عرس الذيب الجزء الخامس

ميدان السحر و الشعودة داير بحال شي بلاعة .. يكفي تحط رجليك فالدرجة اللولة و هي غتتكلف و تجرك ببطأ شديد حتى تلقى راسك فالقاع كتقاتل تخرج لكن لا حياة لمن تنادي ...!

هو إدمان من نوع ثاني صعيب الواحد يتخلص منوو بين ليلة و نهار .. رغم أنوو شرك بالله و حنا عارفين أن الغيب ما كيعلموو غير الله .. لكن كاينين بعض من الناس لي كيتيقوو بكلام الدجالين و المشعودين ثقة تامة و كيربطوو سعادتهم و تعاستهم بطليع الخط ..!

بحال كريمة تماما لي جالسة فدار امها ببيجامة طويلة .. مزيرة على نواظرها بزيف حياتي .. كضرب ففخاذها و تعدد و تعيط على لي يعدد معاها على أيامها ..!

كريمة: وا تي تعالي أ مي شوفي بنتك فين تالات بيها ( حركات راسها بالنفي ) لاااا لااا لااا .. هي لي ما تكون لها .. السوسية الخانزة لي حطاتها .. ياو بربي حتى نذبحها و نعطيها فالضحية ..!

الأم:( جات امها جلسات حداها و قالت ) مالك نتي من البارح و نتي تنوحي علينا هنا ياك لباس ؟؟

كريمة: وا الراجل بغى يطير من بين يدي وا مي بغاو يشتتولي شملي الكفرة بالله .. أنا نصبر و نراري بيه كي الصبي الصغير و يجييوا مورايا يسرطوني أنا و ياه ..!

الأم: وا سرطيييه نتي نيت .. خليك من داك الهضرة العوجة .. الراجل ما عندو ما عز من كرشوو و موو .. شبعيه شهيوات و تهلاي فعكوزتك و جمعي راسك و كوني مراة حرة قادة بقدودك و نهار يتشدلك عاد تحزمي و ترزمي ليه ..!

كريمة: أحياني عليك تي راه ما كتعرفيش حكيم كي داير .. و موو واقفة لي حسكة فسعدي .. بقالوو غير يشهد بيها .. أنا كنقلب نطمسوو من جهتها و نعميليه العينين على دارهم و يكتب ليا الديوور و الملاكات لي مكنشهم لموو و نتي سايرة تgوليلي جريها عندك ؟

الأم: وا الهبيلة راه ما كاين لي غيخليه يكتبلك قد ولدك .. تهلاي فراسك و فيه .. راه الولاد هما عينيه باش كيشوف و ربي كيبغيك منين عمرلك كرشك بترابي منوو .. سايسي معاه تا تولدي و تفرعني عليهم ساعتها .. علاه أنا مع باك شنوو نفعني ؟؟( ضربات على ذراعها ) وا شبهي لمك و ديري علاش تعودي ..!

كريمة: وا لايني عبد العالي gالي هضرة فششششكل أ مي gلباتلي الدماغ

"فلاش باك"

كاينين جوج أنواع دالناس فهاذ الضومين .. الشوافة لي كضرب الكارطة و تهزلك الخط بيها .. و الفقيه لي كيخدم معاه الشياطين و ضريب الخط عندو بالحساب ..!

دقتهم صعيييبة عكس الشوافات لي كيكونوا مملوكين حالتهم حالة لا شكلا لا رائحة .. ما كيلقاوش وقت لراسهم نهائيا .. تابعين غير الليالي و الضحيات و الهديات .. أما الفقية العكس تماما .. مستحيل تميزيه فالشارع على غيرو .. او كونطخيغ كاينين شي وحدين لي كيبانوو بحال الوزراء و كيرافقوو غير شكون و شكون ..!

خدامين غير مع الشخصيات الكبار و عندهم سمعتهم كيجيوا عندهم منين حتى لين .. و الضربة الصحيحة فين كيضربوو يديهم .. هي مع خوالجة ..!

كريمة: هزلي الخط شوفلي واش غيرجعني الله يستر عليك ..!

عبد العالي: سميتوو و سمية موو

كريمة: حكيم ولد حبيبة

جر وحدة من دوك الوراق البويض كيقطع فيها لقطع صغار فوق الطبلة .. حداه بواطة فيها الزعفران الحر سائل .. و مورصوو من الخشب راسوو ماضي بحال شكل دالستيلوو ..!

ساكت كيتمتم بين شفايفوو بكلام غير مفهووم .. و يديه كيسطروا فالورقة .. جداول صغار مفرقهم بمربعات .. كيرقمهم و يحسب .. و جوج كتوبة كبار محطوطين قداموو كيقلب فيهم و يدون ..!

عبد العالي: ولد حبيبة تابعوو تخرويض كبير .. ناوي لك على نية .. و باقي غيجمعكم الفراش و الد٠٠م من تا و جديد ..!

كريمة:( باستغراب ) شمن نية ناويلي عليها هااويلي ؟؟

عبد العالي: ما باينش .. جاياكم عجاجة غتعمي لكم العينين .. السوسية مربوعة القد مولات الشعر المظلم .. فطريقها غتطيح البطانة و تزهق الروح ..!

كريمة:( شدات على صدرها و قالت ) هااا ويلي أ خاي و تا آش ساير تgوول ..!!

عبد العالي: غيطيح فالحرام معاها و

كريمة:( قاطعاتوو ) يااو شكون هاذ السوسية ؟؟ تا اش ساير تبرول عليا ( ضربات فحجرها ) ها ويلي حكيم هو لي ما يخوني .. واش كيعرفها من قبل و لا كيفاش ؟

عبد العالي: تابعاكم حرب طويلة نتوما الجاوجات ( شاف فيها و قال كيتنهد ) هو لاسق عليها و فتحلها عينيها عليه ..!

كريمة: هاااااه على الشلاهبي و اش ساير يدير و فين ناوي يصد .. و لايني غا بلاتي عليه ..!

عبد العالي: خادمة ليه دقة صحيحة و غيجيبها لبيت الحلال ..!

كريمة:( وجهها صفار و عينيها الخوضر تغرغرو بالدموع بغات تبكي بالصدمة ) أء ؟؟

عبد العالي: عندك فرحة و تابعاها قهرة و دموع .. قلبك شاعلة فيه العافية و السوسية هي سبابك ( سد الكتاب و حط المورصوو من يدوو ) خاصنا خدمة صحيحة أ كريمة .. توكدي معايا و لي نقولك ديريه بالحرف .. نقطعوو لهاذ الحية راسها من الجذر قبل ما تبيض بيضها و تعشش ..!

"عودة"🤜

كريمة: آش بانلك فلي قال ؟؟

قبل ما تجاوبها أمها تسمع صوت التبراح من الزنقة بإسم كريمة .. طلات من الشرجم لقات صاحبتها شيراتلها و قالت

كريمة: أ تي فين غبوورك .. طلعي نشوفوك .. عندي واحد الخبيرة سخوونة ليك ..!

....: وا غير هبطي ما فيا لي يطلع .. تطنطن ليا الدماغ فالسويقة .. كتنغل بالبشر ففف

كريمة: وا عايني ..!

ناضت بالزربة كتلبس فجلابتها دالكاشمير المعروفة و تجمع فشعرها سفنجة باش تقاد زيفها و أمها موراها تابعاها بالنكير

الأم: نقصي من الطيران ديالك أ كريمة و عطي الراحة لراسك و لداك الترابي لي فكرشك ..!

كريمة:( كتهضر مزروبة ) وا غير للتحت و نجي ما عندي فين نزيد ( هبطات لباب العمارة كتسالم معاها بوسة تابعة ختها .. مستفاهم لها بحال العيالات الشارفين .. تا كملات و قالت ) كنت سايرة نعاود لمي و يالاه غنجبدك على طرف لساني و نتي تغاوتي عليا .. الgلوب عند بعضها أ خيتي

....:( ضحكات و قالت ) خبار الخير ا كريمة ؟؟

كريمة: هضرتلك لبارح مع عبد العالي gالك غير أجي يقضي لك لي طالبة عليه و يساوي معاك فالثمن ..!

....: هي فوقاش نمشييوا ؟؟

كريمة: فوقما كنتي مسالية دوزي عندي غوتي عليا نلبس جلابيتي و هانا معاك .. راها جبادة دالطريق من بوسكورة تال سباتة يا خيتي .. وا لايني نديرو فيك هاذ لاجر

....: و نتي باقية هنا ؟؟ راجلك مزال ما غيردك ؟؟

كريمة:( ردات بضحكة ) تي حكيييم ؟؟ راه بحال القشواشة فيدي .. انا لي مثقلة الجلسة فدارنا .. سايرة نتفشش عليهم و نجيب وحامي على مي ..!

....: اااه قوليلي هكاك ..! اجي بعدا ديما كنبغي نسولك .. راجلك لباس عليه و مخليك ناقصة كسوة ؟؟ يجيبلك غير التفكيرة بلاصة هاذ الجلابة لي تلبسي فيها .... خاصك ضربي لعند ابراهيم .. راه كيبرح فالسويقة بشي جلالب فنين يا ختي ..!

كريمة:( تقرسات ) علاه مالها جلابيتي كيف جاتك لي سايرة تعيبي فيها ؟؟ الحمد لله ما منقصني لا من كسوة لا من طعام وا لايني تنبغي نفقصوو مع تيشووفها على ظهري مع كتشعل فيه الحراgية .. كتجيني لاصقة على فورمتي كيبغي يطرطق بالغيرة ايوا و شنوو لي ما يغير على مراتوو موتوا حسن من حياتوو ههههههه

جالسة مربعة رجليها فوق الفراش خدامة كتسبح فتيليفونها .. لي مطرطق بالبلانات .. يلا مشات حتى تفرقات عليه كثر من نهار تشدها سكتة قلبية ..!

حبيبة: ما غتحطيش عليا داك المشقوف ؟ تقيلي خاشية عينيك فيه و من بعد تجي تشكي عليا بحريق الراس ..!

ملاك:( ضحكات و حطاتوو ) ها هو أ لالة .. لي يسمعك ما يقولش نتي نيت لي كتقيلي تسيفطيلي أذكار الصباح و المساء .. و فينما كانت شي مدابزة فاليوتيب راكي حاضرة ناضرة معاهم ..!

حبيبة: باز لوجهك .. أنا هي نتي ؟ هاكيلي على القراية هاكيلي ؟؟

ملاك: ديريلي بحال عمي ما يلقى فمن يشد يجي عندي كيفرنس ليا تقول كيشهر اللوبيا ( كتعيبوو ) ماري شحال خمسة فسبعة ها ها ها ؟؟؟

حبيبة: هههههههههه زعما نتي ما يقد عليك غير لي خلقك

ملاك: و هو بناتوو لمخيرة فيهم معششة فلافاك .. شوية ما يعطيوهم شهادة السكنة ( تفكرات ) ااااه حقا عرفتي شكون شفت فاش كنت جاية أنا و محمد أمين ؟

حبيبة: شكون ؟؟ ( حكات فوق فمها ) نيت من قبيلة و فمي تياكلني باينة غنسلم على شي حد ..!

ملاك:( ميقات ) شلى علامن غتسلمي .. شفت كريمة واقفة فباب العمارة مجمعة مع واحد خيتي .. و لكن غير تتسنى .. يلا ما وصلتها لحكيم كتبقبق منكونش ماري ..!

حبيبة:( خنزرات فيها ) وا وصليها ليه يلا ما زرقتك خليت لخلى .. واش حنا كنقلبوو منين نصلحوو الجرة و نتي باغى تعميها ؟

ملاك: علاش هما اللولين و لا هما اللولين لي غيطلقوو ؟؟ ولدوو غيشوفوا فوقما بغى و بزز منها .. علاش معقدين الأمور ما فهمتش ؟

حبيبة: الولد غيكبر معقد و مريض كلشي بواليديه إلا هو .. نتي نهار توفى المرحوم لقيتي حكيم و حليتي عينيك عليه و على خوتك .. لي كل واحد كيراري من جهة و عمرهم يدوزوك .. ما غتحسيش بداك الولد .. خصوصا نهار ينوض حكيم يتزوج و يدير ولادو مع مراة اخرى و تبدا المقارنة .. و كريمة تا هي تدير دارها و هو غيبقى فالوسط تا حد ما قابل عليه ..!

ملاك:( ضحكات ) لهلا يحوجوو نجيبوه يعيش معانا منوو من الجغولة لي مشاركين معاهم لهوا

حبيبة:( قلبات وجهها كتحمض ) عندك نتي كلشي بالضحك و سيري قولي شي حاجة لحكيم و تشوفي يلا جا لساني على لسانك

ملاك: وا صافي ما نقول والوو واخا الله يسمحلي ما كرهتش يطيحلها و نتهناو ( شافت فيها حبيبة ) ما تشوفيش فيا هاكا و الله يا ماما ما كتبغي تسرطلي .. واحلة هنا فالقرجووطة

حبيبة: هههه وا هبطيها ببطيعة دالخبز ..!

ملاك: مونتيف و لسقتيه فيه حق الله و كن بلاصتوو ما نولي نقرا عليك حتى السلام .. هههههه ما ضربيش العار غير كنضحك

حبيبة:( كتقلب على باش تشير عليها و كتهضر ) واش أنا يسحابلي غيخرج منها العجب المعجب ؟؟ الزين زوينة و لاطاي هي هاذيك .. حادكة و متولة فشغالها و بنت الدار الكبيرة .. باها و امها كيهضرو غير بقال الله قال الرسول .. و هي غير ساكتة و حانية راسها لي يشوفها يحلف عليها ما تحرك دجاجة على بيضها .. قلت فبالي هاذي هي علامن كيقلب ولدي .. نبالي قبل ما يطيروو بيها ..!

ملاك: وا ها هي غطيرولك و نتي كتشوفي بعينيك .. ما مخصصها من والوو و الشهرية كتحط فوق الطبلة .. اللباس غير الرفيع مخيطلها و مقيدها فلاصال غير ديال شكون و شكون .. مهلي فيها التهلية لي عمرها تلقاها فشي قنت .. و فلخر كتخرج كي السعاية د باب الجامع .. كن شفتي على تبهديل كانت لابساه قبيلة اععع بلدية و سواقية فكولشي تفوو .. لي يشوفها يقول غير خويا حارمها و مخصصها .. نتي كتباني بنت الوقت و شباب عليها ..!

حبيبة: ايوا الله يهدي ما خلق هذا ما نقوولوا .. الله يلطف بينا و على الله تكون ندمات بصح و تابث على فعايلها ..!

********************

نجاة:( شادة لابيل مع مها كتشكي و تبكي ) ياك ا ماما ولدك باغي يخرجلي على زواجي و انا باقي حتى ما قلت بسم الله

....: عيطلي أبنتي و عااااودلي شنوو طرا معاكم .. كنت ماش نهضر معاك دابا نيت

نجاة: و عجبك لي دار ؟ مشى داعيلي الراجل و مجرجرو تال الكوميسارية .. ما طلقوه تا سنالوو التزام بعدم التعرض .. و مسيفطولي شاعل كيغوث غير بوحدو حتى من السفر دار منوو مناقص ..!

....:( ردات بتحذير ) نجاة ..! يلا كان حبيبك عسل ما تلعقيهش كولوو .. ما تعيقيش الله يرضي عليك .. شكون يكون كاع باش يتعدا على خوك و يمنع علينا المجية لعندك .. كنبانوو ليه شياطة و لا شنوو ؟؟

نجاة: أ ماما

....: بغيتيه الله يطليك بيه و باقي تشووفي الويل معاه و قولي ماما قالتها .. و داك الساع عائلتك و خوتك لي لحتي موراك و طيحتي بيهم غتلقايهم واقفين و مكبرين بيك ( قطعات عليها )

شريفة:( سهات كتفكر .. حتى حركات شفايفها بلا صوت ) حكيم ( بصوت مسموع كملات ) النوارة لي كتكون فالحدود .. كتكون زوينة و كاع لي يشوفها كتعجبو و تطير ليه العقل و لكن حد ما يقدر يقرب منها و يقطعها .. ممنووع .. هي شي حاجة لي خاصة بزاف و ماشي أي واحد يزعم و ياخذها ليه .. هي ديال راسها و ما مملوكة لحتى حد .. عرفتي دابا علاش مسميك نوارة الحدود ؟؟

ابتسامة حلوة زينات شفايفها و هي كتفكر هضرتوو و اهتماموو هو و أموو .. بالرغم من أنها ما كتبغيش تتذكر الماضي و لكن كيفما كاينين ذكريات خايبة ليها فصغرها كاينين حتى المزيانين واخا محسوبين على رؤوس الأصابع ..!

قاطع تفكيرها صوت التيليفون فصاكها .. جبداتوو كتأفأف و غير طلعات لها سمية إلياس كحلات بالعمى و ردات

شريفة: واش أنا ما غنتهناش منك ؟؟ غتبقى السيمانة كاملة تابعني بالتيليفونات .. ما عندك شغال من غيري ؟

إلياس:( كيغوت معصب ) فيييين هو الشيك ما تحمقيش الز** بوويا .. راه غنشد عليك الطريق دابا يلا ما هضرتيش .. لاش هازة الززززبل ؟؟ ألوو ألوو شريييفة

شريفة:( بعداتوو على وذنيها خلاتوو حتى كمل و جاوبات ببرود ) قول أنا ز** .. باك آش دارلك مسكين ؟ و ما تبقاش تغوت عليا هنا .. تتعصب تعصب على مك ماشي عليا .. ما شفت لا شيك لا ق*** وا زيد حك عليا نتعرا على أصل جد بوك الكلب .. فينما تحفى لك الجرية أجي عند شريفة ..!

إلياس:( كينهج ) دابا ما غتهضريش فين درتيه ؟؟ ما كاين لي هزو من غيرك أ شريفة ( سكت لمدة ) راه كنقسملك بالله نهار ترجعي ما دوزلك طريفة .. فرعنتي فوق القياس و الحساب وصل لآخرو معايا

شريفة: يوصل حتال زكوو .. خليني طرونكيل الله يرحم باك يلا مريض مع كرك سير داويه و ما تجيش تفرعلي كري بالهضرة ديال ز** ..!

طفات عليه التيليفون و هزات راسها كتسووط باغى تقطع الشانطي .. تا دازت من حداها نفس الطونوبيل لي فيها حكيم .. بزز لمحات جزء صغير من ملامحوو بالسرعة باش غادي ..!

شريفة:( عضات على شنافتها كضحك و تغني ) و الزين ملييح أ مامَّا و آه يانا .. و الزين ملييح أ مامَّا و آش جا يدير ..!

فتحات الباب و ركبات مهبطة المرايا قدامها كتعاود فعكارها و دندن .. تا قلعات خارجة من تما طايرة خالقاها غير مع راسها .. وصلات للوطيل دخلات لجهة دالقهوة كتقلب عليهم ..!

شريفة: صباح التوت الذي لا يموت ( باستهم بوسة بوسة للحنك و جلسات هزات زيتونة دارتها ففمها ) ارتاحيتوو ؟؟

حجيبة: فين مشيتي و خليتينا كنقلبوو ؟ و طنجة راه مقلوبة قالك شدوو صحاب الحشيش مهربينوو .. عاد كان البوليسي مدوزينوو فالأخبار كيهضر ..!

شريفة:( عوجات فمها ) يعطيهم دقة هما و هضرتهم لي كتغيلف .. ذكرنا السمن و العسل ( رمشات عينيها ) عرفتي أ ماما وقعات معايا واحد الحاجة فشي شكل هاذ الصباح ..!

حجيبة: مالك ياك لباس ؟؟

شريفة: مشيت كنتمشى فالكورنيش حتى وقفاتني واحد المراة كبيرة .. باينة من هضرتها من الجبل .. المهم ..! مداتلي واحد الساشي فيه شي عشوب .. قاتلي نشربهم نحبل فشهري

حجيبة: بصح زعما ؟؟ و لكن نتي

شريفة:( قاطعاتها ) أنا كاع ما تقت فيها خفت و كنت غنلوحهم عليا و لكن شي عيالات جاو عندي قالولي راها ببركتها و ما وحدة ما جوج شرباتهم و هزات ..!

حجيبة:( بفضول ) وا أراهم نشوفهم

شريفة:( هزات بتيبان كتاكل فيها ) ما عندي ما ندير بيهم راه غير حشمت نلوحهم قدام الناس .. بلاتي و نكبهم فالزبل .. ما تعمريش راسك بيها أنا غير طرالي العجب فيها .. ما كتعرفني ما كنعرفها و جات عندي من دون الناس و عطاتني ..!

حجيبة: وا هاذي علامة من عند مولانا .. طلقهم لهنا يلا ما بغيتيهمش أرايهم ليا أنا

شريفة:( جبدات الكاغيط من ساكها و مداتولها كتقلب فيه و تشمشم ) عطيه لوردة يلا بغات تزيد شي وليد .. هاذشي يلا كان بصح كيعاون ..!

حجيبة:( تنهدات و قالت ) أححح على وردة راه مسكينة محمقينها داك الولاد .. حارت معاهم وا لا هما تهدو .. ما ولداتهم حتى شابت و ما غيديرو عقلهم حتى يصفيوهالها .. معصبينها و ماشي لخاطرها فهاذ الايام ( بتردد ) راه باغى تتصالح معاك و مع خوها و حشمانة منكم

شريفة:( ببرود ردات ) علاه حنا مقاطعين باش نتصالحوو ؟ أنا نسيت أصلا لي وقع .. هي هضرات و خذات جوابها .. غير يلا بغات تدير فيها دراما كوين و تهز فخاطرها ..! ( سكتات شوية تا ضوراتها فدماغها و قالت ) و لا عرفتي ؟؟ فاش نكونوا راجعين ندوزوا عندها هي لولة نشوفوها ..!

حجيبة:( فرحات ) سيري الله يرضي عليك دنيا و آخرة ابنتي ( كملات فطورها كتجمع ) عيط عليا ولدي ما بغيتش نقولوا راك خارجة .. قالي نرجعوو فهاذ اليوماين

شريفة: امم ( دماغها ماشي معاها .. كتشوف فأسية لي ماشي هي هاذيك ) مالك أ ثاسااانوو " هي كبيدة و كتنطق ملحنة ههه "

أسية: والوو غير باقي دايخة بالطريق و ما شبعتش نعاس ..!

شريفة: ها حنا نفطرو و نمشييوا لواحد البلاصة تشبعي فيها غير راحة و نعاس .. الطبيعة ضايرة بيك من كل جهة و طريق

حجيبة: ما نمشيوش للبحر ؟؟

شريفة: ما كيوافقنيش ديال طنجة .. عقلتي داك العام كي رجعت كولي مبرققة بالحبوب و فلخر رجعاتلي حساسية بحال البهق .. ما براو تا ربي غفرلي

أسية: و فين نمشييوا دابا ( تفوهات ) و الله تا عييت ..!

شريفة: انمشيوا نضربوو لتطوان و ندوزوا لكاسطيخوو و كابوو نيغرو .. نتقداو الشكلاط و الفرماج و داك التقيوتات ديالهم ( شافت فحجيبة ) داك لي دايرة بحال خبيزة صغيرة فالأبيض عرفتيها ؟ فكريني ناخضها كتحمقني و من تم نطلعوو لأقشوور

حجيبة: أقشوور ؟؟ بغيتي تقولي أشقار ؟؟

شريفة: لا أقشور ( بحماس ) نمشيوا نشريوا كاع لي غنحتاجوو و نطلعوو نخيموو ( شافتهم ما عاجبهم حال ) أهيتا زيروا معايا السمطة و نتوما فشلتوو قبل ما نبداو .. راه غيعجبكم الحال .. أنا متأكدة ..!

أسية: هاذ النهار ما غنهبطوش من الطونوبيل على هاذ الحساب ..!

**********************

بسعادة عارمة و فرحة كبيرة بداو رحلتهم .. ناشطين مع شريفة ما كاين غير قولها و ضحك عليها .. ما كاين لي يصدعهم و ينكر عليهم .. لي بغى الخاطر كيديروه و كل ساعة واقفين فشي بلاصة ما خلاو ما خذاو و ما خلاو فين تصوروا ..!

آخر وجهة ليهم قبل ما يطلعوو لأقشور كانت فالمضيق .. فالمرسى ..! مستفين الطبالي وحدة حدا الثانية و الشلي ديالهم حداهم .. مدرقينهم بلي باراسول و السربايا كيضورو عليهم يحطوو لهم طلبياتهم من بعد كيختارو شنو بغاو فقنت مقابل معاهم فين كيشويوا .. و كالعادة شريفة شاداها تجمع و مخلياهم كيتسناو فيها تجي ..!

....:( كيقابل فالشواية و كيهضر معاها ) هي نتينا ماشي بنت هنا ؟ ( مدلها حوتة ) شد تذوق و عطيني الخبار ..!

شريفة:( خذاتها كتسوط عليها و كتاكل براس صبعانها ما عندهاش كي دير مع الظفران .. غمضات عينيها بتلذذ ) امممم الله يعطيك الصحة .. بحال المذاق بحال الريحة ( هزات يديها بإشارة ) سانك سير سانك ..!

....: باش ما تقولشي ماجا تال عندنا و ما تهليناشي فيك

شريفة:( ضحكات ) هههه لا لا كن هاني .. حتى نتا مرحبا بيك فاليوسفية عندنا .. تجرب الراية المشوية ديالنا .. الناس ذاقوها فكاع البلادات و كيحلفوو ما كاينة بحال ديال اليوسفية ..!

....: نجي علاش مانجيشي ؟ غير هو أول مرة نسمع بيها يا بنت الخير ..!

شريفة:وا وفي معانا .. الله يجعلك فحال زيما فايض هههه

...: زيما ؟؟

شريفة: امم هاذ الدعوة من نهار سكنت تما و أنا كنسمعها .. مع كيبيعوو عندنا واحد الملح طبيعي .. واخذينوو من الشامعية عندهم واحد البحيرة دالملحة من عند الله .. و شحال ما هزيتي منها كتوفى و تتعوض بالألوفات ..!

....:وا العايلة دوختيني بالسميات هههه

شريفة: و مالك مصندل ا صاحبي ركز معانا .. اليوسفية جايا بين مراكش و آسفي .. سير شبعلك حلايقية فجامع الفنى و دوز عندنا ذوق الراية على حقها و نسمها اسيدي بملح زيما و كمل طريقك لآسفي شبعلك حوت و شواية و فخار ..!

.....:( عمرلها الطبسيل تال الفم بالحوت و قال ) الله يحفضك العزيزة .. ها الفريتوز ديالك وجد .. الشواية باقيلا شويش و ها هي ناضية .. غير مشي الدراري يجيبوهلك

شريفة: الله المعين .. ااه و مرحبا بيك .. عنداك ... يلا جيتي سول غير على السوسية يوصلوك تال باب الدار

....: سير الله يسهل عليك اختي .. غير جوج دالكليان بحالك فالنهار كافيين

شريفة:( ضحكات ) ههههههه باش دير فاييت و تجلس الله كريم .. وا تبعني أنا نخرج عليك راني مسالية قبي ما عندي لا تابع لا متبوع غا هبيلة و طالقينها

خلاتوو من موراها كيضحك و مشات لطبلتها كتسناهم يحطولهم طلبيتهم و مرة مرة تهز عينيها فشاب جالس قبالتها هو و صاحبوو كيتغذاو و يتناقشوو .. شبهاتوو لمول الطونوبيل لي شافتوو قبيلة ..! ما ارتاحت حتى حصلها حاضياه و جات العين فالعين ..!

شريفة:( بابتسامة هزات راسها بحركة بطيئة و حركات شفايفها بلا صوت ..! ) بون أبيتي ..!

حكيم:( تبسم بالجنب و هبط عينيه و رجع طلعها كيشوف فيها .. كأنوو كيقولها شكرا ..! )

قاطعهم السيرفور لي بدا كيحط لهم فطلبيتهم .. ما خلاش من جهدوو تا عمر الطبلة .. بابتسامة شكراتوو و مشى ..!

شريفة: أسية هههه عرفتي هاذ الجلسة باش فكراتني

حطات يديها فوق الطبلة كتموت بالضحك تا ضحكات معاها أسية بلا ما تعرف السبب .. أما حتى حجيبة كفظات على كمامها و بدات هاذي تضر هاذي تنفع ..!

شريفة: هههههههه اوووف يا ربي

أسية:( كتمسح الدمووع من عينيها و تسوط عليهم ) هههههه شرحيلي غير علاش أنا كنبكي بالضحك بعدا ؟؟

شريفة: هههه هانتي داك الجهة فين كيشويوا و الدخان طالع فيها دايرة بحال الباب دالحمام فاش كدفعيه و كتبداي تسمعي فالصداع و الغوات دعباد الله و كلشي مضبب تقول داخلة لجهنم و بئس المصير ..!

أسية: ههههه و نتي فين عمرك مشيتي ليه ؟؟

شريفة: شي عشر سنين دابا و لا كثر .. هههه سمعي سمعي غير كتدخلي كطلع معاك ريحة الخزامة و الغاسول و العكر الفاسي و الريحة ديال الط*** خلاص .. كتلقاي وحدة شعرها شبعان حشيش و تومة كتبوق دينمها و تبوق الزمر كامل معاها ..!

أسية: ههههه و كيشدوها ربعة دالسوايع عندهم صبر ايوب يا ربي السلامة

شريفة: ايوا داك الروايح العجيبة بحال لي كنشموو دابا مع هاذو لي ضايرين بينا ..! المهم كدخل المراة هازة من موراها تبارك الله و صلاة على النبي ما هازة أنا فقلبي .. كتشد بلاصة ليها و لجيرانهم و كضورها بالسطولة و داك القنت يلا كنتي مراة قربيليه ههههه و تكملها بلاطخوس فوق الجلدة .. زعما بلا ما تناقشيني ينعل ط*** يلا جلستيها ههههه

أسية: ههههههه بحال هاذوو غا مضورين عليهم الشلي

حجيبة: وا كولوو غيبرد هاذشي باركة من الضحك

شريفة: هههه واخا .. ايوا و تما كتبداي تشوفي المنكر ها لي كتحسن ط*** قدامك بحال يلا غير كتحك فسنانها .. ها لي كتضور قلوا٠٠نية .. الفواكه الجافة كيلعبوو عندها فالهواء الطلق و هاذوك هما الهمزة عند صحابات الشيخ أبو ياسر الشلاوي القحبا٠٠ني .. ما كاين غير ما يخالف حبيبتشي هههههههههههه اما العرايس النصائح لي كيعطيوهم وااايلي واااايلي ما كاين غير القنبوول كيتشاير

أسية: تخيلتها هههههه اويييلي

شريفة:( بصوت مسموع لحجيبة ) ماما كنتي كتدي معاك إلياس لحمام العيالات و هو صغير ؟؟

حجيبة:( ردات مخشعة مع واحد الحوتة ) معلوووم و ما كانت تا وحدة كتزكلوو كولشي كيبوس و يعنق فيه

شريفة: ههههههه من صغروو بو بنات ولد الهم ( شافت فأسية ) كتلقاي بحال لالة حجيبة جايبة دري قلا** فيهم 3 كيلوو و كتقولك ويلي وليدي ؟ غااا نية صغيير و مكيعرفشاي هانتي قلبي تشووفي ههههه و هو داخل فرحان كيشوف البزوول غا مشتت فينما ضار يعنق و يلسق على اللحومات و الهباري

أسية:( ضربات فالطبلة كضحك و واحلة لها فنفس الوقت ) سكتي سكتي هههههههه وحلتيها ليا

شريفة:( عطاتها كاس دالما و ضرباتلها على ظهرها ) حلال لك .. حلال لك هههههههه و الله تا هاذ الهيت فكرني فدوك الليام ( حطات راسها على الطبلة كضحك ) غيهربلي ما فيهاش ههههه

حجيبة: وا كوولوو غيبرد

شريفة:( جرات عندها كتاكل و قالت بضحكة ) فخبارك الحوت كيسخن أماما ياك ؟؟ وا تكايسي لنصدقوو كنقلبوولك على العوينة لي تسقيك و تبرد شحفتك ..!

حجيبة:( بعدم فهم ) ها الما علاش غنقلبوو على العوينة ..!

شريفة: ههههه كيكون ديكشي طبيعي من البزبوز لعندك .. كترواي و تشبعي فيتامينات دقة وحدة يا الحبيبة ..!

أسية:( غوتات قافزة من بلاصتها تا خلات كلشي كيشوف فيهم ) بعدييييها بعديييها وا ماااماااا

شريفة: حنا تابعانا الشوهة فينما مشينا .. راه غير قطة يعطيك دقة .. شوفي شحال فنة ( تبسمات كتعيط لها ) مياااو مياااو ههه بغيتي تاكلي ؟

رماتلها حوتة مخلياها كتاكل فيها .. هزات عينيها فالطبلة دحكيم لقات ناس وحداخرين جالسين .. ميلات شفايفها بعدم اكثراث مكملة تجماعها .. تا بغاو ينوضوو و هي تنقز القطة للكرسي لي حداها

شريفة:( مدات يديها كتلعب لها فشعرها ) أسية بب صوريني معاها ( خداتلها تصويرة و مداتلها التيليفون تشوف كي جاتها ) فمي جا بحال البرميل و نيفي مدلي كي الثنين شوية ما ترديني حولة ..! هاذي كاملة خلعة فيك ؟ شدي عاودي ..!

خداتوو من عندها تعاودلها التصويرة و يالاه جات شريفو تقيص فالقطة كانت طارتلها على يديها خبشاتها بظفارها تا سيلاتلها الدم و مشات كتجري ..!

أقشور من أجمل المناطق فالمغرب التابعة لمدينة طنجة فإقليم شفشاون .. كيجيولها الناس من كل المناطق .. بسبب الشلالات الرائعة لي كتمتاز بها بالإضافة لجمالية الجبال لي ضايرين بيهم ..!

كاع لي عزيز عليه الكالم و الهدوء كتلقاه شاد بلاصتوو تما .. و هي أيضا وحدة من الوجهات الرئيسية للشباب لي عزيز عليهم التريب و تسلق الجبال ..!

وصلوو للحد فين ممكن تزيد الطونوبيل و وقفوو حدا الناس لي كاينين تما .. نزلات شريفة دايرة فاصمة صغيرة على يديها و حجيبة باقى كتنكر فوق راسها

حجيبة: بقيتي تطيري .. القطة القطة .. هانتي جبتيها فيديك وا شدي دابا .. على الله تتهدي ..!

شريفة: وااا صافي راسي نفختيهلي .. آش عرفني انا غتقمشني ؟ ففف عاطياني الحريق و لالكول لي ضرباتلي البنت ما حسيتش بيه كااااع

أسية:( قربات و باستها معنقاها بحزن بقات فيها ) شوية تهدن لك و ما يبقى عندك والوو

شريفة:( دوزات على ظهرها بمعزة و قالت ) دوزي نهبطوو الباكاج يالاه دغيا باش نتبعوو داك القشلة راني ما عارفاش الطريق ..!

بداو كيهبطوو فالباكاج وا لا هو بغى يتسالى .. ها الخيمة ها المانط ها البوطة الصغيرة ها جوج خناشي ديال الخضرة مسطوكيين حتى من الطاجين دالفخار مشات شراتوو باش تقاد الطاجين نعام اسي و هاذشي كامل زيد عليه لباسهم لي غير شريفة جايبة باليزة بوحدها .. قاتلك نوونوو كحل عيونوو خاصها تعوم فالشلال و ربي كبير ..!

شريفة:( لأسية ) هاذو مالهم كيشوفوو فينا حابسين الضحكة ؟؟ شككوني فراسي واش دايرة شي فضيحة ..!

أسية:( ردات بفهم ) نتي ما فهمتييييش

شريفة: اييه و فهميني أختي ؟؟ راه شكيت واش مهربة شي كيلوو دالحشيش ..!

أسية: راه هاذ القنت بانلي فيه غير الدراري و تصدموو فاش شافونا حنا بنات بوحدنا .. فهمتي ؟؟

حجيبة: وا دوزوا تهزو نطلعوو نشوفوا فين جايبانا .. أنا الركابي قاتلينني بزز نهز راسي

و هما باقيين كيتناقشوو وقف عليهم واحد من الدراري لي من قبيلة و هما يشوفوا فيهم .. باحترام قال

....: السلام عليكم .. واش الواليدة طالعين لأقشور ؟

حجيبة: اييه أوليدي علاش ؟؟

....: واش بوحدكم الواليدة و لا غيخلط عليكم شي حد ؟ ( شاف فشريفة ) راه هاذ الباكاج بزاف ما غتقدروش عليه و الوقت مزحوم .. شوية و يطيح الظلام و المسافة طويلة ..!

شريفة: و لكن هاذشي كاع محتاجينوو ( طلقاتها و لي ليها ليها ) ما ديرش نتا و صحابك فينا هاذ الخير و تهزو معانا ( رمشات و بحركة دلوعة قالت ) حنا غير وليات و نتوما تبارك الله مكدرين و رجال تحنتوو عشرة ما نلقاوش حسن منكم توصلوو معانا انا و ماما و ختي ..!

....:( حشم منها و عجباتوو فنفس الوقت يلا رفض غيضيعها من بين يديه ) واخا أختي نهضر مع الدراري و نرض عليك

شريفة: و غير سمحولنا غنعذبوكم معانا

طالعين فالطريق ثلاثة دالدراري سابقينهم هازيين كاع البكاج ما خلاو لهم والوو و اسية و شريفة موراهم عاد حجيبة لي جايا بزز تمشي جوج خطوات و ترتاح

أسية: غنقتلووها هههه ما توصل تا تطيح شي ستة كيلوو ( شافت فالدراري و قالت ) أ ربي و شحال فيك ديال التحلوين و التمسكين ما كتقيلي عليك حتى واحد

شريفة: فكيتكم من الثقل و باقية كتهضري ؟كن راحنا واحلين كنصبصبوا بالعرق .. نزيدو ثلاثة متر و نستارحوو ربع ساعة ..!

بعد نص ساعة دالطريق كانوو وصلوو لواحد الشلال .. لكن الدنيا خاوية و حتى حد ما جالس فيه ..!

شريفة: واش وصلنا ؟؟

...: باقي عاااد بديتي شي ساعتين عاد نوصلوو و غير حضيوا مع الواليدة فالطريق من هنا للفوق .. صعيبة القضية شوية و كاين ل glissement ( منحذر كيزلق )

شريفة: مك يا مك على ساعتاين .. حجيبة تلقايها غادية و تدعي فيا ..!

أسية: ههههه عرفتي داك الفيديوو .. بغيتلها الجذام الهردام لي ما تصيب ليه لا طبيب وا لا طالب .. واه يا لالة عيطونة وا بغيتها كي الذيب ديما تابعها الغوث .. يا بغيت نهار يعمرو الزرايب زريبتها ما تتصاب فيها حتى فرقش بحرمة الله

شريفة:( قاطعاتها كضحك ) ههههههههه عنداك غير توقعلها شي كارثة .. دوزي نشدوو فيها نجروها ..!

أخيرا بعد ساعتين دالطريق .. وصلوو للمكان المزعوم .. و لي بكل صراحة يستاهل داك العذاب و الصبر كامل ..!

المنطقة كلها ضايرة بالجبال و الحجر فاشكال مختلفة .. الشلالات عاطيين منظر ولا اروع .. الدراري غير بالشورطات كيعوموو فالبحيرة الصغيرة لي كيتكب فيه الما دالكاسكاد .. الربيع اخضر نابث و جوج دراري دالمنطقة راكبين على الأحصنة كيتسابقوو ..

أجواء زوينة كتدخل السعادة للقلوب .. حتى من حجيبة لي بكات بالعيى و تا من الشهادة شهداتها كتقول هاذي هي لخرة ليها .. غير ارتاحت عجباتها البلاصة و فرحات ..!

بانيين خيمة صغيرة بزز كافياهم هما بثلاثة و الباكاج لي مطلعين .. مزاحمين فيها كي الذبان المهم قاضية غرض .. شافت فيهم شريفة و قالت

شريفة: عييت بزاف حاسة براسي ماشي هي هاذيك .. غننعس شوية بلاتي و نفيق نشوفوا شنوو نديرو .. بانلي واحد عندو الغيتار الليلة نبلبلوها ..!

خواولها بلاصة تكات فيها تا داتها عينيها بالعيى و ما دازش بزاف و تبعوها حتى هما .. أسية لي نعاسها ثقيل ما تفيقش بيك واخا تجيب الزمار و الغياط فوق راسها و حجيبة لي صوتها كيتسمع فأقشور كاملة .. غير طراكطور و شعلووه ..!

أما شريفة ضرباتها الفيقة مع يالاه ديمارات حجيبة بالشخير .. مكمشة فبلاصتها عرقانة كل شوية تدير صوت ديال وحدة مخنوقة بزز كتنفس .. كلها كترعد سنانها بداو كيتقرقبوو و دموعها كيطيحوو من عينيها ..!

عضات فالصبر حتى ما قدات فالأخير ناضت من بلاصتها خاشية سنانها بقوة فشنافتها التحتانية حتى الدم بدا كيسيلها .. هاذشي باش ما تغوتش و تخلعهم عليها عند بالها غير تشم الهوا غتولي مزيانة ..! لكن للأسف مع كل خطوة كتزيد كتبغي تمووت بالحريق .. بحال يلا شي واحد شادها و كيهرسلها فعظامها عظم بعظم ..!

ما خرجات من الخيمة حتى شافت الموت بعينيها .. كتقول روحها غتخرج فأي لحظة ..!

ضربها البرد ديال الشلال تا وقفات يابسة فبلاصتها غير بكسوة فالكحل قصيرة .. رجليها حافيين و شعرها قصير مخربق بالنعاس و العرق .. كيبانلها كل واحد فين جالس .. كاين خيم لي مشعول فيهم الضوو و وحداخرين ناعسين ..!

قهرة كبيرة حسات بيها و هي بوحدها .. ذاتها شاعلة فيها العافية بالحرارة و كلها عرقانة .. الجرحة فيديها كتحس بالفوار كيخرج منها بكثرة السخونية .. ما قادراش تطلع النفس و لا تهبطها .. مخنوووقة و غير كتبغي تتحنى تاخذ نفس طويلة كتغوت بالحريق صبعها هو لخر يلا طواتوو تمووت فبلاصتها بالوجع ..! الحاجة الوحيدة لي فصالحها هو الشلال لي عاطي معاه ريح قوي كتحاول تدخلوو من فمها باش ما تخنقش .. واخا التنخصيصة دالبكى ما مخلياهاش تتنفس براحة ..!

بعد مدة لي قصيرة لكن طويييلة بزااااف بالنسبة ليها و هي فديك الحالة .. بانلها شاب قريب من جهتها كيتمشى .. طويل و وازن .. معنكر غير من مشيتوو و لباسوو حربي .. كاط فرجليه و سروال ديال البارا مع تيشورط فالخزي دالقطن ..!

شريفة:( غوتات بالجهد لي باقيلها ) خوووياااا أ خوووويا

ضار الشخص شاف فيها و بانتلوو ماشي هي هاذيك .. واقفة بزز كلها كترجف و تنخصص بالبكى .. قرب منها بخفة و قال

حكيم: شراه صايرلك ؟ ( رمى عينيه فالمكان فيه واقفة و كمل ) مريحة بوحدك ؟

شريفة:( بزز كتهضر الحروف ما كيخرجولهاش بالحريق و دموعها كيتكبوو قناطر ) عاونني الله يحفضك ( قرب شدلها فيديها و هي تغوت ) اااااه .. لا ما تقيصنيش

شهقات بالجهد كتبكي و النفس كطلعوو بزز بحال يلا كتلقف .. خلعاتوو و بقات فيه فنفس الوقت واخا مافاهمش مالها ؟

حكيم: صايي ما نحاديش فيك ( قرب منها بخطوة هاز يديه ) واش بيك ؟

شافت فيه كتنفس بصوت مسموع بحال يلا غتولد و كلها كترعد .. حتى قرب مزيان عاد قدرات تميز ملامحوو لي واخا هكاك ما مركزاش معاهم بالحريق و الحالة لي فيها ..!

شريفة:( بزز كتهضر ) جرحاتني قطة قبيلة يمكن مسمومة ( سكتات مدة كتبكي و ترد النفس ) غتكون واقعة ليا infections " إلتهاب " خاصني الطبيب ضروري ..!

حكيم:( شاف فالبلاصة فين هما و قال بتساؤل ) غتقدري تتحركي ؟ بعيييد الحال من هنا ..!

شريفة:( عضات على شنافتها و ردات بقهرة ) اااه .. لا ما قادراش راه غير صبعي ما كنقدرش نحركوو ..!

حكيم:( زفر بصوت مسموع ) مشكلة هاذي ( حط يديه على جنبوو قالب وجهوو من جهتها .. كأنوو كيقلب على شي حاجة .. تا لمحها و رد بسرعة ) عايني هنا .. أنا راجع ..!

خلاها من موراه واقفة بحالة كتقطع فالقلب .. مشى لمدة خمسة دقائق تقريبا و تم راجع راكب على العود ديال داك جوج دراري لي كانوو كيتسابقوو بيه قبيلة .. نقز واقف حداها شاد اللجام فيديه ..!

حكيم: غتصبري معايا حتى نخرجوو من هنا .. ما كاينة حتى طريقة اخرى ..!

شريفة:( شافت فالعود و قالت بتنخصيصة منيمة عينيها فيه ) هزني ..!

*******************

صوت العود كيتسمع بالجهد خصوصا فاش كيتضربوو رجليه مع الأرض و يكمل الجرا ديالوو .. متحكم فيه حكيم بيد وحدة و الثانية مزير بيها شريفة عندو .. لي هازة تيليفونوو ضاربة بيه الفلاش فالطريق .. حتى طلعاتلها سمية كريمة كتصوني .. بلا عكز عليها دوزات صبعها فالشاشة و قطعات ..!

مكمشة فيه كتصبر فراسها بلي ما بقى والو و يوصلوو و يرجع كلشي غير معاودة .. هزات عينيها لي فازكين و حومر بالدموع كترمش ببطئ كتأمل فملامح وجهوو ..!

حكيم بحالو بحال أي شاب مغربي عادي .. زينوو حرش طبيعي .. ماشي من النوع لي تشوفيه و تسهاي فيه من جمالوو القتال ..! لكن عندو ما حسن بدرجات ..! الكاريزما لي كتبان غير من شوفاتوو من تعنكيرتوو فالوقفة و الطريقة لي كيهضر بيها .. حتى من لباسوو الحربي لي أغلبوو كاطات و سراول ديال البارا .. كيعطيك خبار على قوة شخصيتوو و ميولاتوو ..!

حطات راسها على صدرو كتحس بذقات قلبوو كيضربوو فقلب الطبل د وذنيها .. ريحتوو دخلات معاها للأعماق حتى خنقاتها و هي بزز كطلع النفس و ما عندهاش مساحة فين تتحرك براحتها ..!

لكن بالرغم من كاع لي واقعلها قدرات تحس بالراحة و الأمان فصدرو .. شعور داخلي كيقولها بلي ما غاديش يآذيك و ما عندك مناش تخافي معاه .. بالعكس غيعاونك و يوقف معاك ..!

بعد مدة من التأمل .. قالت بهدوء و صوت خافت بزز كيتفرزو الحروف

شريفة: شبهتيلي لواحد السيد .. تا هو كنتلاقاه غير فالمرض و الكوارث الله يستر ..!

تسناتوو يرد عليها لكن لا جواب منوو و الواضح أنوو ما سمعهاش من الأصل .. مركز غير مع الطريق و مع أنينها و صوت أنفاسها لي كيطلع مرة مرة بطريقة كتخلع ..!

سكتات حتى هي فالمقابل .. كترمش فيه عينيها و سنانها مزيرة بيهم على شنايفها من حر الحريق .. ما قالت وصلوو للساحة فين مبلاصيين الطونوبيلات تا غفرلها الله الذنوب ..!

هبط ربط العود مع واحد الشجرة و هزها عندو ما حطها حتال طونوبيلتوو .. حيت ما لابساش فرجليها و الدنيا تما مخلطة زاج و تراب ..!

حكيم:( ركب جهتوو و ديمارا ) شوية دابا ؟؟

شريفة:( بلعات ريقها ) حسن من قبيلة ..!

حكيم: غتزيدي تصبري باقي .. على الله نلقاو تما شي طبيب بيرمانونص ..!

قلع فلابيسط غادي طاير مخلي العجاجة موراه قالبة الدنيا .. و غير وصلوو لطريق مقادة فتحلها الشراجم بربعة باش تتنفس مزيان ..!

حكيم:( شافها غير مكتعرق كثر و سنانها كيتقرقبوو .. فيها البرد و الكسوة لي لابسة قصيرة و عريانة ما عندها ما ترد عليها .. و هاذشي كوم و النفس لي بزز كطلعوو كوم ثاني .. ضروري ما خاصها ريح مجهد باش متخنقش .. سد الشراجم داللور و نطق باغي يتلفها على الحريق بالهضرة ) نتي من هنا ..!

شريفة:( شافت فيه بابتسامة مهدودة .. بزز كتهضر ) لا أنا سوسية من أكادير و لكن عايشة فاليوسفية من شحال هاذي

حكيم:( حرك راسوو بالإيجاب و قال بلهجة مسرحة و بسرعة فالكلام .. كأنوو متعود يهضر بيها ) صدفة إيفولكين أيا .. تشرفغ سيليس الخير .. تمازيغتنون زغ نواحي نيت ؟ زغ نواحي دو كادير نيت ؟

《 صدفة مخيرة هاذي .. مشرفين ببنت الخير .. بلادكم من النواحي د أكادير نيت ؟ 》

شريفة:( ردات بدهشة ) حتى كيي تكيت أسوسي ؟؟ حتى نكي تشرفاغ سيك والله ( ضحكات ضحكة مهلوكة ) تحوسيت سيليس نتمازيغتنك إخصات ماستيعاون .. نكي زغ تشيرا تسنست؟

《 حتى نتا سوسي ؟؟ الشرف ليا و الله .. معذورهم كيقولوا الدم كيجر ( ضحكات ضحكة عيانة ) حسيتي ببنت بلادك خاصها لي يعاونها .. أنا من تشيرة عرفتيها ؟؟ 》

و هي باقى كتهضر لمحاتوو جبد كاروو من الكارطوشة ديالوو .. شعلوو و دارو ففموو كيسف فالدخان و يسوط لبرا .. قالب وجهوو من جهتها باش ما توصلهاش الريحة .. لكن هيهات زادتها القطعة على الحريق لي شادها .. الريحة د النيكوتين لي كيتحرق طلعات معاها للأعماق حتى تفتحو لها العينين .. متبعاه بلهفة و مع كل جرة كتبلع فريقها بحسرة ..!

حكيم: الله أودي .. ميدن إفولكين أيان ..!

《 الله أودي .. من خيرة الناس ..! 》

شريفة:( غمضات عينيها كتحاول تتحكم فراسها و لكن والو فالأخير قالت ) واخا تشعلي واحد معاك ( ساطت ) تقطعت و ما هازاش معايا ..!

قلب عينيه السود لجهتها بنظرة حادة خلعاتها خصوصا فاش هز حاجبوو لمبعثر فالسما .. ملامحوو تبدلات فدقيقة .. ما تقولش هذا هو نيت لي عاد كان كيهضر بهدوء و حركاتوو مسالمة .. دغيا نظراتوو رجعات خاسرة ..!

ما هضرش حدو لاحلها الكارطوشة فوق حجرها .. هزات واحد دارتوو ففمها و قربات عندو بتردد .. باش يشعلوو لها ..! غير قضى لها الغرض رجعات لبلاصتها غالباها الضحكة ..!

شريفة: داك الشوفة لي كيدير فيك الحمق قبل ما يجمعها معاك هي لي دايرها فيا دابا ( ساطت ) ففف الله أخاي كتسالني الضريبة ؟ ( وحل لها الدخان تا بدات كتكح .. عطاها القرعة دالما تشرب لكن امتانعات ) نوو بلاش شكرا ..!

سكتوو بجوجهم لمدة قصيرة .. هي عينيها غير على لي كيتحرق بين يديها .. مستمتعة بيه و كتحاول تبرد على راسها و تتناسى المرض ..! أما هو مركز مع الطريق و نفس الوقت حاضي تصرفاتها لي قدر يخرج باستنتاج واضح منهم ..! أنوو الكارو ماشي شي حاجة لي جديدة عليها بالعكس شي حاجة عادية عندها .. بنبرة صوتوو لي كتزعزع قال

حكيم: الق****ة بعينيها هي هاذي .. راك غادية و كطحني فصحتك و الصحة ما كنترونجاوش فيها ( شاف فيها ) حسبتك منك من الخوادرية ما نبغيش ليك الضَّر أبنت البلاد بحالك بحال ختي ( سكت لثواني معدودة ) واخا كن دارتها هي كن طفييتوو لمها بين عينيها ( سكت ثاني ) بَلْعِي عليك هاذ الباب راك ما غتربحي منوو تا قل** ..!

شريفة:( هزات حاجبها باستغراب .. ياك حتى هو كيكمي ؟ ولا غير هي بنت صافي محكوم عليها ..! ) يفوتوك غير ولاد الق** دالبشر ما غينقصك حتى خير ( بجرأة طبطبات على يديه لي محطوطة فوق الفيطاس ) ماشي غير أجي و قطع .. الله يعفوو علينا و عليك ..!

حكيم: ساااااهل ..! ( ميل فموو باستهزاء و كمل كيشوف فيها ) نهار تزيري السمطة و تعولي .. أجي عندي نقطعولك عمرك تولي تضوري بيه ..!

شريفة:( نساها المرض بالهضرة .. دخلات معاه فالجو كضحك ) باش نتخالط لك مع ختك و طفيهلي بين عيني ؟ تولي سميتي المكوية ههههه أنا بالله و الشرع معاك ..!

حكيم:( قهقه بصوت مسموع و قال ) لا .. لا .. غير بالسياسة ..!

شريفة:( عاوداتها من موراها مثثثقلة ) السياسة .. هاذي لي كتهضر عليها غير من سميتها كتعرفها بنت الق** مقطرة مربية فحجر القواو***د .. ما كتاكلش معايا لا هي لا ماليها .. ما لقيتي ما تجبدلنا غير الجماعة دالقطاطعية و الشفارة ..!

حكيم:( ببرود رد ) ساهل تكون سياسي و لكن صعيب تكون طولانطي ( حط صبعوو على راسوو و حركوو بحال الفردي ) و هاذو لي كتهضري نتي عليهم غير بيادق ..!

شريفة: ما فهمتش ؟؟

حكيم: الق*** هي تعيش فبلاد كلشي عند بالوو فاهم و هما غير ملهوطين دايرين حالة .. القح** مهم ما شاديين حتى قل** ( وقف فالسطوب ضاير جهتها ) صعيب عليك تفهمي دومين نتي كتشوفيه غير من بعيد و ما معاشراش صحابوو ..!

شريفة: عندك الصح صعيب عليا نفهم واحد كيسولوه غير واش غذا عطلة كيقولك .. احم احم استنادا على ما جاء في حقوق الانسان و بناءا على ما اتفقت عليه الأمم المتحدة و المجتمع الدولي عامة .. بما أن الإنسان له الحق في

حكيم:( قاطعها كيضحك ) هههههه وا نمرة و شمن نمرة نتي ( حرك حاجبوو بخفة ) ما بقيتيش مريضة .. شفتك صحيتي ؟

شريفة: هيهي أن لساني كاع ما كيمرض واخا نكون كنموت عزيز عليه يدير الرياضة .. عندي حَرْبي مسكين الله يخليه ليا واخا عارفة ما غيمشي حتى يجيبلي خلى دار عشتي و لكن هانية ما نفوتوا ما يفوتني

حكيم:( بهدوء رد ) و هاكا الدنيا غاذية .. كن ما كنتي مكبل " مربوط " ما غتوقفش على الحيلة باش تتفك .. و كن ما كنتي مضغوط و محرق ما غتدويش بجهالة .. و كن كانت فمصلحة الشيخ .. القبيلة كاملة تشرب من البير .. كاع ما يحط عليه الحضية ..!

غمزها بحركة مثثثقلة بمعنى الفاهم يفهم .. حتى هي فهماتوو و بابتسامة مداتلوو يديها و قالت مغيرة الموضوع

شريفة: دخلنا فبعضنا طول و عرض و باقي ما تعارفنا ؟؟ ( بضحيكة ) لا هاذشي ماشي معقول خاصنا نزيدو بالعلاقات الديبلوماسية ديالنا للقدام ..!

بابتسامة هادئة خذا يديها بين كفوفوا مزير عليها حتى حس بالسخونية لي شاعلة فيها .. هز حاجبوو كيحركو بثقالة و العين ضاربة فالعين .. لا هو هبطها لا هي ..!

حكيم: حكيم .. سميتي حكيم ..!

شريفة:( ضحكات و قالت ) اوووه .. السمية العزيزة .. مشرفين أ سيدي و أنا مها ..!

حكيم:( طلقها من بعد ما شعل الضوو و زاد مع الطريق ) مشرفين أ لالة مها .. عارفة معناها بعدا ؟؟

شريفة: امم .. لا ؟؟

حكيم: عمرك سمعتي بعيون المها ؟؟

شريفة: فحياااتي .. آش كتعني ؟؟

حكيم:( دار السينيال باش يبلاصي .. حاضي مع لوطو و معاها ) عيون المها هو نوع ديال الظباء

شريفة: شنو هو الظباء ؟؟

حكيم: بحال يلا بغيتي تقولي الغزال .. عينيه كبار و مجبدين و واسعين .. المهم مقاااا***ن .. و زمان كانوو فالمجالس ديال الشعراء .. لي كيشكرو عينيها و زينها كيقارنوها بعيون المها

شريفة:( ضحكات و قالت ) اححح عليا .. لا هو الصراحة الزين زيينة .. ما كذبوش منين مدحوني .. يعطيهم الرضى لي ما يتئاضى و لا يتم ..!

حكيم:( شاف فالطبيب لي خاصهم يدخلوو ليه و قال ) غنهزك ثاني ؟؟

شريفة: وا آش ماش نئولك الحبيب .. أنا راه واحد الجلاخة مني ما كان و وجهي صنداااالة .. و راه قالوها ناس زمان لي صبر على لي ضرو الشيطان غرو ..!

حكيم:( تنهد و رد كيهبط بحالوو ) نزلي و كان ..!

شريفة:( تبسمات و مداتلوو يديها فرحانة غير تعلقات فيه قالت ) عرفتي من فوقاش ما تهزيت هاكا ؟؟ وايلي وايلي .. الليلة عندي متورخة

حكيم:( قالب وجهوو لجنب باش ما يشوفش شي حاجة ما هياش .. كتافوو كيتهزو بالضحك ) بالرب تا نمرة مقااا***ة

شريفة:( رمشات عينيها و ردات ) يالاه تكون عندك خبرة مسبقة فاش تتزوج بمراتك و تنوي تهزها فالدخلة دلوطيل ( شافت لوور ) خاصنا غير لي يزغرت مورانا و يكمل المشهد ..!

حكيم: ريحي هنا ( جلسات فوق واحد الكرسي و كمل هو هضرتوو ) نشوف شي حد نهضر معاه و أنا معاك

شريفة: تمام ..!

**************

بعد مدة لي كانت طويييلة .. راكبين فاللوطوو راجعين بحالهم .. بعد طول إنتظار .. أخيرا قلبوها و ضربات الشوكة فكرشها و بقاو جوج آخرين .. كل وحدة فشهر ..!

حكيم: سمعتيها شنوو قالت ؟ ما تبقايش تووشي " تقيسي " فالقطوط دالزنقة ..!

شريفة: واييه بنت الهم .. شفت الموت بسبابها .. قاتلي الطبيبة لداخل بلي فهاذ الوقت كيكونوا مسمومين بزاف .. و أحسن حاجة درت جيت لعندهم .. أما يعلم الله فين كنت نقدر نوصل ..!

حكيم: المرة الجايا انتابهي ( جبد تيليفونوا كيقلب فيه و شريفة حداه كتهضر .. غير دوز لابيل صقلات ) افين أخاي .. ياك هانية بعدا ؟؟ شنوو درنا فلافير ديالنا ؟ أنا واجد حتى دابا غير طلقني .. وا عليه نتقاشعوو تما ..!

شريفة:( شافت فيه و قالت ) مشغول واقيلة .. ز الصباح دابا صبح علينا .. خليتك بلا نعاس .. ربي لما سمح ليا .. جيتي قدامي بحال الدرهم الحلال ..!

حكيم: ما كاين مشكيل .. شنوو دابا ندوزك لأقشور ؟ غتقدري ترجعي بوحدك ؟ و لا تمشي معايا نطرق هاذ المسمار و نرجعوو مجموعين

شريفة:( بعد تفكير ) نمشي معاك غير هو واخا تعطيني ندوز مكالمة لختي .. غيفيقوو ما يلقاونيش غيتخلعوو عليا ( عطاه لها بصمت )

الشمش شارقة مجهدة و شتا خفيفة بدات كتنشنش لي سرعان ما قوات و عطات حقها حتى هي .. جوج ظواهر قليل فين كيتجمعوو لي هما الشمش و الشتا ..!

شريفة: الا اونزار تيلي تافوقت ازيسكازَر اوشن تامغرا ..! 《 كاين الشتا و كاينة الشمش و الذيب داير العرس 》

حكيم:( مخرج يديه من الشرجم و الشتا كضرب فيه ) تّريذ أو ووشّن

شريفة: كنت هاذ الجملة كنسمعها فصغري بزاف ( حطات يديها على ذراعوو بحماس ) شوف قبالتك .. قوس قزح .. شكيسميوه ؟؟ ( سكتات كتفكر ) اه عروس السما .. احييه ..!

حكيم:( تبسم من طفوليتها و قال ) ثيسليث أوجنّا

شريفة: الذيب راه معرس ولد اللاذينة هو معامن جات .. قالك بلي الذيب ناذرا فين كيتلاقى برفيقة العمر لي يرتاح معاها و تكون كتكملوو .. شي حاجة لي ما كتوقعش ديما و ماشي بالساهل كيحصل عليها ..!

حكيم: فالأصل كيgولوو بلي الذيب وصل لسن الزواج و ما كانش باغي يعرس حيث عارف لي تابعوو .. و عطاهم شرط تعجيزي هو نهار طيح الشتا و تكون الشمش ساطعة فنفس الوقيتة .. تما فين غيقبلهم بداك الزواج لي شرطوو عليه .. عند بالوو راه مطور .. فلخر تحنت و تدارليه عرس كبير كلشي هضر عليه ( حرك راسوو بمعنى دوز حيد ) كيبقاو غير تخاريف لا غير ..!

شريفة: بالعكس هاذو تقاليد زوينين .. عاقلة شحال كنا كنفرحوو فاش كيطلع قوس قزح و نجلسوو نغنيوا ..!

حكيم: و كاين ثاني لي كيgولك كيتسمى بعرس الذيب .. حيث فاش كتصب الشتا القطيع دالخرفان كيهرب و داك الخريف الضعيف فيهم كيبقى .. موخر و غير كتشرق الشمش كيفرح و كيخرج يتأكد كيصدق مقولب ..!

شريفة: كيلقى الذيب واقف كيتسناه ههه و فاش كيطيح الخروف بين نيابوو .. فرحتوو كتكون كتساوي فرحتوو بزواجوو ..!

حكيم: المهم هاذشي كامل غير الخوا الخاوي .. الهضرة دالناس القدام لي كيتيقوا بهاذ التعاويد

شريفة:( حركات راسها بتأييد ) وا راه أكيد ا صاحبي و لكن المهم كانوو خالقين بيناتهم جو زوين .. كن ما كانت هاذ القصة شكون فينا كان غيعرف بلي الذيب ما كياكلش لحم الجيفة .. و من أوفى المخلوقات لمراتوو .. الاغلبية كيتزوجو مرة وحدة و فحالة توفات الذئبة ديالهم كيكون حداد طويل يقدر يوصل حتال عام .. و على عكس كاع الحيوانات لوخرين .. الذيب عمرو يطيح فزواج المحارم .. بالعكس بار بواليديه لواحد الدرجة لا تصور و خوتوا هما الضو د عينيه ..!

حكيم: بصح .. الناس عندهم فكرة غالطة بزاف على الذياب .. مهم خلينا من هاذ اللغى .. غنمشي غير لهنا شي خمسة دقائق و أنا معاك ..!

بلاصى الطونوبيل و خلاها موراه شادة تيليفونوو لي بلا كود مدوزة لابيل لنمرتها .. هضرات مع أسية و طمناتها عليها و قيداتلوو نمرتها فالتيلي باسم " ثيسليث أوجنّا "

هزات راسها فيه بابتسامة فاش فتح عليها الباب عاطيها ساشي كبير فالأبيض .. رمشات فيه باستغراب قبل ما يقول

حكيم: شي سخرة ليك .. ما تبقايش بهاذ الحالة ..!

خداتها من عندو و فالبلاصة سد عليها الباب .. لقات عباية مفتوحة فالخزي .. شكلها عصري و كمامها مطرزين بطرز زوين ماشي سواقي .. مع كلاكيط خفيفة لرجليها .. استغربات من العباية لي جايبها ؟ ما فهماتش شنوو قصد بيها ؟ زعما تستري يا أختاه ؟

شريفة:( من بعد ما لبساتهم و شكراتوو .. قالت باستهزاء مخفي ) زعما هاذ البنات ديال هاذ الوقت غير الله يستر مع الله يحفظ معاهم .. ما بقاو لا يحشموو لا يرمشوو .. كثر العيب بزاف غير الله يدينا فالضوو و كان ..!

سبحان الله كيفاش بعد المرات كنتلاقاو مع شي واحد لأول مرة و مع ذلك كنحسوو براسنا مرتاحين برفقتوو لأقصى حد .. كنتصرفوو بطبيعتنا بلا زواق و لا نفاق .. ما كاينش داك البريستيج فالهضرة و عنداك نقول شي كلمة و يفهمني غلط ..!

بعد أيام و هي ما كتنعسش .. ما حساتش براسها تا كانت غمضات عينيها و مشات فسابع نومة .. ما خايفاش منوو ولا شنوو ممكن يوقعلها معاه .. بلعكس رمات الحمل كامل من على كتافها متبعة فقط إحساسها و شنوو كيقولها ..!

واقف حكيم معاه جوج رجال فوق واحد الأرض .. كيتناقشوو بيناتهم .. هاز فيديه شي وراق كيقرا فيهم .. بعد أخذ و رد .. مد يديه و سلم عليهم بقوة ..!

رجع كيزرب للطونوبيل لي موقفها جنب الطريق .. ساد الشراجم و مطرق البيبان على شريفة خوفا يجيلها شي حد و هي ناعسة ..! مع فتح لباب ضربات معاه ريحة فشكل حتى بعد وجهوو مكمشوو باستغراب .. جبد من حداها شي وراق مدهم ليهم و هو واقف مكالي مع الباب كيتوادعوو بيناتهم ..!

حكيم: هذا هو .. نتقاشعوو بلاتي أ با حسن

ركب فبلاصتوو و ديمارا خارج من تما .. غير زاد شوية فتح الشراجم تتهاوى الدنيا .. أما شريفة غير دار أمارش فاقت كتفوه بتعب و دوز يديها على رجليها لي حاسة بيهم فازكين بطريقة ماشي عادية .. و الريح لي داخل جابلها البرد فنصها التحتاني كامل ..!

ما احتاجتش مدة طويلة باش تفهم الفزاك ديالاش ؟و فالبلاصة وجهها تزنك حتى بغاو عينيها يدمعوو ما راضياش بشنو دارت ... بلعات ريقها و قالت بصوت خافت ..!

شريفة: كملتي ؟

حكيم:( جاوبها مركز مع الطريق ) صافي طرقنا معاهم هاذ المسمار دابا .. غذا و نتكاتبوو ..!

شريفة:( كتضور فعينيها و تشمشم بلا حس .. ما عرفاتش واش عاق بيها و لا لا ... لكن بغات تحافظ على كبريائها و تلفوو بالهضرة على ما تمشي الريحة ) مزيان الله يسخر .. غير حضي مع النصابة راهم كثار فهاذشي .. الواحد ما بقاش قادر يتيق كاع

حكيم:( حرك راسوو بالايجاب ) حفينا سناننا فهاذشي ما عندهم ما ينيطوو منا " يديو منا " ..!

شريفة: و هاذشي فيه الربح ؟ دابا يلا بغيت نطلع مشروع بشحال يطيح عليا كاع ؟؟

حكيم: الأرض بحالها بحال الذهب .. عمرك تخسري فيها ( شيرلها بيدو ) مشروع فهاذ القنت يلا بغيتيه ينجح أتضربي على المنتجعات السياحية .. بحال El cortijo .. راه دزنا عليه قبيلة .. غيخدملك مخير ..!

شريفة:( سكتات كتفكر ) منتجع كاع ؟ غيطيح عليا بغسيل الفندق ..!

حكيم: لأراضي هنا طايحين فالثمن .. الواحد يلا عندو ياخذ و حتى يدير باش و يبنيهم و لا يعاود فيهم البيع من بعد .. غيربح التريبل لي خسر ..!

شريفة: بلان هذا والله

حكيم: يطلعولك البني و يلوحولك الضالة بشي 10 دالمليون .. الفينيسيون هي لي كيضربوو فيها يديهم .. المهم فالطوطال بين الارض و البني يقدر يتقام عليك بشي 30 مليون هكاك و لا قل

شريفة: لا بزاف أويلي .. نبيع راسي كاملة و ما نجيبش داك الثمن

حكيم: مفكرة فشي حاجة فبالك باغى تطبقيها ؟

شريفة:( بحماس ) مطعم ديال الطبخ يكون جامع كاع لصناف .. الاكل المغربي الاماراتي السوري الهندي هههه المهم كلشي ..!

حكيم:( تبسم بثقالة و رد ) وا شغنقولك .. الخلا و القيفار لي هنا غير د شي سطل دسيكوك و اللبن و طحن مع راسك .. اما هاذشي لي كتهضري عليه خوذي محل واجد فالمدينة بلا حريق الراس مع الطاشرون و الخدامة ..!

شريفة: ديكشي لي كنفكر فيه اصلا غير باقى تالفة شوية ... مع غنبدل حتى المدينة .. باقية مترددة بين سلا و كازا .. راك عارف اليوسفية مدينة صغيرة و شي عشر سنين و أنا ساكنة فيها .. غتجيني صعيبة فداك لول نعيش فمدينة كبيرة ..!

حكيم: كازا خاصك غير تعرفي معامن تترافقي و فشمن سيكطور تعمري .. غتعجبك و ترتاحي فيها ( هز حاجبوو ) يلا جيتي لتما ضربي المحل على حسابي و العباسية عليك .. آش قلتي ؟

شريفة:( ضحكات و ردات ) هههه تستاهل كل خير .. ربي يخليك .. غير نفك شي مشاكيل عندي و نرصي دماغي و نعول و هانا معاك ..!

حكيم: على مولانا

شريفة:( هبطات عينيها كنقلب على القرعة دالما .. هزاتها لقاتها خاوية ) ما بقاش الما ؟؟ يلا دزتي على شي حانوت وقف عافاك ناخذ شي قرعة ..!

حكيم:( رد ببرود .. ما كيشوفش فيها عينيه غير مع الطريق ) شوية و ندخلوو فلابيسط ما غتلقاي فين تفشي النبولة .. صبري حتى نوصلوو ..!

غير كمل كلاموو قلبات وجهها لجنب كتبرد فيه من التزنيكة لي طلعات معاها .. عرفاتوو عاق بيها و شم فالروائح العطرة ديالها حتى شبع .. زيرات لسانها حتى عيات و فلخر طلقاتها و هي مغمضة عينيها ..!

شريفة: عندك الصح .. عرفتي قبيلة ؟ ( كملات بتفسير ) فاش وقفنا حدا الأرض .. حليت الشرجم نشم الهوا دسيدي ربي .. قلبوني الروايح .. واخا رجعت شديتوو لسقات داك الريحة فالطونوبيل ففف زعما كاينين شي ناس الله يهديهم و كان .. لا حنا ما نكونوش بحالهم .. حتى نوصلوو

حلات عينيها كتشوف فيه بنص عين .. أما هو ما قدرش يصبر و فلتات ليه ضحكة خفيفة .. ماشي من لي دارت و لكن من طريقتها الحلوة فالهضرة و التمسكين ... سرح حلقوو كيحرك فراسوو بلا حول و لا قوة إلا بالله ..!

شريفة:( هزات حاجبها شادة البكية بزز ) علاش كتضحك ؟؟

حكيم:( شاف فيها و ركز مع الطريق ) تفكرت ملاك .. حمقة بحالك ( كمل بتفسير ) الخوادرية سميتها ملاك ..!

شريفة: اااه هههه ( عاوداتها موراه بهدوء ) ملاك ..!! شحال بيكم فالدار ؟؟

حكيم: كاينة يمَّا و خمسة دالخوت

شريفة: بنت وحدة وسطكم ؟ ( حرك راسوو بالايجاب و ردات عاضة على فمها ) صعيبة الصراحة .. ناري يحسن عوانها ههه واخا هكاك سعداتكم .. العائلة ما كاينش بحالها نهائيا ( زفرات بصوت مسموع و رجعات تبسمات ) حتى أنا عندي واحد الكتكوتة معوضاني بالدنيا و ما فيها .. كن ولدتها من كرشي و موحال نبغيها كيفما دابا ..!

حكيم:( فهم بلي يتيمة ) تهلاي فيها .. ما غتلقاي ما حسن منها تشمي فيها ريحتهم .. الله يرحمهم ..!

شريفة:( تبسمات ابتسامة باهتة و سكتات حتى شافت الباراج دالجوندارم و قالت ) شفتهم مزيرين السمطة .. قالك شدوو شي حشيش ما حشيش ..!

حكيم: بصح ؟؟

شريفة: واييه .. تلقاهم غير طالقينها علينا و ضامسين اللعبة بيناتهم .. أودي كهمونا بالتبهلة و سريق العواد .. غير لي يشعل فمهم العافية و يجلس يتفرج ..!

حكيم:( هز حاجبوو و رد ) اللهم مخزن ظالم وا لا رعية سايبة .. نهار يتطلق اللعب تلقايهم كيقطعوو فلحمك طراف و نتي كتشوفي و ما كاين لي يهضر .. بنادم صعيب يلا ما تحك ما يعطيش الريحة ..!

شريفة: من هاذ الناحية عندك الصح

حكيم:( ضحك جنب ) حسدتيهم ديري بحالهم ..!

شريفة: شنوو زعما نخدم فالحشيش هههه و الضومين فيه الفلوس الصحيحة زعما ؟ كيبانلي كولشي مرمي ليه .. كتامة عامرة غير بالبزنازة .. شنوو غيخلي الربح يكون طالع عند واحد على الثاني ؟

حكيم: واجدة خاص غير لي يجبدك ؟ ( هز حاجبوو و رد بثقالة مطول فالهضرة ) فيه التخث دالفلوس ماشي غير الفلوس ..! ديري يديك معاهم و غتتعلمي القوالب ..!

شريفة:( حطات يديها على حنكها ) و الله حتى بلان .. شحال يخصني باش نجمع 400 مليون فنظرك ؟؟

حكيم: ماشي بزاف

شريفة: و كيبغيوا يخدموو معاهم العيالات زعما ؟

حكيم: وااهلي ؟ راك هوتة مضخمة ليهم .. كيقلبوو على بحالك بالريق الناشف يطلعوو معاهم القرعة ..!

شريفة: اويلي

حكيم: وا ريحي دماغك .. ما عندك ما ديري بداك الق*** كامل .. جمعي كرك حسن ما تلقايه كيشرشر فشي قنت .. دايرين عليه النوبة ..!

شريفة:( كمشات فمها من المنظر لي تخيلاتوو ) أنا بالله و الشرع معاك .. أجي بعدا قبيلة بغيت نسولك لهجتك فشكل ؟

حكيم: لا عادية .. غير مرة مرة كتزهق شي كلمة بالوجدية .. هذا ما كان ..!

شريفة: اه يمكن ماماك من وجدة

حكيم: لا .. دوزت السربيس ديالي تما .. سنين و أنا عايش فيها .. أيام نيت ( ميل راسوو ) ناس الشرق من خيرة الناس لي تعاشرهم ..!

شريفة: اودي فينما مشيتي كاين طوب و حجر .. غير الله يلاقينا مع ما حسن منا و صافي ( قلبات راسها جهتوو ) مي السربيس ديالاش ؟؟

حكيم:( ضور وجهوو تا جات العين فالعين و قال ببرود ) دالبوليس ..!

شريفة:( بحال ضربتيها بتسرفيقة .. مصات شنافتها و قالت ) دابا نتا بوليسي ؟؟ ( رمشات عينيها فيه ) و الله تا عرفتها بالله .. شفتي أنا مسخووطة و كنطيرها فالسما ..!

حكيم: ياك بعدا ..؟

شريفة: و الله العظيم و لكن ما عندي ما نسالك راك حاظر ناظر .. بغيت نجربك ساعة صدقتي ناضي .. المخزن ديالنا يعولوو عليه الناس ( بضحكة صفرة ) عاش الملك الله ينصر سيدنا ..!

من بعد ساعات طويلة دوزاتهم معاه و لي ما حساتش بيهم نهائيا .. أخيرا وصلوو للساحة فين مبلاصية طونوبيلتها .. رمشات عينيها لي فيهم لمعة خفيفة .. و بابتسامة مشرقة كتغطي بيها حزنها .. قالت

شريفة: وصلنا ..!

حكيم:( رخى يديه فوق الفولا و قال بنفس النبرة ) وصلنا

شريفة:( حنات راسها لثواني و رجعات هزات عينيها فيه .. مداتلوو يديها و بصوت مخنوق قالت ) ما سخيتش بيك .. شكرا بزاف على كاع لي درتيه معايا و سمحلي يلا عيقت عليك .. كن ما ارتاحيت لك ما نهضرش معاك هكاك

شد فيها مزير عليها بيد و اليد الثانية حاطها فوق منها .. عينيه فعينيها بنظرات غريبة ما قدراتش تفرزهم .. هي ماشي من النوع لي كتحشم نهائيا و لكن فهاذ اللحظة و بداك الشوفات لي داير فيها و السخونية لي طالعة معاها من يديه .. تزنكوو حناكها و ما قدراتش تخلي عينيها عليه ..!

حكيم:( بعد مدة قال ) بالعكس .. تشرفت بيك أبنت البلاد .. يلا ضربتي لكازا مرحبا بيك ( جبد تيليفونوا )

شريفة:( حركات راسها بالايجاب ) ضروري ما نسول فيك ( قبل ما يقاطعها قالت ) نمرتي هي لي صونيت عليها قبيلة راني قيدتها لك .. نبقاو على اتصال ..!

حرك راسوو بالايجاب و طلق منها بالشوية .. حتى فتحات الباب من جهتها و هبطات .. رجعات ضارت عندو و حركات يديها ب باي باي .. باين فيها ما ساخياش و هو نفس الشي متبعها بعينيه حتى بانولوا بنت فعمر المراهقة و مراة كبيرة وقفوو عليها كيهضرو معاها .. رجع مارشاريار و مشى ..!

حجيبة: تبارك الله عليك زعما ما عندنا ما نسالوك .. مخليانا و زايدة ما مسوقاش و راجلك كيعيط و يعاود .. صعر عليك قالك دابا نشدوو الطريق نرجعوو بحالنا .. يالاه زيدوو خلاص

أسية:( قربات من شريفة و قالت ) خلينا لهم كلشي لفوق جبنا غير لباسنا .. واش نتي مزيانة أختي ؟؟

شريفة:( عنقاتها بقوة خاشية وجهها فعنقها كتهضر بالصوت لي تسمعها هي فقط ) من بعد 12 لعام شفتوو أ أسية .. و ماشي غير شفتوو راه ( ساطت النفس مرعد ) عمري ارتاحيت لشي حد فحياتي قد لي ارتاحيت ليه ... جاني بحال نفسي ماشي واحد غريب عليا ما كرهتش ما نطلقش منوو و نبقى غير معاه ..!

أسية: علامن كتهضري ؟ ( بدهشة ) واش هو هو .. ولد الفرناتشي ؟؟؟

شريفة: أجمل ذكرى فحياتي ( تنهدات و بعدات وجهها كتمسح فعينيها ) كانت غتبدل شحال من حاجة كن تلاقينا فالوقت لي كنت كنقلب عليه .. شفتي الدنيا أكبر بنت الق***

حجيبة:( قاطعاتها بالغوات ) واش غتبقاو توشوشوو ليا تما ؟؟ دوزي حلي لباب نتحركوو بحالنا

شريفة: ديري بووق و عيطي على لي يغوت معاك .. راه باقي ما سمعتي لهم ( قلبات وجهها كتحسبن ) عطيها الزمر ياك عندك .. لاش بقيتوو برا أصلا ؟

مداتلها أسية الكونطاكط و بركات على البوطون فتحاتلها

أسية: خفت نمشيوا نقيصوو شي حاجة و نصدقوو فشي كارثة .. خلينا من هاذشي .. شنوو قالك شنو قلتيلوو ؟؟ واش عرفك ؟؟

شريفة: شكيت واش هو واخا تبدل بزاف .. و لكن فاش عيطتلك طلعاتلي نمرة د ماماه مدخلها بسميتها .. يمَّا حَبيبة .. تأكدت بلي هو ساعتها ..!

أسية: ايوا ؟؟

شريفة: كيفاش إيوا ؟؟ شنوو كتسناي مني ؟ نقز عليه و نقوولوو ياه عرفتي أنا شريفة لي ما خلات حتى قنت كتقلب عليك ..! ( تنهدات ) دوزي نطلعوو بحالنا من هنا .. حكيم صعيب ندخلوو فحياتي فهاذ الوقت .. كولشي غيتخربق يلا عرفني و كاع لي معولة عليه غيتضرب ليا فالزيرو .. هاذشي يلا كان عاقل عليا بعدا ..!

أسية: علاش لي ما يعرفك ؟؟ أنا متأكدة حتى هو ما نساكش ..!

شريفة: أسية نتي راك ما فاهماش واقيلة ؟ راه تابعاني حرب مع إلياس و حكيم ما عندو حتى بلاصة فهاذ الصداع كامل .. و أصلا ما بقاتليش الطاقة فين نخرج من حبس و ندخل لما كفس منوو .. هاذ الساعة طالبة غير الفكاك و راحة البال ..!

حجيبة:( غوتات من الشرجم ) واش ما غطلقوناش من الهضرة

شريفة:( ما جاوباتهاش حدها شافت بابتسامة فأسية ) عرفتي تبدل بزاف .. زيان المسخوط و صحاح هههه .. ستيل ديالوو مفشكل .. حربي باين عزيز عليه التمشكيل ههه

أسية: العار وصفيهلي ؟؟

شريفة: هههه دابا تشوفيه من بعد ( غمزاتها ) و لكن مختالف على كاع ولاد هاذ الجيل .. قليل فين وليتي كتلقاي واحد عندو شخصية ماشي الهوا لي جا يديه .. شي و لا كيقلد شي .. تخرجي لزنقة يبانولك كلهم مغوفلين كي القرودة .. مربيين الشعر و اللحية مطراسية و لا تستيلاو كيخليوها مغوفلة .. هو العكس .. ضارب لواحد و مطراسيها مزيان مع جبهتوو و حتى من اللحية ما عندوش .. المهم كتحسيه راجل ماشي نعيوة غيتسابق معاك على المرايا ..!

أسية: ههه ناري بغيت نشوفوا ( عنقاتها ) الله يفرحك يا ربي و يالاه دابا نركبوو قبل ما تعيط بالعداو

شريفة:( فتحات الباب ركبات و ديمارات كتشوف فالمرايا ) ها حنا ماشيين .. جوج كلمات ما تخليناش نهضروهم فخاطرنا

حجيبة: و الولد لي من الصباح و هو يعيط عقلوو غيخرج ؟؟ ياكما عند بالك ديال راسك ؟ راك مزوجة ا لالة .. ما تعيقيش بزاف

شريفة: هاذ الهضرة كتبيها فوريقة و فزكيها و شربيها و عيطي معاك للصالحين .. زدتوو فيه واش نهار ما نجلسوهش فخاطرنا ؟ ضاربة سبعة دالسوايع دالطريق باش نرجع لغذ ليه .. هو لي غيصوكهم ليا ؟؟

حجيبة: ضبري لراسك ... مهم شدي تيليفونك و ردي عليه .. قالك نقبطوو الطريق نرجعوو هي نقبطوها .. و انا لي متيقاك و جايا معاك .. بقالك غير الكذوب

شريفة:( رفرفات بعينيها و عوجات فمها ) الكذوب منكم تعلمتوو و يلا شداتك لي ما تعلم نقطعلك أول كار و نسيفطك عندو .. ما غادية أنا فين حتى نمشي ندوش و نرتاح من الطريق و الوجع و يحن الله ..!

حجيبة: و ولدي

شريفة:( فقصاتها تا غوتات صاعرة ) ولدي ولدي ولدي .. الخرا المخرنن هذا .. السيد بقاتلوو خطوة للقبر و هي كتراري بيه بحال ولد ست شهور .. بقالك غير تعطيه البزولة يمصهالك ..!

أسية: صافي بردي

شريفة:( وقفات الطونوبيل جنب و قالت ) مناقص من شي سفر دالمرض .. ما صايكاش انا كاع .. عيطيليه يجي يوصلك يا الله .. بنادم مريض مهلوك و زايدينوو بالهضرة .. نمشي ببولي و عرقي باش ولدك يبقى على خاطروو تفوو

قلبات وجهها كتبركم و هما ساكتين عاد ديمارات لووطو فاتجاه طنجة .. تبدل عليها و ترتاح عاد تشووف شنوو دير ..!

********************

حجيبة:( جالسة كتنهد و حداها أسية و شريفة .. كتشوف فبنتها وردة لي كترحب و تعاود بيهم .. باغى تصلح الجرة ) و الله ابنتي لا هاذي دخلتنا عليك .. من الطريق لهنا .. تهدينا كاع ..!

وردة: مرحبا و نهار كبير هذا .. نيت من شحال هاذي ما جيتوو عندي و فرحت بيكم .. شريفة كي بقيتي مزيانة ؟؟

شريفة: الحمد لله ( سرحات عينيها ) فين هما لولاد شفتهم ما كاينينش ؟

وردة: العزري راه فالمدرسة و البنت ( تنهدات ) خلي داك الجمل راكد .. حمقاتني شيباتني .. يا ختي ما كتخلي حتى حاجة فبلاصتها .. الريكاطة كتنوض عندي فالدار .. الريدويات تتعلق فيهم وا الحيط تقشرو و تاكلوو .. فينما قلبت عليها نلقاها كتحفر دير شي كارثة .. ما يمكنش تجلس هانية .. ضربت .. غوتت .. هضرت بالخاطر و والوو ..!

حجيبة: وا الله يهديهم عليك

وردة : حتال للبارح واحد جارتي قاتلي واحد السيد يديه مباركة شكراتولي بزاف .. ولادها كانوو بحال الشكل ديالي و دابا تهدنوو .. ايوا جبتوو يشوفها و يقرا عليها شي بركة .. على الله الفكاك يجي على يديه .. راه معاها دابا

شريفة:( خرجات عينيها فيها و وقفات ) واش نتي مريضة ؟؟؟ واش حمقة ؟؟ مخلية بنتك صغيرة مع واحد ما عرفت منين ملقطاه و جايا جالسة معانا مرتاحة ما ناقصك حتى خير ؟؟

خلاتهم موراها و طلعات بالجرا كتحل بجهالة فالبيبان تا طاحت فالبيت فين كاين السيد و بنت لوستها .. دخلات بحال البرق جرات البنيتة عندها و هزات صبعها فالفقيه عينيها خارجين و الذاكرة كترجع بيها للطفولة .. للحذث لي باقي ليومنا هذا مؤثر لا على نفسيتها لا على صحتها ..!

"فلاش باك"🔥

المدرسة هي البيت الثاني للطفل .. داك الوطن الصغير لي كيكون فيه شخصيتوو و يبني أحلاموو و طموحاتوو ..!

كل شخص كيتواجد فوق هاذ الكرة الأرضية عندو ذكريات لا تنتسى فهاذ الفضاء .. بحال أول نهار غنكتاشفوها .. الأنشطة المميزة لي كنمارسوها كالمسرحيات و التكريمات د نهاية السنة الدراسية .. و ما إلى ذلك ..! و شريفة كأي وحدة مننا عندها حتى هي ذكريات خاصة بيها .. لكن ليست بالسعيدة ..!

فتاة فعمر الزهور .. ملامحها بريئين و شعرها طويل مضفراه جنب ضارب لها حتى لجهة الحزام دالسروال .. ضعيفة و قليولة .. كلشي عندها حدو قدو .. كتتمشى حانية راسها لابسة طابلية بيضة و كارطابلتها محملاها على ظهرها ..!

وصلات لدارهم واقفة قدام باب الحديد كتبلع فريقها مترددة و مرعودة .. خايفة من لي جاي لكن ما عندها حتى بديل .. دقات فالباب مهبطة الكاسكيطة على وجهها و حانية راسها ..!

تفتح الباب و بانت امها كَبيرة .. لي غليضة و وافية .. زينها سوسي حر .. باينة فيها حارة و صعيبة .. دايرة العكسة على شعرها و نواظرها خارجين من الجنب ..!

كبيرة:( بنبرة قاسحة قالت و هي دايرة يديها على جنبها ) شهاذ الوقت جايا فيه ؟؟ باقي الحال على الصونيط ( خرجات عينيها فيها ) ما قريتوش ابنت الحرام و بقيت تالعة ليا فالدروبة تال هاذ الوقت

نزلات عليها بضربة لبين كتافها زواتها بيها و قبل ما تجرها للداخل قالت بصوت باكي

شريفة: لا ا ماما و الله حتى قريت .. الأستاذة هي لي خرجاتني و سيفطاتني نعيطلك تتكلمي لها

كبيرة:( جراتها من ذراعها لعندها مطرطقة عينيها فيها ) آش درتي ابنت الحرام فعايلك ؟؟ بقالك غير تجيبيلي التبرية تال قلب الدار ..!

طلعات معاها بقرصة حتى نقزات فبلاصتها شادالها يديها كتبكي و ترغب

شريفة: ما ضربينيش أ ماما و الله ما درت شي حاجة ( مسحات حناكها و كملات بترجي ) عافاك

كبيرة:( طلقاتها ) هانا غنلبس جلابتي و نمشي نشوف هاذ ما درت والوو كي دايرة .. و يا ربي نسمع عليك شي هضرة .. لحمك نفرسوو لك الكلبة ..!

دخلات لقلب الدار كتقلب على جلابتها و زيفها بالخبيط .. غير كملات طفات على البوطة و هزات السوارت و خرجات عندها كتجر فواحد البلغة فرجليها .. غادية و تنكر على شريفة لي شاداها البكية و التقفقيفة ..!

وقفووا قدام باب صغير مصبوغ بالبلوسيال .. دقات فيه كبيرة بالجهد حتى حل عليها الحارس لي تما واحد الشرجم صغير فيه جوج حديدات فالوسط .. داير بحال دالمحابسية ..!

شريفة: راني قارية أ عمي .. الأستاذة سيفطاتني نجيب ماما و نرجع

كبيرة: يعطيك الغمة ( شافت فيه بعصبية ) حل لنا هاذ الباب نمشيوا لشغالنا

دوز الزكروم و فتحلهم الباب دخلوو و هو قالب وجهوو من على كبيرة كيحسبن ..! كانت ساحة واسعة متوسطينها شجيرات و وريدات فالألوان و الأشكال .. الحيوط دالأقسام مقشرة لهم الصباغة .. الابواب دالخشب و طاويلات محفرين .. الحديد ديالهم مدري مزيج ما بين اللون الأحمر و النحاسي ..!

قصدات شريفة قسمها دقات بالشوية فالباب و ثواني معدودة كانت تحلات الباب و بانت الاستاذة بطابليتها البيضة و الطباشير فيديها .. شافت فكبيرة و قالت

الأستاذة: السلام عليكم أ لالة ( مداتلها يديها سلمات عليها ) نتي ماماها دشريفة ياك ؟؟

كبيرة: هي هاذي .. آش دارت المسخووطة .. راني مبرية منها و من فعايلها .. يلا دارت شي حاجة غير عطيها من عندي و نكمل أنا عليها فالدار ..!

الأستاذة:( ردات محمرة عينيها فشريفة ) بنتك الشريفة قراية و مهدنة .. داخلة سوق راسها و ما كتجبد حد و تمارينها ديما مصوباهم ما كنلقاو معاها حتى مشكل

كبيرة:( قاطعاتها ) و لاش مكلماني أ أستاذة ؟؟

الأستاذة: شفت شي حاجة ما عجباتنيش .. هاذي ماشي تربية أ لالة تحسني للبنت حجبانها ؟ فهاذ السن تضربيلها النص فحجبانها ؟

كبيرة:( شافت فشريفة و قالت ) حيدي داك الكاسكيطة و هزي وجهك نشوف

مع هزات وجهها فيها بانلها حاجب مدخول فيه شوية باين محسن .. جراتها من حنكها بقرصة مطلعاها لعندها و عينيها لي مكحلين بكحول بلدي خارجين فيها ..!

كبيرة: شكون لي حسن لك حجبانك الموسخة ؟؟ ( كتجرها من حنكها لي حمار و بغى يطرطق بالدم .. من الشدة لي قابطاها بيها ) أ دوي ؟؟

بقات ساكتة عينيها مغرغرين بالدموع حتى دخلات الأستاذة لجهة البيرو جابتلها تيوو فاللون الاحمر .. مداتوو لكبيرة .. لي ما عطلاتهاش و عطاتها سلخة بيه .. قدام القسم كامل ..!

ما عارتش اهتمام لنفسية شريفة قدام صحابها لي كيضحكوو عليها و يوشوشو بيناتهم و هما كيسمعوو أمها كتنعتها بأخبث الأوصاف .. ما كاين غير بنت الحرام .. المسخوطة .. الكلبة .. الموسخة .. ما حيلتها للعصا لي كتاكل و لا للعينين لي كيشمتوو فيها ..!

داز الوقت و بردات العصا لي كلات و لكن لداخل ديالها واش برد ؟ أبدا ..! جمرة شاعلة كتكوي فيها غير بالمهل .. حتى كتقول طفات و كترجع تزند ..!

الأنظار كلهم عليها .. تماما بحال أول يوم فالمدرسة .. فين كيسولوها الاساتذة على الأب ديالها و الحروف كيتبعثرو من لسانها .. ما كتقدرش تركب جملة وحدة فحضور زملائها لي كيجاوبوو بلاصتها باستهزاء واضح .. و أغلب العبارات كتكون .. " هي بنت الحرام .. غير ملقطة .. ما عندهاش باها ..! "

حسكة خايبة كتحس بيها فقلبها .. كتقتلها غير بالشوية .. من ديما كتتجنب الصداع و كتمشي غير مع الحيط باش ما يجبدوهاش هي و أصلها لي عندها عقدة منوو .. العقدة لي رباتها فيها امها هي اللولة .. و خلاتها تكره حتى سميتها .. شريفة ..! فين هو الشرف فالموضوع هي مجرد لقيطة نكرة حتى واحد ما راضي بيها ؟؟

بعد نصف ساعة تسمع الصونيت و خرجات حانية راسها قلبها كيحرقها و عينيها بحال شي بركة بالدموع .. فينما سمعات شي واحد كيضحك و يهضر موراها كتقول عليها هي ..!

وقفات فالجنب كتسنى فأسية لي عندها أول عام .. باش يمشيوا بجوج .. لأنوو المدرسة فين كيقراو جامعة كاع المستويات ..!

أسية:( جايا كتزرب تا ترمات عليها و قالت ) سمحيلي أ شريفة .. سمعت شنو وكع ( عينيها دمعوو ) أنا السباب أنا لي كصتك .. نتي ما بغيتيش أنا لي ضربتك فيه .. أنا حمارة تفوو عليا

حنات راسها كتبكي تا حسات بجوج يدين عنقوها و صوت حنين كيسكتها

شريفة: ما تبكيش أ خيتي العزيزة .. ماشي مشكل أنا ما بيا والوو

هزاتلها راسها و تبسمات معاها كتحرك فراسها بالايجاب .. و زادت هازالها شكارتها كتسول فيها شنوو قرات و كي دوزات صباحها .. مسافة الطريق و كانوو قدام دارهم .. الباب الكبيرة د برا مفتوحة و واقفة فالسطوان كبيرة مع عبد الله خال أب شريفة لي عمرها شافتوو و لا عرفاتوو كي داير ..!

كبيرة:( غير شافتها بغات تطير عليها .. كن ما شدها عبد الله ) طلقني أ خويا طلقني نوريها التكلبين .. وصلتي لحجبانك ابنت الحرام ؟؟ ايوا صافي من هاذي لتاشيخيت ..!

عبد الله: هضرت معاك ا كبيرة زعما .. الله يهديك .. ما كنحلوش المشاكل هاكا ( شاف فشريفة و فتح يديه ) أجي عندي أ بنتي

قربات منوو بخوف عينيها غير على كبيرة .. حتى حساتوو جرها عندو عنقها و باسها فحناكها بجوج .. مدوزها من قدام امها فاتجاه الدروج ..!

عبد الله: طلعي عندي للدار نهضر معاك ( شافت فيه بتردد و كمل قائل ) طلعي ما تخافيش غير خالك أبنتي

خلاتهم من موراها و طلعات شادة على قلبها لي كيضرب من لي تابعها مع كبيرة .. أما لتحت هز عبد الله أسية كيلعبلها فشعرها بابتسامة

عبد الله : دخلي جلسي مع خالتك كبيرة .. شوية و تهبط عندك شريفة تلعبوو بجوج ..!

شاف فكبيرة لي جرات عندها أسية .. كيحرك راسوو من الفوق للتحت كأنوو كيقولها الأمور مضبوطة ..!

عبد الله:( بخفة لحق على شريفة .. شد باب الدار عليهم و بابتسامة حرك يديه قداموو كيكيدها ) زيدي أبنتي دخلي ..!

دخلها لبيت النعاس ديالوو و شد الباب موراه .. طلع فوق الناموسية و طبطب قداموو

عبد الله: أجي ابنتي تجلسي .. ما تخافيش ما غنديرلك والوو .. غير نرقيك من العين .. زيدي ..!

شافت فيه بخوف و استغراب كتضور فعينيها و هو كيحرك فحجبانوو باش تقرب .. حتى جلسات حداه و دفعها تكات على ظهرها ..!

واقف على ركابيه كيجر فالمانطة لي مطوية فالراس ديال الناموسية .. سرحها و غطاها كاملة مخلي غير وجهها لي كيبان و هو جالس قدامها على ركابيه و مفرق رجليه كل وحدة فجنب .. لابس فوقية بيضة واسعة ساتراه ..!

بابتسامة جرلها يديها و حط كل وحدة على العصبة درجليه من لتحت كيحرك فيهم بحركات دائرية و عينيه كيغليوا عليها ..!

عبد الله: مالكي مخلوعة ؟؟ ارتاحي ابنتي و بقاي ديري هاذ الحركة .. غير غنرقيك لا غير .. كما على الله تبرد الامور بينك و بين مك ..!

بدا كيقرا فالقرآن و يجود فالسور .. لي يسمع صوتوا يحلف عليه حتى الايمان كيقطر منوو .. كيقرا و يطلع لها فيديها مع رجليه و هي كترعد .. حاسة بملمس لحموو مشوك مع يديها .. حتى وصل للحد ديال حجرو ..!

عينيها تغرغرو بالدموع و وجهها احمر كترعد حاسة بهموو كيضرب فيديها لي ولاو بحال حجرة دالصم واخا عيى يجر فيها ما تزعزعاتش .. يابسة فبلاصتها .. ذاتها معصبة و سنانها بداو كيتسمعوو كيتقرقبوو فاش مد يديه لجهة سروالها ..!

شدات فيديه مخرجة فعينيها لي ولاو كي الجمر بالحمورية .. صورتوو رجعات فعينيها بحال شي شيطان من بعد ما كانت كتعزو بدل المعزة جوج و حاسباه فمقام الأب ديالها ..!

الصوت لي تخرجوو و تغوت بيه ما لقاتووش بالصدمة .. كترعد شادة فيديه و مزيرة بكل جهدها حتى غرسات ظفارها فيه و شفايفها كيترعدوو و هي كتحاول تهدن راسها و تقرا فالقرآن لي كتعرف .. لكن مع الأسف كلشي تمسحلها من عقلها .. بقات غير آية الكرسي لي ثابثة عليها كتعاود فيها و تبكككككي بكل جهدها ..!

عبد الله:( طلق منها و وقف هز كاس دالما محطوط تما كيتمتم بدون صوت و يتف عليه و ضار عندها مدولها ..! ) هاكي ابنتي .. صافي سالينا .. ما تخلعيش .. شربي يالاه

شريفة:( خذاتوو بجوج يدين كيرجفوو حطات شفايفها عليه و ولات حيداتوو بزز كتهضر ) ب بغ بغيت ن نمشي ع عند ماما ( هبطو دموعها بقوة )

عبد الله: ما شربتي والوو ابنتي ؟

شريفة:( ردات كتقفقف ) ما ب بغي بغيتش بغيت ماما

دفعات عليها الغطى و وقفات حاسة بالدنيا كتضور بيها و رجليها كيلعبوو من تحتها بحال العجين .. ما قادرينش يشدوها .. و مع ذلك زطمات على راسها و زادت مندافعة خارجة من تما كتكالي بالحيووط ..!

غير وصلات لدارهم لتحت .. طاحت قدام الباب كتبكي و تشهق داخلة فحالة هستيرية كلها كتهز .. عينيها خارجين ما متيقاش بلي خالها لي حاسباه باها يخرج منوو هاذشي ..!

كتشوف فيهم ضايرين بيها مخلوعين و لكن باش تقول لهم ها شنوو كاين و ها شنوو ما قدراتش تهضر .. كتعاود فنفس الجملة بعدم تركيز

شريفة: خالي دارلي حاجة خايبة أ ماما

ثواني معدودة و كان نزل عبد الله وجهوو ما كيتفسرش .. دق فالباب و قال

عبد الله: كبيرة أجي نهضر معاك ( يالاه خرجات عندو و قبل ما تسولوو كان زرب عليها و قال ) قبيلة ما بغيتش نعلمك بلي شفتوو و لكن من بعد ما رقيت شريفة ضروري نفتحلك عينيك على شي مسائل ..!

كبيرة:( باستغراب ردات ) شمن مسائل ا خويا عبد الله ؟؟

عبد الله: قبيلة فاش كنت راجع من الجامع الله يقبل مننا و يتوب علينا .. شفت شريفة واقفة مع واحد الولد ( نحنح ) و بيني و بينك وقفتهم ما كانتش عادية .. و نزيدك سمعت شي هضرة كضور على بنتك ماشي حتال تما ..!

كبيرة:( ضربات ففخاضها و ردات مغزفة ) أويلي على المووسخة اويلي بغات طيح بوجهي للأرض يرفسوو فوقوا ( جات ضايرة تدخل لعندها و هو يشدها )

عبد الله: راني رقيتها كما على الله تتهدن شوية و جبدتلها وذنيها شوية عليها جات كتبكي .. قسحي معاها تجمع راسها حسن ما نوقعوو فشي حوايج ما يقبلهم لا الله لا العبد ..!

حركات راسها بالايجاب و دخلات لدارها سادة لباب عليهم .. عينيها مظلمين من جهة شريفة .. حالفة بحلوفها حتى تاكلها بسنانها و ما تبردش ..!

خلات شريفة فالصالون كلها كترعد .. الخلعة و الصدمة رجعات لها بالباردة ..! و مشات هي للكوزينة كتقلب بدماغ طافي .. حتى هزات بواطة دالحار و خرجات عندهم .. جرات بنتها من شعرها كتجرجرها فالأرض و تسب فيها ..!

كبيرة: بقالك غير العزارة تضوري بيهم كي الق*** يا الموسخة ؟؟ بديتيها بولد الفرناتشي لي جايباه كيرعرع عليا هنا و غتكمليها بكرش الحرام ؟؟ انا كنقي فيك و نتي كي الكلبة عزيز عليك تتمرغي فالوسخ و العفن

طرشاتها تا قلباتلها وجهها .. كتعطيها فالركل و الضرب ديال الغصب .. واخا شايفة حالتها ما هياش و ما كتقاومش اصلا .. ما حناتش فيها حتى شوية بحال يلا هاذيك ماشي بنتها لي ولداتها من صلبها و تقطعات عليها ..!

هبطاتلها سروالها قبالت أسية لي خاشية راسها بين فخاضها كتبكي شادة وذنيها من الغوات و الانين د شريفة .. حتى تسمعات غوتة فالسمى .. هزات راسها كتشوف ..!

لقاتها دايرة شريفة بين فخاضها حاطة رجليها على صدرها و بجوج يدين كتهز من داك الحار و تديرولها تحتها .. فالشفرات ديال عضوها الأنثوي و كتجبد فيهم بحال يلا كتحلب فبقرة ..!

المنظر خلى أسية بلا ما تحس ديرها فسروالها .. و هي كتشوف شريفة كتقاتل تخرج من تحتها ميلة راسها للجنب كتغوت تا عروق راسها تطراساو واضحين و وجهها تلون باللون الأحمر ..!

يتبع...

‎