عرس الذيب الجزء التاسع

شريفة:( مصات شنافتها و قالت بدلع ) عندك تعنيقة حنييييينة ..!

حكيم:( شاف فيها بنص عين و قال ) حيث ما فياش السم بحالك ..!

قربات منوو متكية على كتفوو الدنيا ضايرة بيها و بصوت مرخي ردات عليه بغنج

شريفة: أنا ما فياش السم .. أنا غيير وحدة نية .. قلبها بيض .. كتبغي الخير لكلشي و لكن نتوما لي ولاد *** أ بوبكر

هزات عينيها فيه كتتفوه و هو متكي حداها على الفوتوي مرجع راسوو للوور .. مغمض عينيه كيسمعلها و مكيجاوبش ..! وجهوو تزنك و عراق فبلاصتوو كيتنفس بصعوبة بلا راسوو لي غيتفركع عليه بالحريق و زادت الموسيقى مكملة الباهية ..!

شريفة: مالك ما كتردش عليا ..؟ ( سهات كتهضر بوحدها ) من اليوم غنسميك بوبكر بحال رفيق بوبكر حيث نتاااا ( هزات صبعها كتقربوو لصدرو و كترجع تميل قداموو ) كتخسر الهضرة بحالوو هء كثر منوو ..!

وقف حاط يديه على فموو كيتكرع مذاق كيروع الخاطر ما تعرفوو بيض خانز و لا شنوو داك العجب ..! شد فيها و وقفها بزز كيهضر

حكيم: نوضي تحركي تمشي بحالك ( حط صبعوو على فموو ) ديري عقلك و بلا صداع .. يالاه

شريفة: لا ما بغيتش نمشي ( كتلوى فبلاصتها باغى تفك يديها منوو ) طلق منننني خليني بغيت نبقى هنا

هز ساكها و تم جارها معاه بزز منها و هي كتترطى فيديه و تفركل تا باش تغوت ما قدراتش بزز كتأنن و تهضر بالشوية و لسانها تقيييل كتبقى تلوي فالكلمة شحااال عاد كتخرج لها ..!

تعكلات بالطالون تا جات جالسة كتحك فلي موراها .. ممرغة فالأرض ما باغياش تمشي ..!

حكيم:( تحنى عندها كيسوط ) شريفة نوضي براكة من التبرهيش ( هز يديه هد عليها بعصبية و رجع هبطها ) راه غنضرب عدو ر** تا تلسقي ( حمر عينيه فيها ) مالنا شنوو كاين ؟؟ شهاد البسالة د والوو ؟

خبعات وجهها مخلوعة كتحرك فعينيها و راسها بالنفي .. بمعنى ما تدينيش و فنفس الوقت مكمشة راسها بين كتافها خايفة يضربها ..! نوضها بجوج يدين حتى وقفات مقادة و جرها حداه حاضي معاها لا تمشي تتعكل و هي كل شوية كتقلب عينيها للريسطوو لداخل .. كتدمع مقهورة تقول قتلها ..!

حكيم:( حاط يديه على فمو كيتكرع تا كيبغي يرض و كيشوف فيها هكاك كيزيد يتعصب ..! وقف و جرها عندو كيمسحلها عينيها و يسكتها ) صافي دابا .. سكتي شوية من البكى

شريفة: ما بغيتش نمشي للدار .. هي كتخلع .. خليني هنا ..!

حكيم:( تنهد كيدوز على راسها ) غنديك نوريك شي حاجة زوينة غتعجبك .. يالاه سكتي براكة عليك .. شوفي وجهك كي رجع ..!

حركاتلوو راسها بواخا كتمايل و تقرب منو بالشوية تا قاس نيفها نيفوو و بتهديد دوز فموو على فمها ..!غير قاسوو و بعد مخليها تابعاه .. كتقلب ترد بوستها لي خذالها المرة اللولة .. معلقة فيه بيديها و كتعلى على ريوس صبعانها ..!

شاف فيها بعينين ناعسين مبسمين و دوز يديه على حنكها و بثقالة حط شفايفوو على شفايفها كيرضع فيهم .. مبرد فيهم الحر لي شاعل فيه و هي مرخية ليه مغمضة عينيها كضحك و كتحرك فشفايفها بالشوية متجاوبة معاه .. تا بعد عليها على خاطرو فاش سمع شي صوت كيقرب جهتهم ..! دوز لسانوو على فموو و جرها من الطريق

حكيم: يالاه نمشييو

شريفة:( ردات حاطة يديها على شفايفها لي منفوخين بالمص ) ششش صافي آخر مرة ..! ( قربات منوو كتهمس بالشوية و عينيها مقلوبين كتقاتل باش تحلهم ) نمشييو توريني حاجة زوينة

شريفة:( قربات منوو كتهمس بالشوية و عينيها مقلوبين كتقاتل باش تحلهم ) نمشييو توريني حاجة زوينة

حكيم: واخا غير ديري عقلك ..!

جرها معاه حاضيها بحال الدري الصغير .. ما خرجوو من الريسطوو حتى حمقاتوو ..! جالسة حداه فالطونوبيل مرجعة الكوسان اللور و متكية .. رجليها مهزوزين قدامها و عينيها كيتسدو و يرجعوو يتحلوو بالنعاس ..! حطات يديها عليه و بصوت حنين قالت

شريفة: واش عيان ؟ حتى نتا بحالي بغاو يسحرولك ؟

شاف فيها كيحرك غير عينيه ما قادرش يهضر ..! التريكوو فزك على ظهرو بالعرق و وجهوو مزنك كيطلع النفس بصعووبة كبيرة ..! الكليما مطلوقة مبردة الجو شوية و القرعة دالما فيديه كيجغم منها مرة على مرة على ود التكريعة لي قتلاتوو و خنقاتوو باغي يجبد مسارنوو و لا داك الخنز لي كيطلع معاه من الأعماق ..!

شريفة:( كتهضر بوحدها مرة تبتاسم مرة تغوبش حاضياه بعينيها ) هههههههه أنا و ياك مناحس من نهار تلاقينا و المشاكيل تابعانا ( مالت براسها حتى ضرباتوو مع الباب ) اححح تحزمات فقوصة بكرعة و قالوو اجييو نقطعوو الواد ..!

سمعها لكن ما جاوبهاش ..! فتح الباب من جهتوو و تحنى على ركابيه كيرض تا قلبوو كيحس بيه غيخرج من بلاصتوو .. بقى مدة هكاك تا حس ولا شوية ..! هز القرعة دالما شلل بيها فموو و بدا كيكب على وجهوو بالجهد باش يصحصح و يشد فراسوو ..! سد الباب و ضور الفولا خارج من تما مكسيري ..!

شريفة:( شافت فيه ناعسة حاطة يديها بجوج تحت حنكها ) كيقولك .. قح* مع ليه٠٠٠٠ود و خلي الجيران شهود ( مصات شنافتها و كملات كلامها بثقالة ) نشهد لك و تشهدلي ؟

حكيم:( زفر بصوت مسموع .. من هاذ الليلة المزفتة .. و باستهزاء رد ) نشهد لك ؟ أنا غنكوي لمك داك اللسان لي كيطلق بلا فرانات ( هز حاجبو كيشوف فيها ) غير خليك سكرانة حسن لك ..!

شريفة:( ما دات ما جابت فهضرتوو .. قلبات راسها كتشوف فالطريق ديخانة و البكية رجعات شداتها ) بغاو يسحرولي يحمقوني ..؟

حكيم:( حط يديه على جبهتوو كيشوف حرارتوو لي بدات كتنزل ) شكون لي بغى يسحرلك ؟

شريفة:( حطات صبعها على فمها و ردات ) ششش يلا سمعنا غيضربها .. أنا قلت لها ما نقولهاش لحكيم

حركات راسها كتتمايل و هو هاز حاجبوو كيسمع لها و كيستنتج ..!

حكيم: اييه ..! و علاش ما بغاتكش تقوليها لحكيم ؟ كتعرفوو ؟

شريفة: هااااء ..؟ وا راها ختوو ..! ( حطات صبعها على فمها ) ششش عنداك تقولها لشي واحد

مداتلوو صبعها الصغير و هو كيشوف فيها باستغراب عاقد حجبانوو حتى شابكات صبعوو معاها و زيرات عليه ..!

شريفة: هذا سر ..! غنقفيك و ما نخليكش تبوسني يلا قلتيها ( غطات فمها بيديها ) ممنوووع

سكتات مخلياه كيفكر كيفاش ختوو بغات تسحر لها ؟ واش قصدات بصح هضرتها و لا غير الدوخة دالسكرة .. لي خلاتها بلا ما تحس تشرشر ليه فالطونوبيل و هي هازة رجليها .. تا طلعات معاه الريحة دالبول ..!

حكيم:( مد يديه قاسلها التوب دالكونبينيزون لقاه فازك و رجع بعد كيحرك فراسوو بالنفي ) ما عندك الحباسات فحتى حاجة ..!

وقف فالشارع حدا واحد من الحوانت ..! كلاكصونا عليه بالجهد مخرج يديه من الشرجم كيشيرلوو تا جا عندو كيجري ..!

شريفة:( ردات عليه كتمضغ فالهضرة بصوت بزز كيتسمع ..! ) هذا هو الذهب .. الفاسوخ الطبيعي ديالي .. أنااااا شريفة ببركتي ( حطات يديها على فمها كضحك بشقاوة ) هههههه كنبوول هواااي

حكيم:( ضحك كيحرك راسوو بلا حول ..! شاف فقرعة دالما خوات و قال للولد لي جا عندو ) شي قرعة دالما مع كاس دميكة يلا عندكم و ساشي د ألزا ( هز عينوو فقهوة قدامهم ) و جيب معاك شي كاس دالقهوة قاسحة بلا سكر

مد ليه الفلوس و بجدية كمل ..!

حكيم: الصرف لي غيشيط ديالك ( حرك حاجبوو بثقالة ) طلقنا دغيا

مشى الولد فرحان بالتضويرة .. بحال فرحة شريفة لي جالسة مفرقة رجليها و كل شوية تفلتلها البولة و تطلقها ليه تما ما ضاربة حساب ..!

حكيم: غير فشي النبولة قبل ما تصحاي و نبداو نخراو بجوج ..! ( قلب وجهوو كيشوف فيها ) من زبلة لختها ما عندكش الفرانات ؟ تسناي غير حتى يبرد لحمك بعدا ..!

شريفة:( هزات يديها فاشلة بغات تضربوو لوجهوو و شادها لها ) طلق مني ..! ما منحقكش تضربني ..! بحالك بحال لولوسة لي عندو جوج سنتيم فرحان بيه

حكيم:( هز حاجبوو غالباه الضحكة ) شنوو عندو ؟؟

شريفة:( هزات صبعها كتحركوو قدام عينيه ) جوووج عندو جووووج سنتيم .. و مزوج بجووج عيالات ولد حجيبة لي كتبول ليه موو فالقراعي د الشراب

حكيم:( ضحك بالجهد هاز راسوو فالسما و تفاحة أدام كتتحرك فحلقوو ..! ) ههههههه غتحمقيني نتي ..!

فتح الشرجم و مد يديه كياخذ السخرة .. تا كمل و حركلوو راسوو بمعنى الله يحفضك و رجع طلع الزاج ..! حل الساشي دألزا كبوو فالكاس دميكة و طلقوو بشوية د الما كيحرك فيه و يشوف فيها

حكيم: أجي لهنا السكايرية ( جرها من يديها لعندو تا شدها من رقبتها باش ما تهربلوش ) حلي فمك

شريفة:( شادة فمها كتبعد فوجهها ) امم بعد مني ما بغيييتش ..!

زيرها عندو حاكمها كيشربها بزز منها تا شرباتوو كامل عاد طلق منها و نزل فتح لها الباب من جهتها .. و هي متكية فبلاصتها دايخة تا طلعات معاها التقية و تحنات كترد مسارنها و مزيرة على حكيم لي شاد فيها .. مغزف عليها ..!

حكيم: عركتيها شراب .. يالاه خوي مسارنك ..! ( باستهزاء ) الناس تمجهدو .. ما بقى حد قدهم .. مزيان هاذشي ..!

هزات راسها فيه دايخة وجهها حمر و عينيها العروق فيهم غيطرطقوو ..! كترمش فعينيها دايخة و الشوفة عاد بدات كتوضاح ليها بالتدريج ..!

حل القرعة و عمر يديه بالما كيغسل لها فوجهها و غير كمل رجع حطها لها على فمها شربات شوية ..!

حكيم: طلعي بحالك ( حرك راسوو من الفوق للتحت ) دابا عاد غنتفاهموو أ السكايرية

شافت فيه باستغراب كتحاول تفهم شنوو كدير معاه ؟ غمضات عينيها .. راسها عاطيها الحريق و الدوخة باقى شاداها خصوصا مع السرعة باش صايك ..! مسافة الطريق و كان وقف فواحد التيساعة كتطل على البحر ..! الدنيا خاوية و طونوبيلات قلال مفرقين بعاد عليهم

شريفة:( رمشات عينيها و قالت ) شنو كندير معاك ؟ علاش جينا لهنا ؟

حكيم:( هز باكية دالكارو مع بريكي و كاسوو دالقهوة و هبط تكى على الطونوبيل ) نزلي ..!

رمشات عينيها باستغراب كتحاول تتفكر شنوو وقع حتى جالسة معاه و فطونوبيلتوو من الفوق ؟ فتحات الباب و نزلات بالشوية ..! الغربي كيضرب مجهد و مع الفزاك لي يبس عليها .. طلعات معاها البرودة ..!

عينيها توسعوو كتحرك راسها بلا ..! وجهها تزنك فالبلاصة فاش قاست لباسها و شمات ريحتها ..! كتشوف فيه عاطيها بالظهر كيتسناها تجي عندو .. و لكن بشمن وجه غتوقف عليه ..!

حكيم:( قلب وجهوو لعندها شافها فداك الحالة و فهم لراسوو ..! ببرود قال ) ياك غير بول ؟ كاملين كنبولوو شنوو الجديد ؟ ( حرك عينيه بلا مبالاة بمعنى الموضوع عندو عادي ..! ما باغيش يحرجها كثر ) غتحركي و لا نجي نعصر مك تما ..!

قربات منوو كتتمشى بالشوية عليها مع الطالون .. وجهها حمر ما حاملاش راسها و ريحتها لي غطلع معاهم كتعطعط مع الهوا دالبحر .. بلا لبرد لي غيجمدلها نصها ..!

تكات حداه كتفرج فالبحر و هو كيكمي قدامها و يشرب فقهوتوو بالشوية عليه تا قرب يكملوو باش يطفيه و هو يجرلها يديها عندو مزير عليها كيهضر ببرود

حكيم: هذا هو الصبع لي صورتيلي البارح ياك ؟

شدلها صبعها عندو كيقربلوو الكارو مزير عليه ..! عيات تجر فيه و تدفع فيه و والوو ..! ما لقات كي تفك راسها و هي تقلبها دموع ..!

حكيم: نحرقولك دابا ؟ غنعطيك خلاصك كامل بلا تسبيق ..! ( هز حاجبوو ) سمعيني صوتك براكة من التهرنين

شريفة: لالا .. بليييز أ حكيم ( كتدفع فيه و تدمع بالشوية على الله تبقى فيه و يخليها ) طلق مني

حكيم:( زاد قربوو لصبعها و هي عينيها خارجين معاه ..! ) تعاودي تديريها ؟ ( حركات راسها بالنفي بالزربة ) و يلا عاودتي ؟

شريفة:( بحنان نطقات سميتوو ) حكييم عافاك طلق لي يدي .. عمري نعاود صافي ..!

لاحوو فالأرض طفاه و طلق منها بهدوء كيشوف فعينيها تا وثرها .. و قالت

شريفة: علاش كتشوف فيا هاكا ؟

حكيم:( طلعها و هبطها بعينيه و بتنهيدة قال ) تبدلتي بزاااااف .. ما تخيلتكش تكوني هاكا ..!

شريفة:( فهمات بلي هضرتوو ماشية للسلبي كثر من الايجابي ..! ) حتى نتا تبدلتي بزاااف ( هزات حاجبها كتشوف فيه ) بجوج بينا وسخاتنا الدنيا .. على الأقل أنا عندي ظروفي و نتا شنوو ؟ ( ضرباتوو لصدرو ) شكون تكون حتى بين ليلة و نهار تخرج فحياتي باغي تشقلب فيها على خاطر خاطرك و تتحكم فيا بحال يلا ما عندي عقل ..!

حكيم:( رد ببرود كيشوف فيها ) ما غنتحكم ما غنشقلب ..! ( تنهد ) ضرباتني النفس عليك و لكن نتي عاجبك راسك و مقتانعة بلي كديريه ياك ؟ ولفتي الوسخ و رجع كيجيك عاااادي ..!

شريفة:( استفزها بهضرتوو و ردات بعصبية ) ها نتا قلتيها حياااااتي هاذي ..! و نتا غرييييب عليا ما جامع بينا واالوو ( ضربات يديها مع بعضياتهم ) شنوو كتعرف عليا باش تحل قادوسك و تقول فيا لي كاين و لي ما كاين ؟

حكيم: عارف لي كافي يخليني نهرسلك وجهك لي فرحانة بيه ..!

شريفة:( ضحكات باستهزاء و قالت ) حتى أنا عارفة لي يخليني نكره راسي و نكرهك على هاذ الوقفة ..! منين نتا أ خويا مزوج و عندك ولادك علاش تابعني ؟ كتقلب على تبرير مني ؟ علاش غنشرحلك من الأصل و نتا باني حياتك بعييييد عليا و جاي باغي تقلبلي حياتي كثر ما هي مقلووبة و ترجع تزيد خلفة ..!

شريفة: علاش غنشرحلك من الأصل و نتا باني حياتك بعييييد عليا و جاي باغي تقلبلي حياتي كثر ما هي مقلووبة و ترجع تزيد خلفة ..!

جرها من ذراعها بالجهد لعندو كيشوفلها فعينيها نيشان و حتى هي نفس الشي ..! دليل على قوتها و نفسها لي حاطاها فمرتبة عاااالية ماشي هو و لا غيرو لي غتحنالوو بسهولة ..!

حكيم: شكون قلب حياة لاخور انا و لا نتي ؟ شكون مرض الثاني و زاد خلفة ..! ( هز حاجبوو ) بوجهك صحيح كتهضري على زواجي ؟ شكون لي بدا ؟ ياكما نسيتي راسك معامن ؟

شريفة:( عصبها ..! ما ناويش يهضر نيشان و هاذشي غير ما كيزيد ينرفزها ) أول حاجة طلق مني و هضر بفمك ماشي بيديك .. سكتت لك مرة ما تزيدش فيه

رخف على يديها حتى شداتها كتحكها .. مدة و هي ساكتة تا هزات راسها فيه بتنهيدة ..!

شريفة: ما عرفتش شنوو سمعتي عليا و لا حتى شفتيه بعينيك و ما كيهمنيش .. حيث أنا خيخت من البشر و ما يجي منوو .. و عرفتي شنوو ؟ ما غشرحلك حتى حاجة و اعتابر لي فبالك صحيح و حسب الدروج من موراك ..!

حكيم:( هز حاجبوو بثقالة و رد ) ايييه ..!

شريفة: اه حيث ما تستاهلش نضيع طاقتي معاك و انا كنشرحلك و فلخر تضحك بلا حتى كلمة و تمشي لدارك عند مراتك ..! غنجيك من التالي أنا ما محتاجاك لا نتا لا غيرك فحياتي .. قادة براسي بيك و لا بلا بيك ( بانفعال ) يلا كتقلب على شريفة د زمااان راها ماتت أسي حكيم .. ماتت هاذي 12 العام فاش كانت كتعيطلك و لقات يديها و الريح ..! كنت محتاجاك فداك الوقت أما دابا مراتك اولى مني ..!

سمعلها تا سكتات كتنهج و قرب منها ببرود دفعها على الكاب د الطونبيل متكية و هو فوق منها مطاكيها بيديه ..!

حكيم: شفت مزيان قداش قادة براسك ..! ( دوز يديه على راسوو و قرب منها ببرود كيهضر ..! ) معصباك مراتي تال هاذ الدرجة ؟

شريفة:( دفعاتوو تنوض و رجع زدحها ) هذاك السوق بعييييد عليا .. أنا قتلك لي عندي ..!

حكيم:( ببرود رد ) ما كايناش هاذي لي تجي بلاصتك لا مراتي لا غيرها ..! بغيتي و لا كرهتي غتجمعي ك** معايا حسن ما نفرع مك ..! و يلا غير نتي ما عندك فراق عليا و يديك فوق راسك ( عوج راسوو فيها ) مزيانة هاذي ؟

شريفة:( غوتات ) وااا نااااري غنقجوو تا يخرجوو عينيه ..! مالك داير هاكا مالك ؟ كلشي عندك بالسيف ؟ ياكما شادني فالكوميسارية و بزز مني نسمع لهضرتك و ندير بيها ؟

حكيم:( ضحك باستهزاء ) بغيتي نضايفك عندي ؟ من غذا يجيبوك و يتهلاو فيك .. ما طلبتي غير الموجود ..!

شريفة:( قلبات عينيها ) الله يكثر خيرك و يخلف عليك ( سكتات لمدة و رجعات قالت ) شنوو دابا ؟

حكيم:( ناض مبعد عليها تا تقادات فالوقفة و جبد كارو جديد شعلوو ..! شاف فيها حاضياه و بهدوء و نظرة غريبة فعينيه قال ) من فوقاش و نتي مبلية ؟؟

شريفة:( بلعات ريقها كتحك فعنقها و ردات عينيها فالبحر ) منين دخلت للاصلاحية ( شافت فيه ) تما تبليت بالكارو و الشراب من مور ما تزوجت بإلياس .. هذاك لي شفتيه فالقهوة

رمشات عينيها فيه .. كتمووت على الضد و يلا جيتيها بالشوية و الخاطر تاكلها بحوايجها .. و هاذشي كيتشابهوو فيه بجوج بيهم .. واحد راسوو قسح من الثاني ..!

حكيم:( ساط الدخان فالسما ) شنوو وقع معاك ؟

شريفة:( مداتلوو يديها بغات كارو ) عطيني ..!

حكيم:( هز يديه بونية ) نعطيك للعين ؟

قلبات عينيها فالسما كتعوج فيه ما كرهاتش تاكلوو ماكلة بالأعصاب لي ركب فيها ..! و حلفات حتى هي يلا باقي هضرات .. ها هما واقفين شوف فيا نشوف فيك أ طجين الحوت ..!

حكيم:( لاحوو فالأرض زطم عليه و تقلب عندها .. كيهضر و يحرك فيديه بالشوية ..! ) شحال باش طلقتي دابا ؟

شريفة:( ردات بهدوء ما كتشوفش فيه ) شهر و شي يامات .. علاش ؟

حكيم: و باش كنتي كتصرفي فهاذ المدة ؟ قبل كان هو لي مكلف بيك و دابا ؟

شريفة: عندي فلوسي و المشروع لي كنت قلت لك عليه أول مرة فأقشور .. الريسطو ..! ما بقى والوو للافتتاح ديالوو ..!

حكيم: يعني حياتك كاملة غتدوزيها و نتي كتخدمي على البلية ؟ ( هز حاجبوو فيها ) عارفة غير المصروف د الكارو و الشراب بشحال غيطيح عليك فالشهر ؟ القليلة واحد 4000 درهم ..!

شريفة:( تنهدات كتحك فعنقها بتعب ) عارفة ..! ( هزات راسها فيه ) عارفة و كنحاول ننقص واخا غير من الشراب بعدا ( ضربات يديها مع فخضها ) و لكن ما قدرتش .. حتى كنبعد منو و كنرجعلوو مرة اخرى ..!

حكيم:( حرك راسوو بمعنى واخا ..! حاط يديه فوق السمطة دسروالوو و مرة مرة كيحركها كيشرح بيها ..! ) ما قدرتيش تقطعيه ؟ و قدرتي ديريها من سطاش قدام بنت يالاه بدات فالمراهقة ؟ ما فكرتيش واحد النهار تا هي غتبغي تجرب ..! ( ضحك باستهزاء ) غتمنعيها تا هي تبلى ؟ غتمنعيها تدخلهم عليك لقلب الدار ؟

شريفة: حكيم ..! أسية خط حمر ما تجبدهاش على فمك باش نبقاو مزيانين ..! عارفة شنوو ربيت .. عمرها تفكر تمشي فنفس الطريق و زايدون أنا ما كنسكر قدامها ما كنترافق مع حد .. الحمد لله كلشي كان حلال من لول و مع رااااجلي ( زيرات على الحروف ..! )

حكيم: ما كتسكريش حداها ..؟ غير كتخرجي للبيران و تعركيها مع راسك ..! بحال اليوم ياك ؟ ( طلعها و هبطها بعينيه ) و خارجة هاكا فقلب سلا .. كتقلبي عليهم يفرعوو لمك الطر** و يسيفطوك كتشرشري ؟

شريفة: ففف أول مرة نديرها ..! خرجت من الدار خايفة ..! حلمت شي حوايج فشكل ..! ما نويتش نسكر ما عرفتش شنوو وقع لي و

حكيم: ما عرفتيش شنوو وقع لك ؟ حتى نهار تفيقي و تلقاي راسك مشاركة الفراش مع شي زا** ما خلى ما دار فط** مك .. ما غتفهمي حتى ق** هه ..!

سكت و سكتات حتى هي ..! عارفة عندو الصح فكاع لي قالوو و لكن ..؟

شريفة:( تنهدات بصوت مسموع و قالت ) أنا عمري خرجت من الدار بوحدي .. ضروري كيكون معايا شي واحد حاضيني و أصلا ما كنتش كنخرج قلييييل ..! نهار كنسكر كنشد عليا بيتي و كنشرب تا نعيى و ننعس .. انا أ حكيم بعييدة على كاع ديكشي لي كتتخيلوو فبالك ..!

حكيم:( ضار عندها ) و دابا صافي طلقتي و الحبل ترخى ؟

شريفة:( ردات بعناد ) اه ترخى و عاد غنعيش حياتي كيفما أنا باغى .. و بلا ما ندخل لها تا حد ينكدها عليا

ضحك ضحكة استهزاء مستفزة ..! عرفاتوو غيعطيها قمعة تبقى كتطلع و تهبط فيها ..! و تا هو ما عطلهاش سيفطها لها فالبلاصة بحال القرطاس ..!

حكيم: باغى تقح***ي ماشي تعيشي حياتك ..! خذيتي الخبرة مع داك الرويجل لي كان عندك .. و دابا جا وقت البراتيك ( التطبيقي ) ؟

جرها من يديها عندو تا قربات لعندو و باستفزاز كمل ..!

حكيم: مخنوقة باقى كتقلبي على لي يسرحك ؟ ( هز حاجبوو فيها ) وا أجي نشوفوك شحال غتجيبي ..!

شريفة:( غفلاتوو بتسرفيقة كترعد ) آخر مرة تقرب مني و لا نشوفك كضور بساحتي أ الكلب

نترات يديها بالجهد مخلياه كيحك حنكوو و هي كتهز فالحجر و تشير عليه واخا ما جات فيه حتى وحدة ..! كيبعد راسوو و يقرب منها بالشوية و الضحكة مرسومة على وجهوو ..! لي غير كتشوفها كتشعل فيها العافية ..!

حنات هزات سباطها كضرب فيه و تنقز على رجل وحدة ..! جرحاتوو بظفارها فعنقوو و طراساتلوو الصدر من لداخل عاد بردات و هو شادلها يديها غالباه الضحكة

حكيم: دقتك مسمومة بحالك

شريفة:( كتترطى ليه فيديه ) طلقني نوريك سم اللفاعي كي داير .. طلللق

حكيم:( دفعها على الطونوبيل و قال ) دابا عند بالك غلبتيني ؟ غترصاي و لا غنلوح مك فهاذ البحر ..!

شريفة: ما تبقاش تهضر معايا هاكا .. انا ماشي قح** فهمها و دخلها لعقلك ..! ديكشي لي كطلب مني نمووت و ما نديروش البعر ( هزات عينيها فيه كترمشهم ببطئ ) كيعجبك تشوفني معصبة و غنطرطق ياك ؟

حكيم: مزيان نتي ماشي بحالهم ..! ( تبسم بهدوء و باسها فجبهتها ) صافي بلعنا علينا هاذ الباب .. ما باقيش نجبدولك .. يالاه رخي النفس ..!

بقات غير كتشوف فيه بنظرات مستغربين ..! عندو كلشي بسهولة ..! كيتقلب فالدقيقة كثر من عشرة د المرات .. ما عرفات منين تشدو نهائيا ..!

شريفة: واخا ..! يالاه نمشييو بحالنا تجمدت هنا

فتحات الباب هاربة منوو و هي تطلع معاها الريحة دالبول تا تزنكات و وذنيها حماروو .. بغات طرطق بالحشمة أكيد تا هو غيشم روائحها العطرة .. بلا لي لسقات فيه فاش كانوو منوضينها برا .. تمتمات بصوت خافت و ركبات

شريفة: الكرعة المكرعاني تال باب الزلاط تابعاني ..!

سمعها و ميك عليها ما قال حتى كلمة ما باغيش يزيد يغرقها فبلاصتها كثر ما هي غارقة ..! الشي لي خلاها ترتاح و يبرد فيها الد٠م .. راجعين بحالهم فصمت .. حتى شافتوو دخل بيها للمحطة د الكيران .. باستغراب قالت ..!

شريفة: علاش جينا لهنا ؟

حكيم:( شيرلها بيديه لشي بنات ناعسين تما و قال ) ها البلية فين كتوصل .. آخرتك تولي بحالهم كتكمي لكازا و ضربي الروج خانز ..! وجهك يزراق .. عينيك يدخلوو و سنانك يخنازو .. يولي الواحد يشوفك يهرب منك ( شاف فيها ) الرجال جات مع الق*** مهم .. يخنازو يدعدع لهم الصوت و لكن البنات ..!!( تنهد ) و الله ما بغيتهالك أ شريفة .. البلية بحر غير كتزعم و تدخل ليه كتولي تنقز من بلية لختها حتى كتغراااق و ما كيلقاو ما يعتقوو فيك

شريفة:( ردات بحزن ) أنا ما باغاش نوصل لهاذشي و راه كنتقاتل باش نقطع .. أصلا كنشرب شراب خفيف عمري زعمت على القاسح و الكارو كناخذ كلامور ..! راه كنحاول ننقص شوية بشوية و لكن بنادم ما كيخليكش كيخرجك على طوعك

حكيم:( ديمارا من تما ) سيري ارتاحي فدارك دابا و غذا نهضرو فهاذشي ..! ( هز حاجبوو كيشوف قبالتوو ) غتسمعي الهضرة و لا غندخلك للطبيب يشدوك تما صحة تحيديهم

شريفة:( ضارت عندو مخلوعة )

شريفة:( ضارت عندو مخلوعة ) لا أ حكيم .. الطبيب هو لي ما ندخلش ليه ( حركات عينيها بالنفي ) صافي غنقطع عطيتك الكلمة ..! و لكن حتى نتا غتقطع الكارو معايا خاصني لي يشجعني

حكيم:( حرك راسوو بواخا ..! ) نقطعوه معاك غير بداي و يكون خير ...! ( فتح الشراجم من بعد ما كان شدهم فالمحطة و بتساؤل رجع قال ) باقي كيتعرض لك ؟

شريفة:( باستغراب ) شكون ؟

حكيم:( هز حاجبوو فيها ) علاش شحال من واحد كتعرفي ؟

شريفة: ههههههه وا بزااااف أ صاحبي شحال قدي نعقل ؟

شافتوو غينزل عليها و هي تشدلوو يدوو ..!

شريفة: غير كنضحك أ بنادم .. مالنا على هاذ الشوفات دالعسكر ؟ ( بحماس كملات باغى تنسيه فالهضرة ) أجي نتا بعدا كي درتي قلبتيها بوليس ؟ كنت كنقول غنرجع نلقاك شي مونيطور و لا شي بوكسور مشهور ..!

حكيم:( تبسم من حماسها و رد عليها بهدوء ) باقي كنطريني .. الخدمة خدمة و السبور سبور ( غمزها بثقالة )

شريفة:( تقلبات كتشوف فيه بابتسامة ) وا راه باينة باقي كتطيريني غير يديك لي قد فخضي تعطيني الخبار ( مصات شنافتها و قالت ) تدربني ؟ تانا بغيت نتعلم

حكيم:( دوز البروميير و قال ) واخا نرتاح و نديرو شي نهار أنا و ياك فلاصال نشوف السوفل عندك كي داير بعدا

شريفة:( ضحكات و عقلها مشى لبعييد ) ههههه لا ناضية نعجبك ..!

قلبات وجهها كضحك بالجهد واخا عيات تقطعها فراسها والوو .. و من الضحكة لي دار تا هو و الشوفة لي شاف فيها عرفاتوو قلعها فالسما غير ما بغاش يقمعها و خلاها على خاطرها حتى سكتات و قال

حكيم: ما جاوبتينيش .. باقي كيتعرضلك ؟

شريفة: واش إلياس ؟ احم لا من داك النهار ما بقيت شفتوو و ما عارفنيش فين ساكنة و لا فين كنعمر بزاف ..!

حرك راسوو بلا ما يجاوبها ..! شافت فالطريق باستغراب ؟ هاذي الطريق ديال دارها ماشي ديال الريسطو فين خلات طونوبيلتها ..! سكتات كتستنتج بوحدها حتى وقف قدام عمارتها و ضار عندها كيشوف فيها

حكيم: تقت فيك للمرة الثانية ا شريفة .. غتلعبي مور ضهري غنذ٠بح مك بخيط رقيق من الوذن للوذن حتى نتي طلبي نذب٠حك و نريحك ( هز حاجبوو ) ديري فبالك ندوزلك كوولشي إلا ترضيني ضحكة ..!

شريفة:( بلعات ريقها حاسة بنوع من الخوف من طريقة هضرتوو ..! ) و مراتك ؟

حكيم:( دوز على راسوو و قال كيتكسل ) ما تعمريش راسك بيها .. نسايها عليك شوية ..!

شريفة: وا راه انا لي غنتسمى بنت الحرام مقطرة ماشي نتا ..! ( بحزن ) دابا الوقت لي خاصك تكون معاها أنا شاداك فيه عندي ..!

حكيم:( زفر بصوت مسموع و قال ) سمعي ..! انا و ياها أصلا مفارقين و ما جامعانا غير البنت لي فكرشها نهار تولدها غنفرقوو المجمع .. ما تبقايش تحكي بزاف ..!

شريفة:( تمتمات بصوت خافت ) خرية كارمة نتا كنحك عليك ( هزات عينيها فيه ) كاع كتقولوو هاذ الهضرة فلول .. بنت لك بهلة غنتيقك ؟

حكيم: داك اللسان شحال ما بقيت غنكويهلك عقلي عليها ..! ( ببرود كمل ) سولي ملاك ياك رجعات صاحبتك ؟

شريفة:( رمشات ببطئ كتحاول تتفكر واش قالت ليه شي حاجة عليها و هي سكرانة .. لكن ما عقلاتش و ما بغاتش تشريها لها معاه فالنواغ ) امم ..؟ ملاك ..!

حكيم:( حرك راسوو بالايجاب ..! ) اه ملاك ..! بيناتكم شي مشكل ؟

شريفة: لا ..! علاش تشكات مني ؟

حكيم: نوو ..! غير كنسول ..! المهم سيري دابا لداركم تال غذا و جيبي طونوبيلتك ( حركلها صبعوو بتهديد ) ديري عقلك ..!

قرب منها باسها فحنكها تا سمعلها البوسة فوذنيها عاد سيفطها بحالها .. طالعة كتجري من الشوهة لي دايرة فحوايجها ..! أما هو قلب الدورة باش يخرج من المدينة و يشد لوطوروط ..!

وقف فالسطوب و هز تيليفونو مدوز لابيل لكريمة لي غير طلعاتلها سميتوو ضحكات و جلسات مربعة رجليها ..!

كريمة: ياو حكييم هذا و لا ؟ يا تا كي داير ؟ عاش من سمع صوتك ..!

حكيم:( بهدوء رد عليها ) بخير أ كريمة .. نتي مزيانة ؟ كلشي هو هذاك ؟

كريمة: كووولشي مفركع أ مولا داري .. يانا و تايمة توحشناااك أ تاج راسي ( بحماس ) gاتلي خالتي غتجي تطرgني نرجع لموضعي

حكيم: تايمة ؟؟ ( رجع كمل بلا مبالاة ) علاش ما وصلك حتى واحد من الدراري ؟ ( قلب وجهوو حاضي الطريق ) وصيتهم زعما ..! المهم انا راجع دابا لكازا .. غذا فاش نعيطلك خرجي عندي ( سكت شوية و رجع قال ) و لا عرفتي غير خليك انا غنجي عندك

كريمة: هانا نعاينك الحبيب تطرgني .. لgيتيني سايرة نتفرج ففضيلة و بناتها تgول علمت عليك غتغوت ليا و كعدت سهرانة

حكيم: سيري نعسي ترتاحي غذا و انا معاك ..!

**************************

مخشية فالبينوار دالحمام كدوز الرغوة على كتافها و تلعب بالشوية فالما .. مغمضة عينيها من حريق الراس لي شدها ..!

مصات شنافتها كتفكر فحكيم و لي وقع معاه ..! غتكذب يلا قالت ما محتاجاش واحد فجنبها .. تعيش معاه حياتها و ترمي الحمل عليه و يكون قادر بيها و بمشاكيلها ..! و لكن واش حكيم هو هاذ الواحد ؟ مترردة بزاف من أي خطوة ممكن تدير معاه و تندم عليها من بعد ..! أولا مزوج و باقي ما متأكدة واش غيطلق بصح و لا غير هضرة و الأسوء جاياه بنت فالطريق و المسؤولية غتزاد ليه .. شحال قدو يبقى تابعها ..؟ ثانيا هو غالب عليها و ماشي شي واحد لي ساهل تديرها بيه .. بمعنى هي ما باغاش واحد تخاف منوو .. لا ..! خاصها ديما الكفة تكون مايلة لها هي و فحالة حكيم مستحيييل يتحقق هاذ الشرط ..!

باغى تكون مخيرة ماشي مسيرة و بزز منها تدير الحاجة غير حيث استفزاتوو و باغي يلعب معاها خوو لعبها ..! هي متأكدة مية فالمية لو ما قاتلوش ما باغاكش فحياتي و ما عندي ما ندير بيك ما كانش غيلصق عليها و يبينلها بلي ماليها بعاد عليه ..! اكيد ما كيبغيهاش و حتى هي نفس الشي .. ممكن يكون اعجاب بيناتهم و لكن حاليا الضد لي غالب عليهم بجوج و واحد باغي يهرس لثاني راسوو ..!

خصوصا شريفة لي حالفة دقتها ما تبقى عندها و ما تبرد حتى ترد ليه التمرميدة لي دارلها نهار القهوة ..! اما حتى الهضرة لي ضارت بيناتهم و هي سكرانة ما بقات عاقلة على حتى حرف منها ..!

🌕 يوم جديد 🌕

أسية:( بملل قالت ) تعطلات هاذ صاحبتك ( شافت فيها ) كي درتي شديتي الستون معاها بعدا ..؟ ياك ضربتي على الصحابات

شريفة: راني صونيت عليها شوية و توصل براكة من النكير ( هزات حاجبها ) ما كنعرفهاش راه قلت لك ملاك خت حكيم غتعاونني فواحد الغرض و صافي

أسية: و شمن غرض عندك مع خت حكييييم ( طولاتها كضحك )

شريفة:( ضحكات و لعبات لها فشعرها ) هههههه ها هي وصلات عنداك تجبدي الهضرة عليه

أسية: مالي حمقة ؟

كلاكصونات عليها فاتحة الشرجم كتعيطلها حتى جات عندهم ركبات بالخف .. كتسلم بابتسامة ..!

ملاك: سمحولي خليتكم كتسناو .. مولات الدار تعطلات عليا باش نعطيها السوارت

شريفة:( ردات كتشوف فيها من المرايا ) طلقتي الدار صافي ؟ و فين هما حوايجك ؟

ملاك: ااه صافي ساليت السطاج ( تكات كتفرج فالطريق ) حوايجي سيفطتهم مع محمد أمين لبارح هو رجع فالعشية و حكيم لحق عليه فليل .. خدام فالصباح ..!

شريفة: اه مزيان

أسية:( ضارت عندها كتشوف فيها ) عندك خوتك بزاف ؟ شحال بيكم ...؟

ملاك: عندي أنا الشحوطة ماشي الخوت ههه ..! ( هزات يديها كتعد ) كاين حكيم هو الكبير قرا عامين فلافاك حقوق و من بعد تقبل فالكونكور د البوليس و قلبها بوليس .. ضابط ممتاز و باقي كيقرا

شريفة:( هزات عينيها فيها فالمرايا و باستغراب قالت ) كيقرا ؟ شنوو كيقرا ؟

ملاك: و الله ما عرفت ( ضارت عند أسية ) و موراه كاين محمد أمين هذا خدام ف " Fst " ديال المحمدية

أسية: أستاذ جامعي ؟؟

ملاك: هههههه لا .. خدام فالإدارة شادلهم ديكشي ديال لانفورماتيك .. راه مهندس ..! و هاذ الجوج أنا مكنعمرش معاهم فالدار بزاف خاصك تعرفي عندنا حنا ديكشي بالطبقات و كل واحد معامن كيتفاهم ..!

أسية: هههه زوينة هاذ الطبقات .. اييوا كملي ..!

ملاك: و موراها كاين عدنااااان ( طولاتها ) هذا هو المكالمي فيهم كاملين .. حكيم المصعور و محمد أمين الزهواني و عدنان الفقيه دالجامع ههههه

أسية: ههههه واش فقيه ؟

ملاك: هههه اويلي لا غير هو الوحيد لي شاد الدين فينا كاااملين .. حنين و داخل سوق راسوو ما عندو لا مع صداع لا مع مشاكل عايش الحياة غير بوحدو .. ايوا هذا شد ليصونص فالشريعة و من بعد قلبها للذهب .. فتح محل فالقيسارية و خدام فيه مخير ..!

أسية: تبارك الله .. الله يخليهم لك ..!

ملاك: أميين يا ربي .. و باقي ما كملت لك .. كاين خليل و موراه انا .. خليل عندو العام لخر فلافاك و داير سونطر كيقرا الألمانية و كيقري هو تما دراري د لافاك كيتعاون بيها ..! صافي هاذو هما حنا فالدار و أنا عندي العام الثاني فلافاك أثار ايوا و ماما خلاص

شريفة: و مرات حكيم ؟

ملاك: اااه مراتوو جالسة معانا .. حيث كانوو دابزو و سيفطها لدارهم ايوا و صدقات حاملة و جابهالنا جلسها عندنا ( قالت بصوت خافت بحال يلا شي واحد غيسمعهم ) لقاها كتسحر ليه و بغى يطلقها

شريفة:( هزات حاجبها ) اويلي على كتسحر ليه ؟ زعما سحور سحور ..!؟

ملاك: وا سحوور سحوور .. دابا هو مبلي بالأراضي ( كملات بتفسير ) وحدين قال غيبنيهم و وحداخرين كيعاود فيهم البيع و كيصدق رابح فيهم نييت

شريفة:( حاضية مع الطريق و كتصنت لها باصغاء ) اهاه ..؟

ملاك: ايوا و كريمة مراتوو ديال دابا .. كانوو عايشين فالعروبية و باهم بغى يجي للمدينة و يبيع الارض ديالوو .. و صافي هي هاذيك شراها من عندو حكيم و فاش جاو يتكاتبوو مشات معاه ماما حيث غير فالنواحي د كازا ما بعيداش بزاف .. ايوا و شافت كريمة و عجباتها و لسقات حكيم عليها تا تزوجها .. و لكن خرج منها العجب ..!

أسية: و دارهم جاو للمدينة ؟

اسية: اه قبل حتى ما يتزوج بيها خويا .. واخا هكاك سكنوو خارجين شوية على كازا خاصك تسافري باش توصلي لعندهم

شريفة:( ردات بفضول ) و كي دار تفاهم معاها زعما هما عقليتهم مباعدين بزاف منين وصلات للسحور كاع ؟ احم شحال من عام و هما مزوجين ؟

ربعات ملاك رجليها بحماس و قالت

ملاك: هانية بعدا نجلس هاكا ؟

شريفة:( ردات بلا مبالاة ) خوذي راحتك ..!

ملاك:( ضحكات و قالت ) خاصني نشري معرفة معاك أ شريفة .. تبقاي غير توصليني بلا نكير

شريفة: ههه علاش ..؟

ملاك: وا حيث داك بكر علال لي عندنا فالدار نهار كنركب معاهم كيندموووني ..! كنحس بيهم كيبغييوا طونوبيلاتهم كثر مني ..! حاضييني غير انا ( عوجات فمها كتعيبهم ) دي معاك الباب و الله حتى تديها ..! قلعي داك السمطة حسن لا ؟ مالكي كتجريها بالجهد ..! وا هبطي رجليك ( ضحكات ) حيث انا فيا قاعدة كنجلس ضروري نربع

شريفة:( ضحكات بالجهد ) ههههههه بكر علال نيت

أسية: هههه وا كاع الدراري هكاك .. كمليلنا على حكيم و مراتوو ..!

ملاك: اااه ايوا قلت لك .. دابا حكيم نهار الرشيم شافها قدامنا و صافي .. ما جلسوش بجوج يهضرو .. حدهم سولوها واش قابلة و قالت اه و ناضت .. و لكن عارفها عروبية و بيتوتية يعني من لول قاريها كي غتكون ..!

شريفة: اهاه ؟

ملاك: اييوا يا لالة صافي مشينا بحالنا و هو هضر مع باها و وجد وراقوو و دفعهم .. راك عارفة البوليس كيتعطلو مدة و عاد كيردو عليك و منين خرجات الموافقة تزوجوو نيشان

شريفة:( باستغراب قالت ) و ما دارو خطبة ما خرجوو مجموعين ما هضرو بالساعات فالتيليفون ؟ نيشان الزواج ؟ ما يمكنش ..!

ملاك: هاذشي لي كاين .. ما هضر معاها نيشان تال ليلة دعرسوو من مور ما ضربوو الصداق .. اصلا ما درنا لا خطبة لا والوو كلشي تجمع و تطوى فعشية دايرين فيها الطلبة و المسمعين و دا مراتوو

شريفة: ويلي على زربة ..! ههه دارو زواج الجدود ؟ و جاتوو هانية زعما ؟

ملاك:( ضحكات و قالت ) حيث أصلا قالك هما فعائلتهم ما كيخلطوش بين العيالات و الرجال و ما عندهمش داك خطبها و سير ضور بيها فالقهاوي .. صافي بغيتيها هزها و ديها تال دارك و دير معاها لي عجبك

شريفة: اه فهمتك كنعرف بزاف من هاذ النوع .. و لكن هو لي جاني بيزاغ يقبل بزواج بحال هاكا ؟

ملاك: بالعكس كن دارها محمد امين تما فين نستغرب أما حكيم عادي .. أنا كنت كنقول نهار ينوي يتزوج غيجيبها من أكادير و لا من شي دوار حداها .. بكثرة لي كان كيطلع لتما

شريفة:( ضحكات و ردات ) يجيبها من الجبل لا ..!

ملاك: و ما تعرفي ..! راه من لول ما باغيش الزواج و نهار لسقاتوو ماما .. قالها بغيت وحدة تكون بيتوتية و مولفة بالدار .. دريوشة و داخلة سوق راسها و شاربة عقلها .. ما باغي يهز هبال حد و ينوض يربي من لول .. اييوا حتى مشى برجليه لعند كريمة و صدقات ماما لاسقة عليها

أسية:( ردات بهدوء ) المكتاب و صافي

ملاك: ديكشي لي كاين .. و تا دابا ما عرفت شنوو غيدير معاها مور ما تولد ما نظنش يرجعها عادي بحال حتى حاجة ما وقعات ...!

أسية: و ياك ردها دابا ؟

ملاك: واخا هكاك راها جالسة معانا فالدار و ما كتشوفوش كاع .. و حتى التيليفون موحال واش كيهضر معاها فيه .. هو طبعوو فشكل و نهار كيحط الواحد كينزلوو سطل بلا تقرقيب .. يكون معاك الطوب د بخير غير يشوف شي حاجة ماشي تال تم كيتقلب قلبة وحدة و ما يشرحلكش كاع شنوو كاين .. كيبقى بالأفلام فراسوو حتى كيمرض و توصل ليه للجذر عاد كيتفركع

شريفة:( ضحكات باستهزاء و قالت ) و شحال و هما مزوجين ما قلتيليش ؟

ملاك: اويلي باقي ما كملوو تا العام ( تنهدات ) هاذشي علاش ما بغيتكش تعلميه داك النهار .. أجيه لأي حاجة إلا السحور ما يتعاتقش معاه .. يقت٠٠لني ..!

شريفة: صافي دابا ( غمزاتها تسكت ) نطلقوو الموسيقى ؟ شنوو تبغييوا تسمعوو ؟

ملاك: طلقيلنا الأغاني ديال هبة طوجي و لا جوليا بطرس و لا حتى عبير نعمة .. سعاد ماسي .. هاذو كيحمقووووني ..!

أسية:( ضربات جبهتها و ردات ) تفاكينا حتى مع فيروز و أم الكلثوم بقات لنا غير جوليا بطرس

شريفة: هههههههه الرقي هذاك أبنتي غير السمية تعطيك الخبار .. بقات فتيو تيو و لا حليوة ديالك ؟

أسية: و مالهم كي جاوك ؟

شريفة: كي البعر ما تعرفهم بنادم كيغني و لا دجاجة قاجينها و هي كتقاقي هنا و لهيه

طلقات لها الموسيقى لي بغات و كملوو طريقهم مرة ضاحكين كيهضرو مرة ساكتين .. حتى وصلوو لكازا و بدات المعاناة فالطريق ..!

شريفة:( مخرجة يديها كتشالي ) شكون هاذ الحيماري لي عطاك البيرمي ؟؟ واش ما كتشوفش ؟

اسية:( حطات يديها عليها ) صافي ضوبليه و زيدي بحالك

شريفة: بنادم قاري فالزحام انا لي عندي الأسبقية و زايد بسلامتوو كيغوت باغي يطير ..! ( هزات عينيها فملاك ) فين جات هاذ داركم ؟

ملاك:( ردات بضحيكة ) وا كتعصصصبي يا صاحبتي هههه بردي السيركيلاسيون هي هاذي ..!

شريفة: وا دابا غير طلقينا .. منين ندوز ؟

قربات حداها كتنعتلها و شريفة متبعة معاها كتسوط من الحديد لي كيغلي فالطريق تقول المغرب كامل خارج فداك الوقيتة ..!

ملاك:( تبسمات ) ها حنا وصلنا .. غير هو راك ما غتلقايش فين تبلاصي قدام الدار .. شوفي فداك التيساعة لهيه و نرجعوو على رجلينا ..!

شريفة: صافي واخا ..!

ملاك:(بثوثر ) و عنداك تهضري قدام شي واحد فالدراري .. خليني أنا نشرح لماما و هي غتتصرف .. واخا ؟

شريفة: واخا ( شافت فأسية ) نتي غتبقاي هنا ا تاسانوو ( كبيدة ) حتى نجي .. غنقضي شي غرض دغيا و نرجع لعندك و ها نتي حداك الجامع و الدنيا عامرة ما عندك لاش تخلعي ..!

حيدات السمطة و قربات منها باستها فحنكها كتهمس لها بالشوية

شريفة: ما جاتش نهجموو حنا كاملين على الناس .. ما غنتعطلش عليك

أسية:( غمضات عينيها و رجعات حلاتهم ) كوني هانية عليا غير سيري ..!

هزات ساكها لي فيه التصويرة و داكشي لي وراتها ملاك و هبطات عندها ..! تمشاو شوية و وصلوو للدار لي كانت R+2 .. فتحات الباب و قالت لها

ملاك: الله على برودة .. دخلي مرحبا بيك ..!

شريفة:( رمشات عينيها مترددة واش تطلع ) ترحب بيك الجنة ..!

تبسمات معاها و سبقاتها طالعة فالدروج و شريفة موراها وجهها مزنك حشمانة تدخل ... خصوصا فاش سمعات الهضرة ديال شي راجل لداخل ..!

شريفة:( شداتها ) بلاتي بلاتي .. شكون كيهضر ؟؟

ملاك:( ردات عليها و دفعات الباب داخلة ) هذا ما يكون غير محمد أمين ( غوتات بالجهد بصوت كيتقب الوذنين ) أناااا جيييييييت اويلي زيدي دخلي

دخلات و هي عاضة على فمها ما كرهاتش تجرها لعندها تنتفها زغبة زغبة لكن خوها تكلف و قرفدها تا طارت

محمد أمين: نقصي صوتك شوية مالنا على هاذ الغوات كامل ؟ حكيم عاد دخل ينعس غيخرج يحيح عليك

ملاك:( حكات عنقها ) وا قلت غتكونو توحشتوني زعما ساعة ما كاينش معامن اش هاذ الحكرة و الديكتاتورية ولات فهاذ الدار ؟ ( شافت من موراها ) شريفة ما تحشميش أ حبيبة الدار داركم .. نعرفكم بعدا .. هاذي شريفة صاحبتي و هذا محمد أمين خويا

شريفة:( مداتلوو يديها سلمات عليه و قالت ) مشرفين ( بلطف ) سمحولي على هاذ الدخلة و ما ديروهاش مني قلة الصواب ..!

محمد امين: مرحبا أ ختي ( شيرلها بيدو ) دخلي و ما تديهاش فهاذ قزيقزة

خرجاتلوو ملاك لسانها جالسة قدام شريفة لي جامعة رجليها و يديها عندها .. كتسمع لهم و تبتاسم بزز بحال يلا جالسة على الشوك خصوصا فاش سمعات حكيم كاين ..!

ملاك: ماما ما كايناش ؟

محمد امين: خرجات ..! شوية و تجي ( وقف كيشوف فشريفة بابتسامة ) خودي راحتك ا ختي .. ماري أجي واحد الدقيقة ..!

خرجات تبعاتوو حتال للكوزينة و قالت

ملاك: هانا شنوو ؟

محمد أمين: شوفي شنوو تحطي للبنت ضايفيها و نقصي شوية من التفرفير ..!

ملاك: واخا هانا نصوب البلاطوو .. قولي بعدا .. ماما غتعطل ؟ شريفة راه جات على ودها ..!

محمد أمين: ما غتعطلش شوية و تجي

ملاك:( ضورات عينيها ) مشات معاها كريمة ؟

محمد أمين: لا راها فالسطح ( تسمع باب الدار تفتح و قال ) ها هي جات واقيلة

تفتح الباب لي جاي مقابل مع الصالون فين جالسة شريفة حاطة رجل على رجل ..! دخلات كريمة كتجر فرجليها فواحد الكلاكيطة دالصبع فالكحل .. لابسة فراشة فالكحل مزوقة بالفراشات .. يديها عريانين و شعرها مغطي بزيف فالبيض ..! بكحول بلدي مكحلة عينيها حتى بان لون عينيها مشعشع .. جاي مع ملامحها الزوعر كيفتن ..!

بفضول قربات منها كطلع و تهبط فلباسها بلا حس ..! الشعر مقطع قصير مطلوق و لافخونش منفوخة شوية هابطة على عينيها لي مجبداهم بأيلاينير فالكحل و مدوزة قلم بيض وسطهم عاطية بيه فوليم للعين ..! الشفار طالعين فالسما و الفم كيلمع بكلوز بارد مع تزنيكة خفيفة فحناكها ..!

سروال دالتوب فالبيض طالع تال صرتها .. مزير من الفوق و غادي و هو كيوساع تال لتحت مع طالون فالكحل .. جاي أصوغتي مع البودي القصير لي لابسة فنفس اللون .. مزيرة على صدرها حتى كتبان الشقة شوية دايزة فوسطها سنسلة مذهبة بحلقاتها ..! و فيسط كلاس ديال السروال من الفوق شادالها الصدايف ساتراها ..!

كريمة: تي gاعدة تتسناي شي حد أ الطفلة ؟ ( ضورات عينيها كتقلب ) ملاوحينك هنا فرادية ؟؟

رمشات عينيها ببطئ فيها ..! وجهها بدا يتزنك بالتدريج مزيرة على شنافتها غطيرها من بلاصتها ..! دمعولها عينيها بالدموع دالضحك لي قاطعاه فراسها بزز ..! شوية ما غتفركع فنص وجهها ..!

كريمة: يا تي gولي راني سايرة ندوي معاك ؟

شريفة:( بصوت بزز كيتسمع ردات ) احم جايا مع ملاك انا صاحبتها

برد وجهها شوية فاش هضرات ..! وقفات مداتلها يديها بهدوء كتشوف فيها العين فالعين ..!

شريفة: أنا شريفة و نتي ؟

كريمة:( جراتها عندها سلمات عليها من الوجه ثلاثة دالبوسات و جلسات ) gعدي gعدي .. تقلت ما بقيت نgد نبقى واgفة بزاف .. انا كريمة مرات ولدهم البكر

شريفة: ااااه مشرفين ..! ( شافت فكرشها ) حاملة تبارك الله شحال عندك ؟

كريمة:( حطات يديها على كرشها ) واه راني حبلة .. غير يانا فايضة من صغري gاع ما كرشت .. ما تبانش فيا كرش الخمس شهور ..!

شريفة:( قلبات وجهها غالباها الضحكة و رجعات شافت فيها ) مزيان الله يفك وحايلك على خير .. احم واخا تكلميلي ملاك باش نمشي بحالي ( تنهدات تنهيدة بالصوت ..! )

كريمة: وا gلبك عامر أ خيتي ..؟ مهموومة و الدنيا ضايرة بيك ما عارفة فوgاش سعدك يتسgم .. تخممي بالليل و النهار و تا موضع ما مريحك ..!

شريفة:( هزات حاجبها و ردات مطمرة ) ما كذبتيش ..! قلبي عاااامر بزاف ما كرهتش نشرب شي دوا ننعس نفيق نلقى راسي نسيت كلشي ..!

كريمة:( قربات لعندها كضور فعينيها ) خوي عليا ما تعلمي نعود نافعاك ( ضربات فصدرها ) و حلك عندي ..!

شريفة: و زعما تقدري تعاونيني ؟ باينة فيك حكييييمة غير من هضرتك ( تنهدات ) ايوا على الله ..!

كريمة:( تبسمات معاها و قالت ) يgولوو ناس زمان دير النية و gعد مع الحية ..! غير نوي و ما تخرجي من هنا تا يكون حالك مغير و مرتاح .. شgلتيلي سميتك ؟ شريفة ؟

شريفة:( حركات حاجبها بالشوية و قالت كتقلب فعينيها ) سميتي شَريفة ماشي " chrifa " .. الفتحة فوق الشين ..! احم ما علينا ( بصوت خافت ) أنا لقيتهم ساحرين ليا

كريمة: و على من زيناتك بنية ( لسقات عليها ) و فكيتي الشغل و لا سايرة تحوصي على لي يفكولك ..؟

شريفة:( فتحات صاكها وراتلها التصويرة و ديكشي لي عندها بلا ما تجبدهم و قالت ) هاذشي لي لقيتوو و ما عرفت ما ندير .. كاع البيبان تشدو فوجهي لقيت غير ملاك جابتني معاها لهنا نفوج معاها شوية و تا هي ما عارفة والو على هاذشي غير نتي ارتاحيت لك باش عاودتلك .. المهم ( طبطبات على كتفها ) ما تعمريش راسك بمشاكيلي

كريمة:( هزات راسها و ردات ) و يلا gتلك فكاكك عندي ..! و لايني لي ندويلك فيه يكعد بيناتنا

شريفة:اتيييني بالحل أختي و الكادو المخير يوصلك من عندي تال قلب بيتك ..! ( غمضات عينيها و رجعات حلاتهم ) و كوني هانية .. تا كلمة ما تخرج من فمي غير ارتاحي .. واش نتي تفكيني و أنا عاد نمشي نفضحك ؟

كريمة: عندي لك واحد السيد .. دقتوو تجمد الما .. يانا نgوولك خدمتوو كي عاملة يا ختي .. واخا عمري gربت لعندو و لا مشيت فداك الطريg و لكن كنسمع عليه و يلا بغيتي نgلب لك على النيميرو ديالوو

شريفة:( رمشات عينيها و قالت ) واش شواف زعما ؟

كريمة: شرييف كيعاون الوليات .. عطيني النيميرو ديالك باش منين نلgاه نغوت ليك تمشي عندو

بهدوء جبدات تيليفونها حلاتوو و قيدات نمرة كريمة عندها و رجعات خبعاتوو من بعد ما دخلات ملاك هازة السينية كترحب بيها و تعاود ..!

ملاك: ياكما تعطلت عليك أ شريفة ( شافت فكريمة ) ااه تعرفتوو بيناتكم .. هاذي مرات حكيم لي قلت لك عليها

شريفة: امم تلاقينا الزين .. تبارك الله عليها و خلاص ( بابتسامة صفرة ) كتدخل للقلب بالزربة ..!

كريمة: الله يعز بيك أ خيتي يانا مسرارة كانوو يgولوهالي ديما ..!

هزات كاس دالعصير من عند ماري و قلبات وجهها من جهتهم عاضة على فمها كتمووت بالضحك فصمت بلا ميحسوو بيها ..! و كل شوية تسوط باش تبرد النفس فيها و مع حطات الكاس على فمها باش تشرب .. تسمع صوت حكيم كيعيط بالجهد ..! قفزات من الغوتة حتى هرقات على راسها العصير و تطبعات اللبسة ..!

حكيم: كريييييييييمة

تضهشرو كاملين حيث الطريقة لي كيعيط بيها ديال وحدة دايرة شي زبلة غتعلق عليها من شفارها ..! مشات كريمة كتخلف لعندوو .. مخلية شريفة دايخة كتمسح فلافيسط ديالها و ملاك لاسقة عليها كتشوف شنوو تعطيها ..!

محمد أمين:( دخل لعندهم كيشوف فملاك ) بيتك ما تخرجيش منوو .. ما نلقاكش كتضوري هنا .. دي معاك صاحبتك على ما تجي حَبيبة ..!

خرج خلاهم ما فاهمين والوو ؟ باينة شي كارثة واقعة ..!

شريفة:( بصوت خافت ) مالهم ؟

ملاك: ما عرفتش ؟ يمكن حكيم مصادع مع كريمة ..! اجي ما قلتيليش بعدا فين كتعرفيه ( جراتها من يديها ) يالاه نوريك بيتي و عاوديلي ..!

شريفة:( داخت حساتهم زربوو عليها ..! ) بلاتي بلاتي ..! أسية ما غنخليهاش فالطونوبيل بوحدها يمشي شي واحد يجي ليها .. ما كاينة ثقة .. واش ماماك باقى معطلة ؟

ملاك: و الله ما عرفت ( طلات براسها ) انمشي نعيط على أسية تجلس معانا ما فيها حتى مشكلة ..! دخلي نتي للبيت هانا جايا

مشات كتجري خرجات حتى قبل ما تسمع الجواب د شريفة لي ما عرفاتها كي دارت طارت من قدامها كي الزواق ..!

زيرات على عينيها ندمانة لاش جات من لول .. خارجة من الصالون و كضور فعينيها ما عارفاش حتى بيت ملاك فشمن قنت .. فالأخير دارتها فيد الله و أول بيت جا قدامها فتحاتوو و دخلات ..!

مشات نيشان للحمام كتشوف فالتطبيعة دالعصير فركاتها بيديها شوية و خرجات كتسوط ..! الهزة باش هزات عينيها شافت التصويرة د حكيم فالكادر .. عاد انتابهات للناموسية لي مليوحين فوقها ملابس رجالية ..!

قربات بفضول كتشوف فاللبسة ديالوو دالبوليس ..! دوزات يديها بهدوء على ثوبها كتلعب فالشارات لي فالكتاف حتى حسات بشي حاجة قاسحة فالجهة فين كيكون الفردي ..! وسعات عينيها بدهشة و حلات ديك الصدافة باش مشدود و جبدات الفردي شاداه بين يديها لي كيرجفوو خايفة يكون عامر و تمشي تيري فراسها بلا ما تنتابه ..!

عضات على فمها كتضور فعينيها بشقاوة و بابتسامة مشاغبة خشاتوو فصاكها و شدات عليه خارجة من تما هاربة ..! يالاه زادت شوية و هي تكسيري راجعة كتقلب بعينيها عليهم فين مخشيين ؟

الفضول كلاها حتى وصلها للكوزينة فين واقف حكيم غير بالشورط شاد لكريمة يديها و هي كتبكي و عينيها خارجين فالحديدة لي هاز فيدو كيسخنها فوق البوطة و محمد أمين واقف مقابل معاهم كيتفرج بكل بروود ..!

بصدمة حطات يديها على فمها فاش هز داك الحديدة شاعلة بحال الجمر كتكوي و حطها لها على يديها .. تا تسمع بحال الشياط و طلقاتها بغوتة فالسما كتترعد و هو كيهز فراسوو من الفوق للتحت شادلها يديها الثانية ..!

حركات راسها بالنفي و عينيها مغرغرين بالدموع ما متيقاش بلي حرقها !!!! الغوتة د كريمة كانت بحال شي تسرفيقة فيقاتها من القلبة و خلاتها تخرج من تما كتجري بلا ما تشوف من موراها ..!

قلبها كيضرب بالجهد مخلوعة و كلها كتترعد فتحات الباب د الدار التحتاني و خرجات كتشوف فالناس تالفة و عينيها غير كيضورو ..!

جبدات تيليفونها من الصاك باغى تعيط على أسية و يديها ما تابتينش .. بقات شاداه عندها كتتمشى بالشوية فاتجاه طونوبيلتها ..! تا حسات بيديها غطير من بلاصتها بالسرعة لي خطفولها الساك من فوق كتافها و طاروو راكبين على الموطور ..!

شريفة:( خرجوو عينيها كتجري معكلة بالطالون .. و فبالها غير الفردي ديال حكيم مشى ..! ) شفااااااار شفاااااار اويلي شفاااااااااار

تسمع صوت حكيم كيعيط بالجهد ..! قفزات من الغوتة حتى هرقات على راسها العصير و تطبعات اللبسة ..!

حكيم: كريييييييييمة

تضهشرو كاملين حيث الطريقة لي كيعيط بيها ديال وحدة دايرة شي زبلة غتعلق عليها ..! مشاو عينيهم مع كريمة لي ناضت عندو كتعثر فحوايجها .. لقاتوو واقف فالكوزينة غير بالشورط .. الصدر عريان و العينين خارجين فيها غياكلوها .. حاط يد على جنبو و الثانية كيشير بيها معصب ..!

حكيم: زيدي .. زيدي لمك لهنا ..!

قربات منوو باستغراب ما فهماتش مالوو ؟ تا هو ما عطلهاش جرها من وذنيها تا حسات بيها غتطير من بلاصتها ..! وجهها صفار و لسانها تقال عليها عرفات آخرتها معاه ليوم فاش بعد من الطريق و بان البوطاجي من موراه محطوط فوقوو الشمع لي خبعاتهم مزيان تا تشعلهم ليه فوقيتهم هما و شي حجابات ..!

حكيم:( هز راسوو فالسما كيسوط و بصوت مغذذ قال و هو كيجبد فوذنيها ..! ) شنوو هاذشي ؟

كريمة: أ ؟ يانا ما ممم ففف ( جمعها معاها بتسرفيقة قلباتلها الوجه تا شدات على حنكها كتبكي ) حكييم حكييم عاين نgولك يانا ( سكتات تالفة )

حكيم:( بعينين حومر عاقد حجبانوو رد ) غتهضري و بلا كذوب و لا كنقسم فمي بالله .. اليوم تجمعي لحمك طراف من هاذ الكوزينة ( بالغوات ) شنوو هاذ القلا** ا بنت **** رجعتي لعاويدك من جديد ..؟

دخل محمد أمين فهاذ اللحظة من بعد ما هضر مع شريفة و ختوو يمشييو للبيت ..! رد الباب عليهم مخليه مفتوح شوية و بصوت هادئ قال كيشوف فكريمة لي عاصرها خوه و هي شادة على كرشها كتبكي ..!

محمد أمين: حكيم البنت ( شيرلوو بعينيه لكرشها ) ماشي هاكا غيتحل المشكل .. ملاك برا كتسمع تهدن ..!

حكيم: خرج تق** عليا نتا و ياها قبل ما ندخل فز** بوكم كاملين .. هاذي هي الوصاية لي موصيكم ؟ مأمنكم واقيلة ياك ..؟( حرك راسوو بالايجاب ) واخا ..!

طلق منها خلاها كترد النفس و هو صدرو كيطلع و يهبط بعصبية .. عينيه مزيرين و كيقلب بجهالة فالكوزينة .. تا جبد من البلاكار حديدة عادية عندها مقبض فالراس ديالها باش كتشد ..!

شعل البوطة قدام عينيها كيسخن فيها و هي لاسقة عليه حاطة يديها على فمها كتبكي و ترغب و ترجع تشوف فمحمد أمين لي بلع لسانوو و سكت فاش ضار فيه حكيم ..! كيشوف فيهم ببرود ما مسوقش ..!

حكيم: رخفت على الق*** مك بغيتي ترديني قرد قدامك ( عض على فموو مغذذ و جرلها يديها عندو مسرحها مزيان ) هاذو هما اليدين لي كيسحرو ؟

حركات راسها بالنفي مخلوعة غادي تديرها فسروالها .. كتبكي عشرة من العين و كتحرك فراسها بلا ..!

كريمة:(عقلها خارج ) حكيييم حكيييم طلgني الله يستر عليك ( سكتات كتلهث و تبكي ) اعععن عمري نعكب لداك الطريg .. يانا نgولك و الله ما

ببرود هز داك الحديدة سخونة كتكوي كي الجمر و حطها لها فنص يديها حتى تسمع صوت بحال الشياط و مع جرها تجرات معاها الجلدة تا غوتات كريمة للمرة الثانية غتسخف فبلاصتها ..!

صوتها ثقب وذنين شريفة لي كتفرج فيهم و ذاتها كتغزل عليها .. كتتفكر نهار حرقاتها كبيرة .. نفس الذكرى و نفس الألم كيتعاود بحال هي لي شادها حكيم ماشي كريمة ..!

خرجات من تما كترعد بوحدها .. كتشوف وجهوو كحل قبالتها .. بحالوو بحال كبيرة امها لي ما رحماتهاش و هي كتبكي د٠م بلاصة الدموع ..! و حتى باش تتدخل و تحاول تفكها من بين يديه ما قدراتش نهائيا ..! أما هو رجع الحديدة فوق البوطة تزيد تسخن شادلها يديها الثانية ناوي عليها تا هي .. ما على بالوش بحالتها كي دايرة و تا محمد أمين لي يوقفوو ما هضرش بين عينيه غير المواصل لي وصلات ليها خوه و الفراش لي شد بسبابها ..!

كريمة:( شدات على كرشها بيديها لي محروقة واخا مكتقدرش تحركها ..! حاسة بالترابي تقلب لها فكرشها تا النفس ما بقاتش تقدر تطلعها ) كنمووت كنمووت ( غوتات بالجهد فاش حرقها للمرة الثانية ) اااااااااااااااي

محمد أمين:( أخيرا تدخل جرو من عليها ما كيقشعش قداموو بالأعصاب ) صافي ا صاحبي واش باغي تقت٠لها ؟ شوف حالتها الله يهديك ..!

سكت حكيم كيشوف فيها بنظرات حاقدين ..! واصلة بيه للجذر و فهاذ الحالة يقدر يذب٠حها و ما تهزش فيه تا شعرة ..! قلب وجهوو جهة خوه فاش تسمع صوت تيليفونوو كيصوني ..!

محمد أمين:( رد بالزربة ) ماري ماشي وقتك دابا من بعد ( يالاه جا يقطع و هو يحبس و بتساؤل قال ) شنوو واقع ؟

حكيم:( جرها من ذراعها بزعفة و هي كترعد بين يديه كلها عرقانة و كتأنن و تغوت بالحريق باغى تنقز ) تحركي قدامي ( خرج عينيه ) صووتك ما نسمعوش .. قططططعي ..!

دخلها للبيت كترعد و صوت بكاها كيتسمع مجهههد كيقطع فالقلب .. كتحاول تسكت فراسها بزز و لكن ما قادراش غتموت بالحريق فيديها و عينيها مع حكيم لي قلب الماريوو سفاه على علاه حتى جبد سمطة د العسكر .. غليضة و كلها حدايد ..!

ضار عندها كيلويها فيديه و هي كتغوت و تبكي فوق الناموسية .. ركابيها خواو عليها .. ما لقات باش توقف و تهرب من قداموو تا محمد أمين لي يفكها كيهضر فالتيليفون برا ..!

كريمة: حكيم ما ضربنيش يانا مزاوكة على وجه تايمة بنتنا أااااييييييييي وا مييي رجلي رجلي

مع كتهز راسها ترغبوو كينزل عليها بالسمطة لرجليها لي شادهم بجوج مسرحهم قداموو .. واقف على ركابيه حداها و كيعطيها بلا ما يهضر حدوو كيحرك فراسوو مغذذ ..! بقى عليها هاذي تنفع هاذي تضر حتى طابو لها رجليها من التحت و تنفخوو كثر ما هما منفوخين ..! حاسة بيهم مسلوخين غيتقطعوو عليها بالحريق غير كتحرك فراسها و تأنن .. ما حيلتها ليديها و لا رجليها و لا كرشها لي كتنغزها مرة مرة ..!

طلق من رجليها تا طاحوو فوق الناموسية ما قادراش تحركهم ..! فشلات فخطرة .. عكسوو هو لي مشى هز اللبسة دالبوليس حطها فوق واحد من الكراسة لي فالبيت بلا ما ينتابه للفردي لي ما كاينش ..! ببرود رجع جلس مقابل معاها مربع رجليه و السمطة فيديه شادها

حكيم:( شحطها معاها لفخضها تا قفزات حاضية معاه ..! حرك حاجبوو بثقالة و قال ) طلعي تهزي جالسة .. دابا عاد غنتفاهموو مزيان

كريمة:( كتشهق بالبكى وجهها حمر بزز راجعة بلوور كتحبوو حتى تكات على الكادر كتشوف فيه مكمشة ) طلgني غنمووت أ مييي يدي كتوجعني غنموت غنموت انننن

حكيم:( هز حاجبوو فيها و قال ) بكي و لا موتي ..! الهضرة رجعات عندك زايدة ناقصة ؟ كتديري غير لي قالك راسك حنا لي كنهضرو معاك قرود قدامك ياك ؟ ( عض على فموو و شحطها معاها للفخض الثاني ) بغيتي غير الخدمة دالعسكر نديروها معاك حتى نشووفو شكون يتهد .. أنا و لا نتي ..! ( عاود شحطها ) تهزي جيبي تيليفونك لهنا

بزز وقفات على رجليها لي غير حطاتهم للأرض ضربها الضو فيهم و يالاه زادت خلفة حسات بشحطة دالسمطة جاتها للور تا طارت من قداموو كتوزوز و هو متبعها كيغلي بالأعصاب و ناوي اليوم يفضيوها و يعرفها شنوو دارت مور ظهرو من لول للخر ..! عاد يشوف شكون كيجيبلها الخدمة تال الدار و غيجبدهم واحد واحد ..!

**********************************

جبدات تيليفونها من الصاك باغى تعيط على أسية لكن ما تابتاش كلها كتغزل .. بقات شاداه عندها كتتمشى بالشوية فاتجاه طونوبيلتها ..! تا حسات بيديها غطير من بلاصتها بالسرعة لي خطفولها الساك من فوق كتافها و طاروو راكبين على الموطور ..!

شريفة:( خرجوو عينيها كتجري معكلة بالطالون .. و فبالها غير الفردي ديال حكيم مشى ..! ) شفااااااار شفاااااار اويلي شفاااااااااار

رمات بالخف الطالون من رجليها و بدات تجري و تقول ما جرات و صوتها كيتسمع فالدرب كامل .. لي جاي شارع واحد ما عندك فين تتلف .. و كيبانولها قراب باقي ما بعدو بزاف ..!

وصلات لطونوبيلتها كتحاول تحل الباب ..! غير لمحات أسية واقفة مع ملاك و شي راجل اخوور كيضحكوو فالجهة الثانية .. ما مسوقينش للعالم .. بدات كتغوت بالجهد عليهم ..!

شريفة: أسسسسية ..! لوحي السوااااارت .. السواااارت د الطونوبيل دغيااااا

شيراتلها بيديها كتزرب فيها واقفة بالحفى .. تا لاحتوو لها ..! تحنات هزاتوو و بالطيران ركبات و حكات الروايض فالخوى مكسيرية موراهم و مدوزة لابيل فنفس الوقت لأسية كتهضر بالزربة

شريفة: ملاك داااابااا تعيط على خو حكيم يهبط عندي دابا .. نرجع نلقاه لتحت

قطعات فاش شافت راسها قربات لهم .. زادت فالسرعة تا ضرباتهم من لوور زعزعاتهم و ضارو كيشوفوو فيها و هي حالة الشرجم حلاقمها غيخرجو من بلاصتهم و بتيليفونها كتصور وجههم فيديوو ..!

شريفة: ها نتوووما ا خوتي حضيييو راسكم من هاذ الشفاااارة .. سرقوووني فسباتة فكازا ( كتزومي عليهم ) حضيييو راسكم ما بقى أمان

زادت ضرباتهم من لور و هما كيتسابوو معاها .. و شكون داها فيهم ؟ وذنيها مصمكين من جهتهم ما كتسمعش ليهم كاع شنوو كيقولوو عقلها كلوو مع الفردي ..! يا يعطيوها الصاك يا تطحنهم و تاخذو ما كاينش حل آخوور ..!

شريفة: لووحوو الصاك الله يحرق طواسل مكم اولاد الواسعة .. طلقوووو البعر لهناااا

قطعات الفيديو و خرجات راسها من الشرجم كتشالي بيد و اليد الثانية محكمة بيها فالفولا ..! و بلا ما تنتابه زادت فالبلاكة د " قف " تابعاهم .. حتى جاتها الضربة من الجنب من حيث لا تدري ..!

عوجات لها الضربة الطريق تا سكتات لها الطونوبيل و الشفارة خرجو لشارع و تخلطوو مع الناس هاربين .. مخليينها فبلاصتها يابسة عينيها خارجين قدامها و قلبها كيضرب بحال المدفع فصدرها .. عاد برد فيها الد٠م و رجعات عليها الخلعة ديال بصح .. شادة على راسها لي كلات فيه دقة قاسحة زعزعات لها المخ من بلاصتوو .. هي و جنبها لي تدفعات عليه باش شدات التوازن ديالها ..!

بزز هبطات من الطونوبيل جالسة فالأرض كتشهق و تبكي تا خلات الراجل لي دارت معاه الأكسيدون يتحنى عاطيها قرعة دالما كيسكت فيها .. من بعد ما كان ناوي على خزيت معاها ..!

شريفة:( كتمسح فدموعها و تمتم بصوت خافت ) حمارة ا شريفة .. حمارة بوذنيين طوال ..!

رد الراجل كيشوف فيها فاشلة فبلاصتها .. : صافي ما وقع باس .. هاذشي كيطرا .. الحمد لله ما تقاسيتيش بشي ضربة خايبة ..!

شريفة:( هزات راسها فيه كترمش بعينيها لي فازكين ) خاصني القطيعة لهاذ اليديين باش نتعلم نقيس فشي حاجة ماشي ديالي ..!

رد بعدم فهم : المهم ماشي شي حاجة كغاف .. بلا ما نقيدو كوسطا .. نفكوها بيناتنا حسن ..!

تنهدات كتشوف فالحديد ديالهم لي ما تضررش .. شي حاجة خفيفة و صافي .. و بقلة حيلة ردات مغبنة

شريفة: أنا سرقوني الشفارة و كنت تابعاهم و خرجتي فيا .. ما بقى عندي ما نعطيك حتى لاكارط ناسيونال مشات ..!

رد بتفهم .. خاصة طونوبيلتوو ما تقاستش بشي ضربة خايبة .. : صافي ماشي مشكل ا ختي الله يسامح علينا ( بتساؤل ) غتقدري تصوكي فهاذ الحالة ؟ عيطي لشي حد يجي لك ..!

شريفة:( وقفات بزز .. كتشمر بنيفها و رجليها حافيين ) ما كنعرف حد هنا لي يجي لعندي .. غير كون هاني من جهتي و سمحلي عافاك

حرك راسوو بالايجاب و مشى من تما بحالوو مخلي شريفة حاطة راسها فوق الفولا لدقائق و عاد ديمارات بالشوية و رجعات للدار دحكيم .. فين لقات ملاك و أسية و محمد أمين واقفين كيهضرو .. باينين كيتسناوها ..! هبطات عندهم كلها مشنتفة و حالتها حالة .. لا لبسة بقات لا مكياج بقى ..!

شريفة:( بصوت مبحوح بالغوات قالت ) خوك كاين فالدار ؟

شافوو فيها كاملين باستغراب قبل ما تمشي عندها أسية كتقلب فيها و فجبهتها لي بدا يتكبد فيها الد٠م و تزراق فالبلاصة ..!

اسية: أويلي مالك ؟؟ فين مشيتي كتطيري خلعتينا عليك و غبرتي ..؟

شريفة:( غمضات عينيها و رجعات حلاتهم ) انا مزيانة غير خليني دابا .. احم واش حكيم فالدار ؟

محمد أمين:( رد كيشوف فحالتها ..! كي كانت فالدار قبيلة بحال البلارة و كي رجعات دابا ..؟ ) اه كاين ..! بغيتيه فشي حاجة ؟ ياكما تعرض لك شي واحد ..؟

شريفة:( خرجات النفس مرعود حاسة بالطونسيو طايحلها شوية و تسخف لهم تما ..! ) أنا تسرقت و مشيت تبعتهم و لكن ما شديتهمش درت أكسيدون

محمد امين:( طرطق فيها عينيه ) هاذشي كامل و مزيانة ؟؟ ( بغى يشد فيها و بلباقة بعدات يديها ) احم .. ما تقسحتيش بعدا ؟ كي طرا لك ..!

شريفة:( غمضات عينيها كتتنهد ) أنا كنعرف حكيم و بالصدفة دخلت لبيتوو و لقيت الفردي محطوط عندو تما ( بلعات ريقها و كملات ) ما توقعتش غنهزو و نخرج للزنقة و يسرقوني ..! كنت عوالة غير نضحك معاه و نردو ليه .. صرف بيناتنا و صافي

محمد أمين:( خرج عينيه كيتأكد من لي سمع و بصدمة قال ) ما فهمتش واقيلة ؟ شنوو قلتي درتي ؟ شنوو تسرق ؟

شريفة:( تكات على باب الطونوبيل شادة على راسها ) هزيتلوو الفردي و دابا تسرق ( شافت فيه كترمش ) عارفة راسي كحلتها و بلا ما تزيد على ما بيا حتى نتا .. بغيتك تفكر معايا فشي حل ..!

محمد امين:( غوت بعدم تصديق ) واش نتي مريييضة فدماغك ؟؟ عرفتي شنوو درتي و لا لا ؟ كاين شي واحد كيلعب قاش قاش بالسلاح ؟ ( باستهزاء ) ياكما سحابلك د عاشورة غتعمريه بالما و ترشي بيه عباد الله ..؟

شريفة: ما نويتهاش هاكا ما نويتهاش

صوتها تقج كثر ما هو مبحوح .. كتمشي و تجي فبلاصتها وجهها حمممر .. بزز قاطعة البكية فراسها قداهم .. هما لي كيشوفوو فيها بقلة حيلة .. جاتهم اللقوة ..!

محمد أمين: خاص ضروري نقولهالوو ( جبد تيليفونوا ) غنعيط نعلموو قبل ما توقع شي كارثة

شريفة:( خرجات عينيها كتحرك فراسها بالنفي ) لالا ما تعيطلوش عافاك ( دوزات يديها على عنقها ) أنا السباب و أنا لي غنلقى الحل .. أنا صو

محمد أمين:( رد بعصبية مقاطعها ) على شمن حل كتهضري ؟ راك خرجتي عليه أ الشريفة .. بردتي دابا منين رديتي صرفك ؟

عقلها حفاتوو بالتفكير و لا لقات حل للكارثة لي دارت .. الفيديو الحاجة الوحيدة لي غتعاونها يلا تحركوو فأقرب وقت قبل ما يفوت الفوت .. و لكن كيفاش غيفيدها هي لي ما كتعرف حد ؟ خاص ضروري البوليس يدخل فالخط ..! تمتمات بصوت خافت

شريفة: قووودتيها أ شريفة قوووودتيها ( رمشات عينيها فيه ) تسنى غير شوية تا يلا ما عرفنا ما نديرو عاد نعيطولو ( بتوثر ) حكيم غيق٠تلني .. غيق٠تلني و يشرب من د٠مي منين يسيق لخبار ..! شوف انا فاش تبعتهم صو

محمد أمين:( رد باستهزاء و وراها تيليفونو لي كيصوني بسميتوو " حكيم bro " مقاطع هضرتها للمرة الثانية ) هاذشي يلا كان باقي ما عرف بعدا ..؟ ( دار هوت باغلوغ و رد ) وي حكيم ..؟

حكيم:( بصوت معصب قال ) ملاك معاك ؟ شكوون قالك تخرجها ؟ علاش ا القلا** كتديرو غير لي قالكم راسكم ..! ما كتعرفووش تتشاورو ؟

محمد أمين: ها حنا غير لتحت ( شاف فملاك لي كتسمع ) واش كاين شي مشكل ؟

حكيم:( رد بصوت خاسر ) قولها تطلع تتقووود لدارهم دابا .. تتعطل غنهبط نطحن مها تما .. فرعنتوو فهاذ الدار .. رجعنا عايشين فغابة لي سلكاتوو شي قل** كيديرها و لكن غير بلاتي ( سكت كيلهت تا كيتسمعوو انفاسوو عندهم ..! )

ملاك وجهها صفار و هي كتصنت ليه كيحيح و كيتسناها تطلع عندو و باينة غيعطيها شي قتلة تمووت و ما تنساها ..! تفكرات كاع الزبايل لي دارت فهاذ الثلث شهوور .. كتخمم شمن وحدة ساق لها الخبار و كتشطح فبلاصتها بالخلعة ..!

محمد امين:( بصوت هادئ قال ) دابا غير تهدن شوية ما تجيبش سبتك عليها حتى هي .. احم المهم هبط للتحت طاري واحد البلان ضروري تعرفوو .. ما تتعطلش

قطع عليه باش ما يبقاش يبحث فيه و يهبط لعندهم بالزربة و ديكشي لي كان ..! نزل بكلاكيط فرجليه مع شورط و تيشورط د القطن ..! عينيه مزيرين و حجبانوو طالعين فالسما ..!

بلعات ريقها و بشجاعة قربات منوو قبل ما يهضر حتى واحد فيهم .. كتشوف فعينيه لي باين منهم واصلة فيه للجذر و شاعل ديال بصح .. خاص غير لي يقيسوو و يتفركع ..!

حكيم:( زاد عقد حجبانوو كيطلع و يهبط فيها ) شريفة ؟ ( هز راسوو فيهم ) شنوو واقع هنا ؟

شريفة: أنا غنقولك ( هزات يديها حركاتها بالشوية ) و متحملة مسؤولية شنوو درت .. ما غنلومك على حتى حاجة غير سمعني تال التالي

بهدوء زادت كحزات عندو مقابلة معاه ..! موجدة راسها للأسوء .. اللهم يسمع منها و لا من عند شي واحد اخور ..!

عوجات راسها فيه كترمش بالشوية كتفكر منين تبدا الهضرة .. خلعوها عينيه لي مطرطقهم فيها بملامح خاسرة ماشي دالمفاهمة ..!

شريفة: احم ..! دابا أنا جيت لعندكم قبيلة مع ملاك بغيت نشوف خالتي حبيبة ( ضحكات بصفورية )

هز حكيم عينوو فختوو تا تخبعات من مور محمد أمين .. حرك راسوو من الفوق للتحت كيتحلف و رجع شاف فشريفة و زعف ..!

حكيم: غنباتوو هنا على جوج كلمات ؟؟

شريفة: طبعت لبستي و دخلت لعندك للبيت نغسل و لقيت اللبسة ديالك محطوطة ( عضات على شنافتها و كملات ) هزيت الفردي و حيث عارفاك ما شفتينيش كنت باغى نضحك معاك و نردولك .. ساعة تسرق مني مع خرجت من الدار .. تبعتهم و صورتهم فيديو غتقدر تجبدهم شكون هما ( بتأكيد ) راني صورتهم

تنهدات بقوة بحال يلا شي حجرة كانت محطوطة فوق صدرها و أخيرا تهنات منها ..! حالة عين فيه مغمضة الثانية خايفة من شي دقة من عندو ..! لكن ما كان حتى رد فعل منوو .. بقى واقف كيشوف فيها عينيه ثابتين عليها بحال يلا ما متيقش شنوو سمع و بثقالة رد

حكيم: شنوو درتي ؟؟؟

ما تسناهاش ترد عليه .. رجع مع الدروج طالع بالشوية تا وصل للدار و دخل لبيتوو ما شافش جهة كريمة لي سخفاتلوو فوق الناموسية مور ما جابتلوو تيليفونها قبل تا ما يقلبوو ..! مشى نيشان للبسة فتح الجهة فين كيكون السلاح لقاه خاوي ..!

غمض عينيه لمدة قصيرة و رجع حلهم بهدووء .. فتح الماريوو جبد سروال ديال الدجين لبسوو مع سبادرين فرجليه .. هز بزطاموو هو و التيليفون و السوارت و رجع خرج من تما بهدووووء ..! بحال يلا تكب عليه شي سطل ديال ما مكلاصي جمدلوو كاع الأعصاب لي كانوو كيغلييو فيه ..!

لقاهم واقفين فقلب الدار كيتسناوه باش تعطيه الفيديوو و يتحرك يشوف شنوو يدير ..! برووود تام مشى لها نيشان جرها من شعرها عندو زدحها مع الحيط و جمع معاها بتسرفيقة قلبات لها الوجه ..! خلطوو لها كامل تا تبنج عليها كتحس غير بالتزنزين و السخونية طالعة معاها بالتدريج .. جامعة رجليها مزيرة عليهم بعد ما هبطات معاها قطرة صغيرة د البول فسروالها من حر الدقة

شريفة:( هزات يديها الضبابة بدات تشوفها قدامها .. متأكدة بقاتلها واحد خمسة دقائق و تسخفلهم تما ) حكييم حكييم تسنى

حكيم:( قشر شنافتوو حتى دماها و مد لها يديه ) طلقي القلا** لهنا .. الهضرة ماشي دابا ( حرك راسوو ) هانا راجع لديلمك

قربات أسية بخوف مدات ليه التيليفون مفتوح بلا كود فالفيديوو ديال السرقة ..! طلقوو تفرج فيه تا كمل و خشاه فجيبوو .. واقف حاط يد على جنبوو موسع بين رجليه ما كيشوفش فيهم نهائيا كيتسنى لابيل تدوز ليه و غير تقبط الخط رد باختصار

حكيم: غتجي بالسطافيط دابا عندي للدار د سباتة ( شاف فخوه ) محمد أمين كاين غيفتحلكم الباب ..! غنكمل شي شغال و نخلط عليكم .. نلقى " شريفة المير " فلاكاب كتتسنى .. تهلاو فيها على ما نجي ( قطع )

قربات منوو مخلوعة ما متيقاش شنوو قال .. حطات يديها على ذراعوو و بصوت باكي نطقات

شريفة: حكيم إلا هاذي .. دير فيا لي عجبك و الله ما نقول لا و لكن ما تدخلنيش للحبس و تلوحني ليهم ( شهقات حانية راسها ) حشوومة عليك أنا رجعت عندك نعلمك كن كانت وحدة اخرى كن هربات و خلاتك تضبر راسك

حكيم:( زير عليها من اليد لي شادة بيها فيه و بعصبية رد ) اش داك لشي قلا** من لول ؟ ( ضربها بصبعوو لراسها ) برهوشة بالرب .. هانتي غتترباي دابا بالمزيان .. يلا ما كرمت مك حتى تحرمي راني ماشي راجل

شريفة:( غوتات كتبكي ) وااا بغيت غير نضحك معاك و ندددددمت نددددددمت

طلق منها كيمشي و يجي قدامها مغذذ .. كيبرد و يرجع يشعل غير بوحدو

حكيم: حتى أنا غنلعب معاك ( باستهزاء ) نلعبوو كاملين و لا ما كاين لعب ( دوز يديه على راسوو ) السلاح يلا ما تلقاش من هنا لغذا غنقوودوها كلنا .. و نتي أول وحدة عرفتي علاش ؟

شريفة:( حركات راسها بالنفي كتمسح فدموعها ) علاش ؟

حكيم:( ببرود رد ) السلاح الوظيفي تهز من قلب الدار يعني كاع لي كتشوفيهم قدامك غيتجرو للتحقيق .. و غتدخل الشرطة العلمية فالخط ( شير بيديه ) أول حاجة غيشوفوو هما الكاميرات لي فالبيت ..! هزيتيه بخاطرك و بيديك سرقتيه ( عض على فموو كيغوت ) واش عند جد مك شي عقل و لا ما تكسابيهش ؟؟

أسية:( ردات بصدمة ) بصماتك فالفردي ا شريفة يلا وقعات شي جريمة غتكوني حتى نتي من المتهمين و مصورة بالكاميرة من الفوق ..! أويييلي ..!

حكيم:( ضار شاف فيها و قال بنرفزة ) بنت 17 العام و عندها العقل عليك .. بقيتي كتخوري حتى عييتي و هانتي جبتي الربحة .. ارتاحي دابا ..!

محمد أمين:( تدخل بيناتهم و قال ) دابا فوقاش خاصك تبوانتي بيه ؟ ما يمكنش تبدلوو بشي واحد اخوور تا يتلقى ..!

حكيم:( رد باستهزاء ) واش كنلعبوو بالقشاوش هنا ؟ راهم مرقمين و كل واحد باش معلمين لوو ديالوو .. كيبقى معاك حياتك كامل تا كتق** من عندهم ( شاف فيها بتخنزيرة ) هاذشي ما فيهش الضحك .. غذا فالصباح يا غنبوانتي بيه يا غنديكلاري تسرق و تحملي مسؤوليتك داك الساعة

خرج من تما مخلييهم واحد كيشوف فالثاني .. شريفة كتبكي فالقنت عرفات راسها صافي مشات فيها بالبيان ..! حداها اسية معنقاها كتسكتها و ملاك مشات لعند كريمة تشوفها فين غابرة حتى هي ..! أما محمد أمين فراه كيجبد فشعرو غادي جاي حامية فيه البيضة ..!

حكيم:( قلع بالجهد تسمعات بحال شي أكسيدون كيهضر فالتيليفون ) حسام .. حتى قو** ما يقيس فشريفة حتى نجي .. نلقاها مقيوسة نق***ها على الز** بوكم كاملين ... هاذيك أنا لي غنتفاهم معاها ( زفر بصوت مسموع ) قطع قطع دابا شوية و نجي

قطع معاه لابيل و دوز الخط لواحد من لي كيتعامل معاهم و لي متأكد غيجبدلوو الشفارة فينما كانوو ..! اكيد ما يخفاوش عليهم ..! كل سيكتور و البانضية ديالوو و كلهم كيعرفوو بعضياتهم دايرين بحال الخليات ..! و هو بنفسوو كيعرف أغلبيتهم .. لكن هاذو أول مرة يشوفهم .. باين فيهم دراري صغار يالاه بداو فالتحرميات ..!

حكيم:( نطق ببرود كيهضر فالتيليفون ) ولد الرقية ..!

شافت فمحمد أمين فاشلة و الدنيا ضايرة بيها ..! ما بقاتش حاسة براسها واقفة فوق الأرض .. بحال يلا محشية فشي قوقعة كتسمع غير الضربات د قلبها فوذنيها و الهضرة بعييييدة ..!

شريفة: غنسخف ( بلعات ريقها ) شي حاجة حلوة نشربها

حرك راسوو بالايجاب و مشى للكوزينة دارها السكر مع الما و رجع عندها كيحرك فالكاس تا ذاب و مدولها هبطات عليه مغمضة عينيها .. بقات هكاك خمسة دقائق و ناضت معاوناها أسية ..!

شريفة: غير خليك نمشي نغسل وجهي .. نشوف واش نرتاح..!

مشات بالشوية عليها حتال بيت حكيم و فتحاتوو دخلات ..! لقات ملاك كتدير الدوا لكريمة فيديها بجوج و لوخرى كتبكي و تشكي ..! كمشات عينيها بحزن ..! اللقطة لي حرقها فيها كتتعاود قدامها مرارا و تكرارا .. ضرها قلبها عليها بالجهد .. هي مجربة و حاسة بيها و بحر داك الحريق لي شاعل فيها ..!

ملاك: شريفة واش صافا ؟ ما تخافيش ان شاء الله ما توقع حتى حاجة خايبة ..!

شريفة:( بصوت بزز كيتسمع ردات ) نخرج من الدوش و نهضرو ..!

كريمة:( تبعاتها بعينيها و بفضول قالت ) مالها ؟ يانا سمعت الصداع gبيلة و كاع ما gدرت ننوض لعندكم ..!

ملاك:( ردات بحماس فمها كياكلها خاصها غير ما تعاود ) علاه ماشي دخلات للبيت و هزاتلوو الفردي و تسرقلها .. داولها الشفارة الصاك بلي فيه ( ضورات راسها ) غير ما عندوش الوقت أما ياكلها ماكلة .. خرجات عليه

كريمة:( تكات على الكادر بزز ) قدامها سخان علينا ( قلبات راسها كتعدد ) هااااويلي غذايذي على زماني يا تي تعالي يا مي تشوف بنتك فين عكبات بيها ( كتقلب بعينيها ) فين هوو التيليفون نغوت على عبد العالي يفكنا ..!

شريفة:( خرجات مع هضرتها و قالت بتساؤل ) شكون عبد العالي ؟

كريمة:( شافت فملاك و طلقاتها فيد الله )داك السيد لي gتلك gبيلة هو لي يهزل لمولا داري الخط و يgولنا شكون دا الشاكوش و فين تلgايه

شريفة: كيفاش زعما يقولك شكون دا الصاك ؟ باش غيعرفهم هو بعدا ؟

ملاك:( ردات بتدخل ) راه كاين لي كيعرف .. فايت تسرق لصاحبتي الذهب و مشات عند واحد الشوافة و عرفات شكون .. احم هاذيك شادية نيت

شريفة:( جلسات قدامهم شافت السمطة مليوحة قدامها و بلعات ريقها كتقلب فعينيها ) هاذشي أنا ما كنتيقش فيه ..! كي غيدير يعرف ؟ خوك راه عندو الفيديو دابا ساهل يطلعهم

ملاك:( ضحكات ) راه نتي لي غيطلعوك فالعمارية شوية و تلقايهم معاك .. ليوم تتكلاصاي فالحبيبيس يا بنتي هههه

خنزرات فيها يالاه جات تجاوبها و هي تنطق كريمة كي الحزقة ..!

كريمة: تكعدي gدامي يا شريفة نهربوو يانا و ياك ..! نطرgوو لعند عبد العالي نشوفوو شنوو يgولنا و تدوزيني لدار بويا نكعد عندو gبل ما يgتليني مولا داري .. اللهم نكعد فخربتي تا يبرد و يرجعني ثاني

ملاك:( بحماس نطقات ) أنا نتلف محمد أمين حتى تخرجوو من الدار ( هزات كتافها ) هربوو قبل ما يرجع لكم و يجمعني حتى أنا معاكم .. و غير ديري النية ا شريفة و سيري معاها شحال من واحد صدقاتلوو و عرف شكون سرق غير من الشوافات

شريفة:( شافت فرجلين كريمة و قالت ) غتقدري تمشي على رجليك ؟ انا نمشي معاك و نتسناك فالباب ما ندخل معاك ما تدخلي معايا

كريمة: نكابر و نتي تعاونيني ( شيراتلها براسها ) هزي من عندي ما تخرgي عليك و يالاه

بهدوء وقفات فتحات الماريوو كتشوف فجلالبها لي معلقين و عقلها كيدي و يجيب واش تمشي و لا لا ..! هضرة ملاك مزعماها شوية و لكن فنفس الوقت مترددة و مستغربة منها ما دخلش ليها لراسها كيفاش كتهضر عليها و تكرهها و فنفس الوقت باغى تعاونهم و كتقولهم سيرو ..؟

أما ملاك راه خلاتهم و خرجات لبيتها .. كتكتب فميساج بالزربة

ملاك: حكيم ..! سمعت كريمة غتخرج تمشي لعند داك الفقيه لي كيخدملها .. سيفط لي يتبعها دغيا .. هاذي هي الفرصة فين تعرفوو و نتهناو منهم هو و ياها

سيفطاتوو و بقات تصوني و تقطع عليه حتى دخل للواتس قرا مسجها مطلع لها ل vu

بدلات عليها بوحدة من الجلالب ديال كريمة لي مخيطين بذوق راقي و حتى الثوب من ديكشي الرفيع ..!

كلهم نقيين و محديين حيث قليل فين كتلبس شي وحدة منهم لاسقة فالكاشمير و ديكشي السواقي لي كيتباع فالحوانت ..! هزات صندالة خفيفة لابساها فرجليها لي ولاو لها حالتهم بداك الجرا ..!

مسحات وجهها من المكياج لي تخربق لها كامل ..! نقاتوو مزيان حتى بقات باينة التسرفيقة مصورة فحنكها ..!

شريفة:( شافت فكريمة لي بزز كتحرك لا يدين تكالي بيهم لا رجلين ) واش متأكدة غتقدري تمشي على رجليك ؟

كريمة:( بزز واقفة عينيها مغرغرين بالدموع و مرة مرة كتنقز فبلاصتها ) غير طلgينا دغيا

شريفة:( هزات كتافها و قالت ) كن كليت هاذ السلخة بلاصتك كن راني ضارباها بنعسة معتبرة ( ضحكات بالجهد ) سبحان الله كيرتاح الواحد و عظاموو كيخفافوو عليه ههههههههههه

تفتح الباب و دخلات ملاك بابتسامة كتشوف فيهم ..!

ملاك: انا تكلفت بمحمد أمين راه طلع لسطح عندو خمسة دقائق هكاك و يرجع .. سربييو خرجوو من هنا .. و أسية غير خليها معايا باش ما يعيقش بيكم و تجبدولي الصداع

شريفة:( هزات حاجبها بشك و ردات بصرامة ) غتبيعيني العجل غنخوي لخوك المزيودة كاملة و نخليه يدير فيك لي عجبوو ديري هاذي فبالك ما غنعقلش عليك ..! و أسية ما نقدرش نخليها مورايا فمدينة ما كتعرف فيها تا واحد .. ما تقدرش حتى ترجع بوحدها ..!

ملاك: انا غير بغيت نعاونكم اما ضبرو لراسكم ما سوقيش .. و على شادية انا درت فيك خير لا غير هي مولات كولشي ماشي انا باش تردي عليا اللومة ..! المهم دابا سيرو قبل ما يجي محمد أمين .. حتى نشوف شنوو نقول ليه فاش يهبط ..!

بتنهيدة قربات من كريمة شداتها من ذراعها معاوناها و هي كتزيد خطوة و تغوت بالحريق و الدموع هابطين لها بالجهد .. سلخ لها الجلدة على العظم و لا هي تابث و فينما تهضر معاها شريفة تقولها غنكابر انا صابرة و حتى هي مشات معاها باغية فوقاش تخرج من تما خلاص قبل ما يجييو يقرقبوو عليها .. خاصها تهرب و ربي كبير ..!

أسية: شكون هاذي ؟

شريفة: زيدي دابا نخرجوو و تعرفي .. اجي شديها من الجهة الثانية عاونيها حتى نتي

بمشقة الأنفس باش هبطات و جاب الله الطونوبيل حطاتها قدام الباب مور ما تسرقات اما سييير فوقاش توصل لهم ..!

فتحات اسية الباب و ركبوو خارجين بحالهم من تما .. و غير هي زهقات من هنا .. وقفات السطافيط من هنا ..!

شريفة:( هزات عينيها فيها من المرايا ) اجي نعتيلي الطريق راني ما عارفة منين نمشي ..!

ما كانتش من العاكزين نعتات لها الدار د عبد العالي لي ما بعيداش بزاف على فين هما و حتى هي فسباتة .. غير الفرق دار الفقيه كاينة فالقاع لداخل فبلاصة شعبية و مخلطة بزااف ..!

عكس الدار د عائلة راجلها لي جايا فجهة نقية و كلشي حداهم قريب .. لي حليتي عليه فمك تلقايه .. هاذشي لي مخلي حبيبة ما باغياش تخرج لهم من تما ..! عاجباها دارها و مرتاحة فيها .. و فاش كتبغي الكالم و السكات راها كتمشي عند حكيم لي عندو الدار فأحسن بلاصة فكازا ..!

كريمة:( شيراتلها بيديها ) وgفي هنا gدام هاذ الخربة غنزلوو على رجلينا ندخلوو مع هاذ السويقة و ها حنا عند عبد العالي

شريفة:( بتردد شافت فأسية و قالت ) ما عندنا ما نديرو يالاه نهبطوو معاها نتسناوها فالباب تكمل نوصلوها و نمشييو بحالنا للرباط ( تمتمات بسخط ) اش جابنا حنا لهاذ الدار الكحلة من اللول

أسية:( قربات لعندها كتهضر بالشوية ) خليها هنا و زيدي بحالنا .. شوفي فين غتدخلنا ا صاحبتي

شريفة:( باستها فحنكها و قالت ) ما نقدرش نخليها فهاذ الحالة بوحدها و حاملة من الفوق .. غير زيدي دابا و منها نيت نعرف الدار .. ضرووري نعرفها

أسية: علاش ؟

شريفة: أنا لي عارفة علاش ( ضارت عند كريمة لي ساكتة كتسناهم يساليو توشويشهم ) كريمة هبطي

شادين فيها معاونينها و هي مكوداهم مع الطريق كتوريهم منين يمشييو ..! حتى وصلوو للدرب المعلوم ..! الدراري صغار كيلعبوو فالزنقة .. العيالات حلاقمهم غيخرجوو بالغوات و فينما تعيط شي وحدة كتقفز أسية من بلاصتها بحكم ما مولفاش بهاذ الأجواء نهائيا ..!

وقفات حدا دار حانية بالدرجة و الباب دالحديد .. الصباغة مقشرة و الحالة حالة الله ..! دفعات الباب بجنبها كتتصرف بعفوية تقول جايا لعند خوها و لا واليديها ..!

كريمة: عاونوني نكعد gداموو نتسنى فنوبتي ( شافت فيها ) راني سايرة نجري على ودك .. طلgي راسك و شوفي شكون ضاربلك الضربة الصحيحة

شريفة:( ضحكات باستهزاء و قالت ) لا لا اختي انا خاطيني هاذشي و كن ما كنتي معطوبة ما نجيش بيك حتال لهنا ..! نتي و ملاك لي بغيتوو تعرفوو و متيقين هاذ العجب أنا غير موصلاك .. ما تقوليلي لا على ودك لا درت فيك خير .. الخير لي تديريه ديريه فراسك ..!

كريمة:( حركات راسها و عينيها غير مع الداخل ) يا و الله ما نتفكع منك و كيما عاونتيني نوgف معاك .. دابا زيدو gدامي الطفلات

أسية:( غمضات عينيها طالع لها الدم باغى تبكي ) شريفة يالاه بحالنا

شريفة:( تنهدات و قالت ) يالاه ندخلوها و نمشييو صافي .. عاونيها فهاذ الدرجة

هبطوو معاها كيشوفوو فحك السردين فين ساكن هاذ عبد العالي ..! الكوزينة مفتوحة على الدار مقابل معاها البيت فين كيخدم و بيت آخور فالراس لاسقة معاه طواليط بلدية ..!

الارض من الطين محفرة و الحيط كاين شي بلايص كيبان منهم الياجوور و ريحة اللوبية كطيب فوق البوطة ..! عوجوو وجهم بتقزز من داك الجو لكن الصدمة لي سكتات لهم الحس هي فاش شافوو البيت شحال كيطيح بالبشر و من لباسهم كيبانوو ماشي شي وحدين لي جاهلين بالعكس بفلوسهم و وظيفتهم .. و تا هاذ عبد العالي لي صدعاتهم بيه .. تشوفيه فالزنقة تقولي هنا نطيح هذا هو الراجل و إلا فلا ..!

شريفة:( تحنات عند كريمة لي جلسات فكرسي حدا الكوزينة كتهضر مع مراتوو ..! ) واش غتسناي هاذو كااااملين عاد غادي تدوزي نتي ؟؟

كريمة:( ردات بافتخار ) شتي اش سايرة نgولك .. عبد العالي دقتوو ما تكعد الراس من وراها .. كيجييو عندو من البلدان ها الطبة ها الاساتيذة ( ضورات راسها بأحياني ) تلgاي هاذ القنت هووك هووك بالبشر .. غير هذاك لي عندي لي ما يكر فيه والوو وا لا هو تهد ..!

شريفة:( تنهدات شادة فأسية لي تقباتلها ظهرها بالنغيز ) ايوا الله يهدي البشر هذا ما نقول ..! ها حنا مشينا .. نتي تبارك الله راكي فداركم دابا و غتعرفي تسلكي راسك من هنا ( بابتسامة صفرة ) ما محتاجاناش ياك ؟

أسية: و يلا تلفنا حنا نيت ؟؟

شريفة:( ضارت عندها كتهضر بالشوية ) ما تحمقينيش أ أسية ..! تمشي و لا تجلسي ..!

باقيين كيهضرو بيناتهم تدفع الباب و دخل راجل قصير و ضعييف الجلدة على العظم .. تقول كيمووت بالجوع ..! معاه خمسة د الرجال مكلظمين بلباس عادي ..! شيرلهم بيديه للداخل و قال

...: ها هي مراتي لي كتسحرلي باغى تقتلني هي و هاذ عدو الله ( شاف فالناس لي عندو تما و بدا كيغوت ) الله ياخذ فيكم الحق أ رباعة المجرمين .. لهلا ينزل عليكم الرحمة

أسية:( زيرات على شريفة لاسقة فيها و بصوت معصب ردات ) شرييييفة هاذو بوليس لي معاه ؟ اويييلي يا ويلي فين جبتينا فييين ( ضربات حنكها ) غتخرجي علينا

كريمة:( نطقات من موراهم كتحرك فيهم ) غطييييوني غيشوفووني ( ضارت عندها شريفة مخرجة عينيها ) كيعرفووني يانا و مولا داري

رجعات ضارت قدامها فاش هضر واحد من داك الرجال .. كيخرج فيهم بالصف : تحركي نتي و ياها من تما كتسناو العراضة ؟؟

شافت فيه كترمش .. عرفات الهضرة عليهم ..! مقدمينها هي فوجه المدفع .. كريمة جالسة فوق الكرسي مخبعة فيها و أسية لاسقة عليها من الجنب الثاني كتولول و تبكي فبلاصتها و ففمها غير نتي سبابنا ..!

شافت حتى عيات و جرات أسية حداها مزيرة عليها لا يمشي يقيسها شي واحد فيهم .. و بكل روح رياضية خرجات قدامهم بلا ما يحلوو فمهم عليها .. لقات سطافيط واقفة كتطلع فيهم ..!

ركبات جالسة حانية راسها حتى طلع كلشي و تسد الباب خارجين بيهم من جهة وحدة اخرى قريبة على لي جاو هما منها و مسرحة فيها الطريق بلا زحام ..!

شريفة:( شافت فكريمة لي جالسة قبالتها و بهدوء قالت ) علاش ضربك بعدا ؟

كريمة: لgاني نسحر ليه ( خرجات عينيها ) و يانا كنت نديرليه غير شوية دالمحبة .. حلال ما فيها عيب ..!

شريفة: لقاكي كتسحري ؟؟ و كيفاش حلال يا بنت الق*** ( صعرات كتغوت بصوت مهموس ) الله ينعل ط*** مي و مك لي جايا معاك .. ما درتش الخير تا فكري بقالي غير البشر .. يالاه وا ديري الخير ..!

اسية: ههههههههه دارلها هاذشي على السحور و حنا ماشيين معاها ؟ ( ضربات حنكها ) وا ماما فين خشيتينا أ شريفة فيييين

كريمة: يااو راحنا غاديين عندو .. هاذو لي طرgونا مرافg معاهم هو و سايرين يخدموو جميع ..!

شريفة:( حركات راسها ) مزيان كملات ( شافتها غتهضر و هي تغوت ) عرفتي و ما تسدي حلقك عليا حتى ننوض نولدك بيدي هاذ النهار .. قو** عليا د الخرا

أسية:( حطات راسها على كتفها كتبكي مخلوعة تمخضات بالصوكان لي دايرلهم الشيفور ..! ) كحلناها أ شريفة .. صافي مشينا فيها أنا و ياك ..! حتى من لي كارط ما عندناش غير هاذي غيسخسخونا عليها

ما رداتش عليها كتشوف فرجليها مههههههدنة حتى بدات كضحك بهستيرية حاطة يديها على فمها كتحاول تسكت فراسها و لكن والوو ..!

الدمووع هابطينلها بالضحك و هي شادة على كرشها لي ناضت تحرقها و بالتدريج بدات كتقطع فالحس فاش وصلوو ..!

شريفة: لي دردكاتو المعزة فراس الجبل غاتخلصوو فدار الدباغ ..! نزلي و دفعي جبهة براكة من البكى ( هزات كتافها ) ما طالعاش ما طالعاش .. اصلا الحبس للرجال مالوو غيخلعنا ؟ حنا عسكر و لا زمر ..!

أسية:( ردات مغبنة ) حنا بعر .. علاش جايبينا للولاية ديريكت ؟ مالنا قات٠لين روح ؟

كريمة:( سمعاتها و ردات ) حكيم خدام هنا .. حكيم مولا داري ..!

شريفة: مشرفيييين .. يالاه نزلي عند ( عوجاتها ) مولا دارك راه صحابوو غيكونوو علموه و كيتسناك غير تباني ليه و هاذ المرة غيقليك فالزيت بلاصة ما يشويك ( قلبات وجهها ) صبحنا على الله

أسية: نوضي ..!

هبطوو معاهم كيشوفوو بعويناتهم و ساكتين ..! خلاو الدروج لي كيهبطوو للاكاب و طلعوهم للفوق غاديين بيهم لواحد من البيرويات .. لي مكتوب فالباب ديالوو بالخط العريض " حكيم أمغار " .. النص دخل لعند حكيم و النص الثاني للبيرو لي قداموو

شريفة:( بقاو هما آخرين وحدين دخلوو .. لاسقين فيها داك الجوج بحال المسكة حتى عصبوها و همسات بالشوية بصوت كيغلي ) دابا قووووودناها قوووودناها لاش شاديين فيا ؟

طلقوو منها مصافين معاها فنفس الصف و هي عينيها غير مع أسية لي عارفاها من التسرفيقة اللولة تكر ليه بلي كاين و لي ما كاينش .. تا قصة حياتهم يلا بغاها تحطها لوو فوق الطبلة غتحطها ...!

تنهدات و هزات راسها بالشوية كتشوف فيه ..! جالس بنفس التيشورط و السروال د قبيلة ..محطوطين عندو فوق البيرو شي ملفات كيكتب فيهم ببرود بحال لي ما واقفينش قداموو .. مخليهم كيتقلاو فنار مهيلة ..!

يتبع...

‎