الشمش شرقات و هما باقيين فالطريق ..! حكيم عينيه حمارو بالعيى و قلة النعاس و البنات متكيين ما كاينينش فهاذ العالم .. كل وحدة حالة فمها فجيه ..! الستة د الصباح كان قدام العمارة د شريفة لي مع وقف حلات عينيها و بتعب و صوت ناعس قالت
شريفة: فففف وصلنا ؟
حكيم:( غمض عينيه و رجع حلهم كيتجبد ) وصلنا .. انهبط معاكم لي فاليز و نكمل بحالي ..!
شريفة: طلع ترتاح لك شوية بعدا ( دوزات يديها على حنكوو بحنان ) بزاف عليك هاذ الطريق كاملة و ما بغيتيش تعطيني حتى نعاونك فالصوكان ..!
حكيم:( رد باختصار كيفتح السمطة ) ما نعذبكش ..!
شريفة: عذابك راحة ا سيدي ..! ( ضارت عند أسية كتفيقها بالشوية حتى فتحات عينيها كتفوه و بهدوء قالت ) وصلنا ا تاسانوو .. هبطي بالشوية عليك سبقيني ..!
هبطوو بجوج أسية سلمات على حكيم و سبقات و شريفة بقات واقفة معاه ..!
شريفة: وصلهم لي غير للسانسور و باركة عليك .. جوج خلفات نتعاون فيهم انا و أسية نجروهم ..! ( حرك راسوو بالايجاب و هي كتسرح عينيها فالشارع الدنيا خاوية كتصفر ) عييتي كيبانلي .. ما غتجيش للافتتاح د المحل عندي فالعشية ؟
حكيم:( كمل الجبيد و وقف مقابل معاها .. حاط يد على جنبوو و الثانية هازها كيشوف الساعة ..! ) هاذ النهار عندي مزير .. موحال نلقى كي ندير ..! عندك ساعة و نص د الطريق عاد نوصل .. ندوش و نرتاح .. و عندي مشية للولاية د الامن غنتلاقى بالعميد على شي خدمة و من تما غندوز للدار نشوفهم و نجلس معاهم شوية و يلا كانت شي حاجة ناقصة نقادوها .. باش فالعشية ضريب الصداق ديال محمد أميين غيجمع كلشي ..!
شريفة: مزيان الله يكمل عليهم بالخير .. حتى أنا تابعني هاذ النهار الجرا بلا قياس .. نطلع نعس شوية و نوض نمشي نشوف عيساوة هما لوالة و نأكد عليهم الوقت لا يمشييو يخليوني كنتسنى .. و داك لي زانفلييونسور لي درت معاهم على ود الاشهار تا هما نتلاقاهم .. و نشوف المحل د الورد واش وصلي الكونتيطي لي بغيت و الدراري فالمحل واش قادو كولشي بالديكور لي عطيتهم .. عاد البيفي واش هو هذاك .. و نسالي هاذشي كامل و نرجع ندوش و نمشي للكوافورة نقاد راسي حتى انا و نشوف شنوو نلبس و نمشي نستقبل الناس ..!
حكيم:( حرك حاجبوو ) الله المعين ..!
شريفة: و لاهيلا كنت باغى خالتي حبيبة و خوتك يحضرو معايا نديرلهم العباسية ههه و حتى نتا ( زادت قربات منوو حتى ما بقى فاصلهم والوو .. حطات يديها على ظهرو هازة راسها فيه ..! ) حتى تسالي كاع و ديرلي وقيت صغيييور تفكرني فيه .. ما كرهتكش معايا و لكن دوماج جا الوقت محزوم ..!
حكيم:( تنهدات تا تكاها عليه و حك على ظهرها ) ما يحتاجش حتى نسالي عاد نتفكرك .. مفكرك فعز شغالي و ما كتمشيش من بالي ( حط يديه على ذقنها طلع لها وجهها جهتوو ) غنحاول نجي و لكن ما نواعدك بوالوو ..!
شريفة:( تبسمات بفرحة و قالت ) يخليك ليلي ا العمر ..! يالاه ما نزيدش نشدك كثر وصل معايا الباكاج لتما و كمل الطريق بحالك .. الله يوصلك على خير ..!
حكيم:( شاف فيها لمدة حتى شككها فراسها ..! صغر عينيه و قال ) دابا ما بقيتش معاك و عندك حريتك كاملة تديري لي عجبك .. و تبارك الله سبعة و عشرين عام ماشي صغيرة لي نبقى تابعك و حاضيك ..!
شريفة:( قاطعاتوو ) حكيم شنوو كاين ؟ جيني من التالي ؟
حكيم:( هز حاجبوو بثقالة و رد ) الشراب الكارو حتى الحشيش يلا بغيتيه .. كلشي ساهل حالوو دابا .. غير هو تفكري آخر مرة بسبابوو شنوو كان غيوقعلك .. ثقتي فيك لي غتخسريها .. صحتك لي غير كتهلكي فيها .. و رمضان لي بقالوو ثلاثة د السيمانات و يدخل .. يلا حطيتي الشراب ففمك هاذشي كامل غيضيع لك و نتي لي غتخسري فلخر ..!
شريفة:( تنهدات بصوت مسموع و حكات على راسها و بنرفزة قالت ) راه انا ا سيموحمد لي باغى نقطع .. ماشي على ودك و لا حيث خايفة منك .. نتا عطيتيني الدفيعة لي محتاجة و انا عندي الارادة باش نكمل و باغى نكمل فداك الطريق و ماشي ضعيفة تال داك الدرجة باش نضرب كاع داك العذاب لي دوزت فالزيرو على ود جغمة د الزبل ..!
حكيم:( حرك راسوو و تبسم ) هاذشي لي باغي نسمع ..!
فاقت على الصباح بالحريق تحتها ..! الماكلة ديال الغصب و الحريق كيضربها بحال الضوو ..! عيات تكابر فاللخر ناصت للحمام حيدات الخرقة حطاتها جنب .. و جلسات فلاساش كتبرد بالما و تحتها حمااااار بزاااف و بدا يتبوق شوية .. عيات تبرد و والوو ..!
كريمة: الوجع كيgطع يااا ربي واش ما ناويش تهمد و لا شالمعمول ؟ ( شافت فالخرقة و عضات على فمها كتطلع سليبها ..! ) نوضي كابري ا كريموو .. خركي عليك جلابييتك طرgي دار عكوزتك .. خشي لها هاذ اللحم يطيب و رجعي بحالك gابلي همك لي ساير ينخر فلحمك ..!
هزاتوو فيديها و خرجات موسعة بين رجليها بحال المختنة و يديها خدامة كتحك بيها و تقول ما حكات .. بدلات التحاتة و هزات جلابتها لبساتها هي و شالها و صاك فين دايرة خدمة عبد العالي ..! و بالشوية عليها زادت كتجر الصابوو فرجليها ..!
كلشي باقي ناعس فالدار .. يالاه السبعة د الصباح و شكون لي يفيق فهاذ الوقت فالصيف من غير لالة حبيبة لي كتجري و تجاري مع التوجاد لضريب صداق ولدها ما خاصها حتى حاجة تنقص .. و فرحتها جوج فرحات بالمجية ديال حكيم لي عندها بحال العيد .. خدمتوو كتخليه يسافر بزاف و يبعد عليهم بعد المرات بالشهورة و لكن بلاصتوو هي بلاصتوو عندهم كاملين .. هو الساس و الراس ديالهم ..!
وصلاتها الطاكسي حتال الباب .. خلصاتها و نزلات كتدق تا طلات عليها حبيبة من الشرجم و باستغراب هبطات فتحاتلها بحال المرة لي فاتت .. فين جات كريمة بلا لحم عوالة تشوف الاحوال كي دايرين و تبيثوو فيها و عاد تضرب ضربتها .. و تكعد ميمونها هي و تايمة مع مولا دارها .. و هاذ الميمون ما جاها يتكعد غير يوم فرحة محمد أمين .. كلشي مشغول و مفتون و حد ما غيديها فيها حتى يفوت الفوت ..!
حبيبة:( بانزعاج قالت ) شنوو جيتي تديري هنا ا كريمة ؟ ياك هضرنا و تافقنا و قلت لك شنوو كاين ..!
كريمة:( ردات بحزن هازة الشال على فمها ) با ما gابلش عليا ا خالتي .. ساير يهنشر فيا بكلاموو .. كينخر فيا نخير بفعايلوو .. الترابي فكرشي تgلبات بالغبينة و ما gدرت نزيد نصبر كثر .. و نسيت الدوا تاعي هنا خاصني نشربوو فوgتوو ..!
وقفات حايرة شنوو غتدير مع حكيم لي جاي عوال ما يلقاهاش و مع محمد أمين نفسوو لي ما باغيهاش فضريب صداقوو ..! ما تقدرش تخليها فالدار بوحدها و ما تقدرش تديها .. حيرة و اشمن حيرة فين حطاتها ..!
حبيبة: و شنوو المعمول دابا ؟
كريمة: احاااح واش نgولك ا خالتي .. يانا لي درتها لراسي .. و هاني سايرة نتجرتل و نخلص يانا و تايمة .. نفطر يانا و ياك نشرب دوايا و نرجع لعند بويا حتى تغوتي عليا فالتينيفون و تgوليلي واش طرgتي ليا المسايل ..!
حبيبة:( تنهدات براحة بحال جبل و تهز على صدرها ) حتى هذا نظر ا كريمة .. لقيتيني فالكوزينة كنفتل سكسكوو ... نقيت الخضرة و يالاه نردها تتقلى و نحطو نفطرو أنا وياك و عاد نقاد لحكيم طنجرتوو حتى هو راك عارفة
حبيبة:( ضحكات ) وا حكيم هو هذا .. الديطوكس ديما عندو فالثلاجة و العطرية ما كياكلهاش .. و كاع لي فيه المرقة ما كيضورش بيه ماكلتوو كاملة فالفران .. حتى من الطاجين كيديرو فالفران يتقلى تا كيبغي يتحرق عاد كيطفي عليه .. هكاك كيعجبوو .. و أراك دابا غير يجي عندنا فعوط طاجين نطيبولوو ثلاثة ..!
دخلات بالزربة ردات طنجرتها تطيب و وجدات الفطور و خرجات حدا كريمة لي عرقانة و وجهها مزير بالحريق و الماكلة لي فيها .. خاصها تحك و ما قادراش قدامها ..!
كلات بزز مع الوجع و عقلها خدام كيفكر كيفاش تدخل للكوزينة و تدير اللحم يطيب مع الخضرة ديال سكسوو د حكيم ..! حتى جاها الفرج و صونا تيليفون حبيبة بسمية محمد أمين .. ناضت كتهضر مبعدة لهيه حتى سالات و رجعات كتزرب ..!
حبيبة: هاذ الدراري كيخلييوك تال آخر نهار و يخرجولك بالشغالات .. هذا محمد أمين كيعيط قالك نسى شي تخربيق نمشي معاه نتقضاوه .. وا يالاه دابا ..!
ملاك:( خرجات كتجر فرجليها و تجمع شعرها .. صبحات شوية على لي كانت خصوصا من السخانة و لكن نيفها باقي مخنوق و حلاقمها منفوخين شوية و صدرها عامر برد ..! ) اححح صباح الخير .. كريمة دغيا توحشتينا كح كح كح ..!
حبيبة: جابك الله .. انخلي حداك الطناجر قابليهم على ما يتقلاو و طفي عليهم .. انا غنمشي مع محمد أمين غير لهنا و نجي دغيا دغيا .. كريمة يالاه معانا نوصلوك ..!
كريمة: واخا ا خالتي .. انا نكعد نعاينك هنا على ما تخرgي عليك ..!
مشات حبيبة لبيتها توجد راسها و ملاك للدوش تغسل وجهها و تقاد مسائلها .. و هنا وقفات كريمة كتزرب شانقة على ساكها .. دخلات للكوزينة لقاتها دايرة الخضرة لحكيم فكوكوط صغيرة بالزربة جبدات اللحم دارتوو تحتهم و الخضرة فوقوو و رجعات كطير لبلاصتها حتى حرقاتها كرشها .. ما حيلتها ليها و لا لتحتها ..!
حبيبة:( بالخف لبسات عليها غير جلابتها .. دخلات للكوزينة هزات الكوكوط بانلها اللحم من التحت كيبان جنيب منوو و الخضرة فوقوو ..! ما دات ما جابت بالفتنة لي فتنها محمد أمين .. قالت راني حطيتوو و نسيت ..! دارت عطرية قليلة و قاداتلها القوام كيفما كيبغي حكيم .. و شعلات عليها تطيب .. كتزرب باش تخرج ) مااااري ها البوطة قدامك عنداك تغفلي عليها .. أنا خرجت .. كريمة يالاه زيدي بحالك .. محمد أمين ما يكون غير وصل دابا و كيتسنانا لتحت ..!
هبطوو بجوج و خلاو ملاك كتفطر بالشوية عليها و التيليفون فيديها مكونيكطية بيه .. حاطة فالفيس بلي مريضة و لي كومونطير و التعناب على الجهد فالبريفي كيسولوو فيها كي بقات .. شي كتجاوبوو شي كتميك عليه .. حتى عيات و دازت كتقلب فالمكياج و المشطة لشعرها شنوو تدير ..! ريحة خانزة عطات فالكوزينة لكن ما دات ما جابت و هي نيوفها مسدودين .. حسباتلهم الوقت و طفات عليهم .. شربات دواها و نيشان مشات لبيتها تكات ..!
********************************
خرج من البيت كيتكسل .. لابس تيشورط و سروال دجين عادي مع سبادرين .. رجع ضرب الواحد لشعرو و طراساها مزيان مع جبهتوو .. تحسينة كتعطيه وقار و هبة خطيرة ...! مخلي اللحية خفيفة كيفما كبرات بلا ما يقيصها حتى يرجع للخدمة و يحيدها ثاني ..!
عصر كاس د القهوة و هزو كيشرب فيه و jim حداه كينقز فرحان بيه .. توحشوو فوق القياس ..! يدور يدور و يتعلى عليه كيلحس فيه بفرحة ..!
حكيم:( دوز لابيل لولد رقية بقى شحال كيصوني عاد رد عليه ) باقي ناعس ؟
ولد رقية:( رد بصوت مدوخ ) وا راك عارف ا با حكيم خدمتنا كاملة فليل ..!
حكيم: المهم .. آتيني بالمفيد و اختاصر علينا الطريق ..!
ولد رقية: كولشي مشى كيف بغيتي ..مهدي برادة دخلتوو بالسياسة و الخاطر .. شابع السيد مشاكل مع عائلتوو و واليديه .. درنالوو اللعيبة فالجعيبة و جريناه للكوميسارية كيف تافقنا .. سكر حتى شبع و دوخوه البنات و وحدة فيهم دارتلوو طرف دالحشيش فالجاكيط و غير خرج شدوو صاحبنا حسام و جروه للكوميسارية .. بزز فكوو باه و نوضها معاه و فالبلاصة عيط علمني بلي قابل يخدم معايا شيفور غير نوجد لوو الوراق ..!
حكيم: زيد ..!
ولد رقية: إلياس خاصوو سلعتوو تدخل .. مهرب تيليفونات و الفانيد " أقراص مهلوسة " ضبرت معاه باش الشركة لي يقاد تكون بسميتوو و بلي الشيفور هو لي غيتحمل المسؤولية د كولشي يلا تشدو .. و فالوراق لعبنا كي بغينا و شركناهم بجوج .. مهدي و الياس ..!
حكيم: ماشكش على ود الشركة ؟
ولد رقية: لا حيث موالف صاحبنا هو لي كيقاد الوراق .. راه كاميوات خارجين من المغرب بالسلعة خاص ضروري كلشي يكون قانوني راه الديوانة هاذي .. علاش مخرجين هاذ البلاغي و شكون الشركة ديالكم و لمن غتبيعهم تما و زيد و زيد .. غير هاذ المرة علمتوو بلي لي كيقادلنا ديما تعرف عند الحنوشة .. عندكم نعام اس و ما نقدروش نخاطرو بالحبة هو يتكلف و على حسابنا كولشي ..!
حكيم: مزيان .. و دابا تحركوو و لا باقي ..!
ولد رقية: اليوم فالليل غيشارجييو لمهدي البلاغي فالكامييو و يتوكل على الله هو واحد الدريري معانا غيمشي معاه باش يوريه شنوو يدير ..و فالرجعة غيكون بوحدو .. غيسطوكييو ليه الفانيد و التيليفونات .. غيجي على مليلية و يدخل من الناظور و تما نتوما غتشقموه و غيتجبدو كاملين .. خدمتك و راك عارفها ..!
حكيم: هي عندو سيمانة و يدخل ؟ غندوز للولاية نعلم العميد باخبارية وصلاتنا باش نقادو الطريق مع البوليس د الناظور و نشدوهم .. هاذ المرة غيمشي بلاصتي حسام أنا ما غنكونش ( بتحذير ) و سميتي ما تجبدش حتى بينك و بين نفسك و لا الخبار فراسك ..!
ولد رقية:( رد بجدية ) كون هاني .. واخا يبحثوو و يطيرو حتى يعياو ما عندهم كي يديرو يوصلولك .. مالنا دراري صغار ..؟
حكيم: يالاه هو هذا ..! ( قطع عليه و ناض خارج يالاه يلحق للولاية )
ولد رقية:( ضحك تا بانتلوو السوسة فالضرسة كتعيط يا ليل يا عين .. كرشوو مقنبلة حداه مزغبة كيطبل عليها فرحان بانجازو ) ولد رقية جاب سلعة نقية ..!
*********************************
مدينة الدار البيضاء من أجمل المدن لي تقدر تعيش فيهم و نتا مرتاح .. ما كاين لا عنصرية لا هم يحزنون ..! شنوو ما بغيتي و حليتي عليه فمك تلقاه .. حاجة وحدة لي كتقهر هي السيركيلاسيون ديال الطونوبيلات ..!
بعد المرات كتبلوكا الطريق فخطرة .. كتبقى غير واقف فبلاصتك .. و ما عندك ما تدير ..! بعد ساعات عاد قدر حكيم يوصل للولاية ..! دخل كيحرك راسوو بهدوء منين ما مشى كيوقفوه يسلموو عليه و يسولوه على أخبارو ..!
داز على حسام شافوو هو اللول و شرحلوو كلشي .. باش يبقى فالصورة بما أنوو هو لي غيتكلف ليه بلافير .. و من تما دخل عند الشاف ديالوو ..! عطاه التحية و تسالموو بمعزة .. من ديما حكيم بلاصتوو نقية و خدمتوو متقونة و حتى جديتوو و صرامتوو كتهضر عليه .. الشي لي كيخليه عزيز عند العميد بزاف ..!
جلسوو كيهضرو و يتناقشوو شحال و بعدها علموو بالاخبارية لي جاتوو و النهار فوقاش غيدخلوو السلعة .. عيطوو على حسام و على لي كيب معامن كيخدموو دارو اجتماع و رصاو أمورهم كاملين و من تما كلها مشى لخدمتوو .. حتى من حكيم ناض باش يخرج بحالوو .. لكن وقفوو العميد و بلباقة قال ..!
العميد الممتاز: حكيم جلس ا ولدي نهضر معاك فواحد الموضوع و سمحلي على التدخل ..!
حكيم:( جمع حجبانوو بتساؤل و حرك يديه لجهتوو ) وي .. كنسمع ..!
العميد الممتاز:( نحنح و شابك بين يديه ) كنت باغي نهضر معاك فيه هاذي جوج سيمانات هكاك و لكن ما رديتيش عليا ..!
حكيم: كنت عطلة .. فاش كنسافر كنحاول نبعد على التيليفون و اي حاجة تضيعلي وقتي ..! شي حاجة مزروبة ما كتسناش ؟
العميد الممتاز: لا لا تتسنى .. خوذ راحتك ..!
حكيم:( شاف فالساعة و قال ) ندخلوو فالمفيد .. عندي مناسبة د الأخ ديالي .. اليوم ضريب الصداق د محمد أمين .. فالعرس مرحبا بيك عندنا ..!
العميد الممتاز: اووه ..! مبارك مسعود الله يكمل عليه بالخير .. نجي بكل فرح .. قولي ا ولدي حكيم مرتاح فحياتك مع المدام ديالك ؟
حكيم:( هز حاجبوو بثقالة و قال ) الموضوع شخصي كنظن ..! شنوو كاين ا الحاج ؟
العميد الممتاز:( نحنح حشمان منوو و ما عارف منين يبدا ليه الهضرة ) باش نجيك للصراحة ا ولدي و نختاصرو الطريق علينا بجوج .. مراتك جات عندي للمكتب .. كانت فحالة خايبة بزاف .. قالتلي طلقتيها .. بكات و طلبات مني نهضر معاك باش
حكيم:( قاطعوو كيغزز فسنانوو .. دموو حس بيه كيغلي .. كيتخيل الحوار لي ضار بيناتهم و شنوو قالت و ألفات من عقلها و كيشخض غير بالشوية ..! عقد حجبانوو و قال بنبرة لا نقاش فيها ) الحاج نتا بلاصتك هنا ( حط يديه على راسوو من الفوق ) راك بحال الواليد و ما يحتاجش عاد نقولها لك .. و لكن موضوعي أنا و مراتي شخصي و ما غنتقبل حتى واحد يتدخل فيه و ما غناقش فيه مع حتى حد .. لي يكفيك تعرفوو هو ما ظلمتها لا هي لا لي فكرشها فحتى حاجة و لي دار شي ذنب راه تخلص عليه و السلام ..! ( وقف )
العميد الممتاز:( وقف معاه و مد يديه سلم عليه و قال ) كنت باغي ندخل بخط بيض و لكن بانلي نتا واخذ قرارك و ما غتراجعش عليه .. نتمناو يكون فيه خير ليكم بجوج و للبنيتة لي جايا فالطريق كثر ..!
حكيم: و هذا هو المطلوب .. نهارك مبروك ..!
حرك راسوو بثقالة من التحت للفوق .. عطاه التحية و خرج .. عاقد حجبانوو بعصبية .. القردة طالعة لوو فوق راسوو كتلعب .. كن يلقى كريمة قداموو هاذ الساعة يطحنها .. حاجة وحدة لي شافعالها هي بنتوو لي كيتسنى غير فوقاش تولدها و يهزها بين يديه و تما هضرة اخرى و وجه آخر غتشوف ..!
حكيم:( شاف فالساعة لقى باقي شوية د الوقت فيديه و قال يمشي يفاجئ شريفة و يكون معاها فالافتتاح ..! صونا ليه تيليفونوو بسمية حبيبة و بهدوء قال ) غير بالصحة سبقوني نتوما حتى نجي .. واحد ثلاثة د السوايع و نص هكاك و أنا معاكم .. كلشي واجد ؟ صافي مزيان تهلاي ..!
مكياج سموكي فعينيها مبينهم مزيان و زايدة مركبة الشفار د الحرير زغبة بزغبة كيبانوو طبيعين مع ليلونتي فالرمادي كيغنييو يا ليل يا عين ..! شفايفها منفوخين و مرسومين بماط فالاحمر كيلمع .. مخليهم كيبانوو بحال شي فريزة كتشهيك تذوقها و تتلذذ بيها .. معروف على شريفة كتحماق على شي حاجة سميتها الاحمر و اغلب حوايجها مزيج بين الاحمر الكحل و الابيض ..!
فارقة شعرها للنص و جايباه للجنب .. عاطي فوليم قوي و مموج .. كيبان طبيعي لكن مخدوم بمشطة متقونة جايا مع القفطان موديغن لي لابسة ..!
قفطان فالكحل مطروز بالدوغي هابط من جناب صدرها تال رجليها .. مشدود حد السمطة د السروال و الباقي مفتوح كيبين سروالوو التحتاني و سوندال عالية فرجليها لي مصبوغين بفرانش كيلمع .. بحالهم بحال يديها لي مزينين بأجمل الحلي مكملين الكومبلي لي فعنقها و وذنيها ..!
كتمشى بحال الفراشة .. الضحكة مرسومة على شفايفها كتشقشق و لي عيط عليها كتمشي عندو بالفرحات عليها كتأكد واش كلشي هو هذاك ..!
طاولات د الخشب مفرقين فالمحل و مباعدة المسافة بيناتهم باش الناس يلقاو راحتهم و خصوصيتهم فالجلسة ..! كل وحدة ضايرة بالكراسة ديالها لي مريحين لأقصى حد ..! محطوط فوق كل طبلة كويسات ضايرين بحال التفاحة فيهم الشموع مضويين و عاطيين رونق خاص للمكان .. جايين متناسقين مع القناديل لي فالأرض و الثريات د السقف لي واخذين شكل مربع من الورق كيعطييو لون أورونجي ..!
فنفس القنت من الجهة الثانية موزعين فوطويات كبار د الجلد مع طبلة صغيرة د الزاج حداهم .. للناس لي ما باغيينش ياكلوو و غيكتافييو غير بشي مشروب ..! و هاذشي كامل مقابل مع الكونطوار لي كلوو شاعل بالضواو فالموف و فيه كراسة عاليين لي بغى يجلس تما نيت ..! لكن فالافتتاح خصصوه للبيفي فين محطوطين لي بلى ديال المأكولات .. العصائر و الحلويات بالأنواع و الاشكال .. أراك غير تتشهى و تاكل ..!
على ليمين و ليسر ديال الطاولات دايزين جوج ريدويات من الجنبات فالباج مشدودين .. و الفوق سلالم بحال لي كيكونوو فالمسرح .. غاديين مربعين و معاكسين واحد مع الثاني منظر هائل و متوازن مع الشوميني لي جاي وسط المطعم مدفون فالحيط و فيه عواد دالخشب على ود البرد يلا بغات تخدموو يسخن الجو و اونفاص ليه كاينة خشبة عالية شوية فين مبلاصية الفرقة الموسيقية .. نتي كتغذاي و لا تعشاي او حتى تفطري و الموسيقى خدامة بالنشاط حتى شاط ..! و هذا هو الديكور لي جا لشريفة فبالها و تمنات تشوفوو على أرض الواقع ..!
أي واحد يجي داخل للريسطوو ديالها غيتبهر بداك المنظر .. كأنوو مسرح او لوحة تشكيلية تفننو فرسمها كيفما هي تفننات فطبخها و عطات كل جهدها فاختيار مكوناتها ..!
الناس شي غادي شي جاي للبيفي .. كاين لي جالس كياكل و كاين لي واقف كيهضر و يضحك .. عيساوة واقفين فالجنب كيغنييو منشطين الجو و لي زانفلييونسور لي عرضات عليهم كيصورو و يحطو فالسطوريات دايرين لها الاشهار و مستمتعين بوقتهم حتى هما ..! عرفات علامن تعرض و شكون يديرلها الدعاية و اختارت غير الطبقة لي هي موجهة ليها مشروعها و لي غيقدرو يميزيو الفلوس كثر ..!
حركات يديها بسعادة و بداو لي سيرفور كيفرقوو دي بوكي د الورد على الحضور .. حتى بقات وحيدة صغيرة جابوها لشريفة تحنات شماتها مغمضة عينيها و مع الهزة بانلها حكيم داخل ..! توسعوو عينيها بفرحة و تبهجوو ملامحها كثر و كثر ..!
تمشات عندو بحال شي أميرة جمالها طاغي .. عنوان للرقة و الأنوثة و الدلع ..! فراشة و طايرة فوق السما كتبهر كاع لي كيشوفها .. سارقة الاضواء بكل ما تحمل الكلمة من معنى .. خصوصا كلشي لابس دي غوب سواغي و هي الوحيدة لي متميزة عليهم بالقفطان المغربي ..!
مداتلوو يديها برقة و قربات سلمات عليه بالوجه و هو كيشوف فالجوهرة لي كتلمع بين يديه ..!
حكيم:( شاف فعينيها و قال بهدوء ) الجوهر الحر ..!
شريفة:( تبسمات ) ههه ياك بعدا ..؟ فرحت حيث جيتي نتا لي كنتي ناقص هاذ الليلة .. شكرا بزااااف .. زيد دخل ..!
حكيم:( سرح عينيه كيشوف فالديكور و يحرك راسوو بالايجاب عجبوو الريسطوو بزاف ) هاذشي ناضي ما عندي ما نسالك .. برافوو ..!
شريفة:( سيفطاتلوو بوسة فالهوا ) يخليك ليلي ا العمر .. يالاه معايا غنقطع لاطاغط دابا و من بعد دوز على البيفي كامل دوق حاجة بحاجة و قولي كي جاتك الماكلة .. نعول عليك ..!
حكيم:( شاف فالساعة و قال ) ما عنديش الوقت بزاف .. واحد ربع ساعة و خاصني نشد الطريق عاود .. مرة اخرى ..!
شريفة:( شداتوو بيد جراتوو و الثانية هازة بيها البوكي ) واخا يالاه دابا تقطع معايا الحلوة و نتصورو ..!
قربات من لاطاغط لي كانت كلها فالبيض و مزوقة بشوية ديال الدوغي " الذهبي " و فالجنب مكتوب سمية ديال الريسطوو 《 عرس الذيب 》لي عاد انتابه لها حكيم و باستغراب شاف فيها حتى قالت بتوضيح ..!
شريفة: شحال و أنا كنفكر فالسمية لي ندير و ما لقيتش ما حسن من " عرس الذيب " .. نفس النهار لي رجعنا تلاقينا فيه فأقشور من بعد 12 عام د الفراق .. كان من احسن الايام فحياتي واخا دازت عليا بالقمشة د القطة ههه ..!
حكيم:( جرها عندو عنقها بمعزة و دوز يديه على ظهرها كيحك عليه و بهمس قال ) ثيسليث أوجنّا ..! " عروس السما = قوس قزح .. السمية لي قيدات على نمرتها و بقات هكاك "
شريفة:( لمعوو عينيها و بعدات بهدوء ) آي ثعيشذ اتسا ينو " تعيش ليا و لا يخليك ليلي "
شعلوو شمع فجناب لاطاغط كيطرطقوو و تطلق دخان خفيف .. الناس مجموعين عليها و هي حداها حكيم من جهة و أسية من الجهة الثانية .. عطاوها موس كبير جاي بحال السيف و اليد مصوبة بالدوغي و الابيض مزوقينها ..! مداتوو لحكيم بغاتوو يقطع معاها و حطات يديها فوق منوو زيرات عليه و قطعوو لاطاغط و الفلاشات كيضربو فيهم كيصورو ..!
عطاوها طرف ذاقت و دوزات لحكيم و أسية حتى هما و الباقي تكلفوو بيه السرباية .. قطعووه و فرقووه ..!
حكيم:( حك على ذراعها و تحنى جهة وذنيها من الموسيقى ) هذا هو الوقت .. غنمشي دابا تال غذا ان شاء الله ..!
شريفة:( دلات شنافتها ) عاد وصلتي ما ذقتي والوو ؟
حكيم: نتغذا مع مالين الدار .. شحال و هما كيتسناوني ندوز عندهم ( قرصها من حنكها ) ايام الله باقى فيدينا ..!
شريفة: داكوغ على خاطرك .. بصحتك الحفلة و سلم على محمد أمين و بارك ليه من جهتي ..!
سلمات عليه بلابيز يالاه غتخرج معاه عيطوو لها تتكلم لوحدة من الكليان كتسول على شي غوسيط .. حركلها راسوو باش تمشي تشوف ضيافها و هو كمل طريقوو تال برا ..! أما شريفة غير سالات دخلات للداخل فين كاينة أسية ..!
هزات معاها البوكي د الورد ديالها كتشم فيه بسعادة و فرحة ما بحالها فرحة .. الضحكة غتنقز من عينيها .. قربات من أسية و بنبرة مرحة قالت ..!
شريفة: غنطيييير بالفرحة أ أسية ..! عمري تخيلت غنكون واحد النهار مرتاحة فحياتي لهاذ الدرجة ..! هو بصح دوزت ايام قاسحة و صعيبة و لكن كلشي كيتقاد شوية بشوية ( باستها بقوة فحنكها ) اححح و شحال كنبغي يماه ( لمعوو عينيها و ضحكات بسعادة ) كنبغيييييه فوقما تتخيلي احسن حاجة وقعات هي رجعت تلاقيتوو واخا مفنطز و عاجبوو كرو ولد الحلال و لكن كنحبوو .. القلب و ما يدير ..!
أسية:( ضحكات و عنقاتها ) و الله يخليك ديما مرتاحة و فرحانة فحياتك ( هزات حاجبها بشقاوة و قالت ) و علاش هو من دون الناس امم ؟ اعتارفي اعتارفي .. علاش كتبغيه ؟
شريفة:( ردات باستهزاء كتقلب فعينيها و ترمش بالهداوة .. معوجة فمها ) اييوا اش ندير عزاز عليا ولاد القح*** فينما كان شي ولد القح** مقطر كيجي لعندي كيجري هههه
أسية: ههههه حرام عليك انا كنهضر معاك من نيتي و نتي كطنزي عليا ..!
شريفة: و حتى أنا كنهضر معاك بصح .. علاش حكيم كيجيك نية ؟ ( رمشات كضحك ) النية خليها ليا أنا لي مسكينة خبز ربي فطبكوو أما هو مقطر اللهم زد و بارك ههههه
وقف فالباب مبلوكي كيسمع .. من عزيز عليا ولاد *** و هو واقف .. كاع الهضرة دازت عليه .. قشر شنافتوو بالجهد حتى دماها .. كيغزز فيها و يقول ما غززت .. عينيه تظلموو من جهتها و قساحت الشوفة فيهم .. من بعد ما كان راجع هاز الكادو لي خذاه لها على ود الافتتاح و نساه فالطونوبيل تا كان ماشي و تفكرو ..!
ضرب الضورة و رجع بحالوو بلا ما يدخل لعندهم ..! صدرو كيطلع و ينزل بالأعصاب .. جملة وحدة كتعاود فوذنيه حكيم ولد القح** مقطر .. فينما كان شي ولد الق*** كيجي لعندي كيجري .. و بصح هو لي جاي عندها كيجري من كازا تال الرباط باش يشوفها لعشرة الدقائق و يرجع بحالوو ..!
ركب فطونوبيلتوو و ديمارا حاك الروايض بالجهد مع الارض و غادي طاير فالطريق .. جبد نمرتها و برك عليها باش يبلوكيها و عاود تراجع ..! مسح نمرتها من عندو و خرج و بعدها طفى التيليفون فخطرة ..!
《 الحديث قياس و الكلام في وقته دواء .. كاين اللي عنده النيف و والديه أعز حاجة في حياتوا ..! 》
واش هنا وقفات علاقتهم ؟ و بهضرتها لي سمع غتخليه يقلب عليها فخطرة و ما يعاودش يضور بساحتها مرة اخرى ..!
واش هذا هو الحد لي سبق قالت عليه حبيبة .. بلي حكيم كيميك حتى يشبع و نهار كينفر كينفر دقة وحدة و لو تنطابق السما مع الارض ما كيرجعش .. واخا يكون كيموت فالواحد .. كرامتوو و كبريائوو ما كيخليوهش ..!
يا ترى وصل لهاذ الدرجة مع شريفة و لا باقي غيعض فالصبر و يبرد دموو و يرجعلها بحال حتى حاجة ما حسكاتوو و ضراتوو فقلبوو من جهتها .. خصوصا حكيم لي عندو واليديه خط احمر ..!
*********************************
أسية:( ردات بضحكة ) ههههه نتي نية و خبز ربي فطبكوو و أنا شنوو على هاذ الحساب ؟
شريفة: نتي المشيشة ديالي .. العسل يا بنتي العسل ههه
سكتات شحال و رجعات قالت و هي حاطة يديها على صدرها و كتهضر من أعماق أعماقها و مرة مرة كتخرج تنهيدة كتبين شنوو هازة فقلبها ..!
شريفة: عرفتي شنوو هي أحسن حاجة فهاذ الدنيا من بعد الرفيسة و الفريت بالموطارد و بسطيلة د الحوت اححح و لالة مولاتي طنجية ( ضحكات بتكركيرة مكركبة ) ههههههههه بديت ما غنساليش .. قلت لك هي تلقاي واحد الانسان لي نتي معتابراه بحال نفسك و مرتاحة معاه للحد و عارفة واخا شنوو ما درتي ليه ما غيسمحش فيك و ما غيطلقش من يديك .. معاك حتال للموت ..!
أسية: و لقيتي هاذشي نتي فحكيم ياك ؟
شريفة: كن جيتيني قبل غنقولك ما كاينش هاذ الواحد .. كلشي باغي مصلاحتوو و ما كاينش هذا لي كيبغيك غير هكاك كلشي كيجري على لي غيريحوو هو و طووز فالباقي ..! و لكن حكيم غير .. الثقة لي عمري عطيتها لشي واحد .. حطيتها فيه كاملة و عارفة راسي ما غنندمش حيث من صغرو تربى و كبر راجل و غيموت راجل و غنكون حمقة يلا ضيعتوو من بين يديي ..!
أسية:( بتردد قالت ) و شنوو الفرق بيني و بينك ؟ ( هزات شريفة حاجبها فيها بمعنى فاش ؟ و كملات أسية بشجاعة ) نتي و حكيم تعرفتوو و نتوما صغر مني و هانتوما دابا بجوج .. مكملين بعضياتكم و كتحمقوو الله يحفضكم يا ربي ..! علاش أنا ما خليتينيش نجرب .. حتى انا بعقلي و عارفة شنوو كندير .. أيوب كان ضريف بزاف معايا فالمخيم و عمرو قلل عليا الحيا و لا قالي شي كلمة ماشي هي هاذيك و واخا هكاك ما بغيتينيش حتى نهضر معاه ..!
شريفة:( توسعوو عينيها بدهشة )
شريفة:( توسعوو عينيها بدهشة من هضرتها .. شطحات رموشها و مصات جنب شنافتها جامعة حجبانها بتساؤل ..! ) أسية ؟ عارفة راسك شنوو كتقولي و لا ما عارفاش ؟
أسية:( بغاو عينيها يبداو يفزكو و بصعوبة قالت ) انا غير قلت لك .. صافي ما تديريش فبالك ..!
شريفة: لا ندير فبالي قالاك ..! ( جراتها من يديها و جلساتها قبالتها ) بعقلك كتقارني لي بين حكيم و أيوب ؟ و بيني و بينك ..؟
أسية: و شنوو الفرق ؟
شريفة: الزمان ديالنا كانت شي حاجة سميتها النية لي ما بقاتش دابا فخطرة ..! حكيم عمري شفت فيه شي شوفة ماشي تال تما .. بالعكس كنت كنحششششم منوو لواحد الدرجة ما تخيليهاش و كنحتارموو بعضياتنا بالجهد .. صبعوو هو اللخر عمرو حطوو عليا ..!
أسية:( ردات بحماس .. نسات الغبينة لي يالاه كانت عوالة تبداها ) بصح ؟؟ عاوديلي على صغركم كي داز .. كيعجبني نسمع بحال هاذشي ..!
شريفة:( تبسمات كتفكر ) ههه كنت هبيلة و عيني ما كنهزهمش من الارض و حكيم ولد الفرناتشي لي كيطيب لنا الخبز فالدرب .. كنت عزيزة على باباه و اول مرة غنهضر مع حكيم كان كيلعب الكورة هو و صحابوو و انا دايزة قدامهم كنتقاتل مع الوصلة د الخبز نوصلها .. قصيييورة و ضعيفة ما كنبانش فخطرة ههه و ضربني بكورة قلبني تا جيت منشورة فالارض و الخبز فالغيس تمرمد ..!
أسية: ويلي ويلي هههههه ايييوا ..؟
شريفة: ايوا عينيك ما تشوف الا النور خلاوها المصريين هههه بكيت و شهقت حتى عييت درتلهم مندبة .. عارفة قتلة د العصا كتسناني من عند كبيرة يلا ما ديتلهاش خبزها .. و باباه د حكيم غير شافنا جا نزل على ولدوو عطاه تا ما قد .. اييوا سكتوني و دخلوني عندهم للدار و مسكينة موو حبيبة رجعات عجناتلي الخبز و خلاتوو يطيبولي و انا مشيت للدار حتى تدوز الساعة و نولي موراه ..!
أسية: واليديه ضريفين مساكن ..!
شريفة: بزااف فوقما تصوري .. موو كانت مفششاهم و باه مزيرهم خصوصا حكيم لكبير كان كيعصرو عصير واخا هكاك عندو مقطر من عينيه .. الله يرحموو ..!
أسية: أمييين يا ربي ..! اييوا كمليلي ..!
شريفة: و صافي تما بدينا كنهضرو من بعد ما كنا كنتشاوفوو غير من بعيد و صافي ( ضحكات ) و بيني و بينك كان كيعجبني من قبل .. كان عاطي العين فالدرب و كاع البنات القدي كيتسابقوو على المحل د باه فاش كيكون تما .. و لكن هو داخل سوق راسوو و من صغرو ما عزيزش عليه الجماعة و الهضرة بزاف إلا معايا ههههه ..!
أسية:( حطات يديها على حنكها كتصنت عاجبها الحال .. بحال يلا كتفرج فشي فيلم .. عايشة اللحظة و ما كايناش فهاذ العالم ) اهاه ..!
شريفة: كان ديما كيقولي واخا فيك ا الشكامة حيث زعما بسبابي كلى قتلة من باه هههه .. صافي علاقتنا كانت بريييئة داك "الحب العفيف" ..! و ما كانش حتى حب بالنسبة لينا راه كنا صغار بزاف .. فينما وقفت عليه كنلقاه .. كيعاونني بكاع لي قدر عليه و يا ويلي نبكي حداه و يلا لقاني مغبنة .. كيدير لي فجهدو يضحكني و يكون بيا .. يسافر مع صحابوو .. يجيب الذواقة و يعطيني و كان مسمي عليا نوارة الحدود هههه كنت غير كنسمعها كنغرق فبلاصتي كتضربني الساكتة و الحناك كيبغييو يطرطقوو بالحمورية و الشعر ديما طالع للسما مشعكك من الخلفة و ظفرتي مورايا كتلعب .. هي طول مني أنا كاملة ..!
أسية: هههه زيدي و من بعد شنوو وقع ؟
شريفة: و من بعد سنين يا لالة شد الباك و بغى يكمل قرايتوو فكازا عند شي واحد من عائلتوو و شحال بكيت عليه و تغبنت فسطح دارنا و ودعتوو من بعييد .. هو كيسلم على واليديه و انا حاضياه تا مشى و من تما غبر و لا كيجي مرة فشحال تا دازو عاماين و عاودت شفتوو .. كنت كبرت و زيانييت على لي كنت و بانوو الثمار نعام ا لالة هههه و دخلنا فالمراهقة غير شفتوو وليت كولي كنفيبري و القلب كيشطح بالخلعة
شريفة: كبرت و زيانييت على لي كنت و بانوو الثمار نعام ا لالة هههه و دخلنا فالمراهقة غير شفتوو وليت كولي كنفيبري و القلب كيشطح بالخلعة
أسية: ههههههه سعداتك زيدي
شريفة: قلت غيكون نساني و لكن مع شافني خرج عندي كيضحك و عيطلي بالسمية العزيزة .. و فداك المرة حضر لشي حوايج خايبين عشتهم و عاونني بزاف و وقف معايا حتى كان ماشي و عطاني تيليفونوو و البراسلي لي كيدير .. البراسلي باقي عندي و التيليفون مشى و مشاو معاه اللعب د الحنش و سوبير ماريوو و اغاني ديال الشاب خالد و عمرو و mr oka و عقيل .. كنت كنحماق عليهم و نبات نسمع فيهم و نحفضهم و الغذ ليه ندند بيهم و غير يوصل الليل و يعيطلي نتسلت للسطح و نرد عليه .. مرة نبقى ساكتة نسمعلوو كيعاودلي على كازا شحال كبيرة و فين مشى و جا و نهارو كي دوزو و مرات نخوي عليه انا قلبي و نغني ليه و هي غادية .. تال النهار لي هربنا فيه .. راني عاودتلك شنوو وقع مع داك خينا ( باها لأسية ) ..!
أسية:( حركات راسها بأسى ) عارفة عارفة ..!
شريفة:( ضحكات ) شفتك سحتي ا بنتي ههههه ايييوا و هنا مشات خبيرتي من واد لواد و بقيت انا مع ولاد الق*** هههه ..!
أسية: ههههه حرام عليك دابا تا حكيم عندك واحد منهم ؟
شريفة:( عضات على فمها و قالت و هي كتقلب فعينيها ) واش نتي حمقة ؟ يلا هو ولد الق** شنوو خلينا للوخرين نيت .. سي امغار راه الحلاوة ديالي .. غير ضحكت معاك و صافي .. حاشة واش يكون ولد الق** ..!
أسية: هاي هاي هاي .. ها هي بدات تكر و تعتارف بلا عصا هههه ..!
شريفة: و شنوو راه الحب العذري ديالي ( تقادات فالجلسة و قالت بحماس ) عرفتي فاش كتلاقاي واحد الانسان لأول مرة .. داك le premier contact بيناتكم .. و بلا حتى حاجة كيبدا قلبك يضرب يضرب يضرب بحال يلا غيسكت .. شي مدفع و لا شي طبل و كيضرب فصدرك تا كتقولي غيخرج من بلاصتوو ..! يديك و رجليك يفشلوو عليك و تجيك السخفة .. تطلع لك السخانة .. يطيح لك الطونسيوو .. ما يبقاش يجيك النعاس شهر و لا كثر و فينما تغمضي عينيك تتفكريه و كاع ديكشي لي قلت قبل كيبدا يخدم من جديد و الفراشات كيلعبوو فكرشك تا كتكمشيها و نتي ما عارفة مالها ..!
اسية: و علاش هاذشي كيوقع ؟ زعما اي واحد تلاقيتيه غتحسي معاه بهاذشي ؟
تفكرات عدنان لي حسات قداموو بهاذشي لي كتوصف شريفة بالضبط لدرجة بقات حالة فمها فيه كي البهلة .. عكس أيوب لي كان لقائهم عادي من غير أنوو كيحشمها بهضرتوو بعض المرات و كيحاول يضحكها ديما ..!
شريفة: نوو أبدا هاذشي كيوقع فحالة وحدة .. فاش كتلاقاي بلي كنقولوو عليه توأم روحك ..! الاغريق القدام كيفسروها بلي الروح كتكون مقسمة على جوج و اللحظة لي كتلاقى بشريكها كيجي داك le choc émotionnel " الاصطدام العاطفي " و داك القوة ديالوو هي لي كتخلينا لا حنا لا للرجال نحسوو هكاك ..!
أسية: وااااو ..!
شريفة: و فاش كنقولوو روح وحدة راه كتهضري على نفس الذوق و الاختيارت و الانشطة لي كيعجبوكم بجوج .. حتى من السلوك و كيفاش كتعاملوو كلشي كيكون متشابه .. كتحسي بداك الانسان مكملك او نقولوو كتعتابريه هو نفسك ..! حب أفلاطوني ما فيه لا مصلحة لا ولف و لا حتى تعمري بيه النقص و الفراغ لي عندك .. حتى حاجة ..! و تا يلا سولوك علاش كتبغي فلان ما غتعرفيش علاش .. يقدر يكون كلوو عيوب من راسوو لرجليه و لكن كتبغيه حيث هو لا غير ..!
أسية: ههه بحالك نتي و حكيم ؟
شريفة:( هزات راسها باه ) سي بحالي انا و حكيم و كاع لي كنحسوو بيه ترجمتوو لك فهضرتي .. نهار رجعت تلاقيتوو فأقشور بحال لقيت نفسي اوس جوج كتمشى حدايا .. داك الدفئ لي حسيت بيه و انا حداه .. سبعة و عشرين عام عشتها و عمري جربتوو الا معاه هو نفسوو .. ولد الجيران ، صديق الطفولة، حبيب المراهقة، و دابا "روح الروح" و غنشوفوو مستقبلا شنوو غيكون هههه ..!
أسية: راجل اللفعة هههه ..!
شريفة: ههههه الله ..!
شريفة: ههههه الله ..! ( عضات صبعها و كملات ) و شفتي ربي كيبغيني حيث دارو فحياتي و لقاني بيه و خلاني نذوق الحلاوة على اصولها و انا عارفة من نهار دخلت لحياتوو ما يقدرش يخونني و ما عمرو يقدر ينساني او يرتاح بلا بيا واخا يحاول مغيقدرش ..!
أسية: حبيييت ..!
شريفة: يقدر حكيم شخصيتوو صعيبة و كيدير شي حوايج كيمرضوو و ما تقدر تصبر عليه حتى وحدة و لكن كاينة وحيدة لي تخلقات ليه .. و هي انا .. باش نصبرو على بعضياتنا و نزينوو فعايلنا الخايبين فعينينا و نبغيوهم حتى هما .. كيفما هو صعيب حتى انا صعيبة و ماشي اي واحد نعيش معاه مرتاحة و هاذي هي الدنيا شي صابر على شي و كل واحد كيضحي بشوية من جهتوو باش جوج يكملوو مع بعضياتهم ..!
أسية:( ضحكات ) ههههه غير كتقولي .. غذا يديرلك شي حاجة تصعري عليه و تناتفي نتي و ياه و تقولوو ما عندي ما ندير بيك فحياتي دييكاج ..!
شريفة: هههههههه بحال شفتيها بعويناتك بجوج ..!
《 ما أجهل الناس الذين يتوهّمون أن المحبة تتولد بالمعاشرة الطويلة والمرافقة المستمرة. إن المحبة الحقيقية هي ابنة التفاهم الروحي، و إن لم يتم هذا التفاهم الروحي بلحظة واحدة، لا يتم بعام ولا بجيل كامل . "جبران خليل جبران" 》
شريفة:( سكتات مدة و رجعات قالت ) أنا ما لقيتش لي يشد بيدي .. ما لقيتش لي يقولي قراااااي .. عينيك حفيهم مع الكتوبة .. ما لقيتش لي يهز عليا الحمل و يعاونني .. كانت طريقي مرسومة و باينة .. و لكن نتي ؟ لي فتحتي عليها فمك كنجيبها لك .. عمري حرمتك من شي حاجة و يا ربي غير تقرايلي و توصلي للي انا ما قدرتش نوصلوو .. علاش غتربطي راسك بواحد و نتي باقى فهاذ العمر ؟
أسية: و لكن شكون قالك أنا مغنقراش و نفرحك ؟
شريفة: فاش تبقاي سهرانة معاه فالشاط تال الصباح و تفيقي بعينيك مبوقين و دماغك طافي .. قوليلي غنقرا .. فاش غيبغي يشوفك و تبطلي قرايتك على ودو قوليلي غنفرحك ..!
سكتات أسية كتضور فعينيها مزنكة و شريفة كتشوف فيها بتنهييييدة .. بعد مدة رجعات قالت ..!
شريفة: حكيم لي كتهضري عليه .. بخدمتوو و دارو و طونوبيلتوو .. عندو مشاريعوو و فلوسوو فجيبوو .. ما عطال على حتى حد .. الدنيا حكاتوو .. جرب و عاش .. عقلوو عامر و عارف راسوو شنوو كيدير و هو شنوو باغي و تا حد ما كيحكم فيه .. راه ربعة و ثلاثين عام تبارك الله ..! و انا لي قدامك بداري و طونوبيلتي و مشروعي هانا بديتوو و وقفتوو و غنخدم عليه حتى يطلع شوية بشوية .. و غير نهنى عليه غنرجع نقرا حتى انا و باقي غندير شحال من حاجة فحياتي ..!
اسية: الله يعاونك و يوفقك ..!
شريفة: أميين ..! لي بغيت نشرحلك هو حنا تقريبا راه وصلنا و درنا علاش نرجعوو و ( ضحكات ) شرفنا كاع .. و لكن نتوما باقيين صغار .. هو البطالة قاتلاه و قلة الشي ما غتخليهش يرتاح معاك و غيقتلك غير بالشكاوي و الحكام الخاوي و نتي بينوو و بين قرايتك ما غتقدريش توازني و غتخرجي على راسك .. هاذشي بلا ما نهضرو على فاش غيبدا يتمرضن عليك و يقولك علاقتنا برداااات و شوفي البنات لالياتك كي عايشين ..! وا نوضي نتي داك الساعة قلبي على كيفاش تسخني هاذ الغولاصيون لي بردات بيناتكم .. حتى يبزل مك فشي برتوش يحكوو معاك و شي نهار تفيقي تلقاي الطبل تثقب .. و غني داك الساعة اش داني و علاش مشيت ..!
أسية:( خرجات عينيها و ردات ) لاااا لاااا اويلي الله
يستر .. خلعتيني ..!
شريفة:( هزات حاجبها و قالت باستهزاء ) اللهم نخلعك انا و لا يخلعك عموو الغول ..! ( نحنحات ) و نقولوو كاع هاذ السيد صدق ولد الناس و بغاك للحلال .. نتي قادرة تتزوجي فهاذ لاج ؟ قادرة على مسؤولية عائلة ..! تهزي راجلك و هبالوو و عائلتوو حتى هي و عاد تشوفي راسك و تتهلاي فيه باش سي السيد ما يملش منك و يخرج يقلب على الجديد .. و عاد نشوفوو قرايتك يلا لقيتي لها شي وقيت .. هاذشي يلا ما غفلوكش الولاد و لقيتيهم كينقزو فوق راسك و كل واحد منين كيجبد ..!
أسية:( غير تخيلاتها وقفات قافزة من بلاصتها ) لاااا
شريفة: وا هي يلا ديتيها فالكتوبة ديالك و هنيتيني من جهتك .. فهاذ العمر راه ما غتزيدك المصاحبة فحياتك والووو ..! غيخرجك ؟ انا نخرجك و نضور بيك و نقشبوو مع بعضياتنا و نرجعوو .. كيسمع لك ؟ ما كاين لي يعرف ينصحك و يتصنت لك قدي ..!
أسية:( تبسمات معاها ببراءة و قالت ) واخا .. و ما تقلقيش مني ..!
شريفة:( تنهدات و شدات فيديها بجوج ) انا باغية لك غير الخير ا أسية و نهار نشوف الواحد لي كيستاهلك غنعطيك ليه و انا مرتاحة .. عيشي و خلي كل حاجة تجي فوقتها .. ما تسبقيش عمرك ..!
أسية:( حركات راسها بالايجاب و عنقاتها بقوة ) شريفة ..! عارفة بلي كنبغيك ياك ؟
شريفة:( ضحكات ) سعداتي هاذ الزين كامل كيبغيني ههههه ( خربقات لها شعرها و قالت ) نخرج عند الناس .. خليتهم بوحدهم .. و لايني عييت بجري من هنا لهنا و ما ناعساش ( تفوهات ) اخخخخ .. خويخات .. سكسوو بالفريخات فليلة الشيخات ..!
****************************************
جالس فالصالون موسع بين رجليه .. حاط يد على الطبلة كيطقطق بجوج صباع فوق منها و تيليفونوو حداه مطفي كي خلاه ..! عينيه على التلفزة لي شاعلة فالجزيرة ..! عاقد حجبانوو و عينيه مخنزرين .. من الشوفة تعرفيه طالعلوو الد٠م حتال قندهار و ماشي د الهضرة ..!
لكن ملاك هي ملاك .. عزيز عليها تجبد خوتها بالهضرة و تفشش عليهم ..! مسرحة شعرها ببروشينغ سامل و مبوكل من الجناب دلافرونش مع مكياج خفيف موالم مع القفطان د الموبرا لي لابسة ..!
حطات البلاطوو لي هازة فيه طبسيل د سكسوو بسبع خضاري مسقي و معلقة باش ياكل ..! و بابتسامة قالت ..!
ملاك: بالصحة و الراحة ا خويا العزيز كح كح ..! ( شاف فيها و رجع حنى عينيه لطبسيلوو .. عمر معلقة كلاها .. و هي حداه كتهضر ) ما شميتيش شي ريحة و نتا داخل ..؟
حكيم:( شاف فيها جامع حجبانوو و حرك راسوو )
ملاك: عرفتي ا خويا احح مريضة و قابلت لك سكسوو حتى طاب و نضت جففت الدنيا و طلقت الفونتيلاطوغ ( بحال الكليم .. غير هو كيسف الهوا .. كينقيه و كيبردو ) نقى الجو بزاف و زدت المعطر كح كح كح و جمعت كاع الحلوة لي باقية ما تستفات و قاديتها ..!
سكتات كتشوفيه كياكل .. عينيه مرة معاها مرة مع الطبسيل .. و دماغوو مسافر .. ساهي و ما هواش فهاذ العالم ..!
ملاك:( كملات كتحاجيه ..! ) حيث ماما مشات مع محمد امين تال المحمدية كح كح كح .. عيطات عليا وصاتني نجمع ديكشي و نحط الغذا للدراري هي غتدمق مع محمد امين بشي بوكاديوس .. لدابا باقي ما جات دازت ديريكت للكوافورة تقاد حالتها .. و عدنان بقى فالمحل .. تغذا معايا غير خليل .. و خواتلنا البوطة كليناه بارد .. وا حكيييم ..!
حكيم:( رد بصوتوو المدعدع ) شكاااين ؟ نقصي من الفريع شوية .. نعرفوو غير شنوو كناكلوو ..!
ملاك: كح كح كح بغيت نسولك غير واش ما جاكش بارد ؟ حيث باقي ما ركبنا البوطة .. حطيتلك غير الخضرة بلا لحم غيكون مجمد .. احح تا حنا ما كليناهش ..!
هز حاجبوو فيها و رجع شاف فالطبسيل لي كلى منوو خير ربي .. مذاق فشكل جاه .. و لكن ما دا ما جاب .. دماغوو ماشي معاه .. هضرة شريفة باقى كتزغنن لوو فوذنيه و زادت ملاك واقفة فوق راسوو ما بغاتش تسكت .. دوخاتوو ..!
جر طرف د بطاطا مع ذاقها بزقها .. و دفع الطبسيل بزعفة و وقف نيشان للكوزينة .. فتح الثلاجة جبد قرعة ديال اللبن هبط على النص فيها و زدح الباب ..! و مع الزدحة تسمع صوت حبيبة و الدراري فالدار ..!
هضرات حبيبة مع ملاك و غير عرفات حكيم كاين دخلات كتطير للكوزينة عندو ..! الوجه مقاد على حقوو و طريقوو .. لابسة تكشيطة فالبلوسيال كتهبل ..! شعرها مقطع كاري و مصبوغ فلاكاجوو .. الظفار مقادين و الطالون قد ما مايلوو فالرجل ..!
مراة د الوقت و عزيز عليها تتهلى فراسها .. واخا هاذشي كيجيبلها غير المشاكيل مع ولادها .. خصوصا حكيم و عدنان .. لي باغيينها تستر و تدير الحجاب ..! و لكن هي اوهوو كحل عيونوو هو لي ما تديرش ..! ففمها غير .. كيخنقني ما نقدرش عليه .. ما شغلكمش فيا .. واش انا لي والداكم و لا نتوما ..! منين نشبع من شبابي دابا ندير الخمار غير هنيوني ..! اييوا لا شبابها تسالى لا هي تهدات لا هما سكتوو من النكير ..!
حكيم:( قرب باسلها راسها و يديها .. تا عنقاتوو بالجهد و كمشها عندو .. موحشاه فوق القياس ..! ) عاد ؟
حبيبة: توووحشتك ا ولدي ( طبطبات على ظهرو ) الغالي ديالي ( حطات يديها على حنكوو و قالت ) ضعافيتي ا حكيم .. ما كنتيش كتاكل ؟ بعدا ماري حطاتلك غذاك و لا بقات مقابلة داك المشقوف ثاني ..!
حكيم:( تبسم بهدوء و قال ) الله يهديك ا الواليدة ..! كليت لي كتب الله ..!
حبيبة: اييوا لباس .. فاش عيطتلك كنت كنشوف واش غتجي مع الغذا نخطف الرجل انا و محمد امين و نتجمعوو على لقمة د سكسوو و لا غير نقضييو باش ما كان فالزنقة .. من الثمنية د الصباح ما وليت للدار .. غير كنطيرو من هنا لهنا .. و الوقت بسلامتوو تا هو دغيا كيدوز ..!
حكيم:( حرك راسوو ) فين هما الدراري ..!
حبيبة: مع مول الهوندة .. كيهبطوو الطيافر غيسبقنا الشيفور مع الدراري ديالوو و عيساوة حتى توجدو نتوما و نلحقوو عليهم ..!
حبيبة: سير لبس عليك و قاد حالتك .. ما تعرف تعجبك شي بنيتة فالحفلة و نفرحوو بيك حتى نتا .. ياك باغي تعمر دارك مور كريمة و دفعتي الدعوة د الطلاق فالمحكمة .. ايوا على الله نلقاو لك شي شريفة ..!
حكيم:( لعب بلسانوو ففمو كيحاول يفهم فين باغى توصل و لاش كتلمح ..! ) يَّما ..!
حبيبة:( تبسمات و قالت ) و شنوو نلقاولك شي شريفة علوية حرة نتناسبوو مع مول الشي ..!
سكتات كتسناه يهضر .. باغى تجبدلوو طرف لسانوو و تسل منوو الهضرة غير بالهداوة ..! ناسية بلي حكيم تموتي و ما تخرجي منوو نص كلمة .. و حتى يلا هو بغى يعاودلك كيرميلك جوج حروف و نتا كمل من راسك .. فهمتي تبارك الله .. ما فهمتيش شغلك هذاك ..!
دار فيها شوفة باردة .. و خرج من تما مخليها مبلقة عينيها ..! داز فالصالون حدا ملاك و على غفلة عطاها بضربة لعنقها من اللور .. تا تسمعات بالجهد و قفزات هي من بلاصتها مخلوعة و موجعة .. شافت فيه مغبنة و هو مطرطق فيها عينيه ..!
حكيم:( هز صبعوو بتحذير و قال ) شحال ما بقيت غنقطع لمك لسانك من الجذر و نعلقولك فوق راسك ..باش تعلمي تجمعيه عندك ..!
ملاك:( ردات بتمسكين ) شنوو درت ؟
حكيم:( رد ببرود كيقشر فشنافتوو و يد وحدة حاطها على جنبوو فوق السمطة د السروال و الثانية كيحركها جهتها ) والوو غير رشقاتلي بغيت نفرعك .. مزيانة هاذي ؟؟
خنزر فيها تا رجعات باللور مبعدة من حداه .. عارفاه فاش كيوصل لهاذ الحالة .. كيكون وصل للطوب غتزيد معاه شوية غيقلبها .. خصوصا من الديبار دخل للدار معصب ..!
واقفة حبيبة وسط ولادها لي ضايرين بيه كي السبوعة واحد يحنث الثاني .. و هي فرحانة و هازة راسها بيهم ..! دايرينلها الشان و المرشان مع البعيد قبل من القريب ..! ملاك حداها و لافامي و الصحاب د محمد أمين موراهم .. و بلا ما ننسى كزانوفا سي حسام لي حاضر ناضر و ممتع عويناتوو بخيورات بنات بلادو ..!
عيساوة مشخضين الطرح و البنات من العائلات بجوج مخشيين وسطهم كيشطحوو .. و الدراري ما كاين غير هاك بلاك بحال الفيران هازين يديهم للسما ..!
الطيافر مهزوزين كيلعبوو بيهم و عائلة العروسة كيسلموو و يعاودو مدخلينهم للداخل .. تاويل و اشمن تاويل .. ترحيب و اشمن ترحيب .. و الحق يتقال دايرين كل ما فجهدهم باش يفرشوو لبنتهم فين تمشي و يحمرولها وجهها ..!
لالة بسمة الطبيبة ديال العائلة .. دريوشة داخلة سوق راسها و عقلها كبير تبارك الله .. خدامة و كتقرا فنفس الوقت .. تخصص القلب و الشرايين ..! قرات و عرفات كي تصيد قليب محمد أمين تا ما يبقى يشوف حد من غيرها ..!
هو لي كان خاشي راسوو غير فالسلوكة و البيسيات .. بما أنوو مهندس دولة .. خدام ف fst د المحمدية و تما عندو دارو فين غيسكن هو و بسمة .. و لي كان قليل فين كيعمرها و كيدوز اغلب وقتوو مع حبيبة ..! الزهواني فخوتوو و لي كان كيقيل يزهيها مع الطلبة .. جات لي جمعات و طواتلوو فخطرة ..!
عينيه غينقزو منهم القلوبة بالفرحة و هو كيشوف لي ملكات قلبوو هابطة بتكشيطة فالغوز بيبي مطروزة و كتلمع بالحجر .. دايرة مشيطة خفيفة و مكياج بارد .. بارزلها حروفها لا غير ..!
سلمات بابتسامة حتى وصلات لعندو و وقف ساهي فيها و هي كضحك حشمانة ..! حط يديه على ظهرها و جرها عندو سلم عليها من الوجه و جلسها حداه ..!
بسمة:( بفرحة و الضحكة فالتة لها و منورة وجهها كثر و كثر ..! ) ما متيقاش بلي راك فدارنا ..!
حاس بالسخانة كتدكد فيه .. و سطولة ديال العرق كيتكبوو عليه ..! تزير عليه الحال بزاف .. تا فتح الصدايف ديال الشوميز .. كيتنفس بصعووبة ..! نغز ملاك لي حداه و قال
حكيم: شي كاس د الما بارد معاك ..!
عوجات وجهها عكزانة تنوض و بزز منها تقلعات تجيبولوو .. غادية وسط الشطيح و الغنى كتقلب على ماماين العروسة تمد لها .. حتى دخل فيها حسام .. شوية ما يطيحها ..!
ملاك: بقيتي مرافق مع اححح كح كح كح
حسام:( رد بضحكة ) مع اححح و اي و امم و ااه .. امالك ا هيتا ..!
ملاك: راني مريضة ا بنادم .. بقيتي مرافق مع القطاطعية حتى رجعوو عندك خداميهم ..!
دازت فيه كتبركم و هو متبعها بعينيه ..!
حسام: بقوة التهلوو الجناب بداو يطلوو ..! ( دازت وحدة من قداموو تبعها بلا ما يحس و بصوت مهموس قال ) شفت الفخاض و قلبي تمخض ..!
راجعة بالشوية عليها هازة كاس د الما كتقلب على حكيم .. حتى خرج فيها حسام مرة اخرى .. هز الكاس و هبط عليه جغمة وحدة ..!
ملاك: ماشي ليك اوييييلي .. هذا ديال حكيم ( تمتمات فنفسها ) تشرب فيه السم يقطعلك المسارن ..!
حسام: حكيم مشى بحالوو .. عيى و مشى يرتاح ( ضحك ) و سيري تجلسي حتى نتي قدام خوتك .. قبل ما ينقز علينا شي واحد فيهم .. شفت عدنان كيبلاني واش يجمعنا بنص و لا يدخل فينا ديريكت بكروشي ..!
ملاك: فين هو ؟
ضورات عينيها عليه حتى لمحاتوو جالس فصالون فيه غير الرجال ..! حاني راسوو و هاز عينيه فيها بتخنزيرة د العداو ..! كيشوف فيها داك الشوفة ديال ذوبي فبلاصتك ما نلقاكش كضوري تما ..! حرك راسوو للجنب بمعنى تحركي .. حتى هبط شوية من شعرو على عينيه ..! و فالبلاصة خوات الساحة و مشات جلسات حدا حبيبة مركنة ..!
قلب وجهوو بانزعاج عاقد حجبانوو .. كيدوز يديه بالشوية على لحيتوو .. مغلغل صباعوو فيها ..! حاس بالعينين عليه مقلقينوو .. بحال هاذ الاجواء ما عندوش معاهم و كن ما كان خوه ما يحطش رجليه تما نهائيا .. يبارك و يسيفط كادو مضخم و هو ما يمشيش ..!
..... 1 : شكون داك الزين المسرار لي جالس تما مع عمي صطوف ههه ..!
..... 2: هذاك ا لالة خوو العريس .. كاين حكيم لي خرج قبيلة .. هذاك بوليسي .. مزوج و مراتوو حاملة .. غزالة يا ختي كتحمق و العوينات خوضر كيهبلوو و لاطاي عامرة تبارك الله .. غير هي عروبية شوية لا فلباسها لا فهضرتها .. كتجيني فشكل ..!
...... 1: و ها هي عروبية و ذاتوو راجل يحنث عشرة .. كيتي انا و ياك .. نقيلوو نتجبدو و الهضرة بالحساب و عنداك بالاك .. و ما حاشاهلنا تا كلب د الخلى هو التالي ..!
..... 2: اييوا الله يعطينا زهر الخيبوعات ..!
..... 1: زيدي كمليلي على المعفر ( غمزاتها جهة عدنان )
..... 2: كاين ا لالة محمد أمين هو العريس و عاد عدنان و الصغير هو خليل .. راه فين هو .. هذاك ا لالة على ما سمعت كيوجد وراقوو غيخرج لألمانيا غيقرا شي ست شهور فورماسيون و يبدا خدمة فبوسط مخير .. يالاه شد الماستر هاذ العام و كان داير السونطر كيقرا الالمانية و كيقري هو لونغلي نعام ا لالة ..!
......1: الفلووس كاينة علاش ما يمشييش حتى نتي .. كتجي غير فالمساكين ..! أجي بعدا عاوداتلك بسمة فين تلاقات بهاذ محمد أمين ديالها .. شفتها ضربات ضربتها و سقرات ما بقات لا تهضر لا تعاود .. بقالها غير تقولنا كلشي جا على غفلة و تبلوكينا ..!
......2: ههههه و الله ما كذبتي .. كيتزوجوو بحال يلا وصلوو للقمر ..! هي كاع ما قالت و لكن على ما سمعت .. تعارفوو فالفيسبوك .. كانوو دايرين شي جروب ديال المهندسين و الاطباء كيتعارفوو بيناتهم .. شحال و هما كيهضرو و نهار تلاقاو قالك محمد أمين كان ناوي غير يكوي و يمشي .. ساعة شاف الزين حوال .. الأداب و الصواب .. جالسة معاه و حشمانة و الضرافات كتقطر .. غرق فيها و ندم على النهار لي فكر يتفلى عليها ( ضحكات ) حلات باب قلبوو بالساروت و رجعات شدات عليها ..!
.....1: ههههه هاذشي كيووت ..!
.....2: و داك الزين المسرار لي كتسولي عليه .. يا لالة داخل سوق راسوو من خدمتوو للدار للجامع .. شاد فدينوو بزاف .. عندو واقيلة الليصونص و لا deug فالشريعة .. و فاتح محل ديال ذهب .. ذهايبي صحيح و كيدخل الزبابل د الفلوس فالنهار و المحل كي داير بانيه .. جوج طباقي يا زكية يا ختي .. ديكشي كيخروض العقل ..!
عينيه حومر كيتشدو و كيرجع يحلهم بصعوبة .. عراق و القاميجة رجعات عليه لاسقة كتقطر ..! تزنك و وجهوو حماار و ذاتوو كلها كتفور بالسخانة لي شاعلة فيه ..! حلقوو ناشف و لسانوو بزز كيحركوو ..!
بحال يلا مخشي فشي قرعة و ساديين عليه .. كلشي كيدوز قداموو ثقييل .. ضواو الطونوبيلات و السطوب ما بقاش كيفرز بيناتهم .. حتى باش يهضر ما قادرش ..!
شعل الاحمر و بلا ما ينتابه زاد مكسيري حتى خرجات فيه طونوبيل من الجنب .. عجناتلوو الباب و تزدح هو بالجهد مع الفولا تا تسمع الكلاكسون كيتقب الوذنين و هو مغيب فوقوو ..!
بغات تحماق بالحريق فالدار ما خلات خزامة .. شيح .. ازير .. و والوو ..! الحريق كيضربها بحال الضوو .. و تحتها كياكلها ماكلة .. كتعيى تحك و ديكشي غير ما كيزيد يهيج كثر و كثر ..!
خارجة من الحمام كلها عرقانة .. وجهها مزير و عينيها حومر بالبكى .. كتمشى مفرقة رجليها و شادة على ظهرها .. لقات قبالتها امها و بحرقة شهقات و قالت ..!
كريمة: الموووت الموووت ما بgيتش gادرة نكعد بلا والوو .. كنتgطع ا مي .. لgيت الدم تحتي عاد دابا دروكا .. نخرg عليا جلايبتي و نطرgو يانا و ياك الطبيب .. احاااااححح ا مييمتي ..!
الأم: نوضي من تما يالاه .. غوتي على عكوزتك ..!
كريمة: واخا يانا نغوت عليها ..!
بزز لبسات جلابتها و قادات فولارها خارجة و كتهضر مع حبيبة ..لي نوضاتها من وسط العشا ديال ضريب الصداق ..!
حبيبة: واش الدم كثير و لا غير شوية ؟ كتحرقك كرشك و لا تحتك ؟ ( تخلعات ) صافي صافي .. سبقوني لابن رشد انا غنجي دابا لعندك .. الطبيبة ديالك ما غتكونش دابا فهاذ الوقت فلاكابين " فالعيادة " ..!
قطعات معاها و هزات ساكها تالفة و مخلوعة عنداك تكون وقعاتلها شي حاجة .. عارفة كريمة بلا عقل و متهورة و تتوقع منها تدير أي حاجة فراسها .. شافت فعائلة العروسة و فولادها و قالت ..!
حبيبة: هاذي كريمة .. جاتها ايموغاجي واقيلة و فيها الحريق كيقطع .. ما غتعرف ما تدير بوحدها خاصني نمشي نلحق عليها دغيا .. عدنان توصلني ..!
محمد أمين: تا حنا سالينا نمشييو كاملين ..! نعلموو حكيم واقيلة ( جبد تيليفونوو دوز لابيل و فالبلاصة رجعلوو ) طافيه .. غيكون مشى لدارو تكى .. نتي و عدنان سبقوو لعند كريمة و أنا نوصل لافامي و ندوز مع خليل و ماري لعند حكيم نبدلوو علينا و نجييو عندكم ..!
عدنان: و عليه .. نتوكلوو على الله ..!
*****************************************
صوت لومبيلونص كتسمع فالشارع كامل ...! و لي دازت من حداه كيردد بأسى .. " الله يحد الباس "
الطريق عامرة غطرطق بالحديد .. بالكشيفة باش كيسلكوو فيها ..! حكيم ناعس فوق الباياص مغيب ..! ما فيه حتى ضربة من غير جنب جبهتوو لي بدا يزراق و تبوق شوية ..!
خافوو يكون جاه نزيف داخلي .. لأنوو من غير هاذشي ما باين عليه والوو ..! و حتى لومبيلونص خاوية من الماطريال ما عندهم باش يفيدوه ..! حدهم قادولوو الاوكسيجين مغطي على نيفوو و فموو .. حيث التنفس عندو قليل بزاف ..!
مدة طويلة عاد وصلوو ل chu ابن رشد ديال الدار البيضاء .. دخلوه نيشان المستعجلات لي كيطيحوو بالبشر ..! ها لي مفتوحة ليه يديه و كيغوث .. ها لي ناعس فالارض كيموت و ما كاين لي يديها فيه .. ها لي رجليه كتسيلوو بالما و مدودة .. واحد الحالة ما تمنى تشوفها لعدوك ..!
الاطباء كيطيرو و ينزلوو و دايرين فوق جهدهم .. و لكن الغالب الله .. حتى هما عندهم خصاص كبير لا من الأطر لا من الماطريال و شحال قدهم .. حتى هما غير بنادم و نهار على نهار الواحد كيحط سلاحوو و كيتقهر ..!
دخلوو حكيم إيغجون دغيا .. ضارو بيه جوج د الاطباء .. كيقلبوو فيه و كيسمعوو للي جاو معاه فلومبيلنوص باش يعطيوهم معلومات عليه .. تأكدوو بلي ما عندوش نزيف داخلي عاد ارتاحوو ..!
قيسولوو الطونسيوو لقاوه هابط تال ربعة و السكر طالعلوو لستة غرام ..! وجهوو صفر لدرجة كتخلع و السخانة كتدكدك فيه و التنفس قليل ..!
ضربولوو الأنسولين فالبلاصة باش يهبطلوو السكر و يتعاوط ..! قادولوو السيروم و دارولوو فيه الدوا ديال الطونسيوو و شوكة على ود السخانة ..! خلاوه متكي و الاوكسيجين على نيفوو و فموو و هو مغيب .. مرة مرة كيحرك صبع يديه ..!
الطبيب:( بجدية شاف فالفرملية و قال ) تسناوه يفيق و ديرولوو هاذ التحاليل د الدم و ديال البولة .. فاش يخرجوو علميني .. داكوغ ..!
ف: داكوغ دكتور ..!
فتح عينيه كيرمشهم ببطئ .. حاس بذاتوو كلها كتحرقوو بحال شي حد جاب شي عصا و هرسها على عظاموو .. كلشي كيضرو .. و السخانة كتاكل فيه من الداخل واخا ضربولوو الشوكة ما قضات فيه والوو ..!
فموو ناشف و لسانوو ثقيل عليه باغي يهضر و ما قادرش حدو كيحرك صبعوو د الشهادة ..! الموت كيشوفها بين عينيه و وجع خايب كيقطع فمسارنوو .. السخفة و الفشلة و حريق الراس و زادو كملوو عليه بالتحاليل و لي سكانير لي دارولوو .. د الراس و القفص الصدري كامل ..!
الطبيب:( شاف فيه .. قرب جهتوو و قال ) كتسمعني ..؟ ( غمض عينيه و رجع فتحهم ) قادر تهضر ؟
حرك صبعوو بالنفي .. كيتنفس بصعوبة .. كن ما كان الاوكسجين كن يعلم الله بحالتوو ..! تنهد الطبيب و قال ..!
الطبيب: داكوغ .. المهم حنا درنالك كاع التحاليل لي شكينا فيهم .... لي زاناليز ديال الدم و ديال البولة خرجوو كاملين عندك مزيانين الحمد لله ..! و مشينا لبعيد كاع و قلنا ممكن تكون شي حاجة خطيرة .. درنا سكانير د الراس و القفص الصدري و حتى هما نتائجهم ممتازة .. يعني ما عندك والوو ..!
مد يديه فتحلوو عينيه كيقلبها و هز طابلوو محطوط تحت رجليه فالباياص كيقيد فيه ..!
الطبيب : السكر و الطونسيوو لاعبين عليك .. دابا بداو يتقادو تحت المراقبة ديالنا ..! السخانة هبطات شوية .. غنعطيك اوغدونونس تبعها و غتولي مزيان .. و ضروري تشوف اختصاصي ديال الديابيتيك " السكر " .. يكمل لك السيرو و تقدر تخرج ( بتساؤل ) تعيط لشي حد يجي موراك ؟
حكيم:( غمض عينيه و رجع فتحهم بمعنى ااه ..! )
جبد تيليفونوو من البلوزة البيضة ديالوو و مدولوو .. قيد بصعوبة نمرة محمد أمين و تزدح كينهج فبلاصتوو و العروقات كتكب عليه بالسطولة ..!
الطبيب:( تسنى مدة و هو كيصوني حتى رد عليه و بجدية ) السلام عليكم .. معاك الدكتور ابراهيم الجوهري .. طبيب ف ابن رشد .. جابولنا هاذ العشية واحد السيد داير اكسيدون هو لي عطاني نمراك .. كنظن الاخ ديالك ( غمض حكيم عينيه و رجع فتحهم ) هو دابا مزيان .. خاصوو يخرج من هنا ما كايناش بلاصة ..! غنتسناوك حتى تجي موراه .. الله المعين ( قطع معاه و حط لوغدونونس فوق كرش حكيم و تم خارج ) الله يجيب الشفا ..!
محمد أمين:( تخطف منوو اللون و تخلع على خوه .. قطع لابيل ما مبينش لخوتوو و بزربة قال ) خليل .. ماري .. خرجلي شغال ضروري غنحطكم فالدار و نكمل ما عنديش الوقت و حتى نتوما ما كاين لاش تتكبوو كاملين فالطبيب .. دابا يعلمونا بشنوو قالولهم ..!
****************************************
تسناوها حدا الباب ديال جناح النساء و التوليد .. جايا حبيبة كتجر فتكشيطتها مخلوعة ..! بقات بلبستها و ماكياجها ما كفاهاش الوقت فين تبدل ..! لقات بسمة فرشاتلهم الطريق و عيطات على بنات صحاباتها باش يسبقووهم هما اللوالة يدخلوهم .. و ديكشي لي كان ..!
دخلوو بثلاثة بيهم و عدنان بقى برا كيتسناهم .. حيث العيالات تما كيكونوو عريانين و لي جاها الوجع و باقي الوالدة ما تحلات لها كدير لامارش تما و ربي لي عالم بيهم .. فما جاتش يمشي معاهم ..!
طلعات كريمة فوق الكرسي فين كيفحصوهم .. حاطة كل رجل على حديدة فالجنب .. و هابطة للتحت باش نصها يجي باين ..! قلباتها الطبيبة مزيان و كريمة كتصرصر و تغوت بالحريق .. طابت بالجهد ..!
د:( كملات و حيدات الليكات لاحتهم و مشات للافابوو ديالها غسلات يديها مزيان و عقمات .. عاد قالت ) تبعوني للبيرو عندي ..!
خرجات و هما موراها حتال بيروها .. جلسات فبلاصتها و هما مقابلين معاها كيتسناو شنوو غتقول ..!
د: مدام كريمة عندها التهاب حاد .. غتكون لقطات شي ميكروب يا فالحمام و لا لابيسين و لا شي حاجة بحال هاكا .. الفاجان ديالك طايب بزاف و بصراحة وصلتي لحالة كغاف " خايبة " بزاف .. و هاذو غير احتمالات .. السبب الرئيسي ما عرفتوش ..!
حبيبة: و بالنسبة للدم ا دكتورة ..!
د: كنظن كان خفيف ياك ؟ ( حركات كريمة راسها باه و كملات الطبيبة ) كيفما قلت ميكروب خايب بزاف لاعب عليك و حتى الحكان لي كتحكي زاد هيج لحمك كثر .. هذاك ماشي ايموغاجي .. غير واحد من الافرازات لي كتخرجهم ذاتنا باش كتعلمك بالخطر .. و الميكروب و هو لي خلى لي بيغط نواغ ينزلوو منها ..!
حبيبة: البيبي ما تضارتش بعدا ؟
د:( حنات راسها كتكتب فلوغدونونص ) ما نقدر نقولك والوو هاذ الساعة .. غنكتبلك شي تحاليل ا مدام .. ضروري تديرهم فأقرب وقت و غير تخرج الغيزياطا تجيبيهالي .. هاذو غير غتستعمليهم و تداوميهم .. غتولي مزيانة ان شاء الله ..!
كريمة: واخا ..!
د: الله يشافي ..!
الكل: شكرا ..!
******************************************
حيدات صندالتها و لاحتها حدا الفوطوي .. متكية بتعب كتكمدهم .. ما كمل النهار حتى تسالات و ما بقى لها جهد ..! يالاه هزات تيليفونها تشوف حكيم واش سيفطلها شي مسج .. و هو يطلع لها لابيل بسمية * أحمد برادة * .. عوجات فمها كتميق بعينيها .. و بهدوء جاوبات ..!
شريفة: موسيوو أحمد برادة ..! عاش من شافك و سمع صوتك ..!
أحمد برادة: شريفة بنتي .. ça fait longtemps " مدة هاذي " ما هضرنا .. j'espère " كنتمنى " تكوني مزيانة ..!؟
شريفة: طخي بيان ربي يخليك ..!
أحمد برادة: Parfait " ممتاز " ..! كنت أنا و مدام خديجة كنهضرو عليك هاذ العشية و بالصدفة سبحان الله .. شفنا لي سطوري ديال مدام كوثر بنجلون مصوراك فالمحل ديالك .. درتي الافتتاح ؟
شريفة:( مصات شنافتها و قالت مطلعاها عليه ..! ) وي درت الافتتاح اليوم و شحال تسنيتك نتا و مدام خديجة .. يمكن تشغلتوو و ما صلاحش لكم تزوروني ..!
أحمد برادة:( باستغراب رد ) و لكن ما عيطتيش علمتينا .. ما يسحابناش عند L'ouverture اليوم ..!
شريفة: وي ما عيطتش مي سخرت واحد من الدراري لي خدامين عندي و عطيتوو كارط فيها سميتك نتا و المدام و كارط لمهدي و اكدت عليه يمدهالكم باليد ..! ( شقلبات عينيها ) راحنا قربنا نولييو عائلة و حباب زعما .. حشومة كاع نحل الريسطوو و ما نحضركمش ..!
أحمد برادة: pfff .. دوماج ما وصلنا والوو .. أما كنا نجييو لعندك بالفرحات علينا .. en tous les cas félicitations charifa " فجميع الأحوال مبروك شريفة ..! "
شريفة:( هزات حاجبها و بكل برود قالت ) شفتي هاذ ولاد الق** ديال المغاربة .. عمرهم يطفروه فحياتهم غير بهاذ الخدايم ديال الشما٠يت .. الله ينعل ط** موو ولد الواسعة .. غير لي يكور دوك ليكارط و يطلع هم ليه مع كرو ولد الق** .. الزا** لي حطوو كنسولوو و كيقولي عطيتهم لكارط و فرحوو .. و قالولك ضروري ما يجييو ..!
أحمد برادة:( خرج عينيه بدهشة .. صدماتوو فيها لدرجة حنا عينيه كيتأكد واش كيهضر مع شريفة نيت لي كيعرف ) شرييفة ؟ mais c'est quoi ça " و لكن شنوو هذا ؟ " ااء ؟؟
شريفة: غير سمحلي تعصبت و ما حسيتش براسي .. داز عندي النهار طويل غير جرا من هنا للهنا .. يالاه دخلت للدار .. و الله ما لقيت لوقت حتى باش نضربلي شي قاسحة و كارو نقاد بيه المجاج .. و لكن دابا هانا غنتكيف بخاطري و نكمل السهرة بشي معسل ناااضي و شي كاس د الشراب يااااا سلااام .. الليلة زاهية .. و الله يعفوو علينا و خلاص .. كنهلكوو غير فصحتنا .. البلية بنت الق** ما مع اصل مها لعب ..!
احمد برادة:( رد مصعوق ) مبلية ؟؟؟ كتديري هاذشي كامل ..!!!
قبل ما تجاوبوو قطع عليها مصدوم .. مخليها كتفركل بالضحك عليه و على مراتوو لي سمعات صوتها حداه كتهضر بالشوية و سي برادة كيعاود هضرتها بالجهد ..!
شريفة: كان يسحابلي كرمة و فيها الكرموس .. صدقتي غير خرية و ضاير بيها الناموس ..! بشااااخ على الرج٠لة د آخر الزمن .. ههه ..! حو*** بكري ..!
****************************************
قاد ليه الخدية مور ظهرو .. عاقد حجبانوو و الد٠م مخطوف من وجهوو .. تخلع عليه حتى ما قد و الموصيبة هي ما عارفينش شنوو عندو .. واش هاذ الحالة لي وصل لها غير من الكسيدة لي دار ؟
محمد امين:( جبد تيليفونوو .. واقف عليه كيقرا فالمسجات ..! ) قالت لك بسمة يمكن غير من العيى ما دام دارولك كاع التحاليل و كلشي خرج مزيان ..! و ضربولك الانسولين .. عطيها غير للحلاوة باش يطلع لك الطونسيوو .. داك السخفة و الهلكة منوو ..! ( شاف فيه ) عليك بعصير د الحليب و التمر و الزبيب .. و بدا تشرب .. أنا غنقادولك و نتا رتاح بحالك يلا نعستي غيكون مخير كاع ..!
حكيم:( بصوت بزز كيتسمع قال ) و وا واخا ..!
خرج مخليه كيتنفس بصعوبة .. غير كيعراق و السخانة كتاكل منوو .. سخفان و فاشل و ذاتوو كيفما تحرك كيغوث بالحريق ..! غبر عليه محمد أمين خمسة دقائق بالحساب و رجع هاز بريق داير فيه العصير و كاس ديالوو .. خوالوو فيه العصير و مدولوو ..!
بزز شرب منوو .. حلوو لدرجة ما كتخيلش و لكن زوين و خاتر .. لسق عليه تا شرب ثلاثة د الكيسان .. خلاه كيكمل فالرابع و خرج هو كيهضر فالتيليفون بخاطرو .. تا تسمع صوت التهراس .. قطع لابيل و دخل كيجري للبيت .. لقى حكيم مغيب و الكاس مهرس قداموو فالارض ..!
الكشكوشة خارجة من جنب فموو و هو ما كاينش فهاذ العالم .. يدو طايحة جنب الناموسية .. كيفما حركوو كيمشي .. لدرجة شك واش ما٠ت ..! عقلوو بغى يخرج و الدموع طاحوو من عينيه و هو كيحرك فيه .. صدرو ما كيطلع ما كيهبط و النبض عيى يقلب عليه فيدو و جنب عنقوو .. و والوو ما كيحسش بيه كيضرب فخطرة ..!
محمد أمين:( كيشهق و يبكي و يحرك فيه بحال الدري الصغير ) ح حكيييم خوويا .. ساسي و علامن كنحط راسي و نعول .. لي كيشري همنا على حساب صحتوو و يسبقنا عليه فكولشي .. فيق ا خويا .. فيق و لمن تخليني ( تزدح على ركابيه وسط داك الزاج و الدموع هابطين حارين مع حناكوو ) نترزا فصحتي و ما نترزا فيك .. ننقص من عمري و نعطيك غير ما تخلينيش ..!
وقف بحال الحمق كيقلب على تيليفونوو يعيط على لومبيلونص .. ما يقدرش يهز حكيم بوحدو .. و حتى واحد من خوتوو ما ساق الخبار من غيرو .. باش يعاونوه ..! ما بغاش يخلعهم و فضل هو يتكلف و يشوفوو بعدا كي بقى و عاد يهضر معاهم ...!
محمد أميين يا محمد أمين .. ربي بوحدو لي عالم بالحرقة لي شاخضة فصدرو و هو كيشوف خوه كيموت قدام عينيه .. هاذشي يلا ما كانش مول الأمانة دا أمانتوو و بقات غير الكسدة محطوطة تما .. كتتسنى تتكفن و تتدفن تحت التراب ..!
محمد أمين:( بصوت باكي و بحة كتقطع فالقلب قال و هو كيهضر مع حبيبة .. من بعد ما رصى مع لومبيلونص د كلينيك بريفي و عطاهم لادغيس د الدار ..! ) الواليدة .. خ خوويا كيموووت ( عض على شنافتوو .. هاز عينيه فالسما حوومر و مدمعين ) أجي تسامحي مع ولدك و شوفيه .. يمكن هاذي آخر مرة لينا معاه
غلباتوو البكية و قطع عليها ما قادرش يزيد يهضر ..!
محمد أمين:( بحرقة ) واش تسوى الدنيا بلا بيك ؟
آش نوصف و آش نقول ؟ موس و تخشى فيها كيذبح و يعاود ؟ حرقة كتحكها فصدرها ؟ عافية و شعلات فيها تا سالوو دموعها كيحاولوو يطفييوها ..! و هي غير ما زايدة كتشخض ..!
عينيها رجعوو بحال قطرة د الدم و هي باقية ما عارفة شنوو واقع معاه .. و لكن محمد امين ما غيهضرش معاها من فراغ .. و حتى قلبها ما غينغزهاش النهار كامل غير هكاك ..!
خرجات بحال الحمقة كتبكي و تغوت حتى خلعاتهم ما عرفوو باش تبلاو .. بغاو غير يفهموو مالها و هي ففمها غير
حبيبة: ياااااا ربي لاااا تحرق قلبي عليه .. ياااا ربي خوذ من عمري و عطيه .. يا ربي راه ما عندي والوو من غيرهم يلا مشى واحد منهم .. عيني يطفاو .. ياااا ربي ما تشويليش كبدتي على عز ما كنملك .. حياتي بلا بيهم واااالووو .. واااا ولديييي
كتحك فصدرها و تعاود .. عند بالها هاكا غتبرد داك الحرقة لي شاعلة فيها ..!
حبيبة:( خرجات عينيها فيهم و قالت بالغوات ) واااا نووضوو وصلوني عند ولديييي .. فرحتي اللولة بين الحيا و الموت .. صاحبي و خويا و علامن كنحط الراس ..بين يدين الله .. شوف واش نعاود نسمع من فموو يَّما مرة اخرى و لا لا ( طاحت للارض تبكي و تقول ما بكات ) ياااااا ربي الحنييين
بالكشايف باش نوضوها من الارض .. عدنان شادها من يد و خليل من اليد الثانية .. و ملاك تابعاهم من لور كتدمع فسكات ... كلشي على اعصابوو و حبيبة ما بغاتش تسكت لهم فخطرة .. كتبكي من قاع قلبها و تشهق حتى كتسمع بحال التلقيفة ديال المو٠ت .. خلعاتهم عليها تا ولاو غير كيسايسوو معاها ..!
اما عدنان غير كمل المكالمة مع محمد امين باش يعرف شمن كلينيك هما فيه ..! قلع تقليعة وحدة طاير فالطريق ..!
ما عرفوش كي دارو وصلوو للكلينيك بداك السرعة و هما سالمين ..! سبقهم خليل للاستقبال عطاهم السمية و الكنية د حكيم .. لي غير طاباوها فالبيسي و علموه فشمن طابق كاين ..!
و بخوف كبير من شنوو غيسمعوو .. تمشاو جهة محمد أمين لي وجهوو صفر و عينيه حومر .. متكي على الحيط و هاز راسوو للسما .. مقهوور و حالتوو كتشفي العدو ..! قربات منوو حبيبة حيط كيديها و الثاني كيردها .. دموعها شلال على خذها و شنايفها كيترعدوو ..! الحروف تلفوو لها .. باغى قلبها يتطمن على كبدتها و فنفس الوقت ما قادراش تسمع شي كلمة تقتلها و هي باقية فالحياة ..!
شاف فيها بقهرة و داز عليهم واحد بواحد و رجع قلب عينيه للانعاش فين متكي حكيم .. صدرو عاري و ملسقين فيه كثرة السلوكة .. كل واحد باش متصل .. ديال نبضات القلب و الطونسيوو باش عبرولوو و ديال التبول ..! الاوكسجين على فموو و نيفوو و الشوكة د السيروم مخشية فيديه ..! و هو مغيب فخطرة ..!
و مع الضورة لي ضارت حبيبة تشوف فين كيشوف .. رجع الخط فجهاز القلب مستقيييييم .. دليل على القلب توقف على النبض ..! خرجات عينيها و قربات من الزاج لي بعيد بمسافة على فين واقفين جوج اطباء و معاهم الفرمليات ..!
حرك واحد فيهم راسوو بالنفي و وسع بين كتافوو و يديه و الثاني غمض عينيه و رجع فتحهم .. دليل على انوو كيوافقوو الرأي ..!
هاذ الحركة قتلاتها .. بغات تتسطى ..! كيفاش زعما ؟ واش صافي ولدها مات ؟ واش لهاذ الدرجة ما قدروش ينقذوه و يعاونوه ؟ ياك عاد هاذ العشية كان واقف معاها صحة سلام .. و دابا مالوو ؟
حبيبة:( غوتات حتى بح لها الصوت .. طاحت على ركابيها كتضرب فوجهها و تنتف فشعرها غتحماق ) وااااااااااااااا ولديييييييييي .... واااااااااا كبدتييييييي كنتشوى فيييييهااااا .. وااااااا ربيييييي ولدييييييي ..!
عرس الذيب الجزء 17
محتوى القصة
الشمش شرقات و هما باقيين فالطريق ..! حكيم عينيه حمارو بالعيى و قلة النعاس و البنات متكيين ما كاينينش فهاذ العالم .. كل وحدة حالة فمها فجيه ..! الستة د الصباح كان قدام العمارة د شريفة لي مع وقف حلات عينيها و بتعب و صوت ناعس قالت
شريفة: فففف وصلنا ؟
حكيم:( غمض عينيه و رجع حلهم كيتجبد ) وصلنا .. انهبط معاكم لي فاليز و نكمل بحالي ..!
شريفة: طلع ترتاح لك شوية بعدا ( دوزات يديها على حنكوو بحنان ) بزاف عليك هاذ الطريق كاملة و ما بغيتيش تعطيني حتى نعاونك فالصوكان ..!
حكيم:( رد باختصار كيفتح السمطة ) ما نعذبكش ..!
شريفة: عذابك راحة ا سيدي ..! ( ضارت عند أسية كتفيقها بالشوية حتى فتحات عينيها كتفوه و بهدوء قالت ) وصلنا ا تاسانوو .. هبطي بالشوية عليك سبقيني ..!
هبطوو بجوج أسية سلمات على حكيم و سبقات و شريفة بقات واقفة معاه ..!
شريفة: وصلهم لي غير للسانسور و باركة عليك .. جوج خلفات نتعاون فيهم انا و أسية نجروهم ..! ( حرك راسوو بالايجاب و هي كتسرح عينيها فالشارع الدنيا خاوية كتصفر ) عييتي كيبانلي .. ما غتجيش للافتتاح د المحل عندي فالعشية ؟
حكيم:( كمل الجبيد و وقف مقابل معاها .. حاط يد على جنبوو و الثانية هازها كيشوف الساعة ..! ) هاذ النهار عندي مزير .. موحال نلقى كي ندير ..! عندك ساعة و نص د الطريق عاد نوصل .. ندوش و نرتاح .. و عندي مشية للولاية د الامن غنتلاقى بالعميد على شي خدمة و من تما غندوز للدار نشوفهم و نجلس معاهم شوية و يلا كانت شي حاجة ناقصة نقادوها .. باش فالعشية ضريب الصداق ديال محمد أميين غيجمع كلشي ..!
شريفة: بصح ؟ هي ما غيديرش العرس على هاذ الحساب ؟
حكيم:( حرك راسوو بالايجاب ) غيكون مور رمضان فشهر ثمنية هكاك ..!
شريفة: مزيان الله يكمل عليهم بالخير .. حتى أنا تابعني هاذ النهار الجرا بلا قياس .. نطلع نعس شوية و نوض نمشي نشوف عيساوة هما لوالة و نأكد عليهم الوقت لا يمشييو يخليوني كنتسنى .. و داك لي زانفلييونسور لي درت معاهم على ود الاشهار تا هما نتلاقاهم .. و نشوف المحل د الورد واش وصلي الكونتيطي لي بغيت و الدراري فالمحل واش قادو كولشي بالديكور لي عطيتهم .. عاد البيفي واش هو هذاك .. و نسالي هاذشي كامل و نرجع ندوش و نمشي للكوافورة نقاد راسي حتى انا و نشوف شنوو نلبس و نمشي نستقبل الناس ..!
حكيم:( حرك حاجبوو ) الله المعين ..!
شريفة: و لاهيلا كنت باغى خالتي حبيبة و خوتك يحضرو معايا نديرلهم العباسية ههه و حتى نتا ( زادت قربات منوو حتى ما بقى فاصلهم والوو .. حطات يديها على ظهرو هازة راسها فيه ..! ) حتى تسالي كاع و ديرلي وقيت صغيييور تفكرني فيه .. ما كرهتكش معايا و لكن دوماج جا الوقت محزوم ..!
حكيم:( تنهدات تا تكاها عليه و حك على ظهرها ) ما يحتاجش حتى نسالي عاد نتفكرك .. مفكرك فعز شغالي و ما كتمشيش من بالي ( حط يديه على ذقنها طلع لها وجهها جهتوو ) غنحاول نجي و لكن ما نواعدك بوالوو ..!
شريفة:( تبسمات بفرحة و قالت ) يخليك ليلي ا العمر ..! يالاه ما نزيدش نشدك كثر وصل معايا الباكاج لتما و كمل الطريق بحالك .. الله يوصلك على خير ..!
حكيم:( شاف فيها لمدة حتى شككها فراسها ..! صغر عينيه و قال ) دابا ما بقيتش معاك و عندك حريتك كاملة تديري لي عجبك .. و تبارك الله سبعة و عشرين عام ماشي صغيرة لي نبقى تابعك و حاضيك ..!
شريفة:( قاطعاتوو ) حكيم شنوو كاين ؟ جيني من التالي ؟
حكيم:( هز حاجبوو بثقالة و رد ) الشراب الكارو حتى الحشيش يلا بغيتيه .. كلشي ساهل حالوو دابا .. غير هو تفكري آخر مرة بسبابوو شنوو كان غيوقعلك .. ثقتي فيك لي غتخسريها .. صحتك لي غير كتهلكي فيها .. و رمضان لي بقالوو ثلاثة د السيمانات و يدخل .. يلا حطيتي الشراب ففمك هاذشي كامل غيضيع لك و نتي لي غتخسري فلخر ..!
شريفة:( تنهدات بصوت مسموع و حكات على راسها و بنرفزة قالت ) راه انا ا سيموحمد لي باغى نقطع .. ماشي على ودك و لا حيث خايفة منك .. نتا عطيتيني الدفيعة لي محتاجة و انا عندي الارادة باش نكمل و باغى نكمل فداك الطريق و ماشي ضعيفة تال داك الدرجة باش نضرب كاع داك العذاب لي دوزت فالزيرو على ود جغمة د الزبل ..!
حكيم:( حرك راسوو و تبسم ) هاذشي لي باغي نسمع ..!
فاقت على الصباح بالحريق تحتها ..! الماكلة ديال الغصب و الحريق كيضربها بحال الضوو ..! عيات تكابر فاللخر ناصت للحمام حيدات الخرقة حطاتها جنب .. و جلسات فلاساش كتبرد بالما و تحتها حمااااار بزاااف و بدا يتبوق شوية .. عيات تبرد و والوو ..!
كريمة: الوجع كيgطع يااا ربي واش ما ناويش تهمد و لا شالمعمول ؟ ( شافت فالخرقة و عضات على فمها كتطلع سليبها ..! ) نوضي كابري ا كريموو .. خركي عليك جلابييتك طرgي دار عكوزتك .. خشي لها هاذ اللحم يطيب و رجعي بحالك gابلي همك لي ساير ينخر فلحمك ..!
هزاتوو فيديها و خرجات موسعة بين رجليها بحال المختنة و يديها خدامة كتحك بيها و تقول ما حكات .. بدلات التحاتة و هزات جلابتها لبساتها هي و شالها و صاك فين دايرة خدمة عبد العالي ..! و بالشوية عليها زادت كتجر الصابوو فرجليها ..!
كلشي باقي ناعس فالدار .. يالاه السبعة د الصباح و شكون لي يفيق فهاذ الوقت فالصيف من غير لالة حبيبة لي كتجري و تجاري مع التوجاد لضريب صداق ولدها ما خاصها حتى حاجة تنقص .. و فرحتها جوج فرحات بالمجية ديال حكيم لي عندها بحال العيد .. خدمتوو كتخليه يسافر بزاف و يبعد عليهم بعد المرات بالشهورة و لكن بلاصتوو هي بلاصتوو عندهم كاملين .. هو الساس و الراس ديالهم ..!
وصلاتها الطاكسي حتال الباب .. خلصاتها و نزلات كتدق تا طلات عليها حبيبة من الشرجم و باستغراب هبطات فتحاتلها بحال المرة لي فاتت .. فين جات كريمة بلا لحم عوالة تشوف الاحوال كي دايرين و تبيثوو فيها و عاد تضرب ضربتها .. و تكعد ميمونها هي و تايمة مع مولا دارها .. و هاذ الميمون ما جاها يتكعد غير يوم فرحة محمد أمين .. كلشي مشغول و مفتون و حد ما غيديها فيها حتى يفوت الفوت ..!
حبيبة:( بانزعاج قالت ) شنوو جيتي تديري هنا ا كريمة ؟ ياك هضرنا و تافقنا و قلت لك شنوو كاين ..!
كريمة:( ردات بحزن هازة الشال على فمها ) با ما gابلش عليا ا خالتي .. ساير يهنشر فيا بكلاموو .. كينخر فيا نخير بفعايلوو .. الترابي فكرشي تgلبات بالغبينة و ما gدرت نزيد نصبر كثر .. و نسيت الدوا تاعي هنا خاصني نشربوو فوgتوو ..!
وقفات حايرة شنوو غتدير مع حكيم لي جاي عوال ما يلقاهاش و مع محمد أمين نفسوو لي ما باغيهاش فضريب صداقوو ..! ما تقدرش تخليها فالدار بوحدها و ما تقدرش تديها .. حيرة و اشمن حيرة فين حطاتها ..!
حبيبة: و شنوو المعمول دابا ؟
كريمة: احاااح واش نgولك ا خالتي .. يانا لي درتها لراسي .. و هاني سايرة نتجرتل و نخلص يانا و تايمة .. نفطر يانا و ياك نشرب دوايا و نرجع لعند بويا حتى تغوتي عليا فالتينيفون و تgوليلي واش طرgتي ليا المسايل ..!
حبيبة:( تنهدات براحة بحال جبل و تهز على صدرها ) حتى هذا نظر ا كريمة .. لقيتيني فالكوزينة كنفتل سكسكوو ... نقيت الخضرة و يالاه نردها تتقلى و نحطو نفطرو أنا وياك و عاد نقاد لحكيم طنجرتوو حتى هو راك عارفة
كريمة: اييه مولا داري كاااعما كياكل العطرية الكثيرة .. gاطعها فخطرة ..!
حبيبة:( ضحكات ) وا حكيم هو هذا .. الديطوكس ديما عندو فالثلاجة و العطرية ما كياكلهاش .. و كاع لي فيه المرقة ما كيضورش بيه ماكلتوو كاملة فالفران .. حتى من الطاجين كيديرو فالفران يتقلى تا كيبغي يتحرق عاد كيطفي عليه .. هكاك كيعجبوو .. و أراك دابا غير يجي عندنا فعوط طاجين نطيبولوو ثلاثة ..!
دخلات بالزربة ردات طنجرتها تطيب و وجدات الفطور و خرجات حدا كريمة لي عرقانة و وجهها مزير بالحريق و الماكلة لي فيها .. خاصها تحك و ما قادراش قدامها ..!
كلات بزز مع الوجع و عقلها خدام كيفكر كيفاش تدخل للكوزينة و تدير اللحم يطيب مع الخضرة ديال سكسوو د حكيم ..! حتى جاها الفرج و صونا تيليفون حبيبة بسمية محمد أمين .. ناضت كتهضر مبعدة لهيه حتى سالات و رجعات كتزرب ..!
حبيبة: هاذ الدراري كيخلييوك تال آخر نهار و يخرجولك بالشغالات .. هذا محمد أمين كيعيط قالك نسى شي تخربيق نمشي معاه نتقضاوه .. وا يالاه دابا ..!
ملاك:( خرجات كتجر فرجليها و تجمع شعرها .. صبحات شوية على لي كانت خصوصا من السخانة و لكن نيفها باقي مخنوق و حلاقمها منفوخين شوية و صدرها عامر برد ..! ) اححح صباح الخير .. كريمة دغيا توحشتينا كح كح كح ..!
حبيبة: جابك الله .. انخلي حداك الطناجر قابليهم على ما يتقلاو و طفي عليهم .. انا غنمشي مع محمد أمين غير لهنا و نجي دغيا دغيا .. كريمة يالاه معانا نوصلوك ..!
كريمة: واخا ا خالتي .. انا نكعد نعاينك هنا على ما تخرgي عليك ..!
مشات حبيبة لبيتها توجد راسها و ملاك للدوش تغسل وجهها و تقاد مسائلها .. و هنا وقفات كريمة كتزرب شانقة على ساكها .. دخلات للكوزينة لقاتها دايرة الخضرة لحكيم فكوكوط صغيرة بالزربة جبدات اللحم دارتوو تحتهم و الخضرة فوقوو و رجعات كطير لبلاصتها حتى حرقاتها كرشها .. ما حيلتها ليها و لا لتحتها ..!
حبيبة:( بالخف لبسات عليها غير جلابتها .. دخلات للكوزينة هزات الكوكوط بانلها اللحم من التحت كيبان جنيب منوو و الخضرة فوقوو ..! ما دات ما جابت بالفتنة لي فتنها محمد أمين .. قالت راني حطيتوو و نسيت ..! دارت عطرية قليلة و قاداتلها القوام كيفما كيبغي حكيم .. و شعلات عليها تطيب .. كتزرب باش تخرج ) مااااري ها البوطة قدامك عنداك تغفلي عليها .. أنا خرجت .. كريمة يالاه زيدي بحالك .. محمد أمين ما يكون غير وصل دابا و كيتسنانا لتحت ..!
هبطوو بجوج و خلاو ملاك كتفطر بالشوية عليها و التيليفون فيديها مكونيكطية بيه .. حاطة فالفيس بلي مريضة و لي كومونطير و التعناب على الجهد فالبريفي كيسولوو فيها كي بقات .. شي كتجاوبوو شي كتميك عليه .. حتى عيات و دازت كتقلب فالمكياج و المشطة لشعرها شنوو تدير ..! ريحة خانزة عطات فالكوزينة لكن ما دات ما جابت و هي نيوفها مسدودين .. حسباتلهم الوقت و طفات عليهم .. شربات دواها و نيشان مشات لبيتها تكات ..!
********************************
خرج من البيت كيتكسل .. لابس تيشورط و سروال دجين عادي مع سبادرين .. رجع ضرب الواحد لشعرو و طراساها مزيان مع جبهتوو .. تحسينة كتعطيه وقار و هبة خطيرة ...! مخلي اللحية خفيفة كيفما كبرات بلا ما يقيصها حتى يرجع للخدمة و يحيدها ثاني ..!
عصر كاس د القهوة و هزو كيشرب فيه و jim حداه كينقز فرحان بيه .. توحشوو فوق القياس ..! يدور يدور و يتعلى عليه كيلحس فيه بفرحة ..!
حكيم:( دوز لابيل لولد رقية بقى شحال كيصوني عاد رد عليه ) باقي ناعس ؟
ولد رقية:( رد بصوت مدوخ ) وا راك عارف ا با حكيم خدمتنا كاملة فليل ..!
حكيم: المهم .. آتيني بالمفيد و اختاصر علينا الطريق ..!
ولد رقية: كولشي مشى كيف بغيتي ..مهدي برادة دخلتوو بالسياسة و الخاطر .. شابع السيد مشاكل مع عائلتوو و واليديه .. درنالوو اللعيبة فالجعيبة و جريناه للكوميسارية كيف تافقنا .. سكر حتى شبع و دوخوه البنات و وحدة فيهم دارتلوو طرف دالحشيش فالجاكيط و غير خرج شدوو صاحبنا حسام و جروه للكوميسارية .. بزز فكوو باه و نوضها معاه و فالبلاصة عيط علمني بلي قابل يخدم معايا شيفور غير نوجد لوو الوراق ..!
حكيم: زيد ..!
ولد رقية: إلياس خاصوو سلعتوو تدخل .. مهرب تيليفونات و الفانيد " أقراص مهلوسة " ضبرت معاه باش الشركة لي يقاد تكون بسميتوو و بلي الشيفور هو لي غيتحمل المسؤولية د كولشي يلا تشدو .. و فالوراق لعبنا كي بغينا و شركناهم بجوج .. مهدي و الياس ..!
حكيم: ماشكش على ود الشركة ؟
ولد رقية: لا حيث موالف صاحبنا هو لي كيقاد الوراق .. راه كاميوات خارجين من المغرب بالسلعة خاص ضروري كلشي يكون قانوني راه الديوانة هاذي .. علاش مخرجين هاذ البلاغي و شكون الشركة ديالكم و لمن غتبيعهم تما و زيد و زيد .. غير هاذ المرة علمتوو بلي لي كيقادلنا ديما تعرف عند الحنوشة .. عندكم نعام اس و ما نقدروش نخاطرو بالحبة هو يتكلف و على حسابنا كولشي ..!
حكيم: مزيان .. و دابا تحركوو و لا باقي ..!
ولد رقية: اليوم فالليل غيشارجييو لمهدي البلاغي فالكامييو و يتوكل على الله هو واحد الدريري معانا غيمشي معاه باش يوريه شنوو يدير ..و فالرجعة غيكون بوحدو .. غيسطوكييو ليه الفانيد و التيليفونات .. غيجي على مليلية و يدخل من الناظور و تما نتوما غتشقموه و غيتجبدو كاملين .. خدمتك و راك عارفها ..!
حكيم: هي عندو سيمانة و يدخل ؟ غندوز للولاية نعلم العميد باخبارية وصلاتنا باش نقادو الطريق مع البوليس د الناظور و نشدوهم .. هاذ المرة غيمشي بلاصتي حسام أنا ما غنكونش ( بتحذير ) و سميتي ما تجبدش حتى بينك و بين نفسك و لا الخبار فراسك ..!
ولد رقية:( رد بجدية ) كون هاني .. واخا يبحثوو و يطيرو حتى يعياو ما عندهم كي يديرو يوصلولك .. مالنا دراري صغار ..؟
حكيم: يالاه هو هذا ..! ( قطع عليه و ناض خارج يالاه يلحق للولاية )
ولد رقية:( ضحك تا بانتلوو السوسة فالضرسة كتعيط يا ليل يا عين .. كرشوو مقنبلة حداه مزغبة كيطبل عليها فرحان بانجازو ) ولد رقية جاب سلعة نقية ..!
*********************************
مدينة الدار البيضاء من أجمل المدن لي تقدر تعيش فيهم و نتا مرتاح .. ما كاين لا عنصرية لا هم يحزنون ..! شنوو ما بغيتي و حليتي عليه فمك تلقاه .. حاجة وحدة لي كتقهر هي السيركيلاسيون ديال الطونوبيلات ..!
بعد المرات كتبلوكا الطريق فخطرة .. كتبقى غير واقف فبلاصتك .. و ما عندك ما تدير ..! بعد ساعات عاد قدر حكيم يوصل للولاية ..! دخل كيحرك راسوو بهدوء منين ما مشى كيوقفوه يسلموو عليه و يسولوه على أخبارو ..!
داز على حسام شافوو هو اللول و شرحلوو كلشي .. باش يبقى فالصورة بما أنوو هو لي غيتكلف ليه بلافير .. و من تما دخل عند الشاف ديالوو ..! عطاه التحية و تسالموو بمعزة .. من ديما حكيم بلاصتوو نقية و خدمتوو متقونة و حتى جديتوو و صرامتوو كتهضر عليه .. الشي لي كيخليه عزيز عند العميد بزاف ..!
جلسوو كيهضرو و يتناقشوو شحال و بعدها علموو بالاخبارية لي جاتوو و النهار فوقاش غيدخلوو السلعة .. عيطوو على حسام و على لي كيب معامن كيخدموو دارو اجتماع و رصاو أمورهم كاملين و من تما كلها مشى لخدمتوو .. حتى من حكيم ناض باش يخرج بحالوو .. لكن وقفوو العميد و بلباقة قال ..!
العميد الممتاز: حكيم جلس ا ولدي نهضر معاك فواحد الموضوع و سمحلي على التدخل ..!
حكيم:( جمع حجبانوو بتساؤل و حرك يديه لجهتوو ) وي .. كنسمع ..!
العميد الممتاز:( نحنح و شابك بين يديه ) كنت باغي نهضر معاك فيه هاذي جوج سيمانات هكاك و لكن ما رديتيش عليا ..!
حكيم: كنت عطلة .. فاش كنسافر كنحاول نبعد على التيليفون و اي حاجة تضيعلي وقتي ..! شي حاجة مزروبة ما كتسناش ؟
العميد الممتاز: لا لا تتسنى .. خوذ راحتك ..!
حكيم:( شاف فالساعة و قال ) ندخلوو فالمفيد .. عندي مناسبة د الأخ ديالي .. اليوم ضريب الصداق د محمد أمين .. فالعرس مرحبا بيك عندنا ..!
العميد الممتاز: اووه ..! مبارك مسعود الله يكمل عليه بالخير .. نجي بكل فرح .. قولي ا ولدي حكيم مرتاح فحياتك مع المدام ديالك ؟
حكيم:( هز حاجبوو بثقالة و قال ) الموضوع شخصي كنظن ..! شنوو كاين ا الحاج ؟
العميد الممتاز:( نحنح حشمان منوو و ما عارف منين يبدا ليه الهضرة ) باش نجيك للصراحة ا ولدي و نختاصرو الطريق علينا بجوج .. مراتك جات عندي للمكتب .. كانت فحالة خايبة بزاف .. قالتلي طلقتيها .. بكات و طلبات مني نهضر معاك باش
حكيم:( قاطعوو كيغزز فسنانوو .. دموو حس بيه كيغلي .. كيتخيل الحوار لي ضار بيناتهم و شنوو قالت و ألفات من عقلها و كيشخض غير بالشوية ..! عقد حجبانوو و قال بنبرة لا نقاش فيها ) الحاج نتا بلاصتك هنا ( حط يديه على راسوو من الفوق ) راك بحال الواليد و ما يحتاجش عاد نقولها لك .. و لكن موضوعي أنا و مراتي شخصي و ما غنتقبل حتى واحد يتدخل فيه و ما غناقش فيه مع حتى حد .. لي يكفيك تعرفوو هو ما ظلمتها لا هي لا لي فكرشها فحتى حاجة و لي دار شي ذنب راه تخلص عليه و السلام ..! ( وقف )
العميد الممتاز:( وقف معاه و مد يديه سلم عليه و قال ) كنت باغي ندخل بخط بيض و لكن بانلي نتا واخذ قرارك و ما غتراجعش عليه .. نتمناو يكون فيه خير ليكم بجوج و للبنيتة لي جايا فالطريق كثر ..!
حكيم: و هذا هو المطلوب .. نهارك مبروك ..!
حرك راسوو بثقالة من التحت للفوق .. عطاه التحية و خرج .. عاقد حجبانوو بعصبية .. القردة طالعة لوو فوق راسوو كتلعب .. كن يلقى كريمة قداموو هاذ الساعة يطحنها .. حاجة وحدة لي شافعالها هي بنتوو لي كيتسنى غير فوقاش تولدها و يهزها بين يديه و تما هضرة اخرى و وجه آخر غتشوف ..!
حكيم:( شاف فالساعة لقى باقي شوية د الوقت فيديه و قال يمشي يفاجئ شريفة و يكون معاها فالافتتاح ..! صونا ليه تيليفونوو بسمية حبيبة و بهدوء قال ) غير بالصحة سبقوني نتوما حتى نجي .. واحد ثلاثة د السوايع و نص هكاك و أنا معاكم .. كلشي واجد ؟ صافي مزيان تهلاي ..!
مكياج سموكي فعينيها مبينهم مزيان و زايدة مركبة الشفار د الحرير زغبة بزغبة كيبانوو طبيعين مع ليلونتي فالرمادي كيغنييو يا ليل يا عين ..! شفايفها منفوخين و مرسومين بماط فالاحمر كيلمع .. مخليهم كيبانوو بحال شي فريزة كتشهيك تذوقها و تتلذذ بيها .. معروف على شريفة كتحماق على شي حاجة سميتها الاحمر و اغلب حوايجها مزيج بين الاحمر الكحل و الابيض ..!
فارقة شعرها للنص و جايباه للجنب .. عاطي فوليم قوي و مموج .. كيبان طبيعي لكن مخدوم بمشطة متقونة جايا مع القفطان موديغن لي لابسة ..!
قفطان فالكحل مطروز بالدوغي هابط من جناب صدرها تال رجليها .. مشدود حد السمطة د السروال و الباقي مفتوح كيبين سروالوو التحتاني و سوندال عالية فرجليها لي مصبوغين بفرانش كيلمع .. بحالهم بحال يديها لي مزينين بأجمل الحلي مكملين الكومبلي لي فعنقها و وذنيها ..!
كتمشى بحال الفراشة .. الضحكة مرسومة على شفايفها كتشقشق و لي عيط عليها كتمشي عندو بالفرحات عليها كتأكد واش كلشي هو هذاك ..!
طاولات د الخشب مفرقين فالمحل و مباعدة المسافة بيناتهم باش الناس يلقاو راحتهم و خصوصيتهم فالجلسة ..! كل وحدة ضايرة بالكراسة ديالها لي مريحين لأقصى حد ..! محطوط فوق كل طبلة كويسات ضايرين بحال التفاحة فيهم الشموع مضويين و عاطيين رونق خاص للمكان .. جايين متناسقين مع القناديل لي فالأرض و الثريات د السقف لي واخذين شكل مربع من الورق كيعطييو لون أورونجي ..!
فنفس القنت من الجهة الثانية موزعين فوطويات كبار د الجلد مع طبلة صغيرة د الزاج حداهم .. للناس لي ما باغيينش ياكلوو و غيكتافييو غير بشي مشروب ..! و هاذشي كامل مقابل مع الكونطوار لي كلوو شاعل بالضواو فالموف و فيه كراسة عاليين لي بغى يجلس تما نيت ..! لكن فالافتتاح خصصوه للبيفي فين محطوطين لي بلى ديال المأكولات .. العصائر و الحلويات بالأنواع و الاشكال .. أراك غير تتشهى و تاكل ..!
على ليمين و ليسر ديال الطاولات دايزين جوج ريدويات من الجنبات فالباج مشدودين .. و الفوق سلالم بحال لي كيكونوو فالمسرح .. غاديين مربعين و معاكسين واحد مع الثاني منظر هائل و متوازن مع الشوميني لي جاي وسط المطعم مدفون فالحيط و فيه عواد دالخشب على ود البرد يلا بغات تخدموو يسخن الجو و اونفاص ليه كاينة خشبة عالية شوية فين مبلاصية الفرقة الموسيقية .. نتي كتغذاي و لا تعشاي او حتى تفطري و الموسيقى خدامة بالنشاط حتى شاط ..! و هذا هو الديكور لي جا لشريفة فبالها و تمنات تشوفوو على أرض الواقع ..!
أي واحد يجي داخل للريسطوو ديالها غيتبهر بداك المنظر .. كأنوو مسرح او لوحة تشكيلية تفننو فرسمها كيفما هي تفننات فطبخها و عطات كل جهدها فاختيار مكوناتها ..!
الناس شي غادي شي جاي للبيفي .. كاين لي جالس كياكل و كاين لي واقف كيهضر و يضحك .. عيساوة واقفين فالجنب كيغنييو منشطين الجو و لي زانفلييونسور لي عرضات عليهم كيصورو و يحطو فالسطوريات دايرين لها الاشهار و مستمتعين بوقتهم حتى هما ..! عرفات علامن تعرض و شكون يديرلها الدعاية و اختارت غير الطبقة لي هي موجهة ليها مشروعها و لي غيقدرو يميزيو الفلوس كثر ..!
حركات يديها بسعادة و بداو لي سيرفور كيفرقوو دي بوكي د الورد على الحضور .. حتى بقات وحيدة صغيرة جابوها لشريفة تحنات شماتها مغمضة عينيها و مع الهزة بانلها حكيم داخل ..! توسعوو عينيها بفرحة و تبهجوو ملامحها كثر و كثر ..!
تمشات عندو بحال شي أميرة جمالها طاغي .. عنوان للرقة و الأنوثة و الدلع ..! فراشة و طايرة فوق السما كتبهر كاع لي كيشوفها .. سارقة الاضواء بكل ما تحمل الكلمة من معنى .. خصوصا كلشي لابس دي غوب سواغي و هي الوحيدة لي متميزة عليهم بالقفطان المغربي ..!
مداتلوو يديها برقة و قربات سلمات عليه بالوجه و هو كيشوف فالجوهرة لي كتلمع بين يديه ..!
حكيم:( شاف فعينيها و قال بهدوء ) الجوهر الحر ..!
شريفة:( تبسمات ) ههه ياك بعدا ..؟ فرحت حيث جيتي نتا لي كنتي ناقص هاذ الليلة .. شكرا بزااااف .. زيد دخل ..!
حكيم:( سرح عينيه كيشوف فالديكور و يحرك راسوو بالايجاب عجبوو الريسطوو بزاف ) هاذشي ناضي ما عندي ما نسالك .. برافوو ..!
شريفة:( سيفطاتلوو بوسة فالهوا ) يخليك ليلي ا العمر .. يالاه معايا غنقطع لاطاغط دابا و من بعد دوز على البيفي كامل دوق حاجة بحاجة و قولي كي جاتك الماكلة .. نعول عليك ..!
حكيم:( شاف فالساعة و قال ) ما عنديش الوقت بزاف .. واحد ربع ساعة و خاصني نشد الطريق عاود .. مرة اخرى ..!
شريفة:( شداتوو بيد جراتوو و الثانية هازة بيها البوكي ) واخا يالاه دابا تقطع معايا الحلوة و نتصورو ..!
قربات من لاطاغط لي كانت كلها فالبيض و مزوقة بشوية ديال الدوغي " الذهبي " و فالجنب مكتوب سمية ديال الريسطوو 《 عرس الذيب 》لي عاد انتابه لها حكيم و باستغراب شاف فيها حتى قالت بتوضيح ..!
شريفة: شحال و أنا كنفكر فالسمية لي ندير و ما لقيتش ما حسن من " عرس الذيب " .. نفس النهار لي رجعنا تلاقينا فيه فأقشور من بعد 12 عام د الفراق .. كان من احسن الايام فحياتي واخا دازت عليا بالقمشة د القطة ههه ..!
حكيم:( جرها عندو عنقها بمعزة و دوز يديه على ظهرها كيحك عليه و بهمس قال ) ثيسليث أوجنّا ..! " عروس السما = قوس قزح .. السمية لي قيدات على نمرتها و بقات هكاك "
شريفة:( لمعوو عينيها و بعدات بهدوء ) آي ثعيشذ اتسا ينو " تعيش ليا و لا يخليك ليلي "
شعلوو شمع فجناب لاطاغط كيطرطقوو و تطلق دخان خفيف .. الناس مجموعين عليها و هي حداها حكيم من جهة و أسية من الجهة الثانية .. عطاوها موس كبير جاي بحال السيف و اليد مصوبة بالدوغي و الابيض مزوقينها ..! مداتوو لحكيم بغاتوو يقطع معاها و حطات يديها فوق منوو زيرات عليه و قطعوو لاطاغط و الفلاشات كيضربو فيهم كيصورو ..!
عطاوها طرف ذاقت و دوزات لحكيم و أسية حتى هما و الباقي تكلفوو بيه السرباية .. قطعووه و فرقووه ..!
حكيم:( حك على ذراعها و تحنى جهة وذنيها من الموسيقى ) هذا هو الوقت .. غنمشي دابا تال غذا ان شاء الله ..!
شريفة:( دلات شنافتها ) عاد وصلتي ما ذقتي والوو ؟
حكيم: نتغذا مع مالين الدار .. شحال و هما كيتسناوني ندوز عندهم ( قرصها من حنكها ) ايام الله باقى فيدينا ..!
شريفة: داكوغ على خاطرك .. بصحتك الحفلة و سلم على محمد أمين و بارك ليه من جهتي ..!
سلمات عليه بلابيز يالاه غتخرج معاه عيطوو لها تتكلم لوحدة من الكليان كتسول على شي غوسيط .. حركلها راسوو باش تمشي تشوف ضيافها و هو كمل طريقوو تال برا ..! أما شريفة غير سالات دخلات للداخل فين كاينة أسية ..!
هزات معاها البوكي د الورد ديالها كتشم فيه بسعادة و فرحة ما بحالها فرحة .. الضحكة غتنقز من عينيها .. قربات من أسية و بنبرة مرحة قالت ..!
شريفة: غنطيييير بالفرحة أ أسية ..! عمري تخيلت غنكون واحد النهار مرتاحة فحياتي لهاذ الدرجة ..! هو بصح دوزت ايام قاسحة و صعيبة و لكن كلشي كيتقاد شوية بشوية ( باستها بقوة فحنكها ) اححح و شحال كنبغي يماه ( لمعوو عينيها و ضحكات بسعادة ) كنبغيييييه فوقما تتخيلي احسن حاجة وقعات هي رجعت تلاقيتوو واخا مفنطز و عاجبوو كرو ولد الحلال و لكن كنحبوو .. القلب و ما يدير ..!
أسية:( ضحكات و عنقاتها ) و الله يخليك ديما مرتاحة و فرحانة فحياتك ( هزات حاجبها بشقاوة و قالت ) و علاش هو من دون الناس امم ؟ اعتارفي اعتارفي .. علاش كتبغيه ؟
شريفة:( ردات باستهزاء كتقلب فعينيها و ترمش بالهداوة .. معوجة فمها ) اييوا اش ندير عزاز عليا ولاد القح*** فينما كان شي ولد القح** مقطر كيجي لعندي كيجري هههه
أسية: ههههه حرام عليك انا كنهضر معاك من نيتي و نتي كطنزي عليا ..!
شريفة: و حتى أنا كنهضر معاك بصح .. علاش حكيم كيجيك نية ؟ ( رمشات كضحك ) النية خليها ليا أنا لي مسكينة خبز ربي فطبكوو أما هو مقطر اللهم زد و بارك ههههه
وقف فالباب مبلوكي كيسمع .. من عزيز عليا ولاد *** و هو واقف .. كاع الهضرة دازت عليه .. قشر شنافتوو بالجهد حتى دماها .. كيغزز فيها و يقول ما غززت .. عينيه تظلموو من جهتها و قساحت الشوفة فيهم .. من بعد ما كان راجع هاز الكادو لي خذاه لها على ود الافتتاح و نساه فالطونوبيل تا كان ماشي و تفكرو ..!
ضرب الضورة و رجع بحالوو بلا ما يدخل لعندهم ..! صدرو كيطلع و ينزل بالأعصاب .. جملة وحدة كتعاود فوذنيه حكيم ولد القح** مقطر .. فينما كان شي ولد الق*** كيجي لعندي كيجري .. و بصح هو لي جاي عندها كيجري من كازا تال الرباط باش يشوفها لعشرة الدقائق و يرجع بحالوو ..!
ركب فطونوبيلتوو و ديمارا حاك الروايض بالجهد مع الارض و غادي طاير فالطريق .. جبد نمرتها و برك عليها باش يبلوكيها و عاود تراجع ..! مسح نمرتها من عندو و خرج و بعدها طفى التيليفون فخطرة ..!
《 الحديث قياس و الكلام في وقته دواء .. كاين اللي عنده النيف و والديه أعز حاجة في حياتوا ..! 》
واش هنا وقفات علاقتهم ؟ و بهضرتها لي سمع غتخليه يقلب عليها فخطرة و ما يعاودش يضور بساحتها مرة اخرى ..!
واش هذا هو الحد لي سبق قالت عليه حبيبة .. بلي حكيم كيميك حتى يشبع و نهار كينفر كينفر دقة وحدة و لو تنطابق السما مع الارض ما كيرجعش .. واخا يكون كيموت فالواحد .. كرامتوو و كبريائوو ما كيخليوهش ..!
يا ترى وصل لهاذ الدرجة مع شريفة و لا باقي غيعض فالصبر و يبرد دموو و يرجعلها بحال حتى حاجة ما حسكاتوو و ضراتوو فقلبوو من جهتها .. خصوصا حكيم لي عندو واليديه خط احمر ..!
*********************************
أسية:( ردات بضحكة ) ههههه نتي نية و خبز ربي فطبكوو و أنا شنوو على هاذ الحساب ؟
شريفة: نتي المشيشة ديالي .. العسل يا بنتي العسل ههه
سكتات شحال و رجعات قالت و هي حاطة يديها على صدرها و كتهضر من أعماق أعماقها و مرة مرة كتخرج تنهيدة كتبين شنوو هازة فقلبها ..!
شريفة: عرفتي شنوو هي أحسن حاجة فهاذ الدنيا من بعد الرفيسة و الفريت بالموطارد و بسطيلة د الحوت اححح و لالة مولاتي طنجية ( ضحكات بتكركيرة مكركبة ) ههههههههه بديت ما غنساليش .. قلت لك هي تلقاي واحد الانسان لي نتي معتابراه بحال نفسك و مرتاحة معاه للحد و عارفة واخا شنوو ما درتي ليه ما غيسمحش فيك و ما غيطلقش من يديك .. معاك حتال للموت ..!
أسية: و لقيتي هاذشي نتي فحكيم ياك ؟
شريفة: كن جيتيني قبل غنقولك ما كاينش هاذ الواحد .. كلشي باغي مصلاحتوو و ما كاينش هذا لي كيبغيك غير هكاك كلشي كيجري على لي غيريحوو هو و طووز فالباقي ..! و لكن حكيم غير .. الثقة لي عمري عطيتها لشي واحد .. حطيتها فيه كاملة و عارفة راسي ما غنندمش حيث من صغرو تربى و كبر راجل و غيموت راجل و غنكون حمقة يلا ضيعتوو من بين يديي ..!
أسية:( بتردد قالت ) و شنوو الفرق بيني و بينك ؟ ( هزات شريفة حاجبها فيها بمعنى فاش ؟ و كملات أسية بشجاعة ) نتي و حكيم تعرفتوو و نتوما صغر مني و هانتوما دابا بجوج .. مكملين بعضياتكم و كتحمقوو الله يحفضكم يا ربي ..! علاش أنا ما خليتينيش نجرب .. حتى انا بعقلي و عارفة شنوو كندير .. أيوب كان ضريف بزاف معايا فالمخيم و عمرو قلل عليا الحيا و لا قالي شي كلمة ماشي هي هاذيك و واخا هكاك ما بغيتينيش حتى نهضر معاه ..!
شريفة:( توسعوو عينيها بدهشة )
شريفة:( توسعوو عينيها بدهشة من هضرتها .. شطحات رموشها و مصات جنب شنافتها جامعة حجبانها بتساؤل ..! ) أسية ؟ عارفة راسك شنوو كتقولي و لا ما عارفاش ؟
أسية:( بغاو عينيها يبداو يفزكو و بصعوبة قالت ) انا غير قلت لك .. صافي ما تديريش فبالك ..!
شريفة: لا ندير فبالي قالاك ..! ( جراتها من يديها و جلساتها قبالتها ) بعقلك كتقارني لي بين حكيم و أيوب ؟ و بيني و بينك ..؟
أسية: و شنوو الفرق ؟
شريفة: الزمان ديالنا كانت شي حاجة سميتها النية لي ما بقاتش دابا فخطرة ..! حكيم عمري شفت فيه شي شوفة ماشي تال تما .. بالعكس كنت كنحششششم منوو لواحد الدرجة ما تخيليهاش و كنحتارموو بعضياتنا بالجهد .. صبعوو هو اللخر عمرو حطوو عليا ..!
أسية:( ردات بحماس .. نسات الغبينة لي يالاه كانت عوالة تبداها ) بصح ؟؟ عاوديلي على صغركم كي داز .. كيعجبني نسمع بحال هاذشي ..!
شريفة:( تبسمات كتفكر ) ههه كنت هبيلة و عيني ما كنهزهمش من الارض و حكيم ولد الفرناتشي لي كيطيب لنا الخبز فالدرب .. كنت عزيزة على باباه و اول مرة غنهضر مع حكيم كان كيلعب الكورة هو و صحابوو و انا دايزة قدامهم كنتقاتل مع الوصلة د الخبز نوصلها .. قصيييورة و ضعيفة ما كنبانش فخطرة ههه و ضربني بكورة قلبني تا جيت منشورة فالارض و الخبز فالغيس تمرمد ..!
أسية: ويلي ويلي هههههه ايييوا ..؟
شريفة: ايوا عينيك ما تشوف الا النور خلاوها المصريين هههه بكيت و شهقت حتى عييت درتلهم مندبة .. عارفة قتلة د العصا كتسناني من عند كبيرة يلا ما ديتلهاش خبزها .. و باباه د حكيم غير شافنا جا نزل على ولدوو عطاه تا ما قد .. اييوا سكتوني و دخلوني عندهم للدار و مسكينة موو حبيبة رجعات عجناتلي الخبز و خلاتوو يطيبولي و انا مشيت للدار حتى تدوز الساعة و نولي موراه ..!
أسية: واليديه ضريفين مساكن ..!
شريفة: بزااف فوقما تصوري .. موو كانت مفششاهم و باه مزيرهم خصوصا حكيم لكبير كان كيعصرو عصير واخا هكاك عندو مقطر من عينيه .. الله يرحموو ..!
أسية: أمييين يا ربي ..! اييوا كمليلي ..!
شريفة: و صافي تما بدينا كنهضرو من بعد ما كنا كنتشاوفوو غير من بعيد و صافي ( ضحكات ) و بيني و بينك كان كيعجبني من قبل .. كان عاطي العين فالدرب و كاع البنات القدي كيتسابقوو على المحل د باه فاش كيكون تما .. و لكن هو داخل سوق راسوو و من صغرو ما عزيزش عليه الجماعة و الهضرة بزاف إلا معايا ههههه ..!
أسية:( حطات يديها على حنكها كتصنت عاجبها الحال .. بحال يلا كتفرج فشي فيلم .. عايشة اللحظة و ما كايناش فهاذ العالم ) اهاه ..!
شريفة: كان ديما كيقولي واخا فيك ا الشكامة حيث زعما بسبابي كلى قتلة من باه هههه .. صافي علاقتنا كانت بريييئة داك "الحب العفيف" ..! و ما كانش حتى حب بالنسبة لينا راه كنا صغار بزاف .. فينما وقفت عليه كنلقاه .. كيعاونني بكاع لي قدر عليه و يا ويلي نبكي حداه و يلا لقاني مغبنة .. كيدير لي فجهدو يضحكني و يكون بيا .. يسافر مع صحابوو .. يجيب الذواقة و يعطيني و كان مسمي عليا نوارة الحدود هههه كنت غير كنسمعها كنغرق فبلاصتي كتضربني الساكتة و الحناك كيبغييو يطرطقوو بالحمورية و الشعر ديما طالع للسما مشعكك من الخلفة و ظفرتي مورايا كتلعب .. هي طول مني أنا كاملة ..!
أسية: هههه زيدي و من بعد شنوو وقع ؟
شريفة: و من بعد سنين يا لالة شد الباك و بغى يكمل قرايتوو فكازا عند شي واحد من عائلتوو و شحال بكيت عليه و تغبنت فسطح دارنا و ودعتوو من بعييد .. هو كيسلم على واليديه و انا حاضياه تا مشى و من تما غبر و لا كيجي مرة فشحال تا دازو عاماين و عاودت شفتوو .. كنت كبرت و زيانييت على لي كنت و بانوو الثمار نعام ا لالة هههه و دخلنا فالمراهقة غير شفتوو وليت كولي كنفيبري و القلب كيشطح بالخلعة
شريفة: كبرت و زيانييت على لي كنت و بانوو الثمار نعام ا لالة هههه و دخلنا فالمراهقة غير شفتوو وليت كولي كنفيبري و القلب كيشطح بالخلعة
أسية: ههههههه سعداتك زيدي
شريفة: قلت غيكون نساني و لكن مع شافني خرج عندي كيضحك و عيطلي بالسمية العزيزة .. و فداك المرة حضر لشي حوايج خايبين عشتهم و عاونني بزاف و وقف معايا حتى كان ماشي و عطاني تيليفونوو و البراسلي لي كيدير .. البراسلي باقي عندي و التيليفون مشى و مشاو معاه اللعب د الحنش و سوبير ماريوو و اغاني ديال الشاب خالد و عمرو و mr oka و عقيل .. كنت كنحماق عليهم و نبات نسمع فيهم و نحفضهم و الغذ ليه ندند بيهم و غير يوصل الليل و يعيطلي نتسلت للسطح و نرد عليه .. مرة نبقى ساكتة نسمعلوو كيعاودلي على كازا شحال كبيرة و فين مشى و جا و نهارو كي دوزو و مرات نخوي عليه انا قلبي و نغني ليه و هي غادية .. تال النهار لي هربنا فيه .. راني عاودتلك شنوو وقع مع داك خينا ( باها لأسية ) ..!
أسية:( حركات راسها بأسى ) عارفة عارفة ..!
شريفة:( ضحكات ) شفتك سحتي ا بنتي ههههه ايييوا و هنا مشات خبيرتي من واد لواد و بقيت انا مع ولاد الق*** هههه ..!
أسية: ههههه حرام عليك دابا تا حكيم عندك واحد منهم ؟
شريفة:( عضات على فمها و قالت و هي كتقلب فعينيها ) واش نتي حمقة ؟ يلا هو ولد الق** شنوو خلينا للوخرين نيت .. سي امغار راه الحلاوة ديالي .. غير ضحكت معاك و صافي .. حاشة واش يكون ولد الق** ..!
أسية: هاي هاي هاي .. ها هي بدات تكر و تعتارف بلا عصا هههه ..!
شريفة: و شنوو راه الحب العذري ديالي ( تقادات فالجلسة و قالت بحماس ) عرفتي فاش كتلاقاي واحد الانسان لأول مرة .. داك le premier contact بيناتكم .. و بلا حتى حاجة كيبدا قلبك يضرب يضرب يضرب بحال يلا غيسكت .. شي مدفع و لا شي طبل و كيضرب فصدرك تا كتقولي غيخرج من بلاصتوو ..! يديك و رجليك يفشلوو عليك و تجيك السخفة .. تطلع لك السخانة .. يطيح لك الطونسيوو .. ما يبقاش يجيك النعاس شهر و لا كثر و فينما تغمضي عينيك تتفكريه و كاع ديكشي لي قلت قبل كيبدا يخدم من جديد و الفراشات كيلعبوو فكرشك تا كتكمشيها و نتي ما عارفة مالها ..!
اسية: و علاش هاذشي كيوقع ؟ زعما اي واحد تلاقيتيه غتحسي معاه بهاذشي ؟
تفكرات عدنان لي حسات قداموو بهاذشي لي كتوصف شريفة بالضبط لدرجة بقات حالة فمها فيه كي البهلة .. عكس أيوب لي كان لقائهم عادي من غير أنوو كيحشمها بهضرتوو بعض المرات و كيحاول يضحكها ديما ..!
شريفة: نوو أبدا هاذشي كيوقع فحالة وحدة .. فاش كتلاقاي بلي كنقولوو عليه توأم روحك ..! الاغريق القدام كيفسروها بلي الروح كتكون مقسمة على جوج و اللحظة لي كتلاقى بشريكها كيجي داك le choc émotionnel " الاصطدام العاطفي " و داك القوة ديالوو هي لي كتخلينا لا حنا لا للرجال نحسوو هكاك ..!
أسية: وااااو ..!
شريفة: و فاش كنقولوو روح وحدة راه كتهضري على نفس الذوق و الاختيارت و الانشطة لي كيعجبوكم بجوج .. حتى من السلوك و كيفاش كتعاملوو كلشي كيكون متشابه .. كتحسي بداك الانسان مكملك او نقولوو كتعتابريه هو نفسك ..! حب أفلاطوني ما فيه لا مصلحة لا ولف و لا حتى تعمري بيه النقص و الفراغ لي عندك .. حتى حاجة ..! و تا يلا سولوك علاش كتبغي فلان ما غتعرفيش علاش .. يقدر يكون كلوو عيوب من راسوو لرجليه و لكن كتبغيه حيث هو لا غير ..!
أسية: ههه بحالك نتي و حكيم ؟
شريفة:( هزات راسها باه ) سي بحالي انا و حكيم و كاع لي كنحسوو بيه ترجمتوو لك فهضرتي .. نهار رجعت تلاقيتوو فأقشور بحال لقيت نفسي اوس جوج كتمشى حدايا .. داك الدفئ لي حسيت بيه و انا حداه .. سبعة و عشرين عام عشتها و عمري جربتوو الا معاه هو نفسوو .. ولد الجيران ، صديق الطفولة، حبيب المراهقة، و دابا "روح الروح" و غنشوفوو مستقبلا شنوو غيكون هههه ..!
أسية: راجل اللفعة هههه ..!
شريفة: ههههه الله ..!
شريفة: ههههه الله ..! ( عضات صبعها و كملات ) و شفتي ربي كيبغيني حيث دارو فحياتي و لقاني بيه و خلاني نذوق الحلاوة على اصولها و انا عارفة من نهار دخلت لحياتوو ما يقدرش يخونني و ما عمرو يقدر ينساني او يرتاح بلا بيا واخا يحاول مغيقدرش ..!
أسية: حبيييت ..!
شريفة: يقدر حكيم شخصيتوو صعيبة و كيدير شي حوايج كيمرضوو و ما تقدر تصبر عليه حتى وحدة و لكن كاينة وحيدة لي تخلقات ليه .. و هي انا .. باش نصبرو على بعضياتنا و نزينوو فعايلنا الخايبين فعينينا و نبغيوهم حتى هما .. كيفما هو صعيب حتى انا صعيبة و ماشي اي واحد نعيش معاه مرتاحة و هاذي هي الدنيا شي صابر على شي و كل واحد كيضحي بشوية من جهتوو باش جوج يكملوو مع بعضياتهم ..!
أسية:( ضحكات ) ههههه غير كتقولي .. غذا يديرلك شي حاجة تصعري عليه و تناتفي نتي و ياه و تقولوو ما عندي ما ندير بيك فحياتي دييكاج ..!
شريفة: هههههههه بحال شفتيها بعويناتك بجوج ..!
《 ما أجهل الناس الذين يتوهّمون أن المحبة تتولد بالمعاشرة الطويلة والمرافقة المستمرة. إن المحبة الحقيقية هي ابنة التفاهم الروحي، و إن لم يتم هذا التفاهم الروحي بلحظة واحدة، لا يتم بعام ولا بجيل كامل . "جبران خليل جبران" 》
شريفة:( سكتات مدة و رجعات قالت ) أنا ما لقيتش لي يشد بيدي .. ما لقيتش لي يقولي قراااااي .. عينيك حفيهم مع الكتوبة .. ما لقيتش لي يهز عليا الحمل و يعاونني .. كانت طريقي مرسومة و باينة .. و لكن نتي ؟ لي فتحتي عليها فمك كنجيبها لك .. عمري حرمتك من شي حاجة و يا ربي غير تقرايلي و توصلي للي انا ما قدرتش نوصلوو .. علاش غتربطي راسك بواحد و نتي باقى فهاذ العمر ؟
أسية: و لكن شكون قالك أنا مغنقراش و نفرحك ؟
شريفة: فاش تبقاي سهرانة معاه فالشاط تال الصباح و تفيقي بعينيك مبوقين و دماغك طافي .. قوليلي غنقرا .. فاش غيبغي يشوفك و تبطلي قرايتك على ودو قوليلي غنفرحك ..!
سكتات أسية كتضور فعينيها مزنكة و شريفة كتشوف فيها بتنهييييدة .. بعد مدة رجعات قالت ..!
شريفة: حكيم لي كتهضري عليه .. بخدمتوو و دارو و طونوبيلتوو .. عندو مشاريعوو و فلوسوو فجيبوو .. ما عطال على حتى حد .. الدنيا حكاتوو .. جرب و عاش .. عقلوو عامر و عارف راسوو شنوو كيدير و هو شنوو باغي و تا حد ما كيحكم فيه .. راه ربعة و ثلاثين عام تبارك الله ..! و انا لي قدامك بداري و طونوبيلتي و مشروعي هانا بديتوو و وقفتوو و غنخدم عليه حتى يطلع شوية بشوية .. و غير نهنى عليه غنرجع نقرا حتى انا و باقي غندير شحال من حاجة فحياتي ..!
اسية: الله يعاونك و يوفقك ..!
شريفة: أميين ..! لي بغيت نشرحلك هو حنا تقريبا راه وصلنا و درنا علاش نرجعوو و ( ضحكات ) شرفنا كاع .. و لكن نتوما باقيين صغار .. هو البطالة قاتلاه و قلة الشي ما غتخليهش يرتاح معاك و غيقتلك غير بالشكاوي و الحكام الخاوي و نتي بينوو و بين قرايتك ما غتقدريش توازني و غتخرجي على راسك .. هاذشي بلا ما نهضرو على فاش غيبدا يتمرضن عليك و يقولك علاقتنا برداااات و شوفي البنات لالياتك كي عايشين ..! وا نوضي نتي داك الساعة قلبي على كيفاش تسخني هاذ الغولاصيون لي بردات بيناتكم .. حتى يبزل مك فشي برتوش يحكوو معاك و شي نهار تفيقي تلقاي الطبل تثقب .. و غني داك الساعة اش داني و علاش مشيت ..!
أسية:( خرجات عينيها و ردات ) لاااا لاااا اويلي الله
يستر .. خلعتيني ..!
شريفة:( هزات حاجبها و قالت باستهزاء ) اللهم نخلعك انا و لا يخلعك عموو الغول ..! ( نحنحات ) و نقولوو كاع هاذ السيد صدق ولد الناس و بغاك للحلال .. نتي قادرة تتزوجي فهاذ لاج ؟ قادرة على مسؤولية عائلة ..! تهزي راجلك و هبالوو و عائلتوو حتى هي و عاد تشوفي راسك و تتهلاي فيه باش سي السيد ما يملش منك و يخرج يقلب على الجديد .. و عاد نشوفوو قرايتك يلا لقيتي لها شي وقيت .. هاذشي يلا ما غفلوكش الولاد و لقيتيهم كينقزو فوق راسك و كل واحد منين كيجبد ..!
أسية:( غير تخيلاتها وقفات قافزة من بلاصتها ) لاااا
شريفة: وا هي يلا ديتيها فالكتوبة ديالك و هنيتيني من جهتك .. فهاذ العمر راه ما غتزيدك المصاحبة فحياتك والووو ..! غيخرجك ؟ انا نخرجك و نضور بيك و نقشبوو مع بعضياتنا و نرجعوو .. كيسمع لك ؟ ما كاين لي يعرف ينصحك و يتصنت لك قدي ..!
أسية:( تبسمات معاها ببراءة و قالت ) واخا .. و ما تقلقيش مني ..!
شريفة:( تنهدات و شدات فيديها بجوج ) انا باغية لك غير الخير ا أسية و نهار نشوف الواحد لي كيستاهلك غنعطيك ليه و انا مرتاحة .. عيشي و خلي كل حاجة تجي فوقتها .. ما تسبقيش عمرك ..!
أسية:( حركات راسها بالايجاب و عنقاتها بقوة ) شريفة ..! عارفة بلي كنبغيك ياك ؟
شريفة:( ضحكات ) سعداتي هاذ الزين كامل كيبغيني ههههه ( خربقات لها شعرها و قالت ) نخرج عند الناس .. خليتهم بوحدهم .. و لايني عييت بجري من هنا لهنا و ما ناعساش ( تفوهات ) اخخخخ .. خويخات .. سكسوو بالفريخات فليلة الشيخات ..!
****************************************
جالس فالصالون موسع بين رجليه .. حاط يد على الطبلة كيطقطق بجوج صباع فوق منها و تيليفونوو حداه مطفي كي خلاه ..! عينيه على التلفزة لي شاعلة فالجزيرة ..! عاقد حجبانوو و عينيه مخنزرين .. من الشوفة تعرفيه طالعلوو الد٠م حتال قندهار و ماشي د الهضرة ..!
لكن ملاك هي ملاك .. عزيز عليها تجبد خوتها بالهضرة و تفشش عليهم ..! مسرحة شعرها ببروشينغ سامل و مبوكل من الجناب دلافرونش مع مكياج خفيف موالم مع القفطان د الموبرا لي لابسة ..!
حطات البلاطوو لي هازة فيه طبسيل د سكسوو بسبع خضاري مسقي و معلقة باش ياكل ..! و بابتسامة قالت ..!
ملاك: بالصحة و الراحة ا خويا العزيز كح كح ..! ( شاف فيها و رجع حنى عينيه لطبسيلوو .. عمر معلقة كلاها .. و هي حداه كتهضر ) ما شميتيش شي ريحة و نتا داخل ..؟
حكيم:( شاف فيها جامع حجبانوو و حرك راسوو )
ملاك: عرفتي ا خويا احح مريضة و قابلت لك سكسوو حتى طاب و نضت جففت الدنيا و طلقت الفونتيلاطوغ ( بحال الكليم .. غير هو كيسف الهوا .. كينقيه و كيبردو ) نقى الجو بزاف و زدت المعطر كح كح كح و جمعت كاع الحلوة لي باقية ما تستفات و قاديتها ..!
سكتات كتشوفيه كياكل .. عينيه مرة معاها مرة مع الطبسيل .. و دماغوو مسافر .. ساهي و ما هواش فهاذ العالم ..!
ملاك:( كملات كتحاجيه ..! ) حيث ماما مشات مع محمد امين تال المحمدية كح كح كح .. عيطات عليا وصاتني نجمع ديكشي و نحط الغذا للدراري هي غتدمق مع محمد امين بشي بوكاديوس .. لدابا باقي ما جات دازت ديريكت للكوافورة تقاد حالتها .. و عدنان بقى فالمحل .. تغذا معايا غير خليل .. و خواتلنا البوطة كليناه بارد .. وا حكيييم ..!
حكيم:( رد بصوتوو المدعدع ) شكاااين ؟ نقصي من الفريع شوية .. نعرفوو غير شنوو كناكلوو ..!
ملاك: كح كح كح بغيت نسولك غير واش ما جاكش بارد ؟ حيث باقي ما ركبنا البوطة .. حطيتلك غير الخضرة بلا لحم غيكون مجمد .. احح تا حنا ما كليناهش ..!
هز حاجبوو فيها و رجع شاف فالطبسيل لي كلى منوو خير ربي .. مذاق فشكل جاه .. و لكن ما دا ما جاب .. دماغوو ماشي معاه .. هضرة شريفة باقى كتزغنن لوو فوذنيه و زادت ملاك واقفة فوق راسوو ما بغاتش تسكت .. دوخاتوو ..!
جر طرف د بطاطا مع ذاقها بزقها .. و دفع الطبسيل بزعفة و وقف نيشان للكوزينة .. فتح الثلاجة جبد قرعة ديال اللبن هبط على النص فيها و زدح الباب ..! و مع الزدحة تسمع صوت حبيبة و الدراري فالدار ..!
هضرات حبيبة مع ملاك و غير عرفات حكيم كاين دخلات كتطير للكوزينة عندو ..! الوجه مقاد على حقوو و طريقوو .. لابسة تكشيطة فالبلوسيال كتهبل ..! شعرها مقطع كاري و مصبوغ فلاكاجوو .. الظفار مقادين و الطالون قد ما مايلوو فالرجل ..!
مراة د الوقت و عزيز عليها تتهلى فراسها .. واخا هاذشي كيجيبلها غير المشاكيل مع ولادها .. خصوصا حكيم و عدنان .. لي باغيينها تستر و تدير الحجاب ..! و لكن هي اوهوو كحل عيونوو هو لي ما تديرش ..! ففمها غير .. كيخنقني ما نقدرش عليه .. ما شغلكمش فيا .. واش انا لي والداكم و لا نتوما ..! منين نشبع من شبابي دابا ندير الخمار غير هنيوني ..! اييوا لا شبابها تسالى لا هي تهدات لا هما سكتوو من النكير ..!
حكيم:( قرب باسلها راسها و يديها .. تا عنقاتوو بالجهد و كمشها عندو .. موحشاه فوق القياس ..! ) عاد ؟
حبيبة: توووحشتك ا ولدي ( طبطبات على ظهرو ) الغالي ديالي ( حطات يديها على حنكوو و قالت ) ضعافيتي ا حكيم .. ما كنتيش كتاكل ؟ بعدا ماري حطاتلك غذاك و لا بقات مقابلة داك المشقوف ثاني ..!
حكيم:( تبسم بهدوء و قال ) الله يهديك ا الواليدة ..! كليت لي كتب الله ..!
حبيبة: اييوا لباس .. فاش عيطتلك كنت كنشوف واش غتجي مع الغذا نخطف الرجل انا و محمد امين و نتجمعوو على لقمة د سكسوو و لا غير نقضييو باش ما كان فالزنقة .. من الثمنية د الصباح ما وليت للدار .. غير كنطيرو من هنا لهنا .. و الوقت بسلامتوو تا هو دغيا كيدوز ..!
حكيم:( حرك راسوو ) فين هما الدراري ..!
حبيبة: مع مول الهوندة .. كيهبطوو الطيافر غيسبقنا الشيفور مع الدراري ديالوو و عيساوة حتى توجدو نتوما و نلحقوو عليهم ..!
حكيم: و عليه ..!
حبيبة: يالاه سير تبدل عليك راني وصيتهم يديولك الكوبوو الجديد ديالك للحداد .. غتلقاه فبيتك .. طلق راسك دغيا ..! ( بغى يهضر و قاطعاتوو ) ياكما ناوي تمشيلي بالسبور كي البوهالي ..!
حكيم:( هز حاجبوو فيها و سكت )
حبيبة: سير لبس عليك و قاد حالتك .. ما تعرف تعجبك شي بنيتة فالحفلة و نفرحوو بيك حتى نتا .. ياك باغي تعمر دارك مور كريمة و دفعتي الدعوة د الطلاق فالمحكمة .. ايوا على الله نلقاو لك شي شريفة ..!
حكيم:( لعب بلسانوو ففمو كيحاول يفهم فين باغى توصل و لاش كتلمح ..! ) يَّما ..!
حبيبة:( تبسمات و قالت ) و شنوو نلقاولك شي شريفة علوية حرة نتناسبوو مع مول الشي ..!
سكتات كتسناه يهضر .. باغى تجبدلوو طرف لسانوو و تسل منوو الهضرة غير بالهداوة ..! ناسية بلي حكيم تموتي و ما تخرجي منوو نص كلمة .. و حتى يلا هو بغى يعاودلك كيرميلك جوج حروف و نتا كمل من راسك .. فهمتي تبارك الله .. ما فهمتيش شغلك هذاك ..!
دار فيها شوفة باردة .. و خرج من تما مخليها مبلقة عينيها ..! داز فالصالون حدا ملاك و على غفلة عطاها بضربة لعنقها من اللور .. تا تسمعات بالجهد و قفزات هي من بلاصتها مخلوعة و موجعة .. شافت فيه مغبنة و هو مطرطق فيها عينيه ..!
حكيم:( هز صبعوو بتحذير و قال ) شحال ما بقيت غنقطع لمك لسانك من الجذر و نعلقولك فوق راسك ..باش تعلمي تجمعيه عندك ..!
ملاك:( ردات بتمسكين ) شنوو درت ؟
حكيم:( رد ببرود كيقشر فشنافتوو و يد وحدة حاطها على جنبوو فوق السمطة د السروال و الثانية كيحركها جهتها ) والوو غير رشقاتلي بغيت نفرعك .. مزيانة هاذي ؟؟
خنزر فيها تا رجعات باللور مبعدة من حداه .. عارفاه فاش كيوصل لهاذ الحالة .. كيكون وصل للطوب غتزيد معاه شوية غيقلبها .. خصوصا من الديبار دخل للدار معصب ..!
ملاك:( تخشات فبيتها مركنة كتبركم ) شي يعصبوو و شي يخلص .. خزييت .. احح ا ربي حلقي ..!
****************************************
واقفة حبيبة وسط ولادها لي ضايرين بيه كي السبوعة واحد يحنث الثاني .. و هي فرحانة و هازة راسها بيهم ..! دايرينلها الشان و المرشان مع البعيد قبل من القريب ..! ملاك حداها و لافامي و الصحاب د محمد أمين موراهم .. و بلا ما ننسى كزانوفا سي حسام لي حاضر ناضر و ممتع عويناتوو بخيورات بنات بلادو ..!
عيساوة مشخضين الطرح و البنات من العائلات بجوج مخشيين وسطهم كيشطحوو .. و الدراري ما كاين غير هاك بلاك بحال الفيران هازين يديهم للسما ..!
الطيافر مهزوزين كيلعبوو بيهم و عائلة العروسة كيسلموو و يعاودو مدخلينهم للداخل .. تاويل و اشمن تاويل .. ترحيب و اشمن ترحيب .. و الحق يتقال دايرين كل ما فجهدهم باش يفرشوو لبنتهم فين تمشي و يحمرولها وجهها ..!
لالة بسمة الطبيبة ديال العائلة .. دريوشة داخلة سوق راسها و عقلها كبير تبارك الله .. خدامة و كتقرا فنفس الوقت .. تخصص القلب و الشرايين ..! قرات و عرفات كي تصيد قليب محمد أمين تا ما يبقى يشوف حد من غيرها ..!
هو لي كان خاشي راسوو غير فالسلوكة و البيسيات .. بما أنوو مهندس دولة .. خدام ف fst د المحمدية و تما عندو دارو فين غيسكن هو و بسمة .. و لي كان قليل فين كيعمرها و كيدوز اغلب وقتوو مع حبيبة ..! الزهواني فخوتوو و لي كان كيقيل يزهيها مع الطلبة .. جات لي جمعات و طواتلوو فخطرة ..!
عينيه غينقزو منهم القلوبة بالفرحة و هو كيشوف لي ملكات قلبوو هابطة بتكشيطة فالغوز بيبي مطروزة و كتلمع بالحجر .. دايرة مشيطة خفيفة و مكياج بارد .. بارزلها حروفها لا غير ..!
سلمات بابتسامة حتى وصلات لعندو و وقف ساهي فيها و هي كضحك حشمانة ..! حط يديه على ظهرها و جرها عندو سلم عليها من الوجه و جلسها حداه ..!
بسمة:( بفرحة و الضحكة فالتة لها و منورة وجهها كثر و كثر ..! ) ما متيقاش بلي راك فدارنا ..!
حاس بالسخانة كتدكد فيه .. و سطولة ديال العرق كيتكبوو عليه ..! تزير عليه الحال بزاف .. تا فتح الصدايف ديال الشوميز .. كيتنفس بصعووبة ..! نغز ملاك لي حداه و قال
حكيم: شي كاس د الما بارد معاك ..!
عوجات وجهها عكزانة تنوض و بزز منها تقلعات تجيبولوو .. غادية وسط الشطيح و الغنى كتقلب على ماماين العروسة تمد لها .. حتى دخل فيها حسام .. شوية ما يطيحها ..!
ملاك: بقيتي مرافق مع اححح كح كح كح
حسام:( رد بضحكة ) مع اححح و اي و امم و ااه .. امالك ا هيتا ..!
ملاك: راني مريضة ا بنادم .. بقيتي مرافق مع القطاطعية حتى رجعوو عندك خداميهم ..!
دازت فيه كتبركم و هو متبعها بعينيه ..!
حسام: بقوة التهلوو الجناب بداو يطلوو ..! ( دازت وحدة من قداموو تبعها بلا ما يحس و بصوت مهموس قال ) شفت الفخاض و قلبي تمخض ..!
راجعة بالشوية عليها هازة كاس د الما كتقلب على حكيم .. حتى خرج فيها حسام مرة اخرى .. هز الكاس و هبط عليه جغمة وحدة ..!
ملاك: ماشي ليك اوييييلي .. هذا ديال حكيم ( تمتمات فنفسها ) تشرب فيه السم يقطعلك المسارن ..!
حسام: حكيم مشى بحالوو .. عيى و مشى يرتاح ( ضحك ) و سيري تجلسي حتى نتي قدام خوتك .. قبل ما ينقز علينا شي واحد فيهم .. شفت عدنان كيبلاني واش يجمعنا بنص و لا يدخل فينا ديريكت بكروشي ..!
ملاك: فين هو ؟
ضورات عينيها عليه حتى لمحاتوو جالس فصالون فيه غير الرجال ..! حاني راسوو و هاز عينيه فيها بتخنزيرة د العداو ..! كيشوف فيها داك الشوفة ديال ذوبي فبلاصتك ما نلقاكش كضوري تما ..! حرك راسوو للجنب بمعنى تحركي .. حتى هبط شوية من شعرو على عينيه ..! و فالبلاصة خوات الساحة و مشات جلسات حدا حبيبة مركنة ..!
قلب وجهوو بانزعاج عاقد حجبانوو .. كيدوز يديه بالشوية على لحيتوو .. مغلغل صباعوو فيها ..! حاس بالعينين عليه مقلقينوو .. بحال هاذ الاجواء ما عندوش معاهم و كن ما كان خوه ما يحطش رجليه تما نهائيا .. يبارك و يسيفط كادو مضخم و هو ما يمشيش ..!
..... 1 : شكون داك الزين المسرار لي جالس تما مع عمي صطوف ههه ..!
..... 2: هذاك ا لالة خوو العريس .. كاين حكيم لي خرج قبيلة .. هذاك بوليسي .. مزوج و مراتوو حاملة .. غزالة يا ختي كتحمق و العوينات خوضر كيهبلوو و لاطاي عامرة تبارك الله .. غير هي عروبية شوية لا فلباسها لا فهضرتها .. كتجيني فشكل ..!
...... 1: و ها هي عروبية و ذاتوو راجل يحنث عشرة .. كيتي انا و ياك .. نقيلوو نتجبدو و الهضرة بالحساب و عنداك بالاك .. و ما حاشاهلنا تا كلب د الخلى هو التالي ..!
..... 2: اييوا الله يعطينا زهر الخيبوعات ..!
..... 1: زيدي كمليلي على المعفر ( غمزاتها جهة عدنان )
..... 2: كاين ا لالة محمد أمين هو العريس و عاد عدنان و الصغير هو خليل .. راه فين هو .. هذاك ا لالة على ما سمعت كيوجد وراقوو غيخرج لألمانيا غيقرا شي ست شهور فورماسيون و يبدا خدمة فبوسط مخير .. يالاه شد الماستر هاذ العام و كان داير السونطر كيقرا الالمانية و كيقري هو لونغلي نعام ا لالة ..!
......1: الفلووس كاينة علاش ما يمشييش حتى نتي .. كتجي غير فالمساكين ..! أجي بعدا عاوداتلك بسمة فين تلاقات بهاذ محمد أمين ديالها .. شفتها ضربات ضربتها و سقرات ما بقات لا تهضر لا تعاود .. بقالها غير تقولنا كلشي جا على غفلة و تبلوكينا ..!
......2: ههههه و الله ما كذبتي .. كيتزوجوو بحال يلا وصلوو للقمر ..! هي كاع ما قالت و لكن على ما سمعت .. تعارفوو فالفيسبوك .. كانوو دايرين شي جروب ديال المهندسين و الاطباء كيتعارفوو بيناتهم .. شحال و هما كيهضرو و نهار تلاقاو قالك محمد أمين كان ناوي غير يكوي و يمشي .. ساعة شاف الزين حوال .. الأداب و الصواب .. جالسة معاه و حشمانة و الضرافات كتقطر .. غرق فيها و ندم على النهار لي فكر يتفلى عليها ( ضحكات ) حلات باب قلبوو بالساروت و رجعات شدات عليها ..!
.....1: ههههه هاذشي كيووت ..!
.....2: و داك الزين المسرار لي كتسولي عليه .. يا لالة داخل سوق راسوو من خدمتوو للدار للجامع .. شاد فدينوو بزاف .. عندو واقيلة الليصونص و لا deug فالشريعة .. و فاتح محل ديال ذهب .. ذهايبي صحيح و كيدخل الزبابل د الفلوس فالنهار و المحل كي داير بانيه .. جوج طباقي يا زكية يا ختي .. ديكشي كيخروض العقل ..!
زكية:( باستهزاء ) اييوا شي عطاتوو و شي زواتوو ..! آتيني بالمفيد .. مصاحب خاطب مزوج ..!
....2: ههه ديال راسوو يا لالة .. غير بيني لينا ..!
زكية: ما تساليني غير نعرض عليك للعرس هههههه .. فين قلتيلي عندو المحل ؟ نمشييو نتقضاو من عندو و نشرييو معرفة ( غمزاتها )
......2: ايوا هاكا يكونوو الصحابات و الا فلا ..!
زكية: تبارك الله عليك الضواسة ديالهم كاملين عندك .. حاضرة ناضرة ههه ..!
***************************************
عينيه حومر كيتشدو و كيرجع يحلهم بصعوبة .. عراق و القاميجة رجعات عليه لاسقة كتقطر ..! تزنك و وجهوو حماار و ذاتوو كلها كتفور بالسخانة لي شاعلة فيه ..! حلقوو ناشف و لسانوو بزز كيحركوو ..!
بحال يلا مخشي فشي قرعة و ساديين عليه .. كلشي كيدوز قداموو ثقييل .. ضواو الطونوبيلات و السطوب ما بقاش كيفرز بيناتهم .. حتى باش يهضر ما قادرش ..!
شعل الاحمر و بلا ما ينتابه زاد مكسيري حتى خرجات فيه طونوبيل من الجنب .. عجناتلوو الباب و تزدح هو بالجهد مع الفولا تا تسمع الكلاكسون كيتقب الوذنين و هو مغيب فوقوو ..!
بغات تحماق بالحريق فالدار ما خلات خزامة .. شيح .. ازير .. و والوو ..! الحريق كيضربها بحال الضوو .. و تحتها كياكلها ماكلة .. كتعيى تحك و ديكشي غير ما كيزيد يهيج كثر و كثر ..!
خارجة من الحمام كلها عرقانة .. وجهها مزير و عينيها حومر بالبكى .. كتمشى مفرقة رجليها و شادة على ظهرها .. لقات قبالتها امها و بحرقة شهقات و قالت ..!
كريمة: الموووت الموووت ما بgيتش gادرة نكعد بلا والوو .. كنتgطع ا مي .. لgيت الدم تحتي عاد دابا دروكا .. نخرg عليا جلايبتي و نطرgو يانا و ياك الطبيب .. احاااااححح ا مييمتي ..!
الأم: نوضي من تما يالاه .. غوتي على عكوزتك ..!
كريمة: واخا يانا نغوت عليها ..!
بزز لبسات جلابتها و قادات فولارها خارجة و كتهضر مع حبيبة ..لي نوضاتها من وسط العشا ديال ضريب الصداق ..!
حبيبة: واش الدم كثير و لا غير شوية ؟ كتحرقك كرشك و لا تحتك ؟ ( تخلعات ) صافي صافي .. سبقوني لابن رشد انا غنجي دابا لعندك .. الطبيبة ديالك ما غتكونش دابا فهاذ الوقت فلاكابين " فالعيادة " ..!
قطعات معاها و هزات ساكها تالفة و مخلوعة عنداك تكون وقعاتلها شي حاجة .. عارفة كريمة بلا عقل و متهورة و تتوقع منها تدير أي حاجة فراسها .. شافت فعائلة العروسة و فولادها و قالت ..!
حبيبة: هاذي كريمة .. جاتها ايموغاجي واقيلة و فيها الحريق كيقطع .. ما غتعرف ما تدير بوحدها خاصني نمشي نلحق عليها دغيا .. عدنان توصلني ..!
محمد أمين: تا حنا سالينا نمشييو كاملين ..! نعلموو حكيم واقيلة ( جبد تيليفونوو دوز لابيل و فالبلاصة رجعلوو ) طافيه .. غيكون مشى لدارو تكى .. نتي و عدنان سبقوو لعند كريمة و أنا نوصل لافامي و ندوز مع خليل و ماري لعند حكيم نبدلوو علينا و نجييو عندكم ..!
عدنان: و عليه .. نتوكلوو على الله ..!
*****************************************
صوت لومبيلونص كتسمع فالشارع كامل ...! و لي دازت من حداه كيردد بأسى .. " الله يحد الباس "
الطريق عامرة غطرطق بالحديد .. بالكشيفة باش كيسلكوو فيها ..! حكيم ناعس فوق الباياص مغيب ..! ما فيه حتى ضربة من غير جنب جبهتوو لي بدا يزراق و تبوق شوية ..!
خافوو يكون جاه نزيف داخلي .. لأنوو من غير هاذشي ما باين عليه والوو ..! و حتى لومبيلونص خاوية من الماطريال ما عندهم باش يفيدوه ..! حدهم قادولوو الاوكسيجين مغطي على نيفوو و فموو .. حيث التنفس عندو قليل بزاف ..!
مدة طويلة عاد وصلوو ل chu ابن رشد ديال الدار البيضاء .. دخلوه نيشان المستعجلات لي كيطيحوو بالبشر ..! ها لي مفتوحة ليه يديه و كيغوث .. ها لي ناعس فالارض كيموت و ما كاين لي يديها فيه .. ها لي رجليه كتسيلوو بالما و مدودة .. واحد الحالة ما تمنى تشوفها لعدوك ..!
الاطباء كيطيرو و ينزلوو و دايرين فوق جهدهم .. و لكن الغالب الله .. حتى هما عندهم خصاص كبير لا من الأطر لا من الماطريال و شحال قدهم .. حتى هما غير بنادم و نهار على نهار الواحد كيحط سلاحوو و كيتقهر ..!
دخلوو حكيم إيغجون دغيا .. ضارو بيه جوج د الاطباء .. كيقلبوو فيه و كيسمعوو للي جاو معاه فلومبيلنوص باش يعطيوهم معلومات عليه .. تأكدوو بلي ما عندوش نزيف داخلي عاد ارتاحوو ..!
قيسولوو الطونسيوو لقاوه هابط تال ربعة و السكر طالعلوو لستة غرام ..! وجهوو صفر لدرجة كتخلع و السخانة كتدكدك فيه و التنفس قليل ..!
ضربولوو الأنسولين فالبلاصة باش يهبطلوو السكر و يتعاوط ..! قادولوو السيروم و دارولوو فيه الدوا ديال الطونسيوو و شوكة على ود السخانة ..! خلاوه متكي و الاوكسيجين على نيفوو و فموو و هو مغيب .. مرة مرة كيحرك صبع يديه ..!
الطبيب:( بجدية شاف فالفرملية و قال ) تسناوه يفيق و ديرولوو هاذ التحاليل د الدم و ديال البولة .. فاش يخرجوو علميني .. داكوغ ..!
ف: داكوغ دكتور ..!
فتح عينيه كيرمشهم ببطئ .. حاس بذاتوو كلها كتحرقوو بحال شي حد جاب شي عصا و هرسها على عظاموو .. كلشي كيضرو .. و السخانة كتاكل فيه من الداخل واخا ضربولوو الشوكة ما قضات فيه والوو ..!
فموو ناشف و لسانوو ثقيل عليه باغي يهضر و ما قادرش حدو كيحرك صبعوو د الشهادة ..! الموت كيشوفها بين عينيه و وجع خايب كيقطع فمسارنوو .. السخفة و الفشلة و حريق الراس و زادو كملوو عليه بالتحاليل و لي سكانير لي دارولوو .. د الراس و القفص الصدري كامل ..!
الطبيب:( شاف فيه .. قرب جهتوو و قال ) كتسمعني ..؟ ( غمض عينيه و رجع فتحهم ) قادر تهضر ؟
حرك صبعوو بالنفي .. كيتنفس بصعوبة .. كن ما كان الاوكسجين كن يعلم الله بحالتوو ..! تنهد الطبيب و قال ..!
الطبيب: داكوغ .. المهم حنا درنالك كاع التحاليل لي شكينا فيهم .... لي زاناليز ديال الدم و ديال البولة خرجوو كاملين عندك مزيانين الحمد لله ..! و مشينا لبعيد كاع و قلنا ممكن تكون شي حاجة خطيرة .. درنا سكانير د الراس و القفص الصدري و حتى هما نتائجهم ممتازة .. يعني ما عندك والوو ..!
مد يديه فتحلوو عينيه كيقلبها و هز طابلوو محطوط تحت رجليه فالباياص كيقيد فيه ..!
الطبيب : السكر و الطونسيوو لاعبين عليك .. دابا بداو يتقادو تحت المراقبة ديالنا ..! السخانة هبطات شوية .. غنعطيك اوغدونونس تبعها و غتولي مزيان .. و ضروري تشوف اختصاصي ديال الديابيتيك " السكر " .. يكمل لك السيرو و تقدر تخرج ( بتساؤل ) تعيط لشي حد يجي موراك ؟
حكيم:( غمض عينيه و رجع فتحهم بمعنى ااه ..! )
جبد تيليفونوو من البلوزة البيضة ديالوو و مدولوو .. قيد بصعوبة نمرة محمد أمين و تزدح كينهج فبلاصتوو و العروقات كتكب عليه بالسطولة ..!
الطبيب:( تسنى مدة و هو كيصوني حتى رد عليه و بجدية ) السلام عليكم .. معاك الدكتور ابراهيم الجوهري .. طبيب ف ابن رشد .. جابولنا هاذ العشية واحد السيد داير اكسيدون هو لي عطاني نمراك .. كنظن الاخ ديالك ( غمض حكيم عينيه و رجع فتحهم ) هو دابا مزيان .. خاصوو يخرج من هنا ما كايناش بلاصة ..! غنتسناوك حتى تجي موراه .. الله المعين ( قطع معاه و حط لوغدونونس فوق كرش حكيم و تم خارج ) الله يجيب الشفا ..!
محمد أمين:( تخطف منوو اللون و تخلع على خوه .. قطع لابيل ما مبينش لخوتوو و بزربة قال ) خليل .. ماري .. خرجلي شغال ضروري غنحطكم فالدار و نكمل ما عنديش الوقت و حتى نتوما ما كاين لاش تتكبوو كاملين فالطبيب .. دابا يعلمونا بشنوو قالولهم ..!
****************************************
تسناوها حدا الباب ديال جناح النساء و التوليد .. جايا حبيبة كتجر فتكشيطتها مخلوعة ..! بقات بلبستها و ماكياجها ما كفاهاش الوقت فين تبدل ..! لقات بسمة فرشاتلهم الطريق و عيطات على بنات صحاباتها باش يسبقووهم هما اللوالة يدخلوهم .. و ديكشي لي كان ..!
دخلوو بثلاثة بيهم و عدنان بقى برا كيتسناهم .. حيث العيالات تما كيكونوو عريانين و لي جاها الوجع و باقي الوالدة ما تحلات لها كدير لامارش تما و ربي لي عالم بيهم .. فما جاتش يمشي معاهم ..!
طلعات كريمة فوق الكرسي فين كيفحصوهم .. حاطة كل رجل على حديدة فالجنب .. و هابطة للتحت باش نصها يجي باين ..! قلباتها الطبيبة مزيان و كريمة كتصرصر و تغوت بالحريق .. طابت بالجهد ..!
د:( كملات و حيدات الليكات لاحتهم و مشات للافابوو ديالها غسلات يديها مزيان و عقمات .. عاد قالت ) تبعوني للبيرو عندي ..!
خرجات و هما موراها حتال بيروها .. جلسات فبلاصتها و هما مقابلين معاها كيتسناو شنوو غتقول ..!
د: مدام كريمة عندها التهاب حاد .. غتكون لقطات شي ميكروب يا فالحمام و لا لابيسين و لا شي حاجة بحال هاكا .. الفاجان ديالك طايب بزاف و بصراحة وصلتي لحالة كغاف " خايبة " بزاف .. و هاذو غير احتمالات .. السبب الرئيسي ما عرفتوش ..!
حبيبة: و بالنسبة للدم ا دكتورة ..!
د: كنظن كان خفيف ياك ؟ ( حركات كريمة راسها باه و كملات الطبيبة ) كيفما قلت ميكروب خايب بزاف لاعب عليك و حتى الحكان لي كتحكي زاد هيج لحمك كثر .. هذاك ماشي ايموغاجي .. غير واحد من الافرازات لي كتخرجهم ذاتنا باش كتعلمك بالخطر .. و الميكروب و هو لي خلى لي بيغط نواغ ينزلوو منها ..!
حبيبة: البيبي ما تضارتش بعدا ؟
د:( حنات راسها كتكتب فلوغدونونص ) ما نقدر نقولك والوو هاذ الساعة .. غنكتبلك شي تحاليل ا مدام .. ضروري تديرهم فأقرب وقت و غير تخرج الغيزياطا تجيبيهالي .. هاذو غير غتستعمليهم و تداوميهم .. غتولي مزيانة ان شاء الله ..!
كريمة: واخا ..!
د: الله يشافي ..!
الكل: شكرا ..!
******************************************
حيدات صندالتها و لاحتها حدا الفوطوي .. متكية بتعب كتكمدهم .. ما كمل النهار حتى تسالات و ما بقى لها جهد ..! يالاه هزات تيليفونها تشوف حكيم واش سيفطلها شي مسج .. و هو يطلع لها لابيل بسمية * أحمد برادة * .. عوجات فمها كتميق بعينيها .. و بهدوء جاوبات ..!
شريفة: موسيوو أحمد برادة ..! عاش من شافك و سمع صوتك ..!
أحمد برادة: شريفة بنتي .. ça fait longtemps " مدة هاذي " ما هضرنا .. j'espère " كنتمنى " تكوني مزيانة ..!؟
شريفة: طخي بيان ربي يخليك ..!
أحمد برادة: Parfait " ممتاز " ..! كنت أنا و مدام خديجة كنهضرو عليك هاذ العشية و بالصدفة سبحان الله .. شفنا لي سطوري ديال مدام كوثر بنجلون مصوراك فالمحل ديالك .. درتي الافتتاح ؟
شريفة:( مصات شنافتها و قالت مطلعاها عليه ..! ) وي درت الافتتاح اليوم و شحال تسنيتك نتا و مدام خديجة .. يمكن تشغلتوو و ما صلاحش لكم تزوروني ..!
أحمد برادة:( باستغراب رد ) و لكن ما عيطتيش علمتينا .. ما يسحابناش عند L'ouverture اليوم ..!
شريفة: وي ما عيطتش مي سخرت واحد من الدراري لي خدامين عندي و عطيتوو كارط فيها سميتك نتا و المدام و كارط لمهدي و اكدت عليه يمدهالكم باليد ..! ( شقلبات عينيها ) راحنا قربنا نولييو عائلة و حباب زعما .. حشومة كاع نحل الريسطوو و ما نحضركمش ..!
أحمد برادة: pfff .. دوماج ما وصلنا والوو .. أما كنا نجييو لعندك بالفرحات علينا .. en tous les cas félicitations charifa " فجميع الأحوال مبروك شريفة ..! "
شريفة:( هزات حاجبها و بكل برود قالت ) شفتي هاذ ولاد الق** ديال المغاربة .. عمرهم يطفروه فحياتهم غير بهاذ الخدايم ديال الشما٠يت .. الله ينعل ط** موو ولد الواسعة .. غير لي يكور دوك ليكارط و يطلع هم ليه مع كرو ولد الق** .. الزا** لي حطوو كنسولوو و كيقولي عطيتهم لكارط و فرحوو .. و قالولك ضروري ما يجييو ..!
أحمد برادة:( خرج عينيه بدهشة .. صدماتوو فيها لدرجة حنا عينيه كيتأكد واش كيهضر مع شريفة نيت لي كيعرف ) شرييفة ؟ mais c'est quoi ça " و لكن شنوو هذا ؟ " ااء ؟؟
شريفة: غير سمحلي تعصبت و ما حسيتش براسي .. داز عندي النهار طويل غير جرا من هنا للهنا .. يالاه دخلت للدار .. و الله ما لقيت لوقت حتى باش نضربلي شي قاسحة و كارو نقاد بيه المجاج .. و لكن دابا هانا غنتكيف بخاطري و نكمل السهرة بشي معسل ناااضي و شي كاس د الشراب يااااا سلااام .. الليلة زاهية .. و الله يعفوو علينا و خلاص .. كنهلكوو غير فصحتنا .. البلية بنت الق** ما مع اصل مها لعب ..!
احمد برادة:( رد مصعوق ) مبلية ؟؟؟ كتديري هاذشي كامل ..!!!
قبل ما تجاوبوو قطع عليها مصدوم .. مخليها كتفركل بالضحك عليه و على مراتوو لي سمعات صوتها حداه كتهضر بالشوية و سي برادة كيعاود هضرتها بالجهد ..!
شريفة: كان يسحابلي كرمة و فيها الكرموس .. صدقتي غير خرية و ضاير بيها الناموس ..! بشااااخ على الرج٠لة د آخر الزمن .. ههه ..! حو*** بكري ..!
****************************************
قاد ليه الخدية مور ظهرو .. عاقد حجبانوو و الد٠م مخطوف من وجهوو .. تخلع عليه حتى ما قد و الموصيبة هي ما عارفينش شنوو عندو .. واش هاذ الحالة لي وصل لها غير من الكسيدة لي دار ؟
محمد امين:( جبد تيليفونوو .. واقف عليه كيقرا فالمسجات ..! ) قالت لك بسمة يمكن غير من العيى ما دام دارولك كاع التحاليل و كلشي خرج مزيان ..! و ضربولك الانسولين .. عطيها غير للحلاوة باش يطلع لك الطونسيوو .. داك السخفة و الهلكة منوو ..! ( شاف فيه ) عليك بعصير د الحليب و التمر و الزبيب .. و بدا تشرب .. أنا غنقادولك و نتا رتاح بحالك يلا نعستي غيكون مخير كاع ..!
حكيم:( بصوت بزز كيتسمع قال ) و وا واخا ..!
خرج مخليه كيتنفس بصعوبة .. غير كيعراق و السخانة كتاكل منوو .. سخفان و فاشل و ذاتوو كيفما تحرك كيغوث بالحريق ..! غبر عليه محمد أمين خمسة دقائق بالحساب و رجع هاز بريق داير فيه العصير و كاس ديالوو .. خوالوو فيه العصير و مدولوو ..!
بزز شرب منوو .. حلوو لدرجة ما كتخيلش و لكن زوين و خاتر .. لسق عليه تا شرب ثلاثة د الكيسان .. خلاه كيكمل فالرابع و خرج هو كيهضر فالتيليفون بخاطرو .. تا تسمع صوت التهراس .. قطع لابيل و دخل كيجري للبيت .. لقى حكيم مغيب و الكاس مهرس قداموو فالارض ..!
الكشكوشة خارجة من جنب فموو و هو ما كاينش فهاذ العالم .. يدو طايحة جنب الناموسية .. كيفما حركوو كيمشي .. لدرجة شك واش ما٠ت ..! عقلوو بغى يخرج و الدموع طاحوو من عينيه و هو كيحرك فيه .. صدرو ما كيطلع ما كيهبط و النبض عيى يقلب عليه فيدو و جنب عنقوو .. و والوو ما كيحسش بيه كيضرب فخطرة ..!
محمد أمين:( كيشهق و يبكي و يحرك فيه بحال الدري الصغير ) ح حكيييم خوويا .. ساسي و علامن كنحط راسي و نعول .. لي كيشري همنا على حساب صحتوو و يسبقنا عليه فكولشي .. فيق ا خويا .. فيق و لمن تخليني ( تزدح على ركابيه وسط داك الزاج و الدموع هابطين حارين مع حناكوو ) نترزا فصحتي و ما نترزا فيك .. ننقص من عمري و نعطيك غير ما تخلينيش ..!
وقف بحال الحمق كيقلب على تيليفونوو يعيط على لومبيلونص .. ما يقدرش يهز حكيم بوحدو .. و حتى واحد من خوتوو ما ساق الخبار من غيرو .. باش يعاونوه ..! ما بغاش يخلعهم و فضل هو يتكلف و يشوفوو بعدا كي بقى و عاد يهضر معاهم ...!
محمد أميين يا محمد أمين .. ربي بوحدو لي عالم بالحرقة لي شاخضة فصدرو و هو كيشوف خوه كيموت قدام عينيه .. هاذشي يلا ما كانش مول الأمانة دا أمانتوو و بقات غير الكسدة محطوطة تما .. كتتسنى تتكفن و تتدفن تحت التراب ..!
محمد أمين:( بصوت باكي و بحة كتقطع فالقلب قال و هو كيهضر مع حبيبة .. من بعد ما رصى مع لومبيلونص د كلينيك بريفي و عطاهم لادغيس د الدار ..! ) الواليدة .. خ خوويا كيموووت ( عض على شنافتوو .. هاز عينيه فالسما حوومر و مدمعين ) أجي تسامحي مع ولدك و شوفيه .. يمكن هاذي آخر مرة لينا معاه
غلباتوو البكية و قطع عليها ما قادرش يزيد يهضر ..!
محمد أمين:( بحرقة ) واش تسوى الدنيا بلا بيك ؟
آش نوصف و آش نقول ؟ موس و تخشى فيها كيذبح و يعاود ؟ حرقة كتحكها فصدرها ؟ عافية و شعلات فيها تا سالوو دموعها كيحاولوو يطفييوها ..! و هي غير ما زايدة كتشخض ..!
عينيها رجعوو بحال قطرة د الدم و هي باقية ما عارفة شنوو واقع معاه .. و لكن محمد امين ما غيهضرش معاها من فراغ .. و حتى قلبها ما غينغزهاش النهار كامل غير هكاك ..!
خرجات بحال الحمقة كتبكي و تغوت حتى خلعاتهم ما عرفوو باش تبلاو .. بغاو غير يفهموو مالها و هي ففمها غير
حبيبة: ياااااا ربي لاااا تحرق قلبي عليه .. ياااا ربي خوذ من عمري و عطيه .. يا ربي راه ما عندي والوو من غيرهم يلا مشى واحد منهم .. عيني يطفاو .. ياااا ربي ما تشويليش كبدتي على عز ما كنملك .. حياتي بلا بيهم واااالووو .. واااا ولديييي
كتحك فصدرها و تعاود .. عند بالها هاكا غتبرد داك الحرقة لي شاعلة فيها ..!
حبيبة:( خرجات عينيها فيهم و قالت بالغوات ) واااا نووضوو وصلوني عند ولديييي .. فرحتي اللولة بين الحيا و الموت .. صاحبي و خويا و علامن كنحط الراس ..بين يدين الله .. شوف واش نعاود نسمع من فموو يَّما مرة اخرى و لا لا ( طاحت للارض تبكي و تقول ما بكات ) ياااااا ربي الحنييين
بالكشايف باش نوضوها من الارض .. عدنان شادها من يد و خليل من اليد الثانية .. و ملاك تابعاهم من لور كتدمع فسكات ... كلشي على اعصابوو و حبيبة ما بغاتش تسكت لهم فخطرة .. كتبكي من قاع قلبها و تشهق حتى كتسمع بحال التلقيفة ديال المو٠ت .. خلعاتهم عليها تا ولاو غير كيسايسوو معاها ..!
اما عدنان غير كمل المكالمة مع محمد امين باش يعرف شمن كلينيك هما فيه ..! قلع تقليعة وحدة طاير فالطريق ..!
ما عرفوش كي دارو وصلوو للكلينيك بداك السرعة و هما سالمين ..! سبقهم خليل للاستقبال عطاهم السمية و الكنية د حكيم .. لي غير طاباوها فالبيسي و علموه فشمن طابق كاين ..!
و بخوف كبير من شنوو غيسمعوو .. تمشاو جهة محمد أمين لي وجهوو صفر و عينيه حومر .. متكي على الحيط و هاز راسوو للسما .. مقهوور و حالتوو كتشفي العدو ..! قربات منوو حبيبة حيط كيديها و الثاني كيردها .. دموعها شلال على خذها و شنايفها كيترعدوو ..! الحروف تلفوو لها .. باغى قلبها يتطمن على كبدتها و فنفس الوقت ما قادراش تسمع شي كلمة تقتلها و هي باقية فالحياة ..!
شاف فيها بقهرة و داز عليهم واحد بواحد و رجع قلب عينيه للانعاش فين متكي حكيم .. صدرو عاري و ملسقين فيه كثرة السلوكة .. كل واحد باش متصل .. ديال نبضات القلب و الطونسيوو باش عبرولوو و ديال التبول ..! الاوكسجين على فموو و نيفوو و الشوكة د السيروم مخشية فيديه ..! و هو مغيب فخطرة ..!
و مع الضورة لي ضارت حبيبة تشوف فين كيشوف .. رجع الخط فجهاز القلب مستقيييييم .. دليل على القلب توقف على النبض ..! خرجات عينيها و قربات من الزاج لي بعيد بمسافة على فين واقفين جوج اطباء و معاهم الفرمليات ..!
حرك واحد فيهم راسوو بالنفي و وسع بين كتافوو و يديه و الثاني غمض عينيه و رجع فتحهم .. دليل على انوو كيوافقوو الرأي ..!
هاذ الحركة قتلاتها .. بغات تتسطى ..! كيفاش زعما ؟ واش صافي ولدها مات ؟ واش لهاذ الدرجة ما قدروش ينقذوه و يعاونوه ؟ ياك عاد هاذ العشية كان واقف معاها صحة سلام .. و دابا مالوو ؟
حبيبة:( غوتات حتى بح لها الصوت .. طاحت على ركابيها كتضرب فوجهها و تنتف فشعرها غتحماق ) وااااااااااااااا ولديييييييييي .... واااااااااا كبدتييييييي كنتشوى فيييييهااااا .. وااااااا ربيييييي ولدييييييي ..!
يتبع...
التنقل بين الأجزاء