أغلب الاشخاص كايتيقو غير بداكشي لي كاتشوف عينيهم وماكايحاولوش يتعمقو كتر و هادشي لي وقع للفرملية ... هي شافت غير حياة مشنتقة و كحلها سايح .. كاتتعكل فطالونها و باين على ملامحها تعابير الذعر كاتستنجد و باغا لي يعاونها و هاربة كالفريسة و موراها عادل لي كايجري موراها كأنه المفترس ولكن ماشي ديما المفترس كايكون تابع الفريسة والفريسة هاربة منو ... شي مرات هداك لي كايبان لك هارب كايكون هو المفترس لي كايجر الضحية ديالو للبلاصة لي بغاها باش ينقض عليه و هداك لي تابعو كايكون هو الفريسة و هادشي لي وقع هنا
الفرملية : [ بالإسبانية ] شنو واقع هنا؟؟
عادل : [ بالدارجة ] يهديك الله واش حماقيييتي؟؟
وقفات حياة وبدات كاترجع بخطواتها اللور وكاتبكي و كاترغبو بيديها وفنفس الوقت كاتهضر بالاسبانية
حياة : عافاك ا عادل ماديرش فيا هاكا .. ماضربنيش حتى هاد المرة
عادل : [ بالاسبانية ] مافهمتش مالهااا هادي راها حماااقت ماتديش عليها و ماتيقيش بهادشي لي كاتشوفي
شدات فدراعها بخوف ... بحالا ديك البلاصة باقا كاضرها و بقات راجعة بخطاويها اللور حتى طاحت او بالمعنى الاصح تعمدات طيح على اساس رجليها مابقاوش قادرين يهزوها ... مشات لعندها الفرملية كاتعاونها باش تنوض حسات بيها كاترجف بالخوف وهنا زادت تأكدات بلي عادل فعلا دار لها شي حاجة
مشا لجهتهم ونوض حياة من دراعها و هو معصصب كايشوفها غاتغرق لباباه الشقف و كون غيير سلخها وبررد فيها جنونو بعدا بعدا يكون داير علاش ولكن هو ماداير والو و يمشي فيها؟؟؟
عادل : [ بالدارجة ] حياااة باراكا من الحمااق دياالك ... [ مكشكش وحاس بعقلو غايخرج معاها ] واش نتي حمقة و باغا تحمقييني معاااك
حس بداك المثل ديال ضربني و بكا و سبقني و شكا كايتطبق عليه هنا دات الفرملية كاتحيد ليه يديه من دراعها حتى طلق منها شاف فالفرملية و بدا كايحاول يقنعها
عادل : [ بالاسبانية ] والله حتى كدابة .. راها غير كاتكدب ماتيقيييش بيها .. شوفيها شوووفيها كي كاضحك
شافت فيها الفرملية لقاتها كاتنخصص وعاودات شافت فعادل لي كان كايحس بالخيوط ديال عقلو غاتشعل فيهم العافية .. وصلو الاعصاب ديالو لأقصى الدرجااات حاس بيها كاتلعب بيه و باغا تحمقو ماحس براسو حتى نقز عليها بقجة كان ناوي يجيفها و هادشي غير مازاد طبز العين و ثبت عليه الجرم ... بدات الفرملية كاتفك حياة من يديه و حياة براسها بدات كاتحاول تفك راسها منو .. مابقاتش قادرة تتنفس و حاسة بروحها غاتخرج ماطلق منها غير بزز
بدات كاتكحب و كاتحاول ترجع النفس و الفرملية فهاد الاثناء مشات لجهة الطوموبيل باش تجبد تيليفونها و تبعها عادل كايحاول يشرح لها بلي حياة لي وصلاتو لهادشي وكايحاول يقنعها باش ماتعيطش للبوليس
شاف حتى عيا ولقا بلي ديك اللفعى لي خاصها تحل هاد الموصيبة حيت ايلا ماحلاتش هي هادشي و عتارفات ولا هضرات مع الفرملية غاتصدق هاد خيتي مغرقة ليه الشقف ... بالعنف و محاولة القتل
شافتو جاي لجهتها و بدات كاترجع بخطاويها اللور و هو كايقول لها غير تحبس باش يهضر معاها مابغاتش تحبس و رجع كايجري لجهتها و غير شافتو هكاك بدات حتى هي كاتجري و هو تابعها باغي غير يتفاهم معاها بالعقل و كايطلب و يزاوك باش توقف ليه .. وصلو للخرجة ديال ديك الطريق لي كانو كايجريو فيها و مع جات دور ما حسات غير بشي حاجة قاصحة دخلات فيها ... كانت طوموبيل لي ضرباتها
بقا عادل واقف مصدوم فبلاصتو كايشوفها طايحة فالارض في حين مول الطوموبيل هبط لعندها كايشوف مالها
حس بالتلفة ... حس براسو فكابوس و كان هاد الكابوس هو حياة .. ماعرفش اشمن دنب دار فحياتو حتى سلط ربي عليه هاد الموصيبة .. ندممم أشد الندم على النهااار لي طاحت عينيه على عينيها .. صافي عرف راسو غرررق حتى لراسو فالمشاكل
جلس جلسة القرفصاء وسط الطريق و حط يديه على راسو .. مابقا عارف مايدير مابقا عارف شهاد الموصيبة و المصائب لي جاوه وحدة من ورا وحدة ... ها حناه لي كاينة فالطوموبيل و كان باغي يديها للطبيب ديالها و ها الفرملية لي من موراه كاتصوني على البوليس .. ها حياة لي ضرباتها طوموبيل .. حتى من ردة الفعل الطبيعية لي المفروض يديرها فهاد الموقف ماقدرش يديرها .. كان المفروض يشوفها اش وقع لها ساعة صااافي تهد
أما حياة فهاد الأثناء ماكانتش حاسة براسها شنو وقع لها ... يديها كانت عاطياها الموووت ديال الحريق و ماقادراش تحركها و ضهرها لي كان كايضرها و ركابيها لي حسات بيهم تحردات لها وحدة منهم ... ماتفكرات غير الكسيدة لي كانت دارت فالمغرب غير هو هاديك كانت كفس من هادي حيت كانت مخلية الموطور غادي و هي واقفة عليه برجليها فداك الوقت اما هادي كانو رجليها باقيين فالارض .. بقات كاتشوف غير داك مول الطوموبيل هبط لعندها و كايسولها و كايقول لها باش ماتتحركش حيت ماعارفش الاصابات لي غاتكون تصابتهم و كاتحاول تستوعب بلي راها دارت كسيدة ...
كالعادة الأثر ديالها كايبقا منين مادازت ... كيفما كانت غارقة فالمشاكل فإسپانيا و معطوبة ... حتى فالمغرب كانت باقي الأثر ديال مشاكلها لي ... داوود لي كان كايقلب على خوها محمد و طلع عندهم للدار
ياسين لي تقربلات بينو و بين داوود على ود وفاء حيت هو كان كايتيق فيه و يدخاو لدارهم وسط مو و ختو .. و أمنو على ختو و صدق فاللخر حط عليها العين ... واخا ياسين ماتصاحب معاها ما قلل عليها العفة شي مرة ماكانت نيتو خايبة من جهتها ولكن كايبقا شاف فيها بشوفة غير بريئة و هو وسط دارهم
فهاد الاثناء لي كان داوود مع محمد و فتيحة و عبد الرحمان كانت حياة فالكلينيك ... و خرجات هاد العشية بتهريسة فدراعها و تقصحات من واحد الرجل .. ركبتها تحردات و الاهم من هادشي كانت باقا فيها الروح
كان واقف حداها الراجل لي ضربها .. من الملامح ديالو كان باين فيه إسباني ويكون فديك الاربعين من عمرو
[ الحوار بالإسبانية ]
_ سمحي لي ا انسة دخلت فيك .. ماكانش عندي الوقت فين ندير شي حاجة
حياة : ماشي مشكل .. حتى انا ماكنتش شايفة الطريق و ماكنتش رادة البال
_ واش كان تابعك شي حد؟
حياة : [ تنهدات وسكتات ]
_ كانظن شي حاجة شخصية
حياة : [ قلبات وجهها كاتشوف جهة الشرجم ] كان تابعني راجلي [ سكتات لثواني وكملات ] كان باغي يقتلني ولكن الحمد الله لي طحتي فطريقي
_ واش قلتي هادشي للبوليس؟
حياة : لا ماقلتهاش ليهم
_ هادشي خطير ... خاصك تقوليها لهم وتاخدي الاحتياط ديالك واش هو هداك لي كان جالس فالطريق؟؟
حياة : وي هو هداك ا مسيو وبخصوص البوليس [ تنهدات ] ماعرفتش واش يقدرو يعاونوني
مشا وخلاها تما ... كانت قادرة تخرج وترجع للفيلا حيت ماعندهاش شي حاجة خطييرة ولكن كان فبالها حوايج خرين ، المشكلة هي قادرة دوز غير هاد نهار هنا و لاغد ليه خاصها تخرج و كان خاصها فين تمشي من غير الفيلا
طاح عليها الضيم منين شافت راسها تلات بيها فالكلينيك غير بوحدها فبلاد ماعندهاش فيها حد .. ماعندها لا لي يجي يقول لها واش نطيب لك شي شهيوة و يدوز لها على راسها بحنان ... ماعندها لي يجي يطل عليها و يسولها كي وقع لها حتى دارت كسيدة
هزات تيليفونها و صونات على عادل ... ماعطلهااش دغيا جاوبها
عادل : [ بالإسبانية ] تهنيتي؟؟؟ هادشي لي كنتي باغا توصلي ليه؟؟؟
حياة : [ حسات بصوتو بحالا داير هوت باغلوغ وجاوباتو بالاسبانية ] مابغيت والو بغيت غير تجي تخلص عليا الكلينيك ماتخلينيش ملاوحة هنا راني مراتك .. حشومة عليك ، هادشي مايبغيه لا ربي لا عبدو .. هادشي علاش جايبني من بلادي؟؟ جبتيني باش تتعدا عليا؟ اجي غير خرجني من هنا و الليلة قطع ليا خليني نرجع فيحالاتي [ بدا صوتها كايبان فيه نمرة البكا ] مابقيت بغيت والو ... درت فيك راجلي و خويا و بابا ... قبلت نجي معاك لبلاد ماكانعرف فيها حد غير حيت..
حياة : [ بالاسبانية ] ماعرفتش علاش كادير فيا هاكا وماعرفتش واش نتا بعقلك وليت كانشك فيك ولكن ها العار .. رجع ليا غير وراقيا لي حيدتيهم ليا .. ها العااار باغا غير نرجع لبلادي
عادل : [ نطق بالدارجة هاد المرة ] كي غاندير نجيب لك شي حاجة؟؟؟ واش نتي مغرقة لملتي الشقف و باقا كاتسنايني نجيب لك؟؟؟ عارفاني فين انا دابا ولا ماعارفاش؟؟
حياة : [ جاوباتو حتى هي بالدارجة ] ماعارفاش ولكن لي عارفة هو غاتجي لعندي دابا نيت و تجيب ليا صاكي ...
قطعات عليه وسيفطات و سيفطات ليه لوكاليزاسيون فالواتس اب وجلسات كاتتسنا فيه يجي و فبالها شلا هضور باغا تقولهم .. المهم دابا بعدا عندها 2 شهود عليه و زيد عليها الكاميرات لي كاينين فديك المنطقة غايكونو صوروه و هو كايجيفها وسط الطريق و فاش كان تابعها ، حسات براسها زمتاااتو و ماخلاتش ليه فين يتحرك
اما عادل فهاد الاثناء كان مع البوليس و كان معاه المحامي و حتى واحد المترجم باش يترجم هضرتها ايلا دوات بالدارجة مي مانفعوش حيت ماقالتش بزااف بالدارجة .. كان باغي غير يخرج من تما و يمشي لعندها ولكن ماخلاوه يتحرك من تما حتى سنا على شحال من حاجة وكان خاصو مايمشي فين و مايسافر فين با مايتسماش هارب ، اول حاجة دارها هي مشا للفيلا هز صاكها و مشا تأكد من شي حوايج عاد شد الطريق لعندها
مشا لعندها و دخل للشومبر لي هي فيها لقاها واكلاها فيديها غير شافتو و هي تمد يديها باش يعطيها الصاك ديالها .. لاحو لها و بدات كاتقلب فيه لقات فيه كاع داكشي لي كانت دايرا فيه ماناقصة حتى حاجة
حياة : ايوا دابا سمعني مزيااان و حل معايا وديناتك
عادل : هاد المرة نتي لي غاتسمعيني ... غدا غاتمشي معايا و تقولي لهم بلي هادشي كامل لي وقع اليوم كان كدوب
حياة : [ ضحكات ] كاتتفلا عليا؟ دخول الحمام بحال خروجو؟ .. دابا شادة عليك دليل على قدو و زيد عليها الشهود .. و مدام وصلنا لهاد المواصيل خلينا من دابا نحطو النقاط على الحروف
عادل : عرفتك ماكاتفهميش بالهضرة .. غانهضر معاك بداكشي لي كاتفهمي بيه
جبد تيليفونو و بدا كايخربق فيه حتى دخل لواحد الفيديو ... كان الفيديو ديالها و هي كاتشوف فحناه كاتجيف و مبعدة عليها الرابوز مخلياها كاتتعلق فيها كي القرد باش توصل ليه ... و كانت باينة فيه فاش حيدات لها الدوا و زطمات عليه و فاش حيدات لها الما و خواتو ونظرا لأنها مرا كبيرة و مريضة من الفوق يعني و بإختصار قوداتها على راسها
هنا تحيمرات و مافكراتش فالعواقب قد ما كان همها تخليها تحس بداكشي لي خلاتها تحس بيه و هي مريضة و هاد البلان كان من بين الحوايج الخايبين فيها .. كاتلعب بلا ماضرب الحساب للعواقب ، المهم عندها هو تفدي دقتها ولا بغات الموت تجي غير تجي .. كانت عارفة مزيان بلي داك الفيديو ماكانش لصالحها ولكن فنفس الوقت كانت عارفة بلي ايلا بينات ليه بلي صدمها بداك الفيديو ولا كبرات البعرة لداك الفيديو غاتخليه يولي يحس بلي شاد عليها شي حاحة كبيييرة .. من بين الحلول لي كانو عندها هو تقلل من قيمة الدليل لي شاد عليها و تحسسو بلي عديم القيمة قدام داكشي لي هي شادة عليه
حياة : [ ضحكات ] صافي غير هادشي؟ هادشي باش فرحان؟ شلاااا و شلالي عند بالي غير شي حاجة كي داايرا
عادل : [ جلس على طرف الناموسية ديالها ] عارفة راسك مزال ماعندكش الوراق؟
حياة : ومن بعد؟
عادل : عارفة ايلا عطيتهم هاد الفيديو كانكحل لك ضواصا ديالك؟ ماغايبقاو الوراق لا من عندي لا من عند غيري ، فهاد البلاد كايبغيو بنادم لي خاطيه المشاكل .. ماواصلش للبوليس
حياة : [ تبسمات ليه ] هاد الهضرة ديالك خليها عندك حيت تقدر تحتاجها كتر مني فاش تمشي تجرب البياص ديال الحبس كي داير نتا وحناك
عادل : نسيتي واقيلا انا عندي بلاصتي فهاد الدولة .. عاطي لهاد الدولة .. كايستافدو مني فالضرائب ونتي شنو عاطياهم؟؟ يكمل العام تولي حارݣة؟
حياة : الضرائب لي كاتخلص تلقا واحد عندو سوبر ماركت صغير و كايخلصهم .. ماشي شي حاااجة و هادشي فنظرك غايخليهم يتساهلو معاك؟
عادل : وريهم داك الفيديو .. هانتي وريتيه لهم ، شكون غايدير لك وراقك؟ شكون غايبقا يعطيك الفلوس؟ .. نتي عارفة عندي الفلوس غاتبغي تغرقيني غانخرج منها ونغرقك نتي ولكن غاتخصريها على راسك .. من عندمن غاتبقاي تشدي الفلوس ايلا دعيتيني؟
حياة : يمكن تخالط لك المغرب مع اسبانيا ا شيغي .. المغرب غاتعطيهم شي 10 ديال زورق و يهضموني فحقي ولكن هنا ا شيغي راحنا فبلاد الحق و القانون
عادل : خليني نشرح لك بطريقة خرا غاتفهميها ... فينما مشيتي كاينين لي كايشدو الرشوة .. هنا .. فالمغرب .. فبلاد خرا ، غايديرو لك خاطرك و فاش غانجبد الفلوس غايتسد الضوسي ديالك وغانخرج منها و ماغاتبقاي تشدي من عندي الريال .. فديك الوقت انا غانعطيهم الفيديو لي عندي و نشري الشهود و نسيفطك تترباي وفاش غاتخرجي عارفة فين غايسيفطوك؟ غايسيفطوك للمغرب طويلة كيما جيتي ، دابا ا حياتي غاتنوضي معايا تقولي لهم ماكاين والو من هادشي وتخلينا نحلو مشاكلنا بحال اي راجل و مراتو ولا غاتمشي توريهم الفيديوات لي عندك وفاللخر نتي لي غاتخرجي خاسرة فهاد لافير ...
حياة : [ تبسمات ليه ] عندك الحق
عادل : تفاهمنا؟
حياة : وي بيان سيغ تفاهمنا
عادل : [ بنظرة شك ] اخر هضرة؟
حياة : واش كانضحكو هنا؟ وي عندك الحق ماعنديش شي حل اخر .. نتا عارف مابغيتش نرجع للمغرب و باقا باغا ندير شي حوايج هنا فإسبانيا
عادل : غدا نرجع عندك باش نمشيو؟
حياة : وي ان شاء الله
ناض من تما و خلاها ... حاس بيها ناوية على خزيت ، مايمكنش تتقلب هاكا و تتقبل هادشي بهاد البساطة .. شنو زعما ياكما ناوية حتى يمشيو لعند البوليس و تكحل ليه الضواصا؟ ... مزال كون كانت شي مرا خرا بحال ختها مروى كانت غاتخاف على راسها و ماغايتوقعش منها تكون موجدة ليه شي بلان ولكن هاد خيتي و غير فهاد الشهورة لي دوز معاها ولا عارفها بلي فاش كاتكون الدعوة مكالمية عندها كايكون الما بدا كايدوز من لتحت ولا كاتكون ناوية على خزيت
بقات هي فالكلينيك بوحدها .. كان ديك الساعة ضلام الحال و الليل وجاها الجوع ولكن شكون غايتفكرها؟ واخا ماشي بزاف باش جات للهنا الا و انها توحشات طياب ماماها و توحشات الحنان ديال خوها .. ماعرفاتش شنو غايكون وقع واش الخطبة كملات ولا داوود حرمها عليهم ، غالبا غايكون حرمها عليهم
وعلى ذكر داوود طاح فبالها وفهاد الضلام غير فاش كانت ناعسة فالكلينيك و كان كايجي لعندها كل ليلة وماكايخليهاش بوحدها ... هزات تيليفونها و بدات كاتقلب فيه على شي برطمة للكرا غير فهاد المدينة .. كانت هاد الخطوة ماصالحاش 100٪ حيت يقدر عادل يشدها منها و يقول لهم هاد السيدة نصبات عليا وتزوجات بيا غير على الوراق و غير طلعتها لإسبانيا ودوزات معايا شي شهورة و هي تهرب و هادشي كانت عارفاه حياة ولكن ايلا دارت هاد الخطوة غاتستفاد بزااف
جاها الكرا غااالي هنا و كانت متوقعة هادشي ولكن ماشي مشكل هادشي ماغايدومش و مزال غاتجبد من عادل هادشي لي غاتخسر .. هزات شي نوامر باش تهضر مع ماليهم لاغد ليه وغير سالات سيفطات ميساج لمحمد فيه الله يكمل عليكم بالخير كانت باغا غير تقلقلو بيه راش تعرف واش داوود حرمها عليهم
حطات راسها على المخدة و نعسات و دايرا فبالها لاغد ليه غادير شحال من حاجة .. مابغاتش تضيع الوقت ولا بقات كاتتسنا الرجل حتى ماتبقاش مقصحة منها ماغايكونش هادشي فصالحها
صبح الصباح و فاقت ... سيفطات ميساج لعادل باش يجيب لها ماتلبس وفهاد الاثناء هي ناضت وطرفات حالتها اما حتى الفطور مافطراتش ، ماعندهاش مع الماكلة ديال هاد القنت .. سيفطات ميساج لخديجة كاتطمئنها بلي كلشي بيخير و سولاتها على شنو وقع ، جلسات كاتتسنا الجواب حتى جا عادل و جاب لها الحوايج لي تلبس ومكياجها
بدات كاتقاتل مع حوايجها حتى لبساتهم اما حتى المكياج ماقدراتش دير بزاف حيت الدقة واكلاها فاليد ليمنية و هي ماكاتعرفش تخدم باليد ليسرية
قادات شعرها و جمعات داكشي وخرجات لعندو ... شدو الطريق لعند البوليس و الطريق كااملة وهو كايفكرها بلي ماشي من مصلحتها تلعب عليه .. ماكانش تاايق فيها نهائيا ولكن الصدمة لي تصدم هي فاش شافها قالت لهم بلي ماكاين والو و هداك غير سوء تفاهم و مازادت مانقصات يعني وفات بكلمتها و فعلا ماجبداتش ليه الصداع .. خرجو من تما ت هو باقي مامتيقش
حياة : نقدر نطلب منك طليبة؟
عادل : خاصك الفلوس؟
حياة : لا .. ايلا قدرتي وصلني للفيلا باغا نجمع حوايجي ، يمكن من الاحسن بلاش مانزيدو نبقاو مجموعين فبلاصة وحدة
عادل : هادشي فاش كنت باغي نهضر معاك .. عارفة راسك غاتتطلقي؟
حياة : وي عارفة هادشي و ماعنديش مشكل ولكن باغا نجيب حوايجي و وراقيا و راك كاتشوفني مقصحة من رجليا مافيا مانشد طاكسي يوصلني حتى لتما
وافق يوصلها و وصلها و بقا راد معاها البال واخا هكاك ... جمعات حوايجها كاملين و خلاتو يهز الفاليزات يديرهم فالطوموبيل ... ركبات معاه و وصلها لواحد لوطيل و تفاهم معاها باش يديرو وقيتة و يتناقشو فهادشي
مشا و خلاها وفهاد الاثناء هي اول حاجة دارتها هي صونات على صحاب دوك البرطمات لي شافت و بدات كاترصي حتى رصات مع واحد عجباتها البرطمة ديالو و فنفس الوقت جاها التمن شوية رخيص .. كان عندهم بزاف ديال الاجرائات عكس المغرب وهادشي عصبها حيت فيه سير و اجي بزاف
وصلها ميساج من محمد قال لها فيه امين .. ماكانتش متأكدة من جوابو و هادشي لي خلاها تصوني على خديجة باش تأكد لها الخبار ولقات بلي الخطبة كملاات وداوود لي غايحرمها عليهم صدق حتى هو حاضر معاهم و هادشي لي خلاها تزييد تسخط ويطلع لها الدم مافهماتش علااش غايخلي ختو تتزوج بخوها .. واش هو عارفها هي السباب فهادشي و زايدها قابل على هاد الزواج؟؟؟ واش على هادشي مشا يهضر مع خوها؟؟ .. روناتها خديجة بهاد الهضرة حتى ولات كاتفكر تصوني على لطيفة و تهضر معاها بكل وجه مقزدر على هادشي ...
إيلا كانت الخطبة دازت .. مايمكنش تخلي داك العرس يدوز ، خاصها غير تسالي مع عادل و تريݣل أمورها و ديك الساعة عااد يبان لها شنو كاين
دازو أيام ريݣلات فيهم أمور السكنة ديالها و تحولات ليها ... واخا ماكانش فيها شي فراش لي زويين و فاش كانقول زوين كانقصد فراش بحال لي خلات فالفيلا ولكن كان كايخصها تصبر
خرجات تقدات لراسها و عمرات التلاجة .. ماكانتش مستعدة تولي تخسر الفلوس فماكلة الزنقة حيت عندها غرض اخر بيهم
دوزات السيمانة اللولة عاطية فيها الامان لعادل مي فنفس الوقت كانت كاتسول على راسها و كاتخرج و تدخل .. كانت فديك السيمانة اللولة كاتكون صداقات مع الجيران ديالها و ركزات على 3 ديال الجيران ... لي ساكنين فليمن ديالها و لي ساكنين فليسر ديالها و لي ساكنين قدامها .. اول حاجة كانت دارتها فالنهار اللول هي قادات 3 ديال الكيكات مازوقاتهمش بسباب يديها لي مهرسة مي واخا هكاك كان شكلهم الطبيعي زوين ... عطات لكل واحد فيهم كيكة باش كاتوريهم حسن الجورة ديالها و من موراها ولات فينما كاطلاقا شي حد ضروري ماكاتلقي عليه السلام مع الإبتسامة
و الاهم هو كانت كاتمشي لشي سواق كانو كايبيعو فيهم الطباسل و الكيسان و الماعن قدام و رخاص .. كانت كاتشري اي حاجة بانت لها ديال الزاج طواال داك الاسبوع .. بدات السيمانة التانية و تما فين ولات كادير شي حوايج غراب
كايوصل الليل كاتبدا تهرس الكيسان و الطباسل و داك التهراس كايوصل حتى للجيران ديالها لي ساكنين على ليمن و على ليسر ديالها و لي قدامها ... ماكتافاتش غير بهادشي ، كانت كاتضرب فالحيوط و كايتسمع الصوت بحالا شي حد كان كايدفعها على الحيط و هادشي ماحبسش هنا ، وصلات للهضرة بالغوات بحالا كادابز مع شي حد و هادشي لي خلا الجيران لي حداها يلاحظو هادشي و بداو كايجيو يشوفو شنو واقع وكان جوابها ديما كايكون بلي غير كاتتناقش مع راجلها لي جا يطلب فيها كالعادة باش ترجع معاه للدار ولكن هي ماباغياش
كانت عارفة راسها ماخاصهاش تعيق فهاد البلان و تطول فيه حيت يقدر يوصل للبوليس و يصدق مضروب لها فالزيرو داكشي علاش هاد المرة دارت اخر خطوة من هاد البلان .. صونات على عادل وجلسات كاتتسناه يجاوب
حياة : عادل فينك دابا؟
عادل : خدام علاش؟
حياة : ماغانتناقشوش فداكشي ديالنا؟
عادل : كنت كانتسناك ديري شي وقت
حياة : ايلا كنتي مسالي هاد العشية نطلاقاو و نتفاهمو
عادل : تجي للفيلا ولا نديرو فشي كافي؟
حياة : راك عارف رجلي مقصحة منها ايلا قدرتي اجي لعندي لفين ساكنة .. ماعرفتش علاش رجلي ولات عاطياني الحريق كتر من اللول .. قالو لي غير تقصحت ولكن مابانش ليا غير تقصحت فيها .. كانشوفها بدات كاتزراق و تنفخات ليا
عادل : و مامشيتيش للطبيب؟
حياة : قلت ماكاين لاش حيت قاليا غير مقصحة و انا كانعرف الاطباء هنا ماكايغلطوش المهم خليك من هادشي .. دابا فين غانطلاقاو؟
عادل : غانجي لعندك للدار سيفطي لي لادريسا
قالت ليه لادريسا غير بفمها ودارت السبة بلي ساهل يعقل عليها و داكشي نيت لي كان .. بقا دايرها فبالو
قطعات معاه الاتصال وبدات كاتفكر فالبلان لي باغا دير ليه .. جلسات كاتشوف فرجليها لي مابيها والو بالعكس كاتقدر تتحرك بيها و عاادي ، كاين الم طفيف ولكن ماشي بزاف
كان شاغل بالها داك البلان لي ناوية ديرو .. الخايبة هي ايلا ماصدقش ليها و صدقات جايباها فراسها على والو ... ناضت لجهة المرايا و بقات كاتشوف فوجهها وكاتدوز عليه بيديها كاتفكر واش ضروري دير داكشي ولا عادي تقدر ديرها فأي بلاصة خرا .. شنو دابا غايخصها دير نظاظر عاوتاني لأيام؟؟ ولكن بعدا فالعين كاتبان الدقة مزيانة .. زعما ضرب غير دراعها و صافي تلبس شي غوب و تغطي دراعها؟
ولكن العين كاتكون اكثر إقناع حيت حتى واحد ماكايشك بلي الانسان يقدر يزرق عينو ... بحكم الضربة تما كاتكون خايبة و كاتحس بالضو ضربك فيها
غمضات عينيها و حاولات تضرب عينيها ولكن ماقدراتش .. خايفة غير تصدق عامية راسها و تصدق حارقة البولة ديال عينيها
عادل فهاد الاثناء كانت فبالو غير حياة ... ماشي حيت كايبغيها ولكن فبالو الحريرة ديالو معاها ، باغي يطلقها فأقرب وقت باش تخرج من حياتو خلاص ويتهنا من كاع المشاكل لي جايين من جهتها
وصلات العشية و قصد العنوان لي عطاتو .. طلع للطابق لي هي فيه ، بانت ليه واقفة هي و راجل و مرا و كاتهضر معاهم ... كانت دايرا النظاظر ديال الشمس ماعرفهاش واش يلاه دخلات ولا عاد ناوية تخرج
° غير طاحت عينيها عليه و هي تزير على يد المرا وبدات كاتفتف فالهضرة ودعاتهم بالزربة و مشات لجهة البرطمة ديالها ... دخل وسد الباب من موراه ، بدا كايدور عينيه على البرطمة ماعرفش اش عجبها فيها قال فبالو يمكن ناوية تعتامد على راسها ولا يمكن مشات على حساب جيبها .. مشا جلس وفهاد الاثناء هي قادات ليها و ليه قهيوة وجلسات و هادشي جاه فشكل .. نكدب عليكم ايلا قلت لكم تايق فيها لدرجة ياكل ولا يشرب شي حاجة من يديها .. واخا ماكانت دايرا ليه والو فالقهوة ولكن ماكانش تايق فيها ...
حيدات النظاظر من عينيها وحطاتهم فوق الطبلة وهزات فنجانها ديال القهوة كاتجغم منو تحت نظراتو لي كانو موجهين لعينيها لي مضروبة
عادل : مالك فعينك؟؟ واش ضربك شي حد؟
حياة : [ قوسات حجبانها وشافت فيه بعبوس ] وي ضربني راجلي
ناض من بلاصتو و وقف من مور مابدا كايحس بالقالب طالع معاه و حس براسو جا لوكرها برجليه
حياة : فين نايض؟ جلس جلس مزال عااد ناوية نهضر معاك و حط داك التيليفون فوق الطبلة باش نتفاهمو على شي حوايج
من سوء حظو الجيران شافوه فاش كان داخل اما بالنسبة للإختيار ديال حياة لهاد العمارة بالضبط ماكانش اختيار عشوائي ... حيت هاد العمارة كانو فيها 2 طرق تقدر تدخل بيهم ليها يا تدخل من الباب لي كايدخل منها كلشي و ديك الباب كانت فيها كاميرا المراقبة يا غادوز من واحد الزنيقة كاينا فجنب العمارة و تما كاينين بعض السلالم لي تقدر تخرج منهم كانو بحال مخارج الطوارئ و كل طبقة كانت عندهم باب منين يخرجو و الأهم هو ديك الزنيقة مافيهاش الكاميرات ، فيها غير شي طوارو ديال الزبل
شد راسو بيديه و بقا كايشوف فيها ... اش غايدير دابا مع هادي؟؟ ، جلس و هاد المرة كان حتى هو فبالو واحد البلان لي كان ديجا خادم عليه من فاش كانو فالمغرب .. هداك هو لي بقا ليه باش يتفك من هاد الموصيبة
عادل : فاش غانتفاهمو؟
حياة : حط التيليفون فوق الطبلة
عادل : حطيه تا نتي
حطو تيليفوناتهم فوق الطبلة باش حتى واحد مايشد على لاخر شي حاجة و بدات هي كاتهضر
حياة : غاتكون فهمتي واقيلا؟ بلا مانشرح لك بلي الجيران شافو مون ماغي مزرق لي العين .. ماعلينا ا عادل عرفتي علاش صونيت لك؟ باش نحطو النقاط على الحروف و نسدو هاد الضوسي
ناض و قلباتو غير بيد وحدة و حتى هو قلبها حتى تأكدو بلي ماكاينش شي تيليفون زايد ولا اي حاجة تقدر تخلي هاد الهضرة لي غايقولوها هنا تخرج لبرا .. فالاصل هي لي كانت كاتتأكد من هادشي اما عادل ماكان غايخسر والو
عادل : شنو باغا؟
حياة : باغا ندير تمن لدوك الفيديوهات و الشهود لي شاهدين من جهتي
عادل : هضري قولي شنو باغا كانسمعك
عطاتو واحد الورقة ماكانتش مكتوبة بخط يديها و انما غير مطبوعة و كان فيها داكشي لي بغات .. دارت رجل على رجل و هزات الفنجان كاتجغم منو و كاتتسنا ردة الفعل ديالو .. اما عادل فاش شد ديك الورقة بدا كايضحك ، كايضحك بالفقصة و بهاد الطنز ديالها .. حط الورقة فوق الطبلة و نطق
عادل : باغا ديري لاباس على ضهري؟ انا ندمر فيها و نتي تجي تديها باردة ياك ا لالة حياة؟
حياة : ماطلبتش منك شي حاجة كبيرة ... باغا الفيلا لي ساكن فيها نتا و حناك .. 100 الف يورو فكونطي يعني 100 مليون مغربية و الطوموبيل ديالك و فكل شهر دوز ليا 5 الاف يورو لكونطي يعني 5 ديال المليون
عادل : الخلاص لي غانعطي ل10 ديال المحاميين باش يفكوني منك و ماغايوصلش لهادشي
حياة : غايفكوك ولكن واش نسيتي واحد الحاجة؟ واقيلا نسيتي بلي اوروبا كاتعاون المرا ماشي الراجل ... هناا فين كاين الفرق بيني و بينك انا مرا و نتا راجل و الجمعيات لي كاينين هنا ا شيغي كايدافعو على حقوق المرأة ماشي حقوق الرجل ... فكر فمستقبلك و فكر فحياتك لي و فكر فالسمعة ديالك وزيد فكر فالشيبانية ديال حناك واش غاتقد تتعايش مع المحابسيات أبار السنين لي غادوز تما واش فكرتي فالعيالات لي غاتلقا تما و المجرمات لي غاتلقاهم؟ فأخر يامها تولي تصبن لهم السليبات ونتا عارف مزيان كايكونو شي محرومات وسط الحبس واش فنظرك غايزݣلو حناك؟ واخا لحمها بيريمي مي قااضية الغرض ... ايلا نتا و حناك غاضربوني ضربة وحدة انا غانضرب 2 ضربات وحدا ليك و وحدة لي عزيز عليك
بقا عادل ساكت شحال عاد نطق
عادل : واش عارفة بلي الطلاق هنا ماشي بحال المغرب؟
حياة : علاش؟
عادل : ختاري وحدة من 2 يا نعطيك هادشي لي طلبتي و مانطلقكش يا نطلقك و غانمشيو بالقانون و النص من داكشي لي عندي غاتاخديه بالقانون
حياة : زيد وضح
عادل : هادشي بزاف عليا .. بغيتي نعطيك الفيلا و الطوموبيل و 100 الف يورو و نولي ندوز لك كل شهر 5000 يورو نديرها معاك ولكن ماغانطلقكش ... بغيتي نطلقك و تاخدي النص ديال داكشي لي عندي .. نساي عليك دوك الشروط لي شرطتي عليا
حياة : و نتا اش عندك؟
هز تيليفونو من فوق الطبلة و بدا كايوريها كاع الاملاك لي عندو .. داكشي لي فإسبانيا و و الدار لي عندو فالمغرب ... كانت عندو سلسلة مطاعم و سلسلة مقاهي كل وحدة كانت فمنطقة و بعض المشارع لي كان كايستفاد منهم حتى هما و 2 برطمات كانو فمدن خرا فإسبانيا و في الاخير 3 ديال الطوموبيلات ...
بقات كاتفكر و تدورها فراسها ... شكات بلي كاين شي بلان تما داكشي علاش كان خاصو يوريها اوراق الملكية لأي حاجة قال لها بلي ديالو .. و فعلا فديك العشية وراها كاع الاوراق لي عندو دابا بقات فحاجة وحدة ... الاوراق لي غايثبتو لها بلي بصح ايلا تطلقو غايقسم معاها الأملاك ديالو
تفاهمو باش لاغد ليه غايجي لعندها للدار و يجيب معاه الوراق لي غايثبتو لها ... خلاتو يمشي و هي راسمة فبالها بلان اخر ايلا فكر يتفلا ولا يدير هاه ولا هاه و فنفس الوقت بدات كاتسول و تقلب على هاد الهضرة لي قالها ليها حيت ايلا كانت بصح يعني راه داكشي لي غاتربح ايلا قسم معاها غايكون حسن من داكشي لي طلبات منو و عاد غايرجع عليها بالأرباح
دوزات ديك الليلة غير فالدار ولاغد ليه مع فاقت اول حاجة دارتها هي قصدات المحامي لي كان عطاها لاكارط فيزيت ديالو ... مشات كاتاخد الاستشارات منو ولقات بلي ممكن يقسم معاها الأملاك ديالو ، دارت معاه باش فاش يجيب لها داك الإثبات غاتجيبو ليه و يتأكد منو واش بصح و داكشي لي كان
رجعات للدار و غير جا عادل و جاب لها الاثبات داتو للمحامي باش يتأكد ... جلسات كاتتسنا جوابو وكان باين فيه كايحلل داكشي مزياان
[ الحوار بالإسبانية ]
حياة : واش هادشي لي هنا حقيقي؟؟
_ [ قاد نظاظرو و شاف فيها ] هادشي لي مكتوب هنا كلو صحيح .. فاش غاطلقو غايقسم معاك الأملاك ديالو و تقسمي معاه الأملاك ديالك
حياة : ولا ماعنديش؟
_ فهاد الحالة هو غايقسم معاك
حياة : ماعرفتش ولكن دخلني الشك فهادشي ... عاود تأكد ليا عافاك
رجع كايشوف فالوراق لي قدامو و عاود شاف فحياة
_ كي قلت لك ا انسة حياة حقك ماغايضيعش والاملاك لي عندو غاتتقاسموهم .. حالتك المادية حتى هي كاتساعدك فهادشي
حياة : ماعرفتش المهم انا غانشوف اش كاين و غانعاود نرجع لعندك [ بغات تهز الوراق و تنوض و رجع وقفها ]
_ نقدر نعطيك نوامر شي محاميين خرين كانعرفهم غاينفعوك .. عاودي تأكدي منهم على هادشي
حياة : غاديرها معايا مزيانة الصراحة
عطاها كارط فيزيت ديال 2 محاميين وحدة ديال محامي و وحدة ديال محامية .. شداتهم و شكراتو و هزات الوراق و مشات من تما ... قصدات المحامي اللول و أكد ليها الهضرة لي قال ليه المحامي اللول اما المحامية الثانية كانت تعمقات هي و حياة فهاد الموضوع
حياة : هادشيي بالضبط لي كنت باغا نوصل ليه هانتي فهمتيني ... دابا ايلا انا ماكانوش عندي الاملاك .. الله كريم ماغانقسم معاه والو ولكن ايلا هو مشا نقل داكشي فسمية شي واحد قبل مانطلقو؟ واش ماغانقدرش نستفاد؟
_ [ بصوت انثوي ] ماغاتقدريش مع الأسف
حياة : و ماكاينش حل؟؟
_ كاين حل
قتارحات عليها الحل و قادات ليها شي وراق وعطاتهم ليها
_ خاصو يسيني على هاد لوراق باش فهاد الفترة ديال طلاقكم ماينقلش الملكية ديال أملاكو لشي حد أخر .. هاد لوراق كايبلوكيوه لواحد الفترة ... فاش يسيني عليهم جيبيهم ليا
حياة : واخا ولكن مزال ماهضرناش على الأتعاب ديالك
تفاهمات معاها المحامية باش يتفاهمو فهادشي من بعد فاش تجيب لها الوراق و داكشي نيت لي كان ... غير خرجات من عندها بدات كاتقلب فالخلفية ديال هاد المحامية .. و هادشي لي خلاها تقرر تخدم معاها هي حيت لحد الساعة هي لي دارت معاها داكشي نيت لي كانت كاتقلب عليه
عاودات عيطات لعادل و دارت معاه باش يطلاقاو فشي كافي و طلاقاو و بداو كايتناقشو ... عطاتو الوراق لي يسني عليهم و سنا عليهم و لاغد ليه رجعات لعند ديك المحامية و عطاتها دفعة مقدمة على الخدمة ديالها معاها و من موراها بداو إجرائات الطلاق بيناتهم و الاتفاق على شنو هي غاتاخد من عادل و شنو غايبقا ليه
كان كايدوز نهار من ورا نهار و كل مرة كاتحس براسها قريبة توصل لداكشي لي باغاه ... فوقما كاتقول لها المحامية تجيب لها شي ورقة كاتمشي كاتجري تجيبها و بحكم الطلاق كان اتفاقي ماكانش داكشي معقد و طويل كاياخد الوقت
وصل النهار لي صافي غاتعتابر فيه حرة و فنفس الوقت النهار لي غاتبدا حساباتها فيه مع عادل على حساب الاملاك ديالو ... طلاقاو عند واحد المحامي و كانت معاها المحامية ديالها و حتى المحامي لي كان ضربها بالطوموبيل و المحامي ديال عادل طبعا
كانو كايتناقشو حتى جبد ليها المحامي ديال عادل شي وراق
حياة : ديالاش هادو؟
عادل : قرايهم
بدات كاتقرا .. كان خاصها تسني على وراق مضمونهم انها كاتسامحو على اي حاجة دارها لها فاش كانو مزوجين وماغاتتابعوش قانونيا تحت اي ظرف من الظروف و فهاد الاثناء حتى محاميتها جبدات وراق خرين باش يسيني عليهم كانو وراق ديال انه كايسامحها و ماغايتابعهاش قانونيا على داكشي لي دارت فيها
سينا هو قبل منها و من موراها وقعات حتى هي وبدات كاتتسنا فالباقي ...
خرجات من داك البيرو وهي ماكاتشوفش قدامها .. غير غادا و رجليها جارينها ، مزال ماقادراش تستوعب شنو وقع معاها هاد دابا واش عادل عادل لي قد الكفة ديال يديها؟ واش هدا هو عادل نيت؟؟
شداتها الدوخة و بدات كاتقلب غير فين تجلس ولا فين تتكالا ، مابقات عارفة فين الطاكسي و فين الطوبيس وفين تمشي و فين تجي
حسات بحوايجها خانقينها و الدنيا مظلمة عليها ، بدات كاتشوف فالوجوه ديال الناس لي غاديين ولي جايين ، بدات كاتسمع هضرتهم كضوضاء فقط .. طاحت على ركابيها فالارض و هي كاتفكر فالتغريقة لي غرقاات و منين غاتجيب الفلوس؟؟ منين غاضبر فيهم و هي خرجات فداك الطلاق غير بيديها خاويين واش خاصها تسرط الصدمة ديال السينياتور ديالها لي كان على وراق ديال الزواج فاش كانت فالمغرب .. سانية بلي ماتشد حتى ريال من عندو ايلا طلقو و ماعندهاش الحق تطالب بأي حاجة .. سانية كي البهلولة و هي ماعارفاش قوانين أوروبا عارفة غير تسني بلي شدات صداقها و السلااام صداقها لي كان كايبان لها شي حاااجة
ولا غاتتقبل الصدمة بلي هي سينات بلي ماغاتتابعوش قانونيا على دوك الفيديوهات و مابقا عندها ماتصور منو ... طمعااات و طمعها كان كبيير ، طمعها وخلاها تختار يا يقسم معاها أملاكو ويطلقو يا يعطيها داكشي و مايطلقوش و هي من الطمع ديالها بغاتها كبييرة حتى خرجات لا بهادي لا بهادي
ولا تتقبل الصدمة ديال المحامي لي ضربها فداك السيكتور لي ساكنين فيه صدق جار عادل و كايعرفو و صدقو مضورينها بيناتهم كي الحمارة كايلعبو عليها و يضحكو عليها بيناتهم و من ورا ضهرها
ولا تتقبل الصدمة ديال الكريييديات لي غرقها فيهم ... و المحامية لي كانت غاتخلصها بواحد القدر صدق خلاصها أضعااف و زادها حتى المحامي لي كان ضربها بطوموبيلتو ولي هي خدات منو غير إستشارة دابا حتى هو غايغرق لها الشقف ايلا ماخلصاتوش ... اش غادير؟؟ فين غاتمشي؟؟ منين غاتجيب الفلوس باش تخلصهم؟؟
كان بنادم كايدوز من حداها غادي جاي ولكن شكون مسوق لها ... حسات براسها ضاايعة و تالفة ، الشمتة وي هاديك نيت لي حسات بيها دابا .. شمتها شمتة هو و المحاميين و خلاوها واحلة غير مع رجليها ، اخر واحد كانت كاتتوقع منو يخرج منو هادشي هو عادل الدميديمة لي كاتقوليه شا كايحبس .. كاتقول ليه را كايزيد ، فين عادل لاخر؟؟ مايمكنش هدا يخرج منو هادشي كامل 100% شي واحد لي قراه
ناضت من الأرض نفضات ركابيها ودوزات يديها على شعرها ماعارفاش شمن إتجاه غاتسلك .. عقلها تبلوكا فنقطة وحدة الصدمات لي دوزوهم لها فالبيرو وحدة ورا وحدة و عادل لي كان هاز التيليفون كايصور ردة فعلها و هي معصبة و هو كايضحك بحالا كايقول لها ايلا دارت شي حاجة ماشي هي هاديك غايكون شاد عليها الدليل لا لا ... بحالا كايرجع لها الاستفزاز ديالها
شدات طاكسي للدار حيت مابقاتش قادرة تزيد على رجليها من مور هادشي .. غير وصلات ، حلات الباب و نسات الساروت فالباب بالعقل لي مابقاش عندها و حتى الباب بقات هكاك محلولة ... كل فردة ديال الطالون فين لاحتها
دخلات جلسات فوق واحد الكرسي وحطات يديها على راسها ... التيليفون بقا كايصوني شحاال ولكن ماقدراتش تجاوب .. هي اصلااا ماسمعاتوش ، مشات لها حاسة السمع و ولات كاتسمع غير الصفير في حين عادل كان ديك الساعة عارض على المحاميين باش يتعشاو عندو فالفيلا و صونا على حناه كايفرحها بالخبار .. ماكانت قاداها فرحة
° بقات على داك الحال شحاال و هي جالسة يمكن ساعة ويمكن ساعتين بنفس الوضعية حتى دخلات عندها وحدة من الجارات لي لقات الباب ديال حياة محلولة
_ [ حطات يدها على قلبها بالخلعة وهضرات بالاسبانية ] خوفتيني ، كنت كانظن غي شي شفار دخل للشقة ديالك يلاه لقيتيني غانصوني للبوليس [ بقلق واضح على محياها ] حياة واش بيك شي حاجة؟؟ كوكو واش كاتسمعيني شنو مقلقك؟
بدات كاتحرك يديها حدا عينين حياة .. ماحسات براسها حتى قفزات فاش تسيفات عليها
حياة : [ تفركعات عليها بالاسبانية ] واش نتوما ماكاتعرفوش الدقان؟ ماكاتعرفوش بنادم باغي يبقا بوحدو؟ بشمن حق داخلة لداري؟؟ ضحكت لك 2 ضحكات وليتي باغا دخلي ليا مع العضام؟ اشمن كوكو ولا زمر؟؟
خلاتها غير كاتبلق فعينيها ... نيتها ماكانتش خايبة غير فكرات ياكما جارتها قتاحم شي حد الشقة ديالها و فاش شافتها هكاك بقات فيها ... ندمااتها كاع علاش سولات
خرجات من تما و هي شادة موقف على حياة ... اما هي فهاد اللحظة بقات تابعة الجارة حتى خرجات و ناضت زدحات الباب من موراها ... هادشي لي كان ناقصها هاد الساعة غير بنادم
مشات جلسات فوق الكانابية و سهااات كاتفكر فحريرتها ... كانو المحاميين ب2 عاطيينها أجل باش تخلصهم ب2 ولا ماخلصاتهمش غايوليو متابعينها قانونيا .. منين غاتجيب لهم الملايين لي كايتسالوها لها؟؟ ... حسات بالتلفة و ماكاين لي يعاونها من غير شخص واحد ماعرفاتش و مامتأكداش واش تقدر تعاونها ولكن على الاقل غير تاخد منها الإستشارة و النصيحة
دوزات نمرة مدام تورية و جلسات تتسناها تجاوبها ...
دارت معاها باش يطلاقاو فالعشية و تفاهمات معاها على الوقت لي بقات كاتحسب ليه بالسوايع و الدقائق والثواني حتى وصل الوقت و مشات للعنوان لي غاطلاقا فيه بمدام تورية .. سلمات عليها و جلسات
كانت ملاحظة تعابير حياة لي كان باين فيها ماشي هي هاديك
مدام تورية : [ بإهتمام واضح ] وجهك ماعاجبنيش ياك لاباس؟ واقع لك شي مشكل مع راجلك؟
حياة : [ خرجات من فمها ضحكة الفقصة ] كان راجلي ا مدام تورية كاان
مدام تورية : واش طلقتو؟
حياة : [ بدات كاتشوف فإتجاه وحداخر ] طلقنا من مور ماغرقني [ حطات يديها على راسها ]
شافت يدها لي مهرسة و شافت العصبية لي كانت باينة على ملامحها ... طلبات قهيوة ليها و لحياة ونطقات
مدام تورية : عاودي لي ، لي كاين وغانعاونك بلي قدرت عليه
عرفاتها فاش غاتكون كاتفكر واخا ماعارفاش شنو هي المشكلة لي حياة طايحة فيها دابا ولكن توقعات غاتكون المشكلة عندها علاقة بعادل
مدام تورية : [ بتاسمات لها ] شوفي ا بنتي ، انا ماجيتش و أسست جمعية لحقوق المرأة .. قبل ما نأسسها كنت وحدة من العيالات لي كايتعرضو للعنف .. كايضربوهم رجالاتهم و كايحرموهم من أبسط حقوقهم .. واخا يكون راجلك ولدي غاندافع عليك بحالك بحال كاع العيالات .. راجلك عرفتو على طريق وحدة من المعارف ديالو لي حتى هي كان عندها مشكل مع راجلها [ عاودات بتاسمات ليها باش تطمأنها ] عاودي لي قصتك وماتخافي من والو
حياة : عاودي لي قصتك نتي كيفاش حتى فكرتي تأسسي ديك الجمعية حيت على مابان لي ا مدام تورية من وراك قصة
مدام تورية : قصتي طويلة و غانحتاج سوايع باش نعاودها لك .. قولي لي مشكلتك
بدات كاتعاود لها كاع داكشي لي دار لها عادل و حناه و كيفاش قولبها فالمغرب و خلاها تسيني باش ايلا طلقو ماتشد من عندو والو و ماتتسال والو و كيفاش قولبها هو و المحاميين و كيفاش غرقات فالكريديات لي عطاوها عليهم أجل وكيفاش المحامي التاني طلبات منو غير استشارة و صدق حتى هو كايتسالها و هي مافاهماش اش كايتسالها و فين كايعاونها ... خلاتها مدام تورية حتى سالات عاد سولاتها
مدام تورية : عاقلة على سمية دوك المحاميين؟
حياة : وي تسناي نعطيط كارط فيزيت ديال كل واحد فيهم
جبداتهم و مداتهم ليها ... بقات كاتشوف فيهم و كانت عاارفاهم بحكم هي كانت كاتعاون شحال من مرا معنفة و اغلبهم كانت كاتعاونهم يتطلقو الشيئ لي خلاها تكون عارفة معظم المحاميين الكبار و الصغار فهاد المدينة .. شافت فحياة و نطقات
مدام تورية : ومالقيتي ا بنتي تمشي غير عند هادو؟ كاينين محاميين صغار و كايخدمو مزيان
حياة : راه ماكنتش عارفة شحال كايخدمو ... كان فبالي غير غانشد داكشي لي جاني فحقي من عندو و غانخلصهم و هاديك المحامية ماكانتش قالت ليا شحال كايخصني نعطيها و المحامي راه ماخدم معايا ما والو غير ناصب عليا
حياة : حيت كنت ضاربة حساب ولكن خرج ليا حساب اخر [ دوزات يديها على شعرها بعصبية و نطقات ] كنت كانقول صافي راها معاوناني غير نشد حقي و نخلصها
مدام تورية : عولتي على الفلوس لي كاينين فكونط طليقك؟ ايلا ماكانوش فلوسك فجيبك ماتبقايش تغامري بهاد الطريقة ا بنتي
حياة : واخا و هداك النصاب؟؟ علاش غانخلصو؟؟ راه ماعاونني فوالو علاش غانعطيه؟؟
مدام تورية : [ بتساؤل ] ماعاونك فتا حاجة؟
حياة : واالو مشيت لعندو النهار اللول خديت منو إستشارة و صافي [ تفكرات شي حاجة ] ولكن كيفاش؟؟؟ انا راه ماخدمتوش واش غايخدم معايا بلا خباري؟؟؟ انا ماكنتش كانقول ليه يعاونني هو لي كان كايتجمع بديك المحامية و كايعجنو و يخبزو غير منهم لراسهم و انا كان كايسحابلي كايعاونني حيت... [ زادت تعصبات و ضربات يديها مع الطبلة حتى تقصحات ]
مدام تورية : ا بنتي المغرب بوحدو و اسبانيا بوحدها ... هنا تا حاجة ما فابور ، كل واحد كايدير خدمتو حيت كايتخلص عليها مايمكنش يخلي الكليان لي غايخلصو و يتبع واحد ماغايخلصوش .. هنا ماكايتخلصوش بالله يرحم الواليدين
حياة : [ كاتعبر بيديها و كاتشرح و هي معصبة ] ولكن راه ماعاونوونيش ... راهم تافقو عليا واش ا عباد الله هما ضوروني بيناتهم و نزيد نخلصهم من الفوق؟؟ شنو غاندير؟؟ منين غانجيب لهم ديك الفلوس؟؟ واش نبيع كلوتي؟؟؟ [ ضحكات بفقصة ] حتى الكلوة لي نبيعها ماكايناش ، اش غاندير؟؟ منين غانجيب لهم الفلوس؟؟ نمشي نبيع راسي؟
مدام تورية : شنو لي خلاكم توصلي نتي و راجلك لهاد الحالة؟
حياة : راني عاودت لك ا مدام تورية كاع لي عندي عاودتو لك
مدام تورية : [ تنهدات ] دابا قلتي لي سينيتي على شي ورقة؟
حياة : سينيت على شحاال من ورقة ماشي غير ورقة وحدة
مدام تورية : تقدري تجيبيهم ليا غدا؟
حياة : ها هما جايباهم معايا
جبداتهم و مداتهم لمدام تورية لي كانت كاتقراهم وحدة بوحدة .. من الوراق لي سينات عليهم فالمغرب حتى لهادو لي سينات عليهم هنا .. كانت واحد الحاجة حياة مارداتش ليها البال فالمغرب فاش جات تسيني ، كانت واحد الكتابة صغييرة مكتوبة على طول الورقة فالجنب ديالها مي بالعرض ...
كانت هاديك الكتابة هي لي مارداتش ليها حياة البال وديك النقطة هي منين شدها عادل و خلاها تسيني على ماتكون كاتسالو حتى حاجة
طلبات منها نسخة من دوك لوراق باش تديهم لواحد الصديق ديالها حتى هو محامي و يشوف ايلا كانت شي ثغرة منهم منين تقدر حياة تسلك راسها واخا غير شوية حيت كانت فواحد الموقف ضعيف بزاف وعندها واحد الأجل محدود ، طبعا مدام تورية ماشي كاطبع الفلوس ولا مكلخة لدرجة تسلف وحدة داك المبلغ كامل ولكن كانت باغا تعاونها باش ماتبقاش مبلوكية فبلاصتها بحال هاكا وداكشي نيت لي دارت .. تفاهمات مع حياة باش يطلاقاو لاغد ليه
° فهاد الأثناء كانت هي كاتفكر غير فالكريدي لي عليها و الاجل لي عاطيينها باش تخلص لي عليها ، ماباغاش تهرب و ترجع للمغرب ... غايتشفا فيها لي يسوا و لي مايسوا واخا تعرف تبقا غير حارݣة هنا و ماترجعش ليه و هي فهاد الحالة .. حمدات الله منين بعدا مروى بعيدة و ماغايعرفوش بخبار طلاقها و هادشي لي واقع معاها ، ماكانتش عارفة بلي عادل ضرب بيها الطررر الطرطور و هادشي لي خلا التيليفون كان كايصوني فاش كانت فالدار
الخبار وصلات لمروى و أدم و من تما وصلات الخبار لمحمد و فتيحة و خديجة و من محمد وصلات الخبار لخالد و من خالد وصلات لباه و مرت باه و خوتهم ... فمدة قصيرة التيليفون كان كايتهز و يتحط ت الهضرة دايزة على كل لسان .. حياة طلقها راجلها وماعطاها الريال لصفر ... خلاها كاتتجلوق و دور فتشاطارا ديال إسبانيا ، حياة ماكملات العام و ها هي غاترجع للمغرب مطلقة كيفما مشات كيفما جات ... حياة غاترجع لدارهم و تبقا تيتي نيني حدا مها ... حياة غاترجع و هي هازة فضهرها لقب المطلقة و غاتبدا الهضرة فالعائلة كتر من لي كانت ... صااافي ديك فريفرة الجلدة لي كانت شاداها على التسلݣيط ها هي تهنات منها و طلقات و دابا غاترجع و تولي تهزو بالعلالي
شلاا هضور تقالو فضهرها و كانو هادو غير شوية منهم مع تبارك الله عائلة باها كايمووتو عليها و النص فعائلة مها كايحماقو عليها و الجيران كايتسطاو عليها .. ما قالو فيها غير الزينة
زهور ماخلاتش من جهدها و ماخلات لمن قالتها بقا لها غير تجيب البراح تخلصو و تخليه كايدور وسط الدروبة كايبرح بحياة
كانت خديجة جالسة و كاتواسي فتيحة لي واخا كانت قاطعة مع حياة إلا و أنها كاتبقا طرف من كبدتها .. حتى ام ماكاتبغي تعرف بلي عش بنتها تفرتك و كون غير كانت فالمغرب ... كاينا فبلاد ماعندها فيها حد و ماكاتجاوب على حد فالتيليفون باش يفهمو منها شنو واقع و فينها فين غاتبات و شنو غاتاكل
فهاد الاثناء كانت زهور جالسة فوق واحد السداري فبوز الدار
زهور : وااالو يا خويتي كاع ولادك زينين الا ديك جدرة ولدتي فيها غا لخلا و جلا .. بقات طير طير تا طلقها الراجل و ها هي من هنا يومين تلقايها جاية تشد لك ركنة هنا ... شوفي مروى زينة البنات مرا وݣادة ، عرفات كي تشد عندها الراجل
خديجة : [ فقصاتها بدات كاطبطب على مامات حياة ] ماديريش فبالك ا خالتي فتيحة ماغايكون غير الخير ان شاء الله
زهور : عوجة السعد غايكون معاها شي خير؟ لا زهر لا ميمون ، ماعرفاتش تا تشد راجلها حدا جنابها [ شافت ففتيحة و نطقات ] كون غا حبستي ف3 و مازدتيهاش معدبة فحياتها و معدباك معاها
خالد : هاديك قلتها لهم نهار اللول عمرها طفرو .. منين ماطفراتوش لهيه فسپانيا غاطفرو هنا؟ حنا لي رجال بشلاغمنا و مامطفرينوش فهاد لبلاد
خديجة : ياك باقا مزال حتى ماجاوباتنا علاش كانفايلو عليها؟
زهور : و مالو كدب؟ وجهها وجه الزلط و الكحط ماوجههاش وجه الصبليون ، ماطفراتو تا هنا بقا لها غا الصبليون و الݣور .. لالقات لي يقبل عليها من دابا لفوق و هي مطلقة مابحالها ولا كان عندها شي سعد مسݣد غاتكون هازة الكرش من راجلها و تجيب ليه البز لي يصرف عليه و عليها اما تا كتافها ما كتاف الخدمة [ ناضت من بلاصتها و بقات كاتقاد ففواطتها ] ليك الله ا خويتي هادشي لي قسم ليك الله و هدا مكتوبك فهاد الدنيا
هبطات لدارها للتحت و زادت غير كملات عليهم ... عاودات طلبات فتيحة من خديجة باش تصوني على حياة و تشوفها واش كاتجاوبها و بقات كاتصوني عليها ولكن ماجاوباتهاش
الخبار زاادت تطلقات و وصلات لشخص اخر من طرف هشام لي حتى هو عرف من الجيران بلي حياة طلقات و ماعطلش بحال هاد الخبار .. دغيا وصلو ...
° كانت جالسة و باقا كاتفكر فشي حل لهاد الحريرة و كيفاش تتفك منها ... عائلتها فيها غير المزالط حتى واحد مامطفرو 1000 درهم هي اللخرة مايبغيوش يسلفوها ليها و فالأصل خايبة حتى للتعاويدة واش هي فإسبانيا و تطلب من لي فالمغرب يسلفوها؟ غاتولي ضحكة بيناتهم ، بقا لها حل واحد ختها مروى على الاقل راجلها لاباس عليه ياك صافي تصفاو الخواطر و مابقاتش هازة شي ضغينة من جهتها كي كاتقول؟ [ تنهدات ] هي من واحد الناحية المبلغ لي غاطلبو منها ماشي قليل ولكن غير تسلفو لها ، غير ماتبقاش بحال هاكا مبلوكية فبلاصتها و واخا تعرف تخدم ليل و نهار و ترجعو لها سنت بسنت
جبدات تيليفونها .. لقاتو غايتفرݣع بلي زابيل ، طلعو ليها ليزابيل ديال خديجة و عائلتها ... ماماها و خوتها و باباها و بلاتي؟ حتى مرت باها مصونية؟؟ و كانت نمرة خرا ماكاتعرفهاش
صاافي عرفات الخبار غاتكون وصلات ليهم سخونة ، صونات على مروى هي اللولة باش بعدا تحاول تحل مشكلتها عاد تصوني عليهم .. جاوباتها فالبلااصة
مروى : مالكي نتي و عادل؟؟ كيفاه تطلقتو و نتوما مزال ماكملتو حتى العام؟؟
حياة : راكي عارفة ا مروى ماشي حنا اول وحدين غانطلقو ياما طلقو ناس قبل منا .. ماتفاهمناش و طلقنا
مروى : ماتفاهمتوش و صافي نضتو تطلقتو .. كان زوااج هداك الله يهديك ا حياة واش من اول مشكل تنوضو تطلقو؟؟ صدمتوني والله حتى صدمتوني معاكم مزال ماكملتو تا عام صحيح باش نقولو دخل معاكم زواج و مشاكلو
حياة : وا صافي ا مروى ماتزيدينيش حتى نتي واش صافي غير نتزوج بواحد خاصني نضرب معاه 10 سنين باش نتسما صبرت .. ماتفاهمناش و من اللخر صدق ولد الحرام
مروى : مالو شدار لك؟؟
حياة : قولي لي اش مادارش داك الكلب
مروى : واش غايكون دار فهاد الشهورة؟؟ ماعطيتوناش تا منين ندخلو بيناتكم و نصلحو لالقينا مانصلحو .. كلشي عندو الحل
حياة : دابا انا ماصونيتش عليك على هادشي .. صونيت حيت غرقت واحد الغرقة و مالقيتش كي ندير نوض منها ، ماعرفتش لي غايعاوني فيها و طحتي فبالي غير نتي
مروى : إيلا قدرت علاش لا راكي ختي
حياة : المهم شوفي سوا قدرتي تعاونيني سوا ماقدرتيش بغيت هادشي يبقا غير بيناتنا بلا ماتوصل الخبار لماما راكي عارفاها صحتها على قد الحال مابغيتش نكمل عليها
مروى : [ بنبرة قلق ] بديتي كاتخلعيني قولي لي واش واقع معاك
حياة : المهم محتاجة شي حاجة ديال الفلوس [ سكتات شوية و عاودات صححات ] ماشي غير شي حاجة .. خاصني نييت الفلوس ، ماشي تعطيهم لي غير تسلفيهم ليا ، غير فكيني من هاد الوحلة ا مروى راه مابقاش عندي من غيرك و ماقدرتش نطلبها من شي حد اخر .. كون ماكنتيش ختي ماكنتش غانطلبها منك
مروى : شحال خاصك؟؟
حياة : 42 الف يورو [ دوزات يدها على شعرها بعدم راحة ] انا قادرة نسيني على اي حاجة ايلا مارجعتهمش ليك دعيني عليهم
بقات مروى ساكتة شحال ... ماعرفاتش ختها فين غرقات راسها باش تحتاج 42 كاملة و مافهماتش شحال من حاجة ، فاش قالت لها تسلفها كانت كاتتوقع شي حاجة قليلة اما 42 مليون؟ على حسب المحيط لي كبرات فيه راه ماكايجمعها غير الفم ... الفلوس ديال 2 برطمات بفراشهم فالمغرب
مروى : الله يا حياة ما قلتي مليون ما قلتي 2 ... 42 مليون كااملة؟
حياة : راني عارفاك ماكاطبعيهمش و عارفة بحال هاد الفلوس ماكايتسلفوش ولكن فهميني والله و ماكنت واقفة عليها فهاد الشهر والله مانطلبها ، ماعرفتش اش ندير .. كونطي بقات ليا فيه غير 3000 يورو و هاد 3 الاف راكي عارفة يلاه تعاونني فهاد المدة على ما نرصي راسي و نضبر فشي خدمة و نقاد اموري
مروى : قولي بعدا غير علاش محتاجاها
بقات حياة كاتفكر لثواني عاد جاوباتها
حياة : خاصاني ل2 محاميين
مروى : وعلاش؟؟
حياة : نصبو عليا ا مروى .. كنت موكلة محامية باش توقف لي على طلاقي من عادل وكنت ناوية غير نشد داكشي لي غايجيني فحقي منو و نخلصها ولكن هادشي ماكملش و ماجاني والو و هي كاتتسناني نخلصها دابا و زيدي عليها محامي وحداخر خدم منو لراسو و انا ماقلتش ليه يخدم معايا و دابا راه كايتسناني حتى هو نخلصو
مروى : و مالكي عليها؟؟ اش داك لمحاميين بحال هادو؟؟ مالكي ماشديتي محامي صغير يفك لك جرتك
حياة : انا قلت غير غانشد الفلوس و غانخلصهم .. دابا راهم دايرين معاها أخر أجل اللخر ديال هاد الشهر ولا غانصدق مجرجرة فالمحاكم معاهم .. خاصني ضروري نفك حريرتي معاهم [ سكتات لثواني و عاودات نطقات ] والله ا مروى و تعاونيني فهادي عممرني نساها لك
مروى : [ بتردد ] ماعرفتش اش غانقول لك والله ... خليني نهضر مع ادم و نشوف باش غايجاوبني
حياة : شوفي راه مايجي فين يخرج العام حتى نرجعها لك واخا نعرف نتقطع عليها غانرجعها لك ولا ماكنتيش تايقة فيا نقدر نرجعها لك نسيني معاك فأي ورقة باش تضمني حقك ...
مروى : راكي عارفة كون كانت فجيبي والله تا نعاونك ولكن خاصني نهضر مع أدم و نشوف معاه
حياة : ردي عليا بلي كان باش نعرف شنو ندير ايلا ماكان والو
مروى : وعلاش طلقتي نتي و عادل؟؟ واش وصلكم لهادشي؟؟
حياة : ماقال لكم والو؟
مروى : قال لينا طلقتو و مابقيتيش على مسؤوليتو و صافي
حياة : على ايمتا انا كنت على مسؤوليتو؟
مروى : و على بيمن كنتي مزوجة؟
حياة : صافي صافي
مروى : علاش تطلقتو؟
شنو غاتقول لها؟ غاتعاود لها القصة كاملة؟ من اللول حتى للتالي؟ من فاش تزوجو حتى لفاش طلقو؟ و كيفاش كان جايبها اصلا على اساس عبدة و كيفاش نقص منها قدام صحابو و كيفاش خلاوها كاتموت فاش مرضات و كيفاش لعب عليها هو و المحاميين و غرقها؟ وي ماسكتاتش ليه ولكن ايلا قالت لها هادشي تقدر تقولو لراجلها و راجلها شوف لكن تاني غايعاودو
حياة : لقيتو مع وحداخرا و صافي ماصبرتش
مروى : دابا هادشي كامل غير حيت لقيتيه مع مرا خرا؟؟
حياة : ا سبحان الله كيفاش غير؟؟
مروى : واش الرجال عارفاهم كايتشدو؟؟ ياك من بانا و جاب زهور على منا
حياة : ماتجبديش ليا عافاك سيرة ديك المخلوقة ... كون دارها ليا داك الأمانة كون وريتو النجوم فعز النهار اشمن الرجال ماكايتشدوش
مروى : والله تا كبرتي الموضوع على والو .. داكشي راه عادي و كايوقع ماشي نتي اول وحدة ، كان خاصك غير تصبري حيت كان غايدور تا يعيا و يرجع لك .. ياك نتي لي تزوج بيك و نتي لي دايرك فدارو ايوا اش خصك؟
حياة : مزوجة بسليمان القانوني و مافراسيش؟ باش نحس براسي عندي الزهر حيت مزوج بيا و دايرني فالدار؟ دايرني السلطانة هيام فالقصر و الباقي جواري ياك؟؟ ا لالة راه بزز عليه يشد معايا الطريق و مايخرجوش عينيه لعيالات خرين ديك الهضرة ديال يدور حتى يعيا مامسلكاش معايا [ خرجات ضحكة ديال الطنز من فمها ] وا زوينة هادي قالك اش باقي خصني
مروى : راه كانهضر معاك فالواقع ا حياة خلينا من داكشي ديال يبغيني بوحدي و غير انا لي نكون .. كاع الرجالة لي تشوفيهم كايقولو هادشي عرفيهم غير كايكدبو على عيالاتهم و على راسهم .. هادشي علاش ربي عطا 4 فالشرع للرجال حيت وحدة ماكاتقدهمش داكشي فطري عندهم
حياة : شوفي اول حاجة هاد الزواج عطاني غير صداع الراس ها العكوزة ها الزبل تاني حاجة وي كاين لي كايبغي غير وحدة و فايتة شفت شحال واحد منهم وتالت حاجة الشرع عطا 4 حيت الرجال اقل من العيالات ماشي حيت الرجال ماقادرينش يشدو عينيهم عندهم ... باراكا ماتبقاو تغطيو عليهم بمايقدوش يشدو عينيهم ولا ماكاتقدهمش مرا وحدة .. لي باغي شي وحدة راه كايبقا معاها غير هي ، علاش العيالات قادرين يشدو راسهم ها؟؟ علاش حتى هما مايقولوش لا ماقادرينش و ماقادناش غير واحد
مروى : العيالات ماشي هما الرجال ا حياة
حياة : شوفي شوفي شوفي الله ينورك خلي دوك الافكار ديالك عندك راكي عارفة انا وياك ماكانتفاهموش فهاد المواضيع ديال الزواج و الضرات ... منين نتي متقبلة الضرة تجيك رجعي للمغرب و قولي لأدم يعزل و يتخير
مروى : راني غير كانهضر معاك علاش دابا كاتتعصبي عليا؟ كانهضر غير على مصلحتك
حياة : ماكانتعصبش ولكن انا اصلا ماشي هي هاديك و زدتي نتي كاتقولي لي ايلا شي وحدة طلقات حيت لقات راجلها مع وحداخرا كاتكون غير زادت فيه ... و نتي عارفة الراجل ايلا لقاها هي مع وحداخر غايخرجها منها .. علاش؟ حيت هو كايدير داكشي لي كايشوفو غايبرد ليه ديك الشمتة لي شمتاتو و حيت الرجال بيناتهم متافقين بلي المرا ايلا غدرات كاتكون قاستهم فرجولتهم ... ايوا و علاش حنا البنات و النسا بيناتنا كانشوفو الراجل ايلا خان خاص نصبرو؟ خاص نسامحو؟ خاص نزيييدو نتزوقو لهم و نبدلو اللوك باش نعجبوهم و مايبقاوش عينيهم فالتين ... قلبي هاد الموضوع الله يرحم الواليدين غير كاينرفزني
مروى : وا شنو غانقول لك هاد العقلية عمرها تسلكك
حياة : غا خليها ا لالة عاجباني و مسلكاني .. المهم شوفي هانا غانقطع معاك راه ماما كاتصوني عليا خليني نجاوبها
مروى : واخا و المهم باش ما جاوبني ادم غانرد عليك [ سكتات شوية و عاودات نطقات ] ماديريش فبالك ايلا مابغاش غانشوف لك شي حل
حياة : عممرني ننساها لك والله
قطعات معاها و عاودات صونات على ماماها لي كانت كاتصوني عليها .. غير جاوبات و هي تسمع صوت محمد كانت كاتتسنا مها لي تجاوبها
محمد : حياة؟
حياة : وي محمد
محمد : مالك ماكاتجاوبيش؟
حياة : غير كنت مشغولة شوية و صافي
محمد : الناس كايهزو التيليفون كايجاوبو .. ماكايخليوش كلشي مشطون عليهم
حياة : راه كنت مشغولة ا محمد
محمد : شنو وقع بينك و بين راجلك؟
حياة : طليقي ا محمد .. مابقا جامعني بيه والو
محمد : علاش طلقتو؟ علاش مافخباري والو؟
حياة : ياك نتا لي قلتي ديك المرة مابقيتيش باغي تعرف عليا شي حاجة؟ ياك قلتي ننساكم؟ ...
وي باقي مانسا داكشي لي دارت ختو و مزال ماتفك داك المشكل ولكن فالأول و الأخير كاتبقا ختو .. واخا يغضب عليها عقود من الزمن و مايدويش معاها و يقطع معاها الهضرة ولكن مايمكنش يعرفها كاتجرجر فبلاد ماعندها فيها حد و تجيه عادية و يقول تضبر راسها .. سوا هي سوا مروى
محمد : درتيها يزلق فيها جمل وكاتسناينا نفرحو لك؟ [ مابغاش يجبد داك الموضوع تاني ] فينك دابا؟ فين جالسة؟
حياة : كارية واحد الپرطمة
محمد : واش عندك باش تخلصي هاد الشهر؟
حياة : وي راني خلصتو و ساليت
محمد : عندك باش تصرفي؟
حياة : عندي ا خويا محمد غير بلا ماتشوشو عليا .. ماعرفتش اش قال لكم عادل ولكن غير تهناو من جهتي راني بيخير و على خير
محمد : منين جاوك الفلوس؟
حياة : كنت موفرة شي حاجة فالكونط هما لي غانديپاني بيهم هاد الأيام و راه غانقلب على خدمة
محمد : وراقك مزال مامريݣلاهم فاش غاتخدمي فالنوار؟
حياة : ماشي لديك الدرجة راني ماشي هنا حارݣة و حالتي مامعقداش لديك الدرجة ... خاصني غير نتحرك و مانبقاش جالسة و صافي
محمد : وشنو وقع بينك و بين راجلك؟ علاش وصلتو للطلاق؟ دار لك شي حاجة؟
حياة : غير ماتفاهمناش و صافي راه ماكايناش شي حاجة لي تتشوشو عليها غير الموضوع كبر على والو
ماقنعاتهاش هضرتو ... حيت الهضرة لي قالت لهم مروى فاش وصلها الخبار هي و راجلها ، ماكانتش هضرة كاتفرح .. ماكرهش يقول لها ترجع بحالها على الاقل فتيحة غاتبقا مهنية من جهتها و على الاقل ماغاتبقاش تما كاتتجلوق ولكن داكشي لي دارتو فالمغرب حتى هو ماكانش كايفرح و فاش غايجيب وفاء للدار مايمكنش يخليها تتجمع هي و حياة فالدار واصلا هادشي علاياش تفاهم هو و الحاج دريس اما الهضرة لي ضارت بينو و بين داوود كان خاص غير دمعة ، دمعة وحدة من وفاء ولا غير تتشكا حيت سمعات شي هضرة ماعجباتهاش .. و كان غايشوف اللخر معاه
على أي حال ... كان مشوش عليها و هي تما بوحدها ولكن فنفس الوقت ماكانش باغيها تجي للمغرب يمكن كانت هاديك هي الضريبة لي غاتخلص على داكشي لي دارت و يمكن كان غير جزء منها
محمد : وغير ماتفاهمتوش و نضتو تتطلقو؟
حياة : هادشي لي عطا الله معاه ماكتابش نطولو [ سكتات لثواني كانت مترددة ] واش ماما حداك؟
محمد : عيانة هاد نهار .. راها كاترتاح
حياة : [ ماتيقاتش هضرتو ] واخا ... المهم سلم على ماما و قول لها بلا ماتشوش عليا حيت ماكاينش علاش
محمد : دابا نوصل لها سلامك ... المهم حضي راسك و ماتيقيش فلي كان ديك البلاد ماشي بحال هنا
حياة : عارفة لي كاين ا خويا محمد
محمد : خليتك فراحة الله .. ردي البال لراسك
قطع معاها و فهاد الاثناء صونات على خديجة و هاد المرة عاودات لها القصة كاملة بلا ماتنقص بلا ماتزيد ... و حتى خديجة عاودات ليها على الاحوال ديال عائلتها و الطرر لي ضرباتو لها زهور وسط الجيران و الهضرة لي كانت كاتسمم بيها فتيحة
بقات كاتهضر معاها شحاال حتى عيات ... قطعات معاها و ناضت نعسات اما حتى الشهية للماكلة كانت عندها مسدودة
صبح الصباح ودارت روتينها الصباحي كالعادة و جلسات كاتقلب على الخدامي لي قراب ليها ولي يسلكوها و تقدر عليهم .. حتى يدها لي مهرسة ماكانتش مساعداها و هادشي لي خلا باش تلقا خدمة صعيب عليها حيت الدقة جاية فاليد ليمنية و ماغاتجي فين تبرا حتى يكونو غرقوها و سالاو
صونات عليها مدام تورية و دارت معاها باش تمشي لعندها لداك العنوان لي كاين فكارط فيزيت ديالها و داكشي لي دارت ... شدات الطريق لعندها لقاتها كاتتسناها سلمات عليها و جلسات كاتتسناها تقول ليها بلي لقاو شي ثغرة منين يدوزو لدوك المحاميين ولكن من زهرها المكوز الثغرة لي لقاو فيها الطلوع و الهبوط و خسران الفلوس وشوف تشوف واش غاتقدر تتفك عادي ولا غاتكون غير خاسرة فلوسها ومعدبة على والو حيت السيدة كانت غير كاتسيني ولي قالوه لها كاديرو ... يعني و بإختصار كان خاصها تختار وحدة من 3 يا تزيد تخسر الفلوس و تبقا طالعة هابطة و شوف تشوف واش غاتسلك منها يعني يقدر تزيد تخسر الفلوس على والو ... يا تخلص وتخرج من باب واسع ... يا تكحل ضواصاها ويجرجروها
حياة : [ شافت فمدام تورية ] ولكن دابا انا اش غاندير؟ ماعنديش الحق نشد كريدي من البنك و ماعنديش من عندمن نتسلف .. هضرت مع ختي ولكن مامتأكداش واش غاتقدر تعاونني
مدام تورية : [ شافت فالمكانة فيديها ] عندي واحد الرونديڤو من دابا واحد الساعة .. غير توصل العشية و نمشيو انا وياك لعندهم .. نقدرو نوصلو لشي حل معاهم
حياة : مانقدرش زعما نمشي لشي بلاد خرا من غير المغرب؟
مدام تورية : باغا تهربي؟
حياة : ماشي نهرب ولكن على الاقل غايكون عندي الوقت باش نجمع الفلوس و ديك الساعة نخلص المحامية اما حتى داك الكلب انا ماشكيتش عليه يخدم معايا هو لي خدم منو لراسو
مدام تورية : ماشي فصالحك ديريها ا بنتي ..
تناقشات معاها و طرحات عليها بعض الحلول لي يقدرو ينفعوها ولكن ماكان حتى واحد فيهم مسلك حياة
خرجات من عندها من مور ماتفاهمات معاها على يمشيو لعند دوك المحاميين فاش تسالي و داكشي نيت لي دارت ... غير سالات شغالها و مشاو لعندهم ولكن ديك المشية غير مازادت تفقصات فيها و كان المحامي كايستفزها بلعاني و يلعب لها بأعصابها
خرجات من تما و هي طالع لها الدم و موراها رجعات للدار من مور ماعطاتها مدام تورية الكلمة بلي غاتعاونها باش ما قدات
ماطالش حالها بديك الحالة بزاف خصوصا منين صونات عليها ختها لي صافي حتى قالت موحال واش باقي غاتصوني عليها ولا ترد عليها
حياة : ها العار ما قولي لي شي حاجة كاتفرح ا مروى ... راني راجعة من عند داك الويل ديال المحامي و انا كانترعد
مروى : غير رتاحي .. جايبة لك خبار كاتفرح [ صونات عليها ابيل فيديو ]
حياة : غير خلي الابيل فيديو حتى لمن بعد والله مافيا و وجهي اصلا بحال الموتى هاد الساعة
مروى : ماشي مشكل ... المهم راني من البارح و انا كانهضر مع راجلي عليك و مابغاش يخصر ليا خاطري ، لهلا يخطيه عليا و خلاص [ شافت فيه حيت كان حداها ] .. المهم راه قابل يعاونك ولكن بشرط
حسات بقلبها تفاااجا و داك الضيق لي كانت كاتحس بيه هاد الايام بدا كايترخف .. احسن خبار سمعاتو هاد النهار هو هدا ولكن بقات فداك الشرط شنو هو
حياة : اشمن شرط؟
مروى : ها هو حدايا عايني ندوزو لك [ شافت فيه باش يهضر ]
أدم : لاباس عليك ا حياة؟
حياة : وي ادم الحمد الله ربي يخليك و نتا؟
أدم : بيخير .. سمعت وليتي كاتعرفي تهضري و تفهمي بالاسبانية .. تبارك الله عقلك خفيف
حياة : كنت كانتعكل غير فالنطق ديالها و صافي ، راها ماصعيباش بزاف
أدم : المهم مروى عاودات لي مشكلتك و فهمت لي كاين من عند عادل
حياة : وي راه صاحبك ايلا ماعاود لك نتا اللول لمن غايعاود ولكن كاتبقا فشنو عاود و شنو خلا و ماعاودوش
أدم : داكشي لي كان بيناتكم فات ، دابا خلينا فهادشي لي واقع لك .. نتي ماشي شي وحدة برانية راكي خت مراتي و من العائلة .. غانعاونك و نسلفك الفلوس لي محتاجة ولكن باغي يكون كلشي بالوراق باش نتفاداو توقع شي حاجة ماباغيينهاش
حياة : ماعنديش مشكل نهائيا .. قلتها لمروى الباارح ، كلشي يكون قانوني ولا مارديتش لك فلوسك خلي ديك الساعة القانون يدير خدمتو معايا .. لي باغا غير عطيني وقت يكون كافي باش نرجع لك فلوسك حيت هادو مزيرين عليا مامخليينش ليا فين نضبر و كون ماكان هاكا والله مانطلب منكم شي حاجة ولكن ماشي لخاطري
أدم : غانعطيك عامين .. كافيينك؟
حياة : وي كافييني
أدم : متيقنة كافيينك؟؟
حياة : وي متأكدة قادرة عليها
أدم : راكي عارفة القانون مامعاهش اللعب
حياة : راه عامين ماشي هي شهر .. كون بغاو دوك الكمامر يصبرو معايا عامين كون عطيتهم زبلهم
أدم : غانشوف السيمانة الجاية نجي لعندك انا و مروى و نقادو معاك أمورك
حياة : [ بإمتنان ] والله ماننسا لك هاد التعامل لي درتي معايا نتا و مروى
أدم : ماشي مشكل مابيناتناش هاني غاندوز لك ختك
عطا التيليفون لمروى و كملات معاها الهضرة ... كانت حياة حاسة بواحد الراحة ماكاتتوصفش ، غير قطعات معاها صونات على مدام تورية كاتبشرها بهاد الخبار .. دابا عااد تحلات لها الشهية و بدا يرجع اللون لوجهها
دوزات الباقي من داك النهار غير فالدار حالة البيسي و كاطلق يديها فرسمة جديدة .. سالات و تعشات و نعسات و غير صبح الصباح بدا التيليفون كايصوني عليها طلعات لها النمرة ديال زهور و ماعرفاتش مال هاد خيتي كاتصوني عليها تاني ... قطعات عليها و عااودات صونات عليها و عاودات قطعات عليها و عاودات صونات عليها حتى طلعات لها الخزز للراس
حياة : ياك لاباس؟ واش بايتة كاتحلمي بيا؟
زهور : والو باس ا حبيبتي ايوا مبرووك مبرووك
حياة : الله يبارك فيك .. عاد وصلك خبار الطلاق؟
زهور : تا حاجة ماكاتتخبا كانهضر لك على المنايل لي غاتشديهم من ختك .. ايوا شتي ا بنت فتيحة ختك لي خرجتي معاها العيب و بغيتي تشتتي لها عشها ها هي كاتعاونك
حياة : غاتجبديها ليا من جيبك؟ واش ماناوياش دخلي سوق راسك؟؟
زهور : وعلاش هادشي فيه السوق؟ قلت لك غا الحق وماخرجات من فمي كلمة العيب .. مروى الله يرضي عليها قلبها كبير وكاتعاون لي يستاهل و لي مايستاهل وربي طيحها فراجل كايدير لها كي الما القليل .. تا حد ماكايلقا لي يخلص عليه تا منيول ونتي لاقية لي يخلص عليك 42 منيول
حياة : قلتها لك و ديما كانقولها لك و غانعاود نقولها لك ... داكشي لي بيني و بين ختي بقاي تخرجي سوقو راه فيا مانرجع و نحرر عليك عيشتك وماندير لا بوجه مي لا بوجه با
زهور : علاش شكاتعرفي ديري من غير هادشي؟ ها نتي الراجل على مزيناتو طيرتيه تا هرب و مابقا شاف من موراه .. عاضرااااه ، من نهار تزوج بيك و انا نخمم ليه مسكين فين غاتتلا بيه ليام و هو واخد كلبة مصعورة
حياة : عضيتك وبقا فيك الحال؟ ماعندك شغل هاد الصباح ياك؟ داكشي علاش بنت لك فالبلان و جاية تتعاطاي معايا ...
زهور : لوكان لسانك و ردان الهضرة و الطيران لي فيك ينفعك ݣاع مايطلقك الراجل بلا ريال بلا جوج ويخليك تتجلوقي فالصبليون لا ورقة لا 2 غارقة كريديات ، الناس كايمشيو للصبليون يجيبو الفلوس ونتي غاتدخلي للبنيقة تاعهم .. ماطفرتيه تا فالمغرب بقا لك غا الخاريج ، غاطفريه فيه بالجفاف على ݣلبك
حياة : نضرب الجفاف ولا الكراطة و نتي اش مشا لك؟
زهور : خنشوشتك غا خنشوشة الجفاف شوفي لالاك لي كاتعرف للخاريج حاكمة راجلها فقرعة و سادة عليه وشادة تيقارها .. كلمة العيب ماتسمعيهاش من فمها .. لسانها يقطر غا العسل و كاتسمع للهضرة ، عارفة شكادير شتيها فاين وصلات؟ ها هي فدار زمانها معززة مكرمة عايشة فالعز و يدير لها كي الما القليل لي حلات عليها فمها يجيبها لها لحدا رجليها
حياة : ساليتي؟
زهور : ماساليتشاي .. ياك كنتي غاتحرمي عليها رزقها هي و زمانها شتيها كي دارت بوجه مك .. ماكاتعرف حسد ما قلبها كحل ها هي دابا غاتخلص عليك لكريديات لي عليك الناس كايشدو استاد نتي بغيتي ديري جناااوح 2 .. ايوا دابا ماين تخلص عليك نكري خيرها يا نكارة الخير و قولي عليها مامزياناش .. كون ما هي كون راك غاتموتي فلبنايق
حياة : و شكون قالك مروى غاتعطيني؟ هداك سلف و غانرجعو لها و كي قلت داكشي بيني و بين ختي و ماكايدخل بين الضفر و اللحم غير لوسخ .. سيري قابلي راجلك و ولادك و فوتي عليك سوقي راني مانليقش ليك ا زهور
زهور : ياودي يا بنيتي طيري تا طيري تاليتك ترجعي للمغرب و تضربي الجفاف على لالياتك لعيالات
حياة : واخا .. بقاي كاتتسناي داك النهار
قطعات عليها و اول حاجة دارتها هي صونات على مروى على هادشي لي دارت واش هي كاتغطي و بنادم كايعري؟ حالفين حتى يعرف كلشي هاد المصائب ديالها ، مع جاوباتها مع دخلات فالموضوع
حياة : علاش قلتيها لزهور؟ واش ماخفتيش تقولها لماما؟ واش انا كانغطي و نتي كاتعري؟ ياك قلت لك خلي داكشي بيناتنا؟؟
مروى : [ كان باين فيها عاد فاقت من النعاس ] صباح الخير [ كاتتفوه ] وا راه عادي .. هاد الخبار كانت غاتوصل لهم غاتوصل لهم
حياة : من عندمن غاتوصل و هي بيناتنا غير حنا؟ .. كان ضروري تقوليها لها؟ نتي عارفاها ماكاتحملنيش وغاتزيد تتشفا فيا .. اش فيها ايلا خليتي هادشي بيناتنا
مروى : عادي تا نتي راه غي انا لي عاونتك ماشي شي حد براني و تا لاهضرات فيك ماغاتقولش براني لي عطاك الفلوس .. مافيها تا حاجة لاقالت ختها عطاتها وزايدون نتي عارفة زهور ماكانخبي عليها والو راها بحال مي
حياة : وا ما مكش هاديك ... مك هي لي ولداتك و ضربات ليك الكرفي منين جاتها مك منين؟؟ واش نتي لي شفتيها تقولي لها مي؟؟ بزاف عليها تا تكون فبلاصة منا
مروى : دابا واش بقا فيك لحال لاش قلتها لها؟
حياة : ماتقوليش ليها ا ختي ياك انا جيت هضرت معاك نتي ... علاش تقوليها ليها و تجي تصبح عليا بهاد الهضرة .. كون بغيتها تعرف غانصوني ليها ديريكت ولا كاع ندير لايف و تعرف
مروى : دابا علاش كاتتعصبي عليا؟؟ انا مادرت تا حاجة خايبة نيتي كانت صافية و ماقصدت فيها والو
حياة : عرفتي شنو صافي صافي .. رجعي كملي نعاسك غانمشي نقضي حاجة لراسي
قطعات معاها و ناضت كاتوجد راسها باش تمشي تشوف واحد الجمعية كاتدعم اللاجئين و المهاجرين ... ماكانتش باغا تزيد تضيع الوقت ، كانت باغا تعرف كاع الجمعيات لي يقدرو يعاونوها والأهم كان خاصها تقلب على شي جمعية تقدر تعطيها مأوى باش تحيد من الكرا و هاكا غاتبقا توفر فلوس الكرا فاش تلقا خدمة باش تقدر ترجع الفلوس لأدم فالوقت
بقات كادور من عنوان لعنوان و اي جمعية لقاتها فديك المدينة مشات ليها كاتسول و تزيد تعرف اي حاجة ماكاتعرفهاش ... مارجعات للدار حتى ضارت عليهم وحدة بوحدة
بدات كاتوجد الماكلة لراسها و فنفس الوقت كانت كاتقلب على شي خدمة تديپاني بيها فهاد المدة لي غاتكون يديها مهرسة فيها ، واخا مايكونش شي خلاص كبير مي على الاقل شي حاجة لي غاتخليها يكون عندها واحد المدخول و داك المدخول تخلص بيه ماكلتها و شرابها بلا ماتقيس الفلوس لي عندها فالكونط ... بقات على داك الحال حتى صونا لها التيليفون ، كانت هاد المرة نمرة باها
حياة : ماحرشتهاش عليها انا قلت لها هاديك ماشي بحال مها و قلت غير الحق وحاجة بيني و بينها علاش تخرجها لبرا؟؟
عبد الرحمان : غادير فيك خير يا بنت الحرام و ماتخليناش تابعيينك فلحباساات و باقا كاتغوتي عليها وتقطعي لها فوجهها؟؟؟ مابغيتيش تي تحشمي ياك؟ كون ما ختك الله يفرشها بالرضا و يغطيها بالرضا فين كانت غاتتلا بيك؟؟؟ ا دوي يا تريكة الناقصة .. حرااام واش يݣر فيك الخير
زهور : [ كانت جالسة حدا عبد الرحمان ] مروى مسكينة ماعندها زهر خبزها ذكر لي كلاه كاينكر .. تعيا مادير لمزية فختها و شوف باش كاتجازيها
حياة : ا سيدي انا مابقيت باغا واالو فرعتو ليا راسي بهاد الهضرة ... خير خير خير ، مابقيت باغا والو لا منها لا من راجلها ... حرااام واش نشد من عندهم شي ريال اللهم الحبس والا نبقا نسمع هاد الهضرة حياتي كاملة ...
قطعات عليهم و صونات على مروى .. بقات كاتتسناها تجاوبها ولكن ماجاوباتهاش حيت كانت مشغولة اما حياة كان كايسحابلها بلعاني مابغاتش تجاوبها
دخلات للواتس اب و سيفطات لها أوديو
حياة : شوفي ا ختي غير هضري مع راجلك شدو فلوسكم عندكم ماتعطيوني مانعطيكم والمرة الجاية ايلا كنتي باغا تعاوني شي حد ماتمشيش تضربي بيه الطر عند لي يسوا و لي مايسواش هدا ماكايبقاش خير و نتي عارفة مزيان فلوسكم كنت غانرجعها لكم واخا ندير لي ماكايدارش ماكنتش غانخليها صدقة فيا راني ماشي طلابة .. هادشي غير مزال ماشديت فلوسكم فيدي اما كون شديتهم كون دوزتوني فدوزيم راه باين العربون من دابا شنو كنت غانسمع من هنا للقدام ... ايلا غير غاتبداي تمني عليا بناقص
سيفطاتو لها ولاحت التيليفون فوق الكنبية ... حطات راسها على الطبلة وهي كاتفكر فكيفاش غاتخرج راسها .. ضاقت بيها الدنيا و ندمات كاع لاش فكرات تطلب من ختها تعاونها واخا ماكانتش غاتصدق عليها و كانت ناوية ترجع لهم فلوسهم بالفائدة باش هاكا مايبدا يتجمل عليها حد ولكن هادشي كان يليق مع الناس الطبيعيين ماشي بنادم لي باغي غير منين يدوز لك و غير شنو يشد عليك ... بدا كايصوني عليها التيليفون و ماتسوقاتش ليه كانت غارقة غير مع راسها كيفاش غاتحل حريرتها .. برزطها التيليفون بالمصونيات طلات على شكون كايصوني لقاتها مروى .. مابغاتش تجاوبها
مشات لبلاصتها باش تنعس او بالاحرى باش تحاول تنعس .. ماداهاش النعاس ديك الليلة ، الليل كامل و عقلها كايفصل و يخيط و كايشوف شي مخرج تخرج منو .. عقلها ماكانش كايفكر هاد المرة فكيفاش تردها لعادل قد ما كان كايفكر فكيفاش تخرج من هاد الوحلة لي راها فيها .. الطاقة اصلا باش تفكر فعادل ماكانتش عندها ، وي ضروري ماغاترد ليه دقتو حيت صرف بنادم مايمكنش يبقا عندها ودقتو كان غايشدها غايشدها قد ماتعطلات واخا يدوزو عقود من الزمن ولكن قبل من هادشي خاصها تفك حريرتها و ماتحاولش تنهك عقلها فشي حاجة ماغاتفيدهاش دابا
دابا عندها حوايج أهم ... العديان لي جالسين كايشمتو فيها و كايتسناوها ترجع للمغرب تضرب جفاف كي قالو .. و الاهم هاد المحاميين لي خارجين لها من الجنب و رابطين لها يديها
ما نعسات حتى وصلات 6 ديال الصباح بكثرة التفكير و ما فاقت غير على الصونيط ديال التيليفون ، هاد ليامات ولاو ليزابيل على الجهد
شافت شحال الساعة لقاتها 9 .. طلعات لها نفس النمرة الغريبة لي ماكانتش مقيداها عندها كانت كاتبدا ب 0039 توقعات يكون أدم يقدر يكون بدل نمرتو ولا شي حاجة حيت فإيطاليا كانت كاتعرف غير ختها و راجل ختها .. اكسيبطات ديك المكالمة و جاوبات ، كان صوتها باقي باين فيه النعاس
حياة : وي؟
_ [ بصوت رجولي ] لي كايكون عليه الدين ماكايديهش النعاس
حياة : أدم؟
_ ماشي أدم
حياة : [ ناضت وجلسات فبلاصتها ] واش خباري دازت فالتلفازة و مافخباريش؟؟ و مغربي من الفوق
حياة : هاد الهضرة كون ماكنتيش باغي تسمعها ماغاتصونيش ، شكون معايا؟
_ أصيل
حياة : متشرفين و علاش مصوني عليا؟ فين كاتعرفني اصلا؟
كان باين بلي غير كاتتبهلل حيت مايمكنش الانسان ينسا شي حد بهاد الزربة و عاد هي ماشايفاهش مرة وحدة واخا كانو لقائاتهم قليلة مي على حسب المواقف لي كانو كايتحطو فيهم ماكانش ساهل تنساه بهاد الزربة
أصيل : السبت غانجي على شي خدمة فإسپانيا ، غاندير معاك الوقت فاش نسالي ونمشيو نحلو المشكل لي عندك
حياة : أولا انا ماشكيتش على ادم يقلب على لي يعاونني ثانيا انا مامحتاجاكش تعاونني و ثالثا شكون قالك انا السبت غانكون مسالية؟ فصلتي و خيطتي مع راسك و ختاريتي تجي و ختاريتي النهار و باغي تختار الوقت من مور ماتسالي و انا غانتسناك حتى تقولها لي و نطلاقاك شكون قالك انا اصلا غانقبل نطلاقاك؟ و رابعا..
أصيل : [ قاطعها ] ماعندكش شي حل ، ماتقصحيش راسك
حياة : [ خرجات ضحكة استهزاء خفيفة من فمها ] و يكون عندي ولا مايكونش و نتا مالك؟ إيلا قصحت راسي و جبتها فراسي .. غانجيبها فيه ماشي فيك و شكرا ، قادة بمشاكلي .. و قول لداك صاحبك مايبقاش يفرق نمرتي على صحابو باش مانخرجش معاه للعيب ... نهارك مبروك [ قطعات عليه ]
كان عارفها طايشة وديك قصوحية الراس ديالها ما غير غاتغرق لها الشقف ... كايشوفها غير غادا و ماراداش البال للحبس لي كايتسناها فأخر الطريق اما هي فهاد الأثناء كانت ناضت من بلاصتها و هي طالع لها الدم ... تاني مرة غاتتعطا نمرتها لواحد من صحاب ادم اللول منهم ها فين وصلها و التاني مانعرفت فين باغي يوصلها ... ولكن الحاجة لي امبوستاحيل تتحيد من راسها هي تشد منو شي ريال ولا من شي قندوح يبقا كايتجمل عليها من بعد .. ختها لي من لحمها و دمها و مشات ضربات بيها الطر؟ و كانت كاتمهد الطريق باش تولي تمن عليها هي و العائلة من هنا حتى لمانعرفت فوقاش ... فما بالك بالبراني ايلا كان غايعاونها؟ و هدا ماشي أي براني ... لا هدا لي ديجا هانها على سلسلة
هادي مشكلتها و باش تتفك منها بلا مايبقا يمن عليها بنادم غايخصها تحلها راسها ولكن كيفاش؟ و هي ماعندها حتى الربع من داكشي لي خاصها تخلص؟ ... دخلات تدوش و عقلها غير كايفكر ، مادازش بزاف ديال الوقت حتى تفكرات واحد الحاجة مهمة غفلات عليها بل نساااتها كاع ...
لوات على راسها فوطة و خرجات بالزربة كاتقلب فشي وراق كانو عندها .. جبدات واحد الكلاسور كانت جامعة فيه كاع الوراق لي كانت كاتسيني عليهم و كايسيني عليهم عادل من فاش بدات مع دوك المحاميين هي عاقلة مزياان على واحد الحاجة داك المحامي هي ماوكلاتوش ، فين الوثيقة لي كاتدل بلي هي وكلاتو؟؟ ماسيناتش على شي وكالة معاه شنو واش وكل راسو براسو؟؟ الحماق هو هدا على هاد الحساب أي محامي يقدر يجي و يقول لها خدمت معاك و كانتسالك القد و القد
جلسات فوق الكرسي وبدات كاترجع السينتة اللور وكاتحاول تعقل واش سينات على شي وكالة معاه حيت فديك الوقت عطاوها تسيني على شحال من حاجة و كترو عليها الوراق .. كان عندها شك واش يكونو دوزو لها شي ورقة تسني عليها بلا ماتحس؟؟ فهاد الأثناء صونات عليها حتى مدام تورية
حياة : صباح الخير مدام تورية
مدام تورية : صباح النور .. كي صبحتي؟
حياة : الحمد الله و نتي؟
مدام تورية : لاباس ا بنتي .. صونيت عليك فهاد الصباح غير باش نقولك شي حاجة ، عاود صونا عليا المحامي و سولني على شي حاجة
مدام تورية : ايلا قدرتي تكوني عندي من هنا واحد الساعة .. اجي باش نلاقيك بداك المحامي
حياة : صافي هانا غانكون عندك تما من هنا ساعة
قطعو المكالمة و ناضت كاتوجد راسها ... كان شحال من سؤال طايح فبالها و شحال من حاجة عندها فيها شك و شحال من حاجة مامفهوماش ليها .. الاتصال ديال مدام تورية جا فوقتو حيت كانت محتاجة شي واحد لي عارف فالقانون باش تسولو
لبسات حوايجها و تأنقات كعادتها و هزات داك الكلاسور كاامل و مشات قاصدة مدام تورية غير دخلات و قبل ماتقول لا سلام لا كلام حطاتو لها فوق البيرو
حياة : [ شافت فيها وهي مبتاسمة ] هادو الوراق لي عطاوني و لي سينيت عليهم ولي سينا عليهم حتى داك القرمود من فاش بديت مع دوك المحاميين ديال الويل
مدام تورية : القرمود؟
حياة : طليقي ا مدام تورية
مدام تورية : [ عاودات شافت فالوراق و بدات كاتقلب فيهم ] و علاش ماجبتيش هاد الوراق كاملين داك النهار؟
حياة : دابا ا مدام تورية سوليني اش لقيت ناقص هنا
مدام تورية : [ شافت فيها بإهتمام ] شنو لي ناقصك هنا؟
حياة : الوكالة مع داك المحامي اللول ماكايناش هنا [ تلاحت فوق الكرسي و حطات رجل على رجل و نطقات ] ايلا كنت عاطياه قضيتي مع طلاقي فين الوكالة؟؟
مدام تورية : [ بتساؤل ] علاش واش مسنيتي معاه على تا ورقة؟
حياة : سنيت على بزااف ديال الوراق راهم كلهم تما ولكن الوكالة معاه راني عاقلة مزيان ماسنيتش معاه فيها حيت كي قلت لك انا اصلا عطيت التسبيق غير للمحامية .. واش كاين شي محامي كايخدم بلا تسبيق؟؟
سمعو الدقان فالباب و دخل من الباب واحد الراجل يكون اربعيني كان هداك هو المحامي لي قالت لها مدام تورية عليه ... دخل سلم عليهم
[ الحوار بالإسبانية ]
مدام تورية : اسيانو لقيتينا بدينا الهضرة قبل ماتجي
حياة : لي قلت لك ا مدام تورية راني هنا كانتعرض لعملية نصب ... ماكاينا حتى شي وثيقة موثقة كاتدل بلي انا وكلتو .. السيد باغي ياكلني ف21 الف يورو غير هكاك
مدام تورية : واش متأكدة؟؟
حياة : وي متأكدة 100٪ حيت أي ورقة كنت كانسيني عليها كنت يا كانشد الاصلية يا فوطوكوبي ديالها و هنا مالقيت حتى شي وكالة سينيت عليها مع داك المحامي و زيدي عليها انا ماعطيتوش نهائيا الملف ديال قضيتي
مدام تورية : و علاش هادشي ماقلتيهش فاللول؟
حياة : حيت كي قلت لك كانو كايعطيوني نسيني على بزاف ديال الوراق ولكن اليوم فاش رجعت السينتة اللور تفكرت بلي المحامية ديجا عاطياها تسبيق ولكن المحامي ماعاطياهش و هادشي لي خلاني نعاود نقلب على واش سينيت معاه على شي حاجة
مدام تورية : [ شافت فأسيانو ] هادو الوراق لي جابت ليا هاد النهار عاود تحقق منهم تقدر تلقا شي حاجة مالقيتيهاش فالوراق اللولين
جلس المحامي كايقلب فدوك الوراق و كايتحقق منهم ورقة بورقة .. اغلب الوراق كانو بدون فائدة حاليا و ماعندهم فاش ينفعوهم ولكن كانو ناقصين شي وراق مهمين هنا ، شاف فحياة وسولها بالاسبانية
أسيانو : [ عاود سولها ] ماتافقتيش معاها قبل ماتبدا الخدمة معاك على شي نسبة غاتعطيها لها فاش تشدي حقك من املاك الطليق ديالك؟
حياة : لا ماتفاهمناش حيت فاش مشيت هضرت معاها بدات معايا ديريكت عطاتني ورقة نعطيها ليه يسيني عليها حتى قبل مانوكلها ... حتى طلقت و ساليت عاد صدماتني بقيمة الاتعاب ديالها
أسيانو : و وقعتي على ديك الوثيقة بلي غاتخلصيها؟
حياة : وي وقعت [ تأفأفات و الفقصة شاداها ] حيت كان فبالي غايكون عندي منين نخلصها ...
أسيانو : [ حط الوراق و شبك يدو و شاف فيها ] الهضرة لي كنت قلت لتورية غانعاود نقولها لك .. أتعاب المحامية غايبقاو تابعينك ولا ماخلصيتهمش فشهر غايعاقبك القانون فاش غاتسالي العقوبة ديالك غايرجعوك لبلادك .. هادشي ماغايتبدلش ولكن الحاجة لي تبدلات ا انسة هي التعامل ديال المحامية معاك كان غير قانوني ، الأتعاب كاتافقو عليهم قبل ماتبدا معاك الخدمة ماشي تا كايقرب الحكم ولا تا كاتساليو .. تقدري تشوفي النقيب هو يدير لك حل معاها باش توصلي نتي وياها لشي إتفاق و يقدر يتنقص لك من الفلوس لي خاصك تعطي ولا يقدر دير معاك حل من غير هدا
حياة : فهمت و المحامي لاخر؟؟
أسيانو : غاتحتاجي تهضري معاه ا أنسة و تتأكدي من أنك ماوقعتي حتى على وثيقة معاه و فحالة ما لقيتي راسك ماوقعتي حتى على وثيقة ماغايكون كايتسالك والو
حياة : ايلا ماكنت مسينية على حتى ورقة ولقيتو كادب عليا مانقدرش نرفع عليه شي دعوة ولا نديكلاري بيه عند البوليس حيت حاول ينصب عليا؟
أسيانو : واش سبق ليك عطيتيه شي فلوس؟
حياة : لا
أسيانو : فهاد الحالة مايمكنش حيت ماخدا من عندك والو
حياة : ولد الحرام راه كان ناوي ينصب عليا
أسيانو : كاتبقا محاولة ماعندكش عليها شي إثبات و ماخداش من عندك تا سنت
حياة : و ديك المحامية مانقدرش ندعيها حتى هي؟؟ راها ماحافضاتش على سرية الإجرائات و كلشي كانت كاتوصلو ليه و لطليقي
أسيانو : وقعتي معاها شي وثيقة على هادشي؟
حياة : صافي فهمت لي كاين .. ماغانقدرش
مدام تورية : خاصك تمشي لعند داك المحامي باش تضبطي امورك و تتأكدي .. ايلا كانت هضرتك على حق غاتتحيد عليه 21 الف يورو
حياة : [ هزات صاكها و الكلاسور ] عندك الحق هانا مشيت [ شافت فأسيانو ] بالمناسبة شكرا بزاف
مدام تورية : حاولي على يدك
حياة : لا ماتخافيش راني موالفة
مدام تورية : ماتنسايش النقيب
حياة : كوني هانيا اليوم ندوز عليهم واحد بواحد
خرجات من تما و اول وجهة قصداتها هي المحامي .. خلاوها تدخل لعندو و غير دخلات و هو يستقبلها بإبتسامة باغي يستفزها بيها
حياة : [ بادلاتو الابتسامة ] لا ماجيتش بيدي خاويين
جلسات فوق واحد الكرسي و دارت رجل على رجل و بدات كاتدور عينيها فالمكتب .. عندها معاه شلاا هضور
_ ماكانش عليك تعدبي راسك و تجي حتى للهنا .. كنتي تقدري دوزي لي الفلوس للكونط ديالي
حياة : وي ندوزهم لك علاش لا؟ ولكن تقدر تعطيني الوكالة لي سينيت عليها معاك؟
بقا كايضحك .. ماعرفاتوش علاش كايضحك ولكن كانت حاسة بيه باغي يستفزها داكشي علاش خلاتو كايضحك و هزات التيليفون ، دخلات لبلاصة المكالمات و كتبات 112 ، حطات التيليفون فوق البيرو و جلسات كاتشوف فيه و هي مبسمة حتى سالا على خاطر خاطرو و نطق
_ عاد ضرباتك الفيقة ا انسة؟ [ ناض من بلاصتو كايقاد فحوايجو و كايشوف فالمكانة لي فيديه ] المرة الجاية قراي الوراق قبل ماتوقعي عليهم
حياة : مدام سينيت عطيني الوكالة
_ ماكايناش
حياة : [ وقفات من بلاصتها و تبسمات ] حتى فلوسك ماكاينينش
_ عارفهم ماكاينينش [ عاود ضحك عليها ] راجلك ماكدبش فاش قال أمية وعقلك تقيل ، أيام عاد عرفتي راسك ماموقعاش معايا على وكالة؟
هنا فهمات بلي فالأصل كانو غير مدورينها بيناتهم و دايرينها ضحكة وسطهم حيت ماكانتش عندها معرفة كافية بالإجرائات و المعاملات لي كاتكون مع المحاميين فهاد البلاد .. بحالا كانو كايلعبو بيها و عاجباهم ديك الحالة لي واصلة ليها ..صدمتها و أعصابها فاش كانت باغا طير على داك المحامي ، كانت بحال شي قردة دايرا لهم حلقة لا أقل ولا أكثر .. و كون دابا مارجعاتش السينتة اللور؟ شنو واش كانت غاتخلص ديك 42 مليون كاملة و غايبقاو مخليينها فدار غفلون؟؟ .. المشكل هنا ماعندوش علاقة بالذكاء و إنما بالخبرة حيت كون كانت فايتة تعاملات مع المحاميين كانت غاتكون عارفة بزاف ديال الحوايج و رادة البال لبزاف ديال الحوايج .. ماكانتش غاتكون عندها معرفة محدودة
قدر يستفزها بهضرتو خصوصا منين فهمات بلي هادشي كامل كان غير مسرحية كوميدية بالنسبة ليه وللمحامية و لعادل و حناه ... ناضت من تما و هزات تيليفونها و وراتو النمرة لي كتباتها فيه
_ [ كايضحك باش يزيد يستفزها ] علاش كاتوريها لي؟
حياة : [ تبسمات ليه و شافت فيديها و عاودات شافت فيه و قوسات حجبانها ببراءة ] يدي مهرسة و لي هرسها لي واحد عديم الرحمة ضربني بطوموبيلتو [ قوسات شفايفها ] بسبتو دابا ماقادراش نخدم و ندير الانشطة اليومية ديالي بشكل طبيعي .. ناهيك على ركبيا لي تحردو
_ [ ضحك ] راه قلت لك طليقك ماكدبش فاش قال عليك أمية [ شاف فيها و بتاسم لها بإستفزاز ] غاندير فيك خير و نقولك هاد المعلومة .. لي ماعندوش لاسورانس هنا ماكايستفادش من التعويضات ديال هادشي
حياة : [ بادلاتو الإبتسامة و قربات ليه حتى تقابلات معاه و نطقات ] نسيت مانقول لك نتا و طليقي .. مخلصة لاسورانس [ بعدات عليه و عطاتو بالضهر باش تخرج من الباب و نطقات ] وجد جيبك حيت الخلاص لي خلصتيه عليا فالكلينيك ماكافيش
خرجات و خلاتو متبعها ... عادل ماقالش ليه هادشي ، قال ليه بالحرف الواحد بلي هي ماعندهاش لاسورانس و ماغاتدي منو لا حق لا باطل فاش عرفو هو لي دخل فيها بالطوموبيل ...
ماكانش فراس عادل بلي كانت مقادة شحاال من حاجة بلا خبارو ... اما بالنسبة للمحامي كان عارف مزيان بلي حياة ماغاتاخدش شي تعويض كبيير حيت أولا خلص عليها فالكلينيك و تانيا ديك الكسيدة ماقتلاتهاش و ماتسبباتش ليها فشي إعاقة ولا فشي إصابة خطيرة مجرد كسر و بعض الجروح لي غايبراو مع الوقت وحتى هي كانت عارفة هادشي ولكن على الأقل غاتخليه يحط التعويض من جيبو سوا كان قليل سوا كان كتير المهم فبلاصة ماتعطيه هو لي غايعطيها
بدات كاتقاد أمورها مع ديك المحامية و مشات لعند النقيب هي وياها كيف قال ليها أسيانو ولكن ديك ل21 مليون مابغاتش تتحيد من ضهرها و ماقدراتش تنقص منها مي فالمقابل دار معاها حل زوين بسباب الحالة المادية ديالها و حيت المحامية ماتفاهماتش معاها على الاتعاب من اللول باش تخلي ليها حق الاختيار واش تكمل معاها ولا تقلب على شي محامي قد جهدها و الحل كان غايخصها تولي تعطي لديك المحامية كل شهر 2000 يورو يعني 2 ملاين فالشهر لمدة عام ، كانت قاصحة عليها شوية ولكن على الاقل كان عندها الوقت الكافي باش تخلص و الأهم هو ماكان غايتجمل عليها حد و ماغايمن عليها حد
عطاوها ورقة تسيني عليها و بقات كاتفليها و تعاود تفليها لاتكون شي حاجة عاوتاني غاتخرج لها من الجنب .. حتى تأكدات منها عاد وقعات عليها هي و المحامية ، عطات نسخة للمحامية و بقات عندها نسخة و ناضت خرجات من تما و هي حاسة بوااحد الحمل كبيير تحيد من فوق كتافها عاد بدات كاترجع فيها الروح
صونا عليها محمد كايسول على مشكلتها و طمأنتو باش يهضر حتى مع ماماهم و ماتبقاش مشوشة و موراها صونات على مدام تورية علماتها بالجديد باش ماتبقاش هازة ليها الهم
رجعات للدار و أول حاجة دارتها هي جلسات كاتفكر فكيفاش غاتزطط راسها هاد العام منين غاتجيب الفلوس و فاش غاتخدم و كيفاش تقدر ترجع الفلوس فأقل من عام و كخطة مبدئية خاصها تفكر كيفاش توفر هو اللول ... و باش توفر غايخصها توفر الفلوس لي كاتعطي فالكرا و الفاكتورات ديال الما و الضو و الغاز هادشي علاش قررات باش هاد الدار غاتكريها للمهاجرين و الحراݣة لي ماعندهمش الوراق حيت كايكونو باغيين غير السقف لي يغطيهم و ماغاتحتاجش دير معاهم لا ورقة لا زوج .. الدار كانو فيها 2 بيوت ، غاتشري 4 من دوك الباياصات لي كايكونو واحد من فوق واحد يكونو مستعملين و كل بيت غادير فيه 2 ... يعني غاتكري الدار ل8 ديال الناس ، كل واحد غايكري غير البياص لي كاينعس فيه و الكوزينة و الطواليط و الدوش خلاص مشروكين و غاتزيد تدخل لهم حتى الويفي باش تكون عندهم وسيلة الترفيه و بهاد الطريقة غايوليو هما لي كايخلصو الكرا و الفاكتورات و من الفوق غايبقاو كايشيطو ليها الفلوس ... و فهاد الأثناء هي غاتكون عندها حرية الإختيار واش تمشي تشوف شي جمعية تعطيها شي مأوى تسكن فيه ولا غاتصبر وتولي تنعس فديك الكنبية لي كاينة فالصالة ... فكرات مزيان ولقات بلي ايلا ولات كاتنعس فديك الصالة غاتولي حاضياهم و رادة معاهم البال مي فهاد الحالة غايخصها شي پورط پلاكي تفرق بيها الصالون باش هاكا على الأقل تكون عندها حتى هي شوية ديال الخصوصية
دخلات كاتقلب على دوك البياصات فكروبات الفيسبوك لعل و عسى تلقا شي واحد .. و هي ناوية تشري 2 و حتى تشوف بلي القضية مسلكاها عااد تزيد 2 خرين و داكشي لي كان .. بدات كاتقلب حتى لقات واحد مستعمل محطوط هضرات مع مولاه و تفاهمات معاه على التمن و دارت معاه فوقاش بغاتو حيت ماكانش عندها لي يجيبو لها و كان غايخصها تجيبو راسها ، بدات كاتقلب تاني على شي واحد كايهز الرحيل حتى طاحت فواحد ... مشات قادات كيكة هي اللولة عاد صونات على داك لي غايجيب لها دوك اللعيبات بالبياصات ديالهم دارت معاه التمن باش يجيبو لها و داكشي لي كان طلاقات معاه و مشات هي وياه جابوه و طلعو معاها و خلصاتو ولكن قبل مايمشي عرضاتو على كويس ديال القهوة باش زعما تشكرو على التعب ديالو ولكن فالحقيقة هي كانت غير كاتشري معاه المعرفة حيت عارفة بلي مزال غاتحتاجو من بعد داكشي علاش دارت معاه هاكا باش من بعد يرخص معاها
° دوزات أيام و أسابيع غير كاتجري فيهم ... دارت فحوصات و بدات كاتجري على الحادث لي كانت باغا تشد منو تعويض و فنفس الوقت كانت كاتقلب على البياصات لي بغات ... دخلات الويفي للدار و جابت لي يقاد لها الپورط پلاكي فالدار و موراها بدات كاتقلب على الحراݣة لي ماعندهم فين يسكنو ، و هاد القضية بالضبط ماكانتش صعيبة بزاف و ماكانتش محتاجة تقلب بزاف بالعكس لقات العراارم لي باغيين و السبب ماشي حيت كانو محتاجين فقط فين يسكنو و انما حيت كانو محتاجين شهادة السكنى حيت عارفين بلي بهاد الطريقة غايقدرو يشدو وراقيهم من مور 3 سنين .. و بكثرة لي لقات الحراݣة بزاف كانت قادرة تختار لي يليق ليها و لي مايليق ليها فيهم ...
شدات التعويض لي خرج لها من عند المحامي ماكانتش شي حاجة كبييرة مي على الأقل ماخرجاتش بلاش و من موراها بدات كاتريݣل أمورها مع الحراݣة لي كرات لهم وطبعا ماكراتش لمن والا ، فينما بان ليها شي جلاخة غاتلقا معاه المشاكيل بعدات منو المهم ضمنات واحد المدخول شهري قليل غايبقا يشيط لها من عندهم و من فوق هادشي ولات كاتوفر حتى فلوس المصروف حيت من مور ماكرات ليهم ولات مهنياهم من الطياب .. كادير لهم داك الطياب ديال المعاكيز ، كاتشرك لهم الغدا مع العشا و تخشي فالكونجيلاتور المهم واكلة معاهم و فلوسها مخبياهم عندها ... ماكانتش معتامدة غير على هادشي ، كانت كاتقلب على لي كايبغيو لي يقابل لهم الحيوانات الأليفة بحال القطوط و الكلاب و ما الى ذلك و كاين لي كان كايقلب على لي يخرجهم ليهم و فهادشي كانو كايخلصوها بالساعة .. جاتها على كانتها هاد الخدمة مي المدخول لي ماجاهاش على الكانة المهم كانت كاتعدي بهاد الخدمة غير على ما تبرا ليها يديها و ديك الساعة غاتبدا تقلب على الخدامي ديال الصح .. فهاد المدة كانت كادير شحال من حاجة كاتزيد تطور الرسمة ديالها و فنفس الوقت كانت هضرات مع مدام تورية باش تلقا لها شي خدمة بالوراق ماشي تخدم فالنواغ
بداو كايدوزو الايام نهار من ورا نهار حتى برات يديها وحيدات جبيرة وبدات كاتقلب على خدمة لراسها على ماتلقا لها مدام تورية شي خدمة زوينة ... و فهاد الأيام لي دازو أصيل ماعاودش صونا عليها ل2 ديال الأسباب السبب الأول ديك الطريقة لي كاتهضر بيها وي كاينا عزة النفس مي عاوتاني زادت فيه فوقما يهضر معاها كادور فيه واخا تكون شادة السما بقاعها .. بزاف على داك التكبر لي فيها و تاني سبب كان عرف من ادم لي عرف من عادل بلي سلكات راسها و وصلات لإتفاق مع المحامية باش تولي تعطيها كل شهر قسط
° كان هاد النهار عندها بحالو بحال الايام لي دازو .. غير الفرق هو كان عندها هاد النهار خاوي شوية داكشي علاش بدات كاتقاد فيه حلوة الريشپوند ديال للدراري لي معاها ماشي حيت هما طلبوهم منها و إنما حيت كان عندها هدف من مور هادشي ... كانت الدار عامرة و الدراري ماخدامينش ، صونات عليها مدام تورية باش تجي لعندها للدار حيت عندها شي خبار ليها و عطاتها العنوان و جلسات كاتكمل فشغالها غير سالات و قادات 2 برارد ديال أتاي وحطاتهم فوق واحد الطبيلة فالكوزينة و بدات تعيط للدراري باش يجيو للكوزينة ، بداو كايجيو واحد من ورا واحد كل واحد كاتعطيه كاس ديال اتاي و تعطيه الطبسيل يهز الحلوة .. كانت عارفاهم مزيان بلي موحشين ديك الحلوة بالضبط حيت كاتفكرهم فالعائلات ديالهم و على وجه التحديد كاتفكرهم فالأم المغربية
_ [ فمو عامر و هاز حلوة فيديه و فاليد لاخرا الكاس ] لهلا يخطيك علينا ا بنت البلاد
_ [ كايشرب من الكاس ديال اتاي ] وا دكة هادي عندك
_ [ كايغوت باش يسمعو دري لي فالدوش ] وا حمييد وا تعالا ݣبل ماتلݣا الطبسيل خاوي
حياة : [ خرجات ضحكة من فمها ] وا غير خليه ياكل راه باقي الخير ... المهم راني خبعت لكم فالتلاجة 2 جبانيات باش تبقاو تلقاو باش تفطرو فالصباح هاد الايام
قرب لها واحد من دراري و باس لها راسها و قرب حتى التاني باس لها راسها بدافع الإحترام حيت من نهار سكنو معاها و هي كاتتعامل معاهم بحال الإخوة ديالها في حين هما كانت كاتفكرهم بطيابها غير بالمغرب ... لقاو راحتهم معاها و هادشي بالضبط لي كانت باغا " الاحترام "
سمعات الدقان فالباب و خلاتهم و مشات تحل الباب لقاتها مدام تورية ... سلمات عليها بالوجه وخلاتها تدخل للداخل
بان ليها واحد منهم دايز لابس غير الشورط و حفيان و مالابس والو من الفوق .. دورات عينيها و هما يبانو ليها جوج واحد هاز كاس ديال اتاي و التاني فمو عامر ... واحد كان لابس حوايج الخروج وداز من حداهم باش يخرج ... و واحد واقف حدا الطواليط كايدق على لي لداخل باش يخرج
_ خنق الميضة عاوتاني ... كاتخرا الكاياص ا صاحبي
_ خاري جيفة هداك
المهم كانت الدار عاامرة و مدام تورية غير كاتشوف فهادشي والصدمة غالبة عليها
مدام تورية : [ شافت فحياة ] حياة شهادشي؟ هادو هما النماذج لي ساكنة معاهم؟؟ فين كاتنعسي؟؟ واش كاتنعسي فهاد الدار معاهم؟؟
حياة : اجي معايا بعدا ا مدام تورية
مشات معاها لداك البيت لي دارتو فالصالون بپورط پلاكي ... دخلات هي وياها و سدات الباب و مدام تورية مزال مصدومة من هادشي لي خاشية حياة راسها فيه
حياة : الدار مرونة شوية .. ماشي مجيتك هادي ا مدام تورية
حياة : ولاد البلاد ... كايعاونوني فالمصروف و الكرا و الفاكتورات باش كانوفر فلوس هادشي و هاكا بعدا غانولي كانخدم غير على الدين لي عليا فهاد الأيام ..
مدام تورية : [ بنبرة عتاب ] إيلا محتاجة فين تسكني فابور علاش ماقلتيهاش ليا ا بنتي؟ انا نعطيك بنت تسكني فيه معايا حتى تترخف أمورك
حياة : ربي يخليك ا مدام تورية ولكن ماباغا نتقل على حتى واحد هاكا مرتاحة وراكي عارفة ا مدام تورية خاصني يكون عندي إثبات بلي كنت ساكنة هنا لمدة 3 سنين و هاد الاثبات هو شهادة السكنى
مدام تورية : انا نعطيها لك غي ماتبقايش عايشة وسط الرجال و نتي غير ولية وسطهم واش ماخفتيش على راسك؟
حياة : انا ماشي دايرا هادشي غير باش نقتاصد ولكن حيت كاتتجمع لي واحد البركة منهم
مدام تورية : خليهم عايشين هنا بوحدهم رجال بيناتهم و اجي عيشي معايا ، راك كاتغامري براسك ا بنتي .. عمرني ماشفت هاد الحالة حتى ليك نتي
حياة : عارفاك باغا تعاونيني والله ولكن ايلا خليتهم هاكا بوحدهم و مشيت لبلاصة خرا غايديرو مابغاو هاكا بعدا من تحت عينيا حسن و دايزين من تحت يدي
مدام تورية : واش ماخايفاش على راسك؟ ماخايفاش منهم؟ نتي مرا ماشي راجل باش يدوزو من تحت يديك .. شي نهار ينوضو لك و يتكرفصو عليك شكون غايفكك منهم ديك الساع؟؟
حياة : ماخايفاش منهم ا مدام تورية لي سخن عليه راسو غانبردو ليه
مدام تورية : كيغاديري تبرديه ليه؟ راكي غير ولية وسط الرجال .. صحتك ماشي هي صحتهم يقدرو يضوروك بيناتهم
حياة : ياك حنا فبلاد القانون؟
مدام تورية : و هادشي لي كاديريه كايخالف القانون
حياة : ماتخافيش عليا .. غانسلك راسي وحتى هادو لي معايا عارفين راسهم ماخاصهمش يغلطو معايا حيت غانعاونهم بشواهد السكنى [ تبسمات ليها كاتطمئنها ] و زايدون ا مدام تورية راني معاشرة معاهم دابا و كانزيد ندير بلاصتي بيناتهم ، نهار غايسخن الراس على واحد غاينوضو ليه 7 لاخرين بلا مانهضر انا [ جلسات فوق الكنبية ] راني ماشي كانطيب لهم و نوجد لهم فالحلاوي غير هكاك
حياة : و هادشي علاش ا مدام تورية محتاجة بزاف كونطرا
مدام تورية : تا لوقتاش غاتبقاي فهاد الحالة؟
حياة : غير نخلص الدين ديالي وغانشوف اش ندير .. واش تبغي تاكلي الحلوى؟ قاديت الحلوى ديال الريشپوند غاتعجبك
مدام تورية : غير جلسي ا بنتي جيت نهضر معاك على حاجة خرا
حياة : [ بإهتمام ] اشمن حاجة؟
مدام تورية : لقيت لك واحد الخدمة مع شي ناس كانعرفهم وغاتخدمي بالوراق ديالك ماغايخصك معاهم تا خير
كان هدا من بين الخبارات لي كانت كاتتسناهم حياة بفاارغ الصبر ... ناضت من بلاصتها و عينيها كايلمعو
حياة : و اخييييرا
مدام تورية : ولكن خدمة ماشي ساهلة تقدر تجيك شوية صعيبة
حياة : ماعنديش مشكل نهائيا واخا تكون كيفما بغات تكون هانيا عندي ... غير قولي لي فاش غانخدم بالضبط؟
مدام تورية : هضرت معاهم على النيفو ديالك فالقراية راكي عارفة ا بنتي هما كايبغيو الانسان يكون عندو خبرة و يكون قاري على الضومين لي باغي يخدم فيه
حياة : عارفة لي كاين ا مدام تورية
مدام تورية : قلتي لي شحال من لغة عندك؟
حياة : عندي الفرونسي و لونغلي وزدت دابا الاسبانية
مدام تورية : مزيان هادي حاجة مزيانة ... المهم غانوضح لك الخدمة لي غاتخدمي فيها كي دايرا و الصالير ديالها و شروطها
حياة : هانا كانسمعك
مدام تورية : الخدمة غاتكون فالشركة ديال واحد من المعارف ديالي غاتكوني موظفة فخدمة العملاء .. الصالير مابيهش ولكن غايكون مزيان كبداية ليك
حياة : شحال؟
مدام تورية : 12 الف و 360 يورو فالشهر
حياة : هدا قلتي ليا مابيهش؟ [ ضحكات ] هدا راه فالمغرب يخليك تعيشي ملكة
مدام تورية : نساي عليك المغرب و حساباتو .. دابا راكي هنا عايشة فإسپانيا ، هاد الخلصة ماغاتشديهاش من اللول حيت ماعندكش خبرة و ماقارياش على هاد المجال غاتبداي معاهم ا بنتي ب6 الاف يورو و فهاد الوقت غاتكوني كاتاخدي الخبرة و كاتقراي هضرت مع الصديق ديالي و غايدير لك إستثناء حيت نتي من الطرف ديالي ولكن ا حياة ماتحشمينيش معاه بغيتك تكوني قد المسؤولية و قد تقتي
بدات حياة كاتحسب لقات بلي ايلا بدات هاد الخدمة غاتقدر تخلص دينها فمدة 5 أشهر و من الفوق غايكون عندها ديپلوم و الخبرة و غادير المعارف و من فوق هادشي كامل الورييقات ... حسات بالفرحة شاداها من الصبع الصغير ديال رجليها
حياة : [ بحماس ] عممرك تندمي ا مدام تورية على هادشي لي درتي معايا
مدام تورية : كانتمنى [ عاودات ضورات عينيها على البيت لي قادات حياة ] كانظن ماغلطتش منين ختاريت لك هاد الميدان تخدمي فيه
حياة : علاش؟
مدام تورية : حيت هاد الميدان كايبغي الصبر .. القدرة على الاقناع ... الإدارة ... و كايبغي بنادم يعرف كيفاش يتواصل و منين قدرتي تتواصلي مع هاد النماذج و خممتي كيفاش توفري و صبرتي باش تعيشي فبحال هاد البلاصة .. ماكانظنش واش الشي لاخر غايجيك صعيب [ عاودات شافت فيها و هضرات بجدية ] ولكن هاد العيشة ا بنتي ماشي عيشة ... هادشي لي درتيه خاصك تساليه فأقرب وقت باش ماتخرجيش على راسك و تخلقي لراسك مشاكل مع الدولة
حياة : راني ماناوياش نبقا هاكا هادشي غير مؤقت ...
ماكانتش مدام تورية مقتنعة بهادشي ديال حياة و جاتها كاتغامر براسها بزاف ... حيت باش بنت تعيش وسط 8 ديال الرجال ماعندهمش حتى الوراق جاتها حاجة فشكل كانت مشوشة عليها من ناحية يمشيو يتقلبو عليها و يضوروها و من ناحية خرا يجبدو لها مشاكل قانونية و يصدقو شاريين لها الصداع وخارجين عليه ولكن ماكانش فراسها بلي حياة ختارت لي غايسكنو معاها بعناية شديدة حيت ستهدفات غير هادوك لي سنين و هما هنا بلا ورقة بلا جوج يعني لي باغيين يديرو غير وراقيهم بلا صداع بلا مشاكل حيت مييتين على الوراق ... ختارت لي ماكايكميوش و مامبليينش باش ماشي يجي شي نهار واحد يتقطع على لاخر و تنوض المضاربة وتوصل الخبار للبوليس ... كانو عندها معايير مشات عليهم فاش بغات تختار لي يسكن معاها
توادعات معاها من مور ماتفاهمات معاها باش لاغد ليه تمشي هي وياها و تعرفها على هداك لي غاتخدم معاه و ترصي معاها حتى الأمور ديال قرايتها باش فاش تسالي الانفورماسيو ديالها و تزيد تطول معاهم و تاخد الخبرة تولي كاتتخلص بنفس الخلصة لي كايتخلصوها باقي الموظفين لي معاها
طلعات ليها نمرة خالد .. جاوبات
حياة : شي حمار مات فسيدي قاسم حتى سولتي فيا
خالد : [ كان كايغوت و هو مكشكش ] صافي طلقتي خرجو رجليك للشواري؟؟؟ لقيييتي داكشي لي بغيتي فديك البلاد؟؟؟؟
حياة : ا غير بشوية عليك علاياش كاتهضر؟ شمن رجلين و شمن زمر لي خرجو للشواري؟
خالد : باغاني نلحق على دينمك تما نحسك لمك الرجلين ياك؟؟؟ هادشي لي باغاني ندير لك؟؟؟ باغاني ندير فدينمك شي جريمة؟؟؟ واش لأصل مك ماعندكش الكمارة لي تحشمي عليها؟؟؟ كنتي فالمغرب مشوهااانا خرجتي من المغرب زدتي شوهتييينا؟؟؟ حالفة لدينمك تا تخلي العالم يهضر فينا؟؟؟
زهور : [ كانت جالسة حداه ] البنات تما تاتلقاهم لاخرجو رجليهم للشواري وخرجو على دينهم تاتلقاهم عايشين مع صاحب واحد و هاد الملقطة جمعات الݣور لي كاينين تما
حياة : قول لديك الملقطة ديال بصح ايلا ماسداتش داك الفم غاندير فيها شي موصيبة عمرها تنساها
خالد : و باقا كاتحلي داااك الدرݣووم؟؟؟ عايشة مع 8 ديال زوافرية لدينمك فين باغا توصلي بهاد التسلݣيط ديالك؟؟؟ مسيفطينك تحلي دار الدعارة تما؟؟ واش لدينمك حالفة تاماتخلينا نهزو راسنا من لرض؟؟؟
حياة : جمع فمك و عرف اش كاتقول و هاد نص راجل لي وصل لكم هاد الهضرة قوليه يمشي يحضي مو فبلاصة مايبقا حاضي ليا قاعي انا و غيير تسناو تترخف ليا القضية ياك بغيتو غير الشوهة؟؟ هانتوما غاتوليو تسمعوني عايشة مع 16 ماشي غير مع 8 ... و لي كايدخل عليا القفة ولا كايخلص عليا الكرا يحل فمو .. ماشي بنادم عايش هاني و حاضيني انا التااابعة يا ربي السلامة
خالد : هبطي للمغرب نوري لأصل مك 8 من 16 داك اللسان كان خاصني نقطعو لك شحاال هدا و نحسك لمك دوك الركابي باش تشدي الركنة و تتكمشي
حياة : وا عطييني بالتيساع ا عباد الله واش انا حاضياكم؟؟؟ حاضية شي قندوح فيكم؟؟ وا خلييوني نعوم بحري حيااتي هادي وأنا حرة فيها و لي باغي يقول شي حاجة فضهري غيير يقولها واش فوقما تحراف لشي واحد يبدا يصوني يفرع ليا راسي بالنݣير ديالو؟؟ هاد النمرة لي فاقصاني نبدل مها و نهني راسي
قطعات عليه والأعصاب شادينها ... هاد الكلب ديال عادل حالف مايقيلها عليه و الحزقة لاحزقاتها كايمشي يوصلها لبنادم و ها هي دابا تطلقات عليها الهضرة ديال عايشة وسط 8 ديال العزارة ... ماكانش عندها شي مشكل فالنظرة لي غايشوفها بيها بنادم .. يكفي انها عارفة راسها اش كاتسوا و عارفة شنو كادير و مقتانعة بيه ... ايلا غلطات راها غلطات لراسها و غلطات فحياتها ماشي فحياة شي وحداخر ولا دارت شي حاجة فيها المنفعة راها غاديرها لراسها و ماشي لوحداخر
فكرات باش غير دوز واحد العامين ولا 3 سنين و تمشي تطلع لفرنسا تما حسن ليها كااع من هاد القنت ولكن خاصها تستغل هاد 3 سنين مزياان و تحاول دير فيها اكتر من انفورماسيو و فنفس الوقت تخدم على البلان لي باغاه و فهاد المدة غاتكون جمعات الفلوس و غاتقدر دير بيهم شي حاجة ففرنسا ، شي حاجة لي تخلي زهور و مروى و العائلة و كاع لي هضر فيها غير حال فمو ... ايلا كانت مروى كاتتعنا بفلوس راجلها و كاتتجمل عليها بعويديل لي عرفاتو عن طريقها هي غاتتعنا بحاجة خرا .. حاجة لي غاتكون هي لي دارتها و حاجة لي غاتسكت الفام و الاهم غاديرها فبلاد من غير البلاد لي وصلها ليها عادل ... بلاد من إختيارها ..
داز عندها داك النهار ولاغد ليه بكرات ... فاقت بكري وجدات للدراري اتاي ديالهم و مشات دوشات و نشفات شعرها ، لبسات حوايج كايليقو للمقابلات و تأنقات باش تعطي إنطباع زوين عليها .. جمعات الوراق لي خاصينها ومشات لعند مدام تورية و من تما شدو الطريق لديك الشركة .. كانت عبارة عن 2 مباني كبار مقسومين و شاركهم الوسط طابق على شكل H ، هزات راسها كاتشوف العلو ديال المبنى حتى ضراتها الرقبة ديالها و نزلات راسها كاتشوف قدامها كانو الموظفين داخلين خارجين وكلهم متأنقين ، دخلات هي وياها و بدات كادور عينيها على الشركة من لداخل .. تبهرات من الديكور و حتى من الموظفين لي كان كايبان فيهم كل واحد مقابل خدمتو .. مامسوقينش لا لي داخل لا لي خارج ، قد ما كانت كاتزيد تتعمق هي و مدام تورية داخل داك المبنى كانت كاتزيد تتبهر حيت ماكانتش متوقعة تكون الشركة بهاد الشكل ... عرفات معنى أخر للفخامة دابا عاد فهمات علاش الصالير هنا مزيان .. ماكانتش هاد الشركة شي شركة لي صغيرة و يمكن كون ماكانتش مدام تورية موحال تجيبها الوقت و تخدم فهاد البلاصة
وصلو لواحد الطابق و هضرات مدام تورية مع السكرتيرة ديال الصديق ديالها و من موراها دخلو للمكتب ، زادت تبهرات بالديكور ديالو ولكن مابيناتش ، بقات كاتشوف غير بجناب ديال عينيها بلا ماتحيد عينيها على داك الشخص القابع من ورا المكتب كان راجل أربعيني قال للأناقة حيدي لهيه نوريك الأناقة الحقيقية .. شعرو كانو كايتوسطوه بعض الشعيرات البيضاء و الذقن ديالو نفس الشيئ .. من الملامح ديالو و حروفو كان كايبان فيه إسباني
سلمو عليه وجلسو ف2 كراسا كانو قدام المكتب ديالو ... و أول حاجة دارها هي سولهم شنو يشربو
الحوار بالإسپانية
مدام تورية : حياة ألفونسو .. ألفونسو هادي هي الشابة لي هضرت لك عليها
تفحص حياة بنظراتو كيفما كايتفحص اي شخص خدام عندو ... باش كايعرف من شمن نوع هو ، واش مهمل واش ثرثار واش عندو حس المسؤولية واش كايخدم ولا ماكايخدمش .. واش صبار و شحال من حاجة ، حياة فهاد الاثناء كانت جالسة بطريقة أنيقة و باين فيها من داك النوع لي عزيز عليه الخدمة ، ماكايظنش واش غاتكون صبارة ولكن عندها حس المسؤولية
هدا كان إنطباعو اللول عليها قبل مايبدا يهضر معاها و يسولها بعض الأسئلة البعض منهم كانو أسئلة روتينية و شي وحدين كانو أسئلة إستفزازية و شي وحدين كانو غير باش يعرف ردود الأفعال ديالها
[ الحوار بالإسپانية ]
ألفونسو : قلتي ليا كاتهضري بالألمانية ياك؟
كان باغي يتأكد واش غاتكدب باش تشد الخدمة ولا غاتقول الحقيقة .. اما هي كانت عارفة بلي مايمكنش مدام تورية تكدب و تقول ليه بلي كاتتقن شي لغة من غير اللغات لي كاتعرف لهم
حياة : [ بإبتسامة ] لا .. كانهضر ب3 لغات من غير اللغة الأم ديالي
ماطرحش عليها بزاف ديال الأسئلة حيت فالأصل هي ماعندهاش خبرة باش يسولها على الشركات لي خدمات فيهم ... و ماجاتش باش دوز مقابلة عادية بحالها بحال الناس لخرين يعني السؤال ديال علاش ختارت هاد الخدمة بالضبط ماكانش سؤال عندو معنى حاليا ... مي فالمقابل سولها بدوك اللغات ب3 و هضر معاها بيهم ب3 باش يعرف واش هي كاتتقنهم كي كاتقول ولا غير كاتكدب
حاول يقرا لغة الجسد ديالها و يقرا شخصيتها العملية غير من خلال الأجوبة ديالها واش قصار بزاف ولا طوال بزاف هي فهاد الاثناء كانت كاتجاوب أجوبة بالطول المناسب ماشي قصار باش مايقولش هادي ماعندهاش تقة فداكشي لي كاتقول ولا ماعندهاش معرفة كافية فداكشي لي كاتهضر عليه و عاوتاني ماشي طوال بزاف باش مايقولش هادي ثرثارة و هضرتها لي كانت قادرة تلخصها و تخلي فيها غير المفيد ماقدراتش تلخصها
سولها أسئلة كانو على شمن قيمة هي غاتضيف ليهم ... شنو كاتعرف على هاد المجال ... كيفاش غاتتعامل مع شي عميل معصب و كيفاش غاتتعامل مع واحد هو براسو ماعارفش شنو باغي ، عطاها بعض الأمتلة و جسد ليها شحال من شخصية من شخصيات العملاء و بقا كايشوف كيفاش كاتتعامل و كيفاش كاتجاوب ، كانت نتيجة مرضية بالنسبة ليه حيت فعلا واخا ماعندهاش خبرة فهاد المجال إلا و أنها كانت عندها واحد القدرة كبيرة ديال الإقناع
سالا معاها و بدا كايقول لها القوانين ديال الشركة و الشروط ديال الخدمة معاهم و السوايع ديال الخدمة معاهم و بزاف ديال الحوايج لي كان خاصها تعرفهم و واخيرا عطاها العقد ديال العمل لي كان صالح لمدة عام ولا عجباتهم فهاد العام ديك الساعة غايعاودو يجددو معاها العقد .. ولكن كانت واحد الحاجة لي ماعاجباهاش فالعقد و هي لابغات تخرج من الخدمة قبل مايسالي العام غايطيح على راسها واحد المبلغ تخلصو في حين هما ايلا طردوها ماغايكونوش عندها تعويضات ... قرات داك العقد و فلاتو مزيان عاد وقعاتو حيت اصلا هي ماناوياش تخرج فهاد العام و كيفاش غاتسخا بهاد البلاصة و بداك الصالير ...
عاصفة هوجاء الجزء 14
محتوى القصة
أغلب الاشخاص كايتيقو غير بداكشي لي كاتشوف عينيهم وماكايحاولوش يتعمقو كتر و هادشي لي وقع للفرملية ... هي شافت غير حياة مشنتقة و كحلها سايح .. كاتتعكل فطالونها و باين على ملامحها تعابير الذعر كاتستنجد و باغا لي يعاونها و هاربة كالفريسة و موراها عادل لي كايجري موراها كأنه المفترس ولكن ماشي ديما المفترس كايكون تابع الفريسة والفريسة هاربة منو ... شي مرات هداك لي كايبان لك هارب كايكون هو المفترس لي كايجر الضحية ديالو للبلاصة لي بغاها باش ينقض عليه و هداك لي تابعو كايكون هو الفريسة و هادشي لي وقع هنا
الفرملية : [ بالإسبانية ] شنو واقع هنا؟؟
عادل : [ بالدارجة ] يهديك الله واش حماقيييتي؟؟
وقفات حياة وبدات كاترجع بخطواتها اللور وكاتبكي و كاترغبو بيديها وفنفس الوقت كاتهضر بالاسبانية
حياة : عافاك ا عادل ماديرش فيا هاكا .. ماضربنيش حتى هاد المرة
عادل : [ بالاسبانية ] مافهمتش مالهااا هادي راها حماااقت ماتديش عليها و ماتيقيش بهادشي لي كاتشوفي
شدات فدراعها بخوف ... بحالا ديك البلاصة باقا كاضرها و بقات راجعة بخطاويها اللور حتى طاحت او بالمعنى الاصح تعمدات طيح على اساس رجليها مابقاوش قادرين يهزوها ... مشات لعندها الفرملية كاتعاونها باش تنوض حسات بيها كاترجف بالخوف وهنا زادت تأكدات بلي عادل فعلا دار لها شي حاجة
مشا لجهتهم ونوض حياة من دراعها و هو معصصب كايشوفها غاتغرق لباباه الشقف و كون غيير سلخها وبررد فيها جنونو بعدا بعدا يكون داير علاش ولكن هو ماداير والو و يمشي فيها؟؟؟
عادل : [ بالدارجة ] حياااة باراكا من الحمااق دياالك ... [ مكشكش وحاس بعقلو غايخرج معاها ] واش نتي حمقة و باغا تحمقييني معاااك
حس بداك المثل ديال ضربني و بكا و سبقني و شكا كايتطبق عليه هنا دات الفرملية كاتحيد ليه يديه من دراعها حتى طلق منها شاف فالفرملية و بدا كايحاول يقنعها
عادل : [ بالاسبانية ] والله حتى كدابة .. راها غير كاتكدب ماتيقيييش بيها .. شوفيها شوووفيها كي كاضحك
شافت فيها الفرملية لقاتها كاتنخصص وعاودات شافت فعادل لي كان كايحس بالخيوط ديال عقلو غاتشعل فيهم العافية .. وصلو الاعصاب ديالو لأقصى الدرجااات حاس بيها كاتلعب بيه و باغا تحمقو ماحس براسو حتى نقز عليها بقجة كان ناوي يجيفها و هادشي غير مازاد طبز العين و ثبت عليه الجرم ... بدات الفرملية كاتفك حياة من يديه و حياة براسها بدات كاتحاول تفك راسها منو .. مابقاتش قادرة تتنفس و حاسة بروحها غاتخرج ماطلق منها غير بزز
بدات كاتكحب و كاتحاول ترجع النفس و الفرملية فهاد الاثناء مشات لجهة الطوموبيل باش تجبد تيليفونها و تبعها عادل كايحاول يشرح لها بلي حياة لي وصلاتو لهادشي وكايحاول يقنعها باش ماتعيطش للبوليس
عادل : [ بالاسبانية ] راها ماشيي هاكااا ... راهااا غير كاااتمتل سوليي حنة راهااا فايتة ضرباتنيي بكرسي [ شاف فحناه لقاها مغمضة عينيها اصلا ]
شاف حتى عيا ولقا بلي ديك اللفعى لي خاصها تحل هاد الموصيبة حيت ايلا ماحلاتش هي هادشي و عتارفات ولا هضرات مع الفرملية غاتصدق هاد خيتي مغرقة ليه الشقف ... بالعنف و محاولة القتل
شافتو جاي لجهتها و بدات كاترجع بخطاويها اللور و هو كايقول لها غير تحبس باش يهضر معاها مابغاتش تحبس و رجع كايجري لجهتها و غير شافتو هكاك بدات حتى هي كاتجري و هو تابعها باغي غير يتفاهم معاها بالعقل و كايطلب و يزاوك باش توقف ليه .. وصلو للخرجة ديال ديك الطريق لي كانو كايجريو فيها و مع جات دور ما حسات غير بشي حاجة قاصحة دخلات فيها ... كانت طوموبيل لي ضرباتها
بقا عادل واقف مصدوم فبلاصتو كايشوفها طايحة فالارض في حين مول الطوموبيل هبط لعندها كايشوف مالها
حس بالتلفة ... حس براسو فكابوس و كان هاد الكابوس هو حياة .. ماعرفش اشمن دنب دار فحياتو حتى سلط ربي عليه هاد الموصيبة .. ندممم أشد الندم على النهااار لي طاحت عينيه على عينيها .. صافي عرف راسو غرررق حتى لراسو فالمشاكل
جلس جلسة القرفصاء وسط الطريق و حط يديه على راسو .. مابقا عارف مايدير مابقا عارف شهاد الموصيبة و المصائب لي جاوه وحدة من ورا وحدة ... ها حناه لي كاينة فالطوموبيل و كان باغي يديها للطبيب ديالها و ها الفرملية لي من موراه كاتصوني على البوليس .. ها حياة لي ضرباتها طوموبيل .. حتى من ردة الفعل الطبيعية لي المفروض يديرها فهاد الموقف ماقدرش يديرها .. كان المفروض يشوفها اش وقع لها ساعة صااافي تهد
أما حياة فهاد الأثناء ماكانتش حاسة براسها شنو وقع لها ... يديها كانت عاطياها الموووت ديال الحريق و ماقادراش تحركها و ضهرها لي كان كايضرها و ركابيها لي حسات بيهم تحردات لها وحدة منهم ... ماتفكرات غير الكسيدة لي كانت دارت فالمغرب غير هو هاديك كانت كفس من هادي حيت كانت مخلية الموطور غادي و هي واقفة عليه برجليها فداك الوقت اما هادي كانو رجليها باقيين فالارض .. بقات كاتشوف غير داك مول الطوموبيل هبط لعندها و كايسولها و كايقول لها باش ماتتحركش حيت ماعارفش الاصابات لي غاتكون تصابتهم و كاتحاول تستوعب بلي راها دارت كسيدة ...
كالعادة الأثر ديالها كايبقا منين مادازت ... كيفما كانت غارقة فالمشاكل فإسپانيا و معطوبة ... حتى فالمغرب كانت باقي الأثر ديال مشاكلها لي ... داوود لي كان كايقلب على خوها محمد و طلع عندهم للدار
ياسين لي تقربلات بينو و بين داوود على ود وفاء حيت هو كان كايتيق فيه و يدخاو لدارهم وسط مو و ختو .. و أمنو على ختو و صدق فاللخر حط عليها العين ... واخا ياسين ماتصاحب معاها ما قلل عليها العفة شي مرة ماكانت نيتو خايبة من جهتها ولكن كايبقا شاف فيها بشوفة غير بريئة و هو وسط دارهم
فهاد الاثناء لي كان داوود مع محمد و فتيحة و عبد الرحمان كانت حياة فالكلينيك ... و خرجات هاد العشية بتهريسة فدراعها و تقصحات من واحد الرجل .. ركبتها تحردات و الاهم من هادشي كانت باقا فيها الروح
كان واقف حداها الراجل لي ضربها .. من الملامح ديالو كان باين فيه إسباني ويكون فديك الاربعين من عمرو
[ الحوار بالإسبانية ]
_ سمحي لي ا انسة دخلت فيك .. ماكانش عندي الوقت فين ندير شي حاجة
حياة : ماشي مشكل .. حتى انا ماكنتش شايفة الطريق و ماكنتش رادة البال
_ واش كان تابعك شي حد؟
حياة : [ تنهدات وسكتات ]
_ كانظن شي حاجة شخصية
حياة : [ قلبات وجهها كاتشوف جهة الشرجم ] كان تابعني راجلي [ سكتات لثواني وكملات ] كان باغي يقتلني ولكن الحمد الله لي طحتي فطريقي
_ واش قلتي هادشي للبوليس؟
حياة : لا ماقلتهاش ليهم
_ هادشي خطير ... خاصك تقوليها لهم وتاخدي الاحتياط ديالك واش هو هداك لي كان جالس فالطريق؟؟
حياة : وي هو هداك ا مسيو وبخصوص البوليس [ تنهدات ] ماعرفتش واش يقدرو يعاونوني
_ هدا ماخاصكش تبقاي معاه فدار وحدة خاصك ديري الحل لراسك
حياة : وي راني كانفكر نطلق منو [ بحزن ] مابقيتش قادرة نعيش معاه كتر .. وليت كانخاف على حياتي ، وليت خايفة شي نهار ننعس و مانفيقش
_ ولكن نتي علاش باقا مكملة معاه لدابا منين هو خطير؟
حياة : لأسباب شخصية
جبد كارط فيزيت ديالو مدها لها
_ ايلا كنتي محتاجة شي محامي .. ها نمرتي ولادريسا ديالي هنا
شداتها و بقات كاتشوف فيها عاودات شافت فيه و تبسمات
حياة : ميرسي
_ [ ضحك بخفة ] كاتشكريني على الكسيدة؟
حياة : [ تبسمات ليه ] لا مي نتا عاونتيني
_ هدا الواجب ديالي ا مدام..
حياة : حياة مي قول ليا مادموزيل حيت موحال باقا نكمل مع هاد السيد من مور هادشي لي وقع هاد النهار [ بحزن ] ما أنبوش حتى الضمير ديالو باش يجي للكلينيك
_ داكشي لي لقيتيني كانفكر فيه وكنت باغي نسولك ولكن مابغيتش نتدخل فحياتك كتر
حياة : ماشي مشكل راني ولفت
_ ماعندش شي حد هنا؟ شي حد من عائلتك نعيطو ليه
حياة : لا ماعنديش .. الفاميليا عندي كاملة تقريبا فالمغرب
_ ماكاتعرفيش شي حد هنا من غير راجلك؟
حياة : كانعرف ولكن مابغيت نبرزط حد
_ فهمتك .. المهم كانعاود نطلب منك السماحة على هادشي لي وقع لك بسبابي وراني تكلفت بالكلينيك عتابريه تعويض من عندي
حياة : لا ماتقولش هاكا الله يخليك ... قادرة نخلص على راسي
_ [ بتاسم ليها ] وصلتي للهنا حيت ضربتك .. هادي اقل حاجة نقدر نديرها ، المهم انا غانخليك دابا عندي شي خدمة
حياة : [ بادلاتو الابتسامة ] خود راحتك
مشا وخلاها تما ... كانت قادرة تخرج وترجع للفيلا حيت ماعندهاش شي حاجة خطييرة ولكن كان فبالها حوايج خرين ، المشكلة هي قادرة دوز غير هاد نهار هنا و لاغد ليه خاصها تخرج و كان خاصها فين تمشي من غير الفيلا
طاح عليها الضيم منين شافت راسها تلات بيها فالكلينيك غير بوحدها فبلاد ماعندهاش فيها حد .. ماعندها لا لي يجي يقول لها واش نطيب لك شي شهيوة و يدوز لها على راسها بحنان ... ماعندها لي يجي يطل عليها و يسولها كي وقع لها حتى دارت كسيدة
هزات تيليفونها و صونات على عادل ... ماعطلهااش دغيا جاوبها
عادل : [ بالإسبانية ] تهنيتي؟؟؟ هادشي لي كنتي باغا توصلي ليه؟؟؟
حياة : [ حسات بصوتو بحالا داير هوت باغلوغ وجاوباتو بالاسبانية ] مابغيت والو بغيت غير تجي تخلص عليا الكلينيك ماتخلينيش ملاوحة هنا راني مراتك .. حشومة عليك ، هادشي مايبغيه لا ربي لا عبدو .. هادشي علاش جايبني من بلادي؟؟ جبتيني باش تتعدا عليا؟ اجي غير خرجني من هنا و الليلة قطع ليا خليني نرجع فيحالاتي [ بدا صوتها كايبان فيه نمرة البكا ] مابقيت بغيت والو ... درت فيك راجلي و خويا و بابا ... قبلت نجي معاك لبلاد ماكانعرف فيها حد غير حيت..
عادل : [ بالاسبانية ] واش كاتحماقي عليا؟؟ علاش دابا كاتمتلي؟؟ علاش كاتكدبي؟؟؟
حياة : [ بالاسبانية ] ماعرفتش علاش كادير فيا هاكا وماعرفتش واش نتا بعقلك وليت كانشك فيك ولكن ها العار .. رجع ليا غير وراقيا لي حيدتيهم ليا .. ها العااار باغا غير نرجع لبلادي
عادل : [ نطق بالدارجة هاد المرة ] كي غاندير نجيب لك شي حاجة؟؟؟ واش نتي مغرقة لملتي الشقف و باقا كاتسنايني نجيب لك؟؟؟ عارفاني فين انا دابا ولا ماعارفاش؟؟
حياة : [ جاوباتو حتى هي بالدارجة ] ماعارفاش ولكن لي عارفة هو غاتجي لعندي دابا نيت و تجيب ليا صاكي ...
قطعات عليه وسيفطات و سيفطات ليه لوكاليزاسيون فالواتس اب وجلسات كاتتسنا فيه يجي و فبالها شلا هضور باغا تقولهم .. المهم دابا بعدا عندها 2 شهود عليه و زيد عليها الكاميرات لي كاينين فديك المنطقة غايكونو صوروه و هو كايجيفها وسط الطريق و فاش كان تابعها ، حسات براسها زمتاااتو و ماخلاتش ليه فين يتحرك
اما عادل فهاد الاثناء كان مع البوليس و كان معاه المحامي و حتى واحد المترجم باش يترجم هضرتها ايلا دوات بالدارجة مي مانفعوش حيت ماقالتش بزااف بالدارجة .. كان باغي غير يخرج من تما و يمشي لعندها ولكن ماخلاوه يتحرك من تما حتى سنا على شحال من حاجة وكان خاصو مايمشي فين و مايسافر فين با مايتسماش هارب ، اول حاجة دارها هي مشا للفيلا هز صاكها و مشا تأكد من شي حوايج عاد شد الطريق لعندها
مشا لعندها و دخل للشومبر لي هي فيها لقاها واكلاها فيديها غير شافتو و هي تمد يديها باش يعطيها الصاك ديالها .. لاحو لها و بدات كاتقلب فيه لقات فيه كاع داكشي لي كانت دايرا فيه ماناقصة حتى حاجة
حياة : ايوا دابا سمعني مزيااان و حل معايا وديناتك
عادل : هاد المرة نتي لي غاتسمعيني ... غدا غاتمشي معايا و تقولي لهم بلي هادشي كامل لي وقع اليوم كان كدوب
حياة : [ ضحكات ] كاتتفلا عليا؟ دخول الحمام بحال خروجو؟ .. دابا شادة عليك دليل على قدو و زيد عليها الشهود .. و مدام وصلنا لهاد المواصيل خلينا من دابا نحطو النقاط على الحروف
عادل : عرفتك ماكاتفهميش بالهضرة .. غانهضر معاك بداكشي لي كاتفهمي بيه
جبد تيليفونو و بدا كايخربق فيه حتى دخل لواحد الفيديو ... كان الفيديو ديالها و هي كاتشوف فحناه كاتجيف و مبعدة عليها الرابوز مخلياها كاتتعلق فيها كي القرد باش توصل ليه ... و كانت باينة فيه فاش حيدات لها الدوا و زطمات عليه و فاش حيدات لها الما و خواتو ونظرا لأنها مرا كبيرة و مريضة من الفوق يعني و بإختصار قوداتها على راسها
هنا تحيمرات و مافكراتش فالعواقب قد ما كان همها تخليها تحس بداكشي لي خلاتها تحس بيه و هي مريضة و هاد البلان كان من بين الحوايج الخايبين فيها .. كاتلعب بلا ماضرب الحساب للعواقب ، المهم عندها هو تفدي دقتها ولا بغات الموت تجي غير تجي .. كانت عارفة مزيان بلي داك الفيديو ماكانش لصالحها ولكن فنفس الوقت كانت عارفة بلي ايلا بينات ليه بلي صدمها بداك الفيديو ولا كبرات البعرة لداك الفيديو غاتخليه يولي يحس بلي شاد عليها شي حاحة كبيييرة .. من بين الحلول لي كانو عندها هو تقلل من قيمة الدليل لي شاد عليها و تحسسو بلي عديم القيمة قدام داكشي لي هي شادة عليه
حياة : [ ضحكات ] صافي غير هادشي؟ هادشي باش فرحان؟ شلاااا و شلالي عند بالي غير شي حاجة كي داايرا
عادل : [ جلس على طرف الناموسية ديالها ] عارفة راسك مزال ماعندكش الوراق؟
حياة : ومن بعد؟
عادل : عارفة ايلا عطيتهم هاد الفيديو كانكحل لك ضواصا ديالك؟ ماغايبقاو الوراق لا من عندي لا من عند غيري ، فهاد البلاد كايبغيو بنادم لي خاطيه المشاكل .. ماواصلش للبوليس
حياة : [ تبسمات ليه ] هاد الهضرة ديالك خليها عندك حيت تقدر تحتاجها كتر مني فاش تمشي تجرب البياص ديال الحبس كي داير نتا وحناك
عادل : نسيتي واقيلا انا عندي بلاصتي فهاد الدولة .. عاطي لهاد الدولة .. كايستافدو مني فالضرائب ونتي شنو عاطياهم؟؟ يكمل العام تولي حارݣة؟
حياة : الضرائب لي كاتخلص تلقا واحد عندو سوبر ماركت صغير و كايخلصهم .. ماشي شي حاااجة و هادشي فنظرك غايخليهم يتساهلو معاك؟
عادل : وريهم داك الفيديو .. هانتي وريتيه لهم ، شكون غايدير لك وراقك؟ شكون غايبقا يعطيك الفلوس؟ .. نتي عارفة عندي الفلوس غاتبغي تغرقيني غانخرج منها ونغرقك نتي ولكن غاتخصريها على راسك .. من عندمن غاتبقاي تشدي الفلوس ايلا دعيتيني؟
حياة : يمكن تخالط لك المغرب مع اسبانيا ا شيغي .. المغرب غاتعطيهم شي 10 ديال زورق و يهضموني فحقي ولكن هنا ا شيغي راحنا فبلاد الحق و القانون
عادل : خليني نشرح لك بطريقة خرا غاتفهميها ... فينما مشيتي كاينين لي كايشدو الرشوة .. هنا .. فالمغرب .. فبلاد خرا ، غايديرو لك خاطرك و فاش غانجبد الفلوس غايتسد الضوسي ديالك وغانخرج منها و ماغاتبقاي تشدي من عندي الريال .. فديك الوقت انا غانعطيهم الفيديو لي عندي و نشري الشهود و نسيفطك تترباي وفاش غاتخرجي عارفة فين غايسيفطوك؟ غايسيفطوك للمغرب طويلة كيما جيتي ، دابا ا حياتي غاتنوضي معايا تقولي لهم ماكاين والو من هادشي وتخلينا نحلو مشاكلنا بحال اي راجل و مراتو ولا غاتمشي توريهم الفيديوات لي عندك وفاللخر نتي لي غاتخرجي خاسرة فهاد لافير ...
حياة : [ تبسمات ليه ] عندك الحق
عادل : تفاهمنا؟
حياة : وي بيان سيغ تفاهمنا
عادل : [ بنظرة شك ] اخر هضرة؟
حياة : واش كانضحكو هنا؟ وي عندك الحق ماعنديش شي حل اخر .. نتا عارف مابغيتش نرجع للمغرب و باقا باغا ندير شي حوايج هنا فإسبانيا
عادل : غدا نرجع عندك باش نمشيو؟
حياة : وي ان شاء الله
ناض من تما و خلاها ... حاس بيها ناوية على خزيت ، مايمكنش تتقلب هاكا و تتقبل هادشي بهاد البساطة .. شنو زعما ياكما ناوية حتى يمشيو لعند البوليس و تكحل ليه الضواصا؟ ... مزال كون كانت شي مرا خرا بحال ختها مروى كانت غاتخاف على راسها و ماغايتوقعش منها تكون موجدة ليه شي بلان ولكن هاد خيتي و غير فهاد الشهورة لي دوز معاها ولا عارفها بلي فاش كاتكون الدعوة مكالمية عندها كايكون الما بدا كايدوز من لتحت ولا كاتكون ناوية على خزيت
بقات هي فالكلينيك بوحدها .. كان ديك الساعة ضلام الحال و الليل وجاها الجوع ولكن شكون غايتفكرها؟ واخا ماشي بزاف باش جات للهنا الا و انها توحشات طياب ماماها و توحشات الحنان ديال خوها .. ماعرفاتش شنو غايكون وقع واش الخطبة كملات ولا داوود حرمها عليهم ، غالبا غايكون حرمها عليهم
وعلى ذكر داوود طاح فبالها وفهاد الضلام غير فاش كانت ناعسة فالكلينيك و كان كايجي لعندها كل ليلة وماكايخليهاش بوحدها ... هزات تيليفونها و بدات كاتقلب فيه على شي برطمة للكرا غير فهاد المدينة .. كانت هاد الخطوة ماصالحاش 100٪ حيت يقدر عادل يشدها منها و يقول لهم هاد السيدة نصبات عليا وتزوجات بيا غير على الوراق و غير طلعتها لإسبانيا ودوزات معايا شي شهورة و هي تهرب و هادشي كانت عارفاه حياة ولكن ايلا دارت هاد الخطوة غاتستفاد بزااف
جاها الكرا غااالي هنا و كانت متوقعة هادشي ولكن ماشي مشكل هادشي ماغايدومش و مزال غاتجبد من عادل هادشي لي غاتخسر .. هزات شي نوامر باش تهضر مع ماليهم لاغد ليه وغير سالات سيفطات ميساج لمحمد فيه الله يكمل عليكم بالخير كانت باغا غير تقلقلو بيه راش تعرف واش داوود حرمها عليهم
حطات راسها على المخدة و نعسات و دايرا فبالها لاغد ليه غادير شحال من حاجة .. مابغاتش تضيع الوقت ولا بقات كاتتسنا الرجل حتى ماتبقاش مقصحة منها ماغايكونش هادشي فصالحها
صبح الصباح و فاقت ... سيفطات ميساج لعادل باش يجيب لها ماتلبس وفهاد الاثناء هي ناضت وطرفات حالتها اما حتى الفطور مافطراتش ، ماعندهاش مع الماكلة ديال هاد القنت .. سيفطات ميساج لخديجة كاتطمئنها بلي كلشي بيخير و سولاتها على شنو وقع ، جلسات كاتتسنا الجواب حتى جا عادل و جاب لها الحوايج لي تلبس ومكياجها
بدات كاتقاتل مع حوايجها حتى لبساتهم اما حتى المكياج ماقدراتش دير بزاف حيت الدقة واكلاها فاليد ليمنية و هي ماكاتعرفش تخدم باليد ليسرية
قادات شعرها و جمعات داكشي وخرجات لعندو ... شدو الطريق لعند البوليس و الطريق كااملة وهو كايفكرها بلي ماشي من مصلحتها تلعب عليه .. ماكانش تاايق فيها نهائيا ولكن الصدمة لي تصدم هي فاش شافها قالت لهم بلي ماكاين والو و هداك غير سوء تفاهم و مازادت مانقصات يعني وفات بكلمتها و فعلا ماجبداتش ليه الصداع .. خرجو من تما ت هو باقي مامتيقش
حياة : نقدر نطلب منك طليبة؟
عادل : خاصك الفلوس؟
حياة : لا .. ايلا قدرتي وصلني للفيلا باغا نجمع حوايجي ، يمكن من الاحسن بلاش مانزيدو نبقاو مجموعين فبلاصة وحدة
عادل : هادشي فاش كنت باغي نهضر معاك .. عارفة راسك غاتتطلقي؟
حياة : وي عارفة هادشي و ماعنديش مشكل ولكن باغا نجيب حوايجي و وراقيا و راك كاتشوفني مقصحة من رجليا مافيا مانشد طاكسي يوصلني حتى لتما
وافق يوصلها و وصلها و بقا راد معاها البال واخا هكاك ... جمعات حوايجها كاملين و خلاتو يهز الفاليزات يديرهم فالطوموبيل ... ركبات معاه و وصلها لواحد لوطيل و تفاهم معاها باش يديرو وقيتة و يتناقشو فهادشي
مشا و خلاها وفهاد الاثناء هي اول حاجة دارتها هي صونات على صحاب دوك البرطمات لي شافت و بدات كاترصي حتى رصات مع واحد عجباتها البرطمة ديالو و فنفس الوقت جاها التمن شوية رخيص .. كان عندهم بزاف ديال الاجرائات عكس المغرب وهادشي عصبها حيت فيه سير و اجي بزاف
وصلها ميساج من محمد قال لها فيه امين .. ماكانتش متأكدة من جوابو و هادشي لي خلاها تصوني على خديجة باش تأكد لها الخبار ولقات بلي الخطبة كملاات وداوود لي غايحرمها عليهم صدق حتى هو حاضر معاهم و هادشي لي خلاها تزييد تسخط ويطلع لها الدم مافهماتش علااش غايخلي ختو تتزوج بخوها .. واش هو عارفها هي السباب فهادشي و زايدها قابل على هاد الزواج؟؟؟ واش على هادشي مشا يهضر مع خوها؟؟ .. روناتها خديجة بهاد الهضرة حتى ولات كاتفكر تصوني على لطيفة و تهضر معاها بكل وجه مقزدر على هادشي ...
إيلا كانت الخطبة دازت .. مايمكنش تخلي داك العرس يدوز ، خاصها غير تسالي مع عادل و تريݣل أمورها و ديك الساعة عااد يبان لها شنو كاين
دازو أيام ريݣلات فيهم أمور السكنة ديالها و تحولات ليها ... واخا ماكانش فيها شي فراش لي زويين و فاش كانقول زوين كانقصد فراش بحال لي خلات فالفيلا ولكن كان كايخصها تصبر
خرجات تقدات لراسها و عمرات التلاجة .. ماكانتش مستعدة تولي تخسر الفلوس فماكلة الزنقة حيت عندها غرض اخر بيهم
دوزات السيمانة اللولة عاطية فيها الامان لعادل مي فنفس الوقت كانت كاتسول على راسها و كاتخرج و تدخل .. كانت فديك السيمانة اللولة كاتكون صداقات مع الجيران ديالها و ركزات على 3 ديال الجيران ... لي ساكنين فليمن ديالها و لي ساكنين فليسر ديالها و لي ساكنين قدامها .. اول حاجة كانت دارتها فالنهار اللول هي قادات 3 ديال الكيكات مازوقاتهمش بسباب يديها لي مهرسة مي واخا هكاك كان شكلهم الطبيعي زوين ... عطات لكل واحد فيهم كيكة باش كاتوريهم حسن الجورة ديالها و من موراها ولات فينما كاطلاقا شي حد ضروري ماكاتلقي عليه السلام مع الإبتسامة
و الاهم هو كانت كاتمشي لشي سواق كانو كايبيعو فيهم الطباسل و الكيسان و الماعن قدام و رخاص .. كانت كاتشري اي حاجة بانت لها ديال الزاج طواال داك الاسبوع .. بدات السيمانة التانية و تما فين ولات كادير شي حوايج غراب
كايوصل الليل كاتبدا تهرس الكيسان و الطباسل و داك التهراس كايوصل حتى للجيران ديالها لي ساكنين على ليمن و على ليسر ديالها و لي قدامها ... ماكتافاتش غير بهادشي ، كانت كاتضرب فالحيوط و كايتسمع الصوت بحالا شي حد كان كايدفعها على الحيط و هادشي ماحبسش هنا ، وصلات للهضرة بالغوات بحالا كادابز مع شي حد و هادشي لي خلا الجيران لي حداها يلاحظو هادشي و بداو كايجيو يشوفو شنو واقع وكان جوابها ديما كايكون بلي غير كاتتناقش مع راجلها لي جا يطلب فيها كالعادة باش ترجع معاه للدار ولكن هي ماباغياش
كانت عارفة راسها ماخاصهاش تعيق فهاد البلان و تطول فيه حيت يقدر يوصل للبوليس و يصدق مضروب لها فالزيرو داكشي علاش هاد المرة دارت اخر خطوة من هاد البلان .. صونات على عادل وجلسات كاتتسناه يجاوب
حياة : عادل فينك دابا؟
عادل : خدام علاش؟
حياة : ماغانتناقشوش فداكشي ديالنا؟
عادل : كنت كانتسناك ديري شي وقت
حياة : ايلا كنتي مسالي هاد العشية نطلاقاو و نتفاهمو
عادل : تجي للفيلا ولا نديرو فشي كافي؟
حياة : راك عارف رجلي مقصحة منها ايلا قدرتي اجي لعندي لفين ساكنة .. ماعرفتش علاش رجلي ولات عاطياني الحريق كتر من اللول .. قالو لي غير تقصحت ولكن مابانش ليا غير تقصحت فيها .. كانشوفها بدات كاتزراق و تنفخات ليا
عادل : و مامشيتيش للطبيب؟
حياة : قلت ماكاين لاش حيت قاليا غير مقصحة و انا كانعرف الاطباء هنا ماكايغلطوش المهم خليك من هادشي .. دابا فين غانطلاقاو؟
عادل : غانجي لعندك للدار سيفطي لي لادريسا
قالت ليه لادريسا غير بفمها ودارت السبة بلي ساهل يعقل عليها و داكشي نيت لي كان .. بقا دايرها فبالو
قطعات معاه الاتصال وبدات كاتفكر فالبلان لي باغا دير ليه .. جلسات كاتشوف فرجليها لي مابيها والو بالعكس كاتقدر تتحرك بيها و عاادي ، كاين الم طفيف ولكن ماشي بزاف
كان شاغل بالها داك البلان لي ناوية ديرو .. الخايبة هي ايلا ماصدقش ليها و صدقات جايباها فراسها على والو ... ناضت لجهة المرايا و بقات كاتشوف فوجهها وكاتدوز عليه بيديها كاتفكر واش ضروري دير داكشي ولا عادي تقدر ديرها فأي بلاصة خرا .. شنو دابا غايخصها دير نظاظر عاوتاني لأيام؟؟ ولكن بعدا فالعين كاتبان الدقة مزيانة .. زعما ضرب غير دراعها و صافي تلبس شي غوب و تغطي دراعها؟
ولكن العين كاتكون اكثر إقناع حيت حتى واحد ماكايشك بلي الانسان يقدر يزرق عينو ... بحكم الضربة تما كاتكون خايبة و كاتحس بالضو ضربك فيها
غمضات عينيها و حاولات تضرب عينيها ولكن ماقدراتش .. خايفة غير تصدق عامية راسها و تصدق حارقة البولة ديال عينيها
عادل فهاد الاثناء كانت فبالو غير حياة ... ماشي حيت كايبغيها ولكن فبالو الحريرة ديالو معاها ، باغي يطلقها فأقرب وقت باش تخرج من حياتو خلاص ويتهنا من كاع المشاكل لي جايين من جهتها
وصلات العشية و قصد العنوان لي عطاتو .. طلع للطابق لي هي فيه ، بانت ليه واقفة هي و راجل و مرا و كاتهضر معاهم ... كانت دايرا النظاظر ديال الشمس ماعرفهاش واش يلاه دخلات ولا عاد ناوية تخرج
° غير طاحت عينيها عليه و هي تزير على يد المرا وبدات كاتفتف فالهضرة ودعاتهم بالزربة و مشات لجهة البرطمة ديالها ... دخل وسد الباب من موراه ، بدا كايدور عينيه على البرطمة ماعرفش اش عجبها فيها قال فبالو يمكن ناوية تعتامد على راسها ولا يمكن مشات على حساب جيبها .. مشا جلس وفهاد الاثناء هي قادات ليها و ليه قهيوة وجلسات و هادشي جاه فشكل .. نكدب عليكم ايلا قلت لكم تايق فيها لدرجة ياكل ولا يشرب شي حاجة من يديها .. واخا ماكانت دايرا ليه والو فالقهوة ولكن ماكانش تايق فيها ...
حيدات النظاظر من عينيها وحطاتهم فوق الطبلة وهزات فنجانها ديال القهوة كاتجغم منو تحت نظراتو لي كانو موجهين لعينيها لي مضروبة
عادل : مالك فعينك؟؟ واش ضربك شي حد؟
حياة : [ قوسات حجبانها وشافت فيه بعبوس ] وي ضربني راجلي
ناض من بلاصتو و وقف من مور مابدا كايحس بالقالب طالع معاه و حس براسو جا لوكرها برجليه
حياة : فين نايض؟ جلس جلس مزال عااد ناوية نهضر معاك و حط داك التيليفون فوق الطبلة باش نتفاهمو على شي حوايج
من سوء حظو الجيران شافوه فاش كان داخل اما بالنسبة للإختيار ديال حياة لهاد العمارة بالضبط ماكانش اختيار عشوائي ... حيت هاد العمارة كانو فيها 2 طرق تقدر تدخل بيهم ليها يا تدخل من الباب لي كايدخل منها كلشي و ديك الباب كانت فيها كاميرا المراقبة يا غادوز من واحد الزنيقة كاينا فجنب العمارة و تما كاينين بعض السلالم لي تقدر تخرج منهم كانو بحال مخارج الطوارئ و كل طبقة كانت عندهم باب منين يخرجو و الأهم هو ديك الزنيقة مافيهاش الكاميرات ، فيها غير شي طوارو ديال الزبل
شد راسو بيديه و بقا كايشوف فيها ... اش غايدير دابا مع هادي؟؟ ، جلس و هاد المرة كان حتى هو فبالو واحد البلان لي كان ديجا خادم عليه من فاش كانو فالمغرب .. هداك هو لي بقا ليه باش يتفك من هاد الموصيبة
عادل : فاش غانتفاهمو؟
حياة : حط التيليفون فوق الطبلة
عادل : حطيه تا نتي
حطو تيليفوناتهم فوق الطبلة باش حتى واحد مايشد على لاخر شي حاجة و بدات هي كاتهضر
حياة : غاتكون فهمتي واقيلا؟ بلا مانشرح لك بلي الجيران شافو مون ماغي مزرق لي العين .. ماعلينا ا عادل عرفتي علاش صونيت لك؟ باش نحطو النقاط على الحروف و نسدو هاد الضوسي
عادل : و انا كرهت؟؟ واش نتي خليتي شي ضوسي يتسد؟؟
حياة : لا لا كون هاني هاد المرة غايتسد مي بشروط
عادل : قولي نسمع
حياة : [ بشك ] نوض نوض بعدا نقلبك نتا مابقات فيك تقة
عادل : نتي لي كاتهضري على التقة؟؟
حياة : وا نوض
ناض و قلباتو غير بيد وحدة و حتى هو قلبها حتى تأكدو بلي ماكاينش شي تيليفون زايد ولا اي حاجة تقدر تخلي هاد الهضرة لي غايقولوها هنا تخرج لبرا .. فالاصل هي لي كانت كاتتأكد من هادشي اما عادل ماكان غايخسر والو
عادل : شنو باغا؟
حياة : باغا ندير تمن لدوك الفيديوهات و الشهود لي شاهدين من جهتي
عادل : هضري قولي شنو باغا كانسمعك
عطاتو واحد الورقة ماكانتش مكتوبة بخط يديها و انما غير مطبوعة و كان فيها داكشي لي بغات .. دارت رجل على رجل و هزات الفنجان كاتجغم منو و كاتتسنا ردة الفعل ديالو .. اما عادل فاش شد ديك الورقة بدا كايضحك ، كايضحك بالفقصة و بهاد الطنز ديالها .. حط الورقة فوق الطبلة و نطق
عادل : باغا ديري لاباس على ضهري؟ انا ندمر فيها و نتي تجي تديها باردة ياك ا لالة حياة؟
حياة : ماطلبتش منك شي حاجة كبيرة ... باغا الفيلا لي ساكن فيها نتا و حناك .. 100 الف يورو فكونطي يعني 100 مليون مغربية و الطوموبيل ديالك و فكل شهر دوز ليا 5 الاف يورو لكونطي يعني 5 ديال المليون
عادل : الخلاص لي غانعطي ل10 ديال المحاميين باش يفكوني منك و ماغايوصلش لهادشي
حياة : غايفكوك ولكن واش نسيتي واحد الحاجة؟ واقيلا نسيتي بلي اوروبا كاتعاون المرا ماشي الراجل ... هناا فين كاين الفرق بيني و بينك انا مرا و نتا راجل و الجمعيات لي كاينين هنا ا شيغي كايدافعو على حقوق المرأة ماشي حقوق الرجل ... فكر فمستقبلك و فكر فحياتك لي و فكر فالسمعة ديالك وزيد فكر فالشيبانية ديال حناك واش غاتقد تتعايش مع المحابسيات أبار السنين لي غادوز تما واش فكرتي فالعيالات لي غاتلقا تما و المجرمات لي غاتلقاهم؟ فأخر يامها تولي تصبن لهم السليبات ونتا عارف مزيان كايكونو شي محرومات وسط الحبس واش فنظرك غايزݣلو حناك؟ واخا لحمها بيريمي مي قااضية الغرض ... ايلا نتا و حناك غاضربوني ضربة وحدة انا غانضرب 2 ضربات وحدا ليك و وحدة لي عزيز عليك
بقا عادل ساكت شحال عاد نطق
عادل : واش عارفة بلي الطلاق هنا ماشي بحال المغرب؟
حياة : علاش؟
عادل : ختاري وحدة من 2 يا نعطيك هادشي لي طلبتي و مانطلقكش يا نطلقك و غانمشيو بالقانون و النص من داكشي لي عندي غاتاخديه بالقانون
حياة : زيد وضح
عادل : هادشي بزاف عليا .. بغيتي نعطيك الفيلا و الطوموبيل و 100 الف يورو و نولي ندوز لك كل شهر 5000 يورو نديرها معاك ولكن ماغانطلقكش ... بغيتي نطلقك و تاخدي النص ديال داكشي لي عندي .. نساي عليك دوك الشروط لي شرطتي عليا
حياة : و نتا اش عندك؟
هز تيليفونو من فوق الطبلة و بدا كايوريها كاع الاملاك لي عندو .. داكشي لي فإسبانيا و و الدار لي عندو فالمغرب ... كانت عندو سلسلة مطاعم و سلسلة مقاهي كل وحدة كانت فمنطقة و بعض المشارع لي كان كايستفاد منهم حتى هما و 2 برطمات كانو فمدن خرا فإسبانيا و في الاخير 3 ديال الطوموبيلات ...
بقات كاتفكر و تدورها فراسها ... شكات بلي كاين شي بلان تما داكشي علاش كان خاصو يوريها اوراق الملكية لأي حاجة قال لها بلي ديالو .. و فعلا فديك العشية وراها كاع الاوراق لي عندو دابا بقات فحاجة وحدة ... الاوراق لي غايثبتو لها بلي بصح ايلا تطلقو غايقسم معاها الأملاك ديالو
تفاهمو باش لاغد ليه غايجي لعندها للدار و يجيب معاه الوراق لي غايثبتو لها ... خلاتو يمشي و هي راسمة فبالها بلان اخر ايلا فكر يتفلا ولا يدير هاه ولا هاه و فنفس الوقت بدات كاتسول و تقلب على هاد الهضرة لي قالها ليها حيت ايلا كانت بصح يعني راه داكشي لي غاتربح ايلا قسم معاها غايكون حسن من داكشي لي طلبات منو و عاد غايرجع عليها بالأرباح
دوزات ديك الليلة غير فالدار ولاغد ليه مع فاقت اول حاجة دارتها هي قصدات المحامي لي كان عطاها لاكارط فيزيت ديالو ... مشات كاتاخد الاستشارات منو ولقات بلي ممكن يقسم معاها الأملاك ديالو ، دارت معاه باش فاش يجيب لها داك الإثبات غاتجيبو ليه و يتأكد منو واش بصح و داكشي لي كان
رجعات للدار و غير جا عادل و جاب لها الاثبات داتو للمحامي باش يتأكد ... جلسات كاتتسنا جوابو وكان باين فيه كايحلل داكشي مزياان
[ الحوار بالإسبانية ]
حياة : واش هادشي لي هنا حقيقي؟؟
_ [ قاد نظاظرو و شاف فيها ] هادشي لي مكتوب هنا كلو صحيح .. فاش غاطلقو غايقسم معاك الأملاك ديالو و تقسمي معاه الأملاك ديالك
حياة : ولا ماعنديش؟
_ فهاد الحالة هو غايقسم معاك
حياة : ماعرفتش ولكن دخلني الشك فهادشي ... عاود تأكد ليا عافاك
رجع كايشوف فالوراق لي قدامو و عاود شاف فحياة
_ كي قلت لك ا انسة حياة حقك ماغايضيعش والاملاك لي عندو غاتتقاسموهم .. حالتك المادية حتى هي كاتساعدك فهادشي
حياة : ماعرفتش المهم انا غانشوف اش كاين و غانعاود نرجع لعندك [ بغات تهز الوراق و تنوض و رجع وقفها ]
_ نقدر نعطيك نوامر شي محاميين خرين كانعرفهم غاينفعوك .. عاودي تأكدي منهم على هادشي
حياة : غاديرها معايا مزيانة الصراحة
عطاها كارط فيزيت ديال 2 محاميين وحدة ديال محامي و وحدة ديال محامية .. شداتهم و شكراتو و هزات الوراق و مشات من تما ... قصدات المحامي اللول و أكد ليها الهضرة لي قال ليه المحامي اللول اما المحامية الثانية كانت تعمقات هي و حياة فهاد الموضوع
حياة : هادشيي بالضبط لي كنت باغا نوصل ليه هانتي فهمتيني ... دابا ايلا انا ماكانوش عندي الاملاك .. الله كريم ماغانقسم معاه والو ولكن ايلا هو مشا نقل داكشي فسمية شي واحد قبل مانطلقو؟ واش ماغانقدرش نستفاد؟
_ [ بصوت انثوي ] ماغاتقدريش مع الأسف
حياة : و ماكاينش حل؟؟
_ كاين حل
قتارحات عليها الحل و قادات ليها شي وراق وعطاتهم ليها
_ خاصو يسيني على هاد لوراق باش فهاد الفترة ديال طلاقكم ماينقلش الملكية ديال أملاكو لشي حد أخر .. هاد لوراق كايبلوكيوه لواحد الفترة ... فاش يسيني عليهم جيبيهم ليا
حياة : واخا ولكن مزال ماهضرناش على الأتعاب ديالك
تفاهمات معاها المحامية باش يتفاهمو فهادشي من بعد فاش تجيب لها الوراق و داكشي نيت لي كان ... غير خرجات من عندها بدات كاتقلب فالخلفية ديال هاد المحامية .. و هادشي لي خلاها تقرر تخدم معاها هي حيت لحد الساعة هي لي دارت معاها داكشي نيت لي كانت كاتقلب عليه
عاودات عيطات لعادل و دارت معاه باش يطلاقاو فشي كافي و طلاقاو و بداو كايتناقشو ... عطاتو الوراق لي يسني عليهم و سنا عليهم و لاغد ليه رجعات لعند ديك المحامية و عطاتها دفعة مقدمة على الخدمة ديالها معاها و من موراها بداو إجرائات الطلاق بيناتهم و الاتفاق على شنو هي غاتاخد من عادل و شنو غايبقا ليه
كان كايدوز نهار من ورا نهار و كل مرة كاتحس براسها قريبة توصل لداكشي لي باغاه ... فوقما كاتقول لها المحامية تجيب لها شي ورقة كاتمشي كاتجري تجيبها و بحكم الطلاق كان اتفاقي ماكانش داكشي معقد و طويل كاياخد الوقت
وصل النهار لي صافي غاتعتابر فيه حرة و فنفس الوقت النهار لي غاتبدا حساباتها فيه مع عادل على حساب الاملاك ديالو ... طلاقاو عند واحد المحامي و كانت معاها المحامية ديالها و حتى المحامي لي كان ضربها بالطوموبيل و المحامي ديال عادل طبعا
كانو كايتناقشو حتى جبد ليها المحامي ديال عادل شي وراق
حياة : ديالاش هادو؟
عادل : قرايهم
بدات كاتقرا .. كان خاصها تسني على وراق مضمونهم انها كاتسامحو على اي حاجة دارها لها فاش كانو مزوجين وماغاتتابعوش قانونيا تحت اي ظرف من الظروف و فهاد الاثناء حتى محاميتها جبدات وراق خرين باش يسيني عليهم كانو وراق ديال انه كايسامحها و ماغايتابعهاش قانونيا على داكشي لي دارت فيها
سينا هو قبل منها و من موراها وقعات حتى هي وبدات كاتتسنا فالباقي ...
خرجات من داك البيرو وهي ماكاتشوفش قدامها .. غير غادا و رجليها جارينها ، مزال ماقادراش تستوعب شنو وقع معاها هاد دابا واش عادل عادل لي قد الكفة ديال يديها؟ واش هدا هو عادل نيت؟؟
شداتها الدوخة و بدات كاتقلب غير فين تجلس ولا فين تتكالا ، مابقات عارفة فين الطاكسي و فين الطوبيس وفين تمشي و فين تجي
حسات بحوايجها خانقينها و الدنيا مظلمة عليها ، بدات كاتشوف فالوجوه ديال الناس لي غاديين ولي جايين ، بدات كاتسمع هضرتهم كضوضاء فقط .. طاحت على ركابيها فالارض و هي كاتفكر فالتغريقة لي غرقاات و منين غاتجيب الفلوس؟؟ منين غاضبر فيهم و هي خرجات فداك الطلاق غير بيديها خاويين واش خاصها تسرط الصدمة ديال السينياتور ديالها لي كان على وراق ديال الزواج فاش كانت فالمغرب .. سانية بلي ماتشد حتى ريال من عندو ايلا طلقو و ماعندهاش الحق تطالب بأي حاجة .. سانية كي البهلولة و هي ماعارفاش قوانين أوروبا عارفة غير تسني بلي شدات صداقها و السلااام صداقها لي كان كايبان لها شي حاااجة
ولا غاتتقبل الصدمة بلي هي سينات بلي ماغاتتابعوش قانونيا على دوك الفيديوهات و مابقا عندها ماتصور منو ... طمعااات و طمعها كان كبيير ، طمعها وخلاها تختار يا يقسم معاها أملاكو ويطلقو يا يعطيها داكشي و مايطلقوش و هي من الطمع ديالها بغاتها كبييرة حتى خرجات لا بهادي لا بهادي
ولا تتقبل الصدمة ديال المحامي لي ضربها فداك السيكتور لي ساكنين فيه صدق جار عادل و كايعرفو و صدقو مضورينها بيناتهم كي الحمارة كايلعبو عليها و يضحكو عليها بيناتهم و من ورا ضهرها
ولا تتقبل الصدمة ديال الكريييديات لي غرقها فيهم ... و المحامية لي كانت غاتخلصها بواحد القدر صدق خلاصها أضعااف و زادها حتى المحامي لي كان ضربها بطوموبيلتو ولي هي خدات منو غير إستشارة دابا حتى هو غايغرق لها الشقف ايلا ماخلصاتوش ... اش غادير؟؟ فين غاتمشي؟؟ منين غاتجيب الفلوس باش تخلصهم؟؟
كان بنادم كايدوز من حداها غادي جاي ولكن شكون مسوق لها ... حسات براسها ضاايعة و تالفة ، الشمتة وي هاديك نيت لي حسات بيها دابا .. شمتها شمتة هو و المحاميين و خلاوها واحلة غير مع رجليها ، اخر واحد كانت كاتتوقع منو يخرج منو هادشي هو عادل الدميديمة لي كاتقوليه شا كايحبس .. كاتقول ليه را كايزيد ، فين عادل لاخر؟؟ مايمكنش هدا يخرج منو هادشي كامل 100% شي واحد لي قراه
ناضت من الأرض نفضات ركابيها ودوزات يديها على شعرها ماعارفاش شمن إتجاه غاتسلك .. عقلها تبلوكا فنقطة وحدة الصدمات لي دوزوهم لها فالبيرو وحدة ورا وحدة و عادل لي كان هاز التيليفون كايصور ردة فعلها و هي معصبة و هو كايضحك بحالا كايقول لها ايلا دارت شي حاجة ماشي هي هاديك غايكون شاد عليها الدليل لا لا ... بحالا كايرجع لها الاستفزاز ديالها
شدات طاكسي للدار حيت مابقاتش قادرة تزيد على رجليها من مور هادشي .. غير وصلات ، حلات الباب و نسات الساروت فالباب بالعقل لي مابقاش عندها و حتى الباب بقات هكاك محلولة ... كل فردة ديال الطالون فين لاحتها
دخلات جلسات فوق واحد الكرسي وحطات يديها على راسها ... التيليفون بقا كايصوني شحاال ولكن ماقدراتش تجاوب .. هي اصلااا ماسمعاتوش ، مشات لها حاسة السمع و ولات كاتسمع غير الصفير في حين عادل كان ديك الساعة عارض على المحاميين باش يتعشاو عندو فالفيلا و صونا على حناه كايفرحها بالخبار .. ماكانت قاداها فرحة
° بقات على داك الحال شحاال و هي جالسة يمكن ساعة ويمكن ساعتين بنفس الوضعية حتى دخلات عندها وحدة من الجارات لي لقات الباب ديال حياة محلولة
_ [ حطات يدها على قلبها بالخلعة وهضرات بالاسبانية ] خوفتيني ، كنت كانظن غي شي شفار دخل للشقة ديالك يلاه لقيتيني غانصوني للبوليس [ بقلق واضح على محياها ] حياة واش بيك شي حاجة؟؟ كوكو واش كاتسمعيني شنو مقلقك؟
بدات كاتحرك يديها حدا عينين حياة .. ماحسات براسها حتى قفزات فاش تسيفات عليها
حياة : [ تفركعات عليها بالاسبانية ] واش نتوما ماكاتعرفوش الدقان؟ ماكاتعرفوش بنادم باغي يبقا بوحدو؟ بشمن حق داخلة لداري؟؟ ضحكت لك 2 ضحكات وليتي باغا دخلي ليا مع العضام؟ اشمن كوكو ولا زمر؟؟
خلاتها غير كاتبلق فعينيها ... نيتها ماكانتش خايبة غير فكرات ياكما جارتها قتاحم شي حد الشقة ديالها و فاش شافتها هكاك بقات فيها ... ندمااتها كاع علاش سولات
خرجات من تما و هي شادة موقف على حياة ... اما هي فهاد اللحظة بقات تابعة الجارة حتى خرجات و ناضت زدحات الباب من موراها ... هادشي لي كان ناقصها هاد الساعة غير بنادم
مشات جلسات فوق الكانابية و سهااات كاتفكر فحريرتها ... كانو المحاميين ب2 عاطيينها أجل باش تخلصهم ب2 ولا ماخلصاتهمش غايوليو متابعينها قانونيا .. منين غاتجيب لهم الملايين لي كايتسالوها لها؟؟ ... حسات بالتلفة و ماكاين لي يعاونها من غير شخص واحد ماعرفاتش و مامتأكداش واش تقدر تعاونها ولكن على الاقل غير تاخد منها الإستشارة و النصيحة
دوزات نمرة مدام تورية و جلسات تتسناها تجاوبها ...
دارت معاها باش يطلاقاو فالعشية و تفاهمات معاها على الوقت لي بقات كاتحسب ليه بالسوايع و الدقائق والثواني حتى وصل الوقت و مشات للعنوان لي غاطلاقا فيه بمدام تورية .. سلمات عليها و جلسات
كانت ملاحظة تعابير حياة لي كان باين فيها ماشي هي هاديك
مدام تورية : [ بإهتمام واضح ] وجهك ماعاجبنيش ياك لاباس؟ واقع لك شي مشكل مع راجلك؟
حياة : [ خرجات من فمها ضحكة الفقصة ] كان راجلي ا مدام تورية كاان
مدام تورية : واش طلقتو؟
حياة : [ بدات كاتشوف فإتجاه وحداخر ] طلقنا من مور ماغرقني [ حطات يديها على راسها ]
شافت يدها لي مهرسة و شافت العصبية لي كانت باينة على ملامحها ... طلبات قهيوة ليها و لحياة ونطقات
مدام تورية : عاودي لي ، لي كاين وغانعاونك بلي قدرت عليه
حياة : [ بنظرة شك ] اجي نسولك بعدا فين كاتعرفي عادل؟
عرفاتها فاش غاتكون كاتفكر واخا ماعارفاش شنو هي المشكلة لي حياة طايحة فيها دابا ولكن توقعات غاتكون المشكلة عندها علاقة بعادل
مدام تورية : [ بتاسمات لها ] شوفي ا بنتي ، انا ماجيتش و أسست جمعية لحقوق المرأة .. قبل ما نأسسها كنت وحدة من العيالات لي كايتعرضو للعنف .. كايضربوهم رجالاتهم و كايحرموهم من أبسط حقوقهم .. واخا يكون راجلك ولدي غاندافع عليك بحالك بحال كاع العيالات .. راجلك عرفتو على طريق وحدة من المعارف ديالو لي حتى هي كان عندها مشكل مع راجلها [ عاودات بتاسمات ليها باش تطمأنها ] عاودي لي قصتك وماتخافي من والو
حياة : عاودي لي قصتك نتي كيفاش حتى فكرتي تأسسي ديك الجمعية حيت على مابان لي ا مدام تورية من وراك قصة
مدام تورية : قصتي طويلة و غانحتاج سوايع باش نعاودها لك .. قولي لي مشكلتك
بدات كاتعاود لها كاع داكشي لي دار لها عادل و حناه و كيفاش قولبها فالمغرب و خلاها تسيني باش ايلا طلقو ماتشد من عندو والو و ماتتسال والو و كيفاش قولبها هو و المحاميين و كيفاش غرقات فالكريديات لي عطاوها عليهم أجل وكيفاش المحامي التاني طلبات منو غير استشارة و صدق حتى هو كايتسالها و هي مافاهماش اش كايتسالها و فين كايعاونها ... خلاتها مدام تورية حتى سالات عاد سولاتها
مدام تورية : عاقلة على سمية دوك المحاميين؟
حياة : وي تسناي نعطيط كارط فيزيت ديال كل واحد فيهم
جبداتهم و مداتهم ليها ... بقات كاتشوف فيهم و كانت عاارفاهم بحكم هي كانت كاتعاون شحال من مرا معنفة و اغلبهم كانت كاتعاونهم يتطلقو الشيئ لي خلاها تكون عارفة معظم المحاميين الكبار و الصغار فهاد المدينة .. شافت فحياة و نطقات
مدام تورية : ومالقيتي ا بنتي تمشي غير عند هادو؟ كاينين محاميين صغار و كايخدمو مزيان
حياة : راه ماكنتش عارفة شحال كايخدمو ... كان فبالي غير غانشد داكشي لي جاني فحقي من عندو و غانخلصهم و هاديك المحامية ماكانتش قالت ليا شحال كايخصني نعطيها و المحامي راه ماخدم معايا ما والو غير ناصب عليا
مدام تورية : هادو ا بنتي معروفين كايخدمو بالغلا غلطتي منين ماسولتيهاش وعرفتي شحال كاتخدم
حياة : حيت كنت ضاربة حساب ولكن خرج ليا حساب اخر [ دوزات يديها على شعرها بعصبية و نطقات ] كنت كانقول صافي راها معاوناني غير نشد حقي و نخلصها
مدام تورية : عولتي على الفلوس لي كاينين فكونط طليقك؟ ايلا ماكانوش فلوسك فجيبك ماتبقايش تغامري بهاد الطريقة ا بنتي
حياة : واخا و هداك النصاب؟؟ علاش غانخلصو؟؟ راه ماعاونني فوالو علاش غانعطيه؟؟
مدام تورية : [ بتساؤل ] ماعاونك فتا حاجة؟
حياة : واالو مشيت لعندو النهار اللول خديت منو إستشارة و صافي [ تفكرات شي حاجة ] ولكن كيفاش؟؟؟ انا راه ماخدمتوش واش غايخدم معايا بلا خباري؟؟؟ انا ماكنتش كانقول ليه يعاونني هو لي كان كايتجمع بديك المحامية و كايعجنو و يخبزو غير منهم لراسهم و انا كان كايسحابلي كايعاونني حيت... [ زادت تعصبات و ضربات يديها مع الطبلة حتى تقصحات ]
مدام تورية : ا بنتي المغرب بوحدو و اسبانيا بوحدها ... هنا تا حاجة ما فابور ، كل واحد كايدير خدمتو حيت كايتخلص عليها مايمكنش يخلي الكليان لي غايخلصو و يتبع واحد ماغايخلصوش .. هنا ماكايتخلصوش بالله يرحم الواليدين
حياة : [ كاتعبر بيديها و كاتشرح و هي معصبة ] ولكن راه ماعاونوونيش ... راهم تافقو عليا واش ا عباد الله هما ضوروني بيناتهم و نزيد نخلصهم من الفوق؟؟ شنو غاندير؟؟ منين غانجيب لهم ديك الفلوس؟؟ واش نبيع كلوتي؟؟؟ [ ضحكات بفقصة ] حتى الكلوة لي نبيعها ماكايناش ، اش غاندير؟؟ منين غانجيب لهم الفلوس؟؟ نمشي نبيع راسي؟
مدام تورية : شنو لي خلاكم توصلي نتي و راجلك لهاد الحالة؟
حياة : راني عاودت لك ا مدام تورية كاع لي عندي عاودتو لك
مدام تورية : [ تنهدات ] دابا قلتي لي سينيتي على شي ورقة؟
حياة : سينيت على شحاال من ورقة ماشي غير ورقة وحدة
مدام تورية : تقدري تجيبيهم ليا غدا؟
حياة : ها هما جايباهم معايا
جبداتهم و مداتهم لمدام تورية لي كانت كاتقراهم وحدة بوحدة .. من الوراق لي سينات عليهم فالمغرب حتى لهادو لي سينات عليهم هنا .. كانت واحد الحاجة حياة مارداتش ليها البال فالمغرب فاش جات تسيني ، كانت واحد الكتابة صغييرة مكتوبة على طول الورقة فالجنب ديالها مي بالعرض ...
كانت هاديك الكتابة هي لي مارداتش ليها حياة البال وديك النقطة هي منين شدها عادل و خلاها تسيني على ماتكون كاتسالو حتى حاجة
طلبات منها نسخة من دوك لوراق باش تديهم لواحد الصديق ديالها حتى هو محامي و يشوف ايلا كانت شي ثغرة منهم منين تقدر حياة تسلك راسها واخا غير شوية حيت كانت فواحد الموقف ضعيف بزاف وعندها واحد الأجل محدود ، طبعا مدام تورية ماشي كاطبع الفلوس ولا مكلخة لدرجة تسلف وحدة داك المبلغ كامل ولكن كانت باغا تعاونها باش ماتبقاش مبلوكية فبلاصتها بحال هاكا وداكشي نيت لي دارت .. تفاهمات مع حياة باش يطلاقاو لاغد ليه
° فهاد الأثناء كانت هي كاتفكر غير فالكريدي لي عليها و الاجل لي عاطيينها باش تخلص لي عليها ، ماباغاش تهرب و ترجع للمغرب ... غايتشفا فيها لي يسوا و لي مايسوا واخا تعرف تبقا غير حارݣة هنا و ماترجعش ليه و هي فهاد الحالة .. حمدات الله منين بعدا مروى بعيدة و ماغايعرفوش بخبار طلاقها و هادشي لي واقع معاها ، ماكانتش عارفة بلي عادل ضرب بيها الطررر الطرطور و هادشي لي خلا التيليفون كان كايصوني فاش كانت فالدار
الخبار وصلات لمروى و أدم و من تما وصلات الخبار لمحمد و فتيحة و خديجة و من محمد وصلات الخبار لخالد و من خالد وصلات لباه و مرت باه و خوتهم ... فمدة قصيرة التيليفون كان كايتهز و يتحط ت الهضرة دايزة على كل لسان .. حياة طلقها راجلها وماعطاها الريال لصفر ... خلاها كاتتجلوق و دور فتشاطارا ديال إسبانيا ، حياة ماكملات العام و ها هي غاترجع للمغرب مطلقة كيفما مشات كيفما جات ... حياة غاترجع لدارهم و تبقا تيتي نيني حدا مها ... حياة غاترجع و هي هازة فضهرها لقب المطلقة و غاتبدا الهضرة فالعائلة كتر من لي كانت ... صااافي ديك فريفرة الجلدة لي كانت شاداها على التسلݣيط ها هي تهنات منها و طلقات و دابا غاترجع و تولي تهزو بالعلالي
شلاا هضور تقالو فضهرها و كانو هادو غير شوية منهم مع تبارك الله عائلة باها كايمووتو عليها و النص فعائلة مها كايحماقو عليها و الجيران كايتسطاو عليها .. ما قالو فيها غير الزينة
زهور ماخلاتش من جهدها و ماخلات لمن قالتها بقا لها غير تجيب البراح تخلصو و تخليه كايدور وسط الدروبة كايبرح بحياة
كانت خديجة جالسة و كاتواسي فتيحة لي واخا كانت قاطعة مع حياة إلا و أنها كاتبقا طرف من كبدتها .. حتى ام ماكاتبغي تعرف بلي عش بنتها تفرتك و كون غير كانت فالمغرب ... كاينا فبلاد ماعندها فيها حد و ماكاتجاوب على حد فالتيليفون باش يفهمو منها شنو واقع و فينها فين غاتبات و شنو غاتاكل
فهاد الاثناء كانت زهور جالسة فوق واحد السداري فبوز الدار
زهور : وااالو يا خويتي كاع ولادك زينين الا ديك جدرة ولدتي فيها غا لخلا و جلا .. بقات طير طير تا طلقها الراجل و ها هي من هنا يومين تلقايها جاية تشد لك ركنة هنا ... شوفي مروى زينة البنات مرا وݣادة ، عرفات كي تشد عندها الراجل
خديجة : [ فقصاتها بدات كاطبطب على مامات حياة ] ماديريش فبالك ا خالتي فتيحة ماغايكون غير الخير ان شاء الله
زهور : عوجة السعد غايكون معاها شي خير؟ لا زهر لا ميمون ، ماعرفاتش تا تشد راجلها حدا جنابها [ شافت ففتيحة و نطقات ] كون غا حبستي ف3 و مازدتيهاش معدبة فحياتها و معدباك معاها
خالد : هاديك قلتها لهم نهار اللول عمرها طفرو .. منين ماطفراتوش لهيه فسپانيا غاطفرو هنا؟ حنا لي رجال بشلاغمنا و مامطفرينوش فهاد لبلاد
خديجة : ياك باقا مزال حتى ماجاوباتنا علاش كانفايلو عليها؟
زهور : و مالو كدب؟ وجهها وجه الزلط و الكحط ماوجههاش وجه الصبليون ، ماطفراتو تا هنا بقا لها غا الصبليون و الݣور .. لالقات لي يقبل عليها من دابا لفوق و هي مطلقة مابحالها ولا كان عندها شي سعد مسݣد غاتكون هازة الكرش من راجلها و تجيب ليه البز لي يصرف عليه و عليها اما تا كتافها ما كتاف الخدمة [ ناضت من بلاصتها و بقات كاتقاد ففواطتها ] ليك الله ا خويتي هادشي لي قسم ليك الله و هدا مكتوبك فهاد الدنيا
هبطات لدارها للتحت و زادت غير كملات عليهم ... عاودات طلبات فتيحة من خديجة باش تصوني على حياة و تشوفها واش كاتجاوبها و بقات كاتصوني عليها ولكن ماجاوباتهاش
الخبار زاادت تطلقات و وصلات لشخص اخر من طرف هشام لي حتى هو عرف من الجيران بلي حياة طلقات و ماعطلش بحال هاد الخبار .. دغيا وصلو ...
° كانت جالسة و باقا كاتفكر فشي حل لهاد الحريرة و كيفاش تتفك منها ... عائلتها فيها غير المزالط حتى واحد مامطفرو 1000 درهم هي اللخرة مايبغيوش يسلفوها ليها و فالأصل خايبة حتى للتعاويدة واش هي فإسبانيا و تطلب من لي فالمغرب يسلفوها؟ غاتولي ضحكة بيناتهم ، بقا لها حل واحد ختها مروى على الاقل راجلها لاباس عليه ياك صافي تصفاو الخواطر و مابقاتش هازة شي ضغينة من جهتها كي كاتقول؟ [ تنهدات ] هي من واحد الناحية المبلغ لي غاطلبو منها ماشي قليل ولكن غير تسلفو لها ، غير ماتبقاش بحال هاكا مبلوكية فبلاصتها و واخا تعرف تخدم ليل و نهار و ترجعو لها سنت بسنت
جبدات تيليفونها .. لقاتو غايتفرݣع بلي زابيل ، طلعو ليها ليزابيل ديال خديجة و عائلتها ... ماماها و خوتها و باباها و بلاتي؟ حتى مرت باها مصونية؟؟ و كانت نمرة خرا ماكاتعرفهاش
صاافي عرفات الخبار غاتكون وصلات ليهم سخونة ، صونات على مروى هي اللولة باش بعدا تحاول تحل مشكلتها عاد تصوني عليهم .. جاوباتها فالبلااصة
مروى : [ بقلق واضح فنبرتها ] ا فينك البنت؟؟ مالك ماكاتجاوبيش؟؟ مخليانا غانحماقو معاك
حياة : ماوصلك والو؟؟
مروى : مالكي نتي و عادل؟؟ كيفاه تطلقتو و نتوما مزال ماكملتو حتى العام؟؟
حياة : راكي عارفة ا مروى ماشي حنا اول وحدين غانطلقو ياما طلقو ناس قبل منا .. ماتفاهمناش و طلقنا
مروى : ماتفاهمتوش و صافي نضتو تطلقتو .. كان زوااج هداك الله يهديك ا حياة واش من اول مشكل تنوضو تطلقو؟؟ صدمتوني والله حتى صدمتوني معاكم مزال ماكملتو تا عام صحيح باش نقولو دخل معاكم زواج و مشاكلو
حياة : وا صافي ا مروى ماتزيدينيش حتى نتي واش صافي غير نتزوج بواحد خاصني نضرب معاه 10 سنين باش نتسما صبرت .. ماتفاهمناش و من اللخر صدق ولد الحرام
مروى : مالو شدار لك؟؟
حياة : قولي لي اش مادارش داك الكلب
مروى : واش غايكون دار فهاد الشهورة؟؟ ماعطيتوناش تا منين ندخلو بيناتكم و نصلحو لالقينا مانصلحو .. كلشي عندو الحل
حياة : دابا انا ماصونيتش عليك على هادشي .. صونيت حيت غرقت واحد الغرقة و مالقيتش كي ندير نوض منها ، ماعرفتش لي غايعاوني فيها و طحتي فبالي غير نتي
مروى : إيلا قدرت علاش لا راكي ختي
حياة : المهم شوفي سوا قدرتي تعاونيني سوا ماقدرتيش بغيت هادشي يبقا غير بيناتنا بلا ماتوصل الخبار لماما راكي عارفاها صحتها على قد الحال مابغيتش نكمل عليها
مروى : [ بنبرة قلق ] بديتي كاتخلعيني قولي لي واش واقع معاك
حياة : المهم محتاجة شي حاجة ديال الفلوس [ سكتات شوية و عاودات صححات ] ماشي غير شي حاجة .. خاصني نييت الفلوس ، ماشي تعطيهم لي غير تسلفيهم ليا ، غير فكيني من هاد الوحلة ا مروى راه مابقاش عندي من غيرك و ماقدرتش نطلبها من شي حد اخر .. كون ماكنتيش ختي ماكنتش غانطلبها منك
مروى : شحال خاصك؟؟
حياة : 42 الف يورو [ دوزات يدها على شعرها بعدم راحة ] انا قادرة نسيني على اي حاجة ايلا مارجعتهمش ليك دعيني عليهم
بقات مروى ساكتة شحال ... ماعرفاتش ختها فين غرقات راسها باش تحتاج 42 كاملة و مافهماتش شحال من حاجة ، فاش قالت لها تسلفها كانت كاتتوقع شي حاجة قليلة اما 42 مليون؟ على حسب المحيط لي كبرات فيه راه ماكايجمعها غير الفم ... الفلوس ديال 2 برطمات بفراشهم فالمغرب
مروى : الله يا حياة ما قلتي مليون ما قلتي 2 ... 42 مليون كااملة؟
حياة : راني عارفاك ماكاطبعيهمش و عارفة بحال هاد الفلوس ماكايتسلفوش ولكن فهميني والله و ماكنت واقفة عليها فهاد الشهر والله مانطلبها ، ماعرفتش اش ندير .. كونطي بقات ليا فيه غير 3000 يورو و هاد 3 الاف راكي عارفة يلاه تعاونني فهاد المدة على ما نرصي راسي و نضبر فشي خدمة و نقاد اموري
مروى : قولي بعدا غير علاش محتاجاها
بقات حياة كاتفكر لثواني عاد جاوباتها
حياة : خاصاني ل2 محاميين
مروى : وعلاش؟؟
حياة : نصبو عليا ا مروى .. كنت موكلة محامية باش توقف لي على طلاقي من عادل وكنت ناوية غير نشد داكشي لي غايجيني فحقي منو و نخلصها ولكن هادشي ماكملش و ماجاني والو و هي كاتتسناني نخلصها دابا و زيدي عليها محامي وحداخر خدم منو لراسو و انا ماقلتش ليه يخدم معايا و دابا راه كايتسناني حتى هو نخلصو
مروى : و مالكي عليها؟؟ اش داك لمحاميين بحال هادو؟؟ مالكي ماشديتي محامي صغير يفك لك جرتك
حياة : انا قلت غير غانشد الفلوس و غانخلصهم .. دابا راهم دايرين معاها أخر أجل اللخر ديال هاد الشهر ولا غانصدق مجرجرة فالمحاكم معاهم .. خاصني ضروري نفك حريرتي معاهم [ سكتات لثواني و عاودات نطقات ] والله ا مروى و تعاونيني فهادي عممرني نساها لك
مروى : [ بتردد ] ماعرفتش اش غانقول لك والله ... خليني نهضر مع ادم و نشوف باش غايجاوبني
حياة : شوفي راه مايجي فين يخرج العام حتى نرجعها لك واخا نعرف نتقطع عليها غانرجعها لك ولا ماكنتيش تايقة فيا نقدر نرجعها لك نسيني معاك فأي ورقة باش تضمني حقك ...
مروى : راكي عارفة كون كانت فجيبي والله تا نعاونك ولكن خاصني نهضر مع أدم و نشوف معاه
حياة : ردي عليا بلي كان باش نعرف شنو ندير ايلا ماكان والو
مروى : ماغايكون غير الخير ان شاء الله
حياة : [ بنبرة تأكيد ] شوفي هادشي يبقا بيناتنا ا مروى
مروى : كوني هانيا ولكن قولي ليا ... فين غاتباتي؟؟ فين كاينة دابا؟؟ واش فشي أوطيل؟
حياة : كارية واحد البرطمة راني فيها
مروى : وعلاش طلقتي نتي و عادل؟؟ واش وصلكم لهادشي؟؟
حياة : ماقال لكم والو؟
مروى : قال لينا طلقتو و مابقيتيش على مسؤوليتو و صافي
حياة : على ايمتا انا كنت على مسؤوليتو؟
مروى : و على بيمن كنتي مزوجة؟
حياة : صافي صافي
مروى : علاش تطلقتو؟
شنو غاتقول لها؟ غاتعاود لها القصة كاملة؟ من اللول حتى للتالي؟ من فاش تزوجو حتى لفاش طلقو؟ و كيفاش كان جايبها اصلا على اساس عبدة و كيفاش نقص منها قدام صحابو و كيفاش خلاوها كاتموت فاش مرضات و كيفاش لعب عليها هو و المحاميين و غرقها؟ وي ماسكتاتش ليه ولكن ايلا قالت لها هادشي تقدر تقولو لراجلها و راجلها شوف لكن تاني غايعاودو
حياة : لقيتو مع وحداخرا و صافي ماصبرتش
مروى : دابا هادشي كامل غير حيت لقيتيه مع مرا خرا؟؟
حياة : ا سبحان الله كيفاش غير؟؟
مروى : واش الرجال عارفاهم كايتشدو؟؟ ياك من بانا و جاب زهور على منا
حياة : ماتجبديش ليا عافاك سيرة ديك المخلوقة ... كون دارها ليا داك الأمانة كون وريتو النجوم فعز النهار اشمن الرجال ماكايتشدوش
مروى : والله تا كبرتي الموضوع على والو .. داكشي راه عادي و كايوقع ماشي نتي اول وحدة ، كان خاصك غير تصبري حيت كان غايدور تا يعيا و يرجع لك .. ياك نتي لي تزوج بيك و نتي لي دايرك فدارو ايوا اش خصك؟
حياة : مزوجة بسليمان القانوني و مافراسيش؟ باش نحس براسي عندي الزهر حيت مزوج بيا و دايرني فالدار؟ دايرني السلطانة هيام فالقصر و الباقي جواري ياك؟؟ ا لالة راه بزز عليه يشد معايا الطريق و مايخرجوش عينيه لعيالات خرين ديك الهضرة ديال يدور حتى يعيا مامسلكاش معايا [ خرجات ضحكة ديال الطنز من فمها ] وا زوينة هادي قالك اش باقي خصني
مروى : راه كانهضر معاك فالواقع ا حياة خلينا من داكشي ديال يبغيني بوحدي و غير انا لي نكون .. كاع الرجالة لي تشوفيهم كايقولو هادشي عرفيهم غير كايكدبو على عيالاتهم و على راسهم .. هادشي علاش ربي عطا 4 فالشرع للرجال حيت وحدة ماكاتقدهمش داكشي فطري عندهم
حياة : شوفي اول حاجة هاد الزواج عطاني غير صداع الراس ها العكوزة ها الزبل تاني حاجة وي كاين لي كايبغي غير وحدة و فايتة شفت شحال واحد منهم وتالت حاجة الشرع عطا 4 حيت الرجال اقل من العيالات ماشي حيت الرجال ماقادرينش يشدو عينيهم عندهم ... باراكا ماتبقاو تغطيو عليهم بمايقدوش يشدو عينيهم ولا ماكاتقدهمش مرا وحدة .. لي باغي شي وحدة راه كايبقا معاها غير هي ، علاش العيالات قادرين يشدو راسهم ها؟؟ علاش حتى هما مايقولوش لا ماقادرينش و ماقادناش غير واحد
مروى : العيالات ماشي هما الرجال ا حياة
حياة : شوفي شوفي شوفي الله ينورك خلي دوك الافكار ديالك عندك راكي عارفة انا وياك ماكانتفاهموش فهاد المواضيع ديال الزواج و الضرات ... منين نتي متقبلة الضرة تجيك رجعي للمغرب و قولي لأدم يعزل و يتخير
مروى : راني غير كانهضر معاك علاش دابا كاتتعصبي عليا؟ كانهضر غير على مصلحتك
حياة : ماكانتعصبش ولكن انا اصلا ماشي هي هاديك و زدتي نتي كاتقولي لي ايلا شي وحدة طلقات حيت لقات راجلها مع وحداخرا كاتكون غير زادت فيه ... و نتي عارفة الراجل ايلا لقاها هي مع وحداخر غايخرجها منها .. علاش؟ حيت هو كايدير داكشي لي كايشوفو غايبرد ليه ديك الشمتة لي شمتاتو و حيت الرجال بيناتهم متافقين بلي المرا ايلا غدرات كاتكون قاستهم فرجولتهم ... ايوا و علاش حنا البنات و النسا بيناتنا كانشوفو الراجل ايلا خان خاص نصبرو؟ خاص نسامحو؟ خاص نزيييدو نتزوقو لهم و نبدلو اللوك باش نعجبوهم و مايبقاوش عينيهم فالتين ... قلبي هاد الموضوع الله يرحم الواليدين غير كاينرفزني
مروى : وا شنو غانقول لك هاد العقلية عمرها تسلكك
حياة : غا خليها ا لالة عاجباني و مسلكاني .. المهم شوفي هانا غانقطع معاك راه ماما كاتصوني عليا خليني نجاوبها
مروى : واخا و المهم باش ما جاوبني ادم غانرد عليك [ سكتات شوية و عاودات نطقات ] ماديريش فبالك ايلا مابغاش غانشوف لك شي حل
حياة : عممرني ننساها لك والله
قطعات معاها و عاودات صونات على ماماها لي كانت كاتصوني عليها .. غير جاوبات و هي تسمع صوت محمد كانت كاتتسنا مها لي تجاوبها
محمد : حياة؟
حياة : وي محمد
محمد : مالك ماكاتجاوبيش؟
حياة : غير كنت مشغولة شوية و صافي
محمد : الناس كايهزو التيليفون كايجاوبو .. ماكايخليوش كلشي مشطون عليهم
حياة : راه كنت مشغولة ا محمد
محمد : شنو وقع بينك و بين راجلك؟
حياة : طليقي ا محمد .. مابقا جامعني بيه والو
محمد : علاش طلقتو؟ علاش مافخباري والو؟
حياة : ياك نتا لي قلتي ديك المرة مابقيتيش باغي تعرف عليا شي حاجة؟ ياك قلتي ننساكم؟ ...
وي باقي مانسا داكشي لي دارت ختو و مزال ماتفك داك المشكل ولكن فالأول و الأخير كاتبقا ختو .. واخا يغضب عليها عقود من الزمن و مايدويش معاها و يقطع معاها الهضرة ولكن مايمكنش يعرفها كاتجرجر فبلاد ماعندها فيها حد و تجيه عادية و يقول تضبر راسها .. سوا هي سوا مروى
محمد : درتيها يزلق فيها جمل وكاتسناينا نفرحو لك؟ [ مابغاش يجبد داك الموضوع تاني ] فينك دابا؟ فين جالسة؟
حياة : كارية واحد الپرطمة
محمد : واش عندك باش تخلصي هاد الشهر؟
حياة : وي راني خلصتو و ساليت
محمد : عندك باش تصرفي؟
حياة : عندي ا خويا محمد غير بلا ماتشوشو عليا .. ماعرفتش اش قال لكم عادل ولكن غير تهناو من جهتي راني بيخير و على خير
محمد : منين جاوك الفلوس؟
حياة : كنت موفرة شي حاجة فالكونط هما لي غانديپاني بيهم هاد الأيام و راه غانقلب على خدمة
محمد : وراقك مزال مامريݣلاهم فاش غاتخدمي فالنوار؟
حياة : ماشي لديك الدرجة راني ماشي هنا حارݣة و حالتي مامعقداش لديك الدرجة ... خاصني غير نتحرك و مانبقاش جالسة و صافي
محمد : وشنو وقع بينك و بين راجلك؟ علاش وصلتو للطلاق؟ دار لك شي حاجة؟
حياة : غير ماتفاهمناش و صافي راه ماكايناش شي حاجة لي تتشوشو عليها غير الموضوع كبر على والو
ماقنعاتهاش هضرتو ... حيت الهضرة لي قالت لهم مروى فاش وصلها الخبار هي و راجلها ، ماكانتش هضرة كاتفرح .. ماكرهش يقول لها ترجع بحالها على الاقل فتيحة غاتبقا مهنية من جهتها و على الاقل ماغاتبقاش تما كاتتجلوق ولكن داكشي لي دارتو فالمغرب حتى هو ماكانش كايفرح و فاش غايجيب وفاء للدار مايمكنش يخليها تتجمع هي و حياة فالدار واصلا هادشي علاياش تفاهم هو و الحاج دريس اما الهضرة لي ضارت بينو و بين داوود كان خاص غير دمعة ، دمعة وحدة من وفاء ولا غير تتشكا حيت سمعات شي هضرة ماعجباتهاش .. و كان غايشوف اللخر معاه
على أي حال ... كان مشوش عليها و هي تما بوحدها ولكن فنفس الوقت ماكانش باغيها تجي للمغرب يمكن كانت هاديك هي الضريبة لي غاتخلص على داكشي لي دارت و يمكن كان غير جزء منها
محمد : وغير ماتفاهمتوش و نضتو تتطلقو؟
حياة : هادشي لي عطا الله معاه ماكتابش نطولو [ سكتات لثواني كانت مترددة ] واش ماما حداك؟
محمد : عيانة هاد نهار .. راها كاترتاح
حياة : [ ماتيقاتش هضرتو ] واخا ... المهم سلم على ماما و قول لها بلا ماتشوش عليا حيت ماكاينش علاش
محمد : دابا نوصل لها سلامك ... المهم حضي راسك و ماتيقيش فلي كان ديك البلاد ماشي بحال هنا
حياة : عارفة لي كاين ا خويا محمد
محمد : خليتك فراحة الله .. ردي البال لراسك
قطع معاها و فهاد الاثناء صونات على خديجة و هاد المرة عاودات لها القصة كاملة بلا ماتنقص بلا ماتزيد ... و حتى خديجة عاودات ليها على الاحوال ديال عائلتها و الطرر لي ضرباتو لها زهور وسط الجيران و الهضرة لي كانت كاتسمم بيها فتيحة
بقات كاتهضر معاها شحاال حتى عيات ... قطعات معاها و ناضت نعسات اما حتى الشهية للماكلة كانت عندها مسدودة
صبح الصباح ودارت روتينها الصباحي كالعادة و جلسات كاتقلب على الخدامي لي قراب ليها ولي يسلكوها و تقدر عليهم .. حتى يدها لي مهرسة ماكانتش مساعداها و هادشي لي خلا باش تلقا خدمة صعيب عليها حيت الدقة جاية فاليد ليمنية و ماغاتجي فين تبرا حتى يكونو غرقوها و سالاو
صونات عليها مدام تورية و دارت معاها باش تمشي لعندها لداك العنوان لي كاين فكارط فيزيت ديالها و داكشي لي دارت ... شدات الطريق لعندها لقاتها كاتتسناها سلمات عليها و جلسات كاتتسناها تقول ليها بلي لقاو شي ثغرة منين يدوزو لدوك المحاميين ولكن من زهرها المكوز الثغرة لي لقاو فيها الطلوع و الهبوط و خسران الفلوس وشوف تشوف واش غاتقدر تتفك عادي ولا غاتكون غير خاسرة فلوسها ومعدبة على والو حيت السيدة كانت غير كاتسيني ولي قالوه لها كاديرو ... يعني و بإختصار كان خاصها تختار وحدة من 3 يا تزيد تخسر الفلوس و تبقا طالعة هابطة و شوف تشوف واش غاتسلك منها يعني يقدر تزيد تخسر الفلوس على والو ... يا تخلص وتخرج من باب واسع ... يا تكحل ضواصاها ويجرجروها
حياة : [ شافت فمدام تورية ] ولكن دابا انا اش غاندير؟ ماعنديش الحق نشد كريدي من البنك و ماعنديش من عندمن نتسلف .. هضرت مع ختي ولكن مامتأكداش واش غاتقدر تعاونني
مدام تورية : [ شافت فالمكانة فيديها ] عندي واحد الرونديڤو من دابا واحد الساعة .. غير توصل العشية و نمشيو انا وياك لعندهم .. نقدرو نوصلو لشي حل معاهم
حياة : مانقدرش زعما نمشي لشي بلاد خرا من غير المغرب؟
مدام تورية : باغا تهربي؟
حياة : ماشي نهرب ولكن على الاقل غايكون عندي الوقت باش نجمع الفلوس و ديك الساعة نخلص المحامية اما حتى داك الكلب انا ماشكيتش عليه يخدم معايا هو لي خدم منو لراسو
مدام تورية : ماشي فصالحك ديريها ا بنتي ..
تناقشات معاها و طرحات عليها بعض الحلول لي يقدرو ينفعوها ولكن ماكان حتى واحد فيهم مسلك حياة
خرجات من عندها من مور ماتفاهمات معاها على يمشيو لعند دوك المحاميين فاش تسالي و داكشي نيت لي دارت ... غير سالات شغالها و مشاو لعندهم ولكن ديك المشية غير مازادت تفقصات فيها و كان المحامي كايستفزها بلعاني و يلعب لها بأعصابها
خرجات من تما و هي طالع لها الدم و موراها رجعات للدار من مور ماعطاتها مدام تورية الكلمة بلي غاتعاونها باش ما قدات
ماطالش حالها بديك الحالة بزاف خصوصا منين صونات عليها ختها لي صافي حتى قالت موحال واش باقي غاتصوني عليها ولا ترد عليها
حياة : ها العار ما قولي لي شي حاجة كاتفرح ا مروى ... راني راجعة من عند داك الويل ديال المحامي و انا كانترعد
مروى : غير رتاحي .. جايبة لك خبار كاتفرح [ صونات عليها ابيل فيديو ]
حياة : غير خلي الابيل فيديو حتى لمن بعد والله مافيا و وجهي اصلا بحال الموتى هاد الساعة
مروى : ماشي مشكل ... المهم راني من البارح و انا كانهضر مع راجلي عليك و مابغاش يخصر ليا خاطري ، لهلا يخطيه عليا و خلاص [ شافت فيه حيت كان حداها ] .. المهم راه قابل يعاونك ولكن بشرط
حسات بقلبها تفاااجا و داك الضيق لي كانت كاتحس بيه هاد الايام بدا كايترخف .. احسن خبار سمعاتو هاد النهار هو هدا ولكن بقات فداك الشرط شنو هو
حياة : اشمن شرط؟
مروى : ها هو حدايا عايني ندوزو لك [ شافت فيه باش يهضر ]
أدم : لاباس عليك ا حياة؟
حياة : وي ادم الحمد الله ربي يخليك و نتا؟
أدم : بيخير .. سمعت وليتي كاتعرفي تهضري و تفهمي بالاسبانية .. تبارك الله عقلك خفيف
حياة : كنت كانتعكل غير فالنطق ديالها و صافي ، راها ماصعيباش بزاف
أدم : المهم مروى عاودات لي مشكلتك و فهمت لي كاين من عند عادل
حياة : وي راه صاحبك ايلا ماعاود لك نتا اللول لمن غايعاود ولكن كاتبقا فشنو عاود و شنو خلا و ماعاودوش
أدم : داكشي لي كان بيناتكم فات ، دابا خلينا فهادشي لي واقع لك .. نتي ماشي شي وحدة برانية راكي خت مراتي و من العائلة .. غانعاونك و نسلفك الفلوس لي محتاجة ولكن باغي يكون كلشي بالوراق باش نتفاداو توقع شي حاجة ماباغيينهاش
حياة : ماعنديش مشكل نهائيا .. قلتها لمروى الباارح ، كلشي يكون قانوني ولا مارديتش لك فلوسك خلي ديك الساعة القانون يدير خدمتو معايا .. لي باغا غير عطيني وقت يكون كافي باش نرجع لك فلوسك حيت هادو مزيرين عليا مامخليينش ليا فين نضبر و كون ماكان هاكا والله مانطلب منكم شي حاجة ولكن ماشي لخاطري
أدم : غانعطيك عامين .. كافيينك؟
حياة : وي كافييني
أدم : متيقنة كافيينك؟؟
حياة : وي متأكدة قادرة عليها
أدم : راكي عارفة القانون مامعاهش اللعب
حياة : راه عامين ماشي هي شهر .. كون بغاو دوك الكمامر يصبرو معايا عامين كون عطيتهم زبلهم
أدم : غانشوف السيمانة الجاية نجي لعندك انا و مروى و نقادو معاك أمورك
حياة : [ بإمتنان ] والله ماننسا لك هاد التعامل لي درتي معايا نتا و مروى
أدم : ماشي مشكل مابيناتناش هاني غاندوز لك ختك
عطا التيليفون لمروى و كملات معاها الهضرة ... كانت حياة حاسة بواحد الراحة ماكاتتوصفش ، غير قطعات معاها صونات على مدام تورية كاتبشرها بهاد الخبار .. دابا عااد تحلات لها الشهية و بدا يرجع اللون لوجهها
دوزات الباقي من داك النهار غير فالدار حالة البيسي و كاطلق يديها فرسمة جديدة .. سالات و تعشات و نعسات و غير صبح الصباح بدا التيليفون كايصوني عليها طلعات لها النمرة ديال زهور و ماعرفاتش مال هاد خيتي كاتصوني عليها تاني ... قطعات عليها و عااودات صونات عليها و عاودات قطعات عليها و عاودات صونات عليها حتى طلعات لها الخزز للراس
حياة : ياك لاباس؟ واش بايتة كاتحلمي بيا؟
زهور : والو باس ا حبيبتي ايوا مبرووك مبرووك
حياة : الله يبارك فيك .. عاد وصلك خبار الطلاق؟
زهور : تا حاجة ماكاتتخبا كانهضر لك على المنايل لي غاتشديهم من ختك .. ايوا شتي ا بنت فتيحة ختك لي خرجتي معاها العيب و بغيتي تشتتي لها عشها ها هي كاتعاونك
حياة : غاتجبديها ليا من جيبك؟ واش ماناوياش دخلي سوق راسك؟؟
زهور : وعلاش هادشي فيه السوق؟ قلت لك غا الحق وماخرجات من فمي كلمة العيب .. مروى الله يرضي عليها قلبها كبير وكاتعاون لي يستاهل و لي مايستاهل وربي طيحها فراجل كايدير لها كي الما القليل .. تا حد ماكايلقا لي يخلص عليه تا منيول ونتي لاقية لي يخلص عليك 42 منيول
حياة : قلتها لك و ديما كانقولها لك و غانعاود نقولها لك ... داكشي لي بيني و بين ختي بقاي تخرجي سوقو راه فيا مانرجع و نحرر عليك عيشتك وماندير لا بوجه مي لا بوجه با
زهور : علاش شكاتعرفي ديري من غير هادشي؟ ها نتي الراجل على مزيناتو طيرتيه تا هرب و مابقا شاف من موراه .. عاضرااااه ، من نهار تزوج بيك و انا نخمم ليه مسكين فين غاتتلا بيه ليام و هو واخد كلبة مصعورة
حياة : عضيتك وبقا فيك الحال؟ ماعندك شغل هاد الصباح ياك؟ داكشي علاش بنت لك فالبلان و جاية تتعاطاي معايا ...
زهور : لوكان لسانك و ردان الهضرة و الطيران لي فيك ينفعك ݣاع مايطلقك الراجل بلا ريال بلا جوج ويخليك تتجلوقي فالصبليون لا ورقة لا 2 غارقة كريديات ، الناس كايمشيو للصبليون يجيبو الفلوس ونتي غاتدخلي للبنيقة تاعهم .. ماطفرتيه تا فالمغرب بقا لك غا الخاريج ، غاطفريه فيه بالجفاف على ݣلبك
حياة : نضرب الجفاف ولا الكراطة و نتي اش مشا لك؟
زهور : خنشوشتك غا خنشوشة الجفاف شوفي لالاك لي كاتعرف للخاريج حاكمة راجلها فقرعة و سادة عليه وشادة تيقارها .. كلمة العيب ماتسمعيهاش من فمها .. لسانها يقطر غا العسل و كاتسمع للهضرة ، عارفة شكادير شتيها فاين وصلات؟ ها هي فدار زمانها معززة مكرمة عايشة فالعز و يدير لها كي الما القليل لي حلات عليها فمها يجيبها لها لحدا رجليها
حياة : ساليتي؟
زهور : ماساليتشاي .. ياك كنتي غاتحرمي عليها رزقها هي و زمانها شتيها كي دارت بوجه مك .. ماكاتعرف حسد ما قلبها كحل ها هي دابا غاتخلص عليك لكريديات لي عليك الناس كايشدو استاد نتي بغيتي ديري جناااوح 2 .. ايوا دابا ماين تخلص عليك نكري خيرها يا نكارة الخير و قولي عليها مامزياناش .. كون ما هي كون راك غاتموتي فلبنايق
حياة : و شكون قالك مروى غاتعطيني؟ هداك سلف و غانرجعو لها و كي قلت داكشي بيني و بين ختي و ماكايدخل بين الضفر و اللحم غير لوسخ .. سيري قابلي راجلك و ولادك و فوتي عليك سوقي راني مانليقش ليك ا زهور
زهور : ياودي يا بنيتي طيري تا طيري تاليتك ترجعي للمغرب و تضربي الجفاف على لالياتك لعيالات
حياة : واخا .. بقاي كاتتسناي داك النهار
قطعات عليها و اول حاجة دارتها هي صونات على مروى على هادشي لي دارت واش هي كاتغطي و بنادم كايعري؟ حالفين حتى يعرف كلشي هاد المصائب ديالها ، مع جاوباتها مع دخلات فالموضوع
حياة : علاش قلتيها لزهور؟ واش ماخفتيش تقولها لماما؟ واش انا كانغطي و نتي كاتعري؟ ياك قلت لك خلي داكشي بيناتنا؟؟
مروى : [ كان باين فيها عاد فاقت من النعاس ] صباح الخير [ كاتتفوه ] وا راه عادي .. هاد الخبار كانت غاتوصل لهم غاتوصل لهم
حياة : من عندمن غاتوصل و هي بيناتنا غير حنا؟ .. كان ضروري تقوليها لها؟ نتي عارفاها ماكاتحملنيش وغاتزيد تتشفا فيا .. اش فيها ايلا خليتي هادشي بيناتنا
مروى : عادي تا نتي راه غي انا لي عاونتك ماشي شي حد براني و تا لاهضرات فيك ماغاتقولش براني لي عطاك الفلوس .. مافيها تا حاجة لاقالت ختها عطاتها وزايدون نتي عارفة زهور ماكانخبي عليها والو راها بحال مي
حياة : وا ما مكش هاديك ... مك هي لي ولداتك و ضربات ليك الكرفي منين جاتها مك منين؟؟ واش نتي لي شفتيها تقولي لها مي؟؟ بزاف عليها تا تكون فبلاصة منا
مروى : دابا واش بقا فيك لحال لاش قلتها لها؟
حياة : ماتقوليش ليها ا ختي ياك انا جيت هضرت معاك نتي ... علاش تقوليها ليها و تجي تصبح عليا بهاد الهضرة .. كون بغيتها تعرف غانصوني ليها ديريكت ولا كاع ندير لايف و تعرف
مروى : دابا علاش كاتتعصبي عليا؟؟ انا مادرت تا حاجة خايبة نيتي كانت صافية و ماقصدت فيها والو
حياة : عرفتي شنو صافي صافي .. رجعي كملي نعاسك غانمشي نقضي حاجة لراسي
قطعات معاها و ناضت كاتوجد راسها باش تمشي تشوف واحد الجمعية كاتدعم اللاجئين و المهاجرين ... ماكانتش باغا تزيد تضيع الوقت ، كانت باغا تعرف كاع الجمعيات لي يقدرو يعاونوها والأهم كان خاصها تقلب على شي جمعية تقدر تعطيها مأوى باش تحيد من الكرا و هاكا غاتبقا توفر فلوس الكرا فاش تلقا خدمة باش تقدر ترجع الفلوس لأدم فالوقت
بقات كادور من عنوان لعنوان و اي جمعية لقاتها فديك المدينة مشات ليها كاتسول و تزيد تعرف اي حاجة ماكاتعرفهاش ... مارجعات للدار حتى ضارت عليهم وحدة بوحدة
بدات كاتوجد الماكلة لراسها و فنفس الوقت كانت كاتقلب على شي خدمة تديپاني بيها فهاد المدة لي غاتكون يديها مهرسة فيها ، واخا مايكونش شي خلاص كبير مي على الاقل شي حاجة لي غاتخليها يكون عندها واحد المدخول و داك المدخول تخلص بيه ماكلتها و شرابها بلا ماتقيس الفلوس لي عندها فالكونط ... بقات على داك الحال حتى صونا لها التيليفون ، كانت هاد المرة نمرة باها
عبد الرحمان : واش ا مسخوطة الواليييدين ختك غاتحط عليك زبااابل دالفلوس ونتي سايرة تغوتي عليها؟؟ واش ماتكسابيش الكمارة لي تحشمي عليها؟؟؟؟؟
حياة : ايمتا غوت عليها؟
عبد الرحمان : سايرة تحرشي فيها على مرت باها؟؟؟
حياة : ماحرشتهاش عليها انا قلت لها هاديك ماشي بحال مها و قلت غير الحق وحاجة بيني و بينها علاش تخرجها لبرا؟؟
عبد الرحمان : غادير فيك خير يا بنت الحرام و ماتخليناش تابعيينك فلحباساات و باقا كاتغوتي عليها وتقطعي لها فوجهها؟؟؟ مابغيتيش تي تحشمي ياك؟ كون ما ختك الله يفرشها بالرضا و يغطيها بالرضا فين كانت غاتتلا بيك؟؟؟ ا دوي يا تريكة الناقصة .. حرااام واش يݣر فيك الخير
زهور : [ كانت جالسة حدا عبد الرحمان ] مروى مسكينة ماعندها زهر خبزها ذكر لي كلاه كاينكر .. تعيا مادير لمزية فختها و شوف باش كاتجازيها
حياة : ا سيدي انا مابقيت باغا واالو فرعتو ليا راسي بهاد الهضرة ... خير خير خير ، مابقيت باغا والو لا منها لا من راجلها ... حرااام واش نشد من عندهم شي ريال اللهم الحبس والا نبقا نسمع هاد الهضرة حياتي كاملة ...
قطعات عليهم و صونات على مروى .. بقات كاتتسناها تجاوبها ولكن ماجاوباتهاش حيت كانت مشغولة اما حياة كان كايسحابلها بلعاني مابغاتش تجاوبها
دخلات للواتس اب و سيفطات لها أوديو
حياة : شوفي ا ختي غير هضري مع راجلك شدو فلوسكم عندكم ماتعطيوني مانعطيكم والمرة الجاية ايلا كنتي باغا تعاوني شي حد ماتمشيش تضربي بيه الطر عند لي يسوا و لي مايسواش هدا ماكايبقاش خير و نتي عارفة مزيان فلوسكم كنت غانرجعها لكم واخا ندير لي ماكايدارش ماكنتش غانخليها صدقة فيا راني ماشي طلابة .. هادشي غير مزال ماشديت فلوسكم فيدي اما كون شديتهم كون دوزتوني فدوزيم راه باين العربون من دابا شنو كنت غانسمع من هنا للقدام ... ايلا غير غاتبداي تمني عليا بناقص
سيفطاتو لها ولاحت التيليفون فوق الكنبية ... حطات راسها على الطبلة وهي كاتفكر فكيفاش غاتخرج راسها .. ضاقت بيها الدنيا و ندمات كاع لاش فكرات تطلب من ختها تعاونها واخا ماكانتش غاتصدق عليها و كانت ناوية ترجع لهم فلوسهم بالفائدة باش هاكا مايبدا يتجمل عليها حد ولكن هادشي كان يليق مع الناس الطبيعيين ماشي بنادم لي باغي غير منين يدوز لك و غير شنو يشد عليك ... بدا كايصوني عليها التيليفون و ماتسوقاتش ليه كانت غارقة غير مع راسها كيفاش غاتحل حريرتها .. برزطها التيليفون بالمصونيات طلات على شكون كايصوني لقاتها مروى .. مابغاتش تجاوبها
مشات لبلاصتها باش تنعس او بالاحرى باش تحاول تنعس .. ماداهاش النعاس ديك الليلة ، الليل كامل و عقلها كايفصل و يخيط و كايشوف شي مخرج تخرج منو .. عقلها ماكانش كايفكر هاد المرة فكيفاش تردها لعادل قد ما كان كايفكر فكيفاش تخرج من هاد الوحلة لي راها فيها .. الطاقة اصلا باش تفكر فعادل ماكانتش عندها ، وي ضروري ماغاترد ليه دقتو حيت صرف بنادم مايمكنش يبقا عندها ودقتو كان غايشدها غايشدها قد ماتعطلات واخا يدوزو عقود من الزمن ولكن قبل من هادشي خاصها تفك حريرتها و ماتحاولش تنهك عقلها فشي حاجة ماغاتفيدهاش دابا
دابا عندها حوايج أهم ... العديان لي جالسين كايشمتو فيها و كايتسناوها ترجع للمغرب تضرب جفاف كي قالو .. و الاهم هاد المحاميين لي خارجين لها من الجنب و رابطين لها يديها
ما نعسات حتى وصلات 6 ديال الصباح بكثرة التفكير و ما فاقت غير على الصونيط ديال التيليفون ، هاد ليامات ولاو ليزابيل على الجهد
شافت شحال الساعة لقاتها 9 .. طلعات لها نفس النمرة الغريبة لي ماكانتش مقيداها عندها كانت كاتبدا ب 0039 توقعات يكون أدم يقدر يكون بدل نمرتو ولا شي حاجة حيت فإيطاليا كانت كاتعرف غير ختها و راجل ختها .. اكسيبطات ديك المكالمة و جاوبات ، كان صوتها باقي باين فيه النعاس
حياة : وي؟
_ [ بصوت رجولي ] لي كايكون عليه الدين ماكايديهش النعاس
حياة : أدم؟
_ ماشي أدم
حياة : [ ناضت وجلسات فبلاصتها ] واش خباري دازت فالتلفازة و مافخباريش؟؟ و مغربي من الفوق
_ كاتهضري بزاف وهاد الهضرة ديال الخاوي ماغاتخلصش المحامي
حياة : هاد الهضرة كون ماكنتيش باغي تسمعها ماغاتصونيش ، شكون معايا؟
_ أصيل
حياة : متشرفين و علاش مصوني عليا؟ فين كاتعرفني اصلا؟
كان باين بلي غير كاتتبهلل حيت مايمكنش الانسان ينسا شي حد بهاد الزربة و عاد هي ماشايفاهش مرة وحدة واخا كانو لقائاتهم قليلة مي على حسب المواقف لي كانو كايتحطو فيهم ماكانش ساهل تنساه بهاد الزربة
أصيل : السبت غانجي على شي خدمة فإسپانيا ، غاندير معاك الوقت فاش نسالي ونمشيو نحلو المشكل لي عندك
حياة : أولا انا ماشكيتش على ادم يقلب على لي يعاونني ثانيا انا مامحتاجاكش تعاونني و ثالثا شكون قالك انا السبت غانكون مسالية؟ فصلتي و خيطتي مع راسك و ختاريتي تجي و ختاريتي النهار و باغي تختار الوقت من مور ماتسالي و انا غانتسناك حتى تقولها لي و نطلاقاك شكون قالك انا اصلا غانقبل نطلاقاك؟ و رابعا..
أصيل : [ قاطعها ] ماعندكش شي حل ، ماتقصحيش راسك
حياة : [ خرجات ضحكة استهزاء خفيفة من فمها ] و يكون عندي ولا مايكونش و نتا مالك؟ إيلا قصحت راسي و جبتها فراسي .. غانجيبها فيه ماشي فيك و شكرا ، قادة بمشاكلي .. و قول لداك صاحبك مايبقاش يفرق نمرتي على صحابو باش مانخرجش معاه للعيب ... نهارك مبروك [ قطعات عليه ]
كان عارفها طايشة وديك قصوحية الراس ديالها ما غير غاتغرق لها الشقف ... كايشوفها غير غادا و ماراداش البال للحبس لي كايتسناها فأخر الطريق اما هي فهاد الأثناء كانت ناضت من بلاصتها و هي طالع لها الدم ... تاني مرة غاتتعطا نمرتها لواحد من صحاب ادم اللول منهم ها فين وصلها و التاني مانعرفت فين باغي يوصلها ... ولكن الحاجة لي امبوستاحيل تتحيد من راسها هي تشد منو شي ريال ولا من شي قندوح يبقا كايتجمل عليها من بعد .. ختها لي من لحمها و دمها و مشات ضربات بيها الطر؟ و كانت كاتمهد الطريق باش تولي تمن عليها هي و العائلة من هنا حتى لمانعرفت فوقاش ... فما بالك بالبراني ايلا كان غايعاونها؟ و هدا ماشي أي براني ... لا هدا لي ديجا هانها على سلسلة
هادي مشكلتها و باش تتفك منها بلا مايبقا يمن عليها بنادم غايخصها تحلها راسها ولكن كيفاش؟ و هي ماعندها حتى الربع من داكشي لي خاصها تخلص؟ ... دخلات تدوش و عقلها غير كايفكر ، مادازش بزاف ديال الوقت حتى تفكرات واحد الحاجة مهمة غفلات عليها بل نساااتها كاع ...
لوات على راسها فوطة و خرجات بالزربة كاتقلب فشي وراق كانو عندها .. جبدات واحد الكلاسور كانت جامعة فيه كاع الوراق لي كانت كاتسيني عليهم و كايسيني عليهم عادل من فاش بدات مع دوك المحاميين هي عاقلة مزياان على واحد الحاجة داك المحامي هي ماوكلاتوش ، فين الوثيقة لي كاتدل بلي هي وكلاتو؟؟ ماسيناتش على شي وكالة معاه شنو واش وكل راسو براسو؟؟ الحماق هو هدا على هاد الحساب أي محامي يقدر يجي و يقول لها خدمت معاك و كانتسالك القد و القد
جلسات فوق الكرسي وبدات كاترجع السينتة اللور وكاتحاول تعقل واش سينات على شي وكالة معاه حيت فديك الوقت عطاوها تسيني على شحال من حاجة و كترو عليها الوراق .. كان عندها شك واش يكونو دوزو لها شي ورقة تسني عليها بلا ماتحس؟؟ فهاد الأثناء صونات عليها حتى مدام تورية
حياة : صباح الخير مدام تورية
مدام تورية : صباح النور .. كي صبحتي؟
حياة : الحمد الله و نتي؟
مدام تورية : لاباس ا بنتي .. صونيت عليك فهاد الصباح غير باش نقولك شي حاجة ، عاود صونا عليا المحامي و سولني على شي حاجة
حياة : [ بإهتمام ] اشمن حاجة سولك عليها؟؟
مدام تورية : قلتي لينا عطيتي للمحامية شي دفعة ياك؟
حياة : وي راه كنت عطيتها تسبيق
مدام تورية : ايلا قدرتي تكوني عندي من هنا واحد الساعة .. اجي باش نلاقيك بداك المحامي
حياة : صافي هانا غانكون عندك تما من هنا ساعة
قطعو المكالمة و ناضت كاتوجد راسها ... كان شحال من سؤال طايح فبالها و شحال من حاجة عندها فيها شك و شحال من حاجة مامفهوماش ليها .. الاتصال ديال مدام تورية جا فوقتو حيت كانت محتاجة شي واحد لي عارف فالقانون باش تسولو
لبسات حوايجها و تأنقات كعادتها و هزات داك الكلاسور كاامل و مشات قاصدة مدام تورية غير دخلات و قبل ماتقول لا سلام لا كلام حطاتو لها فوق البيرو
مدام تورية : مرحبا [ شافت فداك الكلاسور ] ديالاش هاد الوراق كاملين؟
حياة : [ شافت فيها وهي مبتاسمة ] هادو الوراق لي عطاوني و لي سينيت عليهم ولي سينا عليهم حتى داك القرمود من فاش بديت مع دوك المحاميين ديال الويل
مدام تورية : القرمود؟
حياة : طليقي ا مدام تورية
مدام تورية : [ عاودات شافت فالوراق و بدات كاتقلب فيهم ] و علاش ماجبتيش هاد الوراق كاملين داك النهار؟
حياة : دابا ا مدام تورية سوليني اش لقيت ناقص هنا
مدام تورية : [ شافت فيها بإهتمام ] شنو لي ناقصك هنا؟
حياة : الوكالة مع داك المحامي اللول ماكايناش هنا [ تلاحت فوق الكرسي و حطات رجل على رجل و نطقات ] ايلا كنت عاطياه قضيتي مع طلاقي فين الوكالة؟؟
مدام تورية : [ بتساؤل ] علاش واش مسنيتي معاه على تا ورقة؟
حياة : سنيت على بزااف ديال الوراق راهم كلهم تما ولكن الوكالة معاه راني عاقلة مزيان ماسنيتش معاه فيها حيت كي قلت لك انا اصلا عطيت التسبيق غير للمحامية .. واش كاين شي محامي كايخدم بلا تسبيق؟؟
سمعو الدقان فالباب و دخل من الباب واحد الراجل يكون اربعيني كان هداك هو المحامي لي قالت لها مدام تورية عليه ... دخل سلم عليهم
[ الحوار بالإسبانية ]
مدام تورية : اسيانو لقيتينا بدينا الهضرة قبل ماتجي
اسيانو : ماشي مشكل .. نكمل معاكم
مدام تورية : [ شافت فحياة ] كملي داكشي لي كنتي كاتقولي ليا
حياة : لي قلت لك ا مدام تورية راني هنا كانتعرض لعملية نصب ... ماكاينا حتى شي وثيقة موثقة كاتدل بلي انا وكلتو .. السيد باغي ياكلني ف21 الف يورو غير هكاك
مدام تورية : واش متأكدة؟؟
حياة : وي متأكدة 100٪ حيت أي ورقة كنت كانسيني عليها كنت يا كانشد الاصلية يا فوطوكوبي ديالها و هنا مالقيت حتى شي وكالة سينيت عليها مع داك المحامي و زيدي عليها انا ماعطيتوش نهائيا الملف ديال قضيتي
مدام تورية : و علاش هادشي ماقلتيهش فاللول؟
حياة : حيت كي قلت لك كانو كايعطيوني نسيني على بزاف ديال الوراق ولكن اليوم فاش رجعت السينتة اللور تفكرت بلي المحامية ديجا عاطياها تسبيق ولكن المحامي ماعاطياهش و هادشي لي خلاني نعاود نقلب على واش سينيت معاه على شي حاجة
مدام تورية : [ شافت فأسيانو ] هادو الوراق لي جابت ليا هاد النهار عاود تحقق منهم تقدر تلقا شي حاجة مالقيتيهاش فالوراق اللولين
جلس المحامي كايقلب فدوك الوراق و كايتحقق منهم ورقة بورقة .. اغلب الوراق كانو بدون فائدة حاليا و ماعندهم فاش ينفعوهم ولكن كانو ناقصين شي وراق مهمين هنا ، شاف فحياة وسولها بالاسبانية
أسيانو : فاش بغيتي تعطي التسبيق للمحامية لي وكلتيها واش وثقتي معاها؟
حياة : وي وثقت معاها
أسيانو : فين الوثيقة؟
حياة : راها تما غاتلقا فوطوكوبي ديالها
أسيانو : و تفاهمتي معاها على قيمة الأتعاب ديالها؟
حياة : لا ماتفاهمناش و حتى هي ماقالتش ليا
أسيانو : [ عاود سولها ] ماتافقتيش معاها قبل ماتبدا الخدمة معاك على شي نسبة غاتعطيها لها فاش تشدي حقك من املاك الطليق ديالك؟
حياة : لا ماتفاهمناش حيت فاش مشيت هضرت معاها بدات معايا ديريكت عطاتني ورقة نعطيها ليه يسيني عليها حتى قبل مانوكلها ... حتى طلقت و ساليت عاد صدماتني بقيمة الاتعاب ديالها
أسيانو : و وقعتي على ديك الوثيقة بلي غاتخلصيها؟
حياة : وي وقعت [ تأفأفات و الفقصة شاداها ] حيت كان فبالي غايكون عندي منين نخلصها ...
أسيانو : [ حط الوراق و شبك يدو و شاف فيها ] الهضرة لي كنت قلت لتورية غانعاود نقولها لك .. أتعاب المحامية غايبقاو تابعينك ولا ماخلصيتهمش فشهر غايعاقبك القانون فاش غاتسالي العقوبة ديالك غايرجعوك لبلادك .. هادشي ماغايتبدلش ولكن الحاجة لي تبدلات ا انسة هي التعامل ديال المحامية معاك كان غير قانوني ، الأتعاب كاتافقو عليهم قبل ماتبدا معاك الخدمة ماشي تا كايقرب الحكم ولا تا كاتساليو .. تقدري تشوفي النقيب هو يدير لك حل معاها باش توصلي نتي وياها لشي إتفاق و يقدر يتنقص لك من الفلوس لي خاصك تعطي ولا يقدر دير معاك حل من غير هدا
حياة : فهمت و المحامي لاخر؟؟
أسيانو : غاتحتاجي تهضري معاه ا أنسة و تتأكدي من أنك ماوقعتي حتى على وثيقة معاه و فحالة ما لقيتي راسك ماوقعتي حتى على وثيقة ماغايكون كايتسالك والو
حياة : ايلا ماكنت مسينية على حتى ورقة ولقيتو كادب عليا مانقدرش نرفع عليه شي دعوة ولا نديكلاري بيه عند البوليس حيت حاول ينصب عليا؟
أسيانو : واش سبق ليك عطيتيه شي فلوس؟
حياة : لا
أسيانو : فهاد الحالة مايمكنش حيت ماخدا من عندك والو
حياة : ولد الحرام راه كان ناوي ينصب عليا
أسيانو : كاتبقا محاولة ماعندكش عليها شي إثبات و ماخداش من عندك تا سنت
حياة : و ديك المحامية مانقدرش ندعيها حتى هي؟؟ راها ماحافضاتش على سرية الإجرائات و كلشي كانت كاتوصلو ليه و لطليقي
أسيانو : وقعتي معاها شي وثيقة على هادشي؟
حياة : صافي فهمت لي كاين .. ماغانقدرش
مدام تورية : خاصك تمشي لعند داك المحامي باش تضبطي امورك و تتأكدي .. ايلا كانت هضرتك على حق غاتتحيد عليه 21 الف يورو
حياة : [ هزات صاكها و الكلاسور ] عندك الحق هانا مشيت [ شافت فأسيانو ] بالمناسبة شكرا بزاف
مدام تورية : حاولي على يدك
حياة : لا ماتخافيش راني موالفة
مدام تورية : ماتنسايش النقيب
حياة : كوني هانيا اليوم ندوز عليهم واحد بواحد
خرجات من تما و اول وجهة قصداتها هي المحامي .. خلاوها تدخل لعندو و غير دخلات و هو يستقبلها بإبتسامة باغي يستفزها بيها
_ [ بإبتسامة مستفزة ] انسة حياة واقيلا هاد المرة ماجيتيش بيديك خاويين
حياة : [ بادلاتو الابتسامة ] لا ماجيتش بيدي خاويين
جلسات فوق واحد الكرسي و دارت رجل على رجل و بدات كاتدور عينيها فالمكتب .. عندها معاه شلاا هضور
_ ماكانش عليك تعدبي راسك و تجي حتى للهنا .. كنتي تقدري دوزي لي الفلوس للكونط ديالي
حياة : وي ندوزهم لك علاش لا؟ ولكن تقدر تعطيني الوكالة لي سينيت عليها معاك؟
بقا كايضحك .. ماعرفاتوش علاش كايضحك ولكن كانت حاسة بيه باغي يستفزها داكشي علاش خلاتو كايضحك و هزات التيليفون ، دخلات لبلاصة المكالمات و كتبات 112 ، حطات التيليفون فوق البيرو و جلسات كاتشوف فيه و هي مبسمة حتى سالا على خاطر خاطرو و نطق
_ عاد ضرباتك الفيقة ا انسة؟ [ ناض من بلاصتو كايقاد فحوايجو و كايشوف فالمكانة لي فيديه ] المرة الجاية قراي الوراق قبل ماتوقعي عليهم
حياة : مدام سينيت عطيني الوكالة
_ ماكايناش
حياة : [ وقفات من بلاصتها و تبسمات ] حتى فلوسك ماكاينينش
_ عارفهم ماكاينينش [ عاود ضحك عليها ] راجلك ماكدبش فاش قال أمية وعقلك تقيل ، أيام عاد عرفتي راسك ماموقعاش معايا على وكالة؟
هنا فهمات بلي فالأصل كانو غير مدورينها بيناتهم و دايرينها ضحكة وسطهم حيت ماكانتش عندها معرفة كافية بالإجرائات و المعاملات لي كاتكون مع المحاميين فهاد البلاد .. بحالا كانو كايلعبو بيها و عاجباهم ديك الحالة لي واصلة ليها ..صدمتها و أعصابها فاش كانت باغا طير على داك المحامي ، كانت بحال شي قردة دايرا لهم حلقة لا أقل ولا أكثر .. و كون دابا مارجعاتش السينتة اللور؟ شنو واش كانت غاتخلص ديك 42 مليون كاملة و غايبقاو مخليينها فدار غفلون؟؟ .. المشكل هنا ماعندوش علاقة بالذكاء و إنما بالخبرة حيت كون كانت فايتة تعاملات مع المحاميين كانت غاتكون عارفة بزاف ديال الحوايج و رادة البال لبزاف ديال الحوايج .. ماكانتش غاتكون عندها معرفة محدودة
قدر يستفزها بهضرتو خصوصا منين فهمات بلي هادشي كامل كان غير مسرحية كوميدية بالنسبة ليه وللمحامية و لعادل و حناه ... ناضت من تما و هزات تيليفونها و وراتو النمرة لي كتباتها فيه
_ [ كايضحك باش يزيد يستفزها ] علاش كاتوريها لي؟
حياة : [ تبسمات ليه و شافت فيديها و عاودات شافت فيه و قوسات حجبانها ببراءة ] يدي مهرسة و لي هرسها لي واحد عديم الرحمة ضربني بطوموبيلتو [ قوسات شفايفها ] بسبتو دابا ماقادراش نخدم و ندير الانشطة اليومية ديالي بشكل طبيعي .. ناهيك على ركبيا لي تحردو
_ [ ضحك ] راه قلت لك طليقك ماكدبش فاش قال عليك أمية [ شاف فيها و بتاسم لها بإستفزاز ] غاندير فيك خير و نقولك هاد المعلومة .. لي ماعندوش لاسورانس هنا ماكايستفادش من التعويضات ديال هادشي
حياة : [ بادلاتو الإبتسامة و قربات ليه حتى تقابلات معاه و نطقات ] نسيت مانقول لك نتا و طليقي .. مخلصة لاسورانس [ بعدات عليه و عطاتو بالضهر باش تخرج من الباب و نطقات ] وجد جيبك حيت الخلاص لي خلصتيه عليا فالكلينيك ماكافيش
خرجات و خلاتو متبعها ... عادل ماقالش ليه هادشي ، قال ليه بالحرف الواحد بلي هي ماعندهاش لاسورانس و ماغاتدي منو لا حق لا باطل فاش عرفو هو لي دخل فيها بالطوموبيل ...
ماكانش فراس عادل بلي كانت مقادة شحاال من حاجة بلا خبارو ... اما بالنسبة للمحامي كان عارف مزيان بلي حياة ماغاتاخدش شي تعويض كبيير حيت أولا خلص عليها فالكلينيك و تانيا ديك الكسيدة ماقتلاتهاش و ماتسبباتش ليها فشي إعاقة ولا فشي إصابة خطيرة مجرد كسر و بعض الجروح لي غايبراو مع الوقت وحتى هي كانت عارفة هادشي ولكن على الأقل غاتخليه يحط التعويض من جيبو سوا كان قليل سوا كان كتير المهم فبلاصة ماتعطيه هو لي غايعطيها
بدات كاتقاد أمورها مع ديك المحامية و مشات لعند النقيب هي وياها كيف قال ليها أسيانو ولكن ديك ل21 مليون مابغاتش تتحيد من ضهرها و ماقدراتش تنقص منها مي فالمقابل دار معاها حل زوين بسباب الحالة المادية ديالها و حيت المحامية ماتفاهماتش معاها على الاتعاب من اللول باش تخلي ليها حق الاختيار واش تكمل معاها ولا تقلب على شي محامي قد جهدها و الحل كان غايخصها تولي تعطي لديك المحامية كل شهر 2000 يورو يعني 2 ملاين فالشهر لمدة عام ، كانت قاصحة عليها شوية ولكن على الاقل كان عندها الوقت الكافي باش تخلص و الأهم هو ماكان غايتجمل عليها حد و ماغايمن عليها حد
عطاوها ورقة تسيني عليها و بقات كاتفليها و تعاود تفليها لاتكون شي حاجة عاوتاني غاتخرج لها من الجنب .. حتى تأكدات منها عاد وقعات عليها هي و المحامية ، عطات نسخة للمحامية و بقات عندها نسخة و ناضت خرجات من تما و هي حاسة بوااحد الحمل كبيير تحيد من فوق كتافها عاد بدات كاترجع فيها الروح
صونا عليها محمد كايسول على مشكلتها و طمأنتو باش يهضر حتى مع ماماهم و ماتبقاش مشوشة و موراها صونات على مدام تورية علماتها بالجديد باش ماتبقاش هازة ليها الهم
رجعات للدار و أول حاجة دارتها هي جلسات كاتفكر فكيفاش غاتزطط راسها هاد العام منين غاتجيب الفلوس و فاش غاتخدم و كيفاش تقدر ترجع الفلوس فأقل من عام و كخطة مبدئية خاصها تفكر كيفاش توفر هو اللول ... و باش توفر غايخصها توفر الفلوس لي كاتعطي فالكرا و الفاكتورات ديال الما و الضو و الغاز هادشي علاش قررات باش هاد الدار غاتكريها للمهاجرين و الحراݣة لي ماعندهمش الوراق حيت كايكونو باغيين غير السقف لي يغطيهم و ماغاتحتاجش دير معاهم لا ورقة لا زوج .. الدار كانو فيها 2 بيوت ، غاتشري 4 من دوك الباياصات لي كايكونو واحد من فوق واحد يكونو مستعملين و كل بيت غادير فيه 2 ... يعني غاتكري الدار ل8 ديال الناس ، كل واحد غايكري غير البياص لي كاينعس فيه و الكوزينة و الطواليط و الدوش خلاص مشروكين و غاتزيد تدخل لهم حتى الويفي باش تكون عندهم وسيلة الترفيه و بهاد الطريقة غايوليو هما لي كايخلصو الكرا و الفاكتورات و من الفوق غايبقاو كايشيطو ليها الفلوس ... و فهاد الأثناء هي غاتكون عندها حرية الإختيار واش تمشي تشوف شي جمعية تعطيها شي مأوى تسكن فيه ولا غاتصبر وتولي تنعس فديك الكنبية لي كاينة فالصالة ... فكرات مزيان ولقات بلي ايلا ولات كاتنعس فديك الصالة غاتولي حاضياهم و رادة معاهم البال مي فهاد الحالة غايخصها شي پورط پلاكي تفرق بيها الصالون باش هاكا على الأقل تكون عندها حتى هي شوية ديال الخصوصية
دخلات كاتقلب على دوك البياصات فكروبات الفيسبوك لعل و عسى تلقا شي واحد .. و هي ناوية تشري 2 و حتى تشوف بلي القضية مسلكاها عااد تزيد 2 خرين و داكشي لي كان .. بدات كاتقلب حتى لقات واحد مستعمل محطوط هضرات مع مولاه و تفاهمات معاه على التمن و دارت معاه فوقاش بغاتو حيت ماكانش عندها لي يجيبو لها و كان غايخصها تجيبو راسها ، بدات كاتقلب تاني على شي واحد كايهز الرحيل حتى طاحت فواحد ... مشات قادات كيكة هي اللولة عاد صونات على داك لي غايجيب لها دوك اللعيبات بالبياصات ديالهم دارت معاه التمن باش يجيبو لها و داكشي لي كان طلاقات معاه و مشات هي وياه جابوه و طلعو معاها و خلصاتو ولكن قبل مايمشي عرضاتو على كويس ديال القهوة باش زعما تشكرو على التعب ديالو ولكن فالحقيقة هي كانت غير كاتشري معاه المعرفة حيت عارفة بلي مزال غاتحتاجو من بعد داكشي علاش دارت معاه هاكا باش من بعد يرخص معاها
° دوزات أيام و أسابيع غير كاتجري فيهم ... دارت فحوصات و بدات كاتجري على الحادث لي كانت باغا تشد منو تعويض و فنفس الوقت كانت كاتقلب على البياصات لي بغات ... دخلات الويفي للدار و جابت لي يقاد لها الپورط پلاكي فالدار و موراها بدات كاتقلب على الحراݣة لي ماعندهم فين يسكنو ، و هاد القضية بالضبط ماكانتش صعيبة بزاف و ماكانتش محتاجة تقلب بزاف بالعكس لقات العراارم لي باغيين و السبب ماشي حيت كانو محتاجين فقط فين يسكنو و انما حيت كانو محتاجين شهادة السكنى حيت عارفين بلي بهاد الطريقة غايقدرو يشدو وراقيهم من مور 3 سنين .. و بكثرة لي لقات الحراݣة بزاف كانت قادرة تختار لي يليق ليها و لي مايليق ليها فيهم ...
شدات التعويض لي خرج لها من عند المحامي ماكانتش شي حاجة كبييرة مي على الأقل ماخرجاتش بلاش و من موراها بدات كاتريݣل أمورها مع الحراݣة لي كرات لهم وطبعا ماكراتش لمن والا ، فينما بان ليها شي جلاخة غاتلقا معاه المشاكيل بعدات منو المهم ضمنات واحد المدخول شهري قليل غايبقا يشيط لها من عندهم و من فوق هادشي ولات كاتوفر حتى فلوس المصروف حيت من مور ماكرات ليهم ولات مهنياهم من الطياب .. كادير لهم داك الطياب ديال المعاكيز ، كاتشرك لهم الغدا مع العشا و تخشي فالكونجيلاتور المهم واكلة معاهم و فلوسها مخبياهم عندها ... ماكانتش معتامدة غير على هادشي ، كانت كاتقلب على لي كايبغيو لي يقابل لهم الحيوانات الأليفة بحال القطوط و الكلاب و ما الى ذلك و كاين لي كان كايقلب على لي يخرجهم ليهم و فهادشي كانو كايخلصوها بالساعة .. جاتها على كانتها هاد الخدمة مي المدخول لي ماجاهاش على الكانة المهم كانت كاتعدي بهاد الخدمة غير على ما تبرا ليها يديها و ديك الساعة غاتبدا تقلب على الخدامي ديال الصح .. فهاد المدة كانت كادير شحال من حاجة كاتزيد تطور الرسمة ديالها و فنفس الوقت كانت هضرات مع مدام تورية باش تلقا لها شي خدمة بالوراق ماشي تخدم فالنواغ
بداو كايدوزو الايام نهار من ورا نهار حتى برات يديها وحيدات جبيرة وبدات كاتقلب على خدمة لراسها على ماتلقا لها مدام تورية شي خدمة زوينة ... و فهاد الأيام لي دازو أصيل ماعاودش صونا عليها ل2 ديال الأسباب السبب الأول ديك الطريقة لي كاتهضر بيها وي كاينا عزة النفس مي عاوتاني زادت فيه فوقما يهضر معاها كادور فيه واخا تكون شادة السما بقاعها .. بزاف على داك التكبر لي فيها و تاني سبب كان عرف من ادم لي عرف من عادل بلي سلكات راسها و وصلات لإتفاق مع المحامية باش تولي تعطيها كل شهر قسط
° كان هاد النهار عندها بحالو بحال الايام لي دازو .. غير الفرق هو كان عندها هاد النهار خاوي شوية داكشي علاش بدات كاتقاد فيه حلوة الريشپوند ديال للدراري لي معاها ماشي حيت هما طلبوهم منها و إنما حيت كان عندها هدف من مور هادشي ... كانت الدار عامرة و الدراري ماخدامينش ، صونات عليها مدام تورية باش تجي لعندها للدار حيت عندها شي خبار ليها و عطاتها العنوان و جلسات كاتكمل فشغالها غير سالات و قادات 2 برارد ديال أتاي وحطاتهم فوق واحد الطبيلة فالكوزينة و بدات تعيط للدراري باش يجيو للكوزينة ، بداو كايجيو واحد من ورا واحد كل واحد كاتعطيه كاس ديال اتاي و تعطيه الطبسيل يهز الحلوة .. كانت عارفاهم مزيان بلي موحشين ديك الحلوة بالضبط حيت كاتفكرهم فالعائلات ديالهم و على وجه التحديد كاتفكرهم فالأم المغربية
_ [ فمو عامر و هاز حلوة فيديه و فاليد لاخرا الكاس ] لهلا يخطيك علينا ا بنت البلاد
_ [ كايشرب من الكاس ديال اتاي ] وا دكة هادي عندك
_ [ كايغوت باش يسمعو دري لي فالدوش ] وا حمييد وا تعالا ݣبل ماتلݣا الطبسيل خاوي
_ [ خطف الطبسيل ] دايرين لينا هنا ماكلة الجمل .. تكايس ا جمي
حياة : [ خرجات ضحكة من فمها ] وا غير خليه ياكل راه باقي الخير ... المهم راني خبعت لكم فالتلاجة 2 جبانيات باش تبقاو تلقاو باش تفطرو فالصباح هاد الايام
قرب لها واحد من دراري و باس لها راسها و قرب حتى التاني باس لها راسها بدافع الإحترام حيت من نهار سكنو معاها و هي كاتتعامل معاهم بحال الإخوة ديالها في حين هما كانت كاتفكرهم بطيابها غير بالمغرب ... لقاو راحتهم معاها و هادشي بالضبط لي كانت باغا " الاحترام "
سمعات الدقان فالباب و خلاتهم و مشات تحل الباب لقاتها مدام تورية ... سلمات عليها بالوجه وخلاتها تدخل للداخل
مدام تورية : واش عندك الضياف ا بنتي ياكما جيت فشي وقت مامناسبش؟
حياة : لا لا هادو غير دراري لي كارية لهم
بان ليها واحد منهم دايز لابس غير الشورط و حفيان و مالابس والو من الفوق .. دورات عينيها و هما يبانو ليها جوج واحد هاز كاس ديال اتاي و التاني فمو عامر ... واحد كان لابس حوايج الخروج وداز من حداهم باش يخرج ... و واحد واقف حدا الطواليط كايدق على لي لداخل باش يخرج
_ خنق الميضة عاوتاني ... كاتخرا الكاياص ا صاحبي
_ خاري جيفة هداك
المهم كانت الدار عاامرة و مدام تورية غير كاتشوف فهادشي والصدمة غالبة عليها
مدام تورية : [ شافت فحياة ] حياة شهادشي؟ هادو هما النماذج لي ساكنة معاهم؟؟ فين كاتنعسي؟؟ واش كاتنعسي فهاد الدار معاهم؟؟
حياة : اجي معايا بعدا ا مدام تورية
مشات معاها لداك البيت لي دارتو فالصالون بپورط پلاكي ... دخلات هي وياها و سدات الباب و مدام تورية مزال مصدومة من هادشي لي خاشية حياة راسها فيه
حياة : الدار مرونة شوية .. ماشي مجيتك هادي ا مدام تورية
مدام تورية : واش كاتعرفي هادوك؟ علاش مسكناهم معاك؟
حياة : ولاد البلاد ... كايعاونوني فالمصروف و الكرا و الفاكتورات باش كانوفر فلوس هادشي و هاكا بعدا غانولي كانخدم غير على الدين لي عليا فهاد الأيام ..
مدام تورية : [ بنبرة عتاب ] إيلا محتاجة فين تسكني فابور علاش ماقلتيهاش ليا ا بنتي؟ انا نعطيك بنت تسكني فيه معايا حتى تترخف أمورك
حياة : ربي يخليك ا مدام تورية ولكن ماباغا نتقل على حتى واحد هاكا مرتاحة وراكي عارفة ا مدام تورية خاصني يكون عندي إثبات بلي كنت ساكنة هنا لمدة 3 سنين و هاد الاثبات هو شهادة السكنى
مدام تورية : انا نعطيها لك غي ماتبقايش عايشة وسط الرجال و نتي غير ولية وسطهم واش ماخفتيش على راسك؟
حياة : انا ماشي دايرا هادشي غير باش نقتاصد ولكن حيت كاتتجمع لي واحد البركة منهم
مدام تورية : خليهم عايشين هنا بوحدهم رجال بيناتهم و اجي عيشي معايا ، راك كاتغامري براسك ا بنتي .. عمرني ماشفت هاد الحالة حتى ليك نتي
حياة : عارفاك باغا تعاونيني والله ولكن ايلا خليتهم هاكا بوحدهم و مشيت لبلاصة خرا غايديرو مابغاو هاكا بعدا من تحت عينيا حسن و دايزين من تحت يدي
مدام تورية : واش ماخايفاش على راسك؟ ماخايفاش منهم؟ نتي مرا ماشي راجل باش يدوزو من تحت يديك .. شي نهار ينوضو لك و يتكرفصو عليك شكون غايفكك منهم ديك الساع؟؟
حياة : ماخايفاش منهم ا مدام تورية لي سخن عليه راسو غانبردو ليه
مدام تورية : كيغاديري تبرديه ليه؟ راكي غير ولية وسط الرجال .. صحتك ماشي هي صحتهم يقدرو يضوروك بيناتهم
حياة : ياك حنا فبلاد القانون؟
مدام تورية : و هادشي لي كاديريه كايخالف القانون
حياة : ماتخافيش عليا .. غانسلك راسي وحتى هادو لي معايا عارفين راسهم ماخاصهمش يغلطو معايا حيت غانعاونهم بشواهد السكنى [ تبسمات ليها كاتطمئنها ] و زايدون ا مدام تورية راني معاشرة معاهم دابا و كانزيد ندير بلاصتي بيناتهم ، نهار غايسخن الراس على واحد غاينوضو ليه 7 لاخرين بلا مانهضر انا [ جلسات فوق الكنبية ] راني ماشي كانطيب لهم و نوجد لهم فالحلاوي غير هكاك
مدام تورية : وراقك تا نتي ا بنتي مزال خاصهم يتقادو
حياة : و هادشي علاش ا مدام تورية محتاجة بزاف كونطرا
مدام تورية : تا لوقتاش غاتبقاي فهاد الحالة؟
حياة : غير نخلص الدين ديالي وغانشوف اش ندير .. واش تبغي تاكلي الحلوى؟ قاديت الحلوى ديال الريشپوند غاتعجبك
مدام تورية : غير جلسي ا بنتي جيت نهضر معاك على حاجة خرا
حياة : [ بإهتمام ] اشمن حاجة؟
مدام تورية : لقيت لك واحد الخدمة مع شي ناس كانعرفهم وغاتخدمي بالوراق ديالك ماغايخصك معاهم تا خير
كان هدا من بين الخبارات لي كانت كاتتسناهم حياة بفاارغ الصبر ... ناضت من بلاصتها و عينيها كايلمعو
حياة : و اخييييرا
مدام تورية : ولكن خدمة ماشي ساهلة تقدر تجيك شوية صعيبة
حياة : ماعنديش مشكل نهائيا واخا تكون كيفما بغات تكون هانيا عندي ... غير قولي لي فاش غانخدم بالضبط؟
مدام تورية : هضرت معاهم على النيفو ديالك فالقراية راكي عارفة ا بنتي هما كايبغيو الانسان يكون عندو خبرة و يكون قاري على الضومين لي باغي يخدم فيه
حياة : عارفة لي كاين ا مدام تورية
مدام تورية : قلتي لي شحال من لغة عندك؟
حياة : عندي الفرونسي و لونغلي وزدت دابا الاسبانية
مدام تورية : مزيان هادي حاجة مزيانة ... المهم غانوضح لك الخدمة لي غاتخدمي فيها كي دايرا و الصالير ديالها و شروطها
حياة : هانا كانسمعك
مدام تورية : الخدمة غاتكون فالشركة ديال واحد من المعارف ديالي غاتكوني موظفة فخدمة العملاء .. الصالير مابيهش ولكن غايكون مزيان كبداية ليك
حياة : شحال؟
مدام تورية : 12 الف و 360 يورو فالشهر
حياة : هدا قلتي ليا مابيهش؟ [ ضحكات ] هدا راه فالمغرب يخليك تعيشي ملكة
مدام تورية : نساي عليك المغرب و حساباتو .. دابا راكي هنا عايشة فإسپانيا ، هاد الخلصة ماغاتشديهاش من اللول حيت ماعندكش خبرة و ماقارياش على هاد المجال غاتبداي معاهم ا بنتي ب6 الاف يورو و فهاد الوقت غاتكوني كاتاخدي الخبرة و كاتقراي هضرت مع الصديق ديالي و غايدير لك إستثناء حيت نتي من الطرف ديالي ولكن ا حياة ماتحشمينيش معاه بغيتك تكوني قد المسؤولية و قد تقتي
بدات حياة كاتحسب لقات بلي ايلا بدات هاد الخدمة غاتقدر تخلص دينها فمدة 5 أشهر و من الفوق غايكون عندها ديپلوم و الخبرة و غادير المعارف و من فوق هادشي كامل الورييقات ... حسات بالفرحة شاداها من الصبع الصغير ديال رجليها
حياة : [ بحماس ] عممرك تندمي ا مدام تورية على هادشي لي درتي معايا
مدام تورية : كانتمنى [ عاودات ضورات عينيها على البيت لي قادات حياة ] كانظن ماغلطتش منين ختاريت لك هاد الميدان تخدمي فيه
حياة : علاش؟
مدام تورية : حيت هاد الميدان كايبغي الصبر .. القدرة على الاقناع ... الإدارة ... و كايبغي بنادم يعرف كيفاش يتواصل و منين قدرتي تتواصلي مع هاد النماذج و خممتي كيفاش توفري و صبرتي باش تعيشي فبحال هاد البلاصة .. ماكانظنش واش الشي لاخر غايجيك صعيب [ عاودات شافت فيها و هضرات بجدية ] ولكن هاد العيشة ا بنتي ماشي عيشة ... هادشي لي درتيه خاصك تساليه فأقرب وقت باش ماتخرجيش على راسك و تخلقي لراسك مشاكل مع الدولة
حياة : راني ماناوياش نبقا هاكا هادشي غير مؤقت ...
ماكانتش مدام تورية مقتنعة بهادشي ديال حياة و جاتها كاتغامر براسها بزاف ... حيت باش بنت تعيش وسط 8 ديال الرجال ماعندهمش حتى الوراق جاتها حاجة فشكل كانت مشوشة عليها من ناحية يمشيو يتقلبو عليها و يضوروها و من ناحية خرا يجبدو لها مشاكل قانونية و يصدقو شاريين لها الصداع وخارجين عليه ولكن ماكانش فراسها بلي حياة ختارت لي غايسكنو معاها بعناية شديدة حيت ستهدفات غير هادوك لي سنين و هما هنا بلا ورقة بلا جوج يعني لي باغيين يديرو غير وراقيهم بلا صداع بلا مشاكل حيت مييتين على الوراق ... ختارت لي ماكايكميوش و مامبليينش باش ماشي يجي شي نهار واحد يتقطع على لاخر و تنوض المضاربة وتوصل الخبار للبوليس ... كانو عندها معايير مشات عليهم فاش بغات تختار لي يسكن معاها
توادعات معاها من مور ماتفاهمات معاها باش لاغد ليه تمشي هي وياها و تعرفها على هداك لي غاتخدم معاه و ترصي معاها حتى الأمور ديال قرايتها باش فاش تسالي الانفورماسيو ديالها و تزيد تطول معاهم و تاخد الخبرة تولي كاتتخلص بنفس الخلصة لي كايتخلصوها باقي الموظفين لي معاها
طلعات ليها نمرة خالد .. جاوبات
حياة : شي حمار مات فسيدي قاسم حتى سولتي فيا
خالد : [ كان كايغوت و هو مكشكش ] صافي طلقتي خرجو رجليك للشواري؟؟؟ لقيييتي داكشي لي بغيتي فديك البلاد؟؟؟؟
حياة : ا غير بشوية عليك علاياش كاتهضر؟ شمن رجلين و شمن زمر لي خرجو للشواري؟
خالد : باغاني نلحق على دينمك تما نحسك لمك الرجلين ياك؟؟؟ هادشي لي باغاني ندير لك؟؟؟ باغاني ندير فدينمك شي جريمة؟؟؟ واش لأصل مك ماعندكش الكمارة لي تحشمي عليها؟؟؟ كنتي فالمغرب مشوهااانا خرجتي من المغرب زدتي شوهتييينا؟؟؟ حالفة لدينمك تا تخلي العالم يهضر فينا؟؟؟
حياة : وا قول الخرا علاياش كاتهضر؟؟ اش درت عاوتاني؟؟ اشمن شوهة هادي؟؟
زهور : [ كانت جالسة حداه ] البنات تما تاتلقاهم لاخرجو رجليهم للشواري وخرجو على دينهم تاتلقاهم عايشين مع صاحب واحد و هاد الملقطة جمعات الݣور لي كاينين تما
حياة : قول لديك الملقطة ديال بصح ايلا ماسداتش داك الفم غاندير فيها شي موصيبة عمرها تنساها
خالد : و باقا كاتحلي داااك الدرݣووم؟؟؟ عايشة مع 8 ديال زوافرية لدينمك فين باغا توصلي بهاد التسلݣيط ديالك؟؟؟ مسيفطينك تحلي دار الدعارة تما؟؟ واش لدينمك حالفة تاماتخلينا نهزو راسنا من لرض؟؟؟
حياة : جمع فمك و عرف اش كاتقول و هاد نص راجل لي وصل لكم هاد الهضرة قوليه يمشي يحضي مو فبلاصة مايبقا حاضي ليا قاعي انا و غيير تسناو تترخف ليا القضية ياك بغيتو غير الشوهة؟؟ هانتوما غاتوليو تسمعوني عايشة مع 16 ماشي غير مع 8 ... و لي كايدخل عليا القفة ولا كايخلص عليا الكرا يحل فمو .. ماشي بنادم عايش هاني و حاضيني انا التااابعة يا ربي السلامة
خالد : هبطي للمغرب نوري لأصل مك 8 من 16 داك اللسان كان خاصني نقطعو لك شحاال هدا و نحسك لمك دوك الركابي باش تشدي الركنة و تتكمشي
حياة : وا عطييني بالتيساع ا عباد الله واش انا حاضياكم؟؟؟ حاضية شي قندوح فيكم؟؟ وا خلييوني نعوم بحري حيااتي هادي وأنا حرة فيها و لي باغي يقول شي حاجة فضهري غيير يقولها واش فوقما تحراف لشي واحد يبدا يصوني يفرع ليا راسي بالنݣير ديالو؟؟ هاد النمرة لي فاقصاني نبدل مها و نهني راسي
قطعات عليه والأعصاب شادينها ... هاد الكلب ديال عادل حالف مايقيلها عليه و الحزقة لاحزقاتها كايمشي يوصلها لبنادم و ها هي دابا تطلقات عليها الهضرة ديال عايشة وسط 8 ديال العزارة ... ماكانش عندها شي مشكل فالنظرة لي غايشوفها بيها بنادم .. يكفي انها عارفة راسها اش كاتسوا و عارفة شنو كادير و مقتانعة بيه ... ايلا غلطات راها غلطات لراسها و غلطات فحياتها ماشي فحياة شي وحداخر ولا دارت شي حاجة فيها المنفعة راها غاديرها لراسها و ماشي لوحداخر
فكرات باش غير دوز واحد العامين ولا 3 سنين و تمشي تطلع لفرنسا تما حسن ليها كااع من هاد القنت ولكن خاصها تستغل هاد 3 سنين مزياان و تحاول دير فيها اكتر من انفورماسيو و فنفس الوقت تخدم على البلان لي باغاه و فهاد المدة غاتكون جمعات الفلوس و غاتقدر دير بيهم شي حاجة ففرنسا ، شي حاجة لي تخلي زهور و مروى و العائلة و كاع لي هضر فيها غير حال فمو ... ايلا كانت مروى كاتتعنا بفلوس راجلها و كاتتجمل عليها بعويديل لي عرفاتو عن طريقها هي غاتتعنا بحاجة خرا .. حاجة لي غاتكون هي لي دارتها و حاجة لي غاتسكت الفام و الاهم غاديرها فبلاد من غير البلاد لي وصلها ليها عادل ... بلاد من إختيارها ..
داز عندها داك النهار ولاغد ليه بكرات ... فاقت بكري وجدات للدراري اتاي ديالهم و مشات دوشات و نشفات شعرها ، لبسات حوايج كايليقو للمقابلات و تأنقات باش تعطي إنطباع زوين عليها .. جمعات الوراق لي خاصينها ومشات لعند مدام تورية و من تما شدو الطريق لديك الشركة .. كانت عبارة عن 2 مباني كبار مقسومين و شاركهم الوسط طابق على شكل H ، هزات راسها كاتشوف العلو ديال المبنى حتى ضراتها الرقبة ديالها و نزلات راسها كاتشوف قدامها كانو الموظفين داخلين خارجين وكلهم متأنقين ، دخلات هي وياها و بدات كادور عينيها على الشركة من لداخل .. تبهرات من الديكور و حتى من الموظفين لي كان كايبان فيهم كل واحد مقابل خدمتو .. مامسوقينش لا لي داخل لا لي خارج ، قد ما كانت كاتزيد تتعمق هي و مدام تورية داخل داك المبنى كانت كاتزيد تتبهر حيت ماكانتش متوقعة تكون الشركة بهاد الشكل ... عرفات معنى أخر للفخامة دابا عاد فهمات علاش الصالير هنا مزيان .. ماكانتش هاد الشركة شي شركة لي صغيرة و يمكن كون ماكانتش مدام تورية موحال تجيبها الوقت و تخدم فهاد البلاصة
وصلو لواحد الطابق و هضرات مدام تورية مع السكرتيرة ديال الصديق ديالها و من موراها دخلو للمكتب ، زادت تبهرات بالديكور ديالو ولكن مابيناتش ، بقات كاتشوف غير بجناب ديال عينيها بلا ماتحيد عينيها على داك الشخص القابع من ورا المكتب كان راجل أربعيني قال للأناقة حيدي لهيه نوريك الأناقة الحقيقية .. شعرو كانو كايتوسطوه بعض الشعيرات البيضاء و الذقن ديالو نفس الشيئ .. من الملامح ديالو و حروفو كان كايبان فيه إسباني
سلمو عليه وجلسو ف2 كراسا كانو قدام المكتب ديالو ... و أول حاجة دارها هي سولهم شنو يشربو
الحوار بالإسپانية
مدام تورية : حياة ألفونسو .. ألفونسو هادي هي الشابة لي هضرت لك عليها
تفحص حياة بنظراتو كيفما كايتفحص اي شخص خدام عندو ... باش كايعرف من شمن نوع هو ، واش مهمل واش ثرثار واش عندو حس المسؤولية واش كايخدم ولا ماكايخدمش .. واش صبار و شحال من حاجة ، حياة فهاد الاثناء كانت جالسة بطريقة أنيقة و باين فيها من داك النوع لي عزيز عليه الخدمة ، ماكايظنش واش غاتكون صبارة ولكن عندها حس المسؤولية
هدا كان إنطباعو اللول عليها قبل مايبدا يهضر معاها و يسولها بعض الأسئلة البعض منهم كانو أسئلة روتينية و شي وحدين كانو أسئلة إستفزازية و شي وحدين كانو غير باش يعرف ردود الأفعال ديالها
[ الحوار بالإسپانية ]
ألفونسو : قلتي ليا كاتهضري بالألمانية ياك؟
كان باغي يتأكد واش غاتكدب باش تشد الخدمة ولا غاتقول الحقيقة .. اما هي كانت عارفة بلي مايمكنش مدام تورية تكدب و تقول ليه بلي كاتتقن شي لغة من غير اللغات لي كاتعرف لهم
حياة : [ بإبتسامة ] لا .. كانهضر ب3 لغات من غير اللغة الأم ديالي
ماطرحش عليها بزاف ديال الأسئلة حيت فالأصل هي ماعندهاش خبرة باش يسولها على الشركات لي خدمات فيهم ... و ماجاتش باش دوز مقابلة عادية بحالها بحال الناس لخرين يعني السؤال ديال علاش ختارت هاد الخدمة بالضبط ماكانش سؤال عندو معنى حاليا ... مي فالمقابل سولها بدوك اللغات ب3 و هضر معاها بيهم ب3 باش يعرف واش هي كاتتقنهم كي كاتقول ولا غير كاتكدب
حاول يقرا لغة الجسد ديالها و يقرا شخصيتها العملية غير من خلال الأجوبة ديالها واش قصار بزاف ولا طوال بزاف هي فهاد الاثناء كانت كاتجاوب أجوبة بالطول المناسب ماشي قصار باش مايقولش هادي ماعندهاش تقة فداكشي لي كاتقول ولا ماعندهاش معرفة كافية فداكشي لي كاتهضر عليه و عاوتاني ماشي طوال بزاف باش مايقولش هادي ثرثارة و هضرتها لي كانت قادرة تلخصها و تخلي فيها غير المفيد ماقدراتش تلخصها
سولها أسئلة كانو على شمن قيمة هي غاتضيف ليهم ... شنو كاتعرف على هاد المجال ... كيفاش غاتتعامل مع شي عميل معصب و كيفاش غاتتعامل مع واحد هو براسو ماعارفش شنو باغي ، عطاها بعض الأمتلة و جسد ليها شحال من شخصية من شخصيات العملاء و بقا كايشوف كيفاش كاتتعامل و كيفاش كاتجاوب ، كانت نتيجة مرضية بالنسبة ليه حيت فعلا واخا ماعندهاش خبرة فهاد المجال إلا و أنها كانت عندها واحد القدرة كبيرة ديال الإقناع
سالا معاها و بدا كايقول لها القوانين ديال الشركة و الشروط ديال الخدمة معاهم و السوايع ديال الخدمة معاهم و بزاف ديال الحوايج لي كان خاصها تعرفهم و واخيرا عطاها العقد ديال العمل لي كان صالح لمدة عام ولا عجباتهم فهاد العام ديك الساعة غايعاودو يجددو معاها العقد .. ولكن كانت واحد الحاجة لي ماعاجباهاش فالعقد و هي لابغات تخرج من الخدمة قبل مايسالي العام غايطيح على راسها واحد المبلغ تخلصو في حين هما ايلا طردوها ماغايكونوش عندها تعويضات ... قرات داك العقد و فلاتو مزيان عاد وقعاتو حيت اصلا هي ماناوياش تخرج فهاد العام و كيفاش غاتسخا بهاد البلاصة و بداك الصالير ...
يتبع...
التنقل بين الأجزاء