خيط الريح الجزء السابع

أيدها فرأيها هو غرضو غي يشوفها ويدوز معاها وقيت اما راسو مامسوقش ليه على قولتو هو راجل وهذا هو رأي أغلب الرجال كيمشيو تحت المقولة"الراجل كيعيبو غي جيبو" ناسين أن المرا مكتشوفش غي الجيب كتشوف الأخلاق والإهتمام والحب والتهلية..

وقفو عند أول بلاصة ونزلو بجوج وقال:هنا

نزهة:ممم كنت كنجي مع ولاد خوتي يتقداو حوايجهم ..شوف نتا(وقفات أمامو كتمسح على كتفو )غيخصك بعدا سبرديلات باش تبدل شي ربعة هاكاك

ميمون:(مبسم لحركتها)اوا

نزهة:شحال تسروال عندك؟؟

ميمون:معرفتش هههه ناخد شي خمسة هاكاك نبدل بيهم

نزهة:(كضحك)البنكة مسدودة عندك؟؟

ميمون:ههههه مفهمتش

نزهة:زعما واش عندك فلوس القد والقد ولا غي نشريو حتا نݣولو عييت

ميمون:شري حتا تݣولي اححح

ضرباتو لكرشو حابسة الضحكة: ماسخ هههه

ميمون:أنا عقلي نقي نتي لي ياربي تستر منك هههههه مال اححح مالها

نزهة:مامالهاش هههه زيد ݣدامي خلاص. .

بغات تسبقو جرها من يديها شابكها مع يديه ممنعاتوش بتاتا مرتاحة..بداو كيضورو على المحلات وهي تجرو لواحد كيقلبو وجات بنت كتستفسر على شنو بغات ..طبيعي محل للرجال غيجيبو مرا ساعة لقات نزهة فاهمة وعارفة كتعطيها شنو بغات وتجيب ليها تا شكيلات فيديها ومشاو جهة القياس

ميمون:أري

نزهة:(كتعزل من سراول)جرب هاد الدجين مع هاد التريكو غا يجيك زوين (بتركيز) أنا نتسنا بعيد شويا لايخرج شي حد من الرجال هنا. .

حرك راسو بتفهم ومشا دخل قيس فحين هي بدات كتخطط للبسة خرا وكتسناه تا خرج عندها بسروال دجين زرق مغلوق ولفوق داير معاه تريكو سخيخن فالقهوي مغلوق جاه لاصق على عضلات جسمو وبينهم عامرين مع شوي تالكريشة

ميمون:كي جاو؟؟

تبسمات بإعجاب ومشات جيهتو كتقاد ليه تريكو من الكتاف محمقها وقالت:عرفتي تخرج هاكا يطيرو ليا بيك ههه

ميمون:لاتزديش فيه هههههه (شاف فمراية طويلة)جا زوين زعما ممولفش لبس هاكا

نزهة:والله حتى جاك زوين كتبان غزااال ..غرت أنا غرت هههههه

ميمون:أش كديري للتحلوين ههههه

نزهة:(قلبات ليه شفرانها)وابصحتي هههه سير قيس هادو حتا هوما

ميمون:واخا

وهاكا بقا كتعطيه يقيس وينفذ. . و يقاد ويخرج عندها تشوف كي جا ..وهي لجاه كتقول ليه زوين لي معجبهاش ترجعو يبدلو ...دوزو قرابة ثلاثة ديال سوايع من محل لمحل سخسخاتو تا ولى كيقول هالعار ياله فحالنا ساعة معامن هو مع مرا كتموت فشوبينغ...طوفاتو وسخسخاتو مزيان تا غرقاتو حوايج وخرجو محملين بالأكياس وهي كتفرنس وقالت:تهليت فيك ههههه

ميمون:(تسخسخ)أش بيني وبينك فهاد العيا هههه

نزهة:ههههههه اوا العيالات

ميمون:هلكني الجوع جاي بلا فطور وكملتي عليا

نزهة:هههههه زيد وصلني وكول. .

طلعو لطونوبيل بعدما حطو كلشي لور وقاال:ماغتمشيش تغداي معايا

نزهة:نمشي الى عرضتي عليا

ضربها بالضحك بلور تيديه وديمارا:تحتاجي نتي لعراضة لمك

نزهة:هههههه لا كلشي ديالي

ميمون:اوا هاكاك

مشاو تغداو فبلاصة نقية من اختيارها هي على حساب معدتها ومن بعد وصلها لدارهم حطها بعيد ومشا بعدما شكرها. .

•••••••

كنت لي الشمس التي كل صباح أحمد الله أني أراها

•••••••

اليوم الموالي ..ميمون فاق مدوش من البارح لبس من شنو شرات ليه نزهة وبقا واقف كيشوف فراسو كي جاتو اللبسة الزوينة لي عبارة عن سروال جينز وسبرديلة آخر ماكاين مع تريكو طالع للعنق مقطن وفوقهم كويرة..رش ريحتو وخرج كيلعب بسوارت طونوبيلتو وكيبان وسيم خاصة حيت عامر مزيان ..قصد محلو كي وقف بغا يحل حيت غيجيو الدراري الجداد وهو يجي عندو واحد من الناس لي خدامين حداه كيصفر:فيييو معرفتكش أ ولد المصري

ميمون:علاش ؟؟

..:وليتي فسر ههههه

ميمون: هههههه الله يحفظك..فين دراري لي ݣلت ليك

شير بيديه لحدا محلو وجاو جوج دراري ونطق:هاهوما ..الله يعاونكم

*****

مرت شهرين بأيامها ولياليها على كوبل الغرام ميمون ونزهة..جوج أقدار مختالفة تلاقاو باش يشكلو قدر واحد...الطباع نفسها واللقاءات نفسها متبدلاتش عندهم..

هو راه ضحوكي وغي كيكركر ومنشطها معاه وحتى هي ولات هازاها منين خفافت غي كضحك وخدامة وناشطة ومرة مرة تجيها كوموند ويعطيها هو السلعة ..مفرحاه وعاجباه حيت معاه

اليوم فايق بكري مدوش ولابس عليه حويجات من لي ختارت معاه لي ولاو كيعجبوه وكيرتاح فيهم خاصة ملي ولى كيسمع المدح من أغلب لي دايرين بيه على أنه تبوكص كيف كنقولو حيت هو كان غا هرݣاوي لي لقاها يلبسها وممسوقش ومباينينش فيه فلوسو..مع رش من ريحتو مع صونا ليها باليد لوخرا مفيقها من النعاس مجاوباه بصوت ناعس:الو

ميمون:الصويت عندك محلون كل صباح هههه فيقي فيقي

نزهة:(بعيون نغمضة)واش نتا مسافر تفيقني أنا حراام عليك

ميمون:ههههه نوضي من العݣز هههههه

نزهة:(تفوهات وحلات عينيها)حشومة عليك البارح مخليني سهرانة حتال الوحدة ودابا محرم فيا النعسة

ميمون:(كيهز فسوارتو)ما عاشش لي يحرم فلالة نزهة نعاسها...رجعي تنعسي أشحيمة بغيت غي نصبح عليك

نزهة:(بدلع)غادي دابا أحبيبي؟

ميمون:اه..بغيت نوصل بكري باش نرتاح

نزهة:فطرتي أحبيبي؟؟

ميمون:(ضحك)هههههه نقصي عليا من حبيبي ونتي بايتة محنناني وفايقة معذباني وااه الالة نزهة

نزهة:(ضحكات تا بح صوتها)هههه واش ندير خاطري ماكتبغيش تعيط ليك بميمون هههههه مكتواتيك ليا غي حبيبي

ميمون:هههههه كتقولبيني بهضرتك..

نزهة:ههههههه غا معاك

ميمون:(بطنز)لا غي تحلوني على شي حد اخر وتشوفي لا مانجي نسلخ مك

نزهة:(فرنسات)ههه ويعطيك خاطرك تضرب هاد الزين كاملو

ميمون:غنضربببك(طولها)ولكن ماشي بالسمطة

نزهة:ههههههههه لهلا يوصلنا لديك الماصل (تفوهات)

ميمون:سيري الزين تنعسي رتاحي ليك اليوم الحد أنا نشد الطريق دابا

نزهة:كي توصل صوني ليا علمني ولا صيفط ميساج

ميمون:ضروري

قطعات معاه ورجعات نعسات عارفا ما كاينة خدمة اليوم أما هو راه شد الطريق لدارو لي فالقلعة..على أنغام شعبية حيت ذوقو هاكا داير

كيتسنط لأغنية شعبية كلماتها كالتالي:

"وهاد ليلة حلات

ونجيبو شي بيرات

ونعيطو للبنات ومتسمع الا كب كب"

واللحن والكلماات كيتعاودو وراسو كيتحرك معاهم خالق جو غي راسو تا ضرب نص الطريق طاير حيت من نوع لي سواق..ميمون رغم أنه مقاريش الا وأنه تعلم السوݣان على يد المعلم ديالو فسن 19 لعام ونهار مسك عليه الله وشرا طونوبيل عطا فلوس صحيحة وخداه وخرج من باب واسع. .

****

قلعة السراغنة أحد أجمل الأقاليم المغربية لي كتمتاز بطيبة أخلاق ناسها وبكرمهم وكذلك بخيراتها الطبيعية حيت كتعتابر من المناطق الأولى فالمغرب لإنتاج زيت الزيتون..وكذلك متميزة بالتبوريدة..وكذلك بالعقارب والحناش بالنواع والشكال. .

أمام منزل مبني من الفوق للتحت كيبان مبني على حقو من ثلاثة طاج ومساحتو كبيرة بزاف ..بابو حديدي مصبوغ بالرمادي ومحلول ودري صغير كيلعب قدامو غي شاف طونوبيلتو تبسم وبدا كينادي على لي فالدار بصوت قلعاوي:وااا مي وا مي وا بابا وجااو جااا جا عمي واعمي. .

ضحك ميمون ونزل من طونوبيلتو كيخوي شنو جايب معاه مقدي مقدية كثيرة من لحم وخضرة وديسير والسقاطة ..مستحيل يدخل بيديه خاوين واخا جاي لدارو . .

لمح الزاهية بتشاميرها وقفطانها ..مشا ليها بعدما حط داكشي فالأرض وعنقها بحب وهي مفرنسة:اوليدي الحنين ديالي

ميمون:ميمتي(باس راسها)توحشتك أمي. .

الزاهية:(فرحانة)مرحبا بيك أوليدي فمحالك مرحبا بيك ...وشحال توحشتك.

ميمون:حتى أنا أمي

خرج خوه منعم مبسم سلم عليه وقال:ايهاي شهاد التزيزة تاني

ميمون:غي شوية وصافي هههه

منعم:لالا حلقتي على الحالة

ميمون:اوا شنو نبقاو حنا غي خدامين ميبانش علينا

الزاهية:بصحتك أوليدي ...رزقك هذااك زيد زيد راني موجدة ليك واحد الݣصعة ديال كسكسو

ميمون:(بشهية)شحال مكليتو نيييت. .

دخلو للدار وخرجو خوتو لوخرين سلمو عليه ب تعناق وترحيب حيت قليل فين كيطلع القلعة وكلشي لاحظ لباسو ..جلسو فصالون تقليدي كبير مفرش فراش مطرطق فالأزرق ملكي..ضارو بيه خوتو ومو أما عيالات خوتو راه سلم عليهم غي بيديه صافي..ودراري صغار راه كينقزو حداهم فرحانين بالعم . .

فتيحة:(فالكوزينة كتزيف الكيسان تاتاي مجمعة مع مرات براهيم)اوا شفتيه ياختي كي جا؟؟على مزيناتو

نادية:شفت أختي شفت..مسرار تبارك الله..هو العامر فخوتو

حفصة:(مرات منعم)زيان صراحة تݣال ..وجات معاه هههه

فتيحة:شحري داك أتاي دروك تبدا الزاهية(كتعيبها)أسربيو ارو ليا أتاي للحنين ديالي للمرضي ديالي . .

ضحكو بجوج بهمس وهزو الصواني فيهم المجامع وكلشي لي كيتعمر بيه أتاي حيت عندهم تقاليد مفادها حشومة نديو للناس أتاي عامر خصو يعمر قدامهم وطبسيل مشكل بحلويات مغربية مقومة ترحيبا بيه لابسين المستور قدام لوايسهم

نادية وحفصة زوجات براهيم ومنعم بلديات بنات المنطقة حشمانين منو بزاف حيت مكيجيش بزاف عكسهم هوما لي كيمشيو عندو..وكاينة سناء ومريم زوجات صالح وعبد الهادي لكنهم غايبين فديور والديهم زايرين

تحط كلشي ونطق براهيم:ياله اأسيدي عمر لينا شي كاس

ميمون:مكنعرفش..أنا هادشي خاطيني عمريه أمي توحشت أتاي من يديك

منعم:(معيبها)ايييه نعمرو للمرضي ديالي

ضحكو كاملين وتا الزاهية حيت قلدها مزيان و هي تنطق بافتخار:اييييه المرضي ديالي أنا نعمر أتاي

غمز خوتو باش يسكتو وهو ينطق صالح:خوتك لباس عليهم؟؟

ميمون:هضرت معاهم البارح بالليل راهم بخير. .

فتيحة:(ممازحاه)كون أخويا ديرها زوينة نمشيو لمصر نتفججو. .

ميمون:غانمشي إن شاء الله نشوفهم ضروري نديك معايا

فتيحة:(فرحات)حلف ههههههه صافي هاني نوجد

براهيم:أيهاي على با ميمون تانتا وليتي تمشي لمصر

منعم:مابقيتيش ساهل اخويا

عبد الصادق:غدا تلقاه مشا لفرنسا

الزاهية:ومالها فرنسا اتغلب ولدي(كتعمر فاتاي وكتهضر مفتاخرة)

فتيحة:لا اختي متغلبش ولدك هههههه تاعت الله أخويا أش داير ليها؟؟ساحر ليها هههههه تضل المرضي ديالي الله يرضي عليه

حفصة:(لوات فمها بهمس) داير ليها ولينا فين نسكنو. .

ميمون:راه حتى فاش كتكون معايا هاكا كتݣول عليكم

الزاهية:وايييه الله يرضي عليكم كاملين ياربي

ميمون:خالي مكاينش

صالح:واخالك فدارو ...دابا تلقاه داخل. .

وعلى إثر جملتو دخل خالو عبد الرحمان الأب الروحي ديالو ولي ليه الفضل فكاع إنجازاتو كون ماهو هزو كون دروك ملاوح فشي قنت ..بجلابة سخونة وبلغة وعلامات الوقار على وجهو والشيب كاسي لحيتو..باين عليه إنسان متدين مرافقاه مرا كبيرة فالعمر قد الزاهية اسمها خديجة..مبسمة وعيونها كتبري..بمجرد ماشافها ميمون ناض من بلاصتو ومشا شد يديها باسهم وعنقها وهي تنطق بصوت حنون:ولدي

ميمون:(عنقها)العزيزة

خديجة:على سلامتك أولدي..خير مولانا هذا. .

عبد الرحمان:(مبسم )على سلامة أولدي...مرحبا بيك. .

تسالم معاه وباس راسو وجلسو من جديد فالقيل والقال والضحك والتكركير ديما مطلعينها على الزاهية وهي كتبجق فيهم مولفة قاعدتهم. .

واللمة ماكتحلا عند المغاربة إلا بكسكسو بسبع خضاري مغربي مأصل وخاصة هذا لي حطو هوما قلعاوي كتشم ريحتو منين ومنين. .

تحطو جوج ݣصاعي وحدة للرجال وحدة للعيالات و الدراري الصغار كل وحدة تعزل لولدها وكثرة اللغى وارا نتا هاك كاسك..كول مرحبا زيد وغيرها من الهضرة. .

الجو لي ميمون كيحماق عليه مكيكرهش يعيش معاهم كون لقى يديهم معاه لدارو يعيشو معاه...كان دائما وحيد وكبر بوحدو كيبغي الناس وهاد الجو العائلي هو عندو بمال الدنيا..

تغداو وتنشرو وهو ينطق:أنا نوض نتكا شوية عيييت

الزاهية:سير اوليدي بيتك راه محلول نعس رتاح ليك شويا

براهيم:صبر نعطيك ماتلبس

ميمون:(وقف بامتناع)لا جبت حوايجي

منعم:(ضحك)لا نتا تبدلتي ههههه ياك كتجي طويل

ميمون:(محرك)ما بقيتش ههههه

خرج لطونوبيلتو يهز حوايجو لي بيتهم فالطونوببل حيت عارف غينساهم..وخلاهم كيشوفو فبعضهم تاحد ميقدر يهضر عليه قدام الزاهية . .

تاناضت تاهيا تدير القيلولة عاد بداو فالهضور والنقاشات بعدما مشا حتا عبد الرحمان.

فتيحة:توما شفنو لي شفت...خوكم ولى يلبس

منعم:جا معاه الصراحة.

صالح:شي خير تما ههههههه

حفصة:وا السيد بغا يتمتع برزقو خليوه. .

صالح:بصحتو مݣلناااش لاا...الحاصول الله يعاون لي عندو شغل يمشي يقضيه. .

طلع ميمون لبيتو لي عارفو فين جا كي دخل لاح صاكو وهز تيليفونو صونا لنزهة لي تعطلات باش تجاوب منفخة:الو

ميمون:(عيبها)الو ههههه مالكي منفخة. .

نزهة:واشوف نتا...غا وصلتي طفيتي عليا التيليفون. .

ميمون:ههههه تواضعي شوية الالة نزهة(مبسم)الريزو مكاينش

نزهة:مممم تيقتك..ݣلست كنتسنا فيك كي الحمقة(جاييا عليه فشوشها وهي راه مشات للحمام )

ميمون:خلاتها نجلاء"حقك عليا من فوق"هههههههه

نزهة:مسامحاك هههه كي لقيتي داركم؟

ميمون:مزيانين(كيطنز)سلمو عليك

نزهة:ههههه يسلم عليهم الخير..ماتوحشتينش الموصيبة

ميمون:(تسرح فوق الناموسية)وياله شفتك لبارح هههههه

نزهة:(عارفاه كيشد فيها)حتانا ما توحشتكش هههههه

ميمون:(تفوه)شكون مايتوحشش الزين ديالو..توحشتك الدبة ديالي

نزهة:والدبة لاش؟؟خليك حلو معانا أنا ديما حلوة ونتا كتعطيني القاسح

ميمون:الالة نزهة متݣوليش القاسح ..غي مكنعرفش نرطب الهضرة

نزهة:هههههه وانتا نهار المبارك كتعيط ليا حبيبة ههههه شبغيت باقي

ميمون:اوا حمدي لله...مخرجتي لحتا بلاصة

نزهة:مشيت لحمام وجيت

ميمون:خهههههه وكتكذبي عليا تسنيتك حرام عليك نسيتيني ههههههه الله يمسخك. .

نزهة:(ضحكها حيت تفرشات)تشوشت عليك فالحمام ههههههه

ميمون:(عينيه منيمين بالنعاس)غتكوني جيتي منو فسرة هههههه اححح ووتعرفي أش مشهي فيك

نزهة:أش مشهي السلݣوط؟؟

ميمون:مشهي نجيبك من الحمام ههههههه

نزهة:ههههههههههههه راه كنݣوليك راك خضر هههههه خضر وغي كتهضر

ميمون:هههههههه وا ش نكذب هراتني الهضرة لحتها ليك

نزهة:هههههههه الحمام أ ميمون الحمام هههههه

ميمون:مالو الحمام ماراجلش هههههه

نزهة:ههههههههههه اوا بااز ليك

ميمون:عيني ثقالو بالنعاس سيري الالاهم نرتاح شوي ونعيط ليك

نزهة:(بلطف)سير ترتاح أنا غنخرج مع ختي وبنتها

ميمون:(حل عينيه)فين غاتمشيو؟؟(شاف فساعة)ربعة هادي مشا الحال

نزهة:لدرب السلطان ماعرفتش شنو بغاو ياخدو

ميمون:مممم واخا..متعطليش

نزهة:(كتعيب فيه)متعطليييش هههه بسلامة بون نعيسة

ميمون:(ضحك بصوتو الغليض)راكي لهيه. .

قطع عليها وناض بدل عليه بسورفيت بيتية باقي جديدة وتخشا ففراشو دغيا غمض عينيه وسرح بنعاسو فين بغا. .

******

لبسات عليها حوايجها وتريحات، هزات مسائلها ناوية تخرج مع حلات الباب تفاجئات بمليكة واقفة وكتبكي وتنخصص رفقة إيناس..شرعات عينيها

وقالت:مالكي؟؟

ايناس:ماعرفتش مالها أعميتو ملي خرجنا وهي كتبكي

نزهة:(بتساءل)زيدي دخلي(جراتها دخلاتها وسدات الباب مشوشة)مالكي هضري. .

مليكة:(طلقات دموع كثار)هءهءهء أنا مزاوݣة يا نزهة وعار الدم لي جامعنا عتقيني. .

نزهة:واش ضربك محمد؟؟مالكي راه خلعتيني!

مليكة:اءهءهءه ولدي ولدي ياختي مشا ليا

نزهة:(طاح ليها الما فركاببها)أويليييي(صاحت)شكون فيهم

مليكة:(جلسات فالدرجة لولة كتبكي)هءهءهءهء أميمتي درتها بيدي أميمتي صيفطت ولدي للموت وماعرفتو عايش ولا ميت. .

ايناس:(كدمع)ماما واش ياسين مات؟؟

نزهة:سكتو سكتو (كترعد حيت دغيا كتخلع)هضري أش درتي فين الولد اش وقع؟؟

مايكة:هءهءهءهء ماعرفتش فينو..تلت أيام ماسمعت عليه خبار ملي مشاا

نزهة:(كتسرط فريقها)فين مشاا؟؟

مليكة:(الصمت)هءهءهءهءه

نزهة:(بالغوات)واادوي فين مشاا!!!!!

مليكة:مشا حارݣ. .

حلات نزهة فمها بصدمة ونطقات بدون شعور ويديها فحنكها:أويلييي...أويلي على مشا حارݣ أويلي ميمتي(جلسات حداها فالدروج ودموعها طاحو)أويلي على مشاا حاارݣ(بعتاب وكتغوت)صيفطتيه للموت ابنت الحرام اويلي

مليكة:(دموعها فاتو دموع نزهة)هءهءهء أميمتي على ولدي معرفتو عايش ولا ميت(بترجي كتبوس فيد نزهة)هالعار أنزهة الى ماديري شي حاجة هالعاااار عاونيني هءهءهءهء

نزهة:(سلات يديها و وقفات كتغوت)سيري الله يعطيك العذاب كثر من هذا أختي لي معيشانا فيه...بقيتي طيري طيري(كتهضر ووجها تحقن بالدم والدموع)حتى جبتيها فراسك وفينا....(رجعات لمود التعداد)أميمتي على ولد خويا وفين لايح راااسووو

مليكة:هءهءهءهء ندمت أختي ندمت حتى سايرتو فهضرتو

إيناس:(كتبكي)نعيط لبابا(جبدات تيليفونها). .

مليكة:(ولاو فيها عشرة طارت حيدات ليها تيليفون)باغيا تخرجي عليا أبنت الحرام هءهءهء غايجي يذبحني. .

نزهة:تستاهلي القتيلة يالكل** بة* ...جاية عندي حتا عورتي لمها العين أش ندير ليك أنا؟؟محمد لي غايفاريها

مليكة:(كطلب فيها وتزاوݣ)هالعاار لا ماتوصلوهاش ليه غيقتلني ومايحنش فيا هءهءهءهء غي هادي وعمري نعاود يرجع ليا ولدي وعمري نعاود. .

ساطت نزهة و وجها محقون بالدم بلا عينيها لي كيدوزو بالدموع كانت معولة تخرج جات مليكة حشات ليها الركابي...زفرات من جديد وقالت:دابا جمعي عليا البكا وعاودي ليا أش وقع بالضبط؟؟كيفاش حرݣ وعند من وشكون داه

بدات مليكة كتبكي وتنخصص وتعاود ليها. .

🔙🔙🔙🔙🔙🔙

- "فلاش باك"

الوقت لي مشات مليكة تشوف ياسين عند نزهة فاش ضارب مع باه وتلاقاو فالباب ..نزهة مشات للحانوت ومليكة طلعات للدار..لقاتو مخشي فمانطة وكيتفرج غي شافها قلب عينيه وهي تنطق بحزن:ياك أولدي ياك؟؟كتحرݣ فݣلبي عليك. .

ياسبن:(بانزعاج)الواليدة الى جايا تسمعيني هاد الديسك الله يحفظااك غا بلاش

مليكة:(جلسات كتحيد فشالها)نوض ياله معايا لداركم أوليدي أش ݣلسك هنا...باك راك عارفو يغوت ساعة ويسكت

ياسين:ماراجعش أنا لديك الدار...خليه يزرع بلاصتي الكيف..أنا مصدع فدماغي وهو زايدني

مليكة:راه جلاخة بحالو بحال تريكتو ماكيتفاهموووش...

نوض ياله معايا هاديك داري حتى أنا..واش تعطيك خاطرك تخليني مهولة عليك. .

ياسين:شوفي الواليدة نجيك من الاخر أنا ماراجعش حتى تضبري ليا باش نقطع البحر..العيشة فهاد البلاد حرارت وأنا مابقيتش باغي نبقا هنا. .

مليكة:باش باغي تقطع البحر..القراية ومامكملهاش..باش غتمشي

ياسين:(بحزم)غانمشي حارݣ بحالي بحال لي سبقوني ومشاو لتما وضبرو على راسهم ودارو لباس وأنا العام لي جا يلقاني مبوانتي فراس الدرب ومضارب مع الواليد

مليكة:(ضربات ففخاضها)أويلي على تمشي حارݣ...طلي عليييا يا مي وعلى ماولدت باغي يخليني مفقوصة عليه...أويلي على تمشي حارݣ

ياسين:(بانزعاج)الواليدة بلا غوات تاني...مالي أنا لول ولا لخر لي غانمشي..عدد سبقوني ودارو لباس وراهم بخير كنهضر معاهم راهم عايشين مزيان

مليكة:(بنفي)لا أوليدي ...مانفرطش أنا فيك...الله يرضي عليك(كترطب هضرتها)نسا عليا هضرة الحريݣ راه يسمعها باك يقتلني أنا وياك

ياسين:(بعصبية)واتي شغنساا؟؟شغنسا؟؟با براسو هو لي محرمها فيا هنا..لا مصروف زين لا هضرة زينة أش نبقا ندير هنا

مليكة:(شافتو تعصب وهي تشد فيه)سكت دابا حنا كنهضرو...(بتساؤل)شكون يديك ؟؟

ياسين:(شافها رطابت وقرب منها قبل يديها)أ لواليدة والله ونمشي منساك..نتهلا فيك ونهنيك من با لي محررها فينا غا تعاملي معايا

مليكة:(تنهدات)أوليدي أنا راه مبغيتكش تمشي تغرب. .أنا معندي فهاد الدنيا غي نتوما.

ياسين:تعاملي معايا نوصل ونتهلا فيك..كنعرف سيد كيحرݣ الناس ب بربعة ديال المليوون ومضمون شحال من واحد داه ووصلو على خير . .

مليكة:(شهقات)الله أوليدي الله وربعة منين تجيني

ياسين:وأ مي شوفي جدة تسلفك ولا شي وحدة فخوالاتي..وذهبك أمي راه يجيب

مليكة:(بحسرة)وإلى مصدقش السيد ويمشيو الفلوس

ياسين:مضمون على ضمانتي..غا ضبري ليا فالفلوس. .

مليكة:أشمن بلاد لاش أتمشي؟؟

ياسين:لي كان المهم نخرج من هاد المغرب لي معاطينا والو. .

مليكة:خليني نفكر ويكون خير...نوض اوليدي دابا معايا لداركم وإن شاء الله يكون خير. .

ياسين:(حس بيها طمعاتو بهاد الهضرة وكعا )ماعندي فين نمشي هنا غنبقا حتا تضبري ليا باش نمشي والى ماضبرتيش هنا غنبقا . .

مليكة:واش نتا عزيز عليك تفقص فيا؟؟مالقيتي عند من تجي ...غا عند نزهة تعرف خباارنا. .

ياسين:عمتي هادي ودار جدة هادي ..

مليكة:واخا واخا(مغددة)

خرجات من البيت وتلاقات بنزهة ودازت فحالها هابطة. .

➡️➡️➡️➡️

- كان هذا هو الحوار لي ضار بينهم ولي عاوداتو مليكة محسرة وكتنخصص وكتردد :أنا لي لحت ولدي للعافية..

نزهة:سيري الله ياخد فيك الحق..ماكتشاوريش كديري لي فراسك حتا صيفطتي الولد للموت أش بغيتيني ندير ليك أنا دابا؟؟غانعلم محمد هو لي غايفاريها نشوفو غي الدري فين زاد. .

مليكة:هالعار أختي هالعاار عاونيني هءهءهءه يرجع ليا ولدي. .

نزهة:شكون هذا لي حرݣو؟؟

مليكة:(حركات راسها بالسلب)مكنعرفووش ءهءهء أنا حدي عطيتو الفلوس وتافقت مع عايشة بنت عمتي لي تلݣى ليه

نزهة:(بصدمة)أويلييي أش جاب عايشة للهضرة؟؟

مليكة:(كتبكي)هءهءهءه هي لي ضبرات ليه فالسيد حيت كلشي لقاه غالي ودوات ليه مع السيد هنا فالمغرب . .

نزهة:(ضربات فخاضها)أويلي ميمتي أويلي عليك واش درتي؟؟أويلي لايحة ولدك معارفاه فين كاين. .

مليكة:هءهءهء كنصوني ياختي تلت أيام هادي وكتݣوليا وصل هءهءهء نݣوليها دوزيه ليا كتݣوليا ناعس ولا خارج هءهءهء حتا شافتو موصلش وݣالتها ليا هءهءهءهء ولدي ماوصلش والفلوكة موضرة كتصوني للسيد كيݣوليها أنا غي ركبتهم وصافي. .

نزهة ضارت بيها الأرض وحسات بالفشلة ..مرة تبكي مرة تولول مرة تفقص مكرهاتش تسلخ مليكة..فالأخير شدات راسها كتبكي حتى هي وكدعي فيها ولوخرا مجاوبتهاش لي فيها كافيها. .

صونا تيليفون إيناس بإسم باها وهي تنطق بصوت باكي:بابا

نتافضات نزهة شدات تيليفون وقالت :أري نجاوب

مليكة:(شدات فيديها)هالعار متݣولي والو ليه راه يذبحني هءهءه

نزهة:(بصرامة)دخلي سوق راسك ماغنخليهش يقرب ليك غنعيط ليه ونشرح ليه باش يمشي يسول ويشوف أش كاين ..

مليكة:(طلقات من يديها وشدات راسها كتبكي )أنا لي درتها لولدي هءهءهءه..

- جمعات نزهة شجاعتها وجاوبات محمد :الو

محمد:إيناس؟؟

نزهة:لا اخويا هادي أنا نزهة. .

محمد:فين إيناس؟؟

نزهة:هاهي حدايا خويا واخا تجي للدار عندنا عندي ليك شي هضرة

محمد:شكاين عاود؟؟شي خطاب ولا شنو؟؟

نزهة:لا ..غي أجي ونفهمك

محمد:واخا أنا جاي

••••

قطع بلا ماينتاظر منها الرد أما هي راه حنات راسها بألم وقلبها معصور على ولد خوها..مومو تعينيها هوما ولاد خوتها وهي القريبة ليهم فالعمات ولا فالخالات..جنات و إيناس هي لي رباتهم ..

نزهة:طلعو للفوق نتسناوه يجي يفك هاد الحريرة

مليكة:(وقفات)عيطي لراجل سعيدة يحضر(بخوف)خايفة يجهل ويضربني. .

نزهة:(غوتات فوجها)كون كان يݣر فيك الضرب ماديريش هاد الفعايل..واش أ مليكة ماكتهديش؟؟واعية شنو كديري؟؟ كتفكري شوية ولا غي مݣدمة؟؟أقل حاجة تشاوري مع إيناس وتݣوليك لا . .

مليكة:ندمت ندمت أختي هءهءهء مصاب يرجع ليا غي ولدي..

سكتات ماجاوباتهاش حيت غاتشدها تسلخها..حدها جرات إيناس لعندها معنقاها وباست فوق راسها وقالت:صافي أعميتو ماتبكيش كلشي غيكون مزيان. .

إيناس:ياربي آميين . .

طلعو للفوق جالسين على الشوك كيتسناو الإعصار ..بثلاثة بيهم عارفين محمد الى تعصب ماكيتحبسش بتاتا وكيضرب ويعاير..مع صونا الباب قفزو وهي تنوض إيناس تحل ليه غي شافتو بدون شعور ترمات فحضنو كتبكي وتنخصص لدرجة استغرب لكن ملامحو بقاو فالجمود وقال مدور يديه عليها:مالكي كتبكي؟؟شواقع؟؟

إيناس:(كتشهق)خويا أبابا خويا ياسين معرفناش أش واقع ليه..

محمد:(حاس بشي حاجة خايبة حيت مايمكنش إيناس تبكي غي هاكاك)شكون كاين لفوق!؟

ايناس:عمتي وماما. .

جوج تالأشخاص عارف محمد مزيان بلي ماكيتجمعوش غي هاكاك ..أما مضاربة بيناتهم ولا شي موصيبة حيت ديما مليكة كديرها وتجي تزاوك فيهم يفكوها...

طلع بزربة للفوق كي شافهم نطق وهو كيلوح سوارت فوق الطبلة:أش كاين؟؟مالكم!!

نزهة:(سرطات ريقها)حممم خويا ݣلس أنا نشرح ليك..

محمد:هضرو خلاص(شاف فمليكة)مالكي كتبكي؟؟اش واقع لياسين ...

نزهة:محمد غا تݣلس بالعقل نشرح ليك نحلو الموضوع وبلا غوات. .

محمد:(بدا كيتعصب)واش نبقاو نترادو فالهضرة هضري خلاص..

جمعات شجاعتها وبدات كتعاود ليه كيفما عاودات ليها مانسات والو وختماتها بترجي:هالعار أخويا الى ماتحرك شوف الولد فين وصل. .

الدم تجمع فوجه محمد والشمتة طلعاتو من ساسو لراسو...عينيه شرار عليها هي لي مكمشة فراسها كتبكي وتعاود.. حقد عليها فلحظة و مقتها حيت اي راجل فالعالم لي هو راجل بالرغم قساوتو إلا ولادو خط حمر..

ومحمد ولادو لي مصبرينو على مليكة وفعايلها وهي ثقبات الورقة. .

محمد:(عض على شفايفو)ياك الالة مليكة (كيهضر ببرود)وليتي تلعبي ورا ظهري وتشفريني باش تصيفطي ليا الق** وا* د" ديال ولدك لبرا يااااك(جهل ورفع صوتو تا قفزو)واش أ عباد الله أنا حيط قصييير(بسرعة البرق طار عليها شدها من شعرها)فين صيفطتي الولد ابنت الق**** فين؟؟؟فيييين ديتيه الله ينعل الروح تاع مك فيييين؟؟(كيدي فيها ويجيب) . .

نزهة:(كتفكها منو)واااخووويااا طلق طلق منها . .

مليكة:(كتبكي تقطع فالقلب) ءهءهءهء هالعار أ محمد الى ما شوف ليا شي حل نلقا ولدي هءهءههء ماعرفتو حي ولا ميت. .

هاد الجملة ضرباتو فقلبو..كيفاش حي ولا ميت؟؟يعني ولدو ممكن يكون ميت دابا وهو ماعارفش..

طلق منها وصرفقها بلور تيديه وبدا كيهلل بالغوات وكشاكشو خارجين: الله ينعل النهار لي ديتك فيييه!!!!لفعة خامجة كتحفري ورااا ظهري...مصيفطا ليا ولدي للموت!!!!متافقة نتي والقو** اوي' د تاع تريكتك على ولدي . .

نزهة:(كتبكي)محمد عفاااك الى ما شد فراسك راه مكاينش لي يعاونا من غيرك. .

إيناس فالقنت كتبكي ومها كتنخصص من جهتين أما هو راه القوالب كيطلعو معاه...تلف وماعرف مايدير فين يمشي وشكون يسول ماعارفش..وكي كيقولو لي تلف يشد الأرض..شداتو الترعيدة فجأة والسخفة حتى فشل وجلس الأرض كيتنهد بالزربة..شافتو نزهة هاكاك وهي تمشي ليه كتجري كتحرك فيه:خويا مالك خويا. .

إيناس:(بخوف)بابا هءهءهء بابا مالك. .

كيحل فالصدافي تالقاميجة كيقلب على الهوا ونطق:المااا...

مشات كتجري جابتو شرباتو وتكاتو للور كيرد أنفاسو وهي تعاود تجيب ليه الما والسكر شرباتهم ليه وبقا منشور للور كيترعد حتى فاتو الحال وطيرها منهم خلعة عاد وݣد شويا..

نزهة:(بتساؤل)شويا؟؟

حرك راسو بالإيجاب و وقف بتعب وقال:خليهم هنا...(شاف فمليكة بحقد)حسابي معاك هو اللخر نتي..أقسم بالله وتوقع لولدي شي حاجة حتى نقتلك وندوز مابقى من عمري فالحبس. .

نزهة:(شافتو غادي)فين غادي؟؟صبر نمشي معاك!

مجاوبهاش وناضت هي هزات ساكها وتبعاتو مخلياهم فالدار كيبكيو ويتاناوحو عليه...نزلو بجوج طلعات معاه فطونوببلتو بلا هضرة بلا جوج عارفاه غيدير شي خطوة للبحث وفعلا مسافة الطريق وهو سايق بتعب كان وقف قدام الكوميسارية...نزلو وهي تنطق:عاود ليهم كلشي أخويا. .

مجاوبهاش صافي الصدمة صرطها ومشات ليه مع العظام وفبالو فقط أنه ياسين إحتمال كبير أنه يكون مات . .

دخلو للكوميسارية ودخل هو فقط عند الكوميسير كيبلغ بالإختفاء ديال ولدو لي فات 3 أيام يعني القانون باين خاص ييدا التقلاب ...عاود ليهم المنزلة كاملة وعرفو أنها قضية هجرة..حدو خسر عليه البوليسي :دعي الله يكون عايش . . البحر كيسرط. .

جملتو كانت كفيلة باش تضبب عينيه بالدموع لكن الرجال لا تنزل دموعهم بتاتا.. خرج حاني راسو مكتوف الأيدي ماعندو حتى حل من غير أنه يتسنا البوليس يديرو خدمتهم..

نزهة:(شافتو وناضت بزربة)أمدرا؟؟

محمد:(تنهد )غيبداو يقلبوو وصافي هذا ماݣالو

نزهة:وشنو نبقاو نتسناو؟

محمد:مكاين مانديرو كثر من هاكا

نزهة:(بأسف)إن شاء الله يكون باقي عايش. .

*****

الهجرة السرية أو الحريݣ بالداريجة ديالنا..هي ملي شباب هاد البلاد او أي بلاد كيقرر يموت على أنه يعيش فبلادو..كينوض كيضبر فزبالة تالفلوس وكيحرݣ ففلوݣة متدوزش بيه حتى فواد أو لا فشي باطو تسلعة مع تفاح ولا البنان..

هو فعل يمكن نوصفوه بالفشل حيت مولاه أكيد فاشل تحت مايمسى "البلاد معطاتنيش'"

والسؤال المطروح هنا:شنو عطيتي نتا للبلاد؟؟

أغلب المهاجرين السرين كيكونو قاصرين خارجين من المدرسة برضاهم مبزز عليهم حد..مبليين بالكارو والحشيش وماعندهمش الذراع للخدمة وكيديرو السبة بأنهم مالقاوش خدمة. .

شباب هاد الوقت كتهضر معاه كيݣوليك معينيش فالقراية كيخرج من القراية كيجرب الخدمة كيلقى راسو غيحوفرو عليه ويدمرو حيت كان مصور أنه الحياة وردية وغيلقا خدمة مريحة بلا قراية لي قليل لي كيلقاها..كيعرف راسو فاشل كيݣلس يعيش شوية تشوماج...كيتلاقا مع شبان بحالو فاشلين ماكيعرفو يهضرو مامكملينش قرايتهم ماعندهمش شي تكوين مانافعين الدولة فوالو من غير فالإحصاء كيتحسبو عليهم. .

وكيجي كيعطيك جملتو الشهيرة: "لي قراو طفروه" أو "هاد البلاد معطاتنيش". .

إلى بغينا نحللو هضرتهم فاغيخصنا نحطو النقط على الحروف..نتا كمواطن تزاديتي فبلد في طور التقدم فقط..شنو لقيتي؟؟لقيتي تعليم مجاني لي قرا فيه مليون ألف واحد من غيرك ووصلو بيه تخليتي على التعليم وخرجتي منو وكتسنا الدولة تحط ليك بوصط صحيح تݣوليك مرحبا بيك هنا راه وجهك لي صحيح

تݣوليه سير تخدم يݣوليك نخدم بالقد والقد مالي مريض...وهو فعلا مريض معاطي للدولة والو منافعها فوالو من غير تموقيف ومستهلك تالحشيش . .

نهارو راه باين بادي مع جوج بجوان ولا كارو مدوزو بين التموقيف والشفرة ويكملو بالمعيار فالفيسبوك لأعضاء الدولة

والسؤال المطروح هنا:علاش؟

علاش كيظنو الشباب أنه إلا مشا للبرا غيعيش مزيان؟ ؟كلشي عارف والعالم كامل عارف أنه الهجرة بلا وراق كتشوف الويل كتبات فالزنقة وكتاكل من الزبل وكتنعس فالجرادي وكتوسخ ومكاينش لي يحن فيك. . فقط هروبا من بلادك لي محيدات ليك والو...والمضحك أنه عندو إستعداد يخدم كيغسل الماعن فريسطو لهيه وميخدمهاش هنا...علاش؟ اااه حݣا كيخلصو بالأورو والتقوليبة هي أنه لهيه راك معايشش بالدرهم..تخدم ب 1000 اورو راها غتعيشك فالمغرب مي تما لا. .

آلاف الشباب غامرو بحياتهم فالهجرة السرية وباعو لي قدامهم ولي وراهم باش يخرجو من هنا ظنا أنه تما كيتسناهم النعيم.. أي نعم الظروف قاسية ومنكروش بلي بعض الحقوق مهضومة ولكن التغيير كيبدا من الشخص بنفسه...

من حقك ميعجبكش الوضع فبلادك ولكن غيرو..قرا وشد شهاداتك وسير هاجر بوراقيك فطيارة معزز مكرم، خدم ودمر على راسك وديك ساعة مزيان . .

كل نهار الشرطة كتوقف محاولات كثيرة ديال الهجرة لي تعتق راه لقاوه ولي غرق راه مشا فالبحر وفآخر المطاف تلوحو المواج...باش أش؟؟باش نهرب من البلاد السعيدة لي أصلا مواقفاش عليك. .

•••••

رجعو للدار مهدودين ...محمد راه كون صاب يموت ومايعيش هاد اللحظة. . لقاو سعيدة ودعاء جاو حيت شافو نزهة تعطلات ساعة لقاو الروينة وجلسو محسرين بعدما فهمو أش وقع..

مليكة:(بصوت باكي)أمدرا أش ݣالو ليكم؟؟

محمد:(بالغوات)ݣالو لينا الله يعطي لدلمك الغرق نتي وتريكتك لي ماشفت منهم غا الق& حو**ب . ...خرجتي على ولدك ماعارفينو عايش ولا ميت ..أقسم بالله أمليكة وتوقع ليه شي حاجة حتى نشرب من دمك

سعيدة:محمد نعل الشيطان وݣلس..ماشي وقت هاد الهضرة هادي

محمد:(بالغوات)وايمتا وقتها؟؟حياتي كاملة وأنا صابر ليك و لفعايلك تنوضي باغيا تقتلي ليا ولدي..واش كبدة هاديك عندك؟؟

نزهة:(بعتاب)الله يعطيك هادشي فاش عيشتينا..من نهارك مكرهة مكتشاورييش. .

مليكة ساكتة وماكتهضرش غي كتبكي معندهاش الجهد كون فساعة خرا تنوض وتجادب معاهم لكن الوضع لا يسمح همها هو تعرف ولدها فين . .

خرج محمد متلف الوقت ماخلى لمن عيط وسول و والو تاحد مكيعطيه راس الخيط وفالأخير رجع لدارو مغدد والنعاس مشافوش بحالو بحال لي فالدار لوخرا...بكات مليكة تا شبعات وكلهم كيدمعو عليه مسبقين الجنازة..دوزو ليلة كحلة مشافو النعاس مشافهم الحسرة والحزن على قلبهم فانتظار شي خبار . .

بزز عليها نزهة مشات للخدمة واخا معندها خاطر ماعندها جهد..بالها مع ياسين وشنو كيدير واش واكل ولا شارب...لدرجة تيليفونها مقلباتوش من البارح كي هزاتو لقات اتصالين فقط من ميمون..زفرات وعاودات صونات ليه لقاتو طافي وحطاتو .

الأخير ملي فاق فالصباح أول مادار هي قلب تيليفونو لقا الريزو والو..خرج للسطح ديركت بحرا ماتشد ليه وهو يصوني بقا شحال كيتسنا عاد جاوبات:الو

ميمون:مافعايلش هادو أنزهة؟؟كنصوني ليك مكتجاوبيش!!

نوهة:(عيانة)ما شفتوش كنت مبرزطة. .

ميمون:شنو لي مبرزطك؟؟مال صوتك؟؟

نزهة:(غرغرو عينيها)واصلة بيا العظم أميمون . .

ميمون:(برد صباح كيسوط فيه)مالكي ؟؟شكون قلقك ليا؟

نزهة:نخرج للغدا ونعاود ليك

ميمون:عاودي دابا غنبقا مبرزط. .

نزهة:خدامة ويدخل ربيع غا يلقاني مجمعة ميمكنش. .

ميمون:واخا الالة كلامك هو الكبير..ماتعصبيش ليا راسك كلشي ليه الحل. .

نزهة:إ شاء الله..وقت الغدا نصوني ليك

ميمون:واخا ...بسلامة

قطع معاها وشاف فاص ليه وعينيه مكمشين من البرد.كيتفكر هاد البلاصة وشحال دوز فيها شكون قال سراح يوصل لهادشي..تنهد ونطق:ولله الحمد. .

نزل للدوش غسل وجهو ومسحو وهبط لتحت ونيفو كيلقط ليه ريحة المخمار والمسمن والبغرير و وذنيه كيسمعو صوت مو كتنݣر على عريساتها. .

"شحري اتاي مزيان"

"مال داك الملوي معجن "

"جبدو كيسان جداد"

ضحك ودخل عليهم للكوزينة مدرم بلا مايدير الصوت ماعارف لي ملابساش ولا لي لابسة تانطق:مي

الزاهية:(دغيا فرنسات)وليدي

ميمون:عاطياهم تاني النݣير رخفي شويا رخفي. .

فرنسو العريسات حيت ضراتهم فراسهم على الصباح وتاهو حرك ليهم راسو وقال:صباح الخير. .

الزاهية:وا وليدي التاويل ضروري منو..كي صبحتي؟؟

ميمون:الحمد لله ...فين الدراري؟

الزاهية:فالصالون كيتسناو الفطور. .

ميمون:أنا تما

مشا وهي ترجع تاني للنݣير كرهاتهم فالشغل نوعها حار كيبغي الشقا يكون متول و ولادها يفطرو بكري لدرجة على الريق كتفيق وكتعطيهم الحليب والتمر ..مومو تعينيها ولادها. .

ميمون:(دخل على خوتو للبيت)أ صباح الخير

الكل:صباح الخير

تنشر حداهم كيتفوه وقال:مخدامينش

عبد الصادق:كونجي أخويا ههههههه

براهيم:نوض أ كونجي دابا يجي ليك عبد الرحمان

ميمون:(شاف التمر والحليب)نتوما معامن جات...التمر والحليب عرسان صافي هههههه

منعم:مك أخويا ههههه أش نديرو

ميمون:سعداتكم هههههه

براهيم:نشر رجليك حتا نتا حداها وتشوف هههههه مكاين غا المرضي ديالي. .

ضحكو كاملين حيت هو ليكيعيبها...تحط الفطور البلدي الشهي ونضم ليهم حتى جمال ولد خالو وتجمعو عليه ضاحكين ناشطين مكركرين عكس عائلة نزهة لي محسرين وجالسين على الشوك كيتسناو شي خبار..وهذا هو حال الدنيا واحد فرحان واحد مهموم والغد ما عالم بيه إلا الله. .

فوقت الغدا خرجات تمشى شويا حتى الماكلة معندهاش ليها الخاطر..دوزات نمرتو ودارت الكيت وهي داخلة لقهوة قريبة للخدمة وتسناتو حتى عيات و قطعات ...أما هو كان معاهم عتاذر وناض خرج لبرا هاز تيليفونو مصوني ليها بعد رنات نطق:حبيبة

نزهة:لباس؟؟

ميمون:هاد الساعة لا!!صوتك ماعجبنيش عاودي ليا شنو وقع؟؟

نزهة:غانطرطق بالفقصة أميمون(دمعو عينيها وصوتها تبدل)

ميمون:كتخلعيني عليك...عاودي ليا!!

عطاها الأذن وبدات كتعاود ليه من الأول للأخير وهو كيسمع وكيسول فيها تا سالات ونطق:وا حريرة هادي...هاد مو عندها خرية فعقلها ولا شنو؟؟

نزهة:الله ياخد فيها الحق مانسمحش ليها لا وقعات ليه شي حاجة

ميمون:دابا البوليس ماعطاكم والو؟؟

نزهة:لا والو...غيبداو يقلبو وصافي

ميمون:شوفي أنا غنشوف لا كان فاش نعاونك نجيب ليك غي خبارو

نزهة:منين؟؟كتعرف شي حد!!

ميمون:نسول ليك ولد خالي هو عندو معارف كثار حيت داخل فهادشي ديال السياسة

نزهة:(بلهفة)منساش ليك هاد الخير أ ميمون لا درتيها معايا...

ميمون:(تبسم)الله يهديك واش حنا بيناتنا...ماتفقصيش ليا راسك

نزهة:كي ندير !!!قلبي تشوا عليه باه غايطرطق بالفقصة..مي تسمعها تموت

ميمون:بلي فيه الخير إن شاء الله..تغديتي؟؟

نزهة:معندو منين يدوز..

ميمون:كولي شي حاجة ماتخلينيش مبرزط عليك..أنا نسول ليك ويكون خير شنو سميتو؟؟

نزهة:ياسين البشريوي

ميمون:واخا قطعي أنا نسول ليك . .

قطعات ديك ساعة وصونا هو على جمال لي كان لداخل و خرج لعندو كيضرب فجنابو حيت غليض وقال:مالك؟

ميمون:بغيتك فبلان وتقضيه معايا. .

جمال:(فرنس)بغيتي الشياخ؟؟

ضربو لقرفادتو وقال:الق لاوي...الشيخات نجيبهم للزاهية هنا باش تعواج ليا. .

جمال:ههههههه وانتا هادشي فاش كتبغيني

ميمون:دابا بغيتك فهضرة معقولة...شوف واحد الدري حرݣ من طنجة لسبليون وكان خاصو يكون وصل وموصلش وبغيت نعرفو فين. .

جمال:(ضحك)واش أنا شوافة ههههههه غايكون سرطو البحر. .

ميمون:وا لق لاوي وابغيت نعرف واش شدوهم البوليس ولا شنو؟؟حيت يا إما مات ولا تشد..

جمال:حممم فهادشي راه غيكون أما شدو البحر ولا لقاوه السلطات ولا تشد لهيه فالسبليون . .

ميمون:بالرجولة خدم ليا معارفك وعرف واش تشد هنا

جمال:صبر نشوف واحد السيد إلى بغا يقضي ليا الغرض يعرف غي واش تشد هنا الى ماكانش تشد راه إما سرطو البحر ولا شدوهم فالسبليون ولا وصل نيت غي تالف. .

ميمون:وا غي قضي!

- جبد جمال تيليفونو صونا لصاحبو او بالأحرى معارفو وبقا كيهضر معاه و يسوول فيه تا دخل ليه للموضوع وعلمو باش كاين وقطع. .

ميمون:اشنو؟؟

جمال:ݣاليا صبر نشوف ليك...شكون هاد الولد؟؟

ميمون:كنعرفو وصافي(قشع بنت وقفات حدا الدار )شكون هاديك

جمال:(تلفت)ههههه بنت عم الدراري...سميتها لمياء

ميمون:ممممم

جمال:زوينة ياك؟؟

ميمون:(فرنس)خلي تانحقق فيها هههه

دازت عشرة دقايق صونا ليه صاحبو وقال كالاتي:الدري مخرجش برا المغرب مشدود فطنجة بتهمة الهجرة الغير الشرعية

جمال:إتوب عليك أخويا..اشمن كوميسارية؟

•••••: كوميسارية *****

جمال:يحفظك أسيدي شكرا لهلا يخطيك.

قطع معاه وقال:عندو الزهر باقي ماخرجش..تشدو واقلة

ميمون:باقي عايش بعدا...فين كاين؟؟

جمال:طنجة أخويا راه مشدود غيكمل 24 ساعة ويطلقو تشد البارح فالليل

ميمون:(خرج تيليفونو كيركب النمرة)صافي..

بعد عليه شويا مدوز نمرتها ولاخر جبد كارو كيكمي فيه مراقبو وكيفرنس. .

ميمون:كبيدة

نزهة:(معندهاش الخاطر)أمدرا؟

ميمون:مشدود فطنجة شدوه البارح البولبس وغيدوز 24 ساعة وغتيخرج

نزهة:ݣول والله مأكد؟؟

مبمون:واش غنضحك معاك؟؟ياسين البشريوي شدوه لبوليس البارح فالليل وراه فطنجة ف ""*******

نزهة:(بفرحة)اححح اربي الحمد لله باقي عايش قطع قطع نعلم خويا. .

قطعات عليه بلا متسنى منو جواب فحين هو ضحك ورجع تيلي لجيبو ورجع حدا جمال خاطف منو كاروه...نطر منو وردو ليه سايط الدخان وقال:الله يعفو عليك

جمال:آمين ههههه

*****

نزهة بالفرحة دوزات النمرة ديال محمد لي كان شاد راسو فقهوة كيخمم ويفكر اش يدير حتى رن تليفونو بنمرتها. ..

محمد:نعام

نزهة:خويا ياسين عايش..راه شدوه البوليس فطنجة فالبحر فكوميسارية******

محمد:(وقف)شكون ݣالها ليك؟؟(مصدوم)واش مأكدة؟؟

نزهة:الباطرون لي عاوني...دابا شوف كي دير نمشيو لطنجة نجيبوه راه مشدود غي 24 ساعة الى طلقوه ماغنعرفوهش فين زاد

محمد:واخا قطعي قطعي

نزهة:(طاحت عليها فكرة)شوف عيط لعبد الجلبل هو فالحسيمة قريب يخطف للشمال

محمد:غانعلمو يسبقني وأنا نتبعو ..

نزهة:واخا

تنهدات براحة والتيلي بين يديها حتى تفكرات ميمون مشكراتوش وعاودات صونات دغيا شدها وهي تنطق فرحانة:عرفتي كون كنتي ݣدامي كون طرت عليك بشي تعنيقة فاعلة تاركة

ميمون:(ضحك)هههههههه لا أختي مبغيتش تعنيقة بغيت شي بوسة معنفجة دلمها تبرد ليا ݣلبي لي مشحفاه شهراين هادي. .

نزهة:هههههههههههه تستاهلها على هاد الخبار الزوينة...لهلا يخطيك علي ياربي منساش ليك خيرك . .

ميموت:شهاد الهضرة تاني ديال منساش ليك خيرك..واش حنا بيناتنا

نزهة:(بدلع دغيا رشقات ليها حيت طمنات على ولد خوها)بيناتنا شي حاجة حلوة على هادي. .

ياله بغا يجاوبها سمع صوت مو كتنادي عليه حيت كان باقي واقف برا وجمال بعيد عليه كيكمي باقي:ميمون زيد أوليدي من البرد زيد راه عندنا الضياف

مبمون:شكون أمي؟؟

جمال:(عارفو كيهضر مع شي وحدة)مع لمياء...ديك زوينة لي شفتي ديال ݣبيل

نزهة:(سمعات كلشي)ياك أميمون؟

ميمون:(شداتو الضحكة)واخا أمي هاني داخل(كيتحلف فجمال)دخلي معاك هاد الخنشة

نزهة:عندكم شي وحدة زوينة ؟؟مشيتي تشوف مك ولا تشوف الزين!!

ميمون:بجوج أختي الزين ربي لي عاطيه واش نسد عيني؟؟

نزهة:(بصدمة)يااك؟؟اوا سير الله يعطيك العما

ميمون:(ضحك)ههههههههههه هاهيا فمك أ مو ترمة مكورة...

نزهة:واش نيت كاينة شي وحدة؟؟

ميمون: والله مكنعرفها...كتجي لخوتي بنت عمهم واقلة

نزهة:وغاتݣلس معاها؟؟

ميمون:أش بيني وبينها!!!تواضعي معانا شوي راه مكاينش من غيرك

نزهة:(مغددة)كتبرد عليا بهاد الهضرة السلݣوط؟؟

ميمون:(جابت ليه الضحك)ههههههههههه علاش كضلميني أ نزهة ههههههه أنا تبث تبث ملي مكنقصرش مع الشيخات باقي عرفيني تبت

نزهة:ياكما حسابك كتدوخني بهضرة الشيخات لا...نتا كل سبت فالليل غابر حسابك معايقاش بيك؟؟

ميمون:القصاير كاينين الشيخات لا (كيطنز)هههههههه مكيخدموش فالشتا

نزهة:تهجرو.

ميمون:تواضعي شوية راك نتي لالاهم. .

نزهة:هاد الهضرة مدوخش علي بيها...والله أ ميمون ونعرفك شديتي الجموع مع شي خانزة حتى نقلب عليك وجهي

ميمون:(باقي شاد فيها)يهديك الله واش نصومو؟؟نتي معاطياناش ونصومو ...نصومو على الزين؟؟تبغيها لياا. .

نزهة:(بغضب)ميمووووون

ميمون:أ الواخدة بال ميمون

نزهة:تهضر نهضر تدير ندير ونشوفو شكون يغلب

ميمون:(كيضحك)واغي جربي جربي وتشوفي هههههههه والله يا دلمك حتا نعلقك من شفارك

نزهة:ودابا تشوووف

مبمون:سيري تخدمي أنا غندخل دابا نشرب أتاي ونسخن عظامي غدا جاي لمك تاني وتشوفي الهضرة

نزهة:سير وإلى جمعتي الله يعطيك الحلاقم

ميمون:ههههههه صافي نسبق نشري الدوا...دوخي فحالك

نزهة:بسلامة السلݣوط

ميمون:بسلامة أ مو ترمة مكورة. .

مع قطع معاها مع دخل للدار لقى نيت ديك لمياء بنت فمقتبل العمر زوينة ومقبولة وغي كضحك..سلم عليها عادي حيت ماشافهاش مني كانت باقي صغيرة وجلس معاهم كيضحك و يفرنس بحالا علمات عليه نزهة فحين لمياء حاضياه بإعجاب أكا هو راه ممسوقش كيكركر ويعاود مخصو تا خير. .

فتيحة:(نغزات لمياء)شت عينيك ماشي خوت!!

لمياء:ويلي سكتي لايسمعك شي حد ويحسابو بصح

فتيحة:ههههه وراها بصح نيت..غا جمعي عينيك مصاحب

ضارت عندها وقالت:حلفي؟؟وياك كضل خالتي الزاهية ماكيدير والو

فتيحة:خالتك الزاهية ولادها كلهم مكيتصاحبو مكيجلسو فقهاوي مع بنات(صفقات بيديها بشوية)صفقي على خالتك البهلة ههههههه

لمياء:ههههههههه بنت الحرام حتى طمعت

فتيحة:اوا غي ݣلت ليك ونتي تعرفي ههههه مصاحب اخويتي

لمياء:خيرو فغيرو هههههه

*****

عند محمد لي تاصل بعبد الجليل وخبرو المنزلة كاملة وهو شاد الطريق لطنجة ماهز لا حوايجو لا والو من غير الفلوس والوراق وتافق معاه يمشي يسبقو باش يجيبوه..أما مليكة راه نهارها كحل وعيونها نشفو من الدموع بالفقصة على ولدها..جات مها وخواتاتها عندها لدار أم نزهة مجموعين على التنهاد والدميعات محسرين جامعين كمية من الطاقة السلبية فالدار حتى دخلات نزهة من الخدمة وشافت الدار كتنغل قول العرس..تلقات ليها سعيدة بهمس:جيتي؟؟

نزهة:شكون كاين؟؟

سعيدة:تريكة خالتك كلها هنا فففففف

نزهة:واش معندهم مايدار!!!(تبسمات)لقينا ياسين

إيناس:(كانت واقفة حداهم)بصح!!!!! ماما ماما لقاو خويااا

ناضو كاملين الهجيج لي فالبيت لبرا ومنهم مليكة لي ولات فاشلة ماكتاكل مكتشرب غي كتبكي ..

مليكة:فين فين؟؟(زادت كتبكي)فين ولدي

نزهة:لقاوه فطنجة شدوهم البوليس فالبحر باقي ماخرجوووش وحبسوه..مشا محمد يجيبو

مليكة:(ضحكات وبكات فنفس الوقت)حلفي أختي ههه حلفي ليا

نزهة:واش غنكذب عليك؟؟لقاوه وغيجيبوه. .

كلشي فرح وتهنا وشي كيعنق شي بين مليكة وخواتاتها أما نزهة وسعيدة حافضين نفاقهم

نزهة:فين دعاء؟

سعيدة:مشات أختي ماتقدرش تبقى راك عارفة الدري والوقت تخلطات

نزهة:حسن ليها..أنا ندخل نبدل عليا

دخلات لبيتها بدلات وخرجات لقاتهم ضاحكين ناشطين والتفرنيسة خارجة ليهم ماغتنكرش عزاز عليهم حتى هوما ياسين..ومجمعين على كاسكروط..كي حطات ترمتها نطقات أخت مليكة:عوينة ياختي وخرجات فيه مسكيين

نزهة:(شافت فيها)من نيتك أختي!!!ختك لي مصيفطااه للموت

مليكة:(زفرات)ماكنتش عارفة يوقع هادشي واش أنا نبغي نلوح ولدي للموت!!

نزهة:(باستهزاء)لا ولكن لحتيه...غي هو راه مغتخرجش ليك طريفة، محمد مغدد عليك وماغيدوزهاش ليك. .

الخالة:اوا لواه ماتزيديش فيه كيما هو ولدو حتى هي ولدها

سعيدة:وشكون لاحو هاد اللوحة؟؟

نزهة:مليكة أنا أختي عارفاك معندكش معايا وحتى أنا ولكن ملي يجي ولدك يݣوليك هاد الهضرة جي عندي أنا ولا عند سعيدة وتشاوري واش حنا نبغيو لياسين ولدنا شي حاجة خايبة؟؟ غي نتي سبحان الله عزيز عليك تديري لي فراسك وهانتي جبتيها فراسك. .

سكتو مالقاو ميقولو كيبقا الذنب تاع ياسين ومليكة يجوج..ها الخالة نطقات:اوا الله يهدي ماخلق

كلات نزهة فصمت مجاوبتهاش فحين الأخوات مجمعين ناشطين كيتسناو ياسين يجي وتا نزهة منخلاهم غي كلات مشات لبيتها شادة الجموع مع ميمون وكتعاود معاه كيف العادة . .

******

"طنجة"

عروس الشمال ..والمعبر الى إسبانيا

وصل ليها عبد الجليل قبل من محمد واقف قدام الكوميسارية كيتسنا فياسين يطلقوه بعدما دخل تأكد أنه تما وأنه قربو يطلقوه...حتى كيخرج مشمكر حالتو حوايجو مسخين ونشفو عليه لأنهم نقزو للما بلا الجوع لي هالكو ..مع شافو نزل كيزرب لعندو ونادى عليه باسمو حتا تلفت ليه. .

مشا تعانق معاه كيطمن عليه ونطق:أش لاحك لهاد الحالة أ ياسين؟؟شهاد الحالة وصلتي ليها راسك. .

ياسين:(تنهد)ياربي تدير شي تاويل ديال الخير. .

عبد الجليل:راك مزيان؟؟

ياسبن:دزت من الموت أ خويا عبد الجليل وشفتها بعيني..

عبد الجليل:الله يهديك على راسك هذا ما نقدر نݣوليك زيد زيد مك غتموت بالفقصة هي وباك . .

ياسين:ديني ناكل راني غانطيح تلت يام ماكليت. .

جبد تيليفونو خبر محمد لي تنهد واخيرا براحة حيت عرفو مأمن وقال:ديه ياكل، ياكل فيه السم ان شاء الله. .

قطع عليه ونطق ياسين:جاي؟؟

عبدو:جاي ..زيد تاكل و وجد راسك تسمع الزابور وهاد المرة غاتسكت حيت نتا لي درتيها لراسك. .

ياسين:نهضر مع الواليدة

عطاه التيليفون ركب نمرتها وهوما غاديين فالطريق لشي بلاصة ياكلو فيها...الاخيرة غي شافت نمرة عبد الجليل قفزات وشدات الخط:الو

ياسين:(تغرغرو عينيه)الوليدة

مليكة:(دارو دموعها فررر على حنوكها)ولدي ياااسييين أولدي..لباس عليك؟؟(كلشي حداها طالق وذنيه بلهفة). .

ياسين:بخير الواليدة ماتشوشيش راسك أنا مع عمي

مليكة:(كتنخصص)خلعتيني عليك أوليدي ..كنت غنموت

ياسين:(باقي احساس الموت والشمتة فيه)متخافيش أمي أنا بخير..غنرجعو لكازا

مليكة:الله يجيبك على خير أولدي..بقا مع عمك راه باك جاي ليك..

قطع عليها حيت غلبوه دموعو..ملي كيتفكر أنه المواج كانو من كاع الجوايه ..الفلوكة تقلبات ومعارفينش راسهم فين والعواام فيهم كاملين كاييفشلوه الأمواج..وكذلك إحساس أنه ضيع فلوسو فتجربة فاشلة فهم فيها أنه الموت ماشي اختيار وأنه الحريݣ خصك ليك شجاعة وفقدان أمل فالحياة باش تزعم ديرها. .

داه عبد الجليل ياكل ودخل فداكشي طول وعرض ولاخر غي كيشوف اشمن حالة وصل ليها راسو..خلاه على راحتو تا كلى وناضو ياله طلعو لطونوبيل صونا محمد بلي وصل عطاه النعت وجلسو كيتسناوه بصمت تاحد مقدر يهضر ..تا وقف محمد بطونوبيلتو ونزل منها وتا الآخرين نزلو هو عينيه غي على ياسين لي مقادرش يشوف فيه ...من نهارو ماكيتنفنفش قدامو عاد دابا فاش دارها قد راسو. .

محمد فهاد اللحظة رتاح وعينيه كتفحصو فاشمن حالة ولى ليها..قرب ليه كيزفر بعصبية..ونطق:هز راااسك. .

مجاش ياسين فين يهز راسو تا كانت الدقة قلبات ليه وجهو...عطاها ليه باه بلور تيديه وهلل عليه بالغوات:ترجلتي دابا؟؟قطعتي البحر هاا؟؟

عبد الجليل:(كيبعد فيه)حيد براكة من جهالة..الدري هاهو مابيه والو . .

محمد:(دفع خوه وعطا لياسين لي مهضرش دقة خرا تا طاح)عندوو زهر ولد الق**** ما ماتش..عندو الزهر كيهرس الحجر أما كون مات ورماه البحر . .

ياسين:(الصمت حاني راسو وعينيه تضببو)

عبد الجليل:أصاحبي برد...صافي دازت هاهو مابيه والو

محمد:كون غي متييي(كيتغدد)لايح راسك للموت ا الرعواني ...البحر الرعوااني كيݣدو عليه غي الرجال ...الرجال الحارين ماشي بحالك نتا الرعواني. .

ياسين:(نفاجر فوجهو)هادشي علاش باغي نحرݣ...على ودك حيت ديما حاݣرني(كيهضر مغدد وعينيه حمرين)ديما منقص مني

محمد:(مشا ليه كيسلخ فيه )واازيد هرب زيييد هرب. .حسابك تما غتلقى الحرير مفرش لييك هااا(كيعطيه فالتصرفيق والناس كدوز وتفرج)

عبد الجليل:(شاف الجوقة)محمد....وااا محمد(كيبعد فيه)طلق منو الناس كتفرج

محمد:(كيترعد عليه)طلق نربييييه...نوريه يلعب ورا ضهري..ولكن الجهد ماشي منك الجهد من ديك الخانزة ديال مك. .

دفعو عبد الجليل بعيد ومشا شد فياسين طلعو لطونوبيل وبعد خوه كيهضر معاه كيشوف لاخر فيهم وكيبكي ... محمد كيترعد باغي يزيد يكمل عليه بحال الأم المغربية فاش كيتوضر ليها ولدها كتبكي وتنوح غي كتلقاه كياكل قتلة ديال العصا. .

طلع عبد الجليل لطونوبيلتو وقال: زيد غنباتو فشي اوطيل وغدا نتيسرو لكازا بكري. .

مجاوبوش لي داروه يمشي عليه وفعلا مشاو لوطيل باتو فيه تالغد ليه . .

*****

فاقت نزهة بكري ومشات لخدمتها كيف عادتها مخلية وراها بنات خالاتها بايتين مع مليكة..فطريفها تاصل بيها ميمون وهي فطاكسي بيض ...جاوبات بابتسامة :الو

ميمون:صباح الخير

نزهة:صباح نور مالك فايق بكري

ميمون:شاد الطريق بكري

نزهة:ههه راجع؟؟

ميمون:ااه..نتي فالخدمة!!

نزهة:ياله غادية

ميمون:نشوفك فوقت الغدا!!

نزهة:(فرنسات)واخا

ميمون:ياله سيري. .

قطع معاها خلاها مفرنسة ونزلات حدا خدمتها ناشطة أما هو كان راجع فحالو مع جمال لي لاصق ليه حدا كرو مطلعها عليه:اوا أسي ميمون

ميمون:اوا اسي تبي هههه

جمال:خصنا نتعرفو على المدموزيل!!

ميمون:(ضربو لراسو)نعرفك عليها ولكن تهز عينيك نثقبهم ليك الزلال

جمال:(بطنز)واش نتا عارفني أنا نديرها!!

ميمون:ديرها وتفوتها نتا كتبع غا الزين

جمال:هي شي زين!!!

ميمون:ديها فكرك ههههههه ماشي شغلك

جمال:هههههههه كون هاني منهزش عيني. .

كملو طريقهم لكازا بعدما ماطلقاتهم الزاهية غير بزز باش خلاتو يرجع قول هازا ليه البزولة. .

أما محمد وخوه و ولدو راه شدو الطريق بكري لكازا والصمت سيد الموقف . .

وصلات وقيتة الغدا وخرحات نزهة هازا ساكها مأنقة كيف ديما رشات ريحتها تا طلات البيرو بيها ويديها فيها التيلفون كيدوز نمرتو لي متعطلش باش يجاوبها:وصلتي؟؟

ميمون:دخلت لكازا..نجي ليك حدا الخدمة. .

نزهة:لا انا غنتسناك ف ******

ميمون:واخا

مشات للبلاصة لي قالت ليه واقفة كتسنا فيه كتقلب فالتيليفون حتى هزات راسها وبان ليها نزل من طونوبيلتو مفرنس ليها تاهو مأنق مابقاش هيطوكي بعدما ولات كتجرو يشري الحوايج..

حسو براسهم شحال ماشافو بعضهم والابتسامة معلية شفايفهم..هي توحشاتو وعزاز عليها كثر ملي دار معاها داك الجيست أما هو بلا والو عزيزة عليه..كي قربات ليه وهي طير عليه عنقااتتوو ويديها ضارو على عنقو وتاهو حضنها من خصرها خاشي وجههو فشعرها من جيهة عنقها وكيضحك. .

نزهة:ههه توحشتك السلݣوط

ميمون:(مزير عليها)حتى أنا أمو ترمة مكورة

ضربات بيديها على ظهرو ماساخياش تفرق التعنيقة وهو كثر منها عاجباه التعنيقة ...

"لولا العناق لما كان للشوق معنى"

بعدات فالأخير وشعرها تخربق والضحكة مرسومة على وجهها كتفحص فيه بشوق..هز يديها باسها من الوسط وقال:توحشتك

نزهة:(حمارت بالفرحة)حتى أنا(رفعات يديها كتقاد ليه فحوايجو ناشرة عليه فشوشها)طولتي بزااف؟؟

ميمون:(يديه كيداعبو صبيعات يديها)غا يوماين بلاا باطل ههه

ضحكات وتخشات فيه حشمانة وحتى هو عنقها بحب حاط ذقنو على راسها من لفوق وقال:تزادت فيك الحشمة خليتك مقزدرة هههه

نزهة:الله يمسخك السلݣوط

شد يديها جارها للطونوبيل وقال:زيدي الزين تغداي..

نزهة:(قشعات الزايد فالطونوبيل)معاك شي حد

ميمون:اه..طلعي وسكتي ههه

نزهة:علاش؟؟

ميمون:هاكاك

حل ليها لور طلعات ساقلة سبقاتها ريحتها وضار هو لبلاصتو دور طونوبيل ونطق:نزهة هذا جمال ولد خالي بحال خويا...جمال هادي نزهة. ..

جمال:(م فرنس)مشرفين(بغا يضور يشوف)

ميمون:(قلب ليه وجهو كيضحك)أش غتشوف لدلمك؟؟

جمال:(ضحك)ههههه خليناأصاحبي غي ونعرفوها فوجهها نتلاقوها مرة مرة نسلمو عليها من الصواب . .

ميموت:(كيضحك وسايق بيد وحدة ويد لوخرا كيضور ليه بيها وجهو)متسلمش عليها كاع ههههه ديها فراسك

جمال:(ممفاكش مد يديها )سلام أختي

نزهة:(كونات ورزنات)سلام(سلمات عليه)

ميمون:دابا نݣرضها ليك..مضسراك ديك اليد لمك

نزهة:هههه

جمال:حيد يديك ابنادم...هههههه

ميمون:(زايد كيضحك)هبط فحالك عند برويطتك

جمال:ههههه نمشي نتغدا معاكم ياك أختي معندكش مشكل؟؟

نزهة:لا مرحبا بيك

ميمون:والله لاطاح فكرشك معاها هههههه(وقف)ياله نزل فحالك

جمال:(كيحيد السمطة)حرام هادشي لي كدير..غي نشوف الزاهية وتشوف الى منعاود ليها

ميمون:سير فحالك هههه أجي نتي حدايا. .

نزهة ساقلة علاين طرطق بالضحك عليهم وخاصة فاش نزل جمال وشافتو غليض جاب ليها الضحكة..نزلات ولاخر مشا كتلفت تشوف لطونوبيلتو رونج بيضة..طلعات حداه وهي تطلق ضحكتها العالية وقالت:ههههههههههههه حشومة عليك

ميمون:(حرك طونوبيل)ولد الحرام الزلايلي جاي وكنوصي فيه ووالو باغي يشوف اش ؟؟الله واعلم . .

نزهة:خهههههههه ماخليتيهش تا يكمل فيا الشوفة ههههه

ميمون:لاش يطولها؟؟غي كنضحك معاه عارفو مافيهش هاد البلانات

نزهة:كيبان ضريف

ميمون:الله يعمر ليه الدار راه بحال خويا..هو لي قضى معايا غرض ياسين

نزهة:كون ݣلتيها ليا كون غير شكرتو بعدا.

ميمون:مالو قاضيها بالجميل هههههه بزز على جدو

نزهة:هههههههه شتي نتا راك خضر

ميمون:بصحتي اختي ههههه (شد يديها باسها)رجع ولد خوك؟؟ . .

نزهة:مشاو ليه خوتي واليوم شدو الطريق راجعين

ميمون:أنا بغيت غي نعرف اش وصلو للحريݣ؟؟

نزهة:كيݣول ملقاش خدمة والبلاد معاجباهش . .

ميمون:هه هذا كون عاش داكشي لي دوزت كون نتاحر شحال هادي

نزهة:(بجرأة حيدات يديها من يديه وطلعاتها للحيتو كتلعب فيها)نتا صبار هو لا. .

مبمون:(ستحلى يديها)خصو يجمع راسو...يبغي يخدم!!نشوفو ليه فين يتخشا

نزهة:بزااف عليا هادشي أميمون ههههه راه غنحبك

ميمون:علاه نتي بالسلامة باقي ݣاع مبغيتيني؟؟نزلي فحالك لمك ههههههه

نزهة:(تلاحت باستو فحنكوو بعذوبة)ههههههه هادي ديال البارح حيت جبتي ليا خبارو

ميمون:دلمك سايݣ وكتبوسي فيا خليني غي حتى نوقف..

نزهة:خههههههه نتا راك مضروب

مبمون:شوفي شحال ماقربت ليك (شاف فيها)اري شي بوسة

نزهة:الظلام لي غتشوف ههههه

ميمون:فين تبغي تمشي تاكلي؟؟

نزهة:معرفنش

مبمون:نديو الغدا للدار عندي!!

سكتات شوية كتفكر وهي تنطق:واخا

مبمون:شتك مابقيتيش خايفة ولا والدار هههه وكدا

نزهة:ههههههه عارفاك مباسلش

ميمون:كذووب والله حتى كذوب...باسل اختي ههههه

نزهة:الله يمسخك السلݣوط..

وقف حدا مطعم نقي داير بحساب معدتها وهز الفلوس من لبواط أݣون ونزل يجيب ليهم الغدا مخليها رابطة الإتصال مع جليل كتسول فيه فين وصلو حتى طلع وهي تقطع دغيا وقال:معامن كتهضري؟؟

نزهة:مع خويا سولتهم فين وصلو!!..

مبمون: ممم هضرو معاه ميعاودش والى بغا يخدم يجي عندي نخدمو فالمحل خاصيني الدراري

نزهة:يكون خير ياربي. .

تحرك لدارو ديركت ونزل هز الغدا فيد ويد لوخرا دورها عليها محتاضنها وقال:بيميني الى توحشت زينك

نزهة:(ضاحكة)علاه داك الزين لي كان عندكم البارح مكفاكش!!

ميمون:(على نيتو)لمياء!!دريوشة حتى هي

نزهة:(كمشات فيه عينيها وطلعو لسانسور)سبحان الله

ميمون:هههههههه مالكي منوية راه باقي صغيرة

نزهة:هي دابا أنا شارفة ؟

شد يديه عنفج ليها وجهها وخشاها فيه:صافي سكتي ههههه

دخلو للدار وهو يتنهد:الواحد.مكيرتاح غي فدارو

نزهة:(كتحيد الساك )علاش لهيه ماشي دارك؟؟

ميمون:دار مي هههه أنا هادي هي داري

نزهة:نتا فلوسك مشاو ليك غي فالديوور(كتحيد السبرديلة)

ميمون:بغيتيهم يمشيو ليا فالحوايج مثلا...أنا سبقت الدار فاش نسكن ودرت لخوتي فين يسكنو والباقي ملحوق ماشي نبقا عايش فالكرا حياتي كاملة. .

نزهة:تفكيرك ديال الشلوح هههههه الدار لي فالقلعة ديالك؟؟

ميمون:(سبقها للصالة حاط الغدا)اه

نزهة:كنت عارفاها ديالك ههههه حسيت..شحال من وحدة عندك؟؟

ميمون:ثلاثة وربعة تالمحلات وجوج أراضي ..وعندي نزهة ههههه

نزهة:ههههههه بصحتك حتا بنزهة هههه جيب طباسل فاش ناكلو

ميمون:لاش الطباسل؟؟نوضي جيبيهم أنا مامولفش

نزهة:(وقفات)أويلي ميمتي..صبر

مشات للكوزينة حفيانة وعينيه مفلتوهاش وقال كياكل ففريتة:هاكاك أمو ترمة مكورة . .

ضحكات وزادت جابت الطباسل وجات كتحط وتهضر:راه مازوينش ناكلو هاكا...الحاجة خاص تكون متولة

ميمون:(شد يديها باسها)نتي متولة انا معنفج هههه

جلسات قريبة ليه وبدات كتاكل ومجمعين وأغلب هضرتهم ضحك مكيدير حتى حاجة من غير الضحك وتزلال تا سالاو..ناضو غسلو يديهم وقالت:شحال فساعة؟؟

ميمون:باقي الحال

جرها معاه شعل التلفازة وتكا وجرها حداه معنقها وكيتفرجو ..دايرها بين يديه حاطة ظهرها على صدرو ويديهم مشابكين..كتلعب فزغيبات لي فمرافقو وصباعو

نزهة:ميمون نسولك!!

ميمون:سولي الزين(باسها فحنكها)

فرنسات ليه بخجل:عمرك بغيتي شي وحدة؟؟

ميمون:كنبغي مي وجدة الله يرحمها هههههه

نزهة:ههههههه واهضر الزمر ههههه عمرك بغيتي شي وحدة؟؟

ميمون:مممم اه

نزهة:(بفضول)إمتا؟؟وشكون هادي؟؟

مبمون:(ضحك)قصتي فشكل خهههه بغيتها وأنا عندي 17 لعام

نزهة:هههههه داكشي تالمراهقة

ميمون:معرفتش هههه مهم كنت باغيها

نزهة:(بحماس)عاود ليا ههههه

ميمون:أش نعاود ليك؟؟داكشي قديم راه سنين لي دازت عليه

نزهة:واغي عاود ليا عفااااك وهاحنا مجمعييين

ميمون:أري بوسة ونعاود ليك

نزهة:ههههه واهضر

ميمون:كنت خدام مع واحد سيد فحانوتو وكانت هي كل صباح كتجي كتشري من عندي نص فيه الفرماج والكاشير..نهار لول حليت فيها فمي..البنت زوييينة عاطية العين لي شافها كتعجبو وكتبان كبر من عمرها مع غليضة..كل نهار كتقدا من عندي وكتزيد تعجبني كتجي هي وصحاباتها يدوزو للمدرسة وكنبقا حال فيها فمي كي الضبع ههههههه حتى وليت مولفها كل صباح..حتى غبرات عاود وأنا غي كنتفكرها كنضحك ...واحد نهار جات عندي كتبكي ݣالت ليا سلفني فلوس ..هزيتهم من جيبي وسلفتهم ليها بالفرحات عليا . .

نزهة:هههههههه سخي مع كلشي ماشي غي معايا. .

ميموت:نتي كلشي ديالك(باسها فنواضرها)دازت ولغد ليه جات عندي فالصباح خدات نص ديالها ولكن مكانتش غادية للمدرسة ..ملي سولتها علاش كنتي كتبكي ݣالت ليا ݣلسوها دارهم من المدرسة ومغتبقاش تخرج..تيقتها وعزات عليا وبقات كل نهار كتجي تقدا فالصباح الحليب كنبقا مجمع معاها وكضحك معايا حتى طحت ...وليت نحلم ونصبح ونمسي بيها ولي ݣالتها ليا كنديرها...كنت كنتخلص النص نعطيه لخالي يخبيه والنص ليها حيت كتعاود ليا مفحالهمش وداكشي (ضحك)هههههه واحد النهار والو ݣلت ليها نتلاقاو دارت ليا خاطري تلاقينا فواحد الجريدة صغيرة اوا مشيت تلاقيتها

نزهة:(قاطعاتو)وشبعتي بوسان مع راسك ههههههه

ميمون:بحالا علمك الله ههههههه كانت أول مرة نقيسها وآخر مرة وتما تزعطت فيها نييت..عقل الصغر وشنو ݣاليا

بقينا مصاحبين والهضرة غي من صباح لصباح ومرة مرة نتلااقاو وهي كتجبد مني الفلوس واحد نهار غبرات حتى لقيتها تزوجات هههههههههه . .

نزهة:(ضحكات)ههههههههههه أويلي ههههههههه

ميمون:ونزيدك حصلوها دارهم معاه داكشي باش خرجات من المدرسة وكانت كتصرف على صاحبها من فلوسي ههههههههه

نزهة:خهههههههههههه ناري على موقف ههههههه اوا وشنو درتي؟؟

ميمون:أش غندير؟؟كمدتها فݣلبي ولات كدوز مع راجلها شويا مع ولادها وهاكا مشات حتى درت محلي ومبقيتش شفتها

نزهة:ههههههههه حب الصغر مكيتنساش

ميمون:وايييه

قرصاتو فيديه وقالت:ولكن نتا خصك تنساه شنو سميتها؟؟

ميمون:سميتها نزهة هههههههههههه

نزهة:(تلفتات ليه رجع وجهها فاص لوجهو)حلف

ميمون:والله حتى نزهة هههههههههه

نزهة:(جاتها الضحكة)مالك صݣع هههههه

ميمون:هانتي كتشوفي هههههه مشات نزهة جات نزهة وربي كبير..

مد يديه تحسس خدودها بحنان وعينيه على عينيها وقالت:كنتي كتبغيها بزاف؟؟

ميمون:اه(قرب لاغي المسافة)

نزهة:(حسات بشنو غيدير وتوترات)حمم ودابا؟؟

ميمون:(وضع نيفو على نيفها)لا

نزهة:(صدرها طالع نازل ويديهم تشابكو)حلف. .

تبسم ليها وعينيه منيمين فيها ومهضرش حدو شد ذقنها بيديه رافعو لجيهتها وطبع قبلة أولى على شفايفها وظغط عليهم بحالا كيوجدهم لسلسلة القبلات الجايا. .

غي شافها متحركاتش وهو يرجع كيقبل فشفايفها بهدوء..من ديما مكيزربش فلول بحال شي حيوان مفترس فاش كيشد فريستو كيكنزز عليها حتى كتموت عاد كيتلذذ بيها..قبلات خفيفة كتنزل عليها كي العسل ويدها قاست لحيتو مقرباه لعندها ..قادها شوي حتا جات مليوحة عليه وتسحكم فوجها عاد بدا رحلتو فقبلاتو السخونة..بشوية عليها حتى حلات فمها وتنهدات وبسرعة توغل فمها وشرك معاها ريقو ويديه على ظهرها كدوز بشوي ..نيوفهم تبجغو وصدرهم كيطلع وينزل مسابقين فسباق القبل شكون يشبع قبل لاخر. .

هو كيبوس بحر جهدو متفنن ويجر فشفايفها كيف بغا ويديه كيدوزهم بزربة على ظهرها وفجنابها لي كيورك عليهم ..أما رجليهم راه مخشيين فبعضهم..هزها شوي حتا ولات فوقو وكمل فتقبليو ليها مغمضين عينيهم كيتسمع غي لاق لاق ديال البوسة..

ترفعات نزهة مع يديه وفمو وحتا ريحتو الفطرية لي ولات بحال النيكوتين عندها..هو راه المعجب بها دائما وأبدا فكاع حالاتها..زعمات يديه ونزلات لترمتها لي ديما كيشوفها وتمنى يحط عليها يديه حتا حان الوقت اليوم..مع قاسها عجنها بيديه ونزل عليها بيديه بلهفة وفمو مفارقش فمها هي لي مجارياه فالقبل مبينة ليه بلي فهاد العلاقة حتا هي عندها رغبة من جهتو

عطاها جزء من الثانية باش تنفس مفارق فيها شفايفهم ورجع من جديد كيلتاهمهم كي الوحش ويديه مبقاوش يغاو يطلقو من ترمتها حتى حسات هي بالقسوحية تحتها عاد وعات شويا وحبسات البوسة بشوية عليها وفمو تابعها باغي ماكثر..مع نطقات بنشوة:فين غاديين؟؟

ميمون:(رجع كيبوس فيها ويهضر وفمو هرب ليه لحنوكها ولوجهها كولو حتا نزل لعنقها كيبعد فالشعر وهي تلوى كي الحنش بالتبوريشة)هداي

نزهة:(خشات وجهها فعنقو حشمانة)مممم

ميمون:(تنهد ويديه دوزات شعرها لجنب كيلعب فعنقها)مسختيش

نزهة:(بصوت منخافض )حتى أنا

ميمون:(قرصها فترمتها)وعلاش حبستيني؟؟ هااا(خرج ليها راسها من عنقو وجها حمر وفمها كيبري)كنزيد نغرق فيك بهاد الحلاوة

عضات على شفايفها بدون ماتحس وقالت:حتى أنا

ميمون:(قبلها بلطف وكيهضرو ونيفو لى نيفها)نقصي من العضان طيبتي ليا فمي ..

ضحكات بصوت منخافض وطارت عليه كتمثل بشفايفها بلي كتعضو فحنكو وهي غي كتبوسو بدلع مخليا حجرو بوقف وقال:زيدي ق وديها على راسك هههههه (محبسهاش ويديه تحت ظهرها)

نزهة:(عضاتو تبصح)متخسرش الهضرة

ميمون:(باسها بقوة فراسها )لي تخسر ليا خاطر حبيبتي معنديش

نزهة:(شافت فعينيه ديركت)عزيزة عليك بزاف أميمون؟؟

ميمون:(كيلعب فشعرها مرجعها لحضنو ناعسة فوقو )بزااف حيت مكتخسريش ليا خاطري

نزهة:ونهار نخسرو؟؟

ميمون:غنكون درت ليك شي حاجة ههه (بتساءل)مرتاحة معايا أنزهة؟؟

نزهة:(بهدوء)بزااف..كتعاملني زوين بزاف وكتهلى فيا

ميمون:(براحة)خليك معايا كيفما عرفتك..بالي مرتاح من جيهتك ومكرهتش نكمل معاك لديما

نزهة:(ضرب قلبها بجهد)كيفاش لديما؟؟

ميمون:(تبسم)كيفما فهمتيها .. يكون خير إن شاء الله

نزهة:(تبسمات بحنان عارفاه كيمعني على الزواج)إن شاء الله

ميمون:شنو الزين عجباتك النعسة راه زيرتيني أنا

نزهة:(ضحكات)هههه الله يمسخك خههه..

قلبها شوي تا تكات حداه وناض من حداها كيسوط وقال:الله ياخد فيك الحق هههه. .

بقات متكية على ظهرها والإبتسامة الخجولة مفارقاتش فمها بتاتا..ديما كتجيها النشوة من ورا قبلاتو أي نعم مقاريش وخضر لكن فاش كيشدها كيحسسها أنها أنثى..غي تعنيقتو كترجع فيها الروح كتحسها خارجة من أعماقو..فاش كيكونو فوضع حميمي كيكون ميمون آخر..ميمون الرجل المسيطر لي كيعيشها إحساس مدوزو ليها بشفايفو ..ميمون لي كيمدح كل إنش فيها وكيستمتع وهو كيدلع أنوثتها. .

دخل لبيتو حيد حوايجو لفوقانيين كيسوط رجع حمر ومباغيش يزرب عليها..بقا عريان من الفوق كيسوط ويعاود فالأخير داز للدوش هاز فوطتو ولاح ليها كلامو:بلاتي ندوش. .

سمعاتو ضحكة عالية عارفاه لاش داخل وهو يجاوبها من دوش:ضحكي أ مو ترمة

نزهة:ههههههههه بصحتك الدوش

ميمون:بعدي مني أختي ..كتشعلي العوافي وتخليني بوحدي

نزهة:اوا الصبر أخويا أش دير

ميمون:هاهيا فمك

سقلات كضحك عليه..ناضت كضور فالدار حفيانة غي بتقيشرات وكتشوف ديكورات وهي تنطق مخاطباه بصوت عالي: ميمون منين كتاخد هاد الديكورات؟

ميموت:من عند واحد السيد صاحبي(تخشا تحت الرشاشة)

نزهة:غزااالييين

ميمون:بحال بوستك الزين

نزهة:كب الما عليك يفوتك الحال..متبقاش تضور بساحتي

ميمون:تسكتي ولا نخرج ليك

نزهة:ههههههه ياكما خصاتك شي حاجة أحبيبي ههههه(كطنز)

ميمون:خاصني العصا هههههه

سكتات مخلياه كيدوش حيت سمعات تيليفونها كيصوني مشا لقات سعيدة وهي تنطق بصوت عالي :ميمون متهضرش ختي كتصوني

شدات الخط مجاوبة:الو

سعيدة:ختي..كي ضليتي؟؟

نزهة:الحمد لله...شنو جاو؟؟

سعيدة:قربوو أختي ياله صونيت لجليل ݣاليا قربو...خفت أختي يجيو يضاربو ليا هنا. .

نزهة:واهاديك ضروري منها..غا متحضرش مي وهوما يضبرو لراسهم (حسات بيديه ضارو على خصرها ووجهو مخشي فعنقها فازك وهي تبسم)

سعيدة:أختي أنا شادني غي ياسين نشوفو معطاتنيش خاطري نخليه. .

بعد ليها ميمون الشعر على عنقها وباسها فيه تا تلوات بالتبوريشة:ههههه بقاي حتى العشية نتلاقاو أصاحبتي

سعيدة:نتي فالخدمة؟؟

ميمون:(باغي يجننها..يديه جراتها حتا تلاصقات معاه)

نزهة:اااه(كتعوج باغيا تفك منو خايفة تفرشها الضحكة)شوفي حتى نجي ونهضرو ممسالياش دابا

سعيدة:سيري أختي الله يسهل عليك ياربي

نزهة:آميين(قطعات)هههههههه واتا طلق مني

دورها لعندو وجات عينيها على أ ق ود منظر ممكن يثير غريزة أي أنثى ..منظرو وهو عريان من الفوق...شعرو و وجهو فازݣين بطريقة مغرية وسموريتو لي زادت بانت..وماشي أي سمورية ديال الفراعنة..ملامحو بتاتا واش مغربية . .

تبسمات باعجاب منباهرة من المنظر لي قدامها ومقدرات تنطق بوالو ..حدها رمشات بزربة تحت نظرتو لي مكتبدلش ليها..نظرة الإعجاب اللا متناهي..عضات بدون شعور على شفايفها تا نقض عليها بقبلة جامحة خلاتها تغمض عينيها من جديد ويديها تحطو على يديه لي شاد بيهم وجهها..خنق فيها النفس بيها وطلقها مشرون:غا ديال التعنفييج

نزهة:هههه مالك طالق عليا عضلاتك هنا(ضور يديه على خصرها جاذبها ليه وهي حطات يديها على صدرو العاري)

ميمون:غا ݣلت نجي نبرزطك هههه..معامن كتهضري؟؟

نزهة:(كتقيس فكتافو الفازݣين)مع صاحبي هههه(قرصها من جنبها)تا طلق

ميمون:(زيرها بقرصة)صاحبك لمك ههههه لقيتيني غشيم ياك هههههه

نزهة:(كتنتر وتضحك)طلق هههههه ضريتيني حراام عليك

ميمون:(رخف عليها)معامن كتهضري؟؟

نزهة:ومع ختي هههههه كثار فيك التسوال أميمون معامن كتهضري معامن كتخرجي!

ميمون:شنو منسولش؟؟

نزهة:(بابتسامة)كيجيب ليا الله مكثيقش فيا

ميمون:لا...أنا ماشي مشكاك غي كنبغي نعرف غي نهار نشم ريحة شي راجل هضرة خرا

نزهة:ههههههه أش دير؟؟

ميمون:(باسها فذقنها)نكويك

ضرباتو لصدرو وطلقات منو وقالت:الله يمسخك هههههههه

ميمون:ههههههه اوا الله يعميها ليك..نمشي نلبس قتلني البرد

نزهة:وانتا لي جاي عندي مسفح كي الفجر(دارت يديها على خصرها معوجة وقفتها)منخافوش

ميمةن:(ضحك وضربها لكرشها )تجمعي لمك.

زاد يلبس عاطيها بضهر وهي تنطق:هذاك لي فظهرك وشام عقرب ؟؟

ميمون:اااه

نزهة:مممم إمتا رتيه؟؟

ميمون:(صوتو بعيد فبيتو كيلبس)غا الصغر والزيغة ودرتو..بغيت نحيدو

نزهة:حسن ليك تحيدو..(كتلبس فسبرديلتها)زيد وصلني مشا علي الحال

ميمون:صبري نلبس

تسناتو حتى لبس وخرج عندها داير طاقية لقاها جالسة كتسناه وهي تقول:ياختي وشكون مصاحب مع الزين ههههه (بلكنة كازاوية حرة) تشاا تكايس علينا اللوين

ميمون:(كيلبس صباطو)اه اه أش كديري للتعناب هههههه

نزهة:(هزات صاكها)بصحتي(باستو فحنكو بعفوية)عندي علاش. .

تبسم ليها ودارها تحت باطو معنقها ويديه كتهز سوارت وقال مقبلها فحنكها:زيدي أ مو ترمة. .

خرجو مشادين كيضحكو ويتعابزو بحال الدراري الصغار ..شد بيها الطريق لخدمتها وهز يديها قبلها من الداخل ناشط وقال:نرجع نديك لداركم

نزهة:لا غتكون الدار عامرة (عاود باس يديها)كليتي هاد اليدين. .

ميمون:كيعجبوني بزااف...رطبيين بلا قياس

نزهة:(بدلع)ومبانش ليك خاصاهم شي حاجة؟؟

ميمون:شي عين وحاجب هههههه

ضحكات نزهة:ههههههه مالك قديم ههههه

ميمون:كنبغي نشري شي حاجة و مكنعرفش ههه راني مناسيكش

نزهة:هه عارفة أكبيدة ديالي(تلاحت باستو فحنكو وبقات حدا خنشوشو )عارفاك كتفكر فيا

ميمون:(مستحلي أنفاسها فوجهو وسايق)ديما ...شنو بغيتي ناخدو ليك؟؟

نزهة: غي كنضحك معاك(رجعات لبلاصتها)

ميمون:لا حشومة عمري جبت ليك شي حاجة

نزهة:هههه ومعرفتش

ميمون:شنو لي كيعجبك وكيفرحك؟؟(حك راسو ببلاهة)

نزهة:ههههه أنا الزين ثلاثة تالحوايج كينشطوني..الحمام ..والحوايج نشريهم وبوووستك الزين ههههههه

طلق ميمون ضحكة غليضة على ديك بوستك وهو يضرب فيديها مكركر كي الشياخ وقال:هههههنههههههه واعرة عندك هادي أبنت الهم

نزهة:هههههههههههه وشنو نكذب؟؟

ميمون:على هادي تستاهلي لي حليتي عليها فمك ههههههه

نزهة: هههههههه بصحتي

ميمون:كتعرفي للتحلوين هههههه الى بقيتي هاكا راه تاكليني

نزهة:واش يبقا ليا الى كليتك ههههه الله يخليك ليا

ميمون:آمين هههه ويخليك حتا نتي أمو ترمة

وصلها لخدمتها وهي تهز صاكها وقالت: بسلامة

ميمون:تهلاي..

نزهة:(مدات ليه حنكها)زيد سلم لمك. .

ضحك وقرب باسها فحنكها ونزلات كتضحك ومشا هو لحال سبيلو ناااشط ماشط كيف لا وهو مع وحدة منيما جاها كيلقاها..محلونة كتعرف تهضر يقوليها هادي تردها ليه تعنيبة وتطلع ليه المورال..باختصار كتعرف ليه.

****

وصل محمد رفقة عبد الجليل وياسين لكازا وموقفو تال قدام الدار الكبيرة..نزلو شي مكيهضر شي، و شي مكيشوف فشي، مع بغا يصوني عبد الجليل حلات مليكة حفيانة طارت على ياسين جراتو كتعنق فيه وتبوس وتقلب فيه وعيونها باكيين أما هو عنق مو بحرارة كأنو لقى الملاذ الأخير ليه. .

داز فيهم محمد وخوه طالعين لفوق فين على الدخلة كانو خواتات مليكة كيتسناو وسعيدة حتى هي رفقة أم مليكة.

عبد الجليل:ختي(باس يديها)كي دايرا؟؟

سعيدة:الحمد لله ونتا؟؟فين ياسين؟

محمد:(خزر فخواتاتها)اش كديرو نتوما هنا؟؟

أم مليكة:اوا اوليدي جينا نشوفو ولدنا.

مهضرش بقا مخنزر جر كرسي ريح فوقو مفرق رجليه كيستناها تطلع باش يتحاسب معاها..الوحيد لي قشع شنو فراسو هو خوه تنهد وبقا واقف حتى طلعات مليكة معنقها ياسين لي خوالاتو طارو عليه يبوسو من هنا ويعنقو من لهيه ..وكيداير أولدي كي درتي؟؟الحمد لله لي بقيتي لينا ..وحتى سعيدة كتقلب فيه بلهفة مطمنين عليه ..أما مليكة موسعة ابتسامتها بولدها وخاطبات إيناس:زيدي بوسي خوك.

ايناس:(عنقاتو)توحشتك أخويا

ياسين:حتى أنا أختي

محمد:(بصوت غليض)ياله الى ساليتو عرسكم زيدوو لهنا نتحاسبو

سعيدة:حممم ياسين فيك الجوع؟؟

أم مليكة:أشمن حساب أوليدي؟؟

ناض من بلاصتو توجه لمليكة لاحها على مها وقال:غتهزي بنتك وغتخرجو عليا من داري وديها معاك

أم مليكة:ويلي يا محمد أوليدي شهاد الهضرة؟؟ايييه غلطات ولكن الحمد لله خرجات سالمة

محمد:(تفركع عليها)خرجات طريفة على ديلمكم نتوما...عندكم زايد نااقص هاد البرهوووش(هز يدو بردة فعل غي متوقعة صلاها معاه)مامسوق ليه حتاحد فيكم من غيري أنا

مليكة:(بانفعال دارت ياسين وراها وخرجات فيه عينيها)مضربش ليا ولديي كتسمع...مضربوووش..كنتي كتزحم علييييه؟؟

بالغدايد عطاها حتى هي تصرفيقة تا ردها كتف ياسين وصاح فوجههم:قا** ودي عليا نتي وولدك أبنت الق**** !!!اش رابح أنا من دلمك من نهار خديتك

حبيبة:أ جمع يديك الحيواان...كتضربها مكاين مخزن فالبلاد

ناضت البلبلة خواتاتها و مها كيغوتو ويدافعو عليها وحلاقمهم خارجين خسر عليهم كلمة وحدة:العدول لي جمعنا نهار لول يفرقنا...من اليوم أ مليكة حراميتي عليا...المرا لي تشفرني ماتبقاش مراتي واخا نكون شمااتة...(بالغوات)خرجي عليا نتي وهاد تريكة الق& *حاب ديالك..(جر إيناس )خرجي براا عليييا ومن اليوم نتي مطلقة وبالثلاث وحرام عليا ديني الى رجعتك. .

يتبع...

‎