دار معاها باش تبدا معاهم من غدا من مور ماتفاهمو و من تما شدات الطريق هي و مدام تورية باش يقضيو غرض اخر على ود واحد الانفورماسيو لي حتى هي غاتزيد تعمر لها وقتها .. ماكانش عندها مشكل فهادشي بالعكس كون كان النهار فيه 48 ساعة كانت غاتپلانيه حيت دوك الأسئلة الاستفزازية لي سولها ألفونسو خلاوها تبغي تغرق فبلاصتها و تقرصات منهم و من شحال من هضرة قالها لها و غير مابيناتش ليه باش مايقولش راها كاتتأثر بهضرة بنادم ، هي ماكاتتأثرش ولكن ديك الهضرة خلاتهل مامرتاحاش حيت ببساطة كاتشوف راسها مزال مادايرا حتى حاجة فحياتها ... دوك لي غايكةنو خدامين معاها عندهم شلا ديپلومات و الخبرة من الفوق ايوا و هي شنو عندها؟ شنو دابا واش غاتكون هي أقل منهم؟؟ واش صافي غاتخدم غير حيت مدام تورية توسطات ليها؟ ايوا ولا خرجات من هنا شنو؟ واش غاتقلب تاني لي يتوسط لها؟ كانت عارفة مزيان بلي المعارف هما أسهر طريقة باش تترقاي للمستويات لي باغا توصلي ليهم ولكن هي ماباغاش غير هادشي ، باغا بزاف ديال الحوايج باغا تكون هي حسن من بنادم
وصل النهار الموالي لي غاتبدا فيه خدمتها تأنقات كالعادة و لبسات حوايج يليقو بالخدمة ديالها وقصدات الشركة ... كانت تما واحد ختنا وراتها خدمتها و البلاصة لي غاتخدم فيها وبقات معاها حتى تأكدات بلي حياة فهمات شنو غايخصها دير
دوزات داك النهار غير تما ، كانت كاتتخالط مع باقي الموظفين و كادير المعارف كعادتها و تتعرف على هادي و هدا وفنفس الوقت كانت مقابلة الخدمة ديالها و توقع مدام تورية كان صحيح حيت فعلا حياة ماكانتش كاتلقا مشكل باش تقنع العميل بداكشي لي هي باغا تقنعو بيه و فنفس الوقت كانت كاتتعامل مع كل عميل بالطريقة لي كاتناسب الحالة ديالو
طوال هاد الأيام لي دازو كانت خدمتها مراقبة و حتى هي لحد الساعة كانت عند حسن الظن ديال ألفونسو .. ماكانتش باغا تخلي مدام تورية تندم حيت عاوناتها ... لقات راحتها هاد الايام واخا كانت كاترجع عيانة و حتى الليل ولكن داك العيا كانت كاتحس فيه بواحد الحلاوة فشكل خصوصا فاش كاتجي و تتلاح على الكنبية ولا فاش كاتدخل و تدوش كاتحس براسها دارت شي حاجة و تعلمات شي حاجة .. ما حبساتش غير هنا زاادت عمرات وقتها بحيث ولات فاش صافي كادخل للدار و تدوش ولا ترتاح 5 دقايق ولا فاش كاتوجد ماكلة دراري كاتمشي لبيتها و تدخل لكورسيرا ... دوك الشواهد ديال الماستر تريك كانو معمرين ليها راسها حيت عارفاهم وااكلين فهاد الوقت و بحكم الخدمة ديالها و الوقت لي كان عندها عامر كانت أفضل وسيلة هي تقرا اونلاين .. كانو عينيها فدوك الشواهد بالضبط ولكن التكاليف ديالهم شوية غاليين حيت غايخصها تخلص فالطوطال 5000 دولار و هي دابا اصلا مأزمة داكشي علاش كانت ختارت حاجة خرا فهاد المدة ولكن كانت دايرا فبالها غير تترخف ليها القضية و تاخد الشهادة ديالها ديك الساعة اراك تاني للتيكنولوجيا وإدارة الأعمال .. أحسن حاجة كانت فالانترنت هي هاد المواقع لي كايخليوك تشدي بعض الشواهد المعتمدة غير من داركم و كايكونو من مؤسسات لي معروفين
ولات كادوز 3 ديال السوايع فكورسيرا و غير كاتسالي كادوز لديك الرسمة ديال مارلين ... ماكانتش رسمة عادية و ماكانتش كاتطلق فيديها فديك الرسمة على والو و إنما كانت كاطلق يديها فالرسم باش تدخل لسوق الفن الرقمي لي معروف بلNFT .. كانت عندها فكرة متجددة على هاد البلان و باغا طبقها و غاتطبقها بأي طريقة
° وصلات 2 ديال الليل وسدات البيسي و بدات كاتتفوه كانت ناوية تنعس حتى صونات عليها خديجة فالتيليفون ... جاوباتها و هي عينيها كايتغمضو بالنعاس وعياانة ... جاوباتها
حياة : [ سادة عينيها باغا تنعس و كاتتفوه ] لقيتيني باغا ننعس
خديجة : واش ماعارفاش اخر الاخبار؟؟
حياة : اشمن خبار؟
خديجة : العرس ديال خوك غدا
حياة : [ حلات عينيها و ناضت من بلاصتها ] كيفاش؟؟
خديجة : كي سمعتي ، مامشيتش لداركم هاد الأيام تا وصلاتني الخبار من عند ماما عرضاتها خالتي فتيحة للعرس
خديجة : فكرتيني بعدا فيه نسيييت و خرج ليا من راسي مانقولك
حياة : ناري ا خديجة واش محلفة عليا حتى طيري ليا النعاس فهاد الليل
خديجة : وااا هاد الخبار لي غانقول لك فيييين يبااان العرس
حياة : اشمن خبار؟؟
خديجة : فراسك ا لالة غنو خوها غايحرݣ ولا شي حراݣ
حياة : صافي هدا هو الخبار؟ وا حتى نتي ا خديجة يحرݣ ولا يتحرݣ و انا مالي؟
خديجة : ياك تا نتي كاينة فإسپانيا؟؟
حياة : و هانا فإسپانيا اش فيها؟ [ ضحكات عليها بالطنز ] هههه واش نقول لهم حضيو معاه ماتخليوهش يحط رجليه هنا؟
خديجة : وا كانقول لك ا صاحيبة حضي راسك ...
ضحكاتها خديجة بهاد الخلعة ديالها حيت كاتشوف بلي إسبانيا فيها 19 لجهة تقريبا و عاد الملاايين ديال بنادم لي ساكنين فيها و هي كاتبان وسطهم بحال إبرة وسط كومة قش و غايلقاها واحد مزلوط؟
حياة : والله يا خديجة ما فيا مانضحك فهاد الليل ولكن راه بزز مني و انا كانشوفك شاداك الرعدة على والو .. واش كايسحابلك جيت سكنت فشي دوار؟ غايدق البيبان باب بباب و يقول لهم واش ماشفتوش حياة بنت فتيحة؟ راني فإسبانيا و ماشي فشي مدينة صغيرة ، شي مرات ماكانفهمكش كي كاتفكري والله
خديجة : اياااه سري يا ختي سري ضحكي مع راساتك
حياة : و اش بغيتيني ندير؟ نبكي؟؟ السيد غير منين قبل يزوج ختو لخويا و هو عارفني انا مولاتها يعني راه باينة غايكون رضا بالواقع و عرف بلي الغلط من الاصل جاي منو
خديجة : هبلتي؟ تسحابتلك حاجة بحال هادي دغيا كاينساها بنادم؟ تلقايه قبل تتزوج ختو بخوك غا باش ماتبقاش هكاك ولا باش خوك يصلح غلطك [ تأفأفات بحيرة ] ماعرفتش ماعرفتش يمكن يكون غا مشا لتما باش يلقا خدمة حيت وسختي ليه ضوسيه هنا
حياة : ايوا على سلااامتك منين فهمتيها راه باينة هادي و من هادشي كامل ايلا كان غير من عندي يااا ربي مايجي فين يوصل للهنا تا يرجعوه لدارهم كسدة بلا روح بغيت ليه الغرق ان شاء الله
خديجة : باغا غير نعرف شدار لك نمووت و نعرف
حياة : يدير ليه يديه فعنݣو و يسيفطوه يدوز هاد المرة شي 20 عام ديال الحبس ... لي دارو راه دارو
خديجة : شدار تا خرجتي ليه على مستقبلو و مستقبل ختو؟ مايمكنش شي حاجة صغير
حياة : مستقبل ختو؟ ايلا عندك مستقبلها هو الزواج راه خويا غايتزوج بيها [ سكتات شوية و كملات ] عرفتي كون لقيت كيفاش نهبط للمغرب بالله مايكمل داك العرس
حياة : ايوا صافي ا خديجة راه قلت لك لي كاين ماتزيديش فيه .. المهم خلينا من هاد الموضوع [ ضحكات و هي كاتهضر ] عرفتي الشركة لي قلت لك خدامة فيها كي دايرا؟ راه شي حاجة بزاااف
خديجة : ماوريتيني التصاور لي قلتي لي
حياة : تسناي نسيفطهم لك
سيفطاتهم ليها و بدات كاتوريها الشكل الخارجي ديالها لي كان عاجبها و كملات هضرتها و هي كاتهضؤ
حياة : عرفتي عممرني فرحت لشي خدمة كيما فرحت لهادي ... مع كانوصل قدامها كاتبان لي ديك لH بحال هكاك ا كاتزيد تتحل ليا
خديجة : وا لاجينا للصراحة زوينة هاد البلاصة لي كاتخدمي فيها ... ماكرهتش تا انا ربي يعفو عليا من هاد البلاد
حياة : راه قلت لك ديك المرة لي كاين غير نرصي أموري والله ماننساك
خديجة : و بعدا كاينة شوية ديال الراحة فيها؟
حياة : اش غانقول لك ايلا كانت شي حاجة خاص تعرفيها هي فاش تجي لهاد القنت ضربي على النعاس لابغيتي ديري شي حاجة .. ماشي ماتنعسيش كاع ولكن دوك السوايع لي غاتنعسيهم و كايكونو زايدين راهم زايدين فيك ديري فيهم شي حاجة .. مثلا غاتنعسي 8 ديال السوايع؟ نعسي 4 و دوك 4 لاخرين تقدري ديري فيهم بزاف ديال الحوايج
خديجة : ولكن عاوتاني هكاك راه كاتهلكي غير صحتك .. خاصك ترتاحي على الاقل 8 ديال سوايع باش ماتفوتايش قبل الوقت
حياة : نو ماشي ضروري .. الوقت لي كايحتاج كل واحد فينا فيه للراحة كايختالف من واحد لواحد [ بدات كاتفوه ] المهم شوفي انا غانخليك خاصني ننوض تابعاني غدا شحال من حاجة
ودعاتها وحطات راسها على المخدة كانت باغا تنعس ولكن طاح فبالها داوود .. هي عارفاه ماغايكونش نسا داكشي لي دارت فختو واخا يكون قبل بالزواج ديالها بخوها ولكن ماغايكونش نسا ، قنعات خديجة بالهضرة ديال غايكون نسا ولكن باش تقنع راسها؟ هي لي عارفة غير فاش كان كايحط شي حد يديه عليها ولا عينيه كان كايدير حوايج لي ماكايطيحوش ليها على البال فما بالك بلي يتعدا على ختو و لي يكون السباب فأنه يتعدا على ختو .. ولكن بلاتي مالها هي لي تعدات عليها؟ يمشي لعند وليد نيت يقلب عليه
تقلبات لجهة خرا ... اصلا امبوستاحيل يلقاها هنا واش غير اجي و لقا بنادم وسط الملايين ديال البشر؟ الحماق هو هدا
عاودات تقلبات على جنبها ليسر وبدات كاتدعي فيه غير بالغرق يا يلوحو يا البحر يا مايلقاوش الكسدة ديالو و تتهنا منو .. على أساس داكشي لي دار هو ساهل؟ يستاهل أي حاجة دارتها فيه و أي إحساس خلاتو يحس بيه و بغات ليه الموت مزال باش حتى داك الاوكسجين مايبقاش مشاركو معاها
تفكرات عادل ... خاصها ضروري فالصباح تسيفط ليه الفيديو ديال حناه فاش كانت كاتعاملها بديك الطريقة الخايبة .. حيت فالأصل هي سينات معاه هو باش تسامحو ولكن ماسيناتش باش تسامح حناه في حين هو سينا بلي سمح لها و هنا باقا عندها واحد النقطة ديال القوة غاتهددو بيها باش ايلا مشا زغبو الشيطان و فكر يديكلاري بيها على اساس كارية الدار و كارياها للحراكة غاتغرق الشقف حتى لحناه .. ناضت من بلاصتها و مابغاتش تأجل هادشي حيت ماتعرف شنو كاين
دخلات للواتساب و سيفطات ليه الفيديو ة معاه أوديو بلي عرفات هو لي وصل الهضرة لمروى على الحراݣة و بلي عرفاتو حاضيها .. داكشي علاش ايلا مشا حتى بغا يخدم معاها الشكامة دنوبو على راسو ...
فكرات تسيفط شي حد يدير شي شوهة فالعرس باش الخدمة لي مادارهاش داوود ديرها هي و مايكملش داك العرس ولكن ديك الشوهة كانت عاوتاني غاتضر خوها و ماماها و غاتبقا تاني ملاهية غير مع هادشي و هما أصلا مزال ماسامحوها يعني غاتزيد تطبز لمها العين و السلام .. تراجعات على الفكرة و حطات حاجة وحدة فراسها غاتركز مزياان على هاد المستقبل و تحاول ماتتلاهاش بحوايج خرين و غير غاتضبط أمورها غاترجع لهم واحد بواحد ... كلشي غايكون مقيد فالكارني
نهار العرس ديال خوها هي كان عندها نهار عادي مزال كون تزوج بشي وحدة خرا ممكن تبارك ليه اما بخت داوود؟ امبوستاحيل داكشي علاش ماعمراتش راسها بيه بزاف و بقات كادوز أيامها بالبروغرام لي ولات غادا بيه بقات غادا على هاد الحال حتى دازت سيمانة و وصلات نهاية الأسبوع الراحة من الخدمة ولكن عندها ماكانتش الراحة حيت كانو عندها بزاف ديال الحوايج خاصها ديرهم و من بينهم خاصها تقاد أمور ديك التصويرة لي خدمات عليها بالفوطوشوب ... حلات البيسي ديالها و دخلات حلات محفظة خاصة بيها فميطا ماسك باش تما غاتبقا تخبع كاع الممتلكات الرقمية ديالها لي غاتولي تخدم عليهم ... الحاجة لي عجباتها و جاتها كانتها عليها فهاد المحفظة هي واخا بنادم كايجيه السيزي و يمشيو ليه جميع الأملاك ديالو ولا مثلا كايتزوج وكايبغي يطلق و كايخصو يقسم الاملاك ديالو مع طليقو ... غايقسم معاه غير داكشي لي على ارض الواقع ولا جاه السيزي غايمشي ليه غير داكشي لي عندو على أرض الواقع اما الممتلكات الرقمية لي عندو كايبقاو فالحفظ والصون ومع العلم يقدرو دوك الممتلكات يكون ثمنهم أغلى من ممتلكات الشخص على أرض الواقع ... ممكن تكون صورة وحدة عندك فديك المحفظة تقدر تشري بفلوسها قصر على أرض الواقع و ممكن تخليك تولي مليونير ولا ملياردير
غير سالات من ميطا ماسك و دازت حلات كونط اخر فأوبن سي لي غاتولي تبيع فيه الأعمال ديالها .. كان واحد الموقع لي تقة و باش عجبها كتر ، كان أمن و زيد عليها عندو ميزات بحال مثلا كايتحطو فيه غير الانفيتي الأصليين و مستحيل تتحط فيه شي حاجة مقلدة يعني مثلا شي حد بغا يهز خدمتها ويطيليشارجيها و يستفاد منها ماكانوش غايقبلوها ليه اصلا باش تتحط عساك باش تتباع
طيليشارجات الرسمة ديالها فأوبن سي من مور ماخلصات نفقات الݣاز لي فرضوها عليها .. ماكانتش غالية بزاف 70 يورو اي 700 درهم ... و تمنها كان مناسب لحياة
ناضت من تما راشقة لها من مور ماريݣلات أمورها ... ماكانش عندها مشكل ايلا مادخلاتش ليها ديك الرسمة شي حاجة نييت حيت ببساطة كانت أول تجربة ليها فداك الميدان لي من 2013 و هي كاتسمع بيه .. كان بالنسبة ليها بحال شي ثغرة لعالم الأغنياء بحال شي تقبة فالحيط كاتقدر تقتاحم بيها العالم ديالهم بلا ماتبقا كاتدمر حياتك كاملة باض تشري طويميبيل و دويرة و بلا ماتبقا تدمر باش دير لاباس و ماتدير شوية ديال الفلوس حتى تلقا راسك وصلتي ل50 عام .. شبابك يضيع غير فهادشي و فاش تموت تخلي الفلوس لولادك هما يستمتعو بيهم
كانت عارفة مزياان علاش شي دول عربية حاظرين الفن الرقمي و تداول العملات وعلاش كايطلقو عليهم إشاعات وكانت عارفة بلي حتى المغرب طال الزمان ولا قصار غايحظرهم حتى هو مدام ولا كايعطي فالتحذيرات عليهم و كانت عارفة مزياان بلي هاد الضغط كامل جاي فالاصل من الاغنياء لي كاينين فدوك الدول .. كيفاش اصلا غايتقبلو يجي واحد من وراهم و يدير لاباس بوالو؟ و هما لي حياتهم كااملة و هما يخدمو و يردمو هما وأبائهم .. يعني هاد رد الفعل كان شيئ طبيعي ولكن حياة ماكانتش داياها فدوك الاشاعات .. راها ماشي صغيرة ولا منونخة باش تتيق اي حاجة كايقولوها داكشي علاش قررات تستغل هاد الثغرة لي كاتجي مرة فالقرن و ماديرش كيما دارو جدودها فاش كانو الأراضي ب2 دراهم للمتر هما كانو مقابلين الزهو و الشيخات فبلاصة مايستغلو الرخص لي كان فوقتهم .. وي
هي ماكانتش باغا هادشي ... باغا تستمتع بشبابها و بالفلوس و تعيش حياة الرفاهية و هي باقا صغيرة .. توصل لمستوى لي جدودها و ماوصلوش ليه داكشي علاش قررات تستغل هاد الثغرة .. وي هي تزادت مزلوطة وفقيرة و هدا ماكانش الغلط ديالها ولكن إيلا ماتت بنفس الزلط لي تزادت بيه هنا فين غايكون الغلط ديالها و ماكاينش فرق بينها و بين جدودها ...
مشات قضات شغالها و رجعات جلسات بدات فالدورات ديالها و ما هي الا لحظات حتى صونات عليها خديجة .. جاوباتها كالعادة و بقات خاشية راسها فالبيسي كاتهضر معاها و هي غير كاتهمهم زعما راني متبعة معاك و كانسمع اش كاتقولي
خديجة : و فراسك بعدا شنو دوزو فالأخبار
حياة : [ عينيها فالبيسي ] هممم
خديجة : وا حيااة
حياة : ويي راه كانسمعك راني معاك ا صاحبتي
خديجة : واش ماسمعتيش اخر الاخبار؟؟
حياة : اخر الاخبار ولاو كايجيوني غير من عندك .. شي حاجة عاوتاني باينة
خديجة : اودي غا سكتي قالك البحر لاح شي وحدين كانو حارݣين لسپانيا قلبي تشوا عليهم والله .. خاصك تشوفي واحد البنيتة صغيرة تا هي بينوها يمكن كانت حارݣة هي و واليديها ولا شي حد معاها
حياة : ايوا الله يرحمها و يرحمهم كلنا ليها هما سبقونا و حنا غانلحقوهم
خديجة : بقات فيا غا البنيتة قطعات ليا فقلبي
حياة : [ رجعات خشات راسها فالبيسي ] بنادم كايموت يوميا و الموت ماكاتعرف لا صغير لا كبير عادي
خديجة : و ماتفكرتي والو؟
حياة : بلا ماتجبدي لي سيرتو تاني راه اصلا العرارم لي كايحرݣو ماشي هو أول واحد
خديجة : ماعرفتش ولكن على ماكنت سمعت تا هو كان غايحرݣ من مور عرس ختو .. مايكونش زعما غرق؟
حياة : هداك راه مش ب7 رواح ولكن من فمك لربي .. على الله تكون هضرتك بصح
شافت فالتاتو ىي فالمعصم ديالها .. غطاتو بالتريكو باش ماتشوفوش و عاودات شافت فالبيسي وكملات هضرتها
حياة : بدلي بدلي الموضوع شوية
بداو كايهضرو و شي مرات كاتكون مركزة معاها فهضرتها و شي مرات مركزة مع قرايتها تا سالات معاها وقطعو الاتصال .. كانت متوقعة منو غايسلك راسو و غاينجا و ماكانش فراسها بلي كاع لي كانو راكبين فديك الفلوكة شي لاحو البحر و شي مزال .. ماكانتش معمرة راسها بهادشي و الايام لي كانو كايدوزو واحد من ورا واحد كانت كاتتسنا فيهم غير تشد أول خلصة ليها و فعلا وصل النهار لي دازت لها فيه 6000 يورو للكونط ديالها .. ماقدااتها فرحة و أول حاجة دارتها هي مشات لعند المحامية من مور ماوجدات واحد الوثيقة و عطاتها تسيني عليها كدليل بلي دوزات لها 5000 يورو للكونط واخا كان ديجا عندها دليل اخر ولكن زادت حتى هدا باش ماتڤنڤنش معاها و غير سالات مشات شرات حلوة بلا كريم باش تحتافل براسها على هاد التقدم الملحوظ .. بقا عندها 16 المليون ديال الكريدي يعني 4 شهور كاع غاتخلص لي عليها و تتفك
مشات للدار و جلسات كاتتسنا دراري يجيو من الخدمة ماكانتش باغا تاكل الحلوة بوحدها ولا نقولو مابغاتش تحتافل بوحدها ... كون كانت فالمغرب كانت غاتحتافل مع صحاباتها و عائلتها داكشي علاش هنا جلسات كاتتسنا دراري حتى جاو عاد دوقاتهم من الحلوة ... كانت واقفة معاهم فالكوزينة ورااشقة لها حتى سمعات التيليفون كايصوني مشات تشوف شكون كايصوني طلعات لها نمرة ديال المغرب ماداخلاش لعندها ولكن بحالا فايتة دازت على عينيها هاد النمرة ، جاوبات و بدات كاتتسنا تسمع صوت المتصل حتى سمعات صوت البكا والنواح ديال واحد البنت ، كاتعرف هاد البنت مزيان و كيفاش لا و هي كانت فالكليكة ديالها
حياة : صابرين؟؟
صابرين : [ كاتبكي و هضرتها كاتتقطع ] الله ياخد فيك الححححق ا حياة .. الله يعطيك الغرق لي تغرقي فيه و عمممرك تقدري تنوضي منو خرجتيي علييه
حياة : علامن كاتهضري؟؟
صابرين : رزيتيينا فيه [ كاتغوت و صوتها مبحوح بالبكا ] ماتهنييتي تا خليتينا نشوفوه مكفن ماتهنييتي تا خلييتي خالتي لطيفة تترزا فولدهااا .. عممرو ما فكر يقطع البحرر تا عرررفك نتييي ، ايلا ماكاتبغيهش علاش لصقتيي فيه .. علاااش رزيتيينا فيه
بدا قلبها كايتوجس من مصدر مجهول .. ماكانتش تايقة فهضرتها وماتايقاش فبكاها و ماتايقاش اصلا بلي تقدر توقع ليه شي حاجة .. طلعات لها حتى نمرة خديجة كاتصوني ، قطعات على صابرين وخلاتها كاتنوح كانت باغا تتأكد من هادشي لي سمعاتو
خديجة : واش فراسك شوقع؟؟
حياة : [ كاتحاول تتأكد من صحة كلام صابرين ] اش وقع
خديجة : دعاويك خايبين والله ... ماعرفتش شدار لك ولكن ماعطلاتوش ، كنت فداركم هاد النهار و سمعت من خالتي فتيحة بلي خو وفاء لاحو البحر و لقاوه هاد نهار
حياة : [ بعدم تصديق ] مايمكنش ، غايكون غير تغالط لهم مع شي حد
خديجة : لا لا ماكانظنش ، وفاء كانت حالتها حالة اليوم ومشات لدارهم هي وخوك
حسات بدقات قلبها كايتسارعو و واحد البرودة هبطات على قلبها ... ماكانتش متيقة نهائيا بلي غايكون طرا ليه شي حاجة .. واش صافي بهاد السهولة؟؟
حياة : راه قلت لك غايكون غير تغالط لهم ... واش شفتي شي جنازة بعينيك؟؟
خديجة : الصراحة ماشتش ولكن غانمشي مع خالتي فتيحة ليها حيتاش بغات تلحق عليهم
بقات كاتتسنا داك الفيديو يوصلها على أحر من الجمر .. كاتتسنا غير ايمتا توصل خديجة ، مشات لها الشهية تا ديال ديك الحلوة مزال حتى ماضحكات مزيان و ها هي هجراتو ... جلسات فالكنبية و بدات كاتتسنا خديجة و كل شوية تصوني عليها تسولها واش وصلات واش لا ... حتى سيفطات لها فيديو فالواتس اب .. خلاتو يطيليشارجا ولكن من زهرها المكوز الويفي تقال فديك اللحظة بحالا حتى هو كايلعب بيها و بأعصابها .. بدات كاتهزهز رجليها و كاتتسنا بفارغ الصبر تشوف الفيديو حتى تفقصات ، ناضت لبسات عليها و خرجات باش تشد الويفي من قنت اخر فالزنقة .. وفعلا شداتو و تشارجا الفيديو ، قد ماكانت كاتزيد تتفرج فيه كان قلبها كايتزير بحالا شدو شي واحد و عصرو فيديه ، تجمدت أوصالها وقلبها كان يقرع كالطبول فالأعراس ولكن هاد المرة كايتقرعو فجنازة روح حسات بشي حاجة فشكل .. ياك هي كانت كاتدعي فيه؟؟ كانت باغاها فيه؟ واش صافي دعوتها تقبلات؟ دعوتها ماكانتش خارجة من القلب و مافاهماش علاش دابا قلبها كايضرها ، واش مات بسبابها بصح؟؟ واش بصح روح مشات بسبتها؟؟ واش بصح كان ناوي يحرݣ غير على ودها؟ تفكرات الهضرة لي كان قالها ليها فاش كانت فالمطار كيفاش نساتها؟؟ هو حلف تا يخرج لها يعني فعلا كان حارݣ على ودها و بهادشي مات ... عممرها مابغات شي حد يموت بسبابها و من ديما كاتقول لي بغا يموت يموت بعيد ، النهار اللول لي مشات تزورو فالسبيطار مشات و هي ماباغاهش يموت بسبتها ولكن دابا شنو؟ ها هو كاتشوفو مات بسبابها يا بسباب دعوتها يا حيت اصلا هي السبب الرئيسي لي مخليه يحرݣ على ودو
رجعات للدار و هي ساهية .. مشات ديريكت لبيتها وجلسات فوق الكنبية .. كانت كاتعاود داك الفيديو كتر من مرة ، هاديك دارهم و هداك حتى هو بابهم و هاديك لي كاتبكي فداك القنت مو و هادوك لي كايواسيوها ماعرفاتهمش شكون .. هاديك راها وفاء و لاخرا صابرين وكلهم كايبكيو و كايواسيو فيهم
لاحت التيليفون ولأول مرة غاتحس بتأنيب الضمير على شي حد حيت هاد المرة كاتشوف بلي مشات روح بسبابها ولكن خلف داك تأنيب الضمير كانو حوايج خرين لي كانت قامعاهم من صغرها .. كانت فصراع مع ذاتها .. حاسة بقلبها شاداه واحد الرعادة فشكل .. يمكن حتى فاش كانو كايموتو جدودها ولا شي حد فالعائلة ماكانتش كاتحس بهاد الإحساس .. عادي كاتحضر للجنازة بحال اي عراضة و صافي ولكن دابا الامر مختلف ، زادت خديجة سيفطات لها واحد تصويرة بالخف ، و ديك التصويرة بالضبط غير زادت كملات على لي فيها وموراها سيفطات لها أوديو بلي غاترجع لدارهم
فديك الليلة ماجاهاش النعاس و كاتبان قدام عينيها غير التصويرة لي سيفطات لها خديجة
° صبح الصباح وماكانتش شابعة نعاس حيت كانت نعسات غير ساعة ... ماكانت عندها الكانة تهضر مع حتى واحد والا تشوف حد ، مورالها كان تحت الصفر و ماباغاش تمشي للخدمة ولكن بززات على راسها .. مشات و هي مفشكلة ... وجهها ماكانش كايتفسر و حتى خدمتها فداك النهار ماكانتش كاتتفسر حيت ناقصة و مامركزاش ... كان الذهن ديالها مشتت و فبالها كادور حاجة وحدة هي كاينة روح مشات بسبابها و هي فنظرها اي واحد كاتمشي روح بسبابو كايتعتابر قتال واخا مايكونش هو لي قاتل
ماكرهاتش ترجع للدار و تبقا هاد نهار غير بوحدها مع راسها ولكن مابغاتش ديرها حيت الخدمة كاتبقا خدمة و ماباغاش يجريو عليها لأي سبب كان ... فواحد اللحظة كانت جالسة و كاتهضر مع واحد العميل فيه الهضرة بزااف و مغنان بقا كايتغان معاها و ماحسات براسها حتى غوتات عليه ... ناضت من تما و مشات للمراحيض ديال الاناث .. رجعات شعرها اللور و بدات كاتغسل فوجهها و تعاود ، رجعات بخطواتها اللور حتى تكات ضهرها مع واحد الباب .. كاتخاطب راسها
مالها على هاد العزو؟ صافي ياك هي ماقتلاتوش بيديها ... البحر لي داه ، بدات كاتحاول تقنع راسها بهاد الهضرة .. قادات مكياجها ورجعات لبلاصتها و حاولات تصلح الغلط لي دارت مع داك العميل باش ماتخرجش على خدمتها ولا يسبب ليها شي مشكل
غير سالات معاه و صلحات الغلط ديالها و هي تهز تيليفونها .. كانت باقا نفسيتها ماشي حتى لتم ، دخلات لداك الفيديو و عاودات شافتو للمرة العاشرة ، مسحاتو من عندها هو و تصويرة باش ماتبقاش محمقة راسها معاه و تبقا كل شوية كاتعاودو
داز عندها داك النهار مريض و كانت كاتتسنا غير فوقاش يسالي باش ترجع لدارها ، ماسالا غا بزز .. رجعات ودخلات لبيتها و مشات حلات الماريو ... بدات كاتقلب بين حوايجها على شي حاجة حتى لقاتها ، كان داك الزيف البيض لي فيه دوك القطرات ديال بكارتها الاصلية .. داك الزيف هو لي كايزيد يثبت صحة هضرتها هو السباب حتى وصلو لهاد الحالة ولا مات غايكون مات بسباب فعلتو ... لاحتو فالكنبية ، هاد المرة داك الزيف ماكانش كافي باش يخليها ماتحسش بتأنيب الضمير حيت كايبقا مات و هو فطريقو ليها ...
بداو كايدوزو عندها الأيام و كل مرة كانت كاتمشي عينيها للمعصم ديالها كاتلقا سميتو باقا موشومة في حين هو مشا .. كل مرة كان كايصوني عليها واحد ... صونات عليها لطيفة ماخلاتش ليها بالدعاوي ... صابرين كل مرة كانت كاتصوني ولكن مع الوقت بداو كاينقاطعو الاتصالات
دازو الأيام و الأسابيع و الشهور وخوها و مها باقيين ماشي هما هادوك معاها ، توحشات ماماها بزاف ماكانش كايسحابلها غاتبقا مقلقة منها هاد المدة كاملة ، فهاد المدة كان الذنب ديال داوود ديما مرافقها و هادو من بين الحوايج القلااال لي يقدرو يخليوها تحس بتأنيب الضمير
طبعا فهاد المدة ماكانوش واقعين معاها غير الحوايج السلبية كانو بعض الحوايج الايجابيين ولكن لدابا كانو قلال ... كان فبالها فاللول تمشي لفرنسا من مور عام ولكن لقات بلي هادشي غايكون سلبي كتر ما هو إجابي ... حيت ايلا سالا العام و مشات ماغاتستفادش من داك الصالير لي كان مزيان و ماغايتطورش ل5 الاف يورو و ماغايكونش عندها شي رأس مال كبير باش دير بيه شي حاجة ففرنسا والاهم هو كانت باغا ضروري ديك شهادة السكنة ديال 3 سنوات و حتى دراري لي كانت كارية لهم كانو محتاجينها
داز عندها العام وخلصات الكريدي ديالها كلو فظرف 6 شهور ... كانت دايرة شي حاجة من فوق جهدها باش تبقا عند حسن الظن باش العام لي موراه يوليو يخلصوها بحالها بحال لي معاها و داكشي لي كان غير سالا العقد عاودو معاها عقد اخر و وصلو لها الخلصة ل5000 يورو و كملات معاهم حتى داك العام حتى اللخر و بدات معاهم فالعام الثالث ديالها ، و هنا كانت كملات 3 سنوات ، 3 سنين و هي فإسبانيا وخدامة بدراعها كاتقتاصد و توفر فالماكلة ولكن فاللبس كانت أناقتها فيه ديما حاضرة ... الشواهد لي كانت كاتشد من كورسيرا حتى هما ماكانتش كاتبخل عليهم باش تخلص بالعكس حيت كانو مهمين ليها باش تزيدهم فالسيفي ديالها ... خرجات الرسمة ديال مارلين لأرض الواقع و زادت لها شي إضافات ... دارت الپيرمي ديالها وبزاف ديال الحوايج خرين غاينفعوها ، ماوصلات ل25 عام حتى كانت ولات مستقلة ماديا و عندها رأس مال تقدر دير بيه مشروع يرجع لها بالمداخيل و هدا بحد ذاتو كان تطور ملحووظ فيها حتى مدام تورية ردات لها البال فهادشي و ردات لها البال كيفاش كادير المعارف بشي طرق كان فيهم التلاعب مي داك التلاعب بطريقة زوينة حيت فالوقت لي كان شحال من واحد كايدير المعارف بلحيس الكابة و كايبقا تابع داك الشخص لي باغي يشري معاه المعرفة هي كانت كاتخلي داك الشخص لي باغا تشري معاه المعرفة هو لي كايسول فيها ، كانو عندها المعارف بحال أهداف كاتبغي توصل لهم .. كاتختار الهدف بدقة و كاتتسنا حتى يكون محتاج لشي خدمة لي مايقدرش اي واحد يقدمها ليه و كاتقدمها ليه هي واخا تعرف تحضرها من السما و بهاد الطريقة كاتخليه مدين ليها بخدمة ... ماكانتش معتامدة غير على هادشي ، كانت شي مرات كاتعطي بعض الحلول لداك الهدف ديالها ايلا لقاتو واحل فشي حاجة و الأهم هو ماكانتش كاتتملق بنادم .. و هادشي لي كان عاجبهم فيها ، ماكانتش كاتصبغ مثلا ايلا شي حد قال لها ماعجباتنيش ديك الحاجة و هي كانت عاجباها ماكاتقولش ليه حتى انا ماعجباتنيش غير باش تخليه يحس براسو عندو ذوق بل كانت كاتدافع على ديك الحاجة و كاتوريه المزايا لي فيها و كاتخلق معاه نقاش عليه و نفس الشيئ ايلا كانت شي حاجة ماعاجباهاش و داك الشخص عاجباه كاتقوليه بصريح العبارة بلي هاديك حاجة مبتذلة و كاتدخل فنقاش اخر معاه
دازت عندها 3 سنين ماقرباتش لعادل ولا حناه .. 3 سنين و هي بعيدة على المشاكل بجميع أنواعها و الخايبة هي أنه 3 سنين دازت و عائلتها باقيين مقلقين منها
بدات كاتريكل امورها باش تمشي لفرنسا من مور ما هضرات مع ألفونسو و مدام تورية على الانتقال ديالها لفرنسا و هضرات حتى مع دراري باش ييداو يقلبو على راسهم حيت 3 سنين لي تفاهمات معاهم عليها ها هي سالات .. فهاد الأثناء كانت كاتمشي لفرنسا و كاتجي باش تريݣل الأمور ديالها و البلاصة لي غاتسكن فيها باش ماشي حتى تكون متقلة بالحوايج عاد تبدا تتجرجر فلوطيلات
وصل نهار سفرها و الانتقال ديالها لفرنسا - باريس .. اراك للسيزي عارفة راسها تما الكرا غالي بزاف على اسبانيا و المعيشة غالية على إسبانيا ولكن هي ماناوياش تمشي باش تجلس .. ودعات مدام تورية و دراري لي دوزات معاهم يامات زوينين واخا كانو واحد جوج منها مرة مرة كايجبدو موضوع الزواج ليها و هي عارفة مزيان غير على ود مصلحتهم ... تصورات معاهم اخر صور قبل ماتمشي من تما و شدات الطريق لفرنسا .. غير حطات فيها رجليها أول حاجة دارتها هي تصورات تصيورات باش تلوحهم فالانسطا و موراها مشات لديك البرطمة لي كرات كانت صغيرة شوية على ديك لي فإسپانيا حيت خاصها تقتصد و ماتطبش فالفلوس ، مزال خاصها تلقا خدمة و شحاال من حاجة ... حطات الطابلو لي جابت معاها بحذر و مشات دوشات و نشفات شعرها وبدلات حوايجها و خرجات باش تشري نمرة و تعمر التلاجة و نيت باش تعرف الطرقان ...
بقات كادور حتى طابو رجليها عاد رجعات للدار صونات على كليكتها و هضرات معاهم أبيل فيديو و موراها صونات على مدام تورية علماتها بلي وصلات و كلشي بيخير لحد الساعة و غير سالات معاهم سيفطات لمحمد ميساج علماتو فيه بلي مابقاتش فإسپانيا ومشات لاحت تصويرتها فالانسطا
ناضت قادات ماتاكل و هزات البيسي ديالها بدات تقلب على شي خدمة و كاتتمنى تلقا الخدمة لي بغات بالضبط .. كان فيها ماتدوي مع مدام تورية تشوف لها المعارف ديالها ولكن مابغاتش حيت جات للهنا باش تعول على راسها و مايقول لها حد انا لي ضبرت لك ولا انا لي درت لك و زيد عليها هي فداك العام مادوزاتوش غير هكاك حيت كانو عندهم بعض العملاء نيت هنا ففرنسا و كاين منهم لي فباريس وهادو كانت حرييصة باش دير معاهم المعرفة لربما شي نهار تبغي شي حاجة من شي حد منهم
دوزات أيام و أيام و هي كاتقلب على لي بغات ولكن مالقاتش .. ماكانتش باغا تبقا جالسة فالدار حتى تلقا شنو بغات حيت غير غاتبدا تخسر فالفلوس لي عندها فالكونط داكشي علاش ولات كاتقبل بالخدامي الصغار ... لقات خدمة مابيهاش و بدات فيها و دوزات معاهم فيها شهر و بدلاتها فاش لقات خدمة حسن منها ولكن حتى ديك الخدمة ماكانتش مرتاحة فيها داكشي علاش ماكانتش ناوية تطول فيها كانت كاتقلب غير على ما حسن و ماحسات بفرنسا بدات كاتضحك لها حتى لقات خدمة فواحد المعرض ديال الفنون فباريس نيت
هو فالأصل ماكانش معرض واحد ولكن كانو معارض هما ... يعني غاتبقا كاتخدم فديك البلاصة لي كايتقامو فيها المعارض و فكل معرض كايتقام فديك البلاصة كانت غاتكون خدامة تما ، تأنقات كعادتها و يا للصدفة صدق هداك مول المعرض واحد من العملاء لي سبق ليها تعاملات معاهم .. غير شافتو عرفاتو و حتى هو عرفها بحكم فايت ليه طلاقا معاها و دخلو فواحد النقاش نيت لي كان على واحد المنتج هو ماكانش عاجبو نهائيا و هي بدلات ليه الرأي ديالو فيه وخلاتو يشوف شي حوايج هو ماشافهمش و حتى داز الوقت عاد عاق بيها خدمات معاه واحد السياسة لي عتامدات فيها على ذكر الامتيازات و ضخماتهم ليه زيناتهم فنظرو ... ركزات ليه على شي تفاصيل صغاار و خلاتو يشوفو من جوانب خرين و حتى الحوايج الخايبين لي فداك المنتج عطاتهم استعمالات خرين الشيئ لي خلاهم يتحولو لميزات ، كانو لقائاتهم معدودين على رؤوس الاصابع ولكن المكالمات ديالهم كانت شحال من مرة هضرات معاه .. تاني لقاء كان محتاج فيه لمساعدة و هي عاوناتو و تما فين تبادلو الأرقام و الاهم من هادشي كامل هو أن هاد الشخص كان مدين بخدمة ليها
الحوار بالفرنسية
_ [ حل يديه باش يعنقها ] الصدييقة
لا مايمكنش ... هاد البلان بالضبط لي فيه ماكاتحملوش ، فيه كترة التعناق بزاف وي كاتحس بيه عفوي ولكن راه غير السلام باليد بوحدو كافي .. لاش التعناق مع كلشي ، كانت كاتحس بيه من داك النوع لي عزييز عليه العيالات مي ماشي نسونجي لا هدا عزيز عليه يتجمع معاهم و حتى ستايل ديالو كان فشكل كايشبه شوية لدوك الحوايج لي كايلبسوهم المتحولين مي الفرق بين هدا و هادوك هدا كانو ميولاتو طبيعية و غير داير ديك الحالة بسباب الموضة
بادلاتو العناق بعناق خفيف باش ماتخليهش معلق وبعدات عليه ونطقات
حياة : [ بإبتسامة ] مسيو بوفس وا صدفة و اشمن صدفة هادي
حياة : [ قرنات حجبانها ] واش ماكاتردش البال لناس لي غاتخدمهم معاك؟
شاف الوراق لي فيديها وشدهم من عندها ورجعهم لها و حط يدو على جنبو ونطق
بوفس : نو واي واش مابقيتيش خدامة مع شركة HMI؟
حياة : [ ضحكات بخفة ودورات عينيها على المكان ] ماكتابش نكمل
بوفس : [ حط يدو على ذقنو و شاف فيها بإهتمام ] علاش؟ واش التعامل ديالهم كان خايب ولا الخدمة كانت قاصحة عليك
حياة : بغيت نبدل شوية و صافي .. مابقاتش عاجباني إسبانيا و بغيت نشوف فرنسا كي دايرا
بوفس : فوقاش جيتي؟
حياة : شي شهراين دابا تقريبا
بوفس : وماقلتيهاش ليا ماشي حشومة عليك
حياة : راك عارف كاتجي فاللول صعيبة الانسان ينتاقل لشي بلاد .. كان خاصني نقاد أموري ..
عرف بلي هادي اول مرة تخدم فشي معرض ولكن كان عارف بلي غاترجع عليه بالمنفعة اما هي ماكانتش ناسية الخدمة لي باقا كاتتسالها ليه ماجبداتش ليه سيرتها دابا باش بعدا حتى دير بلاصتها داكشي علاش كتافات هاد النهار غير بالموضوع ديال الخدمة لي رصاتو معاه و قادات أمورها معاه فيه
خرجات من عندو ورجعات للبرطمة ديالها .. بدات كاتقلب على شي طوموبيل صغيرة و زوينة رخيصة تشريها باش تتهنا من فلوس المواصلات ، لقات وحدة و صونات على مولاها هضرات معاه عليها و ماجات فين تبدا خدمتها الجديدة حتى كانت قادات أمورها مع البائع لي باع لها الطوموبيل ... ماقداتها فرحة حيت اول مرة غاتكون عندها طوموبيل ديالها والأهم هو شارياها بفلوسها و بعرق كتافها ... صوراتها و سيفطاتها لمدام تورية و للبنات و بدات كاتتصور حداها و بارطاجات كالعادة التصاور فالانسطا ، ماكانتش غاتقدر تبقا تمشي و تجي بيها من دابا حيت باقي خاصها عاد توالف داكشي علاش الأيام الأولى ديالها فالخدمة كانت باقا كاتمشي غير بالمواصلات حتى كاتخرج عاد كاطلق يديها فيها
دوزات أيامها فديك الخدمة عاديين كل سيمانة كان كايكون معرض مختلف و كل مرة كانت كاطلاقا بناس جداد ولكن هادشي ماكانش كافي حيت واخا كانت كاتطور حياتها الا و انها حااسة بالغربة .. على الاقل يهضرو معاها غير مرة فالسيمانة كاع .. ياك صافؤ محمد تزوج بوفاء؟؟ ايوا علاش باقيين معاها هاكا؟؟ لهاد الدرجة قلبهم قاصح؟ لدرجة حتى الفلوس لي كانت كاتبغي تسيفطهم ليهم مايقبلوهمش؟ مالها واش جايباهم من الحرام؟؟
ماكانتش عارفة بلي محمد عن قصد ماكايسولش و كانو تما أسباب ، و فالأصل واخا تزوج بوفاء الا و أنها باقا لدابا عندها ديك العقدة و باقا لدابا ماقادراش تعيش حياتها بشكل طبيعي ، واخا محمد كان داير معاها جهدو و من فوق جهدو لكن داكشي لي عاشتو ماشي شي حاجة لي غاتتنسا بين ليلة و ضحاها ، حتى هو ماكانش باغي يفرض راسو عليها ماشي حيت بارد و إنما حيت اصلا مايمكنش يفرض راسو على شي وحدة و حيت عارف مزيان شكون سبابها ... طوال هاد 3 سنين عمرو ماجبد لها سيرة الاغتصاب و حاول ما امكن ماحسسهاش بلي غير سترها ، كان كايحاول يحسسها بالأمان معاه باش تقدر تيق فيه و يخرجها من حالتها وفعلا كانت بدات تحس بالامان شوية معاه و بدات تتيق فيه ولكن العقدة باقا هي هي .. كان كايدير جهدو كامل باش يوفر لها و لمو كاع لي خاصهم بلا مايشد الريال من عند حياة ... اما فتيحة كانت كاتعامل وفاء بنفس الطريقة لي كانت كاتعامل بيها بناتها ، ماكاتخصرش ليها و ماكاتحرتش عليها .. حتى للهنا كلشي مزيان ولكن لي ماكانش مزيان هي زهور لي كانت فالأصل كل مرة تسممها و تفكرها و تخليها تعرف بلي ختو هي السباب بحالا كانت حرييصة باش ماتخليهاش تنسا والا تخليها تعيش حياتها بشكل طبيعي
° دازو أسابيع و فهاد الأسابيع طلبات من بوفس طلب و كان داك الطلب هو ديك الخدمة نيت لي مدين ليها بيها ، ماكانتش شي حاجة ساهلة طلباتها طلباتها شوية كبيرة هاد المرة و ماكانش ساهل يقبل كون مادارتش جهدها باش تقنعو و فعلا قبل ولكن بشرط لي قبلات بيه حيت هي عارفة بلي ماشي البلاصة لي عطاها هي لي غاتحكم على قيمة داك الشيئ و إنما هو لي كايدير القيمة لراسو
مشات لدارها بالزربة و جابت منها الطابلو ديالها ... البلاصة لي عطاها كانت مغطية و نقدرو نقولو الطابلو ديالها بحالا كان غايكون فالهامش حيت ماكانش يقدر يضحي ببلايص خرين على شي حاجة بحال هادي و ديك البلاصة لي عطاها راها بحد ذاتها حاجة كبيرة واخا جاية مدرݣة من تما حيت باش يكون الطابلو ديالها فشي معرض بحال هدا و هي مامعروفاش و الطابلو اصلا ماشي قديم و النوع ديالو كايكونو عليه الشبهات راه دار معاها المزيان و هنا مابقاتش كاتسالو و مابقاش كايسالها
[ الحوار بالفرنسية ]
بوفس : مابغيتش نحبطك ولكن راكي عارفة قيمة الفن بتاريخو
حياة : [ تبسمات و هي كاتشوف فالطابلو ديالها ] نحاول
بوفس : [ حط يدو على جنبو و عوج رجليه ] و دابا غانبقاو هنا ا مادموزيل احياة؟
حياة : [ شافت فيه ] راك ماعارفش قيمتو و..
بوفس : [ قاطعها بيديه وقلب وجهو بحالا ماباغيش يسمعها ] لا .. لا ماتجربيش فيا ماغانشريهش منك
حياة : [ ضحكات بخفة ] وا صافي مالك
بوفس : [ حط يدو على جنبو و اشار ليها بصبعو ] شحال من مرة درتيها بيا؟ هادشي ديريه مع الناس لاخرين [ صفق بيديه ] يلاه يلاه ا حياة حركي ديك القزيبة عندك و سيري بداي توجدي راسك للخدمة ماتبقايش واقفة هنا [ مشا و عاود وقف و ضار لعندها و دار لها اشارة بصبعانو جهة عينيه ] راني كانشوفك ماتبقايش مقابلة غير داك الطابلو ..
مشات تقابل خدمتها .. فهمات بلي كايلمح لها باش ماشي غير تتبالا فالطابلو ديالها و تبدا تشكرو و تنسا خدمتها ... ماكانتش ناوية دير هاكا ولكن فنفس الوقت ماكانتش ناوية تخلي الطابلو ديالها فالتوش حيت ايلا مادارتش مجهود فهاد الاسبوع و تستفاد من هاد الفرصة غايخصها تتسنا شحااال و ماعارفاش فوقاش غاتعاود تجيها بحال هاد الفرصة داكشي علاش حاولات ما امكن باش تسلط الضو على الطابلو ديالها ولكن ماكانوش بزاف لي كايديوها فيه حيت قليييل لي كايقبل بالتجديد و اغلب الاشخاص عهم افكار تقليدية على الفن و الرسم ... كاين لي كايميل غير لداكشي لي قديم و عندو تارييخ و حكاية و كاين لي كايميل لشي طابلو كايبدا يتخايل فيه شي حوايج و كاين لي كايميل لشي طابلو حيت كايخليه يحس بشي احاسيس ولا كايرجع ليه شي ذكريات .. ولكن الطابلو لي كان عليه الطلب بزااف و جذب الناس هو واحد الطابلو كان قريب شوية للطابلو ديالها غير الطابلو ديالها كان فالدورة ... مشات كاتشوف الطابلو لي كايتهتافو عليه ، مافهماتش شنو لي فيه مميز عبارة عن تخربيقة و السلام شي كايقولك كايشوف فيه راسو و شي كايقول لك كايشوف فيه شي حد عزيز عليه اما هي كانت كاتشوف فيه غير شخبط شخاابيط .. من سوء حظ لي كانو باغيينو كان داك الطابلو مبيوع
تقابلات حتى هي معاه وحاولات تعرف شنو فيه و ماكاينش فالطابلوات لاخرين .. ماكانتش فيه شي حاجة مميزة ، بعدات و تما عرفات بلي الانسان ماكايديهاش فالابداع بزاف قد ماكايديها فشكون مول داك الابداع و واخا يكون داك الشخص غير كايخربق يكفي تعرف سميتو و السينياتور ديالو .. و هدا من واحد الناحية كايكون ظلم لبعض المواهب لي مامسلطينش عليها الضو
بعدات من حدا داك الطابلو و كملات خدمتها مع الناس .. طوال الأسبوع كانت دايرا جهدها باش تبين الطابلو ديالها لبنادم ولكن المشكل هو بنادم ماكايزعمش و ماكايبغيش يغامر و كاين لي ماكايبغيش حتى يسمع والا يعطي الفرصة باش تثبت ليه بلي الطابلو ديالها مايمكنش لي جا يقلدو حيت فيه حوايج مميزة ولكن شكون يسمعك
بوفس كان شايف هادشي ومتوقعو حيت شكون غايغامر بالملاايين باش يشري طابلو بحال هداك مولاتو مزال مجهولة و مامعروفاش؟
وصل النهار اللخر فالمعرض و واخا هكاك ماستسلماتش ... حتى ايلا ماشراوهش على الاقل تعطيهم فكرة على الفن لي بغاتو يكتاسح الاسواق ... على الاقل تدخل لهم الفكرة كاين لي غاينسا هضرتها مي كاين عاوتاني لي غاتخلي هضرتها خدامة فالعقل ديالو
رجعات وقفات تاني قدام داك الطابلو لي ماحملاتوش ، باقي عقلها ماعارفش هدا لي بغا يرسمو فاش كان كايفكر؟؟ واش يديه مهرسين مثلا؟ راسم برجليه؟ واش كايضحك على الوقت
تحركات من تما و مشات لعند شخص عيط ليها .. بدات كاتتناقش معاه و كاتشرح لو شي حوايج ، سالات معاه و مشات عينيها لجهة داك الطابلو تاني شوية بان لها شي حد واقف قدامو و كايبان غير ضهرو .. شبه لها لواحد الشخص مي ماكانتش متأكدة منو ... شافت النص ديال وجهو و تما تأكدات من هويتو ، ماكانتش عارفاه مولوع بالفن وماكانتش باينة فيه أصلا
تقدمات لجهتو بخطواتها و وقفات قدام الطابلو .. حتى هدا قدر يجذبو ليه؟ العجب يا متعجب .. كانت عارفة بلي الطابلو مبيوع ولكن مابغاتوش يخرج من هنا حتى هو بلا مايستافدو منو والو داكشي
حياة : [ عينيها على الطابلو ] انتيغيسي بهاد الطابلو؟
أصيل : [ مرجع يديه اللور و باقيين عينيه على الطابلو ] شنو بان لك
حياة : الصراحة ماعنديش مع هاد النوع من الفن بزاف .. فالأصل ماكانفهمش فالفن بزاف ولكن هاد الطابلو كايجيني لا علاقة
أصيل : ماعندكش مع الفن وكاينة فبلاصتو
حياة : وي
أصيل : علاش
حياة : حيت خدامة هنا
رمقها بنظرات متفحصة .. ماكانتش مبدلة بزاف ، ملامحها باقيين هما هما .. شعرها نقصات منو و المظهر ديالها ولا أكثر رسمية ، كاتبان بيه كإمرأة عملية .. بعد عينيه عليها وماكانش ناوي يزيد يطول الشوفة فيها
أصيل : [ رجع كايشوف فالطابلو ] خدمتي هنا بالوجه
حياة : بمجهودي
أصيل : بيني لي
حياة : [ سكتات لثواني و بقات شحاال كاتشوف فداك الطابلو ] لي خدامين هنا غايبغيو يلصقو لك الطابلو باش تشريه .. غايزينوه لك فنظرك حتى غاتقول من هدا نخلاق مي فغيمون مايستاهلش
أصيل : خدمتكم تلصقو الطابلوات ، ولكن كانشوفك كاديري العكس
حياة : وي حيت فنظري هاد التخربيقة ماتستاهلش تخسر عليها حتى يورو
أصيل : [ عقد حواجبو واحد شوية ] إهانة للفن؟
حياة : ماشي إهانة مي هاد تخربيقة راه يديرها ولد صغير فعمرو 5 سنين .. هدا لي راسمها بحالا راسمها برجليه حيت حاشا واش تكون باليدين .. حاجة باينة غايكون داك الطابلو داير داك التمن غير بسباب شهرة الرسام ديالو
كان كايسمع هضرتها بإهتمام حتى سالات ونطق
أصيل : فوقاش بديتي الخدمة هنا؟
حياة : علاش واش هادشي كايهم؟
أصيل : [ تلفت لعندها و خشا يد فجيب ] وريني الطابلو لي كايبان لك يستاهل نشريه [ رمقها بنظرة شبيهة للإستهزاء ] ا مولات الحس الفني
حياة : تبعني ...
مشات وقفات قدام الطابلو ديالها و تبعها هو بخطوات تقيلة حتى وقف حداها ، بقا كايشوف فالطابلو شحاال عاد نطق
أصيل : [ هز حاجب ] هدا هو الفن عندك؟ تصويرة ديال مارلين مونرو؟
شافت فالطابلو وهي فخورة فيه و عاودات شافت فأصيل بنظرة غرور ... كانت عارفة مزيان شنو فداك طابلو
حياة : كون كنتي عارف قيمتها كنتي غاتقول تحفة فبلاصة تصويرة
تلفت لجهتها و تقابل معاها ونطق
أصيل : [ ببحبتو المميزة ] علاش غانحط فيها فيها الفلوس فالوقت لي غايلقاها غيري فشي صوق صيني ب5 يورو؟ [ عاود شاف فالطابلو ] حاجة لي تقدري تشريها ويشريها غيرك [ نطق بإستهزاء ] مارلين؟!
حياة : القضية ماكاتتعلقش بالشخصية لي فداك الطابلو .. كاتتعلق بالقيمة الأصلية للطابلو ككل
أصيل : بحالاش هاد القيمة
حياة : يقدر يكون بالنسبة ليك مارلين كانت شخصية مسالية قبها ماعندهاش شي إنجازات كبار لي عاونو البشرية و يقدر تكون كاتشوفها كانت غير أيقونة للجمال و مايكون عندك غرض بهادشي و..
أصيل : [ قاطعها ] كايعجبني الزين [ رجع تقابل معاها ] ولكن أنا سولتك على القيمة
حياة : كون ماقاطعتينيش كنتي غاتعرف القيمة
أصيل : باقي عندك الوقت
حياة : من غير مارلين لي هي بحد ذاتها أيقونة جمال كاينة قيمة خرا فالطابلو .. هاديك هي القيمة الحقيقية و الأصلية ديالو [ تبسمات بإبتسامة جانبية ونطقات بنبرة ثقة ] هاد الطابلو هو أول صورة ديال لNFT خرجات لأرض الواقع من مور ماكان غير فعالم إفتراضي كايدوز من سيت لسيت ، و لي مافراسكش و مافراسش كاع لي حاضرين هنا هو هاد الطابلو خرج لأرض الواقع قبل من التاريخ ديال المعرض لي غايكون فشيكاغو معرض imnotArt .. هاد طابلو قديم ب3 سنوات على المعرض ديال الفن الرقمي لي يلااه غايديروه ، القيمة ديالو طالعة على كاع الطابلوات لي غايكونو فداك المعرض وهادشي ماعارفو حد من غيرك هنا حتى من بوفس ماعارفش بلي هاد المعرض هاز أول طابلو خرج لأرض الواقع ، ونتا عارف مزيان بلي المستقبل ديالنا غايكون هو التداول الرقمي و هادشي كان واضح غير من عملة البيتكوين لي طلع الثمن ديالها فهاد ل10 سنين من 0,001 دولار حتى وصلات ل35,475,69 دولار .. واش فنظرك الفن الرقمي ماغايطلعش هاد الطلعة لي طلعاتها البيتكوين؟ هو أصلا دابا و طالع ولكن انا كانهضر على الصور والتحف لي ولاو كايخرجو لأرض الواقع [ شبكات يديها ] ايلا بغيتي نصيحتي ، ستغل هاد الفرصة وشري هاد الطابلو لي حاليا تمنو مابيهش .. شكون عرف من هنا 5 سنين ولا 10 سنين تولي ملياردير بسبابو .. ماديرش بحال داك لي شرا بيتزا دايرا ب25 دولار مقابل 10 الاف عملة بيتكوين هادي 10 سنين ، هو ندم و مانفعاتو ندامة ماتحطش راسك فنفس الموقف ديالو
تحركات من حداه باغا تمشي شوية وقفات ، حطات سبابتها على شفايفها بحالا تفكرات شي حاجة مهمة .. رجعات لجهتو و نطقات
حياة : ااه كاين واحد الفرق بين الطابلو و البيتكوين ، البيتكوين باقي تقدر تشريه وتشري شحال مابغيتي منو ولكن الإن في تي كايكون فيها من كل حاجة إصدار واحد ودير فبالك قضية خرا .. موحال واش طيح فبحال هاد الهمزة مرة خرا .. خاصة النسخة الأصلية لهاد الطابلو حيت نتا هنا ماغاتشريش غير طابلو ، غاتشري حتى النسخة الأصلية ديالو لي كاينة فالعالم الافتراضي و بخصوص تخاف لاتلقاها فشي سوق صيني ماعندكش علاش تخاف حيت الإصدار الأصلي كايكون مدعوم من بالبلوكتيشن لعنصر رقمي يعني حتى فاش غاتبغي تبيعها بنادم غايكون عارفها أصلية حيت غايقدر يفرق بينها و بين النسخة المزورة [ خرجات نفس طوييل و ختمات كلامها ] و أخر حاجة خاص تعرفها .. هاد الطابلو كاين نوع واحد من نوعو فهاد المعرض [ تبسمات ] ماتفلتش فرصة بحال هادي وتبقا خاشي راسك فديك تخربيقة لي لقيتك واقف حداها
خشا يديه فجيبو و تقدم لعندها بخطوات رزينة و على فمو كانت واحد الابتسامة خفيفة مبينة سنانو .. قرب لعندها و وقف
أصيل : [ ختارق عينيها بنظراتو ] عجباتني المعرفة ديالك فهاد المجال .. تبهرت فيك ماكنتش عارفك عندك العقل لي يهز هادشي [ زاد قرب بخطواتو ] ولكن ماجيتش للهنا باش نتاجر فالفن [ حول أنظارو لجهة الطابلو لي ماحملاتش حياة و نطق ] جيت باغي ندي التخربيقة ديال با سيدي [ حتى بغا يتحرك و هو يحبس و كمل هضرتو ] ماخدمش عليها بيديه حيت مقطوعين ليه
داز من حداها وخلاها واقفة فبلاصتها و متبعاه بعينيها .. دابا شنو واش هي عايرات جدو؟ السيد صدق بصح ماراسمهاش بيديه و هي لي كانت كاتقولها غير باش تعيب فداك الطابلو .. وزايدون مالها كدبات؟ كاتبقا تخربيقة و هي قالت غير الصراحة تقبلها تبارك الله ماتقبلهاش لهلا يݣلب ... لي مقطوعين ليه يديه الله يفرجها عليه
تحركات من تما وبدات كادور من واحد لواحد حتى قرب يسالي النهار و هي تمشي تسول بوفس على داك الطابلو ...
[ الحوار بالفرنسية ]
حياة : بوفس اجي نسولك
بوفس : ياكي عارفة هاد نهار اخر نهار لطابلو ديالك؟
حياة : واييه عارفة غير اجي نسولك ... داك الطابلو لي لهيه [ نعتات ليه ] واش مولاه بصح مقطوعين ليه اليدين؟
بوفس : [ بتعجب ] ماكنتيش عارفة؟
حياة : لا اول مرة نسمعها
بوفس : واقيلا ماعارفة والو منين ماعرفتيش الرسام لي رسمو و قصتو ... مافخباركش بلي كاع طابلوات ديالو راسمهم بصبعان برجليه؟ حيت وقع ليه مشكل فشبابو خلاوه يبتر يديه .. ولكن هادشي ماخلاهش يوقف و بلا يدين قدر يكون من اشهر الرسامين .. كلن رسام ناجح قبل مايموت
بوفس : مات واقيلا قبل ماتجي نتي لهاد الدنيا و هداك لي شرا الطابلو حفيدو
هادي فلتات ليها ... ماكانتش سولات على داك الطابلو فاللول و ماعطاتوش شي اهتمام حيت كانت متوقعة ماغايتسوق ليه حد صدق اصلا داك الطابلو هو لي داوها فيه و كيفما توقعات الطابلو لقا إعجابات غير بسبب الشخص لي رسمو و حيت داك الشخص جذب تعاطف الناس حيت قالو شوف برجليه و قاادر يرسم ... شوف برجليه و ولا رسام مشهور ... مسكين كايفرغ داكشي لي كايدوز منو فالرسم .. و اصيل باين علاش شراه غير حيت ديال جدو ، اما كون كان شي حد اخر لي راسمو موحال يتسوقو ليه وهنا تزادت لها معلومة جديدة فراسها و هي ان الفن كيفما بغا يكون حتى الظروف لي كايبدع فيهم داك الشخص كايلعبو دور كبير باش يتشهر .. مثلا ايلا شي حد كان فشي حرب و القرطاس من فوقو و هو كايرسم داكشي لي كايشوف و سما الطابلو تضحية الشهداء و تطلقات القصة ديال الطابلو و ايمتا ترسم فأكيد غايلقا إقبال ... ولا مثلا شي حد كان لحمو كايدوز بالدم بسباب الحكة و رسم طابلو بداك الدم واخا مايكونش واضح ولكن غايلقا واحد الشهرة
خرجات من خدمتها و مشات للدار بدلات حوايجها و خرجات باش تتسارا فشوارع باريس على رجليها .. كان عاجبها الجو ديالها فالليل .. بانو ليها شي وحدين دايزين بالماطر وتفكرات الأيام لي كانت فيهم مع داوود و كليكتو ، رجع لها الحنين لدوك الأيام و عاودات حسات بقلبها تزير فاش طاح فبالها .. ماكرهاتش تمشي لعند شي قاضي و تسولو كيفاش كايقدر ينعس ايلا حكم على شي واحد بالإعدام ولا تمشي لعند شي قتال و تسولو كيفاش عايش بدون تأنيب ضمير .. عممر ماجاها تأنيب الضمير على شي حد من غير مها حتى جاها دابا على داوود لي كاتشوف البحر دار فيه مابغا بسبابها .. ندمات أشد الندم علاش تعطيه اصلا الفرصة من النهار اللول ، كون غير بقا كل واحد شاد تيقارو
رجعات لدارها مابقا فيها مادور أصلا هاد الموضوع غير كاتتفكرو كايبدا قلبها يتعصر و داك تعصار ماكايعجبهاش .. لاحت شي تصاور فالانسطا تصوراتهم فاش خرجات و مشات قادات لراسها الماكلة وجلسات قدام البيسي وبقات شحااال كاتفكر ، كان ممكن تدخل لهاد الفن الرقمي بشحال من حاجة ولكن هي ختارت الرسم اما هو فالأصل راه كاين لي كايدخل ليه يا بأوديو يا مقطع فيديو يا شي ميمز تفكرات داك الراجل لي دخل ليه غير بالحجر لي خرجو من الجسد ديالو ... هدا كاع هو لي ضحكها بمرة و جاها ذكي بزاف حيت داكشي لي خلص على صحتو باش يحيدو ليه داك الحجر ، ربح الأضعاف ديال الأضعاف ديالو بسباب داك الحجر نيت .. ماعرفاتش شكون هاد المقطع لوراق لي شراه من عندو و خلص دوك الفلوس كاملين ولكن لي باعهم بعدا صرعها .. اما بالنسبة لهادوك لي كايبيعو ليمونة ولا بنانة ولا تفاحة بملايين الدولارات هادوك حالة خاااصة
فكرات باش تخشي راسها حتى فتداول العملات باش تزيد تتعلم ، كان عندها ميول حتى لهادشي ولكن المشكل لي عندها كايكمن فالتحليل .. بدات كاتبحت على تداول العملات و ناوية تجرب حظها فيه ، وهادشي خلاها تسهر و تتعطل فالنعاس
سدات البيسي و ناضت تنعس باش تقدر تفيق الصباح و غير صبح الحال مشات لخدمتها دوزات نهارها عادي كسائر الايام .. دازت سيمانة كانت خدامة ماعليها مابيها و غير سالات خدمتها و هو يجي لعندها بوفس ...
حياة : ايلا كان شي خبار زوين نيت علاش لا ... نخرجو دابا ونعرضك
بوفس : تسنايني نسالي شي شغل ونمشيو
حياة : [ قرنات حجبانها ] والخبار؟
بوفس : العراضة هي اللولة
غمزها و مشا كايتعوج فالمشية .. كايقتلها غير بديك المشية عندو تشوفو تحلف عليه غير شي لوبية ، مشات كاتقاد فالمكياج ديالها على مايسالي ، سالاو و خرجو من تما عرضاتو على الكوكتيل لي قالت ليه وخدات واحد ليه و واحد ليها ، داك لي خدات ليها كان خالي من الكحول
حياة : ايوا قول الخبار .. العراضة ها حنا عرضناك
بوفس : هنيئا و أخيرا واحد عجبو الطابلو ديالك وعرفتي شكون داك الواحد [ ضرب كتفو بكتفها ]
حياة : شكون؟
بوفس : حفيد الرسام لي سولتيني عليه هادي سيمانة و راه بغا يطلاقاك باش تتفاهمو على الطابلو ديالك
حياة : صافي قوليه يجي نيت لعندنا و نتفاهم معاه تما
بوفس : ماتشغليش بالك بهادشي ، هو ريزيرڤا فواحد ريسطو غدا فالعشية باش طلاقاو فيها وتتفاهمو على الطابلو ديالك [ عطاها العنوان ]
ماشافتش فالعنوان .. حدها كانت كاتتنغم بداك الكاس لي فيديها ونطقات
حياة : مامسالياش غدا
بوفس : هادشي راه يستاهل تلغي كاع داكشي لي عندك
حياة : واخا مايكون عندي مايدار ماغانمشيش ، مابغيتش
بوفس : نتي حمقة .. لا نتي حمقة وبغيتي تحمقيني معاك ، واش لقيتي لي يشري من عندك الطابلو ب250 الف يورو التمن لي بغيتيه فيه ودابا كاتجري عليه؟ ديري عقلك فراسك .. تا واحد ما سول فالطابلو ديالك من غيرو .. هادي الفرصة الوحيدة لي عندك
حياة : [ شافت فيه ] كون بغا يطلاقا بشي حد مشهور كان غايتعامل معاه بهاد الطريقة؟ .. هانا غانقولك كيفاش كان غايتعامل معاه ، كان غايهضر معاه ويشد معاه الرونديفو حيت الناس مامساليينش غير ليه ولكن انا عارفاه دار هاكا حيت عارفني مزال يلاه بادية و مامعروفاش وهو من داك النوع لي كايحݣر بنادم و يقلل من دوك لي باديين .. واخا نكون كانموت بجوع مانبيعوش ليه ايلا بقا كايتعامل بهاد الطريقة
حياة : قلتي غير ظلمتو؟ واخا .. تقدر تشرح لي علاش حتى دازت سيمانة عاد سول على الطابلو؟
بوفس : حيت مشغول ا حياة .. مالكي ماكاتعذريش الانسان واش هو مسالي 24 ساعة على 24 ساعة
حياة : كاينة حاجة سميتها التيليفون كيفما دار فاش بغا يشري الطابلو ديال جدو كان قادر يديرها حتى معايا .. علاش هاد الطابلو ماهضرش عليه فالتيليفون فهاد السيمانة كاملة؟ أپار هادشي كان قادر يشريه النهار اللول لي شافو مدام عاجبو ولكن لا .. هو بلعاني دارها وتسنا حتى دازت سيمانة باش يخليني نحس بلي نسبة الفرص لي عندي باش نبيع الطابلو قلييلة و يبان لي هو بحال شي فرصة ذهبية يعني نشوفو بنفس الشوفة لي شفتيه نتا ... وااو هو الوحييد لي جا كايسول فالطابلو هادي سيمانة يعني خاصني نبيعو ليه و نبقا تابعاه حتى يشريه لايصدق مبدل الرأي ديالو
بوفس : [ بشك ] واش عندك معاه شي مشكل؟
حياة : عندي مشكل مع التعامل ديالو حيت هاد التصرف لي دار ماداروش هكاك بشكل عشوائي .. كان دارسو بغا يخليني نحس بلي الطابلو ماعندو قيمة باش يجي هو ويدير لو قيمة فنظري حيت زعما غانشوفو هو الشاري الوحيد لي قبل بيه [ ضحكات بإستهزاء و جغمات من داك الكاس ديال المارتيني ] هاد السياسة لي باغي يدير معايا كنت كانديرها فالمغرب فاش كانت عندي 17 العام مع صحاب الحوايج فاش كاتعجبني شي حاجة و كانبغي نشريها .. غايكون هبيل ايلا بغا يطبقها عليا ، ايلا كان كايسحابليه غانقبل نطلاقاه فالوقت و البلاصة لي باغي هو غير حيت غايشري من عندي الطابلو راه غالط
بوفس : غاتخلي داك الطابلو تا يولي من الخردة؟ ماغاتبيعيهش؟
حياة : حمقة ونص غي تهنا ليا مع راسك .. خليه حتى يتعلم كيفاش يتعامل وديك الساعة نشوف اش كاين [ شافت فيه ] كون عرفت غانعرضك على بحال هاد الخبار كون كاعما جيت .. هاد الخبار خاص نشربو عليها القطران ماشي شي حاجة خرا [ ناضت من بلاصتها ] واش نوصلك لطوموبيلتك ولا تشد طاكسي؟
بوفس : [ دار يديه على فمو ] جبتيني لهنا وبغيتي تهربي عليا؟
ضورات راسها ل2 اتجاهات و خرجات كاتتسناه ... كون ماكانتش كاتعرفو كون عقداااتو بالتنمر لي غاتتنمر عليه ، وصلاتو لطوموبيلتو و ديمارات لجهة دارها .. طيبات لراسها العشا و خشات راسها مع واحد تصويرة خرا كاتقادها ولكن هاد المرة هاد تصويرة لي كانت كاتقادها كانت مختلفة على كاع لي سبقوها بقات على داك الحال حتى عيات و ناضت تنعس ولاغد ليه كالعادة مشات للخدمة و غير وصلات العشية و هو يصدمها بوفس بلي داك الشخص ضاعف المبلغ لي غايعطيه ليها و هادشي صدم حتى بوفس ل2 أسباب .. السبب الاول هو انه اول لوحة ليها بداك الشكل غاتتباع بداك التمن و ثاني حاجة هي الشخص لي باغي يشريها ماشي زاد 1000 ولا 2000 يورو و انما ضوبل التمن و وصلو ل500 الف يورو دقة وحدة والصدمة الكبيرة لي جاتو هي فاش حياة واخا شافت المبلغ تضاعف ماقبلاتش بيه .. كايشوفها كاتجري على رزقهم بيديها حيت طبعا ايلا باعتها راه حتى هو غايشد واحد العمولة ...
مافهمهاش كيفاش كاتفكر .. كايشوف السيدة كاتزݣل داك المبلغ كامل و علاياش؟ على والو كي قال ولكن هي كانت عندها وجهة نظر خرا أو بالأصح تكونات عندها وجهة نظر خرا من نهار عادل هضر عليها بديك الطريقة مع الرباعة ديال صحابو حيت ديك الهضرة هي لي خلاتها تفهم المعنى لي كان من تحت هضرة داوود فاش كان فالحبس هدا علاش هي ولات حاطة ديما واحد الحاجة قبل من الفلوس واخا يكون المبلغ ملاييير المليارات ، و ديك الحاجة بالضبط هي لي غاتخلي عندها القيمة فالوسط الفني خصوصا أنها مجرد دخيلة عليه باغا تدخل لهم فن من نوع أخر .. يعني غاتلقا صعوبة باش يتقبلوها أصحاب الأفكار التقليدية و معارضي الفن الرقمي .. و تقدر توصل كاع لمرحلة يتطلقو عليها إشاعات على أساس نصابة كيفما تطلقو على الفن الرقمي داكشي علاش كان ضروري تفرض الإحترام على بنادم باش يحتارمها قبل مايحتارم لوحاتها .. داكشي علاش كان خاصها دير قيمة كبيرة لسميتها فهاد الوسط قبل من القيمة للطابلو
رجعات لدارها و دخلات للدوش كاتفكر فخطوتها الجاية ... باقي 6 شهور للمهرجان السنوي ديال وارن بافت و غايكونو فيه أشخاص لي غاينفعوها بزاااف إيلا دارت معاهم المعرفة ، حيت إيلا شكرها شي حد من ديك الطبقة لشي واحد اخر هدا بحد ذاتو غايكون تقدم كبيير ليها و غايوفر لها سنين من الجهد باش يتشهرو الطابلوات ديالها حيت فاش كايشكرك ولا يهضر عليك شي شخص ناجح واخا غير يجبد سميتك فالهضرة ديالو .. بهاد الطريقة كايتوجهو الأنظار ليك .. تماااما بحال فاش ايلون ماسك كايهضر على شي عملة و من موراها مبااشرة كاطلع ، علاش كاطلع؟ حيت ببساطة هو واحد الشخص مشهور بالنجاحات ديالو الشيئ لي كايخلي معظم الاشخاص واخدينو قدوة و كايتوقعو من كل عملة ذكرها غايكسبو منها ربح كبير و هادشي بالضبط لي بغات هي تطبق على راسها .. ايلا الطابلوات ديالها ولا غير سميتها تذكرات على لسان شي شخص من الاشخاص لي سابقينها بعقود من الزمن اشخاص لي ناجحين هادشي غايخلي كاع دوك لي معتابرينهم قدوة يوجهو أنظارهم ليها حيت غايبانو لهم اللوحات ديالها مكسب ليهم و هادشي لي غايخليها تكتاسب الشهرة + الإحترام + الفلوس ... ولكن السؤال هنا هو كيفاش غاتقدر دخل لداك المهرجان؟ ماشي أي واحد كايقدر يدخل ليه .. خاص يكون عندك تصريح منين غاتجيب داك التصريح؟ بحال دوك المهرجانات راه بوفس و مايقدرش يدخل لهم عساك هي ، لوات عليها الفوطة و خرجات من تما الحل لي عندها هو تولي تمشي مع بوفس للحفلات لي عندو باش بهاد الطريقة تزيد دير المعارف
سمعات التيليفون ديالها كايصوني و مشات تشوف شكون ، المتصل كان من إيطاليا .. جاوباتو و دارت هوت باغلوغ و مشات كادير لراسها ماتاكل
حياة : كون درتيها من اللول و صونيتي .. ماشي تصوني على بوفس
بقا ساكت شحال حيت صونا و هو أصلا مشغول بشي خدمة فيديه ، يعني فعلا الوقت ماعندوش
أصيل : [ عينيه باقيين على الوراق لي فيديه ] عاد شديت نمرتك
حياة : و علاش؟
أصيل : عندك شي وقت غدا؟!
حياة : مشغولة
أصيل : [ باقيين عينيه على الوراق ] السبت الجاي؟!
حياة : مامسالياش فيه
أصيل : [ حط الوراق من يديه ] فوقاش غاتسالي
حياة : بعد غدا مسالية
أصيل : بعد غدا عندي شي خدمة
حياة : بعد غدا لي غانكون انا مسالية فيه
ضغط بيديه على محاجر عينيه وعاود دوز يديه على الذقن ديالو .. يعني هضرة بوفس كانت صحيحة فعلا حسات بيه نقص منها
أصيل : [ بنبرة توضيح ] ايلا مقصحة راسك وكاتتعاندي علاش ماشديتش معاك رونديڤو ، كنت مشغول السيمانة لي دازت ، وبعد غدا وقتي عامر
حياة : وعلاش كاتبرر لي؟ كلنا وقتنا عامر ماشي غير نتا
بقا ساكت لثواني كايشوف الوقت لي غايكون عندو خاوي باش يقدر يرجع لباريس فيه
أصيل : الشهر الجاي؟!
حياة : لا .. الشهر الجاي مامسالياش خلي للشهر لي موراه
أصيل : مالك راسك قاصح؟
حياة : الموضوع مافيهش قصوحية الراس .. فيه الشهر الجاي عندي عامر مامسالياش فيه و ماعنديش الوقت لي نحك فيه راسي
أصيل : [ عاود دوز يديه على الذقن ديالو ] بعد غدا 7:30؟
حياة : وي حيت عاد تفكرت بلي بعد غدا مامسالياش .. بغيتي نطلاقاو من هنا شهراين غانكون مسالية
أصيل : أخر هضرة؟!
حياة : وي أخر هضرة
أصيل : على بالك هاد النفخة لي فيك ماغاتعاونكش تزيدي للقدام؟!
حياة : [ تبسمات ] وي فراسي ... المهم ا سي أصيل نخليك
كون ماكانتش ديك النفخة غاتعاونها ماكانش غايتسنا شهراين غير باش يطلاقا معاها لمدة نص ساعة قطعو الإتصال ومشات هي كاتتعشا في حين أصيل كان متأكد من حاجة وحدة غايصوني عليه بوفس عاجلا ام أجلا و يقوليه بدلات الرأي ديالها ، حتى لإيمتا غاتبقا نافخة ريشها؟ هو كايعرفها مزياان و عارفها من النوع لي عزيز عليه الفلوس .. مايمكنش تصبر شهراين على 500 مليون ...
وي باقي عاقل بلي ماقبلاتش يعاونها ولكن هادشي لي باغي يخلصها بيه دابا ماشي هو لي كان غايسلفها ديك المرة ... ديك المرة كان سلف اما دابا راهم قادرين يوليو فلوسها
دازت شهراين و فهاد الشهراين حياة كانت مقابلة غير الهدف ديالها ... ياما طلاقات بنات و عيالات فشي حفلات حضرات لهم ، كانو منهم لي تبادلات معاهم النوامر و كاينين لي شحال من مرة عرضوها لشي حفلة ولا تمشي معاهم لشي ديسكو ولكن هي كانت كاتختار الحفلات لي غاتحضر لهم بعناية حيت ببساطة ماكانتش كاتشوف هاد الوقت وقت الرفاهية و داك الوقت لي غاتضيعو فحفلة باش تشطح فيها و تفوج فيها كان زايد فيها .. هي من واحد النوع ايلا شد فشي حاجة كايشدها ݣرجة وحدة بواحد الشكل مبالغ فيه ، الوقت لي غاضيعو مع لصحاب و الصحابات هنا ماعندهاش ، الوقت لي تسافر فيه باش تفوج فيه ماعندهاش ، الوقت لي تضيعو فالعلاقات الغرامية مابقاش عندها ، ولات كاتحط قدامها 3 خطط وحدة للأهداف القريبة المدى و التانية للأهداف البعيدة المدى و الثالثة كانت فالأصل عبارة عن خطط إحتياطية .. حبها للفلوس و الثراء الفاحش باقي هو هو غير الفرق لي كاين هو دابا ولات باغا سميتها تطلع حدا ديك الثروة لي غاتبنيها بمعنى تكون هي لقدام و موراها ثروتها ماشي يكون الراجل لقدام و هي و ثروتو موراه
أما بالنسبة لأصيل ماينكرش بلي فاجئاتو بهاد التغيير لي طرأ ليها او بالاحرى ماكانش كايظن غاتقدر تصبر شهراين باش عاد تشد الفلوس ، هادي هي لي كانت طمعات فالسلسلة لي كان عطاها لصوفيا؟ كيفاش قدرات تصبر على 500 الف يورو؟ فينها ديك الطايشة لي كانت تابعة غير الفلوس و تزوجات بعادل اصلا غير على الفلوس؟
فهاد الأثناء لي كان هو مشغول مع خدمتو وصلو ميساج منها حددات فيه النهار و الوقت و البلاصة لي غايطلاقاو فيها .. ختارت البلاصة لي كاتخدم فيها و ماعطاتوش الفرصة يختار شي ريسطو ، شاف الميساج ديالها وضحك ضحكة خفيفة و ضغط على عينيه بصباعو ، حيت كايسحابليه هي يسحابلها بلي اللقاء لي كان باغيه يكون فريسطو هي شافتو على اساس مغازلة ولا كايسحابلها عرضها لتما باش يتعرف عليها .. هدا كان توقعو حيت هي كاتبان وحدة عاد بادية و بسباب المحيط لي كابرة فيه والفقر لي كابرة فيه غايكونو الناس من ديك الطبقة كايعتابرو اي عراضة لريسطو ولا كافي ولا عراضة للدار كايكون من موراها هدف فيه نوع ما المغازلة يعني توقع بلي حتى هي تفكيرها باقي هاكا مدام ماقدراتش تشوف شي كافي ولا ريسطو وختارت البلاصة لي خدامة فيها.
° كانت فمقر خدمتها واقفة مع واحد الرسام ومجموعة أشخاص ضايرين ييه كانت كاتتناقش معاه على الأعمال ديالو لي جذبوها و بوفس واقف بعيد مع مجموعة خرا ديال الناس و مرة مرة كايشوف لجهتها ، طريقة خدمتها كانت فشكل ومخليها تخدم بيها غير حيت طريقة فعالة
بقات النهار كامل و هي على داك الحال .. كاينين أشخاص لي جاتهم على كانتهم و اشخاص لي ماعجباتهمش بسباب وقاحتها
بداو الناس كايتنقصو واحد بواحد والوقت لي دارت مع أصيل يطلاقاو فيه قرب ولكن ماكانش جاوبها واش غايجي ولا ماغايجيش .. غير وصل الوقت و هو يبان لها داخل ، لقاتو جا فالوقت نييت لي دارو يطلاقاو فيه
مدات يديها باش تسلم عليه وسلم عليها حتى هو اما بوفس هداك ماكايسلمش باليد .. كايسلم بالتعناق و داكشي لي دار مع أصيل
[ الحوار بالفرنسية ]
حياة : [ تبسمات ليه ] عندك الوقت هو الوقت
أصيل : [ نظراتو ليها كانو كايختارقو عينيها ] الوقت ماكايتشرا ماكايرجع [ ضور عينيه على البلاصة ] غاندويو هنا؟!
يلاه جات تجاوبو و هو يسبقها بوفس
بوفس : [ ضرب بيديه و شبكهم وشاف فيهم بأسف ] كانتأسف ولكن ماغاتقدروش
حياة : [ شافت فيه و هزات حاجب ] ياك قلتي..
بوفس : [ قاطعها ] عندي رونديفو وراكي عارفة الوقت لي خاص نحبسو فيه
طولات الشوفة فيه و هي شاكة فيه متافق عليها مع أصيل ولكن فالحقيقة كانت غير ظالماه حيت ماكانش متافق معاه وماعندوش علاش يتافق معاه أصلا .. بعدات عينيها عليه و شافت فأصيل
حياة : [ شافت فأصيل ] لا ماشي هنا مي ايلا كنتي تقدر تتسنا واحد ل10 دقايق غانمشي نجيب شي حاجة من الدار ونجي
أصيل : [ شاف فالمكانة لي فيديه ] ماشي مشكل
خرجات هي وياه من تما من مور ماهزات صاكها و ركبات فطوموبيلتها و شدات الطريق للبناية لي ساكنة فيها في حين هو كان تابعها من اللور بطوموبيلتو و كايتبادر فالذهن ديالو شحال من سؤال .. شنو دارت فهاد 3 سنين؟ شكون عاونها؟ على ماكايعرف و على حساب لي سمع ، طلقات من عادل بلا ريال بلا 2 و من الفوق طلقات بالكريدي ولكن كيفاش حتى خلصات الكريدي و خرجات من المشكل لي هي فيها و دارت الطوموبيل و كرات برطمة فهاد القنت؟
بقا كايتسناها لتحت حتى طلعات و هبطات كانت بدلات حوايجها و هازة فيديها واحد الشنيطة صغيرة وقفات قبالتو ونطقات
حياة : كانعرف واحد الريسطو زوينة وفيها الكالم ، غانقدرو تما نهضرو على راحتنا
فهاد الأثناء هو كان كايتفحصها بنظراتو ... مابقاتش لابسة حوايج رسميين ولكن كالعادة كانت كاتعرف مزيان كيفاش تختار حوايجها و تختار كل حاجة مناسبة للبلاصة لي مناسبة ...
عطاتو سمية الريسطو و بغات تركب فالطوموبيل ديالها باش تمشي ولكن قتارح عليها بكل جنتلمانية باش تركب معاه و فاش يساليو غايوصلها ... بقات كاتشوف فيه شحاال حتى صافي قال غاتقصح راسها و تشد الضد ولكن خالفات توقعاتو .. تبسمات ليه و مشات لجهة طوموبيلتو يكفي انه عارفها مامحتاجاهش يوصلها ، حيت حتى هي بطوموبيلتها بغض النظر على ثمنها الرخيص المهم كاتديها و تجيبها و شكلها زويون
ركبات معاه وشدو الطريق للريسطو .. كان واحد الصمت رهيييب بيناتهم هو كايفكر فحاجة وهي كاتفكر فحاجة ولكن لي جامعهم هو كل واحد كان كايفكر فداك لي حداه .. هي جاها التعامل ديالو تبدل في حين هو جاتو هي كلها تبدلات حاس بلي كاينة شي حلقة مفقودة من حياتها و هو ماعارفهاش
وصلو لديك الريسطو لي قالت ليه عليها وجلسو .. بغات تجبد البيسي باش تبدا تهضر معاه على الخدمة ولكن حبسها بهضرتو
أصيل : باقي عندنا الوقت والليل باقي طويل
حياة : [ بإستغراب ] قبيلا ماشي هادشي لي قلتي ، قلتي الوقت ماكايتشرا ماكايرجع وغالبا غدا غاتكون عندك الخدمة زيد عليها انا ماعزيزش عليا السهير
أصيل : مابقيتيش كاتسهري؟!
حياة : لا ماكانسهرش
شاف فالسرباي لي هو بدورو جا لعندهم و طلب منو شنو بغا و شاف فحياة باش طلب حتى هي و داكشي لي كان .. قالت للسرباي شنو بغات ورجعات البيسي لبلاصتو ، ماكانتش ناوية تتعامل معاه بحساسية مدام قاد التعامل ديالو .. غاتعاملو بحال اي واحد كان غايشري منها الطابلو
حياة : مامعمراش عليك باش نخوي مي كاتبقا على النظرة لي هازاها عليك
أصيل : باغا ندويو فهادشي؟!
حياة : وي باغيا
أصيل : تقرصتي من الرياض؟!
حياة : ماتقرصتش حيت شفتك فديك الوقت بحالا ماعندك مايدار باش تعمر شومبر على ودي وتتسناني حتى نجي باش تشدني بالجرم المشهود .. زعما يسحابلك راني وحدة سراقة؟ كنتي كاتتسناني نسرق من تما؟ راك غالط وماكاتعرفنيش مزيان
أصيل : عارف يدك ماخفيفاش
سكت لمدة دقيقة على مايسالي السرباي لي جا كايحط لهم العشا .. وغير شافو مشا كمل هضرتو
أصيل : عارف السلسلة ماسرقتيهاش
حياة : وعلاش ديك الحالة لي درتي؟
أصيل : الإنسان إيلا عاش شي حياة ماشي ديالو لمدة طويلة ، كاينسا أصلو
حياة : بنادم لي كايدخل راسو فسوق ماشي سوقو كاينسا الطريق للسوق ديالو
أصيل : تكالماي
حياة : عرف تهضر مع لي كايكون معاك
أصيل : الحياة لي كنتي عايشاها فالسوشل ميديا كانت ديال صوفيا
حياة : ومن بعد؟ كانت واحد المرحلة ديال الطيش لي كلشي كايدوز منها
أصيل : ماكايبرر غير لي حاس براسو غالط ، عارفة شحال من واحد كان غالط فيك فالسوشل ميديا؟!
حياة : مدام نتا ماشي منهم علاش كاتتدخل فشي حوايج ماكايعنيوكش
هز الفرشيطة والموس باش يبدا ياكل ولكن قبل مايبدا نطق
أصيل : كنت منهم
حياة : ماشي مشكلتي ايلا كنتي متبع الكونط ديالي
أصيل : باقي طالع عندي
بدا كايصوني عليها التيليفون وهزاتو كاتشوف النمرة لي كاتصوني .. عقدات حجبانها وهي مافاهماش علاش هدا كايصوني عليهت من مور هاد المدة كاملة؟؟ ياك صافي داكشي لي كان جامعهم سالا؟؟ ياك قال ليها ماتعاود تعرفو مايعاود يعرفها ... علاش كايصوني عليها دابا فالانسطا؟ .. خلات التيليفون كايصوني حتى عيا .. دارت ليه سيلونص و ماتسوقاتش ليه حيت اصلا شغلها هي وياه تسالا و مابقا عندهم فاش يهضرو .. شافت فأصيل ويلاه جات تهضر وهو ينطق ...
حياة : لا عادي غير بنادم ماعندو مايدار و صافي
شافتو كايصوني و كايعاود حتى دخل ليها الشك و بقات مبرزطة مع التيليفون .. يلاه جات تجاوب وهو يتقطع و هاد المرة ماعاودش صونا
حياة : [ شافت فأصيل تبسمات ليه ] واحد الدقيقة .. هانا راجعة
هزات تيليفونها و ناضت من تما كاتصوني على وليد .. بقا التيليفون كايصوني ولكن هاد المرة حتى واحد ماجاوبها ، عاودات صونات و نفس الشيئ لا رد ، شنو واش غايكون هاد القرد هبط للمغرب و شدوه سلخوه وبغا يزرفها؟ ولا غايكون هبط للمغرب وقرقبو عليه و بغا فيها الخدمة حتى هي؟ ولا ياكما هبط للمغرب وصحاب داوود شدوه و وصلوه للسبيطار؟
كانو عندها بزاف ديال الإحتمالات فبالها ولكن ماعرفاتش لي صحيح فيهم ، رجعات جلسات فبلاصتها و خلاتو حتى يعاود يصوني على خاطرو
أصيل : مالك؟!
حياة : غير تبرزطت بدوك لي زاپيل .. فين خليناها؟
أصيل : فطلاقك
حياة : [ عينيها باقيين مع التيليفون لي حطاتو ] هداك موضوع و داز [ شافت فيه ] طلقت انا وعادل حيت ماتفاهمناش اما بخصوص التصاور لي كنت كانحط فالانسطا كي قلت لك كانت واحد المرحلة ديال الطيش بنادم كايبغي يجرب اي حاجة كايشوفها
أصيل : ماكانش طلاقك على مول الموطور؟!
حياة : [ قرنات حجبانها ] ونتا مالك و مال مول الموطور؟
أصيل : باغي نعرف
حياة : الراجل مات وماعزيزش عليا نشد الهضرة فالميتين
أصيل : البركة فراسك
حياة : واش دابا كاطنز عليا؟
أصيل : تكالماي
حياة : شوف نقولك باش نتفاهمو على واحد النقطة لي شفتك من قبيلا و نتا كادور ليا عليها ... عادل من فاش تزوجت بيه ماشفتش فشي حد من غيرو وهنا كانهضر على من فاش جمعاتني انا وياه واحد الورقة [ ناضت من بلاصتها ] المرة الجاية فاش تبغي تضرب شي واحد فالكمارة حسن ماتبقاش تقوليه باغي تهضر معاه فالخدمة [ حلات صاكها وجبدات منو الفلوس و حطاتهم فوق الطبلة ] كمل عشاك بصحتك
خرجات من الريسطو وبدات كاتقلب على شي طاكسي .. عصبها واش السيد جالس كايلصق لها تهمة الخيانة الزوجية عاين باين؟ اشمن نوع ديال الناس هدا ، وقف لها طاكسي و يلاه جات تركب وهي تحس بشي حد شدها من دراعها .. تلفتات ليه لقاتو دار اشارة لمول الطاكسي باش يمشي
حياة : [ نترات دراعها من يديه ] علاش تابعني؟
أصيل : الليل عليك خليني نوصلك
حياة : ماتوصلني مانوصلك غير بعد مني .. هادشي لي بقا ناقص واش نتا ماكاتعياش؟ كترة النفخة على والو؟ كاتشوف راسك حسن من بنادم مالنا ياك لاباس؟ بنادم كاع كايتبدل الا نتا صباغتك هي صباغتك شكون نتا فملك الله كاع باش تبدا تتهز و تتحط عليا؟ داك القفص لي ماعاجبكش انا عاجبني وغايبقا عاجبني ومرتاحة فيه قيمة الحاجة ماكاتتقاسش بالحجم ديالها ولا على ديك السلسلة لي باقي تابعني بيها لدابا .. انا نخلصها لك غير سكتني و ماتبقاش فوقما نطلاقاك تجبد ليا سيرتها ولا على الرياض و شراوطو نخلص لك الشراوط لي قيستهم داك النهار اش اخر؟ الورد لي كنتي كاتسيفط؟ نخلصو لك حتى هو باقا شي حاجة؟ نكون انا و مول الموطور ولا انا و مول الكاميو حتى واحد ماشغلو فيا ماديرش ليا فيها نتا عمرك دخلتي فشي غولاسيو ولا ياكما نتا من داك النوع لي كايشوف الرجال من حقهم يدخلو فعلاقات مع عيالات اشكال و الوان بمختلف الاحجام و العيالات حرام عليهم حيت غايتسماو توسخو؟ عقلية ديال الويل [ ضارت باش تمشي و عاودات شافت فيه ] اه ولا كان هادشي غايخليك تعيش حياتك فراحة نفسية هانا غانقولو لك ... انا و مول الموطور تفارقنا قبل مانتزوج بعادل .. و حاجة خرا داك الطابلو مابقيتش غانبيعو [ بعدات عليه و تمتمات ] الݣنس الناقص
تفركعات عليه و مشات شدات طاكسي للدار مخلياه موراها .. من هاد الناحية باقي هي هي الخصال لي فيها باقيين هما هما و لسانها باقي طويل خاص غير لي يجبدها
وصلات لدارها ودخلات لاحت الطالون ديالها مع الدخلة ديال الدار .. كان باقي عقلها مرون مع وليد لي صونا و زاد ترون حتى مع أصيل لي كاتشوفو فوقما كايشوفها كايبقا غير يقول لها درتي ودرتي ودرتي على اساس هو واحد معصوم من الاخطاء ، كانت كاتشوفو واحد متكبر لأقصى الدرجات و كايبغي غير يتصيد اخطاء الناس .. ندمها كاع علاش خرجات معاه ، عاودات هزات تيليفونها وسيفطات ميساج لخديجة باش تتأكد لها من البلان ديال وليد ايلا سمعات شي تنقنيقة عليه فحالة ما كانو شدوه صحاب داوود ولا شي حاجة بحال هاكا .. و ما هي الا دقائق حتى عاودات صونات عليها
حياة : واش هبط؟؟
خديجة : مافراسي والو من هادشي ولكن غي عايني تا لغدا ونمشي لداركم حيتاش ايلا شدوه غاتكون وفاء ولا خوك سايقين الخبار
حياة : غير شوفي لي اش كاين حيت شفت داك الويل كايصوني عليا و ماعرفتش مالو
خديجة : وايلي شبغا عندك ا صاحبتي؟
حياة : والله ماعرفت ضرني فراسي داكشي علاش صونيت عليك ...
قطعات معاها و ناضت دوشات حيدات العيا ديال النهار ولبسات پيجامتها ... قادات لراسها مشروب ساخن باش تتكونسوطرا ، مشات كاتقلب على البيسي باش تبدا خدمتها ولكن مالقاتوش .. بدات كاتقلب ياكما حطاتو فالكوزينة .. ياكما فالصالة؟ ولا يمكن دخلاتو للبيت؟ مشات كاتقلب فالبيت واالو غبر ليه الأثر .. قلبات البرطمة سفاها على علاها و حسات بقلبها طاح من بلاصتو ياكما نساتو فالطاكسي؟؟
حياة : [ ضربات جبهتها بيديها ] خدمتي كلها مشات
جلسات فوق الكرسي كاتحاول تتفكر ... واش نساتو فالطاكسي؟ ولا ياكما نساتو فالريسطو؟؟ .. ناضت من تما كاتقلب على تيليفونها حتى هو صدقات متلفاه فاش كانت كاتقلب على البيسي .. جاب الله صونا و تبعات الصونيط ديالو حتى طاحت فيه
طلعات لها النمرة ديال أصيل وجاوباتو
حياة : مانسيت والو فالريسطو؟
أصيل : خليتي اللاب ديالك
حياة : [ هزات سوارت طوموبيل ديالها ومشات كاتزرب ] قول ليا غير فين كاين نجي لعندك
أصيل : بلا ماتعدبي راسك .. واقف لتحت
خرجات بالزربة وهبطات لعندو لقاتو واقف حدا الطوموبيل ديالو وهاز 2 حوايج .. الشانطة ديال البيسي ديالها و شي حاجة خرا فيديه غير وصلات لعندو عطاها البيسي ديالها
حياة : [ زفرات براحة ] قلت صافي مشا [ شافت فيه ] كون ماعصبتينيش ماكنتش غاننساه
أصيل : غاتبرد
حياة : شنو لي غايبرد؟
وراها شنو كاين فيديه لاخرا .. كان هاز صاك ورقي
أصيل : الحريرة
حياة : [ بإستغراب ] ونتا منين جاتك الحريرة؟
أصيل : غانبقاو هنا؟!
حياة : وفين بغيتينا نمشيو؟
أصيل : ماغاتعرضينيش لدارك؟! من الصواب
حياة : مابقيتش كاندخل الرجال لداري
أصيل : وغاتبقاي خارجة بالبيجامة؟!
حياة : لا لقيتيني غانطلع ونتا بصحتك وراحتك الحريرة
دوز يديه على شعرو و عاود دوز يديه على الذقن ديالو .. يمكن كون كانت شي وحداخرا ماكانش غايلقا معاها هاد المشكل كامل ، هو أصلا مشا قلب على الحريرة على ودها حيت عارف بلي غاتكون توحشات المغرب و ماكلتو ولكن كيفاش غايقول لها بلي جايبها على ودها وهو أصلا عمرو دارها لشي وحدة حيت فاش كايبغي يطلاقا بشي وحدة كايجلسو فريسطو عادي ماكايدي لها ماكاتدي ليه ، شافتو هكاك كل مرة كايشوف فجهة فهماتو حتى هي بلي جايب الحريرة باش يشربوها ب2 ومالقاش كي يقولها لها
حياة : تسناني نطلع نجيب 2 زلايف ونجي
أصيل : كيفاش؟!
طلعات وخلاتو متبع سرابها .. صدقات دايراها بصح و نييت مابغاتوش يدخل لدارها لا و الزوينة غاتهبط 2 زلايف و يشربوها هكاك بالواقفية وعلى برا و هي بالبيجامة وعادي جدا .. بانت ليه هبطات و فيديها 2 زلايف ، يا دينك منين هاد المخلوقة؟
وقفات قدامو ونطقات
حياة : نشربوها فطوموبيلتك ولا طوموبيلتي؟ بان ليا فطوموبيلتك حسن حيت طوموبيلتي صغيرة [ وقفات قدام الباب ديال طوموبيلتو ] حل الباب راني كرمت بالبرد
حل لها الباب وطلعات وهو باقي كايشوف فيها من برا .. طلع من الجهة لاخرا ولقاها مدات ليه الزلايف باش يخوي
أصيل : باش نخوي؟!
حياة : نطلع نجيب مغرفة؟
أصيل : غير جلسي فبلاصتك
السيدة ناوية ترحل ليه الكوزينة لوسط الطوموبيل ... بقا كايخوي و حاضي لاتتكفح عليه ولا تتكفح فالطوموبيل في حين حياة كانت جالسة و طاوية رجل و الرجل التانية طالقاها و شادة زلافتها كاتتبنن فيها ، توحشات نييت الحريرة و هاد الحريرة جاتها على قلبها
حياة : هدا ولا هادي لي طيباتها الله يعطيها الصحة
فهاد الأثناء لي هي كانت كاتشرب حريرتها هو ماكانش خوا لراسو وإنما كانو عينيه مفيكسيين فيها و من نظراتو كان باين بلي ماجاش لعندها غير هكاك على والو فهاد الليل
رجعات كاتشرب من زلافتها في حين هو كان سكت لثواني و كان كايدوز يديه على لحيتو وكايشوف قدامو .. كانت عندو هضرة لي كان ممكن يكون قالها من زماان كون ماتزوجاتش بعادل و ماعرفهاش ولات مرت الراجل .. ولكن دابا مابقاتش مرت الراجل
ماحسات براسها حتى خرجات لها الحريرة من نيفها وبدات كاتكحب وعينيها كايدوزو بالدموع وتكحب وتقول ماكحبات حتى كانت غاتجيف بسباب حمصة وحلات لها فالحلق ...
عطاها قريعة ديال الما صغيرة كانت عندو من مور ماحلها لها .. ماشداتهاش حيت كان بالها مع هضرتو ، بدات كاتهضر و تكحب و الكحبة كاتقطع لها فهضرتها ولي فهم من هضرتها غير ديك " اش هاد الزربة؟ "
أصيل : شدي شربي قبل ماتجيفي
شدات القرعة و بدات كاتشرب و حتى حسات بالكحبة بدات كاتمشي بشكل تدريجي عاد كملات هضرتها و هي كاتمسح فعينيها لي دمعو بالكحبة
حياة : اش هاد الزربة؟ كي درتي لها؟ وكيفاش هاد بغيتيني؟ [ خرجات لها كحبة خفيفة قاطعات لها كلامها ]
أصيل : ماعنديش مع كترة الدوران ونبقا ندخل ونخرج عليك فالهضرة [ حيد لها الزلافة من يديها وكمل ] فهمتي علاش كنت كانسولك على مول الموطور
حياة : اش غانقول لك؟ الصراحة انا ماكانفكرش فهادشي
أصيل : عارفك باغا تحققي ذاتك ، ماغانحبسكش
حياة : [ كحبات ] زربتي عليا واحد الزربة خايبة .. باقا اصلا ماعارفاش ايمتا فكرتي و ايمتا طاح فبالك هادشي و كيفاش حتى طاح فبالك .. صدمتيني
ماقدراتش تيق بالهضرة لي سمعاتها .. اشمن بغو؟ هدا بعدا عمرها توقعاتها منو والا توقعات تجمعها معاه حتى الصداقة عسااك عسااك يبغيها و تبغيه؟ الحماق بعينيه هدا ... تحركات من بلاصتها و قربات ليه و بالضبط لعنقو و لحدا الذقن ديالو بقات كاتشمشم واش ضاربها بشي سكرة لقاتو ماشارب والو
حياة : يا الكوكايين يا الحشيش يا القرقوبي وحدة من هاد 3 .. تكيفتي قبل ماتجي؟ حيت موحال واش هاد الهضرة قلتيها ونتا بعقلك ... واش ضربتي شي كاس قبل ماتجي؟
أصيل : [ جبد ݣارو من الباكية لي عندو ونطق ] ماكانشربش
حياة : ومالك على هاد الهضرة؟
أصيل : [ شعل الݣارو و نتر نترة و خرج الدخان على برا باش ماتتخنقش ] هاد الهضرة كنتي غاتسمعيها قبل ماتولي مرت الراجل [ عاود نتر نترة خرا ]
حياة : وعارفني مطلقة بعدا
ترسمات إبتسامة جانبية على شفايفو و نتر نترة ونطق
أصيل : عارف طليقك مادخلش عليك
حياة : و ها خبار خرا قريب دوز فشوف تيفي مدام نتا وصلاتك ... واش عرفتي الإختلاف لي بيني و بينك قداش؟ إختلافات هما قول ليا شحال فعمرك؟
أصيل : حتى نتي مابقيتيش صغيرة .. كبرتي ودرتي عقلك
حياة : ايلا كان عقلي ينفعني راك كبير عليا ب11 العام يعني عندك 36 عام ولا 37 وماتقولش ليا العمر غير رقم حيت العمر عقلية
أصيل : فعمرك 25 ولا 26 ماشي 17 ولا 18 .. مابقيتيش صغيرة
حياة : نتا مافاهمنيش ..مابقاتش فالعمر 17 ولا 18..
أصيل : ها نتي رجعتي على هضرتي
حياة : ماتشدش ليا الموضوع من زنطيطو راني عارفاك فاهم اش بغيت نقول
حس بيها كادخل و تخرج فالهضرة .. كاتقول هضرة وترجع تقول العكس ديالها ، ولكن هي فالحقيقة ماشي كانت كادخل وتخرج فالهضرة .. المشكل هو ماكانش فاهمهاش شنو بغات توصل ليه بالضبط و هي كايسحابلها داير راسو مافاهمش
أصيل : [ نتر نترة طويلة ولاح الكارو وعاود شاف فيها ] شرحي
حياة : هادشي مافيهش الشرح راه باين اش كاين .. مابغيتش وكاينين بزاف ديال الأسباب ماغايخليونيش نبغي ولا نقبل
أصيل : سميهم
حياة : أولا و باش نجيك للصراحة ماعنديش معاك و ماكاتعجبنيش [ شافت تعابيرو لقاتهم باقيين هما هما ] تاني حاجة عقليتك كاتجيني فشكل كاتجيني عقلية تقليدية وشخصيتك حتى هي ماكاتعجبنيش وتالت حاجة و ركز لي عليها ، ماعنديش الوقت للتفلية و نبقا داخلة خارجة معاك مرة نطلاقاو فريسطو مرة فكافي و مانقدرش نعطي الاهتمام المطلوب فشي علاقة حاليا وغانعاود نرجع للنقطة ديال ماعنديش معاك
طول فيها الشوفة و حسات بنظراتو كايختارقوها
حياة : مالك كاتشوف فيا بحال هاكا؟ شنو واش بغيتيني نكدب عليك ولا نصبغك؟
كان عارف مزيان علاش شادة هاد الموقف من جهتو حيت ببساطة كان فوقما كايطلاقاها و كايلقاها باقا بنفس الطيش ديالها كايعطيها درس
أصيل : غانعطيك شهر تفكري فيه
حياة : غاتتسنا شهر على والو والله حيت الهضرة اللخرة لي عندي قلتها [ هزات الزلافة وخرجات من الطوموبيل و طلات عليه ] تصبح على خير
دخلات للبناية لي ساكنة فيها وهي كاضحك ... من نيتو؟ واش طاح على راسو؟ كيفاش حتى فكر فحاجة بحال هادي؟ المشكلة هي مابيناتهم و لو قاسم مشترك واحد يعني غايخص ضروري واحد يضحي بشخصيتو باش يقدرو يتعايشو هادشي فحاالة ما قبلات ولكن هي اصلا ماغاتقبلش .. تفكرات فاش جبد ليها عادل صاافي راه باين البلان مروى غاتوصل الخبار طااير لزهور مدام اصيل لي براني و ساق الخبار و هناا غايعرفو بلي حياة ماتزوجاتش براجل كامل مكمول كيف كان كايسحابلهم
دخلات للبرطمة ديالها و باقي بالها مع هضرة أصيل ... كانت اكبر صدمة ليها ، واش واحد كان فوقما يشوفها يهينها و كاع المواقف لي جمعوهم كانو خايبين كيفاش غايفكر بهاد الطريقة؟ وكيفاش قال لها من قبل ماتتزوج بعادل كان غايقول لها هاد الهضرة؟ جاها هادشي فشكل و ماتيقاتوش اصلا حيت هادي بالضبط حاجة ماكايتقبلهاش العقل ديالها .. كون بوفس قال لها تتزوج بيه و غاتتيق ولكن اصيل؟ راه مايمكنش ...
دازت ديك الليلة على خير ولاغد ليه فاقت كالعادة كاتوجد راسها باش تمشي تخدم .. بدات خدمتها من مور ماسولها بوفس على فين وصلات هي و أصيل و واش باعت ليه الطابلو و كان جوابها لا حيت أصلا مابقاتش باغا تبيعو ليه .. و فهاد الوقت لي كانت خدامة فيه وصلها الورد ديال زنبق العنكبوت حتى لمقر العمل ديالها .. كان داك البوكيه أنيق و مقاد على حقو و طريقو ، فاش شافتو أول حاجة تفكراتها هي الأرض لي كان داوود زرعها كلها بالورد
[ الحوار بالفرنسية ]
بوفس : الناس ولا كايوصلهم الورد
حياة : ها نتا كاتشوف
بوفس : شكون سيفطو لك؟
حياة : [ شافت شكون مسيفطو لها ] حفيد داك الرسام
بوفس : تطورات علاقتكم وماقلتيهاليش
حياة : [ ضحكات ] ماتطور والو .. شحال كاتجيني هاد الطريقة بلدية و قديمة
بوفس : [ باغي يسل ليها لسانها التعبير على الحب هداك
حياة : التعبير على البعر هداك .. الورد داير بحال المصيدة [ عطاتو ليه ] شد شد
بوفس : [ شدو من عندها ونطق وهو كايشوف فيه ] ياك عاقلة على داكشي لي قلت لك النهار اللول
حياة : [ ضارت لعندو ] عاقلة غير كون هاني و ماكاين والو من داكشي لي فراسك
مشات تكمل خدمتها عرفاتو كايلمح لها للشرط لي كان شرط عليها النهار اللول .. ممنوع تجمعها شي علاقة مع شي حد من الناس لي كايجيو لهنا حيت كترة العلاقات الغرامية مع الاشخاص لي كايتعاملو معاهم غاتضيع لهم السمعة ديالهم وبالتالي غايضطر يجري عليها
صونات عليها خديجة وطمأناتها بلي الأمور كلها بيخير .. دابا بعدا عاد رتاحت من هاد الناحية ، مابقاتش مسوقة لعلاش صونا لها ، سيفطات ميساج لأصيل
[ غير كاتحفي دماغك معايا على والو والله ]
سيفطاتو و خبعات التيليفون وكملات خدمتها ... كانت كاتحاول تلقا شي حد غايحضر لداك المهرجان حيت هداك هو البطاقة الذهبية ديالها ، خاصها غييير تصريح الدخول .. غير تحط رجليها تما و الباقي كلو غاتتكلف بيه هي
دوزات داك النهار غير فخدمتها وصل الوقت لي خاصها تمشي فيه للدار و مشات
هاكا دازو عندها أيامها لمدة أسبوعين ... كل صباح كان كايوصلها بوكيه ديال الورد حتى لبلاصة خدمتها و فوقما كايوصلها كاتعطيه لبوفس وكاتسيفط ميساج لأصيل كاتقول ليه غير كايحفي دماغو ... غير كايضيع وقتو ... 2 وردات ماغايبدلوش الرأي ديالها والنهار ل15 فداك الصباح كانت كاتتسنا الورد يجي تاني ولكن ماجاش ، تسنات لوسط النهار و نفس الشيئ ماجاش
بوفس : [ حط يدو على جنبو و عوج رجليه ] فين وردي؟
حياة : ولفتيه ياك
بوفس : [ دوز يديه على شعرو وهز راسو للسما ]
حياة : تلقاه عيا مايسيفط حتى طلع ليه الدم ، احسن مادار
مشات كاتكمل خدمتها حتى صونا عليها التيليفون .. بقا كايصوني شحال عاد جاوبات ، سمعاتو كايهضر مع شي حد وعلى مابان ليها مشغول بالخدمة حيت الهضرة كانت ضايرة نيت غير على الخدمة
حياة : وي؟
دار إشارة بيديه لداك لي قدامو باش يكمل خدمتو ورجع كايهضر معاها
أصيل : هاد العشية غانجي لباريس
حياة : خدامة هاد العشية
أصيل : ماخداماش ماتكدبيش
حياة : يقدر يكون عندي حاجة خرا باغا نديرها مثلا
أصيل : عندي شي حاجة ديالك
حياة : اشمن حاجة؟
أصيل : دابا تعرفي
حياة : ماكانساليش الخدمة بكري راك عارف
أصيل : غانتسناك
حياة : المهم دابا نشوف معاياش غانسالي و غانرد عليك ، نخليك باقا تابعاني الخدمة
قطعات عليه و مشات تكمل خدمتها و غير سالات لقات التيليفون كايصوني عليها ، جاوبات وخرجات لقاتو واقف على برا بالطوموبيل ديالو .. كانو كاتشوف هادشي عادي في حين هو راه كان كايضرب الطريق نييت يا بالطيارة يا بالطوموبيل غير على ود هادشي يعني كان مخصص لها واحد الوقت مع انه وقتو عندو عامر و عندو شي ظروف لي ماكايخليوهش يقدر يطلاقاها ديما
سلمات عليه باليد وقتارح عليها باش تمشي معاه لواحد الريسطو والغريب لي ماموالفاتوش منو هو انه كان تعاملو مغاير تماما على لي والفات منو بحالا كان كايصحح ليها ديك النظرة لي عندها عليه
حياة : واخا مي خاصني ندوز للدار هو اللول
أصيل : طلعي نوصلك
طلعات معاه و هي مزال جايها هاد التغيير ديالو فشكل .. بحالا شي حد مسموم كايولي دغيا ضريف وا هاكا كانت كاتشوفو واخا دازت 2 سيمانات من مور الهضرة لي كان قال ليها
وصلها للدار و طلعات بدلات عليها و تأنتكات وهبطات لعندو و مشاو للريسطو لي حجز فيها ... كانت كاتجيه كاتصرف بزااف على الحوايج ديالها و المظهر .. ماكانش صعيب عليه باش يعرف بلي كاتضرب غير الدوريجين و ماشي المدرح حيت هادشي باين غير من نوعية ولكن الأهم من هادشي كامل هو كايلقاها ديما أنيقة ، ماكانش فراسو بلي هي فالأصل ماكاتخسرش الفلوس بزاف على حوايجها و المكياج وليزيكسوار و الصيكان و الصبابط واخا دوريجين حيت ببساطة كانت كاتشريهم من عند وحدين لي كايكونو شافرينهم من المصانع و كايطيحو عليها رخاص و داكشي باقي جدييد ، منها كاتهتم بمظهرها منها ماكاتخسرش الفلوس بزاف وماكانش سوقها واش مشفورين ولا لا حيت ببساطة كاتحط فيهم فلوسها يعني كاتخلص عاد كاتلبس ماشي كاتشدهم فابور ...
وصلو للريسطو وجر لها الكرسي باش تجلس ... جلسات و هي كاتتبسم ليه بقدر ماصدمها بهاد البلان بقدر ما عجبها
جلس قدامها ونطق
أصيل : مرتاحة؟!
حياة : وي مرتاحة .. عجبني هاد الريسطو
أصيل : مرتاحة فخدمتك؟!
حياة : وي مرتاحة علاش؟
أصيل : بغيت نعرف
حياة : اشمن حاجة عندك ديالي؟
أصيل : زربانة؟!
حياة : لا مي بغيت نعرف واش شي حاجة نسيتها فالريسطو ولا عندك فالطوموبيل؟ ولا طاحت ليا؟
جبد بواطة مخملية سوداء ... بقات كاتشوف فيها بإستغراب حيت هي ماعاقلاش بلي كانت عندها شي بواطة بهاد الشكل .. ناض من بلاصتو و وقف موراها ماخلاش ليها الفرصة باش تقبل ولا ترفض واش تتحط فعنقها ولا لا ... حل البواطة و جبد منها سلسلة كانت بنفس الشكل ديال السلسلة لي كانت السباب باش طلاقات معاه غير الفرق هو هاد السلسلة الوردة ديالها كانت حمرا يعني باللون لي كايعجبها عكس لاخرا لي كانت كحلة .. حسات بشي حاجة باردة تحطات على عنقها .. هزات صبعانها كاتشوف شنو حط لها فعنقها في حين هو رجع جلس فبلاصتو كايراقب ردة الفعل ديالها كان متوقع تعجبها
° بقات شحال كاتشوف فديك السلسلة و فالأخير حيداتها بقات كاتقلب على السدادة باش تحلها و هو مقابلها كايشوفها اش بغات تصنع حتى حيداتها و حطاتها ليه قدامو
حياة : مانقدرش نقبلها
أصيل : علاش ماترطبيش راسك معايا شوية؟!
حياة : راسي رطب مي مانقدرش نقبلها لا هي لا غيرها .. يمكن عجباتني فواحد الوقت مي مابقاتش عاجباني دابا ... الذوق كايتبدل و من الاحسن ماتزيدش تعدب راسك على والو حيت راه نيت انا مامعمراش راسي بهادشي ديال العلاقات الغرامية
حط ذقنو على يديه .. وبقا متبع معاها هضرتها ، ايلا كان هي كايسحابلها بلي بهاد الطريقة غير كاتبعدو فراها غالطة حيت اغلب الرجال كايميلو لهاديك لي نييت ماكاتقبلش بديك السهولة ، هاديك لي كايكون خاصهم ليها جهد .. هو فاللول كان عند بالو بلي يقدر يخليها تقبل بالورد ولكن هي ماشي عاطفية ... الفلوس؟ مابقاتش تابعاهم يعني مايقدرش يخليها تقبل بالفلوس ... بالكادوات؟ حتى هما موحال يقدرو يخليوها تقبل ، كان عارف بلي ضروري ماغايكون عندها الكود ديالها وهاد الكود طاح فيه تقريبا ، ماكانش ناوي يبعد هاد المرة حيت كان مصمم باش تولي ديالو وهو من داك النوع ايلا دار شي حاجة فراسو راه كايوصل لها
جبد من جيبو 2 تيكيات و حطهم لها فوق الطبلة .. هزات وحدة منهم وبدات كاتقرا ديالاش حتى لقات بلي هاديك كانت تصريح الدخول لمهرجان وارن بافت ، ماكانش صعيب عليه يعرف حيت داك المهرجان ماكانش كايخطا لسانها فهاد الفترة لي دازت
حياة : [ هزات حاجب ] بغيتي طمعني بيهم؟
أصيل : [ ببحتو المميزة ] باغيك تمشي معايا
حياة : [ بقات كاتشوف فداك التصريح شحال ] نفكر و نرد عليك
أصيل : خودي وقتك
كان عارف مزيان بل متأكد غاتقبل تسافر معاه ويمشيو لداك المهرجان وكيفاش لا وهداك فرصة ماكاتتعوضش بالنسبة ليها .. فهاد الاثناء كانت هي كاتفكر غير كيفاش حتى ضبر فهاد التصاريح وهي شهراين و زيادة و هي كاتقلب على شي حد يكون عندو غيير تصريح عساك 2؟ واحد ليها و واحد ليه .. كانت احسن حاجة غاتوقع لها هاد النهار هي هاد القضية
صونا عليها التيليفون وطلعات لها نمرة بوفس .. ماعرفاتوش علاش كايصوني عليها فهاد الوقت ، ستأذنات و ناضت باش تجاوب
حياة : وي بوفس؟
بوفس : فرحي عندي خبار غاتعجبك
حياة : اشمن خبار؟
بوفس : كاين الشاري للطابلو ديالك
حياة : واش أصيل؟
بوفس : لا .. هادي واحد السيدة و من زهرك لقيتيها مولوعة بهاد الفن
حياة : [ تبسمات ] وا هدا بعدا خبار زوين
بوفس : ولكن غاتشريه من عندك بالتمن لي درتيه فاللول 250 الف
حياة : عادي ماشي مشكل
بوفس : نقاد لك امورك معاها؟
حياة : ولا عطيني نمرتها ولا الايمايل ديالها نهضر معاها
بوفس : ها هو شوية و يوصلك
قطعات معاه و وصلها الإيمايل ديالها ونمرتها .. رجعات جلسات فالطبلة وعااجبها الحال حيت لقات شاري اخر من غير أصيل
حياة : 250 الف يورو و هاد السيدة لي غاتشريه عارفة بقيمة الفن الرقمي ...
أصيل : هادشي ماكافيش
حياة : علاش؟
أصيل : عارفة علاش كنت باغيه؟!
حياة : حيت عارف بلي هداك هو المستقبل
أصيل : لا
حياة : وعلاش؟
أصيل : ماكاندعمش الفن الرقمي ولكن كاندعمك ، زدتي فيه اللمسة ديالك
حياة : خاص الشخص يكون متجدد حيت كون جينا نبقاو بنفس العقلية القديمة وماكانقبلوش التجديد كنا غانبقاو فالعصر الحجري
أصيل : التجديد لي كايكون واقف على الصح
حياة : وحتى هدا واقف على الصح
أصيل : يقدر الانسان يستثمر فشي طابلو ويرجع عليه بالخسارة
حياة : حتى التجارة فيها الربح والخسارة
أصيل : ربحها مضمون
حياة : بنادم ايلا كان كايقلب غير على الحاجة المضمونة ولي غاترجع عليه غير بالربح الربح الربح ماغاتكونش المغامرة هنا و الحياة هي المغامرة
أصيل : التجارة فيها المغامرة
حياة : المغامرة كاتعني ديرها فيد الله يا ربحة يا دبحة .. ماترخيش وتنسا راسك وفنفس الوقت ماتبقاش منغلق على راسك و مادير حتى شي محاولة باش تجرب شي حاجة جديدة
أصيل : البيع والشرا فيه هادشي
حياة : ولكن البيع والشرا باقي كايبان لي شي حاجة لي تقليدية
أصيل : وهادشي لي كاديريه؟!
حياة : هادشي لي كانديرو فيه غير الابداع والبيع .. ماكانشريش
أصيل : كاتخلصي الضو؟!
حياة : بيان سيغ
أصيل : كاتخلصي الويفي؟!
حياة : وي كانخلصو
أصيل : هنا كاتشري الضو والويفي باش تبدعي وتبيعي ، فهمتي شنو هو البيع والشرا؟! البيع والشرا مافيهش غير الحوانت ، جالسة فبلاصتك وكاتبيعي وتشري
أصيل : الانسان باش يزيد للقدام خاصو ماينساش الركازي ديال داك الضومين لي غايدخل ليه ، ايلا بديتي بلا ماترجعي للركازي لي مبنية عليهم التجارة من وقت جدودنا ماغاطوليش فيها
حياة : نرجعو للركازي ولكن ضروري من التجديد
أصيل : و انا ماشي ضد التجديد
حياة : عاد قلتي ماعندكش مع الفن الرقمي
أصيل : كاين فرق بين التجديد وبين تلوحي راسك وفلوسك فبلاصة نتي ماعارفاش واش غاتربحي منها
حياة : غانعاودو نرجعو للمغامرة هي اساس الحياة
أصيل : المغامرة هي تشري الحوت فالبحر؟!
حياة : عادي تقدر تشري الحوت فالبحر حتى هادشي كايتعتابر مغامرة
أصيل : باغا دخلي للتجارة باش تربحي ولا تخسري؟!
حياة : باغا ندخل لها باش نطيح و نعاود نوض ولا غلطت نتعلم عادي اي واحد كايطيح فاللول
أصيل : وعلاش ماتتعلميش من الاغلاط لي طاحو فيهم لي قبل منك؟!
حياة : حيت يقدر يكونو دوك لي طاحو فدوك الاغلاط ماعرفوش كيفاش يحولو الاغلاط لأرباح
أصيل : الغلط ماكايجيش من موراه الربح
حياة : وي كايجي
أصيل : غانسولك وجاوبيني
حياة : وي سول
أصيل : غاتشدي ديك ل250 الف يورو وغاتبغي تستثمري بيها فطابلو بان لك التمن ديالو غادي طالع ولكن فاش غاتشريه غاتهبط قيمتو ل1000 يورو كيفاش غاتقلبي هاد الخسارة للربح؟!
شعل ݣارو و جلس كايتسناها تجاوبو
حياة : أول حاجة انا ماشي حمقة باش نستثمر ب250 الف يورو كلها ثاني حاجة حتى وكان ايلا ستثمرت بيها راه غير غانشوف التمن هبط بديك 20 الف غانبيعو باش ماتكونش عندي الخسارة كبيرة ماشي غانتسنا حتى يوصل ل1000 يورو
بقات ساكتة شحال ... كيفاش غادير لها؟ طبعا ايلا وصلات للتمن ديال 1000 يورو راه غاتكون خسارة كبيرة ... كيفاش غاتربح فداك الطابلو نيت لي خسرات فيه؟ ، حسات بيه زمتها فهاد اللحظة ولكن ماكانتش قادرة توريه بلي تزمتات ... كانو عندها حلول ولكن كلهم حلول غير أخلاقية حيت كانو كايعتامدو على النصب و إستغباء الشخص لي غايشري
حياة : نتا عارف ايلا هبط التمن من 250 الف ل1000 هادي كاتكون فضيحة
أصيل : ماشي فضيحة
حياة : وي كاتتسما فضيحة مدام قلتي الطابلو كان طالع يعني كانو اشخاص كايتهاتفو عليه ولكن الخلل وقع فاش تبدل البائع ديالو
أصيل : ناوية تنتاحلي شخصية البياع اللول؟!
حياة : لا ولكن كانوضح لك فين كاين الخلل
أصيل : والحل؟!
حياة : نستغل ديك الفضيحة لي وقعات على الطابلو يعني الفضيحة نقدر نقلبها للشهرة و بهاد الطريقة غانسلط الاضواء على داك الطابلو لي هبط ديك الهبطة كاملة
أصيل : مايمكنش
حياة : علاش مايمكنش؟
أصيل : كاينين طابلوات غاليين عليه وكايتباعو بملايين الدولارات ، ايلا كان شي حد غايضيع وقتو باش يقابل شي فضيحة غايقابل فضيحة طابلو مشهور و غالي ماشي طابلو ديال 250 الف يورو ، من غير هادشي ماكاينش لي غايزعم يشري طابلو فوقت قصير هبط تمنو ب249 الف
حياة : كاينين لي عارفين بلي من مور كل هبطة كاينة طلعة صاروخية
أصيل : علاش هادشي ماوقعش مع الطابلوات لي هبطو و تنساو مع الوقت؟!
حياة : وشكون قال لك تنساو؟ الفن قيمتو كاينة حتى فالقدومية يعني ايلا دازت مدة طويلة يقدر داك الشخص يستغل هاد الثغرة
أصيل : غاتتسناي 50 عام باش عاد تربحي منو؟! ...
حياة : لا ماشي ضروري نتسنا ... ماتنساش بلي القيمة ديال الحاجة والشهرة حنا لي كانديروهم لديك الحاجة
أصيل : كي غاديري لها؟!
حياة : قلت لك قبيلا .. الفضيحة كادير الشهرة ، نقدر مثلا نشوف شي طابلو يكون جديد على الطابلو لي جات منو الخسارة وفنفس الوقت يكون مشهور عليه و نشوف نقاط التشابه بينو و بين الطابلو ديالي ونرفع دعوة على داك الشخص بتهمة عدم احترام حقوق الملكية وغايكون الدليل هو التاريخ ديال كل طابلو حيت ببساطة غانقول لهم بلي خدا الافكار من الطابلو ديالي و هادشي لي خلاه يطلع على الطابلو ديالي [ تبسمات ] بهاد الطريقة غانستفاد من 2 حوايج التعويض لي غايعطيني مول داك الطابلو و زيد عليها الفضيحة لي غايستفاد منها الطابلو ديالي على اساس هو الطابلو الاصلي
أصيل : غاتسرقي شهرة طابلو فنان وحداخر؟!
حياة : نتا سولتيني على كيفاش نحول الخسارة للربح ماشي قلتي لي بغيتي طريقة يكونو الاخلاق حاضرين فيها و على اي حال انا غير عطيتك مثال حيت اصلا انا ماكانشريش طابلوات و انا قادرة نديرهم .. عرفتي راني عطشت بكترة الهضرة والله
مازادتش هضرات و حتى هو خلاها تاكل ... واخا قالت ليه بلي هي ماكاتشريش ولكن لي كايشوف فيها ، ايلا طاحت فشي مشكلة ماغاتترددش باش تخدم بطريقة خبيثة يعني تزطم على وحداخر و وحداخر و وحداخر باش تطلع راسها وفعلا راه هادشي لي كاين ، هي كاتشوف بلي القاضي و شي مرات ماكايحكمش بالعدل علاش هي مثلا غاتلعب بعدل وفالمقابل تخرج بالخسارة؟
واخا شاف فيها هادشي ولكن لي شاف ورد ليه البال .. هي اصلا ماعندهاش مشكل باش تغطي شخصيتها يعني عراتها ليه و وراتو بلي هي ماشي من داك النوع لي كايقبل يكون ضحية والحاجة لي ماكانش متوقعها منها هي انها باعت الطابلو لوحدة خرا ب250 الف وتخلات على 250 الف كاملة كون قبلات تبيع ليه الطابلو ، بمعنى كان واحد التغيير ملحوظ نييت
اما حياة كانت بدات كاتكتاشف شخصيتو .. واخا كاين بيناتهم واحد الاختلاف كبيير ولكن فالنقاش ديالها معاه حسات بيه راسو عامر و ماشي من داك النوع لي كاينساحب من النقاش يعني ممكن كون ماشحفاتش و بغات تشرب و تاكل كان غايعطيها حاجة خرا تعصر معاها دماغها باش تجبد حل ، عزيز عليها تتناقش مع بحال هاد النوع حيت كاتستفاد منهم من شحال من بلان و كاتحس بالنقاش ديالها معاهم عاامر
حياة : مزال كون كان شي كادو لي خاص نقدر نفكر .. ولكن ديجا شفت بحال هاد السلسلة عند صوفيا واش كاتتسنا مني نقبل بالنسخة ديال شي حاجة؟ [ هزات التصريح و ناضت ] نقدرو نمشيو؟
ناض بغا يخلص و جبدات حتى هي الكارط بونكيغ ديالها .. فهاد الاثناء هو جبد الفلوس لي كانت حطاتهم ليه فوق الطبلة فاش مشات و هي معصبة و رجعهم لها
حياة : و انا ماكايخلصش عليا الراجل ، غانخلص على راسي
أصيل : فاش تخرجي راسك وخلصي لراسك
حياة : فاش تخرج مع مرا خرا و خلص عليها
أصيل : ماتقصحيش راسك
حياة : ماكانقصحش راسي مي علاش غاتخلص على شي حاجة دازت فمعدتي؟
أصيل : انا لي عارضك
حيد لها الكارط من يديها ورجعها لها لصاكها ومشا كايخلص ... مشات كاتتسناه حدا الطوموبيل حتى خرج وحل الطوموبيل و شدو الطريق لدارها ، وصلها وهبطات من مور ما سلمات عليه و غير سدات الباب ديال الطوموبيل وهو يعيط لها
أصيل : كاديري لي فراسك؟!
حياة : مدام قادرة نخلص على راسي علاش غاتخلص عليا؟ تصبح على خير
طلعات للدار وخلاتو كايشوف فالفلوس لي خلاتهم فبلاصتها قبل ماتنوض ... كانت رجعات ليه الفلوس لي رجعهم لها و زادتو عليهم حتى الفلوس ديال هاد النهار .. تحرك من تما و مشا قاصد المطار حيت اصلا جا للهنا غير على ودها
° بدلات حوايجها و جبدات البيسي ديالها ، ماكانش عاجبها الحال بزاف حيت كاتشوف راسها من فاش بدات هاد تداول العملات و هي غير غادا فالخسران ..يا كاتشري شي عملة لي ماغاترجعش عليها بشي ربح كبير يا العملة كاتكون غادا طالعة و غير كاتشريها كاتهبط بحالا تقول مجونبة و هادشي وقع لها بزاف ديال المرات .. ماعرفاتش مال زهرها تكوز هنا
سدات البيسي و مشات نعسات ولاغدليه غير فاقت اول حاجة دارتها هي هضرات مع ديك السيدة لي باغا تشري من عندها الطابلو وهضرات مع بوفس بلي غاتتعطل شوية على الخدمة حيت غاتمشي ترصي امورها مع ديك السيدة و داكشي لي كان ... طلاقاتها و قادات امورها معاها وموراها شدات شيك فيه 250 الف يورو مشات ديريكت صرفاتو ودوك الفلوس دوزاتهم لكونطها و ها هي و اخييرا باعت اول طابلو ديالها .. الفرحة كانت شاداها من الصبع الصغير ديال رجليها .. صونات على مدام تورية بشراتها بالخبار وموراها مشات لخدمتها وعاودات لبوفس على كيفاش داز اللقاء و عطاتو حتى هو العمولة ديالو من داكشي لي شدات ...
بوفس : دابا نقدر نقولك غاتتبدل بلاصة الطابلو الجديد ديالك
حياة : لا غير خلي البلاصة اللولة نيت لي تحط فيها الطابلو اللول .. هكاك حسن حيت لي غايبغي يشوف الطابلو لي من مور هداك غايمشي لديك البلاصة نيت
مشا وخلاها خدامة ... بقات كالعادة نهار كامل فخدمتها وفاش سالات رجعات للدار ، بداو الايام كايدوزو نهار من ورا نهار و الورد ولا كايوصلها لدارها فبلاصة المقر ديال خدمتها و كان أصيل فهاد الايام كل نهار كايهضر معاها فواحد الوقت محدد ، كمل الشهر و باقا الحالة هي الحالة تعجبات حيت ماعاودش جبد لها الموضوع .. داز شهر من مور داك الشهر وفداك الشهر كانو كايطلاقاو مرة فالسيمانة حتى ل2 مرات وفكل مرة كانت كاتزيد تعرف شخصيتو كتر و الطبع ديالو كتر ، لقاتو واحد الشخص لي كايقدر المرأة .. كايحتارمها و الأهم من هادشي كانت عندو شخصية عكس الشخصية لي كانت هي كاتشوفها ولكن لي مافهماتش ، علاش ماعاودش جبد لها سيرة تكون بيناتهم شي حاجة و واخا هكاك باقي كايسافر من بلاد لبلاد باش يجي يشوفها؟ و واخا هكاك باقي الورد كايوصلها و باقي كايسول فيها كل نهار؟
قرب الوقت ديال المهرجان وعلمات بوفس بلي غاتسافر على ود المهرجان .. بدات كاتوجد أمورها وكاتتسنا غير ايمتا تسافر لإيطاليا ، كانت هاد الفرصة من بين الفرص القلااال لي كايجيو حيت فالأصل هاد المهرجان السنوي لي كاينظمو وارن موالف ينظمو فأمريكا - نيويورك ولكن هاد المرة كان الاختيار على إيطاليا وهادشي لي خلاها هاد العام تحط عليه العين حيت تقدر تمشي لإيطاليا بسهولة
ماكانتش عارفة شحال غاتبقا فإيطاليا ولكن لي عارفة هو ماغاتجي من تما حتى تكون ستافدات من شي حاجة ، دارت فبالها باش تسافر بقبل من أسبوع باش يكون عندها الوقت نيت باش تعرف الاجواء تما و تشوف واش كاين مايدار .. ايلا لقات القضية تما مسلكاها كتر من فرنسا ممكن تنتاقل لتما ولا ماعجباتهاش غاتبقا ففرنسا حتى تلقا شي بلاصة فأوروبا تقدر تبقا فيها وتبدا فالخطوة الموالية للهدف التالي
شدات الطريق لإيطاليا - ميلانو وغير وصلات مشات شدات أوطيل حطات فيه الفاليزات ديالها وبدلات حالتها وخرجات كادور كاتستكشف المدينة و كاتتصور .. صونات على البنات بأبيل فيديو كاتوريهم فين كاينة
اية : ياودي نتيي لي عطاتك ليام ا بنت العبد
شيماء : الناس ديال السفر كل مرة فبلاد .. ا شفناك نسيتينا ماناوياش تضبري لينا فشي ݣاوري يهزنا من هنا
أية : بنت الحرام مشيتي لبلاصة التيتيز [ شافت فشيماء ] عرفتي كي دايرين الرجال ديال تما واك واااك
حياة : صبرو نوريكم واحد الرباعة واقفين قدامي
قلبات الكاميرا ديال التيليفون باش يشوفو وشدات اية فقلبها
أية : احح على قلبي التييتييز واللحية
خديجة : واش وقع لك شي مشكل ففرنسا؟
حياة : لا اش عندي مايوقع لي تما
خديجة : وعلاش خليتيها؟
حياة : كاين واحد الفيستيڤال هنا وماقدرتش نفلتو حيت كايكون مرة فالعام ومولاه كايديرو فنيويورك .. قليل فين كايديرو فشي بلاد خرا
أية : زهااي ليا مع راسك يا ختي ا ماكاين غير نيويورك ميلانو باريس .. حنا هنا ضايرين بينا غير المزالييط نضورو تا نعياو حدنا افران ولا مكناس
حياة : [ كاتشوف قدامها ] فبالي واحد البلان غانقدر نطلعكم بيه ب3 ولكن صبرو عليا غير نقاد شي أمور و نحط رحيلي فشي بلاد و ديك الساعة نجيبكم لعندي
شيماء : ومال فرنسا؟
حياة : بنادم فيها فشكل ماعجبنيش الجو فيها
أية : ياودي طلعينا ليها حنا غاتعجبنا و غانعرفو لها واش نعمة ربي كاضيع فيها وتقولي لينا مارتاحيتيش فيها ا بنت العبد
حياة : توحشتكم والله
خديجة : كون تشوفي حنا .. بلاصتك بقات كبيرة
شيماء : توحشت نخرجو مجموعين
أية : واييه .. كنا مزهيينها
حياة : خاص غير طلعو و غانعاودو نرجعو لدوك ليام
أية : ايام التنمر يا المتنمرة
خديجة : لا لا مابقاتش كاتتنمر
حياة : [ ضحكات ] غير حيت مابقاش عندي الوقت مي كايبقا الاصل هو الاصل
أية : هااا ما قالت الشوافة عمر الشيخة ما تنسا هزة الكتف
شيماء : واش صافي من فاش طلقتي من راجلك ماعاودتي طحتي فتا شي واحد؟
حياة : داكشي خاصو الاهتماام و تعطي لبنادم وقتو وليزابيل ولا طلاقيت بشي واحد مساالي قبو غايبقا يبرزط ليا راسي نهار كامل بليزابيل فينك؟ معامن؟ اش كاديري؟ باغي نشوفك ... تصوري و عاد ابيل فيديو و البعر الكحل مالي على حالي؟
خديجة : ولكن ماشي كلشي هكاك ، هادو غير دوك المشومرين البطاليين الحازقين هما لي كاتلقايهم مساليين لهادشي
حياة : من واحد الناحية عندك الحق ..
بقات كاتهضر معاهم شحال وغير سالات معاهم بدات كاتتصور ، وتصور فيديوهات ليها .. مشات لواحد الكافي وجلسات كاتختار فالتصاور لي تحط فالانسطا و شمن فيديو تحط .. ختارت لي بغات وصونا عليها أصيل كان هداك هو الوقت لي كايصوني عليها فيه
أصيل : وصلتي؟!
حياة : وي وصلت قبيلا
أصيل : بقاي فبلاصتك شوية ونكون عندك
حياة : راك قريب من هنا؟
أصيل : شوية
حياة : شحال تقريبا خاصك باش توصل؟
أصيل : [ مركز مع الطريق ] ربع ساعة ونكون معاك
حياة : ايوا صافي المهم هانا غانقطع حتى توصل
قطعات معاه الابيل و بقات كادور عينيها على لي غادي ولي جاي .. عجباتها هاد البلاصة ولكن واش غاتلقا فيها راحتها؟ هدا هو الاهم عندها .. بقات جالسة وكاتقلب فتيليفونها على اخر اخبار المهرجان لي غايكون حتى دازت ربع ساعة و صونا عليها اصيل كايسولها فين كاينة .. نعتات ليه فين كاين وجا لعندها ، ناضت خلصات الكابوتشينو لي شرباتو وتحركو من تما لجهة الطوموبيل ديالو .. ماجابتش معاها طوموبيلتها حيت ماكانتش ديال السفر و المسافات الطويلة غير ديال سير و اجي و صافي
أصيل : [ حاضي مع الطريق ] حاطة حوايجك فلوطيل
حياة : وي ... جالسة فلوطيل عاد خاصني نقلب على شي اپاغطومو نكريها
أصيل : ماتحتاجيش ، شمن لوطيل جالسة فيه؟!
حياة : أوطيل ديل سود
وصل للوطيل لي عطاتو سميتو وبلاصا الطوموبيل
أصيل : طلعي جيبي حوايجك
حياة : وعلاش بالسالاما؟
أصيل : هدا لوطيل يجلسو فيه الناس؟!
حياة : ماغانعيش فيه راه قلت لك غانبقا فيه نهار ولا يومين على مانلقا شي اپاغطومو
أصيل : طلعي جيبي حوايجك غانديك لبلاصة خرا
حياة : دارك مثلا؟
أصيل : غانديك لبلاصة تليق لك
حياة : [ حلات الباب ديال الطوموبيل وخرجات ] شوف غانقولها لك من دابا .. ايلا شفتك غاتديني لدارك ماغانتفاهمش انا وياك ولا لقيتك ناوي تحطني قدام دار مروى ماغانتفاهمش انا وياك
مشات باش تجيب حوايجها وخلاتو كايتسناها فالطوموبيل غبرات شي 10 دقايق و هبطات بالفاليزات ديالها .. مشا عاونها و حطهم اللور
ركبو وشدو الطريق ماحبس حتى لقدام واحد لوطيل .. كان كايبان فخم من برا اما من لداخل مانعرفت كيفاش غايكون
حياة : شوف غير رجعني منين جبتيني .. كون بغيت نجلس فشي لوطيل بحال هدا كون مشيت ليه من اللول ، ماكانطبعهمش باش نحطهم فلوطيل بحال هدا
هبط من الطوموبيل وجبد الفاليزات ديالها من الكوفر ، غايبقا كايتناقش معاها وقد ما تناقش معاها غاتزيد تقصح راسها .. تبعاتو و هزات التيليفون كاتقلب فكوكل على التمن ديال الليلة هنا ، غير كتبات سمية لوطيل و هي تبان لها واحد ل1451 يورو مجبدة تما يعني قريب لمليون ونص مغربية الليلة لوحدة ، واش هي كارية فلوطيل ب43 يورو يعني تقرييا 430 درهم وعاد باغا تقلب على برطمة باش ماتخسرش فلوسها فلوطيلات وهو جايبها لهدا؟ .. بدات كاتزرب بخطاوي وماجات فين تلحق عليه حتى كان دخل لداخل بان ليها المسؤول على لوطيل جا لعندو وبدا كايهضر معاه بالايطالية .. ماكانش صعيب عليها تفهم شنو كايقولو بحكم كاين تشابه بين الايطالية و الإسبانية ولي قدرات تفهم من الهضرة .. كان أصيل كايوصيه عليها وعلى الشومبر لي يعطيها و الأهم ، كان هاد لوطيل ديالو
سالا الهضرة معاه و جا واحد الشخص شد من عندو الفاليزات وعاد تلفت ليها
أصيل : [ شاف فالمكانة لي فيديه ونطق ] غانمشي نقضي واحد الغرض ونرجع
حياة : مي حنا ماتفاهمناش على هادشي ماشي غير حيت لوطيل ديالك غانجلس فابور
أصيل : ضيافي ماكايخلصوش ونتي ضيفتي [ صونا عليه التيليفون وبقا كايشوف فالمتصل .. عاود شاف فحياة وكمل هضرتو ] فاش تحتاجي شي حاجة هبطي لعندو ولا عيطي لي ندوي معاهم ، ردي البال لراسك
دوز يديه على دراعها ومشا من تما و جاوب فالتيليفون .. اما هي فهاد الاثناء بقات كادور فلوطيل و كاتستكشفو ، النزلاء لي كانو فيه من حوايجهم كان باينين صحاب الفلوس و جيابهم متقليين وعلاش واش المزلوط يقدر يخلص قرابة مليون و نص الليلة فأوطيل 5 نجوم؟ .. من واحد الناحية عجبها الحال و عجبها كيفاش كان كايتعامل معاها المسؤول على لوطيل فاش عرفها ضيفة خاصة .. الفلوس شحال زينين ولي كايقول عليهم وسخ الدنيا غير كايكدب على راسو بهاد الهضرة ... وراوها الشومبر ديالها لي كانت كبر من الشومبر لي كانت فلوطيل لي كانت فيه وهادشي بلا مانهضر على الدوش و الأثاث ديالها و الإطلالة ، و النقااا .. عكس ديك لي كانت فيها فلوطيل لاخر كانت شوية محشرة وا معذرو يقول لها واش داك لوطيل يجلسو فيه الناس .. ها لي كايقولو عليه الناس لوطيل ، تلاحت على الناموسية حسات براسها بحالا ناعسة فوق السحاب .. خرجات من تما كادور و تشوف شنو كاين فهاد لوطيل ، لقات فيه جمييع وسائل الترفيه لي تبغيها ولا تتشهاها .. معذرو داير هاد التمن كامل و معذروو واخد 5 نجوم ...
هزات البيسي ديالها و مشات جلسات فالبالكون .. دخلات لسيت Crypto ، واخا لحد الساعة خسرات كتر من داكشي لي ربحاتو فتداول العملات ولكن ماكانتش باغا تحبس .. غير كايطلع لها الدم كاتسد البيسي و كاتمشي تبدل ساعة بخرا وكالعادة جتى دابا كانت مزاال خاسرة و هادشي كاتشوفو كاتزيد تمرض
مشات كاتقلب فأخر الأخبار .. هادي شهراين تقريبا كانت سمعات شي خبار على شي واحد مغربي التحليل ديالو للعملات كان كايكون ديما صحيح 100٪ هو الصراحة ماشي هادشي لي سمعات بالضبط حيت لي سمعات كان كايهضر على ثروتو لي كتاسبها من تداول العملات وقدر يقتاحم عالم الأغنياء بديك الثغرة نيت ، ماكانتش جاتها شي حاجة غريبة حيت هي عارفة مزيان بلي بنادم فمدة عام قادر يولي ملياردير بسباب تداول العملات و يقدر يدير داكشي لي ماداروش واحد سنانو طاحو و شعرو شاب و هو كايطلع و يعلي فالمشاريع ... و كاينين اشخاص لي ضاعفو ثرواتهم لأضعاف بسباب تداول العملات بحال مثلا "بـنـكـمـان فـرايـد" لي ضاعف ثروتو و وصلها من 8.7 مليار دولار ل26.5 مليار دولار فظرف عام و هادشي كامل و هو عندو يلااه 29 عام يعني شخص لي قادر يعيش الرفاهية و هو باقي صغير و من فوق هادشي عندو مؤسسة بورصة على قدها و من غير هدا كاين "بــريــان أرمــســتــرونــج" لي حتى هو باقي صغير و مع ذلك قدر يبني ثروة فظرف عام طور ثروتو من مليار دولار ل6.5 مليار دولار و من الفوق مأسس شركة مسميها كوين بيس و بلا ماندوزو للتوأم "ويــنــكـلـيـفــوس" و "مــايــكــل ســايــلــور" ... "فــريــد إهــرســام"
هادو كلهم بناو ثروات فأقل من 10 سنوات كاين لي بنا ثروة فظرف 10 أشهر و كاين لي بناها فظرف عام و كاين لي بناها ف3 سنوات و كاين لي بناها ف6 سنوات وبلا هادوك لي مزال مامعروفينش حيت كايلعبو غير فالخفاء و دابا منين شافت هاد المغربي لي حتى هو قدر يبني ثروة فظرف 3 سنين شداتها الفقصة على راسها .. ها هو مغربي بحالو بحالها بنا راسو ف3 سنين لا و من الفوق التحليل ديالو للعملات ديما كايجيبو صحيح ، مال التحليل ديالها؟؟ واش هو عندو العقل و هي ماعندهاش؟؟ كي دار لها لا هو لا هادو؟ وي هي كانت عارفة تداول العملات فيه المغامرة بزااف ولكن كانت باغا تربح منو دغيا و هادشي بالضبط لي كايخليها تخسر و ماتحللش بطريقة صحيحة حيت كانت من النوع لي كايقول صافي فظرف 3 اشهر نقدر ندير ثروة بتداول العملات و هاد الفكرة واخا هي كاتشوفها عادية الا و ان هاد الفكرة كانت من بين الاسباب لي كايخليو تحليلها يكون غالط .. ماكافيش .. ماصحيحش
بدلات حوايجها و هبطات جلسات لتحت فالريسطو ديال لوطيل تعشات و رجعات للبيت باش تنعس
داز عندها داك الأسبوع عادي ، شافت أصيل شي 3 ديال المرات بسباب الخدمة و الأشغال ديالو و من غير هادشي كانت غير كاتستكشف المدينة و مقابلة خدمتها و تصاور و لي زابيل مع صحاباتها
وصل النهار ديال المهرجان .. كانت متحمسة بزاف ، حاولات تقلب فالخلفيات ديال كاع لي غايحضرو باش فاش تجي تبغي تهضر مع شي واحد تعرف كيفاش تهضر معاه .. دابا بقات ليها حاجة وحدة ، خاص غير توصلها لاغوب لي شرات و نورمالمو كان خاصها تكون وصلات ولكن شافتها تعطلات
مادازش بزاف ديال الوقت حتى سمعات الدقان فالباب .. لقات قدامها واحد المرا من حوايجها كان باين بلي خدامة هنا ... شافت شنو هازة فيديها و توقعات تكون جابت ليها سخرتها داكشي علاش خلاتها تدخل و تحط ليها الكريطينات و داكشي لي فيديها
غير خرجات سدات الباب و بدات كاتقلب ... حلات السلسلة باش تشوف لاغوب ديالها ولكن ستغربات منين مالقاتهاش هي ، هي عاقلة بلي لاغوب لي ختارت كانت فلكحل مي هادي لونها حمر و ماكاتشبهش للاخرا فحتى حاجة
هزات تيليفونها باغا تصوني و تشوف ياكما غالطين ولكن سبقها أصيل لي صونا عليها ...
أصيل : واجدة؟!
حياة : [ تأفأفات و شافت فديك لاغوب ] مزال
أصيل : شنو معطلك؟!
حياة : والو غير وصيت على شي حاجة و سيفطو لي حاجة خرا
أصيل : ماعجباتكش؟!
حياة : زوينة عجباتني مي.. ... [ قرنات حجبانها ] بلاتي واش جات من عندك؟
أصيل : باغي نشوفها عليك
حياة : يعني جات من عندك ياك؟
أصيل : غانتسناك تلبسيها هاد نهار
حياة : [ تبسمات ] واخا
قطعات معاه الإتصال ومشات كاتوجد راسها للمهرجان في حين هو كان كان واجد و كان نيت فلوطيل
عارفها كاتموت على الحمر و عارفو كايواتيها ... داكشي علاش ماخلاهاش هي لي تختار شنو تلبس هاد النهار ، إنطلاقا من اللبس لي ولات كاتلبس كان عارفها غاتختار شي غوب فشكل بمعنى تقدر تكون مزيرة بزاف و تقدر تكون معرية داكشي علاش لاغوب لي ختار لها كانت شوية مستورة و فنفس الوقت غالبة عليها الفخامة
هو فالأصل و فالحقيقة ماكانش باغيها تمشي للمهرجان حيت ببساطة مخلط وهو من النوع ايلا بغا شي وحدة ماكايخليهاش تجلس حتى مع صحابو عساك رجال كاتجمعو بيهم علاقات سطحية؟ طبعا هادشي كان كايشمل حتى الحفلات لي ماكايبغيهاش تحضر لهم ولكن هنا ماكانش عندو شي اختيار حيت ببساطة حياة مزال ماقبلات ، و هو عارفها دايرا كي الصابونة الفازݣة .. فاش كاتبغي تزير عليها بيديك كاتزلق داكشي علاش كان خاصو يخليها حتى تنشف بمعنى حتى تقبل
بقا كايتسناها لتحت و فنفس الوقت كان مقابل خدمة خرا .. دازت تقريبا ساعة و هي مزال ماهبطات ، شاف فالمكانة و يلاه بغا يشوفها فين وصلات و هي تبان ليه هبطات و كاتقلب عليه ، طلعها بندراتو من اخمص رجليها لقمة رأسها .. شافتو و تبسمات ليه ، قربات عندو بخطوات و الطالون ديالها كاينخر الارض .. كانت مكحلااها بحال الغراب و لاغوب لي بغاها تلبسها هي لي حلفات لالبساتها لا و من فوق هادشي عطاتها لوحدة من لي خدامات هنا
ضربات ليه توقعاتو عرض الحائط ل2 أسباب السبب الأول هو مالبسات حتى حاجة من داكشي لي عطاها واخاا اللون لي كاتبغي و السبب التاني .. لقاها اصلا مالابساش شي غوب معرية .. كالعادة الحوايج المناسبين للأماكن المناسبة .. كان باين نوع المهرجان لي غاتمشي ليه و باش ياخدوها بجدية كان خاصها تعرف تختار المظهر لي تبان بيه بمعنى كانت عارفة بلي العرا ماشي ديال هاد البلايص و أبار هادشي ، هي ماكانتش من داك النوع لي كايشوف حرية المرأة كاينة فالعرا
حياة : [ مدات ليه يديها و تبسمات ] مشينا؟
شد يديها و مشاو لجهة الطوموبيل ديالو .. حل ليها الباب ركبات و مشا هو للجهة لاخرا ركب و شدو الطريق للبلاصة لي غايكون فيها المهرجان
أصيل : [ مركز مع الطريق ] ماعجباتكش؟!
حياة : [ عينيها على الطريق ] لا ، عطيتها للسيدة لي غاتعجبها نيت
أصيل : [ قطب حجبانو ] عطيتيها؟!
حياة : وي عطيتها ... الانسان فاش كايبغي يعطي كادو كايقول لمولاه واش تقدر تلبسها على ودي .. واش ممكن نشوفك بيها ماشي كايبغي يفرض عليه و يقول ليه بغييتك دير هاد الحاجة
أصيل : على هادشي عطيتيها؟!
حياة : وي
أصيل : الكادو ماكانلوحوهش
حياة : مدام ولا ديالي نقدر ندير بيه لي بغيت و زايدون مالحتوش ، عطيتو
أصيل : لمن عطيتيه؟!
حياة : ياك عطيتيه لي علاش باقي كاتسول عليه؟
زفر ودوز يديه على الذقن ديالو .. مازادش هضر معاها ، الحاجة لي فهمها هي المشكل ماشي فالإختلاف لي بيناتهم المشكل هو حياة ماكانتش مخلية منين يدوز الما .. كان خاصها تتنازل واحد الشوية ضروري حيت لحد الساعة كايحسها حاطة واحد الحاجز بينها و بينو و داك الحاجز هو لي خاصو يتهرس
وصلو للوجهة ديالهم وبلاصا الطوموبيل ، هبط وعطاها دراعو باش تشد فيه و داكشي لي دارت .. زادو واحد الشوية حتى وقفو عند واحد الشخص كايتحقق من التصاريح عاد دخلو للداخل ، كانو كايبانو كوبل مثالي لا من ناحية الطول والا من ناحية المظهر ديالهم ، كانت هي فهاد الاثناء غير كاتدور عينيها على الحضور .. كاينين لي عرفاتهم غير من كوكل طبعا و كاين لي أول مرة تشوفهم ، معذرو يكون هادشي بالتصريح حيت كاع لي كانو حاضرين تقريبا كانو من اصحاب الوزن الثقيل و شي وحدين منهم شافتهم كاينين ماتوقعاتش نهائيا بلي غايجي شي نهار تقدر طلاقا معاهم وجها لوجه
طاحت عينيها على واحد الشخص و ترسمات على شفايفها ابتسامة واضحة .. كانت فرحانة و مامتيقاش بلي حتى هو كاين هنا اصلاا عمرها توقعات بلي يقدر يجي شي نهار و تتجمع هي وياه فبلاصة وحدة
حياة : [ بعدم تصديق ] واش هداك ايلون ماسك؟ ...
كان هو نيت و ماكانش غير بوحدو فداك الفيستيفال .. كان طبعا مول هاد المهرجان لي هو وارن بافت و كانو اشخاص خرين بحال جاك ما ... كارلوس سليم ... بيل غيتس ... أمانسيو أورتيجا .. جيف بيزوس و طبعا كانو حتى العيالات بحال دوريس فيشر ... جيل ميلر ... ليندا ريسنك و زييد و زيد المهم مهرجان كاتشم فيه ريحة الثراء من بعييد دابا السؤال لي عندها هو شحال غاتكون كاتتقدر ثروة أصيل مدام قدر ياخد تصريح بحال هدا؟ .. ردات البال لواحد الحاجة و هي انه ماكانتش الصحافة هنا ، يعني دابا اصلا تصاورها معاهم ماغايخرجوش من هنا؟ هادشي كايعني خاصها تبذل مجهود كتر
طلقات منو و بقات غادا حداه و فكل مرة كايبغي يسلم على شي واحد .. حتى هي كاتسلم عليه و كاتتسنط لهضرتهم و فاش كاتلقا منين تدخل لوسط النقاش كاتدخل وكاتقلبو لشي حوايج لي هي عندهم معاها و لي قدرات تعرف من خلال هادشي لي سمعات فاش كانت حدا أصيل هو انه ماكانش عندو غير داك لوطيل و المركب لي ففاس و انما كان عندو سلسلة ديال الفنادق لي كانو كلهم 5 نجوم و واحد من بيناتهم كان فدبي 7 نجوم و من غير هادشي كان عندو سلسلة مطاعم و سلسلة مقاهي اما داك المركب كان غير على ود فاش كايمشي لفاس باش كايجلس هو و أدم فيه ولا هو و شي صحابو و هادشي غير داكشي الكبير يعني ما خفي اعظم ، طبعا هاد الثروة كاملة ماجاتش و تكونات بين ليلة و ضحاها حيت داكشي كان من الجد للأب ومن قبل مايموت الاب ديالو و أصيل كايعاون و كايطور فهاد الثروة حتى وصلات لفين وصلات دابا حيت مقارنة بداكشي لي كان عندهم لهادشي لي كاين دابا كان واحد الفرق كبيير و هادشي طبعا بفضل الجهد و الذكاء ديالو
بدات كاتشد الهضرة مع دوك لي كايجيو يسلمو على أصيل حتى كايجي شي شخص اخر يسلم عليهم كاتخليهم و كاتمشي تهضر مع داك لي عاد جا ، كان غرضها تهضر مع ديك الطبقة ديال ايلون ماسك ولكن مابقاش كايبان لها .. ماعجبهاش الحال و حسات براسها ضيعات واحد الفرصة ذهبية ، ندمات اشد الندم حيت مامشاتش عندو ديريكت حيت داك الشخص كان كايبان لها هو الشخص الأكثر قيمة فهاد المهرجان كامل ولكن هادشي ماخلاهاش تتراجع على الفكرة لي جات على ودها للهنا حيت بقات غادا بشوية بشوية من واحد لواحد تحت أنظار أصيل لي متبعها بعينيه حتى وصلات لوارن بافيت
هدا بالضبط كانت جمعات عليه شلاا معلومات و كان خاصها غير منين دوز ليه .. بدا الشخص لي معاها كايعرفهم عليها و بحكم انها كانت وجه جديد اول مرة يشوفوه و اول مرة اصلا يعرفوها كاينة على الوجود كانو البعض منهم مامسوقينش ليها و من بينهم وارن بافيت لي كان كايهضر مع المعارف ديالو في حين البعض الاخر كاين لي كان كايهضر معاها و كاين لي كانت كاتبان ليه متطفلة على هاد المهرجان و كاين لي كان كايسولها كيفاش حتى خدات التصريح و كاين لي كان كايسولها واش هي مرافقة؟ ... المهم فبحال هاد البلايص الجمال و الشباب ماكاتكونش عندو شي قيمة كبيرة قد ماكاتكون قيمة لمكانتك الإجتماعية اما فحالة حياة الحاجة لي خلاتهم يعتابروها متطفلة و مايعطيوهاش وقت أصلا ماشي غير حيت ماعندهاش شي مكانة إجتماعية .. السبب كان هو داك الميدان لي هي فيه و لي ذكرو داك الشخص لي عرفهم عليها حيت داك الميدان بصفة عاامة سواء الفن الرقمي او تداول العملات الرقمية ، مشبوه و هادشي سمعاتو نيتةمن هضرتهم مع بعضياتهم عليه و هما متجاهلين وجودها
مارضاتش من داك التعامل لي عاملوه بيها و كيفاش ماعطاوهاش الوقت و اصيل كان شايف هادشي و ماكانش صعيب عليه يعرف شمن موقف تحطات فيه
° تقدمات بخطواتها حتى تقابلات مع وارن بافيت لي كان عاطيها بالضهر
[ الحوار بالإنجليزية ]
حياة : [ بتاسمات ليه بلباقة ] عندك شي وليدات؟
شاف فدوك لي حداه وعاود شاف فيها مستغرب من السؤال ديالها
وارن : [ بنظرات إستغراب ] ماكاتعرفينيش؟
حياة : [ محافضة على نفس الابتسامة ] لا كانعرفك ولكن غير بغيت نزيد نتأكد
وارن : عندي لولاد و الاحفاد و قريب يوليو عندي احفاد الاحفاد
حياة : و ثروتك ايلا ماخفت نكدب غاتكون فاتت 111 مليار
_ [ ضحك واحد من دوك لي حاضرين ] هادي بانت لي شي وحدة مهووسة بيك
حسات بشي حد حاوط لها خصرها بيديه غير تلفتات ليه لقاتو واقف فجنبها .. كان محاوط خصرها بيد و اليد التانية خاشيها فجيبو .. حسات بيه بحالا حس بيها فموقف خايب و بغا يجي يعاونها باش مايخليهاش بوحدها
أصيل : [ مقطب حجبانو ] مالك؟
حياة : [ جاوباتو و عينيها على وارن ] والو غير كانتناقش انا و مسيو وارن .. ماجاوبتينيش ا مسيو وارن ...
شخص بحالو عايش هاد السنين كاملة .. ماكانش خافي عليه بلي كاين موضوع من مور داك السؤال لي سولاتو و كاين حوار شيق نييت
تقابل معاها كدليل على الاهتمام بالنقاش و نقط
وارن : كانظن الجيل ديالك كايعرف للانترنت و كايعرف يقلب باش يعرف الثروة ديالي
حياة : ماكدبتيش ولكن الانترنت ماغايجاوبنيش على هاد السؤال لي عندي حيت الجواب كاين عندك غير نتا
وارن : [ بإهتمام ] شنو هو هاد السؤال؟
حياة : شنو هي أول حاجة كاتشوفها فالمرايا كل صباح؟
وارن : ماكايكونش عندي الوقت للمرايا
سمعات واحد ضحك و كانت فديك الضحكة رنة السخرية .. ماتسوقاتش لها حيت اصلا اخر حاجة تتسوق لها هي ضحكة بحال هادي
حياة : و عينيك اش كايشوفو كل صباح؟
وارن : كايشوفو السقف
حياة : فاش كاتبغي تدخل للدوش ماكاتشوفش فالمرايا؟
وارن : هادي حاجة طبيعية
حياة : فديك المرايا اش كاتشوف؟
كان متبع معاها و هو عارف بلي هاد الحوار فيه شي حاجة من غير المرايا ... حيت المرايا ماكانت الا البداية
وارن : كانشوف راسي
حياة : لا ا مسيو وارن فاش كاتشوف فالمرايا كاتشوف العلامات ديال كبر السن ... ديال الشيخوخة [ تبسمات ] العلامات لي كايوريوك بلي السنين لي عشتيهم كتر من السنين لي باقيين ليك فهاد الدنيا و باش نكون واضحة كتر معاك .. نهار على نهار كاتعرف بلي مابقاش ليك بزاف فهاد الدنيا .. كل نهار كايدوز كايتحسب فعمرك ، تبارك الله راك عايش 91 عام .. مراتك ماتت البركة فراسك واخا جات معطلة
حسات بيه تزير و حتى أصيل ماعجبوش الحال علاش تجبد هاد الموضوع .. تحدر لودنيها و هضر معاها بينو و بينها باش مايحرجهاش
أصيل : شنو وصلك لهاد الهضرة؟!
ماداتهاش فيه .. كانت كاتراقب غير لون وجه وارن لي تبدل فاش جبدات ليه مراتو .. كاع لي كانو تما كانو عارفينو كان كايحماق عليها و من فاش ماتت ماعاودش شاف فوحداخرا و حتى هي كانت عارفاه بلي ماتزوجش من مور ما ماتت مراتو .. كوكل كافية و وافية
وارن : [ شاف فأصيل ] ديها من هنا .. ماتخلينيش نلوحها برا
أصيل : [ دوز يديه على الذقن ديالو ] ماتحكمش على الكتاب من غلافو ولا النقاش من بدايتو
وارن : [ شاف فحياة ] اخر فرصة غانعطيها لك
حياة : ايلا كنتي ناوي تعطيها لي ا مسيو وارن ماتقاطعنيش باش تفهمني اش بغيت نقول
وارن : كانسمعك
حياة : [ تبسمات ليه بلباقة ] ميغسي ... كي قلت لك ا مسيو وارن نتا كبرتي و ماضامنش شنو غايوقع لك من هنا للقدام وكيفما كاتعرف الناس الكبار كايتقسمو ل4 فئات الفئة الأولى كانت منهم مراتك لي مشات من هاد الدنيا واخا هي صغر منك [ شافتو بدا كايتزير تاني ] ... الفئة الثانية كاتمشي لهم صحتهم و كايبقاو عايشين غير بالخيوطة و ماكايتحركوش ايلا ماحركوهمش ولادهم ... الفئة الثالثة كايجيهم مرض الخرف .. الزهايمر .. النسيان اي مرض عقلي لي كايخلي قراراتهم كاكاتكونش بكامل قواهم العقلية ... الفئة الرابعة هادو كايبقاو بصحتهم و كايعيشو طول من الفئات لي ذكرت مي هاد الفئة قليلة و من زهرك نتا منهم ولكن واش هاد الزهر معاونك غير نتا؟ حيت حاجة باينة كاينين شي وحدين من عائلتك لي كاتلقاهم باغيينها فيك و نتا عارف بلي ضروري ماكايكون شي حد عندو ضغينة من جهتك يعني كايبقا إحتمال وارد يوقع لك ماكايوقع لدوك الفئات ب3 لي ذكرت ويكون سبابك واحد من ولادك ولا حفادك
وارن : نتي شنو كاتخربقي عليا؟
حياة : ماكانخربقش .. خليني نكمل و غاتفهم ، وي تقدر تكون واحد من بين دوك 3 ديال الفئات اللولين ، يقدرو يكونو كايعطيوك دوا لي كايأثر على الخلايا الدماغية ديالك ، يقدرو يتسببو لك بالخرف و يخليوك تسيني على وراق باش يخليوك الله كريم .. يقدرو يحمقوك و يلوحوك فسبيطار الحماق ... يقدرو يعطيوك السم و يتهناو منك بمرة ، واش نتا غاتضمن ديك الساعة لراسك جنازة لائقة؟ و الاهم هو واش نتا غاتموت مرتاح و هما قاتلينك بالغدر؟ ... ماغاتقدر تضمن حتى حاجة لا جنازة لائقة لا قبر لائق حيت ببساطة ورقة وحدة قادرة تحيد لك كاع هادشي لي عندك دابا
أصيل : [ شاف فالمكانة ] خلينا نمشيو
حياة : [ ماشافتش فيه .. كانو باقيين عينيها على وارن ] ولكن ا مسيو وارن إيلا كانو عندك ممتلكات و ثروة فمحفظة إلكترونية و تكون مخلي محامي ثقة هو الوصي عليها باش فحالة ما وقعات لك شي حاجة خايبة لاقدر الله و متتي و قبل ماتموت يكونو حيدو لك املاكك .. غاتكون عندك ثروة ماقادرينش يوصلو لها حيت مايقدرو ياخدوها منك بحتى شي وثيقة و بديك الثروة المحامي يقدر يتكفل بجنازتك ايلا ماتكفلوش بيها و حتى ايلا دخلوك لسبيطار الحماق غاتكون عندك ثروة باش تخرج راسك .. يعني المحفظة الالكترونية فبحال هاد المواقف كاتكون نافعة حيت ماجاتش تعيش حياتك فالثراء الفاحش و تكملها بيحرقو الجثة ديالك بلا جنازة لائقة .. ولي غانقول لك انا ماعارفاش شنو بينك و بين بنادم وشكون حاقد عليك [ تبسمات ] ولكن لي عارفة هو داك الكاس لي فيديك فيه شي حاجة يا غاتديك للقبر يا غاتخليك معاق يا غاتديك لشي سبيطار [ هزات الكاس و تبسمات ليه بلباقة و نطقات بالإسبانية ] سالود ( نخبك ) مشات من تما و خلاتو كايشوف فالكاس لي فيديه و واحد كايشوف فواحد و ما هي الا لحظات حتى بدات كاتترون الدعوة من مور ما شم ريحة فشكل فالكاس ديالو ...
كانت عندها هاد المعلومة دقيقة حيت فالوقت لي كانت كاتتنقل من بلاصة لبلاصة فالمهرجان و غير كادور من واحد لواحد .. لمحات واحد من لي كايسربيو كان واقف فواحد الزاوية و كايقطر شي حاجة فالكاس تما فين بقات متبعاه بعينيها حتى مشا بيه لإيرون و على حسب داكشي لي شافت فيه .. كان باين بلي داكشي لي قطرو ليه فالكاس ماكانتش شي حاجة طبيعية حيت كان باين عليه التوتر و كايشوف هنا و كايعاود يشوف لهيه واش شافو شي حد و باش زادت تأكدات بلي فعلا كاينة شي حاجة غير طبيعية فداك الكاس .. الكاس لي تعطا لوارن كانو فيه 2 من اعواد القرفة و القرفة من بين الحوايج لي كايستعملوهم باش يغطيو على المذاق ديال السم ولا اي مذاق ماباغيينوش يحس بيه ولي ستنتجاتو هو الشخص لي كاين من مور داك لي كايسربي و لي قال ليه شنو يدير غالبا غايكون يا من ولادو يا من حفادو حيت مايمكنش يجي لي كايسربي و يختار يحط اعواد القرفة فالمشروب ديالو باش يغطي على المذاق .. يقدر وارن يرفض ببساطة ، راه ماشي شي حد لي غايقبل واحد كايسربي يختار ليه شنو يشرب يعني هدا واحد الشخص قريب ليه لي قنعو بقضية يزيد عويدات القرفة للمشروب ديالو باش ياخد راحتو فالمدة لي كان كايعطيه داك السم ولا أي كان و الخلاصة من هادشي كامل ... هادشي ديال اليوم كانو من زماان و هما كايعطيوه لييه ماعرفاتش شحال المدة بالضبط ولكن ماكانتش غاتخلي فرصة بحال هادي ضيع منها
عارفة راسها جبدات ماشي غير النحل .. بل شي حاجة كتر من النحل حيت غايقدرو يشكو فيها هي نيت لؤ حطات ليه داك العجب ولكن الكاميرات لي كانو ف2 زوايا كانو شادين داك السرباي ولا مشاو حتى تلاعبو بيهم و بغاو يضوروها غاتجبد لهم الفيديو لي صوراتو .. حيت فاش شافت داكشي و فاش قررات تلعب بهاد النقطة كانت عارفة بلي يقدرو يقلبو عليها كلشي و كانت عارفة بلي الفاعل الحقيقي غايبغي يا يغرق ليها الشقف يا يقدر يبقا تابعها فحياتها ولكن كي كاتقول هي ، الحياة هي المجازفة .. ماكانش عندها مشكل فهادشي و كانت متوقعة كلشي .. الأهم من هادشي هو النتيجة ديال هادشي لي كانت متأكدة منها غاتكون نتيجة مرضية
أما أصيل كان عارفها دخلات راسها فواحد اللعب كبير عليها و بزاف حيت الشكوك غايتوجهو ليها هي اللولة غير يتأكدو من شنو كاين فداك الكاس بالضبط .. بحكم هادشي عمرو كان حتى جات هي و ثانيا غاتولي مستهدفة من طرف هدا لي دار هادشي لوارن
ترون المهرجان و بداو كايقلبو على داك لي عطا الكاس لوارن ولكن مالقاوهش بحالا سرطاتو الارض .. ماخلاو حتى واحد يخرج من داك المهرجان و باش نكون اكثر تحديد حطو على حياة حيت اصلا هي لي جبدات هادشي ، و داوها تجلس فواحد البيت باش ماتهربش و هادشي ماجاش من فراغ حيت فالاصل كانو غايمشيو يجلسوها مع البوليس و تاكل الدق لي يخليها تعتارف بحاجة هي مادارتهاش مي أصيل جا فصفها
و ديك الروينة لي هي خلاتها برا كان هو كايحلها بالتيليفونات باش حقها مايتهضمش ويغبرو لها الاثار .. على اساس راها ماقادراش على راسها ، ماكانش فراسو بلي مصورة داكشي و هادشي بالضبط لي مخليها مكالمية و جالسة فالبيت لي دخلوها ليه بحالا ماواقع والو
حاطة رجل على رجل و كاتدور عينيها فالديكور ديال البيت لي خلاوها تجلس فيه وفهاد الأثناء لي كانت هي جالسة ماعلابالهاش بشنو واقع على برا كانو طاحو فالتسجيلات ديال الكاميرا لي كانت شادة واحد الجزء من ديك الزاوية لي كان واقف مخبي فيها الفاعل ولكن كاتبقا فشكون لي موراه و فينو؟
دازو ساعات و هي على هاد الحال جالسة تما ، سمعات صوت الباب تحل و عاود تسد ... دخل عندها أصيل لي كان باقي شاد فيديه التيليفون .. وقف حدا البالكون كايطل على برا و فيديه ݣارو و مرة مرة كاتمشي عينيه للتيليفون .. ماهضرش معاها و مالامهاش و هادشي جاها فشكل حيت عادة كايلومها و يقول درتي و درتي و درتي مي هاد المرة كانت مختلفة .. و هادشي لي خلاها تنوض من بلاصتها و مشات وقفات حداه كاطل من البالكون
حياة : شفتك ماقلتيش ليا واش وصلات بيك للقتيلة
أصيل : [ باقيين عينيه على برا ] تايق فيك
فلتات لها ضحكة من شفايفها .. ماكانتش كاتتسناه يتيق بلي هي ماعندها يد فهادشي حيت كانت كاتقول غايقول فبالو هي غفلاتهم و دارت ليه داك العجب و مابغاتش تخليه يشرب زعما حيت غرضها تسلط عليها الاضواء ماشي تقتلو مي من بين الحوايج القلائل لي كايعرف عليها ، وي هو عارفها عزيز عليها المجازفة مي ماشي لهاد الحد
حياة : [ ربعات يديها و تبسمات ] صدمتيني .. دابا ماجيتيش للهنا باش تقول ليا علاش درتيها؟
أصيل : لا [ طفا الكارو و شاف فيها ] عارفة راسك جبدتي المشاكل
حياة : كنت غانقول لك باقي عايش بسبابي مي ماكانظنش حيت هدا لي دار ليه داكشي ماكانش غرضو يقتلو يمكن كان غرضو شي حاجة خرا من غير الموت مي لي عارفة ماكانش فمصلحتو
قرب لها بخطوات ثقال حتى تقابل معاها ونطق
أصيل : غالطة ...
حياة : [ قرنات حجبانها ] علاش غالطة؟
أصيل : منين عرفتي هادشي لي طرا؟!
حياة : حيت شفتو بعينيا .. علاش قلتي غالطة؟
أصيل : داكشي لي كان فكاسو سم
حياة : وا معذرهم ... السيد 91 عام ومزال باغي يحيد لهم الطريق غاتلقاه جالس لهم على قلبهم
أصيل : الأعمار بيد الله
حياة : و انا غير قلت وصافي .. مي مدام باغيين يقتلوه مالهم ماقتلوه بشي طريقة تكون زعما شوية ماتجيبش الشك اما باش يموت هكاك قدام بنادم؟ جاتني شوية فشكل ولا زعما بغاو يحيدو الشك عليهم و يرميوه على واحد من لي كانو حاضرين؟
أصيل : داك السم كايخصو الوقت والمداومة
حياة : دابا لي بغيتي تقول ليا ماكانوش قاصدين يموت اليوم؟ غايكونو زعما من مدة و هما كايعطيوه ليه؟ حيت ماكانظنش غاتكون هادي اول مرة يعطيوه ليه .. دوك لعواد ديال القرفة لي كانو فكاسو كانو باش يتلفو المذاق ايلا ماخفت نكدب
أصيل : باقي ماكاينش اليقين
حياة : وعلاش؟ ياك كلشي باين
أصيل : التحاليل لي غايبينو لينا شنو طاري معاه ومن فوقاش والسم فذاتو
مشات من حداه ورجعات فين كانت جالسة ... حيدات الطالون ديالها وهزات تيليفونها
حياة : يعني دابا غانبقا هاد الليلة هنا؟
بدا التيليفون ديالو كايصوني
أصيل : غانرجعك معايا
خرج من تما باش يجاوب فالتيليفون وخلاها جالسة كاتلعب بخصلة من شعرها و كاتتسنا غير ايمتا تخرج من هنا ، عجبها الحال من واحد الناحية حيت تاق فيها هاد المرة بلا مايشك فيها والا يشك فنواياها ... بقات تما شحال جالسة بوحدها حتى عاود رجع من مور نص ساعة
أصيل : نوضي نمشيو
حياة : صافي جاء الفرج؟ خرجو التحاليل؟
أصيل : باقي عليهم الوقت ، غاتكوني عييتي هاد نهار
حياة : مادرت حتى حاجة باش نعيا .. يا كنت واقفة يا كنت جالسة يا كنت متكية مي مانكدبش عليك ، معدتي تقهرات بالسوائل هاد نهار
الدنيا بااقا مقربلة و هي والا على بالها .. لي فبالها باغا تاكل و السلام طبعا حيت عارفة مزيان بلي هادشي لي واقع لحد الساعة لمصلحتها
أصيل : لبسي ولحقي عليا
وقفات ولبسات فرجليها و بدات تقاد فشعرها
حياة : ماكاين لاش نلحق عليك هانا نيت واجدة دابا .. عطيتي 5 دقايق نقاد المكياج ديالي و نمشيو
جلس كايتسناها حتى قادات داكشي لي خاص يتقاد وشافت فيه بإبتسامة
حياة : دابا صافي واجدة مي واش غايخليوني نخرج؟
ماجاوبهاش .. حيت فهاد الاثناء كانو عينيه كايسكانيوها ، كانو فيها شي نقاط لي كايثيروه و شي حركات كاديرهم و كايثيروه كتر ، و كون ماكانش عارف طبعها ماكانش غايتوانا و يدير شحال من حاجة فبالو .. ولكن هي فالاصل مزال ماقبلات و أي تصرف غالط غايرجع بالرفض و هو هادشي لي ماباغيش
مد لها يديه و شدات فيه وخرجو من تما وكيفما توقعات ماكانوش باغيين يخليوها تخرج ولكن أصيل ماكانش أصلا ناوي يخليها هنا بوحدها ... خرجو هو وياها من تما على أساس خطيبتو ماشي شي حد لي غريب و من غير هادشي ماعندها فين تمشي ولا تهرب ، و طبعا حياة كانت عارفة بلي دار هكاك غير باش يخرجو
توقعات بلي غايمشيو لشي ريسطو كالعادة ولكن هاد المرة مشاو لبلاصة خرا ... ماوقف حتى وصلو لقدام واحد الفيلا ، هبطو ب2 وعطاها دراعو تشد فيه و دخلو
ستقبلاتهم مرا كبيرة فالسن غاتكون عندها على الاقل 70 عام ملامحها إيطالية مهلية فراسها وأنييقة .. سلمات على أصيل بحرارة اما حياة سلمات عليها سلام عادي مرفوق بإبتسامة .. بحكم ماكانتش كاتعرفها ، رحبات بيهم و دخلو لداخل لقاو راجل حتى هو كبير فالسن .. مهتم بالمظهر ديالو و انيق تكون عندو على الاقل 75 عام ، سلم عليه أصيل بعناق رجولي وكان باين فيه كايعزهم بزاف اما بخصوص حياة فاش جا يسلم عليها .. باس ليها يديها بكل جنتلمانية في حين هي تبسمات ليه بلباقة
[ الحوار بالإيطالية ]
نطقات المرا لي حلات لهم الباب فاللول
_ ماكنتش كانظن واش باقيين غاتجيو .. تعطلتو
أصيل : [ بتاسم ليها ] ماتقلقيش ، كان عندنا واحد المشكل صغير
نطق الراجل لي كان واقف فجنب مراتو
_ راك عارفها ولات مزاجية و دغيا كاتتقلق [ شافها بدات كاتتقلق وكمل هضرتو ] ولكن هادشي غير ماكايخليني نزيد نبغيها
نطقات المرا و هي كاتبتسم من هضرة راجلها
_ ماتديش على هادشي لي كايقول .. ماكانقدرش انا نتقلق من ولدي اصيل
_ [ شافت فأصيل ] علاش غايغيرو راه بحالو بحال ولدي .. فنفس المكانة ديالهم ، دخلو ماتبقاوش واقفين هنا
كانت حياة كاتحاول تفهم واش جايبها تشوف عائلتو ولكن لي فهمات بلي هادو ماشي واليديه .. كان إحتمال ديال تكون مجرد عراضة عادية و صافي ولكن هو ماعلمهاش اصلا بهادشي ، سبقوهم ديك المرا و راجلها و بقاو هما موخرين
حياة : شكون هادو؟
أصيل : أصدقاء ديالي
حياة : هكاك مي ماقلتيش ليا غانجيو لعندهم
أصيل : ماكانش الوقت من مور داكشي لي طرا
حياة : و باقيين غانرجعو لديك البلاصة؟
أصيل : ماشي ضروري ولكن غاتبقاي فإيطاليا حتى يتحل المشكل
أومأت ليه براسها كإشارة بلي فهمات و دخلات لداخل هي وياه ...
دخلات للداخل لقات 2 رجال و شابة بحالها .. كون كانت باقا كاتديها فالزين بزاف كانت غاتقول هاد الايطاليين مانعرفت واش كايرضعو الزين فبلاصة الحليب ولا مانعرفت كيفاش بلانهم .. ما شاء الله كانو الزين و الطولة ولي بغيتيه كاين فيهم ... فالاصل كانت هاد المرا و الراجل أصدقاء لواليدين أصيل بالتحدييد اما هو كان بحالو بحال ولدهم
سلمات على دوك لي لقات لداخل و جلسات فالكرسي .. بحالا كانو كايتسناوهم غير هما باش يتعشاو ، تجمعو و بداو الخدامات كايحطو لهم العشا و فهاد الأثناء كانت المرا الكبيرة كاتهضر مع أصيل
_ [ شافت فيه ] اممم ظروف .. كون قلتي مريض كون تيقتك [ شافت فحياة ] انا ننصحك من دابا غير هربي ايلا لقيتي فين تهربي ، غاتعيشي مع واحد حياتو هي الخدمة
حياة : [ تبسمات ليها ] لا واقيلا فهمتونا غلط .. راه مابيناتناش داكشي لي فبالكم
نطقات المرا الكبيرة موجهة كلامها لبنتها
_ بعدي منها ماتحرشيهاش عليه
_ واش كدبت ا ماما .. ياك عندو نهار فالشهر لي كايرتاح فيه وديما مسافر .. نهار مبارك هدا منين شفناه واقيلا كون ماجابتوش لينا كون ماشفناه حتى للعام الجاي
أصيل : [ وجه أنظارو ليها ] النهار لي غايوصل أجلنا فيه غانرتاحو
حياة : [ تبسمات ] الخدمة هي هادي كاتعمر وقت بنادم مي من واحد الناحية مزيانة حيت كاتخلينا نخرجو من منطقة الراحة ديالنا و نديرو شي حاجة كاترجع علينا بالمنفعة
_ [ نطقات المرا بإنزعاج ] صافي سدو علينا هادشي ديال الخدمة [ شافت فبنتها ] كولي مزيان ماكليتيش [ شافت فولدها ] ونتا ماغاتنوض من بلاصتك تا تكمل طبسيلك
بدات كاتحضي مع كل واحد فولادها باش يكمل ماكلتو واخا كانو كباار مي كانت كاترد لهم البال و من خلال داكشي لي شافتو حياة قدام عينيها و كيفاش كانت كاتعامل راجلها و كايعاملها راجلها ستنتجات بلي مزوجين عن قصة حب .. و كان استنتاجها صحيح حيت من القصة ديالهم لي سمعاتها و هما كايعاودوها بزوج عرفات بلي فالاصل فاش تزوجو كانو فقراء و حتى فاش ولدو ولادهم كانو باقيين عاد كايطورو مستوى معيشتهم
بقات كاتتسنط لقصتهم ... كانو مزوجين لمدة نص قرن ، ماكانتش عارفة والا فاهمة كيفاش 2 ديال الناس قدرو يبقاو عايشين مع بعضياتهم لمدة 50 عام .. 50 عام و هما كايصبحو على وجوه بعضياتهم ... 50 عام و هما متقاسمين الحياة مع بعضياتهم و لي كان كايزيد يخليها تستغرب هو فاش كانت المرا كاتعاود على شي نهار من نهارات لي كانت كاتحيد النعمة من قدامها و كاتعطيها لراجلها و ولادها .. ماعرفاتش كيفاش كاتفكر واش هادي ماكاتبغيش راسها؟ واش لهاد الدرجة عندها قيمتهم كتر من قيمتها؟ و معدتهم حسن من معدتها؟ الصراحة هي ماقادراش دير هاكا ، ايلا طاحت فيديها جغمة ديال الما فشي صحرا و كان معاها شي واحد و ب2 كانو ميتين بالعطش ، امبوستاحيل تعطيه يشربها ولا تقسمها معاه و نفس الشيئ ايلا كان كايموت بالجوع و هي عندها غير شدق ديال الخبز .. غاتسبق راسها هو اللول يعني هي ماكاتشوفش اصلا بلي تقدر تكمل فشي علاقة ديال الزواج لهاد السنين كاملة و تضحي فيهم و تحيدها منها باش تعطيها لولادها ولا راجلها
كان عندها واحد التناقض ... ماكاتبغيش شي حد يموت بسبابها ولكن ايلا تحطات فشي موقف لي خاصها تختار يا راسها يا داك الشخص .. غاتختار راسها ثم راسها ثم راسها حيت هي ببساطة ماشي من النوع لي كايقدم التضحيات
ماشي كاع الرجال كايصدقو بحال راجل هاد المرا ... كاين الرجال لي بحال باها ، ولكن المشكل ماشي غير هنا .. الحاجة لي كاتستغرب منها و زادت ستغربات منها هي كيفاش بعض العيالات عندهم ديك القدرة ديال يفضلو راجلهم و ولادهم على راسهم .. كاتجيها شي حاجة فشكل و موحال واش يجي شي نهار لي تقدر تفضل راجلها على راسها ولا ولدها على راسها وهادشي ايلا كان عندها شي ولد
سالاو العشا و مشاو جلسو فالجردة .. باش عااد ياخدو راحتهم فالهضرة فالمواضيع لي بغاو و كالعادة كان النوع الاول لي غايبدا يتناقش فيه أصيل هو الخدمة
ماكانتش عارفة بلي كايعطي الراحة لراسو مرة فكل 15 اليوم .. يعني الايام لي دازت فعلا كايبقا غادي جاي مسافر من هنا للهنا ، كان واحد الشخص لي مهووس بالخدمة و مامساليش قبو باش يبقا تابعها بليزابيل صباح و ليل و ماغايطلبش منها الاهتمام المفرط فالعلاقة .. ماغايبقاش يقول لها نطلاقاو ديما و هادشي نوعا ما عجبها ولي عجبها كتر هو عقلو وكيفاش عامر .. فين ماجيتيه كايسكتك و فين ماجيتيه كاتلقاي عندو معرفة واسعة و هادشي كانت فكل مرة كاتزيد تتأكد منو ...
بقات كاتتسنط لهضرتهم بإهتمام و تركيز و طالقة ودنيها معاهم كاتسمع حتى لدوك النصائح لي ماكانوش موجهين ليها فالأساس بل ليهم .. حتى لواحد الوقيتة شاف فيها واحد منهم
_ ماقلتيش لينا ... شنو كاديري فحياتك؟
تقادات فجلستها ونطقات
حياة : حاليا خدامة فصالة ديال المعارض الفنية و قريب إن شاء الله غاندير معرض خاص للطابلوات ديالي
_ [ بإهتمام ] نتي رسامة؟
بقاو كايشوفو فيها و كايتسناوها تجاوب ، مع نيت كانت ساكتة فالوقت لي كانو كايهضرو فيه و هادشي خلاهم يوجهو أنظارهم ليها
حياة : لا ماشي رسامة ، تقدر تقول ݣرافيك ديزاينر مي ماشي بداك المفهوم لي فهمتيه دابا .. حيت ماكانصممش لوغوات للشركات
_ [ بإهتمام ملحوظ ] زيدي شرحي لي كتر
حياة : كانصمم رسومات ديال الان في تي و كانخرجهم على شكل طابلوات باش كايوليو ملموسين
_ و هادشي لقا شي نجاح؟
حياة : [ ضحكات بخفة ] مزال عاد بديت و باقي قدامي الطريق طويلة قدامي قبل ماندير معرض ديالي ، المعارض كايخصهم تخصص لهم واحد الميزانية و كايخصك تمهد ليهم الطريق و دير بلاصتك هو اللول باش نهار تفكر دير شي معرض ماتكونش ضيعتي فيه الوقت على والو المهم بإختصار كايخص حتى نضمن الدعم
_ وعائلتك ماكايدعموكش فهادشي؟
سولها هاد السؤال على أساس راها شي وحدة من عائلة مرموقة لي غاتدعمها بالمعارف و تعاونها تشهر فاللوحات ديالها و كان سؤالو واضح وباين ليها حيت حاليا كايهضرو فالاعمال ماشي فالدعم و الحنان العائلي .. يعني من الأصل غالط فيها شوية على ما بان ليها ، كان عندها جواب طوييل ليه ولكن قبل ماتجاوب ختاصر أصيل هضرتها ف3 ديال الكلمات لخصو كاع داكشي لي كانت غاتقول
أصيل : هي عصامية ماشي عظامية
_ [ بفهم ] اه [ هزهز براسو ] مزيان بنادم لي كايرفع القدر ديالو براسو [ جبد كارط فيزيت من جيبو ] إيلا حتاجيتي أي حاجة ولا كانت خاصاك شي مساعدة فالمعرض ديالك
شاف فأصيل لي كان باين فيه مامرتاحش ... دوز يديه على نيفو و بقااا كايشوف فيه ... دوز ديك الكارط فيزيت ليه وكمل هضرتو
_ إيلا حتاجيتي اي حاجة ، غير قوليها ليه و غايوصلها لي
حياة : [ تبسمات ليه ] ماكاين لاش نبقاو نبرزطوه معانا و نلاهيوه على خدمتو فكل مرة .. عطيني نمرتك وغاتبقا عندي
أصيل : عطيه نمرتك ، نتي نمرتو غاتتلف لك
_ [ وافقو الرأي ] عطيني نمرتك ندخلها عندي .. هاكا نضمن ماتحشميش فاش تحتاجي شي مساعدة
عطاتو نمرتها ودخلها عندو ... بقاو جالسين تما ربع ساعة كايتبادلو أطراف الحديث حتى وصل وقت المشي و ناضو ودعوهم
أصيل : سبقيني شوية ونلحق عليك
سبقاتو في حين هو بقا واقف مع داك لي عطاتو نمرتها لمدة لا بأس بها عاد تبعها و شدو الطريق للأوطيل .. هبطو و وقفو ودخلو للداخل
حياة : بان ليا غاتمشي دابا تنعس باش غدا ترجع لخدمتك كالعادة .. ضاع لك هاد نهار النهار
أصيل : ماضاعش فالخاوي
حياة : وي مي موحال واش ترتاح فالنهار لي موالف ترتاح فيه
حياة : [ ضحكات ] صعيب؟ هاد النهار داز عندي عادي ماشي شي حاجة
أصيل : وماغاتنعسيش؟!
حياة : لا .. لقيتيني كانفكر نطلع نبدل حوايجي و نهبط للبار لي عندكم ، عجبني الديكور ديالو .. نتا لي بنتي ليا غاتمشي لدارك وتنعس .. تابعاك الخدمة نيت غدا [ تمشات باللور و نطقات ] بون دودو
طلعات فالاسانسور و خلاتو كايشوف فالمكانة لي فيديه .. البار لي كان عندهم كان نقي و ناسو نقيين مي كايبقا بار و هو مامنحقوش أصلا يقول لها واش تمشي ولا ماتمشيش
اما حياة فهاد الاثناء كانت طلعات و بدات كاتقلب فتيليفونها لقات الكونسياج مصوني عليها .. كان الوقت شوية معطل و ماكانتش باغا تصوني عليه دابا داكشي علاش أجلات المكالمة و دخلات للدوش غسلات لحمها وخرجات بدلات .. عاودات المكياج ديالها و هزات تيليفونها وهبطات للبار لتحت ، بدات كادور عينيها باش تشوف فين تجلس حتى بان ليها أصيل حتى هو كاين تما .. ستغربات حيت اصلا السيد مضيع نهار على قدو مامرتاح فيه ماخدام فيه و كاتشوفو باقي هنا
مشات فالاتجاه ديال البلاصة لي جالس فيها و جلسات
حياة : بنتي ليا باقي قصار هاد الليلة
أصيل : داكشي لي بان لي
حياة : كاين عندكم هنا المارتيني؟ بطبيعة الحال غايكون راه اوطيل سانك ايطوال هدا
أصيل : كاتشربي؟!
حياة : لا غير كانتنغم [ ضحكات ] اش خاصك العريان الخاتم ا مولاي .. بقا خاصني غير نخسر الفلوس على القراعي .. كانسول على المارتيني الحلال ، بلا سكرة بلا والو ...
طلب لها المارتيني لي بغات و شافت شنو طلب لراسو لقاتو بلي حتى هو طلب مشروب اخر خالي من الكحول يعني الهضرة ديال ماكايشربش كانت بصح
حياة : راك شفتي السيد رجل هنا و رجل لهيه و واخا هكاك ماقالوهش .. ناويين يقطعو ليه التيكي من عند عزرائيل قبل الوقت ، دابا كون شفت و سكتت كنت غانتسما مغطية على جريمة ولا لا؟
أصيل : وتدوي وتغرقي راسك؟!
حياة : مانكدبش عليك هادشي مادرتوش حبا فيه ولا بسباب المعزة [ تكات ضهرها ] مي حيت كون مادرتش هكاك كنت غانخرج من داك الفيستيفال بيدي خاويين .. كنت قادرة نهضر معاه بوحدو بيني و بينو مي الاستفادة كانت فنهضر معاه و الشهود حاضرين باش ايلا سكت هو و مابغاش يهضر ولا كاع يودع قبل مايهضر بعدا على الأقل يكون باقيين الشهود حيين و ماتخافش عليا من ناحية البوليس قادرة نسلك راسي
أصيل : فبالك غاتعاوني راسك ويتيقو بيك؟!
حياة : وي غايتيقو .. عادي ماشي اول مرة نسلك راسي
أصيل : كاتسلكي راسك مع ولاد الكارتي ديالكم؟!
حياة : كانسلك راسي مع من والا ومارميتش راسي فداك المشكل كون ماكنتش عارفة راسي قادة نخرج منو
ماكانتش ناوية تقوليه على الفيديو لي عندها .. اما هو فهاد الاثناء كان باغي يفهمها بلي المشكل ماشي فالبوليس حيت راه ساهل تسلك راسها .. كانو الشهود بزاف بلي كانت معاهم و حتى الكاميرات كانو مصورينها من فاش دخلات مامشاتش لجهة السرباي و كان باين فيهم بلي كانت كاتصورو إضافة لهادشي السم كان فعلا فالجسم ديال وارن من مدة و كان كايتعطا ليه بإنتظام و فديك المدة هي ماكانتش اصلا معاه والا كاتعرفو .. هو ماخايفش عليها من ناحية البوليس و انما يقدر تولي متبوعة حيت ضيعات لشي شخص خطة شهور غير باش تتشهر
دوز يديه على الذقن ديالو
أصيل : حليتي المشكل ديالك مع العائلة؟!
وكالعادة مروى و أدم دارو بيها البراح .. بااين شكون لي وصل ليه الهضرة بلا ماعاد تسولو كيفاش عرفتي ، وشكون عرف غايكونو قالو ليه حتى علاش تبراو منها
حياة : مروى بطبيعة الحال
أصيل : ماشي ختك
حياة : ايوا غايكون راجلها .. صاحبك ، مافهمتش واش ماكاين مايتعاود من غير يوميات حياة؟ زعما ضروري بنادم يعاود باش يتشفا؟
أصيل : حيدي من راسك هادشي ، لادوا فيك شي حد ماكايدويش باش يتشفا
حياة : و علاش كايهضر؟ من اللول مايهضر فيا مانهضر فيه
أصيل : كاتجيبها الهضرة
حياة : دابا هو خلا السياسة .. خلا الاقتصاد ... خلا الرياضة و الدين و أحوال الطقس و سوق الاسهم و خلا حياتو و حياتك باش تجيبو الهضرة عليا؟ كايبقاو مشاكل شخصية مشاكل كاتخص عائلة مرتو لاش فمو مزراݣ؟ ولي جا يعاود ليه؟ عيق بمرة شحال ما بقا غاندور فيه على هاد التبرݣيݣ لي فيه
أصيل : [ قطب حجبانو ] مابغيتيهش يعاود لي؟!
حياة : لا .. مابغيتش
أصيل : عاودي لي نتي
حياة : ياك ختي و راجلها عاودو لك كلشي اش باقي؟
أصيل : ماكاندويش مع ختك وماعندي غرض بيها
حياة : و بيمن عندك الغرض؟
أصيل : بيك [ جغم من الكاس لي فيديه ] عاودي لي على راسك
حياة : لي كايبغي يعرف شي واحد ماكايحتاجش يتسنا حتى يعاود ليه داك الواحد .. مع الوقت كايعرف كلشي براسو
أصيل : ولي ماقادرش يتسنا؟!
حياة : يصبر
طول الشوفة فيها واش هي كاتدوي ليه على الصبر على اساس السنين لي دازت ماكافياش ... جاتو 3 سنين بزاف حيت فالاصل ماموالفش يبقا هاكا حاط عينو على شي وحدة لسنين ... و حياة ماشي زينها لي جرو ليها حيت زينها عادي أپار ديك الحاجة لي مختلفة فيها لي كاينة فيها ، كانت حاجة خرا كاتجرو ليها .. شخصيتها لي فيها بزااف ديال التناقضات عندها واحد القدر من الحنية و هادي شافها فخوفخا على مها مي فنفس الوقت قلبها حجرة و هادي ديما كايشوفها فيها ... بعقلها و هادشي كايشوفو فاش كاتجي تتناقش بعقلانية و فنفس الوقت متهورة و هادي كايشوفها فاش كاتلوح راسها للخطر و كاتغامر .. معقولة و هادي شافها فالعرس ديال ختها فاش عرفها ماعندهاش مع لي كاتتمشا مع الراجل المزوج و فنفس الوقت فيها التخلويض حيت فنفس العرس خدمات التخلويض ... كدابة مي فاش كاتبغي تقول الصراحة كاتقولها بطريقة وقحة ... شخصية عبارة عن صفات متناقضة ولكن كايبقا هادشي على قمتو 4 حوايج ، متمردة .. شرسة .. راسها قاصح و عندها نفس خايبة و هادشي عرفو فاش مابغاتش تشد الفلوس لا منو لا من ختها ... يعني و بإختصار شخصيتها و نظراتها و ثقتها لي عطاو لزينها قيمة .. هادوك هما لي ميزوها و هادوك هما لي خلاوه يبغيها ، كيفاش؟ حتى هو ماعرفش كيفاش ولكن لي عارف هو شخصيتها لي زادت جراتو ليها حيت من قبل كانو كايطلعو ليه تصاورها فالانسطا ولكن ماكانش كايعطيهم أهمية كبيييرة حيت كي قلت سابقا راه شاف الزين بأشكالو و أنواعو و شاف لي فايتينها فالزين ولكن هو ماكانش من النوع لي كاينجاذب للزين بوحدو ...
عاصفة هوجاء الجزء 15
محتوى القصة
دار معاها باش تبدا معاهم من غدا من مور ماتفاهمو و من تما شدات الطريق هي و مدام تورية باش يقضيو غرض اخر على ود واحد الانفورماسيو لي حتى هي غاتزيد تعمر لها وقتها .. ماكانش عندها مشكل فهادشي بالعكس كون كان النهار فيه 48 ساعة كانت غاتپلانيه حيت دوك الأسئلة الاستفزازية لي سولها ألفونسو خلاوها تبغي تغرق فبلاصتها و تقرصات منهم و من شحال من هضرة قالها لها و غير مابيناتش ليه باش مايقولش راها كاتتأثر بهضرة بنادم ، هي ماكاتتأثرش ولكن ديك الهضرة خلاتهل مامرتاحاش حيت ببساطة كاتشوف راسها مزال مادايرا حتى حاجة فحياتها ... دوك لي غايكةنو خدامين معاها عندهم شلا ديپلومات و الخبرة من الفوق ايوا و هي شنو عندها؟ شنو دابا واش غاتكون هي أقل منهم؟؟ واش صافي غاتخدم غير حيت مدام تورية توسطات ليها؟ ايوا ولا خرجات من هنا شنو؟ واش غاتقلب تاني لي يتوسط لها؟ كانت عارفة مزيان بلي المعارف هما أسهر طريقة باش تترقاي للمستويات لي باغا توصلي ليهم ولكن هي ماباغاش غير هادشي ، باغا بزاف ديال الحوايج باغا تكون هي حسن من بنادم
وصل النهار الموالي لي غاتبدا فيه خدمتها تأنقات كالعادة و لبسات حوايج يليقو بالخدمة ديالها وقصدات الشركة ... كانت تما واحد ختنا وراتها خدمتها و البلاصة لي غاتخدم فيها وبقات معاها حتى تأكدات بلي حياة فهمات شنو غايخصها دير
دوزات داك النهار غير تما ، كانت كاتتخالط مع باقي الموظفين و كادير المعارف كعادتها و تتعرف على هادي و هدا وفنفس الوقت كانت مقابلة الخدمة ديالها و توقع مدام تورية كان صحيح حيت فعلا حياة ماكانتش كاتلقا مشكل باش تقنع العميل بداكشي لي هي باغا تقنعو بيه و فنفس الوقت كانت كاتتعامل مع كل عميل بالطريقة لي كاتناسب الحالة ديالو
طوال هاد الأيام لي دازو كانت خدمتها مراقبة و حتى هي لحد الساعة كانت عند حسن الظن ديال ألفونسو .. ماكانتش باغا تخلي مدام تورية تندم حيت عاوناتها ... لقات راحتها هاد الايام واخا كانت كاترجع عيانة و حتى الليل ولكن داك العيا كانت كاتحس فيه بواحد الحلاوة فشكل خصوصا فاش كاتجي و تتلاح على الكنبية ولا فاش كاتدخل و تدوش كاتحس براسها دارت شي حاجة و تعلمات شي حاجة .. ما حبساتش غير هنا زاادت عمرات وقتها بحيث ولات فاش صافي كادخل للدار و تدوش ولا ترتاح 5 دقايق ولا فاش كاتوجد ماكلة دراري كاتمشي لبيتها و تدخل لكورسيرا ... دوك الشواهد ديال الماستر تريك كانو معمرين ليها راسها حيت عارفاهم وااكلين فهاد الوقت و بحكم الخدمة ديالها و الوقت لي كان عندها عامر كانت أفضل وسيلة هي تقرا اونلاين .. كانو عينيها فدوك الشواهد بالضبط ولكن التكاليف ديالهم شوية غاليين حيت غايخصها تخلص فالطوطال 5000 دولار و هي دابا اصلا مأزمة داكشي علاش كانت ختارت حاجة خرا فهاد المدة ولكن كانت دايرا فبالها غير تترخف ليها القضية و تاخد الشهادة ديالها ديك الساعة اراك تاني للتيكنولوجيا وإدارة الأعمال .. أحسن حاجة كانت فالانترنت هي هاد المواقع لي كايخليوك تشدي بعض الشواهد المعتمدة غير من داركم و كايكونو من مؤسسات لي معروفين
ولات كادوز 3 ديال السوايع فكورسيرا و غير كاتسالي كادوز لديك الرسمة ديال مارلين ... ماكانتش رسمة عادية و ماكانتش كاتطلق فيديها فديك الرسمة على والو و إنما كانت كاطلق يديها فالرسم باش تدخل لسوق الفن الرقمي لي معروف بلNFT .. كانت عندها فكرة متجددة على هاد البلان و باغا طبقها و غاتطبقها بأي طريقة
° وصلات 2 ديال الليل وسدات البيسي و بدات كاتتفوه كانت ناوية تنعس حتى صونات عليها خديجة فالتيليفون ... جاوباتها و هي عينيها كايتغمضو بالنعاس وعياانة ... جاوباتها
حياة : [ سادة عينيها باغا تنعس و كاتتفوه ] لقيتيني باغا ننعس
خديجة : واش ماعارفاش اخر الاخبار؟؟
حياة : اشمن خبار؟
خديجة : العرس ديال خوك غدا
حياة : [ حلات عينيها و ناضت من بلاصتها ] كيفاش؟؟
خديجة : كي سمعتي ، مامشيتش لداركم هاد الأيام تا وصلاتني الخبار من عند ماما عرضاتها خالتي فتيحة للعرس
حياة : و فين داك زبل ديال خوها؟ علاش ماهضرش؟؟ علاش ماحبسش هاد الخرا كامل؟؟ اشمن عرس و اشمن زبل؟؟ واش هادو تفربلو؟؟ علاش خوها ماشدش ختو؟؟؟ واش ماعندو كرامة؟؟ وا يشدها عندهم علاش يخلي خويا يديها؟؟؟
خديجة : فكرتيني بعدا فيه نسيييت و خرج ليا من راسي مانقولك
حياة : ناري ا خديجة واش محلفة عليا حتى طيري ليا النعاس فهاد الليل
خديجة : وااا هاد الخبار لي غانقول لك فيييين يبااان العرس
حياة : اشمن خبار؟؟
خديجة : فراسك ا لالة غنو خوها غايحرݣ ولا شي حراݣ
حياة : صافي هدا هو الخبار؟ وا حتى نتي ا خديجة يحرݣ ولا يتحرݣ و انا مالي؟
خديجة : ياك تا نتي كاينة فإسپانيا؟؟
حياة : و هانا فإسپانيا اش فيها؟ [ ضحكات عليها بالطنز ] هههه واش نقول لهم حضيو معاه ماتخليوهش يحط رجليه هنا؟
خديجة : وا كانقول لك ا صاحيبة حضي راسك ...
ضحكاتها خديجة بهاد الخلعة ديالها حيت كاتشوف بلي إسبانيا فيها 19 لجهة تقريبا و عاد الملاايين ديال بنادم لي ساكنين فيها و هي كاتبان وسطهم بحال إبرة وسط كومة قش و غايلقاها واحد مزلوط؟
حياة : والله يا خديجة ما فيا مانضحك فهاد الليل ولكن راه بزز مني و انا كانشوفك شاداك الرعدة على والو .. واش كايسحابلك جيت سكنت فشي دوار؟ غايدق البيبان باب بباب و يقول لهم واش ماشفتوش حياة بنت فتيحة؟ راني فإسبانيا و ماشي فشي مدينة صغيرة ، شي مرات ماكانفهمكش كي كاتفكري والله
خديجة : اياااه سري يا ختي سري ضحكي مع راساتك
حياة : و اش بغيتيني ندير؟ نبكي؟؟ السيد غير منين قبل يزوج ختو لخويا و هو عارفني انا مولاتها يعني راه باينة غايكون رضا بالواقع و عرف بلي الغلط من الاصل جاي منو
خديجة : هبلتي؟ تسحابتلك حاجة بحال هادي دغيا كاينساها بنادم؟ تلقايه قبل تتزوج ختو بخوك غا باش ماتبقاش هكاك ولا باش خوك يصلح غلطك [ تأفأفات بحيرة ] ماعرفتش ماعرفتش يمكن يكون غا مشا لتما باش يلقا خدمة حيت وسختي ليه ضوسيه هنا
حياة : ايوا على سلااامتك منين فهمتيها راه باينة هادي و من هادشي كامل ايلا كان غير من عندي يااا ربي مايجي فين يوصل للهنا تا يرجعوه لدارهم كسدة بلا روح بغيت ليه الغرق ان شاء الله
خديجة : باغا غير نعرف شدار لك نمووت و نعرف
حياة : يدير ليه يديه فعنݣو و يسيفطوه يدوز هاد المرة شي 20 عام ديال الحبس ... لي دارو راه دارو
خديجة : شدار تا خرجتي ليه على مستقبلو و مستقبل ختو؟ مايمكنش شي حاجة صغير
حياة : مستقبل ختو؟ ايلا عندك مستقبلها هو الزواج راه خويا غايتزوج بيها [ سكتات شوية و كملات ] عرفتي كون لقيت كيفاش نهبط للمغرب بالله مايكمل داك العرس
خديجة : ياودي فكري غا فحريرتك هاد الحرݣة ديال هاد الݣنس ماعاجبانيش
حياة : ايوا صافي ا خديجة راه قلت لك لي كاين ماتزيديش فيه .. المهم خلينا من هاد الموضوع [ ضحكات و هي كاتهضر ] عرفتي الشركة لي قلت لك خدامة فيها كي دايرا؟ راه شي حاجة بزاااف
خديجة : ماوريتيني التصاور لي قلتي لي
حياة : تسناي نسيفطهم لك
سيفطاتهم ليها و بدات كاتوريها الشكل الخارجي ديالها لي كان عاجبها و كملات هضرتها و هي كاتهضؤ
حياة : عرفتي عممرني فرحت لشي خدمة كيما فرحت لهادي ... مع كانوصل قدامها كاتبان لي ديك لH بحال هكاك ا كاتزيد تتحل ليا
خديجة : وا لاجينا للصراحة زوينة هاد البلاصة لي كاتخدمي فيها ... ماكرهتش تا انا ربي يعفو عليا من هاد البلاد
حياة : راه قلت لك ديك المرة لي كاين غير نرصي أموري والله ماننساك
خديجة : و بعدا كاينة شوية ديال الراحة فيها؟
حياة : اش غانقول لك ايلا كانت شي حاجة خاص تعرفيها هي فاش تجي لهاد القنت ضربي على النعاس لابغيتي ديري شي حاجة .. ماشي ماتنعسيش كاع ولكن دوك السوايع لي غاتنعسيهم و كايكونو زايدين راهم زايدين فيك ديري فيهم شي حاجة .. مثلا غاتنعسي 8 ديال السوايع؟ نعسي 4 و دوك 4 لاخرين تقدري ديري فيهم بزاف ديال الحوايج
خديجة : ولكن عاوتاني هكاك راه كاتهلكي غير صحتك .. خاصك ترتاحي على الاقل 8 ديال سوايع باش ماتفوتايش قبل الوقت
حياة : نو ماشي ضروري .. الوقت لي كايحتاج كل واحد فينا فيه للراحة كايختالف من واحد لواحد [ بدات كاتفوه ] المهم شوفي انا غانخليك خاصني ننوض تابعاني غدا شحال من حاجة
ودعاتها وحطات راسها على المخدة كانت باغا تنعس ولكن طاح فبالها داوود .. هي عارفاه ماغايكونش نسا داكشي لي دارت فختو واخا يكون قبل بالزواج ديالها بخوها ولكن ماغايكونش نسا ، قنعات خديجة بالهضرة ديال غايكون نسا ولكن باش تقنع راسها؟ هي لي عارفة غير فاش كان كايحط شي حد يديه عليها ولا عينيه كان كايدير حوايج لي ماكايطيحوش ليها على البال فما بالك بلي يتعدا على ختو و لي يكون السباب فأنه يتعدا على ختو .. ولكن بلاتي مالها هي لي تعدات عليها؟ يمشي لعند وليد نيت يقلب عليه
تقلبات لجهة خرا ... اصلا امبوستاحيل يلقاها هنا واش غير اجي و لقا بنادم وسط الملايين ديال البشر؟ الحماق هو هدا
عاودات تقلبات على جنبها ليسر وبدات كاتدعي فيه غير بالغرق يا يلوحو يا البحر يا مايلقاوش الكسدة ديالو و تتهنا منو .. على أساس داكشي لي دار هو ساهل؟ يستاهل أي حاجة دارتها فيه و أي إحساس خلاتو يحس بيه و بغات ليه الموت مزال باش حتى داك الاوكسجين مايبقاش مشاركو معاها
تفكرات عادل ... خاصها ضروري فالصباح تسيفط ليه الفيديو ديال حناه فاش كانت كاتعاملها بديك الطريقة الخايبة .. حيت فالأصل هي سينات معاه هو باش تسامحو ولكن ماسيناتش باش تسامح حناه في حين هو سينا بلي سمح لها و هنا باقا عندها واحد النقطة ديال القوة غاتهددو بيها باش ايلا مشا زغبو الشيطان و فكر يديكلاري بيها على اساس كارية الدار و كارياها للحراكة غاتغرق الشقف حتى لحناه .. ناضت من بلاصتها و مابغاتش تأجل هادشي حيت ماتعرف شنو كاين
دخلات للواتساب و سيفطات ليه الفيديو ة معاه أوديو بلي عرفات هو لي وصل الهضرة لمروى على الحراݣة و بلي عرفاتو حاضيها .. داكشي علاش ايلا مشا حتى بغا يخدم معاها الشكامة دنوبو على راسو ...
فكرات تسيفط شي حد يدير شي شوهة فالعرس باش الخدمة لي مادارهاش داوود ديرها هي و مايكملش داك العرس ولكن ديك الشوهة كانت عاوتاني غاتضر خوها و ماماها و غاتبقا تاني ملاهية غير مع هادشي و هما أصلا مزال ماسامحوها يعني غاتزيد تطبز لمها العين و السلام .. تراجعات على الفكرة و حطات حاجة وحدة فراسها غاتركز مزياان على هاد المستقبل و تحاول ماتتلاهاش بحوايج خرين و غير غاتضبط أمورها غاترجع لهم واحد بواحد ... كلشي غايكون مقيد فالكارني
نهار العرس ديال خوها هي كان عندها نهار عادي مزال كون تزوج بشي وحدة خرا ممكن تبارك ليه اما بخت داوود؟ امبوستاحيل داكشي علاش ماعمراتش راسها بيه بزاف و بقات كادوز أيامها بالبروغرام لي ولات غادا بيه بقات غادا على هاد الحال حتى دازت سيمانة و وصلات نهاية الأسبوع الراحة من الخدمة ولكن عندها ماكانتش الراحة حيت كانو عندها بزاف ديال الحوايج خاصها ديرهم و من بينهم خاصها تقاد أمور ديك التصويرة لي خدمات عليها بالفوطوشوب ... حلات البيسي ديالها و دخلات حلات محفظة خاصة بيها فميطا ماسك باش تما غاتبقا تخبع كاع الممتلكات الرقمية ديالها لي غاتولي تخدم عليهم ... الحاجة لي عجباتها و جاتها كانتها عليها فهاد المحفظة هي واخا بنادم كايجيه السيزي و يمشيو ليه جميع الأملاك ديالو ولا مثلا كايتزوج وكايبغي يطلق و كايخصو يقسم الاملاك ديالو مع طليقو ... غايقسم معاه غير داكشي لي على ارض الواقع ولا جاه السيزي غايمشي ليه غير داكشي لي عندو على أرض الواقع اما الممتلكات الرقمية لي عندو كايبقاو فالحفظ والصون ومع العلم يقدرو دوك الممتلكات يكون ثمنهم أغلى من ممتلكات الشخص على أرض الواقع ... ممكن تكون صورة وحدة عندك فديك المحفظة تقدر تشري بفلوسها قصر على أرض الواقع و ممكن تخليك تولي مليونير ولا ملياردير
غير سالات من ميطا ماسك و دازت حلات كونط اخر فأوبن سي لي غاتولي تبيع فيه الأعمال ديالها .. كان واحد الموقع لي تقة و باش عجبها كتر ، كان أمن و زيد عليها عندو ميزات بحال مثلا كايتحطو فيه غير الانفيتي الأصليين و مستحيل تتحط فيه شي حاجة مقلدة يعني مثلا شي حد بغا يهز خدمتها ويطيليشارجيها و يستفاد منها ماكانوش غايقبلوها ليه اصلا باش تتحط عساك باش تتباع
طيليشارجات الرسمة ديالها فأوبن سي من مور ماخلصات نفقات الݣاز لي فرضوها عليها .. ماكانتش غالية بزاف 70 يورو اي 700 درهم ... و تمنها كان مناسب لحياة
ناضت من تما راشقة لها من مور ماريݣلات أمورها ... ماكانش عندها مشكل ايلا مادخلاتش ليها ديك الرسمة شي حاجة نييت حيت ببساطة كانت أول تجربة ليها فداك الميدان لي من 2013 و هي كاتسمع بيه .. كان بالنسبة ليها بحال شي ثغرة لعالم الأغنياء بحال شي تقبة فالحيط كاتقدر تقتاحم بيها العالم ديالهم بلا ماتبقا كاتدمر حياتك كاملة باض تشري طويميبيل و دويرة و بلا ماتبقا تدمر باش دير لاباس و ماتدير شوية ديال الفلوس حتى تلقا راسك وصلتي ل50 عام .. شبابك يضيع غير فهادشي و فاش تموت تخلي الفلوس لولادك هما يستمتعو بيهم
كانت عارفة مزياان علاش شي دول عربية حاظرين الفن الرقمي و تداول العملات وعلاش كايطلقو عليهم إشاعات وكانت عارفة بلي حتى المغرب طال الزمان ولا قصار غايحظرهم حتى هو مدام ولا كايعطي فالتحذيرات عليهم و كانت عارفة مزياان بلي هاد الضغط كامل جاي فالاصل من الاغنياء لي كاينين فدوك الدول .. كيفاش اصلا غايتقبلو يجي واحد من وراهم و يدير لاباس بوالو؟ و هما لي حياتهم كااملة و هما يخدمو و يردمو هما وأبائهم .. يعني هاد رد الفعل كان شيئ طبيعي ولكن حياة ماكانتش داياها فدوك الاشاعات .. راها ماشي صغيرة ولا منونخة باش تتيق اي حاجة كايقولوها داكشي علاش قررات تستغل هاد الثغرة لي كاتجي مرة فالقرن و ماديرش كيما دارو جدودها فاش كانو الأراضي ب2 دراهم للمتر هما كانو مقابلين الزهو و الشيخات فبلاصة مايستغلو الرخص لي كان فوقتهم .. وي
هي ماكانتش باغا هادشي ... باغا تستمتع بشبابها و بالفلوس و تعيش حياة الرفاهية و هي باقا صغيرة .. توصل لمستوى لي جدودها و ماوصلوش ليه داكشي علاش قررات تستغل هاد الثغرة .. وي هي تزادت مزلوطة وفقيرة و هدا ماكانش الغلط ديالها ولكن إيلا ماتت بنفس الزلط لي تزادت بيه هنا فين غايكون الغلط ديالها و ماكاينش فرق بينها و بين جدودها ...
مشات قضات شغالها و رجعات جلسات بدات فالدورات ديالها و ما هي الا لحظات حتى صونات عليها خديجة .. جاوباتها كالعادة و بقات خاشية راسها فالبيسي كاتهضر معاها و هي غير كاتهمهم زعما راني متبعة معاك و كانسمع اش كاتقولي
خديجة : و فراسك بعدا شنو دوزو فالأخبار
حياة : [ عينيها فالبيسي ] هممم
خديجة : وا حيااة
حياة : ويي راه كانسمعك راني معاك ا صاحبتي
خديجة : واش ماسمعتيش اخر الاخبار؟؟
حياة : اخر الاخبار ولاو كايجيوني غير من عندك .. شي حاجة عاوتاني باينة
خديجة : اودي غا سكتي قالك البحر لاح شي وحدين كانو حارݣين لسپانيا قلبي تشوا عليهم والله .. خاصك تشوفي واحد البنيتة صغيرة تا هي بينوها يمكن كانت حارݣة هي و واليديها ولا شي حد معاها
حياة : ايوا الله يرحمها و يرحمهم كلنا ليها هما سبقونا و حنا غانلحقوهم
خديجة : بقات فيا غا البنيتة قطعات ليا فقلبي
حياة : [ رجعات خشات راسها فالبيسي ] بنادم كايموت يوميا و الموت ماكاتعرف لا صغير لا كبير عادي
خديجة : و ماتفكرتي والو؟
حياة : بلا ماتجبدي لي سيرتو تاني راه اصلا العرارم لي كايحرݣو ماشي هو أول واحد
خديجة : ماعرفتش ولكن على ماكنت سمعت تا هو كان غايحرݣ من مور عرس ختو .. مايكونش زعما غرق؟
حياة : هداك راه مش ب7 رواح ولكن من فمك لربي .. على الله تكون هضرتك بصح
شافت فالتاتو ىي فالمعصم ديالها .. غطاتو بالتريكو باش ماتشوفوش و عاودات شافت فالبيسي وكملات هضرتها
حياة : بدلي بدلي الموضوع شوية
بداو كايهضرو و شي مرات كاتكون مركزة معاها فهضرتها و شي مرات مركزة مع قرايتها تا سالات معاها وقطعو الاتصال .. كانت متوقعة منو غايسلك راسو و غاينجا و ماكانش فراسها بلي كاع لي كانو راكبين فديك الفلوكة شي لاحو البحر و شي مزال .. ماكانتش معمرة راسها بهادشي و الايام لي كانو كايدوزو واحد من ورا واحد كانت كاتتسنا فيهم غير تشد أول خلصة ليها و فعلا وصل النهار لي دازت لها فيه 6000 يورو للكونط ديالها .. ماقدااتها فرحة و أول حاجة دارتها هي مشات لعند المحامية من مور ماوجدات واحد الوثيقة و عطاتها تسيني عليها كدليل بلي دوزات لها 5000 يورو للكونط واخا كان ديجا عندها دليل اخر ولكن زادت حتى هدا باش ماتڤنڤنش معاها و غير سالات مشات شرات حلوة بلا كريم باش تحتافل براسها على هاد التقدم الملحوظ .. بقا عندها 16 المليون ديال الكريدي يعني 4 شهور كاع غاتخلص لي عليها و تتفك
مشات للدار و جلسات كاتتسنا دراري يجيو من الخدمة ماكانتش باغا تاكل الحلوة بوحدها ولا نقولو مابغاتش تحتافل بوحدها ... كون كانت فالمغرب كانت غاتحتافل مع صحاباتها و عائلتها داكشي علاش هنا جلسات كاتتسنا دراري حتى جاو عاد دوقاتهم من الحلوة ... كانت واقفة معاهم فالكوزينة ورااشقة لها حتى سمعات التيليفون كايصوني مشات تشوف شكون كايصوني طلعات لها نمرة ديال المغرب ماداخلاش لعندها ولكن بحالا فايتة دازت على عينيها هاد النمرة ، جاوبات و بدات كاتتسنا تسمع صوت المتصل حتى سمعات صوت البكا والنواح ديال واحد البنت ، كاتعرف هاد البنت مزيان و كيفاش لا و هي كانت فالكليكة ديالها
حياة : صابرين؟؟
صابرين : [ كاتبكي و هضرتها كاتتقطع ] الله ياخد فيك الححححق ا حياة .. الله يعطيك الغرق لي تغرقي فيه و عمممرك تقدري تنوضي منو خرجتيي علييه
حياة : علامن كاتهضري؟؟
صابرين : رزيتيينا فيه [ كاتغوت و صوتها مبحوح بالبكا ] ماتهنييتي تا خليتينا نشوفوه مكفن ماتهنييتي تا خلييتي خالتي لطيفة تترزا فولدهااا .. عممرو ما فكر يقطع البحرر تا عرررفك نتييي ، ايلا ماكاتبغيهش علاش لصقتيي فيه .. علاااش رزيتيينا فيه
بدا قلبها كايتوجس من مصدر مجهول .. ماكانتش تايقة فهضرتها وماتايقاش فبكاها و ماتايقاش اصلا بلي تقدر توقع ليه شي حاجة .. طلعات لها حتى نمرة خديجة كاتصوني ، قطعات على صابرين وخلاتها كاتنوح كانت باغا تتأكد من هادشي لي سمعاتو
خديجة : واش فراسك شوقع؟؟
حياة : [ كاتحاول تتأكد من صحة كلام صابرين ] اش وقع
خديجة : دعاويك خايبين والله ... ماعرفتش شدار لك ولكن ماعطلاتوش ، كنت فداركم هاد النهار و سمعت من خالتي فتيحة بلي خو وفاء لاحو البحر و لقاوه هاد نهار
حياة : [ بعدم تصديق ] مايمكنش ، غايكون غير تغالط لهم مع شي حد
خديجة : لا لا ماكانظنش ، وفاء كانت حالتها حالة اليوم ومشات لدارهم هي وخوك
حسات بدقات قلبها كايتسارعو و واحد البرودة هبطات على قلبها ... ماكانتش متيقة نهائيا بلي غايكون طرا ليه شي حاجة .. واش صافي بهاد السهولة؟؟
حياة : راه قلت لك غايكون غير تغالط لهم ... واش شفتي شي جنازة بعينيك؟؟
خديجة : الصراحة ماشتش ولكن غانمشي مع خالتي فتيحة ليها حيتاش بغات تلحق عليهم
حياة : ايوا فاش توصلي صوري ليا فيديو
خديجة : داخلت عليك بالله واش بنادم كايعزي ويبكي وانا نهز تيليفون نصور لك
حياة : وا صافي ا خديجة صوري ليا اش غاتخسري
خديجة : صافي دابا نصور لك ...
بقات كاتتسنا داك الفيديو يوصلها على أحر من الجمر .. كاتتسنا غير ايمتا توصل خديجة ، مشات لها الشهية تا ديال ديك الحلوة مزال حتى ماضحكات مزيان و ها هي هجراتو ... جلسات فالكنبية و بدات كاتتسنا خديجة و كل شوية تصوني عليها تسولها واش وصلات واش لا ... حتى سيفطات لها فيديو فالواتس اب .. خلاتو يطيليشارجا ولكن من زهرها المكوز الويفي تقال فديك اللحظة بحالا حتى هو كايلعب بيها و بأعصابها .. بدات كاتهزهز رجليها و كاتتسنا بفارغ الصبر تشوف الفيديو حتى تفقصات ، ناضت لبسات عليها و خرجات باش تشد الويفي من قنت اخر فالزنقة .. وفعلا شداتو و تشارجا الفيديو ، قد ماكانت كاتزيد تتفرج فيه كان قلبها كايتزير بحالا شدو شي واحد و عصرو فيديه ، تجمدت أوصالها وقلبها كان يقرع كالطبول فالأعراس ولكن هاد المرة كايتقرعو فجنازة روح حسات بشي حاجة فشكل .. ياك هي كانت كاتدعي فيه؟؟ كانت باغاها فيه؟ واش صافي دعوتها تقبلات؟ دعوتها ماكانتش خارجة من القلب و مافاهماش علاش دابا قلبها كايضرها ، واش مات بسبابها بصح؟؟ واش بصح روح مشات بسبتها؟؟ واش بصح كان ناوي يحرݣ غير على ودها؟ تفكرات الهضرة لي كان قالها ليها فاش كانت فالمطار كيفاش نساتها؟؟ هو حلف تا يخرج لها يعني فعلا كان حارݣ على ودها و بهادشي مات ... عممرها مابغات شي حد يموت بسبابها و من ديما كاتقول لي بغا يموت يموت بعيد ، النهار اللول لي مشات تزورو فالسبيطار مشات و هي ماباغاهش يموت بسبتها ولكن دابا شنو؟ ها هو كاتشوفو مات بسبابها يا بسباب دعوتها يا حيت اصلا هي السبب الرئيسي لي مخليه يحرݣ على ودو
رجعات للدار و هي ساهية .. مشات ديريكت لبيتها وجلسات فوق الكنبية .. كانت كاتعاود داك الفيديو كتر من مرة ، هاديك دارهم و هداك حتى هو بابهم و هاديك لي كاتبكي فداك القنت مو و هادوك لي كايواسيوها ماعرفاتهمش شكون .. هاديك راها وفاء و لاخرا صابرين وكلهم كايبكيو و كايواسيو فيهم
لاحت التيليفون ولأول مرة غاتحس بتأنيب الضمير على شي حد حيت هاد المرة كاتشوف بلي مشات روح بسبابها ولكن خلف داك تأنيب الضمير كانو حوايج خرين لي كانت قامعاهم من صغرها .. كانت فصراع مع ذاتها .. حاسة بقلبها شاداه واحد الرعادة فشكل .. يمكن حتى فاش كانو كايموتو جدودها ولا شي حد فالعائلة ماكانتش كاتحس بهاد الإحساس .. عادي كاتحضر للجنازة بحال اي عراضة و صافي ولكن دابا الامر مختلف ، زادت خديجة سيفطات لها واحد تصويرة بالخف ، و ديك التصويرة بالضبط غير زادت كملات على لي فيها وموراها سيفطات لها أوديو بلي غاترجع لدارهم
فديك الليلة ماجاهاش النعاس و كاتبان قدام عينيها غير التصويرة لي سيفطات لها خديجة
° صبح الصباح وماكانتش شابعة نعاس حيت كانت نعسات غير ساعة ... ماكانت عندها الكانة تهضر مع حتى واحد والا تشوف حد ، مورالها كان تحت الصفر و ماباغاش تمشي للخدمة ولكن بززات على راسها .. مشات و هي مفشكلة ... وجهها ماكانش كايتفسر و حتى خدمتها فداك النهار ماكانتش كاتتفسر حيت ناقصة و مامركزاش ... كان الذهن ديالها مشتت و فبالها كادور حاجة وحدة هي كاينة روح مشات بسبابها و هي فنظرها اي واحد كاتمشي روح بسبابو كايتعتابر قتال واخا مايكونش هو لي قاتل
ماكرهاتش ترجع للدار و تبقا هاد نهار غير بوحدها مع راسها ولكن مابغاتش ديرها حيت الخدمة كاتبقا خدمة و ماباغاش يجريو عليها لأي سبب كان ... فواحد اللحظة كانت جالسة و كاتهضر مع واحد العميل فيه الهضرة بزااف و مغنان بقا كايتغان معاها و ماحسات براسها حتى غوتات عليه ... ناضت من تما و مشات للمراحيض ديال الاناث .. رجعات شعرها اللور و بدات كاتغسل فوجهها و تعاود ، رجعات بخطواتها اللور حتى تكات ضهرها مع واحد الباب .. كاتخاطب راسها
مالها على هاد العزو؟ صافي ياك هي ماقتلاتوش بيديها ... البحر لي داه ، بدات كاتحاول تقنع راسها بهاد الهضرة .. قادات مكياجها ورجعات لبلاصتها و حاولات تصلح الغلط لي دارت مع داك العميل باش ماتخرجش على خدمتها ولا يسبب ليها شي مشكل
غير سالات معاه و صلحات الغلط ديالها و هي تهز تيليفونها .. كانت باقا نفسيتها ماشي حتى لتم ، دخلات لداك الفيديو و عاودات شافتو للمرة العاشرة ، مسحاتو من عندها هو و تصويرة باش ماتبقاش محمقة راسها معاه و تبقا كل شوية كاتعاودو
داز عندها داك النهار مريض و كانت كاتتسنا غير فوقاش يسالي باش ترجع لدارها ، ماسالا غا بزز .. رجعات ودخلات لبيتها و مشات حلات الماريو ... بدات كاتقلب بين حوايجها على شي حاجة حتى لقاتها ، كان داك الزيف البيض لي فيه دوك القطرات ديال بكارتها الاصلية .. داك الزيف هو لي كايزيد يثبت صحة هضرتها هو السباب حتى وصلو لهاد الحالة ولا مات غايكون مات بسباب فعلتو ... لاحتو فالكنبية ، هاد المرة داك الزيف ماكانش كافي باش يخليها ماتحسش بتأنيب الضمير حيت كايبقا مات و هو فطريقو ليها ...
بداو كايدوزو عندها الأيام و كل مرة كانت كاتمشي عينيها للمعصم ديالها كاتلقا سميتو باقا موشومة في حين هو مشا .. كل مرة كان كايصوني عليها واحد ... صونات عليها لطيفة ماخلاتش ليها بالدعاوي ... صابرين كل مرة كانت كاتصوني ولكن مع الوقت بداو كاينقاطعو الاتصالات
دازو الأيام و الأسابيع و الشهور وخوها و مها باقيين ماشي هما هادوك معاها ، توحشات ماماها بزاف ماكانش كايسحابلها غاتبقا مقلقة منها هاد المدة كاملة ، فهاد المدة كان الذنب ديال داوود ديما مرافقها و هادو من بين الحوايج القلااال لي يقدرو يخليوها تحس بتأنيب الضمير
طبعا فهاد المدة ماكانوش واقعين معاها غير الحوايج السلبية كانو بعض الحوايج الايجابيين ولكن لدابا كانو قلال ... كان فبالها فاللول تمشي لفرنسا من مور عام ولكن لقات بلي هادشي غايكون سلبي كتر ما هو إجابي ... حيت ايلا سالا العام و مشات ماغاتستفادش من داك الصالير لي كان مزيان و ماغايتطورش ل5 الاف يورو و ماغايكونش عندها شي رأس مال كبير باش دير بيه شي حاجة ففرنسا والاهم هو كانت باغا ضروري ديك شهادة السكنة ديال 3 سنوات و حتى دراري لي كانت كارية لهم كانو محتاجينها
داز عندها العام وخلصات الكريدي ديالها كلو فظرف 6 شهور ... كانت دايرة شي حاجة من فوق جهدها باش تبقا عند حسن الظن باش العام لي موراه يوليو يخلصوها بحالها بحال لي معاها و داكشي لي كان غير سالا العقد عاودو معاها عقد اخر و وصلو لها الخلصة ل5000 يورو و كملات معاهم حتى داك العام حتى اللخر و بدات معاهم فالعام الثالث ديالها ، و هنا كانت كملات 3 سنوات ، 3 سنين و هي فإسبانيا وخدامة بدراعها كاتقتاصد و توفر فالماكلة ولكن فاللبس كانت أناقتها فيه ديما حاضرة ... الشواهد لي كانت كاتشد من كورسيرا حتى هما ماكانتش كاتبخل عليهم باش تخلص بالعكس حيت كانو مهمين ليها باش تزيدهم فالسيفي ديالها ... خرجات الرسمة ديال مارلين لأرض الواقع و زادت لها شي إضافات ... دارت الپيرمي ديالها وبزاف ديال الحوايج خرين غاينفعوها ، ماوصلات ل25 عام حتى كانت ولات مستقلة ماديا و عندها رأس مال تقدر دير بيه مشروع يرجع لها بالمداخيل و هدا بحد ذاتو كان تطور ملحووظ فيها حتى مدام تورية ردات لها البال فهادشي و ردات لها البال كيفاش كادير المعارف بشي طرق كان فيهم التلاعب مي داك التلاعب بطريقة زوينة حيت فالوقت لي كان شحال من واحد كايدير المعارف بلحيس الكابة و كايبقا تابع داك الشخص لي باغي يشري معاه المعرفة هي كانت كاتخلي داك الشخص لي باغا تشري معاه المعرفة هو لي كايسول فيها ، كانو عندها المعارف بحال أهداف كاتبغي توصل لهم .. كاتختار الهدف بدقة و كاتتسنا حتى يكون محتاج لشي خدمة لي مايقدرش اي واحد يقدمها ليه و كاتقدمها ليه هي واخا تعرف تحضرها من السما و بهاد الطريقة كاتخليه مدين ليها بخدمة ... ماكانتش معتامدة غير على هادشي ، كانت شي مرات كاتعطي بعض الحلول لداك الهدف ديالها ايلا لقاتو واحل فشي حاجة و الأهم هو ماكانتش كاتتملق بنادم .. و هادشي لي كان عاجبهم فيها ، ماكانتش كاتصبغ مثلا ايلا شي حد قال لها ماعجباتنيش ديك الحاجة و هي كانت عاجباها ماكاتقولش ليه حتى انا ماعجباتنيش غير باش تخليه يحس براسو عندو ذوق بل كانت كاتدافع على ديك الحاجة و كاتوريه المزايا لي فيها و كاتخلق معاه نقاش عليه و نفس الشيئ ايلا كانت شي حاجة ماعاجباهاش و داك الشخص عاجباه كاتقوليه بصريح العبارة بلي هاديك حاجة مبتذلة و كاتدخل فنقاش اخر معاه
دازت عندها 3 سنين ماقرباتش لعادل ولا حناه .. 3 سنين و هي بعيدة على المشاكل بجميع أنواعها و الخايبة هي أنه 3 سنين دازت و عائلتها باقيين مقلقين منها
بدات كاتريكل امورها باش تمشي لفرنسا من مور ما هضرات مع ألفونسو و مدام تورية على الانتقال ديالها لفرنسا و هضرات حتى مع دراري باش ييداو يقلبو على راسهم حيت 3 سنين لي تفاهمات معاهم عليها ها هي سالات .. فهاد الأثناء كانت كاتمشي لفرنسا و كاتجي باش تريݣل الأمور ديالها و البلاصة لي غاتسكن فيها باش ماشي حتى تكون متقلة بالحوايج عاد تبدا تتجرجر فلوطيلات
وصل نهار سفرها و الانتقال ديالها لفرنسا - باريس .. اراك للسيزي عارفة راسها تما الكرا غالي بزاف على اسبانيا و المعيشة غالية على إسبانيا ولكن هي ماناوياش تمشي باش تجلس .. ودعات مدام تورية و دراري لي دوزات معاهم يامات زوينين واخا كانو واحد جوج منها مرة مرة كايجبدو موضوع الزواج ليها و هي عارفة مزيان غير على ود مصلحتهم ... تصورات معاهم اخر صور قبل ماتمشي من تما و شدات الطريق لفرنسا .. غير حطات فيها رجليها أول حاجة دارتها هي تصورات تصيورات باش تلوحهم فالانسطا و موراها مشات لديك البرطمة لي كرات كانت صغيرة شوية على ديك لي فإسپانيا حيت خاصها تقتصد و ماتطبش فالفلوس ، مزال خاصها تلقا خدمة و شحاال من حاجة ... حطات الطابلو لي جابت معاها بحذر و مشات دوشات و نشفات شعرها وبدلات حوايجها و خرجات باش تشري نمرة و تعمر التلاجة و نيت باش تعرف الطرقان ...
بقات كادور حتى طابو رجليها عاد رجعات للدار صونات على كليكتها و هضرات معاهم أبيل فيديو و موراها صونات على مدام تورية علماتها بلي وصلات و كلشي بيخير لحد الساعة و غير سالات معاهم سيفطات لمحمد ميساج علماتو فيه بلي مابقاتش فإسپانيا ومشات لاحت تصويرتها فالانسطا
ناضت قادات ماتاكل و هزات البيسي ديالها بدات تقلب على شي خدمة و كاتتمنى تلقا الخدمة لي بغات بالضبط .. كان فيها ماتدوي مع مدام تورية تشوف لها المعارف ديالها ولكن مابغاتش حيت جات للهنا باش تعول على راسها و مايقول لها حد انا لي ضبرت لك ولا انا لي درت لك و زيد عليها هي فداك العام مادوزاتوش غير هكاك حيت كانو عندهم بعض العملاء نيت هنا ففرنسا و كاين منهم لي فباريس وهادو كانت حرييصة باش دير معاهم المعرفة لربما شي نهار تبغي شي حاجة من شي حد منهم
دوزات أيام و أيام و هي كاتقلب على لي بغات ولكن مالقاتش .. ماكانتش باغا تبقا جالسة فالدار حتى تلقا شنو بغات حيت غير غاتبدا تخسر فالفلوس لي عندها فالكونط داكشي علاش ولات كاتقبل بالخدامي الصغار ... لقات خدمة مابيهاش و بدات فيها و دوزات معاهم فيها شهر و بدلاتها فاش لقات خدمة حسن منها ولكن حتى ديك الخدمة ماكانتش مرتاحة فيها داكشي علاش ماكانتش ناوية تطول فيها كانت كاتقلب غير على ما حسن و ماحسات بفرنسا بدات كاتضحك لها حتى لقات خدمة فواحد المعرض ديال الفنون فباريس نيت
هو فالأصل ماكانش معرض واحد ولكن كانو معارض هما ... يعني غاتبقا كاتخدم فديك البلاصة لي كايتقامو فيها المعارض و فكل معرض كايتقام فديك البلاصة كانت غاتكون خدامة تما ، تأنقات كعادتها و يا للصدفة صدق هداك مول المعرض واحد من العملاء لي سبق ليها تعاملات معاهم .. غير شافتو عرفاتو و حتى هو عرفها بحكم فايت ليه طلاقا معاها و دخلو فواحد النقاش نيت لي كان على واحد المنتج هو ماكانش عاجبو نهائيا و هي بدلات ليه الرأي ديالو فيه وخلاتو يشوف شي حوايج هو ماشافهمش و حتى داز الوقت عاد عاق بيها خدمات معاه واحد السياسة لي عتامدات فيها على ذكر الامتيازات و ضخماتهم ليه زيناتهم فنظرو ... ركزات ليه على شي تفاصيل صغاار و خلاتو يشوفو من جوانب خرين و حتى الحوايج الخايبين لي فداك المنتج عطاتهم استعمالات خرين الشيئ لي خلاهم يتحولو لميزات ، كانو لقائاتهم معدودين على رؤوس الاصابع ولكن المكالمات ديالهم كانت شحال من مرة هضرات معاه .. تاني لقاء كان محتاج فيه لمساعدة و هي عاوناتو و تما فين تبادلو الأرقام و الاهم من هادشي كامل هو أن هاد الشخص كان مدين بخدمة ليها
الحوار بالفرنسية
_ [ حل يديه باش يعنقها ] الصدييقة
لا مايمكنش ... هاد البلان بالضبط لي فيه ماكاتحملوش ، فيه كترة التعناق بزاف وي كاتحس بيه عفوي ولكن راه غير السلام باليد بوحدو كافي .. لاش التعناق مع كلشي ، كانت كاتحس بيه من داك النوع لي عزييز عليه العيالات مي ماشي نسونجي لا هدا عزيز عليه يتجمع معاهم و حتى ستايل ديالو كان فشكل كايشبه شوية لدوك الحوايج لي كايلبسوهم المتحولين مي الفرق بين هدا و هادوك هدا كانو ميولاتو طبيعية و غير داير ديك الحالة بسباب الموضة
بادلاتو العناق بعناق خفيف باش ماتخليهش معلق وبعدات عليه ونطقات
حياة : [ بإبتسامة ] مسيو بوفس وا صدفة و اشمن صدفة هادي
بوفس : [ كان واقف بواحد الوقفة فشكل كاتدخل الشك ] شنو كاديري هنا؟ نهار زوين منين شفناك
حياة : [ قرنات حجبانها ] واش ماكاتردش البال لناس لي غاتخدمهم معاك؟
شاف الوراق لي فيديها وشدهم من عندها ورجعهم لها و حط يدو على جنبو ونطق
بوفس : نو واي واش مابقيتيش خدامة مع شركة HMI؟
حياة : [ ضحكات بخفة ودورات عينيها على المكان ] ماكتابش نكمل
بوفس : [ حط يدو على ذقنو و شاف فيها بإهتمام ] علاش؟ واش التعامل ديالهم كان خايب ولا الخدمة كانت قاصحة عليك
حياة : بغيت نبدل شوية و صافي .. مابقاتش عاجباني إسبانيا و بغيت نشوف فرنسا كي دايرا
بوفس : فوقاش جيتي؟
حياة : شي شهراين دابا تقريبا
بوفس : وماقلتيهاش ليا ماشي حشومة عليك
حياة : راك عارف كاتجي فاللول صعيبة الانسان ينتاقل لشي بلاد .. كان خاصني نقاد أموري ..
عرف بلي هادي اول مرة تخدم فشي معرض ولكن كان عارف بلي غاترجع عليه بالمنفعة اما هي ماكانتش ناسية الخدمة لي باقا كاتتسالها ليه ماجبداتش ليه سيرتها دابا باش بعدا حتى دير بلاصتها داكشي علاش كتافات هاد النهار غير بالموضوع ديال الخدمة لي رصاتو معاه و قادات أمورها معاه فيه
خرجات من عندو ورجعات للبرطمة ديالها .. بدات كاتقلب على شي طوموبيل صغيرة و زوينة رخيصة تشريها باش تتهنا من فلوس المواصلات ، لقات وحدة و صونات على مولاها هضرات معاه عليها و ماجات فين تبدا خدمتها الجديدة حتى كانت قادات أمورها مع البائع لي باع لها الطوموبيل ... ماقداتها فرحة حيت اول مرة غاتكون عندها طوموبيل ديالها والأهم هو شارياها بفلوسها و بعرق كتافها ... صوراتها و سيفطاتها لمدام تورية و للبنات و بدات كاتتصور حداها و بارطاجات كالعادة التصاور فالانسطا ، ماكانتش غاتقدر تبقا تمشي و تجي بيها من دابا حيت باقي خاصها عاد توالف داكشي علاش الأيام الأولى ديالها فالخدمة كانت باقا كاتمشي غير بالمواصلات حتى كاتخرج عاد كاطلق يديها فيها
دوزات أيامها فديك الخدمة عاديين كل سيمانة كان كايكون معرض مختلف و كل مرة كانت كاطلاقا بناس جداد ولكن هادشي ماكانش كافي حيت واخا كانت كاتطور حياتها الا و انها حااسة بالغربة .. على الاقل يهضرو معاها غير مرة فالسيمانة كاع .. ياك صافؤ محمد تزوج بوفاء؟؟ ايوا علاش باقيين معاها هاكا؟؟ لهاد الدرجة قلبهم قاصح؟ لدرجة حتى الفلوس لي كانت كاتبغي تسيفطهم ليهم مايقبلوهمش؟ مالها واش جايباهم من الحرام؟؟
ماكانتش عارفة بلي محمد عن قصد ماكايسولش و كانو تما أسباب ، و فالأصل واخا تزوج بوفاء الا و أنها باقا لدابا عندها ديك العقدة و باقا لدابا ماقادراش تعيش حياتها بشكل طبيعي ، واخا محمد كان داير معاها جهدو و من فوق جهدو لكن داكشي لي عاشتو ماشي شي حاجة لي غاتتنسا بين ليلة و ضحاها ، حتى هو ماكانش باغي يفرض راسو عليها ماشي حيت بارد و إنما حيت اصلا مايمكنش يفرض راسو على شي وحدة و حيت عارف مزيان شكون سبابها ... طوال هاد 3 سنين عمرو ماجبد لها سيرة الاغتصاب و حاول ما امكن ماحسسهاش بلي غير سترها ، كان كايحاول يحسسها بالأمان معاه باش تقدر تيق فيه و يخرجها من حالتها وفعلا كانت بدات تحس بالامان شوية معاه و بدات تتيق فيه ولكن العقدة باقا هي هي .. كان كايدير جهدو كامل باش يوفر لها و لمو كاع لي خاصهم بلا مايشد الريال من عند حياة ... اما فتيحة كانت كاتعامل وفاء بنفس الطريقة لي كانت كاتعامل بيها بناتها ، ماكاتخصرش ليها و ماكاتحرتش عليها .. حتى للهنا كلشي مزيان ولكن لي ماكانش مزيان هي زهور لي كانت فالأصل كل مرة تسممها و تفكرها و تخليها تعرف بلي ختو هي السباب بحالا كانت حرييصة باش ماتخليهاش تنسا والا تخليها تعيش حياتها بشكل طبيعي
° دازو أسابيع و فهاد الأسابيع طلبات من بوفس طلب و كان داك الطلب هو ديك الخدمة نيت لي مدين ليها بيها ، ماكانتش شي حاجة ساهلة طلباتها طلباتها شوية كبيرة هاد المرة و ماكانش ساهل يقبل كون مادارتش جهدها باش تقنعو و فعلا قبل ولكن بشرط لي قبلات بيه حيت هي عارفة بلي ماشي البلاصة لي عطاها هي لي غاتحكم على قيمة داك الشيئ و إنما هو لي كايدير القيمة لراسو
مشات لدارها بالزربة و جابت منها الطابلو ديالها ... البلاصة لي عطاها كانت مغطية و نقدرو نقولو الطابلو ديالها بحالا كان غايكون فالهامش حيت ماكانش يقدر يضحي ببلايص خرين على شي حاجة بحال هادي و ديك البلاصة لي عطاها راها بحد ذاتها حاجة كبيرة واخا جاية مدرݣة من تما حيت باش يكون الطابلو ديالها فشي معرض بحال هدا و هي مامعروفاش و الطابلو اصلا ماشي قديم و النوع ديالو كايكونو عليه الشبهات راه دار معاها المزيان و هنا مابقاتش كاتسالو و مابقاش كايسالها
[ الحوار بالفرنسية ]
بوفس : مابغيتش نحبطك ولكن راكي عارفة قيمة الفن بتاريخو
حياة : [ تبسمات و هي كاتشوف فالطابلو ديالها ] نحاول
بوفس : [ حط يدو على جنبو و عوج رجليه ] و دابا غانبقاو هنا ا مادموزيل احياة؟
حياة : [ شافت فيه ] راك ماعارفش قيمتو و..
بوفس : [ قاطعها بيديه وقلب وجهو بحالا ماباغيش يسمعها ] لا .. لا ماتجربيش فيا ماغانشريهش منك
حياة : [ ضحكات بخفة ] وا صافي مالك
بوفس : [ حط يدو على جنبو و اشار ليها بصبعو ] شحال من مرة درتيها بيا؟ هادشي ديريه مع الناس لاخرين [ صفق بيديه ] يلاه يلاه ا حياة حركي ديك القزيبة عندك و سيري بداي توجدي راسك للخدمة ماتبقايش واقفة هنا [ مشا و عاود وقف و ضار لعندها و دار لها اشارة بصبعانو جهة عينيه ] راني كانشوفك ماتبقايش مقابلة غير داك الطابلو ..
مشات تقابل خدمتها .. فهمات بلي كايلمح لها باش ماشي غير تتبالا فالطابلو ديالها و تبدا تشكرو و تنسا خدمتها ... ماكانتش ناوية دير هاكا ولكن فنفس الوقت ماكانتش ناوية تخلي الطابلو ديالها فالتوش حيت ايلا مادارتش مجهود فهاد الاسبوع و تستفاد من هاد الفرصة غايخصها تتسنا شحااال و ماعارفاش فوقاش غاتعاود تجيها بحال هاد الفرصة داكشي علاش حاولات ما امكن باش تسلط الضو على الطابلو ديالها ولكن ماكانوش بزاف لي كايديوها فيه حيت قليييل لي كايقبل بالتجديد و اغلب الاشخاص عهم افكار تقليدية على الفن و الرسم ... كاين لي كايميل غير لداكشي لي قديم و عندو تارييخ و حكاية و كاين لي كايميل لشي طابلو كايبدا يتخايل فيه شي حوايج و كاين لي كايميل لشي طابلو حيت كايخليه يحس بشي احاسيس ولا كايرجع ليه شي ذكريات .. ولكن الطابلو لي كان عليه الطلب بزااف و جذب الناس هو واحد الطابلو كان قريب شوية للطابلو ديالها غير الطابلو ديالها كان فالدورة ... مشات كاتشوف الطابلو لي كايتهتافو عليه ، مافهماتش شنو لي فيه مميز عبارة عن تخربيقة و السلام شي كايقولك كايشوف فيه راسو و شي كايقول لك كايشوف فيه شي حد عزيز عليه اما هي كانت كاتشوف فيه غير شخبط شخاابيط .. من سوء حظ لي كانو باغيينو كان داك الطابلو مبيوع
تقابلات حتى هي معاه وحاولات تعرف شنو فيه و ماكاينش فالطابلوات لاخرين .. ماكانتش فيه شي حاجة مميزة ، بعدات و تما عرفات بلي الانسان ماكايديهاش فالابداع بزاف قد ماكايديها فشكون مول داك الابداع و واخا يكون داك الشخص غير كايخربق يكفي تعرف سميتو و السينياتور ديالو .. و هدا من واحد الناحية كايكون ظلم لبعض المواهب لي مامسلطينش عليها الضو
بعدات من حدا داك الطابلو و كملات خدمتها مع الناس .. طوال الأسبوع كانت دايرا جهدها باش تبين الطابلو ديالها لبنادم ولكن المشكل هو بنادم ماكايزعمش و ماكايبغيش يغامر و كاين لي ماكايبغيش حتى يسمع والا يعطي الفرصة باش تثبت ليه بلي الطابلو ديالها مايمكنش لي جا يقلدو حيت فيه حوايج مميزة ولكن شكون يسمعك
بوفس كان شايف هادشي ومتوقعو حيت شكون غايغامر بالملاايين باش يشري طابلو بحال هداك مولاتو مزال مجهولة و مامعروفاش؟
وصل النهار اللخر فالمعرض و واخا هكاك ماستسلماتش ... حتى ايلا ماشراوهش على الاقل تعطيهم فكرة على الفن لي بغاتو يكتاسح الاسواق ... على الاقل تدخل لهم الفكرة كاين لي غاينسا هضرتها مي كاين عاوتاني لي غاتخلي هضرتها خدامة فالعقل ديالو
رجعات وقفات تاني قدام داك الطابلو لي ماحملاتوش ، باقي عقلها ماعارفش هدا لي بغا يرسمو فاش كان كايفكر؟؟ واش يديه مهرسين مثلا؟ راسم برجليه؟ واش كايضحك على الوقت
تحركات من تما و مشات لعند شخص عيط ليها .. بدات كاتتناقش معاه و كاتشرح لو شي حوايج ، سالات معاه و مشات عينيها لجهة داك الطابلو تاني شوية بان لها شي حد واقف قدامو و كايبان غير ضهرو .. شبه لها لواحد الشخص مي ماكانتش متأكدة منو ... شافت النص ديال وجهو و تما تأكدات من هويتو ، ماكانتش عارفاه مولوع بالفن وماكانتش باينة فيه أصلا
تقدمات لجهتو بخطواتها و وقفات قدام الطابلو .. حتى هدا قدر يجذبو ليه؟ العجب يا متعجب .. كانت عارفة بلي الطابلو مبيوع ولكن مابغاتوش يخرج من هنا حتى هو بلا مايستافدو منو والو داكشي
حياة : [ عينيها على الطابلو ] انتيغيسي بهاد الطابلو؟
أصيل : [ مرجع يديه اللور و باقيين عينيه على الطابلو ] شنو بان لك
حياة : الصراحة ماعنديش مع هاد النوع من الفن بزاف .. فالأصل ماكانفهمش فالفن بزاف ولكن هاد الطابلو كايجيني لا علاقة
أصيل : ماعندكش مع الفن وكاينة فبلاصتو
حياة : وي
أصيل : علاش
حياة : حيت خدامة هنا
رمقها بنظرات متفحصة .. ماكانتش مبدلة بزاف ، ملامحها باقيين هما هما .. شعرها نقصات منو و المظهر ديالها ولا أكثر رسمية ، كاتبان بيه كإمرأة عملية .. بعد عينيه عليها وماكانش ناوي يزيد يطول الشوفة فيها
أصيل : [ رجع كايشوف فالطابلو ] خدمتي هنا بالوجه
حياة : بمجهودي
أصيل : بيني لي
حياة : [ سكتات لثواني و بقات شحاال كاتشوف فداك الطابلو ] لي خدامين هنا غايبغيو يلصقو لك الطابلو باش تشريه .. غايزينوه لك فنظرك حتى غاتقول من هدا نخلاق مي فغيمون مايستاهلش
أصيل : خدمتكم تلصقو الطابلوات ، ولكن كانشوفك كاديري العكس
حياة : وي حيت فنظري هاد التخربيقة ماتستاهلش تخسر عليها حتى يورو
أصيل : [ عقد حواجبو واحد شوية ] إهانة للفن؟
حياة : ماشي إهانة مي هاد تخربيقة راه يديرها ولد صغير فعمرو 5 سنين .. هدا لي راسمها بحالا راسمها برجليه حيت حاشا واش تكون باليدين .. حاجة باينة غايكون داك الطابلو داير داك التمن غير بسباب شهرة الرسام ديالو
كان كايسمع هضرتها بإهتمام حتى سالات ونطق
أصيل : فوقاش بديتي الخدمة هنا؟
حياة : علاش واش هادشي كايهم؟
أصيل : [ تلفت لعندها و خشا يد فجيب ] وريني الطابلو لي كايبان لك يستاهل نشريه [ رمقها بنظرة شبيهة للإستهزاء ] ا مولات الحس الفني
حياة : تبعني ...
مشات وقفات قدام الطابلو ديالها و تبعها هو بخطوات تقيلة حتى وقف حداها ، بقا كايشوف فالطابلو شحاال عاد نطق
أصيل : [ هز حاجب ] هدا هو الفن عندك؟ تصويرة ديال مارلين مونرو؟
شافت فالطابلو وهي فخورة فيه و عاودات شافت فأصيل بنظرة غرور ... كانت عارفة مزيان شنو فداك طابلو
حياة : كون كنتي عارف قيمتها كنتي غاتقول تحفة فبلاصة تصويرة
تلفت لجهتها و تقابل معاها ونطق
أصيل : [ ببحبتو المميزة ] علاش غانحط فيها فيها الفلوس فالوقت لي غايلقاها غيري فشي صوق صيني ب5 يورو؟ [ عاود شاف فالطابلو ] حاجة لي تقدري تشريها ويشريها غيرك [ نطق بإستهزاء ] مارلين؟!
حياة : القضية ماكاتتعلقش بالشخصية لي فداك الطابلو .. كاتتعلق بالقيمة الأصلية للطابلو ككل
أصيل : بحالاش هاد القيمة
حياة : يقدر يكون بالنسبة ليك مارلين كانت شخصية مسالية قبها ماعندهاش شي إنجازات كبار لي عاونو البشرية و يقدر تكون كاتشوفها كانت غير أيقونة للجمال و مايكون عندك غرض بهادشي و..
أصيل : [ قاطعها ] كايعجبني الزين [ رجع تقابل معاها ] ولكن أنا سولتك على القيمة
حياة : كون ماقاطعتينيش كنتي غاتعرف القيمة
أصيل : باقي عندك الوقت
حياة : من غير مارلين لي هي بحد ذاتها أيقونة جمال كاينة قيمة خرا فالطابلو .. هاديك هي القيمة الحقيقية و الأصلية ديالو [ تبسمات بإبتسامة جانبية ونطقات بنبرة ثقة ] هاد الطابلو هو أول صورة ديال لNFT خرجات لأرض الواقع من مور ماكان غير فعالم إفتراضي كايدوز من سيت لسيت ، و لي مافراسكش و مافراسش كاع لي حاضرين هنا هو هاد الطابلو خرج لأرض الواقع قبل من التاريخ ديال المعرض لي غايكون فشيكاغو معرض imnotArt .. هاد طابلو قديم ب3 سنوات على المعرض ديال الفن الرقمي لي يلااه غايديروه ، القيمة ديالو طالعة على كاع الطابلوات لي غايكونو فداك المعرض وهادشي ماعارفو حد من غيرك هنا حتى من بوفس ماعارفش بلي هاد المعرض هاز أول طابلو خرج لأرض الواقع ، ونتا عارف مزيان بلي المستقبل ديالنا غايكون هو التداول الرقمي و هادشي كان واضح غير من عملة البيتكوين لي طلع الثمن ديالها فهاد ل10 سنين من 0,001 دولار حتى وصلات ل35,475,69 دولار .. واش فنظرك الفن الرقمي ماغايطلعش هاد الطلعة لي طلعاتها البيتكوين؟ هو أصلا دابا و طالع ولكن انا كانهضر على الصور والتحف لي ولاو كايخرجو لأرض الواقع [ شبكات يديها ] ايلا بغيتي نصيحتي ، ستغل هاد الفرصة وشري هاد الطابلو لي حاليا تمنو مابيهش .. شكون عرف من هنا 5 سنين ولا 10 سنين تولي ملياردير بسبابو .. ماديرش بحال داك لي شرا بيتزا دايرا ب25 دولار مقابل 10 الاف عملة بيتكوين هادي 10 سنين ، هو ندم و مانفعاتو ندامة ماتحطش راسك فنفس الموقف ديالو
تحركات من حداه باغا تمشي شوية وقفات ، حطات سبابتها على شفايفها بحالا تفكرات شي حاجة مهمة .. رجعات لجهتو و نطقات
حياة : ااه كاين واحد الفرق بين الطابلو و البيتكوين ، البيتكوين باقي تقدر تشريه وتشري شحال مابغيتي منو ولكن الإن في تي كايكون فيها من كل حاجة إصدار واحد ودير فبالك قضية خرا .. موحال واش طيح فبحال هاد الهمزة مرة خرا .. خاصة النسخة الأصلية لهاد الطابلو حيت نتا هنا ماغاتشريش غير طابلو ، غاتشري حتى النسخة الأصلية ديالو لي كاينة فالعالم الافتراضي و بخصوص تخاف لاتلقاها فشي سوق صيني ماعندكش علاش تخاف حيت الإصدار الأصلي كايكون مدعوم من بالبلوكتيشن لعنصر رقمي يعني حتى فاش غاتبغي تبيعها بنادم غايكون عارفها أصلية حيت غايقدر يفرق بينها و بين النسخة المزورة [ خرجات نفس طوييل و ختمات كلامها ] و أخر حاجة خاص تعرفها .. هاد الطابلو كاين نوع واحد من نوعو فهاد المعرض [ تبسمات ] ماتفلتش فرصة بحال هادي وتبقا خاشي راسك فديك تخربيقة لي لقيتك واقف حداها
خشا يديه فجيبو و تقدم لعندها بخطوات رزينة و على فمو كانت واحد الابتسامة خفيفة مبينة سنانو .. قرب لعندها و وقف
أصيل : [ ختارق عينيها بنظراتو ] عجباتني المعرفة ديالك فهاد المجال .. تبهرت فيك ماكنتش عارفك عندك العقل لي يهز هادشي [ زاد قرب بخطواتو ] ولكن ماجيتش للهنا باش نتاجر فالفن [ حول أنظارو لجهة الطابلو لي ماحملاتش حياة و نطق ] جيت باغي ندي التخربيقة ديال با سيدي [ حتى بغا يتحرك و هو يحبس و كمل هضرتو ] ماخدمش عليها بيديه حيت مقطوعين ليه
داز من حداها وخلاها واقفة فبلاصتها و متبعاه بعينيها .. دابا شنو واش هي عايرات جدو؟ السيد صدق بصح ماراسمهاش بيديه و هي لي كانت كاتقولها غير باش تعيب فداك الطابلو .. وزايدون مالها كدبات؟ كاتبقا تخربيقة و هي قالت غير الصراحة تقبلها تبارك الله ماتقبلهاش لهلا يݣلب ... لي مقطوعين ليه يديه الله يفرجها عليه
تحركات من تما وبدات كادور من واحد لواحد حتى قرب يسالي النهار و هي تمشي تسول بوفس على داك الطابلو ...
[ الحوار بالفرنسية ]
حياة : بوفس اجي نسولك
بوفس : ياكي عارفة هاد نهار اخر نهار لطابلو ديالك؟
حياة : واييه عارفة غير اجي نسولك ... داك الطابلو لي لهيه [ نعتات ليه ] واش مولاه بصح مقطوعين ليه اليدين؟
بوفس : [ بتعجب ] ماكنتيش عارفة؟
حياة : لا اول مرة نسمعها
بوفس : واقيلا ماعارفة والو منين ماعرفتيش الرسام لي رسمو و قصتو ... مافخباركش بلي كاع طابلوات ديالو راسمهم بصبعان برجليه؟ حيت وقع ليه مشكل فشبابو خلاوه يبتر يديه .. ولكن هادشي ماخلاهش يوقف و بلا يدين قدر يكون من اشهر الرسامين .. كلن رسام ناجح قبل مايموت
حياة : علاش واش هو مات؟
بوفس : [ ربع يديه ] واش كانو سادين عليك فشي تابوت؟ ماعارفة والو
حياة : وا دابا جاوبني باراكا من الطنز ديالك
بوفس : مات واقيلا قبل ماتجي نتي لهاد الدنيا و هداك لي شرا الطابلو حفيدو
هادي فلتات ليها ... ماكانتش سولات على داك الطابلو فاللول و ماعطاتوش شي اهتمام حيت كانت متوقعة ماغايتسوق ليه حد صدق اصلا داك الطابلو هو لي داوها فيه و كيفما توقعات الطابلو لقا إعجابات غير بسبب الشخص لي رسمو و حيت داك الشخص جذب تعاطف الناس حيت قالو شوف برجليه و قاادر يرسم ... شوف برجليه و ولا رسام مشهور ... مسكين كايفرغ داكشي لي كايدوز منو فالرسم .. و اصيل باين علاش شراه غير حيت ديال جدو ، اما كون كان شي حد اخر لي راسمو موحال يتسوقو ليه وهنا تزادت لها معلومة جديدة فراسها و هي ان الفن كيفما بغا يكون حتى الظروف لي كايبدع فيهم داك الشخص كايلعبو دور كبير باش يتشهر .. مثلا ايلا شي حد كان فشي حرب و القرطاس من فوقو و هو كايرسم داكشي لي كايشوف و سما الطابلو تضحية الشهداء و تطلقات القصة ديال الطابلو و ايمتا ترسم فأكيد غايلقا إقبال ... ولا مثلا شي حد كان لحمو كايدوز بالدم بسباب الحكة و رسم طابلو بداك الدم واخا مايكونش واضح ولكن غايلقا واحد الشهرة
خرجات من خدمتها و مشات للدار بدلات حوايجها و خرجات باش تتسارا فشوارع باريس على رجليها .. كان عاجبها الجو ديالها فالليل .. بانو ليها شي وحدين دايزين بالماطر وتفكرات الأيام لي كانت فيهم مع داوود و كليكتو ، رجع لها الحنين لدوك الأيام و عاودات حسات بقلبها تزير فاش طاح فبالها .. ماكرهاتش تمشي لعند شي قاضي و تسولو كيفاش كايقدر ينعس ايلا حكم على شي واحد بالإعدام ولا تمشي لعند شي قتال و تسولو كيفاش عايش بدون تأنيب ضمير .. عممر ماجاها تأنيب الضمير على شي حد من غير مها حتى جاها دابا على داوود لي كاتشوف البحر دار فيه مابغا بسبابها .. ندمات أشد الندم علاش تعطيه اصلا الفرصة من النهار اللول ، كون غير بقا كل واحد شاد تيقارو
رجعات لدارها مابقا فيها مادور أصلا هاد الموضوع غير كاتتفكرو كايبدا قلبها يتعصر و داك تعصار ماكايعجبهاش .. لاحت شي تصاور فالانسطا تصوراتهم فاش خرجات و مشات قادات لراسها الماكلة وجلسات قدام البيسي وبقات شحااال كاتفكر ، كان ممكن تدخل لهاد الفن الرقمي بشحال من حاجة ولكن هي ختارت الرسم اما هو فالأصل راه كاين لي كايدخل ليه يا بأوديو يا مقطع فيديو يا شي ميمز تفكرات داك الراجل لي دخل ليه غير بالحجر لي خرجو من الجسد ديالو ... هدا كاع هو لي ضحكها بمرة و جاها ذكي بزاف حيت داكشي لي خلص على صحتو باش يحيدو ليه داك الحجر ، ربح الأضعاف ديال الأضعاف ديالو بسباب داك الحجر نيت .. ماعرفاتش شكون هاد المقطع لوراق لي شراه من عندو و خلص دوك الفلوس كاملين ولكن لي باعهم بعدا صرعها .. اما بالنسبة لهادوك لي كايبيعو ليمونة ولا بنانة ولا تفاحة بملايين الدولارات هادوك حالة خاااصة
فكرات باش تخشي راسها حتى فتداول العملات باش تزيد تتعلم ، كان عندها ميول حتى لهادشي ولكن المشكل لي عندها كايكمن فالتحليل .. بدات كاتبحت على تداول العملات و ناوية تجرب حظها فيه ، وهادشي خلاها تسهر و تتعطل فالنعاس
سدات البيسي و ناضت تنعس باش تقدر تفيق الصباح و غير صبح الحال مشات لخدمتها دوزات نهارها عادي كسائر الايام .. دازت سيمانة كانت خدامة ماعليها مابيها و غير سالات خدمتها و هو يجي لعندها بوفس ...
[ الحوار بالفرنسية ]
بوفس : عندي ليك مفاجأة .. خبار كايستاهل نشربو عليه شي مارتيني
حياة : ايلا كان شي خبار زوين نيت علاش لا ... نخرجو دابا ونعرضك
بوفس : تسنايني نسالي شي شغل ونمشيو
حياة : [ قرنات حجبانها ] والخبار؟
بوفس : العراضة هي اللولة
غمزها و مشا كايتعوج فالمشية .. كايقتلها غير بديك المشية عندو تشوفو تحلف عليه غير شي لوبية ، مشات كاتقاد فالمكياج ديالها على مايسالي ، سالاو و خرجو من تما عرضاتو على الكوكتيل لي قالت ليه وخدات واحد ليه و واحد ليها ، داك لي خدات ليها كان خالي من الكحول
حياة : ايوا قول الخبار .. العراضة ها حنا عرضناك
بوفس : هنيئا و أخيرا واحد عجبو الطابلو ديالك وعرفتي شكون داك الواحد [ ضرب كتفو بكتفها ]
حياة : شكون؟
بوفس : حفيد الرسام لي سولتيني عليه هادي سيمانة و راه بغا يطلاقاك باش تتفاهمو على الطابلو ديالك
حياة : صافي قوليه يجي نيت لعندنا و نتفاهم معاه تما
بوفس : ماتشغليش بالك بهادشي ، هو ريزيرڤا فواحد ريسطو غدا فالعشية باش طلاقاو فيها وتتفاهمو على الطابلو ديالك [ عطاها العنوان ]
ماشافتش فالعنوان .. حدها كانت كاتتنغم بداك الكاس لي فيديها ونطقات
حياة : مامسالياش غدا
بوفس : هادشي راه يستاهل تلغي كاع داكشي لي عندك
حياة : واخا مايكون عندي مايدار ماغانمشيش ، مابغيتش
بوفس : نتي حمقة .. لا نتي حمقة وبغيتي تحمقيني معاك ، واش لقيتي لي يشري من عندك الطابلو ب250 الف يورو التمن لي بغيتيه فيه ودابا كاتجري عليه؟ ديري عقلك فراسك .. تا واحد ما سول فالطابلو ديالك من غيرو .. هادي الفرصة الوحيدة لي عندك
حياة : [ شافت فيه ] كون بغا يطلاقا بشي حد مشهور كان غايتعامل معاه بهاد الطريقة؟ .. هانا غانقولك كيفاش كان غايتعامل معاه ، كان غايهضر معاه ويشد معاه الرونديفو حيت الناس مامساليينش غير ليه ولكن انا عارفاه دار هاكا حيت عارفني مزال يلاه بادية و مامعروفاش وهو من داك النوع لي كايحݣر بنادم و يقلل من دوك لي باديين .. واخا نكون كانموت بجوع مانبيعوش ليه ايلا بقا كايتعامل بهاد الطريقة
بوفس : [ ضور راسو ل2 جوايه ] غي ظلمتيه .. خديتي عليه نظرة خايبة وغالطة
حياة : قلتي غير ظلمتو؟ واخا .. تقدر تشرح لي علاش حتى دازت سيمانة عاد سول على الطابلو؟
بوفس : حيت مشغول ا حياة .. مالكي ماكاتعذريش الانسان واش هو مسالي 24 ساعة على 24 ساعة
حياة : كاينة حاجة سميتها التيليفون كيفما دار فاش بغا يشري الطابلو ديال جدو كان قادر يديرها حتى معايا .. علاش هاد الطابلو ماهضرش عليه فالتيليفون فهاد السيمانة كاملة؟ أپار هادشي كان قادر يشريه النهار اللول لي شافو مدام عاجبو ولكن لا .. هو بلعاني دارها وتسنا حتى دازت سيمانة باش يخليني نحس بلي نسبة الفرص لي عندي باش نبيع الطابلو قلييلة و يبان لي هو بحال شي فرصة ذهبية يعني نشوفو بنفس الشوفة لي شفتيه نتا ... وااو هو الوحييد لي جا كايسول فالطابلو هادي سيمانة يعني خاصني نبيعو ليه و نبقا تابعاه حتى يشريه لايصدق مبدل الرأي ديالو
بوفس : [ بشك ] واش عندك معاه شي مشكل؟
حياة : عندي مشكل مع التعامل ديالو حيت هاد التصرف لي دار ماداروش هكاك بشكل عشوائي .. كان دارسو بغا يخليني نحس بلي الطابلو ماعندو قيمة باش يجي هو ويدير لو قيمة فنظري حيت زعما غانشوفو هو الشاري الوحيد لي قبل بيه [ ضحكات بإستهزاء و جغمات من داك الكاس ديال المارتيني ] هاد السياسة لي باغي يدير معايا كنت كانديرها فالمغرب فاش كانت عندي 17 العام مع صحاب الحوايج فاش كاتعجبني شي حاجة و كانبغي نشريها .. غايكون هبيل ايلا بغا يطبقها عليا ، ايلا كان كايسحابليه غانقبل نطلاقاه فالوقت و البلاصة لي باغي هو غير حيت غايشري من عندي الطابلو راه غالط
بوفس : غاتخلي داك الطابلو تا يولي من الخردة؟ ماغاتبيعيهش؟
حياة : لا ماغانبيعوش ليه غي قولها ليه
بوفس : [ هبط على داك الكاس ديال المارتيني ونطق ] نتي حمقة .. نتيي قلت لك حمقة واحمق منك ماشفتش
حياة : حمقة ونص غي تهنا ليا مع راسك .. خليه حتى يتعلم كيفاش يتعامل وديك الساعة نشوف اش كاين [ شافت فيه ] كون عرفت غانعرضك على بحال هاد الخبار كون كاعما جيت .. هاد الخبار خاص نشربو عليها القطران ماشي شي حاجة خرا [ ناضت من بلاصتها ] واش نوصلك لطوموبيلتك ولا تشد طاكسي؟
بوفس : [ دار يديه على فمو ] جبتيني لهنا وبغيتي تهربي عليا؟
ضورات راسها ل2 اتجاهات و خرجات كاتتسناه ... كون ماكانتش كاتعرفو كون عقداااتو بالتنمر لي غاتتنمر عليه ، وصلاتو لطوموبيلتو و ديمارات لجهة دارها .. طيبات لراسها العشا و خشات راسها مع واحد تصويرة خرا كاتقادها ولكن هاد المرة هاد تصويرة لي كانت كاتقادها كانت مختلفة على كاع لي سبقوها بقات على داك الحال حتى عيات و ناضت تنعس ولاغد ليه كالعادة مشات للخدمة و غير وصلات العشية و هو يصدمها بوفس بلي داك الشخص ضاعف المبلغ لي غايعطيه ليها و هادشي صدم حتى بوفس ل2 أسباب .. السبب الاول هو انه اول لوحة ليها بداك الشكل غاتتباع بداك التمن و ثاني حاجة هي الشخص لي باغي يشريها ماشي زاد 1000 ولا 2000 يورو و انما ضوبل التمن و وصلو ل500 الف يورو دقة وحدة والصدمة الكبيرة لي جاتو هي فاش حياة واخا شافت المبلغ تضاعف ماقبلاتش بيه .. كايشوفها كاتجري على رزقهم بيديها حيت طبعا ايلا باعتها راه حتى هو غايشد واحد العمولة ...
مافهمهاش كيفاش كاتفكر .. كايشوف السيدة كاتزݣل داك المبلغ كامل و علاياش؟ على والو كي قال ولكن هي كانت عندها وجهة نظر خرا أو بالأصح تكونات عندها وجهة نظر خرا من نهار عادل هضر عليها بديك الطريقة مع الرباعة ديال صحابو حيت ديك الهضرة هي لي خلاتها تفهم المعنى لي كان من تحت هضرة داوود فاش كان فالحبس هدا علاش هي ولات حاطة ديما واحد الحاجة قبل من الفلوس واخا يكون المبلغ ملاييير المليارات ، و ديك الحاجة بالضبط هي لي غاتخلي عندها القيمة فالوسط الفني خصوصا أنها مجرد دخيلة عليه باغا تدخل لهم فن من نوع أخر .. يعني غاتلقا صعوبة باش يتقبلوها أصحاب الأفكار التقليدية و معارضي الفن الرقمي .. و تقدر توصل كاع لمرحلة يتطلقو عليها إشاعات على أساس نصابة كيفما تطلقو على الفن الرقمي داكشي علاش كان ضروري تفرض الإحترام على بنادم باش يحتارمها قبل مايحتارم لوحاتها .. داكشي علاش كان خاصها دير قيمة كبيرة لسميتها فهاد الوسط قبل من القيمة للطابلو
رجعات لدارها و دخلات للدوش كاتفكر فخطوتها الجاية ... باقي 6 شهور للمهرجان السنوي ديال وارن بافت و غايكونو فيه أشخاص لي غاينفعوها بزاااف إيلا دارت معاهم المعرفة ، حيت إيلا شكرها شي حد من ديك الطبقة لشي واحد اخر هدا بحد ذاتو غايكون تقدم كبيير ليها و غايوفر لها سنين من الجهد باش يتشهرو الطابلوات ديالها حيت فاش كايشكرك ولا يهضر عليك شي شخص ناجح واخا غير يجبد سميتك فالهضرة ديالو .. بهاد الطريقة كايتوجهو الأنظار ليك .. تماااما بحال فاش ايلون ماسك كايهضر على شي عملة و من موراها مبااشرة كاطلع ، علاش كاطلع؟ حيت ببساطة هو واحد الشخص مشهور بالنجاحات ديالو الشيئ لي كايخلي معظم الاشخاص واخدينو قدوة و كايتوقعو من كل عملة ذكرها غايكسبو منها ربح كبير و هادشي بالضبط لي بغات هي تطبق على راسها .. ايلا الطابلوات ديالها ولا غير سميتها تذكرات على لسان شي شخص من الاشخاص لي سابقينها بعقود من الزمن اشخاص لي ناجحين هادشي غايخلي كاع دوك لي معتابرينهم قدوة يوجهو أنظارهم ليها حيت غايبانو لهم اللوحات ديالها مكسب ليهم و هادشي لي غايخليها تكتاسب الشهرة + الإحترام + الفلوس ... ولكن السؤال هنا هو كيفاش غاتقدر دخل لداك المهرجان؟ ماشي أي واحد كايقدر يدخل ليه .. خاص يكون عندك تصريح منين غاتجيب داك التصريح؟ بحال دوك المهرجانات راه بوفس و مايقدرش يدخل لهم عساك هي ، لوات عليها الفوطة و خرجات من تما الحل لي عندها هو تولي تمشي مع بوفس للحفلات لي عندو باش بهاد الطريقة تزيد دير المعارف
سمعات التيليفون ديالها كايصوني و مشات تشوف شكون ، المتصل كان من إيطاليا .. جاوباتو و دارت هوت باغلوغ و مشات كادير لراسها ماتاكل
حياة : كون درتيها من اللول و صونيتي .. ماشي تصوني على بوفس
بقا ساكت شحال حيت صونا و هو أصلا مشغول بشي خدمة فيديه ، يعني فعلا الوقت ماعندوش
أصيل : [ عينيه باقيين على الوراق لي فيديه ] عاد شديت نمرتك
حياة : و علاش؟
أصيل : عندك شي وقت غدا؟!
حياة : مشغولة
أصيل : [ باقيين عينيه على الوراق ] السبت الجاي؟!
حياة : مامسالياش فيه
أصيل : [ حط الوراق من يديه ] فوقاش غاتسالي
حياة : بعد غدا مسالية
أصيل : بعد غدا عندي شي خدمة
حياة : بعد غدا لي غانكون انا مسالية فيه
ضغط بيديه على محاجر عينيه وعاود دوز يديه على الذقن ديالو .. يعني هضرة بوفس كانت صحيحة فعلا حسات بيه نقص منها
أصيل : [ بنبرة توضيح ] ايلا مقصحة راسك وكاتتعاندي علاش ماشديتش معاك رونديڤو ، كنت مشغول السيمانة لي دازت ، وبعد غدا وقتي عامر
حياة : وعلاش كاتبرر لي؟ كلنا وقتنا عامر ماشي غير نتا
بقا ساكت لثواني كايشوف الوقت لي غايكون عندو خاوي باش يقدر يرجع لباريس فيه
أصيل : الشهر الجاي؟!
حياة : لا .. الشهر الجاي مامسالياش خلي للشهر لي موراه
أصيل : مالك راسك قاصح؟
حياة : الموضوع مافيهش قصوحية الراس .. فيه الشهر الجاي عندي عامر مامسالياش فيه و ماعنديش الوقت لي نحك فيه راسي
أصيل : [ عاود دوز يديه على الذقن ديالو ] بعد غدا 7:30؟
حياة : بعد غدا مامسالياش
أصيل : [ عقد حجبانو ] هادي 5 دقايق ماكانتش هادي هضرتك
حياة : وي حيت عاد تفكرت بلي بعد غدا مامسالياش .. بغيتي نطلاقاو من هنا شهراين غانكون مسالية
أصيل : أخر هضرة؟!
حياة : وي أخر هضرة
أصيل : على بالك هاد النفخة لي فيك ماغاتعاونكش تزيدي للقدام؟!
حياة : [ تبسمات ] وي فراسي ... المهم ا سي أصيل نخليك
كون ماكانتش ديك النفخة غاتعاونها ماكانش غايتسنا شهراين غير باش يطلاقا معاها لمدة نص ساعة قطعو الإتصال ومشات هي كاتتعشا في حين أصيل كان متأكد من حاجة وحدة غايصوني عليه بوفس عاجلا ام أجلا و يقوليه بدلات الرأي ديالها ، حتى لإيمتا غاتبقا نافخة ريشها؟ هو كايعرفها مزياان و عارفها من النوع لي عزيز عليه الفلوس .. مايمكنش تصبر شهراين على 500 مليون ...
وي باقي عاقل بلي ماقبلاتش يعاونها ولكن هادشي لي باغي يخلصها بيه دابا ماشي هو لي كان غايسلفها ديك المرة ... ديك المرة كان سلف اما دابا راهم قادرين يوليو فلوسها
دازت شهراين و فهاد الشهراين حياة كانت مقابلة غير الهدف ديالها ... ياما طلاقات بنات و عيالات فشي حفلات حضرات لهم ، كانو منهم لي تبادلات معاهم النوامر و كاينين لي شحال من مرة عرضوها لشي حفلة ولا تمشي معاهم لشي ديسكو ولكن هي كانت كاتختار الحفلات لي غاتحضر لهم بعناية حيت ببساطة ماكانتش كاتشوف هاد الوقت وقت الرفاهية و داك الوقت لي غاتضيعو فحفلة باش تشطح فيها و تفوج فيها كان زايد فيها .. هي من واحد النوع ايلا شد فشي حاجة كايشدها ݣرجة وحدة بواحد الشكل مبالغ فيه ، الوقت لي غاضيعو مع لصحاب و الصحابات هنا ماعندهاش ، الوقت لي تسافر فيه باش تفوج فيه ماعندهاش ، الوقت لي تضيعو فالعلاقات الغرامية مابقاش عندها ، ولات كاتحط قدامها 3 خطط وحدة للأهداف القريبة المدى و التانية للأهداف البعيدة المدى و الثالثة كانت فالأصل عبارة عن خطط إحتياطية .. حبها للفلوس و الثراء الفاحش باقي هو هو غير الفرق لي كاين هو دابا ولات باغا سميتها تطلع حدا ديك الثروة لي غاتبنيها بمعنى تكون هي لقدام و موراها ثروتها ماشي يكون الراجل لقدام و هي و ثروتو موراه
أما بالنسبة لأصيل ماينكرش بلي فاجئاتو بهاد التغيير لي طرأ ليها او بالاحرى ماكانش كايظن غاتقدر تصبر شهراين باش عاد تشد الفلوس ، هادي هي لي كانت طمعات فالسلسلة لي كان عطاها لصوفيا؟ كيفاش قدرات تصبر على 500 الف يورو؟ فينها ديك الطايشة لي كانت تابعة غير الفلوس و تزوجات بعادل اصلا غير على الفلوس؟
فهاد الأثناء لي كان هو مشغول مع خدمتو وصلو ميساج منها حددات فيه النهار و الوقت و البلاصة لي غايطلاقاو فيها .. ختارت البلاصة لي كاتخدم فيها و ماعطاتوش الفرصة يختار شي ريسطو ، شاف الميساج ديالها وضحك ضحكة خفيفة و ضغط على عينيه بصباعو ، حيت كايسحابليه هي يسحابلها بلي اللقاء لي كان باغيه يكون فريسطو هي شافتو على اساس مغازلة ولا كايسحابلها عرضها لتما باش يتعرف عليها .. هدا كان توقعو حيت هي كاتبان وحدة عاد بادية و بسباب المحيط لي كابرة فيه والفقر لي كابرة فيه غايكونو الناس من ديك الطبقة كايعتابرو اي عراضة لريسطو ولا كافي ولا عراضة للدار كايكون من موراها هدف فيه نوع ما المغازلة يعني توقع بلي حتى هي تفكيرها باقي هاكا مدام ماقدراتش تشوف شي كافي ولا ريسطو وختارت البلاصة لي خدامة فيها.
° كانت فمقر خدمتها واقفة مع واحد الرسام ومجموعة أشخاص ضايرين ييه كانت كاتتناقش معاه على الأعمال ديالو لي جذبوها و بوفس واقف بعيد مع مجموعة خرا ديال الناس و مرة مرة كايشوف لجهتها ، طريقة خدمتها كانت فشكل ومخليها تخدم بيها غير حيت طريقة فعالة
بقات النهار كامل و هي على داك الحال .. كاينين أشخاص لي جاتهم على كانتهم و اشخاص لي ماعجباتهمش بسباب وقاحتها
بداو الناس كايتنقصو واحد بواحد والوقت لي دارت مع أصيل يطلاقاو فيه قرب ولكن ماكانش جاوبها واش غايجي ولا ماغايجيش .. غير وصل الوقت و هو يبان لها داخل ، لقاتو جا فالوقت نييت لي دارو يطلاقاو فيه
مدات يديها باش تسلم عليه وسلم عليها حتى هو اما بوفس هداك ماكايسلمش باليد .. كايسلم بالتعناق و داكشي لي دار مع أصيل
[ الحوار بالفرنسية ]
حياة : [ تبسمات ليه ] عندك الوقت هو الوقت
أصيل : [ نظراتو ليها كانو كايختارقو عينيها ] الوقت ماكايتشرا ماكايرجع [ ضور عينيه على البلاصة ] غاندويو هنا؟!
يلاه جات تجاوبو و هو يسبقها بوفس
بوفس : [ ضرب بيديه و شبكهم وشاف فيهم بأسف ] كانتأسف ولكن ماغاتقدروش
حياة : [ شافت فيه و هزات حاجب ] ياك قلتي..
بوفس : [ قاطعها ] عندي رونديفو وراكي عارفة الوقت لي خاص نحبسو فيه
طولات الشوفة فيه و هي شاكة فيه متافق عليها مع أصيل ولكن فالحقيقة كانت غير ظالماه حيت ماكانش متافق معاه وماعندوش علاش يتافق معاه أصلا .. بعدات عينيها عليه و شافت فأصيل
حياة : [ شافت فأصيل ] لا ماشي هنا مي ايلا كنتي تقدر تتسنا واحد ل10 دقايق غانمشي نجيب شي حاجة من الدار ونجي
أصيل : [ شاف فالمكانة لي فيديه ] ماشي مشكل
خرجات هي وياه من تما من مور ماهزات صاكها و ركبات فطوموبيلتها و شدات الطريق للبناية لي ساكنة فيها في حين هو كان تابعها من اللور بطوموبيلتو و كايتبادر فالذهن ديالو شحال من سؤال .. شنو دارت فهاد 3 سنين؟ شكون عاونها؟ على ماكايعرف و على حساب لي سمع ، طلقات من عادل بلا ريال بلا 2 و من الفوق طلقات بالكريدي ولكن كيفاش حتى خلصات الكريدي و خرجات من المشكل لي هي فيها و دارت الطوموبيل و كرات برطمة فهاد القنت؟
بقا كايتسناها لتحت حتى طلعات و هبطات كانت بدلات حوايجها و هازة فيديها واحد الشنيطة صغيرة وقفات قبالتو ونطقات
حياة : كانعرف واحد الريسطو زوينة وفيها الكالم ، غانقدرو تما نهضرو على راحتنا
فهاد الأثناء هو كان كايتفحصها بنظراتو ... مابقاتش لابسة حوايج رسميين ولكن كالعادة كانت كاتعرف مزيان كيفاش تختار حوايجها و تختار كل حاجة مناسبة للبلاصة لي مناسبة ...
عطاتو سمية الريسطو و بغات تركب فالطوموبيل ديالها باش تمشي ولكن قتارح عليها بكل جنتلمانية باش تركب معاه و فاش يساليو غايوصلها ... بقات كاتشوف فيه شحاال حتى صافي قال غاتقصح راسها و تشد الضد ولكن خالفات توقعاتو .. تبسمات ليه و مشات لجهة طوموبيلتو يكفي انه عارفها مامحتاجاهش يوصلها ، حيت حتى هي بطوموبيلتها بغض النظر على ثمنها الرخيص المهم كاتديها و تجيبها و شكلها زويون
ركبات معاه وشدو الطريق للريسطو .. كان واحد الصمت رهيييب بيناتهم هو كايفكر فحاجة وهي كاتفكر فحاجة ولكن لي جامعهم هو كل واحد كان كايفكر فداك لي حداه .. هي جاها التعامل ديالو تبدل في حين هو جاتو هي كلها تبدلات حاس بلي كاينة شي حلقة مفقودة من حياتها و هو ماعارفهاش
وصلو لديك الريسطو لي قالت ليه عليها وجلسو .. بغات تجبد البيسي باش تبدا تهضر معاه على الخدمة ولكن حبسها بهضرتو
أصيل : باقي عندنا الوقت والليل باقي طويل
حياة : [ بإستغراب ] قبيلا ماشي هادشي لي قلتي ، قلتي الوقت ماكايتشرا ماكايرجع وغالبا غدا غاتكون عندك الخدمة زيد عليها انا ماعزيزش عليا السهير
أصيل : مابقيتيش كاتسهري؟!
حياة : لا ماكانسهرش
شاف فالسرباي لي هو بدورو جا لعندهم و طلب منو شنو بغا و شاف فحياة باش طلب حتى هي و داكشي لي كان .. قالت للسرباي شنو بغات ورجعات البيسي لبلاصتو ، ماكانتش ناوية تتعامل معاه بحساسية مدام قاد التعامل ديالو .. غاتعاملو بحال اي واحد كان غايشري منها الطابلو
أصيل : تبدلتي [ حط إصبع السبابة على ذقنو ] درتي عقلك
حياة : [ تبسمات ليه ] لا ماتبدلتش
جبد بكية ديال الݣارو وجبد منها واحد وشعلو وشاف فيها بنظرة عميقة بحالا كايحاول يختارق عينيها
أصيل : ماعندكش مشكل لابعدنا على على الخدمة؟!
حياة : عادي خود راحتك مدام غاتبقا محتارم راسك
أصيل : شنو درتي فهاد 3 سنين؟!
حياة : كنت عايشة كيفما باقا عايشة دابا
أصيل : و علاش طلقتي من راجلك؟!
حياة : ايلا كنا غاندخلو لبحال هاد المواضيع ، عندي شحال من حاجة باغا نسولك عليها
أصيل : [ نتر نترة من الݣارو لي فيديه و شاف فيها بإهتمام ]
حياة : علاش كنتي باغي تعاونني هادي 3 سنين؟ على ماكانعقل ماكناش مفاهمين [ ضحكات ] و باش ماننافقكش ماكانش عندي معاك
أصيل : ودابا عندك؟!
حياة : على حسب نتا كيفاش كاتتعامل .. مانقدرش نقول لك عندي معاك و مانقدرش نقول لك ماعنديش معاك
أصيل : [ طفا الݣارو من مور ماشافها مامرتاحاش بداك الدخان ] بسباب الرياض؟!
حياة : لا ماشي بسباب الرياض
أصيل : خوي لي عندك
حياة : مامعمراش عليك باش نخوي مي كاتبقا على النظرة لي هازاها عليك
أصيل : باغا ندويو فهادشي؟!
حياة : وي باغيا
أصيل : تقرصتي من الرياض؟!
حياة : ماتقرصتش حيت شفتك فديك الوقت بحالا ماعندك مايدار باش تعمر شومبر على ودي وتتسناني حتى نجي باش تشدني بالجرم المشهود .. زعما يسحابلك راني وحدة سراقة؟ كنتي كاتتسناني نسرق من تما؟ راك غالط وماكاتعرفنيش مزيان
أصيل : عارف يدك ماخفيفاش
سكت لمدة دقيقة على مايسالي السرباي لي جا كايحط لهم العشا .. وغير شافو مشا كمل هضرتو
أصيل : عارف السلسلة ماسرقتيهاش
حياة : وعلاش ديك الحالة لي درتي؟
أصيل : الإنسان إيلا عاش شي حياة ماشي ديالو لمدة طويلة ، كاينسا أصلو
حياة : بنادم لي كايدخل راسو فسوق ماشي سوقو كاينسا الطريق للسوق ديالو
أصيل : تكالماي
حياة : عرف تهضر مع لي كايكون معاك
أصيل : الحياة لي كنتي عايشاها فالسوشل ميديا كانت ديال صوفيا
حياة : ومن بعد؟ كانت واحد المرحلة ديال الطيش لي كلشي كايدوز منها
أصيل : ماكايبرر غير لي حاس براسو غالط ، عارفة شحال من واحد كان غالط فيك فالسوشل ميديا؟!
حياة : مدام نتا ماشي منهم علاش كاتتدخل فشي حوايج ماكايعنيوكش
هز الفرشيطة والموس باش يبدا ياكل ولكن قبل مايبدا نطق
أصيل : كنت منهم
حياة : ماشي مشكلتي ايلا كنتي متبع الكونط ديالي
أصيل : باقي طالع عندي
بدا كايصوني عليها التيليفون وهزاتو كاتشوف النمرة لي كاتصوني .. عقدات حجبانها وهي مافاهماش علاش هدا كايصوني عليهت من مور هاد المدة كاملة؟؟ ياك صافي داكشي لي كان جامعهم سالا؟؟ ياك قال ليها ماتعاود تعرفو مايعاود يعرفها ... علاش كايصوني عليها دابا فالانسطا؟ .. خلات التيليفون كايصوني حتى عيا .. دارت ليه سيلونص و ماتسوقاتش ليه حيت اصلا شغلها هي وياه تسالا و مابقا عندهم فاش يهضرو .. شافت فأصيل ويلاه جات تهضر وهو ينطق ...
حياة : لا عادي غير بنادم ماعندو مايدار و صافي
شافتو كايصوني و كايعاود حتى دخل ليها الشك و بقات مبرزطة مع التيليفون .. يلاه جات تجاوب وهو يتقطع و هاد المرة ماعاودش صونا
حياة : [ شافت فأصيل تبسمات ليه ] واحد الدقيقة .. هانا راجعة
هزات تيليفونها و ناضت من تما كاتصوني على وليد .. بقا التيليفون كايصوني ولكن هاد المرة حتى واحد ماجاوبها ، عاودات صونات و نفس الشيئ لا رد ، شنو واش غايكون هاد القرد هبط للمغرب و شدوه سلخوه وبغا يزرفها؟ ولا غايكون هبط للمغرب وقرقبو عليه و بغا فيها الخدمة حتى هي؟ ولا ياكما هبط للمغرب وصحاب داوود شدوه و وصلوه للسبيطار؟
كانو عندها بزاف ديال الإحتمالات فبالها ولكن ماعرفاتش لي صحيح فيهم ، رجعات جلسات فبلاصتها و خلاتو حتى يعاود يصوني على خاطرو
أصيل : مالك؟!
حياة : غير تبرزطت بدوك لي زاپيل .. فين خليناها؟
أصيل : فطلاقك
حياة : [ عينيها باقيين مع التيليفون لي حطاتو ] هداك موضوع و داز [ شافت فيه ] طلقت انا وعادل حيت ماتفاهمناش اما بخصوص التصاور لي كنت كانحط فالانسطا كي قلت لك كانت واحد المرحلة ديال الطيش بنادم كايبغي يجرب اي حاجة كايشوفها
أصيل : ماكانش طلاقك على مول الموطور؟!
حياة : [ قرنات حجبانها ] ونتا مالك و مال مول الموطور؟
أصيل : باغي نعرف
حياة : الراجل مات وماعزيزش عليا نشد الهضرة فالميتين
أصيل : البركة فراسك
حياة : واش دابا كاطنز عليا؟
أصيل : تكالماي
حياة : شوف نقولك باش نتفاهمو على واحد النقطة لي شفتك من قبيلا و نتا كادور ليا عليها ... عادل من فاش تزوجت بيه ماشفتش فشي حد من غيرو وهنا كانهضر على من فاش جمعاتني انا وياه واحد الورقة [ ناضت من بلاصتها ] المرة الجاية فاش تبغي تضرب شي واحد فالكمارة حسن ماتبقاش تقوليه باغي تهضر معاه فالخدمة [ حلات صاكها وجبدات منو الفلوس و حطاتهم فوق الطبلة ] كمل عشاك بصحتك
خرجات من الريسطو وبدات كاتقلب على شي طاكسي .. عصبها واش السيد جالس كايلصق لها تهمة الخيانة الزوجية عاين باين؟ اشمن نوع ديال الناس هدا ، وقف لها طاكسي و يلاه جات تركب وهي تحس بشي حد شدها من دراعها .. تلفتات ليه لقاتو دار اشارة لمول الطاكسي باش يمشي
حياة : [ نترات دراعها من يديه ] علاش تابعني؟
أصيل : الليل عليك خليني نوصلك
حياة : ماتوصلني مانوصلك غير بعد مني .. هادشي لي بقا ناقص واش نتا ماكاتعياش؟ كترة النفخة على والو؟ كاتشوف راسك حسن من بنادم مالنا ياك لاباس؟ بنادم كاع كايتبدل الا نتا صباغتك هي صباغتك شكون نتا فملك الله كاع باش تبدا تتهز و تتحط عليا؟ داك القفص لي ماعاجبكش انا عاجبني وغايبقا عاجبني ومرتاحة فيه قيمة الحاجة ماكاتتقاسش بالحجم ديالها ولا على ديك السلسلة لي باقي تابعني بيها لدابا .. انا نخلصها لك غير سكتني و ماتبقاش فوقما نطلاقاك تجبد ليا سيرتها ولا على الرياض و شراوطو نخلص لك الشراوط لي قيستهم داك النهار اش اخر؟ الورد لي كنتي كاتسيفط؟ نخلصو لك حتى هو باقا شي حاجة؟ نكون انا و مول الموطور ولا انا و مول الكاميو حتى واحد ماشغلو فيا ماديرش ليا فيها نتا عمرك دخلتي فشي غولاسيو ولا ياكما نتا من داك النوع لي كايشوف الرجال من حقهم يدخلو فعلاقات مع عيالات اشكال و الوان بمختلف الاحجام و العيالات حرام عليهم حيت غايتسماو توسخو؟ عقلية ديال الويل [ ضارت باش تمشي و عاودات شافت فيه ] اه ولا كان هادشي غايخليك تعيش حياتك فراحة نفسية هانا غانقولو لك ... انا و مول الموطور تفارقنا قبل مانتزوج بعادل .. و حاجة خرا داك الطابلو مابقيتش غانبيعو [ بعدات عليه و تمتمات ] الݣنس الناقص
تفركعات عليه و مشات شدات طاكسي للدار مخلياه موراها .. من هاد الناحية باقي هي هي الخصال لي فيها باقيين هما هما و لسانها باقي طويل خاص غير لي يجبدها
وصلات لدارها ودخلات لاحت الطالون ديالها مع الدخلة ديال الدار .. كان باقي عقلها مرون مع وليد لي صونا و زاد ترون حتى مع أصيل لي كاتشوفو فوقما كايشوفها كايبقا غير يقول لها درتي ودرتي ودرتي على اساس هو واحد معصوم من الاخطاء ، كانت كاتشوفو واحد متكبر لأقصى الدرجات و كايبغي غير يتصيد اخطاء الناس .. ندمها كاع علاش خرجات معاه ، عاودات هزات تيليفونها وسيفطات ميساج لخديجة باش تتأكد لها من البلان ديال وليد ايلا سمعات شي تنقنيقة عليه فحالة ما كانو شدوه صحاب داوود ولا شي حاجة بحال هاكا .. و ما هي الا دقائق حتى عاودات صونات عليها
حياة : واش هبط؟؟
خديجة : مافراسي والو من هادشي ولكن غي عايني تا لغدا ونمشي لداركم حيتاش ايلا شدوه غاتكون وفاء ولا خوك سايقين الخبار
حياة : غير شوفي لي اش كاين حيت شفت داك الويل كايصوني عليا و ماعرفتش مالو
خديجة : وايلي شبغا عندك ا صاحبتي؟
حياة : والله ماعرفت ضرني فراسي داكشي علاش صونيت عليك ...
قطعات معاها و ناضت دوشات حيدات العيا ديال النهار ولبسات پيجامتها ... قادات لراسها مشروب ساخن باش تتكونسوطرا ، مشات كاتقلب على البيسي باش تبدا خدمتها ولكن مالقاتوش .. بدات كاتقلب ياكما حطاتو فالكوزينة .. ياكما فالصالة؟ ولا يمكن دخلاتو للبيت؟ مشات كاتقلب فالبيت واالو غبر ليه الأثر .. قلبات البرطمة سفاها على علاها و حسات بقلبها طاح من بلاصتو ياكما نساتو فالطاكسي؟؟
حياة : [ ضربات جبهتها بيديها ] خدمتي كلها مشات
جلسات فوق الكرسي كاتحاول تتفكر ... واش نساتو فالطاكسي؟ ولا ياكما نساتو فالريسطو؟؟ .. ناضت من تما كاتقلب على تيليفونها حتى هو صدقات متلفاه فاش كانت كاتقلب على البيسي .. جاب الله صونا و تبعات الصونيط ديالو حتى طاحت فيه
طلعات لها النمرة ديال أصيل وجاوباتو
حياة : مانسيت والو فالريسطو؟
أصيل : خليتي اللاب ديالك
حياة : [ هزات سوارت طوموبيل ديالها ومشات كاتزرب ] قول ليا غير فين كاين نجي لعندك
أصيل : بلا ماتعدبي راسك .. واقف لتحت
خرجات بالزربة وهبطات لعندو لقاتو واقف حدا الطوموبيل ديالو وهاز 2 حوايج .. الشانطة ديال البيسي ديالها و شي حاجة خرا فيديه غير وصلات لعندو عطاها البيسي ديالها
حياة : [ زفرات براحة ] قلت صافي مشا [ شافت فيه ] كون ماعصبتينيش ماكنتش غاننساه
أصيل : غاتبرد
حياة : شنو لي غايبرد؟
وراها شنو كاين فيديه لاخرا .. كان هاز صاك ورقي
أصيل : الحريرة
حياة : [ بإستغراب ] ونتا منين جاتك الحريرة؟
أصيل : غانبقاو هنا؟!
حياة : وفين بغيتينا نمشيو؟
أصيل : ماغاتعرضينيش لدارك؟! من الصواب
حياة : مابقيتش كاندخل الرجال لداري
أصيل : وغاتبقاي خارجة بالبيجامة؟!
حياة : لا لقيتيني غانطلع ونتا بصحتك وراحتك الحريرة
دوز يديه على شعرو و عاود دوز يديه على الذقن ديالو .. يمكن كون كانت شي وحداخرا ماكانش غايلقا معاها هاد المشكل كامل ، هو أصلا مشا قلب على الحريرة على ودها حيت عارف بلي غاتكون توحشات المغرب و ماكلتو ولكن كيفاش غايقول لها بلي جايبها على ودها وهو أصلا عمرو دارها لشي وحدة حيت فاش كايبغي يطلاقا بشي وحدة كايجلسو فريسطو عادي ماكايدي لها ماكاتدي ليه ، شافتو هكاك كل مرة كايشوف فجهة فهماتو حتى هي بلي جايب الحريرة باش يشربوها ب2 ومالقاش كي يقولها لها
حياة : تسناني نطلع نجيب 2 زلايف ونجي
أصيل : كيفاش؟!
طلعات وخلاتو متبع سرابها .. صدقات دايراها بصح و نييت مابغاتوش يدخل لدارها لا و الزوينة غاتهبط 2 زلايف و يشربوها هكاك بالواقفية وعلى برا و هي بالبيجامة وعادي جدا .. بانت ليه هبطات و فيديها 2 زلايف ، يا دينك منين هاد المخلوقة؟
وقفات قدامو ونطقات
حياة : نشربوها فطوموبيلتك ولا طوموبيلتي؟ بان ليا فطوموبيلتك حسن حيت طوموبيلتي صغيرة [ وقفات قدام الباب ديال طوموبيلتو ] حل الباب راني كرمت بالبرد
حل لها الباب وطلعات وهو باقي كايشوف فيها من برا .. طلع من الجهة لاخرا ولقاها مدات ليه الزلايف باش يخوي
أصيل : باش نخوي؟!
حياة : نطلع نجيب مغرفة؟
أصيل : غير جلسي فبلاصتك
السيدة ناوية ترحل ليه الكوزينة لوسط الطوموبيل ... بقا كايخوي و حاضي لاتتكفح عليه ولا تتكفح فالطوموبيل في حين حياة كانت جالسة و طاوية رجل و الرجل التانية طالقاها و شادة زلافتها كاتتبنن فيها ، توحشات نييت الحريرة و هاد الحريرة جاتها على قلبها
حياة : هدا ولا هادي لي طيباتها الله يعطيها الصحة
فهاد الأثناء لي هي كانت كاتشرب حريرتها هو ماكانش خوا لراسو وإنما كانو عينيه مفيكسيين فيها و من نظراتو كان باين بلي ماجاش لعندها غير هكاك على والو فهاد الليل
أصيل : الهضرة لي كانت فالريسطو مانقصتش منك بيها
حياة : ايوا و شنو قصدتي بيها؟
أصيل : ماكنتش كانتسنا يجي شي نهار نلقاك درتي فيه عقلك
حياة : بنادم ماكايبقاش صغير
رجعات كاتشرب من زلافتها في حين هو كان سكت لثواني و كان كايدوز يديه على لحيتو وكايشوف قدامو .. كانت عندو هضرة لي كان ممكن يكون قالها من زماان كون ماتزوجاتش بعادل و ماعرفهاش ولات مرت الراجل .. ولكن دابا مابقاتش مرت الراجل
قلب وجهو لجهتها ونطق
أصيل : [ بالبحة المميزة ديالو ] غانجيك ديريكت ، باغيك ليا
ماحسات براسها حتى خرجات لها الحريرة من نيفها وبدات كاتكحب وعينيها كايدوزو بالدموع وتكحب وتقول ماكحبات حتى كانت غاتجيف بسباب حمصة وحلات لها فالحلق ...
عطاها قريعة ديال الما صغيرة كانت عندو من مور ماحلها لها .. ماشداتهاش حيت كان بالها مع هضرتو ، بدات كاتهضر و تكحب و الكحبة كاتقطع لها فهضرتها ولي فهم من هضرتها غير ديك " اش هاد الزربة؟ "
أصيل : شدي شربي قبل ماتجيفي
شدات القرعة و بدات كاتشرب و حتى حسات بالكحبة بدات كاتمشي بشكل تدريجي عاد كملات هضرتها و هي كاتمسح فعينيها لي دمعو بالكحبة
حياة : اش هاد الزربة؟ كي درتي لها؟ وكيفاش هاد بغيتيني؟ [ خرجات لها كحبة خفيفة قاطعات لها كلامها ]
أصيل : ماعنديش مع كترة الدوران ونبقا ندخل ونخرج عليك فالهضرة [ حيد لها الزلافة من يديها وكمل ] فهمتي علاش كنت كانسولك على مول الموطور
حياة : اش غانقول لك؟ الصراحة انا ماكانفكرش فهادشي
أصيل : عارفك باغا تحققي ذاتك ، ماغانحبسكش
حياة : [ كحبات ] زربتي عليا واحد الزربة خايبة .. باقا اصلا ماعارفاش ايمتا فكرتي و ايمتا طاح فبالك هادشي و كيفاش حتى طاح فبالك .. صدمتيني
ماقدراتش تيق بالهضرة لي سمعاتها .. اشمن بغو؟ هدا بعدا عمرها توقعاتها منو والا توقعات تجمعها معاه حتى الصداقة عسااك عسااك يبغيها و تبغيه؟ الحماق بعينيه هدا ... تحركات من بلاصتها و قربات ليه و بالضبط لعنقو و لحدا الذقن ديالو بقات كاتشمشم واش ضاربها بشي سكرة لقاتو ماشارب والو
حياة : يا الكوكايين يا الحشيش يا القرقوبي وحدة من هاد 3 .. تكيفتي قبل ماتجي؟ حيت موحال واش هاد الهضرة قلتيها ونتا بعقلك ... واش ضربتي شي كاس قبل ماتجي؟
أصيل : [ جبد ݣارو من الباكية لي عندو ونطق ] ماكانشربش
حياة : ومالك على هاد الهضرة؟
أصيل : [ شعل الݣارو و نتر نترة و خرج الدخان على برا باش ماتتخنقش ] هاد الهضرة كنتي غاتسمعيها قبل ماتولي مرت الراجل [ عاود نتر نترة خرا ]
حياة : وعارفني مطلقة بعدا
ترسمات إبتسامة جانبية على شفايفو و نتر نترة ونطق
أصيل : عارف طليقك مادخلش عليك
حياة : و ها خبار خرا قريب دوز فشوف تيفي مدام نتا وصلاتك ... واش عرفتي الإختلاف لي بيني و بينك قداش؟ إختلافات هما قول ليا شحال فعمرك؟
أصيل : حتى نتي مابقيتيش صغيرة .. كبرتي ودرتي عقلك
حياة : ايلا كان عقلي ينفعني راك كبير عليا ب11 العام يعني عندك 36 عام ولا 37 وماتقولش ليا العمر غير رقم حيت العمر عقلية
أصيل : فعمرك 25 ولا 26 ماشي 17 ولا 18 .. مابقيتيش صغيرة
حياة : نتا مافاهمنيش ..مابقاتش فالعمر 17 ولا 18..
أصيل : ها نتي رجعتي على هضرتي
حياة : ماتشدش ليا الموضوع من زنطيطو راني عارفاك فاهم اش بغيت نقول
حس بيها كادخل و تخرج فالهضرة .. كاتقول هضرة وترجع تقول العكس ديالها ، ولكن هي فالحقيقة ماشي كانت كادخل وتخرج فالهضرة .. المشكل هو ماكانش فاهمهاش شنو بغات توصل ليه بالضبط و هي كايسحابلها داير راسو مافاهمش
أصيل : [ نتر نترة طويلة ولاح الكارو وعاود شاف فيها ] شرحي
حياة : هادشي مافيهش الشرح راه باين اش كاين .. مابغيتش وكاينين بزاف ديال الأسباب ماغايخليونيش نبغي ولا نقبل
أصيل : سميهم
حياة : أولا و باش نجيك للصراحة ماعنديش معاك و ماكاتعجبنيش [ شافت تعابيرو لقاتهم باقيين هما هما ] تاني حاجة عقليتك كاتجيني فشكل كاتجيني عقلية تقليدية وشخصيتك حتى هي ماكاتعجبنيش وتالت حاجة و ركز لي عليها ، ماعنديش الوقت للتفلية و نبقا داخلة خارجة معاك مرة نطلاقاو فريسطو مرة فكافي و مانقدرش نعطي الاهتمام المطلوب فشي علاقة حاليا وغانعاود نرجع للنقطة ديال ماعنديش معاك
طول فيها الشوفة و حسات بنظراتو كايختارقوها
حياة : مالك كاتشوف فيا بحال هاكا؟ شنو واش بغيتيني نكدب عليك ولا نصبغك؟
كان عارف مزيان علاش شادة هاد الموقف من جهتو حيت ببساطة كان فوقما كايطلاقاها و كايلقاها باقا بنفس الطيش ديالها كايعطيها درس
أصيل : غانعطيك شهر تفكري فيه
حياة : غاتتسنا شهر على والو والله حيت الهضرة اللخرة لي عندي قلتها [ هزات الزلافة وخرجات من الطوموبيل و طلات عليه ] تصبح على خير
دخلات للبناية لي ساكنة فيها وهي كاضحك ... من نيتو؟ واش طاح على راسو؟ كيفاش حتى فكر فحاجة بحال هادي؟ المشكلة هي مابيناتهم و لو قاسم مشترك واحد يعني غايخص ضروري واحد يضحي بشخصيتو باش يقدرو يتعايشو هادشي فحاالة ما قبلات ولكن هي اصلا ماغاتقبلش .. تفكرات فاش جبد ليها عادل صاافي راه باين البلان مروى غاتوصل الخبار طااير لزهور مدام اصيل لي براني و ساق الخبار و هناا غايعرفو بلي حياة ماتزوجاتش براجل كامل مكمول كيف كان كايسحابلهم
دخلات للبرطمة ديالها و باقي بالها مع هضرة أصيل ... كانت اكبر صدمة ليها ، واش واحد كان فوقما يشوفها يهينها و كاع المواقف لي جمعوهم كانو خايبين كيفاش غايفكر بهاد الطريقة؟ وكيفاش قال لها من قبل ماتتزوج بعادل كان غايقول لها هاد الهضرة؟ جاها هادشي فشكل و ماتيقاتوش اصلا حيت هادي بالضبط حاجة ماكايتقبلهاش العقل ديالها .. كون بوفس قال لها تتزوج بيه و غاتتيق ولكن اصيل؟ راه مايمكنش ...
دازت ديك الليلة على خير ولاغد ليه فاقت كالعادة كاتوجد راسها باش تمشي تخدم .. بدات خدمتها من مور ماسولها بوفس على فين وصلات هي و أصيل و واش باعت ليه الطابلو و كان جوابها لا حيت أصلا مابقاتش باغا تبيعو ليه .. و فهاد الوقت لي كانت خدامة فيه وصلها الورد ديال زنبق العنكبوت حتى لمقر العمل ديالها .. كان داك البوكيه أنيق و مقاد على حقو و طريقو ، فاش شافتو أول حاجة تفكراتها هي الأرض لي كان داوود زرعها كلها بالورد
[ الحوار بالفرنسية ]
بوفس : الناس ولا كايوصلهم الورد
حياة : ها نتا كاتشوف
بوفس : شكون سيفطو لك؟
حياة : [ شافت شكون مسيفطو لها ] حفيد داك الرسام
بوفس : تطورات علاقتكم وماقلتيهاليش
حياة : [ ضحكات ] ماتطور والو .. شحال كاتجيني هاد الطريقة بلدية و قديمة
بوفس : [ باغي يسل ليها لسانها التعبير على الحب هداك
حياة : التعبير على البعر هداك .. الورد داير بحال المصيدة [ عطاتو ليه ] شد شد
بوفس : [ شدو من عندها ونطق وهو كايشوف فيه ] ياك عاقلة على داكشي لي قلت لك النهار اللول
حياة : [ ضارت لعندو ] عاقلة غير كون هاني و ماكاين والو من داكشي لي فراسك
مشات تكمل خدمتها عرفاتو كايلمح لها للشرط لي كان شرط عليها النهار اللول .. ممنوع تجمعها شي علاقة مع شي حد من الناس لي كايجيو لهنا حيت كترة العلاقات الغرامية مع الاشخاص لي كايتعاملو معاهم غاتضيع لهم السمعة ديالهم وبالتالي غايضطر يجري عليها
صونات عليها خديجة وطمأناتها بلي الأمور كلها بيخير .. دابا بعدا عاد رتاحت من هاد الناحية ، مابقاتش مسوقة لعلاش صونا لها ، سيفطات ميساج لأصيل
[ غير كاتحفي دماغك معايا على والو والله ]
سيفطاتو و خبعات التيليفون وكملات خدمتها ... كانت كاتحاول تلقا شي حد غايحضر لداك المهرجان حيت هداك هو البطاقة الذهبية ديالها ، خاصها غييير تصريح الدخول .. غير تحط رجليها تما و الباقي كلو غاتتكلف بيه هي
دوزات داك النهار غير فخدمتها وصل الوقت لي خاصها تمشي فيه للدار و مشات
هاكا دازو عندها أيامها لمدة أسبوعين ... كل صباح كان كايوصلها بوكيه ديال الورد حتى لبلاصة خدمتها و فوقما كايوصلها كاتعطيه لبوفس وكاتسيفط ميساج لأصيل كاتقول ليه غير كايحفي دماغو ... غير كايضيع وقتو ... 2 وردات ماغايبدلوش الرأي ديالها والنهار ل15 فداك الصباح كانت كاتتسنا الورد يجي تاني ولكن ماجاش ، تسنات لوسط النهار و نفس الشيئ ماجاش
بوفس : [ حط يدو على جنبو و عوج رجليه ] فين وردي؟
حياة : ولفتيه ياك
بوفس : [ دوز يديه على شعرو وهز راسو للسما ]
حياة : تلقاه عيا مايسيفط حتى طلع ليه الدم ، احسن مادار
مشات كاتكمل خدمتها حتى صونا عليها التيليفون .. بقا كايصوني شحال عاد جاوبات ، سمعاتو كايهضر مع شي حد وعلى مابان ليها مشغول بالخدمة حيت الهضرة كانت ضايرة نيت غير على الخدمة
حياة : وي؟
دار إشارة بيديه لداك لي قدامو باش يكمل خدمتو ورجع كايهضر معاها
أصيل : هاد العشية غانجي لباريس
حياة : خدامة هاد العشية
أصيل : ماخداماش ماتكدبيش
حياة : يقدر يكون عندي حاجة خرا باغا نديرها مثلا
أصيل : عندي شي حاجة ديالك
حياة : اشمن حاجة؟
أصيل : دابا تعرفي
حياة : ماكانساليش الخدمة بكري راك عارف
أصيل : غانتسناك
حياة : المهم دابا نشوف معاياش غانسالي و غانرد عليك ، نخليك باقا تابعاني الخدمة
قطعات عليه و مشات تكمل خدمتها و غير سالات لقات التيليفون كايصوني عليها ، جاوبات وخرجات لقاتو واقف على برا بالطوموبيل ديالو .. كانو كاتشوف هادشي عادي في حين هو راه كان كايضرب الطريق نييت يا بالطيارة يا بالطوموبيل غير على ود هادشي يعني كان مخصص لها واحد الوقت مع انه وقتو عندو عامر و عندو شي ظروف لي ماكايخليوهش يقدر يطلاقاها ديما
سلمات عليه باليد وقتارح عليها باش تمشي معاه لواحد الريسطو والغريب لي ماموالفاتوش منو هو انه كان تعاملو مغاير تماما على لي والفات منو بحالا كان كايصحح ليها ديك النظرة لي عندها عليه
حياة : واخا مي خاصني ندوز للدار هو اللول
أصيل : طلعي نوصلك
طلعات معاه و هي مزال جايها هاد التغيير ديالو فشكل .. بحالا شي حد مسموم كايولي دغيا ضريف وا هاكا كانت كاتشوفو واخا دازت 2 سيمانات من مور الهضرة لي كان قال ليها
وصلها للدار و طلعات بدلات عليها و تأنتكات وهبطات لعندو و مشاو للريسطو لي حجز فيها ... كانت كاتجيه كاتصرف بزااف على الحوايج ديالها و المظهر .. ماكانش صعيب عليه باش يعرف بلي كاتضرب غير الدوريجين و ماشي المدرح حيت هادشي باين غير من نوعية ولكن الأهم من هادشي كامل هو كايلقاها ديما أنيقة ، ماكانش فراسو بلي هي فالأصل ماكاتخسرش الفلوس بزاف على حوايجها و المكياج وليزيكسوار و الصيكان و الصبابط واخا دوريجين حيت ببساطة كانت كاتشريهم من عند وحدين لي كايكونو شافرينهم من المصانع و كايطيحو عليها رخاص و داكشي باقي جدييد ، منها كاتهتم بمظهرها منها ماكاتخسرش الفلوس بزاف وماكانش سوقها واش مشفورين ولا لا حيت ببساطة كاتحط فيهم فلوسها يعني كاتخلص عاد كاتلبس ماشي كاتشدهم فابور ...
وصلو للريسطو وجر لها الكرسي باش تجلس ... جلسات و هي كاتتبسم ليه بقدر ماصدمها بهاد البلان بقدر ما عجبها
جلس قدامها ونطق
أصيل : مرتاحة؟!
حياة : وي مرتاحة .. عجبني هاد الريسطو
أصيل : مرتاحة فخدمتك؟!
حياة : وي مرتاحة علاش؟
أصيل : بغيت نعرف
حياة : اشمن حاجة عندك ديالي؟
أصيل : زربانة؟!
حياة : لا مي بغيت نعرف واش شي حاجة نسيتها فالريسطو ولا عندك فالطوموبيل؟ ولا طاحت ليا؟
جبد بواطة مخملية سوداء ... بقات كاتشوف فيها بإستغراب حيت هي ماعاقلاش بلي كانت عندها شي بواطة بهاد الشكل .. ناض من بلاصتو و وقف موراها ماخلاش ليها الفرصة باش تقبل ولا ترفض واش تتحط فعنقها ولا لا ... حل البواطة و جبد منها سلسلة كانت بنفس الشكل ديال السلسلة لي كانت السباب باش طلاقات معاه غير الفرق هو هاد السلسلة الوردة ديالها كانت حمرا يعني باللون لي كايعجبها عكس لاخرا لي كانت كحلة .. حسات بشي حاجة باردة تحطات على عنقها .. هزات صبعانها كاتشوف شنو حط لها فعنقها في حين هو رجع جلس فبلاصتو كايراقب ردة الفعل ديالها كان متوقع تعجبها
° بقات شحال كاتشوف فديك السلسلة و فالأخير حيداتها بقات كاتقلب على السدادة باش تحلها و هو مقابلها كايشوفها اش بغات تصنع حتى حيداتها و حطاتها ليه قدامو
حياة : مانقدرش نقبلها
أصيل : علاش ماترطبيش راسك معايا شوية؟!
حياة : راسي رطب مي مانقدرش نقبلها لا هي لا غيرها .. يمكن عجباتني فواحد الوقت مي مابقاتش عاجباني دابا ... الذوق كايتبدل و من الاحسن ماتزيدش تعدب راسك على والو حيت راه نيت انا مامعمراش راسي بهادشي ديال العلاقات الغرامية
حط ذقنو على يديه .. وبقا متبع معاها هضرتها ، ايلا كان هي كايسحابلها بلي بهاد الطريقة غير كاتبعدو فراها غالطة حيت اغلب الرجال كايميلو لهاديك لي نييت ماكاتقبلش بديك السهولة ، هاديك لي كايكون خاصهم ليها جهد .. هو فاللول كان عند بالو بلي يقدر يخليها تقبل بالورد ولكن هي ماشي عاطفية ... الفلوس؟ مابقاتش تابعاهم يعني مايقدرش يخليها تقبل بالفلوس ... بالكادوات؟ حتى هما موحال يقدرو يخليوها تقبل ، كان عارف بلي ضروري ماغايكون عندها الكود ديالها وهاد الكود طاح فيه تقريبا ، ماكانش ناوي يبعد هاد المرة حيت كان مصمم باش تولي ديالو وهو من داك النوع ايلا دار شي حاجة فراسو راه كايوصل لها
جبد من جيبو 2 تيكيات و حطهم لها فوق الطبلة .. هزات وحدة منهم وبدات كاتقرا ديالاش حتى لقات بلي هاديك كانت تصريح الدخول لمهرجان وارن بافت ، ماكانش صعيب عليه يعرف حيت داك المهرجان ماكانش كايخطا لسانها فهاد الفترة لي دازت
حياة : [ هزات حاجب ] بغيتي طمعني بيهم؟
أصيل : [ ببحتو المميزة ] باغيك تمشي معايا
حياة : [ بقات كاتشوف فداك التصريح شحال ] نفكر و نرد عليك
أصيل : خودي وقتك
كان عارف مزيان بل متأكد غاتقبل تسافر معاه ويمشيو لداك المهرجان وكيفاش لا وهداك فرصة ماكاتتعوضش بالنسبة ليها .. فهاد الاثناء كانت هي كاتفكر غير كيفاش حتى ضبر فهاد التصاريح وهي شهراين و زيادة و هي كاتقلب على شي حد يكون عندو غيير تصريح عساك 2؟ واحد ليها و واحد ليه .. كانت احسن حاجة غاتوقع لها هاد النهار هي هاد القضية
صونا عليها التيليفون وطلعات لها نمرة بوفس .. ماعرفاتوش علاش كايصوني عليها فهاد الوقت ، ستأذنات و ناضت باش تجاوب
حياة : وي بوفس؟
بوفس : فرحي عندي خبار غاتعجبك
حياة : اشمن خبار؟
بوفس : كاين الشاري للطابلو ديالك
حياة : واش أصيل؟
بوفس : لا .. هادي واحد السيدة و من زهرك لقيتيها مولوعة بهاد الفن
حياة : [ تبسمات ] وا هدا بعدا خبار زوين
بوفس : ولكن غاتشريه من عندك بالتمن لي درتيه فاللول 250 الف
حياة : عادي ماشي مشكل
بوفس : نقاد لك امورك معاها؟
حياة : ولا عطيني نمرتها ولا الايمايل ديالها نهضر معاها
بوفس : ها هو شوية و يوصلك
قطعات معاه و وصلها الإيمايل ديالها ونمرتها .. رجعات جلسات فالطبلة وعااجبها الحال حيت لقات شاري اخر من غير أصيل
حياة : خلينا نشوفو شنو ناكلو ... تحلات ليا الشهية هاد الليلة
أصيل : وصلك شي خبار؟!
حياة : وي لقيت شاري للطابلو ديالي .. فالحقيقة شارية ماشي شاري
أصيل : شحال غاتبيعيه؟!
حياة : 250 الف يورو و هاد السيدة لي غاتشريه عارفة بقيمة الفن الرقمي ...
أصيل : هادشي ماكافيش
حياة : علاش؟
أصيل : عارفة علاش كنت باغيه؟!
حياة : حيت عارف بلي هداك هو المستقبل
أصيل : لا
حياة : وعلاش؟
أصيل : ماكاندعمش الفن الرقمي ولكن كاندعمك ، زدتي فيه اللمسة ديالك
حياة : خاص الشخص يكون متجدد حيت كون جينا نبقاو بنفس العقلية القديمة وماكانقبلوش التجديد كنا غانبقاو فالعصر الحجري
أصيل : التجديد لي كايكون واقف على الصح
حياة : وحتى هدا واقف على الصح
أصيل : يقدر الانسان يستثمر فشي طابلو ويرجع عليه بالخسارة
حياة : حتى التجارة فيها الربح والخسارة
أصيل : ربحها مضمون
حياة : بنادم ايلا كان كايقلب غير على الحاجة المضمونة ولي غاترجع عليه غير بالربح الربح الربح ماغاتكونش المغامرة هنا و الحياة هي المغامرة
أصيل : التجارة فيها المغامرة
حياة : المغامرة كاتعني ديرها فيد الله يا ربحة يا دبحة .. ماترخيش وتنسا راسك وفنفس الوقت ماتبقاش منغلق على راسك و مادير حتى شي محاولة باش تجرب شي حاجة جديدة
أصيل : البيع والشرا فيه هادشي
حياة : ولكن البيع والشرا باقي كايبان لي شي حاجة لي تقليدية
أصيل : وهادشي لي كاديريه؟!
حياة : هادشي لي كانديرو فيه غير الابداع والبيع .. ماكانشريش
أصيل : كاتخلصي الضو؟!
حياة : بيان سيغ
أصيل : كاتخلصي الويفي؟!
حياة : وي كانخلصو
أصيل : هنا كاتشري الضو والويفي باش تبدعي وتبيعي ، فهمتي شنو هو البيع والشرا؟! البيع والشرا مافيهش غير الحوانت ، جالسة فبلاصتك وكاتبيعي وتشري
حياة : على الأقل كانتقبل التجديد
أصيل : ولكن ماعندكش مع التجارة التقليدية
حياة : حيت خاصنا نجددو مانبقاوش واحلين فالقديم
أصيل : القديم ماكانفرطوش فيه
حياة : وغانبقاو واحلين فيه؟ ايلا بقينا واحلين عمرنا نزيدو للقدام
أصيل : زيدي لقدام و ماتنسايهش
حياة : بنادم باش يزيد للقدام خاصو مايشوفش موراه
أصيل : الانسان باش يزيد للقدام خاصو ماينساش الركازي ديال داك الضومين لي غايدخل ليه ، ايلا بديتي بلا ماترجعي للركازي لي مبنية عليهم التجارة من وقت جدودنا ماغاطوليش فيها
حياة : نرجعو للركازي ولكن ضروري من التجديد
أصيل : و انا ماشي ضد التجديد
حياة : عاد قلتي ماعندكش مع الفن الرقمي
أصيل : كاين فرق بين التجديد وبين تلوحي راسك وفلوسك فبلاصة نتي ماعارفاش واش غاتربحي منها
حياة : غانعاودو نرجعو للمغامرة هي اساس الحياة
أصيل : المغامرة هي تشري الحوت فالبحر؟!
حياة : عادي تقدر تشري الحوت فالبحر حتى هادشي كايتعتابر مغامرة
أصيل : باغا دخلي للتجارة باش تربحي ولا تخسري؟!
حياة : باغا ندخل لها باش نطيح و نعاود نوض ولا غلطت نتعلم عادي اي واحد كايطيح فاللول
أصيل : وعلاش ماتتعلميش من الاغلاط لي طاحو فيهم لي قبل منك؟!
حياة : حيت يقدر يكونو دوك لي طاحو فدوك الاغلاط ماعرفوش كيفاش يحولو الاغلاط لأرباح
أصيل : الغلط ماكايجيش من موراه الربح
حياة : وي كايجي
أصيل : غانسولك وجاوبيني
حياة : وي سول
أصيل : غاتشدي ديك ل250 الف يورو وغاتبغي تستثمري بيها فطابلو بان لك التمن ديالو غادي طالع ولكن فاش غاتشريه غاتهبط قيمتو ل1000 يورو كيفاش غاتقلبي هاد الخسارة للربح؟!
شعل ݣارو و جلس كايتسناها تجاوبو
حياة : أول حاجة انا ماشي حمقة باش نستثمر ب250 الف يورو كلها ثاني حاجة حتى وكان ايلا ستثمرت بيها راه غير غانشوف التمن هبط بديك 20 الف غانبيعو باش ماتكونش عندي الخسارة كبيرة ماشي غانتسنا حتى يوصل ل1000 يورو
أصيل : ماعطيتينيش الحل
حياة : و اش بغيتيني نقول لك؟
أصيل : [ نتر نترة من الكارو لي فيديه ] هادي 2 دقايق ݣلتي الخسارة تقدري تقلبيها للربح ، عطيني كيفاش غاتقلبيها للربح
بقات ساكتة شحال ... كيفاش غادير لها؟ طبعا ايلا وصلات للتمن ديال 1000 يورو راه غاتكون خسارة كبيرة ... كيفاش غاتربح فداك الطابلو نيت لي خسرات فيه؟ ، حسات بيه زمتها فهاد اللحظة ولكن ماكانتش قادرة توريه بلي تزمتات ... كانو عندها حلول ولكن كلهم حلول غير أخلاقية حيت كانو كايعتامدو على النصب و إستغباء الشخص لي غايشري
حياة : نتا عارف ايلا هبط التمن من 250 الف ل1000 هادي كاتكون فضيحة
أصيل : ماشي فضيحة
حياة : وي كاتتسما فضيحة مدام قلتي الطابلو كان طالع يعني كانو اشخاص كايتهاتفو عليه ولكن الخلل وقع فاش تبدل البائع ديالو
أصيل : ناوية تنتاحلي شخصية البياع اللول؟!
حياة : لا ولكن كانوضح لك فين كاين الخلل
أصيل : والحل؟!
حياة : نستغل ديك الفضيحة لي وقعات على الطابلو يعني الفضيحة نقدر نقلبها للشهرة و بهاد الطريقة غانسلط الاضواء على داك الطابلو لي هبط ديك الهبطة كاملة
أصيل : مايمكنش
حياة : علاش مايمكنش؟
أصيل : كاينين طابلوات غاليين عليه وكايتباعو بملايين الدولارات ، ايلا كان شي حد غايضيع وقتو باش يقابل شي فضيحة غايقابل فضيحة طابلو مشهور و غالي ماشي طابلو ديال 250 الف يورو ، من غير هادشي ماكاينش لي غايزعم يشري طابلو فوقت قصير هبط تمنو ب249 الف
حياة : كاينين لي عارفين بلي من مور كل هبطة كاينة طلعة صاروخية
أصيل : علاش هادشي ماوقعش مع الطابلوات لي هبطو و تنساو مع الوقت؟!
حياة : وشكون قال لك تنساو؟ الفن قيمتو كاينة حتى فالقدومية يعني ايلا دازت مدة طويلة يقدر داك الشخص يستغل هاد الثغرة
أصيل : غاتتسناي 50 عام باش عاد تربحي منو؟! ...
حياة : لا ماشي ضروري نتسنا ... ماتنساش بلي القيمة ديال الحاجة والشهرة حنا لي كانديروهم لديك الحاجة
أصيل : كي غاديري لها؟!
حياة : قلت لك قبيلا .. الفضيحة كادير الشهرة ، نقدر مثلا نشوف شي طابلو يكون جديد على الطابلو لي جات منو الخسارة وفنفس الوقت يكون مشهور عليه و نشوف نقاط التشابه بينو و بين الطابلو ديالي ونرفع دعوة على داك الشخص بتهمة عدم احترام حقوق الملكية وغايكون الدليل هو التاريخ ديال كل طابلو حيت ببساطة غانقول لهم بلي خدا الافكار من الطابلو ديالي و هادشي لي خلاه يطلع على الطابلو ديالي [ تبسمات ] بهاد الطريقة غانستفاد من 2 حوايج التعويض لي غايعطيني مول داك الطابلو و زيد عليها الفضيحة لي غايستفاد منها الطابلو ديالي على اساس هو الطابلو الاصلي
أصيل : غاتسرقي شهرة طابلو فنان وحداخر؟!
حياة : نتا سولتيني على كيفاش نحول الخسارة للربح ماشي قلتي لي بغيتي طريقة يكونو الاخلاق حاضرين فيها و على اي حال انا غير عطيتك مثال حيت اصلا انا ماكانشريش طابلوات و انا قادرة نديرهم .. عرفتي راني عطشت بكترة الهضرة والله
مازادتش هضرات و حتى هو خلاها تاكل ... واخا قالت ليه بلي هي ماكاتشريش ولكن لي كايشوف فيها ، ايلا طاحت فشي مشكلة ماغاتترددش باش تخدم بطريقة خبيثة يعني تزطم على وحداخر و وحداخر و وحداخر باش تطلع راسها وفعلا راه هادشي لي كاين ، هي كاتشوف بلي القاضي و شي مرات ماكايحكمش بالعدل علاش هي مثلا غاتلعب بعدل وفالمقابل تخرج بالخسارة؟
واخا شاف فيها هادشي ولكن لي شاف ورد ليه البال .. هي اصلا ماعندهاش مشكل باش تغطي شخصيتها يعني عراتها ليه و وراتو بلي هي ماشي من داك النوع لي كايقبل يكون ضحية والحاجة لي ماكانش متوقعها منها هي انها باعت الطابلو لوحدة خرا ب250 الف وتخلات على 250 الف كاملة كون قبلات تبيع ليه الطابلو ، بمعنى كان واحد التغيير ملحوظ نييت
اما حياة كانت بدات كاتكتاشف شخصيتو .. واخا كاين بيناتهم واحد الاختلاف كبيير ولكن فالنقاش ديالها معاه حسات بيه راسو عامر و ماشي من داك النوع لي كاينساحب من النقاش يعني ممكن كون ماشحفاتش و بغات تشرب و تاكل كان غايعطيها حاجة خرا تعصر معاها دماغها باش تجبد حل ، عزيز عليها تتناقش مع بحال هاد النوع حيت كاتستفاد منهم من شحال من بلان و كاتحس بالنقاش ديالها معاهم عاامر
حياة : [ مسحات فمها ونطقات ] قابلة نمشي لداك المهرجان
أصيل : والكادو غاترديه فوجهي؟!
حياة : مزال كون كان شي كادو لي خاص نقدر نفكر .. ولكن ديجا شفت بحال هاد السلسلة عند صوفيا واش كاتتسنا مني نقبل بالنسخة ديال شي حاجة؟ [ هزات التصريح و ناضت ] نقدرو نمشيو؟
ناض بغا يخلص و جبدات حتى هي الكارط بونكيغ ديالها .. فهاد الاثناء هو جبد الفلوس لي كانت حطاتهم ليه فوق الطبلة فاش مشات و هي معصبة و رجعهم لها
أصيل : ماكاتخلصش عليا المرا ، رجعي الكارط ديالك لبلاصتها
حياة : و انا ماكايخلصش عليا الراجل ، غانخلص على راسي
أصيل : فاش تخرجي راسك وخلصي لراسك
حياة : فاش تخرج مع مرا خرا و خلص عليها
أصيل : ماتقصحيش راسك
حياة : ماكانقصحش راسي مي علاش غاتخلص على شي حاجة دازت فمعدتي؟
أصيل : انا لي عارضك
حيد لها الكارط من يديها ورجعها لها لصاكها ومشا كايخلص ... مشات كاتتسناه حدا الطوموبيل حتى خرج وحل الطوموبيل و شدو الطريق لدارها ، وصلها وهبطات من مور ما سلمات عليه و غير سدات الباب ديال الطوموبيل وهو يعيط لها
أصيل : كاديري لي فراسك؟!
حياة : مدام قادرة نخلص على راسي علاش غاتخلص عليا؟ تصبح على خير
طلعات للدار وخلاتو كايشوف فالفلوس لي خلاتهم فبلاصتها قبل ماتنوض ... كانت رجعات ليه الفلوس لي رجعهم لها و زادتو عليهم حتى الفلوس ديال هاد النهار .. تحرك من تما و مشا قاصد المطار حيت اصلا جا للهنا غير على ودها
° بدلات حوايجها و جبدات البيسي ديالها ، ماكانش عاجبها الحال بزاف حيت كاتشوف راسها من فاش بدات هاد تداول العملات و هي غير غادا فالخسران ..يا كاتشري شي عملة لي ماغاترجعش عليها بشي ربح كبير يا العملة كاتكون غادا طالعة و غير كاتشريها كاتهبط بحالا تقول مجونبة و هادشي وقع لها بزاف ديال المرات .. ماعرفاتش مال زهرها تكوز هنا
سدات البيسي و مشات نعسات ولاغدليه غير فاقت اول حاجة دارتها هي هضرات مع ديك السيدة لي باغا تشري من عندها الطابلو وهضرات مع بوفس بلي غاتتعطل شوية على الخدمة حيت غاتمشي ترصي امورها مع ديك السيدة و داكشي لي كان ... طلاقاتها و قادات امورها معاها وموراها شدات شيك فيه 250 الف يورو مشات ديريكت صرفاتو ودوك الفلوس دوزاتهم لكونطها و ها هي و اخييرا باعت اول طابلو ديالها .. الفرحة كانت شاداها من الصبع الصغير ديال رجليها .. صونات على مدام تورية بشراتها بالخبار وموراها مشات لخدمتها وعاودات لبوفس على كيفاش داز اللقاء و عطاتو حتى هو العمولة ديالو من داكشي لي شدات ...
بوفس : دابا نقدر نقولك غاتتبدل بلاصة الطابلو الجديد ديالك
حياة : لا غير خلي البلاصة اللولة نيت لي تحط فيها الطابلو اللول .. هكاك حسن حيت لي غايبغي يشوف الطابلو لي من مور هداك غايمشي لديك البلاصة نيت
بوفس : ديك البلاصة ماغاتعاونكش بزاف
حياة : هاانيا غير خليها
بوفس : نتي تعرفي مصلاحتك ، فكرتيني كاينة حفلة هاد الليلة تمشي تفوجي؟
حياة : شكون غايحضر فيها؟
بوفس : شي اصدقاء كانعرفهم
حياة : اش غانقول لك ا بوفس خليها حتى لمرة خرا
بوفس : ماغاتبقاش الحفلة للصباح
حياة : راه عندي مايدار داكشي علاش
بوفس : لي عجبك .. راكي كاتفلتي عليك المتعة
مشا وخلاها خدامة ... بقات كالعادة نهار كامل فخدمتها وفاش سالات رجعات للدار ، بداو الايام كايدوزو نهار من ورا نهار و الورد ولا كايوصلها لدارها فبلاصة المقر ديال خدمتها و كان أصيل فهاد الايام كل نهار كايهضر معاها فواحد الوقت محدد ، كمل الشهر و باقا الحالة هي الحالة تعجبات حيت ماعاودش جبد لها الموضوع .. داز شهر من مور داك الشهر وفداك الشهر كانو كايطلاقاو مرة فالسيمانة حتى ل2 مرات وفكل مرة كانت كاتزيد تعرف شخصيتو كتر و الطبع ديالو كتر ، لقاتو واحد الشخص لي كايقدر المرأة .. كايحتارمها و الأهم من هادشي كانت عندو شخصية عكس الشخصية لي كانت هي كاتشوفها ولكن لي مافهماتش ، علاش ماعاودش جبد لها سيرة تكون بيناتهم شي حاجة و واخا هكاك باقي كايسافر من بلاد لبلاد باش يجي يشوفها؟ و واخا هكاك باقي الورد كايوصلها و باقي كايسول فيها كل نهار؟
قرب الوقت ديال المهرجان وعلمات بوفس بلي غاتسافر على ود المهرجان .. بدات كاتوجد أمورها وكاتتسنا غير ايمتا تسافر لإيطاليا ، كانت هاد الفرصة من بين الفرص القلااال لي كايجيو حيت فالأصل هاد المهرجان السنوي لي كاينظمو وارن موالف ينظمو فأمريكا - نيويورك ولكن هاد المرة كان الاختيار على إيطاليا وهادشي لي خلاها هاد العام تحط عليه العين حيت تقدر تمشي لإيطاليا بسهولة
ماكانتش عارفة شحال غاتبقا فإيطاليا ولكن لي عارفة هو ماغاتجي من تما حتى تكون ستافدات من شي حاجة ، دارت فبالها باش تسافر بقبل من أسبوع باش يكون عندها الوقت نيت باش تعرف الاجواء تما و تشوف واش كاين مايدار .. ايلا لقات القضية تما مسلكاها كتر من فرنسا ممكن تنتاقل لتما ولا ماعجباتهاش غاتبقا ففرنسا حتى تلقا شي بلاصة فأوروبا تقدر تبقا فيها وتبدا فالخطوة الموالية للهدف التالي
شدات الطريق لإيطاليا - ميلانو وغير وصلات مشات شدات أوطيل حطات فيه الفاليزات ديالها وبدلات حالتها وخرجات كادور كاتستكشف المدينة و كاتتصور .. صونات على البنات بأبيل فيديو كاتوريهم فين كاينة
اية : ياودي نتيي لي عطاتك ليام ا بنت العبد
شيماء : الناس ديال السفر كل مرة فبلاد .. ا شفناك نسيتينا ماناوياش تضبري لينا فشي ݣاوري يهزنا من هنا
أية : بنت الحرام مشيتي لبلاصة التيتيز [ شافت فشيماء ] عرفتي كي دايرين الرجال ديال تما واك واااك
حياة : صبرو نوريكم واحد الرباعة واقفين قدامي
قلبات الكاميرا ديال التيليفون باش يشوفو وشدات اية فقلبها
أية : احح على قلبي التييتييز واللحية
خديجة : واش وقع لك شي مشكل ففرنسا؟
حياة : لا اش عندي مايوقع لي تما
خديجة : وعلاش خليتيها؟
حياة : كاين واحد الفيستيڤال هنا وماقدرتش نفلتو حيت كايكون مرة فالعام ومولاه كايديرو فنيويورك .. قليل فين كايديرو فشي بلاد خرا
أية : زهااي ليا مع راسك يا ختي ا ماكاين غير نيويورك ميلانو باريس .. حنا هنا ضايرين بينا غير المزالييط نضورو تا نعياو حدنا افران ولا مكناس
حياة : [ كاتشوف قدامها ] فبالي واحد البلان غانقدر نطلعكم بيه ب3 ولكن صبرو عليا غير نقاد شي أمور و نحط رحيلي فشي بلاد و ديك الساعة نجيبكم لعندي
شيماء : ومال فرنسا؟
حياة : بنادم فيها فشكل ماعجبنيش الجو فيها
أية : ياودي طلعينا ليها حنا غاتعجبنا و غانعرفو لها واش نعمة ربي كاضيع فيها وتقولي لينا مارتاحيتيش فيها ا بنت العبد
حياة : توحشتكم والله
خديجة : كون تشوفي حنا .. بلاصتك بقات كبيرة
شيماء : توحشت نخرجو مجموعين
أية : واييه .. كنا مزهيينها
حياة : خاص غير طلعو و غانعاودو نرجعو لدوك ليام
أية : ايام التنمر يا المتنمرة
خديجة : لا لا مابقاتش كاتتنمر
حياة : [ ضحكات ] غير حيت مابقاش عندي الوقت مي كايبقا الاصل هو الاصل
أية : هااا ما قالت الشوافة عمر الشيخة ما تنسا هزة الكتف
شيماء : واش صافي من فاش طلقتي من راجلك ماعاودتي طحتي فتا شي واحد؟
حياة : داكشي خاصو الاهتماام و تعطي لبنادم وقتو وليزابيل ولا طلاقيت بشي واحد مساالي قبو غايبقا يبرزط ليا راسي نهار كامل بليزابيل فينك؟ معامن؟ اش كاديري؟ باغي نشوفك ... تصوري و عاد ابيل فيديو و البعر الكحل مالي على حالي؟
خديجة : ولكن ماشي كلشي هكاك ، هادو غير دوك المشومرين البطاليين الحازقين هما لي كاتلقايهم مساليين لهادشي
حياة : من واحد الناحية عندك الحق ..
بقات كاتهضر معاهم شحال وغير سالات معاهم بدات كاتتصور ، وتصور فيديوهات ليها .. مشات لواحد الكافي وجلسات كاتختار فالتصاور لي تحط فالانسطا و شمن فيديو تحط .. ختارت لي بغات وصونا عليها أصيل كان هداك هو الوقت لي كايصوني عليها فيه
أصيل : وصلتي؟!
حياة : وي وصلت قبيلا
أصيل : بقاي فبلاصتك شوية ونكون عندك
حياة : راك قريب من هنا؟
أصيل : شوية
حياة : شحال تقريبا خاصك باش توصل؟
أصيل : [ مركز مع الطريق ] ربع ساعة ونكون معاك
حياة : ايوا صافي المهم هانا غانقطع حتى توصل
قطعات معاه الابيل و بقات كادور عينيها على لي غادي ولي جاي .. عجباتها هاد البلاصة ولكن واش غاتلقا فيها راحتها؟ هدا هو الاهم عندها .. بقات جالسة وكاتقلب فتيليفونها على اخر اخبار المهرجان لي غايكون حتى دازت ربع ساعة و صونا عليها اصيل كايسولها فين كاينة .. نعتات ليه فين كاين وجا لعندها ، ناضت خلصات الكابوتشينو لي شرباتو وتحركو من تما لجهة الطوموبيل ديالو .. ماجابتش معاها طوموبيلتها حيت ماكانتش ديال السفر و المسافات الطويلة غير ديال سير و اجي و صافي
أصيل : [ حاضي مع الطريق ] حاطة حوايجك فلوطيل
حياة : وي ... جالسة فلوطيل عاد خاصني نقلب على شي اپاغطومو نكريها
أصيل : ماتحتاجيش ، شمن لوطيل جالسة فيه؟!
حياة : أوطيل ديل سود
وصل للوطيل لي عطاتو سميتو وبلاصا الطوموبيل
أصيل : طلعي جيبي حوايجك
حياة : وعلاش بالسالاما؟
أصيل : هدا لوطيل يجلسو فيه الناس؟!
حياة : ماغانعيش فيه راه قلت لك غانبقا فيه نهار ولا يومين على مانلقا شي اپاغطومو
أصيل : طلعي جيبي حوايجك غانديك لبلاصة خرا
حياة : دارك مثلا؟
أصيل : غانديك لبلاصة تليق لك
حياة : [ حلات الباب ديال الطوموبيل وخرجات ] شوف غانقولها لك من دابا .. ايلا شفتك غاتديني لدارك ماغانتفاهمش انا وياك ولا لقيتك ناوي تحطني قدام دار مروى ماغانتفاهمش انا وياك
مشات باش تجيب حوايجها وخلاتو كايتسناها فالطوموبيل غبرات شي 10 دقايق و هبطات بالفاليزات ديالها .. مشا عاونها و حطهم اللور
ركبو وشدو الطريق ماحبس حتى لقدام واحد لوطيل .. كان كايبان فخم من برا اما من لداخل مانعرفت كيفاش غايكون
حياة : شوف غير رجعني منين جبتيني .. كون بغيت نجلس فشي لوطيل بحال هدا كون مشيت ليه من اللول ، ماكانطبعهمش باش نحطهم فلوطيل بحال هدا
هبط من الطوموبيل وجبد الفاليزات ديالها من الكوفر ، غايبقا كايتناقش معاها وقد ما تناقش معاها غاتزيد تقصح راسها .. تبعاتو و هزات التيليفون كاتقلب فكوكل على التمن ديال الليلة هنا ، غير كتبات سمية لوطيل و هي تبان لها واحد ل1451 يورو مجبدة تما يعني قريب لمليون ونص مغربية الليلة لوحدة ، واش هي كارية فلوطيل ب43 يورو يعني تقرييا 430 درهم وعاد باغا تقلب على برطمة باش ماتخسرش فلوسها فلوطيلات وهو جايبها لهدا؟ .. بدات كاتزرب بخطاوي وماجات فين تلحق عليه حتى كان دخل لداخل بان ليها المسؤول على لوطيل جا لعندو وبدا كايهضر معاه بالايطالية .. ماكانش صعيب عليها تفهم شنو كايقولو بحكم كاين تشابه بين الايطالية و الإسبانية ولي قدرات تفهم من الهضرة .. كان أصيل كايوصيه عليها وعلى الشومبر لي يعطيها و الأهم ، كان هاد لوطيل ديالو
سالا الهضرة معاه و جا واحد الشخص شد من عندو الفاليزات وعاد تلفت ليها
أصيل : [ شاف فالمكانة لي فيديه ونطق ] غانمشي نقضي واحد الغرض ونرجع
حياة : مي حنا ماتفاهمناش على هادشي ماشي غير حيت لوطيل ديالك غانجلس فابور
أصيل : ضيافي ماكايخلصوش ونتي ضيفتي [ صونا عليه التيليفون وبقا كايشوف فالمتصل .. عاود شاف فحياة وكمل هضرتو ] فاش تحتاجي شي حاجة هبطي لعندو ولا عيطي لي ندوي معاهم ، ردي البال لراسك
دوز يديه على دراعها ومشا من تما و جاوب فالتيليفون .. اما هي فهاد الاثناء بقات كادور فلوطيل و كاتستكشفو ، النزلاء لي كانو فيه من حوايجهم كان باينين صحاب الفلوس و جيابهم متقليين وعلاش واش المزلوط يقدر يخلص قرابة مليون و نص الليلة فأوطيل 5 نجوم؟ .. من واحد الناحية عجبها الحال و عجبها كيفاش كان كايتعامل معاها المسؤول على لوطيل فاش عرفها ضيفة خاصة .. الفلوس شحال زينين ولي كايقول عليهم وسخ الدنيا غير كايكدب على راسو بهاد الهضرة ... وراوها الشومبر ديالها لي كانت كبر من الشومبر لي كانت فلوطيل لي كانت فيه وهادشي بلا مانهضر على الدوش و الأثاث ديالها و الإطلالة ، و النقااا .. عكس ديك لي كانت فيها فلوطيل لاخر كانت شوية محشرة وا معذرو يقول لها واش داك لوطيل يجلسو فيه الناس .. ها لي كايقولو عليه الناس لوطيل ، تلاحت على الناموسية حسات براسها بحالا ناعسة فوق السحاب .. خرجات من تما كادور و تشوف شنو كاين فهاد لوطيل ، لقات فيه جمييع وسائل الترفيه لي تبغيها ولا تتشهاها .. معذرو داير هاد التمن كامل و معذروو واخد 5 نجوم ...
هزات البيسي ديالها و مشات جلسات فالبالكون .. دخلات لسيت Crypto ، واخا لحد الساعة خسرات كتر من داكشي لي ربحاتو فتداول العملات ولكن ماكانتش باغا تحبس .. غير كايطلع لها الدم كاتسد البيسي و كاتمشي تبدل ساعة بخرا وكالعادة جتى دابا كانت مزاال خاسرة و هادشي كاتشوفو كاتزيد تمرض
مشات كاتقلب فأخر الأخبار .. هادي شهراين تقريبا كانت سمعات شي خبار على شي واحد مغربي التحليل ديالو للعملات كان كايكون ديما صحيح 100٪ هو الصراحة ماشي هادشي لي سمعات بالضبط حيت لي سمعات كان كايهضر على ثروتو لي كتاسبها من تداول العملات وقدر يقتاحم عالم الأغنياء بديك الثغرة نيت ، ماكانتش جاتها شي حاجة غريبة حيت هي عارفة مزيان بلي بنادم فمدة عام قادر يولي ملياردير بسباب تداول العملات و يقدر يدير داكشي لي ماداروش واحد سنانو طاحو و شعرو شاب و هو كايطلع و يعلي فالمشاريع ... و كاينين اشخاص لي ضاعفو ثرواتهم لأضعاف بسباب تداول العملات بحال مثلا "بـنـكـمـان فـرايـد" لي ضاعف ثروتو و وصلها من 8.7 مليار دولار ل26.5 مليار دولار فظرف عام و هادشي كامل و هو عندو يلااه 29 عام يعني شخص لي قادر يعيش الرفاهية و هو باقي صغير و من فوق هادشي عندو مؤسسة بورصة على قدها و من غير هدا كاين "بــريــان أرمــســتــرونــج" لي حتى هو باقي صغير و مع ذلك قدر يبني ثروة فظرف عام طور ثروتو من مليار دولار ل6.5 مليار دولار و من الفوق مأسس شركة مسميها كوين بيس و بلا ماندوزو للتوأم "ويــنــكـلـيـفــوس" و "مــايــكــل ســايــلــور" ... "فــريــد إهــرســام"
هادو كلهم بناو ثروات فأقل من 10 سنوات كاين لي بنا ثروة فظرف 10 أشهر و كاين لي بناها فظرف عام و كاين لي بناها ف3 سنوات و كاين لي بناها ف6 سنوات وبلا هادوك لي مزال مامعروفينش حيت كايلعبو غير فالخفاء و دابا منين شافت هاد المغربي لي حتى هو قدر يبني ثروة فظرف 3 سنين شداتها الفقصة على راسها .. ها هو مغربي بحالو بحالها بنا راسو ف3 سنين لا و من الفوق التحليل ديالو للعملات ديما كايجيبو صحيح ، مال التحليل ديالها؟؟ واش هو عندو العقل و هي ماعندهاش؟؟ كي دار لها لا هو لا هادو؟ وي هي كانت عارفة تداول العملات فيه المغامرة بزااف ولكن كانت باغا تربح منو دغيا و هادشي بالضبط لي كايخليها تخسر و ماتحللش بطريقة صحيحة حيت كانت من النوع لي كايقول صافي فظرف 3 اشهر نقدر ندير ثروة بتداول العملات و هاد الفكرة واخا هي كاتشوفها عادية الا و ان هاد الفكرة كانت من بين الاسباب لي كايخليو تحليلها يكون غالط .. ماكافيش .. ماصحيحش
بدلات حوايجها و هبطات جلسات لتحت فالريسطو ديال لوطيل تعشات و رجعات للبيت باش تنعس
داز عندها داك الأسبوع عادي ، شافت أصيل شي 3 ديال المرات بسباب الخدمة و الأشغال ديالو و من غير هادشي كانت غير كاتستكشف المدينة و مقابلة خدمتها و تصاور و لي زابيل مع صحاباتها
وصل النهار ديال المهرجان .. كانت متحمسة بزاف ، حاولات تقلب فالخلفيات ديال كاع لي غايحضرو باش فاش تجي تبغي تهضر مع شي واحد تعرف كيفاش تهضر معاه .. دابا بقات ليها حاجة وحدة ، خاص غير توصلها لاغوب لي شرات و نورمالمو كان خاصها تكون وصلات ولكن شافتها تعطلات
مادازش بزاف ديال الوقت حتى سمعات الدقان فالباب .. لقات قدامها واحد المرا من حوايجها كان باين بلي خدامة هنا ... شافت شنو هازة فيديها و توقعات تكون جابت ليها سخرتها داكشي علاش خلاتها تدخل و تحط ليها الكريطينات و داكشي لي فيديها
غير خرجات سدات الباب و بدات كاتقلب ... حلات السلسلة باش تشوف لاغوب ديالها ولكن ستغربات منين مالقاتهاش هي ، هي عاقلة بلي لاغوب لي ختارت كانت فلكحل مي هادي لونها حمر و ماكاتشبهش للاخرا فحتى حاجة
هزات تيليفونها باغا تصوني و تشوف ياكما غالطين ولكن سبقها أصيل لي صونا عليها ...
أصيل : واجدة؟!
حياة : [ تأفأفات و شافت فديك لاغوب ] مزال
أصيل : شنو معطلك؟!
حياة : والو غير وصيت على شي حاجة و سيفطو لي حاجة خرا
أصيل : ماعجباتكش؟!
حياة : زوينة عجباتني مي.. ... [ قرنات حجبانها ] بلاتي واش جات من عندك؟
أصيل : باغي نشوفها عليك
حياة : يعني جات من عندك ياك؟
أصيل : غانتسناك تلبسيها هاد نهار
حياة : [ تبسمات ] واخا
قطعات معاه الإتصال ومشات كاتوجد راسها للمهرجان في حين هو كان كان واجد و كان نيت فلوطيل
عارفها كاتموت على الحمر و عارفو كايواتيها ... داكشي علاش ماخلاهاش هي لي تختار شنو تلبس هاد النهار ، إنطلاقا من اللبس لي ولات كاتلبس كان عارفها غاتختار شي غوب فشكل بمعنى تقدر تكون مزيرة بزاف و تقدر تكون معرية داكشي علاش لاغوب لي ختار لها كانت شوية مستورة و فنفس الوقت غالبة عليها الفخامة
هو فالأصل و فالحقيقة ماكانش باغيها تمشي للمهرجان حيت ببساطة مخلط وهو من النوع ايلا بغا شي وحدة ماكايخليهاش تجلس حتى مع صحابو عساك رجال كاتجمعو بيهم علاقات سطحية؟ طبعا هادشي كان كايشمل حتى الحفلات لي ماكايبغيهاش تحضر لهم ولكن هنا ماكانش عندو شي اختيار حيت ببساطة حياة مزال ماقبلات ، و هو عارفها دايرا كي الصابونة الفازݣة .. فاش كاتبغي تزير عليها بيديك كاتزلق داكشي علاش كان خاصو يخليها حتى تنشف بمعنى حتى تقبل
بقا كايتسناها لتحت و فنفس الوقت كان مقابل خدمة خرا .. دازت تقريبا ساعة و هي مزال ماهبطات ، شاف فالمكانة و يلاه بغا يشوفها فين وصلات و هي تبان ليه هبطات و كاتقلب عليه ، طلعها بندراتو من اخمص رجليها لقمة رأسها .. شافتو و تبسمات ليه ، قربات عندو بخطوات و الطالون ديالها كاينخر الارض .. كانت مكحلااها بحال الغراب و لاغوب لي بغاها تلبسها هي لي حلفات لالبساتها لا و من فوق هادشي عطاتها لوحدة من لي خدامات هنا
ضربات ليه توقعاتو عرض الحائط ل2 أسباب السبب الأول هو مالبسات حتى حاجة من داكشي لي عطاها واخاا اللون لي كاتبغي و السبب التاني .. لقاها اصلا مالابساش شي غوب معرية .. كالعادة الحوايج المناسبين للأماكن المناسبة .. كان باين نوع المهرجان لي غاتمشي ليه و باش ياخدوها بجدية كان خاصها تعرف تختار المظهر لي تبان بيه بمعنى كانت عارفة بلي العرا ماشي ديال هاد البلايص و أبار هادشي ، هي ماكانتش من داك النوع لي كايشوف حرية المرأة كاينة فالعرا
حياة : [ مدات ليه يديها و تبسمات ] مشينا؟
شد يديها و مشاو لجهة الطوموبيل ديالو .. حل ليها الباب ركبات و مشا هو للجهة لاخرا ركب و شدو الطريق للبلاصة لي غايكون فيها المهرجان
أصيل : [ مركز مع الطريق ] ماعجباتكش؟!
حياة : [ عينيها على الطريق ] لا ، عطيتها للسيدة لي غاتعجبها نيت
أصيل : [ قطب حجبانو ] عطيتيها؟!
حياة : وي عطيتها ... الانسان فاش كايبغي يعطي كادو كايقول لمولاه واش تقدر تلبسها على ودي .. واش ممكن نشوفك بيها ماشي كايبغي يفرض عليه و يقول ليه بغييتك دير هاد الحاجة
أصيل : على هادشي عطيتيها؟!
حياة : وي
أصيل : الكادو ماكانلوحوهش
حياة : مدام ولا ديالي نقدر ندير بيه لي بغيت و زايدون مالحتوش ، عطيتو
أصيل : لمن عطيتيه؟!
حياة : ياك عطيتيه لي علاش باقي كاتسول عليه؟
زفر ودوز يديه على الذقن ديالو .. مازادش هضر معاها ، الحاجة لي فهمها هي المشكل ماشي فالإختلاف لي بيناتهم المشكل هو حياة ماكانتش مخلية منين يدوز الما .. كان خاصها تتنازل واحد الشوية ضروري حيت لحد الساعة كايحسها حاطة واحد الحاجز بينها و بينو و داك الحاجز هو لي خاصو يتهرس
وصلو للوجهة ديالهم وبلاصا الطوموبيل ، هبط وعطاها دراعو باش تشد فيه و داكشي لي دارت .. زادو واحد الشوية حتى وقفو عند واحد الشخص كايتحقق من التصاريح عاد دخلو للداخل ، كانو كايبانو كوبل مثالي لا من ناحية الطول والا من ناحية المظهر ديالهم ، كانت هي فهاد الاثناء غير كاتدور عينيها على الحضور .. كاينين لي عرفاتهم غير من كوكل طبعا و كاين لي أول مرة تشوفهم ، معذرو يكون هادشي بالتصريح حيت كاع لي كانو حاضرين تقريبا كانو من اصحاب الوزن الثقيل و شي وحدين منهم شافتهم كاينين ماتوقعاتش نهائيا بلي غايجي شي نهار تقدر طلاقا معاهم وجها لوجه
طاحت عينيها على واحد الشخص و ترسمات على شفايفها ابتسامة واضحة .. كانت فرحانة و مامتيقاش بلي حتى هو كاين هنا اصلاا عمرها توقعات بلي يقدر يجي شي نهار و تتجمع هي وياه فبلاصة وحدة
حياة : [ بعدم تصديق ] واش هداك ايلون ماسك؟ ...
كان هو نيت و ماكانش غير بوحدو فداك الفيستيفال .. كان طبعا مول هاد المهرجان لي هو وارن بافت و كانو اشخاص خرين بحال جاك ما ... كارلوس سليم ... بيل غيتس ... أمانسيو أورتيجا .. جيف بيزوس و طبعا كانو حتى العيالات بحال دوريس فيشر ... جيل ميلر ... ليندا ريسنك و زييد و زيد المهم مهرجان كاتشم فيه ريحة الثراء من بعييد دابا السؤال لي عندها هو شحال غاتكون كاتتقدر ثروة أصيل مدام قدر ياخد تصريح بحال هدا؟ .. ردات البال لواحد الحاجة و هي انه ماكانتش الصحافة هنا ، يعني دابا اصلا تصاورها معاهم ماغايخرجوش من هنا؟ هادشي كايعني خاصها تبذل مجهود كتر
طلقات منو و بقات غادا حداه و فكل مرة كايبغي يسلم على شي واحد .. حتى هي كاتسلم عليه و كاتتسنط لهضرتهم و فاش كاتلقا منين تدخل لوسط النقاش كاتدخل وكاتقلبو لشي حوايج لي هي عندهم معاها و لي قدرات تعرف من خلال هادشي لي سمعات فاش كانت حدا أصيل هو انه ماكانش عندو غير داك لوطيل و المركب لي ففاس و انما كان عندو سلسلة ديال الفنادق لي كانو كلهم 5 نجوم و واحد من بيناتهم كان فدبي 7 نجوم و من غير هادشي كان عندو سلسلة مطاعم و سلسلة مقاهي اما داك المركب كان غير على ود فاش كايمشي لفاس باش كايجلس هو و أدم فيه ولا هو و شي صحابو و هادشي غير داكشي الكبير يعني ما خفي اعظم ، طبعا هاد الثروة كاملة ماجاتش و تكونات بين ليلة و ضحاها حيت داكشي كان من الجد للأب ومن قبل مايموت الاب ديالو و أصيل كايعاون و كايطور فهاد الثروة حتى وصلات لفين وصلات دابا حيت مقارنة بداكشي لي كان عندهم لهادشي لي كاين دابا كان واحد الفرق كبيير و هادشي طبعا بفضل الجهد و الذكاء ديالو
بدات كاتشد الهضرة مع دوك لي كايجيو يسلمو على أصيل حتى كايجي شي شخص اخر يسلم عليهم كاتخليهم و كاتمشي تهضر مع داك لي عاد جا ، كان غرضها تهضر مع ديك الطبقة ديال ايلون ماسك ولكن مابقاش كايبان لها .. ماعجبهاش الحال و حسات براسها ضيعات واحد الفرصة ذهبية ، ندمات اشد الندم حيت مامشاتش عندو ديريكت حيت داك الشخص كان كايبان لها هو الشخص الأكثر قيمة فهاد المهرجان كامل ولكن هادشي ماخلاهاش تتراجع على الفكرة لي جات على ودها للهنا حيت بقات غادا بشوية بشوية من واحد لواحد تحت أنظار أصيل لي متبعها بعينيه حتى وصلات لوارن بافيت
هدا بالضبط كانت جمعات عليه شلاا معلومات و كان خاصها غير منين دوز ليه .. بدا الشخص لي معاها كايعرفهم عليها و بحكم انها كانت وجه جديد اول مرة يشوفوه و اول مرة اصلا يعرفوها كاينة على الوجود كانو البعض منهم مامسوقينش ليها و من بينهم وارن بافيت لي كان كايهضر مع المعارف ديالو في حين البعض الاخر كاين لي كان كايهضر معاها و كاين لي كانت كاتبان ليه متطفلة على هاد المهرجان و كاين لي كان كايسولها كيفاش حتى خدات التصريح و كاين لي كان كايسولها واش هي مرافقة؟ ... المهم فبحال هاد البلايص الجمال و الشباب ماكاتكونش عندو شي قيمة كبيرة قد ماكاتكون قيمة لمكانتك الإجتماعية اما فحالة حياة الحاجة لي خلاتهم يعتابروها متطفلة و مايعطيوهاش وقت أصلا ماشي غير حيت ماعندهاش شي مكانة إجتماعية .. السبب كان هو داك الميدان لي هي فيه و لي ذكرو داك الشخص لي عرفهم عليها حيت داك الميدان بصفة عاامة سواء الفن الرقمي او تداول العملات الرقمية ، مشبوه و هادشي سمعاتو نيتةمن هضرتهم مع بعضياتهم عليه و هما متجاهلين وجودها
مارضاتش من داك التعامل لي عاملوه بيها و كيفاش ماعطاوهاش الوقت و اصيل كان شايف هادشي و ماكانش صعيب عليه يعرف شمن موقف تحطات فيه
° تقدمات بخطواتها حتى تقابلات مع وارن بافيت لي كان عاطيها بالضهر
[ الحوار بالإنجليزية ]
حياة : [ بتاسمات ليه بلباقة ] عندك شي وليدات؟
شاف فدوك لي حداه وعاود شاف فيها مستغرب من السؤال ديالها
وارن : [ بنظرات إستغراب ] ماكاتعرفينيش؟
حياة : [ محافضة على نفس الابتسامة ] لا كانعرفك ولكن غير بغيت نزيد نتأكد
وارن : عندي لولاد و الاحفاد و قريب يوليو عندي احفاد الاحفاد
حياة : و ثروتك ايلا ماخفت نكدب غاتكون فاتت 111 مليار
_ [ ضحك واحد من دوك لي حاضرين ] هادي بانت لي شي وحدة مهووسة بيك
حسات بشي حد حاوط لها خصرها بيديه غير تلفتات ليه لقاتو واقف فجنبها .. كان محاوط خصرها بيد و اليد التانية خاشيها فجيبو .. حسات بيه بحالا حس بيها فموقف خايب و بغا يجي يعاونها باش مايخليهاش بوحدها
أصيل : [ مقطب حجبانو ] مالك؟
حياة : [ جاوباتو و عينيها على وارن ] والو غير كانتناقش انا و مسيو وارن .. ماجاوبتينيش ا مسيو وارن ...
شخص بحالو عايش هاد السنين كاملة .. ماكانش خافي عليه بلي كاين موضوع من مور داك السؤال لي سولاتو و كاين حوار شيق نييت
تقابل معاها كدليل على الاهتمام بالنقاش و نقط
وارن : كانظن الجيل ديالك كايعرف للانترنت و كايعرف يقلب باش يعرف الثروة ديالي
حياة : ماكدبتيش ولكن الانترنت ماغايجاوبنيش على هاد السؤال لي عندي حيت الجواب كاين عندك غير نتا
وارن : [ بإهتمام ] شنو هو هاد السؤال؟
حياة : شنو هي أول حاجة كاتشوفها فالمرايا كل صباح؟
وارن : ماكايكونش عندي الوقت للمرايا
سمعات واحد ضحك و كانت فديك الضحكة رنة السخرية .. ماتسوقاتش لها حيت اصلا اخر حاجة تتسوق لها هي ضحكة بحال هادي
حياة : و عينيك اش كايشوفو كل صباح؟
وارن : كايشوفو السقف
حياة : فاش كاتبغي تدخل للدوش ماكاتشوفش فالمرايا؟
وارن : هادي حاجة طبيعية
حياة : فديك المرايا اش كاتشوف؟
كان متبع معاها و هو عارف بلي هاد الحوار فيه شي حاجة من غير المرايا ... حيت المرايا ماكانت الا البداية
وارن : كانشوف راسي
حياة : لا ا مسيو وارن فاش كاتشوف فالمرايا كاتشوف العلامات ديال كبر السن ... ديال الشيخوخة [ تبسمات ] العلامات لي كايوريوك بلي السنين لي عشتيهم كتر من السنين لي باقيين ليك فهاد الدنيا و باش نكون واضحة كتر معاك .. نهار على نهار كاتعرف بلي مابقاش ليك بزاف فهاد الدنيا .. كل نهار كايدوز كايتحسب فعمرك ، تبارك الله راك عايش 91 عام .. مراتك ماتت البركة فراسك واخا جات معطلة
حسات بيه تزير و حتى أصيل ماعجبوش الحال علاش تجبد هاد الموضوع .. تحدر لودنيها و هضر معاها بينو و بينها باش مايحرجهاش
أصيل : شنو وصلك لهاد الهضرة؟!
ماداتهاش فيه .. كانت كاتراقب غير لون وجه وارن لي تبدل فاش جبدات ليه مراتو .. كاع لي كانو تما كانو عارفينو كان كايحماق عليها و من فاش ماتت ماعاودش شاف فوحداخرا و حتى هي كانت عارفاه بلي ماتزوجش من مور ما ماتت مراتو .. كوكل كافية و وافية
وارن : [ شاف فأصيل ] ديها من هنا .. ماتخلينيش نلوحها برا
حياة : [ تبسمات بلباقة ] تهدن ا مسيو وارن كانعرف عليك راجل مرزن
شاف وارن فأصيل
أصيل : [ دوز يديه على الذقن ديالو ] ماتحكمش على الكتاب من غلافو ولا النقاش من بدايتو
وارن : [ شاف فحياة ] اخر فرصة غانعطيها لك
حياة : ايلا كنتي ناوي تعطيها لي ا مسيو وارن ماتقاطعنيش باش تفهمني اش بغيت نقول
وارن : كانسمعك
حياة : [ تبسمات ليه بلباقة ] ميغسي ... كي قلت لك ا مسيو وارن نتا كبرتي و ماضامنش شنو غايوقع لك من هنا للقدام وكيفما كاتعرف الناس الكبار كايتقسمو ل4 فئات الفئة الأولى كانت منهم مراتك لي مشات من هاد الدنيا واخا هي صغر منك [ شافتو بدا كايتزير تاني ] ... الفئة الثانية كاتمشي لهم صحتهم و كايبقاو عايشين غير بالخيوطة و ماكايتحركوش ايلا ماحركوهمش ولادهم ... الفئة الثالثة كايجيهم مرض الخرف .. الزهايمر .. النسيان اي مرض عقلي لي كايخلي قراراتهم كاكاتكونش بكامل قواهم العقلية ... الفئة الرابعة هادو كايبقاو بصحتهم و كايعيشو طول من الفئات لي ذكرت مي هاد الفئة قليلة و من زهرك نتا منهم ولكن واش هاد الزهر معاونك غير نتا؟ حيت حاجة باينة كاينين شي وحدين من عائلتك لي كاتلقاهم باغيينها فيك و نتا عارف بلي ضروري ماكايكون شي حد عندو ضغينة من جهتك يعني كايبقا إحتمال وارد يوقع لك ماكايوقع لدوك الفئات ب3 لي ذكرت ويكون سبابك واحد من ولادك ولا حفادك
وارن : نتي شنو كاتخربقي عليا؟
حياة : ماكانخربقش .. خليني نكمل و غاتفهم ، وي تقدر تكون واحد من بين دوك 3 ديال الفئات اللولين ، يقدرو يكونو كايعطيوك دوا لي كايأثر على الخلايا الدماغية ديالك ، يقدرو يتسببو لك بالخرف و يخليوك تسيني على وراق باش يخليوك الله كريم .. يقدرو يحمقوك و يلوحوك فسبيطار الحماق ... يقدرو يعطيوك السم و يتهناو منك بمرة ، واش نتا غاتضمن ديك الساعة لراسك جنازة لائقة؟ و الاهم هو واش نتا غاتموت مرتاح و هما قاتلينك بالغدر؟ ... ماغاتقدر تضمن حتى حاجة لا جنازة لائقة لا قبر لائق حيت ببساطة ورقة وحدة قادرة تحيد لك كاع هادشي لي عندك دابا
أصيل : [ شاف فالمكانة ] خلينا نمشيو
حياة : [ ماشافتش فيه .. كانو باقيين عينيها على وارن ] ولكن ا مسيو وارن إيلا كانو عندك ممتلكات و ثروة فمحفظة إلكترونية و تكون مخلي محامي ثقة هو الوصي عليها باش فحالة ما وقعات لك شي حاجة خايبة لاقدر الله و متتي و قبل ماتموت يكونو حيدو لك املاكك .. غاتكون عندك ثروة ماقادرينش يوصلو لها حيت مايقدرو ياخدوها منك بحتى شي وثيقة و بديك الثروة المحامي يقدر يتكفل بجنازتك ايلا ماتكفلوش بيها و حتى ايلا دخلوك لسبيطار الحماق غاتكون عندك ثروة باش تخرج راسك .. يعني المحفظة الالكترونية فبحال هاد المواقف كاتكون نافعة حيت ماجاتش تعيش حياتك فالثراء الفاحش و تكملها بيحرقو الجثة ديالك بلا جنازة لائقة .. ولي غانقول لك انا ماعارفاش شنو بينك و بين بنادم وشكون حاقد عليك [ تبسمات ] ولكن لي عارفة هو داك الكاس لي فيديك فيه شي حاجة يا غاتديك للقبر يا غاتخليك معاق يا غاتديك لشي سبيطار [ هزات الكاس و تبسمات ليه بلباقة و نطقات بالإسبانية ] سالود ( نخبك ) مشات من تما و خلاتو كايشوف فالكاس لي فيديه و واحد كايشوف فواحد و ما هي الا لحظات حتى بدات كاتترون الدعوة من مور ما شم ريحة فشكل فالكاس ديالو ...
كانت عندها هاد المعلومة دقيقة حيت فالوقت لي كانت كاتتنقل من بلاصة لبلاصة فالمهرجان و غير كادور من واحد لواحد .. لمحات واحد من لي كايسربيو كان واقف فواحد الزاوية و كايقطر شي حاجة فالكاس تما فين بقات متبعاه بعينيها حتى مشا بيه لإيرون و على حسب داكشي لي شافت فيه .. كان باين بلي داكشي لي قطرو ليه فالكاس ماكانتش شي حاجة طبيعية حيت كان باين عليه التوتر و كايشوف هنا و كايعاود يشوف لهيه واش شافو شي حد و باش زادت تأكدات بلي فعلا كاينة شي حاجة غير طبيعية فداك الكاس .. الكاس لي تعطا لوارن كانو فيه 2 من اعواد القرفة و القرفة من بين الحوايج لي كايستعملوهم باش يغطيو على المذاق ديال السم ولا اي مذاق ماباغيينوش يحس بيه ولي ستنتجاتو هو الشخص لي كاين من مور داك لي كايسربي و لي قال ليه شنو يدير غالبا غايكون يا من ولادو يا من حفادو حيت مايمكنش يجي لي كايسربي و يختار يحط اعواد القرفة فالمشروب ديالو باش يغطي على المذاق .. يقدر وارن يرفض ببساطة ، راه ماشي شي حد لي غايقبل واحد كايسربي يختار ليه شنو يشرب يعني هدا واحد الشخص قريب ليه لي قنعو بقضية يزيد عويدات القرفة للمشروب ديالو باش ياخد راحتو فالمدة لي كان كايعطيه داك السم ولا أي كان و الخلاصة من هادشي كامل ... هادشي ديال اليوم كانو من زماان و هما كايعطيوه لييه ماعرفاتش شحال المدة بالضبط ولكن ماكانتش غاتخلي فرصة بحال هادي ضيع منها
عارفة راسها جبدات ماشي غير النحل .. بل شي حاجة كتر من النحل حيت غايقدرو يشكو فيها هي نيت لؤ حطات ليه داك العجب ولكن الكاميرات لي كانو ف2 زوايا كانو شادين داك السرباي ولا مشاو حتى تلاعبو بيهم و بغاو يضوروها غاتجبد لهم الفيديو لي صوراتو .. حيت فاش شافت داكشي و فاش قررات تلعب بهاد النقطة كانت عارفة بلي يقدرو يقلبو عليها كلشي و كانت عارفة بلي الفاعل الحقيقي غايبغي يا يغرق ليها الشقف يا يقدر يبقا تابعها فحياتها ولكن كي كاتقول هي ، الحياة هي المجازفة .. ماكانش عندها مشكل فهادشي و كانت متوقعة كلشي .. الأهم من هادشي هو النتيجة ديال هادشي لي كانت متأكدة منها غاتكون نتيجة مرضية
أما أصيل كان عارفها دخلات راسها فواحد اللعب كبير عليها و بزاف حيت الشكوك غايتوجهو ليها هي اللولة غير يتأكدو من شنو كاين فداك الكاس بالضبط .. بحكم هادشي عمرو كان حتى جات هي و ثانيا غاتولي مستهدفة من طرف هدا لي دار هادشي لوارن
ترون المهرجان و بداو كايقلبو على داك لي عطا الكاس لوارن ولكن مالقاوهش بحالا سرطاتو الارض .. ماخلاو حتى واحد يخرج من داك المهرجان و باش نكون اكثر تحديد حطو على حياة حيت اصلا هي لي جبدات هادشي ، و داوها تجلس فواحد البيت باش ماتهربش و هادشي ماجاش من فراغ حيت فالاصل كانو غايمشيو يجلسوها مع البوليس و تاكل الدق لي يخليها تعتارف بحاجة هي مادارتهاش مي أصيل جا فصفها
و ديك الروينة لي هي خلاتها برا كان هو كايحلها بالتيليفونات باش حقها مايتهضمش ويغبرو لها الاثار .. على اساس راها ماقادراش على راسها ، ماكانش فراسو بلي مصورة داكشي و هادشي بالضبط لي مخليها مكالمية و جالسة فالبيت لي دخلوها ليه بحالا ماواقع والو
حاطة رجل على رجل و كاتدور عينيها فالديكور ديال البيت لي خلاوها تجلس فيه وفهاد الأثناء لي كانت هي جالسة ماعلابالهاش بشنو واقع على برا كانو طاحو فالتسجيلات ديال الكاميرا لي كانت شادة واحد الجزء من ديك الزاوية لي كان واقف مخبي فيها الفاعل ولكن كاتبقا فشكون لي موراه و فينو؟
دازو ساعات و هي على هاد الحال جالسة تما ، سمعات صوت الباب تحل و عاود تسد ... دخل عندها أصيل لي كان باقي شاد فيديه التيليفون .. وقف حدا البالكون كايطل على برا و فيديه ݣارو و مرة مرة كاتمشي عينيه للتيليفون .. ماهضرش معاها و مالامهاش و هادشي جاها فشكل حيت عادة كايلومها و يقول درتي و درتي و درتي مي هاد المرة كانت مختلفة .. و هادشي لي خلاها تنوض من بلاصتها و مشات وقفات حداه كاطل من البالكون
حياة : شفتك ماقلتيش ليا واش وصلات بيك للقتيلة
أصيل : [ باقيين عينيه على برا ] تايق فيك
فلتات لها ضحكة من شفايفها .. ماكانتش كاتتسناه يتيق بلي هي ماعندها يد فهادشي حيت كانت كاتقول غايقول فبالو هي غفلاتهم و دارت ليه داك العجب و مابغاتش تخليه يشرب زعما حيت غرضها تسلط عليها الاضواء ماشي تقتلو مي من بين الحوايج القلائل لي كايعرف عليها ، وي هو عارفها عزيز عليها المجازفة مي ماشي لهاد الحد
حياة : [ ربعات يديها و تبسمات ] صدمتيني .. دابا ماجيتيش للهنا باش تقول ليا علاش درتيها؟
أصيل : لا [ طفا الكارو و شاف فيها ] عارفة راسك جبدتي المشاكل
حياة : كنت غانقول لك باقي عايش بسبابي مي ماكانظنش حيت هدا لي دار ليه داكشي ماكانش غرضو يقتلو يمكن كان غرضو شي حاجة خرا من غير الموت مي لي عارفة ماكانش فمصلحتو
قرب لها بخطوات ثقال حتى تقابل معاها ونطق
أصيل : غالطة ...
حياة : [ قرنات حجبانها ] علاش غالطة؟
أصيل : منين عرفتي هادشي لي طرا؟!
حياة : حيت شفتو بعينيا .. علاش قلتي غالطة؟
أصيل : داكشي لي كان فكاسو سم
حياة : وا معذرهم ... السيد 91 عام ومزال باغي يحيد لهم الطريق غاتلقاه جالس لهم على قلبهم
أصيل : الأعمار بيد الله
حياة : و انا غير قلت وصافي .. مي مدام باغيين يقتلوه مالهم ماقتلوه بشي طريقة تكون زعما شوية ماتجيبش الشك اما باش يموت هكاك قدام بنادم؟ جاتني شوية فشكل ولا زعما بغاو يحيدو الشك عليهم و يرميوه على واحد من لي كانو حاضرين؟
أصيل : داك السم كايخصو الوقت والمداومة
حياة : دابا لي بغيتي تقول ليا ماكانوش قاصدين يموت اليوم؟ غايكونو زعما من مدة و هما كايعطيوه ليه؟ حيت ماكانظنش غاتكون هادي اول مرة يعطيوه ليه .. دوك لعواد ديال القرفة لي كانو فكاسو كانو باش يتلفو المذاق ايلا ماخفت نكدب
أصيل : باقي ماكاينش اليقين
حياة : وعلاش؟ ياك كلشي باين
أصيل : التحاليل لي غايبينو لينا شنو طاري معاه ومن فوقاش والسم فذاتو
مشات من حداه ورجعات فين كانت جالسة ... حيدات الطالون ديالها وهزات تيليفونها
حياة : يعني دابا غانبقا هاد الليلة هنا؟
بدا التيليفون ديالو كايصوني
أصيل : غانرجعك معايا
خرج من تما باش يجاوب فالتيليفون وخلاها جالسة كاتلعب بخصلة من شعرها و كاتتسنا غير ايمتا تخرج من هنا ، عجبها الحال من واحد الناحية حيت تاق فيها هاد المرة بلا مايشك فيها والا يشك فنواياها ... بقات تما شحال جالسة بوحدها حتى عاود رجع من مور نص ساعة
أصيل : نوضي نمشيو
حياة : صافي جاء الفرج؟ خرجو التحاليل؟
أصيل : باقي عليهم الوقت ، غاتكوني عييتي هاد نهار
حياة : مادرت حتى حاجة باش نعيا .. يا كنت واقفة يا كنت جالسة يا كنت متكية مي مانكدبش عليك ، معدتي تقهرات بالسوائل هاد نهار
الدنيا بااقا مقربلة و هي والا على بالها .. لي فبالها باغا تاكل و السلام طبعا حيت عارفة مزيان بلي هادشي لي واقع لحد الساعة لمصلحتها
أصيل : لبسي ولحقي عليا
وقفات ولبسات فرجليها و بدات تقاد فشعرها
حياة : ماكاين لاش نلحق عليك هانا نيت واجدة دابا .. عطيتي 5 دقايق نقاد المكياج ديالي و نمشيو
جلس كايتسناها حتى قادات داكشي لي خاص يتقاد وشافت فيه بإبتسامة
حياة : دابا صافي واجدة مي واش غايخليوني نخرج؟
ماجاوبهاش .. حيت فهاد الاثناء كانو عينيه كايسكانيوها ، كانو فيها شي نقاط لي كايثيروه و شي حركات كاديرهم و كايثيروه كتر ، و كون ماكانش عارف طبعها ماكانش غايتوانا و يدير شحال من حاجة فبالو .. ولكن هي فالاصل مزال ماقبلات و أي تصرف غالط غايرجع بالرفض و هو هادشي لي ماباغيش
مد لها يديه و شدات فيه وخرجو من تما وكيفما توقعات ماكانوش باغيين يخليوها تخرج ولكن أصيل ماكانش أصلا ناوي يخليها هنا بوحدها ... خرجو هو وياها من تما على أساس خطيبتو ماشي شي حد لي غريب و من غير هادشي ماعندها فين تمشي ولا تهرب ، و طبعا حياة كانت عارفة بلي دار هكاك غير باش يخرجو
توقعات بلي غايمشيو لشي ريسطو كالعادة ولكن هاد المرة مشاو لبلاصة خرا ... ماوقف حتى وصلو لقدام واحد الفيلا ، هبطو ب2 وعطاها دراعو تشد فيه و دخلو
ستقبلاتهم مرا كبيرة فالسن غاتكون عندها على الاقل 70 عام ملامحها إيطالية مهلية فراسها وأنييقة .. سلمات على أصيل بحرارة اما حياة سلمات عليها سلام عادي مرفوق بإبتسامة .. بحكم ماكانتش كاتعرفها ، رحبات بيهم و دخلو لداخل لقاو راجل حتى هو كبير فالسن .. مهتم بالمظهر ديالو و انيق تكون عندو على الاقل 75 عام ، سلم عليه أصيل بعناق رجولي وكان باين فيه كايعزهم بزاف اما بخصوص حياة فاش جا يسلم عليها .. باس ليها يديها بكل جنتلمانية في حين هي تبسمات ليه بلباقة
[ الحوار بالإيطالية ]
نطقات المرا لي حلات لهم الباب فاللول
_ ماكنتش كانظن واش باقيين غاتجيو .. تعطلتو
أصيل : [ بتاسم ليها ] ماتقلقيش ، كان عندنا واحد المشكل صغير
نطق الراجل لي كان واقف فجنب مراتو
_ راك عارفها ولات مزاجية و دغيا كاتتقلق [ شافها بدات كاتتقلق وكمل هضرتو ] ولكن هادشي غير ماكايخليني نزيد نبغيها
نطقات المرا و هي كاتبتسم من هضرة راجلها
_ ماتديش على هادشي لي كايقول .. ماكانقدرش انا نتقلق من ولدي اصيل
_ [ جاوبها راجلها ] غايسمعوك كاتقولي هاد الهضرة غايبداو يغيرو
_ [ شافت فأصيل ] علاش غايغيرو راه بحالو بحال ولدي .. فنفس المكانة ديالهم ، دخلو ماتبقاوش واقفين هنا
كانت حياة كاتحاول تفهم واش جايبها تشوف عائلتو ولكن لي فهمات بلي هادو ماشي واليديه .. كان إحتمال ديال تكون مجرد عراضة عادية و صافي ولكن هو ماعلمهاش اصلا بهادشي ، سبقوهم ديك المرا و راجلها و بقاو هما موخرين
حياة : شكون هادو؟
أصيل : أصدقاء ديالي
حياة : هكاك مي ماقلتيش ليا غانجيو لعندهم
أصيل : ماكانش الوقت من مور داكشي لي طرا
حياة : و باقيين غانرجعو لديك البلاصة؟
أصيل : ماشي ضروري ولكن غاتبقاي فإيطاليا حتى يتحل المشكل
أومأت ليه براسها كإشارة بلي فهمات و دخلات لداخل هي وياه ...
دخلات للداخل لقات 2 رجال و شابة بحالها .. كون كانت باقا كاتديها فالزين بزاف كانت غاتقول هاد الايطاليين مانعرفت واش كايرضعو الزين فبلاصة الحليب ولا مانعرفت كيفاش بلانهم .. ما شاء الله كانو الزين و الطولة ولي بغيتيه كاين فيهم ... فالاصل كانت هاد المرا و الراجل أصدقاء لواليدين أصيل بالتحدييد اما هو كان بحالو بحال ولدهم
سلمات على دوك لي لقات لداخل و جلسات فالكرسي .. بحالا كانو كايتسناوهم غير هما باش يتعشاو ، تجمعو و بداو الخدامات كايحطو لهم العشا و فهاد الأثناء كانت المرا الكبيرة كاتهضر مع أصيل
_ [ كانت كاتاكل بالفورشيط و موجهة كلامها لأصيل ] ماموالفش تجلس فهاد النهار ، نهار الراحة ديالك كايكون ف15 فالشهر
نطقات بنتها
_ ماكانأمنش بالمعجزات ولكن منين ماخدمش هاد نهار وليت كانأمن بيهم
أصيل : كايجيو ظروف
_ [ شافت فيه ] اممم ظروف .. كون قلتي مريض كون تيقتك [ شافت فحياة ] انا ننصحك من دابا غير هربي ايلا لقيتي فين تهربي ، غاتعيشي مع واحد حياتو هي الخدمة
حياة : [ تبسمات ليها ] لا واقيلا فهمتونا غلط .. راه مابيناتناش داكشي لي فبالكم
نطقات المرا الكبيرة موجهة كلامها لبنتها
_ بعدي منها ماتحرشيهاش عليه
_ واش كدبت ا ماما .. ياك عندو نهار فالشهر لي كايرتاح فيه وديما مسافر .. نهار مبارك هدا منين شفناه واقيلا كون ماجابتوش لينا كون ماشفناه حتى للعام الجاي
أصيل : [ وجه أنظارو ليها ] النهار لي غايوصل أجلنا فيه غانرتاحو
حياة : [ تبسمات ] الخدمة هي هادي كاتعمر وقت بنادم مي من واحد الناحية مزيانة حيت كاتخلينا نخرجو من منطقة الراحة ديالنا و نديرو شي حاجة كاترجع علينا بالمنفعة
_ [ نطقات المرا بإنزعاج ] صافي سدو علينا هادشي ديال الخدمة [ شافت فبنتها ] كولي مزيان ماكليتيش [ شافت فولدها ] ونتا ماغاتنوض من بلاصتك تا تكمل طبسيلك
بدات كاتحضي مع كل واحد فولادها باش يكمل ماكلتو واخا كانو كباار مي كانت كاترد لهم البال و من خلال داكشي لي شافتو حياة قدام عينيها و كيفاش كانت كاتعامل راجلها و كايعاملها راجلها ستنتجات بلي مزوجين عن قصة حب .. و كان استنتاجها صحيح حيت من القصة ديالهم لي سمعاتها و هما كايعاودوها بزوج عرفات بلي فالاصل فاش تزوجو كانو فقراء و حتى فاش ولدو ولادهم كانو باقيين عاد كايطورو مستوى معيشتهم
بقات كاتتسنط لقصتهم ... كانو مزوجين لمدة نص قرن ، ماكانتش عارفة والا فاهمة كيفاش 2 ديال الناس قدرو يبقاو عايشين مع بعضياتهم لمدة 50 عام .. 50 عام و هما كايصبحو على وجوه بعضياتهم ... 50 عام و هما متقاسمين الحياة مع بعضياتهم و لي كان كايزيد يخليها تستغرب هو فاش كانت المرا كاتعاود على شي نهار من نهارات لي كانت كاتحيد النعمة من قدامها و كاتعطيها لراجلها و ولادها .. ماعرفاتش كيفاش كاتفكر واش هادي ماكاتبغيش راسها؟ واش لهاد الدرجة عندها قيمتهم كتر من قيمتها؟ و معدتهم حسن من معدتها؟ الصراحة هي ماقادراش دير هاكا ، ايلا طاحت فيديها جغمة ديال الما فشي صحرا و كان معاها شي واحد و ب2 كانو ميتين بالعطش ، امبوستاحيل تعطيه يشربها ولا تقسمها معاه و نفس الشيئ ايلا كان كايموت بالجوع و هي عندها غير شدق ديال الخبز .. غاتسبق راسها هو اللول يعني هي ماكاتشوفش اصلا بلي تقدر تكمل فشي علاقة ديال الزواج لهاد السنين كاملة و تضحي فيهم و تحيدها منها باش تعطيها لولادها ولا راجلها
كان عندها واحد التناقض ... ماكاتبغيش شي حد يموت بسبابها ولكن ايلا تحطات فشي موقف لي خاصها تختار يا راسها يا داك الشخص .. غاتختار راسها ثم راسها ثم راسها حيت هي ببساطة ماشي من النوع لي كايقدم التضحيات
ماشي كاع الرجال كايصدقو بحال راجل هاد المرا ... كاين الرجال لي بحال باها ، ولكن المشكل ماشي غير هنا .. الحاجة لي كاتستغرب منها و زادت ستغربات منها هي كيفاش بعض العيالات عندهم ديك القدرة ديال يفضلو راجلهم و ولادهم على راسهم .. كاتجيها شي حاجة فشكل و موحال واش يجي شي نهار لي تقدر تفضل راجلها على راسها ولا ولدها على راسها وهادشي ايلا كان عندها شي ولد
سالاو العشا و مشاو جلسو فالجردة .. باش عااد ياخدو راحتهم فالهضرة فالمواضيع لي بغاو و كالعادة كان النوع الاول لي غايبدا يتناقش فيه أصيل هو الخدمة
ماكانتش عارفة بلي كايعطي الراحة لراسو مرة فكل 15 اليوم .. يعني الايام لي دازت فعلا كايبقا غادي جاي مسافر من هنا للهنا ، كان واحد الشخص لي مهووس بالخدمة و مامساليش قبو باش يبقا تابعها بليزابيل صباح و ليل و ماغايطلبش منها الاهتمام المفرط فالعلاقة .. ماغايبقاش يقول لها نطلاقاو ديما و هادشي نوعا ما عجبها ولي عجبها كتر هو عقلو وكيفاش عامر .. فين ماجيتيه كايسكتك و فين ماجيتيه كاتلقاي عندو معرفة واسعة و هادشي كانت فكل مرة كاتزيد تتأكد منو ...
بقات كاتتسنط لهضرتهم بإهتمام و تركيز و طالقة ودنيها معاهم كاتسمع حتى لدوك النصائح لي ماكانوش موجهين ليها فالأساس بل ليهم .. حتى لواحد الوقيتة شاف فيها واحد منهم
_ ماقلتيش لينا ... شنو كاديري فحياتك؟
تقادات فجلستها ونطقات
حياة : حاليا خدامة فصالة ديال المعارض الفنية و قريب إن شاء الله غاندير معرض خاص للطابلوات ديالي
_ [ بإهتمام ] نتي رسامة؟
بقاو كايشوفو فيها و كايتسناوها تجاوب ، مع نيت كانت ساكتة فالوقت لي كانو كايهضرو فيه و هادشي خلاهم يوجهو أنظارهم ليها
حياة : لا ماشي رسامة ، تقدر تقول ݣرافيك ديزاينر مي ماشي بداك المفهوم لي فهمتيه دابا .. حيت ماكانصممش لوغوات للشركات
_ [ بإهتمام ملحوظ ] زيدي شرحي لي كتر
حياة : كانصمم رسومات ديال الان في تي و كانخرجهم على شكل طابلوات باش كايوليو ملموسين
_ و هادشي لقا شي نجاح؟
حياة : [ ضحكات بخفة ] مزال عاد بديت و باقي قدامي الطريق طويلة قدامي قبل ماندير معرض ديالي ، المعارض كايخصهم تخصص لهم واحد الميزانية و كايخصك تمهد ليهم الطريق و دير بلاصتك هو اللول باش نهار تفكر دير شي معرض ماتكونش ضيعتي فيه الوقت على والو المهم بإختصار كايخص حتى نضمن الدعم
_ وعائلتك ماكايدعموكش فهادشي؟
سولها هاد السؤال على أساس راها شي وحدة من عائلة مرموقة لي غاتدعمها بالمعارف و تعاونها تشهر فاللوحات ديالها و كان سؤالو واضح وباين ليها حيت حاليا كايهضرو فالاعمال ماشي فالدعم و الحنان العائلي .. يعني من الأصل غالط فيها شوية على ما بان ليها ، كان عندها جواب طوييل ليه ولكن قبل ماتجاوب ختاصر أصيل هضرتها ف3 ديال الكلمات لخصو كاع داكشي لي كانت غاتقول
أصيل : هي عصامية ماشي عظامية
_ [ بفهم ] اه [ هزهز براسو ] مزيان بنادم لي كايرفع القدر ديالو براسو [ جبد كارط فيزيت من جيبو ] إيلا حتاجيتي أي حاجة ولا كانت خاصاك شي مساعدة فالمعرض ديالك
شاف فأصيل لي كان باين فيه مامرتاحش ... دوز يديه على نيفو و بقااا كايشوف فيه ... دوز ديك الكارط فيزيت ليه وكمل هضرتو
_ إيلا حتاجيتي اي حاجة ، غير قوليها ليه و غايوصلها لي
حياة : [ تبسمات ليه ] ماكاين لاش نبقاو نبرزطوه معانا و نلاهيوه على خدمتو فكل مرة .. عطيني نمرتك وغاتبقا عندي
أصيل : عطيه نمرتك ، نتي نمرتو غاتتلف لك
_ [ وافقو الرأي ] عطيني نمرتك ندخلها عندي .. هاكا نضمن ماتحشميش فاش تحتاجي شي مساعدة
عطاتو نمرتها ودخلها عندو ... بقاو جالسين تما ربع ساعة كايتبادلو أطراف الحديث حتى وصل وقت المشي و ناضو ودعوهم
أصيل : سبقيني شوية ونلحق عليك
سبقاتو في حين هو بقا واقف مع داك لي عطاتو نمرتها لمدة لا بأس بها عاد تبعها و شدو الطريق للأوطيل .. هبطو و وقفو ودخلو للداخل
حياة : بان ليا غاتمشي دابا تنعس باش غدا ترجع لخدمتك كالعادة .. ضاع لك هاد نهار النهار
أصيل : ماضاعش فالخاوي
حياة : وي مي موحال واش ترتاح فالنهار لي موالف ترتاح فيه
أصيل : ماشي مشكل ، طلعي تنعسي داز عندك هاد النهار صعيب
حياة : [ ضحكات ] صعيب؟ هاد النهار داز عندي عادي ماشي شي حاجة
أصيل : وماغاتنعسيش؟!
حياة : لا .. لقيتيني كانفكر نطلع نبدل حوايجي و نهبط للبار لي عندكم ، عجبني الديكور ديالو .. نتا لي بنتي ليا غاتمشي لدارك وتنعس .. تابعاك الخدمة نيت غدا [ تمشات باللور و نطقات ] بون دودو
طلعات فالاسانسور و خلاتو كايشوف فالمكانة لي فيديه .. البار لي كان عندهم كان نقي و ناسو نقيين مي كايبقا بار و هو مامنحقوش أصلا يقول لها واش تمشي ولا ماتمشيش
اما حياة فهاد الاثناء كانت طلعات و بدات كاتقلب فتيليفونها لقات الكونسياج مصوني عليها .. كان الوقت شوية معطل و ماكانتش باغا تصوني عليه دابا داكشي علاش أجلات المكالمة و دخلات للدوش غسلات لحمها وخرجات بدلات .. عاودات المكياج ديالها و هزات تيليفونها وهبطات للبار لتحت ، بدات كادور عينيها باش تشوف فين تجلس حتى بان ليها أصيل حتى هو كاين تما .. ستغربات حيت اصلا السيد مضيع نهار على قدو مامرتاح فيه ماخدام فيه و كاتشوفو باقي هنا
مشات فالاتجاه ديال البلاصة لي جالس فيها و جلسات
حياة : بنتي ليا باقي قصار هاد الليلة
أصيل : داكشي لي بان لي
حياة : كاين عندكم هنا المارتيني؟ بطبيعة الحال غايكون راه اوطيل سانك ايطوال هدا
أصيل : كاتشربي؟!
حياة : لا غير كانتنغم [ ضحكات ] اش خاصك العريان الخاتم ا مولاي .. بقا خاصني غير نخسر الفلوس على القراعي .. كانسول على المارتيني الحلال ، بلا سكرة بلا والو ...
طلب لها المارتيني لي بغات و شافت شنو طلب لراسو لقاتو بلي حتى هو طلب مشروب اخر خالي من الكحول يعني الهضرة ديال ماكايشربش كانت بصح
حياة : ماغاتخدمش غدا؟
أصيل : باقا متبوعة بمشكل هاد نهار ، عزاز عليك المشاكل؟!
حياة : راك شفتي السيد رجل هنا و رجل لهيه و واخا هكاك ماقالوهش .. ناويين يقطعو ليه التيكي من عند عزرائيل قبل الوقت ، دابا كون شفت و سكتت كنت غانتسما مغطية على جريمة ولا لا؟
أصيل : وتدوي وتغرقي راسك؟!
حياة : مانكدبش عليك هادشي مادرتوش حبا فيه ولا بسباب المعزة [ تكات ضهرها ] مي حيت كون مادرتش هكاك كنت غانخرج من داك الفيستيفال بيدي خاويين .. كنت قادرة نهضر معاه بوحدو بيني و بينو مي الاستفادة كانت فنهضر معاه و الشهود حاضرين باش ايلا سكت هو و مابغاش يهضر ولا كاع يودع قبل مايهضر بعدا على الأقل يكون باقيين الشهود حيين و ماتخافش عليا من ناحية البوليس قادرة نسلك راسي
أصيل : فبالك غاتعاوني راسك ويتيقو بيك؟!
حياة : وي غايتيقو .. عادي ماشي اول مرة نسلك راسي
أصيل : كاتسلكي راسك مع ولاد الكارتي ديالكم؟!
حياة : كانسلك راسي مع من والا ومارميتش راسي فداك المشكل كون ماكنتش عارفة راسي قادة نخرج منو
ماكانتش ناوية تقوليه على الفيديو لي عندها .. اما هو فهاد الاثناء كان باغي يفهمها بلي المشكل ماشي فالبوليس حيت راه ساهل تسلك راسها .. كانو الشهود بزاف بلي كانت معاهم و حتى الكاميرات كانو مصورينها من فاش دخلات مامشاتش لجهة السرباي و كان باين فيهم بلي كانت كاتصورو إضافة لهادشي السم كان فعلا فالجسم ديال وارن من مدة و كان كايتعطا ليه بإنتظام و فديك المدة هي ماكانتش اصلا معاه والا كاتعرفو .. هو ماخايفش عليها من ناحية البوليس و انما يقدر تولي متبوعة حيت ضيعات لشي شخص خطة شهور غير باش تتشهر
دوز يديه على الذقن ديالو
أصيل : حليتي المشكل ديالك مع العائلة؟!
وكالعادة مروى و أدم دارو بيها البراح .. بااين شكون لي وصل ليه الهضرة بلا ماعاد تسولو كيفاش عرفتي ، وشكون عرف غايكونو قالو ليه حتى علاش تبراو منها
حياة : مروى بطبيعة الحال
أصيل : ماشي ختك
حياة : ايوا غايكون راجلها .. صاحبك ، مافهمتش واش ماكاين مايتعاود من غير يوميات حياة؟ زعما ضروري بنادم يعاود باش يتشفا؟
أصيل : حيدي من راسك هادشي ، لادوا فيك شي حد ماكايدويش باش يتشفا
حياة : و علاش كايهضر؟ من اللول مايهضر فيا مانهضر فيه
أصيل : كاتجيبها الهضرة
حياة : دابا هو خلا السياسة .. خلا الاقتصاد ... خلا الرياضة و الدين و أحوال الطقس و سوق الاسهم و خلا حياتو و حياتك باش تجيبو الهضرة عليا؟ كايبقاو مشاكل شخصية مشاكل كاتخص عائلة مرتو لاش فمو مزراݣ؟ ولي جا يعاود ليه؟ عيق بمرة شحال ما بقا غاندور فيه على هاد التبرݣيݣ لي فيه
أصيل : [ قطب حجبانو ] مابغيتيهش يعاود لي؟!
حياة : لا .. مابغيتش
أصيل : عاودي لي نتي
حياة : ياك ختي و راجلها عاودو لك كلشي اش باقي؟
أصيل : ماكاندويش مع ختك وماعندي غرض بيها
حياة : و بيمن عندك الغرض؟
أصيل : بيك [ جغم من الكاس لي فيديه ] عاودي لي على راسك
حياة : لي كايبغي يعرف شي واحد ماكايحتاجش يتسنا حتى يعاود ليه داك الواحد .. مع الوقت كايعرف كلشي براسو
أصيل : ولي ماقادرش يتسنا؟!
حياة : يصبر
طول الشوفة فيها واش هي كاتدوي ليه على الصبر على اساس السنين لي دازت ماكافياش ... جاتو 3 سنين بزاف حيت فالاصل ماموالفش يبقا هاكا حاط عينو على شي وحدة لسنين ... و حياة ماشي زينها لي جرو ليها حيت زينها عادي أپار ديك الحاجة لي مختلفة فيها لي كاينة فيها ، كانت حاجة خرا كاتجرو ليها .. شخصيتها لي فيها بزااف ديال التناقضات عندها واحد القدر من الحنية و هادي شافها فخوفخا على مها مي فنفس الوقت قلبها حجرة و هادي ديما كايشوفها فيها ... بعقلها و هادشي كايشوفو فاش كاتجي تتناقش بعقلانية و فنفس الوقت متهورة و هادي كايشوفها فاش كاتلوح راسها للخطر و كاتغامر .. معقولة و هادي شافها فالعرس ديال ختها فاش عرفها ماعندهاش مع لي كاتتمشا مع الراجل المزوج و فنفس الوقت فيها التخلويض حيت فنفس العرس خدمات التخلويض ... كدابة مي فاش كاتبغي تقول الصراحة كاتقولها بطريقة وقحة ... شخصية عبارة عن صفات متناقضة ولكن كايبقا هادشي على قمتو 4 حوايج ، متمردة .. شرسة .. راسها قاصح و عندها نفس خايبة و هادشي عرفو فاش مابغاتش تشد الفلوس لا منو لا من ختها ... يعني و بإختصار شخصيتها و نظراتها و ثقتها لي عطاو لزينها قيمة .. هادوك هما لي ميزوها و هادوك هما لي خلاوه يبغيها ، كيفاش؟ حتى هو ماعرفش كيفاش ولكن لي عارف هو شخصيتها لي زادت جراتو ليها حيت من قبل كانو كايطلعو ليه تصاورها فالانسطا ولكن ماكانش كايعطيهم أهمية كبيييرة حيت كي قلت سابقا راه شاف الزين بأشكالو و أنواعو و شاف لي فايتينها فالزين ولكن هو ماكانش من النوع لي كاينجاذب للزين بوحدو ...
يتبع...
التنقل بين الأجزاء