قصة ذو التيجان

ما ذا التقاطعُ في الإسلامِ بينكمُ وأنتمُ يا عبادَ الله إخوانُ

ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ

يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ

بالأمسِ كانوا ملوكًا في منازِلِهِم واليومَ همْ في بلادِ الكفرِ عُبدانُ

فلو تراهمْ حيارى لا دليلَ لهمْ عليهِمُ منْ ثيابِ الذلِّ ألوانُ

ولو رأيتَ بكاهُم عندَ بيعِهِمُ لهالَكَ الأمرُ واستهوتْكَ أحزانُ

يا رُبَّ أمٍّ وطفلٍ حِيلََ بينهمَا كما تُفرَّقُ أرواحٌ وأبدانُ

و حسناءٍ مثلَ حسنِ الشمسِ إذْ طلعتْ كأنما هي ياقوتٌ ومَرجانُ

يقودُها العلجُ للمكروهِ مُكرهةً والعينُ باكيةُ والقلبُ حَيرانُ

لمِثلِ هذا يذوبُ القلبُ من كمدٍ إنْ كانَ في القلبِ إسلامٌ

وإيمانُ

تَمعَّن يا قارئِي في الابيَاتِ جيّدا فبِها مُلخَّصُُ لٍسطور ذُو التِّيجان ُ

تتمة عروس الملك السابعة. تحت عنوان. " ذو التيجان "

للكاتبة G.T ✅

شكون فالاض اشقى من المُحب

واخا يكون الهوى حلو فالمداق

تلقاه كيبكي من حين لحين

ويبكي الى دنى من الفراق

تسخن عينه فالتنائي

وتبكي عينو فالتلاقي..

يا ملقانا ليوم بعد سنين طويلة

ها الايام جابتك بين يوم وليلة ..

والليلة يتقابلو الوجوه .. ويتقابلو القلوب .. ويبان شنو بضمر فالقلب وتبان الحقيقة .

هاكا دخلات ملكتنا لقصرها من بعد ما ضربات طريق طويلة وخططات خطط كثيرة.. ولاكن شكون قال غتمي السفينة عكس الطريق اللي رسمات ليها .. شكون قال تلعب الاقدار لعبتها وتجمع الحباب والصحاب والسنين اللي مرت مريرة .. هادي ملكتنا روح الندى .. داخلة لقصرها من جديد من بعد ما كانت فزيارةاستكشافيك لقصر الصفاف فالبلاد الجديدة اللي فتحو .. دخلات مع وصيفات والتبسيمة على وجهها .. مرى واشمن مرى .. الطولة والقد و، والزين كيقطر وكتفتن .. ملك على اصولها لافمشيتها لا فكلامها ..اما نضرتها ورموشها متقدرش توصفهم العين.. تخطي بأقدامها على الرخام وراسي على .. شعرها كحل كيلمع مجموع اللور وعلى تسريحتها توب شفاف اخضر .. مزينة بأغلى الحلي .. ولابسة افخم الثياب .. دوقها رفيع ما عليه كلام . وتبسمات وقالت وهي كتمشى وسط قصرها الفسيح وبصوتها الرنان خاطبات وصيفتها ورفيقة دوبها عبدية وقالت

.. عبدية… قولي للوصيفات يوجدو ليا الحمام .. الطريق لقصر الصفصاف كانت معدبة شوية

تبسمات عبدية وكانت مرى ربعينية فايتة لاللة روح الندى فالعمر .. غليضة وسمراء ومن وجهها كتبان مقبولة ولطيفة .ردات عليها بنفس الرقة وقالت

هي اللولة الاللة .. على سلامتك فقصرك .. نشاء الله تكون الزيارة عجباتك

تبسمات لاللة روح الندا وقالت ليها

شفت حتى عييت فالقصور .. ماشفت بحال هاد القصور الغربية.. الحق يتقال.. فالفن عطاو ما عندهم وسابقين العرب فالمعمار.. واخا قصورنا عربية بلدية ولاكن حتى هاد القصور ضي حاجة مكتوصفش

ابتسمت عبدية وهي مرافقها لجناحها وقالت : قصورنا الاللة واحات وجنة فوق الارض .. غير ملليتي منهم واقيلة

ضحكات لاللة روح الندى ومكملة طريقها لجناحها .. لاكن قبل ما توصل تقدم عبد من العبيد ديالها وقال حادر الراس.

مولاي يور كيتسناك فقاعة الضيافة الاللة ..

تلفتات براسها مرفوع ورقبتها حادة منحوتة ووجها صافي كيلمع وقالت

علاش فقاعة الضيافة؟ عندنا شي ضيف ؟

رد العابد وقال : ايه الاللة.. وقالك تكوني عندو فالحين

استغربات وضحكات كتقول .. شكون هاد الضيف ؟؟ وحنا براسنا ضياف جداد فهاد المدينة !! غريبة هادي

رجعات من طريقها قبل ما توصل لبيتها ونزلاتها بكل رقتها واناقتها لقاعة الضيافة في صالة فسيحة عريضة كيزنها الرجام والاصوار العالية والزخرفة بكل الالوان .. سرحات عينيها مالقات حتى واحد فهاد القاعة ؟ استغربات وقالت مع راسها .. فين الضيف ؟ وفين ولدي يور ؟اش هاد الملاغة الباسلة ؟

تقدمات عبدية كتزرب فالمشية وقالت على عجلة .. لاللة .. سيدي. يور جاه مرسول مستعجل مشا يطركو وقالي نعلمك تستقبلي الضيف حتى يشوف شنو جاي مع المرسول ويلحق عليكم

تنهدات رافعة راسها وسدات عينيها وقالت

هاد المرسول ما لقا فوقاش يجي غير مع وقت هاد الضيف؟ وشكون هاد الضيف اللي عارض عليه ولدي يور !! وبلا خباري

تسمع النفار فساحات القصر وكأنه سلطان او ملك داخل .. تلفتات عبدية كضحك وقالت ..ها جوابك وصل الاللة فالحين ماعطلكش..مايكون غير هاد الضيف المهم عند سيدي يور هوا اللي وصل !!

استغربات وتقدامات جهة الدهلة الفسيحة وقفات تستقبلو وقالت كتستفسر.. وعلاش عليه هاد العياط وهاد اللغط كامل!! وعلاش دار ليه الامير يور هاد الاستقبال ..شكون هوا؟؟

تنهدات وقفات رافعة راسها وسرحات قفطانها الاخضر المرصع بالاحجار بيديها وحطات يدها على مضمتها كتبتها وتجهز نفسها للاستقبال.. بكل اناقة ملكات العالم ورقتهم ونعومتهم ابتسمت وشافت جهة البوابة الكبيرة من الخشب المنقوش واللي عالية حتى للسقف وهي كتتحل فقلب القصر .. بأدق التفاصيل. وابطأ حركة وحماس كبير لا يوصف وخطوات المشي على الاقدام اللي كدق فودنيها وتقرب .. دخل راجل قوي شديد البنية وراسه فالارض لباسه لباس الفرسان ويدو على سيفه من اتباع الضيف ووقف قدام الملكة. روح الندى وشهر سيفه فالقاعة عطاها التحية راكع على رجليه وقال بصوته القوي المسموع فأرجاء القاعة الفسيحة ..

جلالة الملك محمد اصيل المرتضي بالله ..

يا لهاذه الكلمات الحارقة والاحرف الحادة اللي ختارقات مسمعها وبخات فجسدها وعقلها بركان حامي من حر الصدمة حتى كانت غتفقد بصرها وهي كتشوف فالوفد بعد القاء التحية ليها رجع ووقف ولقا تحيتو الخاصة شاهر سيفه هوا والثنائي دياله المقابل ليه وركعو في اتسقبال ضيفها ذو الاسم الطويل العريض اللي دخل على ساحة ضيافتها بهبته وقامته في لباس ملكي بدون سيف او سلاح .. رفع عيونه الحادة اللي يستحيل تنساها واشاف فيها بتبات وفخامة يتعرف عليها لاكن كانت الصدمة والطامة الكبرى لما جات عينو فعينها وكانت صدمته لا تقل شيئا عن صدمتها وبقاو النضرات متبادلة في ذهول وسط الحضور كأنه شي حلم !! كأنه شي كابوس وتحقق! .. كل واحد فيهم كيشوف فالاخر ويحاول يتأكد من اللي كتشوفو عينه .. النضارات ختارقات الاعين حتى كانت لاللة روح الندا غتشك فراسها وفعقلها ..فجأة تكلمجمع اطراف عينيه اكثر كيحدق فيها وقال بصوت كيخرج من فمو بصعوبة

روح الندى!!!

أكد ليها صوتو حقيقة ما كتشوف قدامها وطاحت الغشاوة على عينيه ورفعات راسها شوية وعينيها كيدورو وطاحت على طولها كانت غتجي فالارض لولا العبيد والخدم دارو بيها فالحين شدوها فاقدة الوعي ديالها والكل كيجري عندها

كانه مشا النور فالقصر !! كانه فيضان هاج وخدا معاه كلشي لدرجة قطع الحس وحتى صوت مابقا كيتسمع .. عاصفة. عصفات لاحت كل واحد فجهة .. لاللة روح الندى فوق لحاف مزوق بين خدمها فزاوية من القاعة سخفانة وكتشوف فالسقف كأنها فقدات البصر ، والملك محمد اصيل المرتضي بالله على برا فالحديقة اللي قدام داك الباب الكبير منين دخل.. واقف مخنوق كيحل عنق السترة الكحلة اللي لابس بعنف ويدو على جنبو وعينيه فالارض كيحاول كيتنفس.. مد ليه عبد من عبيد القصر كاس دالماء وخداه واحد من الوفد مدو لواحد اخر داق منو ومن بعد دقيقة تأكدو من الماء سليم مدوه للملك اللي شدو بلا ميتلفت ليه شرب كأنه عمرو شرب..بعد الحادث اللي مافهم فيه حتى واحد شي حاجة كلشي خدا اختياطاتهوالحذر يالو من التاني.. انا الاصيل ففقد تركيزو واحد اللحضة وبدا كيهضر بوحدو غادي جاي والكاس فيدو ويردد .. هادي نتي… نتي اروح الندى .. حياني الله حتى لاقاني بيك .. بزاااف ديال الاسئلة غادي تجاوبي عليهم ..وبزز منك .

شار بيدو لواحد من الوفد قاليه. دخل تأكد واش فاقت من السخفة وقوليها جلالة الملك كيتسناك على انفراد فالجردة ..

تنهد وهز راسو فالسما كيردد.. خليها تخرج عندي لهنا ..

رجع الرفد وصل الرسالة كما هي لروح الندى اللي باقا كما هي وقالها باحترام تام ..لاكن هي حركات بؤبؤ عينها ومدات يدها قائلة ..عبدية …ديني لجناحي ..

شدات فيها عبدية وقفوها وهي مزالة تحت تأثير الصدمة كتشوف جهة الباب كأنها تشيرات وبغات طلع لجناحها ..لاكن دخل عليها الاصيل من بعد ما رد عليه الرفد فالحين ووقف قدامها كيشوف فيها واشوفيه بتمعن وهز صبعو وراسو وقال..

مغتمشي لحتى بلاصة .. حتى توضحي ليا بزاف ديال الامور

هزات صدرها كتنفس وقالت بصوت متعب شادة فيد عبدية ..

ماعندي منوضح ليك .. انا محتاحة نرتاح

زادت خلفة تحركات ورد عليها بصوت بحال الرعد وسط القاعة قاليها ..هاد الليلة …هاد الليلة غادي نعرف داكشي اللي سنين باغي نعرفو … هاد الليلة ومغترتاحي حتى تحطي الحقيقة اللي هربتي بيها

تلفتات كتسائل وترمش بتعب وقالت

اشمن حقيقة ؟؟؟ شنو كيقول

ردت عبدية بخفوت قالت ليها عنداك دخل الحقيقة برجلها مع هاد الباب ويشوف هادشي ونوليو كنشرحو جوج حقيقات

هزات لاللة روح الندى عينيها بانتباه وبلعات ريقها تفكرات ولدها وشافت فيه كترمش قالت ليه بصوت متعب ويدها على صدرها

انا دابا مامستاعداش نهضر .. غنطلع لجناحي نرتاح ومن بعد نهضرو

هز حواجبو بجوج بحدة وقال : غاتهضري دابا…ومكاينش شي حاجة سميتها غدا

تنهدات بتعب وسدات عينيها مطولا وجمعات طاقتها وقوتها ورقفات مقادة كتشوف فيه وتبلع ريقها بصعوبة

رافقو جلالة الملك للديوان ..

هزات راسها ومشات هي وياه لديوان رجلو على رجلها ودخلو واسد الباب عليهم وسط الديوان الملكي ووقفات هزات راسها بتحدي وقالت

ماتنساش باللي راك وسط القصر ديالي ..نقدر فأي لحضة نقتلك

هز راسه كيضحكوقال

معلوم هادا طبعك ..مولفة بالغدر نتوقع منك أي حاجة …

ضحك بسخرية ورجع اللور كيطلع فيها ويهبط من ساسها راسها ويقول

وليتي ملكة ..وعندك مملكة …ياك هادشي اللي كنتي باغا توصلي ليه من صغرك ..هادشي اللي كتسعاي ليه وماقدرتيش عليه فالقصر ديالي

هزات راسها كضحك وقالت ليه : الغدر ؟؟ شوف شكوم كيهضر على الغدر ..سمح ليا يا جلالة الملك..انا مابغيتش نقلل من احترامك ..ولاكن الغدار هوا نتا ..اما انا ضحية..

دار يدو فجنابو مصدوم وحل عينيه قاليها ضحية؟!!!

ضحك وقال ضحية ديالاش؟؟ نتي ضحية؟؟ !!

هر يديه فالسماء كيضحك ودار فبلاصتو كيشوف ارجاء المكان وقال.. ااخر حاجة كنت كنتوقعها هي نتلاقا بيك هاد النهار ..لا واللي اكثر كاع ..تقوليا ضحية!!

شاف فيها بحدة وقال ليها ضحية ياك!!!! براكة متكدبي على راسك.. باراكة ماتنافقي راسك ونتي عارفة وانا عارف.. المهم دابا هاد الهضرة خاوية ماعندي مندير بيها … فين هوا ولدي؟

بلعات ريقها وهزات راسها كتشوف فجنابها وزفرات قالت ليه ..ولدك؟؟ على اشمن ولد كتكلم ؟

قرب منها كيشوف فيها بحدة وقال: اشمن ولد ؟؟؟ ااااشمن ولد؟؟

هزات كتافها وقالت ليه .. الى كنتي كتهضر على الولد اللي حملت بيه ؟؟

حرك راسو وقال كيزفر

اه هوا هاداك ..فين راه؟

ميلات فمها بتساؤل وقالت ماعرفتش؟؟

عقد حجبانو وهز يدو كيوف فيها قاليها كيفاش معرفتش؟؟ ولدي كان فكرشك فين هوا؟؟

هزات كتافها بجوج بتساؤل وقالت ماعرفتش ؟؟ بحالي بحالك ..دزت من ضروف صعيبة فاش ولدتو ومالقيت كي ندير ليه وعطيتو ..

تصدم وحل عينيه قاليها كيفا؟؟؟ عطيتيه ؟؟

رجعات اللور عطاتو بهضرها وشافت جنبها كتزفر وقالت. عطيتو حيت ماعندي باش نعيشو…عطيتو لناس ميسورين باش يقدو يعيشوه .. تلفتات شافت فيه وقالت ..من ديك الساعة ماسمعت عليه حتى خبار وماعرفتوش فين ولا حتى هما فين مشاو ..شدو الولد..خافو نرجع فيه ..باتو ماصبحو حيت مكيولدوش اصلا.

حل فمو مصدوم وهز يدو وجمع القبضة زيرها عطاها ليها نيشان دارت حدا وجهها وضربات لوحة فنية موراها حتى تشتات فالارض وقال كينهج ويشوف فيها وهي يديها على ودنيها وعينيها مسدودين

ولدي ..ولديييي انااا عطيتيه لناس اخرين؟؟؟ ولدي اروح النداااا؟؟؟ ولدي انا وولدك نتي ..قدرتي تفرطي فولدك وتعطيه وتجي تقوليها ليا بدم بادر

حنات راسها بعدات من قدامو شوية وهزات وجهها قالت ليه بكلرياء.. انا عمرني توقعت غادي نتلاقا بيك شي نهار ..لولا ربيبي يور اللي لاقاني بيك اليوم عمرني كنت متوقعة نشوفك ..وهاد التفسيرات هادي كلها انا ماشي مجبرة باش نعطيها ليك.. وماشي شغلك فيا وفكبدتي ..الحمد لله عرضني الله بيور ولقيتو يالاه تزاد ومو ماتت وربيتو بحال ولدي..اما ولدك نتا كان غيكون عالة عليا ونشوف فيه صورت ومادرزتي عليا فداك القبر ماشي القصر

هاج بركان الملك وماقدرش يتيق داكشي اللي كتشمعو ودنيه من فم روح الندى .. بقا كيضحك من قوة الصدمة وجلس على واحد الكرسي كيشوف قدامو بدون تصديق وقال

ميمكنش هادشي اللي كتقولي !! هادشي مكياقبلوش العقل.. عطيتي ولدك لناس اخرين غيير باش ميفكرش فيا … لهاد الدرجة مهم عندك انا واكثر من كبدتك!!!

جلسات على كرسي اخر ودارت رجل على رجل رافعة راسها وقالبة وجهاا وقالت ببرودة

نتا معارفش شنو داز عليا ..معارفش اشنو عشت وشنو شفت وشنو قاصيت. من نهار خوجت من داك القبر ديالك.. حتى واحد معارف اشنو داز عليا وبكل سهولة كتحكم عليا و كتقول ليا عطيتي كبدتك!!! اشنو كان خاصني ندير هاا؟؟ شنو ؟ نخليه يموت بالجوع ؟؟ والبرد ..ولا يتشوط بالشمي وحرارة الصهد ؟ نخليه يعاني معايا وانا براسي مقادراش نهز حتى راسي وانا فديك السن الصغير.. هادشي اللي بغيتي بغيتي نموتو بجوج انا وياه بالجوع والبرد وقلة الشيء باش سيدايتكم تبقا مرتاح وتقول ااه ماتت مسكينة مافرطاتش فولدها ..اعضم مرى وضحات تضحية غيذكرها التارييخ !!!

شافت فيه معجبة من كلامه وهي كتشرح ليه ..ناض وقف هز راسو وتقدم ناحيتها حامع اطراف عينيه وقال ليها بالسبابة

حتى القطة اللي قطة ومكترميش ولادها …الكلبة وكترضع وتحضن ونتي اللي …نتي شكون نتي ؟؟ واش نتي بنادم ؟؟

غزز اسنانه وقرب كيهضر مقابل مع وجهها وشدها من عنقها بيد وحدة حتى طلعو عينيها وقاليها مخرج عينيه فيها

عنداك يحساب ليك وليتي ملكة ولا سلطانة غادي تخلعيني ولا منقدرش نطلع روحك بيدي!! عنداك تيقي بهاد السلطة ديالك وهاد الشوية دالعبيد اللي دايرين بيك ويحساب ليك غيحميوك مني ولا غتصداي ليا بيهم … الى كنتي نسيتي شكون انا غنفكرك فيا .. وبالطريقة اللي تليق بيك بحال العادة

شدات فيدو كتحاول طلع النفس وهوا كيروقفها على رجليها بديك الخنقة حتى وقفات ورجع وجهها صفر كتشهق عاد طلق منها طاحت على الكرسي كتنفس كأنها غتموت وهوا هاز راسه كيشوف فيها كترد الروح وتشهق .. حطات يدها على عنقها حتى رجعات فيها الروخ وبلعات ريقها بصعوبة ووقفات كتشوف فيه هازة راسها بتحدي وعنقها حمر مطبع وقالت ليه باستفزاز

مغتقدرش تقتلني … وماعندكش القوة باش تقتلني

نقض عليها مرة اخرى بخنقة بيدو وميشوف فيها من فوق مناخرو وقال ليها يالاه نشوفو واش نقدر

بلعات ريقها ونطقات بصعوبة كتصارع الخنقة وقالت ليه

متقدرش حيت انا اللي عارفة لمن عطيت الولد ..

حل عينيه ورخا يدو على غنقو شوية ودفعاتها ليه بيدها كتنفس وتخزر فيه ورجعات هزات راسها قائلة بابتسامة مستفزة

انا هي الطرف دالخيط االوحيد. اللي غيوصلك لولدك … حتى واحد معارف بقصة الولد من غيري ..من نهار خرجت من عندكم .. والى قتلتيني عمرك مغتشوف ولدك ..اما الى بقيت حية. يا جلالة الملك ..هه. محمد الاصيل المرتضي بالله .. فحتى املك فأنك تلقا ولدك غيبقا حي…ونتا مغتقدرش تقتل الامل الوحيد..وتقطع الخيط الوحيد اللي فيدك .

تنهدات ومشات حدا لوحة فنية فيها مرى هازة ولد كتأمل فيها وقالت .. ماعندكش القوة .. والقدرة حتى تمس شعرة مني من هنا لفوق.. هادا علاش غادي تبرد الدم ديالك .. وترجع للقصر ديالك بحال الى حتى حاجة ماوقعات ..وتخلي حتى نسترجع طاقتي اللي استنزفت معاك دابا عاد نفكرو شنو نديرو ..ولا نبداو رحلة البحث على هاد الولد من النقطة اللي عارفة انا طبعا..واللي معارفها حتى واحد من غيري ..اشنو رأيك فهاد الكلام عجبك ياك

سمع لكلامها المستفز من اوله لاخره وقرب ليها كيشوف فعينيها وفداتو طاقة سلبية كبيرة ماكرهش كيخرجها فيها ويبرد ..جمع اطراف عينيه مرة اخرى كيشوف فملامح وجهها وقال باشمأزاز

شفت حتى عييت فالحريم ..والنسا ديال الدنيا والدين..وبحالك نتي عمرني شفت ..شيطان فالسفة دملاك… انا ماعرفتش كفاش حتى تجمعت بيك شي نهار ..

حط يديه على جنابو وقال هاز راسو . هاه ..قولي ليا ..شحال من واحد خدعتي بهاد الوجه وهاد السيفة ..هه باينة ماشي ساهل تولي ملكة ولا توصلي لهاد المقام ..هاد الكمارة اللي قدامي كتلمح لبزاف ديال الحوايج .. وبزاف ديال الخديعة والخبث اللي مخبيين ورا هاد الجلدة اللي لابسة وهاد عينين عينين القطة اللي كيتسمكنو ..

دووات عينيها بجنابها وراسها مرفوع كتسمع ليه بلا متملل حتى رجع خطوة اللور وقاليها ماعندك فين تفلتي اروح الندى .. مزال غتخلصي على داكشي كاع اللي درتي وعينيك محلولين ..مغنسالي معاك حتى نشوفك كترجايني نوحمك بحاال اللي كنتي كديري ونتي جدرة فالارض

عطاها ضهرو ومشا ونهارت قوتها وفشلت فوق واحد الكرسي كترعد وتردد ة بصوت غير مسموع

حتى نتا غتخلص على كاع داكشي اللي درتي..وغدفع الثمن غااالي..وغالي بزاف

خرج بحال التور كيفك على صدرو عقاد السترة من الخنقة ووقف وسط القاعة الكبيرة فين كاين الخدم والحشم وتلفت على ليمن لقا عبدية فواحد القنت واقفة كتشوف فيه بنص عين وراسها فالارض .. حقق فيها مزيان وطلعها من راسها لرجليها وزاد خلفة مع الباب خرج هوا والوفد ديالو مشا ودخلات عبدية من موراه للديوان كتجري لقات روح الندى كترجف فبلاصتها وتنفس الصعداء ومشات شدات فيها كتسول على حالها ومالها ..

قالت ليها الملكة بتعب وارهاق

ديني لجناحي..ديني لجناحي حاسة بالموت شداني .. ديني وقلبي ليا على يور فين غطس نشوف اش بينو وبين الاصيل ..شنو اللي كيوقع وراء ضهري وانا مافخباريش وكفاش حتى عرض عليه لهنا وعلاش وشنو السبب..منقدرش نتنفس اعبدية حتى نعرف شنو كيوقع ..

طلعوها لحناحها .

طلعاتها عبدية لجناحها حيدو ليها حوايجها وطاحت فالفراش مريضة وقوتها منهارة وبغات تبقا بوحدها ..سدو عليها كاع الابواب وتكات على وسادتها كتبكي وناضت عضات ديك الوسادة من حر الصدمة والشمتة وبدات تلوح فالمخاد من بلاصتها وتغوت بوحدها حتى رجعات عبدية لقاتها كتغوت وشعرها محلول وجالسة فالفراش والدنيا مرونة وشدات فيها كتهدن من روعها ..وقفات الملكة عاى ركابيها وسط الفراش كتبكي وتغوت وتردد

كلشي اللي خططت ليه مشا ..كاع الطريق اللي ضربت والصبر اللي صبرت وعاد المسافة وهاد النخطيط كلشي ضاع ..كلشي كلشي وفجأة طلع ليا الاصيل من الجنب..علاش علاااا طلع ليا فهاد الوقت علاش كلشي ضدي كلشي خرج على سيطرتي ..فين يووووووووووووووور

وصل الملك للقصر في حلة غضب رهيبة ونزل على غير المعتاد وسط الخدم وحراسه كينفر ..تعرض طريقو شاب في ريعان شبابه من لباسه ولباقته كيبان عليه امير من الامراء .. حذر ليه الراس بغا يكلمو وقال مولاي ..

زاد الملك ماجاوبوش خلاها كيشوف فيه ودخل لجناحو هاز صبعانو بجوج كيكلم حارسه الشخصي اللي تابعه وقال

مانشوف حتى واحد وميدخل عندي حتى واحد ..

تسدو عليه البيبان وبقا بوحدو كيصارع الغضب ، ضرب تخفة فنية بقوة هرسها وحط قبضات يديه بجوج على الطاولة كيسوط ويردد

غندمك على هادشي.. غندمك اروح الوييل .

بعد الهدنة والعاصفة اللي مرات وقفات كتمشي فقفطان طويل ابيض بلا حزام محلول من جنابها حتى للركبة وكتمشي وتجي فبيتها معنقة يد ويد الاخرى على فمها كتفكر .. شعرها مجموع اللور مرخوف ووجها شاحب وعينيها كيدورو ..دخلات عبدية سدات الباب وراها وقالت

يور مكاينش .. قلبنا عليه القصر سفاه على علاه الاللة

دقات بأصابعها على فمها كتفكر وقالت

فين غيكون مشا ..الفجر هادا والنهار طلع !! فين غيكون غبر .. عنداك تكون واقعة ليه شي حاجة؟ قلبتو عليه فالجنانات لايكون جالس مع شي وحدة ومخليني انا هنا كنتقلى بوحدي؟

عبدية : قلبنا الارض كلها وآثارو مكاينش الاللة

ضربات فخادها كتسوط وجلسات كتفكر قائلة :

فين مشا هادا حتى هوا ؟؟ فين غطس فين .. ااه. عرفتي شنو ..جيبي ليا شادية .. سربي راسك جيبي ليا شادية نشوف اشنو عندها ماتقول ليا

خرجات عبدية كتجري فالقصر والكل عاد كيفيق ودخلات على بيت من البيوت كانو فيه جوج بنات ناعسين حدا بعضياتهم والغطا طايح فالارض.. مشات عبدية جرات شادية اللي غارقة فنعاسها من رجلها وقالت ليها

نوضي تكلمي ..لاللة روح الندى بغاتك فجناحها فالحين

حلات شادية عيونها الزرقاء وحكاتهم كتردد بشفايفها الصغيرة

شنو واقع ؟

عبدية: نوضي تبعيني سربي راسك

خلاتها عبدية تلبس وخرجات للمطبخ القصر شافت فطور الملكة فين وصل وطلات عليه سمحات ليهم يسيفطوه لجناحها فين حين وصلات شادية بقفطانها الاحمر والشد امازيغي على راسها لجناح الملكة..حلو ليها العبيد الباب دخلت وتقدمت حادرة راسها قائلة

عبدية قالت ليا نجي عندك الاللة مولاتي

هزات روح الندى راسها وقالت ليها بصرامة

اولا هاديك مكنقولوش ليها عبدية حرفية..هاديك سميتها لاللة عبدية .. ودابا اجي كملي ليا الخط اللي مكملتيش ليا فتاروادانت

جلسات شادية جنب الملكة روح الندى وبدات تقرا كفها حتى بدا اللون دوجهها كيتبدل ..تخلعات روح الندى وجمعات كفها وقالت

شنو كاين .. شنوو نطقي غيطيحي ليا النقطة

ردت شادية كتمتم وترمش وتشوف فيها وقالت

حرب الاللة ..حرب بحال الطوفان ..غيمشي فيها الغالي والنفيس..

برقو عيون روح الندى من الخلعة وقالت: شكون هاد الغالي والنفيس؟؟ هضري

عطاتها يدها وبدات شادية تردد وقالت

هاد الارض الاللة ..هاد الارض هادي ملعونة .. هاد الارض هادي مزال غادي تهز ..مزال غادي تقلب سفاها على علاها .. الدم !!! الدم الاللة !!

ردت روح الندى وقالت

ديالمن؟؟ ديالمن هاد الدم هضري؟؟

بقات شادية كتحاول تفهم وقالت ليها

ماعرفتش الاللة .. هادشي كثير ..هادشي كيخلع ..كيخلع بزااف خاصنا نمشيو من هنا ..خاصنا نمشيو ولا هاد الطوفان غادي يهلكنا كاملين ..هاد الارض غتنفنينا ومتخلي حتى واحد فينا .. هادشي فيدك كيخلع. الاللة كيخلع بزاف

غززات روح الندى سنانها وقالت ليها .. كملي وقولي ليا شن و كاين بلا ماتبقاي تفتفي عليا حتى نتي

بلعات شادية ريقها وقالت ..ماباينش هادشي..هادشي تخربق عاوتاني!!! مابقيت فاهمة والو هادشي عاوتاني كيتحرك !! خاصنا نمشيو من هنا ولا ..ولا

روح الندى : ولا شنو ؟؟؟

شادية ولا راه غطيح ارواح عزيزة ..

بلعات روح الندى ريقها وقالت

روح من غطيح؟؟؟ هضري مرضيتيني

هزات شادية عينيها والدموع كتمشي فيهم وقالت

رر..رر..روح ..روح سيدي يور

كلام شادية كان غيسكت القلب لروح الندى ..جمعات يدها مخلوعة حطاتها على صدرها وقالت ليها بخوف

خرجي عليا … خرجي عليا اا

ناضت شادية مخلوعة خرجات من جناحها كتجري مشات لجناحها وسدات عليها الباب مخلوعة ..لقات ختها عيشة الشقراء حتى هي جالسة ماهامها غير كرشها ..كتفطر والهواء دالصباح من الشرفة كيضربها وماكايناش فهاد العالم .. سدات عينيها وقالت لشادية كتبنن

امممم .. اجي دوقي هاد الفطور شحال بنين .. انا صافي حبيت هاد البلاد ودخلت ليا بين عروقي

وقفات عليها شادية حيدات ليها اللقمة من فمها وقالت

هاد البلاد غادي تصفيها لينا …نوضي جمعي حوايجك ..غنرجعو منين جينا

بعدات عيشة راسها وقالت كتكمل ماكلتها

رجعي نتي… انا ماشي هبيلة نرجع لديك الخربة فين كبرنا… تلقاي مسعودة كتقلب علينا بحال الحمقة باش طمرتا حيين

جلسات شادية ودارت يدها على خدها وقالت

كما كان الحال كان بالنا هاني حسن من دابا

هزات عيشة حاجبها وقالت بفمها عامر كيتشتت بالنعمة

فين اودي هاني!!! فييين؟

خربة كلها تراب وفراش كلو مقطع وبيت قد القبر جامعنا كاملين فالارض !! عضامنا شربو البرد ومي كل صباح تصبح علينا بالشقا ..غير نتي كنتي كضلي فالسرحة من الصباح حتى تودن المغرب وكترجعي كاملك مشوطة !! نسيتي ولا نفكرك ؟؟ ياكما عيشة القصور نساتك فيام الجوع والكحط..نفطرو بالقتيلة علو الطبلة والحسوى سلقات لينا مسارنا ..لا ملاحف كيف الناس ولا ماكلة زينة!! شكون قال شي نهار غادي نعيشو هاد العيشة ولا نرحلو مع سطانتنا لبلاد بعيدة ؟ نسيتي؟؟ كانو كدامنا قصح من الحجرة …الحجرة كتفتت وكدامنا حرام واش بغاو يرطابو .. اما شعرنا بلا منهضر عليه ..غير القمل كلانا والمشطة رشات فراسنا ..وكتقولي ليا نرجعو لديك النوالة فين كنا عايشن ..شتي انا بت هنا نبت ..واخا تكون الموت كتسارا هنا ..اللهم نموت على شبعة ولا على فكعة ..الموت كاينة كاينة

تنهدات شادية وقالت ليها

خلينا نرجعو اعويشة ..اللهم لقمة يابسة ولا هاد العيشة ..الخلعة والرعب..ياك وليت كنهز الخط لناس القبيلة وبدينا كنترقعو قبل ماتنادي علينا الملكة ..ايوا نكملو على شغلنا حسن لينا

دورات عويشة راسها وهيا مربعة كتاكل وقالت

ياكما تيقت سفر مي مع ديك الهيشة ديال يامنا للسادات تزورها وخلاتنا فالقبيلة دايرين مابغينا يحساب ليك الى رجعنا غنلقاوها كما خليناها !! راه مي تكون رجعات شحال هادي وكتقلب علينا وتحلف فينا !! نسيتي البقرة والتور اللي جادت بيه الجماعة علينا فين رديناه!! والمعرة والعتروس والحولي والنعج ة اللي ردينا للقصر!! غترجع تلقا الزريبة خاوية و ..

دخلات عليهم عبدية لقاتهم جالسين وقالت ليهم اشمن زريبة واشمن عجل ولا بقرة ؟؟ شنو كتخططي نتي وياها؟

وقفو بجوج بالخلعة بداو يتمتمو وقالت شادية ..لا والو الاللة غير منهضرو على خربتنا

ردت عويشة وقالت.لاعساك راه بغات تهرب وترجع للقبيلة

حلات عبدية عينيها وقالت

كيفاش؟؟ واش عرفتي فين نتي ولا غير مدرمة ؟؟

ردت عيشة وقالت ليها

شتي الاللة راه بغات ترجع للقبيلة .. ونزيدك الاللة ..راه فاش كنا فالدوار ..وكنا نضلر نسرحو العتروس والنعجة اللي نكسابو ..تلاقات بسيدي يور فالغابة ..وهضرات معاه شلا هضاضر وقالت ليه نتوما واكلين رزقنا .. ايوا وماعجبوش الحال وقرر يوهب الارض ديالو لناس القبيلة اللي مايكسابو مايعلامو بحالنا ..ووهب عجل وبقرة لكل محتاج ..ومي حتى هي عطاوها الجماعة تور وبقرة. وخروف ونعجة ..زعما باش يولدو وتعمر لينا الزريبة ..ولاكن حيت واحد ختنا هبيلة ناقصها عقل ولا منعرف ليا ..داتها مي لواحد السيد فالصحرا تزورها وخلاتي انا وهادي فالدار نردو الهيبة ..ولاكن حنا ..مشينا بعيد كاع..واستغلينا هاد هزان الخط ديالها اللي كضحل تهزو للبنات وضحك بيه ..رديناه حرفة ورديتا الدار زاوية.. وفاش بدينا نتمعششو منو سمعات بينا الملكة وهي اللي جمعاتني انا وختي وخوات لينا الزريبة باش نبقاو حداها وتشوف ليها شادية .. وسفراتنا معاها لهاد البلاد ..ودابا شادية قالت ليك بغات ترجع للقبيلة فتاروا دانت. و تمشي ترجع البهايم ديالنا من القصر لمي وتجلس معاها ..حيت مي دابا غتكون رجعات وكتقلب علينا فهمتي الحكاية ديالنا ..انا مابغيتش نمشي والى مشات هي مايبقا ليا هنا شغل وبزز مني غنرجع حتا انا للقبيلة غند مي وتهلكنا عصا ..

ولسان سليط عند عويشة ماكيقدوش الفم فين يتخشا.. اما الملك الاصيل فما غفا ليه جفن ديك الليلة ولا شاف شي غمضة من النعاس ولو غير قليلة ..بات اللي كيفكر وصبح فجناحو كيخمم ..مابقا معمر ليه راسو غير هاد الحريرة المحرحرة وولدو اللي معارف عليه حتى حاجة.. وكما قالت ليه روح الندى وتصاب عندها الحق..الى صفاها ليها غادي يقتل الامل ديالو فمرة ويقطع الخيط اللي رابطو بولدو المخفي ..وهاد العصيدة مكاين اللي يفكها غير شي تخميمة وشي حيلة يلوي بيها دراع روح الندى حتى تكر بالسر اللي عندها ..

وديك الساعة غيطوف بيها ويوريها جهنم الحمرا اللي عمرها شافتها فحياتها ..

جلس فالشرفة ديال جناحو كيخمم والفطور محطوط قدامو وباقي كما نزل ..ماداقو منو حتى جغمة ..

دخل عندو المستشار الاول ديالو والمخطط ودراعه الايمن وصبح عليه بالتحية وابتسم

مولاي … صباحك مبروك .. الى سمحتي ..

شار ليه الملك بيدو وهوا فسهوة جلسو وكمل المستشار اللي كان سنو كيوازي سن الملك وقالك

مولاي..كنتمنا تكون المشاكل دالواد تحلات والزيارة ديال لبارح تكون جابت نتيجة

رد الملك ويدو حدا فمو كيشوف قدامو وقال

..ماكاين حتى مشكل احكيم .. الواد صحيح فصيح ..وداك السم والبلا اللي صاب الناس ديال ديك الجهة كان مقصد ومقصود..

استغرب حكيم وحك لحيتو وقال

..كفاش امولاي مقصد ومقصود؟؟ مافهمتش عليك

حرك الملك راسو وجمع طراف عينيه وقال

هادالمملكة بلوة وسلاطت علينا .. وهي سبب الواد فداك السم .. هادو جايين مقصدين لينا..ومافتحوش مملكة اوتاليموس لوجه الله..ولاكن جاو باش يجاورونا .. و يمحي مملكتنا على وجه الارض

استغرب حكيم وتصدم من كلام الملك وقال

حنا مسلمين بحالنا بحالهم !! ولا هما ليهم شي دين ثاتي؟؟! وحسب علمي ملكها الجديد اللي فتحها…

قاطعو الملك وحل عينيه كيدق بصبعو على الطبلة وقال

ماشي ملك .. ملكة .. هادي خطة باش منعرفوش شكون ملك هاد المملكة الجديدة!! ومنين جاو وكفاش حتى بانو هاكا على غفلة !! من اينا بلاد بداو حتى وصلو لينا

تعجب حكيم وقال : كفاش امولاي انا مافهمت حتى حاجة ؟

تنهد الملك وشاف ساهي قدامو وقال

اللي كيحكم هاد المدينة مرى ..ماشي كنا ضنينا فالاول ..رجعات باش تكمل ليا داكشي اللي بقا

بقا كيشوف فيه حكيم مستغرب لاكن تصدم صدمة عمره فاش قاليه الملك

هاد الملكة احكيم .. هي روح الندى

هز حكيم وجهه مصدوم من الكلام اللي كيسمع .. كفاش روح الندى؟؟ واش روح الندى روح الندى اللي كيعرف هوا !! واخا زمان ما تاحتش ليه الفرصة يعرفها ومكانش فداك الوقت حاضر ولاكن كلشي فالقصر عارف باللي الملك محمد اصيل كانت عندو وحدة من الحريم سيمتها روح الندى .. وكانت المفضلة عندو وكان قوانين صارمة فداك الوقت ومع ذلك اختارق معاها جميع القوانين وحملت منو .. والكل كان عارفها حاملة ..لاكن فجأة وبسبب خلافات عائلية حسب ما سمع من اهل القصر اللي نشأت بينها وبين الجدة ديالو هربات بالولد فكرشها ومن تما تقطعات خبارها ..ومن زمان وهما كيقبلو عليها وجميع جواسيسهم انتاشرو باش يحضروها لاكن غبرات غبرة وحدة ..تقول سرطاتها الارض!! وهاكا فجأة بين ليلة ونهار جات ومحات اثار مملكة على قدها وقطعات نسل سلالتها بلا شفقة وبلا رحمة ! كفاش؟ وعلاش؟ وفين كانت مخبية هاد الوقت كامل؟ وكفاش حتى قدرات تكسب الحرب وتقضي على اوتاليموس وتقلب الدنيا سفاها على علاها وهي غير ولية ومامعروف عليها والو

تقال لسان حكيم بدا كيتمتم ويتأكد وراسو كيمشي ويجي قدامو وقال بثلعتم

رر..روح الندى. اللي روخ الند..ندى

جمع الملك النفس فصدرو طلقها وحول نضره ليه قاليه امم..روحا الوَيل اللي هربات ليا بالولد..وجات جاوراتني وماكاملاش على استقرار ممكلتها حتى ربع شهور بدات تهاجمين ..وبالخبث والغدر واستعملت اخبث وسيلة ممكن طيح على بني ادام .. دارت الحدود على طول الواد اللي بيني وبينها من الضفة اللي جهتها باش تحمي اتبعاها وعشيرتها .. وضخات كل ما تكساب وتعلام من السموم فالواد اللي كيتنفعو منو اهل المدينة اللي من ديك الجهة وسمماتهم كاملين ونشرات بسمها الفتنة والبلاوي كلها اللي صابت المدينة فهاد الايام الاخيرة حتى رجع شي باغي يقتل شي وشي كيمسحها فشي وناضت عندنا حنا القتيلة

حكيم تجمد بلاصتو وبلا ميشعر قاليه مصدوم

ضخات السموم فالواد ؟؟ اشمن مرى هادي ولا جنية و..

نتابه لكلامو وقبل مايتعتاذر رد عليه الملك وقال

جنية … جنية وكان خاصني نصفيها لهاد الجنية مللي كانت صغيرة .. قبل ماتكبر ودور بيا وتلعب كااع هاد المسرحية عليا ..

رد حكيم بصرامة وقال

حسب قولك امولاي خاصنا نستاعدو للحرب مع هاد الخطية ..

حرك الملك راسو بتااقل ساهي قدامو وقال

الحرب خليها بعيدة ماشي وقتها احكيم ..ولاكن غادي نفنيها ..غنفنيها فاش نلقا ولدي ..وغنخرج منها سنين الحرام كلها اللي عيشاتني .. حنا دابا فصراع على الجزيرة الايبيرية .. والهدف ديالنا نمحيو ملوك القوط الغربيين ..اللي بقاو ونضمو الغرب للاندلس .. وهادا هوا الهدف الاول ديالنا .

رد حكيم وقال : كان خاصنا نحطو مملكة اوتاليسموس بين هاد الاهداف حيت جات حدانا ..قبل ماتستولا عليها هاد الملكة هادي وتفتحها وتجاورنا

حرك الاصيل راسو ساهي وقال : مصالحش فالوقت الحالي ..الصلح المؤقت اللي تم بيننا وبين اوتاليموس خلاني نخليه الهدف الاخير باش ميعلنش التحالف ديالو مع ملوك القوط الغربيين ..والا كنا غندخلو فصراعات كثيرة معاهم كاملين ومنربحو حتى حاجة من وتشتت الاندلس ويتهدر دم خوتي واجدادي على الخاوي..

تبسم حكيم وقال: مولاي..الاندلس تحت الحكم ديالنا ووحدنا البلاد بفضلكم وبفضل سلالتكم امولاي وتبارك الله تمددات الفتوحات الاسلامية .

هز الملك راسو وقال : ثلت سنين ديال الحصار والصراعات مع الملك قربيز..جا الوقت فين خاصنا نساليو هاد الصراعات ونفضاو لهاد المملكة اللي تولدات حدانا .

استغرب حكيم وقال: غادي ننهيو الصراعات امولاي ..ونعقدو وتيقة سلم وصلح مع الملك قربيز

وقف الملك ااصيل وهز راسو قال بصرامة

غنعلنو الحرب على الملك قربيز وغتنطالق الحملة عاجلا غير اجلا وغتجيبو ليا راس قربيز على صحن من ذهب وكل نا كيملك فمملتكتو .. جمع النفس وتنهد قال

ونتا اكحيم غتكون قائد هاد الحملة ..

وقف حكيم وحدر راسو وقال

وسيادتكم امولاي مغترافقناش لهاد الحملة؟

عطاه بالضهر وقال

مغنخليش السوسة حدايا ونخوي المملكة ونقدمها ليها بهاد السهولة احكيم ..غيابي على المملك خطر عليها وعلى شعبها وعلى سلاتنا ..غيرافقك الامير مهتدي للحملة وغيكون هوا عاى راسها .

وجدو الاسلحة ..المعدات ..واستعدو للحرب

تعلنات الحرب فقصر الملك الاصيل ووصلات خبارو حتى لعند روح الندى ووقفات فجناحها كتمشي وتجي وتردد والمرسول فيدها

شحال قدك تفتح وضم لمملاكتك ا اصيل..صبر عليا وغتشوف الى ماخليتك تركع عندي رجلي..نتا غير فتح ووحد ..وغنجي انا غنحكم كاع هاد المناطق اللي فتحتي فبلاصتك .

دخلات عليها عبدية فجأة خلعاتها وتلفتات عندها لاللة روح الندى وقالت

مالكي عل هاد الدخلة شي نهار تسكتي ليا القلب

عبدية جاك مرسول من تا روادانت الاللة

عقدات حجبانها وشداتو بالزربة تعرف اشنو فهاد المرسول اللي جاها من قبيلتها وبدات تقرا بالزربة وسدات عينيها رتاحت وجلسات كتحمد الله وتشكرو

سولاتها عبدية وقالت

شنو فالمكتوب الاللة ياكما كاين باس

تبسمات لاللة روح الندى وقالت

هاد المرسول من عند يور .. يور فتاروادانت ..مشا هاكا فجأة باش يقمع التمرد اللي واقع تما ..ومكانش عندو وقت اللي يضيع حيت البلاد كانت غتمشي فالهلاك فغيابنا ..وغير تستاقر الاحوال غادي يرجع لهنا ان شاء الله

ردت عبدية وقالت

وشكون سيب هاد التمرد الاللة شكون هاد الخاين

جمعات روح الندى المرسول وقالت

قالي شي مرى هي اللي تسببات فهاد العصيان وهوا غيدير معاها اللازم .. المهم دابا هوا الجاسوس ديالنا اللي خاصني ندخل لقصر السلطان باش يلقط ليا لخبار ونعرف شنو كيدور تما وشنو الجديد عندهم

بقات عبدية ساكتة وتفكر وقالت ..مكاينش لاللة شي جاسوس اللي يعطيك خبار القصر بالتمام والكمال من غير طامو ..ااه شحال توحشتها..يعلم الله كيف رجعات وكيف ولات من بعد كاع هاد السنين ؟ وشنو كدير

تلفتات لاللة روح الندى وقالت : هادي خدمتك اعبدية ..بغيتك توصلي لطامو بأيتها طريقة .. يالاه

ندمات عبدية علاش بدات ريها وخرجات محصورة بين افكارها كتفكر كيفاش غادي توصل لطامو ؟ ..عيات حتى تقادا ليها الجهد ورجعات عند روح الندى وقالت ليها

عييت الاللة نفكر مالقيت حتى حيلة تخليني نوصل لطامو !! ماعرفت ماندير

وقفات روح الندى وهزات كموسة ديال الذهب فديها وقالت بابتسامة شرانية

هادي غادي تخليك توصلي ليها … غدا فالعشية غتخرجي مع الخدم للسوق ..

ركبات عبدية الفلوكة اللي كتقطع الواد بين جوج مدينات مع الناس وعلى لتامها على نابها ودازو حدا الجسر المقفول اللي بين البلدان بجوج والمموع من عامة الشعب استخدامه ومشات مسافة طويلة حيت الواد كبير وقطعات للجهة لاخرى ونزلات وسط الناس فجنب الواد كتشوف يمين يسار .. ركبات كروسة مع الناس ملتمة بحال جميع العيالات حتى وصلات للسوق ونزلات كتسول على طباخ الملك ومنين كيتقدا وغير بالفن .. حتى لقاتو ووقفات كتسلم عليه وقالت تحت لسنانها ..زعبول كيبلغ ليك السلام وقاليك تبارك الله عليك وعلى الخضرة اللي نقيتي ليه ..وبغاك اسدي تنقي بيه خضرة بحال ديال ديك المرة

ضحك الخضار وقال كيحك فالعمامة

ايوا على سلامتي مللي شكرها ليا هاد المرة.. علااا سلالامتي..ماشي بحال ديما كيمسح فيا رجليه فالسوق

ضحكات وقالت ..لااا راه هاد المرة قالك جمع ليه خضيرة نقية ورسلها ليه للقصر بحال النوبة الفايتة ..كي شتي دابا البلاد واقفة على الحرب ومامساليينش ليك يحيو يديوها ..نتا غير جمعها ووصلها لباب لقصر وهما غادي يدخلوها للكشينة

كفض على جلايلو بدا يجمع وهي معاه كدور بيه من سلة لسلة ودور فعينيها حتى طاحت عينها على رزمة دالخص وهزاتها خشات بين عروشها ورقة صغيرة وجمعاتها بخيط ولاحتها وسط السلة بلا ماينتابه ليها حتى واحد ولا يشك فيها .. ضحكات ليه جوج ضحكات وتأكدات من السلعة تحملات والخادم واقف على الكروسة كيتسانها .. تسلات من حداه كتكرر وزادت خلفة خارجة من السوق حتى بعدات وبدات تقرب من مجمع لكرارس اللي يوصلوها عند الواد حتى فجأة ضارو بيها الرجال دورة الخاتم هزوها خطفوها وهي كتغوت وعطاوها دقة سخفوها وناضت العجاجة بين مجموعة دالرجال خرجو من الجنب ومابقا كيبان لا شكون مع شكون ولا شكون مع شكون ..ضربني نضربك وهزوعبدية جمعوها فوق واحد الكروسة وهربو بيها .

تعاشات لعشية بالتسرفيق فقصر الملك الاصيل وهوا واقف كيزفر وقدامو مجموعة من الرجال وكيردد بغضب فساحة كبيرة فالهوا ء الطلق

مرى ماقدرتوش تجيبوها ونعول عليكم انا تجيبو ليا النصر

رجع اللور من بعد ما خلا حناكهم حومر وعطاهم بالضهر واقف وكينفخ وفجنبو حكيم ساكت وكيتمتم

الملك : خرج هاد الحمير عبا من هنا وهبطهم لأدنى مستوا اللي يليق بيهم وبخدمتهم ..وحط بلاصتهم محموعة اخرى تراقب داك الخويدم حتى يجيبوها ليا

حرك حكيم راسو وقال : هي اللولة امولاي

زاد الملك الاصيل رافع راسو بغضب يكاد ينفجر ولو بلمسة وقال كيسرط الغضب ديالو ويبرد

قارية صواريك اروح الندى .. مايستاهانش بيك

حلات عبديك عينيها وراسها محزوم كيمشي ويجي وهي ناعسة فوق لحاف فالارض فجناحها الملكة ..مع الحلة لقات روح الندا واقفة عند راسها كتشطح برجلها وتشوف فيه ويديها مربعين وفكامل انقاتها المسائية وبكل برودة قالت

على سلامتك اعبدية

حلات عبدية عينيها سخفانة وراسها كيدور قالت ليهم فين انا

تنهدات لاللة روح الندى بملل وضارت جلسات على كرسي حاطة رجل على رجل وقالت

نتي فأمان اعبدية

هزات عبدية راسها كتشوف فيها وقالت ليها شنو وقع ؟؟ شنو وقع ليا ؟؟

بدات روح الندى كتشطح برجلها وقالت ليها

رجال الاصيل.. هما اللي دارو بيك وكانو غيديوك ..وكنتي غتكوني دابا فيديك الاصيل كيشوي فيك بحال القطبان

حطات عبدية يدها على صدرها وقالت مخلوعة

هاااا رجال الاصيل !!! ايمااا؟!!

وقفات روح الندى كتمشا وتسارا فجناحها وتتعطر وقالت ببرودة

ااايه .. الاصيل حاط عليك العين ..ووصا رجالو غير تجي الوجيبة ويهزوك يحطوك قدامو

جلسات عبدية مخلوعة وقالت

وعلاش الاللة شنو درت ليه انا انا غير خويدم

ضحكات روح الندى وقالت

خويدم وخويديم مهم عند الاصيل اعبدية .. حيت مكاينش من غيرك اللي قريب ليا وهوا شاف هادشي فاش كنت عندو فالقصر هادا شحال ..وبلا شك غيكونو فالقدوم حتا هما ويتيبن ليهم باللي هربتي معايا .. يعني الاصيل شاد طرفي وطرفك حتى نتي .. وبطبيعة الحال انا ماشي هبيلة نسلمو صندوق اسراري بهاد السهولة ونغفل على هاد النقطة .. المهم دابا وصلتي المرسول ولا حتا هوا لواو عليه ؟

شدات عبدية حناكها وعاد فاقت بالمصيبة فين طاحت حتى هي .. هزات عينيه بالخلعة وقالت

ويلي يالاللة ..اش بغا مني انا غير ولية بنت باب الله

شمات روح الندى العطر من يديها وقالت

غير ولية وعندك اهم اسرار حياتو .. ماتخافيش اعبدية انا كنخاف عليك اكثر مكنخاف على راسي.. حيت الى شدك …اييلى مشا حتى شدك ..غادي يخليك يكري باللي كتعرفي واللي مكتعرفيش ونتي عارفاه اش كيسوا ، هادشي علاش خليتك تخرجي..لحتك ليه طعم باش نتأكد من غرق نيتو ..ومنها نيت باش توصلي المرسول لطامو ..ومنها عاوتاني نيت باش تعرفي الخطر اللي كيدور بيك حتى نتي وماتيقي فحتى قران وتحضي راسك وجنابك حيت انا ماشي كل مرة غادي نفكك من قبضة الاصيل..هاد المرة درت بحساب رجالو حيت عرفتو معول عليك ..ولاكن مرة اخرى موحال نقدر نفكك منو الى لاح ليك شي طعم بلا منعرف ..غير اللي خاصك تعرفي هوا رجلك غاتطسة فالغيس كتر مني..انا الى حصلت يقدر ولدي فيوم من الايام يشفع ليا ونفك راسي ..اما نتي مكاين اللي يشفع ليك ..غيشدك واللي يديرو ليك منعاودو ليك الحبيبة ..ايوا ردي بالك

شدات عبدية حناكها كتولول وتبكي وروح الندى كتسنى الرد على المرسول اللي سيفطات معاها للقصر ..واللي دخل كما خططات ليه روح الندى بلا حتى غلطة ووصل حتى للمطبخ ، وزعبول بو كرش وشاشية بيدو وقف كيراقب خضرتو باش يخدم ويحسب وينقي حتى طاح فيديه الخص وحلو يشوف وراقه واش نقية ..

طاحت فيدو الورقة واستغرب كيشوف فيها وحلها قرا اش فيها وخرج عينيه مصدوم وتلفت فجنابه كيشوف واش شافها شي واحد وخباها فحزامو وقال كيتفتف ..ستفو الخضرة ..ستفوها هنا جاي دابا .

تنهدات ووح الندى وقالت : كنتمى توصل لطامو ..كنتمنى زعبول يبقا عاقل عليا وعليك ويوصلها لطامو .

قال زعبول وهوا واقف حادر راسو ويديه فوق كرشو وسط جناح الملك وجنبو حكيم كيستنطقو وقدامو الملك واقف لابس سروال جلد بلون ترابي وسترة جلدية كحلة وبوط عالي ديال الجلد فكامل اناقتو عاطيه بالضهر ويدو فجيبو وبين صبعانو ااورقة كيشوف فيها ويضحك بسخرية .

حكيم : شكون سيفط ليك الخضرة ؟

تكلم الملك قبل ميتلفت وقال مكاينش لاش احكيم .. باين شكون بلا مضيع وقتك .. المهم دابا هوا تعرف شكون هادا ولا هادي اللي مسيفطين ليا هاد المرسول وتجيبوه ليا فأقرب وقت

حكيم دار خدمتو وما فجهدو واكثر باش يعرف شكون المقصودة فالمرسول المعلوم .. واستنطقهم كاملين واحد واحد وماخلاش من جهدو ..المرسول مامدكورش فيه اسم معين .. فقط رمز من الرموز لقديمة واللي كيدخل على خيانة متبتة فحق الملك ..

دارت الايام فهدنة وراحة البال كل واحد واخد احتياطاتو والواد باش يصفا من السموم خصو ايام وليالي وصبر كثير .. فعشية من لعشيات المبردة فحديقة الملكة وهي كتبرد مع وصيفاتها وتخطط لنضام القصر الجديد من بعد ما هرسو جميع التماتيل الماسخة ونقاوه من المسخ وبداو يمشيو حريم القصر على عاداتهم وتقاليدهم ويحاولو يدخلوهم الاسلام باللتي هي احسن ..وصل اثنائها عبد من العبيد بسروال قندريزي وكندورة بيضا وشاشية حمراء واقدم مد يدو وقال

جاك مرسول من قصر الملك الاصيل الاللة مولاتي

مدو ليها شداتو باستغراب وبرقة وهوا منضم ومخشي فغشاء نحاسي منقوش ..شداتو فيدها والخاتم فصبع السبابة كبير مذهب وطلقات الورقة كتقرا حتى سالات وضحكات وقالت لعبدية اللي جالسة جنبها

الملك محمد اصيل المرتضي بالله شخصيا ..كيدعوني للعشاء عندو فالقصر .. وباغيني فجلسة حبيية نتناقشو فيها فأمور سياسية ..

عبدية : هي بغا الصلع وبغا هاد يحد هاد العداوى

ضحكات الملكة بهدوء وقالت كتشوف وتأمل قدامها ..

حنا اصلا بحال السمن على العسل .. فين بانت بيك شي عداوة دابا؟ وعلاش غادي نتصالحو وحنا اصلا مامخاصمينش.. ياك درنا ليه عراضة حنا اللولين ودرنا ليه احسن استقبال ..جات نوبتو يرد لينا العراضة ماشي راحنا خوت فالاسلام ؟

ردت عبدية وقالت

وشنو غديري الاللة دابا ؟بلا شك غترفضيها ومغتمشيش لداك القصر

ابتسمت روح الندى وقالت

من الواجب نرد على سيد الملوك ..مجاتش نخليه بلا مرسول .

التسمت وناضت كتبات ليه رسالة وقبلات دعوتو لعندو فالقصر ورسلاتها مع المرسول وبدات من بعدها كتوجد لهاد الدعوة المهمة ..طبعا حيت هادي دخلتها الاولى للقصر وهي ملكة ..وماشي جارية منا كانت من قبل ..وجا الوقت فين تقابل فيه وجوه قديمة وترد شلا ذكرايات فداك القصر

تفرشو تفاصل ولاثواب بالاوان والاشكال ..اشمن ك تواب من الحرير .. اشمنك يا جوهرة ..ويا حرير الدودة ..وياتواب الصم والتليجة ..ها الوان الطاوس وها الوان البحور .. ها الخضر وها الاحمر والسماوي ..تحير العين فالاختيار .. يهزو ويقيسو عليها ويقلبو على اللون والتوب اللي يواسيها ..اما الحلي والجواهر .. تبرق العين فشوفتهم.. ها الالماس والياقوت .. ها اللؤلؤ واصداف المحار .. والزمرد والالفيروز ..تناسق شي مع شي .. وتجرب شي مع شي . وهادشي كامل على قبل الدعوة دالعشاء ..

ثلت ايام والتواب كيتخيطو حتى وحدو وفصنادق منقوشين تحطو قدام لاللة روح الندى الدواقة اللي كلشي كيتسناها ويشوفها كيف غطلع بحال ديما..

الحاصول ومافيه.. روح الندى متخلاتش من جهدها فالتاويل.. لبسات التكشيطة الخاصة وهبطوها عليها بشوية تقول مزوقة بالجاج ..تليجة خضرا وكتموج بالاولوان .. مزينة بالحجر والخيرط ذهبية .. ومضمة كتلؤلؤ بحجر سماوي مخزز ومرجان . اما التاج المذهب ..كيسحر العين ويسلب الشوفة ..ويبهر الحاضرين ..حتى هوا مزين بحجر سماوي وخضر مخزز..والعقد فعنقها كيسقسق بلمعتو ..والخاتم فيدها بحال الريشة واصل فالطول حتى للضفر ..والحوالق نعام اسيدي .. كملو الزينة ومع الشعر المجموع اللور زادو فتنة على فتنة ..الفرقة دالشتر الوسط مزينة بحجار الالماس صغيرة .. والوجه كيبري تقول حور العين ..الخدود موردة والشفايف كيشهيو بحال الشهد ..شهدة منزلة تقول للزين نوض ويدكروني فمكانك ..وقفات لاللة روح ندا مادة يديها والخدم كيعطروها ويبخروها .. والعبد كيلبس ليها السلهام ويسترها ..باش تخرج سالمة مستورة من عيون عباد الله .

ركبات هودجها وعلى بركة مشات تقابل عدوها .

اما ملك الملوك وسلطان السلاطين ..فكان فجناحو بحال العادة ..كيتجهز لهاد العراضة ..الشموخ والفحولة ..والوقفة والرجولة .. الروايح فايحة ويديه مسرحة ..لبسو عبدو خواتم فصباعه ..وطلعو عليه السترة الكحلة وزيرو خيصرو بحزام عريض من التوب فالكحل وعقدو صدايفه حتى للعنق وسدو ليه البوط دالجلد اللي حتى للركبة .. تجرد من كل الاسلحة اللي مولف يحمل معاه .. وفزي مسالم دخل وتسلم .. كان طول الوقت ساهي وكيشوف قدامو حتى سالاو العبيد والخدم خدمتهم وانسحبو فهدوء وسلم.. تقدم حكيم ولقا التحية وقال

مولاي.. رسلنا الفيل والهودج للواد كما قلتي .. باش نستقبلو ضيفتكم اللي تكون دابا وصلات ..

هز راسو ومسح على شعرو الكحل المزين بشعرات خفاف فالابيض رتبو وتلفت وقال

خليها تعيش دور الملكة المؤقت .. باش تعرف تحس بطعم العذاب فاش نسلبها عزتها وكل ما كتملك .. باش تعرف الفرق بين الراس وبين الرجلين ..خصها تجربهم بجوج ..

وصلات روح الندى للقصر وعلى هودج فوق اضخم فيل !! ووراها خدمها الخاص ووصيفاتها .. ودار ليها استقبال اللي مكانتش متوقعاه ..دخلات كتشوف فأحوال لقصر مع المغرب ..وكتسرح عينيها وشتوف شنو اللي تبدل .. دارو فعقها شلى ذكريات ..من نهار تنكرات مع الرجال حتى لنهار هربات على العود.

وقف بيها الفيل قدام باب القصر الرئيسي الكبير ..ونزلوها قابطين فيها وهي مخبية فسلهماها بحال العروسة.. قول عروسة !

وقفات على رجليها ورفعات راسها والخدم تابعين توابها ويقادو ليها ..عرات على راسها وحلات سلهام سلماتو للخدم خداوه على كتافها وشافت قدامها لقات الاصيل شخصيا واقف هوا وبعض من الوفد ديالو كيتسناوها ..

تبسمات ابتسامة صفرا ورمشات كتشوف فالاصيل وقالت .

مس لخير جلالة الملك محمد اصيل المرتضي بالله

بنفس الابتسامة استقبلها وراسه مرفوع ويدو ورا ضهروه قاليها وحاجبو مهزور .. مس الخير جلالة ..الملكة رووح الندى..فقصرك الثاني

قالها وعينيه كيهزوها من راسها وكيشوف هادال ملكة اللي تملكات بلهلا يطريه لشي ملوك اخرين .

اما حكيم فحدر راسه باحترام باش يخفي الفتنة ديالو اللي تفتن بيها وجمالها وقوة شخصيتها اللي كضهر على جسدها كامل وتعابر وجهها ..والاكثر نعومتها ورقتها وطريقتها فالكلام اللي عمره سبق وشافها عند شي مرى اخرى من غيرها ..فتنة متنقلة ..

شار ليها الاصيل بيدو تتقدم وتقدم جنبها ويدو ورا ضهره كيضحك بسخرية على هاد القدر وقال ليها وهي كتمشى جنبه وجلايلها وراه كيتجرجرو

جميع الحيوط والزينة اللي فهاد القصر توحشاتك ..توحشات تسمع غواتك الاللة روح الندى

ابتسمت وقالت كضحك بسخرية .. وهانا جيت نقلع ليها الوحش اللي كلاها ..واللي ضلم ركانها وبيوتها ..مال قصرك طايح عليه الضيم اجلالة الملك ..واش هوا هاكا من نهار خويت المكان ؟

ضحك بسخرية كان غيجاوبها لاكن سكت حيت كانو وصلو لقاعة الضيوف فين كانت العائلة واقفة مستفة وكتسنى تتعرف على هاد الضيفة اللي قصتها سارت على كل لسان ورجعات حكاية .. ومع مرور الزمان تنسات الحكاية وولات مشكوك فأمرها واش حقيقية ولا غير كدوب واتهامات ما عندها معنى ..حتى واحد مامتأكد من اتهامات الموجهة لروح الندى وشنو اللي طرا بصح فداك الوقت ..شي كيقول تحرقات مع النار اللي شعلات فجناح السلطان..وشي كيقول فناتها لاللة زينب جدات السلطان بسبب الخلاف اللي وقع .. وشي كيقول انتحرت حيت خافت من عقاب السلطان .. وشي كيقول غيرك الحريم اللي دارو ليها مكيدة وطيروها من القصر..حتى واحد ما متتأكد من صدق الحكاية بالضبط..وحتى واحد ما عطا شرح وتفصيل عليها.. لانه السلطان ومو. لاللة ياقوت بوحدهم اللي عارفين الحقيقة ..وحتى واحد ميتجرأ ويسول على الاسباب الحقيقية المتعلقة بأمر السلطان .. ولاكن اللي متأكدين منو الاغلبية .. هوا ان. الحريم ضمرو ليها مكيدة ولاحوها برا القصر وغبروها .وهادا علاش ضل السلطان كيقلب عليها كاع هاد السنين ..وفرواية اخرى كتقول ان حب السلطان ليها هوا اللي خلاه يقلب عليها وينشر رجالو فجميع المدن .

شلا حديث ومقال تقال وحتى واخد معارف صدق الحكاية ..

لقات روح الندى راسها واقفة قدام عائلة تقيلة .. وانتبهت روح الندى ولفت انتباهها الاميرة الام .. لاللة ياقوت ..واخا كبرات شوية وبياض راسها لاكن اللي قال اميرة اميرة ..جامع شعرها اللور والتاج على راسها .. واقفة بمل اناقتها ورقتها ..لاكن الدموع ضفاو عينيها .. تقابلات معاها لاللة روح الندى وبداو الصور والذكريات بيناتهم كتبادل من عين لعين ..طولو فالنضرة وبان عليهم تأثير اللقاء .. لاكن اللسان اللي يسبق ويهضر تقطع .. بقا الاصيل كيشوف فيهم بجوج ونافر من شوفتهم ..دور عينيه وتجهل يقدم الاميرة مو مدام روح الندى عارفاها شكون هي وتلفت اللي موراها وقبل ما يهضر هضرات بنت طويلة حسناء الوجه واميرة بحال سميتها ..تبسمات تبسيمة خفيفة كأنها دايرة الوجب فقط وقالت

..لاللة روح الندى ..مرحبا بيك

تلفتات روح الندى بنضرها عندها شافت فيها وتبسمات وقالت

ترحب بيك الجنة

تكلم السطان وقال بابتسامة كيشوف فالاميرة

..لاللة جوريا ..بنتي

تجمعات ابتسامة روح الندى وهي كتشوف فبنت بحال الوردة قدها فالقد وقالت بابتسامة وتلعثم

مشاء الله عليك ..منورة حبيبتي

سدات الابتسامة عيون جوريا وقالت ليها وراسها مايل

بنورك حبيتي

مدات بنت اخرى يدها بابتسامة وكانت كتبان اصغر سن شوية من جوريا ولا تقل عنها جمال ورقة وقالت

انا روح الياسمين ..

تبسمات كدور عينيها بحنابها روح الندى وقالت مشاء الله غتكوني نتي الاميرة الصغيرة .. تبسمات روح الياسمين وقالت .. وانا المففضلك عند بابا الملك

بلعات روح الندى ريقها من هاد اليانبيع اللي ضهرو ليها فجأة وبغات تسمم السلطان وقالت بابتسامة

كيضهر ليا ماعندكش ولي العهد امولاي

عقد الملك حواجبو من حشيان الهضرة ديالها وتلفت كيشوف فيها بصرامة وغرور وحول نضره وراها وابتسم وهي كتشوف فيه حتى سمعات صوت وراها قال

جلالة الملكة روح الندى ..

تلفتات لقات شاب وسيم انيق الشبه بينو وبين الاصيل قريب جدا و أومئ ليها وقال

مرحبا بيك عندنا فقصر الملك الاصيل الاللة

ابتسمت بابتسامة مرعودة مستغربة وهز الشاب عينيه فيها حدق فيها مزيان فإذا ببريق من الاعجاب بدا كيلمع فعينيه وهوا كيعبرها من راسها لرجليها وهي ساكتة مالقاتباش تجاوب ..حط الاصيل على كتف الشاب وقال

الامير سلطان بن محمد .. ولي العهد والخليفة ديالي من بعدي .

خرجات التبسيمة مرعودة ثاني وبقات روح الندى غير كتكابر ودير فالصواب حتى كمل عليها صوت طفل صغير قال بحدة ولد الملك محمد اصيل. البطل

حمعات فمها مصدومة كتشوف حدا رجليها لقات تحفة صغيرة بريئ الوجه وبسرعة هزو الامير سلطان فيدو وقال

نتا البطل ولد الملك. ولاكن مكنغوتوش قدام الضيف بهاد الطريقة

شاف فلاللة روح الندى وقال

سمحي لينا الاللة مولاتي كنعتاذرو منك

تبسم الاصيل وقال بسخرية

مكاين لاش تعتاذر ..تلقاها مجربة الدرادي الصغار .. ولا انا غالط ؟

ابتسمت للاللة جوريا وقالت : طبعا امرى بحالك فهاد السن المتوسط غادي يكونو عندها اولاد .

تزيرات روح الندى وبدات تشوف غجنابها ورجعات رفعات راسها بابتسامة وقالت

لا حبيبتي ماعنديش ..كانو عندي امور اهم من هادشي فحياتي ومهتميتش بأمر الاولاد

تقدم الامير سلطان جنبهم فين شار ليها الملك تجلس على طاولة العشاء وقال كيضحك بلباقة

ميمكنش مرى ..فهاد الجمال الرباني كامل ..وماتزوجات ما ولدات ؟ هل هوا ضلم فحق انوثتك ام اعين الرجال لا تبصر ؟

عفوية الامير حرجات لاللة روح الندى ..اما السلطان ضحك وشار بيدو قال ليها

فاجئينا بشي جواب مقنع ..الاللة روح الندى

زيرات روح الندى عصاب حلقها وطلقت ابتسامتها على الامير سلطان وقالت

مالقيتش الراجل المناسب واللي يليق بيا ..وفضلت نختافظ براسي لنفسي..على حسب قولك ..وشكرا ليك قلتي امرى بحالي بهاد الجمال والانوثة ..حرام ضيع مع اشباه الرجال اولا سيدي الامير

شافت فالملك محمد اصيل اللي تبدل لون وجهه وحس بيها كأنها وجهات الكلام ليه واخا ماشي بطريقة مباشرة وبقا كيشوف فيها بغيض حتى فكات العقدة دالغيض ديالو امرى اكثر من جميلة ..رقيقة وانيقة لابسة افخر الثياب واحمل المجوهرات ..امرى شقراء بتسريحة ناعمة ووجه جميل وقفات رافعة راسها وهازة حاجبها قائلة

الملكة روح الندى !! يا مرحبا يا مرحبا

ابتسمت روح الندى وهيكنخدق فيها وبرقة وقفات مكانها وقالت

شكرا ليك ..

ماعرفات باش تنعتها وتكلم حينها السطان وهوا جالس كيشوف فالحسناء اللي قدامو وقال كيشير بيدو

الاميرة لاللة شهرزاد .. ام للأمير سلطان والامير الصغير يوسف. … و وزوجتي

تصدمات روح الندى من هاد الخبر واخا كانت متوقعاه حيت لايعقل ملك بشحمو ولحمو ميتزوج ما يولد مايخلي اللي لخليفة ديالو !! وعلاش هوا اذا ملك اصلا وشنو الدور دياله فهاد الملوكية ! استسلمات للحقيقة وابتسمت بصعوبة وقالت

كنشكر على الترحيب ديالك الاللة شهرزاد وجلسات على الكرسي الخاص ديالها جنب الملك وعينيها شادين فولادو وزوجته ..لمحات عيون لاللة ياقوت لقاتهم شاردين فيها وكأنها كتسول بعينيها على احوالها وعلى حفيدها الضايع .. كسر الصمت صوت الملك وقال ملفت لقها

..مابغيتش نهضر فموضوع الواد حيت هاد العشا خاص بالتعارف على بعضياتنا .. ولاكن شي حاجة بقات شاغلة بالي وقلت ضاروري خاصني نسولك عليها مدامك حتى نتي عندك حق فالواد من الجهة الاخرى وكيتنفعو منو المناطق المجاورة .. المهم ..حللنا الماء باش نعرفو سبب الكارثة اللي سلاطت علينا هاكا ونزلات من السماء ..ولقيناه ماء مسمم باواع كثيرة من السموم اللي كتصيب الجلد وتصيب الكرش وتقتل حتى لحيوانات .. تضررنا بزاف فالأواني الاخيرة وشكينا يكون شي واحد اللي تسبب فهاد الكارثة ..وحاجة اخرى نتابهت ليها فزيارتي للقصر عندك لمرة الفايتة هوا الحدود اللي درتو بينكم وبين الواد باش تحميو عشيرتكم ..قلت يمكن عندك شي خبار على هادشي اللي صابنا ودرتي الحد ..اولا عارفة شكون هاد الشيطان اللي فالسيفة دبنادم سمم الماء دالواد .. فنصرك يكون شي واحد ميسواش هوا اللي قام بهاد الفعلة ؟

بلعات ريقها كدور عينيها وتفكر فجواب وقالت بتبات

حنا غير شكينا وزربنا ودرنا الحدود فاش بداو بعض الناس كيتسممو منو ولحقنا الوضع ..ولاكن ما زال كنبحثو على سبب هادشي..كنضن من سي اعشاب يمكن مسمومة تكون نبتات فقاع الواد ولا فجنابو

رد ويدو حدا فمو كيشوف فيها وقال

ولا شي خبيث هوا اللي سمم ناس ابرياء بلا شفقة وبلا رحمة وما فكرش فالايتام اللي خلا .

دورات وجهها حمراء كتبلع ريقها فصمت وسلطان كيشوف فيها بابتسامة وفالشكل ديالها. وقال

يمكن يكون الربيع اللي ناض مسموم ..مكنضنش يقدر شي واحد يسمم واد كامل ..خصو ليه محصول اللي يكفيه باش يسمم الواد وهادشي ماشي ساهل

حرك السطان راسو وقال كيعبر روح الندى

ولا شي واحد يدو طويلة وخصها تقطع .. وان شاء الله قريب غادي نقطعها ليه وبيدي

ابتسمت لاللة شهرزاد وقالت :خليونا من المواضيع السياسية وخلينا نرحبو بالملكة لاللة روح الندى .. ااه سمحيلي ماسولتكش.. علاش ماجاش معاك الزوج ديالك نتعرفو عليه

ابتسمت روح الندى وقالت : انا مامزوجاش .. والزوج ديالي مات هادي عماين الله يرحمو

ابتسم سلطان وقال

الله يرحمو ..وفرصة سعيدة هادي اللي تعرفنا عليك الاللة مولاتي ..والاسعد اكثر هوا نتعرفو عليك ونتي حرة

تلفت نضر السطان جهة الامير سلطان وبقا كيشوف فيه ويدرس حركاته بعينيه بنضرات غير راضية وقال

لو انها فكرات تولد وتخلي ونيس معاها لاكان هاد الولد قدك اسلطان .

تبسم سلطان وشاف فيها وقال : كان غيكون محضوض حيت عندو ام بحالك

عبسات لاللة شهرزادوفنفس لوقت قالا بالضحك وقالت

علاش نتا ماشي محضوظ؟

ابتاسم وقال

محضوظ حيت عندي ام واب مكاينش بحالهم فهاد الدنيا ..

حول نضره للاللة روح الندى وكنل كلامو قال ولاكن حسيت بالحظ كيبتاسم ليا اكثر هادالمرة

ابتسم الملك وقال كيتأمل فالانير سلطان ..رد بالك من ابتسامة الحظ الصفراء

خلاوها على هاد الجملة ونزل العشا بالمشوي والمبهر والمحمر والمجمر وعلى طبلة الملوك نزلات اشهى الاصناف والذ المشروبات ..قطعو للملكة من الشواء ما يكفيها فطبسيل مدور وقبل مايحطوه ليها شدو الملك بيدو وخدا منو قطعة كلاها وابتسم وهوا كيحط الصحن قدامها في استغراب الجميع وقال

..الغدر ماشي من شيامنا الاللة روح الندى ..بالصحك والراحة

زفرات بغيض والتسامة صفراء كتحاول تخفي ماامح وجهها وسكتات كتشوف فالكل والكل كيشوف فيها ويتعشاو في سلم وهدوء حتى سالاو وناضت لاللة جوريا بابتسامة وقالت

لاللة روح الندى ..الى سمحتي تفضلي معايا نوريك بعض اللوحات اللي كنرسم ..غادي يعجبوك بزاف

ابتسمت روح الندى بارتباك وشار ليها الملك بيدو باش تاخد راحتها وتنوض وناضت بابتسامة رافقات لاللة جوريا اللي خدات من وقتها بزاف وهي كتعرض عليها اللوحات المرسومة وروح الندى عقلها اللور بين ذكرايات الماضي والصغر والعشق المجنون اللي دمر ليها حياتها وخلاها تتجرد من الانسانية والرحمة من بعد ما كنت شخصية حساسة وطفولية ومليئة بالمشاعر والطيبة .. عرفات راسها تبدلات ومابقات فقلبها ولو ذرة من الاحاسيس الزوينة اللي كانت فيها ..بل ماتت وحياة مكانها روح جديدة قادرة انها تحرق الاخضر واليابس بلا شفقة وبلا رحمة .

زادت حقدات اكثر على الاصيل وهي كتسارا بين اصوار القصر وتتحصر على اهم خاجة فقداتها وحزنات عليها هي الطمئنينة ..الاحساس بالغير ووتأنيب الضمير ..الحزن والسعادة اللي كانو اهم حاجة فحياتها ..كلشي مات ..حتى ذرة مشاعر فيها الحياة او نبض القلب مابقاش.. بقا الفراغ السواد والتأثر على كل ماضاع وتسلب منها .

قدمات جوريا لوحة فنية لروح الندى وقالت بابتسامة

هادي هدية مني ليك ليك

ابتسمت روح الندى وقبلات الهدية وشارت بصبعها للوصيفات يهزوها وقالت بابتسامة

شكرا ليك جوريا ..الرسم ديال غزال كيفتن ..دابا كنضن مشا الحال وخاصني نرجع للقصر

ابتسمت جوريا وقالت :شرفتينا الاللة روح الندى. تفضلي نمشيو للصالة ؟

مشاو كيهضرو للصالة ويتجمعو ودخلت روح الندى تودع العائلة لاكن قطع وداعها الملك وقال

مزال ماسخينا بيك الاللة روح الندى .. والليل طويل .. واسراره كثيرة ..وحنا عاد غتبدى السهرة عندنا

هز صبعو عطا الاشارة وتحلو الابواب ودخلو راقصات ورجال كيلعبو بالنار وصدقات روح الندى جالسة كتفرج وماجابتهاش الدار ترفض الدعوة .. جلس الجميع فأماكنهم الخاصة كيشاهدو هادالفن وهاد التنضيم والموسيقى والنيران الملتهبة اللي كتلعب فالسما وتخرج من افواه الرجال وحتى النساء.

كانت طول الوقت اعين الامير سلطان على روح الندى اللي عينيها كيلمعو بشعلة النار اللي فعينيها وهي كتفرج فمجموعات كيدخلو بانتضام يقدمو اجمل ما عندهم باش يسعدوهم . فجأة وبين هاد الصخب والموسيقى لمحات عبد من العبيد دالملك هبط حدا ودن الملك وتكلم فودنو وكان واضح انها شي حاجة كتفتح النفس وتفرح والا فمكانش غيضحك ويحل عينيه بنضرات قوية تاقبة وهما كلهم سعادة .

شكات روح الندى من حدوث شي حاجة ماشي طبيعية وتقبط قلبها واحساسها اللي عمرو خانها قاليها الامر كيتعلق بيك .. بلعات ريقها ودورات عينيها وابتسمت فوجه الملك وقالت

شكرا على كلشي يا جلالة الملك ..لاكن انا خاصني نمشي وتعطلت وماشي من عوايدي نخرج بالييل بحال هاد الوقت

وقف ورفع يدو وقف الموسيقى وانهى الحفلة وغاد الجميع وابتسم وقال كيشوف فيها بكبرياء

هادي احمل سهرة بالنسبة ليا ومكارهتش طول اكثر..ولاكن حتى عندي سهرة اخرى دابا ومن نوع خاص.. غيرافقوك الحراس على لمعبر الواد ..نتي فأمان ماخدك فوق هاد الارض.. ولاكن منضمنش ليك الراحة والامان فاش تحطي رجلك على ارضك

ضحكات بسخرية وقالت

لا نضفت ارضي من كاع الشياطين قبل منحط فيها رجلي ..نتا غير استمتع بالسهرة ديالك الخاصة

ابتسم ودار يدو وراه قال كيضحك

متصوريش شحال غنسمتمع الاللة روح الندى .

شار ليها بيدو وهي كتشوفيه وقلبات عينيها بملل وودعات الجميع بابتسامة .. تكلم السلطان امير وشار بيدو قائلا

غادي نرافقك لبرا الاللة روح الندى تفضلي

تفضلات قدامو كتمختر وتتمشى بحال الحمامة ومشا معاها قدام انضار الجميع اللي جاتهم حاجة طبيعية الا الاصيل اللي واضح انه انزعج وكيبان الانزعاج ورا ديك الملامح الميتة اللي على وجهه . مسح على لحيته وتلفت رفع راسه قال

.تصبحو على خير ..يالاه كل واحد لجناحو

انسحب الجميع وبقات لالة شهرزاد واقفة معاه وقالت

مولاي.. راسي مشطون بواحد الموضوع وبغيت ليه جواب الى سمحتي ..

شار بيدو وقال على عجلة

. الجواب منبعد الاللة شهرزاد دابا عندي امور مهمة بألف مرة على الموضوع ديالك كتسنا فيا دابا .. تصحبي على خير حتى نتي

باس جبهتها بلطافة ومشا على عجلة خرج من ااقاعة في حين وصلات روح الندى للهودج اللي جابها وجنبها الامير سلطان وتلفتات بابتسامة بغات تودعو وقالت

..شكرا على وناستك اسيد الامير

ابتسم وهوا كيتأمل ملامح وجهها وقال

هادشي كيسعدني الاللة روح ندى ..نرافق امرى بهاد الهبة وهاد الزين بحالك .. والاهم انها ملكة على رؤوس جميع الملوك

ضحكات لاللة روح الندى وقالت بابتسامة

طريقتك فالكلام كتشبه لودي يور تماما

ابتسم وقال كيتنهد: ولاكن انا ماشي ولدك الاللة روح الندى.. فرق كبير بين غزل الولد لمو وبين غزل … معجب مثلا بمرأة اخرى

ردت كضحك وقالت: انا سبق لي قلت ليكم ماعنديش ولاد .. يور بحال ولدي واكثر وهادشي علاش شبهتو ليك .. المهم خليت ليك الراحة مولاي سلطان

رد باعجاب وقال: كنتمى ماتكونش اخر مرة .. وكنتمى نشوف نبع وجهك مرة اخرى

شدات فالرصيفات بغات طلع عل الهودج وقالت

ان شاء الله امولاي سلطان .. تصبح على خير

طلعات فوق الهودج مشات وبقا واقف مراقبها حتى غبرات فوق الفيل ومشات وجعات بحالها للقصر مرهقة والتاج متقل على راسها وبغات ترتاح ،

وقفات قدام مرايتها الكبيرة المنقوشة والوصيفات كيحاو ليها المضمة ويجهزو ليها حوايج النعاس والجو اللي ترتاح فيه من هاد التعب .. رفعات يديها ليهم يفكوها من تقل المحوهرات وقالت بتعب وهي كتشوف جنب فصندوق المجوهرات ديالها وقالت

بشوية عليهم ..عامليهم بشوية .. وعيطو ليا عبدية هي تتكلف بداكشي الثمين ديالي .

حنا عبد غلض وطويل سمر راسو وقال

عبدية مزال ماجات الاللة من الساعة اللي رسلتوها تجي عندكم

حلات روح الندى عينيها وتلفتات شافت فيه وقالت

كيفاش من الساعة اللي جات عندنا شنو كتقول؟؟ فين عبدية فين مشات؟

حدر راسو وقال بتبات

مشات تلحق عليكم القصر الاللة ..

جمعات روح الندى يديها مصدومة وهزات التحتية ديال التكشيطة اللي بقات عليها وتخطات برجلها المخاد اللي فالارض تقدمات جيته وقالت

فين لحقات علينا اعابد شكون قاليها لحقي علينا للقصر؟؟! اش كتخرف؟

رد عابد وقال : كنا كنتسناو ك الاللة ترجعي فالوقيتة المعهودة ديالك .. ومللي تعطلتي علينا جاو شي رجال من القصر دمولاي الاصيل قالو لينا باللي حالتك صعيبة ووقعات ليك شي حاجة وطلبتي عبدية ضاروري ورسلتيهم يجيو عندها تقوم بيك هي اللي كتعرف ليك الاللة .. كلنا تخلعنا من هاد الخبر ومشات عبدية كتجري عندك ومن ديك الساعة ما بانت ..

ضربات روح الندى فخادها وفشلات فوق واحد الصندوق فقه مخدة وجلسات كتشوف قدامها وتنهج وتردد

اوييلي داها .. اوييلي دارها بيا الكافر بالله .. داها ..

حلات عينيها كتفكر كلامو ليها فكل مرة وبدات تردد وتمتم وتحك على فخادها

ارضي مأمنة ونتي فأمان .؟؟ منضمنش ليك الراحة فوق ارضك؟؟ عندي سهرة اخرى وكدا ماكدا !! والعبد اللي وشوش ليه فودنو !! اويلي كيفاش مارديت البال ..اويلي جالس حدايا الديب ومادرت حتياطي منو

وقفات كتغوت فوجههم كلهم وقالت

كيفاش قدرتو تصدقو كلام رجال ماشي منا ؟؟؟ كيفاش قدرتو تصدقو كلام رجال الاصيل وخليتوه يدير فينا مابغا

رد عابد في حيرة وقال

حنا الاللة قالو لينا صرات ليك شي حاجة .. وكما العادة كتعولي على عبدية ديما وهي دراعك ليمن وقلنا بصح رسلتيها تجي عندك تسندي عليها حتى تنوضي.. هاكا مشا بالنا الاللة وتشطنا عليك بزاف .. شنو كنا غنديرو لولا ماجاتش عندك شنو نخليوك بوحدك تما ؟

ضارت بحنابها هازة يدها مصدومة وقالت .. ماجات عندي لا عبدية لا غيرها .. داها الكافر بالله وانا كنضحك معاه مجايبا للدنيا خبار .. دارها بيا ودا عبدية وحلف حتى يديها هاهوا داها دابا شنو المعمول

رد عابد وقال : وشنو بغا بعبدية الاللة اش با يدير بيها ؟

جلسات شدات وجهها وسكتات كتكمد فالشمتة وتبرد وزيرات على عينيها ووقفات مخرجاهم كتشوف فنقطة وحدة وترد هازة صبعها

ويااك ويااك اعبدية تنساي علاش تافقنا .. وياااك اعبدية .. وياك يعرف بالسر ديالنا .. وياك تنسيك الخلعة والخوف والرعب اللي غادي يوريك فالوعد ديالك ليا .. وياك تنساي الوعد اعبدية .. وياك تنساي الوعد اعبدية ..

بدات كتمشي وتجي فبيتها وتغلي وتردد جملتها الاخيرة وخرجات للشرفة كتنفس وغوتات بصوت حاد وغضب قائلة

عيطو ليا على القائد على ذو الفقار دغياااا دغيااااا

يتبع...

‎