عرس الذيب الجزء الرابع

شريفة: نمشي أنا و ياك و أسية لطنجة نصيفوو .. ما بغاش ها حنا مجموعين حبايب مع بعضينا .. حتى نريبوو مها هاذ الفيلا ..!

حجيبة: الله يرضي عليك أ بنيتي لما نعل الشيطان و دخل تنعس .. صافي هضرت معاك

شريفة: و يعطيني الطونوبيل ما غنمشيش لتما فالطرونسبور كنتكرفس و زايدون ما تنعرفش نتحرك على رجلي

إلياس: الحاجة تصبحي على الخير

حجيبة: تمسى بخير اولدي ( طبطبات على يديها ) وا دخل أبنتي لبيتك حتى نتي الله يهديكم .. ما تبقاش تزايد معاه فالهضرة راه يلا شفتي جوج مفاهمين عرف الدرك على واحد

شريفة:( هزات حاجبها ) و مالوو هو محني لي ما يهزش الدقة ؟ علاش المراة هي لي خاصها تصبر ؟ آخرتها كتشرف غير بالفقايص و مالنا عليها ..!

حجيبة: حنا هاكا تربينا و هاكا كنعرفوو .. شحال ما كنتي لبيبة و لسانك حلوو .. الرا٠جل يمضغك و ما يبلعك .. سمعي مني

شريفة:( ضحكات ) منين يمضغني غير يبلعني نيت حسن ما نبقى شفاية ههه و لاهيلا زوينة هاذي عندكم و هو لي جايب صاحبتي ضرة عليا جاتك عادية و كتفرشيلها الورد و الحرير ياك ؟؟

حجيبة: الكذوب على الله حرام أبنتي .. و الله و ما تساليني حلوف حتى عكست ليه و ما عجبني حال و لكن إلياس و كتعرفيه .. يلا بغى يوصل لشي حاجة تا حد ما كيحبسوو

شريفة:( تمتمات بالشوية ) الكذوب على الله ماشي على شريفة ( ميقات ) امم .. ايوا خليه ..!

حجيبة: و سمع مني الله يْكَوْن منك الزرع .. صبري على را٠جلك و جمع شملك و ما تبقى تتعايب معاه هكاك ( هزات الشال ديالها غطات بيه وجهها كضحك ) نعقل المرحوم داني صغيييرة بزاف .. كنت كنخاف منوو حيث صعيب و كيضربني و زماننا حنا كان فشكل ماشي بحالكم

شريفة:( ضحكات ) ههههه توحشتيه أ حجيجيبة هاي هاي على الحنيكات و التزنيكة يا لالة

حجيبة:( حشمات غير كضور فعينيها ) وا سمعني .. الواليدة كانت مولفة كل صباح نجي نزورها واخا غير من الباب .. تال واحد المرة غبرت سيمانة لا حس لا خبر .. تخلعات و قلبها تخطف عليا و ناضت علمات الواليد .. قالت ليه راه حجيبة بنتي بيها شي حاجة سيمانة ما بقيت شفتها و لا ريتها

شريفة: ايوا ؟

حجيبة: و با تقول حس بيا و عرفوو ضربني .. جا بداك السلهام و العكاز ديالوو كيزدح فباب الدار دالحديد .. عرفت با غير من ديك الدقة و مشيت كنجري فتحت ليه لباب و أنا الوجه مزرق و حالتي حالة و خايفة من الصداع ينوض ..!

شريفة:( حاطة يديها على حنكها كتسمع ) دخل خلا دار بوه الحرا٠يمي و لا والوو .. عطيني المفيد خلاص ..!

حجيبة: يا دلي دخل عليه بداك العكاز بغى يهرسوو فوق راسوو .. الحاج كيرغب و يزاوك فيه و با كيترعد عليه ما فكوه غير بزز و من تما جمع يديه عندو

شريفة:( بقات ساكتة كترمش تا قالت باستغراب ) و شنوو غنستافد أنا من هاذشي ؟ نتي لي بهلة و سمحيلي عليها كلمة ..! بقيتي ساكتة كتاكليها فعظامك أما من لول يموت الكل٠ب .. هذا هو الصبر لي كيولي دل ( هزات حاجبها ) و يلا نتي كانوو موراك الرجال أنا نهار نطيح ما نلقى حد يلا ما جبت حقي بسناني ما كاين لي يجيبولي ..!

حجيبة: من هضرتي كاملة هاذشي لي فهمتي ؟؟

شريفة:( حطات يديها على عنقها و جراتها ) خاصني نضرب أنا معاك شي كويس .. و شوف تشوف واش نقتانع بلي كتقوليه ..!

حجيبة:( ضرباتها بشوية لراسها ) الله يمسخك

شريفة:( شافت أسية جايا عندهم .. سيفطاتلها بوسة فالهوا و قالت ) ها أسية تحكم بيناتنا .. أجي اختي قوليلي .. الرا٠جل كيصبر على النكير ؟ على العفن و الوسخ ؟ كيعطيك عذر يلا ما كانتش راشقة لك ؟ كيصبر على مرتو يلا كانت مارجة و لا واسعة مسكينة و لا فيها البرود ؟

أسية: لا

شريفة: الحمد لله ..! أغلبيتهم كيهزو خنافرهم للسما و يبدا يصوط عليك كي الثور .. فرحان بداك الوقيدة لي يكساب و يقولك أنا رااااا٠جل و هاذشي ما مسلكنيش .. آخرتوو يا كيطلقها يا كيجيب عليها المراة .. بلاصة ما يصبر معاها و يمشيوا لطبيب يقلبوو على الحل ..!

حجيبة: و لكن

أسية:( قاطعاتها ) العيالات صبارات ماشي بحالهم .. ما تقارنيش بيناتهم

شريفة:( عطاتها صبع ) شتي هذا .. هو لي غتربحيه من مور ما تصبري .. غيعطيهلك فعلبة المفاجئات تا تلقايه طالع معاك و نتي كتعيطي وا الحافيظ الله

أسية: هههههههههه كتفشليني

شريفة: العيالات كيموتوو فالدراما ديال ثبي .. علاش غنصبر لموو ؟ يلا هو بنفسوو ما غيراعيش ليا .. باغيين مراة كاملة من كلشي و كتلقايه لا شخصية لا زين لا بعر ( هزات حاجبها فحجيبة ) قزيبة حفيدك حسن من خنشوش شي وحدين ..!

أسية: و الله تا عندك الصح ههههه كلشي إلا همهم كتشدهم الصعرة

شريفة: حتى العيالات خاص تشدهم الرعدة على حقهم .. كيصبرو على الشخير و الخنز و البرود و القذف السريع و العجز ..! ما كينعسو لا ليل لا نهار كيفكرو لرجالهم فالحل و كيهضرو معاهم و هما مرعدين عنداك نقول شي كلمة نجرحوو بيها بلا ما نحس .. ايوا و نهار ربي كيطلق سراحوو كيبدلها هي لولة و كتولي تبان ليه بلدية و ماشي من سهموو .. و هو داير كي الفقمة .. زعما غير لي يجمعهم فشي زريبة و يشعل فمهم العافية ..!

حجيبة:( تنهدات بفقصة و فلخر هزات يديها طبطبات على ظهرها ) دخل تنعس .. يصبح و يفتح

شريفة: بون نعيسة ( خلاتها حتى مشات و نطقات كتشوف فأسية ) باردات القلب اتف ..!

دخلات لبيتها و اسية تابعاها تا شافتها ترمات فوق ناموسيتها كتبومبا مغمضة عينيها كتهضر

شريفة: وجدي راسك فهاذ اليوماين نطلعوو لطنجة بثلاثة بينا .. خلي يفوت غير غذا ( حلات عينيها كضحك ) موووحال ننعس بالفرحة هاذ ليلة .. كيف شتي غذا جايين فيا الخطاب ( قلبات عينيها كترفرف بشفارها )

أسية:( جلسات حداها ) كتقتليني فاش تبداي تقلبي فعينيك هههههه ها نتي كتعاوديها

شريفة:( عوجات فمها كتقلب فعينيها ) سيري تلعبي سيري ..!

أسية:( تفكرات ) و لكن انا عندي القرايا العطلة صافي سالات .. راه باقيلنا شهر عاد نكملوو ..!

شريفة:( بدا يديها النعاس و ترخى . بصوت مهدود ردات ) سيمانة ما دات ما جابت .. عندي شي شغال ضروري فطنجة خاصني نطلع نقضيه ..!

أسية: صافي واخا ( دوزات يديها على ظهرها ) عييتي ؟؟ نوض انا نخليك ترتاحي

شريفة: هزي الساروت دالبيت و طرقي موراك الباب فاش تخرجي .. عنداك تمشي تصبحي ناعسة و تخليني هنا كنبني و نريب ..!

أسية:( باستغراب هزات كتافها ) اووكي

شريفة:( حركات راسها باستهزاء كضحك غير بوحدها ) و لاهيلا قالك حيث راجل خاصنا نصبرو عليه هه ! و مالها المراة ؟

أسية: هههه ما تديش على الحاجة راه كل مرة بري ( رأي ) جديد

شريفة: المراة كتسعى عليهم ؟ ( جمعات صباعها و حطاتهم على فمها باستهم ) المراة بحال الكرموصة كلما كبرات كتولي شريحة وكتزيد تحلى أما إلى تخمرات كتولي ماحيا وأراك لنشاط و زهو هههههههههه

البطانة دغيا كتطيح و الروح فرمشة عين كتزهق .. تما عاد كترجع سخونية الراس بالبرودة .. و يا ويلك من لي زايغ بشبابوو و صحتوو .. ما كيطلع معاه الصح حتى كيلقى راسوو مشلل فالركنة و لا مرهون مور القضبان ..!

أخيييرا واحد فالجيران تحرك و دوز الاتصال للبوليس .. لي غير ردوو عليه عطاهم العنوان و عاودلهم شنوو واقع و قبل ما يقطع قال

...: راه ضر٠بوو و هرب و خرجوو تابعيينوو ما غيكونوش بعدو من هنا بزاف .. غير فالسيكتور .. لحقوو عليهم دغيا قبل ما توقع شي كارثة

جلسات مراتوو حداه مخلووعة .. حاطة يديها على حنكها و كتحسبن فنفسها

المراة: لا حول و لا قوة إلا بالله .. مشاو يتكرفسوو عليهم هاذ الليلة .. بقات فيا غير البنت لي خاشية راسها وسطهم ..!

رد عليها راجلها : و هذاك لي تقسم ليه الظهر ما شفتيهيش ؟؟ مشى يشقوو و يرزي ميمتوو فيه ..!

المراة: الله يدير فنفوسنا خير هذا ما يقول الواحد .. هاذ ولاد الوقت عندهم الذبي٠حة كيف السلام عليكم و فاش كتجي تشووف علاياش نايض الصداع كتلقى الخوى الخاوي ..!

رد عليها : الشيطان كيحضر أما جيراننا عمرنا سمعنا عيبهم و حتى الولد لاخور باين فيه ولد عائلة و مربي

المراة: أويلي راه نوضوها على الخوى الخاوي .. راه كنت مع فاطمة لتحت فاش جا داك الولد دق على R+2 لي قبالتنا .. خرج عندو صاحبوو كيتمالغوو بالضحك بيناتهم .. حتى قالوو عطيني أ خاي السنسلة دالذهب ديالي يلا كنتي ما بقيتيش واقف عليها راني باغيها .. ناض ولد جيراننا خرجهالوو مقطعة

رد عليها : نوضوها على سنسلة ؟

المراة: واايييه و الولد ما قال عيب واخا قطعهالوو قالوو أخاي نتا باك خدام عند ذهايبي مدها ليه يصاوبها .. عطيتهالك كاملة ردهالي كي عطيتهالك .. ما شفناه غير مشاد معاه كيسب و يربب علاش يجبدلوو باه و خرج الراس لكبير تزاد معاه و ضوروه بيناتهم و على ما فهمت الولد مول السنسلة يتيم مسكين

رد عليها: لا حول و لا قوة إلا بالله .. الله يلطف بينا .. الله يلطف ..!

************************

كيجري موراه فوسط الشانطي دايزين بين الطونوبيلات لي كيكلاكسونيوو عليهم و يقلبوو فالطريق .. شحال من كسيدة فلتوو منها على بونت ..!

حكيم: وووووقف الله ينعل مك وقااااف غنgبضك ( نشدك ) ن*** ك

غير قرب ليه هز رجليه و نقز ض٠ربوو لظهر .. جابوو مسرح على كرشوو و الجن٠وي تلاحت لبعييييد .. وقف كينهج شاد فكتفوو من لور لي حس بالضوو ضربوو فيه .. و لكن لي فيه ما هناه و الشمتة كطلع و تنزل معاه تحنى عندو شان٠ق عليه و دخل فيه براس

حكيم: مطرطق عليا المضى الز*** ( رخى يديه تا رخاها و سيفطها ليه للوجه و لاخور دايخ من الراس لي عطاه ) كضرب من الظهر بحال الق*** وا ضرب دابا الله ينعل الق*** دمك

ما عرفش منين بعثوو عليه حتى شدووه ربعة بيهم جارينوو من على الدري لي وجهوو ما بقاش فيه لون و الد٠٠م كيهبط كيشرشر من نيفوو

حكيم: طلقووو الز*** طلاااااااق ( كيتهز و يتحط بلاصتوو و دموو بحال البزبوز ) يلا ما حكيت لأصل مك وجهك فالأرض راني ولد الق*** ( شاف فباه لي مشى عندوو كينوضوو ) غنحو** العرووق قدام المخير فطاسيلتكم اولد الواسعة يا الز*** كتحاماو و نتوما موالفين بالز** كيضربوها للق** مكم

دفعهم عليه بالجهد حتى تفك من اليدين لي شادين فيه .. لكن وقف مكوانسي من الحريق لي طلع معاه ما قدرش يتحرك .. حدوو كيسمع لي جاو معاه هاربين منين شافوو السطافيط و جوج مواطر دالبوليس قاصدينهم .. يجمعوهم ..!

الكوميساريات دالمغرب و بالأخص د كازا فبعض السيكتورات لي معرووفين .. كتكون جامعة غير النكعة ديال المقطرين .. كدخل كيسبطك من راسك لرجليك سبان .. على أبسط حاجة .. فمهم خاسر عطارة ..!

لكن موالفين بهاذ الأجواء و كيعرفوو يتعاملوو مع ولاد الاحياء الشعبية لي بدورهم صعاب و مكيتفاهموش و ما كاين لي كيعرفلهم من غير هاذ النوع دالبوليس ..!

دخلوهم بربعة بيهم من بعد ما طرقوو حكيم لسبيطار خيطولوا الجرح لي ما كانش مغمق و لكن خسر د٠٠م بزاف و خاصو راحة باش يعوض شوية .. عطاوه كالمون يهدن ليه الحريق ..!

مع الدخلة دفع حكيم لباب و مشى تزدح فوق الكورسي بلا احم و لا دستوور .. مفرق بين رجليه مهبط راسوو شوية و عينيه هازهم فالكوميسير لي قبالتوو ..!

حاقد على الوضعية و قبل ما يهضر شي حد فيهم جبد بزطاموو حلوو و جبد بطاقة فيه معلوماتوو و تصويرتوو بزي الشرطة ..!

حكيم: تهز كنش ( كتب ) عندك فداك الق***ي د ز** لي مخلعوو ليا تما

كوميسير:( قرا السمية بصوت مرتفع ) حكيم *** ضابط شرطة ممتاز ( هز عينيه فيه و عطاه التحية واقف ) مون شاف سمحلنا جبناك هاكا واش

حكيم:( قاطعوو بغضب .. مزير على يديه من الحريق ) قتلك قيد عندك ( هز عينيه فالأب و ولدو ) التعدي على ضابط ممتاز أثناء مزاولته لعمله بالضرب و الجرح بواسطة السلاح الأبيض .. الذي كان بحوزة الجاني عليه .. مع التهديد العلني بالقتل و

الأب:( قاطعوو مخرج عينيه بخوف ) شنوو كتقول أ ولدي .. آش وصلنا لهاذشي نتوما خوت و الغيار كيوقع

حكيم:( حرك راسوو مغزف .. ما قادرش يحرك يديه و بدا كيعيى من الدم لي خسر .. ) الغيار كيوقع ؟؟ ها انا غنوري للق** مكم الحكرة آش كتسوى .. كتتملغوو نتملغوو ( نضحكو ) كاملين ( خرج عينيه فالولد ) مطرطق عليا المضى الز*** توحشتي التخوار ديال الزوافرية هانا غندخل مكم لعندهم يضربووها لك

الولد:( رد بتمرد ) حتى حنا غنقيدوو دعوة على خوك تا هو

قاطعوو كيشوف فالكوميسير لي شابع كيسان كيشوف فيهم و يطبطب على كرشوو لي خارجة قداموو بحال الموحمة كيطبل عليها و يجر واحد الموسطاج باغي يقلعوو من بلاصتوو و ربي كبير ..!

حكيم: كتب ليه الق***ي خلينا نق** بحالنا من التق*** د الز* .. الق**ينا حفيناهم مع ولاد الق** بحالك غتريكل عليا البرهوش

**********************

تعكزات فبلاصتها .. راسها تقيل و بدا كيعطيها الحريق .. تنهدات بتعب و وقفات كتمشى بالشوية لجهة الماريوو تبدل حوايجها و تلف الصداع لي شادها .. لبسات غووب قصيرة فالحمر ثوبها حريري رطيطب و بارد .. هزات البريكي كتشعل فالشميعات حتى كملاتهم و شعلات العود .. حاطاه فبلاصتوو المعتادة ..

شريفة:( طلعات معاها الريحة للأعماق .. تنهدات براحة ) الله ( طولاتها ) على ريحة ..!

تكات كتشوف فالسقف بهدوء غريب و يديها كيجبدوو فكارو واحد من البوشيط .. دارتوو ففمها و شعلاتوو كتسف الدخان للداخل و ترجع تسوط بالشوية عليها و الطفاية حاطاها جنبها .. حتى كملاتوو و طفات البونتة لخرانية لي بقات ..!

ذاتها مرخية عليها و عندها رغبة كبييرة فالنوم لكن عينيها و أعضائها عندهم رأي ثاني ..! عيات تحاول تنعس قبل من الوقت لي متعودة أنها تشرب فيه لكن ما قدراتش .. كتحس بالعروق ديالها ناشفين و خاصها ترويهم بماء الحياة .. عاد باش الحرقة لي شاعلة فيها لداخل تبرد ..!

جربات الما و والوو ..! ما كاينش لي غيبرد عطشها من غير قطرات من المشروب الكحولي .. عاضة فالصبر تال الجهد .. كتمشي و تجي فبلاصتها و العروق فراسها بداو كيتطراساو خوضر .. كيبانوو كينبضوو بالجهد .. و غير بدات ذاتها كترعد عليها جلسات فوق الناموسية الدنيا ضايرة بيها و يديها كيرجفوو قدامها .. راسها عاطيها الصداع ديال بصح و جسمها كيعطي إنذارات بالخطر .. كيتسنى فجرعتوو اليومية ..!

الوقت كيدوز ثقييل عليها و هي كي الحمقة .. عيات صابرة و وقفات غادية لكوافوز ديالها .. هزات بارفان دالقرشي د العود فتحاتلوو الفم و شربات جغمة منو .. هبطات كتحرق مع حلقها و طعم المرورة كيخنق طلع معاها ..!

رجفوو يديها تا طاحت القرعة للأرض مهرسة لأجزاء صغيييرة و حداها شريفة طايحة على ركابيها كتبكي من أعماق قلبها و بين شفايفها غير

شريفة: الله ياخذ فيك الحق

تكمشات مربعة رجليها و خاشية راسها وسط فخاذها كلها كتهز .. العروق دراسها غيطرطقوو أما ديال عينيها خلاص حوومر كي الجمر .. ما شافت النعاس وا لا ذاقتوو .. كانت ليلة كحلة عندها .. و على هاذ السبب طلبات أسية تطرق عليها لباب حيث عارفة نفسها غتغلبها و غتمشي للقراعي د إلياس تشرب منهم .. و يلا مشات حتى شربات و ضربات الكاو ما كتبقاش تكونطرولي تصرفاتها و ما كتعقلش على النص فديكشي لي دارت .. !

و هي ماشي شي وحدة لي كتشرب فالمناسبات او مرة مرة تتنغم بشي كاس .. لا .. عشر سنين و هي مصاحبة مع القرعة و الكاس .. يوميا فنفس التوقيت بطقوس خاصة بيها ..!

سبحان مغير الأحوال لي كيمسيها فشان و يصبحها فشان ثاني .. شكون يقول شريفة لي كانت ضاحكة لبارح تصبح ذابلة اليوم .. واخا مدرقة لي سيغن و الصفورية دوجهها بشوية دالمكياج .. إلا أنها كتبان عيانة ماشي على مودها .. غير عينيها لي داخلين و حومر يعطييو للواحد الخبار ..!

جالسة فالجردة كتكمي كاروها مدوزاه بكاس دالقهوة على الريق .. غير كملاتو .. دخلات جلسات حدا الحاجة و أسية فوق الطبلة .. كيتسناو إلياس و نجاة باش يفطرو مجموعين

حجيبة: صبحتي عيانة فطري و طلعي لبيتك ارتاحي لك ا بنتي

شريفة: ماشي مشكل غير خليني متلفة معاكم ( زفرات بالجهد ) غنبقاو نتسناو سيادتهم تال لين .. ما عندنا شغال ؟

مدات يديها هزات بغريرة كتاكل فيها بالشوووية غير كملاتها بدات كتعيط على سهام .. وحدة من البنات لي كيعاونوو فالفيلا ..!

سهام:( خرجات عندها كتمسح فيديها ) نعام أ لالة ؟؟

شريفة: دوليبران و شي كاس دالما معاك الله يستر عليك ( حطات يديها على نواظرها كتزير عليهم ) راسي غيتقسم عليا

نجاة:( هبطات مع كلامها .. جلسات فوق الفراش مقابلة معاها ) ما يكون عندك باس أحبيبة .. عطي الراحة لراسك شوية و غيتهدن عليك .. هاذيك غير الصعرة لي راكباك

شريفة: صبحنا على الله و ملائكة الرحمان ( هزات عينيها فيها مكرهة ) وا حضي معايا لا نمشي نعضك ..!

حجيبة: فطرو باركة من الهضرة الخاوية ( شافت فنجاة ) فين هو إلياس

نجاة:( بنص عين فشريفة ) خليتوو كيدوش شوية و يجي .. صبح رااااشقة ليه أ خالتوو على الله ما يخسرش ليه المود بمسبة شي ناس

شريفة:( واخا الشقيقة شاداها .. لي فيها ما مهنيها ) منين كيفتح عينيه على موكة راه ما يخلعوش بلارج أحبيبة غير هناي على حبيب القلب ( طلعات فيها و هبطات ) و نتي بالسلامة ما عليك حالة حمام .. هابطة لنا بجنابتك

نجاة: لهلا يحييك

حجيبة:( ضربات فوق الطبلة ) مونيكة أنا قدامكم هنا ؟؟ ما بقيتوو تحتارموو حد .. لا كبير لا صغير ..!

شريفة:( مدات يديها لسهام خدات من عندها الدوا ) أراي أختي لهنا أراي

إلياس: السلاااام عليكم

ردو عليه السلام من غير شريفة لي قالبة وجهها من جهتوو و ما فيها ما يتعاطى معاه تا هو على الصباح .. فطرو فهدوء و غير كمل مسح فموو و ناض

إلياس: شريفة تبعيني بغيتك ( مشى )

شريفة:( هزات راسها باستغراب و ناضت تبعاتوو لجهة لباب فين واقف ) هانا شنوو ؟

إلياس:( قرب منها حاط يديه على حنكها ) مالك ؟ عيانة ؟

شريفة: غير ما ناعساش مزيان ( ضحكات باستهزاء ) أما نتا تبارك الله صابح منور

إلياس: علاش ما ناعساش ؟ مالك ؟ ( هز حاجبوو ) يلا على نجاة راه هضرت معاها

شريفة:( تبسمات بملامح هادئة .. كتهضر مثقلة ) ما صبرتش على بعادك أ كبيدة .. فراشي بلا بيك بااارد .. بت كنتقلب غير بوحدي و نعيط وين راح الغالي ( خنزرات فيه ) طلقني للمفيد و براكة من التبهلة و سريق العواد لي يشوفك ليوم ما يقولش هذا هو نفسوو إلياس دالبارح

إلياس:( تنهد ) خلينا هانيين .. غنخرج نجيبلك التيليفون لي بغيتي و لاكارط .. تمشي تختاري بيديك ؟

شريفة:( حركات راسها بالنفي ) تء ما فياش .. مشهية الشوا و الدوارة سيفط عبد الله يجيبهالنا نطيبوها

إلياس:( تبسم ) تآمري .. و قادولنا شي جلسة دايزها الكلام فالجردة

نجاة:( لحقات عليهم كتعوج و تحنات على حنك إلياس باستوو ) حبيبة صافي غتمشي ؟

إلياس:( بعد شوية و رد ) اه .. ما غنتعطلش شي ساعة دالمكانة و هانا معاكم ( شاف فشريفة ) السخرة شوية و توصلك .. تهلاي

نجاة: شمن سخرة ؟

إلياس: شي بركة دالشوا و الكرشة حتى توجدوهم

نجاة: امم ( شافت فظفارها ) و لكن أنا أحبيبة كاع ما عندي مع هاذشي .. ظفاري غيخسرو ( تبسمات بصفورية ) غير تكلفي نتي .. فيك الخير و البركة ..!

شريفة: ما غنتسناكش تقوليلي شنوو ندير و شنوو لا .. نقصي شوية من التبعكيك الخاوي .. تنفختي كي البابور بقالك شوية و طرطقي غير بسمك

نجاة:( بحزن ردات ) مي نوو .. علاش كتعاملي معايا هاكا .. خلينا ننساو لي فات و نبداو من جديد ا شريفة كنبقاو صحابات ..

شريفة:( ميقات فيها ) بعدي مني الله يرحم جدك .. ما فايقالكش من النعاس ( شافت فإلياس ) سيفط لي قتلك مع عبد الله دغيا .. شغالي قادة بيه ( هزات حاجبها فنجاة ) المرا لي ما تهز ماتحط في دارها مانساوموهاش في سوق النسا .. دوزي بخير أ ألكساندرا لاروسا ..!

بعيدا على مدينة اليوسفية .. و بالضبط فمدينة الدار البيضاء .. من بعد ليلة طويلة عريضة تختمات بخزيت و حلف حكيم ما يتنازل على الدعوة واخا تنطابق الأرض مع السما .. طلقووه رجع لدارو عكس الولد الثاني لي ضيفوه عندهم حتى يتقدم عند وكيل الملك و دوز القضية فالمحكمة ..!

هابط من العمارة مسكسف على الحالة واخا اللون فوجهوو مغاير على العادة بسبب الد٠٠م لي خسر لبارح .. لابس كاط فرجليه مع سروال بارا دالعسكر و تيشورط كحل سامبل من فوقو جاكيطة خفيفة ..!

حبيبة:( واقفة كتسناه تحت العمارة بجلابة جبلية مخزنية فالكحل و الشعر عريان مقطع قصير صابغاه بالاكاجو .. مقادة الفيترينة على حقها و طريقها ..! ) صباح الخير و الرباح .. عاد دابا ؟

حكيم:( تحنى باسلها راسها و يديها ) صباح الخير يمَّا .. نتحركوو ؟

حبيبة:( شداتلوو وجهو كتشوف فيه ) مالك صفر اويلي ؟ ( قاستلوو نيفوو داير عليه سبادرا صغيرة .. تخلعات شادة على قلبها ) ضاربتي ا حكيم ياك .. بغيتي تهبطلي النقطة ياك أ ولدي ..!

حكيم:( بعد وجهوو ) وايلي أ يمَّا ؟ غير طرينيت لبارح مع الدراري فلاصال ما تهزي هم مالنا دراري صغار ..!

حبيبة:( ضرباتوو لكتفوو من لور تا عض على فموو و وجهوو تزير ) على نتوما همكم كيتسالى ؟ غير كتكبرو و هو كيكبر معاكم .. ما نهنى حتى نمشي لبليصتي

حكيم: وا خلينا من هاذ اللغى لي كيشد النفس على النبوري أ الواليدة الله يحفضك ( جبد تيليفونوو كيقلب فيه ) ضورتي ليا ؟؟

حبيبة: لبارح فليل ما قدرت لا ننعس لا نشوفوا و زدتي عليا ما كتجاوبش .. حتى عيط عليا خليل علمني راه بايت معاك و برد قلبي من جهتك .. تيليفونك ديما يبقى فجيبك الله يرضي عليك دنيا و آخرة

حرك راسوو بهدوء و زاد سابقها حل لوطوو و ركبوو منطالقين فإتجاه سكورة فين كاينين عائلة مراتوو كريمة .. زاد مع الطريق .. عين مع الحديد و عين فتيليفونو حتى دوز الخط

حكيم:( بثقالة ) شارجييو السلعة و تيسروو فطريقكم .. غذا نفكوو علينا هاذ المنامة

قطع و شاف فموو كيتبسم قبل ما يشعل البلوتوت طالق اغنية من الأغاني لي كيعجبووه .. غادي كيدندن معاها و موو كتعوج ففمها

حكيم: يا جيبولي الممنوعات و زيدولي البيرات .. يا راها غايضتني .. يا روحو رونجوها من بلعباس جيبوها

حبيبة:( رشقاتوو للظهر حتى ضربوو الضوو ) ما عرفت آش كيعجبكم فهاذ زبايلوو كتفسدو غير فمكم بيه

حكيم:( عض على لسانوو ) وا مرات بوويا ... هضري بلسانك و جمعي يديك خلينا طرونكيل هاذ الساعة ( ضحك و كمل غناه ) يا عمري نافزتني .. جيبولي السوسية .. عمري و حبيبتي يا راني نسكر على جالها ..!

دخلات للكوزينة كتجبد فالقوام لي غتحتاج كامل .. و فنفس الوقت كتتعاود مع البنات لي كيعاونوو فالفيلا .. عندهم عزيزة و حتى هي ما كتنساهمش نهائيا ... ديما مهلية فيهم واخا مرة مرة كتقلب ليها البرادة و كتسوط فكلشي ...!

شريفة: نخرج نجلس برا على ما يجيبوو السخرة و نرجع .. توحشت نرون و نخربق حتى نطلع الحاجة

سهام: بلعكس أ لالة طيابك متقوون و يديك فيهم البنة النهار لكبير فاش كتدخلي و تحطيلنا من دوك الصبيعات شي طاجين دايزو الكلام

شريفة:( ضحكات و قالت ) راه واخا تكوني شكون ما بغيتي .. و تقراي حتى تطيبي .. و يكونو عندك

20 خدامة ... خاصك تعرفي دارك علاش قايمة .. راحنا عيالات ماشي زوافرية و تا الزوافرية ديال هاذ الوقت كيعرفوو يطيبوو عشاهم و يسدو جوعهم كاع ما فايقين لنا من النعاس ..!

سهام: عندك الصح أ لالة

شريفة: ايوا الله يخلينا فصباغتنا .. هاكا كبرنا و تربينا .. كاملين غير دراوش قدام باب الله .. ما كاين فرق بيني و بينك و بين لوخرى بوالو .. و فلخر كل وحدة و مغرفتها آش هزاتلها ..!

حليمة:( البنت الثانية ) الله يكبر بيك ا لالة و يخليك ديما الفوق الفوق

شريفة: ههه الله يحفضكم الفنون .. يالاه انا نمشي و وجدو معاكم الجردة نخرجوو الفاخر و المجمر لتما نجلسوو نشوييو .. غير الدوارة لي نقوموها هنا

نجاة:( دخلات كتنحنح ) البنات ما ديروش الزيت البلدية فالدوارة ما كناكلهاش و نقيوها مزيان عنداكم تخليو فيها شي وسخة .. ديرولها دوليبران و خرجوها كتلمع ما باغيين تسمم

شريفة:( فقصاتها هاذ الصباح بالتبعكيك الخاوي ) نجاة حبيبة يلا نتوما وصلتوو للكرشة بريستيج .. حنا دراوش و ماكلتنا درويشة بحالنا غضسروها علينا تولي تنفخ و تبغي نعام أ لالة تا هي لوز إيفيلي و المهرمش .. لكريم شونتيي والمعسلات والمكسرات و نوليوو نجريوو نقلبوو على طبسيل طاوس الحر فين نحطو تلقامنا .. بغيتي شي عجب عري على ذرعانك تا وحدو فيهم ما مسالية للفشوش الخاوي ديالك

ضربات فيها .. الكتف مع الكتف و خرجات مخلياهم كيديرو لي قالت لهم .. و فالبلاصة تبعاتها حتى نجاة هازة نيوفها للسما ما راضياش .. غير فاتت العتبة تكرشخوو بالضحك

سهام: عطاااااتها ههههههه

حليمة: شتي وجهها كي تلون ويلي ويلي ههههه الشوهة قالك حيدو الزيت بلدية ..!

سهام: كتحمقني شريفة يا ختي و كتموت المسخوطة على الضحك و النشاط واخا تكون واصلة لها لجذر

حليمة: كنعيشوو بعدا معاها .. و داك الجلسة و شحال كتفتح النفس .. غير قولها و ضحك عليها و ريحة دالشوا كتقلب الدنيا

سهام: توحشنا الصراحة داك الجو دالضحك لي كان .. قتلنا الهم و الغم .. واخا الفرح فالدار .. كل نهار نايضة القيامة .. عويينة و طرطقات فيهم الله يلطف

جالسين فصالون مفرش بتلامط الخريبة .. الزرابي مطلوقين فالحمر كيشقشقوو .. الثرية كبيرة د الكريسطال كتلمع فالسقف .. الطبالي منقوشين باليد و الخشب صامت و باين فيه من النوع المزيان .. غالبا غيكون دالأرز .. الحاصول النقى و التاويل باين من باب الدار ..!

متكي حكيم كيسرح عينيه بهدووء و حبيبة جالسة حداه حشمانة من عائلة كريمة .. الأب متقي .. من وجهوو كتبان الطيبوبة و القلب الكبير .. و الأم كأي مراة مغربية كتفرش لبنتها فين تحط رجليها .. عاطياهم اللسان الحلوو .. كترحب و تعاود .. حتى تسمع صوت الذقان فالباب

الأم:( بابتسامة ) سمحوولي نشوف شكون .. مرحبا بيكم

الأب: اييوا ا ولدي كي داير مع العمل و المشاغيل .. خدمتكم صعيييبة الله يعينكم عليها

حكيم:( نحنح و رد ) ها حنا أ با الحاج كنسلكوو .. الله يحفضك العزيز

مع سكتوو تموو داخلين خمسة دالرجال بجلالب دالحبة فالبيض .. الوقار و الحكمة كتنبع من وجههم لي مزين باللحى ..! رماو السلام على حبيبة بالفم لي غرقات فبلاصتها من الشعر المعري و التعكيرة لي ضاربة .. و الباقي مدولهم يديهم سلموو عليهم و جلسوو مقابلين معاهم كيسألوو على الحال و الأحوال .. حتى نحنح واحد فيهم و قال

.....1 : سي حكيم جيت أنا و الإخوة ديالي ندخلوو بخيط بيض بينك و بين الزوجة الفاضلة يلا ما كانش فالموضوع إزعاج و قلة أصل و صواب

.....2: إن أبغض الحلال عند الله الطلاق أولدي .. و خصوصا يلا كانوو جامعين بيناتكم وليدات .. راه المال و البنون زينة الحياة الدنيا .. و نهار يدخلوو على حياتكم غينوروها و يحلوو مشاكيل كبيرة كي الجبل .. غير بضحكة منهم

....1: سي العثماني علمنا بالندم الشديد دالإبنة ديالوو أولدي و الحالة السيئة لي وصلات ليها .. مشات فطريق الظلالة و من حقك تاخذ موقف و تعاقبها

الأم: شوف بعين الرحمة فداك الترابي لي غيتزاد يلقى الشمل مشتت بيناتكم .. بنادم كيخطى

....3: و خير الخطائين الثوابون أولدي .. هو غير يلا جا عندك الضيف و كنتي صائم صيام أجر و فطرتي على وجهوو باش تحسسوا بالراحة تخليه ياخذ حريتوو فالتصرف و الأكل .. عندك بدل الأجر أجرين .. فما بالك تحسن فوجه هاذ البنت و هاذ الواليدين لي قلبهم محروق تا هما

حبيبة:( حنات راسها كتتنهد ) لا حول و لا قوة إلا بالله

حكيم:( شاف فنسيبتوو كيتنهد ) راها الداخل ؟ بغيت نهضر معاها بوحدنا

الأم: الدار داركم أولدي عاد كتسول ؟ تحرك كيما بغيتي راها فبيتها جالسة

وقف كيقاد فسروالوو غادي فإتجاه بيت مراتوو كريمة .. فتح البواني و دخل ساد الباب موراه .. واقف مربع يديه كيشوف فيها و هي حانية راسها .. شعرها طويل دايرة ليه ليميش مزعراه .. غليضة شوية و وافية .. لابسة جلابة إيفازي .. ملامحها زعرين .. حجبان كثاف و عينين ملونين فالخضر ضاير بيهم خط كحل مبين لونهم واضح وضوح الشمس ..!

حكيم: كتحشمي و لا ؟؟ ( سكت كيتسناها تهز راسها تهضر لكن بقات ساكتة ) مزيان هاذشي .. مخير كاااع أ كريمة

هزات راسها فيه كتبكي ما قادراش تشوف فيه .. واخا ما غوت ما قال تا كلمة دالعيب .. لكن هضرتوو حفرات فقلبها حفيير .. حسات بذنب كبييير و خوف و رهبة لي من ديما كتحسهم إتجاهوو واخا مشاركين نفس الفراش .. إلا أنها ما زاعماش عليه بزاف

حكيم:( قرب منها جرها من شعرها تا طلعات عندو شادة فيديه ) علاش كدمعي عليا الله ينعل عدوو ر** ؟؟ ( هز يديه كيهد بيها ) نديرلك علاش تبكي دالفغي ( دبصح )

كريمة:( شداتلوو يديه جراتها باستها و حطات حنكها عليها ) دير فيا لي بغيتي غير ما تخلينيش أنا و ولدي .. الله يستر عليك ا حكيم .. الشيطان كيحضر و عمرها تتعاود

حكيم:( جرها و بنرفزة رد ) راه غنهرس للق*** مك وجهك هاذ التمسكين دالز** ديريه على قرانك ( ضورلها وجهها عندو شادها من ذقنها بجوج صباع )

كريمة: حكيم

حكيم: جلسي على قاعك فداركم أ كريمة و جمعي كرك معايا راه دود و كيقلب على لي يخوروو .. نعرف مك مشيتي لشي حبس بلابز عينيك نجبدهملك .. عطي لديكشي لي فكرشك الراحة توقعلوو شي حاجة ذنوبك على كرك ( طلقها و تم خارج .. تا فتح الباب و رجع ضار عندها ) نرجع من السفر و نريحوو فشي قنت نريgلوو ( نساويو و لا نقادوو ) أمورنا

************************

نجاة:( خرجات من الكوزينة دموعها مغرغرين فعينيها جلسات قدام حجيبة و قالت ) علاش أخالتي حتى حد ما كيحملني فهاذ الفيلا .. ما عاطيينيش قيمة .. كلشي كيفضل وحدة على الثانية ..!

حجيبة:( تنهدات و ردات ) وحدة سنين و هي معانا ماشي بحال وحدة جديدة يالاه قالت بسم الله .. شريفة حارة لا فشخصيتها لا فتاويلها و كيفاش كتصرف لا فطيابها و نقاواتها

نجاة: و أنا

حجيبة: و نتي باش ديري بلاصتك خليك مزيانة معاها .. بعدي من طريقها ما تجبدي معاها صداع ما تعمري راسك بيها .. ما تسرعيش ففعايلك و ما تخليهاش تستفزك و تلعب عليك .. هاكا غادي تضري غير نتي .. صلحي علاقتك مع راجلك راك باقى فلول دالزواج جريه عندك بالحلاوة و اللسان الرطب .. الكلام الحلوو كيشافي القلوب ..

نجاة: واخا أ خالتي

حجيبة: و هانتوما غتسافرو الراس فالراس .. تقربي منوو و هزي فحجرك شي ترابي تفرحيه و تفرحينا بيه ... و غير تدوز السبعيام و تجي لهنا ندير لبنتي حنينة و نحزم ليك .. على مولانا ربي يحن علينا و عليك

شريفة:( خرجات من بعد ما كانت كتصنت مركنة فواحد الجنب .. تبسمات ببرود و قالت ) ماما حجيبة ؟ كتعلمي فضرتي كي دير تجر راجلي ليها ياك .. حماة ما منكش جوج الصراحة .. هه ..!

حجيبة:( تسمرات ) لا أبنتي ماشي هكاك

شريفة:( وجهات نظرها لنجاة ) سعداتك دخلتي عليهم كاملين فرحانين بيك و كيفرشولك الورد ما كرهوش يسقيوك بالحليب و الزهر .. ماشي بحالي تقول ديتلهم ولي العهد .. ما كاين غير الحروب و الدق من تحت الطبلة .. و لكن أ ماما حجيبة نسيتي واحد الحاجة مهمة

حجيبة:( تزنكات كدور فعينيها )

شريفة: بعدا ما سميتك ماما حتى راك لفعة بحالها .. تقول غير مقرصة على يديها و ذايقة من سمها و قباحتها .. هي لفعة من لفاعي لكبار و نتي لفيفيعة

حجيبة:( غوتات ) لعنة الله و عليك .. قدي قدك تهضري معايا هاكا ؟؟ ما وقرتي حتى لي تحت التراب

شريفة:( ضحكات ) بصح عندك الحق .. ماشي قدي قدك باش نتعاطى مع شيبة عاصية بقاتلها خطوة للقبر و نيت تعلمي تحتارميهم راه ما بقالك واالوو و تشركي معاهم التراب ..!

حجيبة:( وقفات كترعد ) قليلة الترابي

شريفة:( ضحكات باستهزاء و قالت ماشية بحالها ) و الله ما نجاوبك .. لي فيك كاااافيييك

خلاتهم و طلعات لبيتها الفوق .. تكات على كرشها مغمضة عينيها .. حاسة بالعيى و كتدعي فسرها تديها عينيها واخا غير غميضة .. أما لتحت جرات نجاة حماتها كتهدن فيها خارجين لظهر الفيلا فين مفرشين الحصاير و المخاذ و حاطين المجمر و كاع لي يقدو يحتاجوو ..!

نجاة: بردي أ خالتي و ما تفقصيش راسك .. صحتك هي لولة ا حبيبتي ..

حجيبة:( الفقصة كتاكل فيها ) غير بلاتي يجي إلياس و يتوالاها الحم٠ارة لوخرى

و فالباب دالفيلا واقف عمر هاز بلاطوو دالحلوة مشكلة فيديه .. صونا فلانطيرفون تا خرجات عندو سهام حلات ليه الباب ..

سهام: أهلا اخويا كي داير بخير ؟؟ دخل بحالك للصالون أنا نكلم لك لالة نجاة

عمر:( دخلاتوو لجهة الصالون و قبل ما تطلع للفوق تقلب عليها كان وقفها بابتسامة ) ماشي مشكل غير شوفي شغالك أنا نطلع عندها نهضر معاها ( كمل بتوضيح ) راها عارفاني جاي

سهام: واخا لي بغيتي مرحبا بيك

خلاها حتى مشات و طلع فالدروج بالزربة مرعود غير بوحدوو .. خايف شي حد يشوفوا و توقع شي كارثة .. ما وصل لبيت شريفة حتى ربي غفرليه الذنوب .. شد الباب بالجهد كينهج .. كيشوف فيها ناعسة على كرشها عاطياه بالجنب و باينة فيها كانت داخلة فنعسة حلوة و مع الزدحة فاقت مخلووعة .. غير شافتوو طلقاتها بغوتة وحدة

شريفة: وااااااااااااااااا

ما بغاتش تسكت تا نقز عندها فووق الناموسية باغي يشدلها فمها ..! فنفس الوقت كان إلياس كيحل فالباب واقفة حداه سهام و حليمة كيمدلهم السخرة .. غير سمع الغوتة غمض عينيه بنفاذ صبر

إلياس: ما غنرتاحووش حنا .. معامن هاذي شابكاها ثاني ؟؟

سهام:( ردات بسهو ) راه عمر خوو نجاة جا و طلع عندها للفوق .. يمكن غلط فالبيت و دخل على لالة شريفة ؟؟

خرجات عينيها من بعد ما عاقت بشنوو قالت و شافتوو رمى كولشي و طلع فالدروج كيطير حل البيت بجهالة .. لقاه متكي فوق الناموسية وجهوو حمر كيحاول يسكتها و هي كضرب فيه و تنتف ..!

شريفة: بعععععععد مني بعااااااااد

في صمت راجعين بحالهم لكازا .. حكيم لي طبيعتوو هاذيك .. كيعجبوو يكون بوحدوو و حتى يلا جلس معاك ما يشبعكش هضرة نهائيا .. عكس حبيبة لي اجتماعية و فينما مشات كتدير بلاصتها و يبغيوها الناس ..!

حبيبة:( وقفها حدا الدار .. تنهدات و قالت ) نزل طلع تغذا معانا المرضي ( طبطبات على يديه ) و منها نهضر مع الحبيب شوية

رد بصوتوو المدعدع لي كيخلع كاع لي كيكونوا مقابلين معاه فاش كيبدا يسب و يربب مخرج فعينيه و كيحرك فيديه بثقالة بحركات مخسرة ..! لكن مع موو حديث ثاني .. كيحاول يقنعها و يتحاور معاها غير بالخاطر و السياسة .. علاش لا و هي عينيه باش كيشوف و بلاصتها ما تعمرها حتى وحدة كيفما كانت تكون ..!

حكيم:( تكسل حاط يديه على الكوسان ديالها من لور ) مشغول أ يمَّا غنطرق حسام " صاحبوو " و نضربوو للولاية و من تم غنشد الطريق يالاه نوصل

حبيبة: وا ما تنساش راسك بلا ماكلة راني كنعرفك ( فتحات ساكها جبدات ليه لاكارط ) هاك المرضي .. الله يفتح ليك بيبان الخير .. فينما حطيتي رجليك ربي يسهل عليك و يحط ولاد الحلال فطريقك

حكيم:( جرلها راسها باسوو و رد ) أمييين أ يمَّا ..!

حبيبة: و سمع مني أولدي يلا كنت عندك عزيزة .. رجع مراتك يلا ماشي عليها على ود الترابي لي فكرشها .. جمعوو شملكم و ما تخليوش داك الولد و لا البنت يجييو يلقاو غير الشتات ( جراتلوو يديه بغات تبوسها و خطفها )

حكيم: وايلي أ يمَّا ( هز حاجبوو ) ريحي من الزعيق ( تحنى باسلها يديها و هي كترضي عليه ) جري عليا نمشي لشغالي .. نرجع من السفر و نهضرو

حبيبة: سير الله يسهل عليك و يوصلك على خير

شيرات لوو و طلعات لدارها كتتنهد .. أما هو غير شافها دخلات كسيرا فطريقوو

***************

كريمة:( لابسة صابوو فرجليها و جلابة دالكاشمير فالقهوي باهثة شوية بكثرة التصبين .. مضورة شال على راسها و واقفة فباب العمارة هي و وحدة من معارفها ) ويلي يا صاحبتي .. نتي باقى تشاوري ياو ؟؟ تي راه قوتلك الشريف دقتوو ما تنوضش العجاج

.....: كنخاف يا ختي نعطي فلوسي و فلخر ما يصدق ليا والوو

كريمة: وا تي راه كنقولك على حسابي .. ها بوركابي ديالي شهر و الزيادة و هو لايحني مكيسولش كاع و غير مشيت خدمتلوو و شعلتلو الشمع .. شعلات فيه العافية تا لقيتوو جاي كيجري .. واخا النفخة هي النفخة و لكن باقي نضربلو ضربة صحيحة ما يكعدش منها الراس .. كواريه نطيحهم ..!

.....: وا صافي .. هي نعول و نجي عندك تمشي معايا .. نتي بعدا راجلك داخل سوق راسوو كيتي أنا لي ما خلى حتى وحدة ما تبعها

كريمة: الخط د عبد العالي واعر و كيجيب ديكشي لاسق .. ضربي الخط شوفي واش ملوية لك عليه شي عقروشة و جيبي الخرقة دصباحك يخدملك بيها ثقفي موو ما يبقى يلقى فين يفش النبولة من غيرك و عاد تحزميلوو و دوزي للصح

دخلوو جوج رجال مع باب العمارة .. دايزين من حداهم حاذرين عينيهم .. غير غبرو ضحكات و قالت

كريمة: ويلي يا مك و يشوفني واقفة هاذ الوقفة هنا حتى يخرا عليا هههههههههه كيبغي يموووت فاش يشوفني مقادة و خارجة .. جاب الله راني عند مي أما كن وصلوها ليه سخونة و جا يشوهني

....: و علاه مالك آش كديري كاع ؟؟

كريمة: كيغير عليااا ههههه

....: موكلاه تقاشرك أبنت العثماني

الباطل ما كاين ما سهل منوو .. و الإنسان بطبيعتوو عينيه كيتعماو فاش كيوصل لأقصى درجات الغضب .. ما كيبقى يفرق لا بين الصح لا بين الكذوب و التمثيل .. هاذشي غير فمواقف عادية .. فما بالك يلا كان الموضوع لي نايضة عليه القيامة هي شرف الزوج .. أكيد ما كيبقى لا تفاهم لا احترام ..!

شريفة: بععععععد مني بعااااااد

دخل عليهم جاهل .. غير شافوو فوق الناموسية طالع فوق منها كيحاول يسكتها و هي كتغوت لربي لي خلقها و كتضرب فيه بيديها و رجليها .. زاد جهل .. ما خلاش الفرصة لعمر لي وقف مقدم يديه كيحاول يشرح ليه بهدوء .... قصدو نيشان جرو و عطاه بكلاك لوجهوو حتى تزنك

عمر: ما تفهمش غلط ا سي إلياس خليني نشرحلك

البرود ديالوو ما كيزيد غير يستفزوو جرو من عنقوو دفعوو على الكوافوز حاك ليه وجهوو مع كاع لي محطوط تما .. كيغوت صاعر .. عقلوو باغي يخرج من بلاصتوو ..!

إلياس: مرااااتي اولد الق*** !!! وصلتي لمرااتي و طالع فووق منها .. دووز عليهاا نتا نيت ( كيترعد و عقلوو ما تابتش هز فاز و بكاع جهدو هبط عليه بيه للراس تا د٠٠ماياتوو بدات كتشرشر ) شكدير فووق مرااتي اولد الكلبة

عمر:( بلسان متلعتم نطق و راسوو دايخ من الضربة .. كيحس بشي حاجة سخوونة هابطة معاه ) كيفاش مراتك ؟ مراتك ..!؟

ضربوو للحنك حتى عض على لسانوو بالجهد .. مع ذلك ما هزش يديه عليه مخليه كيضرب فيه .. الصدمة فشلاتوو .. ما بقى فهم والوو .. حدوو كيقولوا كيفاش مراتك و كيجيه كلاك لوجهوو كيسكتوو فالبلاصة ..!

سهام:( مشات كتولول لجردة عند حجيبة و نجاة لي بدورهم سمعوو الصداع .. ما عرفوو باش تبلاو ) لالة لالة عتقي اليوم طيح الروح .. خوك دخل على لالة شريفة لبيتها و سي إلياس طلع عندهم صاعر

مع كملات تسمع صوت تهراس دالشرجم و بدا الزاج كيطيح طراف صغار لعندهم .. شي لي خلاهم ينوضووا طافجين كيجريوو فداك الدروج .. نجاة سمحات فحماتها و طلعات كطير و حجيبة راه بزز كتحرك بالركابي و زادت الخلعة فشلاتها .. شادة فيها غير سهام معاوناها .. طالعين و كيسمعوو فالغوات د إلياس و د نجاة لي دخلات بيناتهم كتفرق ..!

نجاة: إلياس طلق منوو طلق غتق٠تلووو طلق

شريفة:( واقفة فالجنب كتبكي .. مشات بالشوية شداتلوو فيديه و جراتوو معافرة معاه تا طلق منوو و فالبلاصة ترمات فصدرو كتشهق ) العرس كامل و هو كيدور بيا .. خرج فيا ما مرة ما جوج و كيبغي يشدني بزز و كنهربلوو خايفة يشوفنا شي حد و نتفهموو غلط .. قلت ليه أنا مراة مزوجة و ما قالنيش عليه ( شهقات ) ما بغيتش نعلمك و يزيد يكبر الصداع فالفيلا كثر ما هو كبير .. ما سحابليش توصل بيه يدخل عليا تال بيتي و يتهجم عليا هء

سكتات كتبكي و تشوف بنص عين فعمر لي ما قادرش يهضر و لا يتحرك .. الصدمة شللاتوو كثر من العصا لي خدا من عند إلياس ..! حتى باش يحل فموو و يقول لا ها لي كاين و لي كاين .. ما قدرش .. تقول تصمك تا هربو ليه الحروف من فموو ..!

نجاة:( طلقات من خوها و غوتات ) نتي لي يعلم الله شنوو درتييلوو و دابا كتبيني البراءة .. حرام عليك بقالك غير خويا باغى ترزيني فيه .. غير نتي ما تكسابيهمش خاصك كلشي يكون بحالك .. مريضة فمخك

سهام: لا .! لالة شريفة طلعات ترتاح و أنا لي حليت لخوك لباب و قلت ليه بالحرف تسنى هنا نكلم لك لالة نجاة .. قالي راه عارف بيتك و باغي يهضر معاك و نتي فخبارك راه جاي كتسنايه

شريفة:( حلات فمها بصدمة ) متافقة معاه ؟؟ نتي لي مسيفطاهلي أ نجاة ياك ؟ ما كفاكش لي درتي الق** تال دابا ؟ و لكن شنو غنقولك ؟ غير زبل و تطلينا بيه و كتحلي ففمك من الفوق .. الله يخلصك.. الله يخلصك ( حسات بإلياس كيبعدها و هي تزير عليه ) خليه صافي ما توسخش يديك فيه .. و لي كيحفرلي شي حفرة إن شاء الله ما يطيح فيها غير هو

إلياس:( هز صبعوو فنجاة كيترعد بالأعصاب ) تعاودي تجبديها على فمك سنانك نهرسهم لك ( بالغوات ) آخر مرة شي واحد من عائلتك يعتب على باب الفيلا و انا ما كاينش ( طلق من شريفة بغضب ) و لا عرفتي شنو ؟ كاين و لا ما كاينش تا حد ما يوصلني لهنا .. بغيتيهم سيري عندهم .. سالينا

شريفة:( ضحكات بتشفي )

نجاة:( شافتها و قربات منهم ) كضحكي ؟؟ هاذشي علاياش كتقلبي ياك ؟ راك واعرة ؟ باغى تيتميني و واليديا باقيين فالحياة .. الواليدين لي ما تكسابيهمش نتي .. و لكن معذورهم خلاوك موراهم و زادو بحالهم .. تهناو من موسخة بحالك

حجيبة:( من قبيلة و هي ساكتة مصدومة من لي واقع غير سمعاتها شنوو قالت غوتات ) نجااااااااة

ما حسوو غير بيه هز يديه و عطاها تسرفيقة قلبات ليها الوجه تا فقدات التوازن و تضربات مع الحيط لي موراها .. و فالبلاصة طار عمر شنق عليه

عمر: زدتي فيه بزاااااف من الصباح و حنا صابرين لك و نتا طالع للسمى ياك لباس ؟؟؟ مرتك لي جبداتني و هي لي عيطات عليا و جراتني لبيتها

نجاة:( شادة فحنكها كتبكي ) فعوط ما تضربني شوف الحية لي مربيها فحجرك .. خويا ما يقربش لها يلا ما عطاتوو هي الفرصة و فتحات ليه الباب بيديها ..!

إلياس:( نفض يديه بالجهد و دفع عمر من عليه .. قلب وجهوو جهة شريفة بنظرات سوداوية قرات فيهم الشر ) شريفة ..!

شريفة:( شافت فيه كترمش بعينيها تا بدات كتحطهم حجر دالدموع و بصوت باكي ردات ) كتشك فيا ياك .. دغيا قلبوك عليا أ بو وذينة ( ضرباتوو لصدرو ) وا سير تمووت .. راه هو لي داخل عليا لقلب بيتي .. ياكما انا لي ركبتوو فوق ظهري من الجايحة الكحلة لي كان فيها و جبتوا تال عندي مطلعاه فوقي ..! و فين أنا بقيت بوحدي باش نشوفو و لا نهضر معاه من الاصل

عمر:( غوت صاعر ) ما تحماقيش عليا شهاد التخربيق .. نتي عطيتيني نمرتك و غير البارح هضرتي معايا فالتيليفون و قلتيلي أجي عندي .. و جاي عوال نخطبك من عمك كنلقاه راجلك .. آش هاذ التخرويض ؟؟

شريفة:( ردات ببرود كتمسح فعينيها ) نتا راك زنزان شوية لا ؟ فين أنا كنعرفك أخويا باش نهضر معاك و لا تهضر معايا .. و داك التيليفون لي عيطتلك فيه ياكما جابوهلي الجنون ( شافت فإلياس ) ياك تهرس ليلة دالعرس و تا لاكارط مشات .. كي غندير نهضر ؟؟

عمر: ما تحمقينيش بفمك قلتيلي أجي خطبني من عمي

شريفة: غتخليه كيطلع فيا و يهبط ما غتكركبش الزبل بحالوو ( خرجات عينيها ) بحال يلا ما كتعرفنيش زعما ؟؟ هاذشي لي بقالي غير نمشي عند شي قمقوم و نقولوو أجي خطبني .. مالي شايطة و لا شايطة

حجيبة: ولدي سير بدل ساعة باخرى .. غير شي سوء تفاهم واقع بيناتكم .. دابا كلشي شاعل .. خليو غير تبردو و صفييو القلوب

شريفة:( شافت فعمر بنرفزة ) ما تحطش عليا الباطل ا سيدي .. يلا نتا و ختك طابخينها بيناتكم ما تجيوش تلعبوها عليا .. واخا نكون مكلخة ما نقولك بوجهي أجي خطبني من راجلي و لا غير حصلتي باغي تقلب عليا القفة .. ياك لباس نكبرو مها تصغار ؟؟

إلياس:( بغضب ) حسب الدروج و عمرني نعاود نشووف كمارتك فهاذ القنت ( لنجاة ) بغيتي خووك تبعييه ..!

بقات تابثة فبلاصتها حانية راسها من نظرات خوها لي كيبينوو أنها خيبات ظنوو بزااف .. مشى بحالوو صاعر و مرعد غير بوحدو من الشمتة لي تشمتها و حجيبة من موراه كتبرد يلا لقات ما تبرد ..!

إلياس: و نتوما أ ريا و سكينة ( جرهم بجوج من وذنيهم ) نعاود نسمع حس صداعكم ما تلوموو غير راسكم .. فضييوا عليا من هاذ البلانات الخاوية ( طلقهم )

شريفة:( ردات بنبرة حزن ) ما عرفت شكون كيدير هاذ البلانات أنا و لا نتوما .. فينما نضور نلقاها كضحك عليا هي و امها و خوتها .. مكيخلييو ما يقولوا فيا و زايدة كتعاير فيا قدامك .. مرة ملقطة مرة موسخة و واليديك تهناو منك ( حنات راسها كتشهق و ذاتها كترعد بالبكى ) زيد ضربني على ودها هاذشي لي بقى

إلياس:( تنهد بحزن .. عارفها محسوسة من هاذ الموضوع .. يالاه قرب يشد فيها و هي تبعد ) شريفة هداي

شريفة:( كتمسح فعينيها و تشمر بنيفها ) بعد مني ( هزات عينيها فنجاة ) دابا تذوقي من نفس الكاس .. شحال ما بقيتي غتشربي من المرار لي كيذوقوا اليتيم ( ضربات على صدرها ) الحرقة لي كتشعل فقلبك و عمرها تبرد .. نهار على نهار كتزيد تحمى و تقتلك كثر من لي قبلوو .. ساعتها ما غنتشمتش فيك حيث ( زيرات على فمها شادة عينيها و الدموع كيحرقوو فعينيها نازلين خط فحناكها ) حيث ما نتمناها لحتى حد واخا لعدوي .. دابا تجربي ..!

رجعات كتزرب بلور حتى دخلات لبيتها و زدحات عليها الباب الجهد مطرقاه و فالبلاصة تسمع صوت التهراس

إلياس:( كيدق بالجهد فالباب مخلوع عليها )

إلياس:( كيدق بالجهد فالباب مخلوع عليها ) شريفة حلي الباب نهضر معاك ( ضرب برجلوو ) حلي الخراا ما تصعرينيش

شريفة:( تسمع صوتها من لداخل ) وا سير تق*** بعدوووو مني و لا و الله تا نقتل راسي أ إلياس ( كتنهج ) بعد مني

إلياس: صافي .. غنمشي بحالي حتى تتهدني و نهضرو ( شاف فنجاة بتخنزيرة ) تبعيني نتي

سكتات كتنهج .. بين وذنيها ضحك الدراري الصغار فالمدرسة .. كينعتوو فيها بالصبعان و يعايروها باخبث الصفات ..! وقفات بالشوية حلات الماريو ديالها .. تعلات و جبدات واحد البوكس دالخشب ..!

فتحاتوو كان فيه دفتر ذكريات قدييييم .. تصاور ديالها و هي صغيرة لكن ما واضحينش مزيان .. مشققين بخيوط بويض .. تبسمات و هي كتجبد براسلي دالجلد فالقهوي مضفور و فيه جوج خطوط فالجناب محفور فيهم إسم حكيم .. تنهدات بقوة كتدوز صبعها على الإسم

شريفة:( تبسمات ببراءة طالعة معاها التزنيكة ديال البكى ) يعلم الله فين شديتيها حتى نتا

رجعات بيها الذاكرة لنهار عطاها البراسلي و هضرتوو باقى عاقلة عليها حرف بحرف كلمة بكلمة كأنوو يالاه قالها لها ليووم ..!

حكيم: خلي هاذي عندك تفكريني بيها .. ما غنخليكش .. غنرجع موراك ا شريفة .. و وعد الحر دين عليه .. صبري .. صبري و كوني قوية ..!

تنهدات و رجعاتوو للبوكس .. تا تحطات يديها على تصويرة أمها .. كبيرة .. شافت فيها مطولا و دمعة وحيدة هبطاتلها مع حنكها كتفكر آخر مرة شافتها فيها ..!

"فلاش باك"

جالسة مع إلياس فالطونوبيل .. مزنكة و قلبها كيضرب بالجهد .. يديها عرقوو عليها كل شوية كتمسح فيهم بزعفة ... حاسة بالهوا كيوصلها ثقييييل ..!

مخنوقة و متوترة .. بعد سنييين غتتلاقى بكبيرة .. هاذ الخطوة لي ما كانتش ساهلة عليها و هي فعمر 23 سنة .. لولا إلياس لي كان واقف جنبها و مساندها معنويا ..!

وقفات سيدة قدام الطونوبيل .. باين من ملامح وجهها .. بلي الزمان حرثها .. حتى شرفات قبل من وقتها .. شافت فيها شريفة و رمشات بالشوية ذاتها كتغزل عليها .. بقات مدة عاد فتحات لباب و نزلات مكالية بيه .. غير بغات تعنقها بعدات و قالت

شريفة: هانا جيت .. شنوو بغيتي ؟؟

كبيرة:( كتشوف فيها بلهفة .. بنتها لي ما بقاتش شافتها منين و هي صغيرة ولات دابا مراة تبارك الله .. تتلاقى معاها فالزنقة ما تعرفهاش ..! رجفوو شفايفها و ردات ) سمحيلي أبنتي .. أنا مزاوكة لما سمحيلي ( قربات منها بخطوة ) خليني غير نعنقك و نشم ريحتك قبل ما نموت

شريفة:( بعدات هازة صبعها فوجهها صوتها مقجوج ) ما تقربيش مني .. أنا مكنعرفكش .. شكون نتي ؟؟

كبيرة:( ردات بحزن ) ما يكونش قلبك قاسح على مك أ بنتي .. سمحيلي و بردي ناري من جهتك نبوسلك رجليك شوفي فيا لوجه الله

شريفة:( ضحكات .. ضحكة مقهورة ) أنا ماما دفنتها فالتراب سنين هاذي ... فين كنتي فاش كنت محتاجاك و كنبكي ليل و نهار على ودك ؟؟ فين كنتي فاش كنت كناكل الحجر و نوسد الكودرون ديال الطريق و كلشي طامع فلحم بنتك .. فين كنتي فاش ترميت فالحبس و ما لقيت تا لي يعنقني و يقولي أنا معاك ( مسحات دموعها بزعفة ) علاش كتقلبي عليا دابا شنوو باغى من موسخة بحالي ؟؟ و لا دابا نقاوني الفلوس ؟؟

كبيرة:( طاحت على رجليها كتبكي من أعماق قلبها ) ندمت ندمت حتى عضيت فالتراب .. وجه الله لما سمحيلي ( هزات عينيها فيها ) ما بقيت نشوف النعاس وا لا نراه .. خالك لاحني لزنقة و

شريفة:( قاطعاتها ) لاش كتعاوديلي خبيرك ؟؟ يلا طامعة فشي حاجة مني غير نساي .. قلبي من جهتك مات .. و يلا لاحك لزنقة الخيريات كاينين غير هما

إلياس:( نزل قرب منها و شد فيها مزير عليها ) شريفة

شريفة:( شافت فيها بقلب مقهور ) من نهار عقلت على راسي و أنا يتيمة .. وسدت العتبة و الركبة و أنا باقيين سناني سنان الحليب .. ما هزيتينيش فصغري ما تسنايش مني نهزك فكبرك .. سيري قدام شي جامع راك تبقاي فيهم .. يصوروك و يدخلوك لشي خيرية ياخذو فيك أجر

عوجات طريقها تا بعدات من جهتها و ركبات فبلاصتها .. دارت نظاظرها و قلبات وجهها لجنب مخلي إلياس كيهضر معاها حتى كملوو حديثهم و طلع زاد مع الطريق

إلياس: قصحتي معاها

شريفة: خرجني من هنا .. كنتخنق فهاذ المدينة .. عمري كنت كنقول غنرجع لها شي نهار ( نطقات بسهو ) أكادير

إلياس: غنهضر مع واحد الجمعية يتكلفوو بيها

شريفة: دير لي عجبك .. ما سوقيش أنا فهاذشي .. يمَّا ماتت من زمان .. ما باغى نشوفها ولا حتى نعرف عليها شي حاجة ..!

"عودة"

شريفة:( تنهدات بالجهد و ناضت فإتجاه الدوش غسلات وجهها مزيان حتى بردات و نشفاتوو خارجة من البيت ) حرمتوو عليا الشوا يا ولاد الك٠لاب بغيتوو يوقف لكم فالركابي يا القوم المجواع .. تفوو تابعينك تا على طرف دالكبدة ما يخليوكش تسرطوو فخاطرك

دازت من جهة الكوزينة بانتلها نجاة واقفة فلافابوو هازة الدوارة بجوج صبعان كتنقي فيها و هي معيبة وجهها و لسانها ما سكتش من النكير .. ضحكها منظرها و بلا عكز عليها مشات عندها ترميلها جوج كلمات ..!

شريفة:( بصوت حماسي ) عنداااك عندااك غتعاااضك .. تلقايك فداركم كتاكليه بخراها و هنا دايرة لنا فيها أميرة زوجي ( هبطات شنافتها بدلع ) امم ..! نتي من صحابات زوجي خد بيدي إلى الجنة ..!

نجاة: الصمت

شريفة:( قربات منها و بصوت هادئ مسموع ليهم غير بجوج ) شفتي ريحة هاذي لي فيديك ما توصلش لريحة الدل لي كنشم فيك .. يمكن كنتي فواحد الوقت صاحبتي و لكن راك ما كتعرفيني حتى قد هاكا ( دارتلها حركة بصباعها كتعني شوية ) ما بقى وااالوو و نلقاك طايحة تحت رجلي كتبكي بالندامة .. باغى غير الفكاك .. و تما غنتحاسبوو على فعايلك كاملين .. شريتيها معايا بالنوار و تسناي الدقة ما تعرفيها منين نزلات عليك

نجاة:( شافت فيها بوجه حمر ) شريفة خليني عليك

شريفة:( بعدات و باستهزاء ردات ) ديريلها دوليبران و ما تنسايش ضربيلها دوا دالجربة هههههه

خرجات للجردة كتسرح فعينيها .. بانولها جالسين فوق الحصيرة غير شافوها تبسموو معاها بحال حتى حاجة ما كاينة لا إلياس لا حجيبة

إلياس: ها الشوا لي بغيتيه وا فرجينا ( شير بعينيه ) فاش تكملي سيري لبيرو غتلقاي واحد الساشية هزيها بصحتك

شريفة: الله يعطيك الصحة

حجيبة: و بداي تجمعي فحوايجك لي تدي معاك .. غذا ان شاء الله نقبطوو الطريق

إلياس:( مدلها الكونطاكط ) ها هو خليه عندك و بالشوية عليك فالطريق .. بلا داك الطيران ديالك

شريفة:( خذاتوو و ردات ) و باش غنصرف ؟

إلياس: لي احتاجيتيها غتلقايها عند الحاجة .. غنعطيها المصروف كامل ..!

شريفة: ها نتا غتبدا طلع ليا عيشة قنديشة لراس .. تخليني انا و تعطيها هي ( بصوت خافت ) نبقى نجبد منها الدرهم بحال يلا كنجر اليه ٠٠٠٠٠& ودي يسلم .. وايلي ا صاحبي ؟؟

إلياس:( سكت )

شريفة: عرفتي شنوو يجيك مليح ؟؟ مناقص ( حلاتلو يديه حطاتلوو الكونطاكط فوسط كفوو ) ما بقيتش مسافرة .. فلوسك و زبلك زيدهم فيك .. مالي أنا كنسعاك ؟؟

إلياس:( شدها ) وا صافي دابا مالك دغيا كتقلبي علينا ؟ غير كنهضرو ما كندابزوش

شريفة: وا شوف راسك شكدير .. عيقتي عليا لا نتا لا داك زبيلوو ديالك ..!

إلياس:( ضحك و رد ) شحال خاصك دابا ؟؟ 5000 درهم كافية ؟.

شريفة:( خرجات عينيها ) و منيين ؟؟ نخسرها فنهارها و نجلس الله كريم .. راه غنكري دار كاملة و خاصني نصرف و نجيب شنوو نحتاجوو عاد المازوط و فلوس لي غيسطوغون و القهاوي و زيد و زيد .. القليلة واحد المليون و شوف تشوف

إلياس:( تنهد ) واخا جاتك .. بلاتي و طلعي للمكتب هزي الساشي ديالك و حلي الخزنة هزي شحال خاصك

شريفة:( تبسمات بدلع ) يخليك ليلي

إلياس:( شاف فموو لي ملهية كتزلك فالقطبان و قرب منها ) شنوو زعما ما توحشتينيش امم ؟ علاش أنا كنديرلك خاطرك و نتي لا ؟

شريفة:( نيمات عينيها فيه و دوزات على لحيتوو ) شنوو بغيتي أ حبيبة ؟؟ ( قربات منوو بحال ف

غتبوسوو و رجعات بعدات ) تء تء .. غير بلا ما تحلم ( حطات يديها على صدرو و دفعاتوو ) نتا لي خليتيني و مشيتي لعند الوسخ .. و ما تفكرش حتى فأحلامك بلي غنخليك تقيسني من مور ما درتي زبلك فعفنها ( دوزات بصبعها على شنافتها التحتانية ) كنعيف ا حبيبة جوسوي ديزولي

سيفطاتلوو بوسة فالهوا و وقفات كتنفض يديها

شريفة: سير عند نجاة بالفرحات عليها .. أما أنا كنا و كنتوو و صرنا و صرتوو .. نمشي نهز الفلوس لي قلتي و التيليفون و نرجع على ما يزند الفاخر ..!

مشات من قداموو بحال الفراشة و هو متبعها و كيحك فكرشوو و يتنهد .. طلعات ديريكت للمكتب .. خلات الساشي و مشات للخزنة حلاتها كتحسب فالرزامي دالفلوس لقات مليون و نص بالحساب .. هزاتها و يالاه جات تشد الخزنة و هي تخرج عينيها .. ما متيقاش شنوو كتشوف ..!

ما فهماتش واش لعبة جديدة منوو و لا بسهوة و بلا ما يعيق حط داك الورقة تما .. هزاتها بين يديها كتقرا فيها و غير كملات ضحكات ضحكة وااااسعة .. لي سرعان ما جمعاتها فاش سمعات الباب موراها تدفع و دخل منوو إلياس كيسوط تقول كان كيجري

بعد المرات كتكون الدقة واصلة فينا حتال لعظم .. كاع البيبان مشدودين فوجهنا .. كنبغيوا غير شق صغير يخرج منوو النور و يدخل البهجة لقلوبنا ..! نحسوو بلي شحال ما بقى ظلام ليل و لا بد غيجي واحد النهار تشرق فيه الشمش ..!

كندعيوا و نتمناو من كل قلبنا .. حتى ربي كيسخر فطريقنا شي حد بحال درهم لحلال .. كيسرلنا شحال من حاجة و يفتحلنا بواب هما بلا ما نكونوا ضاربين لحساب ..!

نفس الشيئ وقع مع شريفة لي طلعات للمكتب ناوية تهز الفلوس و التيليفون و تمشي بحالها حتى بانتلها ورقة صغيرة محطوطة غير حدا يديها فالجنب .. هزاتها كتقرا فيها و سرعان ما تبسمات و ملامحها تبهجوو .. الورقة لي عبارة عن شيك بقيمة 50 مليون .. فيه الإمضاء ديال الياس و إسموو لكن بدون صاحب .. يعني ما كاتبوو لحتى حد ..!

فتح الباب كينهج تقول كان كيجري فالدروج .. شاف فيها عاطياه بالظهر كتضور فعينيها مكمشة الشيك بين يديها .. تا سمعاتوو قال

إلياس: هزيتي الفلوس ؟ مديلي معاك واحد الشيك كان تما و شدي الخزنة يالاه نتغذاو قبل ما يبرد ديكشي

شريفة:( رفرفات بشفارها و تقلبات جهتوو هازة الشيك فيديها باين ) ياك ا لولوسة .. عندك خمسين مليون غا مليوحة كتشاير و معيشني فالميزيرية و القحط ..!

إلياس: أراي لهنا من البسالة ديكشي د ماليه ( هز حاجبوو ) و فين عمرك حليتي فمك على شي حاجة و ما جبتهاش تال بين يديك ؟؟

شريفة: و المشروع لي قتلك فين هوو ؟؟ ضربتي الطم عليه .. باغي تنسيني فيه باش ديرلي خاوية فعامرة ؟ راني حافضاك و شارباك ما أ مولا داري ..!

إلياس: الله يهديك من الهضرة الخاوية .. منين ندير دابا نعطيك راس المال و نشووفوا فين غتوصلي كاع .. يسحابلك غتطفريه ؟؟ راه غير صداع الراس جلسي بحالك فالفيلا و قابليني أنا و دارك .. آش ناقصك ؟؟

شريفة: راه غنتقيى لك على كمارتك بسبة هاذ الهضرة لي كتغيلف .. أنا باغى الحريق و نتا شنوو مشالك يلا راسي أنا تشقق ؟

إلياس:( قرب منها ياخذ الشيك و بالزربة رداتوو مور ظهرها ) كنقلب على راحتك .. و أراي داك الشيك لهنا ما غنبقاش نلعب أنا وياك ..!

شريفة: قالك شيك د ماليه .. انا لوح ليا التفرتيت و مولات الحسن و الجمال خسر عليها الملاين صحيحة .. و طالع كتطير ؟ باز يا خوويا غير كتكون الحاجة فيها الفلوس كيرجعوو فيك عشرة ..!

إلياس: الله يهديك شمن خسران ( غلباتوو الضحكة ) هههههه عارف يديك كياكلوك و غتمشي تهزيه و دفعيه فالبانكة و الكونط عندي خاوي .. غنصدقوو داخلين معاك فشيك بدون رصيد و تزوير و فكها يا من وحلتيها داك الساعة ..!

شريفة:( تبسمات و قربات منوو كتلعب بصباعها فصدرو ) عطيهلي على ود المشروع و ما ندفعوو حتى تعمر الكونط .. شنوو قلتي ؟

إلياس:( طلع حواجبوو للسما كيعيبها ) تء .. غير بلا ما تحلمي نخليهلك أ حبيبة .. نهار تعولي و نلقاو المحل نمشييوا ديريكت نتكاتبوو معاهم .. دابا طلقيه لهنا ..!

شريفة:( رمشات عينيها و عقلها كيدي و يجيب .. تا ضحكات ضحكة صفرة و قالت ) علاه ما قتلكش أ لولوسة ؟؟

إلياس: هههه لا حول و لا قوة إلا بالله .. شنوو ثاني ؟؟

شريفة: واااا لقييييت المحل و هضرت مع مولاتوو و تفاهمنا بيناتنا .. كنت كنتسنى غير نهضر معاك و نقولها لك ..!

إلياس:( شاف فيها داك الشوفة ديال واش من نيتك ؟ ) شريفة ...!

شريفة: نعام أ حبيبة ؟

إلياس: باش هضرتي مع مولاتوو ؟؟ و فين شفتيها نتي أصلا ؟؟

شريفة: هاء ( ضربات فجبهتها ) بدا يقيسني الزميمر أ كبيدة ديالي .. نسييييت ما قتلك .. كيف شفتي أنا ؟

إلياس: ايييه ؟

شريفة: فاش مشيت نجيب نظاظر ديالي .. لقيت تما واحد السيدة خدامة فمراكش .. قاتلك عندها واحد المحل تجري فيه الخيل .. على الشارع مشمش و الغادي و الجاي عليه .. يعني فييه الرواج .. غير هي ساكنة هنا فاليوسفية و جاتها بعيدة كل نهار تضربها بساعتين و نص ديال الطريق عاد توصل .. بغات تبيعوو و تحل شي حاجة غير هنا ..!

إلياس:( دايها على قد عقلها ) اييه هي جاتها عادية و نتي أ عزري الدوار ؟

شريفة:( ضحكات بغنج ) ههه دابا أنا كاملة عزري ؟ باز لكمارتك ما كتقشرش .. علاه فين أنا كنخرج و لا كنشوفوا ؟ بقى غير نشدها سمطة كل نهار ..! غندير لي يقابل الشغل و فينما نكونوا مساليين نمشيوا نوقفوا عليهم .. شنوو قلتي ؟؟

إلياس:( مسح على لحيتوو ) واش كتهضري بصح ؟؟ ( بقات غير كتشوف ) هاذ البلانات الخاوية ديالك ما بانليش فيهم .. خلينا دابا هانيين حتى نرجعوو من السفر و يحن الله ..!

شريفة:( تسيفات ) ايييه أ راجلي العزيز .. قولي هاذشي هاااكااا و أنا كي الهبيلة دايرة فيك راسي .. حلقي نشف و أنا كنقنع فمولاي السلطان .. نهضر و نعطي لقلبي ..و نتا داير بلانك بوووحدك ..قول داك الفلوس مخبعهم على ود نجاة ياك .. غادي تطبهم نتا و ياها و تجي تال عند شريفة مسكينة و هز يديك لسما قلها الله كريم ..!

إلياس: باركة من التخربيق ديالك راك ما دوزيهاش عليا ..!

شريفة:( مصات شنافتها و ردات ) اييه دابا وليت غير كنخربق ؟؟ و هضرتي زايدة ناقصة .. جات لي جمعات و طواتلك ؟ ما بقيتش نبان لك كاع ؟ هضرتي ولات مسوسة ياك .. هه و لاهيلا هذا هو لي قالك بلاصتي عمرها تزعزع و عمرو يفرط فيا .. و هو تقلب بين ليلة و نهار ..!

إلياس: صدعتيني على بالك ؟؟ طلقي الشيك لهنا .. باركة من الأفلام ( هز حاجبوو ) الكذاب كيقضي عليه النصاب يلا ما كنتيش عارفاها ها هي فبالك ...!

شريفة:( حطاتلوو الشيك بزعفة فيديه و قالت ) ولينا فالمعايرة كاع و لاهيلا زوينة هاذي .. الله يجازيك بالخير اسيدي .. و مالي عليها كاع ؟ يلا ما عطيتيش نتا يعطيني سيدك و بلا تجرجير كاع يا ربي غير نحل فمي ..!

إلياس:( خرج عينيه فيها و جرها من ذراعها بالجهد لجهتوو .. عاطيها وذنوو ) عاودي عاودي نسمع ؟

شريفة:( كمشات فمها فيه ) غير نتوما لي تعرفوو تقتلونا و تردونا زحفانين فالركنة .. طالقينها على الصاحبة ؟ حتى انا يا غنقتلك يا غنردك محابسي و رافعة عليك الطلاق و نمشي نزها مع راسي ..!

إلياس:( غوت ) شرييييفة غنهرس لمك فمك .. كتسمعي فراسك آش كتقولي ؟؟؟

شريفة: نتا لي ما بغيتيش ديرلي المشروع .. نمشي نضبر على لي يديرولي و يفكني منك من الفوق .. يسحابلك غير حيث أنا نية و مسكينة غتديرني تحت السباط ؟

إلياس:( ما عرف يضحك و لا يغوت ) واااش نتي مريضة باغاني نقت٠٠لك عاد ترتاحي ؟؟؟ و شكووون لي نية بعدا ؟؟؟؟

شريفة: ايييه دابا أنا مريضة ؟؟ وا زيد عمر الدفتار عليك نتحاسبوو فلخر

إلياس:( دفعها ) غنضربك ا شريفة بالله تا غنهرسلك فمك سيري بحالك حسن لك

شريفة: أنا اصلا حمااارة لي جالسة كندي و نجيب معاك فالهضرة .. مثالك ما يليق لهم غير التنخال .. ييخ تفوو

زادت بحالها تا بغات تخرج و رجعات ضارت عندوو

شريفة: خليك نتا مع داك بنت الحرام .. دابا تولد لك ولي العهد مولاي الحسن هه ..! و أنا شحال ما بقيت غنمشي نجيب راجل لي يح***نا بجووج .. أنا و ياك .. يا كيتك يا خلاك يا الحيماري بزاف على مك الرج٠لة .. كن عرفك باك غتخرج هاكا كن مسحك فالمانطة و هنى البشرية من لي بحالك ..!

غير قالت كلامها و شافتو لاح الشيك للأرض .. خوا يديه غيطير عليها بلا وجهوو لي تلون بالاحمر .. و هي تحل لباب و عطات رجليها للريح تا شدات عليها بيتها كتنهج و تتعاطى معاه من الباب

إلياس: غتحلي هاذ الباب و لا غنهرسوو لمك على راسك .. حلللللللي

شريفة: ايييوا يلا سميتك راجل و مزغرتة عليك حجيبة هرسوو و دخل عندي نتشاموو أنا و ياك الكراسن يا الشارف الهارف .. يا لي كتجبدوو بفنيتة و فرحان بيه .. ( باستهزاء ) داير مخك فوحدة قد بنتك .. ما ناقصك خير و لكن أنا لي خاصني عقل لي صابرة على شقفة بحالك ..!

إلياس:( كيترعد بوحدو ) يا الله حلي الباب تشووفي حلان الفم بشحال كيتقام و لا كتعرفي ضربي غير من لوور و تهربي ..!

شريفة:( ردات بتسميم ) هانا نجيبلك لي يضربها لمك تا يخرجوو عينيك .. شتي نتا ؟ ما ناقصك واالووو خاصك غير لي يح***ك ( طلقاتها بضحكة عالية ) شلى ترامي أ مولاي التهامي

يالاه كيجي يجاوبها كيتسمع الصداع و الهضرة فالفيلا لتحت و صوت الحاجة حجيبة كتهضر

حجيبة: علاش بغييتووه أولدي ؟؟ راه كاين شي خطأ .. آش دار ا ولدي ؟

شريفة:( سكتات كطلل و تسمع في حين إلياس هبط يفهم شنوو كاين من بعد ما تحلف عليها )

الضابط: كاينة شكاية فحق سي إلياس .. كلميه لينا الحاجة

إلياس:( خرج عندهم للباب ) ياك لباس ؟ معاك إلياس ****

الضابط: تفضل معانا .. فالكوميسارية تعرف شنوو كاين

شريفة:( تسمع صوتها من البالكون كتهضر ) أ شاف غير ديوه أنا راه طرالي العجب ما طحتوش عليه من شحال هاذي .. راه واحد الشلاهبي منوو ما كان .. أنا نقولك ..! ما يكون غير قا٠٠تل شي واحد و دافنوو فالجردة لور .. راه شوية زانزان و كيدير الزبلة ما كيحسش بيها حتى كيفوت الفوت .. الله يعز المخزن .. دييو موو يتربى بلسكايري لي حطوو ..!

الضابط:( شاد الضحكة بزز ) شكوني نتي ؟

شريفة: مراتوو حاشاك

🍻 طاح الليل 🍻

التبزنيز بحر و العوامة فيه قلال .. ماشي كلشي كيعرف يسلك راسوو .. كاين لي داخلها غير جبهة حتى كيلقى راسوو بين ليلة و نهار بين القضبان .. و كاين لي حل عينيه فكتامة لقى كولشي خاشي كعوو فالدومين و تقا٠تل معاهم حتى شد الحرفة حتى هو ..المهم تتعدد الأسباب و النتيجة وحدة ..!

فمدينة طنجة .. لي كتعتابر بوابة لأوروبا حلم كل الشباب ..! و بالضبط فميناء طنجة المتوسط .. واقف صف من الطونوبيلات .. الطريق مبلووكي و البوليس كيسلكوهم بالشوية باش يطبعوو لباسبوور فالديوانة ..!

و من جهة الثانية واقف حكيم بلباس سلك الشرطة الرمادي و الشارات مزينين كتافوو .. نظراتوو جدية و ملامحوو هادئة و غامضة فنفس الوقت .. كيشوف فالبوليس لي منتاشرين فالمكان و حاضيين معاه كأنهم كيتسناو غير إشارة منوو ..!

بعد مدة ليست بهينة .. الظلام طاح و صوت البحر كيتسمع مجهد منين كيتضرب مع الحجر .. الكلاب كينبحوو و الشاحنات واقفين كيتقلبوو فالديوانة .. بالمواس كيتقطعوو الكراطن و يجبدو قلبهم بجهالة .. و لي شيان بوليس كيشمشموو تحت إضاءة لي بيل دالمخازنية ..!

دازت الشاحنة لولة و تشدات الثانية .. و هاذ المرة حكيم لي تقدم من بعد ما غمز صحابوو و حرك راسوو إتجاههم ..!

حكيم:( ضوا على السائق بالبيل و قال ) نزل عندي ( من بعد ما هبط كيشوف فيه قال ) الوراق أ جمي ..!

مدهم ليه .. كيقرا فيهم حتى كمل و هز لاكارط ناسييونال ديال السائق دوزها فواحد الآلة طلعوو ليه كاع المعلومات الشخصية د حامل البطاقة ..!

ل RF ID بحال كارط مير صغيرة كتكون فكاع لي كارط ناسيونال .. كيتخزنوو فيها المعلومات الخاصة د حامل البطاقة .. بمجرد ما كتسكانيها فأحد الأجهزة الأمنية .. كيطلع لك كل ما كيتعلق بيه من اسموو حتال البصمات ديالوو ..!

باقي كيقرا و يحرك فراسوو بهدووء كيسمع للسائق لي كيخبر عليه .. حتى هز واحد من المخازنية دلاحة تال لسمى و فركعها مع الأرض .. تقسمات و بانوو سشيات صغار فيهم مادة فالأبيض .. هي نفسها ما يطلق عليها الذهب الأخضر .. كتامية .. مخذر الشيرا ..!

🍻 فمدينة الدار البيضاء 🍻

دار صغيرة كلها مجيرة و بنيها راشي .. فيها جوج بيووت و كوزينة مفتوحة على كلشي .. جالسة فيها مراة غليضة شوية .. عندها حقها من زين .. عاقدة شعرها بزيف حياتي و كتسمع لراجلها لي متكي فالبيت مربع رجليه و قداموو طبلة صغيرة ..!

حاط وراق بوويض كيقسم فيهم و بواطة صغيرة فيها مادة سائلة فالقهوي .. بحال الصلصال غير هي جارية .. كيفزك فيها المورصو دالخشب لي بارضوو بحال القلم ..!

كريمة: ا خويا عبد العالي انا جيت عندك و متااايبة الله يخليلك الوليدات .. راني حرت مع داك الراجل .. شعلت الشمع لي عطيتيني و فزكت الحجاب فالما دسيدي علي و بيتوو جوج ليلات و لكن ما عندي كي نعطيه يشربوو جا لدارنا ما كلا ما شرب حاضي سواريه ..! هزلي الخط شوفلي واش غيرجعني الله يستر عليك ..!

كالعادة التليفزيون المغربي حاضر و بقوة فبحال هاذ المواقف .. فساحة خاوية مستف الحشيش بلي سطووك .. مكتوب على الكاغيط رقم 59 و من فوقهم بطاقات فاللون الأصفر و حرف D بالأسود .. ضايرين بيهم المخابراتيين لي هازين فيديهم سلاح رشاش و مغطيين وجههم .. كيبان فيهم غير العينين ..!

الشاحنات لي كانوو محملين بالمخذر مقابلين معاهم .. و أصحاب الشاحنة مشدودين هما و كاع لي فحوزتهم .. و طونوبيلات صغار دالبوليس و الصحافة معمرين الدنيا كيصورو ..!

واقف حكيم بتكلظيمتوو المعتادة .. واحد من الصحفيين شاد ليه الميكرو و كامرة مان فجنبوو كيسجلوو كلاموو صوت و صورة .. و موراه كميات من الحشيش كتحرق ..!

حكيم:( بصوت قوي و جدي ) هاذ العملية تأتي فإطار المجهودات المتواصلة لي كتقوم بيها مصالح الأمن على مستوى ولاية أمن طنجة .. و كذلك فالسياق العام المتعلق بالعمليات المتعددة لي كتقوم بها كذلك المديرية العامة للأمن الوطني .. بغرض الحد من جميع الجرائم و كذلك التخصيص من ظاهرة التجارة فالمخذرات ..!

دازت الكاميرة لواحد من مصالح الأمن لي فتح ساشي دمخذر الشيرا كيبينوو للكامرة و موراها رجعات الأنظار لحكيم و الدخان لي كيقلب موراه

حكيم: و بناءا على معلومات تم التوصل بها من مصالح المديرية العامة لمراقبة التراب الوطني تؤكد أن أحد الأشخاص يعمل على نقل كمية من مخذر الشيرا قادما من أحد مدن اسبانيا باتجاه مدينة الدار البيضاء مرورا بمدينة طنجة .. و بأن هذه الكمية معدة للنقل الدولي .. بناءا على هاذ المعلومة و استغلالها و مؤازرة من عناصر الدرك الملكي .. تم وضع خطة لإيقاف المعني بالأمر لي كان بالرفقة ديالوو شخص آخر يعمل على مساعدته فهاذ العملية .. تم وضعهم تحت الحراسة النظرية .. بالنسبة للكمية المحجوزة تنهاز طن و 100 كيلوغرام .. الأبحاث و التحريات راها مسترسلة بغرض ايقاف هاذ الشبكة ..!

بعد مدة كانوو الصحفيين رجعوو ادراجهم و الخبر غيتبث حصري و فظهيرة الغذ فالاذاعات المغربية .. أما فالساحة كان حذيث ثاني واقف حكيم مع صحاب الشاحنة

حكيم: سلعتكم فوتها لكم .. هزو الق***ي ديالكم و تحركوو من هنا الدراري غيوصلوو معاكم حتى لبليصة ..!

....: ما عندنا مناش نخافوو أخاي .. على حسابك ؟

حكيم: ما عند الق** دمهم ما ينيطوو منكم " يدييو او ياخذو منكم " بلا فريع دالكر باركة هاذ الق***ي لي شاعل مورايا .. قلب لأصل منا البرادة

....: ذواقتك توصل تال عندك فكازا ا با حكيم .. و تضويرتكم راها تحطات فوق الطبلة .. ما تسالونا ما نسالوكم

حكيم:( سلم عليه ) توكل بحالك و مرة اخرى ما تزربوناش بهاذ الفعايل دز** ( ضار عند واحد من المخازنية لي حاضرين قال ) شعل فالق*** العافية

فالتبزنيز كاين قانون واضح معروف عند كلشي .. حتى حد ما كيتشد إلا يلا كانوو مشكميين بيه .. فهاذ الحالة عندك معارف صحاح غتخرج بحال الشعرة من العجين و تدي معاك سلعتك من بعد ما يدوز البروطوكول العادي على أنظار الجميع .. يا ايما غير مكيد و غتدخل تدوزها حبس مع خوتك .. نتا و معامن غطيح ..!

حتى البوليس كيخافوو على راسهم .. و الكمية لي كتحرق و تبان فالتلفازة قليلة بزاف .. ما يقدروش يغامرو و يحرقولهم السلعة و هما عارفين و متأكدين دوك الناس ما عندهم ما يخسرو .. تدويزة وحدة من الوذن لوذن للمسؤول و ها هو رد حقوو بيديه و دخل يدوز المؤبد مع صحابو و حبابوو و طااالعة ليه ..!

غالبا فبحال هاذ المواقف كيكونوو موجدين الحوالة لي كيمشييوا فالرجلين عوض الريوس الكبار .. و لي أكيد كتكون التضحية برضاهم و مخلصين على كل نهار كيدوزوه محبوسين ..!

شعلات العافية فالمكان بعد دقائق من موور ما خرجوو الشاحنات .. تعيط على البومبيا و رجال الإطفاء .. مصرحين بلي بخطأ تشدات العافية فكمية المخذر كاملة حتى بقى كولشي رماد .. و لحسن الحظ حتى حد من المصلحة الأمنية ما تصاب بأذى ..! ضامسين القضية بيناتهم و تضويرة صحيحة رابحينها من لافير .. لي كتكون مرة فشحاااااال ..!

سايكة شريفة وحداها أسية و لور الحاجة حجيبة .. طايرين فالطريق و صوت الموسيقى مطلووق على جهدها ..!

أسية:( شافت فيها بدهشة ) نقصي السرعة باغى تقتلينا ؟

شريفة: ماشية غير بالمية و عشرين يلا مشيت نقصت لسبعين ما غنوصلوو لطنجة العالية يا الحبيبة دئلبي من هنا 7 دالسوايع .. اتسوكيهم نتي ؟؟ طرمتي غتدخل غير بكثرة الجلاس ..!

أسية: عليها لابسة لك الجلابة و الصندالة و جايا بهاء التشعكيكة ( لعباتلها فشعرها لي مخلياه قصير مبوكل شوية على طبيعتوو )

شريفة: يالاه نرتاح فالطريق

حجيبة: واش ابنتي متأكدة قالك ولدي الأمور هانية و غير شدوو الطريق ..!

شريفة: وايلي أماما حجيبة ضاربين 3 دالسوايع دالطريق و باقى كتسولي .. راه عيط و هضر معايا .. ما بغاكش تجلسي تتفقصي بوحدك فهاذ ليل ..!

حجيبة: و شكون ديكلارا بيه ولدي مسكين ما كيجبد حد و داخل سووق راسوو

شريفة:( ردات بتهكم ) امم بقوة لي ما كيبغي صداع كيمشي غير مع الحيط مسيكين ..!

أسية:( نغزاتها بالشوية ) نتي فين هضرتي معاه ؟

شريفة:( ردات عليها بهمس ) كن بقيت فالفيلا حتى رجع كان غيقطعني و يشويني قطيبات و يعطيكم تجغدوو فيا .. ترضايها ليا ؟

حجيبة:( كتهضر بوحدها ) و علاه ما هضر معايا انا ؟ بغيت نعرف غير شكون هذا لي مسيفطلوو البوليس لقلب دارو

شريفة:( ردات بضحكة ) ويلي يا لالة حجيبة ما عرفتيشي شكون ؟ وانا شماش نئولك يا ئلعتها فالسما السابعة ماش يكونوا غير ولاد الئاع و الباع و الشمعة فيها دراع .. ولد سيدي عبد البائي لي ما عرفناه خرا و لا بائي كيتسنى فلالة مفتاحة ..!

حجيبة: اويلي يكون عمر ؟؟؟

شريفة: بحال يلا شفتيها بعينيك بجوج لي غياكلهم الدود .. يلا ما كانش نيت قاتل شي حد و دافنوو فالجردة ههههه

أسية:( كتمووت بالضحك ) ربي لما كملي التعياب ههههههههه

شريفة: ويلي الشيطان .. العزبة سايرة تتمرغ ليا هنا بالتكركير كا ما ناقصك خااااير ؟ كا ضرب بووك جن كا عماايل بووصفير هااذي ( دارت يديها على جبهتها شادة الضحكة ) ما تساليني حلووف غذوة مع بوونبييير نجري و نجاري بيك عند الفقية يسببوولك

أسية:( ضحكات ) شعليلي 12 لشمعة

شريفة: هههههههه و نعيطوو للصاليحين .. بغيتيهم يشعلوو فيهم ( ضارت عند حجيبة ) ايوا احجيجيبة فين خليناها

حجيبة:( غوتات مخرجة عينيها ) واااا ضوووري حضي طريق واش حالفة تصفيهالنا هاذ الليلة ؟؟

شريفة: راها اوطوماتيك .. غا بردي و نتي شوية يشدك بومزوي غا بالخلعة

أسية: شنوو هو بومزوي ؟؟

شريفة: باين المزوي .. ااش عرفني أنا ..؟؟

سكتات مكملة طريقها حتى وصلات لباحة استراحة و دارت السينيال دخلات .. شافت فيهم و قالت

شريفة: غنمشي ندوموندي على العشا .. اختاري معاك شي بلاصة زوينة الحاجة ( غمزات أسية ) شديلي بلاصة فموطايشة هاذ النهار نتزعللوو ههههه احححح و شحال فرحانة .. السعاااادة بلا بوووكلاوي

طلقاتها بضحكة فالأعالي و هبطات كتكسل بتعب مخلية الكونطاكط لأسية باش تشد لبيبان .. أما هي قصدات الكزار لي تما نيشان .. داخلة كضحك راشقة لها

شريفة: مسى الخير عليكم ..!

الكزار: مسى النور أ لالة اش حب الخاطر ؟

شريفة:( تبسمات كتشوف فالفيطرينة دالزاج ) عمل ليا شي ربعاوى ديال الصوصيط و شي ستاوئ ديال الكفتة و شي رابعة كبيرة ديال الكوطليط .. اييه و وفي يا الحبيب يكونوو كبيبرين و ملحمين .. و ما نوصيكشاي تعبيهم لنا مع شي بريريد دأتاي مشحر دايزو الكلام و تهلى يعطيك الستر لي مايتئاضى و لا يتم ..!

الكزار:( ضحك و رد ) و الله تا نتهلى غا شنوو هي هاذ ربعاوق و ستاوق و رابعة كبيرة .. باينة فيك فاسية حرة هههه

شريفة:( ضحكات و قالت ) غير كنبسط معاك الشريف ها ننا ديرلنا جوج كيلوو مخلطة من هاذشي كامل لي قتلك

الكزار: الله يحفضك .. هي لي متعاود ..!

صبح الصباح على شريفة .. لي تسخسخات بالمعقووول مع السوكان .. وصلوو معطلين بزااف لطنجة .. قصدو لوطيل نيشان .. غير خذاو بيوتهم طاحوو كاو بثلاثة بيهم ما حاسينش بلي ضاير بيهم ..!

خلاتهم ناعسيين و هبطات خدات قهوة تفيق بيها هي و كارو على الريق .. يطفيولها الدماغ شوية .. صايكة و مخرجة يديها من السرجم كيضرب فيها الهوا دالبحر .. تا وصلات لجهة ميناء طنجة ..!

خلات البلاصة لي كتدي لديوانة و مشات لسطاسيون .. وقفات لوطوو و نزلات كتكسل .. باقى مبوقة بالنعاس .. و دايخة ..!

بهدوء كتسرح عينيها فالمكان .. بحال يلا كتقلب على شي واحد ..! دازت قدام وحدة من الطونوبيلات لي مساطسيونين تما .. باين فمولاها عندو ذوق عالي فالطونوبيلات ..! نفس النوع لي كتسطى و تحماق عليه شريفة و ياما رغبات إلياس ياخذلها وحدة و لكن ما كيبغيش نهائيا ..!

لأنها من النوع الخفيف دغيا كتقلب ماشي شي وحدة لي ثقيلة .. و الفيطاس فيها مجهد .. كتحسي براسك كطيري ماشي كتسوكي .. و لالهم شريفة فالسوكان شوية ما توصل عند سينا للفضاء يلا ركبات فيها واااهلي فين يلقاوها مخشية ..!

خرجات لسانها بابتسامة فاش ما بانلها حد فلوطوو .. جبدات تيليفونها واقفة قدامها كتبوزا و تلعب بشعرها لي كيرجع كلوو للقدام بالهوا دالبحر ... لابسة كسيوة خفيفة فالكحل و فيها وريدات فالأحمر صغار .. جاية كيووت سيغطوو مع حركاتها و دلعها و كل شوية تحنى تهبط الكسوة ..!

ما حسات براسها غير قافزة مخلوعة فاش تشعلوو الضواو القداميين دالطونوبيل و مولاها او مولاتها دارو أمارش مخليينها تسخن ... و لكن هاذ الساعة غير شريفة لي سخن فيها الد٠٠م و تزنكات بغات طركق من الفرطة و التحشيمة لي ما بعدها تحشيمة و عاد فهمات بلي الزاج كيبين للداخل و لبرا لا ..!

غير عاقت براسها .. طارت كتجري لجهة الثانية قاطعة الشانطي و مرة مرة تشوف بلا ما تعيق فاتجاه الطونوبيل .. ماصة شنافتها التحتية ..! حتى انتابهات لسيدة علامن كتقلب و تناسات الموضوع معاها ..!

شريفة: لالة شافية ؟؟

....:( هزات عينيها فيها و ردات ) شريفة ؟ نتينا ليعيطتي عليا الشهر ليداز على العشوب ؟

شريفة: اه أنا ..!

....: هاك .. مرح يديك قبض .. هاذو دقة بطلة شربوم غدهز ودعمار كرشك بترابي مورا شهر ..!

شريفة:( خدات من عندها الكاغيط فين ملوية لها العشوب و مداتلها الفلوس ) شكرا ربي يخليك .. دوزي بخير ..!

خلاتها موراها كترضي عليها و زادت مع الطروطوار .. كتتمشى بهدوء فاتجاه واحد الوردة مفتحة فالأبيض مع خطوط مميزة فالوردي .. بمنظر و لا أروع كتجذب العين ..! تبسمات و بلا ما تحس مدات يديها دوزاتها عليها برقة كأنها كتقيس فبيبي صغيير خايفة تجرحوو ..!

و فالمقابل متكي حكيم بيديه على الشرجم متبع شريفة من اللقطة لي جات كتبوزا حدا طونوبيلتوو لهضرتها مع المراة .. ما عرفش علاش شدو فضول اتجاهها .. واش من حركاتها اللطيفة و لا ضحكتها لي كتحسها خارجة من أعماق قلبها .. يكفي تشوف فوجهها و تدخل السعادة لأعماقك ..!

حكيم:( لمحها حدا الوردة و بلا إحساس نطق بصوت عميق ) نوارة الحدود

شريفة:( سهات كتفكر .. حتى حركات شفايفها بلا صوت ) حكيم ( بصوت مسموع كملات ) النوارة لي كتكون فالحدود .. كتكون زوينة و كاع لي يشوفها كتعجبو و تطير ليه العقل و لكن حد ما يقدر يقرب منها و يقطعها .. ممنووع .. هي شي حاجة لي خاصة بزاف و ماشي أي واحد يزعم و ياخذها ليه .. هي ديال راسها و ما مملوكة لحتى حد .. عرفتي دابا علاش مسميك نوارة الحدود ؟؟

يتبع...

‎