قصة خيط الريح

في إحدى القصص التاريخية وجدتك❤️

هي فكرة مغربية بامتياز بدور نسائي كتحكي موضوع كيضرب المغربيات والعربيات والنساء عامة...هي فكرة تقليدية لجوج تناس لاقاتهم الايام فظروف عادية..واقعية الى درجة مكاينش الخيال فيها

كيفما عاهدتوني ديما..قصصي واقعين من صلب الواقع وكنتمنى وقع قصصي السابقة تلقاه حتى هادي لي كتبتها بحي كيف ديما

خيط الريح

من الزينة والحلي تعرف فالمغرب العربي عبر العصور لبساتو المرا للتزين وبقا ميراث وتورث بحالو بحال العادات ومنو تنسجو خيوط الزواج اسمى رابط عند الله سبحانه وتعالى

مرحبا بيكم فقصة جديدة ومغامرة جديدة كيف ديما مكاينش تكرار بطلة جديدة وبطل جديد مغاير معمري كتبت عليه

🦋 || خيط الريح.

أمام مرآة طويلة واقفة سيدة فمقتبل العمر.. بكندورة خفيفة فالبوردو نازلة تال لتحت مزيرة من الصدر..

دايرا زيف حياتي لشعرها لي من النواضر تيبان مزيت..بعيون سوداء مشفرين وخالة تحت النيف معروفة بخالة الزين..هازا فيديها اكسسوار معروف فالمغرب ب

"خيط الريح"..

هاد الأخير هو عبارة عن زينة من الحلي تايتحط على الجبهة كديرو العروسة فوق جبهتها اما فالخطبة او فالعرس..

حطاتو بابتسامة عذبة على جبهتها وبعينيها تتشوفو كي جا معاها.. مغتنكرش انه جاها زوين بزاف خاصة حيت ملامحها حرشين وعربيين

بتاسمات لراسها فالمراية وعينيها سهاو فجمالها البسيط وفوذنها كتردد: "داتو وداتو والله مخلاتوو..داها وداها والله مخلاها"

"يا نزهة يالمرضية المخير فالرجال ديتيه نتيا..يا نزهة يا المرضية المخير فرجال ديتيه نتيا"

بابتسامة حنونة علات وجهها و هي تتخيل يوم عرسها فوق العمارية وناس تتشوف فيها واصفقو ليها دايرين بالعمارية وهي تتشير ليهم بلبسة العروس دايرا خيط الريح على جبهتها.. وقلبها تيضرب...

للحظة حسات بيه فعلا انه بصح وانها ماساهيااش..بكثرة ماكيراودها هاد الحلم ولات تتحس بيه حقيقة. .

تحل عليها الباب خلاها تفيق من سهوتها وتشوف من المراية لي مقابلة مع الباب مرات خوها..

سميرة إمرأة بشوشة وباقية صغيرة بعمر 26 سنة.. لابسة قفطان خفيف ودايرا طابلية الشقا.. وشال على راسها خفيف وفظهرها لاايحا ولدها الصغير مركباه وقالت: نزهة زيدي راه كيتسناوك باش تمشيو الحمام..

نزهة:(بابتسامة عذبة)هاني صاافي واجدة..

سميرة:(شافت خيط الريح فيديها ونطقات بأمل)الله يسهل عليك تانتي بشي ولد الناس لي يعرف بقيمتك. .

نزهة: (بابتسامة حزينة)آمين ياربي..(خباتو فماريوها)واجدين هوما

سميرة:(حاسا بيها)واجدين اختي...

هزات ساكها تالحمام المجموع وسطولة لي فيهم مستلزماتها حيت دخلات غي تلبس جلابتها ولصقات تتشوف فخيط الريح. .

لبسات عليها دغيا عباية خفيفة وهزات مسائلها وخرجات لقاع دار لي فيه بنات العائلة من بنات خالاتها وبعض الأقارب أغلبهم عزبات غادين باش امشيو مع العروسة للحمام..

كلشي هاز سطولا والسيكان هي العزبة على ختها تترواح اعمارهم من من 17 ل 25 ..

وبينهم العروسة لي صغيرة فعمرها 17 لعام فقط وباينا فيها..بتاسمات لنزهة وقالت:ياله زيدي

نزهة:ههههه ياله زيدي

خرجو تحت زغاريد الباقيين فالدار تيضحكو واكركرو فرحانين بهاد المناسبة. .

فالكوزينة كانت مرا كبيرة واقفة بقفطان زوين وحازماه بحزام خاشية فيه جلايل القفطان من لتحت تيبان سروالها البيض المخطط بالخضر وصابو فرجليها..

كانت تتشرمل الدجاج وهي توقف عليها بنتها لي اسمها سعيدة وقالت:مي ساليتي

الأم:اش ساليت ياله بديت..مشات بنتك لحمام

سعيدة:(تتشرب)مشات اميمتي..الله يسݣم سعد نزهة حتا هيا ياربي. .

تنهدات الام بحسرة وقالت:ياربي امين...بغيت غي نشوفها عروسة والى جاات الموت تجي

سعيدة:الله ينجيك أمي ...باقي تشوفي ولاد ولادها

الأم:احيانا..العمر كيجري هي البارح زوجتك واليوم هاني كنزوج بنتك(تنهدات)بغيت غي نتهنى عليها ونشوفها فدارها

سعيدة:إن شاء الله ربي يدير تاويل ديال الخير..أنا نزل نشوف اش خصهم

الأم:سيري وݣولي لسميرة تطلع ليا ديك الكبدة

سعيدة:واخا

نزلات سعيدة أم العروس لي هي اخت نزهة الكبيرة تقابل الناس وتقاسي لي خاص..حيت عرس بنتها

أما البنات العويتقات لي مشاو للحمام راهم وصلو بالضحك والتقشاب ومطلعينها على العروسة لي طايح عليها السر...

قلعو حوايجهم وهزو سطولاتهم ودخلو للحمام ..شدو قنت واحد كل وحدة فرشات جلدتها وبداو تيعمرو سطولة..

جلسات العروسة المسمية ب دعاء فوق جليدة وكلها مدبوغة بالحنة وتتبتاسم طايح عليها سر العريسات..

جابت ليها خالتها لي هي نزهة السطولة فرحانة ليها وقالت :ياله الكبيدة دوزي الصابون باش نكسلك

دعاء:(تتفزݣ راسها بالما)ويلي اخالتي هههه انحك راسي

نزهة:هههه خليني نحك ليك راكي عرووسة ههه

دعاء:لهلا يخطيك يالكبيدة..

بداو مراحل الاستحمام ولي أهمها الحكان.. كسلات نزهة بنت ختها مزيان وحكات ليها تا خرجات حمرة والأعين عليها..

بعض قريبات دعاء من عائلة باها تيشوفو فيها واوشوشو. .

..:ياختي ديك خالتها زوييينة

..:صراحة زوينة..شوفي لحمها كي بيض

..:وايييه ياختي..فنة وشوفي وجهها كي مسرارة تتحمقني انا

نطقات وحدة حداهم باستهزاء:داكشي كولو وممزوجاش راه تيقولوها الله يعطينا زهر الخايبات

..:الله يعطي للرجال العمى ياختي..شوفي كي فنة

...:اوا اش قضات بالزين..بقات فالقلب والتصرفات

...:انا بعدا حمقني لحمها فن

..:حكي حكي. .

هذا هو الحديث لي ولات تتسمعو نزهة من نهار فاتت عتبة العشرين.. جمل كثيرة تسمعات فوذنها تاولات حافضاها. .

"ياختي زوينة وممزوجاش"

"الله يعطي للرجال العما"

"فنة وفايتها الكار"

"غزالة ياختي ومعندها زهر"

"الله يعطيك سعد الخايبات"

بالاضافة لتساؤلات تناس :ما تزوجتيش؟؟باقي مكاين والو؟؟مجابش ربي شي راجل؟؟

تغبر على ناس شحال وارجعو اسولوها:باقي مالقيتيش راجل؟؟

وصلات 33 سنة وتسمات عليها "بايرة"

كلمة ختارعها المجتمع المغربي لوصف انسانة ربي باقي مجابش ليها رزقها..

او بالأحرى ماتزوجاتش بمجرد مكتفوت البنت العشرين كيبداو تساؤلات الناس لي ماليهم أصلا دخل..

- علاش متزوجاتش؟؟، واش ماكيجي فيها حد؟؟ياكما مديورة ليها شي حاجة؟؟شحال فعمرها؟؟

وغيرها من الأسئلة لي واخا تكون حجر غاتضرك..كنتي خدامة وواصلة ومامزوجاش تتسماي مدايرا والو..

كنتي مخداماش وهي الدار وممزوجاش راكي مدايرا والو..المهم خاصك راجل. .

كأنما الراجل راه يحيد عليك التراب من القبر.. وكايقيسو معيار جمال البنت بعدد الرجال لي جاو خطبو فيها أو عدد الرجال لي تبعوها فالزنقة أو عدد العيالات لي عجباتهم وبغاوها لولادهم. .

كلمة خلات جميع نساء المغرب الغير المتزوجات بدخلو فإكتئاب حاد بسبب أن سعادتهم تربطات براجل..

لأن المجتمع المغربي كباقي المجتمعات كايبغيو يزرعو فكرة أنك أنثى إذا تزوجي.. ناسيين أن الزواج قسمة ونصيب. .

تحممو مزيان وخرجو من الحمام كلشي بفوطتو ملوية عليه والعروسة حمرة طايح عليها السر...

صلاو على النبي فالچلسة وزغرتو ليها فرحانين بيها وجلسو كيلبسو حوايجهم والأعين على العروسة وخالتها لي تيضحكو مامسوقيينش. .

رجعو للدار بنفس الشكل لقاو فاستقبالهم العائلة لي لتاحقات حيت اليوم العرس ديال دعاء..كي دخلو سرباوهم للغدا حيت باقي تابعاهم الكوافورة..

مجموعين فالصالون بجوج طوابل كيتغداو ويضحكو وصوت ضحكهم واصل لفين..تانطقات وحدة فيهم:اوا الله يسهل عليك حتا نتي انزهة بشي عراسية. .

نزهة:فحياتك احبيبة

صديقة دعاء:عنداك متعرضيناش اخالتي

نزهة:مرحبا يالحبيبة وعلامن نعرض انا الى معرضتش عليك هه. .

شافت فيها بنت عمة دعاء لي معاهم فالطبلة هي كبيرة وقالت:غيجيب ليك ربي رزقك حتلال عندك

نزهة:(باقي مبتاسمة فوق قلبها)اميين. .

سكتات موراها تتاكل ووحلات ليها..هي صح الناس مقصدو والو ولكن بكثرة ما هاد الموضوع منغص عليها حياتها راها تتقرص منو..

تتخاف من شي وحدة تجرحها بهضرتها حيت ياما تعرضات لهاد المواقف. .

نقبات شوي وناضت غسلات يديها وحالها مغير لكن الإبتسامة باقية وأصعب موقف هو تكون تتحرق من الداخل وخاصك تبتاسم..

كملو غداهم ولبسو جلالبهم عاود ومشاو معاها للكوافورة البنات القراب ليها. . داهم اب العروسة بطونوبيلتو وغاديين ومحيحين بالشعبي فالطريق فرحانين ليها

تمكيجو وتقادو وتصايبو ورجعو بلارات كاملين..نزهة راها بماكياج ثقيل لاعب على العينين ودايرا شدة للجنب بشعرها خفيفة تتبان زوينة ورائعة بالقفطان الشيبي لي لبسات..طاح عليها السر..لبسو عند الكوافورة وتوجهو ديركت للقاعة فين دايرين العرس..

لبسو العروسة لبسة الحنة ووجدوها ونزلوها بصلا والسلام والديدجي طالق أغاني مناسبة للحناء..

العائلة كلها مجموعة من عائلة العروسة سوا من جهة مها ولا من باها ..

حمى الطرح وناضت نزهة وسميرة وسعيدة تيشطحو رفقة بنات العائلة.. لي كلشي تيتحير إلا نزهة تتشطح بالتاويل وفمها مترع بالضحك وهي تشوف فيها دعاء تصيفت ليها بوسة فرحانة ببنت ختها..دخلو معاها تالعزارا ولاد خوتها لي اعمارهم من 15 ل24 ..

كلشي تايشطح ومحيح والعرس دااز نشااط ولوز..مع نهاية الأغنية رجعو لبلايصهم تاينشو على ريوسهم وضاحكين ناشطين. .

كي جلسات نزهة حدا خوها الكبير كاع لي فعمرو 56 سنة . . و قالت:واحيحنا

محمد:اوا هي لتركنتو شويا..الناس كلها جالسة ونتوما نايضين كتشطحو

نزهة:اوا اخويا حبيبي راه عرس بنتنا هادا

محمد:حتال عرسك وشطحي..الدنيا مخلطة . .

سكتات نزهة ومتتلاتش هضرات وبقات جالسة واخا بدا طرح جديد لكن رفضات تنوض حيت عرفات خوها دق عليها وديما تيلوح ليها الهضرة..هو الكبير وهو لواعر فيهم. .

رغم كل محاولات الباقين باش تنوض لكنها تحججات بالتعب وبقات قارمة بلاصتها تتشوف فيهم تيشطحو واردحو ومرة مرة الى جات عينيها على شي حد تبسم ليه عادي. .

الأم:نزهة نوضي ابنيتي ديني للفوق نسند..عيني تغمضو علي

نزهة:(شدات فيها وهمسات فوذنها)عيتي امي

الأم: (بصوت عيان)وايييه مبقات صحة مشاو الركيبات. .

داتها ل واحد البيت فالقاعة نيت فين تتبدل العروسة فيه سداري صغير ماحاطين فوقو والو وحطاتها فيه وقالت: تكاي اميمتي والا بغيتي نعيط لمحمد ولا لعبد الجليل يديك..

الأم:لا هي خليني نتساراح باقي ماسخيتش بالعرس ههه

نزهة:واخا الالة

الأم: العقبة مانحضر فعرسك ان شاء الله. .

باست ليها راسها وقالت:ان شاء الله

خرجات مخلياها وتنهدات بحسرة.. تتبقا فيها مها لي تتشوفها مكوية من جيهة بنتها على قبل الزواج..هاد الأخير لي كل ما كايزيد الوقت كيتبدل مفهومو عند الناس ناسيين انه قسمة ونصيب. .

وهي راجعة لبلاصتها من كولوار تلاقات برجل خمسيني..لابس كوستيم .. زوين فوجهو وريحتو فايحة..عندو شعر خفيف وشيبات فلحيتو..بتاسم ليها ورداتها ليه بأدب ودازت خلاتو متبع ليها العين وتايبتاسم. .

رجعات بلاصتها ونطق محمد:حطيتيها

نزهة:ااه

مليكة:(مرات سمحمد)وانوضي تشطحي محدك ديال راسك

محمد:(كان تيسمع)دخلي سوق راسك نتي. .

سكتات ومجاوباتهاش نزهة باقي كتفات تشوف لاغير..ماكتقدرش على الصداع مع خوتها..

تسالا العرس وتوادعو مع العروسة بالدموع..كلشي تايبكي ويعنق ويبوس فيها وهي كذلك..ركبات ومشات مع راجلها وعائلتو لبداية حياة جديدة..

طلعات نزهة ومها وولاد خوتها فطونوبيل محمد لور ومراتو لقدام وديمارا فيه نعاس باغي يوصلهم للدار..كي وصلو نطقات نزهة:كون غي تنزلو تباتو ماتعذبوش فالطريق

يونس:(ولد خوها):حسن والله

مليكة:لا اختي نبات فداري ماكيعجبنيش نبات عند البراني

نطقات الأم لي كانت مسهوتة بنعاس:دار عدوزتك براني

مليكة:هيهي لا اخالتي ماشي هاكاك

محمد:(بغضب)هنيونا..مي نزلي سيري تنعسي.

نزلات نزهة ومها وقلع خوها وهو ينطق ياسين ولدو لاخر:أ الواليد كون غي بتنا عند الميمة

مليكة:تبات على هيضورة السبع ان شاء الله سكتنااا

عوج الدري فمو وسكت حدا خوه..

طلعات نزهة مها لبيتها بدلات ليها وحطاتها تنعس..مع سدات عليها لبيت دخلات سميرة مرات خوها وخوها وولادهم مسهوتين بالنعاس. .

سميرة:ياله كل واحد يشد سداري

عبد الجليل:مي نعسات؟؟

نزهة:ااه(تتفوه)انا راني ميتة بالنعاس وغدا صابحة خدامة

سميرة:(تتحيد الشال)كون سعفتيني ماتمشيش ݣوليهم مريضة

نزهة:والله اختي مانصيب..ياله تصبحو على خير

عبد الجليل:تلقاي الخير اختي

دخلات لبيتها حيدات التكشيطة وعلقاتها باش ماتكمشش ..بقات بكولون وديباردور مبينين فورمتها البسيطة عندها حقها من كلشي..

مسحات وجهها بمزيل الماكياج وخرجات تا غسلاتو فالحمام عاد تخشات ففراشها مهلوكة باغيا هي تنعس..

لكن سرعان ماغمضات عينيها وستحلات النعسة تا صونا تيليفونها بالغيفي فيها الثمنية واقفة..حلات عينيها بزز وراسها تيزدح بقلة النعاس ماعندهاش علاش تحط الراس..

كابرات وناضت والصقيل فالدار كلشي صابح ناعس..

دخلات للحمام غسلات وجهها بما بارد صحصحات و حكات سنانها كذلك ورجعات لبيتها غتموت بنعاس..

دارت ديدوغون ديالها وحلات ماريوها جبدات كسيوة نازلة تالتحت وجايا واسعة من الكمايم فالاحمر الابيض .. لبساتها ودارت صنيديلة فرجليها خفيفة لي مصايبين ومصبوغين بلون بيج فاتح وحميمرين من عند الله..

سرحات شعرها ورداتو لور فايت ليها الكتف بشوي..كتافات بواقي شمسي وماسكارا وعكر خفيف لاغير..

هزات صاكها وخرجات للكوزينة صايبات قهوة كحلة مقطرة شرباتها بالزربة وخرجات لخدمتها..مسافة قليلة ركبات فطاكسي كبير مزاحمة مع الناس فيه تاوصلات خدمتها..

خلصات ونزلات تتفوه باقي مسخسخة..رجليها تيصادعوها وراسها تاهو

طلعات لعمارة وحلات مكتوب عليها مركز ******* للغات ..خلات الباب محلول وعلى صوت التيليفون حطات صاكها فبيروها لي فالإستقبال وجاوبات :الو سونطر **** * وي موسيو..داكوغ

قطعات معاه وجلسات شادا راسها وتتحل البيسي ديالها

نزهة مرا فعمرها 33 سنة..كبرات وسط عائلة متكونة من أم واب وجوج دراري وجوج بنات..الأب توفى وهي عندها 10 سنين ..عندها اخت سعيدة هي لكبيرة فيهم فعمرها 57..محمد عمرو 56 وعبد الجليل راه 36 وهي الصغيرة فعمر 33

محمد ومراتو عايشين عازلين عليهم وهي عايشة مع مها وخوها ومراتو فدار الورثة لي خلاها ليهم باهم.

قرات و شدات ديبلوم سكريتاريا و خدمات بيه مع مركز للغات فالإستقبال مدة لا تقل عن 10 سنوات..

معرفة قديمة وعندها دخل قار ديالها متتمدش يديها لشي واحد فخوتها بالعكس هي لكان فاش تعاون تتعاون

زوينة وقارية ومصوابة وحادݣة وانيقة واجتماعية وضحوكية وواعية لكن معندها زهر فالزواج..

وهادي فكرة دخلوها لراسها الناس بعدما تخطات عتبة الزواج لي بناها المجتمع

من امثالها عدد..تتلقى عندهم كلشي الا السعد..

دوزات الفترة الصباحية بستة وستين كشيفة موصلات الوحدة تا بغات تحماق بكثرة الاتصالات واستقبال الزبائن ..خرجات هازا بزطامها دازت لسناك خدات ليها غداها حيت ماجابتش معاها بحكم مبقاش عندها فين تطيب غداها وتجيبو معاها

خداتو وداتو لإحدى القاعات سدات عليها وكلاتو وتكات شوي مرجعة راسها للور تالكرسي تاغفات مفيقها هي صونيت ديال تيليفونها بالمنبه لي دارتو...فاقت عنقها ضارها من النعسة لي نعسات

كملات خدمتها بزز..ومع السبعة واقفة ناضت تتجمع بعدما خرجو الأطر فحالهم وهزات تاهيا قشها وبين عينيها فقط تنعس لاغير..

كي وصلات لدارهم دخلات مالقات حد من غير عبد الجليل تايتفرج فكورة فالبيت..لقات السلام وقالت:العزيز

عبد الجليل:على السلامة هههه امالكي مدوخة؟؟سكرانة؟؟

نزهة:هههه كون كنت سكرانة كون سحييت..ياخويا عظامي طايحيين علي بالعيا

عبد الجليل:عاد غيرجع معاك العيا..نوضي كولي ونعسي

نزهة:(وقفات)سامحة فكرشي بغيت غي نعس ههه فينهم؟؟

عبد الجليل:ا مشاو عند سعيدة داو معاها الفطور لبنتها وبقاو

نزهة:ااااه..انا هاني مشييت نعس

عبد الجليل:ههههه سيري

دخلات لبيتها تخلصات من حوايجها ولبسات بيجامة مريحة نقية وانثوية وغسلات وجهها ومشات تخشات بلاصتها طاحت دودة بنعاس مفاقت تال الصباح بمنبه جديد مع الثمنية تصباح. .

كباقي أيامها تاتفيق بالمنبه بكري توجد على خاطرها كاتاخد وقتها فاللبس وفالماكياج الخفيف وفتجهيزها لبرا..إنسانة متولة نقية وقارية ..

مر سبع أيام على عرس دعاء وخص أهلها يمشيو لعندهم على قبل السابع..كان نهار سبت فالعشية..

خرجات من الخدمة مع الوحدة وشدات طاكسي للدار..كي دخلات تلقاو ليها ولاد عبد الجليل بالبوسان والتعناق..العمة الحنونة لي كلشي تيحماق عليها..

سميرة: (تتصايب الكحل فالمراية لي فقاع دار)فين تعطلتي؟؟

نزهة:(تاتحيد صاكها من رقبتها) واراكي عارفا السبت ..فين مي؟؟

سميرة:داز موراها محمد وداها معاه وحنا انمشيو فطاكسي نتبعوهز

نزهة:واخا..صبري غي ندوش ونلبس

سميرة:نزهة عطيني شوي من داك الفوندوتان ديالك

نزهة:كاتشاوري ههه هزي ازين كلشي ديالك. .

مشات سميرة بالفرحة هزات منو وبدات تاتصايبو فحين الأخرى دخلات بالزربة هزات حوايجها وفوطتها ودخلات للدوش دوشات دوش خفيف فقط ولبسات حوايجها عبارة عن جلابة مخزانية خفيفة مع صنيديلة فالرجل بلا وضفيرات نقيين ومبرودين بدون طلاء الأظافر..

دارت ميكاب خفيف جدا وهزات ساكها وخرجات رفقة سميرة لي لابسة جلابة وبلغة وشال وجارا ولادها معاها..شدو طاكسي كبير تالمنطقة وتلفو مع معارفينش الدار..

نزهة:(كدوز نمرة سعيدة)وحلنا هنا

سميرة:وايييه تلقايها كتشطح متجاوبش ههه

نزهة:هاا الو..اختي راه وصلنا والدار معرفتهاش

سعيدة:ههه صبري هاني جايا ليك

نزهة:واخا

سميرة:اش قالت؟؟

نزهة:ياله نوقفو بعيد من شمش نتسناوها هاهيا خارجا لينا..

مشاو حدا واحد السور وقفو تايتسناوها ولي داز يلوح كليمة لنزهة..وسميرة تاتفرنس:ايهاي راك عاطية العين

نزهة: اش قضات ليا هاد العين وانا السعد عندي مكفس(بمرارة)قدي راه دخلات ولدها للمدرسة وانا باقي كيتلوطو علي فالزنقة..

سميرة:دابا يجيب ليك الله شي ولد الناس يستاهلك ويعرف بقيمتك..كل توخيرة فيها خيرة

نزهة:(بابتسامة)ان شاء الله ياربي

..:مادموزيل نزهة!!

تلفتات لمصدر الصوت ولقات سيد خمسيني وجهو مألوف بلحية مخلطة بين البيض والكحل لابس سروال توب وقميجة وريحتو فايحة مع بتسامة ..

نزهة:(بلطف)هي انا

..:صيفطاتني ختك لالة سعيدة نجيبكم حيت تلفتوو

نزهة:ااه شكراا بزااف

..:تفضلو معايا

سميرة:(تتفرنس)واخا

تبعوه فنفس الطريق فاش غادي طويل و عامر يدير منها ستة..وسميرة تتنغز فنزهة وتفرنس وتغمزها زعما زوين والدراري سابقين حداه مجمعين معاه..

وصلو للدار وحلو ليهم..دخل هو وقبل مايبعد تلفت ليها رمقها بنظرة إعجاب وكمل خطواتو للصالون فين كاينين الرجال. .

تلقات ليهم أم العريس تترحب وتعاود ودخلاتهم للصالة فين كانو حباب العروسة والعريس المقربين فقط..

سلمو على كلشي وجلسات حدا دعاء لي جالسة بقفطان بيج والسر طايح عليها..

قرصاتها بشوي وقالت:العفريتة

دعاء:ههه توحشتك اخالتي..فين غبوررك؟؟

نزهة:هههه الخدمة ماكنبغيش نبرزطك ونتي لسه في العسل

دعاء:(حشمانة)هههه هي سكتي غرقت فالعسل

نزهة:هههه بصحتك عالله غي تبرد فيك الدودة هههه

دعاء:برداات هههه

عطاتها اخت العريس كويس ديال اتاي وحليوة تدوز بيها.. شكراتها بلباقة وجلسات مجمعة مرة مع دعاء مرة مع اخوات العريس خالقة جو مع الناس كتفرغ ستريس الخدمة. .

تحط الغدا وتجمعو عليه ربعة تطبالي هوما حيت العيالات كثار..تغداو وسالاو وناضت تغسل فالحمام وهي تصادف مع الخمسيني بتاسمات ليه بلطف كأي إنسان تلاقاتو صدفة ودازت..فحين هو راه عاجبو الحال. .

غسلات ورجعات حدا دعاء لي نوضاتها وقالت:ياله معايا لبيتي

نزهة:حشوومة ههه

دعاء:ازيدي

شدات فيديها ونوضاتها من وسط ناس طالعين لبيتها مخلية اللغا عليها

اخت العريس:شفتها ياخالتي..غزالة فنة وبلا زواج

المرا:زوينة يابنيتي ..ولبيبة..والله ماكرهتها لولدي

اخت العريس:متلقايش ما حسن منها..الحداكة والزين والصواب والآداب راك شفتي كلشي على عينيك

المرا:كلشي باين..زوينة ومرزنة ..كلشي عندها بالعبار ..الله يحفظها

اخت العريس:حلوة ياخالتي متلقايش ماحسن منها

المرا:اسمها قلتي لي

اخت العريس:نزهة

المرا:زينة السمية...شحال عمرها

اخت العريس:واقلة 30ولا 31

المرا:ويلي الشيطان كببيرة

اخت العريس:ومالها؟؟كبيرة وشاربا عقلها حسن من برهوشة

المرا:(بنفي)لا ابنيتي انا بغيت لولدي مرا صغيرة..كون كانت 26 27 مكاين بااس ولايني 30 لالا ممسلكانيش.. الصغر زين تولد ولادها وتقبلهم ..هادي راه عام عامين تغسل من حق الشهر اوا وفين الدراري . .

المرا:مقلناشااي العيب..كلشي قدامي تنشوف البنت..و راني كبيرة وديت وجبت فالدنيا هي من الشوفة نعرف الخفيفة من المرزنة ولايني الصغر ابنيتي..ولدي بغا الصغر والصغر زين

اخت العريس:اوا نتي تعرفي

سالا نقاشهم هاكا..فحين دعاء دخلات هي وخالتها لبيتها وجلسو تيهضرو وتتعاود ليها وتاخد نصائحها حيت كبيرة ورزينة تتنصحها بالعقل

دعاء:شوفي بعدا راه خصني ندوي معاك فواحد الموضوع

نزهة:لي هو؟؟

دعاء:(بابتسامة غريضة)جاااوك الخطااب

نزهة:(توسعات بتسامتها) بصصصح؟؟؟شكون هههه

دعاء:(قشعات الحمورية فحنوكها) ايهاي نااس حشموو هههه

نزهة:ههههه سكتي براكا..وقولي لي شكون هذا

دعاء:يالحبيبة شافك فعرسي وحمقتيه ولصق عليك. .

نزهة:(عجبها الحال)بصح هههه شكون كانعرفو؟؟

دعاء:لالا محال واش تعرفيه..كايجي لراجلي ولد خال باه . .

نزهة:عاودي ليا التفاصيل ههه(بحماس)

دعاء:ههههه سيد قاري وخدام خدمة مزيانة عندو قهوة كبيرة هنا فكازا..وميسوور يعيشك مزيان كان برا ياله شي ربع سنين باش دخل. .

نزهة:شحال فعمرو؟؟

دعاء:والله مانعطيك خبار ...غير هو كبير شوي تكون ديك 40 مي هو هذاك سن مقاد معاك. .

نزهة:وزعما نييت بغاني يااك

دعاء:فالفطور ديالي جبدك لراجلي هههه قاليه منها نخلاق قاليه تالسابع يكونو دارهم ونهضرو

نزهة:حممم عندك شي تصويرة؟؟

دعاء:ههههه اش غاندير بيها هههه لا ماعندييش راه فراس ماما والميمة بقبتي هي نتي

نزهة:اش نقوليك الى فيه الخير مرحبا مافيهش الله يعاونو

دعاء:ان شاء الله كل الخير..السيد الله يعمرها داار ومافيه مايتعاب.. كلشي فالعائلة كيذكرو بالخير

نزهة:وشنو ݣالو ليكم؟؟

دعاء:غايهضر مع خالي محمد و يديرو شي نهار يجيو وتعرفي عليه تفاهمتو هو هذاك ماتفاهمتوووش خيرو فغيرو ههه ولكن أنا متأكدة غاتفاهموو

نزهة:(بتمني)ياربيي امييين بغيت تانا ندير وليداتي

دعاء:إن شاء الله

دوزو العشية هاكاك مع العائلة ومع المغرب تفرق المجمع وخرجو عائلة العروسة مشاو فحالهم..

فقدام الباب خرجات هازا ولد خوها ناعس وهي تشوف محمد واقف مع الرجل الخمسيني تايهضرو..هي شافها وتبسم وهي تقلب وجهها حيت واقف مع محمد. .

شوية تم جاي محمد عندهم وقال:نزهة لباس؟؟

مدات ليه حنكها سلمات عليه:لباس اخويا ونتا بخير؟؟

محمد:الحمد لله..شوفي داك سيد ايوصلكم نتي ومي وسميرة والدراري

نزهة:وزعما هانيا؟؟

محمد:هانيا السيد من عائلة راجل دعاء..حمم راه كيتسنا انا ندي مي

نزهة:واخة. .

طلعات سميرة ولادها وطلعات حداهم..فحين الخمسيني بلطافة منو عاون أم نزهة تاطلعات للقدام ورمق نزهة بنظرة إعجاب متحمس وطلع بعدما طلعات تاهيا..

نطالق فالطريق والصمت سيد الموقف.. سميرة كاتنغز نزهة ففخضها زعما شوفي ولوخرا حابسة ضحكة تتفادا تشوف جيهتو هو لي كيسوق بالرزانة..

عليه على من كتبو الخمسيني الوسيم..طونوببلتو فايحة بريحتو وحضورو مهيب..

وصلهم وشكراتو أم نزهة بلطافة وتبسمات وكذلك سميرة أما نزهة كتافات ب"شكرا عذبناك"..

..:عذابكم راحة تصبحو على خير.

عضات على شفايفها بخجل وقالت:تصبح على خير. .

حلو باب الدار وطلعو عاد تحرك هو مرتاح ومبتاسم لهاد المرا لي تتدفى فيها الخاطر. .

دخلو لمحلهم ودراري كيلغيوو وسميرة تنكر:سيروو تنعسوووو تحركووو

نزهة:تصبحو على خير

سميرة:تباتي فراحة الله

كلها دخل لبلاصتو من غير دراري لي بغاو العشا مزال بقاو مع مهم اما نزهة راه مخشية ففراشها تتقلب فتيليفونها طالعا نازلة فالفايسبوك تا طيبات نعاسها حطاتو ونعساات براحة وطيف الخمسيني تيزورها مرة مرة..

مع تسعود تصباح وحيت سيدة موالفة الفياق بكري تريݣلات عليها.. ناضت براحة شابعة نعااس تتسمع السقيل فالدار..حيدات عليها الغطا وناضت تتجمع شعرها وتفوه

خرجات للدوش هازا لاتخوس صغير ديالها..

قضات حاجتها ورافقاتو بروتينها الصباحي وتهليتها فوجهها من كريمات وأكثر ماتتركز عليه هو التجاعيد...

تتكره تلقا راسها تكمشاات تتحس بناقوس الشرف تيدق عليها وبسعدها تيبعد..

خرجات للكوزينة وقررات هي توجد ليهم الفطور اليوم..

باشرات فالإعداد..دارت اتاي على حقو وطريقو بالنعناع وصايبات صوينية ديالو وحطات ليهم اومليط على طريقتها مزين بطوماط سوغيز والزيتون مرافق بالفرماج .. زيتون كاشير زيت زيتون وماغيرهم ..

نزلات جابت باريزيان سخون وحطات الطبلة وماهي الا شوي فاقو الدار كاملة على ريحة النعناع..

سميرة:(خارجة من بيتها تتفوه)اخخخخ الله...صباح الخير

نزهة:(كتقلب فاتاي)صباح نووور ههه رتاحيتي شوية

سميرة:هههه شوية(شافت الطبلة) عذبتي راسك اختي ونتي اليوم لي كترتاحي فيه

نزهة:هههه ماشي مشكل..نيت شحال مدخلت لكوزينة..خويا فاق

سميرة:راه فطواليط..انفيق دوك الحلالف..

نزهة:خليهم اختي ينعسو الحد هذاا انفطرو غير حنا

سميرة:ههه واخا..نمشي نغسل ونفيق خالتي. .

حركات ليها راسها وجلسات تتسناهم تاجاو كااملين تجمعو على الطبلة..

عبد الجليل:اش هذا الالة نزهة تهليتي فيناا

الأم:تتاكل وتنكر تقول هاد بنت الناس مخلياك بجوع

سميرة:ههههههه ولاهيلا

ع.الجليل:سميرة عاطيانا البلدي ونزهة الرومي هههه

نزهة:كلشي بحال بحال هههه فطرو ياله..

باشرو الإفطار فجو عائلي ضاحكين ناشطين.. تاتسمع صوت التيليفون ام نزهة وقالت:اربي ابنيتي جيبي ليا تيليفوني

نزهة:(وقفات)فين حاطاه؟؟

الأم:فبيتي..

مشات جابتو ولقات نمرة خوها ومداتو ليها و قالت : هذا محمد

الأم:(كمشات عينيها تاوركات على الأخضر)الو وليدي..

محمد:الواليدة صباح الخير

الأم:صباح الخير وتيسير..كي داير

محمد:لباس ..كاينين فالدار

الأم:وااييه ياله فقنا

محمد:مزيان بيت هي نعلمك بلي بنجي انا ومليكة ودراري

الأم:وجيي اوليدي دارك هادي مرحبا بيكم

محمد:ان شاء الله...ياله الله يعاون..

قطع معاها وشاف فمراتو لي جالسة حداه تتخشي فوجهها من الفطور وقالت:شقالت ليك؟؟

محمد:(حط تيليفون وهز الخبز ببرود)اش غتقول؟؟جيوو معرفتش انا كاع لاش معيط ليها راه داري هاديك..

مليكة:(ضحكات بسخرية)هههههه دارك..زوينة هادي..دارك هي هادي فاش جالس اما هاديك دار خوك وختك

خنزر فيها وقال:سكتينا من هضرة السم على الصباح..

مليكة:(بسخرية)نتا الوقت لي نجبد ليك هاد الهضرة قوليا سكتي واخليهم تا يورثوك فالحياة..

لوات فمها وسكتات تتعوج فراسها وتخمم..

الأم:جاي خوكم

ع.الجليل:ولاش معيط؟؟موالف تيعلم

الأم:مانعرف اوليدي..مهم غيجيو للغدا

سميرة:(شافت فنزهة)خصنا نديرو شي غدا زييين

نزهة:هههه واخا

ع.الجليل:نفطرو وكتبو ليا اش خاصكم نيت شحال متجمعنا

سميرة:مممم..

فطرو وناضو كتبو ليه اش بغاو.. وتعاونو على لماعن ديال الفطور..

سميرة:نزهة شوفي اخيتي انا نجمع دار ونسيق ونتي طيبي(بابتسامة تتبحليس)طيابك زيين ونيت باش نطرطقو لديك العݣربة السم

نزهة:(تتلبس طابلية)هههههههههههههههه كضحكيني والله..واخا ازين انا نغسل لماعن ونتي جمعي دار..

سميرة:لالا هي وجدي وصافي الماعن انا نغسلهم هههن يعلم الله كي غيدوز هاد الغدا..

الأم:(دخلات تتعجز)اححح اربي ركابيا.. كي غيدوز..بصحة وسلامة

سميرة:بحالا اخالتي نتي معارفاااش ملييكة كتقلب غي منين تضرب..

الأم:الله يهديها على راسها وكان...اروو ليا لاكان فاش نعاونكم.

نزهة:هي سيري امي ترتاحي كلشي ملحوق. .

ناضت لقاتها من الجنة والناس وقالت:اوا ربي عوين

خرجات خلاتهم مقسمين الشغل كلها وشنو غادير...نزهة اختصاصها الكوزينة تتصرعها وتتبدع فيها

طيبات الدجاج بالدغميرة على حقو مرافق بالشلايض.. وسميرة تتجمع الدار وتغاوت مع ولادها تا جرات عليهم لسطاح وكملو شغلهم

موصلات الوحدة تا كانت الدار تتشعل والغدا قرب يوجد وكلشي نااضي..

سميرة:(داخلة للكوزينة)وارويحة هي ههه يعطيك الصحة اختي..

نزهة:هي شوي وصافي هههه

تسمع سرسار وقالت:انا نزل نحل عينيك على هادشي ليتحرق

سميرة:سيري سيري

نزلات نزهة تتجمع فشعرها حلات لباب لقات خوها محمد واقف بصرامة كي ديما ومراتو لي لاوية فمها وتتطلع وتنزل فنزهة ..رفقة اولادهم..

ابتاسمات ابتسامة عريضة وسلمات على ولاد خوها هوما لولين لي قربو يوصلوها فالطول..

نزهة:ههههه الحلووف طواليتي

ياسين:نزهة العمر هههه(عنقها)

محمد:(بصرامة)عمتييي

نزهة:(تسالمات مع خوها بالوجه)كي صبحتي احبيبي؟؟

محمد:الحمد لله(طلع)

يونس:الزين

نزهة:(تسالمات مع مليكة بالحنك)كي صبحتي ازين؟؟

مليكة:نحمدووه احبيبة(بسخرية)

نزهة:زيدو مرحباا بيكم هههه(دارت ولاد خوها تحت باطها)كيغاديين مع القراية ؟؟..

مليكة:(تتطلع فالدروج وتعوج ترماحتها)حممم راهوما مسلكيين

نزهة:جمعو راسكم بغينا شي نقطة زوينة

ايناس:اكون خير اعمتي

دخل محمد للدار نافخ ريشو كي عادتو..توجه للبيت فين متوقع مو تكون تما..قبل راسها وجلس

وقال:كي صبحتي؟؟

الأم:نحمدو الله ونشكرووه..(تتشوف فالباب)فين ولادك..

جلس حداها حاط مخدة على ركبتو:هاهوما طالعين

دخلات مليكة دايرا ابتسامة مصطنعة..باست يديها وقالت:كي دايرا اخالتي؟؟

الأم:الحمد لله..

دارت دراري حداها ابوسوها وتساول هي وياهم..دخل جليل وتجمعو كاملين كيهضرو ويناقشو كأي عائلة مغربية ولكن بالدق وسكات من لتحت..شي تيضرب المعنى على شي..

محمد مخالف عليهم ...ابن تيقول راسي يا راسي لاغير.. مايصرف على مو ما يسول فيها لا ماسولات فيه..انسان بارد ممسوقش للعالام وزادت مليكة كملات ليه ..

تحط الغدا لي تفننات فيه نزهة مع شلايض ..طبيلة كاملة مكمولة..ميقات مليكة وقالت:عذبتو راسكم . .

سميرة:(فاهماها)عذابك راحة يالحبيبة علاه شحال عندنا من مليكة..

مليكة:(بابتسامة استهزاء)عندكم غي انا..

نزهة:(كتحط الخبز لخوها)كول اخويا شفتك شاد يديك

هز فيها راسو وحركو ببرود..وكمل ماكلتو لي لا هو لا غيرو نزلو فيها طول وعرض حيت طياب نزهة زوين

كلاو في صمت الا القليل من الكلام لي تيتلاح بين جليل و محمد..جمعو الماعن ودارو كاس تاتاي تجمعو عليه الكبار فقط دراري راهم فالصالون جالسين مع ولاد عمهم..

مليكة:اوا نزهة راه جاوك الخطاب

نزهة:(جالسة على طرفها اليمين دايرا رجل على رجل )هااا(تصدمات)

الأم:(بابتسامة عذبة)فراسنا..

محمد:(عقد حجبانو)شكون قالها ليكم؟؟

الأم:سعيدة ختك ..السيد من عائلة راجل دعاء

مليكة:ممممم يعني حنا لخرين لي عارفين

نزهة:(تزنݣات قدام خوتها)حتا انا مفراسيش

محمد:(نظف حلقو ونطق بصوت غليض)المهم انا سيد هضر معايا البارح..كيبان معقول وولد ناس..بخيرو وبخميرو..

الأم:هو لي وصلنا لبارح انزهة(ربتات على رجل بنتها)

نزهة:(دارت ليها طن فراسها)داك الشايب؟؟

مليكة:(باستهزاء)ومالكي بغيتيه يجيك شاب

خزر فيها محمد ونطق:ماكبيرش..السيد شارب عقلو وميسور وكيبان ولد نااس..اش بغيتي ؟؟برهوووش؟؟

نزهة:(تزيرات فيها النفس)ماقلتش لا اخويا ولكن راه كبير..القليلة بتكون عندو خمسيين..

محمد:(متحكم فاعصابو)وشنو كتسناي؟؟يجيك عندو 30 ولا؟؟راك كبرتي الالة ومغرفتك هذا مهزاات

جليل:(مكره)محمد...رد لبال لاش كتݣول؟؟

الأم:شهاد الهضرة اوليدي؟؟هذا ولى معيور معيور راه ختك هادي علامن داوي

مليكة:مالو اخالتي ݣال شي حاجة فيها العيب. ݣال الصراحة..نزهة تبارك الله كبرات وفاتت الثلاثين ..بابها مبقاو ادقو فيه ناس صغار..الى باقي اختي نزهة تترجاي تديه صغير راه تما بقيتي..

نزهة:(بحدة وعينيها عمرو دموع)الى كنت غنتزوج باش نتزرف فحياتي هي خليوني (نطقات بمرارة)بايرة حسن لياا ..

محمد:(بغضب)تانكونو حمقين..القيل والقال عليك من كلشي..كبرتي قريتي وخدمتي اش تتسناي؟؟مشاا زمان لي بقيتي تاشرطي فيه فالرجال..راك وصلتي الثلاثين

نزهة:والى وصلت لثلاثين..نااس وصلو خمسين عام وتزوجو وعاشو مزيان

الأم:محمد جمع الهضرة اوليدي..انا لي تخسر خاطر بنتي مكاينش موالداش منها عشرة(بهدوء)شفت السيد ووزنتو تايبان مرزن ومتبت والله يعمر ليه الدار والى مبغاتوش تا حد ميبزز عليها..

جليل:(مأيد رأي مو)راحتها هي لولة..واش تاخد واحد كبير عليها بعشرين عام؟؟

مليكة:(مفقصة)واش كتهضرو بصح ولا كضحكو؟؟نزهة(شافت فيها) واش اختي عارفا السيد اش عندو ؟؟راه عندو لي يعيشك قايدة شفتي غي طوموبيلتو كي دايرا..

نزهة:(بحدة)مابغاش فلوسو تانا بخيري الحمد لله..بغيت نتزوج باش نعيش مرتاحة ماشي نفني شبابي.

محمد: (رفع صوتو من جواب ختو)واقلة الحياا هادي الالة نزهة هااا؟؟!! مابقات حشمة وليتي عاين باين تقولي باغية نعيش مرتاحة..واش انا غانبغي ليك متعيشيش مرتاحة!

نزهة:(شافت فيه بعينين دامعين)تقبل تعطيه لبنتك؟؟

محمد:(بتأكيد)الى شرفات نعطيها تالمول الثمانين..

وهنا حفر بخنجر لنزهة فقلبها..ضربها بالكلمة لي تتكره.."شارفة"

يمكن كون كانت بولادها وتقالت ليها غاتكون فرحانة وتجاوب "الله يكبرنا على طاعة الله" لكن فحالتها هي تتفكرها انها كبرات وانها على وشك الشرف وتحرم من الأولاد..

نزهة انسانة باغية الحب و وليدات لاغير..باغية زوج محب يبغيها يتهلا فيها تلقى معاه راحتها وتولد معاه وليداتها ، ماباغياش تزوج باش تسمى مزوجة وهذا بحد ذاتو السبب لي خلاها ترفض شحال من واحد..

نزهة:(وقفات حابسة الدمعة)الله يخلف عليك اولد ميمتي..راك هضرتي ووفيتي..(شافت فيه بحرقة)حتا تكبر بنتك وعطيها فابور كاع..

خرجات من البيت مخلياه واقف تايغوت بغا ينوض ليها يحاسبها..

حبسو جليل لي صاح فوجهو:شهاد الهضرة ݣلتي؟؟

محمد:(بالغوات محيح)مزيان تبارك الله ولات ترد علي الهضرة..كبرتي يالبرهووشة وحسيتي بجنابك

الام:(ضربات على ركابيها)ݣللللس الأرض..شديك الهضرة سمعتيها؟؟

مليكة:هضرة الحق مابغاها حد

الأم:(بغضب)حتا تكبر بنتك وديري فيها لي بغيتي

مليكة:(دارت راسها ضحية)ياك اخالتي ياك؟؟وانا لي قلبي واكلني عليها بغيتها تدير دارها وتستر راسها وتدير وليداتها العمر تيجري..شكون يدوم ليها؟؟

جليل:(بحدة )انا ندوووم ليها..(شاف فمحمد)تعلم تهضر مقاد

محمد:(صاح فوجهو تيهزز فيديه مهلل ولادهم واقفين امام البيت تيتفرجو مافاهمين والو) انا اسيدي محرم كاع هضرتها..بناقص من هضرتها اش زايداني..بنادم باغييين ليه الخير وكيتهزز علينا فالهضرة..(داز خارج)ضبرو راسكم الله يجعلها ماتضفر الشيب حداكم(نهض فمراتو)تحركييي نتيييي(نادى على ولادو)زيدوو نتوما..

الأم:(تتوقف وتنادي عليه)محمد محمد واامحمد

خرج ماتسوقش ليهم تيغلي..دمو حامي ومن ديما هضرتو تيبغيها تتطبق ولباس..متسلط ومتحكم ومتيبغيش لي يجادلو..

تبعاتو مليكة مرتاحة نفسيا حيت ترونات بيناتهم..جارا ولادها وراها...مخلين مو شادة راسها وسميرة تاتمد ليها الما اما جليل تيغزز سنانو معصب:لعنة الله وعليه الكلب لاخر ..بلا حشمة بلا حيا تيقول ليها شارفة..

الأم:(شادا راسها)واميميتي على ولادي واميمتي على ولادي

سميرة:الله يهديك اخالتي راه هو لي داير العصا فالرويضة

الأم:مايعرف يهضر مايعرف يتفاهم (تتنهج )جاي يسمم فيها...

جليل:اخر مرة يعتبها فهاد الدار...الى بغا يشوفك يجي ولايني حاجة خرا لا...الكلب لاخر ساكتين ليه حيت الكبير وكنحشمو نخسرو ليه ولايني طلع لينا فوق راسنا.

الأم:(تاتحاول تنوض)نوض نشوف ديك الزغبية مسكينة غيكون قلبها غايطرطق..

ناضت بمساعدة سميرة دقو عليها مرارا وتكرارا لكن تاحد ماجاوب

الأم:(بحسرة)اشنديرو ابنيتي؟؟

سميرة:(تنهدات)خليها اخالتي تبرد ونهضرو معاها...هضرتو قاسحة عليها.

الأم:(تنهدات متحسرة)مديريش فبالك ابنتي..هضرتو زايدة ناقصة..

تحركات هي وسميرة من حدا بيتها مخلينها متكية على كرشها كي شي بنية صغيرة وعينيها تيقطرو دموع لي كيتلاقاو فنقطة تنيفها واقطرو على الفراش..

هضرة الناس تقتلك وتحييك وهضرة الأقرب ليك كاتقتلك وتديك المقبرة..

شنو ذنبها لاكانت باغية تزوج على الصح...عدد تصحاباتها تزوجو باش ميفوتهمش التران كي تيقولو..

قضاو باشما كان باش يحاربو اسم العنوسة وباش اتسماو مزوجات وبرجالهم..

المهم عندهم هو ارضاء الناس وتحبسي الأقاويل عليك ومتسمايش"بايرة" والحياة لي غايعيشوها من بعد هي الاسوأ

فالعادي كاينة لي تاتزوج صغيرة اما قاصر ولا باقي ماقفلاتش العشرين وهادي بحد ذاتها هي لي كدير اكبر موفيز افير فحياتها بحيث ان عقلها كيصور ليها انه مفهوم السعادة مرتابط بالزواج وأن لي غاتزوج بيه غيعيشها لي كانت تتشوفو فالأفلام التركية وماغيرها..

وكاينة لي تتزوج هروبا من اسم "عانس" باش تفك من هضرة ناس وتدخل تاهيا تحت سقف. ."الراس المغطي حسن من العريان" ..

ناسيين ان لي مغطي ليه راسو يعلم الله باش مغطيه ماشي ديما الراس تيتغطى بالحرير..مرة حرير ومرة قزدير نتا وزهرك..

بكات نزهة تا شبعات وتنخصصات فداخلها متحسرة من هضرة خوها..تا تعاشات العشية وياله بغات تغفا بعد موجة بكاء صونا تيليفونها فيقها من الطريق نحو النوم..

هزاتو مضهشرة وجاوبات بعدما شافت اسم.. "الهام"

نزهة:(بصوت باح)الو

الهام:افين الصاحيبة ؟؟

نزهة:اهلا زين(بغير نفس)لباس عليك؟؟

الهام:الحمد لله ونتي؟؟ياختي غبرتي الى ماسولنا ماتسولي من عرس بنت ختك ماباقيش تشاوفنا

نزهة:هي الوقت والخدمة صافي..نتي مزيانة؟؟

الهام:كلشي بخير..نوضي نوضي نديرو قهيوة ازين توحشت جموعك

نزهة:(باعتذار)كون غي عفيتيني والله تاعيانة

الهام:ههههه انوضي من الهضرة ههه نتلاقاو من هنا ساعة فقهوة****

نزهة:(دارت ابتسامة باهتة)زعما نتي مايقد عليك غي لي خلقك. .

الهام:هههه عارفة ياله نوووضي. .

قطعات معاها وتنهدات متذكرة كلام خوها...ناضت تتنهد حلات الباب ودازت ديركت للحمام غسلات وجهها وشافتو فالمراية عينيها منفوخين بالبكا. .

رجعات لبيتها لبسات عليها سروال دجين وشوميز مع صنيديلة مرافقة ببعض الإكسسوارات الخفيفة عطاوها جمالية خاصة..

رشات برفانها وهزات ساكها وخرجات من البيت تلاقات سميرة لي بتاسمات ليها:الزين

نزهة:(حاولات ماتبينش)انا خارجة نشوف الهام

سميرة:(بمزح)اوا نخرجو كاملين

نزهة:سيري لبسي أنا نتسناك

سميرة:واش لي عندو الدراري باقي كيخرح هههه لمن نخلي هاد الجنون؟؟

نزهة:(تأثرات بهضرتها)الله يعطيني حتا أنا شي جنون نحبس عليهم الخريج هه

سميرة:سيري ازين خرجي فوجي

نزهة:قوليها لمي..ماغنتعطلش

سميرة:واخا كوني هانيا

خرجات دايرا نظارتها الشمسية مخبية عيونها الباكية..غادية بمشية عادية وتيبان التاويل تايتقطر منها كلشي عندها بالعبار..وخدات طاكسي كبير حطها قريب من القهوة على بعد اقدام تالمشي

تمشات وعقلها تيضارب فالتفكير وقلبها متحسر..تاوصلات القهوة وزولات نظاظرها تتقلب عليها بانت ليها مريحة بعيد ومشات عندها.. تسالمو وجلسو فاص لبعضهم..

الهام:كنت غاملة فالدار ههه

نزهة:هههه كيدايراا؟؟توحشتك

الهام:تانا احبيبتي..هاحنا مع الخدمة وجري عليا نجري عليك . .

نزهة:كلشي هاكاك(شيرات للنادل)كافي كغيم

الهام:مال عينيك؟؟كنتي كاتبكي؟؟

نزهة:(تنهدات متحسرة) اوديي ا خليها عالله..

الهام:(بقلق)اش واقع؟؟

نزهة:تخاصمت مع خويا

الهام:محمد؟؟(حركات ليها راسها بالايجاب) و علاش؟؟

عاودات ليها نزهة القضية من لول تللخر ونطقات لوخرا:هضرة الخراا تفووو..حتا تكبر بنتو وازوجها لمن بغا..

نزهة:هضرتو ياختي بقات كتطلع وتنزل فيا..كلشي نسمعها منو الا خويا(غرغرو عينيها)

الهام:(شدات يديها)ااربي ماتبكييش..الله يجعلو ابكيهم هو نييت..واش هذا مرييض تزوجي شارف هارف باش تسماي مزوجة ولا؟؟هاني تزوجت انا اش قضيت بيه؟؟كون عرفت نخرج مطلقة مانتزوجش نبقا نييت تاع راسي

نزهة:ماعارفش بلي الزواج ارزاق هو تايعرف هي تسماي مزوجة والناس ميهضروش..

الهام:لي بغا يهضر يهز بووق..تفني شبابك على قبل واحد شارف هارف عاش وشاف وتشوف وتبقاي نتي هازاه تبدلي ليكوش وتراري حتا يموت وفلخر ميطلع ليك منو تا ورث صحيح..

نزهة:انا الهام والله ماغرضي فالفلوس الحمد لله خدامة وساترة راسي واخا ماشي شي صالير نيت ولكن هازني ماتنمد يدي لحد ..انا بغيت لي ندير معاه وليدات ونعيش معاه فالهنا يبغيني ونبغيه كون بغيت زواج من والا كون تزوجت من شحال هذا..

الهام:واسيري نتي فهميها ليهم..دايرين ليك بحال كيدارو ليا دارنا..تزوجي تزوجي تزوجي تا تزوجت وطججوني صدقت مزرفة ومصيدة أكبر تصييدة..ديتو مقطر ولد الحراام رزاني فصحتي وففلوسي وفشبابي..

نزهة:هههه را باقي صغيرة باقي تجيبي سيد سيدوو

الهام:شكون هذا لي يبغي يدي وحدة مطلقة. .

نزهة :بالفرحات عليه..زوينة وقارية ومصوابة وبنت الناس ههه الله يعطيهم العما

الهام:ههههه امييين..شربي كافي ديالك اتبرد

شرباتها مبتاسمة فعلا خرجتها مع الهام تتنفس عليها..هي صاحبتها الوحيدة الروح بروح معرفتهم من ايام القراية وبقاو صحاب رغم ان كل وحدة ساكنة بعيدة على لوخرا ولكن بقاو صحابات..

الهام بنت زويونة مربوعة القد..عندها حقها من الزين مطلقة عامين هادي وعايشة مع دارهم..

دوزو وقت مع بعضهم وناضو فحالهم متوادعين..رجعات نزهة للدار بنفس جديد ومرتاحة.. متناسية شوية حالتها..دخلات عليهم تايديرو كاسكروط سلمات وجلسات عادي بحالا ما وقع والو ..

بعدها ناضت للحمام ضرباتها بتحمحيمة ورجعات تعشات ووجدات غداها لغد ليه وتلاحت تنعس بعد يوم متعب مترجية أيامها الماجية تكون أحسن. .

*****

دازت جوج سيمانات بالحساب ..نزهة بين الدار والخدمة عايشة بخير مرتاحة ..اليوم راجعة من خدمتها نهار سبت فالعشية عيانة باغيا هي تنعس..مع دخلات لدار تتسمع التوشويش.. والهضرة..

استغربات وتقدمات وهي تلاقا ليها سميرة جراتها للكوزينة وقالت:شكون كاين؟؟

سميرة:علاه ماشي داك الحرامي تخوك ناض عطاا للناس الكلمة وݣاليهم جيو نهار السبت تخطبو

نزهة:(شرعات فمها )اشنوو؟؟؟عطا لكلمة لداك الشارف؟؟

سميرة:وايييه حشاك ومعلمنا مݣال لينا جاي حتا وقفو عند الباب هو وديك سامة ديال مراتو ونضنا بتلفة كنوجدو..

نزهة:(طلعات ليها القردة للراس وݣرنات حجبانها)دابا هذا راه كيقلب عليا نوريه نزهة المصعورة...(بغات تمشي ليهم)طلقي مني والله حتانفرتكها على جدوو..باغي غي الشوهة انا نشوهو نييت ..

سميرة:اويلي تسناي واش تسطيتي؟؟اجي لهنا(تنطرات منها وتتعيط ليها بهمس)نزهة نزهة..

اما نزهة طلعو ليها الجنون لراسها..اعدى حاجة عندها لي يشد معاها الزكير والضد..ولي يفرض عليها شنو دير..وقفات عليهم مخنزرة فباب الصالون وماعاجبها حال باقا بحوايج الخدمة..

قشعات خوها جالس مترع فمو لضحك مع الخمسيني لي لابس مزيان ومأنق ماتعطيهش عمرو..

ومعاهم شي عيالات معرفاتهمش رفقة مليكة لي تتفرنس عايشة الدور وكذلك جليل لي جالس ماعاجبو حال رفقة مو لي تادير الصواب. .

هزو راسهم فيها متفاجئين ونطق محمد:ختي جيتي؟؟

شافت فيه بشوفة مخنزرة:شكون هاد الناس؟؟

جليل:(نقذ الموقف)نزهة اجي اختي ݣلسي

الأم:ݣلسي ابنتي..

دخلات مخنزرة وباينا ماعاجبها حال وأم العريس تتطلع وتنزل فيها وقالت:شكون هاد الناس؟؟

نطقات أم العريس بابتسامة: واش ماݣلتو ليها والو؟؟

محمد:ههه لالا عالمينها..نزهة سيد لي دويت ليك عليه(شير بأدب للخمسيني)سي عمر..

نزهة:وي عرفتو وحتا أنا راه قطعت معاك الهضرة ݣلت ليك ماموافقاش

هنا كلشي تزير وأولهم محمد مرضااش من هضرتها ..وهو ينطق:نزهة ههه ياك هضرنا؟؟

خنزرات فيه ومخايفاش حيت لافات تاتعصبات راه متعقلش على شي حد ونطقات:هضرنا وݣلت ليك ماموافقااش!!

بغا يهضر تاني وهو ينقز العريس براسو: سي محمد عطيوني معاها دقيقة نهضرو و يكون خير..

نطقات مرا جالسة جنبو باينة ختو من الشبه لي بينها وبينو زيادة على صغر عمرها:اش هادشي اسيدي جايين نخطبو ولا نسمعو الهضرة

نزهة:(ببرود)معندي فاش ندوي انا وياك اسيدي..واقلة خويا (باستهزاء) ماعلمكش بلي ݣلت ليه لا

عمر:(بابتسامة)ݣالها ليا ولكن درت راسي ماسمعتش..عطيني دقيقة نهضرو..

ام العريس:(ماعاجبها حال)الى بان المعنى لافايدة فالتكرار..السيدة هضرات(وقفات)الله يجيبنا فالصواب وسمحو لينا..

وقفو النااس وهي توقف مليكة ومحمد معاهم لي عينيهم فالتين ومتشبتين بهاد الزواج

مليكة:ويلي لالة نجية(ام العريس)نعلي الشيطان

نجية:الهضرة باينا(مخنزرة)البنت بايعا شبابها غالي مبغاتش من لول لاش محشمينا..

رجاء:(اخت العريس)لي تݣال تݣال..زيدو فحالنا

محمد:(كاتم غضبو)اسيادنا هديو النفوس راه البنت عيانة معارفاش اش كتݣول

نجية :باغيين تعطيونا بنت مريضة ولا..براكا هي كبيرة فالعمر

نزهة:(شعلات ووقفات ليها مخنزرة)لالة نجية ولا سومية ..زارتنا البركة الباب على يديك ليمن..

دازت نجية مخنزرة تابعاها بنتها وولدها لي عينيه معلقين بنزهة ..هاد الأخيرة لي مخنزرة فيهم وفخوها بلا حشمة بلا حيا ..

هاد الاخير تبعهم تايراضي نفوس مخلي كلشي مصدوم واولهم مليكة لي خرجات عينيها:اويلي واش مسطية؟؟لاش جريتي على الناس

نزهة:(بالغوات وبلحوحتها تسرحات) المسطي هو راجلك لي هضرتي داخلة ليه من وذن وخارجة ليه من وذن..اش ݣلت ليه انا داك نهار؟؟مابغيتش هي مابغيتش تيحسابو باقي برهوشة يبزز علي

مليكة:(مرضاتش)معارفاااش مصلاحتك البهلة

جليل:مليكة سالات الهضرة

مليكة:(الجنون ركبوها السيد عندو الفلوس وطمعات هي وراجلها)اويلي على الهضرة سداات؟؟ واش هذا تيݣولو ليه الناس لا..السيد خانز فلووس ويعيشك قايدة وجالسة كتشرطي..نوووضي الالة نوووضي راكي شرفتي وهترتي

نزهة:(تحزمات ليها وغوتات فوجهها)شرفت ولا جلست ديها فرااسك..شارفة وخدامة على راسي كنلبس حوايج واخا تخدمي فمعرت اش ماتشريهم..عندي خدمتي وزوينة ولي شافني بغااني نجلس ندفن راسي مع واحد عام عامين اهز العݣاز..الى عجبك ديييه نتي نيييت

مليكة:(عرات على وجهها)ياااك ابنت خالتي هذااا هو وجهك..عريتي على نيابك تاني ياااك وليت انا لي مانسوا بصلة

الأم:سكتو سكتووووو

نزهة:كون بغاوني نسكت(تترعد)كون مايحطونيش فهاد البلان..سمعيني نݣولليك(تتحلف عليها بصبعها وحواجبها معقودين)نتي وراجلك تفوتو ساحتي..نتزوج ولا نجلس مسوقكمش ياكما تتحطو ليا القفة وانا مفراسيش..

على هاد الهضرة تجرات من شعرها كان محمد لي طالع معصب وكشاكشو خارجيين :اييييه ابنت الكلب ...

نزهة:(تتجر شعرها)بغيت ليك مصيييبة طللللققق

تجمع جليل ومراتو تيفارقهم وهو تينتف فيها وتيغوت:مرمدتي ليا وجهي فالتراااب ابنت الحرااام مع النااااس

نزهة:(تتغوت ومها تتفك مع سميرة اما مليكة واقفة تتفرج)طللق الله يعطييك العذاب الحيواان..

دفعها تا جا وجهها على لحيط وصااح:والله لبقات فيك البايرة أعيفة البنات..

نزهة:(بالصعرة لي فيها مأثراتش فيها الكلمة)بايرة وبصحتي خدامة وبفلووسي وماغنتزوجش بداك الشاارف..

مليكة:(مغددة)تماا بقيتي يالبايرة تاحد مايسااومك قدك تزوجوو وولدو ونتي جالسة تشرطي..

الأم:(صاحت)نعلة الله وعليك ابنت الحرام...بنتي بزاااف علييييك (شافت فمحمد)النهار لول ݣالت ليك لا هي لا...لاش جايبو لاش؟؟؟

محمد:تجيكم شي مصيبة تقلب دنمكم كااملييين(تينهج)سر لي بغا يدير فيك خيييير..

جليل:خرج فحالك من هنا..خرج كتجي تجبد الصداع وتزيد

نزهة:هي نتا تزوجتي(شادة راسها لي تضرب مع الحيط)بوحدة مباغيهاش حسابك كاع الناس بحالك ... شفتي انا بزاف عليك وبزااف على هاد الشيخة تمراتك (شافت فمليكة تتقلي السم)كتݣولي عليا بايرة بحالا نتي جبناك بنت العشرينات..جايبنك غي نسدو بيك الثقابي لي حفراتهم بنت فاطمة..(شافت فخوها تتسممو بهضرتها مرضاتش اضربها وعاد قوتها ماشي قدو باش تواجه معاه جسديا) عاقل على بنت فااطمة لي ماخليتي مادرتي عليها ومخديتيهاش وجات هاد بنت الكلب لي بنت خالتنا ياحسرة تاخد بلاصتها... بغيتيني نولي بحالك عايش مع مرا محاملهاش جامعكم هي الولاد..

محمد(تعصب وفكراتو فالماضي لي باقي حي فيه ودفع جليل ومشا ليها صرفقها تاضار حنكها وبغا يكمل عليها لكن جرو جليل معصب ودفعو:خررج علينا متبقاش ترجع عندنا

مليكة :(بالسم لي فيها ولي طالع نازل فيها)يالكلبة الخانزة تحل ليك الفم ورجعات حليمة لعادتها القديمة...

نزهة:(تترعد)موتي فسمك شفتي غي محمد عمرو بغاك ولا غايبغيك ونتا(شافت فمحمد وبتاسمات باستهزاء)اولد ميمتي هنا تحدات الخاوة متعرفني منعرفك..تشوفني فالطريق دير راسك مكتعرفنيش يالكلب...عايش حياتك مزفتة وبغيتيني نتزوج بحالك ونعيش حياتي كاملة كنبكي حيت زرفت حياتي...خرج علي من دار با...خرج

الأم:(طاحت تتنهج وتضرب فرجليها)هاويلي ميمتي هاويلي ياجيلالي اجي تشووف فين وصلوني ولاادك اميمتي اميمتي

مليكة:الله يعطيك شي مصيبة بغيت ليك شي تشتيتة ان شاء الله ميلقاو مايجمعوو فيك...بغيت ربيي(تتغوت وكشاكشها خارجين)يرزيك فلي عزيز عليك...توخر ليك بوحدك متلقاي تا لي يهزك ابنت الكلب(جمعات دفلة ودفلات فالزربية)الى باقي عتبتها عندكم يالكفرة بالله راني بنت الحرااام..

محمد:(غوت)تحركيييي قداميي..

خرج مخليها تتغلي تتهز فصاكها ولوخرا تتفقص فيها:راكي بنت الحرام نيت مالكي بنت النااس يالكلبة..لي تدخل على خالتها عروسة وتنبش بين الخوت تبغي تشتت الشمل بنت الناس ها

محمد:(تيغوت فقاع الدار)خرجييي خلااص(تيترعد بالعصاب تفكر هضرتها وحسرتو على بنت فاطمة لي حياتو كاملة منساهاش ومغينساهاش)..

لبسات جلابتها وتبعاتو خارجين مغددين وتيترعدو مخلين الكل ضاير بالأم لي تتبكي وتنخصص وتضرب فصدرها

جليل:مي الله يهديك...نوضي نوضي ترتارحي(مغدد)الكلب لاخر كيجي يجبد الصداع و يمشي..

نزهة:(تتبكي وشادة فمها)بغيت ليه تشتيتة ان شاء الله

سميرة:من لول ماتخليوهش يدخلهم معاه

الأم:(تتبكي)انا لي شويت ولدي فقلبو تاتقلب علي هءهءهء انا لي مخليتوش يديها ...كون داها كون رتاحينا..جبت ليه بنت ختي ݣلت تدير بحسابي وتخلي الشمل مهزوز...(تضرب على صدرها)انا لي درتها حتا ولدي مابقيت نعرفووو..

جليل:(باس راس مو)يهديك الله امي..واش عاد غتعرفيه؟؟منهارو حماار وكيعرف غي راسو..سميرة جيبي لمي دواها..

نزهة:(تتمسح دموعها)هءهءهء سمحي ليا امي(باستها فراسها وعنقاتها)سمحي ليا امي..معقلتش اش كندير هءهءهء عصبني وغددني

الأم:(شدات فسميرة)ديني ابنتي عييييت عيييت..

تعاونات عليها نزهة وسميرة داروها ففراشها عطاوها دواها وخرجو مخلينها تترتاح..

سميرة:(بحزن)الله يرحم ليك الوالدين ماديريش فبالك...هضرتها كتقتل..

نزهة:(ببرود)بردت سمي فيها مبقات فيا غي مي مسكينة اما هو شحال هذا وانا كاندير عين ميكة عليه بدوك التصرفات...الخو لي مايسول فيك مايسول فمو ..ربطة تنعناع معمرو جابها لينا منهار عزل دارو..

سميرة:وديك الخانزة زايدة ليه فيه (ضحكات) ههه ولكن عبرتي عليها غي جبدتي ليها بنت فاطمة وهي تبدا تلون كي بوصيحة

نزهة:(بتعب)اختي انا ماكنبغي نجبد حد ولكن لي جبدني كايلقاني..عيييت صابرة ليها تضل تحرش فيه وتضل تقرص فيه تا سيد قلب وجهو علينا

سميرة:الله يدير لي فيها الخير...سيري ترتاحي سيري غا تكوني عيتي

نزهة: جيت عيانة وزادو كملو عليا الله ياخد فيهم الحق

دخلات لبيتها ..بدلات عليها وتخشات ففراشها تتنهد..اعدى حاجة عندها هي تتعصب وتفرغع على بنادم..بقد ماهيا إنسانة بشوشة ضحوكية مصوابة ومرزنة بقدر ماهيا لا طلع ليها الدم تتولي كي الكلبة تنبح وتعض وتقمش. .

أما مليكة راها مليكة نيييت..تملكات وتنكرات من هضرتها وبقات كطلع فيها وتنزل مغددة..المرا تضربها هي المرا.. و وحدة بحال مليكة حياتها مكرساها للصداع والمشاكل

شافت دار راجلها تزاد عليهم هي الجفاف تنكر على محمد تاتطججو ..

كرهاتو فعائلتو ومايجي منها تضل تحرش وتنݣر ومتخلي متقول..

هي بنت خالتو لي عشقاتها ليه مو بالشهوة لكن للأسف هو عمرو بغاها.. حالها من حال بزاااف تالبنات خداو رجال قلوبهم عند نساء خرين.. وكايبقاو عايشين معاهم تحت مايسمى "اضور تاعيا ويرجع لمت ولادو"

الجملة بحد ذاتها تتعرف ديك المرا انها أم الأولاد فقط وماشي ملكة القلب..

سايق وتيسوط مغصب وتيترعد.. ماحملش تحشيمة لي تحشم مع الناس وهاد الصداع لي ناااض..كي وصلو نزلات مراتو معصبة تضرب بالباب وداخلة تتنكر كأنها كانت خاصها هي دارها باش تفركع عليه..

دخل مهدود ..وجهو غاضب وقوي لكن داخلو مهدود وقلبو معصور على حب حياتو. .

الحب فالسبعينات والثمانينات والتسعينات عمرو يتسنا وتسول أي واحد غايقوليك اه عاقل على لي بغيت. .

لاح السوارت فوق الطبلة وهي تبدا شادة جنابها معصبة وتتكرز على سنانها: دوي الراجل ..شفتي تريكتك مدارت فيا هاا..شفتي اش سمعوووك؟؟(تتحنى تال عندو)ياك كانݣوليك ماكيحملوكش ومكيحملونيش وماكايبغيوش ولادنا..شفتي على تحشييمة(شافتو ساكت ورفعات صوتها)أ دوي معايا..

ناض منتافض على غفلة وصاح بغضب ف وجهها تا كشاكشو ضربو فوجهها:سدي عليا داك الفم ودخلي سوووق رااااسك...

مليكة:(خرجات فيه عينيها)يااك اسيدي ندخل سوق راسي؟؟عاجباك تحشيمة لي دارت لينا ختك مع الناااس...ياك ݣلت ليك نديوه لبنت ختي ...ونتا كاطير واخدو ليها بحالا راها قايدة. .

محمد:(تايتنفس بجهد)شوفي أ مليكة قسمت بفمي بالله الى مامشيتيش من ݣدامي حتا نسلخ مك عصا(صاح فوجهها)قااأااااودي علييي

مليكة:(تسممات)ضرك خاطرك هاا؟؟تغير خااطرك حيت سمعتي سميتها هااا..سمعتي سميتها ياااك و. .

قاطعها بصفعة بيديه الكبار لوجهها تا ضار وجهها وقال بالغوات:ينعل دنمها حيااة معاااك الق**...كلها منين كايجرر(دفعها وزاد خارج)الله ينعل النهار لي ديتك فيه تفووووو. .

خرج مخليها شادا حنكها وشالها معوج فراسها بالتصرفيقة وفكها تيترعد ..ودمعة شريرة لاصقة فطرف عينيها وقالت:يااااك...واخا واخاا اسي محمد لابقات فيك راني بنت الحراااام..وتريكتك لبقات فيهم راني بنت الكلب . .

ضربات رجليها مع الأرض ودخلات لبيتها تتغوت وتسمم ولي لقااها تضرب بيها فغياب اولادها لي صدراتهم عند مها

****

مرت أيام وجات أيام..وحالهم نفسو..خدامين واكلين شاربين ناعسين فقط..

خرجات من خدمتها مع سبعة تتسنا طاكسي كبير يدوز تا حسات بشي حد حداها..ضورات وجهها لقاتو هو..

لبسات البرود ودورات وجهها تاتسنا طاكسي تانطق بصوت حرش:مدموزيل نزهة دقيقة

نزهة:(شافت فيه)كتهضر معايا؟؟

عمر:(بابتسامة بشوشة)كاين غي انا وياك هنا..سمحي لي بغيت نهضر معاك. .

نزهة:(تتشوف فيه)مكاين فاش نهضرو..ديجا هضرنا

عمر:هه لالا هاديك ماشي هضرة..الهضرة لي بعقلها هي لي نجلسو اطابل ونذاكرو؟؟

كمشات عينيها باهتمام:فاش غانهضرو ؟؟

عمر:(برسمية )حمم لالة نزهة يمكن متعطاتناش فرصة نجلسو ونهضرو ونتناقشو...حكمتي عليا بلا ماتسمعيني وتعرفي قصدي. .

نزهة:(ببرود)سمع اخويا انا عرفت قصدك وعطيت جوابي

عمر:وانا ماخديتش جوابي (بابتسامة) عطيني سويعة من وقتك نهضرو ونذاكرو وديك ساعة منبقاش نبان قداامك(شاف فيها بترجي) عافاك..

نزهة:(زفرات)هانا كانسمع

عمر:(بتاسم تا بانو سنيناتو بيضين ومسرار)نهضرو فشي كافي..الوقفة فشارع ماشي ديالك الزوينة

لاح كلمة بسيطة تالغزل خلات قلبها يلين شوي وقالت:واخا

دار ليها يدو وقال:تفضلي معايا انمشيو فطونوبيل..

سلمات أمرها لله وبدون ماتحس كانت راكبة فسيارتو الفاخرة وباينة غالية رغم أنها ماكاتفهمش بزاف فالسيارات لكنها مريحة.. اول ماشمات هي الريحة اللطيفة ديالو كتوحي للرجولة..

طلع حداها داير ابتسامة مرزنة وسحابة من الهدوء حداه..ديما مرتاح وهي بنص عينيها تتشوف فيه..اول ماشافت يديه الحرشين لي واضعهم على الفولون تيسوݣ مهدن..باين انسان مرزن ومثقف..مهضرش بتاتا

تانطقات بروية:مانبعدوش عفاك

عمر:ماتخافيش..نجلسو غي هنا نذاكرو

لتازمات الصمت شادة فساكها تاوقف قدام قهوة راقية..نزلات ونزل تاهو وبكل احترام مسبقها قدامو وهي قلبها تيضرب بجهد وتتسرق فيه الشوفة..تتحسي براسك مع راجل نيييت. .

مواصفات وجهو يمكن نحصروها فملامح رجولية وحرشة بامتياز..لحيتو كحلة تاتخللها شعيرات فالبيض عاطياه وقار زين..لكن لباسو غير الرجال فسنو باين مهلي فراسو وخاسر على راسو الفلوس. .

مافيقها من سهوتها هي الكرسي لي جرليها باش تجلس..وبالفعل جلسات راسمة ابتسامة ياذوب تاتبان وجلس تاهو فاص ليها..

حط يديه فوق طبلة مبتاسم باينة عليه فرحان وقال:اش تشربي؟

نزهة:حمم كافي كخييم

عمر:تأمري(بابتسامة وسيمة)

نادى للنادل عطاه طلبهم وتقابل هو معاها وقال:صافا الخدمة؟؟

نزهة:الحمد لله

عمر:شنو دومين تالخدمة ديالك؟؟

نزهة:(حشمانة وعينيها تيضورو)فالغيسبسيون ديال سونطخ

عمر:مزيان..ديجا قارية عليه؟؟

نزهة:عندي ديبلوم سيكرتارية

عمر:(باهتمام)مزياان ..خدمتك مرتاحة فيها؟؟

نزهة:اه

تحط طلبهم وجرات كاسها شربات منو وقالت:علاش جينا لهنا؟؟

هز فيها عينيه رامقها بنظرة ذكية وقال ويديه تتحرك السكر فالقهوة لي طلب:نهضرو شوي ونفهم منك علاش رفضتي تزوجي بيا؟؟

نزهة:(بتوتر)ماكاين حتى سبب

عمر:سي..ضروري مايكون سبب(بهدوء باين عليه تايهضر مرتاجل يعني ماشي موجد هضرتو)اي حاجة عندها سبب فالحياة قانون السببية راه واضح..(بمزح)

نزهة:حمم ماكنعرفكش باش نقبل؟؟

عمر:شحال فعمرك الالة نزهة؟؟

تحرجات ولمطات فمها بتوتر وخجل من سنها.. بعض العيالات تايحشمو يصرحو بعمرهم حيت لقاوها قاعدة غادين بيها لي قبل..والبعض بحال نزهة تتخاف من كلمة"بايرة"

نزهة:(بصوت شبه مسموع)33 سنة

عمر:(بابتسامة)باقي صغيرة بطولة العمر

هزات فيه عينيها مصدومة..هو الوحيد لي قاليها باقي صغيرة بسرعة رسمات تبسيمة خفيفة وقالت ممازحة:على فم السبع نههه

عمر:(رتاح فاش شاف ضحكتها)لالا باقي صغيرة وجوون(شابة)ياله بديتي فالدنيا

نزهة:الله يكبرنا على طاعة الله

كمل كلامو:وزيدي شنو من غير ماكنعرفكش؟؟عامل السن ياك؟؟

نزهة:حمم(تحرجات)لالا غير..

قاطعها مبرد:جيتك كبير ههه صراحة عندك الصح انا عندي 50 سنة واخا ماكتبانش فيا ولكن الواقع هو هذا..

نزهة:الصمت

عمر:سمعيني انزهة..انا انسان صريح وعندي نيشان..شفتك وعجبتيني..زوينة مرزنة تتبان فيك راقية ومتبتة(لاحظ ملامح وجهها تبشرو من مدحو وستمر)وبعقلك شاربة عقلك كي كانقولو..وملي طاحت عليك عيني وانا نقول هادي بنت ناس وهي لي تستاحق نبني معاها حياتي من جديد

نزهة:(بتشكيك)ديجا مزوج؟؟

حرك راسو بالإيجاب وقال بهدوء:وي..وعندي بنية(بابتسامة)

نزهة:(جاها تخوف)الله يخليها ليك

بتاسم ونطق:انا ماغنحاسبكش على لي درتي فداركم..حيت بان ليا ماكنتيش عارفا

نزهة:(بتأييد) لا مكنتش عارفا وديجا عطيت رأيي وݣلت لخويا لا..وهو دار لي فراسو. .

عمر:علاش رفضتي(جلس براحة كثر عاطيها وقت)قنعيني علاش رفضتي والى قنعتيني بالعقل وباللوجيك عمري باقي نطوف بيك

نزهة:(تتجمع الكلمات)يمكن الطريقة باش وصلاتني الهضرة معجباتنيش

عمر:(مكمش عينيه)اشمن طريقة؟؟

نزهة:انا الهضرة وصلاتني فلول من دعاء بنت ختي وكنت راضية نعطي فرصة ونشوفك ونعرفك واخا ماكنتش عارفاك نتا بالضبط حيت فايت شايفاك ولكن..(سكتات تتجمع الهضرة)من بعد فاش خويا هضر معايا ماعجبنيش الحال

عمر:شنو الفرق بين الهضرة لي قال خوك وهضرة دعاء؟؟

نزهة:(شافت فيه)نقدر نسميه مشكل خطاب

بتاسم وقال بذكاء:عندك صح..الخطاب هو كلشي تعرفي انزهة ان الكلمة ممكن تبني شعب وكلمة ممكن تهدمو

نزهة:بيان سيغ..كلشي على لفاصون تالهضرة

عمر:(بتأكييد)كاينين رواد تنمية بشرية عندهم محاضرات فالعالم كيديرو محاضرات بعنوان"the power of the word"كيقولو فيها انه الانسان الى تحكم فكلماتو وختارهم بعناية كي كانقوالو ممكن يتحقق ليهم كلشي

نزهة:(باهتمام)وي سي فغي

عمر:واقرب مثال هو الحسن الثاني فاش دار خطاب المسيرة قاليهم غانمشيو نحررو الصحرا والاسبان متحضرين ومثقفين ماغيهضروش..هنا ضرب على قوة الكلمة واستعملها لصفو وبالفعل ماتقاس تاحد من لي مشاو..

نزهة:(عجباتها هضرتو) الله يرحمو.. وي عندك صح الواحد لي كايعرف يهضر يقدر يقنع لاخر

عمر:تماما وهادشي بضبط لي وقع..خوك يمكن قالها بطريقة فشكل ودعاء قالتها بطريقة زوينة(بتساءل)ياك؟؟

حركات راسها بإيجاب وكمل هضرتو:داكشي علاش انا ماحكرتش وقلت مع راسي وحدة بحالها كتبان مرزنة ومتبتة مايمكنش تكون بديك العصبية هاكاك..وحسبت راسي ماشفت والو وݣلت ضروري نهضر معاها..مايمكنش عيني تخطأ(قاس شيباتو فلحيتو)هاد شيب راه ماناض حتا دوز نواع وشكال تناس

نزهة:ههه(عجبها)سمح ليا ماقصدتش داك نهار..انا الى تعصبت ماكنعقلش وماكنحملش لي يمشي علي كلمتو

عمر:نقدر نسميه تحرر؟؟

نزهة:لا هي حرية

عمر:(بابتسامة)وشنو الفرق بين الحرية والتحرر؟؟

نزهة:(زيرها بالسؤال)هه معرفتش ..مهم كنبغي نكون حرة!!

عمر:الواحد فينا انزهة(كيهضر بثقالة وعينيه فعينيها كيرمي عليها سحر كلماتو)كيتزاد من كرش مو حر..بالنسبة ليا الحرية هي ندير لي بغيت على حسب داكشي لي انا كنعتاقد وهنا كندخلو حتا فالمعتقدات.. واحد كايجيه ان القهوة حسن من اتاي هو معتقد عندو.. والواحد لي كايجيه الما حسن منهم كاملين راه حتاهو معتقد هههه يعني الحرية ديما مرتابطة بمفهوم المعتقد ..تكون حر هي تدير لي بغيتي داخل المعتقدات ديالك..مضر حد ميضرك حد..اما التحرر يمكن نحصروه فانك تكون وسط مجتمع او عائلة او دولة عندها مبادئ كاتبغي تمشي عليهم الناس لوخرين

مثال بسيط ههه المغرب عندو العمارية فالعرس متميز بيها على كاع الدول هذا بحد ذاتو يمكن نسميوه مبدأ او اساس العرس المغربي فاعتقاد المغاربة..ولكن مؤخرا ولينا كنشوفو ناس كيديرو جلسة فالعائلة صافي وهذا هو التحرر

فالحالة ديالك نتي هذا تحرر.. كيعجبك تكوني متحررة بمعنى متمشيش على مبادئ ناس خرين..خوك فهاد اللحظة على حساب المثال لي عطيتك هو المغرب ههه ونتي هي لي غتدير جليسة ههههه

ضحكات بخفة وقالت مازحاه:لا انا ندير عرس مغربي على حقو وطريقو والعمارية ضرورية

ضحك على هضرتها وقال:غي قبلي ونديرو ليك لي بغيتي

حشمها عرفاتو سلك طريق ليها وقالت:يكون خير

ابتسامتو توسعات وقال:شنو حسن دابا واش فاش هضرنا ووضحنا وخلقنا حوار بيناتنا ولا قبل فاش معرفتي علي والو

نزهة:ههههه دابا

عمر:الواحد ديما يكون متحكم فراسو وميكونش متسرع..السرعة تقتل(بمزح)

نزهة:ههههخ وي..باينة فيك كتقرا كتوب بزاف

عمر:باش عرفتيها؟؟

نزهة:هضرتك واقفة على صح ماشي جيب يافم وݣول

عمر:ههههه عندك صح..انا انسان كيعحبني نقرا الكتوب بزاف هههه فالدار عندي عندي مكتبة كبيرة فيها لي بغيتي تالكتوب

نزهة:هههه مزيان

عمر:ونتي كتقراي شوي؟؟

نزهة:(بخجل حيت سيد تيفرنس ليها واضحك عاجباه )اخر كتاب قريت ديال ادهم الشرقاوي عرفتيه؟

عمر:سي كنسمع بيه مي خصك تقراي شوي تالكتب الثقافية والتاريخية ثقفي راسك

نزهة:هههه واخا

عمر:وشنو اخر كيعجبك ديريه؟؟

بغات تجاوبو صونا تيليفونها خرجاتو من صاكها تحت انظارو لي حاضي كل تفصيل فيها وجاوبات بارتباك :الو..واخا اماما انا جايا

حطاتو فالساك ونطق:تعطلتي؟؟

نزهة:ااه خصني نمشي

عمر:انا نوصلك

نزهة:بلا منبرزطك ناخد طاكسي

جمع الوقفة وقال:مجاتش..ياله نوصلك

ناضت معاه بلا ميخلص ومشات جنبو غادين تاقربو اخرجو وهي تنطق:ماخلصناش الكونصوماصيون!!

عمر:(بهدوء)الكافي ديالي

نزهة:(تصدمات)سي فغي..زوينة

عمر:(حل ليها باب طونوبيلتو)نتي لي زوينة

حشمات وترعدو ملامحها وهي تدخل وقلبها تيضرب على جهد وضار هو من جهة لوخرا لبلاصتو وقال:مرتاحة؟؟

نزهة:الحمد لله

حرك طونوبيل ونطق بهدوء:نتمنى نكونو حيدنا ديك الصورة لي خديتي علي قبل..وتعطي فرصة نتعارفو كثر

نزهة:ان شاء الله

شاف فيها وبتاسم ورجع شاف فقدامو مرتاح وعاجباه..سكتو مهضروش تا حطها حدا الدار وهي تقول:ميغسي بوكو وسمح ليا مرة خرا على داك نهار

عمر:c oublie pour moi..(جبد تليفونو)خلي ليا طون نميغيو نعيط ليك من بعد..مرا بحالك ميمكنش منشوفهاش مرة خرا

نزهة:واخا ههه

قيدات ليه نمرتها وعطاتو تيليفون شافتو تاكتب عليها نزهة ودار قليب خلى عينيها اينقزو وقال:انا نعيط ليك من بعد داككوغ

حركات راسها بالإيجاب ونزلات غير كيف طلعات مخلياه واقف تا دخلات لدارهم لي حلاتها بساروت..هي دخلات وهي تكا على لباب عاضة على فمها وعينيها كيبربو..حمقاتها شخصيتو وحمقها زينو وهضرتو وكلشي..

طلعات فالدروج لقاتهم جالسين دايرين كاسكروط وهي تسلم وجلسات ناشطة ماشطة تتفرنس وتهضر وتضحك عاجبها الحال وبالها كولو معاه. .

جمعات الماعن وغسلاتهم ودخلات بدلات عليها بسرعة وخرجات ترد العشا واتطيب غداها للغد ليه وبالها كولو معاه

انسان رزين و متبت ماشي برهوش ماتيقولش اي حاجة..وازن هضرتو وعاطيها قيمة وثقتو فنفسو عالية..مثقف وباينة فهضرتو وكيعطيك وذنيه وتايسمع ليك ويعطيك قيمة ووقت..

واهم حاجة عينيه كيبقاو مفيكسين على لي قدامو..ونزهة طول المحادثة ديالهم لي مفاتتش ساعة الا ولاحظات انه سيد رزين

بالإضافة لجمالو الأربعيني..واخا فسن الخمسين لكن زينو عربي فشكل..خلاو الفراشات فقلبها تيضربو. .

ردات العشا وغداها للغد ليه وجات سميرة هازا تيو كانت تتسلخ ولادها

نزهة:نتي غنتخاصم معاك شي نهار. منزلاهم لتحت حسابك ماغانسمعش

سميرة:(تتنهج)اختي فقصوني عصبووني..نهار كامل لاعبين ملي تقولي ليهم اجيو تحفضو يوليو عيانين..جابتهم لبنت لي كدير ليهم السوايع ݣالت ليك مسهوتين وباغين غي ينعسوو اللهم نوكدهم

نزهة:هههه حرام عليك واش باقي تاع لعصا هادوك راه كبرو

سميرة:انبقا نسلخهم حتا يوليو بولادهم

نزهة:انا بعدا والله مانحط عليهم يدي هههه

سميرة:بلاتي تولديهم وتشووفي اتكرهي زواج وميجي منو

نزهة:ههههه هههه (عرات طاجين)مممم الله

سميرة:يعطيك الصحة ازين صافي غي سيري نغسل الماعن

نزهة:(ناشطة)لا ازين غي سيري انا نغسلهم

سميرة:ننزهة(شافت فيها)شفتك ناشطة؟؟زادوك فالخلصة ؟

ضحكات نزهة:ههههههه يزيدوك تمارة اما الخلصة والله لحلمت بيها

سميرة:اوا وشنو؟؟

نزهة:واغير ناشطة وصافي ههه

***

تعشاو بداكشي لي طيبات وجمعات الماعن ..مسات عليهم ودخلات لبيتها مقابلا مع مرايتها بدات كاتمشط شعرها وتشوف فوجهها مع ابتسامة خفيفة اثر ظهورو فخيالها..

صونا تيليفونها وناضت هزاتو لقات رقم غريب وبتاسمات عاضة شفايفها عرفاتو هو..جمعات النفس وجاوبات:الو

عمر:(بصوت باح وحرش خلاها تزعزع فبلاصتها)صافا نزهة؟؟

نزهة:الحمد لله ونتا؟؟

عمر:وي مزيان..ياكما عطلتك قبيلا؟؟

نزهة:(رجعات جلسات فاص لمرايتها تتهضر وتشوف وتفرنس)لالا هه

عمر:مزيان...فرحت اليوم فاش هضرنا وتناقشنا وحيدنا كلشي علينا

نزهة:(بخجل)اه

عمر:شنو نشوفك غدا انزهة؟؟

نزهة:ماعنديش وقت..خدامة تال السبعة تالعشية

عمر:عندك پوز تالغدا

نزهة:وي

عمر:اوا صافي نتشاوفو ديك ساعة نشوفك غير شوية

نزهة:واخا ان شاء الله

عمر:ياله مانشدكش سيري تنعسي ترتاحي شوي

نزهة:تصبح على خير

عمر:بونوي

قطع معاها مخليها مفرنسة للخلا بوحدها وتاتخمم فالخرجة تا ناضت قافزة بحالا نغزها شي حد لماريوها..حلاتو تشوف فحوايجها وتتقلب على ماتلبس لأنه غدا عندها موعد

أكيد وحدة بحالها ماشي اول موعد غرامي تدوزو ولكن هذا اول راجل مثبت ومرزن ومافيهش اللهفة تالبراهش ...رزين وتيهضر بعقلو وهادشي لي عجبها فيه

ختارت شنو تلبس وحطاتو ووجدات اكسسواراتها وادق التفاصيل باش تكون ناضية..

صباح جديد على نزهة لي واقفة قدام مرايتها تتصايب عكر خفيف غوز مبين شفايفها العامرين..

كانت بسروال دجين لاصق طاي هوت وشوميز خفيفة فالبيض بالكول وشفافة من اليدين..مع صبيبيط فالأسود بسيط.. مزينة بماكياج خفيف و إكسسوارات ما كتعداش خاتم ذهب خفيف فصبعها وساعة يدوية..

رشات بارفانها وهزات صاكها وخرجات للكوزينة صايبات فطور دغيا فطرات وخرجات بدون ما تاخد غداها حيت اتغدى مع المثقف..

ساعات قليلة دازو عليها فالخدمة بين الإستقبال والوراق وماغيرها حتى وصل وقت غداها وهي تهز صاكها وتأكدات من حالتها وخرجات برا فين لقاتو بطونوبيلتو كا يتسنا فالوقت..

بتاسمات وتوجهات ليه ديريكت طلعات عرفاتو تيتسناها..بتاسمات بعذوبة وقالت : سلام

عمر:أهلا صافا؟؟!(بابتسامة رزينة)

نزهة:الحمد لله ونتا

عمر:تخي بيان (حرك الطونوبيل)كاتباني زوينة هادشي كولو على قبلي؟؟

بتاسمات بخجل تتشوف فاص ليها ويديها متعرقين:ههه ربي يخليك

عمر:فين نمشيو؟؟

نزهة:فين ما حبيتي..

شاف فيها بنظرة خطيرة وضحيكة خفيفة خلاتو يزيد يبان مسرار : لي حبات خاطرك نتي..علاه شحال عندنا من نزهة.

كلامو نزل عليها كي الدوا لحمر رجعها حمرة نييت ومزنݣة وأحاسيس الأنوثة طلعو معاها..خلات راسها ساكتة مخليا ليه مساحة للهضرة..

بطبعها فبادئ أي لقاء مع أي شخص كيما بيكون نوعو خجولة ولكن هي تتطلق عليه تترجع عادية. .

وقف قدام ريسطو راقي فكازا وقال:ننزلو؟؟

بمشاورتو ليها خلاها تزيد تفهى فيه وقالت بصوت خفيف:اهاه

نزلو ودخلو للريسطو وهي حشمانة وتترعد..ماشي اول موعد ولكن اغربو

خداو طبلة وسط المطعم هي فاص ليه ويديها معرقين..بتاسم وهو كيشد الموني من عند السرباي وهي كذلك واخا عارفة بتسامتو ماشي ليه ولايني ليها

لهات راسها وسط الموني وهو عين فيها عين فالمون ونطق:شنو حبيتي تاكلي؟؟

نزهة:ههه صراحة فيا جوع.. (بابتسامة دلع)خود ليا على ذوقك

عمر:كا ثيقي فيا زعما؟؟

بابتسامة خجولة وعينيها تيرمشو بالزربة:عههه باينة فيك ذوقك زوين

سد الموني وحط يد على يد فالطبلة عاطيها نظرة زوينة تحسسها بزز منها بانوثنها وقال:كيفاش باين؟؟

نزهة:باينا فيك مذواق

عمر:حيت عجبتيني نتي راه ذوقي زويين..(حل لموني)انا نطلب لينا. ..

بتاسمات فرحانة هي حشمات تفرنس كي الهبيلة ..بعدما طلب ليهم رجع لحديثو معاها لي كولو أدب وصواب..انسان بسرعة تقدر تفهم انه مثقف وتيقدر المرا

تحطو لي بلا لي كايشهيو وبداو تياكلو وهي تنطق:مغلطتش .. ذوقك زوين

عمر:بصحتك الالة

كلاو فصمت تاحد مهضر ..اولا حيت هو متيهضرش فالماكلة وثانيا حيت هي جاتها الماكلة بنينة فركزات عليها..حدهم لا تبسمو لبعضهم..

مع سلاو نطقات:حمد لله

عمر:(بابتسامة)ناخد باش نحليو؟

شاف فساعتعا اليدوية:واخا باقي ليا ساعة هه

عمر:مانعطلكش

طلب ليهم تحلية وتهزو لي بلا من حداهم ونطق هو باهتمام:قولي ليا الالة نزهة..شنو درنا فموضوعنا؟؟

نزهة:(فاهماه ودارت راسها بليدة)اشمن موضوع(حسات بذاتها سخنات بالحشمة)

عمر:موضوع زواجنا..اش بان ليك؟؟كاانظن عرفتيني وعرفتك وعلى ما بان ليا انا وياك مرتاحين لبعضنا(بتساءل)ياك؟؟

حركات راسها بالإيجاب لسانها تعقد ونطق تاني:أنا انسان واضح..بغيت نكمل حياتي مع إنسانة بحالك..زوينة وضحوكية..اجتماعية وراقية ورزينة شنو بغيت كثر من هاكا؟؟

نزهة:حم ولكن حنا باقي ماكانعرفوش بعضياتنا

عمر:(باهتمام)لي بغيتي تعرفيه علي مرحبا..سولي

نزهة:حمم لي بغيتي..وحتانا خاصك تعرفني

عمر:هادشي لي شفت كافيني..عشت سنين وعاشرت ناس وكانعرف زين من الخايب

نزهة:(بارتباك)الزواج هذا

عمر:(حط يدو على صدرو)مستاعد نعاود ليك كلشي علي ونتي الى بغيتي عاودي ما بغيتيش راها مسألة شخصية انا يكفيني لي عرفت..

نزهة:(زعمات)عاود ليا على راسك

فرنس ناشط حيت فهم خطوتها انها قابلة:اسمي عمر(ضحك)هههه عندي 49 ههه نقولو خمسين..مطلق وعندي بنية

نزهة:فينها بنتك؟؟

عمر:(مستامر بنفس الابتسامة) فايطاليا مع مها

نزهة:مراتك ماشي مغربية؟؟

عمر:لا مغربية..تزوجتها بكري وطلعنا لإيطاليا..ماتفهمناش وتفرقنا

نزهة:مزيان..وبنتك تتشوفها؟؟

عمر:بيان سيغ..كاتجي عندي وتنطلع عندها حتاحاجة متبدلات..وعاد هي فهاد سن محتاجة ليا

نزهة:(اعجبت بشخصيتو)شحال فعمرها؟؟

عمر:17 سنة..سميتها أمنية

نزهة:(بابتسامة)الله يخليها ليك

عمر:مغسي..شي حاجة خرا؟؟

ضحكها سؤالو بحالا تايقوليا اش باقي جاك فيه الفضول ونطقات:عاود ليا عليك..شحال عشتي فايطاليا

تحطات ليه هو قهيوة وهي جلاص ونطق:عشت فيها نص عمري..مشيت وانا عندي 25 ورجعت ربع سنين هادي

نزهة:مزياان هه ودرتي مشروع هنا

حرك راسو وهو تيجغم من قهوتو:وي..دوزت حقي فالغربة وجمعت رزقي وجيت ندير مشروع ونستاقر فبلادي حدا اهلي. .

نزهة:احسن مادرتي الغربة صعيبة

عمر:على لي بغا يصعبها على راسو..الإنسان الا دار فبالو الحاجة غيوصل ليها..دار فبالو غايتعايش مع الوضع راه غيتعايش معاه..بنسبة ليا جاني بحال هنا بحال لهيه

نزهة:(بمزح)وماتعرفتي علي حتا رجعتي هه قلنا نفوجو تماك

ضحك وقال:هي قبلي نتزوجو نديك تال اخر الدنيا

بتاسمات بخجل وقالت:يكون خير ان شاء الله

عمر:انا هدفي واضح..كبرت على دخل وخرج فالقهاوي..راني كبير وواعي وباغي بنت زوينة محتارمة نكمل معاها حياتي

نزهة:(بتساءل بغير وعي سولاتو)والولاد؟؟كتفكر تولد مرة خرا

عمر:(بضحكة)وعلاش لا ههههه وا صراحة بنتي معمرا علي ولكن الا غيكونو منك نتي علاش لا..

ضحكات بخجل وسرا معاها احساس الأمومة من جديد وبدات فمخيلتها تتخيل العرس والولاد والدار وتتفرنس ليه كي الهبيلة

عمر:شنو دابا؟؟

فيقها من سهوتها وقالت:يكون خير

عمر:ايمتا نعاودو نجيو؟؟

نزهة:حمم وزعما تبغي مك تجي معاك؟؟واخا ديك شوهة لي درت

عمر:(بجدية)انا لي غنتزوج ماشي هي..مي غتفرح لتزوجت تاني شحال وهي صارعا ليا راسي بالزواج

نزهة:هههه انا نطلب منها السماحة

عمر:(بابتسامة معوج راسو معاها)نعتابرها موافقة

ضحكات بخجل وسكتات حانية راسها وهي تهزو من جديد وقالت:بلي فيها الخير ان شاء الله ولكن عطيني وقيت نعلم مالين دار راك شفتي فلول مابغيتش ونجي دروك نقݣوليهم بغيت مجاتش

عمر:خودي وقتك هغي متعطليش علي

نزهة:ان شاء الله

بتاسم بفرحة وهي الاخرى فرحانة تاتشوف راسها تسنات تا تسنات وداتو كيف حبات..قاري واعي مثقف وزوين وضحوكي ورومانسي..ما مرة ما زوج تتبغي تقرص راسها لا تكون تتحلم..

*****

مر وقت قصير يتحسب فجوج سيمانات..اتصالات كل نهار ولقاءات فالغدا وفمورا الخدمة..زادت تعرفات عليه كثر وكثر وبين ليها كثر انه جانتلمان نيت وضريف وحنين..

تعاملو من ديما زوين وراقي ومقدرها وعاطيها قيمة مخلي الفراشات يلعبو فكريشتها بالفرحة..

جوج سيمانات كلها دوزاتها رومانسية بكلامو المعسول ونشاط وتضل مفرنسة..

اليوم رجعات من الخدمة ناشطة حيت تغدات معاه ..دخلات للكوزينة فين كانت سميرة وقالت:مسا الخير

سميرة:(سدات على الطنجرة)امسا الخير..كي ضليتي؟؟

نزهة:(جلسات فوق كرسي )الحمد لله ونتوما؟؟

سميرة:بخيير..عيتي ياك؟؟

نزهة:لالا(تتفرنس)

سميرة:هههههه غي ݣولي ليا هاد ليام غي مفرنسة وكاضحكي وناشطة وماخصك خير

نزهة:و انا ديما هاكا هههه(وقفات)

سميرة:عاودي لياا هادشي ماهواااش(تبعاتها لبيتها)ياك انا ختك

نزهة:فين مي الالة ختي ههه

سميرة:عند سعيدة..وخوك باقي مدخلش والهجيج ديال ولد خوك فالزنقة سارحين تالفين وا عاودي لياا

حيدات صاكها وتتزول السبرديلة ونطقات:نعاود ليك ولكن بيناتنا

سميرة:(دارت يديها على خصرها)لا نعيط لمليكة ونعاود ليها هههههه

نزهة:ا سكتي مالقيتي من ذكري..ذكرنا السمن مع العسل ههه

سميرة:اوا عاودي

جلسات حداها وبدات نزهة تتعاود ليها المنزلة من لول تالخر بكل تفاصيلها حيت سميرة ضريفة وبنت النااس ويأمن ليها الواحد

سميرة:(تتفرنس معاها)احااي..دااك الشيباني خرج منو هادشي نههههه

قرصاتها فذراعها :ههه لا تقوليش عليه شيباني هههه

سميرة:شوف ليك البنت ههههههههه دخل ليك مع العظم

نزهة:ناري يا سميرة راه مصواب وضريف وكايتعامل مزياان

سميرة:صراحة تقال من ديك شوهة لي درتي ليه راه يطج ولايني ملي عاود رجع راه شاريك اختي والله..واخا كبير ولايني فعايلو اغطيو كبرو..وهانتي كي ݣلتي نتي راه عقلو زوين وكايعرف يدوي

نزهة:(بحماس)بزااف الجلسة معاه ماتشبعيش منها(تلاحت على ظهرها حاضنة راسها بيديها)اححح وشحال زيين

سميرة:البنت تدفݣات ههههه انوضي أحنينتي

نزهة:ههههههه(ناضت تتبدل حوايجها) والله حتى ذبت هههه

سميرة:اوا وامتا يجي لدار

نزهة:(تتمسح بيطانها بلانجيت)هو من غدا بغا يجي..ففف توسخت ياختي خاصني نمشي للحمام

سميرة:غدا السبت جي من لخدمة وسيري..واقولي ليا دابا اش درتي معاه

نزهة:ايخصني نقولها لمي وهي تݣول لراجلك اوا ويجي ديك ساعة

سميرة:نݣولها لعبد الجليل انا؟؟

نزهة:(بتساءل)وتقدري زعما؟؟

سميرة: (دافعا صدرها للقدام)ومالي منݣدش ههههه زماني هذاك

نزهة:ايهاي على زماني وليتي حتانتي تعرفي الحب والتعناب

سميرة:ومالي ههههه راه خيخنا فالزواج..هانتي انا نهضر مع خوك ونتي هضري مع مك ورصي مع السيد.. لاش قوة الدخول والخروج لي نطولوه نقصروه مايجي فين يخرج رمضان تعقدي وتمشي لدارك

نزهة:(بسعادة)عرفتي ياسميرة غاندير عراسية فاعلة تاركة..اندير بزاف تالباسي ومانخلي مانصايب فالحلوة ونتهلا فالضياف..وركب فالعمارية جوج مرات ههههه

سميرة:(ضحكات)هههههه ان شاء الله ..بلي فيه الخير ان شاء الله

تعانقووو بحب حيت عزاز على بعضهم وتاوحدة ماباغا الاذى لوخرا..خرجات سمية مخلياها تاتديماكي وجهها والبسمة مفرقاتش فمها تا صونا تيليفونها باسم

- "عمر❤️"..

جاوبات بحب:الو

عمر:حبيبة صافا؟؟كي وصلتي..ديزولي ماعيتطش ليك اليوم

نزهة:(محمقها باهتمامو)لالا ماشي مشكل ياله دخلت وبدلت علي

عمر:كليتي شي حاجة؟؟؟

نزهة:عاد ناكل

عمر: نصيفط ليك عشا اموبورطي احبيبة؟؟

نزهة:(بخجل)لا احبيبي غانتعشا مع دار ماتعذبش ليا راسك

عمر:عدابك راحة ازين ديالي..

نزهة:ونتا مزيان كي ضليتي؟؟

عمر:تخي بيان..خاصاني غي نتي ههه تعطلتي علي فجوابك

نزهة:ههههه انا نهضر مع ميمتي اليوم وغدا نرد عليك

عمر:اوا هذا جواب هههه هذاك هو نهار الكبير عندي..صافي غي نعول

نزهة:ههههه واصبر نعلمها وديك ساعة عول

عمر:واخا الالة صبرنا صبرنا نزيدو نصبرو..

نزهة:ههههه واخا

عمر:نخليك دابا نرجع لخدمتي كنت بغيت غي نشوف كي وصلتي

نزهة:لهلا يخطيك علي

عمر:ههه بسلامة

قطعات معاه وهي تنقز بمرح فرحانة ماكرهاتش تطير..تجي عندها دروك تقوليها سلام تقوليك كنبغييك..

احساس زوين عيشها وتاهو عايش معاها احساس ولا اروع..بصوابها وادبها وانوثتها ولطافتها راها محمقاه وعاطيها حيز كبير فحياتو. .

خرجات بعدما مسحات وجهها وغسلاتو فالحمام وتوجهات للكوزينة وقالت:مي غاتبات؟؟

سميرة:اييه اتبات..صوني على عبد الجليل شوفيه فينوو

حركات راسها ومشات عيطات ليه ورجعات حداها وقالت:رمضان قرب

سميرة:وايييه بقا ليه شهر ونص بالحساب

نزهة:خاصنا نتقدااو ليه

سميرة:ياويلي باقي الحال اخوويتي

نزهة:ههههه راكي عارفاني خدامة ياله ياله..هي تنقية قوام سلو كاتبغي الوقت اوا وتوجاد

سميرة:انا نقي

نزهة:اتعياي نتعاونو عليه .. خاصني نمشي نتقدا نهار لحد كلشي ياله ياله نلحق وباقي بزااف نيت مايدار (تتفرك فروة شعرها)

سميرة:اوا صافي لحد نمشييو نيت بغيت نشري شي بيجامة

سميرة:نشريو شي ثوب وندفعوه للخياطة ياله تخرج لينا مع العيد نشان

سميرة:غاديري جلابة!!

نزهة:ضروري وشي قميص نحلقو على الحالة راحنا عريساات زعما ههههه

ضحكات سميرة ورفعات يديها فالسما:ان شاء الله ياربي هههه انا راه لا مشطحتش فعرسك كي والو

نزهة:ودابا نشووف ههه بغيت كلشي يشطح واحيح هههه

سميرة:ان شاء الله(دخل عبد الجليل)علا السلامة فين كنتي؟؟

جليل:هادي هي فين احبيبي وعلى سلامتك وكدا

سميرة:(حشمات)الله يمسخك هههه

سلم عليهم وجر كرسي وقال:والله الى تمارة وصافي..كي ضليتو؟؟

بجوج:الحمد لله

جليل:فين مي

نزهة:بايتا عند سعيدة..ياله نحطو العشاا

سميرة:عيط اخويا لولادك ادخلو من الزنقة وديركت للطواليت اغسلو علي حالتهم

عبد الجليل:واخا اختي ههههههه

حطو داك العشا وتجمعو عليه تياكلو واضحكو كاي عائلو مغربية فلخر غسلات نزهة لماعن ودخل كل واحد انعس..بحكم تايفيقو بكري وتيضلو فالخدمة وسميرة مع دراري وشقا تيجيبو الكاو دغيا

دخلات لفراشها وهزات من فوق كوافوزها مرطب يدين ديال نيتروجينا ..رطبات يديها مزيان وتخشات تاتقلب على النعاس وبالها مرتاح وقلبها هاني

*****

على صوت لالاغم فاقت من نعاسها منزاعجة حيت قطعاتها على حلمها الزوين..حلم انها جالسة فمرتبة العرايس لابسة كي ديما لبسة الحنة محنية رجليها ويديها وناس فرحانين بيها صورهم مبايناش تتخطف..

مرة مها مرة خوتها وهي مشرعة فمها بالضحك فرحانة..وشخص كايحيد ليها الفوال على وجهها ويقبل جبهتها بحب

كشرات ملامحها طفات المكانة ورجعات نعسات تتقلب تكمل الحلم منين وقف تاوعات عاد ناضت طافجة ..للحمام ديركت غسلات سنانها ووجهها ورطباتو ودارت ايكرون تالشمس..وخرجات لبسات عليها خفا زربان وقصدات الكوزينة صايبات ليها قهيوة وخرجات بزربة حيت اليوم السبت مكيدخلوش بكري..

فالوحدة واقفة خرجات من الخدمة لقاتو تيتسناها حيت عارف عندها نص دوام..بتاسمات وطلعات حداه مفرنسة وقالت:اهلاا

عمر:(بابتسامة حيد نظاظر الشمس والروايح عاطين منو)وسهلا..صافا كبيدة؟؟

نزهة:حمد لله ونتا؟؟

عمر:بشوفتك..شنو نمشيو نتغداو

نزهة:مكرهتش ولكن خاصني نمشي لدار عندي مايدار

عمر:شنو غديري؟؟

نزهة:ههه داكشي تالبنات

عمر:(غمزها)تتخبي علي(حرك الطونوبيل)واخا الالة نخلي ليك espace تهناي فيه مني

نزهة:لا حاشا مقصدتش هاكاك

عمر: ههه كانضحك معاك الحمقة..من حقك يكون عندك وقت لراسك..المرا بحد ذاتها كإنسان خاصها وقت بينها وبين دماغها عكس الراجل

نزهة:مافهمتش

عمر:بمعنى انه المرا كايجي وقت كايخصا تجلس مع راسها تتحرر من الناس وتكونصونطرا مع راسها تعيش جو من العزلة راسها ترتب فيه افكارها

نزهة: والراجل؟؟

عمر:الراجل ديما عايش مع افكارو وكايترجمهم لتصرفات ...

نزهة:(باعجاب)عندك مع هادشي تاع التحليل ههه

عمر:ماشي تحليل غير رأي..الإنسان ماحدو تيكبر ويستوعب عقلو والحياة كمفهوم غتولي عندو وجهة نظر خاصة بيه مبنية على شنو فشخصيتو

نزهة:ااه بصح(مفاهما والو فهضرتو هي مسايراه)

عمر:حيت احبيبة الإنسان ماحدو كايكبر وهو تيكتاشف حوايج جديدة وتيتعلم حوايج جداد..

نزهة:(بدلع )وشنو كتاشفتي معايا انا؟؟

شاف فيها مبتاسم وقال:الغراام

يتبع...

‎