أقوى مما أدرك الجزء الخامس

سد أحد عناصر الشرطة الكيس لي دارو فيه بثينة بعدما تخلطات الدعوة وهزو جثتها ناقلينها لبلاصة خرا..

فاش تجمعو الناس والغوات كاين لي روعو المنظر ورجع لور سوا راجل سوا مرا وكاين لي ستجمع شجاعتو..وهادو بالضبط لي تكلفو وعيطو للبوليس لي أكيد فور ماسمعو جريمة قت. ل جاو كيجريو اما هدى راه كانت كتبكي وتشهق حدا الباب مجلسينها الجيران حدا الباب وكتبكي وتنخصص صوت شهقتها كيتسمع منين ومنين..

جاو البوليس لي بدورهم عيطو للشرطة العلمية وتجمعو جيمع عناصر الأمن الوطني باش يديرو اولى التحقيقات..طوقو مسرح الجريمة وخداو كلشي لي بغاو من مسح بصمات ومن أي آثار و كذلك تم نقل الجثة للتشريح باش دوز فالتحقيق..والخبار شاعت برا العمارة حتى ولى بنادم مكبوب عليهم وغي كيبعدو فيهم..تاحد مافاهم وكلها كيلغي بلغاه لكن الحقيقة لي متافق عليها الجميع هي "شي وحدة لقاوها مقت. ولة"

وقف عميد الشرطة على هدى لي مسندة على كتف إحدى الجارات ملبسينها شالها وعينيها دايزين بالدموع..كتبقا رفيقتها فالسكن وصاحبتها وعزيزة عندها ومعمرها شافت منها العيب ومنظرها وهي هاكاك جثة وبعض أطرافها مقطعين ضرها فخاطرها..شفايفها كيترعدو بالبكا..نطق مخاطبها:نتي صاحبتها؟؟

مجاوباتوش حيت باقي تحت تأثير الصدمة ..دور عينيه على لي ضايرين بيها وقال:ساكنة معاها؟؟

نطقت الجار:آه اسيدي عايشين بجوج ومعمرنا شفنا منهم العيب بنيات داخلين سوق راسهم

العميد:مممم(عينيه على هدى عارفها مصدومة وكيقرا تفاصيلها)

تحرك ونادا على إحدى زملائه وقال منعت بصبعو ليها:صاحبتها تجيبوها..سدو ليا على كلشي..العساس وكلشي يتسول ..غيخرج التشريح ونعرفو اش كاين

حرك راسو ومشا توجه لهدى قايل:خصك تمشي معانا

نطقات الجارة مخاطباها مخرجاها من شرودها :بنتي خصك تمشي مع البوليس

هدى:(كتبكي بحرقة)مشات ليا صاحبتي اخالتي هءهءهءهء

عنقاتها بحنية وقالت:الله يرحمها ابنتي..سيري مع البوليس باش يعرفو شكون دار فيها هادشي

هدى:واخا

وقفات ورجليها ماموقفينهاش مع الخلعة..المنظر ديالها وصدمة موتها خلاو توازنها يختل مجاتش فين ترصي الوقفة حتى طاحت للأرض مغمي عليها

شدوها غي الجيران قادوها وكيرشوها بالما فحين الشرطي قال:عمررر عيط لومبيلونص ديو هادي للصبيطار

وبالفعل بقات مغيبة مفاقتش حتى جات لومبيلونص داتها للسبيطار مخلية الدعوة مرونة فدارها وكلشي مطوق

أما بثينة راه مشات للتشريح نيشان..تكلفو البوليس بهويتها لي لقاوها فالدار وقدرو يوصلو لأهلها لي فاش علموهم كانت صدمتهم لا تقارن بصدمة هدى..هاد الأخيرة لي علقو ليها السيروم باش توكد شويا وحرصو على أنها تفيق شويا مجاتش فين دوز ساعتين حتى وكدات لكن دموعها منشفوش..لقات الشرطة كتسناها داوها نيشان للمركز حيت هي لي لقات الجثة وهي أول وحدة غتستجوب..

أما فالمركز راه كان التحقيق بدا فالبلاصة مع اولى الناس لي هوما العساس ومول الدار لي ساكن فوقهم

الشرطي:قول لينا اسي محمد كي دايرا هاد بثينة؟اش كتعرف عليها؟

العساس:الله يعمر ليها الدار..داخلة سوق راسها هي وهدى

الشرطي: ملاحظتيش شي حاجة مؤخرا شي حاجة تبدلات فيها شي حد كيجي عندها

العساس:هي ديما كيجيو عندها الناس حمممم(نطق بصوت خافت)على ماكيعاودو خدامة فبار

الشرطي:مممم ايييه اوا

العساس:وكيجيو عندها ششي أشكال الله يحفظ وصافي

الشرطي:مشفتيش عندها حد مؤخرا؟؟

العساس:شلا وجوه اسيدي

الشرطي:(شاف فصاحبو)رجال ولا عيلات

العساس:(كيضور عبنيه)بجوج اسيدي

شاف فيه وزفر قايل مخاطب صاحبو:كمل معاه نشوف بلانها

تلاقا بهدى جايبينها مهدودة وعينيها ورمو بالبكا..خاطب صاحبو:هادي صاحبتها؟؟دخلها للبيرو عندي نسمع اش كاين

بالفعل دخلوها للبيرو وستجوبوها عادي سولوها اسئلة بزااف بزز باش كتجاوب عليهم كتبكي بزااف وتجاوب شويا وهو محاول يتفهم حالتها ويدير باعتبار انها ممولفاش هادشي..خدا المعلومات لي بغا وخلاوها عندهم تا يتوصلو بالجديد..جبدات تيليفونها من الجيب وطلبات اذن تدوز مكالمة لكن رفض..عطاها الحق تدوزها من عندهم هوما حيت حاليا هي براسها مشتبه بيها

دوزات ليلتها تما فالبيرو كل مرة داخل عليها بوليسي فشكل كاين لي كيسولها وكاين لي كيدخل يهز شي حاجة ويخرج وهي غي كتبكي و تنخصص علمات خوها لي تخلع وحاول يشد الطريق فليل ماوصل حتال اشمن وقت ورفضو يخليوها تخرج غتبقا تحت الحراسة النظرية ولانه فالمخزن سمحو ليه يدخل يشوفها مع دخل مع تلاحت عليه

تتبكي ومخشية فيه بقات فيها صاحبتها وكل مرة كتعاود ليه المنظر لي لقات وكيحاول يصبر فيها..

احمد:صافي اختي الله يرحمها.. والبوليس راه داير خدمتو غيخصك تبقاي هنا

هدى:الله ياخد الحق فلي دارها مشات مسكينة باقي صغييييرة(نفاجرات بالبكا)

عنقها عاود كيواسي فيها حتى خففات شويا وقال:مختخافيش كلشي غيبان غتبقاي هنا حتى يزيدو شويا فالتحقيق

هدى:حوايجي كاملين بقاو فالدار معندي والو هءهء مخلاوني نهز والو..ياكما شاكييين فيا أنا لي قتلتها؟؟(شهقات وبدات كتبكي عاود)

أحمد:هدى براكة..معندهم حتى دليل ضدك كتبقاي نتي اول وحدة لقات الجثة ..القضية راه جريمة قتل غيشكو فكلشي حتى يلقاو لي قتل..نتي غي حيت نتي لي قريبة ليها

هدى:هءهءهء الله يرحمها مسكيييينة

هدى:مبغاتش تنتسنا ليا صورتها وهي مقطعيين ليها يديها!!شكون غيبغي يقتلها ديك الموتة هءهءهءهءه

احمد:معندها عداوة مع حد ؟؟

هدى:(كتبكي وتهضر)لا هءهءهءه داخلة سوق راسها

أحمد:فففففف الله يرحمها...البوليس غيتبعو داكشي تا يلقاو مولاها

سكتات شويا كتنخصص حتى نطقات:تفكرت مي مسكينة نهار مااتت

احمد:(تزير عليه خاطرو)الله يرحمها

هدى:معمري نسا بلي ماتت ليا فيدي هءهءهءه(بدات كتجهد فلبكا)

احمد:الله يرحمها..هدى ما تبقايش تفكري هادشي داكشي فات وصاحبتك مكتب ليها تموت هاكاك

سكتات كتنخصص وتبكي تجبدو ليها المواجع ديال سنين تفكرات مها وبنتها وشبعات تنخصيص ..سالات الوقينة لي عطاوه وخرج مخليها شادة راسها وكترعد بالبكا ..بقات ماتبقى من الليل تما ..كل مرة يدخل شي حد ويخرج وهي غي كتبكي وعنقها عواج عليها

صبح عليها الصباح متكية راسها على لبيرو ومزال فيها الشهقو ديال البكية..فاقت مفزوعة على صزت الباب لي تحل وصوت المحقق كيهضر بجهد..شدات على قلبها وبقات كتسعغفر الله وهي كتشوفو داخل بهمجية ممسوقش ليها وجلس فبيروه عادي.كيهضر مع شرطي اخر او بالاحرى كيعطيوه اوامر

شاف فيها شوفة قاسحة وقال:

م:هدى نتي صاحبة الضحية وكتعرفي عليها كلشي..بغينا نعرفو واش ااضحية كانت كتعرف شي راجل؟؟

هدى:(على نيتها وصوتها مبحوح)آه كانت مخطوبة وخطيبها سميتو خليل

م:كتعرفيه؟؟

هدى:تلاقيتو فاش كانت خدامة معايا فالمحل وشحال من مرة خرجت معاهم

م:كان كيجي عندكم للدار؟؟

هدى:لا عمرو جاا عندنا

م:متأكدة؟؟

هدى:والله..معمرو عتبها عندنا

م:كانت كتعرفو غي هو؟؟

هدى:اه

م:فاش قلبنا تيليفونها لقيناها كتعرف شحال من واحد من غير هاد خليل

هدى:(تنهدات)ماشي شي معرفة(توترات وحايرة بين تقول الصراحة ولا تستر صاحبتها)

م:مممم كانت بنت و لا؟؟

هدى:(بسرعة)اه اه بنت

ضحك المحقق بشويا كيحك فشيباتو حيت راجل كبير قايل:واش مأكدة كنتي عايشة معاها؟؟

هدى:مفهمتش

سكت المحقق كيقرا فلي بين يديه وكيفكر حتى نطق:مخاطب زميلو:دخل خونا لعندي

.

تحل لباب ودخل جسد رجل ضخم مقارنة كاع بدوك لي جالسين معاهم ..عضلات بارزة من التيشورت كيبانو فيخم العروق..سميمر شويا وطويل داير كاسكيط مع لحية خفيفة ووجهو عاقد فيه سبعة فربعة..ملامحو مايلين للجدية اكثر..وعندو تفصيل زوين فيه هو جسدو لي لونو مكسر بلون ابيض وهو البرص لي عاد باديه ومكتاسح منطقة فعنقو ويديه

نطق المحقق مخاطبها:

م:هدى كتعرفي هاد السيد؟؟

شافت فين كينعت ليها او بالأحرى هزات عينيها حيت طويل بزااف قابلها بتغوبيشة مكانتش مسالية باش تعرف شنو معناهت وقالت:لا

م:شوفي مزيان..هذا واحد من صحاب بثينة

شافت فيه هدى عاقدة حجبانها وقالت:بثينة معندهاش صحابها..بثينة عندها راجل واحد فحياتها هو خليل وهذا مكنعرفوش معمرني شفتو

م:عرفي تهضري بعدا

هدى:(بلا متشعر)حتى نتا عرف شنو كتقول..السيدة ماتت الله يرحمها الى دارت شي حاجة راه بينها وبين الله سولوتيني جاوبتك مكنعرفوش وعمري شفتو..

م:(ضحك بسخرية)باش كتعجبوني ابنات اليوم(رجع باسترخاء)كتعرفو تمثلو

هدى:شي حاجة خرا الشاف(عاقدة فيه سبعة فربعة)

م:(ضحك مع زميلو)عويفية مع راسك هههه لقيتيني راشقة ليا اما نقادك مع جوابك

ساطت قالبة وجهها وحجبانها معقودين غافلة على الكتلة الضخمة لي فاص ليها..جالس مفرق رجليه ويد هابطة على فخضو..كيطلع فيها ويهبط..كيحاول يتفكر فين شافها لكن مطاحش فبالو..

م:صاحبتك كانت مصاحبة مع هاد السيد وخارجة معاه مرة ماجوج..

هدى:مكنعرفوش انا كنعرف خليل بوحدو وو

قاطع هضرتها دقان فالباب سمح ليه بالدخول ودخل شرطي مد ليه تقرير لي بمجرد ماقراه نطق:فوالا..(ضحك)الضحية ماتعرضاتش لإغتصاب مكانتش فييغج..وقبل ماتموت دارت علاقة جنسية

طاح عليها الخبر كي التصرفيقة بقات غي حالة فمها مصدومة متوقعاتهاش بتاتا منها..شدات راسها ومسحات على وجهها مستغفرة الله تحت انظارهم حتى نطق: ونتا كتعرفها؟؟

حرك راسو بالسلب وعاود سولو:الى نتا صاحبها وهي صاحبتها ومكتعرفوش بعضياتكم يعني اش

تسمع صوت قاسح وغليض مخلط بالبحة ديال الرجولة:ماشي صاحبتي..كنعرفها

م:(بلا ميحشم)طرات بينك وبينها شي حاجة؟؟

..:اه..قستها مرة وحدة وغي سطحي حيت قالت ليا راها بنت

هدى خرجو عينيها فالفراغ ومسحات على وجهها كتحس بذاتها غتخرج منها شي حاجة اولا من قسوحية وجههم وثانيا من شنو كتسمع..

م:فين وقع هادشي وامتا؟

..(ببرود)مبقيتش عاقل..ووقع فدارها فين ماتت

هدى:(شهقات)فدااري؟؟لالالا(بانفعال)ميمكنش كيكذب كيكذب(بدات كتبكي)ميميكنش أنا كنبات فالدار كل نهار ميمكنش منعيقش

..:(شاف فيها مغدد وقلب وجهو للمحقق)فالنهار مشيت عندها مع الطناش تنهار

م:هاد الوقت كتكوني نتي فالخدمة؟؟

هدى:(زفرات)اه..واش نتوما كتحاولو تقولو ليا بلي صاحبتي كانت كتجيب الرجال لدارناا؟؟راه ميمكنش

م:ماشي حنا لي تنقولو التقارير لي كتقول..صاحبتك ماشي فييغج وهاديك هي خدمتها وبحال والو تكوني نتي وياها خدامينها وطالقاها علينا

هدى:(بانفعال)بزااااف علييييك انا سمعتيها..انا بزاااف عليك(نسات راسها واش مع محقق)وعلى عشرة من بحالك...ياكما كاع لي كتعرف هاكاك يحسابك كلنا. بزااف عليك وعلى مية من بحالك. كون بغيت داكشي كون خرجت ليه خمس سنين هادي ماشي حتال دابا..جالس كضرب فأعراض الناس بلا حشمة بلا حيا معندكش اخويا البنات معندكش خواتات

غاع لي فتلبيرو تصدم من جرأتها ومن وقاحتها وكيفاش ضارت فيه بحالا ملاقية معاه فالسويقة وياله بغا يغوت وهي تقاطعو:فينما بغات توصل توصل..مالك اش كيحساب ليك راسك من البارح ونتا كدوي فعرض البنت لي ماتت ودابا نوبتي أنا ولا؟؟الى بوليسي عليهم هوما ماشي عليييا وتادابا غا ديني فين نتبرد حيت الى بقيت معاك هنا غنطلييييك كثر من هاكااا(خلاها كترعد حتى بدات كتبكي)كتضربو فشرف بنات الناس بلا حشمة بحالا معندكم بنات ...هبطنييي دابااا نتبرد ودير لي بغيتي وتعاود تتهمني بلي مافياش نوصل معاك لشي مااصل متطيحش فبالك

بقا المحقق كيشوف فيها كيفاش كتهز عليه وتبومبا من جهة ضحكاتو ومن جهة عصباتو..معرف مايدير من غير ينطق:ديوها تبرد

وبالفعل جا جارها واحد وهي تلوحها ليه فوجهو:غدا قدام الله غتحاسب على هادشي وان شاء الله تخرج ليك فتريكتك

داوها تحت انظار خوها تتبرد نيشان..هي بطبعها كتكره لي يضلمها ولا يقلل منها واخا يكون معرت شكون. عارفا راسا مغدوزش ليها طريفة ومكانش عليها وتغوت عليه لكن يتهمها فشرفها جاتها صعيبة بزاااف

م:كثارو علينا الق**حاب حتى ولاو يقريونا

...:نقدر نهضر فتيليفون؟

شاف فيه بغضب:نتا لي خصيتيني فهاد الساعة

..:(ببرود عكس العصبية لي فيه)من حقي نهضر فالتيليفون

خزر فيه وعطاه يهضر كيسمعو قال كلمه وحدى:لحق عليياا ل *****

حط التيليفون منيرفي وكيهزز رجليه حتى نطق المحقق:ديوه حتى هو يتبرد...وجيبو ليا تقرير الطب الشرعي على حالة الضحية مفصل فففففف واصباح هذا

ناض وقف مع شرطي قصير عليه ورقيوق...طلعو وهبطو وغادي خارج معاه لكن سمع اسمو :رزقي

تلفت عندو لقاه كيقرا فملف:شكيجيك عبد المولى رزقي

...:عمي

هز المححقق حاجبو وحنحن وعاود نطق:خليه غي هنااا(شاف فيه)نتا ولد خو القاضي عبد المولى

حرك راسو بالايجاب الجهد باش يجاوبو مكاينش وراسو كيزدح..شافو حنا راسو للضوسي وقال:عبد الدائم رزقي..

حطوها فالسيلول على الهضرة لي عطاتو عاد وعات اش قالت ليه وبدات كتبكي وتنخصص شادة راسها وتتدمع بغات طرطق..أطرافها كترجف بالخوف والذكريات كيزورو بالها على الموت..تكونات عندها فوبيا من فقدان الناس أو بالأحرى الموت..توفات بنتها فيديها وجداها حتى هي والمنظر لي شافت رجعوها لحالتها لي كانت فيها قبل..بكات لمدة طويلة حتى ريقها نشف غير مبالية بشنو داير ليها..اما برا كان أحمد كيتقاتل باش يعرف علاش هبطات حتى قالو ليه اش كاين لعن لسانها لي مبري منها وغي سابقها وبدا كيمشي ويجي ويعيط لي شاف ديالو عالله يعاونوه وأكيد علم حتى رشيد لي تفهم الوضع وعرض عليه المساعدة ديالو...

عبد الدائم حتى هو قيد الحراسة النظرية عازلينو فغرفة مراقبة بكاميرات مراقبة كيتسناو يشوفو ردة فعلو و مخلينو يفكر حيت دايرين شك أما هو اما هدى وبجوجهم معارفينش اش واقع..

فبيرو ديال المحقق دخل القاضي عبد المولى رزقي شخصيا لي غي شافو لآخر ناض سلم عليه بحرارة ورحب بيه..المعرفة كتشري بيها البحر..

عبد المولى:(بهدوء)زاركم ولد خويا ؟

م:ولد خوك غيطول الزيارة هنا..القضية خانزة شويا عندو

ع.المولى:جيني من لخر اش فالقضية؟

م:ختنا مقتولة فدارها ومكرضين ليها يديها وممارس عليها قبل ماتموت وولد خوك كيعرفها وفايت شايفها وجاي عندها لدار..والكاميرا شداتو وهو داخل عندها ما مرة ماجوج

القاضي:وهاد الكاميرا شداتو غي هو؟

م:(ضحك)هاد الساعة غي هو..البارح لي وقعات فيه الجريمة كان هو جا عندها فالصباح مع ديك العشرة وخرج وموراها حتى حد مادخل عندها من غيرو يعني غيكون قتلها وخرج

ع.المولى:تقرير الطب الشرعي اش كيقول؟؟

م:كيقول سيدة تقتلات بموس والآداة ملقيناهاش حيت مذبوحة وتاحاجة مكاينة

ع.المولى:ههههه صكع هاد ولد خويا ولكن ليها التخريجة محد التقرير كامل موصلش مانتهموه بوالو

م:ماشي بوحدو لي كاين حتى صاحبتها لي ساكنة معاها متهمة معاه حيت هي لي لقاتها والدرية معارفا والو عليها لي سولناها كنلقاوها عكس شنو كاين

ع.المولى:بغيت نشوفو (شاف فيه )الى بغيتي زعما ههههههه

م:اودي اسي رزقي ههههههه واخا تشوفو

وبالفعل قدر يشوفو ودخلوه عندو ..سلم عليه بعناق رجولي وقال:كون ما تشديتي مكناش نشوفوك هااا ههههه صحاحيتي الحلوف

عبدو:(مراشقاش ليه)عنداك طيح لخبار لمي وبا فراسهم؟

ع.المولى:حتى تحكم بشي ثلاثين عام ونعلمهم ههههه(جلس مقابل ليه)اش لاحك لهاد الجرة؟

عبدو:تابع الزهو حتى جبتها فكري فففففف

ع.المولى:مقتلتيهاش؟

عبدو:لا ..خرجت خليتها عايشة حدي.جلست معاها شويا تكيفت عندها وخرجت

عبد المولى:شي واحد اخر دايرها فيها حسيفة..كون هاني غنوقف على هادشي

عبدو:شكون قالها ليك؟؟

ع.المولى:ديرها غي زوينة ههه علمني سفيان

عبدو:ولد ننن(متانع ميخسرش الهضرة )مكيعرفش يسد فمووو هذاااك...محامي ت(سكت عاود)

ع.المولى:القضية شويا صعيبة ومحدك هنا الى وراه شاكيين فيك ..

عبدو:متكونش فراس باا ومي..خليوها بيناتنا

ع.المولى:كون هاني..غيخصني نمشي

عبدو:تهلا العميم

مشا وخلاه كيضور فعينيه كي النمس وكيسوط..مكمش عينيه كثر ماهوما مكمشيين ومرة مرة كيحك شعرو محيد الكاسكيطة ولوخرين حاضيينو من بعيد

اما هدى راه منشفوش دموعها وعينيها ضروها بالبكا ماكلات ماشربات كتحس بطاقتها مهدودة باغيا طيح على وقفتها حتى جا الفرج وخرجوها للإستجواب عاود بعد ست ساعات

داوها لنفس الغرفة فين تقابلات مع عبدو لكن هاد المرة كان خليل لي جالس وشاد رلسو وعينينه دامعييين..شاب فمقتبل العمر زوين و كيبان درويش..شافها وهي تبدا تدمع وقالت:خويا خليل

خليل:الصمت

م:جلسي

جلسات كتشوفةفيه قالب وجهو عليها حتى نطق المحقق:كتعرفيه؟

هدى:(محركة راسها بالإيجاب)اه خطيب بثينة

م:ونتا كتعرفها؟

خليل:اه(بصوت متعب)

م:خليل كيقول مشافش الضحية خمس ايام هادي

هدى:انا لي فراسي متشاوفوش هادي عشرين يوم فاش جا راه شفتو معاها تقهوينا بجوج وجينا

م:هادشي مقالوش لينا سي خليل ههه اوا؟

شافت فيه هدى باستغراب:انا هادشي لي فراسي

خليل:تشاوفت معاها خمس ايام هادي فالدار عندي باتت معايا ومشات..

هدى:(مكمشة ملامحها كتستعقل)معقلتش أنا مقالت ليا والو

م: السيدة خارباها وماتت من الفوق ففففففف رجعو هادي فين كانت وديو حتى هذا وخليو التشريح حتى يجي التقرير ديالو وديك ساعة نهضرو

وبالفعل كل واحد فيهم داوه يتبرد فقنت عازلييينهم كيكملو تحقيقاتهم لي دازت عليها يوماين ومكاينش جديد كل مرة جايبين ليها شي واحد ومكتعرف على حتى واحد من غير خليل أما عبدو راه بقا تحت الحراسة كيتسناو شي حاجة تبان

يوماين دازت عليهم كحلة والتحقيقات جارية مخلاو تا حد مستجوبوه كلشي..من دمهم هزوه ليهم كيديرو تحاليل..

حتى لنهار الثالث جا تقرير جديد فيه أنه على جسم الضحية كانو بقايا ديال السائل المنوي ناشف ويابس فلحمها بالضبط ففخضها الشيء لي خلاهم يفحصوو رحمها من جديد..وهزو عينة منو وتدارت ليه التحليلة وكيقلبو على نسبة التطابق لي خرجات سلبية من ناحية عبدو وخليل وبعد البحث الطويل لقاو مول السائل ولي كان شاب بزناز بهاد المفهوم..جابوه فاقل من اربعة تسوايع تقرقب عليه وحطوه حتى هو أمام رئيس التحقيق وبعدما زيرووه وهبطو عليه بالأسئلة عتارف أنه هو مول الفعلة

م:علاش قتلتيها؟؟

شاف فيه بشوفة خايبة وقال:كان خصها تم *وت..خاينة بحالها بحالهم كلهم

م:(شاف فزميلو)خونا مفضي هخهه حتى الضوسي عندو تبارك الله ناضي ها الحشيش ها الغبرة ايهاي كملتيها بالقتل(سد على ضوسيه)حمممم تحلات القضية

وبهاكا تحلات القضية فاقل من سيمانة بمجهود كبير من الأمن الوطني لي معروف على الصعيد العالمي بلي فالمغرب كيجبدوك من قاع الخابية..وبكثرة التحقيقات والتحليلات والذكاء المغربي كيفكو أصعب القضايا في أقل وقت داكشي باش المغرب كيحتل مراتب عليا فالأمن فالعالم

خرجو عبدو من الحراسة وداوه لعند المحقق لمكلف بالقضية لي نطق بهدوء:خرجتي منها لقينا لي ق*تل

عبدو:شكون؟؟

م:(ضحك)صاحبها لاخر ههههههه بزناز عرفاتو فالبار تعشرات معاه السيد ولات عندو بلية ديالها ..حصل عليها الخيانة صفاها ليها فاسييل

عبدو:(الصمت)

الشرطي:الشاف البنت نطلقوها؟؟

م:هاديك غي خليوها مزال تخلص الغوات والحيحة لي دايرا ليا هنا..راه إهانة موظف أثناء تأديته لعمله ونتا تيسر وغنعيطو ليك من بعد لشي اجراءات

حرك راسو وناض بتثاقل خارج من البيرو مصادف سفيان وعمو..تسالم معاهم وقال:خرجات سالمة

سفيان:الحمد لله

ع.المولى:قلت ليك غتحل..أنا غنمشي ماشفتيني ماشفتك نتلاقاو فالدار عندكم

حرك ليه راسو وزاد لكن قبل مايبعد نادى عليه ومشا لعندو بهدوء كيقول:البنت لي ساكنة مع ختنا غتدوز فدعوى ديال إهانة موظف...خونا رمان مغيخليهاش فيها حيت غوتات عليه حشومة ضيع

ع.المولى:(ضحك)قلبك حنين على العيالات ههههههه كون هاني عتابرو تحل

عبدو:يحفظك

خرج عبدو كيعمر ريتو بالهواء النقي وقال مخاطب سفيان:توحشت مي

سفيان:مفراسها والو غا تهنا هههه دوز

اما هدى راه حتى هي طلعوها وعلموها بلي لقاو القاتل شبعات بكا عاود وقالت:صافي أنا نمشي

م:كنتي عدوزي شي سنين هنا على داك الغوات ديال داك النهار ولكن عندك الزهر طلب عليك بنادم المرة جايا ابنتي تعلمي تعرفي تهضري

هدى:(خسرات فيه سيفتها وذرة خوف مافيها)حتى نتا تعلم تهضر ...الله يعاون

خلاتو مضهشر وزادت خارجة بلا إذن خصها غي معامن وراسها كي البيضة الخاسرة لقات خوها عنقاااتو وبدات كتبكي فحضنو وتشهق بحرا ماسكتات..ركبها معاه فسيارة صاحبو وتحركو وهي ساكتة عينيها كيشوفو فالطريق منفوخين شاهدين على دموع ليالي وحزن عميق فقلبها ...خلاها على راحتها حتى وصلو لقدام واحد العمارة وقال:هادي دار صاحبي خاوية مافيها حد..غدخلي ترتاحي ونشوفو حل من بعد

هدى:حتى الدار كي الناس ماعندناش (تنهدات)ففففففف

أحمد:نهار قلت ليكم متخرجوش ضرتو فيا لا حقا نتا صغير ميليقش ليك تهضر هاهوما دابا باعوها وحنا ضايعيين

هدى:(معندهاش جهد لي تهضر)اشمن ضايعيين اخويا حقهم هذاااك..بغيت باش نبدل؟؟

احمد:طلعي رتاحي غنجيب ليك من حوايج غيثة ..ربعة وعشرين ساعة ويعطيوك حق تهزي حوايجك

هدى:خصني نقلب على الكرا فففففف ياربي غنموت مافيهاش والله

احمد:خوي راسك ..هضرت مع إكرام راه مشوشة عليك عاودت ليها اش وقع حتى ترتااحي وصوني ليها عقلها غيخرج

حركات راسها بالايجاب وهبطات معاه للدار لي كانت فالسفلي..دخلو ومشات نيشان لأقرب سداري تلاحت عليه محيدا فولارها وصندالتها..قشعات رجليها لي يوماين متغسلو وخسرات وجهها بقرف قايلة:جيب ليا اخويا ندوش منقدرش نبقا هاكا

احمد:واخا نتي غي رتاحي نص ساعة كلشي يكون عندك..تاكلي شويا؟؟

هدى:معندو منين يدوز

خلاها براحتها خرج ساد عليها مخليها كتشوف بعينيها فالسقف وساهية ..منظر بثينة مباغيش يتمحا من بالها كانت ونعم الرفيقة وكتعاملها زوين ومفاهما معاها وتم*وت هاكاك جاتها قاسحة...ووسط استرجاعها للصور فدماغها دازت صورة اسراء وهي مخنوقة وميتة..غمضات عينيها وسالت دمعة من جناب عينيها خلاتها ترجع سنوات للورااء.

🔙🔙|| "فلاش باك"

جالسة وسط صالون دارهم كتشوف فاص ليها و وذنيها مسدودين على اشنو تيتقال حداها..لابسة بيجامة ودايرا فولارها الى شفتيها تعطيها ثلاثين للفوق وهي باقي متخطاتش عتبة العشرين..خدود مليئة بالدموع كينزلو من العين بلا صوت من طرفها..والناس حداها كلشي كيهضر، شي داخل وشي خارج فديك اللحظة بالضبط حتى حد مكتعرفو ..صراع داخلي واقع فداخلها وقلبها كتحس بيه كيتقطع ..لي مستوعباه هو أنه قبل ساعة تم دفن بنتها ..صغيرتها و وحيدتها لي مدوزاتش معاها بزاف..أصعب إحساس عاشتو هدى فحياتها هي فاش توفات إسراء بين يديها وهي معاقلاش..إحساس بالذنب بتأنيب الضمير بالقرف بالكره وبأي شعور خايب فالدنيا..سمعات كلام جارح بزاف من الزوبير ومن خواتاتو مرحموهاش ونسبو ليها تهمة أنها هي لي قتلاتها ناسيين أنها أم..

تدفنات إسراء بعدما عطاهم الطبيب الترخيص بالدفن وأكد ليهم أن البنت مماتش بالطيحة إنما حيت تخنقات وحيت عندها مشاكل تنفس عويصة ..لكن هضرتو مكانتش كافية باش تبرأ هدى قدام الزوبير لي روحو كانت غتخرج فاش عيطات ليه إكرام وخبراتو بموتها..جا كيجري هو وعائلتو لي تصعقو بالخبر..وعطاها هضرة قاسحة فوذنيها أمام عائلتها.

-الزوبير: ماتهنيتي حتى قتلتليها عاد بردتي ياك؟؟ اعدوة الله المعفونة اعيفة العيالات قتلتي بنتك غي بخنزك..

كتجر فيه مو يسكت وهو جالس كيغرق ليها قدام العالم لي فيهم عائلتها وجيرانهم وكلشي دا ما يعاود .

الزوبير:خرجتي على راسك وعليا وقتلتي ليا بنتي اعدوة الله...خارجة فنص الليل كتجاراي بالبنت حتى قتلتيها..سيري راك مطللقة مطلقة طلاق الثلاث وحرام عليا ديني الى رجعتك اعيفة العيالات..

خرجوه خوالها لي معجبهمش الحال وكذلك باها لي عايرو وخرجو برا وهو كيشوف فهدى كتغوت وتضرب فراسها على بنتها لي مشبعاتش منها ومعمرها غتشبع منها..كتغوت لربي لي خلقها بحالا كتصرع وتركل وتنخصص غي العيالات لي شادييينها وففمها كلمة وحدة:بنتي

أصعب شعور فالعالم هو يموتو ليك ولادك قيد حياتك..كيكون بمثابة اختبار من الله على صبرك واش قادر تصبر وتحمد لله ولالا..هدى كانت من العباد لي ماتو ليهم ولادهم..خسرات آخر حاجة كتربطها بالدنيا..بكات وتركلات وغوتات حتى تهد حيلها وتكمشات كتبكي فحضن مها لي محروقة عليها حيت هي براسها عاشت نفس الإحساس مع خديجة

تدفنات البنت طير من طيور الجنة والناس كيواسيو فيها وكيقولو ليها :غتشفع ليك يوم القيامة..

رغم كل عبارات المواساة لكن حرقتها وجرحها كان جديد حتى طبيب وحتى إنسان مغيقدرش يعاالجو هو فقط الوقت كينسي ويعالج و يداوي..

بعد ثلاث أيام الجنازة الزوبير مشا من نهار لول هو وعائلتو وكانت هاديك هي نهاية علاقتهم الزوجية...أما هي راه دخلات فاكتئاب أكبر من لي كانت فيه..كتحس براسها عايشة فعالم فحدود بيتها باغيا غي تغمض فيه عينيها وتخايل اسراء وتعاود تفيق كتبكي وتغوت فاليل ..شي مرات كتبغي تهرب ليم من الدار وترجعها إكرام لي كانت كتشوف ختها غادية للهلاك

هي إنسانة معفونة ومع موت بنتها عتاكفات فالبيت وزادت عفن على عفن الى مانوضتيهاش لطواليط تبول تطلقهم فالفراش. مامرة ماجوج لقاوها بايلة فحوايجها ومحاساش ..حتى شكون واش تخلخلات فدماغها..نوضاتها إكرام واحد النهار بعد مرور شهرعلى موت اسراء دوشات ليها كتفك ليها شعرها ولوخرا متحرك فيها ساكن غي كتشوف فالفراغ..غسلات ليها ونقاتها وداتها لبيتها كتلبس ليها حوايجها وكتهضر:حتى لين غتبقاي هاكا أهدى؟؟اتضيعي راسك وتمشيوحياتك

هدى:حياتي ضاعت ملي مشات ليا بنتي

إكرام:ختي ماشي نتي أول وحدة كيموتو ليها ولادها(كتمشط ليها شعرها الفازك ونصو كيهبط مع المشطة)ياك ماما ماتت وراه مي مسكينة كملات وكبراتنا ..واش نعارضو قضاء الله؟

هدى:(شافت فختها بعيون باكية)مقتلتهاش ا إكرام ياك؟؟هءهءهءهءهء مقتلتش بنتي (شداتها هستيرية البكاء)والله ماكنت بغيتها تطيح هءههءهء طاحت راااسها والله..زلقات ليا اختي مشفتهاش هءهءهءهء علاش كيقولو ليا قتلتها علااااش ؟؟أنا مقتلهااااش واش كاينة شي وحدة كتبغي تقتل بنتها...قوليها ليهم إكرام قولي ليهم هدى مقتلاتش بنتها هءهءهءهءهءه(بدات كتركل وتبكي وتغوت بصوتها )مقتلتش بنتيييي ميمكنش نقتل بنتتيييي...بغييييت بنتييي بنتييي اسرااااء بنتيييي

عنقاتها إكرام عندها وكتسكت فيها حتى دخلات ربيعة مخلوعة كتشوف فحالة بنتها لي منهارها وهي هاكا..سكتو فيها وخشاوها ففراشها وفمها كيترعد بكلمة:مقتلتهاش

تأنيب الضمير أصعب حاجة ممكن تجي للإنسان..ومحد ضميرك حي يعني نتا إنسان..هدى سمعات هضرة قاسحة وسببو داك شي لي قالوه ليها أنها هي السبب فحين أنه البنت مكتاب ليها تموت حتى كون ماتخاصماتش مع الزوبير ديك الليلة كانت غتجي تقلبها وتلقاها ميتة حيت ربي ممكتبش ليها تعيش لكن المجتمع مكيرحمش..وكيزيد على هم الإنسان بهم اخر ومكيفلتش فرصة انه يعذبو ..

دوزات ورا ديك الليلة ليالي كثار كتغوت فيهم وتبكي وتفيق مخلوعة وتبغي تهرب..مامرة ماجوج كيلقاوها وصلات للشاريع غي الناس لي كيردوها عرفوها نفسيتها مزفتة..عتاكفات فالبيت كتاكل غي بزز حتى وزنها هبط وصلات لعتبة الربعين وهي مع زينة كمل ليها الضعف شنو خاص..كتعيا معاها إكرام كتبغي تخرجها ولا تفوج بيها شويا كترفض..حتى لنهار لي وصلاتها استدعاء فالمحكمة ديال الطلاق..شافتها وببرود خطاتها فوق الطبلة:حسن نتفارقو

ربيعة:معندك ماديري بيه ابنيتي حرام الرزق والعشرة بيناتكم

هدى:(ذابلة)من نهارها محرمة غي أنا لي كنطير

كانت عندها الجلسة ديال الطلاق..لبسات جلابة وصابو وشال وحالتها الى شفتيها توصفها بامراة خارجة من شي سبيطار تالحماق..مشاو العوينات وذبالو وحتى الوزن طيحات بزااف والصفورية طغات عليها..رافقاتها إكرام ختها لي كانت واقفة معاها فهاد المحنة

دخلو للمحكمة لي لقاوها عامرة غي بالقاصرات لي أغلبهم طلاق جراء زواج فاشل ..عينيها كيضورو على الناس فلخر حطات راسها على كتف ختها

اكرام:ولد الحرام حتى هو داعيك هنا فكازا

هدى:الله يسهل عليه بغيت غي نتفك

إكرام:كلشي عند الله قريب

ناداو بإسمهم بعد انتظار ودخلات حانية راسها وغي كتجر رجليها وتبعها حتى هو لي مكيشوفش فيها كاع

بعد التساؤلات والهضرة سولهم القاضي على أسباب الطلاق وهو يتكرع عليها الزوبير:هاد السيدة حرامت معايا عشرتها..ماهي مرا ماهيا بنت... العفن والوسخ والحداكة والو..معفووونة ومكتعرف دير والو..نخلص ليها لي بغات غي نتفك

شافت فيه هدى بعيون مدمعة مظناتوش يكون جامع ليها هادشي كامل..بدات كتبكي فصمت والقاضي كيسولها حتى نطقات:حتى أنا بغيت نطلق ومسامحة ليه فكلشي

دازت جاسة الطلاق.. و فعلا طلقو، خرجات هدى من المحكمة.. غادية حانية راسها لابسة جلابتها و دايرا صابو فرجليها، غاديا و هضرتو تتعاود فوذنيها.. غادية ما حاساش بشنو واقع.. باقي عقلها تيحاول يستوعب الهضرة لي قالها راجلها و باقي عقلها حابس عند هضرتو، ما قادرة تفكر ف حتى شي حاجة من غير ديك الهضرة، ما حاساش بالعالم، غير غادية و جارة رجليها..

محسات غي وهي قاطعة الشانطي وعينيها مضبببن بالدموع مكسورة..جرحها مزال جديد وتزاد ليها جرح..تسمع صوت ختها من بعيد كتنادي عليها بصوت مسموع وكتجري جيهتها..وقفاتها كتلهث وقالت:تسناي اصاحبتي(قندشات)مالكي كتبكي؟؟ماشي نتي لولة ولا لخرة لي طلقات مزال تجيبي سيد سيدو

هدى:(عيون منفوخة ووجه شاحب وفم بيض بقلة الماكلة)مظنيتوش يشوهني أ ختي ..طلع ولد الحرام

إكرام:(عنقاتها)الله ياخد فيه الحق مديريش فبالك ..الف واحد يتمناك

هدى:حتى حد مايتمناني وانا معفونة هذهءهءهءهء هو عندو الحق اختي انا عيفة العيالات

عنقاتها ختها وكتواسي فيها شدات ليها طاكسي ومشاو للدار وطول طريق مخشية فختها كتقلب على الأمان فيها..ومكذبوش عمر الدم يولي ما.. كتبقا ختها واخا تكون غالطة غتوقف معاها ضد العالم..لا ربيعة لا احمد لا اكرام عارفين بلي هدى لي منها الغلط وبلي ماشي قد الزواج لكن واقفين معاها ومبينين ليها بلي ماشي هي الغالطة..واكرام كانت نعم الأخت مخلاتهاش فهاد الفترة وممخليا مدايرا على قبلها

وصلو للدار لقاو ربيعة دايرا لغدا صيدوها دغيا تغدا مامبينيش بلي راه كاين شي مشكل..نقا ليها احمد الحوت وقال:هاكي الحوت اختي كولي ..

هدى:مبغيتش

احمد:(مال عليها)واعفااااك غي دووقي

ربيعة:وتا دفكتي على البنت غتبجغها وهي ولات كميشة

هدى:غنمشي ننعس راسي ضارني

ماهضروش ومحكروش عارفينها باغيا تبقا بوحدها وفعلا مشات لسريرها بجلابتها تكات فوضعية جنين وهي وضعية كديرها ملي كتكون فقمة ضعفها..و بقات كتبكي فصمت على حالتها المزرية لاش وصلات..

دازو أيام وتبعوها شهور حتى ضار العام وولات فعمر العشرين سنة ...هدى ولات عندها عشربن عام خارجة بتجربة زواج فاشل وبفقدانها لبنتها..باقة حالتها هي هي مكتخرجش الا قليييل مرة فربع شهور مكتنوضش من سريرها غي متكية وصافي مكدير والو فحياتها..مرة مرة كتنوض تشقا وترجع تتكا بلاصتها حتى التيليفون معمرها شعلاتو ولا قلباتو...

تنهدات من وسط سريرها وناضت للطواليط باغيا تبول..مع حيدات السليب كيبتن ليها سلببها موسخ وعاطية منها ريحة خايبة خسرات سيفتها وتفكرات هضرة الزوبير..بالت وناضت تقابلات مع المراية..هالات سوداء كثيرة خلات عينيها يفقدو بريقهم..شعرها مشا كولو ولا خفيف وناااشف بزااف بالإضافة للحبوب لي رجعو ليها ..راقبات ملامحها فصمت ويديها كدوز بشويا على وجهها كأنها اول مرة تفحصو..بلا شعور خرجات لبيتها هزات مقص ومشات للحمام فغفلة من مها طلقات شعرها مخبل وبدات كدوز عليه بالمقص وسنانها كيتكنززو حتى قطعات باباه خلاتو حد وذنيها كي الفرطاسة..نزلات عينيها كتشوف في فالارض مغددة جمعاتو ودارتو فالزبل لقات راسها رجعات كي العزري ومهتاماتش..جبدات حوايج نقيين وهزات منتوجات إكرام ودخلات للدوش حيدات حوايجها وطلقات الما فالسطل يعمر..وكتكب عليها وتعاود وتعاود مملاتش بحالا كتقلب تحيد لحمها وتبدلو..غسلات شعرها مزيان وهزات الكيس بدات كتحك بالغدايد حتى كتخلي الحمورية فلحمها بمعنى آخر حردات راسها..حكات مزياااان وغسلات تحتها بصابون الحجرة وخشات صبعها غي من الفوق خرجاتو كتشم ريحة فشكل. خسرات سيفتها وناضت كتقلب فكدامها لقاتهم حوورش نيييت حكاتهم مزيان وخرجات ملوية فبينوار جداها لي لقاتها عند الباب كتسناها وعينيها خارجين

هدى:مالكي

ربيعة:تي لي كنتي دوشي؟؟

هدى:ااه(بحسرة)عرفتي لحمي كي ولى أ مي حالتوو

ربيعة:كلشي كيتقاد خصك غي ديري عقلك سيري لبسي ميضربكش البرد

مشات بزربة لبسات وخرجات دايرت زيف حياتي على راسها بان فيها شويا تضو..جلسات مع احمد ..حتى دخلات إكرام وغي شافوها قطعات شعرها خاصمو حتى عياو وسكتوو حيت عارفينها سايط ليها الريح فمخها. تعشات معاهم ومشات شعلات تيليفونها اكتيفات الويفي لي مؤخرا دخلاتو إكرام وبداو كيدخلو الميساجات للواتساب ..لقات عائشة مبلوكياها هي وخواتات الزوبير ومستغرباتش حتى هي مسحات نمرتها...كطلع وكتهبط فالفيسبوك نفس البوسطات نفس المشاكل تقول بنادم متبدلش ولا متزعزعش من بلاصتو بفرق بسيط الجهد لي كان عندها باش تجاوب مبقاش عندها اليوم غي كتشوف وكدوز حتى طاح ليها فيديو ديال مؤثرة كتهضر على كيفاش تقوي شخصيتك وتخرجي من منطقة الراحة ديالك..دخلات كتفرج فيها..زوينة وراقية فماكياجها وفلباسها وكتبان نقية كتهضر بحالا كتوصف حالتها هي وعلى التغيير ..عجباتها خلاتها تفرج فيها باريحية واكرام كتسمع حداها تبسمات وتنهدات براحة كتقول عالله ينفعوها..بقات من فيديو لفيديو وكتزيد تحمس حتى غفات بلاصتها وخاطرها رتاح شويا..

بقات كل نهار كتفرج فيها وفغيرها بدون مادير حتى ردة فعل حقيقية كانت بحالا كتشارجا وكتستامد طاقتها منهم..وفيوم من الأيام هداها الله وناضت كتقلب على زيوت للشعر باش يطوال صحي..كتقلب وتخربق فاليوتوب ومخلات ماقلبات حتى طاحت على زيت الفلفلة لي كلشي كيشكرها حيت معندهاش باش تشري زيوت..شدات الفلفل قطعاتها ودارتها فقرعة تالزاج خوات عليها زيت زيتون مطبوخة باش تحيد الملوحة ولاحت فيها جوج ضروس تالثومة وسداتها ودارتها فبلاصة فيها الضلام حتى دوز 15 ليوم وتستعملها..خلات ربيعة غي كتشوف من الجهد لي ولى عندها..الرجلين قلبات ليهم على وصفة باش تحكهم مع دارتهم فميهة سخونة مع الملحة والخل والبيكاربونات بداو كيتفرتتو كتحك حتى طاحو كتافها وشي وسوخات خرجو ومع ذلك مرطبووش مزيان ولكن دارت لي عليها...مع جات إكرام لصقاتها على لاصيغ وحيت هي كوفورة عندها كلشي فالدار كانت كتمنى غي تهزهم ليها ودير

دارتها تسخن وتنشرات حداها كتكتب مبسمة ولوخرا كتشوف فيها مبسمة:مع علي؟

اكرام:اه ههههه غيجي للمغرب

هدى:غتشاوفو؟

اكرام:ضروري..قاليا ناوي المعقول

هدى:حتى تشوفي كي داير واش يستاهلك

اكرام:عرفتي كي كيعاملني راه زوين بزاااف والله

هدى:الله يعطيك شي رزق حس من رزقي وتعيشي حسن من داكشي لي عشت

اكرام:حتى نتي غيعوضك ربي دابا تشوفي

هدى:(بهدوء)مابغيتش داك التعويض..بغيت غي نعيش وصافي نديها غي فراسي اما الرجال غسلت عليهم يدي مبقيت بغيت حد فحياتي

إكرام:عاد جرحك جديد اهدى

هدى:دازت عام اختي وباقي جرحي مبغاش يبرا نتسنا أنا يبرا بوحدو الى ماجريتش عليه أنا عمري نبرا

إكرام:ديما كنقوليك هاد الهضرة عاد فهمتيها

هدى:كان خصني وقت..نوضي شوفي واش سخنات

قلباتها لقاتها سخنات وبدات كتنتف فيها ولوخرا كتغوت وتغرق ليها لي فيها ماهناها ..إكرام كتنتف وتغدد وتسب فيها:بنت الكلب مخليا الشعر عوالة ضفريه

هدى:(مقسحة)سيري الله ينعل مك تفو بعدييي مني

إكرام:اري ليا البيطان اري فقصة البيطان بوحدها

هدى:(هزات يديها)حيدي وغي بشويا

حيدات ليها بالغوات والدق بيناتهم كتنوض كتسبها وترجع تكمل ليها دخلات ربيعة لقاتهم هاكاك فرحات حيت رجعو كيتغاوتو..

إكرام:ديري حل لبيطانك راه سمارو ليك

هدى:اش ندير؟

إكرام:شوفي الكحولية شحال من عام متجيش وتحيد دغيا..واحد سيروم تاع اوردينيري واعر ولكن غالي

هدى:خلي نخدم ونشريه..قلبت فالفيسبوك قاليك نشا ودانون مسوس كيبيضو

اكرام:زوين حتى هو غي متسنايش دغيا يبياض خصك وقت..داومي ليه هاد الماسك نتخلص ونشري ليك السيروم راه دقة ببطلة كيعطي مفعول دغيا..

هدى:خاصني نخدم

إكرام:الالة غي جلسي متخدميش ريحي راسك حتى تولي شويا وخرجي ..

هدى:ان شاء الله يكون خير..دابا اش ندير؟؟نوض ندوش

ناضت دوشات حيدات بقايا لاصيغ ولبسات عليها مرتاحة كتحس براسها خفيفة بزاف ومن هنا بدات رحلتها فالعناية بالنفس..كان خصها غي شي تحول شي حدث او شي حد يموتيفيها ملي حسات براسها بغات تغير ناضت للتغيير..

وبالفعل ولات هدى كتبحث وتقلب هذا ماسك وهذا مقشر وهذا روتين العناية..كانت كتفرج ففيديوات مؤثرات فالعناية بالنفس ولي شافتهم داروها كديرها..مرة مخلطة النشا وما ورد ودانون..وهاهيا مخلطة قهوة داياها للحمام وتقشر وهاهيا كترطب بمنتوجات إكرام حيت معندهاش دياولها وبيطانها راه ولى عندها روتين كدير ليهم ماسك تبيض وتقشرهم بالقهوى والزيت وكل نهار طل عليهم كي ولاو..

مدة شهراين وهي غي هاكاك مقابلة غي ذاتها..مرة تعيا مرة تعاود تنوض وتحمس شاغلة تفكيرها وبالها فكثرة الوصفات والروتينات حتى طيحات ليهم العجب..

******

كانت إكرام كضور مع صاحبتها بين المحلات فنهار الأحد من هذا لهذا دايرين الشوفينغ اما الشوبينغ بعيد عليهم..دخلو لمحل كبير باينة عاد حل جايب سلعة زوينة للبنات ..دارو وقلبو فيه على بياسات زوينين وتمو غاديين للاكيص لقاو رشيد بنفسو واقف كيتخلص منهم وهي تنطق:عفاك هادي فطاي s

رشيد:(كيسوط)واخا اختي غي صبري خصني ندوز الناس فلاكيص

وبالفعل تسناتو ومشا كيقلب ليها على لاطاي والكليان كيتسنا وهو غي بوحدو موفق بيناتهم حتى بغا يحماق..

إكرام:جيب لي تعاونك ههههه مالك مرون بوحدك

رشيد:ياله حليت اختي وقلت محالش يكون بنادم ساعا هانتي كتشوفي

إكرام:ههههه غا جيب لي تعاونك العيالات راه مافيهمش الصبر

رشيد:شكون هادي لي غتبغي تخدم ليا بالفين درهم

اكرام:والى جبتها ليك؟

رشيد:نتي؟؟

إكرام:لالا ختي..تاهيا كيعجبها هادشي وراه تعجبك ولي عطيتيها هو هذااك

رشيد:عتقيني بيها..اري ليا نمرتك

عطاتو نمرتها وخرجات شادة فصاحبتها فرحانة حيت لقات ليها خدمة مبطا عليها امتا توصل الدار ..دخلات مبسمة لقاتها ناشرة رجليها ويديها دايرت ليهم ماسك وهي تقول:سبحان مبدل الأحوال

هدى:مضحكنيش هادشي غيكمشيني هههه

أحمد:(جاي ولا ضعيف)حتى أنا بغيت

اكرام:(طرشاتو بشوي)سير تحفض راه الى مشديتيش الباك غنصيفطك لعند باعدي تسرح الغنم

أحمد:(رجع ليها التصرفيقة)وعلاش كضربي هااا؟؟علاش(صرفقها تاني)

إكرام:ههههه سير تحفض ونتي لقيت ليك خدمة

هدى:(شافت فيها بهدوء)فاش؟؟

ربيعة:(خارجة كتهد برجليها والعيا متمكن منها)فاش

هدى:واحد المحل ف ***** حل جديد خصاتو بنت تخدم معاه

هدى:حوايج البنات؟؟

إكرام:اه

هدى:ولكن أنا مكنفهمش فهاد شي

إكرام :حتى حد ماتزاد معلم غي سيري وحلي عقلك راه غتعلمي

هدى:صافي واخا..

باتت ديك الليلة كتفكر وتخيط تحلم بالتغيير..داك شويا تالمجهود لي دات خدا منها وقت لكن ريحها بنسبة قليلة..شغلات راسها شويا وخلا راسها ترتاح..

خيطات وفصلات وماخلات ماحلمات وبالأخير داها النعاس مكمشة فراسها مفاقت غي على رنة المنبه..طفاتو وناضت كتفوه كانت تسعود تصباح..مشات غسلات وجهها بصابونة وحكات سنانها..هزات يديها شمات بيطانها كانت ريحة ديدوغون..صبحات على ربيعة ومشات لبسات عليها سروال دجين ديال إكرام جاها عرييض نيييت عصبها..وهي تلوحو وعاودات هزات واحد آخر دارت ليه السمطة ولبسات شوميز وهزات فولار عادي معاجبهاش جاها راسها مقاداتش اللبسة وغي كتخربق..هزات صاك ختها فيه بزطام لقات إكرام مخلية ليها فيه مية درهم..تبسمات بحب وقالت:الله يقدرني نرجع ليك غي شويا

باست ربيعة لي عيات فيها تجلس تفطر مبغاتش وخرجات من الدار متخوفة وتتنهد..أول مرة تخرج بوحدها ورا عام ديال الإعتكاف..جاتها الرهبة بحالا عمرها خرجات..ولات غادية كتشوف الناس كيحسابها كيشوفو فيها..عيونها عاد وضاحو فضو النهار أنهم فقدو بريقهم والشحوب باين على وجهها..وقفات فمحطة ديال الطاكسيات كتسنا طاكسي بيض لي غيحطها حدا البلاصة هي بنت كازا وعارفا اش كاين..

طلعات وبقات تتسنا تعمر تتسرط ريقها كل شوي تتشم راسها ولات موسوسة..موصلات تاعرقات نزلات كضور بعينيها فالحي لي فيه المحلات بزاف..عيطات لإكرام تقوليها سميتو وغي عطاتو ليها مشات لقاتو ياله حل والصقيل..سبقات اولى الخطوات كضور عينيها وهي تقشع جسد رجل فالمحل..حنحنات وقالت:السلام وعليكم

تلفت ليها رشيد قايل :وعليكم السلام..هدى ياك؟

هدى:باش عرفتيني؟؟

رشيد:نتي لي كنتسنا هاد الساعة ههههه(قرب ليها مد يدو)معاك رشيد

هدى:مشرفين اسي رشيد

رشيد:غي رشيد بلا سي..مهم اجي نجلسو ونشرح ليك

حركات راسها و تبعاتو متشبتثة فصاكها جلسو فجوج كراسا وعينيها كيضورو على المحل لي عامر حوايج عيالات

رشيد:مهم اهدى أنا ياله بادي وإن شاء الله بغيت شي وحدة معقولة وكتخدم من نيتها ..تشد ليا غي البيع و الشرا ومع الوقت نعطيها تا لاكيص..

هدى:أنا الصراحة ماعمري خدمت فهادشي ولكن عقلي خفيف والله وتنفهم دغيا الى درت راسي فشي حاجة راه نشدها..والله منحشمك..

رشيد:لهلا يحشمنا..امتا تبغي تبداي؟

هدى:وقتما بغيتي

رشيد:بداي اليوم نيت أنا نوريك كلشي

هدى:واخا

رشيد:حطي صاكك لهيه

حطاتو ومشات تابعاه كيوريها الحوايج وكل حاجة راه خداها ثمنها وأصر عليها أنه مكايناش مفاوضة..دورها المحل كولو وهي حالا عقلها داك شويا تالجهد لي عندها خدماتو..شرح ليها مزيان و خرج يجيب قهوة وهوما يدخلو شي كليانات كيضورو ومشات كتعاونهم وتوريهم لكن مجابش الله وخرجو خيبو أملها وهوما يدمعو عينيها حيت على سبة أول فشل ولو بسيط غيكرفصها

دخل رشيد هاز قهيوة ليه وليها وقال:نالكي؟؟جا شي حد؟

هدى:(معرفات تكذب معرفات تقول صح)اه ولكن ماشراوش واخا شرحت ليهم

رشيد:سوق العيالات راه صعيب كاين لي كيخرج غي كيشوف خصك تعطيه الوقت وتزوقي ليه الهضرة الا مشراش اليوم يشري غدا

هدى:واخا ان شاء الله(مد ليها قهوة)شكرا

وهاكا هدى تعرفات على رشيد ضربات معاه خمس سنين ولات هي وياه كي الضريرات هو كيشرق وهي كتغرب..مع شافها بدات كتولف ولى كيخليها بوحدها كيحل ليها ويزيد ويخليها غارقة..شغلات راسها فالخدمة كتبقا بوحدها نهار كامل فيها من العشرة تصباح حتال العشرة تليل ..ومع كانت بوحدها كتمل بالواقفية وتحضي مع الكليان..ضربات ست شهور تعلمات و ولات معلمة فالبيع و الشرا قليل لي كيخرج من عندها مشاريش وصدقات عاجبااه تروج ليه المحل وعجباتو خدمتها صدق زايد ليها بنت اخرى وهي بثينة ومن تما وهو وياها فشد ليا نقطع ليك..كيحتارمها ودايرها ختو معمرو بسل عليها رغم أنه زلايلي لكن محتارمها ومعمرو عرفها مطلقة حتى قالتها ليه ومتسوقش ..

أما هي راه كانت مرتاحة بالتغيير كتجي عيانة اه كتاكل وتنعس وفرحانة حيت على الأقل تشغلات..فهاد المدة احمد شد الباك فرحو بيه وزغرتو ليه ومخلاو مدارو عليه وشجعوه على مسارو لي قرر يكملو فالمخزن..

رجع روتينها باين الخدمة والوصفات والتهلي فراسها..فينما كانت شي تبريمة جرباتها وفينما كانت شي وصفة جرباتها ..غي تخلص كتعطي لمها المصروف لي ولات كتقسمو مع إكرام هاد الأخيرة لي تلاقات بعلي لي كنزز عليها وأصر يتزوح بيها..باقي خلصتها كانت كتشري حويجات وتقلب وتشوف وتعبر فالبنات كي كيلبسو حتى لقات ستيل خاص بيها..ستيل مستور وخفيف رفضات تحيد الفولار حيت جا مع فترة أن شعرهها قصير. . كذلك مقدراتش تحيدو حيت ولفاتو...

تبدلات هدى وولات بنيتة خرا غير ماكانت عليه..بنيتة عندها راسها وجمالها وشكلها أهم شيء..وخدمتها وراحتها الباقي مهامهاش..كيشدوهل نوبات بكاء واكتئاب مرة مرة فاش كتفكر إسراء لكن دغيا كيفوتها الحال بوجود مها وخوتها وحتى باها لي ولى كيجي عندهم بزاف رغم أن ربيعة معاجبهاش الحال

دازت وقت وجا وقت وربيعة عيات ولازمات الفراش..مامريضة مافيها علة هي فقط إنسانة كبرات فالعمر وبداو عظامها كيضروها شدات الفراش وتعللات ولاو ولادها داخلين خارجين عليها كل مرة كاينة وحدة فعيالات ولدها معاها حيت البنات بجوج خدامين .. مخلاو بيها حتى طبيب لكن السيدة عيات فقط وجا أجلها

وفليلة صيف سخونة كانو هوما لي معاها..أحمد كيقرا فمدينة خرا وإكرام وهدى دايرين العشا ومهمومين على حال مهم..مشاو طلو عليها لقاوها شاداها الموت بهاد المفهوم معرفو مايديرو من غير يبكيو حداها ويتنخصو حتى ناضت إكرام تقلب على طاكسي يعتقو الى فيها مايتعتق وفهاد الأثناء كانت خرجاتها الروح وهي فيدين هدى لي مبقاش عندها فين تزيد...ماتت ليها فيديها وشهدات فيديها

بكاو وغوتو وحيحيو وعيطيو للخوال يجيو يشوفو مهم لي لقاوها ميتة وحتى باهم وجداهم من باهم حضرات كتبقى الموت و مايكنش متجيش . تدفنات ربيعة وخلات وراها ولاد خديجة لي تيتمو من جديد معندهم حد من غير بعضهم..بكاو عليها وتنخصصو فالأخير حمدو الله كتبقا الموت علة لابد منها

دخلات هدى عاود فحالة من الحزن والإكتئاب ورجعات لحالتها ديال أنها باغا تنعازل وتشد راسها موكدها غي رشيد لي طلبها ترجع تخدم بعدما جلسات سيمانة وولات كتمشي تلف شويا وتا خوها رجع للمدينة فاش كيقرا،ا بقا باهم كيجي عندهم كل سيمانة حتى تفاجئو بالخوال بغاو يبيعو دار مهم..حيحات إكرام وأحمد لكن هدى معارضاتش حيت ستوعبات أنه حقهم..وتباعت الدار وهوما أيضا شدو حقهم حيت ولاد خديجة عيا فيهم باهم يمشيو معاه مبغاوش فالأخير كراو بجوجات ومن حسن حظهم خلاو ليهم خوالهم الفراش وكلشي...حتى قررات إكرام تزوج بعلي وجا للمغرب خطبها من باها فدارهم لي كاريين دارت عقد رافضة تدير عرس حيت مها مكملاتش العام باش ماتت ومشات معاه للإمارات مخلية هدى وحدها عايشة فنفس الدار لي من بعد جات بثينة سكنات معاها فيها وتعاونو على الكرا حتى وقعات الجريمة..

"Back"↩

حلات عينيها قافزة لقات الدموع كيدوزو من جنب عينيها بغزارة وففمها غي:اسراء

شدات على صدرها وغمضات عينيها والألم كيعصر فقلبها وبدات كتبكي فصمت..معرفاتش شحال نعسات ولا فوقاش لي عرفات هو أنه صورة ربيعة واسراء مكتفارقش ذاكرتها..

دخل أحمد لي سمع الحس كان فالكوزينة ..شافها كتبكي مشا عنقها وحتى هي متردداتش أنها تطيح فحضنو..هي كبر منو لكن محتاجاه دابا..عنقها بحنان وباس راسها خلاها حتى بكات على خاطرها وقال:تاكلي شويا؟

هدى:(كتسمح دموعها)معندو منين يدوز(شافت فيه)نمشي نشوف بابا..

سكت للحظات كيجمع فهضرتو ونطق:واخا نمشيو

عارفاه معندوش معاه بزاف لكن هي من ديما كتخلي المشاكل بعاد كتقول مع راسها كلها يخلصو الله..

هدى:دير لما منين يدوز كيبقا باك

أحمد:انا معنديش معاه شي حاجة خايبة كيبقا با وخصني نحتارمو ولكن راه مدايرش فين نحطو

هدى:الله يهديه..واش نفرطو فيه؟؟(شافتو ساكت)عارف بلي معندنا حد من غيرو؟

أحمد:كاينين خوالي

هدى:هانتا قلتيها خوالك..ولكن هذا بااك..نعل الشيطان نمشيو نشوفوه لله فسبيل الله

أحمد:من امتا وليتي هاكا؟؟

هدى:من نهار ماتت ليا بنتي وعرفت بلي الدنيا غادية

أحمد:واخا سيري شوفيه أنا مزير خصني نرجع لخدمتي اليوم بالليل

هدى:واخا..

أحمد:شغديري فالكرا؟؟

هدى:انعيط للسمسار نشوف شي دار قريبة للخدمة عاود

أحمد:هي داباما غانمشي تاتكوني لقيتي بعدا الدار

هدى:غي سير متخافش عليا أنا راني فران وقاد بحومة

أحمد:هادشي لي خالعني فيك مرة كنشوفك كنقول هادي ميهدها والو كيجي بلان كترجعي بحال شي وحدة ياله تزادت

هدى:مولاها ربي

ناضت دوشات خفا زربا ولبسات عليها من شنو جايب ليها وخرجات معيطة للسمسار لي دار معاها غدا

هدى:حتال غدا غي توكل عالله سير لخدمتك

أحمد:ونتي فين غتمشي؟؟

هدى:انمشي نشوف بابا

احمد:واخا وراه غي يوماين يوصلك تصريح تدخلي تهزي حوايجك من الدار

هدى:ان شاء الله

خرجات هي وياه دوزاتو حتى شرات بيجامة كتقلب فدار باها وبعض من اشيائها خاصاها وشدو الطريق لدار باها فسيارة خوها..وهي ساكتة كتخمم وعقلها ملخبط بالأفكار..كتفصل وتخيط غي بوحدها..مسافة ٣الكريق وصلو لدار باهم وقشعاتهم نعيمة من بعيد بسيارتهم كتساءل دايرا يديها على راسها وتتحقق مدا منها الوقت والو

نعيمة:تي شكون هادوو(نزلو وقشعاتهم)ولاد باعدي

نطقات زوجة باعدي:الربايب هادو مممممم اوا جابتها الوقت نعرفوهم

نعيمة:ماصابو امتا يجيو غا حتى بنتي جايا فففففففف

سعيدة:سكتي سكتي هاهوما قربووو

قربو حداهم وهدى غي كتشوف فنعيمة ببرود معندهاش معاها من نهارها لكن متحملاها على وجه باها:خالتي لباس

نعيمة:(ضاحكة)لباس وتي لباس؟؟تا حمد هذااا(قربات سلمات عليه)

احمد:كي دايرا الالة مزيان؟؟الوليد مكاينش

سعيدة:(نقزات)لا مشا للسوق زيدووو دخلووو مرحبا بيكم

هدى:(بتشكيك)نتي مرات بابا

سعيدة:ايييه اختي(سلمات عليها وكطلعها وتهبط)تبارك الله باعدي والد الزييين زيدي ابنيتي دخلي دخلي

دخلو معاهم ولوخرين كيصكانييوهم ..دخلوهم للبيت فين كان المكي لي ناض رحب بيهم ترحيب شديد اما حتى مهم راه ماتت

-فالكوزينة

نعيمة:جاييين طوال قول جايين يتبراو

سعيدة:بنتو زوييينة تي هاكا كانت مرتوو

نعيمة:(بغات تفقصها)خديجة كانت زين منها..شي عينين عندها يفتنو وحارة وحادكة مشبهاتهاش هاد المعيفينة

سعيدة:والزين زينة..حمد ميشبهش لباه

نعيمة:تي سايرة تدوي بحالا عمرك شتيهم

سعيدة:شتناهم فالتصاور..زيدي زيدي نحطو ليهم الصواب

نعيمة:زيدي تي رحبي بربايبك

حطو اتاي ودوازو وتجمعو عليه مع المكي لي مرحب بيهم وفرحان بيهم بحكم راه غي هوما لي ولاد خوه حيت باعدي ولد مع خديجة بوحدها وعاد شي شهور باش تزوج عاود

احمد:الوليد مكاينش

المكي:مشا للسوق دابا يدخل..دوز كاسك اوليدي الجدارمي ديالنا..خيري فرحي بولد خويا ولى فالمخزن

احمد:الله يكبر بيك

نعيمة:كي دايرا ختك اهويدة؟؟

هدى:لباس عليها

سعيدة:ختك لي مجوجة للسعودية ياك؟؟

هدى:(معندها حتى ضغينة معاها)ايييه ولكن فالإمارت

سعيدة:بحال بحال ونتي مناوياش ان شاء الله تعاودي

تجاهلات هضرتها مع سماعها لصوت باعدي داخل كيغوت قاعدتو هي قاعدتو..ناضت بزربة لبرا شافتو وتبسمات قايلة:بابا

باعدي:(نفس الوقفة ونفس الحوايج)تا هودا هاديي

مشات عنقاتو وباست راسو مفرحاه كيعجبو الحال فاش كيجيو عندو ويسولو في عارف راسو ميسوا بصلة ومطبوعة عليه والصغر والصحة لعبات عليه حتى كان طاغي وناسيهم ملي كبرو ولى كينعل الشيطان ويتفكرهم وحتى هوما كيجيو مرة مرة ...إكرام راه بحرا مابدات كتسول فيه حيت معندهاش معاه وكديرها غي على وجه هدى اما احمد راه مرة مرة وصافي..ياله هدى لي ديما كتسول

عنقها تحت باطو ومدخلها مفرنس تفاجأ بأحمد لي ناض سلم عليه فوق خاطرو..

باعدي:الجدارمي ديالنا هذااا ههههه نهار كبير هذااا

احمد:كي داير أبا؟

باعدي:عاش من شافك..كي داير اوليدي صحيحتك؟؟

هدى:نتا مزيان ابابا

باعدي:الحمد لله..باكم شرف ههههه ضروني ركابيا

هدى:اوا العمر

بقاو من الحال والأحوال والتسوال وباعدي مجمع وكيضحك والعيلات ناضو للكوزينة الا هدى لي مناضتش بقات ناشرة رجليها حتى ستأذن أحمد عياو يشدو فيه لكن أصر يمشي حيت خدام..عنق هدى.. .

وقال:غندوز ليك فلوس فحسابك

هدى:لا مديرهاش ولا غنتقلق منك ...عندي فلوس

احمد:متقسحيش راسك

هدى:صافي سير..تهلا فراسك حتال شي ويكاند ونجي عندك

قبل راسها وسلم على باه وخرج شاد الطريق هو الباب ومريم وولادها الباب حرك ليها راسو وزاد تبعاتو بعينها ودخلات كتنادي على مها وجوج ولادها سابقينها وواحد مركباه وراها

نعيمة:(فرحانة)زيدي زيدي هههههه يا بنيتي وتوحشتك

تعانققو بحب كتبقا وحيدتها لي خرجات بيها من الدنيا..باست ولادها ودخلاتها كترحب بيها وتعاود

مريم لي غي مزادت غلاضت كثر كثر فاضت مع الحمل والزواج ولات بلدية مية فالمية لابسة جلابة وصابو..باقي محافضة على جمالها لكن الغلض كبرها..شافت هدى وتبسمات سلمات عليها عادي بلا ضغينة بلا حقد مهزاتش فخاطرها من جهتها وحتى لوخرا محكراتش..تبادلو الأخبار والأحوال عادي ودوزو عشيتهم مزيان ..هي ماناضتش من البيت وغي كتفكر باغيا دوز النهار مع باها وتمشي فحالها

ومريم:(واقفة مع مها فالكوزبنة)شفتي يا مي هدى كي ولات

نعيمة:كي ولات؟؟كي بنادم اش تزاد عليها؟؟

مريم:زيانت امي..شوفي الوجه كي ولى واللبس تي واش هادي هي هدى المعيفينة

نعيمة:ايييه طارت معزة نزلات معزة كتبقا معيفينة وريحة صنانها مزال فنيوفي

نريم:صافي سكتي خالتي سعيدة جايا.. ..

وهذا هو بنادم الى بغى يحافظ على نفس الصورة لي شاد عليك راه يخليها مكيهمو لا واش تبدلتي ولا اش تزاد عليك..كتبقا نتا هو نتا عندو واخا تشلل بالذهب

******

دوزات عندهم ليلة وحدة ورجعات أدراجها لكازا لازم تكمل حياتها رغم أن موت صاحبتها كيضرها فخاطرها ومزال كتفكرها وتبكي لكن الحياة تستمر راها ماتو ليها جوج تناس فيديها وكملات حياتها.. .

مع نزلات لكازا مشات تلاقات بالسمسار ومخلا بيها حتى دار لي دخلات ليها مكتعجبهاش حتى رصات فوحدة صغيرة واخا الثمن طالع لكن معندها مادير..هي مولفة تسكن مع البنات باش متهرسش فالكرا لكن تجربتها مع بثينة خلاتها تفقد ثقتها فالبنات..ختارت دويرة صغيرة على قدها فيها بيتها وبيت صغير وحتى الصالون لكن بمساحة صغيرة ..وقريبة للخدمة مابعيداش مسافة طاكسي بيض..تفاهمات مع مولاتها وسنات معاها العقد تالكراء وفنفس الوقت كتعيط لمول الدار لي وقعات فيها الواقعة وعلمها بلي صافي خرج التصريح وتجي تهز حوايجها..بالفعل عيطات لي يهز معاها وخرجات رحيلها كولو رغم أن قلبها تخطف فاش دخلات للدار واخا كلشي تنقا وتمسح لكن الذكرى لاعبة عليها

جمعات قشها كولو من حوايج وفراش وخدا ليها داكشي يوماين كل مرة محولة حاجة..ظهرها تقسم بالتستاف أعدى ماعندها الرحيل حيت فيه تمارة..لكن هاد المرة غير بغات تشغل راسها باش مدخلش فدوامة اكتئاب من جديد مونسة بختها لي كضل معيطة ليها باش طمن عليها..

فرشات الدار بفراش دارهم البسيط لي جابتو من دار ربيعة عاد تلاحت كتنعس مع الوحدة تنهار فوق ناموسيتها والدار كتعطعك بريحة جافيل جبدات عليه تال العصر وناضت فيها الجوع دوموندات من كلوفو وتسناتو حتى جا..لاحت عليها عباية بفولارها والبعض من خصلات شعرها كيبانو بوجه صافي دايرا غي مورد الخدود شدات طلبيتها وراجعه للعمارة لي مع غتحل مع تحل لباب وكانو جوج شبان فمقتبل العمر..مهزاتش فيهم حتى العين زادت طالعة للدروج نطق واحد فيهم:ولى عندنا الزين فالعمارة

هضرتو مدخلاتها من حتى قنت طلعات لدارها كلات ويديها كيدوزو نمرة غزلان:الو الحاجة

غزلان:عاش من شافك ولا سمع صوتك

هدى:هاني ياله ساليت

غزلان:فين غابرا الشيخة؟؟

هدى:تمارة الدار الجديدة..معلينا مسالية تمشي للحمام؟

غزلان :مخارجا حتال الخمسة فيك مايتسنا

هدى:نتسناك نتلاقاو مع ستة فالحمام *******

غزلان :صافي نخرج نجمع حوايجي ونتبعك

هدى:كي دايرا الدعوة تما؟؟

غزلان:غي سكتي ياختي راني غنطج مع هاد رشيد لعار الى مرجعي

هدى:هخهه لثنين هاني معاكم.

غزلان :ونتسناو اختي حنا حتال الاثنين؟؟

هدى:اوا هذا الله ههههه

قطعات معاها ومشات جمعات حوايجها بعناية خلطات زويتة لشعرها جامعة فيها كاع الزيوت لي يطيحو على البال لي كيقويو الشعر (الزيتون الزنجلان الكوك الكيف....)شققاتو مزيااان وهزات طاسة خلطات فيها تبريمتها المعتمدة ولي كتاخدها من عند @siliyacosmetics ..قادات صويكها ومنتجاتها وماجاتش فين تسالي حتى كان وصل الوقت رجعات شالها وعبايتها وشداتها للحمام غي بالصاك بحال ديال لاصال وماعنها كلشي فيه

وصلات للحمام ديال البلاصة فين كانت ساكنة بطاكسي صغير خلصاتو وهبطات طلبات طيابة تحك ليها حيت العظم الصحيح ماعندهاش..دارت تبريمتها وترخات فالسخون كتسنا تطلق فيها حتى دخلات الطيابة شداتها كتحك ليها مزيان حتى جات غزلان لي بدورها شدات لي يحك ليها الإنسان مع تمارة كيولي خدام على راحتو مافيها باس يدلل راسو مرة مرة...تكسلو مزيان وبقاو كيتعاودو على بثينة لي بقات فيهم وبزاف..غسلو شعرهم وخرجو كل وحدة خلصات الطيابة وهدى عطاتها بالزايد حيت حتى مها كانت خدامة نفس الشيء وعارفة بحق تمارتهم

خرجو معطرين بروايح زوينين والراحة كتنبع من وجههم..هدى ولات الى بغات ترتاح تمشي لحمام تكسل وتخرج ناشطة..

هدى:(غادين فالطريق كيشربو فقرعة سيدي علي)ياله باتي معايا

غزلان:مكرهتش ولكن الواليد عيان خصني نمشي

هدى:ميكون باس عندو..مرة خرا تهلاي فراسك

تباوسو وتفارقو كل وحدة شداتها لدارهم..خدات بتي طاكسي مافيهاش لي يمشي على رجليها جهدها كولو مشا فالرحيل..دازت للحانوت خدات الحليب ومشات لدارها طالعا فالدروج كتسمع هضرة الرجال بصوت غليض..محكراتش وآخر همها..لكن الرجال لي فالدروج او بالأحرى واقفين قدام واحد الدار..مهزاتش فيهم العين طالعا فحالها وريحة سبراي لذيذة كتفوح منها ميمكنش يزكلها نيفو هو لي تبلوكا كيشوف فوجه ماغريبش عليه بتاتا..تبعها بعينيه ساكت ويديه بقات فنفس الهزة باش كان كيتهز على عمر صاحبو

عمر:أ سبحان الله الشريف

عبدو:هاد ختنا ساكنة هنا؟

عمر:مليحة ياك؟؟واخا الفولار..

عبدو:(شاف فيه مكمش عينيه)سولتك از*** جاوبني

عمر:عاد تحولات هههه كرات ليها الخالة

عبدو:بوحدها؟؟

عمر:هاد الساعة

بقا ساكت لثواني كيخمم حتى سترجع وعيو وقال:دووخ فحالك..

عمر:(كيضحك)تسنا اصاحبي نمشيو نقصرو جميع

عبدو:تلاح غنمشي نشوف مي..

دوزات أربع أيام وهي هي فالدار كتخرج غي تقدا وترجع شادة تيقارها مكتجبد حد ومتسمعش حسها وهادشي لي كانت كتقلب عليه الحاجة صفية مولات الدار ولي العمارة كاملة ديالها وارثاها من راجلها وبحكم لا ولاد لا بنات راه كتكري الديور تعيش بيهم..

اليوم فاقت بكري على خاطرها خصها اليوم ترجع لخدمتها..نفضات أفكار الحزن وعرفات الى بقات فالدار غتزيد تكتائب..لبسات كسيوة فالكحل طويلة ومرخوفة غي شويا لكن كتبين رشاقتها لي ميمكنش نسميوه ضعف حيت مبينة فسنها..دارت إكسسوارات لي كتلخص فسنسلة طويلة زائد براصلي خفيف مع خويتمات كثار فصبيعاتها لي رقاق وطوال..خشات رجليها فصندالة والصبيعات مبرودين نقيين مصبوغين فالبيض..قادات فولارها ودارت كحل خفيف نسمات بيه عينيها مع ماسكارا وعكر خفيف وميمكنش تنسا ليكخون..رشات ريحتها وهزات صاكها وصويك تالماكلة ديالها لي فاقت خصيصا باش توجدها بكري وتديها معاها..خرجات مسورتة الباب وشادة الطريق للخدمة هي هاديك جات مع العشرة نيشان حيت خدات وقتها فانها تجهز باغيا تطرد الحزن والهم حيت لقات أنه فلخر كيرجعها للنقطة الصفر رغم أنه فالليل مزال كتحلم بكوابيس بثينة..

لقات المحل محلول وعرفات شكون حلو مع دخلات بان ليها كيتفوه فالكونطوار..حطات يديها المزينة بالخويتمات:خوي عليا من هنا

رشيد:(قفز)هاانن(فرح)هدى جيتي اختي

هدى:نوض خرج ليا من محالي

رشيد:زيدي زيدي الى باقي شفتي وجهي أنا حمار هاكي اختي(حط ليها سوارت)عومي بحرك..

هدى (ضحكها):هي عيتي؟؟مزيانة فيك تعرف غي اش كنعاني

رشيد:على هادي غنزيدك خمسميات درهم فالصالير

هدى:خصك تزيدها راه كريت غالي

رشيد:(مفرنس)رتاحيتي شويا؟؟(حقق فيها)لا كحلتي لينا العوينات راكي مزيانة

هدى:مالك باسل(مخسرة فيه سيفتها)

رشيد:نسيت نتي ميتين ليك المشاعر..خليك هنا ماتمشي فين نجيب لينا قهيوة واجي خوي ليا المزويدة

هدى:ههه سير سير

مشا جاب ليهم قهيوة للواحد وشدو الكونطوار كيتعاودو كي الجيران..هي وياه كي الخوت كضل مغاوتة معاه لكن ميفوتهاش عارفها هي لي شادة المحل ومسيراه بحالا ديالها ولايح عليها الدرك كولو زائد كتبيع ليه مزيان

رشيد:(كيطنز)اوا الخوينزة اشكتعاودي؟

هدى:ناري شحال حامض والله كون ماكنتي مزوج حتى نقول مهرس

رشيد:ههههه نعلي الشيطان(جمع الضحكة)كيووقع ؟

هدى:(تنهدات)معرفتش أخويا..انا كيحسابني عايشة مع بنت عادية صدقت لقيت حوايج خرين

رشيد:شكون لي قتاها فلخر؟

هدى:شي واحد ماهواش فمخو تعرفات عليه ولقاتو حاقد ودوز عليها(لحمها تبورش كتفكر المنظر)..

رشيد:قالو ليا شي قتيلة خايبة

هدى:اه فففف الله يرحمها وصافي

رشيد:نهار لول فاش خدمات وشفتها كي كتزلل على الكليان الى جاو مع عيالاتهم محملتها ماقبلتها وضرت فيها مرة وجوج وكنتي تتضوري فيا

هدى:مممم(كتشرب من القهوة)..

رشيد:نهار سكنتي معاها قلت ليك لا راه مازاكياااش

هدى:مظنيتش لهاد الدرجة..كلشي كيتصاحب وكلشي كيدير ولكن ماشي لهاد الدرجة أنا نخرح من هنا وهي تدخل ليا بنادم لدارنا من هنا..

رشيد:هذا هو بنادم الله ينجيك منو هي مشات عند الله وتما غتحاسب..المهم نتي ديري بالك

هدى:يكون خير ياربي(شافت فيه )شفتك وليتي ضريف..

رشيد:أش باقي كندير هنا؟؟الله يعاون منشوفش وجهك حتال خر الشهر ضبري لمخك

هدى:سير فحالك

خرج معاودش تلفت مخليها فالمحل فاش جاو البنات فرحو حيت لقاوها حيت رشيد كيفقص على الجهد وممولفينش الخدمة معاه..

وهاكا رجعات لروتينها فالخدمة من دار للعمل والعكس صحيح..ولات مكترجع حتال الليل حيت المسافة ف طاكسي بيض كتقول تدي غداها تتبقا تما حتى كتسد وكترجع لدارها تعشا وتنعس ..

*****

فواحد الليلة راجعة من الخدمة ياله حطها الطاكسي وكملات على رجلها دازت خدات الحليب كيعجبها تديرو فالعصير ولا تشربو بارد هاكاك طالعا فالدروج وكي ولفات تسمع الهضرة بزاف فدار الحاجة صفية بحالا دارها زاوية..مع وصلات للطابق فين كاينة دار الحاجة مع تحل وخرجات هي بقفطانها وشعرها مقطعها كاري..كلها مكمشى لكن شادة فراسا

صفية:هدى لباس عليك؟

هدى:(سلمات عليها)لباس الحاجة ونتي لباس؟؟

صفية:الحمد لله ابنتي..كي غادية مع خدمتك عاد جيتي؟

هدى:ياله سدينا

خرجو ضيافها كلهم نساء سلمات عليهم ومشاو مخلينها واقفة مع هدى

صفية:دخلي تعشاي ابنتي

هدى:مرة خرا ان شاء الله

صفية:مرحبا بيك فاي وقت ابنتي الدار داركم..

تبسمات ليها وشكراتها على لطافتها وبغات تمشي وهي تسمع صوت غليض ديال شي راجل كيقول وراها:الحاجة الواليدة مشات؟

صفية:عاد مشاو اولدي واقلة جا ليهم باك

تلفتات بدون وعي تشوف مصدر الصوت شافت فيه وطلعات فحين هو كتم غضبو داخلو وبدون شعور حتى هو ضار جيتها شايفها كالعادة فالدروج شافها غي من الجنب..مزاحش عينو عليها رغم صوت صفية لي كتهضر معاه لكن عقلو سرح بيه ليها اخر مشاف يديها لي محطوطين على حافة الدربوز

زفر ونطق:دنيا هانيا الحاجة..

خرج فحالو معصب والعروق فيديه غيطرطقو مزير على يديه وكينهط قول كان كيجري..خرج نفس سخووونة وجبد من جيب الشورط الجينز ديالو باكية تالكارو شعلو مغدد وبقا واقف حدا سيارتو كيسوط كي اللفعة تقيسو يتفركع..لابس شورط جينز مع سبادري ورجليه مزغبيين على الجهد بلا يديه لي كيبانو من التريكو لي لابس نص كم..مع تبرقيعات ديال البرص لي كيكتاسح جسدو..كمل داك الكارو كيترعد وعينيه غي كيضورو ..الصدر كيطلع وينزل فالاخير دوز نمرة باه وبلا مقدمات قال:مي فالدار؟

الحاج:ايييه جبتها

عبدو:مزيان

قطع عليه مخلاهش يسولو حيت غيسولو غيطلق عليه قطرانو..بقا تما حتى تهدن شوية عاد طلع فحديدتو وزاد مع الطريق مكسيري..جاه اتصال من "يوسف"

جاوب :وي

يوسف:فين أخويا..مغتجيش؟؟

عبدو:فين نتوما؟؟

بوسف:ف ****** جي جي راه زاهية دريات كوان واعر

عبدو:معاكم عمر؟

يوسف:معانا غي جي

قطع عليه مخلاهش يكمل هضرتو وشد الطريق لفين قاليه..وفلحظة طاحت فبالو بمشيتها وبديك الشوفة الغير مبالية لي شافت فيه دارتو بحالا مكاينش وهادشي هو مامولفوش بتااتا..معروف عليه بلا ميهضر يطيحك..بفورمتو الواعرة لي عندو..بكثرة ما المغاربة كلهم مكرشيين هو لي عندو طاي واعرة وخادم العضلات والكرش لي شافتو تحل فيه فمها وزادو البرص لي مزين لحمو على اللحية والكاسكيط رغم أنه زين وجهو زين عادي كاين مازين منو لكن الهيبة عندو والصوت يخليوك تطيحي فيه بلا متحسي..الى غي حنحن كيستاعد يهضر راه قضى غرض خاصة ولينا فعصر ان البنت كيطيحو فالشكل قبل المعنى

وقف سيارتو الفخمة ديال لوكاسيون أمام ملهى ليلي راقي داكشي الخاتر والواعر ماشي اي ملهى..عطا الساروت للكارد ودخل كيتفحص المكان بعينيه نفس الأشكال ونفس الوجوه..راقصات وعروض مغرية وكل طبلة فيها شلة حاطين قطعة ناضية فيها غي الشراب الغالي وكل واحد معنق ساطة..الضواو كثار ميقدرش يميز صيفط ميساح لصاحبو ونعت ليه فين ماحس بيه حتى وقف عليه لقا كل واحد معنق وحدة حداه والطبلة مزوقة لعلك ترضى...طلب ليه شيشة وضرب كويس بعدا هو لول يريق بيه عاد نطق:هادو هوما الكوانات؟؟

يوسف:(مقرب ليه حيت صوت الموسيقى)ناااضي اعشيري...التيتيز فينما مشيتي ...شيشة ناااضية اش باقي بغيتي

عبدو:خص لي ي****** أنا لي جاي عندك(شاف فعمر)شوف ليك بابلو اسكوبار (عاقد حجبانو متعرفو ضاحك ولا مغوبش)

يوسف:هذاك ضبر على هاد ختنا راها لاعباها عليه بنت دارنا

عبدو:(حطو ليه شيشتو وهز تيلي كيخربق فيه)بنت دارهم راه نعسات دابا بقاو غي بنات الخير

الصداع والموسيقى والطبلة مقادة ودماغو ناشط لكن باش تبان ليه فوجهو وتقول..بدلات ليهم السرباية تحت طلب عمر القطعة من جديد وعينيها على عبدو لي ناشر عضلاتو..تحنات بشويا حتى بان صدرها وقالت:خاصك شي حاجة؟

شاف فيها وجر من تيو تشيشة مكمش عينيه:التيقار

زادت معاوداتهاش كتلوز فيها وحتى هو تبعها بعينيه حاضي منحنيات جسدها..مؤخرة مكورة ومبومبية ومئة فكرة وفكرة ضارت فدماغو عليها حتى نطق عمر:كتموت على السربايات..

عبدو:(هز كويسات كيضرب فيهم)حدي كنشوف..أنا باقي نعاود

يوسف:ديالك مافيها مايتعاود على شويا كنتي غتكمل العمر فالحبيبيس هههههههههه

سكت مجاوبوش ديجا دماغو مرون وافكارو متضاربة ..ملي جا فاكونص وهو من هادي لهاديك ..ضرب لي قد عليه وناض مخلص لي عليه وخرج عينيه حمريييين خدا طونوبيلتو وشدها طوالة وحدة للدار لي كاري ينعس فيها...كي وصل باركا الطونوبيل وهبط مزاكيش فوقفتو..طلع للدار..ومشا نيشان للناموسية تلاح فيها بحوايجو وغطس فنوم عميييق واخر صورة جات فبالو بهلوسات الشراب هي يديها لي فيا بزاف تالخواتم.. مفاق حتال الجوج تنهار وغي الضو تالشمش لي فرع ليه راسو اما ميفيقش..خسر سيفتو وناض سد الريدو وراسو غيطرطق عليه..بزز كيحل عينيه...قنطوه حوايجو حيدهم وبان صدرو وكرشو لي مخدوميين نيت تعشق تحط عليهم راسك..حيد حتى الشورط وحك حجرو شويا ومشا نيشان للحمام طلق عليه الما محيد حتى السليب تيحاول يصحصح..كيبان جسمو مابيض ماسمر بين وبين ومبرقع بالبرص لي بدا كيتمكن منو وابدا واش شكل ليه مشكل...

لوا عليه فوطة وخرج كيقطر كيلبس عليه رابط الإتصال بسفيان ولد عمو لي داز شحال عاد جاوب

سفيان:خويااا

عبدو:عام باش تجاوب

سفيان:حدايا الناس

عبدو:طالع لطنجة تمشي؟؟

سفيان:وايلي هههه نقضي شي أغراض ونتبعك

عبدو:ضبر لكرك أنا غادي

قطع عليه مخلاهش يكمل وهادي قاعيدة فيه يقطع فيك الهضرة سوا هو لي معيط سوا الطرف الآخر..غي كيكمل هضرتو وعاود نتا لراسك..وبالفعل جهز راسو هز حوايجو لي غيخصوه وشدها نيشان خدا قهوة كحلة ضرب كاروه ومشا لعروس الشمال طنجة..

******

أما لالة هدى راه حياتها عادية مافيها حتى جديد من غير ختها لي كضل فارعة ليها راسها بموضوع التعارف

اكرام:(كتفطر وشادة ابيل فيديو)واغي شوفيه بعدا

هدى:غنبلوكيك والله حتى نبلوكيك..بقا ليا غي تريكة ال سعود

إكرام:(خسرتت فيها سيفتها)ماشي سعودي بحريني..وصاحب علي وكيقلب باغي يتزوج وبغاها مغربية

هدى:اوا يديها مغربية أنا مالي؟؟

إكرام:علاه الاخت بلجيكية وأنا مفراسيش

هدى:(ضحكاتها)ههههههههههه سيري بعدي مني راه هضرت معاك ماباغيا تعارف مابغيت حد فوتو ليا ترمتي

اكرام:تكسابيها بعدااا

ناضن من بلاصتها وعطاتها بالظهر :هاهيا شفتيها على قدي منفوخة شويا

إكرام:حيدي عليا دايرا كي اشهار ديال السم

هدى :سيري فرقيتي عليك..بقا ليا غي حتى انا نقول شلونك

إكرام:والله كون ماعرفتو ضريف وولد الناس منشكروش ليك..حاولي وعطي لراسك فرصة

هدى:سيري فحالك البنات جااو

قطعات عليها مخسرة سيفتها قايلة:مزيان تبارك الله بقا ليا غي سواعدة هععععععه

كملات نهارها عادي حتى لديك الستة هاكاك الشمش قربات تغرب باقيا ضاربة فبلاصة وبلاصة لا وهي تنطق مخاطبة ماجدة:شهوتي فالكريب بشوكولا والبنان

ماجدة:ضربي الطوالة وعلى يديك ليمن كاين واحد كيديرهم غزاالييين داير غي طوينيبيلة صغيرة محرك بيها داير حتى ماشين تالقهوة

هدى:الناس تاع البروجيات الصغار نعام الالة

ماجدة:(كتستف الحوايج)كيدخل منو صريف حتى هو

هدى:ماحد الدعوة خاوية غنمشي نجيبهم بغيتي؟؟

ماجدة:محوزقة القضية

هدى:دابا نجيب ليك معايا

خرجات هازا بزطامها وغادية بالمهل كتسرح رجليها لي جاراهم فصنيديلة والوجه مزين بكحل فالعين ومع الشميشة ضاربة فيها اراك للزين كيترعد..وعلى الضورة لقات طونوبيل مفتوحة من لور فيها ماشين تالقهوة وحداها طبيلة خاصة بالكريب والناس كيتقداو..وقفات كتسنا نوبتها وكتلعب فتيلي حتى وصلاتها وهي تنطق:عفاك كريب شوكولا بنان وكثر ليا الشكلاط

هز فيها راسو وتبسم ملي شاف العوينات:نكثرو الالة

تبسمات ليه وتسناتو كيقاد ليها وفنفس الوقت فرانا عبدو طونوبيلتو ونزل ياخد قهوة..لابس تيشورت مزير عليه فالكحل مع شورط دجين ولحمو برونزيي مزيااان الا نقيطات البرص ..لابس سبرديلة وداير كاسكيط كي ديما..حمحم ونطق بصوت غليض:شي جوج نوار

..:هي لولة

هدى:(واقفا بعيدة عليه بخطوتين)دير ليا وحدة شوكولا ووحدة كراميل عفاك..

لاهو تلفت ليها لا هي تلفتات ليه..لبس نظارتتو الشمسية وشد القهوة لولة جغم منها كيتشعر مذاق الكافيين وكيتسنا الثانية..جبد من جيبو فلوس مدهم ليه وعطاه الكاس الثاني ياله بغا يتحرك برجليه كان غيعثرو السير لي ممسدودش مزيان..زفر بغضب يادلي مقطوع وياله فايق بعد سهرة ناضية وقال:الخراا

تلفتات هدى بشويا لمصدر الصوت كان مهبط الكاسكيط والنظاظر بتاتا واش ميزاتو ولا ستعقلات عليه..شافت غي يديه هازين القهاوي بجوج وهي تحنى بدون تردد وقالت:صبر أنا نسدهم ليك

هو شاف غي جسد مرا كيتحنا باش يسد ليه السيور وسمع حتى صوتها لكن ابدا واش عرف شكون مولاتو حيت حانية راسها كتقاد فعقدة السيور بسهولة..مع سالات وقفات قايلة:مكانوش مسدودين مزيان(شافت فيه كتبان ليها غي الكسدة اما وجهو متقدرش تحقق مع الشمش لي ضاربو فيها من الجنب)

تلاقاو وجاهم مع بعض..هو بقا كيشوف فيها وفلحظة بسيطة ستوعب بلي هي لي كيشوف شحال من مرة..رمقها من ورا النظاظر بنظرات هادئة عكس ملامحو وشنو كتبين..كيشوف عوينات قدامو مكحليين ومجبدين بالماسكارا ودلك اللون ديال القهوة هو لي ملصق فعينيها..مقدرش يزيح نظرو على عينيها وستاغل انه داير نظاظر باش يشوف براحتو..اما هي غي هضرات قلبات وجهها تاخد شنو بغات حتى سمعات الدري كيقوليه :هاك الصرف

شافت فيه لقاتو هاز جوج قهوات مكاينش كي يدير يشد وهي تشدو من عندو وقربات ليه باقي مكوانسي بلاصتو..بان ليها جيب الشورط وحطات ليه الصرف تما غافلة انها خلقات قرب بيناتهم خطير خلاوه هو يبقا غي يشوف ويشم رائحة عطرها لكن لا مجال للمقارنة بعينيها لي مقدرش يزيح نظرو عليهم...

وعى على راسو ملي شافها شدات كريب وغادية وهو ينطق بصوت غليض:شكراا..

هدى:(بدون ماتلفت)مرحبا

لقات هاد الكلمة ومشات فطريقها مخلياه متبع ليها العين وكيعض على شفايفو.مافيقو غي صوت سفيان من الطونوبيل:واطلقنا خلاص واش كيعصروها منك

مشا كيزرب دخل عطاه القهاوي وحرك الطونوبيل بشويا مركز مع الطريق غادي معاها فالريتم..

سفيان:مالك؟؟(شافو فين كيشوف)واانا نفهم

مركز مع السياقة ومعاها هي باغي يعرفها فين شاداها علاش؟؟الله وأعلم وسفيان حداه حاضي وحدة خرا حداها غادية هازا مهاز قلبي

سفيان:واطرف هو ممممم

وقف بعيد كيشوفها دخلات للمحل وييه يطرقو على الفولون وكيفكر...حتى نطق سفيان:واصاحبي راه مشاات لهيه(كيخرج راسو من الشرجم متبع مولات الطرف)راه هيياا ضوور اصحبي

عبدو:(وعى )زنزنتي ليا فالطنطون ديال كري

سفيان:الكر هو لي فلتنا دابا

عبدو:(ضور الفولون)هبط تبعها ففف باشاااار

سفيان:ماكنفهمكش ههه واش ماشي هي لي تابعين

حرك ليه راسو بالسلب ونطق:وشكون؟؟

عبدو:ارا ليا قهوتي لنبدا نهاري بيك

سفيان:(مد ليه قهوتو)النهار راه سالا الشريف صباح الخير هههه فين شاديينها

عبدو:للمطار نجيب علياا

سفيان:جات؟؟صافي صفااات ههههه

سكت عبدو مركز فسوقانو وعقلو فيه غي عينيها..عينين صافيين بنكهة القهوة البنية مزينين بلون أسود تخلي لي يشوف فيهم يحلف ان المبدع هو الله

"عيناك بحر تاهت به سفني ...أنا الذي لا يهزني برق ولا رعد..أعين متلألئة تهزم ثباتي"

يتبع...