عرس الذيب الجزء الثالث

شريفة: كرهتوو ا أسية كرهتوو .. خاصني نلقى حل نتفك ما يمكنش نبقى هاكا حياتي كاملة ..!

أسية: و شنوو الحل ؟؟ ما قدرتيش تعرفي فين دايرهم زعما ؟ و لا تجمعي حتى نص دالثمن و حتى يلا دفعهم غيتعاملوو معاك تخلصي طرف و طرف يبقالك طريطات بحال الكريدي ؟

شريفة: كن لقيتهم غتلقايني حداك هنا ؟؟ ما عرفتش فين مغبرهم و ما عنديش أنا حتى الثلث ديال داك الفلوس .. و فنظرك هذاك حل ؟ نبقى أنا حياتي كاملة كنخدم عليه فشي حاجة أنا ما دايراهاش أصلا ؟

أسية:( سكتات كتفكر )

شريفة: الحل هو نلوي ليه يديه كيفما لواها ليا ( شافت فيها ببرود ) يسحابلك أنا قابلة بداك الضرة لله فسبيل الله ؟ و لكن حسابي فراسي بوووحدو ( حكات عنقها ) هي الورقة الرابحة لي بين يدي دابا ..!

أسية: شرحي كثر ما فهمتش ؟؟

شريفة: بلا ما تفكري بزاف .. كلشي غتشوفيه على عينيك .. الدقة لي عطاني غنردهالوو مضوبلة .. كنتمنى هاذشي يصدق و إلا تاليتها نلوح راسي من شي سطح

أسية: تء الله ينجيك ما نتي عليك بفال

شريفة:( سهات ) غنحتاجك تعاونيني فواحد الحاجة .. نتي إلياس كيعزك بزاف .. غتطلبيه معايا يفتحلي مشروع .. ضروري و مؤكد ( هزات نظاظرها دارتهم فوق راسها ) واخا هضرت معاه و عطاني الكلمة .. راه ما عندو كلمة و غير كيتبوهل عليا داك زعطوط ..!

أسية: واخا و الله حتى نهضر معاه مرة و جوج و عشرة

شريفة: ما يمكنش من بعد هاذ السنين نخرج بحتى درهم .. من بعد ما ربيتلوو الريش و علمتوو يجمع يديه و يدير علاياش يرجع .. و نهار حفظ سواريه قلب عليا أنا لولة .. عارفني بالعاه غير على ود فلوسو ( باستهزاء ) الريال هو لخر ما كنشدو فيدي .. حتى من الذهب ما عنديش الروسيات ديالهم .. كلشي عندو .. عارف نهار ندير علاياش نرجع غنزيد خلفة .. ما غنعقلش عليه

أسية:( بقات فيها .. واخا عايشين مجموعين عمرها سحابها ما مرتاحاش فزواجها بالعكس كتبان فرحانة و قبل من زواجوو كانوو كأي كوبل ) لا حول و لا قوة إلا بالله .. بغيت نفهم غير شنوو ربحتي من هاذ التزويجة ؟

شريفة: هه ! تعلمت القوالب .. عرفتي أ أسية نهار نتفك .. الحفلة لي ندير عمر شي بنت المراة ما دارتها فحياتها ( تنهدات بالجهد ) حجرة و غتهز من فووق قلبي .. عييت و ملييت من هاذ العيشة .. بغيت نحس براسي حرة .. نعيش حياتي كيفما بغيت و كيفما كنتمنى ..!

أسية: كولشي دابا يتصلح و يتعوض أحبيبتي .. ما تفكريش بزاف

شريفة: عند بالوو بلي دار غينسيني الإصلاحية لي دخلت ليها بمسبتوو غينسيني الع٠صا و التمرميد لي دوزت .. الجوع و الس٠بان و الضر٠ب .. لا محنة لا شفقة .. قالك كيصلحوو لولاد ( باستهزاء ) كيعقدوهم و يخرجوهم كارهين كلشي و الدنيا كتبانلهم كحلة قدامهم .. عدفت البوليس و ما يجي منهم ولاد الق*** مقطرين من الطرف لطرف

أسية:( تنهدات ) ما عرفت ما نقولك .. الله يفاجيها

شريفة:( شافت فيها ) ما قتلكش هاذشي باش تكرهيه .. واخا هكاك كان حسن من لي ولدوني .. دار معايا لي من لحمي و دمي ما داروهش .. اييه طلع شما٠تة فشي حوايج و را٠جل فحوايج أخرى .. كنعزو و عليه فتحت عيني و لكن أنا صافي قنعت من حس الرج٠ال باغى نعيش طرونكيل بوحدي .. طلعولي فكري من لخر

أسية: دار هاذشي كامل عليك و من بعد مشى تزوج بنجاة بقلب بارد .. كنعيى نفهم فالرج٠ال و ما كنفهمش

شريفة: و ما عندك ما ديري بيهم أصلا .. قراااااي أ أسية ... وصلي لديكشي لي ما قدرتش أنا نديرو .. طامعة فيك فحاجة وحدة .. تخدمي و تهزي راسك و يجي النهار لي نشوفك فبوسط كيحمر الوجه .. ما باغى منك والوو ( حركاتلها راسها ) يالاه نهبطوو غنتعطلوو عليه و يبدا يتق** عليا

*****************

عينيه حوومر بالعيى دالطريق لي ساعات و هو كيطحن فيها .. مخرج يديه من الشرجم كيدقدق فالباب بجوج صباع .. ضاربة الشمش حارة فيديه مبيناهم سوومر و فيهم شعيرات زعرين بالشعى .. مرة مرة كيدوز يدو على راسوو لي ضارب ليه تحسينة دالواحد .. مطراسيها مزيان مع جبهتوو .. عاطياه وقار و كاريزما خاصة .. ما كتخليكش تزعم عليه ..! نطق الشخص لي جالس حداه قائل

....: شدرتي باقي معاهم فلافير ديال طنجة أ با حكيم تافقتوو ؟؟

قلب وجهوو شاف فيه هاز حاجبوو بنظرة خاسرة .. باين غير من حركاتوا بلي شخصيتوا صعيبة و ماشي شي واحد لي ساهل ابدا ..! بقى شحال ساكت عاد رد بصوت غالبة عليه اللهجة الكازاوية .. حرش و مدعدع شوية

حكيم: هوتة متختخة ( كيهضر و يعبر بيديه .. حركاتوو مخسرين ) طاحت فيدين شي ولاد لق** غير خاشيين كرهم فالق** ما عارفين حتى يجيبوها للبر

حسام: هاذي معروفة .. الرج٠لة بحر و العوامة قلال .. و باش دخل ليه خاصك الميطرناجور العايق دالقاعة

حكيم:( بهدوء ) و الشناقة طايحين على لحيس المرقة العشير

حسام:( ضحك ) زكيتي معاهم بعدا ؟

حكيم: نطرق شي مسامر و نطلع نفكلهم الشغل

سكت مكسيري فالطريق و مرة مرة كيطرطق فعظاموو لي مهدودين عليه .. عكس حسام لي ضاربها بتكرشيخة عظيمة قداموو ..

عينيه خارجين فالتيليفون كيدير الرياضة لصباعوو ما كاين غير البارود كيطرطق و السلوكيات كيتشيروو خالقها مع البنات لي مكججين عليه كي الذبان .. حتى طلعات ليه نوتيفيكاسيون دلايف دوحدة من البنات لي مأبوني عندهم فالأنسطا .. ضحك حتى بانتلوو الخوية دالضرسة دالعقل لي مزولها و قال

حسام: الخوادرية راها شابكاها أ با حكيم

حيد لكيت تا تسمع صوت خت حكيم مع صحاباتها .. جالسين فكافي كيضحكوو بيناتهم و اللايف شاخض تعناب عشرة للضس .. عقد حجبانوو و مد يديه هز تيليفونوا دوز الخط .. غير ردات عليه قال

حكيم: بالرب و ما تقطعي عليا داك القلا** و ترجعي تق** منين جيتي النم .. حتى نجي نشمعها لك

ملاك:( خلعها ما عرفاتوا منين تسلط عليها و فين شافها أصلا و هي مبلوكية خوتها كاملين ) ح حكيم ؟؟

حكيم:( بكلمات متقطعة .. كيهضر و يولي يسكت عاد يرجع يكمل ) خلا دار بوك هذا .. فاتحة لمك دار القح** فينما كان شي زا** جامعاه عندك .. حتى نوصل و نوريك التق** كي داير

قطع عليها و فالبلاصة دخل للواتساب للكونفيغساسيون ديال موو .. سجل أوديوو صوتي سيفطولها و لاح تيلي حداه

حكيم: بنتك دابا تكون حداك فالدار .. راها كتقلب ندوز عليها نخليها كتخرخر قدامك .. تجمع ك ( سكت ) راسها ولا غنجمعها تا تشوف النجوم .. الضسارة د والو

تقطع اللايف و لبروفيل ديالها ما بقاش كيطلع .. عيى كيطابي باش داخلة * Marry Lanam * وا لا هي طلعاتلوو .. ما عرفها بلوكاتوا و لا بالخلعة سيبخيمات الكونط كامل .. رجح الاحتمال الثاني لأنوو ما داخلش بسميتوو الحقيقية و ما عندها باش تعرفوو ..!

حسام: رخف أ صاحبي شوية .. غتقتلوو الدرية غير بالخلعة

****************

فصالون بلدي مفرش على حقوو و طريقوا .. آش من تاويل و آش من تسماق و نقى .. الروايح كتفتح النفس ..!

جالسة حبيبة بقفطان دثليجة فالأبيض مخلط مع الرمادي بارد .. مقطعة شعرها كاري و صابغاه فالكرونة .... باينة فيها مراة د الوقت ماشي شي وحدة لي معقدة بلعكس لبيبة و مسرارة ترتاحي لها غير من الشوفة ..!

حبيبة:( مفقوصة كتشوف فختها لي جالسة معاها ) شفتي نهاري كي كيدوز معاهم .. كنبقى حاضية غير التيليفونات و جري عليا نجري عليك .. شي نهار يسكتولي القلب بكوارثهم ..!

خالصة:( تنهدات ) الله ينجيك و يخليك ليهم .. دابا يتهدوو و يطيحوو لكتاف .. هاذ الجيل غير الله يهديهم

حبيبة:( حركات راسها بلا ) ولادي بوووحدهم يا ختي بوحدهم ما يتهناو حتى يدفنوني و يبكيوا عليا ( حطات يديها على راسها ) تسناي تجي العافية الصغيرة تحمدش عليا هنا تا تشبع

خالصة:( هزات حاجبها ) نهار لول قتلك ما دخليهاش عليك و نتي ما كتسمعيش .. دابا لي عطى الله عطاه هضري معاه يخليها عليه .. مالها آش كدير كاع ؟ كدوز عمرها حتى هي ..!

حبيبة:( ساطت ما عاجبها حال ) ما تبقايش تجبديلي هاذ السيرة أ خالصة .. ملاك منها من ولادي .. راه ختهم من باهم .. ها هي آخرتها موت .. دا معاه شي حاجة ؟ و هاذ البنت فين غنلوحوها أمها توفات و تبعها باها .. ايوا ؟

خالصة: وا صافي ما تديش عليا راه تا انا عندي عزيزة

حبيبة: ملاك عويناتي باش كنشوف .. راه كنخاف عليها من خوتها .. ما غيمشيوا حتى يزحفوها و تجلس ليا فالركنة ..ما هو واحد وا لا جوج .. ربعة كياكلوو من العينين

خالصة: و عقلتي علينا حنا فالصغر فاش كنوضوا نتشادو .. بالعداو باش كيفكونا

حبيبة:( عضات فمها كتضور فراسها ) لبنات حنانات واخا هكاك .. أجي تشوفي لي عندي نهار كينوضوا السقف شوية ما يتهدم فوق ريوسنا .. كيبغييوا ياكلوو بعضياتهم ..ما كيبردوو حتى كيبداو الدمايات يتشرشرو و خييتك تعيط بالعداو ..!

باقيين كيهضرو حتى تفتح لباب و تسمع صوت أنثوي رقيق كيطرش الوذنين .. داخلة كتغوت غطرطق غير بوحدها

ملاك: وااا قووولي لداك ولدك يبعد مني واش غيبقى غير حاضيني .. يمشي يحضي مراتوا و يبعد مني اعععععع وا ماما حراااام عليه شبغى عندي

حبيبة:( خرجات عينيها فيها ) صوتك كيتهز عليا ؟

ملاك:( طلقات صاكها تا طاح للأرض و مشات تخشات فيها كتبوس ) واش أنا نقدر .. هاذ الزين كااامل و نتهز عليه أنا .. نتي لحبيبة ديالي غير هضري معاه يقيلني عليه ( تجننات ) واااا عييييق وااه

حبيبة:( ضحكات كدور فراسها ) أحياني عليك ا البحلاسة .. شنوو درتي حتى صاعر عليك ؟

ملاك:( معنقاها حاطة راسها على كتفها ) و الله ما درت شي حاجة أ ماماتي .. بل المص٠عوور لاخور ( ضرباتها لراسها و هي تدلي شنايفها ) قولوا يبعد مني .. يقلب وجهوو من جهتي شوية و يشوف للقنت لي ضارو .. مالي انا من دوون الناس واعووووو غننتف شعري معاه .. معقد و باغي يعقدني

خالصة:( ضحكات ) وا لالة ماري تكايسي شوية على ختي راه نجرها معايا و نزيدو ما تعرفونا فين صدينا

ملاك:( تبسمات و مشات باستها من حناكها ) يا ختي على الزين السوسي و شحال كنحماق عليه .. شفتي يلا درتيها نعرفك كاينة .. بلحاق ديوني معاكم ما تخليونيش مع داك الوح٠وش ( عرات على ذراعها كتعصر باش تبين عضلاتها ) يحيى الحلف النسائي

حبيبة: وا سيري بدلي عليك و تكمشي تتسنطي لعظامك قبل ما يجيلك ( شافت فالساعة ) بقاتلوو شي ساعتين و ها هو معاك .. يعلم الله شمن شووهة درتي تا ساق ليك الخبار .. ديريها غير مستورة يا بنت الهم و نتي يلا ما كانت بالغياطة و عيساوة ما ترتاحي

ملاك: ههههه مهاوشة هاذشي لي عطى الله ( وقفات ) نمشي نعمر كرشي قبل ما يوحلوهالي داك خلق ليفترس لي والدة أ لالة حبيبة

مشات كطير مخلياهم كيضحكوو عليها .. مقرقبين الناب بيناتهم ما كاين غير هري دري .. حتى تجبدات الهضرة على مرات حكيم

خالصة: و آش خبار لالة العروسة ؟؟ شفت حسها مقطووع ؟ ما بقاتش تجي لعندكم ؟

حبيبة: أ حياني خلي داك الجمل راكد .. ولدي ما عندو زهر مع العيالات مسكين ( تنهدات ) زهرو فالله

خالصة: ياك لباس ؟؟

ملاك:( غوتات من الكوزينة ) وا الله يعطيها مو٠صيبة .. بنت الك٠لاب

خالصة: شوفلك البنت لي عاد كانت كتدعي فيه ما حاملاهش هههه

حبيبة:( ضحكات ) راها كتحماق عليه و عندها مقطر من عينيها بلاتي غير يبانلها و تمشي تبحلس عليه .. ما كاين غير نجيبلك أ خويا نديرلك أ حبيبي و تبوس و تعنق .. تهزي بنت و تحطي وحدة اخرى .. ما تعرفيهاش .. و حتى هو ما منقص عليها حتى حاجة الحمد لله .. غير الله يهديهم و كان .. عارفاه معصب غير بوحدو و غارق مشاكيل و هي كطير مع القرودة ما عرفت فين باغى توصل

خالصة:( بفضول ) واش مشاكيل مع المراة ؟

حبيبة: راهم واقفين على الطلاق .. شمن زواج بقى حتى نتي ؟؟ بغيناه يدير دارو و يهنى بالنا عليه ، ساعة صدقنا جايبين ليه بنت الحرام قاطعة يديها من يد الرحمة .. هلكاتوو و هلكاتنا .. الله ياخذ فيها الحق

خالصة:( صغرات عينيها ) كتسحرليه ؟؟

حبيبة:( حركات راسها بالإيجاب ) عييت نطبل و نغيط وا لا هو سمع كيقولك ديكشي غير خزعبيلات .. لي مهم عندو هو شادة معاه الطريق ..

ملاك:( خرجات من الكوزينة هازة تفاحة كتاكل فيها و تهضر ) وا غير يلا ما بغاتش تشد الطريق .. شكون هاذي لي تفنفن مع داك الغول لي ولدتي .. تقول نهار كيدخلوو لداك البوليس كيضربوو لهم الشوكة ديال الصعر و التاحرميات

خالصة: هنينا نتي خليني نفهم ( شافت فختها ) و يلا هو ما تايقش نوضي نتي جري على ولدك .. اويلي على غذايذي

حبيبة: راه لقى الحجابات بيديه و شمع مكتوب فيه و شي ما خانز يعلم الله شنو دايرين فيه ( ضربات على صدرها ) و ولدي غير كيلغج من عندها حتى عطاتها ليه على قبة الراس .. حكيم ما بقى كيف كنعرفو لا فخاطرو لا فصحتوو .. بغات تحمقوو و تردوو تابعها بحال الحم٠ار ..!

ملاك: الله ياخذ الحق فكل وحدة كتمشي فهاذ الطريق و تبغي تخرج على بنات و ولاد الناس

حبيبة: اميين .. ايوا نهار لقاهم عطاها قتلة عمرها تنساها و سيفطها لدارهم مهرسة .. حلف ما ترجع ليه مراة واخا عيات تبكي و ترغب .. قاتلك الشيطان غرها .. غير يردها و عمر داود ما يعاود .. و هاذ الأيام عيطات أمها قاتلك راه البنت حبلة و ديرو معانا الحل ( تنهدات ) ما نهز تقليد حد .. يجي و نشوفوا شنو غيدير معاها .. واخا ما بانليش فهاذشي

خالصة: ايوا الله يديرلوو تاويل ديال الخير .. واخا هاذشي كامل درتيه بيديك .. نهار بغيتي تزوجيه خليتي بنتي كي الوردة قدامك و مشيتي جبتيليه داك البلدية ما حملتها ما قبلتها ما جايا معاه تا قد هاكا ( دارت إشارة بصبعها كتعني شوية )

ملاك:( شداتها الضحكة ) أويلي على بنتك ا خالتي ههههه و مالها ساخية عليك تال هاذ الدرجة

خالصة: و مالها ؟

حبيبة: راه قالتلك الصح هو أصلا ما كانش باغي الزواج من أصلوو و بستين كشيفة باش قبل لينا .. و شرط علينا تكون مراة ديال الدار .. بيوتية و شاربة عقلها .. يتناقش معاها تفهموو .. ما فيه ما يحرق راسوو مع شي وحدة و يبدا يربي من تا و جديد .. باركة غير هاذ الجذرة لاسقة ليه فقزيبتوو

ملاك:( خرجات لسانها كضحك و تحك فيديها مع بعضياتهم ) خوويا حبيبي وا يالاه

حبيبة:( ضحكات ) ههههه ما بقاش و٠حش و مصع٠ور و ما عرفت شنوو

ملاك:( تفكرات و هي تكحل بالعمى ) وا غير يبعد مني و ينطح راسوو تا مع الحيط .. يا هو حرايمي ما خلى لا حاحة لا ملاحة .. و جا تال عندي بغى يحرمني .. نتفك من واحد يخرج ليا لاخور .. ما لقيتهمش هما يخرجولي صاحبهم تفوو على حالة

حبيبة:( خرجات عينيها شادة الضحكة ) كنتي معاه أبنت الهم .. الله يمسخك

ملاك: و مالها ضحى ( مراتوا ) داتوو بثوول ؟؟ ( سمعات الباب كيتفتح و هي تشير لخالصة ) هذا ما يكون غير عدنان ميمتي وا قووودتها تهلاي السوسية

مشات كطير شدات عليها بيتها خلاتهم غير كيشوفوا و يرمشوو حتى سمعوو حلقوو كيغوت

عدنان: ماااااااري

حبيبة:( شدات راسها ) ها حنا بدينا .. ياا ربي تعفوو عليااا ( خرجات عندوو ) يا مالنا على هاذ الغوات ؟ خلعتي خالتك كاع

عدنان:( شاف فخالصة و حرك راسوو و هو حانيه ) السلام عليكم ( رجع شاف فموو ) صافي والو من بعد

داز من حداهم حاني راسوو حتى دخل لبيتوو .. رجع تقطع الحس و جلسوو فبلايصهم كيتنهدوو

حبيبة: الله يثبثنا على الشهادة .. نسيت حتى شنوو بغيت نقولك .. اااه .. قتلك أ خالصة بنتك على الراس و العين و دابا يجيها رزقها .. يكون حسن من حكيم .. لي يعرف بقيمتها و يتهلى فيها ..!

خالصة:( شافت فحبيبة ) شغنقولك الله يجيبنا فصواب و يفاجيها عليه .. ما يستاهلش تا هو مسكين

حبيبة:( من قلبها ) أمييييين يا ربي دعي معاه يا ختي .. ما كنعس ما كنشوفوا .. كنبات غير نخمم ليه كثير شي منين قاتلك البنت هازة فكرشها .. مصيبة و تسلطات علينا .. اللهم زوفري وا لا هاذ العيشة

حبيبة:( تبسمات مبدلة الموضوع ) خلينا من الهم و الغم .. قولي ليا كي دايرة البلاد .. و شحااال توحشت داك القنت يا ختي ..!

خالصة: كولشي بخير .. حتى هما كيسولوا عليك ديما و لاهيلا

حبيبة: يسول عليهم الخير و الرباح .. تانا توحشتهم و الله .. قلبي كيتفاجى تما .. يشدو الدراري كونجي و نطلعوو شي سيمانة للعروبية .. خسارة بعنا الدار و المحل لي فاكادير اما نصيفوو بخاطرنا تما

خالصة: من الخير .. الوقت صعيب يالاه تتعاونوا حتى نتوما .. شحال قد حكيم يبقى هاز الحمل بوحدو

حبيبة: شفتي .. واخا هكاك ما بغاش يبيع الدار .. أنقولك هاذي ( سكتات كتعد بصباعها ) شي ربع سنين هكاك عاد بعناها .. كان كل عام كيطلع لتما لقليلة ثلاثة دالمرات .. كونجيه كيمشي غير فأكادير .. دابا شفتوو قطع الرجل من نهار تباعت الدار ..!

خالصة: الوقت يا الحبيبة كديرها .. لواحد كيغرق فالدنيا و مشاكلها ( هزات شالها كتلويه على راسها ) وا هذا هو .. نجيك فساعة الخير

حبيبة: ويلي جلسي بلاتي غير يجييوا الدراري يشوفوك ( حطات يديها على فمها كترغبها ) غير نحطوو الطبلة بعدا

خالصة:( خطفاتلها يديها بغات تبوسها ) عزيزة و غالية غير خليني يالاه نشووف تانا مول الدار و البنات راك عارفة .. سلمي على العزارة

حبيبة: على خاطرك .. و زورينا ماشي دخلتك هاذي

ناضت معاها حتى ودعاتها و سدات بابها عليها ..!

*****************

حاطة رجل على رجل فجلسة مستقيمة مشابكة يديها فوق ركبتها كتسرح عينيها بنظرات هادئة و ابتسامة جميلة .. كتشوف فالبنات لي خدامين تما كتسناهم يجيبولها نظاظرها .. حتى دخل راجل يكون فالخمسينات أو الستينات .. لكن كيتعاند مع الشباب ..

راد جوج زغبات لي بقاولوو للور و مفيكسيهم بجيل .. الساعة فاليد و السروال دالدجين مزيرو بسمطة فالكحل و خاشي فيه القاميجة حتى بانت كرشوو مشنوقة .. ضحكها منظرو باغي يصغر راسوو و ربي كبير .. حطات يديها على فمها و قلبات وجهها كتافها كيتهزو بالضحك و لكن بالها بقى معاه .. متبعاه غير بنص عين كتشوف آش كيدير .. حتى قالت بلا ما تحس

شريفة: جو بخيفيغ " كنفضل " هاذوك .. جربهم ايجييوا معاك

...:( ضار شاف فيها و قال بابتسامة ) باغدون مادموزيل ..!

شريفة:( ما كانتش من العاكزين وقفات بهدوء كتمشى عندو و عينيها فعينيه .. دليل على ثقتها العالية فنفسها ..! ) جو سوي ديزولي .. حيث تدخلت و لكن بنتي ليا حاير فشنوو تختار نيسبا " ياك " ؟؟

...: وي إيفيكتيفمون " بالضبط " كلشي زوين هنا .. حتى كنقول اختاريت و كتبانلي فحاجة أخرى

شريفة:( مدات يديها هزات واحد الشكل ) جرب هذا ( كتشوف معاه ) فحالة كان ذوقك كلاسيكي غترتاح فيهم بزاف ( هز راسوا فيها و قالت ) كي جاوك ؟

....: جي طخوو إيمي " عجبوني بزاف "

شريفة:( تبسمات ) هاذ لاماغك معروفة و ليبياس ديالها دغيا كيتباعو .. كاع الشباب لي مذواقين بحالك كيطيرو بيهم سيغ بلاص

....:( تبسم و قال ) الله يكبر بيك ( مد يديه ) si vous me permettez , j’en profite le max de vous faire connaissance.. c ahmed berrada " يلا سمحتي ليا غنستاغل الفرصة ما أمكن باش نتعرف عليك .. سي أحمد "

شريفة: avec plaisir mr ahmed .. c charifa El mire " بكل فرح موسيو أحمد .. سي شريفة المير "

أحمد:( سرح عينيه فالمحل ) أول مرة نجي لهاذ لوبتيك .. و كان أحسن ما درت باش نتعرف على إنسانة جميلة بحالك .. قلبا و قالبا

شريفة:( رمشات عينيها و قلبات وجهها لجنب بنص تبسيمة خجولة ..! ) انا ديما هاكا أ موسيو أحمد .. عزيز عليا نعاون بلي قدرت و فينما مشيت نحاول نرسم الضحكة على وجوه الناس .. راه الابتسامة فوجه أخيك المسلم صدقة

أحمد: تبارك الله عليك ( حرك راسوا بضحيكة ) و غير أحمد عافاك .. نحيدو الرسميات

قاطعاتهم البنت لي جابت النظاظر لشريفة خداتهم من عندها و شكراتها .. بعدها هزات يديها و شيرات لأسية باش تجي عندها يمشيوو

شريفة: فرصة سعيدة أحمد .. خاصني نمشي ( شافت فالنظاظر لي اختارت ليه ) نتمنى يجيوك بالشهوة

أحمد:( شد فيديها مانعها بلطف ) ما نقدرش نخليك تمشي بلا ما نتعرفوا كثر .. القليلة غير نوصلك ( حط يديه على صدرو ) ما تنويهاش خايبة فيا .. راك فعمر ولادي .. غير فهاذ الوقت ولينا قليل فين كنلقاو بحال لالة شريفة .. souriante et sympa " ضحوكية و ضريفة "

شريفة:( رجعات شعرها مور وذنيها ) ديما كيقولولي كنجي بالخير و البركة و قدامي مباركين .. شريفة حرة ( ضحكات ) و فالعائلة فينما يشوفوني فالصباح يغنيوو عليا ههه ( بصوت دلوع ) صباح الخير و الرباح و رزق ربي يجيك مفتاح و لي ما صبح عليك ما يجيه خير .. ما عرفت كيصبغوني و لا بصح ( هزات حاجبها برقة )

أحمد: لا لا باين النهار كي غيطلع من صباحو ..راني مرضي منين ربي لاقاني بيك ( ضحك ) قشابتك واسعة .. هاكا لازم يكونوا الشباب

شريفة: ههههه ارتاحيت لك و الله باينة من وجهك من احسن خلق الله .. فكرتيني فواحد السيدة الله يذكرها بخير فينما نتلاقاها تقولي .. يا شريفة يا المير يا بوقشابة حرير لي ما يبغيك يا المير يعمى و يسوق الحمير و تبقى دارو خالية

أحمد: ناري ( ضحك حتى شبع و قال ) نخلص و نوصلك نتي و الأخت

شريفة:( هزات الكونطاكط لعبات بيه قبالت عينيه ) عندي لفواتيغ .. مرة أخرى ان شاء الله

أحمد: هي نديرو شي كافي أونسومبل ؟

شريفة:( جمعات شفايفها بأسف ) ما نقدرش هاذ الساعة عندنا مناسبة عائلية .. و تعطلت عليهم

أحمد: اه داكوغ ( جبد تيليفونوو ) على الاقل عطيني طون نيميغوو و سمحيلي ديرونجيتك ..!

شريفة: لا بالعكس ( تبسمات ) واخا عطيني نقيدها لك

كتباتها ليه و ودعاتوو كضحك .. جارة اسية معاها ..

أسية: ما كتوبيش نتي والوو ؟؟ أويلي على غذايذي بقى لك غير هاذ الشارف حتى هو فالحساب

شريفة:( فتحات لباب و طلعات .. شافت جهة المحل لقاتوا باقي حاضيهم .. خرجات يديها شيرات و كسيرات كضحك ) ضرب الق** حتى تبول لي فيها ما يزول .. و أنا احبيبة عيني خضرة ما كيقنعوها غير الزرقالافات .. نشوفوا شكون غيميزي كثر ( غمزاتها ) نخلقوها شوية

أسية: و ما بانلك غير هاذ المك٠بوت منين بديتي تهضري و هو حاضيلك فمك

شريفة:( طلقاتها بضحكة دالشيخات ) هااااهاااي خليه كيتأكد من رزقوو .. كيقولك اكبيدة يلا بغيتي تعرف الحنتوش دالبنت قداش .. شوفلها فمها .. شحال ما كان مطبز غيكون المغبون مبطبط ( رشقاتها لكتفها كضحك )

أسية: أويلي حي هههههه صافي قلبتيها لفلا٠شق

شريفة: ضروري اكبيدة .. هاذي سميتها الثقافة الجن٠سية تكسابيها نتي ؟؟

أسية: اييه و فيدينا معاك شنوو تعلمتي من هاذ ( كتعوجها ) الثقافة الجن٠سية

شريفة:( ضربات بشعرها لور ) عرفت حشوني شمن نووع .. واش العضاض قاهرهم و لا سيدهم المغوبش و لا القتال لمبطبط و لا مول الخوامي زين السمية ههههه

أسية: هههههههههه العار .. اييه و شمن نوع عندك ؟

شريفة:( قلبات عينيها كترفرف بدوك الشفار ) المعسل أ كبيدة خاصني غير لي يزندوو بجميرات و يسوطلي عليه ( عضات على شفايفها بإثارة )

☄ فالفيلا ☄

من بعد ما برد الجو .. جا الطريطور كيوجد الطبالي و يقادو الدنيا على ما توصل عائلة العروسة .. كولشي واقف على الشغل باش وجههم يتحمر مع النساب .. و يعوضوا شوية على نهار العرس لي ما كملش كي بغاو .. و فواحد من البيوت جالسة حجيبة كتنهد مفقوصة من المدابزة د ولادها .. حتى تدق لباب و دخل إلياس .. باسلها راسها و قال

إلياس: الواليدة عيطتي عليا ؟

حجيبة: اييه أ ولدي جلس ندردشوو أنا وياك شوية ( تسناتوا جلس و شدات فيديه كطبطب عليها ) بغيتك فواحد الموضوع .. شفت شي حاجة و ما عجباتنيش و لازم عليا نهضر ..!

إلياس: على ختي ؟ وردة ؟

حجيبة: لا .. هاذيك ماشي وقتها دابا ( نحنحات ) احم كي صبحات نجاة ؟ شوية ؟

إلياس: كانت عيانة شوية .. كضرها كرشها ..يمكن من الماكلة دالبارح .. أنا نكمل معاك و نمشي عندها نشوفها يلا ما فاتها الحال نخرج نجيب الدوا

حجيبة:( بملامح أسف ) مسكينة عوينة و طرطقات فيها .. الله يحد الباس

إلياس: أميين الواليدة

حجيبة: سمعني ا ولدي و دير كلامي حلقة فوذنيك .. و ميمتك ما تبغي لك غير الخير

إلياس:( باسلها يديها ) الله اودي الواليدة كلامك فوق ريوسنا كاملين

حجيبة: الله يرضي عليك ( سكتات لوقت بسيط مفزكة شفايفها كتهضر برزانة ) و باش ربي يرضى عليك و يكون منك ا ولدي .. خاصك تعدل بين عيالاتك .. من لبارح ما بقاتش عندك غير شريفة ولاو جوج عوينات .. ما تعطي الدرك على وحدة و تريح الثانية .. مع الوقت اللولة تعمى و الثانية تولف العكز و الراحة و نهار توقف عليها ما تنفعك بوالو

إلياس:( حرك راسوو فصمت كيسمع بتركيز )

حجيبة: ما تخليش قلبك يغلب عليك و تظلم وحدة على حساب الثانية .. شد العصا من الوسط .. ما تزيرش بزاااف و ما ترخفش ثاني فوق القياس ..!

إلياس: هاذشي معمول بيه الواليدة بلا ما تحتاجي توصي

حجيبة: نحيد عليا التقليد و ذنوب بنات الناس ما نهزهم على رقبتي ( تبسمات ) شريفة يا شريفة الوحدانية لي ما عاقل عليه حد من حبابها .. كتبقى فيا ديك البنية بزاف واخا تانا ظلمتها فلول و هزيت فقلبي منها وا لايني ربي عالم بمحبتها عندي .. حنينة و بكوشة غير لسانها لي ماضي .. صبر و عدي معاها ..!

إلياس:( ساهي كيتفكر و يتبسم ) بلعكس .. قبلتيها و علمتيها و فهمتيها على يديك .. عقلتيها و عطيتيها من حنانتك ( تنهد ) ها حنا معديين معاها

حجيبة: و راها بنتي و وحدة منكم و الله يجعل عملنا لله و يغفرلنا .. ليتيم ذنوبو صعاب و ما نقد عليهم لا أنا لا نتا .. و هي راه كثر من اليتيمة ( تنهدات بقوة ) ما عارفة شحال باقيلي فهاذ الدنيا .. وا يااااك اولدي تتدهى مع نجاة و تنسى شريفة .. راه ما عندها حد من غيرنا .. دير وليداتك و فرح بيهم و لكن ما تميز وحدة على الثانية .. ما تلوحها و تغبر عليها بالشهورة ..!

إلياس:( عقد حجبانوو شوية ) ديالي هاذي الحاجة ؟

حجيبة: ما ديالك اولدي .. ولكن الشيطان حاضر و كيجر مولاه لخلاه .. و ما يرتاح تا يخليه يدير عكس كلاموو و ينسى وعدو .. و الوعد دين علينا تال غذا قدام الله .. ديرها فبالك المرضي

إلياس:( حرك راسوو بصمت مهبط راسوو شوية )

حجيبة: أما الثانية .. نجاة .. هي النويويرة د هاذ الدار .. لي غتنورها عليك و تفرحك بلي من زمان و نتا متمنيه .. ما ديرهااش طريق و غير توصل لمرادك تبعدها عليك ! منها من شريفة بجوجهم منك و فيك ما تفرط فيهم .. ما تخليها تحس ب لولة هي الساس و الأصل و هي الشياطة .. قربها منك حن عليها و تحن عليك و ربي يتاوي قلوبكم للخير .. عطيها حقها حتى هي و ما تخليها تشوى بنار الغيرة و تعذبها من بعد ما جبتيها من وسط خوتها و حبابها .. راه ا ولدي ا إلياس النار لي تحرقها ليوم فالدنيا تحرقك نتا غذا فلاخرة

إلياس:( سكتات و سكت مدة تا هزلها يديها و باسهالها ) كلامك منوو يتفرق لحكايم ا ميمتي و الله يقدرني و ندير بيه

حجيبة:( غمضات عينيها و حلاتهم بإطمئنان ) كلشي غيكون بخير .. غير بالسياسة و ربي راه معاك ينقي طريقك من الشوك و يحن عليك نتا و وليدات المسلمين

إلياس: أميين يا ربي .. نمشي نشوفها كي ولات

حجيبة: و لازم عليكم ديرو الواجب أولدي .. امها غتجي تسولها .. ضروري ما تريح قلبها على بنتها

حرك راسوو في صمت و خرج من عندها و وجهتوو لعند نجاة ..!

جالسة حبيبة كتنقي فالزنجلان و مرة مرة تهز راسها فالتلفازة بملل .. ما كتحملش حس السياسة عكس ولدها لي جالس قدامها مكفح بشورط حد الركبة فالكحل و تيشوورط فالخزي لاسق عليه و كلاكيط دالنايك فرجليه .. باينة فيه مونيطور أو ملاكم غير من فورمتوو لي مخدومة و طالعة على الصح .. بصوتوا المدعدع و بهدوء مطلق قال ..!

حكيم: محمد أمين و خليل باقيين كيحوصوو " كيضورو " تال هاذ الوقت ؟

شافت فيه كان حاني على تيليفونوو خدام .. فنفس الوقت كيلعب بالكلاكيط فرجليه كيتسناها ترد عليه ..!

حبيبة: محمد أمين يالاه هضرت معاه قبيلة .. يسالي خدمتوو فلافاك و يدوز على خليل للسونطر يجييوا بجوج .. راك عارف هاذ الوقت الدنيا كتكون مبلوكية بالحديد

حرك راسوو فصمت تا تم داخل عليهم عدنان كيحك فشعروو .. شاف حكيم و مشى جهتوو مد يديه تضاربوو بيهم و جرو هبطو عندو سلم عليه و بيدو الثانية ضرب على ظهرو

حكيم: هانيا ؟

عدنان:( جلس قداموو ) غير تعطيني ختك التيساع و غنكون هاني .. هضر مع ماري أ خويا عيقات عليا

يالاه جا يعاودلوو مالهم و هو يتفتح باب بيتها .. خارجة عندهم مبوقة بالنعاس عينيها حوومر و منفوخين كتحك فكرشها و تهضر

ملاك: حلمت واحد الحلمة أ حبيبة قلبي آش غنقولك الدم يبسلي فالعرووق .. ما مرتاحين لا ناعسين لا فايقين .. يا ربي السلامة .. مالك عاطياني النخالة عداك داك ولدك بقلة الهضرة

هزات راسها شافتهم و هي تخرج عينيها و نقزات فوق السداري .. كتشوف فعدنان لي باغي يغززها بسنانوو و فحكيم لي غير ساكت مربع يديه .. هاز عينيه فيها بنظرات كتخلع

ملاك:( كتنقز من سداري لسداري هاربة و حبيبة كتغوت موراها غتفسدلها طلامط ) البزيييزييلة ما تضرب أ حكييم وا والله تا قلتها لماما و قاتلي سيري مشيت غير للقهوة لي هنا و الصباح هذا كانت خاوية غير حنا لبنات و دوك دراري أنا أصلا كاع مكنعرفهم .. منين خرجولي ما عرفت هنهنهن هاذي غير مؤامرة ماسونية بغاو يخاصموني معاك أحبيبي و لكن والله ما تكون ليهم أنا ديما كنقولهم غير حكيم لي كاين و ما كاين ما حسن ( مغزفة ) ولااااد الحرام

عدنان: أهاااه .. دابا حكيم لي كاين ؟ اييه و الإيربوتز ديالي فينهم ؟ حزقيهم نشووف ..!

ملاك: وايلي عليك أ عدنان و لكن معذورهم كيقولوو الخاوة حدها حد الدنيا .. دغيا بعتي محبتنا على قشواشة د جد ريال صاوبوها ليهود باش تنوض الفتنة بين المسلمين ؟ أما فاش نكونوو كنتشواو غتهز جميراتك و تجي تزندلي ديالي .. عقل فيها عقل مزيان ( غطات وجهها كتغبن و تشوف فيهم بنص عين ) أنا أصلا عارفة ما عندي زهر

حكيم:( سرح حلقوو و بهدوء قال ) التيليفون أ ملاك ( شير بصبعوو جهة بيتها ) جيبيه و أجي

شافت فيه كتغزز شنايفها مع جات تهبط تفتح باب الدار و دخلوو جوج خوتها .. محمد أمين و خليل .. غير شافتهم و هي تكحل بالعمى

ملاك:( بتبسيمة صفرة ) نمشي نصلي الله يقبل .. علاه ما فخباركمش ؟ انا وليت كنبغي البنات .. أعوذ بالله عليها كلمة .. و لكن ما تخافوش سولت واحد الفقيه فالجامع قالي صلي قيام الليل و ربي يغفرلك .. نبدا من دابا حسن ليا و ليكم

حكيم:( بكلمات متقطعة كيقول كلمة و يسكت شوية و يرجع يكمل ) ملاك .. التيليفون .. دابا

محمد أمين:( مشى عندها خربقلها فشعرها ) مال هاذ سليعفانة عاود

حبيبة: غتهبطي من تما و لا غنوض ناكلك أنا نيت ( جنناتها ) رفستي الفراش كامل

ملاك:( هبطات و جلسات مربعة رجليها كتهرنن عليهم و تشوف فحكيم بنص عين ) السلخة فيها فيها ياك ؟ وا ضرب بوحدك نتا فيك الخير و البركة .. باغيين تفصلوني بربعة ؟ حولي دالعيد أنا ؟ ياك أ حكيم ياك خليتيهم حتى تجمعوو بلعاني ..

حبيبة:( تحت سنانها ) جيبيليه التيليفون و هنينا .. مالكي كتبيعي فالحشيش ؟

ملاك:( شافت فيها بنص عين مغبنة ) راه ما شافوناش منين كنا كنبيعوو شافونا منين كنا كنقسموو هنهنهن كتخلعووني و أنا باقى صغييرة .. باغيين تركبوو فيا بوصفير

حكيم: ما سمعتينيش واقيلة ؟ ( وقف ماشي لعندها ) نعاودهالك من جديد ؟

ملاك: لا لا و الله حتى نجيبولك صافي

مشات كطيير هزاتوو و خرجات لقاتوو فالكوزينة كيقلب على بريكي هزو و داز من حداها رمالها الهضرة

حكيم: تبعيني للسطح

ملاك: واخا ( شافت فيهم ) مشى يشوطني اولاد الحرام والله و ما طلعتوو تفكوو لا بقيت عقلت عليكم حتى أنا

طلعات تابعاه للسطح سخفانة .. كتبيض بيضة هنا و بيضة لهيه .. مع دفعات لباب تدخل .. خرج فيها كلب من نوع الهاسكي .. جميل الشكل ذو فرو كثيييف مزيج ما بين اللونين الأبيض و الرمادي و عينيه الزورق حكاية ثانية من إبداع الخالق ..!

غوتات لربي لي خلقها و هو واقف مخرج لسانوو كينبح و يضور عليها فرحان و باغي يلعب معاها و هي كترعد بالخوف .. كبير و مكلظم كي مولاه ..! غير كيتعلى قلبها كيتهز و يتحط بالخلعة كتقول غينقز عليها يجيبها حبل و بونت

ملاك:( بغات تبكي ) حكيييييييييييم حكييييييم أجي ديييه اعععععع

تسمع صوتوا من لداخل كيعيط عليه بسميتوو * جيم * غير سمعوو خلاها و مشى كيجري تا كيتهزو رجليه فالسما و يتزدحوو مع الارض بقوة

حكيم:( طل عليها كيلعب ليه فراسوو ) زيدي دخلي .. بلع معاك داك الباب

ملاك:( مخلوعة قلبها كيضرب بالجهد ) ربطوو عافاك و لا خليني نمشي بحالي ..!

كتشوف فيه عينيها خارجين و فنفسها كتقول باز ليه و لقلبوو .. كيفاش شاد ليه راسوو كيفتح ليه ففموو تقول كيقلب فحولي ماشي كلب نيابوو كيبريوو كيقلبوو غير شكون يطحنوو اما لسانوو لي خارج للجنب هذاك بوحدوو طيحلها النقطة .. كتحس برجليها كيلعبوو كي العجين تحتها .. كن ما كانتش كتعرف حكيم غتقول طلعها غير باش يطلقوو عليها ..!

حكيم:أجي ( حرك راسوو ) كتخافي و أنا معاك ؟؟

ملاك:( شدات فيديه مزيرة عليه تا جرها لعندو ) لا و لكن ربطوو الله يستر عليك

حكيم:( بنبرة حازمة نطق ) جيم .. رِيَّحْ

حرك يديه جهة الأرض تا جلس و تنهدات ملاك براحة .. لي ما دامتش بزاف فاش خدا التيليفون كيقلب فيه و هي كتبلق فعينيها شادها ما عندها فين تزعزع ..!

حرك راسوو بواااخا بهدوء تام خاشيه فجيبوو و جرها معاه تال لصور ديال السطح .. كلشي داز فرمشة عين تا لقات راسها مدلية من السطح .. نصها الفوقاني كيلعب فالهواء الطلق و النص الثاني كتفركل بيه مخلووعة .. وجهها مسقووط منوو الدم ..!

حكيم: واخا ( عوج راسوو فيها ) غتزيري معايا السمطة هي هاذيك غتبداي تتق*** عليا .. غنلووح مك من هنا .. مفهومة هاذي ياك ؟؟

ملاك:( شادة فيديه و الدمووع نقزولها من عينيها كتحس براسها غترض كاع لي فجوفها و ذاتها كتزهق للهاوية شوية بشوية ..! ) اننن غنطييح ا حكيم طلعني طلعني و الله ما نعاود صافي ا ماااماااا

حكيم:( شدها مزيان بيد و اليد الثانية دوزها على راسوو تا حطها حداها فوق الدربوز .. مغزز سنانوو ) داك بنات الق** شحال من مرة كَلتلك قلبي عليهم ؟ ما باغاش تجمعي كرك ؟؟ كتقلبي عليهم يتوزوك أبنت الق*** عاد تهناي ؟

ملاك:( كتبكي بالجهد قلبها غيسكت ) حكيم ما ضحكش معايا هاذ الضحك .. غنطييح و الله تا غنطييح أ مااامااا

حكيم: فاتحة ليا دار الق** فينما كان شي ز** ضاربينهالوو جامعاه عندك .. علاياش كتقلبي ؟؟ يوسعوهالك حتى نتي ؟؟ باش نجي نفرعك ؟؟ ( خسر وجهوو ساخط على الوضعية ) ما غنفرعكش غنشمعهالك .. مفهومة حتى هاذي ياك ؟؟

حس بشي حاجة سخونة قاستوو فرجليه حنا راسوو كيشووف لقاها طلقاتها فسروالها .. قلب وجهوو لجنب كيسووط و بجوج يدين هزها و حطها حتى وقفها على رجليها و غير طلق منها طاحت للأرض عينيها خارجين كترعد بالخلعة

ملاك: بغيتي تقتلني

خشات راسها بين يديها كتشهق حتى حساتوو ضورلها راسها بزعفة عندوو

حكيم: بلا ما نكثر معاك اللغى ( ضربها بصبعو لجبهتها ) تديري عقلك فراسك .. تجيبيها للبر معايا .. تدود عليك طر٠متك نلوح مك من هنا .. بلا تمرضين د الز*

حركات راسها بالايجاب مخلوعة كتحس بذاتها كلها كترعد عليها .. شداتها السخفة و الشمش فوقهم مطنطنة .. حنات راسها كتدرق فوجهها و هي تنتابه لواحد الطرف مغلف ببلاستيكة شفافة على قدو .. شكلاطي اللون ..!

على الغالب طاح ليه من جيبوو فاش هبط لعندها .. مدات يديها هزاتوو و لي فيها ما هناها واخا عاد كان غيلوحها من السطح ..!

ملاك: من فوقاش وليتي كتاكل الشكلاط ؟؟ ( خطفولها و هي تغوبش ) عطيني نذوق

حكيم: بيريمي غيضرك ( ضحك باستهزاء ) هبطي بحالك .. شي سخرة ديالك عند يمَّا خوديها ( وقف كينفض فيديه )

ملاك:( وقفات كضحك صافي طارت الخلعة مولفة معاهم افلام الرعب ) حلف جبتيلي لي قتلك ؟؟ حتى الإيربوتز ياك ؟ فالكحل عنداك تكون خذيتي شي لون آخر ؟؟

حكيم: فالكحل شوفي بعدا واش يجييو قدك ما كانش نرونجيهم ( ميل راسوو ) و قلبي الروايض من على عدنان شوية .. بغيتي شي حاجة أجي عندي و خلي حوايجوو عليك فالتيقار بلا الفريع ديالكم

ملاك: واخا ( يالاه زادت خطوة نبح عليها جيم حتى قفزات من بلاصتها شادة على قلبها ) غتسكتوه نتا و هاذ ولد الكلاب ( حاضية عينيه تا جات العين فالعين و هي تقلب وجهها مخلوعة كتقول ها هو غينقز عليا ) ما لقيتي غير هاذ الذيب تربيه ؟ ياكلني فذقمة نوحل ليه غير فضروسوو مسكين ما نعمر ليه حتى قنيت

حكيم:( ضحك كيلعب بداك الطرف فيديه ) الذيب ما كياكلش الجيفة غير هناي

ملاك: دابا أنا جيفة ؟؟

حكيم:( صفر عليه حتى جا عندو كينقز عليه بفرحة و يتعلق فيه باغي يلحسوو مخرج لسانوو كينهج ) حسبي الدروج قبل ما يرجع لعندك

مشات كطير هبطات و شوية دالسخفة شاداها بلا قلبها لي كيضرب بالجهد نيت ما بغاش يهدن .. أما هو جبد داك الطرف حطوو على الصور كيفرتت فيه .. شعل فيه العافية كيقاد فوراق دالنيبيرو و كيلسق بلسانوو حتى قاد الجوان و شعلوو كيكميه .. يطفي بيه الراس .. كيردد بصوت خافت ..!

حكيم: ما نزيدش نعشق أنا و نربي .. عندي وحدة ساكنة كَلبي ..!

صوناليه التيليفون هزو شاف شكوون و رد كيسمع بإصغاء

...: وا فيين أ با حكيم .. قلبتي وجهك علينا ..!

حكيم:( ساط الدخان فالسما و قال ) لخص أ ولد رقية .. كاين ما نقضييو ؟؟

...: نشووفوك فالعشية فبلاصتنا المعلوومة .. عندي ليك واحد البلان غيجيك على الكانة و قول ولد رقية قالها ..!

حكيم: شي همزة ؟

...: همزة مقااااااودة أ خاي و كيف العادة تضويرتي ما تنسانيش فيها .. نتا مول الجود

حكيم:( براس طافي كيهضر منغم ) شنوو جاب ولد رقية

....:( بضحكة مدعدعة ) ولد رقية جاب سلعة نقية

حكيم: هاذي فخاطر ال تي و التاتي

....: و العقل و ما فيه

حكيم: و لي عندوو حبيبوو

...:( بصوت ثقييل مطولها ) يزغرت علييه

حكيم: و لي ما عندوش

...:( بنفس النبرة ) لي ما عندوش

حكيم: لي ما عندوش يقلب عليه

...: طااالب

حكيم: حنا كاينين و نتووما

...:حنا كااينين و نتوماا

حكيم: Plus fort plus fort " بقوة "

...: جبدهاا جبدهاا ( كيغني بالجهد ) ياباني معذب .. ندير شي موصيبة نبرد جنووني .. نديرها و نهرب

حكيم:( ساط آخر نترة من الجوان و رد ) دووز تقو** و نتا تحليتي كي الق*& خاص غير لي يجي يحو**

...: مقبوولة منك أ خاي حكيم ( نحنح ) المهم نتسناوك فالليل .. تا يلا ما عجباتكش الهمزة غير نشووفوا وجهك العزيز

حكيم: نتقاشعوو ( قطع )

*******************

فتح باب بيتها و دخل كيسرح عينيه و كلام الحاجة حجيبة كيتعاود فبالوو .. لقاها متكية فبلاصتها .. مربعة رجليها و مفيكسية الشوفة فيه بعينين حومر و تحتهم منفوخ .. باينة فيها شبعات بكى .. !

ما دارت حتى رد فعل .. حاضياه غير بعينيها و الغبينة شاداها من صبع رجليها الصغير .. جلس حداها بابتسامة هادئة و قال

إلياس: نجاة صافا ؟ كي صبحتي ؟

نجاة:( بلعات ريقها و بنبرة حزن ردات ) شنوو درتلك حتى تنتاقم مني هاكا ؟

نجاة:( بلعات ريقها و بنبرة حزن ردات ) شنوو درتلك حتى تنتاقم مني هاكا ؟ ياك نتا لي قلبتي عليا و طلبتيني من دارنا و أنا بحال أي بنت شفت مصلاحتي و راحتي .. عاد عطيت جوابي .. ياك درت الحلال ما درتش الحرام ؟

إلياس:( هز راسوو بااه ) درتي الحلال

نجاة: أنا علاقتك مع شريفة ما كتهمنيش و ما باغى نعرف عليها والو ... قلت نتا إنسان رزين معاك غندير وليداتي و نعيشوو مرتاحين .. غتكون حقاني و تعدل بيناتنا و لكن ( سكتات شوية ) لقيت العكس .. زطمتي عليا باش هي تبقى على خاطرها .. قهرتيني فأول نهار ليا معاك .. بكيتيني و فرحتيها هي ..!

إلياس:( مسح على وجهوو من حريق الراس .. قرب منها شاد فيديها ) كن ما بغيتك ما ندخلكش لقلب داري و لفراشي .. أعدى حاجة عندي قلة الاحترام .. هاذيك ماشي طريقة تهضري معاها بيها .. و منين نبهتك سكتي و ما تزيديش مورايا كلمة .. نتي ما عارفاش شحال من حاجة

نجاة:( هبطات راسها و بصوت باكي ردات ) خليتيها ضرباتني و ما رجعتيش تشوف حتى حالتي كي بقات .. سباتني و ما خلات فيا غير لي نسات و أنا على كلمة وحدة كليت تسرفيقة مضخمة ( هزات رايها فيه بتساؤل ) و هي لي ما خلات فيا غير لي نسات ؟ إلا يلا كنتي كتشوف فيا بنت الزنقة كيفما قالت ..!

إلياس: ما تعمريش راسك بهاذ التخربيق .. بجوجكم عندي فنفس الكفة

سكت و بعدها عليه شوية كيدوز يدو على الحمورية الخفيفة لي باينة فحنكها و تحنى باسوو .. ما فهمااتش تصرفوو و شنوو كيعني بيه ؟ زعما يكون اعتذار بطريقة غير مبااشرة على الدقة لي كلات ؟

إلياس:( كيدوز يدو على القمشات لي خلاتهم لها مزوقين وجهها ) تء .. خاصك ديري ليهم الدوا

نجاة:( بهدوء ردات ) لبارح ما كنتش باغى نغوت و نطيح بكلمتك .. سمحلي ( تبسم معاها محرك راسوو بهدوء و بتردد كملات ) و لي قالت شريفة راه ما منوش أنا عمري خليت شي حد يقرب مني .. بصح درت اخطاء و لكن

إلياس:( قاطعها ) ماشي مهم .. صافي نساي شنوو قالت شريفة و راك كتعرفيها كي دايرة و عاشرتيها من قبل .. تجنبي الصداع معاها كوني نتي مولات العقل

نجاة:( تنهدات ) ما توقعتش ليلة عرسي دوز كحلة بحال هاكا .. ماشي على هاذشي كنت ناوية .. صدمتيني فيك

إلياس:( دوز يديه على جنبها و خلاها تما محطوطة و دفعها على ظهرها بشووية حتى تكات ) نبيضووها ا لالة

غمزها حتى غلباتها الضحكة .. حابساها بزز .. فهماتوو شنو باغي و حتى هي من عينيها باين أنها مستاعدة لعلاقة متكاملة بيناتهم ..!

نجاة: ما قلتيليش فين كنتي .. علاش ما جيتيش عندي ؟

إلياس: كنت مشغول .. المهم دابا هانا معاك ..!

قرب منها و باسها حتى غمضات عينيها .. حالة فمها مخلياه يدير لي بغى و هي كل مرة تقفز مع حركة يديه لي مطلعها مع جنابها تا بعد شوية مخليها تتنفس .. حلات عينيها برقة و بصوت خافت قالت

نجاة: سحابلي مشيتي عند شريفة

إلياس: بلاتي نحيدو هذا

قرصها فجنبها بخفة حتى تهزات و حيدلها السوميج .. بقات قداموو بدووبياس دالدونتيل مشبكين كيبينوو كلشي .. تحنى و باسها فالفرقة دصدرها كيهضر

إلياس: ما تفكري فواالوو و خويلي داك الراس ( هز عينيه فيها بابتسامة )

*****************

داخلة هي و أسية كيتسلتوو ما باغيين حد يشوفهم و يشدهم بالهضرة .. ما رتاحوو حتى طلعوو للفوق .. يالاه غيدخلوو لبيت شريفة بانلها خرج من جهة فين كاين بيت نجاة .. بجابادور كيشقشق فالباج و مطرز بالذهبي .. شافت فأسية و قالت

شريفة: دخلي نتي نمشي نعطيه الكونطاكط و نجي .. شوفي المكياج لي بغيتي نرجع و نقادولك

سيفطاتلها بوسة فالهوا و مشات كطير للبيت فتحاتوو بالشوووية كتأكد واش ما كيناش حتى سمعات صوت الما فالدوش و دخلات على ريوس صباعها كتقلب جهة الناموسية .. حتى طاحت علاياش جايا .. هزات المنديل باش مسحلها ( صباحها زعما ) و خرجات من تم بلا حس .. دازت لبيتها و قالت بالزربة

شريفة: عطييني مندييل بيض من حداك فالمجر طيييري دغيا

عطاتها منديل بيض كمسات فيه داك الصباح و زادت خلفة مخلية أسية غير كتشووف ما فهمات حتى لعبة فيها .. جات و مشات كي الزواق .. أما لالاهم شريفة راه هبطات فالدروج قاصدة الكوزينة غير بانتلها جراتها من كتفها لجنب كتهضر معاها بالشوية

شريفة: إلياس فين هو ؟؟

سهام: مشاو أ لالة يتلاقاو صحاب

شريفة:( قاطعاتها ) صافي صافي .. شدي ( عطاتها المنديل ) ما تشوفي لا هاكا لا هاكا طيري نيشان عند الحاجة عطيه لها .. قلها خلاه لك إلياس و هي غتفهم شنوو دير

سهام: واخا أ لالة

خرجات تدير لي قالتلها و شريفة متبعاها من بعيد ما ارتاحت تا شافتها عطاتوو لها من اليد لليد .. و تخنات كتوشوش ليها فوذنيها .. بعدها ناضت حجيبة قاصدة بيتها ..! تنهدات و خرجات راجعة بحالها لعند أسية من بعد ما طبقات لي فبالها .. دخلات و قالت

شريفة: عطيني تيليفونك أ أسية ضروري خاصني نهضر ..!

أسية: كنشووف المكياج خليني تا نكمل

شريفة:( طيراتولها ) غنديرلك حسن من هاذ التخربيق .. خليني دابا نركز و بلا تقزقيز

فتحات المجر جبدات لاكارط ديالها .. حيدات دأسية و ركبات ديالها .. كتحرك فرجليها بثوثر .. حتى تشعل و بداو كيطلعوو المكالمات .. نمرة معيطالها كثر من عشرة دالمرات .. نمرة معيطة مرة و لانكوني لي مغرقاها حتى هي اتصالات ..!

دوزات لنمرة لولة و جلسات تتسنى يرد عليها .. غير جاوب قلبات عينيها بميووعة

شريفة: عميمير هذا ؟؟

عمر: هو ( طولها ) هذا .. أخييرا تكرمتي علينا .. قلت غير عطيتيني نمرة غالطة ..!

شريفة: حرام عليك تظنها فيا هاكا ( عوجات فمها ) و أنا لي حصلني عمي باغى نجاوبك و قلبلي التيليفون .. ناض ليا صداع كبييير بسبابك أ عمييمير ..!

عمر: داك عمك مريض مالوو على هاذ الفعايل

شريفة:( قاطعاتوو ) مهم هاذي آخر مكالمة بيناتنا غير باش ما تقول ضحكت عليك و لا شي حاجة .. أنا بنت دارنا و كنخاف من هضرة الناس و المشاكيل .. ما عندهم فين يجييوني الصراحة .. النهار لول قتلك لي كاين ..!

عمر: وا مهى راه قتلك حتى أنا لي كاين و غرضي شريف .. ما ناويش نضحك عليك

شريفة:( هزات حاجبها ) أنا أصلا كاع ما متيقة بلي ما كتعرفنيش ؟؟ شوف غير كيف كتهضر على عمي .. ما تكونش باغي ترد ضربتك على ظهري ( شهقات ) لهلا يسامحك

عمر: وا أقسم بالله ما كنعرفك أ مهى .. عمرك جيتي عندنا للدار مع عمك باش نشوفك ؟ و العرس بقيت مقابل غير السخاري ما جلستش كاع فخاطري .. و غير دخلات ختي بشوية راك شفتي شنوو وقع .. صافي تقلبات البرادة و مشيت بحالي نبدل ساعة بختها حتى عيطولي نجي موراهم عاد رجعت .. باش شفتيني فالجردة ..!

شريفة: المهم أنا قلتلك لي عندي .. بغيتي الحلال جيب واليديك و أجي تخطب ( سكتات شوية ) و لا عرفتي شنوو .. راك جاي هاذ النهار مع لافامي للصبوحي ؟

عمر: لا ..!

شريفة: حشوومة كاع نكونوا عائلة و النساب مقاطعين .. أنا ما نقدرش ندير شي حاجة بلا ما يقبل عمي باش تكون فبالك .. !

عمر: و المعمول ؟

شريفة:( سكتات شحال عاد ردات ) عرفتي ما يجيك مليح .. ليوم واخا تجي غتكون الدنيا عامرة و ما غتهضروش فخاطركم و تصفييو الخواطر .. أجي غذا بوحدك .. أنا عارضة عليك .. نجمعوو بيناتكم و نهدييو النفوس و منها تجبد مع دارنا الهضرة .. اشنوو قلتي ؟

عمر:( سكت مدة ) غيير على وجهك نتي

شريفة:( ميقات و ردات ) مهم ارتاح لك ليوم و بلا ما تجي منها تتنفس شوية .. و غذا مرحبا بيك .. ما تبقاش تعيط عليا راك غتنوضلي الصداع

عمر: صافي هضرة وحدة

شريفة: اييوا الله يجيبنا فالصواب .. واخا الصراحة خاصني نقولك واحد الهضرة ضرورية قبل ما تتلاقى بعمي و ما عرفت كي غنقولها ؟

عمر: غير هضري شنوو كاين ؟

شريفة: لا لا هضرة ماشي ديال التيليفوون .. خصنا نكونوا فاص أفاص ( عضات على شنافتها شادة عين و حالة الثانية ) تقدر تطلع عندي للبيت نهضر معاك بلا ما يشوفك حتى واحد ؟

عمر:( رد بنبرة تضخيم ) البييييت ؟؟

شريفة: امم هي البلاصة لي نكون فيها مرتاحة و نقدر نأمن فيها ما يشوفنا حد .. و ما عندك ما تلف غطلع فالدروج دور علة يديك ليمن البيت لي قبالتك ديالي

سكت ما جاوبهاش حتى هي سكتات لثانية و رجعات قالت

شريفة: نتا يمكن مشى بالك لبعييد .. راه قتلك مل نصلاحوش لبعضنا .. و بصح بلاش يمشي عمي يحصلك و يصدق ضاربك مرة أخرى .. لا لا بلاش .. صافي حتال من بعد بسلامة

قطعات عليه كتنش على وجهها .. هزات عينيها فأسية

شريفة: الله يا ربي الله .. ليووم السطووك لي عندي ديال الكلام الحلوو قاضييتوو مع هاذ جوج بغ٠ال .. تفوو ديشارجيت ..!

أسية: كتلعبي بالعافية أ شريفة و غتحرقك نتي لولة .. ما عرفت آش كطبخي تما يا خوفي تندمي

شريفة:( هزات حاجبها و ردات شعرها مور وذنيها ) عمري ندمت على شي حاجة درتها .. نهار تحرقني غنكمدها و نسكت

أسية: ضبري لمخك

شريفة: و مالي آش درت ؟ طلبت غير الحلال ( غلباتها الضحكة ) علاش أختي يتلاقاني فالجرادي و يبغي يبوسني مخبية ؟ بزااف عليه و لهلا يحييه ما رانيش شايطة و لا رخيصة باش نعطيه لحمي يلعب فيه كي بغى .. بلح٠يماري لي حطوو

أسية:( كتعيبها ) امم مسكينة خبز الله في طبكوو

شريفة: معززة مكرمة فدارنا .. يلا ما جاش هو الخاسر ماشي أنا .. راه عارف هاذشي مزيان و نتخاطرو حتى غيجي

أسية: شكون هذا ؟؟

شريفة:( ربعات رجليها كضحك ) عرفتي تحمست اححح و شحال كنحماق على هاذ الستونات ( شافت فيها أسية بمن نيتك و هي تضحك ) هههههههه السعادة

أسية: بااز ليك عندك الجهد

شريفة: عندي البعر ( صغرات عينيها ) يلا ما خليتش نجاة فينما تشوفني تقلب الطريق راني خليت الدل .. أنوريها الزبل فاش كتعطي ريحتوو آش كيدير فالعينين

اسية: كيعميهم ههههه

تسمع صووت الطونوبيلات و الصداع دالماطيريال كيهبطووه .. طلات من البالكوون بانتلها الهونضة ديال صحاب عيساوة وصلات و معاهم إلياس لي كيعيط على الخدامة يدخلوو معاهم الماتريال و يوريوهم فين يوقفوو .. بقات شحال حاضياهم حتى ما بقاوش يبانوولها عاد رجعات للبيت

شريفة: أنا جاية سرحي شعرك بالبلاك ما بقى والو و يجييوا عائلتها ..!

خلاتها و مشات كتزرب لجهة الدروج غير بانلها و هي تعيط عليه بنبرة صوتها المبحووحة

شريفة:( تسناتوو حتى طلع عندها و قالت ) خرجتي و ما شريتيليش التيليفون واش أنا غنبقى بحال الحمقة غير كنضور عيني فربعة دالحيوط ؟؟

إلياس:( تنهد ) وا شريفة يهديك الله .. نفرتكوو علينا هاذ الجوقة و نشريهلك .. راه هضرنا زعما

شريفة: امم و خوذلي نمرة جديدة حتى هي ..!

إلياس: علاش ديالك فين مشات ؟؟

شريفة: علاه ما قتلكش ؟؟ ماشي أسية مشات تصوني عليا قبيلة و جاوباتها واحد المراة سميتها مهى واقيلة يلا كان عقلي ينفعني ..! داك اتصالات المغرب ولاو غير كيركعوو حنا نشريوو لاكارط بالكونطرا و فلخر نلقاو حد آخوور كيخدم بنفسها .. ما فهمتش أنا ؟؟

إلياس:( رد مزروب ) كتوقع بعد المرات .. غتكون شراتها من الشارع دابا يبلوكيوها ليها .. ماشي مشكل ..!

شريفة: وا دابا طروووطار طرطقتها فالصباح قبل ما نخرجوو .. تعصبت فاش قالتهالي

إلياس:( بدا تيليفونوا كيصوني ) خاصني نمشي وجدي راسك نتي .. غذا النمرة و التيليفون يكونوا عندك

شريفة:( بابتسامة ) واخا أ كبيدة

بقفطان جوهرة فالأبيض و الوردي .. مخدوم بسفيفة داليد .. الغرزة متقوونة و باينة فيه خدمة فاسية حرة .. واقفة نجاة كتطلل من الشرجم و الضحكة مشرعة لها من الوذن للوذن .. طايح عليها سر العرايس .. و زايدة ملحة فوق طعام بالمكياج لي مبينلها حروفها الزوعر مزيونين ..!

الشعر مطلوق كيلعب موراها .. و هي حاضية غير عائلتها لي جايبينلها فطورها بالجوق و عيساوة حتى قلبوو الدرب و كولشي خرج يتفرج و المباركات و التهاني كيتسمعوا منين حتى لين ..!

واقفين معاهم صحاب الدار الكبيرة كيرحبوو و يعاودو .. و عيساوة خدامين على الجهد و فينما يعلقو ليهم كيزيدو يزندو الطرح كثر و كثر .. قدامهم ثمنية دالدراري بجبادورات فالبلوو غوايال هازين ربعة ديال الطيافر كيلعبوو بيهم ..!

شوية بشوية بداو كيتحركوو بالغنى داخلين لقلب الفيلا .. تحطوو الطيافر الوسط و عراوهم قدام الناس لي كيشطحوو و يحركوو فكتافهم مع الأمداح العيساوية ..!

الطيفور لول فيه كعب غزال مستف و الثاني غريبة ديال اللوز ( العقدة ) و الثالثة محنشة كبيرة قد الرويضة مسقية بالعسل الحر و اللوز مهرمش من الفووق .. أما الطيفور الأخير فكانوا فيه هدايا لعائلة العريس ..!

نجاة:( جلسات كتلبس فصندالتها دالطالون و الناموسية موراها باقية مخربقة ما كفاهاش الوقت تجمعها .. تفتح الباب و دخل إلياس )

إلياس: كملتي ؟

نجاة: اه ( حانية راسها كتقاد فقفطانها )

إلياس: مزيانة ياك ؟

نجاة:( تبسمات حشمانة و هو شادلها فيديها ) شوية الحمد لله .. يا الله نهبطوو عافاك ناري شحال توحشتهم

إلياس:( ضحك ) توحشتيهم كاع ههه واخا يالاه ( شاف فالناموسية و جر الغطى غطاها )

نجاة: احم ما كفانيش الوقت يالاه وجدت راسي .. حتى نرجعوو و نجمعها

إلياس: ماشي مشكل .. مشينا ؟

نجاة: واخا ( مداتلوو يديها ) شد فيا عافاك كنتقسح شوية و خفت نطيح بهاذ الطالون

إلياس: زيدي يالاه

خرجوو كيتمشاو بشوية هابطين فالدروج على الزغاريت ..! نجاة كضحك مع حبابها و خوتها هازة يديها كتشير بفرحة و حماس واضح .. في حين إلياس كيقلب بعينيه على شريفة ما ارتاح حتى بانتلوو جالسة دايرة رجل على رجل بقفطان كيعيط يا ليل يا عين .. الوجه مراية .. مقاد على حقوو و طريقوو .. مركبة لي زيكسطونسيون .. مخلية الشعر مسبسب فوق كتافها .. مبينة راسها فأحسن حلة .. كتلمع بالذهب لي مزرزة بيه في حدود المعقول ..!

ما خلاوهش يكمل شوفتوو فخاطروو .. دغيا جروهم للوسط دايرين دائرة عليهم كيعشقوو و يصلييو على النبي و عيساوة خدامين يمجدو فمولاي السلطان و لالة العروسة لي فرحانة و الضحكة غتنقز من عينيها .. كتشطح بالشوية مع خوتها لي كلهم حاضرين من غير عمر .. أما إلياس غير كيبتاسم و يصفق بيديه و مرة مرة يحطها على صدرو و يحني براسوو كتحية ..!

عيساوة بصوت واحد: وااااا الله يجعععععل كووووولشييي مباااارك مسعووووود

تفرق المجمع و كل واحد فين جلس .. الآلة خدامة .. أتاي و دوازوو كيتفرقوو على الناس .. نجاة مقابلة مع شريفة كتهضر و ضحك مع أمها و خواتاتها و جداتها جالسة فالركنة كتميق بعينيها .. كبيبرة فالعمر و لكن لي فيها ما هناها ..!

لابسالك أ لالة قفيطين حتى هي و ضاربة كوب قصيرة لشعرها صابغاه فالماغون ... عكيكير فالأحمر لشنايفها لي تكمشوو و صغارو .. الكحول فالعينين و واحد الفوندوتان كيبان مطراسي مع التجاعيد ..!

الجدة: تباغك الله و صلاة على النبي على لالة نجاة ( شافت فحجيبة ) إيوا شماش نئولك يا لالة حجيبة ديييييتوو و عغفتوو آش دييتوو

شريفة:( نطقات كي الحزقة ههه و مع هضرات سكتات الآلة تا كلشي سمعها ..! ) ويلي يا سيدي عبد البائي خريتي و لا بائي

شريفة:( نطقات كي الحزقة ههه كتعيب فيها و بالزهر غير نطقات تقطعات الآلة تا كلشي سمعها ) ويلي يا سيدي عبد البائي خريتي و لا بائي

شافوو فيها و حتى حد ما قدر يرد قلبوها ضحكة صفرة بيناتهم و تمياق كيعوجوا فوجاههم .. لا هي حاملاهم لا هما سارطينها ما كاين غير القرطاس من لتحت للتحت .. عكسها هي لي كتعطيها لك فالوجه و مووت يا ح٠مار ..!

شريفة:( حانية عينيها كتشوف جهة سباطها و تهضر مع أسية بشوية ) تخنقت بكثرة النفاق

أسية:( زيرات على يديها ) أجي نتصورو ؟؟ جيت قرطاسة ههه الزين سلالة يا الحبيبة

شريفة:( ضحكات و قربات باستها .. كتهضر و تمسحلها العكار من حنكها ) يخليلي ثسااااينووو " هي كبيدة ديالي "

أسية:( بنص عين كتشوف فجدة نجاة ) شحال فيها ديال التبعكيك .. كتفقص ..!

شريفة:( ضحكات ) هههه خايفة يسلموو عليها و يتمسحلها العكار ( بغنج عوجات فمها ) يا مسكيينة ..!

أسية: كيشرفوو كيحماقوو

شريفة:( تنهدات و قالت ) هاذو ما غيسكتوش ؟ عيقوو بغمزني نغمزك و شوف فيا و ضحك .. كلوون أنا هنا داير لهم الحلقة ؟

أسية: ما تديهاش فيهم

شريفة: و لا كيقلبوو نيت نوض نضربها لهم بشي نتفة دايزها الكلام .. نديرو الحلقة نيت .. يدييو معاهم ما يعاودوو و لي ما شرى يتنزه ..!

شافت فيها بحاجب مهزوز و قبل ما تهضر أسية و تبغي تشدها كانت وقفات كتمشى ناحية نجاة و خواتاتها بكل أنوثة و رقة .. حركاتها حكاية ثانية من الغنج و الدلع .. وقفات عليهم و هزات صبعها كتحركو لبعيد باستصغار

شريفة: كحزي أ حبيبة خليني نجلس نهضر مع ضرتي العزيزة

بقاو يضورو فعينيهم حتى كحزو دارولها بلاصة حدا نجاة .. هزات راسها بنظرات متعالية و ابتسامة خفيفة مزينة شفايفها ..!

شريفة: كي صبحتي أ حبيبة ؟ ارتاحيتي فالنعسة عندنا ؟؟

نجاة:( كمشات فمها و ردات ) شريفة عطيني شبر دالتيساع الله يرحم ليك الوالدين ما تجبديني ما نجبدك

شريفة: لهلا يرحم فيهم شي عظم أ حبيبة ( باستهزاء كملات ) مك لالاك ما علماتكش الصواب أ الزين الفاسي الإيدريسي ؟ ( حطات يديها على صدرها و طبطبات ) ما عليش كلها كيدير بأصلوو و باش تعرفيني مضيافة و مولات القلب الكبير .. جايا نشوف واش مرتاحة معانا .. فين تلقاي شي ضرة بحالي ؟

نجاة:( باستهزاء) الله يكثر خيرك

شريفة: الله أودي .. الصواب مني كيتفرق .. المهم نوض أنا بحالي صباحية مباركة يا عروس ( حتى وقفات و رجعات تحنات شوية و قالت ) ااه باش ما ننساش و هل فاس يديو عليا نظرو خايبة .. يديك ما تحط فالكاس هو لخر أحبيبة حتى يفوت النهار السابع ديالك متافقين ياك ؟

نجاة:( بابتسامة صفرة كتشوف فيها و فالناس ) واخا أحبيبة

شريفة: حتى من البيت راه سيفطت البنت تجمعولك ما نعذبوش سيادتكم .. غير المرة جايا بقاي تجمعي سليباتك ريحة الحوت خنزات لينا القنت ..!

غمزاتها و رجعات لبلاصتها كتتبسم ببرود و تسرح فعينيها هنا و لهييه .. مخلية أسية غتموت بالفضول تعرف شنوو قالت لضرتها حتى وجهها تسقط منوو اللون و ختها مخرجة عينيها فيها باينة كتغوت غير من لتحت للتحت .. الحاصول بغاو يفقصوها جات هي قاتلهم حيد بالاك ما كتعرفووش .. قنبلاتها فوجههم تا طيحاتلهم اليد و الرجل فخطرة ..!

...:( كتبسم بزز ) مخلية سليباتك منشورين ؟ فين هو صباحك ؟

نجاة:( صفارت و قلبها كيضرب بالجهد ) تزحمت فالوقت و خلييتوو فوق الكوافوز حتى نرجع نخبعوو و نقاد البيت

....:( بغات تاكل راسها بالفقصة ) واش حم٠اااارة ؟؟ ما عارفاش شكيديرو بالصباح ؟ ديور تشتتوا غير بهاذ قلة الفهامة

نجاة:( بغات تبكي ) ما سحابليش ما سحابليش .. تفتنت و ما بقيت عرفت شنوو ندير

....: اييه ماشي مشكيل .. ويلي .. ما درتي حتى شي حاجة غير خليتيه للضرة محطوط كيقولها اجي هزيني .. نوضي طلعي تأكدي من شغالك الله يتبعك البلا

نجاة: ماشي صواب ننوض دابا .. حماتي و بناتها ما غيخلييو ما يقولوا .. طلعي نتي

....: فييين غنطلع فييين ؟؟

عضات فالصبر و وقفات بابتسامة من بعد ما نعتاتلها البيت فين كاين .. يالاه زادت خلفة وقفاتها الحاجة حجيبة بتساؤل ..!

حجيبة: بغيتي شي حاجة أبنتي ؟

....: امم الطواليط أ خالتي حاشاك

حجيبة: واخا أجي معايا

مدة قصيرة و تمات راجعة الحاجة حجيبة و خت نجاة قدامها وجهها حمر غطرطق .. ما لقاتش الفرصة فين تزعزع نهائيا .. رجعات جلسات حدا ختها كيتحكوو بالفقصة و الخوف ..!

شريفة:( شافت فأسية بابتسامة و هي حاطة يديها على وذنها ) الذبانة بقات تزنزن حتى شداتها المصيدة و جابتها فكرها .. الله على راحة دابا غنجلس فخااااطري خليهم يتشوااااو تا هما

أسية: شنوو قلتيلهم ؟؟ شوفي وجهها كي رجع و ختها تالفة غير بوحدها ..!

شريفة: قلت لها واحد المثلة قدييييمة على الله تفقه شوية واخا موووحال ( هزات حاجبها ) اودي .. كن كان البريق يعيق كن كاع ما يعطي زكوو للحريق ..!

المجتمع المغربي كيتقسم لفئات .. كل طبقة و فين كترتاح و معامن معاشرة .. كيفما كاينين عشاق النهار فأكيد كاينين عشاق الليل ..!

فمكان تجمعوو فيه غير صحاب الزطلة و التنغام .. الليل طويييل و الرووج قليل .. الزين غير كيتشاير ها الزعرة ها البيضة ها السمرة غير عزل و تخير فمن تفش النبولة و تشد لاهاي طاير فوق فيكيك ..!

واحد من أقدم لي كلوب فكازا .. خدام ليل و نهار ما كيعرف لا عيد لا رمضان لا عواشر جامع غير النكعة ديال البزنازة مضورين بيهم السماسرية لي لسانهم راس مالهم .. يلا خطاوهم المعارف هزهم الما و ضربهم الضوو .. و واحد من هاذ السماسرية هو ولد رقية لي عيط على حكيم ..!

حكيم لي الأغلبية كيعرفوه فداك القنت و لي ما عمرو تعامل بيه راه سامع عليه ..! واحد من البانضية الصحاح .. لي حتى حاجة ما كتصعاب عليه .. خاصك غير تميزي فوق الطبلة و تصفي معاه .. شد و هاك ..!

متكي فوق الفوطوي موسع بين رجليه و التيوو د الشيشة ففموو كيمص و يسوط فالسما .. عينيه كيشوفوا لبعييد و وذنيه مع صاحب دعوتوو ..!

حكيم:( بصوت ثقييل قال ) نخمم فهاذ التنقنيقة و نرد عليك الخبار

ولد رقية: أ ناضية أخاي .. سلعة نقية غتعجبك ( حط يدوو على ذراعوو ) ذواقتك تجي تال عندك .. تنغملي فيها و رد عليا الخبار

حكيم: الحنوشة قاطعيين اللعب ما عندي كي ندير ندوز لكم السخرة .. غتسناو بحال خوتكم تسلك الطريق

ولد رقية: غير شوف كي دير أ با حكيم .. راه مزيرين خاصهم يفكوو القضية فهاذ اليوماين

حكيم:( سكت شحال عاد رد ) لي عندي قلتوو ا ز** .. هاذ الق** ما فيهش المرانجية

ولد رقية: مشكييييلة

حكيم:( شاف فيه هاز حاجبوو ) آش باقي درتي فلي موصيك ؟

ولد رقية: الأرض ؟ ( حرك حكيم راسوو و كمل ) كاينين شي بقعات فطريق تطوان آش نقولك أ خاي .. ديكشي د الرفيع و طاطا بالرطل

حكيم: الأرض عمرك تخسر فيها .. ريكَّل ( قاد ) ليا البلان و بتضويرتك ( غمزو )

ولد رقية:( قرب منوو كيضور فعينيه و بصوت خافت ) صحابنا ديال سكورة راهم طايحين على همزة للسيمانة الجايا تمشي ؟

حكيم: دوك ولاد الق** .. كيركعوو هما و داك الطلامس د ز** .. غير خاشيين كرهم فالق** ما عارفين حتى قل**

ولد رقية: وا غير تهنى هاذ المرة مضمونة

حكيم: ما غيهناو حتى يهزوو الق*** جملة ( هز يدوو ) أنا خاطيني داك القو** .. قنعت .. غير بصحة

البليات كثار كل واحد و باش بلاه الله .. و لكن بلية حكيم غييير .. كيعشق المغامرات .. أي حاجة فيها الأدرينالين طالع كيخشي راسوو فيها حتى من الجنوون ما قالهمش عليه ..!

هما شلة بيناتهم .. بعضهم خداو الحرفة من واليديهم .. كل مرة و فين كيصدوو كيقلبوو على الكنز .. كيرددو طلامس خاصيين باش الحراس دالذهب ما يعوجوهمش ..! لي عندو دراية بالسحر و الكتب ديالوو كيتقدم و لي ما كيتيقش فداك الخزعبيلات بحال حكيم و ما جاوره كيميزي الفلوس على ود الماطريال .. و كيمشي يتفرج من بعييد فالمخبي ..!

هو عمل غير قانوني لأنوو بمجرد ما الواحد كيلقى الكنز أو نقولوا صنادق دالذهب و اللوييز و قس على ذلك .. لازم مباشرة تديكلاري و ديكشي كيتجمع و يتهز لمول الشي .. فالأخير كيتحطوو فخزينة الدولة .. و أي واحد حصل هز شي حاجة الحبس ديريكت .. لأنوو كيتواجد فوق التراب المغربي و تا حد ما عندو الحق ياخذوو ..!

آخر تجربة ليهم كانت فالمدينة القديمة ففاس .. من بعد ما تسد ضريح مولاي دريس باش يترمم و يتعاود البني هو و داك الزناقي و المحلات لي ضايرين بيه ..! و بحال هاذ البلانات ما يخفاو لا على حكيم لا جماعتوو .. بقاو يخبشوو حتى خشاو راسهم فالتنوعيرة .. شاكيين واش يلقاو علاياش كيقلبوو فداك القنت ..!

و بالفعل بعد مدة تدارت بوووم ففاس بلي تلقى الكنز فمولاي دريس و الناس شافوو الصنادق دالذهب لا تعد و لا تحصى كتخرج بالحراسة دالمخزن .. لي كان منهم حكيم .. شنوو وقع فداك الليلة حتى تردع و قلب الفيستة على داك الهيت .. الله و علم ؟ و شنوو خلاهم يعلموو المخزن حتى هي الله و علم ..!

لكن لي أكيد .. هو غيكون وقعوو شي حوايج ما كيتقبلهمش العقل نهائيا .. لي خلاو راس كي الحجرة بحال ديال حكيم يقتانع بداك الحيتيات .. بحال الجنون .. السحور .. الطلامس .. و يبدا يلاحظ على مرتوو و ينبش موراها .. تا لقى الكوارث فدارو ..!

قاطع هضرتهم .. واحد من الدراري لي داخل كيجري و عينيه تالفيين .. غير شاف حكيم طاار عندوو كيلهث

....: عتق أ خاي حكيم .. خليل مطايف أخاي راه تحاماو عليه ولاد الق*** حكرووه و هو غيير بوحدو

قفز من بلاصتوو تقول قرصاتوو شي نحلة .. شعل غير بووحدوو عينيه خارجيين و لسانوو كينقط بيه غير العسل ما خلى لا حاحة لا ملاحة .. و كاع لي عرفوو خو حكيم مطايف هزو راسهم و تبعووه ..!

موكب بيهم هاجميين .. الولد جالس مع حكيم فالطونوبيل كيكَّيدوو و البقية تابعيينوو بالطونوبيلات و المواطر .. صووت الكلاب كيتسمع من بعييد ..و المساطر كيبرييوو مع الضوو دالقمرة .. الدم سخوون و الراس طافي .. ربي بوحدو لي عارف هاذ ليلة باش غتختم ..!

********************

كتقلب فبيتها بجهالة ما خلات حتى قنت ما قلبات فيه على الخرقة وا لا لقاتها .. كلها كترعد بالخلعة .. داز عليها نهار كحل .. ما دا بيها فووقاش تخوى الفيلا و تطلع تقلب

نجاة:( وقفات كتنهج سنانها كيتقرقبوو ) بغات تسحرلي تحمقني

مشات بالفقصة لي فيها لبيت شريفة .. حلاتوو و دخلات عوالة تقلبلوو ساسو على راسوو حتى تلقى رزقها .. ما بانتلهاش شريفة و غير مشات للمجر فتحاتوو .. خرجات شريفة من الحمام تشووف شكوون جا عندها .. غير شافتها كحلات بالعمى ..!

شريفة:( غوتات و تمات ماشية لها كطلع فكمامها ) شكديري تما ينعل أصل مك الق** بقاولك غير حوايجي

نجاة:( ضارت عندها كترعد ) صباحي هزيتيه من قلب بيتي .. دابا غتجبديهلي و لا نوصلوها فينما بغيتي

شريفة: يسحاب لك أنا بحالك الق** ؟ غير نتي كتحطي عينك على حاجة غيرك كوولشي بحالك ؟

نجاة: وااا سيييري تق*** .. ما تبلعاتش لك خلاك و جا عندي يا الق** بغيتي تقفيني و

شريفة:( حتى كانت غتجرها و هي تحبس كضحك .. تا بردات و قالت ) نجاة سيري تبدلي ساعة بأخرى راني مكالمية غتزيدي معايا كلمة .. داك الوجه غنخسرو لختي و سيري عند راجلك حبيبك يطبطب عليك ساعتها

نجاة:( ردات بتسميم ) مريضة نتي .. ما راضياش الراجل باش كنتي فرحانة جا برجليه تال عندي و

شريفة:( قاطعاتها ) وا سيري تتق*** نتي و ياه قالك نتقفها دايالي جووني هنا ؟ راه غا خبز ربي فطبكوو فالح** ما كيعرف يح** و لا يحرك السواكن أ كبيدة .. كيترعد بوووحدوو و هوو باقي تا ما فات الثقبة ( مصمصات شنافتها ) كيجييبوو غير بالخلعة .. و كولوا كيقفقف غيموت غير بعرقوو .. تا هذا يفرحوو ليه الناس ؟؟ ( هزات حاجبها ) و لا طامعة ففلوس الفوسفاط هههههه ( حركات صبعها بحركة دائرية على المكان ) كاع لي كتشووفي مكتوب فسميتي بيع و شرا .. من غذا نشريليه الصداع فخدمتوو مع الراس لكبير و نكركب مكم مع الباب ( ببرود ) ديريه فشي كروسة و جريه تسعاي بيه .. يجيبلك صريف نيت ما تفرقي بينوو و بين المعواقين بوالوو تانتي حالتك غير دالسعاية ..!

نجاة؛( سالاتهم لها ما لقات باش تجاوب .. هزات يديها تا السما و نفضاتهم فالهوا ) واااش من نيييييتك ؟؟

شريفة:( حمرات عينيها و قالت مشربنة ) كتهزي عليا أناااا ؟؟ من قبيلة و أنا صابرة ليك و نتي كيحكك جلدك واا أجي لمك لهنا ( نقزات عليها للشعر )

معروف على الأحياء الشعبية بلي ما كتسكت لا بالليل لا بالنهار ديما حاضرين ناضرين .. الجمعة ما بين العيالات و تقرقيب الناب ما كيحلى حتى يتبرد الحال و يطيح الظلام ..!

كل وحدة فيهم مخرجة كرسي و لا حصيرة جالسة عليه فالعتبة دالباب و واحد درهم دالزريعة كتشالي بيها فيديها .. ما كاين غير هري و دري و كول الزريعة و لووح القشور على الغاذي و الجاي ..!

ولادهم حداهم منوضين الروعة بالغوات .. و شكوون تسوقلهم ؟ هما غا دراري صغار كيلعبوو .. واخا يريبوو الحي غيضحكوو و يقولك واش تدي عليه ؟؟ الله يحفضوو مسكين عزيز عليه يكتاشف تا لنهار لي الله يحفظ كضربوو شي طونوبيل تجيبوو حبل و بونت فنص الشانطي و لا هو يهز حجرة يفلق بيها صاحبوو يصدق مخور ليه عينيه و المدركَّات كثار ..! تما عاد كتضربهم الفيقة و يخرجوو يعددو و يبكييوا على ولادهم ..!

فبلاصة ما يشدو ولادهم عندهم .. جالسين حاضيين التبركيك .. فلان دار و علان راه كان مع شي وحدة .. بنت فلانة شفتها نازلة من شي طونوبيل كضحك مع الصاحب ..! الحاصول كلشي حاضي كلشي و لي عندو شي خبار سخون كيلقف كيحطوو للمجمع باش تبرد لولة لي فيه كتاكل ..! ولي مبعدة راسها و واخذة تيقارها كتسمى بالمبعككة لي عاجبها راسها ..!

أما بنات الوقت ها لي فدارهم متبعة مسلسالاتها ها لي خارجة كتسرح فرجليها ... ها لي ضارباها بنعسة ما كايناش هنا .. و ملاك وحدة من هاذ لبنات ..!

جالسة فالسطح كتبرد على راسها من الفقصة دالتيليفون لي نساتوو عند خوها و من تما ما بقات شافتوو و تا هو باين ما انتابهش دارو فجيبوو و زاد خلفة مخليها كتضور عينيها بملل .. تا سمعات صوت بنت كتبسبس عليها من السطح لي قبالتهم

....: بس بس الزين ما نتصاحبوش ؟

ملاك:( ضحكات و قربات جهتها حطات الكرسي و طلعات عليه تا تعلات شوية ) جيب عشرة من الحاجة و ديك الساعة نشووف

....:(عضات على فمها كتعوج الدراري فطريقتهم فالتح٠٠رش ) نجيب لحوبي تا عشرين من الحاجة غا تبوردي عليا كي بغيتي الزين

ملاك: هههههه الله يمسخك قولي أميين

....:(حكات كرشها و دفعات صدرها ) و شنوو ماشي نهار مضخم شفنا لالة ماري و يا مساء الخوخ احح و كي نشوفك ندوخ ( غمزاتها كطلع و تهبط فيها بنظرات كيقتلوو بالضحك ) يا الفريزة دقلبي

ملاك: ههههههههههه غير عبد المولا الكزار محطوط ( ضربات بشعرها لور ) ايوا مساء السفرجل أجي خطبني و ترجل أ سيد الرجال ..!

.....:(ضحكات تا شبعات و قالت ) واعرة عندك هاذي هههههه فين شاداها بعدا ؟ من الصباح ما بقينا شفناك .. غبرتي حتى من الواتس ..!

ملاك: غييير الدار .. كنبغي نطلع لسطح كنخاف يخرج فيا جيم ما نلقى لي يفكني منوو .. جاب الله داه معاه حكيم .. نشم بعدا غير هوا دسيدي ربي

دنيا:( دوزات على فمها بلسانها و قالت بابتسامة ) شفتوو رجع ساكن معاكم .. ؟

ملاك: امم .. ! لا غير كيتوحشني و يجي يشوفني كيف شتي أنا الغريبة الهشيشة ديالهم فالدار ( ضحكات ضحكة عجيبة ) هيهيهي ما كيسخاوش بيا كي نقيطة دالعسل على قلبهم

دنيا: و لي ما عرفك خسرك يا الحبيبة .. قوليلي بعدا شفتوو كثر الجلوس معاكم سحابلي غير بينوو و بين مراتوو شي مشاكيل و لا طلق الدار للبيع ..!

ملاك:( قلبات الهضرة ) شفتك مسكسفة على الحالة .. كنتي خارجة ؟

دنيا: وايييه و فلخر خواو بيا شفتي الصحبة د الكارطون ؟

ملاك: هاذيك غير نيتي خرجات فيكم .. عارفيني ما يصلاحش ليا نخرج ليوم و متافقين بلا بيا ( دلات شنافتها بكياتة ) أ شووف فيكم يووم أ بنات العبد

دنيا: ههههه وا نتي أصاحبتي عارفاهم ما غيبغيوش آش نديرولك ؟

ملاك:( هبطات من الكرسي غضبانة و ضارت نازلة لدارهم ) تدارلكم كحلة زحلة

دنيا: ماااري واا ماااري أجي نقولك اصاحبتي وا غا أجي

ملاك:( ضارت عطاتها صبع ) هاكي سيري تزبلي عليا

زدحات لباب دالسطح و هبطات فالدروج كتسابق غير مع راسها .. دخلات على حبيبة كي العجاج زدحات الكرسي و جلسات عليه

ملاك: وليت شفاية للعديان ا حبيبة قلبي .. ترضايها لبنتك الدرويشة الحنينة المرضية فخوتها ( هزات عينيها فيها بحركة بريئة)

حبيبة:( قربات منها باستها فحنكها بجهد و بعدات كضحك ) حللللوة يا بنتي

ملاك:( كدوز على حنكها ) شي نهار تمشييوا ديروني فخبيز و تاكلوني يسحابلكم غير عسيلة هنهنهن

حبيبة: هههه دابا مالك و كان ؟ ( مداتلها طرف دالحلوة لفمها ) ذوقي بعدا كي جاتك ؟؟

ملاك: واعر .. كيحمقني الكعك ديال وجدة مذاقوو مغاير على لي كيعجنوه هنا ( كتبنن ) على هو كان تما ؟

حبيبة: اه مشى لبني درار كان عندو شي شغال .. وصيتوو على الكعك و المقروط ديالهم هاذ السيدة كتصوبهم غزالين بحال نفسك لا من القوام لا من النقى .. واخا مغلية شوية و لكن كتاكل و تعرف آش كليتي ..!

ملاك: لذيذ ( سكتات مدة تا كملات ماكلتها ) بغيتي تنسيني فلي جايا عليه ياك ا حبيبة ياك

حبيبة: الله يعطيك عقل قولي أميين .. شنوو بغيتي ؟

ملاك: بغيت نتزوج و نتهنى من ولادك احح الراحة

حبيبة:( وحلات لها تا بدات تكح و وجهها تزنك ) كح كح كح ( خدات من عندها كاس دالما هبطات عليه ) اييه و شكون هاذ مول السعد ؟

ملاك: هاذيك خدمتكم نتوما تجيبوهلي مالي أنا ندير كولشي ؟ بزااف أنا عليا هاذشي كامل ..!

حبيبة:( كضحك داياها على قد عقلها .. عارفاها غا طالقاها ) اييه الصراحة ..! بزاف عليك و نتي غير عسيلة سايحة تضربك الشمش تذوبيلنا ما نعرفوك فين صديتي

ملاك: ها نتي بديتي تفهميني يعطيك الرضى و الحلوة المكردة يا ماماتي الفنة .. نعطيلك المواصفات لي بغيت باش تقلبي ليا ؟

حبيبة: لا بلاش نشوفوو غير واحد من صحاب خوتك مالنا على هاذ العذاب كامل .. نديرولهم صف قدامك و نتي تعزلي و تخيري فلي عجبك .. خيرنا ما يديه غيرنا ..!

ملاك:( ضربات يد مع يد و قالت ) اويلي حي ..! نهرب من المعقد نطيح فخوه ولد عموو ؟ أنا خاصني شي دريوش كيمشي مع الحيط .. نقوولو أحبيبة بغيت ندير لايف نجمع مع الناس يقولي ما طلعيييش هاكا أ مون بيبي داموغ ديري هاذ الفيلتر كيجيك على من زيناتوو

حبيبة: اهيييه ...!

ملاك: نبغي نتصور فشي بلاصة يحلف عليا تا هو لي غيصورني و يجيبلي العكار لي عندو عزيز و يقولي هاكي أحبيبة باش يشع منك النور ههه ( كتملس على شعرها ) أما داك الجغولة دولادك ما عندي ما ندير بالفوطوكوبي ديالهم ..!

حبيبة: تا تلقاي بحالهم عاد دوي

ملاك: هههههه أجي نقولك .. هضرتي مع حكيم على ود السطاج ؟ ما بقى والو غير شهر و نص

حبيبة: فين أنا شفتوو و جلست معاه بخاطري ؟ باقي .. غذا عارضين علينا دار كريمة ( مراتوو ) غنمشيوو عندهم نشوفوا باش غنفضيوها .. ايوا و بعد غذا هو طالع لطنجة .. وصاني على لاكارط ديالي و الوكالة نعطيهم ليه .. باغي ياخذ شي أرض يمكن ..!

ملاك: ايييه الناس شابعين أملاك .. ما تقسميش معانا ؟ غا شي حصيصة يرحم باباك ( حطات يديها على فمها كترغب )

حبيبة:( ضحكات ) راه كلشي ديالكم الحمقة .. علاه انا و لا هو يحيدلكم شي حاجة ؟

ملاك: غير كنضحك عارفة لي كاين

حبيبة: نهار يدير وليداتو كاع ملاكاتو نكتبهم فسميات ولادو و نصفي حسابي أنا

ملاك: ما كنفهمش علاش البوليس .. دايرين لهم بحال هاذ البلانات .. مالهم ما نحقهمش ..! دابا ما علينا هضري معاه عليا .. الكونجي ما بقى ليه والوو و يتسالى .. غيبدا الخدمة و الأعصاب و المرض و ما غتهضريش معاه و نهار نبغي نمشي غيديرلي الحجرة فالسباط

حبيبة: قتلك ضربيه على حسابي .. غتمشي تسطاجي ماشي تلعبي ( سكتات ) كازا كاااااملة ما لقيتيش فيها فين ديري .. ما جبرتي غير فالرباط حتى نتي الله يهديك ..!

ملاك: الضومين ديالي و ديكشي لي باغى ندير ما كاينش هنا ما مطلوبش كاع .. داك السيد عندمن غنخدم واعر بزاااف .. راه منين قبل راني مزهااارة .. و ما تفقصونيش و الله تا ننتاحرلكم من فوق السداري اعععع

حبيبة: ها حماداشة موسى غتبدا .. يادلي راني هضرت معاك .. كلمة وحدة

ملاك: وا غير يلا بغيتوو تركبوو فيا الملحة بالفقصة و أنا باقى صغيرة .. ذنوبي عليكم هنهنهن

حبيبة:( ضحكات ) لا غنركبوو فيك السكر بالخلعة و غنمثلوو الجزء الثاني ديال فيلم .. فيها الملحة و السكر و مزال ما بغاتش تموت .. آش بانلك ؟

موكب بيهم هاجميين .. الولد جالس مع حكيم فالطونوبيل كيكَّيدوو و البقية تابعيينوو بالطونوبيلات و المواطر .. صووت الكلاب كيتسمع من بعييد ..و المساطر كيبرييوو مع الضوو دالقمرة .. الدم سخوون و الراس طافي .. ربي بوحدو لي عارف هاذ ليلة باش غتختم ..!

كلشي خرج كيطل من البالكونات و الديور .. بلا دراري لي كيتكيفوو فراس الدرب و العيالات لي مجمعين فالبيبان د العمارات عينيهم غير كيضوروا باغيين يفهموو آش طاري ؟ كيتسمع غير صوت د بنت كتصرصر بالغوات

....: غيق٠تلوووه غيق٠تلووه طلقووو منووو

كتغوت لربي لي خلقها داخلة بين باها و خوها لي شان٠قين على خليل كيض٠ربوو فيه .. كتحاول تفرقهم و كتزيد تعيط على أمها لي خارجة كتولول غير ببيجامة فوقها فواطة ..!

الفضول دالجيران خلاهم كلهم يطلوو و يبغييوا يعرفوو آش واقع .. لكن حتى حد فيهم ما هبط و قال نفكوو داك الولد و هما غياكلوه ماكلة وسطهم .. حتى من بنتهم ما حنوش فيها و دفعوها تا جات مزدوحة مع الحيط كتنهج ..!

لكن الفراجة عاد بدات فاش وصل حكيم و حبس الطونوبيل بالجههههد فنص الطريق .. تسمعات بحال شي اكسيدون .. و لي باقى ما جاب خبار راه كيلطف فالله و خارج يشوف شكون دخل فشكون ..!

هبط كيجري شاعل و عقلوو بغى يخرج فاش شاف خوه وجهوو كلوو د٠ما٠يات .. حاكرينوو بيناتهم و دايرينوو فراجة .. ما بقى موقر لا عمر لا معرفة مشى نيشان لباهم دخل فيه براس حتى طلق من خليل و دخل فلولد برجل جابوو مسرح .. جر خوه عندو مكره و عينيه كيضوروا على وجهو و ذاتوو

حكيم: سير لطونوبيل ( غير سيفطوو و شاف فيهم ) كتحاماو أ ولاد الق*** دايرين الحمية على دري صغير الله ينعل زابور مكم العطاية

شن٠ق على الأب مزيروو مع الحيط عينيه خارجين و لسانوو كيقطر غير العسل ما خلى لا أصل لا ملة .. رجع بعد راسوو لوور و زدحوو معاه بقوة ضار٠بوو براس مرة أخرى تا فشل و طاح و فالبلاصة تهز و هبط عليه بكوعوو بطريقة احترافية حتى جابوو على كرشوو عينيه خارجيين ..!

طلع عليه و بدا يستف ليه فكلاكات متابعين و باين من ضر٠بوو بلي متدرب و عارف آش كيدير .. ما كيضر٠بش عشوائي ابدا .. ما خلاش للأب لفرصة حتى فين يهد عليه .. د٠موو سخوون و عينيه غير على لي بين يديه .. نسى الولد لاخور كاع ..!

وذنيه تصمكوو على الغوات ديال الأم و بنتها لي كيعيطوو بالعداو عقلهم غادي يخرج من بلاصتوو و زادو وجووه الش٠ر لي جايين مع حكيم هبطولهم النقطة بالخلعة .. واخا ما تدخلووش غير كيهدوو بالسواطر من بعييد و طالقين لكلاب كينبحوو على البشري لي عاد جاهم الفكان .. و مرة مرة يديماريو المواطر بالجهد حتى كيتسمع صوت كيطرش الوذنين ..!

أما لبنت فراه عيات كتشوف و دخلات بين باها و حكيم كتحاول تفك و كترغب فيه يطلقوو .. غافلين على الولد لي دخل تالف للكوزينة كيقلب .. عينيه حاق٠دين و مكيبشروش بالخير .. هز جن٠وي كيلمع و خرج عوال على خزيت .. مشى نيشان لحكيم لي ما منتابهش ليه و عطاه بض٠ربة لظهر حتى طوش الد٠٠م ..!

كرز حكيم على عينيه عاض على فموو من حر الضر٠بة .. بقى هكاك لثواني ثابث و بعدها وقف يديه مزيرين و القاميجة لسقات عليه بالعرق .. الد٠٠م كيشرشر بالجهد مع السخوونية .. واخا هو راه باقي ما طلع معاه حر الضر٠بة ديال بصح .. ما حاسش بيها كاع .. أما لاخور غير شافوو وقف طلق رجليه لسما كيجري بطيران تا حكيم ما كانش من العاكزين تبعوو تا هو كيجري و فالبلاصة داروو أمارش و تبعوهم .. مخليين الام غتحماق بالبكى و الغوات على ولدها .. أما حتى بنتها طارت موراهم هي و باها .. لي واخا ما قادرش يتحرك من الهلكة لي عطاه .. قلبوو على ولدوو نوضوو بزز ..!

البطانة دغيا كتطيح و الروح فرمشة عين كتزهق .. تما عاد كترجع سخونية الراس بالبرودة .. و يا ويلك من لي زايغ بشبابوو و صحتوو .. ما كيطلع معاه الصح حتى كيلقى راسوو مشلل فالركنة و لا مرهون مور القضبان ..!

شريفة:( حمرات عينيها و قالت مشربنة ) كتهزي عليا أناااا ؟؟ من قبيلة و أنا صابرة ليك و نتي كيحكك جلدك وا أجي لمك لهنا

نقزات عليها للشعر جراتها منوو هبطاتها للتحت و نجاة كتضرب بيديها حتى خبشاتها و هي تجمع معاها بصقلة نفخاتلها الحنك .. عاد طلقات منها و حلات لباب كتغوت بالجهد

شريفة: إليااااااااااااااس إلياااااااااااااااس

ما دازش بزاف حتى كان طلع هو و الحاجة كيجريوا مخلوعين .. غير شافتوو نجاة طارت عندو عنقاتوو كتبكي بالجهد و ترعد

نجاة:( كتهضر بصوت باكي كل شوية تشهق ) حرام عليها هئ من نهار دخلت لهاذ الدار و هئ و هي كتكرفس عليا

إلياس: آش واقع هنا ؟؟

نجاة:( بعدات من عليه و شافت فيها ) هو لي جا عندي و هو لي طلبني هء يلا غتحاسبي شي حد بداي بيه ( هزات صبعها كترعد ) بعدي مني ا شريفة حسن لك

شريفة:( قربات و قالت ) و يلا ما بعدتش شنوو غديري ؟؟ هو شما٠تة و نتي ق** بجوجكم بحال بحال رتاحيتي ؟

حجيبة: لواه أبنتي الله يهديكم و ما تخليوش

شريفة:( قاطعاتها بنرفزة ) الحاجة دخلي سوق الجنب لي كيضرك .. ما هضرتش معاك ما تنقزيليش هنا ديريلي فيها رابعة العدوية .. الله يرحم جدك ..!

إلياس:( جرها عندو و تحت سنانوو قال ) شريييفة

شريفة: نعام ؟؟

إلياس:( ساط النفس ) مالكم ؟؟

شريفة:( جرات يديها من عندوو بزعفة و ردات باستهزاء ) ما مالها واالوو خاصها غير لي يح** يمكن نتا ما نقنعهاش و جات عندي نطلع معاها القرعة

نجاة:( نقزات كتغوت ) بزااااف عليك

شريفة:( ردات تا هي بصوت عالي ) الله ينعل اصل جد مك الك٠لب .. آش دخلك لبيتي ؟ و وصل يديك لحوايجي .. علاياش كتقلبي ؟؟ يا المع٠فوونة غير نتي مو٠سخة و عينيك فالتين فحاجة غيرك .. يسحابلك كلشي بحالك ..!

نجاة: حتى نتي وصلتي للي بعيد عليك و هزيتي صباحي من قلب بيتي

حجيبة:( باستغراب ردات ) و لكن الصباح أبنتي راه عندي مخبي في الحفظ و الصون

شريفة: هااااا ..! الحمد لله .. الله يجيب لي يقول الحق ( هزات صبعها فإلياس و بغضب كتكمل كلامها ) كل٠بتك تربطها قدامك و ريحة خنزها ما توصلنيش و لا أقسم بالله حتى نذ٠بحها و نشرب من د٠مها ( قلبات عينيها لنجاة ) قلبي عليا حسن ما نزطم عليك تا يخرجوو مسارنك

إلياس: نجاة بيتك دابا ( خرج عينيه ) تحررركي

شافت فيهم و خرجات كضرب بيديها و رجليها مفقوصة غطرطق .. قبل ما تجي عروسة لإلياس كانت عوالة على شي ثاني .. لكن للأسف لقات العكس تماما ..!

إلياس:( قرب من شريفة و بحدة قال ) لسانك تصونيه قدامي و قدام الحاجة و لا ما غيعجبك حال

شريفة:( شافت فيهم بجوج و عطاتوو صبع ) هاك نتا جبتيها وا تحمل الزين الصافي ( بتحدي قربات منوو هازة حاجبها و فعينيها نظرة قوة ) تبرهشتي بزاااف حشم غير على شيباتك أسيدهم و هاذشي كامل غنصرفولك دراهم غير تسنى .. باغي تفقصني ؟ ( ضحكات باستهزاء ) و يلا خليتك تفرح بشي ولد منها راني ق** أودي أ إلياس دابا خرجوو تق** عليا من هنا

إلياس:( هز يديه باغي يضربها و فآخر لحظة شداتوو حجيبة كترغب فيه و هو كلوو كيترعد عليها ) حيدي الواليدة خليني نربي هاذ الخا٠نزة

شريفة: هاااهاااي قداش قلتيها و منين أنا خا٠نزة عطيني شبر دالتيساع ( شافت فحجيبة ) و قدام مك هانا كنقولها يلا كنتي را٠جل و مزغرتين عليك .. ما تقربش ليا .. نفرني اسيدي .. هجرني و هجر فراشي ..!

حجيبة: شريفة شهاذشي زدتي فيه

شريفة:( ردات بصوت مرتفع من بعد ما زدح لباب و خرج هايج ) خداها بفرنك و بغاها تولد ليه قايد .. دابا تشبع بز غير تسنى هه!

حجيبة:( شافت حتى عيات و خرجات بحالها .. لقاتوو باقي حدا الباب كيمشي و يجي بعصبية .. بهدوء قالت ) صافي ا ولدي بدل ساعة بأخرى الله يرضي عليك .. الله يهديها هذا ما نقول ( شدات فيه كتبرد الخاطر ) غذا هز نجاة و سافرولكم شي سيمانة و بردو هاذ العافية لي شاعلة فيكم بثلاثة .. الله يكون منك

شريفة:( سمعاتها و خرحات حاطة يديها على جنبها ) ايييه ا خالتي هو و الق** يمشييو للهاني موون و أنا نجلس نحرق فدمي هنا .. و الله لا كانت ليهم

إلياس: دابا نتي علاياش كتقلبي ؟؟ ( بغى يمشيلها و زيرات عليه الحاجة )

شريفة: تسافروو نسافر حتى أنا .. أنا نبقى محبوسة و نتوما تفطحوو ليا ياك ؟ فاش جاتكم بالسلامة ؟؟ و عرفتي آش يجيك مليح ؟ تسافر و تخليني هنا غترجع تلقى بلاصة الفيلا رمااااد .. يلا ما شعلت فطب** مها العافية راني ما نتسماش

حجيبة:( دارولها الشقيقة .. قالت كتاوي معاها ) نسافروو أنا و بنتي .. صافي ارتاحي

شريفة: نمشي أنا و ياك و أسية لطنجة نصيفوو .. ما بغاش ها حنا مجموعين حبايب مع بعضينا .. حتى نريبوو مها هاذ الفيلا ..!

يتبع...

‎