ذو التيجان الجزء الثامن

انتهى كلشي ..كأنه عمرو كان..

ودخل فصل الشتاء من بعد ماداز الصيف الحارق بدمو وقتيلتو .. وهزات روح الندى يديها فالسما كتبكي فصلاتها باش ربي يغفر ليها دنوبهت اللي دارت ..يسمح ليها على اخطائها ومايعاقبهاش اكثر من هاكا ..

ناضت ومشات جلسات على طاولة شدات قلم كتبات رسالة

مولاي السلطان اطال الله عمرك .. كنتمنى تكون وليتي بصحة جيدة ونقزتي الازمة .. انا شخصيا مزالة غارقة فأزمتي ومأزمة لاخر حد ..كنطلب منك يا مولاي ترسل لي نجي ونخرج من هاد الكآبة اللي حاصلة فيها بوحدي .. حفيدي قرب يتولد ومابغيتش يتولد فهاد القصر واخا هاد النفي كان سبب مجرد سبب فحمايتنا من ديك الحرب القاتلة . انا كنتسنا الرد يا مولاي

لوات الرسالة وخرجات دايرة عليها فرو غليض استنشقات برودة الجود والارض فازكة ..جا عندها احمد يافع حدر ليها راسها قاليها امري يا لاللة

عطاتو الرسالة قالت ليه وصلها للسلطان محمد اصيل

خداها ورجعات دخلات مشات جلسات على واحد الكرسي تحت سقف خشبي ساهية ..جات عبدية جلسات معاها ساكتة وتنهدات روح الندى قالت ليها كولشي سالا .. كولشي مشا ..حتى حاجة مابقات اعبدية .. كاع الكلام اللي قالتو شادية تحقق بالحرف.

تنهدات عبدية قالت ليها الحمد لله على كل حال

قالت ليها روح الندى شكون فنضرك السبب؟ شكون السبب فهاد الحرب

قالت ليها عبدية انا بعدا كنشوف السبب فهاد الحرب هوا الحقيقة اللي تكشفات.. هي اللي ستاغلات شنو وقع

حطات روح الندى راسها كتنهد وعينيها شاردين ..شافت فمتعة كتمشى وكرشها لفمها وقالت

مابقا والو لحفيدي يجي لهاد الدنيا .. على الله يكمد جروحنا ويدخل الفرحة على قلبنا.

سدات عينيها كترتاح وفتح السلطان اصيل الرسالة وهوا جالس فشرفة جناحو قراها وجمعها شرد بعينيه بعيد وتنهد ..شار بيدو لواحد من. العبيد كلم ليه حكيم اللي حضر فالحين حدر ليه راسو وقاليه

نعام امولاي امرني

قاليه الاصيل شد الطريق اليوم لمنفى الاميرة روح الندى..جيبها من تما وحرص على سلامتها وسلامة حفيدي.

هبط حكيم راسو خرج ينفد وكان فهاد الاثناء سلطان مع لاللة شهرزاد فبيتها جالسة كتفكر وناضت قالت ليه

اصلا حتى واحد ماعارفك نتا مول الفعلة.. الحرب هادي وحتى واحد ماقدر ينجى منها ويور اصلا كان مستهدف ..نتا المهم حافظ على الهدوء ديالك والتركيز ديالك وخليك متبت عنداك تتهور ولا دير شي خطوة بلا خباري

وقف مسح على وجهه قاليها متأكد حتى واحد مشافني..انا متأكد

فهاد الاثناء كان السلطان الاصيل كيشوف فالطبلة اللي قدامو فالشرفة وقدامو ريوس الاسهم اللي ختارقات جسد يور شادهم بيديه مزير عليهم وشارد قدامو بعين حمرة .. حل واحد المنديل كان مطوي حداه حتى هوا فيه ريسو اسهم اخرى وهز واحد الراس كيشوف فيه ويشوف فالاسهم اللي ضربات يور وزير على سنانو كيتوعد ويتحلف بينو بين نفسه وهز راسو رجع كل راس مكانه وناض من بلاصتو دار يدو ورا ضهره وقف على حافة الشرفة وسرح عينيه بعيد

وصلات القوة للمنفى وجمعات روح الندى امتعتها هي ووصيفاتها..ركبات فالعربة ساهية وقدامها عبدية ومتعة ..شوية بدات متعة تشد فكرشها ولفتات انتباه روح الندى الشارد وشدو فيها تخلعو ..شافو الماء نازل مع رجليها وحبسو العربة من السير ونعسوها على ضهرها

عبدية: ماتخافي مادهشي ..كولشي غيدوز مزيان

روح الندى:كن خليناها حتى تولد حسن ..شدانا لشي سفر والطريق طويلة

تبسمات عبدية قالت ليها غادي تولد كما ولدتي نتي وحنا مسافرين

جلسات قدامها عبدية وهي كتوجع وكل شوية تقلبها حتى بدات تزحم وتغوت ..شدات ليها روح الندى فيديها حدى راسها وعبدة كاتعاونها حتى ولدات وهزاتو قدام روح الندى اللي دمعو عينيها بالفرحة

عبدية: تبارك الله .. على وليدي حبيبي

لواتو فخرقة وعطاتو لروح الندى شداتو تركنات بيه كتشوف فيه وتبوس راسو وشعره الكحل وبدات كتبكي ..اما عبدية كملات شغلها مع متعة فكاتها وبقوة الجهد سخفات ليها وغطاتها وقادات ليها راسها خلاتها ترتاح وكملو الطريق

ضربو نص الطريق وطلات روح الندى من الخامية للجنود اللي على الخيل جنبها قالت ليهم شحال باقي لينا ونوصلو غرناطة؟

قاليها احمد يافع مابقا والو الاللة ..غنوقفو نرتاحو شوية وندوزو الليلة حتى للصباح نكملو الطريق

ردات الخامية عليها ورجعات اللور ..فاقت متعة وجلساتها عبدية عتقاتها بالماء ومدات ليها روح الندى الولد ليدها وقالت ليها

هادا هوا كولشي.. حطيه فعينيك عنداك تقرسو شي نموسة سمعتي

ضحكات متعة بالفرحة وشدات ولدها فيدها عنقاتو ووبدات توريها عبدية كيف دير ترضعو ودوزو الليلة ارتاحو حتى صبح الحال وكملو الطريق لغرناطة .

فهاد الصباح خرج السلطان اصيل ويدو وراه قابل حكيم وقاليه رافع راسو

ليوم غتوصل الاميرة روح الندى .. وجدو ليها جناح المرحومة لاللة ياقوت .

حدر حكيم راسو ومشا للغرفة ديالو الخاصة اللي كان فيها مكتب ورفوف عامرين بالكتب ووقف عي على طامو رئيسة الخدم حضرات عندو فالحال حدرات راسها وقال

جهزي جناح لاللة ياقوت لاللة روح الندى .. هما فطريقهم وقربو يوصلو

حلات طامو عينيها قالت ليه لاللة روح الندى؟!! ومن بعد هاد السنين كلها غادي نشوفها !! كيفاش ولات وشنو خبارها

بقات كتهضر بوحدها وهوا كيسمع وقاليها وياك تخدمي المصالح ديال شي واحد من غير السلطان .. نساي الماضي اطامو الى بغيتي تعيشي وماتنجارفيش مع العاطفة

حدرات راسها قالت ليه انا طول عمري وفية لمولاي.. وكن هاني من هاد النحية يا السي حكيم

خرجات من عندو وهي شاردة كتذكر ايامها وتذكر عبدية وحياتها اللولة قبل ما دخل للقصر وحتى من مور مادخلات ..مشات نيشان عند الخدم فرقات عليهم الخدمة وبداو فتجهيز جناح لاللة ياقوت من الاول ويبدلو الاغطية والفراش .. وصلات لخبار لاللة شهرزاد اللي كانت فجناحها كتلبس حوالقها وتلفتات بغضب قالت لوصيفتها شنو قلتي؟؟؟

حدرات الوصيفة راسها قالت ليها طامو كتوجد جناح لاللة ياقوت .. للاميرة روح الندى..قالك هي فطريقها وقريبة توصل

رجع وجه شهرزاد زرق والكشاكش بغات تخرج قالت ليها وعلاش جايا ؟؟ علاش كيوجد ليها الجناح لاتكون ناوية تجلس هنا مللي مالقات فين تجلس … لا وكيوجد ليها جناح مو كاع هادشي مغاديش نسكت عليه

خرجات سخونة مشات عندو لجناحو دخلات هبطات راسها وتلفت شاف فيها باستغراب

هزات راسها قالت ليه مولاي ..سمعت باللي كيوجدو جناح لاللة ياقوت الله يرحمها ؟؟ واش روح الندى جايا للقصر

قاليها اه جايا للقصر ..كاين شي مشكل؟

بلعات ريقها والغصة وقالت ليه ولاكن جناح لاللة ياقوت حناح مقدس امولاي.. كاينين البيوت على الجهد فالقصر تختار اللي بغات

هز راسو كيشوف فيها ويدو وراه بلا ميهضر حتى حشمان وهبطات راسها كترمش قدام ديك النضرات وقالت ليه انا ماقصدش امولاي .. نتا الامر والناهي ..وسمح ليا الى قلقت راحتك

رجعات اللور وهوا مزال. كيدير فيها دوك الشوفات حتى خرجات وسملل عينيه رجع عطا بضهره للباب

وصلات روح الندى بالعربة لقصر الحمرا .. استقبلها حكيم فالنزلة والعبيد والخدم واولهم طامو اللي هزات عينها فيها بقات مصمرة ..اما روح الندى ماعقلاتش عليها وتلفتات وراها شافت فمتعة اللي نازلة ومدات يديها للعربة لداخل شدات ولدها من يد عبدية ..ضماتو لصدرها ونزلات عبدية تقابلات مع طامو بقات وحدة كتشوف فوحدة ووحدة نطقات بسمية لاخرى وكيحققو فبعضياتهم .. حدرات طامو عينيها للارض وعبدية كتشوف فيها وقالت ليها

سنين اطامو ..دازت سنين

بقات طامو ساكتة وشار حكيم لروح الندى تقدمات والنقاب شفاف على وجها لابسة فور طويل من البرد دخلات للقصر وساهية رجعات تذكرات كل ذكراياتها .. مالقات حتى واحد فاستقبالها وعرفات الفرق بين انك تكوني ملكة وانك تخسري كلشي متيبقا عندك حتى قيمة.. لاكن فلحضة خرج الاصيل من ممر واسع ورفع راسو تبسم ووقف قدامها كيشوف فيها ..هزات عينيها شافت فيه وهبطات النقاب تبسمات والحزن مالي عينيها وقالت

شكرا

فتح يديه قاليها نتي فقصرك .. قصرك الاصلي اروح الندى ماشي ضيفة

غرغرو عينيها حتى بغات تبكي وشتتات النضر وضارت وراها خدات حفيدها من يد متعة بشوية شداتو وقالت ليه

حفيدنا .. تزاد فالطريق وحنا جايين

تفاجأ الاصيل وكان ت مفاجأة زوينة وقرب عندها مدات ليه الحفيد تحت انضار شهرزاد اللي كتراقب كلشي من بعيد بنار .

هبط الغطا عليه شوية شاف فوجو وباس جبهتو وبدا كيأذن ليه فودنو ورجع عطاه ليها عطاتو لمو شداتو وتقدمات طامو قالت ليهم اجي معايا مرحبا بيكم نوريكم مكانكم

مشات عبدية ومتعة هازة ولدها وبقات روح الندى واقفة قدام الاصيل ..قاليها سيري ترتاحي من تعب السفر

قالت ليه راحتي راك عارفها فين كاينة امولاي

تنهد وتقدم جنبها مشات معاه لجناحو من بعد ماحيدات الفرو عطاتو لوصيفاتها وبقات فقفطان كحل مخيط مخزاني بالصم . دخلات وراه لجناحو ووقفات قدامو قالت ليه بغيت نشوف ولدي.. انا كنتحرق عليه

شد كتافها قاليها ولدك فالحفظ والصون .. وغادي تشوفيه ولاكن كل حاجة فوقتها

فشلات قالت منقدرش نزيد نصبر

قاليها صبري لمصلاحة ولدنا

تنهدات قالت ليه غير ديني نشوفو ..نشوفو باش نقدر نعس

بقا ساكت كيشوف فيها مطولا وقاليها طلعي لجناحك رتاحي .. فاش نرسل ليك وجدي راسك تشوفيه

ردات بالايجاب وحدرات راسها ومشات وصلوها لوصيفات لجناحها الجديد ودخلات بخطوات تقيلة كتتأمل ارجاء المكان اللي حامل ذكريات كثيرة .. قالت هادا جناح لاللة ياقوت

ردات من وراها طامو قالت ليها لاللة ياقوت ماتت الله يرحمها ..ومولاي عطاك جناحها

تفاجآت روح الندى وسدات عينيها قالت ليها الله يرحمها وتلفتات شافت فيها بتمعن وطامو كترمش وتخبي تعابير وجهها حتى قالت ليها روح الندى مصغرة عينيها

طامو؟

بقات طامو ساكتة بلعات ريقها وقالت ليها على سلامتك الاللة روح الندى ..

تبسمات روح الندى ابتسامة ساخرة للاقدار والدنيا وحولت عينيها شافت الدنيا من واحد النافدة وقالت كتنهد .. الايام دازت اطامو ..والاحوال تبدلات .. عاد كنت كنجري فهاد القصر صغيرة ..وليوم رجعت ليه وراسي عامر من تجارب الدنيا .. سبحان الله

انساحبات طامو وخلات الوصيفات كيرتبو جناح روح الندى ويحطو اغراضها ولباسها وكل حاجة فمكانها ..

جات تحيد التاج الرقيق اللي على راسها تحطو وسمعات شهرزاد دخلات ورجعاتو على راسها بيطىء وتلفتات بشوية رافعة راسها ..تبسمات شهرزاد وتقدمات قالت ليها مرحبا بيك ..على سلامتك

بقات روح الندى كتشوف فيها من فوق نيفها وشارت بصبعها للكل خرج وتسد الباب وقالت لشهرزاد

رجعت للقصر ديالي الاول ..مكاين علاش ترحبي بيا فداري

حولتن شهرزاد عينيها فجنابها وتبسمات قالت ليها انا عارفاك مأزمة .. صعيب تفد كلشي ما كتملك

زادت قربات منها روح الندى وقالت ليها صعيب بزااف.. ماشي بحال الهضرة ..ولاكن فاش كتجرب كتعرف بحرها الاللة شهرزاد.. ودم ولدي مغيبقاش مزلع فوق الارض بلا مقابل .. غادي ناخد حق ولدي بيدي ..ونرجع كل ماكنملك من نهار بلغت ..فماتقلقيش من جيهتي

تبدل اللون فوجه شهرزاد وقالت ليها رتاحي من عناء السفر .. مزال ايام الله طويلة وغادي نهضرو ..كيبان ليا غنتفاهمو انا ونتي

مجاوبهاتش روح الندى بقات كتشوف فيها ومشات شهرزاد خرجات من جناحها وجمعات قبضة يدها وهزات خنافرها قالت

عارفة شنو واقع ..انا متأكدة وجايا تنتاقم ماجاتش غير هاكاك

رتاحت روح الندى من العيا وتحممات وكمدات عضامها وطمنات على حفيدها اللي دارو ليه كي الماء لقليل..

بالليل والكل ناعس جات عندها عبدية فيقاتها فداك الضلام والشمع شاعل همسات فودنها وناضت بسرعة لبسات عليها وخرجات معطية بسلهام كحل دافي وجامعة شعرها كعكة غليضة والفرقة الوسط والشعر مسرح كيبري كحل.. وجهها ابيض كيشعل تقول مزالة فاعشرينات ..تخبات وخرجات بلا ميحس بيها حتى واحد وخرجات من باب صغير فجهة اخرى لقات حكيم كيتسناها وتبعاتو فسرية تامة حتى للعربة اللي كتسناها وطلعات لقات الاصيل تما وجلسات قدامو حيدات اللثام والقب على راسها وقالت ليه

غنشوف ولدي

حرك ليها راسو بالايجاب وهي متشوقة والطويق كلها وهوا كيشوف فيها ويتأمل حتى وصلو ونزل مد يدو شد فيها نزلها بالقب ديالها واللثام لقات راسها وسط قصر صغير ودخلات معاه كتشوف فداك القصر وكيف داير ..كامل زليج وزخرفة وزينة كأنه تحفة فنية اور لوحة.. طلعها للطابق الاعلى وداها وقفها قدام جوج بيبان كبار على بابهم حراس واقفين وخدم فتحو الابواب ودخلات شادة فقلبها لداك الجناح الهاىء اللي كيتوسطو سرير كبير عليه خيام بيضاء مدلية .. عراو ليها الخدم الخيام وقربات كتبكي لقاتو ناعس على ضهرو وصدرو عريان وعليه توب من الحرير بيج والمخاد ضايرين بيه وقالي وجهه للجنب ناعس

قربات حداه دايرة يدها على فمها كتبكي وشدات ليه فيدو وشافت فالاصيل وحرك ليها راسو بالايجاب وقربات باست ليه راسو ..تحرك اثنائها وتلفت حل عينيه بتتاقل شاف فيها وكانت المفاجأة انها معارفاهش كيحل عينيه وقالت

ولدي!! فقتي الحبيب ديالي

هز يدو اللي شادة فيها باسها وقال بتعب

سمحي ليا ..سمحي ليا على كولشي ..عفاك سمحي ليا

عنقاتو قالت ليه مسامحة ليك اولدي..دنيا واخرة واخا دير فيا للي درتي انا مسامحة ليك

هز يور عينيه فالاصيل كأنه كيتأسف لاكن الاصيل بلا ميضهر تحنا ضرب على رجلو جوج ضربات كيقويه ومشا خرج لبرا خلاه مع مو ناعسة على كتفو ماسخاتش بيه..عطاها الوقت الكافي فالاخير شار براسو ونوا عاطي للباب بضهرو لحكيم يدخل ومشا حدر راسو ليها قاليها لاللة روح الندى ..جا وقت الرجعة

هزات راسها باستو من راسو وغطاتو وبدات كتقاد ليه المخاد وباست ليه يدو قالت ليه كابر ..كابر باش ترجع كي كنتي واحسن..مزال مسالينا .. حنا عاد بدينا

سد عينيه كيطمنها وناضت خلاتو خرجات عند الاصيل وقفات قدامو كتمحس خدودها وقالت ليه

ماعرفتش شنو كان غيوقع كن ماوقفتيش ..

قاطعها مربع يديه كيسملل فعنيه قاليها راه ولدي ..ولدي وهادشي قليل مزال واللي دار هاد الفعلة غادي يتجازا بنفسها شكون ما بغا يكون

قالت ليه باستغراب باش تضرب؟ واش سيف ولا شنو ؟ طول فالفراش

قاليها تضرب بجوج سهام

قالت ليه وهاد جوج سهام خلاوه ينعس هاد المدة كلها

قاليها السهام كانت عليهم مادة سامة .. والسم سرى فيه هادا علاش مزال مريض .. اما الجرح تلم وبرا ولاكن تأثير السم كان قوي وخاصو يبقا هنا مراقب ويتعالج حتى يصفا

سدات عينيها ودارت يدها على فمها ماقدراتش تصدق وفشلات ..قرب منها شد فيديها كيصبرها وعنقاتو سدات عينيها وحتى هوا دوز بيدو على ضهرها وعنقها ساد عينيه حتى رتاحت وهزات راسها شافت فيه وتلفت كيدور نيفو على خدها ومسح ليها دمعتها قاليها

ماتخافي من والو ..كلشي غيرجع كي كان

حطات راسها على كتفو ساكتة وبدات تبدل تعابير وجهها وكتوعد شهرزاد وتحلف فيها على مادارت فيها وما وصلاتها ليه من الم وحزن

رجعات للقصر قبل الفجر كأن شيئا لم يكن ومشات لجناح نعسات مرتاحة من بهد اشهر من العداب .

صباح فقصر الحمراء.. القصر الكبير اللي كيتمناه اي ملك .. جمع جميع الصفات وشبهوه بقصر علاء الدين وشهريار..شيهوه بقصر الاحلام والقصص والرويات الخيالية ..لاكن فالواقع كان احسن بكثير واروع مما حكاو عليه .. مساحة كبيرة وغرف كثيرة وحدائق كبيرة سلالم فكل مكان ومررات كثيرة واسطح واسعة ومليئ بالاسار ..كان اكبر من قصر قرطبة بثلاتة مرات متميز متميز بمنتجعات خضراء ونافورات لا تعد ولا تحصى .. مايكفيهمش يوم واحد لاكتشاف كل مافيه ..

صبحات روح الندى واقفة فجناحها كتقاد اخر قطعة على راسها ووجهها مبشور من بعد ما تطمنات على ولدها ورجعات فيها الروح ورجعات اسم على مسمى ..قفطان بلدي اخضر ملكي بالطرز من الموبرة وتحتو جوهرة شفافة والفتحات فالجناب حتى للخصر بخياطة مخزانية. غليضة..الممضمة مذهبة والتاج بلدي والشعر كحل محموع كعكة والفرقة الوسط بيضاء خط رقيق. العينين كوحل محبدين والوجه ناصع بالنقى والصفا والشفايف حمرا .. الخواتم فيديها والنبالة والجوهر فعنقها ..كانت كتبخرها عبدية بالعطور الزكية ودخلات عندها ام جويرية ..مولات الشعر احمر ولعيون زرقاء وكانت حتى زوينة وطويلة ورقيقة ..لاكن فاش شافت روح الندى نسات زينها واخا حتى هي متولة وخيط الريح على جبهتها والشعر مطلوق .. هزات روح من رجليها حتى لراسها وتبسمات كتقول بينها وبين راسها

هاي هاي هاي ..والله الى مشات عليك اشهرزاد.. ليوم تبدا الفراجة

تلفتات روح الندى عندها تبسمات ليها وقربات منها ام جويرية شوية وقالت ليها

انا شامة ..ام جويرية ..تقابلنا اول مرة هنا فالقصر الى عقلتي عليا

تبسمات روح الندى وقالت ليها اه عقلت عليك ..

شامة: سمحي لي لبارح ماقدرتش نستقبلك …ولاكن ليوم جيت نقول ليك مرحبا بيك نورتي القصر ..والبراكة فراسك تعيشي وتجيبي ان شاء الله فالصراحة كلنا تصدمنا فاش سمعنا الحقيقة ..ماكناش متوقعين يكون المرحوم ولدك ولد السلطان . وحزننا فاش سمعنا خبر موتو

تبسمات روح الندى قالت ليها مامشا معاك باس.. الله يخلي ايك بنتك جويرية

استأذنات شامة وقالت ليها بغيتي اي شي حاجة قوليها لي ..ومرحبا بيك مرة اخرى

قالت ليها روح الندى شكرا ومشات خرجات لبرا وخرجات عينيها بمكر قالت

جاب ليك الله اللي يحبس فيك النفس ويكويك ..كاع المرار اللي شربتينا نشاء الله تشربو ليك هادي ..وباينة فيها مجبدة وغتجبد معاك

هزات روح الندى راسها كتستاعد تخرج من الجناح وتقابل اهل القصر واستجمعات قوتها باش تواجه جميع انواع البشر اللي جمعهم قصر الحمراء.خرجات هزات راسها وضهرها مستقيم كتشوف من فوق نيفها والتاج تابت على راسها .. داز جنبها رئيس الخدم والحشم اللي مسير القصر كامل تحت اوامر الاميرات وكان طويل وجهه رقيق ولباسو متول ..وقف هبط عينيه وراسو بابتسامة ولباقة وقاليها اهلا وسهلا بيك لاللة روح الندى .. الحمد لله على سلامتك ..وعضم الله الاجر في سلطان يور

تبسمات غير بفمها قالت ليه مامشا معاك باس يا..

حنا ليها قاليها لمسير بوشعيب نعام الاللة ..المسيير ديال الخدم والعبيد من اول باب لآخر باب

هزات راسها كتر ضحكات عجبها الحال وقالت ليه لمسير بوشعيب.. مللي نتا هوا المدبر دالقصر بغيتك تنضم ليا حفلة مع الحريم ومع الناس اللي هنا ..بغيت نتعرف على كولشي فدقة وحدة بلا مانبقا كل مرة نقابل واحد بحال شي ضيفة فهاد القصر.

بقا ساكت كيرمش يالاه جا يهضر زادت وخلاتو كيشوف فيها وقال

زياانت الايام .. الحفلة والقصر داير حداد اش هاد الام هادي الله يستر .. ارا لنا نشوفو لاللة شهرزاد فاش تسمع بهاد الخبار

مشا كيجري ويمسح يديه وصلها ليها سخونة وهي كتفطر فجناحها سد ليها الشاهية وقف هبط بشوية عليه لقا التحية وقاليها

لاللة شهرزاد ..صحة فطور ان شاء الله .

سمللات عينيها قالا ليه شنو كاين شفتك جاي كتجري شاعلة فيك العافية

تبسم قاليها والو الاللة كل خير ان شاء الله غير لاللة روح الندى قالت لي نضم ليهت حفلة تعارف فهاد القصر

ناضت وقفات فالبلاصة حيدات اللقمة من فمها قالت ليه شنو قالت ليك؟ حفلة ؟ وشكون هي بالسلامة لا يحسابها راسها ام ولي العهد!!

تبسم بهدوء وقاليها وقالت لي مابغاتش تبقا كل مرة تعرف على واحد بوحدو بحال الى هي ضيفة فهاد القصر

خزرات فيه قالت ليه بحال الى ضيفة؟؟ وشنو كيحساب ليها ؟! بلاصت ما تركن تحزن على ولدها اللي مزال ماسالا من حساب القبر باغا حفلة!! شهاد العجب هادا ؟

تنهد قاليها وشنو المعمول الاللة شهرزاد؟

هزات خنافرها قالت ليه المعمول راه باين يالمسير .. حنا فحداد على ولد السلطان وقرطبة اللي مالقاتش الرجال يحكموها وطاحت ..ماشي فوقت الحفلة ..وزايدون انا اللي كنقرر هنا واش تنضم ولالا

قاليها المسير. هياش؟

قالت ليه هي لا..والى سمعت شي طقطوقة نتا اللول نتحاسب معاك

تبسم قاليها واش انا نقدر الاللة شهرزاد..نتي الري ونتي الشوار ..نهارك مبروك

خرجات روح الندى لواحد الساحة وسط القصر لداخل مامسقفاش ووقفات فاش شافت عبدية جايا عندها طالع ليها الدم وقالت ليها وجهها احمر

ماعرفت شنو ندير فهاد القصر.اللي حطيت عليها يدي كيحيدوها ليا .. مابقيت عارفة فين نمشي ولا فين نجي ..بحال القط كلشي كيجري عليا من جهة

هزات روح الندى نيفها قالت ليها صبري شوية حتى ديري بلاصتك ..معتبقايش هاكا تالفة ..فين طامو ؟

ميعات عبدية قاليت ليها راها عاجبها الحال تقول مكتعرفينش!! حتى الهضرة مكتهضر معايا

قالت ليها روح الندى بحدة فاش نهضر معاك هبطي عينيك اعبدية وجاوبيني باحترام ..

تصدمات عبدية بقات كتشوف فيها وغرغرو عينيها قالت ليها حتى نتي ضرتي فيا

دورات روح الندى عينيها يمين وشمال وطولات عنقها عند عبدية قاليت ليها بصوت منخفض وغيض

حنا ماشي فقرطبة بوحدنا سمعتي..حنا مع عرام ديال الريوس الكبار والى ماهضرتيش بالقاعدة معايا كيف كيديرو غضسريهم عليا جمعي خنونتك دابا راك كبرتي ووردي بالك راه ماشي غير حنا اللي كاينين جمعي راسك يالاه وتوكضي وحلي عينيك

رجعات وقفات هزات راسها وقالت ليها سيري جيبي ليا طامو لهنا

حدرات عبدية راسها وهزات نص عين فيها قالت ليها واخا لاللة ومشات دخلات لجهة الخدم كتقلب واللي داز حداها مكيعبرها وهي كدور عينيها حتى لقات طامو خارجة من جناح الحريم ورقفات هزات خنافرها حتى هي وقالت ليها تكلمي للااااااللللللة روح الندى ..يالاه سيري

عقدات طامو حجبانها قالت ليها شنو بغاتني؟ انا مخصني مشاكل

هزات عبدية حاجبها قالت ليها سيري عندها وغتعرفي ..ولا غتجي عندك لهنا وراكي عارفاها شكاتسوا ..ولا نسيتي

قلبات طامو وجهها ومشات غادية وكتفكر كلام حكيم ليها ووصيتو باش تخدم شي واحد لمصالحو الخاصة وكان كيعني بيها روح الندى حيت عارفها كانت قريبة ليها في مضى . جمعات قوتها وخرجات للساحة وعبدية حداها لقات روح الندى واقفة كتشوف فيها من لفوق وطلع وتهبط فيها وقالت

طاامو !! ماجيتي باركتي ليا ماجيتي عزيتني ؟؟

هبطات طامو راسها ساكتة وقالت ليها البركة فراسك الاللة

ميعات روح الندى شفايفها وقالت ليها سمعي اطامو ..عبدية كانت فالقصر هي الري هي الشوار ..

هزات عبدية راسها حتى وصل للسما وشافت فطامو بنص عين والاخيرة ماحملتتهاش حتى هي شافت فيها بنص عين

كملات روح ندى كلامها قالت ليها غتوريها شغل القصر اللي كديري نتي ومن ليوم غتعاونو بجوج وتقسمو المهام بجوج

هبطات طامو راسها قالت ليها انا الاللة روح الندى كندير غير خدمتي ..ماعنديش الحق ندخلها فالشغل اللي كندير

خرجات روح الندى عينيها وقربات ليها قالت ليها عادي دخليها هي غادي دخليها ..غدخل لجناح لحريم سمعتي

بعدات طامو وجهها كتفتف قالت ليها هضري مع المسير هوا يوضفها الاللة انا الى جات عليا نعطيها بلاصتي حسن ليا

بعدات روح الندى راسها قالت ليها المهم ماتنهطيش عليها حيت بحالها بحالك ..وحسن منك حيت الوصيفة ديال لاللك روح الندى

مشات طامو وجرات روح الندى عبدية قالت ليها حللي عينيك جيبي ليا خبيرات شنو كيوقع تما فركاني العيالات ..وعنداك تنساي علاش وصيتك

مشات عبدية تبعات طامو كتجري وبقات روح الندى واقفة وهزات عينيها فالسما كانت الشمسة ساطعة واخا الارض على برا فازكة بشتاء الليل.

اما الاصيل فاق على غير المعتاد وفتح يديه حط ليه العبد موحى اللي كيلبسو حوايجو سترة بنية وبدا الاصيل كيسدها والعبط كيربط ليه لحزام على خصرو ويزير ويشد ومد ليه الخنجر ديالو المنحوت خشا بينو وبين حزامو وتلفت بابتسامة هاز راسو مد يديه خوا ليه العبد العطر فكفو ومشح بيه يدو ودوزو على لحيتو وشعرو لكحل وتنهد قاليه صافي براكة منها

رجع موحدى اللور حادر راسو بجلابتو القصيرة وسروالو القنديريزي والبلغة صفرا والطربوش احمر وقاليه فطورك واجد امولاي

تبسم الاصيل قاليه مافيا اللي يفطر .. خرج بوجه بشوش غادي وحكيم اللي كان كيتسناه فالباب جنبو قاليه الاصيل شنو عندنا اليوم احكيم من غير قضية قشتالة

حدر حكيم راسو قاليه عندنا مشكل الاكتضاض فالمدينة امولاي..مللي فتحتو ابوابكم لشعب قرطبة كتر الغاشي..والسكن قليل وناضت الريكاطة امولاي.. والسوق مابقا قادر يهز ولادم نحلو هاد المشكل ونضمو الشعب امولاي

قال الاصيل بابتسامة ليوم غنحلوه بإذن الله احكيم .. شنو اخر من غير السوق والسكن؟

قاليهم حكيم هادا هوا المشكل الكبير امولاي ..والشتا والناس ضايعة وكولشي كيتشكا والمال اللي خرجنا ماقضى ليهم والو ..كارثة امولاي فالمدينة

وقف الاصيل قاليه كلف امين القياد دالمدينة يحصيو لينا الناس المهمشة ويعطيونا تقدير .. باش نعرفو شنو نديرو ونحلو هاد المشكل

حدر حكيم راسو قاليه هي اللولة امولاي.

تبسم الاصيل قاليه سير شوف شغلك احكيم

حدر حكيم راسو وكمل الاصيل طريقو وخرج للساحة لقا روح الندى داخلة ووقف ووقفات حتى هي تبسمات وحدرات ليه راسها وشافت فيه قالت ليه صباح الخير امولاي

تنهد كيتأمل فيها وقاليها صباح النور ..كي صبحتي

تبسمات قالت ليه هانتا شفتيني كي صبحت..الحمد لله

تبسم قاليها منورة

حدرات راسها قالت ليه صباحك مبروك امولاي

بغات تمشي لاكن وقفها قاليها فين غادية ؟

قالت ليه نطلع نفطر مزال مافطرت

ضار حتى هوا حداها قاليها نفطرو مجموعين

تبسمات ومشات جنبو لجناحها لقات الفطور محطوط وجلسات هي وياه يفطرو وشارت بصبعها للخدم يخرجو .. تلفت قاليها بابتسامة رتاحيتي من جهة ولدك

ضحكات حتى نضع بياض سنانها قالت ليه الحمد لله .. ماعرفتش كيفاش وقع ليه امولاي..واش كانت مقصودة ولا شنو؟ باينة مقصودة

حط يدو على يدها فوق الطبلة قاليها نساي اللي فات ..كلشي غيتصلح وغيرجع احسن من الاول

قالت بأسى كفار قشتالة حلفوها فينا ولقاو الفرصة المناسبة وخرجونا من اراضينا .. دمرو كلشي بنيناه

مسح بصبعو على يدها قاليها مغنموت حتى نرجع قرطبة نتي غير تهناي من هاد الناحية

شهقات قالت ليه يموت عدوك واللي مايبغيك امولاي

تبسم بقا كيشوف فيها وهي تزنكات دارت يدها على فمها وقالت بارتباك

ماكليتي والو ..هاك دوق هاد الحلوى شحال بنينة

هز الحلوى كياكل وهي كدور فعينيها وقالت ليه ان شاء الله فاش يصح ولدي يور غنرجعو لبلادنا لتارودانت

تلفت قاليها وهادي ماشي بلادكم ؟

قالت ليه ولابد نرجعو ..عدبناكم معانا بما فيه الكفاية امولاي..خصنا نرجعو ونخليو مالين القصر يرتاحو

قرب كيشوف فيها مطولا قاليها ولدك هوا ولدي.. ومكانو ومكانك حتى نتي هنا

معات عينيها قالت ليه انا ماعنديش من غير ولدي امولاي فهاد الدنيا ..هوا اللي بقا ليا

تنهد وقربها منو عنقها على صدرو وعضات على شنايفها كضحك فصمت قاليها لا ماشي بوحدك فهاد الدنيا ..هادي نساو كاع اللي فات ونبداو ضفحة جديدة

ميل راسو شاف فيها وضحك قاليها الا الى كنتي مزالة كتكرهيني

تنهدات وجلسات مقادة شافت فيه قالت ليه فالحقيقة ماقدرتش نسا داكشي اللي دوزتي عليا ..كل بلاصة فهاد القصر كتفكرني بشي نهار كحل..من قلبي كنحاول ننسى ولاكن عقلي كيتفكر شي حوايج خايبين ..

تبسم قاليها كيتفكر غير الحوايج الخايبين؟ ماكتفكرش الحوايج الزوينين؟

بقات ساكتة مهبطة راسها وقالت ليه فالحقيقة كنحس براسي متقلة عليكم فهاد القصر..ماعندها حتى معنى نبقا جالسة هنا..انا بغيت غير نطمن على ولدي.

قاليها الى ماكنتيش مرتاحة هنا نديك تجلسي فالقصر القديم حدا ولدك ..ولاكن ممنوع عليك دخلي عندو تشوفيه كل مرة

حلات عينيها كتشوف فجنابها قالت ليه فيا الحساسية دالبحر ..منقدرش نجلس تما كيضيق عليا صدري وكنتخنق

حط يذو على يدها قاليها ايوا ماعندك فين تمشي غتبقاي هنا ..هادي هي بلاصتك

قالت ليه لاللة شهرزاد غادي تقنط من جلوسي هنا وغتنوي فيا نية خايبة.. حاسة بيها خايفة من جيهيتي واخا كتعاملني مزيان ولاكن انا مرى بحالي بحالها وحاسة بيها ..هي دابا كتقول غادي ناخد ليها راجلها ..حيت حتى انا كن كنت بلاصتها مايدينيش النعاس وانا حدايا وحدة كانت من قبل مع راجلي ولدات معاه

بقا ساكت كيشوف فيها والابتسامة مرسومة على وجهه وقاليها نتي هنا بحالك بحال شهرزاد ..وكتر

هبطات راسها ساكتة قالت ليه هادا من خيرك امولاي..عمرني ننسا وقفتك معانا

قاليها نساي غير اللي فات خايب..هادا هوا المهم

هدزات واحد الحبة ديال التفاح قطعاتها على جوج عطاتو نصها وخدات النص لاخر وقالت ليه كنواعدك غادي نسى .

مسح يديه قاليها بالصحة والراحة ..انا غنخليك دابا

ناض وناضت معاه وقفات قالت ليه مولاي..الى جات على خاطرك ..ماكرهتش ندير شي وليمة ..صدقة لناس هاد القصر ومنها نتعرف على افرادها كلهم

فتح يديه قاليها خودي راحتك ..شوفي مع المسير هوا اللي يقدر يعاونك

حدرات راسها تبسمات قالت ليه شكرا امولاي

خرج وهزات راسها جمعات النفس وشارت بصبعها خارجة لوصيفتها قالت ليها سيري عيطي ليا عاى المسير بوشعيب

مشات الوصيفة كتقلب عليه حتى لقاتو واقف مع الصدر الاعضم كيعاود ليه وقالت ليه المسير..لاللة روح الندى طالباك فجناحها

شاف فحكيم وقاليه شنو ندير ؟ نقول ليها لا

هز حيكم راسو كيردد قاليه هاد الحية ماكدوزش ليا ..ماخلات مادوزات علينا وجات لقلب القصر باغا دير بلاصتها

مشا الصدر الاعضم والمسير تابعو وقف كيتسنا السلطان حتى خرج وحدر ليه الراس قاليه مولاي ..لاللة روح الندى باغا دير حفلة فالقصر ..

هوا كيهضر قاليه السلطان اييه عارف خليها دير اللي بغات ووفرو ليها كاع اللي تحتاجو..حتى هي اميرة وعندها حق بحال جميع الاميرات

تلفت الصدر الاعضم عند المسير بنص عين قاليه سير بعينو ومشا المسير كيجري ويولول ويردد

نهار غتغيب فيه الشمس ..الى ساقت لاللة شهرزاد الخبار

قلب الطريق جهة الخدم جمعهم وعطاهم امر يجهزو وليمة وحفل نسائي فقاعة الولائم وبدات التجهيزات من الصباح حتى للعشية حتى نزلات شامة كتمشى شافت كلشي كيجري ووقفات واحد من الخدم قالت ليه شنو كيوقع هنا

حدر راسو قاليها كنوجدو لوليمة الاللة شامة

استغربات وقالت ليه وباسم من هاد الوليمة

قالت ليها روح الندى من اللور باسمي يا لاللة شامة

حفل رجوعي لهاد القصر من بعد خمسة وعشرين عام ..كيستاحق وليمة فغرناطة كلها ماشي غير فالقصر

تلفتات شامة حاللة فمها والضحكة فعينيها لقاتها واقفة هي ووصيفاتها وراه وقالت ليها بصح ..انا معاك فهاد الوليمة الاللة روح الندى ..ولاكن ماشي بكري عليها ؟ مزال الحداد على المرحوم فالقصر

تبسمات روح الندى قالت ليها انا اللي كنقرر امتى يزول الحداد..وليوم قررت نزولو ،عندك شي مشكل؟

ردت شامة بالنفي قالت ليها لالا بلعكس..حتى حنا شحال هادي ما نشطنا..وهادي مناسبة زوينة كنبارك ليك رجوعك الاللة روح الندى ..ولاكن واش لاللة شهرزاد فخبارها هادشي ؟

زادت روح الندى قدامها كتتمختر مجاوباتهاش وخلات السؤال في فمها ومشات .عضات شامة على شنايفها قالت ..طحتي يا شهرزاد ففم السبع بلا بسملة

ضارت وراها بغات تمشي ولقات ام روح الياسمين جايا مستغربة كتشوف فالخدم كيتجاراو وكان شعرها كحل جامعاه اللور والتاج على راسها وعينيها كوحل جمال عربي والتاج على راسها اسمها اسمهان. .قالت لشامة شنو كيوقع هنا كلشي كيجري؟!!

جمعات شامة يديها قالت ليها وليمة يالاللة اسمهان ..

عقدات اسمهان حجبانها قالت ليها هاد شهرزاد كتقلب على المشاكل وعارفة الحداد فالقصر ونايضة دير وليمة

شدات شامة فكتفها ووقفات حدا ودنها قالت ليها هادي يالاللة راه روح الندى ..هي اللي دايرة هاد الوليمة

شافت فيها اسمهان مصدومة قالت ليها روح الندى؟!! وعلاش هي وصلات؟

ضحكات شامة قالت ليها وصلات البارح فين كنتي نتي يالاللة اسمهان

قالت ليها اسمهان كان راسي كيضرني وشربت الدوا نعست ..ايوا ولاللة شهرزاد فراسها هادشي؟

ضحكات شامة قالت ليها مااااااانعرف

حلات اسمهان عينيها قدامها قالت ولاهيلا زوينة هادي!! غنشوفو شنو غدير هاد المرة اللفعة لخرى

قالت ليها شامة كن تشوفي روخ الندى يا لحبيبة…شخصصصصصيييية وجات فوقتها ..حنا غنرجعو اللور ونتفرجو ..انا بعدا مع روح الندى

قالت ليها اسمهان ماعندك ماتربحي الى جيتي فصفها ..شهرزاد ام ولي العهد وروح الندى ماعندها والو ..ولدها الله يرحمو ..وطير ولا تنزل كتبقا شهرزاد هي الكلمة الكبيرة فهاد القصر

هزات شامة كتفها كضحك قالت ليها ايوا دابا نشوفو شكون اللي كلمتو كبيرة يا اسمهااان

ومشات كضحك خلات اسمهان واقفة كتفرج وقالت غادي تزهى الوقت فهاد القصر بالمعقول

نزلات شهرزاد فلعشية لقات الفيشطة فالقاعة المخصصة بالسهرات..اشمنك يا اطباق..اشمنك يا حلويات ..اشمنك هدايا كيتفرقو على الحريم ..رجع وجعها زرق بالغضب وكملات ليها شامة اللي جات لابسة قفطان ديال الحضور وجهزة راسها ومتولة شافتها واقفة فباب القاعة وكلشي حادر ليها الراس ومشات تقدمات عندها هازة راسها قالت ليها

لاللة شهرزاد..مرحبا بيك

حولات شهرزاد نضرها عندها شافت فيها بعيون كتخلع وكملات شامة كلامها قالت ليها ماتقوليش ليا مافراسكش؟؟؟ لاللة روح الندى يالاللة دايرة هاد الحفلة ..قالك ماقالك بغات تفوج بيها وتتعرف على الحريم

بقات شهرزاد كتشوف فداكشي ساكتة والبنات لابسات ومقادات ولاللة اسماهان داخلة ومعاها بنات السلطان حتى هما ..وقفو شي على ليمن شي على ليسر كيشوفو فشهرزاد وردة فعلها لاكن بلعات ريقها وتبسمات قالت ليهم مافيها باس نحتافلو ونبدلو الجو ..انا فخباري باللي الحفلة كاينة بطبيعة الحال وانا اللي عطيت الامر للمسير باش ينضمها .

حلات شامة عينيها مصدومة والمسير وراها سمعها اش قالت ودار يدو على فمو فمصدوم ..مشات تقدمات جلسات فراس القاعة فالبلاصة المخيرة ورفعات راسها مبسمة ..اما اسمهان وشامة جلسو حدا بعضياتهم فالجناب مقابلين مع بنات السلطان وقالت شامة لاسمهان

انا بعدا كاع مامتيقاها..غير مابغاتش طيح كلمتها للارض ويهبط مستواها قالت هاد الهضرة

ميلات اسمهان راسها قالت ليها بخفوت راني قلت ليك ماتستخفيش بيها راه لفعة كرطيطة..ماتعرفي تكون عطات الاوامر للحفلة تقام شكون عارف شنو كيوقع ..

قاطعاتها شامة قالت ليها سكتي سكتي ها روح الندى جات ارا نشوفو باش غتسالي

قالت ليها اسمعان روح الندى مافيذها مادير الى طلعات لشهرزاد فراسها غطيرها من هنا..ماعنها شكون يحميها كتر منا غير تهناي

دخلات روح الندى بقفطان ابيض مخزاني والتحتية بيج مشبكة والمضمة والفتاحي فالجناب..الصدر عامر والضهر واقف والرقبة طويلة رقيقة والدقن منحوت والوجه مدور صغير..طالقة شعرها وخيط الريح غليض مذهب مدور على راسها والخواتم فيديها والوصيفات وراها ..المشية كي لحمامة والتقالة والرزانة والزين والحروف عربية..كتفتن اللي مايتفتن المشية بالعبار والشوفة بالعبار والنخوة والهمة ..كلشي كيشوف فيها ويتهامسو بيناتهم ..هادي هي روح الندى ؟ اه هي اللي هربات للسلطان حاملة..قالك كانت جارية ..لا راه اميرة..مسكينة مات ليها والدها ..راه هي اللي حكمات قرطبة قبل ولدها ..قالت دكية ..سمعت طامو كتقول للمسير دكية وقافزة ومن صغرها مكتشدهاش الارض..قالك مشكلجية فين ماكانت كيكونو المشاكل..لعجب السلطان تسامح معاها..واقيلا كيبغيها..قالك حتى هي كتبغيه..وعلاش جابها لهنا؟ تبارك الله شحال زوينة واخا كبر منا..شهرزاد كي دارت قبلات بيها تجي..ولاكن علاش دايرة خفلة وولدها عاد مات ..راه قالك متمردة تقول شا تقول هي را ..دوزاتها على السلطان وشربها المرار..خسارة حتى مات ولدها عاد تصالحو ..شهرزاد مغتخليهاش طول هنا ..

الهضرة بالحس وروح الندى داخلة مبسمة مشات حتى لفين جالسة شهرزاد وتبسمان قالت ليها قدام كلشي

مرحبا بيك فالحفلة ديالي يا لاللة شهرزاد..نورتيني ..نشاء الله دوم الحفالات وتنوريني فالايام الجايا ..ايوا غتخليني واقفة ماديريش ليا بلاصة حداك؟

طلقات شهرزاد ابتسامتها وقالت لطامو اللي واقفة كتشوف غير بنص عين

طامو صاوبي للاللة روح الندى البلاصة هنا جنبنا

شارت بصبعها فالطرف جنب اسمهان وشامة اللي غير كيشوفو من فوق مناخرهم مستمتعين بشنو كيوقع ومتحمسين

هزات روح الندى راسها تلفتات بابتسامة مريحة شافت فطامو وشارت ليها براسها تقاد ليها البلاصة .. تلفتات اسمهان ضحكات بسخرية نص ضحكة وقالت تحت لسانها

قلت ليك شهرزاد ماشي ساهلة

تبسمات شامة قالت ليها اللخر مبخر 

قادات طامو البلاصة فالارض ورجعات اللور وكلشي كيتفرج متشوق ..شافت روح الندى فشهرزاد وشدات ليها فيدها بابتسامة قالت ليها لاللة شهرزاد..لاللات الاميرات ..اجي معايا يا للاللة مرات سيدي تفضلي

بقات شهرزاد غير كتشوف فيها مافهمات والو وناضت شادة فيدها عند بالها بغات تهضر معاها على برا ولا شي حاجة لاكن متوقعاتش من روح الندى كاع الزعامة وقصوحيك الوجه وماتخيلات توصل بيها الوقاحة تشد فيدها وتجلسها فوق المخدة جنب الحريم وتجلس هي بلاصتها بالزربة وطلق تكشيطتها ..شهق كولشي ودارو يديهم على فمهم مصدومين وكاين اللي عض شنايفو ضحك بلا ميحس بغاها فشهرزاد اللي حتى لقات راسها جالسة كدور فعينيها ورجع وجهها احمر وروح الندى رافعة راسها بابتسامة للجميع..ناضت شهرزاد من بلاصتها غطق وقفات قذام روح الندى ورفعات راسها قالت ليها وصلات بيك الوقاحة تنوضيني من مكاني وتجلسي فيه ؟!!

ناضت روح الندى وقفات بتعابير مريحة قالت ليها ونتي يالاللة شهرزاد وصلات بيك الوقاحة تترأسي حفلتي؟!

قالت شهرزاد بصرامة انا اللي عطيتهم الحق يجهزو الحقل

ردت روح الندى ببساطة قالت ليها مزياان ..الى نتي اللي عطيتي الحق للحفلة دوز تقدري تعطي الحق للحفلة تلغى ..عا دي

هزات شهرزاد نيفها بغيض وبلعات ريقها بقات كتشوف فروح الندى وقالت ليها انا عطيت الحق للحفلة دوز ماشي باش تلغى ..

تبسمات روح الندى قالت ليها اذا شاركيني حفلتي

زيرات شهرزاد على سنانها قالت ليها عطيت الحق وصافي مكنرجعش فكلمتي

قالت ليها روح الندى لا غير لغيها حتى واحد ميقدر يدير شي حاجة بلا رضاك

قالت ليها شهرزاد قلت ليك مكنرجعش فكلمتي..وحسابنا من بعد استمتعي بالحفلة اللي سمحت ليك ديريها

ضارت شهرزاد مشات وخرجات ليرى بشفايفها كيترعدو قالت كتردد

مغطيحينش فالفخ ديالك يا الحية ..مزال ماعرفتي راسك معامن اروح الندى دابا ندمك

جلسات روح الندى رافعة راسها طلقات قفطانها وكلشي مصدوم وتبسمات قالت ليه يالاه ..فرجونا ..ولا ماعندكمش مع الفرح ؟

طلقو ليها الموسيقى وناضو البنات كيشطحو ويتلواو وهي كتفرج واسمهان و شامة كيتغامزو على ما جرا وبنات الاصيل غير كيشوفو فروح الندى ..اما شهرزاد طلعات لبيتها كتغلي والمسير بوشعيب وراها كيجري دخل ومع الدخلة ضارت عندو كتفركع ماعقلاتش على راسها قالت ليه السلطان عارف بالحفلة ولالااا

بقا كيتمتم وهي تغرت قالت ليه جاوبني عارف بالحفلة ولالا

قاليها اه عارف الاللة شهرزاد

قالت ليه هوا اللي عطاها الحق؟

حرك واسو بالايجاب وهي ضرب الطبلة دمرايتها بيديها قالت ليه وعلاش ماجيتيش قلتيها لياااا..علاش

شكت كيتمتم قاليها ماطلقونيش الاللة شهرزاد

كدب عليها فهادي حيت خاف يقولها ليها وتغضب وتطلب منو شي حاجة فوق طاقتو يديرها ويغرق ..مدام خدا امر من السلطان فرجع اللور يطبقو فصمت ويهني راسو من الصدع .

قالت ليه بغضب بنت الحرااام..غرضها تشريها ليا مع السلطان ومالقات غير هاد الطريقة دالحفلة ..كن ما فطنتش بيها ولغيت الحفلة شنو كات غيوقع ليا ابوشعيب؟؟؟ هاااا هضر

قاليها وعلاش مالغيتيهاش وطيحتي زنافرها فالار ض؟

قرباتو منو مخرجة عينيها قالت ليه نطيح زنافرها فالارض باش يخشي ليا السلطان راسي كامل فالارض!! هادشي اللي بغات الحمق ..بغات تشريها ليا معاه فهمتي دابا؟!!

قاليها بتردد. ولاكن راه طيحات بقيمتك قدام الحريم

نفضات يديها قالت ليه قيمتي كانت غطيح بصح لوكان طحت فشباكها ..اما دابا راه باقا مكانتي كما هي .. حيية عاد عرفت علاش السلطان كان كيقول عليها حية ..عارفك شكدير وحفرات ليا من تحت رجلي..على شوووووية ..شوية كانت غتجر بيا الحصيرة ..اللفعة كتشوف بعيد ماشي غير فجنابها

قاليها المسير شنو بغيتي تقصدي شنو كتشوف؟

قالت ليه بغيض كتشوف بعيد ..معاندها سوق نلغي ليها حفلتها قدام كلشي ونطيح زنافرها للارض..هي كتنيش على البرج العالي..ماشي النوالات اللي ضايرين بيها ..خاصني نزيد نرد بالي منها ..اويلي وحدي كانت غتحش ليا الركابي جاب الله فطنت بيها ضرب ليها حسابها فالحيط..خليها دابا تشطح وتردح دابا شوية تنوض تنعس اصلا خطتها فشلات بقات ليها غير الحفلة وطقاطق

.

وفعلا ناضت روح الندى ماكملاتش الحفلة ..جلسات شوية وخلاتهم خرجات من القاعة غادية لجناحها كضحك وتمص فلسناها وعبدية وراها قالت ليها. مالكي نضتي ؟ باقي عاد بدينا

ضحكات قالت ليها خليهم يتوحشوني..براكة عليهم جلست معاهم شوية..

طلعات بحالها تنعس وشوية بشوية بدات كتولف الجو فالقصر واخا كتسمع شلا كلام وهضرك عليها ..

دخلات مور الغدا بحال العادة لبيت متعة لقاتها جالسة شادة ولدها كترضعو وتبسمات ليها روح الندى طلات عليه وقالت ليها

كي صبح ولدي ؟ اش خبارو

تبسمات متعة قالت ليها لاباس الاللة روح الندى

قالت ليها روح الندى واش كتهلاي فيه مزيان ؟

شافت فيها متعة قالت ليها مكنعس مكنشوفو الاللة روح الندى ..كنبات حاضياه

هزات روح الندى حاجبها قالت ليها ايوا ردي بالك..ماتيقي فحتى واحد حتى فوصيفاتك اللي كيعونوك ماتيقيش

حركات متعة راسها قالت ليها اير تهناي انا حاضية الاللة روح الندى

باست روح الندى جبهتو وخرجات مشات قاصدة نيشانحناح الاصيل اللي كان واقف كيهضر هوا وحكيم عليها ولاول مرة يتجاوز حكيم حدو وقاليه براسو حادر

مولاي اللي وقع ماشي ساهل ..ولاللة روح الندى متشي ساهلة كتمنى ماتوضعش تيقتك كلها ..وسمح ليا الى جرأت من خوفي عليك امولاي

تبسم السلطان هز حاجبو قاليه ماعندك مناش تخاف احكيم..انا اكثر واحد كيعرف روح الندى وطباعها ..واخا تبان ليك قبيحة ومتمردة ..ولاكن ماشي خاينة

قال ليه حكيم انا كنشوفها فصورة اخرى عكس اللي كتشوف نتا ..شخصية مشاكسة ومتمردة وكتغدر ..كما كنتي كتقول عليها من قبل

ضحك السلطان قاليه كتشوفها هاكا حيت شحنت ليك راسك بسلبياتها ..حتى مابقيتي كتشوف فيها جهة مضوية..هي بصح روح الندى ..الشخصية المشاكسة ..ماتملش معاها ..ديما عندها المشاكل اللي يشغلو حياة الواحد حتى مع ولدها ..حتى هوا مسلمش من افعالها ..ولاكن ماشي منافقة ..كتصرف حسب مشاعرها.. كتخرج نيابها فاش كتكون شي حاجة ضاراها ..اما با تآدي شي واحد غير هاكاك لا ..

قاليه حكيم ولاكن امولاي ماتنساش شنو وقع فالماضي.. وخمسة وعشرين عام ديال الحرمان والسراط اللي دوزاتنا منو ..مزال عاقل على كل حاجة

تنهد السلطان قاليه هادا حال الدنيا..وحال الانسان..ميمكنش تكون كامل مكمول مرتاح فدار الشقاء.. دار الشقاء عمرها تخلي بني ادم يعيش وكأنه عايش فالدنيا..ديما عندنا مايشقينا ..وانا عشت حياتي بطولها وعرضها مكانش عندي نقص..الى غياب ولدي يور ..هوا الحاجة الوحيدة اللي كانت ناقصاني..وكن مان معايا كنت غنشك واش الجنة هادي..حيت بالفعل كنت مرتاح فكلشي الا فتقص ولدي.. اما روح الندى منقدرش تزيد دير شي خطوة خايبة ..بلعكس هي كدير الطريق باش ترجع المياه لمجاريها..حيت باقا كتبغيني مزال عندها امل نرجعو .

وصلات لجناحو و

لقات حكيم خارج من عندو ووقفات هازة راسها بابتسامة ..حدر ليها راسو بنفور بغا يمشي لاكن وقفاتو وقالت ليه

حكيم ..اخر مرة كنا تقابلنا فيها نهار حطيتي ليا السيف على عنقي

قال حادر راسو لا اخر مرة فاش رافقتك للعربة تشوفي ولدك

صغرات عينيها قالت ليه باين ليا السلطان كيتيق مزيان ..ولاكن واش عارف باللي نتوما اللي بغيتو تقتلو ليه ولدو؟ تافقتي نتا وشهرزاد وولدها وطعنتوه ديك الطعنة حتى كان غيموت

قاليها بصرامة انا متافقت مع حد الاللة روح الندى..ومكنلعبش فالضلام والى كان شي حساب كنصفيه فالضو ..وكنخدم لصالح مولاي لا اقل ولا اكثر

بقات هازة خنافرها كتشرف فيه وقالت ليه ايوا على الله ترد لبال لولد السلطان اللث راه شاد الفراش ..وعنداك توقع ليه شي حاجة

دخلات لجناح الاصيل خلات حكيم واقف مطايقش يشوف وجهها وحدرات راسها للاصيل اللي شافيها مبسم وقاليها صباح الخير

قالت بابتسامة صباح النور امولاي..الى سمحتي لي بغيت نشوف ولدي ..توحشتو وبغيت نعلمو بولدو اللي تزاد

حرك ليها الاصيل راسو بالايجاب قاليها مرحبا..وجدي راسك هاد الليلة

حدرات راسها بابتسامة قالت ليه نهارك مبروك امولاي

قبل ماتمشي قال ليها كي دازت الحفلة ديال دلبارح؟

تبسمات قالت ليه مزيانة ..حتى لاللة شهرزاد غزالة دخلات ليا لخاطري..تفاهمنا انا وياها وماقصراتش من جهدها معايا

تبسم قاليها مزيان هادشي اللي بغينا ..الله يهدي النفوس

تبسمات قالت ليها وعلاش اللي ماتهداش ..كل واحد عارف قدر نفسه ولازم حدودو..وهادشي اللي خصو يكون

حدرات ليه راسها خرجات ماطولاتش معاه الهضرة وحتى هوا ماهضرش بقا ساكت..خرجات للساحة باغات تبقى بوحدها بين الربيع والطبيعة باش تعرف تفكر لاكن قاطعات تفكيرها لاللة جويرية اللي جات عندها بتبسيمة قالت ليها صباح النور الاللة روح الندى

تبسمات روح الندى كتشرف فيها رقالت ليها صباح النور ؟!! لاللة جويرية الى ماخفت نكدب

ردت جويرية بابتسامة قالت ليها اه الاللة روح الندى

قالت ليها روح الندى بابتسامة تبارك الله ..اخر مرة شفتك كنتي صغيرة شوية..

قالت جويرية بحياء اخر مرة شفتيني هنا فالقصر ..ودازت عليها خمس سنين الاللة روح الندى ..انا فالحقيقة كنت كنسمع عليك بزااف ديال الكلام ..ولاكن فاش كتاشفت باللي نتي روح الندى نفسها اللي كانت مع السلطان زمان وهربات بالولد تصدمت ..ماتصوريش صدمتي قداش كانت وشحال خدات مني دالوقت باش خرجت منها

تنهدات روح الندى كتشوف فيها قالت ليها كل واحد كياخد غير اللي مقسم ليه الله ..مايبقاش فيك الحال

تبسمات جويرية قالت ليها لا بلعكس ..كنت تمنيت من بقا خويا يور عايش..على الاقل حتى نتعرفو عليه مزيان..ولاكن خطفاتو الموت بالزربة..وحتمات علينا نساو لي فات بالمرة

بقات روح الندى ساكتة كتشوف فيها لاكن جويرية بدلات الموضوع وقالت ليها مرحبا بيك فالقصر.. نورتينا ..الى بغيتي اي حاجة ولا حتاجيتي شي حاجة قوليها لي

حركات راسها روح الندى بالايجاب وقالت ليه شكرا ليك اجويرية

تبسمات جويرية قالت ليها الى بغيتي ترافقني لجناحي ..نوريك شي حاجة

رحبات روح الندى بالفكرة ومشات معاها لجناحها لقاتو عبارة عن لوحات فنية.. جميلة وصباغات فالشرفة وطاولة وادوات ..تفاجآت روح الندى وقالت ليها نتي اللي كترسمي هادشي؟

قالت ليها جويرية اه انا ..

بقات روح الندى كتسارا فديك الشرفة الكبيرة ووقفات قدام لوحة فيها وجه يور مرسوم وبقات كتأمل فيها وماجات فين تنطق حتى عيطات ليها جويرية وعرات على لوحة كبيرة ديال امرى في غاية الجمال وقالت ليها

هادي صورتك اللي كانت فخيالي..من خلال ما عاود ليا بابا السلطان عليك ووصفو ليك حاولت نخرج ديك الصورة اللي فمخيلتي..

تفاجآت روح الندى قالت ليها السلطان عاود ليك عليا؟

تبسمات جويرية قالت ليها انا سبق وسمعت عليك بزاف ديال الحكايات فصغري..حكاتها ليا جداتي قبل ماتموت لاكن مكنتش عارفاها كتقصد بيها السلطان نفسه …ومع المرور الوقت جاني شوق نعرف الحقيقة كما هي..كاين اللي كيقول قتلها السلطان ..كاين اللي كيقول حرقها .. كاين اللي كيقول قتلات راسها..كاين اللي كيقول هربات ..واغرب حاجة سمعتها انهم كانو كيقولو باللي هي ماشي مرى حقيقية..هي جنية في غاية الجمال وتغرمات بالسلطان وكانت كتبان فهيئة مرى.. وكاين اللي كيقول عليها ساحرة وكتقدر تبان وتغبر فأي لحضة..وباللي كان ساكنة جناح السلطان فغيابو شحال من يوم ..وباللي انتقامات من كاع الناس اللي آداوها ..

بقات روح الندى ساكتة كتسمع وقالت ليها والسلطان اشنو قاليك عليا؟

ردت جويرية بعفوية قالت ليها.

حكا ليا حكاية زوينة فاش كنت صغيرة ولاكن ماعرفتش واش بصح ولا غير منخيالو

قالت ليها روح الندى بفضول وشنو كتقول هاد الحكاية؟؟ حتى متشوقة نسمع شنو حكا عليا السلطان

تنهدات جويرية كتشوف فديك اللوحة بعفوية وقالت ليها

قالي فاش كان فريعان شبابو وتولى الحكم نزلات عليه واحد البنت من السما..بحال الملاك ..تجندات بحال الجنود ..ودخلات القصر بحال الراجل..فاش تكشف امرها وتعرف سرها دخلوها للحريم..وتما تعرف عليها..من نهار تعرف عليها ماقدرات وحدة اخرى تلفتو ليها..بير وطاح فيه وقطع حبل النجاة..ولاكن هاد البنت كانت ابليس فصيفة بنت!! كانت باسلة ومن مشكل امشكل وكان حتى السطان مامقصرش من جهدو..ضلمها وقصى عليها..ولاكن واخا كاع اللي صرا كان ناوي يتزوجها ويولد معاها..ولاكن حكمت الاقدار وطجات البنت من ضلم الضالم وهربات..هربات وخدات معاها طرف منو فكرشها ..ومن تما غبر ليها الاثار ..ماعرف واش باقا حية ولا ميتة..واش ولدات بنت ولا ولد!! مشات وماخلات ليه حتى ذكرى ..من تما تبدلات حياتو.. فاق من السبات ديالو وكبر قبل الوقت..كانت قصتهم زيية تمنيت كن عشت حتى انا قصة بحالها..على الاقل يبقا لقا ما نتفكر ..وما يعاودو عليا الناس..ويبقا الطرائفة ديالي من لسان للسان بحال روح الندى .. من خلال ما وصف ليا فالحكاية فكل مرة حاولت نجمع الصورة ونطلع هاد الوجه ..

تبسمات روح الندى قالت ليها هاكا كنت فاش كنت صغيرة.. كنت زوينة ونية وهبيلة ..كانت البرائة فعينيا .. دابا كلشي تبدل

شافت فيها جويرية قالت ليها باقا زوينة احسن من شحال من وحدة من وحدة فجناح الحريم..با السلطان كان عندو الحق فاش قالي كتشبه للقمر فاكتماله ..

هزات روح الندى راسها قالت ليها كل واحد شنو كيألف ..والله العالي العالم بقلوب العباد..

تبسمات جويرية وهدات ليها اللوحة وقالت ليها انا بغيت نكونو صحابات ..الى قبلتي

شدات روح الندى اللوحة قالت ليها قابلة وبطبيعة الحال

تبسمات جويرية بسعادة قالت ليها بغيت نكون بحالك ..انا كنخاف بزاف ..بغيت نكون كما كنتي..

شدات روح الندى فكتفها قالت ليها متأثريش بشنو كيحكيو الناس..حتى زين ماخطاتو لولا ..ومانبغيش ليك داكشي اللي عشت ..كن حكاو بالحرف المر اللي دقت مكان حتى واحد يتمنى يكون بلاصتي ولا بحالي..خليك كما نتي وصنعي من نفسك مرى وحكاية غير حكايتي

خدات روح الندى اللوحة خلات وصيفاتها ياخدوها لجناحها وفطريقهم تلاقاتهم شهرزاد وقالت ليهم باستغراب

شنو هادشي؟

حنات وحدة من الوصيفات راسها قالت ليها هادي لوحة ديال لاللة روح الندى

قربات شهرزاد عرات عليها شافتها وقالت بمياعة

وشكون عطاها هاد اللوحة؟!

قالت الوصيفة لاللة جويرية

هزات خنافرها مشات كتردد هاي هاي على جويرية ..حتى نتي وليتي كتعطي الهدية

مشات فلعشية لجناح جويرية لقاتها كترسم ووقفات قالت ليها

جويرية ..فين وصلتي فالرسم ديالك؟

تلفتات جويرية وسدات عينيها مطايقاهاش قالت ليها كندوز الوقت

تبسمات شهرزاد قالت ليها بغيتك ترسميني انا والسلطان فلوحة وحدة

بقات جويرية ساكتة كتشوف قدامها ووقفات قالت ليها هادا طلب ولا امر

تبسمات شهرزاد قالت ليها كما حلى ليك قبليه ..المهم بغيت لوحة ليا انا والسلطان

تبسمات جويرية قالت ليها مكنقدرش نرسم بلا احساس الاللة شهرزاد..فاش يكون عندي احساس لوجهك غادي نرسمو ونتفنن فيه تيقي بيا

هزات شهرزاد حاجبها قالت ليها واحساسك تحرك جهة روح الندى؟! وتفننتي فرسمها

قربات جويرية قالت ليها انا كنرسم داكشي اللي كنبغي..وكنرتاح فيه .واللي مكنرتاحش فيه مكنقدرش نتخيلو باش نرسمو…تقدري تجيبي رسامين من برا يرسموك..

عطاتها بالضهر كتمسح يديها وقالت ليها ااه نسيت..مابقاش فالرسم ..بقات فشكون غيرسمك..يرسم رسام عادي ماشي بحال ترسمك بنت السلطان

هزات جويرية حاجبها بابتسامة مايعة خلات شهرزاد كتغرق فبلاصتها ..مارضاتش ورجع وجهها احمر وتشوطات بالمعقول لاكن رغم الاحاسيس المشوطة هزات راسها قالت ليها واخا اجويرية ..كما بغيتي..ديري اللي كترتاحي فيه

خرجات شهرزاد من جناحها ولاحت جويرية المنشفة من يدها مع اللولة قالت بميوعة

بقيتي ليا غير نتي يا الممسوخة نرسمك هادشي اللي بقا!! لا ورسميني انا والسلطان !! باز لقصوحية وجهك

مشات شهرزاد مكمداها خرجات للجردة تشم لهوا وتنفس ولقات تما روح الندى هازة حفيدها كتمشى بيه هي ووصيفاتها ..غير شافت شهرزاد تبسمات وقربات منها قالت ليها مال وجهك احمر الاللة شهرزاد..تقول غير واحلة ليك شي حاجة ومابغاتش دوز!؟؟

تبسمات شهرزاد كتشوف فيها وفالحفيذ اللي فيدها وقالت ليها لا انا حتى حاجة مكتوحل ليا ..ااه فكرتيني ..داكشي اللي درتي فالسهرة مانسيتوش ليك اروح الندى

ردت روح الندى ببساطة قالت ليها عادي شنو دخلني فذاكرتك؟ ..الى منسيتيش هادشي كيعنيك نتي علاش كتعلميني بيه؟!

قالت ليها شهرزاد قلت ليك مانسيتوش ليك باش تردي بالك معايا مرة اخرى

مدات روح الندى الحفيد لوصيفتها قالت ليها ديه لمو ترضعو وتلفتات عند شهرزاد هازة راسها قالت ليها خصني نرضيك باش تنساي اللي وقع زعما؟ والى مارديتش بالي اشهرزاد غادي تقتليني؟! تبعيني لولدي يور ؟!!

هزات شهرزاد خنافرها وتزيرات بقات كتشوف فيها بغيض وكملات روح الندى كلامها قالت ليها هازة حاجبها والحقد مالي عينيها حتى دخلات الخوف فشهرزاد

انا ماعندي منخسر..هادشي علاش ماعندي مناش نخاف..اعز ماعندي خسرتو وخوفي عليه تدفن معاه.. دابا الاي خصر يرد بالو ويخاف هوا اللي عندو مايخسر..يخاف على معندو من الخسارة..وهاد الشخص هوا نتي..نتي اللي عندك ما تخسري ايوا نتي اللي ردي بالك..حيت الام الى عاشت مور موت ولدها المغدور مكترتاح حتى ترد ليه حقو بالثني والثلت ..ونتي ام وعارفة شنو كنقصد

فالوقت اللي كلهى يلغي بلغاه فالقصر كانت حياة اخرى برا القصر..حياة شادية اللي ولفات العيشة والاعتماد على النفس هي وختها..الهم هم اللي ماعندو دراع ماعندو عقل..اما هي كي عاشت فالقصر كي برا القصر المهم تعيش والسلام ..رجعات لعوايدها القديمة ..ورجعات لنفس الحي في كانت ساكنة ..حي الدراوش..قدرات توقف على رجليها احسن من الرجال اللي بشلاغمهم..شحال من واحد مور الحرب ضاع وتشرد..وعائلات كثيرة مالقات فين تبات ..واخا حل السلطان الاصيل بيبانو واحتاضنهم لاكن ماقدروش يكونو من راسهم الكاينة ..خصوصا اللي دراعو كاضي ومولف عيشة الفشوش..وهادو اغلبهم غير التجار ..اما العبيد والخدم كانت حياة جدية بالنسبة ليهم ..مولفين تمارة فين ما مشاو يحفرو ..تقلبات الاية وسبحان مبدل الاحوال..رجعو العبيد تجار والتجار عبيد..كاع اللي مولف الخنات ماعرف منين يبدا وجلس كيتسناها كبيرة ..اما الخدم من التعويض اللي كان عطاهم السلطان يور دارو الكثير ..وفاض عليهم الرزق والخير والخمير..ولفو اللسان الحلو ونعام سيدي. نعام لاللة..ايوا التجارة اش بغات؟ من غير سلعة مزيانة ولسان يقطر بالعسل ..كاين اللي بدا بخيمة وكاين اللي بدا بزربية فالارض..حتى وقف على رجليه ودار سقيفتو وحانوتو وعاد الخير مدفق عليه.

وشادية من هاد الناس الحارة ..هي بعدا عندها هيبة ربانية فين ماتحصل ترجع ليها ..وهاد المرة عرفات راسها مشات خلا وموت السلطان شنعات على الفام ومابقا ليها غير دراعها ..خرجات ليها نيشان وفرشات فراشك بين التجار فالسوق وصاوبات خيمة قياس اللي تجلس فيها درقها من الشمس وطلقاتها لهزان الخط ..يامنة حداها كتبيع الخبز وشادية من يد ليد كتهز الخط

يجلسو يبيعو فالعشية والصباح تلقاهم فخيمتهم اللي كراو بحال الدار القديمة ..يامنة تصبح مع الفجر على العجينة وتطياب الخبز ..وشادية تلقايها من دار لدار كتنقز عند نسا التجار الكبار وثريات البلاد..ايوا لعشية يشدو ركانيهم فالسوق ويجلسو وحدة تبسع الخبز وحتى تهز الخط..

وبحال كل عشية من لعشية مور العاصر..كانت شادية جالسة مابيها ماعليها ..والعيالات ضايرين بيها كل وحدة تسنا نوبتها ..ايوا ويامنة مربعة ويدها على خدها قدامها الطبق دالخبز اللي جا من التجار تبيع ليه باش يعتق.

مرى مور مرى حتى جلستت قدامها مرى ملثمة بلحاف كحل..ربعات يديها وشادية قدامها حادمة راسها بدرة الشلوح والهدب نازلة ..شدات كفها كتقرا بالزربة باش تكمل الزحام اللي عليها وقالت

نتي يالاه ضايعة وقلبك غبينة.. قاطعاه البحور والجبال وفصدرك دفينة ..على ثلاتة دالحجرات حرات غرات تبكي حزينة ..طاحت الحجر الوسطانية وبقاو جوج فديك الحنينة..تبكي وتلالي وتجري وتشالي ولا فيوم من الايام برد قلب ونعستي وماسهرتي ليالي ..على حجيراتك تبكي..وطول الليل تشكي.

الكبيرة ناقصة عقل والصغيرة هازة جبل ومن بلاد بعيدة جارة نخل وفيوم بحال ليوم صفا الرمل وتهز الهم والغم ومن حجيراتك …

سكتات شادية كتكمل بتتقال وكتهز عينيها بششوية والخوف فقلبها كيتغلغل وقالت

قربتي وجمعتي بين الخلية والنحل!!

طارت ليها مسعودة على يدها شداتها وهبطات اللثام قالت ليها طحتي فيدي يا الكافرة بالله..طحتي وما يفكك مني ليوم فكاك

شافتها يامنة وبالخلعة طارت من بلاصتها قلبات الطبق قالت ليها بصوت غليض ماااااي

طارت عليها يامنة طيحاتها بتعنيقة وسط السوق وناضت شادية هزات قلوعها هربات ويامنة ومسعودة فالارض والغبار محبدين وحدة باغا تنوض والاخرى طايحة عليها حتى الغبرة دخلات ليها فمها كتقول ليها وتهرنط بالضحكة بحال الحمار. وامي لقيتي سروالي؟! لقيتيييه ههههه

هزات ليها يامنة الحاية من تحت رجليها حالة فمها فرحانة قالت ليها لبستييه !!!

هزات مسعودة الصندالة كتشنر راسها وناضت دارت الحايك على راسها جمعات مع يامنة سلخاتها على الفضيحة اللي دارت ليها فالسوق وناضت قالت ليها فين الكافرة بالله اللي حررات عيشتي ليوم نحرر عيشتها

بدات يامنة تنقر قالت ليها توحشتك امي ..توحشت ديك القتلة اللي كنتي تعطيني فاش كنت كنبول في الفراش ههخهخخخههننهنخخخ

نزلات عليها مسعودة للراس قالت ليها اويييلي باقا هبيلة ماخليت فين زورتك ماخليت بيك سادات ولات عادات ولا بلادات انااااري راه انا اللي غيخرج ليا العقل..زيدي قدامي وريني اللفعة دختك

مشات يامنة بالزربة كضحك فرحانة جمعات خبزها وزربيتهم علاض كيجلسو والخيمة وروحات للدار هي ومها .

وصلو للباب وقفو وبدات يامنة كدق وتعيط واا شادية..واتي حلي يا بنت الهم يا مجبد البلا حلي ليووووم تسخلك ماااي

نزلات عليها مسعودة قالت ليها اللقوة .. اللقوة .

بلعات مسعودة ريقها كتمسكن وتكات على الباب قالت ليها حلي ليا بنيتي الباب الله يرضي عليك واه !! ماتوحشتيش مك ؟

ردات عليها شادية من لداخل قالت ليها حلفي ما ضربني

قالت ليها مسعودة والنهار اللي ولدتكم فيه مانمسك

بقا الباب مسدود ومسعودة كتمسكن حتى حلات ليها شادية الباب بشوية كطل عليها بعين وحدة شافتها كتقطع فالقلب ووراها يامنة بديك الكرش والمجدول معقود لقدام كحل ديال الموزون رقيق وكرشها كتشطح بوحدها بلا هزة..اما الي ضحكات ولا هضرات تقول الكرش اللي كتهضر..هازة الخيمة فوق راسها وكتمايل بيها

قالت مسعودة لشادية حلي لميمتك ابنيتي

حلات شادية الباب ومع الدخلة طارت ليها بعضة فودنها وهزات الصندالة ويامنة حداها كتنقز قالت ليها يا كقلت ليك غتسلخك سرررررك نيييييت

كلات شادية ماكلا الطبل فيد البراح

سلخاتها وخلاتها مكمدة الدقة فواحد الركنة ..اما فاش سمعات بشنو وقع فالقصر وبنتها اللي ماتت..هزات يديها للعالي كتغوت وتولول وضرب فخادها وتبكي وتنوح وسط الدار ..تقلبات الدار كنارة ..تفكرو الصورة دعويشة فاش طاحت وبكاو حقهم وحق جدودهم ..تشوات مسعودة فكبدتها ومرضات ليهم وطاحت فالفراش حازنة على بنتها ..وماكان على شادية ويامنة غير يجيبو ليها الحكيمة فالنهار السابع حتى للدار دوزات ليها ..تمات شادية جاية من الكشينة جامعة جلايل قفطانها البالي مع الحزام ووقفات حدا فراش مها فين ناعسة قالت ليها الله يرحم والديك الاللة ..هادي شهور وكرشي كضرني والحريق مابغا يمشي..تقول الحرب نايضة فكرشي كل مرة منين تزدح ..خفت غا لايكون شي مرض ولا شي وباء

قالت ليها الحكيمة نعسي نشوف مالك ابنتي..

نعسات شادية جنب مها فين مفرشة ليها ومسعودة حازمة راسها كتنين وراسها كيتمايل جهدها تقاضى ..

اما يامنة واقفة والطبسيل ابيض ديال الحديد تحت باطها خاوي واقفة مركنة قالت ليها هادا عا خبزي اللي كليتي ليا كرم ليك في كرشك ..انا نضل نعجن ونتي ضلي تسرطي كي بوسيكة .

جمعات الحكيمة يدها على كرش شادية اللي مزالة مجبدة وقالت ليها مستغربة نتي ابنتي ركي حاملة والتيلاد خرج يديه ورجليه اشمن مرض ولا وباء !

ناضت مسعودة جلسات فالبلاصة قالت ليها هاوييييلي حي توما شسايرة تقول اتوما واش سمعتوها

جمعات شادية النوضة ديك الساعة بحال سراق الزيت ماعرفات فثن تعطي بالراس وتكمشات فواحد الزاوية مخلوعة ومصدومة وكلشي مخلط ويامنة حالة فمها فالحكيمة قالت ليها

هااا !!! حاملة ؟!!

قالت ليهم الحكيمة اييه حاملة .. الكرش راه باينة والتيلاد راه يتركل في كرشها صحة سلام الحمد لله

نتفات ديك الساعة مسعودة نواضرها وطلقات شادية ويامنة غوتة وبغات تهرب ومابانو ليها غير دروج التراب قدامها تطلع السطح لاكن مسعودة جراتها من اللور من الدرجة الثالتة شداتها من شعرها عضاتها فيدها وسحات بيها الارض والحكيمة كتفك ويامنة كتنقز بلاتها ودوح براسها هازة يديها وتقول

فينك اااجيلالي وبااا تعالى تشوف بنتك شادية حاملة …واهياااا الجيلالي وبااااا ..وهايا مسعودة اللي ماعندها سعد ..واك واك الجيلالي واابا

فكاتها الحكيمة من مسعودة قالت ليها شوري اناري غتقتلي ليها التيلاد

عضات مسعودة يدها قالت ليها نقتلو ناكلو بسناني وناكلها معاه .. كوغا مشيتي وبقات عويشة ختك ..كية حدة وتبرد ولا كواوي فحياتي ..مي شوهتيني الله ينتاقم منك يا الكافرة يا سحارة.. كو غا كنتي بلاصتك ختك عيشة..اربي فين نعطي بالراس وفين ندير وجهي

قالت ليها يامنة وياااك حنا دابا في قرناطة معارفنا حد ما سامع بينا حد شكون غيسولك ؟!!

طارت عليها عضاتها قالت ليها حيدي من قدامي ..حيدي هدوتيني

عاودات الحرمة لراسها اللي هبطات وقالت كتنهج وطل على شادية مور الحكيمة قالت ليها شكون ابنت الهم ؟ ياااااااويلك تقولي لي باعوك في سوق العبيد ..ياربي كو غامت ولا حضرت لهادشي..تس قولي ليا شكون هاد ولد الحراااام نمشي نقتلو بيديا

قالت ليها شادية من تحت الحكيمة مخبيبة

السلطان امولاي

ضارت لحكيمة شافت فيها مصدومة وضربات مسعودة فخاضها قالت ليها شكووون؟

صبحات مسعودة مع الفجر والنهار كيطلع لابسة حايكها قاجاه عليها وجارة موراها شادية حتى هي فحايك ابيض ولثام كتقول ليها

زيدي يا الكافرة بالله ..يا مجبد البلا نشوفو هاد الفضيحة

قالت ليها شادية خايفة اويلي امي واش غتديني لقصر السلطان هاكاك يحساب ليك خماس ؟! راه السلطان هادا

جراتها بالجهد مسعودة قالت ليها زيدي وسدي. عليا قرقارتك .. ياك هاد التيلاد ولد ولدو ..ايوا يفكنا معاه ولا والله غا لما قلبت البلاد عليه ..هاي هاي هاي تسحابوني حايط قصيرو!! زيدي

خرجات وراهم يامنة بحايكها حاللة فمها كضحك طلات عليهم من مور الباب قالت ليهم نمشي معاكم؟!

شيرات عليها مسعودة بالصندالك قالت ليها تمشي ما تجي ..قالك تمشي. معانا ..والله يا طاسيلتك وخرجتي من الدار غا لما قطعت ليك رجليك

بقات يامنة كتنخنخ باغا تبكي ورا الباب وهما غادين والناس من الجامع راجعين ..خلاتهم حتى بعدو وطلات حالة فمها وخرجات سدات الباب وتبعاتهم كتجري .

وصلو للقصر مع سطوع الشمس والطريق كلها ومسعودة كتنوح حتى وصلات لباب الصور اللول .

طلات عليهم يامنة حاللة فمها من اللور مور واحد الشجرة وضحكات حتى بانت ضراسها .

وقف و الحراس مسعودة فالباب ماخلاوهاش تزيد وهي واقفة دايرة يد غلى يد هازة راسها ومكمشة فمها كتشكى قالتليهم

خليوني غا ندخل ندوي مع السلطان ..

قاليها الحارس مننوع الاللة هادشي واش غي اللي جا يدخل عند السلطان السيبة هادي…واش عارفة راسك فين واقفة ولالا

قالت ليه عارفة عارفة راه تا انا جايبا ليه خبار تهزهز البلادنعام السي..تا غاسير قول ليه شادية

جراتها شادية قالت ليه وماشي الشلطان ولاللة روح الندى اللي كتعرفني

زواتها مسعودة سكتاتها وقالت ليه شير عند لاللة روخ الندى راه هي اللي مسيفطك علينا نجيو.. تا غا سير قوليها شادية ..راه لا مامشيتيش ماتلوم غا راسك

بقا كيطلع ويهبط فيها وتلفت شار براسو لحارس من الحراس مشا كيجري دخل قالها للمسير ..المسير استغرب ووصلها لاللة شهرزاد سخونة وحتى هي استغربات وقالت ليه سير دخلهم ودوزهم لصالة الصغيرة نشوف اشنو تحت راسهم

رجع الحارس للباب وخلاوهم يدخلو ويالاه زادو خلفة خرجات يامنة كتجري درمات فيهم داخلة حتى شدها واحد قاليها فين الشريفة

قالت ليه كضحك وتهرنط مي مييي انا مع مي

ضارت مسعودة شافتها وراها وجراتها ويالاه بغات تحيد الصندالة وقف عليها المسير قاليها شكون نتي الاللة

زربات عليه شادية قالت ليه رسلات لينا لاللة روح الندى السيدي

طارت مسعودة قالت ليه حنا السيدي ترزينا فيام الله وايام هاد السلطان ..

نخزاتها شادية قالت ليها سكتي راه القصر هادا امي تي راكي مزال معارفة شناهوا القصر خلينا غا حتى نوصلو عند روح الندى قبل مايردونا من الباب يقولو تسطاو

وقفات يامنة ورا امها كضحك قالت ليه السلام

ولسقات فمها غادية وراها بثلاتة فالملاحف ملويين

يامنة : ياحليلي غنرجعو لعشية القصور

دخلهم المسير دوزهم من طريق مخبية لاكن ماجا فين يدخلهم الصالة حتى شافتهم عبدية ومشات عندو عقلات على يامنة اللي لثامها كيطيح وترضو..قالت ليها يامنة !!!

شافت فيهم والمسير كيتلون ويدور فعينيه وتبسم دغيا قاليها راه كنت غادي بيهم للاللة روح الندى

حيدات شادية اللثام صدمات عبدية وقالت ليها مصدومة شادية؟!!!

بقات مسعودة بيناتهم كدور عينيها فيهم مافهمات والو

قالت ليها شادية متبلع ريقها.

خاصني نشوف لاللة روح الندى ضاروري

هزات مسعودة يديها قالت ليها ديني ياخييتي نفكر هاد الجرة ..حنا راه ناس شوراافة ..مانكسابو ما نعلامو ولاكن نموتو على الشرف ديالنا وعلى بناتنا ..

قالت ليها عبدية شكون هادي ؟

ردات عليها مسعودة قالت ليها نتي فااايت ليا شايفاك فشي بلاصة ولاكن فين الله واعلم

قالت ليها يامنة كتهرنط فرحانة

وراه هي اللي كانت جات عندنا هاربة من القطاطعية

خرجات عبدية عينيها فيها قالت ليها

هييييه ؟؟!!! علاه نتي هادي..

طلقات مسعودة حلقها قالت ليها وكي جييييتك ؟!!!! هاااا ضحكو على بنات الناس وتزيدو هادا هوا خيرنا ..درقناكم من برد الليل خرجتو بالنعجة والخيل هادا خيرنا

ضارت عبدية عند المسير قالت ليه صافي انا عنديهم لاللة روح الندى

بقا المسير عا كيشوف وجراتها عبدية قالت ليها زيدي قدامي راك كتقلبي على شي قطعة لداك اللسان .

نترات مسعودة يدها غادية قالت ليها طلكي مني

وصلات عبدية لجناح روح الندى ودخلات لقاتها واقفة كتوجد راسها تخرج من جناحها ..قالت ليها راه شادية فالباب قالت ليك بغيتيها

حلات روح الندى عينيها مصدومة قالت ليها شادية؟!! علاه شادية هنا؟

قالت ليها عبدية راه قالت لي نتي عيطتي ليها

قالت ليها روح الندى متحمسة سربي سربي دخليها جااااابها الله فوقتها

خرجات عبدية عندهم وشافت فمسعودة قالت ليها دخلي وهبطي راسك …راه والله وهزيتي تا يطير من الجدر ..نتي باينة ليا راسك تقل عليك

دفعاتها مسعودة بكتفها دخلات وجرات وراها شادية وبغات حتى يامنة دخل لاكن جراتها عبدية قالت ليها تسناي مك هنا

بلعات يامنة ريقها قالت ليها نتسناها في الكشينة حسن ليا

تسد باب الجناح ودخلات شادية ومها بجوج حانيين الراس وروح الندى كتشوف فيهم مستغربة

قالت ليها

شادية؟!! شكون هاد المرى اللي معاك ؟

حدرات شادية عينيها وهضرات مسعودة قالت ليها مها نعام الاللة

هزات روح الندى حاجبها قالت ليها مها؟!!

قالت ليها مسعودة كتبوحط ..اه الاللة مها ..عاد كيف تجمعت ببناتي ..جيت قاصداك والمقصود الله ..نتي ولية وعارفة بحق الوليات ..وانا غا مرى وحدانية ببناتي لا راجل لا والي لا تالي ..

هزات روح الندى يدها بعفوية كنحرك صبعانها قالت ليها هضري هضري دغيا شنو عندك سربي راسك

دورات مسعودة عينيها فجنابها قالت ليها الاللة روح الندى .. بنتي كانت جارية عند المرحوم ولدكم ..ودابا الاللة جيناك قاصدينك بالتيلاد اللي فكرشها منكم

تصدمات روح الندى هزات حاجبها قالت ليها واش عارفة شنو كتقولي ولا لا؟!!! اش هاد الخرايف؟

بلعات مسعودة ريقها قالت ليها والله الاللة ماخرايف..بنتي حاملة من المرحوم السلطان ..هاهي قدامكم الاللة ..جيبو ليها لحكيمة دوز عليها

قالت روح الندى بغضب. واش ساخية براسك؟! كيفاش حاملة من السلطان

شافت فشادية اللي مهبطة راسها كتبكي وقالت ليها. نطقي نتي تكلمي!!

قالت ليها شادية مي عندها الحق الاللة..

ضحكات روح الندى قالت ليها مزيااان..غير نتي حملي مع العبيد واجي عندي انا قولي ليا ولدكم ؟؟ لا ولاهيلا زوينة

قالت ليها مسعودة غير ماضلميناش الاللة روح الندى..نتي القلب الكبير والسما الصافية ..ماترضاي بالضلم والناس كلها تشهد عليك غير بكلام الخير ..

قالت ليها روح الندى الضلم جايبيونا نتوما..بنتك الاللة ماخلات لا عبيد لا خدم وهربات من القصر وعاودات رجعات..زايدون ليلة ولا جوج ماعندهم ما يقضيو ليها .

دابا خليني من هادشي. هادا .شادية اجي لهنا بغيتك ..الى كنتي باغا غير تستري غادي نتستر عليك ..يالاه زيدي

شافت شادية فمها اللي مافهمات والو كتمتم قالت ليها شنو ماصيرنا الاللة؟

صفقات روح الندى بيديها للوصيفات دخلو وقالت ليهم خودو هاد السيدة عطيوها تاكل ..وتهلاو فيها

داو مسعودة وهي كتمتم ماخلاوها حتى تهضر وبقات شادية ساكتة حادرة راسها قدام روح الندى اللي هازة حاجبها فيها وقالت ليها

قتلك الجوع والزلط قلتي نمشي ندي ليهم كرش؟!!..ماحشميتيش يا اللفعة

حنات شادية راسها قالت ليها حاشا يالاللة

جلسات روح الندى كتنهد. قالت ليها زيدي. زيدي سربنيني شوفي ليا شنو كاين .. وشوفي ليا هاد المرة خط القلب وولدي واش باقا تابعاه الموت ولا لا يالاه طلقيني

جلسات شادية كتمسح دموعها ساكتة وجلسات قدامها روح الندى متحمسة قالت ليها يالاه سربي قولي ليا شنو كاين ..ماتنساي حتى حاجة

شدات شادية يدها كتشوف قالت ليها باش نبدا ليك

قالت ليها روح الندى فرحانة متحمسة بداي ليا بخط القلب..شنو كيقول ؟

طلات شادية على يدهت قالت ليها قلب فرحان وتروى من بعد ما كان عطشان … تلم الجرح الاللة روح الندى ..

قالت ليها روح الندى شوفي ليا شنو كاين شنو غيوقع من بعد هاد اللمة الزينة

قالت ليها شادية قريب الاللة تكمل الفرحة ..كنشوفك نخلة مجردة فجنان..

سدات روح الندى عينيها فرحانة كتسمع وقالت ليها وشهرزاد بنت الحرام شنو مصيرها ؟

قالت ليها شادية واش هي اللي زعرك وقمحية ووطيلة وعيونها خضرة؟

تنهدات روح الندى قالت ليها هيااا هاديك. الحرام

قالت ليها شادية جاياك منها دقة غتقسم قلب على جوج …

حلتن روح الندى عينيها قالت ليها كيفاش دقة؟! شنو غدير ليا ؟

قالت ليها دقة غتزهق فيها روح الاللة روح الندى ..

شهقات روح الندى مخلوعة قالت ليها روح من اويلي؟

قالت ليها شادية روح ولدك الاللة

شدات روح الندى وجهها قالت ليها اوييلي وحدي مزالة الموت تابعة ولدي

قالت شادية باستغراب

واش مولاي مزال حي الاللة؟!! الطالع كيقول مزال تابعاه الموت ؟!! الموت كاينة والروح طايحة وقربات الاللة روح الند ى..ماعندك عليها لاين

شداتها روح الندى قالت ليها سكتييي..سكتي قطعي الحس ماخاص حتى واحد يسمع بهاد الخبار ..هاد بنت الحرام ماخصهاض تبقا حية.. تبعاتني فصحتي وفبلادي وارضي وعرشي وولدي..هي راس الحربة خاصني نصفيها ليها قبل ماتصفيها ليا

ناضت روح الندى كتمشي وتجي وتفكر وشادية جالسة مصدومة كتهضر بوحدها ..السلطان يور عايش؟!!!

قالت ليها روح الندى قطعي حسك ..الى مشا حتى عرف شي واحد بهادشي غنصفيها لمك وختك قدام عينيك .سمعتي..سيري دابا خرجي ومننوع تخرجي من القصر..هنا غتبقاي

سفقات روح الندى للخدم دخلو عندها قالت ليها عطيوها بيت قريب ليا هي وطاسيلتها يعيشو فيه

حدرات وحدة من الخدم راسها خرجات ومشات عند طامو خبراتها وطامو قالتها للمسير والمسير مشا وصلها لشهرزاد اللي بقات كدور عينيها وتفكر قالت ليه شكون هادو ؟!! هادي غتبقا دخل لينا فالحاشية ديالها شي مور شي وجالسة كتفرق عليهم فالبيوت تقول هي مولات القصر؟!! سير عطيهم بيت لتحت بين الخدم حتى نشوف شنو ندير معاهم وجيب ليا خبارهم شكون هما وشكون يكونو وعلاش جاو

بقات روح الندى كتفكو فبيتها وغادية جايا فاللخر عيطات على شامة واستقبلاتهت بابتسامة وجلسو على برادداتاي كيتجمعو

تبسمات روح الندى قالت ليها اللي نطولوه نقصروه الاللة شامة.. انا كنشوف الحقد فعينيك من جهة شهرزاد..ميمكنش ام ولي العهد تخلي ضرايرها فالتيقار ومتيجي منهم سهد

سكتات شامة كتشوف قدامها مطولا وروح الندى كتشوف فيها قالت ليها وحدة بحال شهرزاد ميمكنش تخليكم فالتيقار ..مدام انا اللي بعيدة عليها ووصلاتني نارها فكيفاش عايشين معاها نتوما

هزات شامة راسها قالت ليها شنو بغيتي اروح الندى مني ؟ جيبي اخر الكلام

تبسمات روح الندى قالت ليها بغيت نعرف كولشي على شهرزاد .ماضيها وحاضرها ..كيفاش حتى وصلات لهاد المكانة وولدات جوج امراء زعما؟!

تنهدات شامة قالت ليها شهرزاد. خت خليفة خورسان رسلها ليه الخليفة هدية وتزوجها السلطان من مور ولدات ليه الامير الاول.

استغربات روح التدى قالت ليها علاش كتهضري بهاد الكراهية جيهة شهرزاد؟ وصلاتك بشي حاجة

وقفات شامة قالت ليها بحقد وفمها كيترعد..انا زوجة السلطان الاولى ..وانا اللي جبت ليه ولي العهد الاول ..ولاكن شهرزاد والخبث ديالها تسببات لي فموت ولدي ..ورداتني اللور ورجعات هي القدام ..فاش جات لقاتني بولدي..ولاكن بغات تبقا هي ام ولي العهد..واستغلت فترة الوباء اللي مرينا منها وطلاتني بيه واخا كنت بعيدة عليها انا وولدي..بسببها وصل الوباء لولدي ومات ..كانت بغات تقتلنا بجوج

بقات روح الندى ساكتة مصدومة كتشوف قدامها وقالت ليها لهاد الدرجة وصلتي فالخبث اشهرزاد!!! والسلطان فين كان فاش وقع هادشي كامل

قالت ليها شهرزاد السلطان ساعتها كان فالحج ..جا لقا ولدو مات والوباء طالي الدنيا.. ردي بالك من شهرزاد راه ابليس فصفة مرى..كان كيحساب ليها ولدها هوا ولي العهد وفاش بان ولدك راه وصلات حتى للموت من قوة الصدمة

ناضت روح الندى كتنهد قالت ليها ووصلات اللي بغات ..انا ونتي اشامة فكفة وحدة..سبابنا هي شهرزاد..غتعطيني كاع التفاصيل على حياتها من قبل حتى لدابا… باش نقدر نعطيها الدقة اللي ماتعاودش مرة اخرى

يتبع...

‎