طلعات نزهة للفوق جبدات السلعة تاتشوف وتاتقيد بشنو غتبدا وهي تنطق:إيناس نتي كملي التنقية ماخصش تجي العشية حتا نكون خلطت سلووو باش تجي الميمة تعاوني فالعشية هي وطاطاك سميرة
ايناس:واخا أعمتي
*****
يوم السبوع بعد أسبوع لي مر حافل عند نزهة..وجدات فيه كلشي وحمرات ليهم وجههم ماخلات سلو ماخلات حلاوي بشكال والنواع تحلف تريتور لي مقاد داكشي ..تا من البساطل صايباتهم ماسالات تابغات تموت بالعيا..قصدات أولا الحمام غسلات وتنقات ومشات ضارت بالحالة بحالها بحال أي بنت ودات معاها إيناس وجنات. .
السبوع غتيدار غي فالدار بين العائلة بحكم راجل دعاء دارهم كبيرة وقررو يديروه غي فالصالون لي كبير والعائلة ماكبيراش بزاف عرضو غير المقربين..
لبسات قفطان فالأخضر ملكي بعدما رجعات من الكوافورة بماكياج سموكي والعينين مخدومين من داكشي..مع طالون رقيق تاتبان ليك ترماحتها مهزوزة وحداها إيناس تاتلبس تا نطقات:ياختي وعلى كرش ولات عندي فففف تفووو(تتقاد السمطة)
إيناس:غلاضيتي أعميتو خصك تنقصيي
نزهة:كانفكر نتقيد ف شي صال نتحرك شويا راه إلا بقيت هاكا نبان حاملة. .
دخلات عليهم سميرة مأنقة تاهيا ومفرنسة وقالت:ياله الحادكات..نتي مك من صباح وهي كاتصوني
ضحكو عليها وخرجو كاملييين متوجهيين للسبوع لي دايرينو غي للنسا بوحدهم الرجال سبقو فالغدا..مع وصلو نزلات نزهة تاتقاد فشعرها وقفطانها وهي تنباعث عليهم مليكة من حيث لا يدروون طارت على شعر إيناس مغددة:فين كنتي السلݣوطة ها .
كلشي ترعب وهي تجرها نزهة وتاتهضر بين سنانها: واش حماقيتي طلقي من البنت أويلي. .
مليكة:نتي غادخلي سوق راسك ولا غانوريك لي مايعجبك(مزيرة على بنتها)دوزي يالكلبة خرجو رجليك للشواري
جرجها عبد الجليل منها بنطرة وضار فيها:تجمعي شويا نتي..راه مع الناس. .
حفيضة:مالكي أبنتي على هاد الشوهة ياك لباس ؟؟البنت كانت معانا. .
مليكة:(طلقات حلوقها)الالة عطيييو لبنتي بتيساع بغيتووو تخرجووها الطريق ..(شافت فنزهة)فرقي عليك بنتي ولا مايعجبك حال نتي باغيا تخرجي ليا عليها
نزهة:(خزرات) شوفي أديك الشيخة هادي بنت خووويا ومع عمتها وماضربتهاش على يديها هي كايعجبها تبقا معايا..والى مسكتيش غانفرج فيك هاد السبوووع . .
تسمع صوت محمد وراهم مخنزر :ياك لباس؟؟
مليكة:أجي نيت أخويا فاريها ليا مع هاد ختك باغيا تخرج ليا على البنت..داتها من أشمن وقت ومرجعاتها تال دابا كي الطعريييجة. .
شاف فبنتو وخزر وقال:تحركي خلي السبوع يدوز بخيييير
إيناس:(تترعد ومكمشة فعمها)بابا أنا غي بقيت مع عمتي وصافي
دخلو للدار وتايسمعو فصوت العاونيات من الصالون لي عامر غي عيالات دخلو وسلمووو وجلسو تينشطوو بيناتهم..نزهة ملي حما الطرح وهي كتشطح مع سميرة وختها سعيدة لي فرحانة أما دعاء هازا التربية نااشطة وتتضحك..
نزهة مثلها مثل غاع النسا محزمة باقرب شال وعطاتها للشطيح وللرديح وتلوااز تا فرغاات الستريس عاد شدات الارض ..نشطو وضحكو العائلة بيناتهم ..
عجوزة دعاء جالسة مع خواتاتها تايدوزو كاسهم بحليوة والسربايات كايفرقو فالمشروبات المتنوعة ولي حرصات عليهم نزهة وجالسين كايرتاحو تايرويو ريقهم بعد جلسة الشطيييح
...:زوينة هاد الحليوة فنة..نتي لي صايبتيها؟؟
العجوزة:لا خالة دعاء الله يمتعها بالرضى..صايبات الحلاوي كامليين
...:الله يعطيها الصحة..بنينة كادوب فالفم
...:اييه عجباتني مقومة وباينا مصايبة بالخاطر يعطيها الصحة
العدوزة:راهيا شفتيها(كاتنعت بصبعها)ديك لي لابسة لخضر
...:تبارك الله غزاالة سعدات لي واخدها
العدوزة:والله ياختي الى زوينة وضريفة والصواب والاداب ولكن مسكينة باقي بلا زواج
...:(بصدمة)أويلي..داك الزين كولو ومامزوجاش اوا الله يعطي للرجال العمى
العدوزة:والله كون بقا ليا شي ولد حتانزوجو ليها حيت نقرة وحلوة. .
...:شوفي أختي راكي عارفا ولدي عرسوو قرب وماكرهتش تشد ليا هي الحلوة. .
العدوزة:موحالش واش كاتشد داكشي..ولكن نسولها ليك!!
...:حتا تهضري ليا معاها الى بغات تخدم ليا. .
العدوزة:إن شاء الله
عند نزهة كانت مجمعة مع مها ومرات خوها تايضحكو مع اللعابات ومليكة تاتخزر فيهم معندهاش معاهم بتاتا جايا غي بزز..تحط العشا كلاو وشربو وشكرو البساطل لي صاببات أما الباقي راه مطيبة الطباخة ..دوزو عشيتهم بالضحك واللعب تاخرجو النااس وبقاو غي هوما بيناتهم. .
عبد الجليل:الى جيتي تفكري فيها أختي راه كازا كلشي كايتمشى فيها..عطاك ربي صنعة فيديك ومتستاغليهاش..الناس راه ولاو دايرين مشاريع غي من الدار ورابحين.كاتنوض المرا كاتشري غي الحوايج بالجملة وتعاود فيهم البيع تربح غي عشرين درهم فالبياسة وهاهيا مدخلة الصرف..
نزهة:كانشوفهم نيت فالانسطا كايخدمو غي من ديوورهم ولكن داكشي كايبغي الصبر. .
سميرة:من عندي أنا غي توكلي عالله شدي غي كوموند فالشهر براكا عليك لا خلات ليك غي الف درهم براكا. .
ضحكات نزهة على نيتها وقالت:غاتخلي ليا الملاين لواه هههه أويلي على الف درهم
عبد الجليل:لا ماشي لديك الدرجة..فلول ماغتربحيش بزااف ولكن من بعد غاتبداي تعرفي وتربحي
نزهة:(تنهدات)يكون خير ان شاء الله. .
الام:غي فكري ابنيتي لا تجريش على رزقك
سكتات تاني ودماغها كا يفكر ويفصل ويخيط تا وصلو ونزلو وكلها توجه لبيتو..ديماكيات وجهها وراسها كايضور بالأفكار حول الموضوع ماعرفات واش تزعم ولا تدير بناقص
محسات براسها تا كانت ففراشها كاتضبط المنبه وكاتحاول تقلب على النعااس. .
-شروق الشمس لا ينتظر النائمين..
هي عبارة الى تمعنتي فيها غتلقا أنها كتعطي ملخص للحياة..بغيتي تخدم نوض بكري بغيتي توصل نوض بكري لي بغيتي تديرو نوض ليه بكري حيت الحياة ماكتوقفش عليك والى منجحتيش نتا غاينجح غيرك وهاكا غادية خاصك غي تعرف إمتا تنوض وفين تنوض وعلى قبل من تنوض.
وهذا حال ميمون...ناض بكري مع السبعة تالصباح ماشابعش نعاس وعظامو واكلين العصا حيت نعس غي فالصالة..جر كلاكيط ديالو للحمام لي بمجرد ماشعل فيه الضو باانت جماليتو..عصري مئة بالمئة تحشم تبول فيه..قضى حاجتو وغسل سنانو و وجهو وخلاه تايقطر عالله اوكد وخرج لبس عليه سورفيت كحلة سخونة لاح فوقها تجاكيط وزاد جار بانطوفة من جديد ..
نازل من عمارة راقية وساكنينها غي الطبة والمهندسين والطونوبيلات لي حداها غي الحديد الواعر ..طونوبيلتو بوحدها لي كاتبان مسخسخة قدامهم..شد الطريق للمحل ديالو حيت عندو سلعة خاصوو يوقف عليها..غادي وساكت كايدوز فشوارع البيضاء تاوقف قدام محلو ونزل منو تايتعجز وتايضور فالسوارت
كان عارف غيلقى الدراري حالين حيت تايسبقوه مع دخل حنحن ونطق:السلام وعليكم
...:جا عمر لي فولاد صالح خلص ليك ربعة تالمليون وݣاليك خلي البقية تالمنبعد
مبمون:شحال بقا؟؟
...:معرفتش
ميمون:(ساط)واا صبااح هو هذااا معاكم..والى ماعرفتيش شكون غايعرف ياك تنݣوليك قيد
...:أ تنسا المعلم
ميمون:تاتنساا!!!الله ينزل عليك المسخ تاتنسا غي لي بغيتي ففف(جيد تيليفونو صونا للسيد وعرف شحال تايتسالو)بقات مليون ونص ..قيدها ومانبقاش نلقا بحال هاد الخدمة
حناو راسهم معتاذرين وهو ينطق ويديه تاتجبد فلوس من جيبو:شد جيب لينا شي بطبوط وشي مسمنات باش نفطروو
مشا تيفرنس هزهم وقال:واخا
ميمون:(ضحك)هههههههه دنموو سمع المسمن وزاد تايضحك مضروب على كرشك
نطق الدري لاخر:لا المعلم راه البنت لي كادير المسمن لي تاتضحكو ههههه
ميمون:شوف ليك الناس لي تاتعرف تطيح!!هههههخخ بحالي أنا نهار عجباتني لقيتها مزوجة وبنتها تݣول ليا جدي خههههخه
مشا الدري تايضحك يجيب الفطور وخلاه هو تايعاون الدري يستفو السلعة مجمعين تقول عليه ماشي مول الشي. .
ميمون بطبعو انسان عادي..الى شفتيه فالزنقة ماتقولش عليه عندو الزبابل تالفلوس تعطيه غي شي حاجة هينة ..إنسان بسيط بزاف عانى فحياتو باش يوصل لشنو فيه هو دابا. .
معروف بولد المصري ماشي غي هاكاك لأن الأب ديالو مصري والأم من قلعة السراغنة..كان باه مصري وتايجي للمغرب بزااف حيت عندو صحابو بزاف فيها ومن بين صحابو خال ميمون لي زوجو ختو بقلب صادق..
غادرات ختو مع راجلها لمصر بزواج تقليدي مئة بالمئة ماكتعرفوش وماكايعرفهااش تا هضرتو مكتفرزهاش بزااف وزطمات معاه فبلد الفراعنة..لقاتو عايش مع مو وباه و خواتاتو وعاشت معاه الويل لمدة عامين..العصا والسبان والظلم ولأنها فبلد المهجر مكانش عندها فين تمشي تا حملات بميمون وجلسات صابرة عليه تا نهار فاض الكاس وتخاصمات مع خواتاتو لي دائما كاينعتوها بالسحارة نظرا للسمعة لي عند المغربيات تما وكباقي الدول العربية لي واخدين أن المغربيات سحارات. .
تخاصمو ودارو ليدين سلخاتهم المغربية كاملات وكرشها لفمها جا باه ولقا الروينة وأكيد جا من خواتاتو سلخها هي الأخرى مزيان تا جاتها ولادة مبكرة هزها لسبيطار ولدات وليد لكن مجاتش فين تفرح بيه تا كان طلقها ولاحها للزنقة فمصر ماكتعرف حد تما من غير الله...
ولحسن حظها كانت كاتشفر ليه فلوس وتاتخبي مشات بيهم لأقرب سفارة مغربية وعاودات ليهم مشكلتها وساعدوها باش تنزل فحالها مخلية وراها كبدتها مع بااه لي شافتو مرات قليلة فقط تا الرضاعة ملحقش يرضع منها. .
لقات راسها منبوذة لأنها مطلقة و ولدها بعيد عليها..بكات عليه الدم و كل مرة تصوني للأب "حسن" تاتطلب فيه يرجع ليها ولدها لكن كان الرفض هو الجواب. .
شواها على ولدها لمدة عامين ماكتاكل ماكتشرب ما كادير تاحاجة من غير تبكي على ولدها وتسمع فالهضرة من باها ومها لي رافضين فكرة أنها تطلقات نظرا للعهد لي كانو فيه هوما..
تالواحد النهار جاها مكتوبها وجاها عرض زواج مايمكنش يفلتوه خاصة أنه عزري وقابل بيها واخا مطلقة وبلا مايفكرو من جديد، زوجوها ليه غي هاد المرة كان حداهم تاهو قلعاوي من السراغنة وبمجرد ماتزوجات ولدات بنية وتناسات حرقة ولدها شويا. .
هاد الأخير لي ماعمرو عرف مو شكون هي كايعرف غي باه ومرات باه وعماتو لا غير لي تزوجو وخواو الدار خلاوه مع جداه لي تكلفات بيه لكن زوجة الأب رفضات رفض قاطع الربيب وبقات كا تنݣر عليه مدة ربع سنين تا نزلو للمغرب ودااه حطو ليهم بعمر صغير بزااف خاسر عليهم كلمة وحدة
"مش عايز اشوف وشوو تاني" . .
هزو خالو وداه لمو لي بكات وفرحات بشوفتو تعنق وتبوووس وقررات تخليه معاها لكن زوج الأم مابغاش الربيب وتا عائلتو مبغاوش ولد الغريب يتربا معاهم وكانت ديك ساعة والدة جوج مع راجلها وخافت من الطلاق وجا الإقتراح من مها أنها تشدو تربيه ليها وتخلات عليه من جديد وتلاوح هو مع جداه و جدو لي معاشوووش بزاف معاه بمجرد ماوصل ست سنين كانو ماتو بجوج بالعافية لي شعلات فدارهم فواحد شهر 8 ب الصهد فالتبن وهو الناجي الوحيد حيت خوالو كلشي عازل داارو . .
بقا ميمون ذو الست سنوات وحيد فيدو فقط لوحة ديال الجامع هي لي نجا بيها من الحريق وهنا تاتبدا معاناة الترحال ..لا أم لا أب كلها بنا حياتو وكلها وشنو مقرر يدير ..شاف فيه خالو لوجه الله وهزو لدارو داه معاه ودخلو للجامع يقرا القرءان ويتعلم ماينفعو لكن ميمون كان ضاسر ورافض يقرا وتخلى على لوحتو بعدما شد شويا تالقرءان وشي حروف قليلة وكايجمع الكلمة فقط بمعنى نصف أمي..كيعرف يقرا ويكتب ولكن عادي ماشي قراية نيت حالو من حال الجيل القديم بزاف لي داز من المسيد وخرج للتعليم بفرق بسيط أن ميمون ماعندوش وراقو فالمغرب باش يدخل للمدرسة أو بالأحرى ماعندو تا ورقة ...
وفسن التعليم هو بلاصة مايهز الورقة وستيلو هز العصا تايسرح البهايم وتايدير الترحال..تكلف ببهايم خالو تايسرحهم بالسيمانات فالقرى ويرجع بعد وقت لابأس به ..
كبر ميمون بين البهايم ووسط البلادات لا حنين لا رحيم إلا الله ..كان النهار لي تاتجي مو لعند خالو عندو بالعيد ..يتلاقاها هي وخوتو بالعناق والبوسان ويتهلا فيهم وتاهيا كتجي مرة مرة تسول فيه وتجيب ليه الحوايج..
باختصار دارت ولاد خرين نساوها فحرقتو أي نعم منساتوش وغيبقا ولدها لكن من راجل أخر فكانت محطوطة وسط قرارين واش تربيه وتكرفص عليه ولا تمشي تعاود تبني حياة أخرى واختارت الثانية وعاش هو مع خالو ومرات خالو لي ماشاف منهم غير الخير والإحسان.
كايكون شوي تاع التمييز أكيد لكنو بعقلو الصغير ماكيفهمش..ميمون مالقاش لي يقوليه سير تدوش وسير تغسل وتنقى واجي تاكل كان إلا ما دارش هادشي لراسو ماكاينش لي يقوليه ديرو..تايغبر بالأيام ولا من حد سائل عليه ..ديما مخشي وسط البهايم والروث وطالقها تسرح ومولاها ربي وديما الضحكة على وجهو منورة جايب الزين المصري الحرش بإمتياز..وطولتهم وسموريتهم تا من فعايلو كايميل ليهم حيت الدم تيغلب. .
هادشي كولو وباه عمرو سول فيه بتاتا ماكانش كايعرفو كاع وديما تيسول خالو تيقوليه نساه كيما نساك تاهو..
شاءت الأقدار أن خالو يرحل للدار البيضاء بعدما تفرق الورث ديال جدودو وكلها شد حقو واليتيم بالوالدين عايشين بقا الله كريم لا دار لا دوار ..
غادر خالو للدار البيضاء وبقا هو ملاوح بين هاد خالو وهاد خالتو ومو..نهار هنا يوماين لهيه وأيام كثيرة فالسرحة تا لقى راسو وصل ل 14 لعام غا ملاوح ومع ذلك ديما ضاحك وتعرف بخفة دمو وضحكو مع الغريب والصديق . .
وفأخر زيارة لخالو ليه داه معاه للمدينة بحجة يقلب ليه على خدمة فين يتخشا..مشا معاه بنفس الحماس تاع ديما معارف والو..لابس عليه سروال كحل توب كولو مدبووغ بالصابون والوسخ وتريكو نص كم ورجليه فيهم صباط معرفو محلول ولا مسدود ماعندو تا حاجة من غير هاد الحوايج وفليساتوو لي شد من البيعة تاع البهايم ديالو ..جوج نعجات وجدي وحولي فقط..
وهنا غاتقلب حياة ميمون لمنحى آخر من سراح لعامل ب إحدى محلات التغذية فكازا أو بالأحرى مول الحانوت..خدمو خالو مع واحد السيد فكازا شلح قح بايجارتو عادي تايبيع مع الناس ويشري ورغم أنه مقاريش لكن كان تايسمع الهضرة وتايدير لي تقال ليه تا طول مع الشلح مدة خمس سنين وشد الحرفة ولى تايعرف منين يتقدا ومنين يجيب ومنين يخرج ومنين يدخل لكن نيتو ديما طاغية..
خمس سنين ماكاينش تواصل مع مو ولا باه ..تايشد مرة مرة من عند السيد ويصوني لمو عند راجلها هو لي يسول فيها أما هي ماكاينش تسوال بحالا برد قلبها عليه وتناساتو بالطاشمة لي ولدات وحتا باه راه مكانش تواصل بتاتا ومكانش تايعرفو. .
كبر ميمون وولى راجل بضخامتو وسموريتو ومواقفو الرجولية مع الناس وباقي حوفار بوعاري خدام عند الناس تا لواحد النهار كان فمحلو جا عندو خالو ومعاه راجل وعرفو عليه أنه باه وجا يشوفو..فرح بزاف وتعانق معاه تا لاخر فرح بشووفتو ..
ميمون كان باغي غي يعمر الفراغ العائلي لي عندو فقط وباه ومو هوما لي باغي..تعرف عليه وجلس معاه وعرفو شكون بدون مايحااسبو نهائيا وتا لاخر مفتاخر بيه وبغا يديه معاه لمصر لكن ميمون رفض يخرج برا المغرب وكانت عاجباه حياتو واخا عند الناس لكن حسن بالنسبة ليه واخا لا عيد كي ناس لا عواشر ولكن مرتاح فيها وهنا هو الفرق بينو وبين الناس انه قنووع وعندو واحد راحة البال يحسد عليها ..
مصفي بينو وبين الله ومرتاح رغم انه عرف ان باه جا قلب عليه حيت فقط ماولدش ولد مورااه..فزواجو الثاني ولد فقط ربعة تالبنات معطاهش ربي الولاد وجا تايقلب على الخليفة وبغا يعطيه سميتو لكن لقا خالو سبقو وناض جرا معاه تتجارا تا دار ليه وراقو وعطاه كنيتو حيت كان وصل للسن القانوني وخصو يدير لاكارط. .
توالات عليه الايام والسنين وهو خدام عند نفس الراجل تايبات فالحانوت عندو مع الفيران لي ياكلو من كلشي ومع سراق الزيت وهانيا عندو ماتماشي مع أي وضع تا ضرب معاه عشر سنين بالحساب..كانت ايجارتو ما كايقيسهاش قليل فقط كايعطي لخالو يخبي ليه والباقي تايشري منو ولكن قليل ..
لا لباس كي الناس لا فلوس كي البشر تاحاجة ماتبان عليه تا جمع مبلغ مالي مزياان وقرر تاهو يدير ديالو لكن المبلغ مكافيش وناض دخل معاه خالو شريك فمحل كرااوه وعمرووه بالمواد الغدائية فمنطقة ياله تسكناات ..وقف على شغلو ومحلو بيديه..
تكلف بالسلعة والتقدية تتستاف ويسربي الناس وكلشي بيديه وتتزوهر عندو فالعواشر مجاش فين ضرب ربع سنين تا كان المحل تروج تما وعمرات البلاصة بمعنى تسكنات وهو المحل الوحيد لقريب يعني كان تايضرب يدو مزياان..
شوي بشوي جاب دري خدم معاه عاونو وبمرحلة بمرحلة كبر مشروعو ودار حوانت خرييين تا عطاه ربي الرزق من حيث لا يحتسب ودار محل تالجملة كاااااع فقط لانه قنوع وصبور وماتشكااش وعمرو قنط من رحمة الله . .
-وصل ميمون لشنو هو فيه بعرق كتافو وبخدمتو وبتمارة لي ضرب وتا واحد ماعاونو الا الله وخالو..لي قرا فيه الحسنة ومابغااش يخليه يضيع رغم أنه شيئا ما ضاع حيت ماقراش وماعااشش مع والديه لي كل واحد فيهم مليوح فقنت . .
مع مو ما رجع التواصل دائم تاتوفى راجلها وكبرو ولادها لي هوما خوتو ولي كان ديما تايشوفهم وعندو عزاز..عندو من مو جوج بنات وربعة تدراري ومن باه ربعة تالبنات ..هاد الأخيرين شايفهم مرات قليلة بزااف فاش تاينزلو مع بااه للمغرب فقط لكنو تايعزهم وديما تايعيط يسول فيهم..
اليوم راه فعمرو 41 سنة ..ضرب فالعمر و وصل سن كبيرة نضج وكبر لراسو واليتيم بالوالدين حيين ولى راجل وخرج حار وحرش وبنى راسو براسو. .
عند نزهة لي ستأنفات عملها عادي كي ديما وعقلها خدام كايدي ويجيب ف فكرة خوها..من ديما كانت تاتمنى تدير تاهيا مشروع خاص بها لكن ماشي بهاد الشكل..بغات محل وتدير فيه لي بغات يعني يكون مشروع ملموس فأرض الواقع ماشي من الدار ناسية أن المشاريع المدرة للدخل هي لي من الدار. .
فالمشاريع كاينين أنواع لكن أفضلها هوما لي من الدار..كايجي أي واحد كيدير سوا بيعة وشرية ولا الكوموندات ولا النقيش ولا الطرز ولا الراندة وماغيرها من الحرافي وكيدخلو بيها فلوس صحيحة بلا مايخلصو الضريبة..المشاريع لي من الدار عندها إيجابيات كثيرة أهمها أن الناس ماكيلخصوش الضريبة وتاتخدم ديال راسك وولينا كنشوفو بزاف تالناس دايرين ماركات تجميل وتايقادو فالدار ويبيعو فالانسطا أو ناس تايخدمو كوموندات وبوكسات ويخرجوهم وداير بنادم الفلوس ومضور صريف . .
طول اليوم وهي دماغها خدام تيحلل فالفكرة ويدي ويجيب باغيا معامن تناقش ويحل عينيها كثر..مع رجعات للدار دارت كاسكروط معاهم وهي تجبد الموضوع مع عبد الجليل. .
- نزهة:شنو بان ليك أخويا نزعم فبلان لي كوموند؟؟
عبد الجليل:علاه مالك لي ماتزعميش!!العمر كايجري أختي والوقت بدالة ..نتي فيديك صنعة علاش ماتخدميش بيها وترزقي بيها..أنا متنݣولش ليك حبسي خدمتك لا كملي فيها وخدمي تالوخرا..ديري معارف وتعرفي وخدمي ونتي أصلا راه غي صحاباتك تديري معاهم لباس. .
نطقات حفيضة لي شادة تيليكوموند:خوك عندو صح أبنيتي..شوفي غي جارتنا بنتها تبارك الله عليها كاتصايب غي المسمن والبغرير والحرشة وكتبيع . .
نزهة:ويلي أمي بغيتيني ندير فراشة ونبيع. .
الام:لا ماشي هكاك..أنا ݣلت خدمي مع الناس بحال خالة رضى وخرجي ليها شغلها وهانتي ربحتي. .
نزهة:(بتساؤل)وشحال غا تخلي ليا كاع هاد لافير؟؟
عبد الجليل:الى خلات ليك غي 200 درهم راها مزيانة
نزهة:(برفض)الا غا نخدم على ميتين درهم غا بلاش
سميرة:أختي راه غي مثلا ݣاليك راه ماشي غاتشدي كوموند صغيرة راه عرس أكبيدة هههه يعني فيها الفلوس ونتي وشطارتك شدي ليهم تا البساطل . .
القرارات لي كنتاخدوها مصيرية فحياتنا ديما تيكون عندنا فيها تردد..كاين لي كايزطم بلا مايتسوق وكاين لي كايخمم مية تخميمة عاد كيدوز المقص..ونزهة باتت تتفكر وصابحة تتفكر فالأخير ربطات الإتصال بدعاء فوقت الغدا وطلبات ليها نمرة خالة راجلها. .
ومجاش فين يوصل العشية تا كانت دارت معاها تدوز عندها للدار..علمات مها يوجدو كاسكرووط وفعلا توجد وجات السيدة دارو معاها الصواب وجلسات معاهم مجمعين ضاحكين تا دخلو صلب الموضوع لي تجبد من طرف أم نزهة
سميرة:الصالون ضربيه علي غدا نهزو وتلقاي التيساع والماتريال راه عندك الضروري غي سلكي وصافي حتا ديري الفلوس وشريه
نزهة:يكون خير
الام:الله يسر ليك أبنتي ياربي ويعطيك الرزق. .
الكل:أمين
*****
فواحد الدار فخرجة تكازا عبارة عن فيرما صغيرة مضلمة ضارب الضو غير فدارها المسكونة فقط..واقف عساس قدام الباب كايحرك راسو مع الموسيقى الشعبية لي مسموعة بجهد تالعندو ماكرهش ينوض يشطح..هاد الصوت كان مسموع من الداخل فواحد الصالون كبير مفرش بالتقليدي مزيان وفيه ربعة تالرجال كل واحد شاد سداري وفيديه تيو تاع الشيشة منخوي عليه. .
جوج شيخات لابسين قفاطن حمرين والشعر حرير كيضرب لنص الظهر محزمين بموزون تيمشيو ويجيو يشطحو ليهم. . ويحركو فطرفهم الكبير والبيوضية كتشعل منهم متماشيين مع الموسيقى الشعبية واجسامهم تتحرك باهتزاز معاها مخليا الفام عليها محلولة...كل واحد فالرجال شاد الشيشة فيدو وضايرين بطبلة فيها قراعي تشراب الغالي والقطعة على حقها وطريقها ديال السكايرية الفري والدخاخن تتصوط فالارجاء. .
ومن بين الرجال كان ميمون لي شاد القصارة بالشيشة وعينيه معسليين بالطرووفة لي تمشي وتجي عليه..ويد كيهز بيها الفلوس ويعلقهم فصدر وحدة من الشيخات وعينيه حوالو على صدرها البيض لي باين نصو من القفطان ..جرها من الكول ونطق فوذنيها منغم:سالي دغيا وياله معايا
ضحكات ليه فوذنو وطرفها التحتاني كيهتز بدون توقف؛لي بغا طامو يحل بزطامو..والقصارة عاد بدات المصري..
شد فمرفقها وعينيه معسلين بالشيشة:بزطامي عامر وتا ز*** عامر..طلقيني خلاص من كثرة الفشوش. .
ضحكات ليه ومشات عاطياه بالضهر تتشطح وتحرك فطرفها وفشعرها منوضة معاها جوج رجال يشطحو وعيونو هو باقي متبعينها منغم عليها. .
ميمون كايموت على الشيخات..فلوسو يخسرهم عليهم وهو فرحان كل سيمانة داير قصارة هو وصحابو معاهم فشكال والنواع ولي جابوها اليوم ماتعاودش ترجع حيت تايكونو دايزين عليها..نشوطي وعندو مع الهرج والضحك والزهو فالشيخات..يخسر عليهم بزطامو كامل ويرجع زيرو درهم ويفرنس من الفوق..
مع سالا الطرح وسكتات الموسيقى جات حداه نفس الشيخة مليوحة عند رجليه كتساراح وقالت بصوت عالي:مال غرامتكم ناقصة معاودوش ليا هادشي
شداتهم ونزلات كدعي فيه وتغرق ليه ممسوقاش أصلا للخلا لي نزلها فيه ..هي حلوف وحافضة الطريق أما هو عفطها عفطة وحدة للسبيطار ووجهو مسقطر من الدم..خلاها صحيحة وعلى رجليها ودروك طايح ليها السكر..ماوصل تا بغا يموت بالخلعة..نزل بزربة ودخل لسبيطار تايقلب بعينيه تا بان ليه خوه ومشا لعندو:أش كاين؟؟فينها
..:أجي اخويا خلص بعدا باش يداويوها
حرك راسو بالإيجاب وقال: واخا واخا
مشاو للاكيص عطاو معلوماتها وهي تنطق المبلغ بالفرنسية ونطق هو بعفوية:شحال بالعربية؟؟
فتيحة:الله يدير بحسابك أخويا..أنا نبات معاها نتوما سيرو
ميمون:نبقا معاك لا تخصكم شي حاجة
براهيم:ياله نمشيو حنا ونخليو فتيحة معاها تا الغدا ونرجعو
ميمون:واخا(زفر)معشية؟؟
فتيحة:اه أخويا غي سيروو
توادعو معاها ومشا بعدما دار ليها فيديها 400 درهم قايل:هادي لاخصات شي حاجة..غي توقع شي حاجة عيطي ليا واخا
حركات ليه راسها ومشا وهي تنطق:ماكاين لي كايعجبني فخوتي ݣدك سخي سخي هههه. .
مشاو الخوت معاه فطونوبيلتو تايتناقشو فموضوع مهم وداهم معاه لدارو كل واحد شد بلاصة ومشا هو حيد حوايجو ودخل للدوش عياان..خدا دوش خفيف ريح فيه راسو من تعب النهار ولبس عليه بيجامة بيتية بيناتو مسرار ومشا تخشا ففراشو تايقلب على النعااس حتى غفا. .
فالإستقبال واقف هو ومنعم وبراهيم ..صالح و عبد الصادق خوتو من مو كاملين كايهضرو فأمور الفرملية ولي رصاو عليها ..
ميمون:شحال غايخصنا؟؟
براهيم:ضبرت فيها بزز وطالبة 3000 درهم وغاتبقا معاها نهار كامل تا يتقاد السكر
صالح:غاتبات؟؟
ميمون:مانظنش
براهيم:لا سبعة غاتمشي
ميمون:واخا جيبها ووريها داري
عبد الصادق:علاش غاتݣلس عندك؟؟
ميمون:ضروري..شنو تديوها للقلعة ماتجيش فين تمرض خاصكم ساعة غي باش توصلوها لمراكش
صالح:لا اخويا دارها حسن ليها ..ماتبقاش هنا تما كاين لي يقابلها
ضحكو كاملين وهو يهضر عبد الصادق:نتا أخويا غسلت عليك يدي صافي ..عينيك ماشي خوت ماباغيش وحدة عينيك فالضريرات
ضحك ميمون وقال:أخويا عرقي مصري شابه با ههههه تايعجبني الزين
صالح:أشنو زعما ماحطيتي عينيك على تاوحدة؟؟هانتا أصاحبي بنات خوالك وبنات العائلة كثار شوف شي وحدة وتوكل ودير دارك حتانتا ..نتا الكبير فينا ومامزوجش
منعم:ههههههههه ولا جيب شي مصرية ياك عندك بنات عمك
ميمون:لا لا خصها تكون مغربية وتكون شيخة مزال ههههه(ضرب فيدو). .
عيد الصادق:الله يعفو عليك ههههه زيدو نشوفو الواليدة..
مشاو عندها لقاوها فغرفة خاصة بوحدها فايقة واخا مسخسخة..ضارو بيها ولادها وهي تترضي وتعاود خايفين عليها ودايرين ليها كي الما القليل ومهليين فيها وتايضحكو
صالح:لقيتينا أمي كانهضرو مع ميمون يتزوج
الزاهية:(بصوت متعب)بالفرحات علي نزوج البكر ديالي بلالة تنسا
ميمون:(ضحك)شوفي ليا أمي شي وحدة تكون زوينة بحالك هههه
الزاهية:شوف لراسك اولدي هه
عبد الصادق:(بغا يشد فيها)ݣاليك غايشوف شي وحدة فبنات عمامو(غمز ميمون باش يطمر)
الزاهية:(غوبشات)والله لا دخلات علي المصرية عروووسة(تعصبات)مزيان تبارك الله بقا ليا غي عائلة الكلب تكون عندي. .
ميمون:(عقد حجبانو)مي غي كيضحك معاك ماكاين لا مصرية لا والو..(سكت تا يجمع فالهضرة) و راه با هذااك أمي. .
عوجات فمها وسكتات ماتلاتش دوات..حيت هاد الموضوع بضبط تايعصبها..تتكره باه لدرجة مكتصورش ومكتحملش تا ذكرو ومن ديما معارضة علاقتو معاه ونهار تتعرفو جا عندو كتجلس تسخط تتكرهو حيت مدوزش عليها قليل. .
لكن ميمون ماكانش كايتسوق كايعطيها جملة"كيفما نتي مي حتاهو با" وكايخرج من باب واسع حيت مايقدرش يلوحو
خارج من الباب وتيليفون فيدو تيهضر مع خالو على أعمالهم..خدا سيارتو وشدها ديركت للمحل وطول الطريق دوزها تيليفونات..ركن سيارتو ونزل داخل عليهم كايلقي السلام وبدا كايشوف فالفاكتورات ويحك فذقنو
:أجي نتا..شكون خدا هادشي؟؟
شاف المتعلم فالورقة وتايضور فعينيه:كليان جديد
ميمون:كليان جديد وحاط 15000 درهم
...:ااه المعلم
ميمون:أش هادشي كاتب هنا؟؟صايب خطك كتكتب كي الطبة ياك لباس؟؟باش غا نفهم أنا هادشي
...:هانتا المعلم فيها دݣيݣ..و60 بياسة ديال الغسيل
ميمون:أشمن ماركة؟؟
...:اريال المعلم
ميمون:وبشحال حسبتيه ليه
المتعلم:بعشرة دراهم
ميمون:مممم صافي(سدهم)سير لشغلك. .
حط الفاكتورات مدا ماجاب ورجع للسطوك تايقلب شنو خاص وشنو لا باش يجيب السلعة ..قضى نهارو كاامل تما تالعشية هز سوارتو بغا يخرج مودع الدراري وكايوصي فيهم مع غادي قاصد طونوبيلتو كاتبان ليه نزهة كي الحمامة جايا..بسروال الدجين لاصق وشوميز قصيرة فالابيض فوقها كويرة سوداء وصاك فيديها الناعمة لي مزيناها باكسسوارات خفيفة..الشعر مطلوق على الكتيفات كايضرب دايرا ليه بروتين تيبان مسبسب..
خلاتو بلهلا يحزقو ليه يوقف من جديد مستنيها تاتوصل جيهتو..فحين هي ماشافتووش بتاتا تا سمعات اسمها من طرفو عاد لمحاتو..تبسمات وتوجهات لعندو بخطوات ثابثة وهو كايتسنا فيها قول تاتمشي ليه على قلبو وعينيه كايطلعوها ويهبطوها تا تبرزطات..
دارت تبسيمة بزز ومدات يديها:سي ميمون لباس؟؟
ميمون:الحمد لله ونتي؟؟(تايشم فريحتها)
نزهة:الحمد لله هاحنا كانسلكو مع البرد
شافها تاتحك يديها مع بعضهم وقال:كي دايرا بنتك؟؟
نزهة:(كمشات عينيها باستفسار)شكون بنتي؟؟
ميمون:البنت لي عيطتي ليها تعاونك(بدا تاينشط حيت شكوكو غلط)
نزهة:(دارت ضحكة رقيقة خطفات قلبو)هههه لا ماشي بنتي بنت خويا..أنا ماعنديش بنات
ميمون:(تبسم)عندك الولاد؟؟
نزهة:ههه ماعندي لا ولاد لا بنات لا راجل ديال راسي ههه
ميمون:(فرح)هههههه واݣوليها لينا مخلياني محتارمك
نزهة:(جاب ليها ضحك)حسابك مزوجة هههههه لالا حتارمني بلا داكشي
ميمون:ينعل لي يقل عليك الحيا...(ريحاتو بهضرتها)شحب الخاطر الالة تلبنات؟؟
عجباتها هضرتو تاتحسو تيدللها بدون قيود وهي تنطق:عارفة راسي بسلت عليك ولكن غي تصاوب معايا . .
ضحك وتقاد فالوقفة تا ولات كاتبان هي قصيرة قدامو ونطق:ههههه نتصاوب معاك مرحبا(دار ليها يديه بمعنى تفضلي)المحل ديالك الالة تلبنات. .
تبسمات بغنج وسبقاتو بشوي مخليا عينيه نزلو ديركت لزكها وتنهد وتبعها للمحل محنحن على قبل الدراري لي دغيا جمعو الوقفة ملي شافوها
حل ليها الباب وطلعات تتسناه هو يكمل السلعة وعينيها كيضورو معنقة صاكها مستغربة من تصرفها معاه..ضورات وجهها لور لقات لكوسان لور فيهم شلا كراطن وشلا مانط مافهمات والو...
حتى دخل حداها وقال:فاش ساهية الالة؟؟
نزهة:حمم والو
ميمون:(تحرك)شحال فعمرك أنزهة؟؟
نزهة:(تحرجات)علاش كتسول ؟؟
ميمون:(شاف فيها ورجع شاف فطريق)غا بغيت ندي ونجيب معاك فالهضرة ههههههه خايف تكوني صغيرة وندي البروصي..
نزهة:(حساتو لمح ليها بلي تتبان صغيرة وعجبها الحال)34 سنة خهه
ميمون:بشاخ باقي صغيييرة خصني نعيط ليك بنتي لا
نزهة:ههههههوعلاش بسلامة شحال فعمرك!؟
ميمون:شحال تعطيني؟؟
نزهة:معرفتش غي ݣول..
ميمون:41 سنة..باقي شاب
ضحكات عليه وقالت :شاارف مع راسك هاا
ميمون:غي فالعمر ..العقل باقي صغيير..
تبسمات ليه وعينيها حاضيين ملامحو وهي تنطق بعفوية:ضرييف نتاا
ميمون:هههههه عجبتك الزين؟؟
نزهة:اوا خلاص عليا من البسالات ههخههه..
ميمون:متفهميش مزاحي غلط والله كون مرتاحيتش ليك منضحكش معاك..باينة فيك بنت الناس..
نزهة:ربي يخليك..
صونا تيليفونو وجبدو عادي ماهو هاتف ذكي موالو كيقول غي الو..استغربات ومحكراتش حدها تتسنع هضرتو مع شي حد وكيهضر بجدية والأغلب على شي مشرووع مامشروع.. ماقطع تاقربو يوصلو ..
لاح التيليفون وقال:التبرزيييط صافي
نزهة:وسع خاطرك شويا
ميمون:موسع معاهم غا هو بنادم فيه الصداع..غرض ميقدرش يقضيه ليك
نزهة:وقف على شغلك بيديك..
ميمون:(بصراحة)والله مابيدي..كنت جالس تا ناض ولد خالي ݣاليك والو تدخل معايا شريك فواحد المشروع ديال التلامط والزرابي فدرب عمر ودخلت راسي للمشاكل(وقف حيت وصل)..
نزهة:وا مشروع زوين..التجار تاع درب عمر ودرب غلف كيدخلو الفلوس صحيحة..
ميمون:(ملفت لعندها)مكيدخلوها حتا كيشوفو الويل ..كثرة طلع وهبط كون حطيتهم فشي قهوة حسن ليا ههه..
نزهة :(مرتاحة فهضرتها معاه)دخل معايا أنا شريك هههه
نزل وتبعاتو خرجو السلعة والعينين عليهم من سكان الحي..صونات للفوق طلات سميرة وقالت:هبطي هبطي عاونيني..
ميموت:(كيطنز)هادي ماما خرا ولا شنو ههه
نزهة:مرات خويا هههه سير بلا منشدك هنا شكرا بزاف
ميمون:دنيا هانيا..الله يسر ليك لاخصاتك شي حاجة عيطي ليا ولا دوزي للمحل..
نزهة:شكرا
تحل الباب من طرف سميرة لي شافتو حركات ليه راسها وتاهو حركو وزاد لطونوبيلتو وتبعوه بعينيهم تانطقات سميرة:شكون هذا؟؟
نزهة:(تتهز)قصة طويلة هههه هزي هزي
سميرة:(كتهز)بحالا فايتة شايفاه!!
نزهة:معرفتش
طلعو التقدية بمشقة الأنفس وطلعو جلسو يرتاحو لقاتهم موجدين كاسكرووط ..كلات وشبعات وناضت بدلات عليها ورجعات حداهم تيهضرو وتتخمم منين تبدا وكتقاد بروكرام تمشي عليه باش ماتلفش
سميرة:شكون داك السيد؟؟
نزهة:(كتكتب)واحد السيد ف***** تيببع بالجملة هادشي وتيدير ثمن ناقص على الحانوت كنتقدا من عندو وكيوصل ليا
الأم:الله يدير بحسابوو
سميرة:معقلتش فين شفتو والله
نزهة:عندو محل كبير ف "*****
سميرة:معرفتش..هي شي شلح ههههه غا الشلوح لي معمرين تما
نزهة:(ضحكات)وتݣول ياختي هذا عروبي صݣع هههههههه تحلفي عليه ماشي محلو هذااك وقتما مشيت تنلقاه لابس نفس الحوايج ههههه ولكن ضريف..
الأم:ومالو بغيتوه يلبس الحرير .
نزهة:ولكن أمي يمشي على قد جهدو ..السيد راه عندو الفلووس حيت داك المحل بوحدو غا يكون مقيوم عليه بزبالة الفلوس راه كيجيبو السلعة بالكثرة والموقع فين عندو يبين ليك ولكن مابايناش فيه ݣاع ..
سميرة:ياختي ماعارفش يتصرف فالفلوووس هعههه
نزهة:ونزيدكم (تلفتات للباب ليكون داخل عبد الجليل)كيضور بيا ههههه..
الأم:اوا ابنتي أش بغيتي بيه؟؟ليكون شي قليل العفة
سميرة:هههههه باش عرفتيها؟
نزهة:هههه السيد غي كيشوفني كيبقا حال فمو ويهضر زوين..و يشد الخاطر تصوري اليوم طلقني ف700 درهم وݣاع مكيعرفني مزيان..
سميرة:راه هاكاك باش كيديرو الكليان!! وياك جا معاك تالداار حسابك لله فسبيل الله..
نزهة:(دارت ليها طن فراسها)والله الى ههههههه أنا حسابني السيد بغا يعاوني
الأم:عافا بنتي إلى كان عينو زايغة بلاش من مقديتو تقداي من عند شي محل اخر وبلا صداع مناقصنا صداع مع محمد خوك..
نزهة:(بلا مبالاة)مالو هاد محمد خويا أش عاطيني ..ياك ݣلست من الخدمة عمرو جا لاح ليا شي ريال ولا تفكرني حتا بفلوس الحمام..يجي يهضر نخرج فيه لاهو لا ديك العݣرب ديال مراتو..ممصبرني عليهم غي دوك الولاد لي من دمي
سميرة:الله يهدي ماخلق(ضحكات)هههههه أش سماه الله هاد التاجر..
نزهة:(شداتها الضحكة)ميمون هههههه
سميرة:(طلقات ضحكة عالية)هههههههههههههههههههههههههه لا زهر لا ميمون ينعل بو الزين تعالي حدايا ..
نزهة:ههههههههههه تعالي حدايا خيتي وعنݣيني .. ههههههههههه سميتو ميمون معروف بولد المصري ونزيدك ݣاليا 700 درهم لي بقات ليه نعرض عليه بيها الغدا هههههه
سميرة:الزلال لاخر ههههههه باينا فيه من العروبية لي باغيين غي يضربو اللحم و ينوضو
الأم:الله يبعدو علينا..ديها فخدمتك وصافي بناقص من مقديتو..
نزهة:كي شفتي أنا فايقة ليه من النعاس هههههه غيوجدو فلوسو نديهم ليه ونسوسو ..بقا ليا غي هو فالحساب..
تسد الموضوع وقلبوه لموضوع اخر ..نظمات وقتها ودارت كل نهار شنو غتخدم وشنو غدير..وتوكلات على الله وربي كبير إنه المعين..
*****
التنظيم والتخطيط هو أساس نجاح المشاريع..تجلس بينك وبين راسك وتحط مذكرة وتكتب شنو باغي تدير وتحطو على أساس هدف وفجانبو تدير كي غندير ننجح مشروعي وشنو غيخصني وشنو لي خصني نرد منو البال وشناهوما الخطوات لي خصني ندير..
وهذا بالظبط لي دارت نزهة..فمذكرتها خططات وكتبات شنو معولة تصايب وشنو خصها وشحال تقام عليها وشحال غتحسب للسيدة وكي غتخدم..ولات كي تدخل من الخدمة تاكل وتمشي للصالون لي جمعات ليها سميرة .. تتخدم كل نهار تتحيد حاجة ومكتنوض من بلاصتها تا كتكون سالات رغم التعب والعياء لكنها صممات وعولات وخصها تخرج كوموند بحقها وطريقها..
خدا منها الوقت سيمانة كااملة وهي كتوجد بعدما ختارت السيدة الشكال لي بغات ..نظمات وقتها وخدمات الكوموند ديالها على أحسن وجه..واليوم كان السبت فالعشية خصها تدير التوصيل للناس ..دارت معاهم وجاو دراري بطونوبيلات هزو كلشييي مزوق مستف ناااضي خلات كلشي يتعجب من الشكل لي زينات بيه البلاطوات.. وآخر راجل هز الكوموند مد ليها جوا فيه فلووسها شكراتو وطلعات فحالها ناشطة وضااحكة حلات الجوا لقات فيه الخير والبركة مخلي ليها البريكول مبلغ زوين فرحها مقارنة مع سيمانة تالخدمة ..
فالغد ناضت تاتفوه حيت الحد شبعات نعاس بعد حمام فالليل بردات فيه جنونها ورتاحت فيه ودللات راسها..فطرات بخاطرها مع دارهم وناضت جارا جنات فيديها تخرجها حيت مها تاتجمع حوايجها وهي ماسخاتش بيها..لبساتها وانقاتها وتأنقات معاها وخرجو شادين الطريق وجنات غي كاتسول فين غاديين لفين غاتديني مسكتاتش تاوصلو . .
لقات المحل حالين واخا كانت مامتوقعاش..دخلات كيف ديما وعطات ريحتها فيه..قبل ماتنطق بالسلام كإشارة لدخولها قشعاتو فالكونطوار ديال المعلمية خاشي راسو فالتيليفون الذكي.. تبسمات من منظرو..لابس تريكو خفيف ولحيتو زادت كثافة بلا موسطاجو لي غي يجلس ويجبد فيه قاعيدة فيه..وسموريتو لي عاطية للعين وكتافو العرااض مامخلي من المصريين والو. .
- نزهة:سلام وعليكم.
هز فيها راسو وتبسم دغيا تاتكمشو عينيه وبانو سنيناتو زوينين مستفين لكن فيهم بقايا الماكلة..قشع البنية وقال:هادي بلا شك بنتك ههههه
نزهة:(تاتقرب لعندو وهو عينيه تيطلعوها تا كتوتر )لا بنت خوياا
خرج من الكونطوار وقرب منها لكن نزل لمستوى البنية وفرنس ليها:الزوينة لباس؟؟
ميمون:اه درتها فيه..قلبيه ليا عربية وعاد ديري ليا فيه الوتصاااب(نطقها بالصاد )
نزهة:(حابسة ضحكة من طريقة باش نطقها)واخا هه أنا نصايبو ليك شوووف كدخل هنا(وركات على جيمايل)بلاتي بلاتي نصايب ليك واحد الحاجة. .
ميمون:أجي ݣلسي أنا نجيب من لداخل كرسي
دخل لداخل جاب كرسي ليه ولجنات لي تتاكل فبيمو وهي شدات تيليفون تتصايب ليه جيمايل باش تخدم ݣوݣل بلاي وهو ساهي فيها تيحفض فوجهها ويتبسم بعذوبة..حاضي تحركات وجهها وكيفاش تاتقطب حجبانها ملي كاتعكس ليها وتا فمها لي تاتلعب بيه ويديها لي شادة بيهم تيليفون تايبانو غي بالشوفة رطبيين مزيناهم بخواتم كثيرة وصباغة لونها فاتح. .
نزهة:ففف هاهو تصايب ..مشارجي نهز الواتساب
ميمون:حمم(حس على راسو)اه غي قضي ..
هزات ليه الواتساب وملى عليها نمرتو وقاداتو ليه وهي تقول :هاهو تصايب..أجي نوريك كي تخدم بيه..شوف هذا تانهضرو بيه اوديو وفيديو مع الناس مثلا(طلعات لكونطاكت أول سمية طلعات بالعربية أية الݣابونية)هاد أية الݣابونية (مسخها الضحك)هعههههههههه
ميمون:(عاق بيها)الشيخات تابعيني فينما مشييت هههههه غمضي عينيك على هادي
نزهة:نجربو فنمرتي حسن باش تفهم كيفاش تهضر وكيفاش تصيفط أوديو
ميمون:واخا ههههه
جبدات تيليفونها طلقات الكونكسيون حطاتو فوق الكونطوار ومشات تاتقيد نمرتها عندو ومع بقا الضو شاعل بقات تصويرتها تتبان دايرا وضعية قبلة بفمها لي معكر بالحمر..بلا حشمة بلا حيا هزوو قول موالفة معاه المزاح هزو بإعجاب وبصبعو تايجر فموسطاجو ونطق:الزين هذا
شافت فيه و شافت تيليفونها حيداتو ليه بنطرة وقالت:اوا الفضول لاش..خليني نصايب ليك تيليفونك وحط ديالي.
ميمون:شفت الزين خاصني نهضر ولا غاترجع علي بحرݣة تالمعدة
ميمون:هههههههههه الليل زوين كلشي فيه مستور ..النهار كايفضح
نزهة:ههههههههههه حشمت نݣوليك الله يمسخك
ميمون:ههههههه الله يمسخني
نزهة:ههههه واتبع معايا..بلاش من الكتبة..مثلا لا بغتي تݣول ليا شي حاجة ورك هنا شفتيه وهضر...مثلا دوي دابا(شادا الاوديو)
ميمون:(على نيتو )أش نݣول؟؟
ضحكها:ههههههههه ݣول لي بغيتي
ميمون:(لاحها ليها فوجهها)كتعجبيني أنزهة والله
حبسات الاوديو بلهلا يطريه ليها وكان مشا ليها..شافت فيه مامستوعباش أي نعم تايلمح ومايمكنش يخفاو عليها ملامحو ولكن مظناتوش يلوحها هاكا..هنا تأكدات يلي راه خضر نيييت
النوع ديال ميمون صرييح..غايقوليك الحاجة يعطيها ليك فوجهك بغيتي ولا كرهتي..عجباتك ولا ماعجباتكش ماكيعرفش يزوق وكيهضر من قلبو..بصريح العبارة "خضر" وهاد المصطلح كينطابق على الناس لي كايهضرو بلا مايفكرو..داك نوع لي تغمزي فيه تاتعياي ويفرشك ويهضر..المهم خصو يهضر ويقول أش فخاطرو وما كيتسوقش..النوع لي ماكيعرفش يتصنع ولا يزوق ليك الهضرة..
نزهة:اوا يهدييك الله(ماعرفات متقول)مهم هاهو وصل لعندي
طمر تاهو ببلاهة وهي تقوليه عاود بعدما توترات من هضرتو وندمات لاش جات:حممم هنا الى بغيتي تصوني لشي حد(ورك هو)هاكاك هاهو كيصوني
طلع تيليفونها كيصوني وهو يقول:مزيانة!!
نزهة:وهنا ورك عليه الى بغيتي تهضر مع شي حد هاكا فيديو هانتا(صونات وصونا تيليفونها هزوو)دوز داك الزرق للفوق
وبالفعل دارها وبانت صورتها ونطق:ممممم زوين هادشي
ضحكها من جديد وقالت:ربي باشنو كنتي خدام؟؟
ميمون:العادي وبخييير ههههه
نزهة:هنيتي مخك ههههه
ميمون:والى بغيت مثلا نجبد نماري خرين من غير ديالك. .
نزهة:هانتا انا نطلعهم ليك...شوف هاهوما (تاتطلع غي سميات الرجال وبزاف تالعيالات)حمم تبارك الله غي العيالات...ها أية ها سناء
نزهة:هانتا أنا نطلعهم ليك...شوف هاهوما (تاتطلع غي سميات الرجال وبزاف تالعيالات)حمم تبارك الله غي العيالات. .
ميمون:ضلمتيني هههههه غي خواتاتي
نزهة:(تبسمات)شحال نتوما؟؟
ميمون:عندي 4 تخوتي وستة تخواتاتي
نزهة:تباااااارك الله ههههههههخ مك مفرخة نيييت كل عام بولد
ضحك من نيتووو ومد ليها يدو ضربات فيها وقالت :لالا ربعة تالبنات من با وجوج من مي والدراي من مي ..
نزهة:والديك مطلقين!!
ميمون:واييه..شي نهار نعاود ليك قصتي خهههه
نزهة:(عجباتها ضرافتو)واش نتا ضريف مع كلشي ولا غي أنا؟؟
ميمون:هههههه وماعرفتش سولي علي يعطيوك العربون...لي نݣوليك أنا قبيييح لا تعصبت وماشي أي واحد كانعطيه وجهي الزوين والضحوكي
سبقها وهي تشوف فيه بسروال السورفيت غي هاد المرة كلاكيطة باينا دوريجين ورجلييه نقييين فيها وغزاالين رغم أنهم سمرين ...حركات راسها ب أحيانا أش كندير وتبعاتو لطونوبيلتو بعدما سد المحل..دارت جنات لور وطلعات حداه وهو يقول:فين بغيتو تغداو؟؟
مع بغا يهضر صونا تيليفونو الصغير هزو جاوب وطول الطريق كايهضر مع شي كليان وأغلب هضرتو كايهضر غي بالملاين ويتحاسب..كاتبان عليه واحد الجدية خطيرة ..سايق بيد وحدة ويد شاد بيها تيليفون وتايتناقش تحلفي عليه ماشي هو هذا لي عاد كان تايضحك ويكركر كي الشياخ. .
وصلو للثلاثين .. سميت بهاد الإسم حيت هي جات 30 كيلومتر برا كازا طريق السوالم..فيها الشوا بجميع أنواعو ولي ذاقو ماكيشبعش منو..شوا بنين وخاتر فينما تلف ليك شي عروبي تلقاه خاشي راسو تما...
مع وصل لقاو بزاف تطونوبيلات شكال ونواع من الغالي للرخيص..حط فقنت وسط طونوبيلات واخا الجو شويا مضبب ولكن ريحة الشوا والدخاخن فايحة
نزل هو وتبعاتو هي حلات لجنات لي غي شافت دخاخن والأجواء وهي تنطق بعفوية:عميتو واش اليوما العيد؟؟
نزهة:(تضور عينيها على الارجاء وتتفرنس)بحال هكاك هخهه. .
ميمون:أجي الزين عند عمو(هزها)أش تاكلي؟؟
جنات:(تتشوف فعمتها)معرفتش
ميمون:وياك من صباح ونتي فيا جوع فيا جوع هههه(باسها فحنكها ونزهة مبسمة ليه)ياله زيدو
تمشاو معاه دخلو وسط الناس لي كايشويو وماكاين غي دخاخن وريحة الشوا فايحة تحل ليك الشهية ..وكواغط محطوطين والملحة وماطيشة وبصلة جو شهوا منوو..تلفات وسط الدخاخن تا شدات فذراعو تتنش بيديها على الدخان..شاف فيها وتبسم:مالك
نزهة:فففف تخنقت
ميمون:راه السيد لي كانݣلس عندو تما ما يوصلك والو
مشاو لواحد طبيلة جر ليهم كراسا جلسو وقال:هاني جاي
مشا وبقات متبعا ليه العين تا غبر وهي تضورهم للناس لي حداها كانو مخلطين بين ناس المدينة وناس البلاد وكلشي خاشي راسو فشواه..
بقات تاتشوف فالناس وريحها الجو والهوا تالشوا بقات هي تاتشوف وتاتسناه..تايبان من بعيد واقف مع واحد تيشوي ليه وتيضحك تاتبسمات تاهيا...ما غاتكذبش كيجيها ضريف ومصواب..شافتو جاي من بعيد وهي تبسم ليه مشيتو زوينة كيتمشى مبندر ومهيب.
جلس حداها وداعب شعر جنات وقال:تعطلت؟؟
نزهة:لالا
ميمون:شوي وتجي الماكلة
نزهة:عذبتي رااسك
ميمون:دنيا هانيا
نزهة:(بابتسامة)مولف تجي نتا لهنا!!
ميمون:(كيلعب بسوارتو)كانجي مع خوتي مرة مرة ومع صحابي مرة ومرة معاك. .
نزهة:(كضحك)معول تبقا ديما تجيبني
ميمون:ههههههه ايييه وعلاش لا..هنا حسن من المدينة كثرة زواق وماتشبعش تا فكرشك
نزهة:وكال مع راااسك ها ههههههه ولكن باينة فيك صحيح هههههه
ميمون:هههههههه
وقف عليهم الدري هاز طباسل كباار عامرين بالكفتة مشوية والكوطليت..ماطيشة وبصيلة مصوطيين معاها..والملحة والخبز داكشي تاع القلب ..
نزهة:تعقلو على مول الجملة ههههه الصكع لي عاودت ليكم عليه
الأم:داك الباسل
نزهة:والله أمي الى داك سيد الله يعمر ليه الدار..مسكين مشيت نخلصو ولصقني ݣاليك نمشيو نتغدااو هههههه اوا وداني للثلاثين ضربت الشوا أنا وجنات حتا خرج من وذنينا وجينا
سميرة:هههههه كون أختي علمتيني نمشي معاك
الأم:(شدات حنكها)أويلي على لي خاصها تخاصم ..يا نعلي الشيطان(بإنزعاج) علاش مشيتي معاه أنزهة؟؟
قطع ديك ساعة خلاها تتفرنس تاتسالي معاها عفويتو وصراحتو وكيفاش انه ماكيتصنعش ولي فخاطرو غايلوحها ليك.
*****
الغد ليه فاقت نزهة كعادتها فالصباح دارت روتين النظافة ديالها وتوادعات مع مرات خوها والدراري بالدمووع ومشات لخدمتها مدوزة نهارها وتيليفونها ماسكتش من الرنات ديال ميمون..ها ميساج فوكال ها اأبيل فيديو ها أبيل فوكال..هي خدامة وتيلي كايفيبري فجيبها تاعصبها وهي تبلوكيه من الوتساب وتهنات مع راسها..
دار ليها داك خالك ولا ديك مك لي ياله كادير الواتساب وكاتبدا تصيفط ليك صباح الخير.. جمعة مباركة ...وتبقا تقوليك سلام فاوديو فيه عشرين ثانية ..فقصها وهي تبلوكيه ودايرا فبالها غي غاترجع للدار ديبلوكيه حيت مع خدمتها تايبقا تيلي مكونيكطي مع الويفي. .
العشية وصلات للدار مهدودة بدلات عليها وخرجات مونسة مها ضاحكين ناشطين كايديرو فكاسكروط تاصونا ليها فالنمرة..شافتها وهي تقول:ونااري هذا شحال لصقة
ميمون:على الذكر والقرءان وقيام الليل الله يقبل مني ومنك ماغانساكش فالدعاء أختي ههههههههه
نزهة:ههههههههههههههه واسير الله يمسخك السلݣوط
ميمون:غدا ندوز عليك صافي
نزهة:إن شاء الله
ميمون:ياله دوخي تنعسي هه
نزهة:الله يبيتك فراحتو
ميمون:(عجباتو الدعوة)أمين
قطع عليها وحط تيلي فوق الطبلة وهز تيو تاع الشيشة جرر منوو وخرج الدخان منخوي مع راساتو مخشي وسط مانطة وشيشتو حداه كايشيش والتلفازة شاعلة بفيلم مصري ..وعينيه معسليين بيها كايبات ويفكر ويخممم فيها تاكمل الشيشة وهو يترخا تخشا ففراشو تايتسنط لعظامو مخليها تشد فيه
*****
اليوم الموالي بعدما خرجات من خدمتها متناسية موضوعو نهائيا ماتفكراتو تا بانت ليها سيارتو قدام الايموبل عاد تفكراتو..تنهدات وتمشات بشوية عليها. .
كاضرب ب ليبوط طالون وسروال دجين لاصق مزير على فخاضها أما الفوق راه لابسة شوميز فوقها مونطو راقي وهازا صاك فيدها صغير..لمحها من بعيد جاية على أقل من مهلها معارفاش بلي تتلعب ليه على الوتر الحساس بهاد الحركات...هو بطبعو تيموت فالمرا الخاترة لي تدير كلشي بالعقل..تحرك بالعقل وتهضر بيه وتفكر بيه..كتعجبو المرا لي بحالها مهلية فراسها وكايبان عليها
حل ليها الباب وطلعات حداه ناشرة ريحتها القاسحة عندو دخلات لنيفو دغيا..تبسم وقبل ماتنطق وقال:واش نتي ديما كاتصايبي ولا غي حيت جاي نشوفك!!
ميمون:(وقف طونوبيل)واخا الزين(تمسح على فخاضو)مكرهتش شي حاجة بلدية بغيتهم يذقو ماكلة البلاد
نزهة:البسطيلة يعني
ميمون:اه وشي حاجة خرا ميمكنش غي هي
نزهة:(بجدية تقادات فالجلسة مقابلة معاه هو لي راخي عينيه فيها)اوا نديرو شي شلاضة منوعة فيها فواكه البحر اوا ونزيدو شي حاجة ديال الدجاج فالفران..تبغيو لحلوة!؟
مع حطات رجليها برا ضربها هوا باارد تا سدات عليها المونطو حيت لداخل كان سخون..لمحات عينيها جسم ميمون لي مايخفاش عليها عاطيها بضهر بتجاكيط وسروال دجين وگاط كحل واقف مع شي شخص..
كمشات عينيها وتاتقرب منهم بشوية تا لقاتو ربيع..تحرجات وإستغربات من وجود ميمون هنا وبقات تتساءل فدماغها واش عاطياه موعد..وعاد مابغاتش ربيع يفهمها غلط وهو باطرون ديالها بغات تبقى العلاقة رسمية مايدخلش شي فشي. .
ميمون:(نتابه لشي حد واقف حداه دور نص وجهو وماتحركش بقات يدو باش كايشرح جامدة.)أهلا
نزهة:(حشمانة قدام ربيع) سلام
ربيع:(استدرك الوضع)ياله أميمون بيناتنا التيليفون سلم ليا على الواليدة
ميمون:مبلغ..نتشاوفوو
مشا ربيع وخلاه ضاير لعندها بشبح ابتسامة وعينيه كايطلعوها وينزلوها بإعجاب..كاتعجبو حيت كتلبس زوين وباين عليها مهلية فراسها..ماشي هي بوحدها لي مهلية فراسها ولا لي لباسة ولكن هي الوحيدة لي دخلات حياتو هاكاك...جميع نساء حياتو كانو تقليديات .
ميمون:(بتاسم)لباس الزين؟؟
نزهة:(تتحك يديها)حمد لله ونتا؟؟
ميمون:زيدي من البرد
نزهة:علاش جيتي؟؟
ميمون:(كان غادي و وقفاتو هضرتها)ياك درنا غانديك تجيبي الحوت؟
نزهة:(عاد تفكرات)نسييت حممم راه وصيت ولد خويا الصباح بكري ومشا غايتقداه ليا ويدوزو ليا لدار
ميموت:بصح!!اوا من الجنة والناس علينا ياله ناكلو . .
نزهة:خههههههههه(قالها بطريقة ضحكاتها)ياله ناكلو ههههه
ميمون:ههههههه وافيا جوع وبقيت كانتسناك فالبرد حتا خرج ربيع. .
سبقها للطونوبيل مخليها كاتبرق عينيها فيه...مسماتو خضر تا كان خضر..تبعاتو تاهيا كي الهبيلة كي طلعات بدات تتحك يديها..دور الطوموبيل وقال:روييحة هي عندك زوينة
نزهة:من ذوقك هههه فين كاتعرف ربيع؟؟
ميمون:ربيع الالة راجل بنت خالتي. .
نزعة:اه يعني من العائلة(حرك ليها راسو)وماسولكش فين كاتعرفني؟؟
ميمون:هههههه أش خاصو حتا يسولني فين كانعرفك!! عائلة وصافي
نزهة:(رتاحت)خفت غي تݣوليه شي حاجة راه لسانك غي كايطلق
ميمون:(بجدية)شنو زعما أش نݣوليه؟؟ خاصك تعرفي الالاهم أنا تاحد فهاد الدنيا ماكيعرف أش تحت راسي ولا شنو كاندير فحياتي عساك راجل بنت خالتي
نزهة:هههههههه أربي شكون هاد المصطية لي قابلة عليك غاتكون تاهيا شي وحدة صكعة بحالك وضحوكية
ميمون:(شاف فيها عجباتو ضحكتها وصوتها)واديك لي كنضل نلوح ليها الهضرة مابغاتش تفهم راسها و قلت مع راسي نعدي بهادو حتا تحني علي . .
نزهة:ههههههه الله يسمح ليك...نتا نحلف عليك غاتكون مزوج ووالد وغارق دراري ..
ميمون:(جمع الضحكة)كون كنت مزوج مانبقاش نتلاقاك حدي معاك الخدمة...زواج هذااك ماشي اللعب
نزهة:(بابتسامة)زعما كاع هادي جدية فيك؟؟
ميمون:(سايق بيد ويد تيشرح بيها)الزواج راه معقوول ومحبة ودوام ݣدام ربي..مجاتش نخليها فالدار ونخرج انا نديع مع البنات
نزهة:وكاينين رجال هاكاك!!
ميمون:أنا كانهضر على راسي ماشي على باقي الرجال..لي كايتزوج ويدير الصاحبة هذاك ماراجلش..بغيتي تزهى زهى معاها..واخا شي عيالات راه ديال الصاحبة نييت. .
نزهة:حتاوحدة أميمون متستاهل تكون عليها الصاحبة
ميمون:كاينة لي تستاهل تربع عليها..كاع صحابي لي كانعرف ومنهم ولاد خوالي دايرين الصاحبة على عيالتتهم على وديت حاجة وحدة وهي الفراش
نزهة:(تزنكات)ويلي وهادشي كيناقشووه معاك ولا؟؟
ميمون:لالا ...الرجال مافيهمش هاد الفعايل ديال يتعاودو أنا عيالاتهم عمري شفتهم حتا بضحك حيت ماكيرضاوش ونفسهم هنا(شير لنيفو)..كايخون مراتو راه باين على الفراش حيت الراجل يسمح فكلشي الا فداكشي
نزهة:(عجباتها طريقة هضرتو وكيفاش ولى جدي)حممم والله واعلم. .
شاف فيها لقاها مزنكة وهو يطلق ضحكة خفيفة وبدل مود الجدية وقال:الناس كايحشموو ههههههه وانتي لي فاضحاني واش مزوج ههههه أنا أختي باير شارف هارف ماعندي لا ولاد لا وتاد
نزهة:وعلاش لدابا ماتزوجتيش؟؟واحد بحالك بخيرو وخميرو واخا ماباينش عليك علاش ماتزوجش؟؟ قدك راه بنتو ولا ولدو فالسادس ابتدائي. .
ميمون:ماتزوجتش حيت مالقيتش لي تدفا فيها خاطري وصافي هههه مي بغاتها قلعاوية با بغا يزوجني مصرية ههههه
نزعة:ععههههه خودهم بجوج وتهنا
ميمون:(وقف الطونوبيل)ههههههه ماكرهتش صراحة ..جوج عيالات الله
نزهة:الله يمسخك هههههه فين جبتينا؟؟
ميمون:دوزي تضربي العدس والبيصارة عند أحسن واحد كايديرها فكازا ههههه
نزل مخليها مضهشرة وعينيها تايضورو على الحي الشعبي لاش جايبها..تخربقات ومبقاتش عارفا واش نيت هذا هو مول داك المحل ولا غي كايكذب عليها وطالقها عليها
نزلات تابعاه مافهمات والو ودخلو لمحل صغير فيه سيد حاط قدامو فورنو كبير داير فيه طناجر اللوبية والعدس والبيصارة لي هوما دوا البرد والمحل عندو فيه الناس قلال حيت قرب يسالي..
نزهة:(تشجعات)هععع دابا نتا واحد الانسان عندك مشروع كايربحك زبالة ديال الفلوس شي واحد أخر بلاصتك غايبغي ياكل فبلاصة واعرة
ميمون:(تبسم)وا نكذب عليك أنا أختي عندي على قد جهدي..عندي رزقي الحمد لله ولكن الماكلة فينما مشيت ناكل..ياكما حسابك تزاديت ولقيت هاد الخير كولو ..هذا لي ݣدامك راه تمحن باش يوصل هنا حتى تجيبها الوقت ونعاود ليك قصتي تشبعي غي هم ههههه
نزهة:(قنعها)الله يزيد فتواضعك كون أنا كون راني مهازانيش الأرض ههههههه(لاحتها بالضحك)
ميمون:هههههه وانتي تجي معاك..مرا زوينة وقارية علاش لي ماتعفرش هههه أنا غا فرعوني
نزلات على طبسيلها تتاكل وتبنن وقالت:زوييين يعطيه الصحة
ميمون:(بتساؤل)كتتعرفي ديري العدس؟؟
نزهة:أكيد . .
كلاو داك العدس بالضحك ديالو ونشاطها هي..معاه تتكون على راحتها متيخصهاش ترد البال لشنو غاتنطق ولا كيفاش غتحرك عكس مع عمر كان عاجبها بزاف لكن تترد لبال لتصرفاتها ولحركاتها باش متخرجش عن نطاق الآداب و التاويل..مع ميمون بحالا جالسة مع نفسها
سالات وناضت غسلات يديها ونشفات بورقة ..مد ليها صاكها وخرجو جيهة ميلود لي كايعطي لدراري لي معرمين عليه خبزهم فيه اللوبية كلشي باغي يسخن عظامو فهاد البرد..وهي تفاديا أنها توقف حدا دراري رجعات شوي لور شادا فصاكها ومكمشة من البرد مخلياه مجمع معاه وكيجبد فلوس من جيبو
وهي واقفة كاتشوف فيه راسمة ملامح هادئة حسات بيد قاست مؤخرتها من فوق المونطو وعبزاتها..شهقات وهي كاتشوف برهوش فالعشرينات دايز من حداها لابس عادي بحالو بحال أي واحد وهي تنطق بالغوات:الله ينعل ترابيك الحيوان
تلفت ليها كلشي من بينهم ميمون لي سمع صوتها الرقيق..قرب ليها مستغرب وقال:مالكي
تدخلو الدراري كيبغيو افكو وهو مكنزز عليه كيعطيه فالركلات والدق لفينما قادتو يديه كيعطيه ولسانو كيطلق غي السم تالهضرة الخاسرة..هزيتي واحد وحطيتي واحد اخر دمو حامي وتياكلو عليها وعلى أي وحدة كتعرض لهاد النوع من التحرش وخاصة وهي معاه. .
"التحرش"
- المنكر ما تانبدلوهش ب منكر آخر، يعني ما يمكنش تجي مرا او راجل كي ولينا تانشوفو فمواقع التواصل، التحرش ولى قضية تحولات ل رأي العام، شفنا بزاف ديال الآراء و منهم لي لا علاقة ليه بالمنطق ولا بالدين، ولا ب أش قال الله ولا اش قال الرسول، عليه الصلاة و السلام. . ..لا يمكن تغيير المنكر بالمنكر ولا يمكن تغيير الخطأ بخطأ أكبر منه.. بزاف ديال الناس ف " شوف تيفي"، فين ما شي واحد ما مربيش يدير شي مونتيف يديونا نشوفو صالون دارهم! تايعطيو الميكرو ، ل ناس ماشي كل شروط الإسلام متوفرة فيهم ، و البعض ايوا كون لبسات غير دجين و كون ما تعرات غاع ما يزعم عليها، يقدر البنت
لبسات لبس معري، الله يهديها، هذا فقط حقنا، نطلبو الهداية و السترة من الله عز و جل. ولكن أليس من الحماقة أننا نبررو خطأ بخطأ! البنت لبسات لبس معري حرام فالإسلام! ولكن يقيسها فجسدها ماشي حرام؟ فين المنطق، فالإسلام العرا ماشي حرية ولا إختيار بصح، ولكن الإنسان فاش تايشوف شي حاجة بحال هاكاك يدعي بالهداية مع نفسو و مع داك الشخص، و الا قدر يبدل شي حاجة يبدلها. . كيفما جا فحديث الرسول عليه الصلاة و السلام. و لي بزاف تايخدوه كيفما العادة بطريقة خاطئة . .
- عن أبي سعيدٍ الخدري رضي الله عنه قال: سمعت رسول الله صلى الله عليه وسلم يقول:( من رأى منكم منكرًا، فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان) رواه مسلم.
ولكن حنا الأغلبية فينا تايشرحو الآية ولا الحديث على حسب داك شي لي مسلكو بحال هاداك لي تايعرف فالدين فقط أنه ربي حلل أربع زوجات و فالأصل ما عارفينش سبب نزول الآية ولا على من تطبق ديك الآية و شنو الغاية منها. و بزاف لي تايقولو راه الرسول (عليه الصلاة و السلام) قال من من رأى منكرا فليغير بيده! و هوما اصلا ما فاهمينش القصد. . .
شرح الحديث هو كالتالي:
- (من رأى) يحتمل أن يكون المراد رؤية البصر، أو أن المراد رؤية القلب، وهي العلم، والثاني أشمل وأعم. (منكم)؛ أي: معشر المسلمين المكلفين القادرين،(منكرًا)؛ أي: شيئًا حرمه الشرع فعلا أو قولًا، ولو صغيرًا،
(فليغيره) قال ابن دقيق العيد رحمه الله: فهو أمر إيجاب بإجماع الأمة، وقد تطابق الكتاب والسنة على وجوب الأمر بالمعروف والنهي عن المنكر، وهو أيضًا من النصيحة التي هي من الدين.
(بيده)؛ لأنها أبلغ في تغييره؛ كإراقة الخمر، وكسر آلة لهو، والحيلولة بين الضارب والمضروب، ورد المغصوب إلى مالكه، (فإن لم يستطع) الإنكار بيده بأن ظن لحوق ضرر به؛ لكون فاعله أقوى منه، فالواجب تغييره (بلسانه)؛ أي: فليغيره بالقول، وتلاوة ما أنزل الله من الوعيد عليه، وذكر الوعظ والتخويف، والنصيحة بالكلمة الطيبة.
(فإن لم يستطع) ذلك بلسانه؛ لوجود مانع؛ كخوف فتنة، أو خوف على نفس، أو عضو، أو مال محترم، أو شهر سلاح، (فبقلبه) ينكره وجوبًا، بأن يكرهه ولا يرضى به، ويعزم أنه لو قدر على تغييره بفعل أو قول، لفعَل، فأفاد الخبر وجوب تغيير المنكر بكل طريق ممكن، فلا يكفي الوعظ لمن يمكنه إزالته بيده، ولا بالقلب لمن يمكنه باللسان.
(وذلك أضعف الإيمان)؛ أي: إن كونه لا يستطيع أن يغيره إلا بقلبه هو أضعف الإيمان.
يدل الحديث على أن الأمر بالمعروف والنهي عن المنكر من خصال الإيمان؛ لذلك أخرج مسلم هذا الحديث في كتاب الإيمان، بأن كون النهي عن المنكر من الإيمان.
حطيت هاد الحديث لأنه الكثييير لي جاهل فالدين، تايفهمو بطريقة غلط، و الكثيرين فهاد الحالات تايقولو را شاف المنكر و بغا يبدلو و الكثير تايقولو بغا يربيها باش ما تلبسش المزير او القصير، الإسلام مبري من هاد النوع، الدين واضح و الحرام واضح و الحلال واضح أيضا
كيف قلت كل واحد فينا ولا الأغلبية فينا عارفين الحلال من الحرام، كي تايقولو الحرام بيِّن و الحلال بيِّن، الإنسان عارف اش لي ليه و لي عليه و عارف الحرام من الحلال. . و التحرش راه ما ليه علاقة باللبس! فا من العجب أنه المجتمع يبرر التحرش ب أنه البنت لي ما حتارماتش راسها! و الا خرجات مثلا بنت محجبة مستورة من راسها ل رجليها و لبسها واسع، و قالت فلان تحرش بيا! ولا بان فيديو فيه واحد دار نفس الشيء مع بنت لابسة لبس مستور و دايرا حجابها! ديك الساعة المجتمع و العيالات و عائلتو و الذكور باش غادي يبررو التحرش ديالو؟؟ ما يمكنش نقتانع أنه البنت ولا لبس البنت هو سيب التحرش حيت دازت على عيني هاد القضية بحال كي دازت على جميع المغاربة، ما معاودينها لينا، ما مختارعينها من مخي،
كنت دايزا من حدا السوق، و بنت كانت تاتبان باقي صغيرة من ملامحها، يعني نقولو فالعشرينات، ولكن البنت من البعييييد غا تبان ليك أنها مزوجة، حيت كانت جارة كروسة فيها بنتها، زائد كرشها واصلة ل فمها! و بلا هاد شي كامل السيدة كانت دايرا حجابها و لابسة جلابتها! و واحد تابعها من اللور و تاينك عليها و يقوليها زين ما تعطيناش شوية من وقتك!
و دابا المجتمع شنو التبرير لي عندو؟ الإنسان المتحرش، ما يحترم لا مرا كبيرة لا صغيرة ما يحتارم لا لي لابسة الحجاب ولا لي ما لابساهشش و ما يحتارم لا لي لابسة قصير ولا لي لابسة طويل، و لي تايبرر للمتحرش أنه كون البنت ما لابساش قصير كون غا يحتارمها و ما يقيسهاش، القصر هو لي عندو فالعقل . .
سلخو ميمون مزياان والناس تتفك تا بحرا ماحيدوه من يديه وهو كينهج وريقوو ناااشف تيترعد عليه...ماشي حيت نزهة معاه ولكن حيت تتبقا مرا ومدارت لا بيديها لا رجليها
الدري مسخسخ والناس تيصرفقو فيه يفيق ولى كولو دمايات وتجمعات الجوقة وكي العادة ها لي كيقول :
"حيوان خا صو التربية"
وها لي كيقول:
"كون غا لبسات حوايجها ما يهضرها حد"
والاراء تختلف لكن التصرف واحد وقلة الادب واحدة..مشا ليه من جديد وميمون تيتعصب عليه:طللللق منيييي ماغنضربووووش غنصيفط ال**** بوووه فين اتربى ..(تنطر منو ومشا تيقلب ليه فجيووبو ودراري كيحبسوو فيه)ولد ال*** ماعندووش حتا لكارط(خشا يديه فجيبو لقا بزطام صغير حلو هز لكارط ناسيونال دوزها قدام وجهو)الى مربيتكش تاتولي تشوف العيالات وتبدل الطريق راني ولد ال***
لاح عليه البزطام وزاد راجع عند نزهة لي عينيها مدمعين باينة كانت تتبكي..عزات عليه بزاااف ودوز يديه بلا شعور ورا كتافها جارها عندو حاط ليها راسها على كتفو مغطيها من الناس كأنو كيوصل ليها رسالة:انا معاك
ميمون:(باقي تيترعد عليه وصوتو انساب فوذنها)متخافيييش غنديه فين يتربااا ...أرا الما اميلود(شاف الجوقة كبيرة وغوت فوجهم )كنفرق المعاونة أنا هنا...الفراجة سالاااات
بداو الناس تايتفرقو وميلود عاطيه الما..خرجها من حضنو عينيها فازكين بالدموع والنيف حمر ..شربها الما بشوي ويديه لوخرا جرات كرسي جلسها فيه وتحنى جالس قفازي ويديه فشعرها كيستناها تكمل شريبها وعينيه فيهم عاطفة وحنان كبير..
مدات ليه الكاس وقالت:نمشييو
ميمون:واخا
مد الكاس لميلود وشدها من يديها مشابكهم مع ديالو تا حسات بدفئهم ومخليها جنبو وعينيه باقي خارجين بالعصب..حل ليها الباب تا ركبات وضار لجهة لوخرا..ديمارا بلا ميهضر ولا ينطق بشي حرف ويديه لوخرا تتقلب فتيليفونو الصغير وحجبانو مجموعين بغضب جهد شي دقايق عاد دوز المكالمة وقال:أخويا هانيا؟؟كلشي مزيان..بغيتك فواحد البلان...واحد البرهوش بغيتك تقرقب عليه ...ضرب واحد السيدة معايا ...اه اه تحرش..نتلاقاو من هنا ساعة ونعطيك كارط ديالو وتهلا فيه...الله يحفظك أخويا تهلى. .
قطع عليه ولاح تيليفون باستهتار..وقلب عينيه ليها هي لي باقي ساكتة ماكيتسمعش حسها وقال:شويا دابا؟؟
نزهة:الحمد لله
ميمون:غانصيفط دلمو يتربى عمرو باقي يطوف بالعيالاات
ميمون:(زير على المقود بيديه)كثارو الكلاب ولى غي البرهوش لي ماقدرش يمشي لشي ق*** (نسا راسو وجلس تيخسر فالهضرة)يضرب ف**** بنات الناس باش تبرد ليه الحرقة
نزهة:(ضربات الطم)حممم
ميمون:(وعى أش قال وزفر)ماتديش علي ..
نزهة:(شافت فيه بامتننان)لهلا يخطييك عمري ننسا وقفتك معايا اليووم
شاف فيها ورجع شاف فالطريق:دنيا هانيا..حتا كون مكنتيش معايا غاندير نفس الحاجة حيت جهلووو بزااف وأنا عندي خواتاتي مانبغيش لي يدير ليهم هاكاك نتي هني راسك غيمشي يتربى
نزهة:الله يعطيه موصيبة قليل الادب تفوووو
بعدها لتازمو الصمت ماهضروش بتاتا أولا هو مابقاش عندو الخاطر لي يهضر ولا يتمازح حيت دمو حمى صافي ماغتبرد ليه تا يشوف لاخر فالحبس وهي راه تهدات وعياات ...ماهضرو تاوقفات السيارة قريبة لدارهم شوية وهو يقول:هاحنا وصلنا
نزهة:مباقيش دزنا للمحل ناخد السلعة
ميمون:(مافيهش لي يهضر)حتا تصوني ليا ونقيدها وغدا تصبح عندك فالدار
نزهة:(بهدوء)واخا..شكرا بزاااف وسمح ليا
شاف فيها راخي ملامحو وعينيه قادوه ديركت لحنوكها الحمرين..مدهم بدون شعور تحسسهم ليها وقال منهد:دنيا هانيا
نزهة:(جاتها تبوريشة)حممم بسلامة.
نزلات مخلياه متبعها بعينيه تا دخلاات لدارهم عاد ضور الفولون عند صاحبو لي فالبوليس باش يتكلف ليه بالقضية. .
دخلات لدارهم سلمات على مها وعقلها مرفوع واخدو ميمون..تصرفو اليوم حمقها وخلااها تحس أنه معاها راجل بالمعقول..كيفاش ضربو وكيفاش عنقها وعطاها الما وبدات كاترجع السينتة لور تاتفكر كيفاش كايعاملها..وكيفاش مقدرها ومبغاهاش تحكر وهي معاه.
دارت كاسكروط مع مها وهي مرفوعة ..عينيها كايرسمو عيونو وملامح وجهو فخيالها بالتفصيل..سموريتو لمايلة للمصرين ولعينيه لي كانو خارجين فالبرهوش..
تغيرات نظرتها ليه فموقف بسيط لمسات فيه رجولة شحال مشافتها فشي حد..فاش كايحميك شي حد اوتوماتيكمون تاتحس معاه بالأمان، والأمان هو أساس أي علاقة بين جوج..الى غادية معاك وخايفة راه ماغنوصلو فين.
تكمشات وسط مانطتها تاتفرج مع مها وساهية مكمشين من البرد تا تحل لباب لتحتاني وتسمع الحس..ناضت طلات لقاتو محمد ورجعات لبلاصتها عالمة مها بمجيئو..دخل كيف ديما مخنزر سلم على مو وعليها هي لا..جلس عاقدهم
وقالت مو:كداير أ وليدي وكي راها مليكة والدراري؟؟
محمد:(تجاهل سؤالها)نتي شكون داك خونا لي موصلك ليوم؟؟
نزهة:(تفافات)شكوون!؟امتا؟؟
محمد:(رفع صوتو حيت شوية تاع الصبر ماعندوش) الݣونݣو لي وصلاتك اليوم ديالمن؟؟
نزهة:(عقدات حجبانها)مالك كاتغوت؟؟ياك لباس؟؟الباطرون ديالي دايز من طريقي و وصلني
نزهة:(زفرات)بااطروووني أمي واش أعباد الله السيد دار غي الصواب رديتوني مامزياناش
الام:نتي عارفا خووك كي داير وعينيه معانا هنا واخا ماكاينش وكاديريها قد راسك
نزهة:(عوجات فمها معصبة)ݣولي مراتو لي حاطة خواتاتها حاضينيي تفووو الله يخليها سلعة ...كون زوجتيه ب بنت فاطمة ماكانش يوقع ليه هاكا خزيتت
الأم:(تنهدات بغضب)ندمت حتاندم الشيب لي فراسي يا سيدي ياربي
نزهة:نكدها علي الله يعطيه الغرق تفووو
ناضت من بلاصتها تتحول فالماعن للكوزينة وهي تقشع حدا باب الفصيل مياكي كثار ..مشات قلباتهم بعدما حطات الماعن فالكوزينة لقاتهم فيهم تقدية الحوت لي بغات و وصات عليها ولدو ..عوجات فمها وقالت:حسابني غي هداك الله ووليتي كادخل علينا القفة.
دات داكشي للكوزينة ونقات لي غايتنقى وغسلات البقية وسطوكات فالثلاجة..هزات مذكرتها تاتخطط كي غاتبدا وتبدا تا قادات بروكرامها العادي..وناضت وجدات عجينة الصابلي لي ماغيكونش كثير بالمكونات لي عندها وحيت تايشد اليد بزااف..صايباتو ودارتو فسولوفان ودخلاتو لثلاجة تالغدا وتبالي بيه...هزات تيليفونها مالقات تا اتصال منو ..عضات على شفايفها ودخلات لبيتها ويديها كياكلوها تتاصل ولا متتاصلش فالأخير دوزات المكالمة بعدما فكرات أنه ماكيفسرش التصرفات..
خيط الريح الجزء الرابع
محتوى القصة
طلعات نزهة للفوق جبدات السلعة تاتشوف وتاتقيد بشنو غتبدا وهي تنطق:إيناس نتي كملي التنقية ماخصش تجي العشية حتا نكون خلطت سلووو باش تجي الميمة تعاوني فالعشية هي وطاطاك سميرة
ايناس:واخا أعمتي
*****
يوم السبوع بعد أسبوع لي مر حافل عند نزهة..وجدات فيه كلشي وحمرات ليهم وجههم ماخلات سلو ماخلات حلاوي بشكال والنواع تحلف تريتور لي مقاد داكشي ..تا من البساطل صايباتهم ماسالات تابغات تموت بالعيا..قصدات أولا الحمام غسلات وتنقات ومشات ضارت بالحالة بحالها بحال أي بنت ودات معاها إيناس وجنات. .
السبوع غتيدار غي فالدار بين العائلة بحكم راجل دعاء دارهم كبيرة وقررو يديروه غي فالصالون لي كبير والعائلة ماكبيراش بزاف عرضو غير المقربين..
لبسات قفطان فالأخضر ملكي بعدما رجعات من الكوافورة بماكياج سموكي والعينين مخدومين من داكشي..مع طالون رقيق تاتبان ليك ترماحتها مهزوزة وحداها إيناس تاتلبس تا نطقات:ياختي وعلى كرش ولات عندي فففف تفووو(تتقاد السمطة)
إيناس:غلاضيتي أعميتو خصك تنقصيي
نزهة:كانفكر نتقيد ف شي صال نتحرك شويا راه إلا بقيت هاكا نبان حاملة. .
دخلات عليهم سميرة مأنقة تاهيا ومفرنسة وقالت:ياله الحادكات..نتي مك من صباح وهي كاتصوني
ايناس:(بلا مبالاة)غادي تنكدها عليا وصافي والله مانجاوبها العصا غناكلها غناكلها اللهم نتفركس ههههه. .
ضحكو عليها وخرجو كاملييين متوجهيين للسبوع لي دايرينو غي للنسا بوحدهم الرجال سبقو فالغدا..مع وصلو نزلات نزهة تاتقاد فشعرها وقفطانها وهي تنباعث عليهم مليكة من حيث لا يدروون طارت على شعر إيناس مغددة:فين كنتي السلݣوطة ها .
كلشي ترعب وهي تجرها نزهة وتاتهضر بين سنانها: واش حماقيتي طلقي من البنت أويلي. .
مليكة:نتي غادخلي سوق راسك ولا غانوريك لي مايعجبك(مزيرة على بنتها)دوزي يالكلبة خرجو رجليك للشواري
جرجها عبد الجليل منها بنطرة وضار فيها:تجمعي شويا نتي..راه مع الناس. .
حفيضة:مالكي أبنتي على هاد الشوهة ياك لباس ؟؟البنت كانت معانا. .
مليكة:(طلقات حلوقها)الالة عطيييو لبنتي بتيساع بغيتووو تخرجووها الطريق ..(شافت فنزهة)فرقي عليك بنتي ولا مايعجبك حال نتي باغيا تخرجي ليا عليها
نزهة:(خزرات) شوفي أديك الشيخة هادي بنت خووويا ومع عمتها وماضربتهاش على يديها هي كايعجبها تبقا معايا..والى مسكتيش غانفرج فيك هاد السبوووع . .
تسمع صوت محمد وراهم مخنزر :ياك لباس؟؟
مليكة:أجي نيت أخويا فاريها ليا مع هاد ختك باغيا تخرج ليا على البنت..داتها من أشمن وقت ومرجعاتها تال دابا كي الطعريييجة. .
شاف فبنتو وخزر وقال:تحركي خلي السبوع يدوز بخيييير
إيناس:(تترعد ومكمشة فعمها)بابا أنا غي بقيت مع عمتي وصافي
حرك راسو وجر مليكة مخلي نزهة تاتعوج ففمها وقالت:وجه الهم تفوووو ماتعرف تفرح ماتعرف تنشط خزييييت
الأم:حاشاك أبنت ختي زيدو زييدووو. .
دخلو للدار وتايسمعو فصوت العاونيات من الصالون لي عامر غي عيالات دخلو وسلمووو وجلسو تينشطوو بيناتهم..نزهة ملي حما الطرح وهي كتشطح مع سميرة وختها سعيدة لي فرحانة أما دعاء هازا التربية نااشطة وتتضحك..
نزهة مثلها مثل غاع النسا محزمة باقرب شال وعطاتها للشطيح وللرديح وتلوااز تا فرغاات الستريس عاد شدات الارض ..نشطو وضحكو العائلة بيناتهم ..
عجوزة دعاء جالسة مع خواتاتها تايدوزو كاسهم بحليوة والسربايات كايفرقو فالمشروبات المتنوعة ولي حرصات عليهم نزهة وجالسين كايرتاحو تايرويو ريقهم بعد جلسة الشطيييح
...:زوينة هاد الحليوة فنة..نتي لي صايبتيها؟؟
العجوزة:لا خالة دعاء الله يمتعها بالرضى..صايبات الحلاوي كامليين
...:الله يعطيها الصحة..بنينة كادوب فالفم
...:اييه عجباتني مقومة وباينا مصايبة بالخاطر يعطيها الصحة
العدوزة:راهيا شفتيها(كاتنعت بصبعها)ديك لي لابسة لخضر
...:تبارك الله غزاالة سعدات لي واخدها
العدوزة:والله ياختي الى زوينة وضريفة والصواب والاداب ولكن مسكينة باقي بلا زواج
...:(بصدمة)أويلي..داك الزين كولو ومامزوجاش اوا الله يعطي للرجال العمى
العدوزة:والله كون بقا ليا شي ولد حتانزوجو ليها حيت نقرة وحلوة. .
...:شوفي أختي راكي عارفا ولدي عرسوو قرب وماكرهتش تشد ليا هي الحلوة. .
العدوزة:موحالش واش كاتشد داكشي..ولكن نسولها ليك!!
...:حتا تهضري ليا معاها الى بغات تخدم ليا. .
العدوزة:إن شاء الله
عند نزهة كانت مجمعة مع مها ومرات خوها تايضحكو مع اللعابات ومليكة تاتخزر فيهم معندهاش معاهم بتاتا جايا غي بزز..تحط العشا كلاو وشربو وشكرو البساطل لي صاببات أما الباقي راه مطيبة الطباخة ..دوزو عشيتهم بالضحك واللعب تاخرجو النااس وبقاو غي هوما بيناتهم. .
دوزو عشيتهم بالضحك واللعب تاخرجو الناس وبقاو غي هوما بيناتهم. .
دعاء:(تاتفوه)ناري عيييت والله بغيت هي ننعس
سعيدة:نوضي ابنتي تنعسي رتاحي راكي باقي نفيسة
حفيضة:أنا نيت عييت غانمشيي
العجوزة :لوااه جلسوو باتو عندنا
نزهة:مرة خرا ان شاء الله انا خدامة غدا
مليكة:(ناضت)بسلامة عليكم..إيناس تحركي قدامي
ناضت باستهم وخرجات ولوخرين مخسرين فيها وجهم حيت تاتدير الصواب مع البراني وهوما عاطياهم القاسح
نزهة:ياله أمي نمشيييو
العدوزة:حݣا أنزهة أبنتي ختي داقت حلوتك وعجباتها وبغاتك تخدمي ليها لعرس ولدها
نزهة:(باستغراب)أش نخدم ليها؟؟
العدوزة:الحلاوي..
نزهة:واخالتي راكي عارفاني خدامة و ماكانساليش وعاد ماعمري شديت شي خدمة بحال هاكا تنصايب غي لعائلة
العدوزة :وتاهيا بحال عائلتك ههه لا ترديهاش فوجهي وماتعرفيه باب الخير عليك
نزهة:(حشمات منها)نفكر ونرد عليك أ خالتي. .
ناضو تسالمو وتوادعو وركبو مع عبد الجليل يوصلهم..فوسط طونوبيل نطقات الأم:واش غاتخدمي أبنيتي نيت لخت عدوزةدعا
نزهة:مالي مريضة؟؟كانجي عيانة خاصني غي ننعس ونزيد تمارة لراسي
عبد الجليل:شي وحدة هادي؟؟
سميرة:ااه..خالة رضى عجباتها الحلوة واقلة وبغاتها تشد ليها عرس ولدها
عبد الجليل:ومالكي اختي كاتجري على رزقك؟؟
نزهة:أخويا أشمن رزق ..أش غا نربح فيه؟؟غايطلع علي بغسيل الفندق هادشي ونربح فيه جوج دريال
عبد الجليل:علاه غاتخدمي عرس صغير..نتي عارفا عائلة رضى عندهم الفلوس وميسوورين وكبيرة عائلتهم يعني غا تكون quantité كثيرة وغاتربحي نيت. .
نزهة:مانكذبش عليك عمري فكرت فهادشي كاع
الأم:الصنعة ابنتي الى ما غنات كا تستر..ونتي يديك كا تخرجي منها الشهد تبارك الله ماكلتك زوينة وطيابك بنين جربي حتانتي ما تعرفي
سميرة:وعاد نتي خدمتك متقونة كتصايبي بالشهوة وكاتجي ماكلتك بنينة. .
عبد الجليل:الى جيتي تفكري فيها أختي راه كازا كلشي كايتمشى فيها..عطاك ربي صنعة فيديك ومتستاغليهاش..الناس راه ولاو دايرين مشاريع غي من الدار ورابحين.كاتنوض المرا كاتشري غي الحوايج بالجملة وتعاود فيهم البيع تربح غي عشرين درهم فالبياسة وهاهيا مدخلة الصرف..
نزهة:كانشوفهم نيت فالانسطا كايخدمو غي من ديوورهم ولكن داكشي كايبغي الصبر. .
سميرة:من عندي أنا غي توكلي عالله شدي غي كوموند فالشهر براكا عليك لا خلات ليك غي الف درهم براكا. .
ضحكات نزهة على نيتها وقالت:غاتخلي ليا الملاين لواه هههه أويلي على الف درهم
عبد الجليل:لا ماشي لديك الدرجة..فلول ماغتربحيش بزااف ولكن من بعد غاتبداي تعرفي وتربحي
نزهة:(تنهدات)يكون خير ان شاء الله. .
الام:غي فكري ابنيتي لا تجريش على رزقك
سكتات تاني ودماغها كا يفكر ويفصل ويخيط تا وصلو ونزلو وكلها توجه لبيتو..ديماكيات وجهها وراسها كايضور بالأفكار حول الموضوع ماعرفات واش تزعم ولا تدير بناقص
محسات براسها تا كانت ففراشها كاتضبط المنبه وكاتحاول تقلب على النعااس. .
-شروق الشمس لا ينتظر النائمين..
هي عبارة الى تمعنتي فيها غتلقا أنها كتعطي ملخص للحياة..بغيتي تخدم نوض بكري بغيتي توصل نوض بكري لي بغيتي تديرو نوض ليه بكري حيت الحياة ماكتوقفش عليك والى منجحتيش نتا غاينجح غيرك وهاكا غادية خاصك غي تعرف إمتا تنوض وفين تنوض وعلى قبل من تنوض.
وهذا حال ميمون...ناض بكري مع السبعة تالصباح ماشابعش نعاس وعظامو واكلين العصا حيت نعس غي فالصالة..جر كلاكيط ديالو للحمام لي بمجرد ماشعل فيه الضو باانت جماليتو..عصري مئة بالمئة تحشم تبول فيه..قضى حاجتو وغسل سنانو و وجهو وخلاه تايقطر عالله اوكد وخرج لبس عليه سورفيت كحلة سخونة لاح فوقها تجاكيط وزاد جار بانطوفة من جديد ..
نازل من عمارة راقية وساكنينها غي الطبة والمهندسين والطونوبيلات لي حداها غي الحديد الواعر ..طونوبيلتو بوحدها لي كاتبان مسخسخة قدامهم..شد الطريق للمحل ديالو حيت عندو سلعة خاصوو يوقف عليها..غادي وساكت كايدوز فشوارع البيضاء تاوقف قدام محلو ونزل منو تايتعجز وتايضور فالسوارت
كان عارف غيلقى الدراري حالين حيت تايسبقوه مع دخل حنحن ونطق:السلام وعليكم
..:وعليكم السلام المعلم
ميمون:هاد السلعة بايتا هنا؟؟
نطق واحد فيهم:ااه
ميمون:(مخنزر)ولاش تبات؟؟جات السلعة تستف فنهار وتقيد
...:والمعلم راه تدهينا مع البياعا . .
ميمون:(متجاهل هضرتو)ماشي هضرة هادي الشريف..وكدوو معايا خاصكم العوين ݣولوها نجيبو شي دري زاايد يعاونكم
حل لاكيص لقا فيها شي بريكات(فلوس)ونطق:خلص شي حد؟؟
...:جا عمر لي فولاد صالح خلص ليك ربعة تالمليون وݣاليك خلي البقية تالمنبعد
مبمون:شحال بقا؟؟
...:معرفتش
ميمون:(ساط)واا صبااح هو هذااا معاكم..والى ماعرفتيش شكون غايعرف ياك تنݣوليك قيد
...:أ تنسا المعلم
ميمون:تاتنساا!!!الله ينزل عليك المسخ تاتنسا غي لي بغيتي ففف(جيد تيليفونو صونا للسيد وعرف شحال تايتسالو)بقات مليون ونص ..قيدها ومانبقاش نلقا بحال هاد الخدمة
حناو راسهم معتاذرين وهو ينطق ويديه تاتجبد فلوس من جيبو:شد جيب لينا شي بطبوط وشي مسمنات باش نفطروو
مشا تيفرنس هزهم وقال:واخا
ميمون:(ضحك)هههههههه دنموو سمع المسمن وزاد تايضحك مضروب على كرشك
نطق الدري لاخر:لا المعلم راه البنت لي كادير المسمن لي تاتضحكو ههههه
ميمون:شوف ليك الناس لي تاتعرف تطيح!!هههههخخ بحالي أنا نهار عجباتني لقيتها مزوجة وبنتها تݣول ليا جدي خههههخه
مشا الدري تايضحك يجيب الفطور وخلاه هو تايعاون الدري يستفو السلعة مجمعين تقول عليه ماشي مول الشي. .
ميمون بطبعو انسان عادي..الى شفتيه فالزنقة ماتقولش عليه عندو الزبابل تالفلوس تعطيه غي شي حاجة هينة ..إنسان بسيط بزاف عانى فحياتو باش يوصل لشنو فيه هو دابا. .
معروف بولد المصري ماشي غي هاكاك لأن الأب ديالو مصري والأم من قلعة السراغنة..كان باه مصري وتايجي للمغرب بزااف حيت عندو صحابو بزاف فيها ومن بين صحابو خال ميمون لي زوجو ختو بقلب صادق..
غادرات ختو مع راجلها لمصر بزواج تقليدي مئة بالمئة ماكتعرفوش وماكايعرفهااش تا هضرتو مكتفرزهاش بزااف وزطمات معاه فبلد الفراعنة..لقاتو عايش مع مو وباه و خواتاتو وعاشت معاه الويل لمدة عامين..العصا والسبان والظلم ولأنها فبلد المهجر مكانش عندها فين تمشي تا حملات بميمون وجلسات صابرة عليه تا نهار فاض الكاس وتخاصمات مع خواتاتو لي دائما كاينعتوها بالسحارة نظرا للسمعة لي عند المغربيات تما وكباقي الدول العربية لي واخدين أن المغربيات سحارات. .
تخاصمو ودارو ليدين سلخاتهم المغربية كاملات وكرشها لفمها جا باه ولقا الروينة وأكيد جا من خواتاتو سلخها هي الأخرى مزيان تا جاتها ولادة مبكرة هزها لسبيطار ولدات وليد لكن مجاتش فين تفرح بيه تا كان طلقها ولاحها للزنقة فمصر ماكتعرف حد تما من غير الله...
ولحسن حظها كانت كاتشفر ليه فلوس وتاتخبي مشات بيهم لأقرب سفارة مغربية وعاودات ليهم مشكلتها وساعدوها باش تنزل فحالها مخلية وراها كبدتها مع بااه لي شافتو مرات قليلة فقط تا الرضاعة ملحقش يرضع منها. .
رجعات للمغرب مكسورة ومهدودة ..تواصل أب ميمون مع خوها وعلمو بشنو جرا وناض الصداع والسبان وخسران الصحبة على وديت "الزاهية" وتفرقو الويدان وتقطعات العلاقة..
لقات راسها منبوذة لأنها مطلقة و ولدها بعيد عليها..بكات عليه الدم و كل مرة تصوني للأب "حسن" تاتطلب فيه يرجع ليها ولدها لكن كان الرفض هو الجواب. .
شواها على ولدها لمدة عامين ماكتاكل ماكتشرب ما كادير تاحاجة من غير تبكي على ولدها وتسمع فالهضرة من باها ومها لي رافضين فكرة أنها تطلقات نظرا للعهد لي كانو فيه هوما..
تالواحد النهار جاها مكتوبها وجاها عرض زواج مايمكنش يفلتوه خاصة أنه عزري وقابل بيها واخا مطلقة وبلا مايفكرو من جديد، زوجوها ليه غي هاد المرة كان حداهم تاهو قلعاوي من السراغنة وبمجرد ماتزوجات ولدات بنية وتناسات حرقة ولدها شويا. .
هاد الأخير لي ماعمرو عرف مو شكون هي كايعرف غي باه ومرات باه وعماتو لا غير لي تزوجو وخواو الدار خلاوه مع جداه لي تكلفات بيه لكن زوجة الأب رفضات رفض قاطع الربيب وبقات كا تنݣر عليه مدة ربع سنين تا نزلو للمغرب ودااه حطو ليهم بعمر صغير بزااف خاسر عليهم كلمة وحدة
"مش عايز اشوف وشوو تاني" . .
هزو خالو وداه لمو لي بكات وفرحات بشوفتو تعنق وتبوووس وقررات تخليه معاها لكن زوج الأم مابغاش الربيب وتا عائلتو مبغاوش ولد الغريب يتربا معاهم وكانت ديك ساعة والدة جوج مع راجلها وخافت من الطلاق وجا الإقتراح من مها أنها تشدو تربيه ليها وتخلات عليه من جديد وتلاوح هو مع جداه و جدو لي معاشوووش بزاف معاه بمجرد ماوصل ست سنين كانو ماتو بجوج بالعافية لي شعلات فدارهم فواحد شهر 8 ب الصهد فالتبن وهو الناجي الوحيد حيت خوالو كلشي عازل داارو . .
بقا ميمون ذو الست سنوات وحيد فيدو فقط لوحة ديال الجامع هي لي نجا بيها من الحريق وهنا تاتبدا معاناة الترحال ..لا أم لا أب كلها بنا حياتو وكلها وشنو مقرر يدير ..شاف فيه خالو لوجه الله وهزو لدارو داه معاه ودخلو للجامع يقرا القرءان ويتعلم ماينفعو لكن ميمون كان ضاسر ورافض يقرا وتخلى على لوحتو بعدما شد شويا تالقرءان وشي حروف قليلة وكايجمع الكلمة فقط بمعنى نصف أمي..كيعرف يقرا ويكتب ولكن عادي ماشي قراية نيت حالو من حال الجيل القديم بزاف لي داز من المسيد وخرج للتعليم بفرق بسيط أن ميمون ماعندوش وراقو فالمغرب باش يدخل للمدرسة أو بالأحرى ماعندو تا ورقة ...
وفسن التعليم هو بلاصة مايهز الورقة وستيلو هز العصا تايسرح البهايم وتايدير الترحال..تكلف ببهايم خالو تايسرحهم بالسيمانات فالقرى ويرجع بعد وقت لابأس به ..
كبر ميمون بين البهايم ووسط البلادات لا حنين لا رحيم إلا الله ..كان النهار لي تاتجي مو لعند خالو عندو بالعيد ..يتلاقاها هي وخوتو بالعناق والبوسان ويتهلا فيهم وتاهيا كتجي مرة مرة تسول فيه وتجيب ليه الحوايج..
باختصار دارت ولاد خرين نساوها فحرقتو أي نعم منساتوش وغيبقا ولدها لكن من راجل أخر فكانت محطوطة وسط قرارين واش تربيه وتكرفص عليه ولا تمشي تعاود تبني حياة أخرى واختارت الثانية وعاش هو مع خالو ومرات خالو لي ماشاف منهم غير الخير والإحسان.
كايكون شوي تاع التمييز أكيد لكنو بعقلو الصغير ماكيفهمش..ميمون مالقاش لي يقوليه سير تدوش وسير تغسل وتنقى واجي تاكل كان إلا ما دارش هادشي لراسو ماكاينش لي يقوليه ديرو..تايغبر بالأيام ولا من حد سائل عليه ..ديما مخشي وسط البهايم والروث وطالقها تسرح ومولاها ربي وديما الضحكة على وجهو منورة جايب الزين المصري الحرش بإمتياز..وطولتهم وسموريتهم تا من فعايلو كايميل ليهم حيت الدم تيغلب. .
هادشي كولو وباه عمرو سول فيه بتاتا ماكانش كايعرفو كاع وديما تيسول خالو تيقوليه نساه كيما نساك تاهو..
شاءت الأقدار أن خالو يرحل للدار البيضاء بعدما تفرق الورث ديال جدودو وكلها شد حقو واليتيم بالوالدين عايشين بقا الله كريم لا دار لا دوار ..
غادر خالو للدار البيضاء وبقا هو ملاوح بين هاد خالو وهاد خالتو ومو..نهار هنا يوماين لهيه وأيام كثيرة فالسرحة تا لقى راسو وصل ل 14 لعام غا ملاوح ومع ذلك ديما ضاحك وتعرف بخفة دمو وضحكو مع الغريب والصديق . .
وفأخر زيارة لخالو ليه داه معاه للمدينة بحجة يقلب ليه على خدمة فين يتخشا..مشا معاه بنفس الحماس تاع ديما معارف والو..لابس عليه سروال كحل توب كولو مدبووغ بالصابون والوسخ وتريكو نص كم ورجليه فيهم صباط معرفو محلول ولا مسدود ماعندو تا حاجة من غير هاد الحوايج وفليساتوو لي شد من البيعة تاع البهايم ديالو ..جوج نعجات وجدي وحولي فقط..
وهنا غاتقلب حياة ميمون لمنحى آخر من سراح لعامل ب إحدى محلات التغذية فكازا أو بالأحرى مول الحانوت..خدمو خالو مع واحد السيد فكازا شلح قح بايجارتو عادي تايبيع مع الناس ويشري ورغم أنه مقاريش لكن كان تايسمع الهضرة وتايدير لي تقال ليه تا طول مع الشلح مدة خمس سنين وشد الحرفة ولى تايعرف منين يتقدا ومنين يجيب ومنين يخرج ومنين يدخل لكن نيتو ديما طاغية..
خمس سنين ماكاينش تواصل مع مو ولا باه ..تايشد مرة مرة من عند السيد ويصوني لمو عند راجلها هو لي يسول فيها أما هي ماكاينش تسوال بحالا برد قلبها عليه وتناساتو بالطاشمة لي ولدات وحتا باه راه مكانش تواصل بتاتا ومكانش تايعرفو. .
كبر ميمون وولى راجل بضخامتو وسموريتو ومواقفو الرجولية مع الناس وباقي حوفار بوعاري خدام عند الناس تا لواحد النهار كان فمحلو جا عندو خالو ومعاه راجل وعرفو عليه أنه باه وجا يشوفو..فرح بزاف وتعانق معاه تا لاخر فرح بشووفتو ..
ميمون كان باغي غي يعمر الفراغ العائلي لي عندو فقط وباه ومو هوما لي باغي..تعرف عليه وجلس معاه وعرفو شكون بدون مايحااسبو نهائيا وتا لاخر مفتاخر بيه وبغا يديه معاه لمصر لكن ميمون رفض يخرج برا المغرب وكانت عاجباه حياتو واخا عند الناس لكن حسن بالنسبة ليه واخا لا عيد كي ناس لا عواشر ولكن مرتاح فيها وهنا هو الفرق بينو وبين الناس انه قنووع وعندو واحد راحة البال يحسد عليها ..
مصفي بينو وبين الله ومرتاح رغم انه عرف ان باه جا قلب عليه حيت فقط ماولدش ولد مورااه..فزواجو الثاني ولد فقط ربعة تالبنات معطاهش ربي الولاد وجا تايقلب على الخليفة وبغا يعطيه سميتو لكن لقا خالو سبقو وناض جرا معاه تتجارا تا دار ليه وراقو وعطاه كنيتو حيت كان وصل للسن القانوني وخصو يدير لاكارط. .
توالات عليه الايام والسنين وهو خدام عند نفس الراجل تايبات فالحانوت عندو مع الفيران لي ياكلو من كلشي ومع سراق الزيت وهانيا عندو ماتماشي مع أي وضع تا ضرب معاه عشر سنين بالحساب..كانت ايجارتو ما كايقيسهاش قليل فقط كايعطي لخالو يخبي ليه والباقي تايشري منو ولكن قليل ..
لا لباس كي الناس لا فلوس كي البشر تاحاجة ماتبان عليه تا جمع مبلغ مالي مزياان وقرر تاهو يدير ديالو لكن المبلغ مكافيش وناض دخل معاه خالو شريك فمحل كرااوه وعمرووه بالمواد الغدائية فمنطقة ياله تسكناات ..وقف على شغلو ومحلو بيديه..
تكلف بالسلعة والتقدية تتستاف ويسربي الناس وكلشي بيديه وتتزوهر عندو فالعواشر مجاش فين ضرب ربع سنين تا كان المحل تروج تما وعمرات البلاصة بمعنى تسكنات وهو المحل الوحيد لقريب يعني كان تايضرب يدو مزياان..
شوي بشوي جاب دري خدم معاه عاونو وبمرحلة بمرحلة كبر مشروعو ودار حوانت خرييين تا عطاه ربي الرزق من حيث لا يحتسب ودار محل تالجملة كاااااع فقط لانه قنوع وصبور وماتشكااش وعمرو قنط من رحمة الله . .
-وصل ميمون لشنو هو فيه بعرق كتافو وبخدمتو وبتمارة لي ضرب وتا واحد ماعاونو الا الله وخالو..لي قرا فيه الحسنة ومابغااش يخليه يضيع رغم أنه شيئا ما ضاع حيت ماقراش وماعااشش مع والديه لي كل واحد فيهم مليوح فقنت . .
مع مو ما رجع التواصل دائم تاتوفى راجلها وكبرو ولادها لي هوما خوتو ولي كان ديما تايشوفهم وعندو عزاز..عندو من مو جوج بنات وربعة تدراري ومن باه ربعة تالبنات ..هاد الأخيرين شايفهم مرات قليلة بزااف فاش تاينزلو مع بااه للمغرب فقط لكنو تايعزهم وديما تايعيط يسول فيهم..
اليوم راه فعمرو 41 سنة ..ضرب فالعمر و وصل سن كبيرة نضج وكبر لراسو واليتيم بالوالدين حيين ولى راجل وخرج حار وحرش وبنى راسو براسو. .
عند نزهة لي ستأنفات عملها عادي كي ديما وعقلها خدام كايدي ويجيب ف فكرة خوها..من ديما كانت تاتمنى تدير تاهيا مشروع خاص بها لكن ماشي بهاد الشكل..بغات محل وتدير فيه لي بغات يعني يكون مشروع ملموس فأرض الواقع ماشي من الدار ناسية أن المشاريع المدرة للدخل هي لي من الدار. .
فالمشاريع كاينين أنواع لكن أفضلها هوما لي من الدار..كايجي أي واحد كيدير سوا بيعة وشرية ولا الكوموندات ولا النقيش ولا الطرز ولا الراندة وماغيرها من الحرافي وكيدخلو بيها فلوس صحيحة بلا مايخلصو الضريبة..المشاريع لي من الدار عندها إيجابيات كثيرة أهمها أن الناس ماكيلخصوش الضريبة وتاتخدم ديال راسك وولينا كنشوفو بزاف تالناس دايرين ماركات تجميل وتايقادو فالدار ويبيعو فالانسطا أو ناس تايخدمو كوموندات وبوكسات ويخرجوهم وداير بنادم الفلوس ومضور صريف . .
طول اليوم وهي دماغها خدام تيحلل فالفكرة ويدي ويجيب باغيا معامن تناقش ويحل عينيها كثر..مع رجعات للدار دارت كاسكروط معاهم وهي تجبد الموضوع مع عبد الجليل. .
- نزهة:شنو بان ليك أخويا نزعم فبلان لي كوموند؟؟
عبد الجليل:علاه مالك لي ماتزعميش!!العمر كايجري أختي والوقت بدالة ..نتي فيديك صنعة علاش ماتخدميش بيها وترزقي بيها..أنا متنݣولش ليك حبسي خدمتك لا كملي فيها وخدمي تالوخرا..ديري معارف وتعرفي وخدمي ونتي أصلا راه غي صحاباتك تديري معاهم لباس. .
نطقات حفيضة لي شادة تيليكوموند:خوك عندو صح أبنيتي..شوفي غي جارتنا بنتها تبارك الله عليها كاتصايب غي المسمن والبغرير والحرشة وكتبيع . .
نزهة:ويلي أمي بغيتيني ندير فراشة ونبيع. .
الام:لا ماشي هكاك..أنا ݣلت خدمي مع الناس بحال خالة رضى وخرجي ليها شغلها وهانتي ربحتي. .
نزهة:(بتساؤل)وشحال غا تخلي ليا كاع هاد لافير؟؟
عبد الجليل:الى خلات ليك غي 200 درهم راها مزيانة
نزهة:(برفض)الا غا نخدم على ميتين درهم غا بلاش
سميرة:أختي راه غي مثلا ݣاليك راه ماشي غاتشدي كوموند صغيرة راه عرس أكبيدة هههه يعني فيها الفلوس ونتي وشطارتك شدي ليهم تا البساطل . .
نزهة:(دارت صبعها فغمها تتفكر)ففف ماعرفتش والله..خفت نزعم ونصدق خاسرة
عبد الجليل:جامعة شي حاجة؟؟
نزهة:شويا وصافي
عبد الجليل:توكلي عالله وبداي بنص ديك البركة وخلي البقية مخبيية
حفيضة:وأنا نعطيك شي فلووس مخبياهم
نزهة:لا أمي غي خليهم عندك أنا نزطم ونزعم ونشوف فين تخرجني
حفيضة:وهاني نݣلس معاك نعاونك
نزهة:بلي فيه الخير إن شاء الله هههه دعيو معايا
الكل:الله يسر ليك
القرارات لي كنتاخدوها مصيرية فحياتنا ديما تيكون عندنا فيها تردد..كاين لي كايزطم بلا مايتسوق وكاين لي كايخمم مية تخميمة عاد كيدوز المقص..ونزهة باتت تتفكر وصابحة تتفكر فالأخير ربطات الإتصال بدعاء فوقت الغدا وطلبات ليها نمرة خالة راجلها. .
ومجاش فين يوصل العشية تا كانت دارت معاها تدوز عندها للدار..علمات مها يوجدو كاسكرووط وفعلا توجد وجات السيدة دارو معاها الصواب وجلسات معاهم مجمعين ضاحكين تا دخلو صلب الموضوع لي تجبد من طرف أم نزهة
حفيضة:اوا مبروك ماغديري
الخالة:الله يبارك فيك العقبة لنزهة حتاهيا نفرحو بيها
نزهة:حمم أمين..ݣولي ليا أخالتي شحال تالناس عندك؟؟
الخالة:صراحة باقي موجدتش ولكن أنا بغيت الكثرة يعني يكون كلشي واجد وماناقصة حتا حاجة . .
نزهة:ههه فهمتك ولكن خاصني نعرف شنو نصايب ليك؟؟وأشمن شكل بغيتي . .
الخالة:الفقاص باين هههه كعب غزال ..البهلة..حبة حلاوة..اوا وزيد وزيد
نزهة:شوفي أنا نوريك الحلاوي لي فايتة مصايبة فعراسات العائلة ونتي ختاري ليا
الخالة:ايييه ماقلتي عيب
ناضت حداها جابدة تيليفونها تتوريها التصاور حيت نزهة ديما تتصور شنو صايبات..دوزات ليها بزااف تالشكال مستفين ومقادين ومصورين عن قرب والسيدة غي تتسمي الله وتبارك فيه عجباتها الخدمة وهي أصلا دايقة الطعم. .
الخالة:هادشي عندك زوييين ابنتي مكرهتش تصايبي ليا كلشي ههههه
سميرة:وصايبي كلشي ههعهه
الخالة:ماكرهتش..مهم صيفطي ليا التصاور لنمرة بنتي أنا نعطيها ليك وحتى نختارو ومن هنا لغدا إن شاء الله نعطيك الخبار وبداي
نزهة:تا هذا نظر أخالتي
سميرة:والطياب شكون يطيب؟؟
الخالة:كاينة السيدة
سميرة:إلا بغيتي البساطل راه نزهة بسطيلتها ماتشبعيش منها
نزهة:(خرجات فيها عينيها)نتكافى غي مع الحلوة. .
الخالة:اوا لا تردينيش هههه تالبساطل بغيتهم ههه
نزهة:(حشمات)لهلا يحشمنا ههه دوزي كاسك أخالتي
الخالة:لا هذا هو الوقت(هاكي) دخلي ليا نمرتك وديري ليها نزهة وهاا(جبدات فلوس من صاكها)ها التسبيق باش تقداي والى خصاتك علميني نزيدك. .
نزهة:(شداتهم)إن شاء الله ياربي
توادعو معاها ووصلوها للباب ورجعو للبيت وهي تنطق نزهة:بساطل نزهة زوينين هههههه اوا زيدي تعاوني فيهم
سميرة:(كاتجمع الماعن وتضحك)ههههه أختي أنا غادية للريف هههه ضبري لمحاينك . .
حفيضة:ههههههه وهانتي لقيتي منين تزيدي فلوس
نزهة:فاش كانتفكر تمارة لي تابعاني كنحس بالعيا من دابا
سميرة:ضروري من العيا تا خدمة مافيها راحة..
نزهة:وفين غانخدم دابا؟؟تانفكر نهز الصالون ونخدم فالأرض وعاد غا يخصني الماتريال. .
سميرة:الصالون ضربيه علي غدا نهزو وتلقاي التيساع والماتريال راه عندك الضروري غي سلكي وصافي حتا ديري الفلوس وشريه
نزهة:يكون خير
الام:الله يسر ليك أبنتي ياربي ويعطيك الرزق. .
الكل:أمين
*****
فواحد الدار فخرجة تكازا عبارة عن فيرما صغيرة مضلمة ضارب الضو غير فدارها المسكونة فقط..واقف عساس قدام الباب كايحرك راسو مع الموسيقى الشعبية لي مسموعة بجهد تالعندو ماكرهش ينوض يشطح..هاد الصوت كان مسموع من الداخل فواحد الصالون كبير مفرش بالتقليدي مزيان وفيه ربعة تالرجال كل واحد شاد سداري وفيديه تيو تاع الشيشة منخوي عليه. .
جوج شيخات لابسين قفاطن حمرين والشعر حرير كيضرب لنص الظهر محزمين بموزون تيمشيو ويجيو يشطحو ليهم. . ويحركو فطرفهم الكبير والبيوضية كتشعل منهم متماشيين مع الموسيقى الشعبية واجسامهم تتحرك باهتزاز معاها مخليا الفام عليها محلولة...كل واحد فالرجال شاد الشيشة فيدو وضايرين بطبلة فيها قراعي تشراب الغالي والقطعة على حقها وطريقها ديال السكايرية الفري والدخاخن تتصوط فالارجاء. .
ومن بين الرجال كان ميمون لي شاد القصارة بالشيشة وعينيه معسليين بالطرووفة لي تمشي وتجي عليه..ويد كيهز بيها الفلوس ويعلقهم فصدر وحدة من الشيخات وعينيه حوالو على صدرها البيض لي باين نصو من القفطان ..جرها من الكول ونطق فوذنيها منغم:سالي دغيا وياله معايا
ضحكات ليه فوذنو وطرفها التحتاني كيهتز بدون توقف؛لي بغا طامو يحل بزطامو..والقصارة عاد بدات المصري..
شد فمرفقها وعينيه معسلين بالشيشة:بزطامي عامر وتا ز*** عامر..طلقيني خلاص من كثرة الفشوش. .
ضحكات ليه ومشات عاطياه بالضهر تتشطح وتحرك فطرفها وفشعرها منوضة معاها جوج رجال يشطحو وعيونو هو باقي متبعينها منغم عليها. .
ميمون كايموت على الشيخات..فلوسو يخسرهم عليهم وهو فرحان كل سيمانة داير قصارة هو وصحابو معاهم فشكال والنواع ولي جابوها اليوم ماتعاودش ترجع حيت تايكونو دايزين عليها..نشوطي وعندو مع الهرج والضحك والزهو فالشيخات..يخسر عليهم بزطامو كامل ويرجع زيرو درهم ويفرنس من الفوق..
مع سالا الطرح وسكتات الموسيقى جات حداه نفس الشيخة مليوحة عند رجليه كتساراح وقالت بصوت عالي:مال غرامتكم ناقصة معاودوش ليا هادشي
نطر من الشيشة مطول ونطق والدخان مغطيها عليه:الغرامة تاع الشطيح بدعة..بغيتي الغرامة المفروضة مرحبا . .
ضحكوو بميااعة مسمووعة هاهاها الرقيقة ديالهم وهو ينطق صاحبو:نوووض المصري ضرب ليك شي كويسات
ميمون:ههههههههه كنصلي أخويا
الشيخة:وعاد باغي تدوق الشهد
ميمون:بيني وبين الله الزين(تقاد فجلستو)ياله نمشيو. .
صاحبو:غاتديها باردة ولا..جلس أصاحبي ياله بدات القصارة
ميمون:أنا نشطت..نوبة ز*** دابا ههههه (وقف وشد فيها)ياله
الشيخة:واااصبر شويا غي نبدل علي
ميمون:نتسناك لتحت...الإخوان نشوفوكم فساعة خرا
شيرو ليه بيديهم لي ياذووب يهزوها الا واحد هو لي موكد ومشا لبس بانطوفتو وزاد تايدندن بفمووو أغنية شعبية ناشط
فحين الشيخة مشات بدلات عليها دغيا لبسات جلابة جاية عبار على طايتها مبينة طرف طرفاية لي هازا والوجه بيض كيشقيق وغلييض باينين الطبقات جيهة الذقن
...:ضربي ومتحني..راه غارق فلوووس
الشيخة:غنتهلا ليك فيه كون هاني هههه
مشات تتلوي فطرفها مخليا صحيبتها مع البقية مكملين سهرتهم لقاتو فطونوبيلتو طلعات وهي تفوح ريحتها وقال:بايعة زينك غالي ..فين تعطلتي الزين؟؟(كيديماري)
الشيخة:سميتي خديجة
ميمون:أرسول الله ههههههه أش كتعرفي ديري أ خديجة؟؟
خديجة:(كركرات عليها مزيان)هههههههههههههه كنعرف ليهم كاملين
ميمون:هههههه كتعرفي ديري ثمانياتون بترمتك؟؟(شاف فطرفها)
خديجة:هههههههه كنعرف ندير بيها شلا حوايج خصك غي تهلا
ميمون:تهلاي فيا نتي بعدا هههههه(تيليفونو كايصوني)قطعي الحس. .
شد الخط وقال:الو
..:فينك أصاحبي ؟؟مي مرضات طاح ليها السكر
ميمون:(حبس الفران)شنوو؟؟فين هادشي فين؟؟أش وقع؟؟
...:طاح ليها السكر معرفناهاش أش وقع ليها..جي أصاحبي دغيا راه مبغاوش يحطو فيها يديهم حتانخلصوو
ميمون:(مخلوع)واخا واخا أشمن سبيطار؟؟
...:*****
ميمون:هاني جاي دغيااا(قطع)نزلي نتي
خديجة:شنوووو؟؟كيفاش نزلي
غوت فوجهها دغيا تقلب:هبطييي فحالك مبقات قصارة(جبد فلوس لاحهم ليها)نزلي ياله
شداتهم ونزلات كدعي فيه وتغرق ليه ممسوقاش أصلا للخلا لي نزلها فيه ..هي حلوف وحافضة الطريق أما هو عفطها عفطة وحدة للسبيطار ووجهو مسقطر من الدم..خلاها صحيحة وعلى رجليها ودروك طايح ليها السكر..ماوصل تا بغا يموت بالخلعة..نزل بزربة ودخل لسبيطار تايقلب بعينيه تا بان ليه خوه ومشا لعندو:أش كاين؟؟فينها
..:أجي اخويا خلص بعدا باش يداويوها
حرك راسو بالإيجاب وقال: واخا واخا
مشاو للاكيص عطاو معلوماتها وهي تنطق المبلغ بالفرنسية ونطق هو بعفوية:شحال بالعربية؟؟
خوه تحرج ونطق:حممم ألفين درهم
جبدها زرقة مورا ختها حيت ديما تايهز الفلوس فالطونوببل وستفهم ليها حسباتهم وشكراتهم ومشاو
ميمون:فينها ؟؟كي وقع ليها؟؟
...:أخويا مك راه ماكتسمعش الهضرة..ماكديرش الريجيم ديالها وما كاتبغيش تضرب الأنسولين. .
زفر بعصبية وقال:لا حول ولا قوة إلا بالله ففففف زيد
مشاو فواحد الكولوار لقا خوه لاخر واقف مع ختو خرا سلم وجلسو تايتسناو وهو عينيه فاص ليه مامسوق لوالو. .
نغزاتو ختو اسمها فتيحة خوها وقالت بهمس:شووف باش جاي؟؟
طلعو ونزلو ونطق بهمس:وانتي عارفاه باش خارج باش كايجي لاش تحمقي راسك معاه؟؟
فتيحة:تݣول جاي يسرح فففففف ماعندو مايلبس ولا .
منعم: ونتي شغلك؟؟يلبس لي بغا ويجي كيفما بغا..ديها غي فمك لي مريضة تا يكونو عندك فلوسو ولبسي بيهم الحرير
فتيحة:كيعطي ربي الفول لي ماعندو ضرااس فففف
سقلات من بعد تتسناو الطبيب تاخرج عندهم وناضو لعندو كاملين واول واحد لي سول هو ميمون:كي بقات؟؟
الطبيب:حالتها مستقرة..المريضة ديالنا ماكاديرش الريجيم وماكتاخدش الأنسولين ديالها خاصها مراقبة
فتيحة:عيينا معاها ماكتبغييش
الطبيب:فهاد الحالة خصها أما تبقا هنا ولا نشوفو ليها شي انفيغمييغ تقابلها وتكونتروليها
ميمون:زعما شي خدامة؟؟
نطق خوه محمحم:لا غي سكت دابا نشرح ليك..دكتووغ لي خاصو يدار نديروه خاصها غي تكون مزيان
الطبيب:غاتبات هنا وغدا تخرج ومن الأحسن شوفو لي تقابلها ..بالشفاء العاجل. .
مشا الطبيب و هو ينطق ميمون:دابا شنو المعمول؟؟
منعم:نجيبو ليها فرملية تقابلها حسن
ميمون:خليوها تبقا عندي فالدار ونتوما شوفو شي فرملية تعود تجي تقابلها فالدار
براهيم:ولكن اخويا راه مصاريف الفرملية كثار
ميمون:واش غيكثارو على مي؟؟أنا نتكلف
فتيحة:الله يدير بحسابك أخويا..أنا نبات معاها نتوما سيرو
ميمون:نبقا معاك لا تخصكم شي حاجة
براهيم:ياله نمشيو حنا ونخليو فتيحة معاها تا الغدا ونرجعو
ميمون:واخا(زفر)معشية؟؟
فتيحة:اه أخويا غي سيروو
توادعو معاها ومشا بعدما دار ليها فيديها 400 درهم قايل:هادي لاخصات شي حاجة..غي توقع شي حاجة عيطي ليا واخا
حركات ليه راسها ومشا وهي تنطق:ماكاين لي كايعجبني فخوتي ݣدك سخي سخي هههه. .
مشاو الخوت معاه فطونوبيلتو تايتناقشو فموضوع مهم وداهم معاه لدارو كل واحد شد بلاصة ومشا هو حيد حوايجو ودخل للدوش عياان..خدا دوش خفيف ريح فيه راسو من تعب النهار ولبس عليه بيجامة بيتية بيناتو مسرار ومشا تخشا ففراشو تايقلب على النعااس حتى غفا. .
فالإستقبال واقف هو ومنعم وبراهيم ..صالح و عبد الصادق خوتو من مو كاملين كايهضرو فأمور الفرملية ولي رصاو عليها ..
ميمون:شحال غايخصنا؟؟
براهيم:ضبرت فيها بزز وطالبة 3000 درهم وغاتبقا معاها نهار كامل تا يتقاد السكر
صالح:غاتبات؟؟
ميمون:مانظنش
براهيم:لا سبعة غاتمشي
ميمون:واخا جيبها ووريها داري
عبد الصادق:علاش غاتݣلس عندك؟؟
ميمون:ضروري..شنو تديوها للقلعة ماتجيش فين تمرض خاصكم ساعة غي باش توصلوها لمراكش
صالح:لا اخويا دارها حسن ليها ..ماتبقاش هنا تما كاين لي يقابلها
ميمون:وها الفرملية تقابلها
منعم:أخويا تما كاينين عيالاتنا غايقابلوها ويغسلو ليها ويديوها للطواليط ..مال الفرملية غادير هادشي كامل
ميمون:كاتعنااو بعيالاتكم ولا ههههه غانتزوج تانا وتبقا تجي تݣلس عندي بالشهورة
ضحكو كاملين وهو يهضر عبد الصادق:نتا أخويا غسلت عليك يدي صافي ..عينيك ماشي خوت ماباغيش وحدة عينيك فالضريرات
ضحك ميمون وقال:أخويا عرقي مصري شابه با ههههه تايعجبني الزين
صالح:أشنو زعما ماحطيتي عينيك على تاوحدة؟؟هانتا أصاحبي بنات خوالك وبنات العائلة كثار شوف شي وحدة وتوكل ودير دارك حتانتا ..نتا الكبير فينا ومامزوجش
منعم:ههههههههه ولا جيب شي مصرية ياك عندك بنات عمك
ميمون:لا لا خصها تكون مغربية وتكون شيخة مزال ههههه(ضرب فيدو). .
عيد الصادق:الله يعفو عليك ههههه زيدو نشوفو الواليدة..
مشاو عندها لقاوها فغرفة خاصة بوحدها فايقة واخا مسخسخة..ضارو بيها ولادها وهي تترضي وتعاود خايفين عليها ودايرين ليها كي الما القليل ومهليين فيها وتايضحكو
صالح:لقيتينا أمي كانهضرو مع ميمون يتزوج
الزاهية:(بصوت متعب)بالفرحات علي نزوج البكر ديالي بلالة تنسا
ميمون:(ضحك)شوفي ليا أمي شي وحدة تكون زوينة بحالك هههه
الزاهية:شوف لراسك اولدي هه
عبد الصادق:(بغا يشد فيها)ݣاليك غايشوف شي وحدة فبنات عمامو(غمز ميمون باش يطمر)
الزاهية:(غوبشات)والله لا دخلات علي المصرية عروووسة(تعصبات)مزيان تبارك الله بقا ليا غي عائلة الكلب تكون عندي. .
ميمون:(عقد حجبانو)مي غي كيضحك معاك ماكاين لا مصرية لا والو..(سكت تا يجمع فالهضرة) و راه با هذااك أمي. .
الزاهية:عرفتووو باااك(بعصبية)وحتانا مك. .
فتيحة:سكتو عفاكم تمشيو تعصبووها تاني..أش جبد لينا حنا دوك التريكة
ميمون:(ما عجبوش الحال ما كايحملش لي يعاير ليه بااه)أنا غنمشي نقضي شي شغال وغنرجع
الزاهية:(بغير نفس)سيررر
باس راسها وخرج مخليهم تيشوفو فبعضهم تا تشجع منعم
ونطق:مي شديك الهضرة؟؟راه بااه هذااك
الزاهية:فين كان باه فاش كان تايتعذب؟؟باه باش؟؟حتا سميتو معاطيهاش ليه
صالح:واخا هاكاك أمي ماتݣوليش ليه هاكاك..عارفاه عزيز عليه بحالك بحالو كايبقا باه
اازاهية:(مكرهة)الله يطليه بييه..داكشي لي ربحت منو انا غايربحو هو
فتيحة:مافهمتش أنا علاش باقي كايهضر معاه..أنا بلاصتو مخليني ولايحني منسولش حتا فيه
عبد الصادق:نتي هاديك..وباه هذاك خليييوه معاه ياك ماخليك أمي خاصك والو اوا خليه منو لباه ..
عوجات فمها وسكتات ماتلاتش دوات..حيت هاد الموضوع بضبط تايعصبها..تتكره باه لدرجة مكتصورش ومكتحملش تا ذكرو ومن ديما معارضة علاقتو معاه ونهار تتعرفو جا عندو كتجلس تسخط تتكرهو حيت مدوزش عليها قليل. .
لكن ميمون ماكانش كايتسوق كايعطيها جملة"كيفما نتي مي حتاهو با" وكايخرج من باب واسع حيت مايقدرش يلوحو
خارج من الباب وتيليفون فيدو تيهضر مع خالو على أعمالهم..خدا سيارتو وشدها ديركت للمحل وطول الطريق دوزها تيليفونات..ركن سيارتو ونزل داخل عليهم كايلقي السلام وبدا كايشوف فالفاكتورات ويحك فذقنو
:أجي نتا..شكون خدا هادشي؟؟
شاف المتعلم فالورقة وتايضور فعينيه:كليان جديد
ميمون:كليان جديد وحاط 15000 درهم
...:ااه المعلم
ميمون:أش هادشي كاتب هنا؟؟صايب خطك كتكتب كي الطبة ياك لباس؟؟باش غا نفهم أنا هادشي
...:هانتا المعلم فيها دݣيݣ..و60 بياسة ديال الغسيل
ميمون:أشمن ماركة؟؟
...:اريال المعلم
ميمون:وبشحال حسبتيه ليه
المتعلم:بعشرة دراهم
ميمون:مممم صافي(سدهم)سير لشغلك. .
حط الفاكتورات مدا ماجاب ورجع للسطوك تايقلب شنو خاص وشنو لا باش يجيب السلعة ..قضى نهارو كاامل تما تالعشية هز سوارتو بغا يخرج مودع الدراري وكايوصي فيهم مع غادي قاصد طونوبيلتو كاتبان ليه نزهة كي الحمامة جايا..بسروال الدجين لاصق وشوميز قصيرة فالابيض فوقها كويرة سوداء وصاك فيديها الناعمة لي مزيناها باكسسوارات خفيفة..الشعر مطلوق على الكتيفات كايضرب دايرا ليه بروتين تيبان مسبسب..
خلاتو بلهلا يحزقو ليه يوقف من جديد مستنيها تاتوصل جيهتو..فحين هي ماشافتووش بتاتا تا سمعات اسمها من طرفو عاد لمحاتو..تبسمات وتوجهات لعندو بخطوات ثابثة وهو كايتسنا فيها قول تاتمشي ليه على قلبو وعينيه كايطلعوها ويهبطوها تا تبرزطات..
دارت تبسيمة بزز ومدات يديها:سي ميمون لباس؟؟
ميمون:الحمد لله ونتي؟؟(تايشم فريحتها)
نزهة:الحمد لله هاحنا كانسلكو مع البرد
شافها تاتحك يديها مع بعضهم وقال:كي دايرا بنتك؟؟
نزهة:(كمشات عينيها باستفسار)شكون بنتي؟؟
ميمون:البنت لي عيطتي ليها تعاونك(بدا تاينشط حيت شكوكو غلط)
نزهة:(دارت ضحكة رقيقة خطفات قلبو)هههه لا ماشي بنتي بنت خويا..أنا ماعنديش بنات
ميمون:(تبسم)عندك الولاد؟؟
نزهة:ههه ماعندي لا ولاد لا بنات لا راجل ديال راسي ههه
ميمون:(فرح)هههههه واݣوليها لينا مخلياني محتارمك
نزهة:(جاب ليها ضحك)حسابك مزوجة هههههه لالا حتارمني بلا داكشي
ميمون:ينعل لي يقل عليك الحيا...(ريحاتو بهضرتها)شحب الخاطر الالة تلبنات؟؟
عجباتها هضرتو تاتحسو تيدللها بدون قيود وهي تنطق:عارفة راسي بسلت عليك ولكن غي تصاوب معايا . .
ضحك وتقاد فالوقفة تا ولات كاتبان هي قصيرة قدامو ونطق:ههههه نتصاوب معاك مرحبا(دار ليها يديه بمعنى تفضلي)المحل ديالك الالة تلبنات. .
تبسمات بغنج وسبقاتو بشوي مخليا عينيه نزلو ديركت لزكها وتنهد وتبعها للمحل محنحن على قبل الدراري لي دغيا جمعو الوقفة ملي شافوها
ميمون:سير نتا وياه شوفو السلعة لي لداخل
مشاو ديك ساعة فهموه بغا يخوي القنت خلاوه راس فالراس معاها..دخلها لبيرو صغير جلس وجلسات تاهيا وبقاو شوف فيا نشوف فيك تايحفظ تفاصيلها. .
نزهة:عندي كوموند خراا
ميمون:كلشي خدمتي ليه إلا أنا ماكتابش ليا نذوق ماكلتك
نزهة:ههههه نذوقك علاش لا
ميمون:شنو خاصك؟؟
جبدات ورقة ومداتها ليه شدها تاهو وعينيه على يديها والضفيرات كي مبرودين..تمعن فيها شوية وضحك:باش كاتكتبي؟؟ههههه خطك ماواضحش
نزهة:هههه بالزربة كتبت
ميمون:سالم سااالم(تينادي)
جا دري مد ليه الورقة وقال:جمع ليا هادشي دابا
شدها وزاد مخلي يديه عنذ ذقنو وكايشوف فيها وهي تكسر الصمت:شحال غاتحسب ليا؟؟
ميمون:وانشوفو بعدا أش فيها أنا خطك مافهمتوووش
نزهة:دير شي ثمن زوين وتعاون معايا ياله بادية
ميمون:(تقاد فجلستو)شنو بادية؟؟
نزهة:هههه كانشد الحلاوي
ميمون:مشروع زوين وفيه الفلوس واخا تمارتو كثيرة ولكن حسن ليك من بلاش. .
نزهة:(كتشرح ليه على نيتها)واراني خداامة خدمتي وݣلت نزيد هادي وحتانا ندير ديالي. .
مبمون:(بجدية)والصراحة الواحد هو لي يدير ديالو..الخدمة عند الناس راه كي والو ..تبقا تحوفر وتبووعر وفلخر يلوح ليك جوج دريال
نزهة:داكشي لي ݣلت مع راسي...نبقا فخدمتي وندير هاكا وهاكا حتاندير كلياني. .
ميمون:ديريني كليانك ..أنا نشري من عندك هههههه
نزهة:هههه كلشي ديالك؟؟
ميمون:كلشي كلشي!!
فهمات قصدو وبدات تاتراوغو فالهضرة باش متضصروش عليها ونطقات:إن شاء الله نكمل هاد لكوموند وضروري ندوقك وعطيني رأيك
ميمون:ماكاين لاش..باينا طيابك بنين ههههه
جا دري مد ليه الورقة وقال:1400 درهم المعلم
نزهة:فففف لالا غليتووو علي ويلي
ميمون:ههههههه أش غلينا عليك هذا الثمن ديالك نتي
نزهة:لالا هذاا ماشي ثمني أنا..نقص شويا اسي ميمون
ميمون:(ضحك)سيدنا وسيدك رسول الله..أنا ماشي شريف هههه راني غا فرعوووني..ثبتي معايا شويا ونديرو ورقة وستيلو لهادشي وتشوفي ثمنوو . .
نزهة:ياله اسيدي دير
ميمون:(جبد ورقة وهز ستيلو)سالم أشنو فداكشي
بدا الدري كيملي عليه وهو كايحط غي الثمن وكيوريها كل حاجة تا كمل وقال :1400 درهم بالحساب
نزهة:(ماعرفات متقول)ماظنيتش هاد الثمن غليتو علي
ميمون:(غمز دري يمشي)شحال هازا معاك؟؟
تحرجات كاتعوج ففمها بدون شعور ونطقات:700 درهم
ميمون:(مد يديه السمراء قدامها)أريها والباقي حتا يكون عندك ودوزيه
نزهة:(صدمها)شكون ضمني ليك؟؟
ميمون:شنو زعما تشفريني هههههه
نزهة:لا هههه غي زعما تقتي فيا دغيا
ميمون:حتا الى ݣاع شفرتيني مايبقاش فيا الحال ..خورني الزين وعيني تعماو ههه
حشمها تا دارت بتسامة خجولة وقالت:عندك مع العيالات هااا!!
ضحك على نيتو وقال:العيالات الزوينات عفااك ههههههه
نزهة:ههههههههههه باز لمراتك معاك
ميمون:مسكينة غا تلقايها دروك كاتسنا تدي شي زين شي قراية فلخر غاطيح فولد المصري هههههه
نزهة:(ضحكها)ههههههههههه ومالو ولد المصري!!! ضحوكي ونشوطي
ميمون:فينما كان النشاط عيطي ليا هههههههه
نزهة:ضحكتيني والله...واخا أسيدي نعطيك هادشي لي عندي والباقي خليه غي نشد فلوس الكوموند ندوزهم ليك
ميمون:عندي شرط!
نزهة:لي هو؟؟
ميمون:نهار تجيبي ليا البقية عرضيني بيهم للغدا
نزهة:ههههههه كاضور بيا أولد المصري؟؟
ميمون:غا ملي فهمتي راسك مايتسالكش..هذا هو شرطي
نزهة:يكون خير إن شاء الله..هاك أسيدي(مدات ليه الفلوس)
لاحهم فالمجر بلا مايحسب وقال:700 لي بقات ديال الغدا
نزهة:واخا ههه
ميمون:جبتي لي يهز ليك ولا تعذبينا عاوتاني؟؟
نزهة:وعذابي راه راحة او لا؟؟(سبلات فيه العوينات)
ميمون:(فرنس ليها)نوصلو لنفس البلاصة!!
نزهة:اه غي هاد المرة غاتخلص مني حشومة كل مرة مجرجراك
ميمون:(رد ليها صرفها)يكون خير...الى كنتي غادية دابا للدار يله نوصلك وتكون السلعة معانا. .
نزهة:(بغات ترفض ومالقات كيدير)واخا وسمح ليا غا نبرزطك
ميمون:(وقف)دنيا هانياا
عيط للدري وقاليه يحط السلعة فطونوبيلتو فحين هي تاطلعو وتنزلو لابس سورفيت عادية وبانطوفة جارها ..ماتقولش عندو الفلووس..ناضت تبعاتو للطونوبيلة وفخاطرها تاتقول اش كاديري انزهة هههه. .
حل ليها الباب وطلعات تتسناه هو يكمل السلعة وعينيها كيضورو معنقة صاكها مستغربة من تصرفها معاه..ضورات وجهها لور لقات لكوسان لور فيهم شلا كراطن وشلا مانط مافهمات والو...
حتى دخل حداها وقال:فاش ساهية الالة؟؟
نزهة:حمم والو
ميمون:(تحرك)شحال فعمرك أنزهة؟؟
نزهة:(تحرجات)علاش كتسول ؟؟
ميمون:(شاف فيها ورجع شاف فطريق)غا بغيت ندي ونجيب معاك فالهضرة ههههههه خايف تكوني صغيرة وندي البروصي..
نزهة:(حساتو لمح ليها بلي تتبان صغيرة وعجبها الحال)34 سنة خهه
ميمون:بشاخ باقي صغيييرة خصني نعيط ليك بنتي لا
نزهة:ههههههوعلاش بسلامة شحال فعمرك!؟
ميمون:شحال تعطيني؟؟
نزهة:معرفتش غي ݣول..
ميمون:41 سنة..باقي شاب
ضحكات عليه وقالت :شاارف مع راسك هاا
ميمون:غي فالعمر ..العقل باقي صغيير..
تبسمات ليه وعينيها حاضيين ملامحو وهي تنطق بعفوية:ضرييف نتاا
ميمون:هههههه عجبتك الزين؟؟
نزهة:اوا خلاص عليا من البسالات ههخههه..
ميمون:متفهميش مزاحي غلط والله كون مرتاحيتش ليك منضحكش معاك..باينة فيك بنت الناس..
نزهة:ربي يخليك..
صونا تيليفونو وجبدو عادي ماهو هاتف ذكي موالو كيقول غي الو..استغربات ومحكراتش حدها تتسنع هضرتو مع شي حد وكيهضر بجدية والأغلب على شي مشرووع مامشروع.. ماقطع تاقربو يوصلو ..
لاح التيليفون وقال:التبرزيييط صافي
نزهة:وسع خاطرك شويا
ميمون:موسع معاهم غا هو بنادم فيه الصداع..غرض ميقدرش يقضيه ليك
نزهة:وقف على شغلك بيديك..
ميمون:(بصراحة)والله مابيدي..كنت جالس تا ناض ولد خالي ݣاليك والو تدخل معايا شريك فواحد المشروع ديال التلامط والزرابي فدرب عمر ودخلت راسي للمشاكل(وقف حيت وصل)..
نزهة:وا مشروع زوين..التجار تاع درب عمر ودرب غلف كيدخلو الفلوس صحيحة..
ميمون:(ملفت لعندها)مكيدخلوها حتا كيشوفو الويل ..كثرة طلع وهبط كون حطيتهم فشي قهوة حسن ليا ههه..
نزهة :(مرتاحة فهضرتها معاه)دخل معايا أنا شريك هههه
ميمون:هههههه نتي شدي الخدمة ووأنا نذوق ليك ههههه هادي فاش نفعك
نزهة:ههههه مضرووب على كرشك ..
حط يدو على كرشو لي منفوخة شوية :ولله الحمد هههه
نزهة:وصلنا..ݣاع ماحسيت بالطريق جيتي طاير.
حيد لاسانتيغ ونطق:الوناسة زيينة أزينة البنات..
نزل وتبعاتو خرجو السلعة والعينين عليهم من سكان الحي..صونات للفوق طلات سميرة وقالت:هبطي هبطي عاونيني..
ميموت:(كيطنز)هادي ماما خرا ولا شنو ههه
نزهة:مرات خويا هههه سير بلا منشدك هنا شكرا بزاف
ميمون:دنيا هانيا..الله يسر ليك لاخصاتك شي حاجة عيطي ليا ولا دوزي للمحل..
نزهة:شكرا
تحل الباب من طرف سميرة لي شافتو حركات ليه راسها وتاهو حركو وزاد لطونوبيلتو وتبعوه بعينيهم تانطقات سميرة:شكون هذا؟؟
نزهة:(تتهز)قصة طويلة هههه هزي هزي
سميرة:(كتهز)بحالا فايتة شايفاه!!
نزهة:معرفتش
طلعو التقدية بمشقة الأنفس وطلعو جلسو يرتاحو لقاتهم موجدين كاسكرووط ..كلات وشبعات وناضت بدلات عليها ورجعات حداهم تيهضرو وتتخمم منين تبدا وكتقاد بروكرام تمشي عليه باش ماتلفش
سميرة:شكون داك السيد؟؟
نزهة:(كتكتب)واحد السيد ف***** تيببع بالجملة هادشي وتيدير ثمن ناقص على الحانوت كنتقدا من عندو وكيوصل ليا
الأم:الله يدير بحسابوو
سميرة:معقلتش فين شفتو والله
نزهة:عندو محل كبير ف "*****
سميرة:معرفتش..هي شي شلح ههههه غا الشلوح لي معمرين تما
نزهة:(ضحكات)وتݣول ياختي هذا عروبي صݣع هههههههه تحلفي عليه ماشي محلو هذااك وقتما مشيت تنلقاه لابس نفس الحوايج ههههه ولكن ضريف..
الأم:ومالو بغيتوه يلبس الحرير .
نزهة:ولكن أمي يمشي على قد جهدو ..السيد راه عندو الفلووس حيت داك المحل بوحدو غا يكون مقيوم عليه بزبالة الفلوس راه كيجيبو السلعة بالكثرة والموقع فين عندو يبين ليك ولكن مابايناش فيه ݣاع ..
سميرة:ياختي ماعارفش يتصرف فالفلوووس هعههه
نزهة:ونزيدكم (تلفتات للباب ليكون داخل عبد الجليل)كيضور بيا ههههه..
الأم:اوا ابنتي أش بغيتي بيه؟؟ليكون شي قليل العفة
سميرة:هههههه باش عرفتيها؟
نزهة:هههه السيد غي كيشوفني كيبقا حال فمو ويهضر زوين..و يشد الخاطر تصوري اليوم طلقني ف700 درهم وݣاع مكيعرفني مزيان..
سميرة:راه هاكاك باش كيديرو الكليان!! وياك جا معاك تالداار حسابك لله فسبيل الله..
نزهة:(دارت ليها طن فراسها)والله الى ههههههه أنا حسابني السيد بغا يعاوني
الأم:عافا بنتي إلى كان عينو زايغة بلاش من مقديتو تقداي من عند شي محل اخر وبلا صداع مناقصنا صداع مع محمد خوك..
نزهة:(بلا مبالاة)مالو هاد محمد خويا أش عاطيني ..ياك ݣلست من الخدمة عمرو جا لاح ليا شي ريال ولا تفكرني حتا بفلوس الحمام..يجي يهضر نخرج فيه لاهو لا ديك العݣرب ديال مراتو..ممصبرني عليهم غي دوك الولاد لي من دمي
سميرة:الله يهدي ماخلق(ضحكات)هههههه أش سماه الله هاد التاجر..
نزهة:(شداتها الضحكة)ميمون هههههه
سميرة:(طلقات ضحكة عالية)هههههههههههههههههههههههههه لا زهر لا ميمون ينعل بو الزين تعالي حدايا ..
نزهة:ههههههههههه تعالي حدايا خيتي وعنݣيني .. ههههههههههه سميتو ميمون معروف بولد المصري ونزيدك ݣاليا 700 درهم لي بقات ليه نعرض عليه بيها الغدا هههههه
سميرة:الزلال لاخر ههههههه باينا فيه من العروبية لي باغيين غي يضربو اللحم و ينوضو
الأم:الله يبعدو علينا..ديها فخدمتك وصافي بناقص من مقديتو..
نزهة:كي شفتي أنا فايقة ليه من النعاس هههههه غيوجدو فلوسو نديهم ليه ونسوسو ..بقا ليا غي هو فالحساب..
تسد الموضوع وقلبوه لموضوع اخر ..نظمات وقتها ودارت كل نهار شنو غتخدم وشنو غدير..وتوكلات على الله وربي كبير إنه المعين..
*****
التنظيم والتخطيط هو أساس نجاح المشاريع..تجلس بينك وبين راسك وتحط مذكرة وتكتب شنو باغي تدير وتحطو على أساس هدف وفجانبو تدير كي غندير ننجح مشروعي وشنو غيخصني وشنو لي خصني نرد منو البال وشناهوما الخطوات لي خصني ندير..
وهذا بالظبط لي دارت نزهة..فمذكرتها خططات وكتبات شنو معولة تصايب وشنو خصها وشحال تقام عليها وشحال غتحسب للسيدة وكي غتخدم..ولات كي تدخل من الخدمة تاكل وتمشي للصالون لي جمعات ليها سميرة .. تتخدم كل نهار تتحيد حاجة ومكتنوض من بلاصتها تا كتكون سالات رغم التعب والعياء لكنها صممات وعولات وخصها تخرج كوموند بحقها وطريقها..
خدا منها الوقت سيمانة كااملة وهي كتوجد بعدما ختارت السيدة الشكال لي بغات ..نظمات وقتها وخدمات الكوموند ديالها على أحسن وجه..واليوم كان السبت فالعشية خصها تدير التوصيل للناس ..دارت معاهم وجاو دراري بطونوبيلات هزو كلشييي مزوق مستف ناااضي خلات كلشي يتعجب من الشكل لي زينات بيه البلاطوات.. وآخر راجل هز الكوموند مد ليها جوا فيه فلووسها شكراتو وطلعات فحالها ناشطة وضااحكة حلات الجوا لقات فيه الخير والبركة مخلي ليها البريكول مبلغ زوين فرحها مقارنة مع سيمانة تالخدمة ..
سميرة:اوا هانتي ها فلوسك شديتيهم وبالرباح..
الأم:العقبة للخدامي الكبار ان شاء الله..
نزهة:أمييين ياربي(جبدات ربعمية درهم)هاكو هادو ديالكم
سميرة:والله منشدهم أنا بعدا دسي فلوسك تحتك وخبيهم
الأم:خلي فلوسك عندك أبنتي حنا مدرنا والو..
نزهة:وحتا نتوما عاونتوني حشوومة
سميرة:فسبيل الله هههههه غا خليهم ليك وجمعيهم وديريهم تحت يديك..
نزهة:ههههه لهلا يخطيكم علييا
سميرة:صراحة ولفتكم والله
نزهة:كنتفكر بلي غتمشيو كيتقبط عليا قلبي..
الأم:اوا فيها خير..أنا غنبقا معاك أبنتي شي أيام ونمشي هههه..
نزهة:ههههه نتي عجباتك الحسيمة و وليتي كتهربي من هنا
الأم:وانكذبوو هههه ريافا زينين وعشرتهم زيييينة
نزهة:هههههه الله يسمح ليك..خصني ندي لداك خونا فلوسوو..
سميرة:المصري هههههه أربي علاش كيݣولو ليه المصري..
نزهة:(كتحسب فلوسو)منعرف لباباه ههههه غدا ندوزهم ليه ونسد عليا هاد السوق..
الأم :مضسريهمش عليك أبنتي
نزهة:كوني هانيا..نمشي نضربها بواحد التحمحيمة شو يدي كي ولاو هههه ندي معايا جنات
سميرة:غا دي هههه
فالغد ناضت تاتفوه حيت الحد شبعات نعاس بعد حمام فالليل بردات فيه جنونها ورتاحت فيه ودللات راسها..فطرات بخاطرها مع دارهم وناضت جارا جنات فيديها تخرجها حيت مها تاتجمع حوايجها وهي ماسخاتش بيها..لبساتها وانقاتها وتأنقات معاها وخرجو شادين الطريق وجنات غي كاتسول فين غاديين لفين غاتديني مسكتاتش تاوصلو . .
لقات المحل حالين واخا كانت مامتوقعاش..دخلات كيف ديما وعطات ريحتها فيه..قبل ماتنطق بالسلام كإشارة لدخولها قشعاتو فالكونطوار ديال المعلمية خاشي راسو فالتيليفون الذكي.. تبسمات من منظرو..لابس تريكو خفيف ولحيتو زادت كثافة بلا موسطاجو لي غي يجلس ويجبد فيه قاعيدة فيه..وسموريتو لي عاطية للعين وكتافو العرااض مامخلي من المصريين والو. .
- نزهة:سلام وعليكم.
هز فيها راسو وتبسم دغيا تاتكمشو عينيه وبانو سنيناتو زوينين مستفين لكن فيهم بقايا الماكلة..قشع البنية وقال:هادي بلا شك بنتك ههههه
نزهة:(تاتقرب لعندو وهو عينيه تيطلعوها تا كتوتر )لا بنت خوياا
خرج من الكونطوار وقرب منها لكن نزل لمستوى البنية وفرنس ليها:الزوينة لباس؟؟
جنات:كي داير أعمو؟؟
عجباتو وشد يديها باسها وقال:لباس أبنتي ونتي؟؟
جنات:أنا لباس
باسها فحنكها ووقف تقابل مع الزين الكبير..مد ليها يديه وعينيه فوجهها تايبين ليها بحالا موحشها ..ماعرفاتو زلال ولا نيت توحشها..شداتها بلطف وقالت:صافا؟؟
ميمون:درجي الزين هههههه
نزهة:تا كي داير ههههه
ميمون:الحمد لله ونتي؟؟غبرتي ماصونيتي ماسولتي ماݣلتي نسول فيه
نزهة:(كمشات فيه عينيها بهيئة من نيتك)هههههههه ماكتحشمش ..باشمن صفة أسيدي
ميمون:وا زعمي ونديرو الصفة ههههههه كي دوزتي شغلك مزبان؟؟
نزهة:الحمد لله ..ساليتها بخير وعلى خير. .
ميمون:مزيان لعقبة للوخرين
نزهة: إن شاء الله
جنات:(تاتنغز فيها)وا عميتوو ياله نمشييو
ميمون:(بمزاح)واش نتي كاضلي مخرجة ولاد خوتك خهههه
نزهة:هادي بنتي ههه أنا لي مربياها
ميمون:وا زعمي وديري ولادك تانتي
نزهة:(قاسها فجرحها)حممم إن شاء الله حمم جبت ليك فلوسك. .
ميمون:(كايطنز وهو راجع لكونطوار)أشمن رزق؟؟
نزهة:(تبعاتو بخطوات قلال)ممممم نسيتي صافي ماكتسالني والو هههه جيت غي نشوفك. .
ميمون:(تقابل معاها فارقهم الكونطوار)مصااب كون جيتي تشوفيني لله فسبيل الله تاخدي فيا الأجر وندعي معاك دعوة الفراعنة
نزهة:شريف ولا هههه
ميموت:فرعوووني أختي هههههه
نزهة:بصح؟؟واش نتا نيت مصري؟؟
ميموت:صباح الخير هههه عاد عرفتيها لي صيفطوك لعندي مݣالوش ليك راني مصري
نزهة:(باستغراب)والله مافراسي حسابني غي كايعيطو ليك بيها وصافي خهههههه(ممصدقاش)دابا نتا مصري ..منين فمصر؟؟
ميمون:ههههخخ وشكون عرف أنا غي تزاديت تما(بجدية)الواليد مصري ومي مغربية
نزهة:(ضحكات)ولاهيلا هههههه أصلا سموريتك ديالهم
ميمون:ݣولي كحوليتي ههههه (جبد بسكوي من المجر)هاكي ابنتي
شداتو بابتسامة لقاتو تاع الشكلاط:شكراا أعمو
تبسم ليها عجباتو وهي تنطق:كاتمشي لمصر؟؟
ميمون:لا معمري مشيت..ولكن كيعاودو عليها زوينة بحالك
نزهة:(حشمات)ماكتفلت حتا فرصة باش ضور بيا سبحان الله هههههههه
ميمون:وا الزين راه غي ديال هادشي ههههه
نزهة:(شافت قدامو تيليفون تايبان تيبري وحداه كارطونتو)بصحتك
ميمون:يعطيك التيليفون ههههه(هزو)ما فهمت فيه والو ههه
نزهة:مالو؟؟ياكما قديم ومخرشش وعاطيه ليك والو
ميمون:لالا جديد نييت هانتي ها الكرطونة(بعفوية)ولكن مافهمتش ليه ..من صباح وأنا نخربق فيه بغيت غي نقلبو للعربية ومعرفتش. .
تبسمات ليه بعفوية من هضرتو لي خرجات بدون تفكير..وهي تقول:أرا نشووف(مدو ليها)شنو بغيتي تدير فيه؟؟
ميمون:ماعرفتش ههههه أش كايديرو فيه الناس؟؟
ضحكات بجهد وتكات على لكونطواار وقاان:نتا راه عالاااام هههههههه انصايبو ليك ونسا الكريدي لي بيناتنا
ركز عينيه فعينيها وقال:نسييتووو شحااال هذا
عطاتو تاهيا نظرة بريئة ومريحة لهاد العفوية والضرافة لي فيه..وهي تنطق:فيه كارطا؟؟
ميمون:اه درتها فيه..قلبيه ليا عربية وعاد ديري ليا فيه الوتصاااب(نطقها بالصاد )
نزهة:(حابسة ضحكة من طريقة باش نطقها)واخا هه أنا نصايبو ليك شوووف كدخل هنا(وركات على جيمايل)بلاتي بلاتي نصايب ليك واحد الحاجة. .
ميمون:أجي ݣلسي أنا نجيب من لداخل كرسي
دخل لداخل جاب كرسي ليه ولجنات لي تتاكل فبيمو وهي شدات تيليفون تتصايب ليه جيمايل باش تخدم ݣوݣل بلاي وهو ساهي فيها تيحفض فوجهها ويتبسم بعذوبة..حاضي تحركات وجهها وكيفاش تاتقطب حجبانها ملي كاتعكس ليها وتا فمها لي تاتلعب بيه ويديها لي شادة بيهم تيليفون تايبانو غي بالشوفة رطبيين مزيناهم بخواتم كثيرة وصباغة لونها فاتح. .
نزهة:ففف هاهو تصايب ..مشارجي نهز الواتساب
ميمون:حمم(حس على راسو)اه غي قضي ..
هزات ليه الواتساب وملى عليها نمرتو وقاداتو ليه وهي تقول :هاهو تصايب..أجي نوريك كي تخدم بيه..شوف هذا تانهضرو بيه اوديو وفيديو مع الناس مثلا(طلعات لكونطاكت أول سمية طلعات بالعربية أية الݣابونية)هاد أية الݣابونية (مسخها الضحك)هعههههههههه
ميمون:(عاق بيها)الشيخات تابعيني فينما مشييت هههههه غمضي عينيك على هادي
نزهة:نجربو فنمرتي حسن باش تفهم كيفاش تهضر وكيفاش تصيفط أوديو
ميمون:واخا ههههه
جبدات تيليفونها طلقات الكونكسيون حطاتو فوق الكونطوار ومشات تاتقيد نمرتها عندو ومع بقا الضو شاعل بقات تصويرتها تتبان دايرا وضعية قبلة بفمها لي معكر بالحمر..بلا حشمة بلا حيا هزوو قول موالفة معاه المزاح هزو بإعجاب وبصبعو تايجر فموسطاجو ونطق:الزين هذا
شافت فيه و شافت تيليفونها حيداتو ليه بنطرة وقالت:اوا الفضول لاش..خليني نصايب ليك تيليفونك وحط ديالي.
ميمون:شفت الزين خاصني نهضر ولا غاترجع علي بحرݣة تالمعدة
ضحكات لهضرتو وقالت :صكع هههههه شووف هانتا هادي نمرتي مكتوبة فيها نزها بالعربية
ميمون:(تيحقق فيها)مممم اوا
نزهة:الى بغيتي تكتب ورك هنا وكتب مثلا السلام (صيفطاتها ورن تيليفونها)
ميمون:(شد تيليفون تايشوف فكلافي ونطق بصراحة)نجيك للصراحة..أنا راه مانقدرش نكتب دغيا هادشي تايتلف.
نزهة:(بفضول)واش مقاريش؟؟.
ميمون:قريت شوي فالجامع وصافي شي بركة تالقرءان ..تانجمع الكلمة الى شفتها ݣدامي ولكن بخط يكون باين
نزهة:(صدمها)وكي درتي تا ولى عندك هاد المحل؟؟
ميموت:ههههه أش جاب القراية للمحل؟؟
نزهة:(باهتمام)زعما خصك باش توقف محل بحال هذا تكون قاري مزيان وعارف صواريك. .
ميمون:(بجدية)والله أختي مجات بقراية..كاع لي داير البيع والشرا وقاري مامطفروش..البيع والشرا والبياعا والجمالا الزمان والوقت والمعارف لي كايعلمووك...راهم قارين شنو دارو؟؟
نزهة:وا ماتحݣرش لي قارين . .
ميمون:(حط يدو على صدرو باعتذار)حاشا واش نحݣر شي واحد..أنا غي شرحت ليك..الحمد لله ماقاريش..ماكنعرفش للفرونسي وماكنعرفش نجمع الكلمات بزاف فوتي ليا الدݣيݣ نولي نتلف ولكن بخيري...القراية زوينة وأنا وغيري لي ماقراوش راه ماكرهناهاش حيت كاتووعي كاتخلي بنادم يحتارمك ولكن راه معندها علاقة بالفلوس..حيت حنا لي كنديروهم ماشي لقراية
نزهة:(قنعها)وكي درتي لهادشي هذا؟
ميمون:(رجع ضحك تقولي ماشي هذا لي عاد كان تايهضر )هههههههههه الوقت والحرفة ..لايحسابك بديت لبارح راه قبل مانصوم وأنا فهادشي ..شعري شاب فيه . .
نزهة:(تبسمات ليه)سبحان من خلقك هاكا صريييح. .
ميمون:لي فقلبي فطرف لسااني هههههه وا كملي ليا دابا باش نبقاو نهضرو فالليل
نزهة: (غلباتها ضحكة)علاش الليل؟؟
ميمون:هههههههههه الليل زوين كلشي فيه مستور ..النهار كايفضح
نزهة:ههههههههههه حشمت نݣوليك الله يمسخك
ميمون:ههههههه الله يمسخني
نزهة:ههههه واتبع معايا..بلاش من الكتبة..مثلا لا بغتي تݣول ليا شي حاجة ورك هنا شفتيه وهضر...مثلا دوي دابا(شادا الاوديو)
ميمون:(على نيتو )أش نݣول؟؟
ضحكها:ههههههههه ݣول لي بغيتي
ميمون:(لاحها ليها فوجهها)كتعجبيني أنزهة والله
حبسات الاوديو بلهلا يطريه ليها وكان مشا ليها..شافت فيه مامستوعباش أي نعم تايلمح ومايمكنش يخفاو عليها ملامحو ولكن مظناتوش يلوحها هاكا..هنا تأكدات يلي راه خضر نيييت
النوع ديال ميمون صرييح..غايقوليك الحاجة يعطيها ليك فوجهك بغيتي ولا كرهتي..عجباتك ولا ماعجباتكش ماكيعرفش يزوق وكيهضر من قلبو..بصريح العبارة "خضر" وهاد المصطلح كينطابق على الناس لي كايهضرو بلا مايفكرو..داك نوع لي تغمزي فيه تاتعياي ويفرشك ويهضر..المهم خصو يهضر ويقول أش فخاطرو وما كيتسوقش..النوع لي ماكيعرفش يتصنع ولا يزوق ليك الهضرة..
نزهة:اوا يهدييك الله(ماعرفات متقول)مهم هاهو وصل لعندي
طمر تاهو ببلاهة وهي تقوليه عاود بعدما توترات من هضرتو وندمات لاش جات:حممم هنا الى بغيتي تصوني لشي حد(ورك هو)هاكاك هاهو كيصوني
طلع تيليفونها كيصوني وهو يقول:مزيانة!!
نزهة:وهنا ورك عليه الى بغيتي تهضر مع شي حد هاكا فيديو هانتا(صونات وصونا تيليفونها هزوو)دوز داك الزرق للفوق
وبالفعل دارها وبانت صورتها ونطق:ممممم زوين هادشي
ضحكها من جديد وقالت:ربي باشنو كنتي خدام؟؟
ميمون:العادي وبخييير ههههه
نزهة:هنيتي مخك ههههه
ميمون:والى بغيت مثلا نجبد نماري خرين من غير ديالك. .
نزهة:هانتا انا نطلعهم ليك...شوف هاهوما (تاتطلع غي سميات الرجال وبزاف تالعيالات)حمم تبارك الله غي العيالات...ها أية ها سناء
نزهة:هانتا أنا نطلعهم ليك...شوف هاهوما (تاتطلع غي سميات الرجال وبزاف تالعيالات)حمم تبارك الله غي العيالات. .
ميمون:ضلمتيني هههههه غي خواتاتي
نزهة:(تبسمات)شحال نتوما؟؟
ميمون:عندي 4 تخوتي وستة تخواتاتي
نزهة:تباااااارك الله ههههههههخ مك مفرخة نيييت كل عام بولد
ضحك من نيتووو ومد ليها يدو ضربات فيها وقالت :لالا ربعة تالبنات من با وجوج من مي والدراي من مي ..
نزهة:والديك مطلقين!!
ميمون:واييه..شي نهار نعاود ليك قصتي خهههه
نزهة:(عجباتها ضرافتو)واش نتا ضريف مع كلشي ولا غي أنا؟؟
ميمون:هههههه وماعرفتش سولي علي يعطيوك العربون...لي نݣوليك أنا قبيييح لا تعصبت وماشي أي واحد كانعطيه وجهي الزوين والضحوكي
نزهة:(متبعة معاه)وعلاش أنا زعما؟؟
ميمون:(بعفوية)وراه ݣلت ليك كاتعجبيني الزمر ههههههه واه نبقاو حنا غي نطلعو ليك فالهضرة..فهمي راسك
جنات:واعمتييي عيييييت ففففففف
نزهة:واخا أكبيدة هاحنا نمشيييو(حطات تيليفون جبدات الفلوس)هاك علاش جيييت شكراا بزاااف
شدهم لاحهم فجيبو وقال:ماكاين لاش...مرحبا بيك
نزهة:لهلا يخطيك...ياله زيدي أشاطة ماطة
جنات:وافيا الجوووع
ميمون:(بلطف)أنا لي عطلتكم ياله تغداو معايا
نزهة:لالا شكرا غانديها نغديها ونقضي شي أغراض
ميمون:غاندير فيك الحق مابغيتش تغداي معايا
نزهة:حممم لا والله ماشي هاكاك غي عندي مانقضي وصااافي
ميمون:اوا مغدية مغدية ياله معايا تغداي وسيري قضي أغراضك
لح عليها بزاف وماعرفاتش متقوليه من جهة ماعاجبهاش أو نقولو ماشي ستيلها ومابغاش تخرج معاه ومن جهة حشمات منوو بزاف...تنهدات باستسلام وقالت:واخا
تبسم ليها وقال:اوا هاكاك الزين(هز سوارتو وخشا تيلي فالمجور)زيدي ياله
سبقها وهي تشوف فيه بسروال السورفيت غي هاد المرة كلاكيطة باينا دوريجين ورجلييه نقييين فيها وغزاالين رغم أنهم سمرين ...حركات راسها ب أحيانا أش كندير وتبعاتو لطونوبيلتو بعدما سد المحل..دارت جنات لور وطلعات حداه وهو يقول:فين بغيتو تغداو؟؟
جنات:عميتووو نمشيو لماكدو
ميمون:كتاكلي فداك العجب(ضور الطونوبيل)غانديكم لواحد البلاصة تنسييك فكاع لبلايص. .
نزهة:فين؟؟
ميمون:الثلاثين تضربي الشوا تا يخرج من وذنيك ههههههخ
تبسمات ببلاهة وقالت:سير عالله (فخاطرها:واحد خضر فين غايديني).
مع بغا يهضر صونا تيليفونو الصغير هزو جاوب وطول الطريق كايهضر مع شي كليان وأغلب هضرتو كايهضر غي بالملاين ويتحاسب..كاتبان عليه واحد الجدية خطيرة ..سايق بيد وحدة ويد شاد بيها تيليفون وتايتناقش تحلفي عليه ماشي هو هذا لي عاد كان تايضحك ويكركر كي الشياخ. .
وصلو للثلاثين .. سميت بهاد الإسم حيت هي جات 30 كيلومتر برا كازا طريق السوالم..فيها الشوا بجميع أنواعو ولي ذاقو ماكيشبعش منو..شوا بنين وخاتر فينما تلف ليك شي عروبي تلقاه خاشي راسو تما...
مع وصل لقاو بزاف تطونوبيلات شكال ونواع من الغالي للرخيص..حط فقنت وسط طونوبيلات واخا الجو شويا مضبب ولكن ريحة الشوا والدخاخن فايحة
نزهة غي كاتشوف وتحلل وتضور فراسها تاتقول فين جيت ومعامن..فحين جنات تاتطل من زاجة تشرجم وتفرنس. .
ميمون:(قطع الإتصال)فريع الراس فففف يلاه نزلو. .
نزل هو وتبعاتو هي حلات لجنات لي غي شافت دخاخن والأجواء وهي تنطق بعفوية:عميتو واش اليوما العيد؟؟
نزهة:(تضور عينيها على الارجاء وتتفرنس)بحال هكاك هخهه. .
ميمون:أجي الزين عند عمو(هزها)أش تاكلي؟؟
جنات:(تتشوف فعمتها)معرفتش
ميمون:وياك من صباح ونتي فيا جوع فيا جوع هههه(باسها فحنكها ونزهة مبسمة ليه)ياله زيدو
تمشاو معاه دخلو وسط الناس لي كايشويو وماكاين غي دخاخن وريحة الشوا فايحة تحل ليك الشهية ..وكواغط محطوطين والملحة وماطيشة وبصلة جو شهوا منوو..تلفات وسط الدخاخن تا شدات فذراعو تتنش بيديها على الدخان..شاف فيها وتبسم:مالك
نزهة:فففف تخنقت
ميمون:راه السيد لي كانݣلس عندو تما ما يوصلك والو
مشاو لواحد طبيلة جر ليهم كراسا جلسو وقال:هاني جاي
مشا وبقات متبعا ليه العين تا غبر وهي تضورهم للناس لي حداها كانو مخلطين بين ناس المدينة وناس البلاد وكلشي خاشي راسو فشواه..
جنات:زوينة هاد البلاصة
نزهة:ههه عجباتك(حركات ليها راسها)واعنداك ملي نوصلو للدار تݣولي ليهم جينا لهنا...ماتعاودي لحد
جنات:واخا
نزهة:(ضحكات فخاطرها)ميمتي وليت نقحب فالثلاثين هههههههههه
بقات تاتشوف فالناس وريحها الجو والهوا تالشوا بقات هي تاتشوف وتاتسناه..تايبان من بعيد واقف مع واحد تيشوي ليه وتيضحك تاتبسمات تاهيا...ما غاتكذبش كيجيها ضريف ومصواب..شافتو جاي من بعيد وهي تبسم ليه مشيتو زوينة كيتمشى مبندر ومهيب.
جلس حداها وداعب شعر جنات وقال:تعطلت؟؟
نزهة:لالا
ميمون:شوي وتجي الماكلة
نزهة:عذبتي رااسك
ميمون:دنيا هانيا
نزهة:(بابتسامة)مولف تجي نتا لهنا!!
ميمون:(كيلعب بسوارتو)كانجي مع خوتي مرة مرة ومع صحابي مرة ومرة معاك. .
نزهة:(كضحك)معول تبقا ديما تجيبني
ميمون:ههههههه ايييه وعلاش لا..هنا حسن من المدينة كثرة زواق وماتشبعش تا فكرشك
نزهة:وكال مع راااسك ها ههههههه ولكن باينة فيك صحيح هههههه
ميمون:هههههههه
وقف عليهم الدري هاز طباسل كباار عامرين بالكفتة مشوية والكوطليت..ماطيشة وبصيلة مصوطيين معاها..والملحة والخبز داكشي تاع القلب ..
ميمون:تهليتي فيا هاا
...:بصحة المعلم
ميمون:زيد بحال هادو
نزهة:ويلي براكة هادشي وغايشيط منو
ميمون:هههههههه غا بلاتي وتشوفي واش يشيط(كيحط لجنات)كولي كولي
جنات:شكرا أعمووو
تبسم ليها ونطق :كولي كولي عتقي ونتي قربتي تموتي
نزهة:(مدات يديها بأدلب تتهز)كتعاير فيا ههههه تݣول راني ضعيفة وأنا عاد كانفكر ندخل للصال نضعاف
ميمون:(كايخشي فوجهو)غتعداي على راسك..نتي هي هاديك لاش غاتضعافي
نزهة:(تبننات)ممممم شحال بنينة الله...نحيد الكرش
مبمون:(كينضغ)فينها الكرش وريها ليا ههههه
جنات:زوينة هاد الكفتة أعمي
ميمون:(زادها)وزيدييك كانت هاد عمتك غاتديك لشي حفرة تاكلي ماتشبعي
نزهة:ههخخههخه مسطي هههههه
ميمون:قابليني ههههه واكولي(شافها تتهز بصبيعاتها)اوا كلينا بكري نتي نكون معاك فطبلة متصوري معايا والو
شد طرف دار فيه كفتة وقربو لفمها بعدما سرط:حلييي فمك حليي. .
نزهة:(صدمها)ههههههه لالا بلاش
ميمون:(خرج فيها عينيه)حلي فمك
حلاتو خشا ليها طرف ديال الخبز عامر بالكفتة وهي تبدا تنضغ تا تقجات وفمها عمر وهو تيضحك مع جنات عليها مسرطات تا بغات تمووت بالتجياف. .
نزهة:اححح أربي..بعد مني خليني ناكل فخاطري
ضحك وخلاها تاكل وتعطي لجنات لي عجبها الجو وتتدخل فالشوا تا ماباقي قدات وتاهو حاضياه بشوي كياكل عادي ظناتو غايكون مصوفج لكن ماكلتو كانت بتاويل .
ساطو فكلشي حيت بنين وعاد رجعو حطو ليهم من جديد وباشر هو تياكل أما هي شدات يديها تتضحك.
تاهز هز ليها راسو وقال:ضحكيني معاك الزين؟؟
نزهة:واش ماشبعتييش هههههه
ميمون:وشحال كليت ݣاع!!!غا البركة هههههه كولي نتي
جنات:أنا شبعت
ميمون:بصحتك أبنتي
نزهة:بغيت نغسل يدي
ميمون:خوي عليك من داك الكاس ههههه
غسلات يديها وتا جنات وهو باقي تايطحن فالشوا على قلبو تا كمل وناض غسل يديه وقال:باقي بغيتو شي حاجة؟؟
تبسمات ليه وقالت:ربي يخليك
مشا خلص ورجع عندهم وقال:وادابا ياله نديك فين بغيتي
طلعو للسيارة متبسميين..نزهة مرتاحة نوعا ما الجو والمها وغير نفسيتها شويا أما هو راه عادي عندو ..
ميمون:(بفضول)أشمن أغراض؟؟
نزهة:واقلة مشا الحال(شافت فساعتها)بغيت نتقدا شلا حوايج تالحلوة
ميمون:(باهتمام)بحالاش؟؟
نزهة:(شافت فيه كي مركز فالسياقة)شي حوايج غايخصوووني وعاد غايخصني ناخد الماتريال. .
ميمون:كتخدمي غي فداركم؟؟
نزهة:هاد الساعة اااه
مبمون:زوينة الصنعة الى عطاك ربي فيديك شي حاجة خدمي بيها حيت كاتغني والله ..واخا خدامة زيدي خدمة خرا
نزهة:واخا كانعيا عرفتي كانجي من الخدمة مهلووكة وكانزيد للحلوة مزال وكاتشد اليد بزااف
ميمون:ضروري تعياي فلول..شوفي شي وحدة تعاونك!!
نزهة:كاتجي بنت خويا تعاوني وهاد الايام تاا مرات خويا ولكن الخدمة الصحيحة علي.
ميمون:شحال عندك من خوتك؟؟
نزهة:هههه كاينة سعيدة هي الكبيرة فينا عاد محمد ..أنا عاد بابات هاد البخوشة لي لور ههههه عبد الجليل
ميمون:(شاف من المرايا فجنات)نتي بخوشة ههههه
جنات:ههههههه اااه
نزهة:(على نيتها)غتخوي عليا الدار تاني ياك اعميتو؟؟
ميمون:ماعايشاش معاك؟؟
نزهة:(تنهدات)لا فالحسيمة
ميمون:(ضحك)ومالكي كاتݣوليها منهدة ههههههه
نزهة:ولفتهم كانبغي نتونس حتانا ههههه كايديو ليا مي كيخليوني بوحدي
ميمون:(هز حاجبو)كتبقاي بوحدك؟؟
نزهة:ااااه كنبقا بوحدي كاتجي مي وتمشي وصافي
ميمون:ها علاش ݣلت ليك الصنعة زوينة..بشوية بشوية كا تعرفي وديري شي محل ديالك وخدمي..ها خوتك كلها فقنت ونتي تبقاي بوحدك اللهم تلاهاي فيها.
نزهة:هههه وايييه داكشي..شوف حطني ف ****
ميمون:(بعفوية)نتسنا معاك حتى تقداي.
شافت فيه بهدوء وملامح الراحة ظهرات على وجهها معرفاتوش واش كايهضر بصح ولا كايطنز وهي تقول:لا غي حطني
ميمون:اوا حتى نوصلو بعدااا هههههه
كملو حديثهم على منوال آخر كولو ضحك وتكركير..هو مع كايهضر عفوي تيخليك بزز عليك تكوني عفوية وهي كتزيد ترتاح ليه هاكا تاوصلها وقال:ياله دردبي فحالك
نزهة:ههههه صافي سخيتي!!
ميمون:(تحلات ليه)حاشا واش نسخا بالزين
نزهة:هههه كنضحك معاك
نزلات ونزل معاها وشدات فجنات وقالت:شكرا على الغدا
ميمون:(حط يدو على صدرو)مرحبا
جرات جنات ومشات مخلياه متبع ليها العين تاغبرات وقال فنفسو:زوينة بنت الحرام ههه
طلع لطونوبيلتو وزاد ناشط كايدندن فحين هي مشات بجنات لعند مالين الماعن كاتشري ششنو خاصها لخدمتها من مولات وقوالب وزيد وزيد
تلاهات العشية كاملة تما تا خدات شنو بغات ورجعات للدار محملة ومثقلة..سلمات وبدلات عليها وجلسات تدير كاسكروط معاهم . .
نزهة:جمعتي كلشي؟؟
سميرة:ااه صافي
الام:اوا الله يديكم على خير
سميرة:أمين أخالتي اوا ماتغبرييش ..غي شي أيام وجي
الأم:إ شاء الله
عبد الجليل:غي شي سيمانة وتبعينا أ مي
نزهة:نتوما راه ورثوني فمي هههه
الأم:(ضحكات)اوا هذا حال الشارفات كايكبرو ولادهم ويبقاو يضورو عليهم
ناض عبد الجليل للجامع وهي تنطق نزهة:وصي بنتك أصاحبتي متتنطق والو ههههه
سميرة:علاش؟؟(شافت فجنات)أش وقع ليوم
جنات:(تتشوف فتلفازة) كلينا الشوا
الأم:(بفضول)فين كليتوه؟؟
جنات:(مركزة فالتلفازة)مع واحد عمي ضريييف
نزهة:(شداتها الضحكة)هههههههههههههه أويلي هادي وصيتها
سميرة:أش وقع؟؟
نزهة:تعقلو على مول الجملة ههههه الصكع لي عاودت ليكم عليه
الأم:داك الباسل
نزهة:والله أمي الى داك سيد الله يعمر ليه الدار..مسكين مشيت نخلصو ولصقني ݣاليك نمشيو نتغدااو هههههه اوا وداني للثلاثين ضربت الشوا أنا وجنات حتا خرج من وذنينا وجينا
سميرة:هههههه كون أختي علمتيني نمشي معاك
الأم:(شدات حنكها)أويلي على لي خاصها تخاصم ..يا نعلي الشيطان(بإنزعاج) علاش مشيتي معاه أنزهة؟؟
نزهة:والله أمي ماخفت منو السيد كايبان شارب عقلو والله..ضحوكي وغي كايفرنس وعرضني وحشمت نردها فوجهو
سميرة:اوا واش ݣاليك ؟؟
نزهة:عرفتي راه صكع وخضر بمعنى الكلمة هههه سمعو سمعو ݣاليا فوجهي وبلا حشمة كاتعجبني فهمي رااسك
سميرة:هههههه وشدي فيه مالكي تبرعي غي شوا
نزهة:اويلي على شدي فيه..السيد ماقاري ليف من زرواطة
سميرو:اش قضاو لي قاريين أختي..را هو ياك ماقارييش وخانز فلووس
نزهة:والله ماباينين عليه..هو ضريف وضحوكي ودغيا كايدخل للخاطر ولكن راه ماباينينش فيه فلوسو
الام:ونتي أش بغيتي بيه؟؟نزهة ها وذني منك تمشي ترافݣي معاه
نزهة:أويلي يا مي ههههه لالا غي كانتقدا من عندو وصافي هذا ماكان..
سميرة:هو زوين فوجهو أخالتي والله
الام:ونتي فين شفتيه؟؟
سميرة:راه جاب ليها السلعة داك النهار هههه طويل ومفورمي
نزهة:ونزيدك مصري أصلو ماشي مغربي باه مصري
سميرة:هههههههههه دلعني ياا بابا هههههههه
الأم:(شافت فيهم بجوج)تلاقيتو ا السلݣوطات . .
ناضت مخلياهم تصلي فحين سميرة جرات بنتها وقالت مخنزرة:والله وتعاودي لباك شي حاجة على لي شفتيه اليوم تانعلقك من قراجطك
جنات:(تخلعات)لالا مانݣول والوو..(تتمد يديها لنزهة)عمتي
جراتها دارتها فحضنها وقالت:ݣلت ليك وصيها ماشي شنقيها هههههه أويلي خلعتيها
سميرة:هههههههه نمشي ندخل داك الزوفري ديالي من الزنقة. .
مشات وناضت لوخرا هزات الماعن غسلاتهم وتكات هازا تيلي وصوت ولد خوها تتغسل ليه مو مسموع تال عندها..ظهرات ضحكة فوجهها فور ماشافت نمرتو مصيفط ليها 22 ميساج حلاتهم لقاتهم أوديوات ماكيفوتوش تا خمسة الثواني
🎤:الزين وصلتي؟؟
🎤:واجاوبني وصلتي؟
🎤:واا المصيبة وصلتي؟؟
ماكملات دوك الاودوات تا ماتت بالضحك وهي تصيفط ليه ميساج فوكال:السلام لباس عليك اه وصلت الحمد لله شكرا. .
قراه فالبلاصة قول عاس عليها وهو يصوني ليها أبيل فيديو تا خرجات عينيها وقالت :واش هذا حمق هههه
قطعات عليه وعاود صونا ليها ابيل عادية ..شداتها ضحكة وناضت لبيتها..شدات الخط وهي تقول:الو
ميمون:هاد الو الحلوة ديالك كاتݣوليها لكلشي ولا غي ليا
نزهة:هانتا غاتبسال تاني ههه
ميمون:مديالش التنعاب نتي ..حرشة حرشة
ضحكات بأنوثة وقالت:أش بغيتي حتا معيط ليا
ميمون:غا مالقيت ماندير وعيطت ليك تونسيني
شدات الضحكة تا بغات تموت وهي تطلقها ليه فوذنيه..ملي قالت ليه خضر راه خضر شي واحد بلاصتو يقوليها بغيت نسمع صوتك هو جاها من الخر مالقا مايدير
نزهة:ههههههههههههه وناري شحال خضر مالك هاكا
ميمون:واش نكذب؟؟نݣوليك توحشتك وأنا ماموحشكش واااه امتا أختي شفتك باش نتوحشك
نزهة:هههههههه لالا الكذوب مامعاناش
مبمون:اوا شتي..غا مالقيت مايدار وݣلت نعيط ليها تونسني
نزهة:اوا أنا مامسالياش؟؟
ميمون:أش كاديري؟؟
نزهة:(كاضور فعينيها)هااا كانطيب العشا
ميمون:اوا مالك خلي تيليفون فوذنيك وطيبي أش بغيتي
نزهة:ههههه كاين خويا فدارر
ميمون:الناس كايحشمو زعما!!!والله مانتيق
نزهة:هههه حرام عليك
ميمون:ياله سيري فحالك طيبي عشااك
نزهة:(محاولاتش تا تشدو)بسلامة
قطع ديك ساعة خلاها تتفرنس تاتسالي معاها عفويتو وصراحتو وكيفاش انه ماكيتصنعش ولي فخاطرو غايلوحها ليك.
*****
الغد ليه فاقت نزهة كعادتها فالصباح دارت روتين النظافة ديالها وتوادعات مع مرات خوها والدراري بالدمووع ومشات لخدمتها مدوزة نهارها وتيليفونها ماسكتش من الرنات ديال ميمون..ها ميساج فوكال ها اأبيل فيديو ها أبيل فوكال..هي خدامة وتيلي كايفيبري فجيبها تاعصبها وهي تبلوكيه من الوتساب وتهنات مع راسها..
دار ليها داك خالك ولا ديك مك لي ياله كادير الواتساب وكاتبدا تصيفط ليك صباح الخير.. جمعة مباركة ...وتبقا تقوليك سلام فاوديو فيه عشرين ثانية ..فقصها وهي تبلوكيه ودايرا فبالها غي غاترجع للدار ديبلوكيه حيت مع خدمتها تايبقا تيلي مكونيكطي مع الويفي. .
العشية وصلات للدار مهدودة بدلات عليها وخرجات مونسة مها ضاحكين ناشطين كايديرو فكاسكروط تاصونا ليها فالنمرة..شافتها وهي تقول:ونااري هذا شحال لصقة
الأم:شكون
نزهة:أنا نجاوب ونجي. .
مشات لبيتها وهي تشد الخط ونطقات بهدوء:الو
ميمون:(بلطف)لالة تالبنات غضبانة علي ولا شنو؟؟
نزهة:(تبسمات)لالا حاشا غي تلهيت فالخدمة حمم وتيليفوني كيتبلوكا ليا فالواتساب
ميمون:بدليييه
نزهة:ههه اوا الله يجيب الرزق
ميمون:أري نبيع ليك ديالي
نزهة:ونتا عاد شريتيه!!
ميمون:ماعجبنيش ههههه أنا أصلا كايعجبني العادي
نزهة:دخل تفرج فيوتوب وهضر حتا مع عائلتك
ميمون:(كايطنز)واخصك تجي عندي وتوريني كيفاش خوك أمي. .
نزهة:ههههههه أنا لي أمية وكان ههههه
ميمون:غي كانضحك معاك الزين..أش كديري؟؟
نزهة:والو غي جالسة مع مي
ميمون:فيك مايخدم؟؟
نزهة:كيفاش؟؟
ميمون:جبت ليك كوموند
نزهة:(فرنسات)شي كوموند صحيحة!!
ميمون:عريضة وطويلة هههه أشنو تخدمي
نزهة:نخدم..ديالمن؟؟
ميمون:ديالي..جاي با من مصر معاه ختي الصغيرة وبغيت شي عراضة زوينة نديرها ليهم. .
نزهة:ايييه على الراس والعين نخدم ليك علاش لا
ميمون:اححح عليك نتي غا ديال شي قصارة
نزهة:اوا بحسبك اولد الناس
ميمون:كانضحك معاك ههههههه
نزهة:شنو بغيتي فهاد العراضة وشحال ديال الناس؟؟
ميمون:هوما غي جوج با وختي..كاتخدمي البسطيلة؟؟
نزهة:كانخدم كلشي
ميمون:داكشي باش خدمتيني انا
نزهة:فاش خدمتك ههههه
ميمون:تانتلاقاو ونݣوليك
نزهة:اوا كمل ليا
ميمون:غدا دوزي عندي للمحل ونهضرو
نزهة:والله ماعندي الوقت غي رصي معايا هنا
ميمون:معاش كاتخرجي ؟
نزهة:واراه مامساليااش
ميمون:عندك التوام تقابليهم هههههخخهه بردي شويا معايا الطرح ونتي كاتعفري علي
نزهة:عععههههه انا كانتعفر؟؟حاشا
ميمون:اوا تواضعي معايا وݣولي معاياش كتخرجي؟؟
نزهة:حمم السبعة
مبمون:وفين خدامة؟
نزهة:كاتعرف ******* خدامة تما ف ******
ميمون:(بهدوء)خدامة مع ربيع؟؟
نزهة:(بإستغراب)كاتعرفو!!!
ميمون:الله اودي هههه صاحبي كايضل مقصر معايا هههه
نزهة:علاش كايقصر معاك ههههه
ميمون:على الذكر والقرءان وقيام الليل الله يقبل مني ومنك ماغانساكش فالدعاء أختي ههههههههه
نزهة:ههههههههههههههه واسير الله يمسخك السلݣوط
ميمون:غدا ندوز عليك صافي
نزهة:إن شاء الله
ميمون:ياله دوخي تنعسي هه
نزهة:الله يبيتك فراحتو
ميمون:(عجباتو الدعوة)أمين
قطع عليها وحط تيلي فوق الطبلة وهز تيو تاع الشيشة جرر منوو وخرج الدخان منخوي مع راساتو مخشي وسط مانطة وشيشتو حداه كايشيش والتلفازة شاعلة بفيلم مصري ..وعينيه معسليين بيها كايبات ويفكر ويخممم فيها تاكمل الشيشة وهو يترخا تخشا ففراشو تايتسنط لعظامو مخليها تشد فيه
*****
اليوم الموالي بعدما خرجات من خدمتها متناسية موضوعو نهائيا ماتفكراتو تا بانت ليها سيارتو قدام الايموبل عاد تفكراتو..تنهدات وتمشات بشوية عليها. .
كاضرب ب ليبوط طالون وسروال دجين لاصق مزير على فخاضها أما الفوق راه لابسة شوميز فوقها مونطو راقي وهازا صاك فيدها صغير..لمحها من بعيد جاية على أقل من مهلها معارفاش بلي تتلعب ليه على الوتر الحساس بهاد الحركات...هو بطبعو تيموت فالمرا الخاترة لي تدير كلشي بالعقل..تحرك بالعقل وتهضر بيه وتفكر بيه..كتعجبو المرا لي بحالها مهلية فراسها وكايبان عليها
حل ليها الباب وطلعات حداه ناشرة ريحتها القاسحة عندو دخلات لنيفو دغيا..تبسم وقبل ماتنطق وقال:واش نتي ديما كاتصايبي ولا غي حيت جاي نشوفك!!
نزهة:هههههه هادي هي كتباني زوينة!!
ميمون:(مد ليها يديه تسلم عليه)قليلة فحقك الالة تالبنات
نزهة:(تبسمات تا بانو سنيناتها)اوا شتي ههههه كي داير!!
ميمون:(ديمارا)مازوينش بحالك
حققات فيه لابس تجاكيط وداير طاقية خفيفة بيناتو وسيييم لكن غي غايهبط غاتقشع البانطوفة المشهورة..ردات بصوت عذب:كاتعرف تهضر هاا
ميمون:غي مع العيالات الزوينين
مزهة:شحال من وحدة ݣلتي معاها هاد الهضرة اليوم؟؟
ميمون:والله ماحسبت هههه عرفتي شحال من مرا شفت اليوم
نزهة:(لوات فمها)اوا بلاش ماتݣولي والو
ميمون:ههههههه ونتي خليتك تالخر باش ننعس ونتفكرك ههههههه
نزهة:ههههههه الله يمسخك..طلقني ݣوليا شنو بغيتي بالظبط؟؟
ميمون:تواضعي معايا شوية ..وقتك غالي ..كون تعرفي شحال خليت باش نجي نشوفك تعرفي معزتك
نزهة:شنو خليتي وكيل الملك ههههه؟؟
ميمون:(بجدية)أقسم بالله حتاهو لي خليت ههههههههههههه
نزهة:سير براكا من التفلية
ميمون:والله ماكنتفلا هههههه كاين واحد ولد خالي جايبو معاه هو صاحبو وكايجيو عندي مرة مرة لكازا
نزهة:(استغربات )اااه مزيان
ميمون:فين نمشييو!!
نزهة:مانمشيو فين أميمون..خاصني نرجع للدار مي مسكينة كتبقا بوحدها
ميمون:(وقف طونوبيل)واخا الزين(تمسح على فخاضو)مكرهتش شي حاجة بلدية بغيتهم يذقو ماكلة البلاد
نزهة:البسطيلة يعني
ميمون:اه وشي حاجة خرا ميمكنش غي هي
نزهة:(بجدية تقادات فالجلسة مقابلة معاه هو لي راخي عينيه فيها)اوا نديرو شي شلاضة منوعة فيها فواكه البحر اوا ونزيدو شي حاجة ديال الدجاج فالفران..تبغيو لحلوة!؟
نيمون:ااه اه
نزهة:نصايب ليك واحد الطاخت فنة تعجبك كبيرة. .
ميمون:والى قدرتي صايبي ليا حتا الحلوة المغربية فقاص ..غريبة وداكشي خواتاتي كايبغيو داكشي نصيفطو معاهم
نزهة:شحال نصايب؟؟
ميمون:معرفتش شوفي نتي شحال جهدك؟
نزهة:واخا..كاينة شي حاجة فاش نقيد
حل لبواطاكون لي حداها جبد ليها مذكرة وستيلو وبدات تاتكتب حانية راسها وهو حاضيها تا قيدات وقالت:إمتا بغيتي هادشي؟؟
ميمون:لاربع بغيتو...الماكلة بغيتها لاربع والحلاوي ماعليش
نزهة:ومالك ماغتحطش ليهم أتاي ماغتعطيهم والو غي الماكلة..
ميمون:ما يݣلسوش عندي فالدار غايݣلسو فالاوطيل
نزهة:(ضحكات)مافيك صواب هههههه شد باك عندك
ميمون:هههههه راه با لي ماباغيش هههههه أما أنا بالفرحات علي يجي يعيش معايا ݣاع. .
نزهة:هههههه اوا سمع أسيدي غانسبق ليك واحد كيلو كيلو من الحاجة حطها مع الصينية ديال اتاي اوا والماكلة حتاهيا والباقي الجمعة يكون واجد. .
ميمون:غايبقا سيمانة غي خدمي على راحتك
نزهة:صافي واخا فففف غي هو غاتمشي نتا تقدا ليا شنو خاصني راه ماعنديش الوقت مع الخدمة
ميمون:سيري للمحل خودي لي خاصك والدراري يوصلووه ليك
نزهة:(باستفسار)ونتا ماغتجيش؟؟
سكت شحال تايشوف فيها بنظرة هادئة والشتا كتقطر برا عمرات ليهم الزاج ونطق بود:ولفتيني نجي عندك؟؟
نزهة:هههههه بحال هاكاك
ميموت:غانكون مبرزط معاهم بزاااف جا أصلا باش يقاد شي أمور هنا فاضحني بيهم . .
نزهة:صافي واخا إن شاء الله غدا نخرج من الخدمة بكري ندوز نتقدا الحوت وشنو نحتاج والباقي نصوني ليك علم الدراري ويدوزوه ليا للدار
مبمون:صافي مشات..شحال تحسبي ليا؟
نزهة:خلي الحساب حتا نتقدا ونشوف بشحال غايطيح..والسلعة تاع الحلوة مامحسوباش ماتخافش ندير معاك ثمن ديال المعرفة
ميمون:ماديريش ديال المحبة وتفهمي راسك
تزنݣات ونطقات متجاهلة الموضوع:متكونش باسل ههه
ميمون:دابا لي ݣاليك عجبتيني راه باااسل ههههه زوينة هادي
نزهة:وانتا لي كاضل كضحك علي ب عجبتينيي ونتا عاطيها للقصاير
ميمون:واشنو فيها؟؟الزين حبوو مولانا وأنا عجبتيني واش نكذب هههههه
نزهة:لالا ماتكذبش ههههه
ميمون:(يكت شوي ونطق)ديري شي حل أنزهة؟؟
شافت فيه بجدية:أشمن حل؟؟
ميمون:(صونا تيليفونو )لقيتيني غارق أما نشد والديك تانديرو حلول هوما ههههه (شد الخط)أشنو خاصك....وافرعتي ليا رااسي هاني جااي .
قطع عليه وقال:الزين نوصلك ونمشي ماستخيتش بيك ولكن راه ولد الخال مرضني فراسي
نزهة:هههههه ماشي مشكل..حطني ناخد طاكسي
ميمون:(تحرك)لواه تاني ماشي بلان هذا..نخليو هاد الزين كامل يمشي فالطاكسياات مانبغيش رزقي فالزنقة يتمشا
نزهة:(كاطنز)مسكييين رزقك خلاني ليك باك فالورث هههه
ميمون:با غيخلي ليا غي المشاكل فالورث ههههه اما نتي جابك ربي تالعندي ههه. .
اليوم الموالي جالسة فخدمتها تاتقاد شي فاكتورات مركزة معاهم والبيرو ديالها عامر وراق تاوقف عليها مول الشي شخصيا بلباسه الأنيق وريحتو المعطرة ..
لقى السلام وهي تهز راسها وجاوباتو بهدوء:وعليكم السلام.
ربيع:كي غادة الخدمة؟؟
نزهة:مزيان أموسيو
ربيع:(جلس فكرسي كايدوز شي اتصالات تا سالا ونطق)نزهة كاتعرفي ميمون؟؟
سمعات سميتو جاتها غريبة على وذنها رغم أنها تتتعرفو..شافت فيه بهدوء أكثر وقالت:اه كانعرفو
ربيع:حيت لبارح كانهضرو وݣاليا كايعرفك
نزهة:اه كانتقدا من عندو..(بتردد)كاتعرفو أموسيو؟؟
ربيع:سي..كانعرفو مزيان إنسان الله يعمر ليه الدار ..مرزن وجدي فخدمتو
نزهة:(بحالا تايهضر على شي حد اخر)اه مزيان. .
ربيع:عفاك دوك لي فاكتيغ لي وصيتك العشية ندوز ليهم غانتلاقا مع الكونطابل فالصباح خاصو يديهم معاه. .
نزهة:(بابتسامة)قربت نساليهم أنا نكملهم نحطهم ليك فالبيرو
ربيع:(كايدوز انصال)مغسي.
مشا وخلاها متبعة ليه العين وتاتناقش فبالها..كيفاش مرزن وهو ملي عرفاتو وهو كايكركر بحالا كايهروو سليبو..
عوجات فمها باستغراب وكملات خدمتها عادي تاوصل وقت الخروج..قدات بيروها خلاتو مرتب ورشات ريحتها وخرجات هازا صاكها ولسانها تايودع لي خدامين معاها ...
مع حطات رجليها برا ضربها هوا باارد تا سدات عليها المونطو حيت لداخل كان سخون..لمحات عينيها جسم ميمون لي مايخفاش عليها عاطيها بضهر بتجاكيط وسروال دجين وگاط كحل واقف مع شي شخص..
كمشات عينيها وتاتقرب منهم بشوية تا لقاتو ربيع..تحرجات وإستغربات من وجود ميمون هنا وبقات تتساءل فدماغها واش عاطياه موعد..وعاد مابغاتش ربيع يفهمها غلط وهو باطرون ديالها بغات تبقى العلاقة رسمية مايدخلش شي فشي. .
ميمون:(نتابه لشي حد واقف حداه دور نص وجهو وماتحركش بقات يدو باش كايشرح جامدة.)أهلا
نزهة:(حشمانة قدام ربيع) سلام
ربيع:(استدرك الوضع)ياله أميمون بيناتنا التيليفون سلم ليا على الواليدة
ميمون:مبلغ..نتشاوفوو
مشا ربيع وخلاه ضاير لعندها بشبح ابتسامة وعينيه كايطلعوها وينزلوها بإعجاب..كاتعجبو حيت كتلبس زوين وباين عليها مهلية فراسها..ماشي هي بوحدها لي مهلية فراسها ولا لي لباسة ولكن هي الوحيدة لي دخلات حياتو هاكاك...جميع نساء حياتو كانو تقليديات .
ميمون:(بتاسم)لباس الزين؟؟
نزهة:(تتحك يديها)حمد لله ونتا؟؟
ميمون:زيدي من البرد
نزهة:علاش جيتي؟؟
ميمون:(كان غادي و وقفاتو هضرتها)ياك درنا غانديك تجيبي الحوت؟
نزهة:(عاد تفكرات)نسييت حممم راه وصيت ولد خويا الصباح بكري ومشا غايتقداه ليا ويدوزو ليا لدار
ميموت:بصح!!اوا من الجنة والناس علينا ياله ناكلو . .
نزهة:خههههههههه(قالها بطريقة ضحكاتها)ياله ناكلو ههههه
ميمون:ههههههه وافيا جوع وبقيت كانتسناك فالبرد حتا خرج ربيع. .
نزهة:(بفضول)فين كتعرف ربيع؟؟
ميمون:واش غاتبقاي تسولي والبرد كايسوط فينا ولا؟تحركيي. .
سبقها للطونوبيل مخليها كاتبرق عينيها فيه...مسماتو خضر تا كان خضر..تبعاتو تاهيا كي الهبيلة كي طلعات بدات تتحك يديها..دور الطوموبيل وقال:روييحة هي عندك زوينة
نزهة:من ذوقك هههه فين كاتعرف ربيع؟؟
ميمون:ربيع الالة راجل بنت خالتي. .
نزعة:اه يعني من العائلة(حرك ليها راسو)وماسولكش فين كاتعرفني؟؟
ميمون:هههههه أش خاصو حتا يسولني فين كانعرفك!! عائلة وصافي
نزهة:(رتاحت)خفت غي تݣوليه شي حاجة راه لسانك غي كايطلق
ميمون:(بجدية)شنو زعما أش نݣوليه؟؟ خاصك تعرفي الالاهم أنا تاحد فهاد الدنيا ماكيعرف أش تحت راسي ولا شنو كاندير فحياتي عساك راجل بنت خالتي
تبسمات بهدوء وقالت:تاحد زعما؟؟ما عندك صحاب ماعندك مرا تعاود ليها
ضحك ميمون بلطافة وقال مرطب الهضرة:واݣولي كتقلبي على المرا تعرفيها واش كاينة ولالا؟؟ههههخ غا ݣري عاجبك يااك؟؟(كايسوق ومرة يشوف فيها مرة فالطريق)
شداتها الضحكة حيت هو بتاتا ماشي ستيلها نهائيا..نوع ربيع هو ذوقها..كايلبس مزيان مهلي فراسو قاري وواعي ..نطقات بضحكة:هههههه الله يمسخك غا سولتك
ميمون:كون مضركش راسك ماتسوليش؟؟!
نزهة:ندمت هههه
ميمون:غا هني راسك مامزوج ماخاطب حدي مصاحب وصافي ههههههههه
نزهة:هههههههه أربي شكون هاد المصطية لي قابلة عليك غاتكون تاهيا شي وحدة صكعة بحالك وضحوكية
ميمون:(شاف فيها عجباتو ضحكتها وصوتها)واديك لي كنضل نلوح ليها الهضرة مابغاتش تفهم راسها و قلت مع راسي نعدي بهادو حتا تحني علي . .
نزهة:ههههههه الله يسمح ليك...نتا نحلف عليك غاتكون مزوج ووالد وغارق دراري ..
ميمون:(جمع الضحكة)كون كنت مزوج مانبقاش نتلاقاك حدي معاك الخدمة...زواج هذااك ماشي اللعب
نزهة:(بابتسامة)زعما كاع هادي جدية فيك؟؟
ميمون:(سايق بيد ويد تيشرح بيها)الزواج راه معقوول ومحبة ودوام ݣدام ربي..مجاتش نخليها فالدار ونخرج انا نديع مع البنات
نزهة:وكاينين رجال هاكاك!!
ميمون:أنا كانهضر على راسي ماشي على باقي الرجال..لي كايتزوج ويدير الصاحبة هذاك ماراجلش..بغيتي تزهى زهى معاها..واخا شي عيالات راه ديال الصاحبة نييت. .
نزهة:حتاوحدة أميمون متستاهل تكون عليها الصاحبة
ميمون:كاينة لي تستاهل تربع عليها..كاع صحابي لي كانعرف ومنهم ولاد خوالي دايرين الصاحبة على عيالتتهم على وديت حاجة وحدة وهي الفراش
نزهة:(تزنكات)ويلي وهادشي كيناقشووه معاك ولا؟؟
ميمون:لالا ...الرجال مافيهمش هاد الفعايل ديال يتعاودو أنا عيالاتهم عمري شفتهم حتا بضحك حيت ماكيرضاوش ونفسهم هنا(شير لنيفو)..كايخون مراتو راه باين على الفراش حيت الراجل يسمح فكلشي الا فداكشي
نزهة:(عجباتها طريقة هضرتو وكيفاش ولى جدي)حممم والله واعلم. .
شاف فيها لقاها مزنكة وهو يطلق ضحكة خفيفة وبدل مود الجدية وقال:الناس كايحشموو ههههههه وانتي لي فاضحاني واش مزوج ههههه أنا أختي باير شارف هارف ماعندي لا ولاد لا وتاد
نزهة:وعلاش لدابا ماتزوجتيش؟؟واحد بحالك بخيرو وخميرو واخا ماباينش عليك علاش ماتزوجش؟؟ قدك راه بنتو ولا ولدو فالسادس ابتدائي. .
ميمون:ماتزوجتش حيت مالقيتش لي تدفا فيها خاطري وصافي هههه مي بغاتها قلعاوية با بغا يزوجني مصرية ههههه
نزعة:ععههههه خودهم بجوج وتهنا
ميمون:(وقف الطونوبيل)ههههههه ماكرهتش صراحة ..جوج عيالات الله
نزهة:الله يمسخك هههههه فين جبتينا؟؟
ميمون:دوزي تضربي العدس والبيصارة عند أحسن واحد كايديرها فكازا ههههه
نزل مخليها مضهشرة وعينيها تايضورو على الحي الشعبي لاش جايبها..تخربقات ومبقاتش عارفا واش نيت هذا هو مول داك المحل ولا غي كايكذب عليها وطالقها عليها
نزلات تابعاه مافهمات والو ودخلو لمحل صغير فيه سيد حاط قدامو فورنو كبير داير فيه طناجر اللوبية والعدس والبيصارة لي هوما دوا البرد والمحل عندو فيه الناس قلال حيت قرب يسالي..
ميمون:با ميلود
ميلود:(راجل كبير لابس طابلية بيضة وهاز خبزة كايعمرها باللوبية )أهلا أهلا بولد المصري. .
ميمون:زيانيتي نفعك الزواج
ميلود:بزاااف نيت ههههه(شاف نزهة وحياها براسو)المدام؟؟
ميمون:(جرها من يديها الباردة حداه مقربها ليه ماسك يديها بطريقة عفوية)دير جوج طباسل عدس(شافيها بتساؤل)كايعجبك؟؟
نزهة:(عينيها كيرمشو بزربة ونيفها حمار بالبرد)اه
ميمون:ميلود هاني لداخل
دخل هو وياها وسلات يديها منو بشوي وتاهو مدا مجاب..خداو طبلة وجلس حداها تايحط تيليفونو وسوارتو وقال:فايت جيتي لهنا؟؟
نزهة:(باقي مامستوعباش)لالا أول مرة..نتا لي جاتني فشكل تجي لهنا
ميمون:(قطب حجبانو باستغراب)علاش بالسلامة؟؟
نزهة:(ضحكات)ههههه ماعرفتش واحد بحالك عندو الفلوس أش غايجي يدير هنا!؟
ميمون:(باستغراب)أش جاب الفلوس للماكلة؟؟
نزهة:حمم هانتا أنا راه حشمانة منك باش نشرح ليك
ميمون:ههههه داكشي باش حمرة هاكا(شد نيفها بصباعو)تواضعي معايا وحيدي الحشمة وهضري
نزهة:(تشجعات)هععع دابا نتا واحد الانسان عندك مشروع كايربحك زبالة ديال الفلوس شي واحد أخر بلاصتك غايبغي ياكل فبلاصة واعرة
ميمون:(تبسم)وا نكذب عليك أنا أختي عندي على قد جهدي..عندي رزقي الحمد لله ولكن الماكلة فينما مشيت ناكل..ياكما حسابك تزاديت ولقيت هاد الخير كولو ..هذا لي ݣدامك راه تمحن باش يوصل هنا حتى تجيبها الوقت ونعاود ليك قصتي تشبعي غي هم ههههه
نزهة:(قنعها)الله يزيد فتواضعك كون أنا كون راني مهازانيش الأرض ههههههه(لاحتها بالضحك)
ميمون:هههههه وانتي تجي معاك..مرا زوينة وقارية علاش لي ماتعفرش هههه أنا غا فرعوني
نزهة:هههه الله يخليك ديما متواضع
ميمون: آمين
حطو ليهم طباسل العدس والخبز وقال:كولي كولي حتال شي نهار وعرضي علي نتي لدوك البلايص الواعرين ههههه
نزهة:نسينا ماهضرناش فالكوموند
ميمون:هضري نتي أنا غانسمعك هههه(كياكل)
نزهة:الحوت وشنو غايخصني عطيت لولد خويا يجيبو ليا غاتخصني تقديتك نتا ديال الحلوة
ميمون:ندوز نعطيها ليك من المحل
نزهة:صافي باش يبقا ليا غي لوز وكاوكاو حالهم ساهل
ميمون:اوا كولي دابا
نزلات على طبسيلها تتاكل وتبنن وقالت:زوييين يعطيه الصحة
ميمون:(بتساؤل)كتتعرفي ديري العدس؟؟
نزهة:أكيد . .
كلاو داك العدس بالضحك ديالو ونشاطها هي..معاه تتكون على راحتها متيخصهاش ترد البال لشنو غاتنطق ولا كيفاش غتحرك عكس مع عمر كان عاجبها بزاف لكن تترد لبال لتصرفاتها ولحركاتها باش متخرجش عن نطاق الآداب و التاويل..مع ميمون بحالا جالسة مع نفسها
سالات وناضت غسلات يديها ونشفات بورقة ..مد ليها صاكها وخرجو جيهة ميلود لي كايعطي لدراري لي معرمين عليه خبزهم فيه اللوبية كلشي باغي يسخن عظامو فهاد البرد..وهي تفاديا أنها توقف حدا دراري رجعات شوي لور شادا فصاكها ومكمشة من البرد مخلياه مجمع معاه وكيجبد فلوس من جيبو
وهي واقفة كاتشوف فيه راسمة ملامح هادئة حسات بيد قاست مؤخرتها من فوق المونطو وعبزاتها..شهقات وهي كاتشوف برهوش فالعشرينات دايز من حداها لابس عادي بحالو بحال أي واحد وهي تنطق بالغوات:الله ينعل ترابيك الحيوان
تلفت ليها كلشي من بينهم ميمون لي سمع صوتها الرقيق..قرب ليها مستغرب وقال:مالكي
نزهة:(مرضاتش وكلشي كايشوف فيها)هذاك البرهووووش قاااسنييي
ميمون:(طيرها فالسما وعقدهم فوجهو ونطق بصوت غليض)فيناهووو!!؟؟
نزهة:هذااااك راااه.
دري لي قاسها دار فيها راسو مدار والو حيت الطريق عامر وتا الى بغا يهرب مايمكنش ليه..نطق لابس قناع الهدوء:أنا اختي؟؟شكون داها فيك
نزهة:الله ينعل طواسلك الكلب..المكبوووت
مخلاهاش ميمون تكمل ..زرب ليه شدو بيد وحدة من الكول وداه وجابو عاقد سبعة فربعة ...وجهو بكثرة ماهو سمر ولى محقون بالدم بحال شي فيخرا زاندة وعينيه قربو يخرجو يلعبو فالأرض..
ميمون:قستيها ؟؟؟
الولد:تشا حيد يديك على قستها...تشاا هذا هو الباطل
نزهة:واش أنا غانكذب عليك الكلب...حيوان مكبوووت كثاريتو الله ينعلكم
ميمون:(تايترعد بالعصب)هضررررر(بالغوات)قستيييها
ميلود:ميمون طلق دريي ميديرهااش
ميمون:(غوت تا كلشي قفز)واش غاتكذب هيي ولا شنووو؟؟؟
نطقات بنت كانت جالسة تاتاكل فأقرب كرسي حداها وقالت:أنا شفتوو أخوياا قاصهاا فلورر...كتاريتووو الله يعطيكم العذااب
دري ولى حمر وبدا تايترعد حاس براسو صافي غياكل ماكلا الطبل..ماحس باللكمة تا نزلات عليه بيد ميمون ليسرية جابتوو راعف فالأرض..وغوت فوجهو:جهلتي لت..ا..م..ل لي ولدك!!!وليتووو غا غادييين وتزللو على العيالات هاااا
ميلود:(كيجر فيه)ميمون طلق أولدي غاتنوض الصداع من والو
نحا ميمون بيديه وشد دري ملخو عصا شبع فيه تصرفيق وسبان السمطة لتحت:الى مرباااتكش مك انا نربيييك الز**** (عطاااه لكمة لعينيه شوي يفكسها ليه)تحط عليها يديك يالكوااااااد مخليها ليك باااك
تدخلو الدراري كيبغيو افكو وهو مكنزز عليه كيعطيه فالركلات والدق لفينما قادتو يديه كيعطيه ولسانو كيطلق غي السم تالهضرة الخاسرة..هزيتي واحد وحطيتي واحد اخر دمو حامي وتياكلو عليها وعلى أي وحدة كتعرض لهاد النوع من التحرش وخاصة وهي معاه. .
"التحرش"
- المنكر ما تانبدلوهش ب منكر آخر، يعني ما يمكنش تجي مرا او راجل كي ولينا تانشوفو فمواقع التواصل، التحرش ولى قضية تحولات ل رأي العام، شفنا بزاف ديال الآراء و منهم لي لا علاقة ليه بالمنطق ولا بالدين، ولا ب أش قال الله ولا اش قال الرسول، عليه الصلاة و السلام. . ..لا يمكن تغيير المنكر بالمنكر ولا يمكن تغيير الخطأ بخطأ أكبر منه.. بزاف ديال الناس ف " شوف تيفي"، فين ما شي واحد ما مربيش يدير شي مونتيف يديونا نشوفو صالون دارهم! تايعطيو الميكرو ، ل ناس ماشي كل شروط الإسلام متوفرة فيهم ، و البعض ايوا كون لبسات غير دجين و كون ما تعرات غاع ما يزعم عليها، يقدر البنت
لبسات لبس معري، الله يهديها، هذا فقط حقنا، نطلبو الهداية و السترة من الله عز و جل. ولكن أليس من الحماقة أننا نبررو خطأ بخطأ! البنت لبسات لبس معري حرام فالإسلام! ولكن يقيسها فجسدها ماشي حرام؟ فين المنطق، فالإسلام العرا ماشي حرية ولا إختيار بصح، ولكن الإنسان فاش تايشوف شي حاجة بحال هاكاك يدعي بالهداية مع نفسو و مع داك الشخص، و الا قدر يبدل شي حاجة يبدلها. . كيفما جا فحديث الرسول عليه الصلاة و السلام. و لي بزاف تايخدوه كيفما العادة بطريقة خاطئة . .
- عن أبي سعيدٍ الخدري رضي الله عنه قال: سمعت رسول الله صلى الله عليه وسلم يقول:( من رأى منكم منكرًا، فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان) رواه مسلم.
ولكن حنا الأغلبية فينا تايشرحو الآية ولا الحديث على حسب داك شي لي مسلكو بحال هاداك لي تايعرف فالدين فقط أنه ربي حلل أربع زوجات و فالأصل ما عارفينش سبب نزول الآية ولا على من تطبق ديك الآية و شنو الغاية منها. و بزاف لي تايقولو راه الرسول (عليه الصلاة و السلام) قال من من رأى منكرا فليغير بيده! و هوما اصلا ما فاهمينش القصد. . .
شرح الحديث هو كالتالي:
- (من رأى) يحتمل أن يكون المراد رؤية البصر، أو أن المراد رؤية القلب، وهي العلم، والثاني أشمل وأعم. (منكم)؛ أي: معشر المسلمين المكلفين القادرين،(منكرًا)؛ أي: شيئًا حرمه الشرع فعلا أو قولًا، ولو صغيرًا،
(فليغيره) قال ابن دقيق العيد رحمه الله: فهو أمر إيجاب بإجماع الأمة، وقد تطابق الكتاب والسنة على وجوب الأمر بالمعروف والنهي عن المنكر، وهو أيضًا من النصيحة التي هي من الدين.
(بيده)؛ لأنها أبلغ في تغييره؛ كإراقة الخمر، وكسر آلة لهو، والحيلولة بين الضارب والمضروب، ورد المغصوب إلى مالكه، (فإن لم يستطع) الإنكار بيده بأن ظن لحوق ضرر به؛ لكون فاعله أقوى منه، فالواجب تغييره (بلسانه)؛ أي: فليغيره بالقول، وتلاوة ما أنزل الله من الوعيد عليه، وذكر الوعظ والتخويف، والنصيحة بالكلمة الطيبة.
(فإن لم يستطع) ذلك بلسانه؛ لوجود مانع؛ كخوف فتنة، أو خوف على نفس، أو عضو، أو مال محترم، أو شهر سلاح، (فبقلبه) ينكره وجوبًا، بأن يكرهه ولا يرضى به، ويعزم أنه لو قدر على تغييره بفعل أو قول، لفعَل، فأفاد الخبر وجوب تغيير المنكر بكل طريق ممكن، فلا يكفي الوعظ لمن يمكنه إزالته بيده، ولا بالقلب لمن يمكنه باللسان.
(وذلك أضعف الإيمان)؛ أي: إن كونه لا يستطيع أن يغيره إلا بقلبه هو أضعف الإيمان.
يدل الحديث على أن الأمر بالمعروف والنهي عن المنكر من خصال الإيمان؛ لذلك أخرج مسلم هذا الحديث في كتاب الإيمان، بأن كون النهي عن المنكر من الإيمان.
حطيت هاد الحديث لأنه الكثييير لي جاهل فالدين، تايفهمو بطريقة غلط، و الكثيرين فهاد الحالات تايقولو را شاف المنكر و بغا يبدلو و الكثير تايقولو بغا يربيها باش ما تلبسش المزير او القصير، الإسلام مبري من هاد النوع، الدين واضح و الحرام واضح و الحلال واضح أيضا
كيف قلت كل واحد فينا ولا الأغلبية فينا عارفين الحلال من الحرام، كي تايقولو الحرام بيِّن و الحلال بيِّن، الإنسان عارف اش لي ليه و لي عليه و عارف الحرام من الحلال. . و التحرش راه ما ليه علاقة باللبس! فا من العجب أنه المجتمع يبرر التحرش ب أنه البنت لي ما حتارماتش راسها! و الا خرجات مثلا بنت محجبة مستورة من راسها ل رجليها و لبسها واسع، و قالت فلان تحرش بيا! ولا بان فيديو فيه واحد دار نفس الشيء مع بنت لابسة لبس مستور و دايرا حجابها! ديك الساعة المجتمع و العيالات و عائلتو و الذكور باش غادي يبررو التحرش ديالو؟؟ ما يمكنش نقتانع أنه البنت ولا لبس البنت هو سيب التحرش حيت دازت على عيني هاد القضية بحال كي دازت على جميع المغاربة، ما معاودينها لينا، ما مختارعينها من مخي،
كنت دايزا من حدا السوق، و بنت كانت تاتبان باقي صغيرة من ملامحها، يعني نقولو فالعشرينات، ولكن البنت من البعييييد غا تبان ليك أنها مزوجة، حيت كانت جارة كروسة فيها بنتها، زائد كرشها واصلة ل فمها! و بلا هاد شي كامل السيدة كانت دايرا حجابها و لابسة جلابتها! و واحد تابعها من اللور و تاينك عليها و يقوليها زين ما تعطيناش شوية من وقتك!
و دابا المجتمع شنو التبرير لي عندو؟ الإنسان المتحرش، ما يحترم لا مرا كبيرة لا صغيرة ما يحتارم لا لي لابسة الحجاب ولا لي ما لابساهشش و ما يحتارم لا لي لابسة قصير ولا لي لابسة طويل، و لي تايبرر للمتحرش أنه كون البنت ما لابساش قصير كون غا يحتارمها و ما يقيسهاش، القصر هو لي عندو فالعقل . .
سلخو ميمون مزياان والناس تتفك تا بحرا ماحيدوه من يديه وهو كينهج وريقوو ناااشف تيترعد عليه...ماشي حيت نزهة معاه ولكن حيت تتبقا مرا ومدارت لا بيديها لا رجليها
الدري مسخسخ والناس تيصرفقو فيه يفيق ولى كولو دمايات وتجمعات الجوقة وكي العادة ها لي كيقول :
"حيوان خا صو التربية"
وها لي كيقول:
"كون غا لبسات حوايجها ما يهضرها حد"
والاراء تختلف لكن التصرف واحد وقلة الادب واحدة..مشا ليه من جديد وميمون تيتعصب عليه:طللللق منيييي ماغنضربووووش غنصيفط ال**** بوووه فين اتربى ..(تنطر منو ومشا تيقلب ليه فجيووبو ودراري كيحبسوو فيه)ولد ال*** ماعندووش حتا لكارط(خشا يديه فجيبو لقا بزطام صغير حلو هز لكارط ناسيونال دوزها قدام وجهو)الى مربيتكش تاتولي تشوف العيالات وتبدل الطريق راني ولد ال***
لاح عليه البزطام وزاد راجع عند نزهة لي عينيها مدمعين باينة كانت تتبكي..عزات عليه بزاااف ودوز يديه بلا شعور ورا كتافها جارها عندو حاط ليها راسها على كتفو مغطيها من الناس كأنو كيوصل ليها رسالة:انا معاك
ميمون:(باقي تيترعد عليه وصوتو انساب فوذنها)متخافيييش غنديه فين يتربااا ...أرا الما اميلود(شاف الجوقة كبيرة وغوت فوجهم )كنفرق المعاونة أنا هنا...الفراجة سالاااات
بداو الناس تايتفرقو وميلود عاطيه الما..خرجها من حضنو عينيها فازكين بالدموع والنيف حمر ..شربها الما بشوي ويديه لوخرا جرات كرسي جلسها فيه وتحنى جالس قفازي ويديه فشعرها كيستناها تكمل شريبها وعينيه فيهم عاطفة وحنان كبير..
مدات ليه الكاس وقالت:نمشييو
ميمون:واخا
مد الكاس لميلود وشدها من يديها مشابكهم مع ديالو تا حسات بدفئهم ومخليها جنبو وعينيه باقي خارجين بالعصب..حل ليها الباب تا ركبات وضار لجهة لوخرا..ديمارا بلا ميهضر ولا ينطق بشي حرف ويديه لوخرا تتقلب فتيليفونو الصغير وحجبانو مجموعين بغضب جهد شي دقايق عاد دوز المكالمة وقال:أخويا هانيا؟؟كلشي مزيان..بغيتك فواحد البلان...واحد البرهوش بغيتك تقرقب عليه ...ضرب واحد السيدة معايا ...اه اه تحرش..نتلاقاو من هنا ساعة ونعطيك كارط ديالو وتهلا فيه...الله يحفظك أخويا تهلى. .
قطع عليه ولاح تيليفون باستهتار..وقلب عينيه ليها هي لي باقي ساكتة ماكيتسمعش حسها وقال:شويا دابا؟؟
نزهة:الحمد لله
ميمون:غانصيفط دلمو يتربى عمرو باقي يطوف بالعيالاات
نزهة:كلب تفووو عصبني(غرغرو عينيها)عفت راسي حيت قاسني
ميمون:(زير على المقود بيديه)كثارو الكلاب ولى غي البرهوش لي ماقدرش يمشي لشي ق*** (نسا راسو وجلس تيخسر فالهضرة)يضرب ف**** بنات الناس باش تبرد ليه الحرقة
نزهة:(ضربات الطم)حممم
ميمون:(وعى أش قال وزفر)ماتديش علي ..
نزهة:(شافت فيه بامتننان)لهلا يخطييك عمري ننسا وقفتك معايا اليووم
شاف فيها ورجع شاف فالطريق:دنيا هانيا..حتا كون مكنتيش معايا غاندير نفس الحاجة حيت جهلووو بزااف وأنا عندي خواتاتي مانبغيش لي يدير ليهم هاكاك نتي هني راسك غيمشي يتربى
نزهة:الله يعطيه موصيبة قليل الادب تفوووو
بعدها لتازمو الصمت ماهضروش بتاتا أولا هو مابقاش عندو الخاطر لي يهضر ولا يتمازح حيت دمو حمى صافي ماغتبرد ليه تا يشوف لاخر فالحبس وهي راه تهدات وعياات ...ماهضرو تاوقفات السيارة قريبة لدارهم شوية وهو يقول:هاحنا وصلنا
نزهة:مباقيش دزنا للمحل ناخد السلعة
ميمون:(مافيهش لي يهضر)حتا تصوني ليا ونقيدها وغدا تصبح عندك فالدار
نزهة:(بهدوء)واخا..شكرا بزاااف وسمح ليا
شاف فيها راخي ملامحو وعينيه قادوه ديركت لحنوكها الحمرين..مدهم بدون شعور تحسسهم ليها وقال منهد:دنيا هانيا
نزهة:(جاتها تبوريشة)حممم بسلامة.
نزلات مخلياه متبعها بعينيه تا دخلاات لدارهم عاد ضور الفولون عند صاحبو لي فالبوليس باش يتكلف ليه بالقضية. .
دخلات لدارهم سلمات على مها وعقلها مرفوع واخدو ميمون..تصرفو اليوم حمقها وخلااها تحس أنه معاها راجل بالمعقول..كيفاش ضربو وكيفاش عنقها وعطاها الما وبدات كاترجع السينتة لور تاتفكر كيفاش كايعاملها..وكيفاش مقدرها ومبغاهاش تحكر وهي معاه.
دارت كاسكروط مع مها وهي مرفوعة ..عينيها كايرسمو عيونو وملامح وجهو فخيالها بالتفصيل..سموريتو لمايلة للمصرين ولعينيه لي كانو خارجين فالبرهوش..
تغيرات نظرتها ليه فموقف بسيط لمسات فيه رجولة شحال مشافتها فشي حد..فاش كايحميك شي حد اوتوماتيكمون تاتحس معاه بالأمان، والأمان هو أساس أي علاقة بين جوج..الى غادية معاك وخايفة راه ماغنوصلو فين.
تكمشات وسط مانطتها تاتفرج مع مها وساهية مكمشين من البرد تا تحل لباب لتحتاني وتسمع الحس..ناضت طلات لقاتو محمد ورجعات لبلاصتها عالمة مها بمجيئو..دخل كيف ديما مخنزر سلم على مو وعليها هي لا..جلس عاقدهم
وقالت مو:كداير أ وليدي وكي راها مليكة والدراري؟؟
محمد:(تجاهل سؤالها)نتي شكون داك خونا لي موصلك ليوم؟؟
نزهة:(تفافات)شكوون!؟امتا؟؟
محمد:(رفع صوتو حيت شوية تاع الصبر ماعندوش) الݣونݣو لي وصلاتك اليوم ديالمن؟؟
نزهة:(عقدات حجبانها)مالك كاتغوت؟؟ياك لباس؟؟الباطرون ديالي دايز من طريقي و وصلني
محمد:(تايحك سنانو مع بعضهم)وباشمن موجب شرع غايوصلك؟؟ردي البال لفعايلك رجليك خرجو شواري
الأم:محمد شهاد الهضرة أوليدي؟؟
نحمد:نتي غا سكتي أمي نتي لي مضسراها...ونتي(شير بصبعو لنزهة)غاتجمعي ولا نتفاهم معاك
نزهة:(فمها ديما سابقها)نعام أخويا؟ راه واقلة بديتي كاتهرت بيا ...السيد خدامة عندو وصلني أش فيها؟؟
محمد:(رفع صوتو)فيها الالة، فيها وبزااف ..الناس كايهضرو
نزهة:لي غايهضر يهضر ماكايتسالني حد وحتاحد ماسوقو فيا الحمد لله بيني وبين الله مصفية نيتي وعارفا أش كاندير
محمد:(مغدد)سمعيني مزيان غاتجمعي وتمشي تخدمي كي الناس ولا ݣلسي فحالك الشوهة ماعندي ماندير بيها
نزهة:(بحالا شعلها)أشناااهوووو؟؟؟نݣلس منها؟؟مالك أخويا كاتصرف عليا...ݣلست عام من الخدمة ماعمرك ماتفكرتيني حتا ب عشرين درهم ديال الحمام ..حادݣ غي تجي تبقا تقرا عليا زابوورك لي مقرياه ليك ديك العݣربة الصفرا ديال مراتك
محمد:(بغا يطير يجبدها من شعرها وهي تسوخر اللور مخرجة فيه عينيها)ضساريتي البرهوشة وليتي تردي عليا الهضرة ...وغانعاود نݣولها بيميني ونلقا عليك ݣد هاكا(شير بقرن صباعو)تا نذبح مك ونمشي عليك الحببس
حفيضة:(رفعات صوتها)هادشي لاش جاي المسخووط غا تفقص فياا هااا...ششوف شحال مشفتك ولا ريتك وجاي تنوض ليا الصدااع فقلب داااري هااا...فرق عليك ختك(كتهددو بصبعها)فرقها علييك ودخل سوووق راااسك
محمد:(وقف جااهل وكشاكشو خارجين)واخااا الالة واااخا ...واعنداك ملي تدير شي فضيحة تجي عندي نفكها ليييها (زعف)الله ينعل لي باقي يݣوليكم شي حاااجة
خرج تايسب ويعرعر و يحك سنانو ببعضهم مخليهم تيغليو بعدما كانو فجو هادئ ومسنطين لعضامهم...
تلفتات ليها مها وصرخات فوجهها:شكووون موصلك نتي ؟؟واش باغيين تفرجو فيا جيراني فاخر عمري هااا شكوون لي موصلك
نزهة:(زفرات)بااطروووني أمي واش أعباد الله السيد دار غي الصواب رديتوني مامزياناش
الام:نتي عارفا خووك كي داير وعينيه معانا هنا واخا ماكاينش وكاديريها قد راسك
نزهة:(عوجات فمها معصبة)ݣولي مراتو لي حاطة خواتاتها حاضينيي تفووو الله يخليها سلعة ...كون زوجتيه ب بنت فاطمة ماكانش يوقع ليه هاكا خزيتت
الأم:(تنهدات بغضب)ندمت حتاندم الشيب لي فراسي يا سيدي ياربي
نزهة:نكدها علي الله يعطيه الغرق تفووو
ناضت من بلاصتها تتحول فالماعن للكوزينة وهي تقشع حدا باب الفصيل مياكي كثار ..مشات قلباتهم بعدما حطات الماعن فالكوزينة لقاتهم فيهم تقدية الحوت لي بغات و وصات عليها ولدو ..عوجات فمها وقالت:حسابني غي هداك الله ووليتي كادخل علينا القفة.
دات داكشي للكوزينة ونقات لي غايتنقى وغسلات البقية وسطوكات فالثلاجة..هزات مذكرتها تاتخطط كي غاتبدا وتبدا تا قادات بروكرامها العادي..وناضت وجدات عجينة الصابلي لي ماغيكونش كثير بالمكونات لي عندها وحيت تايشد اليد بزااف..صايباتو ودارتو فسولوفان ودخلاتو لثلاجة تالغدا وتبالي بيه...هزات تيليفونها مالقات تا اتصال منو ..عضات على شفايفها ودخلات لبيتها ويديها كياكلوها تتاصل ولا متتاصلش فالأخير دوزات المكالمة بعدما فكرات أنه ماكيفسرش التصرفات..
بعد عدة رنات جا صوتو الغليض :الو
نزهة:(بصوت أنثوي)ميمون
ميمون:(مبسم)الزين توحشتيني؟؟
يتبع...
التنقل بين الأجزاء