أقوى مما أدرك الجزء الثاني

نشراتو وبقات جالسة كتسنا التعاليق واحد شويا بداو الطبيبات ديالنا والفرمليات والفاهمات كيكتبو:

-"خلطي قرعة تاع ****** وديري معاه عشرين كينة من *** "

-وحدة اخرى:شري مكسرات وديريهم مع شكلاط وكوليهم

-وحدة اخرى:بيرلي والزنجلان

-وحدة من عالم آخر:ختي عندي لحسة معقولة بالعشوب تغلاضي فخمس أيام

-وحدة اخرى من عالم الحبس:ختي خودي ليك بيطاستييين

وغيرها من التعاليق لي كلها وصفات قاتلة تخنق فيك النفس وتبوشي ليك العروق وتخرج ليك الكرش وطلع ليك السكر باش فلخر تعجبي واحد راسو مربع فورمتو ماتنعسي معاها فسبيل الله

وبالفعل هدى ضحية بحالها بحال كاع البنات لي كيقلبو على الهلاك واقناع الناس رغم أن إرضاء الناس غاية لا تدرك..سكرينات كلشي وبقات لساعات كتقلب تا دخلات عليها مريم قايلة:تي هنا

هدى:اه..مريم شوفي حدانا شي فرماسيان؟

مريم:مريضة؟؟

هدى:لالا بغيت غي واحد دوا

مريم:اشمن دوا؟؟

هدى:واحد دوا وصافي

مريم:نصيفط ليك ولد خالي يجيبو ليك..اش سميتو؟؟

هدى:بيطاستين

مريم:ديالاش؟؟

هدى:ديال الضرسة وغا قولي ليه يجيبو

بالفعل خرجات مريم سخرات ولد خالها بعدما عطاتو فلوس حيت لفارماسي فالشارع بعيد على الدار خصهم يتمشاو مسافة..وبقات هدى جالسة كتسنا بفارغ الصبر وتيلي فيديها كيتزعزع تا دخلات مريم بأيدي فارغة وقالت:مبغاوش يعطيوه ليه كاليك خصك ورقة ديال الطبيب

هدى:(قندشات)كيفاش ورقة ديال الطبيب؟؟

مريم:معرفتش..هادشي لي قال معاذ..

هدى:(ساطت)تفووووو حتى حاجة فهاد البلاصة مكتحمر الوجه..كون فكازا كون خديتو..

مريم:(حطات من يدها حوايج كانت هازاهم)هدى كنبغي نسولك وكنسى...معمرك صونيتي على جداك؟؟

سكتات هدى للحظات يمكن هي كتسول راسها هاد السؤال الغريب وكتسنا عقلها ينسج ليها جواب..ونطقات ديك ساعة:مشات ليا النمرة

مريم:اوا اختي خصك تسولي..وختك وخوك غيكونو توحشوك

هدى:ختي؟؟؟(ببرود)غتكون تهنات مني دابا متلقاش شكون تضرب

مريم:شفتي الخوت راه نعمة سوليني أنا بوحدي..لا خويا لا ختي معندي معامن نضارب ولا نتغاوت

هدى:(بمزح قالبة الهضرة)كاينة الميمة ههههه

مريم:ههههههههه والله هههههههه فيها النكير بزااف..ولكن مبقاش بزاف ونمشي تانا لداري وندير ميحالي ووليداتي بزاااف(كضحك بعفوية)..

هدى:الله يسهل عليك

*****

واقفة هدى فالفارماسي ديال الفيلاج لابسة جلابة مريم لي مبقاتش جلابتها بكثرة ماكشتراتها..جامعة شعرها شدة مهملة وتقدر تميزو من بعيد بلي شابع قشرة وما مفكوكش بتاتا مخبل لكن رغم ذلك محافظ على الكحولية ديالو لي كتكون بالفطرة..كتهضر مع السيدة لي تما:عفاك بغيت بيطاستين؟؟

...:عندك ورقة تالطبيب؟؟

هدى:علاش ورقة ؟؟

...:حيت راه ديال الضيقة كيعطيوه غي لي مراض بيها..نتي مريضة؟؟

هدى:(ببلاهة حركات راسها بالسلب)الله ينجيني اختي..انا غي سمعت عليه كيعاون باش نزيدو الوزن

...:باغيا تغلاضي؟؟(طلعاتها وهبطاتها وهدى محملاتش البلان)

هدى:لا ماشي ليا لختي...عندها العرس قريب وصافي أما أنا مكيعجبنيش

...:ممممم اوا راه ميمكنش نعطيه ليك حتى تجيبي ورقة تطبيب خودي هذا (جبدات ليها انتغنونيكس)زوييين غي قولي ليها تبعو

هدى:(هزاتو كتقلب فيه بعينيها)ويغلضني زعما بغيت نقول يغلضها؟؟

...:هو لي كيديوه البنات بزااف كيدير الحنيكات

فرحات هدى وخلصاتو ليها وخرجات فرحانة دايراه فيديها وعينيها كيصورو ليها فأحلامها بلي غتولي عندها مؤخرة وشي صدر وتاهيا غيولي زهرها زوين..

...:(مخاطبة سيدة معاها فالفارماسي)وهانتي اختي على البرهوشة باقي لاصقة غي فالأرض وقالت ليك بغات تغلاض

...:حتى نتي كون غي عطيتيها بيطاستين ههه

....:باغيا تخرجي علينا...يعرفو خرج بلا ورقة يسدو الفارماسي ويديونا للحبس..علاش ماسمعتيش ديك لي ففاس عطاوه ليها شرباتو ضربات بيه سيمانة وماتت بوشا ليها عروق فقلبها..

.....:سلامة ياربي مسمعتهاش؟؟واش ماتت؟؟

...:ايييه توفات..السيدة صحة سلام مامريضة موالو ناض قاليها راسها نوضي غلاضي اش ندير؟؟نشرب دوا تضيقة لي ناس تضيقة مكياخدوهش..مشا فيها مول الفاغاماسي ولي عطاتو ليها حيت باها ناض حل تحقيق حيت البنت مابيها والو وماتت..

..:ياربي سلامة..ونتي عطيتيها هذاك لاخر راه حتى هو ديال الحساسية؟؟

..:خليها تشربو هذاك معندو مايدير ليها غادي ينفخها شويا ويدير ليها الحنيكات تساليه وتفش تاني

...:حرام عليك كون قلتيها ليها..؟؟

...:واش اختي حنا مانبيعوش ونشريو هنا..راه تتشوفي الحركة عيانة..الناس هنا مكيمشيوش للطبيب ويجيو عندك حتى كيجربو دوا العرب حتى ميقضي فيهم عاد يجيو..معندو مايدير ليها..غينفخها شويا تقطعو تفش(ضحكات)ياك بغات غي تنفخ خليها تنفخ هههه

ضحكو البنات لي خدامين تما وكملو حديثهم على منوال آخر..وضميرهم مرتاح معارفينش بلي داكشي لي عطاوها يقدر يجبد فيها أمراض أخرى ويضعف مناعتها أو بالأحرى مباغينش يعرفوها بهادشي مكتافيين بالمعلومة لراسهم..وهدى من البنات لهبيلات لي خداتو ومشات للدار ناشطة وهي دخلات شربات منو معلقة ومشات هازا تيليفونها ولا على بالها..

يوم ورا يوم وهدى مداومة على الدوا كثر مامداومة على شريب الما..تشربو ثلاثة تالمرات فالنهار بدون مايسيق شي حد الخبار..ثلث أيام اللولة كيكوخها بالنعاس..كتضل وتبات ناعسة كتنوض غي تاكل كي الجيفة وترجع تنعس حتى دخلات ليهم الشك..لكن سرعان ما بدا جسمها كيولف على الدوا ومكوناته رجع مكيديرش ليها النعاس.. وبالفعل ولات شهيتها كتحل وبلاصة الوجبة كتاكل ربعة وبداو حنيكاتها كيتنفخو ووجها طبز ولات تضحك ويوقفو حنيكاتها وهادشي مفرحها خاصة لي شافها كيقوليها غلاضيتي وهي كتفرح بزااف وكتحس براسها زوينة حيت عقلها تبرمج على ديك الفكرة...غلضها حتى فداتها لكن المشكل هو الكرش..خرجات ليها الكرش منفوخة بالما تتبان أراك من بعيد...

فغضون شهر هزيتي جسم وحطيتي آخر..جسم ممتلئ و الوجه كذلك لدرجة كيبانو طبقات تحت من ذقنها بشكل مقزز وكتبان كبر من عمرها..

فمجمع عائلي ديال اللفعات تعماتها كيفما مسمياهم نعيمة ومهم الفعى الكوبرا..جالسة هدى ياله خارجة من الحمام وحناكها قد الطبل كتعلف تاني عاود وهي تنطق جداها:اوا المكي كاليك مريم ادير عقدها السيمانة جايا

نعيمة:الى بغا الله..تعقد ودير ليلتها وتمشي لدارها والسلام

العمة:إن شاء الله هي نوجدو قفاطنا وتكاشطنا للامة

العمة 2: يييه وشنو؟؟نشطو عاود ونضحكو ونغنيييو مشهية غا نطلق حلوقي

مريم:وعلاش تسناي؟؟صبري نجيب بنادري نغنييو شويا

ضحكو كامليين وبقاو كيتسناو فيها تجي وبالفعل دازو دقائق جايا هازا طعارجها لي كل عيشورا يشريوهم ليها..مدات لكل وحدة وحدة وشاطت وحدة وهي تنطق هدى فمها عامر:مدي ليا وحدة

مريم:تعرفي؟؟عداك يكون ضربك عسري

هدى:واتي اري تي لي عسرية ههههه

العمة:اش نغنيو؟؟

هدى:نتوما ضربو أنا نخلف

وبالفعل فاش كيتلاقاو النسا لي متمكنين من هادشي كتحس براسك فمجمع الشيخات لكن لي صدمهم وهو ضريب هدى وتخلافها تحلف عليها شيخة..هزات ليهم ميزان مبرع بالضرب والغنا وتردد عليهم وتختمها بتزغريتة تال آخر طرح فاش ضربات بالبندير الفوق معلنة على نهاية الطرح...

نعيمة:واتي ضربك زيييين تي فين تعلمتي؟؟

الجدة:ربيعة هي لي علماتك ..تاهيا كتضرب بحالك

هدى:هي لي علماتني هعههههه

كملو مجمعهم ضاحكين ناشطين فرحانين بخبر زفاف مريم لي مثبتة ومحصنة حداهم حشمانة..حتى كلها تسرسب لدارو وزاد كيوجدو لعرس مريم بفارغ الصبر..

اليوم الموالي..فاقت مريم بكري كيف عادتها قضات شغالها ودخلات لبيتها كتجبد فماريوها تطويه وتحيد منو لي مغتديش معاها تصدقو..وقالت مع راسها نطوي حتى ديال هدى بحسن نية..حتى كتلقا قراعي تاع سيرو مخشي فحوايجها ..ثلاثة تالقراعي جوج تقاداو ووحدة فيها نص..استغربات وحطاتهم على جنب وكملات الطويان..

حتى فاتت الجوج عاد فاقت لالة هدى على صورة مريم كتقاد الحوايج..تعجزات وقالت:صباح نور

مريم:(ولفاتها معاش تتفيق)صباح الخير..كي صبحتي؟؟

هدى:(كتهز تيلي تبقشش فيه هو اللول )حمد لله ونتي؟؟

مريم:الحمد لله

هدى:شكديري؟؟

مريم:كنطوي الحوايج بغيت نحيد لي مابغيتوش ومنديهش معايا لداري

هدى:مممممم مزيان واطوي طوي

مريم:طويت حتى ديالك وستفتهم

هدى:ممم مزيان..فيا الجوع؟؟

مريم:نوضي فطري ولا تغداي هههه

ناضت هدى كتعجز وتفوه بالقادوس لي عاطيها ربي وداكشي لي خصها فالعفن كملو ليها الغلض ..لقات ريحة العرق نيت فين تصنن

مشات للطواليط قضات حاجتها وسكنات تما تتشوف فراسها وتفرق شعرها جاتها عليه الكانة تفكو ..مخرجات تا فكاتو ومشات نيشان للكوزينة وقبل ماتخطي الخطوة الأولى لباب الكوزينة سمعات حوار خلاها تحبس قبل ماتكمل..كان حوار مريم ومها وكيهضرو فيها

مريم:وابعيني أمي ..شوفي السيروات..مامريضاش وما فيها سخانة ديالاش؟؟ديال الغلض

نعيمة:(بتركيز)ياويلي حي تي منين جاوها؟؟(كتقلب فالقراعي)تي هادي واش خدامة مع الفرماسيان ولاوو؟؟

مريم:ماشفتيهاش كداش ولات ...وكتاكل وتسرط وتنعس

نعمية:أ بغيت ليها مصيبة..ضل نهار كامل تاكل وتسرط ولات كد الفيلة هي تربي فالصحة وحنا نطيحو كتافنا...بحالها بحال ديك العاقيسة لي فالبيت لهيه حاضيين غا السريط والمريط وشي مايشيط

مريم:ويامي كنضل معاها مقالتهاش ليا؟؟كتبان ليا البنت كتغلاض وتفيض ..

نعيمة:علاه مالها هبيلة؟؟راه بنت خديجة هاديك...مطورة وحارة كي مها متعرفيها علاش طاوية...لفعة كضرب غي من التحت ..جاها السم والغيرة منك حيت نتي مخطوبة وهي لااا سوليني عليها بحالها بحال مها . .

هدى كتسمع وحواجبها كيتعقدو وكتخرج فيها واحد الكازاوية مشرملة كتخليها ترعد ماقدراتش تكبح راسها حتى دخلات عليهم مدرمة مخرجة عينيها وحبالها الصوتية واصلين فين وفين :بزاااااااف عليك ماما يالشارفة العاقييييصة...متجبديييش ماما على فمك

تصدمو بجوج معرفوها منين بعثاث عليهم وتاهيا مخلات ليهم فرصة فين ...سرحات عليهم القادوس تاع فمها وجلسات كتعاير..

هدى: ديك لي كتعايري متسواي تا ظفر من ظفرها ولا تراب رجليها..

نعيمة:(وقفات ليها)تحل ليك الفم البرهوشة؟؟وليتي تسنطي على لالياتك

مريم:مييي صافي سكتي(كتحاول تبرد الجو حيت عرفات راسها تفرشات)هدى ماتديش على مي..

هدى:(ضارت فيها)علاه مالها حمقة؟؟؟ونتي يالبرهوشة علاش كتقلبي ليا فحوايجي؟؟شكون طلبك أصلا تجمعيهم ليا ولا تطويهم؟؟شكون حاشاها ليك؟؟

نعيمة:(مصبراتش لصوتها العالي وهي كتغوت على بنتها) ايوا يواااا جمعي فمك وعرفي راسك اش تتقولي...تغوتي عليها حيت طوات ليك حوايجك وجمعات ليك خنزك يالمطوطة..

هدى:(عصباتها وزادت كتغوت)بزااااف عليك أوجه تمارة نتي وبنتك...نهار ومطال ونتوما فتمارة ظهركم تقوس غي بالشقا بلا فايدة وشي شقا زين مشفنااااه..(بتحذير هزات صباعها عليهم)والله وتقربي ليا لحوايجي باقي ختى نتفاهم معاك..

مريم خافت مبغاتش صداع سكتات ولايني مها شعلو فيها العوافي وقلبها عامر على هدى ناضت تكبات عليها وبدات كتحسب ليها لي فات:يااااااك المعفونة...يالمصننة يالطارو ديال الزبل...تانتي وليتي تهضري وتحلفي على لالاك؟؟؟حتى نتي كبر ليك الشان والمرشان ووليتي تعرفي تعايري وتهضري؟؟يا المصننة يااالمعفونة المخموجة ...يا لي ريحتها تشم من داربيضا...بنتي يالخانزة المجيفة دارت فيك خير...جمعات ليك روينتك ونقات ليك حالتك...بنتي لي سايرة تغوتي عليها يالبكرة وقتما نشرات الصابون تلقا سليباتك المحمضييين وحوايجك المصننين ميصبنهم لا لا يهودي ولا المسلم...تحل ليك الفم يا خانزة البيطان وليتي تعايري بنتي...

هدى:(قادوس وتكب ومرضاتش)بزااااف عليك يالك**لبة يالعاقيصة..الخانزة هي نتي والمصننة هي نتي، ياوجه الهم وتماااارة ونتي وبنتك الله يعطيكم مصييييبة يا تريكة السحا*رااااات..

مشات ليها نعيمة مغددة حيت معصبة عليها وسنانها عليها قد خيزو..شحال جمعات ليها وشحال كتمات فقلبها ..طارت عليها لداك الشعر لي ياله تمشط وجراتها للأرض كتشطب بيها ديك الكوزينة وهدى كتغوت لربي لخلقها....فلحظة ولات الكووينة حلبة مصارعة..بفرق بسيط أنه نعيمة شادا هدى كتسلخ فيها وكتعاود ليها ترابي..مخلات فيها نتيف ولا قرييص ومريم تتفك وتغوت تعيط لي يفك معاها والمعيووور خدام...هدى السمطة لتحت بحالا كتشارجي نعيمة لي سلخاتها مزيان مجاش فين تدخل الجدة وباعدي تا كانت كلاتها وكددداتها وغواتها وصل لفين وفين ..

فرقهم باعدي وجر هدى منتوفة ومقموووشة ومعضوضة مافيها عظم صحيح تتبكي وتقول مابكيت وتتغوت لربي لي خلقها:ضربااااتني بنت الق***بة ضرباااااتني لكلب**ة(باغيا طير عليها وباها شادها)حيييييد بعد منييي خليني نتف حسها..

باعدي:(مصدوم)اتوما اش واقع(كيغوت بصوتو العروبي)علاه سايرة ضربي فيها

نعيمة:(كتنهج شاداها مريم لي صفرة بالخلعة)خصها ترااابي وربيتها....بنتك اسي باعدي حكات عليا وعلى بنتي لي ضل تجمع ليها وسخها...بنتي لي تضل تنقي موراها....جالسة تعاير ليا فبنتيييييي..

الجدة:(بسخط)اش داك تقيسييبها ا؟؟؟كتي تولدي فيهاا(قرصاتها)تي دووويييي

نعيمة:(خرجات فيها عينيها لأول مرة)تي حيدي لهيه لنسوط فيك حتى نتي...الكرش لي تولد ليا هادي بغيت ليها العكر ياربي...الوسخ والعفن وقلة الذراع والنقااا..سيري أنا اش بغيت لييييك.. بغييييت ليك غا شي موصيبة يالمعفوونة يالعود لاووي مكاين لي يساومك..كراناتك جايبين الخطاب غا مسرسبين عليهم ونتي حتى بوبي مبغاااكش...يالمصننة يالمعفونة

هدى:(كتبكي مرضاتش)شفتيها ابابا شفتيها؟؟مجبدتهااااش ياااك

مالقات كي دير ليها وهي طير ليها على مريم جراتها بحر جهدها من شعرها وباها كيفصل بيناتهم معرفها منين دازت ليه تا هزاتها...هبطاتها الأرض ومريم تتغوت ولوخرين يفكو..تخالطو ولات هدى كتنتف مريم ونعيمة كنتتف هدى والغوات والحيحة والسبان واكواك اعباد الله مفكووهم غي بستة وستييين كشييفة فرقوهم كينهجو وجا المكي وشي ناس كانو غي دايزييين ودخلو حيت الروينة نايضة والغوات بحرا مافكوهم..جر باعدي بنتو واكلة لعصا ونعيمة كتحلف عليها والجدة كتغوت قربات تسخف ..

باعدي:(حمر فيها)تي كوني تحشمييي..جمعتو علينا النااااس الك**لبات مدرتو بحساب حد(كيغوت عليها)

هدى:(مخرجة عينيها وشعرها واقف بلا عنقها لي مجبود فيه جريحات وشي حبيبات فوجهها خرج منهم دم)هي لي جبداتني وكتدوي فيا هي وبنتهااا...من ديما محامليينيييش وكيحسدوونيييي...والله منبقا ليهم هناااا بغييييت نمشي فحالي

الجدة:(خرجات كتغدد والشوهة فدارها عمرها كانت ليها)عاجبك الحال نتي وياها فرجتو فينا العديان والجيران...عمر داري سمعو غواتها واليوم تغاوتو ليا هنا...غي لي خلاتو فيا مك كملتيه ليا نتي هااااا لقاتك ساااهلة هي لفعة ونتي لفعة كثر منها..

هدى:(غوتات فوجهها)متجبدييش مي على فمك...مي بزاااف علييييكم

باعدى:(نهض فينا)هووودااااا

هدى:(حسات بيهم ضوروها)والله منبقا ليكم هنا(بدات كتبكي بحرقة)بغييييت نمشييي عند مييي لكازاااا

نعيمة:(خرجات من الكوزينة تتنهج)يا أنا يا هي فهاد الدااار والله منبقا مع كل**بة ديال الخلا مووووسخة مصنننة مالي خلاك ليا الوالي ولا التالي..

كثر اللغا والكلام وهدى حسات براسها بوحدها تما..الغوات من أي بلاصة كلشي تلم عليها وهي تأصر باش تمشي عند جداها ترجع وعزمات وقررات مشات جمعات حوايجها كاملين شارجورها وتيليفونها وكنززات لباها كتبكي لابسة جلابة ووجها حالتو بحالا غيطلقها الراجل..

وبالفعل خرج باعدي حاني راسو ماباغيهاش تمشي باغيها تبقى معاه...بالفعل هو مكانش كيصرف عليهم واخا عندو مناش لكن كان ديما فراسو راه عندو وليداتو خرج بيهم من الدنيا..ركب طونوبيلتو وركبات حداه كدمع وساكتة كتقلب فتيليفونها كتصوني لختها كتشدها العلبة الصوتية ولا كيصوني ويقطع فالبلاصة مفهمات والو...طوالت الطريق وبطا عليها غي امتا ترجع وتهنى..لا هو هضر لا هي هضرات تادخلو لكازا وهي تنهد براحة وما حسات ببالها هنى حتى وصلات لحومتهم..ياله بغات تنزل وهو يحبسها باعدي قايل:ديري عقلك ابنتي راه مبقيتيش صغيرة

هدى:(شافت فيه بشوفة باكية نسخة مصغرة على شوفة خديجة نهار كانت كتبكي عليه وتشكى ليه)تهلا فراسك ابابا

نزلات حاضنة صاكها والجو مصهد بقا باعدي واقف حاضيها وهي تتدق فدارهم حتى تحل الباب وهي مرعدة كتسنى تشوف شكون غيحل كانت إكرام لي تصدمات فاش شافتها لكن مبيناتش دارت ليها وقفة مربعة يديها وهازا فيها حاجبها مخنزرة قايلة:اش خصك؟؟

هدى:(بهدوء باينة فيها باكية)فين مي؟؟

دارت إكرام يديها على الباب حابساها ونطقات:مكاينا مك..مك ماتت الالة هدى سيري رجعي فين كنتي شحال هذا

هدى:(خزرات فيها بعيون باكية)واش نتي مريضة؟؟(بغات تحيد ليها يديها تدخل)

دفعاتها إكرام تا رجعات خطوة للور وصاحت فوجهها:لاش راجعة؟؟ياك مشيتي ومسولتي معلمتي ماقلتي لحد غادية اوا سيري فين كنتي..

بغات تهضر هدى وهي تخرج ربيعة لي سمعات الحس وخرجات تشوف تا كتبان ليها هدى وهي تبسم فرحانة قايلة:هدى بنيييتيي(تخطات إكرام)جيتي؟؟(بدون تردد عنقاتها)الله يا بنيتي الله

هدى:(تخشات فحضنها كتبكي)ميييييي

جراتها تحت باطها ناسية كلشي وقالت:تي حيدي خلينا ندوزو..

إكرام:(مقندشة)هاد خيتي مغتدخلش ..تمشي فين كانت(شافت من بعيد طوموبيلة باها)جابك؟؟مبقاش بغاك؟؟طلعتي ليه فراسو؟؟

ربيعة:(خزرات فيها)إكراااام كوني تحشمي وحيدي ندخل ختك(حضناتها ولوخرا كي لفعة فحضنها)

خزرات فيها ودخلات مغوبشة ومعصبة نيشان لبيتها مخلية ربيعة مدخلة هدى مبسمة وفرحانة نساتها شنو دارت..دخلاتها للبيت تتعنق فيها وتبوس فيها وففمها كلمة وحدة:على سلامتك ابنييتيي

ربيعة:كنتي كتبكي؟؟ضربك باك ولد العديمة؟..

حركات راسها بالسلب والقط كلا ليها لسانها وكتسبل فعويناتها كتخلي ربيعة تفكر بلي خديجة لي قدامها..عاودات سولاتها برقة:فيك الجوع ابنيتي؟؟ندير ليك بيضات؟

حركات ليها راسها ونطقات بصوت خافت:اه

ربيعة:(جمعات الوقفة واخا رجليها كيضروها)دابا نصايب لبنيتي بيضات واتاي..صبري

مشات ربيعة كتعرج وتعاود الصحة رشات وعاودات ولايني الفرحة عليها غلبات...خلات هدى كضور فعينيها كتشوف اش تزاد فدارهم لقات كلشي كيفما هو..الدار كتشعل وتلفازة مشعولة وريحة مريقة كطيب حتى سمعات صوت إكرام فالكوزينة كتهضر مع مها

إكرام:لا نوووضي جيبي ليها النقاشة على زين فعلتها

ربيعة:إكرام نعلي الشيطان(تنهدات وهي كتخوي البيض فالمقلة)واش نجريو عليها؟؟راه ختك

إكرام:(بانفعال)معنديش ختي أنا...لي تنوض تهز راسها وتزيد مع واحد عمرو سول فيها ولا قال فينها واش واكلة ولا شاربة هاديك ختي...خلاتك مريضة ملاوحة نصك طايح عليك تا تيليفون مخسراتوش عليك ومبلوكياني من الواتساب هاديك ختي

ربيعة:معندها عقل..ونتي عارفاها هبيلة ومعندها عقل

إكرام:(تفقصات وضربات بشبكة حداها)هاديك تبيعك وتشرييك ثيقي ليا فيها راه لفعة

ربيعة:تي سكتيييي خلاااص وهنينا ...أنا المباركة رجعات لينا

ساطت ومشات دايزة لبيتها وهي تضربها لهدى بتخنزيرة ديال الغدايد وحتى لوخرا معطلاتهاش خنزرات فيها وقلبات عينيها كتقلب فشفارها..وناضت إكرام ردخات الباب عليها وهي تمتم:الله يردخ عليك بيبان الخير الكل*بة الخامجة..

دقائق وجات ربيعة هازا بلاطو كتعرج حطات ليها تاكل مبسمة وفرحانة ليها ولوخرا دخلات فداكشي طول وعرض تاكل وتقول ماكليت تا مسحات كلشي بلا هضرة بلا كلام وهي تنطق ربيعة:كي درتي تما ؟

هدى:(غوبشات)كي الويل؟

ربيعة:اش دارو ليك؟

هدى:(تغرغرو عينيها)ضرباتني نعيمة وبنتها

خبطات ربيعة فخاضها فجأة وصاحت:هااا ويلي؟؟أويلي على ضربوك؟؟

هدى:بنت الحرام تحامات علي هي وبنتها كددوني امي..شوفي(كتوريها عنقها)شوفي امي..وشوفي تاني(كتوريها يديها)

ربيعة:(تفقصات)ياويلي على الهاترة...ياويلي على نعيمة الواسعة لي مخلا المكي معامن فسد عليها...ياولي ياويلي دارو فيا حسييفة ولي يتسالوه ليا خرجووه فيييك

هدى:وكون شتي امي(كتشكي عليها)مخلات فيا غي لي نسات وعايرات ماما حتى هي

ربيعة:(كشاكشها خارجيين فجأة)بغييييت ليها مصيبة بنت المهتوكة...تعاير لالاها ولي كان المكي يعايريها بيها...اويلييي ميميتي اويلي لقاوك وحيدة تما..وديك العقرب ديال جداك مدواتش

هدى:ضارت فيا وسمعاتني لي كاين ولي مكاين وغي سمعات نعيمة غتخوي الدار وهي تقول لبابا دي عليا بنتك لجداها(زادت كتبكي)

دخلات إكرام لي كانت كتسنط عليهم شاداها الفقصة:وجابك الحم*ارة؟؟لاحك عاوتاني..ختار مو ومختارش بنتووو يااك؟؟ياك قلتها ليك هااا ياك قلت ليك راه ولد الحرام ميسوااااش ونتي غادية تتجري عندو مفرش ليك الحرير

ربيعة:(مغددة شدوها الأعصاب)وطيييح فيدي ديك الخامجة ديال نعيمة والشارفة تختي ناكلها بسناااانييييييي فقصووووني

هدى:(كملات الشكوى)كيضلو يحشيييو ليا الهضرة امي

إكرام:(شهوتها تنتف هدى)غزاااو فييك أنا بغيتهم كون بيتو مك مع البهايم..غادية ليا فرحانة مصونية ليه زعما ومشيتي مخليا مي ملاوحة مريضة وصحتها كتموت عليها ومبلوووكيااااني يالحمارة الغاملة فرحانة ليا؟؟بردتي دابااا(دايرا يديها على خصرها)دويي؟؟

هدى:(غوبشات فيها وتخشات فربيعة)سيري بعدي مني نتيييي

إكرام بغات طير عليها وهي تغوت تخشات ورا ربيعة لي مطاكياها وهازا يديها تتبعدها:اتي بعدي لهيييه توما مالكم كي الكلاب غي تلاغطو..سيري تجلسي وخلي عليك ختك..ماشفتيهاش كي ولات

إكرام:(كتغدد فسنانها)كي ولات؟؟منفوخة كي البرميييل

هدى:(لي فيها ماهناها)ماشي سوقك المحسااادة

ربيعة:(شداتها الضحكة)ههههه الله يعطيكم المسخ بجوجات كي الضريرات

إكرام:(خرجات معصبة) الحمارة لوخرا

هدى:عاودي لمك الكل*بة

ربيعة:(خزرات فبها)واتي جمعي فمك خلاص..نوضي سيري للحمام

هدى:(بتكاسل)وااامي وااا راني عيييت جيت شادة الطريق(باغيا تبدل الموضوع)فينو احمد توحشتوو ههه

ربيعة:خرج للمدرسة..ديما تيسول فيك مسكين

هدى:(بابتسامة)توحشتو مسكين

ربيعة:(بحنان)وأنا؟؟

تلاحت هدى عنقاتها مخشية فيها كي نملة وقالت:نتي راك واحد الحنينة هههههههه توحشتك امي(باست ليها راسها)سمحي ليا فقصتك

ربيعة:ديري عقلك اهدى ...كبرتي دابا مبقيتيش صغيرة نعلي الشيطان وديري عقلك ..باك محبسك حد ماتشوفيهش..بغيتي تمشي تشوفيهم سيري ولكن العيشة معايا حتى نموت وديري لي بغيتي..واش أنا كون عرفت تريكة باك فيهم الخير غنحبسك عليهم؟؟؟ غا هي عقرب ولدها حنش

هدى:(ضحكات)ههههههه وأنا هي اللفعة الكبيرة

دخل احمد مفرنس حيت سمع صوتها مع شافتو تلاحت عليه وقالت:بطاطا قصبية

أحمد مع شافها توسعو عينيه بالفرحة لاح ل فيديه ونقز عليها قايل:خرشوووف النصااارة هههههههه

تعانقات هي وياه أو بالأحرى تعابزو شي فوق شي كيتعانقو ويضاربو وصوت ضحكهم مسموع تال عند إكرام لي مغوبشة أما ربيعة راه الضحكة واصلة ليها فين وفين فرحانة بولادها

******

مرت أربعة أيام رجعات فيه هدى لروتيناتها العادية ولي كتنحاصر فتاكل وتشرب وتنعس وتهز تيلي وسلسلة العفن مستامرة...دخلات إكرام من الخدمة فالعشية وحوايجها شبه سارديين لقات السلام على ربيعة ومحاشاتوش لهدى لي تاهيا ممسوقاش موالفة هي وياها فشد ليا نقطع ليك ويتخاصمو لكن ربيعة رباتهم على أنهم عندهم غي بعضهم..

ربيعة:عيتي ابنيتي؟؟

اكرام:بزاااف امي...غنبدل ناكل ونمشي للحمام

ربيعة:سيري ابنيتي..بغيت نمشي معاك ولكن ركابيا وكتافي فاشلين

اكرام:غي خليك أمي نتي مابقيتيش ديال تمارة..جلسي فدارك

ربيعة:(بصوت كيترجاها)دي معاك ختك..

خزرات إكرام فهدى لي مكايناش هنا لاهية مع المشقوف وميقات قايلة:قوليها تجمع حوايجها

ربيعة:(بصوت مسموع)هدى نوضي سيري للحمام

هدى:ممممم

ربيعة:اتي نوضي سيري مع ختك للحمام

هدى:(بكسل)وامي مافيااااش خلي تالغدا ونمشي

ربيعة:ربع يام ونتي تگولي ليا اليوم غدا نوضي ها ختك غادية

هدى:(شافت فإكرام لي لاوية شفايفها)وغتحك ليا؟؟

إكرام:(بسرعة عطاتها صبع)هاكي هاهووو هااااا شفتييييه

هدى:(كتسمكن)شفتي امي ياك شفتي مكنجبدهاش

إكرام:نوضي يالموسخة للحمام بغيت ليك مصيييبة نتي وعفنك نووووضي غسلي حالتك راه فقصتيني(سناناها كيغززو)

ربيعة:نعلي شيطان اهدى وسيري مع ختك غسلي(بصوت هامس)وراه غتغسل ليك غي نوضي

هدى:(فرنسات بشويا)واخا..

ناضت تجمع حوايجها وإكرام كتميق تحت توصيات ربيعة ليها:رخفي فيك النفس ونتي غي معصبة راه ختك هادي..اش نديرو ليها؟؟نلوحوها؟؟واختك صغيرة معندها عقل

إكرام:(تنهدات)أنا لي معندي عقل أمي أما هادي تبيعني وتشريني...

ناضت بدلات عليها وجمعات ماعنها وحوايجها وخرجات رفقة هدى لي كتجر رجليها مهضرو ماتكلمو كي وصلو للحمام قلعو حوايجهم وهي تضرب عليها إكرام بديك الكرش لي ولات عندها وقالت:داكشي لي وكلوك دار فيك غي الكرش

هدى:مفهمتش

إكرام:اش وكلوك تما تا غلاضيتي؟؟

هدى:(بذكاء)بغيتي نوريك اش كليت نوريه ليك

إكرام:زيدي زيدي تغسلي..كتفقصييي تتباني كد مي

هدى:(غادية كتعوج)بصحتي وبراحتي

وبالفعل جسدها فالحمام متوشفيش فيه...كرش خارجة بزااف وصدرها منفوخ لكن.. واقف ممدليش فخاض عامرين كثر من القياس أما الرجيلات بقاو ضعاف..داخلة وكتعوج فجسمها زعما شوفوني قداش وليت وزيانيت وإكرام غي كضور فراسها..شدو بلاصة وجلسات هي تتسنا ختها تعمر سطولة بحال الضيفة..مع بداو كيحكو وهي كيخرج منها الدود..وبالفعل كسلاتها إكرام مزياااان تتحك وتعطيها صلية بالكيس ولوخرا تتغوت حتى كيبغيو يقلبوها وترجعها تحك ليها وتحيد ليها عفنها..فقصاتها حيت مدودة..بززات عليها تحيد الزغب وشدات شعرها كتفكو ليها وتنتفها ولوخرا كتبكي وتحلف غتقولها لربيعة..مطلقاتها حتى رجعات حمرة وطاح عليها سر الحمام..خرجات هدى تتفرنس بحالا ماشي هي لي عاد سلخاتها إكرام غي بالفن فالحمام

الخوت هاكا دايرين..كيضاربو ويتقاتلو ويتناغشو ويتغاوتو وفلخر ليهم غي بعضهم..مكاينش لي مكيدوزش حرب الخوت مع خوتو..يضاربو على تلفازة على الحوايج على البلاصة على الشقا وفآخر النهار كتفرقهم ليام كتلقى كل واحد كيقلب على لاخر

جلسات هدى كتلبس حوايجها وهي تخرج إكرام مزنكة كثر منها وقالت:فففف سخفت

هدى:الحمام كاع ماسخون

إكرام:(شافت فيها بنص عين)غا تكسلتي ليا وتقولي مسخونش..لبسي لبسي

بدات كتلبس وهي تنطق إكرام :لي زوين فيك هو دوك العينين ودوك ثقابي تلزين لي فترمتك ..غيرهم راكي كوفرة ههههههه

هدى:هههههههه فراسك كالت ليا عمتي نجية تا ماما عندها

إكرام:(ميقات)يعميييك إن شاء الله ههههههه

تسمع صوت مرا كتعيط باسمها تلفتات هدى لقاتها بنت لابسة خمار وهازاه على وجهها..بيضة وغليضة الوجه عامر كد الخبزة والزين طايح عليها..بسمات هدى وهي كتحاول تستعقل:واش عائشة؟؟

عائشة:خههههه هي هادي(تسالمو بالوجه)كيدايرا الزين لباس عليك؟؟شكتعاودي؟؟

هدى:الجمد لله ازين ونتي مزيان؟؟(طلعاتها)ايهاي هاي على عائشة دارت عقلها ودارت النقاب ههههه كي طرا ليك

عائشة:هههههه اوا ياختي تزوجنا(كتقلب فشفارها فرحانة)

هدى:(تفاجأت)بصح؟؟حلفي؟؟امتا امتا؟؟خديتي عماد نيت؟؟

عائشة:ههههه اويلي سكتي ليسمعك شي حد اشمن عماد ولا ؟؟تزوجتو اختي مكنعرفو مكيعرفني ههههه مشفتو تا جا لدارنا..(بدات كتعاود ليها)ياختي غا شافني فعرس ولصق عليا مشا دوا مع خويا كالو ليه باقي صغيرة مشا وجا وبحرا ما قبل سعيد خويا يجي للدار ..اوا كنت صغيرة شي سبعطاش هاكاك راكي عارفاني عقلي كان فيه غي الضوران والتزنديق هههههه حتى دويت معاه رتاحيت ليه وتزوجنا وهاحنا درنا دارنا الحمد لله

هدى:(متبعة باهتمام ومفرنسة)ياختي سعداتك عبرتي والله..ديك المدرسة كنا غي مضعين فيها وقتنا

عائشة:ونتي اش درتي؟؟تزوجتي؟؟..

ضحكات إكرام بشويا وجمعات وطوات فحين هدى نطقات كتحاول تبين راسها عادي:لا اختي..خدمت

عائشة:فاش خدمتي؟؟علاه كملتي قرايتك؟

هدى:لا ويلي ..خدمت فصالون تالحلاقة الزين..

عائشة:ربي خلي ليا نمرتك نتهاضرو فالواتساب

هدى:ومرة مرة نتلاقاو

عائشة:جي عندي مرحبا بيك اما الخريج مكيخلينش نخرج بوحدي ههههه..

تبادلو النوامر ومشات عائشة دخلات لداخل فحين هدى نطقات مخاطبة ختها:شوف ليك السعد؟؟كانت تضل تضور مع عماد فوق سنطروا وفلخر هاهيا تزوجات..

إكرام:ههههههه نتوما البرهوشات معرفتكمش منين كتجيبو هاد فريفرة لي فيكم..مخنشة ليا هي فدوك الحوايج بحلا عندها مية عااام..

هدى:واتي سيري عرفتي هادي كي غتكون فدارها؟؟غتكون قايدة سوليني أنا

إكرام:وانوضي القايدة لي خدامة فصالون ههههههههههه

هدى:هههههههه وبغيتيني نكول ليها مدرت والو .

تمو خارجين من الحمام ونطقات إكرام:ومالكي لي مديريش؟؟دوزي تقراي شي صنعة ولا قلبي على خدمة دوزي وقتك

هدى:دابا نشووووف

******

"بعد مرور شهر"

هدى كتراسل عائشة فنمرتها كيف ولفو لمدة شهر..منهار خدات نمرتها وهوما كيتفكرو الأيام الخوالي لي دوزو فالكوليج والضوران والضحك و التكركير ..كيجلسو مجمعين أبيل طول النهار فاش كيكون راجل لوخرا خارج..هي تتشقا ولوخرا مونساها ويتعاودو ولوخرا باقي فيها حر سبع أيام الباكور ضور ضورة راجلي دار راجلي فعل ..شتي شنو تيقوليا؟؟اي موضوع تتدخل فيه راجلها وتعاود ليها على يومياتهم وكيفاش كيضحكو ومرة مرة كيجبدو مواضيع جنسية وتدير فيها خبيرة وتنصح فيها وتشرح ليها ولوخرا عاطياها الخاطر و وذنيها وتتقيد فدماغها وترسخ وشعلات فيها دودة وحدة وهي الزواج

فاش كتكون فشي محيط أكيد غيأثر عليك خاصة فاش كتشوف كثرة المؤيدين كتولي تبدا تأثر بالأفكار..مثلا كتكون فمحيط كولو ناجحيين وكاع الناس كيحققو إنجازات فأكيد غدير النفس ودير مافجهدك باش تكون بحالهم ونفس الشيء فاش كتكون فوسط كولو سلبيات وفشل فا كتولي تقول حتى نتا راه كلشي بحال بحال

وهذا بالذات لي وقع لهدى..عايشة فوسط كولو حواراتو على الزواج..لي سولتيه كيقوليك"فلانة تزوجات,,فلانة دارت وليداتها"

أفكار كثيرة ترسخو فبالها وخلاوها حتى هي تمنى تزوج وتعيش شنو كيعاودو ليها ناسية بلي فالزواج كيعاودو غي على الليل والنهار لا..

واقفة لابسة جلابة إكرام زوينة بعدما طلباتها ورغباتها عليها وحتى مشات للحمام وتنقات عاد عطاتها ليها..وفرجليها بلغة طالية العكر الفاسي كيبان معيق فكدامها وشعرها طلقاتو نصو محروق بقلة التهلية ومشنتفة باينة ناشف شابع نشوفية من لتحت..الوجه رجع مسلوت حيت مبقاتش كتاخد الدوايات وضعافت شويا لكن الكرش حاضرة ناضرة كتبان شويا وهادو مخلفات الدوايات تسم ديال الغلض ..دارت ماسكارا وهي تنطق ربيعة من لور لي جالسة حاضياها قايلة:كحلي عينيك

هدى:تحت عيني زرق مغيجينش باقي

ربيعة:وبسيييف ونتي كضلي شادا المشقوف تسبحي فيه

قلبات عينيها بملل من نفس الموضوع وقالت:واصافي امي...اري ليا فلوس طاكسي

جبدات ربيعة بزطامها مدات ليها لي قسم الله وقالت هدى متذمرة:ويلي يا مي خمسين درهم اش غندير بيها؟؟وغندخل بيدي خاويين؟؟وزعما البنت عارضاني لدارها حشومة أمي

ربيعة:(بعتاب)هي لي عندي..راه مبقيتش خدامة هانتي كتشوفي رجلي ضاراني وختك يديها بوحدها

هدى:(عوجات فمها)بااااز ليكم والله دابا نخدم وتشوفو

ربيعة:خص غي تهزي راسك مبغينا منك والو

هدى:(بتاسمات)نخدم ونديك أمي للعمرة وترجعي الحاجة ربيعة

ربيعة:ومالكي متقولي الحج؟؟

هدى:وانبداو بالعمرة

ربيعة:(كتحرك راسها زعنا احياني)مممممم ملي تكوني ناعسة حلمي بيا ههههههه سري ولاتعطلييش تفوتي العشا من هنا نعلقك(شدات قرجوطتها)..

هدى:واخا

هزات صاكها وخرجات بعد مدة طويلة وهي فالدار قليل فاش كتخرج لدرجة الحبوب كيبان حمر وسط وجهها البيض حيت مكتخرجش للشمس..وخلاوها لولاة اش خصك العريان الخاتم امولاي...أش خصك أ هدى العكر الفاسي للكدام..

خرجات شدات طاكسي كبير حطها بعيد شويا كملات على رجليها ومشات كتهضر معاها فالتيليفون كتنعت ليها حتى شافتها بخمارها من بعيد كتشير ليها..مشات عندها مبسمة ومحمسة حيت ولات معجبة بيها وبحياتها..تعانقو وتسالمو وبقاو غاديين حتال الدار لي غي دخلو بدات عائشة كتقلع..لابسة بيجامة لاصقة عليها وزادت غلاضت..

تعانقو وتسالمو وبقاو غاديين حتال دار لي غي دخلو بدات عائشة كتقلع..لابسة بيجامة لاصقة عليها وزادت غلاضت كثر من لول ومؤخرتها كتلعب..شعرها صابغاه بالاكاجو والوجه ماكي والروايح كيفوحو منها زوينين مع اثار النقيش فيديها

عائشة:مرحبا بيك ازين نهار كبير هذا

هدى:الله يكبر بيك أ لالة..كاينة بوحدك؟؟

عائشة:اه عدوزتي مشات عند بنتها وراجلي خارج

هدى:(كتبركك دار بلا متعيق)دارك زوينة

عائشة:يزين يامك

حطات عائشة ما لذ وطاب وتهلات ووفات وجلسات مجمعة هي وياها ويضحكو وأغلب مواضيعهم الزواج والرجال دايرا فيها الناصحة كتنصح فيها وتوريها وتوضح ليها بلي أحسن قرار خداتو هو الزواج

عائشة:اوا وهذا مكان..

هدى:هههههههه ضحكتيني المصيبة..كديري ليه شي زبايل

عائشة:صابر ليا مسكييين ههههه الله يحفظوو ونتي مكاين والو زعما؟؟

هدى:لا هاد ساعة ديال راسي

عائشة:ويلي هاد زين كامل ومجاك حد؟؟؟تعقلي على صفاء لي كانت معانا فالقسم لاخر حتى هي تزوجات

هدى:هههههه لالا كيجيو الناس ولكن أنا مبغيتش

عائشة:وعلاش؟؟شحال جهدك تردي فالناس محدك صغيرة ديري دارك وعيشي الحلال مع راجلك اللهم هاكا ولا تصاحبي

هدى:ههههههه اوا ملقيتش داك لي بغيت

عائشة:وكي بغيتي هاد الراجل؟؟

هدى:بغيتو يكون راجل(تبسمات)يحن فيا ويتهلا فيا ونكون عزيزة عليه

عائشة:ههههههه ويكونو عندو الفلوس

هدى:ماشي شي فلوس راكي عارفاني أنا ماشي طماعة

عائشة:الله يجيب ليك شي ولد الناس حتى نتي وياربي يسكنك حدايا باش نعودو نخرجو بجوج هههههه

بعد ساعتين من الزمن ناضت هدى مساخياش ولكن خصها ترجع حيت ربيعة ملي قالت ليها غنعلقك من قرجوطتك عارفاها قاصداها..تسالمات معاها ووصلاتها للباب مع حلو لقاو راجل زوين فوجههم..تدرقات عائشة ورا الباب وتبسمات قايلة:على سلامتك

...:حسابني كملتو(حاني راسو مهزوش فهدى لي تتشوف فيه)

عائشة:عاد سالينا...هدى سلمي على داركم

هدى:حم مبلغ

تحركات من حداهم ودخل هو وتسد الباب وهي تسمع بصوتو:توحشتك أحبيبة

عائشة:هههه حتى أنا

فرنست ومشات مع الطريق وعقلها كيضرب فأخماس وأسداس..تمنات حتى هي تكون مزوجة وبراجلها وبدارها وتلبس بحال عائشة وتدير بحالها ..غادية وكتخايل راسها مزوجة حيت ترسخات ليها فكرة أنه أرقى مامكن دير هو تزوج...شدات طاكسي وعقلها مزال كيفكر وتفرنس وصمات على أنها بغات تزوج تاهيا وتعيش داكشي لي سمعات وشافت أما الواقع حاجة خرااا..

-قالو ناس زمان"أش خصك العريان ..خصني الخاتم أمولاي"

جالسين على طاجين للعشا من يد ربيعة فدفئ عائلي والحال بدا كيبرد..كياكلو وبهضرو وكل مرة طلعينها على واحد وهدى يد فتيليفون يد فطاجين حتى نطقات إكرام:لقيت ليك خدمة اهدى

هدى:مممم

إكرام:(شافت فيها مهزاتش راسها)والبنت

هدى:وا شنو فففف اش كلتي؟؟

إكرام:لقيت ليك خدمة

هدى:فاش ؟؟

إكرام:فمخبزة تبيعي للناس

هدى:(قطبات حجبانها بتساؤل)فين؟

إكرام:ف *****

هدى:ناري بعيييدة بزاااف

ربيعة:طاكسي كبير يديك لتما وكملي على رجليك

هدى:غنعيا أمي والله

إكرام:اوا تمارة هي هادي..سيد كتعرفو صاحبتي عمها غيتهلا فيك وغتخدمي براحتك راه ماشي مخبزة عادية داكشي تاع ناس الهاي

هدى:(ساطت)فففففف جيتيني على غفلة..امتا نمشي؟؟

إكرام:هدى جمعي راسك معايا شحال جهدك تبقاي فالدار خرجي وشوفي وتشوفي

ربيعة:حتى حد مادايم ليك ابنيتي خرجي خدمي وعرفي الوقت اش فيها

هدى:(محاملاش تخدم)واخا..امتا نبدا ؟؟

إكرام:غدا غتمشي مع الجوج غتسولي على سي عبد السلام هو مول الشي غيهضر معاك ويسولك عادي ويقوليك اش غديري

هدى:واخا

إكرام:دوري بحالتك وهزي شي حاجة من حوايجي ..هزي لي بغيتي لبسيه وسيري تخدمي شحال ماعطاك ديري بيه لي بغيتي ..

هدى:(لمسات الحنية فكلامها وتبسمات)واخا

ربيعة:الله يسهل عليك...(سكتات شويا)باك سول فيك؟؟

هدى:ممممممم ݣاليا غيصيفط ليا ألف درهم

إكرام:(ضحكات حتا قفز أحمد لي مبوق بالنعاس)هههههههههههههههه إلى شفتيها اجي عكري ليا

أحمد:(مبوق بالنعاس)مي انمشي ننعس

ربيعة:سير اوليدي نعس

هدى:حتى أنا تصبجو على خير

مشات مخلياهم بجوج وهي تنهد إكرام:عالله دير شي حاجة

ربيعة:عالله ياربي

****

اليوم الموعود..فيقاتها ربيعة مع العشرة باش ياله تنوض ولوخرا سهرانة الليل كامل بالغوات والحرب باش فيقاتها ووقفات عليها تا فطرات..حكات سنانها ودارت ديدوغون حيت إكرام تتوصي وتعاود وهي تتقول غي اه اه..دايرين ليها بحالا غدوز الباك..لبسات دجين وتريكو دافي وسبرديلة وطلقات شعرها لي صايباتو ليها إكرام..كحلات عينيها بقلم وكثفات حجبانها بماسكرا وميمكنش الواحد ينكر بلي عطاها ربي الزين بزاف فعينيها..دارت عكر وتلفتات لربيعة

- قالت:كي جيت أمي؟؟ديال الزواج

ربيعة:زوينة ابنيتي(تمعنات فيها)كتشبهي لخديجة الله يرحمها

هدى:آمييين ياله أنا مشيت

مشات بالفعل مافيهاش الحماس بحالا دايرا ليهم غي الخاطر..خدات طاكسي وكملات على رجليها وتتقلب حاقدة بحرا مالقات البلاصة..شافتها مخبزة زوينة وكبيرة ماشي عادية ديال الناس الميسوريين كلها زاج وكيتقداو منها غي صحاب الطوموبيلات الواعرين..

دخلات كتضور فعينيها وتتشوف الناس كي لابسة وكي عايشة توجهات نيشان للبنت لي تما لي لابسة زوين و اللبس ديال الخدمة موحد فيه بادج صغيرة فالجنب فيه سميتها..نطقات بابتسامة:السلام

..:بونجوغ لالة..فاش نقدر نعاونك؟

هدى:كنسول على عبد السلام

البنت حققات فيها ونطقات :نتي البنت لي جيتي على قبل الخدمة

هدى:اه اختي

...:اجي احبيبة دخلي راه لداخل فبيروه

تبعاتها وعينيها كيضورو للمحل وكي مصلوح وكيفاش الناس كيهضرو بالشويا والرقي ..دخلاتها فعلا لمكان وراء الواجهة..هي سمعات مخبزة حسابها بحال كاع المخبزات لي عرفات لكنها صدقات مخبزة راقية..شافت راجل يكون فالربعينات تما كيخدم فبيسي فبيرو زوين ونطقات البنت:موسيو عبد السلام جات البنت

عبد السلام:سي بون تقدري تمشي

مشات وخلات هدى كتشوف فيه طلب منها بأدب تجلس ونفدات طلبو وبدا كيسول فيها ويشرح ليها الخدمة وكيفاش كتمشى و أمورهم وبزاف تالحوايج وهي تتحرك غي راسها..كذلك على الصالير وتمنى ليها التيسير..دار معاها تبدا غدا فالصباح مع الستة تصباح حيت كيحلو على تيساع وخص مايجيو تا يبداو الكليان يدخلو تا يلقاو كلشي واجد

ودعاتو وخرجات راسها ضارها ويديها فالتيليفون كتهضر مع إكرام وتعاود ليها ولوخرا فرحانة وكتوصيها ..

وبالفعل الغد ليه لالة هدى مشات للخدمة بكري خرجات فالنبوري وربيعة وإكرام وقفو ليها حتى شدات طاكسي كبير عاد رجعو يكملو نعاسهم حيت خرجات قبل الفجر راسها غيطرطق حيت منعساتش مزيان..وغي إكرام لي لبساتها وعاوناتها ..وصلات وعطاوها التوني ديالها بسميتها ودارت بوني للشعرها وبدات البنت كتشرح ليها سميات المنتوجات وأغلبهم بالفرونسي وغي كتشوف وكتحاول تعقل...دايرا مجهود باش تفهم وكتعاونهم شويا بشويا وتدير معاهم يديها حتى بداو يجيو الكليان وكتوريها البنت كي خاص تعامل معاهم وأنها تبقا ديما ضاحكة وبشوشة..ومن هادي لهادي والتعب نايل منها حتى سالا نهارها مع ثلاثة تالعشية مهدودة وباين فيها العيا حيدات حوايجها وودعاتهم وخرجات هازا تيلي كتقلب فيه حيت مهزاتو نهار كامل لقات عائشة نيت سولات فيها وجلسات كتعاود ليها تا رجعات للدار كيسولو فيها وهي تتعاود ليهم حتى قرب المغرب ومشات تنعس

وهاكا دازو يامها لي عبارة عن عشرين يوم وهي خدامة دغيا تعلمات وستعقلات وبدات كتبيع وتشري وتسهال عليها الخدمة لكن عيب هدى واضح وهو النظافة الشخصية منعادمة عندها وسرعان ما كتاشفوه فيها البنات لي خدامين معاها ولاو دايرينها مسكة بين ضراسهم كيشدو بيها النميمة وحتى أغلب الناس بداو كيشمو ريحة العرق الكريهة وهي لأنها مكتفهمش راسها بزاف كدير ديدوغون على العرق كتولي ريحة كوفيد تسعيين لي منتاشرة..تشكاو ليها للباطرون لكن رفض يهضر معاها حيت أمور نسائية وحتى كتبيع ليه مزيان وكتعامل الناس مزيان فكان ميك...

سمية:قتلاتني اختي راه مبقيتش كنقدر نوقف حداها

خولة:بزاااف اصاحبتي راه دوخاتنا كاملييين مبقيتش كنشم ريحة الماكلة ريحتها هاربة عليهم

سمية:حمد لله خارجة مع الثلاثة ندير تسييقة ونعطر البلاصة

خرجات هدى مهدودة ممسوقاش لنظراتهم ولباسها مكشتر..لي لقاتو كتلبسو قدامها دجين وتريكو والشعر كتجمعو كعكة مهملة ومع هو معلك كتكمل القضية..كيبان وجهها شاحب مافيهش الأنوثة بتاتا مع العلم عطاها ربي حقها فالزين وغي شويا تاع الروتوش غتبان قوقة لكن العجز دار فيها مابغا

رابطة إتصال مع عائشة كيتعاودو كيف ديما ويتناقشو..حتى نطقات عائشة:عندي ليك خبار زوينة وغتعجبك

هدى: قولي نسمع

عائشه:يالالة جات عندي لوستي لبارح وقالت ليا لوسها باغي يتزوج وقاليهم قلبو ليا على شي بنت الناس ومع لوستي حدودية مكتعرف حد سولاتنني وأنا نفكر فيك

هدى:(تقلشو وذنيها بالفرحة)بصح؟؟عاودي عاودي ليا عليه

عائشة:هههههه ياختي سميتو الزوبير عندو 25 سنة خدام فشركة ديال الترونسبور شيفور كيتخلص مزيان ماشي شي شركة محشرة راه بوراقيه ...والسيد الله يعمر ليه الدار ومتدين شاد طريق الله وضريف مصوااب أنا شفتو مرة وحدة ومكيهزش الراس..مرضي ميميتو وعندو برطمة ديالو عاطيها ليه باه

هدى:(عجبها الحال تتسمع وتتفرنس)اوا؟؟كملي كملي

عائشة: السيد بغا يكمل دينو وطحتي فبالي الى بغيتي نرصييو ونعلمها ويجيو لداركم نيشان

هدى:مغنعرفوش قبل؟؟

عائشة:نعطيوه نمرتك وهضرو والى تفاهمتو يجيو نيشان لداركم

هدى:(عضات شفايفها)ايييييه علاش لا..عطيها ليه

عائشة:عالله يتسير ليك وتزوجي حتى نتي ونفرحو ليك ههههه بلاش عليك من ديك تمارة

هدى:واييييه اختي تمارة والله عيييت

عائشة:اوا يكون خير

هدى:واعطيهم نمرتي اليوما صافي

عائشة: واخا ههههه ياله سيري راه خليت راجلي جالس بوحدو

دخلات من الخدمة مفرنسة على غير عادتها كتجي مهلوكة بالعيا والوقيف..دابا لا ضاحكة ومبشورة تقول ليها نوضي سيقي جامع الفنا تديرها..كيف لا وهي حسات بجنابها شي حد عبرها ..وغتزوج تاهيا..

سلمات على ربيعة وجلسات مبيمة:كي ضليتي امي؟؟

ربيعة:حمد لله ابنيتي هاحنا ونتي

هدى:بخييير..

ربيعة:(ضرباتها الريحة)نوضي ابنيتي دوشي يخفافو عليك عظامك

هدى:اه عيييت نيت انا نوض

وبالفعل ناضت بلا عجز وبلا متبقا تغاوت معاها ربيعة عليه الشيء لي خلاها تستغرب..خدات دوش خفيف حيدات ريحة الصنان ودارت ديدوغون ومشات جلسات معاهم لقات لوخرين جاو كيديو ويجيبو فالهضرة وهي دماغها تيفص فالمرتبة والعرس

يوماين موراها جاها إتصال وهي فالطاكسي من نمرة ممعروفاش..جاوبات بصوت عادي:الو

تسمع صوت رجولي ثقيل:الو

هدى:شكون معايا؟؟

...:حممم معاك الزوبير السيد لي من طرف عائشة

دار قلبها طق فرحات وتقادات بلاصتها وهي تنطق بصوت هادئ:لباس بخير؟؟

الزوبير:الحمد لله ونتي؟؟

هدى:الحمد لله

دام صمت لثواني وهو يكسرو قايل:كاينة برا؟؟

هدى:اه

الزوبير:توصلي للدار صوني ليا ونعيط ليك نهضرو واخا

هدى:(بتاسمات بخجل)واخا

الزوبير:الله يعاونك

ماخلاش ليها فرصة فين تجاوب قطع خلا سنانها لي عامرين بالماكلة عضو على شفايفها بخجل..وعينيها كيضورو متوقعاتش اتصالو..صوتو عجبها وبدات كتررسم ليه صورة فبالها انطلاقا من أحبالو الصوتية لي نعشات شويا تالأنوثة فداخلها رغم انه متغزل بيها ماقال والو..محادثة عادية بحال كاع المحادثات لكن البنت عامة فاش كيكون شي راجل مفيزيها هي يعني هي لي حاط فراسو كتحس بجنابها شويا..وهذا ماطرا لهدى لي بمجرد ماحطها الطاكسي مشات تتجري بحالا مسخرة للقايد..

دخلات للدار سلمات ومشات سدات عليها بيتها بلا متبدل حوايجها..تتفكر تصوني ولالا وهي تدوز الخط بضع رنات وكل مرة تتقول غتعاود تسمع الو لكن مكاين حتى رد وتقطع راسو...غوبشات معجبهاش الحال وبقات مربعة رجلييها تتسنى يصوني..نص ساعة ساعة ووالو حتى عيات وناضت بدلات عليها وخرجات جلسات معاهم وعينيها مع التيليفون لي غي صونا قفزات تا خلعاتهم وقال أحمد:مالكي؟؟

هدى:والو..(هزات تيلي خارجة )

إكرام:(هزات حاجبها) الله يعميها ليك

دخلات عاود سدات عليها وشدات الخط وبصوت هادئ نطقات:الو

الزوبير:هدى لباس؟؟

هدى:بخير ونتا؟؟

الزوبير:الحمد لله(سكت شويا ونطق)مهم واش هضرات معاك عائشة

هدى:اه

الزوبير:واشنو بان ليك؟؟أنا ابنت الناس منكذب عليك مانجيك عوج..أنا على قد الحال خدام فشركة تاع ترونسبور شيفور..برزقي الحمد لله ومخصنيش وبغيت نكمل ديني ولكن مابغيتش بنات هاد الوقت بغيت شي وحدة بنت الناس ندير معاها دار ووليدات ونكونو يد وحدة..نحط عليها الراس وتحطو عليا..وسولت وقالو ليا كاينة نتي

هدى:حممممم

الزوبير:(كمل كلامو)اش بان ليك؟؟

هدى:حمممم(تلجم ليها اللسان المعقول ضهشرها)نتعارفو بعدا

الزوبير:مقلتي عيب ..نجيو لدار نديرو تعارف العائلات ونتعارف أنا وياك..الخطبة حللها ربي باش جوج ديال الناس يتفاهمو ويشوفو واش موالمين ياك متافقة معايا؟؟

هدى:(سارحة فصوتو)اه عندك صح

الزوبير:هضري مع داركم وأنا نجي أنا ومالين الدار حسبونا بحالا ضياف وجاييين هههه(ضحك باش يلطف الجو)وبلي فيه الخير

هدى:واخا حمممم نسولك؟؟

الزوبير:سولي

هدى:شحال فعمرك؟

الزوبير:25 سنة ..باقي صغير ولكن هذا هو الجهد لي مباغيش يدير الحرام يمشي للحلال

هدى:اه عندك صح.

الزوبير:الحلال زوين..الله يسر لينا فيه ..دوي مع داركم نتعارفو أنا وياك بخبارهم وديك ساعة الى كنا مكتاببن لبعضياتنا راه نهار الكبير

هدى:اه عندك الصح

الزوبير:ياله نخليك دابا الالة هدى..تهلاي فراسك غدا نعاود نعيط ليك

هدى:واخا..تصبح على خير

قطع معاها وخلاها كتخطط وتفصل وتخيط فرحانة..بدون شعور نقزات بصمت فبيتها ومشات تخشات فبلاصتها كتقلب فتيليفونها وعقلها كيصور ليها بارزة وعندها العرس

حتى دخلات إكرام بعدما دارت روتينها الليلي ووجها كيبري بسيروم وهي تنطق متسائلة:شنو دايرا لوجهك

إكرام:(تلاحت بلاصتها)سيروم مرطب

هدى:مزيان..شوفي كثار ليا الحبوب فوجهي ياك

إكرام:بسييف اختي واش نتي كتغسليه من الحمام لحمام ولي كتمشي ليه على عشرين يوم خص تنوض فيه البطاطا الخامجة هههه

هدى:(قطبات حجبانها)معنديش فلوس باش نشري هادشي

إكرام:هانتي خدمتي دابا خسريهم على وجهك..مفهمتش كي وقع ليك.. كان وجهك بلارة تشوفي فيه وجهك خرجتي عليه

هدى:دابا نتهلا فيه(شافتها كتفرنس للتيليفون)معامن كتضرب؟؟

إكرام:تعرفت على واحد البحريني عايش فالإمارت غزااال

هدى:حولي ؟؟ههههه

إكرام:مك ههههه مالي غنتزوج بيه راه غي ندوزو الوقت

هدى:غتزوجي بيه؟؟

إكرام:تي تسطيتي ههههه باقي الحال على الزواج مالي مريضة

هدى:مكتفكريش تزوجي؟؟

إكرام:لا(تفوهات)تصبحي على خير

هدى:تصبحي على خير

كل وحدة حطات راسها على المخدة ونعسو بعد يوم متعب فانتظار شروق شمس جديدة

******

رابطة إتصال مع عائشة كتعاود ليها وتضحك فرحانة ...كاع التفاصيل عاوداتهم ليها ولوخرا كتشكر ليها السيد والزواج باغيا دخلها للقفص..

عائشة:ميسورين والله دارهم كبيرة وعاطينوو طبقة مفرشها وزوينة ميخصك معاه خير..ومتدين عارف الله

هدى:اه ياختي مقللش عليا الحيا ولا العفة بالعكس كيدوي بالصواب...مكرهتش نشوف وجهو

عائشة:دويتو فواتساب؟؟

هدى:لا ياختي..

عائشة:دخلي نمرتو وشوفي عالله يكون داير تصويرتو

هدى:واخا

قطعات معاها ودخلات للواتساب وهي تطلع ليها التصويرة..شاب زوين باقي صغير..ضعيف شويا..حروفو بلقين او بالأحرى شهيب..مبسم كيبانو سنانو مقاديين وداير لحية شويا طويلة وشهبة...كيبان فيه هادئ..سكريناتها وخباتها عندها كل شويا تطل عليه وكتسنا اتصالو بيها..كل دفيقة طل ياكما صونا

حتى خرجات من الخدمة وبحالا عارفها معاش كتخرج صونا ليها هي شافت نمرتو وهي تبسم باعجاب..تنفسات وشدات الخط قايلة:الو

الزوبير:الو هدى لباس؟؟

من جملتو لي لاح ليها حساتو بحالا كيعرفها وهي تنطق براحة:الحمد لله ونتا؟؟

الزوبير:اللهم لك الحمد..امدرا هضرتي مع داركم؟؟

هدى:باقي..اليوم ندوي معاهم ولكن

الزوبير:عندك شي مشكل؟؟

هدى:لالا غي كلت زعما نتعارفو هو لول عاد نكولها لدارنا

الزوبير:(بنبرة انزعاج)التعارف كيكون مع الوالدين..انا ابنت الناس مباغي لا نطلع لا نهبط معاك..باغي الحلال وباغي نجيو ونتعارفو بالشرع وقدام الله..اما هضرة التيليفونات راه مامسلكش..كاع لي كيجيك فتيليفون ومكيجيش للدار غي غيضحك عليك ونتي تعرفي ابنت الناس

هدى:(حسات براسها زبلاتها)لالا مقصدتش هاكاك..غي قلت نتعارفو ولكن عندك الصح لي كيبغي المعقول كيجي للدار

الزوبير:(بجدية)هضري مع داركم ابنت الناس وعلميني

هدى:واخا

اازوبير:الله يعاونك

قطع وتنفسات براحة كتحاسب فراسها على شنو قالت خافتو يفهم واش هي بنت الزنقة وممربياش وغادية للدار وتتفكر كي دير تقولها ليهم فالدار...

داخت وبلاصة ماتمشي تنعس بالعكس عاونات مها غسلات ليها الماعن وشطبات وكتشقا معاها وشادا ليها الخاطر كتمهد ليها..حطو العشا كيتعشاااو ويتهاضرو حتى نطقات كي الحزقة:بغيت نكوليكم شي حاجة؟؟

ربيعة:قولي

هدى:حمممم(حشمات)غيجي واحد سيد يخطبني..

للحظة توقف عندهم كلشي..يد إكرام لي كانت غادية للفمها وقفات وكضور فعينيها..أحمد كيندغ ببطء كيحاول يستوعب..أما ربيعة راه وحلات ليها وبدات تتكحب وكيعطيوها الما حتى نطقات ربيعة:اش كتقولي؟؟شكون هذا وفين عرفتيه؟

هدى:مكنعرفووش ..شافني من بعيد وبغاني للزواج

إكرام:(بجدية)تعشاي الى بغيتي تعشاي غنديرو راسنا مسمعنا والو

هدى:(حطات الخبز من يديها وقطبات حجبانها)علاش زعما؟؟

ربيعة:باقي صغيرة

اك٣رام:واش قدك كيفكر فالزواج؟؟قدك راه باقي كيقرا

هدى:وانا مكنقراش اش غنجلس ندير؟؟اللهم نتزوج

إكرام:سمعي اهدى غنهضر مرة وحدة ومغنعاودهاش..الزواج ونتي فهاد لاج متحلميش بيه واخا تعواجي..تعاشرتي ليا مع ديك الهاربة ديال عائشة لي مخلات لا حاحة ولا ملاحة ...حتى درب مخلاتو حطات قزيبتها فكاع دروبا ومكاينش شي سونطرا مركباتش فيه..نهار بغات تستر راسها تزوجات وعايشة كي الشارفات باغيا تولي بحالها؟؟..

هدى:مالها عائشة؟؟عايشة مزيان..مزوجة وساكنة بوحدها وعندها دارها وراجلها ونزيدك كتوحم وفرحانة فحياتها

ربيعة:تي راه عاودو ليك غي هلى الليل النهار معاودوش ليك عليه؟؟شمن زواج ونتي كد الكمشة؟؟اش موجدة لهاد زواج؟؟

إكرام:واش كتعرفي على هاد السيد؟؟فاش خدام وشنو أصلو وفصلو واش عندو؟؟واش كيكمي ولا كيسكر

هدى:(باندفاع فيها الدودة ديال الزواج)السيد الله يعمر ليه الدار. .متدين وداخل سوق راسو و مباغيش الضوران والتصاحيب باغي الحلال..هضرت معاه قاليا ما بغيت خروح ودروج بغيت المعقول

إكرام:(زفرات كتحاول تبرد معاها السوق عارفاها دغيا كتشعل والى عكسات ليهم غتوقع شي مصيبة)هدى باقي صغيرة على الزواج..عاد خدمتي باقي ماشفتي والو

ربيعة:يرضي عليك ابنتي الى مانساي هاد الهضرة وديها فخدمتك..ميغركش الزواج راه سبعيام تالباكور دغيا كدوز

مع شافتهم تهدنو فهضرتهم ومبقاوش كيهضرو بالغوات نطقات بصوت هادئ:وامي واش شفتوه؟؟عرفتوه؟؟دغيا حكمتو عليه ودرتوه خايب؟؟السيد ضريف ومكيقللش علي العفة باغي يجي للدار مباغي ضوران

إكرام:وفين عرفتيه؟؟

هدى:عائشة لي جابتو ليا

إكرام:(بصوت مرتافع شويا )ها لي قلنا..ديك الهاربة لي ملوية فنص ميترو تالثوب هي مولاتو..ميكون غا بحال راجلها

هدى:(عقداتهم تاني)انا بغيت غي نعرف اش دارت ليك هاد عائشة؟؟فاش وصلاتك؟؟

إكرام:تعطينا بالتيساع جالسة تخبر عليك وتعمر ليك راسك بزواج دمق من عندك..

ربيعة:(تنهدات بتعب)هدى نساي هاد الهضرة وديها فخدمتك راكي باقي صغيرة

بإنفعال وقفات وهضرات بنبرة تحذير:أنا غي قلت ليكم ساعا نتوما مكتبغيوش الواحد يشاوركم..بلاصة ماتقولو ليا مرحبا قوليه يجي كتوقفو ليا فسعدي

إكرام:(بسخرية)سعدك؟؟؟هي شي ملياردير هذاا

هدى:نتي ديما عندك الفرحة هي الفلوس..الفلوس ماشي هوما كلشي

إكرام:حيت نهار غتوقفي ومتلقاي متاكلي غتاكلي الحب. شدديه شحريه مع البصلة وغتشبعي..راه غي كتخراي اختي والله...الواد لي جا يديك..كل مرة خارجة بعجب..مرة بتنجلس من القراية غندير التكوين..مرة غنمشي عند باا نعيش معاه ودابا باغيا تزوجي؟؟اش موجدة لهاد زواج؟؟عندك ليه الصبر؟؟كتعرفي لشي شقا؟؟ولا حسابك غيحط ليك الخدامة؟؟اش وجدتي ليه؟؟الهضرة ومكتعرفييش تهضري عساك تزوجي

هدى:(مغوبشة)ماشي شغلك...أنا هاني علمتكم ونتوما تعرفوو ضبرو راسكم لدرت شي حاجة ماهيااش

زادت وخلاتهم مبلقين عينيهم ..من نهار كدير لي فراسها وبلاصة الراس عندها حجرة الى قالت مغنديرش مغديرش والى قالت غدير غدير..تفكيرها منحاصر والعامل الاساسي هو السن..مكتعرفش تناقش لانها مامنفاتحاش على ناس وتعرف ناس باش تاخد أفكار ويتبناو عندها ميادئ واراء..كتمشي بداكشي لي كتقرا فمواقع التواصل الإجتماعي وحاليا الفكرة الوحيدة عندها هي "تزوج"

إكرام:اش بان ليك أمي؟؟

ربيعة:(رجعات كتاكل مصطنعة البرود)حتى نموت وتزوج وهي صغيرة..مزيان تبارك الله بيطانها مكتغسلهمش الى مقلتهاش ليها وبغات تمشي تزوج..اش خصك العريان الخاتم امولاي

إكرام:وراكي عارفاها راسها قاسح كدير لي فراسها..الى بقات لاصقة ليا فالزواج راه مغتمشي حتى تزوج

ربيعة:خليها غدا نهضر معاها ويكون خير

سكتو موراها وهازين ليها الهم حيت بالمعنى الصحيح عذباتهم فتربيتها..ربيعة عانات معاها بزاف هي نعم كانت القريبة ليا والضحوكية والاجتماعية وكذلك الزويونة فيهم لكن راسها قاسح والى شدات الضد كلمتها تمشي واخا تنزل الغيوم تطلبها ..اما إكرام راه كتشوف راسها مسؤولة عليها..باغياها تولي شي حاجة تطفرو دير شي حاجة باش تهنى عليها وحتى هي تشوف حياتها..من نهار خرجات تتخدم وهي هازا مسؤوليتهم وكدير كلشي ليهم

اما هدى تخشات ففراشها كتكتب لعائشة وتعاود ليها شنو قالو ليها ولوخرا كتهضر معاها بالعقل وتفهمها بلي خصها غي تهضر معاهم وتقنعهم وبقات هاكاك حتى دخلات ختها وتقلبات عطاتها بالظهر ونعسات مصرة على قرارها

"الزواج"

بقدر ماهو معرف أنه شرع الله ورابط كيجمع بين جوج تناس بغية المودة والمحبة وانشاء أسرة الا انه ولى مؤخرا مصيبة على رؤوس البعض خاصة القاصرات...كتلقايها كي كتوصل 15 كتصوم ييداو يبانو جنابها..تزعم فعكر تبعو ماسكارا والجرادي وتختمها بغات تزوج...اي واحد قدامها قلليها مرحبا تقوليه سبقني للعدول..كتزوج صغيرة بزاف وتخنش وتدخل فدور الزوجة التقليدية كي لقات مها وتعيش حياة زوجية مرهقة..يقدر تدي صاحبها وتعيش معاه القهرة ولا اي واحد المهم تسمى مزوجة ولباس

لغد ليه كانت هدى روبو ممشات للخدمة صبحات ناعسة...ناضت غسلات وجهها غضبانة بعدما تصفحات التيليفون..وجلسات حدا ربيعة فالكوزينة كتفطر ومكتهضرهاش حتى نطقات لوخرا:خدامة غدا؟؟

هدى:لا..مبقيتش خدامة

ربيعة:وعلاش؟؟(جرات كرسي)

هدى:هاكاك...ياك نتوما فاضحيني خدمي خدمي هاني غنبرك الأرض نيت باش تعرفو اش كاين

ربيعة:كيفاش اش كاين؟؟واش تي تسطيتي؟؟ظاهر ليا توحشتي شي قتلة

هدى:(ساطت)مالكم أمي معايا؟؟كتشدو معايا الضدد على والو..مجيتكم للحرام ماقلت ليكم مصاحبة بغيت غي نتزوج وندير تانا داري

ربيهة:واتي اشمن دار بغيتها تريب عليك..تي اش معاودين ليك على الزواج..عود الند مكتعرفي تشعليه وباغيا تزوحي؟؟اش موجدة لهاد الزواج

هدى:دابا نتعلم تاحد ماتزاد معلم..وزايدون لي بغاني غياخدني كيفما انا(شدات ليها فيديا)خليهم غي يجيو للدار غي نتعارفو الى معحبكمش والله حتا نقوليه الله يعاون..(بترجي)عفاك أمي غي يجيييو بعدا امي..واش عندي 18 ومعمر شي حد جا لدارنا(بترجي)غي نتسما تانا جاوني الخطاب

ربيعة ضهشراتها بتفكيرها المدود..معرفاتها اناكودت معرفاتها اشمن دودة فيها لي تتفكر هاكا..زفرتت وقالت بعد صمت طويل:واخا...يجي انا نهضر مع ختك ويجي نشوفو اش كاين..ولكن والله ونشوف قد هاكا(كتعبر ليها بصباعها)حتى نجري عليهم

طارت عليها بتعنيقة بفرحة بحالا معرت شنو دارت وباستها وقالت:الله يخليك ليا أمي...كوني هانيا كلشي غيدوز مزيان..وغتشوفيني عروسة

ربيعة:(تبسمات منهدى)واش انا كرهت نشوف كل وحدة فدارها وبولادها ومستورة

هدى:ان شاء لله امي...كوني هانيا غتشوفينا وترتاحي. نمشي نعلم عائشة

مشات كتجري مقاداها فرحة فحين رببعة غي دارت ليها خاطرها وقالت:بغيت يعششو ليها فالراس ان شاء الله(ساطت)مخصوني غي الخطاب..

بالفعل صونات لعائشة ضاحكة وعلماتها بشنو كاين ولوخرا فرحانة بالها غي غيوليو بجوج مزوجات ويتعاودو..

عائشة:صافي انا نعلم لوستي ونرد عليك ونشوفو امتا غنجيو

هدى:غتجي معاهم؟؟

عائشة:ضروري ههههه وعلميه حتى هو ولا عرفتي اشنو خليهم نعلمهم انا ونتي خليك حشمانة

هدى:هههههه حمقة نتي..والله ممتيقة ياختي

عائشة:هانتي غتزوجي حتى نتي ونعودو نتعاودو ونتوانسو غي خسارة غتعيشي فمراكش

هدى:اوا الرزق

ضلات هدى داك نهار مع مها..لي قالتها تقول واخا..تشقا وتحرك وناشطة حيت غتزوج مسبقة الفرح بليلة حتى جات إكرام فالعشية ودواو عادي..جراتها ربيعة عندها وبدات كتهضر معاها: شوفي راه عطيتها الكلمة باش يجيو الناس

إكرام:(خرجات عينيها)واش حماقيتي أمي؟؟كيفاش يجيو؟؟

ربيعة:تي سكتي بتسمعك راه غي درت ليها الخاطر يجيو ونخرج ليها فيه شي عيب يمشي فحالو

إكرام:(قندشات)وعلاش هاد العذاب؟؟

ربيعة:خفتها تغضب وتمشي ليا تاني..هاد المرة حتى تريكة باها مخاصمة معاهم خفتها تهرب ولا شي حاجة راه ولات كتخلعني ملي مشات

إكرام:خلي نضرب لمها شي نتفة ونكتفها فالبيت وتشوفي واش تكود..هاديك راه لحمها ولف العصا كتمشى غي بيها

ربيعة:يا بنيتي سلخت حتى عيييت كتافي طاحو ليا غي بعصاتها وهي وتقول واش تهدات..خليونا نسايروها ونشوفو ..أنا معولة الناس انقوليهم لا غي ندير ليها الخاطر

إكرام:(شدات راسها)المشااكل عاوتاني..تقهرت أنا والله...ووسط الشهر منين غنجيبو فلوس باش هاد الناس نضايفوهم..واش هادي مكتفكرش؟؟. .

ربيعة:صافي غي سكتي عندي واحد ربعالاف نقضي بيها..نديرو ليها خاطرها تبرد فيا الدودة

إكرام:هي براسها دودة..(بتذمر)البرهوشة

ربيعة:الله يرضي عليك الى ما ساعفي معايا فيها راه خفتها تهرب ليا..مبقيت قديت على صداعات براكة غي الصداع لي فعظامي

إكرام:والله حتى عيييت مبقيتش كنفهمها كلنا دوزنا المراهقة هادي راه عششات فيها

قبل ماتجاوبها ربيعة دخلات هدى مبسمة وقالت:الزين جيتي

إكرام:(ببرود)عروسة الشتا

هدى:(فرنسات ناشطة)لا اختي نديرو نيت فالصيف هههه

ربيعة:علمتي الناس؟؟

هدى:علمت عائشة هي غتوصل ليهم الهضرة

إكرام:(بهدوء عكس الغضب لي فخاطرها)واش اهدى ماكدة اش باغيا ديري؟؟راه الزواج هذا راكي باقي صغيرة

هدى:عارفا اش كندير وانا باغيا نتزوج..الحمد لله مدرت الحرام موالو جيت للحلال نيشان..وزواج صغر زوين ياله نولد وليداتي ويكبرو معايا ياك ماما تزوجات قدي

ربيعة:الخلا والجلا لي دات يا زين مادات..أنا كون عرفت مك غتكرفص هاكاك نخليها تبور حدايا

إكرام:هذاك زمان وهذا زماان..

هدى:الواحد يمشي بنيتو ويشوف فين يخرج

إكرام:هادي ماشي هضرتك..هادي هضرة ديك عائشة بغيت يعشش ليها الدود فحشونها

هدى:ناااري وليتي مسمومة

إكرام:غندير ليك خاطرك ويجيوو ولكن نشوفو ماهواش اقسم بالله متعتبيها

هدى:كوني هانيااا(تبسمات)غنعلم بابا

إكرام:(بانفعال)يعطيييك واباااا والله ميدخل علي هذااااك بالله هو يدخل انا نخرج

هدى:واش ميحضرش بابا ..شكون غيلقاو هنا؟؟

ربيعة:نعيط لخوالك

هدى:كاع معندهم معايا

إكرام:زعما باك راه كيموت عليك.. شتي هذاك الى مسمحنا ليه معندو فين يحط راسو بغيت ليه دقة...تفوووو(ناضت شاعلة)بابا قالت ليك

خرجات معصبة حيت موضوع باها كينيرفيها..مهضرتت معاه سنين هادي مكتبغيش تجبدو حيت هي الوحيدة لي عاشت دوك الظروف وعقلات عليهم..وشافت مناش دازو وبلي كانو كيعانيو ومكيعاونهمش..من تما حقدات عليه

ربيعة:تي مالك عزيز عليك الصداع..لاش تجيبيه؟؟

هدى:واش بابا عايش وميحضرش لخطبتي؟؟

ربيعة:تي دغيا رديتيها خطبتك؟؟غاا غيجييو تتشاوفو يعدااا اشمن خطبة..(فقصتتها)تي مكتعرفي تفرقي بين خطبة والشوفة وباغيا تزوجي

هدى:(مبردة)ناري راه لبقتوووني...ماغنعيطش ليه ولكن الى غندير الخطبة غنعيط ليه

ربيعة:واخا غا سيري غا سيري..معرفتكش شكون شابهة بهاد قصوحية الراس

هدى:ههههه ماما

ربيعة:بزااف عليك...مك كانت لبيبة وتعرف تهضر نتي راه غي كربة وعامرة قطران لي قاسك تطليه

هدى:(مبسمة)اجي نوريك نسيبك

مع بغات تهضر ؤبيعة صونا تيليفون وطلعات سميتو وهي تقول عمرو طويل وقالت سكتي غنديرك تسمعي..

اكتيفات الهوت باغلوغ ودوزات الابيل وتسمع صوتو حرش:الوو

هدى:لباس؟؟

الزوبير:حمد لله ونتي؟؟

هدى:بخير

الزوبير:وصلني جوابك..ان شاء الله بلي فيه الخير نهار السبت نجيو عندكم

هدى:مرحبا بيكم ..

الزوبير:غي بغيت نعلمك غتكون الوالدة والواليد وربعة تخواتاتي ومرات خويا وخويا..

هدى:مرحبا بيكم نهار كبيير هو تجيو لعندنا..

الزوبير:الله يكبر بيك الالة هدى..ياكما خصاتك شي حاجة؟؟

هدى:(القلوب كيخرجو من عينيها ومن وذنيها وكتشوف فمها زعما شفتي)لا مخصني والو لهلا يخطييك

الزوبير:ياله تهلاي فراسك..تصبحي على خير

هدى:تصبح على خير

قطعات معاه وهي تلفت لمها قايلة:شفتي؟؟كيهضر زوين؟؟

ربيعة:(مضهشرة)اش سماه الله؟؟

هدى:الزوبير

ربيعة:هاااش

هدى:هههههه الزوبير أمي

ربيعة :هاد زوبير ديالك اختي شفتو جاي لموسم الحصاد تي مالو على كاع دوك الناس

هدى:اوا الصواب وصافي..سيد ضريف ومصواب ومحتارم

ربيعة:(تنهدات)راه نتي لي مامصواباااش

هدى:هاد هبل تربح كنديرها غي عليكم هو را غنكون معاه زوينة

إكرام:(دخلات لاقطة الجملة لخرا)شتي الى غي جا وشم صنانك راه والله ميرجع

هدى:(قندشات)باااززز...شوفي خصني نكون زويينة ونتي لي غتماكي ليا وديري ليا لاصيغ (كتساءل)واش وجهي صفا شويا؟؟

إكرام:هههه منين؟؟نتي كتغسليه من شعبانة لشعبانة..

هدى:غندير فوندوتان ديالك هي لي غتنفعنيي حيت راه بقات غي ربع أيام واخا نمسحو ببطانة العجل مايصفا

إكرام:(قلزات لياها)هاكي هاهو شفتيه؟؟طليه دابا لوجهك..نشريه بزبالة تالفلوس وتديه نتي ..

هدى قربات ليها كتبوس ليها ولوخرا كتبعدها وتنطر فيها لقاتها فرصة كتقرص فيها ويتعابزو وحدة فوق لوخرا ووحدة كدفع لوخرا بالضحك حتى جا حمد تلاح عليهم ومع هو غليض بجغهم

إكرام:(تجيفات)بزووولتي يا ولد الكلب بزوووولتييييي

هدى:مي مي قوليه ينوووض(خنقهم)امييي اش كياكل

ناض عليهم كيضحك وحنوكو حمرين وغليييض وقال:كتلعبووو؟؟

إكرام:(شادة فبزولتها)نتا غتقطع الفورص..غلاضيتي تاني اولد الهم..خرجتي مني الحليب بلا وقت

هدى:(شعرها مشنتف قاست ليه بزازلو)كبرو ليك البزيزلات المسخوط هههههههههههه

طلقو ضحكة عالية كلهم مطلعينها عليه حيت غليض مترم ومبزل ومع هو البيض فيهم دغيا كيتنزك..مشا عند ربيعة كيتشكا ليها وهي كتنكف فيه:بعدو مع ولديي...جدارمي داليييي

إكرام:ههههههههه انقص الى بغيتي تدخل للمخزن..

هدى:بهاديك الترمة حق رب تاتولي من صحاب طالوني

حمد:(غوبش)مييي هضري هضرييي راه غننننن

إكرام:(كتعيب فيه)نننننننن نوض النفاخة جيب الخبز باش نتعشاااو معندك السوايع اليوم؟؟

حمد:لا(تنهد كيشكي من نيتو)بقا ليا للامتحان شهر

إكرام:عرفتي الى منجحتييش نعلقك من بزازلك حتى يتفشو

هدى:هههههههههههههه ياربي مينجحش

قلبوها ضحك وناضو يتعشاااو بيناتهم والمداقة..كل مرة مطلعينها على واحد فيهم حتى تفرق المجمع وكلها مشا ينعس وكلها عندو همو..

مرو أيام قليلة كتوجد فيها هدى لخطبتها بفرحة وممتيقاش..من داك نهار مصوناش ليها الزوبير وهادشي محيرها لكن مع الفرحة كتقول مع راسها هو انسان متدين مكيبغيش كثرة الهضرة واللغا..من نهار رصاو امتا غيجيو وهي حامية فيها البيضة..تضور ضورة وتسول مها ولا ختها اش نديرو اش نلبس اش ندير اش نفعل طبخات ليهم راسهم وهوما غي مسايرينها فهبالها...علمات ربيعة ولادها بجوج باش يجيو يكبرو بيها فحين إكرام تكلفات بتقدية وتسلفات وتكلفات وتزيرات باش تقوم بالناس..هي يد بوحدها ..ربيعة لي كانت كتعاون معاها عيات ورشا ليها العظم وجلسات من الخدمة يعني ولى الدرك فيها .بسيف كتكمل الشهر ..ولات خدامة غي على ماكلتهم وشرابهم لكن مع ذلك دارت الواجب...اما هدى ممسوقاش كاع معارفاش بحق الوقت..هي باغيا غي تزوج وخلاص..فيها دودة خصها تبرد ولباس

جا اليوم الموعود وخداتو هدى روبو..ومع بونبر فاقت ناشطة ومفرنسة طايح عليها السر بحالا صابحة ..كيف لا وهي مشات للحمام البارح داتها إكرام وفركاتها مزيان خرجاتها كتشعل دايها فهبالها..فيقاتهم ومشات باغا دير فيها حادكة عمرات ليهم اتاي ووجدات الفطور وهوما مستغربين غي كيشوفو فبعضياتهم

ربيعة:هدى فيك سخانة؟؟

اكرام:هاديك الفرحة طيرات ليها البلاكة(كتكب اتاي)شهاد بول الجمل هههه(هزات الكاس صفر)واتاي مكتعرفي ليه وكتسنطحي بغيتي تزوجي

هدى:دابا نتعلم ومي لي غتعلمني ياك أ مي؟

أحمد:هههههههه انا والله مناكل ماكلتك

هدى:فطرو فطرو باقي تابعنا شلا مايدار

اكرام:اشمن فطور هههههه (هزات البراد)نشحرو بعدا اتاي ويحن الله

مشات شحرات اتاي ورجعات كيفطرو وموضوع الساعة هو خطبتها..سيقات اكرام وربيعة كطيب برفقة مرت ولدها لي جات باش تعاونها ...اما لالة العروسة راه جالسه فالبيت شادة جموع مع عيشة وكتشجع فيها..دخلات اكرام قايلة:نوضي نقاد ليك شعرك

هدى:علاه غنعريه؟؟

اكرام:لي بغيتي ولكن خص يتقاد غتخليه هاكاك مشنتف كولو محروق

هدى:(كتعاود ليها على نيتها)عرفتي اش قالت ليا عيشة؟؟

اكرام:(سيرتها كتفقصها)يعششو ليها الحناش فحشونها اش قالت؟؟

هدى:قالت ليا هو شوي متدين ومكيبغيش داك كثرة الزواق برا..كيبغي بنادم يكون مستور

اكرام:وانا غنخرجك عريانة عندو..راه غي شعرك وزايدون غديري الزيف

هدى:اااه واخا(مدات ليها يديها)وصايبي ليا ظفاري

اكرام:الظفار ماشي حشومة؟؟راه مكتحشمييش ههههههه معرفتكش شكون شابها

هدى:(عنقاتها من لور) غنتوحشك المصيبة

اكرام:يا ويلي نتي حسبتي راسك تزوجتي خلاص...سيري بركي لارض

شداتها صايبات ليها شعرها بالمغاوتة هي وياها وسبان..لوخرا تنتف على فقصة الشعر ولوخرا كتضرب فيها..كل شويا جايا ربيعة تفكهم مكملو داك الشعر حتى قربو يخرجو فجورنال..صبغات ليها ضفيراتها تيديها ورجليها

اكرام:(شادا ليا رجليها)واش اعياد لله هادو رجلين بنت؟؟مالهم ناشفين واقربو يتشققو فقصتيينيي

هدى:واصافي اصاحبتي رقعي الى كاين مايترقع

اكرام:اميمتي على فقصتي فيك

كملات ليها ومدات ليا قفيطين خفيف جوهرة فالبيج زوين وراقي وقالت:لبسي هذاا

هدى:مفهمتكش ياك كتقولو ليا غي تعارف ونلبس قفطان؟؟حماقيتو لا؟؟نلبس بيجامتي حسن

ضحكات اكرام بالفقصة وقالت:راه كنقول ليك جد.مك شابهة ليا تريكة باك مكلخة..داخلة عليهم بالبيجامة غطيبي ليهم ولا

هدى:وامعرفتش انا ففففف مخلوعة

اكرام:(كضحك)عهههههههههههه كنشوف حتى نعيا وكنضحك حيت والله معندك عقل(كتسمع الحس)جاو خوالي

هدى:(قندشات)الله يدوز هاد العشية بخير

اكرام:وجه الهم

خرجو لبرا لقاو جوج خوالهم كبار فالعمر وكيبانو متاقيين الله والوقار على وجههم..سلمو عليهم وبداو كيتبادلو أطراف الحديث ويتساولو وهدى جالسة بزز معندهاش معاهم حيت ديما كيضورو فيها على قبل بسالتها...من صغرها باسلة وواعرة وكانت ربيعة كتجي منها وكتوقف ضد ولادها على قبلها حيت معندها عقل

تعاشات العشية وبدات ربيعة واكرام ومرات خالهم كيوجدو الصواني لي غيحطو ودواز اتاي مخلاو ماوجدو..مكبرين بالناس على قد جهدهم وحتى خوالها تقداو بجهدهم كدوز على وجه مهم وختهم. .

يتبع...