خيط الريح الجزء 15

مشا لجهة الإتصالات لقا النمرة مصونيا مرة وحدة فقط وجديدة ممسجلاش بتاتا..بقا للحظات كيشوف فاص ليه وكيرتب أفكارو..يديه كيترعدو مكرهش يهبط يسلخ نزهة لكن مباغيش يتسرع..بدون سابق إنذار حرك الروايض وداز والتيلي فيديه كلما طفا كيعاود يشعلو يقرا الميساج ..موقف حتال قدام مول التيليفونات ..نزل بوجه محقون قايل:فين عبدو؟

...:لداخل

جمال:(كيزفر)عيط ليه ݣوليه ولد الحاج عبد الرحمان

دخل الدري وبعد لحظات خرج رفقة شاب فالثلاثينات داير نظارات تالشوف..تبسم ليه وسلم عليه قايل:كلشي مزيان؟؟

جمال:بغيتك فبلان(شاف حواليه)ماشي هنا..زيد معايا لطونوبيل

تبعو لاخر بهدوء وطلعو وهو ينطق جمال ماد ليه التيلي:بغيت نعرف شنو طاري فهاد التيليفون

شدو الدري ونطق وهو كيتفحصو:مفهمتش

حمال:بغيت نتجسس عليه بهاد المفهوم..أي مكالمة وأي ميساج فأي بلاصة فيه توصلني بالحرف

عبدو:(ضحك)باغيني نمشي للحبس

جمال:عليك الامان..مكاينش فالحناش لي يوصلك

عبدو:واخا (بتفكير)1500 درهم

جمال:(بدون تردد)جاتك..مبغيت حتا واحد يعرف أشنو غدير فيه..وغتصايبو قدامي ومبغيتكش تدخل للدوسي بيرصونيل..بغيت غي شي سيستيم نتجسس بيه ومول التيليفون ميعيقش

عبدو:صافي حسبوو عندي..زيد دخل معايا دابا نيت

نزل ومشا معاه للداخل تالمحل ديالو عاطيه تيلي وحاط قدامو بيسي مكونسونطري مع الشاشات كيقاد فشنو غيتقاد ..فحين جمال كيهزز رجليه بعصبية مبغاتش تسرط ليه الهضرة

صونا تيليفون نزهة بنمرة خالتي الزاهية..هزو جاوب قايل:ختي راه نسيتيه هنا فطونوبيلتي غي نسالي شي شغال ندوزو ليك راني غارق فالشغالات

نزهة:واخا معليش أخويا

قطع معاها وزفر وقال:طلق راسك أصاحبي

عبدو:كون هاني قربت

الشك دخل لجمال..ميقدرش يفجرها فوجهها وميقدرش يسكت..أصعب حاجة هو يحصل الخيانة على مرات خوه..عارفينهم الناس ماشي خوت فالدم لكن فالوراق وفالمواقف..وجمال بكثرة مادوز هو وميمون مغيبغيش الما يدوز من تحت رجليه

نضا ليه الشغل ووراه كيفاش ..مد ليه فلوسو وناض خارج وخاطرو ممهنييش..كل شويا يحل تيلي نزهة يقرا الميساج وكيتعصر عليه قلبو كل مكيفكر أنه ممكن يكون خوه دايز الما من تحت رجليه

*****

فمطار القاهرة الدولي..حطات طيارة ميمون لي عايش أجواء غريبة عليه تماما..كيسمع غي المصرية مع الانجليزية لبعض الأجانب..خرج بحالو بحال الناس كيضور فراسو زوابع ارشادات العاملين فالمطار ولي طلبوها منو فالوراق كيعطيها...واحد اللحظة بقا السيد لي كيتحقق من الوراق كيشوف فيه حتى ظن بلي كاين مشكل فهويتو وشك أنه يشدووه حيت أول خطوة قانونية فمصر هي هادي..تبسم ليه وقال:أهلا وسهلا بحضرتك

شد وراقو وتحرك ومن بعيد سمع سميتو بصوت نسائي..ميزو أكيد ديال نجلاء لي مشات كتجري تلاحت عليه معنقاه وتبعاتها هدى..سلمو عليه بالعناق الحار فرحانيين بيه

هدى:مصر نورت بيك يا خويا..أهلا وسهلا

نجلاء:ده الدنيا حتولع يا بتاع المغرب انتا ههههههه (عنقاتو)

ميمون:ههههه شكرااا

هدى:سفرتك تمام؟؟

ميمون:وا بشويا ههههه

نجلاء:ياعم تعال معانا ...الكل مستنيييك

مشا معاهم مبسم فرحان بيهم لقى سيارة مرسيديس كتسناهم بالشيفور لي غي شافو مشا سلم عليه وقال محييه بود:يا أهلا وسهلا يا سعادة الباشا(مبسم بتأثر)شبه الباشا الكبير الله يرحمو

ميمون:(تبسم ليه )شكراا

حل ليه الباب وطلعو بثلاثة لور والفاليز تكلف بيهم هو وقال:توحشتكم..

وقفات السيارة الفخمة قدام أحد أكبر الفيلات المصرية..فيلا الحاج حسن..رجل الأعمال الراحل ولي عندو مكانة كبيرة فالبلاد..جات فالخرجة ديال القاهرة راقية وشادة مساحة كبيرة..تحل بابها الكبير ودخلات السيارة وبانو ناس كثار كيتسناو ماكانو الا عائلتو..كاين لي شايفو وكاينن لي أول مرة يشوف الوريث ديال حسن

ميمون:شكون هادو؟؟

هدى:دول عيلتك يا حبيبي كلهم فرحانين بيك وعايزين يتعرفو عليك

ميمون:مرحبا

بغا ينزل لكن الشيفور سبقو حل ليه الباب ..عطاه تبسيمة شكر وبداو عماتو كيبوسو فيه ويسلموا ويعنقو وحتى هو مع لقاوه ناقصو حنان كلشي عنقو وسلم عليه ..هذا ولد عمتك وهادي مراتو وهادي عمة خالة باك وماغيرها...الجذور الصغيرة فعائلة حسن جاو يشوفوه..كلشي أنيق وكلشي كيبان كلاص ..هو حشم من الكم الهائل لي كيتسناه وعطا لكل واحد حقو

دوزو ما يقارب ربع ساعة وهو غي كيتعرف فاخر المطاف ستقرات سلمى بنت ختو فيديه هازها كيبوس فيها وهي ففمها غي خالي ياخالي

دخلو للفيلا المصممة بالطريقة المصرية..مصر ماشي دولة يستهان بها فالاثاث عندهم تاريخ وتراث وتقاليد عريقة..كيكون ديكورهم معروف حيت غالب عليه الطابع الفرعوني

سارة:نورت بيتك يا حبيبي

ميمون:ههه شكراا

زهرة:ألف الحمد لله على رجوعك لينا...كان نفسي بابا الله يرحمو يشوف اليوم ده

ميمون:الله يرحموو

نجلاء:زمانك جعان..السفرة جاهزة؟؟

العمة:كلو جاهز..بنستناك بس انتا..تفضلو

دخلو كاملين لسفرة طويلة وعريضة فيها أشهى المأكولات المصرية ..جراتو نجلاء وقالت:مكانك هنا..ده مكان بابا الله يرحمو محدش قعد فيه ولا حيقعد فيه غيرك

ميمون:(فهمها وتبسم بحب)شكرااا

جلس فراس الطبلة وكلهم جلسو ضايرين بيه مبسمين ليه بفرحة الا أدهم لي من لول معاجبوش هادشي

أدهم:رحلتك كانت تمام؟؟

ميمون:الحمد لله

هدى:بقيت تتكلم مصري جامد اهو

ميمون:هههه الأفلام

العمة2:ماشاء الله..شبه أبوك الله يرحمو مش كده يا سميحة؟؟

سميحة:(البنت)اه ياماما شبه خالو تماما

سارة:(لرئيس الخدم)قدم الأكل يا سيد

بدا رئيس الخدم كيقدم ليهم الماكلة وهوما كيعرفوه على ماكلتهم ومكاين غي كول أميمون هاك أميمون ..خود من ده وده ويضحكو طالقينها وهو محور الجلسة..

هاد الإحساس بالظبط هو لي مفتاقدو ميمون..يحس براسو عندو قيمة وسط عائلة كان كيتمنى كون حضى بهاد الاهتمام قبل كانت حياتو تكون حسن..

تغدااو وناضو للجليسة يشربو قهيوة بعد الغدا كيديو ويجيبو معاه فلهضرة ويبسطو هضرتهم حتى حسو بيه عيا وهي تنطق نجلاء:ميمون قوم ياحبيبي ترتاح ..أكيد السفر تاعبك

ميمون:عيييت باغي غي ننعس

هدى:تفضل معايا هوريك اوظتك

ناض معاها معتاذر وقال:سمحو ليا

ادهم:إذنك معاك

مشا معاها كيتضربو كتافو ..ذرع هدى بيديه وقال:اوا الزين

هدى:(عنقاتو حتى هي)وحدة وحدة علي ههه مش فاهمة

ميمون:هههه خصني نعيط لمراتي

هدى:اتصل بيها (فتحات باب غرفة كبيرة)دي اوظة بابا ارتاح فيها..كان ممكن أجهز لك اوضة ثانية بس حبيت اديك اوضة بابا..

ميمون:(مرتاح)شكرا الزين هههه

هدى:لو احتجت حاجة كلمني

ميمون:تمام

ضحكات وخرجات خلاتو يرتاح..لقى شوانطو تما..أول مدار هز تيلي دوز نمرة نزهة مرارا وتكرارا لكن مكتجاوبش..حيت اكتيفات ليه الخط الدولي..دوز خط الزاهية وبعد رنات قليلة جا ردها:الو

ميمون:مي

الزاهية:هذا نتا.. كي وصلتي أوليدي؟؟

ميمون:الحمد لله أمي نتوما مزيان؟

الزاهية:مخصنا غي نتا..كي دايرين خواتاتك؟؟

ميمون:الحمدلله لله أمي..علاش نزهة مكتجاوبش؟؟

الزاهية:نساتو فطوموبيلة جمال اوا وماسالاش باش يجيبو ليها

ميمون:واخا...دوزيها ليا

الزاهية:واخا..

عطاتها التيلي وهي تنطق:ميمون

ميمون:مو ترمة

نزهة:(ضحكات)الله يمسخك ههههههه كي وصلتي؟؟

ميمون:بخييير ..نتي مزيان؟

نزهة:الحمد لله..كي راهم البنات وعماتك؟؟

ميمون:الجو هنا زوييين ..مصر زوينة صراحة وحتى عائلتي زوينين..الناس هنا فشكل أنزهة كيعاملوني زوين

نزهة:(لمسات الراحة فصوتو)وراك ولدهم أحبيبي(نسات راسها بلي حداهم)غيكبرو بيك

ميمون:صراحة مكبرين وكيتعاملو زوين..عرفت بنات عماتي وولادهم..(بعفوية)أنا خال هنا

نزهة:هههههه جوج ياك..يا سيدي راك أحلى خال

ميمون:كون غي جيتي غيعجبك الجو هنا

نزهة:مرة خرا أحبيبي..كليتي؟

ميمون:اه..ماكلة مصرية بنينة

نزهة:(بمزح)مشيتي الغدار ونسيتي ماكلتي دغيا هههه

ميمون:لي ذاقك نتي وطيابك أنزهة يصوم موراك ههههه

نزهة:الرضى هههه

الزاهية:أريه ليا

نزهة:ميمون هاك خالتي...تهلا فراسك غي يجيب ليا جمال تيليفوني نصوني ليك

ميمون:واخا الزين

الزاهية:(شدات التيلي)أوليدي..واش كليتي عندهم؟؟

ميمون:ونبقا بالجوع أمي؟هههه

الزاهية:رد البال أوليدي..ورجع دغيا

ميمون:واخا أمي..سلمي على فتيحة

الزاهية:يسلم عليك الخير الكثير أوليدي..بسلامة

قطعات معاه وهي تقول:ناشط مع لكلاب

نزهة:ههههه الله يهديك أخالتي

الزاهية:(دارت يد على يد فوق كرشها كي حجيب)أبغيت غا نسولك أبنيتي..واش تي ولدي معندكمش علاش تحشموو؟؟

نزهة:(مسخها الضحك)ههههههععععع علاش أخالتي؟

الزاهية:(بدات كضحك)وا ملي تزوجتو ونتوما كي الحميمات هههههههه غا هو يديه وفمو غا سابقو للبوسان ونتي فمك كيطلق غي حبيبي (جبدات حنكها)أويلي حااااي كتحشموونا

نزهة:(كطنز عليها)ععههههه اححححح أخالتي وتعرفي أش ولدتي ليا؟؟كي العسل ياخالتي كيطيح على قلبي ههههههه

الزاهية:(كضحك)هههههههههههههه الله يمسخك هههههه غا هو خضر ونتي كثر منو

نزهة:ههنتنههههه حنين أخالتي داك ولدك الله يعطيه صحيحتو

الزاهية:(بافتخار)شاابهني أبنيتي حسابك شابه شي حد من تريكة باه

نزهة:(كتنفخ فيها)صراحة كيݣولها موراك كيݣوليا حنين بحال مي(قرب يمسخها الضحك)

الزاهية:(ثيقات راسها)ههههههه اوا الحمد لله

فالمساء رجع جمال وعطاها تيليفونها بعدما مسح الميساج وحالو مغير على غير العادة..مهضرش بزاف حدو مدو ليها ومشا مجلسش معاهم..مدات مجابت غي شدات تيلي مشات كتهضر مع ميمون

******

اليوم الموالي..كانت نزهة قدام المراية كتقاد فشالها لابسة سورفيت فالبوردو وسبرديلة..

دخلات عليهم الزاهية وقالت:فين غادية أبنيتي؟؟

نزهة:غي لصال أخالتي

الزاهبة:(بعدم فهم)فين ؟

نزهة:غنمشي لفين كندير شويا تالرياضة

الزاهية:(حطات صباعها على فمها)فين؟؟تمشي تريضي؟

نزهة:ااه(كتقاد فصاكها)

الزاهية:وتي مجوجة شتمشي ديري تما..

نزهة:كنبدل الجو أخالتي

الزاهية:(بجرأة)ماهيا خصلة أبنيتي..نتي مرا مزوجة مديالش دوك البلايص المخلطيين..وزايدون(طلعاتها ونزلاتها)هاد اللباس ديالك ماهوااش..غتخرجي هاكا؟؟

نزهة:(قطبات حجبانها باستغراب)كيفاش؟

الزاهية:(بهدوء)وابنيتي نتي مزوحة وراجلك مسافر خلاك أمانة عندي وتنوضي نتي تخرجي هاكا شوفي هادشي لي لابسة مامستور فيه والو ونتي تبارك الله عامرة ووافية ..عيب تخرجي هاكا

نزهة:(معجبهاش الحال وبردات الطرح)أخالتي لباسي مستور وهاكا باغيني ولدك

الزاهية:ولدي عارفك كتخرجي هاكا؟؟(بتأكيد)محالش..أنا كنعرف ولدي مايبغيش مراتو تخرج هاكا

نزهة:علاه مالو لباسي أخالتي؟؟مستور وعادي

الزاهية:لا سمحي ليا أبنيتي...مافيه بو سترة شوفي عيالات لواسك كيلبسو الجلالب ومستورين

نزهة:(كتقاد فصاكها)كلها كيلبس شنو مرتاح فيه

الزاهية:(قشعاتها كتهز الفوطة)وديك الفوطة لاش؟؟(بفضول)دايزة للحمام؟؟

نزهة:لا..غندوش مورا لصال

الزاهية:(جبدات حنكها)أويلي تي مخوطرة ولا؟؟غدوشي تما؟مخفتيش

نزهة:مناش نخاف أخالتي..صال معروف ونقي وميمون لي مقيدني فيه

الزاهية:(بعدم ثقة)ولدي ولدي؟؟هذا ولدي قيدك فيه(بصوت منخافض)واشوف لي نݣول عليه دغري

نزهة:(زربات عليها باستها فحنكها)بسلامة أخالتي ساعة ونرجع

الزاهية:(باقي مستغربة)بسلامة

كي خرجات نزهة نطقات فنفسها:واشوف ليك الفضوول..

الزاهية:(غادية لعند بنتها لي كتفرج)تي هادي شتها زيرات وخرجات

فتيحة:شغلك؟؟

الزاهية:ياويلي على واش شغلي؟؟راني حاطني ولدي هنا نحضي غيبتو ونرد هيبتو

فتيحة:مالك نتي بوبي هههههه دخلي سوق راسك أمي وخرجي سوق السيدة

الزاهية:أنا معاجبنيش هادشي..هادي راها كتعلب على ولدي العشرة..ويلي ݣالت ليك هو لي مقيدها فهادشي ديال الرياضة

فتيحة:نتي ولفتي دوك المخموجين ديال ولاد الشريف ..عيالاتهم نهار ومطال وهوما مخشيين فيك ..من لكوزينة للبيت حاضيين غي السريط والمريط

الزاهية:(بتعالي)كيجاوك عيالات ولادي..كلهم عيالات حارات وݣاوطات الله يرضي عليهم

فتيحة:وهادي محاراش؟؟

الزاهية:حارة ولايني عيب هادشي..هي بنت ناس ومافيها مايتعاب ولايني راخف ليها خوك بزااف..دار ليها طوموبيل شويا خلاها تمشي تريض غدا متعرف شنو

فتيحة:أنا خليني عليك جايا نبرد راسي ونريحو من هم ولاد ولادك..وذني عاد بردو الى كتقلبي على المشاكل الله وعلم

الزاهية:(ميقات فيها)شلا..قابلي تي هاد التلفازة الناس دارو ولادهم ونتي مزال شادة الأرض حدايا

فتيحة:(ببرود)طفرتيه تي لي مزوجة جوج مرات

ريحات نزهة راسها بكور ديال الشطيح حيدات فيه الستريس والعيا خرجات كتحس براسها خفيفة..دوشات ولبسات عليها وخرجات حمرة وهي تصادف زميلة ليها ف لاصال وجلسو كيتحدثو شويا وهي تقوليها:ياله نديرو كافي هنا غي قريب ونرجعو

نزهة:زيدي أختي توحشت نهضر معاك هههه

جراتها ومشاو لكافي قريبة جلسو شادين قهيوة وكيهضرو ويضحكو ويتعاودو مفرفشة على راسها حتى لقاتها دازت ثلاثة تالسوايع..هزات سوارتها ومشات شادة الطريق لدارها كتسنط لأغنية خليجية وتدندن معاها مع حبسات قدام دارها صونا ليها ميمون..فرنسات وشدات الخط:الحب ديال نزهة

ميمون:فينك؟

نزهة:غنطلع لدار..مشيت لصال

ميمون:هادشي كولو لصال أنزهة؟

نزهة:(عقدات حجبانها)وفين غنكون مشييت

ميمون:طلعي فحالك أنزهة(زفر)حتى نجي

نزهة:(طلعات ليها قنديشة)كيفاش حتى نجي؟؟كتحلف علي ولا شنو؟؟

ميمون:سيري أنزهة للدار

قطعات عليه مخنزرة وقالت:لي ضحكتو نهجروو خخخخخ

نزلات هازا صاكها طالعة لدارها والمغرب قربات ..مع حلات الباب كتسمع صوت التلفازة وهي تنطق الزاهية لي كانت جالسة كي حجيب حاطة يد على اليد

ونطقات بجرأة:على السلامة

نزهة:(حاولات متبنيش)الله يسلمك

حيدات سبرديلتها و جات جلسات حداهم وهي تنطق فتيحة:كيدازت الحصة؟

نزهة: كي عويناتك كون غي مشيتي معايا تفوجي

الزاهية:كنا أبنيتي فساعة رجعنا فثلاثة ديال السوايع..تعطلتي (بدون ماتفكر)هادشي لي كديري فيه أبنيتي ممسلكش

نزهة:شنو كندير؟؟

فتيحة:(بتذمر)تي دخلي سوق راسك

الزاهية:سكتي نتي..وواش نتي خارجة مزيرة على راسك وغادية تريضي ولا منعرف أشمن بلاصة صديتي وتعطلتي والظلام قرب يطيح عاد داخلة...هادي حالة مزوحة؟؟

نزهة:(بهدوء)هي أش اخالتي؟؟درت شي حاجة عيب؟؟صافي غي مزوجة نشد الركنة وندير لراسي الحبس باش يبقا علي اعتبار راني مزوجة

الزاهية:مزوجة وماشي غي مزوجة وسكتي..مزوجة بولدي..بميمون ولد الزاهية راجل وسيد الرجال..مسافر مكاينش هو فدارو شخرجك نتي أصلا؟؟ياك المونة ومقدي أش مخرجك؟؟(بتحذير)هادشي لي سايرة ديري فيه راه مهواش..عيط ݣبيل وسول فيك معرفت مانݣوليه

نزهة:(عصباتها ومبيناتش)هي الصهد من عندك عندمن جاي؟؟سمعيني اخالتي نتي على راسي وعيني..مت راجلي ونحطك فوق راسي والى مهزك هاد الكتف يهزك هاد الكتف..ولكن باش تدخلي فشي حوايج بعاد عليك لا...أولا نتي مو ..وانا مزوجة كي ݣلتي بميمون يعني دخلت خرجت هذاكشي خصو هو يهضر فيه..وولدك للحمد لله محابس علي والو..ثانيا خرجت مشيت فوجت ماشي غنبقا حابسة راسي وسط الدار راه حتى هو مشا يفوج..وسولتكم واش بغيتو تمشيو معايا مبغيتووش..ثالثا أخالتي خليك بعيدة على علاقتي بميمون حيت لا أنا لا هو صغار باش منعرفوش نسيرو راسنا ونسيرو حياتنا..هاد المرة غندير راسي مسمعت والو ..حيت أنا كنعاملك بالصفا وعمري تدخلت فشي حاجة بعيدة علي

الزاهية:(شوكاتها)يااااك أبنيتي يااك؟؟دابا أنا وليت فضوولية؟؟يااااك وليت مكندخلش سوووق راسي(قلبات عليها القفة)واسمحي ليا أبنيتي سمحي ليا أنا غي مرا شارفة فضولية كندخل السواق لي بعاد علي...ولدتو من كرشي وتكرفصت بيه فبلاد الغربة ومبغيتينش ندخل فيه...نشوف المنكر بعيني ونسكت

نزهة:(قندشات)فين بان ليك المنكر؟؟درت شي حاجة عيب..المنكر هو تنوضي تعاودي لولدك شي حوايج لي مكاينينش..غيحسابو معرفت شنو كندير أنا هنا؟؟هذا ماشي منكر(ساطت وناضت)أستغفر الله العلي العظيم ياربي الصبر. .

مشات لبيتها معصبة ومغددة أعدى ماعندها هو دخول الصحة..بدلات عليها مغددة ماحيلتها للعجوزة ولا لي مصوني ليها كيحاسبها..فحين الزاهية بقات مصدومة وضارت شافت فبنتها قابلة:سمعتيها كي هضرات معايا؟؟سمعتي ياك؟؟أجييي طلي علي ياا مي وتشوفي مرات المرضي رداتني فضولية ومكندخلش سوق راسي

فتيحة:عطاااتك ..نتي لي مكتبغيش دخلي سوق راسك..أش ليك فيها؟؟صونا ليك كوليه خرجات وصافي لاش خرجات معرفناها فين زادات معرفناها فين مشات..محشمتييش

الزاهية:(خنزرات)الله ينعل لي مايحشم قولي أمين بحالك بحالها كتبغيو تديرو الرجال تحت رجلييكم..ولايني حتى يجي ولدي ونوريكم شغلكم

فتيحة:ياكما حسابك ولاد الشريف هادو؟؟راه ولد المصري هذ كيدير غي لي ݣاليه راسو..الله يستر

سكتات الزاهية وجلست كتبرد فالفقصة وتطلع فيها الهضرة وتنزل معصبة ومغددة مرضااتش..تلوي ففمها وتعاود

أما نزها راها ديركت للكوزينة كتوجد العشا عاقدة حجبانها حتى دخلات فتيحة مبسمة:الحادݣة كاين فاش نعاونك؟؟

نزهة:(تنهدات)غي رتاحي الزين

فتيحة:(جات طبطبات على كتفها)مديريش فبالك الزين..مي فيها شويا تالنݣير

نزهة:النݣير نقبلو ولكن تعيط ليه وتبقا تحرشو عليا لا..هو لي مقيدني فداك لصال أصلا

فتيحة:تي هاديك أش تعرف؟؟أنا لي بنتها وكطلع ليا فراسي هي حقانية ومكتبغيش الظلم ولكن دقا قديمة

نزهة:غي بالحق أختي واش درت العيب؟؟مالي أش درت؟؟

فتيحة:يا راك مدرتي والو غي هي مع عايشة مع عيالات الشرفة كيخصها كلشي يكون هاكاك..أنا نيت كتفقصني ولكن راه طبعها هاكاك كتبغي كلشي يكون بلدي

نزهة:(زفرات)الله يهدي ماخلق هذا مانݣول

فتيحة:هضري مع ميمون راه شعلاتها ليك معاه هههه

نزهة:هههه لالا هو ماشي بوذينة غي معجبنش كي هضر معايا

فتيحة:تريكة الزاهية وحدة...علاه أنا شنو سبابي حتى مكملتش قرايتي..غاهي بقات على با خرجها نزيدها تعلم ماينفعها تزوج ...خرجها أوا وخرجت وهاني بقيت الله كريم

نزهة:الله يهدي ماخلق وصافي

دارت العشا وحطاتو كتقاد فالطبيلة والزاهية هازا خنافرها كتفرج فالتلفازة ونص عينيها فنزهة كتسناها تحزرها..

نزهة:حممم خالتي نوضي تعشااي

الزاهية:مخصنييش

فتيحة:اتي نوضي ضربي لبرا ودوزي تعشاااي

الزاهية:(عوجات فمها)بسعي منيي

نزهة:نوضي أخالتي يهديك الله راه غيطيح ليك السكر الى متعيشيتش

الزاهية:مكاين لي يعصبك ويطلع ليك السكر ݣد هضرة بنااادم..هضرة الحق مايبغيهاش حد

نزهة:(سدات عليها باب الهضرة)لي بان ليك

تعشات هي وفتيحة كيهضرو ويضحكو ممسوقينش خلاوها غتكردد بالفقصة حيت ولفات الحزارة من ولادها

الشخص غي كيكبر كيولي كي الدري الصغير كيدير حركات البرهوش والى تنفخ خصك تحزريه..

تعشاو وناضت نزهة جمعات الماعن وخلات ليها عشاها فوق طبلة فالكوزينة جات مسات على فتيحة ومشات لبيتها بعدما عرفاتهم مزال غيسهرو

عتانات بنفسها مزيان عاد تخشات ففراشها..ياله بغات تغمض عينيها حتى وصلها ميساج..هزات تيلي وهي تقشع نمرة خرا تاني مكتوب فيها:مكتحيديش من بالي أنزهة

خرجات عينيها والنعاس طار فرمشة عين..مع بغات تمسح الميساج صونا بنفس النمرة ترددات باش تجاوب لكن فالاخير جاوبات معصبة وساكتة وهي تسمع صوتو كيهضر:نزهة

نزهة:(بغضب)شوف نݣوليك إما غتبعد مني ولا أقسم يالله حتى نشوووهك واش مناااوي شتعطيني بالتيسااع

براهيم:(ضحك)ههههه بردي شويا الزين بغينا غي نسولو فيك

نزهة:ماشي ختك باش تسول فيا

براهيم:مرات خويا حشوومة منسولش فيك وهو مسافر

نزهة:بزاااف عليييك كتسمع..بزاااف عليييك وشتي ملي غيجي ميمون هادشي كولو غنعاودو ليه وديك ساعة تفرج وتشووف...الله ينعل لي مايحشم..كلب وغتبقا حياتك كاملة كلب

براهيم:أش وصلنا للمعيار أنزهة؟؟

نزهة:تفوووووو

قطعات عليه مغددة وفكها كيترعد وهي تسمع رنة اخرى لقات ميساج فيه الفيديو ديالها..تليشارجاتو ومع دخلات ليه مع تشوكات وعينيها خرجو مصدومين.؟كتفرج وتعاود مشووكية والدمعة موقفة فعينيها حتى كتب ليها:كيصبرني عليك غي هاد الزين وهاد الفورمة لي ميستاهلهاش ميمون

..

الصدمة

هي الكلمة لي ممكن توصف ملامح نزهة دابا..مصدومة جدا من وقاحتو ومن شنو كتشوف..كتعاود تفرج فالفيديو وعينيها خارجين بلا فمها لي محلول مبغاش يتجمع..القلب كيضرب فالتسعين..مقادراش تيق بلي براهيم عندو فيديو ليها..ترعد التيلي فيديها ونشف الريق ففمها..بسرعة دوزات الخط ليه أبيل عادية

ما جاش فين يشد الخط حتى نطقات بصوت كيترعد:الله ياخد فيك الحق أعدو الله...كلب وغتبقا حياتك كاملة كلب مافيكش الخييير وعمرو غيكون فيك..

براهيم:(مبرد)علاش مقسحة راسك أنزهة؟؟أنا مباغي منك والو

نزهة:(طاحت دمعتها)الله يعطيك شي موصيبة ..الله يرزيك فصحتك تولي زحااف يالكلب...مرات خوك مصورها وكتفرج فيها..مرااات خوك لي لحم كتافك من خيرو

براهيم:(بصوت لعوب)هاد الهضرة حفضتها..نيتي ماخايباش أنزهة جيتك نيشان عاجباااني

نزهة:(بإشمئزاز)الله يعطييك موصصصيبة بعد مني...أقسم بالله غيرجع ميمون وغنفضحك معاااه غنشوووهك ...سمعتيينيي غنشوهك

براهيم:أش غتݣولي ليه؟؟

نزهة:(دفلات)تفووووو عليك أعيفة الرجال تفووووو ..والله ومتسمح الفيديو من عندك حتى نشوهك...سمعتيني كاين المخزن وغياخد ليا حقي منك

براهيم:(ببرود)تصبحي على خير الزين

قطع عليها خلاها كترعد وبدون تردد بلوكات نمرة والدموع هوادين من عينيها مفقصة و معصبة..كتحاول تفكر فين كانت كتشطح بحرا معرفات راه العرس ديال ميمون..شادة راسها بين يديها ومزيرة على جذور شعرها ..القلب كيضرب فالتسعين معرفاتش منين تبدا هاد المهزلة كاملة..واشمن طريق دخلات ليها

-فالطرف الآخر من كازا..كان جمال فدارو شاد التيلي فيديه كيسمع تسجيل المكالمة من جديد..الصدمة كانت متمكنة منو حيت ميمكنش ميعرفش صوت براهيم...آخر ماكان يتوقع هي هاد الوقاحة...من نهارو ولاد الزاهية مع الشريف معندوش معاهم ..لكن عمرو ظن أن الوقاحة وقلة الرجولة توصلو أنه يتحرش بمرات خوه.

عقلو مبلوكي و مقادرش يستوعب آش سمع..كاع الرسائل تالواتساب وديال أي تطبيق كيدخلو عندو ..لكن هو مشا ديركت لجهة النمرة المجهولة..متطفلش بتاتا ومحاولش يسمع هضرتها لا مع ميمون ولا مع شي حد آخر..كان غرضو هو دليل...شك فنزهة فالأول لكن ملي سمع هضرتها تأكد بلي ماعندها يد فهادشي.

محس براسو غي و هو ضارب الطبلة لي قدامو برجليه حتا تقسح ناض كيمسح على وجهو معصب وكيسب ويغرق لبراااهيم..عروق راسو تنفخو بالغضب..مقدرش يستوعب أنه براهيم كيضور بمرات ميمون

تحط فنار صعيبة أما يقول الحقيقة ولا يسكت وأكيد القرار كان هو يهضر ..دوز ديك الساعة الإتصال لميمون كيصوني وكيلقاه مشغول فالواتساب...هاد الأخير لي كان صونا لنزهة مرارا وتكرار ومجاوباتوش حتى تشوش عليها وهي تجاوب كتحاول تبرد فراسها..

نزهة:ألو

ميمون:لالاهم...مالك مكتجاوبيش؟

نزهة:(بصوت عيان فيها الشخرة تالبكية)مشفتوش

ميمون:مقلقلة مني؟

نزهة:(تزير عليها قلبها مصيبة براهيم نساتها كيفاش هضر معاها)لا

ميمون:ومالك؟؟صوتك معاجبنيش؟؟قلقك شي حد

نزهة:لا..غي توحشتك

ميمون:(تبسم)غي شويا ولا بزااف؟؟أنا عاجبني هنا نبقا هنا حسن

نزهة:(عينيها هوادين بالدموع)وتعطيك خاطرك أميمون تخليني

ميمون:أنا وياك حتى للقبر ههههه غي كنضحك معاك

نزهة:إمتا غترجع؟

ميمون:تسالي الفيزا ونرجع...تقلقتي على ݣبيل؟؟متديش علي غي مع صونيت ليك مجاوبتينش تخلعت عليك

نزهة:(بتفهم)عارفة أحبيبي ماتقلقتش

ميمون:(كيطنز)تشكات منك الزاهية ههههه

نزهة:هههههه والله مدرت شي حاجة ههههه

ميمون:هههههه عارف ..غي صبري راه مي واعرة ولكن قلبها حنين

نزهة:(فخاطرها:كون قلبها حنين غتلوحك)اش ݣالت ليك؟؟

ميمون:خرجات أوليدي معرفتها فين مشات..لابسة الحمر

نزهة:البوردو هذاااك هههههههه والله أميمون مكانت نيتي شي حاجة غي مشيت لصال

ميمون:ههههه عارفك كي دايرا غي ملي تبغي تخرجي علميني

نزهة:واخا أسيدي(تبسمات)شخبار البنات؟

ميمون:(براحة)الجو هنا زوين والله...كنحس براسي مع عائلة نييت

نزهة:بصحتك أحبيبي فوج مع رااسك

ميمون:غدا مسافرين لبلاصة سميتها شرم الشيخ

نزهة:زوييينة بصحتك..تصور وصيفط ليا

ميمون:مدازتش ليا بلا بيك

نزهة:حسابك غنساها هههههه حتى نجي وتخلصها مضوبلة

ميمون:(ضاحك)نخلصها الالاهم نخلصها

نزهة:غنمشي ننعس أحبيبي سير حتى نتا رتاح ليك شويا

ميمون:تصبحي على خير

نزهة:تصبح على خير

ميمون:أري شي بوووسة

نزهة:ههههههه نعطيك ماكثر غا جيتيني بعيد

ميمون:دلمها كتموت ليا على قلة الحيا

قطعات معاه و تلغات بتسامتها بحالا كانت غي مصطانعاها باش متبانش غريبة عليه..مباغاهش يعيق..تضاربات أفكارها وبين الإعتراف والسكوت كانت قلة الحيلة

مع قطع معاها نطق مبسم:كنحماق عليها

صونا تيليفونو كان جمال جاوب كيثاوب:هبيزة

جمال:هانيا؟؟

ميمون:لباس ونتا؟؟هانيا؟

جمال:الحمد لله ..امتا راجع؟

ميمون:ههههههه توحشتوني هاا هههههه مراجعش هنا زويين..

جمال:واهضر.. عندي ليك بلان خصني نهضر معاك فيه

ميمون:هضر كنسمعك

جمال:(نظف حلقو)حمممم لا ماشي ديال تيليفون حتى تجي

ميمون:غي تسالي الفيزا وهاني معاك

جمال:بصحتك أخويا فوج مع راسك ومع خواتاتك

ميمون:والله أخويا الى ضريفييين بزاااف..واحد عمتي راه مسكينة ففمها غي سميتي..كتحيد الحاجة من ݣدامها وتعطيها ليا

جمال:(مبسم)راك بوحدك لي ولد عندهم

ميمون:وايييه..مشيت للشركة ديال با..بشاااخ على المشاريع راه شابع فلوووس هههههع

جمال:شد حقك

ميمون:لالا أنا ماباغي حق عندي رزقي..الله يزيدهم فيه

جمال:ياله سير حتى تجي

ميمون:تهلا مرة مرة دوز للدار عندي شوف ياكما خاصاهم شي حاجة

جمال:بلا متوصي أخويا

*****

بعد ليلة كلها كوابيس دازت على نزهة فيها..تنعس ساعة وتقفز بكابوس فيه ميمون كيقتل براهيم..ولا هي كتقتلو ..دوزاتها صعيبة بغات غي امتا يطلع الصباح..ومع بونبير نفضات عليها الفراش عيانة ..مشات للطواليط نعلات الشيطان وتوضات وصلات كتدعي فخاطرها ربي يفرجها عليها..مع ناضت مع شافت الزاهية خارجة من بيتها منفخة

نزهة:صباح النور

الزاهية:(دخلات للكوزينة)صباح الخير

نزهة:(تبعاتها)أنا نصايب الفطور أخالتي

الزاهية:(شافت فيها)تي مالك صفرة؟؟

نزهة:(بتعب)مانعستش مزيان كنحس براسي فاشلة

الزاهية: تكونيش حاملة؟

نزهة:لالا محاملاش

الزاهية:وتي باش عرفتيها؟

نزهة:عرفتها أخالتي..(ردات الما)

الزاهبة:غا حيدي نعمر اتاي وسيري ترتاحي

شافت فيها مبسمة وقالت:لهلا يخطيك أخالتي غا رتاحي قادرة نوجدو

الزاهية:(بافتخار) باش ميݣولش ولدي راه ممهلينش ليه فمراتو فغيبتو

نزهة:(ضحكات)ههههههه لالا معندي مانݣول(باست ليها كتافها)سمحي ليا أخالتي على البارح..

نزهة: سمحي ليا أخالتي على البارح

الزاهية:(حبات تصرفها)وابنيتي أنا غي هضرت ومبغيتش ولدي يغضب عليك...أنا راني عاجنة ولادي وخابزاهم عارفة شنو كيقلقهم وشنو لا..أنا غي نصحتك

نزهة:(مسايراها)عارفة لي كاين..غي ميمون راه فشكل..كيبغي راحتي ومخليني على راحتي وأنا راه بيه ولا بلا بيه عارفة حدودي

الزاهية:وانتي تعرفي

تلاهات فشغلها ملاهية بالدار والكوموندات شدات جوج تلهات فيهم وعاونوها نيت حتى دوزو سيمانتهم عادي..وخبار براهيم مقطووع مكاينش حسو ولا خبر منو

******

بعد مرور أسبوع ..اليوم ميمون غادر التراب المصري بعد أسبوع دوزو مع خواتاتو وعائلتو كلو ود وحب ومحبة..جو عائلي بامتياز..وفنفس المطار مناش مشا نزلات طيارتو ومشا يدير الإجراءات..برا كانت نزهة رفقة الزاهية وجمال لي باينا عليه أنه منزاعج..ماشي على عوايدو غي ضاحك

كيستناوه .. مجمعة نزهة هي والزاهية حتى كيبان ليهم من بعيد جاي دافع باݣاجو..جاي بضوبل باش مشا

نزهة:(تبسمات)خالتي راه هو ههههه

الزاهية:(فرنسات)ولدييي

جا عندهم سبق مو هي لولة عنقها بحب وباس راسها ويديها حتى بدات السلسة تاع الرضا تاني

الزاهية:على سلامتك اوليدي..الله يرضي عليك الله يغطيك بالرضا اوليدي

ميمون:(معنفها موحشها)توحشتك أمي

الزاهية:الله يرضي عليك

داز لنزهة لي مبسمة لمنظرهم كتسنا دورها...حتى هي عنقها مزير عليها ناطق:لالاهم

نزهة:على سلامتك ههههه(مزيرة عليه)

ميمون:(باسها فجبهتها بحب)توحشتك..راك مزيانة؟

نزهة:الحمد لله ضاربني البرد شويا

ميمون:(قاس حنوكها)فيك سخانة لا؟

الزاهية:اولدي كضل تدوش حتا صمكها البرد

درعها بيدو وسلم على جمال قايل:هانيا

جمال:(تبسم بزز)لباس ونتا؟؟زيانيتي

شي مصرية هادي

نزلات عليه الزاهية لبين كتافو:الخلا والجلا

جمال:ههه أعمتي الشوهة لا..

نزهة:(كيدوز على حنوكها)سخونة شويا

نزهة:شويا ..معليش ياله

دارو باكاجو فالسيارة..طلعات الزاهية لقدام وهو لور معاها..مدرعها بيدو ..باسها فحنكها وقال بصوت هي لي كتسمعو:كي وقع ليك؟

نزهة:(كطنز)غي مع ولفتك نتخشا حداك وملي خويتي علي الفراش بردت

ميمون:ههههه ياك..شربتي شي دوا؟

نزهة:شربت ..جابو ليا جمال

جمال:(حاضيهم من المراية بلا ميعيقو)ميمون كي راهم البنات

ميمون:مزيانين..كانت غتجي معايا زوهرة وولادها

الزاهية:عندها تبارك الله وليدات

ميمون:(حابس الضحكة)حسن وسلمى

الزاهية:الخلا والجلا

وصلو للدار لقاو فتيحة فانتظارهم..سلمات عليه بحرارة وجلسو ضايرين بطبلة تالغدا لي وجدوها مخصوص ليه ..جمال كياكل بزز عليه الشهية مكايناش باغي غي امتا ينفارد بيه باش يعاود ليه كلشي ويفركع الرمانة بالدلائل..الشوفة مكيقدرش يطولها فنزهة بتاتا..كتبقى فيه حيت فاص لهاد المشاكل بوحدها

هزات الماعن للكوزينة وكتحس بالحريق فراسها بلا السهطة لي فيها..مشات غسلات وجهها والتعب متمكن منها..دخل عليها ميمون لطواليط وقال:مالك

نزهة:مكنحسش براسي مزيان أميمون(مسحات نيوفها)

ميمون:دوزي للطبيب(بغات تهضر وحبسها)زيدي ياله

نزهة:مكاين لاش أميمون بغيت غي ننعس

ميمون:زيدي أنزهة بلا صداع..يعطيك الدوا(درعها بيدو)ضربوك ليا بالعين

نزعة:ههه الله يمسخك

بغا يبوسها وبعدات قايلة:غنعاديييك

شقمها ببوسة مزير عليها وقال:دلمها سيمانة مبستها وݣالت ليك نعاديها ههههه زيدي لطبيب

داها للبيت لبسها حوايجها حيت يديها فاشلين وخرج قايل:هاحنا راجعين

الزاهية:فين أوليدي؟

ميمون:نديها لطبيب شوفي حالتها(مخاطب جمال)خليك هنا حتى نرجعو

جمال:خاصك شي حاجة؟؟

الزاهية:ندير ليها غي شويا ديال العشوب ويفوتها الحال

ميمون:لا..جاتها السخانة خصها الطبيب

جمال:ديها لطبيب أخويا حسن

خرجها مذرعها هاز سوارتو و وراقيه ومخلين الزاهية غي كتشوف:واشوف ليك الدغري..غا فالمطار يبوس فيها ݣدامي ودابا الطبيب

فتيحة:واتي دخلي سوق راسك

جمال:مراتو أعمتي خصو يديها للطبيب

الزاهية:واش أنا ݣلت لا ولايني واش غي السخانة نوضو عليها الطبيب

جمال:(تسرح)خليهم أعمتي عليك..

خدا الطريق لأقرب طبيب معنقها مفرقهاش..وهي عينيها غيتسدو بالعيا بلا نيوفها لي غي دايزيين والجو سخون..كتحس براسها فيها البرد..تكمشات فيه حاسة براسها غتموت بالعيا

وصلات نوبتهم فحصها الطبيب وعطاها الدوا وبرا باش تهبط ليها السخانة وخرجو مرجعها للدار لي غي وصلو داها لبيتها غطاها ومشا يوجد ليها متاكل..

الزاهية:غندير ليها شويا متاكل أولدي غا سير

ميمون:عفاك أمي وجدي ليها دغيا باش نعطيها الدوا

الزاهية:سبحان من خلقك هاكا حنين ههههه سير اولدي سير

ميمون:(ضحك وضرب فكتفها)كنبغيها أمي

الزاهية:ويلي ويلي هههههههه سير الله يمسخك

خرج عند جمال لي عاصر على أتاي وقال:العشيير

جمال:المصري ..باغي نهضر معاك

ميمون:هضر

جمال:ماشي هنا

ميمون:تاكل نزهة وتشرب دواها ونخرجو

جمال:(ضحك)عهههههههه مكذباتش مك..دوخاتك

ميمون:بصحتي ههههه

تسناها حتى كلات ووقف عند راسها حتى عطاها الدوا وقال:غنخرج مع جمال بغاني فشي حاجة..متنوضيش من بلاصتك

نزهة:معنديش العظم لي ينوض

ميمون:(باسها فراسها)الله يشافيك أحبيبة

ياله هز سوارتو وحلو الباب وهوما يتصادفو بجوج رجال ..قطب حجبانو وقال:نعام؟

..:نتا هو ميمون مزلوط؟

ميمون:ااه

جمال:كاين مانقضيو الشاف

..:زيد معانا..

ميمون:شكون نتوما؟؟

جبد ليه لاكارط ديالو:العميد هيثم ..مطلوب دابا فالكوميسارية

بغا يهضر معطلوهش شدوه من يدو ودوروه على غفلة مونكاوها ليه وبدا كيتغاوت:شكاااين يااك لباااس؟؟

جمال:(كيحاول يفهم)شكاااين الشااف..لاش هاد الشدة؟

...:حتال تما وتعرفو..

تشوكا ميمون..كيهضر بالغوات باغي يفهم علاش مونطاوه..أما جمال راه لايقل صدمة عليه..كيحاول يفهم لكنهم جارينو معاهم..تسمعات الهضرة عند لي لداخل..ناضت نزهة لايحة عليها شال العظم علاش توقف مكاينش..حتى كتفاجأ بميمون جارينو بالمينوط خرجو عينيها وتبعاتو كتساءل شنو واقع..مو وختو وراهم لكن والو واش بغاو يقولو حدهم خسرو عليه :تالتما وتعرف

داروه فسيارة أمن صغيرة مصدوم معارف شنو كاين..خلا نزهة كترعد ماحيلتها للسخانة ولا للخبر..تلفتات لجمال لي مشوكي:أش كااااين؟؟

الزاهية:(جايا كتجري بحرا لحقات تهبط من دروج)أوليدي..مالو ولدي؟؟علاش داوه البوليس

جمال:(كيدوز نمرة)معرفتتتتش..(مشا كيجري لطونوبيلتو)

ديمارا وزاد خلاهم فحين نزهة راه فشلات ..راسها فيه الحريق بلا زاهية لي كترعد مافاهمين والو..

فتيحة:(شادة فمها)أش وقع ؟؟

نزهة:(ناضت طالعا)غنتبعهم للكوميسارية نشوف شواقع

الزاهية:جلابتي جلاابتييي نمشي معاك

فتيحة:خليك هنا نجيبها ونجي نمشيو كاملين

طلعات نزهة فالسانسور كتنهج ..عظامها واكلين العصا لاحت عليها كاب طويل هزات صاكها وسوارتها وتمات نازلة..ركبات الزاهية لور مع جات فتيحة حركات الروايض تيلي فوذنيها مصونية لجمال:فين داوه؟

جمال:ل****

نزهة:اوك

كترعد وسايقة والعظم واكل العصا بلا حريق الراس لي غيطرطق عليها..أما ميمون راه كان وسط السيارة مفاهم والو كيسولهم وحتى حد معاطيه راس الخيط..للحظة جا فبالو بلان الوراق ديالو وشك واش هو

وصلو أمام مقر **** ..ودخلوه بعدما فكو ليه المينوط ومزالو كيسول..دخلوه لبيرو فيه البوليسي لي غيدير التحقيق الأولي معاه

ميمون:بغيت نعرف علاش جايبيني؟؟

الشرطي:غي ريح أسي ميمون دابا تعرف

ميمون:(تعصب)كيفاش دابا تعرف؟؟مداير والو

للشرطي:غاتسد فمك وتسكت خلينا نديرو خدمتنا

ساط معصب مفاهم والو حدو شافو بدا كيكتب فالة الكتابة قايل:سميتك كاملة

مبمون:ميمون مزلوط

..:سمية مك وباك

ميمون:خديجة بن زروال وعبد الرحمان مزلوط

..:السكنة؟

ميمون:*******..واخا نعرفك دابا علاش جبتوني لهنا

الشرطي:(تبسم ليه)انت متهم بحيازة جوج كيلو ديال الحشيش تلقات فالمحل ديالك لي ف**** وخنيشة تالغبرة

خرجو عينيه مشوووكي فيه وتبلووكا وهضرة الحشيش فمحلك مع الغبرة كتعاود..نطق باستغراب:محلي انا؟؟الحشيش عندي أنا؟؟منين غيجيني؟والغبرة مزال؟؟

....:وهادشي علاش جبناك هنا..بغينا نعرفو منين جاك

ميمون:كتسطا علي نتا ولا؟؟(تعصب كثر)منين غنعرف أنا مالي كنبيع فيه

...:غتصلح فمك ولا نزلك فيم تصلحوو..وبالتي هي أحسن غتهضر وتݣولينا منين جاتك ديك جوج كيلو تالحشيش ليفمحلك وديك الغبرة

ميمون:(كمش عينيه)معرفتش..أنا معارف والو..كيفاش تلقى عندي؟؟أنا كنبيع بالجملة لمالين الحوانت منين غيجيني الحشيش

..:اوا نسولوك نتا

ساط معصب وقال :معارفش علاش كتهضر؟؟أنا كنت فمصر ياله دخلت للمغرب

...:عرفناك كنتي فمصر وصيفطنا ليك مرة وجوج وماجيتيش..درنا خدمتنا وجبناك بطريقتنا...غنعاود نسولك..الحشيش لي فمحلك ديالمن؟؟ومنين كتجيبو حيت باين ديالك ..أما بلان الغبرة هذاك ضوسي اخر

ميمون:(مخنزر)ماعندي حشيش ومعارفش علاش كتهضرو..

...:عندك شي محامي؟

ميمون:(بدون تردد)اه

...:قضيتك واعرا أسي ميمون غي عتارف وخلينا نسدو للقضية

ميمون:نعتارف بشي حاجة أنا مدايرهااش

...:عيط ليا لاخر

دخلو الدري لي خدام عندو حاني راسوو وقال:كتعرفو

ميمون:خدام عندي..

...:هاد خونا لي لقينا فاش جانا بلاغ تالحشيش والغبرة..وݣالينا أنا غي خدام

معاذ:أنا غي خدام المحل ديال سي ميمون

ميمون:(بنرفزة)والحشيش ديالي مثلا؟؟

معاذ:أنا غي خدام

...:المصري منين جاك الحشيش والغبرة؟

ميمون:(زفر)أنا مكنعرف لا حشيش لا والو..كنت فمصر

وصل جمال لكوميسارية ونزل كيتساءل..بتيلفون واحد عيط للمحامي معروف فكازا ..سول الكوميسير لي جابو بتساءل وقال:خويا الله يحفظك شواقع ؟؟علاش جابوه؟

...:الحشيش ..جوج كيلو تالحشيش فالمحل ديالوو سيد قاتلها حشيش ..ومكملها غبرة

بحال سطل تالما تكب عليه ..خلا أعصابو تفور..مسح على وجهو بعصبية وبقا غادي جاي تما كيتسنا المحامي وميمون زال لداخل فالتحقيق الأولي

وصلات نزهة مرعودة متبوعة بفيحة لي شادة فالزاهية لي ففمها غي"الله على وليدي"..كي شافت جمال طارت عليه مخلوعة:جمال شواقع؟؟علاش شدوه؟..

جمال:(زفر)لقاو عندو جوج كيلو تالحشيش والغبرة فالمحل

نزهة:(شهقات)أويلييي...منين جاه؟؟شكون حطو ليه؟؟

جمال:معرفتش..كنتسنا المحامي يجي ونشوفو اش كاين

نزهة:(شدات على صدرها)شكون غيكون حطو ليه؟؟

جمال:معرفتش فغففف

الزاهية:(بخوف)أولدي شكاين؟؟

جمال:عمتي علاش جيتي؟؟خليك فالدار

الزاهية:واش أنا ولدي تشد ونبقااا

بقاو واقفين كيتسناو بخوف معارفين والو كيشوفو البوليس دايزين هاهوما مدخلين جوج مضاربين والسبان والملة لعلك ترضى..وصل المحامي ودخلوه لعندو..وبقاو كيتسناو على أحر من الجمر والتحقيقات متواصلة لداخل..كيستجوبو ميمون وكل مرة كينفي أنه مول الحشيش ..دخلو معاه فتفاصيل حياتو بالتفصيل..فين كان ومعامن وشنو كيدير وكثرة الأسئلة تبخو ليه راسو وكينفي أنه مولاه

خرج المحامي بعد ساعة ونص ديال التحقيق ناضو عندو وقال:الهضرة برا

نزهة:ميمون غيبقا هنا؟

المحامي:مالوغوزمون اه..غيتشد 48 ساعة قيد التحقيق قابلة للتجديد

الزاهية:أويلييي على يبقا..أنا ولدي يتشد فالحباسات؟؟

فتيحة:سكتي أمي خلينا نفهمو شكاين

المحامي:القضية فيها جوج كيلو تالحشيش كاملة تلقات فمحلو لي ف***** وزيد عليها الغبرة هي لي غتورطو كثر

جمال:(غمض عينيه رافض يستوعب)الغبرة(بحسرة)مشاا فيها

المحامي:الأدلة كاملة ضدو..الدري كيقول مفراسي والو انا غي خدام (شاف فجمال)أجي معايا بغيتك

خرجو لبرا مخليين لوخرين مصدومين ..نزهة السخانة لعبات عليها واقفة غي بزز أما الزاهية راه شادة فيها غي فتيحة قربات طيح

فبرا المحامي جار جمال كيهضر معاه بصوت منخافض:سي جمال التهمة ثابثة عليه غيبداو التحقيقات دابا ومن هنا 24 ساعة غيخرج قرار باش يحجزو على كاع ممتلكاتو لي فالمغرب كامل..التحقيق غيطول شويا وكل مرة غيجددو المدة ديال السجن ديالو حتى تبان البراءة ولا تثبث عليه التهمة حيت القضية فيها الغبرة ضروري من الحجز

جمال:ميمكنش يخرج بكفالة؟

...:مستحيل راه جنايات أسي جمال..دابا غي بيناتنا باش نعرف شنو ندير..الحشيش ديالو ولالا؟؟

جمال:(بتأكيد)مديالوش والله مديالو..دير جهدك خصو يخرج من هنا

المحامي:غيبقا معاهم اليوم وغيكملو التحقيق غدا ..غدا أنا معاك

جمال:صافي واخا

مشا المحامي ورجع جمال كيزرب بغا يجر نزهة يهضر معاها..وتصادف مع خروج ميمون شاد فيه بوليسي..حجبانو معقودين محاملش راسو والباطل لي طاح عليه

طارو لعندو كيسولو فيه..حدو باس راس مو وقال:سيري أمي من هنا غنخرج غنخرج

الزاهية:(طاحو دموعها)مديالكش هادشي أولدي مديالكش

ميمون:(باس يديها)رضي علي أمي..مداير والو

نزهة:ميمون(شاف فيها)غنخرجك من هنا..

ميمون:ردي لبال لمي..جمال غيتكلف(باس راسها)رجعي فحالك كلك سخونة

نزهة:(دمعو عينيها)متخافش كلنا معااك..

داوه لحبس لي لتحت كيحطو فيه نواع وشكال تنااس ..زفر وشد راسو بين يديه ..نيفو كيجيب ليه الريحة الخانزة ها البول ها الشراب وحداه ناس خرين كلها علاش مشدود..تنهد بتعب وقال:ياربي تفرجها راني مظلوم

فبرا جر جمال نزهة بزربة وقال فونيها:غطيري لدار عندكم..الكوفغ ديال ميمون لي فالدار فلوسو كلهم تهزيهم وتديهم لدار عندي (مد ليها السوارت)ها سوارت داري

نزهة:(بتساءل)علاش؟؟

جمال:من هنا 24 ساعة غيخرج قرار باش يتحجزو على كاع ممتلكاتو..سبرديلاتو غيهزوهم الى لقاو فلوسو غيبقا على الضس كلشي ديه خبيه فداري

نزهة:مكنعرفش دارك..نديهم لدارنا تما مكاين لي يوصلهم..خويا عندو كوفر

جمال:ثقة؟؟

تزهة:ثقة(طاحت دمعة من عينو)غيخرج؟

جمال:معرفتش..خصهم يبداو التحقيقات باش نشوفو أش كاين..حد الساعة كلشي مشدود عليه

نزهة:(طاحو دموعها)الله ياربي فين كان مخبي ليه هادشي

جمال:ختي جمعي دموعك..مخصوش المرا لي تبكي خصنا نوقفو معاه حتا يخرج

نزهة:(زفرات)الله يدير لي فيها الخير..

جمال:طيري أنا غنتكلف بعمتي وفتيحة

مشات كطير لطونوبيلتها فحين جمال لي قال:عمتي ياله لدار عندي

الزاهية:انا منتحركش من هنا حتى يخرج ولدي

جمال:معندنا مانديرو ليه هنا أعمتي..نديك ترتاحي متطيحيش ونزيد همك..غيخرج غيخرج

فتيحة:علاش منمشيشو لدار خويا؟

جمال:غيبغيو يقلبووها اللهم نخويوها..نزهة غتجيب ليكم حوايجكم

داهم فطونوبيلتو مخليين ميمون فالسيلول كيستغفر الله ويخمم فهاد المصيبة لي معرفوها منين نزلات عليه

فطريقها لدارها صونات لمحمد قايلة:خووويا نتا فالدار؟

محمد:لا فخدمتي

نزهة:طير عندي لداري دابا عفاك دابا

محمد:مالك ياك لباس؟

نزهة:جيي أخويا محتاجاك

قطعات عليه وكملات طريقها مهدودة ..كي وصلات للدار طلعات كتجري سادة ورها الدار ..حلات الكوفر لقات فيه بزاااف تالبريكات كلهم حاطهم فالدار معندوش كونط بونكيغ..شي مخبيه عند جمال شي عندو..جمعات المبلغ كامل لي فيه كثر من سبعين مليون..كتجمع وتساءل علاش خبا هادشي كولو هنا..عمرات الشانطة وشاط وهزات ساك صغير جمعات فيه البقية..حتا سمعات الصونيت فالباب وهي تقفز مشات كتسلت شافت فالعوينة لقات خوها وهي تحل..جراتو دغيا وسدات كلها كترعد وحمرة بالسخانة

محمد:مالك؟

نزهة:خويا عاوني ..ميمون شدوه البوليس تاهمينو بالحشيش ...جوج كيلو تهموه بيها والغبرة.. غيجيو يحجزو على كاع ممتلكاتو وبما فيها فلووسوو خصني نخرجهم من هنا

تشوكا لكنه زرب هز معاها الشانطة بدون مايقلبها وتمو نازلين بعدما خدات فيتامين سي باش تحيد التعب حيت كتجهد على راسها..وهوما شادين الطريق كان كيسول فيها وكتشرح ليه مخنوقة باغيا غي تبكي حتى تفركعات بالبكا..داها للدار خباو الفلوس مزيان فبلاصة مطيحش على شي حد ورجعات مصونية لجمال كتطمنوو

نزهة:بغيت نشوفو

جمال:مخلاونااش أختي..دابا معلينا غي نصبروو

نزهة:نتا فين؟

جمال:حطيت عمتي وفتيحة وغنرجع لكوميسارية

نزهة:أنا جايا

*****

الحشيش فالمغرب من بين أخطر القضايا لي كتلبس للناس وزيد عليها الغبرة لي حساسة بزاف...الى لقاو عندك كرام كتشد بشهورا الى تحول الغرام للكيلو كتولي القضية فيها الحبس بالسنين والحجز على الممتلكات كاملة..كيزرعوه اه لكن ممنوع تبيعو بحال الشراب مرخصينو لكن يلقاوك فحالة سكر تمشي للحبس..الحشيش ممكن يتروج لكن الغبرة ميعقلوووش على مولاها

الخبر تنشر فالعائلة..كلشي فعائلة الزاهية ساق الخبار لميمون لي تشد بتهمة الحشيش والغبرة..كي عيط جمال لباه علمو تنشر الخبر بين خوتو وعيالاتهم وكلها كيلغي بلغاه..كلشي تصدم وكلشي عز عليه ميمون

هاد الأخير لي بقا فالسليل مع المحابسية لي مشدود غي على السكر العلني ولي مشدود على الضرب كلشي مجموع ومكاين غي الله يعطيك صحيحتك فالمخاصمات..حالتو ولات تشفي العدو..عقلو خدام كيفكر شكون ممكن يحفر ليه هو معندوش أعداء بتاتا

أما نزهة راه كانت كي الحنش المقطوع ليه الراس ..رفيق دربها لداخل وهي برا كضل هي وجمال كيتجاراو من هذا لهذاك كيستفسرو..من هذا وكيل ملك لهذا محامي لذاك كيسولو عالله يلقاو شي حل..فحين الزاهية خاطرها مغير وغي كتبكي فدار جمال هي وفتيحة ما لاقيين ليه جهد

جا براهيم وصالح وعبد الرحمان فقط الباقي بقاو مع النسا..وكيف قال المحامي بخصوص الحجز ..خرج قرار من وكيل الملك باش يتحجز على كاع ممتلكاتو بسباب الغبرة لي تلقات

فبرا الكوميسارية واقف المحامي مع نزهة وخوتو وجمال كيشرح ليهم:القرار خرج..غيتحجز على كلشي لي عندو(كيقرا فنسخة من القرار)الدار فالقلعة والمحلات بجوج والأرض لي فالدروا

براهيم:حتى ديال القلعة مشات؟؟

المحامي:لحد ساعة اه..غيبداو التحقيقات الفعلية على ماعرفت من مصدر موثوق غيدوز لوكيل الملك وغيتصدر قرار بالبحث و التفتيش

نزهة:كيفاش التفتيش؟الدار وقلبووها

المحامي:غيبداو يقلبو عند البزنانزة الصغار...خصك تعرفي امدام بلي العلاقة بين البوليس والبزنانزة راه بحال جوج مزوجين..البزنازة الصغار كيكونو معروفين عند البوليس حيت داخلين خارجين للحبس وأشاك فوا كيكونو فمذكرات البحث..غيقلبو ويسولو ..تيليفونو غيتراقب وكلشي غيتقلب حتى يشوفو واش عندو علاقة ولا لا ؟؟

صالح:واش غيحجزو على كلشي كلشي؟؟مغيبقا عندو والو

المحامي:فحالة الكوكايين راه كيحجزو حتى على صبابطو ..غنشوفو غدا واش وكيل الملك غيعطي قرار بأنه يديرو ليه تحاليل..كيكمي؟؟

نزهة:لا..الشيشة اه مي الݣارو لا

المحامي:الى خرجات التحليلة مزيانة غتكون فصالحو ..حيت نوغمالمون ميمكنش يكون كيبيع فداكشي ومكيديروش..مي نتوقعو اي حاجة

نزهة:بغيت نشوفو

المحامي:مستحيل دابا..أنا الوحيد لي عندي الحق ندخل عندو ونهضر معاه..هو مزال شاد فهضرتو بلي معارفش منين جاي هادشي

محمد:(بتنبيه)محلو مافيهش كاميرات؟؟

شافو فبعضياتهم كاملين ونطق المحامي:هادي متقالتش فالتحقيق..غنذكرها غدا باش يتصدر أمر يتقلبو كاملين

نزهة:(زفرات)ياربي خييير...واش هو مزيان؟؟

المحامي:نتمناو الخير..راه مزيان(شاف فجمال)موسيو جمال كيفما تافقنا

جمال:كون هاني..

مشا المحامي وخلاهم واقفين فالشمس كيتسناو على لفاضي..نطق براهيم:خصنا نعلمو عيالاتنا يخويو

جمال:(محاملش يشوف فيه)اه

صالح:موصيبة كحلة هادي..نمشيو نشوفو مي غتكون مفقصة

نزهة:مسكينة خالتي حالتها تشفي العدو

براهيم:(شاف فيها كتبان ليه حمرة وعينيها ذابلين)مريضة؟

شافت فيه بنص عين وردات باش متعيقش:مممم

جمال:(شاف فيه)نزهة اجي معايا..نتوما سيرو للدار عندي

براهيم:فين غتمشيو؟

جمال:(تحرك وتبعاتو نزهة)من بعد

مشاو مخلينهم تاهوما شادين الطريق وكيهضرو..نطق صالح:غرق فيها المصري

براهيم:غرق وغرقنا معاه

صالح:اش تݣول نتا ديالو ولالا؟؟

براهيم:بغيتي الصراحة انا شكيت واش ديالو..المخزن مكيظلم حد والسيد فلوسو كثيرة واه زعما هادشي كولو تجارة..دارو راه ساوية الملاين الصحاح بلا لي فالقلعة..العرس لي دار وها السفر لمصر واااه واخا يكون كيطبعهم ( تطبع كمارتك فحيط الجحموم) ما تمسحيهاش اسميتك

صالح:حتى أنا شكيت ولكن الله وأعلم..خصو يخرج منها حيت لغرق حتا حنا مشينا فيها لا دار لا دوار

براهيم:بلي فيه الخير

جمال:نزهة غتمشي لدارك نتي وميمون بقاي فيها متخرجيش فاش يجي قرار الحجز يلقاوك تما

نزهة:(تنهدات)ياربي غي يخرج هو على خير الدار يخلفها الله

جمال:يكون خير..خاصاك شي حاجة؟

نزهة:خاصني ميمون..غنمشي نشرب شي كينة وننعس راسي غيتشق علي..بغيت نفكر ومالقيت جهد

جمال:وقفتنا هنا معندها فاش تنفعنا اختي غا سيري رتاحي باقي الطريق طويلة

نزهة:الله يدير لي فيها الخير

بعد مرور ساعات تحركات دورية من البوليس فيديها قرار ديال التفتيش معاهم فرق التفتيش..وحدة مشات لدارو قلبات وروناتها مزيان مخلاو حتى قنت فالأخير نطقات نزهة:واش غيخصني نخرج؟

..:كان عايش معاك؟

نزهة:دارو هادي

...:على حساب شنو عندو الدار ماشي فسميتو..غي ساكن هنا ..

زاد وخلاها فحيرة من أمرها غي خرجو بدات كترجع كل حاجة لبلاصتها ومنيما دازت كتفكرو..واحد اللحظة عقلها بغا يحماق جاب ليها الله ماات وكتفكر فيه..شدات راسها وجلسات كتبكي وتنخصص غي بوحدها حتى بردات قلبها وناضت من جديد لبسات عليها وخرجات فاتجاه دار جمال تشوف الزاهية رابطة الإتصال مع مها كتشكي عليها اما حتى ختها راه مسافرة ياله محمد لي واقف معاها

وصلات عندهم كانو كلهم..سلمات وجلسات مهمومة حتى هي..نطق عبد الرحمان:رتاحيتي شويا ابنتي؟

نزهة:خاطري ممرتاحش أخالي..ميمون مسكين مظلوم لداخل وأنا معارفا مندير

عبد الرحمان:ربي فاش كيبغي يمتاحن عبدو كيعطيه ابتلاء وعند كل ابتلاء خص العبد يقول الحمد لله

نزهة:الحمد لله

الزاهية:(مهمومة)ماتجي غي فالمرضي ديالي..الحنين ديالي لي دايرني فعينيه

دخل براهيم من الزنقة لقى السلام وقال:صونات ليا حفصة(معصب)قرقبو عليهم فالدار..خرجو كلشي

جمال:راه ݣلنا ليك غيحجزو على كلشي..

براهيم:كون كان كاتبها لمي كاع ميوقع هادشي

جمال:(محاملوش)حتى تكون نتا بانيها وكتبها ليها(قلب وجهو )

فتيحة:فين حوايجك انزهة؟؟

نزهة:مخرجونيش أنا..حدهم قلبو مالقاو والو وزادو

صالح:وياك حتى هي دارو..

نزهة:معرفتش..حدي عطيتهم سوارت طونوبيل وداوها معاهم ديالي وديالو

عبد الرحمان:(بهدوء)فلوسو؟

نزهة:عندي

صالح: ولكن علاش محجزوش دارو؟

جمال: (مبرد) كاتبها لنزهة فسميتها...

كأنه رمى ليهم قنبلة فوجهم..نفاجرات عليهم واحك مورا لاخر إلا عبد الرحمان لي كان عارف هو وجمال..نزهة خرجات عينيها معمرها فراسها ولا طاحت فبالها أنه الدار فسميتها..الزاهية نوغش أفكارها أما براهيم وصالح راه بحالا كتصرفقي فيهم..تصدمو وخرجو عينيهم

نزهة:ليا؟؟كيفاش كاتبها ليا؟؟أنا مفراسي والو(شافت فالزاهية)

عبد الرحمان:مكانش باغي شي حد يعرف ...كتبها ليك هاديك الدار

براهيم:(خزر)وهادو فعايل هادو مخلي مو ماكاتب ليها والو وكاتب لمراتو

خزرات فيه نزهة وقالت:الهضرة ماعندها فاش تنفع دابا

الزاهية:(تنهدات بتعب)يخرج ليا غي ولدي ويدير لي بغا

صالح:(ناض معاجبوش الحال)زوينة هادي..حنا فالزنقة وهو كاتب للمرا الدار

جمال:(نهض فيهم)سد علي الهضر نتا وياه..شغلو هذااك ..البلان كان مستور غا جات القضية وفرشاتو..رزقو ويدير بيه لي بغا...المشكل دابا هو لي طايح فيه

نزهة:(مسحات على وجهها مكرهة تحت نظراتهم)أستغفر الله العلي العظيم

خرج صالح وبراهيم معاجبهمش الحال بتاتا مخلين جمال مقندش باغي غي منين يدوز لبراهيم..

صالح:(فقهوة مريحين)اوا هانتا تشوف...كاتب ليها دار قد الخلا فسميتها على زينها

براهيم:(كيكمي معصب)عوض يكتب لمو كاتب لمراتو..ݣول كانت تدمر معاه عليهم..بصح غي خليه دابا تقلب عليه مضسرها ها طونوبيل ها الدار

صالح:التخويرة منا لي هزيناها..لا دار لا دوار..الى تشد راه كلشي مشا غيشدو ليه كلشي فين غنسكن ولادي أنا؟؟

براهيم:تا علاش نرجعو ما جاامعين..خراااا هاد ميمون فبلان الديور

صالح:تالورث منورثووش فيه ...ما حالية غي لجمال وديك نزهة غيديوها باردة

براهيم:(كيكمي ويشوف قدامو)يفك حريرتو بعدا الى خرج منها ويكون خير.

صالح:غنعيط لمراتي نشوف فين صادة

براهيم:عند العزيزة فالدار حتى يشوفو اش كاين(زفر)زوينة هادي كاتب ليها الدار

•••••

- سم العيالات ليه دوا، و سم الرجال لا دوا ليه

•••••

فالقلعة كانو العريسات كاملين عند خديجة مرات عبد الرحمان..الدار كتنغل ببنادم قول العرس هوما كثار وتزاد عليهم الزايد ولاو كينغلو

سناء:اوا حصلة هي حصلنا فيها ميمون

حفصة:الله يفرجها عليه مسكين ما ديالوش ديك الحالة

حكيمة:(بهمس)توما واش مݣلوبة عليكم القفة..السيد منين جايينو هاد الفلوس كاملة؟؟مالها الحانوت لي غتجيب ليه هاد الرزق

نادية:أختي منعرف ..ݣاليا خوه راه غارق نييت ومتهوم نييت محالش يخرج منها..

حكيمة:(كلاها فمها)توما مفراسكمش ..الدار لي فكازا كاتبها لنزهة

كلهم شهقو وقربو من بعضهم باغيين ياخدو خيوط التبركيكة وينسجوهم..نطقات سناء:أويلي ..حلفي حتى كتبها ليها

حكيمة:والله..كاتبها ليها ݣالها ليا صالح الصباح

نادية:وهانتي على الزهر..مغيحيدوهاش ليها. ياختي متكون غي محركة ليه شي مجمر

حفصة:محركة ليه القليب..راها طايحة فالحنين فولاد الزاهية تفرنسي ليه يعطيك ألف درهم

سناء:هاهو دابا مبقا عندو باش ينقي سنانو(ضحكات)ههه غينفعها دابا فاش ولى مزلووط نييت

نادية:غا ضحكي نييت وشوفي فين غنعيشو ..راه صافي بااااح لي كان هازنا هزو الما

******

مرت 24 ساعة خرا عليهم فالستريس والإنتظار ولي مضروب بالمزود هو لي لداخل ..دوز أكفس 48 ساعة فحياتو بين الشمكارا والخيوط الخانزين حتى الماكلة مكدوزش ليه..تحت عينيه كحال حيت يوماين مناعسش بزااف وحتى ظروف الراحة مكايناش

اليوم غيدوز قدام وكيل الملك فإطار التحقيقات الإبتدائية..جاو ليه على الصباح خرجوه مغوبش مضارب غي مع حوايجو..وفقاعة كبيرة فيها الوكيل فمكتبو دخلوه..بعد المقدمات البديهية بداو الأسئلة كيتطرحو عليه من جديد

"شكون كيعطيك؟شكون مخدمك؟؟امتا كدخلو السلعة؟؟ولمن كتبيع"

كانت ردود ميمون كلها ماشي أنا ماديالش معارفش..كينكر نكران كبير وكيدافع على راسو وكذلك المحامي لي قتارح الكاميرات كا إقتراح وكان ميمون نساهم..خرجوه من عند وكيل الملك مونطاوه حيت غيممشي للحبس الاحتياطي لأنه تحبس عاود مدة خمسة أيام قابلة للتجديد. .

خارجين بيه فين كانت عائلتو..مشات نزهة هي لولة عندو عنقااتوو بحب وزيرات عليه وحتا هو بحالا كان محتاج..زير عليها وخشا وجهو فعنقها كيستمد منها قوتو حيت أصعب مايمكن يجي للإنسان هو الظلم

"ياما فالسجن مظاليم"

الزاهية:(كتعنق فيه)كون هاني اولدي غتخرج ربي معاك

ميمون:(باس راسها)تهلاي فراسك أمي

جمال:متخافش غينبشو وغتخرج مبقاش بزااف

ميمون:جمال مراتي ومي معاك

داوه معاهم فسيارة اخرى باش يدخل للسجن الاحتياطي بيدما تسالي خمس أيام التحقيق من جديد..

التحقيق جاري على قدم وساق والمحامي ممخليش من جهدو..خرج الإذن بالتفتيش فالكاميرات وبالفعل تهز ووقلبوهم...قلبو تسجيلات المكالمات ديالو على بعد خمس أشهر لكن مكانش شي اتصال غريب كلهم اتصالات عادية...ويوماين موراها تدار لميمون تحليلة ديال الدم ديال الشعر باش يشوفوه واش كيتعاطا

دوز يوماين فعكاشة جهة ديال الاحتياط..لأنه سجن محاي كبير مقسم لعدة أقسام..دوز يوماين كي الويل فالحبس والعيا متمكن منو..هاز اللهم لجوج تناس"نزهة ومو"

اليوم الثالث لقاو تسجيل كاميرا فيه الدري لي تشد خدام عندو كيخبي الماصوات تالحشيش فالسلعة لداخل فالديبو لي مظلم وكيحسابهم مافيهش كاميرات..لأنه ميمون عالمهم بلي ممخدمهمش باش يشوف واش غيلقى السرقة من بعد ولالا

دخل شرطي هاز فيدو كلي على العميد.ديالو وقاال:قضية المصري بان فيها الجديد

العميد:لي هو؟؟

الشرطي:(بين ليه الكلي)الكاميرا فالمحل شدات البرهوش لي نكر كلشي كيخبي شي حاجة وفنفس البلاصة فين لقينا العشبة

العميد:ارا نشوف

عطاه ليه خدمو تفرجو فيه وقال:ماشي دليل كافي يقدر يكون عطاه ليه يخبيه

الشرطي:غنزيرو البرهوش يهضر ونزيرو تا المصري يدوي

العميد:التحقيق مع البزنانزة؟

الشرطي:تاحد مكيعرف شي واحد سميتو ميمون وتاحد مكيتقدا من تما

العميد:متأكد!!

الشرطي:مون شاف خدمتي هادي..خصنا غي نزيرو البرهوش يهضر فكرشو العجينة

العميد:داك المصري جاني مكيكذبش..(ضحك) فورمتو ماشي ديال الحشيش

الشرطي :ههه فورمتنا حنا ديال البوليس(ضرب ليه التحية)احتراماتي

******

فبرا المحامي كي ديما جامع عليه تريكة ميمون بحالا داير ليهم الصدقة كيهضر معاهم ويشرح ليهم المستجدات

جمال:والكاميرا مكافياش؟

المحامي:خص الدري يعتارف بلي ميمون ماعندوش علاقة..غيزيروه يهضر حيت لحد الساعة راه الأدلة موجهين ليهم بجوج

نزهة:مغيقدروش يخرجو ميمون بكفالة؟

المحامي:لا ..ميمكنش كيخافو يمشيو يعلمو لي معاهم..حاليا راه كلشي غادي مزيان نتسناو التحقيق مع الدري الى عتارف ميمون من غدا يخرج معتارفش غيبقا تما حتى نشوفو الجديد

براهيم:(داير فيها راسو فاهيم)الى ثبتات عليه شحال يتحكم عليه؟

المحامي: 10 سنين

نزهة:(تزير قلبها)إن شاء الله يخرج ..

فغرفة التحقيق كانو جوج من البوليس فبيرو وقدامهم معاذ..هالكاه القطعة والحبس كيستجوبو فيه

..:غي كتعي فراسك التهمة ثابتة عليك..تسجيل الكاميرا فيه بلي نتا لي كتخبي الحشيش

معاذ:أنا غي خدام مادرت والو

...:ميمون لي كيصيفطك تخبي

معاذ:الصمت

ضرب البوليسي فالبيرو ونطق مغوت:واش غنبقا مقابلك هنا؟؟شكون مخدمك؟؟

معاذ:معرفتش علاش كتهضر

...:(بعصبية كيضحك)ههههه راه غي كتزيد تقود ها على راسك أما راه الحبس غادي ليه غادي..سوا عتارفتي سوا لا ..حيت داخل فالقضية لا نتا لا داك المصري غي ݣر شكون وراكم

معاذ:(تزير)أنا ماعارف والو ...غي مݣيد

...:شكون مݣيدك؟؟ميمون؟

سكت معاذ كيضور فعينيه عارف راسو حصل حصلة تالكلاب..زفر وقال:مدياليش الحشيش غا مسخر

..:لمن؟لميمون؟

سكت للحظات كيضور فعينيه وهو يحرك راسو بالنفي..عاود الشرطي السؤال:واش ميمون لي مسخرك؟

معاذ:لا الشاف..المعلم معارف والو

شاف كل واحد فلاخر ورجعو براحة جالسين على كراسيهم بحالا هم ونزاح عليهم حيت كيكرفصوهم فالتحقيق..ونطق:دابا عجبتيني ياله عاود ليا كلشي من لول (كيطمعو) وغنتعاون معاك حتى أنا باش متغرقش

معاذ:(بندم)الشاف عندي مي أنا لي كنصرف عليها مبغيتش نمشي للحبس

الشرطي:(مسايرو)غي هضر بعدا..عاود ليا لافير من لول

قاطعهم الدقان سمح واحد فيهم بالدخول..ودخل واحد البوليسي آخر هاز فيديه ملف وقال:قرار وكيل الملك باش تدار تحليلة لميمون مزلوط ومعاذ بن عمار

شدو قراه وقال:شدرنا فبلان لوخرين؟

شاف فمعاذ ونطقحتى واحد معمرو تقدا من عند ميمون...كيعرفو المحل ولكن ميمون مكيعرفوهش..كلشي كيعرف غي معاذ

معاذ:(حاني راسو)ففففففف

شاف فيهة البوليسي بابتسامة سخرية وقال:هاك دي هذا وديو ميمون يدير تحليلة كي تخرج أنا لول نشوفها

...:علم الشاف

خرج ورجع لاخر لتحقيقو قايل :ياله عاود ليا لافير كاملة

معاذ:واش يضمني ؟

...:(ضحك)هههههههه خصك غي الضامن أولدي غا هضر راها مقودة علييك..شكون مول الحشيش؟ميمون؟

معاذ:لا..المعلم مافراسو والو..خدام مع ****** كنشد من عندو بحالي بحال لي مبلي كنكميه وصافي واحد نهار ݣاليا نتا فبلاصة فيها الرواج والناس داخلة خارجة..عطاني طرف بعتو ليه دغيا..عاود زادني وبعتو وبقا كيعطيني بزاف وكنبيع

...:كنتي كتخبيه وسط السلعة؟؟

معاذ:اه..المعلم كيجي مكيقلبش بزااف..كنخبيه مزيان فاش كيمشي كنبيع

...:شحال ونتا كدير هادشي؟؟

معاذ:شهراين

..:الغبرة؟؟

معاذ:مبعتهاش غي عطاها ليا نخبيها..ݣاليا غيدوز عندك واحد خونا مع ستة عطيها ليه..حتى قرقبتو علينا الشااف(بترجي )أنا الشاف مداير والو غا مݣدم

...:ميمون مفراسو ولو؟؟

معاذ:المعلم معارف والو على داكشي..مكيكميهش كاع كان كيلقاني كنكمي ومكيهضرش

...:(تبسم براحة وغمز صاحبو)ديه يقيد أقوالو..وصيفط تقرير بالجديد..دابا المحامي يحضرعندي

..:واخا الشاف

عتارف معاذ بلافير كاملة وبرأ مبمون بأقوالو وبهذا الدليل لول نزاح..داوه يدير تحليلة ديال الدم والشعر باش يشوفوه واش كيتعاطا ولالا..وميقدرو يديرو حتى شي ٱجراء الى مخرجاتش التحليلة فصالحو

تاصل المحامي بجمال وخبرو بالجديد..خلاه مفرنس كي قطع عليه نطقات نزهة:خبار الخير؟؟

جمال:(براحة)الحمد لله البرهوش عتارف بلي ميمون مامعاهش وبلي هو مول الحشيش وغي مسخر

كلشي تنهد براحة وتفاجى قلبو..نطقات نزهة:صافي غيخرج ياك؟؟

الزاهية:(بفرحة)حمدتك ياربي وشكرتك لي خرجتي ليا ولدي منها...ولدي مرضي

عبد الرحمان:كمل؟

جمال:خصها غي تخرج التحليلة ديال الدم بلي مكيتعاطاش الغبرة باش يتبرأ نيت

الزاهية:(حركات صبعها بنفي)أنا ولدي ماكيكمي ماكيشرب مكيخرج طريق..ولدي دغري وكيعرف غي من الدار للخدمة..

الزاهية:(حركات صبعها بنفي)أنا ولدي ماكيكمي ماكيشرب مكيخرج طريق..ولدي دغري وكيعرف غي من الدار للخدمة

نزهة:(مبسمة براحة)الحمد لله ياربي...خص المحامي يݣولها ليه عالله غي يرتاح شويا معرفت حالتو كي غتكون

صالح:حالة الحبس وصافي..هادي دير ليه العقل خصو يعرف شكون مخدم معاه

براهيم:وامتا يخرج ؟وامتا يرجعو ليه ديورو؟

جمال:(ناض)غنوض نشوف المحامي ونهضر معاه

براهيم:تسنا نمشي معاك

جمال:(غادي متجاهلو)مكاين لاش

نزهة:جمال عرف لينا أخويا امتا يخرج

خرج جمال يتذاكر مع المحامي فحين نزهة عيطات خبرات خوتها أما حتى مها كانت شادة الطريق عندها مقدراتش تخلي بنتها بوحدها..

فالقلعة كان عبد الهادي ومنعم مريحين فدار خالهم كيذاكرو كأي خوت

منعم:خصنا نوضو نضبرو على الكرا

عبد الهادي:مالنا غنسكنو مجموعين؟؟مي غتبقا معايا أنا

منعم:فينما بقات هو هذااك...(بتعب)وحلة وحلنا فيها المصري والله كنا هانيين صدقنا كاع لي جمعنا نحطوه فالرهن والكرا..

عبد الهادي:خصو غا يخرج بعدا منها..مديالوش الحبس أصاحبي

كنعم:شتي هذااك غيسمعوه المصريات تشد يجيو منين ومنين يخرجووه عندو الزهر كيهرس الحجر

عبد الهادي:تاحد مالقاها كي بغاها

*****

وصلات الخبار لميمون فالحبس ورتاح نفسيا ملي براءتو نوعا ما بانت ..شكر ربي فخاطرو وحمدو أنه خرج منها واخا دوز تجربة صعيبة على قولة المغاربة "الحبس ماتبغيه لعدوك"

وماشي أي حبس..الحبس المغربي لي كيتعتابر من بين أخطر السجون حيت فيه نواع وشكال تالمجرمين ..

وصلات حفيضة وجابها ولدها عند نزهة لدار جمال مبغاتش تخليهم بوحدهم..كي حلات عليها الباب تلاحت عليها معنقاها وطلقات دموووعها فحضن مها مزيرة عليها وكتبكي وتشهق كأنها كانت كتسنى غي مها تبان باش تنفاجر

هي مرا وقوية ودارت جميع الإحتمالات باش توقف معاه لكنها بمجرد ماشافت مها نفاجرات حيت شافت ففترة قصيرة بزااف وجوه مختالفة...شافت الزين والخايب وشافت لي هامو ميمون ولي غي دايرو طريق..

حفيضة:(كتبطب عليها)وصافي أبنتي الله يرضي عليييك برااكا

محمد:(بهدوء)نزهة براكة درتي ݣنازة

نزهة:(بعدات على حضن مها)حبستها حتى عييت مقدرتش هءهءهء راجلي أمي كان غيمشي ليا

حفيضة:الحمد لله خرجات على خير(كتمسح دموعها)

الزاهية:(جايا عندهم)لالة حفيضة

حفيضة:(سلمات عليها)على سلامتو أختي لهلا يعاودها عليكم

الزاهية:(التعب متمكن مها)الحمد لله..الى جات من عند الله مرحبا بيها لا جات من عند العبد لا سماحة ليه

فتيحة:(جات كتمسح على ظهر نزهة)صافي أختي براكة طيبتي عينيك..هاهو غيخرج لينا بخيير وعلى خير..

دخلو كاملين للصالة وجلسو كيهضرو فموضوع الساعة ميمون..الزاهية لقات ݣرينتها كتعاود ليها وتشكي وتنفس على همها..فحين نزهة غي ساكتة وكتشوف العيا النفسي والجسدي مجموع فيها..هزات عينيها بصدفة ولقات براهيم حاضيها قلبات وجهها باستحقار وبدات كدعي فيه فخاطرها حتى دخل جمال

نزهة:أمدرا؟؟

جمال:ݣاليا المحامي غدا غا تخرج التحليلة و 12 ساعة يخرج

نزهة:(براحة)الحمد لله ياربي

الزاهية:حمدتك ياربي

فتيحة:خصنا نديرو المعروف (الصدقة)

الزاهية:يخرج ليا ولدي ونطعم القلعة كاملة غي يخرج ليا ولدي على خير

فتيحة:رشيدة غتجي صباح أمي مقدراتش تصبر

الزاهية:الحنينة ديالي حتى هي غتكون تشوشات على خوها..

دوزو ليلتهم على أعصابهم..نزهة مشات هي ومها وخوها لدارها باتو معاها فيها..بايتة كتقلب فالفراش بحالا كيقرصوها الجنون مبغاش النعاس يجيها بتاتا حتى سمعات اذان الفجر..ناصت كتلعن فالشيطان توضات وصلات ودعات معاه هو بالراحة والهناء..

هي من تطبق عليها مقولة "صبرت ونالت" بمجرد مكتفكر شنو داير معاها كدهي معاه من قلبها بالراحة والفرج.. رجعات تكات فبيتها دايرا الساعة على التسعود..كي صونات ناضت كتجمع الدار والجهد فيها جهدين..دوزات عليها خفا زربا ووجدات الفطور

كي فطرو وصلهم محمد لدار جمال صبحات عليهم كتسنا فيه يمشيو يشوفو شكاين..وبالفعل غي شرب قهوة كحلة مشات معاه كيسولو ويستفسرو فالمحامي

...:(هاز تحليلة فيديه)هادي تمشي لوكيل لملك..ميمون ماداير والو خصو يخرج

..:واخا الشاف

المحامي:سعادة العميد شكرا بزااف..

العميد:كمل الإجراءات وغيخرج

المحامي:ان شاء الله غنكملهم ويخرج..

العميد:24 ساعة وياخد ممتلكاتو عادي

المحامي:داكوغ مغسي بوكو

خرج المحامي مفرنس عندهم وقال:الحمد لله ..ثبتات البراءة ديالو..خرجات التحليلة فصالحو ..غيصيفطوها لوكيل الملك ويخرج قرار باش يطلقوه

نزهة:(بفرحة)الله ياربي..امتا غيخرج نتسناوه؟

المحامي:الإجراءات غتعطل أنا غنتكلف..سيرو نتوما يقرب يخرج ونعيط ليكم

جمال:غنبقا معاك حتى تسالي كلشي (شاف فنزهة)ختي سيري للدار علميهم

نزهة:عفاك أ جمال غي يقرب يخرج صوني ليا ...بغيت نتلقى ليه

جمال:(مبسم)واخا أختي

******

خدات طاكسي لدارها وصونات للزاهية بشراتها زغرتات ليها فوذنيها فرحانة والتفرنيسة هاربة ليها ..كلشي فرح ليه وباركو ليها..

نزهة دازت تقدات ومشات تحداݣ عاود..مخلات موجدات ليه كاع لي طاح فبالها كيعجبو كطيبو ليه بلا عجز عليها فرحانة حيت غيخرج ..طرفات الدار وعطراتها رجعات فيها الحياة من جديد بعدما غاب بصيص الحب فيها

دازو ساعات طويلة حتى وصلات العشية عاد صونا ليها جمال لبسات عليها وخرجات كتزرب شادة طاكسي موقفات بيها تال قدام الكوميسارية ..واقفة حداهم كتسنى آخر مراحل الإجراءات تكمل..

ماهي إلا نصف ساعة حتى بان ليهم ميمون رفقة المحامي ديالو خارج والتعب نايل منو..ستنشق هواء الحرية ونطق:الحمد لله...

يتبع...

‎