دازت شهر معتصم ولا حالتو اللحية كبرات و تحت عينيه كحلين بقلة النووم و عيونو حمرين باين عليه قلة الراحة مخلا حتى بلاصة كيقلب عليها والو ملقاهاش تقول الارض نشقت و بلعتها
كان جالس و كيدوي معا الحاجة: غدا انشاء الله غادي نجي الحاجة
الحاجة: ديرها مزيانة أولدي راه سيراج غير كيبكي مخلينا منديرو ليه و هو مسيكن توحشك و توحش ماماه
معتصم جمع قبضة يدو فاش تفكرها: انشاء الله غدا نكون معاكووم(وقطع الخط و شاف فجيهت توفيق)
معتصم: أنا ضاروري خاص نمشي و نتا هنا دير خدمتك و قلبلي عليها
توفيق: كون هاني مغاديش نوقف بالتقلاب نتا سير عند ولدك و خدمتك والتيليفوون بيناتنا
أمين: أنا غادي نمشي نجيب الباليزة يالله نتحركو اليوم باش غدا نكونو وصلنا
توفيق: سيرو و بالكووم مرتاح
ناض معتصم خرج و تبعو امين بالباليزة و ركبو الطوموبيل وكسيرا
أمين: كتبغيها؟؟
معتصم ساكت مبغاش يجاوبو
أمين: إذن كتبغيها
معتصم شاف فيه: أنا مكنبغي حد و الحب معنديش فقاموصي أنا بغيت غير ولدي لي فكرشها و داك الساع تمشي فين مابغات ولكن ولدي مغاديش نفرط فيه
أمين: نتا باغيها هيا قبل متكون باغي هذاك الجنين واش مكتشوفش حالتك كي ولات كتقلب عليها بالليل و النهار
معتصم: كنقلب على ولدي
امين: مغاديش نزيد ندوي حيت نتا غادي تجي و تدويلي عليها و عقل على كلامي
جالسة فبيتها في كامل اناقتها لابسة كسيوة فالرماضي بارد غادي لللشيبي و مطروزة من جيهت الصدر بنفس اللون ديال الكسوة ومكتافية فقط بعكر احمر ماط و فنديشن و ريسين صاف
مبغاتش دير العرس كتافات فقط فحفلة صغيرة جمعات فيها العائلة المقربة كتسنا ماماها تجي من موراها باش تهبط و تسيني على العقد من بعد مخطبها دانيال مشا لاستراليا جمع وريقاتو ورجع باش يديرو العقد فالمغرب
الرجال مجموعين فالصالة و العيالات فصالة بعيدة عليهووم باش ياخدو راحتهووم و الكيسانديال اتاي محطوطين و طباسل الحلاوي مشكلين كيتفرقو كلشي ديال اللوز كعب الغزال و الملوزة و بريوات اللوز معسلين و البيشكيتو والفقاصة تطوانية ريحت الزرارع و السمن بلدي و الزهر لي مقطر على اليد كتفوح منهووم هاذو ضاروري يتحطو فأي سبوع أو عرس ضاروري من هاذ الحليوات و كلشي ناشط كيسمعو للطرب الأندلوسي لي مشغليناه غير فالسيدي
اما دانيال أو نقولو أحمد كان جالس لابس كوستيم فااكحل و قميجة حتى هيا فالكحل و البسمة على وجهو ممفارقاهش وأخيرا غادي تولي ديالو وأخيرا تحقق حلمو..
العدول جا و جاو حتى الشهوود وسي دشيد قال لمليكة تمشي تكلم ليه سعاد باش تجي تسيني على ورقة زواجها ماشي مشكل دخل حدا الرجال حيت غير خوالها و عمامها لي كينين مكاين حد براني و داكشي لي دارت لالة مليكة
دخلات عند سعاد والفرحة مسايعاهاش فرحانة لبنتها ليوم غادي يتكتب كتابها وفنفس الوقت حزنانةحيت غادي تخوي عليها الدار واليوم غادي تسافر معا راجلها لدارها
سعاد شافت مها كيف ساهية فيها و الدموع نازلين من عينيها ناضت عندها وعنقاتها: ماما صافي متبكيشي ولا لا نقولوم مناقص من شي زواج و نبقى معاك
لالة مليكة: هاذو غير دموع الفرحة ابنتي و الله يجعل زهرك حسن منك و الله يتبت ليك الغرس ياربي
سعاد حاسة بقلبها مقبوط معرفاش شنو عندها ولكن معا الستريس و الفراق ديال واليديها ولات حساسة
مليكة: زيدي ابنتي باباك كيعيط ليك باش تسيني على العقد راه جا العدوول و فاش نخرجو من البيت قراي المعودات فقلبك عين الانسان خايبة
سعاد كوني هانية اماما غادي نقرا القرآن
مليكة: تمنيت لون كانت عبير معانا كانت فرحتنا عتكوون كبيرة وكنت غادي نعمل ليك العرس لي كتحلم بيه كل واحدة ولكن ابنتي نتينا مبغيتيشي العرس.
سعاد : الله يرحمها اماما و عبير راها فبلاصة زوينة أحسن من هنا ندعيو ليها غير بالرحمة
هبطو فالدروج و سعاد كتبان كي الأميرة بديك الكسوة و داك النور لي على وجهها كتضوي كي القمر فالليل
دانيال غير شافها مقدرش يحيد عيونو منها جات زوينة بزااف و هيا داخلة حشمانة و مزنكة جلسات حدا باباها عاد العدول بدا كيدوي...
العدول شاف فدانيال: سي أحمد واش نتا موافق على الزواج بالآنسة سعاد على سنة الله ورسولة و على الصداق المسمى بينكما؟؟
و الشاهد لي جا معا العدول طرجم ليه شنو قال
دانيال شاف فسعاد: آه موافق
عطاه العدول الكتاب و سينا فيه و كذلك سول سعاد لي وافقات حتى هيا و سينات فداك الدفتر
من بعد العدوول الناس قراو الفاتحة و دعاو للعرسان بالرفاه و البنين ويكملو حياتهووم معا بعض
داز الوقت و وصل وقت الوداع سلمات سعاد على ماماها وعلى باباها و العائلة و دموعها دايزين كي الشلال من عينيها
السي رشيد واقف معا دانيال كيوصيه على سعاد كيدوي معاه بالانجليزية جيت عبير فاش كانت كتقرا اللغات كانت كتهضر بيهوم معا باباها وكتعلمو
دانيال: كون هاني غادي نديرها فعيوني ولي خصاتها غادي نحضرها ليها...
توادعو و تسالمو و شدو الطريق للمطار و سعاد غير كتبكي اما دانيال كاع ممسوق ليها وشاد تيليفونو فيديه حتى وصلو للمطار نزل دانيال و توادع معا عم سعاد هو ولي وصلهوم وخدا الباليزات سعاد تمات غادة بجنبو و هو كاع ممسوق ليها متجاهلها
بقاو على ديك الحالة حتى طلعو للطائرة و شدو بلايصهووم و دانيال مزال مكيشوفش حتى لجيهتها معرفاتش مالو ومقداتش تجاوبو
الطريق كلها و هو مكيدويش معاها معرفاتش كيف غادي تصرف واش عملات شي حاجة لي خلاتو يتعصب منها مبغاتش تهضر معاه خلاتو على خاطرو حتى وصلو لسيدني نزلو من الطيارة على نفس الحال دازو من الجماريك و خداو الشنطات ديالهووم
دانيال كان غادي هو الأول كيجر الشاريو لي فيه الباليزات و هيا تابعاه حط الباكاج فالطوموبيل و ديماراو مسافة الطريق كانو وصلو لواحد ميني فيلة جات بعيدة على المدينة شوية و دايرا بالغابة وقف طموبيلتو فالجردة و هو مزال مغوبش سعاد غير ساكتة من طبيعتها سكوتية
نزل و هيا بقات فالطوموبيل حتى دار جيهتها و دوى
دانيال: نزلي ولا خاصك العراضة؟؟
سعاد تفاجآت بطريقة كلامو معاها فتحات باب الطموبيل و نزلات غادة فاتجاهو دانيال حط صبعو على واحد الشاشة حدى الباب باش فتحها حيت كتحل بالبصمة ديال اليد ماشي بالسارووت
شاف فيها و فتح دراعو لجيهت الباب باش تدخل...سعاد دخلات و هيا حادرة راسها تخلطو عليها جميع الاحاسيس اول مرة تكون معا شي راجل بوحدهووم احساس الحشمة و الخوف كانو متملكينها و قلبها مقبوط عليها حاسة بشي حاجة غادي توقع....
دخل و سد الباب و هو كيجر دوك الباليزات حطهوم حدا الدروج و دار يدو فجيبو وتمشى بشوية عليه لجيهت واحد الميني بار كان تماك و هيا كتشوفو فين غادي حتى كتفاجأ بيه خدا واحد القرعة ديال الشراب حطها فوق الكونتوار ديال داك الميني بار و مشا للكوزينة لي كانت مفتوحة على الصالة فتح الثلاجة و خدا منها الثلج و خدا 2 كيسان حط وسطهوم الثلج و رجع لديك القرعة فتحها و كب فالكيسان.
شد كل كاس بيد و هو غادي اتجاهها و هيا كانت متفاجأة من تصرفو شنو كيدير كل حركاتو راقباتهووم حتى شافتو كيجغم من كاسو و هو غادي اتجاهها.
سعاد غير شافتو كيشرب و هيا تنطق: أحمد واش كتشرب؟؟راه حرام..
قبل كتكمل كلامها قاطعها: أنا سميتي دانيال نسميتيش أحمد و وقف اونفاص معاها و تبسم ابتسامة ماكرة على وجهو
دانيال تحنى لعندها: غير كنت لاعب معاك سميتي دانيال و أحمد غير لعبة كنت لاعبها
سعاد طلعات عليها الحمورية و الصهدة: كيفاش لعبة؟؟؟ شنو كتقصد بلعبة؟؟؟
دانيال تبسم وتخطاها بقا غادي حتى حط واحد الكاس على الطبلة و الكاس الثاني مزال شادو فيدو و جلس على واحد الفوتاي ديال الجلد فالكحل و حط رجع على خوه و رجع كيجغم من كاسو و كيشوف فيها بنضرات استفزازية.
دانيال: كيف قلت لييك لعبة لعبتها معاكووم باش نجيبك و شاف فعيونها لي كانو مصدومين و كمل كلامو لي نزلو عليها كي السم البارد؛ أنا مسلمتش مزال على ديني
سعاد ودنيها تصمكو بقات واقفة كتعاود كلمة واحدة فودنيها أنا مسلمتش ...أنا مسلمتش : كييفاااش مسلمتيييش؟؟؟ كضحك ياااك؟؟؟ (كتشوف اتجاهو و كترجااه يقول ليها بلي غير ضاحك معاها ....
دانيال رجع جغم من كاسو و حطو فوق الطابلة: توء توء امراتي هاذشي مافيهش الضحك أنا مكنضحكش وقت الضحك مشا و دابا جا الوقت لي غادي ندفعك على كل ما درتووه
سعاد معرفاش شنو كيقوول اصلا مخها تبلووكا كتحس برجليها مبقاوش هازينها تمشات و جلسات اونفاص معاه و دموعها دايزين نقطة ورا نقطة و عيونها حمرين: علاش؟؟؟شنو درت ليييك؟؟؟علاش؟؟؟
دانيال ناض من بلاصتو و شاف فاتجاهها: ماشي وقتو غادي يجي النهار لي غادي نقوليك شنو درتي
خرج و خلاها فوسط دوامة ديال الأفكار شنو دارت ليه باش عمل ليها هكذا و كيفاش مسلمش؟؟يعني زواجهووم حراام؟؟وشنو ورا هاذ الزواج تبلوكات وطاحت فالأرض و بدات تبكي علاش مكتاب ليها ديما تكون عايشة معذبة
ناضت كي العادة كتستفرغ هاذ الأيام الوحم تزاد عليها ولات كل ساعة كتيتفرغ غسلات وجهها و قادات راسها وخرجات لقات اكرام جالسة هيا و الجدة كيتساينوها باش يفطرو
اكرام: صباحو
عبير بابتسامة:صباح النور
الجدة: كيف صبحتي ابنتي واش مزال كتقياي؟؟
عبير جلسات حداهوم و خدات طبسيل ديال الزيتون كحل و بدات تاكل فييه: شعنقلك اجدة هاذشي كيزيد يصعاب
الجدة: عادي ابنتي فهاذ الفترة غير تقفلي الشهر الرابع و دخلي فالخامس مغاديش تبقاي هاكا غادي يخفاف الوحم حتى ميباقاش
عبير: على الله اجدة(و شافت فاكرام) خاصنا نمشيو عند شي ذهيبي
اكرام: علاش؟؟
عبير: بغيت نبيع شي لعيبة باش نكملو داكشي لي ناقصنا فالروض
اكرام: صاف غير نفطرو و نمشيو
(عبير فهاذ الشهر تبدلات بزااف ولات قوية كتحاول توقف على رجليها وتبدا حياة جديدة بدات تسترجع نفسها خصوصا حاملة هاذ الجنين عطاها امل فالحياة كتحس بلي عندها علاش تعيش واخا غادي تولدو من الحرام و بلا باباه ولكن هيا معندها ذنب فلي وقع)
جالسين فالبار و البنات على الاشكال و الانواع كيشطحو الوسط و كلشي سكران و شارب اما هو جالس فواحد القنت هو و أمين و باين عليه التعب كيفكر غير فيها كي غادي يدير حتى يلقاها توحشها بزااف
جات واحدة من هاذوك البنات و جلسات حداه و بدات تقرب ليه بطريقة جنسية و طبعات بوسة على خدو للحضة و هو ساد عيونو حس بيها هيا لي حداه هيا لي كتبوسو و نطق بدون وعي عبييير
فتح عيونو و وعا علا روحو شنو قال و شاف فأمين لي كيشوف فيه شوفات هو لي فهمهووم شوفات كيقولولو بلي كلامي صحيح و بلي معتصم البارودي كيبغي عبير و كيمووت عليها
قبل مينطق شافوه جاي اتجاههوم و نضرة الانتصار على وجهو و ابتسامتو الماكرة جات فطريقو واحدة من السرباية لي تماك شدها من عنقها و دخل معاها فقبلة شرسة و بعد عليها و همس فودنيها: من دابة نص ساعة اجي لعندي لبلاصتي المعهودة و خلاها و تمشا اتجاههوم
امين كيشوف فييه: كنضن الليلة ليلة زواجك وخاصك تكون معا مراتك و دوزو ليلتكووم الاولى ماشي دوزها معا القح**ات
عرفتو شكون هذا لي جا عند معتصم و أمين؟؟؟ آه هاذاك لي فبالكووم هو هذاك بشحمو و لحمو ولكن عندو سبب ثاني لهاذشي لي داار معا سعاد
كانت عبير فالروض صاف كلشي تقاد و غدا غادي يبداو الخدمة
عبير شافت فاكرام لي كان لونها شاحب: مالكي؟؟كنشوفك بزز واقفة؟؟
اكرام: والو غير لاغيكل كدير ليا هاذ الحالة
عبير سيري رتاحي لك
اكرام شافت فالساعة غادي نمشي لفرمسيان نجيب الدوا على الله يخفف عليا هاذ الوجع
عبير شافت فالساعة: هاذي 9 ديال الليل و فارماسيان مسدودة و عاد كاين الشتا
اكرام: غادي نمشي للفرماسيان لي كتكون محلولة فالليل حيت منقدرش نزيد نصبر أنا غادي نمشي داغيا و نجي مغاديش نتعطل
عبير: سيري وانا كنتسناك
خرجات اكرام و هيا شادة كرشها حيت فيها الوجع و ختارت دووز من واحد الطريق مختصرة باش توصل داغيا
غادية فالطريق ندمات علاش دازت من هاذ البلاصة أول مرة دوز منها شادة ساكها فحضنها معنقاه و الشتا خيط من السما مبغاتش توقف شوية و هيا تشوف واحد التييندا ديال واحد الحانوت مشات وقفات تحتو كتسنى الشتا توقف باش تكمل طريقها حتى كتسمع الهضرة وراها دارت لقات 2 ديال الشماكرية كانو جالسين فالدرجة ديال الحانوت
الشمكار الاول: راه كاين البرد هاذ الليلة بحرى ندفاو شوية و نسخنو
اكرام خافت بزاف لي قدرات دير هو تشد ساكها مزيان وبلا متجاوبهووم عطات رجليها للريح ناضو الشمكارة بزوج تابعينها و هيا كتجري على حر من جهدها و كرشها عاطياها الحرييق حتى دخلات لواحد الدرب لقاتو مسدود بغات ترجع لقاتهووم وراها
الشمكار الثاني: معندك فين تهربي منا القطيطة
الشمكار اللول: جيتي لبلاصتنا
وشافو قبعضووم بنضرات شيطانية و تمو كيقربو لعندها و هيا كتقفقف بالبرد
الشمكارة كيضحكو واحد منهووم دوا: توء توء توء احبيبة مغادي نخليواك تمشي حتى تسخنينا راه كاين البرد هاذ الليلة (و شدها من يديها هو وصاحبو عيات متعافر معاهووم و كتحس بالوجع كيقطع فيها ولكن مهامها حتى حاجة من غير تهرب منهوووم )
ولكن هوما كانو أقوى منها طيحوها فالأرض و واحد شاد ليها يديها باش متهربش و هيا كتغوت ربي لي خلقها والو مكاين لي يعتقها و الثاني بغا يحيد ليها حوايجها و هو يشوفها نازلة بالدم من يتحت كلها دمايات و هو يبعد عليها ووشاف فصاحبو لي حتى هو شاف حالتها كيف دايرا خلاوها تماك مليوحة بدمها و مشاو كيجريو هربانين
دانيال: ناري الخبار داغيا كتوصل حتى حاجة مكدتخبا عليكووم
أمين تقاد فالجلسة: واش حنا قلنا ليك سير تزوجها؟؟؟ ياك زورتي الموت ديال عبير واش معرفش بلي هاذشي لي درتي يقدر يدير مشاكيل من بعد خصوصا فاش تعرف سعاد بلي ختها عايشة؟؟
دانيال: عندي معاها واحد الحساب فاش نساليه غادي نلوحها فالبلاصة لي عمرها تقدر تخرج منها
معتصمغير كيسمع ليهووم ماقادش يهضر كيحس بداتو تقيلة عليه
أمين : اذن متزوجتيهاش حبا فيها؟؟؟
دانيال: هاذشي لي بقا ليا نبغي ارهابية واش نتا بعقلك؟؟؟
أمين دار نصف ابتسامة و نعت ليه لجيهت معتصم بيدو لي كان شاد بيها الكاس ديال الويسكي: حتى هذا كان كيقول نفس الكلام و هاهو طاح على راسو...شي نهار حتى نتا تجي تونسو فالاكتئاب
دانيال على يديه بزووج: مالني هبيل؟؟؟ راه اصلا ضروفي ماشي فحال معتصم هذا كان باغي يكون معاها اسرة اما انا باغي غير نبرد ولو شوية من داكشي لي وقع
أمين كيشرب من كاسو: أنا غادي نمشي ندوز شي وقيتة زوينة راني مزال ديال راسي هههههههههه و غمزهووم و مشا فاتجاه واحد القح** كانت جالسة كتسناه
اما معتصم دفع هاذيك لي كانت لاسقة فيه: سيري من حدايا مباغي موسخات و دفعها و رجع كيفكر فيها هيا لي شاغلة ليه بالو
دانيال اول مرة يشوفو بهاذ الحالة راه عشرة عمر بيناتهووم فاش كانو فأمريكا تعارفو فلافاك ب 5 بيهوم هو و معتصم و أمين و توفيق و ايميلي كانو شلة واحدة وفاش قرر معتصم يمشي لأستراليا مشاو كلهووم معاه
دانيال حيت اوصولو استرالية كان غير كيقرا تماك و ايميلي كانت فعلاقة معا معتصم و هو طلب منها تجي معاه اما أمين فهو مغريبي ولكن الضروف( لي غادي تعرفوها من بعد) خلاتو يتوضر على عائلتو الشي لي خلاه يكبر فدار الأيتام و فاش نجح فالباك كانت عندو 17 عام و نجح بمعدل كبير فتبناتو جامعة امريكية و تماك تعارف على معتصم و توفيق الولد المفشش ديال واليديه مغربي فاش خدا الباك حتى هو صيفطوه عائلتو يقرا ادارة الأعمال فأمريكا و هنا كملو الشلة ديالهووم
دانيال: معتصم اشنو هاذ الحالة لي وصلتي ليها؟؟؟
معتصم مزال مغمض عيونو: بغيت نلقاها
دانيال: كتبغيها؟؟؟
معتصم مرجع راسو اللور فتح عيونو لي سكرانين و كيشوف فالسقف: معرفتش واش كنبغيها واش بغيت غير ولدي معرفتش واش ولفتها لي عارفو هو بغيتها جنبي توحشت تصرفاتها الطفولية العفوية توحشت ريحتها و توحشت صوتها(ورجع سكت )
دانيال: طحتي طيحة خايبة راه قلناها ليك شحال هذا و نتا كنتي كتقول بلي كدير هاذشي غير على ود سيراج(سكت شوية و كمل كلامو) دابا يلقاها ليك توفيق
كملو السهرة ديالهووم و كلا رجع لدارو دانيال دخل للدار لقاها ناعسة فالصالوون و لاطراس ديال الدموع مزال فحنيكاتها
قرب اتجاهها و هو يقفزها: نتي فيقي ههيييه
سعاد فاش خرج حاولات تهرب ولكن البيباب كلهووم كيتحلو بالبصمة ديال اليد و هيا بصمت دانيال من بعد محاولات عدة استسلمات و داتها عينيها حتى كتقفز فاش فيقها شافت فيه: شنو بغيتي
سعاد خافت اول حاجة جات فبالها بلي يقدر يكون باغي ينعس معاها: مغاديش نوض و متحاولش تقرب ليا حيت داكشي لي فبالك عمرو يكوون و اصلا زواجنا باطل مكاملش يعني أنا ماشي مراتك
دانيال ضحك بصوت مرتافع ضحكتو الاستفزازية: حتى يكون عندي شايط نتي هيا آخر واحدة نفكر نديرو فيها أو نقرب ليها و نتي هنا فقط باش تعاقبي و تخلصي لي داز
سعاد مرضاتش بهاذ الكلام لي قالو ليها و معرفاش علاش هاذ الحقد كلو لي كيكنو ليها : غيير قوولي انا فشنو آذيتك؟؟ شنو درت ليييك؟؟عمرني شفتك او تلاقيتك؟؟
دانيال : باغيا تعرفي واخا ماشي مشكيل داكشي لي دارو راجل عمتك نتي غادي تخلصيه واخا حتى هو مات ولكن نتي غادي تخلصي بلاصتو
سعاد زادت خافت عرفات بلي راجل عمتها غادي يكون دار شيحاجة لدانيال: شنو علاقتك بيييه؟؟؟
تمشا جيهتها و شدها من دراعها بقوة و بقا كيتمشى بيها حتى وصلو لواحد البيت فتحها ووهيا تشوف حائط عامر بالصور ديال راجل و مرا و بنتهووم و واحد الوليد و كتشووف صورة ديال حافلة ديال المدراسة دايرا كسيدة و الوليدات كلهووم ميتين و صورة فيها طموبيل حتى هيا دارت كسيدة ولي فيها باين عليهوم حتى هوما ماتو
دانيال: هاشنو دار راجل عمتك قتل 32 طفل بريء و قتل ليا واليديا وختي و خلاني نولي يتيم راجل عمتك ارهابي
(حيت راجل عمت سعاد كان شيفور ديال الباص دالمدراسة )
سعاد كتحرك راسها بالنفي: لا لا ماشي هو راه الفران كان مقطع مدارشهاش بلعاني
دانيال: نتوم ارهابيين و نتي غادي دفعي الثمن
قبل متنطق كان عطا ليها طرشة فوجهها حتى خرج الدم من نيفها و شدها من راسها و بقا غادي بيها حتى وصل لواحد للدروج لي كيديو ل لاكاب بقا نازل بيها حتى وصلو للقاع كتلقى غرفة كبيرة فيها مانطة واحدة فالارض و بولة فالسقف و طواليك فالجنب ماشي مبني و لافابو واقف
هاذي هيا بلاصتك هنا غادي تعيشي و رجع طالع و هيا واقفة مسمرة كتخااف بزااف بوحدها و داك لاكاب جاب ليها الخووف مفيقها من سهوتها غير دانيال رجع و فيديه باليزتها رماها ليها من الدروج
هاذو حوايجك و رجع سد الباب هيا طاحت فالأرض كتبكي حتى داتها عينيها و نعساات
كان غادي بطوموبيلتو و الشتا خيط من السما غادي يشوفها و يتأكد من المعلومات ديالو واش صحيحة و هو يشوف بنت كتجري و من وراها 2 ديال الشماكرية فالأول معطاش للأمر أهمية بقا غادي فطريقو ولكن شيحاجة قالت ليه ينزل يشوف شنو كاين رجع بالطوموبيل ماشاريال حتى كيشوف دوك الشمكارة خارجين من واحد الدريبة و باين عليهوم مخلوعين
نزل من طوموبيلتو و دخل لديك الدريبة لي كانت ديقة بدا يقرب بشوية و هو يلمحها مليوحة فالأرض و كلها دمايات نزل لمستواها هزها بين يديه و رجع لطوموبيلتو مسافة قريبة ديال الطريق كان وصل لواحد الكلينك
أما عبير قادات كلشي فالروض و بقات كتسنى اكرام ترجع تعطلات عليها و صلات 11 ديال الليل و هيا مزال ماجات ممولفاش تبقى فالزنقة حتى لهاذ الوقت خدات التيليفوون و دوزات نمرتها باغيا طمن عليها و تشوفها علاش تعطلات...
نرجعو للكلينيك من بعد مدخلوها لغرفة الفحص مدة و هيا تخرج الممرضة سمحلي اسيدي راه المريضة تيليفونها كان كيصوني ليها
الشخص خدا التيليفون: واش البنت بيخير؟؟؟
الممرضة: غادي تخرج الطبيبة دابا وتقول ليك على حالتها(ورجعات دخلات )
شوية و هيا تخرج الطبيبة : واش نتا لي جبتيها؟؟؟
الشخص: وي أنا لي جبتها، كيف بقات و شنو هيا حالتها؟؟
الطبيبة: حالتها مستقرة حاليا غير جاتها ايموراجي يمكن وقع ليها شي حاجة خلات الغيكل تهبط منها بديك الشكل غير تفيق يمكن ليها تمشي (خلاتو و مشات)
عبير زادت تشطنات عليها خصوصا فاش مجاوباتش اكرام و رجعات صونات غير تحل الخط و هيا تدوي
الشخص: حاليا هيا مزيانة حتى تجي و الطبيبة تعطيك كل التفاصيل و هيا حاليا فكلينيك.....
عبير: صاف شكرا اخويا أنا جاية دابة
قطعات عليه و لبسات المونطو ديالها و سدات الروض و خرجات للشارع باش تشد طاكسي....
غادا فالطريق و بالها كلو معا اكرام باغيا غير ايمتا توصل باش دتطمن عليها...
مسافة ديال الطريق كانت وصلات ، دخلات كتجري لجيهت الاستقبال كتسول عليها
عبير: عافاك اختي بغيت نسول على واحد المريضة جابها شي حد كانت طايحة فالطريق
الموضفة بابتسامة: أنا نشوف ليك أختي( بقات كتشوف فالكومبيوتر و رجعات شافت فعبير) الآنسية لي كدوي عليها كاينة فالشومبر رقم 120
عبير: شكرا أختي( خلاتها ومشات كتفتش على الشومبر)
وصلات للشومبر و دخلات لقاتها مزال ناعسة و كاينة تماك ممرضة...
عبير: سلام اختي كيف بقات اكرام؟؟ و شنو عندها؟؟
الممرضة: واش نتي من عائلتها؟؟
عبير: آه أنا ختها الكبيرة
الممرضة: حاليا هيا ناعسة عطيناها مسكن ديال الوجع و نعسات و إلى بغيتي معلومات على حالتها راه كاينة الطبيبة لي فحصتها و هيا حاليا مشغولة تقدري تسنايها حتى تجي
الممرضة: وي جابها واحد الراجل الشرطة مخلاواهش يمشي حيت هو لي جاب ختك و خاص ضاروري حتى يجي شي حد من العائلة عاد يقدر يمشي...و هو حاليا جالس فالكافي ديال الكلينيك
عبير: ممكن تاخديني عندو بغيت نتشكرو
الممرضة: واخا اصلا كنت غادي نمشي عندو باش نعلمو بلي جيتي ويقدر يمشي.
قادات السيرووم ديال اكرام و خرجو فاتجاه القهوة حتى وصلو
الممرضة: راهو هذاك لي جالس لديك القنيتة
عبير: شكرا ليك أختي نتي سيري انا غادي نعلمو باش يمشي (خلاتها و مشات اتجاهو )
كان جالس فيديه كاس ديال القهوة و كيشوف فالساعة تعطل خاصو يمشي يشوف واش المعلومات لي وصلو ليه صحيحة حتى كيسمع صوتها
عبير: السلام عليكوم أخويا
علا عينيه حتى شافها واقفة حداه تفاجأ من وجودها شحال و هو يقلب عليها و دابا هيا جات عندو برجليها
الشخص باستغراب حيت على حد علمو ختها حاليا فاستراليا ولكن مبغاش يبين ليها : العفو أختي هذا الواجب ديالي
عبير بابتسامة: كنكرر الشكر ديالي ليك أخويا و تقدر تمشي ترتاح
الشخص: الحمد لله ملي ختك بيخير
عبير: نستأذنك دابا و شكرا مرة آخرة ( تمشات شوية حتى سمعاتو كيعيط ليها )
الشخص: سمحيلي آنسة...آنسة؟؟
عبير ضارت عندو لقاتو وصل عندها قبل متسولو حتى قاطعها: تيليفون ختك بقا عندي (و مدو ليها)
عبير: شكرا ليك بزاف أخويا(وخذات التيليفون)
الشخص: توفيق سميتي توفيق
دانيال من بعد مسد على سعاد الباب طلع لبيتو حيد التيشيرت و رماه فالأرض بقا غير بالسروال خرج للبالكوون كيحس بالحرارة فداتو من لداخل
كيتفكر ختو و باباه و مو بثلاثة بيهووم ماتو فاش كان فأمريكا توحشهووم كون مماتتش ختو كان غادي يكون فعمرها 19 عام 6 سنين باش ماتو كل نهار كيفكر فيهووم فالأول مكانش عارف شكون السبب فموتهووم و السلطات الأسترالية نسبات الحادث لي وقع بأنهو عمل ار*ه**ابي واخا التحريات بينو بلي الفران تقطع بسباب إهمال المؤسسة لي مكانتش كتراقب جودة حافلات المدرسة و هذا كان حل باش ميوقعوش فمشاكيل معا عائلات الضحايا لهاذا نسبو الحادث لعم سعاد وهاذ الشي معارفوش دانيال
وفاش رجع معا صحابو لأستراليا قرر يدخل الشرطة باش يحمي الناس و من بعد مدة جاهوم خبر ديال واحد الانفجار غادي يوقع و ملي مشاو يشوفو البلاصة كان صديقو ضحية لهذاك الانف**جار
هنا دانيال زاد حقد على المسلمين خصوصا المتشددين لي كيصليو و عندهوم اللحي و لي لابسات الزيوفة اما لي مسلمين كي معتصم و أمين يعني واخدين غير اسم الاسلام كيشربو و مكيصليوش و كيديرو المحرمات هاذوك بالنسبة ليه ماشي مسلمين
دخل لبيتو و تكا و هو مغمض عينيه كيتفكر نهار لي قال ليه أمين على الخطة كلها و شنو غادي يديرو جات عندو سعاد محملهاش حيت كانت محجبة و بغا يبحث عليها ولقاها من عائلة هذاك لي كان سباب فموت واليديه خصوصا مكانش عندو شي حد تماك من غير سعاد و مراتو لي ماتت فكان خاصو يطفي نار فراق عائلتو فاش كان كيشوفها كتبكي على ختها كان كيحس بواحد النشوة ولكن نهار عرفها غادي تمشي للمغرب وعمرها ترجع تصدم حيت باغيها تعذب نفسيا لهذا خدا وقت و مشا لعندها ولعب لعبتو عليها ....
أما معتصم دخل للقصر و هو كيميل يمين و شمال معارفش فين كيحط رجليه حتى حس بشي حد شادو من ذراعو دار و هو يلقاها حداه بشعرها الأصفر و داك العكر الأحمر و نص داتها عريانة ممغطيا والو فيها
أيلول لي كانت فرحانة حيت خالتها قدمات ليها أحسن كادو و بعدات عبير من طريقها و لكن الشهر لي كان معتصم غابر فيه كانت خايفة يلقاها ولكن فاش رجع بلا بيها فرحات بزااف لدرجة كانت خارجة معا صحاباتها و فاش صونات عليها نيرمين خبراتها بلي معتصم جا و طلع عند بنو سمحات فصحاباتها و كسيرات بأعلى سرعة حتى كانت غادي دير اكسيدون و فاش رجعات لقاتو خرج و بقات كتسناه حتى يرجع.
أيلول و هيا شادة فيديه: بشوية علليييك عنداك طيح
معتصم بتاسم ابتسامة جانبية : راني طحت طيحة خايبة
أيلول و هيا غادة بيه لجيهت الأسنسور باش يطلع لبيتو: مزال مطحتي راني شاداك
وصلاتو لبيتو و تكاتو على النموسية بعدات عليه و هيا كتلهث حيدات الشعر من علة عنقها و حيدات ليه صباطو و قربات جيهت عنقو تفتح ليه الصداف ديال القاميجة و معتصم متبع ليها بعينو للحضة جات صورتها فبالو و بلي هيا لي معاه شد ليها فيديها وهيا قربات عندو طلع يديه لعنقها وزاد قربها لعندو حتى تلاقاو شفاههوم
عبير بابتسامة: مشرفين مستر توفيف أنا سميتي عبير
توفيق: الشرف ليا أنا حيت تلاقيت بييك
عبير: نخليك دابا و مجددا كنشكرك بزااف و نتمنى نرد ليك خيرك انشاء الله
توفيق: أنا درت غير واجبي ولكن الى كنتي باغيا تردي الخير بغيت نطلب منك طلب
عبير: وي مرحبا إيلى كان فالمقتدر ديالي
توفيق:ماشي شي حاجة بغيت غير تاخدي معايا شي كاس ديال القهوة
عبير بقات ساكتة مبغاتش تحرجو: آه واخا انشاء الله ولكن دابا خاصني نمشي نشوف ختي راه تكون فاقت
توفيق: اوكي سيري ولكن عطيني نمرتك(و جبد تليفونو باش يسجل النمرة)
عبير خدات من عندو التيليفون و كتبات ليه النمرة : هاذي نمرتي و دابا نخليك و شكرا مجددا (خلاتو و رجعات عند إكرام لي كانت عاد فاقت ..
عبير: كرومة خلعتيني عليك كيف بقيتي؟؟
اكرام بابتسامة : شوية الحمد لله كنت غادي نمشي فيها اليووم
عبير جلسات جنبها على النموسية: ياك لاباس شنو وقع ليك؟؟
اكرام: ليوم كنت غادي نتغتاصب كنت غادي نفقد أغلى معندي وكنت غادي نضيبيع
عبير: اويلي شكون و كيفااش؟؟؟وااش وقعات ليك شي حاجة؟؟؟
اكرام شدات فيد عبير و بدات كتعاود ليها شنو وقع ليها بالتفصيل و هيا كتبكي و كتشهق: الحمد لله كانت فيا لغيكل كون مكانتش معت شنو كان غادي يوقع ليا الرجال خيبين أعبير كلهووم كيشوفو المراة كأنها صندوق يفرغو فيه شهواتهووم معندهاش الحق تعيش كيف بغات و تختار لي بغات هيا وسيلة باش يبردو شهوتهووم فيها(و عنقات عبير و بدات كتبكي و عبير كدوز بيديها على راسها و كتهدنها )
حتى كيقاطعهووم صوت التيليفوون ديال اكرام جبداتو عبير من ساكها لقات الجدة مصونيا عليعووم
عبير: خودي جاوبي جدة راه يمكن تقلقات علينا حيت تعطلنا
اكرام خدات التيليفون و جاوباتها: آلو جدة....وي هاحنا جايين غير تعطلنا...صاف شوية و نكونو فالدار (وقطعات)
عبير: نوضي نعاونك تلبسي باش نمشيو
اكرام: متقولي لجدة والو على لي وقع
عبير: كوني هانية
عوناتها حتى لبسات و خلاتها جالسة و مشات عند الطبيبة باش تعطي ليهووم ورقة الخروج و تشوف واش غادي تعطيها شي دوا و من بعد مشات لاكيس خلصات الكلينيك و رجعات مورا اكرام و خرجو
فهاذ الوقت كان توفيق حاضيهوم من البعيد كيشوف عبير كيف مهتمة باكرام باين عليها بدات حياة جديدة و نسات معتصم
خرج من وراهووم ركب فطموبيلتو و ديمارا و هو كيسترجع كيف قدر يلقاها من بعد مقلبو عليها اكادير كلها و ملقاوهاش مشا عند واحد صاحبو مدير ديال الفرع الرئيسي ديال البنوك فالمغرب و طلبو الى يشوف ليه واش شي حد صرف العملة الأسترالية فهاذ الأيام خصوصا الجالية المقيمة بأستراليا قليلة مكينينش بزااف
مدير البنك وافق واخا غادي ياخد وقت حتى يعرف حيت كينين بونوك بزااف ولكن غادي يدير كثر من جهدو و توفيق طلب منو يشوف بين المدن لي بين الدار البيضاء و أكادير حيت الشيفور عاقل علة عبير فاش كانو خرجو من الدار البيضاء كانت مزال فالكار يعني تقدر تكون نزلات فأكادير أو شي مدينة آخرة
و من بعد 15 يوم مدير البنك صونا عليه و خبرو بلي جا واحد عندو اجونص ديال صرف العملات لواحد البنك كاين فمراكش و كيف ماوصاه توفيق خداو عنوانو من البطاقة الوطنية و صيفطوها ليه...
كلشي دارو توفيق بلا ميخبر معتصم أو أمين ...وصل للأوتيل و نزل وعلى وجهو ابتسامة ماكرة خدا الساروت ديال السويت لي نازل فيه و طلع كيفكر فهاذشي لي دار
هاذي فرصة جات حتى ليديه مغاديش يضيعها مراتو و ولدو بين يديه بسبابو تخلات عليه أيميلي حب حياتو حيت معتصم عندو الفلوس أكثر و عندو نفوذ أكثر فحين هو فذاك الوقت كان غير كيقرا و واليديه هوما لي كيصرفو عليه و حتى درجة الغنى ديالهووم ماشي فحال معتصم لي كان خدام و كيقرى فنفس الوقت ولكن واخا سمحات فيه و تزوجات بمعتصم مقدراتش تنساه و بعد 3 أشهر من الزواج صونات عليه و عتارفات بلي هيا كتبغيه و هنا كانت عندها خطة غادي تنفذها باغيا فلوس معتصم و أملاكو و باغيا تكون معا حب حياتها لي هو توفيق
فالأول هو رفض هاذ الفكرة ولكن قلبو خانو ضعف قدامها و قررو يقتلوه باش هيا و ولدو لي كانت حاملة بيه يورثو الأملاك ولكن القدر لعب اللعبة ديالو و انقلب السحر على الساحر و ايميلي هيا لي ماتت.....
فتح عيونو بزز كيحس براسو ضارو كثر من الشراب بزااف بغا يتحرك و هو يشوف شي واحدة ناعسة حداه وجهها مغطي بشعرها و ناعسة على كرشها معرفش شكون هيا شاف حالتو لقا راسو صولو ملابس والو و حتى ديك البنت ساترها غير داك ليزار قبل ميزيد يفيق حتى كانت ضارت اتجاهو و هنا كانت الصدمة كيشوفها ناعسة حداه و عريانة من فوق
أيلول بدات تفتح عويناتها غير شافتو فايق و هيا تبسم ليه باين عليها فرحانة
أيلول: حبيبي فقتي(و بغات تقرب ليه باش تبوسو و هو يحبسها)
معتصم: آشنو كديري هنا؟؟ و شنو وقع؟؟
أيلول بدموع التماسيح: عرفتك غادي تنكرني و قولتها ليك البارح قلت ليك بلاش و بلي غادي تسمح فيا ولكن نتا واعدتيني تبقى جنبي
معتصم جلس و هو مزال مغطي النص التحتاني: شكتخربقي؟؟شمولي غادي ننكر؟؟ واش كتصطاي عليا؟؟
أيلول: و هيا كتبكي كيفاش غادي نتسطى عليك و أنا البارح قدمت ليك أغلى ما كنملك عطيتك شرفي لي خافظت عليه حتى جيتي نتا وخديتيه
معتصم: آشناهو؟؟؟ لا لا ميمكنش ميمكنش تكون وقعات بيناتنا شي حاجة
معتصم معاقل على والو وراسو ضارو مقادرش يفكر سد عيونو لي عاقل عليه هو أنهو كان كيبوسها
معتصم:صاف بلا متبكي سيري لبيتك من بعد و ندويو
أيلول شافت فيه: يعني مغاديش تخلى عليا؟؟
معتصم: أيلول سيري لبيتك حتى نفيق مزيان وداك الساع ندويو
أيلول: اوكي غادي نتسناك و ناضت لاوية عليها ليزار باش تخرج
معتصم: واش عتخرجي هاكاك؟؟لبسي حوايجك عاد سيري
أيلول خدات حوايجها و دخلات للدريسينج لبسات وهيا فرحانة وأخيرا وصلات لداكشي لي بغات و دابا مغادي تفرقهوم غير الموت خرجات من الدريسينج و هيا كتعرج و كتمثل بلي هيا حزينة
معتصم مدواش معاها مقادش يدوي حاليا راسو ضارو مشاكيلو كافييناه ماباغي صداع حاليا ولكن هو غلط و خاصو يصلح الغلط ديالو
ناض من بلاصتو و دخل للدوش دوش عليه و خرج للدريسينج لبس عليه حوايجو و رش ريحتو و هو كيتفكرها كيف كانت معمرا عليه حياتو حوايجها مزال فبلاصتووم كيف خلاهوم تمشا لواحد المجر فتحو وجبد ديك الورقة لي كانت كتبات ليه فتحها و رجع كيقراها
كيسح براسو ضايع بلا بيها توحشها بزاف مشا لواحد الشال ديالها ودارو على نيفو باغي يشم ريحتها و تبسم: غادي نتلاقاو أعبير ضاروري مايجي داك النهار لي غادي نتشاوفو فيه
خرج من الجناح و مشا لعند سيراج لقاه مزال ناعس باسو و خرج ديريكت للبيرو ديالو فتحو بالبصمة ديال يديه حيت مبقاش كيتيق بيهووم كلهووم
دخل و سد الباب وراه مشا للبيسي ديالو و فتحو مشا ليجهت تسجيلات الكاميرا ديال الليلة لي دازت باغي يعرف شنو وقع
فتحات باب الدار و دخلو بشوية مباغيينش الجدة تفيق من النعاس اكرام كتدوي بهمس معا عبير
اكرام: عنداكي تقولي شيحاجة لجدة اتفقنا
عبير:'كوني هانية مغاديش نقول ليها
اكرام: الرضى(دارت وهيا تلقى الجدة مزال جالسة فالصالون و عكازها فيديها و كتشوف فيهووم باين عليها معصبة شافت فالساعة و ولات شافت فيهوون
الجدة: تبارك الله على البنات ولاو يدخلو معا الواحدة ديال الليل(وشافت جيهت عبير) ولا ملقيتو لي يحكمكوم سايبات وليتو كتضورو فالزناقي حتى لنصاص الليل علم الله فين كنتو
اكرام:لا اجدة راه تعطلنا فالروض كنا كنقادو شي حاجات
الجدة: نتي سكتي و دخلي لبيتك راني ماشي ناعسة على ودنيا صيفطت كريم للروض لقاه مسدود
عبير شافت فاكرام باش تدخل...اكرام حنات راسها ودخلات لبيتها وخلات باب البيت مفتوح باش تسمع
الجدة: شوفي نتي راه من نهار جيتي وانا ساكتة لييك قلتي عائلتك فالبادية وجيتي تخدمي عليهووم مقلنا باس عرفناك حاملة و قلتي راجلك مات مقلنا باس واخا مشتك شادة حق الله؟ملابسة بيض؟قلنا ندوزوها بجغمة الما مسوقناش فيك الموهيم تعاونينا على المصروف (و ناضت من بلاصتها و كتعكز بعكازها و قربات عند عبير لي كانت حادرة راسها و شابكة يديها معا بعضهوم حتى دخلو ضفرانها فلحمها و تجرحات ولكن لي جرحها كثر هو كلام الجدة فحالة كتقوليها نتي ممزياناش وبلي عندها كرش من الحرام
الجدة كملات كلامها:'ولكن هنا و حبس ماشي نتي خارجة الطريق و شوفتي بنتي محافضة على راسها بغيتي تجريها معاك هاذي عمرني مغادي نقبلها فمن الأحسن تجمعي حوايجك و الصباح منلقاكش مزال فداري
عبير مقدراتش تجاوبها بقات ساكتة حيت شنو غادي تقول ليها و باش غادي تدافع على راسها طاحت الأرض و بدات تبكي كل ما كتبغي تنسى لي داز كتفكرو معتصم وسخها وسخ ليها حياتها كلها
الجدة دخلات و هيا تنفاجر عليها اكرام:حشومة عليك اجدة اش داكشي لي قلتي لعبير
الجدة:نتي حسابي معاك من بعد آجي بعدة فين كنتو وفين داتك فين مشيتو؟؟؟
اكرام بعصبية:وا راه مبغيتش نخلعك عليا ولكن أنا كنت فالكلينييك مشيت نجيب الدوا من فرماسيان و تلاقاو ليا شي شمكارة.....(و بدات تعاود ليها شنو وقع ) ونتي اجدة ضلمتي عبير ضلمتيها بزااف
الجدة: أنا مضلمتهاش واش يسحابليها كنرضع صبعي...كاين ي مرا كيموت ليها راجلها و متلبسش عليه البيض؟؟؟
اكرام: نتي أجدة معارفة والو معارفاش شنو داز عليها وشنو عاشت و قاسات مسكينة
جدة جلسات على الناموسية: عاودي ليا داكشي لي كتعرفيه وعانداكي تكذبي عليا فشي حاجة
اكرام جات و جلسات حدى جداتها و بدات تعاود ليها كل ماداز على عبير كن نهار مات جلال و شنو دوزات عليها العدوزة وكلام الناس وكيف حاولات دنتاحر وكيف وقع حتى مشات لاستراليا وخدمات عند معتصم وكيف تعدى عليها وكذب عليها وعيشها فأوهام باسم الحب و الزواج وكيف ولات ام بلا متولد و كيف حملات عاودات للجدة كلشي حتى كيف هربات و شكون عاونها عاودات ليها بلي ملقاتش الوجه باش تواجه عائلتها و عاد هيا عارفة بلي معتصم مغاديش يتخلى عليها خصوصا حاملة بولدو يقدر يآذي عائلتها كلشي قالتو و الجدة ساكتة كتسمع لكل كلمة قالتها ليها اكرام بقات فيها بزااف عرفات بلي داز عليها كثر من القياس كون شي واحدة بلاصتها كون حماقت بنت مزال صغيرة مزال فالعيشرينات دازت من هاذشي كلو ومزال غادي دوز كثر ولي مخبي ميعرفو غير الله سبحانو
الحاجة وقفات و خرجات من البيت و هيا كتعكز على عكازها حتى وصلات لبيت عبير دقات عليها والو مفتحاتش الباب و فتحات الباب لقاتها متكية فبلاصتها و كتبكي و عيونها مسدودين تقدمات خطوات لعندها و هيا كتشوف فيها كيف كتبكي و وجهها حمر و عرقان زادت قربات و دوزات يديها على راسها وهيا تلقاها سخونة طايبة ضارت شافت فاكرام لي تبعات جداتها معرفتهاش شنو كدير
الجدة: سيري جيبي الما بارد و فوطة نقية راها سخونة بزاف و هاذ السخانة مصالحاش ليها خصوصا حاملة
اكرام مشات للكوزينة جابت البانيو و الفوطة داكشي لي قالت ليها جداتها و بداو يديرو ليها فالكمادات و والو الحرارة مبغاتش تنزل
اكرام: عبير عافاك نوضي راه السخانة طلعالك بزااف وخاص نزلوهاليك باي طريقة
عبير مقادراش تحرك و اكرام بدات تعاونها توقف حتى وقفات و تكات عليها و بقات غادة بيها حتى وصلو للدوش دخلاتها و عاوناتها تنصل حوايجها و وقفاتها تحت الرشاشة وفتحات عليها الما بارد حتى شهقات عبير وبدات تحل عويناتها
عبير: بارد بارد الما و كترعد
اكرام: خاص تنزل ليك الحرارة بقاي مت تحت الما أنا غادي نمشي نجيب ليك البينوار
عبير بقات من تحت الرشاشة حتى كتشوف الما لي نازل منها مخلط بالدم معرفاتش علاش كتشوف واش مجروحة والو و هيا تحط يديها فتوتو ديالها وهيا تحس بشي حاجة كاينة لتحت شداتها بيديها وهيا تلقى جنين صغيور بين يديها كامل مكمول بيض كي الحليب وفيه عريقات فالزرق عندو يديدات و رجيلات و تقيبات صغار ديال العينين قدو قد الصبيع الصغير ديال يديها بالطولة بقات مدة و هيا مبلوكيا كتشوف فيه بين يديها و كتشوف يدها عامرة دم بدات ترعد بوحدها و الخلعة تملكاتها لا لا ميمكنش ميمكنش تخسر ولدها ميمكنش حسات بالدنيا كدور بيها و بلي خسرات كبدتها أصعب احساس ممكن تجربو الأم هو هذا تخسر واحد من ولادها كبدتها واخا يكون جنين و تشدو بين يديها كتشوفو وسط كفة يدها ممتيقاش مكرهاتش ترجعو لبلاصتو حتى يكبر مكانش عليه يخرج بهاذ الطريقة للدنيا..
كان خاص حتى يكمل تسعة أشهر و يخرج و هو عايش و تسمع البكية ديالو ماشي يخرج جثة مزال صغيير بزاااف دموعها دايزين بالسكات لدقائق وهيا كدستوعب داكشي لي بين يديها لدقائق وهيا كدستوعب بلي السبب لي كان مخليها تعيش مات السبب لي كان مخليها تقاوم كل الصعوبات و تحاول تبدى من أول و جديد مبقاش فهاذ الدنيا دقائق وهيا ساكتة حتى تسمعات صرخة خلات الحيوط تبكي معاها صرخة كتدل على كمية الحزن لي فقلبها صرخة لي كتعبر على مدى الانكسار لي هيا فيييه صرخة أم على فقدان جنينها صرخة خلات اكرام و الجدة يجيو كيجريو عندها غير دخلات اكرام شافت فيها عبير و مدات ليها يدها لي فيه الجنين
اكرام دارت يديها على فمها و هيا كتشوفو بين يديها بداو دموعها دايزين و الحاجة حتى هيا بقات فييها قبل كينطقو او يقولو شي حاجة كانت سادة عينيها و طاحت الأرض وسط دمها كتنزف........
نرجعو عند معتصم من بعد مفتح البيسي و شاف تسجيلات الكاميرا خرج من البيرو و سدو و طلع لجناح أيلول لي كانت فرحانة بالانجاز لي دارتو ز فاتحة واحد السيت كتشوف آخر مكاين فكساوي العرس حيت عارفة بلي معتصم مغاديش يتخلى عليها
شوية و هيا تشوفو دخل عندها و عيونو حمرين ايلول خافت من صورتو خلعها وهو هكاك مزال حتى مدوى معاها
معتصم غير دخل قرب ليها و شنق على عنقها: إذن نتي لي عاونيها باش تهرب؟؟ ياك؟؟ دابا عاوديلي كي درتو ليها؟؟
أيلول كتحس بالتنفس ديالها علاين يتقطع بقات كضرب لييه فيدو و تقمشو و هو مزال شانق عليها حتى رخف عليها شوية باش تقدر تدوي
أيلول: معتصم شنو كتقول؟؟ شكون هرب أنا معاونت حتى شي حد
معتصم: نتي لي عندك الربح باش تهرب ونتي لي غادي تستافدي و الدليل هو الكذبة لي كذبتي عليا فقوليلي شنو وقع و كيفاش حتى عاونتيها ولا مغادي يعجبك حال
أيلول: شمن كذبة كذبت؟؟ واش على داكشي لي وقع بيناتنا؟؟راني مكنكذبش
معتصم رضخها معا الحيط: متكذبييييش؟؟ راني شفت الكاميرات موقع بيناتنا والو فا أحسن ليك تقوليلي شنو وقع قبل متصيفطك للبلاصة لي جيتي منها
أيلول: كاميرات؟؟؟آشمن كاميرات؟؟
معتصم صرفقها حتى طاحت الأرض: واش كتكلبني عليا هنا باركة من تابوهاليت ديالك الكاميرات لي فالجناح راهووم سجلو لي وقع البارح قلتي نعست معاك و حوي*ك وانا طحت كاو مقصتكش كاع من غير ديك البوسة و نتي باغيا تبلاي عليا و تلقايك كنتي باغيا تمسحي كلشي كيف ديما ولكن لقيتيني بدلت القفل ديال الباب
معتصم تحنى لمستواها و شدها من شعرها: دابا دابا غادي تعاودي ليا كيفاش عاونتي عبير حتى هربات حيت اليووم غادي نسيفطك للبلاصة لي جيتي منها
جرح لا يذمل الجزء السابع
محتوى القصة
التنقل بين الأجزاء