة لباب حتى ولات مقابلة معااه...حاطة ايد تحت فمها وايد كتكتب بيهاا ...مررة مرة تهز عينيها فاتجاه لبيرو ...كالس ضارب فيه شعا تاع لبيسيي كيحك فلحيتو بتفكير تهز عينو فيهاا وهبطاتهم بزربة

لاعبين لعبة العيوون المعجبة ...الشوفة لمخطوفة لي كتبقاا احلى لحضاات ...هزات عينيها فيه لقاتو على وضعيتو كيشوف فيهاا غمزها بعينيه كيضحك حتى بدات كضحك وعوجات راسها بانوثة متلفة بلميلف ...عرفات راسها الى بقات مقابلاه اتبقا بلا خدمة

باشرات فخدمتها بعدما دخل لباطرون لبيرو عند هشام وسد لباب عاد قدرات تكونصونطرا مع لبيسي

صونات ل اقبال لي خدات وقت قبل متجاوب

هيبة:خلعتوني مالك مكتجاوبي
اقبال:اسماعيل نعس وحيدت الصوت
هيبة: امضرا !
اقبال: نجحاات
هيبة(بفرحة )حلفييي اوى تستاهل دابا لكادو ههههه منجحات حتى هبلاتنااا ...شتك مفرحاناش
اقبال:لاا فرحانة ..غير طاح ليا طونسيون شوية هاني عند شهيد كنعبر فيه
هيبة:مع رضاعة ابب عنداك يكون فقر دم
اقبال:غناخد شي فيتامين ضروري
هيبة:واخة اختي ..حم
اقبال:شكاين
هيبة(كتلعب فستيلو )هشام قالي باش نمشي نشوف دار باش نشوف شنو خاصهاا
اقبال:نتي وياه ! ديرو العقد ويديك فين بغا
هيبة:لاا غتكون خالتي نزهة راه دار مشرووكة فهمتي غير كل واحد واخد طبقة
اقبال:متعطليش مرة مرة علميني فين كاينة
هيبة:صافي واخة ...انصوني لغيثة نبارك ليها
اقبال:بلااش خليها تاتجي وهدري معاها
هيبة:علاش ؟ مالها
اقبال:وصلاتها ورقة تاع طلاق .. سدات عليها فلبييت
هيبة:ياك هدشي لي كانت باغة اشنو تبدل
اقبال:طلاق كيبقا طلاق اهيبة سواا بغيتيه سوا كرهتيه ختك راك عارفاها عند بالها ايبقا مجرور وراها وهيا هازة نيفها لسما
هيبة:الله اهديها
اقبال:الله اهدي الجميع

قطعات معاهاا وكملات خدمتهاا

حياة(بكسوة حد الركبة وسبرديلة بيضة مقابلة مع لمراية كتقاد اخر لمسات قبل متخرج
انصاف:خارجة
حياة:ايه الزين خاصك شي حاجة !
انصاف:لا اختي غا سولتك
حياة(جبدات من بزطامها 400 درهم )وحدة ليك وعطي لغيثة وحدة خرجي نتي وياهاا
انصاف(بامتناع )لاا اختي والله عندي
حياة:كتشدي من اقبال وانا لاا ؟
انصاف(سكتات وشداتهاا )واخة
هزات صااكهاا رشات ريحتهاا وخرجات وقفات فلكولوار وقالت:غيثة والبرهووشة ...خرجي شوية نتي وانصااف

الغالية(كتعكد الزيف فوق راسها بغات تعجن وقالت بهمس:فيين فيين عادما ربطات رجليها شوية

حياة: بغيتي تحبسيها حياتها كلها ...راه واعدناها خليها تخرج شوية اتغمال فلبييت

طلات من باب لبييت وقالت:خاصني فلووس
حياة:بنت لحرام سمعات لخروج وبانت كي لببوشة ...راه عطيت لانصاف

مدات ليها ربعالاف انصاف وميقات وقالت:شنو هادي ؟ هدا هوا لكادوو ؟
حياة:معجباتكش ؟ اراي لخرا
غيثة:بغيت ناخد شي حاجة من شي أن واحد السباط ب 250 درهم
حياة:تنرجع قدي بهاديك معنديش دابا

غيثة:ياك غير لبارح سيفط ليك 5000 درهم ابن لحراام

حياة:حضيني كتعرفي سوق كر** ودخلي ليه الزين ...هاني مشييت
الغالية:وتعطلي تاني تاالنصاص الليل


هبط ليها تيشورت على ايدها وقال:تعصبتي ؟
اقبال:لا
باس ايدها وقال:ايكون غير سهير تاع اسماعيل
حركات راسها باه كالسة فوق لفوطوي وسط رفوف دوايات فالصيدلية لداخل ...امامها شهيد بطابلية نص كوم مسدودة مع سروال كحل
وقف وجا كلس حداهاا وقال كيبعد زغيبات من على وجها :نتغداو برا ليوم
اقبال (عوجات راسها معاه )او السي السيد باقي صغير

شهيد:نحطوه لمينة تلاها بيه شوية
اقبال:ههع غادي غير نبرزطوهاا
شهيد:خليها نيت باش نشوفو فهامتها فتربية هههه توحشتك

مقدراتش ترفض ليه طلب وقالت:واخة ...نسبقك ندوش بينما جيتي
شهيد(غمزها) دوشيي وتحمحمي مزيان
اقبال(وقفات كضحك ) الله ايرد بييك الزين
خرجات مبسمة حتى تلغات بتسامتها بتنهيدة حرقاتها فصدرها ركبات فطموبيلتها ديماارات ساهية كتفكر وتعاود فهاد لمشاكيل لي كتهنا من وحدة تنوض وحدة

عيات تميك وتقول يضبرو راسهم ...خاطرها وقلبها واكلها علييهم ...مكاينش لي يهز معاها لحمل ويتحمل لمسؤولية كلشي فوق رااسها ...شحال من مرة كتقول ..شنو غيوقع الى ميكت وبعدت عليهم...شنو غيوقع الى غمضت عيني على مصائبهم ...شنو ممكن يتبدل

وقفات فسطوب ساهية فلفراغ حتى كتسمع لكلاكصون من وراها فيقهاا ...خرجات ايدها من السرجم كتعتادر لي وراهاا

صونا تيليفونها وهزاتو وهيا صايكة لقات نمرة جابر طلقات سينيال وخرجات من طريق فتحات الخط وقال:جابر
جابر:اقبال بخير ...اش خبارك
اقباال:كنعديو اجاابر (جاتها تنهيدة من طرفو ) متأكد
جابر:هكا حسن ...حم نجحات
اقبال:نجحات
جابر(بغصة بانت فصوتو )من بحالها ...جوج فرحات فنهار واحد
اقبال:مفرحاتش
جاها سكات من جيهتو واستئنفات كلامها وقالت: يمكن تصدمات ...يمكن مبغاتش ولكن داباا لي عطا الله عطاه اجابر ..يجيب ليك الله ماحسن

جابر:لبنات غير مشتتين ههه اوديي بنات هاد لجيل متبغيش بلدي بحالي ههه
اقبال: الناس طوب وحجر ...نخليك داباا تنين تقريبا انجي ونهدرو
جابر:ان شاء الله

وصلات لدار اتاصلات بانصاف تهبط ليهاا اسماعيل كلسات فسيجور كتسناهاا تدخلااتو شداتوو كتلاعب فييه وتبوسو فايدياتوو

اقبال:حياة فدار
انصاف:خرجات شي نص ساعة هادي
اقبال:مقالتش فين غادية
انصاف:لاا ...هدرتي معاها
اقبال:مزال ...تشدي ليا اسماعيل ندوش
انصاف:نشدوو هههالى مشديتوو سكون ايسدوو سكوون ...كيحمقني هاد لببخوشة

اقبال: بخوشة نييت (باست ايدو )مبرزيييط
انصاف:ههه كينعس بنهار ويفيق ليك ليل
اقبال:ضروري اشنو ندير ...طلعيه لفوق معاك
انصاف:وخة
لعبات ولدهاا ونسات بيه شويية رضعاتوو تاشبع وبقات شداه كدغدغ فعنقوو وتبوس فيه عطاها طاقة ايجابية دغيا رتااحت وهيا حاضنااه

اقبال:سير عند خالتوو
شداتو انصاف معنقاه زادت عليه ملايتو رطبة مغطياه وعطاتو السكاتة

اقبال:غير ندوش نجي نديه لمينة
انصاف:خليه معاياا عفااك
اقبال: بغيتيها تجيي توقف عليك ههه تهوا حفيدها ماشي مشكيل
انصاف:وخة

خرجات وسدات وراها لباب مشات لبيتها جبدات حوايجها لي تحتااج ودخلات لدوش سخناتو ولجو دافيء تعطلات فييه تحكات على خااطرهاا وخخرجات ملوية فبينوارهاا حناكها حمريين كتمسح شعرهاا وتنشف فيه ...وقفات مشعلة السوشوار نشفااتو من لماا ... لبسات حوايج خفاف ولبسات عباية صلا ...فرشات السجادة صلاة بعد اربعين يوم ..كان الصلاة غتقربهاا من استجابة دعائها كتر رتاحت وتخشعات مع كل ركعة وكل دعاء

وخة نكونو مقصرين فقربنا من الله الصلاة هيا عمااد الدين ...الى مكتصليش كينقص منك بنادم قبل ربي...كيشوفو فيك ديما ديك الشوفةكيفاش يخاف فيك الله وهوا حتى جبهتو مكتحط فلرض ! الصلاة كتعطيك امان وبنادم كتبغيك فلان كيصلي ...يعني راه عارف بينووبين الله ...واخة ولينا كنشوفو بزااف تاع الناس شادين الدين بطريق غير صحيحة
طريقة جاهلة حاشة واش ربي قالها فكتابوو .

سلات صلاتها بدعائهاا ويقينها فالله ناضت حيدات لعباية باش تلبس حوايجها وتسناا شهيد يجي ...سمعات لباب تحل ..طل عليها كيصفر طلات عليه وتبسمات ...كانت بجسم متنتتسق ف بيل بيض وشورط تاعو كري قصير لكرش مكايناش غير شوية مع لوقت تشد بلاصتهاا

شهيد: اش هاد الزين تااني ضربها لمؤخرتها قبل ميتلوا عليها كي لحنش مزيرهاا عندوو قدام لمراية كيبوس فعنقهاا

اقبال :شهيد هاز زيت زوين !
شهيد:نشوف
اقبال:ورات ليه فاليتيلفون شدو من عندها في حين هيا كتلبس

شهيد:لاش بغيتيه ! الى كان دوريجين راه مزيان سينو لا
اقبال:كيقولو زوين لشراطي لي كيبقاو ورا لحمل وبغيت ندير ليه كوموند

شهيد: Bio oil غير ضياع لفلوس نقولها لييك ...واشمن شراطي فيك نتيي ! ..بالنسبة لديال لحمل راه كيبهاتو مع لوقت وكيصغارو بليس لون كيحكم نتي راك بلقة مع لوقت راه ميبقاوش يبانوو باش نكدب عليك نقوليك راه غيمشيو نن ...حيت هداك لحم تجبد غيرجع كي كان فحالة وحدة تجميل ! سينو غيبقاو غير هوما مع لوقت كيبهاتو ...

اقبال:بلا مناخدو
شهيد:بغيتي تجربي خوديه ...الى جات عليا بلااش ...خودي زيت ارݣان كوصميتيك حسن من هدشي
اقبال:منين غنجيب زيت اركان
شهيد:انكموندي ليك علييه ڤري غير مبقاش لياا فلفاغماصي

اقبال:شهيد
شهيد:كبيدة
اقباال:اش بان ليك نسافرو واحد يوماين بلاصت لغدا
شههيد(شافيها من لمراية ) كيف جا السفر دقة وحدة
اقبال:داباا كضل عليا نسافرو نسافرو نهار طلبتها اناا اه حقا كيفجا
شهيد: لا ماشي هكاك غير ضهر ليا لعجب وصافي
اقبال:دابا شنو قلتي
شعيد:فيين بغيتي تمشي
اقبال:شي بلاصة ...بغيت نشم غير هوا نقيي نبعد من صداع واخة غير نهار
شهيد(باسها فعنقها حتى بورشها وتكمشات وسط ايدو )وخة نمشيو داباا
اقبال:فين
شهيد: معرفتش ههه فين تبغي تمشيي (قرصها فجنبها )وتكون دخلتك التاانية
اقبال:هه شو فاش كيفكر
شهيد:عقل الرجل يا زوجتي ...ياله جمعي شنو خاصك بينما دوشت نلبس علياا ونمشيو
اقبال:وفين بعدا
شهيد:نديك لشي غابة ياك باغة الطبيعة


خرجو من دار فايدهم اسماعيل وشهيد هاز صاك اسماعيل وصاك اسود فيه حوايجهم لوجهة من بعد هضرة وكلام كانت افران ...جو معتدل وهواء نقي بالنسبة ليها ول تربية لي اي ريحة كيتحسسو منهاا وطريق مطويلاش بزااف باش ميعياش فطريق

**
وصلات طنااش دخلات لحمام لفوق حددات لقلم فعينيها دارت فغاجو وعكر ومسحاتو بقا باين فمها طبيعي خرجات كتقاد فشعرها تلقات معاه خارج من لبيرو كيهدر فالتيليفون اشار ليها براسو باش تسبقو

هبطات وهوا وراها كيهدر فتيليفون على لخدمة حل طموبيل من بعيد ومشات ركبات وهوا حداها

هشام:داكوغ يكون خير نهدر مع دراري فشونتي ... انا عند بالي لبلان كاامل وخة وخة دابا ساايݣ من بعد نهدرو (قطع )فف مشاككيل صافي
هيبة:شي مشكيل فشونتي

هشام: والو غير خربقو لحسباات ...جابو لحديد ناقص
هيبة:غيديرو خدمة معاودة داباا
هشام:صداع الراس ...

هز تيليفون كيهدر مع معاد ودراري لي فلبيرو دار ليهم طيارة باش لبلان يتعاود يتقلب ضحكات حيت عاد عرفات علاش مسمينو مود افيو حيت كيدير ليهم الطياارة بحال دابا حرم عليهم لغداا

هشام:كضحكي

هيبة:ههه خليهم غير يتغداو بعدا
هشام:من اللول يخدموه بعقلوو ...لخدمة لمعاودة مكنحملهاش ...حيت انا لي كنعطي وجهيي لكان شي غلط كيجيو عندي اناا ..اما هوما مخشيين فلبيرو معارفين كاع اش وااقع انا لي راسي كيبغي يتفركع بشكاوي ولي غوماغك لخاوين على ايرور بسيط
هيبة:عارفة الله احسن عوانك هههه وخة شي مرات كتجي تبرد فينا حنا ودير لينا طيارة
هشام(شاف فيها وضحك )مود افيو ياك

هيبة(خرجو عينيها وغلب عليها الضحك)مقلت والو اناا
هشام: وخة الالة هيبة واخة

ملحق 30/10/2021

ضحكات وسقلاات قدامهاا مسافة الطريق لقات راسها فحي راقي وزوين كل ديور لمجاورة ضايرة بجريدات ديال الدار عندها بارك خاص لوسط مقاد ديال السيارات باركة هشام طموبيل تحت لبارك مظلل من الشمش وخرجو كيضرب فيهم صهد وشمش حاارة ...كتشوف هنا وهنا دار تنسيك فدار لكالم وسكات وقيت طناش كلشي داخل لدارو
هشام:اجي هيبة
شافت فيه وتبعاتو لجيهة دار هزات عينها فيهاا باعجاب زوينة ومصلوحة بشكل زوين شجر تالجيهة لباب تاع لحديد على شكل عود فصباغة متفرقيش بينهم ...ارضية بيضاء بزليج كبير وحقول غادية مع لحييط ديال شجر والنباتات دنيا خضرة وڤيزان جنب باب دار الدخلاني تحل من طرف سيليا لي سمعات باب برا تحل مشات كطير عنقات باها فدرجة وباستو وتعلقات فهيبة بفرحة
سيليا:ميمااا طاطا هيبة جاات
هيبة:توحشتيني هه
سيليا(حلات ايديها وهيبة هزاها )بزاااف قد هكا ههه
باستها وحطاتهاا شداها فايدها كتقاد فلقاميجة حل هشام لباب وقال:مرحبا بيك فدارك

تبسسمات بخجل مع ضحيكة وهيا كتسبق رجلها ليمين مسلوبة بديكور دار لتحت الخاصة ب واليديه غالب عليها الديكور الفاسي بامتيااز من ديكورات واتات وطابلوات ..دروج عراض جنب لباب دار كتبري بزليج بيض ..جاية نزهة ب قفطان بيتي وفواطة مرحبا ب هيبة بطبسيل تاع تمر وكاس تاع لحليب وقالت:مرحبا بلالة عرووستيي
هيبة:ترحب بيك جنة اخالتي
نزهة:حلي ابنتيي ...الله اجعل ايامكم صافي كيي لحليب ...وحلوة كي تمر
هزات تميرة وجغيمة تاع لحليب وعطات ل سيليا كتنقز حداهاا

جاها صوتو جاي بكندورة تاع صلا تيليفونو فايدو وطربيش على راسوو
الحاج:مغحبااا مغحباا بلالة كيف نتيناا الالة بنتي
تقدمات باست ايدو وقالت:لباس عمي نتاا
الحاج:الله اغضا عليك ...الحمد لله والشكغ لله...سيدي هششام عاد خغج لبلومبي عاد شوية ...معجباتنيشاي خدمتو اللاغوب اولي

هشام:انطلع نشوف اش كاين
نزهة؛بلااتي عادي جيتو اولدي كلسوو حتى تشربو اتااي وطلعو شوفو على خاطركم بينما حطيت لغدا ...بنتي دخلي مرحباا

حشمات تزطم برجلها فوق ديك الارض حطات سبرديلتها بعيدة على الصالون لي حمقهاا بفراشو او تريات ديكورات طابلو فيه لخيل والتاني سورة الاخلاص بخط عربي ب دهبي متماشية مع الوان الصالون ...شرجم كبييير شاد من لحيط لحيط مغطي بريدوات بلباج باينة دنيا خضرة وراه كلسات هيبة حداه ولاحت عينيها لسرجم جراتها لخضورة ... لخضوورة يسلام تاع جريدة اللور حقول صغيرة من نعناع القزبر شجيرات مطيشة صغيرة بانت ليها حمرة

قاطع تاملها هشام لي كلس جنبها وقال:مزرعة لالة نزهة

هيبة(كلسات كضحك )غزالة ...احسن حاجة هيا دار تكون فيها لخضورة (حطات ايدها على صدرها )النفسية كترتاح
هشام:فهادي بعدا غتفااهموو
حطات نزهة الصينية ونطقات هيبة بادب:خالتي عدبناك
نزهة:عدابكم راحة ابنتيي
سيلياا:ميما موجدة طااجيين (كتصفق بايدها )مممم
نزهة:ههه نتي الفارة بغيتي غير شهيوات
تخشات بين هيبة وهشام كضحك

الحاج:خليهاا خليي ديمانضة نتاعي تاكل لي حبات خاطغهاا ...ماكلة سأطة ومكلة الزنأ شوفي كي مسأوطة من دم متأولشاي كتاكل النعمة ...الله تعالى يشوينا فيهاا
هشام:حممم
فهمات الهدرة علامن وطمرات بحالا مسمعات والو وقال:الله اعطيك صحة اخالتي جريدة زويينة كتباان
نزهة:انا عطيني غير لخضورة نشوفها قلبي كيتفاجاا

الحاج؛مال لالة نزهة شكون كيخسغ خاطغهاا ااه غبي(ربي)تعالى يعطيه دأ لمتعوس لمنحوس يعصب ليا لالة غزاليي

نزهة:متعصبني غير نتاا
هيبة(ضحكاات كتشرب فكاسها تاع اتاي موانسة بلهدرة تاع لحااج ولكنتو لفاسية لي شي مرات كيضطر يعاود لهدرة باش تشد اش قال

هشام(حط لكاس )هيبة نطلعو
هيبة:مم واخة


تبعاتو سيليا شادة فيهاا

نزهة:سيلياا اجي ابنتيي
هيبة:غير خليها اخالتي
لبسات سبرديلتها وطلعات وراه وسيليا كتنقز
سيليا:نوريك ما شونبغ اطاطا؟
هيبة:اه وريها لياا

دازو على الطبقة الاولى وقال:هادي تاع خويا انا طروازيام
هيبة: كلشي مزيان
تبسم ليها وكمل طريقو حل باب تاع لعود مخدوم من داكشي وقال: جابر خدمتو متقونة

هيبة:تبارك الله عليه كيبغي خدمتو كيتقنهاا
هشام(حل لباب )مرحبا بييك ..فدارك
سبقات رجلها ليمن شمات ريحة صباغة سد وراه لباب او وقف حداها كتشوف كانت مصبوغة بخيال فلكري ..الصالون واسع وكبيير

هيبة:واش مكانتش مفرشة
هشام:لا لا مفرشة ...غير عاودت ليها صباغة وشي اصلحات كانو ضرورين ... لفراش كلو كاين لفوق تكلفات بيه لواليدة شدات واحد السيدة تغسلو ...كنهدر على الصالون ...اما البيت نن بدلتو كلوو ..دخلي

حل ليها باب لبيت مصبوغ ريحة صباغة فيه عاطية
هشام:هنا كان حمام ...ولكن صلحتو درتو دريسينك تاع لحوايج مع كبير ..لماريو كان شاد ايسباس كبير
دخلات لدريسينك كلو طاجيرات تاع لعود تالسقف فيه بلكارات مسدودين ومراية لوسط

هيبة:اه حسن
تسارا بيها دار لي كبييرة ومصلوحة زوينة كوزينة حتى هياا كبيرة برخامة كحلة شادة من لحيط تالحيط

سيليا:اجيي معاياا نورييك ما شومبغ طاطاا
كتجر فيها حتى تبعاتها كضحك حلات ليها باب مكتوبة فيه سيليا حلاتوو على بييت طفلة من اروع ما يكون باينة فراشو غاليي ..ومدلعها بلا قياس اللعاب لماريو وسرير كبير ...هزات حاجبها باعجااب وضحكات مفكرة طفولتهم هيا وخوتاتها كي دازت...شحال من مرة نعسات وفاقت لقات راسها فازݣة من شي جنب ب بول غيثة

سيليا:اتبقاي تنعسي حداياا ؟
جبدات ليها حناكها وقالت:نعس حدااك ونعاود ليك ايصطواغ فنة بحالك
سيليا(بدلع )تاع لي بخانسيس !
سيليا:بيان سييغ

تقدمات ناحية البيرو تاع كتوبتها فين كانت صورة محطوطة تما فيها سيليا او مها وباها ...هزاتها كتمعن فيهاا ممكن احساس الغيرة تحرك فيهاا وهيا كتشوفهم ضاحكين بجوج فصورة بداو تساؤلات فعققلها هاد الصورة قبل طلاق ولا وراه
وقفات بغات دور وجات فيه بغات ترجع بلور وشدها من خصرها لطيح وقال:بشوية
هيبة: مشتكش ...حم (كان قريب ليها بزاف كيشوف فيها حتى وترهاا وضارت عند سيليا تلف معاها

هشام:دابا راك شفتي شنو خاصك مع 6 نمشيو تشوفي لفراش تاع لبييت
هيبة:واخة
هشام:سيلياا ...جمعي لي كخايون ديالك فلارض
سيليا:داكوغ

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.