قصة عرس الذيب

هناك قلوب عاشت وماتت وهي تنتظر فقط لحظة عطف وإحتواء !

وهناك قلوب قد غدر بها رغم أنها لم تنبض يوما إلا بالوفاء !

و قلوب من الرحمة معدومة ، و بالغدر موصومة ، ملوثة بالكذب ، لاتعرف معنى للنقاء !

🐺 عرس الذيب

تّريذ أو ووشّن 🐺

بعد فترة راحة لي كانت طويلة شوية .. رجعتلكم بقصة جدييدة .. حبكة جديدة و لون مغااير تماما على كااع لي كتبت من قبل بأحذاث خااطفة للأنفااس .. سيداتي ! آنساتي ! سادتي ! اربطوا أزحمتكم للانطلاق في عالم الخطاايا 🔞☠

بقلمي:🍷 خولة الغريب 🍷

جاءتْ تراهنُني

و قالتْ ..

قُبلتي هيَ وحدها الأحلى

على شفةِ البناتْ

هيَ عاندتني

أنْ أتوقَ لقُبلةٍ أخرى

حاولتُ ..

قلتُ سأعترفْ

فعلا هيَ امرأةٌ تثيرُ و تختلفْ

لكنني رجلٌ بحقٍّ للأسفْ

يهوى مراهنةَ النساءْ

ويفوزُ في زهوٍ

و لا يخشى غرورَ العاشقاتْ

إني أراهنها

بأنَّ شفاهها

ستكونُ مثل حروفِ شِعري طيِّعاتْ

و إذا التقتني

سوفَ تغرقُ

ثمَّ تطفو

ثمَّ تغرقُ

إنني عندي من القبلاتِ

ما يكفي النساءَ الغارقاتْ

🍷🍷قصة تشمل من كل فن طرب "عناد" ... "قسوة" ... "حقد" ... "انتقامات" ... "قتل عمد" ... "تشويق" ... "كووميديا" ... "تفرشييييخ" ... "رومانسية".. "درااما" .. و العديييد من الخبايا نخليكم تكتاشفوهم مع أحذاث القصة !

أبطاال قصتناا جبتهم لكم من قااع الخااابية .. المغااربة الحراار .. هوو ذييب شاافها نعجة ساااهلة يطيب بيهاا جووعوو و تكوون طعاامووو .. صدقات لحلاحة و لحرووب نسى حاافضة و قاارية و على سم الرجاال مقرصة .. توعداات و وفاات و ليه رباات ..

بكحل عيينيها سحرااتوو .. و بشفايفها ذوباااتوو و بيدييها شكلااتوو .. !!

خربقااتووو و هبلااتووو .. !!

لراحتوو قلقاات .. و لمجاجوو قلباات .. و لفضوولووا حركاات ... !!

أما لعقلوو فراها سكناات و عششات .. و لرووحووا ملكاات !!

و لايني الذيب ما يبقى غييير ذييب .. عقلوو يوزن بلداان و بحوور .. و شطاارتوو هي رااس ماالوو اييواا و قلة النية و الفهاامة عنوااانووو .. يلا كانت هي عويشة ذويبة هو رااه الغوول لي ماالهاا منوو هرووب و لا بعاااد .. هي قصة مااشي بحال سااير لقصاااص .. و بحروووفي غتكتاشفووهاا و تعشقوووهااا و تسرييي لكم فالعروووق .. و نتووما لكلامي يلا قدرتوو حنتوووو !!

مرحبا بيكم معايا فرحلة جديدة مختلفة على كل قصصي لي كتبت من قبل ..

عرس الذيب قصة من خيالي لكن بأحذاث كلها واقعية ممكن توقع مع أي واحد ( جواب لي غيسولوا واش حقيقية .. هي واقعية و ليست بحقيقية ) .. نقلت لكم فيها جانب كبيييير من الواقع المخفي لي بزاااف غافل عليه .. بشخصيات مميزة و معقدة خدااو مني وقت كبير فالتفكير .. من هنا انقولكم ما كاينش تغيير فالأحذاث نهاائياا و لا حتى فالشخصيات .. منها يكون تنوع فعالم القصص و نشوفوا شخصيات جداد عمرنا قرينا عليهم و لكن من المستحييل ما نكونوش صادفناهم فحياتنا الواقعية و لو من بعيييد . نتمنى لكم قراءة ممتعة ❤

راكبين جوج بنات فطونوبيل ميني كوبر فالأحمر .. وحدة ساايكة و الثانية حداها كتنكر

... 1 : تعطللللتي أ صااحبتي .. ساااعة و أناا كنتسنى فييك .. مخلياني منشوورة حتى قلت صافي هااذي سمحاات فياا و مشات للعرس بلا بياا

.... 2 : نوييهاا غييير زوينة ا بنت الحرااام .. أناا أصلا ماشية غيير على ودك .. ما معمراش رااسي بهااذ العرس عارفااه غيتقلب كناازة

.... 1: ماالناا على فاالك أختي اوييلي ؟؟ ( هبطات مراية قدامهاا تتقاد عكارها ) أنا بعداا فرحاااانة اندخل لداار بووعزة ... تقلب حتى مووسم مهم نااكل و نشطح و موولاهاا ربي

... 2:(ضحكات) لي ضاربك ضاربك على كرشك هههههه باااز ( سكتاااات تتفكر و قالت بتعجب ) عرفتي ! عممممري فحياااتي تصورت غيجي شي نهار يتزوج فيه إليااس على مرااتوو و يديرلهاا نهاارها مطرطق بالفوور يا الشييفوور و فين ؟ فالفيلا فين جالسة مرااتوو نيت ( تنهداات ) و لكن الرجاال ولاد الحرام منهم ماا كاين .. توقعي معاهم أي حاجة .. !

.... 1: علاه هو مزوج من قبل ؟؟ أوييلي و أناا كيسحابلي أول مرة ؟؟ أجي نتي بعداا فين عرفتي هااذشي ؟؟

.... 2: ايواا رااه شحااال من مرة خدمت معااهم .. ديك العاائلة كنعرفهاا واحد بوااحد ..

.... 1: مسكينة مرااتوو غتكوون اتحمااق .. و داير العرس عندها فالفيلا ؟ ويلي على ولد الحراام باغي يطرطق لها المراارة ؟ (سهاات ) بففف تلقاايه مزوجها بزز عندو زااايدة نااقصة .. دوز عليها الدكاكة و جات هاااذي جمعااتلوو و طوااتلوو حتى رجع غير تاابعهاا كيهتهت

.... 2:(عطاتها صبع ) هااا مزوج بيها بزز .. عرفتي مرااتوو لولة كيييي داااااايرة و لا ماا عرفتييش هههههه ولاهيلا قالك جمعاتلوو و طوااتلوو .. حتى تكون شريفة سااهلة ليهم .. شفتي وااخاا ما عندييش معاها و ما كتسرطلييش .. هي فشي شكل معفرة .. الشووفة هي لخرى ما كطلعهااش فبناادم كتحسيها مقروصة و غير منوية بوحدها .. ( هزات يديها كتشالي بيها حدا نيفها ) كتققققطر بالعيااقة ياختي و لكن حاااارة و صعيييبة كااع لي فداك الدار ملعبااهم على صبااعهاا و هو ماا كاين غير لالة شريفة لالة شريفة .. تا هي مجبببدة بنت الحراام .. عندهاا واحد الذووق قتااال .. !

.... 1: و منين هااذشي كاااامل لاش مزوج عليهاا ؟؟

....2: وا هااذشي لي مهبلني ؟؟؟ عييت نفهم و الفهاامة تحبساات ليااا فهااذ اللقطة .. و العرووسة الجديدة يا حسرة صااااحبتهاا الرووح بالرووح .. كانت مكتحيدش من عندهاا و حااسباها بحال ختهاا .. و لكن كاينين شي كلباات ما كيحلاو ليهم غييير الرجااال لمزوجيين .. لاش ؟ الله و علم ؟

.... 1: واا قووليهاا من لووول باااينة تلواات عليه كي اللفعة .. ضربات ضربتهاا و بخاات سمهاا على صاحبتهاا و رجعات لوور كتمثل البراءة ! خلاوها المصريين ياا ما تحت السوااهي دوااهي

....2: اودي تاا وحدة ما بريئة فيهم .. كن كانت شريفة شي بكوشة و نية نقوولوا أماا هماا وحدة كفاااس من الثاانية .. و خباارهم دابا يجييبوهاا لخريين غير تسناي و عقلي فين قلتها لك ....

.....1: مهم دابا خلينا منهم و قلبي على فين تبلاصي طونوبيل .. بانلي الشاارع مبلووكي

بقااو مدة كيقلبووا على بلاصة بزز لقااوهاا .. و نزلوو هاازيين الكاادوو و ضاربين حطة ناااضية .. و مالهم ما عليهمش الله تا هما يحسوو براسهم همة و شان و يفرحوو ؟؟

دار بوعزة .. دار الخير و الخمير و لي قصدها ما يعود خاايب .. ناسها معرووفيين فالمدينة و كلشي كيشهد ليهم غير بالخير و لي ما شايفهم راه سامع بيهم .. ! واقفيين جووج حجاامة فالباب بالطااغية الحمرة و السلهاام فلبيض كيستقبلوا الناس بالحليب فكويسات صغاار و طبق ديال التمر فوق منوو الكراكاع معمر تال القبة ....

غير كتفوت الدخلة كتلقى فرقة موسيقية كيستقبلوك بالايقااع و الآلة .. و حداهم أم العرووسة و العرييس كيتساالموو مع حبابهم .. !! بااركووو لييهم و عطااوهم لكاادوو و دخلوو كيسرحوو فعينيهم بابتساامة .. الدنياا مخلطة بالشطييح و خالد البناني مشششخض الدنيااا بالأغاني الشعبية لي ما كتخطى حتى عرس .. !

ماا حسووو براسهم غير مخشيين وسط الناس كيشطحووو تا هماا و يحركوو فكتاافهم و يديييهم و متبعييين الغنى كيعااودوو مووراااهم

《 حنااا جيينااا نبااركووو على لالة لعرووسة .. مبرووك عليك يا لالة مبرووك علييك .. 》

....1:( حنات على وذن صاحبتها كتغوت باش تسمعها ) فين هو العرييس كااع ماا بانلي ؟؟

....2: ماا قشعتييش موو من قبيلة و هي غاادية جاية بالتييليفووناات .. و العرووسة كتسنااه مبندة فالعماارية بااش تدخل ..يعلم الله فين شاادهاا ؟؟

....1: هيييه !! ( دورات عينيهاا كتطلع و تنزل فلبنات لي معروضين .. غير بنص عين لعلى و عسى تقلع شكون شريفة فيهم ؟ .. ساعة واالوو .. رجعاات نغزاات صاحبتها و قالت ) فيين هي مرااتوو لولة .. يلا بانتلك وريهاالي نشوفها كي داايرة ؟؟

...2: ماااا عرفت تااناا ما بااانتلييييش من قبيلة و أنا كندور فعيني عليهاا واالوو .. غاابرة لا هي لا العرييس ؟؟

بااقي ماا كملات هضرتهااا و هوو يباانلهاا فالتلفازة .. موولاي السلطان خاارج من الطوونوبيل .. بجباادوور بلدي فالصفر بااارد ماايل للباج .. محلوول من القداام شوية و زغيبات كووحل كيباانوو من صدرو .. بلغة فرجلوو مع تقاشر بوويض نااصعيين .. دااير سااعة فيدييه و خااتموو ، حاطها جهة صدروو و كيحرك رااسوو بابتساامة خفييفة .. !

حرووفوا عربية سودااء .. باين عليه الشيب فشعروو و لحيتوو مع بعض التجااعيد لي باينة حداا عينيه و جبهتوو .. !

....2: هااا هو العريييس رااه موو فين وااقفة تتهضر معاه .. على هاذ الحساب دااباا غيدخلوو العروسة .. و لكن كااع ماا باانتلي شرييفة يمكن ماا غتحضرش ؟؟

هزات صااحبتهاا عينيهاا كتبركَكْ و تسقي فضوولها .. تا تفتح لباب القداامي دالطونوبيل و نزلات .. أنثى في قمة الأنااقة .. بتكشيطة فالغووز بااااارد كلها محجرررة .. منحوووتة على ذاتها .. مبينة تفاصيلها بطريقة جميلة .. ! جاياها عباار و هاابطة لتحت بحال الوردة حد رجليها مغطايهم .. !

الوجه كيبري .. العيينين بحاال الغزاال كباار و مجبديين .... و سيدهم الفم ضاربة ليه لالة موولاتي تعكييرة .. تاا ولى بحال شي فريزة تشهااي غير ذووقييهاا .. ! الشعر كحل كي الظلام ..طوييل و ناازل مع ظهرهاا تاال النص ملويي و من القداام مشدوود بمشيطة خفييفة و لافروونش مقسوومة فالنص .. و زايداها بتااج صغيييور فالأبيض مع لوونسومبل دياالوو لي بااين فعنقها و وذنيهاا و يدييهاا .. !

كااع الأنظاار توجهاات لييهم و هماا دااخليين .. شااد فييهاا شدة العمى فالظلمة تقول خايفها تهرب ليه .. ! تا وصلوو جهة العماارية و تحناات بابتساامة مبينة على سناانهاا ثلجة حدا ثلجة .. ! جبداات بوااطة فالحمر فتحاتهاا و ركباات ليهاا تعلييقة دالذهب الأبيض و سلمات عليهاا بهدووء

شريفة: مبروووك

وقفاات كتقاااد لبستهاا و تلمس على شعرها .. فنفس الوقت ترمات فوذنيها هضرة

إلياس: جلسي مركنة .. ماا نبغييش مشااكل هاذ ليلة

شااف فيهاا بصرااامة أماا هي تبسماات باستهزااء و خلات النكافات ضاايرين بييه كيزغرتوو و يصلييو على النبي و يوريوه فين يوقف بااش يااخذوو لهم تصييوراات .. ! أما هي دازت عند عكوزتها و قالت بهدوء

شريفة: أسية فينها ا ماما حجيبة ؟

حجيبة: باقى ضاراها كرشها راه فبيتك لفوق متكية خليها ترتاح و دوز نتي دخل تجلس باركة من الدوران

حركات راسها بالايجاب بهدوء و دخلات للصالون لداخل جلسات و العينين عليها غياكلووها و التوشويش على الجهد ..! أما فالجردة .. تصورووا العرسان و تهزاات لالة لبنات فالعماارية على أنغاام خاالد البناني ..

الفرحة غتنقز لييهاا من عيينييهاا و هي كتشاالي بيدييهااا .. حباابهاا ضاايرين بيهاا كيغنييوا و يشطحوو و يشيرووا لهاا .. و كاين لي غير جاالس فبلاصتوو كيتفرج من التلفاازة لي كتنقل لهم كل الأحذااث

....1: ما كذبتييش مراااتوو لولة فنة فييين تبان الثاانية .. هاذي يتزوجوا عليها الناس ؟ أويلي لاطااي كتغني يا ليل ياا عيين ! فنة و مسرااارة كتحمق .. شووفي غير الجلسة كي دايرة و الصدر كي مدفووع و النخوة حتى فالشووفة .. !

....2: راه قتلك زويينة .. أنا لي بنت نهار شفتها تزعطت فيها حرااك هو و لكن دابا راها زاايدة ملحة فوق طعاام .. ليلوونتي و الشفاار نعام ا لالة .. ورقيلي على التاج ههههه

....1: من حققققهااا ما نلوومهاااش يلا بغات تبان على كلشي .. راه الله يحسن عواانهاا مسكينة

....2:( ضحكات ) شفتييهاا كي علقاات لييهاا ؟ تلقاها من الدااخل كتحك ما تكرهش طيير عليهاا تمضي فييهاا سناانهاا

....1: لا لا جااتني مااشي من النووع العيشووري بالعكس ما ترضاااش .. أنا بلاصتهاا ما نحضرش أصلا لعرس رااجلي حراااك نباارك لييهااا و نزرزرهاا ؟؟

....2: ما شفتيهااش خلاتهاا كتقلى كتسنااه و هي شااداه معاهاا .. حتى ( طولاتها ) رشقااتلهاا عااد سيفطااتوولهاا .. غير هااذي راها ضربة قاااضية للعرووسة تبغي تمووووت فييها .. راجلهاا جاي مع مرااتوو لولة تاال شمن وقت بحال يلا غييير معرووض ..ماشي عرسوو !

مقاابل مع البرزة فين طاالقة العرووسة يدييها و رجلييهاا كيتنقشووا .. جاالسيين اللعاباات محمييين الطرح .. و تباارك الله عليييهم كلهم مكضريين و وااقفيين على الصح .. لاابسيين قفاااطن فالموووف و محزميين بمضاام دالتوب عاديين فالصفر .. الأغلبية دايرين ليميش و جامعين شعرهم لوور مكحلين العينين و ضاربينها بتعكيرة مشعشعة .. !

ناااضت شرييفة بابتساامة جهتهم علقاات لييهم و وقفات كتشطح كتحرك غيير يدييهاا و كتاافها بالشوية .. مدة قليلة و تحناات عند المعلمة ديااالهم و هضراات معاهاا فوذنييهااا حتى بدلاات الرييتم فالبلاصة و بصوت قوي رنااان قالت

اللعابة: يااا واااعرة صحييبتي عليكم يااا واااعرة و بالصواب بزااف عليكم

كيعاودو موراها : يااا واااعرة ياااه

اللعابة: وا ردي بالك لياا .. واا صاااحبتييي ياااه

كيعااودوو موراها: واا صااحبتييي يااا ااااه

اللعابة: و اناا حباابي و بعااد عليااا

كيعاودوا موراها : واا صااحبتيي ياا ااااه

اللعابة: وا صااحبتي على فين نصييبك

كيعاودو موراها: واا صااحبتيي ياا اااه

اللعابة: واا صااحبتي على تااع درااعي

كيعاودو موراها: واا صااحبتيي ياا اااه

ماا حساات حتى خداات شرييفة المييكروو من عندهاا و بصووت حنيييين و فيه بحة قتااااالة كملات الأغنية .. كتشطح بالنخوة و العين فالعين مع العرووسة !

شريفة: وا راا ولادك هماا ولاادي

موراها: واا صااحبتييي ياا اااه

شريفة: وا راا حباابك هماا حباابي

موراها: واا صاااحبتيييي ياا اااه

شريفة: ا صاااحبتي لياام بداالة

موراها: واا صااحبتيي ياا ااااه

شريفة: واا صااحبتي على تاعت قلبي

موراها: واا صااحبتيي يااا اااه

تخنقاات و بانت فصوتها بحة بكاااء .. حتى كيوقف لها الكلام فالحلق و كتبغي تشهق و كترجع تسرط الكية و تكمل غناها .. عيينيييهاا تغرغروو بالدموع و حماااروو راافضة تهبط دمعة وحدة قداام شي حد و هااذشي غيير ماا زااد خنقهااا حتى النفس ماا بقااتش تقدر تطلعوو و مع ذلك معااندة

شريفة: اوو صحابااتي ماا يدووزونييش اهاااه ..

ا خليك حدااياا ما دوزينيش اهاااه

موراها: او صحاباتي و ما يدوزونيش اهاااه .. ا رااه عزاااز علياا و ماا دوزوونيش اهاااه

شريفة: ا نجااة ما دوزينيش اهااه واا خليك حداايا و ما دوزينيش اهاااه

موراها: او صحاباتي و ما دوزونيش اهااه

شريفة: و حتال النهااية ما دوزينيش اهاه .. اصحاباتي ما دوزونيش اهااه .. و لا شتوو العدوو ما تلووحونييش اهاااه

و قبل ماا تختم نااضت المعلمة دياال اللعاباات و عنقااتهاا بيديها من كتفها باش تاخذ الميكرو .. الشي لي جا شريفة على قلبها بحال العسل و خشات راسها فصدرها حتى تسمعاات شههههقة حاااااارة من قااع قلبهاا .. تنخصييصة دالبكى كتقطع القلب .. خلااات كلشي مصدوووم و لي فااهمهاا و عااارفهاا شكوون رااه بكى معاااها و أثراات فييه حتى ما قدات !

طلقاات منهاا و خرجاات كتزرب للجردة لووور كطلع النفس بزز حااسة بشي حااجة وااقفة لهاا فالصدر ماا مخليااهاش تتنفس .. حتى وجهها تحقن فييه الدم .. عينييهااا خرجوو و هي كتشير بيدييهاا فالجنب بحال شي وحدة كتغرق باغى غير طلع النفس و كضرب و تشهق بالجهد و واالو .. تا حساات بيد شداات فييهااا .. ضوراات وجههاا لقااتوو إليااس كيشووف فييهاا بحزن

إليااس: تنفسي .. تنفسي .. بشوووية طلعي نفس .. شهييييق زفييييير يااالااااه

داارت لي قاالهاا و هي كتشووف فيه بعيينييهاا فااازكييين و واالوو ما قادراش تنفس حتى بدااا كيشوف وجهها كيزراق قدااموو و هو كيتفتف تالف ما عارف ما يدير .. كيطرش فوجهها بالشوية و مزير عليها كيغوت باش تتنفس .. طار على وااحد القرعة دالماا و فتحها كيشربهاا و يمسح على ظهرها بخووف .. حتى بدااات كتلقف .. بصوت دشي واحد كيموت و لا عاد نجى من الموت !

تحنات كترجع كاااع لي فجوووفهاا و هو شاادلها الشعر لوور و جاامعلهاا التكشيطة باليد الثااانية كيشوف فيها مخسر وجهوو عايف و ما قادرش يخليها فديك الحالة .. ! ما زفر و ارتاح حتى طاحت على ركابيها كترد النفس و تبكي بخووف .. شافت الموت بين عينيها .. و غير توكضات و حسات بيديه عليها تنفضات منوو بجهد كتغوت

شريفة: طللللق بععععد منيييي .. صفيهالي و ارتاح ! الله ياااخذ فييكم الحق الكلا٠٠ااب

كتبكي و تمسح فعينيها بالجهد حتى شدهاا بزز منهاا جرهاا عندوو كتنثر و هو كيعنق فيهاا و يمسحلهاا فدمووعها

إلياس: شووو صاافي اشرييفة .. تهدني .. ما طراا واالوو صافي ( باسها فجبتها ) قرااي المعوذات احبيبة يا الله ... !

غير سمعاااتووو تقوول ركبوولها البريز بالأعصاب .. تنترات منوو و بعداات كتمسح عينيها تا خربقات مكياجها .. ما راضياش تبكي عليه و لي فيها ما هناها .. !

شريفة:( بصوت عاالي ) بغييتلك حبووووبة فهذاااك لي مزييييغك ا ولد الحراااام ( بانتلها القرعة دالماا لي عطاها شربات منها .. تحنات هزاتها فتحاتها و شيرات بيها جيهتوو حتى رجع كيقطر ) نقرااا المعوذااات ياك ؟؟ أنااا بغيييت نقراااهم على قبررررك ان شاء الله ..

إلياس:( حنى رااسوو لي كيقطر و دوز يدوو على وجهوو و نفض الماا بالجهد هااز عينيه فيها كيخنزر ) خليييك تحضري بلحمك صااافي حسن لك

فالبلاصة سيفطات ليه للكمارة القرعة غير بالزهر خوى لها و قرب منها لوالها يديها بالجهد تا تقلبات معاه و ولات عاطياه بالظهر

إلياس: رااه غنضربك نعووجك هداااي

شريفة:( طلق منهاا و بعداات كتنهج و تقااد فشعرهاا و حاالتهاا مخلياه كيلهث حتى هو سخفااتوو ) بغييتلك ضربة .. يهزووك مشتت ما يلقااو فيييك ماا يتجمع ( شافت فيديها حمرة مطبعة و كتحرقها و بدات تبكي ) حكرتيينييي و اناا بوووحدي .. عارف واخا ديير فياا لي بغييتي غنبقى معااك ياك ا إلياس ... لقيتيني لقمة سااهلة ما ليا والي وا لا تالي (ضربات على ذراعها ) الرجال لي يديرولي الهمة و الشان و يوقفوك عند حدك و يحاسبووك السلكوو٠٠ط .. و لكن عندي الله كبر من كووولشي

حنات راسها كتشهق حتى ندماتتووو و قرب منهاا كيسكت فييهاا و يبووسلهاا فيدييهااا يا ربي غير تسكت .. عارفها فهاذ اللحظة بالذاث ما كتبكيش بلعاني و ماشي فشووش منها .. بلعكس موضوع كيقتلهاا من لدااخل و عندها حساسية منوو .. !

عاودلها البوسة فيديها و شدلها فراسهاا مهبطوو جهتوو بايسها فجبهتها .. و مع البووسة مع خرجات العرووسة فيهم هي و النكاافات جايبينهاا تبدل اللبسة .. تسقط فيها اللوون و هي كتشوفهم هكااك و ديك الضحكة لي كاانت مرسوومة على وجههاا تقلبات لصدمة .. تا لقات رجلييهاا جارينها لعندهم

نجاة: ش شكدييرو هناا ؟؟

قلبات شريفة وجهها من جهتهم كتمسح فعيينييهاا و تبرد على وجهها و إلياس كيشووف فنجاة ببروود ..

إلياس:( حاضي شريفة بنص عين ) سيري ا نجاة دابا بدلي عليك ما تعطلييش .. ماشي وقت الهضرة

نجاة:( بعصبية ) كييفااش كيفااش ؟؟ وااش من نيتك ا إليااس ؟ أناا تقوولي هااذ الهضرة ( باستهزاء ) راه عرسنا هذا يلا نسييتي ؟

شريفة:( ضارت عندها مشربنة ) و يااك لبااس ا الشرييفة ؟؟ كيهضر مع مراااااتووو ااش كااين !! يااكماا نسيتي رااسك معاامن ؟؟

إلياس: شريفة صاافي .. نجاة دخلي بدلي راه كيتسنااوك

نجاة:( ما داتهاش فيه و بغضب نطقات ) يلا مرااتوو اكبيدة حتى أناا مرااتوو .. شنوو تكوني فملك الله كااع ؟؟

شريفة:(ضحكات باستفزاز ) أناا لي دخلتك من البرد و الشتى فاش ما كنتيش تكساابي الساانتيم الكحل .. أنا لي لقطتك فنصاص ليالي و دخلتك لداري و وكلتك من خيري .. بغيتهم يوقفولك فالركابي ان شاء الله نتي و هاذ بوبريص لي فرحاان بهموو

إلياس:( بحدة) شرييييفة سكتيينااا

شريفة:( شافت فيه و رجعات عينيها على نجاة بابتسامة باردة ) أنااا لي عمرك توصلييني و ديييما غنبقى شي حااجة بعييييدة و صعييييبة توصلييهاا واااخااا تمووووتي

نجاة:( قربات منهاا و قالت ) كنااااا و كنتوووو احبيبة .. يلا نتي باااقة عاايشة فلبااارح .. نفكرك .. باليوووم ( هزات يديها لي فيها الخاتم ) اليووم أناا مراااااتووو .. و نتي لاااااحك بحاال الزبل و جاااب لااالااااتك و منها تعرفي مقامي من مقامك .. و ما كايناش شي ملقطة قدك

شريفة:( شافت فإلياس بدمووع مغرغرين فعينيها ) شكراا بزاااف ا إلياس هذا هو المضموون فيك .. خليتي لي يسوى و لي ما يسوى يهضر علياا

حطات يديها على صدرهاا بحركة حزينة و يالاه نوات تزيد بحالها تخليهم يضبروا راسهم .. كان شدها من يديها مزير عليها و هز يديه الثانية مقلووبة و عطى بيها لنجاة لوجه بتسرفيقة حاارة قلبات لها ملامح وجهها .. التااج ماال و المشطة تفكات شوية .. حطات يديها على حنكهاا لي خلاه لها حمر كيوزوز و هي مصدووومة ما متيقاش شنو دار .. ما كتسمع وااالو من غير التصفاااار بالجهد فقاع وذنيها ..

ما دارت حتى رد فعل لحد الساعة غير النكافات لي دخلوو بيناتهم كيفكوو حشماانين من الموقف و مصدووومين فالتسرفيقة لي عطاها ليلة عرسهاا ... !

المكياج ما بقى ماكياج و العينين ما بقاو عينين رجعوو جمر .. الشعر تفك و المشطة كلها مايلة .. التاج مليوح فالأرض و كرسي مقلووب فالجنب .. كيتسمع صووت شهقاتها بالجهد فالبيت فين ضايرين بيها خواتاتها و أمها فقط ما علموش الرجال باش ما يزيدش يكبر المشكل أكثر ..!

مقابلين معاهم شريفة لي كطلع و تنزل فيهم باشمئزاز و إلياس لي مربع يديه كل شوية يزفر بصوت مسمووع غاضب .. !

الأم: سمع ا إليااس .. نهار جيتي عندناا شرطت علييك بنتي ماا يمسهاا ضر بسباب مرااتك و نتاا أكدتي علياا وحدة ما توصل الثاانية و صهد شريفة ما يقيسش كبدتي

شريفة:( ضحكات ) أ سبحاان الله أ مداام ؟؟ وااش نتوما شوية أ نوورماال ؟؟ عندكم شي عقل و لا متكسابوهش ؟؟

إلياس:( من تحت سناانوو ) شرييييفة هنييينااااا

شريفة:( هزات حاجبها ) وا غير بناادم ما يسحاابلووش رااني سااكتة حيت خاايفة منهم !! راني نااكل أصل مهاا بسنااني يلا غيير نواات تجبدني ( قربات منهاا )

إلياس:( بالغوات ) تحركي خرررجي من هناااا بااركة من الشوووهة

شريفة:( عضات ففمهاا بصبر و ردات ) ها هي م@ودة بحالها أ سي إليااس ( خرجاات و كملات جملتها ) الشووهة بااااقي ما شفتي منهاا واالووو غير تسنى !!

أماا لدااخل غير خرجات شريفة شااف إلياس بصراامة فنجاة و قال

إلياس: شرييفة كاانت قبل منك و نتي عااااارفة هااذشي و قبلتي بيه .. الصدااع الخاوي ما عندي ما ندير بيه .. عليك بالاحترااام ليهاا و حتى هي نفس الشيئ ..

تدخلات الأم و قاالت

الأم: ايييه و ها هي نااضت قللات الاحتراام كااع .. تنوض تعطيهاا للوجه ليلة عرسهاا ؟ ما جلسات معااك لا شهر و لا عاام باش تطلع لك فالراس .. من نهاارهاا باادي بالعصاا ؟ مالها حماار ما كتفهمش تهضر معاها ؟؟

إلياس:( ببرود ) هضرررت و ماا فهمااتش .. و هااذيك مااشي هضرة تتقاال و قدااام النااس " النكافات "

نجاة:( بانفعال كتبكي ) و حتى التسرفيقة لي عطيتيني ما كتعطااش قداام النااس .. شوهتيني قداامهم و صدمتييني .. طيرتي عليااا كاااع فرحتي .. ما ضنيتكش هااكااا يا خساارة ... !!

إلياس: حتى دااباا ما زال الحال يلا ما عجبكش الحال العدول لي جمعنا يفرقناا و ها حنا هانيين من الفريع

نجاة:( خرجات فيه عينيها صدمهاا ) يااك ؟؟ ( فاش ما ردش عليهاا قالت ) ما غنوصلهااش لدييكشي لي كتمنى .. و ليلتي غنكملهاا و من بعد ليناا هضرة طوييلة .. !

إلياس:( حرك راسوو بهدووء ) ديري لي عجبك و لكن ( حط يديه على وذنيه ) حس الصدااع بينااتكم ما نبغيهش .. خلي ليلة تكمل على خير

أما شريفة راه خرجات من الجهة الثانية دالجردة عوالة تطلع لبيتها تقاد حالتها .. حتى لمحات شاب فالعشرينات جاي جهتها .. صغرات عينيها و قربات منوو و بمبادرة قالت

شريفة: نتا خوو نجاة ياك ؟ عمر لا ؟

الأخ:( بابتسامة و افتخار قال ) هو هذاا .. كاين ما نقضييو ؟؟

شريفة:( صغرات عينيها و بابتسامة باردة ردات ) لا راه غيير ماماك كتقلب عليك هي و خواتاتك .. راهم فالبيت دالجردة فين كيبدلوو العرسان عرفتيه ؟

الأخ: اااه وي .. واخا انا نشوفهم اختي شكرا

شريفة: هذا وااجب ( نحنحات ) و غير سير دغياا راه الصداع ناايض .. قياس الخير العريس ضرب ختك بوااحد مولاتي تسرفيقة حتى هرسلها الوجه ( حطات صبعها تحت الجفن د عينيها ) شفتوو بعوينااتي لي غياكلهم الدود .. ! أناا نقوول و نتا قوول الله و علم ..؟ ايوا راه تقلبات الفرحة كنااازة الله يستر

الأخ: كتهضري على نجااة ؟؟ ضربهاا ؟؟ كيفاش ضربهاا ؟؟

سمح فيهاا و مشى كيطيير لجهة فين نعتات ليه شريفة .. أما هي عوجات و فمها و تمتمات

شريفة: يعطييكم ضربة كاااملين

كملات طريقها طالعة لبيتها .. فتحاتو و دخلات .. لقاات بنت تكون فعمر 17 لعاام زعييعرة مظفرة شعرها جنب .. حروفها حلويين و باقي باين فيها البراءة و مع قصيرة و ضعيفة لي شافها كيعطيها قل من عمرها ببزاااف .. ! متكية فووق الناامووسية مكمشة .. شافت فيهاا شريفة و ضربات بسااكهاا تا جاا حداهاا و غمزاتها

شريفة: أفيين أ حي و ميت ؟ فاتك الحال ؟

أسية: شوووية .. شربت دواا بغيت غير ننعس شوية نرتاح و مع الصدااع ما قدرتش

شريفة:( دوزات يديها على شعرها بحنان و ربعات رجليهاا جالسة حداها ) وا غير صبري كااع كتدوزها علينا فاش كتجينا و زادوك هاذو بفريع الراس .. التعربيط الخاوي

أسية:( حركات راسها و قالت ) أجي بعدا نتي ..ااش بقيتي درتي مع عمي إلياس ؟ باش فضيتيوها ؟ عرفتي مشى يحماااق و هو كيقلب عليك سيمانة و هو كي الزومبي .. خلعتيني حتى أنا اصاحبتي هزيتي راسك و زدتي خلفة ما فكرتي فيا و لا فخالتي حجيبة لا تا حد ؟

شريفة:( تنهداات و قالت ) و أنا شكون فكر فياا ؟ داك موو حلات فمها و قالت شي كلمة ؟ كن بغات تتدخل كن وقفات ليه حسكة .. الحيرة غير فبنتي بنتي .. ياك هي أول وحدة علمهاا و رصى معاها .. أووودي .. خليناا من الزمر باش غنفضيوها كااع ؟ بخلى دار بووه لكل٠٠ب غير بلاتي عليهم

أسية: أنا ما عارفاش كاع لاش ناض هاذ الصداع كنتوو هانيين فشهر تقلب كلشي حتى سقنا الخبار راه تزوج و كتب كتاابوو و نتي نضتي جمعتي حوايجك و مشيتي بحالك ما بقالك لا حس لا خبر .. فين لقاك بعدا ؟ و شنوو درتي معاه ؟

شريفة: راكي قولتيها ا أسية نتي ماا عااارفة واالوو و ديكشي بيناتنا أنا وياه مزعلك معلك ( تنهدات) ماشي هو لي لقاني أناا لي عيطت ليه فاش ضربت حسابي فراسي .. و ما درنا والو نوضناها سباط حتى كنت غنشقلوو راسوو و نسيفطوو يغرز و من داك النهار و هو سااد علياا فالدار ديال بوسكورة خايف نهرب ليه مسكين حتى للبارح عاد جابني لهنا .. باغي يفقصني زعما هه !

أسية: ما فهمت واالو فيكم والله .. حتى هو هاذشي ماشي دياالو تقول هزيتي راجل و حطيتي آخور ؟؟مهم سلكي تا ربي يدير تاويل دالخير

شريفة: نتي راك باااقى غالطة فيه ا كبيدة و كيبانلك بحال الملاك .. أناا لي عاجناه و شارباه ماا راه عشرة عشر سنين سهلتيها ؟ هرف عليا منين كنت بعلوكة بنت 16 لعام و لكن أناا لي كنت كنقلب عليه .. كان الحل الوحيد قدامي ..

أسية: كنت صغيرة أناا عاقلة غير على التشاش .. كنتفكر شي حوايج من الصغر و لكن ماشي بزااف .. كان كبيير عليك ياك ؟

شريفة:( سهات ) ما عندك ما تتفكري .. أنا لو نلقى شي دواا نشربوو يمسح لياا الذاكرة ما نفكرش جوج مرات ( شافت فيها ) فداك الوقت كان فعمرو 39 واخا الصاالوبار لي حطوو مكيبانش فيه العمر .. دابا إلياس تقولي فبالك بلي بقاتلوو حزقة لارووب و يكمل الخمسين ؟ ما تجيش تال لبال

أسية:( بتفاجئ ) حلفي تا بصح ؟؟ لا بزااف نعطيه كااع واحد و ربعين عام .. ؟

شريفة: ايوا راه تسعوود و ربعين احبيبتي و عاد جااتوو المراهقة ..

أسية: الله يديرلك شي مسلك دالخير .. و يهديه الله تا هو ما كنحملش نشوفكم هاكا

شريفة:( ضحكات جنب ) الله يهديك تا نتي .. !هو فاهمني ااش باغى و أنا فاهماه و دايرين فيها عوريين غير كنضهصسوو على بعضياتنا ايوا و ها حنا لاعبينها تا ربي يحن ( ضحكات ) ما كاين لي غيبقى فيا قد داك الموصيبة د نجاة .. فرحانة براسها ما ناقصها خيير تا غيطلع معاها أحسن قالب .. غترجع بحال الكرة بيناتناا و الواعرة هي ما فاهمة واالوو و ما عندها ما تفهم أصلا و إلياس ما يقدرش يفتح فموو بنص كلمة و يعاود شي حاجة عليا ..

أسية: تمشي تمووت .. تتحمل مسؤوليتهاا تا حد ما ضربها على يديها و جرها بزز

شريفة: على ذكر الضرب فلتاتلك واااحد اللقطة عااالمية ( عضات على فمهاا بحماس و بدات تعاودلها على لي وقع ) عرفتي راه ماشي طرشها راه صننننكعها ..!

أسية: نااري على بلان !! ( حطات يديها على حنكها ) أويلي !!

شريفة:( ضحكات بالجهد ) بررررد لياا قلبي فييهاا كن تشووفي وجهها كي ولى .. تنفخ كي الطبل .. تا هو الحرايمي تقول كان محلف فيها عطاه بالظهر ( هزات يديها كتوريها لكف الداخل ) الضربة من هنا راه سااااهلة و ليها الدوااا أما بالظهر اححح راه زعزعلها لافيشوور ا صاحبتي

أسية:( ضحكاتها حتى بدات كرشها كضرها ) مع نتي تبارك الله خبرة مجرباهم كااملين هههههههههه ضحكتيني و ما فيا لي يضحك كلي كنزدح كي الباف

مع يالاه فتح لباب يخرج من البيت يخليهم يقادولها الحالة شوية و يغطييوا لي يتغطى .. لقى فوجهوو خوها مخرج عينوو

إلياس: عمر ؟؟

الأخ:( ضرب السنة فالسنة و قال ) عليك كنت كنقلب اولد ***

هز يديه جاامعهاا بوونية و عطاها ليه للوجه نيشان حتى رجع بجوج خطوات للور و حنى راسوو كيمسح الدم لي خرجلوو جنب فموو ما عرفش راسوا باش تبلى ؟ خنزر و مع هز راسوو داخل فيه برااس حتى تلفوو على القبلة .. و قبل ما يتوكض لواليه يديه و دفعوو للبيت لدااخل تا جا معكل .. و بغضب قال و هو كينهج

إلياس: مال **** سخن عليك رااسك ؟ سير تكمش حداا مك راني نشدك نطحنك .. بقاولنا غير البراهش يتهزوا عليناا

تدخلات الأم جاراه عندها مخرجة فيه عينيهاا و خواتاتوو كيبردو الجو .. فالوقت لي هو وجهوو حمممر غيطرطق ماارضاش و كيغوت بالجهد

الأخ: واااا مااا تضررربش ختييي الشمااا٠٠تة ( ضرب على صدرو ) أجي هضر معااياا أنااا

إلياس:( قلب وجهوو كيتمتم و رجع شاف فيهم ) طلقووا منوو .. طلقوو خلييوه .. ! يالاه أجي الر٠٠ويجل ..!

كيقرب جهتوو بهدووء رهييب باين من موراه بركان من الغضب .. ما فكاتهم غير نجاة لي دخلات وسطهم و دفعاتوو من صدروو كتطلب فيه

نجاة: عافاك ا إلياس بدل ساعة بأخرى .. صاافي الله يسمح عليينااا

الأخ: وااا مااا ترغبيييهش الله ينعل عدوو ربك

نجاة:( شافتوو راجعلوو و هي تغوت ) واا ماا سوووووقكش بيني و بين رااجلي و نتاااا مااالك ؟؟ خررررج علياااا ماا تعصبنيييييش خرااااااج .. ديييه ا نزهة ( ختها )

جروه من تمااا بزز و هي جروها النكافات كيبردوو الخااطر .. عين معاهم و الثانية مع إلياس خايفاه يتبع خوهاا و ينوض صداع كبيير بينااتهم .. تا شافتوو مسح على وجهوو و خرج ..

نجاة:( رغبات وحدة فالبنات ) لمييمة قولي لماما تسيفط بابا عند إلياس يبقى معااه .. عنداك عمر يشبكهاا معااه قدام الناس

سيفطاتهاا و جلسات كتويل و قلبها مقبوووط عليهاا .. كااع الفرحة لي فرحات تقلبات عليهاا .. عاطياهم راسهاا كيقادوو فيهاا بعقل مشطوون ما ارتاحت حتى دخلات مهاا عندها و قالت

الأم: صافي نسااي علياا كااع لي وقع و فرحي براسك هاذ ليلة ( شدات عينيها و رحعات حلاتهم ) كلشي هو هذاك

أما لفووق عند شريفة من بعد ما قادات تا هي مكياجها و شعرهاا .. تحناات لمجر حداا اسية فتحااتوو جبداات منوو كااروو و برييكي .. شعلااتوو و حلات الباب دالبالكون كتكمي و تبخ لبراا فسكاات كتصنت لصدااع دالموسيقى لي قاالب الدنياا لتحت .. حتى لمحات إلياس مبدل حوايجو لي فزكات و واقف مع الرجال كيهضر و هو مبتااسم كأن حتى حاجة ما وقعات و الأجواء جد طبييعية .. كلشي ناشط و فرحان !

كملات كااروها و دخلات عند أسية كتقلب فحوايجها ..

شريفة: فين درتوو قفطاني ؟؟

أسية: را هو فغشااه فالمااريووو ( شافتها زولات المضمة و كتحيد فاللبسة و هي تقول ) باقى غتهبطي ؟؟ كن درتي بريي و جلستي بحالك و الله

شريفة:( بهدووء ) و نفلت عرس صاحبتي و راجلي ؟ خاايبة تال المعاودة هه !

كملات و ضاارت عند أسية و قالت

شريفة: كي جيت ؟؟

أسية:( طلعاتها و هبطاتهاا .. كانت بدلات بقفطاان فالخزي دالمووبراا بااردة .. كيجي لاااسق على اللحم ) زاااز و لوووز يااا ختي .. قفااطن دنياا بطمة تخيطوو غير على ودك بااش تشعلي الفتنة ( خرجات لسانها كضحك ) كلك زبدة و منين نبداا

شريفة: ههههه الله يمسخك .. يالاه أناا هابطة .. يلا سمعتي شي صدااع هبطي تفكي ( سكتات و رجعات قالت ) و لا عرفتي نوضي تهبطي معايا حسن الحريق فيه فيه اللهم تلفي مع الموسيقى و الهرج

أسية: لا لا غير هبطي بصحتك .. ما فياا لي ينزل عاد خاصني ندوش و نوض نصوب شعري و حالتي .. ما كاين لاش .. و منها نيت نوجد واحد ليكسبوزي معصبني ما عرفت ما نكتب فيه .. قالك شكوون هو قدوتك و علاش و هضر عليه ؟ ( حكات شعرها ) نقولوا الرسوول ؟

شريفة:( تطوات فالنص كضحك تا دمعوو عينيها ) ههههههههه لا لا سمحيلي و لكن ما قدرتش ههه يا ربي تسمحلي .. مع نتي الإيمان عندك كيقطر نسولوك غير على سمية عيالاتوو موحال تعرفي

أسية:( سكتات كضور فعينيها ) وا احم المهم

شريفة:( باقى غالباها الضحكة ) قولوو ا كبيدة .. الحسن الثاني و شووفي يلا ما سكتيش ليمااه الحس .. و يلا كانت مزغرتة عليه موو يعيب لك فشي حاجة .. غادي تزمتيييه

أسية: بصح و الله تاا فكرة و لكن شنوو غنقول عليه ؟ لاش قدوتي ؟

شريفة:( بملل ) تا هاذي تفكري فيها ؟ حيت رجل سياسي بامتياز .. شخصية و كاريزماا .. لغاتوو سليمة و من بين الناس القلال لي كيثقن فرونسي دو مولييغ و الجرائد الفرنسية كانت كتقيل تهضر فيه و تمجد فذكاءو و تفكيرو .. زيدي من راسك شوية و خليني نهبط

أسية: أجي و عنداك ديري شي حاجة خلي السويعات لي بقاو يكملوو على خير

شريفة:( هزات حاجبها و قالت ) شتي داك الشوهة لي مناش خايفين كااملين هي لي غنديرلوو .. أنا راه غاا طحبة ما عندي لا تابع لا متبووع و هضرة الناس كدخل من هاذ الوذن و تخرج من ختها .. اجي و ها هما هضرو كااع ااش غينقص فالدنيا ؟ ياك واالوو

أسية: هههه واالوو

شريفة: و منين واالو .. يدهم فأكبر شيخ يطلبوو التسليم و يعيطوو للصالحين ( ضربات بشعرها ) راجلي العزيز لي مغتسرطش ليه .. على الله يسكتلوو القلب على يدي

أسية: اوييلي

شريفة: باااركة عليه عااش بزااف هااذ الخرى ما ناويش يهز قلعوو و يمشي يتشوى مع أبو لهب ؟ يخلينا غير نورثوو فيه و ندوقوا طعاموو كي غيطلع ( جات تهضر و حبساتها بيديها ) سكتي صافي خليني ننزل خلاص .. تشااااو بايبي

سيفطاتلها بوسة فالهواا و خرجااات كضحك ناازلة بالبلغة فرجلييهاا كتمختر و تلعب فشعرهاا .. حتى وصلات لصاالووناات و رجعوو الأنظاار من ثااني و جديد علييهاا .. ميقاات بعيينييهاا .. و بشووفات قتااالة .. مشات قصداات المعلمة داللعاباات هضراتلهاا فودنييهااا و تحنات هزات كاسها دالقهوة كركباتوو فحلقهاا فجغمة و حركات راسهاا بالزربة من المروورية .. و المعلمة مخرجة فيها عينيها ما لقات ما تحبس و لا تشد بقات تويل و تمتم .. فلخر مشات دير لي قاتلها .. !

ما كاملاش جوج دقاائق كاان سكت الجووق و طلعاات شرييفة حاافية فووق القعدة محمزة نصهاا بالمووزون و جاايبة العقدة للقداام ناازلة على حجرهاا شوية ..

طلعاات شرييفة حاافية فووق القعدة محمزة نصهاا بالمووزون و جاايبة العقدة للقداام ناازلة على حجرهاا شوية ..

بدات الدقة و بدات كتحرك فنصهاا بالشوووية غاااادية مع الريييتم فيينمااا يزربوو تزييد تلعب بطر٠٠متهااا يمييين شمااال بالزرررربة و غير يتقلووو كتقلهااااا و تنزل ترسم بيهاا ثمااانية .. تاا شاافت كلشي منتاابه لييهاا حتى من شي رجاال مركزين معاها بلا ما يحسوو .. واخا من بعد ما دخلوو العروسة فرقوو المجمع .. العيالات لداخل و الرجال براا و لكن الفيلا مفتووحة و كااع لي لدااخل كيتسمع و يبان للي فالجردة .. !

نزلات بالشوية و بدات كدووور على ديك الدائرة لي داارو عليهاا .. بكل رقة و أنوووثة كتررررعد فط٠٠رمتهااا حتى كتخليييهم غيحواالووو و كتحنى تااال لتحت و ترجع طااالعة بشوية كتلعب بصدرهاا و تضرب بشعرهااا .. و ترجع تعطيهم بالظهر و تبداا تفييبري من صبااع رجليهاا تال صدرهاا كلشي كيتحرك بثقااالة و بدقة خطيييرة .. كتخليك بلا ما تحسي تبغي تقلديها و تديري بحاالهاا .. تاا حمااات الطرح مزياااان و خذااات الميييكروو و رجعاات طلعاات فووق القعدة .. و بصوت خطيير مميزاه بحتهاا الثقيييلة قالت

شريفة: عندكم شي حاجة ( حطات يديها على العقدة دالموزون ) نديروها لهذاا .. !! المخلفني !!

كيعاودو اللعابات موراها : واا بالصبر

شريفة: المتيهني ( عضات على شناافتهاا ) المحمقني ( دورات رااسهاا ) وااا المريكني

موراها: بالصبر

شريفة: المخرجني من داار بااا

موراها: بالصبر

شريفة: واا من داار باا و بلا سبة

موراها: بالصبر

شريفة:( هزات حااجب و ضحكاات بخناااث ) وااش هذاا يصبر و الله مااا يصبر

و مشااات مع الريتم كترعد فلي مووراهااا و كدوور فبلااصتهاا هاازة رااسهااا فالسمى و الضحكة مرسوومة على شفاايفهااا

شريفة: وااا عطييتوو للحييط واا رااب عليااا ( دارت يد على يد فووق رااسهاا ) وااا عطييتوو للمش (هزات يدييها مبينة على ظفارهاا ) وااا قمشوو لياا .. واا ديتوو لطبيب قاالياا عريييه .. عريتوو و حشمت ( حطاات يدييهاا على حنكهاا بحركة بحال كتويل ) عرييتووو و ندمت .. !! ا وييلي وييلي وااااا هيااااا ايييييييييه واااااا العاااالييي ياااااااه

هزااات رااسهااا من بعد ماا كانت كتحير لقاات إليااس وااقف فالباب و دااير فيها شي شوووفااات ديااال القتييلة .. غمزااتوو و طلعاات قفطانهاا تاا باانوو فخااذهاا شوية و كملات غنااهااا كأنوو ما كااينش مخلية العاافية شااعلة فيه بااغي غير يوصل لهاا

شريفة: ديتوو الفارمااسي عطااني سيريلاك .. كبرلووو الحناااك وييليي ويييلي حلووو و بنييين كييف الكااراامييل ( مصات شناافتهاا بدلع ) ... ويلي ويلي مشقووق بلا جنوييي غييير مدلي .. اح٠وييي و ولي ..

غير قاالتهاا هزات عينيهاا فإلياس باانلهاا دااخل جااي منير جهتهااا و كل شوية يدخل فعباد الله و يبعدهم عليه .. كملات كلامها بالزربة

شريفة: وااش هذاا يصبر ؟؟ وااا و الله ماا يصبر هههه وااا صبري ياا المرااة .. نقصي هضرة .. يجييبلك الضرة .. يعيشك فالقهرة اهااااا ايااااااه

نزلات من القعدة كطييير و خلات اللعاباات مكمليين عليييهااا .. كتنقز ثلاثة دالدرجااات و هو موورااهاا طاالع بالشوية و احتمال من جوج يا خواو ليه الركاابي و ما بقالوا جهد يا باغي يوصل ليها بلي واخا تطير حتى تعيى غيشدها غيشدها .. !

و هي هاذيك بقى تابعها تا وصلوو للطاابق الفووق و مع حلات لبااب مع جرها من شعرهاا بالجهد حتى بقاولوا فيديه لي زيكسطونسيون " شعر مركب " ..و دخلات هي زدحات الباب بالجهد كتنهج و طرقات عليها فالبلاصة .. !

أما التحت فراه الدنياا مقلوبة بالشطيح .. شريفة شخضاتلهم الجو و نوضاتلهم الهوايش فينما كاينة شي شيخة طلقات شعوراتها و دخلات تهز و تحط فميزانها ..! من غير لالة العروسة لي جالسة فالبرزة جامعة فمها .. حابسة دموعها بزز من الحالة و الشوهة لي دارتلها الضرة فعرسها .. و من الأنظار لي سرقاتهم منها تا رجع كولشي متبع شريفة و لي عليها العمد مليوحة للجنب !

بغات طرطق بالفقصة كثير شي منين بانلها إلياس طالع تابعها .. وجهها تزنك و بانت فيها تزيراات .. نغزات النكافة تا عيطاتلها على أمها

نجاة:( بصوت حزيين و غااضب فنفس الوقت ) ما بقيت بغييت بوو عرس .. صااافي هضري معاهم يجمعوو عليا و ينزلوا الطبالي نعشييوا الناس يمشيوا بحالهم

الأم: يهديك الله ابنتي ما تعصبيش راسك .. باقي ليلتك عاد بدات و شلى لباسي ما درتيهمش غير تهدني ا ما

نجاة:( قاطعاتها تتهضر تحت سنانها مع تبسيمة صفرة ) ما غنلبس والو ا ماما .. ديري لي قتلك و لا راه غنطرطق عليهم هناا قدام كلشي .. صافي ما بقيت بغيت والو

الأم: وا لي بانلك ابنتي .. لا حول و لا قوة إلا بالله

خلاتها و مشات كتتنهد جرات الحاجة حجيبة أم العريس كتهضر معاها و يشوفوا فنجاة .. بعد نقاش طويل تحركو لجهة الكوزينة فين كاينين الحجامة ديال الطريطور ..

....2:( حاضية لاسين كااملة و راسها ضارها باغى تعرف شنو كاين ) شي حاجة فشششكل وااقعة أ نسرين .. ما عرفت ماالهم ؟

نسرين:( شافت فيها فمها عامر بالحلوة .. هزات أتااي دوزات بيه حتى بلعات و قالت ) عادي بحال أي عرس مفتونين مع التوجاد .. آش غيكون بيهم كاع ؟ أنا لقيتيني تنفكر غير فهاذ شريفة و الشوهة لي دارت الله يعطيني من قلبها غير شوية ا ختي خديجة

خديجة: ايوا و كلها و نفسوو و قلبوا تضبر راسها ..!

نسرين: وا لاواه واخا هكاك .. نكون محروقة و ما نشوهش براسي على ود شايب الراس .. اجي بعدا ما عندها عائلة ما عندها خوت و لا حباب ؟ شفت حتى واحد ما حاضر معاها واخا غير يصبروها و يثبثوها ؟

خديجة: مالها ماتلها الراجل حتى نتي ؟ أ ربي و العيالات شحال فيهم ديال الدراماا

نسرين: نتي بعدا فيك غيير الهضرة و دفيع الجبهة نهار تدارلك قد فمك بينيلي وجهك ساعتها .. و لي كيقول العصيدة باردة يخشي فيها يديه يجرب

خديجة: راك عارفاني عندي عادي بلعكس يلا قدر يزيد حتى ثلاثة غير الله يربح

نسرين: امم .. و كاع ما جاوبتيني فين هي عائلتها لقليلة أمها تكون معاها ..!

خديجة: وا شنوو غنقولك .. أنا تنعرف عائلتو مزيان مسارنهم حافضاهم حيت ديما عندهم تقريبا .. و لكن شريفة ما كنعرفش عليها بزاف .. لي عارفة هو نهار تزوجها جات هي و بنت خال باها و شرطاتها عليه باش تسكن معاهم .. سميتها أسية عرفتي فنة ديك البنت و الله .. هي الوحيدة لي كنعرف من عائلتها

نسرين: ههه ريحة الشحمة فالشاقور .. مقطوعة من شجرة لا ؟ يكونوا واليديها ميتين مسكينة ؟

خديجة:( ضورات عينيها مزيان و قربات منها و قالت بهمس ) لا منظنش .. فلول د زواجهم كنت كنسمع شي هضرة كتضور بلي شريفة بنت الحرام .. أمها ولداتها فالحرام .. غير ملقطة .. و باها ما بغاش يعتارف بيها .. كبرات غير مع أمها و خال باها و على ما كيقولوا هاذ الخال كان فقيه دالجامع و مدين بزاااف و فاش قصداتوو أمها بالتربية صغيرة دخلهم لدارو و سكنهم مع عائلتوو و هز معاها الحمل .. !

نسرين: و فين أمها دابا على هاذ الحساب ؟

خديجة: و شكون عرف ؟ هاذي كتبقى غير هضرة ما عرفنا لا بصح لا كذوب .. و لكن بحال والوو حتى نتي ..!

نسرين: ما نظنش ؟ الواحد فاش مكيلقاو منين يشدوه كيبداو يهضرو فيه و يلبقو ليه لي كاين و لي ما كاين .. و ها هي بصح .. باش عرفوا هما بالسلامة ؟

خديجة: حيث على ما قالوا رفعات دعوة على هاذ خال باها .. بغات تبدل كنيتها و ما تبقاش على سميتوو و دخلات فشباكية د طلع و هبط .. ها تحديد النسب ها الطعن و نتي غاذية .. و لكن كيفما قلتي الله و علم ما نهزو تقليد حد ..!

نسرين: ايوا الله يديينا فالصواب هذا ما نقوولوا .. لي باقي فالدنيا ما خرج من عقايبها

خديجة: أميين يا ربي .. وا خليناا منها شبعنا لحم معاها .. يا ربي تسمحلنا ما ناقصين ذنووب

نسرين: وايييه ( تطلقات أغنية سوسية و بداو أفواج أفواج كينوضوا يشطحو لا كبار لا صغار و بحماس رهيب ..! هزات حاجبها و قالت ) هاذي الريفية ؟ ما فهمتش شكيقول ؟

خديجة: لا السوسية .. راهم كاملين سواسة من غير نجاة لي فاسية أما لا شريفة لا إلياس و عائلتو سواسة

نسرين: بصح ؟ و ما باينة فيها حالة فوااسة الصراحة .. !

خديجة: وااييه فين هو السماق و التاويل و الذووق بلا ما نهضرو على اللسان الحلوو و الجلسة الهماوية ..!

نسرين:( هزات كاسها كتشرب و تسرح عينيها فالناس ) قوليلي شريفة سوسية هههه معذورك قلتي صعيبة و حارة .. كيعجبوني السوسيات قد كلمتهم قد ذراعهم مٌقَاادِين تبارك الله

خديجة: قولي محركة ليه جميرات هههه هما مساخط فهاذشي .. دقتهم صحيحة ما تخليك تكعدي الراس

**************

إلياس:( ضرب فالباب بالجهد ) حليييي الخرااا

شريفة: بعد مني سير عند مراتك المقطرة ليك من العين ( رققات صوتها ) لي عاطيها قيمة و ما كتجريش عليها قداام أمة محمد .. لالة لبنات لي ماا كتشوهكش !!

إلياس:( بعصبية ) برب ا شريفة حتى نق٠٠تل مك ( كينهج ) غنقتلاااااا٠٠ك

شريفة:( كتعاطى معاه من الباب ) ما أناا ساهلة لك ؟ هههههههه سير ا بابا تنعس سير راك شرفتي و هترتي ( بتسمييم ) و كييفما جبتي الجديد .. ها نتا شفتي على عينيك الطلب لي عليا .. و العينين لي غيحوالوا بزيني .. خاص غا نآمر أ كبييدة و نجيبو نيوو " جديد " كيبري هههه

إلياس:( كيغوت عقلوا غيخرج ) واااخاا تسناااي .. و عقلي مزياااان على هضرتك فااش نشدك ( بصوت غااضب ) لماا هرستلكش دووك الرجليين و سل٠٠خت لمك الجلدة على اللحم .. فينما تشووفيني تنخمي عليا

شريفة:( قلبات عينيها بملل ) اوكي اوكي غير حطلي معاك داك الشعر فالباب باش نركبو منين ننزل نتعشى اكبيدة

سمعاتوو ضرب فالباب برجليه و زاد خلفة .. و هي ضور عند أسية كضحك و تحك فشعرها

شريفة: تقسحت تفوو .. قلعلي الشعر من الجذر يعطيه موصيبة باغي يشمت فيا العديان طلعت بالشعر نهبط قرعة ؟؟

ضارت جهة الكوافوز كتقاد فيه .. فالكحل قصير مقطعاه حد وذنيها من القدام ديكرادي و من لور نازل شوية على عنقها

شريفة: طوال ليا شعري .. خاصني نمشي ننقص منوو .. كنشوفوا هاكا كيخنقني

أسية: الله يا ختي الله و قداش قلتيها .. منين جاتوو غير قوليلي ؟ و لا كلاوك يديك عاوتاني و غتنوضي تضربيلو كووب كاغصون ( حطات راسها على المخذة ) بقاي حاضياه فينما تكبرلك شي زغبة دوزي على مها بالمقص .. لي يشوفك يقول غير معقدة منوو شي نهار نفيقوو نلقاوك ضربتي الزيرو

هي كتهضر و شريفة ساهية كتشوف فيها من المرايا و عقلها سافر لبعييد .. رجعات لصغرها .. لذكريات ما كتبغيش تتفكرهم نهائيا و لكن للأسف ديما ملازمينها و عايشين معاها .. !

"فلاش باك"

دار سفلية كلها ضايرة بالزليج البلدي المنقووش .. مشمشة بالمزيان و الهوا سخوون كيضرب فالصالوون فين مربعة مراة فالثلاتينات .. رجليها و حازمة راسها بزيف حياتي .. لابسة بيجامة طويلة فالقهوي و حداها قصرية دالطين مخلطة فيه الطحين و كاع القوام باش تعجن .. متكية عليه بالدليك حتى بدات تقطر بالعرق و تسمع صووت باب ديال الحديد تدفع و تبعو صوت طفلة صغيرة كتقول

شريفة: ماما أناا جيييت

هزات المراة راسها.. عاقدة حجبانها و شعر نواظرها خارج من الجناب .. زينها سوسي مليار فالمية و تا لكنتها مغلووبة بزااف

كَبيرة: يجيبولي خبارك ابنت الحرام لفعايلها ( خرجات فيها عينيها ) فين صديتي ؟ مخلياني ننبح موراك كي الكلبة

تكمشات مخلوعة و بملامح بريئة هزات يديها الصغيورة وراتها لاستيك مرسومة فيه سالي و بصوت مرعود قالت

شريفة: ما سمعتكش و الله مشيت شريت غير هاذي ا ماما الزوينة ( رمشات شفيراتها كتبلع فريقها ) تظفريلي شعري بيه عافاك

كَبيرة: زيدي لهنا نشووف

تبسمات بفرحة و قربات منها توريها مع وصلات حداها لوات يديها على شعرها تا جمعاتو مزيان فيديها و بدات تديها و تجيب و شريفة كتبكي و ترغب فيها طلقهاا

كَبيرة: أنا لكلبة لي ولادتك تنخليني ؟ امممم ( قرصاتها تا يبسات فبلاصتها ) شميتي ريحة بيطانك ما بقيناش نباانوو قدامك ( صلاتها معاها و هي باقى ناتفاها .. عاضة على فمها مغزفة ) غتجلسي تكملي هااذ العجينة و صوتك ما نسمعوش قطططعي

شريفة:( كلها كترعد و تبكي .. الشهقة كطلعلها مرعودة و حاطة يديها على فمها باش ما يتسمعش صووتهاا ) اننن

كَبيرة:( طلقات منها و لاحت ليها الزيف ) جمعي داك الشعر .. نلقى شي زغبة فالخبز .. مراودك نزرقهم لك الكلبة

خلاتها كتبكي و تجمع فشعرها باش تكمل العجينة و مشات هي للكوزينة فين عندها بوطة صغيرة فالأرض و مويعنات قلال .. الدار مصلوحة و صغيرة .. كوزينة و طواليط و صالون منوو للجلاس منو للنعاس .. فيه جووج سدادر ملمطين بتلميطة فالمووبراا مزوقة ..!

طفات على الغذا و جلسات حدا بنتها كتمسح فجبتها من العرق و العيى لي هالكها ..

كبيرة: هزي الخبز ديه للفران و قولو يتهلى .. يعاود يحرقو و يسيفطولنا ( خشات يديها فشونها و جبدات الفلوس من البزطام مداتهم لها ) شدي

ديكشي لي كان هزات شريفة السينية فين دايرة الخبز و مغطياه بنص صغيير باش يخمر دغيا .. دارتها على راسها و تمات ماشية بالشوية عليها كل مرة توقف تستارح و السينية غالباها و هي كي لقيمة ما هازاش تا راسها .. ما وصلات لعند الفران حتى ربي غفرلها

شريفة:( مداتلوو الوصلة و الفلوس و قالت ) عمي قاتلك ماما تهلى عنداك تعطيهلها محروق عاود

خرج ولدوو من الداخل .. كان كبير شوية فعمر 20 سنة .. حروفوا سوداء و شعرو قوي .. طويل و شاد صحتوو .. تبسم معاها و قال

حكيم: تهناي عليه بيدي نقابلوولك أ نوارة الحدود

شريفة:( غرقات بالحشمة و بصوت بالكاد كيتسمع ردات ) على سلامتك أ خويا

حكيم:( حنا راسوو كيحك فشعرو و بعيون مبتسمة قال ) الله يسلمك ( نحنح و هو كيشوف فساعتو ) ما قرياش ؟

شريفة: عندي حصة دابا عند مولات لفرنسي غير تسخرت لماما

حكيم:( غمزها بخفة ) قراي مزيان ..!

حركات راسها بابتسامة بريئة و شيرات ليه بمعنى بسلامة قبل ما تدور بحالها لجهة دارهم .. و قلبها كيخبط خبيط .. كل شوية الضحكة تفلث ليها .. حتى تلاقات بوحدة من صحاباتها

..: يالاه ا صاحبتي هذا هو الوقت أنتعطلوو .. فين هي طابليتك ؟

شريفة: عرفتي ؟ حكيم جاا لعند دارهم

..: حلفي ؟ فين شفتيه ؟

شريفة: راه فالفران .. مشيت ندي الوصلة دالخبز و خرج عندي .. عاماين دابا ما جا لأكادير .. غبر فداك كازا .. كيعاودو عليها كبيرة و كتخلع

..: هاي هاي على القردة فرحاانة و أنا كنقول مال الحنيكات مزنكين قولي جا حبيب القلب

شريفة:( غطات وجهها كضحك حشمانة ) ويلي راه بحال خويا .. ضريف مسكيين و عزيزة عليه

..:( قالت بلا مبالاة ) تلقايه حوالوو ليه العينين منين شاف التفاحات .. مشى خلاك بعلوكة عندها جوج حموصات .. رجع لقى الزرع فاض

شريفة:( بغات تبكي ) حشووومة عليك ( تفكرات أمها ) نااري مي كبيرة ليووم تعيد بيا .. انمشي تعطلت عليها نتلاقاو فباب المدرسة

مشات كتجري و ضحك على كلام صاحبتها موراها

..: أنا نمشي نجيبلك mp3 ديالي، الليلة تباتي تسمعي لشاب خالد (مشات كدندن )ننساك كيف ندير ننساك و نتا لي تمنيت حياتي تبنى حدااك

غير وصلات لدار لقات أمها فالباب كتسناها دخلاتها بقرصة من حناكها جاراها تال السداري و طلقاتها بشنتة حتى جات مزدوحة عليه

كبيرة: نووضي ينوضوا عليك عظامك و لكن ماشي دابا الهضرة حتى ترجعي و نتولاك مزيان ( دارت فيها واااحد الشوفة ) طلقيني جيبي المشطة

ما عاوداتهاش معاها .. هزات المشطة و لاستيك و جلسات بين رجليها منها للأرض مخلياها تظفر ليها شعرها صابرة على المشطة لي كدوز على النص من جبهتها و على النتيف لي كتنتفها .. عارفة يلا قالت غير ' أي ' غتصليها معاها حتى تشووف النجووم .. لكن لي ما كانتش ضاربة ليه حساب .. هو

كبيرة: قططططعتي شعرك ؟؟ ( جمعاتلها شعرها مزيان كتشوف فالأطراف و تحنزز مزيان و قبل ما تنطق شريفة نزلات عليها لظهر تا زواتها .. الصوت ما بقاش يطلعلها ) بغيتي تخرجي لطريق ابنت الحرام ؟ بقالك غير الشعر ياك ؟

شريفة:( مخلوعة ما عرفات باش تبلات .. و النفس تقطعات فيها بداك الضربة بزز كتهضر ) ما قطعتوش ا ماما و الله ما قصتوو

كبيرة:( نتفاتها ) بغيتي تشبهيلي لتريكة باك الموسخة ؟ انا نقي فيك و نردك ناس و نتي سهمك غير العفن

شريفة:( شادالها يديها مقسحة كتبكي و كل مرة تقفز من شي ضربة ) الله يرحم واليديك ا ماما ما ضربينيش .. و الله ما قستوو و لا قطعت منوو علاش ما متيقانيش ( شهقات ببكية حارة ) اناا ماشي موسخة

كبيرة:( قرصاتها بين فخاذها ) كنقولك شعرك ما تقيسيهش و لا مكنقولهااش ؟؟ امممم ( عاوداتها )

شريفة:( بقهرة بدات تتغوت ) و الله ما قستوو حرام علييك

كبيرة: و زايداها بالكذووب ؟؟ ما ربيت فيك غير لخلى بلحاق هانا نوريك

دفعاتهاا و ناضت معصبة و مغزفة كتقلب بعينيها و شريفة لاسقة لها عند رجليهاا كتبكي دم و صوتها تبح بالبكى و الرغيب و أمها كل شوية تقبصها و تدفعها عليها .. تا خرجوو عينيها منين شافتها جرات البوطة الصغيرة عندها و شعلاتها و فيديها الثانية المعلقة باش كتهز البطاطا .. و بدات كتسخن فيها و شريفة قلبها غيسكت و صوت بكاها ما كاينش هذا لي يسمعوو و ما تبقاش فيه

كبيرة: ما بغيتيش ترباي ؟؟ هااذي لي غتربي الكلبة لي ولدااتك و تعقلي عليها مزياان

ضارت عندها لقاتها طارت جهة لباب باغى تخرج و بالخلعة و التفتيفة الزكروم تعكس معاها .. كتضرب بالجهد فالباب و تغوت عل و عسى يجي شي واحد يفكها .. ما حسات براسها غير تجرات من شعرها الطويل و حكماتها فالجنب شادالها يدييها بقبضة قاسية بحال اللقاط ..

واخا عيات تترطى و تبكي و تحنى تبوسلها رجليها و لا قلبها حن عليها .. ما مشات تا حطاتها لها على لحمها .. الجهة فين كتكوون الساعة .. و فالبلاصة تسمع صووت د الشياط و الجلدة لسقاتلها مع الحديد ديال الماعوونة .. مع حيداتها حيداتها بجلدتها تا بقى كيبان لشريفة لحم مشوط فداك البلاصة و ضاير بيه البيووضة

كبيرة:( طلقات منها تا طاحت شرويطة اللون ما بقاش فيها و الصوت تبح ما بقى يتسمع كاع مع الغوتة لي غوتات .. إحساس صعيييب لبنت باقى فنعوومة أظافرها .. ما قدراتش حتى تستحملوو و بداو عينيهاا يتقلبوو فسمى و فمهاا محلوول شوية كيتسمع أنين خافت .. و بالرغم من هاذشي كاامل ما بقاتش فيها حتى شوية و بغل قالت ) يالاه شدي .. ها لي يقرب لشعروو و يقطعوو .. المرة الجايا صباعك نقزبهوملك

شريفة:( سخفاانة فبلاصتها كتحس بالموت داخلاها و صوتها بزز كيتسمع .. الدموع هابطين بالقناطر ) أ مااماا يدي أ ماامااا .. ما قطعت اننن

كبيرة: مزيان تبارك الله و لاهيلا هاذشي لي بقى .. كتبكي يا مسكينة ظالمينك ياك ؟ ( دفعاتها برجليها ) تهزي لمدراستك الله يهزك عندوو

تبعاتلها شكارتها و جراتها هكاك دفعاتها لزنقة و زدحات الباب عليها كتنهج .. أما شريفة الخطوة عندها بعشرة تقول كتزطم على عينيها و الشوفة عندها مضببة .. كتحس بالدنيا كتمشي و تجي بيها و يديها غتقطعها بالحريق ..

وقفات تكات كتنهج على بوطو دالضوء و التبوريشة بدات كطلع معاها تا رجعات كترجف .. ما حاسة بحتى حاجة ضايرة بيها .. تا من حكيم لي وقف عليها مدة كيشير بيديه .. ما حسات عليه تا هضر و قال بمزاح

حكيم: الهرابة .. ما بقيتيش قارية ؟

هزات راسها فيه بعينين جمر فمها كيترعد غير شافتوو بحال يلا تحلات باب الجنة فوجهها و البكية حكماتها بالمزيان تا شهقات بالجهد كتبكي من جد عقلها و تطلع النفس مرعودة بشهقة حارة .. صدماتو و خلعاتو عليها تا حط يديه على كتافها

حكيم:( بانفعال ) شريفة مالك ؟ هضري ؟؟ ما تخلعينيش عليك .. شطاري ؟

شريفة:( هزات يديها كترعد ما قادراش تشوف فيها ) ي يدي كتقطعني بالحريق ( سنانها كيتقرقبو مع بعضياتهم ) يا ربي نمووت و نتهنى

شد فيديها بالشوية خايف يقسحها .. عينيه دمعوو من داك المنظر .. قلبوو ضروو عليها .. و عاد انتابه لدمايات لي كتسيل منها .. يالاه جا يهضر كانت سخفات ليه بين يديه و آخر جملة طاحت فوذنيه

شريفة: خليني معاك .. ما تدينيش عند ماما عافاك انا ما قستوش انن

***********

فتحات عينيها لقات راسها متكية فوق ناموسية فرادية .. بيت صغير و مجموع ببلاكارو و مكتب متوسط الحجم .. باين البيت ذكوري من الملصقات لي معلقين لأصحاب كمال الأجسام .. تكعدات شوية حتى ضار عندها بخوف كيقلب فجبتها

حكيم: خليك متكية .. حاسة براسك مزيانة ؟ شوية ؟ ( بدا كيعيط بالجهد تا تفتح الباب و دخلات موو ) الواليدة جيبيلها الصوبة باش تشرب الدوا

حبيبة: نزلاتلها السخانة بعدا ؟

حكيم:( حاط يديه على جبهتها ) شوية .. شريفة واش صافا ؟ هضري ؟

شريفة:( رمشات فيهم كتفزك فشفايفها لي يبسوو .. شافت فيديها لمضمضة و قالت بصوت بزز كيتسمع ) س سمحولي عذبتكم معايا

حكيم: تسكتي و لا نجمعها معاك ؟ ( شاف فماماه ) وا جيبي ا لالة حبيبة و نتي حلاتلك الجلسة ؟؟

خرجات من البيت بالزربة مخلية لباب مردودة عليهم ..

شريفة:( بلعات ريقها حانية عينيها من شوفاتو ) شكرا ا حكيم بزاف

حكيم:( حك حاجبو و قال ) شكون دار فيك هاذشي ؟ شكون قاص فنوارة الحدود ؟

شريفة:( تبسمات ببراءة كتحاول تلف الحريق ) علاش كتعيط ليا نوارة الحدود ؟

حكيم: ما عارفاش علاش ؟ ( حركات راسها بلا .. و هز هو يديها السليمة .. فتحها كيدوز بصبعو على كفها بحال يلا كيهرها ) النوارة لي كتكون فالحدود .. كتكون زوينة و كاع لي يشوفها كتعجبو و تطير ليه العقل و لكن حد ما يقدر يقرب منها و يقطعها .. ممنووع .. هي شي حاجة لي خاصة بزاف و ماشي أي واحد يزعم و ياخذها ليه .. هي ديال راسها و ما مملوكة لحتى حد ( هز عينيه فيها و غمزها ) عرفتي دابا علاش ؟

***

إلياس عندو 49 سنة

شريفة عندها 26 سنة

نجاة عندها 29 سنة

حكيم كان عندو فداك الوقت 20 سنة .. و فوقتنا الحاضر 32 سنة ( شريفة وقتها كانت 14 لسنة )

أسية بنت خال باها .. علاش عايشة مع شريفة و ماشي مع باها و عائلتها .. غتعرفوا من بعد ..

عرس الذيب كعنوان ما منسوبش لعرس إلياس و نجاة .. لا .. عندو دلالة أخرى غتشرح مع الوقت ..

***

تبسمات معاه و حنات راسها ساكتة حتى دفعات حبيبة لباب و دخلات هازة السينية .. شافت فيه و قالت

حبيبة: شفتك تسمرتي فداك البلاصة ؟ نوض تقضي شي شغال يلا تكسابو

حكيم:( ضحك و وقف هز عليها ) كتجري عليا من قلب بيتي أ يمّا

حبيبة: هي يلا فهمتي راسك و حسبتي خطاويك و خليتيني مع بنتي الغزالة ( دوزات يديها على ذراعها ) نهار كبير هذا لي دخلتي عليا ..

شريفة: ربي يحفض أ لالاّ

خرج حكيم مخليهم بجوج الراس فالراس كتوكلها و طبطب عليها و تملس على شعرها

حبيبة: وا بقاي تزوريني و تجلسي معايا .. حسبيها داركم و بقاي شحال ما بغيتي .. راكي بحال بنتي غير تعمري عليا شوية ( تنهدات ) شحال طلبت ربي يرزقني بنوتة حليلوة بحالك .. ساعة المكتاب

شريفة: نجي عند تراب رجليك ا لالاّ

حبيبة:( تبسماتلها بحنان ) بقيت زيد على الله .. هاذ المرة بنت .. المرة جايا بنت .. حتى كملنا بلاطو ديال البيض ( ضحكات ) زعما حنا ما نحتاجوش نشريو لبيض .. نفقص غير لي عندي كافيين

شريفة: أء ؟ ااه

ضحكات كضور فعينيها ما فاهمة والو .. تا شداتلها فيديها و قالت بجدية

حبيبة: قوليلي أ شريفة مالها لالاّ كبيرة معاك ؟ ديما كنبغي نهضر معاها و كننعل الشيطان و لكن هاذشي لي كدير فيه ما يبغيه لا ربي لا عبدو .. عاوديلي مالكم لربما ندخل بخيط بيض و نصلحو يلا كاين ما يتصلح ( بصوت خافت قالت ) فين باباك ؟

شريفة: ما كنعرفوش و ما بغيتش نعرفو لا هو لا عائلتوو .. كلهم ما حاملينيش ( حنات راسها كتبكي ) حتى هو ما كيبغينيش و ما رضاش بيا أنا غير موسخة عندهم ( شافت فيها بنظرة منكسرة ) علاش يولدوني و يعذبوني ؟ ( دموعها غلبوها من جديد ) حرقاتني بالعافية حيث سحابها قطعت شعري و أنا و الله ما قست فيه ا لالاّ

حبيبة: لا حول و لا قوة إلا بالله ( قربات منها عنقاتها كتسكت فيها ) صافي ا بنتي صافي

شريفة: شنو درتلهم حتى يديرو فيا هاكا ؟ ( بعدات من عليها كتشهق ) أنا عمري فحياتي نولد شي ولد من لحمي و دمي .. لاش كتولدوهم و تقتلوهم و هما فالحياة ؟

حبيبة:( تنهدات بحرقة ) ما تقوليش هاكا ابنتي لولاد كيجيو بخيرهم و ببركتهم كينوروا لنا حياتنا .. كاينة لي غتحماق و تعمر حجرها بشي ترابي .. و كاينة لي عندها النعمة و ما عارفاش بقيمتها نطلبولها الهداية

شريفة: أنا ماشي نعمة أ لالاّ .. ما كرهتش نموت و نرتاح ( مدات يديها كتمسح فدموعها و كيرجعو ينزلوا فالبلاصة .. ضحكات بقهرة ) عرفتي ماما سماتني شريفة غير باش تعايرني بالوسخ و نبقى عاقلة عليها حياتي كاملة

حبيبة: احاح ابنتي احاح ( سكتات مدة ) و خالك ما كيقولها والو ؟ راه مومن زعما و حافض كتاب الله .. عيب عليهم

شريفة: نهار بكيت و تشكيت على خالي شداتني سلخاتني عصى و حكاتلي فلفلة ففمي و ف تحتي ( شهقات بالجهد و شدات فيديها كترغبها ) انا غير كنخوي قلبي عليك .. عنداك تمشي تقوليلها شي حاجة غتقتلني

حبيبة:( عنقاتها بالجهد كتسكت فيها و قلبها حارقها عليها .. هزات عينيها فالباب لي مردود بانلها حكيم واقف تما .. تنهدات كطبطب على ظهرها ) صافي ا بنتي .. الله يهديها الله يهديها هذا ما نقول

شريفة: حرقاتني بزااف .. بغيت غير الما نشرب و ما خلاتنيش .. بقيت النهار كاامل هكاك و من داك النهار ما بقيتش نشوف مزيان .. ما بغاتش تديني لطبيب تدوزلي حتى من الصبورة فالمدرسة ما بقاتش تبانلي أ لالاّ

بقات تبكي و تشهق و تعاودلها شحال من حاجة خازنة فقلبها .. حتى بدات تنعس و العيى يتمكن منها و ففمها جملة وحدة

شريفة: عمري نولد فحياتي .. ما غنولدهمش نعذبهم ..

غطاتها و خرجات من عندها مخلياها ناعسة .. قلبها معصور على حالة شريفة كل شوية تتنهد .. باغى تتدخل و دايخة ما عارفة ما تقدم و لا تأخر .. حتى من حكيم لي يعرف يتفاهم معاها و يطيب خاطرها ما بقاش بانلها ..!

حكيم لي سمع كاع الهضرة لي ضارت بيناتهم و خرج من دارهم ما كيقشعش قدامو .. دمو كيفور بالأعصاب قاصد كَبيرة و يديه كيترعدو عليها .. ما بقى هامو لا مراة كبيرة لا هم يحزنون .. دق بالجهد فباب الحديد تا تسمع صوتها كتغوت

كبيرة: أ هرسوه الله يعطيكم القطيع فداك اليدين ( تزاد الزديح ) وا أنا جايا تجيكم الساحقة

مع حلات الباب شنق عليها زادحها مع الحيط موراها .. خانقها بيديه بجوج .. ما عرفات باش تبلات عصرها تا باش تهضر ما قدراتش كضرب فيه بيديها بجوج و هو عاقد حجبانوو و كيزير بيديه على عنقها بكل جهدو حتى العروق بداو تيبانوو ليه مطراسيين ..

ما طلقها تا الروح بغات تطلعلها .. طاحت على ركابيها كتتنفس بالجهد و توسع عنق دالبيجامة عينيها خارجين النفس بزز كطلعها .. الضربة ديال الغفلة ديما كتجي صعيبة .. أما هو ضرب السنة فالسنة و قال

حكيم: ياك ابنت الق*** حليتي رجليك بخاطرك ؟ طيرتي البلاكة بخاطرك ؟ ما حوا*** فالظلام ؟ ماكلاكش فبليزيرك ؟ لاش فارعة لنا مخنا ؟ كاين شي موسخة قدك ؟ ( مخرج عينيه ) كتقلبي لي يفرع المارجة لي ولداتك ؟؟

كبيرة: عبد الله ( كتعيط بجهد قليل لي بقالها من الخنقة ) عبد الله فينك .. أنا نوريك الضسارة أولد الفرناتشي .. يلا ما ديتك فين تتربى ما ولدو فيا غير الخلى

بزقات فيديها و شرطات فالحيط .. باقى شادة على صدرها كتنفس بزز و تا باش تنوض توقف ما قدراتش رجليها خواو عليها

حكيم: ولد الفرناتشي و راجل على قبيلتكم كاملة ( ضرب على صدرو ) شتي أناا ولد الق*** يلا ما دخلتهمش للواسعة مك لقلب داارك شركولك لور مع القداام ( تحنى عندها مغزف و كمل ) برب أ كبيرة و ترجعي تقيسي فداك لبنت مسارنك نجبدهوملك و نعلقك بيهم .. يلا غير الحبس نمشيو ليه على ود الز** بوك .. مزيانة هاذي ؟

كبيرة:( هزات يديها طرشاتوو تا عواج حنكوو و قالت ) انا تهضر معايا هاكا .. الله ينعل ترابيك الحمار و لكن كلشي من الكلبة لي مسيفطاك .. صافي خرجاتلها ؟ بقالها غير دخل الصاحب عليا لقلب الدار .. و لكن الوسخ كيجبد الوسخ

حكيم:( حك حنكوو مغذذ و قال ) دابا نتي أم نتي ؟ واخا تكوني لقيتيها فالبركاسة ماشي حتى ولدتيها من صلبك .. غتحني فيها و نتي هازاها بين يديك و هي لحمة حمرة .. عوينة وحدة لي عندك باغى تطفيهاا ؟ ( شنق عليها و نوضها عقلو غيخرج) نطفيك أنا لول و نهني الدنيا منك .. نطفيك قبل ما تطفيها ابنت الق***

باقي كيهضرو تموو داخلين مع السطوان .. بنت صغيرة فعمر الخمس سنوات شادة فراجل لابس عباية بيضة مع صابو فرجليه و طاكِية مشبكة فالراس عندو لحية قوية و طويلة ضاربة النص فصدرو ..

باين فيه حالة الفقية دالجامع .. لكن الشوفة فيه غير مريحة .. كتحس بعينيه غير كيضوروا ما صافيينش .. حتى سيفتو كتخليك دير منو أطونسيون .. ! قبل ما تهضر لا كبيرة لا عبد الله لي .. كانت نطقات الطفلة فرحانة واخا باقي أغلب الحروف عندها مزاكلة

أسية: لالاّ عرفتي مسيت أنا و بابا عند مامات ماما الله يرهمها .. فرهات بيا بزاف و كاتلي نكول لك واحد الهاجة ( حكات راسها ) شنو كالت ؟ اء نسيت

عبد الله : السلام عليكم ( شاف الوضع ماشي هو هذاك و قال ) ياك لباس ؟ ولدي حكيم خبار الخير ؟

أسية: ااه ( نقزات فبلاصتها ) تفكرت تفكرت .. كاتلك تبارك الله عليك يديك مباركة .. شعري طوال على آخر مرة كطعتيه ليا أنا و شريفة ( بابتسامة ) فين هي شريفة ا لالاّ نلعب انا و ياها

حكيم:( خرج عينيه فيها ) شنو قلتي ؟؟ فوقاش قطعاتولكم ؟

أسية:( خلعها حتى تكمشات فباها و ردات بالشوية ) فاش مشينا للحمام .. كانت عِيشورة و كطعاتولنا شوية باش يطوال

حكيم:( ضرب يديه مع فخاذو و ضار شاف فيها هي لي براسها تالفة و عاد كتفكر ؟؟ ) الله ينعل عدو ربك ابنت الق** .. حاشا تكون الجنة تحت رجلين لي بحالك

بزق فالأرض مشربن تا سمع عبد الله قال

عبد الله: خلينا محتارمينك ا حكيم .. اش هاذ الهضرة كنسمع ؟ ( دوز على لحيتو كيتمتم بين شفايفو ) أستغفر الله العظيم .. اللهم لا تآخذنا بما فعل السفهاء منا

داخل للدار وجهو كحل بالأعصاب .. كيلقى شريفة واقفة هي و حبيبة كتودعها باش تمشي بحالها لدارهم .. بلا سلام و لا كلام قال

حكيم: تقبلي عليا ا شريفة ؟ تصبري معايا على الميزيرية و قلة الشي ؟ تبغي تتزوجي بيا واخا هاذشي كامل ؟

رمشات فيه شريفة مصدومة و وجهها لي كان صفر تزنك ما كرهاتش الأرض تتشق و تبلعها وا لا يبقى يشوف فيها بداك الشوفات لي كيذوبوها .. ما فكها غير حبيبة لي قالت

حبيبة: السلام عليكم و عليكم السلام نوضي نتزوجوا ؟ حكيم رزن و ثقل اولدي الله يرضي عليك ( هزات حاجبها و تكات على الحروف ) رزن .. هاذ البنت فين غتسكنها ؟ باش غتعيشوا ؟ باك غيخدم على جوج ديور ؟ و لا نتا خدام و أنا ما فخباريش ؟ عندك شي ملك ؟ شي ورث شي فلوس ؟

حكيم:( تنهد ) البنت باقي صغيرة أصلا .. من هنا لربع سنين انكون تخرجت و خدمت الواليدة و تا هي تصبر معايا على ما ربي يحن و نعيشها ملكة فدارها .. غير تعطيني الكلمة نعرف راسي من رجلي .. راك ما شفتيش داك الناس كي دايرين .. باز لها معاهم ( عطاها السلام ) ها البوجور ديالك

حبيبة: هاذي ماشي هضرة .. من هنا لتما يعلم الله شنو يوقع .. ما غنهزوش ذنب هاذ بنت الناس على ظهرنا .. و يلا بقات تتسنى فيك و ما رجعتيش ؟ تبقى مرهونة ؟ ( ضربات على ذراعها ) منين تعري على ذراعك و تدير علاياش ترجع و تكون قادر تهزها و تهز راسك .. العيب و العار يلا ما مشيناش خطبناها لك و كبرنا بيها ( شافت فيها ) نحطوك فوق رموش عينينا و ربي شاهد عليا .. منك من ولادي ..!

حكيم:( حنى راسوو ما بقى ليه ما يزيد فوق هضرتها ) كلامك هو الكبير

حبيبة: خرج مع شريفة وصلها لدارهم ما تمشيش بوحدها و الظلام ما بقى ليه والو و يطيح

حكيم: أصلا على ديكشي جيت .. خالها كيتسناها فالدار عندو هو لالاّ كبيرة

حبيبة:( تنهدات و عنقات شريفة ) الله يحنن القلوب و ما تنسايش داري ديما مفتوحة فوجهك .. ديريني بحال ميمتك

*************

غاديين فالطريق حدا بعضهم .. في صمت تام كل واحد فاش كيفكر و بالو فين غارق .. و يديهم كيتحركو بحرية قدامهم حتى بدا احتكاك طفيف بيناتهم .. مرة يتقاربوو مرة يتباعدوو بخجل .. حتى تشابكوو الأصابع مع بعضياتهم .. مزير على يديها بين يديه .. مخلي قلبها كيزدح و خوف فشكل متملكها .. خوف زوين .. حتى حد ما يقدر يوصفو .. هو فقط احساس متناقض ؟ دفئ خطير زحف فعروق شريفة حتى تبورشات .. حزينة و فرحانة فنفس الوقت ..!

حكيم:( مع قربو لدارها وقف و حيد من يديه كورميط ديال الجلد مظفورة و فيها جوج خيوط نازلين محفور فواحد فيهم اسم حكيم .. فتحلها يديها و حطولها و رجع شدها مزير عليها ) خلي هاذي عندك تفكريني بيها .. ما غنخليكش .. غنرجع موراك ا شريفة .. و وعد الحر دين عليه

جبد من جيبو تيليفون صغير سكة فالكحل مركب فيه لي زيكوطور ديالو فالكحل حتى هما .. مدولها بهدوء

حكيم: عندي غير هاذ اليوماين و خاص نرجع لكازا .. خليه معاك فيه نمرتي غير ناخذ نمرة جديدة و نعيط عليك .. جاوبيني ما تخليش بالي معاك

شريفة: و نتا ؟ لا لا ما نقدرش حشومة و الله

حكيم:( تبسم ) بغيتي تقلقيني ؟ ( حركات راسها بلا و رد عليها فالبلاصة ) هي يلا خديتيه .. عارفك ما كتلقاي باش دوزي لوقت .. فيه اللعبة دالحنش اتعجبك ( ضربها بصبعوو لنيفها ) و شبعيلي مع راسك من أغاني نصرو و الشاب خالد و بلال .. عارفك كتحماقي عليهم

شريفة:( ضحكات و خذاتوو دارتو فجيبها هو و الكورميط ) شكرا بزاف .. ما عرفت ما نقولك

ما حسات بيه حتى جرها عندو عنقها بالجهد و تا هي استحلات داك التعنيقة .. حاسة معاه بالأمان لي من نهار تزادت ما حساتو حتى مع أقرب الناس ليها ..!

حكيم:( قلب وجهو من جهتها .. مسح دمعة غلباتو و بصوت مقجوج رد ) تهلاي فراسك و صبري ( زير على يديها بلا ما يشوف فيها ) صبري و كوني قوية

شريفة:( تابعة وجهو باغى تشوف مالو حتى قالت بتفاجئ ) كتبكي ؟؟ علاش كتبكي ؟ أنا مزيانة و الله .. ما تدير فبالك والوو و شكرا على اي حاجة .. غتبقى ديما فبالي و عمري غننساك

تعلات جهة حنكوو لي عاطيها و باستوو ببراءة و مشات كتجري ما متيقاش شنوو دارت .. ما وقفات تال قدام دارهم لي عبارة على R+2 .. ساكنين هما و خال باها لي كتعزو و كتعتابرو فمتابثة الأب و كاحترام كتعيط عليه بخالي ..

قبل ما يتفتح الباب ضارت جهتوو كتشوف فيه واقف مكروازي يديه .. حاضيها و الضوو ديال البوطو ضارب فيه .. لمعات عينيها و جاتها رغبة كبيرة فالبكاء .. حاسة بلي هذا آخر نهار غتشوفوا فيه ..

لمعات عينيها و جاتها رغبة كبيرة فالبكاء .. حاسة بلي هذا آخر نهار غتشوفوا فيه .. ما قدراتش تحبس دمعتها و حرراتها تا هبطات كتحرق مع حنكها .. فنفس اللحظة تفتح الباب من طرف عبد الله لي داير نظرة حنينة فيها .. مد ليها يديه و بقى مدة طويلة كيشوف فيها حتى شككها فراسها و بعدها جرها عندو و عنقها لصدرو حاط شفايفو فوق جبهتها ..!

عبد الله: دخلي ابنتي .. طلعي عندي للدار راه أسية تما ..

طلعات سابقاه و هو موراها كيشوف فيها من التحت للتحت .. حتى دخلات لدارو لي كانت مأثتة و مثولة مقارنة بدارهم .. شافتها أسية و مشات عندها كطير عنقاتها .. عندها مقطرة من العينين و حتى شريفة نفس الشيئ .. حاسباها كثر من ختها و كتعز عليها بزاف حيث بدورها كبرات بدون أم .. غير وحدة تحرمات منها و هي بالحياة و عمرها شافت منها ذرة حنان أمومي و الثانية وفى أجلها و انتاقلات لدارها الأخرة تحت التراب ..!

عبد الله:( ربع رجليه موسع بيناتهم و قداموو طبلة فوقها بلاطو دبال البيض و بانيو كبير .. شيرلها تجي تجلس حداه و قال لأسية) جيبيلها باش تستر راسها

حركات راسها مخلياهم الراس فالراس كيدوز بيديه على ظهرها مصغر عينيه فيها و ابتسامة مزينة شفايفوو كيحرك راسوو بهدوء

عبد الله: الله يرضي عليك ابنتي .. الله يرضي عليك .. راني هضرت مع كبيرة و عقلتها و راها ندمات على لي دارتو .. ما تديهاش عليها راها كتبقى مك

شريفة:( حنات راسها ساكتة )

عبد الله: حاسك مخنوقة و عيانة .. من شحال ما رقيتك .. و نتي العين دغيا كتشد فيك ( شاف أسية جايبة فيديها ثوب على شكل ملحف فلون الأبيض كيتخشى فالراس يغطيه و ينزل تال للتحت واسع ) لبسيه

وقفات لبساتو عارفة شنوو غيديرلها ما دام حاط البيض قدامو .. و مولفة بهاذ الطقوس .. تسترات و جلسات قدامو .. هز بيضة و بدا كيضورها على راسها و هو كيقرا فالقرآن و يجود .. حتى تطرطقات البيضة فيديه و رماها فداك البانيوو و رجع هز وحدة أخرى و تكررات العملية مرات عديدة .. و على قولتوو هاذ الطريقة كتحيد العين .. و ما حدوو كيقرا و البيضة كتنفخ تنفخ تنفخ حتى طرطق و كيلقى فيها نقاطي حومر أو كوحل .. على أساس هاذيك العين لي شادة فالواحد ..!

تقريبا جهد ساعة و هو كيقرا عليها .. تا كمل و هز كاس دالما بدا كيقرا عليه و يتف فيه و شريفة كتشوف و ما حاملاش راسها خصوصا فاش مدولها تشربوا .. و لكن للأسف اللسان و القدرة لي تهضر و تقول لا .. ما عندهاش .. غمضات عينيها و شرباتو بلا نفس و حطاتوو تحت عينيه لي حاضينها

عبد الله: نوضي ترتاحي .. الليلة غتباتي معانا منها تونسي أسية و منها تخلي النفوس تتهدن شوية

شريفة: واخا

************

نعسات شريفة مكمشة حدا أسية دودة بالعيى و البكى لي بكات .. و فنص الليل بدات كتحرك رجليها بالشوية .. حاسة شي حاجة كتهرها .. و فذهنها كتقول راها غير كتحلم ..! لكن منين عاودات حسات بشي حد كيتلمس فرجليها حلات عينيها قافزة و غير شافت خيال شي حد غوتات بالجهد

"عودة"

شريفة:( غوتات ) ااااااه

أسية:( قفزات فبلاصتها و غوتات تا هي شادة على قلبها ) خلعتيني الزمر ندمتينا لاش قصناك .. فين سهيتي ؟

شريفة:( شافت فيها كترعد و تبلع فريقها و صوت فودنيها كيتكرر و يقول ) غير أنا أبنتي ما تخافيش .. بغيت غير نغطيكم من البرد

شدات فيها مزيرة و قالت بصوت مبحوح

شريفة: عطيني نشرب .. بغيت لما

أسية:( مشات كطير عطاتولها .. هبطات عليه فنفس واحد ) منين نتي خايفة لهاذ الدرجة مالكي على داك الشوهة ؟ و زايدة كتستفزيه و تعصبيه كثر و كثر .. باغى يدير فيك شي موصيبة ؟

شريفة:( بقات شحال كتشوف فيها عاد فهمات علامن كتهضر .. عوجات فمها و ردات ) شنو فجهدو كاع ؟ يطرطق كاع هو لي غيركب فييه السكر و الملحة ( هزات حااجبهاا ) أما أناا حدي نلبس علييه البيض .. حتى داك جووج دمعاات مووحال نزلهم .. !

أسية: تا ما نكونش سمعتك كتبكي و تشهقي قبييلة عاااد ديري عليا هاذ الدراما

شريفة: هه ! بكيت على الشمتة و على كرامتي لي زطم عليها و خلى لي يسوى و لي ما يسوى يهضر فيا .. أما هو لهلا يقلب عندي و زاااايد ناقص .. و نزيدك حاجة .. المراة كتبقى غيييير مراة و ضعيفة قدام الراجل و سلاحها دموعها .. و ما كاينش شي واحد فهاذ الدنيا لي مكيضعفش قدام دمووع المراة .. كثييير شي يلا كان كيموووت عليك

أسية:( باستهزااء ) بحال إلياس

شريفة: و مالكي كتقوليها بالبجوق ؟؟ ايييه كيموت و يحماق عليا و يا ربي غير نرضى .. و يلا على زواجوو .. ديكشي بيناتنا و ما عندك ما تعرفي فيه .. بغى يرد صرفوا بشرع الله .. غير يزيد مع الطريق نشوفوا فهامتوا فين غتحد و يلا ما ندمتوش راني خليت الدل على العيالات

أسية: هههه هاذي ما عنديش فيها شك .. مشاو فيها لا هو لا نجاة .. غير الله يستر مع الله يحفض من لي جاي .. و لكن لي ما تفهمليش كيبغيك علاش ينوض يتزوج عليك ؟ ما لقى غير هاذ الحل يرد الصرف بيه ؟

شريفة: ما عندك ما تفهمي فالرجال .. يلا بغيتي ترتاحي فحياتك ما تعمريش عقلك بيهم ديريهم غير حماق و مشاركين معانا الهوا و نوضي نايضة و أصلا هما طينتهم فشكل

أسية: كيفاش زعما ؟

شريفة: حنا حساسين و كنفكرو بالعاطفة .. عكسهم هما لي كيفكرو بالعقل كثر .. يقدر يبغي وحدة و يعيش مع عشرة غيرها و عادي جدا عندهم .. القلب فجهة و العقل فجهة أخرى .. ماشي بحالنا عندنا كلشي بالعاطفة و نهار كنبغيوا كنبغيوا واحد لا غير .. و ما نقدروش نشركو معاه حد خور واخا غير فالخيال .. كيبقى يبالنا هو كلشي ..!

أسية: أنانيين و صافي

شريفة: تقريبا ( حطات يديها على حلقها ) ما عرفتش مالي ؟ حاسة بشي حاجة ماشي هي هاذيك .. تا السخانة بحال يلا طلعاتلي لا ؟ ( مداتلها جبهتها قاستها )

أسية: وي شوية .. اتكون غير مع الشطيح و الجرا .. هبيلة حق الله هربتيني ههههههه

شريفة: تئ .. حلقي حاسة بشي حاجة محببة واحلة فيه و باغي يتجرح .. شربت الما و والو ( شافت فالمرايا ) لا ما تقوليليش ما بيا حتى حاجة .. شوفي عيني كي حمارو ؟؟

أسية: يكون ضربك البرد ؟

شريفة: لا ( سكتات كتفكر واش كلات و لا شربات شي حاجة و هي ديرلها طريين للدماغ ) اويلي القهوة داللعابات ياكما مخلطة بشي حاجة ؟؟

أسية: شربتي منها ؟ ( حركات لها راسها بنعم و هي ضحك ) ايوا صافي ما يكون غير شي شراب خانز قديم دايرينو معاها ؟

شريفة:( هزات حاجبها ) واش أنا غيخفى عليا المذاق دالشراب ؟ لا لا هاذي ما تكون غير شي كتامية طاحنينها تما .. ههههههه ويلي

أسية: و فرحانة ما ناقصك خير ؟؟

شريفة: عرفتي شنو تفكرت ههههه نهار حصلنا الحاحة حجيبة كتخلط البول مع قراعي الشراب ديال إلياس .. قالك بغاتو يثوب هههه

أسية: وا ما خلات ما دارت لي قالها شي حد شي حاجة ديريها تنوض تجربها فيه .. لا هو ثاب لا هي تهدات

شريفة: لا لا دابا تهدات من بعد ما مشات للحج .. و لكن راها مسخوطة ما جيتش وقلت علينا لفيفيعة .. كيفما عطاها خاطرها تعطي لولدها يشرب بولها راه تكون شرباتني أنا نيت شي عجب .. خصوصا فلول ما كانتش حاملة أصل مي

أسية: ما نظنش

شريفة:( صغرات عينيها ) تديرها و تفوتها لهيه .. كنتفكر غير عرسي كنبغي نتكلاطى بالضحك .. كلشي مبوق من الطرف لطرف ههههههه ما فهمتش اش وقع ليهم و الواعرة هي لادياغي لي جاتني وليت كنقول عنداك غير نرشرش عليهم من العمارية الفوق ( تطوات كضحك ) يذوقوا من بركة لالة شريفة

أسية:( مبسمة معاها ) أنا ما عاقلاش على هاذشي

شريفة: الشوهة غير بلا ما تفكري حسن لك .. بقالهم شوية يغنيو ليا .. عروستنا و يا قطيب لوز خريتها مبغات دوز .. عروستنا يا وردة شمينا خريتها يعطيها الرضى ..عروستنا يا قطيب البانان خريتها واحلة كتبان .. ا صباح صباح ماليه ناس جابتو وهي خرات عليه

يتبع...

‎