عرس الذيب الجزء 13

تعصر قلبها حاسة بضغط كبير من جهتوو .. و بصعوبة بدات كتهضر ..! معصب و باغي يفهم و تتوضحلوو شحال من حاجة ..! لأنوو الحد الآن بكلامها و باستنتاجاتوو .. عارفها دخلات للإصلاحية و تما تبلات بالكارو ..! و يمكن هاذي الحاجة الوحيدة لي كتشفعلها عندو فكل مرة كيبغي يهبطها تتبرد ..!

تزوجات عاد تبلات بالشراب .. و ديجا عاوداتلوو و هي سكرانة على إلياس و مو حجيبة و فهم بلي تا هو سكايري و ما يكون غير هو لي جرها لهاذ الطريق .. كان حابسها ما كتخرجش فمرة إلا يلا كان هو و لا موو معاها ..!

و بما أنها أول مرة طلبات مساعدتوو هضرات على الكمبيالات لي مسينييها عليهم خوها و لي كانت باينة كذبة غير من فمها المعضوض بوحشية ..! ف لي قدر يفهم من الموضوع أنوو إلياس لي لعبها عليها فالشيكات و بسبابهم كان شادها فداك التزويجة ..! و داك النهار يا ايما حصلها مع شي واحد أو سرقاتوو ..! تما ضربها و دار فيها داك الحالة و هربات ليه ..!

حصلها مع واحد استنتجها من هضرة الياس فالقهوة .. كيفاش مبرد و كيقولها رجعتي لعوايدك من واحد لواحد و دايرة الصاحب على راجلك ..! و السرقة ردها للفلوس باش خدات الطونوبيل .. المشروع و الدار .. دقة وحدة ..!

حكيم ماشي من النوع لي كينسى و لا كيسمع و يدوز بحال حتى حاجة ما وقعات ..! أي كلمة كيماركيها عندو بستيلو حمر .. كيسكت و يجمع للواحد تا كتوصل بيه للحد ما كيبقالوو فين يزيد يصبر .. عاد كيتفركع و تما كيجبد الجديد و القديم .. شي حوايج يصدمك بيهم حتى تولي تقولي غير فوقاش أنا درت هاذشي ؟

شريفة:( بحزن قالت حاطة يديها على صدرها ) ما كنقدرش نقطع أ حكيم .. كنمووت و أنا كنحاول و ما كنبغيش نبين ( هزات عينيها فيه ) كنتقاتل بوحدي و لكن كيجي واحد الوقت ما كنبقاش حاسة بشنو كندير ( تنهدات بقوة ) ما كنتحكمش فراسي كاع

حكيم:( رد عاقد حجبانوو ) علاش ما مشيتيش للطبيب ؟ منين ما قادراش بوحدك .. مراكز معالجة الإدمان شنوو كيديرو ..؟

شريفة:( حركات راسها بالنفي ) ما نقدرش .. ما نقدرش نمشي ( دوزات يديها على عنقها ) أنا فايتة قلت لك دخلت للإصلاحية .. ما نقدرش نمشي لشي مركز يحبسوني فيه فشي بيت شادين عليا ( غوتات بجنون ) مااااا نققققدرش و ما نقدر نعاود لحتى طبيب على حياتي .. شكون يضمنوو هو نيت ..! كلشي طامع فيا .. فينما ضرت كنلقى غير الوحوش ..!

حكيم:( رد عليها مغلغل العروق فجبهتوو مطراسيين .. غيطرطق بالأعصاب و هاذ الهضرة ما واكلاش معاه .. مكتفهمش ليه ..! ) شنوو زايدك هاذ ز** ؟ هانتي سكرتي و رجعتي صحيتي تبدلات شي قل** فحياتك ؟؟ ( عض على فموو ) كنتي غتفرحي فاش تلقاي راسك مع جوج شاركين فراش واحد ..!

غير الفكرة د شنوو كان غيوقعلها كتخليه يخرج على عقلوو .. شحطها بالسمطة لجنبها تا غوتات يابسة فبلاصتها و دموعها لي شحال و هي شاداهم .. طلقاتهم من حر الضربة لي غير صوتها مع الهوا قبل ما تنزل عليها .. كترعد القلب ..!

حكيم: خارجة و سكرانة علاياش كتقلبي ؟ ( خرج عينيه فيها ) تفيقي تلقاي راسك فجامع ؟ ( رجع شحطها معاها للجنب الثاني ) معاك كنهضر .. علاش كتبكي دابا ؟ كن ما أسية كن شبعوو فمك تقلاب و لعب .. داك الساعة غترتاحي ؟

قلب وجهوو للجنب .. صدرو كيطلع و يهبط بغضب ..! ما باغيش يتخيلها فداك المنظر المعفن ..! كيسمع صوت بكاها و نفسها لي مرعد و كيزيد يتغذذ عليها ..!

حكيم: ما قادراش تقطعي ؟ ( حرك راسوو من التحت للفوق كيتحلف ) أنا غنشوف من بعد هاذ الليلة واش غترجعيلوو مرة اخرى .. و يلا حفات لك عاوديها ..!

شافت فيه وجهها كلوو مزوق و الد٠م يابس فيه .. مزنكة بالبكى و حناكها فازكين بالدموع ..! ذاتها كلها كترجف .. جهدو ماشي هو جهدها و هاذ المرة غير على كاع المرات ..! بصعوبة وقفات فوق الناموسية و عنقاتوو بيديها بجوج .. صدرها كيرجف بزز كتجمع الهضرة مقادة ..!

شريفة: ما تضربش ( شهقات حاطة راسها على كتافوو ) عافاااك برااااكة هء لحمي طاب ما قادراش غنموووت

حكيم:( رد بعصبية ) سيري برديه و عاودي سكري و عطيهم يلعبوو فيه

شريفة:( بانهيار قالت كتبكي ) ما نعااااودش و الله ما نعاود .. نتا ما عارف والوو .. أنا نهار هربت من الدار .. خالي بغى يتعدا عليا و هذاك فدار الشباب

سكتات خاشية راسها فعنقوو كتبكي بالجهد ما باغاش تتفكر و لكن هذا هو الوقت فين تخوي لي فقلبها و تعاود كلشي من أول نهار هربات فيه ..! الضغط ديالوو فهاذ اللحظة بالذاث عاونها نوعا ما .. لأنها مستحيل كانت تدير هاذ الخطوة فنهار عادي و ديما غتبقى تتهرب و تنقط عليه ..!

عكس دابا عارفة يلا شدات الضد معاه و لا حتى كذبات عليه غتجيبها غير فراسها ..! ما غيعقلش عليها و هي ما بقاتش قادرة تستحمل .. شعل العافية فلحمها بالعصا ...!

سكتات من البكى من بعد ما بردات شوية و رجعات جلسات فوق الناموسية و هو حداها حاط يديه على جبهتوو مزير عليها و فنفس الوقت كيسمعلها ..!

شريفة: نهار حرقاتني كبيرة مشيتي غوتي عليها و ضربتيها ؟ و ضار الزمان و درتي بحالها ..! حتى نتا حرقتي كريمة و هي حاملة و مثقلة .. كتبكي عليك و ترغب فيك .. كيفما كنت كنرغب كبيرة تطلقني و كنحلف لها ما قطعت شعري ( بحسرة ) قلبك قصاح بزاف أ حكيم

حكيم:( توسعوو عينيه بدهشة و باستغراب رد ..! ) كتقارني بيني و بين كَبيرة ؟ ( حرك راسوو بالنفي كيتنهد ) ما عندي قلب من شحال هاذي ماشي عاد دابا ..! يلا كنت كنحن فيك ف حيث كنتي كتستاهلي و ما شفتش منك شي حاجة لي تخليني ندير العكس ..! ( هز حاجبوو بثقالة ) اش جاب تقطيعة د الشعر .. للسحور .. باش تشبهيني بيها ؟

شريفة: ما بقاتش فالفعل .. المهم العقاب نفسوو .. نتا تبدلتي بزاااف .. ما بقيتش كنعرفك .. وليتي كتخلعني أ حكيم .. كنت كنخاف كنهرب لعندك .. دابا رجعت كنخاف حتى نجي و نهضر معاك ..!

حكيم: بالله عليك نتي كتخافي ؟ ( دوز يديه على راسوو و زفر النفس بصوت مسموع ) باش نعطيك النهاية و بلا تخوار فالهضرة ..! أنا ما كنجيش و نتبلى عليك .. هضرت و هضرت نتي لي ما كتفهمي غير بهاذ الطريقة و ما كتتعلمي حتى كتاكليها فجلدك ( زاد عقد حجبانوو ) ياكما نصفق لك على فعايلك ؟ ( بغضب ضرب بجوج صباع حدا ناظرو " جنب عينيه " ) جايبينك مع جوج د الزوا** من قلب دارهم و نتي ضاربة الكاو .. يديرو ف مك لي عجبهم و ما عندك ما تنيطي منهم .. واش كتفهمي الهضرة و لا ما كتفهميش !؟

شريفة:( حطات يديها على وذنيها مغمضة عينيها ) فههههمت فهههههمت و ندددمت ( تنهدات بتعب و سخفة .. تنهيدة خرجات فيها كاع طاقتها ) و لكن نتا لي فهمني أ حكيم .. فاش كنت كنشرب بالوقت .. كنشد عليا الباب و كنكون موجدة و عارفة راسي شنوو كندير ..! دابا كنبقى صابرة صابرة صابرة حتى كيجي واحد الوقت ما كنبقاش عارفة راسي من رجلي .. بزز مني كنمشي للشراب .. ما كنقدرش نتحكم فراسي ما كنتحكمش فنفسي ( بخنقة ) راني عييييييت من هاذ الحالة و داك النهار لي هضرتي معايا فيه و قلتي غتعاونني قبلت و بيدي فتحت لك الباب و يلا كنت غنحرموو بالعصا .. قت٠لني .. سلخني .. دير فيا لي عجبك .. واخا نبكي و نطلبك ما تسمعش مني .. المهم فلخر نتهنى منوو

حكيم:( شاف فعينيها و تنهد .. الطريقة لي كتهضر بيها ديال وحدة يأسات و صحتها تكالت و هي كتحاول ..! ) غنلقاو الحل و غتقطعيه بالخاطر و لا بزز .. واخا نعرف نربطك و نجلس حداك ..!

شريفة:( غمضات عينيها و رجعات حلاتها بمعنى موافقة ..! ) أسية كانت باقى صغيرة .. واحد النهار دخلاتلي فحاجبي بالموس دالحسانة و شافتني الأستاذة و سيفطاتني نعيط على كَبيرة ( سكتات شحال ) فاش وصلاتها و علماتها .. ضرباتني و عايراتني ببنت الزنقة و الموسخة قدام القسم كامل .. كلشي ضحك عليا داك الصباح

شافتوو كيتمتم بصوت ما مسموعش .. عرفاتوو غيكون كيسب و ما باغيش يقاطعها ..!

شريفة: فاش جيت للدار طلعني هذاك لي كنت معتابراه فبلاصة بابا .. قالي غنرقيك بحال ديما .. دخلني لبيتوو .. نعسني فوق الناموسية مغطيني و بدا ( بصوت مخنوق كملات ) كيقرا فالقرآن و كيطلع لي فيدي من رجليه حتى قرب يوصل لحجرو مدوزلي يدي على لحموو و باغي يحل ليا سروالي ..!

حكيم:( قاطعها و هو عاقد حجبانوو و عينيه فيهم شي عروق حوومر ..! ) القرآن ؟؟؟

شريفة: يبست فبلاصتي بحال الحجرة .. سناني كيتقرقبوو .. كنت مخلوعة مصدومة كلشي مجموع عليا .. و هو شانق على زبلوو .. ما طلقني حتى جابوو و القرآن كيتعاود فوذني ( رمشات فيه ) تخيلي حالتي داك الساعة .. الشيطان و ما يوصلش لهاذ السطاج ..! طلقني و بدا يطبطب عليا زعما ما كاين والوو غير رقية بحال ديما و انا هاربة من تما حيط يضربني و حيط يرضني .. الرجلين لي نوقف عليهم ما لقيتهمش ..!

رجع سكت كيسمعلها .. ساهي فالأرض و مرة مرة كيهز عينوو فيها ..!

شريفة: هبطت و دخلت سخفانة طحتلهم فقلب الدار .. لمرة وحدة فحياتي كنت كنتسنى من كبيرة تعنقني و تعرف مالي ؟ ( خرجات النفس مرعد ) عيط عليها و كذب عليها و هزات الحار كيقطع من الكوزينة و دارتولي تحتي

شيرات بصبعها لعضوها و دموعها هابطين خط مع حناكها .. حطات يديها على فم معدتها كطلع النفس بصعوووبة مع الخنقة لي شاداها .. بقات شوية تنفسات و كملات ...!

شريفة: داك النهار دفنت كبيرة .. التكرفيسة لي تكرفسات عليا عمري ننساها .. الحقد لي فعينيها من جهتي ماشي عادي..! ( كمشات فمها و حجبانها بالتدريج هازة عينيها لفوق ما باغاش تزيد تبكي عليها ..! ) بغيت غير نعرف شنوو ذنبي حتى تخرج فيا حرها ؟ منين حليت عيني فهاذ الدنيا تال داك النهار .. أنا شنوو صرفت فيها خايب ؟

مد يديه باغي يجرها عندو .. مألم من حالتها و كلامها .. واخا ما كيبينش ..! واليديها قتلوها قبل ما تكبر و تنور .. واخا كتعيى تكابر هاذ الموضوع كيقتلها .. شدات فيديه و حركات راسها بالنفي ..!

شريفة: خليني نكمل .. ياك نتا لي بغيتي تسمع .. يالاه سمع و سكت ..!

حنات راسها مسحات عينيها بيد و اليد الثانية بقات عند حكيم شداها ..!

شريفة: لقيت الخير فأسية من مور ما سخفت و خرجات كبيرة من الدار بحال يلا ما دارت والوو .. غسلاتلي بسطيلة د الما صغيرة و قابلاتني العشية كاملة و أنا طايبة بالسخانة .. و غير طاح الظلام سيفطها باها تتسخر و قرب لعندي كيبوس فيا و يعض .. باغي يكمل لي بداه فالصباح و هاذ المرة نيشان حيث عارف ما كاين حد لي يفكني و لكن كاين الله كبر من كلشي و عطاني القوة حتى ضربتوو بموس .. خليتوو كيشرشر و هربت من تما أنا و أسية .. فراس مالي 200 درهم .. التيليفون لي عطيتيني و لي عييت نعيط لك بيه .. البراصلي لي فيه سميتك ( ضحكات وسط دموعها ) باقي عندي لدابا هو و شي تصاور قدام ..!

لحظة صمت طويلة دازت بيناتهم .. ما بقى تا صوت كيتسمع من غير التنهيدات لي خارجة من القلب .. مغلفة بآلام و أحزان دفينة ..!

شريفة: لقيت الكار خارج و شحال بكيت و رغبت فيه عاد قبل يركبنا .. و فاش وصلت للمحطة د كازا .. تما قصة اخرى .. كنظن مخيل شنوو ممكن يوقع .. و هاذشي كتشوفوو يوميا فخدمتك .. جوج بنات وسط ( خرجات عينيها فيه عاد تفكراتها ) فين هي أسية ؟؟؟؟

حكيم: فالأمان غير تهناي من جهتها ..! كي درتي خليتيها معاك و باها باقي فالحياة ؟

شريفة: ما تقاطعنيش .. كلشي غنعاودو لك ( زيرات على يديه حتى خشات ظفارها فكفوو ..! ) مرضت بزاف من التحت .. الحريق لي داز عليا ما نبغيه لحتى وحدة .. واخا تكون عدوتي .. بغيت نحماق و ما كاينش لي ينصحني شنوو ندير .. كنشوف كلشي طامع فيا أنا و أسية .. ما عندي لا باش نكري لا باش نجلس فالأوطيل .. و شكون هذا و لا هاذي لي غيقبل يتعامل معايا و أنا فداك العمر .. اول ما حطيت رجلي فكازا تسرقلي التيليفون و بقيت الله كريم

حكيم: و فين جلستي ؟

شريفة: فالمحطة فين عندي نمشي .. كنعس أسية بين الكيران و كنجلس حاضياها حتى كتضرب الستة د الصباح و كنرجعوو ندخلوو للداخل حدا الناس كنغمض عيني تانا شوية و كنشوفوو ما ناكلوو ...! سيمانة و أنا كنتسناك تعرف و يجي لبالك هربت عندك و تجي تقلب عليا .. كنقول واخا التيليفون تسرقلك ا شريفة و لكن راه غيلقى لي زابيل ديالك و يدير شي حاجة على ودك ..!

حكيم:( غمض عينيه بعصبية و رجع فتحهم .. كيزير بيديه على جبهتوو لي عاطياه الصداع ..! ) كن عرفت غنسمح فكلشي و نجي موراك .. راني قلت لك فوقاش وصلني الخبار ..!

شريفة: النهار السابع داتني واحد المراة معاها للمحمدية .. كانت عند بنتها فكازا و راجعة لمدينتها .. عاونتها فالشوانط ديالها و شافت حالتي أنا و أسية .. سولاتني واش نبغي نخدم عندها حتى هي محتاجة لي تعاونها فالدار ( هزات كتافها ) قبلت فالبلاصة بلا ما نفكر جوج د المرات و يا ريتني ما مشيت ..! كنت باغى غير سقف يغطيني أنا و تاسانوو و الباقي نلقى ليه حل مع الوقت

شريفة: كنت باغى غير سقف يغطيني أنا و تاسانوو و الباقي نلقى ليه حل مع الوقت

حكيم:( رد بتساؤل ) علاش ما مشيتيش عند يَّما ؟ هي بعدا كانت غتعاونك بلي قدرات عليه و حتى الواليد كان كيعزك بحال بنتوو و لا كثر ..!

شريفة:( تنهدات ) كنت خايفة و ما كانش عندي العقل لي يفكر داك الساعة .. بغيت غير نهرب و نبعد و ماماك أول وحدة غتجي لبالهم مشيت عندها .. غادي نوض لكم الصداع و آخرتي يردوني لكبيرة بزز مني ..!

حرك راسوو بالايجاب فصمت .. عندها الصح فلي قالت و الظروف لعبات و حكمات ..!

شريفة: المراة لي مشيت معاها كانت عندها بنت وحدة مزوجة فكازا مرة مرة كتطلع لعندها .. أما هي ساكنة بوحدها .. طباخة معروفة كتمشي للعراسات كتحط الذهب من يديها و راجلها عسكري فالصحرا كان باقي ما شد التقاعد

حكيم: من عندها تعلمتي للطياب ؟

شريفة: اااه ( رمشات عينيها ) تكرفسات عليا بتمارة .. صحتي هلكتها ديال بصح ..! فينما عندها شي زرابي و شي كواش و المواعن ديال النحاس كتجبدهملي نحك على قلبي .. حتى من العراسات كنمشي معاها نغسلهم المواعن و نعاون فالميناج

حكيم:( بهدوء قال ) الخدمة ماشي عيب و أي حاجة دازت على الراس كتنفع .. و هانتي دابا غادي تديري مشروعك و كن ما هي ما تشديش الحرفة .. واخا تكرفستي المهم خرجتي بشي حاجة تفيدك او لا ..؟

شريفة: بصح و لكن خايب بزااااف فوقما تتصور تحس براسك بوحدك و ما عندك حد لي تتكى عليه و تقولوو انا عييت .. كتعيى و كتاكل الدق و كتسمع الغوات و كتنوض بزز منك ( وراتوو يديها ) كانوو ديما مسلوخين بالحكان و القريط

سكتات كترمش عينيها فيه بصدمة .. ما توقعاتوش يشدهم بجوج عندو و يبوسهم .. هاز عينيه فيها ..!

حكيم: المهم عشتي فالنقى و ما مشيتيش فطريق معفن .. كاع لي داز عليك ما يجي والوو قدام العذاب ديال لي كيخرجو للوسخ .. لي كيشدوه اليوم فليل كيخلصوه غذا عند الأطباء و فالدوايات .. بلا العصا و الكبث بجميع أنواعوو لي كيشوفوه ..!

شريفة: كَبيرة سماتني شريفة غير باش نكره سميتي و راسي .. حيث أنا ماشي بنت الناس و أنا غير موسخة ( قلبات عينيها و رجعات شافت فيه ) مستحيل نبيع لحمي باش ناكل .. نموت و ما نديرهاش .. كنت كلما كنسمع سميتي كنزيد نكافح على داك "الشرف" ما باغياش نوسخ راسي فعينيا .. و لهلا يحييني لداك النهار ..!

حكيم:( حرك راسوو و بتأييد قال ) هاذي نوارة الحدود لي كنعرف

شريفة:( غلباتها الضحكة و رجعات حركات راسها و بجدية كملات هضرتها ..! ) نهار قلت لك ما تقدرش تقيس فيا حيث باقي ما كملت العدة .. ما كنتش كنساوم فراسي غير بغيتي تقلبها عليا و صافي ..! راه ا حكيم نقتل راسي يلا فقت شي نهار و لقيت شي حد ناعس معايا .. واخا تكون حتى نتا

حكيم:( لعب بلسانوو ففموو و رد ) كنتي غتفيقي غتلقاي جوج ماشي واحد ..! ( هز حاجبوو ) أما يلا جات عليا .. ما غنقربش منك حتى تطلبيها نتي بفمك

شريفة:( ضحكات بالفقصة ) شنوو غنقولك الزين ؟ راني سخنت شي حو*** الله يستر عليك ..! وا تا نووض تبول .. راك كتحلم باللوان ..!

حكيم:( خرج عينيه و رجع ضرب يد مع يد .. غالباه الضحكة ) الله يعطيك شي عقل قولي أمين

شريفة:( قلبات عينيها كترمش ببرود ) العقل لي عندي أنا ما عندكش حتى نتا و لهلا يوريك شنوو كاين هنا ( حطات يديها على راسها .. كتميق فيه ) كية لي فعقلوو غير المسخ و البوسان .. يضور يضور و يبوس .. سير سير ا عيشة بواسة قالك حتى تطلبيها .. لهلا يوصل يديك لرجليك ..!

حكيم:( تبسم هاز حاجبوو ) نتي لي تراهنتي معايا ( حرك راسوو مع غمزة ) شفتك دغيا قلبتي وجهك ..!

شريفة:( جمعات حجبانها باستغراب ..! بغات تسول شمن رهان و لكن حساتوو غيطنز عليها و قلباتها عليه ) أنا كاع ما كنتراهن ا الشاف .. حرااااام ..!

حكيم:( حرك راسوو كيطنز ) اييه نتي غير زطايلية ..!

شريفة:( ضحكات مخرجة لسانها ) كنت كنمشي معاها للعراسات بزاااف واخا كنعيى و لكن كيعجبني الحال نسمع للشيخات كيغنيو و فاش كيكملوو و يجييو حدايا هاذيك هي السعادة عندي .. هضرتهم كانت فشكل .. كلها ضريب المعاني و كتحسهم مقادات .. عيالات حرات .. كل وحدة و شنوو خلاها تخدم و كلها و ظروفها ..!

حكيم:( حرك راسوو بالنفي ..! تفكر الفيديو ديالها لي تنشر كتشطح و تغني فيه .. غير شيخة محطوطة نيت ..! لكن ما قال والوو عليه ) الله يحسن العوان

شريفة: دازت مدة و جا راجلها من الصحرا ( تنهدات ) غنقولك بغى يتعدا عليا غتكذبني ..! حيث بزاف على الزهر العوج و لكن ما عندي ما ندير ..!

حكيم: متيقك غير كملي ..!

شريفة: رجعت عايشة فرعب .. كل مرة كتسلك الجرة معاه و ما كيقيسنيش .. حتال النهار لي ما بقيتش قادرة نزيد نصبر و قلتها لمراتوو ( باستهزاء ) رداتني أنا لي طامعة فيه و ولاو فيا الفعايل .. ما خلات ما قالت و جرات عليا أنا و أسية من تما ..!

شافت فيه لقاتوو كيسمع بتركيز مصغر عينيه فيها .. بهدوء كملات هضرتها ..!

شريفة: ربي سخرلي فنفس النهار فخدمة فالقهوة .. عطانا بيت أنا و أسية فين نبقاو ننعسوو شادينوو علينا .. الخلصة كانت كافية و موفية ..! تما شفت أشكال أنواع د الناس .. عيني بداو كيتحلوو من لي كنسمع و كنلاحظ ( هزات حاجبها ) ياما تحرشوو بيا و كاين لي بغى ينعس معايا بالفلوس كاع ( رمشات عينيها كتفكر لي داز عليها و قلبها كيحرقها ) كنت كنخاف بزاااااف ما تصورش الهم لي هازاه فوق كتافي ..! فينما كنشوف المعاملة فالخدمة تبدلات و بداو يطمعوو فيا .. كنسمح فكلشي و نهرب .. ما خليت فاش خدمت .. سيكليس .. ميكانيك .. اي حاجة تطيحلك فبالك جربتها المهم بعرق كتافي ..! و آخر خدمة كانت كوافورة و حتى هي شديت حرفتها و عجبني الضومين و كنت باغى نقرا عليه و لكن ما كتابش ( سكتات كتنهد ) داك الساعة كنت قربت نكمل 16 لعام

حكيم: فداك الوقت تعرفتي على طليقك ؟

شريفة: تقريبا ( لمعوو عينيها و قلبات وجهها من جهتوو ) أنا و إلياس جمعونا ظروف فشكل .. تلاقاني فوقت كنت كنقول صافي هاذي هي النهاية ..! و هاذشي ما عارفوو حتى واحد من غيري أنا و ياه .. حتى أسية ما عاقلاش و ما كنبغيش نعاودلها بحال هاذشي .. قليل فين كنخوي قلبي عليها .. باغاها تكبر مرتاحة فحياتها ..!

حكيم:( حرك راسوو ) فهمتك ..!

شريفة: داك الساعة كنت لقيت بيت و كوزينة ساكنة فيه أنا و ياها .. نص النهار كنت كندوزو عند الكوافورة و النص الثاني كنسيق الدروج و مرات كنجففهم و مرة مرة كندير الميناج لشي وحدة ..! و واخا هكاك ما كانتش الفلوس كتكفيني .. الكرا ديال الدار كيدي النص الكبير .. و الماكلة يلا تغذينا ما نتعشاو و هي غادية .. هاذشي كلوو باش ندخل أسية للروض و ما تنساش على قرايتها ( تنهدات حلقها ضرها بالهضرة ) ما كانوش عندي وراقها و ما قدرتش ندخلها للمدرسة ..!

حكيم: ماشي مشكل باقى صغيرة و عندها الوقت فين تعوض ..!

شريفة: هاذشي لي كنت كنقول حتى أنا .. تال النهار لي تقلبات حياتنا راس على رجلين .. و من موراها تلاقيت بإلياس و تبدلات شحال من حاجة

حكيم:( عقد حجبانوو و قال بتساؤل ) هنا فين دخلتي للإصلاحية ؟

شريفة: لا لا قبل من ديكشي .. أما الإصلاحية دخلت لها بسباب إلياس و قلة عقلي ..!

شريفة: أسية مرضات بزاااف .. الطبيب د المخزن ما كاينش لي عتقني تما وا لا شاف فيا و فيها بعين الرحمة .. بقات تما مليوحة كتموت .. بغيت نحماق و انا كنشوفها فداك الحالة و ما عارفة ما نديرلها .. و حتى دابا نحماق يلا وقعاتلها شي حاجة

سكتات حانية راسها شاداه بين يديها .. حتى بدا كيتسمع صوت بكاها و دموعها كيقطرو على حجرها ..! زفر النفس بالجهد و جرها عندو .. معنقها كيدوز يديه على ظهرها ..!

شريفة:( بصوت باكي كملات ) تسلفت و مشيت دوزتلها فالطبيب .. كان عندها مشكل فالكلاوي و خرجولي دوا غااالي بزاف خاصها تبعوو ست شهور و ترجع تدوز و يلا ما خداتوش حالتها غتزيد تتكفس .. غيخصها ساعتها العملية و تقدر كاع تولي كتدير دياليز " تصفية الدم " ( شهقات مخنوقة و فمها كيترعد ) تخيل بنيتة فداك العمر كتدير الدياليز ..!

حكيم: ششش صافي ( باسها فراسها .. ساكت و مرة مرة كيسوط النفس حتى كيتهز صدرو )

شريفة: رجعنا للدار و جبل فوق ظهري .. كنسيفطها للروض تبدل الجو و تبقى مع الدراري .. و أنا كنجري و نجاري نلقى شي حل للفلوس .. ما بقيتش كنشوف النعاس .. حتى من الكوموند د الحلوة رجعت كناخذها و نخدمها فالوقت لي خاصني ننعس فيه .. و لكن حتى الربع د الفلوس ما عندي و أسية غير ما كتزيد تعيى ..!

بعدات من عليه كتمسح فدموعها .. و بتنهيدة طوييلة كملات و عينيها فعينيه ..!

شريفة: واحد النهار عيطات كليانة للصالون باغى لي يخدملها فالدار .. مشيت انا و جوج بنات .. صوبنالها لي بغات و وجدناها للحفلة لي عندها و فلخر لسقاتنا ما خلاتناش نمشييو .. جلسوو لبنات و جلست حتى أنا محتاجة نفوج شوية على راسي ( دوزات يديها على عنقها كتنحنح ) داك النهار تعرفت على واحد من لي جاو عندها

حكيم:( قلب عينيه بضيق و قال ) إلياس نيت ؟

شريفة: لا واحد اخور .. كان كبير عليا فالعمر و باينة لاباس عليه .. هضرنا عادي ..! و رجع كل مرة كيسول عليا داك السيدة و كيطلبها تعيط عليا .. و حتى أنا داك الساعة كنت كنتسناه غير يهضر .. هو الحل لي بقى كيبانلي من مور ما طيحت صحتي و ما جمعت والوو ..! المهم تصاحبنا .. عاودتلوو على الظروف لي كندوز منها و بلي محتاجة الفلوس و خدمتي ما كافيانيش ..!

حكيم:( هز حاجبوو كيسمع بإصغاء تام ..! )

شريفة: ما غاديش ننكر خيرو عليا .. هزني أنا و أسية بكاع لي نحتاجوو .. شهوورة و حنا مع بعضياتنا كنخرجو نضحكو و يردني للدار .. كنت دايرة حدود بيناتنا .. تعنيقة هي اللخرى عمري عطيتهالوو .. و هاذشي مع الوقت بدا كيجبدلنا فالصداع .. حبس عليا الفلوس قالك تزير و بدا ينحنح بلي هاذي ما عيشة ما والوو و حنا فعلاقة و أبسط حاجة تخليني نبوسك ( قلبات عينيها ) هضرة الدراري راك عارفها

حكيم: هضرة الزوا*** ( حرك حاجبوو ) كملي ..!

شريفة: رجعنا ديما مناقشين و طلعلي فراسي .. صابرة غير على ود اسية ( رمشات بعينيها ) و نجيك للصراحة .. أنا تهديت ما بقيتش قادرة على تمارة و رميت الحمل كامل عليه ..! الكوافورة هاذيك بوحدها لي بقيت معاها .. كنقول نص نهار ماشي مشكل .. تال النهار لي خرجنا بنات بيناتنا للقهوة نفوجوو شوية و تما تلاقيت إلياس لأول مرة

شريفة: تما تلاقيت إلياس لأول مرة .. الوقت كامل و هو حاط عليا العين و البنات كيتغامزو و يضحكو .. واخا عارفيني مصاحبة مع لاخور و لكن المخيرة فيهم دايرة ثلاثة و كثر ( تنهدات ) أما انا كنت كنعيفهم و كن ما الظروف عمري فحياتي نفكر نتصاحب مع شي واحد و لا ندخل لراسي لمعمعة كبيرة عليا

حكيم:( حرك راسوو بمعنى لي عطى الله عطاه غير هضري ..! )

شريفة: عطيتوو النمرة و تصاحبت معاه حتى هو ..! إلياس جيتوو ديريكت غتميزي عليا الفلوس غنبقى معاك .. ما غتعطينيش غنشوف لي يعطيني ..! ( هزات كتافها ) و ديكشي لي كان .. حط عليا الزبابل د الفلوس .. تعامل معايا زوين عزيز عليه الضحك و النشاط واخا سكايري .. ديما كيعاودلي على زبايلوو .. ما كيتفرقش عليا و لي حليت عليها فمي كتحط و هاذشي راه عمرو قرب مني و لكن كيحلف فيا يلا لقاني شي نهار مع شي حد ما يدوزهاليش ..!

حكيم:( زاد عقد حجبانوو و بزعفة قال ) ياكما نردك لعندو توحشتيه يمكن ؟

شريفة:( ضحكات باستهزاء قالبة عينيها ) دازت مدة و رجع اللول كيقلب عليا باغي يتصالح و كيعتاذر .. حتى لنهار لي جا مورايا إلياس و قالي ولد خالتوو و لي هو نيت خوه بالرضاعة غيمشي معانا نتقهواو مجموعين ..!

حكيم:( هز حاجبوو ) غيصدق خوه نفسوو لي كتعرفيه ..!

شريفة:( فتحات يديها باستسلام كتحرك راسها بمعنى اه ..! ) خليتهم منوضينها بيناتهم و هربت بحالي للدار و المشكل بجوجهم كيعرفوها فين جات ..! الغذ ليه فالصباح عيطلي إلياس جاعر ..! جا عندي دارلي فضيحة و مشيت معاه لدارو كنت عوالة ناكل قتلة من عندهم بجوج و الله يعاون الله يعاون

حكيم:( حرك يديه بهدوء ) المشكل فيهم لي دايرين عقلهم فبنت قدك ..! الكثيرة يعطيك جوج تسرفيقات و يسيفطك بحالك ..!

شريفة:( كمشات فمها ) نتا هاذشي لي كنتي غادي تدير زعما ؟

حكيم:( هز حاجبوو ) أنا ما غنشوفش فوحدة قد بنتي ..! و تا داك جوج تسرفيقات موحال نعطيهم لك .. لي غتلعب مور ظهري ما عندي ما ندير بيها ( عوج راسوو فيها ) و لكن دابا نلقاك مع شي واحد ن

شريفة:( قاطعاتوو ) صافي فهمنا بلا ما تبدا عاود ..! ( تغيرو ملامحها و بحزن كملات ) ضربني و غوتت معاه قلت لوو صافي سالينا و خرجت من تما كنجري هربانة ..! على ما وصلت للدار و جلست كنفكر شنو ندير كان جابلي البوليس .. هرسوو و دكدكوو كلشي فالدار و هزوني للكوميسارية .. كانت داك الساعة أسية فالروض و أنا بوحدي ..!

حكيم: هزوك للكوميسارية و نتي باقى مينور " قاصرة " ؟ ( لعب بلسانوو ففموو ) اهاه زيدي ..!

شريفة: دخلوني لواحد الخربة و لا نقولوو حفرة و ( خرجات النفس مرعد ) ضربوني و لا نقولوو ما خلاو عظم واحد فيا صحيح .. انا خايفة و مخلوعة من وجاههم و كناكل فالعصا و النفس ما قادراش نطلعها .. كنحس بروحي كتخرج شوية بشوية حتى سخفت و فشلت طايحة فالأرض .. و واخا هكاك ما رحمونيش كلهم كيضربوو دقة وحدة بالركل باش نوقف و السبان لي عمري فحياتي سمعتوو .. سمعتوو منهم داك النهار ..!

تنهد ساكت كيدوز بيدو على راسوو .. هو أكثر واحد عارف شنوو كيوقع لداخل و شنوو يقدر يدوز عليها .. و خصوصا فالوقت لي كتهضر عليه هي " قبل من عشر سنين " .. أما حاليا ما بقاش داك الضرب و المعاملة د زمان ..!

شريفة: من موراها جا الياس و تما قالولي .. بلي دار بيا شكاية .. و أنا سرقت ليه ثمنية د المليون من الدار .. الناس و الجيران شافوني هاربة من دارو هاذ الصباح و شهدو فيا ..! ( بنظرة أليمة شافت فيه ) ما بغاش يتنازل و أنا ما هزيتلوو حتى درهم و ما عندي ما نعطيه .. أسية بوحدها مريضة شكون يكون بيها و شكون يحن عليها و شكون يحن عليا أنا نيت .. صافي تقهرت و عييت و لي خفت منوو طحت فيه ..!

《 سألت الإبريق السحري أن يمنحني فارسا مغوارا وبطلا هماما، فأبى. سألت لم ..!؟

فقال : ومن أين آتي ببطل يليق بك وأنت فارسة نبيلة على عرش البطولة قد تربعت ..! 》

***************************

شريفة: دخلت شهراين للإصلاحية ( غمضات عينيها شحال ساكتة و رجعات حلاتهم حومر ..! ) الظلم .. القهرة .. الضرب و السبان .. شي حاكر على شي .. الماكلة بحال الزبل بزز كندوزها فحلقي .. البيت قاسمينوو و كل واحد عاطيينوو شبر فين ينعس و كنتسابقو على شكون يدخل للداخل ( رمشات حتى هبطات دمعة وحيدة ) عرفتي علاش ؟

حكيم:( رد بعينين مزيرين بالأعصاب ..! ) علاش ؟

شريفة: حيث كانوو كيجرو البنات و ينعسوو معاهم بزز ( شافتوو وقف و ضرب الكوافوز برجليه .. عاطيها بالظهر .. كيغلي بوحدو ..! ) كنت كنسمع صوتهم و كنشوفهم .. كينعسوو بنت مع بنت و ما كدوزش عليها غير وحدة .. بنات هما ..! ( تنهدات بقوة ) ما بقيتش كنقدر ننعس خايفة تجي نوبتي حتى أنا شي نهار .. و كن قاسوني كن قت٠لت شي وحدة فيهم ..! لقيت الكارو هو الحل .. فلول بغيت غير نجرب و نعرف باش كيحسوو هاذوك لي كيكميو و من بعد ولى بلية كنرجع ليها فينما تزير عليا الحال و ضياقت بيا ..!

رخى يديه حتى تضربات مع فخضو و ضار عندها مأزم من جهتها .. ما تخيلش تكون دوزات هاذشي كامل ..! واخا فالواقع كيشوف ما كثر و دازو عليه حالات كفس منها .. و لكن نوارة الحدود ما قدرش يتقبل تكون عاشت و قاسات لهاذ الدرجة ..!

حكيم: و داك الزا** الرعواني فين هو من هاذشي كامل ؟( سكت شوية و رجع قال ) و كَبيرة ؟ هاذيك أول وحدة غيعيطولها ..!

شريفة: كبيرة نكراتني و قالت لهم تستاهل و هاذيك غير ق*** و تدير ما كثر ( عوجات فمها باستهزاء ) و إلياس قبل من آخر جلسة جا عندي .. بكيت عليه و عاودتلوو القديم و الجديد ..! بست ليه رجليه يخرجني من تما و نعطيه لي بغى ..!

حكيم:( حرك صبعوو بقلة صبر بمعنى كملي ..! )

شريفة: جا هو و المحامي .. عطاني وراق سنيت عليهم و قالي غيرجع يخرجني بشرط نتزوجوو .. قبلت و مور شي يوماين هكاك .. طلق الله سراحي ..!

حكيم: الوراق هما الكمبيالات لي كنتي هضرتيلي عليهم ؟ كان شادك بيهم ؟ ولد الق*** ( قلب وجهوو بزق فالأرض مغذذ )

شريفة: كان فيهم 500 مليون .. واخا نبيع راسي ما نجيبهالوو .. من مور شهر و هو مقابلني بالدوا حيث مرضت بزاف .. بغى نتزوجوو و أنا كنت باقى قاصرة و باش نتزوجو ضروري ما تكون كبيرة و تمشي معايا للمحكمة و يسولني حتى أنا القاضي واش قابلة .. راك عارف الاجراءات ..! ( ضحكات ببرود ) طلبات منوو الملايين و ساومات فيا بحال يلا كتبيع فبقرة و باها د أسية من مور ما شاف الفلوس لي خذات لوخرى .. ناض تداعى مع إلياس باغي بنتوو ..!

حكيم: القوا**دة ..!

شريفة: و من هاذشي كامل كان طامع حتى هو لا غير .. و طحت على إلياس بغسيل الفندق .. حط كثر من داك ثمنية د المليون لي تبلى عليا بيها ..! المهم تفاهموو بيناتهم بلا ما نحضر أنا ..! تنازل ليه على أسية ..! بقات بكنيتها و لكن حنا لي مكلفين بيها بالقانون و هو خذا فلوس بلاصة بنتوو ...! ( مصات شنافتها و قالت ..! ) ناض صداع كبير بين الخوت و تقاطعات العائلة بيناتها فاش عرفوو إلياس تزوج بيا ..! ( قلبات عينيها بملل ) فالمغرب الراجل كتتزوجيه هو و عائلتوو .. الحرب و القرطاس نايض على العروسة و كلشي كارهها تقول دايا لهم مولاي الحسن و أنا من السعدات عليا يجمعوو زبلهم عندهم ..!

حكيم:( عوج فموو باستهزاء مكروازي رجليه و متكي على الحيط كيسمع ..! )

شريفة: دوزت الليلة د عرسي سكرانة و كانت أول مرة نجربوو .. و منين فقت فالصباح و عرفت كلشي تسالى

تنهدات بقوة ما ناوياش تدخل فالتفاصيل و حتى حكيم من ملامحوو بانلها ما باغيش يسمع شي حاجة على داك الموضوع ..!

شريفة: دازت عندي كنازة و ما بقيتش كنصحى .. فكل مرة كيبغي يقرب مني كيعطيني نسكر و بقى معايا حتى أنا وليت كنطلب الشراب و رجع عندي بحال عصير

شريفة: مرضت و كرهت راسي لدرجة ما تقدرش تتخيلها و مو و ختوو زايديني بهمهم حتى هما .. صبرت حتى بغيت نطرطق و فلخر درت سطوب و قلت مالي على حالتي ؟ دابا تزوجنا و لي عطى الله عطاه .. بلاصة ما نتفقص على كلا٠ب د الخلى .. غنعيش حياتي بفلوسوو و أنا لي غنسيرو ماشي هو ..! تفركعت على الخرا كامل و ما بقيت كنحشم من حتى واحد .. تعلمت يلا ما خرجتش عيني و عضيت بسناني على حقي ما كاين لي يجيبولي ..!

حكيم:( حرك راسوو بالايجاب ) كاينة ..!

شريفة: كانوو كيشوفوني كنكمي .. نشرب و نسب قداموو كيبغيو يطرطقوو ما عارفينش ولدهم سبابي فديكشي كامل و يلا هضر غنهبطلوو وجهوو يلا كان عندو شي وجه علاياش يحشم بعدا ..!

حكيم:( تبسم بلا خاطر ) القطوط لي كيقمشوو ..!

شريفة: عشت معاه حتى الخير ما ننكرش .. دوزلي البيرمي .. تكلف بأسية بكلشي لها و حسبها بحال بنتوو .. لي قلتها كتحضر ... قاديت سناني و اي حاجة بغيتها و لكن ما كانش كيخليلي السانتيم هو اللخر و فوقما نقولوو بغيت نقرا كندابزو .. ما باغينيش ندير ديبلوم فيدي و شي حاجة ديال الفلوس علاياش نرجع .. خاص نبقى ديما تابعة ليه .. حتى باش نخرج بوحدي و نتلاقى بالناس ما كيخلينيش و ما كيناش شي حاجة سميتها نعتب برا الفيلا بوحدي و لا مع أسية ..! صافي لقيت الفيس كنتلف فيه مع البنات و واحد الوقت كنت كندير لي لايف بزاف .. كنسمعلهم و نعاونهم بلي قدرت عليه .. حتى تعرفت على وحدة على طريق الجروب .. كانت واحلة ديال بصح .. عاونتها و درت جهدي كامل معاها .. لي دزت منوو ما كنبغيه لحتى وحدة كيفما كانت ( سكتات كتشوف فيه )

حكيم:( هز عينوو ) غير كملي .. أنا كنسمع لك ..!

شريفة: وقعوو مشاكل بيني و بين إلياس

ضورات عينيها كتفكر واش تعاودلوو كلشي و لا تنقص شوية .. فلخر هزات كتافها بلا مبالاة .. شنوو غيوقع كاع .. كثر من لي وقع ؟

شريفة: أنا من لول و فعز المرض شرطت عليه الولاد هما لي ما نولدش و لا معاه لا مع غيرو .. و حتى هو قبل و ما كان عندو حتى مشكل ..! ( شاف فيها هاز حجبانوو و سكت مخليها تكمل ) و فلخر بغى يتعشى بيا نضت تغذيت بيه .. بخلاصة بغى يحملني بزز و وهمتوو بلي حيدت الوالدة ..!

حكيم: ياك ما كتخرجيش بلا بيه ؟

شريفة: كنهرب ( رمشات بعينيها ) شحال من مرة هربتلوو و ردني بالتهديد .. و حتى الفلوس لي قاطعها عليا كنت كنخليه حتى يسكر و نهز لي قدرت عليه و نخبع ..! المهم فاش ساق الخبار تزوج عليا بنفس البنت لي عاونتها و تحاربت معاه عليها ( باستهزاء ) دخل صاحبتي ضرة عليا ..! و هذاك الولد ديال دار الشباب خوها .. ما غنقولكش أنا بريئة .. انتاقمت منهم كاملين و ما تطلقت حتى رديت دقتي ثانية مثنية و باقي نتفرج فيهم كاملين و هو ما رضاش شنوو وقع لختوو و جاي عندي يتبوزا عليا

حكيم: نهار عيطتيلي و جيت عندك للرباط شكون ضربك و دار فيك داك الحالة ؟ ( هز حاجبوو ) إلياس مريض بيك على هاذ الحساب كي درتي تطلقتي ؟ و هاذ صاحبتك شنوو وقع معاها .. شرحي مزيان نفهم ..!

شريفة:( مصات شنافتها و ردات كتلعب فصباعها ) تطلقت بزز منوو و عرفت بلي الكمبيالات ما عندهم باش ينفعوه صافي هذا ما كان

حكيم: متأكدة هاذشي لي كاين ؟

شريفة:( غلباتها الضحكة و قالت ) ا لاااا

شريفة:( غلباتها الضحكة و قالت ) ا لاااا ( عضات على فمها كتفكر كيفاش تقولها ) ففف دابا

حكيم:( هز حاجبوو فيها ) شنوو قلنا على الكذوب ؟

شافت فالسمطة لي مليوحة فالأرض حدا الناموسية و رجعات حطات يديها على فخاضها و جنابها لي باقيين ما بردو لها .. و بابتسامة صفرة رجعات شافت فيه .. هو لي متبعها و عارفها فاش كتفكر ..!

شريفة: النهار لي عيطتلك كان تلاح فيديو ديالي كنشطح فيه فعرس إلياس و ناض الصداع بيناتنا .. ضربني و اغتاص٠٠بني .. لقاني مهرسة من رجلي و دار فيا لي عجبوو و البنات لي كيعاونوو فالفيلا هربوني من تما و جيت للرباط ..!

قلب وجهوو كيسب ما خلى فيه غير لي نسى ..! و تا هي تسناتوو حتى كمل عاد رجعات تعاود

شريفة: فاش تلاقيتك و طلبت تيليفونك شفت ميساج ديال كريمة و عرفتك مزوج و عندك الولاد .. ما بغيتش نكون بحال نجاة حتى أنا و بعدت عليك .. واخا كان خاصني نشرحلك قبل ما نبلوكيك و لكن

حكيم:( هز راسوو ) باقي ما جاوبتيني ..! كي درتي تطلقتي ؟ و البنت الثانية شنوو وقع معاها ..!

شريفة: نجاة بقيت كنحفر لها حتى بعدات على عائلتها كاملة .. بقات بوحدها و جربات لي كانت كتعايرني بيه تا هي و داك خوها كنت قلت لإلياس بلي تهجم عليا و نوضوها بيناتهم .. و عطيتها عشوب على يد حماتي و حملات بيهم .. كنت عوالة ندخلها للحبس بأي طريقة و من مور ما رفعت بإلياس دعوة د الطلاق و درت شكاية على الضرب و دخلت حتى الجمعيات فالخط .. و رجع قلب عليا كلشي و ما شديت منوو لا حق لا باطل .. نضت درت حنة يدي و انا لي تكلفت بيه ..!

حكيم: هاذ حنة يديك أنا بغيت نعرفها ..!

شريفة: دابا نتا غتعرف فجميع الأحوال .. اللهم تسمعها من عندي ..! ( سكتات شوية و طلقاتها لوو فوجهوو ببرود ) سيفطت لي يغتا٠٠صبوو كيفما دارلي ..! صوروه هكاك و بداك الفيديو هددتو و طلقني واخا فلول كنت عوالة الولد لي غتحمل بيه ضرتي هو لي غيجيب طلاقي .. يطلقني نتنازل لها على الدعوة لي غنكون رافعاها عليها ..!

حكيم:( رمش عينيه بثقالة و هز يديه وقفها ) بلاتي بلاتي ..! عاودي شنوو درتي ؟

شريفة:( بلقات عينيها فيه ) لي خاصوو يتدار .. هو لي ما بغاش يبعد مني

عضات على فمها فاش شافتوو ضحك و رجع جمعها .. عرفاتوو عجبوو الحال و جاتوو على قلبوو و لكن ما بغاش يبين ..!

شريفة: باش ما تمشيش بعيد .. سيفطتلوو ربعة د الدراري شدوه و صوروه فيديو .. بحال يلا ( قلبات عينيها ) دايرينلوو اللعيبة فالجعيبة هههه .. و لكن هما ما دخلوو ما خرجوو ( خرج عينيه فيها تا غلباتها الضحكة ) غير صوروه و مونطاو الفيديو مزيان .. تشوفوو تحلف عليه حتى بصح ..!

حكيم:( رد بعينين مبسمين ) تبارك الله على القطاطعية ..!

شريفة: و ضرتي .. درتلها قضية نصب و تزوير و قبطوها و هي كتشد الفلوس بيديها .. يعني القضية مضموسة .. موسيو أحمد برادة لي تكلفلي بيها و رفع عليها دعوة بلي ناصبة عليه فشي أرض و كتقول راجلها غيجيبلوو الوراق و هي غير كتجبد منوو الفلوس و شي أرض ما كاينة ..!

حكيم:( زير على جبهتوو لي عاطياه الصداع ديال بصح ..! ) شكون هاذ أحمد برادة عاود ؟

شريفة:( مصات شنافتها التحتانية و ردات ) ويلي علاه ما قلتش لك ؟ سي برادة هو باباه ديال خطيبي ( بدلع عوجات فمها ) مهههههدزي لي شفتي معايا فالقهوة داك النهار هو و إلياس .. دوى فيا و بغاني للزواج نتا مول الخير ..!

حكيم:( رد باستهزاء عارفها كتطنز ..! ) هو داوي فيك و أنا راشمك أ مدام ..!

شريفة:( رجعات شافت فالسمطة ) وا هو من ناحية راشمني راك راشمني بكاع اللوانات ( هزات عينيها فيه ) الله يزازيك ..!

******

بجلابة د الكاشمير فالكحل و الرمادي جالسة فوق الكرسي حانية راسها .. مرة مرة تجر الفولار لي كيزهق لها و كيبان منو شعرها الزعر من التحت ..! حاطة يديها على كرشها كتضور فعينيها لمكحلين ..!

كريمة: يانا جيت gاصداك الشاف و المgصود الله ( هزات طرف دالشال غطات بيه نص وجهها و بدات كتبكي ) يانا غير ولية مgطع بيها الحبل على موضعها و مولا دارها .. مالgيت عندمن نصد من غيرك ا سيدي ..!

رد العميد الممتاز لي جالس مقابل معاها فبلاصتوو ..! و لي هو الشاف ديال حكيم ..! من وجهوو كيبان معقول و دا و جاب فالزمان .. غير من الشيب لي فراسوو ..!

العميد : شي مشكل مع سي أمغار ؟ ياك لباس ا بنتي ..!

كريمة:( ساست نيفها فداك الشال و الكحول داع فعينيها شوية ) يانا ا سيدي حبلة و هازة منوو بنية فكرشي .. و ها هي سايرة تسمع فينا و تتgلب موجعة بحال مها ..!

العميد: فراسي ا بنتي .. تتربى فعزكم ان شاء الله ..!

كريمة:( ردات بتنهيدة ) يلا gبل علينا باها لي كاعد يدكدك فيا و يانا حبلة و ( رجعات هزات شالها ) طلgني ا سيدي طلgني و لاحني .. و يانا سايرة نضور و نعدد عليه .. شكون يكون بيا يانا و تايمة

العميد:( عقد حجبانوو مقاطعها ) طلقك ؟؟

كريمة:( خرجات عينيها و قالت ) يلا راني سايرة نكذب عليك بغيت ربي يرزيني فتايمة ( ضربات على فخاضها ) gالي سيري راك مطلgة و حرمتك عليا و ماشي راجل يلا رديتك و يانا ما لgيت لعندمن نصد من غيرك ا سيدي .. نغوت عليه فالنيميرو ديالوو و نgيل نعيط و نسيفط فالمسجات و لا هو يرد عليا .. ساير يخسر فلووسنا على الكل٠بات .. باغي يgتلني بالغذايذ

العميد:( رد بتنهيدة ) ما منحقوش يطلقك و نتي حاملة و هو عارف هاذشي ..! المهم غنعيط عليه يجي لعندي و نهضر معاه .. هاذشي ماشي ديال سي أمغار .. من نهار عرفناه و هو معقول و يعول عليه الواحد ..!

كريمة: الصحااااب خرجوو عليه ا سيدي ( وقفات بغات تبوسلوو يديه و هربها ) يانا مزاوكة فيك لما دوي معاه .. يانا ما بgالي حد حتى من دارنا سايرين يضربوو بيا المثلة و باغيني نخوي عليهم .. ما gادين يهزو جوج نفوس

العميد: الله يحسن العوان .. غنهضر معاه ا بنتي و يكون خير ان شاء الله

كريمة:( ناضت خارجة كتدعي معاه ) الله يشدلك فالصحيحة .. الله يخليك ديما لفوg لفوg و يغلبك على العدوو ..!

شدات عليه الباب و مدات يديها كتمسح فدموعها .. هابطة مع الدروج بالشوية عليها كتحلف حتى تردو بغى و لا كره ..! حتى وصلات للباب باش تخرج و هي تلمح حسام صاحب حكيم .. واقف كيكمي فالجهة الثانية و عينيه مع وحدة هازة الصاك دالحمام و لابسة واحد مولاتي جلابة كتبين كلشي .. 3D ..!

حسام:( صفر و قال ) ا بااا بااا بااا ( شافت فيه البنت كتميع بعينيها و هو يعض على فموو ) الصدر سداري يتوسدوه الدراري و الطرف ديالي لي قرب ليه نكويه بالعلالي

....: وا سير الله يعفوو عليكم ما تقيلوو حتى وحدة ..!

حسام:( رد كيضحك غير هبيل و قالو ليه زغرت .. ما داهاش فهضرتها نهائيا ..! ) الله على زبيدة الله .. الله على عسيلة الله ( بصوت عالي ) ودوووووقني ابا حميد دوقنييي

كريمة:( مشات كتسلت ) و يانا كنgول لاش مولا داري مكني عليه " كازانوفا " ( ضورات راسها ) احياني عليكم يا الكنس الgصيف ..!

بهدوء ضور راسوو كيكمي حتى لمحها كتسلت .. عقد حجبانوو باستغراب ..! الليل طاح و نورمالمون ما غاديش يخليوها تدخل .. قال يمكن جات تتعرض لحكيم بالي تتلاقاه خارج و فاش عيات مشات بحالها ..!

رمى البينتة د الكارو زطم عليها و قطع الشانطي يرجع لخدمتوو .. حك كرشوو و ضرب على كتف البوليسي لي فالباب كيقشب معاه ..!

حسام: ا سعدات الخرقة لي كتحك الفرقة ا با السليماني ..!

وصلات لراس الشارع كتنهج بالعيى لقات صاحبتها المعلومة واقفة كتسناها .. تسالموو مع بعضياتهم بوسة تابعة ختها حتى طابولهم الحناك ..!

كريمة: اهياوين ا خويتي ( رشقاتها للكتف ) تي فين صديتي و غبرتي على صحيبتك .. خليتيني كي الراس المgطوع ..!

ردات عليها بابتسامة كتمد لها واحد القفة : وا غير مع الوقت اختي .. راحنا جالسين مع عكوزتي هاذ ليام .. أنا غير عرفتك قريبة ليا جيت نجري موراك .. شدي سخرتك بعدا ..!

كريمة:( فتحات القفة كتطل و باستغراب قالت ) تي آش سايرة تgولي ؟ شمن سخرة هاذي ا خويتي ( بانلها طرف د اللحم مغلف فميكة .. ضحكات و شافت فيها ) تفكرتيني يتفكرك الخير وا هاذي لي ما كنت عالمة عليها .. دروكة نمشي نشرملوو و نكطعوو

قاطعاتها مخرجة عينيها : عنداااااك ..! ( ضارت بين جنابها و قربات لها ) هاذي سخرة كان عطاهالي عبد العالي .. كان كيخدم لك فيها و لاباس لي كملها لك قبل ما يشدوه ( بتساؤل ) ما عرفتيش بشحال حكموو عليه ؟

كريمة:( هزات يديها ) شوري عليا اخويتي .. و لاش يالاه gايلاها ليا دروكا ؟ مخلياني هابلة غير بوحدي و سايرة نضور على لي يهد لمولا داري لكتاف و نتي كاعدة على الكنز تحتك

ردات بهدوء : وا غير تشغلت مع الدراري و مشى من بالي كاع .. دابا سمعيني مزيان و حلي وذنيك فشنوو غادي نقولك ..!

كريمة: هاني .. غير طلgينا ..!

شيرات لها للقفة و قالت : هانتي هذا لحم .. غادي تمشي تديريه فالثلاجة ( بتأكيد ) عنداك تمشي تحطيه فالفريكوو يجمد .. راكي تمشي تقتليه .. عبد العالي كيأكد و يعاود تخليه غير فالثلاجة .. راه كاتبلك فيه و خادموو بالمزيان .. قالك مولا دارك غيبقى ديما معصب و راحتوو مقلقة و زيدي عليها حريق الراس و شحال من حاجة .. المهم راه ما يتهنى غير يلا كان حداك ..!

كريمة: اييه و شنوو ندير بيه ؟

حركات يديها بهدوء : هانا جاياك للهضرة .. غادي تخليه فالثلاجة لتحت غير على ما تلقاي كي تديري تطيبيه ليه .. ضروري خاصو ياكلوو .. و نتي فاش تلقاي كي تديري تعطيهلوو .. ديري ليلة قبل و حطيه فشي خرقة د الثوب بيضة

كريمة:( ردات بفهم ) يلا كنت غادي نطيبوو اليوم .. ندير هاذشي البارح زعماكينات .. هاذشي لي كاعدة تgولي فيه

هزات راسها بالايجاب : ايييه .. غتهزي هاذ اللحم و تديريه فخرقة د الثوب بيضة .. تلويها عليه و تحطيه تحتك فالسليب .. تبيتيه ليلة كاملة معاك و الغذ ليه تطيبيه ( زادت كتوضح كثر ) غادي تديريلوو بحال أولويزة

كريمة:( جمعات القفة عندها و ردات بثقة ) اييه يانا فهااامتك ( شافت فالساعة ) يالاه نتلاgاو مرة ياخرة و يعطيك الخير ا خويتي ..!

الطريق كاملة و هي حاضية عدنان فوقاش يقرا المساج ديالها و يرد عليها ..! نص عقلها مع شريفة و النص الثاني معاه .. جالسة فبلاصتها بهدوء تام ما مسوقاش للشطيح و الغنى لي قالب الكار موراها ..! حتى طلع لها بلي قراه مخليلها vu ..! شعلات فيها العافية كتسنى غير فوقاش يجاوبها ..!

خمسة .. عشرة .. عشرين دقيقة و والا رد منوو ..! تغرغرو عينيها و تزنكات تا رجع وجهها بحال ماطيشة غتطرطق ..! عيات صابرة و فلخر كتباتلو مساج ..!

أسية: سمحلي راه غير بغيت نسيفط الفيديو ديالك لصاحبتي و غلطت و تسيفطلك نتا ..!

خرجات من الكونفيرساسيون بالزربة و مشات كتفرج لفيديو قديم ديالها هي و شريفة كيغنيو فيه ..! تسنات حتى كمل الفيديو و بفضول بغات تدخل للصفحة ديال عدنان .. لكن لقاتوو مسحها من الأصدقاء و رد الباج بريفي ما بقى كيطلع لها والوو ..!

******************************

شريفة:( رجعات شافت فالسمطة ) وا هو من ناحية راشمني راك راشمني بكاع اللوانات ( هزات عينيها فيه ) الله يزازيك ..!

حكيم:( تحنى هزها لواها و حطها جنب ) بقاي حاضياها ..!

شريفة:( قلبات عينيها و رجعات قالت بتوضيح ) راني ما كنضحكش كنهضر معاك بصح ..! دابا هاذ أحمد برادة عاونني فنجاة باش دخلتها للحبس .. و اليوم رجع قالك خلقتلوو مشكل مع الياس و بغى يدعيه .. خصوصا فاش تلاقى بمهدي داك النهار فالقهوة و عرفوو شكون ..! و فهم بلي ضحكنا عليهم

حكيم:( غمض عينيه و حرك صبعوو بشكل دائري ) عطيني المفيد ..!

شريفة: المفيد ا سيدي قالك بغاني نتزوج بولدو و نبعد داك صاحبة ختك على ولي العهد سيدي مهدزي ..! يلا قبلت غادي يفكني من الياس و ما عمرو يوصلني و يلا ما قبلتش لي زابيل ديالنا و مساجاتنا فين تافقنا و شرحتلوو شنوو يدير .. مسجلهم عندو و غادي يعطيهم ل إلياس و يدعيوني و هو دار سيرتيفيكا فالطبيب بلي حمق و ما عندي ما ندي منوو لا حق لا باطل ..!

حكيم:( فتح عينيه فيها ) و فوقاش كنتي غتعاوديلي هاذشي ؟ حتى تخشي كرك فشي كارثة ..!

شريفة:( ردات بطنز ) حتى تلقاني فوق العمارية كنشالي بيدي و نقولك كولشي جا بالزربة غير سمحلي ..!

حكيم:( هز حاجبوو ) شريييفة ..!

شريفة: صافي هانا ..! دابا إلياس على ما فهمت من داك عمر ..! بلي طلق نجاة و طاحلها البيبي و هي باقية فالحبس ..! هاذشي لاش خارج فعودي و باغي يهضر معايا .. عند بالوو فاش غنعرف غنقبل نرجع معاه و لا ما عرفت ليه ..!

حكيم:( زفر النفس بصوت مسموع ) دابا بلا كثرة اللغى .. نساي عليا كلشي هاذ الساعة .. خلينا مدوزين الصيف طرونكيل و فاش نرجعوو أنا غنتكلف لك بهاذ ولاد الق** ( لعب بلسانوو ففموو ) يلا كنتي غترتاحي منين تشوفيهم فالحبس ( هز يديها كيعد لها ) كَبيرة .. خالك .. إلياس .. هاذ برادة حتى هو ..!

شريفة:( تبسمات و قالت مقاطعاه ) غتقدر تدخلهم زعما ؟

حكيم:( ببرود رد كيجبد تيليفونوو لي كيصوني ) حسبيهم فيه ..! الوو وي ( سكت كيتصنت ) واخا أنا جاي ..! ( قطع و شاف فيها ) غنمشي نشوف داك خينا و نرجع .. تحركي فالدار كيفما بغيتي ما عندك مناش تخافي شوية و أنا معاك ..!

شريفة: علاش أنا بقاولي الرجلين لي نوقف عليهم ..!

حكيم:( تبسموو عينيه و رد بهدوء ) بقى فيك غير اللسان .. هذاك ما كيعياش عندك ..!

شريفة:( ميقات فيه و ردات بينها و بين راسها بلا ما تسمع ليه ) باقي خدام عندي حتى الحتشون بلاتي و تلقى الشلال كيشرشر ...!

حرك راسوو بمعنى تهلاي و خرج من البيت مخليها متكية كترتاح و راسها غيطرطق عليها بالحريق د البكى و السكرة ..! أما هو مشى نيشان لدار الشباب لقاهم كيتسناوه ..! عمر جالس فوق الكرسي .. يديه مهزوزة مهرسة و وجهوو كولوو فاصمة .. غير شافوو بدا كيغوت .. كيخرج و يدخل فالهضرة ..!

قرب منوو بهدوء كيسمع ليه بعينين حومر و راس ثقيييل .. حرام واش بغى يسكت كيترطى غير بوحدو لاسق على حكيم بالكرسي ..!

حكيم:( بنبرة صوت رخيمة قال ) بعد شوية لهيه دابا يسحابوك غير كا تمص ليا ز**ي

للحظة كلشي سكت حتى تسمعات هضرة حكيم بالجهد فالصالة ..! تزنك عمر حتى بغات الارض تتشق و تبلعوو .. موقف لا يحسد عليه ..! أما لي ضايرين بيهم بزز شادين الضحكة ..!

حكيم:( قلب عينيه بلا مبالاة و بثقالة هز يدو شيرلوو يتبعوو ) أجي نهضر معاك واحد جوج كلمات ..!

بتردد ناض كيضور فعينيه و مشى موراه مبعدين على البقية ..! جبد حكيم كارو شعلوو كيكمي فيه و بجدية قال ..!

حكيم: باش تتر٠جل على بنت و تقرب منها و هي كتبدل حوايجها .. خاصك تكون ولد الق***

عمر:( قاطعوو ) هذاك حساب بيناتنا .. نتا ما عارف والوو و تدخلتي فشي حاجة ما فاهم فيها والوو

حكيم:( هز حاجبوو ببرود ) فاهم و عارف كلشي ( شاف فيديه لي مهرسة ) نبهتك ما تقربش من حاجتي و دابا غنعاودها لك آخر مرة

عمر:( رد باستغراب ) هي أصلا يالاه تطلقات و أنا كنعرفها

حكيم:( بنفاذ صبر كرر هضرتوو بصوت عالي شوية ) غنعاودها لك لآخر مرة ..! يلا راجل ختك ما طلعش را٠جل معاكم ما تجيبش سبتك عليها ( حرك يديه بهدوء ) نسى بلي عرفتيها شي نهار .. كيفما ظلماتك حتى نتوما ظلمتوها ..!

عمر:( تنهد بصوت مسموع ) فففف

حكيم: المهم ..! أنا هضرت معاك راجل لراجل ..! ( زير على كتفوو حتى شاف فيه ) باقي دري صغير و نقي .. بعد على هاذ القلا** كامل باش ما تجيبهاش فكرك ..! ( لاح الكارو للأرض و زطم عليه و بتحذير قال ) مرة اخرى توصلها غنح***لك عروق طاسيلتك كاملة قدام عينيك .. هانا علمتك ..!

عمر:( جمع حجبانوو ) راك تعديتي عليا و عيطولك تطلب مني السماحة بلاصة ما ندعيك ..!

حكيم:( رد باستهزاء كينعث ليه بصبعوو ) ها الكوميسارية و ها صحابك و الشهود معاك .. جرهم و سير دعيني راني تقبتك ..!

خرج بحالوو من بعد ما وصل الرسالة لي جاي عليها .. مخلي عمر مصدوم فيه .. من ديما كيشوف حكيم من بعيد .. بيناتهم غير السلام السلام .. لكن كيعزو و كيحتارموو بزز منوو من الهيبة لي داير لراسوو ..!

و اليوم أول مرة يشوف وجهوو المقطع و الموقف لي تحط فيه معاه هاذ النهار .. خلاه يخاف على راسوو كثر و كثر ..! لأنوو حس بلي حكيم ما عندو ما يخسر و يقدر يمشي عليه للحبس غير يلا فكر يقرب لشريفة ..!

****************************

واقفة بزز فالحمام مقابلة مع المراية و مهبطة سروالها ..! حاطة حداها الثلج مكعبات فبانيوو .. كتدوز على فخاضها و جنابها لي زراقوو ..! حاسة بلحمها هبط و طاب بالعصا غير كتقيس فيه كتغوت .. عينيها مدمعين بالبرودة و الحريق و لي فيها ما هناها ..!

شريفة: احححح و لو كان ما نعرفك أ زكي نقول غير مدفع ( قلبات عينيها كترفرف بيهم ) فينما تبانلك شي كارثة جريلها و لسق فيها .. هذا هو المضنون فيك ..! ايوا الله يقرب الشوكة للزك العريان ( مع كملات هضرتها تفكرات إلياس و الفيديو لي غيتحط ..! خرجات عينيها ) ناري نسيتووو ..! قوووودتييها أ شريفة ( غلباتها الضحكة ) هههههه ويلي غيشوفوو قزيبتوو المزغبة كثر من حياتي ..!

حكيم:( جغم من كاسوو د القهوة .. حاط رجل على رجل .. كيشوف لبعيد ..! ) المشكل أ وليد ما باغاش تدخل لمركز معالجة الادمان و حالتها صعيبة شوية ..!

وليد:( تنهد و بجدية قال ) دابا ما غنهضرش معاك بصفتي صاحبك .. غنهضر معاك كطبيب ..! الإدمان كيفما كان نوعوو صعيب على الواحد يتحكم فيه بوحدو .. و فهاذ الوقت بالضبط خاصك تعطيها الخاطر ا حكيم ..! خاصك تعرف بلي هي عايشة حرب لداخل واخا ما تكون كتبين حتى حاجة ..!

حكيم: واش هاذشي عاد غتقولولي نتا ؟

وليد:( شاف فيه ) نتا براسك حالتك ماشي هي هاذيك ما بقيتيش عاجبني

حكيم:( حرك راسوو و قال ) غير غيرها الله يحفضك ..!

وليد:( بقى ساكت شحال و عاد رجع كمل هضرتوو ) فالفترة لي المدمن كيحاول يقطع فيها داك المادة لي كينتاشي بيها .. توقع معاه اي حاجة ..! عينيك ما تغيبش عليها ..! غترجع تدير شي تصرفات لي نتا يبانولك الطوب د الكلاخ و لكن هي عقلها ما كيبقاش يريزوني فخطرة و كيجيها ديكشي عادي .. ما كتبقاش تتحكم فراسها .. كيكثرو التهيئات و تقدر تتخيل شي حوايج ما كاينيش ..!

حكيم:( ساكت ساهي ..! )

وليد: شحال من وحدة كتبغي تنتاحر كاع و كتقولك لا انا غير تابعة راجلي مثلا ..! هاذشي علاش كنصحوو بالطبيب و المراكز كثر .. باش المدمن كيكون محمي من راسوو هو اللول .. مشدود عليه فبيتوو و جالس تحت عينينا .. ما عندو حتى طريقة باش يآذي راسوو ..!

حكيم:( هز عينيه فيه ) و فنفس الوقت كيشوف حتى الناس لي مدمنين بحالوو .. و واحد كيبدا يموتيفي الثاني .. كيفتحوو قلبهم لبعضياتهم فجلسات و كتسمعولهم حتى كتلقاو المشكل الرئيسي فين هو و كتحاولوو تفكوو العقدة درجة درجة ..!

وليد:( حرك راسوو بتأييد ) راك عارف لي كاين .. و حتى منين كيكون الواحد بعيد على الضغوطات ديال الدنيا و مشاكلها .. كيسهال عليه يتغلب على نفسوو

حكيم:( دوز يديه على راسوو ) و غير يرجع للمشاكيل و حريق الراس كتبدا تضعاف نفسوو بالشوية و كيبانلوو غير الشراب .. حتى هذا ماشي حل و خصوصا ليها هي ( هز الكونطاكط و التيليفون ) هاذشي راني طايب فيه ا با وليد .. عيطت لك على شي كالمون و لا دوا كتكتبوه لهم تعطيهلي ..!

وليد: نكذب عليك .. غنعطيك و لكن حتى هما غيضروها و ترجع يلا ما شرباتهمش ما تنعسش .. تحاول معاها تقطع شوية بشوية .. يلا كتشرب يوميا ترجع تشرب يوماين فالسيمانة مثلا ..! و نتا غادي و كتنقص لها و عمرلها وقتها .. تعيى و تطيح تنعس ما تفكر فوالوو

حكيم:( تنهد كيضرب بالساروت فوق الطبلة ) يكون خير ..! هو هذا نخليك هاذ الساعة ..!

وليد:( تسالم معاه ) وا ما تغبرش علينا .. ضرب مرة مرة عندنا لفاس .. ناسها توحشووك ا خاي ..!

هزلوو يديه بمعنى ان شاء الله و توادع معاه راجع للدار لي جالسين فيها .. و لي كراها من عند واحد من المعارف ديالوو ..!

مسافة الطريق و كان وصل ..سمع السقييل و حس شريفة ما كيضورش فالدار ..! بهدوء قرب من بيتها و دق بجوج صباع .. منين ما سمع حتى جواب عرفها نعسات و خلاها ترتاح ..!

تكسل بتعب و مشى للبيت الثاني فتحوو و دخل مخلي الباب مردودة شوية ..! حيد التيشورط حطوو فوق الناموسية و فتح السمطة د السروال عاطي بالظهر للباب .. فين وقفات شريفة كتسلت بلا صوت حاضياه بعينين موسعين ..!

بقى بالبوكسور و ضار كيفتح الساكادو ديالوو د السفر .. لي كيديه معاه دائما للتريب كيتهز فالظهر .. جبد بوكسور جديد .. مع تيشورط و شورط قصير ..!

رمشات جوج ترميشات و مصات شنافتها كتنهد و تعاود حاضية المسائيل ديالوو ..!

شريفة:( رجعات عضات على فمها كتهضر بينها و بين نفسها غادية بالايقاع كتغني عليه ) شعل البولة حتى نشووفوو ..! قد الخبزة تبارك الله ..! عريض و فيه الركاني اححح طويل و فيه التلاوي ( تنهدات بقوة حاسة بالحرارة طالعة معاها .. و ضارت بالزربة راجعة لبيتها ) الله ياخذ فيك الحق اودي أ إلياس كيفما ضيعتيني معاك ا ولد الحرام

من بين أصعب الأحاسيس فهاذ الدنيا .. تكون بوحدك .. تطيح و ما تلقى حتى واحد جنبك ..! تعض فالصبر و توقف بوحدك مكمل طريقك و كاع العينين عليك .. كتشوف كلشي باغي يحفر لك و يطيحك .. و نتا خاصك ديما تبقى قوي و واقف بحال الجبل .. ما تعطيهمش الفرصة فين يهرسوك و يوصلوو لديكشي لي هما باغيينوو ..!

شحال ما كانت الوحدة قوية .. كتحتاج فحياتها ظهر تتكى عليه و سند يوقف معاها .. يحميها و يحافض عليها .. راجل تحس بأنوثتها حداه و ترمي عليه الحمل و هي متأكدة قادر بيها و بكاع مشاكيلها ..! و شريفة لقات فحكيم هاذشي ..!

حكيم لي من أول نهار رجعات تلاقاتوو كتحس براسها كتعرفوو من زمان .. و كتصرف معاه على داك الأساس .. واخذة راحتها و مرتاحة معاه .. يمكن حيث ذكريات الطفولة مخلياها لحد الآن تعزو و تقدرو على كاع ديكشي لي دار على ودها ..! وقف معاها و هو باقي فالعشرينات فما بالك دابا و هو راجل بذراعوو ..!

حطات يديها على فخضها حاسة بالعافية دالسخونية خارجة من دوك الشحطات .. غمضات عينيها تا هبطات دمعة خفيفة جنب عينيها .. كتفكر كن وقع لها هاذ النهار شي حاجة بسباب الشراب .. فين غتوصل ..! تنهدات بصوت مسموع و تمتمات برجفة من الاحساس د الندم و الخوف لي دخل معاها للعظام ..!

شريفة: يااااا ربي عاونني و عطيني الطاقة من عندك .. راني عييت و بغيت نرتاح يا ربي ..!

غير كملات دعائها نعسات بتعب .. بعد يوم طويييل .. ما بقاش فيها عظم واحد صحيح ..! و واخا هكاك ما هازاش فقلبها من حكيم على الضرب لي ضربها .. حيث عارفة راسها تستاهل ما كثر و متحملة مسؤولية شنوو دارت و منين خرجات لها طريفة و جات غير فيه هو راه لبااااس ..!

🌞 يوم جديد 🌞

فتحات عينيها على صوت الدقان فالباب ..! بتعب تكسلات فبلاصتها .. مهلووكة بالمعقول .. يديها هي اللخرى ثقيلة عليها .. حسات بالفزاك تحتها و ساطت النفس معصبة ..!

شريفة: اوووف اوووف اوووف .. صبحنا على الله .. الخرا المخرنن تفوو ( جهدات فصوتها باش يسمعها ) أنا فقت صافي

طرطقات ظهرها و تجبدات مزيان .. عاد ناضت فتحات لافاليز ديالها كتجبد ما تلبس و لي برودوي ديالها د الدوش باش تمشي تبدل عليها هاذ الحالة ..!

هزات لي غتحتاج و جرات ليزار غطات الطبعة .. عاد خرجات من البيت ماشية للحمام لي جاي مقابل مع الصالة ..! دايرة عليها بينوار ديال الساتان مغطي شوهتها ..!

بانلها جالس فالصالة متكي براسوو لور مغمض عينيه و السهات حداه .. استغربت من حالتوو .. و بهدوء قالت دايزة من قداموو

شريفة: صباحوو ..!

حكيم:( ببحة صباحية رد كينحنح ) صباح الخير ..!

دخلات دوشات غير لحمها .. جامعة شعرها للفوق كتدندن بهدوء عاطية الخاطر لراسها ..! كملات و جمعات الدنيا و صبنات حوايجها لي تقاسوو بيديها .. ناشراهم فالبالكون ينشفوو ..!

بابتسامة خرجات عندو دايرة سفنجة لشعرها .. لابسة بيجامة د الدار بشورط حد الركبة و تيشورط نص كم ..!

شريفة: نفطرو ؟ ( حطات يديها على كرشها ) كريشتي كتغني الطرب الاندلسي على الصباح .. فيا الموووت د الجوع

حكيم: ما تعشيتيش لبارح .. دقيت عليك كنتي نعستي واقيلة

شاف فيها بنظرة هادئة شككاتها فراسها واش يكون حس بيها فاش كانت كتجسس على ممتلكاتوو الخاصة ههه ..؟ و لكن رجعات قالت لي فيه الفز كيقفز راه كيهضر عادي أنا لي منوية بوحدي ..!

شريفة: امم عييت بزااف ما حسيتش براسي ( شافت جهة الكوزينة ) كاينة شي حاجة تما نقادها و لا والوو ..!

حكيم:( هز يديه بثقالة و شيرلها ) سيري شوفي ..!

حركات راسها بمعنى واخا و دخلات للكوزينة .. لقات لباكيط سخون محطوط و خبيزات ديال الشعير صغار و بتي بان ديال الزرع ..! كمشات حجبانها باستغراب أول مرة تشوف كرواسة ديال الزرع ..!

رجعات فتحات التلاجة كتقلب .. لقات بواطة د الخليع باقى مشدودة و ميكة فيها البيض .. حطاتهم جنب .. هما و فروماج و الزيتون الكحل و المشرمل و أتاي حبوب ..!

قلبات على البراد و المقلة فين تطيب البيض بالخليع .. كتحرك براحتها باغى كتطلق عظامها لي ترخاو عليها ..! مدة و هي كتول و تقاد فطبلتها .. نقية فخدمتها و عزيز عليها النظام ..!

شريفة:( طلات عليه ) حكيم أجي يد الشمال كتسناك ..! ( هزات البراد د أتاي كباتلوو كاس منعنع و مداتوو ليه ) هانتا ا سيدي كاس برزتوو .. و لكن ما فيهش السكر ما كنشربوش يلا بغيتيه زيدو فكاسك ..!

حكيم:( جغم منوو و هز يديه على شكل لايك ) لا هو هذاك ( شاف الخليع و تبسم ) الله يعطيك الصحة ..!

شريفة: بالصحة و الراحة ( ذاقت و غمضات عينيها كتبنن ) امممم تبارك الله عليا و خلاص .. أودي لي عندو عندو .. البنة و لمن عطاها الله ..!

حكيم:( ضحك كيحرك فراسوو بالنفي ) معامن أنا ( هز حاجبوو فيها ) نكملوو و وجدي راسك نشدو الطريق يالاه نوصلوو فالعشية .. هضرت مع أسية قبيلة .. سلمات عليك

شريفة:( تبهجوو ملامحها و قالت ) سيفطتيها للحسيمة معاهم ؟ القطيطة غتكون خايفة بوحدها ( سكتات شوية و رجعات قالت حانية راسها على خبزها ) اااه فكرتيني بعدا بغيت نقولك واحد الحاجة نسيتها البارح

حكيم:( حرك راسوو حاضيها و هي ما كتشوفش فيه ) شنوو ثاني ؟

شريفة: احم داك الفيديو ديال لولوسة ( رمشات عينيها و هزاتهم فيه ) د إلياس زعما .. لبارح قبل ما نجي لعندك .. مور ما عرفت شنوو ناوي هو و برادة .. هضرت مع لي صوروه يحطوه فيوتيب و يشوهوه

حكيم:( طقطق بجوج صبعان على الطبلة و قال ) غتجبدي الصداع على راسك ا شريفة .. حتى حد ما يرضاها لراسوو .. غتصدقي داخلة فمعمعة ما عندها تالي ( بمعنى ما عندها نهاية ) ..!

شريفة: و لكن راه باقي ما عطيتهم الفلوس علاياش متافقين .. الفيديو ما غيتحط حتى يشدو خلاصهم .. خاصني نعيطلهم و لكن تيليفوني بقى فصاكي البارح .. ما شفتيهمش .. كاع ما لقيتوو ؟

حكيم:( عقد حجبانوو ) كتفكريني بعدا ؟ ( بزعفة قال ) جابوك بلا بيه شوفي نتي فين طوعتيه ..!

شريفة:( سكتات كتضور فعينيها .. هازة شدق د الكومير كتاكل فيه حتى لمحات شي حاجة فشكل فذراع حكيم .. قربات منوو كتشوف باستغراب و خوف ..! ) اويلي شنوو هاذشي ؟؟

حكيم:( شاف فيدوو .. كانت طبعة كحلة شكلها معوج .. زفر النفس و قال ) دابا تمشي .. مرة مرة كيخرجولي .. حساسية واقيلة ..!

شريفة:( دوزات يديها عليها و قالت بنفي شادة على جبهتها ) توكال هذا .. هاكا كيخرج فالذاث .. شمن حساسية ا صاحبي الله يهديك .. بففف المرض و صافي .. راه حتى هاذ حريق الراس د البارح و اليوم لي صابح فيك ما عاديش .. شوف غير عينيك

حكيم:( رد ببرود ) فطري باش نتحركوو

شريفة:( ضرباتوو لذراعوو ) غنضربك و الله تا غنضربك ( خنزرات فيه ) راه كنهضر مع والديك .. جاوبني بحال الناس ..! ( تنهدات ) واش خالتي حبيبة ما دارت لك والوو .. ما عطاتك حتى حاجة تشربها ؟ كاينين عشوب واعرين كيصفييو و لكن خاصك تبعهم .. ماشي غير مرة و لا جوج و تنوض نايض ..!

حكيم:( قلب عينيه بملل ) خلااااص ا شريفة من التخربيق ( شاف فيها ) هنينا ..!

شريفة:( هزات كاسها كملاتوو و قالت ) وجه الله لما سكتنا ..! زعما نتوما الر٠جال فيكم الفهامة فكوولشي كتوصلوو تال هاذشي و كيرجع راسكم يابس بحال الحجرة ( خرجات عينيها فيه ) غنهبطوو للمدينة القديمة ما حدنا باقيين ففاس .. ناخذ لي خاصني و أنا غنصوب لك شنوو تشرب و يلا خفتي على راسك نشربوو معاك كاع غير ارتاح ( شافتوو غيهضر و هي تهز صبعها ) و يا ربي تقولي لا باش نفلقك و الله تا نفلقك ا قاصح الراس ..!

حكيم:( رد باستسلام ) ديري لي عجبك غير طلقي راسك

شريفة: هي يلا نضتي جمعتي معاك الطبلة ( وقفات حتى مشات و رجعات لعندو ) الفيديو شنوو ندير فيه ؟ نمرتهم راه عندي مقيداها حتى فواحد الكارني .. هي و شحال من نمرة مهمة .. كنت خايفة يمشيلي التيليفون و نبقى الله كريم و هانا وقفت على هضرتي ..!

حكيم: نخرجوو خوديلك تيليفون جديد و عيطي أنيلي معاهم لافير كاملة ( شدلها فيديها مزير عليها بين كفوفوو ) راه قلت لك غنتكلف بيه .. هناي من هاذ الجهة ..!

شريفة:( غمضات عينيها و رجعات حلاتهم ) و أنا تايقة فيك .. واخا تفكني غير من إلياس و أحمد برادة و لوخرين ربي يخلصهم .. و راه بداو يتخلصوو أصلا ( بضحكة استهزاء كملات ) كبيرة قالك رجعات نادمة هه ..! كن لقيت غير قد هاكا ( وراتوو صبعها ) د الندامة فعينيها بلاصة الحقد لي كنت كنشوفوو حياتي كاملة .. كان يمكن نسمحلها و لكن ما تستاهلش .. طامعة ففلوسي لا غير و هذاك علامن كانت عوالة يردلي العقل " إلياس" راه تكلف و دخلها لدار العجزة داكشي لي تستاهل ..!

حكيم:( رد بنفاذ صبر ) فينما كانت غتجبد ..! ( جرها عندو و باسها فراسها ) و بمعزة با فالقبر ما يبقى واحد فيهم كيضور بساحتك .. و لي ذوقوك منوو .. غيذوقوه مضوبل ( حس بيديها ضارو على كرشوو و تخشات فيه معنقاه بحنية و بدلع كتحك حنكها مع صدرو .. تبسم و حنى راسوو جهتها ) نساي علينا الزبل ..!

شريفة:( ردات بصوت حنين ) حكيييم ..! شنوو تبدل دابا ؟ زعما فاش عرفتي شنوو وقع من بعد ما تفارقنا ؟ هاذ الهضرة كتقولها حيث شفقتي عليا ياك ؟

حكيم:( بعدها عليه حتى بان وجهها و نطحها بجبهتوو بالشوية محاول عليها و باستهزاء قال ..! ) كتسناي تبقاي فيا و نشفق عليك ؟؟

شريفة:( بكبرياء ردات ) لا و ما عاودتش لك باش نبقى فيك ( رمشات عينيها فيه بهدوء ) هو أنا أصلا لقيت الحل لبرادة بقى غير إلياس لي لاسق فيا كي لحم الراس .. و عاودتلك غير حيث غنحتاجك فديكشي لي ناوية ندير و لا نقولوو محتاجة خدمتك و واقفة عليها ..!

حكيم:( حرك راسوو و بطنز قال ) العام زييين ..! ( هز حاجبوو فيها ) كان خاص نعرف باش منين نلقاك مع هاذ ز**ي ديال مهدي و لا لقلا*** ما نذبحش اصل مك .. و تا دابا راه حتى حاجة ما تبدلات غادي تديري عقلك معايا و لا الخبار فراسك ( غمزها بثقالة ) الحاجة الوحيدة لي تبدلات هي احتارمتك كثر ..!

شريفة:( غلباتها الضحكة ) ههه علاش ؟

حكيم: حيث محاربة و قادة براسك .. تقاتلتي حتى وقفتي على رجليك .. أما لي دوزتيه ماشي شي حاجة لي غتشفعلك عندي ديريها فبالك ( حرك يديه بهدوء و هي باقى مخشية فيه ) كاملين تعذبنا فحياتنا و ها حنا عايشين فوق فيكيك ..! تا حاجة من ديكشي ما تستاهل تبقى ملازماك و ممرضاك فحياتك ..!

شريفة:( حركات راسها فالنص ) متافقة معاك و لكن ( سكتات ما عارفة ما تقول فالأخير دوزات صبعها على صدرو ) نمشي نلبس عليا حسن ..!

حكيم:( زيرها عندو و قال ) أجي بعدا .. شنوو الحل لي لقيتيه و غتحتاجي خدمتي فيه ؟

شريفة:( ضحكات ) اااه ههههه .. نقولك واحد الحاجة .. أنا كنحقد و ما نقدرش نسمح لشي حد ما صرفتش فيه العيب و هو ضرني غير هكاك ( رمشات عينيها ) طبع خايب و لكن أنا هاكا دايرة .. و يلا كنت كنعز داك الواحد راه كنعطي فرص كثيرة و نهار كنحط السطل راه كنحطوو بلا تقرقيب و كنغسل يدي عليه ..! و هاذشي وقعلي حتى مع ملاك ختك

حكيم:( عقد حجبانوو و قال ) ملاك ؟

شريفة: ااه ملاك ( بهدوء كملات ) بقات فيا فاش ضربتيها و قلبي ضرني من جهتها و لكن الشمتة لي شمتاتني ما قدرتش ننساها .. النهار لول فتحتلها قلبي و تعاملت معاها طوب د بيخير و حتى هي دخلات ناوية على الغذر

حكيم:( رد ببرود ) فاش عطيتك السمطة داك الساعة شديها و خودي حقك منها .. و تا يلا ما بغيتيش تضربيها كنتي غير تهضري و غنعطيك الأوكي على اي حاجة بغيتيها .. ما غنشدكش عليها حيث دارت معاك الفالطة ..!

شريفة:( تبسمات ) و لكن دازت على وجهك ..! المهم ملاك عطاتني الفيس ديالها باش نهضر مع صاحبتها لي مع مهدي .. و بطريقتي غادي نسل لها لسانها و نقولك .. ما كايناش شي بنت كتلسق لداك الدرجة لي شفت على واحد إلا يلا كان ناعس معاها .. و تما غنشوهها مع باها و اكيد أول واحد غتمشي تشكي و تبكي عليه هو مهدي و تما فين غنحتاجك

حكيم:( باستغراب ) فاش ؟؟

شريفة: نتا و لا شي صاحبك فشي باراج د البوليس .. يشدوهم على السرعة و بالوصاية ديالك يتزايدو معاه فالهضرة و بلعاني يقيسوو الكاميرة باش شافوو السرعة و تتهرس و تلسق فمهدي و هنا غنكون تهنيت منهم بثلاثة .. هما و باه ..!

حكيم:( تبسموو عينيه و زير على عنقها ) جنية نتي ..! هاذي براسها راها جريمة .. تخريب جهاز تابع للدولة و تعطيل السير العام و العقوبة ديالها التعويض المادي ..! يلا قالولو حط 200 مليون ثمن داك الكاميرة راه يحطها .. حيث الماطريال ماشي د البوليس .. كتولي الدولة لي مداعية معاك ..!

شريفة:( ضحكات ) وا راني عاااارفة و هاذي الطريقة الوحيدة لي جاتني البالي باش نرد دقتي .. أولا شادية غتشوه مع باها و الرعب لي عيشاتني فيه على السحور غتجربوو فشكل آخور .. و مهدي و باه غيغرقوو كريديات و غينساني عليه مصاب يفك غير ولدو من الكارثة لي خشى راسوو فيها و بحال والوو باها لشادية ينوض يدعيه بالاغت٠٠صاب يلا كان بصح ناعس معاها و داير نونو فالثقيبة هههههه

شداتلوو يديه لي كان غيقرفدها بيها مخرج عينيه فيها .. غالباها الضحكة بزز كتهضر ..!

شريفة: ههههه ماتضربش العار ههه غير زلقات ( هربات من قداموو ) صافي نمشي نبدل و نهبطوو للمدينة القديمة عند سيدي عبد البائي هههه

حكيم:( حرك راسوو بلا حولة .. هرباتووليه بأفكارها ..! ) هه ..! حديدانة

خرجات عندو بجلابة قصيرة فالبلوسيال مخدومة بالسفيفة فالصفر بلا قب ..! طالقة شعرها على طولتوو مقادة لافخونش و نظاظر دالشمش فوق راسها ..! مغطية الأثار ديال يديه بفوندوتان و مجبدة عينيها بالأيلاينير و كلوز خفيف فشفايفها مع سبرديلة فرجليها ..!

جرات الفاليز مخرجاها من البيت و بهدوء كتقاد ساكها لي دايراه مجنب قدامها ..!

شريفة: يالاه مشينا ..!

خدا من عندها الفاليز هبطها هي و الصاكادو ديالوو .. رجعهم للكوفر و ركبوو بجوج فاتجاه المدينة القديمة .. وصل للرصيف و وقف مبلاصي فالباركينغ ..!

حكيم: عارفة فين غتمشي ؟

شريفة: لا و لكن نتا غتكون حافظ هاذ الجهة ( زادت حداه ) كتعرف مولاي دريس وا حداه كاينين محلات كيبيعوو ديكشي لي باغى أنا .. نمشييو لعندهم تما ..!

حرك راسوو بالايجاب داير النظاظر د الشمش على عينيه و كاسكيط فراسوو .. بتيشورط و شورط حد الركبة ..! هاز راسوو فالسما .. بظهر مستقيم .. كيتمشاو و يديهم كيتحاكوو مع بعضياتهم .. مرة على مرة حتى شابكوهم ..!

مخليين العينين عليهم منين ما دازو .. كيبانوو كوبل مواتي مع بعضياتهم .. لي تسهاي فيهم و تقولي ما شاء الله ..! لا فالطول و الفورمة .. لا فالتخنزيرة لي ضارب حكيم و النظرات لي دايرة شريفة ..! كيبان فيه دافع كبير ديال بصح و ماشي شي واحد لي ساهل .. مهياب ..! أما هي من الشوفة لولة تقول هاذي متكبرة و شي لالة مولاتي ما سايعاهاش الأرض ..!

دخلوو مع التقاوص ديال الرصيف لقاو ساحة كبيرة مقابلة معاهم .. على ليسر واد هابط من تما و الجهة الثانية فيها من كل فن طرب .. القهاوي و المحالات .. ها المصورين ها صحاب الخوردة و الجديد لي عجبك .. بلا لكرارس لي كيبيعوو التقيوتات و العصائر د قصب السكر و اللتشين ..! تا فاتوهم و دخلوو للداخل عاد بداو يبانوو التعاليم ديال فاس ..!

بازارات د الجلد و محلات د الثواب .. البلاغي مستفين باللوانات و المجوهرات على الأشكال و الألوان ..! بعينين مبسمين شادة شريفة فحكيم لي مقدمها حداه من الزحام ..!

دوزها جهة الصفارين فين كاينين الأواني د النحاس على الجهد .. كيتسمعوو غير المطارق خدامين و اللواني مجبدوين كيشقشقوو قدامهم .. ترحيب غريب تلقاوه من طرفهم .. أما فاش قربوو لمولاي دريس .. تما عالم آخور بالمحلات و فينما دازو كيرحبوو و يعاودو بيهم و كيعطيوهم الدواقة .. شبعات شريفة حلوة حتى ولات كتحشم تشوف فيهم ..!

شريفة: شحال حلوييين هاذ الناس .. شوف شحال بساط و فنفس الوقت ضاحكين و ناشطين ( بابتسامة ) ما كرهتش شي بليصة معاهم ما كاين غير ئالي و ئلت لك يا سيدي و يا لالة هههه اربي الحبيب

تبسم معاها و وقفها قدام واحد من المحلات لي مقابل مع مولاي دريس من بعد ما سدوه و كيصلحوه ..!

حكيم: واحد السلام عليكم ( حيد النظاظر و بهدوء قال كيسرح عينيه فلي عندو ) بغينا شي سخرة ..!

البائع: الله ا ودي ا سيدي مرحبا و ألف مرحبا .. يلا ما بعنا معاكم نربحوو غير شوفة وجهكم المنورة ..!

شريفة:( تبسمات من حلاوة لسانهم .. من كبيرهم لصغيرهم ..! ) ربي يخليك منورة بناسها ا مولاي ( حطات يديها على الفيترينة ) بغيت بعدا صرغينة هي و الروح د الزهر .. و غير وفي معاك

البائع:( جبد لها جوج ديال البواطات و قال ) غير باش نقولك ا لالة غتشري من عندي و تعرفي شنوو تشري .. كاينة هاذ صرغينة و كاينة هاذي و نتي و شنوو بغيتي .. الاصلية و لا لي نص نص ..!

شريفة:( شماتهم و قالت ) لا بغيت هاذي و حنا ما جينا عندك ( شافت فحكيم بابتسامة ) حتى عارفين خدمتك كي دايرة ..!

البائع: حيث كاين لي كتجيهم غالية .. هي نفسها و شاريها للمدام بيدي ميبساها و منقياها على حقها و طريقها .. غير هاذي مخلطة بالعواد و هاذي الاصلية

شريفة:( ردات بهدوء ) راني عارفاها و كنا كنشريوها فاش كانت الربطة بدرهم و نقيوها فالدار على يدينا .. دابا بشحال تبيعلي ربع كيلوو ؟ ( لحكيم ) ناخذ رابعة و لا نص كيلوو ؟

حكيم:( نحنح ) لي عجبك ..!

البائع:( رد عليها براحة .. عجباتوو مبشورة ) قولي حتى نتي بنت المدينة و باقى عاقلة على ايام الربطة بدرهم اجي تشوفي دابا .. و الله يا ختي حتى بثلمية د ريال باش تاخذها و تحطلك 50 غرام .. المهم على وجهكم العزيز نديرلكم رابعة ب خمسالاف .. 250 درهم

شريفة:( صدمها الثمن ) لا لا غليتي علينا ا الشريف و عاد عوالة ناخذ من عندك شحال من حاجة ..! ( بابتسامة ) و أنا سوسية شريفة هههه

البائع: مرحبا بهل سوس .. ناس الخير و الكرم و الجود ..!

شريفة: الله يكبر بيك الشريف .. وا شنوو درنا دابا ؟ صاوبلي واحد نص كيلوو .. ااه بعدا غادي تديرلي التخليطة ديالها و لا كتبيعها بوحدها ..!

البائع:( تبسم معاها ) خوذي باش ما سخاك الله ا بنتي .. و ضروري من التخليطة ( جبد كاغيط حط فيه صرغينة عبرها لها و قال ) و ها الوفاية ا لالة ما تكوني غير على خاطرك ..!

خلاهم و رجع كيجبد فالبواطات .. ها ديال الشبة و الحرمل .. ها ديال العود .. ها ديال المسكة الحرة .. و ختمها بروح الزهر .. و قبل ما يديرو كبلهم شوية فيديهم حتى خلى فيهم الريحة كتقلب

شريفة:( من قاع قلبها قالت ) الله على ريحة ( شافت فحكيم ) كنحماق على العود و هاذ التبخيرات .. زوينين بزاااف

و هي كتهضر لمحات واحد واقف مقابل معاها بدراعية فالأبيض و طربوش فوق راسوو .. داير خناك غليض فعنقوو و ضايرين بيه ربعة د العيالات .. كيتمتم و يقرا عليهم .. و فنفس الوقت كيعيطوو لبناتهم يجييو لعندهم يدعي معاهم ..!

عوجات فمها عايفة منهم و من أشكالهم و بنظرة استحقار رجعات قلبات وجهها للمول المحل لي جمعلها صرغينة و قريعة صغيرة ديال روح الزهر ..!

شريفة: و دابا غتعطيني .. الجاوي الكحل و البيض و الفاسوخ الكحل و البيض و غتقولي شي واحد كيبيع وراق السدر ناخذهم من عندو يكونوو باقيين طريين .. بغيت نطحنهم على يدي ..!

البائع:( رد حاط يديه على صدرو ) مرحبا و ألف مرحبا .. راحنا كنبيعوو وجهنا ماشي سلعتنا يلا غشيتك اليوم غذا تدوزي من حدايا و تقولي الله ينعلها سلعة .. و وراق السدر أنا نجيبهم لك ابنتي غير تسناي ..!

جمعلها كاع لي بغات و مشى بيديه جابلها وراق السدر مخليهم واقفين حدا المحل ديالوو ..! فرح بشوفتهم و تبشر بيهم .. دار معاهم المزيان .. ناقصلهم فالثمن و موفي لهم فالميزان ..!

حكيم:( خلص و هز ميكة عندو حاط يديه مور ظهرها و مزيدها قداموو ) ديالاش هاذشي ؟

شريفة: صرغينة و الجاوي البيض و الكحل و الفاسوخ لكحل مزيانين بزاااف تبخر بيهم كيفكوو شحال من حاجة و ريحتهم زوينة ماشي خايبة خصوصا صرغينة .. ايوا و الفاسوخ البيض هذا كل صباح على الريق غتسخن كاس د الحليب و تذوب معاه قياس حبة د العدس .. غييير شوية و تشربوو و تشوف الردان لي غترد .. كيصفي بالمزيان يلا واكل شي حاجة دقة ببطلة

حكيم:( هز حاجبوو ) زعما ؟

شريفة: راه كنهضر معاك .. تبعوو لخمس ايام متابعين .. مخير كاع و لكن قبل غتدير وراق السدر مطحونين مع كاس د الحليب سخون على الريق تا هما لخمس ايام و عاد تبع الفاسوخ ( وراتوو بيديها ) كيخرجوو بحال سيور كووحل و ديكشي غير سم فسم .. اودي الله ياخذ الحق ..!

حكيم:( رد بتنهيدة ) نتمناو ..! ( شاف فوحدة كتحني جالسة فالجنب كتشيرلهم و بهدوء قال ) تحني ؟؟

شريفة:( ضحكات و شافت فين كيشوف ) نوو نخاف تكون الحنة قديمة و لا شي وحدة مريضة و خدماتلها و تجرحات و لسق فيها دمها و لا شي حاجة و عاد الشوكة .. تصاوب لهاذي و للوخرى .. تء ..! ما بلانش ..!

الحناية:( سمعاتها و ناضت عندها ) اجي تحني ا ختي .. أنا نخلطها قدامك و نفتح شوكة جديدة حداك ..!

شريفة:( تبسمات بتردد حتى شافت حكيم كيزعمها عاد زادت .. حضاتها تا جبداتها جديدة و خلطات الحنة فطاسة بوحدها قدام عينيها عاد عطاتها يديها تديرلها صبيع .. و بسعادة قالت كتشوف فسيد الرجال ) نديرو حنينة باش ربي يحن علينا ..!

يتبع...

‎