خيط الريح الجزء السادس

فايق على الصباح بصوت التيليفون كثرة تعياط من شي كليان نوضاتو بزز.. غسل وجهو وسنانو لي عاد تفكرهم يتغسلو ولبس عليه جاكيط الجلد وݣاط وخرج مدرم بلا فطور بلا والو قاصد أشغالو لي ماكيتسالاوش نهائيا وكان أول غرض هو لقاءو مع شخص على قبل مشروع جديد

وفقهوة راقية جدا لي كايعرف مولاها عن طريق ولاد خوالو هوما لي كيتواصلو مع الناس الراقيين أما هو كلشي عندو عادي وخضر. .

جالس كيشرب فقهوة كحلة يحل بيها عينيه فإنتظار الشخص لي داير معاه لي ماوصل تا نشرو بالمزيان عاد وقف عليه بلباس زوين ونقيقي كيبان من صحاب الأورو

سلم عليه وجلس وقال:ديزولي تعطلت كان لومبوتياج راك عارف كازا

ميمون:(كايلعب بلسانو لداخل)حممم هانيا..تشرب شي حاجة؟؟

...:(شير للنادل)café créme

ميمون:ندويو فالبلان

...:ماتعارفناش أموسيو ميمون؟

ميمون:أش غاتعرف فيا ههههه خليقة ربي هو هذا

ضحكو ونطق:هههههه عندك صح

ميمون:نذاكرو فالموضوع لي جينا عليه..المصبنة

...:وي اكزاكتومون و...

قاطعو ميمون:خويا حيد عليا هاد الفرونسي ديالك حيت ما أنا نصراني ماعيني زرقين راني غا مصري. .

...:هههه ديزولي غي مع الخدمة سيتو. .

ميمون:هههههخ اصاحبي هضر بحالا كاتهضر مع خوك..كمل

...:المشروع هو مصبنة دو ليكس بمعني مصبنة راقية ماغنخدموش مع الناس العاديين غنخدمو مع لي زوطيل لي كيبغيو يصبنو فراشهم ويصلحوه وكذلك الرياضات

ميمون:شرح كثر حيت مافهمتش . .

...:مصبنة راقية غاينوض واحد من الناس لي خدامين معانا لابس زوين مقاد ونقي غايمشي للادارة ديال لأوطيلات الواعرين و يقدم ليهم خدمتنا ويشرح ليهم وحنا ننفذو. .

ميمون:واخا...وبشحال غيتقام هادشي؟؟

....:على حساب الدراسة لي درت أنا عشريت مليون وحتا نتا

ميمون:عشرين مليون أصاحبي مالنا غنحلو بار!!!!(مفرشخ فوق الكرسي وكيحرك يديه اليسرية ويهضر)

...:راه لي ماشين غاليين وو

ميمون: (مقاطعو)واش الدارجة مقصرة معاك هههه درج أصاحبي

....:ههههههههه أسيدي الماكينات غاليين وعاد البلاصة فين غانديرو المحل الكرا غايطيح غالي والخدامة . .

ميمون:المحل ضربو على حسابي ..غاينقص عليا واحد العشرة تالمليون

... :ههههههه نقصتي بزااف

ميمون:إلى بغيتي تشريه راه تسعين مليون للفوق والى بغيتي تكريه راه 5000 درهم للفوق هادشي غير القليلة. .

....:(ضحك)هو لي صيفطني لعندك ݣاليا راك جلاخة وماتقتش بيه ولكن تأكدت هههههه. .

ميمون:هههههههههه والحق مابغاه حد

...:أسيدي مكذبناكش..شنو ݣلتي؟؟

ميمون:باش نجيك دغري..البلان زوين حيت غاتخدم مع صحاب عُمَرْ "الفلوس" ولكن جيتيني خاوي...أنا معاك فيه وبغيت نزعم ليه غي هو ديك عشرين مليون لي جيتي حطيتي ليا بفمك بغيتها حساب...جيب ليا ورقة وستيلو وعطيني كل حاجة بثمنها من الماكن تال الزليج تالمحل ههههه مهم يجيني كلشي مفسر باش حتا أنا نعرف فين نحط رزقي. .

....:(شوكاه)حمممم ضروري؟؟

ميمون:ضروري وبغيت كل حاجة مفسرة نيت ونديرو جلسة فينما بغيتيها وتشرح ليا مزيان وديك ساعة نتوكلو عالله. .

....:إن شاء الله ماگلتي حتا شي عيب. .

سلم عليه وحط الكونصوماصيون وزاد خارج مخليه متبع ليه عينيه ..فحين ميمون ركب فطونوبيلتو وزاد لشغالاتو لخرين ومنهم خواتاتو لي شافهم وطمن عليهم عاد بقا فالمطارق حتا وصلات وقت الغدا وتحرك لعند نزهة كي وصل صونا ليها وخبراتو بلي غاتنزل. .

نزهة فبيروها كترش عطرها وتقاد شعرها وعكرها عاد هزات صاكها ونزلات لعندو لابسة كسوة سخونة تالبرد فايتة الركبة مع ليبا موص فلون اللحم وبوط ومن لفوق لايحة عليها جاكيط قصيرة ..الكسوة مبينة تفاصيل جسدها لي فيه غلط واحد هو الكرش فقط اما حقها من الأرداف والمؤخرة راه عندها. .

لمحها من بعيد وطلعها ونزلها باعجاب ماغينكرش ديما مغرية وديما أنيقة كي خدامة كي غتلاقاه..عينيه تبسمو ليها من بعيد وتاهيا عطاتو بتسامة خفيفة عاد طلعات وعيون أخرى من بعيد مترقباها . .

ميمون:(شم عطرها)شهاد الزين؟؟(عينيه غياكلو زينها) تلفتيني ألالة تالبنات

نزهة:(حشمات )هههه لا تزيدش فيه غي شوية. .

ميمون:بايت معاك لا سلام لا والو(مد ليها يديه). .

نزهة:ههه اوا راه تلفتيني كي طلعت ههههه(دارت يديها فيديه)

كي طاحت يديها البيضة فيديه زير عليها بشوية ودار يدو لوخرا فوقها وبشوية عليه تا طلعها عند فمو باسها من برا ومن لداخل وقال بحنية بلهجتو المصرية المخربقة:حق اليدين عليا هههههه شافو تمارة . .

عجبها الحال وحسات بالدفء فقبلتو ليديها وبالحنان كتحس بيه مكيتصنعش إنما كيدير شنو كيملي عليه عقلو وقلبو..وهادشي كيريحها واخا عقلها متضارب من جيهتو..تبسمات ليه بخجل ويديها مزال فيديه وعينيه مختارقين زينها وقالت كترمش بالزربة:هههه راك كتفشش فيا بزااف

ميمون:(عاود باس يديها من الداخل)هذا هو الفشوش عندك؟؟

نزهة:مممم

ميمون:باقي ماشفتي والو هههه فين نمشيو الزين واخا راك بهاد الزين كولو معندي فين نديك من غير داري. .

نزهة:(جرات يديها)الله يمسخك هههههه

ميمون:غي كنضحك معاك...فين تبغي تمشي؟؟

نزهة:واصراحة والله حتا عيانة الخدمة جيت ليها بزز ..مع سهرت مع الحلوة ماكرهتش نجيبو الغدا غي فطونوبيل ونمشيو لشي بلاصة مافيهاش الصداع ناكلوه. .

ميمون:نديوه للدار عندي؟؟(طلقها بلا مايفكر ومحرك طونوبيل)

نزهة:(تنوات)ميمون واش عارف أش كاتݣول؟؟كيفاش للدار عندك؟؟ماعرفتش كيفاش كنبان ليك. .

ميمون:(استغرب وقطب حجبانو)مفهمتش..ݣلتي بغيتي شي بلاصة مافيهاش الصداع . .

تقلب عندها المود هضرتو لاحت ليها ميساج من لتحت فهمات منو فقط أنه كيشوف فيها بنت الزنقة وفهمات كذلك أنه مصاحب معاها على قبل الجنس فقط ...عقدات حجبانها ومعجبهاش الحال وهي تنطق:مقصدتش دارك...ماشي شايطة باش نمشي معاك للدار. .

طلق ضحكة خفيفة ووقف فأقرب بلاصة جنب وقال:شكون شيطك؟؟

نزهة:(شافت فيه مخنزرة )هضرتك لي بيناتني شايطة كيفاش ياله للدار؟؟كيف كنبان ليك بنت الزنقة ولا شنو. .

ميمون:(عاد فهم)اااااااه ݣولي فهمتيها هاكاك هههههههه والله ماقصدتها هاكاك..أنا بغيتك غي تكوني براحتك وصافي اشنو الفرق بين الدار وبين القهوة؟؟

نزهة:(عاقداهم وساكتة)الصمت

ميمون:عقلك كيمشي بعيد راه ماشي جيتي عندي للدار صافي راكي خايبة ولا ماشي بنت الناس...ياك جلستي شحال قستك قربت ليك؟؟ ݣلسنا كي الناس وخرجنا بحالهم

نزهة:واخا هاكاك متبقاش تݣوليا بحال ديك الهضرة كنحس براسي ممزياناش

ضحك وقال:كون تشوفي لي ممزياناش شنو كدير غتعرفي مزيااان أش كتݣولي. .

نزهة:(شافت فيه بجدية)معرفتش أشنو وصلت ليك فاش جيت لعندك وبقيت معاك ولكن أنا ماشي ديال كل مرة الدار الى كان هذا هو غرضك غا بلاش من لول . .

ميمون:(حرك الطونوبيل)غاندير راسي ماسمعت والو ..نساي هاد الهضرة ..حنا بجوح دابا ولي مريحاك نديروها

نزهة:الصمت

سكتو موراها بجوج مخليين هدنة بيناتهم هو معندوش مع النقاشات الخاوية حيت غايصدق خارب كلشي وهي فيها لافونص تقدر تقول شي حاجة تسالي هادشي ديالهم ولي هي أصلا ممرتاحاش ليه لكن مكملة وشنو السبب؟؟معرفاتش. .

حبس حدا واحد المحل وقال:اش بغيتي تاكلي؟؟

شافت فيه ونطقات منفخة:لي جبتي هو هذاك

ميمون:(بجدية)أعدى ماعندي هو النفخة على لخوا...هضرتي معجباتكش ݣوليها ونبدلوها. .

نزهة:ماعجباتنيش

ميمون:اوا ݣلتيها صافي دازت مغتبقاش تݣال ماشي تبقاي دافعة شبابك عليا غالي ..

نزهة:(شافت فيه هازا حاجبها)ماضربك حد على يديك باش تهضر معايا..(بانزعاج)ديني فحالي عفااك بناقص من هاد الغدا. .

حرك طونوبيلتو وسكت مدواهاش ماحزر مابزر حيت أعدى ماعندو النفخة بلا سبب وهي خربقات ليه المود لي عندو. .

سايق مخنزر ماحاملش يهضر وتاهيا كذلك تاوقف حدا خدمتها وهي تنزل بلا هضرة بلا جوج مخلياه كيشوف فاص ليه هي سدات الباب وتحرك ديك ساعة شاد فخاطرو من جهتها فحين هي تبعات ليه العين وتغرق:مزيان تبارك الله باقي حتا مدرنا فالطاجين مايتحرق بديتي كاتحس بجناوحك..اش داني لهاد المصيية كااع كبرنا ليك الشان. .

دخلات لخدمتها قبل الوقت مامغدياش مشايفاه دوزات بوز ديالها غي مخنزرة وهازا تيليفون أما هو خاسر كثر منها ومحاملش راسو على شنو ظنات فيه. .

دوزات يومها هاكاك متوترة وماحاملاش راسها وتاهو كذلك هزو فخواطرهم من أبسط مشكل وأبسط نقاش ...

داز أسبوع والهضرة مقطوعة بيناتهم لا هو سول فيها ولا هي سولات فيه ..حاسبين علاقتهم سالات نهائيا وهي باقي كاع مابدات بسبب بسيط لو جلسو وهضرو فيه كان غيتحل كلشي. .

العلاقة بين جوج مختالفين فالجنس راه كتكون صعيبة تنجح خاصة لكان الحوار مفقود وكانت النفخة طاغية ..دوزات سيمانتها مكملة للسيدة للكوموند ديالها وكايطيح فبالها مرة مرة ..مرة تبسم مرة تغوبش أما هو مبرزط مع مشاغلو ومع خواتاتو لي قررو يمشيو وشاد فيهم حتى تشد نجلاء راسها. .

فهاد الاسبوع مها مشات للحسيمة ..توادعات معاها والحزن طاغي عليها ماكتحملش تبقى بوحدها كيجيها إحساس أنها غتبقا هاكا حياتها كاملة ماشي بحال فاش كتكون الدار عامرة بزااف..ورجعات لمود حياتها الممل من الخدمة للدار من الدار للخدمة وميمون قاطع الهضرة معاها وحتى هي مدواتوش معبراتوش . .

******

يوم الإثنين وبداية الأسبوع كتكون مفعمة بالحيوية عند كاع الناس حيت كيكونو رتاحو فالويكاند..وأغلب الناس كيبداوها مرتاحين لابسين مقاد ومهليين فالحالة غي كتبدا سيمانة تسالي كيبدا بنادم يدمق ويلبس لي لقى قدامو ويتسنا الويكاند باش يرتاح وهذا بالظبط هو الروتين القاتل عند الموظفين ..معفيين منو غي التجار لي ديال راسهم كيمشيو وقت ما بغاو ويرجعو وقتما بغاو حيت الرزق رزقهم. . وهذا حال ميمون لي واخا الإثنين مامسوقش مرتاح فدارو كايفطر على خاطرو هو و ولد خالو لي جا عندو مدوز معاه الويكاند دوزوها كلها زهو ونشاط مع الشيخات والقصاير

جمال:فطور الزنقة هههه يخ

ميمون:بانت ليك عندي شي مرا توجدو هههه

جمال:خاصني نزوجك أصاحبي راه ماشي بلان نجي عندك وناكل ماكلة الزنقة

ميمون:هههههههه ولد الحرام باغي تزوجني غي باش تاكل

جمال:ومالي أش غيجيني من زواجك هههه

ميمون:تما بقيتي أنا مامزوجش

جمال:وفلوسك لمن غاتخليهم

ميمون:ماغنموت حتا نحرق كلشي هههه غي تهنا نوض خلاص من الماكلة ونتا قربتي ميدخلكش الباب

جمال:هههه سوق مك...خليني ناكل

ميمون:خلي ماتاكل فالعراضة

جمال:واش اليوم؟؟

ميمون:مممممم حيت غدا غايمشيو

جمال:صافي سخاو بيك ههههه أجي شي زين هاد خواتاتك

ميمون:جوج فيهم غا أنا جوج الخرين لا،

جمال:اوا نشوفو فجوج خرين هههه

ميمون:(بجدية وعقد حجبانو)جمااال جمع عيينك ..الضسارة ماشي معاهم. .

جمال:(كيطنز)وماتعرف ربي يجيب الفكاك على يديهم

ميمون:ومراتك بغيتيها لرمضان ولا؟؟نوض الله ينعل زلال لي ولدك...جمع عينيك ولا نثقبهم لمك. .

جمال:بناادم ههههه هاحنا نايضين. .

ناضو هزو مسائلهم وركب معاه فاتجاه دارو لوخرا فين مو وختو أما خوه مشا دايرين عراضة لخواتاتو قبل مايمشيو..كي دخلو كاتشم ريحة كسكس على جهد ..دخل عليهم للكوزينة لقى مو وفتيحة مشمرين كايوجدو كسكسو وقال:حممم مي

الزاهية:أوليدي

ميمون:خاصاكم شي حاجة؟؟

الزاهية:كلشي موجود والخير تبارك الله غي مدفݣ..إيمتا غيجيو؟؟

ميمون:شويا ويجيو

الزاهية:واخا أوليدي...راه حتا فرح بنت خالتك غاتجي تغدا هي وراجلها

ميمون:ربيع ياك؟؟(طاحت فبالو نزهة وحك لحيتو)

فتيحة:اييه هو هذاااك...لي مزوج ديك العوجة هههه

الزاهية:عوجة وعندها الراجل كيتك نتي. .

فتيحة:(عوجات فمها)الله يستر عدوك منك..سربي خلاص. .

تلهاو فشغلهم فحين ميمون جالس مع ولد خالو مجمعين تا قرب الوقت ومشا جاب خواتاتو لي باقي لابسين الأسود وجرحهم طري برفقة أدهم ...جايين ساكتيين ماهضروش بتاتا تاوصلو ومدخلهم كيرحب بيهم..خرجات الزاهية مبسمة ليهم سلمات عليهم وقالت:أنا مو . .

نجلاء:إنتي مرات بابا؟؟

ميمون: نتي ماحضرتيش للجنازة ماشفتيهاش..هادي مي

سلمو عليها عادي ودخلوهم للصالون الكبير فين كان جمال ناشر رجليه شافهم وتقاد وسلم عليهم عادي. .

زُهرة:(بغات ترطب الهضرة)اييه الريحة الطيبة دي

ادهم:الكسكس مش كده؟؟

ميمون:ااه

سارة:(مخاطبة أم ميمون)تسلم ايديك يا خالتي

الزاهية:(بالمصرية)ربنا يخليك يا بنتي..عاملاه خصوصي عشانكو. .

زوهرة:انتي بتتكلمي مصري جامد ياخالتي؟؟

ميمون:(مصدوم)هادشي مدرتوش معاك الزاهية ههه

الزاهية:(بالمصرية)أنا عشت سنتين فمصر مع أبوكو وكانو إخواتو بيكلمو مصري دايما فتعلمتها هناك. .

جمال:(شداتو ضحكو)هههههه شوفي شحال داز ومانسيتيش هههه

أدهم:المصرية صعب تتنسي

هدى:(بهدوء)حضرتك مش شبه ميمون خالص

زُهرة:(بابتسامة)ميمون ده بيشبهني أنا(تكات على كتفو)مش كده؟؟

فلتات ليه تبسيمة ودور يديه عليها كانو حاضنها عندو وقال:شابهين با الله يرحمو

الكل:الله يرحمو

جمال:عمتي حطي لينا ناكلو جاني جوع

ناضت الزاهية مخلياهم مجمعين معاه وأدهم غي ساكت ماعاجبوش الوضع بتاتا ..حتى دخل ربيع رحبو بيه وجلس معاهم تعرفو على بعضهم وعلى بنت خالتو..كانت لمة عادية ضاحكين ناشطين عادي وماكانتش حساسية بيناتهم تا الزاهية كانت كتصرف عادي معاهم يمكن حيت مات لي كان مكرهها فأي حاجة فالمصريين وفالأخير كتقول خواتاتو وعمرها كانت عندها معاهم مشاكل ..لو تعلق الأمر بعماتو كانت تكحل ليه بالعما وميذكرهومش. .

تحط الغدا وتقسمو لجوج طبالي حيت العيالات كثار ..جوج قصاري عامرين ديال اسفي مزخرفين واللبن فالكيسان وبداو الماكلة ...المصريات حمقهم كسكس واخا كياكلو بالمعلقة هوما وميمون وربيع ومراتو لكن جاهم بنين . .

تهز كسكو وتحطات صينية ديال أتاي تجمعو عليها مجمعين عادي كايحاولو معاهم ينساو شنو واقع ليهم حتى رن تيليفون ربيع وستأذن منهم يجاوب مخليهم . .

بعد لحظات رجع وقال معتاذر:غتسمحو ليا أنا خصني نمشي

الزاهية:ياك لباس أوليدي؟؟

ربيع:مشاكل فالخدمة

جمال:وجلس أصاحبي هانتا جالس خليهم يفكوها

ربيع:مانقدرش واحد السيدة عندي طاحت بتسمم ولا ماعرفت شنو خصني نمشي. .

ميمون:(بفضول)شكون؟؟

ربيع:(تفكر بلانو معاها)كتعرفها..نزهة

ميمون:(وقف قافز)مالها؟؟

كلشي ضار كيشوف فيه وهو عينيه فربيع:ماعرفتش ݣالو ليا جاها وجع وغايهزوها لسبيطار

ميمون:(تحرك من مكانو قايل)زيد أنمشي معاك

ربيع:(فرنس) ههه ايييه ياله

ميمون:(كايلبس صباطو)مي البنات معاك حتا نرجع

أدهم:حصل حاجة؟؟

ميمون:خاصني ضروري نمشي معاه. .

ربيع:(حابس الضحكة)واخا

زُهرة:روح يا حبيبي احنا هنا

هدى:ااه لو عايز مساعدة أنا هنا

ميمون:شكراا

خرج معاه كايزرب فالدروج ماتسناش السانسور خلى ربيع تابعو بجرا قرب يطرطق عليه بالضحك وكايسول فيه:معرفتيش مالها؟؟لاش الوجع؟؟

ربيع:علمي علمك ههه مالك أصاحبي

ميمون:واازيييد

فتيحة:ياويلي مال هذا طاار ..شكون هاد نزهة؟؟

نطقات بنت خالتو اسمها فرح:وا سمعت شي خبار ولكن ماعرفتش

الزاهية:(بإهتمام) اينا خبار هضري

فرح:صراحة ربيع ݣاليا شافو جوج مرات مع وحدة خدامة عندو

هدى:ممكن تشرحونا..إيه إلي حصل؟؟

ادهم:في وحدة بتشتغل عند الراجل لي إسمو ربيع عيانة وميمون راح معاه وبيقولو إنو بينهم حاجة. .

تبسمات سارة:ما جايز تكون حبيبتو. .

تزنكات الزاهية وضربات ففخضها:أويلي دااير الصاحبة

جمال: (كيضحك)هههههههه ولد الهم ݣاع ماݣالها ليا هههههههه ونزهة مزااال

فتيحة:هههههههههه وهانتي ليييك

الزاهية:(شدات حنكها)ياويلي على لي نݣول عليه دغري . .

وقفات طونوبيلة ربيع حدا الكلينك لي عطاوه الموظفين اسمو..نزل هو وميمون لي كايزرب وكيسول فيه :أشمن بلاصة كاينة؟؟

ربيع:(وقف فالإستقبال)صبر نسول..(بالفرنسية)عفاك واحد سيدة جابوها دابا إسمها نزهة البشريوي. .

...:واحد الدقيقة (قلبات) ااه وي راها فالمستعجلات

ميمون:شنو عندها؟؟

...:(بالفرنسية والعربية مخلطين)عندها تسمم من شي حاجة كلاتها

ميمون:(شاف فربيع مافاهمش)أش ݣالت؟؟

ربيع:حممم داكوغ ميغسي..أجي معايا أميمون..عندها تسمم كلات شي حاجة ضراتها ...ياله نشوفو الطبيب...

مشاو ناحية المستعجلات ولقى واحد من الموظفين تما لي مسؤول ونطق:شنو وقع أ مروان؟؟

مروان:كانت خدامة غي شويا كانسمعو غواتها كتغوت بالحريق وكاتقيا ومعرفناش علاش

ميمون:(ضرو خاطرو)فينها دابا؟؟

مروان:باقي كيشوفها الطببب..بغيت نعيط لعائلتها مي ماعنديش نماريهم

ميمون:ماتعيط لحتى واحد..

مروان:موسيو ربيع خاص التكاليف يتخلصو

ميمون:ربيع خليك هنا أنا نجيب الفلوس ونجي

ربيع :(لقاها من الجنة وللناس)داكوغ. .

مشا ميمون كايزرب لطونوبيلتو حل الباب وهز طابي لي تحت رجليه وهز أونفلوب فيه بزاف تالفلوس داهم كاملين ومشا للإستقبال خلص كلشي ورجع لعندهم لقاهم واقفين وقال:أمدرا؟؟

ربيع:خرجوها..ها طبيب يشرح لينا. .

وقف عليهم الطبيب ونطق ميمون:كي بقات؟؟

الطبيب: دابا مزيان...السيدة عندها تسمم كلات شي حاجة خاسرة وضراتها

ميمون:فايقة؟؟

الطبيب:سي فايقة..عطيناها كالمون ودرنا اللازم خاصها الراحة واحد لاسومين وترجع مزيان..

ربيع:ميغسي دكتوغ..

الطبيب:بالشفاء العاجل. .

مشا وخلاه زفر زفرة ديال الراحة وقال:فين داوها.؟

ربيع:لشومبغ ناف

ميمون:(بعصببة)هي أش؟

ربيع:ياله معايا نوريك..مروان تقدر ترجع لخدمتك. .

مشا معاه ماحاملش راسو ..وماعارفش راسو علاش خاف عليها هاكا..واش من المعزة ولا من الحب لي تسلل لقلبو بلا مايحس..هي مواقفو الرجولية راه مع كلشي وبشهادة الجميع.. ميمون معروف لي بغاه كيلقاه ولي خصو كيعطيه لكن مع نزهة حس براسو هو لي مقيوس..

وقفو قدام باب غرفتها..دخل ربيع لعندها وتبعو هو أكيد..فور ماطاحت عينو عليها تعصر قلبو..كانت بحوايجها نيت مبدلوهمش ليها حيت حالة خفيفة وجها شاحب والتعب متمكن منها..أما هي راه مغمضة عينيها والسيروم معلق فيديها للقوة ..سمعات صوت الصباط لي لابس ربيع وهي تحل عينيها بشوية عيانة ..غي شافت فيه وهي توعى وكانت باغا تنوض تجلس ساعا قرب منها وحبسها بيديه لي شدات فكتفها:رجعي نعسي رتاحي

نزهة:(باقي مصدومة وكضور فعينيها)حممم أش كدير هنا؟؟

حمحم ربيع وقال:مدوموزيل نزهة صافا دابا؟؟

نزهة:(شافت فيه)شويا الحمد لله(عينيها كايهربو لميمون)

ميمون:(واقف عند راسها كيفحصها بعينيه)كي وقع ليك؟؟

سرطات ريقها حشمانة منهم أولا حيت متكية وهوما عند راسها ثانيا حيت ميمون معاها ومافهماتش كيفاش..حدها نطقات:كليت كرواصة قديمة

ربيع:(شاف نظراتهم لبعض)مادموزيل بون غيتابليسمون..عندك سيمانة ديال الراحة رتاحي مع راسك

نزهة:شكرا بزااف..الخدمة راه..

ميمون:(قاطعها)نسااي الخدمة دابا

ربيع:وي بصح..رتاحي مع راسك..أنا نخليكم مايكون باس أمدموزيل

نزهة::(تبسمات بتعب)شكراا

خرج وخلاها معاه الراس فالراس قلبها كايضرب بالجهد

و ما عرفاتش علاش..وعينيها عليه هو لي مدور وجهو جيهة ربيع متبعو بعينيه كيتأكد من خروجو ...غي شافو سد الباب تلفت ليها وهي تقلب عينيها دغيا بحالا ماكتشوفش فيه..لمح ملامح وجهها التعبانة ومع ذلك باقي كتبان زوينة فعينيه بداك الزين العربي..تجرأ ومد يدو قاس حنكها بحب بلور تيديه لقاهم سخان وهي تشوف فيه كترمش بزربة مفاهماهش لكن مبلوكية بلمستو الحنونة. . وقال: كي وقع ليك؟؟

***🔙🔙🔙🔙

جايا لخدمتها كيف عادتها وفايقة معطلة مالحقاتش تفطر فالدار دازت للمخبزة خدات منها كرواصة وشنيك وقالت تفطر بيهم مع وصلات صايبات قهوة فالماكينة لي داير ليهم ربيع وجلسات كتفطر بيهم وناضت لخدمتها مع وصلات وقت البوز بداها الوجع فكرشها فلول تجاهلاتو لكن فاش تجهد عليها بغات روحها تخرج بالوجع. .

التسمم هو أكثر الظواهر انتشارا فالمجتمع المغربي بسباب الماكلة لي فالزنقة..مكنعرفوهاش باش طايبة ومناش مصنوعة المهم هو تشبع الكرش وغاديين بمبدأ"كل عفينة تتزيد بنينة" لكن ناسيين أنه ناس ماتو بالتسمم حيت معدتهم مقدراتش تحمل وكذلك الجسد جاه الميكروب صعيب .

أغلب سكان العالم كيعانيو من جرثومة المعدة لي كيسببها بالدرجة الأولى ماكلة الزنقة لي تقدر تكون بايتة وتقدر تكون خاسرة أو دايزين عليها الحشرات او مخلطين فيها ..وأغلب الناس كتاكل عند أي واحد واخا ميكونوش شروط النظافة متوفرين فيه المهم الكرش تشبع ناسيين أنه الموت حضرات فبزاف ديال الوقائع ديال التسمم. .

➡️➡️➡️➡️➡️

ميمون:(جلس فطرف السرير كيحشمها بنظراتو لدرجة نسا علاش تخاصمو ...عقد حجبانو فيها)ومالك فيه؟؟فطري فداركم عاد سيري ماكلة الزنقة مصيبة كحلة. .

نزهة:حممم كنت مزروبة وصافي

ميمون:شكون هذا لي شريتيها من عندو؟

نزهة:حدانا

ميمون:نعتي ليا

نزهة:(بتساؤل)شبغتيه؟؟

ميمون:غاتخليه هاكاك بلا متحسابي معاه..كنتي غتموتي

نزهة:لالا غي خليه أنا لي خصني نشد رجلي من ماكلة زنقة حممم. .

مدات يديها بغات تهز الما من حدا راسها وهو يسبقها وناض كب ليها فالكاس المحطوط ومدو ليها كاتشرب وعينيه عليها تا فلتات ليه البسمة..مع سالات مداتو ليه وقالت:مالك كضحك؟؟

حط الكاس وقرب ليها شد يديها وهزها تحت نظراتها الغير مفهومة وباس قاع يديها بحب وقال مبسم:توحشتك

"توحشتك"

كلمة تحييك من بعد موت الشوق...كلمة بسيطة لكن وقعها على المتحابين كبير..باش يجي الطرف الآخر لي كان بيناتكم مشكل ويلخص ليك جميع المخاصمات والعتابات فكلمة وحدة ...كيطفي بها نار الغضب والفكعة والكسرة لما لا...كلمة كتخليك طاير فالسما السابعة وكاتحس المرأة ملي كتسمعها أنها أنثى ..معناها جميل هو فقط أنني "افتقدتك"

"افتقدتك

تنقصني قطعة من قلبي

وتنقصني مساحتك انظر اليها"

ما غتنكرش بتاتا أنها مافرحاتش..بالعكس بانت فوجهها من ملامحها لي ترخاو وهي كتشوف شفايفو قايسين يديها الرطبة وكينطق بكلمة توحشتك لي جمعات ليها الإعتذار والأسف وحتا الشوق..حاولات تخبي ابتسامتها تا عيات وفلخر بانت وقالت بدلع وصوتها عيان:باينة..وعلاش ماكتسولش فيا؟

ميمون:(جلس فقنت السرير ويديها مخشية فيديه )حمم اوا الخاطر وصافي

نزهة:(بهدوء)وهاد الخاطر هارب غي من جهتي؟؟

ميموت:(بين على سنانو بتفرنيسة)نسااي الالة تالبنات..نتي دابا مريضة خاصك ليا الراحة..رتاحي ليا شويا

نزهة:مممم بغيت نخرج

ميمون:لا خليك حتى يفوتك الحال وتقدري تمشي ونديك لداركم

نزهة:ماكنحملش السبيطارات وغانقنط

ميمون:أنا نيت معاك..(رجع قبل يديها)

نزهة:(تبسمات تاتغمضو عينيها)وليتي رومانسي؟؟

ميمون:(طلق من يديها ضاحك)واشفتي التبرهيش هههه خلينا رجالا

نزهة:(ضحكات بشوي)هه مال الرومانسية غاتنقصك من الرجلة..رطب رطب معايا شويا ونتا غي كضور فيا

ميمون:إمتا ضرت فيك؟؟

نزهة:(كتسبل فعينيها وتعوج ففمها بدلع وهو حاضيها زلايلي)وا داك نهار عطيتيني هضرة قاسحة وو. .

مد يدو سكتها بيها وقال بجدية:نساي ديك الهضرى حنا ولاد اليوم ..مباقيش غنهضرو فداك البلان. .

نزهة:(بهدوء)واخا

ميمون:فيك جوع؟؟

حركات راسها بالسلب:لا مافياش..معدتي ضاراني

ميمون:ردي لبال الزين ماشي لاقيينك فالزنقة باش تبقاي تكرفصي على راسك ههه(مسح على حنكها)مال جدك على هاد الرطوبة أش كديري لوجهك؟؟

نزهة:ههههه اوا داكشي ديال العيالات هههه مشاو خواتاتك؟؟

ميمون:غدا عوالين..كنت نيت معاهم ملي سمعت ربيع اش ݣال جيت لعندك

نزهة:(بابتسامة مراقبة عينيه)خفتي علي؟؟

ميمون:(بدون مايفكر)بزاااف

نزهة:هههه(غمضات عينيها وغطات وجهها)غاترجعني مراهقة كنحشم هههه

ضحك تاهو ومد يديه حيد ليها يديها على وجهها وقال مفيكسي عينيه فعويناتها الكحلين المشفرين:عندي عزيزة ونتي عارفاها

نزهة:(بابتسامة بلهاء)حتا نتا عزيز علي..لهلا يخطيك كلفتي راسك وجيتي

ميمون:(داعب يديها)مابيناتنااش. .

صونا تيليفونو وخرجو جاوب حداها مخلي ليها فرصة فين تحقق فيه بإعجاب..ماغتنكرش أنه فاش جا لعندها صدمها وكبر فعينيها نسا أنهم مخاصمين وركز فقط فأنها مريضة..

جوج رجال ماتنساهمش المرا..أول واحد قاسها وراجل وقف معاها فمحنتها...وهي ربي عطاها محنة صغيرة ولقاتو حداها..

عينيها مكمشين فيه هو لي كيهضر بجدية لكن أغلب الحوار مسمعاتوش مزيان حيت ساهية فيه وفالراحة لي نازلة عليها معاه فديك اللحظة بالظبط..

قطع وشاف فيها وهو ينطق:فريع الراس

نزهة:مالك؟؟

ميمون:غانمشي واحد الساعتين مغنفوتهاش نشوف البنات ونجي

نزهة:بلا ماتعذب راسك غير سير أنا وليت شويا

ميمون:غنبات معاك..دغيا نشوفهم ونرجع. .

نزهة:(حمقها اصرارو)كنهضر معاك بصح غير سير أنا مزيانة غدا نخرج

قرب منها لاغي المسافة بيناتهم بغفلة منها باس جبهتها وقال:تهلاي فراسك..ساعتين وراجع..مخصك والو؟؟

نزهة:(ركزات شوفتها فعينيه)لا...شكراا

تبسم ومشا مخليها متبعا ليه العين بهدوء وإعجاب..كبر فعينيها فاش لقاتو واقف عند راسها فاش مرضات ..وحتى بوسة اليد والجبين لي معروفين انهم بوسات الأمان حساتهم معاه.. الى على الضرافة راه ضريف وتعاملو زويين كيخليها تحس براسها مرتاحة بزااف. .

تنهدات ورفعات عينيها للسقف كتفكر و تحلل فهاد السيد لي معرفاتو منين دخل لحياتها ..قاطع تفكيرها الممرضة لي جات تطمن عليها وطلبات ليها صاكها ومداتو ليها كان فبلاكار تما

نزهة:حممم عفاك واش تخلصو المصاريف؟؟

الممرضة:وي على الأغلب اه

نزهة:مممم غيكون ربيع لي خلصهم حممم شكراا. .

خرجات الممرضة مخلياها متكية كتضور فعينيها تا داها النعاس ...أما هو راه رجع للدار وحجبانو مقرونين جمال عاود ليه كلشي لي قالت فرح بالتفصيل واعدى ماعندو هو دخول الصحة. .

طلع لدارو لقا خواتاتو غايمشيو عتاذر منهم على الخرجة لي خرج وهي تبسم ليه سارة وقالت بصوت منخافض:هي الست دي خطيبتك؟

ميمون:(بجدية)لا

نجلاء:(سمعاتهم تتبسمات)ربنا يجيبلك بنت الحلال ...إنتا انسان كويس هتوحشني اوي يا خويا. .

عنقها عندو وهي كتخشا فيه ولوخرين كيسلمو عليه من الوجه مساخيينش بيه..

هدى:(بابتسامة)تشرفنا بيك يا ميمون..هنستنى زيارتك لمصر ..

زُهرة:لازم تيجي ...ولادي هيفرحو بيك. .

ميمون:(شي فهمو شي لا)إن شاء الله. .

تعانقو من جديد ونزل معاهم تا وصلهم للاوطيل وشد الطريق للسبيطار مبسم وعينيه فرحانين بيها..يمكن وفرات عليه طرق كثيرة بهاد المرضة...بلاصة مايدخلو فنقاشات وعتاب تختاصرات الطريق عليهم...كي دخل لعندها لقاها ناعسة براحة..تبسم وجر كرسي حداها وبدون شعور يديه قادوه لحنوكها قاسهم بلور تيديه منتاشي بزينها..

هي مثلها مثل أي مرا متكاملة لكن نزهة عندها نظرة غير وجاتو على ݣانتو يمكن كاع نݣولو دخلات لخاطرو. .

بقا جالس حداها مرة يشوف فيها مرة يجبد تيليفون يخربق فيه باقي مشادوش مزيان مرة يصورها كل مرة وشنو يدير حتى بدات كتفيق وكتحرك وهي تحل عينيها فيه مباشرة تبسمات بشوي ونطقات بصوت ناعس:جيتي

ميمون:شويا باش جيت..رجعي نعسي

نزهة:(تفوهات ودارت يديها على فمها)ففففف خمرت بزااف..عرفتي شحال مانعست هاكا

ميمون:علاش؟؟

نزهة:(تقلبات على جنبها لي كيشوف جيهتو وحطات يديها تحت خدها وعينيها فيه)هههه جوج خدمات كنعيا ههه وكنبغي نكون مرتاحة

ميمون:منهار عرفتك كنݣوليك أنزهة راكي متقدريش عليهم بجوح صعاب عليك ختاري وحدة. .

نزهة:(مبسمة)اوا الوقت واش خلاتني ندير

ميمون:(بتساؤل)خلصتك ماكتݣدكش؟؟

نزهة:حممم أنا مصاريفي كثار هههه كتݣدني الحمد لله غي عيني كبيرة . .

شد صبيعاتها بين يديه ونطق:عطي الراحة لراسك وبعدي من ماكلة الزنقة.. نتي ماشي شي وحدة لي ماكتعرفش تطيب باش ماتطيبش. .

نزهة:(ضحكات)ههه داكشي لي كانت مي غتݣول هانتا كتݣول فيه الشارف

ميمون:أجي فين مك؟؟

نزهة:مشات للريف عند خويا

ميمون:معندكش شي حد هنا

نزهة:كاين خويا وختي ومبغيتش نبرزطهم..أنا ݣادة براسي

ميمون:(عيبها)انا ݣادة براسي هههه باينا فيك ونتي نسوطو فيك تطيري

نزهة:(ضحكات)تعهههههه ضعافيت؟؟

ميمون:(كيحقق فيها)ماعرفتش ههه

نزهة:ويلي هي الرياضة مانفعات والو

ميمون:كاديري رياضة؟؟علاش؟؟اش باغيا تطيحي؟؟

نزهة:مكتشوفنيش كي وليت غلاضيت بزااف والكرش خرجات. .

ميمون:(ضحك)من نيتك؟؟اشمن غلض؟؟نتي هي هاديك...

نزهة:لالا أنا كايعحبني راسي ضعيفة

ميمون:(داعب يديها)كوني غي براحتك غليضة ضعيفة مكيهمش

نزهة:البنات مشاو

ميمون:ااه...غيمشيو غدا..مسخيتش بيهم صراحة

نزهة:(فرنسات)مالك الزمر ضريف وحنين هاكا هههه لي سمعك يݣول عاشو معاه سنين

ميمون:هههههه(لوا ليها صبعها بشوية) كون غير عاشو معايا..ماكرهتش كون بغاو يعيشو معايا هنا

نزهة:(بتساؤل)ماكبرتيش مع خوتك؟؟.

ميمون:لا...كبرت بوحدي

نزهة:ولكن كنتي ݣلتي ليا عندك بزااف

ميمون:اخخخخخ هههههه أنا الالة كبرت يتيم لا مي لا با

نزهة:(بفضول)كيفاش زعما؟؟

ميمون:كبرت بوحدي با معرفتو حتا وصلت 18 لسنة ومي كنت كانشوفها من العام لعام مبدات كتجي عندي ونمشي عندها حتى مات راجلها

نزهة:(عز عليها)احححح وفين كنتي عايش؟؟

ميمون:فينما هههه ولد باب الله...فاش جيت لكازا كنت صغير بزاف ومعندي حتا ورقة حيت با زاد وخدا معاه وراقيا خدمت مع واحد مول الحانوت شلح الله يرحمو مسكين علمني الحرفة ووراني كيفاش نهضر وكيفاش نتعامل مع الناس وكان كيخليني مسكين نبات عندو فالحانوت . .

نزهة:(ممصدقاش)حلف ...كنتي كتبات فالحانوت؟؟

ميمون:واش غنكذب عليك؟؟ههههه كنت كنبات والسكر فوق راسي والسميدة عند رجلي والبوطات ضايرين بيا ههههههههه

نزهة:(بغات تضحك ومقدراتش)مامتيقاش والله...كمل ليا عفااك . .

ميمون:(ضحك )فيك ماتسمعي!!!واخا راه ماشي شي حاجة

نزهة:(شدات فيديه)ياك غتبات معايا؟؟اوا عاود ليا

ميمون:(شاف فيديها)نعاود للالة تالبنات..اش بغيتي تعرفي؟؟

نزهة:كلشي..ملي خدمتي هنا

ميمون:خدمت مع واحد السيد بقيت معاه شحال وكان خالي مسكين كيجي عندي يشوفني وهو مسكين لي حطني بسميتو حيت خصوني وراقي...بقيت كنتلاوح من حانوت لحانوت مرة بايت فيها شي مرات كنبات فبيت مع دراري...دوزت تكرفيص صراحة...كنت ماكنشوف الحمام على شهر باش نجمع الفلوس وندير ديالي وكنت كي الخيط تسوطي فيا نطير

نزهة:ومك؟؟

ميمون:(تبسم)كانت مزوجة فالقلعة

نزهة:سمحات فيك؟؟

ميمون:لا ماسمحاتش فيا..حتاهي عندها ظروف..واحد الوقت كان كيبقا فيا الحال كنشوف خوتي كابرين مزيان واكلين شاربين عندهم مهم وباهم وأنا لا ولكن تنعل الشيطان وتنݣول فيها خير

نزهة:وباك؟؟

ميمون:با الالة معرفتو حتال 18 لعام...واحد نهار كنت فالحانوت تنبيع ونشري حتا جا خالي ومعاه با تما عرفتو وكون تشوفي شحال فرحت هههه من تما تهزات علي ولد المصري. .

نزهة:(تبسمات بضحكتو)مكنتيش عارفو مصري؟

ميمون:لا عرفتو مصري خالي كان كيعاود ليا عليه وكان كيجي يشوفني ومانكذبش كيعطيني فلوس ديك ساعة كان حتا هو غي عادي ماشي شي واحد خانز فلوس ...غي دار الفلوس وهو يموت هه. .

نزهة:ههههه اوا هاهوما بقاو ليك

ميمون:لا...أنا ماشي فسميتو ...سميتي على سمية خالي..عيا معايا مسكين يدير ليا الوراق ولكن مابغيتش..كنت باغي غي نشوفو ونݣلس معاه نجمع معاه وصافي ماباغي والو

نزهة:(بتأثر)لو أنا فبلاصتك مكنتش نشوف فحتا واحد فيهم..

ميمون:وعلاش؟؟ههههه دابا الى أنا نكرتهم وحقدت عليهم شكون لي غيكون خاسر .. انا ...حيت ربي كيوصي على الوالدين ..الى هوما خلاوني فصغري انا منخليهمش فكبرهم حيت نهار غانتخاسبو هوما يتحاسبو على ذنب وانا ندي السخط ههههههههه وعلاش؟؟كلها وحياتو كي دازت...وهاني كبرت ووليت راجل وݣاد براسي الحمد لله

نزهة:(غرغرو عينيها)والله حتى عزيتي عليا ههه تكرفصتي

ميمون:هادشي غي علاش عاقل هههههه أما راه شلا مايتعاود أنزهة...غي لقاتني الوقت مكنهزش فخاطري وصافي

نزهة:غايعوضك الله إن شاء الله مديرش فبالك

ميمون:(ضحك)عهههههههه كي شفتي أنا دابا داير فبالي ههههه با بقا معايا حتا مات ومات وهو راضي علي ومي هاهيا معايا حتى هي اوا والحمد لله. .

نزهة:هههههههههههههههه حنييين المصيبة بزاااف

ميمون:جربيني عععععهع

نزهة:لالا تأكدت حنين نيييت. .

دخل عليهم الطبيب ديك ساعة رفقة الممرضة مقاطع حوارهم وقال بأدب:مزيان دابا؟؟

نزهة:الحمد لله

الطبيب:عطيتك دوا تبعيه لمدة وحاولي تبعي معاه نظام غذائي بعيد على الذهنيات والمقليات حيت معدتك حاليا متضررة . .

نزهة:إ شاء الله..واش نقدر نخرح؟؟

الطبيب:نن غا تبقاي حتال غدا إن شاء الله(خاطب الممرضة)أشمن وقت تحيد ليها السيروم؟؟

الممرضة:شي ساعة ونص هادي

الطبيب:(مبسم)بون غيتابليسمون مادموزيل

نزهة:شكراا

خرج وخلاهم بجوج تاني وهو ينطق ميمون:هاد الطبة شحال فيهم ديال الفرونسي ههههه

نزهة:هههه كاع ماهضر بيها بزااف...أجي كنبغي نسولك وكنحشم

ميمون:(تفطح على الكرسي كيحيد تجاكيط)باينا الحشمة فوجهك غا سولي هههههه

نزهة:علاش ماقريتيش؟؟

ميمون:اش كنت كنعاود ليك؟؟فين لقيت الوقت وفين وراقي با خدا ليا وراقي ماقريت ماشفتو..تعلمت الحساب غي بالحرفة والقراية راه من دوك الحريفات لي قريت فالجامع و صافي ههههه

نزهة:تبغي تقرا؟؟

ضحك ميمون وقال:اش نقرا وأنا شبت

نزهة:القراية ماعندهاش عمر أميمون

ميمون:اوا يحن الله هههه أنا راجع نشوف مناكل ..نتي ؟؟

نزهة:غايجيبو ليا ماكلتي

ميمون:شي نص ساعة ونجي واخا. .

حركات ليه راسها وناض هز من تجاكيتو الفلوس وزاد مخليها متبعة ليه العين مبسمة ومبدلة نهائيا..نزهة قبل ماتسمع قصة حياتو ماشي هي بعد...خلاتها تغير نظرتها عليه الخارجية وتشوف الجانب الجوهري منو..الجانب الداخلي لي فيه غي الصفة والنية. .

بقات ملاهية حتى رجع كانت كلات هي وسالات وهي تبغي توقف باش تمشي لطواليط ودخل هو متساءل:فين غادية؟؟

نزهة:للطواليط

تمشات قدامو بشوية عليها وقال:نعاونك؟؟

نزهة:ههه لالا

دخلات للحمام قضات حاجتها وخرجات لقاتو جالس فوق سريرها وكايضور عينيه على الغرفة وقالت:مالك؟؟

ميمون:(حيد ليها باش تكا غي تكات غطاها )كايربحو زبالة تالفلوس

نزهة:شكون؟؟

ميمون:صحاب السبيطارات

نزهة:اوا زعم ديرو حتى نتا ههه

ميمون:(على نيتو)غاندير واحد اخر جديد...مشروع مصبنة ديال الناس الواعرين

نزهة:كيفاش زعما؟؟

ميمون:مصبنة ما غتخدمش مع ناس عاديين(جلس)مع لوطيلات لي كايبغيو لي يصبن ليهم فراشهم ولكن شي حاجة واعرة . .

نزهة:فكرة زوينة ههه الله يسر غي حضي لا يشفروك تاني. .

ميمون:(ضحك)هععههه حسابك هذاك شويا لي خداو دوك البراهش شفرة؟أنا فاش كنبغي ندخل فشي حاجة كنحضر عقلي غي كانتيسر كيبداو اشفروني هههههه

نزهة: (ضحكها)ههههههههههه واحضي راسك

على هاد المنوال كملو حديثهم لوقت طويل...مواضيع من جميع الأصناف مافيها لا قلة أدب لا جرح لا تقليل كأي جوج تناس تلاقاو فالتران ولا فشي مجمع وجلسو كيتبادلو الهضرة واللغى..هو من النوع لي مطلوق فالهضرة وهي من النوع لي كيسمع..مناقشين ضاحكين مجمعين داويين فأي حاجة ممكن طيح فبال اي واحد تا غفات هي ومشا هو للكانابي لي فالبيت تكا على ظهرو ودار يديه على عينيه وغفى هو الاخر

*****

خيط الريح

هو أحد الخيوط التي ستربطني بك الى الأبد

*****

فالدورة تصباح لي كيديروها الاطباء والممرضين للمرضى ديالهم كانت نزهة كتفيق على أصواتهم الهادئة..حلات فيهم عينيها ونطقات الممرضة:صباح الخير

نزهة:حممم صباح النور(شافت ميمون باقي ناعس)

الطبيب:صافا شويا؟؟

نزهة:حمد لله

الطبيب:إن شاء الله تولي حسن تبعي شنو قلت ليك(كيفحص فيها)بالشفاء تقدري تخرجي اليوم

نزهة:ميغسي. .

خرجو وخلاوها كتفوه ..ياله ناضت وهو يحل عينيه عاقدهم باينة مناعسش مزيان ..تبسمات ليه ورجليها بدات كتلامس الأرض وكانت عينيه عليهم..نقيين ومبوردين وصغيورين وعامرين ..نطقات:صباح نور

ميمون:(حمحم )حنننن صباح الخير(ناض )احححح عواج ليا عنݣي هنا. ..

نزهة:هههه اوا علاه الزين ساهل

ميمون:(تبسم)ههههههه حارة ياختي معرفتش علاش كتقلبي ههههه

نزهة:كنقلب نخرج غي من هنا ههههه نخرج من الحمام ونمشيو

ميمون:(ناض كيتفوه)بلاتي نخرج أنا مزير. .

نزهة:(تزنكات من خضوريتو)أستغفر الله

ميمون:(موجه للحمام كيضرب بدوك الذرعين)مكتبوليش أختي نتي واااه . .

مع سد الباب مع طرطقات بالضحك حتى ضراتها كرشها بالضحك ..خضر ومبصومة ليه واحد ياله عرفتيه وتيݣوليك بلاتي نبول كي والو لا طولات معاه يݣوليها بلاتي نخرا..خرج غاسل وجهو وكيمسح فيه بالبابي المحطوط تما وقال:ياله نوضي ههههه

نزهة:ياربي يعطيك شي عقل . .

تحركات من حداه حفيانة وعينيه على رجليها كي بيضين وقال:الله يعطيني غي الصبر معاك(كي دخلات نطق بينو وبين راسو)كلشي فيها زوين بنت الحرام ههه. .

جلس فالكانابي مفرق رجليه ويد وحدة منشورة على رجليه ولوخرا كيحك بيها لور ديال راسو حتا خرجات هي بنفس اللحن باش دخلات..

ميمون:مابغيتش نتعنب عليك ولكن واش كتفيقي كل صباح زوينة هاكا هههه

نزهة:ههههههههههه غي فعويناتك كانفيق زوينة ...عاد دابا طليت فالمراية لقيت راسي حالتي حالة هههههه

ميمون:الله يسمح ليك هههه زيدي جلسي لبسي سباطك

جلسات حداه مابيناتهم حتى مسافة وقالت:فيا واحد العيا واخا نعست

ميمون:(بتساءل قاس حنكها بلور تيديه)بمعدتك زعما؟؟

نزهة:ااه..كنحس براسي باقي باغيا نعس

ميمون:(دار يدو ورا راسها كيلعب فشعرها وعينيه فيها كيف كتهضر)قتلاتك ليا كرواصة المصيبة

نزهة:هلكاتني..

ميمون:(جرها حط ليها راسها فوق كتفو)غايفوتك الحال..الى بغيتي تزيدي شي ليلة خرا هنا حتا تبراي نزيدوها

نزهة:لالا حسن نمشي لدارنا(شد ليها فيديها وتاهيا زيرات عليه لي لقى علامن يتفشش لاش يتكبر)

ميمون:(دوز يدو لوخرا ظهرها حتا قاست جنبها وضربها ضو)شحال تالفشوش هههه واش هاكا مفششة ولا باغيا تجيبي عليا هبالك. .

هزات راسها بشوي حاسة بيديه وحدة مستاقرة فجنبها ويد خرا فيديها وقالت بدلع:اوا شنو مريضة ومانتفشش؟؟

ميمون:(تبسم وعينيها تكمشو غادين جايين من عينيها للخالة لي فوجها لفمها)تفشيي علي الالة...ونفششك حتا تبراي

نزهة:(رمشات عينيها ببطء)سعداتي هههه. .

مد يدو لي فيدها قاس بيها ذقنها وعينيه تمركزو فشفايفها..كيعجبوه بشكلهم المغري خاصة دابا مافيهم لا عكر لا والو..طبيعين مافيهم حتا حاجة تحبسو عليهم..طبيعية وياله كي فايقا باقي وجهها مبعص بالنعاس..وحتى هي ماشي من العاجزين عطاتو نظرة بريئة منها وعينيها مفارقوش عينيه فقط خايفة تشوف ففمو وتصدق زاعمة هي تبوسو..من أول ماشد ذقتها عرفاتو غيبوسها ومكانتش غترفض حيت عارفا راسها باغية...هي أنثى فالأخير وواحد بحال ميمون كيحرك ضروري فيك شي حاجة ..شافتو بدا كيلغي المسافة بيناتهم وراسو كيميل ببطء للجنب استعدادا باش يبوسها..بدون شعور حطات يديها على صدرو ويدو هو وحدة فالذقن ولوخرا كتقربها من جنبها...مع كيقرب مع المسافة كتلغى والهواء كيقلال ولاو بجوج مشاركين نفس كمية الهواء..أرنبة انفهم تلاصقات وشفايفهم واخدين وضعية الشفاه لمحلولة بشوي مستاعدة تاخد قبلة...هو راه شاعل على سبة وهي متعطشة لقبلتو ترضي بيها أنوثتها ..حس بيدها على صدرو وهو يزعم وحط شفايفو على ديالها ببطء مصيفت ليها إحساس القشعريرة ضرب فجميع أنحاء جسدها...آخر بوسة خداوها شفايفها كانت منذ سنين من أيام المراهقة العشرينية ..أما هو سيد الرجولة ..

قبلتو كانت خفيفة فلول شفايفو كانو كيبوسو شنينفاتها قبل سطحية قبل مايشوفها غمضات عينيها بشوي مستمعة بدوك اللذعات لي كيعطيها..وبدون مايتردد تعمق فالبوسة وقرب ليها كثر ويديه كتجر فيها يخشيها فيه..كيتبادلو القبل باحترافية من طرفو أما هي مسايراه كتحس بيديه كيجروها محتاضننيها شعل فيها العافية ديال الرغبة من جهتو...

حلات فمها ليه بشوي وبسرعة ستوطنو بلسانو كأنها عطاتو الإذن باش يدفعها شوي وتاهيا كي الزبدة دغيا رجعات بلور ولى هو مليوح عليها أما يديها راه طلعو لجيهة وجهو قايسين لحيتو بحالا كطلبو بالمزيد وتاهو ممعطلهاش حاس بيها أنها باغيا كثر..وبقا كيبوس فيها بلهفة وصوت القبلة مسموع حتا ولات مايلة وجسمو فوق جسدها العلوي ..

دامت القبلة لدقائق كثيرة جربو فيها البوسة على الريق والاحتكاك وكذلك النشوة ..بوسة لغات بزاف تالحواجز من جديد بيناتهم..شافها تخنقات شوي وهو يقطع البوسة وبقاو شفايفو قراب لشفايفها ممبعدش وعينيها فوجهها هي لي كانت مغمضة عينيها فور ماحسات بيه توقف حلاتهم بشوي وعطاها قبلة خفيفة ..وعات على راسها وجاتها الحشمة خاصة انه لايح جسمو عليها واخا محافضين على وضعية الجلوس لكن مايلين

مصات شفايفها بعفوية وعينيها منزلاهم للتحت حشمانة منو هو لي قبل جنب فمها وقال كلمة وحدة:فنة ...فنة

نزهة:(تزنكات)حمم ميمون

ميمون:(لونو حمر ومع هو سمر ولا بحال شي فاخرة زاندة)فنة(باسها من جديد ففمها)ماسخيتش

نزهة:(شافت فيه ووجاهم قراب لبعض)خصني نمشي

ميمون:(بعد كيمسح وجهو)حمممم (مد يدو كيمسح ليها فمها قبل راسها )فنة مع رااسك

نزهة:(ضحكات وغطات وجهها)سير بعد مني حشووومة عليك

جرها مذرعها دارها فحضنو مخبيها باش تحشم على راحتها وقال:يخلي ليا الزين لي كيحشم ورطب وكيزلق. .

ناضت من حداه حشمانة ومحمقاها البوسة حسات بيها رضات واحد النسبة من أنوثتها وشهوتها..فحين هو مد ليها صباطها وقال:لبسي وياله نديك. .

حركات راسها بالإيجاب وتحنات لبساتو مزنكة أما هو راه فوق فكيك..يبوس ويشلقم على الريق راه قمة السعادة ليه..حس ببوستها حلوة وعجباتو ومسخاش..هزات ساكها وتمشات سابقاه بهدوء وتاهو تابعها بخطاوي قراب ..وبدون قصد نزل عينيه لتريكوها القطني طالع شوية على ترمتها بالجلاس والتعنفيجة لي تعنفجات ..مد يدو نزلو ودرعها من كتافها مقربها ليه وقال:الله ياخد فيك الحق أختي لا باغا طيحي هاد الخير كولو هههه

نزهة:(عرفاتو علاش هضر)الله يمسخك ههههه السبور زوين كيخليك تبقا باقي صغير

ميمون:(حل لباب كيضحك)ههههههه زعما نتي دابا كبيرة؟؟

نزهو:وشنو مكبيراش؟؟راني 34 سنة

ميمون:باقي صغيرة ...ياله ݣلتي بسم الله

نزهة:(تبسمات ليه )بصح كانجيك صغيرة؟؟

ميمون:وشنو ماشي صغيرة ...المرا فالثلاثين كتكون فتية ورطبة

نزهة:(عجبها راسها حيت ديما كتسمع كبرتي كبرتي)ههه اوا الله يخليني ديما فعينيك صغيرة. .

شد يديها شابكهم مع بعضهم وباسهم من الفوق وقال:زيدي البرهوشة

ضحكات ليه عاجبها الحال محمقها حيت مصغرها بحكم ديما كاتسمع كبيرة . . كبرتي..يديه لي شادا فيديها محسسها بالأمان والراحة رغم الألم لي باقي كيشد فكرشها..

خرجو ضرب فيهم البرد تا نعش ملامح وجههم..حسات بيديه ضارو عليها كثر مقربها ليه كأنه خايف عليها من البرد وتاهيا مامنعاتش أنها تخشا فيه..تا نيفها البارد قاس صدرو ..نطق بهدوء:زيدي غيمرضك البرد

حل ليها الطونوبيل طلعات ورجع لبلاصتو وقال:السم هذا ماشي البرد

نزهة:(كتحاول تسخن يديها)ففف بارد الحال..ديني للدار

ميمون:(شاف فيها بقلة حيلة)غانهضر ومتفهميش هضرتي غلط..معامن غتجلسي فداركم؟

نزهة:بوحدي

ميمون:وشكون غيقابلك؟؟ساعفيني وياله معايا للدار أقسم بالله ماعندك مناش تخافي..غي باش تلقاي لي يقابلك غي تبراي وسيري

نزهة:(مبسمة)نتا لبقيتي حلو هاكا غنولي نبغيك هههه

ميمون:ههههه بغيني أختي...ياله معايا والى بغيتي نخوي ليك الدار نجيب ليك مرا تقابلك وأنا نجلس فداري لخرا

لمسات الصدق فكلامو ومدات يديها ليديه لي محطوطة على لفولون وقالت بهدوء:عارفة نيتك زوينة غي حسن نمشي للدار يجي خويا ميلقانيش

ميمون:نصيفط ليك مرا تجلس معاك؟؟

نزهة:لا مكاين لاش..(كتفكر)ندوز عند ختي نݣلس معاها واقلة

ميمون:وختك عايشة بوحدها!!غتكون مزوجة وبولادها

نزهة:لالا عزيزي الله يعمر ليه الدار ضريف وأنا عندو عزيزة

ميمون:واخا الالة(باستسلام )انا درت لي عليا ونتي تعرفي ..فين ساكنة ختك؟؟

نزهة:لهلا يخطيك عليا ياربي..ساكنة ف****

ميمون:واخا..ندوزو لشي فارماصيان ناخدو ليك الدوا ونديك

نزهة:حم وااخا

صاݣ بيها لأقرب فارماصيان خدا دوا ليها وجلس شحال كتشرح ليه السيدة وكتكتب وتيحاول يستعقل عاد رجع عندها شرح ليها وداها وصلها عند ختها بعيد واقف بطونوبيلتو..كتجمع فقشها وهو كيشوف فيها ما ساخيش مع سالات تبسم وقال:مسخيتش الزين أش ندير

نزهة:هههههه نصيفط للزين شي تصويرة ديالي تشوف فيها تال الصباح

ميمون:دخلي للدار رتاحي وصيفطي ليا نشوف ههه

نزهة:دارها بصح ههههه واخا..ياله بسلامة

جرها باسها فحكنها وقال:تهلاي فراسك(كيسد ليها المونطو عليها من البرد)لا خصاتك شي حاجة صوني ليا

نزهة:واخا هه

نزلات مخلياه متبع ليها العين حتى دخلات لدار ختها عاد تحرك فحين هي سلمات ودخلات كتعاود لختها المنزلة كاملة من غير لقائها مع ميمون..تخلعات سعيدة وعاتباتها تاعيات فلخر داتها ترتاح ..عطاتها تفطر شربات دواها وتكات كتسنط لدماغها

****

فالعشية بعدما شبع ضوران على محلاتو كاملين من هادي لديك عاد دخل لدارو يرتاح وتصدم ملي لقى مو وختو فدارو لي جات معاه ليها نزهة ماشي لوخرا..لقى السلام وجلس عيان

الزاهية:عيتي اوليدي؟؟

ميمون:بزااف ..غنمشي للحمام

الزاهية:حمم فيك الجوع أوليدي؟ (بتوتر)

ميمون:(شاف فيها وتبسم)ههه مّي طلقيها أش عندك

الزاهية:(لاحتها فوجهو)شكون ديك نزهة أوليدي؟؟

ميمون:(ضحك )هههههه واحد السيدة كليانة ديالي مرضات ومشيت شفتها

الزاهية:اااه...ويلي وأنا حسابني درتي الصاحبة المسخوط(ضرباتو لذراعو)هههه

فتيحة:(جايا وسمعاتها)راه مبقيتيش كتحشمي أمي ههههه

ميمون:غا مني أنا كاعلا تحشم..لا أمي مكاين والو

الزاهية:أنا راه ݣلتها ليهم ݣلت ليهم وليدي ميديرش الحرام ولدي دغري

ميمون:(شداتو الضحكة فخاطرو فاش كيتفكر شنو داير)داك ربيع غنتفاهم معاه على التعاويد لي كيتعاود مع مراتو عليا

فتيحة:ماخلات ماݣالت ديك الموصيبة..

الزاهية:سكتيي عليا...متدويش معاه اوليدي ماتقرب ليه يݣول لي بغا

ميمون:يكون خير...أنا غنمشي للحمام

الزاهية:سير أوليدي بصحتك وراحتك تعوم فالجنة إن شاء الله. . الله يرضي عليك. .

مشا لبيتو كيردد غي آمين آمين وفتيحة تتشوف فيها حالا فيها فمها وقالت:ياختي عطينا غي شوية من دوك الدعاوي

الزاهية:على فعايلك الزينين..

فتيحة:واخا أمولات الفعايل الزينين ههههه إمتا نمشيو فحالنا؟؟

الزاهية:غدا إن شاء الله نمشيو..توحشت محالي وداري و ولادي

أما ميمون جمع حوايجو وزاد للحمام فطونوبيلتو وتيلي كيصوني بنمرتها تا بحرا مجاوبات

ميمون:الحاجة فين غارقة؟؟

نزهة:(بصوت ناعس)حمم ميمون

ميمون:كاين شي حد اخر الالة تلبنات؟

نزهة:(كتفوه) شوف نتا ههه

مبمون:لا مديالكش ههه نلقى شي حد ورايا نهارك ميحضروش فيه الطلبة

نزهة:معيط ليا تهدد فيا ههه هادي هي كي بقيتي أحبيبة؟؟ياكما عيانة احبيبة

ميمون:(كيطنز)كي بقيتي أحبيبة ديالي..؟؟

نزهة:الله يمسخك هههه ݣول غي كلمة معسلة

ميمون:كنعرف غي الفعايل المعسلة الهضرة ماعنديش معاها ههههههه كي بقيتي أ شحيمة

نزهة:ههههههههههه شويا..نعست بزااف شكون ينعس ليا فالليل

ميمون:لاش تنعسي دوزي تقصري معايا هههههه

نزهة:الله يستر حاضي غي القصاير والشياخ الله يعفو عليك

ميمون:(ضحك وهو كيبلاصي حيت الحمام كان على بعد ثلاثة شوارع) لا لا إلا الشيخات لالا

نزهة:(عوجات فمها)الله يعميها ليك

ميمون:تغيري من الشيخات يقطع جدهم من الجذر ههههههه

نزهة:مالك حلو ههههه

ميمون:هادشي لي عطا فيا الله...ياك غي نتي مزيانة؟

نزهة:الحمد لله واخا ضاراني شويا معدتي

ميمون:راه هلكتيها..كليتي شي حاجة؟؟ولا نجيب ليك تاكلي

نزهة:(تبسمات وختها داخلة لعندها)لا لهلا يخطيك اكبيدة كليت

ميمون:(تبسم تاطراسات ليه الثقبة فحنكو)كبيدة!!!احححح تاني فشلتيني شكون غيقدر يحك دابا ههههه

نزهة:(طلقات ضحكة)ههههههههههههههههههه غادي للحمام؟؟

ميمون:واقف ݣدامو..وا دابا شكون غيغسل ليا ههههه

نزهة:شد كسال ههههه حسدتك فالحمام

ميمون:كتعرفي حمام*****

نزهة:لالا مكنعرفوش ..

ميمون:نجي نديك ودوزي دخلي تغسلي

نزهة:هههه لا أكبيدة غي بصحتك أنا عيانة شويا..بالصحة والراحة

ميمون:نخرج وندوز عليك نشوفك؟؟

نزهة:حممم اليوم؟

ميمون:اه..نكمل وندوز عليك نشوفك ونمشي

نزهة:حممم واخا ياله سير غسل مع راسك بصحتك

ميمون:واخا بسلامة(كيعيبها)أكبيدة

نزهة:هههههه الله يمسخك

قطعات معاه وشافت فختها مبسمة ولوخرا دايرا ديك الشوفة تاع أحيانا عليك..ضحكات على ملامح وجهها وقالت معيباها:كبيييدة

نزهة:(رمشات بعينيها بزربة)ايييه كبيدة

سعيدة:هههههههههه هادشي غي معاجبكش؟؟

نزهة:باش عرفتيني كنهضر مع ميمون؟؟

سعيدة:كتعرفي شي واحد اخر هههههه ݣري ليا كيفاش كبيدة

نزهة:حممم وا ياختي داك سيد حلاوة ضريييييف(جبداتها)ملي عرفني مريضة وهو كيعيط علي ويسول فيا مسكين

سعيدة:ههههههه مبقاش خضر

نزهة:والخضورية خضر ههههه ولكن اختي الراجل ضريف مسكين الله يعمر ليه الدار وتيعاملني زوين

سعيدة:وشدي فيه مالك..ملي مرتاحة غي سوليه اختي هو لول واش م سل م هههههه

نزهة:(ضحكات)ههههه سكتي متفكرنيش أختي بحرا منسيت و وليت نضحك

سعيدة:فيها خير

نزهة:مسلم كيصلي ههههه وكيذكر الله

سعيدة:اوا بلي فيه الخير

نزهة:غيجي يشوفني ..ياكما عزيزي فالدار؟؟

سعيدة:لا..معروض مع شي رجال صحابو لشي سبوع..غي ميهزكش من هنا بعدي أختي ليشوفك شي واحد من دراري

نزهة:انبعد شويا..(ضحكات)تي وليت كي المراهقات..إيناس ومحال واش كدير هاكا

سعيدة:هههههه إيناس الى بغات غي طلع النفس كتوقف عليها مليكة

نزهة:ولهيلا ههههه

ميمون راه قطع معاها ونزل للحمام تحمحم مع راسو دوز فيه ربعين دقيقة دغيا خرج..لبس عليه سورفيت فالرمادي مع بانطوفة كيف ديما وتقيشرات وداير طاݣية مقطنة فوق راسو ولايح عليه تجاكيط..كي طلع فطونوبيلتو هز قرعة تالما كان حاطها تما نزل عليها وتحرك فجيهة دار ختها هي...

أما نزهة راه بشوية عليها حتى لبسات من جديد حوايجها باش جات..سرحات شعرها وجالسة مخشية فمانطة مجمعة مع ختها حتى رن هاتفها وهي تبسم وجاوبات :الو

ميمون:خرجي الزين

نزهة:بعد شويا مبغيتش يشوفوني ولاد ختي

ميمون:انا غنسبقك للدورة واخا

نزهة:واخا

وبالفعل زاد بسيارتو للقدام مفاوت على دار ختها وهي راه مشات فيه قال ليها مدفية راسها بيديها كتبان كي القطة..واخا وجهها مسقوط منو الدم حيت المعدة تهلكات ليها..

شافت طوموبيلتو من بعيد ومشات ديركت ركبات وسدات الباب مبسمة:بالصحة والراحة

ميمون:(مد ليها يديه سلمات)الله يعطيك الصحة الزين..(طلع يدو الدافية بلور ديالها قاس حنوكها مداعبهم)شويا دابا؟؟

نزهة:شويا(مبسمة حشمانة من يديه لي كتقيس حنكها)

ميمون:شبعتي نعاس مع راسك؟؟

نزهة:تحرك أ ميمون من هنا عفاك

ميمون:(ديمارا)واخا...تمشي تعشاي؟؟

نزهة:لالا شبعانة وخاطري مبغاش ليا الماكلة

ميمون:خصك تاكلي الالة تالبنات راه معدتك كلات العصا

نزهة:علاش كتݣوليا لالة تالبنات؟؟

ميموت:هههه شنو نݣوليك؟؟

نزهة:ههههه معرفتش..

ميمون:لالة البنات حيت زوينة وقارية وحادݣة جمعتيهم كاملين

نزهة:غنولي نحس براسي ههههه

ميمون:(وقف)تسناي نجيب قهوة سخونة..تشربي شي حاجة؟؟(كيهز فلوس )

نزهة:لا

نزل وتبعاتو بعينيها غادي معنݣر جار رجليه فديك البانطوفة لي غيشافتها فلتات ليها ضحيكة وعينيها كيبريو عكس الضحيكات لي كانت تضحك قبل وقالت بهمس:بو بانطوفة ههههه

تسناتو حتى تم راجع هاز قهوة أومبورطي ..كي.طلع ساط تا خرج الدخان بيض من فمو: البرد خايب هاد العام

نزهة:نتا من الحمام لعندي ...كون مشيتي تخشا فشي مانطة وشرب شي كاس ديال أتاي ومتلعقش البرد

ميمون:(زاد كيضحك)ههههههه وادير الخير وجي أولد الهم من الحمام زربان حتا الحكان محكيتي بخاطرك حيت

غتشوفها وفلخر تصدرك وتݣوليك سير تشرب أتاي هههههههههه نشرب معاك الشراب ومتسرطش ليا ههههه

نزهة:(طلقات ضحكة)ههههههههههههههههههههه الله يسمح ليك أنا غي مابغيتكش تمرض

ميمون:بنت الحرام أنا كنطير باغي نشوفها وهي كتفكر ليا فالمانطة...المانطة غتفرنس ليا ولا غتجي عندي هاكا زوينة

نزهة:(حشمها)هههههههههه اوا ݣول أنا عزيزة عندك

شد يديها باسها من القاع وقال:والله حتى عزيزة عندي واخا نكرتك ݣبيل!!

نزهة:كيفاش

ميمون:داك خونا عندمن خدامة ناض كيهضر عليا مع مراتو ..مشات مراتو عاودات لمي بلي كنجي نهزك من الخدمة وݣالتها ليها

نزهة:هههههههخخ واشنو ݣالت؟؟

ميمون:(كيشرب قهوتو وكيشوف فيها)سولاتني أش بينك وبين نزهة ههههههه

نزهة:(صدمها)اويلي عرفات سميتي

ميمون:راه ولد الق (توقف )ولد دين الكلب عاود ليها كلشي..ساعة نكرت ݣلت ليها كليانة ديالي مرضات وعزات علي(كيطنز)ومع مسكينة عزيزة عليا(منيم عينيه فيها)مشيت كنجري عندها نخافها تموت ليا ومنلقا شكون يتقدا من عندي

نزهة:ههههههههههههههه(مسايراه)مسكييين بقيتي فيا هههههههههه الى مت شكون يجي يتقدا من عندك يالكذاب ههههههههه كاذب على مك

ميمون:هههههههههه باغياني نݣوليها مي راني درت الصاحبة (شداتو الضحكة)غيطلع ليها السكر وتسخط علي ههههههههههه عارفاني دغري

نزهة:(ضحكها)هههههههه كون تجي عندي نݣوليها الدغري اش كيدير؟؟ها الشيشة ها الشياخ ها القصاير بقا ليك غي الحبس

ميمون:والله حتى دوزتو ههههههههههه

ضربات فخاضها كضحك وقالت:أويلي على السكايري ههههههههههخ ناري معامن طحت....

ميمون:(كيضحك تا ولى مزنك)ههههههههههه كون تعرف مي وحدة من هادو ماغتبقاش ترضى عليا

نزهة:مسكينة غشييمة فيك هههههههه ولكن(بتهديد والضحكة باقي فوجها)تعاود تحط رجليك عند شي شيخة غا ضرب عليا

ميمون:(جمع الضحكة)تشطحي ليا نتي؟؟

نزهة:أنا خليني غي نشطحك على قرون صباعك أما سطاج الشطيح باقي بعيد

ميمون:الله يعفو عليا وصافي...كنبغي النشاط

نزهة:كلنا كنبغيووه هههه

ميمون:تال شي نهار ونقصر أنا وياك ههههههه نشوفو جهدك فالنشاط

نزهة:واخا غي تسنا ههههههه

ميمون:(كيشرب قهوتو)والله حتى ضحكتيني ههههههههه شحال من واحد غالط فيا

نزهة:وا منكذبوش كتبان ليا درويش

ميمون:مالي ماشي درويش راني درويش ولكن أختي الزهو راه فالدم

نزهة:زهى مع راسك غا زهى ههههخخه ديني لدار غيجي عزيزي ميلقانيش

ميمون:(مد ليها الكاس)شدي...إمتا تمشي لداركم؟؟

نزهة:غدا ولا بعدو نرتاح بعدا شويا هاد سيمانة ونضور براسي شويا

ميمون:(سايق)غتحلقي ليا على الحالة الالة نزهة؟؟ناوية تصفيها ليا!

نزهة:هههههههههه أنا ديما محلقة على الحالة لايغركش دابا غي المرض

ميمون:(شاف فيها)زوينة الزين حتى دابا زوينة..حاسديني فيك الناس أنا عارف هههههههه

نزهة:طناااز ههههههههه حطني بعيد

ميمون:عارف...جاوبي فتيليفونك وعطي الراحة لراسك...غدا نجي نديك لداركم

نزهة:(زعمات وحطات يديها على ذراعو)لهلا يخطيك عليا غنݣول لعزيزي يديني لدارنا نتا غي شوف شغالك

ميمون:كترتي عليا من هاد عزيزك هههههههه

نزهة:حيت عزيز عليا مسكين مكيخصرش ليا راه كبير فالعمر

ميمون:شحال عندو؟؟

نزهة:شي ستين هاكاك

ميمون:واش ختك كبيرة؟؟

نزهة:واييه...راه خوتي كاملين كبار مصغارش

ميمون:(ممازح)يعني نتي الصغيورة ديالهم هههههه وخرات مك الحلاوة

نزهة:ههههههه باقي مجربتيش مراري

ميمون:(دوز لسانو على شفايفو بدون ماترد البال متذكر البوسة تالصباح)على ديك الحلاوة لي ذقت الصباح غا أري ماعندك قابل عليه

نزهة:(حشمات وبقات كتشوف فاص وساكتة)حممم

ميمون:سكتي؟؟(شاف فيها وعاود شاف فالطريق)دلمها عارفا راسها حلوة ههههههه

ضحكها دغيا وبقاات كتكركر مجاوباتوش تا وقفها من نفس البلاصة فاش هزها وقال:ياله دوخي فحالك...شربي دواك وكولي وشربي حتا يبانو والديك ونعسي عطي الراحة لراسك

تبسمات ليه بعذوبة على اهتمامو وقالت:واخا..تهلا فراسك وبصحتك عاود

ميمون:(شد يديها باسها)يخليك ليا المصوابة ديالي..سيري

نزلات منملة عليها يديها بالبوسة وبالعسل لي خدات وجرعة النشاط والضحك لي زودها بيها..خشات يديها فجيوبها ومشات بمشيتها الأنثوية للدار وعينيها فالأرض وراسها مخشي بين كتافها حشمانة وداخل معاها الغزل والكلام الزوين مغير مودها. .

فحين هو قلع لدارو ناشط بحالها ومرتاح وعاجبو الحال. .

•••••

تغدو الحياة بك جنة

وانا لجنتك أعمل

•••••

دازت يوماين طبيعية جدا عند كلا الطرفين ..نزهة راها فدارها بوحدها كتاكل وتشرب مكتخرجش وفيدها التيليفون ديما هي وميمون فالواتساب بأوديو وليزابيل ..منشطها حيت فيه الضحك والتكركير و هو راه بين أشغالو ونزهة..هاد الأخيرة لي دخلات حياتو مفرحاه حيت مرتاح ليها. .

ميمون من النوع لي علاقاتو نادرة مرة فخمس سنين أو سبع سنين أغلب علاقاتو كانو علاقات تعارف ..شي صاحبو مشا مقصر معاه وجايب صاحبتو وهي جايبة صاحبتها..أو شي واحد فولاد خالو كيعرفو على بنات مرة يكمل مرة يمل..كيلقا فيها الفريع ولا النكير ويقلب الستة تسعود وكأي رجل لا بغا الجانب الجنسي راه عطاهم الله هذا ماكان..و معروف عليه المعقول فالعائلة لي عرفو كيقول راجل مزيان وداخل سوق راسو ميديرش وهو دوزهم كاملين. .

اليوم كيف ديما ..جالس فمحلو ديال المواد الغدائية مع الصباح وعينيه على تيليفونو بالكاميرا لي دار كيشوف التسجيلات ديال البارح و فعلا لقى هضرة نزهة صحيحة ..عيط لواحد من الدراري مطمر وتم جاي. .

ميمون:جيب ليا البون ديال الدݣيݣ

عبد الهادي:راه أخويا فالمجر حداك

جبدو وشدو كيشوف فيه قشع 60 خنشة من فئة خمسة كيلو وقال:شحال دخل؟؟

عبد الهادي:دوزت ستين أخويا

ميمون:وشحال بعتي؟؟

عيد الهادي:خمسين أخويا

ميمون:فين عشرة؟؟

عيد الهادي:هاا راهم أخويا فسطوك

ميمون:(وقف)زيد نشوفهم. .

عبد الهادي تصدم ماموالفش كيقوليه وريني كيسولو وكيزيد عمرو قاليه نشووف ..حنى راسو ووجهو تزنݣ..دخلو للسطوك فين مسطوكية السلعة وقال:ياله فينهم؟؟

عبد الهادي:(داير راسو كيقلب حيت دقيق كثير بأنواع وأشكال الماركات)بلاتي أخويا. .

ميمون:(ربع يديه)هاحنا صابرين

بقا واقف عليه وهو كيضور على دوك الخناشي وتقول النوع لي بغا واش كاين وهو عينيه مخنزرين فيه حيت حصلو

ميمون:الخناشي مكيولدووش أخويا لا؟؟(شير ليه بيديه ليسرية)زيد هنا. .

جا قدامو مسقطر من الدم ومحاشم مع راسو وقال ميمون بجدية وحجبانو معقودين ونطق بصوتو الغليض:درتك خويا وجبتك وحطيت فيديك كلشي ..وعطيتك خلصة مزيانة باش تعاون مع مك وباك ونتا شنو درتي؟؟

عبد الهادي :الصمت

ميمون:علاش ؟؟خصوك فلوس وما عطيتكش؟؟

عبد الهادي:(باسف)الشيطان أخويا. .

ميمون:(بإنفعال)الشيطان مدار ليك والو..غي لي شفار يݣول الشيطان(خشا يديه فجيبو وجبد فلوس)شد ها رزقك ..متبقاش تجي وعلى وجه مك وباك ماغنعيطش لبوليس

عبد الهادي:(بترجي)عفاك أخويا ميمون ..سمح ليا غي هاد المرة راك عارف الصغر وبنادم معندوش ..

ميمون:(محافظ على صرامتو)كون جيتي عندي وݣلتي ليا خويا خصوني فلوس نعطيك ولكن نتا..أش درتي؟؟هزيتي من رزقي. . شد فلوسك والله يعاونك وجر معاك صاحبك

عبد الهادي:(شدهم حاني راسو). .

خرج ميمون و حتى هو نادم وكاره راسو حيت يعيا ينكر راه كان كيعاملو زوين كيعطيه نهار تراحة وديما تضاور وخلصتهم مزيانة وفالأعياد كيعطيهم المونة لكن لي شفار شفار معندو مايدير. .

جلس بلاصتو كيفكر شكون ممكن يجيب دوز الغرق تناس وتشفر حتى طاب..تهزات ليه السلعة حتى عيا وحشم ولا بنادم بغا حشم وهو فغمار تفكيرو صونا تيليفونو الصغير..شد الخط وقال:الو

...:موسيو ميمون معاك جلال

ميمون:ااه سي جلال كي داير صحيحة بخير؟؟

....:حمد لله ونتا بخير..عيطت ليك على قبل المشروع ديال المصبنة

ميمون:جبتي شنو ݣلت ليك؟؟

..:وي كلشي هو هذاك الى عندك شي وقينة نتلاقاو

ميمون:نتلاقاو مرحبا ...فين؟؟

...:قهوة*****

ميمون:واخا أنا جاي

قطع عليه وقال:قوة القرايا كتخلي بنادم يدوي بهضرة ليهود

سد المحل حيت جرا على الدراري بجوج مكاينش لي يجلس ليه شافو واحد من الناس لي حداه وقال:ولد المصري ياك لباس؟؟مالك كتسد؟؟

ميمون:مكاين لي يݣلس..اجي مكتعرفش شي حد معقول باغي يخدم

...:نشوف ليك شي دري

ميمون:شوف ليا شي جوج ولا ثلاثة يكونو ثقة...ݣاع لي جبت انا مصدقوش

...:هههههه واصعيب تلقى لي يثيق والله...جيب شي واحد فخوتك وتهنى ..

ميمون:كلشي خدام..نعول عليك شوف ليا

...:العشية نعيط ليك

سلم عليه وزاد راكب فطونوبيلتو والمطارق فراسو ..سايق بسيارتو العملية فشوارع الدار البيضاء العامرة ولي مكيسوق فيها غي المحترف فقط..وقف فسطوب وصباع يديه كيلعبو على لفولون ..للحظة قلب عينيه لليمين وعاود رجعها وبسرعة عاود قلبها ملي حقق فشنو شاف..كانت نزهة بشحمها ولحمها واقفة مع شاب وسيم لابس توني وسروال دجين وناض لاخر معنقهاا وتاهيا زيرات عليه ..ميمون تضهشر وبقاو عينيه مفيكسيين ..عض على شفايفو بالفقصة فاش شافو باسها فحنكها ..ياله بغا ينزل وهو يتطلق الضو الخضر وبداو الأصوات تاع الكلاكصون كيتسمعو..وزاد وعينيه باقي تما. .

أنفاسو كتصاعد وحجبانو تعقدو..مغيكذبش عينيه نزهة هاديك بشحمها ولحمها و تاهيا عنقات الراجل تعنيقة نييت ..يديه زيرهم على الفولون وهز تيتيلفون كيصوني ليها مرة وجوج وثلاثة ومكتجاوبش تا رعداتو ولاحو فكرسي لي حداه وقال :هاحنا نشوفو بلانك أنزهة ...واثيق نتا فالعيالات. .

كمل سياقتو و أعصابو على القرص خصو غي لي يجبدو...عدوه لي يخورو ولا يلعب موراه كيحقد بقدر ماهو ضريف وحنين و معقول بقدر مكيكره الغدر من الناس القراب..واحد بحالو حل عينيه مو وباه زادو وخلاوه تربات عندو فوبيا من الغدر..مكيديرش بالو مع الناس لكن نيتو كتحصلهم قدامو. .

وصل للقهوة نزل مخنزر ضرب بالباب ودخل ..قشع السيد ومشا جيهتو ونيوفو مفرشين بالغضب وتحت عينيه كحل بالتعب تهضر معاه يشعل..لقى السلام وجلس ماتسناه لا يجاوبو ولا هضر معاه. .

..:ياك لباس أموسيو ميمون؟؟

ميمون:(كيزعزع رجليه بغضب)مكاين والو..دخل فالهضرة

جلال:حمم داكوغ ..بون

قاطعو بعصبية ويديه مشابكهم:حيد علي هاد الفرونسي الغاملة راه كتمرضني ..هضر مݣاد أصاحبي. .

جلال:(بابتسامة)أش عصبك أصاحبي؟؟

زفر ميمون بعصبية وعينيه كيضورو على البلاصة وقال: مكاين غي لي يعصبك...(تنهد) سمح ليا..كمل كمل

...:واخا..بون فعلا درت دراسة على أرض الواقع ولقيت بلي دوك الحسابات لي درت فبالي ماشي هاكاك...مشيت قلبت وبحثت وسولت وها الحساب(مد ليه ملف)

ميمون:(شدو وهو يصوني تيليفونو شاف المتصل كان اسم نزهة مكتوب بعربية ومحلش الضوسي)شوف ها الملف عندي اليوما يشوفو ليا ولد خالي ونرد عليك

جلال:واخا ماشي مشكل..نتسنا الرد فأقرب وقت

ميمون:(عينيه على التيليفون لي سكت)إ شاء الله..سمح ليا عندي مانقضي دابا فالليل نرد عليك

جلال:إن شاء الله

وقف مسلم عليه وتم خارج مخنزر كثر ملي داخل وتيليفون فيدو كيدوز نمرتها مجاش فين يوصل حدا الطونوبيل تا كانت ردات بصوتها لي كيفشلو :الوو

ميمون:فين كاينة؟؟

نزهة:مالك؟؟

ميمون:(بصوت مرتافع)فين كاينة؟؟

نزهة:(ستغربات)مالك ياك لباس كتغوت؟؟

ميمون:(عض على شفايفو مصبر راسو)هضري أشمن قرينة كحلة كاينة؟؟

نزهة:(ساطت)ماشي شغلك..ياك لباس مالك كتغوت؟؟

ميمون:نزهة ماتعصبينيش كثر من هاكا..سولتك فين كاينة بغيت نشوفك

نزهة:(عوجات فمها)فمرجان*****

ميمون:(هز حاجبو)خليك تما هاني جاي

نزهة:( تنهداات )متجيش ..سير حتى تبرد وتفركع فشي قنت

ميمون:الى ملقيتكش تما(كيحل باب الطونوبيل)ديك ساعة نتفاهمو. .

قطع عليها وزاد فاتجاه العنوان لي عطاتو مغدد وعلى النقشة غي كيتفكر معامن كانت كيبغي يموت بالفقصة ...اخر ما يتوقع هو تخورو. .

مسافة الطريق كان قدام مرجان لقاها بنفس اللبسة لي شافها قبيل هازا ساشيات كي شافتو توجهات لعندو عاقدة السبعة فالربعة كثر منو..حلات لباب لور لاحت دوك ساشيات وطلعات حداه عاقدة حجبانها باستفسار وهي تنطق:مالك كتغوت ݣبيل؟؟

ميمون:(شاف فيها مخنزر )عاد غنعرفو لاش كنغوت...ديري السمطة نمشيو نهضرو

نزهة:لا أخويا الى كنتي غتبقا منفخ هاكا وكتغوت غي مع جنابك غا خليني نمشي فحالي

ميمون:واخا الالة نوصلو لشي بلاصة(تحرك)ونهضرو

نزهة:فاش غنهضرو؟؟أش واقع حتى كتغوت عليا

ميمون:زميه دابا حتا نوصلوو

نزهة:راه معندكش الحق تهضر معايا هاكا..هبطني الله يرحم باك فحالي

ميمون:الصمت

بسكوتو خلاها تشوف قدامها مربعة يديها مغددة هازا حاجبها للسما مافاهماش أش قلبو أما هو ماكرهش يطير لشي بلاصة دغيا باش يفهم منها..بعد مدة خرج بشوية على كازا موقف تال حدا واحد الخلا والشانطي كيدوزو منها الناس قلال كتشوف ديور بعاد ومع البرد قليل لي خارج. .

ميمون:(حيد السمطة)نزلي

نزهة:فين جايبني!؟(شافتو نزل)معاك كنهضر!!!

نزلات تابعاه كي وقفات قدامو لاح ليها الهضرة فوجهها كي الدفلة مكشكش:شكون داك الز...ا..م..ل لي كتباوسي معاه فالقهوة؟؟

نزهة:(بلوكاها بهضرتو)ها نعام!؟

ميمون:كنهضر بالشينوية..جاوبيني(مقرب عندها قرب ينطحها)شكون داك البرهوش لي كتبوسي فيه الصباح ومدا ليه حنكك كيبوس فيه .

نزهة:(مضهشرة فيه)واش كتهضر من نيتك؟؟

ميمون:من كري كنهضر أختي...شكون داك خونا(هز صبعو فوجهها بتهديد)وياك تكذبي. .

نزهة:(نزلات ليه صبعو)هبط صبعك عليا مالنا منخافوش!!!أش كتخربق؟؟أشمن برهوش ولا بوسان!!

ميمون:(مسح على راسو من لور)شوفي أنزهة راه ماعدى عندي من الكذوب والغدر..هضرنا وزعما تحسبنا بجوج ونتي تنوضي تخوريني

نزهة:وا فهمني أش كاين؟؟أش كتخربق عليا؟؟

ميمون:كتحماقي عليا دابا ياك؟؟(ضرب الكابو تطونوببل)كنتي فقهوة****** هاد الصباح؟؟. .

نزهة مع نطق السمية دارت ليها الطرن فبالها...وتفكرات معامن كانت ..لمحات وجهو الغاضب وتذكرات غواتو عليها ..بداو ملامحها كيترخاو وكيميلو للضحك وعيات تحبس فيها ولكن وجهو ضحكها...وهي تطلقها ليه فوجهو كتكركر وتعاود فحين هو خرج عينيه فيها وغوت عليها:كتضحكي؟؟عاجبك الحال؟

نزهة:هههههههههههههههههه (شدات فتجاكيطو من جيهة صدرو وشافت فيه مبسمة تاتكمشو عينيها)غرتي علي أولد المصري؟؟

ميمون:(عينيه بين يديها ووجها عاقدهم)شهاد الهضرة تزبل..كنهضر على الغدر

نزهة:ههههههه ياختي راه الى بقيتي هاكا غنتزعط فيك نههههههه(زعمات وهزات يديها جرات ليه حنوكو كي الدري الصغير)ياختشي على الزين فاش كيغير وكيتسيف هههههههه. .

حيد ليها يديها معصب وقال:واش كتضحكي عليا أنزهة؟؟

نزهة:واسمعني ههههه كنت فقهوة **** مع البرهوش لي ݣلتي وداك البرهوش راه ولد خويا

ميمون:(محافظ على تخنزيرتو وملامحو راسمة علامة الاستغراب)كيفاش؟؟ولد خوك؟؟داك شحط كولو ولد خوك؟؟كضحكي عليا؟

نزهة:(خمسات ليه فوجهو ضاحكة)خمسة فعينيك كي شفتيه تخليه ههههههههههه اييييه ولد خويا الكبير

ميمون:ماثقتش!!

نزهة:ههههههه بلاش ماتيق واش غنكذب عليك أنا...راه ولد خويا سميتو ياسين مسكين مخاصم مع باه وجرا عليه صونا ليا لقاني خارجة لمرجان نتقدا ومشيت تلاقيتو عطيتو الساروت ديال الدار باش يمشي ينعس(شافتو مزال مكمش فيها عينيه بشك) والله يهديك هععععع والله حتى ولد خويا (جاب ليها الضحك )هههههههه صبر نوريك تصاورنا

جبدات تيليفونها وجبدات ليه تصويرة عائلية فيها ولاد خوتها كاملين جوج شحوطا ولاد محمد وجوج ولاد سعيدة وولاد عبد الجليل وحيت الدراري غي كيوصلو ديك 13 لعام دغيا كيطوالو كلهم كانو طوال ...زومات على ياسين وقالت:هو هذا معامن شفتيني؟؟(شد تيلي شافو وحرك راسو باه وخاطرو بدات كتهدن )

ميمون:حنحن وعلاش مݣلتيهاش ليا؟؟

نزهة:نجي عندك سلام سلام هذا ولد خويا ههههههه

ميمون:مكنهضرش عليه كنهضر علاش على فاش خارجة مݣلتيهاش ليا؟

نزهة:اوا لوااه ههههه مشيت لمرجان نݣولها ليك

ميمون:(ببرود)واش فيها؟؟علميني ونمشيو بجوج ݣاع

نزهة:(ضحكها)ههههههههه حماقيتي أولد المصري ههههههه(ضرباتو لصدرو)واصااافي هههههه أويلي تغير من ولد خويا

ميمون:وباش غنعرف أنا؟؟الدري كبير وطويل وكيبوس فيك ويعنق أش باغياني نفهم

نزهة:مكثيقش فيا؟؟

ميمون:نتي كون شفتيني فنفس البلان غتبقا شي ثقه؟؟مفراسيش واش خوتك والدين داك الݣد

نزهة:قوستي عليه ههههههههه (قربات منو كتمسح على كتافو الندى تاع الجو وعينها فكتفو)غرتي عليا؟؟

ميمون:(حاضيها بهدوء بعدما تهدن)ݣلبتيني فعقلي أنزهة(شد يديها عندو باردة حضنها بيد وحدة وطلعها لفمو قبلها من الداخل قبلة عميقة)سمحي ليا غوتت عليك. .

فرنسات فورا من قبلتو وهضرتو وقالت:خلص الحق ههه

دور يديه على عنقها وجرها عندو خاشيها فصدرو ويد أخرى حضناتها من خصرو وقال:نخلصو الالة غي متقلقيش ليا.

دورات تاهيا يديها على خصرو معنقاه عارفا الخلا والقفار مكيعرفها حد وحاسة حتى أنها بحاجة تعنقو حيت ديما كايبين ليها بلي راحتها أهم حاجة عندو. .

مبخلش عليها حتا هو بجرعة من الحنان ترجم فيها اعتذارو ليها..وعلى قولة الأدباء"لولا الشوق لما كان للعناق معنى"

والعناق كيطفي الشوق وكيشعل شعلة الحنان والراحة ..كيستنشق فشعرها لي جا تحت ذقنو ريحة زوينة عكس البارفان لي راشاه..ريحة معطرة وزكية خلاتو يخشي نيفو تما ..من نهارها كتهلكو بروايحها الانثوية وكيبقا اتذكرها بيهم..يديه راه فخصرها متحركوش وهي راها حاطة راسها عند قلبو مخششة فيه باغيا هاد تعنيقة حيت بصريح العبارة عندها نقص فالحنان الرجولي ههه

باعدها شوي مساخيش ويديه شدوها من حنوكها وقال: متقلقيش مني ..مكنحملش نتغدر ودوزت صباح كي زفت

نزهة:(بابتسامة)ممقلقاش!!مالك شنو عصبك؟؟(مدات يديها قاست موسطاجو لي كيحمقها رامية عليه طريقتها فالغزل)عاود ليا

ميمون:(فرنس عاجباتو زعامتها)جريت على الدري لي خدام معايا شداتو الكاميرا كيشفر

نزهة:مديرش فبالك(حطات يديها على كول تريكوه)دار الذنب يستاهل العقوبة

ميمون:(زفر)منيما شديتيها كتعواج!!

نزهة:متعصبش راسك نتا مدرتي حتا حاجة خايبة هو لي صدق ولد الحرام

ميمون:يكون خير(تبسم)مݣلتيش ليا خارجة لمرجان؟؟خصاتك شي حاجة؟؟

نزهة:مممم خرجت تقديت شي حوايج خصوني ونيت بغيت يضربني شوية ديال البرد

ميمون:وصوني ليا الزين

نزهة:عرفتك غتكون خدام داكشي علاش..كنت عوالة غي مرجان حتى تلاقيت ياسين

سمع سمية ياسين وهو يتفكر فاش باسها فحنكها وجرها لعندو فغفلة باسها فحنكها بوسة خفيفة وقال:ولد الحرام هنا باسك ههههه

نزهة:(بقات قريبة ليه كتشوف فعينيه المنيمين فيها)حسدتيه؟؟

ميمون:(عينيه فيها لاصقين ومنيمين كيدوزو من عينيها لفمها لحنكها للخالة لي فوجهها)بزاااف

قرب بشوية عليه لاغي المسافة بيناتهم كثر ومحني عندها..شدها من ذقنها من جديد مقربها ليه بشوية ودوز شبح شفايفو من حدا شفايفها تا حسات بنفسو كيضرب فيهم وعينيها فعينيه منزلاتهمش باغيا تقراهم ولباس...بشوي عليه حتى عوج راسو معاها ونيفو ونيفها واخدين اتجاهين متعاكسين..وضع لمسة على شكل قبلة على شفايفها المزيناهم بعكر نيود تا جاب ليها هر وتبوريشة..ومنها كانت البادرة انها تعلات بشوي باش تقرب ليه كثر تا طبع قبلة اخرى خفيفة على فمها تلاوها قبلات ثقال نفرقين مباغيش يتعمق حيت الزنقة...هو عاطي بضهرو للشانطي وهي مخبية فيه..وبقبلات حارقة لسعها فجميع أنحاء وجهها من عينيها باسهم ليها حتى برد عاد قال:مباغيش شي حد يعاود يبوسك كيفما غيكون

نزهة:(باقي متأثرة بقبلاتو)واغي ولد خويا

زيرها من خصرها عندو وقال وعينيه فشفايفها بغا ياكلهم:واخا يكون خوك براسو...فنة مباغيش لي يذوقك بحالي

نزهة:(دوزات يديها على لحيتو)نعتابرها غيرة!!؟؟

ميمون:(باسها فحنكها)لي بغيتي ههه. .

وقف بطوموبيلتو بعيد على دارهم ويديه شادة فيديها وقال:سيري دابا للدار ..المرة الجاية أنزهة تكوني خارجة علميني

نزهة:ماتزيدش فيه أميمون واش أنا باقي صغيرة؟؟

ميمون:لا أختي شرفتي لي يسمعك يݣول هادي ماعرفت شحال عندها ههههه تواضعي معايا وبقاي تعلميني الى كنتي خارجة

نزهة:(بجدية)يكون خير..(هزات ساشياتها)

ميمون:أشنو شريتي؟؟

نزهة:(ضحكات)هههههههه لالا نتا راك باغي تدخل ليا مع العظام ..

ميمون:هههههههه ݣلسي لمك..كي دايرا هاد المصاحبة لي مافيهاش هاد تسوالات

نزهة:وأنا كاع ماكنسولك فين كنتي ومنين جيتي وشنو شريتي

ميمون:اوا باش تعرفي راسك مامسوقاش ليا هههههه

نزهة:ماكنبغيش نحكرهههه أنا نسولك فين كاين غي فالليل لا تكون مشيتي عند شي شيخة. .

ميمون:واش أنا با ياله توفى وكاتݣولي ليا الشيخات ههههه نعلي الشيطان

نزهة:(ستاغلات فرصة موت باه)علاش كتبان ليا كضحك أميمون ولكن عينيك مامرتاحينش

ميمون:(جمع الضحكة)اوا راه الوجه فيه ضحكة والݣلب لا..داك لي مات راه با

نزهة:(بحنية داعبات يديه)عز عليك بزاف فاش مات؟؟

ميمون:بزاااف(بحزن)ماشبعتش منو كان معول يمشي للحج وݣاليا نمشيو بجوج

نزهة:(متأثرة تا لمعو عينيها موضوع الأب كيضرها فخاطرها)الله يرحمو ويوسع عليه ياربي

ميمون:آمين ياربي..ماديريش فبالك الرجال دغيا كتنسا

تبسمات وقربات منو بحنان وطبعات قبلة خفيفة على حنكو وقالت:بسلامة

ميمون:تهلاي فراسك

هزات قشها ونزلات وبقا هو متبعها بعينيه حاضي مشيتها و حركتها ولى على القرص من جيهتها ..دخلات لدارهم لقات السقيل ..نادات باسم ياسين جوج مرات مجاوبهاش تا لقاتو فسيجور ناعس على كرشو ومامغطيش..مشات جابت ليه الغطا غطاتو وباست حنوكو ..

بدلات عليها ومشات للكوزينة تتدير الغدا بصمت وتتفكر لحالة ولد خوها لي مافاق تالظهر. .

دخل عليها مبوق للكوزينة لقاها شادة التيليفون وقاال بصوت خشن:صباح نور

نزهة:هههههه الظهر هذاا أمولاي..نعستي مزيان الزين؟؟

تنشر حداها كيتفوه وقال:شحال مانعست هاكا ههههه

نزهة:كتفيق على الموال ديال محمد كل صباح

ياسين:متجبديهش ليا أعمتيي...داك سيد عندكم حجرة

ضرباتو ليديه:هههههه غي معارفوش مزيان وصافي..مالك معاه؟؟

ياسين:الديسك ديال كل نهار..نوض تخدم نوض تدير نوض نوض واش أنا لقيت هاد الخدمة وݣلت لا..هذاا الله راه قلبنا حتاعينا مكاينش.

نزهة:غي الصبر أحبيبي وصافي دابا ربي يفرجها

ياسين:بصراحة أنزهة مبانش ليا فهاد البلاد ..البلاد معطاتنا والو . .

نزهة:وفنظرك لهيه غاتعطيك أياسين!!أش معاودين ليك على اوروبا أولدي

ياسين:كل الخير أختشي..الخدمة موجودة بنادم واكل شارب مصبط مداوي ماشي بحال هنا

نزهة:(بجدية)سمعني ولد خويا وحل معايا وذنيك..والله ومقفلتي لافورتي..راه الى مدمرتيش وخدمتي وحفرتي مايطلع ليك حتا باش تنقي سنانك..حسابك لهيه غيخدموك فالبيرو راه غي تمارة تخدم سرباي يلوحو ليك جوج فرنك

ياسين:أتي سيري أشمن جوج فرانك راه كيتخصلو بالساعة...

نزهة:مالك حمار؟؟راه تما الى تخلصتي حتا 20 اورو للساعة راه مغتقدكش حتا فالمصروف ديالك...ياسين أنا ماشي ضد تمشي لبرا..مغنكرووش ظروف العيش تما زوينين وحسن من هنا ولكن الى غاتمشي سير بشي كونطرا صحيحة مضمونة فيها خدمتك ماشي تمشي هارب وتبات فزناقي باش تسمى مشيتي

ياسين:خليها عالله اختشي..دايرا لينا الطاجين

نزهة:بالقوق وجلبانة عرفتو كيعجبك هههخ(ضرباتو لقرفادتو)نوض غسل وأجي تتغدا

ياسين:خصني نعيط للواليدة

نزهة:غتلقا عقلها غيخرج عليك..صوني ليها أنا نحط للغدا

ناضت كتوجد فيه يتحط فحين هو صونا لمليكة لي دغيا جاوبات كانت على القرص:الووو ياسين ياسين

ياسين:الواليدة لباس؟؟

مليكة:الله أوليدي الله وفين مشيتي ومخليني مشوية عليك

ياسين:انا عند عمتي نزهة فالدار

مليكة:ياوليدي وداركم كبيرة وتمشي لتم..رجع أولدي الله يرضي عليك ماتديش على هضرة باك راك عارفو كيداير

ياسين:مراجعش..غنبقا هنا تانشوف شي حل راسي ولا نمشي نتلاح فشي قنت نموت ونهنيه من صداعي

مليكة:(تخلعات)لا أوليدي لا متݣولش هاكا..خليك تما مع عمتك حتا تبرد ورجع لداركم

تسمع صوت محمد حداها ياله داخل وسمعها أش كتݣول وهو يصيح:ميورينيش وجهو الى ماترجل ولقى خدمة ولا غنتبعك ليييه

ياسين:(سمعو وتعصب حيت مكيتردعش)ݣوليه خليتها ليه يزرع بلاصتي الكيف تفوو(قطع)

مليكة:الو ياسين أولدي(عرفاتو قطع وخاطبات محمد)واش نتا عدوك منك؟؟راه ولدك هذااك لي جاري عليه. .

محمد:(جلس مبرد عكس الغضب لي عندو لداخل)الى بقا فيك جمعي حوايجك وتبعيه وهنيوني من مشاكلكم بحالك بحال ولادك

مليكة:(شعلات)اوا باااز باااز...عندك منو عشرة ..أش هاد القلب عندك؟؟واش ولدك معارفو فين مشا ومبرد. .

محمد:جهدو عند نزهة ...مراجلش باش يمشي يبات فالزنقة..كون بيت مو فالزنقة كون تحك وترجل..البرهوش لاقيك نتي كتفششي من هنا ..جداه كتراري من هنا رديتوه مرااا..إيناس وحرشة عليه. .

مليكة:(صاحت فوجهو)الله ينعل لي مايحشم...كرهتيني عيشتي وكرهتي ولادي فيها يخ منك ومن فعايلك...شوف نݣوليك(كتهدد فيه بصبعها) أما يرجع ولدي ولا نتبعو

محمد:تبعيييه ياله أش كتسناي؟؟فاش فايداني غي السريط والمريط وميبان عليك . .

مليكة:(توقعات هضرتو)ياااك أسيدي ؟؟اوا والله منها لخرجت ..فيها حقي وحق ولادي ...سنين صبرت معاك فيهم وغنزيد نصبر حتا ندفنك

محمد:(ببرود )اوا ريحي الأرض وديها فهمك...ولدك خصو يترجل والله ميدخل علي الى مالقا خدمة.

فديك الأثناء دخلات إيناس ناشطة من المدرسة كتفرنس لقات السكات وقالت بفرحة:بابا جبت 20 فالفيزيك

محمد:(شاف فيها ببرود)جيبي حتا مية..أش قضاو ليا لولين تقضي ليا نتي (ناض )

ايناس:(تلغات فرحتها)هااا..ماما

مليكة:(نقماتها)يعطيك الغما درݣي كمارتك نتي لي خصيتيني فهاد الصباح. .

هنا إيناس تلغات فرحتها ورجعات لأحساسها الأول كيف العادة..علاقتها بباها واحد الوقت كانت قوية لكن بمجرد ماكبرات ولات كتشوف فيه الأب المتسلط لي مبقاش كيبغيها كبنتو ولى كيعاملها كأيتها الناس..ومن جهة أخرى كاينة مليكة لي دائما ممسوقاش وحاسبة راسها كتربي إيناس بتزيارها وتحمار العينين لي كدير فيها ناسية أنه جيل مغاير ومخالف للجيل السابق. .

الولاد فاش كيكونو صغار كيخص الوالدين يصغغرو عقلهم معاهم ..كيتزاد كيبدا يعلمو ها المشي ها الماكلة ها القراية وملي كتوصل البنت لسن 11 لسنة كيبداو التغييرات الجسدية والنفسية كيطرؤو عليها وهنا كيخص إما الأم أو الأب يكونو قراب من بناتهم وولادهم باش ميخرجش حاشية لكن غلط مليكة أنها من نهارها كتحمر فيها وكتقمع فيها باش ماتديرش و باش متضسرش وباش ماتخرجش ناسية أنه التزيار كيفوري الحاجة. .

هزات شكارتها من جديد ودخلات لبيتها جامعة دميعات صغار فعينيها كاسرين فرحتها...وأخيب حاجة هي والديك يكسرو فرحتك . .

العديد من الأمهات والأباء كيجيبو ليهم ولادهم نقاطهم وكيتعاملو مع الأمر بمنتهى البساطة ناسين أن داك الطفل كيعتابر ديك النقطة اكبر إنجازاتو وخصك نتا كأب او أم تعامل معاه على أنه فعلا إنجاز أما بالتحفيز او بشي هدية...وقليل بزاف لي كتقول مع راسها اجي عاود ليا نهارك كي داز. .

شنو فيها لطرحنا السؤال ديال كيف داز نهارك؟؟هاكا كتعودي الطفل على أنه يعاود ليك كلشي وأنه تكوني نتي مخبأ أسراره.

لكن فحالة إيناس العكس..الأب قاسح قسحاتو الأيام والأم قسحها الأب..مكتحن حتا كتشوفهم قربو يوصلو للحافة

دارت يديها فوق عينيها وطلقاتهم ينزلو مكسورة..كانت فرحانة حيت ديما باها كيقوليها عشرين ماتنزليش عليها .

*****

تغدات نزهة مع ياسين بالضحك والتكركير وناضت جمعاتهم ورجعو تكاو مخشيين من البرد كلها شاد مشقوفو ..مولفا هي ولاد خوتها بحال ولادها وتاهوما كيرتاحو مع عميتو..تا تعاشات العشية وقالت:ياسين نديرو حريشة للكاسكروط

ياسين:غنولف أصاحبتي ههههه

نزهة:شد حق باك ههههه

ياسين:بغيت منو غي التيساع

نزهة:أنا نمشي نتقدا ونجي

حرك ليها راسو ومشات لاحت عليها مونطو هزات تيليفونها والفلوس ونزلات مع بغات تحل الباب صونا تيليفونها بإسمو بتاسمات وهي تجاوب بدلع:المصري ديالي

ميمون:احححح على ديالي

حلات الباب كضحك لقات مليكة فوجهها:حممم بلاتي...أهلا

مليكة:وسهلا...كيدايرا(بزز)

نزهة:بخير ونتي؟؟

مليكة:ماشفت الخير مع داك خوك...فين ولدي؟؟

نزهة:(حشمات من ميمون لي كيسمع)راه الفوق فين إيناس؟؟

مليكة:فالدار

نزهة:طلعي أنا نتقدا ونطلع. .

دازت فيها داخلة وهي تخرج لوخرا وقالت مسترجعة الهضرة:الو

ميمون:شكون جا عندك؟؟

نزهة:غا مرات خويا

ميمون:الواليدة ديال ياسين؟؟

نزهة:هي هاديك...فين غابر عليا النهار كامل؟؟

ميمون:غا تمارة االالة تلبنات..كي ضليتي مزيان؟؟

نزهة:الراحة أسيد الرجال ههههه

ميمون:فين خليناها؟؟المصري ديالي ياك اختي. ..

نزهة:(ضحكات)تخوا من جنابك ماختكش أنا..إلى تخاوينا مابقات معنى

ميمون:أش المعنى لي كاينة الزين هههه؟

نزهة:(فهماتو)شوف أداك الزلال راني عارفاك أش قصدتي هههننههه

ميمون:(ضحك )هههههههههه باش كتعجبيني كتفهميني ههههههه

نزهة:ماسخ ياخويا والله هههههه صبر نتقدا. .

سكت وهي تنطق:محماد لباس؟؟

محماد:أهلا بلالة نزهة

ميمون:(سمعو)شوو ليك الزلال. .

نزهة:(مطمرة)كيداير لباس عليك؟؟

ميمون:واش جايا تقداي ولا تزوري. .

محماد:بخير ونتي؟

نزهة:نحمدو الله ونشكرووه..عطيني كيلو سميدة رقيقة..

ميمون:ملي خاصك هادشي دوزي ليه من المحل لاش محماد

نزهة:(بصوت منخافض)سكت المصيبة

ميمون:هاهيا فمك أمو ترمة مكورة

محماد:صافي غي هادشي مخصك والو

ميمون:نتا لي خاصك العصا

نزهة:(كتضحك )هههههههه ماخصني والو صافي. .

مد ليها سميدة وخلصاتو وهي تقول:شكرا ربي يخليك

تفاوتات من حداه وقالت:واش نتا مكتحشمش؟؟

ميمون:بربي حتا نتي لي مكتحشميش..دايز فيك التحلوين بلا قياس انزهة

نزهة:(بدلع)اوا هادشي لي عطا فيا ربي حلوة ومقيبيلة بسلامتي

ميمون:والحلاوة راكي حلوة غي هو نقصي

نزهة:(مجاوباتوش حابسة الضحكة)اأش ننقص؟؟

مبمون:التحلوين هههه راه قهرتيني

نزهة:هادشي باقي مخدمت التحلوين نيت مزيان

ميمون:(بلهفة)خدميه عفااك هههههه بغيت نحس براسي فوق السحاب

نزهة:اوا واش يجيني أنا الى تحلونت

ميمون:عيني نعطيهم ليك...غي كوني معايا فالطريق راه شرفنا على المصاحبة

نزهة:(عضات شفايفها)لا عويناتك خليهم ليك يبقاو يشوفوني زوينة...عطيني غي نيتك وصافي

ميمون:الى سولتي علي البعيد غيݣوليك واعر وجلاخة..سولتي القريب غيݣولو ليك نية ويمشي معاك فالطريق..

نزهة:خلي لي الدرويش ديالي ههههه

ميمون:مال مك مكتحلوني هاكا ݣدامي

نزهة:مكنزعمش ههههه

ميمون:غا زعمي وديري نيتك هههههه ونقصي الهضرة مع محماد

نزهة:هههههههههههههه دخلتي ليا مع العظم شويا أش شريتي شويا محماد

ميمون:مزال ماشفتي والو..مزال نولي نمشي معاك حتا تشري

نزهة:اوا أنا نيت نولي نلصق فيك لابغيتي تشري حتا نتا ههههه

ميمون:غا هني راسك أنا مكنشريش بزاف مرة فشحال

نزهة:وعلاش؟؟؟

ميمون:ماعرفتش(ببلاهة)ماكنعرف مانشري

نزهة:(زعمات)مممم نمشي معاك؟؟أنا كنت مولفة كنمشي مع ياسين ويونس ولاد خوتي كايتقداو حوايجهم

ميمون:(كيدورها فراسو)واراه نشريهم كاع مغنلبسهمش

نزهة:وعلاش بسلامة؟؟عندك الفلوس ماتشري ماتلبس..قبل راه كنتي معندكش وكتخبي دروك ولله الحمد مسك عليك الله

ميمون:معرفتش ههه صافي نمشي

نزهة:نمشيو غدا؟؟

ميمون:هههه لي بغيتي..صافي نمشيو..معاش ندوز عليك؟؟

نزهة:مممم الوحدة مزيانة؟؟

ميمون:صافي نسالي شغالي ونجي نديك

نزهة:نتلاقاو ف ***** بلا ماتجي حتال هنا نخاف يدوز محمد ويشوفك

ميمون:واخا أزينة البنات...نتبعوك فهضرتك

نزهة:يخليك ليلي يالمصري الدرويش ديالي..نخليك غندخل نشوف مرات خويا

ميمون:سيري الزين الليل نصوني ليك

نزهة:(بصوت هامس حيت حلات الباب)غنتسنااك

قطعات عليه مفرنسة وطلعات للدار كتسمع فصوت مليكة منغنغ بالبكا ..كي.دخلات جمعات لوخرا دموعها مطمرة لقاتهم جالسين وياسين مطمر ومخنزر ولوخرا عينيها حمرين..

وقالت:مالكم ياك لباس؟؟

مليكة:(وقفات)ياله نوض زيد معايا

ياسين:(شاف فيها)الواليدة هضرنا أنا ماغنمشي فين..خليه يضبر راسو وينساني عليه

نزهة:ياسين شهاد الهضرة؟؟نعل الشيطان...مليكة خليه هنا حتى تصفا الخواطر وراه غايرجع راسو

مليكة:(تنهدات محسرة)ياربي تفرجها...نزهة(مرطبة الهضرة)هاهو معاك أختي الميمة ردي البال. .

نزهة:متوصينيش على ولد خويا ..ݣلسي ديري كاسكروط

مليكة:لا غنمشي(تحنات باست ياسين لي مامعبرهاش)رد البال لراسك. .

خرجات مخليا السقيل فالدار...وقف ياسين وقال:أنا نطلع للسطاح نكمي راسي تشق بهضرة الواليدة

نزهة:أش ݣالت ليك؟؟

ياسين:(منزاعج)هضرة خاوية...رجع للدار باك هذاك

نزهة:خليك معايا هاد ليام حتا يبرد حتاهو ورجع

ياسين:غتجيب ليا حوايجي أنا هنا ݣالس(ممازح)ياك دارو وعندو حقو فيها اوا أنا من الورثة

ضحكات وضرباتو لكتافو العراض:دوز الله يمسخك هههههخ

هز باكي تالكارو طلع للسطح يتكيف ويقلب الأمور فدماغو أما هي صايبات حريشة وعمرات أتاي سخنات المسمن وحطات طبيلة مزينة عشقة وجلسو كياكلو..وهاكا دوزات باقي يومها مع ياسين وميمون فابيل فاخر الليل شدوها ضحك وتكركير فقط. .

****

فالصباح فاقت معطلة سيدة ولفات الراحة ..ناضت صايبات الفطور حطاتو وفيقات ياسين وجلسو كيفطرو عادي حتى نطقات:غانخرج نشوف واحد صاحبتي . .

ياسين:هههه صاحبتك(بنبرة ديال عايق بيك) هاد صاحبتك هي لي شادا معاها الهضرة البارح أعمتي؟؟(قرصها من حنكها)صدقتي خوينزة هااا. .

جاب ليها الضحكة وهي تضرب ليه يديه كضحك وقالت تتقلب فشفارها:بصحتي غي نتا قاضيها ميساجات حسابك كاع الناس ههههه

ياسين:تمجهدتي عليا ههههههه حتى نتي عندك حبقلبك

نزهة:حتارمني راني عمتك هههههههه

ياسين:اوا سلمي عليه وحضي مع سمحمد ليحصلك هههههههه

نزهة:يعاود راسو مالو هو ممدوزش هههههه

ياسين:واخا تحلفي ليا بالزابور مانتيق...با أنا يتصاحب هذاك حاضي غي الخدمة والدار وشنو خاص. .

نزهة:اوا غي مالقيتيهش فوقتو..كان خاربها حتى هو البنات يموتو عليه

ياسين:(شداتو الضحكة )هههههههه هاربة ليهم الحقيقة سرو غي مليكة محررة فيه العيشة

نزهة:(تبسمات بمرارة)نݣوليك واحد الحاجة ومتقلقش

ياسين:غي هضري

نزهة:باك ومك جامعهم غي نتوما وصافي..مك كتشرق وباك كيغرب

ياسين:نكذب عليك أنا وخوتي كبرنا مع جوج تناس باينة ماحاملينش بعضياتهم..كل نهار صداع ومشاكل ونفس الهضرة

نزهة:من لول زواجهم غلطة..الله يسمح لمي لي كانت سباب فيها. .

ياسين:(بتساؤل)واحد السمية كنسمعها ديما من فم مي هي بنت فاطمة...فينما يتخاصمو تلوح ليه هاد السمية

نزهة:(بحسرة)نعاود ليك ولكن متعاودش لمك

ياسين:لا غي هضري

نزهة:كان مصاحب معاها كان كيبغيها وكتبغيييه راك عارف داك الوقت مكانش هادشي ديال نتلاقاو والتيليفون كانو غي شوف فيا نشوف فيك...هي كانت مها شيخة اوا وديك الساعة الشيخة عيب وحماق عليها بغا ياخدها كانت غزااالة (كتستعقل) أنا مابقيتش عاقلة عليها مزيان ولكن ملامحها كيمشيو ويجيو فبالي..زوينة وفنة ولكن مي مابغاتهاش ليه..من داك نهار هزيتي محمد وحطيتي آخر

ياسين:كون خداها كون لباس عليه هههههههه الزلال لاخر

نزهة:ههههههه اوا المكتاب...نوض نجمع ونخرج

ياسين:هههههههه خلصيني ومانݣولهاش لمحمد

نزهة:(كتجمع الطبلة)خلصني نتا دابا ونݣولها ليه هههههه

ضحك عليها وطلع للسطح يكمي فحين هي مشات جمعات لماعن دغيا ودازت لبيتها بدلات عليها لبسات كسوة سخونة فاللموف بارد نازلة فايتة الركبة مع بوط كحل جاتها لاصقة ..شعرها طلقاتو أكيد ودارت حلقات خفاف مع ماكياج ناعم..رشات ريحتها المفضلة وشافت فراسها وهي تفرنس وقالت:ياختي على الزين الله يحجبني ويعطي الرجال العما لي ماطاروش بيا فالول. .

ضحكات على راسها و خرجات كتقاد فمونطوها وهي تلاقا مع ياسين داخل معطعط بريحة الكارو صفر فاش شافها باعجاب وقال:الزين يالالة

نزهة:هههه(بنفخة)اوا شفتي..وهادشي كولو ݣالسة بلا زواج

ياسين :والى تزوجتي عندمن نغضب ههههه

نزهة:الله يمسخك حيد خليني ندوز

ياسين:(فسح ليها الطريق)سعداتو هههه. .

خرجات كضحك ناشطة فرحانة كيفها كيف أي مرا ملي كيمدحها شي حد..شيرات لطاكسي وعطاتو العنوان ومسافة الطريق كانتت واصلة خلصات ونزلات كضور فراسها كتقلب عليه حتا صونا تيليفونها ...ردات عليه مبسمة وقبل ماتهضر نطق:نتي هي الزوينة لي نزلات من الطاكسي؟؟

نزهة:(بدلع)لا الخايية فيهم

ميمون:ݣادي وقفتك لحسك هههه أنا وراك. .

تلفتات وشافت طونوبيلتو تبسمات وهي تقطع وتمشات جيهتو بكامل أناقتها مستخدمة عليه سحر أنه ديما أنيقة عكسو هو..الراجل فاش كيكون هامل راسو وكيكون مع مرا نقية وزوينة ومهلية فراسها كيحس براسو شاد الزين بين يديه. .

نزل عندها قبل ماتوصل وعينيه كيتفحصوها بإعجاب..ماعمرها جات عندو مبهدلة ديما زوينة وعمرو شاف عليها شي حاجة لي بعض النساء كيوصفوها أنها عادية مثال صباغة مقشرة ولا اليدين حرشين.

مجاش فين يقرب ليها تا كانت تبسيمتو وساعت ملي شم رويحتها الزوينة...بسرعة قرب ليها وطبع قبلة على حنكها وقال :شهاد السر عاوتاني؟؟

نزهة:(دارت ليه بصباعها)غي شويا وصافي ههه..(حطات يديها على ذراعو بخجل)

ميمون:(كيداعب يديها الرطبة)الله يخليك ديما زوينة(عاود باسها فالحنك الآخر تا بورشها)

نزهة:راك عيقتي هههه الزنقة أ ميمون

ميمون:هههههه اوا سبحان لي مينسا...زيدي ياله

مشات من جهة وهو من جهة ..كي طلعو نطق:فين نمشيو؟؟

نزهة:(كدير فالسمطة)كتعرف شي حد كيجييب داكشي زوين ولا نديك أنا

ميمون:كلشي فيديك أنا غي داير ليك خاطرك هههه

نزهة:علاه مالك نتا ماتبغيش تشوف راسك زوين!!

ميمون:وأنا راجل زوين ولا خايب كنبقا راجل نتوما لي خاصكم تبانو زوينات(تحرك)

نزهة:راك غالط اسيدي ..حتى نتوما خصكم تهلاو فراسكم غتشوف كي غنرجعك!!!شهوة

ميمون:هههههههههه واخا الالة. .

يتبع...

‎