ذو التيجان الجزء الثالث

ضمات الملكة ولدها ودخلات هي وياه للديوان .. وقفات جنب الكرسي ديالها الرئيسي وجلساتو تما فرحانة وقالت شادة فكتافو

من ليوم ..هادي هي بلاصتك .. هادا هوا المكان المناسب ليك اولدي.

ناض بخطوا تقيلة وقف وجلسها بلاصتها وقال

ماشي مكاني..مزال الحال على هادشي..ومزال مامهيأش نفسيا لهاد التقل وهاد المسؤولية كلها

ابتسمت فرحانة وقالت: مستاعد ومهيأ نفسيا ومعنويا ..حنا بصح بدينا من قبيلة صغيرة ومامعروفاش بزاف..او يمكن كانت مبودة لمدة طويلة وعاد رجعات حياة ..بصح ما عندناش جيش كبير بحال اللي عند ملك غرناطة..ولاكن حنا عندنا المال ..عندنا الكنوز..عندنا العقل اللي ماكيتباع مكيتشرا ..واكبر برهان هوا هاد المدينة اللي دخلنا ليها بلا منحتاجو لجيش كبير ..

هز راسو بالنفي وقال :لا ..ماشي هادشي اللي باغي انا ..ماشي هاد المكائد والخطط ..انا باغي ساس صحيح ..باغي جيش ..باقي استقرار وهادشي ماشي ساهل ..انا مكنواجهش بالمكر والمكائد ..ولا نربح بالغدر .. انا باغي نضرب فالوجه ماشي فالضهر .

تنهدات ووقفات كضحك معاه قالت ليه مصغرة عينيها

مزال معارفش شنو كتعني الحرب اولدي..الحرب ماشي غير جهد بدني وقوة ..الحرب دماغ ..وعقل..غيييير بالعقل تقدر طيح امبراطورية بلا متحتاج لا عكسر ولا قوة بدنية ..

رد بالنفي وقال

ماغاديش نشد هاد الطريق اللي متقولي ..هادا علاش خليك بلاصتك ..وانا معاك حتى للموت ..فاللي حطيتي عليها يدك وغنخليكش بوحدك

ابتسمت كضحك وتنهدات شدات ليه فكتفو كدور بيه وقالت

ااااه اولدي هادا ما قدركم عليه الله ..وماقدرنا عليه الله شييء عضيم ..هادا هوا الفرق بين النسا وبين الرجال ..حنا النسا مكنعرفوش نخدمو القوة ونسيرو البلاد بالجيوش وبهادشي اللي كتقول عليه .. حنا طريقنا ليينة ..اساليبنا خاصة سبحان الله وهادا طبعنا ..لا نتوما تقدرو تكونو بحالنا ولا حنا نقدرو نكونو بحالكم ..نتوما الرجال مختاصرين فشغلكم وماعزيزش عليكم كثرة الهضرة و واللغط..وحنا النسا سوقنا عامر وهادشي اللي معطي لينا ..وخانا نتوما كيبان ليك هاد السوق خاوي وكيبانو ليكم النسا ناقصات عقل ودين ..وتافهات ..ولاكن راه هما الاعمدة دالحياة ..بيديهم يشدو التوازن وبيديهم يرخيو ليه وفثانية كلشي يطيح ويتردم .

ضحك وقال : يمكن هادا علاش مامسوحش ليهم يتحكمو وتكون السلطة بيدبهم ..حيت قلوبهم هشيشة ودغيا كيتخدعو وكيتيقو اكثر من اللازم .

جمعتن يديها كتسارا فالديوان وابتسامات وقالت

غرناطة ..

تلفت وقال مالها غرناطة؟

ردت وقالت : غنطيحها ..

ضحك وقال بسخرية: غطيحي غرناطة وهي فاتحاد الدولة الاموية كي درتي ليها والدولة الاموية مكتاسحة العالم كامل..واش مافخباركش؟؟

رمشات بتاقل وهبطات راسها وقال ت : عارفة ..وعارفة الملك الاصيل من العائلة الاموية ..وعارفة النفود والجيوش اللي عندهم ..ولاكن غنوريك اساليب النسى باش عمرك تستاهن بيهم حتى هما ..

عقد حجبانو وقال

انا مغنقبلش بهادشي..كيفاش كتفكري طيحي غرناطة وهيما مسلمين بحالنا ..واش باغا تشتتي ما جمعاتو سلالة من هادي قرون !! بلاصت ما خصنا نتاحدو ونديرو يد فيد كوننا مسلمين ونزيدو بالاسلام لقدم غادي نبداو نهاجمو بعضياتنا ؟ وعلاش؟ على قبل السلطة؟ انا ماخصنيش بهاد السلطة والحمد لله ما سراتش مع عروقي عدوة السياسة والسلطة لحد الأن ..

ردت وقالت :غير حيت مزال مادخلتي فتحدي..تولدتي لقيتي راسك امير. ماعشتي حكوة ماعشتي دل ..حياتك كلها مسالمة ..اما نهار تحس بالحكرة وتحس بالدل ديك الساعة غتشوف هاد العدوى كيفاش غتسلل للعروق ديالك وتجري فالدم ديالك ومايبقا يبان ليك حتى حاجة من غير السلطة باش اللي ذلك ذلو واللي حكرك حكرو وترجع حقك تاني ومثلت وما يقدر حتى واحد يرفع الراس قدامك ..انا ماقدراش نفهم كيفاش كنحاول نخلي منك حاكم فيوم من الايام ونتا باغي تبقا دايع فالجبال وكتسارا فالاسواق ..ماعلى بالكش بحتى حاجة

عقد حجبانوبغضب وقال :نديع فالجبال ونجيب اللقمة حلال ..حسن ليا من هاد الهم وهاد الغم والعيشة بالقواعد وكلشي مضبوط وتحت الضغط وفوق النفس..

ردت بغضب :بزز منك تقبل الوضع حيت ماختاريتيش راسك ..ماختاريتيش شكون بغيتي تكون وتولدتي امييير واش كتفهم ..تولدتي امييير وغتموت امير ولا سطان وهادشي ماشي بخاطرك ..بزز منك ايور ..سمعتي ..بزز منك حيت تولدتي معلقة ديال الذهب ففمك ..وثمن هاد المعلقة هوا هاد المسؤولية وهاد العرش الي كطيح عليه الارواح

هز حجبانو بحوج وقرب شاف فوجهها وقال :خليت ليكم العرش..خليت ليكم كولشي..هاد البلاد الى طاحت فيدين المسلمين مرحبا ..اللي عليا انا هوا ندافع عليها من العدو الكافر ..هادي هي الرسالة ..وهادا المطلوب مني..وماطلبيش مني شي حاجة اخرى من غير هادشي..والى عاديتي غرناطة غتعاديني حتى انا ..عقلي على هاد الكلام . هز راسو زفر وخرج خلاها فالديوان كتزفر بالغيض وسدات عينيها وقالت

كتمررررد عليا ..كتمرررد عليا ايور ..

زيرات على عينيها وكمشات يديها وغواات تحت سناناها بغضب ورجعات نفضات راسها وخرجات

غرناطة كتهلل بالفرح النصر ..رجعو القاادة من الحرب ومعاهم شلا غنائم وشلا كنوز ..وطلعات نسبة الجواري فالاندلس بعدد لا يعد ولا يحصى بسبب هاد الفتح لعضيم لمنطقة قدها قداش..طاحو فيهم الاثمنة نضرا لكثرة الحريم .. واكيد كان للقصر النصيب الاكبر اللي جابو معاه حكيم وستفهم فواحة كبيرة على برا تحت الشمس ونخل القصر ومياهه العذبة ..عدد كبير لا يعد ولا يحصى من الجواري الخايفات والمخلوعات ..حالتهم حالة ووجوهم مسخة وحوايجهم مقطعة ..منهم الوصيفات ومنهم الاميرات وبنات سلالة القوط..ومنهم الخادمات والجاريات ..وحتى بنات ملك القوط ..لاكن مابقات كتفرق بيناتهم لا اميرة لا جاوية لا خادمة ..كلشي رجع بحال بحال وفحالة وحدة .. كيفوق عددهم ستين وحدة.. واقفين فصفوف منضمة حانيين الواس ..الشعر مخبل وجروح فاليدين نتيجة الحرب والصراعات اللي عاشوه .. اما العبيد فعددهم لا يعد ولا يحصى..جميع الرجال اللي كيفوق عددهم الالأف وقفو جنب الجواري فصفوف طويلة وسط القصر قدام القائد حكيم في انتضار خروج الملك اصيل.. وهوا ذا خارج بهبته وعضمته منتصرا .. وحذر ليه الجميع وصوطو باسمه وسط القصر كيهللو ويباركو .

وقف بابتسامة قدام حكيم وهنئو على هاد الفوز العضيم وضم بلاد القوط الغربيين للاندلس، هز حكيم راسه بكل سعادة وقال

الفوز فوزك امولاي ..

هز الملك راسو لقا نضرة على العبيد والجواري وشار بيدو بابتسامة وقال

فحصو العبيد..صحاب البنية القوية عزلوهم بوحدهم .. الكبار شوية يعزلوهم البني ..والصغار ينضمو للتكوين العسكري. ..والباقي للقصر .. حول عينيه للجواري لقا نضرة وتلفت بغا يمشي وعينو كتشوف فيهم حتى لمحات عينو وحدة فالصفوف الوسطانية وثارت انتباهه بشدة لحسن جمالها المخبي وسط الملابس البالية والشعر المنكوش والوجه المتسخ ..استقم فالوقفة وشار بيدو لحكيم قاليه

جيب ليا هاديك

هزات عيونها الكبيرة الجذابة شافت فيه ورجعات حذراتهم فصمت وخوف حتى جروها العبيد من بين كاع البنات ووقفوها قدام الملك اللي بدا كيحدق فيها من راسها لرجليها وهي كتنتر يدها من يد العبيد وكتستر راسها باطراف ثيابها المقطعة ..ابتسم الملك الاصيل وهوا كيشوف فهاد البنت الجميلة اللي ماقدرش الوسخ يخفي جمالها واخا كثر عليها وماقدرش الذل يغطي على كبريائها وحركاتها المذللة ..ابتسم الملك ونوا كيشوف فيها قالبة وجهها بغيض للجنب كتسوط وراسها فالارض وقال

.شنو سميتك ؟

ردت في خوف وقالت ..سبأ..هز ليها وجهها بيدو كيشوف فتعابير وجهها المنزعجة وقال بعيون مبتسمة

خودو سبأ تاكل ..وخليوها تنعس وتهلاو فيها

جرو العبيد سبأ الجميلة حفيانة مسخة ورجليها مجروحين ودخلوها للقصر شادينها وحناكها ملطخين بلحموم وشعرها مكمش كتمل وسخ ..دوزوها قدام لاللة شادية اللي دايزة رافعة راسها مع وصيفاتها ووقفاتهم كتشوف فسبأ قائلة

شنو واقع ؟

ردات وحدة من الخدم وقالت : مولاي وصا نوكلوها ونتهلاو فيها

عوجات الاميرة شهرزاد حاجبها ورددات

مولاي قال وكلوها وتهلاو فيها؟؟! وعلاش هي من دون غيرها

ردات الهادمة وقالت :هادشي اللي وصا عليه الاللة

ميلات شهرزاد راسها كتشوف فيها وتحقق وجاتها الغيرة من صغر سن سبأ وبرائة وجهها وجمالها الطاغي ودخلها الشك ومشات تعرف السبب، صادفات الملك الاصيل داخل وحنات راسها باحترام وشافت فيه قائلة

مولاي.. مبروك عليك النصر ..

ابتسم ومشا جنبها داير يديه وراه وقال

مبروك علينا كلنا ..

ابتسامت كتشمى جنبو وقالت

هاد المرة النصر كبير امولاي ..نصر عضيم

تلفت ليها وحرك راسو بالايجاب وهي كدور عينيها وتحنحن وقالت

تصادفت مع العبيد داخلين وانا فطريقي عندك .. وشفت معاهم بنت من الحريم اللي جاو ..علاش وصيتيهم هما امولاي ؟ وصيني انا نتكلف بيها ..باينة الامير سلطان غيعجبو الحال .. وشكون بحاله ختار ليه جلالة الملك بنفسو

ابتسم وحرك راسه قاليها غادي نخليك ..عندي مايتقضا الاللة شهرزاد..انتابهي للأمير الصغير وردي معاه البال

طبطب على كتفها ومشا خلاها واقفة كلم القائد حكيم اللي لحق عليه لجناحه فالحين وحدر واسه قدامو وقال

السمع والطاعة امولاي

تلفت الملك شاف فيه وقال

مابغيتش سبأ دخل فحريم سلطان.. غادي دخل للحريم ديالي..وممنوع تتخالط معاهم ومع غيرهم ..وممنوع تبات حداهم ..مابغيت مشاكل فجناح الحريم ومانقصينش الصدع ديالهم ..نتا المسؤول على سبأ احكيم

حدر حكيم راسه وقال : السمع والطاعة امولاي

هز الملك راسه وكمل كلامه وقال

علموها القواعد والاصول ديالنا .. وسايسوها باللتي هي احسن وعالجو جروها ..وعرف ليا الكبيرة والصغيرة عليها ..دخلو ليها ثقافتنا و نضامنا وأدبنا لوسط مخها وتهلاو فيها ..مانبغيش ناموسة وحدة تعضها

ابتسم حكيم وقال : هي اللولة امولاي..من ليوم انا اللي غنتكلف بيها بنفسي

رد الملك وقال: ماقلتي ليك تكلفها بنفسك وتخلي شؤون البلاد والجيش احكيم اللي عليها العمدة .. عندنا ما يكفي ويشيط من الخدم ولعبيد اللي يقومو بيها ..وهادشي تحت المراقبة ديالك ..

تبسم حكيم وقال : السمع والطاعة امولاي.. مولاي الى سمحتي لينا نحتافلو بهاد الفوز العضيم فالقصر كما محتافلة كاع البلاد .

تلفت المللك وقال كيسرح عينيه ويتنهد

ورسلو دعوة باسم القصر للفعة تجي تحضر

هز حكيم راسو بتساؤل وقال : عفوا امولاي؟؟

تلفت الملك وقال :عيطو على روح الندى باسم القصر ..وديرو ليها استقبال يناسبها واخا ماتستاهلش

خرج حكيم للبيت ديالو ونادى على طامو اللي حضرات فالحين وقفات قدامو وكانت مرى سنرا كبيرة ودراع روخ الندى فسابق عصرها .. طولات فالقصر ورجعات كبيرة الرصيفات دالحريم والمربية ديالهم . حدرات راسها وقالت نعام السي حكيم

تنهد حكيم وقال : سبأ..الجارية الجديدة

تساؤلات طامو وقالت :شكون سبأ امولاي ؟ بزاف دالحريم جداد دخلو ليوم للحرم

حكيم: سبأ علامن وصا حلالة الملك ..واش تلفتي على خدمتك؟

ردت طامو وقالت : اه اه عرفتها قولي اللي موصي عليها حيت مزال ماعرفناش سميتها.. اييه تبااارك الله جوهرة ..جوهرة عمرني شفت فالزين بحال ديك البنية !!

حكيم: هاديك بالضبط حطي عينك عليها ..ختارها من دون البنات وكيوصي عليها ويعاود ..وياك توقع ليها شي حادثة.. غتخصصي ليها جناحها بوحدها وتلسقي ليها شي وحدة كتيقي فيها من البنات ترافقها وتقرب ليها .. باش نعرفو من خلالها فاش كتفكر سبأ .. وشوفي ليا من بين البنات اللي جات معاهم واش كيعرفوها وشنو كيعرفو عليها ..والاهم من هادشي علميها اصول الادب والكلام وبروتوكول القصر .. يالاه سيري شوفي شغلك

خرجات طامو مشات كتجري لجناح الحرم اللي كان كبير مقسم لعدة اقسام.. غرف النوم وحمامان وغرف الملابس. وعاد الصالة اللي كيضلو فيها وحديقة خاصة بيهم من جهتهم ..وقفات سولات الخدم على سبأ وقالا ليها وحدة من الخدامات الكبرى تدعى طاهرة:

راها فالحمام الاللة طامو . رقدناها فالطين وغسلناها ودههناها بالحنة والعشوب ورطبناها .. وفكينا ليها سوالفها ومشطنا ليها بالحنة وشللناها.. خرجناها من الحمام وراها فبيت اللباس كيلبسوها

مشات طامو كتجري لبيت اللباس ودخلات كان بيت كبير فيه تكاشط وقفاطن معلقين وشلا شراوط وشرابل وسدادر كبار مستفين وزربية ..لقات سبأ ملوية فواحد المنشفة جالسة وشاداها بيديها وجامعة رجليها .. بقات طامو كتشوف فيها وفعيون وتسمي الله ..الحق يتقال ..لا زين فوق زينها ولا عمر عيونهم شافت بحالها .. جمالها فتان كيبهر ..وعاد فاش تنضفات وتغسلات وبان جهها المستدير الابيض وخدودها الممتلئة الوردية ..اما عيونها ..كبار مشفرين لوزية ..مجبدين تقول كاين فالزين غير هي .. جالسة مسيكينة مخلوعة وماعارفة اش كيجرا قدامها وعلاش هاد الاهتمام كامل بيها .. شي كيمسح ليها شعرها المتموج الفازك وشي كيمسح ليها رجليها وينقي ليها دفارها وودنيها.. دخلات اثنائها الحكيمة فحصاتها وناضت وقفات مقنتة هي وطامو وقالت .

البنت تبارك الله مليحة .. صحيحة وفصيحة .. ولاكن باقا صغيرة ومزال حتى حق الشهر ما لحقات عليها .. مزال رمانة مغمضة ووردة حشمانة .ماتليق لا لخلوة ولا لسرير .. باقي قدمها صيف ولا صيفين ..عاد نقولو راه حرمة من الحريم

ردت طامو وقالت : خلي هادشي مستور مابغينا حتى واحد يعرف شنو كيدور .

قربات منها طامو شوية ودوزات يدها على شعرها الفازك وقالت

كليتي شوية ابنتي؟

حركات سبأ راسها ببراى فصمت

ابتسمت طامو وقالت

ماتخافي مادهشي..نتي فالحفض والصون .. وتحت وصاية سيد الاسياد ..غتلبسي حويجاتك .. وتمشي تقراي وتتعلمي مع قراناتك .صافي؟

حركات سبأ راسها بالايجاب وطلمو كترطب على يديها و تتودد ليها وقالت

قولي ابنتي؟ شكون باك ومنين اصلك ؟

ردت سبأ والحزن مالي عينيها وقالت. :ابنت ولي العهد نوريسمو

مافهماتض طامو هي بنت من بالضبط وردت بالايجاب ونتضت خلاتها ومشات توصل مت لقطات لحكيم . خرجات فطريقها لعندهوتصادفات معاه هوا والملك خارجين بجوج ووقفات فاجنب كتشير ليه ..استأذن حكيم مشا عطاها ودنو عمرتها بالمعلومات ورجع بحالو عند الملك حنا ليه الراس وقاله

مولاي ..اخبار على سبب وشكون تكون

حرك الملك راسو بتساؤل وابتسم حكيم وقال

سبأ كتكون بنت ولي العهد القوط نوريسمو .. وهي حفيدة الملك قربيز من ولي العهد

هز الاصيل راسه وتنهد قال :اش هاد الصدف الغريبة اللي كتوقع ..على هاد الحساب هي اميرة

حرك حكيم راسو وقال :اميرة امولاي ..وباقا ما حق عليها حق الصيام ..الحكيمة كتقول باقي شي عام ولا عماين ..

تبسم الملك وقال :مزيان .. باش تكبر على يدينا ..على هاد الحساب عاملوها كأميرة .. وقريوها وعلموها ودخلوها للاسلام

طلقات روح الندى المرسول قدام عينيها مع اذان الضهر ..قرات المكتوب وجمعاتو كضحك وقالت

باغي تجيبني باش نشوف انتصارتك السي الاصيل..واخا هي اللي متعاودش..وجد ليا راسك.

شارت بيدها للخدم باش يبداو تجهيزاتها لهاد الحفل وانغمسات فيه وتهلات فالتوجاد فيحين كانت عبدية فالعمبر كتكتاشف المكان وكتهضر مع عابد اللي عاود ليها كل ماجرا فغيابها .. شافت البنات قلال مافايتينش عشرين وحدة والقصر كيهز الالف الجواري والخدم ماشي غير عشرين ..سمعات الخبار من عند العبيد اللي كيخرجو يتسخرو وخبروها باللي الدنيا مقلوبة سفاها على علاها بالحريم الجداد والنساخين اللي فالاندلس كلهم جايبين نسا جداد وصغار كما عندهم فالقوانين.

دخلو قدامها البنات مصافين راجعين من درس الآخلاق وبدات تحسبهم وتشوف فيهم حتى دارت قدامها عويشة ووقفاتها كطلع وتهبط

عويشة؟ شكاديري هنا؟

هبطات عويشة راسها وقالت : ختاروني من بين الحريم ..حيت فيا كاع الاوصاف الاللة عبدية

عبدية: اممم وفين ختك شادية ؟؟

عويشة: ماعرفتش الاللة ..من نهار دخلت لهنا ماشفتها ما عرفت عليها شي خبار .. وكي شفتي انا دابا كنقرا ونتعلم ..ماعنديش كاع الوقت باش نفوت باب العمبر .

دارت عبدية يد على يد وقالت ليها : سيري اعويشة ..سيري ودير عقلك لا طيري هاد النعمة من بين يديك .

حدرات عويشة راسها ومشات فرحانة تبعات صحاباتها وتلفتات عبدية عند بصيرة قالت ليها ..ردي البال مع عويشة..راه كطير وتقول ماطرت .

حركات ليها بصيرة عينيها وقالت ليها كوني هانية ..انا غنمشي نشوف الغدا فين وصل نغديو الحريم

عبدية :حتى انا غنمشي نشوف غدا مولاي الغالي فين وصل ..

مشاو بجوج للمطبخ لقاوه كيشطح ويردح بالخدمة والتوجاد .. رقفات عبدية قدام الطباخ اللي كان باين عليه مزيان طباخ غير من كرشو الكبيرة وبزز باش كيزيد بالتقل والغلض ..

عبدية : غدا مولاي ديوه للجردة الخاصة .. تما فين غيتغدا

تلفتات عند بصيرة وقالت ليها شوفي شي جماعة من البنات خليهم يمشيو يونسوه فالغدا راه طالع ليه الدم وخصو اللي يطيب خاطرو .

حدرات بصيرة راسها مشات وبقات عبدية كتفرج فيهم وهما خدامين حتى طاحت عينها على يامنة اللي كانت كتشطب وتجمع الزبل وقاطعة الحس ..طلعات فيها وهبطات وقالت ليها. خلي داكشي من يديك وحطي ليهم الصواني فين يحطو الغدا يالاه .

شافت فيها يامنة وقالت حادرة راسها وتبرقق فيها

واخا لاللة .

مشات عبدية مخنزة وبقات يامنة واقفة قالت ليها بصوت منخفض: الله يعطيك لوبة

خرجات عبدية للجردة لقات الامير متكي حدى الميدة والمخاد مشتتين حداه ووسط الطبيعة والنخل وساهي كيخمم ..ابتسمت وقالت ليه

مال وليدي ساهي شنو شاغل بالو

تلفت ليها وقال

مكاين والو

وصل عليهم راجل بلحية مزوقة بالشيب وقصير ورقيق فقشابة بيضاء ومقاد الحالة ومشيك وابتسم للأمير اللي شار ليه بيدو جلسو قدامو وقال ليه

يالاه ابوشعيب ..حكي لينا شي حكاية من الحكايات ديالك نطردو بيها الملل ونبدلو بيها الجو شوية

ابتسم بوشعيب وربع رجليه والامير حاط يدو على خدو ومتكي ..استعد بوشعيب ووجهه البشوش وكان هاد بوشعيب جليس الامير من زمان وكينتقل معته من مكان لمكان . تبسم وبدا الحكياة وقال

كان يا مكان في قديم الزمان …. شيخ فعمره ستين عام .

شاف بوشعيب الماكلة جاية والاطباق الشهية والميدة كتمر بما الذ وطاب وسكت فالجملة الاولى حتى قاليه الامير ويدو على خدو كيتسنى

وشنو من بعد ابوشعيب

شاف بوشعيب باللي الحكاية غتلهيه على الماكلة وهوا كيحكي وقال

و مرض ومات

فهم الامير مراد بوشعيب ووماكان عليه غير يخليه ياكل وبقا كيضحك على سرعة البديهة عن هاد بوشعيب وقال

عطيو لبوشعيب كل ما كيتشهى ..لعل وسعى تفكرو الماكلة فطيات الحكاية اللي نسى .

ابتسمت عبدية وهي واقفة عليهم ومشات عيطات على البنات ومن هم عويشة ..دارو بالامير وجلسو حداه يونسوه فغذاه .. اما بوشعيب فالماكلة سدات ليه عينيه ومابقا كيشوف غير هي.. بداو الخدم كيحطو وكانت من بينهم يامنة. اللي هازة طبسيل فيه العنب والخوخ والتفاح ووقفات كانت غتحط الطبسبل لاكن بالصدمة فاش شافت عويشة جالسة مع الامير فالطبلة طيحاته وقالت حالة فمها

عويشة!!!

تلفت بوشعيب شاف النعمة تشتات فالارض وقال

واش كن كانت كرشك خاوية غيطيحو يديك هاد النعمة ؟؟ هزي النعمة يا هاد المرى

هزو الخدم النعمة بالزربة ..اما عويشة تقول شافت شي جن !! ماقدراتش تصدق وهي اصلا خلات ختها ومها فالقبيلة اش جابهم للقصر فقرطبة؟ ..بلعات عويشة ريقها وحتى باش تنطق ماقدراتش.. اما يامنة بقات كتشوف فحوايجها والحلي اللي عليها وكيف كانت وكيف ولات وقالت مبهوطة

هااي هاااي هاااي على عويشة !!! هاي هاي هاي كي كانت وكي ولات !!

باعات عويشة ريقها وبدات دور فعينيها مارضاتش ويامنة كضرب فخادها وقالت

تي هنايا جالسة بحال الحمامة وانا ومي. كنقلبو عليكم بحال البهايم ؟؟

جراتها عبدبة بغضب بغات تديها لاكن ابتسم الامير كيشوف فيها وقال

خليها .. جلسي ايامنة

بلعات يامنة ريقها وشافت فجنابها وهزات خنافرها عجبها الحال وجلسات حدى بوشعيب مربعة رجليها وكتشوف فالبنات ودور عينيها

تلفت ليها الامير وعويشة مخرجة عينيها عارفاها هبيلة وخايفة تقول شي حاجة تشوها وعضات صبعها ماحملاتش راسها ..اما الامير تعجب ف يامنة وقال

شكون جابك لهنا ايامنة ؟؟ وكي درتي حتى وصلتي لاندلس ؟

هزات صبعانها وقالت ..نعاودها ليك امولاي بحال الخرافة ..

قبل ماتهضر يامنة قالت عويشة بصوت خافت وخجل

ماتيقهاش امولاي..راه ناقصة عقل شي شوية

سمعاتها يامنة وقالت ليها

اانتي اللي ناقصة عقل ..اما انا بزاااف عليك ..انا بعدااا داتني مي زوراتني كيتك نتيا اللي عمرك شفتي السادات

ضحك الامير وقال ليها : بداي لينا الخرافة ايامنة ..ولا نسيتي حتى نتي

حركات راسها وقالت : الاااا اسيدي مانسيتهاش ..علاه نسا الدورة اللي دارو بينا الكطاطعية .. ماتعرفهم جنون سسسم الله الرحمان الرحيم ما تعرفهم بنادم بحالنا بحالهم ..

تنهد بوشعيب وقال

بداي لينا من اللول الله يهديك

تلفت الامير بعينيه الابتسامة وصبعانه على خده وهما كياكلو ويهضرو وتلفت حداه لقا وحدة من البنات ريحتها واصلة حتى لعندو ..ابتسمت ليه وبدات تتود بحركاتها وهوا كيشوف فيها وفمفاتنها ورمى يدو ورا ضهرها ويامنة كتعاود الحكاية من نيتها

يامنة : نبدا ليك منين مشيت انا ومي للسيد ؟

حرك راسو بالايجاب وقال

يالاه بداي قبل مايبدا العصر يأذن

حلات عينيها على نيتها وقالت : شدينا الرحال مع الفجر امولاي..وخلينا شادية وعويشة فالدار ..يردو الهيبة ويحضيو الغيبة

وخلينا ليهم التور والبقرة والحولي والنعجة .. ولاكن من بعد شهر ديال السفر ..رجعنا ولقينا الدار كتصفر .. لا عويشة وشادية لا بقرة لا تور ..ضرت بينا الدنيا اسيدي وتجمعو علينا هل القبيلة ..مي تنتف فشعرها وتقول مزال منتفت شي زغبة .. عااد قالو لينا ناس القبيلة .. باللي الخطيات بجوج قلبو الدار زاوية ..وجمعوهم ناس القصر مرابعين وداوهم هما وبهايمنا .. وخلاونا الله كريم ومي بحال الحمقة كدور وضرب بي الحجر ..

حرك راسو وقال : عليها جهلات وجمعات الناس حرضاتهم ومشات بيهم حتى للقصر

حدرات يامنة عينيها حشمات وقالت : مشات بوحدها امولاي ..انا والله مامشيت معاها ..وعاد زادت شعلات العافية فالفدادن بالليل وقلبات القبيلة سفاها على علاها ..كن ماشفعتي ليها كن باقا لدابا كتكمد فعضامها فداك الحبييس ..

تنهد وقال ليها ايوا ومن بعد كيفاش حتى وصلتي لهنا ؟

تنهدات وقالت لايحة يديها

اييوا مالقينا مانديرو .. تكمشنا بحال الدجاج فخيمتنا .. غا حتى سلاطت علينا واحد المرى بالليل ..وجهها كحل وكتخلع بحال سحت الليل ..ماعرفتش مالها حيت مي جرات عليا وماخلاتني نتسنط. عليهم وهما كيهضرو ..ولاكن هي اللي قالت لينا فين صدات هاد الجنية هي وشادية. السحيحيرة .. وغير عرفناهم فين زادو بتنا ماصبحنا ..جمعنا شطايطنا وبعنا كاع البهايم اللي عندنا واللي رجعو لينا من القصر ..مابقا عندنا لا دجاج ولا بقرة ولا تور ..خوينا الدار وخوينا الزريبة وشدينا القافلة انا ومي حتى للبحر ..وتما ركبنا السفينة وقطعنا للبر .. وغا حطينا رجلينا فهاد جهنم الكحلة وشفنا الويل اللي عمرنا شفنا فحياتنا.. ضارو بينا القطاطعية فنصاص الليل وحنا فالطريق لقطيبة ..وتلفونا وشيرونا حتى لقيت راسي تحت واحد الشجرة ..وتما تلاقيت واحد الشفار ولد الحرام اللي شاف كمارتو يقول امام ..وهوا قاطع يدو من يد الرحمان ..كدي عليا وقالي مك كاينة وبقا حية .. زيدي قدامي نوريك فين هي ..مشيت معاه بالصفا والنية ..حتى لقيت راسي فسوق العبيد واقفة بحالي بحال الجارية.. كنتباع ونتشرا لوااد لحرام ..فاللخر فاش ماجبت ليهم تا ريال عطاوني لعبيد لقصر هدية .. وهادي هي امولاي هي خلاصة الحكاية

ماعرف الامير يضحك ولا يتحصر على حالهم لا كن طريقة يامنة فالتعاويد كتقتل بالضحك ..خلات كلشي كيضحك .. تلفت ليها بوشعيب. يد فالفخدة ددجاج ويد فكاس دالعصير وقال بفمو عامر

نتي نتي وقفوك فسوق العبيد؟؟ !! لعجب

قالت ليه علاش مالني ؟

قاليها نتي خاصك تتباعي فسوق البهايم !!

هز الامير حاجبو وقال بصرامة :: بوشعيب .. شهاد قلة الترابي

حدر راسو بوشعيب وقال حشمان : سمح ليا مولاي اللسان مافيه عضم

انزعج الامير وقال : الى مافيه عضم ربطو

تلفتات شاقت فيه سامنة وهزات حجبانها وقلبات عينيها وقالت

اااايه بزااف عليك ..عنداك تشوفني هاكا تحسابني عالة ومايتسوق ليا حتى واحد..راني لاللة البنات ..ووقفت فسوق العبيد وقالي حيدي الحيك والسروال من لفوق .

حل برشعيب عينيه وعويشة كانت غتسخف وشدات فراسها.. رد عليها بوشعيب وقال

وحيدتهم ؟؟

قالت وهي كتتمايل وتقلب وتشقلب فعينيها : انا اصلا كنت محيدة السروال .. حيت فاش شيرونا الكطاطعية بلت فيه بالخلعة وحيدتو ينشف ..وفاش وقف عليا داك ولد الحرام مشيت معاه وخليتو معاق فالشجرة

ضحك بوشعيب حتى وحلات ليه فالحلق وقال

والى لقات مك السروال معلق فالشجرة !!! غيسكت ليها القلب

قالت ليها : لااا راه غديه تبدل بيه حيت انا وياه كنلبسو بحال بحال وهي ماجابتش معاها الحوايج بزاف..تحمد لله خليت ليها باش تبدل

ضحك الامير حتى شبع الضحك اللي كان محتاج ليه نيت وناض على اذان صلاة العصر يصلي ووقف قاليها

شنو سميت مك ايامنة؟

قالت ليه مسعودة وشي سعد ماعندها

مشا الامير كيضحك خلاهم جالسين وناضت عويشة طارت على يامنة من شعرها هبطاتها فوق الطبلة وبوشعيب وسطهم قلبو عليه الطباسل وقلبوه عل كى ضهرو عينيه خارجين واللقمة واحلة ليه والبنات كينزلو عليه للضهر والمرايشة بين الخواتات فكوهم الوصيفات بزز وكل وحدة رجعوها بلاصتها . اما الامير طلع لجناحو صلى وجلس فبلاصتو كيسبح حتى دخلات عليه لاللة روح الندى بابتسامة وحطات يديها على كتافه وقالت

باقي مقلق

ماجاوبهاش وكمل تسبيحه ..تنهدات في حيرة بغات تراضيه ومسحات على شعره وقالت

ملك غرناطة رسل لينا دعوة نحضرو الاحتفال ديالهم بالنصر ..ونشاركهم فرحتهم .. الى مكان فيك اللي يمشي ماشي مشكل ..انا فالكافية

ناض من على السجادة وطواها وقال

فيا مايمشي..هادي فرصة نتعرف على الملك محمد اصيل .. ملك بحالو يحصل ليا الشرف نتعرف عليه

ابتسمت ووح الندى وقالت : هوا اللي يحصل الشرف يتعرف عليك .. وشرف كبير. غير هوا اولدي كما وصيتك ..انا مابغيتش يعرف حتى واحد بأنك ولدي..كما سبق وقلت ليك .. وكما عارف الحكاية وكفاش هربت بيك وانا حاملة ..وكيفاش طاحت البلاد وهجم علينا العدو وقتل باك ..وقتل العائلة كلها .. ودمرو مدينتنا وخلاوني كنجري بيك هاربة باش نحميك ..حتى وصلت لتاروادانت وانا هزاك صغير فيديك .. والباقي راه فراسك ..وماشي فصالحنا يعرفو الحقيقية لا من قريب لا من بعيد ونتا عارف علاش. خليها كما هي ..وكما شرحت ليك من قبل ..تفاهمنا؟

تنهد وقال : حتى لامتى هاد الكدوب؟. حبل الكدوب قصير ..واخا نتسترو حتا نعياو عيجي يوم ويتفضح فيه كلشي. .. ومايبقا ديك الساعة غير الصحيح ..

تنهدات وقالت :ماتنساش وصية المرحوم ليك ..تفكرها فكل مرة حسيتي براسك ضعيف..تفكرها وعادي ترجع فيك روح الصمود من جديد..يالاه جهز راسك وريهم شكون هوا الملك يور ولي العهد ..والخليفة ديالنا .

تنهد وخرج قوية بتعب ومشا بعا يلبس حوايجو لقا الخدم دايرين بيه ووقف كيشوف فيهم وقال

فوقاش تقطعو يديا حتى وليتو كدورو بيا؟؟تنهدات روح المدى من عنادو وهزات يديها والراية البيضة وخرجات خلاتو يضبر راسو ومشات تكمل زينتها

ومور العصر مباشرة انطلق هودج الملكة فطريقو لقصر السلطان والامير او بالاحرى الخليفة يور فمقدمتها على خيل اصيلة عربية ناذرة حتى وصلو لباب القصر وكانت اثنائها اصوات الاحتفالات خارجة من بين اصوار الحمراء كلها .. استقبال حتفل ومنضم واحترام تام على طول مسافة الطريق داخل قصر الحمراء حتى للبوابة الخاصة دالملك ونزلات لاللة روح الندى بمساعدة الخليفة ووقفات لقات فاستقبالها الامير سلطان اللي كان مندهش من جمالها ورقتها .. تلفت مبتاسم للامير يور وتبادلو التحية وتسالم بالايادي وقال الامير يور بابتسامة وخشونة

مبروك عليكم النصر ..الله يدومها على الامة الاسلامية

ابتسم الامير سلطان بسعادة كيشوف فعينين الامير يور وقال ويدو على يد يور

ان شاء الله امولاي يور ..اسمك امازيغي ناذر. حبيتيو ..مرحبا بيكم فقصركم الثاني وبغرناطة

خرج الملك الاصيل فور سماعه بوصول صاحبة دعوته ورفع راسه بابتسامة فاتح يديه وتقدم قائلا ..مكانتش غتكمل فرحتنا بلا بيك الاللة مولاتي

ضحكات حتى تسدو عينيها عارفة شنو مخبي ليا ورا هاد الكلام وقال وانا ماكنتش غادي نخليك تحتافل بوحدك بلا بيا اسيدي. مولاي

حول بصره جهة يور اللي رفع راسو شاف فيه وفجأة تلاشات الضحكة الساخرة فوجهه الملك الاصيل وبقا كيتمعن فعيون يور وروح الندى كدور عينيها وقاطعات تأثير الدم اللي بيناتهم وقالت

الامير و الخليفة يور بن محمد

هز الملك عينيه شاف فيه وقال يور بن محمد؟!!

ابتسمت وقالت : كنسميو على اسم الاب..والمرحوم كان اسمه محمد بن يزيد ..اسيدي. مولاي

ابتسم يور ومد يدو للملك لاصيل اللي بدوره مد يدو لاكن بنضرات غريبة وتم التصافح بيناتهم وقال الامير يور

سمعت بزاف على الفتوحات ديالك والشجاعة ديالك ..وهادا شرف نتعرف ليك ونتقابل معاك

حرك الملك راسو فصمت واكتفى بالقول

مرحبا بيكم

فتح ليهم السلطان الطريق دازو وانساحب بلا ميهضر خلا معاهم الامير سلطان ومشا فاتجاهه جناحه ..انتبه ليه الصدر الاعضم حكيم ومشا تبعو لجناحه كيجري موراه ودخل معاه حتدر راسه وقال

مولاي ..واش كاين شي حاجة ؟ خلعتيني عليك

تخنق السلطان وبدا كيحك على صدرو كأن النار شاعلة فيه وقال كينهج

كنحس بقلبي كيجري بالجهد وشي حاجة ماشي طبيعية ..واش خوف واش فرحة ..جاني احساس غريب وقوي اثر عليا

رد الصدر الاعضم وقال

نادي على الطبيب امولاي ؟

رد السلطان بالنفي وجلس على كرشي كيشوف قدامو ويديه على ركابيه بلع ريقه وبلل شفاهه بلسانه وقال

الطبيب ماعندو مايفهم فالاحاسيس..داك الولد…داك الولد …

ناض ماكملش كلامو ورجع كيدوز على صدرو وقال ليه حكيم

الولد ؟ علامن كتتكلم امولاي؟

جمع الملك النفس وخرجها مدرجة وقال بتعب

داك الولد اللي مع روح الندى .. فكرني فولدي اللي هربات بيه ..ماعرفتش علاش حسيت بواحد الجادبية اتجاهه .. واش حيت رغبتي قوية فنلقى هاد الولد وكنفكر فيه ليا ونهار وبالي معاه ولا غير تهيأتها وبديك كنتخيل شي حوايج ماشي عاديين ..

ضرب على الطبلة بجنون وقال تحت سنانه

هاد الحية سمماتني وبغات تحمقني .. بغات تخرجني على طوعي وتخرج شي شر اللي غيخرج هلى الزمر كامل … مرة تقولي ولدك عطيتو .. مرة تجيب ليا ولد كما تخيلتو فخيالي ولدي!!! كما كنت كنتخيل ولدي وبنفس المواصفات والصفات اللي رسم ليه. جابتو وحطاتو قدامي

رد حكيم وقال في حيرة

يمكن امولاي حطيتي الوصف ديالك والصفات ديالك فهاد الولد وتخيلتيه كما كنتي نتا فشبابك .. يمكن تعمدات دير هادشي ودراستو من زمان وربات هاد ربيب باش يطلع مثلك وجهزاتو. لهاد النهار !؟؟ يمكن بغات تلفك وبغات تخليك تايه وحتى كتقول مع راسك شديت طرف الخيط وكتلقاه فاللخر مقطوع ..او يمكن بصح تكون سحارة وسحرات ليك باش تبقا تتخيل داكشي اللي بغات

هز راسه وزير على قبضة يدو وقال بغضب شديد

نتوقع منها اي حاجة .. نتوقع منها اي حااجة.. اللي خلات سلطان السلاطين يخرج كيجري ويخوي البلاد ويتنكر فلباس التجار ويقطع بحور ووديان حتى لاعلى الجبال ويرجع هاز يديه فالسما ..تقدر تخليني نمشي بالليل وانا ناعس فوق السحاب وفوق الماء.. بدات كتخلعني هاد الموصيبة ووقديت كنحس براسي كنتيه ..قلبي كيقول ليا يمكن ولدك ..عقلي كيقول ليا كتلعب عليك وباغا تحمقك ..اشمن نوع من النسى هاد الولية ..شكون عاشرت انا وشكون بغا قلبي وكيفاش حتى تحولات من ديك البنت الخوافة الصغيرة اللي تشيطينيها على قد الحال لمرى مجبدة بحال النخلة مايقهرها غير القهار

دخلات الملكة رافعة راسها وعقلها مع الاصيل اللي غبر غيرة وحدة ..كدور فعينيها وتشوف ياكما يبان باش تعرف مالو غبر بهاد الطريقة .. لقات العائلة الملكية قدامها بحال العادة واولهم لاللة شهرزاد فتكشيطة حمرا كتسلب العقل ومضمة ديال الذهب كتأسر القلب .. فأبهى حلتها وابتسامتها على وجهها والبنات جنبها ..ولاكن عاد المرة معاهم جوج نسى اخرين واقين جنب البنات وحتى هما غزالات بحال الحمامات ..حيت كاع اللي ولدات فسن صغير كيكبرو بناتها ووللادها معاها بحال الصحابات ..وكتجي فين توصلي الثلاتين. .. حتى كيكونو بناتها وردات مفتحات جاهزين للزواج .

وفهاد التعارف والسلام وقفات جوريا قدام الامير يور كتسلم وبلا متحس لقات راسها تايهة وعينيها معلقين كتشوفيه ..ومن ساعتها ماهزات عليه العين ..شكون قال هاد الضيفة اللي جات المرة اللولة بوحدها تكون مخبية كاع هاد الزين ..وماشي غير الزين .. الشهامة والقوة وكاع اللي تتمناه اي وحدة ..وعاد الاخلاق الزينة والقلب الكبير اللي مزال ماتعرفات عليهم لاللة جوريا . تلفتات روح الندى وبان ليها غياب لاللة ياقوت الاميرة الام ..وسولات عليها لاللة شهرزاد وقاات ليها باللي عيانة شي شوية وبقات فجناحها ترتاح .. دورات روح الندى عينيها يمين وشمال وتبسمات وقالت

الى سمحتي نمشي نشوف لاللة ياقوت فجناحها ونطمن عليها

تبسمات لاللة شهرزاد و قالت ليها مرحبا بيك ..يالاه نمشي معاك ابتسمت روح الندى وقالت بلا منعدبة الاللة شهرزاد كيفكي هاد التكبيرة اللي درتي لينا غير الوصيفات قادرين يوصلوني لعندها ابتسمت شهرزاد وخلات وصيفاتها يرافقو لاللة روح الندى ومشات خلات الامير مع العائلة مواانس.. الامير سلطان راق ليه الامير يور لحسن اخلاقه واذبه وكلامه الموزون .. وضايفه وجلس جنبه وبداو كيهضرو فالامور السياسة وعيون الخواتات عليه واكثرهم جوريا اللي نسات سميتها وتصمكو ودنيها .. رجع السلطان من بعد ما تهدن وداز عليه الحال لقاه جالس وفالحين وقف الامير يور والامير سلطان احتراما ليه حتى جلس وبقا كيحدق فالامير يور فصمت ..استغرب الامير سلطان لهاد التحديق هادا كله وقال

مولاي؟؟ واش لقيتي شي حاجة كانت تالفة ليك؟؟ بحال الى كتأكد من شي حاجة ؟

حرك السلطان راسو وقال ..بعد المرات كتفاجأني اسلطان ..خصوصا فاش كتفهمي

تبسم الامير يور وقال كيشوف فالملك .. كنت ديما كنتمى نقابلك ونجلس معاك ..وليوم نهار كبير ونهار عضيم واحسن مناسبة جمعاتنا امولاي

جمع السلطان النفس فصدرو وكيشوف فيه وقال

كتفكرني فراسي فاش كنت قدك .. الفرق بيني وبينك انا كنت كنت أب..واخا كنت أب بلا ولد .

تبسم الامير سلطان وقال

ها انا قدامك امولاي وفين كنت انا ساعتها

تنهد السلطان وتلفت شاف فيه وبقا ساكت ماهضرش وطول الوقت وعينو على الامير يور ماقدرش يزيحها ..اما لاللة شهرزاد فكانت الكل فالكل فالقصر ..طبعا ام الامراء وام ولي العهد وكلمتها مكتنزلش لارض..اما الحريم اللي معاها امهات البنات فعيطقو بالغيرة حيت هي ديما فالمقدمة وهي اللي كتسير القصر وجناح الحريم

تنهدات شافت فيهم وفالبنات وقالت بابتسامة

خليو الرجال جالسين بوحدهم ..ودخلو لجناح لحريم حتى ترجع لاللة روح الندى ونادي عليكم

تكلمات جوريا وقالت بأسى : علاش نمشيو لجناح لحريم ولاللة روح الندى دابا وهي رجعات

تبسمات لاللة شهرزاد وقالت كترمش

سمعي الكلام اجوريا ..وفاش غادي ترجع لاللة روح الندى غنادي عليكم ..حتى انا غندخل غير كوني هانية

ناضو بغيض مشاو فاتجاه لحريم والنسا الامهات مور البنات كيهضرو وقالت وحدة لوحدة .. غندخلو لجناح لحريم ومغنخرجوش دابا تشوفي.. مغاديش تعيط لينا وغتخلينا منسيين بحال ديما ..كتبغي تبقا مع الضيوف المهمين غير هي ..باش كلشي يعرفها ويهضر عليها ودير بلاصتها وتكبرها ..ماشي بحالنا حنا ديما كتمحي لينا الوجود .

دخلو عامرين على لاللة شهرزاد للحريم في حين دخلات روح الندى لجناح لاللة ياقوت لقاتها ناعسة كترتاح فجناحها وقربات منها وعيونها مدمعة شدات فيدها وقالت

لاللة ياقوت ..لاللة ياقوت

خلات لاللة ياقوت عينيها لقاتها قدامها وهزات راسها جلسات وتكات ضهرها على السرير وشافت فالوصيفات خرجات كلشي لبرا وشدات فيدين روح الندى وعنقاتها كتبكي وقالت

كتاب ليا عمر ابنتي حتى شفتك ..كتاب ليا عمر والى بغات تجي الموت دابا غير تجي ..سرك حفضتو وحلفت نديه معايا حتى للقبر ..وعمرني بحت بيه ولا عرفو شي حد دمعات روح الندى وقالت وفمها كيرجف

وحتى انا جبت ليك حفيدك حتى لهنا ..باش تشوفيه وتتعرفي عليه ..خيرك عمرني ننساه ..ضحيتي على ودي وانا ليوم مستاعدة نضحي على ودك ..

فهادالاثناء طلعات لاللة شهرزاد لحناح لاللة ياقوت تتفقد الوضع من بعد ما دحات لبنات ومواتهم لحناح لحريم ، وصلات حتى للباب وبغات تحلو لاكن سمعتت صوت البكا وجمعات يديها وطلقات ودنها تسمع شنو واقع لداخل ..سمعات شي كلام مقطع ودفعات الباب شوية تتفهم سبب هاد البكا وسمعات لاللة ياقوت كتبكي وتقول

..دازو سنين ابنت خويا ..دازو سنين وشحال بكات عليك العين.. تقطعات خبارك فمرة من نهار هجرتي هاد البلاد وخديتي فكرشك داك التيلاد .. شحال قلب عليك الاصيل وماخلى عليك لا شرق لا غرب..تقول بلعاتك الارض.. هادا نهار كبير ابنت خويا ..نهار كبير اللي شفتك فيه ورجعي ليا سالمة غانمة شان وهمة ..ورجعتي ليا بحفيدي ولد الاصيل

ردت روح الندى كتبكي وقالت ..نوضي تشوفي حفيدك ..نوضي تشوفي قرة عينك اللي ضحيتي بسعادتك على ودو وعلى ود مو .. نوضي تشوفي ولدي قداش رجع ..ولدي رجع امير وخليفة وحاكم قدو قداش..ولدي ربيتو حسن من تربية باه ..ولاكن بغيتك تحفضي هاد السر كما حفضتي سري وعاوتيني ..مابغيتش الاصيل يعرف شكون ولدو ..ولا ولدي يعرف شكون باه ..حتى نقرر انا وتجي اللحضة المناسبة ..واعديني تحفضي هاد السر ..واعديني

شدات لاللة ياقوت فيديها واعداتها وكلامهم كامل هزاتو لاللة شهرزاد فودنها وصدمها وذبحها حتى فشلو رجليها وكانت غطيح لولا وحدة من الوصيفات شدات فيدها وسولاتها على حالها وعاوناتها حتى هبطات وكتردد بلسانها مصدومة

روح الندى ..هادي نتي؟ هادي هي روح ..روح ..روح

ماقدراتش تنفس وبقات كتشير بيدها يعتقوها وتجمعو عليها الخدم دخلوها جناحها وحطوها وعتقوها بالماء وهي كلها كتوعد ماقدراتش حتى تنطق

نزلات روح الندى ومعاها لاللة ياقوت شادة ليها فيدها ودخلو للصالة الكبيرة فين جالسين ..وقفات لاللة ياقوت ووقف يور احتراما لكبر سنها ..ابتسمت وكانت كتخفي دموعها وملامح وجهها وهي على وشك السقوط فاش شافتو ..وقف السلطان بسر عة شد ليها فيدها وقال

مي ..علاش نزلتي ونتي مزالة عيانة ..رجعي لجناحك ترتاحي

ابتسمت وقالت :بغيت نشوف ضيافنا وصافي.. وغادي نرجع

ابتسمت روح الندى وقالت : طلعي ترتاحي كيبان عليك عيانة بزاف

فهاد الاثناء خرجات شهرزاد وعينيها ووجها احمر وحالتها ماشي طبيعية لاكن فنفس الوقت كتخفي حقيقة مشاعرها وهي رافعة راسها ..وقفات قبل ماتتقدم وشافت فروح الندى وبقات كتتمعن فيها وفكل تفاصيلها الكبيرة والصغيرة ..من بعد حولات نضرها للامير يور وبقات كتحدق فيه مزيان وبلعات ريقها وتقدمات في حين شدو الوصيفات فيدين لاللة ياقوت ودوزوها قدام للة شهرزاد اللي حنات ليها راسها وعينيها متبعين خطواتها بغيض ومكر .. حتى غبرات عاد تقدمات وابتسمت لروح الندى وقالت كتشير بيدها

لاللة روح الندى : كنضن مزال متعرفنا على بعضنا مزيان ..اشنو ضهر ليك الى انفردنا شوية ونخليو سيادنا مرتاحين فالامور السياسة

ابتسمت روح الندى وقالت :مرحبا الاللة شهرزاد..حتى بغيت نتعرف عليك اكثر

شارت ليها لاللة شهرزاد بيدها وتلفتات شافت فالملك اللي جالس شارد وعينيه على الامير يور وعوا كيتكلم مع الامير سلطان .

انفردو السطانات بجوج فجناح مابعيدش بزاف على قاعة الضيافة وجلسو مقابلات مع بعضياتهم ووحدة كتشوف فوحدة حتى تكلمات لاللة شهرزاد وقالت ضاعر ليا والفك الجو ديال قرطبة بزاف ؟

ابتسمت لاللة روح الندى وقالت

اكثر من اللي كتصوري..عمرني تخيلت الاندلس تكون فهاد الجمالية وهاد الاصوار العالية والزغرفة الغالية ..الاندلس من اجمل ما شافت عيني

ابتسمت لاللة شهرزاد وقالت : امم ..وماكرهتش نعرف عليك شوية ومنين بالضبط جيتو وتاريخكم الى سمحتي

هزات روح الندى راسها وابتسمت وقالت

مكاين حتى مشكل الاللة شهرزاد..انا اصولي من السلالة الملكية …. تزاديت فمدينة فالمغرب وكان الاب ديالي حاكم ديك المدينة ..دخلنا فحرب ومشاكل عائلية اللي انا براسي معارفاش سببها ..وغالبا غيكون على كرسي العرش حيت عليه كطيح الارواح بين الخوت الاللة شهرزاد

جمعات لاللة شهرزاد نفسها وقالت : عندك الحق فهادي

ابتسمت لاللة روح الندى وكملات كلامها وقالت

كنت ديك الساعة صغيرة .. وبسبب داك الاعصار العائلي اللي ناض كليت دقة على راسي ومابقيتش عقلت على البقية ..من بعد فاش وصلت سن الزواج تزوجت بملك من الملوك ..وماتفهناش وطلقنا ورجعت لبلادي اللي وقعات فيها الواقعة …تما تزوجت بالحاكم ديالها اللي كانت مرتو يالاه ولدات وماتت وخلات الامير بين احضاني ربيتو وكبرتو حتى مات من بعدها زوجي وقررنا ننفاتحو على العالم ونبداو الفتوحات بحال جميع المسلمين

حركات لاللة شهرزاد راسها وقالت

اممم ..شنو سميت البلاد اللي جيتو منها؟

ابتسمت لاللة روح الندى وقالت :سميتها تارودانت..اسم امازيغي . .. من بعد الحرب اللي وقعات فيها وانا صغيرة ماتو بزاف دالناس كبار وصغار ..وكانت مرى من هاد القبيلة والدة بزاف ديال الاولاد ..وبحر الكبدة والعافية اللي شعلات فيها طلعات فوق الجبل وبقات كتغوت كتغوت كتغوت وتقول بالامازيغية ..تاروا دانت. تاروا دانت ..يعني الولاد مشاو ..وبقات هاكاك كتغوت حتى ماتت ..وتسمات من بعدها المدينة بهاد الاسم ..تارودانت . وعاودات حياة من جديد من بعد ديك الفاجعة

تنهدات لاللة شهرزاد بعمق وعرفات باللي لاللة روح الندى كتكدب عليها فقضية الزواج من الملك وقالت

الى سمحتي تقدري تقولي ليا شكون الملك اللي سيق ايك تزوجتي بيه وطلقك؟؟ حيت لا يعقل يطبع ليك على وتيقة الطلاق شي ملك من الملوك ..هادشي مكاينش فالبروتوكول الاللة روح الندى

خرجات روح الندى لسانها بللات شفاها وقالت

لالا طلقني ..حيت انا اميرة ماشي جارية ..وبين الامراء والملوك كاين الطلاق وكاين حتى الحقوق واحترام السلالة .

جمعات لاللة شهرزاد نفسها وجعات حمراء وعينيها تزيرو وابتسمت وقالت

وعلاش ختاريتي قرطبة بالضبط؟ وحداكم مناطق كثيرة فالمغرب محتلة

ابتسمت لاللة روح الندى وقالت :مابقات حتى منطقة الاللة شهرزاد محتلة ..كلها تحت حكم المسلمين ..وانا شفت قرطبة هي نقطة الانطلاقة ديالي وهي مدينة مهمة بزاف بالنسبة ليا

حركات لاللة شهرزاد راسها وقالت امم ..مزيان الله يوفقك .. اذا الامير يور ماشي ولدك على هاد الحساب؟

ردت روح الندى وشافت فيها بعين غارقة ماعرفاتش لاياش كتلمح ولشنو باغا توصل وقالت في تبات ونبات

بحال ولدي ..حيت تربية يدي وماعنديش من غيرو الاللة شهرزاد

ابتسمت شهرزاد وقالت :الله يخليه ليك ..تفضلي الاللة روح الندى ..العشا تحط

ناضت روح الندى وابتسمت وهزت تكشيطتها وتقدمات خرجات للقاعة وجلسات جنب الامير يور وشافت بابتسامة فالملك وهوا كيبان عليه مامرتاحش وتنهدات في ارتياح ورمشات كتنادي

عبدياااا

جات عبدية حانية الراس وتلفتات روح الندى عند الملك شافت الغيض فعينيه وقالت وهي كضحك برقة ..خليك جنبي يقدر فأي لحضة نحتاجك .

دور الملك عينيه وهوا تحت الضغط من الاستفزازات ديالها ..ابتسمت روح الندى وكتحاول تكبت الضحكة والفرحة وقالت كتخاطب الملك

مولاي.. سمعت باللي سافرتي لتارودانت على غفلة .. واش كاين شي مشكل ؟

تلفت الامي يور وقال : بصح امولاي؟ جيتي حتى لبلادي وانا مافخباريش ؟

حلات شهرزاد عينيها ورجعات زرقاء ..امت الملك فاللي شافو مايفهم كاع واش فرحان ولا غضبان ..بقا صاكت وافع راسه وكيشوف فيها بلا ميهضر وهي شادة المنديل على الطبلة كتقادو باش تتعشى وقالت

معقولة تمشي لبلادي بلا متعلمني نرحب بيك وندير ليك استقبال يليق بمقامك ؟

رد الامير يور وقال :بصح ..كان خاص تعلمنا باش نستقبلوك استقبال يليق بمقامك

ضحكات لاللة روح الندى وقالت حاطة يدها على الامير يور . ماتخافش ..مرة الجاية غنديرو ليه استقبال كبير ..عمروه ينساه حتى هوا

ابتسم الامير سلطان وقال : غيكون هاد السفر مهم بالنسبة ليك كنضن ..ولا امور سياسية في غاية السرية

هزات لاللة روح الندى شاف فيه وقالت في هدوء وابتسامة

مهم اكثر من اللي كتتصور ..وفي غاية السرية اكثر من اللي كتتخيل ..والا علاش غيقطع البحور ويشد الطرقان ويسافر بالليل والنهار حتى لتارودانت ! وفي غاية السرية ! كنتمنى من قلبي امولاي تكون بلغتي مورادك فهاد السفر الصعيب ويكون جاب ليك نتيجة ..ومتكونش تعدبتي على والو

تلفتات لالة شهرزاد وابتسمت قائلة

لاللة روح الندى ..كتهضري على على السفر اللي فغاية السرية بحال الى عارفة علاش يكون سافر

شافت فيها روح الندى وابتسمت رافعة راسها

حنا الحكام كنفهمو بعضنا الاللة شهرزاد ..انا مثلا منضربش هاد المسافة كلها بنفسي الا مكانتش شي حاجة مهمة ..والسرية هادي من طباع الملوك الاذكياء الاللة شهرزاد..اللي دقتهم مكتنوضش الغبرة ..والى نوضلتها كتعمي العينين فمرة .. كاين هادشي امولاي ولالا

تنهد وقال بابتسامة

..نقدرو نبداو العشا ..

ضحكات روح الندى وقالت :كنتيق فيك امولاي تيقة عمياء ..داكشي علاش معنعطيش للخدم يدوقو قبل مني ..هانتا ..باش تعرف مدى تيقتي فيك

ابتسمت وهزات بيدها طرف من اللحم وهوا كيخزر فيها وتعشات وكتردد

امم ..بنين هاد العشاء بصراحة تحلات ليا الشهية

مد ليها الامير سلطان من الحلويات وقالت

دوقي حتى هاد الحلوة الاللة روح ندى ..لحلو كيستاهل لحلو

هز الامير يور عينيه شاف فيه نص شوفة ورجع حول النضرة واهتم بيها طول الوقت حتى سالا العشا وتبسمات ومدات يديها قدام الجميع شدات فيدين سلطان وقالت بسعادة

شكرا ليك امولاي سلطان ..المجمع بلا بيك مكيسوا والو

هز الامير يور راسه بنفاد الصبر وزدح الكاس مع الطبلة حتى تلفت الجميع وقالت ليه لاللة شهرزاد

ياك لاباس امولاي يور

زفر وقال :والو الاللة شهرزاد ..غير فلت ليا من يدي ..شكرا على العشا ..جا الوقت فين خصنا نرجعو ..وان شاء الله المرة الجاية العشا عندنا

تلفتات روح الندى جمعات الضحكة وطلقات وحدة اخرى صفراء وقالت

مزال الحال باقي قدامي موضوع سياسي خاصني ناقشو انا وجلالة الملك

تلفت شاف فيها وعينيه شاعلة وقال تحت سنانو الهوا كيخرج من مناخرو

غنرجعو ..باش ترتاحي من العيا وتقدري تركزي فالامور السياسية

خرجات عينيها كتنفخ وقالت

باقي الحال امولاي ..

هز حاجبو وطرطق عينو وقال

غتمشي

وقف وحدر راسو للملك الاصيل وقال

شكرا امولاي على الدعوة ..الله يطول فعمرك ويدوم علينا النصر

وقف الملك شاف فيه رافع راسه وقال :مزال خاصنا نتقابلو ..وفأقرب وقت اسيد الامير

وقفات روح الندى بغيض مابغاتش تمشي وضحكات بزز منها وتلفتات شافت فلالة شهرزاد بابتسامة ودعاتها وزادت جنب الملك خارجين وابتسمت وقالت بصوت منخفض

كنتمنى نكون خفيفة ضريفة على قلبك امولاي هاد العشية

قال وهوا كيشوف قدامو ويديه موراه

مزال غندمك الحية ..راني كنجمع ليك

دارت يدها على فمها وكتشوف فالامراء قدامها غاديين كيهضرو وقالت

تعلم من ولدك ..الامير سلطان ..شوف كيفاش حنين

زفر وقال كيحرك راسو :دابا نوريك الدق اللي مكينوضش العجاج

بدات كضحك وقالت :علاش امولاي؟ كاين شي سبب اللي خلاك تكرهني وتقول هاد الكلام ؟ مافهمتش فهمني امولاي !! انا كنهضر بنية صافية ماقصدت فالكلام حتى شي حاجة

سد عينيه وتنفس وكمل طريقو حداها ماهضرش حتى للهودج ديالها وشاف فيه كضحك وقالت

خليت ليك الراحة امولاي ..احلام سعيدة بعيدة ان شاء الله

ضحك سلطان وقال :دمك خفيف وروحك مرحة ..شرفتينا الاللة روحالندى

شد ليه الامير يور فيديه دورو عندو وقال

الشرف ليا امولاي ..ليلة سعيدة

حدر راسو لجلالة الملك وقال

ليلة سعيدة امولاي

سد ليه الملك عينيه برضى وتلفت الامير يور هز روح الندى دخلها للهودج ورد عليها الخيام وطلع فوق العود ديالو وهي فالهدوج ..بعدات الخيام بصبعانها وابتسمت للملك للي كان كيشوف فيها من البوابة الخاصة وشارت ليه ومشات وخلاتو واقف وتلفت زفر بغضب وقال

منين غيجيها السعد

وصلات للقصر ودخلات كيحيد عليها السلهام الابيض بالطرز والعقيق ونيفها كيسوط مقادراش تزيد تسمع لهضرة الامير يرد اللي جاي وراه كيشوف فيها وكيسمعها لمنقي خياره على قلة الاداب اللي دارت فوق الطبلة ..تلفتات بغضب شافت فيه رافعة راسها وقالت

انا ندير اللي بغيت …سمعتي ..ندير اللي بغيت ومنعدكش الحق تهضر معايا وتقلل معايا الادب ايور ..رد لبال لشنو كتخرج على فمك

وقف قدامها فغضب هاز راسه وخرج عينيه وربع حواجبو الكحلة وصواد عينيه كيبري وقال رافع صبعه كيتهمها

نتي قللتي العفة وهادشي ماشي من شيام الملوك ..ماشي من الادب والصواب وقدام الملك محمد اصيل المرتضي بالله ..بينتي على الانحطاط وقلة الذوق قدامهم وحرجتيني وماحتارمتينيش ومادرتيش بحساب الوجود ديالي

هزات يديها بتساؤل كتتهرب من الاتهامات وبعدات من قدامه قائلة

علاش هاد كاع هاد الاتهامات كلها مالي شنو درت ؟ الامير كيرحب بيا وانا درت معاه الصواب فين كاين المشكل ؟

رد بغضب وقال :هادشي فات الصواب ..فات الصواب وتجاوز قلة الادب والاحترام ..حنا عرب واصلا المرى مكتجمعش مع الرجال

ردت بنرفزة : وكيفاش بغيتي نسير هاد البلاد واش كتقارني انا اللي ملكة مع العيالات اللي مساليين اصلا ماعندهم علاش يتحمعو مع الرجال ..اما انا راه ملكة واش فهمتي ؟؟ ملكة وهادشي اللي كتقول غير تخربيق

رد بغضب وقال : انا ماقلتش العكس ديال هاد الكلام ..اه ملكة وماقلتش ليك ماتجالسيش الرجال..ولاكن تحالسيهم بصفتك ملكة جارة بلاد وراك وبقيمتك وقدرك وشانك ومرشانك ..ماشي تنزلي المستوى وتتعاملي بديك الطريقة فالعشا

عقدات حجبانها وبعدات عليه كتمتم وقالت

اشنو فيها الى مرحنا شوية .. اصلا الولد قد ولدي علاش هاد العوات هادا كامل

هز راسو فالسماء وزفر وقال : الولد قد ولدك؟؟ واخا الاللة روح الندى شوفي ليا فعيني وضحكي عليا ..شوفي فيا مزيان انا عندي الكرون

خلاها واقفة كتزفر ومشا دخل لجناحو سد عليه . وفبحال هادا لوقت تماما كان جناح الملك محمد اصيل كيعصف رعد وهوا واقف عاطي بضهرو للامير سلطان اللي حاذر راسه وكيتمتم

مولاي ..انا ماقصدتش نقلل الادب والاحترام قدامكم .. بلعكس كنحاول نربط العلاقة بطريقة سلمية بينا وبين الملكة روح الندى

تلفت الملك حنزز فيه مزيان وقال

انا حي وباقي مزال قدامك سنين طويلة حتى تربط العلاقات ودير الخدمة ديالي…ديها فالمهمة ديالك اسلطان ..ودير فراسك الى انا مابغيتكش تاخد شي خاجة مغاديش تاخدها ..والى بغيت نعطيك شي حاجة غانعطيها ليك وحتى حاجة مغديرها بلا انا منكون قابل عليها …سمعتي.

بلع سلطان ريقه وقال

حاشة امولاي .انا ماقلتش العكس..نتا تاجنا وفوق راسنا ولاكن ..

قاطعو الملك وقال : سالات الهضرة …ووجدك راسك تمشي توقف على منطقة القوط الغربية اللي فتحنا ..ومن هاد اللحضة نتا المسؤول والحاكم عليها ..وماتتحركش ولا تزيد خطوة حتى نعطيك الاذن ..يالاه تصبح على خير

خرج سلطان غيطق بالغيض من جناح الملك ومشا فاتجاه جناحه ، قابل لاللة شهرزاد فطريقها عندو وتباعته بسرعة مللي شافتو غادي غضبان ودخلات سدات الباب وراها وقالت

مالك اولدي شنو وقع ؟؟ شفتك جاي من جهة جناح الملك ؟؟ شنو وقع ؟

تلفت شاف فيها وقاا بغضب

انا ماعرفتش علاش كيعاملني بهاد الطريقة ..حتى نهار ماحسيت بيه قريب ليا وحسيت براسي ولدو؟ ديما كيقمعني وديما كيدير داكشي اللي انا مكنكونش باغي وكيبعدني على داكشي اللي كنبغي

شافت فيه مخلوعة مافهماتش مالو وقالت

علاش شنو كاين؟؟ اصلا الملك هاكا داير ..ماشي غير معاك مع كولشي. .. هوا طبعو هاكا بارد ..ولاكن هادشي مكيعنيش انه مكيبغيكش ..بلعكس راك ولدو من دمه ولحمو ..وولي العهد..وكيتعامل معاك بصرامة باش حتى تكون قاصح ..وتعول عليك البلاد من بعد

رد بغضب وقال

نتي ماسمعتيش اشنو قال .. قالي الى انا بغيت نعطيك شي حاجة غنعطيها ليك والى مابغيتش مغنعطيهاش ليك واخا نرمي راسي من راس الجرف..القضية مافيها لا ولي العهد لا ولي الويل..هاد الملك هادا اناني وكيبغي راسه ومكيهمو حتى واحد ..

سدات ليه فمو وقالت خايفة

شوووو سكت سكت ..سكت غيسمعك شي واحد وتخرج على راسك ..سمع ..سمعني شنو غنقول ليك ..ماحد مك حداك غتوصل لداكشي اللي باغي ..نتا غير برد وتهدن ومادير حتى حاجة تخرج بيها على راسك ..

زفر سلطان بغضب وقال: واه سيفطني لمنطقة القوط الغربية ..واش عرفتي فين لاحني!!! لاحني لابعد منطقة فالاندلس وخلاني فديك الجهة المخربة المرونة مني لداك الشعب الجاهل

سدات ليه فمو وجلساتو قائلة : سكت ..سكت ودير عقلك ..اصلا شكون اللي غيحكم بلاصتك شكون ؟؟ علامن غيعول الى معولش عليك نتا؟ هادي فرصة تبين ليه فيها بلا انت قد المسؤولية ..هادا تحدي ليك اسلطان قدام باك ..خاصك تكون قدها ..وتخلي باك يتيق فيه ويعول عليك وحتى اسراره يتشاركهم معاك ..نتا مابقيتيش صغير وهادي هي الانطلاقة ديالك وخاصك تربحها وتبين على قدراتك ..باش دير بلاصتك فديوان وتكون عند قيمة وكلمة ويعرفك الشعب ويعرف شكون ولي العهد ديالهم ..ونتا خاصك تعرف براسك بانجازاتك ماشي بالهضرة ..وتخرج للمدينة وتبقا تغرت وتقول انا ولي العهد!!! خاصك تبين راسك فالدرلة وتخلي كلشي يضربك ليك حساب واش كتسمع ..كن راجل ..الصح راه بدا وهادي فرصتك

زيرات على كتافو وخلاتو كيسوط ومشات حتى للباب بغات تخرج وتلفتات شافت فيه كتمدو بالقوة من خلال نضراتها وخرجات كتزفر وتسوط مشات نيشان لجناح لاللة ياقوت ودخلات هازة راسها كدور عينيها ..ابتسمات وقالت ليها وهي فسريرها

مس الخير الاللة ياقوت ..بغيت نهضر معاك الى سمحتي

شارت لاللة يقوت بيدها للوصيفات خرجو وبقاو بجوجو ..قربات لاللة شهرزاد منها ووقفات قدامها وقالت

لشنو كتسعاي الاللة ياقوت؟

استغربات لاللة ياقوت ووجهها شاحب فرراشها وقالت

شنو كتقصدي

قربات لاللة شهرزاد عندها وخرجات عينيها وقالت

انا عرفت كلشي..عرفت شكون هي هاد روح الندى ..وعرفت شكون هاداك اللي معاها .. هه خسارة ضحيتي براسك على قبلها ..شوفي حياتك كي دازت ..دازت كحلة عمرك شفتي فيها النهار الزوين ..ونتي سبب هادشي اللي وقع ليك ..ولاكن عرفتي شنو ..مغنخليك لا نتي ولا ديك الكلبة توصلو لداكشي اللي بغيتيو

خرجات لاللة شهرزاد من جناح لاللة يقوت والدم كيفور من دمها .. وقفات بعيدة وقالت بغضب

مغنخليكش توصلي لشنو بغيتي اروح الندى .. هانتي غتشوفي اش غندير فيك ..وجدي راسك

صبح الحال وحتى واحد ماقدر يدوق النعاس كل واحد فاش كيفكر وكل واحد وهمو .. لاللة ياقوت بايتة تخمم ودمم ماحيلتها لولدها ولا لحفيدها ولا لروح الندى ولا شهرزاد اللي خرجات ليها من الجنب والسر صبح عندها .. وروح الندى اللي بايتة تحت القمرة والحجر داير بيها وسمية الاصيل عند راسها ..غير هادا فحد داته عقاب ليها من نهار رجعات وهي على نفس المعانات مابقاتش داتها كتعرف السرير ..ولات مفرشة فالشرفة على الارض وكل صباح كيصبحو عضامها مهدودين .. وسمو الامير سلطان ..ماقدر حتى يجلس ويشد الارض ..هاد القرار اللي جاد بيه عليه مولاي الاصيل خلاه غادي جاي كيفكر حتى اذن عليه الفجر .. اما الاصيل بجلالة قدره .. فاللي فيه كافيه .. عصبة واحلة ليه فحلقو كيتسنى الوجيبة فين يقبطها من رجليها ويهزها حتى لسابع سموات ويردخها .. همو تقيل .. مابقا عارف رجليه من يديه .. عيا يحلل ويناقش بينو وبين نفسو واستهدف الامير يور باش يعرف اصله وفصله .. الولد يكون قد ولده ..ويقدر يكون هوا ولده بلحمه وشحمه ..خاصو اللي يأكد ليه هادشي وهادا هوا اللي بقا خاصو .. دليل يأكد ليه باش يترتاح ..وهاد الدليل هوا اللي رجع شاغل قله وباله ..

صبح على حكيم وعطاه امر باش يجيب ليه جميع المعلومات عليه .. وسيفطو حتى لتارودانت باش يبحث وينبش موراه ويعرف الصغيرة والكبيرة عليه .. اما كدوب روح الندى ليه .. فمابقاش مالي عقله .. ورجع باغي يتأكد بنفسه .

ناضت لاللة شهرزاد ومعولة على خزيت .. مشات طلات على ولدها لقاتو ساخط على يامو وكيجمع فشطايطو .. تنهدات وخلاتو وخرجات ..وفطريقها تصادفات مع طامو كبيرة الخدم والعبيد ..لقاتها جارة. وراها شلا عبيد وخدم جداد .. طلعات فيهم لاللة شهرزاد وقالت

هادو هما اللي غيمشيو يخدمو سمو الامير فبلاد الفتح ؟

حنات طامو راسها وقالت

اييه الاللة . هما هادو

شهرزاد: بان ليا هادو عاد خصهم يتعلمو ويبداو من جديد ..

ردت طامو وقالت : كاين فيهم اللي عاد غيتعلم وكاين اللي من زمان معلم .

ضحكات شهرزاد بسخرية وقالت : فين غيكونو تعلمو ؟ هادا راه قصر بقواعده ماشي سوق ولا قصبة

ردت طامو كتشوف فيهم وقالت

كاين فيهم الاللة اللي خرج من قصر قرطبة .. جراو عليهم وخلاو غير اللي ينفعهم

هزات شهرزاد راسها عابسة وقالت : لاحو الشياطة وحنا نهزوها ..خرجوهم عليا من هنا واش مالقيتو غيرهم لسمو الامير

ردت طامو وقالت :بلعكس الاللة هادو مولفين بحياة القصر ..احسن من عبيد وخدم عاد غيبدا يتعلم

دارت شهرزاد يدهت فمها كتفكر وتشوف فيهم وقالت

شكون فيهم اللي سبق خدم فالقصر عن الملك روح الندى

عزلاتهم ليها طامو قدامها ووقفاتهم وقالت

هما هادو الاللة .. كانو من الحريم ..ولاكن صفاو منهم اللي بغاو وخرجو اللي بقا يتباع فسوق العبيد

بقات كتشوف فيهم شهرزاد وحطات العين على وحدة فيهم وقالت

زيدي نتي لهنا

تقدمات وحدة منهم ووقفات حادرة راسها

تنهدات شهرزاد وقالت

نتي كنتي من ااحريم ؟

ردت قائلة

اه الاللة

مشات شهرزاد عطاتها بالضهر وقالت

تبعيني

تبعاتها الجارية حتى لجناحها ..وسدات عليها بيبانها وجلست كتشوف فيها. وقالت

شنو كتعرفي على قصر الملكة روح الندى

ردت البنت قائلة

غير الخير الاللة

ابتسمت شهرزاد وناضت وقفات شافت فيها وقالت

سمعي ..نتي دابا فقصري .. وتحت حمايتي .. بغيتك تعاودي ليا كاع اللي كتعرفي فداك القصر

ردت البنت بالصفا والنية وقالت

والله ماكدبت عليك الاللة .. كنعرف غير الخير .. من نهار دخلو علينا ماشفنا النهار الخايب ..بلعكس علمونا العربية .. وكنا كنعيشو احسن من العيشة القديمة .. وعمرها بخلات علينا بشي حاجة .. وكتعاملنا احسن معاملة ..كنا فالقصر بحال الخوت لا مع الحريم لا مع العبيد ولا حتى الخدم .. وسمو الامير كان كيعاملنا بحال الماء القليل .. عمرنا شفنا فيامو شي نهار كحل

نفخات شهرزاد وقالت .. مزيان مزيااان .. قلتي ليا كنتو بحال الخوت ..وخليتي شي ختك تما ولا خرجوكم كاملين. نتوما الخوت

ردت البنت وقالت : كنا كلنا بحال بحال ..ولاكن كانت ليا صاحبة قريبة ..غير هي بقات عزلوها مع الحريم وانا خرجت حيت كانو بغايين غير البنات العزبات .

هزات شهرزاد حاجبها وقالت : وشنو سميت هاد صاحبتك العزيزة؟

ردتالجارية :عويشة الاللة

ضحكات شهرزاد وقالت : عوييشة الدريويشة..سمعي الى درتي بكلامي غتكوني نتي هي الوصيفة ديالي .. والى مادرتيش بكلامي غادي تجني غير الشر لراسك فهاد القصر

حدرات راسها الجارية وقالت : انا غير جارية .. تابعة لاسياد فشنو ما قالو الاللة

ابتسمت شهرزاد وقالت . هاكا مزيان ..شنو سميتك بعدا

ردت الجارية وقالت.سيليا الاللة

شافت فيها شهرزاد مزيان وقالت ..من ليوم سميتك يمنى ..حيت نتي دراعي ليمنى ايمنى تفاهمنا

ردت يمنى وقالت : امريني الاللة مولاتي

فقصر غرناطة الاحوال مبدلة ..عيات لاللة روح الندى طارد ولدها لاكن مابغاش يعطيها وجهه ..خرج للصيد بحال العادة ومن الصيد داز يتسارا فالسوق بحالو بحال كاع العباد ..لباسو عادي وعاد زايدها بالغبابر حارم راسو بوشاح وطرافو مدلية للجنب.. غارس خنجر بين حزام خصرو وغادي كيتسارا ويتمنضر .. بان ليه الزحام والناس مجمعة وصوت الصدع كيدل عالخصام ..دخل وسط الجماعة يشوف اش واقع لقا راجل بعباية ثمينة وباين عليه العز ..كيغوت على مرى على قد الحال وحدا رجليها قلوش دالسمن..تدخل يعرف اش واقع وقاليه الراجل قبيح الوجه مول العباية

اسيدي هاد المرى زلعات عليا السمن .. ودابا بغيتها تعطيني حق العباية اللي خسرات بعاد ليدام

قالت ليها المرى المسكينة ووجهها كحل بالشمس ..اسيدي انا ماعندي مال ولا كنور ..انا غير مرى مسكينة كتبيع السمن ..درتو فوق راسي وانا جاية للسوق كنبرح شكون يشري من عندي..وبحر الشمش داب فالقلوش وفاش سولني هاد السيد على شنو هازة قلت ليه السمن ..بغا يشري وهبطت راسي نبيع ليه ..تزلع عليه شوية على توبه وكيطالبني نعوضو ونخلس خسارتو

تلفت الامير شاف فيه وشاف فعينيه الغرور والتكبر وقال

التوب مزال يتصبن ..ياك هادا غير سمن؟

قاليه قبيح السيفة انا تربي حر الاصل .. فسداتو لي هاد الكحلة وانا عاد جاي بيه من عند التاجر

قاليه الامير وشحال كطلب فيه ؟

قاليه المجدام كحل السيفة خمسين متقال

قاليه الامير واش كطلب خمسين متقال والمرى مسكينة ماكتربح من القلة حتى خمس دراهم ؟

قاليه المجدام. هادشي باش طلعات عليا ..وماشي شغلي

جبد الامير من طياته رزمة فيها خمسين متقال .. وغير داكشي اللي كان هاز فجيبو وما هاز موراه حتى ريال ..قاليه شد خمسين متقال ديالك

شدها قبيح السيفة وبغا يمشي بحاله ..وقفو الامير وسط الجماعة اللي كتفرج وقال

خديتي لخمسين متقال ؟

قاليه المجدام. اييه؟

قاليه الامير يالاه عطينا العباية

قاليه قبيح السيفة نعطيك العباية؟!!

قاليه الامير ياك خديت الثمن ديالها والناس شاهدة ..يالاه عطينا العباية ديالنا

قاليه قبيح السيفة وبغيتيني نمشي عريان!!؟؟

قاليه الامير انا عطيتك ثمن العباية ..ودابا عطيني عبايتي !

قاليه قبيح السيفة منقدرش نعطيها ليه وانا نبقا غادي عريان ؟!

قاليه الامير انا شريت ..وماشي شغلي

قاليه القبيح هاك ها خمسين متقال ديالك اللي عطيتيني

ضحك الامير وقاليه العباية عبايتي دابا ..وانا اللي طلب فيها الثمن اللي بغيت

تفاجأ القبيح وقاليه. وشحال كطلب فيها ؟!!

قاليه ميات متقال

تعجب القبيح وقال ميات متقال فعباية ؟؟! الضلم هادا والتعدو

قاليه الامير وماضلمتيش مولات السمن وطلبتي منها خمسين متقال وهي متكساب متعلام ؟ دابا غتعطيني العباية وتمشي عريان ولا غتعطيني الميات متقال ..

دارو بيه الجماعة وبقاو كيهضرو وجابو عليه الحق ..وليهودي مالقا ليه مخرج وتحشم وغيزيد يتحشم الى بقا عريان .. جبد الميات متقال عطاها ليه كيبكي ومشا هرب قبل مينزلو عليه الجماعة بالضرب .. خدا الامير الميات متقال وعطاها لمولات السمن وقال هادا دم وجهك .. وعمرك تسكتي على حقك

شداتها مولات السمن كتبكي بالفرحة وهوا غادي وبدموع الفرحة كتبكي وتدعي

زاد الامير ويديه ورا ضهرو كيدور ..ومعجب من حال السوق اللي جامع شلا كنوس ..قادوه رجليه حتى لواحد الجماعة دالرجال ووقف يشوف اشنو كيشوفو ..لقا ريوكهم سايحة وقدامهم جارية واقفة .. لابسة ومغطية ..وباين عليها الخير ومفششة .. هز عينو فيها وتبهر ..حسن وجمال شيحان الخالق المنان .. حلف مايمشي من تما حتى يعرف هاد الزينة الفنة بشحال غتتباع .. خرج ليهم سيدها من واحد الخيمة فوق واحد الخشبة عالية علاش واقفة وتبسم وقال

بسم الله نفتحو الدلالة .. شكون فيكم اللي مشوق وشكون اللي بغا يبدا ..

بدا تاجر من التجار وقال

نبدا بخسمين متقال ..

تكلم واحد مول الحدبة وقال ..انا عاطي ميات متقال

رد واحد اخر والامير كيتفرج وهما كيتزايدو حتى وصلوها لألف متقال .

وحبسات الزيادة وسعر الجارية طلع فوق العادة .

تبسم مولاها ووقف جنبها وقال

تهدنو يا الجماعة ..انا عطيت وعد لهاد الغزالة ..مانبيعها غير للي ختارتو هي بنفسها ..حيت ماشفت منها غير الخير .. وذكية وبنت الدار لكبيرة …ايوا بلاتي نشاورها ..قولي ليا يا جوهرة ..هاد السيد هوا اللي شراك .. راضية عليه ؟

شافت فيه باشمأزاز وقالت ..مانتباعش لهاد كحل السيفة .. متقب الوجه

هز مول الحدبة يدو وقال انا نعطي لالف متقال اللي عطا اللخر

شافت فيه الحارية وقالت منتباعش لهاد عوج الضهر .. ريحة فمو كي ريحة قدامو

دار الامير يدو على فمو وشبع ضحك ..هز واحد طويل القامة ورقيق الخامة وقال ..انا نشريها ..وبالف متقال اللي طلبات

عبسات فوجهه الجارية وقالت

منتباعش لهاد طويل النيف.. نيفو يأسات منو جميع الانوف..هوا ناعس فبيتو ونيفو فمكة كيطوف

رجع الامير اللور كيضحك وهبط وجهه وبقا غير كيشوف.

قاليها النخاس وشكون فهادو اللي بغيتي يا زينة البنات

سرحات عينيها كتقلب حتى بان ليها الامير واقف مخبي مور الشيوخ . شارت بيدها وقالت انا منتباع غير لهاد لغزال موال الوشاح لكحل

دور الامير عينيه بجنابو مابان ليه غزلان من غيرو ..عرف راسه المعني بالامر وتراجع بغا يمشي حتى عيط عليه النخاس وقال

جاريتي مابغات حتى راجل من غيرك ..هي ليك تعمر دارك وتحلي لياالك

بقا ساكت ومافي جيبو حتى باش يشري خبزة ولزم الصمت

عاود كلمه النخاس وبقا كيشكر ليه فيها وهوا ساكت ..حشم يقول ماعندي مال والمال كيدير قيمة للرجال

بقا لازم الصمت والجارية كتشوف فيه ..قالت لنخاسها خليني نقرب ليه نقنعو يشريني

رخا ليها النخاس لحبل شوية قربات من الامير وقالت كتودد ليه

شريني عمرك تندم عليا ..شريني وغتشوف الخير والخمير اللي غيتدفق عليك

همس فودنها وقال

انا معنديش هاد الاف اللي طالبين فيك

قالت ليه عطي فيا تسع مية

قال ليها حتى هي ماعنديش

قالت ليه عطي فيا سبعمية

قالت ليها حتى ديك سبعمية ماعندي

بقات كتنقص ليه حتى وصلاتها لمية وقالت

عطي فيا مية .

قاليها واش سيدك غيعطيك ليا بمية ولخرين عطاو فيك الف وشوية

قالت ليه غير عطي فيا مية وخلي الباقي عليا

قاليها لا مية لا نصها .. ماعندي فجيبي حتى باش نشري خبزة

دورات عينيها شافت سيدها كيضهر مع الشيوخ عليها وجبدات من طياتها رزمة حطاتها ليه فيدو وقالت

هادي الالف متقال ..عطيه منها تسع مية وخلي مية نتقوتو بيها هاد العشية .

شد الالف متقال وبقا غير كيشوف فيها ومشا عطاها للنخاس وفك رقبتها من البيع وقاليه

هنيئا ليك بيها ..لولا حاجتي فالمال ماكنت نفكر فالبيع ديالها

رجعات كتجري هزات رزمتها وضارت لقاتو مشا وتبعاتو كتجري لسقات حداه وقالت

علاش عطيتيه كولشي شنو غناكلو دابا؟؟ ها؟!! وانا غنسخف بالجوع

تلفت شاف فيها وقاليها نتي من اليوم حرة ..مابقيتي لاعبدة ولا جارية

تصدماات وخرجات عينيها وقالت

حرة !! حررتيني؟؟؟ حررتيني ؟؟ انا حرة؟!!!

بقات كدور بلاصتها وتغوت وتلفتات لقات مشا وتبعاتو كتجري وتغوت

اااسيدي ااسيدي اشنو سميتك

وقفاتو وقالت

ولاكن انا فين غنمشي؟؟ ماعندي فين نمشي ؟؟ وغيشدوني النخاسين ويعاودو فيا البيع

هز يديه وقاليها وانا شنو غندير ليك ؟؟ ماعندي مندير ليك ياك حررتك ..وا بصحتك

بدات كتبكي عليه وتابعاه وهوا كيشوف فجنابه وترغب حتى وصل للعود ديالو خارج السوق ركب وبغا يمشي..تلفت لقاها مزالة واقفة كتوسل ليه بعينيها وتنهد مد ليها يدو هزها قدامو وزاد وضرب الخيل زاد كيجري

عطات الخيل رجليها للريح ..وجوهرة قدام الامير كتنقز وضحك ..تلفتات سولاتو وقالت فين غنمشيو؟

ضحك وهوا شاد اللجام بقوة يديه وقال

لجهنم

وقبل ميكمل ضحكتو داز على راسو صف من السهام .. وكان غيصيب واحد منهم راس جوهرة لاكن رفع الامير يدو بالخف وهز عليها الضربة وكلاها فدراعه ..طلقات جوهرة صوتها بالغوات السهام تابعاهم من اللور بحال النحل ولحسن الحظ كانت قدامهم غابة من النخل وسط ديك الصحراء اللي قاطعين ودخلو تلفو بين الاشجال ..هجمو عليهم اصحاب السهام بالسيف قاصدينهم ..هز الامير النبلة اللي كيصد بيها وهز السهام على قد اصابع يدو وطلق ربعة فضربة وحدة طيح منهم ربعة دالرجال ..وهز اربعة اخرى طيح بيهم ربعاء اخرين ..ومكان ليه لاسيف لا والو غير الخنجر ديالو والسهام ..بقا كيضرب بالسهام بطريقة اكثر من احترافية واسهل وكيطيح فيهم بحال الصيد حتى بقا ليه واحد منهم ونزل جبد الخنجر ونزع اللثام على وجهه وحط الخنجر على حلقه .. قاليه شكون نتوما ؟. رجال من ؟

اعترف الغدار بانه واحد من رجال الشيوخ اللي كانو فالدلالة وبغا جوهرة بشدة لاكن عايراتو بأنفه الطويل .. قال الامير وهوا فشدة الغضب. سير رجع وقوليه غنرجع ونقص ليه من نيفو

دفعو مشا كيجري وتلفت لقا جوهرة طايحة فوق العود وغارقة فدمايتها ..مشا كيجري هرس السهم اللي فدراعه وقلبها على ضهرها لقا سهم اختارق احشائها.. قلب نبض قلبها سمعو تقيل وطلع على العود وانطلق كيجري متكيها على يدو حتى للقصر ودخل نوض فيهم الرعب بالحالة اللي وصل بيها .. جاو يسعفو يدو السايحة بالدم لاكن امر باسعاف البنية اللي كانت روحها معلقة ما بين السما والارض وخطفوها دخلوها فرمشة عين ودخل هوا شاد راعه وحابس الدم ..سمعات لاللة روح الندى خباره ونزلات كتجري بلا عقل تبعاته لجناحه لقاتو كينزف والطبيب حداه ..طاحت حداه مخلوعة كتسول وقالت

اشنو وقع ليك ؟؟ شكون ضربك ؟

رد بغيض وقال : خرجو ليا لقطاطعية فالطريق وانا راجع للقصر

ضربات فخادها وقالت : هادشي مناش كنخاف..هاشنو كنضل نبرح ونغوت ونتا ماكيهمكش حتى واحد.. رحمني ..رحمني الى مابغيتيش ترحم راسك رحمني انا اللي غيسكت ليا القلب

شدات دراه كتقلبها وضربات فخدها وقالت

السهم مغروس حتى للجدر ..ويلي السهم واصل حتى للعضم

تلفت وقال : براكة من هاد الهضرة ..السهم ماواصلش للعضم .. وكاع الناس كيتصابو واش انا اللول ولا اللخر

هز الطبيب الموس من بعد ما نضف الجرح وبغا يخرج راس السهم .. وقفو الامير وتلفت لاللة روح الندى وقال

رجعي لجناحك حتى نضمد الجرح ونعيط ليك

وقفات كتمشي وتجي وقالت مغنخرجش ..غنبقا هنا حداك

شار بيدو للطبيب وعطاه دراعه وجالس فزاوية من جناحه ..حيد ليه الطبيب راس السهم وروح الندى غطلع روحها وهي كتشوف السهم طالع من وسط اللحم وغوتات

بشوية عليه ..بشوية عليه. اويييلي عاى ولدي

عضات يديها كتبكي وتتحرق وتلفت عندها الامير قاليها

مالك يا الاللة روحي راه كيوقع ما كتر فالحرب ولفنا هادشي علاش كتعدبي راسك

طلقات النفس فاش طلعات السهم وحتى قالت رتاحت وهي تشوف الطبيب هاز موس حمر حامي لونو لون الويل من وسط محمر الجمر ومشا بيه لدراع الامير ..يسد بيه الجرح ..وقفو الامير مرة وتلفت شاف فلاللة روح الندى ومابغاش يخلي الطبيب يخط عليه يديه حتى خرجات هي من البيت. عاد عطا دراعه وتكا راسه على الوسادة وسد عينيه كانه غيستسلم للنوم حتى حس بالنار لمات ليه اللحم وخرج النفس بعمق قائلا .. يا الله

ضمد ليه الطبيب يدو وخرج والعرق كيتصبب من جبينو بصهد النار .. لقا روح الندى واقفة حدا الباب كتشوط وشافتو عاد وجعات فيها النفس وقالت

كي بقيتي ؟ فاتك الحال ؟. باش كتحس القلب ديالي ؟. باس على جبينها وقال . صافي فاتني الحال ماتخلعيش عليا

شدات فيه وقالت : خليك فجناحك .. عبديااا عبديااااا جيبو للامير الماكلة لجناحو. .

بدات كتمشي. وتججي بغات تسيفط ليه الماكلة والبنات يريحوه وتجلس حداه لاكن مابغاش وباس يدها وقال

غير بشوية عليك ..هانا غنرجع صافي واخا ..وجدي داكشي اللي بغيتي

قالت ليه فين غادي فين غتمشي رتاح

قاليها معنخرجش غير هنا فالقصر

خلاها واقفة ومشات كتجري توجد ليه وتقاد ليه وماكرهاتش قلبها تعطيه ليه ..مشا كيسول على جوهرة وقطع لجناح لحريم فين كيتعالجو ودخل لقا الحكيم والعوين معاه دايرين بيها ووقف كيسول على حالها وهي ممدة فوق سرير قهوي معريين ليها كرشها وناعسة كتصبب بالعرق ووجهها اصفر وعيونها مسدودة ورموشها طريلة مقلوبة بحال الملاك ..جلس جنبها كيتأسف على حالها وحط يدو على راسها قال بصوت متعب

صبري.. صبري يا الحمامة .. ان ًشاء الله غادي تبراي وترجعي طيري احسن من قبل

قلع الطبيب السهم وجمع ليها اللحم بالابرة والخيط وهز قطيب رقيق من المجمر حطو على طول الفتحة الصغيرة حتى تهزات من بلاصتها وأنأنات وزيرات على يد الامير ورجعات غابت .

تلفت الامير شاف فالطبيب وقال : غتولي لاباس ياك

رد الطبيب وهوا كيمسح على جبتهها العرق وقال

غادي تبرى .. مشاء الله قوية وباغا تعيش..واخا جسدها صغير ولاكن عزيمتها كبيرة .غير خاصها ترتاح والجرح غيتعطل باش يبرى

مسح الامير بصيعو على يدها الرقيقة وقال

عينك عليها ورد ليها البال .. مابغيتش هاد البنت ضيع ..بغيتها نشوفها كتجري فالقصر…بغيت نجلس معاه وسمع قصتها ..بغيت نعرف عليها كلشي

حدر الطبيب راسه وقال

السمع والطاعة امولاي

وقف الامير ومسح على شعرها المتموج بحال اللواية وقال

فاش تفيق علموني

رجع الامير لجناحو وقبل ميدخل تفارق مع عابد اللي كان غادي حداه وكيسمع الوصاية من لسان الامير على جوهرة .. وحع عابد ادراجه وتصادف مع لاللة روح الندى خارجة ووقف حدر راسه وهي كتشوف فيه مستغربة على الزربة ديالو وقالت بعينيها

مالك ؟ شنو كاين ؟ خسيت بحال الى شي حاجة فالقصر ماشي هي هاديك ؟!

تبسم وقال : لاللة مولاتي اللع يطول فعمر لاللة .. مولاي الامير جاب معاه واحد البنت اش غنقول.. الشوفة فيها تسر الناضرين .. ماشفت فالزين بحالها .. زينة مسرارة .. نوارة يا لاللة تشهاي تبقاي تشوفي فيها ..سبحان الجميل اللي خلق الجمال

هزات حاجبها باستغراب وقالت ليه كيفاش سمو الامير جاب معاه بنت ؟. منين جاب هاد البنت ؟ شا هاد الكلام كتقول واش مولف الامير يجيب لبنات؟. ناقصينو بنات فالقصر والعمبر عمر وغيطرق غير بالزين ؟

تبسم عابد وقال: لاللة ام سيدي .. كوان تشوفي هاد النوارة الجوهرة .. ماتبقا تبان ليك حتى وحدة فالبنات.. واحد القبول الاللة .. واحد الفسرة نعيا نوصف ليك الاللة مانوفيهاش حقها من راسها لقدام رجليها .. اما منين جابها .. الله واعلم الاللة .. هوا وصانا وحنا درنا بالوصية

عقدات حواجبها وقالت

وباش وصاكم ؟

عابد : وصانا نديروها .

فعويناتنا ..ونقابلوها حتى تبرا

لاللة روح الندى: تبرى ؟. شهاد الخرايف اعابد واش بغيتني نقطع ليك داك اللسان اللي كيقطر الكلام قطران

جنع عابد تبسيمتو وقاليها لاللة ام سيدي ..البنت جاتنا مجروحة ..ومسكينة غايبة بخال الطير المجروح

زفرات وقالت ليه زيد قدامي نشوف هاد الزين المجروح ..وعلاش جابها وشنو قصتو معاها

مشات طلات عليها لقاتها غارقة فالزين حتى لودينها ..زين مميز .. ومكتشبه لحد وما عندها زين بحال قراناتها فالقصر.. داك النوع اول مرة يطيحو عليه..دغيا كتحبب العباد فيها غير من نضرة ليها .. شفقات على حالها لاللة روح الندى وتنهدات قالت ليهم مالها مسكينة ؟

قاليها عابد ضربوها النبال الاللة وحيدنا ليها الاثر وكوينا الجرح ..

حلات روح الند عينيها ومشات عند الامير دخلات عليه لقاتو ناعس كيرتاح وجنبو جوج جاريات وحدة دلك عضام ضهرو ووحدة عصاب رجليه .. وقفات عليه لاللة روح الندى وربعات يديها قالت ليه

شنو فصتك نتا والبنت اللي جبتي وبجوج مضروبين بالسهام ..هضر قولي شنو وقع ليك وماتخبي عليا حتى حاجة ولا مغنسمحش ليك غدا قدام الله

تنهد ودور وجهه اللي كان فالوصادة مخشي وبزز منو عاود ليها اللي طرا ..ايوا غير سمعات اش وقع وكيفاش حتى حصل عليها ناض فيها الصعر وناضت الطبيعة القبيحة ونسات ثاني راسها اميرة حتى شافت فالحريم كيشوفو فيها ورجعات تقادات مع السطر وقالت

كفاش كتجيب معاك وحدة من السوق ونتا امير ومستهدف من بزاف ديال الاعداد ؟. غير قشتالة اللي جينا على الحدود ديالها مستهدفينك وكيقلبو منين يغتالوك .. ونتا جايب معاك جارية منخوسة يعلم الله شحال من النخسة للقصر ومن فوق هادشي لسقات فيك هي ؟؟ علاش هاد شي وعلاش نتا بالضبط .

تنهد وقال ليها مالها اشنو غيكون وراها كاع .. عادي جارية بحاال كاع الجواري شريتها وجبتها

ردت بغضب قالت ليه شريتيها بفلوسها ؟ هادي هي شريتها !! ومنين جابت الفلوس. يعلم الله !! هي واه مسيفطة نوض دابا خرجها ولا ندر سرع يدي دور وحهه للجهة الاخرة وتجاهلهت وقال

واخا حت تفيق بحال

مأسات نزلات روح الندى والله يحد الباس..هزات هم البنت المريضة وهم ولدها اللي خلاها ماتنعس لا ليل لا نهار ..قلبها وعقلها كيقولو فخ وتبنا ليه ومن غير هاد الاحساس ما كاينش ..اما جوهرة فلقات راحتها فغيبتها وماسخات تنوض منها واخا داز اسبوع كامل..

نمشي نطلو غلى قصر الاصيل..اللي هادي ايام وهوا معصب وطاير ليه .. جالس فشرفة جناحو فالارض والشمس الساطعة ضاربة فيه ..متكي وكيحك صبعانو مع بعض وساهي كيشوف بعيد وسط الخير والخمير اللي داير بيه والحريم اللي كل مرة تجي وحدة تحط ليه شي حاجة ولا تخوي ليه شي حاجة ..كان باله مشغول وكيخمم وحكيم قدامو جالس كيتناقش معاه

حكيم : وموحال امولاي تكون مقصودة .. يقدر القدر وقف فالطريق عاد المرة وقع اللي وقع

رد الاصيل وهوا شارد وقالي: القدر ! .. القدر مع اميرة؟. هادي مقصودة ..ومايكون غير شي واحد من طاسيلتها باقي حي..

حكيم : قلبنا عليها امولاي الدنيا سفاها غلى علاها ..مكنضنش تكون هربات .. غادي تكون تلفات فداك السطو اللي سطو عليهم وهوا فطريقهم اشبيلية .

تنهد الملك وقال : غادي تبان .. غادي تبان وغادي ترجع حتى لهنا للقصر

رد حكيم وقال: البنت مزال صغيرة امولاي واخا كتبان عليها فاخرة ..ولاكن عقلها ماشي قد كسدتها .. على حسب ما كان كيوصلني من جناح الحريم امولاي عليها كانو كيقولو عاجبها الحال فالقصر ومكدير لا مشاكل لا صدع .. وكتعلم وعقلها خفيف دغيا كيتشد..غير البنات دالحرم امولاي الله يهديهم اللي كانو كينبشو فيها ويتعداو عليها من غيرتهم منها امولاي

رد الملك وقال: ماتكونش طجات منهم ؟

تبسم حكيم وقال: طج منهم لجناحك امولاي ..ديما كتجبدك على لسانها وتستقوى بيك .. اما تهرب منك ومن القصر كامل منضنش

زير الملك على يدو وقال فشرود

اااخ يا سبأ.

كانت فهاد الاثناء لاللة شهرزاد كتمشى فالقصر والتبسيمة من فمها لودنيها وجنبها وصيفتها كضحك وتعاود ليها

لوكان تشوفي الاللة شهرزاد كيفاش رميناها من الجرف .. موحال تعيش من مور ديك الرمية

ضحكات شهرزاد وقالت: عاد اللفعة الصغيرة خاصها تموت صغيرة .. ماشي حتى تكبر وتبيض ودور بيها الحمية تحميها ..مزيان مللي ماتت وتهنيت منها.. العقبة للحية الكبيرة .. حتى هي تموت ونرتاح منها

ردت الوصيفة وقالت : خايفة يشك فينا مولاي ويصفيها لينا حيت كتقلنا ليه جاريتو اللي عزيزة عليه

ردت شهرزاد وقالت: مغاديش يشك ..كاين بزاف ديال الاسباب من غير السبب ديالي.. عندو الف سبب اللي يخلي سبأ تهرب واللي يخلي بزاف دالناس يستهدفوها واللي يخلي بزاف دالناس يقتلوها ووحدين اخرين يهربوها ويحميوها ..كاين عندها مية سبب وسبب.. ها البنات اللي كيضمرو ليها على الشر هنا .. ولا شي واحد فقبيلتها فين كانت يكون باغي يخرجها ويهربها ..ولا هي نيت باغا تهرب..اجي وعلاش لا منقولوش باللي كانت على علاقة مع شي واحد ولا محبوبها ورجع باش يديها ..او لا شي واحد من اعداء الاصيل اللي تربص بالقافلة وتعدا عليها ..وحساب ليه وحدة من بناتو وبغات ينتاقم من مولاي..شتي شحال من سبب عند هاد القملة اللي عطات للعين قبل وقتها. المهم دابا عندي هوا مابقاتش هنا وتهنيت منها

كملات لاللة شهرزاد طريقها وخرجات للجردة الخاصة على غفلة وقشعات جوريا كتهضر مع رسول القصر وكتمد ليه مرسول وخايفة يشوفها شي حد ..تبعاتها عين لاللة شهرزاد حتى رجعات وقفاتها كتشوف فيها بنص عين وقالت

اشنو كنتي كديري مع رسول القصر؟ ولمن رسلتي المرسول؟

رتابكات جوريا وقالت :مارسلت والو !! اير تهيأ ليك اللة

زادت لاللة جوريا كدور فعينيها خلاتها في حين طار المرسول فرمشة عين من قصر الحمراء حتى لقلب قصر الملكة روح الندى. وتقدم ليد الامير يور اللي جالس فالحديقة الخاصة مع جوايه العصر والبرودة كضرب والنهر قدامو كيجري ويشرشر. استغرب وقال كيفتح المرسول

من قصر الحمراء؟

حدر الرسول الراس وانسحب من مجلس الامير اللي فتح الرسالة ولقا كلام عمرو سمع بحاله .. رسالة كتعبر على الاهتمام والاعجاب ويمكن حتى الحب بين سطور شعرية وتحتها ختم باسم الاميرة جوريا اللي صدم الامير وهز عينيه كيشوف قدامو مامصدقش!.. جمع الرسالة فحزام خصره وتشغل بكلامها وشنو تكتب فيها لاكن خفت الامر برزانة وتبات وبقا فبلاصتو شاد كاس دا تاي حتى سمع صوت نسوي جاي وكيقرب وتلفت لقا عابد اللي جاي هوا ووصيفة ووسطهم جوهرة فلباس خفيف بني فاتح وشعرها محلول حتى للمؤخرة وعيونها مفتحة وشفشافها حمراء ..شادة فجنبها وكتمشى تحت توبيخ عابد والوصيفة حتى وصلات عند الامير اللي تبسم ومد يديه ليها جلسها جنبو على وسادات ناعمة

عابد: سمح لينا امولاي .. مابيناش نجيبوها هي بات تجي

رد الامير وقال: ماشي مشكل سير شوف شغلك

انفرد الامير بجوهرة وتلفت بابتسامة يسول على حالها لقاها حالله عينيها وفمها وكتشوف فيه بلا متنطق وقال

علاش كتشوفي فيا بحال هاكا ؟

بقات ساكتة وكتهبط عينيها على ملابسه الفاخرة وشكله اللي عاد بدا كيبان على حقيقته وكيوحيانه فعلا كينتمني لسلالة ملكية وقالت فخجل واحترام

علاش ماقلتيش. ليا باللي سيادتك امير؟

استغرب وقال: وعلاش غنقولها ليك؟

هبطات عينيها وقالت: سمح ليا امولاي.. انا ماقصدتش نسولك !!.. انا غير ..

سكتات وهوا كيشوف فيها ويتمعن وقال: الى بقيتي كتهضري بحال هاكا مغنسمعش ليك

هزات عينيها وقالت: وكيفاس غنهضر ؟

رد بعفوية: عادي كما هضرتي معايا من قبل

حركات راسها وقالت : ولاكن دابا كولشي تبدل ..هاد القصر ..وهادشي.. !!

لاحظ فيها التعب فالكلام وباقيكيبان عليها المرض وعينيها تقال وقال

رجعيفين كنتي حتى ترتاحي ونهضرو

ردت بالنفي وقالت : لا لا انا مزيانة .. غير بغيت نعرف فين انا؟ ومعامن انا ؟؟ فالسوق ؟!! فالسوق قلتي لي ماعندكش باش تشريني!! وماعندك حتى فلس! كيفاش دابا عندك هاد القصر ..وهاد الخدم وهاد الخير كامل

ربع يديه تنهد بابتسامة وقال

ونتي منين جاتك الف متقال ؟ وعلاش بالضبط ختاريتيني انا نشريك؟

حمار وجهها لانها كانت حاكراها فالسوق وكانت عندها تقة فالنفس كبيرة وهي كتهضر وكتختار ووصفاتو بالغزال فالاخير طلع العزال امير ودو نفود ومال وجاه وماشي كما كان كيبان عليه فالاول وقالت كترمش قدامها

انا ؟؟ ماختاريتكش؟!

هز حاجبو وقال :متختاريتينش؟ وباش دفعت الثمن ديالك الغزالة جوهرة؟

بلعات ريقها وقالت كترمش

انا ماسميتيش جوهرة

هز حاجبو باستغراب وهز راسه كيتقاد وقال

هاااا!!! باين عندك ما يتعاود حتى نتي ..يالاه بداي نشوف ..اشنو قصتك ؟

حنات راسها وقالت كتلعب فطرف التوب بيدها

انا سميتي سبأ..

سميتي سبأ.. وانا من بلاد القوط .. بنت ولي العهد وحفيدة قربيز ..ضحية الحرب اللي شن علينا الملك محمد اصيل.. من بعد ما تهدم كلشي وضاع كلشي .. ومابقا من السلالة غير انا بوحدي..جابوني مع البنات للقصر عند الملك محمد اصيل.. وختارني من بين كاع البنات واهتم بيا وحطني فمرتبة خاصة ..تعلمت لعربية ..واسلمت ..وبديت كنتعلم اتيكيت القصر .. هتد الاهتمام خلا عيون الجواري كلهم يتحلو جيهتي .. وبديت كنتعرض للتهديد وشي مرات حتى للقتل.. وتسممت شحال من مرة ..تحرقت وتجرحت حتى وليت كنخاف مابقيتش كنقدرش ننعس..مكنعرفش شكون اللي مستهدفني بالضبط حيت مرة كناكلها من الحريم من مرة من الوصيفات حتى مرضت وعييت ..حكروني حيت صغر منهم وتعداو عليا بزاف فالاخير طلبت نشوف الملك محمد اصيل ..شكيت عليه شنو كيوقع ليا وشنو اللي كيخبيو عليه من جيهتي .. وعطا امر باش نتحول من القصر ونمشي لقصر اخر بعيد عليهم .. ماعرفتش علاش كيعاملني هاكا ؟ ماعرفتش واش اعجاب ولا شاف فيا شي حاجة مشافهاش غيري ولا شنو اللي خلاه يهتم بيا لهاد الدرجة .. وقالي غنمشي لاشبيليا غنبقا تما حتى نبلغ سن الصيام .. غنكمل التعليم ونكمل داكشي اللي كندير فالقصر بشكل عادي وفاش نكبر شوية نرجع للقصر.. ولاكن فطريقنا لقصر اشبيليا تعرضو لينا لقطاطعيا وونشبات بيناتهم حرب وبغيت نهرب من وسط داك السطو لاكن تدفعت من فوق واحد الجرف وطحت وماعقلتش على راسي ..حتى لقيت راسي فواحد الدار بحال الرياض ناعسة وشي مرى كتقابلني .. فاش سولتها قالت ليا انا فدار تاجر من التجار الكبار .. دوزت ايام عندهم وكان التاجر كيعاملين احسن معاملة ..وكان باغي يتزوج بيا فاش نبرا..لاكن مرتو مابغاتش وسمعتها كتهددو الى تزوجني غتسلبو كاع املاكو .. وشرطات عليه يخرجني من الدار . وداك النهار اللي تلاقيتك فيه عطاني الف متقال ليدي.. قالي انا بغيتك من قلبي ولاكن مستقبليهوا الاول وهوا بيدين مرتو .. وقالي مابغيتكش تكرفصي وتتعدبي وغنخرجك للسوق نبيعك .. وهادا رزقك خليه عندك غنحتاجيه ..قلت ليه متبغيتش نتباع ..رجعني للقصر وغيعطيوك اللي طلبتي .. ماقدرش يرجعني وقالي مابغيتش المشاكل لراسي ومغيتفكوش معايا غير هاكاك ..اللي عليا غنبيعك لراجل اللي ختاريتيه نتي .. وهادا وعد مني . وهادشي اللي وقع امولاي وانا كنت ختاريتك وحسيت بيك ماعندكش الثمن ديالي ..وماشفتش فعينيك الطمع والغدر بحال اللي شفتو فلخرين ..هادا علاش ختاريتك ولسقت عليك ..ماحسابنيش امير وعندك هاد الخير كله ..وكن حسابني مابغيتيش تشريني والقضية ماشي فالمال ماكنتش غنبزز عليك راسي.. ..كن غير تشقات الارض وبلعاتني ديك الساعة حسن من هاد الذل

بقا ساكت كيسمع ليها حتى كملات كلامها وقال.

الذل؟ ..فين هوا الذل؟

ميلات راسها للجنب وقالت فإحراج :كان كيحسابني على قد الحال والمال هوا اللي منعك تشريني..

رد وقال: المال اللي منعني نشريك فعلا ..مكان عندي حتى فلس ديك الساعة

بقات ساكتة وهوا كيشوفها مطولا حتى تنهدات كتحرك راسها وقال كيسول بعينيه

شنو شفتي نتي؟

ردت وقالت: ماشي المال .. انا حيدت عليك عائق المال ..وشريت راسي وماحرجتكش قدام الرجال..واخا هاكاك مابغيتنيش وحررتيني ومشيتي وانا اللي تبعتك وانا اللي لسقت فيك

هز يديه وقال : دابا شنو ؟ من هادشي كامل شنو بغيتي؟ شنو اللي معجبكش؟

شنو كيدور ليك فراسك ؟

شافت فيه وعزة النفس كتعصر ليها وجهها وقالت :علاش ماقلتيش ليا باللي نتا امير وعندك قصر وعندك حريم وعندك كاع هادشي..من الاول..علاش خليتني تابعاك وكنرغب فيك وانا كيحسابني مقهور وماعندكش باش تهزني؟

عقد حجبانو شاف فيها وقال: وشنو الفرق الى كنت ماعنديش وماباغيش؟ شنو اللي ضرك نتي؟

تزيرات وقلبات وجهها وعنقها تشنج كتصارع نفسها وتقجات حتى تزيرو عينيها وبقات يابسة وهوا كيشوف فيها وكيتسنا جواب لاكن مارداتش خلاتو هاكاك فالاخير ناض وقف وقاليها

وجدي راسك غترجعي لقصر الملك محمد اصيل هاد العشية ..

ناضت وقفات تقول مافيها حتى وجع .. لاكن فالحقيقة وجع الكرامة كان اكبر من وجه الجرح وقالت مدورة وجهها

انا واجدة من دابا

كان غيمشي ورجع تلفت بقا غير كيشوف فيها وقرب بغا يمد يدو على راسها لاكن بعدات ونترات وجهها بغيض الشيء اللي خلاه مصدوم من قصوحية وجهها وجرها من يدها بعنف حط يدو على راسها كيتأكد من قصتها وهي فسبات كأنها ناعسة فور ما حط يدو عليها .. عاش الصراع والخوف وألم الجرح النفسي والجسدي والكبرياء وعزة النفس وصراع المشاعر وعذاب ما قاصات كامل فرمشة عين بحال شي كابوس تنفض منو وحيد يدو بقا كيشوف فيها وهي كترجع للوعي ديالها حتى استوعبات لاكن ماعرفاتش شنو وقع وكأنه ماوقع والو ورجعات اللور كتشوف فيه بنص عين قالبة وجهها ..تنهد ودور وجهه قاليها . غيكون الملك محمد اصيل كيقلب عليك ..وخاصك ترجعي فأقرب وقت

فالحين كتب الامير رسالة للملك محمد اصيل وخبرو باللي جاريته سبأ عنده وجمعاتهم الصدفة وكيتسنا منو الرد باش يرجعها ليه للقصر .. قرا الملك محمد اصيل الرسالة وهوا في حالة استغراب ماعرفش شنو يدير واش يصدق كلام الامير ولالا .. عيا يتخيل ويتهأ ليه ويحط قدامو احتمالات لاكن احساسه كان كيضرب ليه كلشي عرض الحائط وكيلقا راسو مرتاح فأنه يصدق رسالة الامير..واخا عيا يكدبها وكيحاول يزرع فنفسه الشك والخوف من غدر الملكة روح الندى والامير لاكن انجرف نحو مشاعره هاد المرة وكتب رسالة رد اللي وصلات صباح اليوم التالي للامير وكان فيها جوابه وطلب منو يرسلها مباشرة لقصر ليشبونة ويخلي الامر سري بيناتهم .. مافهمش الامير سبب هاد السرية هادي لاكن حاول يجمع الاسباب من داكشي الاي حكات ليه سبأ وتأكد انها فعلا مميزة عند الملك وفاقت كل التوقعات ..

حرق الرسالة فالمدخنة وعيط لخادمه المخلص وحارسه الشخصي واللي كان اسمه حيدر ..كان رقيق الوجه وطويل القامة وبلا لحية لاكن من عينيه كيبان عليه الذكاء والفطنة ..وقف قدام الامير وجنبه عابد وقال

أمرني امولاي

وقف الامير ويدو ورا ضهره كيشوف فيه وقال

ليوم بالليل مع العشا غتوصل واحدالامانة لقصر الملك محمد اصيل فليشبونة .. وهاد الامانة فغاية السرية ومابغيت حتى واحد يسمع شي خبار عليها ولا توقع ليها شي حاجة . .. عابد غيعطيك الامانة فالليل .. وشدد الحراسة عليها فالطريق وعنداك توقع ليها شي حاجة ..يالاه سير طريق السلامة

حدرو الراس بجوج وخرجو خلاو ضلام الحال وخرجوهافسلهام بني من طريق اخرى ورا القصر واخا طويلة على اصوار القصر لاكن امنة وبعيدة على عينين البشر … طلع فهاد الاجواء المضلمة المضوية بشعلات النار الامير يور لأحد اسطح القصر الكبير اللي كيطل على ضهر الحدائق الكبيرة من الخلف وحط يديه فوق الصور كيتأمل ويراقب خرجها من القصر فوق خيل اسود حتى اختفت عن الانذار ورفع راسه للسماء كيتأمل في روعة الخالق السماء السوداء المزينة بالنجوم اللامعة .. شيئا فشيئا بدا لونها كيتبدل ويتفتح حتى اصبح ازرق فاتح والشمس الوسط ساطعة واليطور البيضاء كتحلق فوق اصوار القصر العضيمة .. نزلات فهاد الاثناء الملكة روح الندى تتفقد حالة المريضة من بعد ما قالو ليها صحات وناضت لاكن مالقاتهاش ورجعات فالحين لجناح الامير دقات عليه ودخلات لقاتو كيصلي.. ربعات يديها تسناتو حتى سلم وناض هز سجادته وقالت

الجارية اللي جبتي قالو ليا مشات ؟ كيفاش مشات ؟ شنو كيوقع مور ضهري ؟

رد بهدوء وقال : قلت ليك فاش تبرا غنخرجها

ردت روح الندى وقالت : فين خرجتيها ؟؟

رد بهدوء : خرجتها فحال سبيلها ..ياك هادشي اللي بغيتي ؟

تنهدات بغضب وحنار وجهها وقالت : كيفاش خرجتيها ؟؟ ماشي حتى نعرفو قصتها بعدا ونعرفو اصلها وفصلها ؟؟؟ حتى نخرجو منها الهضرة ونتأكدو ونعرفو العدو من الصديق عاد تخرجها ..خرجتيها هاكاك بلا منعرفو عليها حتى حاجة ؟؟ وبلا شواري؟؟ تكون دابا نشرات سمها بيناتنا هنا فالقصر .. تكون دارت لخيوط ديالها والعلاقات عاد خرجات ..باش فاش تخرج ..شفتي شنو درتي دابا؟؟ دخلتينا فمتاهة ما عندها حتى اخر

بقا واقف كيتسناها حتى سالات الهضرة ونفخ بملل وقال

حتى حاجة من هادشي ما كاينة ..الى كنتي خايفة منها تنشر السم هنا ..غير نعسي على جنب الراحة

ردت في حيرة وغضب: وشكون ضمن ليك هادشي ؟؟ شكووون.. غير مرة وحدة اولدي ..مرة وحدة عطيني يدك .. عطيني يدك وعطيني عقلك وسمع ليا .. علاش غادي عكسي..علاش مابغيتيش توقف معايا وتهز معايا الحمل

تعصب ورد بغضب قاليها اشنو بغيتي مني؟؟ شنو بغيتي بالضبط ؟؟ بغيتي نهز معاك الحمل راني هازو اكثر من هاد التقل اللي هاز معاك بزز مني ..انا ماباغيش هاد القصور ..ماباغيش كاع شي امارة ولا شي قيادة ..ربي كيطيح فطريقي غير الناس اللي بحالي واغيين يعيشو بحال الناس ..انا باغي نعيش بخال الناس فميها .. ماجاني من هاد السلطة غير النحس

نفض السجادة بغضب فالارض وخرج خلاها واقفة مصدومة فبلاصتها ..تقول ماشي ولدها المأدب الخلوق اللي هضر معاها ..تقول شي مسخوط الوالدين اللي هضر بلاصتو ولا شي جن راكبو .. اما هوا خرج مشا فاتجاه الباب حتى دخل فشادية اللي كانت جاية جهة جناح الملكة وتلفت بقا كيشوف فيها وتشوف وقلب وجهه كمل طريقه قبل ماتكلمه شادية اللي زادت هلفة وراه كانت بغات تكلمه .

رجعات شادية اللور وعينيها مغرغرين .. حتى فرصة فين تهضر ما تعطاتها ..وكملات ليها الملكة اللي جات دازت حداها بحال الريح مغلغلة ولقات عبدية جايا كتجري فيدها مرسول عطاتو ليها وقالت

لاللة روخ الندى … هاد المرسول لقيناه فالجردة الخاصة ديالك الاللة

شداتو روخ الندى بغضب طلقاتو قدامها ولقاهات فيه جملة قدها قداش مكتوب عليها " الامير يور بن محمد اصيل المرتضي بالله "

كمشات الرسالة ديك الساعة وخواو بيها رجليها حتى كانت غطيح على طولها وعينيها كيمشيو ويجسو بلاصتهم والقلب كان غيسكت ..

وقفاتها عبدية وشادية وهي تالفة ومزيرة غلى الورقة وقالت بصوت متقطع

ديوني لجناحي..ديوني

وصلوها لجناحها وجرات على كولشي بقات بوحدها وعاودات طلقات الورقة كتقرى وشداتها قطعاتها طراف طراف وبدات كتغوت وعضات نص الوقة الباقي بسنانها قطعاتو وناضت مخلوعة ووجها صفر كتمشي وتجي وعيطات لعبيدية جات كتجري عندها ..يالاه دخلات طارت عليها روح الندى قجاتها من عنقها وقالت

نتي ..نتي لكتبي الرسالة ..نتي اللي باغا تلعبي معايا ..انا غنوريك اللعب

خرجو عينين عبدية حتى كانت غتموتوكترد. اشمن رسالة اشمن مرسول ..متطلقاتها روح الندى حتى رجعات زرقة وقالت نتي اللي سيفطتي ليا الرسالة ..هضري ياك نتي

جلسات عبدية نقنتة كتهق قاليت ليها اشمن رسالة الاللة روح الندى واش انا بعدا كنعرف نكتب ولا نقرى !!

ضربات روح الندى جبهتها وضارت كتمشي وتجي بغات تسطى وعقلها مشوش وتلفتات عند عبدية قالت ليها كتنهج

الرسالة .. المرسول دالويل. اللي جبتي ليا فين لقيتيه؟ هضري

ردت عبدية وقالت : فالجردة ديالك الاللة فين كنجلسي

ضربات روح الندى فخادها قالت ليها اوييلي على فين كنجلس..اوييلي مشيت فيها ..اوييلي كن لقاه ..هادي اللخرة ليا ..صافي اعبدية خصرت كلشي..خصرت وضعت

جلسات فالارض كتبكي وناضت عبدية كتواسيها وتسول علاش كدير هادشي وقالت ليها روح الندى والدموع غزيرة من عينيها

سيفطو ليا مرسول كتبر ليا فيه سمية ولدي وسمية باه .. كتبو ليا فيه السر ديالي اعبدية .. شكون اللي عارف؟ شكون ؟ من غيري انا ونتي ولاللة ياقوت ..ولاللة ياقوت مستحيل تخدعني وهي ضحات بسعادتها طول هاد السنين وماقالتش ليه فين انا ..مقالتش ليه فين مشيت واخا عارفة فين كنت وخلاتو كيقلب عليا ..شكون من غيرنا حنا بثلاتة اللي عارف؟ شكووون اعبدية

بدات كتبكي وضرب فخادها وتاج مدلي للجنب والعنين هابطين بالكحولية والتكشيطة تكمشات من القدام وناضت وقفات مسحات خنونتها للجنب وهزات صبعاها قاطعة الخص ومخرجة عينيها

عرفت شكون .. صافي صافي عرفت شكون.. ضكون من غيرها ديك الجنية اللي جاب يور من السواقات ..كن عارفاها تابعة لشي واحد..كنت عارفاها ماشي بنت باب الله .. هي اللي خلات الرسالة وخرجات ..كيفاش عرفات ومنين ؟ خاصني نجيبها ..غنجيبها اعبدية واخا تكون فسابع سموات وسابع ارض خاصني نجيبها لهنا تحت رجليا

خرج لعقل لروح الندى..مابقات كدوز ليها ماكلة ولا شراب ولا نعاس ولا راحة .. غادية جايا وكتخيط وتفشه وتبني وتردم حتى رجع الامير من الصيد ودخل دوش ونعس يرتاح عاد خرجات من بيتها مشات كتشول واش وصل ..دفعات باب جناحو بشوية طلات عليه لقاتو ناعس وعندو وحدة من العمبر متكية حداه ، عرفاتو روح الندى كان فعلاقة معاها وشارت ليها براسها ناضت الجارية فالحين تغطات وخرجات بلاحس ودخلات روح الندى قربات من الامير جلسات قدامو كتشوف فيه وساهية وهوا ناعس ساد عينيه وصدرو على راسها فراشو.. دارت يدها على خدها وجلسات تخمم وتفكر فين غيكون داها ؟ ويكون بصح داها لشي بلاصة ومابقاش عرف طريقها ولا يكون داها لشي بلاصة خاصة باش يبقا يزورها مرة مرة .. وشكون هاد الحية هادي اللي دخلات عليهم على غفلة ..يكون الاصيل مسيفطها ؟ لالالا شكنخربق واش الاصيل غيكون عارف ولدو وساكت .. كن كان عارف كن راه نوض عليها اللي ماينوض.. لا متأ ..ماشي الاصيل وهادا احتمال مستبعد..هادا شي واحد اخر الل عارف بالسر وخاصني نعرفو ..واللي غيوريني شكون هي ديك الحية اللي جات للقصر فالسر وخرجات فالسر ..

بقات كتفكر وتخمم وتشوف فالامير حتى تنفض بعصبية عطاها بالضهر ورفع عليه الغطا حتى تخلعات وناضت كتباع ريقها وتشوف فجنابها ماعرفاتش باش تبلات ..ماعرفاتو ناعس ولا فايق ولا شنو بيه وهوا كان كيبان عليه ناعس شوية تهز تقلب بحاا الى عارفها قدامو ..خرجات تسلات بشوية وسدات الباب ومشات كتهضر بوحدها فالقصر وتحرك يديها وتشاور غير مع مخها واللي داز كيشوف فيها مصدوم حتى دخلات لجناحها وردات الباب عليها ..

فهاد الاثناء نزلات شادية لجهة العمبر وكانت مقصدة تشوف ختها وقفات كتسناها حتى ضهرات جايا كتلعب بشعرها وضحك مع وحدة من البنات .. شافتها عويشة و جمعات الضحكة وعقداتهم ووقفات قدامها قالت ليها علاش جيتي لهنا مننوع عليك تجي للعمبر واش بغيتي تغرقيني ؟ بغيتي ديري ليا المشاكل .. شحال من مرة كنقول ليك ماتجيش عندي لهنا

دارت شادية يدها على جنبها وقالت : يااك ؟؟ صافي نسيتيني ؟ شفتك مابقيتي لا كتسولي فيا لا كتحاشيه ليا ؟؟ تقولي ماعندكش كااع ختك فهاد القصر ؟؟ تقولي كاينة غير نتي

جراتها عويشة من يدها وقالت

سكتي واش بغيتي ديري لينا الصدع ؟!! شنو بغيتي شنو كيفاش بغيتي نسول فيك وحنا كنخرجو بالوصيفات وندخلو بيهم

وهما كيتنقارو وصلات الجارية اللي كانت فجناح الامير كضحك وشارت لعويشة بيدها وبان على هاد الاخير الغيض وحمار وجهها وبلا متحس شافت فشادية وقالت

اللي فيا كافيني.. براكة عليا غير هاد بنات الحرام اللي معايا كل مرة كتمشي وحدة وانا عمرني مشيت لجناح الامير

تصدمات شايدة وقالت :اشنووو ؟؟ تمشي لحناح الامير ؟؟ واش خليتك هنا وضحيت عليك باش تاكلي وتشربي ولا طمعي فالامير ؟!!

دورات عويشة عينيها وقالت : صافص صافي سيري دابا سيري راه الى شافونا كنهضرو هنا غيجمعوها بجوج ..سيري حتى لمن بعد دابا راه غادي نطلعو لفوق عندنا شي شغل

هزات شادية حاجبها وقالت :اشمن شغل

شافت الخادمات جايين بالصف عاوتاني ودفعاتها بالزربة ورجعات للعمبر كتجري وقفات فالصف بين البنات وتنضمات فالوقفة وبصيرة كتشوف فيهم وتشير بيدها كتعزل وعويشة كتسنى الصبع يجي فيها حتى لاهير لحضة وتعزلات لاول مرة وكانت غطير بالفرحة . مشاو مور بصيرة لداخل فالعمبر وقفاتهم فجناح الحوايج وفرقو عليهم ملاحف خفيفة هشيشة حمرا وبداو كيعاونوهم يلبسو وكيسرحو ليهم الشعر وهما فقمة السعادة ..جلست عويشة ووجهها احمر بقوة الفرحة بغات تنوض تجري وبدات كطيح كل مرة شي حاجة بلا متقصد ويديها كيرجفو حتى حمرات فيها بصيرة تبت عاد تكمشات وتبتات ولبسات الوشاح لواوه ليها على نصها وصدرها بحال لباس الرومانيات وعطاوهم صنادل خشبية وخرجوهم فصف واحد طالقين الشعر قدام شادية اللي متبعة ليهم العين من بعيد وكتشوط فمكانها ..خرجوهم من بين الجدران لغابة النخل والشجر والورد اللي وسط القصر وهبطوهم لواد الذهب..كان الواد كبير دايز مياهه صافية بلارة والحجر كيبان لتحت بحال الزاج ومنضر كيفتن وكان ممنوع على شي واحد يعوم فيه..كان خاص بالامير وهادا علاش سماوه وادي الذهب .

وصلو كيجريو وينقزو ويلعبو بجنابو لقاو الفراش مفرش واشهى الاطباق مشتتة وبداو كيقلبو بعينيهم حتى بان ليهم الامير هز راسو من وسط النهر ونزلو عندو البنات اللي كيعرفو يعومو وبقات غير عويشة جالسة وكدور بجنابها وباغا طرطق وكتشوف البنات حيدو كاع الملاحف بقا بالصدور معرية وسط الماء كيضحكو ويلعبو وكل وحدة كتحاول تلفت انتباه الامير جهتها .. عيات عويشة تصبر والفرصة بين يديها وهادي اول مرة يجمعوها مع البنات اللي كيرافقو الامير ومابغاتشضيع الفرصة وقالت لي ليها ليها ونقزات فالماء بغات تمشي عندو لاكن لقات غير الماء كيجري تحت رجليها وبقات كتغوت وتبقبق حتى هبطات ومابقاتش عقلات على راسها فين هي .. لاكن عندها الزهر عتقاتها وحدة من البنات جراتها من لتحت وعيطات على لعوين وتلفت الامير شفها ومشا جر عويشة هزها فوق الماء وجرها فوق الفراش وبدا كينفخ ليها فمها حتى حلات عينيها لقات شعرو كيقطر عليها وصدرو بحال السقف مغطي السما والشعر كحل مشتت عليه فازك ولحيتو فازكة ..تبسمات كأنه حلم وتحقق وحلات فمها هايمة لاكن بالزربة صدموها البنات اللي مدلين الصدر عليها وكيشوفو فيها بلا غطا حتى تخلعات وفاقت جلسات كتحب وكتشوف فيهم وتشوف فالامير ..لستغلت الفرصة ورجعات سخفات على يديه وهوا كيضرب عاى وجهها باش تفيق .. بدات كتنفس وتأهأ وحلات عينيها شدات فعنقو وقالت

مولاي.. كنموت

شافت فيها الجارية اللي عتقاتها وشارت براسها للبنات وقالت بابتسامة

مولاي ..حنا غنتكلفو بيها غير رتاح ..نتا ليوم بغيتي تروق وترتاح وحنا هنا على هادشي

جروها وهي كتشوف فيهم قالو ليها غير رتاحي حتى نتي هاحنا غنردوك للقصر

دورات عينيها شافتو ناض من حداها بعد ونترات يدها خرجات فيهم عينيها وقالت

بعدي مني كون قالت انا محتاجة ليك تفوو

دفعاتهم ورجعات جلسات بلاصتها وهما كيضحكو عليها وخلاها جالسة ونقزو فالماء مع الامير حتى عيا وطلع تكا يرتاح.. تقلبات جيهته عيشة وحطات يدها على صدرو وقالت ندلك لمولاي عضامو

حيد ليها يدها بشوية وشاف فيها وقال

رجعي للقصر اعيشة

رجعات ليه مرة اخرى وقالت كتنهد

علاش كتصدني امولاي شنو اللي فيا كيخليك تهرب مني

قلب وجهو كيسوط وقال

عقلت ليك رجعي للقصر

جراتها نفس البنت الشقرا اللي عتقاتها بعداتها وحلات حجبانها وكانت بنت زوينة وعيونها زرقاء وجسمها مشدود وصدرها عاري وقالت

قالك سيري سيري.. بلا متخالفي القوانين وبلا ماتخليه يتعصب..نتي هنا باش ترضيه ماشي ترضي راسك يالاه رجعي ولا غنقولها لبصيرة

خرجات لعشية مكفسة عند عويشة ورجعات كتزطم فحوايجها وتبكي.. اما لاللة روح الندى رجعات لجناح الامير وماقدراتش تصبر وتسناتو حتى دخل لقاها جالسة وقلب وجهه ..لاكن هي مابقا كايبان ليها حتى واحد من غير الجارية اللي جاب معاه .. ويغضب حتى يعيا ويتعصب حتى يعيا ..المهم تعرف مكان الجارية ويوقع الي بغا يوقع مايكونش كفس من اللي غيرق الى مشا حتى عرف الحقيقة ولا رسلو ليه رسالة كما رسلوها ليها ..

وقفات قدامو عيني عينك وهزات راسها قالت ليه فين سيفطتي الجارية اللي جبتي معاك ؟

تلفت شاف فيها وعقد حجبانو كيتساؤل والمنشفة مدورة على خصرو ووحدة اخرى فيدو وقال

علاش كتسولي عليها؟ شنو بغيتي بالضبط فهميني

جمعات النفسوالقوة وقالت

غتقول ليا فين سيفطتيها .. وفين مشات

عطاها بالضهر غادي حتى تقولي ليا علاشبغيتي تعرفي

مشات وقاات قدامو وقفاتو وقالت

انا مك ..وكنخاف عليك .. وبغيت نعرففثن مشات باش نعرف شنو تحت راسها

مشح يديه وقال مافراسها والو .. راسها خاوي كيصفر وانا قريت اشنو اراسها ..تهنيتي دابا

ربعات يديها وقالت ماكيهمنيش اشنو قريتي انا خاصني هاد البنت ..ومكانش خاصك تخرجها حتى تستاشر معايا انا اللي كنحكم وخاصك طيعني

كمش الفوطة ورجع وجهه احمر وخرج عينيه قاليها صافي عييت..صافي بزاف عليا هادشي.. ديما كديري اللي فراسك بلا متشرحي بلا ماتعطيني تبرريرات بلا والو .. نتي اللي كتحكمي؟. واخا حكمي ..هانتي حكمي كيف حبات خاطرك .. من اليوم غادي تحكمي وانا غنطيع صافي ..خليني نلبس عليا دابا

خرجات وخلاتو كيلبس ومشات لجناحها هازة راسها ومقصحة قلبها وسدات عليها حتى صبح الحال وتنادم معاها الحال وندمات على الكلام اللي قالت وخرجات من جناحها سبقات منو هوا الاول ..مشات لجناحو تصبح عليه لاكن مالقاتوش . وفراشو بقا كما هوا مرتب منعسش فيه .. مافهماتش شنو وقع وبقات كدور فالبيت لقاتو كما هوا .. الذهب فبلاصتو والمال فبلاصتو وكل حاجة فبلاصتها ..حتى الحوايج بلاصتهم من غير اللبسة دالصيد اللي مكايناش..ضنان انه خرج يصيد لاكن استغربات للفراش اللي بقا كما هوا ..خرجات عند الحراس اللي فباب جناحو سولات عليه خبروها باللي خرج بالليل ومارجعش .. تزاد معاها الزايد بدا الشك كيدخلها وبدا الخوف كيركبها وقلبها كيجري ويتسارع ورجعات دخلت لجناحو كتقلب حتى حسات براسها زطمات على شي حاجة وهبطات راسها شافت فالارض لقات رسالة ..هزاتها قدامها كتقرا لقاتو كاتب ليها

نتي الري ونتي الشوار . نتي ختاريتي شنو بغيتي تكوني ..وانا ختاريت شنو بغيت نكون .. من اليوم كل واحد فينا فطريق

يتبع...

‎