خيط الريح الجزء التاسع

جلسات كتصايب فشعرها فبيتها مع سميرة كيضحكو حتى نطقات:خصني شي زيف

سميرة:علاش؟

نزهة:ميمون مبغانيش ندخل لعندهم بشعري حيت غندير الزيف

سميرة:هههههههههههه ݣولي والله...صافي غتحجبي

نزهة:واهانتي تشوفي..ݣاليا هو لي مانتناقش معاك فيه

سميرة:كيجيك زوين الصراحة..ديريه اختي أشمن لون بغيتي

نزهة:قفطاني فالقهوي جيبي ليا بيج ويكون خفيف

سميرة:واخا الالة هههههه

ناضت تجيبو ليها وهي تقول مع راسها نصوني ليه ودارت هوت باغلوغ..كيصوني حتى قرب يقطع ونطق بصوتو:الزين

نزهة:نسيتيني أحبيبي؟؟

ميمون:كنسالي شغالي باش نسالي ليك هههه كي راك

نزهة:على مزيناتي جايا من الحمام فسرة(ضحكات)خهههههخهه

ميمون:احححح على دلمها كتشهي فيا...

نزهة:هههههههه فين كاين؟؟

ميمون:جبت للواليدة شي سخرة ملي جات وهي كتصيفطني من هنا لهنا..نمشي ندوش باش نجيو

نزهة:غتلحقو الغدا ؟؟الطناش تلقاكم هنا..

ميمون:إن شاء الله متنسايش الزيف

نزهة:ههههههه واعيقتي هههههه من البارح ونتا الزيف

ميمون:كاينين الرجال أبنت الحرام..يشوفوك اليوم بلا زيف غدا بالزيف ولاش هاد المرض؟ غطي شعرك

نزهة:واعنداك تݣوليا جذبي ليا بيه هههههه

ميمون:ههههههه غتلوزي وغتجدبي وغديرهم كاملين ياله سيري فحالك

نزهة:هههههههه الله يمسخك سير فحالك

قطعات عليه وكملات شعرها والتفرنيسة غا خارجة فوجها..دخلو عندها كاملين منهم نيت عبد الجليل لي مبسم وقالت:كون غي جا محمد

إيناس:بابا راسو قاسح

عبد الجليل:خليوه على راحتو ..مباغيش يتفهم ليا والله

سعيدة:طبعو بحال با الله يرحمو

دعاء:ماهو طبع هذااك ...خالي صعيب(شافت فايناس)حسن عوانك معاه..

إيناس:(بحنية)واخا هاكاك بابا ضريف

ضحكو كاملين وجرها عبد الجليل عندو وقال:شي واحد كيحامي على محمد ههههههه

إيناس:والله أعمي حتى ضريف كيخلص ليا السوايع وكيعطيني كل سيمانة 300 درهم بلا خبار ماما هههه ..

حفيضة:(كتحك راسها)سبحان مبدل الأحوال..فيناهوما خوتك؟؟

إيناس:غيجيو الميمة..

جبدات نزهة كتصبغ ضفارها بلون بارد مأدب وهي تنطق سعيدة:واش عندك العرس؟؟

نزهة:خليني أختي نفرح براسي

عبد الجليل:أنا برا نمشي نشوف ولادي

حفيضة:نقصي شويا أبنتي من الزواق متزربيش

نزهة:(مركزة على ضفران رجليها)هذا هو لي غناخد والى مخديتوش غيديه سيدي ربي ههههههههه

سميرة:هههههههههه الماسخة لوخرا..نوضو لبسو حتى نتوما سعيدة فين راجلك؟؟

سعيدة:ناعس

وهذا هو حديثهم على الضياف..الدار كتشعل مطلوق فيها عود الند وريحة الطياب مشمومة..نزهة مع قرب الوقت وهي تبدا كترعد وتفتف وتعراق..

أما فبيت ميمون راه نفس اللومبيونس دايرة ليهم الزاهية لي واجدة بكري لابسة جلابة اخر مكاين فالخياطة ومزررة ذهوبات والعينين مجبدين بالكحل الحر مع مرات خوها خديجة لي حتى هي لا تقل عنها أناقة بالزي المغربي..

"الجلباب المغربي"بخياطتو الأصيلة والمتوارث من جيل لجيل وحداهم عبد الرحمان بزي مغربي عبارة عن جلباب وسلهام مغربين كيمثلو الفخامة المغربية لي كتميز المغرب..

الزاهية:تا فين الدراري

عبد الرحمان:مشاو يكملو السخرة

خديجة:جماال(كتنادي)وا جمال أتا طلق راسك

الزاهية:معرت أش كيديرو تما..

فبيت ميمون كان كيدير عطرو الرجولي لي كان من اختيار جمال بحال اختيارو للبسة..خوه فالوراق وفالمواقف..جمال وميمون كتربطهم علاقة قوية ديال جوج تلخوت محطوطين فالوراق لكن ماشي نفس الأم او الأب..عزيز عندو وياما ميمون وقف معاه وحتى هو كذلك..

أمام مرآت طويلة واقف ميمون بلباس زويين بينو وسيم لدرجة كبيرة..سروال ديال التوب وقاميجة بيضة فاتح ليها الصديفات وطاوي الكمام حتا بان زغبو الأسود الكثيف فيديه السمرا..

وكذلك من جيهة الصدر كانو زغيبات كحلين عطاوه منظر خاص..لونو الأسمر المصري المنعاكس على جاذبيتو خلاوه يبان عارض أزياء مع طولتو وتكضيرتو وكتافو العراض..هو علامن غنات الباعزية"والى جا كتافو عراض وديال السلهام"..شعرو ماشطو عادي وطالعاه الفرحة ..

جمال:(هاز سباط)شد لبس وزيد ݣدامي نخطبو البنت

ميمون:(جلس كيلبس)مبانش ليك زدت فيه باللباس؟

جمال:ههههههه غادي تقدا اللحم أولد عمتي..راه غادي تخطب الزين(جاه السباط لوجهو)احححح

ميمون:جمع عينيك هاني كنوصي فيك من هنا ..تهز عينيك فشي مرا نعاود لمراتك القديم والجديد

جمال:هههههههههههه أعوذ بالله أنا كنبغي مراتي منشوفش فالعيالات(بتساؤل)عندهم الزين؟

ميمون:هههههههههه ها لي ݣلت(صونا تيليفونو)ختي..

شد الخط وجلس كيهضر مع هدى المصرية هي تدوي فشرق وهو يجاوب فالغرب لكن لي فهم بلي هنأتو ومكرهوش كون حضرو..تبسم وهو كيقطع معاها وقال بعفوية:هاد هدى صدقات ضريفة هههه

جمال:هههههه وانتا تعرف..باقيين كيسولو؟؟

ميمون:ديما..ملي مشاو وحنا كنهضرو عادي ..مكرهوش يحضرو ولكن جاهم على غفلة..

جمال:العرس إن شاء الله(طلعو ونزلو وصاح)وااعمتي زغرتي

ميمون:هههههههههههه دوز ..

خرجو بجوج لعندهم غي شافتو الزاهية وهي تطلقها بتزغريتة وبدات بافتخار كتنݣف فيه:تبارك الله عليك أوليدي...عريس صافي مسرار الله يحفظك بحال خوتك

عبد الرحمان:الله يبارك

خديجة:الله يحفظك من العين أولدي

جمال:(بابتسامة عريضة كيوريهم عرض جسمو)وأنا؟؟

خديجة:ومسرار ولدي نييت هههههه

عبد الرحمان:ياله طلقونا نمشيو

ميمون:فين الدراري؟؟

جمال:(كيصوني ليهم)زيدو نزلو نلقاوهم فالطريق..

خرجو كاملين فرحانين وناشطين ..نزلو لتحت وهو يلوح جمال السوارت لميمون وقال:سير سوݣ رونج

ميمون:ونتا؟؟

جمال:الميرسديس أحبيبي..مي با أجيو معايا

ميمون:مي أجي معايا..

مشا لرونج كحلة كتبري ديال لاجونس ديال جمال بغاه يمشي بالكبرانية حل لباب لمو وجلسات ترضي عليه ..وتحركو تابعينو هو لي غادي ناشط ومخصو خير وتيليفونو كيدوي مع منعم لي علمو بالعنوان..

الزاهية:منسينا والو؟؟

ميمون:لا كلشي ديناه

مسافة الطريق و وقفو قدام دار نزهة قد قد مع خوتو لي مخالطين فكازا..رونج ومرسيديس فحي شعبي بالإضافة لجوج كليو راه غيعطيو العين وكلشي غينتابه ..نزلو تحت أعين المارين والجيران..وبداو كيهزو من الكوفر شنو جابو من سكر وشكلاط وحتى اللباس لي أصرات الزاهية متدخلش بيديها خاويين دخلات بلبسة كاملة لنزهة من ساسها لراسها..

منعم:(كيشوف فالحي)واحسابني كضحك معانا ملي ݣلتي ******

براهيم:الناس تفركسو هههه جات معاك التهلية

عبد الصادق:ههههههه لي شافك يغلط فيك ميحسابهمش راه نتا هو لي كتخرج بالسورفيت.

ميمون:اوا جايين نخطبو نكبرو بالمرا هههه

صالح:وا كبرتو بيها نيت ملي كاسيينها ههه

الزاهية:ومال عيالاتكم دخلت عليهم بيدي خاوية..كلهم كبرت بيهم عساك مرات المرضي..

عبد الرحمان:قاديو من الهضرة وزيدو توكلو على الله.. حممم هادي هي الدار

ميمون:اه

عبد الجليل وزوج سعيدة و يونس و ياسين هوما الرجال لي تكلفو..نزل عبد الجليل حل الباب بعدما صونا لابس مبوكص حتى هو مكبر بختو..تبسم فوجهم وقال:أهلا وسهلا

عبد الرحمان:(بابتسامة)السلام و عليكم

عبد الجليل:(تحنى سلم ليه على يديه)سيد الحاج؟؟كيداير لباس عليم

عبد الرحمان:(عجبو الحال)الله يكبر بيك أولدي ويرضي عليك

عبد الجليل:زيدو مرحبا بيكم. .

دخل ميمون هو لول مزنݣ ومع سمر ولى بحال شي فاخرة لا زندتيها..سلم عليه باحترام ودخلو خوتو سلمو رفقة جمال أما النسا باس ليهم عبد الجليل يديهم احتراما..رحب بيهم بالقول أشد الترحيب وطلعو للدار للفوق وعينين خوتو على الدار وكلهم دايرين نظرة استغراب حيت الدار مصلوحة وكتشم فيها ريحة الند..كانو كيظنو غيجيبهم لشي وحدة عادية..

فباب البيت تلقى ليهم زوج سعيدة مرحب بيهم حتى هو رفقة سعيدة وحفيضة لي تكلفو بالنسا

تسالمو وترحبو بيناتهم..

الزاهية غي مفرنسة فرحانة مقاداها فرحة..ميمون جاه شعور فشكل عمرو كان محط الأنظار من قبل خاصة فاش سلم على أم نزهة ..رحبو بيهم ودخلوهم للصالون البلدي الكبير مفرش بحقو وطريقو والنقا ضرب الزاهية على الشعا..كلها كيعبر عبارو وكلها كيضرب تخمامو فراسو..

جلسو كاملين كيرحبو بيهم ويتعارفو بيناتهم..

عبد الجليل:مرحبا بيكم أسيدي(شاف فالحاج)نهار كبير هذا

الزاهية:(نقزات كتهضر فرحانة)الله يكبر بيك أولدي نتوما مالين الخير

عبد الرحمان:(بادب)أنا عبد الرحمان خال ميمون هادي مراتي خديجة وهذا ولدي ميمون . .

الزاهية:وأنا موو و هادو خوتو الله يرضي عليهم. .

زوج سعيدة:الله يبارك مرحبا بيكم ونهار كبير هذاا

حفيضة:مرحباا ببيك الالة أش سماك الله

الزاهية:الزاهية الالة ونتي

حفيضة:حفيضة..هادي بنتي سعيدة وهادو ولاد ولدي يونس وياسين

براهيم:الله يبارك...

حديث النسا والرجال راه باين داز كولو تعارف والحال والأحوال..سميرة راه كتعمر أتاي وتفرنس مع إيناس لي غطير باش تطل على طونوبيلات من الشرجم أما نزهة راها كتعراق وتصفار قول عمرها تخطبات..كتسول فإيناس بهمس:شحال هوما؟؟

إيناس:(كطل بشوي)بزاااف هههه جوج عيالات وحدة فيهم عجوزتك وكلهم كيضحكو..

سميرة:(كتقاد الصينية وتولها)زيين أبنت الحرام كيبان مݣضر وعامر متعطيهش 41 ..

نزهة:(كتنش على راسها)مݣادة اأنا؟؟جيت زوينة؟؟

إيناس:(كضحك)جيتي قطة أ عميتو ههههه..

دخلات سعيدة وقالت:ويلاه سربيو أتاي(شافت فنزهة وتبسمات)مالكي..

نزهة:مخلوعة هههه كي كيبان ميمون؟؟

سعيدة:لوين ههههه زوين زوين حتى خوتو زوينين تبارك الله لوايس كثار..

نزهة:باقي ستة تالبنات هههههه

سميرة:الصينيه واجدة نوضي أنزهة

نزهة:ويلي ميمتي نخاف نعطر هههههه غي زيدو غيجي وجهي فوجهو غنتمسخ بالضحك..

سميرة:ههههههههه زيدي زيدي حدري راسك ماتشوفيش فيه..

سمات الله وهزات الصينية المغربية ببرادها كيبري وكيسان تقليدين لابسة قفطانها لي جاي منحوت على جسمها لي مؤخرا تقاد بلاصال نقصات الكريشة شوي وتبرزات التر مة لي متلفة ميمون.. بشال خفيف على راسها مغطي شعرها باينة غي القصة وماكياج ناعم كيعكس شخصيتها المتفننة فالذوق..وراشة ريحة كتسلب وأول واحد شمها هو ميمون لي ميمكنش ميعرفهاش من ريحتها وهو كل ماعنقها كيشمها فيها حتى تقيدات فبالو....

هز هو لول نظرو ليها وفيكساهم بحب و إعجاب كانت أول مرة يشوفها بالحجاب..تنهد بشوية و عينيه غياكلوها وكيف ديما كيطلعها وينزلها باعجاب..

هي مرا كتعرف تعزف على أوتار قلبو..كتختار اللحن بعناية ومع كل رنة كتخليه مزعزع عليها ومتشوق ليها..ماشي غي ميمون لي هز فيها عينو إنما حتى البقية..عائلتها راه مبسمين أما خوتو راه حلو فمهم آخر مكان على بالهم ميمون خوهم لي حاسبينو ما كيفهم فوالو راه يطيح فهاد الزين..كلهم صكاناوها من لفوق للتحت..من غير جمال وعبد الرحمان لي مطولوش الشوفة

منعم:(فوذن صالح)أش هادشي؟؟خوك طاح على الزين..

صالح:سكت راني باقي مصدووم(بابتسامة)زويينة بزاااف

براهيم:(عينيه تكمشو فيها كيعبرها بعينيه)مممم معرفتش كيدار ليها..

الزاهية فرنسات ليها بحالا لقات الكنز وغي شافتها حطات الصينية وجايا تسلم عليها و هي توقف ضاحكة جراتها كتسلم عليها من وجهها تتبوس خلاتها تضحك بزز..

وتقول:ههههه تبارك الله ماشاء الله الله يحفظك يا بنيتي(شافت فحفيضة)لالة حفيضة تبارك الله والدة الزين

نزهة:(رتاح قلبها)الله يكبر بيك أخالتي(باست يديها)

الزاهية:(شافت فميمون)ماكذبتيش..ههههه زيدي أبنتي جلسي

نزهة:حمم نسلم(بصوت هادى)..

مشات نزهة باست يد عبد الرحمان لي قال:الله يرضي عليك

دازت سلمات على خوتو لي بقا غي كيشوفو فيها مضهشرين كيفاش ميمون ياخدها هاكا وهوما لي كانو جايين عوالين على بنت عادية..

وصلات عند لي كيضرب ليه قلبها..تبسمات حشمانة عرفات لشافت فيه غيمسخها الضحك وغتفرش اللهم مشافتش فيه كي مدات يديها ليه وشدها وهي تجرها ومشات سلمات على خديجة لي مبسمة بارتياح:ماشاء الله فنة أبنيتي

نزهة:(بصوت هادئ)ربي يخليك أخالتي..

عبد الجليل:الحاج كب أتاي ومرحبا بيكم..

تكب أتاي تحت أنظار ميمون لنزهة ..كيعيا يحيد عينيه عليها مكيقدرش عجباتو بالفولار وحمقاتو بيه..عينيه ضاحكين كثر من فمو كيحك على فخاضو بشوية مبعد التوتر ومكرهش ينوض يضرب ليها شي بوسة ويتخلوا بيها..

سعيدة:(ناضت كتحط طباسل صغار وتدور طبسيل الحلوة)مرحباا بيكم

الكل:الله يبارك فيك

الزاهية:(مبسمة لنزهة)كيدايرا أبنيتي؟؟صحيحتك بخير

نزهة:(شافت فيها مبسمة)الحمد لله أخالتي ونتي بخير؟؟كيدرتي مع الطريق؟

الزاهية:الحمد لله لي جرا فالخير ما يعيا وأنا جيت اليوم ندير لولدي دارو ونخطب ليه مراتو(مبسمة فوجه حفيضة لي غتهرب ليها التفرنيسة)

حفيضة:مرحباا بيكم

تفرق أتاي وهوما مجمعين فمختلف المواضيع الا ميمون ونزهة لي جاتهم اللقوة هي كتحاول متشوفش فيه وهو حاضيها من رجليها لوجهها..همس فوذنو جمال:براكا الزلال غتفرش مع مك

ميمون:(تلفت مبسم)دخل سوق راسك ههه شرب أتاي

جمال:نغز با يهضر خلاص باش تديرو الرؤية الشرعية

ميمون:زعما؟؟

جمال:وادارها ليا أنا هههه

ميمون:(نغز خالو)حممم هضر أخالي..

حط عبد الرحمان كاس ديال أتاي وقال:اوا أسيادنا شركنا الطعام نهضرو فاللازم..سي عبد الجليل(شاف فزوج سعيدة)سيد الحاج جينا اليوم أنا وختي طالببين راغبين فبنتكم لالة نزهة لولدي ميمون على سنة الله ورسووله..

الزاهية:والى بغات خاطركم تناسبو معانا نديرو نزهة فعينينا ونحسبها بحال وحدة من بناتي

عبد الجليل:الله أودي..وجوهكم وجه الخير

زوج سعيدة:سيد الحاج أنا منعطيك مانحيد ليك..نزهة نسيبتي ولكن بحال بنتي..نسولوها هي واش قابلة

عبد الرحمان:أش ݣلتي أبنتي؟؟

نزهة:(تمسخات بالحمورية)حممم بلي فيه الخير

جمال:(هز يديه فوضعية الدعاء)نقراو الفاتحة(نغزو ميمون)حممم

عبد الرحمان:نخليوهم يهضرو ويذاكرو بيناتهم ونقراو الفاتحة ..

زوج سعيدة:ماݣلتو عيب..سعيدة ديهم يهضرو ويتبعو السنة

وقفات سعيدة ونطقات:ايييه سنة الحبيب..سيرو أختي للبيت وذاكرو..

ناضت نزهة رجليها شابعين عرق سبقاتو بطا عليها إمتى تفلت فحين هو بقا جالس حتى نغزو جمال وقال:تنوض ولا نوض؟؟

وعى وناض تابعها للبيت لاخر فرحان قرب يزعرت..كي دخلو للبيت طلق الخامية وهي تضور عندو وطلقات الضحكة بشوية سادة فمها وتنشر حتى هو كيضحك بصمت..كيبانو ليك بجوج كيضحكو بمود سيلونص

ميمون:(شد يديها باسها من لقاع بعدما جمع الضحكة)ديتي قلبي بهاد الزيف

نزهة:(مبسمة )حمقتيني اليوم(حطات يديها كتقاد ليه الكول ونظرتها اعجاب)خديت الزين..

بدون شعور مد يدو حطها على خصرها مقربها ليه وعينيه مايلة فعينيها:منكونش زوين بحالك(قرب باس جبهتها)الله يحفظك من العين ..سمعتي لهضرتي ومطيحتيش بيها..

نزهة:(أكتيفات مود تحلوين ونيمات عينيها فيه ويديها مهداتش من اللعب فالكول)معاشش لي يطيح كلمتك الأرض..واش أنا عندي منك عشرة

ميمون:(فرنس وقرب ليها لاغي المسافة)شنو الالاهم..متعطينيش بوسة؟

نزهة:هههههه لالا..(بصوت منخافض)نتا لي واش متعطينيش بوسة

ميمون:يهديك الله راني دغيا كنسيح ههه

مدات يديها للحيتو لعبات فيها وقالت:فرحتي بيك اليوم قداش..

ميمون:(خدا نفس اليد وباسها من القاع وحطها على صدرو)الله يحفظك ليا ألالة نزهة..خرجي دابا نقراو الفاتحة ونهضرو على العقد

نزهة:(تبسمات بحنان)واخا..

ميمون:(باسها فراسها)جيتي زوينة اليوم تاني

نزهة:هاز تيليفونك؟؟

ميمون:(خرجو من جيبو)هاهو..

شداتو دارت كاميرا سيلفي و وقفات قدامو رافعة يديها الفوق وقالت:عطيني شي ضحيكة قتالة

ميموت:(ضحك تا بانو السنين وعنقها بيد)هاهيا..

شدات التصويرة وقالت:الله اوا هاهيا سوفونيغ هههه

ميمون:واخا معرفتكش أش ݣلتي ولكن جيتي زوينة

قرصاتو فكرشو وقالت:يخليلي الكبيدة..ياله دوز ومتبقاش تشوف فيا غنضحك ليهم فوجهم

ميمون:واخا هههه

خرجو مبسمين وفرحتهم مكتقدرش بالكلمات..كي شافوهم تبسمو خاصة الزاهية لي مقاداها فرحة مكرهاتش تدي معاها نزهة بكثرة مكتسنا زواج ميمون..

عبد الرحمان:أمدرا تافقتو؟

شاف فيها وشافت فيه باستغراب هوما مصيفتينهم يتذاكرو ورجعو مقالو والو..ميمون حمحم وقال:ݣلنا نديرو عقد وعرس فنهار واحد

عيد الجليل:وعلاش مديروش العقد والعرس من بعد

خديجة:اييه عندك الصح..لاش العقد تالعرس

زوج سعيدة:عندكم الصح(شاف فنزهة)بنتو ليا مفاهمين ..نقراو الفاتحة وديرو عقد وعاد العرس بلاش من الخطبة وديك الجماعة لي مكتجيب غي الهضرة..

نزهة:(بخجل)لي ݣلتوها أعزيزي أنا موافقة

ميمون:حممم إن شاء الله(هز يديه)نقراو الفاتحة..

تهزو اليدين وبدا الحاج كيقرا سورة الفاتحة دلالة على البركة والتيسير..كلشي هز يديه بدون إستثناء مشاركينهم فرحتهم.. مع قولة آمين تبادلو المباركات والتهاني مع بعضهم فرحانين ليهم ..

تحط الغذا مشكل فالأول بالدجاج محمر مطيب من طرف حفيضة طاحو فيه عميين دارو جوج طبالي كلشي كياكل ويتنبن أولهم جمال لي كيخشي فوجهو ممسوقش

جمال:(بهمس لميمون)هاد الدغميرة واعرة..

ميمون:سكت المصيبة

تهز الدجاج وتحطات البسطيلة وهي تنطق حفيضة:هادي بنتي لي مصايباها

الزاهية:تبارك الله على الحادكة ديالنا

نزهة:بصحتك أخالتي

طاحو فيها عاود عميين مناضوش كيتشاركو الهضرة والكلام وختموها باتاي ودوازو من جديد مجمعين فشتى المواضيع وميمون عينيه على نزهة بلهفة عجباتو مجمعة مع مو بهدوء

الزاهية:خدامة أبنيتي؟؟

نزهة:اه اخالتي

الزاهية:الله يسر..نوصيك وصية أبنتي تهلاي ليا فولدي راه درويش وحنين الله يرضي عليه..متلقايش معاه المشاكل..

نزهة:لهلا يحشمنا..

سميرة:حتى نزهة راها حنينة وبنت الناس غيتفاهمو..

الزاهية:هادشي لي بغيت أنا غي ولدي يكون مرتاح هو الكبير فخوتو وشهوتي نزوجو..

حفيضة:تبارك الله والدة خمسة

الزاهية:لا سبعة عندي جوج بنات كي السعد الله يرضي عليهم

حفيضة:تبارك الله وباه علاش مجاش؟؟ولا ميت؟؟

الزاهية:معندوش باه عندو غي أنا وخالو..

نزهة:(عارفة البلان)حممم باه ميت أمي ياله مات

الزاهية:(تنوغشات بذكر حسن)ياله مات وعندو خواتاتو من باه

سعيدة:تبارك الله..

فمجمع الرجال لي غير بعيد عليهم كان عبد الجليل كيتناقش مع ميمون نقاش أخوي وكيتساولو

عبد الجليل:فين ݣلتي ليا عندك المحل؟

ميمون :ف***** سول على ولد المصري وجي مرحبا بيك عند خوك..

عبد الجليل:(ضحك)كيعيطو ليك ولد المصري

عبد الرحمان:باه مصري ماشي مغربي

عبد الجليل:بصح؟!!مزيااان السكنة فين عندك؟؟

ميمون:ف****

عبد الجليل:واييه زوين تما واخا غالي..

ميمون:اوا القدر سكنت تما..

عبد الجليل:واييه أنا نيت ساكن فالحسيمة واخا كازاوي

ميمون:فاش خدام؟

عبد الجليل:la climatisation

ميمون:(بعفوية)هي أش؟

نقز عبد الصادق:داكشي تالfroid

ميمون:(ضحك)هههههه كتبانو عليا بالفرونسي ههههه درجو

صالح:اوا كيفما شرحناها مشكيلة هههههه

جمال:(عارف كيحشيو ليه الهضرة)داكشي ديال لكليما

ميمون:اااه مزيان الله يسخر أسيدي..

عبد الصادق:سيادنا نتحركو

عبد الرحمان:هذا هو الوقت

عبد الجليل:باتو عندنا

ميمون:(وضع يدو على صدرو )الله يكبر بيك..غنمشيو حتى تخلي ليا نمرة تيليفونك باش نذاكرو على وراق نزهة

عبد الجليل:واخا قيدها..

ملاها عليه وصونا عليه وناضو مودعينهم تسالمو مع بعضهم وصل ميمون لنزهة سلم عليها بيديه وهي حلفات لشافت فيه تا زاد كيضحك..شكروهم على حسن الضيافة وخرجو معاهم تال لتحت إلا نزهة لي بقات كتطل بشوي من الشرجم ومعاها إيناس لي غتحماق على الحديد..

إيناس:عمتي واش ديالو؟؟

نزهة:لا ماشي ديالو هههه احححح على الزين

إيناس:غزاااال فن أنا حمقني

نزهة:ههههههه دعي معايا

إيناس:الله يسهل عليك أعميتو..

طلعو لي نزلو وتنشرو فالبيت يديرو محادثة نميمة أكيد من تقاليدنا العريقة..

حيدات نزهة الشال والضحكة هاربة ليها ونطق زوج سعيدة:الناس الله يعمر ليهم الدار أنزهة الله يكمل عليك ابنتي

حفيضة:حتى مو مرا زيينة وفمها كينقط غي العسل

سميرة:زينين مافيهم مايتعاب وجاو بالكبرانية..شفتي شنو جابو ليك

نزهة:ماشفتش

عيد الجليل:حتى السيد الله يعمر ليه الدار...بياع وشراي ف****** (ضحك)ومصري

نزهة:ههههه باه لي مصري هو كابر هنا..

زوج سعيدة:كيبان معقول وراجل نيت الله يتمم بالخير

عبد الجليل:خصو غي يتهلا أنا غنسول عليه

حفيضة:سول أوليدي وشوف أش كاين واخا كيبانو الناس مزيانين

زوج سعيدة:الله يعاونكم هاد الساعة نزهة الله يثبت الغرس ابنتي..

ناضت باست ليه يديه وقالت:الله يكبر بيك أعزيزي شكراا..

تسالمات مع ختها لي مشات لبسات جلابتها ونزلات مع راجلها..

سميرة:فين يونس وياسين؟؟

عبد الجليل:شدوهم ولاد الدرب بالهضرة(ناض لبيتو)

سميرة:(شاعلة فيها العافية)نوضي نشوفو أش جابو ههههه

حفيضة:هههههه العافية صافي

مشات نزهة جابت شنو جابو وفرشاتهم فالأرض كتحل وتكتاشف ..لقات جوج ثواب تجلابة راقين وغالين..لقات صندالة طالون بلدية وكذلك بواطة حمرة فيها سنسلة رقيقة..

نزهة:ذهب(قلباتها)والله حتى ذهب

سميرة:سخي عندك ههههههه (شداتها)فنة ياختي

إيناس:زوينة أعميتو..(بهيام)حسدتك ههههههه

نزهة:تسمعك مليكة تعواج ههههههههههه

إيناس:ههههههههه غا كنضحك

كملو هضرتهم على منوال ميمون ونزهة مقاداها فرحة قربات تطير حيت داز اللقاء زوين..

أما فالطرف الآخر كان ميمون ومو فطونوبيلتو وهي كتهضر وتشكر فنزهة:تبارك الله زويييينة(بمزاح)عرفتي تختار..زوينة وعامرة

ميمون:ههههههه مصوابة

الزاهية:مصوابة ويديها بنينة..الله يرضي عليك أوليدي ويتمم ليك كلشي بخير

ميمون:آميين. .

فسيارة خوتو راكبين بربعة نطق صالح:اوا هانتوما على ميمون..جابها بنت المدينة..

براهيم:وزوييييينة تبارك الله ههههه هذا غي لي مقاريش

عبد الصادق: هو لي صدقات ليه ختارها راسو كيتنا حنا لي الزاهية لي ختارت..

منعم:عطاتو الوقت بفلوسو ودارو يجيبها كيفما بغات تكون

براهيم:اخايت على الوقت..كون عندي فلوسو نتزوج ربعة

منعم:اوا دار ربي خير ههههه ..

وصلو للدار وطلعو ضاحكين ناشطين إلا خوتو لي كيتصرفو عادي..كي جلسو نطقات خديجة:ختاريتي وعرفتي أش ختاريتي..البنت زوينة أولدي وحادݣة ولبيبة

ميمون:الله يحفظك العزيزة

جمال:إمتا العرس أبا ميمون..هانتا شوف الشيخات على حسابي

عبد الرحمان:والله لا جبتيهم الك#$ لب..

جمال:عدو النشاط أبا نتا ههههه

براهيم:فين عرفتيها أميمون؟

ميمون:كتقدا من عندي مع كتصايب الحلوى للناس

الزاهية:تبارك الله حادݣة ماشاء الله..

خديجة:الى هي لي مطيبة راه زين

منعم:(بسخرية)خدامة غي فالحلوة؟؟صافي؟؟أنا حسابني موظفة

ميمون:لا خدامة فالشركة ديال ربيع راجل أحلام..

عبد الصادق:واهي السيدة قارية

ميمون:ااه

عبد الرحمان:باينة فيها..كتعرف تهضر الله يتمم أولدي كلشي بالخير..جمع وراقك وديرو العقد..

الزاهية:ندير لولدي عراسية فاعلة تاركة القلعة كاملة تهضر عليها

عبد الرحمان:نوض أنا نجدد الوضو..

ناض مخليهم وهي تنطق خديجة:واخصنا نشمرو ونوضو نتقداو ليها ندهزوها

ميمون:حتى نديرو العقد ونعطيكم الفلوس

الزاهية:إن شاء الله

جمال:(تنشر كيتعݣز)مبروك أخويا..تستاهل

ميمون:(ضحك)الله يبارك فيك(ناض )أنا نمشي نطل على المحلات

براهيم:فين وصلتي فالمصبنة؟؟

ميمون:غدا غنحلوها..وبعدو نبدااو

براهيم:ممم مزيان..

خرج يقضي شغالو وجلسو هوما مقرقبين الناب واخدين راحتهم فالدار حيت مولفين كيجيو عندو..

خرج من دراو ناشط و التبسيمة باينة فوجهو مع طلع لسانسور دوز نمرتها وتسنا صوتها يوصل قلبو مع تشد الخط نطق:مو ترمة ديالي

نزهة:هههههههه السلݣوط ديالي

ميمون:ربيتني أمو ترمة وليت تايب معاك هههه

نزهة:غي لامبغيتش توب

ميمون:(خارج من العمارة)أنا غناخد الزين ومنتوبش هههههه

نزهة:(بارتياح)عرفتي أ ميمون شحال فرحانة هههههه شكرا على داكشي لي جبتو ليا. .

ميمون:بصحتك الالهم باقي نجيب ليك ماكثر(طلع لطونوبيلتو)أشنو الزين تجمعي وراقك

نزهة:(بدلع)وا بلاتي عليا ماتزربنيش

ميمون:هانتي غتبداي تقحبني عليا هععهههه(ديمارا)كيفاش متزربنيش أنا كون لقيتك تجي معايا دابا

نزهة:ههههههههههه صلح فمك السلݣوط

ميمون:ماتلاقايش هاد السلݣوط غدا؟؟

نزهة:(بدلع)وعلاش ماشي اليوم؟

ميمون:(تبسم وهو سايق)مكرهتكش اليوم قبل من غدا هههه غدا نسالي مع المصبنة ونخرج أنا ولالاهم ..

نزهة:خاصني نخرج نتقدا شديت كوموند جديدة وخصوني حوايج لفولار(لاحت ليه الهضرة)ميمون حبيبي ديالي باغيني مستورة

ميمون:ميمون باغيك كيفما نتي غي كيغير عليك

نزهة:اححح أولد المصري شفت غيرتك هههههه

ميمون:تقاي شري هههه غدا ندوز عليك

نزهة: إن شاء الله أحبيبي..شنو ݣالت مك؟؟

ميمون:كلشي عجبتيه أبنت الحرام ههههه زوينة مع راسك

نزهة:هههههههههه بصح؟؟

ميمون:والله مّي أصلا ماشي شي وحدة لي كتشرط فالزين بغاتني غي نتزوج..

نزهة:مسكينة ݣالت ليا ولدي درويش تهلاي ليا فيه ههههههههه معارفاش هاد الدرويش كيشيش وكيشيخ

ميمون: (ضحك) ههههههههههههههههه أ بصحتي الالة..دابا غنولي نزهى عليك أنزهة..

نزهة:خصك غي تعرف ليا ههههه

ميمون:(وصل)قطعي نسالي شي شغال ونصوني ليك

نزهة:واخا أحبيبي

*****

فاليوم الموالي بعد ليلة نعسوها بجوج فراحة وهناء ..

هو كيتسنا يعمر دارو وهي كتسنا تحقق حلمها وتلبس

"خيط الريح"..

فاقت بكري نهار لحد فطرات مع دارهم بالضحك والتكركير وتا ولاد خوتها معمرين عليها..ناضت علماتهم بلي غتخرج تقدا وغمزات سميرة باش تطمر ليها وتا لوخرا فهماتها ومهدات ليها الطريق..

لبسات عليها سروال جينز وشوميز طويلة شوية ساترة لور وقصيرة من القدام مبينة ليهونش والكريشة منفوخة شوية عقداتها لاحت عليها فولار غي رماتو ودارت ماكياج ناعم وخرجات مودعاهم ..

خدات طاكسي و ما وقفاات حتال قدام محل محمد لقاتو حال عارفاه غيكون فيه حيت عندو كوموند صحيحة وديجا قايلها ليها..جمعات النفس وطلقاتها كتشجع تهضر معاه..

أي نعم ضاربو ودارو اليدين ودعا فيها ودعات فيه لكن كيبقا خوها وكتبقى ختو والخاوة حدها الدنيا وماعمر الدم كيولي ما.

مع دخلات كتقلب عليه بعينيها حتى لقاتو حداها مخنزر كيف ديما وقال:أش كديري هنا؟؟

نزهة:(تلفتات ليه)جيت نهضر معاك

محمد:(جرها بعيد برا المحل)مبقات هضرة سيري فحالك

نزهة:(رطبات هضرتها)خويا ماتقسحش راسك..البارح خصيتينا غي نتا ..كلشي كاين إلا خويا محمد محشوماش عليك.

محمد:كنتي باغياني نجي نحضر للمنكر..ݣلستي حتى عيتي وتاخدي هذااك عروبي..

نزهة:ومالو العروبي أمحمد؟؟مابنادمش هذاك العروبي راه داير ليا كي الما القليل وماعمري شفت منو العيب مالك مقسح راسك راه العمر كيهرب أخويا..

محمد:(مخنزر)عمري هرب ولي عطا الله عطاه سيري من هنا تزوجي ولا ضبري لراسك..

نزهة:ماشي بنت الحرام باش نتزوج وخويا لي بحال با مكاينش(شدات فيديه)الى كنت عزيزة عليك جي حضر للعقد ديالي..أنا عارفة غلطت ومكانش خصني نتضارب معاك ولكن لي غلب يعف وأنا جيت نݣوليك سمح ليا وديرني بحال بنتك أخويا ومتخلينش بوحدي فنهاري..

بنفس النظرات بقا كيرمقها بحالا كيقوليها ساليتي ياله دوخي فحالك بقات كتشوف فيه عالله يلين قلبو شوية لكن ملامحو كانت جامدة ..تنهدات وحنات راسها و زادت فحالها.. لايحة ليه الكورة و مخلياها عندو..حتى هو بقا كيشوف فيها حتى غبرات وهو يدخل لمحلو يستأنف خدمتو..

أما هي دوزات نمرة ميمون عالماه بالمكان لي غيتلاقاو فيه وخدات طاكسي للوجهة...

مسافة الطريق نزلات وياله غتصوني ليه وهو يكلاكصوني عليها ..قشعات طونوبيلتو ومشات مبسمة عندو كي طلعات نطق:السترة زينة أزينة البنات..

نزهة:(باستو فحنكو)هههه باش تعرف خاطرك غالي عليا

هز يديها باسها بحب وقال:الله يحفظك ليا..فين نمشيو؟

نزهة:غنمشيو ناخدو مانلبس راه حوايجي كاملين ماسخين

ميمون:(تحرك)ههه عارفاهم ماسخين ..منين كتقداي؟؟

نزهة:من *****

ميمون:واخا..فين كنتي؟

نزهة:مشيت شفت خويا وهضرت معاه

ميمون:(غوبش)وعلاش؟كتقلبي يسلخك!!!

نزهة:(تنهدات)راه خويا أ ميمون واخا نضارب معاه واخا نديرو اليدين كيبقا خويا الكبير..البارح مادازتش ليا بلا بيه..

ميمون:(شاف فيها ورجع شاف الطريق)لي سمعك داك نهار يݣول هادي مكتحملوووش..

نزهة:فاش كنتعصب راه كنݣول أي حاجة وفاش كنبرد كنولي نندم..

ميمون:واش ݣاليك؟

نزهة:سمع ليا وݣاليا سيري فحالك..درت لي عليا وصافي الباقي عليه

ميمون:مديريش فبالك غيبرد ويرجع يهضر عادي..(جرها باسها فحنكها)هاد جوج زغبات باقي مدخلوش للإسلام ..

نزهةه:هههههه شوية بشوية ..راه صبحت دايراه مافاهمو والو أنا ومعندي حتى شرويطة ديالو

ميمون:احنا نشريو ليك الالة ...بداي تجمعي وراقك انزهة باش نعقدو

نزهة: (فرنسات)واخا..فراس خواتاتك؟

ميمون:(تبسم)فراسهم فرحو مساكن بزااف غيجيو للعرس

نزهة:مرحيا بيهم

ميمون:عندك باسبور ؟

نزهة:لا

ميمون:صايبيه الزين غنبغي نطلع لمصر تمشي معايا

نزهة:حلف ههههههه من غدا نطلعو

ميمون:سبقي وراق العقد عاد نشوفو مشية مصر يقدرو يتعكسو الوراق..

نزهة:علاش؟؟خواتاتك تما يديرو ليك وكالة باش تجي

ميمون:شلا مايتعاود فداك البلان..مورا موت با لقيت شي حوايج برزطوني..

نزهة:أشمن حوايج؟

ميمون:أنا فراسي با معاطينيش كنيتو حيت عندي كنية خالي و محطوط فسمية العزيزة مرات خالي فاش جا با مد ليا شهادة الميلاد مصرية فيه ميمون حسني

نزهة:يعني دابا عندك جوج سميات؟؟

ميمون:اه

نزهة:(بخوف)الى ساقو الخبار غيقرقبو عليك اميمون راه جوج كارطات

ميمون:لا..أنا معنديش الكارط ديال مصر عند غي شهادة الميلاد بحالا ݣلتي هنا عقد الإزدياد ولاكارط ديال المغرب يعني مغربي ماعنديش ديال مصر..

نزهة:سولتي على راسك؟

ميمون:اه..مشيت عند واحد المحامي وشرحت ليه وݣاليا غدير تنازل لوحدة فيهم حيت تقدر تعيش بجوج سميات عادي ولكن خصك تكون عندك سمية وحدة باش خدام نضت درت تخلي على المصرية وعزلت راسي على البنات

نزهة:ولاش هاد التخلويض من لول؟

ميمون:الله يرحمو هو لي دارو..فاش مشيت للقلعة سولت مي بدات كتصفار وتخضار هي وخالي وعطاوها ليا فوجهي..با لاحني هنا ومخلاش ليهم وراقيا دا معاه كلشي ملي ناض خالي بغا يدير ليا وراقي باش ندخل للمدرسة..هضر مع با وݣاليه عطيني توكيل نصايب ليه وراقو باش تطلع ليه الجنسية المغربية ناض با شد العكس معاه ݣاليه لا..مي فاش بغات تحطني بسميتها راجلها مخلاهاش حيت غتحطني بسميتها بوحدها..

نزهة:اوا؟؟

ميمون:ناض خالي جرا وتجارا وعطا فلوس صحيحة ودوزني فسميتو هو والعزيزة ودرت لاكارط مغربية ..

نزهة:ودابا واش فالقانون ماشي مشكل؟؟

ميمون:أنا مكنتش عارف ݣاع..با فاش جا عندي ݣاليا غنحطك فسميتي زعما تدير وراقيك تمصر باش تورث أنا ماكنتش باغي ملي مات عطاتني هدى شهادة الميلاد فيها با ومراتو مت البنات..

نزهة:دخت هههه واش باك مسجلك بسمية مرا خرا

ميمون:ااه ولكن معنديش كارط ديال تما يعني غي محسوب مزيود تما ماشي مصري فالوراق..فالوراق أنا مغربي با هو عبد الرحمان ومي هي العزيزة

نزهة:وامتا درتي التخلي على الإسم المصري؟؟

ميمون:مامشيت فين علمت جمال وهدى تكلفو وحيدت السمية حيت لبقاو عندي بجوج غنولي كنخولض وفالمطار غيقرقبو عليا..

نزهة:رونو هادشي والله..مالهم فيها؟علاش ميعطيكش باك من لول وراقك وتحط بسميتو هو ومك..

ميمون:قلة العقل شد الضد مع مي وصدقت أنا مقاريش وفاخر يامي عندي جوج سميات ..

نزهة:وعلاش معمرهم شدوك؟؟

ميمون:حيت عمري جربت ندخل لمصر...كون بغيت ندخل غيشدوني فالدخلة ديال مصر

نزهة:ودابا باش غدخل؟؟

ميمون:بوراق مغربية وغيديرو ليا البنات كي نشد الفيزا باش نمشيو..

نزهة:القانون المغربي أش كيݣول فهادشي؟؟

ميمون:كيݣول ميمون مغربي وصافي..المشكل غيكون نهار البنات غا يبغيو يفرقو ورثهم غيجيبو الحالة المدينة ماعرت أش كيسميوها هوما غيلقاو كاين ولد هنا فالمغرب مغيقدروش يفرقو حتى يحضر الولد ولا تحضر شي ورقة كتݣول بلي السيد مات..

نزهة:وراه غيبغيو يفرقو..

ميمون:لا مبغاوش..فاش مات با هضرات معايا هدى على الورث باش ناخد حقي ݣلت ليها مسامح مابغيت والو..

نزهة:ميمون واش غتسمح فحقك؟

ميمون:مابغيت لا فلوس لا والو(كيهضر بجدية)واش أنا بحرا مالقيت خواتاتي نوض نݣوليهم بغيت حقي..هوما بنات معندهم حد دوك الفلوس زايدين فيهم أنا عندي رزقي هنا الحمد لله وديك ساعة كان با كيصيفط ليا ديما فاش دار لباس..

نزهة:(مصدومة)سبحان من خلقك هاكا..كون أنا كون شديتو هه

ميمون:راه مجاتش أنزهة..انا لي ولد عندي عود كامل غنجي من ورا كلشي وندي ليهم النص ونخليهم هوما لي عيالات كيتجاقرو على النص لاخر ياك لباس؟؟مالي غنموت بالجوع. .

نزهة:(تكات على كتفو)اححح عليك الحنين هههه ممنكش جوج أش ݣالو خواتاتك؟..

ميمون:مݣالو والو خلاو داكشي مجموع وصافي..حسن يبقا مجموع الفلوس كيفرقو الخوت وأنا مبغيتش نتفرق عليهم ..بغيتهم يبقاو يجيو عندي ونمشي عندهم و بغيت ولادي يعرفوني عندي خوتي حتى أنا وعندي عائلة مايعيشووش داكشي لي عشت أنا.. ..

نزهة:(قبلاتو بحب فحنكو)إن شاء الله ولادنا يعيشو حسن منا ياربي..نتا ولد الناس وقلبك بيض غيعطيك ربي على قد نيتك..

ميمون:(باس راسها من جنب وعينيه مركزين فقدامو)آمين..هاحنا وصلنا نزلي..

نزلات ضاحكة وحتى هو تبعها..شدات فيديه ودخلو للقيصارية لي كتقدا منها..فيها مايديه للمول لكن فكرات ليه فجيبو ومغتلقاش شنو بغات..وحتى هو عاطيها الخاطر..

دخلو عند أول محل مولاتو مرا كتجي عندها نزهة تاخد من عندها..هو كيضور عينيه فالمحل فيه حوايج نسا فقط وبعض العيالات..

نزهة:الزين لباس عليك؟

..:أهلا اهلا ..ياختي وغبرتي عليا ..

نزهة:(كتسلم عليها)غي الخدمة نتي مزيانة ؟

...:الحمد لله(شافت فميمون لي كيشوف فالحوايج)شكون هذا

نزهة:(لاحتها ليها مبتاسمة)راجلي

...:بصح..تزوجتي؟؟ياختى مبروك عليك..

نزهة:الله يبارك فيك..شوفي بغيت شي لبيسات لصحاب الفولار..

...:دخلت سلعة جديدة زوينة غتعجبك..هداك الله ودرتي الحجاب؟؟

نزهة:(ضحكات)اوا أش ندير هههه أجي وريني(قربات لميمون)كبيدة أجي معايا وختار ليا على ذوقك..

ميمون الرجل لي باغي يدوز معاها وقيتة كيفما بغات تكون..فيه مايعطيها ويقوليها سيري شري شنو بغيتي لكن فضل يمشي معاها ويدوز معاها لحظات يمكن كتلعب دور فالعلاقة الزوجية...

دخلات وبدات كتعزل وتخير وتمد ليه يشوف معاها و حتى هو كيعطيها رأيو و يقيس عليها حتى جمعات بزااف ومشات كتقيس وتخرج عندو حتى خدات ستة تالبسات كاملين ..لبسات عليها وخرجات لقاتو خلص جات شدات فذراعو مبسمة ليه ونطق:بصحة الالة..

نزهة:الله يعطيك الصحة

...:هاكي الالة(مدات ليها الساشيات)بصحتك

نزهة:الله يعطيك الصحة أحبيبة شكرا..

شدات الساشيات وحتى هو عاونها وخرجو من تماك و هي مفرنسة طالع ليها المورال حيت تكسات وقال:خاصاك باقي شي حاجة؟

نزهة:(كتزلل عليه)خصاتني واحد البوسة منلقاهاش عندك؟

ميمون:(شرع فمو كيضحك)هههههههههههههه كاينة ..شحال بغيتي منها؟

نزهة:هههههههه بغيت وحيدة نبلل بيها ريقي..

ميمون:ههههههههه مشيت فيك غالط كيحسابني كتحشمي ههههههه

نزهة:مقزدرة غا معاك السلݣوط ههههههه

ميمون:هههههههههه زيدي أمو ترمة غتكون زاهية الوقت معاك

نزهة:دوز ناخد فولارات ..(بمزح)غندير ليك اليوم مسيحة لرزقك كامل..

ميمون:(دوز يدو على كتفها وغاديين)ما تغلا عليك حتا حاجة..كنت كنجمع فيهم غي على ودك باش تجي وتخسريهم..

نزهة:(بحب شافت فيه)خصك حتى نتا تبرع برزقك

ميمون:أنا مبرع واكل شارب ضاحك ههههه

نزهة:(كضحك)عرفتي كي غنردك يا ولد المصري ههههه غيجيو يخطبووك مني..

ميمون:(ضاحك)ههههههههههههه زيدي أختي بدليني نشووف.

شدات فيه و داتو لمحل خاص بالفولارات الغاليين ..خدات مايكفيها فجميع الألوان لي حبات خاطرها وهو ميقولش لا كيخلص ويتبعها..دازو من حدا محل كيبيع دو بياس وهو ينطق مفرنس:متاخديش الزين ؟

شافت فين كيشوف وهي تضحك:ناخد زيييد ههه(جراتو)..

دخلو كان محل نسائي الملابس..بدا كيضور عينيه فالألوان مفرحينو تقول لقا الكنز..نزهة حاضياه ماسخاها الضحكة وقالت:ياله لي تشهيتها ناخدها..

ميمون:(ضحك)ههههههه جمعي كلشي وكثري عفاااك..

ضرباتو لكتافو وقالت:الله يمسخك(قاست واحد دونتيل فالأبيض)زوين هذا؟..

ميمون:(حقق فيه وقرب ليها باش ميسمعهم حد)عرفتي كي غيجيك هذااا...وااااعر هههه(هز سليب وشاف فترمتها)هذا صغير على داك المكور لي هازا وراااك..

نزهة:(كضحك عاجبها الحال)هههههههههههه نتا منهار حضيتيها وهي مسكينة مبغات تزاد..

ميمون:خصها غي جوج عضات وتولي مبوقلة ههههههه

شدي ݣوليها تعطيك هذا (شير للون اخر)وهذا..وهذاااك وهذاك وهذااك(كيضور عينيه)وهذااك..

نزهة:هههههههه بشوياا عليك

ميمون:شدي عههههه

عيطات للبنت وقالت:عفاك أحبيبة بغيت هادو(كتشير ليها)فلاطاي 40

...:واخا أنا نجيبهم ليك

ميمون:(فرنس لنزهة و همس فوذنها)كتلبسي ربعين فزكك؟؟

عيات تحبس فيها وهي تطلقها وكتمات فمها بكتفوو مقدراتش تسكت باقي من الضحك وحتى هو ماشي من العاجزين زاد كيضحك على نيتو معاها حتى جات السيدة عطاتهم أش بغاو وهو لي شدهم كيقلب فيهم وكيضحك معاها لدرجة البنت حباتهم وزادت كضحك واخا معارفاش علاش..خلصها وزاد ناشط جارها معاه وهي باقي كضحك..

نزهة:ههههههههه ساليتي معايا

ميمون:ععههههههه دلمك مكتعرفيش تضحكي بالسكات ههههههه مشوهانا غيحساب السيدة معرت أش

نزهة:ههههههههه لا نتا غتقتلني غي بالضحك

ميمون:(عنقها)زيدي الالاهم ههههههه أش خصك باقي

نزهة:هاد الساعة نتا لي غتاخد

ميمون:مخصني والو

نزهة:دوز ݣدامي غنمشيو ناخدو ليك حتى نتا نتكسا أنا ونتا لا

ميمون:(بعفوية)ماخصني والو

نزهة:والله حتى تدوز هههههه

ميمون:واصبري نحطو هادو ونمشيو

نزهة:أصلا ماشي هنا غنديك غي زيد..

طلعو لطونوبيل ضاحكين كي ديما وتحرك بيها فين نعتات ليه منين يتقداو وفعلا مخلات مشراات ليه على حسابو طبعا وتهلات فيه بذوقها عاد مشاو لطونوبيل مسخسخاه..

ميمون:الى باقي خرجت معاك راني هبيل

نزهة:هههه وراك هبيل نيت(حيدات الشال كتجمع فشعرها)

ميمون:(حرك طونوبيل)واش نتي داك الفولار دايراه غي هاكاك ولا شنو؟راه كاتباني للعالام.. ..

نزهة:(رجعاتو كتصايب فيه)متزيدش فيه هههه ياله كنولفو

ميمون:(ضحك)هادي دازت هههههه ربطي شوية ميتحيدش من فوق راسك ݣدام شي ولد المرا واخا يكون خويا..

نزهة:(شافت فيه)معرفتها غيرة ماعرفتها زيار

ميمون:ممزيركش ههه غي مكنبغي حد يشوف أش شفت

نزهة:(بتحلوين)باقي ماشفتي والو

ميمون:(تلفت ليها ضاحك)ههههههه باقي بزاااف مانشوف نهار نشوفهم ماغيعجبك حال

نزهة:(ضحكات)هههههه الله يمسخك..

ميمون:زربي وجمعي وراقك أ لالاهم باغيين نعقدو خلاص...

نزهة:صافي واخا من غدا نبدا نجمع..

دوزها تغداو و وصلها للدار محملة ومجملة بساشيات..

باستو فحنكو وقالت:شكراااا

ميمون:زيديها فترمتك هاد شكرا باش تزيد تكبار

نزهة:ههههههه الله يمسخك..

نزلات لدارهم وبقا متبع ليها العين حتى دخلات وتحرك مرتاح لدارو حتى هو..دخلات للدار فرحانة وماتعطي فرحتها لحد.. لقات كلشي فالدار الا محمد وعبد الجليل سلمات وتنشرات كضحك ..

نزهة:كساني ميمون

سميرة:ههههههه حلفي ههههه انشووف..

بدات كتجبد وتوريهم وتقيس وتبوزا عليهم فقاع الدار وهوما ضاحكين لفرحتها..

ايناس:ودابا نتي درتي الزيف واعطيني حوايجك ههههه

نزهة:الى ݣدوك غا هزي..

ايناس:نتي أعمتي غليضة هههههه

نزهة:ضعافيت كاع مع لاصال..

حفيضة:واقياسك هذاااك

سميرة:خاصك تجمعي وراقك أ نزهة..

نزهة:(كتطوي الحوايج)هو زربان باغي يعقد دغيا..

حفيضة:كيبان فيه مرزن وحشومي..

نزهة:(ضحكات)هههههههه بزااف حشوومي ميهزش الراس(كتحرك فراسها)..

سمسرة:ههههههههههههه لاهيلا..

نزهة:فين عبد الجليل؟؟

سميرة:خرج..نمشي نجمع قشي غنشدو الطريق اليوم

نزهة:صبري نوض نجمع معاك..شوفي هزي دوك لبواطات ديال الحلوة ديهم معاك..

سميرة:شكرااااا ههههه حلوتك زينة..

*****

بعيد عليهم كانت الزاهية شدات الطريق رفقة تريكتها راجعة فحالها وهضرتها كلها فيها غي عرس ميمون ومراتو وشنو دير ليه جالسة تخطط هي وخديجة ويفصلو حتى وصلو وتلقاو ليها عريساتها وهي من الفرحة تعنق فيهم وتبووس ... .. توضات وصلات وجمعاتهم عليها كتعاود ليهم..

الزاهية:مرات المرضي زينة تبارك الله..

حفصة:عندك شي تصويرة أخالتي..

الزاهية:لا ولايني زيينة تبارك الله

نادية:حسن منا؟؟

ضحكات الزاهية وقالت:الله يمسخك كلكم زينات منكذبوووش وكلكم عندي بحال بحال ولي درتو ليكم نديرو ليها..

حفصة:ههههه ويلي أخالتي علاه ميمون هوما رجالتنا..

الزاهية:بحال بحال العرس لي دار ليكم يدار ليها

نادية:غتعيش معانا؟؟..

الزاهية:راجلها لهيه وهي هنا ؟؟لا غا تعيش معاه لهيه

حفصة:اوا الله يثبب الغرس أخالتي..

الزاهية: آمين(بصوت مرتفع)سناء وااسنااء واتي طلقي خلاص داك أتاي..

*****

فواحد الصباح بعد مرور أيام دخلات إيناس لدارهم من المدرسة وكتعيط بإسم مها لي كانت فالكوزينة كتنقي الحوت..

مليكة:يعطيك الغمة هانا..

إيناس:(دخلات بتذمر)ماما شوووفي(وراتها وجهها)

مليكة:(شهقات )أويلي مالكي فوجهك(حيدات يديها من الحوت كتقيس فعينيها لي منفوخة)شكون ضربك..

إيناس:(بتذمر)ضربني واحد الولد فالسبور بكورة كبيرة

مليكة:يعطيييه ضربة!!!ضربك ولا مشافكش؟ ..

إيناس:(زادت كتبكي)شااافني وضربني هءهءهء

مليكة:(طلقات حلوقها)مزيااان تبارك الله مالها سايبة(كتشلل فيديها)زيدي وريني دارهم نوري جدبوه يضربك..

إيناس:معرفتهااش ..أنا مبقيتش غادية لديك المدرسة ديما كيتعرض ليا..

دخل ياسين على وقع اخر كلمة ونطق مخنزر:شكون هذاا لي كيتعرض ليك(قشع وجهها)شكون ضربك..

مليكة:شي واحد كيقرا معاها ضربها لوجهها بالكورة..سير جيب ليا جلابتي نمشي نوري جدو يضربك..

ياسين:تشي شكونااهوو هذااا وريييه ليا معور ليك عينيك..

ايناس:كيقرا معايا(تخشات فياسين)هءهءه ديما كيتعرض ليا بغاني نتصاحب معاه..

ياسن:(شعل)شناااهو؟؟وعلاش مݣلتيهاش لينا؟؟علاش؟؟نوري الز**** لي ولدووو الضسارة..

مليكة:(خبطاتها لظهرها)ومالكي مݣلتيها لينا الك*&لبة نمشيو نتشكاو بيييه هااا..

إيناس:(تخبات ورا ياسين )وا طلقي مني هءهءهء كنت كنخاف ..غنمشي نݣولها لبابا..

ياسين:وريني دارهم وتشوفي لا ما نربييه..

إيناس:لا..ݣلتها للمدير وݣاليه جيب ولي أمرك فالعشية وحتى أنا غندي بابا..

مليكة:(صعرات)يعطيك واباا..كي شتي بااك غي مسوق ليك معارفكش ݣاع فاش كتقراي يا تريكة البيور..العشية غنمشي معاك رجلي برجلك..

ياسين:خلي أمي أنا نمشي معاها..

مليكة:(رجعات لحوتها)دير لختك الثلج لعينيها أنا نمشي معاها تمشي نتا تدير ليا المشاكل تما ... ..

جبد الربيع مجمد حطو ليها على عينيها وهي كتنين وقالت :راه صونيت لبابا..

مليكة:(كتعيب فيها معصبة)صونيت لبابا ..شتك تحابيتي نتي وياه؟؟هضرة جوج صونيت لبابا .

إيناس:(عارفا كاين ياسين يفكها منها)ورااه بابا ..

مليكة:يعطيك وبا..

ياسين:أنا نيت شفتو البارح فالقهوة أنا و يونس..

ضحكات بفقصة وقالت:تبارك الله وليتو تݣلسو فالقهاوي معاه..على يامكم كنتو الطبلة مكتجمعوش فيها ياك لباس؟؟كنت شادة ليكم العكس ولا..

ياسين:(ضحك)هههههه ولى سخي ههههه أ ݣول كنتي شادة علينا الصندوق ..

مليكة:(ضربات بالحوت)خرج عليا الله يخرج ليكم العقل..بحالكم بحالو خزييييت ..

إيناس:بشويا راه عيني كتضرني..

خرجو مخلينها كتبرݣم بفمها وتنݣر:الله يعطيه شي مصيبة إن شاء الله نلبس عليه البيض قبل مانطقلوو ياربي آمين..

كملات داك الحوت وقلاتو ومشات لبسات عليها جلابتها ويديها باقي زافرين بالحوت جرات صابو وشال فوق راسها ..جرات إيناس غادية معاها للمدرسة وتبرݣم..

وفأمام ثانوية كبيرة عامرة بالتلاميذ وقت الدخول شكال ونواع تالبنات ودراري من هاد الجيل ..صونا تيليفون إيناس كان باها .. جاوبات وعلماتو بلي غيدخلو يسبقوه ومليكة غي كتلوي ففمها وتنݣر حتى دخلو للإدارة وجلسو كيتسناو الحارس العام لي كيفرق أوراق الغياب ولي مادخلش كيدخلو لقسمو.. حتى وقف عليهم محمد مغوبش كيف ديما ونطق:السلام(بدون مايشوف فمليكة)

إيناس:(هزات فيه راسها)بابا.

خرج عينيه فيها وصاح:أش هادشي؟؟أش هاد الضربة؟؟(كيقلب فيها)

إيناس:ضربني بكورة..

محمد:(طلع ليه الدم)وريني هاد البرهوش نربي دلمووو الى باه مرباهش..

مليكة:(كتبرݣم)صباح الخير فففف

محمد:فينو الحارس العام..

إيناس:شويا ويجي..

بقا واقف مخنزر مشافش فمليكة بتاتا لي كتشوف فيه بنص عين ..عينيه على عين إيناس لي منفوخة وزرقة وسنانو كيتكنززو..هو كيسلخها نيت إلا دارت علاش لكن عمرو ضربها لهاد الدرجة باش يجي برهوش ويضربها

جا الحارس العام لقى السلام ودخل لبيروه طالب منهم يتبعوه..

جلسو قدامو بجوج و إيناس واقفة هازا شكارتها على كتفها..

محمد:بغيت نعرف شكون هاد قليل الترابي لي ضرب بنتي..

الحارس:والله أسيدي معرفت منݣوليك..راه ضااسر بزااف كل النهار الشكاوي..

مليكة:(طلقات حلوقها)ومالها سايبة؟؟اليوم نفخ ليها عينيها غدا يعور ليا الدرية..

محمد:(بصوت مرتافع)كنصيفطها تقرا ولا يتعرض ليها؟؟غنشكي بيه للبوليس نربييه ..

الحارس:أسي محمد أش وصلنا لشي بوليس.. الدري ضاسر وقبيح منݣولش ليك لا.. أنا غنهضر معاه عمرو يطوف بساحتها..

مليكة:واش يضمن ؟

الحارس :(شاف فإيناس) إيناس(تبسم)..

ايناس:أستاذ راه ديما كيتعرض ليا فالزنقة

محمد:(ساخط)وعلاش مݣلتيهاش ؟فيناهو هاد البرهوووش ..

بغا يجاوبو وهو يتدق الباب ونطق الحارس:دخل..

-تحل الباب ودخل شاب فعمر 18 لعام لابس سروال دجين مقطع و التشاوك مطلعين شعرو وهاز شكارة على كتافو وموراه مرا لابسة جلابة وصندالة فرجليها عامرة وبيضة.. وهازا وراها طرف مطرف دايرا شال مغطي نص شعرها وهازا بزطام...أول ما شافتها هي مليكة حيت مݣاودة مع الباب مناش دخلات..خرجات عينيها فيها برهبة بحالا شافت الجنون..وبقات مشوكية فيها وتا لوخرا ماشي قل منها ..

مليكة يستيحل تنساها ولا يغيبو ملامحها على بالها..حيت كل نهار كتسمع سميتها ملي كيكون ناعس وأغلب مضارباتها مع محمد كانو عليها...وشكون من غيرها..

"بنت فاطيمة"

فيقها من سهوتها غي الحارس لي قال:زيدي الالة

تسمع صوتها الباح قايل:السلام وعليكم . .

تلفت محمد مخنزر و مغوبش ناوي يصبن السيدة لكن ملامحو جمداات فور ما ضار وتوقف الزمن عندو..عينيه ميمكنش يخونوه ونظرتو ليها ميمكنش تبدل..معمرو نساها ولا غينساها كانت ملخصة ليه جميع النساء..

عينيه تكمشو فيها و قلبو ضرب ضربات كثار فدقة وحدة..هي و ما يمكنش عينيه يكذبو..كبرات فالعمر مبقاتش ديك البنت لي حب ولي باقي طفلة تسوطي فيها تطير..اليوم ولات مرا أو بالأحرى ولات أم كيفما هو ولا هو أب..

أما هي راه كانو عينيها عليه فقط..كتشوف السنين لي دازو وشنو بدلو فيه..باقي كيف خلاتو ديما وجهو معصب وديما مغوبش لكنها الوحيدة لي دارية على قلبو كيفاش داير..

عينيها تضببو فيه ومقدراتش تزيحهم عليه وهي كتفكر اخر مقال ليها:"مِّي مبغاتكش أحنان سمحي ليا"..

فيقهم من سهوتهم غي صوت الحارس وهو كيعاتب ف صلاح لي عينيه مرة فالحارس مرة فإيناس: عاجبك هادشي لي درتي؟؟معور البنت؟؟أش كيحساب ليك راسك..

نطقات حنان بعدما استوعبات الصدمة وقلبات عينيها على محمد لي بقا ضاير متبع ليها العين تحت أنظار مليكة لي غتبخ الدم:سي الحارس عفاااك سمح ليه غي هاد المرة(ضرباتو لراسو)راني عارفاااه ميسواااش ويديه ساابقاه( شافت فإيناس بحسرة )..

مليكة:(لقات منين دوز ليها) الالة لي مرباتوش مو يربيه المخزن..ماعنديش منها عشرة باش يضربها ليا والى ماديتو فين يتربى راني ماشي مليكة..

شافت فيها حنان بنظرة هدوء ونطقات:دوزيها ليه غي هاد المرة الالة عمرو يعاود(كتشوف فيها بترجي)..

مليكة:(بحقد)كتعرفو غي تولدو وتطلقو تربيو لا؟؟

محمد:(عينيه ماحيدوش على حنان زمجر بغضب)ملييييكة سكتييي..

الحارس:حتارمو راسكم شوية راه مؤسسة تعليمية هادي..ݣلسي الالة نتذاكرو

ملقاتش فين تجلس وهو ينوض محمد فالبلاصة من بلاصتو وقال بصوت هادئ عكس صوتو قبل ماتدخل...مكرهش كون يطير عليها بتعنيقة يفدي فيها شوق السنين كاملة لي معمرو شافها ..مكرهش ينطق باعتذار منو على ضعف رجولتو فداك الوقت..

أما مليكة راه كتهزز فرجليها بغل وقلبها كيضرب ويضرب بجهد محملاتش الموقف مكرهاتش تنوض تحيح عليهم بجوج ومرضاتش ينوض ليها..شافت فيه حنان بهدوء وجلسات كتهضر بعقلانية:أستاذ أنا عارفا ولدي لي غالط وجيت نطلب السماحة من والدين البنت والله ميبقا يقرب ليها..

الحارس:(بغا يخلعها)راه زبايلو كثار..كل سيمانة تقرير كل مرة مضارب ليا فالمدرسة..الإجراءات فهاد الحالة هو التوقيف...

حنان:(بخوف)لا ميحبسش قرايتو(عينيها دمعو)عفااك أ أستاذ نسني إلتزام عمرو يقرب ليها مبغيتووش يضيع خليه يقرا..

صلاح:(الإبن)لاش التوقيف مالي قتلتها!

حنان:(بغضب)سد فمك الحماااار مزال زايد فيه؟(شافت فايناس)عفاك أبنتي سمحي ليه عمرو باقي يطوف بساحتك..

مليكة:(كطلع فيها وتنزل)ممسامحينش أختي..لي دار الذنب يستاهل العقوبة وأنا بنتي مشايطاش عليا..

محمد:(باقي مصدوم بشوفتها)صافي صافي (جر إيناس عندو)هادي غندوزها و ندير ماوقع والو ولكن..

حنان:(شافت فيه بترجي)عمرو يقرب ليها غي ميتحبسش من قرايتو..

مليكة:(بغات تبخ الدم)كيفااااااش داازت(كتغوت)أسيدي مدازتش وغنمشي ندعيه نوريه يضرب بنات الناس..

محمد:(خزر فيها)تجمعي شوية ودوزي ݣداامي حسن ليك..(شاف فالحارس)يدير التزام معمرو يقرب ليها ..

حنان:أنا نسنيه(شافت فيه)الله يرحم ليك الوالدين..

فيناهو محمد راه ذايب فيها وفهضرتها لي توحشها ومغابتش على وذنيه رغم السنين ..تنهد وقال:دنيا هانيا..

مليكة:(بغات تموت بالفقصة)لي بديتيه قبل كمليه أبنت فاطيمة(خرجات كتنݣر )..

إيناس:(شافت فحنان وكتهضر بهمس)نتي هي..

حنان:(متوترة)طلب السماحة من البنت ياله..

صلاح:سمحي ليا أختي(كيطنز)..

محمد:(هضر قاسح مع دري)آخر مرة تطوف بساحتها هاني هضرت معاك..

مداهاش فهضرتو بتاتا حدو قلب عينيه بلا مبالاة ..زفرات حنان وقالت:خليه يدخل يقرا وأنا نسني ليك

الحارس:سير لقسمك ونتي سيري لقسمك واخر مرة أ صلاح..كتشفع ليك قرايتك..

خرج هو لول مشا وبقات إيناس كارمة حدا باها لي عينيه متزاحوش عليها بشوق..مغينكرش توحشها بزاااف والزمان بدل شكلها بزاف لكن كيقول واحد المثل الى مشا الزين كيبقاو حروفو هي زينها بقا فيه الحروف بزااف رغم التجاعيد ورغم كبر السن لكنها كتبقى ست الستات عندو..

حنان:(عايقة بنظراتو)أرا نسني اسيدي..

جبد ليها التزام سناتو وقالت موجهة الكلام لايناس:سمحي لينا ابنتي

محمد:(نقز جاوبها)ماشي مشكل..

لقات عليه نظرة أخيرة تلاقاو فيها عيونهم بحسرة على السنين لي دوزو بعاد على بعضهم وصدق من قال:الحب الأول مكيتنساش..

خرجات مخلياه متبع ليها العين وصوت الحارس العام كيتسمع فوذنيه بعيد مركز مع طيفها فقط تا غبرات وهو يقول:إيناس سيري لقسمك..

ودع الحارس وخرج كيقلب عليها بعينيه ساعا لقا غي مليكة واقفة مخنزرة فيه ياله بغات تهضر داز فيها خارج من باب المؤسسة كيقلب عليها كي الهبيل..

بنت فاطمة غادية ومحمد وراها ومليكة وراه بغل وحقد حتى شافها واقفة بعيد كتسنا طاكسي حانية راسها مهزاتوش بتاتا..قلبو كيضرب بجهد بغا يقطع عندها وهي توقف مليكة بغل:اوا تبارك الله على الراجل سمحتي فحق بنتك على ودها..

محمد:(عينيه عليها)سيري فحالك أ مليكة ممساليش ليك ..

ضحكات باستهزاء والغضب متمكن منها:صافي وصلتي لشنو لغيتي..لقيتي علامن محرر فيا العيشة..

محمد:(مرفوع حاضيها )سيري فحالك..

مليكة:(عين فيها وعين فيه بغات تبخ الدم)الله ينعل لي مايحشم حشم غي على عمرك تفوووو والله متكون ليك أولد خالتي....

مداهاش فيها مشا كيزرب لطونوبيلتو ركب مخليها كتدعي وتسب غي بوحدها وهو تبع الطاكسي حالف ميفلتها بعدما شافها..

تبع قلبو و تبع الطاكسي بلهفة وقلبو كيضرب ميمكنش افلتها بعد سنين نسا أنه ممكن تكون مزوجة..ماشي بزاف باش حطها الطاكسي و نزلات منو كتمشى وخيرها كيتحرك معاها والراس محني للأرض مكتهزوش من الشوفة لولة تبان ليك داخلة سوق راسها..نزل حتا هو بعدما بلاصا طونوبيلتو وتبعها بشوية حتى شافها دخلات لدار عادية وتنهد براحة وبشوية حتى ظهرات ابتسامة على ملامح وجهو الغاضبين ديما..عرفها فين ساكنة وهذا هو الأهم..قصد أقرب مول الحانوت حداهم مقدم الحانوت لي فلت ليك تلقاه عندو من خبارات الحومة..

محمد:السلام وعليكم

..:وعليكم السلام

محمد:حمم الشريف بغيت نسولك على ديك الدار(كينعت ليه)...

تحنى مول الحانوت على الكونطوار حتى شافو فين شير وقال:ايييه دار الحاج حميد

محمد:(صفار)مزوج هاد الحاج؟

...:مزوج ولكن مساكنش فيها..كاريها للناس

محمد:كاينة شي مرا تما ساكنا ياك؟؟

...:كاينين شلا عيالات..كاينة(كيحسب ليه بيديه)لالة عيشة ولالة فاطمة وكاينة لالة حنان..

محمد:(خفق قلبو)هاديك حنان..معامن عايشة؟؟

...:هي و ولدها واحد الضاسر اش نݣوليك و..

قاطعو محمد:وراجلها حمم مع كيجيني من العائلة

...:والسيدة من نهار سكنات ماعندها راجل ..ياله هاد العام جات كيعاودو عليها ماشي من هنا كانت ساكنة فسلا والله وأعلم مرا الله يعمر ليها الدار..

محمد:(تبسم)الله يحفظك شكرااا

...:دنيا هانيا..

مشا محمد قلبو كيرفرف ورجع لخدمتو غير كي جا فلول وهو متأكد انه لقى حب حياتو لي عمرو مانساها..

••••••

"بعض قصص الحب تموت فينا ولا نموت فيها"

••••••

فبيروها جالسة خدامة والشال فوق راسها مغطي غي النص حيت كيزلق..يديها مزينة بساعة زوينة وخاتم رقيق مبرودين ومقادين بلوين بيج بارد..ريحتها مالية البيرو..ما حسات تا دخل عليها بجسمو الضخم الناس تضعاف هو غادي ويغلاض ويتضخم..حسات بالغاشي مع هزات راسها خرجات فيه عينيها وقالت:أويلي شكدير هنا؟؟..

ميمون:(تبسم)توحشتك الزين

نزهة:هههه أويلي لاش جاي؟

ميمون:(قرب ليها باسها فحنكها)جيت نطل عليك

نزهة:(وقفات)ههه واش نتا هبيل راه بلاصة الخدمة هادي

ميمون:(كيقاد ليها الشال)غطي شعرك..

حيدات ليه يديه وقالت:واش هبيل شوف أنا فين ونتا فين؟

ميمون:غنضرب مك حتى تصلي هههههه مابغيتينش نجي عندك..

نزهة:(طلات مبان ليها حد وهي تدفݣ)واتوحشتك ولكن مݣلتش تجي لهنا ..

ميمون:(شد يديها باسها من القاع)مجيتش نشوفك ههههه عيط ليا ربيع على شي بلان..

نزهة:(كمشات فيه عينيها)أشمن بلان؟؟

ميمون:شي مشروع واقلة

نزهة:ونتا عاد درتي المصبنة منين يجيوك الفلوس..

ميمون:(يديه كتلعب فحنوكها)ههه شفرتهم مال مك هاكا..أري شي بوسة من هاد الشهد(قرصها ففمها)..

نزهة: الجهل هههه مسحتي لعكر لطاسيلتك هههههههه سير راه ربيع فبيروه..

ميمون:تسنايني ماتمشيش نخرج نتغدا أنا وياك

نزهة:(تبسمات)واخا ياله سير يدوز شي حد يشوفك

ميمون:هههههه واخا

تحرك من حداها و هي تطلعو وتنزلو جاتو اللبسة قتالة وقالت ضاحكة:الزين..

تلفت ليها وهي تصيفط ليه بوسة فلهوا وقالت:كتبان قتاال نشدك نننن(ضحكات)هههههه ناكلك..

ميمون:بلاتي نكمل ونجي ناكل مك هنا نيت هههههه

خرج مخليها مفرنسة غطير بالفرحة عليه..ولات كتسطا عليه بضرافتو وحلاوتو..رجعات لخدمتها وخلاتو هو مشا عند ربيع..

ميمون:(دخل مدرم)سي ربيع

ربيع:(وقف كيقاد فكوستيمو)أهلا أهلا بسي ميمون

ميمون:(صافحو)كي داير مزيان؟؟مالين دار بخير؟؟

ربيع:الحمد لله ونتا بخير(شير ليه للكرسي)جلس جلس..

جلس ميمون مفرق رجليه ويديه ليسرية كيلعب بيها فموسطاجو وقال:هاني جيت

ربيع:أش تشرب؟

ميمون:والو غا طلقني هههه شي مشروع هذا

ربيع:بحال هاكاك..واحد سيد صاحبي بغا يدير مشروع ديال مخبزة وااعرة داكشي الغالي(كيبسط معاه عارفو مقاريش)وݣاليا قلب على شريك وݣلت نتا..

ميمون:شكون هاد السيد؟؟لاقيني معاه ونتذاكرو وديك ساعة نشوف

ربيع:مغتندمش والله أنا كون عندي راس المال ندخل معاه حيت غيخلي ليك زبابل تالفلوس..

ميمون:لاقيني معاه دير شي نهار نتقهواو ونمشي نشوفو ونهضرو

ربيع:صافي إن شاء الله..حمم مبروك بعدا

ميمون:الله يبارك فيك(ضحك)العقبة لعندك هههه..

ربيع:ههههههه لا صافي أنا تزوجت شوف غي نتا(بهدوء)نزهة إنسانة زوينة وضريفة ..

ميمون:عارف هههه أنا مشيت حتى تصوني ليا

ربيع:كون هاني..

خرج من عندو ومشا لبيروها كانت منغامسة فالخدمة حتى دق فالباب بجهد وقال:وياله تغداااي ..

نزهة:ههههه مالك خضر تا دوي بشوي هههه(جمعات الوراق وهزات صاكها)..

ميمون:(طلعها ونزلها)بنت الحرام واخا لابسة الطويل كتباني فسرة

ضحكات وشدات فيديه وقالت:زيد العناب..

ميموت:(نيم فيها عينيه)أري شي بوسة لهاد العناب

قلبات عينيها ضاحكة:هههههه حقك فجنة

خرجو من الشقة لي فيها المكتب و وقفو قدام السانسور لي غي تحل نزلو منو ناس و ولى خاوي..كي طلعو كليكات على زر الطابق لتحتاني مع تسد مع معرفاتو منين نباعث عليها لصقها مع الحيط ولصق عليها ويديه وقفات سانسور ببوطون واحد.. مجاتش فين تهضر كان نقض عليها ببوسة لفمها عنيفة كأنو مغدد عليها..شد وجهها بين يديه وبدون سابق إنذار بدا كيشلقم فشفايفها بنهم كي الجيعان أما هي راه مع تصدمات مع تضهشرات مع هزات يديها لخصرو حطاتهم عليه وبدات كتبوس فيه حتى هي بحب..مغتنكرش كانت مشهية هاد البوسة معاه ...

شفاهم كتباوس وأجسامهم ملاصقة مع بعض مزير عليها ويديه وحدة فوجهها ووحدة فخصرها كتنزل تالفخضها وتطلع من جديد مزير عليها باغي ياكلها..

دوزو دقائق غي بوووسان حتى ولا الشال محيد ..كلاها وكلاتو تضور وتجرو تبوس فيه مطلقاتوش وحتى هو فاش شايف إصرارها متفرقش عليها حتى حس براسو روى عطش البوسة لي مشهي عاد فرق شفايفهم بشوية ماليهم الريق ديالهم المشتارك..زفر وعينيه فعينيها بحب باقي منتاشي ببوستها وقال كينهج:بزااف عليا هادشي أنزهة(عاود قبلها بلطف )..

نزهة:(يديها فكول تريكوه كتلعب وعينيها منيمين فيه)بزاف عليا حتا أنا..

ميمون:(قبلها فحنوكها)مبقيتش قادر نصبر..ز*** غيتفرݣع من جهتك..

ضحكات ليه فوجهو وخشات وجهها فعنقو:الله يصبرو مسكين

ميمون:(باسها فعنقها)حني فيه خلاص راك عزيزة عليه

نزهة:(منتاشية بقبلاتو فعنقها)وهو ميحنش فيا ههه

ميمون:(خرج راسو من عنقها ووجهو قريب لوجهها)غي طلقيه للفراجة غيحن فيك

نزهة:(باستو ففمو)أنا وراقي واجدين..

ميمون:الجمعة نديرو العقد وسبت نحن فيك..

نزهة:هههههههه صافي نعول على السبت

ميمون:(عضها بشوية فشفايفها محمقاه فتحلوينها)السبت يبات فيك ..غي وجدي ليه راسك

نزهة:(باصابعها الرقيقة كتقيس فلحيتو)ديما واجدة ليك

ميمون:(شد يديها باسها من القاع وعينيه عليها)شكون يصبرني حتال السبت..

نزهة:غا صبرو ليا تال السبت خهه

ميمون:(بعد عليها شوي كيصايب ليها شعرها)شنتفتك ههه

بدات كتقاد فشالها عاد طلعات معاها اش دارت واش قالت..صايبات شالها وعكرها راه تمسح كولو تلفتات ليه لقاتو فيه وهي تضحك ومسحاتو ليه :ههههههه عكرتي

ميمون:مسحي مسحي عههه تشوهت معاك

نزهة:نتا لي ملهوف عليا

ميمون:(ضحك و طلق السانسور)غنموت باش نقيسك أنزهة(قرب باسها فحنكها)حركتي فيا الجنون على هاد الحلاوة لي فيك . .

نزهة:(ضحكات)هههههههههه اححح كون تشوف أنا..

تحل السانسور وهربات ليه كضحك وتابعها حتى هو تا شقمها من راسها مهبطو ليها وجارها وقال:ههههه دودتك أنا نبردها ليك..الى معمرك جربتي حر السراغنة والمصريين تجربيه

نزهة:دابا نشوووف ههههه

حل طونوبيل وطلعو وقال:فين تمشي الشيخة ديالي تغدا

ضرباتو لكتافو:حشااك السلݣوط

ميمون:هههه شيخة حلالا طيبا الزين ..

نزهة:دينا ناكلو فشي بلاصة وصافي..

ميمون:(تحرك)واخا...وزربي وراقك غدا بغيتهم باش الجمعة نعقدو..

نزهة:(غطير بالفرحة)واخا..

الأيام القليلة كدوز بسرعة على نزهة لي ما قاداها فرحة وساترة فرحتها ما خبرات حد من غير خوتها وختها.. عائلتها مساقوش الخبار لكن مليكة فراسها وماخلات لمن قالتها الأغلبية جاهم الأمر عادي مولفين يسمعوها تخطبات و مولفين يتسناو خبر إنفصالها حيت عارفينها ما كيصدقش ليها الزواج..

كيفما تافقات مع ميمون الجمعة يعقدو وعلى هاد الأساس خدات من الخميس كونجي باش توجد راسها للعقد على خاطرها..وفليلة الجمعة كانت فالكوزينة كترتب الكعبة فالسوبيرات ومها حداها كتشوف وترضي حتى دخل محمد حيت عندو الساروت ونطق:السلام..

ردو السلام ومشا شد التلفازة كيتفرج عايق بيهم كيوجدو وعارفها عندها العقد لغد ليه حتى دخلات عليه مو كتعرج وقالت:كي ضليتي أوليدي..

محمد:الحمد لله(حنحن)حممم غدا غتعقد؟؟

حفيضة: إن شاء الله..ما تمشي فين حضر مع ختك..

محمد: إن شاء الله(بهدوء)سولت عليه..

حفيضة:أش لݣيتي؟

محمد:السيد بخيرو ومعروف فكازا

حفيضة:واش كيعادوو عليه؟؟ولد الناس!؟

محمد:مممم اه(كينقب من طبسيل الكركاع)ݣالو..

حفيضة:اوا بالتيسير إن شاء الله عالله تصدق ليها مسكينة بغيت نتهنا عليها..

مهضرش باقي سكت وساقل ميقول لا اه لا لا..عقلو خدام مع بنت فاطيمة لي ولى كيضل تابعها..فحين نزهة سالات كلشي وخرجات عند مها قايلة ليها :مي هانا مشيت للحمام

حفيضة:سيري ومتعطليش..

محمد:(حنحن)هاكي..

جبد من جيبو مية درهم وقال مطمر مكيبغيش يبين حنيتو بتاتا ولي ماعمرو أصلا بينها:باش تمشي للحمام..

تبسمات وشداتها وتحنات باستو فحنكو وقالت فرحانة :الله يعطيك الخير..

مشات هزات سطولها وحوايجها لي مجموعين أصلا وقصدات الحمام معولة تفركس وتحلق على الحالة..لاصيغ دوزات حرها البارح حيدات كلشي مخلات حتى زغبة..ناشطة وفرحانة حيت غتزوج بميمون....

خلصات ودخلات قلعات حوايجها ومشات وصات كسالة تتبعها باغيا تدلع راسها..مع دخلات بدات تسلم وتضحك مع هذا وديك كون يقولو ليها فلانة دوزي تحكي للحمام كامل تحك ليهم ..

جبدات ساشية قهوية فيها أحسن تبريمة جربات فحياتها من عند "siliya cosmetics@" مع حلاتها ضرباتها ريحة العشوب لي كينقيو اللحم ويصفيوه من الشوائب.. وكيخرجو الوسخ على حقو..خلطاتها بصابون البلدي والما وطلاتها للحمها وتسنات شويا تا شربها لحمها بيدما جات الكسالة وشللات ..مع قاست لحمها لقاتو رطب باقي حتى متحك..جات الكسالة كسلاتها نيت خرجو منها وسيخات نيت تفسخات وبقات فيها رويحة تالعشوب المعطرة فلحمها..تكلفات هي بغسيل الشعر وما باقي خرجات من الحمام كتشعشع بالنقا ..

خدات وقتها الكافي فالترطيب كتدلع راسها بيه..مخلاتش شي بلاصة مرطباتهاش وخرجات لدارهم ناشطة وطايح عليها السر..كي دخلات سلمات ومشات لتيليفونها جاوبات ميمون لي مصوني ستة تالمرات ..

نزهة:الزين

ميمون:(بهدوء)فين كنتي الحب؟

نزهة:مشيت للحمام ضربتها بواحد الغسلة مكرهتهاش ليك..

ميمون:(ضحك)ههههه بصحتك الالاهم تحمحمي مع راسك

نزهة:ونتا؟؟

ميمون:مالي أنا؟؟

نزهة:ما غتمشيش للحمام؟؟

ميمون:كنتنسا نهار السبت ندير علاش باش نمشي للحمام

نزهة:ههههههه السبت جايين عائلتي أحبيبي..

ميمون:هههههه يجيو حتى عائلتي أنا مالي هههه ݣلتي ليا السبت يبات فيك هي السبت ..نطلع برهوش مع ز****..

طلقات ضحكة عالية تسمعات كي تاع شياخ وقال:هههههه صيكي ليا الشيخة

نزهة:ههههههه سير الله يمسخك الماسخ ضحكتيني..

ميمون:هههههههه ݣالت ليك عائلتي مزيان تبارك الله

نزهة:معاش غتجيو غدا؟

ميمون:مع الفجر تلقايني عندك..

نزهة:ههههههه واهضر بصح

ميمون:العشرة كاع نكونو تما

نزهة:(قلبها كيضرب)نتسناااك

ميمون:تسنايني هههه غدا عارضاكم الواليدة مور العقد للغدا

نزهة:وعاد كتݣولها؟؟

ميمون:كنت مغنݣولها ليك حتال غدا هههههه غا تفكرت شوفي غنعطي نمرتك للبنات فمصر بغاو يهضرو معاك..

نزهة:عطيها ليهم الزين على الراس والعين نشوفو خواتات المصري..

ميمون:ياله سيري فحالك خهههه غنمشي ننعس عييت اليوم

نزهة:رتاح ليا أ كبيدة غدا تابعك بزااف.

ميمون:السبت فاش تابعني مايدار هههههه تصبحي على خير الالاهم..

نزهة:تصبح ليا على خير..

قطعات مفرنسة ومشات طلقات شعرها ينشف وهزات لاتخوس ديال الماتريال ت ضفارها وبدات كتبرض وتقطع وتقاد وصبغاتهم بلوين زوين كراميلي عاد نشفات شعرها لي بالبروتين دغيا كيطلع زوين ..

تخشات ففراشها متوسدة يديها والبسمة مفرقاتش وجهها فانتظار اليوم الكبير عندها ولي كتمناه أي بنت..

مع الصباح بكري فاقت نزهة بدون منبه..السيدة بالفرحة ما نعساتش كليا كتنعس وتفيق بحال ولد من التسعينات كيتسنا صباح العيد..شافت راسها فالمرايا و رسلات ليه قبلة صباحية ودازت وجدات الفطور بيدما فاقو لوخرين كلشي واجد وكلشي على حقو كيتسناو غي مجية العريس..

فاقو كاملين وتجمعو على الفطور بالضحك والنشاط إلا محمد لي ساكت ..تسيقات الدار من طرف سعيدة وحفيضة كتزيف فالكيسان وتحط فالضيافة مقادة أما لالة العروسة مشات لبسات قفطان فالكراميل جوهرة لكنو عريض وكيتحزم بالمجدول..

وجهها خدمات ماكياج ناعم لعبات فيه على عينيها كثر كثفات شفارها وكحلاتهم بقلم أسود لامع عطاها منظر زوين لعويناتها..كتافات بعكر ماط فالقهوي بارد ورشات ريحتها وجلسات شادة تيليفون وقلبها كيضرب حتى دخلو عليها ولاد خوتها كي الهجيج يبوسو ويعنقو ويباركو ليها فرحانين للعمة الصغيرة..

كلشي واجد وقلبها كيضرب قربات تحقق حلم حياتها ..ماهي إلا دقائق حتى تسمع السرسار فالباب وقفز معاه قلبها..

نزهة:(يديها عراقو)هوما؟؟(مخاطبة إيناس لي كتطل من الشرجم) .

ايناس:اااه هههه

ياسين:أنا نازل ههه يونس زيد معاذ أنس زيدو..

نزلو وخلاوها مع إيناس ودعاء كتنش على راسها..أما محمد راه كان برفقة راجل سعيدة لابس عليه مزيان مأنق حل الباب ولقى فوجهو ميمون لي شاف فيه مستغرب مد يدو.. وقال:السلام وعليكم

محمد:(ببرود)وعليكم السلام..زيدو دخلو مرحبا..

رحب بخالو و ولد خالو وخوتو ومو وختو فتيحة لي دايرا كي تنبر لي لاصق فالبرا..كلشي مأنق كلشي لابس مزيان والروايح كيتشايرو..العدول وراهم بجلالب تقليدين والترحيب قائم بين العائلتين..

ميمون راه ملبسو ولد خالو دجين كحل وسبرديلة مع فوقاني تقليدي مطرز..وشعيرات كحلة كيبانو فصدرو..الى هي خايفة هو راه كيترعد كثر منها..دخل معاه المعقول خلاه غي تالف لدرجة متسوقش لمحمد بتاتا..طلعو معاهم مرحبين بيهم وفنفس الصالون جلسو مجموعين من جديد على طبلة أتاي ودوازو..الهضرا رايجة بين العيالات فيها غي الترحيب أما الرجال راه غي عبد الرحمان وراجل سعيدة لي كيدويو..محمد حاضيه من لتحت للفوق كيعبرو ويعاود بنظرة برود..

نطق العدول:سيادنا نبدااو باقي تابعنا ضريب صداق آخر

زوج سعيدة:ايييه أسيدي ماݣلتي عيب..

العدول: الكارط ديال العريس أ سيدي

مدها ليه ميمون وقيد منها ونطق: و الكارط ديال العروسة؟

مدها ليه محمد قيد معلوماتها وقال:عيطو للعروسة باش نديرو اللازم..

بالفعل مشات مها عيطات ليها و خرجات فأبهى حلة بقفطانها لي كيتجرجر فالأرض لاصق عليها والشال مليوح على راسها والشعر باين مطلوق مع الشوفات القتالة لي كيذبحو ميمون..هاد الأخير فور ماشافها دق قلبو كأنو معمرو شافها..تبسم تا بانو سنانو ليها مأسور بيها وبزينها العربي الأصيل..أما الزاهية راه مفرنسة هي وفتيحة عجباتهم وغي كترضي وتصلي على النبي فخاطرها ...

فتيحة:(فوذن مها)واخدا الزين..

الزاهية:وشنو (بافتخار)ولدي زين يجيب الزين..

وما فالعافية غير نزهة لي كاع الأنظار عليها بالحشمة والعرق لي فيها قربات تعتر ..سلمات على النسا ومشات جلسات فين نعتات ليها الزاهية على يمين العدول وميمون السايح فيها على اليسار..

العدول:حممم بسم الله الرحمان الرحيم والصلاة على أشرف المرسلين نبداو ا سيادنا..سي ميمون (كيحقق فالكينة وشداتو الضحكة) مزلوط ولد عبد الرحمان.. مزلوط(مع فتح الميم)قابل بالسيدة نزهة البشريوي بنت الجيلالي زوجة على سنة الله ورسوله..

كلشي كيتسنا جوابها و الباقي من عائلة نزهة شادين الضحكة على كنيتو قربو يطلقوها عليه..فحين هي مرفوعة نطقات بأدب:اه قابلة..

ميمون:(تبسم)حتى أنا قابل ..

العدول:بلاتي أسيدي نسولوك بعدا هههه

ميمون:(بضحكة)واقابل غا قضي هههههه..

ضحكو كاملين من بينهم نزهة لي هزات فيه عينيها وهبطاتهم وقالت فخاطرها:خضر هههه..

العدول:(توصلتي أبنتي بصداقك؟

ميمون:حممم هاهو(مد يديه لجمال)..

مد ليه ظرف صحيح عامر نييت كان خاشيهم فشانطة صغيرة حداه ومدو ليها هو الآخر شداتو بشوية عليها كيبان ليها داكشي ثقيل و نطق العدول:شحال أولدي؟

ميمون:خمسة تالمليون

كلشي تشوكا من عائلة نزهة..أي نعم الصداق غي مبلغ عادي وكلها و شنو كيعطي لكن متوقعوش يعطي هاد المبلغ كامل ومنهم نزهة نيت لي قلبها كيضرب بغات تنوض تنقز تبوسوو... كتب العدول شنو قال وعطاه سنا وعطاها هي تسني تا ستيلو عوااج فيديها

ونطق:سيادنا الله يكمل بالخير عليكم.. بالرفاه و البنين إن شاء الله..

تسمعات زغروتة ديال الزاهية رقيقة وخارجة من القلب و تلاوها زغاريد حفيضة وسعيدة ..أما الرجال راه كيتباركو بيناتهم لميمون ونزهة عينيها مغرغرين بحلمها لي تحقق ..معنقاها الزاهية وفتيحة كيباركو ليها بحب وفرح..

نزهة:الله يبارك فيك أخالتي.

جا ميمون حتى هو عنقاتو مو وقالت:مبروك على البكر ديالي..المرضي ديالي الله يتاويكم للخير..نزهة أبنيتي تهلاي تهلاي ليا فولدي راه درويش وحنين بحالي..

فتيحة:(ضحكات)هههه ايييه أختي راك ديتي النقرة فولاد الزاهية(عنقاتها) مبروك عليكم..

ميمون:الله يطول ليا عمرك أمي

تلفت لحبقلبو لالة نزهة الآسرة لقلبو لي مشيبا عروق قلبو عليها..بدون شعور باس راسها وعنقها حتى هو مبغا يطلق وحتى هي عنقاتو محشماتش حيت عرفات ضربات الكحل فالبيض محبسهم غي محمد لي وقف عليهم بنفس النظرة..

وقال:مبروك..

نزهة:(عنقاتو)الله يبارك فيك أخويا..

ميمون:حمم الله يبارك فيك..

محمد:(بجدية)تهلا تهلا فيها..

ميمون:لهلا يحشمنا..

حفيضة:(باس ليها ميمون راسها)تهلا فيها أوليدي وحتى نتي تهلاي فيه الله يتاويكم للخير(دمعو عينيها) . .

نزهة:ههه لاش البكا

الزاهية:الالة حفيضة بنتك راه بحال بنتي(بتأييد)غتعيش مع ولدي كي القايدة راه خدات الحنين فيهم الله يرضي عليه..

حفيضة:الله يتاويهم ياربي..

تلفت ميمون لنزهة وتبسم برزانة عكس الخضورية لي ديما طالياه..وقرب منها باس ليها راسها وهي تزنݣ حيت جاتها فشكل قدام خوها و راجل ختها و ولاد خوتها..لكن فاش عنقها مسلم عليها بحب سالا معاها وطلقاتها تسرح حتى هي عنقاتو بشوية والأعين عليهم فرحانين ليهم ..

جلسو حدا بعضهم وقالت الزاهية:ويلي مالبستوش الخواتم

ميمون:نسيتو(مد يديه لجمال وعطاه ليه)..

سعيدة:أراه ليا نݣادو شي بلاطو زوين ليه..

مفهم والو ولكن مدو ليها و لوخرا جالسة حداه مبسمة وقلبها كيضرب متعطي فرحتها لحد..وآخيرا تزوجات ..

الزاهية:الله يتاويكم أبنتي ياربي..إيمتا إن شاء الله نفرحو بيكم ؟؟

محمد:شوفو نتوما إمتا مناسبكم نديرو العرس..

ميمون:العرس أنا لي نديرو و نتكلف بكلشي..

حفيضة:لا حتى حنا بغينا نفرحو ببنتنا و عائلتها ..

الزاهية:جيو نتوما وعائلتكم عندنا للقلعة مرحبا بيكم الى مهزاتكم الأرض نحطوكم فوق ريوسنا..

حفيضة:الله يكبر بيك الالة الزاهية

محمد:نزهة هي الصغيرة وبغينا نديرو ليها عرسها . .

نزهة:(قلبها كيضرب)الصمت

زوج سعيدة:أنا جاني كلها يدير عرسو هههه

ميمون:حتى نذاكرو أنا ونزهة وديك ساعة يكون خير

عبد الرحمان:ماݣلتو عيب..

شاف فيها هي لي جالسة حداه حشمانة وعينيها فاص ليها نازل عليها السر وقال بشوية بصوت يا ذوب تسمعو:مو ترمة ولينا واحد..

شافت فيه حابسة الضحكة وقالت:حشم السلݣوط

ميمون:غدا لدلمك نوريك السلاݣط ههههه..

نزهة:هههه سكت غتضحكني غيحسابهم معرت أش كنݣولو

حداهم تقريبا أو بالأحرى فاص ليها كانو خوتو الدراري جالسين وساقلين غي كيشوفو إلا براهيم لي عينيه متزاحوش على نزهة كيعبرها من صباع رجليها لوجهها لحركاتها وكيقارن بينها وبين ميمون..

نزهة:علاش مجاتش ختك الصغيرة؟

ميمون:ناسها شويا صعاب وراجلها خدام بعيد ݣالت حتى للعرس

نزهة:ااه صافي..

جات سعيدة ببلاطو زجاجي مذهب من الجناب فيه بواط ديال الخاتم الراقي لي كان من اختيار الزاهية وماشي ميمون..ذوقها زوين وخدات ليها كيف خدات لعريساتها قبل..بجانبو الحليب والتمر فأواني فضية زوينة..

حطاتو فطبيلة صغيرة قدامهم وقالت الزاهية:لبسها الخاتم أولدي..

هزو على نيتو مدات ليه يديها الناعمة المصبوغة بلون هادي ومأدب ..وضع الخاتم الذهبي بحب فصباعها تحت نظراتها المحبة ليه..كتبان فعينيها بلي عزيز عندها..بدون شعور هز يديها باسها من الكف بحب و إيناس كتصور..أما هي خدات خاتمو من النقرة دارتو فيديه السمرة وتبسمات ليه بحب..

هز الحليب شربها و وكلها التمر وحتى هي كذلك ومثال و ختموها بالدعاء ليهم بالذرية الصالحة واليسر والبركات..

▪▪▪▪

جلسو كاملين على طبلة وحدة كيشربو أتاي و يدوزوه بحلوة مغربية أصيلة وكيتذاكرو على شتى المواضيع حتى نطقات الزاهية:لالة حفيضة مرحبا بيكم اليوم عندنا للعشا..

حفيضة:ايييه ولينا دابا عائلة وحدة نجيو

ميمون:(حمحم بصوت غليض)سي محمد مرحبا بيكم اليوم للعشا..

حرك محمد راسو ببرود وقال: إن شاء الله

عبد الرحمان:سيادنا خلينا ليكم الراحة ..نتلاقاو إن شاء الله فالعشا..

محمد:ݣلسو معانا نتغداو بعدا..

عبد الرحمان:واحد المثل كان كيݣولو واحد صاحبي مراكشي لي خلا غذاه لعشاه ربي غناه ههههه

زوج سعيدة:عندك الصح هههه أسيدي اليوم إن شاء الله نتعشاو مجموعين..غي عطيونا فين عندكم السكنة..

ميمون:(نقز) ها نزهة تجيبكم راه عارفا الدار..

هنا كلشي سكت وكيشوفو فنزهة لي قربات تندب زهرها الخضر مع هذا لي كيجاوب بلا سوالات..حس بشنو قال وهو يعتق الموقف وقال:كان وصلات ليا الماكلة فاش جا عندي با الله يرحمو تالدار..

زوج سعيدة:ايييه مع ولات كتخدم داكشي. .

الزاهية:(ضحكات)بزايد الرزق أبنتي(وقفات)مرحبا بيكم عندنا . .

وقفو كاملين تسالمو وتوادعو والخواطر هانيا والضحكة قربات تفلت لنزهة قدامهم..تسالمات معاه وهو يهمس فوذنها :السبت الزين..

مسخها الضحك وهي تضور عند مها كتهضر معاها وتضحك..خرجو الناس وهي تطلقها سعيدة بالزغاريد والصلاة والسلام على الحبيب وكيباركو ليها من جديد .

حفيضة:(بفرحة)ودابا لبغات الموت تجي غا تجي ..

نزهة:(عنقاتها)الله ينجيك لينا ويطول عمرك..

ياسين:(طالع كيضحك)غدوزوها لينا سكوتي ولا.. ههههه(جبد تيليفونو طلق الشعبي وجر نزهة)

بفرحتها طيرات الشال وحزمات بيه وعطاوها للشطيح والرديح مع عمتهم والزغاريد والجديب ..شافهم محمد وداز للبيت كيلعب فالتيليفون ما مسوقش عارفا كتطلقها معاهم..محبسو تالركزة لخرا ضاحكين..دوزو أبيل مع عبد الجليل وسميرة لي بكات حيت محضراتش لكنها فرحات ليها. .

أما ميمون راه مكرهش يدير الصدقة ولا يحزم حتى هو و يشطح..مو غي ترضي وتعاود كتوصي قيه وتعاود:أولدي البنت زينة ودارهم ناس مزيانين تهلا فيها ..الراجل هو لي يتهلا فمراتو..ومتخلي حد يظلمها ..أنا التقليد عليا منخلي شي وحدة فبناتي توصلها (نسات راسها) على مدوزو عليا عماتك ..

ميمون:(شاف فيها بنص عين)نساي أمي الوقت تبدلات ..عماتي راه كبرووو.

الزاهية:(عوجات فمها)لي فيه السم راه فيه..على مادوزو عليا وتا داك خوهم مكانش يجي من جيهتي..نوصيك أولدي تهلا فيها ماتديرش فعايل باك..

ميمون:(بانزعاج) أمي الله يهديك با راه ماات الله يرحمو

الزاهية:وأنا غي ݣلت وصافي..

ميمون:أستغفر الله(لمح خاتمو فيديه وتبسم)..

*****

العشية تعاشات والليل طاح..ونزهة فبيتها كتدير آخر اللمسات عليها ..كتشوف فراسها بجلابة فلون موتارد مغلوق منبتا بالعقيق من يد أسماء..معاها فولار بلون فاتح عليه وصندالة طالون حيت الحال بدا كيدفا..مرافقاه بخاتمها تزواج ذهبي والصبيعات لا ديال اليدين لا الرجلين بلون فاتح كيعكس شخصيتها..كتبان أنيقة بزااف لي شافها يطول فيها الشوفة وما طاروش بيها قبل حيت كان سعدها واقف كيف كنقولو..

خرجات لبرا فين مها لابسة ومحلقة مع سعيدة وإيناس مفرنسين فرحانين ليها وكيمدحو فجمالها..

سعيدة:تبارك الله عليك الله يحجبك..

نزهة:آمين أحبيبتي..جيت زوينة؟؟ياكما كنبان معربنة

حفيضة:نتي هي هاديك أبنتي غي زيدو خوك راه غياكلنا

نزهة:فين الدراري؟

إيناس:عندهم ماتش..

نزلو لتحت فين كان محمد مسخن الطونوبيل وعاقدهم كي طلعو وهو يهضر معصب:ساعة و أنا كنتسنا غاديين للعرس ولا؟؟..

حفيضة:اوا أوليدي توجاد النسا..

سعيدة:(كتبركم)غا هو واخد وحدة كانت تلوح عليها جلابتها وتخرج حسابو كلشي هاكاك ..

نزهة:فين عزيزي؟

محمد:سكنتوووو نتوما كاااع..

ضربو الطم مهضروش عارفينو لا تعصب كيبدا يدخل ويخرج فالهضرة اللهم سكتو حدو نطق :فين كاينة دارو؟؟

نزهة:حممم ف*****

سكتو عاود ومشا بيهم عاقدهم قاصد البلاصة أما نزهة قلبها كيفرفر فرحانة حيت تزوجات ومتاحتش ليها الفرصة تهضر مع ميمون وتشاركو فرحتها فعليا.

كي وصلو وباركا الطونوبيلات كيبان ليك غي الحديد الواعر..محمد كيضور عينيه بإعجاب لكن ممبينش الحي زوين ورااقي بزاف..

سعيدة:تبارك الله وا هادي هي السكنة

حفيضة:شوفي تبارك الله العمارة كي دايرا(تنهدات مرتاحة)هذا هو السعد لي بغيت ليك..

نزهة:(ضحكات بشوية)مرحبا بيكم فداري هههه

إيناس:أنا حمقني الحديد ههههه هاديك رونج وهاديك جيب ..

وقف راجل سعيدة بطونوبيل ونزل قايل:زوين هنا

محمد:أشمن طاج؟؟

نزهة:حمم نسولو الكونسياغج..

بالفعل سولوه وعطاهم النعت وطلعو هازين بلاطويات تالحلوة من يدين سعيدة مشكلة كلها لوز..وقفو قدام الباب وتقدم محمد صونا وبعد لحظات قليلة تحل الباب من طرف عبد الرحمان لابس كيف ديما جلابة مغربية وطربوش وسلهامو الخفيف فوق كتافو..وموراه الزاهية هازة صينية فيها الحليب بنكهة الزهر والتمر معمر بالكركاع..طلقات زغروتة برفقة فتيحة ورشيدة لي جات تالاخر لحظة تشاركهم فرحتهم..

ترحب بالرجال من طرف عبد الرحمان وخوت ميمون ودخلو الرجال أما النسا راه شربات نزهة من الحليب وكلات من التمر ودخلات برجلها ليمن والدنيا مش سايعاها عينيها كيقلبو بحشمة على ميمون لي مبانش ..

دخلو للدار لي غتاخد قلبك من اللول بديكورها الراقي وفراشها الغالي ...سعيدة ومها و إيناس عجباتهم الدار بزااف بقاو غي كيشوفو أما نزهة راه شايفاها من قبل

دخلوهم للصالون الكبير المفرش بالبلدي على حقو وطريقو وفيه المجامع تاتاي وبوطة عصرية مزوقة بالنحاس وطبسيل عامر بالفاكية إضافة الى طباسل الحلوة المشكلين..

الزاهية:مرحبا بييكم مرحبا بيك أبنتي فدارك

نزهة:ربي يخليك أخالتي

الزاهية:هادي بنتي رشيدة خت ميمون الصغيرة

نزهة:مشرفين أحبيبة..كي دايرا لباس عليك؟

رشيدة:بخير أختي ونتي..

نزهة:الحمد لله

فتيحة:مرحبا بيك أنزهة فداارك..

نزهة:ربي يخليك أختي..

كملو عبارات الترحيب على هاد المنوال الرجال راه مجمعين كيف العادة بيناتهم وعينين براهيم كيفلتو لنزهة لي حاطا رجل على رجل حتى كيبان الخلخال فرجلها البيضة والقديمات نقيين ما مشققينش ..ولأنها واضعة رجل على رجل ..بان ليها واحد طرف من ليهونش مطراسي فلاه براهيم لي غيكيشوف ويحلل فراسو..

هاد الأخيرة عينيها فالتين كيقلبو على ميمون ما شافتووش ومكرهاتش تسول حتى نطق راجل ختها:فين سي ميمون؟؟

عبد الرحمان:خرج يقضي شي أغراض فخدمتو ويرجع دابا يكون هنا

فتيحة:خالي عمر للناس أتاي..

مد عبد الرحمان يديه كيعمر أتاي ليهم مجمع معاهم والنسا كيهضرو بيناتهم..

فتيحة:ايمتا رصيتو العرس أنزهة؟؟

نزهة:والله أحبيبة معرفت..باقي مݣلنا والو..

الزاهية:(بافتخار)ندير لولدي واحد العراسية فاعلة تاركة

رشيدة:(ضحكات)المرضي ديالي ههههه

فتيحة:(مسخها الضحك كتعيبها) ومالو يغلبني..يا نزهة ولفي مي تضور ضورة و تشكر فميمون غا هي وجران لي والدين..

حفيضة:هههههه اوا عندها الصح..سيد ما فيه ما يتعاب ..

الزاهية:(عجباتها)ݣوليها ليها ..أنا ولدي عارفا علاش كنشكرو حيت مافيه ما يتعاب...

نزهة:(فخاطرها)غا خضر وزهواني صافي ههه..

رشيدة:ههههههه مي الى ݣلسات تشكر ليك ولادها صافي غي نوضي ههههه

سعيدة:خليوها فرحانة بولادها

الزاهية:واييه أ ختي(كتعاود على نيتها)تكرفصت على قبلهم مزياان ..

حفيضة:الله يعوضك خير ياربي..

تحل لباب ودخل ميمون مفرنس كي قشع نزهة بداك الزين أول ماناض عندو هي رشيدة حيت ماشافتوش.. تعانقو وتسالمو ومشا كيسلم غي وصل عندها وهو يفرنس ومد ليها حنكو بلا حشمة وهمس فوذنها:الزين

نزهة:(بصوت منخافض) السلݣوط..

سلم على البقية وتنشر حداها هي نيت مدور راسو لعندهم مجمع معاهم وباين من الأول أنه إجتماعي بزااف وكيعجبوه الناس..

تعمر أتاي وتفرقات الحلوة وشركو الطعام مرة خرا واللغى كثير كيتعارفو..غي حس بيهن غفلو عليهم وهو يتلفت ليها هاز أتاي وقال بصوت تسمعو غي هي:شفتي داك سداري لهيه فاش جالس خوك هو فاش تكيتك داك نهار ههه ..

نزهة:(بغا يمسخها الضحك)ههه سكت (شافت فيه حابسة الضحكة)غنبول بالضحكة..

ميمون:ههههه طلقيها نشوف هههه غدا نتكي مك فيه نيت

نزهة:الله يمسخك

ميمون:(بملامح مبسمة)شهاد الزين ؟؟دلمك طرفك كيبان من جلابة هبطي رجليك لنوض نقلبك هههه ..

قرصاتو فجنبو بشوية محافظة على ملامحها وقالت:الحلاقم ههههه حضيتي ليا هاد الطرف حتى صغار

ميمون:(على نيتو)مسكين خصاتو شي عضة ..

نزهة:(فرنسات ليه ممبيناش)مكرهاااش..

ناض بدون سابق انذار خاف يتفرش ومشا لطواليط شبع ضحك و رجع فحالو مطمر جالس حداها هي لي مجمعة مع خواتاتو خالقة معاهم حوار زوين وحتى هوما ماشي من نوع المشرارات..

حطات الزاهية العشا.. اللحم بالبرقوق مطيباه بيديها جوج طبالي كبار تسربااو وكل مرة تلوح لنزهة لحيمة و لوخرا عاطياها للشكير..

نزهة:تبارك الله عليك أخالتي ..طيابك بنين

الزاهية:(فرحات)زيدك أبنتي كولي خودي ليك لحيمة كولي ماتحشميش..

حفيضة:الله يكبر بيك الالة الزاهية بنت الخير..

تعشاو مجموعين وتهزو الماعن وتحط ديسير تجمعو عليه فطبلة وحدة..رجع ميمون جالس حداها كيهضر مع خوتو فحين هي هزات تفاحة قشراتها ليه وحطاتها بلا ماتعيق قدامو..حنى عينيو شافها وتبسم وهزها بيد وحدة كياكل فيها و بيدو لخرا ظغط بلطف على فخضها كعبارة شكر..

محمد:حممم شحال ونتا فالتجارة؟

ميمون:(شاف فيه حيت ملي دخل مهضرش معاه كيهضر غي مع خوتو)ملي كنت صغير شي 12 لعام ياك أخالي؟

عبد الرحمان:ااه صغير بزااف

براهيم:من السرحة لتجارة مشكون بحالك...

جمال:(هز حاجبو)اوا الواحد كايزيد القدام..ميمون تبارك الله راه زااد نيت..

زوج سعيدة:وباك أولدي فين كان؟

ميمون:حمممم (بجدية)فمصر..

الزاهية:(نطقات كي الحزقة)باه لاحو ليا وزاد الله يسمح ليه..

شاف فيها ميمون هاز حاجبو محافظ على ملامح وجهو كيفما هي..مباغيش يهضر ويضور فيها هو أصلا عمرو ضار فيها..

منعم:(بغا يفوح عليهم)و الى غا يلوحني ويخلي ليا زبالة تالفلوس غا يلوحني ههه..

ميمون:(بجدية)ملاحنيش غي الظروف وصافي الله يرحمو فهاد النهار

عبد الرحمان:آمييين..

توتر الجو وتعكر عند ميمون لي سكت ولزم الصمت حيت أعدى ماعندو هو يتذكر باه ولا مو بطريقة خايبة..حسات بيه نزهة وهي تشوف فيه بصمت تبسمات ليه وتاهو عطاها نفس التبسيمة وسكت باقي مخلي الهضرة رايجة بيناتهم..

وقف زوج سعيدة وقال:خليناكم على خير أسيدي

عبد الرحمان:جلسو باتو عندنا..

محمد:نهار آخر إن شاء الله(مد ليه يديه)الله يكبر بيكم

عبد الرحمان: نهار كبير هذاا أسيدي..

داز جيهة ميمون مد ليه يديه وقال:شكرا..

ميمون:(بابتسامة) مرحبا بيكم الدار داركم..

نزهة:(كتسلم على لويساتها)شكرااا بزاااف خليو ليا نماريكم..

شدات نماريهم وباستهم من جديد ..قبلات يد الزاهية وراسها برضى وقالت:شكرا أخالتي الله يكبر بيك.

الزاهية:الله يرضي عليك ويكون منك..تهلاي ليا غي فولدي

نزهة:لهلا يحشمنا

تسالمو البقية وخرجو وخرج معاهم ميمون جار كلاكيطة فرجليه..توخرات معاه نزهة لور ومع كثار مهزهمش سانسور نطق ميمون:غي سبقو نتوما دابا نزل أنا ونزهة..

فهموه شنو قصد بلي بغا ينفارد بيها وتا حد معارض حيت مراتو قانونا وشرعا حتى هي بحالا حساتو بغاها مهضراتش خاصة لاحظات أنه ملامح وجهو تبدلو..

يتبع...

‎