حكاية أنثى الجزء 64

دخلات لمحل و قربات عندهم مغلغلة حتى هزو فيها راسهم بجوج فدقة وحدة...... لمحات البراد ديال اتاي محطوط فوق الطبلة مع طبسيل فيه المسمن.....

كريمة (طلعاتها و هبطاتها) : غيثة لاباس؟؟؟

غيثة (مقندشة) : شغلك الزيين " رفعات صوتها" اش كديري هناا

كريمة (عقدات حجباانها) : اش هاد الطريقة باش كاتهضري معايا

جابر (عرفها علاش جاية ) : غيثة اجي نعطيك داكشي ديالك و سيري

غيثة (شاف فيه الشوفة ديال يااااك اسي) : بااااااغي تصدرني باااش تبقى على خااااطرك معاها يااااااااك "شافت فكريمة و نطقات مغددة" ونتي المدلولة ماباغاش توووبي مزااااال غا كادوري ليا هنا ببراااادك و مسمنك

كريمة (ناضت ليها مشربنة) :جمعييييي راااااسك البرهووووشة دابا نوووريك المدلولة كيدايرة...ملقيتي لي يربيك

غيثة:كنتسنااا فيك تجي تربينيي السحاارة

حابر:(بحدة )غيثة

كريمة: جابر شهد عليها راه مكنضلمهااش ...اش هاد لبسلات معرفت منين خرجتي لاقبال

انصاف (تخلعات و خافت تنوووض شي روينة تاني... جرات غيثة من يدها و نطقات) : غيثة ياله نمشييو اش كاديري

غيثة (تنترات منها) : طلقي مني نوووري مها بنت لغاااالية علاش قادة

مجااات فين تكمل كلامها حتى تلاحت ليها على الزيف جرااااتو ليها ناوية تنتفها مغددة عليييها ولكن جااابر دخل بيناتهم فالبلاصة بعد غيييثة شادها من درعانها بجوج و حمر فيها عينيه

جابر (بحدة) : وااااش انا حيييط قدامكم لا نتي لا هي اش هاااااد ضسااارة

غيثة (بلا ماتشعر نطقات) : طلق مني طلق نوريها كيفاش دووور على راجل مزوج طلق " عينيها تغرغرو بلا هواها" ياااااك اجااابر ياااك هادشي باش بدلتيني...(ضرباتو لصدروو شاعلة فيها العافية كتغوت ) كتغوت علياا بمسبتهااا اجاابر ...انا لي مكنتيش كتخلي شي حد ايقرب لياا (بصعرة كضرب فصدرو وهوا مشوكي فيهاا )مخليي هااادي (طاحو دموعها )تغوت علياا وتسبنيي

شاف فيها مصدوم من كلامها ياله بغا ينطق طاااارت من يدو بحال الزوااااق و مشات لداك الطبسيل ديال المسمن هزاتو طوعاتو جا مشخشخ فالزنقة و المسمن تشتت.... و مدات يدها لبراد هزاتو هكاك سخون مشاعراش اش كااادير العافية شااااعلة فيها لداخل ماعرفاتش تفسر احساااسها... ماوصلاتش مزال لحقيقة انها غاااارت عليه و نار الغيرة كاتحرق فيها...... هزات البراد من قاعو و لاحتو على كريمة لي كانت كاتقاد فزيفها و تنهج ماشعرات حتى جا ليها لبراد فراسها طنطنها جاب الله كان خاوي تشتت عليها اتااي ونعناع و تخوا عليها شوية غوتات شادة جبهتهاا ...طارت انصاف كتجر ف غيثة تبعدهاا وصلاح لمتعلم كيتفرجر فلمطايفة وكيحك فلباب على براا

صلاح:عطاتك ليام ابا دكاليي يضاربو عليك لوليات

غيثة :اقسم بالله ونلقاك كدوري مزال هناا تن

انصاف(جراتها بنتير )زيديي قداااميي اغيثة براكة من شووهة

غيثة(شافت فجابر واقف كيشوفيها وايديه فجنابو ) عقل الدكالي...والله هاد لخانزة لحطات رجلها ففراشي وتوسدات لي توسدت

انصاف:غيثااا

تنترات منهاا ومشات هزات حوايجهاا وشافت فيه وقالت:يخلصك الله

كريمة : والله متبقا فييك اغيثة

غيثة:سيري شعلي شمع (تمشات ورجعات )ومتنساايش طلعيه معااك

جابر:غيثااا غنسلخ مك هاد نهار صباح الله

جرات انصصاف ومشاات شادة صاشياتها كتمسح فدموعها

كريمة(بدموع )شتي ...شتي على عينيك اشنو درت ليها

جابر(شافيهاا كيرمش ويكدد ف شنايفوو )سيري اكريمة الله احفضك ...سيري

مشات كتجمع فلمسمن فزنقة وغادية لمحال قبالتو .. فينما تقرب خطوة كتبان غيثة تريب ليها الحفلة

**

دخلات هيبة مع طناش كتسمع لهدرة عند حمااتهاا...حشمات تدخل تسمعات اسمها من طرف نزهة

نزهة:هيبة

هيبة(هبطات سلمات عليها )بغيت ندخل سمعت لهدرة وطلعت

نزهة: مكاين حد غير ولدي مروان مراتو او ولدو

هيبة:ااه مزيان

نزهة:دخلي بعدا

هيبة:حم واخة اخالتي

تبعاتها وقبل مدخل رمات عينيها لجيهة مراية جات فدخلة مزوقة شافت راسها وسرحات شعرها من اللور ..رمات عينيها لصالون بانت ليها شابة تكون قد هيبة فلعمر او اكبر بسنة ولكن عامرة لابسة جلابة فلكحل طالقة شعرهاا كحل ودايرة طاطو لحجبانهاا فمها عامر معكراه بعكر حمر ماط وضفار مصبغيين وبييضة ...كالس حداها ولد فعمر الاربع سنوات

هيبة(بادب)سلاام

هزات البنت راسها بابتساامة قالت:السلااام

تحنات من صواب تسلم عليهاا بادب ريحة لميكااب كضرب من وجهها سلمات على لوليد صغير وضارت لجنب ونزهة كتعرفها فالرجل بلي هوا مروان شاب فلعشرينات هوا اصغر فرد فعائلة هشام عمرو كيتراوح بين 28 او 27 سنة لا غير ..ضعييف وشنايفو مايلين لازرق من لمحة اللولة تعرفوو كمااي من درجة ممتاز وخة ملامح وجهو زوين ولكن زينو بهات ولونو كااشف تعطيه اكبر من عمرو بسنوات

نزهة:هادي اسماء مرت مروان وهدا ولدهم امين

اسماء:هادي مرت مولاي هشاام ؟

نزهة:هيا هاادي

اسماء (تبسماات )الله ايباارك اختي

هيبة:امين ياربيي

مروان(بصوت مدعدع شاابع دخان ) فين هشام اختي ؟

هيبة:مزال ميجيش عندو شي خدمة بعيدة على لمدينة

مروان:مم نتي خدامة معااه

هيبة:اه (انساحبات )خالتي نبدل علياا ونجي نعاونك !

نزهة:واخة ابنتيي

هيبة:خلي لباب تاع جردة ندوز منوو هه وحدة مشات لكوزينة ولخرا طلعات خلات عينين اسمااء عليهاا ضحكات داير رجل فوق رجل وميقات وقالت لراجلها )ماشي شيي زييين ياك أ مروان ؟ ماريا حسن منهاا

مروان (همس ليهاا )دخلي سوق ك** بدا كيعطيك صداع تاني ؟

ميقات فييه وهزات تيليفونها كتبقشش

هيبة مشات بدلات حوايجهاا بكندورة ديال الدار فلون لبيج بسفيفة فلحمر وبليغة فلحمر داارت دهبها تزينات بييه وهبطات خرجات دازت من جردة لباب للكوزينة لقات نزهة دايرة لفواطة كتوجد فالصينية دخلات هيبة بابتساامة وقالت:خالتي فاش نعاونك ؟

نزهة:ديك شلاضة لي درتو ليناا دااك نهار نتي لي درتيها ؟

هيبة:اناا ههه

نزهة:ديري ابنتي الى قدرتي الله ارضي علييك

هيبة:واخة اخالتي كلشي كااين ؟

نزهة:وشوفي الى مكفاكش راه دريس نصوني لييه يتقدا شنو خاص

حركات راسها بواخة دارت طابلية تماا وجمعات شعرها كتجبد فلخضرة والروز لي تصلق باش دير صلاد جريدة كيف كيسميوها البعض

نزهة:اجي تشربي معانا اتااي

هيبة:لا اخالتي غير بصحة نساليها عاد نجي

فنفس لوقت دخلات سيليا مع جدها او وراهم دريس جاب لي قالت ليه هيبة داباا دخل عندهاا لكوزبنة وقال:هاي هاي ناس لحداݣة ناضو لكوزينة

هيبة:هههه اوى شنو

ادريس: سانك سانك مكاين ميتقال ...صونا ليا هشام دابا مزال معطل ..قيدي ليا شنو خاصك نمشي نتقدا لييك لعراضة ديالك فلعشية

هيبة:نحيد هدشي من ايدي ونكتب ليك

دريس:الى مكاين لي يجيبهم نمشي نجيبهم زعمة على داركم

هيبة:لاا كاينة ختي

دريس:ممم غتجي تا انصاف ؟

هيبة:ضروري ههه علاش

دريس:كتجيني حشومية بزااف

هيبة:هههههه بزاااف حنا نيت وكتحشم منا

جات سيليا كتبكيي عند هيبة تشافت فيهاا مخلوعة :ماالك

سيليا:هءهءههء ضربني امييين

هيبة:خوك الصغيير ابنتي صاافي اجي كلسي حداياا

دريس:اجي اعميمو عندي اجي

الحاج (تبعها)اجي اديامضا نتااعي ...لاتبكيشاااي الالة بنتي يااا عنأود العنب اجي

مشات عندو كتبكيي هزها كيفشش فيهاا وامين كيبكيي على الحاج

الحا:اوى لاااا اسيدي اميين متضربشاااي ليا ضيمانضا تااعي

اسماء:جاتو الغييرة اعمي هههه

الحاج:وصاافي وصافي متكونشاي باسل اسيدي امين واجي تكعد حداياا ولايني متعملش لمسايل انعلأ ولدي من شفاغو

كلس حداه وتركن وسيليا فحضن الحااج مخشوشة فييه كي لمشة كتلعب فلحيتوو

**

كالسة فلقهوة مقابلة مع جميلة وعقلها سارح ولخرا كتكميي موانسة بحجااية حياة

جميلة: يالهبلة بلاكي من لغبينية ...صاي نسااي توت فاصون هدشي نتي تعرفييه ...لغولاصيون مع لبوكسور كانت روحها اتسالي سوا ليوم سوا غدوا

حياة(تنهدات وحجرة محطوطة على صدرها ) دابا شوفي كي ضبري ليا نبيع الطموبييل نمشي نتق** فحالي من هاد لقنت

جميلة: تنكيت ما شيغي طموبيل مبيووعة شحال طلبي فيهاا ؟

حياة: 13

جميلة:بلاوروو ..مانيش نفهم بدرهم لمروكي

حياة :13،000€

جميلة:انحوس لييك على الشاري مترفدي هم (تنهداات )ايااي لمووغ سي ان كوشمااغ

حياة:مبقيت باغة لا حب لا زمر ...دوزت حقيي

جميلة:لقيتها لك ...ماكوبيين تشري من عندك

حياة:واش بصح

جميلة:نتأكد ونقولك ...كانت تحوس على ڤواتيغ مزيانة

حياة:راك عارفة طموبيل ياله ضاربة عاام مزال جديدة وتوت اوبصيون

جميلة:ولا عالييك

***

دخل هشام لدار ...لقا السلام فالصالون ومشا امين كيجري عندو هزو باسو وقال:لبااس علييك اسي امين

امين:لبااس ...عميي سيليا قمشاتنيي

هشام:ايااي اش درتي ا سيلياا

تمخشات فلحااج مخبيية ...بغا يدخل وشاف هيبة فلكوزينة تبسم لطيفهاا ...نزل امين مشا كيلعب

نزهة:اجي اولدي تشرب اتااي

هششام:واخة الواليدة

خداوه رجليه لكوزينة ايديه فجيااب والاخيرة عاطياه بالظهر تبسمات لقدووموو ودارت راسها مشاافتوش حتى باغتها بقبلة على عنقها هربات منو كضحك

هيبة:خلعتيني

هشام:وليت بوعو

هيبة (داعبات نيفو بصبعهاا ) حبيبي ماشي بوعو

هشام:وشنو

هيبة (دفعاتو مخرجة عينيهاا )تء غتجي خالتيي

هشام (بعد كيضحك وقال)شنو كديري

هيبة:هبطت نعاون خالتي شوية ...راك شتيها عياانة صايبت ليها لصلاد

هشام:فين ادريس

هيبة:مشا يتقدا لياا لي خاصني

هشام:وخة الزين

قرصها من حنكها ومشاا خلاها كتبسم غير بوحدهاا

دارت لكيت فتيليفونها كتهدر مع اقباال وكتقطع فلباربة

اقبال:كوني هاانية

هيبة:مكرهتش كون حياة كلسات حتى تجي عندي حتى هياا

سكتات اقباال مجاوباتش تنطقات هيبة:الوو بيلو

اقبال:معاك معاك غير طريق عامرة

هيبة:منشدكش...تالعشية ان شاء الله

اقبال:ان شاء الله اختي ربي عوينك

هيبة:اميين

قطعات معاها شافت فلباب وتبسمات لاسماء لي دخلات

اسماء:تبارك الله على لعروسة ديالناا

هيبة:براك الله وفيك ...يكما بغيتي شي حاجة

اسمااء :هههه ويلي نسيتي راه انا كنتهم من زمااان ههه شقيت فهاد لكوزينة تطلعات لياا فرااسيي هههه شنو هاديي ماكينة تاع لمااعن ؟

هيبة:اه

اسمااء :غزالة يمكن عاد شراتها مكاانتش

هيبة:ممكن (تبسمات ليها وهبطات راسها مكملة شغلها ولخرا كتبركك فلكوزينة

شربات لماا وجابت الصينية تاع اتااي

حطوو ليهم لغداا هيبة كتوجد ودريس كيحول تحطو غدا متول

دار ليها هشام بلاصة حدااه وجات كلسات حداه بكل فررح وجنبهاا سيلياا كتهز وتعطيها وتقطع ليها الخبز دايراها بحال بنتهاا ولخرا كدالك عزيزة عليهاا

الحاج(شاف فايدين اسمااء وميق ) لاش مغبية دوك ضفغان كي نسغ تبقي ستغ

اسماء::مالهم اعمي الحااج خاسرة عليهم فلووسي هههه

هشام:الحااج ..كول

الحاج(ميق ونطق بهمس )الله تعالى يغصبك ...يا مغصوبة سنين

حسات برجلوو على رجلها وهمس حداها :كولي اش كتلمسي

هيبة (بابتسامة جاوباتو بنفس النبرة )كنااكل ههه

***

دخلات لدار معندهاا خاطر من ورا مشافت كريمة مع جابر وهيا مامرتاحاش فخاطرها ...ندمات كاع لاش مشات عندو

دخلات لبيت كتجبد فالصاشيات وانصاف كتحط فحوايجها

غيثة :شفتيها كي لاصقااه كتقلب غير منين تدوز لييه ...لخانزة لمدلولة والله ميديها فيهاا

انصاف:ونتي مالك اصااحبتي ...ياك مبغاهش او واقفين على طلاق شنو بغيتيه ميتزوج ميتصااحب ؟

غيثة (بنتير )يتزوج ؟ و الله لكانت لييه وكريمة وخة تنطابق سما على لرض متديش جابر

انصاف:وعلاش ؟

غيثة (وجها حمر )هكااك والله متديه

دخلات لدووش معصبة كتخبط فشنو ماجا قدامهاا

الغالية:مال هادي

انصاف :معرفتش ...والله معرفت ...

بردات الطررح وخرجات ساكتة دخلات كتقلب فشنو خدات جوج قوامج او سروال لارج وقصير شوية

الغالية:اش هاد لحوايج مهدولين تااني ؟

غيثة:اويلي اماما سكتي سكتي ...هادي راه لاموض جديدة اوڤر سايز كيجيو واعريين انلبسهم وتشوفي كيغيجيو

بدات كتحط حداهم او وتلبس السروال فيه لحزام لفووق وقالت الغالية:محزمة كي شطابة

غيثة:اش كتفهمو فلموضة

لبسات الشوميز فلبلو سيال خشات لقدامي فسروال واللور بقا مطلووق ولارج

غيثة:عندك تماما شي فولاغ بيض

الغالية:لااا البيض معنديش ديري زرق

غيثة:لا وييلي خاصني بيض (مدات ليها ايدها) عطيني نشري فولاغات

الغالية:على قلتهم عندي

غيثة:هادوك تاع الشارفات انا بغيت لي كيتجبدو كيجيوني زوينين ....وداباا درنا زيف وحلة حيدناه وحلة ؟

الغالية:شحال بغيتي اهااد لبنت

غيثة(كدور فعينيهاا )عطيني 200 درهم

الغالية :هادي لاش

غيثة:نشري جوج فولاغات راهم غالين اماما وعفااك صبري علينا تيرجع شعري كي كاان

تنهدات ومداتها ليهاا زرقة ...قيسات لحوايج وخرجرات جارة معاها انصاف مشاو لمحال خاص بلفولارات شرات جوج واحد بيض واحد كحل ورجعات تقيسهم مع لبسات جداد

العشية جاتت وهيبة فدارهاا كتوجد فلعشاا من صباح مكلسااتش طلعات لدارها تاني ينيشان لكوزينة ...تدخل عندها هشام :نعاونك اهيبة

هيبة:شنو دير ههه

هشام :شتك بحالاا حاݣرااني (كيحيد فالسااعة الجلدية من ايدو وجمع لقاميجة وقال:بوون باش نبداو بيك ولا بلخضرة

هيبة:ههههه قطع لياا البصلة

هشام (جر لقطاعة ولموس كيضحك )حشومة عليك بداي بالساهلة

ضحكات وغسلات ايدها حداه خلاتو كيقطع ومشات كتحرك فلحم فطنجرة لكبيرة ...كتسمع فييه كيجر فنيوفوو وقال:احح حارة

ضحكات وشافت فيه لقاتو مغمض عين ولخرا دايزة بدموع ...قربات ليه مسحات ليه دموع لي هبطو وقال:اش هدشي اهشاام تبكيك بصلة

مسح وجهو فدرااعوو وقال: اهانة هادي داباا ؟ صافي برااكة

هيبة(هزات القطاعة )برااكة

لاحت البصلة فلحم وسدات وعطاتو ينقي ليها ماطيشة وكيعطيها تقطع ...عاونها علاش قد مونسهاا ومضحكهاا مرة مرة تعطيه يدووق يشكر ويعاود ...وهدشي مفرحهاا انه الحاجة لي طيبات كيقوليها زوينة

*الكلمة الطيبة صدقة *

تعشاات العشية والمغرب مبقا ليه والوو وهياا واقفة مرتااحتش بغات كلشي يكون هوا هدااك ريحة دجاج ريحة لحم عااطية فدار

ماشي غير خوتاتها علامن عارضة حتى على جابر وشهيد

وجدات كلشي خلاتو كيطيب ومشاات لبييت تابعاهاا سيليا لاصقة فيهاا

كلسساتها حداهاا ومشاا كتجبد شنو تلسب

سيليا:اشنو اتلبسي اطااطا !

هيبة:قفطاان

سيليا:نلبس حتى انا قفطاان

هيبة:لااا نتي عندي ليك كاادوو

جبدات ليها صاشية خرحو القلوبة من عينيها مداتها ليها ...جبدات منهاا كسوة قطنية تاع الصيف بلوينات موردين مع صباط بلا فلحمر مناسب الوان لكسوة وبانضة تاع شعر ...نقزات بفرحةة وعنقات هيبة

سيليا:ميغسيي بوكوو طاطا

هيبة:بصحتك احبيبة ...صبري نلبس ونلبسك حتى نتيي

سيليا(بفرحة حضنات لكسوة وكلسات فطرف سرير وشعرهاا مطلوق على ضهرها )داكوغ طاتي

تبسمات ليها ومشات لبسات قفطان جوهرة فلبلو غوا مع بليغة بنفس اللون جاي ايفازي دار ليه مجدوول كحزاام. كيجي راقي فاللبسة مشطات شعرهاا بلبلاك ومكات حيت غغيكونو غير نساا تريحاات ولبسات سيليا تما نيت مشطات ليها شعرها خلاتو ليها مطلوق ودارت ليها لبانضة على شكل بابيون فلحمر وتاها اللون مع زعرة

دخل هشام لبييت هز عينيه ف هيبة ونظرات الاعجاب كسات عينيه من جيهتها واضحة

هشام:بصحة

هيبة:الله اعطيك صحة

سيليا:باباا شوف لكاادو لي جابت لي طاطا

هشام(هبط عينو لبنتو مقرب ليهم هبط بااسها وقال )بصح ! بصحتك ابابا ...ياله هبطي عند باا سيدي بغااك

سيليا:نمشي نوري لميمة. لاغوب دياليي

خرحات كتجري ...تقاد فلوقفة وهيا حدااه كتقاد فلبراصلي فايدها ...لامس بشرتها بدفئ ايدو وسد ليهاا لبراصلي فايدهاا بحركة بسيطة باس رااحة ايدهاا خلاهاا ساكتة ...حشمهاا وسكتاات مكتافية تبسم ليه عاجبها لحال

هشام:اش هاد زين عندي

هيبة:هه بصح جيت زوينة ؟

هشام:زوينة وسكتيي (جرها عندو من خصرها )ولكن عنداكك تهبطي بهادشي لتحت

هيبة:ههه لاا كون هاني (كدور فعينبهاا )كتغير عليياا

هشام(تلمس حناكهاا بخلف ايدو )لي ميغيرش على مرتو منسميهش رااجل

تبسمات مهبطة راسهاا تصونا تيليفونها وقالت:يمكن وصلو

هشام:غنهبط عندهم تسنايهم هناا تيجيو عندك

هيبة:هههه وخة الشااف

باسها فعنقهاا وخرج خلااها كضحك غير بووحدهاا فرحاانة وعايشة الحب الحلال لي كينبت فقلبها شوية بشوية ...بتنهيدة رااحة كتشوف راسها فلمرااية

مشات لبالكون كطل بانت ليها اقباال بجلابة مخزانية فلكحل هازة صاشية كبيرة فايدها طالقة شعرها الاسود على راحتوو معاها لبناات او الغالية شادة اسماعيل فرحانة لبنتهاا كدور عينيها فدار تبانت ليها لفوق وضحكات شيرات ليهم ودخلاات

حلات باب داار كتسمع فيهم طالعين كيهدرو مع ننزهة فدروج زغرتات الغاليية كتصلي على نبيي والحاج كالس فلبيت ديالو بكندورة مخزانية شاد تيليفون كيبقشش فيه لبس بلغتوو وخرج لقاا هشام فلباب

الحاج:جاو نسابك الحبيب؟

هشام:عاد طلعو

الحاج(تحنا كيطل من دروج مبان ليه حد )شكون جاا

هشام:خوتات هيبة ومهاا ...انا كنتسنا ف شهيد وجابر

الحاج:ميعرفوشااي يسلمو علياا ؟

هشام: دابا يسلموو عليك

الحاج؛نطلع نسلم ؟

هشام(هز حاجبو )الحاج ݣلس تيجيو هوما عفااك

الحاج(رجع لصالون)ماا أولتي عييب اولدي

**

الغالية:تبارك الله تباارك الله ...الله يتبت الغرس ابنتيي

هيبة:اميين اماما دخلوو غتبقاو واقفين خالتي نزهة نتي راك مضيفااش

نزهة:هاني ابنتي ههه دار تبارك الله رضاتها غزالة الله ارضي عليهاا

الغاليية (كترخف الشال حيت الصهد ) التاويل كيعجبهاا

نزهة:لا معندي منقول

هيبة:عدبتو راسكم اختي

اقبال(مدات ليها اش جابت )لكادو تاع زواج ودار ...بصحتك

هيبة:ههه مجيتكم كافية اختيي ....غيثوو جا معاك لفولار

غيثة:حلفي !

هيبة:والله اختي مع وجهك عامر وحروفك حرشين جاك وااعر

انصاف:قلتها ليهاا

غيثة:ومتولفوهاش يرجع شعري ونحيدو

هيبة:هههه اوى باز دخلوو

كلسو كلهم ف الصالون وسيلياا كتمشي وتجي من وحدة لوحدة توريهم لكسوة وسبااط فرحانة استقرات عند الغالية كتلعب مع اسماعيل لي سااكت كيدور فعويناتوو لكووحل لكبار

هيبة دخلات الساشية لدار كانت خارجة ونتابهات لشنو فيها وتبسماات هزات لفوقي كانت كرطونة فيهاا لعبة بنووتية ولتحت كرطونة مغلفة ...خلاتهم هكاك وخرجات ل كوزينة كتقاد فالصينية جات عندهاا انصاف بكسيوة صيفية وتقيشرات بويض

انصاف:ختي نعاونك

هيبة:لهلا يخطيك علياا احبيبتي ...هاكي حوليي معاياا

انصاف:هيا اللولة ههه

طبيلة تحطات مشكلة بلحلاوي او لفاكية على انواعها كويس تاع اتااي فنفس الوقت قدات صينية لرجال فنفس طبااسل

هبطات انصاف طباسل فايديهاا تعطيهم لهشام حتى بان ليها ادريس جاي فدروج داير لكاسكيط تااني

دريس: لحلوة هازة لحلوة

انصاف:حم

شد من عندها طباسل وعينيها فلارض مهدراتوش وقال: اجيي هناا

معطاتوش وقت دغياا هربات طلعاات وهوا متبع ليهاا لعين وقال:عقلي الكميشة

هشام:جابر كيغادي مع الخدمة

جابر :بخير الحمد لله تمارة ضروري منهاا

هشام؛داكشي لي كااين ...نيت بغيت ندوز عندك على وديت واحد لبلان عندناا ...الطولة تكون بلعود وخاصنا شي نجار عمرك خدمتي بحال هادشي

جابر:اييه ماشي مشكيل فايت خدمت بحال هدشي

هشام: نهار تنين هكاك ندوز عندك تمشي تشوف فين نشرح ليك شنو بغيت وتخرج دوفي اش بان ليك

جابر:الله يسر

الحاج:وعلاش مجا معاكم سيدي ناصغ اولدي شهيد

شهيد: غير مكتاابش وصافي اسيد الحاج

الحاج؛ساعة سعيدة هادي لي تجمعناا معاكم اسيادنا

جابر:الله اكبر بييك الحاج

الحاج:أولي اسيدي شهيد ...مشكيت علييك بحغيق الرااس بحال المطارأ تضغب فغاس ....ديك لويلة نتاع دوليبغان مأضاتليشااي متكونشاي مغشوشة ؟؟

ادريس (مد ليه اتااي ) الكفرة بالله ايكونو بدلوها ليك بالجير

شهيد:ههههه لا لا دوليبران متقضي ليك والو فشقيقة خود *** ايفيكاص ليها

الحاج؛الله امتعك بغضا ويغحم من قغاك ...(ميق فدريس )هاد لويل ميفأه شااي فهادشي طبيب بلفم

دريس:راه بصح طبيب ديال لفم ...شوف ناب لي ركبت ليك عمرو طاح

الحاج ؛ لا لا معمغو طاح الله اغضى عليك امولاي هكا نبغييك

ضحكوو كلهم مدوزين اتااي بلهدرة

دخلات سيليا هازة اللعبة فايدهاا

سيلياا :باباا شوف لكادو تااعي ...جابتولي طاطا اقبال

هشام(بابتساامة )بصحتك ابنتي قلتي ليها ميغسي !

سيليا :بيان سييغ وبستها بوسة كبييرة

ادريس:اجي نلعب معااك

الحاج:دغنااا لولاد بكغي معااك باإي تلعب

دريس:مالي شرفت ...(هز حاجبو لشهيد لي خرج فيه عينيه )غير لبارح قصرت معااه طرح فلبابجي .....غلبتك الساط

شهيد(تقاد فبلااصتو كضحك )لا لا كنت مغيب ماشي اناا

هشام(حك جبهتو كيضحك )لا لا يعول عليكم لواحد

جابر:ههههه (هز تيليفونو ملي صصونا ليه لقاه كلياان مجاوبش لقا نضرة على الواتساب مشا لسطوريات بانت ليه لفوق عاد لاحتو ب خمسة دقايق حرك راسو بلا حول ودخل يشوف لقاها لايحة تصويرتها فطموبيل تاع اقباال ضاربة الشمش فعيننيها بانو عسلياات ولونهم فااتن ولخالة تحت نيفهاا وشفايفها لباارزين ولي وتاهم لون لعكر ...الايلاينر ووشفار مجبدين كان مزوومي على تصويرة ورجع خرج ....دخل النفس كتيرة لصدروو وخرجو فتنهيدة كيحك فعيينه من رواها دخل معاهم فلحديث

ولفوق كدالك هدرة مدورة باتااي عقل وحدة فيهم مخطووف وشكون خاطفو ؟ هم حياة ومصيبتها لي غرقات فيها تالودن ...كضحك وعاطية لنزهة صوابهاا ولكن عقلها مرفووع

داز لعشاا فجو زوين لخوتات الفوق ورجال لتحت من بعدماا تعشاو تسرح لسان لحااج وبدا كينغمهم بالطرب الاندلسيي بصوت متمكن نظراا لالتحاقوو بفرقة موسيقيية لطرب الاندلسي في فاس

الحاج:

شَمْسُ العَشِي قَدْ غَرَّبَتْ وَاسْتَعْبَرَتْ

عَيْنِي مِنَ الفُرْقَا

عَلَى الشَّفَقْ قَدْ سَطَّرَتْ حِينَ غُيِّبَتْ

زَادَ العَشِيقْ شوقا

حَتَّى الطُّيُورْ قَدْ غَرَّدَتْ وَتَرَنَّمَتْ

تَرْثِي عَلَى الوَرْقَا

يَا شَمْسَ العَشِيَّة

أمْهِلْ لا تَغِبْ بِالَّلهِ رِفْقَا

هَيَّجْتِ مَا بِيَ

حَتَّى زِدْتَنِي فِي القَلْبِ شَوْقَا

تَرَفَّقْ عَلَيَّ

إنِّي فِي الـمَلِيحْ قَدْ زِدْتُ عِشْقَا

فِي الوَادِي الـمُذَهَّبْ

كلهم كيسمع لييه وسيليا كالسة فحضنو كتصفق بايدهاا وكتشوفيه كيعجبها صوتوو

دريس:شتيي مرة مرة كيتسرح ليه لساان فلغنا مبقات لا أ لا غ

شهيد(مربع ايدو كيضحك وهمس لدريس) والله اخااي هاد مولاي عبد الباقي نمرة حرة ههههه

دريس: امقص بالله عندي هاد الواليد هههه

جابر:سي لحاج تبارك الله علييك

الحاج:ههه شويش وصافي الحبيب

وقف جابر : اوى هدا لوقت

هشام(شاف الساع لقاها قرابة لحضاش ) مالك زربان

جابر:لا نمشي ...سلم ليا على هيبة

هشام:مبلغ

ناض معاه تالباب براا وتوادع معااه

لفوق كدالك ناضت اقبال وتبعوها البنات

هيبة:مزال الحال كلسسو بلاتي

العالية:لا ابنتي نمشييو الليل على ختك وطريق واللييل

نزهة:بصح نييت ...الله اجيكم الخير اختي الغالية

سلمات عليها من وجها وقالت:الخير فوجهك الا لحاجة

نزلو فدرووج بقات واقفة هيبة فدروج كتوادع معاهم منزلاتش توخرات اقبال شداتها هيبة عنقاتها شاكراها على لكادو

هيبة:اقباال باقة عيانة ؟

اقبال:لا الحمد لله شوية

هيبة:حسيت بيك ماهياش ... ملي مرضتي ونتي غير ساكتة وساهية ...شنو وقع بينك وبين حياة حتى غضبتي عليهاا ...حتى فلكروب مبقيتوشش كتهدرو

اقبال :متشغليش بالك (داعبات شعرها )باركة غير تكوني نتي بخير نتهناو من جيهتك لباقي يسر فيه الله

هيبة:انا بخير ...ولكن ملي كنشوفك هكا كي ضرني خاطري ومعرفتش علااش ...اخر حاجة نبغي هياا تمرضي ولا توقع ليك شي حاجة

اقبال:ربي لي كيعطي اهيبة ...تهلاي فراسك (عنقاتهاا )تصبحي على خير سيري رتاحي عيناك ليوم

هيبة:عدابكم رااحة اختي والله

هبطات للتحت سلمات على لحاج فلباب واقف

الحاج:او حياة مالها مجاتشاي معاكم ؟

الغالية:مشات لعند راجلهاا

الحاح:اخيااار مزوجاا

دريس(وراه بهمس مسمعها ليه )دوماااج

الحاج(دور وجهو لعندو ميق فيه ) لله اغصبك

توادعو معااهم وكل دخل لمحالو دريس طلع لدارو او هشام هز بنتو لي كتاوب بنعاس وطلع

سد باب دار ندا باسمهاا جاوباتو بصوت خافت من الصالون كتجمع فالطبلة مزال بالقفطان

دخل بنتو لبيتها عطاهاا بيجامتها خلاها كتلبس مدوخة بنعااس قاد ليها الشورط لي لبساتو عوج وطلعها لبلاصتها غطاهاا...خلا كرة ضوئية كضرب فلحيط باشكال نجوم صغيرة فاللون الازرق الغاامق مكيخليهاش تنعس فالظلام ...سد الباب ومشا لعند هيبة لكوزينة لقاها مضرووبة بلماعن

هشام:هيبة خلي هدشي تالصباح ونعاونك فيهم

عاطياه بالظهر وكتهدر:لا لا نحيدهم باش نرتاح

قرب لجيهتها شاك فصوتها دورها عندوو هز ليها راسها وقال:كتبكي ؟ اش وقع مالك

طاحو دميعات من عبنيها ومسحاتهم شفايفها كيرجفو وقالت:معرفتش هء

هشام(جر كرسي من طابل مونجي كلسها وكلس جنبها حاضن ايديها وسط ايدو )مال حبيبتي شنو وقع !

هيبة:جاني احساس خاايب فخاطري معرفتش مناش (مسحات عينيها كتحدد لكحل لي هبط )

هشام:قولي اعود بالله من الشيطان الرجييم ونوضيي خلي هدشي تالغداا ...صليتي العشا

هيبة:مزال

هشام:صلييه وصلي جوج ركعاات غترتااحي

حركات راسها بااه كتمسح فعينيها...غمة وجاتها على صدرها من ورا متوادعات مع اقباال

نوضهاا طافي الضو فلكوزينة دخلها البيت خدات بيجامتها هزات برودوباتها تديماكي وجها ...شعل التلفازة ومتكي فبلاصتو توصلو مساج حلو ولقاه من ماريا فلواتساب

ماريا: لويكاند جاي غنجي ...واشش تقدر تجيب لياا سيليا لمراكش

هشام:نن سسليا عندها لي كوغ ديال calcul mental (الحساب الدهني )او لپيسين حتى تبقا كانز جوغ ليكول ديها تماا بليس الصهد عليهاا

ماريا:ولكن انا باقة بغييت نكلس مع ماما شوية هنا فمراكش

هشام : ݣلسيي

ماريا:جيبهاا وجيي عفااك

هشام:بونوي مارياا

خلاها كتكتب وطفا لويفي مسح لمسجات معاهاا باش ماتبقاش طالعة نمرتها اللولة فلواتساب وحط تيليفون كيتفرج حتى دخلات هيبة مشات لبسات عليهاا كتصلي خرج هوا طل على بنتوو قاد ليها لحاشيية تاع سرير طلعها باشش مطيحش غطاها وخرج دخل لحمام

دخل لبيت لقاها صلات وتلاحت فبلاصتهاا مهدودة عينيها كيتلصقو

هشام:شي مسااج ترتاحي

هيبة:مكرهتش ههه

كانت ناعسة على كرشها تحسات بايده تحت تيشورت كتماصي ظهرها حيدو ليها بقات بسوتياان كيماصي فكتافها مرة مرة ينزل يبوسهاا

هيبة(غمضات عينيها )ايدك حنان جابو لي نعااس

هشام:نعسي اتكوين عيتي..وقف طفا التلفازة وجا تخششا حداها ...تلاحت فحضنو وغمضات عينيها مستسلمة لنوم

***

عند غيثة لي كلشي نعس وهيا نعاس هرب من عينيهاا ساهرة فبلاصتهاا ششادين البيت لي كان تاع هيبة وانصاف كل وحدة فيهم شادة ناموسية ...انصاف نعسات وغيتة حاطة التيليفون على ركابيها كتفرج فالظلام دايرة لكيت ومربعة ايديهاا

لقطة وسط لغابة لحبيبين كيتبادلو القبل مطيح فبالها غير لقطات مع جابر حدا البير الظلاام و العلاقة لي جمعاتهم داك نهار متقدرش تنساهاا ...ميلات راسها على لمخدة مغمضة عينيهاا مخلية عقلها يسرح لداك نهار لي خرجات من بين شفايفو كنبغييك ...طلعاتها التنهيدة وتفرفير فكرشهاا عاضة على فمهاا

رجعات لوااقع دايرة بوز لتيليفون كتلعب بخيوط لكيت معوجة فمهاا كترمش ...مشات لكلاندري مبقات الا ايام قليلة على اول جلسة ...حطات التيليفون بزعفة وطاحت على لمخدة بزعفة

غيثة:زمر تفوو (تغرغو عينيها بدون شعور تكمشات فبعضياتها هاربة من بعض الدكريات لي هاجماتها دقة وحدة ...لكل حاجة زوينة كدير ليه حاجة خايبةحداهاا

رجعات لتيليفون دارتو تحت الغطا ساني فيها الضو كيبانو عينيها مضببين بدموع مشات لالبوم ...هابطة هابطة فبزاف تاع تصاور ولفيديوات تالقاتهاا صورة قريبة لقلبهاا فوسط ورد اصفر ...ضاحك وبشرتو السمرااء ولحيتو السوداء ميزينوو زومات الطوف كتشوف ...تكميشات فجناب عينه شوي...سنانو بويض بشكل طبيعي مقادين على بعضهم ..رمشاا وهبطات دمعة مع نيفهاا حتى قطرات فلمخدة...خشات التيليفون تحت لمخدة مزيرة على راسهاا حلف نعاس ل دار جيهتهاا ولا هيا شافتو

**

دازو ايام كتعدا الاسبوع ...فاقت اقباال على صوت المنبه ...تقلباات فبلاصتهاا كتستاعد تنوض حاضنها شهيد بايدوو غاررق فنعاس بصدر عاري

كلسات كتاوب كتجر ملابسها من حداها بشوية وبلا حس ليفيق الصغير دوشات وصلاة وتوجهات لكوزينة توجد فطور ليهم ....تبسمات ليه ملي طل عليها شعرو مخربق بنعاس لابس شورط فقط كيتااوب

شهييد:صبااح الخير

اقبال:صباح لخيير ...نعستي مزيان ؟

شهيد(باسها فحنكهاا )ممم ...ندوش دغياا ونجي نفطر

اقبال:واخة

شهيد:غتخرجي بكري !

اقبال:ضروري ...ليوم لجلسة عند غيثة

شهيد(ربت على كتفهاا )فيها خير

حركات راسها بااه كتغسل فلبيبرون لاسماعيل ...مشا دوش وكلسو كيفطرو من وراهاا لبسو حوايجهم

***

صابحة الغالية مهمومة ومضيومة كلسات تعيات فلكوزينة تدخلات عليها غيثة بشورط وديباردو

غيثة:صباح لخير ماما

الغالية(كانت شادة حنكها وشافت فيها )صباح لخير ...دوزي تفطري شوية ودوز اقبال

غيثة:نغسل ونجي

غسلات وجات كلسسات متلفة بتيليفون والغالية كتشوفيها وتنهد

الغالية:اسربي راسك

غيثة (وقفات مشات غسلات سنانهاا ودخلات لبييت موجدة ديجا لحوايج لي تلبس حيداات تيكيت لتيشورت لارج فلموف بلكمام صيفي وسروال دجين قصير دارت زيف ليكراا كحل ...قدات وجهاا بمكياج زوين برز عينيها وهيلايت وعكر مااط فلبوردو

طلات عليها انصاف تعلمها باقبال كتسناها تحلات فمها فيهاا وهيا كترش فريحة

انصاف:واش غادية طلقيي

غيثة :بغيتي نمشي بجلابة ماما ...باش يتشفااو

انصاف:وسربي اقبال كتسناا

غيثة:جيبي ليا السباط لكحل لي طالع

انصاف:وخة !(ضارت عاطياها بضهر معوجة فمها ) لي بغا يفهمك معندو ميدار