خيط الريح الجزء 11

بقات فبينوارها كتشنف شعرها حتى خرج لاوي عليه فوطة كيقطر وقال:مزال مالبستي؟؟

نزهة:عاد غا نلبس غنموت بالجوع أحبيبي..

ميمون:وا لبسي وياله نمشيو ناكلو

نشفات ولبسات عليها تحت أنظارو محشماتش بتاتا غادية بمبدأ غتحيد الحشمة غتحيد اللهم نحيدوها من لول..

لبسات سروال دجين مغلوق مع شوميز فالأسود طويلة فايتة ترمة وسباط كلاص فرجليها قادات فولارها بعدما نشفات شعرها و وجها كتافات بعكر وماسكارا..

نزهة:(كترش ريحتها)ياله

ميمون:(هز راسو فيها)غادية للعرس هههع(درعها بيدو معنفج ليها الشال)..

نزهة:واا تا حيد يديك راه خسرتي الزيف

ميمون:هههههه ولفتك بالشعر (قبلها فحنكها)فين بغيتي تمشي؟

شدات يديه لي مدور عليها من عنقها وقالت:كنعرف واحد البلاصة هنا زوينة نمشيو ليها..

ميمون:زيدي ههههه نتي راكي ضايرة الغابة كثر من الحلوف

نزلو بجوج معانقين من بعيد تعرفيهم عرسان و حيبان..لباسو تبدل تماما ولى كيلبس زوين ومقاد متماشي مع رزقو ..تعشاو فواحد المطعم فاكادير الراس فالراس مقصرين بالضحك والتكركير هو يهضر وهي تشيخ وهاكا غادية بيناتهم فلخر تقهواو فتاغازوت وشدوها فحالهم خالقينها فالطوموبيل بالغنا والضحك..

*****

-على طبلة العشا كان محمد مع مو و ختو وراجل ختو كيتعشاو أما ولاد سعيدة راه مكيدخلوش بكري..حتى حمحم محمد ونطق:الواليدة

حفيضة:مالك..خاصك الخبز..

محمد:حممم لا(كيجمع شجاعتو)غنتزوج..

-لحظة صمت شي كيشوف فشي وفلخر فيكساو فيه الشوفة هو لي نطق..كون كان ضحوكي غيقولو كيضكك معاهم لكنو دائما جدي فمواقفو و قليل فين كيضحك . .

حفيضة:نعام؟؟

محمد:كيفما سمعتيها أمي غنتزوج

سعيدة:وتا الطلاق باقي مطلقتي تنوض تزوج

محمد:مالي غندير الحرام؟؟

زوح سعيدة:لا حاشاا أسي محمد غي هو حنا كنترجاو ترجع مراتك وتجمع الشمل

محمد:(بجدية)مكاين رجوع بيني وبين ديك السيدة..صافي ..

حفيضة:(وحلها ليها)أش هادشي أولدي؟

محمد:(بحزم)أنا غا علمتك وصافي

سعيدة:شكون هادي؟؟

محمد:(جمع شجاعتو وشاف فمو)بنت فاطيمة، حنان. .

خرجات فيه عينيها ممصدقاش ..نفس السيناريو كيتعاود نفس الهضرة قاليها سنين هادي وقابلاتو بالرفض بغات تهضر وهو ينطق مقاطعها:الى غتݣولي شي حاجة ماهيااش غا خليها عندك.

سعيدة:(مشوكية)واش حنان نيت؟؟فين شفتيها؟؟

محمد:حمم تلاقيتها بالصدفة وغنتزوج بيها. .

حفيضة:(مصدومة)تا شكتخربق عليا من الصباح؟؟كيفاش بنت فاطيمة !!!عاوتاني بنت فاطيمة..

محمد:(تعصب)اه تاني وثالث درت ليك خاطرك فكثر من عشرين عاام ودابا خاطري لي غيمشي وغنتزوج بيها

حفيضة:(تنهدات)واش أنا ݣلت شي حاجة غي مفهمتش فين لقيتيها واش دايرا هي دابا؟..

محمد:حممم ولدها كيقرا مع إيناس فالمدرسة

سعيدة:(بتعجب)سبحان الله ..شوف الأقدار فين وصلاتكم وفين لاقاتكم..

زوج سعيدة:الى متافقين الله يسخر حممم(مكيبغيش يتدخل)

محمد:خصني مزال نهضر معاها غي علمتكم (ناض)أنا مشيت نبات فالدار

حفيضو:(مشوكية)سير سير

خرج مخليها كتشوف فيهم وفيه حتى نطقات سعيدة:معندك متݣولي خليه يضبر لراسوو

حفيضة:واش أنا كنترجاه يرجع مراتو وهو ناض كيقلب على بنت فاطيمة..

زوج سعيدة:الحاجة رطبي راسك شوية أنا حضرت لهادشي كولو راه البراني تجيبيه ويݣوليك محمد معمرو رتاح مع مليكة ومعمرو غيرتاح معاها خليه مدام لقى لي بغا خليه يتزوج بيها..

حفيضة:واش أنا نقدر نحبسو؟؟راه كبر ولى رااجل وقرب يدير الحفايد غير جاني هادشي بزربة..

سعيدة:(ضحكات)هههههه شوفي الزمان عاود لاقاهم ..مكتابين يتزوجو معندنا ماندير

حفيضة:واش أنا غنبقا غي نبدل فالعريسات

سعيدة:هههههههه كولي أمي راه غي علمك ونوضي إلا غتدهزي بنت فاطيمة ههههه(بتساؤل)معرفت الشيخة أش غتكون دارت . .

زوج سعيدة:حمممم سعيدة

صقلات ماتلاتش دوات ماعندهاش مشكل لا مع حنان لا مع مليكة ديما هي اللوسة لي عاطياهم بالتيساع حيت مالحقاتهاش مليكة فالدار عكس نزهة لي عمرها كامل وهي وياها فشد ليا نقطع ليك. .

شرقات شميسة دافية فمدينة اكادير عاصمة سوس ..

ميمون ونزهة ناعسين فحضن بعض بعدما رجعو فحالهم معطلين و دوزو ليلة حميمية بيناتهم كباقي الليالي لي قضاوها مع بعضهم ولي تحصرات فخمس أيام كلها حب وغرام ودلال وحميمية..مساخينش ببعضهم بتاتا

هو المدلل ليها وهي الأنوثة على رجليها..

كان عريان لابس غي الكالصون مخشية فيه ب أونصومبل عبارة عن شورط فالموف وديباردور ديالو مشبك فالأسود ..شعرها مغطي وجهها باينة فيها غارقة فالنعاس..هو لول فاق بعدما ضربات فيه الشمس لي داخلة من البالكون حيت مدوزوش الريدو..حيد ليها الشعر وباسها فراسها عاد ناض دخل دوش عليه بالخف وخرج لبس.. مباغيش يفيقها، دوز الريدو خلاها تنعس لكنها سرعان مافاقت كتفوه وكتبعد الشعر عليها قاشعاه كيلعب فالتيليفون..تبسمات وعينيها كيتفحصوه و قالت بصوت مبحوح:المصري..

هز فيها عينيه وقال:الزين..فيقتك؟

نزهة:تؤ لا..ضرباتني الفيقة، دوشتي؟؟

ميمون:ااه..(حط تيلي ومشا تخشا حداها دارها فحضنو وتاهيا تخشات فيه)تفطري؟

نزهة:نطلبوه هنا حسن(بدلال)مسخيتش نرجع والله

ميمون:غا نتي لي مزربانا على وديت خدمتك أما نݣلسو حتى شهر

نزهة:اوا خصني نوجد للعرس تابعني شلا وغندخل للخدمة

ميمون:(بجدية)خدمتك غتبرزطني أنزهة..كون تديري ليا خاطري تݣلسي منها..

نزهة:(لحظة صمت وهزات فيه عينيها ويديها كتلعب فلحيتو وشفايفها منفوخين)واحبيبي راه دوينا..أنا مرتاحة فيها نهار غنعيا غنݣلس منها..

ميمون:ماشي قضية تعياي ولكن علاش تخدمي؟؟ مغيخصك والو!

نزهة:وا حبيبي وراني مكنبغيش نݣلس فالدار وصافي..دير ليا خاطري غي بيدما نحمل ونݣلس..

تبسم ليها دغيا وقال:على هاد الكوا لي كويتك خصك تكوني دابا كتوحمي

ضحكات بجهد و قالت:هههههههه ما تعرف

ميمون: إلا عطاني ربي ولد غنسميه حسن على سمية با الله يرحمو

نزهة:(ضحكات)ههههههه الى خلاتك مك سميه حتى على سمية عماتك هههههههههههههههه

ميمون:ههههههههههه مكذبتيييش ههههههه نوضي دوشي نفطرو

نوهة:اليوم غتديني نشري باروك أݣادير أحبيبي

ميمون:ندي لالة نزهة تاخد شنو مابغات(باسها فكتفها)..

رجعات ليه البوسة فحنكو وناضت كتنقز كي الدريات الصغار متقولش عندها 34 سنة..أولا الغلض معامراش بزاف باش يبان فيها العمر قد الطول قد العرض وثانيا التهلية مهلية فراسها ..

دوشات عليها وخرجات ملوية فبينوار الأوطيل ..طلبات الفطور وقالت:ناري شحال باقي تابعني ها النݣافة ها القاعة!!

ميمون:(شد من عندها الفوطة كينشف ليها بحنية)القاعة على حسابي وجمعي معاها حتى داكشي ديال الماكلة ..شوفي النݣافة لي بغيتي ونمشي نخلص..

نزهة:(تبسمات بحب)بزاف عليك هادشي كولو..غتكون عائلتك و عائلتي خلينا نقسمو الصبر..

ميمون:(لاح عليها الفوطة ضاحك)متقسمي معايا مانقسم معاك ههه العرس أنا نتكلف بيه

نزهة:(هزات سوشوار)خليني نخلص النݣافة والباقي خلصو نتا حتى تعلمني شحال ديال ناس عندكم

ميمون:يكون خير..وا طلقي راسك ههههه داك الشعر حرݣتيه بداك العجب..

نزهة:اوا شنو نخليه فازݣ وندير زيف حياتي

ميمون:(فرنس)عرفتي كي غتجيك المسخوطة قتالة هي وشي بيجامة اححححح

نزهة:هههههههه خضر خضر..

نشفاتو دغيا ودارت فولارها فطرو وخرجو مشادين ضاحكين كيف ديما وهي التيلي ديما كتصور وتحط مخلية الزاهية وفتيحة جايبة خبارهم ومشيعاهم على الناس كاملين. .

قصدات نزهة واحد التعاونية كيدوزو عليها فالطريق بين اكادير والنواحي ديالو كيديرو فيها كل ماهو طبيعي وكيف معروف على سوس زيت أركان كيخرجو منو جميع أنواع المنتوجات الطبيعية للعناية بالبشرة..نزلو ومشات كتقدى شنو ماحباات مخلياه حدا الطونوبيل كيتسنا فيها..

هاز تيليفونو كيصيفط للمصريات التصاور كيفما موصينوو حتى سمع سميتو بصوت رقيق:ولد المصري..

هز راسو فإذا بيه كيلقا مرا طويلة وعريضة وهازا ماهاز قلبوو وراها لابسة جلابة إيفازي لاصقة عليها عازلة مؤخرتها لي ضخمة والكرش وكذلك الصدر المبندر..مع الذهوبات طالقة الشعر لي مصبوغ ب ليميش..تاهو كيف شافها فرنس وقال:نعيمة هههههه..

نعيمة:هي هادي(تلاحت سلمات عليه بوجهها )فين غبورك يالمسخوط؟؟شحال ماشفناك...

ميمون:الدنيا هههههه كيدايرا أبنت الحرام فين غبرتي واشمن قصارة تلات ليك هههههه

نعيمة:هههههههههه أنا موجودة غا نتا الله يستر قطعتي الرجل

ميمون:شكديري هنا؟؟

نعيمة:(تكات على طونوبيل كتريح خيرها)جينا خدمنا فواحد العرس هنا لشي ناس شلوح زهوانيين بحالك هههههههههههه(كتضحك والمسكة كطرطق ففمها)..

ميمون:بنت الهم هههههههههه البنات لباس عليهم..

نعيمة:كلشي موحشيينك...غرامتك ياولد المصري مابحالها غرامة ولاو غي السقراميين مخلي لينا داك عباس كيغرم عليا خمسين درهمات..

ميمون:(طلق ضحكتو)هههههههههههههههه حمدي الله مݣاليكش هاكي خمسين ورجعي ليا ستيمة هههههههه..

ضكات تاهيا مصيكة وضربات فيديه متذكرة الموقف وقالت:عقلتي فاش كيغرم عليا عشرة دراهم ههههههه الله يعطيه موصيبة فلوسو منحوسيين..

ميمون:هههههههههه مسخوطة صافي...واكنتي كتعفري عليا

نعيمة:ربي شخبار جمال؟؟ضعاف ولا باقي هاكاك..

ميمون:قرب يولي يصوݣ كاميو هههههه راهو باقي زهواني تابع الشيخات

نعيمة:والله مكنسخا بليلتكم ههههههه وابااان متغبرش

ميمون:لا عفا الله تزوجت ههههههههه..

نعيمة:(طلقات ضحكة رقيقة)ههههههههههههههه أويلي على تزوجتي؟؟نتا تزوجتي؟نههههههههههههه صافي القيامة غتقوووم ملي نتا تزوجتي ههههههخخ ولايني منخافش عليك شهر شهراين ترجع لينا، بلية الشيخات صعيبة تحيد..

ياله بغا يهضر وهي تنطق نزهة من جنابو معرفها فين كانت ولا امتا جات ولا أش سمعات:عندك صح أختي!!بلية الشيخات صعيبة تحيد(حلات الطونوبيل طلعات زاعفة)..

ميمون:(جمع الضحكة)سيري أبنت الحرام شريتيها ليا ..

نعيمة:خخهخهههههههه مسخوط.

مشات نعيمة مخليا ميمون كيشوف فيها من الزاج باينة معصبة عاقدة السبعة فالربعة وحجبانها مهزوزين الفوق..طلع حداها ونطق بهدوء:ميمشيش بالك بعيد أ نزهة غي..

قاطعاتو ببرود عكس شنو داخلها:رجعني للاوطيل

ميمون:نزهة غي

قاطعاتو بصوت مرتافع :رجعني للاوطيل

ميمون:متغوتيييش..نهضرو فالاوطيل..

مدواتش بتاتا حدها قلبات وجهها لجيهة الزاج عاقدة حجبانها و خاطرها معصور عليها الدمعة حابساها بزز حيت سمعات كلشي وشافت كيفاش هضر معاها وكيكركر كي الشياخ..كانت كظن أن ميمون مطلوق معاها بوحدها ساعا السيد صدق مع كلشي كيضحك بأريحية الشيء لي معجبهاش أولا..ثانيا وقف مع شيخة من شيخاتو القدام وكيضحك معاها ويتفكرو أيام الخوالي مدايرش ليها اعتبار بتاتا..

فضل يسكت تيكونو بجوج ويهضر..مجرب غضيبها وعارفها عصبية على الجهد فهاد المواقف ..وصلو لوطيل متسناتوش هبطات دغيا ..تنهد وتم تابعها عارف غيدوز نهار كحل حيت عورها بالمعقول وعارف كذلك أن جنونها الشيخات..

كي دخلات للبيت كتغلي و وجهها حمر نطرات الشال بعصبية كترعد و مشات لشانطتها ديركت كتصايب فيها حوايجها معصبة وبنترة حتى دخل هو شافها أش كدير ومشا ليها شدها من يديها ونطق:خلينا نهضرو ماتفهميش غي لي بغيتي..

بحالا عطاها الضو الخضر صاحت فوجهو رافعة صوتها:أش باغيني نفهم؟؟ أنا نتقدا من هنا ونتا تصيك ليا مع الشيخة من هنا؟؟واقف معاها قدامي وقدام الناس و كتكركر معاها بحالا ديال رااسك؟؟مدرتيييي ليا لا اعتبار لا قيمة واقف كتفكر معاها أيام الغرامة والشطيح والقح**ووووب(كتهضر وكترعد)فين أنا فهادشي؟؟مݣلتي حشومة مراتي كتشوف مݣلتي تزوجت خصني نحشم على راسي نتا عاد مازايد فيييه..

ميمون:(شدها من وجهها)نزهة الله يهديك واش شفتيني مقصر معاها بقات معرفة قديمة وتلاقيتها جات هضرات معايا وسلمت عليها مافيها والو..

تنطرات منو هازا سروال دجين فيديها كضرب بيه :لا فيها أسيدي!!كي كنبان ليك أميمون؟؟واش حمارة ولا شنو؟؟سلمات عليك بوجهها ومحبستيهاش ماد ليها حناكك وزايدها كضحك معاها وتفكر معاها لي فات !!!وملي باقي مقانعش من الشياخ لاش واااخدني لاش مزوج بيا؟؟؟(كتغوت)لاش ؟؟؟

ميمون خلعاتو ردة فعلها شعل فيها العافية ماصاب ميقول حيت الغلط راكبو هو تصرف بعفوية ودوا معاها عادي لكن مرادش لبال لتصرفاتو..شدها من كتافها وبنبرة اعتذار:سمحي لياا مقصدتش هاكاا ولا كي فهمتيها راكي عارفااني..

نزهة:(عينيها تغرغرو)عارفاك زهواني وزطمت معاك وتزوجت بيك..مزال مكملنا حتى شهر وشوف أش خرج منك (طاحت دمعة من عينيها).

كي شاف دمعتها تزير عليه قلبو ..مد يدو مسحها ليها دغيا وجرها معنقها مزير عليها وهي كتنطر منو محاملاهش باقي شاعلة فيها العافية تخلط ليها الدموع مع العصب ولات كلها كترعد..دفعاتو عليها وكملات الجميع وقالت معصبة:خليتها ليك جيب شيختك تݣلس فيها..

حبسها بيديه مزير عليها وهضر كيحاول ما أمكن يبرد:نزهة ..جلسي للأرض بلا طيرااان راه مابيني وبينها والو غي معرفة قديمة..

نزهة:(عطاتها ليه فوجهو)حتى أنا عندي معارفي القدام ومنهم عدد..

هز فيها حاجبوو وخزر معجبوش الحال ونطق:مالنا فالتبرهيش دابا أنزهة؟؟جلسي الأرض راه موقع والو...الالة ندمتيني حتا سلمت عليها ماباقيش نسلم .

نزهة:(بعصبية)عرفتي أش دير؟؟سلم ماتسلمش بوسها نتا كاع غي أنا فرق ساحتي..ومتبقاش تعرفني السلݣوط..

دازت فيه حسابو غتخرج مشا كيزرب شدها من خصرها رافعها من الارض وهي كتركل ليه وكتغوت ممخليهاش تنزل وتغرق ليه ..واحد اللحظة جابت ليه الضحك تا طلقها مع هو ضحك وهي تشعل فيها العافية مضوبلة حساتو كيستهزأ بيها وبالموضوع علاش نايض الصداع..

غوتات تا طلق منها ودموعها نزلو على خدها وجلسات تبكي وتنخصص وتدعي فيه:سير الله يعطيك فاش تلاها كيفما فقصتيني هءهءهء الله ياخد فيك الحق بعد منييي...أنا مفقصة ونتا كضحك عاجبك راسك شنو درتي؟؟ولا حيت صافي درتيني تحت رجليك هاااا(غلباتها البكية)نيتي غتخرج فيك أ ميمون..(دخلات للدوش زدحات عليه الباب)..

ميمون:(تنادم معاه الحال ومسح على وجهو بندم )نزهة حلي الباب نهضرو متقسحيش راسك عارف راسي غالط خليني غي نهضر معاك..

مجاوباتوش كيسمع غي تنخصيصها من الداخل عزاات عليه حيت بكاها..نوعو حنين مكيبغيش يأذي شي حد لكن المرا لي كيبغي آذاها بطريقة غير مباشرة..

أما هي كتحس براسها نقصات ليها ثقتها فنفسها..جلسات فوق لاشاص حاطة راسها بين يديها وكتبكي من نيتها..

أي مرا فالعالم لقات قد حبة عدس على راجلها أنه كيشوف فجهة خرا كتنقص ثقتها فنفسها ولو تكون ملكة الجمال..علاش؟؟لأنه هي حاصرة ثقتها فكونها مقنعاه فقط..نوع نزهة واعية ودارية بالوقت آش بغات وماشي بلدية عارفة لي عليها وعارفة شنو كيبغيو الرجال وطبقاتو كولو مع ميمون لكن متقبلاتش بتاتا تشوفهم واقفين وكيضحك مع الشيخة كيفما كيضحك معاها هي..متقبلاتش تشوف الماضي ديالو قدامها وهي لي منوية من بلان الشياخ ..

بكات حتى طابت على زهرها وعلى مكتابها وعلى حالتها..مرضاتش ومتقبلاتهاش نهائيا حسات براسها قلل منها أما هو كان كاره راسو تصرف بعفوية خرج عليه وخلاه يكره راسو على وديت دموعها وهو لي عاطي العهد ميضرها..

بقات فطواليط مدة طويلة حتى تفشات عاد ناضت غسلات وجهها والعينين منفوخيين نيت والتعب متمكن منها حيت منعساتش مزيان بايتة فعلاقة وفايقين بكري فاش تحرك هو فيقها و عاد زادها البكا..شافت فوجهها فالمراية لقات عينيها تنفخو بالبكا خرجات مغوبشة والعوينات حمرين متسوقاتش لواش كاين ولالا؟؟

مشات ديركت حيدات حوايجها لبسات بيجامة ساتان خفيفة..ضلمات البيت وتخشات فالفراش كتشخر بنيوفها بعد جلسة بكاء..كلما كتذكر ضحكتو كتبغي تموت بالفقصة..

مع سمعات البيت تحل مع غمضات عينيها دايرا راسها ناعسة مكمشة فالغطا..كان هو لي دخل هاز الغدا مشا مخصوص يجيبو ليها حيت عارفها كيعجبها الحوت..حطو فوق طبيلة ومشا لجيهتها نحى الحوايج لي شتتات وتكا على مرفقو حداها ويديه تحطات على ذراعها وهضر بلطف:نزهة نوضي تغدااي(ساكتة)نوضي أحبيبة تغداي متغضبيش على الماكلة..

صاقلة عاطياه مشي مضارتش ومتحركاتش حسابو نيت ناعسة..على راسو طل عليها شاف النيف حمر وبقا فيه الحال عليها..طبع قبلة على حنكها كعربون اعتذار وناض خارج معصب محاملش البلان مخليها هي كي سمعات باب البيت تسد وهي تحل عينيها مغرغرين بالدموع بقا فيها الحال نييت ديال بصح..رجعات غمضات عينيها من جديد باغيا غي تنعس ..

أما ميمون راه تلف ومعرف مايدير ماعمرو قلق شي مرا باش يحزرها..كاع نساء حياتو كانو عابرات كيضحك و ينشط معاهم و يزيدو، عمرو قلق شي وحدة باش يتعلم فن الحزارة ..هز طونوبيلتو وبقا غادي فالطريق تلفان معارف مايدير فالأخير وقف فلاكوط وهز تيلي صونا لهدى تعتقو ..

عيط ليها واتساب رنات قليلة جاوبات:الو

ميمون:هدى لباس؟؟

هدى:الحمد لله وانتا ازيك ازي مراتك؟؟كلو تمام

ميمون:حممم الحمد لله..بغيت نسولك..

هدى:وحدة وحدة عشان أفهم ماتستعجلش

ميمون:حممم الى غضبتو نتتوما النسا أش كيحزركم

هدى:ههههه مش فاهمة انتا بتقول ايه؟؟

ميمون:(معصب غا مع جنابو معارفش كي يشرح ليها)يعني أنا و نزهة مخاصمين..

هدى:اااه متزاعليين..ليه ياحبيبي حصل ايه؟

ميمون:أنا لي غالط

هدى:يعني إنتا الغلطان لازم تعتذر يعني تقولها سوري

ميمون:نعام

هدى:تقولها سامحيني يا حبيبتي..

ميمون:شي حاجة نديرها باش تسامحني

هدى:ممم فهمتها دي...هاتلها ورد

ميمون:هااا كيفاش؟

هدى:احنا الستات كلنا بنحب الورد يعني هاتلها بوكي ورد يعني مممم باقة ورد..

ميمون:ندي ليها الورد؟؟

هدى:ايوا كده..وقول كلام حلو كده عشان ترضي خاطرها

ميمون:(زفر)المشكلة كبيرة ومحال الورد ينفع معاها

هدى:خود لها الورد وبعدين لو مرضيتش احنا نبقا نراضيها

ميمون:واخا شكرا..أنا نمشي نشريه

هدى:ابقا قولي عملت ايه

ميمون:واخا

قطع معاها ودوز نمرة جمال لي جاوبو وقال:المصري

ميمون:ݣوليا فين كاين شي محل كيبيع الورد فاݣادير

جمال:(ضحك)باغي دير شي تعاونية ديال ما ورد الزين ههههههههههه

ميمون:واهضر أ ز**** راني واقف عليها

جمال:وليتي عناب هههههههه سير ل ****** فيه واحد كيبيع الورد تما

ميمون:واخا أنا نسول

عطاه النعت منين يدوز وقطع معاه ومشا ديركت فين قاليه غادي ويسول حتى لقى المحل بستة وستين كشيفة ..نزل مغوبش مفاهم والو كثرة الورد بالشكال والنواع مافهم تازفتة فالأخير عيط لهدى كاميرا وختارت معاه بوكي زوين من ورد الجوري فالحمر خلصو وزاد راجع فحالو عند لالة غنو لي باقي جابدة عليه مفيقها غي صوت تيليفونها لي نوغشها من النعاس..لقات مها جمعات معاها شوية بلا خاطر وقطعات..ناضت من بلاصتها بان ليها الغدا غسلات وجهها وجلسات كتاكل على خاطرها..نوعها لي كيتفقص وياكل بلا حباسات ويغلاض..برددات سمها فالماكلة مزيان ماجاتش فين تكمل حتى تحل الباب ودخل هو هاز بوكي تالورد الأحمر مشافتش فيه معرفاتوش شنو هاز..مكملة ماكلتها مبردة..تنهد براحة فاش شافها كتاكل معارفش مزوج بغولة متصومش على الماكلة...

جا جلس حداها ساكت معارف مايقول والبوكي فيدو كي العريس..حدو مدو ليها وقال بحنية:سمحي ليا أنزهة ..

رمات عينيها للبوكي لي فيديه مادو ليها ومشافتش فيه وسكتات مهضراتش..شربات الما وناضت منخلاه ..زفر وناض تابعها للدوش حالف تا يصالحها لقاها كتغسل سنانها شافت فيه من المراية وكملات عادي ممسوقاش غوتات وبردات..

-نطق بجدية:واش غنبقاو هاكا أنزهة؟؟خلينا نهضرو!

-شللات فمها ونطقات بعدما فقد الأمل أنها تجاوبو:ما بقا فاش نهضرو الصواب خطيتيه أولد الناس..(كتهضر وتشوفيه من المراية)..

ميمون:(قرب دور يدو على خصرها معنقها بزز عليها حاسها باغي تفك منو ونظرتها نظرة قطة شرسة)سمعيني وحكمي وعرفي نيتي أش فيها(كيشوف فيها من المراية)عمر نيتي يكون فيها نخونك ولا نشوف فبنت المرا من غيرك..منهار ݣلت ليك بغيتك للمعقول وأنا حاسبك غي نتي لي كاينة..مغنكذبش لي درتو ممزيانش وغلطت ونسيت راسي وجلست كنضحك معاها ولكن ماشي مدايرش ليك حساب..نتي مراااتي(زير عليها من خصرها حاضنها وباسها فحنكها)وحبيبتي وصاحبتي وختي فيك كلشي..عارف راسي زهواني ومغنكرهاش ولكن معمري نخونك..ضحكت معاها وغلطت واخا أنا ضحكت على نيتي عادي بحالا ضاحك مع شي حد فالزنقة ومكنتش عارف بلي غنضرك هاكا ..مكاينش لي يقلل منك أنزهة ولا يحرك بلاصتك عندي..

كلما هو كيهضر وهي عينيها كيتغرغرو..مرضاتش بتاتا ينقص منها بديك الطريقة ولو عارفاه مقاصدش لكن الشيطان مزين ليها أنه فأي لحظة يقدر يخونها..حاولات تكبح دموعها ومقدراتش ومكتبغيش تبكي قدام شي حد دارت وجهها بين يديها وجهشات فالبكا ممتحملاش الوضع..دورها عندوو محسر على حالتها ضمها ليه بجهد مخليها كتبكي وتشهق على نيتها بتاتا واش ظن أنه ممكن موضوع بحال هذا يبكيها ولا ينوغشها..

خلاها كتبكي على راحتها حتى سكات حدو كيدوز على ظهرها بحنية ويبوس راسها مبين اعتذارو وندمو الشديد..

خرج ليها وجهها من حضنو ومن يديها كتشهق وقال:واصافي أنزهة براكة...سمحي ليا(باس راسها)الله يرحم ليك باك سمحي ليا.

نزهة:(شهقة شاداها)واش أنا مقصرة معاك فشي حاجة؟

ميمون:(باس جبهتها)ممقصرا فوالو أنا لي فمي غي مترع للضحك ..نتي فيك كلشي زوين لي يتمناه أي راجل وأنا مرضي لي لقيتك فيك كلشي زين..غا سمحي ليا راه مافنيتي والو لا نضرك ولا نغدرك..

نزهة:(باقي دموعها هوادين)معارفش باش حسيت فاش سمعتك كتهضر معاها هءهءهء كون نتا كون شوهتيني تما هءهءهء ݣالس كتضحك معاها وتكركر بحالا أنا مكايناااش!!

ميمون:(باس يديها بجوج )والله منويت فيها شي حاجة..كنت كنعرفها فالقصاير وصافي وتلاقيتها وملي هضرات معايا هضرت عادي وصافي..

نزهة:هي دابا وقتما تلاقيتي شي وحدة تبقا تضحك معاها

ميمون:أنا؟؟دفنيني لدرتها(ضحك)وااصافي أنزهة ..سمحي ليا(باس راسها)

نزهة:(تنهدات)أنا غادية معاك بنيتي ونتا الى كتغدر فيا الله ياخد فيك الحق

ميمون:(عقد حجبانو)أش وصلنا لهاد الهضرة أشحيمة(عنقها)الغدر راه مكاينش ومعمري نغدرك ..

سكتات متلاتش هضرات كتحاول تقبل هضرتو وتنسي بيها شنو شافت..

ميمون:زيدي خرجي من طواليط شي نهار يصليها معاك شي جن

نزهة:(بصوت باكي)سير أنا تابعاك

ميمون:هي باقي مقلقة!؟؟

نزهة:(بنرفزة)واش منبوولش؟؟

ميمون:(ضحك)هههههههه واخا

خرج خلاها مشات دارت بيبي ولقات الحيض وهي دير طران فراسها نسات واش قربات ليها..زفرات وخرجات قدامو هزات اولويز وسليب ورجعات من جديد تحت نظراتو ..شويا خرجات ومشات هزات التيلي من حداه ممعبراهش باقي منفخة..جرها حداه درعها بيدو.. وقال:مالنا؟؟باقي مقلقين؟؟

نزهة:لي درتيه ماشي ساهل ننساه

ميمون:غا سرطييه الالاهم(هز البوكي)هاكي

نزهة:(هزات حاجبها)جايبو باش نسمح ليك

ميمون:(غلباتو الضحكة)هادشي لي ݣالو ليا

نوهة:شكون ݣالها ليك؟؟

ميمون:ختي

نزهة:مزيان بحرا تعرف مك راه زهواني وكتبع الشيخات

ميمون:ههههههه لالا ختي هدى ماشي دياول مي..طلقي البشرة براكا من البكا..

نزهة:غي ديرها ݣد راسك وݣوليا طلقي البشرة

ميمون:(زير عليها وباسها ففمها)لهلا يقلقك لينا الالة تالبنات..(بتساؤل)شفتك هزيتي داك العجب ديالك؟؟باقا كدوزي بدم..

نزهة:جاتني العادة الشهرية

ميمون:وااه؟؟(حركات راشها بالإيجاب)كضرك شي حاجة؟

نزهة:ضارني خاطري

ميمون:(عارفها باقي ما تفشات غي باغية تجيب فشوشها)ميضركش غي زكك أما الخاطر غادي نصفيوه..

شافت فيه بنظرة جامدة وقالت:راشقة ليك؟!

ميمون:رخفي فيك النفس ونتي كتعصبي راسك على والو!

نزهة:(بنرفزة)حتى تكون بلاصتي وحسبها والو..

ميمون:(هز حاجبو)نزهة صافي سدي الهضرة هنا..غلط مغيبقاش يتعاود..

بغات تجاوبو صونا تيليفونو كانت هدى رد عليها:الو

هدى:هاا عملت ايه

ميمون:(ضحك) الأمور تمام..

هدى:ههه بقيت مصري أهو..متيجي نتكلم كاميرا..

ميمون:كيفاش

نزهة:بغات تهضر فيديو

ميمون:اه واخا

قطع عليها ونطق:ديري زيفك!

نزهة:(زفرات)ماغنبانش..

ميموت:ماجاتش أنزهة باغيين يشوفوك نتي ..

ساطت وناضت دارتو ورجعات حداه لقاتو شد الأبيل بانو المصريات مستفين كاملين والتيلي قدامهم..تبسم وقال:الحب..

سارة:يا حبيب أختك انتا..اييه القمر لي قاعد جنبك

نزهة:(تبسمات ليها واخا ما عندها خاطر)ربنا يخليك ياحبيبتي ازيكو ..

نجلاء:اييه ده يا ميمون اييه الجمال ده هههههه ده نتي جميلة أوي..

نزهة:(شافت غي النسا وحيدات الفولار)ربنا يخليكو انتو كمان ماشاء الله عليكو..

زهرة:ياحبيتبي ده نتي تحفة ربنا يحفظك ويخليكو لبعض

ميمون:كي دايرين مزيان؟؟

نجلاء:نزهة الترجمة الترجمة..

نزهة:هههه قال ازيكو

هدى:لازم تيجي مصر عشان تتعلم مصري

ميمون:إن شاء الله

بقاو كيهضرو معاهم ويشكرو فنزهة وفزينها ويضحكو معاها محبوبات على الآخر مكبرين بخوهم لي واخا معاشش معاهم حاسبينو منهم..تنفسات معاهم نزهة شويا وضحكات جهد شي نص ساعة وقطع ميمون المكالمة..

وقال:كي جاوك؟؟

نزهة:زوينين..عائلتك كلها الله يعمر ليها الدار..

ميمون:(دوز يدو لشعرها كيفكو بصباعو )وأنا؟

نزهة:(بهدوء تنهدات كأنها حاملة هم الدنيا)مالك نتا؟؟زهواني شغندير ليك؟..

ميمون:(مبسم)تزهونت غا عليك..ماشي شفتيني كنهضر معاها راه غنغدرك معاها ولا عاجباني..

نزهة:كون نتا شفتيني غي ݣلت السلام غتقلب عليا الدنيا ..أنا عارفاك كثرة تسوال فين كاينة منين جايا فين غادية ديري زيفك كلها غيرة فيك ..كون عيشتك شوية منو غتحس بيا(تنهدات بحزن) ولكن أنا محتارماك فغيبتك وفحضورك..كنتي ولا مكنتيش كتبقا ميمون(حطات يديها على قلبها)ميمون ديال قلبي لي منبغيش نضرو بݣد هاكا..براكا غي شنو عشتي وشنو دوزتي كتعز عليا نطيح بهضرتك ولا بقيمتك الأرض ماشي حيت كنبغيك وصافي ولكن حيت قيمتك عندي كبيرة..

طلعات تبسيمة حنينة ففمو معبرة على احترامو ليها فهاد اللحظة..بينات ليه بلي عاطياه قيمة كبيرة لي يمكن قبل تاحد ما كان دايرها ليه وكذلك عن حبها ليه وكيفاش كيعز عليها تعذبو يكفي شنو دوز..محس براسو حتى جرها دارها فحضنو بهدوء مقبل فوق راسها:سمحي ليااا أنزهة..مقصدتهاش هاكا....

نزهة:(بتعب)ربي يسمح ليك

ميمون:(حاضنها بحنية)تخرجي شويا؟؟

نزهة:مافياش رجلي عاطيني الصداع مع ليغيكل

ميمون:نجيب ليك شي دوا!!

نزهة:لا غنتكا وصافي..فاش كتجيني مكنحملش نخرج حيت كتبرزطني..

ميمون:واخا..(محاول يراضي خاطرها ومعارفش)نجيب ليك شي حاجة؟؟بغيتي السقاطة

نزهة:لا..

خلاها على راحتها حاطها على صدرو وسكتو كيتسنطو لعظامهم حتى حس بيها سقلات نيت طل عليها لقاها نعسات..تبسم وناض هزها بشوية ونطق مازح:الحلوفة ثقيلة..

دارها فالسرير..قاس رجليها ملي بغا يجر عليها الغطا لقاهم باردين..غطاها وخلاها ناعسة من جديد تقول ماشي هي لي عاد نعسات..طلب لراسو شيشة نعناع شيش عليها وبقا جالس جاه القنط فالبيت مكيدير والو حتى ضرباتها الفيقة بتيليفونها لي صونا كان محمد..ستغربات وجاوبات..

ضرباتها الفيقة بتيليفونها لي صونا كان محمد..ستغربات وجاوبات..

كتثاوب:محمد

محمد:لباس؟

نزهة:الحمد لله أخويا ونتا؟؟كي دايرين دراري..

محمد:بخير حمم فين كاينة

نزهة:فأݣادير

محمد:امتا غترجعي؟

شافت فميمون وقالت:غدا علاش؟؟واقعة شي حاجة؟

محمد:بغيتك فواحد القضية..

نزهة:أشمن قضية؟؟ياكما مي مريضة

محمد:لالا..حتى تجي ونهضرو

نزهة:واخا إن شاء الله بسلامة..

قطعات معاه كتفوه شافت فميمون مزال شاد الشيشة وقال:خمرتي ؟

نزهة:كادير ليا النعاس هاد الويلة(تعجزات)شبعتي شيشة

ميمون:مجاتش زوينة بلا بيك ...أجي نݣوليك!

ناضت بشوية عليها كتعجز تحت نظراتو ومشات حداه باقي دايرا فيها معفرة..درعها بيدو وقبلها ففمها بلطف حتى تذوقات طعم النعناع وقال:شويا دابا؟..

نزهة:(عينيها مجبدين بالنعاس)الحمد لله..نخرجو؟؟

ميمون:ياله الالة نخرجو

نزهة:(وقفات)غتخلص ضريبة البكا لي بكيتو غا بلاتي

ضحك وضربها لمؤخرتها وقال:أري شي عضة

نزهة:حلم طيبتييها

ساط الشيشة وقال:اححح عليك أمو ترمة ومدايرا فهاد المصري

مشات هزات حوايجها ودخلات للدوش غسلات وبدلات عليها وتريحات خرجات ناضية بقا ليها غي الفولار لقاتو كمل ومتكي لايح راسو لور عارفاه كترخيه الشيشة ..

سالات وقالت:ميمون

ميمون:مممم صافي

ناض عينيه حمرين كحب وقال:زيدي (ذرعها بيديه)مال الزين كيبان عيان؟

نزهة:فاقصني واحد خينا الله يعطيه على قد نيتو معايا..

ضحك وباسها فحنكها وخرجو معنقها قاصدين أسواق أݣادير باش تاخد منها لي حبات وكيف قالت كيف نفذات خلص ضريبة بكاها غالية بزاااف ماخلات ماشرات من ماعن لدارها ومن حوايج ليه وليها منساتوش نفسات شويا وتهدنات حيت عرفات حقيقة الموضوع واخا متقبلاتوش بينها وبين عقلها..

رجعو بعدما تعشاو على برا مهدودين خلاو كلشي فالطونوبيل حيت لغد ليه غاديين فحالهم..كي دخلو مشات بدلات عليها وطرفات ورشات عليها سبراي للجسم وخرجات لقاتو كيتسناها باش يدخل حيت ولف كل نهار الدوش كيتعلم منها هي لي نقية وديما النظافة مكيبغيش يكون قل منها..

فالزواج شي كيتعلم من شي ..كلها كياخد الطباع لي بغا سوا بطريقة غير مباشرة ولا مباشرة..

تخشات فالفراش كتهضر فالواتساب مع سميرة مفرنسة طلعاتها عليها حيت عرفاتها صبحات حتى خرج لبس ومرداتش ليه البال حتى تنشر حداها وقال:معامن شادة الجموع؟؟

سدات تيلي وقالت:مالك غي نتا لي تغدر؟

ميمون:(بجدية)نعام؟

نزهة:والو ههه غي مع سميرة وصافي..

جرهت دارها فحضنو وقال:اليوما صومتينا الالاهم

نزهة:اوا صبر ماعندك مادير نرتاح نيت أنا شويا راه قتلتيه مسكين..

ميمون:(كيدوز يديه على ذراعها بحب)كيعجبني مكنقدرش نتفرق عليه(مسخو الضحك)مبطبطب

نزهة:(ضحكها)هههه كيفاش

ميمون:منفوخ الزين ..بحالا كتعض فشي بطبوط ديال شياظمة هههههههه..

نزهة:(عيات تحبس فيها)ههههههخخخخخخخههههههههههه أويلي هههههههههههههه حتى هو رديتو ليه سمية

ميمون:ههههههههه غا أنا لي مسمي هههههخهه(طلع ليها راسها باسها ففمها)

نزهة:الله يمسخك هههههههه دير لينا شي فيلم نتفرجو فيه

ميمون:بلاتي نطلب شي شيشة باش نزهى عليك

نزهة:مكتعيكش أميمون؟؟(قاست كرشو)شو ݣداش ولات غي بالشيشة

ميمون:معندها مادير ليا غي كتنغمني وصافي

نزهة:لي بان ليك

طلبها ليه وبقاو شادين الجموع الليلة كاملة عاصرين على فيلم مصري هي لي ختارتو حيت عرفاتو باغي يتعلمها على وديت خواتاتو حتال أشمن وقت ونعسو فحضن بعض..

******

ناضو فالصباح معطلين فطرو وجمعو حوايجهم وشدوها لكازا بعد ما دوزو أيام عسل مع بعض تذوقو فيه طعم الزواج والحب بنكهة أخرى..

وصلو لكازا دوزها لدارهم ومساخيش..وقف قدام الباب وقال:ميهديكش الله وتمشي معايا للدار

نزهة:تابعني شلا مايدار غدا النݣافة وخصني نطل على ثوابي عند الخياطة نشوف واش وجداتهم ليا بقات غي 12 ليوم للعرس

ميمون:مسخيتش بيك؟؟

نزهة:(تبسمات)باقي تابعنا العمر كامل نݣلسو فيه (باستو فخدو)

ميمون:أري شي وحدة ففمي لمك

ضحكات و نزلات وتبعها نزل معاها شوانطها حطهم ليها قدام الدار ياله بغا يهضر وهو يتحل الباب كان محمد لي غي شافوه تجمعات ليهم الضحكة..

محمد:حممم على سلامتكم(باستو نزهة فحنكو)

ميمون:سي محمد لباس؟؟

محمد:الحمد لله

نزهة:حمم ميمون أنا غنطلع..

محمد:خلي هادي هنا لتحت حتى نجي من الجامع ونطلعها

ميمون:الله يعاونكم..(سلم عليها بوجهو)إلا خصاتك شي حاجة صوني ليا

نزهة:واخا..بسلامة .

مشا ودخلات هي ومحمد لي نطق:كاع هذا سفر

نزهة:ويلي راه راااجلي

محمد:(خزر)مبقيتيش كتحشمي

نزهة:(طالعا)حشم غا تاا(ضارت عندو)أجي لاش بغيتيني؟

محمد:حممم سيري حتى نجي من الجامع ونهضرو

نزهة:واخا

دخلات لدارهم سلمات على مها بتعناق وجلسات ضاحكة ناشطة و لوخرا كدير ليها استنطاق:فين مشيتو كاع؟

نزهة:ما خلينا حتى بلاصة هههه واحد السيمانة تالعسل

حفيضة:(بصوت منخافض)صبحتي؟؟

نزهة:(هزات فيها حاجبها)أش بان ليك؟

حفيضة:(لمطات فمها)أنا ݣلت لا ..

نزهة:اوا لا ههههههه(بغات تلفها)أش بغاني محمد؟

حفيضة:(بتساؤل)منعرف(زفرات)فراسك بغا يتزوج؟

نزهة:(ضحكات بجهد)أويلي هههههههههههه ومزال كاع مطلق

حفيضة:والمصيبة هي شكون بغا ياخد!!!

نزعة:شكون؟؟(كطنز)ياكما شي وحدة فبنات عمتي هاد المرة؟؟

حفيضة:(بهدوء)ببنت فاطيمة!!

نزهة:(شرعات عينيها)حلفي ..فين شافها؟؟فين لقاها!!

حفيضة:منعرف ليه ..لاحها ليا وزاد و مكيتشاورش أنا كنتسناه يرجع مراتو ويجمع الشمل وهو مشا كيقلب ليا على بنت فاطيمة..

نزهة:(بجدية)مي دخلي سوق راسك واش نتي عشتي مع هاد مليكة ولا غي جاب ليا الله..مليكة راه متعااشرش مها وكتݣول فيها واعرة وحارة ..كون كانت لالة ومالي كون نساتو بنت فاطيمة ..مالها أش خصها؟؟الزين وزوينة والحداكة وحادكة ولكن معندهاش هذاا(شيرات للسانها)مكتعرفش تهضر ومكتعرفش تصرف وغي كتنݣر حتى نفراتو كثر ماهو نافر..لا كان دار ليك خاطرك وخداها وعاش كثر من 20 عام ديال العذاب راه غي باش متقلقيش..

حفيضة:(تنهدات)أنا كيبقاو فيا غي الدراري

نزهة:(ناضت)أنا مبقاوش فيا!!حيت دابا عايشين مزيان..فين عمر محمد و ولادو يجلسو تا فالطبلة مجموعين؟دابا راهم كيتقهواو ويخرجو وكيصرف عليهم عادي ..شوفي غي إيناس كي ولات، رتاحت فحياتها حيت مكاينش الصداع ..شي مرات أمي الفراق كيكون رحمة..

حفيضة:اوا أ شنݣول الله يسهل عليه وصافي..بلي فيها الخير

نزهة:آمين أنا نبدل حوايجي..غدا غنمشي للنݣافة نعربنها

حفيضة:واخا ابنيتي

مشات بدلات عليها ناشطة وماشطة وجلسات حدا مها كيتعاودو حتى دخل محمد تعشااو ومجبدش الهضرة بتاتا حتى هي طمرات حيت عرفاتو لاش بغاها..موراها كلها مشا فحالو لبيتو ينعس..

دوزات اتصال ليه بعد رنات قليلة جا صوتو ناعس:الو

نزهة:نعستي أحبيبي؟

ميمون:ممم عييت مع الطريق

نزهة:صافي غي سير نعس ..تصبح على خير

ميمون:(كيتفوه)خصاتك شي حاجة؟

نزهة:لا غي بغيت نݣوليك كي وصلتي..غدا غنمشي للنݣافة تمشي معايا!

ميمون:واخا نمشي ديري شي وقيتة وعلميني..

نزهة:واخا..ياله سير أكبيدة تنعس

ميمون:تصبحي على خير

نزهة:ده نتا الخير كولو..

ضحك وقطع معاها ومشا كمل نعاسو مهدود بالعيا وحتى هي تخشات ففراشها كدوز تصاورهم بجوج وتفرنس فالأخير حطات وحدة فالفيسبوك كيبانو فيها زوينين معانقين وكتبات عليها

"دمت لي عمرا"..

▪︎▪︎▪︎▪︎

أنا الذي أغرمت بكل النساء

عشقتك أنت فقط..

▪︎▪︎▪︎▪︎

صباح جديد صبح على ميمون لي نعس بكري فاق مرتاح..ناض دوش وغسل سنانو و وجهو وهادي عادة كتاسبها من نزهة لي ولفاتو الدوش فهاد المدة لي دوز معاها

لبس عليه وخرج بلا فطور هاز طونوبيلتو ورابط الإتصال بيها هي مجاوباتش عرفها غتكون ناعسة...

نزل لمحلاتو كيضور فيهم ويسول على الشادة والفادة حتى وصلات وقيتة ديال الغدا عاد تفكر بلي باقي بلا فطور مع بغا يمشي يفطر مع صونا تيليفونو لقاها نمرة نزهة..شد الأبيل وتحرك:لالاهم..

نزهة:ولي فقلب ميمون فايتاهم

ميمون:ههههه كي صبحتي الزين؟؟ناشطة مرتاحة ليا

نزهة:منعست ماشفتو

ميمون:وعلاش؟؟

نزهة:(بدلع)وا ولفت ننعس حداك هههه

ميمون:قولي ولفتي الحلوة كل نهار

نزهة:(كركرات عليها)ههههههههههههه واش نكذب ولفتها..راه غا ذوقتيني ودزتي..

ميمون:(ناشط بهضورها)متسالني لالة البنات غي شي ليلة مقو*** دة ههههههه

نزهة:هاهيا قيدها فالكارني ههههههههههههه

ميمون:مشات ههههه فين كاينة؟؟

نزهة:فدارنا ونتا؟؟

ميمون:ياله غنمشي نفطر الزين ونتلاقا بجمال..

نزهة:حتال دابا عاد تفطر راه 12 هادي..

ميمون:ملي خرجت و أنا من هادي لهادي ..كثرة المطارق

نزهة:وا رخف على راسك وكول فالوقت باش تطلع فسر فالعرس

ميمون:ههههههه هي الى جيتي توجدي ليا هاد الفطور

نزهة:ومالو يغلبني ههههه

ميمون:عارفك الزين حادݣة

نزهة:ياله سير تفطر وملي تسالي شغالك علمني نمشيو للنݣافة

ميمون:أنا الجوج نسالي..جوج ندوز عليك واخا..

نزهة:واخا..بسلامة السلݣوط

ميمون:بسلامة أمولات المبطبط..

قطعات كتضحك من نيتها مع تلفتات بانت ليها مها شادة حنكها وقالت:كتݣولي لراجلك سلݣوط؟؟

نزهة:(حابسة الضحكة)كنضحك معاه ههه..

حفيضة:تي منين جبتي هاد الصواب أويلي..السيد شهوة وتݣولي ليه سلݣوط..

نزهة:هههههههه علاه غي شهوة ههههه حلووو(تلاحت عليها فحضنها)كنبغيييه أمي..

حفيضة:الله يمسخك ههههههههه خصو غا هو يبغيك

نزهة:عندو عزيزة والله ممنوش جوج ههههه ولداتو ليا مو غا بوحدو

حفيضة:الله يخليه ليك هههههه

أما عند ميمون دخل للمحل عادي كيفطر فيه كيضرب فالبيض واتاي حتى شاف جمال داخل لاح سوارتو.. وجلس:اححح أرجلي..

ميمون:مالك؟؟

جمال:فيا الجوع!!

شير لسرباي وجا وقاليه:جوج مقالي وثلاثة تالخبزاات..

ميمون:(مسخو الضحك)وشي كلاك تهزو ههههههههههه

جمال:سري أنا لي خارج نقضي ليك فأغراضك أولد الحرام...

ميمون:مالك بالجميل ههههه بزز عليك..

جمال:(كياكل معاه ويهضر)المصبنة كلشي مزيان أخويا..ناضي المشروع وراه بدات كدخل

ميمون:خصني نرد شنو خسرت دغياا باش نعرفها خدامة

جمال:(هز ليه كاسو كيشرب منو)لا غترد..

ميمون:نههههههه حلوف صااافي

جمال:كيدايرا نزهة؟؟

ميمون:ههههه عشيرتك حتى كتݣوليها نزهة؟؟

جمال:(كيطنز وياكل خبز حرفي حيت سالا البيض)لالة مرات سيدي كي دايرا ههههههههه؟؟

ميمون:ههههههه ݣول ختي لدلمك لباس عليها ههههه ههههههه

جمال:اوا مزيان (نادى)واصاحبي تعطلتو راني غنلوا هنا

ميمون:نعل جدك نتا وماكلتك هههههه

جمال:كاينين شي لعيبات فبلان محل الزرابي

ميمون:عرفتي شحال مامشيتش لتما!! كنعرف غي فلوسي كتوصلني

جمال:ملݣيني أنا للعافية وصافي...

ميمون:فطر ونمشيو للمحل عندي خصني فيه شي شغل وشرح ليا شكاين

جمال:(عض الخبز)واخة..

جابو ليه ماكلتو ساط فيها كاملة وناض ميمون خلص وخرجو بجوج لمحلو كيهضرو ويتناقشو مع وصلو لحدا المحل كانت جوقة صغيرة..

جمال:نايضة مطايفة؟

ميمون:(كيشوف مركز)منعرف..

هبطو بجوج وبان ليه مول الجيلي أو ما يسمى بالݣارديان ديال الطونوبيلات مشانق مع واحد السيد وكيتغاوتو و الناس كتفك بيناتهم..مشاو كأيها مغاربة بغاو يشوفو أش واقع ..

لقا ميمون الݣارديان كيعرفو حيت كيحضي الطونوبيلات تالبياعا والشرايا صحاب الجملة وداك الشارع كولو ديالو هو لي حاضيه..تدخل كيفرق بيناتهم والغوات نااايض ..

ميمون:(كيفرق)وااطلق أ سيمو أصاحبي

سيمو:(كيهضر وكشاكشو خارجين)حييييد حييييد نوري لموو يتهز علياا تشاااا بربي حتاتطيح بطااانة..

السيد كيغوت تاهو:أنا غنربيي دلمك أولد الق***** نوريك النصيييب ..

كيتجارو ويفارقو والسيد معامن مضارب معاه صاحبو بغا يتحاماو عليه وميمون يجر وجمال يجر والناس تفك لكن والو فاش كيحضر الشيطان كيكون الواحد فيه عشرين وميقدرووش عليه وكأي استعراض مغربي راه ضروري واحد فيهم كيدير فيها راسو بطل وكيحيد تريكوه ويغوت ويرعرع وهنا كان الݣارديان هو لي تقمص الدور المغربي المشهور..

حيد تريكوه وبدا كيغوت مبعد منهم كيسب ويخصر الهضرة باينا فيه مقطوع عياو صحابو يشدو فيه والرجال لكنو كيتنطر باغي يسلخو..

معيور من كلا الطرفين لكن الݣارديان مشا للبنيقة ديالو الصغيرة حيت حارس ليلي كذلك هز منها مووس مااضي كيشعشع دايرو احتياط على حساب الليل فاش كيعس..وجا كيتبومباا بيه عليهم ..

كلشي تخلع وهو كيتحرك كي شي حمق وسط الشانطي وكيغوت ويهدد:حيدوووو غنيك لمو وجهووو نوريييه تنصااابت حيدووووووو

ميمون:(جا قدامو)سييمو ريييح وحيد الق لاوي من يديك..غدير لي تندم عليه..

سينو:حيدد المصري حييييد نيك مووو

بقا كيروبل ليه فالطريق والناس أغلبية بعدات حيت المضا هذاك أو بالأحرى الجناوة ..إلا الأقلية لي كيعرفو سيمو راه بقاو كيهضرو معاه ويشدو فيه ومن بينهم ميمون لي شدو من يديه كيهضر معاه:برد أصاحبي أنا نخلصك . .

سيمو كيتنطر ويغوت باغي يضرب لاخر لي مبعدينو الناااس..مع بغا يتنطر ليه مع حرك الموس وكيتجبد دفع ميمون ومشا للسيد ناوي يضربو بيه لكن ميمون عتارض طريقو من جديد لكن للأسف خدا الضربة لي غيشد السيد وتخشا فيه الموس فكرشو خلاتو يتوقف عن الحركة وعينيه يخرجو من شدة الألم..أما سيمو راه تصدم وبعد عليه مخلي الموس فيه مصدوم ويديه فيها الدم..

كلشي شهق والرجال كيتجاراو ويغوتو أما النسا المارين راه تسمع غواتهم وشهقاتهم منين ومنين..

جمال:(غوت)مييييمووووون..

هاد الأخير لي حس بألم فظيع ويديه تحطات على بلاصة الضربة مع شاف الدم طاح للأرض على ركابيه فمنظر تدمع له العين..التصفار فوذنيه ومكيسمعش مزيان كيسمع صوات بعيدة.. ..

مع طاح مع شدو جمال قبل مايكمل الطيحة..وغوت باسموو من جديد:ميمووون!!!

صرخة جمال كانت عالية خاصة فاش طاح بين يديه وكمش عينيه من شدة الألم لي سرى فديك المنطقة فالبطن..تجمعو الناس والݣارديان تخلع وهرب..

المضاربة توخرات بالقتيلة ولي مشا ضحيتها هو ميمون..الضربة جاتو فكرشو جنب شويا ..الناس مجموعة عليه وهو عينيه تضببو كيشوف الناس لكن مع الألم مستوعبش بتاتا...كلشي هاز تيليفونو كيعيط للبوليس و لاموبيلونص إلا جمال لي كان متوتر وكيعراق عينيه تغرغرو وهو كيشوف المصري خوه كيموت..

أما ميمون راه حالتو مزرية بالألم وكيحس براسو غيموت وعلى بعد خطوات قليلة من الموت..زير على يد جمال والدم دايز منو..هاد الأخير لي كيتاصل بمعارفو توصلو الإسعاف لأنه إلا جلس يتسنا دياولنا غيموت ..

الشارع كولو تحبس لي داز كيوقف و جمال كيغوت باش يخليو ليه منين يتنفس..وجهو مع سمر بالألم زراق و ولى كينهج والألم حاد حتى باش يغوت ميقدرش..

جمال:ميمون شد راسك متغيبببش(كيدير اتصال)وااافينها أصاحبي سيد كيموت..

حيت الدم سال وقفات سيارة الشرطة لي نزلو منهاجوج رجال كيبعدو الناس..واحد فيهم قاس عرق النبض.. وقال:نبضو كيضعاف(كيعيط للإسعاف)

جمال:عيييطت ليهم غيجيو مغنديهش للدولة غا نديه كلينيك..

الشرطي:لي جات لولة تديه..

بعدو الناس شويا ودارو اتصالاتهم دازت عشرة دقايق كيتسمع تصفار الإسعاف من بعيد أكيد الخاص ماشي الدولة...بعدو ليها الناس ونزلو المسعفين مهبطين فاش يهزوه أول مادارو هو قاسو النبض..دارو ليه جهاز تنفسي حيت تنفسو قلال لكن قبل مايديروه نطق ميمون بصعوبة:جمااال مييييي

جمال:سكت سكت مغيطرااا والووو..

شافو الرجال فبعضهم و عطاو الإشارة بعينيهم بعدما حسبو لثلاثة وهزوه بطريقة احترافية تفاديا لأي نواتج أخرى لانه فحالة الطعن طريقة تحريك المريض كتلعب دور كبير يقدر حركة بسيطة تزيد تعمق الجرح ..

تهز ميمون وداروه فالإسعاف طلع معاه جمال لي مخلوع ولى صفر بالخلعة..قاسو ليه الظغط وحبسو ليه النزيف بفاصمات باش ميزيدش يخسر الدم.. كل الاسعافات تدارت ليه ومجاش فين يوصل السبيطار حتى كان فقد الوعي وغمض عينيه..

وقفات الإسعاف أمام المستشفى الخاص الشيخ بن زايد..من بين أحسن الكلينيكات فكازا و نزلات ميمون لقاو فريق طبي فانتظارهم كيزربو بيه عطاوه للممرضين والطبيب لي كيتسناه وكيسول على حالتو لي دققوها المسعفين...دخلوه للفحص ديركت والموس مزال فكرشو..

خلاو جمال كينهج بالخلعة معارف مايدير علاين يسخف هو نيت كانو فالضحك صدقو فالجناوا والقتيلة..مشا كيتسناهم ويمشي ويجي بحالا فيه السهال..خرجات ممرضة حسابو طبيب وقال:أمدرا؟

الممرضة:هادشي لقيناه معاه..منقدر نݣوليك والو دابا الطبيب معاه ..

شد تيليفونو وشي فلوس وسوارتو وتحنى شاد راسو بين يديه وكيتنهد..لي لداخل خوه وعشيرو ومدوزوش القليل منظرو وهو كيتألم وكينطق مي خلات عينو تدمع ..

وقفات عليه سيدة لابسة مزيان نطقات:موسيو نتا لي مع السيد لي جا دابا؟؟

حرك راسو بالإيجاب و وجهو عليه علامات الحزن وهي تنطق:خصك تعمر وراق خاصين بييه..

ناض كيتنهد وراسو محني للأرض مباغيش يعليه باش ميطيحوش دموعو..مشا معاها كيعمر فالوراق وخلصها بالكارط بونكيغ مع بغا يسني شي وراق كان تيليفون ميمون صونا بإسم نزهة..

حط الوراق وهزو كيشوف فيه واش يعلمها ولالا..معرف ميدير خلاه كيصوني حتى سكت ورجع كيتسنا من جديد وقلبو شاعلة فيه العافية على لي لدااخل..

أما نزهة كانت لابسة عليها كتسناه يصوني ليها حتى صونات ليه مرة وجوج وثلاثة مكيجاوبش بتاتا وستغربات

حفيضة:تي مالك؟؟

نزهة:معرفت مال ميمون كنصوني ليه مكيجاوبش

حفيضة:تصيبيه خداام ونتي باركة تبرزطي فيه

نزهة:كيكون خدام وكيجاوبني أمي..

حفيضة:اوا خليه غيعيط ليك أبنتي ..

نزهة:دار معايا ثلاثة نمشيو للنݣافة

حفيضة:الغايب حجتو معاه أبنتي

نزهة:ونتي مناوياش تمشي ولا؟؟نوضي لبسي جلابتك

حفيضة:ويلي تي غادية معاه ونمشي معاكم؟؟لالا خليني فداري

نزهة: علاش؟أش فيها؟

حفيضة:هههه كنحشم مزال مولفت عليه ههههه

نزهة:شتي غا ميمون كاعلا تحشمي منو مقزدر هههههه

حفيضة:واخا هاكاك مولفتش ههههه غا سيري ابنتي نتي وياه

نزهة:(كتعاود تصوني)لا غتمشي معايا..والله مايجاوب ففففف..

عينيه على التيليفون لي كيصوني مقادرش يجاوب..أصعب الحوايج فالحياة هو تنقل خبر سيء مكيقدرش لسانك يجمع الكلمة بتاتا..دوز نمرة باه خبرو بشنو كاين لاخر لي تهز من بلاصتو مرعود عليه حدو عطاه فين كاينين وقطع وجلس كيتسنى..

أما عبد الرحمان راه قفز من وسط مقر عملو وعيط لمنعم وغادي خارج كيزرب الصحة قليلة لكن الجهد جهدين..

منعم:أمالك أخالي؟

عبد الرحمان:زيد ديني عند مك...خوك فالسبيطار

منعم:(خرج عينيه)شكون فيهم؟؟

عبدك الرحمان:ميمون..

فشل منعم حتى هو وطلع حداه كيسول فيه حدو خسر عليه تضرب بموس وهاد العبارة كفيلة باش تخلي بزاف تالتهيئات يزورو خيالك..

"تضرب بموس"

غيجي فبالك..تجرح..تحل..تشرشم و الموت أكيد..

ما وصلو عند الزاهية حتى عبد الرحمان علاين يطيح ليه طونسيو..كيبقا ميمون ولدو الروحي ولو ميكونش ولدو ولد ختو....نزلو كيزربو دخلو حيت الباب ديما محلول لقاو الزاهية كتنصب الطاجين وتكركر مع عريساتها حتى نطق:الزاهية

الزاهية:(تلغات ضحكتها)خويا..شساير دير هنا؟؟

عبد الرحمان:سيري لبسي جلابتك غنمشيو لكازا..

الزاهية:(سرطات الريق )لاش؟؟(شافتو ساكت)خويا لا؟؟

منعم:مي ميمون ضربوه بموس وراه فالسبيطار..

طاحت عليها الخبرية بحال الما القاطع فقلبها..تهز وتحط وملامحو جمدو أما فمها صفار..غوتات مولولة:أويلييي...أويلي مال ولدي( كانت علاين تطيح وشداتها فتيحة)مال ولدييييي(طاحو دموعها)..

فتيحة:خالي(بخوف)أش طرا ليه؟؟

عبد الرحمان:جمعو عليا من البكا(بعصبية)تحركي إلا غادية ولا نزيد ونخليك ..

الزاهية:(كتبكي وترعد ) واا ولدي...وااا ولدي وا المرضي ديالي واش طاري ليك؟؟(كضرب ففخاضه))أميمتي على ولدي عوينة وحدة لي عندي ياربي..

فتيحة:(عطاتها الما والسكر كترعد)نوضي أمي نمشييييو نوووضي..

كلشي تصدم فالعريسات خبر نزل عليهم كي الصاعقة كلها منين جابت حاجة لبسوها و ركبوها فطونوبيلة عبد الرحمان لي سايقها...حالهم حال لي مات ليه شي حد..مسكتاتش الزاهية من البكا والتنواح وفتيحة كذالك كدمع..كيبقا ميمون هو الأخ وهو الإبن البار ومن غيرو ميكونش..كتبقا الكبدة لي كتدوي الإنسان ..

*****

فالسبيطار كان جمال باقي جالس كيلعب برجليه بتوتر كيتسنا فالطبيب والريق نشف من فمو و التيلي باقي كيصوني زفر وقرر يجاوبها وشد الخط..تسمع صوتها:أحبيبي فينك!!!

جمال:(غمض عينيه وحلهم)ختي

نزهة:(جاها ماشي صوتو)ميمون؟؟

جمال:جمال هذاا أختي

نزهة:جمال؟؟كيداير أخويا؟؟

جمال:(تنهد)نزهة أختي ميمون تضرب بموس وأنا معاه فالكلينيك..

تهز قلبها هي الأخرى فور ماسمعات جملتو وجلسات لثواني معدودة عقلها كيحاول يستوعب جملتو حتى قفزات ونطقات بخوف:أويلييييي...كيفاش تضرب(بدات كترعد)فينو ميمون؟؟

جمال:(زفر)ختي جي لكلينك خليفة بن زايد..هادشي لي نقدر نݣوليك...

قطع عليها خلاها كي الحنش سرعان ماطاحت دمعة من عينيها وتبعوها دموع خرييين كتبكي وتقول مابكيت وتهضر مع راسها:أويلي على راااجلي اميميتي

حفيضة:أتي أش طااري؟؟مالو راجلك

نزهة:(كي الهبيلة ناضت كتجري جارا ساكها وكتبكي)تضرب أمي بموووس..

متنسناتهاش باقي نزلات مع الدروج مخلياها كتبرح عليها..نزهة لي كتبكي وتعطي لصحتها..كتضور يمين يسار فالشارع كتقلب على طاكسي وتشهق كتبان كي الحمقة

تعصر قلبها ملي سمعاتو تضرب بموس وعقلها طاار..ميمكنش تخيل أن ميمون يخليها ولا تكمل بلا بيه..تزايد معاها الحال وتعصر قلبها عليه وزادت كتبكي فالشارع كي الحمقة وتشير لطاكسي حمر حتى بحراا موقفات ليها وحدة طلعات كتبكي و تنخصص وجهها رجع حمر وصدرها كيطلع وينزل..نزل عليها الخبر كي السم مزق ليها قلبها لأشلاء كل واحد فيهم كيعاود يتقطع عليه..

شلا توقعات زارو خيالها..وأكفسها الموت لي بمجرد مكتخيل بلي غيقولو ليها مات كتجيها هستيرية تالبكا والشيفور كيهدن فيها عزات عليه..مرة تبكي مرة تدعي معاه حتى وصلات بغات تخلصو وهو يقول:غاسيري أبنتي الله يسامح..

نزلات بلا متشكرو كي الحمقة كتجري باغيا تروي عطش فضولها وتاخد خبارو ..توجهات للإستقبال عطات سميتو وقالو ليها:باقي فالبلوك

نزهة:فين؟؟

نعتات ليها ومشات كتجري وتقول ماجريت حتى الشال طاح بقا فعنقعا..الوجه حمر وتجلخو العينين بالكحل والمسكارا..بان ليها جمال ومشات كتجري عندو معرفها منين نزلات عليه..

نزهة:فيناهو؟؟أش طرا ليه؟(غلباتها البكية)عااايش يااك..ݣوليا عاايش يااك؟؟.

جمال:(وقف وشد فيها حيت بانت ليه غطيح)عايش أختي(كان باين أنه حزين)

نزهة:أش طرا ليه؟؟شكون ضربو؟؟هءهءهءهءه كان صحة سلام شكون ضربو؟؟

جمال:(جلسها)جلسي أختي...تضرب بموس فالزنقة كان كيفارق مضاربة وتقاس

شهقات وشدات على فمها والعيون محبسوش من البكا والتنخصيص:أويلييي على تقااس؟؟أويلي على كيفارق هءهءهء(نفاجرات بالبكاا)هءهءهءهءهءهءهء

جمال ماحيلتو لحالتو ولا لحالتها لي بان فيها بلي غتحماق كتبكي وتعطي لصحتها ..فكرة أنه تضرب بموس ضرباتها فقاع قلبها..سكت مخليها على راحتها عارفها مرا وعاذرها..

داز وقت وهوما جالسين هدات من الحركة لكن وجهها كان جامد كيشوف قدامو وعينيها محابسينش من الدموع..تهدات بالبكا والجرا حتى ولات غي كتبكي..غي شاف جمال الطبيب خرج ناض وهي تلفت وناضت حتى هي كتساءل:كي بقا؟؟

الطبيب: الحمد لله قدرنا نحيدو الموس بدون أضرار ..الحمد لله متقاسش فالأعضاء ديالو، كان جرح سطحي بنسبة متفاوتة ..وقع نزيف لكن بسيط..

جمال:شنو دابا واش بخير؟؟

الطبيب:(مبسم)وي il va bien..خصو وقت باش يبرا..لي ضربو مادخلش الموس بزااف كانو غي بعض السنتيمرات والحمد لله متقاسوش الأعضاء وحتى المريض ديالنا ماعندوش شي مرض لي خلاه يعذبنا فالعملية..

نزهة:(بترجي والدموع عمرو عينيها)حال عينيه؟؟

الطبيب:أمبوسيبل يحلهم دابا..ياله غيطلع للشومبغ ديالو وغيكون تحت الرعاية ديالنا éspérant ميكونوش مضاعفات كثيرة..

نزهة:واخا نشوفو؟؟

الطبيب:c'est pas possible pour le moment..خصاتو الراحة ويكون تحت الكونترول ديالنا..en tout cas جبتوه فالوقت وقدرنا نتحكمو فمستوى الجرح..الله يشافيه..

مجاوبو حد كانو فحالة اطمئنان..تنهد جمال براحة وقال:الحمد لله

نزهة:(زادت كتبكي عاود)الحمد لله..الحمد لله

جمال:جلسي أختي رتاحي ..ربي يفاجيها هاهو طبيب ݣالينا راه مزيان خصو غي الراحة..

نزهة:(بضعف)ما غيموتش؟؟

جمال: لا أختي إن شاء الله ميوقع والو..

عزات عليه وجلسها مخليها على راحتها عرفها مقهورة عليه..دوز الإتصال لباه علمو بشنو كاين طمنهم وطمن الزاهية لي والو باغيا تشوفو ولباااس..

الحب هو أنك تضرر فاش كطرا للطرف الآخر شي حاجة..هو كعمود كتكا عليه من حر الزمان..الفرق بين حب زمان وهذا هو الأحاسيس..هاد الأخيرة لي تعرضات

للإنحراف..ولى الحب كيبدا عند بعض الشباب فقط حيت الطرف الآخر زوين ولا عندو الفلوس ولا كيعرف يلبس..و تاع زمان هو أنهم كيوقعو فحب المواقف

▪︎▪︎▪︎▪︎

"الحب هو المواقف التي سقطت فيها

ووجدتك أول يد تنتشلني من سقوطي "

▪︎▪︎▪︎▪︎

-بقاو جالسين ساكتين كيتنهدو بحزن على حالتو لي رغم أن الطبيب طمنهم لكن الخلعة كترجع معاهم..مسكتاتش من البكا عليه بدون صوت..عز عليها بزااف دماغها كيدوز لحظات دوزوها بجوج و حوارات ديالهم ومعاملتو ليها خلاتها تزيد تجهش فالبكاء حتى تسمع صوتها ..

جمال:(بهدوء)ختي..براكا من البكا راك سمعتي الطبيب أش ݣال ..الحمد لله نقزها

نزهة:(حطات يديها على صدرها وبدات كتبكي بالصوت)كون غي جات فيا ومتجيش فيه هءهءهءه معندووش الزهر مسكين منهارو الدقة كتجي فيه هءهءهء

جمال:(معرف مايدير)الله يشافيه ويجعلها مغفرة للذنوب واش نعارضو قضاء الله..صافي أختي راه ما يبغيش يشوفك كتبكي

نزهة:(كتحاول تلملم راسها وتمسح دموعها)أستغفر الله العلي العظيم ياربي تشافيه وتعافيه

جمال:(وقف)أنا نجيب ليك تشربي ..

حركات راسها ومشا وهي تقاد شالها ويديها كيمسحو ماتبقى من دموعها لكن بمجرد مكتمسحهم كيعاودو يطيحو لوخرين لا شعوريا..دقائق ورجع جمال هاز قراعي تالما عطاها وحدة شربات و تنهداات بحسرة ..خرجات تيليفونها لقات اتصالات كثيرة بنمرة مها ومحمد ..

دوزات نمرة مها بعد رنات قليلة ردات وقالت معاتبة:أتي فين زدتي خليتيني كي الحنش المقطوع ليه رااسو..مال راجلك

نزهة:(تغرغرو عينيها)تضرب بموس فشي مضاربة أمي

حفيضة:(بخوف)أويلييييي..وكي بقا؟؟

نزهة:ݣالينا الطبيب راه مزيان واخا قلبي ممريحنيش حتى نشوفو قدامي

حفيضة:أشمن سبيطار كاينين؟هاكي خوك

محمد:أشمن سبيطار؟؟كيبقا؟؟

نزهة:معرفتش (غلباتها البكية)فشيخ زايد

محمد:هاحنا جاايين

-قطعات معاه وسقلات كتسناه يخرجو بعد دقائق خرا خرجوه فسرير متنقل دافعينو الممرضات قفزات هي لولة لقات عليه نظرة كان ممد وعريان من الفوق مغطينو كولو حيت ياله خرج من العملية مغمض عينيه وجهاز التنفس لاصق مع ثقاب نيوفو..ومع هو سمر ولى صفر وفمو بيض تقولي عليه مات..شهقات بلا ماتحس بغات تقيسو لكن حبساتها الممرضة قائلة:مدام عفااك..

جرها جمال لي قلبو تعصر عليه من منظرو..خلاوها كتبكي موراه وتابعاهم كي الحمقة وجمال موراها مقدراتش تنطق بحتى حرف وما تفرقات معاهم حتى دخلو لشومبر مجهزة باش يرتاح فيها عاد جلسات كتبكي عاود من جديد..

وصلات مها و خوها لي بمجرد مشافتهم ناضت عنقات حفيضة كتبكي وتشكي عليها تا بكاتها ..

محمد:(مخاطب جمال)واش غي عايش؟؟

جمال:عايش جاب الله مدخلش الموس بزاف ماتقاس فوالو

محمد:(براحة)اوا الحمد الله غيكون غي تقاس

جمال:الموس تخشاا نييت غي ربي شاف من جيهتو

حفيضة:(كطبطب على بنتها)الله يرضي عليك أبنتي لا تبكيش راه مابيه والو..

نزهة:ماشفتيهش أمي كيدايرا حالتو مسكين هءهءهء كيقطع فالقلب

حفيضة:الله يشافيه ياربي

محمد:(حط يدو على كتف نزهة)جمعي أنزهة من البكا..السيد بخيير وعلى خير

جمال:(دوز اتصال لباه)فين وصلتو؟؟

عبد الرحمان:قربنا..خوك خرج؟

جمال:راه بخييير

*****

-داز وقت طويل وصلات فيه سيارة عبد الرحمان أمام السبيطار وفنفس الوقت وقفات ديال خوتو كاملين ..الزاهية غي شادة فيها فتيحة علاين طيح..كضور راسها كي الحماق..سولو عليه و قالو ليهم الشومبر فاش كاين..و مشاو كيزربو

جمال:(قشعهم)ها عمتي جات

الزاهية:(شافت جمال) ولدي ولدي فين ولدي؟؟فينووو؟؟فينو المرضي ديالي فيناهو؟؟

جمال:عمتي راه بخير خرجووه للبيت راه كيرتاح

براهيم:كي وقع ليه؟؟..

حكى ليهم جمال شنو وقع وكل مكيعاود كتزيد الزاهية تنوح و يضور فيها عبد الرحمان..

صالح:واش غي عايش؟؟متقاس ليه والو؟

جمال:لا

عبد الصادق:الحمد لله ياربي

حفيضة:(كتواسي الزاهية)الزاهية أختي ربي كبير دابا ينوض على رجليه

الزاهية:(كتبكي )عندي غي هو بكر ياختي يا حفيضة هءهء

نزهة:(عنيها مدمعين)غيولي لباس أخالتي..رتاحي راه غاطيحي

الزاهية:ياربي تعطي لي ضربو شي مصيبة بغاو يرزيوني فولدي..

خلاوها كتعدد على راحتها ولازمو الغرفة متحركوش من حداها وكيهضرو على الحادث حتى طاح الليل و وصلات العشرة تقريبا..

جمال:با، دي عمتي للدار ترتاح..

الزاهية:وتݣول واش نمشي الى ماشفت ولدي بعيني

محمد:حممم سي عبد الرحمان ياله معانا للدار عندنا باتو فيها حتال الصباح ورجعو..

منعم:وقفتنا هنا معندهاش فاش تنفعو مغيخليوناش نشوفوه حتال الصباح

فتيحة:عندو الصح أمي نمشيو للدار وغدا نجيو فالصباح، غيمشي يطيح ليك السكر ونتي ماواكلاش

نزهة:(بصوت باكي)سيري أخالتي للدار عندنا رتاحي ليك أنا غنبقا هنا الى فاق فنص ليل نصوني ليك

براهيم:غي سيرو أنا غنبقا هنا

جمال:حتى أنا باقي هنا غي سيرو..با دوز نديكم تعشاو ورتاحو نتوما أصلا مراض ميصلاحش ليكم السهير

عبد الرحمان:بلاتي نشوفو الطبيب

خرج الطبيب من عندو لقاهم فوجهو نطقات الزاهية:كي بقا ولدي؟

الطبيب:(بابتسامة)الحمد لله..مكاينينش مضاعفات وراه كيرتاح..البوليس كيسولو عليكم فالإستقبال والله يجيب الشفا

نزهة:إمتا يفيق؟؟

الطبيب:غدا فالصباح يفيق مي الخروج لا..غيبقا شي أيام هنا حتى نطمنو بلي مكاينينش مضاعفات ويخرج.

داز وخلاهم كيتنهدو براحة ونطق جمال:ياله زيدو

الزاهية:(بترجي لنزهة)لعار أبنتي الى فاق صوني ليا واخا مع الفجر..نشووف ولدي

نزهة:(باست يديها)كوني هانيا أخالتي

حفيضة:نزهة كون تساعفيني تمشي للدار ترتاحي

نزهة:(برفض )غي سيرو أنا غنبقا هنا غنمشي غيبقا بالي مبرزط معاه

منعم:أختي راه ماغا تنفعيه فوالو ياله ترتاحي حتى نتي

نزهة:(برفض)غا خليوني ..راني مزيانة.. .

محمد:(بتساءل)خاصك شي حاجة؟؟نجيب ليك تعشاي

نزهة:معندوش منين يدوز غا سيرو وديو معاكم خالتي

ناضو كاملين بقات بوحدها طلقات زفرة طويلة كدل على تعبها النفسي لي عياتو فمدة قصيرة.. و كتدعي فخاطرها ينوض ليها بخير.. .

****

جمال خداهم عشّاهم و دوزهم لدارو لي عندو فكازا أما حفيضة أصرات على الزاهية تبات عندها هي و فتيحة و داتهم معاها عطاتهم البلاصة المخيرة والغطا المخير وطمنات عليهم ومشات تنعس تاهيا كيدعيو معاه ينوض بخير..

-فالمستشفى..رجع براهيم هاز معاه ساشية فيها العشا ..تبسم لنزهة وقال:هاكي تعشاي متبقايش بالجوع ..

نزهة:(شداتها)شكرا عذبتي راسك(عينيها كيبريو بالدموع)ماعنديش ليه الجهد..

براهيم:بغيتي ميمون يفيق يݣولينا قتلتو ليت مراتي بالجوع..كولي ميكون غي الخير..

تنهدات وبدات كتاكل بنفس مسدودة بلا شهية غي كتسد الجوع لا تسخف..وهو ساقل جالس حداها وعينيه كتهرب ليها حتى جا جمال هاز حتى هو العشا وقال:تعشيتي؟؟

نزهة:(بهدوء)جابو ليا براهيم

جمال:(بغا يلطف الجو)اوا صافي ناكلو أنا

براهيم:هه غتكون تعشيتي معاهم ومزال باغي تزيد

جمال:أخويا من الفطور لي فطرت مع ميمون ما طاح فكرشي

نزهة:(بعفوية)مسكين مفطرش بكري ..

شاف جمال فبراهيم ونطق:ضارب مقلة تالبيض والخبز واتاي ومفاطرش ههه(تبسم)الله يشافيه..

براهيم:غينوض إن شاء الله

نزهة:ياربي آمين

سكتات موراها ممشاركاهمش الحديث كتسمع ليهم فقط هوما لي كيدويو على ميمون وكيتفكرو ليه مواقفو وهي كتبسم بحزن تا كيتغرغرو عينيها..

****

باتو ليلتهم مسهدين تما كيتسناو شي تغيير..نزهة بفرط التعب تكات راسها لور على الحيط وغمضات عينيها بتعب لكن دماغها ما ناعسش غير مغمضة عينيها و الدماغ خدام..أما لورخين راه جمعو حتى عياو وسقلو كيتفوهو وكل مرة واحد مسند على لاخر..

مع بزوغ الفجر ..وتعلن على يوم جديد قفزات نزهة من كابوس مرعب فيه أنه لابسة البيض وكتلقى التعازي..شافت جنابها ملقات حد وهي تنهد بتعب ومسحات على وجهها وفمها كيردد:أعوذ بالله من الشيطان الرجيم..

وكدات شويا وناضت كتقلب على لي طواليط لقاتهم غسلات وجهها ورخفات عليها الشال ..ثم خرجات راجعة لبلاصتها كتستغفر الله..شافت الممرضة خارجة من بيتو وتقدمات:ختي..كي بقا؟؟

الممرضة:وقعو مضاعفات شويا..طلعات ليه السخانة

نزهة:(بخوف)وعلاش؟؟

الممرضة:عادي هادشي أمدام..من بين الأعراض ديال الجرح هو تطلع السخانة والحمد لله درنا اللازم عطيناه بعض الأدوية ..

نزهة:فايق؟؟

الممرضة:نن باقي ناعس

نزهة:واخا نشوفو(بترجي)الله يرحم ليك الوالدين أختي ويخلي ليك لي عزيز عليك الى ماخليني نشوفو..منتعطلش غي نشزفو ونخرج أختي ..حسي بيا راني غنطرطق الى مشفتو

الممرضة:(عزات عليها)واخا ولكن عفاك متعطليش أنا نتسنا هنا غي نعيط ليك خرجي

نزهة:(بفرحة)الله يسهل عليك ياربي..

دخلات بالشوية عليها وقلبها كيضرب بالجهد..قشعاتو ناعس فسريرو بلباس المشفى والسيروم معلق ليه فيه الدويان لي غيساعدوه باش يتشافا بسرعة..بالإضافة للأكسجين لي مدخلينو فنيفو بشوي ..تزير عليها قلبها وهي كتشوف ولد المصري طريح الفراش وفرمشة عين تغرغرو عينيها عليه..

توجهات ليه شادة على صدرها ما متحملاش تشوفو هاكاك..وبشويا عليها تا قربات منو وطاحت دمعتها من عينيها موقفات تالذقن ..هزات يدو السمراء بالشوية وقبلاتها بحب من الداخل وبرا وقالت:الله يشافيك ليا ياربي ويعطيك صحيحتك..

تسمعات الممرضة و هي تتعيط ليها بمدام وخرجات بالزربة مساخياااش ..مسحات دموعها وقالت:شكراا أختي لهلا يخطيك(مشات هزات صاكها جبدات مية درهم مداتها ليها)هاكي شكراا بزااف..

شداتها لوخرا مبسمة وقالت:الله يشافيه

نزهة:آمين ..

رجعات جلسات تاني فبلاصتها كتسنا حتى جا جمال و براهيم لقاو السلام وجلسو من جديد...طلعات الشمس وناض جمال يجيب ليهم قهيوة يحلو بيها عينيهم ..

مجاش فين يصبح الصباح تاكانت الزاهية جاية كتزرب وتقول مازربت جارا معاها كاع داكشي لي والدة وخوها وأم نزهة..

الزاهية:أمدرا فاق؟؟

نزهة:لا..باقي مدازش عندو الطبيب

الزاهية:(بخوف)أويلي وعلاش ما فاقش؟؟(تتعدد) أميمتي على ولدي

براهيم:الواليدة يهديك الله راه باقي مشافوش الطبيب

عبد الرحمان:فطرتو؟

جمال:باقي(شاف فنزهة)ختي نوضي تفطري..

نزهة:(بامتناع)ماعندوش منين يدوز غا سيرو..

حفيضة:لواه أبنيتي ماشي ينوض لينا ميمون تطيحي نتي..نوضي الله يرضي عليك فطري ورجعي

نزهة:بلاتي غي يجي الطبيب بعدا نشوفو أش كاين..

تسناو جهد ساعة تقريبا عاد وصل الطبيب لي داير دورة على المرضى..دخل عندو فحصو من جديد وهو يحل عينيه بالشويا والصورة مضببة عندو..كيشوف وجه الطبيب كيخاطبوو..فين هو وعلاش؟؟معارفش..

مع توضحات ليه الرؤية سمع الطبيب كيهضر:موسيو ميمون..صافا؟؟كتسمعني؟

ميمون:(بصعوبة)ممم

الطبيب:(كيقلب ليه عينيه)فاق الحمد لله(مخاطب الممرضة)عطيه شنو قلت ليك..و إلا كان شي جديد علميني

الممرضة :داكوغ..

خرج تلقاو ليه وعطاهم تبسيمة وقال:الحمد لله فاق خصو غي شوي تالوقت باش يوكد راسوو..

الزاهية:نشوفو!!

الطبيب:واحد نص ساعة يرجع راسو ودخلو..ولكن متصدعووهش باقي خصاتو الراحة ميدخلش كلشي

نزهة:داكوغ..

مشا وخلاهم كيتنهدو براحة وهو ينطق جمال:ياله أختي تفطري ورجعي نشوفوه

عبد الرحمان:دايااك غا كرشك

جمال:واا بااا راه فيا الجوع هههه يفيق هاد الشحط وأنا نموت بالجوع

فتيحة:تاكل جغديد

مشات نزهة فهدوء ماعندها كانة للمزاح ومشات معاهم فتيحة باغيا غي تهنى عليه..دازو لمطعم زوين حدا الكلينيك طلب ليهم براهيم الفطور وهي هادئة غي ساهية فالخوا وهو حاضيها بلا يعيق أما جمال كيدوز إتصالات خدمتو..

فطرو وخرجو راجعين للسبيطار مالقا حد قدام الشومبر عرفوهم دخلو..دخلات بالزربة لعندو غي طاحت عينيها عليه واقفين عليه كاملين دايرين بيه..طلات عليه وعينيها تضببو بالدموع كي قشعها بملامح تعبانة ..قربات منو متأثرة مقدراتش تحبس دموعها حتى قبلات راسو بحب قدام كلشي وقالت:على سلامتك ..خلعتيني عليك..

الزاهية تشوكات دوزات صبعها على حنكها كتويل ورجعات لور..أما الباقي محكرووش بتاتا...

ميمون:(بصوت متعب)ما تبكيش

نزهة:(هزات يدو باستها ليه)ششش رتاح متهضرش

عبد الرحمان:الله يجعلها آخر الأمراض ياربي

الكل:ٱين

الزاهية:حممم ياكما فيك الصداع أوليدي!!

ميمون:(بتعب)لا

نزهة:بغيتي تاكل؟؟

منعم:حتى يطلقو الحال شويا ..

نزهة:(عينيها مبغاوش يحيدو عليه هو لي كان كيشوف فيهم بعياء)حمد لله خرجات هاكا..

فتيحة:(بابتسامة)على سلامتك أخويا

ميمون:الله يسلمك

دخلات الممرضة:عفاكم ماتوقفوش عند راسو..خليوه يرتاح

الزاهية:مادرنا والو أبنتي..(تبسمات)خلعتينا عليك أولدي كنت غنموت

ميموت:(شد يديها )لهلا يخلعك أمي

الممرضة:عفاكم خرجو خليوه يرتاح

نزهة:(باست يديه من جديد)رتاح شويا أنا برا إلى خصاتك شي حاجة أنا هنا

تبسم ليها وقال:لهلا يخطيك..

خرجو كاملين مخلينو يرتاح.. بنفس مرتاحة حيت طمنو عليه ..شي جلس وشي بقا واقف..

صالح:(كيهضر مع خوتو بهمس)قلة الحيا صافي ههه عشنا وشفنا ميمون كيتباسو ليه اليدين..

براهيم:عطاتو الوقت..تشوفها أش دارت عليه

منعم:ضحكاتني مي ..جابدة حنكها ههههه

الزاهية:(بهمس فوذن فتيحة)شفتي مرت خوك شدارت؟؟أويلي حشمت ݣدام خويا

فتيحة:راه راجلها ..تخلعات عليه شبغيتيها دير!! السيدة صفارت بالخلعة..

الزاهية:وماݣلناش لا ولايني تبوسو وسط الناس قلة الحيا هادي

فتيحة:(بتذمر)غا نتي ولفتي لبا الكرفي حسابك كاع الناس..

الزاهية:يخليك بالخلا حيدي عليا..

حفيضة:واش نتي ماحشمتيش كتبوسي ليه فراسو وفيديه ݣدام الناس

نزهة:فيها شي حاجة ؟؟راه راجلي

حفيضة:عرفناه راجلك ولايني مو وخوتو وخالو حاضرين حشووومة أبنتي

تزهة:(بانزعاج)متبقاوش تصرعو ليا راسي أنا راجلي كنت كنتقطع عليه كنت باغا نعنݣو غي خفت نقسحو

حفيضة:(لوات فمها)قليلة الحيا الله يستر

نزهة:(ببرود)راجلي هذااك ماسوق حد

حفيضة:ماشفتيش عدوزتك كي دارت فيك؟؟

نزهة:ماسوقيش أمي..هاد الساعة كيبان ليا غي ميمون

سكتات مها باقي وكلشي كيهضر مع بعضهم وعلى حالتو ..صونا تيليفون ميمون لي عند جمال كانت نجلاء..مدو لنزهة وقال:ختي هاكي جاوبي نجلاء ختو وعلميها

نزهة:نعلمها؟؟

عبد الرحمان:خصهم يعرفو راه خوهم..

شداتو ورجعات بعيد شدات الخط علماتها وخبراتها بلي غيجيو ورجعات دايرا تيلي فجيبها ..مد ليها جمال السوارت وقال:ختي هادو سوارت المحلات ودارو و طونوبيلتو...

مع بغات تشدهم نطقات الزاهية:أراهم أولدي ليا اراهم لا يمشيو يتجلاو ليها

نزهة:اه غي عطيهم ليها ماشي مشكل

جمال:والدار؟؟

نزهة:عندي

مدهم للزاهية خباتهم وجلسات كتهضر مع ولادها بشوية احتراما لحرمة السبيطار والناس المراض وعيون براهيم كيفلتو لنزهة مزومي على وجهها بعينيه..

*****

داز وقت طويل عاودو دخلو عندو كيطمنو عليه واخا كيجاوب بالشويا .. سمحو ليه ياكل ويشرب حيت تنفس..جابو ليه الماكلة الصحية وهي تنوض نزهة قالت:أنا نوكلك..

جلسات فطرف السرير مبسمة ليه وحتى هو بشر ملامحو وقال:عذبناك (قشع عيونها منفوخين)

نزهة:غي برا ويكون خير هه

بدات كتوكل فيه وتمسح ليه عند فمو ونطق بتذمر:فيا الحريق

نزهة:(بأسف وبصوت بوحدو لي كيسمعو ) غي صبر أحبيبي

وكلاتو تحت أنظارهم لي فيهم نطرات رضى بما فيها الزاهية لي فرحانة لولدها و نظرات استغراب وهو براهيم

بداه الصداع وجاو عطاوه مهدئ وهي تنطق نزهة:ميمون انا غنمشي نجيب ليم حوايجك وندير سيختيفيكا ندفعها للخدمة باش نقابلك..

ميمون:بلا ماتبرزطي راسك

نزهة:لا..غي رتاح (بهمس)ملي غي رجعتي ليا نعطي عليك عمري..

تبسم ليها وشد يديها بتعب وقال بشوية:غا ديال شي بوسة

ضحكات و ناضت مستأذنة منهم قايلة:خالتي غنمشي نجيب ليه حوايجو باش من بعد يبدل ..

الزاهية:اييه سيري ابنتي الله يرضي عليك ويكون منك..

ميمون:(بصوت خفيف)جمال وصلها أخويا..

نزهة:لا بلاش غنمشي راسي غا خليك أخويا لا تخصو شي حاجة

حفيضة:تسنايني نمشي معاك أبنيتي(قربات لميمون) الله يجيب العفو اوليدي..لالة الزاهية الحمد لله على سلامتو لهلا يضرو

الزاهية:لهلا يوريك بااس..

حفيضة:نوضو ياله معايا تغداو فالدار ونخليوه يرتاح شويا

فتيحة:غي سيرو أنا نبقا معاه لا تخصو شي خاجة

ميمون:(بتعب)غي سيرو(كيتألم بالحريق)..

ناضت الزاهية كتعرج على رجلها مع الكبر كيضروها الركابي وخرجو كاملين إلا جمال وفتيحة خلاوهم معاه. ..

خرج منعم لي تكفل هو وخوتو وصلو نزهة لدارهم وحفيضة مع ضيافها لعند سعيدة لي عالماها مها قبل دير بحسابهم..

نزهة كي دخلات للدار مشات بالزربة دوشات حيدات عليها العرق والعيا تالسبيطار وتالحيض خاصة أنها ضلات و باتت بنفس أولويز لقات راسها غارقة.. تعطرات ونقات حالتها وعينيها كيتسدو..لبسات عليها سورفيت فالخزي مستورة مع تجاكيط خفيفة مناسبة للجو..وقادات قهيوة قاسحة تحل بيها عينيها حيت غتطيح بلاصتها بقلة النعاس،

وبالخف كذلك صايبات ماتاكل دمقات وناضت كتزرب هازا صاكها متوجهة لأقرب عيادة طبية دارت شهادة طبية أخرى فيها 20 يوم باش تفرغ لميمون..ومشات دفعاتها ليهم فالخدمة..وبنفس السرعة دازت لدارو حيت عطاها ديجا السوارت مشات لبيتو جمعات ليه لي يلزمو من حوايجو باش غيبقا فالسبيطار وحتى أدوات النظافة الخاصة بيه ولي مالقاتوش دازت شراتو..هادشي كولو قضاتو فثلاثة تسوايع ..ومن بعد خدات طاكسي للكلينيك والتعب نايل منها ..لقات جمال وبراهيم وفتيحة قدام بيتو..لقات السلام وقالت:كي بقا؟؟

هز فيها براهيم راسو طلعها ونزلها بالسورفيت وهي تنطق فتيحة:مسكين ملي طلقو البنج تمحن نييت ...

نزهة:(بحزن)ضراتو الفتحة!!؟

جمال:ضروري(شاف الصاك)جبتي ليه حوايجو؟؟

نزهة:اااه أنا ندخل نشوفو

دخلات مخلية براهيم متبع ليها العين ..لقاتو مغمض عينيه ..مشات حطات الصاك فبلاكار تما وتوجهات ليه راسمة ملامح الحزن على وجهها على حالتو..فمو بيض وناشف وباينا ما مرتاحش..قربات بالشوية طبعات قبلة فجبهتو وفحنكو بحنية وحب حتى فتح عينيه بتعب وقال بصوت يا ذوب تسمعو باينا مهدود:لالاهم..

نزهة:(باستو ففمو بوسة خفيفة)أحبيبي(يدها كتمسح على شعرو)فيك الصداع باقي؟؟

ميمون:(بصوت عيان)شويا..

نزهة:(كداعب لحيتو بحب)آش وصلك تفك شي حد أ ميمون؟؟ خلي لي بغا يضارب يضارب هانتا جبتيها فراسك

ميمون:مكتابة وصافي...نعستي؟

نزهة:لا مشيت جبت ليك حوايجك باش غتبدل ودفعت شهادة طبية للخدمة باش نݣلس معاك..

ميمون:(يديه تحطات على فخضها)بلا متبرزطي راسك

نزهة:هههه إوا لواه مالي عندي منك عشرة هههههه ولدك ليا المصري غي بوحدك وخلاك ليا (باستو فحنكو)..

ميمون:نقصي تحلوين راني عياان حتى باش نوض نتكيك ما قادرش

نزهة:(ضحكات)هههههههههه أسيدي غي نووض ليا على خير وبخير و وقف على رجليك وندير ليك واحد الليلة تموت و ماتنساهاش

ميمون:(كيضحك بشوية )ههه كنت غنموت بلا ماتشطحي ليا ههههههه ..

نزهة:ههههههه لهلا يمحنك ههههه غي نوض نشطح ليك حتى يتقداو فلوس الغرامة..

ميمون:سكتي ما ضحكينيش هه

نزهة:تبغي تاكل شويا

ميمون:غيجيبوه ليا دابا..

-تسمع صوت جمال داخل:سيدي ميمون فقتي

ميمون:باقي مامشيتيش؟؟

جمال:(مقلد صوت النسا)ماسخيتش بيك الزين هههه

تبسمات نزهة بشوية وناضت جلسات فالفوتوي القريب ليه حيت شافت كلشي دخل مخلياهم كيسولو فيه..

ميمون:سير أولد الحرام قابل ليا شغلي

جمال:مزوج بيك أنا؟؟نوض أولد المصري من الفشوش

براهيم:مامولفش يمرض هذا غدا ينوض هههه، نوض أصاحبي راه الزاهية كانت غاتعواج لينا..

جمال:(ضحك)علاه هي غي الزاهية هههههه(شاف فنزهة) المدام عندك دارت العزو ههههه

فتيحة:اوا شنو مسكين عطاوها ليه..كي تزوج بغا يعرس تضرب..

ميمون:مكتابة

نزهة:الله يجعلها مغفرة للذنوب ياربي..

الكل:آمين

ميمون:(بصوت متعب)جمال سير ضرب طلة فالمحل على الدراري..حط ليا شي حد ثقة تما..

براهيم:خدمتك ضربها علينا

ميموت:غا خلي جمال يتكلف هو كيعرف الدراري ..

براهيم:(تقرص)ومالنا حنا مانعرفوش

فتيحة:وتا أش عرفك فالهري..ياك خدمتك فالسلوكاا

ميمون:نزهة عطيني نشرب..

ناضت بزربة كبات ليه فكاس ودارت فيه باي شرب تا روى ومسحات ليه بمنديل ورقي تحت أنظارهم ..

نزهة:خواتاتك ساقو الخبار وغيجيو

ميمون:علاش علمتيهم؟؟غايتشوشو

نزهة:غيعرفو غيعرفو اللهم مني أنا..

فتيحة:(تبسمات )صدقتي عزيز أخويا ها هههههه كلنا جينا نجريو

براهيم:مبرع خوت..شكون بحالك ها مك تبكي عليك ها خواتاتك يشدو عليك الطيارة هاا خوتك يتجاراو عليك ههه..

-ميمون:واحد الوقت ماكانش عندي حتى لي يݣوليا فين بايت..

-ميمون:واحد الوقت ماكانش عندي حتى لي يݣوليا فين بايت ودابا جا الخير بمرة

جمال:أسيدي راك عزيز علينا..أنا غانمشي نرتاح شويا ونطل على شغلك

فتيحة:ديني معاك

براهيم:نتي نوضي ياله نمشيو ..

ناضو مودعينو و خرجو خلاوه معاها ..قربات باستو فحنكو وقالت:نعس أكبيدة نعس(كتلعب فشعرو)نعس ترتاح..

غمض عينيه كيقلب على النعاس حيت لا هو عندو جهد الغوات بالألم ولا هو عندو ݣانة للفياق..

أما فسيارة براهيم كانت فتيحة كتهضر وتعاود مع براهيم:تا المصريات غيجيو

براهيم:هادشي ليݣالو...فين غيݣلسوو؟؟

فتيحة:مانعرف ليهم..تا راه عندهم شلا فلوس غيݣلسو فشي أوطيل

براهيم:عطاتهم الوقت..

صونا تيليفونو وجاوب كانت حفصة:الو

حفصة:أ الراجل تا فين غاطس؟؟

براهيم:واش كنبان ليك جاي مفوج راني جاي نشوف خويا

حفصة:كي بقا؟؟

براهيم:الحمد لله

حفصة:مكرهناش نجيو نشوفوه

براهيم:خلي حتى يخرج من السبيطار ونجي نديكم..الدراري لباس؟؟

حفصة:لباااس الحمد لله، الله يعاون..

براهيم:بسلامة

قطع معاها وهي تنطق فتيحة:بغاو يجيو؟؟

براهيم:التبرزيط..فين غيجيو؟؟

******

دوزات نزهة نهار كامل فالسبيطار مع ميمون حتى جات مو و خوتو من جديد وخالو جالسين معاه وهي جالسة بعيد فالفوتوي مخلياهم ضايرين بيه كيهضرو معاه هو لي التعب واخد منو . .

جمال:(تم داخل)السلام وعليكم.. كي بقيتي المصري ؟

ميمون:الحمد لله..أمدرا؟؟ كلشي مزيان؟

جمال:سلمو عليك البياعا لي حداك كلشي سول فيك ..الخدمة غادا مزيان الدراري خدامين..

الزاهية:أوليدي داك لي ضربك أش دارو معاه؟؟

جمال:مشا سلم رااسو

ميمون:(بهدوء)غي نولي لباس ندير ليه تنازل مديالش الحبس سيمو دروييش..

الزاهية:(شهقات حتى خلعاتهم)احاااااااي أويلي على تنازل ليه؟؟تا هو وصلك للموت وباغي تسمح ليه؟؟

صالح:مبوكر فدماغك نتا لا؟؟

ميمون:(بهدوء)ماكانش قاصد السيد كنعرفو سنين هادي خدام حدايا غي الشيطان لي غرو وناض بغا يضرب السيد وجيت أنا ݣدامو وضربني.. . .

فتيحة:ولايني راه اليوم نتا وغدا غيرك..

عبد الهادي:حق الله حتى هترتي..خلي السيد يتربى

عبد الرحمان:أنا ري من ري ميمون..إل السيد ما قاصدش لاش يدخلو للحباسات؟

الزاهية:كان باغي يقتل ليا ولدي وتݣول ليا ماقاصدش

ميمون:السيد عندو وليدات وعائلة نوض أنا نرشيه فالحبس ..ماجاتش الله يسامح كون عرفتو قاصدني أنا نغرقو..

الزاهية:(شدات حنكها)نزهة تي دوي أبنيتي ؟؟هضري معاه!

نزهة:(بهدوء)أخالتي هو يعرف حسن مني..ملي بقا ليا غي عمرو هذااك هو الفضل

الزاهية:(برفض)نتوما حماقيتو والله..

براهيم:(بهدوء)دير لي عجبك أميمون..من نهارك ماكتعلم حد

ميمون:(تبسم)بعدا درت ليكم فاش تجمعو ههههه

الزاهية:وا وليدي خصك غي تنوض كنا نيت عوالين نتجمعو فعرسك ساعا مكتابش..عطاوها ليك أوليدي فصحتك عينوووك ليا أولدي..

منعم:(مقلدها)عينوو ليا المرضي ديالي..سناااا أري ليا المجمر وشوية ديال الشبة نبخر ولدي شدات ليا فيه العين..

فتيحة:(كملات تعياب)تابعين ليا ولادي معينينهم ليا بغاو يرزيوني فيهم..

الهادي:لكانت من عند العبد (مرقق صوتو)الله يلݣيها ليه ههههه شواوني فالمرضي أري ليا المجمر..

ضحكو كاملين بمزح عليهم حيت كيقلدوها مزيان عارفينها كتضل حاضية ولادها ..حتى ميمون ضحك حتى تعݣر

الزاهية:(بافتخار)ايييه ولادي ونبخرهم والعين حق وأنا ولادي مهديين مرضيين ما كيكميو مكيشربو والصلاة والدين علاش لي ماتشدش فيهم هااا..

فتيحة:غا نتي والجران لي والدة أنا و رشيدة مساكن عمرك حركتي علينا حتى الرقية

الزاهية:فين غتشد فيك نتي العين لسانك مبري منك..

فتيحة:بصحتي هههههه..

يتبع...

‎