ذو التيجان الجزء 11

ناضت لبسات التحتية ديال التكشيطة الدهبية وضرات عندو قالت ليه صبر على هاد الوضع راه ماكاين حتى حل اخر

شد ليها فيديها كيشوف فيهم وقاليها المهم نتي تكوني راضية ومرتاحة ..اما كن جات عليا نسد عليك فداري نشوف فيك غير بوحدي

قالت ليه مبسمة اللهم نص خبزة ولا والو..

ضارت قدام المرايا كضحك طلقات سالف لحل بحال الحنش هبط كيتلوى ويبري بالكحولة حتى للارض وطلقاتو بيديها واصابعها كترتاح من تقلو على راسها..وقف وراها لابس فوقية بيضا ودوز يديه على شعرها من اللور قاليها

الصلاة على النبي مشاء الله .. زين فوق الزين الاللة روح الندى ..اش بغيتي عندي عوالة تصفيها ليا واقيلا نتي اللولة

ضرات عندو كضحك قالت ليه وييلي علاه عاد شفتيه؟ من قبيلة وهوا منشور حداك

قاليها وعلاه انا بقا لي شي عقل

عطاتو بضهرها كضحك وتسرح شعرها قالت ليه ايوا بشوية عليك السي يحي لايطير ليك العقل

بقا كيضحك وجرها من يدها قاليها اجي نطلعو لفوق شوية قبل متمشي

طلعات معاه هازة قفطانها تقول عروسة لاول مرة لديك السطيحة اللي على بيت النعاس كانت مفرشة بزربية حمراء بلدية وسدار مدورين وطبلة لوسد ومخاد وشجرة الوسط مضللة الجلسة والمحابق كبار ديال الورد.. لقات الجبال عالين ضايرين بالرياض وسرحات عينيها قالت ليه الصور بعيد؟

قال ليها بغيتي طلي؟ اجي الاللة نديك طلي

شدها من يدها طلعو واحد ربعة الدرجات طوال وكان السطح كبيرة ضاير على الرياض كله وفيه بيوت وشجر وركاني ديال الماء..قربها من الصور العالي وطلات شافت القصر مقابل معاها مباشرة بعيد واشمأزات قالت ليه القصر كيبان من هنا

قاليها ولاكن الرياض مكيبان من عندكم

قالت ليه كان المنضر زوين حتى خرج القصر فالصورة ..كنرجع ليه قلبي كيتقبط عليا

رجعات بحالها جلسات معاه فسطيحتهم وطلعات ليهم عيشة الحرشة مدورة كتغلعل وسطها الزبدة بلدية وقصرية دباداز معجن بالحليب دالجمل عليه البيض بلدي ووسطو السمن صينية داتاي والفاكية وبدات كترحب وتبارك بروح الندى . قالت ليها فهاد الكصعة دباداز خاتم دالنقرة ..الى لقيتيه نتي اللولة غادي تكون الغلبة ليك ..والى لقاها السي يحيى غتكون الغلبة ليه ..هادو عاداتنا ففطور عروستا .ايوا مرحبا بيك الاللة روح الندى

هبطات عيشة خلاتهم كيضحكو على مقالت وضحك السي يحيى هز فوقيتو شوية على رجليه وقرب قاليها يالاه بسم الله

حطات يدها كتاكل بيدها لقمة مور لخرى وكضحك قالت ليه هادشي غير هضرة وصافي ..وهاد الخاتم حتى هوا مابغا يبان

كان كياكل من الحرشة ويضحك عليها ومسح يدو قاليها بسم الله

ودار يدو فباداز مع الهزة اللولة هز الخاتم دالنقرة فصبعو الصغير وبدا كيضحك قاليها ايوا شغادي نقولك ..من هنا لفوق مكاين غير نعام سيدي

طلات عليه تشوف ووراها صبعو الصغير كان لاسق فالطرف ديالو كيحركو ويضحك وهي كتشوف فيه قالت ليه دارتو قدامك بلعاني

قاليها هزيتي من قدامي ومالقيتي والو

قالت ليه امم كنتي عارفو فين كاين

قاليها والله معارف فين جا !

بقات ساكتة وهوا كيضحك قالت ليه شنو زعما كيعني هادشي

قاليها كيقولو زعما اللي لقاه من العرسان كيكون الطرف الاقوى زعما فالعلاقة الزوجية

قالت ليه كيفاش هاد الاقوى؟!

قاليها كيضحك. زعما هوا اللي جار الحبل مسيطر والثاني كيغلب عليه الحب الحبيبة ..واخا بان لي هادشي غير كدوب ها العربون قدامك

بدات كضحك وتكات على كتفو قالت ليه ناري فاش كنتفرك تابعاني الطريق رجعة لقصر كنمرض.. ماسخيتش بهاد الجلسة

تنهد وبقا ساكت وعنقها قاليها ماتعطليش وماطوليش الغيبة.. الى ماقدرتيش رسلي ليا طمنيني عليك

عطاها الخاتم قاليها هاكي يالاللة مايبقاش فيك الحال

خداتو كضحك قالت ليه اممم..

دارتو فصبعها السبابة ليسرى يالاه جا قدها وسطو بولة كحلة غامقة كتلمع ..كملات فطور العروسة ديالها وشافت فيه قالت ليه عاود ليا شوية على راسك ايحيى..حياتك وماضيك..

قالت ليه بدا لي من الاولمن نهار عقلتي على راسك

قاليها بكل بساطة

انا انسان عادي زعما حليت عيني لقيت راسي غير انا عند الواليدين الله يرحمهم ..با كان تاجر ومي جالسة فالدار ..خيرني با بين الجيش وبين القرايا ختاريت القرايا .. كنت كنخدم معاه وكنتعلم ..با كان رجل دين وحقاني..علمني ماينفعني الله يدكرو بالخير..علمني الفروسية وركوب الخيل ..والرماح والسباحة والسيف وحتى التجارة ..كانت حياتنا فالارل فبغداد .. من بعد فاش خرجت السلكة وحفضت القرآن وهزيت يدي على العدل جيت لهنا ..هنا تزوجت المرحومة الله يرحمها وولدت بنتي مرجانة ولاكن ماتت المرحومة وكملت ترابي بنتي انا وعيشة.

قالت ليه وعلاش متزوجتيش؟

قالها خفت نتلهى ويغلبني كيد النسا وحلاوتهم ونسا بنتي ونهملها ..درت بناقص واكتافيت بالجواري

قالت ليه كانو عندك جواري؟!

قاليها كانت عندي وحدة دوزات معايا خمس اعياد ..وبان باها وحررتها مشات عند باها ..من بعد كانت عندي وحدة اخرى كملات اللي بقا من السنين وماتت الله يرحمها ..هاديككا ماكان ي

وماتت الله يرحمها من بعد ما عانات شي شهور مع المرض

قالت ليه الله يرحم الجميع ..ودابا الى تهداتك جارية مثلا تقبل بيها

تلفت شاف فيها مطولا كيتبسم قاليها تصدقي واحد الحاجة الى قلتها ليك؟

قالت ليه شنو؟

قاليها مور زواج مرجانة هداني واحد التاجر رفيقي جارية باش منبقاش بوحدي دعما

قالت ليه مصدومة وفين هي؟

هز يدها باسها قاليها عقلي كان معاك وحررتها مشات فحال سبيلها

تساعت الدنيا فعينين روح الندى ماقداتهاش فرحة وحطات راسها على كتفو نسات الدنيا حتى رجعات عيشة قالت ليها تتكلم لعبدية وناضت نزلات عندها معبسة قالت ليها متقديتيش تجلسي حتى شوية بلا ماتصدعي ليا راسي

ضربات عبدية يد فيد قالت ليها راه سكنتي هنا واش نسيتي راسك!! زيدي نمشيو قبل مايردو ليك البال وتحكال عليك الايام المتعوسة

نفخات روح الندى قالت ليها تفوو عاوتاني غنرجعو لداك القصر الكحل يخخ

رجعات زعفانة مشات لبسات حوايجها ونزل لقاها لبسات وسالات وقاليها صافي سخيتي؟

قالت ليه خصني نرجع ..الى لقيت الغفلة نعاود نجي

باس جبهتها وتنهد بقا ساكت وعنقاتو ونزلات خلاتو كيتحسر وراها وخرجات كتسلت رجعات للقصر كأن شيئا لم يكن .

دخلات لجناحها وطاحت على سريرها كتشوف السقف قالت لعبدية واش انا كنحلم ؟؟

قالت ليها عبدية نوضي توكضي قبل ميجي ولدك يفقيك بشي قنبة ..والله فير لاما قجك على هادشي ..ويييلي وحدي كن يسيق الخبار..اللخرة ليك هادي اروح الندى

تقلبات روح الندى كضحك قالت ليها يسيق ولا يجلس..انا والله كن ماكنت خايفة على يحي من هاد قطاع الارواح هوا وباه حتى نخرج فيهم..ولاكن جا يحيى فالطريق..

تنهدات وتقلبات على ضهرها كتلعب بشعرها قالت ليها شكون قال غادي نعشق اعبدية..

قالت ليها عبدية ايوا نتي اللي قلتي بغيتي واحد ينسيك فالاصيل..ايوا ها هوا جا

قالت ليها روح الندى تهنيييت ..تهنييت منو ومن غدايدو ..انا دابا فرحانة وباغا غير نعيش ونتمتع بحياتي..مابقا كيهمني لا هادا لاداك ..والله ماسخيت بحيى اعبدية ..عاد دقت طعم الحياة ..كنحس الشغف والرغبة فالعيش الصراحة ..سيري سيري وجدي ليا الحمام نغسل

مشاو وجدو ليها الحمام دخلات تغسل وخرجات بدلات عليها وخرجات من بيتها بحال الوردة مفتحة غير كضحك وراشقة ليها ..نزلات تسرح رجليها ولمحات شادية جالسة تحت واحد السقيفة فالحديقة شادة بنتها عندها ومتكية على الكرسي ساهية

بقات روح الندى شاردة فيها ومشات عندها رافعة راسها خلعاتها وناضت شادية وقفات حدرات ليها الراس فصمت ..دورات روح الندى عينيها وتبسمات قالت ليها شخبار حفيدتي

شافت فيها شادية مصدومة قالت ليها الحمد لله الاللة

بقات روح الندى كطل بعويناتها من بعيد على. البنتية ماكرهاتش تشدها لاكن تفكرات تهديد يور ليها تبعد منهم وبقات واقفة ..مداتها ليها شادية بحدر قالت ليها تهزيزها ؟

مدات روح الندى يديها بلا متشعر قالت ليها اه عطيني

عطاتها ليها شداتها وقرباتها من وجهها كتشوف فيها وتشم ريحتها وضماتها وتنهدات بعمق ومشات كدور بيها وسط الورد وتتأمل عويناتها وشادية موراها تابعاها ..تفكرات روح الندى كلام شادية ووقفات هزات راسها قالت ليها علاش قلتي لي كنتي دايرة علاقة مع العبيد ؟

هبطات شادية راسها قالت ليها ديك الوقت كنت انا وختي عيشة..ختارو وحدة فينا تبقا ومكان عندي مندير من غير نقول ليك ديك الهضرة حيت ختارني انا ندخل للعمبر ..خفت نتفارقو وتخرج تتباع فسرق لعبيد..قلت الله تدخل هي نضمنها حدايا ونبقا انا جنبك ولا تخرج مانعاود نسمع خبارها وياكلوها الدياب..هادا مكان الاللة روح الندى

هزات روح الندى حاجبها قالت ليها وعلاش ماقلتي لي الحقيقة؟؟

قالت ليها شادية ماشي بيدي الاللة انا مغلوب عليا..ختي من دمي ولحمي خفت عليها

قالت ليها روح الندى وفين ختك دابا ؟

قالت ليها شادية ماتت فديك الحرب الاللة

تنهدات روح الندى قالت ليها الله يرحمها ..ومك شنو كدير؟

قالت ليها شادية كتخدم مع الخدم هي وختي يامنة

بقات روح الندى ساكتة ورجعات تبسمات فوجهه تيليلا وتبوس يديها وشادية واقفة حداها ..

كان الامير يور دايز من تما وشاف داك المنضر ووقف كيراقب تصرفات روح الندى من بعيد وتبسم من عينيه ودخل بحالو وجلسات روح الندى على الكرسي هي وشادية وقالت ليها

نتي كتعرفي معضم اسراري اشادية ..واللي مزال مخليني صابرة لفعايلة هوا صدقك وحفضك للامانة ..ولاكن هاد المرة الى عاودتي كدبتي عليا مغاديش نرحمك .شفعات ليك هاد البنية اللي جمعاتك بينا ..تهلاي فيها وحطيها فعينيك

تبسمات شادية قالت ليها كوني هانية الاللة روح الندى

مدات روح الندى البنت لوحدة من وصيفاتها شداتها ومشات كتسارا بيها قدامهم وضارت روح الندى عند شادية كحزات عندها كدور فعينيها وتشوف فجنابها واش حاضيها شي واحد وقالت ليها بغيتك تقراي ليا الكف ..قولي لي شنو مخبي ليا ..يالاه هانا غنمشي وخليني حتى ندخل لجناحي واجي بلا ميشوفك شي واحد ويقولها للامير يور .

تبسمات شادية قالت ليها واخا الاللة روح الندى

ناضت روح الندى هزات راسها داخلة لداخل ولقات السلطان خارج وتبسمات هبطات ليه راسها قالت ليه مس الخير امولاي

استغرب بقا كيشوف فيها وضحك بسخرية قاليها منين جاك هاد الصواب الاللة روح الندى ..

شافت فيه كتقلب عينيها وضحك قالت ليه جاي من قلبي امولاي .. الحمد لله على نعمة النسيان

دار يديه ورا ضهرو قاليها ايوا الحمد لله ..ماتنسايش غير باش وصيتك ..ماناقصنا مشاكل وحنا ماشي فوقتهم

قالت ليه لااالا كن هاني..من ليوم عمرك تسمع صوتي ..ولاكن بغيت غير نطلب منك شي حاجة

صغر عينيه قاليه اما هي

قالت ليه ليوم بانت لي واحد الكنيسة مهجورة فطريق السوق.. بغيت الى سمحتي تسلم ليا الاذن نعاود نفتحها ونردها مشغل للنسا..كي شفتي دابا حنا مطولين هنا والحرب كتاخد الوقت..لقليلة واحد ثلت سنين ..بغيت نلهي راسي فهاد المشغل ونترأسو حسن ما نبقا جالسة لاشغل لا مشغالة .

قاليها شغل القصر ما قدش؟ شكون اللي غيسير الحريم و الخدم

قالت ليه انا غير ضيفة امولاي..شغل الحريم تتكلف بيه لاللة شامة ولاللة اسمهان ..والله يشافي لاللة شهرزاد كانت مسكينة قايمة بالواجب قبل ميتشلل ليها النص .

بقا كيشوف فيها مطولا قاليها واخا ..من ليوم نتي المسؤولة على ديك الكنيسة..ديري فيها اللي بغيتي على لله تلهي فيها راسك بلا مشاكل

حدرات ليه راسها حتى قنع من ولائها وقلت ليه الله يطول فعمر مولاي..خليت ليك الراحة

مشات قدامو وهوا متبع ليها العين مستغرب من داك الهدوء والرزانة ديالها وسد عينيه تنهد ومشا بحالو

مشات هازة خنافرها لجناح الامير ماحاملاش تدخل عندو وتهضر معاه لاكن عندها بيه الغرض وبزز منها دخلات لقاتو محني على واحد الخريطة كيخطط وقالت ليه

جيت عندك بغيت شوية دالمال

هز راسو فيها كيتساؤل بعينيه قاليها شحال ؟

قالت ليه ثلت ميات متقال

حل عينيه قاليها ثلت ميات متقال؟؟ علاش هاد المال كامل ؟؟

قالت ليه السلطان وهبني واحد الكسينة مهجورة غادي نحولها لمشغل نسائي .. خاصني باش نقضي

بقا ساكت وقاليها واخا خلي من بعد ونشوف

خرجات عطاتو بالضهر هازة راسها ورجع لديك الخريطة كيخطط حتى دخل السلطان عندو قاليه فين وصلتي ؟ كملتي داك الرسم؟

قاليه الامير تقريبا..وبغيت نسولك على لالة روح الندى..قالت لي وهبتيها كنبسة مهجورة ..طلبات لي ثلت ميات متقال

قاليه السلطان وهوا كيشوف فديك الخريطة اه وهبتها ليها قالت ليك بغات دير مشغل نسائي..احسن مادارت فحياتها لحدود الساعة

تبسم يور ورجع كمل داك الشغل هوا السلطان وقاليه شي خبار على قصر قرطبة

قاليه السلطان كلشي غادي كما خططنا ..سبأ قدرات تشعل الفتلة بين الخوت والجو مكهرب..دابا نوبتنا خاصنا نجهزو الجنود للحصار ..مابغيناش الحرب بالدم ..قرطبة مزال بلاد مسلمة وعامرة مسلمين معدبين مع داك القوم ..مابغينا حتى طوبة طيح من داك القصر..غادي نديرو عليها الحصار فالوقت المناسب ونستعمروها فاش تشد المصيدة

هز راسو مبسم قاليه مابقا والو ونخرجو الكلاب كينبحو من قرطبة..

قاليه الامير ولاكن الحصار غياخد الوقت وصعيب ملك قتالة يتنازل عليهت ويخرج هاز يديه

قاليه السلطان غخرج منها بحال الكلب كتافو باردين..ماشي مهم شحال غتاخد ديال الوقت..المهم هوا نردوها بلا دم

دخلات شادية عند روح الندى لجناحها وجلسات حداها مبسمة وحتى روح الندى كانت راشقة ليها ..مدات يدها غتغمز وضحك قالت ليها شوفي ليا شنو مخبي ليا مكتوبي

شدات شادية يدها كتقرا قالت ليها

تبااارك الله الاللة روح الندى !!!

قالت ليها روح الندى ملهوفة شنو كاين تكلمي دغيا

تبسمات شادية قالت ليها ضحكات ليك الايام وهداتك اجمل مافيها ..فرحي ونشطي يا لاللة روح الندى السعد سعدك والفرح فرحك .. قلبك على مول الحكمة زين السمية مسرار الحروف وصافي النية..

ضحكات روح الندى قالت ليها وهوا ؟؟ هضري دغيا

قالت ليها شادية هوا غارق فغرامك من ودنيه حتى لصباع رجليه..كيتسناك طلي عليه ويسهر الليالي يخمم فيك..هااهوا كيحسب فالوقت ويتسناك امتى تباني ليه..

تبسمات روح الندى قالت ليها ياك بيخير عليه ماتابعو غيار ولا خطر

قالت ليها روح الندى لا الاللة روح الندى .. جايك معاه الخير والايام الزينة .. ولاكن شي حاجة جاياك فالطريق مزال ماوضاحت ليها الصورة

قالت ليها روح الندى شنو جاي ؟؟ زوينة ولا خايبة؟

قالت ليها شادية من زينة الدنيا الاللة روح الندى..وحبيب قلبك تابعاه طريق طويلة ..وغيبة قصيرة .. جاياه فرحة العمر من اللي عزيز عليه ..المهم الاللة روح الندى راه الدنيا ضاحكة ليك..قريب تفتحي ابواب جديدة غتفيض عليك بالخير والخمير

قالت ليها روح الندى فرحانة وديك الموت اللي كانت كتبان ليك واش صافي مشات

قالت ليها شادية هاد الموت نقطة كحلة ..فالاول كانت صغيرة وجايا وكتكبر..

قالت روح الندى وولدي يور شنو بان ليك عليه؟

قالت ليها شادية ولدك بعيد ليك الاللة روح الندى..ولاكن ولاكن قلبو عليك..عقلو غايب وقريب يرجع ليك

قالت ليها روح الندى يعني مكاين غيار هاد الساعة؟ كلشي مزيان؟

قالت ليها شادية كولشي مزيان مكاين غيار . مزوجة؟!!!

دورات روح الندى عينيها قالت ليها كفاش مزوجة ؟

قالت ليها شادية طلع ليا الخط فيه عروسة بسميتك!!

قالت ليها روح الندى دوزيه خليه شوفي ليا غير داكشي اللي تابعني

قالت ليها شادية تابعك غير الخير ..بلاتي!!!! ولاكن كاين واحد المرى قدامك !!!

قالت ليها روح الندى شكون هاد المرى؟!!

قالت ليها شادية مافايت فيها زواج ولا ولاد !! جاياك عن قريب .. غيكون بيناتكم غيار وغادي تغوت عليك !!!

قالت ليها روح الندى مستغربة كيفاش غتغوت عليا مافهمتش

قالت ليها شادية حتى انا مافهمتش!! المهم كتبان مغيرة عليك..وقوى منك بالاضعاف!!!

حلات روح الندى عينيها قالت ليها كيفاش قوى مني!!! كيفاش دايرة وصفيها ليا!! اوييلي على تغوت عليا؟؟ وانا ساكتة زعما؟

قالت ليها شادية ساكتة ومتقدري تهزي لا راس لا سلاح قدامها ..اربي السلامة كيف دايرة !!

قالت ليها روح الندى كيفاش دايرة!!؟؟ واهضري

قالت ليها شادية قبيحة قبيحة قبيحة …تقول ميرة فسيفة مرى زينة!! مالحة مدوز لا لانس ولا جان .. ماطويلة ماقصيرة ..ماضعيفة ما غليضة..متوسطة القد والطول..بحال اللعنة غتسلاط عليك ..ولاكن مغاديش تآديك..غير هي غادي تآدي ناس كتار منهم المزيان ومنهم العيان . . ايوا هادا ماكان الاللة روح الندى

قالت ليها روح الندى لالل زيدي شرحي ليا ..واش هادي شهرزاد؟

طلات شادية على يدها قالت ليها لا الاللة روح الندى..ماشي شهرزاد..هادي عاد جاياك ..غادي تنفعك وغادي ضرك ..وغطيح على يدها ارواح بلا عداد ..ردي بالك مزيان .. وعطيها والى عرفتيها عطيها التيساع..حيت كبر منك ماتقدري ديري قدامها حتى حاجة ..كتحاولي وكتجاهدي .. فكل مرة كتقربي تهزي راسك كتهبطو ليك لاسفل سافلين ..غدوز عليك معاها من هاد الناحية

ضربات روح الندى فخادها قالت ليها اوييلي هادشي كامل وكتقولي لي فرحي وسعدي!!! شكون هاد الكارثة ؟!! كيف دايرة بيضا صفرا خضرا كيف دايرة!!

مدات يدها لشادية اللي قالت ليها منقدرش نوف الصورة كاملة ..الخط كيعطيني غير السمية وصافي..مابيضا ماسمرا . لا قمحية ولاكن مايلة للبيوضة..صافي هادشي اللي كيبان !!

جمعات روح الندى الوقفة قالت ليها خياااار !!! قولي جاياني موصيبة كحلة !! وييلي شكون هاد الموصيبة عاوتاني!! شكون تكون هاد بنت الحرام اللي قادرة تغوت عليا !! تنفعني وضرني!! وييلي وحدي على هاد الحجاية باش غنفكها!!

دق عليها المسير ودخل عندها حدر الراس وسرح يدو للعبيد دخلو ليها صنادق ديال الخشب وقاليها لاللة روح الندى..هادو رسلهم ليك سمو الامير يور ..

شافت فدوك الصنادق قالت ليه حل نشوف اش تما

حل ليها الصنادق وسطع الذهب وكولشي خرج عينيه ..قالت ليه سد داكشي وحطوه ليا لهيه يالاه

هزو الصنادق حطوهم فمكان الذهب ديالها ومشاو بقا غير المسير كيتودد ليها مللي شاف اش عندها وقاليها

لاللة روح الندى..اميرة الاميرات..شنو كطلبي مني

تنهدات مشطونة قالت ليه ماخصني والو ..غير سير خرج عليا

ضارت الدنيا بروح الندى ومالقات جهد ..عيات تقلب وتخمم ودور فالقصر واللي بانت ليها تقول هي !! ماشي هي! اصلا القصر عايش هدنة كل واحد فين لاهياه الوقت وحتى حريم السلطان مكاينش اللي ينوغشهم ويجبد بلاهم ..كل وحدة شادة تيقارها مكتشوف من لخرى ما يستافزها ..اما شهرزاد اللي كانت محرراها فيهم حرارت عليها من نهار بان يور ومن الصدمة تشلل ليها النص مابقات كتقدر حتى تهضر ورجعات شفاية لعيالات السلطان اللي كل شوية دخل عندها وحدة فيهم تكمل ليها الباقي وتشفا فيها وتزيد .

فقصر قرطبة كانت الاجواء مختالفة عكس قصر الحمرا..يمامة نجحات فمهمتها بامتياز ..وبسبب ميزاتها وصورتها الخارجية وانوثثتها الطاغية وحبها للملك والتملك والدلل اللي لايعلى عليه كانت هوايتها شغفها اسقاط الرجال فشباكها والمشي رافعة الدقن والضحكة على شفايفها ..خدات الامر كتحدي ليها وزاد حماسها وشغفها باللعبة وكانت فكل مرة كتحاول تفتن فيها التوأم كتزيد سعادتها تكبر واستمتاعها حتى تمكنات من اغوائهم بجوج ووقعاتهم فشباك يستحيل الخروج منه وكانت كتسنا روح واحد فيهم الطيح على يد الثاني لاكن خاب ضنها من بعد الرسالة الملكية اللي وصلات التوأم بوقف النزاع والخلافات التافهة وجاهم تحدير خلا مل واحد فيهم يتراجع .الرسالة زادت من غضب يمامة اللي دخلات جناح لوسيوس خلسة كتقلب على شنو مكتوب فيها من بعد ماساقت الخبار وصولل المرسول من قشتالة حامل رسالة ملكية .

من بعد استغلت حمام لوسيوس مع البنات شدات الرسالة حلاتها قراتها وقطعاتها بغضب وكمشاتها فيدها ورفعات راسها خرجات كتتوعدهم بما اكثر .

كانت اذكى من شيطانها فوقت الغضب وحطات ليهم اسوأ ما يمكن يطيح على عقل. مرى وقررات تتصرف بنفسها ومشات عند الخادم ديالها المخلص اللي كان قافز وذكي صاحب الانف الطويل والنحيف والقصير كان اسمه " قيروط" وطلبات منو يجيب ليها سم من اقوى السموم وجابو ليها حطاتو فعشا لوسيوس سمماتو وهي جنبه كتعشا معاه ..غير بدا كيتلوى ليها ناضت كتجري مشات عند لويس لجناحو بقات كتغوت كتردد سم سم لوسيوس سم على اساس معارفاش لغتهم وكتتهجا وخلاتو مشا كيرهول يشوف شنو واقع .غير خرج حطات القارورة فصندوق. من صنادقو الصغيرة ومشات كتجري جمعات اهل القصر بغواتها حتى سمعوها القياد وتجمعو فجناح لوسيوس اللي شد فلويس وهوا كيموت كيقول ليه نتا اللي سممتيني..نتا اللي بغيتي تقتلني

تراجعات يمامة اللور بابتسامة انتصار من بعد مانفدات خطتها فالوقت المناسب قبل مايطفى الغضب بيناتهم .

القياد سمعو ما تقال من فم لوسيوس اللي مات فيد لويس اللي مصدوم مافهم والو لاكن بسبب الخلاف اللي بينهم واتهام لوسيوس لخوه شكو فيه هوا الاول وتاهموه بعينيهم لاكن ماقدرو يديرو والو من غير يتسناو الامر من عند الملك

صبح الصباح وخرجات كنازة لوسيوس وموراها عابد حامل الرسالة للسلطان خلسة وبقات يمامة حاطة عينها على شنو كيجرى وكتتسنا الوقت المناسب باش تكمل خطتها .

بعد دفن لوسيوس دخل القائد عند لويس لبيتو كناقش معاه موضوع موت ترأمه واتهامه الخطير ليه وهنا كانت يمامة كتتسنى دخوله وسرعات للمطبخ حاملة معاه الشراب والكيسان ولابسة الاسود كونها حازنة على ماجرا ودخلات للبيت هازة المشرب حطاتو فوق الطبلة جنب الصندوقة ورا ضهر لويس اللي كيدافع على نفسه ..دورات عينها خوات الكاس تمدو ليها وحركات يدها بعفوية كاذبة تحت انضار القائد وطيحات الصدوقة قدامهم بجوج وطاحت قارورة السم كتكركب حتى لعند القائد ونزها فيدو مصدوم قاليه شنو هادشي

حل لويس عينيه قاليه شنو هادا

شاف فيه القائدة وهوا كيشم ريحته وكيشوف فالقارورة قاليه هادا سم !!!

قاليه لويس باش عرفتيه سم ؟

قاليه القائد هاد السم ديال اللفاعي اللي مربيين فالقبو باش نقتلو اعدائنا بيه ..نتا اللي سممتي خوك

خوج لويس عينيه من داك الاتهام عرف ان الامر مدبر ليه وقبل ميتحرك القائد تلفت عند يمامة كيقرا الاحداث الاخيرة اللي وقعات معاهم وجبد سيفه عليها حتى كان غيقتلها لاكن القائدة امر الحراس فالوقت المناسب شدوه جروه وهوا كيغوت على يمامة اللي مركنة فالحيط والبولة هابطة معاها بالخلعة معنقهة كاس الشراب اللي مزلع عليها وكترعد كتشوف فعينيه غيفلتو . بقا كيغوت ويردد خاينة ..خاينة نتي الخاينة

لاكن حتى واحد ماداها فكلامه وكملها بالدفاع على راسو وبدا كيضرب وشد السيف بدا كيقتل فيهم بجنون .اما يمامة غير شافت القتيلة نايضة هربات مع جناب الخيط كتجري ولويس تابعاها حتى تكركبات من الدروج وكان غيهبط عندها لاكن القائد تعرض ليه بالسيف باش يردعو لاكن لويس كان اقوى وقتلو فالبلاصة .دخل كم هائل من الحراس كيجريو ومابقاش لللويس فين ينتاقم من يمامة وهرب نقز من واحد الصور وهي كتزحف وتغوت برجلها والجنود كيتجاراو وينقزو عليها وهي بحال النملة تحت رجليهم كتغوت حتى فاتو

اما لويس فكان بحاا البرق هرب من قبطة يدين الجنود اللي هجمو عليه وخرج من القصر حتى قال نجيت وغادي نرد حقي وننتاقم لاكن طاح فمصيدة الاصيل والامير اللي كانو نيت كيتسناوه يخرج من بعد تنبيه يمامة ليهم فالرسالة اللي كانت كتقول

شد الطير قبل لايطير .. وجد ليه فين بات جا نهارو وتحدد ليه المصير

اخيييرا جاء الفرج ..تخطيطات الاصيل والامير مامشاش سدا ..اخيرا طاح لويس بين يديهم وركعوه عند رجليهم فالقصر وسط الحديقة اللي الخاصة بالسلطان ..ركع لويس ويديه للور وراسو فالارض قدام السلطان والامير اللي واقفين عند راسو كيشوفو فيه باستهزاء

وكان الامير كيفهم لغتهم ويهضر بيها كونه جلس مدة طويلة فاش فتح قرطبة وسط القصر وكان كيتفاهم مع الخدم والنسا وكذلك الاصيل كان كيفهم لغتهم بحال شريب الماء حيت كان ديما هوا وقشتالة وملوك القوط اللي منهم يمامة فصراع دائم وحتى الاندلس كانو فيها لغتين العربية والاسبانية بين الشعوب وهادشي خلا الاصيل يتعلم لغة جيرانو من نهار تزاد .

بغضب وحرقة قاليه الامير طحتي دابا قول لباك يفكك

بغا يشدو يبرد فيه الغضب لاكن شد ليه السلطان فيدو قاليه خليه…هوا اللي غيسلم لينا قرطبة بيدو ..

قاليه لويس نتوما خونة ..هادي ماشي حرب نزيهة

شدو الامير هزو من ودنيه بجوج ردخو مع الارض قاليه ها النزاحة يا رباعة الخونة الاستغلاليين

شدو السلطان ردو اللور كيضحك قال للويس نتوما خديتوها بالغدر ..وحنا ردينا ليكم نفس التصرف.. الفرق بيننا حنا ضحينا برواحنا باش نحافضو غلى بلادنا ..ولاكن نتوما ماضحيتوش ومغاديش ضحيو وغادي تعطيوها لينا بالخاطر ..حكييييم…هزو خشيه تحت الارض فامتن سجن خليه تما حتى يتعفن .

هزو حكيم من رقبتو وقفو داه وجلس السلطان ويور كيزفر حداه وينفض يديه ..شاف السلطان وقاليه بشوية عليك..السياسة كتبغي التبات والرزانة …مكتبغيش الغضب والاعصاب مكينفعو فحتى حاجة

مسح الامير على وجهه الاحمر بغضب كيسوط قاليه منبرد حتى نرفسو بيدي..

قاليه الاصيل ماتبرد حتى تشد قرطبة بيديك …من غير هادشي حتى حاجة متبرد النار اللي فيك

قاليه الامير دابا جا وقت الحصار

تبسم السلطان قاليه دابا هضرتي..

ناض وقف حتى رجع عندو حكيم وقاليه جمع ليا القايد فلان وفلان ومشا حكيم حضرهم ليه واعلن الحصار على قرطبة ورسل ليها جيش من الفرسان طوقوها ودخلو ليها ..استغل هوا والامير غياب الحكام واستعمروها من لداخل ومن الخارج قبل ماتجي القوة من قشتالة وتنوض الحرب بالدماء.. رباش يهدنو الوضع ويوقفو ديك القوة اللي ولابد كانت غتجي تهاجم بالارواح وهادشي اللي مابغاش الاصيل..بغا ياخد قرطبة نقية بشعبها وبسلامها بلا ميضطر لاستعمال القوة ..هادا علاش قررو يرسلو لملك قشتالة صبع من اصابع لويس بالخاتم ديالو وتهديد ملك قشتالة بقتل ولي عهده الوحيد اللي بقا ليه في حالة ما حاول يتحرك او يهاجم وحصروه فبلادو وحاصرو القصر وخلاو الوضع كما هوا حتى تنساحب قشتالة وتتنازل على قرطبة فهدوء..

اما الامير يور مضيعش الوقت ..خرج للصيد فنصاص الليل الليلة اللي شدو فيها لويس ورسلو الرسالة ولبس حوايجو ولاح الوشاح على وجهه وركب الخيل رفقة فتاح والفرسان القراب ليه ومشا

انتهت المهمة بنجاح لاكن يمامة كلاتها فعضامها وناضت الروينة فالقصر ورجع قائد الجيش اللي كيحكم في انتضار حل من الحلول وهدء الوضع ونشر الحراس والفرسان فكل نكان تحسبا لاي هجوم وجلس كيفكر وبقا حاير بين حقيقة قتل لويس لخوخ وبين اغتياله وبرائته ..فكر حتى عيا وخرج عيط لاعوانه فالقصر سول على البنت اللي كانت وقت وقوع الفاجعة قالو ليه اسمها سبأ وعطاوهم ملخص عليها وصراع الاخوين عليها والمشاكل اللي جاتهم بسببها وقاليهم جيبوها ليا

مشاو للبيت فين سادة عليها بالخلعة والحراس فكل جهة مننوع شي واحد يتحرك ..بقاو كيدقو مابغاتش تحلهم وبدات كتقلب منين دوز تهرب لاكن لا مفر.فرعو عليها الباب حتى غوتات صمكاتهم وشدوها جروها وهي كتغوت نسات راسها وبدات تحلف ليهم بالقشتالية اللي هي الاسبانية.حتى قاليها واحد من الخدم القشتالي دابا وليتي كتهضري وتفهمي ..زيدي يا الغدارة

وقفوها قدام القايد كترجف وهوا كيسبها ويعايرها وهي سادة عينيها ..قاليهم حبسوها وسلخوه ليا الجلدة حتى تعتارف بكاع داكشي اللي دارت واللي كتعرف

جروها كتغوت حيد ليها الخادم من شعرها الخلال اللي كان هداها لوسيوس قدامو قاليها مزال شادة بيه شعرك الخاينة..ودعي هاد السوالف يالاه تحركي

جرها بزز منها كتغوت ماعندها قوة وشعرها المدرج محلول حتى للمؤخرة كينقز معاها وداوها كيدفعو فيها جهة الحبس والمررات المضلمة المضوية بالنار وهي كتشوف فداك الضلام كيخلع ..بقات كتشطح بالخلعة حتى حسات باللي حداها طاح على طولو وشافت فيه لقات عنقو مدبوح ماعرفات منين جاتو الدبحة وتلفتات جهة الخادم الكافر لقاتو واقف والدم كيطوش من عنقو وطاح كيتركل ..خرجات عينيها غوتات من هول المشهد وشافت الحراس شهرو سيوفهم وقفو قدامها كيقلبو على شكون الفاعل لاكن شافت جوج وراهم بحال الجنون كيبان فيهم غير العينين طوال وعراض شدو الحراس. بحوهم بشوية عليهم وطلقوهم فالارض..رجعات باللور غوتات وسط داك القبر الطويل وهربات عكس اتجاههم لاكن جاو مقابلين معاها حراس اخرين كيجريو ووقفات ضارت مخلوعة مع طريق اخرى مضلمة لاكن فجأة سحباتها يد بحال بلمح البصر دوراتها وسدات ليها فمها حتى لقات راسها مقنتة مع واحد الحيط بالحجر قدام راجل كامل لابس الكحل لاسق عليها وساد ليها فمها قاليها شووو..

جمعها بلا متفهم كي دار ليها وخرجها من القصر حتى لقات راسها فوق العود راكبة قدامو وفجنابها رجال خرين ملثمين غاديين ..ضارت وراها والبرد كيضربها شافت فوجهه الملثمن وشافت عينيه ضاحكين وكان عندها احساس كيقول ليها راه الامير هاداك وزادت تأكدات اكثر فاش قاليها زوينة الركبة فوق العود بالليل

حلات عينيها فدهشة عرفات صوتو وهبطات ليه اللثام على وجهه قالت ليه مولاي !!!!

شافت قدامها مصدومة كترمش وتستوعب انها شافتو عينيها من جديد من بعد ما كانت عيونها ناشفة كتشوف غير الضلام فخبر موتو ..تلفتات كتشهق فجنابها من الفرحة

وعابد والخادم قيروط هاربين وراها من بعد ماساهمو فنجاتها وهما اللي ساعدو الامير عطاوه اشارات منين يدوز

دمعو عينيها وهي غادية كتجري على الخيل وضحك وتبكي فنفس الوقت وتمسح عينيها حتى وصلات لقصر الحمراء فالليل الدامس والكل ناعس..نزل من العود محيد اللثام مبسم وشد فيها هبطها وقفات قدامو كتشوف فيه ويشوف فيها وبلا متحس تخشات فحضانو كتبكي وتشهق حتى كانت غتسخف من تعب البكا وتزير وجهها ..عنقها بقوة جمع ليها عضامها وحتى واحد فيهم ماهضر ..كانت المشاعر اقوى من الكلام ..وعم الصمت ..تنهدات يمامة بعمق حتى ترعدو شفايفها ومسح دموعها شد ليها فوجهها قاليها سيري تنعسي خاصك الراحة ..غدا ان شاء الله ونهضرو فهادشي

حركات راسها بالايجاب وهوا كيتأمل ملامح وجهها وطلق منها مشات كتشوف بجنابها بان ليها المسير واقف وعقلات عليه حيت سبق ليها شافتو فاش كانت فالقصر لاكن هوا ماعقلش عليها حيت دخلات عندهم صغيرة ودازت سنوات كبرات فيها مابقاتش ديك الطفلة الصغيرة اللي دخلات اول مرة

حرك المسير راسو فالايجاب وهوا كيشوف فالامير اللي هضر معاه بعينيه واستقبلهم بابتسامة دخلهم للقصر وتلفت شاف فعابد وقيروط طلع فيهم وهبط بكبرياء وقاليهم وقفو نتوما هنا حتى نرجع ونوريكم فين تنعسو..وبلا صدع راه كلشي ناعس

حدرو راسهم ماتنهدوش قدامو وتبسم ليمامة قاليها مرحبا باللي جا مع سمو الامير..مرحبا لالة ؟…

شافت فيه بتعب تنهدات قالت ليه يمامة

قاليها مرحبا..اهلا وسهلا بالزين ..كان ناقصنا الزين فالقصر كان ناااقصنا

مشا معاها حل ليها واحد البيت صغير بالساروت فيه سرير وخزانة وعندو نافدة كبيرة حتى للارض وقاليها دخلي تنعسي الجمال ..تصبحي على خير

عطاها الساروت ليدها ودخلات سدات عليها بقات كتشوف فداك البيت ومشات جلسات على السرير كتنفس بتعب وحيدات جميع حوايجها لاحتهم للجنب بقات بقطعة توب قصيدة ناعمة لابساها تحت حوايجها وبدات تشمشم فراسها واشمأزات من نفسها وناضت كتقلب بعينيها لقات قلة دالماء محطوطة وهزاتها فزكات بيها واحد الطرف ديال التوب من حوايجها مسحات بيه لحمها كامل ورجليها ولاحت القطعة دالتوب باشمأزاز فالجنب وبدات كتشم ريحة الفراش كي دايرة ودوز يدها تشوف ملمسه عاد دخلات فيه نعسات وتغطات

من اجمل اشراقات الشمس لى قصر الحمرا هوا شروقها فهاد الصباح ..بين الامس واليوم مر وقت قصير لاكن غير احوال كثيرة! الى جات تتفسر وتتعمق صعيب تتفهم ..كفاش لتخطيطات كثيرة تنفدات فليلة ! غريب امر هاد الدنيا.

صبح القصر متفائل بحياة جديدة ..والشعب فرحان لسحق العدو والدعوات مع السلطان فالمساجد لا تنتهي..

اليوم يوم الجمعة ..قرر السلطان وصمو الامير يصليو فمسجد المدينة الكبيرة..خرجو من القصر مع الوفد والشعب مجمع كيبارك ليهم ويدعي بالنصر..دخلو للمسجد تسنطو لخطبة الجمعة اللي كانت كتهضر على الاحداث الاخيرة والحصار وتختمات بدعاء من لقلب مع السلطان وسمو الامير وخرجو فوق العود لقا الناس مصافين كيشيرو بيديهم ويهتفو فرحانين بشوفة السلطان وسمو الامير ..

نزل السلطان قال للامير يالاه نتمشاو شوية على رجلينا نشوفو شنو كاين فالمدينة

ندلو ومشاو كيدورو والحراس وراهم وكيتجمعو على احوال الشعب حتى جا واحد الولد صغير كيجري عند السلطان باس ليه يدو وقاليه السلطان واش معرفتي شكون هادا اللي معايا؟

قاليه الولد لا معرفتوش

قاليه السلطان هادا ولدي ..ولي العهد ..اللي غيحكم الجيل ديالك واش مناويش تربط بيه صداقة تنفعك فاش تكبر

قاليه الولد الصغير اه

تحنا بغا يبوس ليور يدو لاكن بعدها ومسح على راسو بحنان قاليه شنو سميتك

قاليه الولد عياد

جبد الامير واحد القطعة نقدية عطاها ليه لاكن الولد مابغاش يشدها وقاليه الامير علاش مابغيتيش شدها

قاليه الولد غضربني مي ..كتقول ليا حرام تشد من عند شي واحد بلا منعرق فيهم

تبسم السلطان والامير وقاليه الامير الى سولاتك منين جانك قول ليها عطاها ليك السلطان محمد اصيل

قاليه الولد لا مغاديش تيقني..حيت السلطان عندو بزاف يديال الذهب ومي كتقول ليا سلطاننا سخي ..هادا علاش مغتصدقنيش الى قلت ليها عطاها لي السلطان

ضحك اللسلطان وهوا كيسمع الكلام اللي كيتقال عليه وتلفت الامير كيضحك قاليه ماعرفتو ذكاء ولا نية ولاكن بجوج يستاحقو المكافأة

مد يدو للحارس اللي حداه عطاه رزمة دالفلوس عطاها للولد وهداه فرس خلا الحارس يرافقو لدارهم ويعطيوهم الهدية اللي جاد بيها الامير عليه

بينما السلطان والامير فجولة بين الشعب كان المسير قاصد حكيم اللي غارق من راسو حتى لساسو فموضوع الحرب اللي بينهم وبين قشتالة على قرطبة ومسير الحصار تحت اوامر السلطان وماعندوش الوقت اللي يضيعو فشي خاجة اخرى ..لاكن ما انه وصى المْسِييَّر على خبار الحريم فكان كيتسناه حتى بان ليه فداك الصباح ومشا كيجري عندو حدر ليه راسو وقالي حكيم على عجلة

طلق دغيا شنو عندك ماساليش ليك

قاليه المسيير السي حكيم..لبارح خرج الامير فنص الليل ومشا جاب معاه واحد الياقوتة .

استغرب حكيم قاليه كيفاش ياقوتة؟

قاليه المسير جاب معاه واحد زينة البنات..الوجه بلار ولعيون معسلة كبار و الرموش كحلة بالقنطار والحواجب ممشوطة عامرة عبار ..اما الخدود مفتحة مخوخة والشفايف مطبزة موردة ومسيريرة وزادها شعرها المدلدل تقول دروج من الرخام !! ااااااية من الجمال السي حكيم تضحك لعين واخا تكون الدمعة واقفة فالباب

بقا حكيم مستغرب قاليه منين جابها؟ وعلاش فنصاص الليل؟ شنو سميتها ؟

قاليه المسيير قالو لعبيد اللي جاو معاها اسمها يمامة ..وحتى المشية بحالها بحال الحمامة ماكدبو

حل عينيه حكيم مبسم عرف شكون تكون وكان كيحضر للرسائل والتخطيطات وقال بعفوية

ماقدرتش يتسنا غامر فنص الليل جابها..بلحق تستاهل

قاليه المسيير شنو اللي تستاهل السي حكيم

هز حكيم راسو قاليه سمع ابوشعيب..هاد البنت حطها فعينيك سمعتي..وسط عينيك..شنو ماطلبات عطيوها وشنو ماتشهات جيبو ليها ..ويااك شي واحد يطول يدو عليها ولا يحاسبها ويعاقبها ..حتى واحد ماعندو الحق عليها من غير سمو الامير يور وجلالة السلطان ..يالاه تحرك شوف شغلك

حدر المسيير راسو مشا وبدا كيتسائل بغا يعرف علاش هاد الاهتمام وشكون تكون هادي فملك الله!! مشا ضرب دورة فالحريم رتب امورو وطلع عندها لبيتها كانت مزالة ناعسة ودق عليها هوا وطامو وقاليها

هادشي اللي قال السي حكيم..قالك تهلاو فيها هي تهلاو فيها

قالت ليه طامو ايوا خاص نعرفو منين خرجات لينا هادي؟!! واش انا نعست وفقت لقيت وحدة فالقصر خاصني نرد ليها البال واش كلات ولا شربات يااه!!

حلات يمامة عينيها سمعات الدقان وناضت حلات ليهم الباب لقاتهم واقفين ودخلو عندها مبسمين

قاليها المسيير بابتسامة واعجاب صباح الخير ازينة الصباح !! اشمس الضحى يا زريعة النوار

نخزاتو طامو وهي كتشوف فيها مبسمة لداك الزين الرباني والبرائة فلعينين وقالت ليها صباح الخير ابنتي..

قالت ليها يمامة صباح الخير ؟!!

قالت ليها عبدية يالاه تمشي معايا نحمموك ..راه الطيابات كيتسناوك فالحمام

حركات ليها يمامة راسها ولاحت عليها حوايجها وخرجات هازة جلايلها وشعرها محلول غادية مع طامو فطريقهم للحمام ..فجأة تصادفات مع شادية دايزة وجات العين فالعين وبجوج تصدمو بقات وحدة كتشوف فوحدة وضارو وراهم متبعين العين لبعضياتهم مقادرينش يصدقو

زادت يمامة شوية ووقفات شافت فطامو قالت ليها شنو كدير هنا هاد البنت؟!

قالت ليها طامو هادي ام الاميرة لاللة تيليلا بنت سمو الامير وهي من المفضلات عندو

مشات الارض وجات بيمامة وخواو بيها ركابيها وشدها المسير وقفها بشوية قبل ماطيح وقالت بصوت ضعيف مصدومة

كيفاش؟ بنت الامير!!

كانت الصدمة قوية ليمامة بزز باش استوعباتها اما شادية كانت الدنيا كحلة فعينيها ماقدراتش تستوعب رؤية يمامة ..مشات لبيتها مصدومة وشدات حناكها كتردد

اوييلي شكون رد هاد الموصيبة؟!! علاش جات ياك قالو كلشي مات علاش كلشي يموت وهي لا؟!!

دخلات عليها مها لقاتها كتهضر بوحدها ولبنت فالمهد ديالها وقالت ليها اسبحان الله اناري تي مالك تشيرتي!

قالت ليها شادية راه دابا تلاقيت واحد الجارية من جواري لقصر لقديم ..حسابني ماتت وهي مزال حية

جراتها مها قرصاتها قالت ليها يا الهبيلة..جارية ماشي جارية راه البيت غيطرطق بالبنات.. كيتسابقو على شكون فيهم تكون بلاصتك..نتي عطاك الله بنت معاه مالك ماتوكضي وتجريه ليك كي جريتيه نهار الاول..وتزيدي معاه واحد الولد ولا جوج ..ودكي وتادك ..وتاد المرى ولادها ويجي نهار يمل ويقلب على الجديد ..لا معاك لا مع غيرك..غتلقاي غير ولادك ديك الساعة دايرين ليك الشان والهمة ماتقدر حتى وحدة تزحزك واخا يبدلك بعشرة..اما الى بقيتي على هاد الحال غادي يشتفو عليك وعلينا وعلى بنتك..دابا يا اما تشتفي عليهم ولا يشتفو عليك اما باش تبقاي غادية مع الحيط لحيط هادي راه مكايناش ومامسلكاكش ..غير مزال ما جات شي وحدة اللي دير بلاصتها وتحيدك لا نتي لا ديك المساليا ديال متعة اللي ما متعة ما متاع ..بحال الرزمة حتى هي كتر منك ..حتى ولدها ماتقدر تحميه ..غير لمنونخة على ختها تلاقيتو حتى نهار تجي الدقة فولادكم وقولو اش درنا هادا ضلم ..فيقي تكعدي ماحد ما وصلتي لديك الماصل ..هانتي شوفي اير لاللة سماهان ولاللة شامة مع لاللة شهرزاد قبل ميطيح ليها النص..خرجاتهم من عير البرى ..ايوا جلسي حت نتي تا دوزي نن نفس العين

تنهدات شادية قالت ليها وشنو ندير شنو؟ انا هادشي ديالهم مكنفهم فيه مكنعرف فيه ..تلف ليا الري من نهار دخلت للقصور

قالت ليها مسعودة غتغمز فيها وجاراها عندها

هزي البنت ديها لباها ..ديها ليه خليه يشوفك ويحن ليك الموصيبة..باني ليه خليه يتحرك شوية جيهتك اويلي وحدي غلى منعرف كي ندير

قاليت شادية مانمشيش بلا ميعيط ليا

هزات خنافرها ومسعودة دايرة يدها على جنبها كتشوف فثها وتعيب قالت ليها امممم منمشي الى معيطش ليا..هاد النفخة ديريها على الحطاب اللث كنتث تسناي ماعند جدو باش يبدلك الى مضارش ليك مايبرد ..ماشي لامير عندو قشلة دالبنات وخدة انشيك فلخرى ..قالك منمشيش بلا ميعيط ليا ..وراه كااع مغيعيط ليك غا تهناي خمري نتي كاع ..مسالي غا ليك ولا عندو غانتي..والله وماكنتي لا للة ومالي تجيبيه بلهلا يطريه ليه لا صورتي منو حتى شوفة..سمعتي..المرى القادة هي اللي تجيب بو نفخك وحاكم قدو قداش وتتحزم ليه وتجيبو حتى لعندها ..اما اللي كتسناه يتلفت ليها مشا عليها الزمان داتو ليها اللي تعرف ليه ورداتو من الطريق

شادية مابقات عارفة ماتقدم ولا ماتوخر ..حطات السلاح وقالت لمها قولي لي شنو ندير ..مابقيت عارفة ما نقدم ولا مانوخر

قالت ليها مها غير يجي الامير من صلاة الجمعة سيري عندو بالبنت ..باركي ليه النهار والنصر … كليمة من هنا كليمة من هنا خلي قلبو يحن وعينو تبصر ..فهمتي يا البهيمة يا قصيفة العمر …يالاه تحركي غسلي حالتك وتزيني بهجي مالين هاد القصر

دفعاتها خرجات مشات تنفد ما قالت ليها مها ودخلات للحمام لقات تما صاحبة دعوتها مكسلة ناعسة على واحد الرخامة عالية والطيابات كيكمدو عضامها ويغسلو ليها

هزات شادية خنافرها متحملاتها متقبلاتها ومشات جلسات قدامها معرية على جسدها وكتسنى الطيابة تعمر ليها الماء تغسل ليها ..

وسط ديك الضبابة والسخونية تقلبات يمامة هازة يدها وراسها وهي تشوف شادية جالسة قدامها ..وقفات ليها النفس فحلقها وكمشات شنايفها لاكن بسرعة طلقات لبشرة وسلطات عليها لسانها باش تغيضها وقالت ليها كتوصفها ببنات ابليس

اعوذ بالله من الخبث والخبائث ..ربي دار بينا وبينكم حجاب ..تسالاو الحمامات فقبيلتكم حتى جالستو الانس فالمجالس

شافت فيها شادية بغيض قالت ليها واه نتي اللي خاصني نقول اعوذ بالله من الخبث والخبائث..بسم الله الرحمان الرحيم

طلقات يمامة يديها كضحك قالت ليها وسخك تقل من خفة دمك

ناضت شادية مارضاتش بداك المعيور وتزيرات وخرجات من الحمام ماقدراتش تجلس معاها فنفس البلاصة ورجعات شادة البكية مشات تشكي لمها اللي شافتها راجعة وقالت ليها اناري مالكي خرجتي دغيا !!

قالت ليها شادية لقيت ديك المسخوطة فالحمام غسلاتني بلا ماء قدام الطيابة وهما كيضحكو عليا

هزات مسعودة خنافرها جراتها قالت ليها زيدي قدامي وريني هاد خيتي انا اللي غنتوالاها

مشات معاها شادية وكتعاود ليها شنو سبق ودارت ليها ودخلات معاها للحمام جلساتها وشمرات على يديها ووقفات على يمامة بحال شمهاروش قالت ليها هاديك هاااه يااللي ماتسما.. غدخلي سرق راسك ولا غندخلك ليه بيديا

تلفتات يمامة شافت فيها مستغربة وقصدات ضحك فيها الطيابات اللي طلعات قهقاهاتهم حتى لخارج الحمام وقالت ليها يااه!! اول مرة نشوف بقرة اسرائيل!! غير نتي يالاللة ماااا كتسريش الناضري

طارت عليها مسعودة طيحاتها من فوق الرخامة جات فالارض على راسها والطيابات كيفكو بعدوها وشادية كتجر مها وضارو الطايايت عند يمامة شدوها لقاوها غايبة فالارض وشافو فمسعودة قالو ليها اوييلي قتلتيها

قالت ليهم مسعودة مخلوعة كتشوف فيها هي جبداتني..غزيييت فيها

يالاه

خرجاتها شادية من تما كتولول قالت ليها اوييلي يا مي شنو درتي

مسحات مسعودة وجهها قالت ليها هي عيراتني ..واش بقرة ؟ ضحك الدرادي الصغار على اخر يامي تجي هاد المنتوفة تعايرني

شداتها شادية جراتها قالت ليها مشينيا فيها الى ساقو الخبار راه ما عندهم اعدى من الصدع ينوض بين الحريم

هزات مستودة كتفها قالت ليهاومن بعد !

شوية وهي تسرى معاها قالت ليها عنداك يجريو علينا؟؟ اناري

قالت ليها شادية ماشفتيش الى حبسونا..ديك بنت الحرام مايقر فيها لا خير لا شر تفوو

وصلات الخبار للمسير مشا كيجري للحمام لقاهم مخرجين يمامة فكاشة مغطية وحناكها حومر بقوة السخونية وضرب حناكو قاليهم اويييلي شكون هاد الكافر دار فيها هاد الحالة

قالت ليه الطيابة هاشمون ها شكون مشا كيشالي بيديه ويضرب فخادو عند مسعودة ودخل وسط الحريم كيجري كلهم ناضو كيسولو مالو قاليهم

فين شادية؟؟ فين مها؟؟ جيبو ها ليا اليوم نشرب من دمها

قالت ليه وحدة فالبنات مالها شنو دارت

دفعها قاليها حيدي من قدامي

سمعاتو مسعودة كيغوت وناضت ضربات فخادها قالت اويلي بوشعيب جاي يقلب عليا

خباتها شادية وسط ركنة ديال الحوايج ودخل عليها كيقلب قاليها فين هي؟؟ فين هي مك

قاليت شادية كتفتف علاش شنو بغيتيها؟

قاليها فين هي فين مخبية

بدا يقلب وشادية تابعاه قالت ليه مكايناش غير بشوية غتفيق ليا البنت

قاليها مك نهار كحل ..

قالت ليه شادية مالها شنو دارت فملك الله

قاليها حيدي عليا تا نتي

خرج كيجري رجع لبيت يمامة لقاها ناعسة كتنين وجلس كيفيق فيها قاليها

نوضي ..نوضي فيقي غتخرجي عليا السي حيكم ليوم يصفيها ليا بسببك ..نوضي الله يرحم ليك الواليدين نوضي

حلات عينيها دايخة وشادت راسها قالت ليه شنو وقع

قاليها كيفرنس واااالو..زلقتي فالحمام وجيتي على راسك ماوقع والو

بقات كتشوف قدامها شادة فكتفها وكتستوعب وحلات عينيها ناضت جلسات قالت ليه زلقت وجيت غلى راسي؟؟؟ هانا غنوريكم شنو هي زلقت

وقفات بغات تخرج وشدها رجعها كيزاوك فيها قاليها ها حجر العافية ها العار ستري ماستر الله..هانتي صحة سلام ما وقع ليك والو بيخير وعلى خير

قالت ليه بغضب مغندوزهاش لديك البقرة الى ماشريتها ليها مانتسماش يمامة

شدها لداخل وسد الباب قاليها يمامامة زينة زينة السمية.. عاد جيتي يا زينة البنات سخني بلاصتك ..ليوم الجمعة خلي يدوز هاد النهار ويحن الله وهانا معاااك والله منخليها فالعقروشة هاااا وباش يحلفو الرجال الشلاغمية

بقات كتشوف وطلع وتهبط وقالت ليه بميوعة

اممم الرجال الشلاغمية ماشي العيالات المزغبة

ميقات فيه وزادت خلاتو واقف كيشوف فراسو قاليها العيالات المزغبة!! ايوا الله يقل حياك !! سرك نيت ما دارت فيك مسعودة

خرج كيبركم ويقول

وا سليطة هادي !!

رجع السلطان والامير للقصر بالجلاب بلصم ذهبية والبلاغي البلدية مع وقت الغدا نيشان ودخلو لصالة كبيرة كانت فيها جلسة العبر الاصلية على الارض والزرابي مفرشة والخدادي مدورة .ك وطبلة كبيرةقصيرة مدورة.. كيسان النحاس مستفة والملاعق دالخشب مفرقة وقلات اللبن منزلة ..وقف الاصيل هز راسو وتلفت عند حكيم قاليه جمع العائلة نتغداو محموعين

حدر حكيم راسو مبسم مشا عند المسير جمع ليه العائلة كلها بأمر من السلطان ..دخل اسمهان وشامة وبنات السلطان ووصل عند لاللة روح الندى قالها ليها وتنفخات هزات خنافرها قالت ليه منين جاه هاد الحنان؟؟!!

هزات راسها خرجات حتى هي وتجمعات العائلة كلها كل واحد دخل مع الباب بوحدو دار ليهم التحية بابتسامة ومشا بتوجيه من المسير جلسو بلاصتو ..

جلس الجميع كل واحد فمكانو وهز الامير راسو كيشوف فكلشي وهوا جنب السلطان مربع رجليه وقال للمسير عيط على متعة وشادية حتى هما

حدر المسير راسو مشا وتلفتات عندو روح الندى اللي جلسات جنبو قالت ليه وعلاش تعيطهم ليهم حتى هما!

شاف فيها قاليها علاش مالهم ماشي امهات ولادي؟ وصبحو من افراد هاد العائلة؟

تبسم السلطان قاليه عندك الحق اولدي..حتى هما عندهم بلاصة بيننا وعندهم حق يتجمعو معانا

دورات روح الندى عينيها والسلطان كيشوف فيها بابتسامة مستفزة وسكتات دارت يد على يد وعبدية جالسة معاهم جنب روح الندى كتنخز فيها تسكت .. اما اسمهان دورات عينيها جهة شامة كتشوف بنص عين فعبدية وقالت ليها بخفوت

ايوا نقولو هاد الجوجات اللي جايين موات ولاد الامير..وديك خيتي شنو محلها بيننا

نخزاتها شامة قالت ليها سكتي غيسمعك شي واحد..راه بمتابة الام عند الامير وهي اللي رباتو ..مغيعجبوش الحال الى سمعك

ميعات اسمهان وهزات خنافرها في حين كانت جويرية ساهية كتشوف فالامير ووجهها احمر تفكرات الرسائل اللي كانت كترسل ليه وتزيرات. حتى بانت على وجها..خز الامير عينيه لقاها كتشوف فيه وتبسم ليها فوجهها وردات ليه الابتسامة وحدرات عينيها فخجل ساكتة

اما المسير وصل كيطير ويشالي عند شادية قاليها نوضي نوضي راه الامير طالبة للغدا معاه نوضي طلقي راسك

سمعاتو مسعودة اللي تخبات من ثاني فاش خل وخرجات من وكنتها كتجري قالت ليها نوضي سربي نوضي دغيا يالا يالاه

شقمها المسير قاليها هااااا احصلتي يا لعقروشة شكووون يفكك من يدي دابا

كمشها من يدها لاكن كانت صحيحة عليه وشنقات ليه على عنقو داتو وجابتو قالت ليه والله ومابسعتي من طريقي غا لاما لويتك كي القنبة علي يدي لاتسحابني خايفة منك انا مانخاف غير من اللي خلقني سمعتي

دفعاتو بالجهد جا على الارض ورجليه فالسما شد طربوشو الاحمر وبقا مخلوع فيها وناض جمع الوقفة كيتحلف فيها قاليها هاهي ..الى بقات فيك يا البقرة ماناش بوشعيب..عقلي فيها

هزات صبعانها قالت ليه واعلى مافي خيلك ركبو انا راه حناااااين بنت الامير سمعتي…واقولها وشلل بيها فمك اما نتا غا خويديم

مشا كيجري ويتحلف وشادية كطير وتنوض ماداتهاش كاع فيهم دغيا لبسات وسالات ومها ناضت وقفات كطلق ليها شعرها وترشها بما الزهر وتردد

كي شافوك يخليوك..بسم الله الرحمان الرحيم ..مولاي بوعفطة معاك ودعوة مرلاي ابراهيم قدامك وبركة مولاي سيدي مولاي دريس المحزون وراك ..يا لاللة عيشة ..يا لميمة..يا بنيتك خارجة ضوي طريقها وعلي مقامها ..

ضارت عندها شادية قالت ليها صافي صافي صافي اخنقتيني براكة عليا

هزات جلايلها خارجة وكتزرب ومسعودة تابعاها دازو قدام الحريم كولشي كيشوف مسعودة كتجري ورا بنتها وشير بيدها تابعاها بمريشة ودعي معاها

تعما العين اللي تشوفك ما تسمي ويلوى اللسان اللي مايقول فيك خير وتقطع الاقدام اللي تجري ليك في الغيار والخيوبة للي هاز عليك ضغينة وفقلبو ..

سكتات شافت يمامة خرجات طلات من بعد ما سمعات اللغط وهما دايزين حدا باباها وشادية كتجري فرحانة..وقفات مسعودة كمشات فمها بواحد الضحكة وعوجات وقفتها بدات ترش الزهر على راسها ويديها فالسما قالت ليها

سيري يا شادية يا بنت كرشي.. يا اللي كرشك ما تولد غير سلالة نقية ملكية..يا شادية يا زينة السمية… يا كبيرة المقام يا صافية النية ..الله يبعد عليك بنننااااات الحرام…بنات الشيطان بسسسسم الله الرحمان الرحيييم والصلاة علللى رسول الله..ياااكي شافوك يخليوك بصحيحتك وبريحتك ويعطي العمى للعين اللي ما تسمي على الله وماذكر الرحمااان.. نتي فعار الله ونبي رسول الله ..يا بنيتي يا شادية يا لمرضية ..كي شافوك يخليوك قلا النية ..ولهلا يصبحك ولهلا يمسيك على الجنية اللي تجيك فسيفة بنية .. قول اعوذ برب الفلق..غداك غدا الملوك وعشاك عشا الملوك وفطورك فطور الملوك ومقامك مقااااام الملوك ..انا بغيت لعديانك زنانة وبغيت ليهم نص ناعس نص فاكد نص يزحف نص مايوقف ما يكعد..

ميقات فيمامة ومشات كتلوى خلاتها واقفة مربعة يديها كتشوف فيها باشمأزاز ورجعات دخلات بحالها زدحات الباب

تلاقات يمامة مع متعة فالباب شافت وحدة فوحدة وضحكو فرحانين دخلو حشمانين لراسهم حدرانين قدام السلطان وافقين

وراهم المسير بلاصيهم جلسهم وحدة حدا وحدة لاول مرة وهما مقادرينش يهزو الراس كيشوفو غير بنص عين ومخبيين بين حوايجهم .. بقا الامير ساهي فيهم بتبسيمة حتى تحطات القصرية ديال الطعام كبيرة بسبع خضاري لحم القديد والزلايف مدورة ديال المرقة ..

مد الاصيل يدو قاليها بسم الله

وتكسرات سهوة الامير مد يدو قاليهم بسم الله ومد الكل يديه كياكل فصمت وشي كيشوف فشي بنص عين ..

بدا يور الماكلة بيدو واستغنى على المعلقة وقاليه الاصيل البنة فاليد

ضحك الامير قاليه مكاين ماحسن من يدك الوسيط كيسرق نصف البنة

حط السلطان المعلقة وجمع كم يدو كيضحك وبدا ياكل وروح الندى كتشوف فيهم بنص عين وتنفخ ..اما شادية ومتعة كيمدو يديهم للقصعة تقول غتعضهم واللي شافهم يقول كيسرقو..ضغمة كيسكنو فيها والى طاحت قدامهم شي خاجة يهزوها ماطاحش كيقضير باللي قدامهم ..

اما فجناح الحريم جميع النسا مجموعين مجموعات على الطبالي فالارض ومن بينهم يمامة اللي دخلها المسير تتغدا ودخلات على جناح الحريم كتسرح عينيها ..هزو عينيهم كاملين شافو فيها واللي عاطياها بالضهر حتى ضارت والطعام ففمها بقاو كيطلعوها ويهبطوها ..هبطات وحدة راسها بين البنات وفمها عامر كتسرط قالت ليهم شكون هادي

قالت ليها وحدة الله واعلم يمكن جديدة!!

حلات وحدة فمها قالت ليهم يااه على زين كي داير !

قالت ليها وحدة مالها كي دايرة!! عادية

بقات لخرى غير كتشوف فيها وقالت وخدة اخرى معاهم لاالا اختي الحق يتقال..فير نتي محيسيدة…الى كانت هادي عادية عندك الزين فنضرك كيف داير

ميعات الوسطانية قالت ليهم ايوا هاهي زوينة ..فرحو ليها غادي درق عليكم كاملين يالاه

قالت ليهم واحد الدريويشة لالا كل واحد كياخد اللي قسم ليه الله ..هي بصح تبارك الله زوينة وزينها مبهج فشكل ومسرار ..ولاكن ولاكن غتاخد نصيبها ورزقها بحال كل وحدة فينا..ماجات لا بزين لا بخيوية كل واحد ورزقو

قالت ليهم اللولة باينة فيها عربيةولاشرقية

قالت ليها الثانيةلالا منضنش يمكن غربية

قالت ليها لخرى ميمكنش حروفها عربية

قالت ليها لخرى لالا يمكن تركية الى ماخفت نكدب عثمانية..لونها فشكل قمحي شوية ..

قالت ليها الثانية الله واعلم الى هادي فارسية..هما اللي عينيهم كبار ونيفهم رقيق

قالت ليها اللي حداها لالا الفرس حروفهم كحلة..انا قلت ليك هادي عثمانية دابا تشوفي نتخاطرو على لويزات الذهب اللي فرقو علينا الصباح ..حيت انا متأكدة ..شعرها ما رمادي ما قهوي مازعر كل مرة يضهر فلون على حسب الضو ..هانتي شوفي ..

داها المسير حتى لعندهم وتقادو فالجلسة تبسمو وقاليهم يالاه يالاه تكاحزو خليو ليها فين تجلس

تبسمات جلسات بيناتهم وشدات ملعقة كتشوف فيهم وهما كياكلو بيديهم وقالت ليها المحسيدة

منين نتي فالخوت ؟

قالت ليها يمامة اصلي قوطية..ولاكن كبرت هنا وترعرعت هنا

ردت عليها قالت ليها امم ..وشحال فعمرك؟

قالت ليها يمامة سطاش لسنة..

قالت ليها وحدة حداها كطل عليها وفمها حدا القصعة

وكيفاش عشتي هنا ونتي اصلك قوطية؟

ضحكات البنت اللي تخاطرات هي وصاحباتها قالت ليها لا ديك لاديك طلعات قوطية

قالت ليها يمامة جيت بأمر من السلطان وانا عندي تسع سنين.

هزو حواجبهم قالو ليها ااامم بأمر من السلطان

قالت ليها لاخرى واش قوطية قوطية ولا مخييلطة زعما حيت ماجيتينش قوطية القوط مسفارين شي شوية بحالا مزعفرين

نغزاتها اللي حداها تسكت وفيقاتها جمعات فمها كتبركم وقالت ليها يمامة ..انا قوطية من م شيعية فارسية

ضربات البنت الطبلة هزاتها خلعاتهم قالت لصاحبتها هاااا جيت فيها اري اللويزة اللي عندك ديال الذهب

بقا كلشي كيشوف فيها ويمامة كتشوف فيهم وتبسم مرة مرة وقالت ليها وحدة حداها انا جابوني كانت عندي ست سنين ..ماتو واليديا فالحرب وبقيت بوحدي هنا فالاندلس ولاكن الحمد لله كبرت وتعلمت حتى بلغت وتحولت من جناح البنات الصغارات لهنا ودابا هانا عايشة هنا ..ولاكن نتي كيفاش ما عمرنا شفناك ونتي كبرتي هنا وعندك سطاش لعام فين كنتي؟

قالت ليهم يمامة انا هداني السلطان للامير يور وكنت عندو فالقصر وبقيت تما من بعد ماشتتات الحرب كلشي ودابا ردوني لهنا

قالت ليها اااممم ..هااكاك

قالت ليهم يمامة مالكم كتشوفو فيا ؟؟ بحال هاكا كولو المكلة غتبرد

شدات المعلقة كضحك وتاكل وبداو الماكلة ..

اما فالصالة الملكية فكانو سالاو الغدا وناضو مبسمين حدرو الراس بالاداب وكل واحد رجع منين جا واولهم روح الندى اللي مابغاتش توقف معاهم..بقا الاصيل و الامير جالسين فبلاصيهم من بعد جابو ليهم ااخدم الشلال غسلو يديهم وناضو خلاوهم كيجمعو الطبلة وقفو جنب بعض وتبسم الامير قاليه

مولاي السلطان ..عندي واحد المفاجأة بغيت نقدمها ليك لعلها ترضيك

استغرب السلطان قاليه مفاجأة ؟! اشمن هي؟

شار الامير بيدو للمسير اللي واقف بعيد جا كيجري عندو وقف حداه وقاليه الامير بخفوت جهة تفو

جيب يمامة

حدر المسير راسو ومشا كيطير دخل على الحريم لقا يمامة كضحك بأعلى صوت وقهقهات واصلة حتى لبرى كتمزج مع البنات وكل مرة تشد فوحدة فيهم ولخرين كيضحكو حتى قفزها المسير قاليها سبااااء

سكتات شافت قدامها بنفاد الصبر وعاود عييط ليها ماضارتش حتى وقف عليها قاليها واش مكتسمعيش؟

وقفات هزات خنافرها قالت ليه اولا ماسميتيش سبأ..ثانيا فاش تبغي تعيط ليا وقف حدايا ماشي تبرح بحال العجل

حل عينيه مصدوم من شنو قالت ومارضاش قدام البنات اللي بداو كيضحكو وقاليها والله غير الى ماقطعت ليك هاد اللسان ..صبري عليا ..صبري وغادي نوريك.. يالاه زيدي قدامي

بغا يشد فيدها ونتراتها مشات والبنات كيعيطو ليها يماامة ..يمامة..عاودي رجعي عندنا ماتغبريش علينا

تلفتات كضحك قالت ليهم بانوثة وميوعة كتلعب فشعرها غنرجع الى ماقطعش ليا العجل لساني

وطلقاتها بضحكة خرجات خلات البنات كيموتو بالضحك والمسير غيموت من غيضه وقفها برا كيتبرا ليها قاليها قسما لازما وماجمعتي فمك غير لاما هرستو ليك..قليلة الترابي..نتي خاصك ترباي

ميعات فيه قالت ليه شنو بغيتي دابا ماعندي ماندير بتهديداتك الخاوية

سد عينيه كمدها وقاليها الامير طالبة فالصالة الملكية ودااابا

هزات راسها كدور عينيها وتتمايل قالت ليه عاد تفكرني؟ وشنو بغا مني؟

قاليها بقا ليك غير الامير حتى هوا تمردي عليه..زيدي تحركي وغتعرفي فاش بغاك

مشات معاه دازت حدا واحد المرايا دوزات يدها على شعرها وزيرات قفطانها الكحل المزرق بزواق المعلم على جناب السفيفة حتى لارض ومحلول من جناب وبلغة دالجلد ومشات وراه للصالة ..غير قربات تدخل وقفات جمعات نفسها والمسير كيجرها وهي كتنتر يديها وتصد عينيها قالت ليه بشوية عليا..غتسكت ليا القلب

جمعات طاقتها وتبتات وحصنات وحدرات راسها دخلات بشوية بقا المسير مصدوم ويدو على فمو قاليها لا والله الا التسليم منك يا بنت الناس

تقدمات قدام السلطان والامير مهبطة راسها والسلطان كيشوف فيها باستغراب حتى قربات وركعات قدامهم على رجليها مهبطة راسها كتقدم ليهم الولاء..بقا الامير كيشوف فيها وشعرها مدلي على الارض والسلطان مبسم شاف فالامير وضحك ..تقدم الامير هز ليها راسها وقفها قدام السلطان ومشات باست ليه يدو بابتسامة ومسح على راسها قاليها بصوت تقيل..سبأ…شمس قرطبة

حدرات راسها فرحانة من الوصف اللي عطاها وقاليها مشاء الله كبرتي ..

تلفت شاف فالامير قاليه مكانتش كنضن غتكون كبرات دغيا !

هز الامير حاجبو كيشوف فيها وفشكلها ويديه وراه قاليه امم ..كبرات وزيانت ..

هز السلطان راسو كيشوف فيها ودار يديه وراه ضهرو قاليها كنحييك على الوفاء والتضحية ديالك ..وكنهنيك على الانجاز اللي عملتي..شار بيدو لحكيم كأنه قاليه يعطيه شي حاجة. ومشا حكيم كيجري خرج من القاعة وبقات هي ساكتة قدامهم كتشوف فالارض قالت ليه هادا واجب امولاي.

طبطب على كتفها قاليها الله يرضي عليك ..درتي اللي ماقدروش الرجال يديروه…تبارك الله عليك

دخل حكيم هاز صندوق فيدو صغير حلو قدام السلطان وجبد منو وسام عطاه ليها ليدها وقاليها هادا وسام اخلاصك ..وووفائك لدولتنا وتضحيتك فسبيل الله ورفع راية الاسلام

شدات الوسام شافت فيهم بعيون لامعة وباست ليه يدو وبغات تبوس للامير يدو وخطفها طبطب على كتفها قاليها طلبي شنو بغيتي ايامامة ..جميع الابواب مفتوحة ليك

تبسمات قالت ليه انا مابغيتش تجازيوني على عملي..هادا واجب عليا كما هوا واجب على اي مسلم ..انا مادرت والو كلشي من فضل الله تعالى

بقا السلطان كيشوف فيور هز حاجبو شار ليه بعلامة الرضى وبقا يور غير كيشوف فيها قاليها ومع ذلك طلبي شنو بغيتي..حتى حنا واجب علينا نكافأوك

قالت ليها هاد الوسام كافيني امولاي..والعيش قريب منكم هوا اللي بغيت

بقا الامير كيشوف فيها وشار ليها بنضارتو تطلب وربع يديه كيتسناها ..شافت يمين يسار كتفكر وهزات راسها قالت ليه الى كان هاكا ..بغيت جناح خاص بيا يكون جناح بعيد على الصدع والضوضاء..بغيت رفوفو كبيرة من كتب اشهر الشعاراء..وبغيت كتاب خاص بيا و جلسات شعرية مع الادبيين المشهورين

تلفت الامير شاف فالسلطان وتبسم ورجع شاف فيها قاليها صافي هادشي اللي بغيتي؟قالت ليه صافي

شار بيدو قاليها جاتك ..

قاليها السلطان طلبك عندو قيمة..ان شاء الله نشوفوك من اشهر الادبيين والشعراء ..وبما انك كيعجبك الشعر خلينا نسمعو شي ابيات من عندك

تبسمات وقلت بارتياح …

أشـــــواقــع فيـك يـــالدنيـــــا مـــايسحــابنيش هكـذا انـتـيــا

المـــــابــــدء فــيــــن هيــــــا غــــابـت مــاتبـانشـي لـيـــــــا

مـــابقـــات قيمـــة الإنســــان صـبــح هـــايــم أو ولـــهــــان

والله يكــــون فــــالــعــــــوان عــــلامـــات هـذي اتـبـــــــــان

الشعـــــوب غــــاديـا تعــــدي وبــــلا ذنـب راهـــــا تــــــودي

كـــل واحــد هــــــاز خنجر ويـقــــول اخــلاصــي بـــيــدي

الــــديـنــــــات هيــــا الحيــــا تـدعـــــي لـسـيلـــم كل هيـــــا

والإنـســان ايـعيشلي هـنيــــا بتســـــامــــح يعــــم ضيــيــــا

ونطلب خــــالـــق الـكـــــوان هو السميــع ارحيم الــرحمــن

نعيشــوا فراحة واطمـأنــــان ونحتـــارمــوا كــل الـديـــــان

يــرجــع الـمـــا الـكـل ســـدي يـخـضــــار ربـيـعـنـــــا ووردي

أرا يـــديــــك نـمـــد يــــــــدي لـيـــك أخــــويــــــا بكــــل ودي

ضحكــي لـيـنـــــا يـــا الـدنيــــا والمحبـــــة تصيـــــــر حيـــــــا

هــــاك أراوي روي عـلـيـــــا لـيــك نـظـمـت هــذ الـسـجـيـيـا

أشـــــواقــع فيـك يـــالدنيـــــا مـــايسحــابنيش هكـذا انـتـيــا

المـــــابــــدء فــيــــن هيــــــا غــــابـت مــاتبـانشـي لـيـــــــا

تبسم الاصيل وعجبو تنضيم كلامها اللي جا فوقته المناسب تلخص فيه كل ما فات .

حدرات راسها وهنئها على فصاحة لسانها وسمح ليها تغادر القاعة .

تحنات باست ليه يدو وحدرات راسها للامير ومشات شادة الوسام فيدها فرحانة بيه وبقا السلطان كيضحك مع الامير وقاليه

شبان ليك فهاد البنت ؟ مختالفة على جميع البنات

حرك ليه الامير راسو قاليه لبيبة .. وزوينة وذكية .. كتتمتع بقطنة وحيلة قوية ..وفحد داتها خطر عليها وعلينا ..ميزاتها زوينة ولاكن فنفس الوقت خطيرة هي والديب مكيختلفوش على بعضياتهم

وقف قدامو السلطان مصغر عينيه قاليه كاع هادشي اللي قلتي عندك فيه الحق..ولاكن ماتنساش ..الديب وفي لعائلته وكيهاجم فالوجه ..الى قدرتي تروض هاد الديبة غادي تربح وتزيد القدام ..خاصك دراع يمين اللي يحضي الغيبة ويرد الهيبة فغيبتك ..وبحال هاد الديبة مغتلقاش ..هي اللي تقدر تشد معاك الساس الى ربطيتها بالعائلة وربيتيها ..متغدر ماتخون

قاليه الامير كمت قلتي الديب وفي لعائلتو..كضن غتكون وفية لعائلتها ؟ ماتنساش باللي عائلتها تدمرات على يدينا ..والى كانت كما كتقول غتكون كتسعى لشي حاجة اخرى

رد عليه السلطان بارتياح فالقول وقاليه البنت حكايتها مختالفة..ماشي كما كضن .هي فعلا اميرة ولاكن اميرة منبودة ..باها هجر مها ونفاها ..وتزوج من جديد .. وضاهر لي البنت عندها عقدة فحياتها من العائلة ومن الاب بالخصوص..وماشافتش امها من اللي كانت عندها ثلت سنين.. فاش ناضت الحرب معاهم ماتو جميع افراد العائلة واتلقات سبأ محبوسة فبيت مخبي على البيوت.. شوف شنو كان واقع وعلاش تحبسات وشنو السبب..بتت فصن التسع سنوات محبوسة والجنود فاش وصلو ليها حلو الباب بصعوبة عليها ولقاوها تما فحالة يرثى لها ..اما امها مابانش ليها الاثر واخا طفتا على البلاد كلها ..وغالبا غتكون هربات وباقا حية ..ولا اقدر ترجع لبلاد الفرس اللي هوا اصلها

استغرب الامير قاليه علاش مها ماشي قوطية ؟

قاليه السلطان امها فارسية ..شيعية .. المهم نرجعو للموضوع ديالنا.. البنت عندها ماضي خايب ..من خلال التحليلات اللي درنا والبحوث على الملك وعائلته قبل شن الحرب..ومن خلال ما جانا من جواسيسنا فالقر عندهم ..تاضحات الامور ..وسبأ فاش وصلات لهنا تلقات العناية الكاملة..نبع وجهها وزينها شفع ليها وميزها على غيرها ..كملات تربيتها هنا وحلات عينيها على حياة من غير حياتها الكحلة واللي عاشتو فقصرها كأميرة غير بالسمية..لقات هنا داكشي اللي مالقاتوش فقصرها ..لدرجة سلمات وتخلات على دينها وتفقهات وقرات وتعلمات فديك المدة كلها اللي قضاتها هنا حتى لسن البلوغ..يعني ولات وحدة من اهل هاد البيت ومن تربية هاد القصر وماعندها ما تخطط ولا تنتاقم ..هادشي فكرت فيه قبل منك لقيت ليه اسباب كثيرة تخلي سبأ تنتاقم من اهلها كن بقاو فالحياة ماشي منا حنا ..وزيد على هادشي كانت عندها ميولات شيعية ..ومها يقدر جراتها لعندها خلاتها تنتمي للشيعة ..وربما هادشي هوا اللي خلى باها يسخط عليها ويحبسها وهادشي اللي ضنيت انا ..يعني كانت كانت كتأمن بالله ولاكن كان ناقصها تآمن بالرسول (ص) وتصحح الدين ديالها ولحسن الحظ كانت عندها رغبة تعرف الحقيقة..حيت على حسب ما بان ليا كانت تايهة بين امها وباها وكل واحد كيعلمها داكشي اللي بغا حتى بقات الوسط ماعرفات اشمن دين تتبع .

بقا الامير ساكت وساهي كيشوف قدامو وقاليه العجب..هادشي عمرها جبداتو ولا هضرات عليه ..ماعلينا ..كل واحد وضروف الحياة اللي عاش المهم ما يجيش منها الآدى فيوم من الايام

رتب على كتفو السلطان وتمنى ليه عشية زوينة وهادية ومشا كل واحد فيهم لجناحو..ماوصلش الامير حتى يجلس وسط جناحو حتى جات يمامة فاجآتو بحضورها ودخلوها عندو وقفات قدامو مبسمة وناض متفاجأ كيشوف فيها وتبسم وفتح ليها يديه مشات عنقاتو بقوة وعنقها جمع عضامها فقبضة وحدة حتى وصل العناق للعروق وتراجعات قدامها اقا عينيهامغرغرين من فرحة شوفتو ..

قالت ليه واش بابامنياتي عندك باقي مفتوح

فتح يديه قاليها باقي طلبي شنو بغيتي

جمعات يديها بجوج مع بعضياتهم بسعادة وقالت ليه شكرا لبيتو ليا الطلب الاول..والثاني خليتو حيت كيتعلق بيك بوحدك

ستغرب قاليها شنو هوا طلبك

قالت ليه طلبت نكون شاعرة ..وشعري كيتطلب الحرية..وبغيت نكون حرة ماشي جارية

طلب يمامة كان مفاجأة كبيرة للامير .. بقا كيشوف فيها مطولا وقاليها شنو كتقصدي بالحرية؟؟ مانتي حرة من نهار عرفتك

تبسمات قالت ليه بصح انا كنت جارية ونعمتي عليا بالحرية نتصرف كما بغيت ..ولاكن كنحس براسي مزال مربوطة ومكتفة وهادشي كيضايقني..بغيت نعيش حرة كما كتعيش الحرة..يعني نتاخد قراراتي بنفسي..وكنواعدك هادشي مغادي يأثر حتى على شي حاجة..كلشي غيبقا كما هوا المهم انني نحس بالحرية الحقيقية

دار يديه وراه وواضح من نضارات عينيه عدم الرضى لاكن قبل بالطلب وحررها وعطاها بضهرو خلاها واقفة وقاليها يمكن ليك تمشي دابا

تبسمات مهبطة راسها قالت ليه شكرا امولاي..الله يطول فعمرك

تراجعات اللور خرجات خلاها حتى مشات وتلفت دار يديه وراه هاز راسو كيزفر في حين بدات الحياة الجديدة عند يمامة من الساعة اللي خرجات فيها فرحانة من جناح الامير رافعة راسها والسعادة كتغمرها ، حرة طليقة بلا قيود ولا ولي امر يتحكم فيها وفحياتها وهادشي كان ليه طعم خاص من بعد ما عاشت العبودية وتحررتت منها وتنورات طريقها .

فهاد الاثناء دخلات عبدية عند روح الندى اللي كانت كتستف مجوهراتها بيديها في اطمأن تلفتات شافت عبدية واقفة قدامها وقالت ليها مالكي ياك لاباس شنو جابك

ضحكات عبدية بسخرية قالت ليها جابني خبار مغيعجبكش… ويمكن يعجبك الله واعلم

استغربات روح الندى وقالت ليها اشمن خبار ؟

قالت ليها عبدية سبأ

تساؤلات روح الندى قالت ليها شكون سبأ

قالت ليها عبدية سبأ ولا يمامة بحال بحال..جاريك مولاي يور لقديمة ..

افأفات روح الندى قالت ليها مالها حياة من الموت

قالت ليها عبدية اييه داكشي اللي كاين..وراها فالقصر معززة مكرمة .. وزيد على هادشي عطاها السلطان الوسام وكرمها

ناضت روح الندى وقفات قالت ليها كيفاش عطاها الوسام ياك ماتت!!

قالت ليها عبدية الله واعلم انا ماعارفة والو غير قلت ليك شنو واقع فالقصر

نفضات روح الندى الوشاح من يدها بغضب وخرجات مشات عند السلطان دخلات عليه غاضبة ..هبطات راسها شوية من بعد رفعاتو قالت ليه سمعت عطيتي وسام لجارية من الجواري..اشنو معناه هادشي؟. من امتى ولاو الاوسمة رخاص حتى بداو كيتفرقو على الجواري

ناض وقف ضحك بسخريةوقرب من وجهها دار يديه وراه وقاليها من هاد الساعة الاللة روح الندى

قالت ليه علاش عطيتيها الوسام؟ اشنو كيوقع ؟ لاياش باغي توصل

قاليها قرراتي ماعندك حتى دخل فيهم.. اهتمي بالامور ديالك وخلي شي لاخر انا قاد بيه

زيرات على قبضة يدها بغيض قالت ليه فالاول هديتيها ليور من بعد خليتيها تتقرب منو ودابا حييتيها وكرمتيها وعليتي ليها الشان !! هادشي مادرتيهش حتى مع بناتك اشنو ناوي بالضبط لشنو كتخطط

تبسم من عينيه كيتأمل وجهها الجميل وقاليها جاتك الغيرة من وحدة صغر من ولدك!

كمشات سيفتها باشمأزاز قالت ليه ااااشمن غيرة داكشي اللي بقا ليا نغير من القوطية

عز حاجبو كيضحك قاليها لا ..دابا غلطتي.. هاديك مسلمة ..مابقاتش قوطية ومجاهدة اندلسية..هادشي طويل باش نفهمو ليك ..ولاكن حسن ليك تصاحبي معاها ورديها فصفك ..ماتعرفي تقدر تنفعك

ضحكات بسخرية قالت ليه خليها نتا فصفك تنفعك اما انا ماعندها فاش تنفعني

دورات وجهها خرجات خلاتو ومشات لجناح الامير دخلات عليه لقاتو فالشرفة جالس كخمم وانتفضات جيهتو بلا سلام بلا كلام فاجآتو وقالت ليه

كيفاش تعطيو لسبأ الوسام علاش فاش جاها؟؟ باشمن حق وسمتوها وميزتوها ؟؟

وقف كيشوف فيها وفطريقة كلامها وقاليها علاش هاد الضجة كلها ؟ سولي السلطان اللي عطاها الوسام اما انا هنا غير ضيف ما نا ناهي ولا آمر ..والى خدات الوسام راه خداتو حيت تستاحقو

خرجات عينيها قالت ليه كيفاش تستاحقو؟؟ فاش ستاحقاتو؟؟ واش عارف شنو معنى الوسام؟؟ واش عارف شنو تقدر دير بيه وشنو كيعني هادا ؟؟

قاليها الوسام اقل حاجة ممكن تاخدها ..والى جلستي بالعقل وبشوية غادي نفهمك اما الى بقيتي كتغوتي على والو ماغنهضوش معاك

جلسات قدامو ربعات يديها قالت ليه عانا اسيدي قوليها علاش خدات الوسام !! اشنو هوا هاد السبب كاع ..وزايدون فين كانت غابرة حتى قلنا ماتت وطلعات لينا عاوتاني.. هادي نحلف عليها ما بشر..هادي جنية ولابسة وجه ملائكي

بقا غير كيشوف فيها وجلس ربع يديه قاليها وعلاش هاد الحقد هادا كله؟؟ علاش؟ اش بينك وبينها؟

دورات وجهها قالت ليه هاد خيتي مكنرتاحش ليها ..كنشوفها قلبي كيتقبط عليا

هز حاجبو قاليها حتى وحدة مكرتاحي ليها. اصلا..لا شادية لا سبأ ولا غيرها وعمرك ترتاحي لشي وحدة غير تهناي

قالت ليه دابا قولي علاش خدات الوسام وفاش جاها جاوبني ..

سد عينيه تنهد بعمق وبدا كيعاود ليها الحكاية من الساعة اللي وصلاتهم رسالة منهنا حتى لساعة الوسام .

اما يمامة فهاد الوقيتة كانت وسط بيت كبير ..حلم وتحقق..بيت من افخم البيوت للعائ لة الملكية ..متوفر فيه حمام كبير من الرخام بسقاية دالماء سخونة جاية من عوينة قريبة مياها مكتحبسش وعلى طول النهار والليل دايزة ..سرير كبير وفراش ناعم من الطراز الرفيع وشرفة كبيرة كطل على اجمل منضر فالمنطقة ..منضر خلاب جامع بين اصوار المدينة والغابة اللي قدامها والصحراء اللي ورا الغابة كأنها واحة فقلب الصحراء..خزانة كبيرة بالنقش وجدران بالفسيفساء والسقف من الخشب المنقوش ..زرابي تقليدية وخامسات طوال شفافة بيضاء..جناح ولا في الاحلام…. كانت كدور وسطه منبهرة بجمالية الجناح وجنبه واقف حكيم رافع راسو ووراها بوشعيب المسير غير كيدور عينيه ويشوف فيها من راسها لرجليها

جبد حكيم يدو ورا ضهرو بابتسامة وكانت فيها ورقة ملفوفة كسر حاجز الواقع والخيال اللي كان قدامها وتلفتات عنده بسعادة

قاليها هادي حريتك ..مختومة بختم الامير ..

شداتها بلهفة حلاتها كتقرا مكتوب عليها

انا السلطان يور بن محمد اصيل المرتضي بالله ..احرر جاريتي سبأ اليمامة واعطيها كامل الحقوق وصلاحيات التصرف بحرية في حياتها الشخصية .

شافت فحكيم بسعادة قالت ليه واش بصح ! ماقدراش نصدق

مد ليها ورقة ثانية قاليها هادا من كرم السلطان على ماقدمتي من خدمات وسعدتيه بانجزاك للمهمة

حلات الورقة لقات مكتوب عليها تعويض مادي على الايام اللي قضاتها مع الصلبيين وكذلك راتب شهري .

مزال ما ستوعباتش الامر حتى كان المسيير واقف قدامها كيشوف فيها بنص عين وفيدو رزمة صغيرة من المال بأمر مم حكيم وقاليها

هادا راتبك الاول..كنتمنى تحسني التصرف وتصرفيه فالمنفعة

قاليها حكيم ماشي من شيامنا نكرو الخير ولا نساوه ..وطالما نتي دايرة عقلك ومحتافضة بمحبة السلطان ليك غادي تشوفي غير الخير والخمير..مولاي الى رضى على شي واحد كيسعدو ..ولاكن الى سخط كيعدمو .

هزات راسها قالت ليه انا روحي فداء لمولاي السلطان .. حتى انا مكنساش اللي كيدير فيا الخير ومكنعضش ليد اللي طعماتني وماشي من الشيم ديالي نكر الاحسان

تبسم حكيم وكان راضي عليها وباين من وجهه القبول وقاليها الى فشي مزة احتاجيتي لشي حاجة علميني

خرج وخلاها كتحل الرزمة وجبدات الذهب كتحسب فيه بالوحدة لاكن فجأة شمات ريحة المسير وهزات عينها لقاتو كيطل عليها ويحسب معاها وكمشات الرزمة شافت فيه بتبسيمة صفرا وهزات راسها قالت ليه باقي كتسنا شي حاجة ؟

حنحن ورجع اللور قاليها سمعي نقولك.. عنداك يغرك الغرار وتبغي توري ..واه فرمشة عين يطير ليك الراس

تبسمات قالت ليه لا راسي مغيطير خاف غير نتا على راسك حيت فرمشة عين تلقاه بين يدي

عبس بوشعيب قاليها الله يعطيني الصبر معاك ..كنتي ناقصاني غير نتي فحياتي باش تكمل المجموعة اللي عندي.

دور وجهه بغا يمشي لاكن وقفاتو وقالت ليه بوشعييب

ضار عندها قاليها السسيك بوشعيب.. اخر مرة تعيطي ليا بوشعيب حرفية

قالت ليه وانا لاللاك يمامة ..مقامي على من مقامة ابوشعيب ..سير قوليهم يجيبو ليا تواب جديدة ..وبغيت خياط القصر اللي يخيط ليا وبغيت ..

خرج خلاها كتعرض عليه المتطلبات ومشا شاد راسو كيردد ياربي .. اش درت فحياتي حتى تجازيني بهاد المعصية غادي تكمل عليا ما خلاتو فيا لاللة روح الندى وشهرزاد

سلا الامير القصة للاللة روح الندى اللي بقات مصدومة كتشوف قدامها مالقات متقول ليه وناضت هزات راسها جمعات النفس وقالت ليه ومع ذلك ماتعطيوهاش كثر من قيمتها ..كتبقا جارية من الجواري ..والو فعلا كانت وحدة منا وكتنتمي لينا كما قلتي واجب عليها ضحي ..واي وحدة فبلاصتها كانت غتعمل نفس الشي..وعابد والخادم لاخر اكبر برهان ..حتى هما خدمو لصالح هاد الوطن وحتى هما يستاحقو المكافئة ..اللي بغيت نقوليك هوا هادشي اللي دارت عادي بالنسبة لجارية تعطاتها فرصة توقف مع شعبها وبلادها وسلطانها ..فهمتي

قاليها حتى عابد والخادم الثاني مانسيناهمش ..وخداو تعويضات على الشي الي عملوه.. ولاكن اللي عندو النصيب الاكبر فهادشي والعقل المدبر فداك القصر هوا يمامة ..بلا منكرو المجهود اللي دارت والخطر والتضحية ديالها..هادشي جناتو نتجية اعمالها مازدناها مانقصناها..كنتمنى تخوي بالك منها ..اصلا مابقاتش جارية وهي دابا حرة مكتنتمي لا لخدم ولا لجواري .. الى بغيتي تعاتبي على شي حاجة اخرى عاتبي السلطان هوا الآمر والناهي فهاد القصر

جاب ليها اخرتها بخبر الحرية حتى ماقدراتش تزيد تهضر وخلاتو خرجات غطق من غيضها مشات لجناحها سدات عليها وشدات راسها عيطات على عبدية تواسيها وتخفف عليها .

اما فجناح الخدم كانت قصة اخرى .. او بداية قصة جديدة..فين كانت مسعودة كتمشط لشادية وتقريها ومرة مرة تنزل عليها بشي دقة تفيقها

كوني بحال العيالات القادات..انا كن كنت بلاصتك كن راني قلبت هاد القصر سفاه علا علاه.. مالك ابنيتي ماخرجتيش ليا..غير هبيلة كتر من ختك وكترعاي فجنان ناشف وقدامك الجنانات بالمياهات عطا الله.. توكضي وكوني لاللة مولاتي. فين مشات قفوزيتك وفهامتك؟ ولا كنتي دايراها غير عليا انا هاا؟

تنهدات شادية قالت ليها واامي.. واش الدوار هوا القصر؟ القبيلة راه كانو فيها غير اللي بحالي وبحالهم منخاف منهم مايخافو مني..اما هنا راه غير قطاع الريوس..الى تنفنفت يطيرو ليا الراس..واللي قالوها خصني نقول ناعم لاللة نعام سيدي..اما الى حلفوها فيا بنات الحرام والعبيد راه يديرو ليا مصيدة يغبر ليا الشقف فمرة.. ومالي على حالتي نخشي راسي بين ريوس ماشي قدي؟ اللهم خليني مع جنب الحيط ..نهار طغيت وتفرعنت على لاللة روح الندى راه ريشاتني وعندي الزهر ماقتلاتنيش..من هاديك حلفت مانعاود

جراتها مسعودة من اللور من شعرها قالت ليها ومالكي اش قلتي ليها؟ قلتي ليها تزوجك والسلام اش طرا..زايدون راك نتي اللي شاداها من دراعها المريضة ماشي هي..زيدي ليها فيخرات فالكف شوية… شوية من هنا شوية من هنا وطلبي وختاري حتى نتي..خليها تحس بيك قادة ولاللة مولاتي..ضرب ليك الف حساب..تشرطي وماتنفدي حتى تنالي

قالت ليها شادية ايييهههيه والى حلفاتها في ودارت ليا شي حفرة غرق من البير طيحاتني فيها ..لااالا منقدرش نتحداها ولا نجبد بلاها.

تنهدات مسعودة قالت ليها اوييلي علامن عوالة انا .. راه هي اللي محتاجة ليك ماشي نتي اللي واقفة عليها.. زيريها شوية

قالت ليها شادية وشنو نقول ليها يالاه نتي عطيني شنو ندير انا صافي راسي حبس

زيرات مسعودة بنتها قرصاتها وقراتها ولبساتها وقاداتها وسيفطاتها لجناح الامير ..دخلوها عندو باذن منو وكانت هازة بنتها فيدها ملفوفة فخرقة بيضاء وتقدمات مبسمة ناحيتو..رفع راسو من على طاولة الخريطة اللي كانت قدامو وناض مبسم استقبلها وهز بنتو فيدو باس جبهتها وبدا كيضحك معاها ويهضر معاها وجلس بيها كيلعب بصبعانو معاها وشادية واقفة مبسمة كتشوف فيه فكامل اناقتها. قالت ليه بادب سمحي ليا امولاي الى جيت فوقت من غير وقتي..قلت نجيب ليك. تيليلا تشوفها

قاليها بلعكس احسن مادرتي..

قالت ليه حتى هي توحشاتك..شوف شوف كيف كتلعب معاك

بدا كيضحك قاليها تشطنت هاد الايام وتشغلت بزاف ..ولاكن من هنا لفوق مغنخلي حتى حاجة تشغلني على ولادي ان شاء الله

تبسمان قالت ليه الله يحفضهم ليك ويخليهم ليك..ويرزقك اضعاف منهم حتى يرجع قصر عامر بولادك

هز عينيه شاف فيها متفاجأ من كلامها وبقا ساكت مطولا وتبسم قاليها امين

دخل العشا فديك الاثناء ودورات شادية عينيها بغات تخرج واخا كانت قاصدة تزورو فوقيتة دالعشا..قالت ليه عطيني تيليلا امولاي نديها باش تعشا فراحتك

رد بالنفي قاليها لا غير خليها ..باغي نبقا معاها شوية

تنهدات بتبسيمة قاليت ليه ايوا نمشي انا نخليك على راحتك معاها

حدرات راسها بغات تمشي ووقفها وعينيه فتيليلا كيلعببصبعو فصبعها قاليها خلي اشادية ..تعشاي معايا

هزات راسها وبتاسمات بنصر ونجحات ليها خطة مسعودة فصلح العلاقة اللي فسدات بيديها اخر مرة وجلسات جنب الميدة بحال الاميرة شهوة منها ..جلس جنبها وعطاها البنية شداتها فيدها وشاف فيها مبتاسم قاليها جات معاك الامومة

حمار وجهها بدات كضحك وبدات كتراري ببنتها اللي بدات كتبكي وقالت ليه بغات ترضع

وكانت هادي من ضمن مخططات مسعودة اللي وصاتها اشنو دير فاش دخل وقاليها بترحيب ..رضعيها خودي راحتك

دورات عينيها يمين وشمال مترددة تجبد بزولتها لاكن قالت فنفسها والله مانبقا نحشم ..نحشم نجيبها فراسي وعاد كملات دابا مللي جات ديك المصيبة للقصر غادي تشطب ليا كلشي اللهم نفطر بيها قبل ماتعشى بيا

جبدات بزولتها كاملة قدها قداش عطاتها لبنتها ترضع منها وجلسات صاقرة حتى حط ليها كاس ديال الخوخ مطحون وقرب ليها الماكلة قاليها كولي مزيان باش تلقاي ماتعطي للبنية

قالت ليه واخا مكتكونش عندي الشهية كناكل على قبلها هي

قاليها وشنو اللي سد ليك الشهية

تبسمات قالت ليه مرة مرة مكيكون عندي خاطر وصافي

طل على تيليلا وهي كترضع شدها من حنكها الصغير كيضحك وبدا كيتعشا هوا وشادية مرة يهضرو مرة يسكتو حتى قربو يساليو العشا وتحل الباب دخل عبد كيشوف فالارض وقف جنب قاليه مولاي ..كاينة مرى فالباب كتقول سميتها مسعودة

شافت شادية فالامير قالت ليه مي

قاليه الامير دخلها

ومشا العبد دخلها دخلات كضحك بسروالها لقصير كامل مطرز مجموع من لتحل وقفطان مجموع على الحزام والشمار والشدة فالراس فالازرق وكتحدر راسها وتعاود قالت ليه سمح ليا مولاي جيتك فهاد الوقت قلت نجي نبدل للتربية الى جات على خاطرك باش ماطيبش

جمعات شادية بزولتها قالت ليها اه بصح عطات الريحة بلاتي نجي معاك

تكاتها مسعودة فبلاصتها خرجات فيها عينيها قالت ليها ماجاتش ومولاي جالس تخوي عليه المجمع ..انا غنديها نبدل ليها ونردها لسيدي

حرك ليها راسو بالايجاب وشاف فشادية هاز حاجبو فشنو غدير ، عطات البنت لمها داتها وغادية وكتبارك فعمر سيدي حتى خرجات مشات وخلات شادية جالسة كدور فعينيها ماعرفات اش دير وكضحك وتخفي التوثر قالت ليه ياكما نمشي حتى انا ؟

جرها من يدها زيرها عندو كيتأمل جمالها الاشقر وقاليها نتي خليك معايا.. توحشتك

قرب من عنقها باسها حتى نسات سميتها ولقات راسها فالفراش معاه فجو حميمي شاعل

صبح الحال وكلها يلغي بلغاه ..القصر جامع شلا حكايات وكل حكاية يا حكااااية .. مانشميش بعيد..غير فالكشينة فين كتعجن يامنة المسمن وتجبد فيه باش تلفت انتباه محبوب القلب اللي حلفات سميتو ماتسكد ليها .. واخا هاكاك كيحضر فالحين كي عيطات ليه كي عيطات عاى غيرو ..

كانت كتمعشق هي والمسمن وحليب القلب حداها شاد ليها زلافة ديال الزيت حتى دخلات عليهم مسعودة كتشمر على دراعها حصلاتهم كيشوفو فبعضياتهم وطارت عليه هزاتو من بلاصتو كتغوت

ياك قلت ليك تفرق على بنتي..قلت ليك خطي جرتها ولا غادي نطيح معاك فالعافية.. هااا؟ ادوي يا مسخوط الواليدين

جراتو يامنة فكاتو وقالت لمها تي مالكي معاه اش دار ليك امي؟؟ مسكين كان غا يمد ليا في الزيت وصافي

ضربات مسعودة فخادها قالت ليها اوييلي غلى صافي !! واش بغا تخرجي ليا لعقل

قاليها كيتفتف خالتي مسعودة

نزلات عليه قالت ليه يخوي ليك الركابي يا مخلوط بزاف عليك وعلى طاسيلتك نكون خالتك انا لاللاااك مسعودة حطها حلقةفي ودنك

بلع ريقو قاليها لاللة مسعودة انا باغي نتزوج بيامنة والله مكنتملغ

خرجات عينيها كتشرف فجنابها مصدومة كتقلب على باش تنزل عليه قالت ليه اويييلي على تزوج يامنة هاوييلي تي ياري ليا لحدية نقسم ليه راسو

قالت ليها يامنة وقاليك امي غا بغا يتزوج بيا مالو الزواج حرام !! شتي انا بعدا راني غنتزوووج بي فاتحتي وشهودي ماشي بحالي شادية اللي غا زايدة ناقصة لا فتيحة لا مريم.. انا بعدا غنتزوج بي شاني ومرشاااني كيت اللي غادي جاي في لحرام واضية عليه يااللاااه

شهقات مسعودة هزات يديها كانت غتنزل عليها لاكن جرها طباخها حبيب قلبها بالخلعة ونقزو هربو خلاوها كتولول وتردد

اوييلي غلى بنت لهبيلة لخرى تصرح ليها اللسان ..هاناري واش هادي يامنة الملهوطة ولا كدبت !!

مسعودة وبنتها شد ليا نقطع ليك..داك الزواج هوا اللي مابغات ..بنتها واخا هبيلة بغات ليها راجل همة وشان ..اما يامنة من الطباخ تخلاق..

فهاد الصباح صبحات ضيفة مألوفة فباب جناح لاللة روح الندى ..استقبلاتها عبدية من بعد ما سرحات عينيها فاامكان لا يكونو ودنين كيتسنطو عليهم وقالت ليها

ياك لاباس اش جابك لهنا ا لاللة عيشة؟

قالت ليها لاللة عيشة بهمس. جيت نشوف لاللة روح الندى وعندي ليها مرسول فلساني

حركات ليها عبدية راسها كتشوف فجنابها قالت ليها ما حس بيك حتى واحد ؟

قالت ليها لاللة عيشة لا سولوني قلت ليهم تاجرة لاللة روح الندى كما جرات العادة ..

قالت ليها عبدية دخلي

هزات لاللة عيشة صنادقها المليانين بالتواب مع العبيد ودخلات لجناح لاللة روح الندى حادرة راسها ..كانت ساعتها روح الندى كتفطر وغير شافت لاللة عيشة تفاجآت وشارت بصبعها لكلشييخرج وبقات غير هي وعبدية وسدو عليهم الابواب

قالت ليها روح الندى عيشة؟! اشنو جابك ياكما يحيى وقعات ليه شي حاجة؟

قربات لاللة عيشة عندها قالا ليها راه مضيوم الاللة روح الندى..مدة هادي ماطليتي على الرياض ولا رسلتي مرسول..بالو غير معاك وزاه مشطون ومغير هاد الايام ..عيا يتسنا ورسلني نطمن عليك

تنهدات روح الندى قالت ليها بلغي ليه سلامي وقولي ليه غنجي نزورو هاد الليلة ان شاء الله

تصدمات عبدية وشافت فيها كتمتم بفمها بغات تقوليها كيفاش تزوريه بالليل لاكن سكتاتها روح الندى بعينيها وهزات كنيميسة ديل الذهب مداتها لاللة عيشة وقالت ليها طمني راجلي عليا وقولي بيه يتسناني هاد الليلة

تبسمات لاللة عيشة وشدات ماجادت بيه الاميرة عليها وخرجات جارة توابها وخلات شي تواب لروح الندى ..تلفتات شافت فدوك التواب اللي بقاو كدليلعلى انها شراتهم زعما وصدقاتهم على الخريم قائلة

خودي هاد التوابات عطيهم للبنات ..انا مامحتاجاش ليهم

قالت ليها عبدية واخا لاللة روخ الندى غادي نشوفو تلبية هادينعاك الله يخرج الطرح بسلام

وقفاتها روح الندى كتتمعن فدوك الاثواب وقالت ليها بلاتي اريهم لهنا

شداتهم وهزات موس تقباتهم من الجناب وكمشاتهم تحت نضرات الاستغراب ديال عبدية وقالت ليها

طويهم دابا وحطيهم فصندوق زوين ..وديهم لسبأ قوليها ليها هداتهم ليك لاللاة روح الندى مبناسبة رجوعك من الموت عاوتاني

قال ت ليها عبدية بجدية واش كتقلبيعلى الصدع ؟ اش بغيتي عندها خليها فتيقارها وديها غير فالموصيبة ديالك علاش كتشري عداوة الناس بالثمن

قالت ليها روح الندى قلت ليك ديهم ماشي شغلك .. كوراه دابا دايرة رجل على رجل كتقول انا المرى وحتى واحد ماقدر يهضر ..سري ديري هادشي اللي قلت ليك

هزاتهم عبدية كتنفخ طبقات الامر بزز منها وداتهم بالنكير هي وعابد والعبيد معاه هازين الصندوق حتى لجناح يمامة ودخلو عليها لقاو الشمس ضاربة وسط جناحها وابواب الشرفة محلولين كلهم لاكن حسها مكاينش.. تلفتو يمين وشمال وجهة السرير المربع والخوامي مدلية عليه من السقف فالابيض الشفاف دايرين على جناب السرير كامل وتقدمات عبدية جرات الستار لقات يمامة باقة ناعسة ونعساها تقيل بحال الموت .. بقات عبدية كطلعها من وجلها العريا نة اللي خارجة من الغطا الابيض حتى لصدرها لعريان المخبي تحت توب خفيف لعنقها الناعم وشعرها البني الغامق ووجها الاحمر بكترة النوم .. ربعات عبدية يديها كتشرف فيها وتسنا تنوض وشافت وراها قالت ليهم حطو الصندوق وخرجو

حطوه وخرجو سدو الابواب وبدات تحرك فيها من رجلها لا كن لاحياة لمن تنادي..حتى شكات عبدية فموتها واستغربات وصفار وجهها بدات كتحرك فيها بالجهد عاد حلات يمامة عينيها بتتاقل شافت فيها وتحركات من بلاصتها وعبدية كتنفخ وتسوط قالت ليها واخا تكوني ميتة!! وراكي نيت ميتة واش كاين شي واحد كينعس هاد النعاس هادا ؟

هزات يمامة راسها كتساؤل قاليت ليها اش واقع؟.

قالت ليها عبدية نوضي راكي خمرتي

شافت فيها يمامة قالت ليها واقيلا زدتي فيه!!! نخمر ولل نجلس شغلك فيا؟

هزات عبدية حاجبها قالت ليها ايوااا !! والله تستاهلي ما يجرا ليك .يا سليطة اللسان..

ها الهدية جاتك من لاللك روح الندى حليها ولاخليها

خرجات عبدية كتنفخ زدحات وراها الباب وناضت يمامة كتسد عينيها وتحلهم وقربات من الصندوق بتتاقل تحنات حداه وحلاتو طلات لقات تواب مطوية .هزات التوب الاول تشوفكيف داير وهي محاملاش اللون من الشوفة وزادت تصدمات فاش لقاتو مخرك ..حطاتو وهزات الثاني وطلع كما اللول وهزات الثالت طلع بحال اللي قبل منو وبدا احمرار وجهها كيبان وحطاتهم كتشوف قدامها عاد توكضات وقالت بغيض

والله كن ما حشمت حتى نرميهم ليك على وجهك ..ولاكن نتي ديال التبهديلة هانا غنوريك الضحك مع الصبيان كيف داير

رجعات الشراوط بلاصتهم وجلسات كتشوف قدامها وتشوف فالبيت وتسنا الفطور يدخل لاكن ما جا فطور ماجا غدا..عرفات راسها فير مرحب بيها بثاتا ومابغاوش يديرو ليها قية واخا السلطان عطاها الوسام والوسام كيزيد مولاه قيمة لاكن فهمات رد اهل القصر ومعناهم ..فهمات كلامهم من خلال تصرفاتهم انه رغم الوسام اللي تعطاها كتبقا ما عندها قيمة واخا تحاول تعمل فالقيمة راسها مكاينش اللي يحاشيها ليها طالما كاين اللي واقف ليها فالطريق وجار معاه البقية .

ضربات طليلة على الخزانة مالقات فيها ما تلبس..ما دارو بحسابها ما داوها فيها..اشنو قيمة الوسام والمال الى مكانش قنادم عاطيهم قيمة؟

تنهدات ومشات جلسات كتفكر ويدها عل خدها وتفكرات وصية حكيم ليها وكتبات ليه مرسول وناضت خرجات عند العبيد المصافين على طول جدران القصر..حتى كانت غتعيط على بوشعيب وتراجعات عيطات على عابد اللي كانت هي وياه اعداء ومن بعد الحرب رجع من الاشخاص المقربين ليها

كلماتو حضر عندها فالحين مبسم قال ليها شخبارك الاللة يمامة

قالت ليها لاباس عليا اعابد ونتا كيف غادي مع هاد القوم

قاليها كنسلكو الاللة وصافي

قالت ليه بغيتك توصل هاد المرسول لحكيم

قاليها كن طلبتي من قيروط يوصلو ليك انا حاط عليا بوشعيب العين فين ما حطيت يدي كيضربها لي

هزات راسها تنفسات قالت ليه غير صبر اعابد دابا نتوالا بداك بوشعيب ..ماشي وقتو خليه حتى نسالي ليه وعند الفورة يبان الحساب..خود المرسول عطيه نتا لقيروط وصيه ..واخا بلا وصاية كنتيق فيه ..نمس وهوا اللي يصلاح لي فهاد القصر

شدو وقاليها كوني هانية الاللة يمامة ..من يدي ليدو

خرج مشا كيطير تلاقا مع قيروط غير كيتختل ..شدو قفزو كان كيطل على بوشعيب ولاللة شامة من بعيد وهمت كيهضرو وضار مخلوع لقا عاقد وراه قاليه

اشا وا مابغيتي تحيد هاد القاعدة منك ؟ دابا يشدوك لا شغل لا مشغلة واجا مخرجك منها ديك الساعة

قاليه قيروط مول الضهر المقوس وعين كبيرة معين صغيرة ناعسة ونيفو طويل ووجهه رقيق وجسدو نحيل وقصير القامة كتبان عليه نمس واخا ديما ساكت واللي قالو ليه كيديرها بلا ميهضر ولا يلفت الانضار ليه..كيسمع الكلام من جهة ويطبق ما قاليه راسو من جهة .. مكيتيق فحتى واحد ومكيأمن لحتى واح.. من غير يمامة اللي جاتو على قلبو وعلى كانتو لقا فيها الشخصية اللي كيبغي ورام ليها من دون الناس

قاليه بانزعاج مالك شنو بغيتي عندي ؟ حي غير نتا راسك اما انا قاد بشغلي

ضرب ليه عابد المرسول للصدر وقاليه وصل هادا للصدر الاعضم ..من يديك ليدو راه وسلاتو لاللة سبأ

خشا قيروط المرسول بين كسانو وحزامو وزاد خلفة بضرات بحال الذئب مشا فاتجاه غرفة الكتب ديال الصدر الاعضم وفطريقو تصادف مع شادية خارجة من جناح الامير ورجع اللور دور وجهه كيطل ويشوف وقال باشمأزاز

خسارة فيكم التضحية ..قوم كيموت على الفراش واخا تكون العافية شاعلة

زاد مع الطريق دخل لغرفة الصدر الاعضم وحدر راسو لقاه جالس كيقرا شي اوراق ومد ليه المرسول فوق راسو المحني وقاليه سيدي حكيم ..جاك مرسول من عند لاللة يمامة

استغرب حكيم فالاول من السمية ورجع تفكر قاليه ااه سبأ.. ارا نشوف

شد المرسول حلو وقراه لقا مكتوب عليه..

يا معشر الرجال هل من سامع؟

طلبي بسيط لبطني الجائع

كسوتم جسدي بصفات ثمان

بعين العفاف وصدق اللسان .

طوا حكيم المرسول ورفع عينيه عاقد حجبانو قدامو ودار يديه وراه وقال لقيروط سير وعيط على بوشعيب يحضر عندي فالحال

حدر قيروط راسو ومشا كيطير نيشان عند بوشعيب خرجو من جناح الحريم قاليه صادفت سيدي حكيم وقالي نادي عليك تحضر عندو فالقبة ديالو فالحين

استغرب بوشعيب ومشا كيجري دخل عندو حادر راسو وقاليه نعام اسيدي حكيم امرني

ناض حكيم من مكانو رفع راسو قاليه واش ماوصيتكش على سبأ؟. قلت ليك مايخصها خير

بلع بوشعيب ريقو قاليه وصيتيني اسيدي

قاليه حكيم وعلاش منفدتيش الوصية؟

قاليه بوشعيب انا غير عبد مأمور اسيدي. وصيتيني وبغيت نفد ولاكن لاللة روح الندى عتارضات ومقدرتش نعارض كلامها

وقف قدامو حكيم كيسوط قاليه وعارضتي كلامي !! ايوا شوف مكان اخر من غير القصر خدم فيه يالاه برا

تخلع المسير وطاح على ركابيه كيرغب قاليه انا غير عبد مأمور ..انا ماعندي دخل فهادشي

قاليها حكيم انا اللي كنقرر وانا المسؤل عليكم واحد واحد..واللي يعارض كلامي مابقا ليه مكان وسط القصر .وشوف مع لاللاك روح ااندى الى قدرات تخليك هنا ..نشوفو شكون اللي كلمتو كتمشي واش انا ولا هي

قاليه بوشعيب انا من هادي ما نفد كلام شي واحد غيرك السي حكيم

رفع حكيم راسو قاليه دابا تدخل الماكلة لجناح سبأ وتكسا عراتها واللي طلباتها توصلها والى منفدتيش هادشي دابا قبل الضهر حسب راسك برا هادالقصر يالاه خرج عليا

مشا بوشعيب كيجري ويدعي الله فيمامة ويردد

سيري كما خلوضتي حياتي الله يخلوض ليك النهار مع الليل ماتنعسي ما تشوفيه ماتعرفي طعم الراحة ..الله يهزك مايردك يا بنت الحرام يا سحارة ماشي طبيعي هادشي هادا اوييلي وحدي السي حكيم مالو داير هاد الحالة عل ى هاد المعصية اللي سلاطت علينا ..الله يسلط عليك جميع المعاصي يا سبأ القوطية عمرك تولي وحدة منها واخا تكتبثها فجلدك ختفو تفو تفوتفو

من بعد ليلة دايزها الكلام رجعات شادية لبيتها كضحك فرحانة دخلات على مها لقاتها جالسة وشادة البنت فيدها كتراري بيها ..قالت ليها مسعودة على سلامة

قالت ليها شادية واش بكات عليا

قالت ليها مسعودة مابكا عليك حد .. سيري غسلي ديك الحالة عاد اجي عند البنت

هزات شادية حوايجها بالزربة قالت ليها غنمشي نقلي السم لللمسمومات اللي كانو يقولو ليا ولدتي البنت عمر سيد المير يتلفت ليا وحتى ديك سبأ حتى هي غادي نطرطق بيها مرارتها

جات تخرج وناضت مسعودة بالزربة حطات البنت وطارت عليها رداتها من الباب من. شعرها وسدات الباب قالت ليها فييين غادية يا المسخوطة فيين جلسي شدي الارض الله يعطيك البلا ! عمرني شفت شي وحدة كتجيب لراسها الصدع حتى ليك نتي؟ اشنو غتقضي بهادشي بغيتي تجبدي على راسك الصدع ويضمرو ليك الضغينة باش عمرك تعتبي باب جناحو؟ ياكما حساب ليك غيجلسو يفرجو فيك كطرطقي ليهم فالسم ومايديرو والو؟ حساب ليك كاع البنات بحالك هبيلات!! تكمشي وقطعي الحس لاعين شافت لا قلب وجع..مابيناش حنا نسا الحريم ولا ديك الموصيبة دسبا بينا مولاي المير وبلاصتك عندو والسلام سمعتي ولالا

جلسات شادية كضحك قالت ليها ولاكن شهوتي نشوف كمارتهم والفقصة فعينيهم

ضحكات مسعودة قالت ليها تشوفي الفقصة اللي غادي يفقصوك الى ما تبتيش ومانضوضتيش عليك العجاج . جلسي قابلي بنتك غادي نمشي نشوف شنو واقع فالدنيا .

جلسات شادية سمعات كلامها ومشات مسعودة خرجات نيشان للكشينة لقات بوشعيب واقف كيتسنى الصينية توجد ومنوض فيهم الشياط بالغوات ، غير شافها كحل بالعمى وحتى هي اكثر وقالت ليه شكون مزال عاد غيفطر ياك كلشي فطر

قلب وجهه قاليها ديها فراسك وسيري ديري شغلك ..ماتزيديش تكملي عليا حتى نتي

قاليه زعبول ها الفطور ..سير قوليها هاد المرة مكاين فطور الى مناضت بحال العباد تفطر فالوقت والله لا داقتو

قالت ليه مسعودة علاه شكون هادي؟

قاليها زعبول الضيفة اللي عاد جات جديدة ..عاااد رشقات ليها فاقت وبغات الفطور

قالت ليه مسعودة شكرن هاد الضيفة؟. جا شي حد انا مافي راسيش؟

قاليها بوشعيب جات الموصيبة الكحلة ..القوطية .. سبأ الى ماكنتي تعرفيها هانتي دابا كتعرفيها

خرجات عينيها وهزات هنافرها قالت ليه علاااش فاش جاتها تفطر وحدها والفطور يمشي حتى لعندها شكون تكون هاد سبا والدة ليه العهودة؟!!

قاليها بوشعيب الايه وزيدك وسمها السلطان وزاد عطاها جناح عمرك شفتيه حتى في منامك وعطاها الفلوس وعطاها سمو الامير الحرية مختومة ومقروسة .. ايوا فاش جاتها الله واعلم !! هادي ماتكون غير سحارة سحرات ليهم كاملين حيدي منهم لاللة روح الندى

بقات مسعودة مخرجة عينيها كتحسب ها الجناح ها الحرية ها المال ها…

وقالت ليه ويديها على جنابها ايواااا …وبنتي اللي والدة ليه الاميرة عاطيينها قبيير هي وبنتها وانا مخشية معاهم !!

قاليها بوشعيب باشمازاز ومالكي شباغا حمدي الله كتنعسي مع بنتك فبيت وتسدو عليكم اما كن راكي مصافة مع الخدم فالبيوت ..زايدون داك البيت اللي ماعجبك راه نايضة عليه الريكاطة كلشي باغيه

قالت ليه والله منسكت على هادشي.. ودابا تشوف ها عقل فين قلتها ليك اشعيبة

مشات كتسوط وتنفخ خلاتو واقف متبع ليها عينو باشمأزاز تلفت قال لزعبول هز الفطور ديوه ليها ..تاكل فيه السم ان شاء الله

خرج هاز مناخرو خرج وماضارش جهة جناح لاللة روح الندى باش ماتوسولو ما تزيد تكمل عليه..سكت ومشا يشوف الشغل باش امره حكيم ،اما روح الندى صبحات عل الحمام كتكمد عضامها ودهن وطلي وتقول ماطليت ..تنهدات وسط البرمة وقالت دلكو ليا ضهري طاب بالنعاس تحت الكمرة

تقلبات على كرشها ونعسات كتمسد وتوجد راسها للمشية عند القاضي يحي.

دخل الفطور عند يمامة وكانت ساهية كتشوف قدامها ويدها على خدها وتلفتات شافتهم مدخلين الصينية وناضت وقفات تقدمات بتوب النوم الابيض خلاتهم حتى حطوه وشافت اصنافو وقالت للخدم وهي كتشير بصبعها

اخر مرة تجيبو ليا قهوة كحلة بوحدها .. انا كنبغي نفطر بخبز الشعير والزيتون كحل..والعسل واتاي ..ولحسوة مسوسة بلا ملحة ..الى كانت مالحة ديوها ماخصنيش بيها

هز العبد الزلافة داقها قاليها فيها الملحة الاللة

قالت ليه ماخصنيش بيها ..قوليهم المرة الماجية مايحطوش لي ملح فماكلتي..انا كنبغي الحلاوة مكنبغيش الملوحة ..يمكن ليكم تمشيو

يتبع...

‎