خيط الريح الجزء 13

مرت أيام قليلة تحصر فسيمانة لي خصصاتها نزهة كاملة لراسها كتوجد لليلة العمر ولي أصر ميمون أنه هو يدير ليها العرس

مبخلش عليها بمرافقتو ليها لعند النݣافة وختار معاها اللباسي وحتى تريتور مشا عندها معاه ممقصرش من جهدو

أما هي راها عاد مزادت تعلقات بيه حيت مكبر بيها وعاطيها وقت وكيختار معاها فأي تفصيل بكل اهتمام..عاطيها الخاطر باش تطلع نهار عرسها كيف حباتو

مثلها مثل أي بنت كتحلم بعرس أسطوري على الطريقة التقليدية..جلسات مع تريتور وناقشات معاه أدق التفاصيل ماخلات والو..مجاتش مها فين تجي حتا لقاتها نضات كلشي

فجليسة نسائية فيها حفيضة ونزهة وسميرة وسعيدة كيتناقشو على أمور العرس لي باقية

سميرة:الحلوة سالات؟؟

سعيدة:واراني خدامة ولويساتي خدامين معايا..

نزهة:(كتقيد فمذكرة)خصني نمشي للخياطة نجيب جوج جلالب بقاو ليا تما

حفيضة:عيقتي بدوك جلالب تي مالك فيه؟؟ستة تجلالب ياك لباس؟؟

نزهة:أمي راني عرووسة وغنمشي عند ناس جداد علي نمشي مبهدلة..خليني ماشي ديما غنتزوج

سميرة:ديري حتا القفيطنات

سعيدة:هادي ݣاع متوصيوها ..عطيوها الحوايج ونساوها ههههه وزاد ميمون كمل ليها بهاد الفشوش

نزهة:(ضحكات وقلبات عينيها)بصحتي ههههه والله يخليه ليا مبرعني

سميرة:ههههههه أمتݣولي غي ساحرة ليه

نزهة:مسحور من عند الله ههههههه عرفتو شاداني الخلعة من العرس هههه

حفيضة:اوا المعقول هذاا ههههههه

سعيدة:أجي نعرضو على بنت فاطيمة؟؟

نزهة:عرضتها

حفيضة:ومعامن تشاورتي؟؟

نزهة:مع راسي..واش أمي كتشوفي محمد باغيها ومنعرضش عليها

سميرة:غتشعل العافية فالعرس كاينة حتى مليكة

سعيدة:محالش تجي مليكة

نزهة:هاديك غتجي غا باش تدي ماتعاود هههه خليها تجي أنا عرضتها على وجه ولادها

حفيضة:(باستهزاء)وبنت فاطيمة على وجه شكون

نزهة:على وجه ولدك ههههههههههه

حفيضة:وبغات زعما؟؟

نزهة:هادشي لي ݣالت..ݣالت ليا غتجي ورطبتها نيت ملي طلبني محمد

****فلاش باك

صونات نزهة فبيت حنان لي كانت ساكنة فالسفلي..وبعد لحظات حلات ليها..دارت علامة استغراب فوجهها وقالت:نعام أختي

نزهة:(مبسمة)حنان ياك؟؟

حنان:اه أختي نتي شكون؟؟

نزهة:غا شوفي فيا مزيان وشوفي واش معرفتينيش

حنان:وجهك فايتا شايفاه ولكن معقلتش

نزهة:أنا نزهة خت محمد ولد حفيضة

حنان:نزهة؟؟الصغيرة فيهم ياك؟؟

نزهة:هاديك ههعع خليتيني باقي صغيرة

حنان:وليتي دابا مرا تبارك الله(بابتسامة)زيدي دخلي مرحبا بالجيران القدام

دخلات نزهة مبسمة ليها وتمشات معاها للصالون المتواضع ديالها ..جلسو بتوتر تاوحدة معارفا متقول حتا نطقات حنان:كيدايرا مك ؟؟وختك وخوك

نزهة:كلشي بخيير الحمد لله ونتي كيدايرا مك؟؟

حنان:(بحسرة)مي ماتت شحال هذاا بقيت غي أنا

نزهة:الله يرحمها ياربي

حنان:أمين..نتي تبارك الله كبرتي وزيانيتي ووليتي مرا..درتي شي وليدات؟

نزهة:ياله غندير العرس وجيت نعرض عليك

حنان:باشمن صفة؟

نزهة:(بهدوء)حنان أختي أنا عارفا أش دوزتي نتي ومحمد وأنا شاهدة واخا هاد الوقت كامل لي داز عمرو نسااك

حنان:(قاطعاتها)هاد الهضرة ماعندها فاش تنفع حنا دابا كبرنا

نزهة:كبرتو ولاقاكم الله مرة خرا..علاش مبغيتش تزوجي بخويا؟؟

حنان:وعلاش هو سمح فيا شحال هذا ؟

نزهة:شوفي أنا منقدرش نجاوبك ولكن لي عرفت هو عمرو نسااك..كان مزوج ولكن ديما بنت فاطيمة حاضرة..الى سولتي ولادو عليك غيعرفوك حيت ديما كيجبدك

حنان:(بهدوء)صعيب ننسا أختي تعذبت وتكرفصت بزااف مورا ما خوا بيا

نزهة:ربي عطاكم فرصة خرا باش تنساو وتعوضو راسكم...متخليش راسك تضيعي معشتيش معاه فالشباب عيشي معاه فالشرف

حنان:(بتساؤل)وياك هو مزوج؟؟

نزهة:طلق..ودابا ديال راسو

حنان:(تنهدات)ماعرفت منݣول ليك أنا أختي مابقيتش معمرة راسي بالزواج ولى همي هو نقري ولدي ونوصلو فين بغا

نزهة:ومنݣال ربي جاب ليك فين تهناي..ثيقي بيا والله محمد منساك ولا غينسااك شي نهار أختي..جيت اليوم باش نهضر معاك ونعرضك لعرسي..ومبغيتكش ترديها ليا فوجهي

حنان:فيد الله

نزهة:جي أختي حسبي راسك عرضاتك ختك الصغيرة جي فوجي ونشطي

حنان:واخا أختي نجي فين دايراه؟؟

نزهة:ف**** نهار السبت مرحبا بييك

حنان:الله يبارك فيك

***Back

حفيضة:واخفتها غي تشوفها مليكة وتنوض الحرب

سميرة:مريضة فعقلها هاديك..تضبر راسها السيد طلقها يتزوج ولا يݣلس

نزهة:(هزات تيلي)أنا غنصوني لميمون ونجي

مرت الأيام بوتيرة سريعة عند نزهة لي من هادي لديك باش تطلع ليلة العمر كيف حبات..وبالفعل يوم السبت ليلا فأحد أجمل قاعات الزفاف بكازا كان عرس نزهة وميمون

كان مثل الحلم وتحقق عندها..قاعة زوينة مزينة بطريقة عصرية ومتفننة فيها وعلى لباب كتلقى أسمائهم"نزهة وميمون" مع صورة كبيرة ليهم فتلفزة حائطية مصورينها يوم العقد

واقفين جوج رجال لابسين لباس تقليدي عبارة عن جلباب بيض وسلهام حمر مع طربوش حمر واحد هاز طبسيل كبير ديال التمر معمر وواحد زلايف الحليب لي كل مرة مبدلهم..مع المصور لي كيوثق لحظة دخول المدعوين..بدون مانساو حفيضة ومحمد وعبد الجليل لي واقفين كيستقبلو الناس ويرحبو بيهم

أما نزهة راه كانو كيوضعو عليها اخر اللمسات..هي ليست جميلة الجميلات لكن بالنسبة لنفسها راها عندها زين على قد جهدها خلاوها لولاة حق الناس ملقاتوش وحقها ملقاوهش الناس..كانت فالفوق فغرفة التبديل مع النݣافة والزيانة لي تابعة ليها..

واقفة قدامهم بقفطان فالاخضر ملكي ديال الحنة..مع توغبان مغطي شعرها ومعري عنقها وهابط طويل من التحت فالذهبي البارد متماشي اللون ديال الخياطة تالقفطان..وأكيد بدون منازع "خيط الريح" لي عليه ضاير الفيلم..

"خيط الريح" لي ورثاتو من مها وكل نهار ملي وصلات سن النضج وهي كتشوفو وكتمنى إمتا يزين جبهتها..واليوم تحط عليها مزينها بطريقة مغربية عريقة..راسمة ضحيكة على فمها لمزين بعكر أحمر مع ماكياج عيون خفيف جدا معمراتهمش..ومجوهرات وحلي مغربية أصيلة

النݣافة:(كتولها)تبارك الله عليك جيتي زوينة

نزهة:الله يكبر بيك أختي..سميرة صوري صوري هههه

شبعاتها سميرة تصاور هاد الاخيرة لي محلقة ومقادة ومصايبة فرحانة لنزهة ..

النكافة:ياله خصك تنزلي كلشي كيتسناك

تبسمات بتوتر وضارو بيها مخرجينها بخطوات خفيفة على أقل من مهلها..هزات قفطانها بقرون صباعها وكتمشا بعذوبة نازلة من الدروج تحت الفولكور المغربي ديال النكافات كيصليو على النبي تلميحا لقدوم العروس..ماحدها كتنزل ووذنيها كيلقط ليها بالجهد صوت الموسيقى..مع وقفات درقوها النݣافات لي لبستهم موحدة وقدامهم العمارية الخشبية لي منقوشة وفانتظار لالاهم على قولة ميمون

نقصات الموسيقى والديدجي كيهضر مع الفرقة باش يوجدو الاغنية لي غيهزوها بيها فالعمارية ديال الدخلة..وبالفعل ضارو بيها من جديد حتا جلسوها وقادوها عاد بعدو وشافوها المدعويين لي كلهم عائلة مها وباها منسات حتا واحد من مليكة عرضاتها هاد الاخيرة لي جات لكن غي باش تسمى زوينة قدام ولادها

تسمعات أغنية"حنيو لالة حنة وحناني"وعلى إثرها تهزات نزهة للفوق حتا خرجات عينيها خايفة لكن سرعان ماستقرات الفوق و حسات بأمان وهي تبسم للناس لي كلشي عينيه عليها

شي كيدعي معاها وشي جاي يدي تبركيك مثال خواتات مليكة

تهزات فالعمارية ودارو بيها العبيد الضورة الشرفية عاد نزلوها وتمشات تاني لجيهة المرتبة على أقل من مهلها مبسمة فرحانة غطير بلفرحة وعيونها كيبريو كيضورو على الحضور

جلسات مثل الأميرة وستعادات باش تحط على لحمها أولى خطوط الحنة دليل على فرحتها

تغنات أغنية الحنة على حركات النقاشة لي كتحني ليها فوسط مرتبة خضراء..حتا حنات وسميرة كتصور فيها ممفلتا حتا لقطة..

نشفات الحنة وهي باقي جالسة والديدجي حامي الطرح والحضور كيشطحو بنادم باغي غي ينشط ويحيد الستريس

****

فبرا كان مولاي السلطان..ولد المصري كيفما كيقولو ليه بكوستيم أسود رائع..بدون كرافاط حال الصدايف لولانين مبين صدرو المشعر..راكباه الخلعة والحشمة قول هو العروسة..مع سمر ولى حمر بالحشمة

وأكيد برفقتو مو وخواتاتو بستة من مو ومن باه كلشي باللباس المغربي الأصيل .."القفطان المغربي"المتوارث من جيل لجيل..وكذلك الرجال مأنقيين لابسين لي كوستيم الا عبد الرحمان لي مكتافي بالجلباب المغربي وسلهامو

موقفين الحديد الواعر قدام القاعة والطيافر بالعبيد فيهم دهازها لي بلاصة حاجة جايب ربعة خمسة..ذوق الزاهية وهي لي دهزاتها بلا داكشي لي دهزات بيه نزهة راسها

الدقايقية كيضربو ويلعبو وميمون كيعلق ليهم رفقة جمال..وهل العروسة خرجو يستقبلووهم فرحانين وكيغنيو ويشطحو مع الدقايقية لي أكيد ماشي مراكشين مئة فالمئة..

الزاهية فرحانة بولدها لاصقة حداه وكتخرك يديها هي وياه كيشطحو..السيد بالفرحة قرب يحزم ويشطح ويردح..دوزو طرح زوين ودخلو الطيافر على أنغام الديدجي لي محيح..

تقدم ميمون مع هلو وحبابو من عائلة مو وعائلة باه..حضرو عماتو بجوج لي بغات تموت الزاهية فاش شافتهم كون ما عبد الرحمان ضار فيها تسكت

غي بان للمدعوين العريس تبسمو حيت جاهم زوين و مقبل أما هو عينيه مشاو ديركت لنزهة لي مفرنسة حتا هي..ماشي غي ميمون لي قشعها إنما حتى براهيم لي فيكسا عينيه عليها..عجباتو وبقا حاضيها الشيء لي لاحظاتو حفصة لي كانت كتشطح لكن عينيها جات فيه وقشعاتو

تقدم ميمون عندها كيفما طلبو منو مخلي أهلو كترحب بيهم حفيضة وتݣلسهم فمواضعهم..تبسم فور ماقرب لعندها حتا مسخها هي الضحك..جات جيهتو النݣافة وقالت:زيد مولاي السلطان..بوس راسها

ميمون:(بعفوية)منبوسهاش فحنكها؟؟

النݣافة:(ضحكات)هههههه لا

قرب حتا نزهة وتحنا حتا طبع قبلة على جبينها بحب وقال:كتح وي ني بزينك أ نزهة

عيات تحبس فيها وهي تطلقها بدون ماتحس لكن مع الموسيقى مسمعوهاش كيبان غي فمها مترع بالضحك وحتا هو كيكركر حداها بكل ما أوتي من خضورية لدرجة الناس ستغربو وكيشوفو فيهم ميتين بالضحك

ميمون:(فوذنها)واصافي جمعي الضحكة هههه

نزهة:هههههه متبقاش تهضر غنبول بالضحك

ميمون:صافي أختي راه حنا عرسان خصنا نتبتو

نزهة:(شافت فيه بحب)جيتي زوين

ميمون:منوصلكش الالاهم هههه مخلاونيش نبوسك..ربع يام مابستك

نزهة:ههههه سكت خلينا نبانو متبتين..هادوك عماتك؟؟

ميمون:(شاف فيهم وشير ليهم)اااه

نزهة:كتشاابهو هههههه

ميمون:ضروري

حيدو ليها الحنة جات حمرة فيديها ولاخر لاصق حدا جنابها مبسم و فرحان لي يشوف فيهم كيشير ليه ويدير يديه على صدرو

بدلات نزهة اللباسي من الخضرة لزرقة للصفرة فرحانة براسها وخيط الريح محيدش من جبينها ..كلشي فرحان وكيشطح بزااف الزاهية لي كل مرة منوضة واحد من ولادها تشطح معاه فرحانة بيهم وكتقلي السم لعماتو لي أصلا نسااو لي فات

فالطرف الاخر جالسة مليكة مع خواتاتها غي عاقدة سبعة فربعة عينيها غياكلو بنت فاطيمة لي كانت بسيطة بقفطان عادي وجالسة كتضرب بيديها بهدوء تحت نظرات محمد لي غي كيضور ضورة ويشوف فيها

لبسات نزهة تكشيطة ديال عرسها ودخلات شاد فيها ميمون لي كيبدل معاها كل مرة لبسات حاجة جديدة فرحانين باينة فيهم مخصهم خير..دوزهم المدعويين يشطحو باش يديرو الباروك..ساعا معامن هوما واحد خضر ووحدة شيخة..وقفو وسط الناس كيشطحو ويردحو يضورها ويشطح معاها ..كاع مواهبو تالشياخ جبدهم وفمهم مترع بالضحك حتا شافها بتبدا تعوج وهو يشدها من خصرها و همس فوذنها :براكة ههههه

مشاو لطبلة كبيرة فيها عائلاتهم بجوج فين غيتعشااو..والباقي كلشي كيضحك حيت حيحيو..نقصات الموسيقى شويا وبدا كيتسربا العشا لي كان ملكي وهائل..

فكرية:(عمة ميمون)ربنا يتمم لك بخير يا بني..عروستك حلوة ماشاء الله

نزهة:ربي يخليك أخالتي

الزاهية:(مغوبشة وكتبركم)بغيت ليكم دقة تبعوو خوكم

رشيدة:(سمعاتها)مي حشمي ويلي

منعم:أخويا نوضوكم تديرو الباروك صدقتو شاطحيين نيت

ميمون:هههههنهههه غا الفرحة هاديك

براهيم:والعريس خصو يكون مثبت هههه نتا كتشطح وتعاود

الزاهية:بصحتك أوليدي عرسك هذاا

فتيحة:خضر تلاقا مع خضرة ههههههه

محمد:(واقف على حنان)ياله تعشاي معانا فالطبلة..

محمد:(واقف على حنان)ياله تعشاي معانا فالطبلة

حنان:(كتضور عينيها على الناس)ويلي سير بعد مني..واش حماقيتي؟

محمد:مالكي؟؟نوضي تعشااي مافيها والو

حنان:هالعار أمحمد فرق جرتي راه شوهتيني..مخصني عشا ندمت لاش جيت

ايناس:(جايا عند باها)بابا ياله كتسول عليك لميمة

محمد:حممم واخا

تعشاو الناس وشركو طعام نزهة لي كلشي كان كيعيط ليها "البايرة"ومكذبوش لي قالو"البنت الى بارت على سعدها ضارت"

الى تعطلتي متزوجتيش عرفي ربي مخبي ليك رزق كبير وكل توخيرة فيها خيرة والا ربي مكتبش ليك تزوجي صغيرة راه نجاك من الفقصة

اللهم تزوجي ونتي فالخمسينات وتعيشي معاه 4 سنين ويموت ولا تموتي وتبقا ديك ربع سنين زوينة فحياتك ولا تزوجي بنت العشرين وتعيشي سنوات من عمرك فالقهرة والفقصة

هكذا هي الأرزاق تعطى على قدر النيات

تعشاو الناس ورجعو لمود الشطيح من جديد ..نزهة غي نقبات الفرحة سدات ليها الشهية وخايفة الماكياج يخسر..

ناضت تبدل اخر بدلة وهي الكسوة البيضة ولي كانت طويلة وفالدونتيل من لتحت بثوب بيض حريري مستورة من جهية الصدر مبينة غي العنق معاها توغبون فالبيض طويل جاي بحال الطرحة..وعلى صوت أغنية مصرية رومانسية دخلات نزهة ويدها فيد ميمون لي معاها خطوة بخطوى مبسمين للناس لي جاو يشاركوهم فرحتهم

تصورو وشبعو تصااور وقطعو الطارطة لي كيف حباتها نزهة فيها تصويرتهم بجوج..وقفو معانقين بجنب كيتحركو بشويا مع الموسيقى حتا باسها فحنكها بعذوبة وتسمعات تصفيرة من جمال لي كينتمي لنفس فصيلة الخضورية..بداو كيصفقو عليهم ويضحكو أما الزاهية حشماات

الزاهية(جبدات حنكها)تي ولدي ولى قبيح هاا أويلي يبوس فيها ݣدامنا

فتيحة:ههههه مكرهتهاش أنا نيت

الزاهية:الله يمسخك

جروه خواتاتو كيشطحو معاه على اخر أغنية شعبية طلقوها بالمصرية تحت طلب نزهة لي خططات ليها باش يحسو أنه خوهم دار حتا أغاني مصرية

تسالات ليلة العمر مع طلوع الفجر..كانت نزهة فرحانة فيها وحققت حلمها منهار بدات كتبان أنوثتها..تربطات بميمون للأبد ..طلع معاها ميمون شاد فيها تالفوق وقال بايسها فراسها:بدلي عليك باش نمشيو

نزهة:واخا

دخلات لغرفة التبديل وعاونوها النكافات حتا بدلات ومها وختها وسميرة عند راسها كيعاونو فيها..فحين ميمون نزل لتحت باقي بكوستيم ديالو خطفاتو نجلاء من يديه وقالت:تعالا أوريك حاجة

خرجاتو لبرا فين كانو خوتو وخواتاتو و مو وخالو وعماتو واقفين حدا طونوبيل بيضة رباعية الدفع اخر ماكاين فجيب ..

هدى:(مدات ليه السوارت)تسوقها بالهنا

ميمون:ديالي؟؟

سارة:ايوا هههههه مبرووك دي هدية فرحك..سمعووما زغرووتة

طلقات فتيحة تزغريته رقيقة فحين هو تبسم وعنقهم كااملين كيشكرهم على هديتهم القيمة بالنسبة ليه

الزاهية:تباارك الله جابو ليه طومووبيييل زينة

منعم:أخايت على الوقت..عطااتوو

براهيم:هو لمن صادقة..عرس مبرع وحديدة اخر مكاين

رشيدة:سدو فامكم من الهضرة خواتاتو بصحتوو يجيبو ليه لي بغاو

ميمون:(عنق زوهرة)عذبتووو راسكم أختي

زوهرة:دي أقل حاݣة نعملهالك..ربنا يتمم لك بخير

هدى:تركبها بالهنا..ههههههه كل أوراقها جاهزة اركب واطلع

ميمون:ههههههه شكرا

جمال:(كيصفر بفمو)الحديد حديدي ونصوݣو بيدي هههههه شي ضويرة أخويا

ميمون:(لاح ليه السوارت)شد كون شيفور هههههه

جمال:اييييه الزين هههههه

الزاهية:(بادب)ربنا يخليكو لبعض يا بنتي..ده أخوكو وانتو اخواتو

سارة:(عنقاتو بجنب)ده وصية بابا الله يرحمو..

سناء:(مبعدة عليهم هازا جلايل تكشيطتها واقفة مع باقي العريسات)الزهر ولمن عطاه الله

حكيمة:واييه هانتي تشوفي أختي..شوفي غي طوموبيل كي دايرا والعرس كيداير..تي هاد الزاهية علاش مجاتش تخطبني لميمون نهار لول ههههههه

حفصة:(ضحكاتها)ههههههههه الله يمسخك ههههه اوا الرزق كلها وشنو عطاه الله(ساهية فبراهيم لي حاضي طونوبيل)

سناء:حنا بعدا غاا مساكن خهههههه أودي بصحتهم عييييت

نادية:تمارة عاد غتبدا..العرس لهيه عاد غيقوم

حكيمة:(بجدية)والله منشقا ..يجيبو شي مرا ولا جوج لي يشقاو حنتي زوينة(كتشوف فيديها)

حفصة:عنداك ماتنساي تݣولي هاد الهضرة ݣدام الزاهية ههههه

صالح:بصحتك أبا ميمون الحديد الجديد نيت تحيد عليك ديك الخرخاشة

براهيم:والله كون ما جابوها ليه لبدلها ههههه بصحتك أسيدي

ميمون:(مبسم)الله يعطيكم الحديد ههههه

خرجات نزهة تحت زغاريد أهلها هازين جلايلهم تابعينها هي لي لابسة جلابة غوز بيبي بسيطة وطالون ومقادة فولارها بشوي كيبان شعرها من القدام والماكياج هو هو

شد ميمون بعدما قربات ليه ودخل ليها الشعر وقال:ياله مشينا

حفيضة:(مبسمة وعينيها مدمعين)تهلا أولدي تهلا فيها(غلبوها الدموع)هءهءهء

نزهة:(زادت كتدمع وعنقات مها)مي متبكيييش(مزيرة عليها)

سعيدة:(كتدمع حتا هي)الله يرضي عليك أختي

الزاهية:والله أختي حتى نديرها بحال بناتي

هدى:هي بتعيط ليه؟؟

العمة:عشان حتسيب بيت أهلها

تعانقات مع سميرة ومع عبد الجليل ومحمد كتبوس فيهم بحالا معمرهم تخاصمو ههه وهادو هوما الخوت الى شفتيهم مضاربين تقول أعداء لكن فوقت الشدة مكتلقا غي هوما

جرها ميمون عزات عليه كيمسح ليها دموعها وداها لطونوبيل الجديدة دارها فيها كيمسح ليها عينيها ويهضر معاها:وصافي أنزهة

نزهة:غنتوحش مي هءهءهء

ميمون:(بمزح)34 عام ونتي عايشة معاها هههههه

نزهة:(ضحكات وسط دموع)مسخيتش

ميمون:(ضاحك وهضر بالجهد باش يسمعوه)أخالتي هاكي بنتك راه مسخاتش حتى تسخا وتجيبها ليا ههههه

عبد الجليل:سير أخويا توكل عالله ههههههه

ميمون:نتلاقاو فالقلعة

الزاهية:سر أولدي سير طريق السلامة

طلع حداها بعدما شد وراق طونوبيل وهز وراقو حتى هو وشير ليهم محرك مخليهم وراه

الزاهية:لالة حفيضة مرحبا بيك عندنا فالقلعة

حفيضة: إن شاء الله غدا هاحنا عندكم

محمد:ياله أمي أنا غنوصل دراري ومهم (هضر فوذن عبد الجليل)دي معاكم حنان

عبد الجليل:واخا

وبالفعل كلشي مشا فحالو ..الزاهية وولادها شدو الطريق ديك ساعة رفضات يرتاحو واخا ميتيين بالعيا لكن أصرات باش ياله توجد لعرس ولدها..

دارو ليها الخاطر ومشاو فحالهم وكذلك المصريات شدو طريق لوطيل وتفرقات اللمة كلها لشغلو

فالطريق لدار ميمون..شاف فيها وضحك:يا براكة من الدموع

نزهة:(كتمسح دموعها)مشعرتش حتا بكيت

ميمون:(جرها معنقها وباس جنب راسها)مسحي دموعك..داركم وقتما بغيتي تمشي عندهم سيري ميحبسك حد..

نزهة:الله يخليك ليا..دازت الليلة واااعرة

ميمون:كي بغيتيها الالاهم؟؟

نزهة:(باستو فحنكو)كي حبيتها وكي عشقتها(باستو جنب فمو)لهلا يخطيك علي

ميمون:آمين..البنات جابو ليا طونوبيل!!

نزهة:ههههه بصح؟؟هادي فاش ݣالسين نيت؟؟

ميمون:ههه اه

نزهة:اححح واعرة هههههه غزاااالة أحبيبي بصحتك تستاهل

ميمون:يحفظك الالاهم

وصلو للدار ونزلو بجوح مشادين وهي كتفلي طونوبيل حمقاتها...طلعو فحالهم حل ليها الباب وقال:مرحبا أختي

نزهة:(بمزح)تخوا من ضلوعك ههههه عندك ستة باغيني أنا السابعة

ضربها لبين كتافها تا درعها كيضحك:مال مك متعرفيش الضحك هههههههه

نزهة:احححح أكتافي داكشي لي خلات ليا اللبسة الفاسية كملتيه ليا نتا

ميمون:ههههههه نتي لي بغيتي(دخلو لبيتهم)

نزهة:(شافت شوانطها)أحسن مادرت هو جبت حوايجي(تفوهات)بغيت غي ندوش وننعس

ميمون:(ضاحك)ديري علاش ونعسي

تلاحت عليه معنقها بدلع وقالت:دوش ليا أميمون عيااانة بغيت غي ننعس

ميمون:(حوطها بيديه )ندوش للزين..زيدي

فالطريق للقلعة كانت الجيب البيضة ديال ميمون شادة الطريق فيها هو ونزهة بعدما باتو فدارهم مفاقو حتا لاش من وقت..لابسة جلابة فالخزي مع فولار ناعم معدلاه بطريقة عصرية ..منهار دارتو وهي حاضية البنات فالانسطا كتقلب على الشدات

حتى هو لايقل أناقة عليها هي لي ملبساه وهي لي ختارت ليه حوايجو ..وعلى أنغام موسيقى ناعمة كانو شادين الطريق

نزهة:كون غير جاو البنات؟؟

ميمون:راك شفتي شحال طلبت فيهم يݣلسو ..حتى هوما عندهم حياتهم تما وخدامين

نزهة:معلييش

*****

فالدار تالقلعة كان الباب مشرع وشي داخل شي خارج والبراهش كيتناقزو ويلعبو حدا الدار لي كتشم فيها ريحة الطياب..والطونوبيلات شلا واقفين باختصار عائلة الزاهية كلها مجموعة

وفالكوزينة راها واقفة على عريساتها لي ناعسين غي ربعة تسوايع وبزز نعسوها خدامة معاهم بمبدأ "مع الزاهية مش حتقدر تغمض عينيك"

كيزيفو الكيسان ويوجدو لاستقبال العروسة الجديدة عروسة الزاهية..هاد الأخيرة لي كتشكر فعروستها وتعاود للناس لي جايا من بعيد باش يحضرو ليها

وماهيا إلا نص ساعة حتى وقفات طونوبيلة ميمون قدام الدار ولقى الحلقة كتسناه..مو معيطة ليه على ريحة الشحمة فالشاقور واقفة كتسناه بالحليب والتمر..فور ماشافوهم بداو كيزغرتو ويصليو على النبي والأعناق كتطاول باش يشوفو العروسة الجديدة

نزلات نزهة حشمانة وقربها عندو محيد عليها التوتر..شربوهم التمر والحليب وخلاها بين يديهم وزاد للبيت مع خوتو..

حفصة:(بأدب)مرحبا بيييك أختي نزهة فدارك

نزهة:الله يبارك فيك

الزاهية:زيدي أبنيتي دخلي مرحبااا بيييك دارك هادي

دخلات حشمانة حيت شافت الناس كثار أغلبهم عيالات لابسين قفاطن فرحانين بعرس ميمون البكر ديال الزاهية

فوسط صالون كبييير تقليدي جلسوها وجلسو معاها العيالات على طبالي ديال أتاي كيتعمر قدامهم والعريسات كيتسخرو ويجيبو شنو خاص قايمين بواجبهم وكذلك بنات الزاهية

...:تبارك الله عروستك الزاهية زييينة

الزاهية:وا ولدي زين يجيب غا الزين هههههه درويشة والله يعمر ليها الدار

سناء:(بهمس)غا بلاتي تسخن بلاصتها

تسربا أتااي والحلاوي بالشكال والنواع ومكاين غي خودي أنزهة هاكي أنزهة..كبرات بيها الزاهية هي وبناتها وعائلتها حتى حسو بيها عيات وهي تنطق الزاهية:نزهة أبنيتي تمشي لبيتك؟؟

نزهة:لي بغيتي أخالتي

الزاهية:حفصة دي نزهة للبيت ديالها

ناضت معاها حشمانة حيت جميع الأنظار عليها ورتابكات ...رافقاتها حفصة لي لابسة قفطان جوهرة خفيف وشال كتبان زوينة وهادئة ..طالعين فالدروج وجا براهيم هابط وعينيه ديركت لنزهة طلعها ونزلها ودوز فمو بجنب كأنو كيقراها..الشيء لي لاحظاتو حفصة لي غوبشات وقالت:حيد ندوزو

حيد بشوي عليه لاصق مع الحيط وعينيه فنزهة لي مهضراتش حدها قالت:خويا لباس؟؟

براهيم:الحمد لله مرحبا بيك معانا

نزهة:ربي يخليك أخويا

طلعات وتبعاتها حفصة لي غوبشات فيه ودازت مخلياه متبعهم بعينيهم حتا غبرو..حك ذقنو وقال بصوت منخافض:كيتعطا الفول غي لي معندو ضراس..

نزل لتحت وخلاهم مشاو للبيت لي بالأصل ديال ميمون فرشوه بكوفرلي جديد ونظفوه ..

حفصة:(بهدوء)ختي هاهو بيتك رتاحي ليك شويا لا خصاتك شي حاجة عيطي ليا

نزهة:لهلا يخطيك الزين شكرااا

دخلات للبيت كضور فعينيها على البيت عجبها وجلسات فطرف السرير محيدة شالها وكتلوي فعنقها بتعب..حلات تيليفونها دوات مع مها طمناتها عليها وخبراتها بلي غدا غيتبعوهم على حساب وليمة العريس..بمجرد ماقطعات معاها صونات لميمون وقطعات..هاد الأخير لي غي شاف الإتصال ناض من مجمع الرجال وخرج لبراا صونا ليها

ميمون:لالاهم

نزهة:أحبيبي

ميمون:مالك؟؟

نزهة:واخا تجيب ليا حوايجي من طونوبيل

ميمون:واخا نتي فالبيت؟؟

نزهة:اه

قطع معاها ومشا هز ليها فاليز ديالها وطلعها ليها وكل مرة موقفو شي حد كيسلم عليه هادي خالة مو هادي عمة خوتو وكيعطيهم الوقت ويستقبل مباركاتهم حتى وصل لعندها

نزهة:تعطلتي؟؟

ميمون:كيشدوني الناس بالهضرة(دوز يدو على شعرها)مالك؟؟

نزهة:هههه والو زوينة دارك

ميمون:دارك حتى نتي الزين(باسها ففمها)أنا ننزل خليت الناس نتي رتاحي

نزهة:(شداتو من يديه)وابقااا معايا

ميمون:(نزل باسها ففمها)مكرهتش ههه الليل هانا معاك

مشا وخلاها بدلات عليها بقفطان فالخزي بااارد مع اكسسواراتها الخفيفة لي أغلبها ذهب..وهي كتسرح شعرها دخلات عليها حكيمة مكفضة:ختي نزهة بغاتك خالتي

نزهة:(هزات شالها)واخا هاني ننزل

أما حفصة راه كانت كتغسل الماعن مغوبشة وكتخمم فشنو شافت..هي معاشرة براهيم وحافضاه وشارباه وأكيد ماشي أول مرة تحصلو..

سناء:(داخلة هازة الصينية عامرة بكيسان)فففف غسلي أختي هادو معااك

حفصة:(بعصبية)ديري أختي يديك نتي نييت أنا يدي طاابو بالصابون

سناء:مالكي كتغوتي؟؟

حفصة:(رجعات كتغسل مغددة)بعدي مني أسناء خليني عليك

سناء:(عوجات فمها)الله يستر

تسربا الأكل للناس لي جاو لاستقبال العروس و كلات معاهم نزهة على لي قدات وبقات غي جالسة كتحس براسها غريبة عليهم وهذا هو إحساس أي عروس جديدة مشات لبلاصة جديدة مع ناس جداد..غي كتشوف وتبسم للي شاف فيها

حتى طاح الليل وتسرسبو الناس لي أغلبهم ساكينين فنفس المنطقة بقاو غي دار ميمون وشي حاجة من العائلة

دخلو الرجال كاملين من بينهم مولاي السلطان لي كيقلب عليها بعينيه..حتى قشعها جالسة قارمة وسط خواتاتو لي كيهضرو ويضحكو مع نساء العائلة لي كانو عيالات كبار

براهيم:(شاف فيها وقلب عينيه)صافي مشا كلشي

منعم:واييييه(جلس حدا مو)عيييت

ميمون:أنا نيت عييت غنمشي ننعس(شاف فنزهة)ياله تنعسي

نزهة:واخا..تصبحوو على خير

الكل:تصبحو على خير

مشات معاه معنقها من كتافها تحت نظرات الزاهية لي نطقات:توما هذا غا ݣالس ويعنݣ فيها

لوستها:هههههه أويلي تي حشمي دراري معانا

صالح:تفلس ليك الطرح أمي هههههه

الزاهية:خضر

دخلو لبيتهم وتخلوا بيها ..حيد ليها الشال وقال:مالك؟؟

نزهة:(بعيون متعبة)كنحس براسي عيانة بغيت غي ننعس

ميمون:واقلة العيا بدا كيرجع معاك..سيري بدلي عليك ونعسي

تبسمات ومشات بدلات عليها ببيجامة بسروال وفوقاني مزيرة عليها وتخشات فحضنو كتقلب على النعااس

****

بعدما جمعو العريسات وبنات الزاهية الكوزينة والتعب نايل منهم كاملين لكن دار العرس هاكا كتكون..التعب والشقا ديما ملازمك

مشات حفصة للببت باقي عقلها منوغش بعدما فرشات لولادها ..كي دخلات لقاتو مخشي فالفراش مبدل عليه هاز تيليفون..مهزش راسو بتاتا يشوفها عارفها هي لي داخلة..

حيدات القفطان وبقات بشورط وديباردور ديالو ياله بغات تلبس بيجامة وهو ينطق:غا خليك الزين هاكاك وأجي

حفصة:(عرفات غرضو)عيانة مافيااش

براهيم:شحال مقربت ليك..ملي بدا العرس

حفصة:(مغوبشة وكتلبس عليها)أنا علامن دايزة تمارة العرس راه قالوها العروسة للعريس والجري للمتاعيس

براهيم:(قندش)هضرة جديدة هادي الالة حفصة

حفصة:(تخشات فالفراش عاطياه بالظهر)حسبها كي بغيتي

براهيم:شنو دابا مغتعطينيش حقي؟؟(شافها منخلاه و نغزها )راه معاك داوي

حفصة:(بهدوء عكس الغضب لي فخاطرها)شوف الله يرحم بااك فرقني عليك راني عياانة كنمووت بالعيا متزيدنيش(شافتو سقل)على زين فعايلك

براهيم:(بغضب)تحل ليك الفم تاني أحفصة؟؟(قلبها عندو ملين صوتو)وانعلي الشيطان

حفصة:(كي حققات فوجهو جات فبالها نظرتو لنزهة)الشيطاان هو بنااادم(ناضت كتسوط محاملاهش)فرقني علييك(هزات مخدتها)

براهيم:(ناض حاقد)فين غادية(جرها من ذراعها)؟؟

حفصة:(خرجات فيه عينيها)غادية ننعس حدا ولادي حسن مانعس هنا

براهيم:(بعصبية)غدوزي تكوني وتعطيني حقي ولا غنريب ليك سنانك تحسبيهم ..

حفصة:(فرعنات كثر منو)معاطياااكش ومكاينش بااااح سير الزلايلي المنافق

براهيم:(شدها من شعرها كيحك سنانو)ينعل أصل مك فهاد الليلة المق***ودة معاااك مال دلمك؟؟

حفصة:(كتجر معاه بألم حيت قسحها)طلللق منييييي ...طللق الله ياخد فيك الحق الكلب أعيفة الرجال..قتلتيني بتزلالك وبعفنك طلللق منييييي

براهيم:(عصباتو وطرشها)تحل ليك الفم وليتي تعايري سياادك؟؟على يامك كنتي عايشة فالقهرة وجبتك تعيشي كي بنادم

حفصة:(طلقات حلوقها)اللهم القهرة أوجه القهرة ولا العيشة معاك ومع تريكتك ..(صاحت فوجهو)منهار خديتك وأنا عايشة القهرة والهم (زير عليها وزادت كتبكي مفركعة عليه)كرهت الزواج وميجي منووو

براهيم:(جرها معصب لاحها على الناموسية وكيهضر بصوت منخافض معصب مباغيش يفيقهم)أش تزاد على الك لبة تمك..أش تزاد عليك؟؟حرشوووك؟؟؟حرشاتك ديك الك لبة تختك ياااك؟؟عمروووك علي؟؟

حفصة:(غي جبد ليها ختها وهي تصعر وطلقات حلوقها)بزاااف عليك الحي**وااان ختي بزااف عليك..ختي قارية عليك وواصلة علييك وكون سمعت هضرتها نهار لول منديش وااحد بحالك...ختي بزااف علييييك ختي حسن منك وماشي غدااارة...حسابك معايقاااش بيك كتشووف فمراات خوووك. .

خرجوو عينيه على الجهد فيها ممصدقش شنو قالت وبالطريقة باش نطقاتها وحتى مستوى الصوت لي نطقاتها بيه عالي ...خاف يسمعها شي حد..محس براسو غي وهو هاز يدديه مبربقها معاها حتا تطراساو يديه فحنكها وطوشاات دمعتها...

طلقات صرخة عالية وناضت فيها جهدين كتغوت وتضرب فيه وففمها كتناااجي ياالعباد مثل أي مراا مغربية

حفصة:وااعتقوووو الروووح أعباااد الله واااعتقوووو الروووح ..كيضرب فيااا كيضربنيييي واااعتقوووو الرووح

عيا يسكت ففمها لكنها كانت فيها قوة مجهدة..قوة ديال ظغط كبير عليها..هي بنت بحالها بحال أي بنت مكملاتش قرايتها حيت ماعينيهاش فيها..نهار شافتها الزاهية فعرس قصدات دارهم بالكبرانية وخطباتها لبراهيم بالعشق لي كيهمو فقط مرا تولد ليه وتعيش مع مو ويتسمى مزوج

عرق تازهوانيت فولاد الزاهية وراثة ..كلهم زهوانيين وكلهم زلالا وكلهم عينيهم فالتين لكن براهيم زايد نغزة رغم أنه تزوج مجمعش عينيه ومجمعش فعايلو باختصار وباللهجة المغربية "كيفسد على مراتو"

تسمع الغوات فالدار الكبيرة ولي كان فيها السقيل وكلشي ناض مفزووع من غرق النعاس على صوت حفصة كتغوت وبراهيم حتى هو كيغوت معاها وكيسمعو صوت تهرااس

خرجو من بيوتهم ولي ناعس لتحت راه نااض طلع للفوق يشوف أش كاين

جايا الزاهية كتجري مخلوعة كتقاد فعكافتها وكتلاقا بولادها وعيالاتهم خارجين كيسمعو الغوات..

ميمون:مي أش كاين؟؟

منعم:صوت حفصة..واقلة داك الكلب كيضرب فيها عاود

كلشي جراا لبيت براهيم وحلو الباب لقاوه كيضرب فيها..جرووه خوتوو من عليها كيكشكش عليها ويغوت وهي كلها مجرتلة كتسب فيه وتدعي

ميمون:(جارو مخرجو مغوت عليه)حيييد أصاحبييييي

الزاهية:(مشات لعروستها كتقلب فيها)أويليي على المسخوووط أويلييي على الك لب أش دار فالبنت

حفصة:( بالغوات)الله يعطيك شي مووصيبة يالك لب الله ياخد فيك الحق

داوها البنات ومن بينهم نزهة دخلوها للحمام كيغسلو ليها وجهها حتا سخفات ليهم وزادو كيغوتو خالتي خالتي..هاد الأخيرة لي ركابيها فشلو عليها بالخلعة وبالروينة ولات صفرة

صالح:(كيدفع فبراهيم برا)خرج الزبللل شهاد الحالة درتي فالبنت؟؟

براهيم:خليوني نربي دلمها نوريها الشماييت..تحل ليها الفم ولات كتعايرني

جابو لحفصة الما والسكر كيرشو عليها الما يفيقوها وهي سخفانة بحرا مافاقت ليهم من السخفة كتنهج وتبكي وتقول مابكيت وبراهيم مزال كيعرعر برا البيت حتا ضار فيه ميمون:جمع فمك لنصليها مع جدك...لاش ضارب البنت؟؟

براهيم:(بزق فالارض)الك**لبة لوووخرااا

خرجات الزاهية لعندو كترعد وكتهضر:الله يعطييك شي موصيية يالك**لب(هزات يديها نزلات عليه بيها للوجه)الله ينعل طاسيلتك الحم**اااار...كتضرب فالبنت اليهوودي...شداارت لييييك؟؟هاااا وليتي مفرعن كتضرب مراااتك الك**لب؟؟هادي هي الرجلة

عبد الهادي:ميي صافي ..غيطيح ليك السكر ..

الزاهية:(كتغوت)مصااافيييش...قتلتيني وقهرتيني بهمك..متضرببش بنت الناااس متضربش بنت الناااس

مسحو ليها البنات دموعها وهي تنوض كتغوت باغا تخرج تجمع حوايجها ويحيدو ليها وهي والو باغيا تمشي فحالها..دخلات الزاهية كتطلب فيها تجلس:لعار ابنيتي لا ما جلسيي فين غتمشي؟؟مسحيها فيا أبنتيي متمشييش

خفصة:عطييوني بالتيساااع قهرتووني فصحتي ...أنا خليتها ليكم ديرو فيها لي بغيتو والله منكون ليه مرااا..كيفسد عليا أخالتييي ولدك..ولدك كيغدرني مع الخانزاات..

تسمعات فوذنيهم كاملين ..خلاتهم كاملين يشهقو من النساء فقط أما الرجال كلهم عارفينها ماغريبش عليهم..

الزاهية:(ضربات فخاضها)هاويلي لااا تݣوليهاش أبنيتي..(حيدات ليها الصاك)ݣلسيي الله يرضي عليك والله متبقا فيه

براهيم:(مهلل برا)حييد خليني نوري دلمها الفساد والباطل كي داير..شايفة رااسك ماشي بحال لالياتك وكتطيحي عليا فالباطل

حفصة:(سمعاتو وزادت كتبكي وتغوت لربي لي خلقها)الله يعطيني شي موصيبة لكذبت أخالتي ديما حاصلاه ديما أخالتيييي...أنااا عيييييت(هزات حوايجها)خليت ليكم هاد الخربة بلي فيهاا

عياو يحبسو فيها وعياو يهضرو معاها لكنها مصرة تمشي حيت فاض بها الكاس مزيان

تدخل ميمون وقال:مي خليوها تمشي ترتاح فدااارهم رااه مداار فيها ميصلاااح

براهيم:(مكشكش)خليوها تمشيييي فحااالهااا ولايني ولادي والله لدااتهم

صالح:(جارو مخرجو)زيد الخراا طليناه خضر معاك شوهتونا مع الناس

عبد الهادي:(كيرطب الهضرا مع حفصة)خليك أختي تال غدا و سيري تدخلي على داركم فهاد الليل تخلعيهم..باك كبير فالعمر غيمرض فصحتو

حفصة:(كتنخصص)والله منبااات فيها ..الله ياخد فيه الحق

الزاهية:(بدا كيطيح ليها السكر)المااا الماااا

طارو عندها حتى هي عطاوها الما كيوعيوها وكلهم طلع ليهم الدم على هاد التصرف لي دار براهيم

ناض عبد الهادي دا حفصة لدارهم لي حلفات ماتبات فيها ومداتش ولادها بتاتا مشات غاضبة أما ميمون راه طلع ليه الخرا وهو كيشوف مو عيانة وذبلات دغياا..عطاوها باش يطلع السكر حتى توكضات وبدات كتصيح فبراهيم لي واقف عند راسها:والله متبقى فيك الك**لب..الى بقات فيك راني بنت الحرااام...كتضرب بنت النااس أعدو الله هاااا خرجج علي خرج علييا من ݣداااميييي بغيت ليك موصيبة

نادية:صافي أخالتي ..دابا يعاود يطيح ليك السكر ..عطي الراحة لراسك

ميمون:(خزر فبراهيم)خرج برااا

براهيم:(بعصبية)مالكم ضرتو فيااا؟؟مسمعتوهاش أش ݣالت

منعم:نتا أصاحبي ديما مبرهش..عصباتك خرج وخليها تغاوت معاها مضربهاااش

براهيم:(غوت فوجهم)قتلو دلمي وتهناااو(مشا كينݣر)خراااا

بقاو مع الزاهية حتى ولات شويا ورجع عبد الهادي فداك الليل..هز ميمون عينيه فنزهة لي جالسة حدا العريسات كضور فعينيها بحال داك لي كيتسائل "لماذا نحن هنا" لقاها ببيجامة تنعاس وممغطياش شعرها حيت خرجات مفزوعة ونسات مدارت فولارها..فيكسا فيها الشوفة عاد رد ليها البال..بقا عاس عليها حتا شافت فيه وحرك ليها عينيه باش تنوض لكن مفهماتش بقات كتحرك فراسها وفعينيها بعدم فهم حيت كيحرك غي حجبانو مباغيش يهضر حيت ميمكنش

شافها مغتفهمووش وخزر فيها ووالو مفهماتش..كتحرك ليه عينيها بمعنى شنو لكن مفهماتش..باس يدين مو وقال:مي نعسي ترتاحي يصبح ويفتح.

الزاهية:(كتنهد)الله يدير شي تاويل ديال الخير

باس راسها وناض معيط لنزهة لي وقفات حتى هي معاه وغادية قدامو ..دخلو لبيتهم وهي تنطق:شنو كنتي كتݣول أميمون؟؟

ميمون:(جامع حجبانو)خارجة هاكا أنزهة ؟؟

نزهة:(شافت لباسها)والله مرديت البال..فيقني الغوات وفيقتك مبقيتش عرفت أش كندير

ميمون:وكنݣوليك بعيني نوضي نوضي ووالو..

نزهة:واش أميمون أنا عرفت غيكون الصداع؟؟نضت كنجري ومرديتش البال

ميمون:كلهم دايرين الحجاب ناضو وداروه..

نزهة:(هزات حاجبها)راه جديدة فيه ياله كنولفو..

ميمون:(مشا لفراشو مغوبش)ليلة مزمرة

نزهة:(ساطت)ولينا فالمعيوور؟

ميمون:(شاف فيها وغمض عينيه)زيدي تنعسي ..

مهضراتوش مشات كتسوط تخشات فالفراش دغيا رجعات نعسات أما هو بقا كيتقلب ..كيكره المشاكل والغوات والصداع خاصة لي كتكوت فيها مو..مكرهش كون سلخ براهيم

أما البقية راه كلشي رجع لبيتو وكلهم كيجمعو على بلان براهيم وداييين مايعاودو على ولد الزاهية لي كيسلخ مراتو وغضبات فنص الليل.

مع شروق الشمس ..فاقت الزاهية وفيقات عريساتها اليوما عندهم اللامة الكبيرة ..وليمة العريس لي غيجيو فيها عائلة مو كاملة يشاركهم الفرحة..لكن القلب مهموم

الزاهية:(كتشرب فاتاي وتنهد)كون غي توصلني أولدي نجيبها

منعم:خليو السيدة ترتاح

رشيدة:أمي ولدك زاد فيه..راه ديما كيضربها!

الزاهية:أنا علاش مفراسيش؟؟امتا كيضربها؟؟علاش مݣلتو ليا والو

صالح:أش فيها مايتعاود؟؟نتي كتغبري من هنا هي تعصبو ويضربها..مامرة ماجوج هضرنا معاه

فتيحة:الله يعطيه الهرس فيديه إن شاء الله..بقات فيا مسكينة

الزاهية:الك**لب لاخر..خليه يدوز عرس ميمون ونتوالاه الى معاودت ليه الترابي راني ماشي بنت القلعة(تنهدات)فتيحة نوضي شوفي الطباخة أش خصها؟

فتيحة:مخصها والو كلشي واجد

رشيدة:اييه أمي كلشي واجد..خصها غي تبدا تطيب

حكيمة:الغدا غيبداو الناس يجيو..هل العروسة إمتا جايين؟؟

الزاهية:العشية إن شاء الله

كان هذا جموعهم مابين حفصة والعرس..مكرهوش يتقسمو على جوج ويمشيو لحفصة لكن العرس حابسهم..

فبيت ميمون كان ياله فاق كيتحرك حتا ضرب نزهة بيديه..بانت ليه ناعسة جيهتو والشعر طايح على وجهها..بدون شعور تبسم وقرب ليها باسها فعنقها حتا تهرات وبدلات وضعية النعاس ولات عاطياه بالظهر..دوز يديه عليها وجرها لحضنو ويديه كدوز على كرشها..وبدا كيبوسها فعنقها بحب ويفيق فيها حتى حلات عينيها على لمساتو ويديه مزيرنها..مع شافها حلات عينيها نطق:لالاهم صباح الخير

نزهة:صبااح الخير(تفكراتو فاش تناقش معاها)مممم

ميمون:رتاحيتي؟؟

نزهة:(بنفخة)الى مغوتش علينا بنادم

قرصها ففخضها وقال:حسبتيها غوات

نزهة:(ضارت لعندو كتشوف فيه)واش تسميها؟؟مدرت ليك والو

ميمون:(رجع شعرها ورا وذنيها مستمتع بجمالها الطبيعي)معجبنيش الحال تكوني مقزبة هاكاك..هاد البيجامة كتبينك كلك

نزهة:واش أنا قصدت؟؟

ميمون:(باسها ففمها)عارفك مقصدتيش غي معجبنيش الحال..

نزهة:مكان حد

ميمون:خوتي ماشي رجال

نزهة:(بدلع)وأنا نسيييت أش ندير؟؟

ميمون:(جرها معنقها ليه)مديري والو غي ردي البال..طرف منك مبغيتوش يبان لشي حد

نزهة:مغنتسناكش تݣولها ليا حافضة سواريا بيك ولا بلا بيك

قرصها فترمتها وقال:مال مك كتنفخي علينا..غتسكتي ولا نقلب جدك هنا

نزهة:هههههههه غيسمعو غواتنا ههههههه حتى يكون عندنا سكس بحال الناس

ميموت:(بتساؤل)شنو هو هذا؟؟

نزهة:سكس هو النعاس ههههههه

ميموت:ههههههههه دابا النعاس هو صكص

مع نطقها بالصاد مع بدات كضحك وتكركر وتقول:ههههههههههه لالا سكس ماشي صكص هههههه

ميمون:(ناض ضاحك)حيدي علي من التعواج فالهضرة هههههه سميتو ال*وا

نزهة:الله يمسخك ههههههه غيكونو فاقووو

ميمون:غيكونو تغداو ههههههه نوضي تفطري

نزهة:(كتعجز)واخا

نزل هو لول بعدما طرف وغسل سنانو هابط باين عليه حالة عريس..صبح على مو وقالت:صباح الربح وتيسير(بابتسامة)عرييس تبارك الله

ميمون:(باس راسها)الله يطول ليا عمرك

الزاهية:فاقت نزهة؟

ميمون:فاقت

الزاهية:انطلعو ليها الفطور لبيتها

ميمون:فين براهيم؟؟

الزاهية:(مكرهة)منعرف محاملا نشوف خنشوشو حتا يسالي العرس ونتوالاه

ميمون:يكون خير أمي متعصبيش راسك

مشا خارج لطونوبيلتو وتيليفونو كيدوز نمرة براهيم وبعد عدة رنات عاد جاوبو ودار معاه فقهوة أما نزهة راها دايرا نيت حالة العريسات .طرفات وحلقات وتعطرات ولبسات قفطان اخر غير مالبسات البارح وسرحات الشعر وجلسات كتماكي حتى دخلو عليها الفطور بالزغاريد نسا كثار من دياول البارح عرفات فيهم غي أسرة ميمون..

حطو ليها الفطور وجلسو مشاركين معاها لغة والكلام محاولين يتنااساو شنو وقع البارح حتى لي محضرش راه عاودو ليه الحاضرين. 

دار العرس كتكون عامرة لغة وفيها ريحة الدجاج كيطيب..نزهة راها ملاهية مع النسا وميمون ريح فقهوة كيضرب فاتاي على الريق وكيتسنا فبراهيم لي لاح تيليفونو وجلس

ميمون:على السلامة

براهيم:(مغوبش)الله يسلمك(شير لسرباي)شي وحدة قاسحة

ميمون:فين بتي؟؟

براهيم:(مراشقاش ليه يهضر)فالجاايحة لي ضربني

ميمون:كنهضر معاك هضر مݣود ..شدوك الفعايل البارح؟؟

براهيم:(مخسر ملامحو منزاعج)ميمون متصرعش ليا راسي بالهضرة حتى نتا

ميمون:(مخنزر)واش عارف أش درتي؟؟ماحرامش عليك ضارب مرااتك وكتعاير فيها ݣدام الناس

براهيم:(شاف فيه)لي دار علاش ياكل العصا ياكلها

ميمون:(شوكاه)كتهضر من نيتك أصاحبي؟؟تضرب مراتك؟؟مالك حي*وان؟؟

براهيم:بيني وبين مراتي ماسوق حد..قللات عليا الحيا وخصها الترابي

ميمون:براهيم راك غي كتخرا هاديك لي ضربتي راه مراتك ..باشمن وجه غتشوف فيها؟؟فاقص مك ومعصبها ومراتك سالخها ..شغتكون دارت هاد بنت الناس كاع؟

براهيم:(عصر على قهوة مخنزر)بيني وبينها..(شاف فيه)مي مقلقة؟؟

ميمون:على مي جيت نهضر معاك..مشاكلك مع مراتك ضبر راسك فيهم ولكن باش ينوض الصداع فدار مي وتنوض الروينة وتعصب وتطيح هاديك منقبلهاش ليك أ براهيم..اخر مرة غنهضر معاك ..ماشي دري صغير باش نݣوليك أش دير..ولكن مي لا..مي منشوفهاش طاحت

براهيم:(ببرود وحجبانو ملاقيين)حسابك أنا عاجبني مي الى طاحت...المشكل وقع وأنا مقدرتش نشد يدي عندي

ميمون:غتمشي تصالح مراتك وترجعها..وتطلب السماحة مزاال حيت نتا لي داير الغلط

براهيم:(ضحك بسخرية)مبغيتونيش ندي ليها القوالب تسكر ونعورض فيها...مرييض نتا والله

ميمون:لحاصول ضبر لمحاينك مع الزاهية أنا غي هضرت ونتا تعرف..تهز للدار

براهيم:(برفض)لا..غا خليني مع راسي

ميمون:(وقف وجرو)تهززززز(لاح الفلوس)مي مغتبغيش متشوفكش فالعرس

براهيم:(مكره)ففففف المرض صافي

ميمون:فينها طونوبيلتك؟؟

براهيم:خاسرة ليا...حطيتها عند المعلم وجيت

ميمون:زيد معايا

طلع معاه فالجيب وشدوها للدار..حتى صونا تيليفونو كانت نزهة وحيت سايق دار الهوت باغلوغ وقال:الو

نزهة:حبيبي(بصوت رقيق)

حيد لوت باغلوغ دغيا ودارو فوذنيه وقال بشوي:راه وليت رطب معاك خهههههه

نزهة:لا متݣولش ليا حداك شي حد ههههه

ميمون:ااه هههههه ربطي شويا

براهيم:(دار بتسامة سخرية وهضر بهمس)نتا لي عطاتك

نزهة:مفطرتيش أحبيبي

ميمون:هاني جاي نفطر

نزهة:واخا الزين

ميمون:تلاحي

قطع عليها وكمل طريقو عادي حتى نطق براهيم:أشابع مع راسك كلام حلو

ميمون:(ضحك)بصحتي ههههههه

وصلو للدار ونزل براهيم حاني راسو داز لقى مو باس راسها وهي معفرة وطلع لبيتو وسط الغنا والشطيح و الرديح ديال العيالات لي وصل لمسامع ميمون ..مع دخل تلاقا جمال كينقب الحلوة فطبسيل وقال:جمال كاينين الشيخات؟؟. .

جمال:(بتذمر)دايرين اللعابات ..وغي لعيالات حرمها علينا با

ميمون:(ضربو لقرفادتو)ياولد الحرام واش مكتوبش ههههههه

جمال: ونتا لاش مسولني؟

ميمون:باش نبدل عليهم الطريق ههههه تبت تبت

جمال:لعجاج هههههه فيناهو داك الكيدار؟؟

ميمون:طلع لبيتو واقلة

جمال:(ببرود)داك خوك راه مريض فعقلو

ميمون:الله يهديه عزات علي مراتو ضربها الحمار

جمال:خصو الطبيب هذااك..زيد ريح

مشاو جاسو فالصالون كيفطر ويقشب مع ولاد عائلتو لي أغلبهم ماعرفوه حتى بنى الدار لمو وسكنهم فيها حيت علاقتهم كانت منقاطعة

*****

فكازا كانو كيتجهزو عائلة نزهة من مها وخوتها وسميرة وحتى خالاتها وعماتها بغاو يديو غي الناس الكبار وأكيد بلا مينساو ولاد خوتها لي المومو تعين نزهة..

محمد:ياله تحركوووو

حفيضة:(جايا لابسة ومأنقة)هاني أوليدي هاني فين ولادك

محمد:مع راجل عمتي..تحركو خلااااص

نزلو كاملين هازين ومحملين من حلويات ودهاز وشدو الطريق للقلعة باش يطمنو على بنتهم ويحضرو لوليمة العريس

هاد الاخيرة لي كانت معاها رشيدة وفتيحة فقط فالبيت بعدما نزلو الناس مجمعين وكيديو وجيبو فالهضرة

نزهة:واش غيكونو الناس كثار؟؟

رشيدة:الرجال لي شويا كثار وغيكونو فالصالونات بجوج والعيالات قلال غي القراب

نزهة:خصني نوجد راسي غيجيو دارنا

فتيحة:وجدي راسك أختي(تنهدات)أنا قلبي مقبوط ملي مشات ديك الزغبية ديال حفصة

نزهة:(بحسرة)حرام عليه دار ليها ديك الحالة

رشيدة:هذااك حالو ديما معاها

فتيحة:كون غي كانت شي وحدة واعرة..درويشة مسكينة متجبدش العيب..كون ديك سناء نݣوليك تستاهل

رشيدة:حتا حد ميستاهل ديك الحالة..

ناضو من بعد خلاو دماغها كيفكر ويحلل فوضعية خوه وكتقرا شخصية كل واحد فيهم..دخلات الدوش بعدما سدات الباب عليها دوشات ورخات عظامها وخرجات كتنشف فشعرها لابسة بينوار خفيف ساتان على اللحم والشعر فازݣ

مع بغات تبدا تنشفو بالسوشوار تدق الباب وقالت:شكون

ميمون:أنا

حطات سوشوار ومشات حلات لباب مبسمة ومدرقة بالباب ليكون شي حد..تبسم ليها وقال:لالاهم

نزهة:(شدات الباب)أحبيبي

ميمون:(طلعها ونزلها وجرها جيهتو ملصقها معاه)شكنتي كديري؟؟

نزهة:والو ههه دوشت باش نوجد راسي قبل مايجيو دارنا

ميمون:(قاس شعرها الفازݣ)كتجي فسرة ونتي ياله مدوشة

نزهة:(بابتسامة دلوعة)غي عويناتك لي كيشوفوني فسرة

ميمون:شنو الزين؟؟منضربوش شي واحد خفيف؟؟

نزهة:ولاش الخفيف؟؟(ضحكات بجهد)ههههههههه خليه ثقيل نييت

معطلهاش حتى هو هجم عليها بقبلاتو اللذيذة مستمتع بجسمها الفتي وغاص معاها فعلاقة حميمية من نوع اخر جربو فيها شكل اخر من الحب مسالاو حتى سمعو الدقان فالباب

نزهة:(واقفة على ركابيها وهو موراها عريانين بجوج خاشي وجهو فعنقها العرقان)ميمون لباب

ميمون:(بهدوء ويديه فصدرها)نعام؟

حكيمة:حمم خويا راه جاو هل العروسة

ميمون:واخا هاهيا شوي وتجي

مشات حكيمة وخلاتو كيبوس فيها مزال طامع فماكثر حتى نطقات بحب:ميمون..صافي أحبيبي

ميمون:(ضورها عندو منتاشي بيها بين يديه ورجع جلس وجلسها فوقو)مسخيتش(وجهو فصدرها)مالكي على هاد الحلاوة(ضحك)تكويزتك مقودة

ضحكات بصوت عالي وقالت:ههههههههه نزيدك وحدة خرا

ميمون:مكرهتش ههههه

نزهة:غنباتو هنا ههههه خليني نشوف مي

ميمون:(صرفقها لفخضها)نوضي شوفي مك هههههه

ناضت من عليه عريانا لاحت عليها البينوار مخلياه عريان وبقا هو على وضعيتو هاكاك كولو عريان..عضات شفايفها وغفلاتو تحنات باست شيخ الشباب وقالت بضحكة:الله ينفعني ببراكتو هههههه

هربات للحمام مخلياه مكرشخ بالضحك عليها وكيهضر معاها هي لي كدوش وتكركر عاجيها الحال..طالع ليها المورال حيت عاشت علاقة حميمية بشكل اخر زادو طيرو الحواجز كثر ماهوما طايرين..بمعنى اخر ولاو كيعرفو يسيرو ليلتهم

خرجات ببينوار لقاتو مغطي نصو السفلي وقالت ضاحكة ويديها كيجبدو ماتلبس:مالك غطيتيه؟؟

ميمون:ههههههه عيا يتسنا فيك

نزهة:هههههه نوض أحبيبي دوش..باش ننزلو

ناض دخل لدوش خرج لقاها نشفات ولبسات عليها دوبياس كتنشف شعرها ونطق:غتلبسي داك القفطان على لحم؟؟

نزهة:اااه..

ميمون:(جا كيقيس الثوب)خفيف أنزهة غيبينك كولك

نزهة:لالا ثوبو مكيبينش

ميمون:مهضرتش على الثوب..لاصق شويا لا

نزهة:(كتمشط شعرها)غيكونو غي العيالات أميمون متزيدش فيه

ميمون:(مشا كيلبس عليه)هاني منزيدكش فيه

تحنات بغات تهز حلقها طاح ليها كوزات ليه محساتو حتى جمعها معاها قايل:يرضي عليها وعلى تكويزة عندها

نزهة:ههههه الجهل هههههه (لبسات القفطان وضارت )كي جاني

ميمون:(عينيه غي على منحياتها)مبينك أنزهة بدليه

نزهة:(مشات لمراية طويلة)والله ممبين..زوين جا مع فورمتي

ميمون:حيت جا مع فورمتك كنݣوليك بدليه

نزهة:واميمون مافيه والو زوين والله ..براكا من نݣير

ميمون:(ببرود)نلقاك بيه فشي بلاصة فيها شي راجل نتفاهمو

نزهة:(كتعيب فيه)نننننن هههههه

مشات كتقاد وجهها وتفتي عليه شنو يلبس ولات هي المصممة ديالو يلبس بشهوتها وبذوقها لي ولى كيريحو نيت حيت كيحس براسو أنيق بحالو بحال الرجال لي فعمرو

سالات اخر اللمسات وهي الريحة وعينيه حاضينها بعدم رضى..جا حيد ليها الريحة كيضحك وقال:أبراكة ابنادم خههههه لي داز غيشمك

نزهة:مريض نتا لا ههههههه طلق خلينا نرشوو ونتريحو نحيدو الجنابة

ميمون:سيري فحالك لنجونبك دابا نيت

نزهة:(كتقاد الشال)كي جيت؟؟

ميمون:كي العسل على ز***

ضحكات بمياعة كي ديما كضحك كي شياخ وقال:يخلي لي شيخ الشباب ههههههه ياله زيد ننزلو.

شدات فذراعو وخرجو بجوج بيهم كيبانو مواتيين نازلين مع دروج كتقاد ليه فكول القاميجة وتفارقو عند النهاية هو عند الرجال وهي عند العيالات لي بمجرد ماشافوها ناضو كيصليو على النبي ويعشقو بزينها..هي لي شافت مها مشات كتجري تعنق فيها وتبوس قول شحال مشافتها وجات سميرة وسعيدة وولادهم..جلسات وسطهم ووسط الناس مثبتة ومحصنة ولي شاف فيها تبسم ليه

حفيضة:(برضى)الله يحجبك أبنتي طاح عليك السر

نزهة:(باستها فحنكها)الله يخليك ليا أمي

سميرة:(همسات فوذنيها)كي داز العسل؟؟

نزهة:(بضحكة)زين أختي هههه (هزات جنات)توحشتك أعميتو

جنات:(كتلعب فشالها)حتا أنا أعميتو..غتبقاي هنا؟؟

نزهة:لا غنمشي لكازا

جنات:باش نعود نجي عندك تديني لحمام

سميرة:هههههههه أش كديري لبنتي فالحمام هههههه كنديها ومنخلي مندير وتݣوليا ماشي بحال عمتي

نزهة:(بجغاتها بوسان)يخلي لي الزين تعميتو

ضورات عليها بنات خوتها تبوس وتعنق وتجمع معاهم موحشاهم قول عام مشافتهم..دخلو اللعابات المراكشيات وحدة تنسيك فلوخرا كل وحدة واش هازا وراها لابسين قفاطن موحدة ووحدة فيهم لابسة مختالف دارو بلاصة وبداو كيغنيو و ينشطو المجمع ومع القلعاويات نشايطيات كل وحدة تحزمات على طرفها وكلسو يلوزو شي باغي يبان على شي..عيالات ولاد الزاهية داخلين خارجين كيسربيو فالناس أتاي والحلوة ويشطحو يديرو حقهم

أما برا كان جمال جالس كي شويا تالهم شاد حنكو بيد وكاس تاتاي بيد كيشكي على ميمون:دابا كون كنا لداخل كون راه بزطامي خوا

ميمون:ههههههه مراتك لداخل أصاحبي

جمال:مراتي درويشة عارفاني نشايطي..سير أبا(هز يد وحدة كيدعي فيه)الله يعطيك الباردة

عبد الرحمان:(صرفقو من لور معرفت منين نزل) وتعطاك نتا الكلب ولفتي الشيااخ

جمال:أبا راه عيب هادشي..عرس بلا نشاط

عبد الرحمان:(جلس فكرسي)تعرس بالعافية الحمار..ولادك قربو يصومو ونتا مزال تابع الشيخات دير مداير براهيم

ميمون:حريرتو بوحدها هذااك حتى يدوز العرس

عبد الرحمان:هذاك هضرة خرا معااه

لداخل كانت القعدة حاضرة كل مرة طالعة وحدة محزمة ورجليها كيلعبو فوق الجفنة وكتحير بشعرها واخدين راحتهم لي عندها شي سالف طلقاتو..نوضو نزهة حتى هي حشمانة دير صواب ..طلعوها ووبدات كتحرك بشوي دايرا شطيح مأدب كون كانت مع ميمون كون ماتفرق بينها وبين شياخ غي بالغرامة..كتحرك فمؤخرتها مع رشيدة مبسمة ومع ختماتها بركزة غافلة على تيليفون كيصورها بيد طفل صغير.

وهاد الطفل كان ولد سناء لي هاز تيليفون مو المشغولة بالناس وكيصور..غي مقاليه عقلو صور ويجلس يلعب بيه ويفنكش فيه..تم خارج هازو فيديه كيلعب بيه حتى تلاقا براهيم شخصيا

براهيم:فين أمين ؟؟

..:برا أعمي..عمي مبغاتش تخدم ليا لعبة هنا

براهيم:ارا نشوف..ديالمن هذا؟؟

...:ديال ماما(مدو ليه)

شدو براهيم مع حلو طلع ليه فيديو فيه صورة نزهة ..هز حجبانو وحلو وبانت كتشطح..هز حاجبو وجبد تيلي دغيا صيفتو لراسو فالبلوتوث ومدو لدري بعدما قاد ليه اللعبة مبسم ومشا لبيتو ناوي يستفرد بالفيديو لي محققش فيه قبل مزيان

سد عليه وجلس فطرف السرير مخدم الفيديو كيشوفها كيفاش كتحرك مبسمة ناشطة وحاضي ملامحها ضاحك حتى تسالا وقال:واااعرة

ناض ببرود خرج عند خوتو وبالو خدام مع الفيديو..نوع براهيم واضح هو أحد أنواع الزلالة فالمغرب

الزلالة فيهم أنواع..لولاني كيتزلل غي بعينيه ويشد يديه مايخونش جسديا..الثاني كيتزلل بعينيه مي على نوع محدد فقط العامرة..والثالث لي جا بسم الله ..يتزوج البيضة ويعشق السمرة..يجرب الغليضة ويبغي يذوق الرقيقة..يعشق الشهبة ويموت فالكحلة وهاكا غادية بمعنى اخر لاشيء يملي عينيه الا التراب عند الممات

وهذا هو نوع براهيم بالضبط..زلايلي وكلشي يحط عليه العين كيفما بغات تكون نوعها..واخا ميقيسهاش ولكن غي المهم تعجبو ويرمي عينيه

****

دازت وليمة ميمون على أكمل وجه كلشي كلا وشرب ونشط وداو مايعاودو للي محضروش وأكيد كلشي لاحظ غياب حفصة والاغلبية كيسول عليها وتكذب الزاهية بلي راها مريضة

بداو الناس كيغادرو العرس مع الحضاش هاكاك حيت الوليمة بدات بكري بقاو غي المقربوون من عائلة الزاهية وعائلة نزهة

عبد الرحمان:أنا غنمشي عيييت..جمال نوض جيب مراتك وولادك ومك ودوز ݣدامي

ميمون:باتو؟

عبد الرحمان:مرة خرا إن شاء الله

بالفعل غادرو لي ديورهم قراب وطلعات نزهة لبيتها مع مها وختها ومرات خوها..كي دخلو بداو يصليو على النبي بشويا

سميرة:البيت غزااال

نزهة:عويناتك...(بتعب)والله حتى عيييت

حفيضة:وابسيف تي من العرس لهنا لصباحك..كيدازت ليلتك؟؟بغيت نسولك ݣبيل وكانو الناس

نزهة:(حابسة الضحكة)اينا ليلة فالليالي؟

حفيضة:(بتساؤل)تي شحال من ليلة دوزتي؟؟

سعيدة:هههههههه بلا عدد

حفيضة:(ضربات فخاضها)أويلي على بنت الحرام..واش ماشي عاد صبحتي؟؟

نزهة:هههههه على سلامتك

حفيضة:(معجبهاش الحال)شهاد الخفة أنزهة؟

نزهة:شمن خفة أمي..راجلي بغاني نݣوليه لا؟؟

حفيضة:حتى ديري العرس

سميرة:أخالتي زمان اخر هذا

سعيدة:مافيها باس العقد لي مهم دارتو

حفيضة:امتا صبحتي؟؟

نزهة:قبل مايمرض ميمون بشحااال أمي..

حفيضة:ماهو كلام هذا أنزهة..زربتي ..حلاوة الصباح فالعرس

نزهة:ماحيلتي للعرس ولا لحريق شويا لباس؟؟سيري أمي داكشي قديم

حفيضة:ماسخة لوخرا

تسمع حوارهم كولو على وذن سناء لي كانت جايا تديهم ينعسو حتى دات نيت متعاود..دقات عليهم وداتهم معاها فين مفرشين ليهم مخليين نزهة محيدة القفطان وكتحيد الماكياج حتى تحل لباب كان ميمون

نزهة:كبيدة

ميمون:(باسها فحنكها)لالاهم

نزهة:عيييت ههههه

ميمون:كثرتي علي فهاد عيييت ههههههه ياكما مريضة نمشيو لطبيب؟؟

نزهة:لا ..غي العيا تالعرس كيرجع معايا وصافي

ميمون:(باس كتفها)نشطتي ليا شويا؟؟دارو ليكم اللعابات؟

نزهة:(ضحكات)نحلف عليك نتا لي جايبهم

ميمون:خهخخههههخه لا والله حتى جمال ولكن كنعرفهم

نزهة:(شافت فيه بصدمة)حاضر ليهم؟؟

ميمون:(تكسل فوق الناموسية)اه ههههههههههه جري داك الصباط

نزهة:(لمطات فمها وبدات كتحيد ليه فالصباط)مكايناش شي شيخة مكتعرفهاش

ميمون:(كيشوف فيها)كلهم عرفتهم زݣلت وحدة

نزهة:(دارت يديها فخصرها)شكون هادي؟

مبمون:نتي الالاهم(مد ليها يديه)

نزهة:(فرنسات وشدات يديه تمات طالعا فوقو وريحات على حجرو مفرقة رجليها وصدرها كولو مكبوب قدامو)خليتيني أنا لخراا باش تختم بيا

ميمون:(كيداعب خدودها)أحسن مادرت

نزهة:فرحان حيت تزوجتي بيا

ميمون:علاه غي فرحان(باسها ففمها )

نزهة:ههههههه سعداتك(كتبوس فيه ففمو بحب)مممم بنين أولد المصري

ميمون:(عينيه معسلين ببوستها)شي مصيصة الله يرضي عليك..

فمنزل حفصة كان فالقلعة نيت ..بيت بسيط مبني غي السفلي و ممصلوحش حدو مركبين الشراجم والباب ..ضاربين غي المرطوب..كانت حفصة جالسة وعينيها حمرين حنكها زراق شويا شادة خدها كتفرج وساهية..العين فتلفازة والتفكير بعيد..حداها مها مرا كبيرة بلدية وختها هازا كتوبها كتحفظ

الأم:نوضي عتقي كولي

حفصة:ماعندو منين يدوز ليا أمي

سكينة:(الاخت)نوضي كولي أنا منك نمشي ندعيه نوقفو عند القاضي

حفصة:(تنهدات)غي كتهضري أسكينة..

سكينة:(سدات كتابها وقادات نظارتها تالشوف)لا أختي مكنهضرش..بغيتي من دابا نوضي ندعيوه نديرو شهادة طبية دفعيها وديه فين يتربى

الام:(نهضات فيها)سكتي لا نصيفت ليك هاد البراد..الناس تدخل بخيط بيض ونتي تكحليها..تمشي تدعي راجلها؟

سكينة:(مخزرة)هذاك الرويجل لي كتقولي عليه راجلها هو لي سالخها فنص الليل وجرا عليها كي الكلبة

الام:(ببرود)الغيار كيوقع وحتى زين مخطاتو لولة

سكينة:أختي داك الحمار فيه غي لولات(دارت صباعها كتحسب)حمار وكلب ومكيعرفش يتعامل وكيضربها ويخونها مزااال أش باقي بغيتي؟؟

الام:(مخرجة عينيها)تي سكتي شهاد الهضرة؟؟

سكينة:كلام الحق مابقا بغاه حد..واحد كيخونها كل مرة ناعس مع وحدة تفرحي ليه؟؟شي نهار يجيب ليك شي مرض ولا شي موصيبة كحلة يلصقها فيك

حفصة:(بحسرة)ندمت على النهار لي قبلت بيه

الام:الغيار كيوقع كلشي كيضارب..علاه هادو لي شفتوهم مطولين حسابكم مطوليين على والو..كلشي بالصبر أبنتي كيݣوليك واحد المثل الى شفتي جوج مفاهمين عرف الدرك على واحد

سكينة:(بسخرية)ياك المرضية؟؟نوض أنا بنت غزاااالة(كتجبدها)وسميتي حفصة نقبل بولد الزاهية(كتحسب ليها بصباعها)ماعندو تا دار صحيحة عايش فخير خوه..ولد مو..مكيعرفش يهضر مكيعرفش يتصرف كيعرف غي يغوت ويديرك خدامة عليه ونعرفو كيخوني مع الخانزات ونحصلو ومينكرش كيعتارف ونكمل معاه؟؟راه الحيط تعاودي ليه هادشي يݣوليك كتخربقي

الام:(ميقات فيها)هاد الكنانش لي خرجو عليك حتى وليتي تݣولي هضرة كبر منك...دخلي سووق راسك(كتهددها بصباعها)خرجي سووق ختك وخليها ترجع لمحالها

حفصة:(عينيها دمعو)فين غنرجع أمي؟؟ديما العصا والغدر والمعاملة مكايناش فين غنرجع..راني كنموت أمي تما..بحالا خدامتهم وعايشة معاهم

الام:(هزات يديها )واشنو أبنتي تجيني مطلقة؟؟وبولادك؟؟كي ندير ليكم..مانتي قارية كي البنات تخدمي ماعندك صنعة..باك عياا..شكون يصرف عليكم؟؟

حفصة:(بحسرة)ندمت حيت سمحت فقرايتي(طاحو دموعها)كون ترجع بيا الوقت منخرجش ومنتزوجش

سكينة:حتى دابا كاين الحل..طلقي وشدي ولادك وخرجي خدمي عليهم..عطا الله فاش العيالات راه كيديرو غي الميناج وعايشيين بعزهم نتي بقاي تابعة ليا ولد الزاهية لي نهار يخطاه ميمون يولي مݣرد

الام:متسمعيش ليها أبنيتي..الزواج هاكا داير ..مالي أنا غي جيت وكبرتكم حتى أنا صبرت وكليت العصا من العݣوزة ومن باكم وصبرت باش نكبركم ونخلي الشمل مجموع

سكينة:(بسخرية)هاد الهضرة ديالك هي لي خلات نص العيالات عايشين فالذل والقهرة..حياتك مشات باطلة..حياتك أمي بحال حياة هاد البنات لي تزوجو صغار حسابهم الزواج فيه غي الحلويات والارنبات معارفينش بلي سبعيام تالباكور دغيا كدوز..والراجل الى مشافكش مرا وݣادة وهازا راسها مغيحتارمكش..نتوما صبرتو علاش؟؟حيت ديك الساعة الوقت مبلدة مكاين فين تقراي ولا تخدمي..وهي دابا لي لوقت زيانت والمدونة عطات المرا حقوقها تزيد تصبر..على زين معاملتو(بسخرية كتعيب مها)لا نصبر باش ولادي يعيشو مع باهم..منضيعش ولادي..صابرين على الولاد..نعيييش أنا بعدا ونشوف حياتي عاد نشوف ولادي..ولادي عايشين بيه ولا بلا بيه..يكبرو ولادي كيشوفو باهم كيضربني ويعاملني خايب كي غيطلعو؟؟ (شافت فحفصة)جوج حوايج أختي الى مدرتيهمش لراسك مكاينش لي يديرهم ليك القيمة والشوهة..الحياة أختي كنعيشوها مرة وحدة ..عندك عمر واحد تعيشي بلاصة ماتعيشيه، كتفضلي تبقاي مع واحد معاطيكش قيمة مكيحتارمكش وممعتابركش كاينة كاع..نسولك؟؟فين عمر هاد السيد هز تيليفون سول عليك؟؟ياك كتجي هنا عمرو هز تيليفونو وݣال نسول أش خصها..كيلوح ليك مية درهم ويزيد..

سكينة: ياك كتجي هنا عمرو هز تيليفونو وݣال نسول أش خصها..كيلوح ليك مية درهم ويزيد..

حفصة:(بحسرة)عندك الصح

الام:شوفي أديك السلݣوطة ديك الهضرة خليها عندك..نتي راه ترجعي ليا من نهار لول ...خلي عليك ختك

سكينة:(بملل) أنا أصلا عارفا هضرتي غدخلها من وذن وغتخرجها من وذن (ناضت هازا كتوبها) نوض نقرا لي غينفعني وغيهزني واحد النهار أما الرجال بحال براهيم راه ولات الحمارة كتعيف تولدهم

ناضت خلاتهم غي كيشوفو..من ديما هضرتها كبر من عقلها ومنطقية..خلات حفصة تسرح فالتفكير حتى قاطعاتها هضرة مها:لاتسمعيش ليها..معندك فين ترجعي أبنيتي..نتي ثقاليتي صبري عليه دابا يتهد ويتبدل..عيشتك تما مزيانة واكلة شاربة لابسة الزاهية ممخلياكش مخصوصة من والو

حفصة:(قلبها مزير عليها)وأنا أمي فين فهادشي؟؟معايشاش حياتي مكنخرجش كي الناس مكنفوج كي الناس..مقابلة غي الدار والدراري والزاهية

الام:(يهدوء)واهادي هي سنة الحياة أبنيتي أش ندير ليك؟؟كولي كولي دابا تجي الزاهية ترجعك ويجي يطلب ويزاوݣ

*****

بعد علاقة حميمة جريئة كيف ديما كيحاولو ما أمكن ميديروش الأصوات على حساب الدار..تكاو مخشيين فبعضهم كيتعاودو..حديث الوسادة

نزهة:أش غيدير خوك؟؟

ميمون:منعرف..أنا هضرت معاه يضبر راسو

نزهة:حرااام عليه يضربها

ميمون:مرجلاش هاديك(كيداعب ظهرها العاري)بقات فيا

نزهة:حتى أنا وحفصة دروييشة مديالش ديك تكرفيصة

ميمون:الله يهديه..من ديما هو الواعر فينا..صعيب بزاااف معرفناه شكون شابه

نزهة:ياكما باه؟؟

ميمون:باه كان عادي ولكن مصعيبش..ملي عاشت معاه مي عرفيه ماصعيبش

نزهة:خصو يمشي يطلب منها السماحة أميمون(شافت فيه)واش بصح كيخونها؟؟

ميمون:(بتردد مباغيش يفضحو)واݣالو

نزهة:(كمشات عينيها)غي ݣول الصراحة..واش كيفسد عليها؟

ميمون:وارااه باااينة...براهيم منهارو زهواني بزااااف..وهي راه عارفا وديما حاصلاه

نزهة:أنا بلاصتها منضربش معاه الضربة

ميمون:(شاف فيها)بصح؟؟

نزهة:هي معول عليها؟؟

ميمون:ههههههههههه حااشاا واش نديرها(باس راسها)متستاهليهاش مني

نزهة:حتى وحدة متستاهلها أحبيبي..الخيانة صعيبة

ميمون:كاين عيالات راه كيديرو علاش أنزهة واش لي متعطيش للراجل حقو على سيمانة هاديك متخونهاش

نزهة:سمح ليا ولكن راه معذورة..الدراري والدار والخدمة راه غتعيا ماشي مرا هاديك راه ماكينة

ميمون:متافق معاك لكانت عيانة الله يكون فالعوان ولكن ديما لا...شتي الراجل يصبر على الجوع وميصبرش على الفراش

نزهة:واخا هاكاك ماشي سبب باش يخون..نتا خوك أشمن نوع؟؟

ميمون:النوع لي غتفرشي ليه الحرير وغيخونك..زلايلي منهارو

نزهة:اوا شفتي..الله يدير ليها شي تاويل تالخير

ميمون :امين

نزهة:(بعد برهة صمت)ميمون تقدر شي نهار تخوني؟؟

ميمون:(ضاحك)فيد الله هههههههه

نزهة:ههههههههه ولد الحرام تديرها..تبان ليك شي شيخة مطرفة تتبعها وتنساني

ميمون:ههههههههههخ ضلمتيني فهادي أنزهة

نزهة:وشننو..باين ليا ولاد الزاهية كاملين زهوانييين

ميمون:زهوااني ولكن علامن بغيت..واحد عندو مرا زوينة وكتعاملو زوين حاطاه فوق راسها وكتهلى فيه وفالفراش عاطياه حقو وكتبين ليه بلي هو كلشي غيخونها؟؟؟الى خنت عرفيني مسحووور ههههههه

نزها:الى خنتي نخون

ميمون:(غوبش)شهاد الهضرة؟؟

نزهة:اوا نتعادلو

ميمون:ضسركم المخزن..(شاف فيها)عمر *بي ميتخطش فشي مرا ولا عيني تعشق شي مرا ولا حتى ننوي ندير..لي تمنيتو راه فيك لقيتو(باسها ففمها)ماشي رعواني باش ننسا اش دوزنا واش كندوزو...يقدر أنا زهواني ونشايطي ولكن ماشي باش نغدرك وندير مݣاليا راسي..حيت غدا ݣدام الله غنتحاسب...نتي كنتي بنت الناس معايا وبغيتيني كثر من مي وبا مجاتش نغدرك وأنا كنت كنقلب على لي يبغيني غي شويا

نزهة:(بفخر)اوا باش تعرف معزتك هههههههه(باستو فحنكو)

ميمون:ألي عندو نزهة وخانها الله يعطيه الموت

نزهة:امين هههههه

مرت أيام قليلة تقدر بأسبوع فيها عائلة نزهة غادرو القلعة وبقات نزهة حتى دوز سبعيام حيت كلشي مشغول بأعمالو..مها راه داها عبد الجليل معاه ولوخرين رجعو فحالهم

طوال هاد المدة عايشة قايدة..الزاهية معاملاها معاملة مزيانة هي وعريساتها متحطش يديها فالما كتجازيها على كرمها معاهم..مقابلة غي ميمون والناس لي كيجيو

نهار السابع كانو مجموعين على طبلة الفطور كلشي إلا حفصة لي باقي غضبانة ولا هو مشا يساومها

الزاهية كتكب أتاي وتفرق على ولادها بحب معمرة عينيها بيهم جات تالبراهيم وهي تعطيه الكاس قالبة وجهها الشيء لي لاحظو وبقا فيه الحال..عندو مو مقطرة

ميمون:(مخاطب نزهة بشوي)فطري

نزهة:مقادراش معدتي ضاراني

ميمون:دوزي غي بشوي تالخبز ..

نزهة :(بنفي )غادي غي ننقب وصافي

سناء:ختي نزهة كولي

نزهة:هاني أختي كناكل

سناء:(ميقات فيها بلا متحس)قفاطنك غزالين..شحال من واحد مخيطة؟

نزهة:(بمزح)بلا عدد

حكيمة:اوا راه عرووسة

سناء:بصحتك أحبيبتي..من حقك عروسة خيطي وفصلي غي تديري وليداتك كلشي يطلع ليك فالراس

نزهة:وا كنترجاو نبقاو هاكا

ميمون:هادي عمرها تبدل..الحوايج عندها هوما لمهميين

فتيحة:أخسري على راسك وميمون يخلص

صالح:مالقات شكون يخلص غا ميمون لي مربي مع الشلوح الدرهم مايزلق

ميمون:(ضحك)عهعععههههههه والله مسقراام

عبد الهادي:كتحطهم فالمشاريع فالحوايج لا

نزهة:(يهدوء)لا ..كيحطهم نيت علي فالحواايج صحاااح نيت ههههخ

الزاهية:أبصحتك أبنيتي

براهيم:(عينيه كيهربو لنزهة)نتونا معامن جات لبسو حنا الرجال ديما مكرفصين هههه

ميمون:أنكذب عليك المرا لي كتݣود الراجل ههههه مالي أنا كنت نلبس حتى جات هاد المخلوقة هههههه دارت فيا خير

براهيم:اوا الله يجيب لينا بحالها

الزاهية:(قندشات)درتي اللازم مع حفصة بقا غي بحالها..نعلة الله وا عليييك

عياو يحبسو الضحكة فلخر طلقوها حيت ملي دار فعلتو وهي كتعطيه فالقرطاس مكرهاه فحياتو وكيصبر ليها ويسكت حيت عندو عزيزة

نادية:خصنا نمشيو أخالتي عندها

الزاهية:هاد العشية غنمشيو وغتمشي نتا ويديك فوق راسك وغتطلب منها المسامحة ولا منتا ولدي مانا مك

لجمات ليه فمو بهاد الهضرة وحنى راسو ماعليه غي يسمع وينفذ..

ميمون:مي أنا اليوم غنمشي

رشيدة:ويلي أخويا باقي الحاال

الزاهية:ݣلس أولدي معانا شويا نشبعو منك وتولفنا مراتك

ميمون:خليت خدمتي أمي خصني نوقف عليها

الزاهية:الى هاكا الله يسهل عليك مسخيناش بيك أوليدي

ميمون:حتا أنا...(كيقلب على سوارتو)معرفت فين درت سوارت طونوبيل؟(كيقلب جيابو)هاهوما..تأ هادو ديال الݣونݣو

براهيم:لاش هازهم معاك؟؟

ميمون:بقاو وصافي

منعم: شنو غدير ليها؟؟

ميمون:(شاف فخوتو وهضر بعفوية)بغاها شوي واحد فيكم؟؟

براهيم:(ضحك)ههههههههههه الله أخويا الله..الݣونݣو واخا نعرف نمشي على رجلي

ميمون:هههههه مالها ماشي برويطة

صالح:وابرويطة ولكن ماشي ألموود هههههه كون شي كليو شي داسيا(ضحك )كونݣووو

ميمون:هههههه كانت هازاني كون مالبنات مانبدلهاش..بالمعقول كنهضر شكون فيكم بغاها؟؟

براهيم:تا مبووكر لا هنهههه أنا بعدا منرضاش نهزها

صالح:زيدني عليه

منعم:حتى أنا عندي برويطتي زينة

عبد الهادي:غا بالصحة ههههههه

نزهة كانت كتسمع وكتقيد وكتحلل فدماغها..طوال مدة مكوثها هنا كتلاحظ بلي خوتو ديما منقصين منو ..ديما كيبغيو منين يدوزو ليه ويحرجوه..فلول كيحسابها كيضحكو ساعا راع وسط الضحك فين كدوز الهضرة الصحيحة..هو معرفاتوش واش فاهم ولا مكلخ

نزهة:(دارت راسها كضحك)عطيها ليا ههههه

ميمون:(تلفت حداه ومدهم ليها برضى)بالصحة. .

شوكاها وشوكا العريسات لوخرين خالاوهم غي حالين فمهم بشوي من فعلو..مظنوهش بتااتا يعطيها لمراتو وحتى هي متوقعاتهاش لاحتها غي بالضحك باش تحيد هضرتهم السامة..فرنسات ليه وقالت:كتهضر بصح؟؟

ميمون:(دار ليها السوارت فيديها)والله حتى بصح هههه هاكي هاهيا

نزهة:ههههههههههه شكرااا ههههههه

الزاهية:(معجبهاش الجيست)وعلاه أبنتي نتي تتعرفي تسوݣي؟

نزهة:عندي البيرمي أخالتي..ياله نضرب بيك شي دويرة

الزاهية:بصحتك

نزهة:هههههه يعطيك الصحة

أما خوتو راه كانو غي كيشوفو وساكتين لجم ليهم فمهم بتصرفهم وعارفين النحل غيتجبد عليهم..العريسات شي تصدم شي مكرهاتش شي جاتو عادي وممسوقش

كملو فطورهم وناضو العريسات للكوزينة كيهضرو على موضوع الساعه "الطونوبيل"

سناء: (بتذمر) شتي العيلات الحادݣات الݣاوطات أش كيديرو؟؟هاهيا مزال مسخناتش بلاصتها عطاها طونوبيل

حكيمة:(تنهدات)شفت أختي شفت..ماحسدناهاش ولكن سعدااااتها...عندها الزهر كيهرس الحجر داير ليها كي الما القليل

نادية:واش لي عاطيها 5 تالمليون فالصداق وداير ليها عرس ديال القايد ميعطيش طونوبيل..راه ميمون هذااك ماشي رجالتنا لي الدرهم ميخرج حتى يعرفوه فين خرج

سناء:(بحسرة)سعداتها أنا مكرهتش غي ندوز البيرمي حتى أنا

نادية:اوا كلها ورزقوو

حكيمة:متكونش محركة ليه؟؟

سناء:تي لا...السيد أصلا سخي ..فلوسو ماديالوووش يعطيها ماكثر(بحسرة)كون غي كان راجلي بحالو

حكيمة:اوا هذا زهرنا ومكتوبنا معندنا مانديرو

نزهة:انشوف البنات ياكما خاصاهم شي حاجة

ناضت للكوزينة خلات الزاهية وولادها غي تفاوتات نطق منعم:طيحتي علينا السوق هههههههه نتا تعطي للمرا الطونوبيل وأنا أش نعطيها ههههه

ميمون:شري ليها موطور ههههه

براهيم:غضسرها أصاحبي لا؟؟

الزاهية:عندو الصح أوليدي..الطونوبيل لاش؟شغدير بيها؟؟

صالح:غتضسرها وتوحل فيها..ربط تلقى ماتسيب..اليوم طونوبيل غدا الدار وبعدو تولي تحكم فيك

ميمون:(ضحك)ههههههه صافي غي حيت عطيتها طونوبيل راه غتولي تحكم فيا...شناهيا بعدا هاد تحكم فيا..حتى حد فينا ماحاكم راه زواج هذا ماشي كورة

الزاهية:(بصوت منخافض)أوليدي ماݣلناش ليك متهلاش فيها..تهلا فيها وديررها فعينيك ولكن ماشي تعطيها طونوبيل دقة وحدة..راه غتولي تبغي ماكثر

ميمون:كنت أصلا معول نشري ليها شي وحدة..غتكرفص ليا فالطاكسيات اللهم ندير ليها ديالها(بعفوية)نزهة بنت الناس تستاهلها

براهيم:كلهم كيديرو بنات الناس فلول غي كيشدوك كيديرو فيك مابغااو

عيد الهادي:ربط أخويا..الضسارة لا

ميمون:تا شمن ضسارا راه مراتي هاديك الى معطيتهاش شكون يعطيها شكون يشري ليها

الزاهية:أش نݣوليك نتا تعرف..غي هو أوليدي جمع شويا جمع يديك..وااه طونوبيل

ميمون:(عارف النقاش معاهم عقيم)تستاهلها..كنت غناخد ليها وحدة وجات الوجيبة وزايدون ياك ݣلت ليكم واش بغيتوها ݣلتو لا...اللهم فيها هي بعدا

منعم:ضبر راااسك

ميمون:أنا غادي نغسل طونوبيلتي ونجي باش نشدو الطريق

ناض جار بلغة فرجليه مخليهم مضورين مهم كيهضرو معاها

منعم:ماهيا قاعدة هادي..عاطيها ليها أمي ݣدام عيالاتنا

براهيم:غيحسو براسهم ناقصين ويبقاو عليكم بالهضرة

عبد الهادي:يضبر لمخو دابا تشطحو ويجي يشكي

الزاهية:(زفرات)خضر ومكيعرفش يتصرف..خصو يجمع يديه شوياا ..(كطلع وتهبط فيها)طونوبيل كاااع. .

بقاو معاهم حتى تغداو و طلعات نزهة جمعات حوايجها كاملين والبيت نقاتو ونضاتو مخلات وراها والو..لبسات حوايجها عبارة عن دجين وشوميز طويلة حد الركبة مع صنيديلة وفولار خفيف هازا بوشيط ديالها ..مع نزلات من الدروج شافتها حكيمة خرجات عينيها ووقالت:تا ويلي هادي مزال كتلوى فالدجين؟؟(ضخكات بمهمس)طلي الزاهية

ميمون:(مهبط الشوانط)أنا جاي

مشات هي بأدب كتسلم عليهم وتودعهم وتشكرهم على حسن الضيافة والكرم وحتا هوما عاطينها صوابها بحالا ماشي هوما لي عاد كيهضرو عليها

الزاهية:(باقي منساتش الطونوبيل كمل ليها اللباس)الله يديكم على خير

نزهة:متغبريش أخالتي بقاي تجي تݣلسي معايا

الزاهية:إن شاء الله تهلاي فراسك وفولدي

نزهة:بلا متوصي أخالتي

سلم عليهم ميمون كذلك وخرجو لطونوبيلتهم شادين الطريق لكازا مخلينهم موراهم كيشوفو فيهم حتى غبرو

*****

نزهة:(حيدات الشال)فففففف صهدني

ميمون:(طلع الزاج)بشوي عليك ههههه

نزهة:والله حتى خنقني هههههه

ميمون:مالكي مضاربة غي مع حوايجك (جرها عندو معنقها)مالها نزهة ديالي؟؟شكون قلقها ليا؟؟

نزهة:غي عيانة وصافي ههههه

ميمون:نوصلو وسيري لشي حمام (ضحك)عارفك كيعجبك الحمام وريحي رااسك وجي تنعسي

نزهة:لا نجيو ننعسو ههههههه

ميمون:(ضرب فيديها)سلݣوطة بحالي هههههههه..

فتمام السبعة تالعشية كان ميمون وقف قدام العمارة ..نزلو بجوج مشادين مخلين الشوانط تما حتال منبعد..طلعو لدارهم لي غتجمعهم مدى العمر..مع حل الباب نطق:الله الواحد مكيرتاح الا فدارو

نزهة:(كتحيد الشال)الواحد مكيرتاح غي مع الزين ديالو هههههه

ميمون:هههههههه علاش كتقلبي

نزهة:ههههههه على والو..طلب لينا العشا نمشي ندوش ونجي

ميمون:واخا الزين

مشا طلب ليهم العشا فحين هي كي دوشات عالله يخفافو عليها عظامها من التعب لي ولى فيها..كتنعس مزيان وكتفيق عيانة ..بلا الراس لي كيحرقها

خرجات لقاتو عاصر على شيشة ومكسل كيشيش منغم مع راسو

نزهة:مبدلتيش؟؟

ميمون:(كيسوط)لا باقي..

نزهة:الشيشة عاود؟؟

ميمون:كثر من سيمانة مشيشت بخاطري..

نزهة:(كتحل الشراجم)هاد الشيشة ممسلكانيش فالدار..غتطلق ليا الريحة فالفراش

ميمون:كتنغمني(ضرب بيديه حداه)أجي حدايا الحميمة ديالي

نزهة:(شدات السداري)والله منجي عاد مدوشة اتلصق فيا الريحة تشيشة

ميمون:هههههه هاهيا فمك

جا العشا وجلسو تعشاااو وتخمدو ينعسوو بعد يوم متعب بالنسبة ليهم

*****

فاليوم الموالي..فاق ميمون بكري حيت هو شابع نعاس لقاها مخشية فيه ..ناض بدا كيلبس عليه وهي تحل عينيها ونطقات بصوت باح:صباح الخير

ميمون:(جا باسها ففمها)صباح النور الالاهم..رتاحيتي(كيدوز يديه بحب على حنوكها)

نزهة:شويا ..نوجد ليك الفطور

ميمون:مكاين والو فالدار..خليك ناعسة ملي تفيقي صوني ليا نصيفت ليك الفطور

نزهة:واخا هههه

رجعات نعسات بالفعل مفاقت تالعشرة ..كي ناضت مشات للحمام بغات تغسل وجهها وقشعات فالمجر اولويز مع بغات تغسل سنانها دارت ليها طن فدماغها ليغيكل لي تعطلات عليها

شللات فمها دغيا وعينيها محيدوش من المراية فحين دماغها كيربط الأمور ببعضها..التعب وتأخر الدورة ...سرعان ما بانت بتسامة على شفتها زينات وجهها الابيض خلاتها تنقز بالفرحة وقالت:حااااملة هههنننهههخههه. .

مشات كتجري هزات تليفونها صونات لسميرة تشاورها..بعد المحادثات البديهية نطقات:سميرة بغيت ندير تيست الحمل أختي

سميرة:(بفرحة)شاكة؟؟حلفي

نزهة:(عضات على شفايفها حشمانة وقلبها كيضرب )ااااه هههه

سميرة:(بسرور)هنية عليك أختي..ياربي تكوني حاملة

نزهة:(عينيها كيبريو)ياربي..شهوتي نولد شي بنية ولا وليد من ميمون

سميرة:سيري شري تيست وديريه غدا صباح

نزهة:واخا هههه نخرج دابا نيت بسلامة متقولي لمي والو حتى نتأكد

سميرة:كوني هانيا

قطعات معاها وناضت كتحسس بطنها بحب..وكتشوف فالمرايا مبسمة كتخايل راسها حاملة وكرشها منفوخة وكل ماطاحت فبالها فكرة كيضرب قلبها بجهد بالفرحة..بزربة وجدات فطور فطرات ومشات لفاغماسي جابت التيست ناشطة ماشطة وفطريقها دازت تقدات تقدية خفيفة باش تقضي للغدا ..فيها جهد لي يدير وليمة

وبالفعل غي وصلات بدلات عليها بكسوة حد الركبة سميطات رقاق..شعرها هزاتو للفوق شدة مهملة نازلين زغيبات من جناب..كتافات بمورد الخدود ناعم و مشات كتوجد فالغذا تحت أنغام الشعبي نااشطة على جهد

داخل لدارو هاز تقدية كيسمع الحيحة فالدار..فرنس عارفها هي لي طالقاها وتم داخل حتى ضرب فالمنظر لي كيرعدو وهو الشعبي..كتشطح غي مع راسها واردح عاجبها راسها فاش تلفتات ولقاتو جراتو بتقديتو كتشطح معاه وتلوز وهو حاضيها غياطلها بعينيه..حيد التقدية وشد فيها وعطاوها للشطيح والرديح حتا بردات جنونها..مع سالات الاغنية مع هزها بين يديه وقال:الله عليييك نتييي

نزهة:(كتركل برجليها)ندوش ندوش ههههههه

ميمون:(غادي بيها للبيت)مكاين بو دوش حتى ديري علاش

*****

مرت ليلتهم بسلام كأي زوجين ياله باديين حياتهم الزوجية كيهضرو ويذاكرو على شنو خص الدار حتى غفاو فحضن بعض بدون ماتقوليه على الحمل مقررة تخليها مفاجئة وتدير ليه ليها جلسية باش تعلن حملها

مشات لطواليط بعدما خرجاتو للخدمة فاطر ناشط ضاحك..دارت تيست كيفما مشروح وبقات واقفة كتسنى عاضة على شفايفها ورجليها كيتحركو بحالا حابسة البولة حتى طلعات شرطة حمرة باينة وشرطة خرا مبايناش مزيان...وهي تلوح التيست بالفرحة كتنقز وكتغوت بالفرحة حتى عينيها دمعو:حاملة حاملة حاملة هههههننهه حمدتك ياربي وشكرتك حمدتك يااربي(طاحو قطرات صغار من عينيها)الحمد لله

خرجات كتزرب للبيت وقلبها كيضرب...أجمل خبر ممكن تلقاه المرا هو أنها غتكون أم..ومن الراجل لي كتبغيه..

بسرعة دوزات الخط لسميرة بشراتها وفرحووو ليها هي ومها ويدعيو معاها يثبثو عارفين لهفتها على الولاد

نزهة:غنمشي لطبيبة دابا نشوف أش كاين هههه

سميرة:خلي حتى تمشي مع راجلك

نزهة:مغنعلمووش غنمشي راسي باش نديرها ليه مفاجئة هنههه غيفرح بزاااف

حفيضة:الله يثبث حملك أبنيتي..أنا غدا نشد الطريق نجي الى مشهية شي حاجة نوجدها ليك

نزهة:الله يحفظك ليا أمي..ممشهيا والو دابا..بسلامة غنلبس نمشي لطبيبة نشوف شحال عندي

سميرة:الله يسهل عليك أختي

قطعات معاهم وناضت كتلبس عليها فرحانة ..دارت لراسها ماكياج بارز وهزات صاكها وسورات الكونكو مع تيست لي مرداتش ليه البال...مشات قصدات الطبيبة لي كتبع معاها سميرة فاش كتكون حاملة..

دخلات كترعد وعينيها متبعين النسا الحاملين أما دماغها راه كيتخيل كرشها منفوخة ومعاها ميمون

سمعات سميتها وناضت داخلة مزيرة على صاكها مبسمة..لقات السلام وجلسات الطبيبة كتسولها:شنو عندك أمدام؟

نزهة:(بابتسامة عريضة)أنا حاملة ههههه عاد درت التيست وطلع ليا فيه جوج شرطات وجيت نعرف شحال عندي ونتبع معاك حتى نولد إن شاء الله

الطبيبة:تفضلي معايا

ناضت معاها عرات على كرشها..ودارت الطبيبة خدمتها تحت نظرات نزهة المتحرقة باش تبشرها كثر

الطبيبة:(مسحات ليها كرشها)تفضلي معايا

جلسات فكرسي فاص لطبيبة وقالت:ممكن نشوف التيست لي درتي أمدام؟

مداتو ليها باقي مفرنسة وغي شافتو نطقات:مكاينش حمل أمدام..فوالا تيست فيه شرطة وحدة...وهادشي كيعني بلي الحمل مكاينش..

تلغات تبسيمة نزهة فورا..وتلغات فرحتها ونطقات بملامح استفسار:ولكن أنا شفت جوج شرطات هاد الصباح

الطبيبة:ممكن تكون طلعات ولكن لي موراها هو الأهم..المشكل ديال هاد لي تيست مكيكونوش ايفيكاس 100%...شحال من وحدة كتكون دارتو وكيوقع ليها بحالك

نزهة:(زيرات على الصاك وعينيها تضببو بالدموع)وليغيكل لي تعطلات ليا

الطبيبة:لي خصنا نعرفو أمدام بلي ليغيكل ماشي مݣانة كيف كيحساب كاع الناس..فالعادي خصها تكمل دورة كاملة لي الاغلبية عندهم 28 يوم لكن بعض الناس الدورة ديالهم فيها 20 يوم ولا 15 ليوم ..يعني هي غي كيكون الرحم مستاعد كيخرجها ماشي محصور بالوقت(كتكتب)غنكتب ليك هنا دي ميديكامون يقادو ليك ليغيكل ديالك ورجعي عندي من هنا 15 جوغ باش نكونتروليك

نزهة:(بحسرة)مأكدة مكاينش حمل؟؟وعلاش تعطل؟؟أنا كثر من شهرين باش مزوجة ومكندير حتى حاجة تمنع الحمل علاش محملتش؟؟

الطبيبة؛(مبسمة)ماشي حيت مكديري حتى وسيلة راه خصك تحملي..كل مرا والجسم ديالها

نزهة:(طاحت دمعة رقيقة من عينيها)واش حيت كبيرة مغنقدرش نحمل دغيا؟؟

الطبيبة؛بتاتا..الأمر ماعندوش علاقة بالسن..دازو علي حالات ديال 45 سنة وحملو عادي..ونتي ماشاء الله باقي صغيرة..لبخوشين فوا غندير ليك فحص للرحم ديالك نحيدو الشك..

نزهة:(شدات الورقة)شكرااا

لقات كلمة شكرا بحسرة وفرحتها تلغات..من بين أصعب اللحظات فحياة المرأة هي انتظار مولود..نساء عبر العالم تحرمو من الامومة كاين لي عندها العقم وميأساتش وكاين لي مديور ليها علاش باش متولدش وكتبقى الرحلة مستمرة باش تسمع "نتي حاملة"

خلصات بلا عقل وخرجات مضببة عينيها بالدموع..كانت حاملة فبالها أفكار كثيرة كيفاش تخبر ميمون وكيفاش عدوز حملها معاه..تهرس خاطرها بجهد

محسات براسها غي وهي طالقا دموعها بغزارة فالطونوبيل وحاطة راسها على لڤولون كتبكي بصمت مصدومة ومأثرة بالخبر

منهار تخطات عتبة ثلاثين وهي كتخاف من جملة وحدة"غتغسلي بكري"بحكم أنها صامت بكري..وهي اشاعة كيروجوها العيالات بينهم معارفينش بلي كل مرا والجسم ديالها كاينين نساء فاتو عتبات الخمسين وباقي لغيكل كتجيهم منتاظمة

كتحس بحجرة فوق قلبها ثقيلة وخاطرها مزير عليها فرمشة عين تلغات فرحتها لي كانت متخيلاها غتكون فرحة ميمون..هزات تيلي دوزات نمرتو مرارا وتكرار لكن مكيردش وهي تدور الطونوبيل وقصدات المحل لي تلاقاتو فيه أول مرة

سايقة وتبكي بصمت مكرهاتش تنفاجر وتغوت لكن الجهد معندهاش..كل مرة تحط يديها على كرشها وتزيد فحدة البكاء..

نزلات من سيارتها ودخلات للمحل كتسمع غي صوت المعلمية ..مسحات دموعها واخا بقا أثر البكاء فوجهها وقالت:السلام ميمون مكاينش؟

...:هاهو ختي لدااخل

نزهة:عفاك عيط ليا ليه

دخل الدري ناداه ثاليه شي مرا بغات تشوفو حيت مكيعرفوهاش..وتم خارج حتى كتبان ليه هي..ستغرب وقال:نزهة؟(قرب جيهتها)أش جابك لهنا(قشعها باكية)مالكي؟؟

مشعراتش حتى تخشات فيه كتبكي بغزارة وتشهق..ستغرب و خلعاتو تم جارها تحت أنظار لي خدامين عندو للداخل فين كان كيحقق فالسلعة..

ميمون:(معنقها )مالكي كتبكي؟؟نزهة كتخلعيني عليك؟؟(بعدها عليه لقى فمها كيترعد بالبكا والشال نصو زلق)نزهة مالكي أحبيبة؟؟

نزهة:هءهءهءهءه غنمووت بالفقصة أميمون هءهءهءهءهء معنديش الزهر

ميمون:(جلسها فكرسي وتحنى قفازي كيتساءل)أش فقصك؟؟شكون ݣاليك شي حاجة؟

نزهة:هءهءهءهء (زادت فالبكا)معنديش الزهر هءهءهء

ميمون:(تعصب)هضري شكون ݣاليك شي حاجة؟؟

نزهة:(شافت فيه بألم)اليوم درت تيست ديال الحمل وطلع ليا حاملة...ومشيت لطبيبة فرحانة وقالت ليا محاملااش

ميموت:(زفر)نزهة واش هادشي لي مبكيك؟؟(حضنها مزير عليها)يقدر تكوني غي غلطتي وصافي

نزهة:(زيرات عليه)بقا فيا الحال أميمون ..علاش حتى أنا منفرحش ونكون حاملة. .

ميمون:راه الولاد بيد الله ...وعاد راه ياله تزوجنا..شحال من مرة قستك أنا ݣاع باش تحملي دغيا

نزهة:(بعيون باكية)بغيت ولد ولا بنت منك

ميمون:(كيمسح دموعها)غتولدي إن شاء الله وتعاودي..علاش تفقصي راسك؟؟(باسها فراسها)وقتما جاو ينفعو

نزهة:نتا معارفش باش كنحس..راني غادية ف 35 خفت تمشي علي لحيض ومنودلش

ميمون:تي مريضة لا!!!راه ݣد مي وولدو..داكشي ديال الله أنزهة..ربي كبير وعاد ياله تزوجنا باقي الحال على تݣولي والى مولدتش

نزهة:(مزيرة عليه كتبكي)بقا فيا الحال كنت جايا نفرحك ونݣوليك حاملة ساعا لي ماعندو زهر ماعندوش

ميمون:(زير عليها كيبوس فراسها)حيدي هاد الهضرة ديال معندي زهر من فمك..راه بحالا كتݣولي ربي ماباغيش ليا الخير..الالة أنا فرحان بلا متفرحيني..الدراري وقتما جاو مرحبا بيهم

بقات فحضنو كتبكي وتعاود تشهق..كل ماكيقول سكتها كتعاود تدمع وتبقا تشكي وتبكي عليه حتى بردات عاد وقفها قايل:طيبتي عينيك(باس عويناتها)متبكيش ليا ألالة البنات

نزهة:(بحسرة)خفت منوليش ماما

ضحك على الطريقة باش قالتها وجرها كيبوس ففمها بشوي ويهضر:دلمك نتي هاكا راه منقدرش نشركك مع شي حد ههههه واش أنا بحرا لقيت الحلاوة والحب ونوض نولد يشركوني فيك

نزهة:(ضحكات وسط دموعها)غتبقا تبغيني ؟؟

ميمون:لا أختي مغنبغيكش ههنهه(درعها بيدو )زيدي تغداي الزين وخوي راسك من هادشي..لي بغاها ربي هي لي غتكون

نزهة:ونعم بالله(تنهدات)

ميمون:(كيقاد ليها شالها)ياله دوزي نتغداو نديك ضربي العدس ههههه

نزهة:(كضحك)والله لمشيت ههههه دوز ناكلو الحوت

ميمون:نتي غي امري

جرها مذرعها وخرج معاها بعدما فشات خاطرها شويا وبكات عليه..فبعض الاحيان كل ما كنحتاجوه هو يسمع لينا الطرف الاخر ويعطينا وقت واهتمام

الى غي بكيتي كتبغي لي يعطيك حيز ومساحة فحياتو باش تبكي وتشكي عليه ويسمع ليك ويعطيك تعنيقة كبيرة كتخفف عليك هم الدنيا كلها..ونزها لقات هادشي فميمون لي مكيبخلش عليها بالحنان وكذب من قال "فاقد الشيء لا يعطيه"

يتبع...

‎