عرس الذيب الجزء السابع

جلسات حداها كدوز يديها على ظهرها و تقربلها فالحلوة و العصير .. فرحانة بيها ..!

شريفة: كي جاتك دارنا ؟ و باقي نزيد شحال من حاجة .. و نقادوها أنا وياك على خاطر خاطرنا ..!

أسية:( هزات العصير كتشرب فيه ) زوييينة و كدخلي لها قلبك كيتفاجى .. ولافة .. صغيرة و مجموعة ..!

شريفة: جوج بيوت .. صالون .. حمام و كوزينة .. كافياني أنا و ياك .. و حتى ماليها صالحينها من ديكشي الرفيع .. أنا بعدا حمقاتني فاش شفتها و قلت والو هاذي لي غنشري و ربي كبير .

صونا تيليفونها شافت شكون و وقفات بالزربة ماشية لبيتها كتشير بيديها لأسية

شريفة: كملي حلوتك و دخلي ارتاحي بحالك .. أنا جايا ( ردات ) ألوو وي موسيو أحمد برادة ..!

أحمد:( رد بنبرة مرحة ) وا الله يهديك أ شريفة .. غير أحمد باركة .. و لا باقى كتحسبيني غريب عليك ؟؟

شريفة:( عوجات فمها كتميق ) حاشا أ سي أحمد غير راك فعمر بابا ما جاتش نقولك سميتك حافية .. بلا ما تقلق و ديرها مني قلة الصواب ..!

أحمد:( ضحك و رد ) مقبولة منك أ لالة .. المهم ديكشي لي طلبتي مني طبقتوو بالحرف .. و غذا فالصباح بكري كلشي غيكون ناضي .. غنشد الطريق دابا نيت لليوسفية

شريفة: هضرتي معاها ؟ ياك ما شكات فوالو ؟ هي راه مطنكة شوية و ماشي تا شوية بزااااف كاع .. و لكن الواحد ياخذ احتياطوو .. ما خاص تكون تا غلطة باش كلشي يمشي كيفما راسماه ..!

أحمد: ما عندك مناش تخافي .. و لكن خاصنا جلسة بجوج و تشرحيلي مالك مع هاذ نجاة و شنوو دارتلك بالضبط .. كن وحدة أخرى ما نتدخلش ليها و لكن نتي عزيزة و غالية و عارفك ما غتجيش و تبالاي بيها غير هكاك ..!

شريفة:( زيرات على عينيها و قالت ) غنشرحلك كولشي .. غير قضي الغرض الله يستر عليك و شكرا بزااف ا موسيو أحمد

أحمد:( رد باختصار ) avec plaisir charifa " بكل فرح شريفة " بوون نخليك دابا .. prend soin de toi " تهلاي فراسك "

قطعات معاه و بقات حاطة التيليفون على فمها .. ساهية فالمرايا قبالتها .. و بعد تفكير طويل عريض خدات شهيق زفير و دوزات الإتصال لنجاة لي ردات في ساع ..!

شريفة:( ببرود هزات عكارها كتدوزو على شنايفها بغنج و كتهضر ) نجاة صافا ؟ عرفتيني ياك ..!

نجاة:( ردات باستغراب ) شريفة ؟؟

شريفة:( ضحكات بصوت مسموع و رجعات ردات بجدية ) هي هاذي بشحمها و لحمها ( قلبات عينيها ) قالولي حاملة .. مبروك عليك ا كبيدة يتربى فعزي أنا و حبيبي إلياس يا ربي ..!

نجاة: شكتخربقي نتي ؟؟ ما قلنا تهنينا منك راجعة ت

شريفة:( قاطعاتها ) راجعة نكويك أ حبيبة ( جلسات حاطة رجل على رجل ) كنتي صاحبتي فواحد الوقت .. عاشرتيني مزيااااان و لكن بانلي ما كتعرفينيش كاع

نجاة:( بحدة ردات ) و مناقص منها معرفة

شريفة:( كملات كلامها بحال يلا ما هضراتش ) شريفة أ نجاة ما كتخليش دقتها و طال الزمان و لا قصار كترد ضربتها مثنية ..! دخلتيني بالظرافة وريتك العسل كيتقطر و بنات الناس و الأصل كيفاش كيكونوو .. ضربتيني فظهري و حكيتي عليا حتى ما قديتي و هانتي غتشوفي وجه الملقطات كي داير .. يلا كنتي نتي قح**ة أنا هي الباطرونة ديالهم

نجاة: و أعلى ما فخيلك سرجيه .. فيك غير الفم الحبيبة و لي عليه العمد أنا درتوو و حاملة ليه بالولد لي غيرهف على كلشي و تاليتك تتلاحي للزنقة بحال الكلبة

شريفة: هههههه واخا أ كبيدة غير حلمي تا الحلم زوين ( هزات حاجبها ) عرفتي شكون لي معايا دابا ..! ( ببرود ) لي مخلي حبيبتوو حاملة كتوحم و عايش مع مرتوو اللولة الحيااااااة .. هه ..! كيخططوو للولد لي غتجيبيه شنوو غيسميوه و كيفاش غيربيوه مجموعين و يصلحوو زواجهم

نجاة:( بصدمة باينة فصوتها قالت ) إلياس ؟؟

شريفة:( بغنج ردات كتمصمص فشفايفها ) امم إلياس أ كبيدة .. ما نزيدش نضيع وقتي معاك و كيفما دخلتك لحياتي بيدي بجوج .. أنا لي غنخرجك .. حلي عين و سدي عين تلقاي كلشي تبخر فالهوا ( بصوت ثقيل كملات ) الفلوس .. الفيلا .. إلياس .. البيبي .. بحال عمرهم كانوو .. تيك توك تيك توك ( قطعات )

《 لا يزال الانتقام الشكل الأضمن للعدالة 🌹 》

حرك الشخص لي هاز الكاميرة راسوو لدراري لي شادين إلياس بحال شي حولي .. واقف على ركابيه و متكي على يديه بجوج .. باركين على ظهروو بالجهد مفشلين حركتوو و فموو ملجوم كيتسمع أنين خفيف لا غير ..!

عاطي بمؤخرتوو للشخص الثالث لي واقف موراه بتكلظيمة .. و بمجرد ما طفات الكاميرة بعد عليه كيطلع فسنسلة ديال سروالوو و يحيد الشال لي مغطي بيه وجهوو ..!

طلقوو من إلياس مخليينوو طايح على كرشوو كيخرج الشرويطة من فموو كيلهث و عينيه خارجين ما قادرش حتى يهضر من الصدمة ..!

فالوقت لي واحد فيهم كيدوز الاتصال لشريفة لي كانت واجدة كتتسنى غير فوقاش يعلموها و تخلط عليهم .. و بالفعل مسافة الطريق و كانت فوسط الدار مقابلة مع إلياس لي تكلفوو بيه و لبسوه حوايجوو .. كيشوف فيها بنظرة ما عرفاتش فين تصرفها ؟ حزن .. غضب .. حقد .. كره و لا ندم ...!

شريفة:( تنهدات بصوت مسموع و بنبرة حزن قالت ) دخلتيني للإصلاحية و تكرفسوو عليا حتى شبعوو .. هاذشي لي شفتيه ليوم كنت كنشوفوا كل نهار .. و كل ليلة كنبات كنترعد غير بوحدي و نقول اليوم نوبتي .. لقيت غير الكارو قدامي يبرد عليا .. خرجت على صحتي و أنا باقى بزة لاسقة فالأرض و كولشي بسبابك

إلياس: نتي السباب نتي لي ضحكتي علينا

شريفة:( ضحكات و الدموع مغرغرين فعينيها ) يلا جيت نعد لك شحال من واحد كينعس مع صاحبتوو و يخليها موراه من بعد ما ضيعها ما غنساليش .. فاش جاتك نتا ؟ فاش جات ولد خالتك ؟ ياك مشى لكندا و ضربها بأحسن تزويجة و فين بقى مسوق لشي زبل .. ما رحمتينيش و أنا بنت سطاش لعام ( هبطاتلها دمعة و مسحاتها ) عارف شنوو داز عليا و عارف داك ليلة لليوم ما قادراش ننساها ( صوتها ترعد و ضربات فقلبها بالجهد ) و مشيتي

غمضات عينيها دموعها كيهبطوو بوحدهم و صدرها كيطلع و ينزل بالجهد حتى تنفسات و كملات

شريفة: درتي فيا كفس من لي داروه .. يلا هما قت٠٠لوني مرة نتا قت٠٠لتيني ألف مرة .. صبرتلك على الضرب و السبان على الش اب لي بليتيني بيه و خليتيني بحال الحمقة لاسقة فيك .. صبرت على مك و خوتك لي ردوني جفاف عندهم .. صبرت على الحبس لي دايرلي .. مرضتيني فحياتي بالتهديد ديالك .. عفتك فكل مرة قربتي مني و عفتك كثر فاش دخلتي صاحبتي ضرة عليا .. كتعنق و تبوس و تكبر بيها قدامي .. شنوو كيسحابلك أنا حجرة ما كنحسش ؟

إلياس: و هانتي رديتي دقتك

شريفة:( بصوت مرعد قالت ) فعايلك كثار معايا أ إلياس .. حتال لهنا و باركة .. صااااااافي ( دارت حركة بيديها كتعني شوية ) ها شحال بقالي و نطيح للأرض طيحة وحدة ما نوليش نوض ..!

شافت فالدراري لي واقفين متكيين على الحيط حانيين راسهم و ساكتين كيسمعوو ..!

شريفة: بلا ما نزيدو نوصلوو لمواصل خايبة و بلا شوهة و فضيحة كثر .. بعد غذا عندنا الجلسة الثانية و هاذ المرة غتحضر فيها و غنطلقوو بالتراضي .. هاذي هي النهاية .. شكيت بيك فالكوميسارية و رديتوني نتا و داك الشماكرية لي بزاف عليهم يكونو بوليس ( ضحكات باستهزاء ) رديتوني ضلعة عوجة و خاصها العصا باش تتقاد مع الطريق .. بجوج كلمات قلبتيهم كاملين حتى من رئيسة الجمعية رجعات فكاع هضرتها .. جاب الله لي ما حضرتش معاكم و سيفطت غير المحامي أما كن ردوني ليك بزز مني واقيلة .. قالك قانون ههه ..! و لكن الفلوس كيديرو طريق وسط البحر ( سكتات لمدة ) يلا نتا ما عييتيش من شد لي نقطع ليك أنا عييت .. شبابي فنيتوو معاك و جا الوقت لي نعيش لراسي شوية ..!

شريفة: شبابي فنيتوو معاك و جا الوقت لي نعيش لراسي شوية ..! الدراري غيمشيوا معاك حتى تجيب الكمبيلات لي عندك و تعطيهم ليا نقطعهم بيدي .. و غتكتبلي التزام بعدم التعرض و بلي نتا متنازل على أي حاجة كتسالها لي .. الريال هو اللخر ما بقاش يجمعنا ..! هاذشي يلا ما بغيتيش الفيديو ديالك يتنشر و تفضح .. و ما عندك منين تشدني ماشي أنا لي غنشرو .. سير دعي حتى تشبع و أرا ما يعاودو عليك ..!

خلاتوو موراها و مشات هزات ساكها كتشوف فيه ببرود من بعد ما مسحات دموعها ..!

شريفة: هاذ الليلة غنضايفوك عندنا .. غير قبل علينا .. و غذا غيمشيوا معاك تدير لي تافقنا عليه .. فحالة كنتي باغي تفرح بولدك لي باقي ما تزاد ( شافت ملامحوو تبدلوو و هي تقول ) الحساب بيني و بين الناس لي فالفيلا باقي ما سالى .. و من هنا لغذا غيجيك خبار الزوجة المصون بنت القاع و الباع متختخة فالحباسات .. لقليلة غتضربلها واحد ست شهور بتدخلاتك طبعا .. الله اودي عارفة الكبيدة ديالي رشايوي من الطراز الرفيع و عزيز عليه يدير الخير ..! ايوا و تما هي و شطارتها لجمات فمها غيبقالها ولدها و تفرح بيه .. فتحات كابينتها و دارت فيها واعرة غير ودع ولدك من دابا و قرا عليه الفاتحة .. و مك و وردة ما ناسياهمش و تا هما باقي يذوقوا من كاس المرار لي ذوقوني منوو ( بابتسامة قالت ) و أنا فاش توكد ليا .. غنكون خويت المغرب ا حبيبة و عايشة حياتي بالطول و العرض .. بفلوس الشيك لي خليتيلي ( هزات كتافها ) خلاص عشر سنين لي ضيعتها معاك .. واخا قليلة و لكن معروف عليا صبارة و بنت الخير ما نحافيكش على تسقريمك ..!

حركاتلهم راسها و فتحات الباب خرجات .. مخلياهم ضاربين العسة عليه ..!

****************************

الصباح هو نكهة البدايات الجميلة .. المعبّقة برائحة القهوة والياسمين ..!

واقف موسيو أحمد برادة بسروال د الدجين مزير عليه و السمطة د ديوغ كتبان شوية من تحت كرشو لي غامق عليها بقاميحة فالغوز .. ضاربلك ساعة آخر ما كاين .. و جوج زغبات لي باقيين فشعرو مهبطهم بجيل جايين ملحوسين بحال يلا لاعقاه بقرة ههه ..!

نجاة:( وقفات عليه و بتردد قالت ) موسيوو برادة ؟

أحمد:( ضار عندها بابتسامة .. حيد نظاظرو دالشمش و مدليها يديه ) مدام نجاة ؟

نجاة:( سلمات عليه و قالت ) هي أنا .. قلتيلي راجلي خلى عندك شي أمانة ؟؟ واش تقهوى معاك البارح ؟ كان داير مع شي صحابوو فمراكش و من تم ما بقيت عرفت عليه شي حاجة .. تخلعت بزاف حتى من التيليفون ما كيردش فيه ..!

أحمد: اه راه مسافر .. المهم غتقضيلي كاع المسائل ياك ( جبد من جيبوو جوا ديال الفلوس و مدهم لها ) هاذو الثمن لي طلبتيلي باش تسربيلي البلان دالأرض و ما غنزيدك حتى ريال من فوق هاذشي .. هذا الله ..! فين هما هاذ المعارف لي غيسلكوو لينا الشغل ؟

خذات من عندو الفلوس كتحسب فيهم و كتسمعليه و هي مستغربة من شنوو كيقول .. و قبل ما تهضر كانوو بعثوو عليهم ستة دالرجال .. لابسين حوايج عاديين و لكن من وجههم و من طريقة حركتهم و هضرتهم .. غتقلع طاير بلي راهم بولييييس ..!

قبل ما تهضر كانوو بعثوو عليهم ستة دالرجال .. لابسين حوايج عاديين و لكن من وجههم و من طريقة حركتهم و هضرتهم .. غتقدر تقلع طاير بلي راهم بولييييس ..!

ضورات وجهها كتشوف فيهم مخلوعة .. خصوصا منين زربوو عليها و ركبولها المينوط فيديها جارينها معاهم و هي نقطة دالد٠٠م ما بقاتش فيها منين شافت طونوبيل صغيرة فالأبيض ديال البوليس ..!

نجاة: ك كيفاش ؟ علاش جاريني ؟؟ ( كتغوت بالجهد ) طلقوووني طلقوووني شكوون نتوما ..!

دفعووها ركبوها لداخل محاصرينها و واحد فيهم بقى واقف مع احمد كيهضر معاه باش يلحق عليهم للكوميسارية د الرباط .. فالوقت لي هما غيضربوو للفيلا هي اللولة يقلبوو فيها ..!

رد واحد من الضباط على نجاة لي ما بغاتش تسكت : هاذ التعجويق الخاوي ديالك ما عندو باش ينفعك .. سدي علينا دلقوشك حسن ليك ..!

نجاة:( شافت فيه و البكية غالباها ) غير شرحلي شنوو درت انا ما فهمتش كيفاش زعما انا راه

رد عليها : نتي متهمة بالنصب و الاحتيال على سي أحمد برادة .. ناصبة عليه فأرض و كل مرة كتجبدي منوو الفلوس موهماه بلي واحد من عائلتك على معرفة بالوالي و هو لي غيجيبلك الوراق .. و الرونديفو داليوم غير خطة منا باش تتشدي متلبسة .. و دابا سكتينا ..!

*************************

ريح خفيف داخل من البالكون .. مبرد حرارة الجو لي واخا هكاك كيفتح النفس و يعطيك طاقة إجابية ..! شاعلة التلفازة طالقة أغنية شرقية .. محزمة على نصها و جالسة هاك بلاك .. كترعد فلي موراها مع كل دقة من الدربوكة و صدرها كيلعب لعب تحت الكسوة لي لابسة ..!

شريفة:( ببحة زوينة فصوتها بدات كتغني مادة يديها لأسية ) قومي تا نرقص يا صبية و شبيكي أيديكي بأدايي .. نرقص و نغني و يا صبية ..!

ضحكات و وقفات كتشطح معاها تا سخفوو و طاحوو بجوج فوق الفوطوي كيلهثوو ..!

شريفة: فففف من فوقاش ما شطحت هاكا .. اححح اقلبي على هاذ الحلاوة لي عندي يا سيدي ربي ( باستها بقوة فحنكها )

أسية: ههههه الزين سلالة ( جمعات فمها كتمسكن ) و شنوو سر هاذ الضحيكة ؟ ختك أنا زعما ..! ما بقيتي تعاوديلي والوو ..!

شريفة: ههه ..! علاه فين عمرك شفتيني دايرة يد على يد و كنبكي .. يبكيوا عدايا على خلى دار حناهم يا ربي ..!

اسية: هاذي عندك ..!

نحنحات كتسرح فحلقها و بصوت كتحسوو خارج من قلبها ماشي من حنجرتها ..! صوت كلو إحساس بالألم و الحزن و الضياع .. فكلماتها لمسات قلب أسية حتى غرغرو عينيها ...!

شريفة: وقتاش نولي تانا كيفي كيف الناس .. رجعات حياتي لور .. نشاالله نولي لاباس ( مغمضة عينيها و ملامحها كيتغيرو بتأثر ) وقتاش أقلبي .. يحيى ليا الإحساس .. نفرح تانا فالدنيا .. راني مليت خلاص .. الزمان قهرني .. وصلني لطريق مهجور .. دموعي كانا دوايا .. سالت من عيني بحور .. و الزمان طعنني .. صبري تعدا الحدود ..!

حلات عينيها بانتلها أسية كتبكي .. ضحكات ضحكة ما واصلاش لعينيها و قالت ببحة

شريفة: غنعاودلك من لول كاع .. من قبل حتى زواج إلياس بنجاة و نشرحلك باختصار كاع لي واقع و علاياش كنت عوالة .. و منين نسالي هضرتي .. ما توليش تجبدي معايا دوك الناس مرة اخرى .. بغيت ننسى ..!

شريفة:( شافت فيها و تنهدات ) المهم نجاة عرفتها من الفيس و وقفت معاها حتى تصالحات مع دارهم و مشات بحالها .. واخا هكاك بقات العلاقة بيناتنا مزيانة .. كنحاول نتلف مع البنات و الجروبات بلاصة ما نطرطق بوحدي ..!

اسية: اهاه ..؟؟

شريفة: و لكن هي ما كانتش نيتها صافية و لاحظت تصرفاتها و هضرتها فليام اللخرة و بقيت مميكة عليها ..شافت عيشتي قالت هنا نبات .. ما فبالهاش بلي راني مخلصة الثمن مضوبل على داك العز ..!

أسية: ايوا ؟ ياكما بدات كتضور بإلياس ؟

شريفة:( ضحكات و قالت ) ايييه ..! لقيت مسجات بيناتهم و السيدة دايرة ما فجهدها باش طيحوو فيها .. مشيت عرقتلها ما خليت فيها غير لي نسيت و سيدهم العريس عجبوو الحال و تفطح .. عند بالو كنغير و لا ما عرفت لجدو

أسية: و نتي غير الحرقة لي مهضراك .. معاوناها و فاتحة لها دارك و قلبك و فلخر باغى تديرها بيك و تكركبك مع الباب ..!

شريفة: ديكشي .. ايوا موراها شكيت فإلياس كينوعر شي تنوعيرة .. و احساسي ما كذبش .. لقيتوو مبدل ليا البيلول بفيتامينات و مقويات باش نحمل .. و إلياس واخا تزوجت بيه بزز و لكن راه جلست جوج سيمانات كنتداوا فيهم عندو فالدار و شرطت عليه عمرو يبزز عليا الولاد و عمري نولد اصلا لا ليه لا لغيرو .. و قبل بشروطي .. و من تما مشينا للمحكمة حيث قاصر و خاص ولي أمري يكون حاضر و كيسولني القاضي واش قابلة و شحال ديال البروتوكول و التخربيق ..!

أسية: ايييه كملي

شريفة: صافي فاش عرفتوو بدل ليا الدوا .. نضت أنا كنقلب على شي عملية كتدار للعضاض ههه و لقيت عملية ديال تضييق المهبل .. عجباتني الفكرة و قلت لي ليها ليها .. واخا طاحت عليا بغسيل الفندق

أسية: اويلي يا المسخوطة

شريفة:( ضرباتها لراسها ) تغراقي فيه ا بنتي .. خليني نكمل .. فاش درتها و خرجت من البلوك و صحصحت عيطت عليه .. قتلوو أجي لكلينيك لفلان فلاني و فاش جا علمتوو بلي حيدت الوالدة و شاف حالتي كي كانت و تاق .. الصدمة خلاتوو ما يسول لا على طبيب لا على حتى حاجة .. و أصلا وصيت الفرمليات لي تما ..!

أسية: هاذشي زعما باش ما يطلبش منك الولاد ؟ صافي الوالدة باح و نتي غير كاذبة ..!

شريفة: اييه بالضبط .. و تا هو سمح فيا فالكلينيك حتى جيت نخرج و لقيتوو كيتسنى .. داني للدار د بوسكورة .. خلاني تما .. شهر تقريبا و هو مطرق عليا الباب ما كنخرج ما كندرج و التقضية من السيمانة لسيمانة كيجيبها و أنا ناعسة .. يحطها و يخرج ..!

أسية: وا راه داك الشهر ما كانش حتى فالفيلا .. و هضر مع الحاجة حجيبة قالها راه مسافرين نبدلوو الجو شوية

شريفة: و تما فين علمها على زواجوو و بدات توجد غير حسي مسي .. غطير بالفرحة غير بوحدها ( هزات حاجبها ) و نهار ضريب الصداق جا مورايا قالي دوزي ترجعي و السيد منور و فرحان كنقول كي طرا و جرا .. حتى لقيت طاسيلتوو لعوجة كاملة مجموعة مع نجاة و واليديها .. و سي السيد جايب العدول يضرب الكحل فالبيض .. و محضرني غير باش يغذذني ..!

أسية: اااه و موراها نتي هربتي .. الغذ ليه فقنا ما لقيناكش و ما خلينا فين قلبنا .. بغى يحماق ..!

شريفة: و فلخر شعلت تيليفوني و هضرت معاه و هددني يلا ما رجعتش غيدفع الكمبيالات و غيجبدوني فينما كنت .. و هضرة كثيرة .. صافي تما رجعت و قررت نلقى حل لراسي .. ما غنبقاش عايشة معاه و أنا خايفة من ظلي .. و الحاجة المشروكة ما عندي ما ندير بيها أصلا ..!

شريفة: قررت نلقى حل لراسي .. ما غنبقاش عايشة معاه و أنا خايفة من ظلي .. و الحاجة المشروكة ما عندي ما ندير بيها أصلا ..!

أسية: ايوا ؟؟

شريفة: العرس غنيت حيث كنت محروقة دبصح .. ماشي عليه و لكن على الزهر لي ما عنديش فالبشر و شحال ما درت فالخير كيرجع ليا ببومزوي .. و بغيتها حتى هي ما تكملش فرحتها و تدوز عليها ليلة كحلة ..!

أسية:( ضحكات و قالت ) وا راه دازت كحلة نيت

شريفة: عمر خوو نجاة ما كنتش عوالة ندخلوو بيناتنا .. و لكن هو جا لعندي برجليه و حتى حد ما ضربوو على يديه .. و داك الليلة بانلي البلان كامل لي غندير

أسية: بقى فيا واخا هكاك

شريفة: و أنا ما بقيتش فيك ؟ ( تنهدات ) المهم فداك الليلة سكرت و كنت كنتسنى غير الوقيتة فين نجر إلياس لعندي .. فبالي غتكون آخر ليلة بيناتنا .. أولا حيث باقي ما دار والوو مع نجاة .. نخاف يهز شي مرض من عندها و يلسقوا فيا .. و ثانيا ناخذ تصاور لينا و حنا ناعسين بجوج و باش نغذذ نجاة لي مخليها بوحدها فليلة عرسها ..!

أسية:( حشمات ) امم

شريفة:( ضحكات ) سكرانة و حاضية حوايجي و واخا هكاك ما عقلتش واش خوا فيا .. تكرهت بالمعقول و بديت كنقلب من جديد .. لقيت النمرة د واحد السيدة فطنجة كتبيع شي عشوب كيعاونوو المراة باش تحمل .. عيطتلها درت معاها توجدلي السخرة و التيليفون بيناتنا ..!

أسية: و علاش العشوب ؟؟

شريفة: ما بغيتش نزيد نطول الفيلم و ندير فيها الضرة المقهورة .. هاذشي ما كيعنيش ما ناكلش اصل امها بسناني و نذوقها من نفس الكاس لي ذقتوو و عايراتني بيه

أسية: لي هو ؟

شريفة: الواليدين و العائلة ..! يلا كانت هي ما كتعرفنيش مزيان أنا شارباها ما .. و كيفما عايراتني بيهم بفعايلها خليتها تبعد على خوتها و واليديها و زاد البلان د خوها عمر كمل الباقي .. و هاكا تقطعات رجليهم من الفيلا و تهنييييت فراسي ( ببرود ) لا هما عارفين خبارها لا هي غتزعم و تعاودلهم الخايب على إلياس و هي دايراه سي السيد ..! و ماشي شي وحدة لي ذكية و غتعرف تسلك راسها .. غير خوتها و امها لي كانوو كيفقهوو فيها ..!

أسية: فخبارك وليتي كتخلعيني

شريفة:( ضحكات و قالت ) وا غير تخلعي نيت .. ماشي أنا لي ندوزها بالساهل .. المهم ..! كنت كنحلف فإلياس على الولاد غير باش يتخلع و يسكن نجاة بعيد عليا .. و هاكا غيبقى كل مرة فقنت و يعطيني شبر دالتيساع نفكر فخاطري .. أما هو يولد و لا يجلس يضبر مخوو ما كيهمنيش ..!

أسية: زيدي

شريفة: و كنت عارفة العشوب غتعطيهم حجيبة لنجاة باش تحمل .. و حتى من إلياس غيكون داير كل ما فجهدوو باش يحملها ..!

أسية: و شنوو الربح عندك نتي يلا حملات ؟

شريفة: كنت حاسبة لها ثلاثة دالوقات .. بمعنى ثلث شهور من زواجها بيه و غتكون حاملة و ساكنة بعيد عليا .. و تما غنسيفطلها التصاور لي صورت نهار كان ناعس معايا إلياس .. و غنعطيها على قبة الراس ( قلبات عينيها بملل ) زعما انا الأصل و ها هو مخليك و جاي عندي و غير غتولدي غيطلقك و يجيبلي ولدك نربيه انا و ياه .. و زيد و زيد

أسية: ايااااه .!

شريفة: و حيث أنا عارفة نجاة كي دايرة .. متأكدة غتهز التصاور تضربلي الطر بيهم ... و أنا غنمشي ندعيها بالتشهير و غيجبدوها فينما كانت ..!

أسية: و التشهير كيتحبس مولاه من شهر تال عام

شريفة: و يقدر كثر كاع على حساب ( هزات حاجبها ) هي غتكون حاملة بولي العهد و إلياس اكيد ما غيرضاهاش لمراتوو و تما كان غيكون الشونطاج بيناتنا .. تحط الوراق و طلقني نتنازل على الدعوة .. ما بغيتيش خليها تتربى ...!

اسية: و ما خفتيش من الشوهة زعما ؟؟

شريفة: لي كيعطيني المانضة من الشهر لشهر يقطعها عليا .. طووز فيهم و فهضرتهم ..! و ما تسمعيش تصاور و حنا ناعسين تتخيلي شي شوهة نيت .. ديكشي ماشي أوفر دوز .. عادي .. غير هي كابرة فزريبة و مولفة بهاذ الفعايل و كنت متأكدة أول حاجة غتجيها لبالها هي تفضحني فالفيس و تحط شي كارثة .. و لكن وردة ضرباتلي كولشي فالزيرو و زاد كمل خوها بفعايلوو تا خلاني ندير لي عمري فحياتي فكرت فيه ..!

شريفة: الشيك لي كان قالب عليه الدنيا أنا لي هزيتوو و كنت متأكدة بلي عندو الفلوس فالكونط و غير طالقها عليا .. داك جوج فرانك لي هزيت هو كيربحهم فشهراين و ما يكونش الكونط عامر ؟

أسية: هي فاش خرجتي من مور ما داوه البوليس ياك ؟

شريفة: وي تما فين دفعتوو .. كنت عارفة يلا تسنيت كثر غيعيط لهم و يبلوكيه و ما غنصور والوو ..! صافي دفعتوو و قاديت معاهم الأمور و رجعت عندكم كذبت على حجيبة و جريتها معانا و سافرنا لطنجة

أسية: دابا عاد فهمت شمن شغال كان عندك .. ضربنا داك الطريق كاملة على ود العشوب

شريفة: ديكشي لي كاين .. كان يمكنلي نلعب فالشيك و ندير شي رقم نغرقوو و لكن تما ما غنربح والوو و حتى البنكات فبحال هاذ الحالات كيعيطوو لمول الشيك و كيحاولو يلقاو معاه حل .. حتى كيتسدو كاع البيبان عاد كيلجئوو للقضاء .. ساعتها ما غنربح معاه حتى سنتيم ( تنهدات ) داك الفلوس ربي حطها قدامي بحال درهم لحلال .. 30 مليون خديت بيها الدار و 15 لمليون شريت بيها الطونوبيل .. بقاتلي خمسة .. لي ما غتكفيني لوالوو ..!

أسية: و باش درتي المشروع ؟

شريفة: مشيت للبنكة عوالة ناخذ كريدي على حساب الدار و تما لقيتهم دايرين إعلان .. كيعاونوا المقاولين الصغار باش يديرو مشروعهم .. زعمت و توكلت على الله و ربي سخر فكلشي .. لي حطيت فيها يدي كتيسر

أسية: ايوا الحمد لله

شريفة: و زاد عاونني موسيو أحمد برادة .. عقلتي على هذاك لي تلاقينا بيه عند لوبتيك و اختاريت معاه النظاظر ؟

أسية: ايييه ..!

شريفة: ايوا صدق مستقر هنا فالرباط .. عاونني بزاااف فالبنكة بالمعاريف ديالوو و بقينا على اتصال .. حتى وقفت عليه هاذ الأيام و ما ردنيش خايبة .. واخا كنتسنى نعرف شنوو غيطلب مني حتى هو ..! ما كاينش شي واحد كيدير الخير فهاذ الوقت غير هكاك

أسية: و فاش عاونك ؟

شريفة: نجاة رديت لها الضربة بالنصب و الاحتيال .. السيدة غرقااااات .. القليلة تدوز واحد ست شهوور فالحبس .. هاذشي مع التدخلات طبعا .. و يزيد يحك جيبو و يحط عليها الملاين الصحيحة ( سهات مدة و رجعات قالت ) تاهمني بلي سرقتوو و هزيت ليه الفلوس و حبسني و ضارت الدنيا و ولدو و لا بنتوو تا هو غيجرب لي جربتوو واخا باقي ما تزاد ..!

أسية: هاذي هي الدنيا نهار ليك و نهار عليك .. دابا قبل إلياس يطلقك ؟ واخا نجاة غتحبس ؟

شريفة:( هزات حاجبها ) ماشي لخاطرو .. غيقبل و يديه فوق راسوو ( شافتلها فعينيها ) غذا عندنا الجلسة .. ما متيقاش بلي صافي غنطلق و نرجع حرة من جديد ..!

أسية:( عنقاتها و قالت ) الله يفرحك .. تستاهلي كل خير ..!

شريفة: ما بغيتش نوصل معاه لهاذ المواصل أ أسية و لكن بصح عييت .. هو عارف شنوو داز عليا .. و عارف مزيان داك ليلة لدابا بين عيني ما قادراش ننساها كاع

أسية: شمن ليلة ؟؟

شريفة: الليلة لي هربنا فيها من الدار .. يلا كان هذاك لي ما يتسماش غير حاول .. إلياس راه دار و وفى ..! ( سهات فالفراغ ) و ليلات هما فاش كنت فالإصلاحية كنشوف بنات صغار كينعسوو معاهم و كيغتا٠٠صبوو فيهم بلا رحمة بلا شفقة و أنا مرعودة غير بوحدي خايفة يتسمع صوتي و يديرو فيا ما كفس .. كن وصلوو معايا لداك المواصل .. موحال تلقايني قدامك دابا .. كن شنقت راسي شحاااال هاذي ..!

أسية:( ترمات عليها معنقاها بكل جهدها ) شريفة يا شريفة

شريفة:( ضحكات و دوزات يديها على ذراعها ) و رجعت تلاقيت بحكيم مرة أخرى مور اقشوور

أسية:( بعدات راسها ) بصح ؟؟ ( بنظرات مشاغبة قالت ) أجي نتي باقية كتبغيه ؟؟ باش حسيتي منين شفتيه و هضرتي معاه مرة أخرى

شريفة:( ضحكات باستهزاء ) شمن حب الله يهديك مالنا كنمتلوو ففيلم هندي ( مصات شنافتها و قالت ) تقدري تقولي ارتاحيت ليه حسيت براسي كنعرفوا من شحال هاذي و تمنيت لو كنت تلاقيتوو من قبل .. واخا كيبان فيه صعيب و ماشي شي واحد لي ساهل و لكن راجل تعولي عليه يوقف فظهرك ايييييوا سعدات مراتوو و عائلتوو بيه .. الله يسهل عليه ..!

أسية:( فوهات فمها بصدمة ) مزوج ؟؟

شريفة:( ضرباتها بمنديل لوجهها و وقفات كضحك ) لا باقي كيتسناني هه ..! كطنزي عليا و لا كطنزي على الوقت ..!

أسية:( تبسمات و قالت مبدلة الموضوع ) عرفتي الحاجة حجيبة مرضات بزاااااف و حتى وردة ساقت الخبار بلي راجلها مزوج عليها و مراتوو حاملة .. هزات راسها و جات جلسات معانا فالفيلا

شريفة:( هزات حاجبها و قالت ) ربي خلصهم .. خليهم يجربوو حتى هما شوية ..!

🌕 يوم جديد 🌕

فمحكمة الاسرة .. جالس القاضي و حداه الكاتبة الخاصة بيه .. مقابلين معاهم .. شريفة و المحامي ديالها و إلياس بوحدو .. وجهوو صفر و حالتوو ما كطمنش .. عكس شريفة لي كيبان على ملامحها الراحة .. مركبة لي لونتي و الشعر .. العينين مجبدين و الفم منفوخ كيشهي ..!

بدا القاضي كيقرا فالمقال ديالوو و غير كمل هز راسوو كيسول أسئلتوو الاعتيادية .. و بما أن الطلاق بالتراضي ما كان قداموو غير ينطق بالحكم من بعد ما قال لإلياس

القاضي: رمي عليها يمين الطلاق

هزات عينيها فيه حاضية تعابير وجهوو و فنفس الوقت ذكرياتها معاه كتصب عليها بحال الشتا .. كاع ديكشي لي عاشتوو معاه الزوين و الخايب ..!

إلياس: سيري راكي مطلقة .. مطلقة .. مطلقة ..!

رمشات عينيها حتى هبطات دمعة وحيدة و هزات راسها كتنفس بالجهد .. ملامحها كيتغيرو شوية بشوية .. ما متيقاش بلي صافي تفكات ..!

قطتك الأليفة ...

تمردت وتحولت إلى أفعى سامة

ومخالبها المنكسرة غدت أنيابا قاتلة

وهذه اللئيمة إبنة مكرك .. وليدة غدرك .. وسيدة ذاتك ...!

هذه أنا فتاة الجحيم من صنع يداك

فإفتخر بما .....صنعت ..!

~~ نهاية الفصل الأول ~~

سريرُ خطيئةٍ كبرى

و موسيقاهُ مِن شهوةْ

و رغبةُ جائعٍ نشوانَ

لم يشبع من النشوة

سريرٌ مذنب في الليلِ

فاحَ بمنتهى النزوةْ

سريرٌ في شراشفهِ

ذنوبُ الذئبِ في الخُلوةْ

سريرٌ زل بالرغباتِ

بينَ جوانحي جذوةْ

و تشعلُنا خطايانا

و تربكُنا معًا شهوةْ

و نشعلُ في سجائرنا

كأنْ في قلبنا صحوةْ

و نصبحُ ندَّعي طهرًا

أنا الشيطانُ وهي " البلوةْ "

رهان القبل 🔥

ووجدتها

من بعدِ أحزانٍ

وبعد التيهِ

في زمنٍ طويلْ

من بعدِ حرمانِ السنينِ

وآهةِ العمرِ العليلْ

و وجدتها

عصفورةٌ وقفتْ تغردُ

فوقَ شُبَّاكي..

وقفتُ أنا

لكيْ أتأملَ الصوتَ الذي

يسري بأعصابي

وليسَ له مثيلٌ

أو بديلْ

أغمضتُ عيني فانبهرتُ

فتحتُ عيني فانشطرتُ

رأيتها امرأةً من الملكاتِ

تأتيني على العرشِ الجميلْ

هي أخبرتني

كيفَ خانتها التجاربُ

أخبرتني كيفَ كان الحبُّ سجنًا

واحتوى القلبَ الذليلْ

هي أخبرتني

كيفَ عذَّبها

وأدمتْها صراعاتٌ

وأعطاها من الحبِّ القليلْ

هي أخبرتني

كيفَ للإنسانِ أنْ يحيا

على أملٍ جديدٍ

أنْ يحبَّ

وقلبه يبقى الدليلْ

أنا لستُ أدري الآنَ من بدأَ الحوارَ

ومن أجادَ الوصفَ

من كتبَ القصيدةَ

من أضاءَ الروحَ بالنبضِ الأصيلْ

كيف القلوبُ تذوبُ

كيف يرددُ الموجُ المواويلَ

التي تعلو على عزفٍ نبيلْ

وقضيتُ أيامًا

ولي معها حواديتٌ

من الوجدِ المقدسِ

حين يأخذنا من الزمنِ البخيلْ

أحسستُ أن الحبَّ آتٍ

إنما لا أعرفُ العنوانَ

أخشى أن نضيعهُ

على قالٍ

وقيلْ

أنا كنتُ أرسمُ وجهها

حتى أظلَّ أضيءُ

كنتُ كمن يعيدُ صياغةَ الدنيا

على رمشٍ كحيلْ

وأقولُ شعرًا في الهوى

ما قاله العشاقُ

شعرًا من حروفِ المستحيلْ

أصبحتُ شاعرها

وأعرفُ أن أناجي حبها

وأظلَّ أدعو الله

سبحانَ الجليلْ

الآنَ تجلسُ بانتظاري

ترتدي ثوبَ الملاكِ

وإنني مازلتُ منتظرا

على شغفٍ

وموعدُ حبنا لايقبلُ التأجيلْ

و وجدتها

الآنَ

أعرفُ

ما أقولْ

حكييييم🐺

****************************

جالسة على أعصابها .. غير كتسوط و رجليها كيتحركوو لا إراديا ..! ناضت بالخف بحال يلا لسعاتها شي نحلة .. كتمشي و تجي فبلاصتها و شعرها كيلعب موراها .. مخلياه على راحتوو كيضرب فالنص فظهرها ..!

زادت فاضت بالحمالة و بان فيها الوزن .. لابسة بيجامة قصيرة .. مكحلة عينيها بكحول بلدي مخلي لون عينيها الخوضر واضح كيفتن ..! ليميش هبط لها و بدا يبان شعرها الأصلي لي زعر تماما بحال ملامحها ..!

كريمة:( فتحات الباب كتسلم و تعاود ) وا تي فين تعطلتي يا خوييتي .. من gبيلة و أنا سايرة نغلي بوحدي ( رشقاتها لكتافها ) نتسنى فيك ا صحيبتي

ردات صاحبتها المعلومة: وا راه عبد العالي لي عطلني يا ختي ( جبدات ميكة كحلة من تحت جلابتها و مداتها لها ) هاكي ها أمانتك .. الشمع راه كاتب لك عليه .. غتشعليه سيمانة نهار تابع خوه و قابليه مع تصويرتوو حتى يطفى

كريمة:( مشات بالزربة للبيت خبعات الميكة تحت الناموسية و وقفات كتلهث ) و راني دوييت مع عبد العالي فلاااابيييل ( طولاتها ) gالي آش نعمل .. هاذ الليلة نبدا الشمع و نغسل رجلي و نبيت الحجابات فداك الما ليلة كاملة و نديرو فقراعي نعطي لمولا داري يشرب .. يولي يمووت على تراب رجلي

ردات صاحبتها: هاذشي لي كاين .. و راه قالي كيوجدلك فخدمة صحيحة ما تخليهش يهز الراس .. تولي تباني ليه غير نتي لي مراة

كريمة:( ضحكات كتغطي فوجهها حشمانة و عطاتها بضربة للكتف ) يعطيك لبلا مرgتيني ( هي حشمتيني )

ردات صاحبتها : وا نمشي أنا قبل ما ترجع عكوزتك .. جيت نجري على سعدي و وعدي خايفة نتلاقاها فالباب هي و لا دراري

كريمة: لا راه مولا داري غذا راجع من سفر .. ثلث شهور و هو فالخدمة ما نكلموه ما يكلمنا ياو بقينا كي الحنش المgطوع لي الراس ... دابا راه ما gاداها فرحة .. سايرة توجد و تgاد ليه .. شوية و تلgايها بعتات معانا و الدراري خدامين ما تشوفينيش مسفحة كي السكيطة دالعيد .. علاه نgدر نلبس gدامهم هاكا ياو ؟

ردات صاحبتها: اييه عندك الحق ( طلعات و هبطات فيها ) و انا كنقول مال الناس منورين و مكحلين و مسوكين ( ضحكات و قربات عندها كيتسالموو حتى طيبوو حناك بعضياتهم )

كريمة: يا تي خليتلك الراحة ا خويتي يجيك الخير ..!

جالسة فوق السداري مفرقة بين رجليها كتنش على وجهها من الصهد و تنكر ..!

حبيبة: الموووت الموووت تقول كلشي خارج يتقدا اليوم .. البشر بحال النمل غير سارح و الشمووشات كتحرق .. تفقي بيضة على راسي تطيب .. الله يا ربي الله رجلي تنفخوو و انا كندور من قنت لقنت

كريمة: وا خالتي كن غوتي على الدراري يمشيوا معاك يهزوو عليك الثقل

حبيبة:( حركات يديها بالنفي و قالت ) لا لا ما نعيط عليهم ما يعيطوو عليا .. شغالي أنا قادة بيه .. وا صافي رجال دايرين مني جوج نوضهم يتسخرو عليا .. ما سخرتهمش تا فصغرهم بقى غير دابا ..!

سكتات كريمة كتشوف فيها معجبة ..! من ديما كتلاحظ بلي كتحتارم ولادها و مكبرة بيهم .. الحاجة المخيرة ديالهم من كبيرهم لصغيرهم " ملاك " ..!

عندها تفكير غريب نوعا ما .. مستحيل تنوض ولادها و هما جالسين يديرولها شي حاجة و لا تكلفهم فوق طاقتهم ..!

كتحشم تسخرهم و لا تقولهم كيني و لا ميني .. البوطة هي لخرى يلا تسالات لها و ما كانش الاحتياط و هما ماشي فالدار .. تخرج لراسها تعمرها .. واخا عياو يغوتوو معاها لي فراسها فراسها ..! يلا شافوو الحاجة كيديروها ايوا و يلا ما داو ما جابوو .. كيلقاوها دارت حنة يديها و مقاتلة غير بوحدها ..! و هاذشي ربى فيهم شوية دالعكز تا هما .. و داك النغزة ديال أنا رااااجل ..!

حبيبة: حكيم غذا بحال هاذ الوقت يكون معانا .. الله يرضي عليه مسكين و يوصلوو على خير

كريمة:( ردات بحزن ) شفتي أ خالتي ما ضور ليا ( عيط ليا ) ما gال نشوفها كي بقات هي و الترابي لي فكرشها .. ثلث شهور ما هز التيليفون حتى بالكذوب ..!

حبيبة:( تنهدات كتماصي فرجليها و قالت ) راه خدمتوو مزيرة أ بنتي و البلاصة فين كان ممنوع عليه التيليفون .. أنا لي موو و ما سمعتش صوتوا من نهار سافر تال للبارح

كريمة: و ها هو ضور لك و نساني .. زعما ما عندوش تا جوج دقايق يسول فيا ؟؟

حبيبة:( بابتسامة شدات فيديها ) شوفي أ كريمة .. باش نكون معاك دغرية كيفما كيقولوو .. ولدي و عارفاه كي كيفكر .. حكيم طبعوو فشكل .. كيلاحظ و كيميك حتى يشبع و فلخر كيقلب قلبة وحدة .. و يسحابلك كيشرح و يقولك ها شنوو درتيلي و ها شنوو فعلتي ؟ ( حركات راسها بالنفي ) هاذيك لي عمرك تحلمي بيها .. كيحطك سطل بلا تقرقيب و يولي يتصرف ببرووود بحال يلا عمرو عرفك .. ما يقطع هضرة ما يقطع كلام .. ها هو كيهضر معاك و لكن قلبوو مغير من جهتك .. كيخليك نتي و فهامتك و كيشوفك فين غتوصلي و نهار كينوض .. كينوض دقة وحدة

كريمة:( قاطعاتها ) و أنا أ خالتي يا و الله تا كنبغييه و ندمت على لي كنت سايرة ندير فيه .. خفتوو يطير من بين يدي و هو بعيد عليا كنحسوو هاملني .. عمرو قالي الكلمة الزينة و الشيطان وسوس ليا و مشيت فداك الطريق ( حنات راسها )

حبيبة: و فين عمرو شبعنا هضرة كاملين ؟ كل واحد و طبيعتوو و حكيم عزيز عليه الكالم .. يجلس بوحدو بلا ما يصدعو تا حد .. هضرتوو كيبينها فأفعالوو .. نهار توقفي عليه تلقايه راجل فظهرك .. أما كثرة القيل و القال خليها لينا حنا العيالات

كريمة: و كي ندير نصالحوو أ خالتي ؟ راني كي الحنش المgطوع راسوو

حبيبة: نتي غلطتي أ كريمة و بزااف .. يلا كاع لي ما كيشبعها راجلها هضرة مشات سحراتلوو فين غنوليو ؟ راه ملاك لي مقطرة ليه من عينيه كيسمع لها غير المنقي خيارو و لكن توقف عليه و تشوفي ؟ عينيه يحطهم لها .. و يجبدها شي مسخوط الواليدين و تفرجي داك الساعة ..! ( تنهدات بقوة ) حكيم من صغرو حنييين و لكن المسؤولية كتقسح و زاد كملنا بداك البوليس .. راه أنا لي موو و شحال من مرة كيزعف عليا بلا ما يحس .. و كن جيت نهز فخاطري بزاف و شوية .. مع الولف بنادم كيتبدل طبعوو و كيرجع قاسح مع كلشي و واخا هكاك راه كيحاول يفرق بين الخدمة و الدار

كريمة:( سهات فالخوى كتفكر فهضرتها و ضورها فراسها )

حبيبة: أنا حاجة وحدة غتقوليلي و ما تكذبيش عليا .. مور ما جينا أنا وياه لداركم .. مشيتي لعند شي فقيه و لا شي شوافة ؟ ( هزات حاجبها ) راه وصلوو خبارك أ كريمة و بالمزاوكة و الرغيب باش ردك و غير على ود لي فكرشك باش ما يوقع ليه والوو ( بتأنيب كملات ) داك الحجابات لي كنتي تهزي ما خفتي يضروو ولدك و يخرج معوق ؟ ما خفتي توقعلوو شي حاجة تندمي عليها حياتك كاملة ؟

حبيبة:( بتأنيب كملات ) داك الحجابات لي كنتي تهزي ما خفتي يضروو ولدك و يخرج معوق ؟ ما خفتي توقعلوو شي حاجة تندمي عليها حياتك كاملة ؟

كريمة: وا ندمت ا خالتي .. الشيطان الله ينعلوو و يخزيه راني gلتلك علاش درت هكاك ( حنات راسها ) هو مشيت داك النهار الله يسمحلي

حبيبة:( ردات بحدة ) هي رجعتي لعوايدك فنفس النهار لي جينا نبردو الخواطر ( ضربات فصدرها وجهها حمر مفقوصة ) شنوو غنقولك ا بنتي .. جيت ندعي خفت تخرج فلي فكرشك .. جيت نعطيك بالظهر .. عارفاك بنص عقل و تمشي ديري شي كارثة ما نلقاو ما نلبقوو فيها .. أ كريمة ديييري عقلك أ بنتي .. راه و الله و يحصل عليك قد هاكا ( دارتلها اشارة بيديها ) و الله حتى يذب٠٠حك و يمشي يكمل عمرو عليك فالحبس .. راه و الله ما يرحمك .. أنا لي عارفة ولدي كي داير

كريمة:( قربات منها باستلها يديها كتبكي ) صافي ا خالتي واش نعاود نرجع لديكشي من بعد ما ردني مالي حمقة ؟ دابا سايرة نخمم غير كيفاش نصالحوو لا غير ..!

حبيبة:( تنهدات كتمسح على وجهها ) راك غير مهوراها و ما كتفكريش .. ما توصليناش للعيب أ كريمة و خلينا مزيانين .. راك و الله تا غتندمي يلا بقيتي تابعة هاذ الطريق .. حكيم عمرو صرف فيك العيب باش ترديهلوو هاكا .. شافك مرة وحدة حدا عائلتك و مشى تا قاد وراقوو و خرجاتلوو الموافقة و جا تزوج بيك .. ما ضحك عليك ما جرجرك معاه .. غير هاذي تشفعلوو عندك أو لا ..!

قالت كلامها و وقفات ماشية للكوزينة تشوف سخرتها فين وصلات و تخبع كل حاجة فبلاصتها .. خاطرها مزير عليها و بزز منها كتساوي بيناتهم و الندامة كتاكل فيها ماكلة .. على الحفرة لي طيحات ولدها فيها ..! هزات راسها كتستغفر فاش بانتلها كريمة دازت قدامها مطرقة عليها بيتها ..!

شدات على كرشها و تحنات على ركابيها كتجبد فالميكة لي عاطيها عبد العالي كتفكر هضرتوو على الشمع .. " الشمع حرقتوا عندي يوماين متابعة .. الباقي نتي لي خاص تشعليه .. غتبعيهم ليه سيمانة .. نهار اه نهار لا و غير يكملوو السبع ايام غتحبسي .. غتهزي ثلاثة فكل مرة و تقابليهم مع تصويرتوو "

دخلات للحمام هازة فيديها ثلاثة د الشمعات و تصويرتوو مع بيريكة .. دارت لي قالها بالحرف ..! تنهدات بتعب و هي كتجر بانيوو عامر بالما لجهة لاصاش .. لي جلسات فوقها خاشية رجليها فداك الما كتفزك فيهم و تحكهم مع بعضياتهم ..!

**************************

تفتح الباب و دخل محمد أمين هاز ساشي د الفارماسي فيديه .. شاف جيم مكسل تحت لاكليم كيتبرد .. فشلان فبلاصتوو بالصهد .. ضحك معاه و مشى مباشرة لبيت حكيم فتحوو و دخل

محمد أمين: باقي فبلاصتك أ صاحبي نوض توكد معانا .. مالك على هاذ التسخسيخة كاملة ؟

طلع الريدوو تا دخلات الشمش و ضربات فعينين حكيم لي مكسل فوق الناموسية بالشورط .. وجهوو حمر و كلوو عرقان .. بزز كيهضر

حكيم: جبتي الدوا لي

قبل ما يكمل جملتوو .. تقلب كيرجع فوق الزربية .. قلبوو كيضرب بالجههههههد حاس بيه غيخرج من بلاصتوو شوية ما يسكت ..! ذاتوو كاملة كترعد عليه و العرق كيتكب عليه بالسطولة .. بلا السخانة لي كتاكل فيه ماكلة ..!

قرب منوو محمد أمين يعاونوو يتكى و بمجرد ما قاس فيه قفز مخلووع من حرارتوو .. و حكيم كيقلب فراسوو بشوية فشلان .. كلشي كيحرقوو تقول واكل قتلة دالعصا ..! عينيه منفوخيين بزز كيفتحهم و أنيين خفيف كيتسمع منوو

محمد أمين:( ناض بالزربة كيقلب بجهالة على مقياس الحرارة .. عينيه تزيروو باغي يبكي ) حكيم واش كتسمعني .. كي كتحس براسك ؟ قادر توقف تكى عليا نديك للطبيب ؟؟

بزز هز يديه باغي يهضر و مع فتح فموو تقلب كيرد من جديد .. حتى بدا كيرجع الد٠٠م ..!

حاطة رجل على رجل كتقلب فعينيها و تبتاسم ببرود .. سيقانها كيبانوو شوية من الفتحة ديال لبستها .. لي تقليدية مئة بالمئة .. قميص فالباج جاي على وقفتها .. مخدوم بالسفيفة فالصدر و اليدين .. لي مزوقين على شكل مثلثات متعاكسين .. و زايدة فوقهم سلهام فنفس اللون واسع باليدين و القب .. مبينها همة و شان ..!

الشعر قصير و الوجه طبيعي كيبري .. مكتافية غير بليكخون و كلوز فالوردي البارد .. جبدات من صاكها نظاظرها د الشوف لبساتهم فبلاصة لي لونتي لي مكتقدرش عليهم فالصهد .. تقادات فجلستها فاش سمعات الصوت كيقرب و بابتسامة هادئة قالت ..!

شريفة: جينا نعدبوك أ مدام خديجة ..!

ردات خديجة بابتسامة كتطلع و تهبط فشريفة .. فأناقتها و لباقتها ..! كيفاش كتحرك و تهضر بالعبار .. ظهرها مستقيم و راسها مرفوع .. جامعة رجليها و مميلاهم شوية للجنب و حاطة يديها فوق فخاضها .. مرة مرة كتهز وحدة كتشرح بيها و تحركها بهدوء مبينة على المجوهرات لي مزينين معصمها ..!

خديجة: مرحبا أ حبيبة .. و لاهيلا صافي بلييزيغ نتعرف عليك .. سي أحمد ديما كيذكرك بالخير .. أخيرا تجمعنا مع بعضياتنا ( شافت فأسية ) تبارك الله على الكتكوتة

شريفة:( ضحكات برقة حتى تغمضوو عينيها و هي كتشوف فأسية لي تزنكات فبلاصتها ) الله يبارك فيك مابييل .. يمكن موسيو أحمد برادة مشغول .. نرجع ف

هزات راسها كترمش فيه و هو داخل كينحنح .. بكنضورة فالبلوو غوايال .. نفس الستيل لي لابسة مراتوو مدام خديجة ..!

أحمد:( قرب سلم عليهم و جلس حدا مراتوو ) لالة شريفة نهار كبير هذا لي شديناك عندنا .. شهر كامل و أنا كنتسنى فهاذ النهار و دابا باغى تمشي بلا ما نضايفوك ؟

شريفة: لهلا يخطيك أ سي برادة .. ما تديرهاش مني قلة الصواب .. كنت عيانة بزاااف .. هاذي اول خرجة ليا من الدار .. من بعد شهر و أنا فالفراش ( تنهدات ) داااازت عليا و لكن كلشي من الخير

خديجة:( تدخلات بلباقة شادالها فيديها ) ياك لباس ؟ مشيتي لطبيب ؟ شنوو قالك لميدسان ؟

شريفة:( طبطبات عليها و قالت ) طانكييط با " ما تخافيش " غير من العيى و قلة النعاس و التفكير .. مي دابا صافا الحمد لله ..!

خديجة: وا prend soin de toi " انتابهي لراسك " ( بابتسامة ) شحال عندنا من شريفة ؟

شريفة:( ضحكات ) غير وحيحيدة ..!

تفتح باب الفيلا و تم داخل شاب فأواخر العشرينات .. زينوو شهب ديال أراك من بعيييد .. باين فيه عايق و دافع شبابوو غالي ..!

مشى للصالون لي مفرش بطلامط الخريبة فالأصفر .. النقش بلدي فالحيوط و السقف .. بلا لكوانات دالخشب و الطبالي لي منقوشين على حقهم و طريقهم .. الزرابي حومر مطلوقين و الثريات ديال النحاس ..! البصمة ديال هل فاس واضحة .. كلشي متول و مقاد على حقوو و طريقوو ..!

....: وااااحد السلام عليكم ..!

خديجة: دخل أ مهدي فين تعطلتي ؟؟

مهدي:( رد كيسلم عليهم ) غير فالخدمة .. ياك باقي ما فاتني والوو ههه

ضار عند شريفة لي كتشوف فيه بهدوء مركزة على عينيه الزورق و شعروو لي قهوي مايل للأحمر .. مزيج غريب عجيب ..!

مهدي: مادموزيل شريفة نيسبا " ياك " ؟

شريفة:( اكتفت تحرك عينيها من لتحت للفوق بمعنى هي هاذي )

مهدي:( ضحك ضحكة مستفزة و قرب هز يديها باسها بجنتلمانة و قال بغميزة ) هاهاهاها .. أخيرا طل القمر .. تشرفت بمعرفتك شوشو .. أنا مهدي .. مهدي برادة ..!

شريفة:( ردات بميوعة ) مشرفين Mehdziii

واقف فباب البيت كيشوف بحزن و خوف فحكيم لي ناعس بتأثير الشوكة لي ضرباتليه الطبيبة ..!

محمد أمين:( رد عليه الباب و قال ) صافي راه نعس .. خلعني بزاف عليه فاش شفت الد٠٠م .. شكرا ا بسمة ما عرفتش شنوو كنت غندير بلا بيك

بسمة:( تبسمات و قربات عندو مزيرة على يديه ) درت غير خدمتي أ ميدو .. حكيم بحال خويا و كثر .. خاصوو ينتابه لصحتوو بزاف .. يدوز يدير التحاليل لي كتبت ليه و يمشي للطبيب يدير كونطخول جينيغال باش نعرفوو مناش هاذ الحالة لي كتجيه

محمد أمين: كوني هانية غير يولي شوية نجرو بزز منوو للطبيب .. غيكون كلى شي حاجة ضراتوو فالخدمة و عطى كثر من جهدو ( تنهد بقوة ) يالاه هاذي يوماين باش جا .. و من داك النهار و هو على نفس الحالة .. و زاد هلك المعدة بالدوايات غير كيسرط تا هو الله يهديه

بسمة:( حركات راسها ) عليها ناض كيرد واقيلة و مع ما واكلش تجرح ليه حلقوو .. خاصوو ياكل شي حاجة فاش يفيق و عطيه الدوا ( هزات ساكها ) مرة مرة انتابه للحرارة واش رجعات طلعاتليه و تا الطونسيو كان لاعب عليه .. طالع بزااف .. المهم .. لي غنوصي و نأكد عليه التحاليل فأقرب وقت ..! غنمشي دابا و من بعد نرجع نشووفوو كي بقى ..!

محمد أمين:( سلم عليها بلابيز و قال ) تسناي نوصلك

بسمة: لا لا غير خليك معاه أنا نخرج للشارع نشد طاكسي .. سلم عليه و قولوو الله يشافيه ( فتحات الباب و رجعات ضارت عندو ) توحشت كيلوو دالفشوش ههه فين غبرتوها ما بقيتش كنشوفها كاع ؟

محمد أمين:( ضحك ) ماري ؟؟ مشات لرباط عندها سطاج تما .. بقاتلها شي سيمانة هكاك و ترجع

بسمة:( ردات بدهشة ) بالصح ؟؟ ديما كنبغي نسولك عليها و كننسى .. خلات بلاصتها الصراحة توحشناها

****************************

رد و هو مفرق بين رجليه كيتغذا : الفكرة ديال المشروع زوينة .. فين قلتيلي عندك المحل ؟

شريفة: ف بير قاسم ..!

مهدي:( حرك راسوو ) كن خديتي المحل فحي الرياض حسن لك و لا السويسي كاع .. أما فبير قاسم و طريق زعير صعيب يتمشى لك .. ياك أ بابا ؟؟

شريفة:( هزات حاجبها و ردات ميوعة ما حاملاش هاذ الجلسة كاملة و بان عليا نبان عليك ..! ) بالعكس أسي مهههدجي ..! أنا كنشوف لبعييييد .. بير قاسم و طريق زعير فيهم الفيلات ديال الفريع و الناس نقيين بزاف .. دارو السفارة د السعودية و الميريكان و باقي مع الوقت تعمر داك الجهة غير بالمشاريع دلييكس .. و المحل عندي غيتعرف تما حسن من أي بلاصة .. حيث أصلا دايراه لداك النوع دالناس و حاطة فيه راس مال كبير ..!

مهدي:( هزهز حجبانوو و طلقها بضحكة مستفزة ) هاهاهاها راس مال كبير هاهاها غير ديري فبالك كاينة نسبة دالنجاح و نسبة كبيييرة دالخسارة

ميقات فيه و حنات راسها كتاكل من طبسيلها فصمت .. تا طاح فبالها حكيم نهار عاوداتلوو على المطعم لي باغى تدير و كيفاش شجعها و ما حبطهاش نهائيا بلعكس كان مستاعد يعاونها ..!

مهدي: كيضهرلي قلقت الآنسة هاهاهاهاها

شريفة:( ضحكاتلوو ضحكة صفرة و قالت ) وااايلي أ مههههدجي .. كون الرابوز فيه النفس گاعما يخشي زنافرو فالرماد

غمزاتوو ببرود و قلبات عينيها لأحمد برادة لي حاضيهم بلهفة .. تبسمات و قالت

شريفة: موسيو أحمد .. شكرا بزاف على العراضة ( مسحات فمها ) غيخصني نمشي دابا .. عندي شي خدمة يالاه نكملها ..!

خديجة: ماشي دخلتك هاذي أ شريفة .. كنت عوالة عليك دوزي معايا العشية كاملة ..!

شريفة:( تبسمات ) مرة اخرى ان شاء الله .. و هاذ المرة نتوما لي مرحبا بيكم عندي

وقفات بلباقة كتوادع معاهم هي و أسية حتى وصلات لعند مهدي .. زير على يديها و قال

مهدي: من هنا للثمنية دالعشية تكوني ساليتي شغالك ؟ شنوو بانلك ناخذوو كافي على حسابك ( طلقها بنفس الضحكة ) هاهاهاها je déconne " كنقشب معاك " أنا لي عارض عليك الغزالة ..!

أحمد:( رد بحماس ) اه اه خرجوو .. نتوما باقيين شباب تليقوو لبعضياتكم .. عطيها نمرتك أ مهدي

شريفة: أوكي نكمل و ناخذو كافي اونسومبل ..!

خدات الكارط فيزيط ديالوو دارتها فساكها بلا ما تقراها و خرجات من تما كتعثر هي و أسية ..!

شريفة:( كسيرات بالجهد و غير بعدات طلقاتها بضحكة من قاع قلبها ) ههههههههههههههههههههههه الفشر و الخرا كيشرشر

ملاك:( جالسة هي و صاحبتها كيتغذاو ) عرفتي تهديييت يا صاحبتي .. رجلي طابوولي من لتحت بالوقوف

شادية: ولد الحرام من قبيلة و أنا نصوني عليه و حلف لا جاوب .. باينة مغرقها بنات فشي قنت .. راه ما كذبوش فاش قالوو لي عينيهم زورق كيكونوا زايغين

ملاك:( ضحكات ) هههههه ا ربي فوقاش نجرب بحال هاذ المشاكيل

شادية: نتي باركة عليك غير داك خينا عندمن كديري السطاج ( شدات على راسها ) كن كنت بلاصتك كن طرطق فيا شي عرق بالفقصة

ملاك: وا راه معروووف ما كيعجبوو العجب و هو فالأصل راه استاذ جامعي كيقري فالسويسي .. بوحدو لي شاد البرونش لي دايراها .. بزز قبل يدخلني مع ليكيب لي خدام معاها ..!

شادية: دابا نتوما شنوو كديرو ما فهمتش ؟

ملاك:( ربعات رجليها و بحماس قالت ) راك عارفة التخصص ديالي .. ديكشي دالأثار .. دابا كنحفرو فواحد الرياض فيه شي مؤثرات تاريخية و حنا كنحللوو فيهم باش نعرفوو الحقبة ديالهم و زيد و زيد

شادية: اااااه .. هاذشي عندكم فشكل ( رجعات هزات تيليفونها كتصوني ) قطع و الله حتى قطع عليا ..!!

ملاك: وا يمكن مشغوول ما عندو كي يدير يجاوبك ..!

شادية:( وقفات كتجمع فشعرها لي مبوكل ) لا لا أنا لي كنعرفوو .. فين عمرك شفتي شي مهدي صدق مع صاحبتوو باش يصدق هو ؟؟

ملاك: هههههههههه هاذي عندك

شادية: أنا بغيت نعرف غير شكون هاذي لي متلفاه على القبلة ..! ( شدات حنكها كتفكر ) عرفتي شنوو ؟ يتبرد الجو و يالاه نخرجوو لواحد القهوة فالمدينة كيكونوا فيها عيساوة .. ديكشي غزااال غيعجبك الحال

ملاك:( هزات كتافها و قالت ) يالاه تا دابا .. غير تكون قهوة محتارمة .. خويا غيرجع ليوم و لا غذا و فأي دقيقة يقولي أنا جيت خرجي عندي

شادية:( ردات بتأكيد ) ما تخافيش ا صاحبتي القهوة نقية و زوينة .. تما فين تعرفت على مهدي نيت .. كيعمرها بزاف هو و صحابوو

ملاك:( هزهزات حجبانها ) قولي الموضوع فيه مههههدي ..!

**************************

محمد أمين:( هز راسوو فحكيم ) كي كتحس دابا ؟ مزيان ؟ خلعتيني عليك ا صاحبي

حكيم:( نطق بصوت مجروح ) لا مزيان ارتاحيت .. الله يحفضك

محمد أمين: يالاه بسم الله .. تغذا باش تشرب الدوا ثاني ( ضحك كيهز فحاجبوو ) دوق طعام المدام .. مشات مسكينة للدارهم طيباتوو و سيفطاتو مع خوها

حكيم:( تبسم بهدوء و قال ) هي صافي نويتي .. هذا هو الجهد هه !

محمد أمين:( كرر موراه ) هذا هو الجهد .. نديرو دارنا تا حنا .. باغي تفرخ بوحدك أ الخوادري و لا ؟

حكيم:( شاف فيه مطولا و حرك يديه جهتوو بثقالة ) فرخ حتى نتا شكون شادك ؟ ( سكت شوية و قال ) كاين شي خبار على ملاك ؟

محمد امين: هانية أمورها مزيانة .. فينما كنكونوا مساليين كنضربوو عندها لتما ( تكسل بتعب ) هاذ السيمانة غترجع على ما قالت

حكيم:( حرك راسوو بالشوية و قال ) هي نتوكلوو عندها هاذ العشية نشوفوها .. خاصني نتحرك يلا جلست فالدار غير ما غنزيد نمرض

محمد أمين:( شاف حتى عيى ) صافي واخا و لكن ندوزوا تدير التحاليل هما لولين و عاد نشدو الطريق ...!

حكيم: و عليه ..!

***********************

شريفة:( هازة تيليفونها كتكتب فيه و كتهضر مع أسية فنفس الوقت ) قالك شي قهوة فالمدينة كيديرو فيها عيساوة .. شنوو بانلك نمشيوا و لا نكركب موو

أسية: قولوو يعطيك السمية و دخلي شوفيها كي دايرة .. عنداك تكون عامرة براهش ؟

شريفة: نوو زوينة قلبت عليها ..! نمشيوا نفوجوو شوية ؟ و يلا بدا يزكزك علينا نقلبوو عليه الطبلة ( هزات كتافها بلا مبالاة ) ما طالعاش ما طالعاش ..!

أسية: صافي يالاه

واقفة شريفة حداها أسية بنفس اللباس التقليدي دالصباح .. كيشوفوا فالديكور ديال المحل باستغراب ..!

جوج بالات د التبن مربعين محطوطين فالجنب و فوق منهم ثلاثة د الساشيات ديال القهوة معاكسين ..! و فالجنب الثاني مفرشين هياضر مصنوعين من جلد المعاز .. شادين القنت كامل محطوطة فوقهم طحانة يديوية فيها حُبيبات دالقهوة فالأشكال و الأنواع .. و فوق من الجلسة معلقين السرج د العود ..!

شريفة:( رجعات شعرها للور و قالت بهمس لأسية ) لي صوب هاذ الديكور راه فناااان .. ناري على منظر يا صاحبتي ( جمعات حجبانها بتساؤل ) و لكن منين الدخلة ؟

أسية: أنا شكيت واش غلطنا فالدرب ؟؟

باقيين كيتشاورو بيناتهم حتى دخلوو جوج بنات لنفس المحل كيتراشقوو بالضحك و شريفة حاضياهم منين غيدوزو ..!

شريفة: لا ما غلطنا وااالوو .. هذا هو النعث .. يالاه نتبعوو داك البنات حسن ما نبقاو نتسناو فمهدي هنا بحال شويش دالهم ( عوجات فمها كطنز ) ويلي سيكواصا

جرات أسية من يديها و دخلوو كيسرحوو فعينيهم .. سالكين نفس الطريق لي دازو منها دوك البنات ..! لقاو واحد الدخيلة صغيرة فيها الدروج مزلجين كيهبطوو للاكاب لتحت و صوت الموسيقى كيتسمع لعندهم ..!

شريفة:( حركات راسها بالايجاب بمعنى هنا ..! و قالت ) يالاه نهبطوو

سبقات أسية مخلية شريفة تابعاها بالشوية عليها حاضية مع حوايجها خايفة تتعكل بالطالون و السلهام و تجي على سنانها ..! مع وصلات و هزات راسها تبسمات بانبهار ..!

الأضواء خافتة و الأثاث عريق .. الكراسة ديال الخشب كبار قدامهم طبالي صغار بحال الصوندريات و محطوط فوقهم ضامة لي بغى يلعبها ..! ديكورات من القصب و مجسمات د الفراعنة معلقين فالحيط ..!

وقف عليهم واحد من السربايا بسروال قندريسة فالكحل و قميجة بيضة مع طاgية فالأحمر بالشوشية فالكحل : مرحبا بيكم .. نتوما لي من طرف سي مهدي برادة ؟

شريفة:( بهدوء حركات راسها ) وي حنا ..!

رد عليها بابتسامة: واخا تفضلوو معايا ( وصلهم لبلاصتهم و تأكد من راحتهم عاد قال ) تطلبوو دابا و لا تتسناو سي مهدي ؟

شريفة: غنتسناوه حتى يجي

تبسمات معاه بمجاملة حتى مشى بحالوو و قالت لأسية و هي كضور عينيها على الحضور بلا ما تعيق ..!

شريفة: ما كذبش البلاصة نقية و زوينة ( ضحكات باستهزاء ) صدق عندو الذوق بعدا ..!

《 صلى عليك الله يا نبينا .. صاحيبُ الشفاعة .. غيث البشر ( بداو كيضربوو بالشوية فالبنادر كيسخنوهم ) صلاة انقضت بالرضى علينا .. في دار الدنيا و بدار البقاء 》

أسية:( سفقات بيديها ) عيساوة بداو يااااي شحال توحشت هاذ الأجواء

شريفة:( حركات راسها بحركة دائرية و هزات يديها كتديها و تجيبها بالشوية عليها و تغني معاهم بصوت خافت ) ا رسول الله يا عريس القيامة هااااا النبي محمد

أسية:( ضحكات فرحانة و شريفة كتقرب تال عندها كتغني و تحرك صدرها بالشوية و ترجع لبلاصتها ) ههههههه

شريفة: ويين المعشووقين فالنبي وا صلييوا على بوو فاطمة

تسمعات تزغيرة دالبنات لي بداو كيوقفوو شوية بالشوية كيعمرو الساحة فين كاينة الفرقة .. بقات متبعاهم بعينيها و هما كيشطحوو حتى نوضوو فيها الهوايش ..! وقفات على غفلة تقول غير شي حاجة قرصاتها و مشات كتشطح براسها و تقاد فقميصها حتى تخشات بيناتهم ..!

و بعيدا على الجوقة و الغنا جالسة شادية معاها ملاك لي كتطبل .. ناشطة و فرحانة معاهم .. عكس لوخرى لي كتسنى غير فوقاش يبان صاحب دعوتها و تشدو فالمصيدة ..!

شادية:( تنهدات و قالت كتشوف فملاك ) شنوو درتي باقي ؟ سيفطتي لخوك لوكاليزاسيون ؟ جاي و لا غيتسناك فالدار ؟

ملاك: عرفتي قلبي بغى يسكت فاش قالي أنا لتحت حدا باب العمارة هبطي .. جاب الله محمد أمين لي جا عندي .. أما كن حكيم و لا عدنان كن دارولي فيها اليدين و الرجلين ..!

شادية:( ضحكات ) محمد أمين باين كوول فدماغوو .. نشووطي و كيعجبوه بحال هاذ الخرجات ( كملات بصوت خافت ) يالاه نفقص بيه داك المسخوط عندي .. ما عرفت منين جاتوو الهداية غير معديين عليه بهاذ السمية ..!

ملاك:( ما سمعاتش مزيان ) شنوو ؟؟

شادية:( قلبات عينيها لعيساوة ) قتلك هاذ البنت لي عطاوها المايك تغني صوتها غزااال تبارك الله

ملاك: هي لي كانت واقفة قبيلة فالباب هي و شي بنيتة زعيعرة .. راها فين جالسة ( غمزاتها ) ها صاحبك وصل .. زاهية عواشر هههههه

شادية:( قفزات فبلاصتها و قالت ) حلللفي فييين ..؟

ملاك: راه أونفاص معاك .. واقف مع السرباي ( ضحكات ) ويلي يا ختي على البضاض و آش داير فيك ههه ..!

شادية:( تبسمات و ردات كتخبع ) راه واخا ولد لحرام من فعايلوو و لكن كنبغييه و معشش ليا فالقلب .. عاطياه لي قدامي و لي مورايا أراك غير يرضى سيد السلطان

ملاك:( هزات حاجبها ) راه نتوما لي كتديروها لراسكم .. شفتي أنا بكثرة ما معاشرة مع خوتي و ديما مع الدراري صحابهم وليت حافضاهم و شارباهم ما .. و هاذشي لي كتديري فيه غيخليك ديما تابعاه و عمركم تزيدو للقدام .. تا تلقايه شي نهار تزوووج ..!

شادية: مالنا على فالك أ ختي .. راه تا هو كيبغيني و كيفما ما نقدرش نخليه تا هو نفس الشي ( تنهدات ) شفتي غير يبعدو مننا واليديه .. غنكونوا بخيير

ملاك: علاش مال واليديه ؟؟

شادية: ما حاملينش فيا الشعرة ا صاحبتي .. قالك ماشي من مقامهم و أنا هي لي ما نديش ولدهم

هزات كاس دالما حاضية مهدي لي مشى عند شريفة كيشطح معاها

شادية: أما حتى هاذ الزيغة و التزهوانيت لي فيه عندي ليها الدوا ( غززات شنايفها كتتغذذ ) شوفي على الحيماري كي كيشطح و يضحك و أنا جالس كيقطع عليا .. و لكن غيير بلاتي عليييهم ..!

ملاك: عنداك تديري شي كارثة و تخرجي عليا ( هزات تيليفونها كتشوف واش ما عيط عليها حتى واحد ) محمد أمين تعطل .. شوية تلقايه معانا

شادية: ما غندير والوو غير نتعرف عليها ..!

ملاك:( هزات حاجبها ) وا تبتيني بما غندير والوو حتى نلقاك كتناتفي معاها و منوضاها غير بوحدك .. و شفتي يلا درتيها غتكوني حمارة و غتزيدي تنفخيه و يعجبو راسوو كثر و كثر ( باستهزاء ) دايرك فالجيب ..!

جلسات فبلاصتها حدا أسية وجهها مزنك بالشطيح و الغنا .. تبسمات معاها و قالت

شريفة: دردكت عليهم .. بردت جنووني ههه غذا نلقاني فشوف تيفي و الله ما كنحشم ما عنديش الحباسات هههه

مهدي:( تدخل ) لا تبارك الله عليك عندك ما تقوولي .. أما صوتك ( عض على شنافتوو و صفر بالشوية )

أسية:( بحماس ردات ) خاصك تسمعها فأغاني أم كلثووم .. دمااار و الله .. حقا صورتك واحد المقطع صغيور و نتي كتغني حطيتوو فالأنسطا و طاغيتك نتي و لاباج دالقهوة حتى تشوفيه ..!

شريفة: صافي ما غنتسناش شوف تيفي نتي لولة لي غتشوهيني ( ضحكات ) اوبس بغيت نقول تشهريني

مهدي:( قاطعها ) هي شي نهار نلقاو لالة شريفة شي مغنية مشهورة هاهاها نشدو الصفوف نتصورو معاك

شريفة: و مالي ما نستاهلش الزين ؟؟

مهدي: هاهاها تستاهلي الله اودي

شريفة:( هزات حاجبها ) واش عندك شي مشكل فالباراميتر ؟؟ غير كتفرنس ( بصوت خافت كملات ) كي القح**ة خاصهم غير يحزموك و تبدا تضور على الغرامة ( قلبات وجهها ) البعر

مهدي:( ما سمعهاش ) انا هاكا داير عزيز عليا الضحك و النشاط ( نحنح ) كي جاتكم الكافي بعدا ؟ ياك ما تعطلتش عليكم بزاف ؟

قاطع حذيثهم السرباي لي وقف يقيد طلبيتهم .. شافوو فيه بثلاثة مبتاسمين ..!

مهدي: واحد شيشة دالتفاح .. و شي كاس د الحليب باللويزة للأنسة هاهاها ياك ا شوشو

شريفة:( غلباتها الضحكة ) هههه واش من نيتك ؟؟ ( شافت فالراجل ) براد د أتاي صغير بالنعناع و بلا سكار عافاك .. و نتي أ أسية ؟

أسية: بحالك

خذا طلبيتهم و انساحب مخليهم على راحتهم ..!

مهدي: اييوا فين خليناها ؟؟

شادية:( جلسات قدامهم دايرة رجل على رجل .. ما عرفوهاش منين بعثات عليهم هي و ملاك ) سي مهدي وا غبوور هاذوو ( شافت فشريفة لي مستغربة من هاذ الدخلة ..! ) ما غتعرفناش على الأنسة .. ؟؟

أسية:( هازة تيليفونها كتضور فالأنسطا ما مسوقاش ليهم .. حتى طلعلها إلياس شاف السطوري و دارلها قلب .. ضربات جبهتها ناسية بلي عندها فليزامي ..! ) شريفة

شادية: سميتها شريفة ؟ أنا شادية و هاذي ملاك و لكن عيطيلها بماري حسن .. صحاب مهدي .. و نتي الغزالة ؟

أسية:( تبسمات بصفورية كتفكر واش تقولها لشريفة و لا تسكت فلخر سكتات ) مشرفين أنا أسية ..!

ملاك:( صونا تيليفونها و هزاتوو ردات مستغربة ) ألوو حكييم

ملاك:( ردات مستغربة ) ألوو حكيم ؟ امم غتعطلوو ؟؟ علاش جاي نتا و محمد أميين ؟؟ ااه بصح ؟ سحابلي غير هو .. صافي أنا كنتسناكم

قطعات كتولول و رجعات سكتات فاش شافت شريفة مركزة معاها .. أو بالأحرى مركزة مع سمية حكيم لي سمعات و كتحاول تتفكر هو شنوو كان قالها سمية ختوو ؟

ملاك:( تبسمات معاها بهدوء و لقات راسها كتشرحلها لا إراديا ) خوتي غيجيوا عندي غير هما غيتعطلوو شوية و كيوصيو نتسناهم ..!

شريفة: اااه ( بتساؤل ) شنوو قلتيلي سميتك ؟؟

ملاك:( ردات برحابة صدر ) ملاك و كيعيطولي ماري

شريفة:( ما عقلاتش كاع على السمية .. تبسمات معاها بهدوء ) متشرفين ا حبيبة ..!

شادية:( كتهضر بصوت خافت مغذذ غير ما يسمع هو ..! ) درتي الجديد الكيدار ؟؟ غنبقى كل مرة نلقطك من قنت كتجمع فالنماري ؟ ( كطلع و تهبط فشريفة ) مخليني كي البلارة قدامك و تابعلي هاذ البقرة الهولاندية ؟؟ ما ناقصك حتى خير ..!

مهدي:( ضحك ) هاهاها كتغيري عليا أ شدشد

ضرباتوو لحنكوو بخفة و رجعات جمعات يديها عندها ببرود .. اللقطة لي دازت على عينين شريفة و خلاتها تسهى فيهم باستغراب ..!

شادية:( حركات راسها بحركة مشر٠ملة باغى غير منين تدوز ليها ..! ) مالك أ بنت بابا و ماما ؟ ياكما خلعناك ؟؟ نضربوو نسرفقوو نخسروو نتقبوو كاع شنوو مشالك نتي ؟؟ حنا صحاب مع بعضياتنا و نتي ايييه ؟ ( بغات تنوضلها و شدها مهدي من يديها )

شريفة:( عوجات فمها بحال يلا عايفة و قالت ) شنوو هاذ الأشكال لي مرافق معاهم أ مهدي ؟ شنوو هاذ المستوى ؟ ( طلعاتها و هبطاتها بصبعها ) كتشوفي راسك كي كتهضري فالمرايا و لا مكتشوفيش ؟؟

أسية:( شافت الأوضاع بدات تشعل و هي تنغزها ) يالاه نوضوو بحالنا

شريفة:( مدات يديها تهز ساكها و قالت بهدوء ) أصلا كنت غنوض الجو توسخ ( هزات حاجبها و حركات يديها فاتجاه مهدي ) بحال هاذ الأشكال ما كنرضاش حتى نوقف معاهم و يشوفوني الناس .. حراااك تعرض عليها و تجلسها معايا و نبدا ندي و نجيب معاها فالهضرة .. آخر مرة تعرض عليا و تكون داير مع شي واحد آخور ..!

مهدي:( قال كيبرد الأوضاع ) جلسي ا شريفة هي ما قصداتش

شادية: لا أ سيدي قصصصصصدت ( كتهز فيديه باغى توصلها ) ياكما حوي** و ما خلصوتش و ضرباتك النفس عليه ؟ فايتين داروها بيك يمكن ..!

شريفة: تغالطت لك أ حبيبة مع راسك ..مولفة تخلصي بيه قهاويك واقيلة ( نطقات باستهزاء ) كلشي تعلوووم غير لخرا كيبقا فترووم و لكن نتي واقيلة معششلك الخرا حتى فالعقل ( شدات فأسية ) عطيتك كثر من وقتك .. سيري تعلمي تهضري مع سيادك بعدا .. عاد اجي عندي ..!

أسية:( خرجات عينيها كتندب فحناكها و قالت بخفوت ) أويلي إلياااااس .. أويلي شكيدير هنا ؟؟

شريفة:( سمعاتها و هزات راسها كتقلب عليه باستغراب حتى جات العين فالعين و تم قاصدها كيخلف ) هاااا القوااادة بعينيها ( ساطت مفقوصة ) شنوو جاب هذا لسلا ؟؟؟

أسية:( ردات بتوثر ) قبيلة شاف السطوري و غيكون دخل للمحل و قلب عليه فين كاين و لكن ما سحابليش معانا فالمدينة و غيجي عندنا ( خنزرات فيها شريفة حتى حنات راسها ) سمحيلي ..!

إلياس:( مشالها نيشان باغي يجرها ) زيدي معايا خاصنا نهضرو أنا و ياك .. شهر و أنا كنتسنى فيك تباني ... ما عندك فين تهربي اليوم ..!

شادية:( تبسمات بتسميم و قاطعاتهم ) و الله لا خرجاتها من هنا حتى تشرحلي آش كدير مع راجلي الراس فالراس ( ضربات فالطبلة تا تقلبوو الكيسان )

مهدي:( غوت عليها تا تجمعات و دفع إلياس من صدرو مبعدو ) شادية سكتييينا .. شكون نتا أ سيدي لي جاي و مهجم على البنت ؟ ياك لباس ؟؟ كاين شي ما نقضييو ؟؟

شدات شريفة على راسها كتسووط بعصبية و شادية فرحانة عند بالها صاحبها و لا شي واحد من عائلتها و شراتها لها معاه ..! أما أسية و ملاك دايرين بحال الصفارة د كوكوط كل مرة كيضورو راسهم لجهة متبعين الفيلم ..!

إلياس: هاذي مرااااتي نتا لي شكوون ؟؟ ( شاف فشريفة بغضب ) غفلت عليك شهر رجعتي لعادتك .. دغيا درتي الصاحب ؟؟

ملاك:( نطقات بصوت مرعوود ديال كحلتها ..! ) حكيييييم ( ضحكات بصفورية ) جيتي ؟؟

يتبع...

‎