أقوى مما أدرك الجزء التاسع

هدى:هادشي كولو ماكيبررش ليك فعلتك...كيفاش تحضيني؟؟أنا درية صغيرة؟؟

عبدو:عقلي ومقال ليا..تعشيتي؟؟

شافت فيه بنظرة ياربي الصبر حيت هاد التنقاز ديالو من موضوع للآخر كيعصبها وتينرفزها..ساطت وماجاوباتوش وناضت كتقلب فثلاجة وكتقرقب فالماعن بلا متهضر وحتى هو مدواهاش المهم عندو لابيل دايزة وشايفها كتحرك قدامو ...بدات حتى هي كتحط اادجاح يطلق...وكتسمع التقرقيب عندو ماهضراتش بتاتا ومشافتش فيه..حتى ريح ففوتوي وبدا كياكل هاز تيلي اخر فيديه كيقلب فيه..كيبان غي نصها وهو ينطق:مبينة نصك خايفة ناكلك؟؟

هدى:خليتك حتى تكمل طيابك الشاف موحا

عبدو:تقلقتي حيت داير عليك العسة؟؟

هدى:(بانت كاملة هازا موس وبصلة)ماشي تصرف هذااك الناس وصلو للقمر ونتا باغي تعرفني اش درت

عبدو:علاش شاداها بطريقة خايبة فيك مايفكر شويا..فنظرك وحدة غندير ليها العسة الا وراها كتعني ليا

هدى:(رجعات كتقطع البصلة)إلى نيت كنعني ليك مخصكش تبقا تخلعني هاكا..داير عليا العسة علاش؟؟

عبدو:فهميها كتعجبيني، فهميها بلب باغيك فحياتي كيفما بغيتي تفهميها فهميها

هدى:(ضحكات)فهمتها بلي نتا مريض فراسك هههههه

عبدو:لدابا باقي ماشفتيش مع التمكريب ديال بصح..غي صبري عليا

هدى:(ضحكات )حضيني هههههه راه ماشي هاكاك الإهتمام

عبدو:(بذكاء )كون تعرفي الإهتمام كيفاش كيبان

تبسمات وقالت:كيفاش؟؟

عبدو:كان خاص الوقت تلاقيك معايا فاش كنت فالمغرب

هدى:ههههههههه مكناش غنتفاهمو(عماتها البصلة بالتقطاع)احححح حارة

عبدو:بغاو يمرضو ليا العوينات وحنا العوينات هوما علاش ضاير الفيلم

هدى:هههه كيعجبوك عيني (الدموع نازلين)

عبدو: سي..أول حاحة شفت فيك هي عينيك..

هدى:(قلبات عليه شفارها)اوا بصحتي هههههه كيشبهو ليا ديال ماما الله يرحمها

عبدو:سعدات باباك بقا كيشوف العوينات ديما ماشي بحالي أنا..

هدى:طايح عليك واحد العنب ليوم خطير ههههههه ولكن عجبني

عبدو:(مبسم كيشوف فيها كتقطع البصلة والشال معذبها)غا رتاحي عمرك تسمعيه هعههه معنديش مع هادشي

هدى:أنا نيت هههه خلينا حرشييين

عبدو:غتندمي ابنتي ههه

هدى:غا خليني مامولفاش الرطوبية

عبدو:(كياكل ويشوف فيها)زعما نتي معرفتي حتى حد ورا ماطلقتي

هدى:(ببرود)الى قلت ليك لا غتبقا تقولي مايميكنش وتولي تعطيني الهضرة قلت اه غنتسما ممزياناش..اللهم دخل سوق راسك

عبدو:(شعل كارو حيت سلا ماكلتو)ههههه المهم عندي دابا أما قبل هانيا

هدى:دابا نيت شكون قاليك مكنعرف حد

عبدو:حتى نحصلك ونتفاهمو

هدى:معندك فين تحصلني ههه صافي مشيتي دابا

عبدو:غيخفا عليا نجي..راه vol واحد وهاني معاك

هدى:ممممم سير سير خليك فبلادك

عبدو:باغيا تهناي مني ولا؟؟

هدى:اييييه ههه

كملو هضرتهم لمدة طويلة هو كيكمي ويشرب من كاس مرظاتش لبال كاع واش شراب وهي مجمعة معاه مونسها محيد عليها القنطة لي كتجيها فاش كدخل للدار..كتقلب غي معامن تشد الجموع فابيل الى مكانتش إكرام كتبغي تطرطق..لقاتو مسالي راسو حتى هو وبحرا ماتشدات ليه كيسمع ليها كتهضر..كيشوف هدى اخرى غير هدى الجعواقة لي موالف..كتهضر بالرزانة وكضحك حتى لقاو راسهم ضربو ساعتين ونص تالهضرة

هدى:فراسك هضرنا كثر من ساعتين

عبدو:كثرتي ليا السحور وأنا عدويا ندوي فتيليفون بزاف

هدى:غتخليني نحس براسي هههه سير خليني ننعس راه عيييت

عبدو:غتنعسي نيشان؟؟

هدى:(على نيتها)نحك سناني وندير سيروم لوجهي وننعس

عبدو:ممم واخا تصبحي على خير

هدى:باي

قطعات معاه وهي تبسم مرتاحة حيت جمعات مع شخص جديد ولقاتو حتى هو فيه الجموع جالس كيسمع ليها..مرة يشد فيها مرة يضحك معاها مرة مغوبش ويعطيها فالمواعظ ..ناضت دارت شنو قالت ليه وهي تمشي تنعس نيشان الحمام سخسخها

وبالفعل دازو أيام وأيام وتلاوها شهور مدتهم ثلاثة أشهر خرج فيه الصيف ودخل فصل الشتاء..فهاد الثلث شهور مشات إكرام فحالها ورجعات هدى غي المحل والدار وعادة جديدة هي عبدو...هاد الأخير لي هي ممحدداش معاه العلاقة محاسباش راسهم واش مصاحبين حاسباه عزيز عليها وكترتاح ليه وحتى هو عمرو جبد ليها شي هضرة كيهضرو كل نهار..مكيقولوش صباح الخير لا كيخليو حتال الليل كيصوني ليها كيشدو الجموع بالسوايع كيتعاودو شنو دارو فالنهار..تعرفات عليه كثر وهو كذلك..كيدويو عادي دايرين هدنة غير طبيعية وكل شهر كتصيفط ليه كرااه بزز عليه...فحين هو راه مرتاح معاها ماكيطلب منها لا تصويرة لا يديك لا رجليك..حاط عمر كيعطيه فين خرجات ومنين جات وحتى هي لقاها صفحة بيضة لي دارتها كتقولها ومعمرو حصل الكذوب وهادي خصلة عشقها فيها غتخرج فيك عينيها وتقوليك مدرتش وواحد بحال عبدو أكثر صفة كيقدسها هو الصدق...هو الآخر ولفها يهضر معاها واخا كتعصبو شي مرات لكن كينعل الشيطان بحكم مكتدخلش فيه محاسباش راسها واش بجوج وهو العكس كيحس بيها كتنتامي ليه..

واقفة فالمحل كتعطي لكليانة تجرب مونطو فالكري حتى صونا التيلي كان هو..طلات بانت ليها غتعطل وهي تجاوب:الو

عبدو:صافا؟؟

هدى:صافا ونتا مامولفاش ليك تعيط فالصباح

عبدو:مالي داير معاك توقيت

هدى:هههه موالفاك فالليل

عبدو:(ضحك)حتى الليل زوين ياله تولفيني

هدى:عندي كليانة فالمحل

عبدو:امتا غتسالي؟؟

هدى:عندي العشرة خصني نشوف رشيد يجيب شي بنت المحل بدا كيتعرف وكيطيح عليا كلشي

عبدو:مزيان قوليها ليه..نخليك بغيت غي نصبح عليك

هدى:ههه بسلامة

خرجات الكليانة وخدات شنو بغات ومشات فرحانة مخلية هدى ملاهية فالمحل حتى سالات وقيتها وهي تبدا كدخل المانكانات لي فالباب ..بقات ليها وحدة ياله حطات عليها يديها وهي تحط عليها يد فيها نقيطات بيضين تلفتات بسرعة وهي تلقاه قداامها...خرجات عينيها بصدمة...كان هو بشحمو ولحمو لابس سروال دجين وتجاكيط سخونة حيت البرد فاسبانيا ..نفس الكاسكيط حاطها على راسو وعينيه كيرميو نظرة حادة عليها

ياله بغات تهضر وهي تشوف بتسامتو خفيفة قايل:بان فيك البرد

هدى:اش كدير هنا؟؟(مصدومة)امتا جيتي

عبدو:(هز المانكان مدخلها خلاها مبلقة عينيها)البارح

هدى:(تابعاه)كيفاش البارح؟؟وعلاش مقلتيهاش ليا؟؟

حط المانكان وتلفت ليها طلعها و هبطها مكبطة مزيان وكان اول مرة يشوفها بدجين لاصق مبين أنها رشيقة ماغليضاش وماضعيفاش..عندها فورمة ديال سنها ومقتناعة بشنو عندها..الحجاب الدافي لي دايرا مرخوف عليها مع التريكو بالكول والوجه الصافي مدايرا والو حتى نقطة..

خلاتو بلا هواه يهضر :شوو هاد الزين هذاا كولو كيتبايع ويتشارا مع العيالات

هدى:(ولفات أنه كينقز من موضوع لموضوع)ههه نبيع مع الرجال؟

عبدو:(قرب منها كيلغي المسافات)شفتي هانتي غطيري ليا النقشة لي داير

هدى:قلتي ليا كتجي من الصيف للصيف؟؟

قرب كثر وعينيه كيحومو على نقطة القهوة فعينيها:مكانش عندي علاش نجي..ولكن اليوم عندي علاش

هدى:(بذكاء راسمة ابتسامة)شنو هي؟؟أنا؟؟متقولش ليا أنا حيت ماغنتيقش

عبدو:ههههه بعدا عارفا راسك مدايراش ليا علاش نجي

هدى:الحمد لله عارفا راسي ميكروبة هههه كي وصلتي مزيان؟؟

عبدو:(قرب)مغتسلميش عليا(مد يديه)

هدى:(صافحاتو بيديها وعينيها كيبريو بشوفتو)على سلامتك

عبدو:(شد يديها بلطف وبغا يجرها يبوسن فوجهها ساعا لقا اليد لوخرا حاصراه ومبعدة راسها)مالك؟؟

هدى:(جرات يديها بهدوء)زعمتي هههه نعل الشيطان راه قربتي تبوسك

عبدو:(بنبرة صريحة)وراه باغي نبوووسك..اريها غي فالحنك

هدى:(تحركات من حداه)مريض لا ههههه (مشات هزات السوارت)خرج خليني نطفي الضواو

عبدو:(كمش فيها عينيه)الواحد ميلقاكش حنينة زعما؟؟

هدى:نبوووسك هي حنينة؟؟صافا با نتا لا؟؟

هبطات الضواو وخرجات معاه كتسد عاطياه صاكها يشدو ليها حاضيها فكل حركة..عاد شداتو منو وقالت:زيد زيد عارضاك للعشا

عبدو:زيدي نتي..(تنهد)قمعتيني قمعة نموت ومنساهاش

هدى:غا نساها غنعطيك لوخرين ههههه عزيز عليا اه ولكن ماشي نسلم عليك بوجهي مالي خرقة ديال الحمام

عبدو:الله يهديك عليا..كظلميني الميكروبة

هدى:تعلمت تمكريب غا منك هههههه (شافت الطونوبيل)

عبدو:طلعي

طلعات وريح حداها لقات الطونوببل كتقلب بريحة الكارو..فتحات الزاج وهو يقول:البرد عليك

هدى:هذا راه بار ماشي طونوبيل ويلي هههه اوا اش كتعاود؟كي دايرا اسبانيا

عبدو:(سايق بهدوء باش ميتحركش البرد بزاف)خاصاها غانتي

هدى:اسبانيا دقة وحدة هعهه أنا حياتي كاملة ف كازا ومراكش

عبدو:نسافرو أنا والمرضية ديالي

هدى:واقول هدى خايبة ههههه كتقوليا المستحيل ههههه

عبدو:حني فيا شويا وأنا جاي نشوفك زعما(شاف فيها)

هدى:(تبسمات)اشنو ندير؟؟هههه أنا هاكا

عبدو:عاطيك زعما وقت ومخليك براحتك

هدى:اوا يكون خير..فين غنمشيو؟؟

عبدو:نتعشااو مزال السهرة طويلة قدامنا ولي نقولوه فابيل نهضروه فاص..

هدى:واخا ههه

معرفاتش علاش كتحس بالراحة معاه يمكن من الجيست لي بين فيه أنه معاها وحاميها خلاها تحس بانه إنسان يعول عليه..إنسان يحميها ويكون ليها السند بعدما فقدات الشعور بهاد الإحساس..مغتنكرش شوفتو فرحاتها ومتوقعاتهاش وكانت فداخلها كتقرا تفاصيلو خلسة على عقلها لي كيمنع تسرب هاد الأفكار لقلبها

وقف قدام مطعم راقي وزوين وكيف لا و هو من ديما كيديها لبلايص زوينين..شافت البلاصة وقالت:صبر نقاد وجهي شويا جايبني هنا كي الاستدعا ههه(حلات الصاك جبدات عكر ونزلات المراية)

محسات بيه حتى طيرو ليها ولاحو بإهمال: حيدي من البسالة الخاوية

هدى:اش كدير؟؟(بعدم فهم)عطيني عكري

عبدو:جاييين نتعشاو ولا نتبوزاو..عكرغاع وحمر من الفوق نزلي نزلي

هدى:باغيني نزل هاكا

عبدو:(بجرأة مد يديه دخل ليها الزغيبات شويا)قادي فولارك ونزلي ..بلا متزيدي والو...حلاوتك فالطبيعي أما الى زدتي شي حاجة غادي غي تقوديها عليا كثر ماهي مقودة

هدى:(غوبشات)مكنفهمكش والله..باغيني ندخل صفرة(بأمر حلات يديها)عطيني عكري(يديها محلولة فالهواء قريبة ليه)

محساتش بيه امتا قرب وجهو شويا وشد يديها بيد وحدة مقبل راحة يديها فغفلة من الزمن قايل:هاكي بوسة وهبطي تعشاي المرضية ..

حسات بملمس شفايفو تحطو على راحة يديها كي نسمة الهواء..لطيفة وحنينة وعفوية خلات قلبها يضرب بجهد لثواني مراقباه بعينين هادئة كتشوف هاد الحيط اش كيدير فيها بهاد الحركات..مجاتش فين تعطي ردة فعل حتى كان هبط من السيارة ..حامت ببلابز عينيها حول المكان بدون ماتحرك راسها مانعة ابتسامة خجولة تخرج منها وداخلة في صراع مع قلبها وعقلها..هزات صاكها وهبطات تابعاه كتشوف فيه هابط كيقاد السيور ديال الكاط لي لابس وهي تنطق مبدلة الموضوع:مغتعرفش غا تهنا(مدات صاكها)شدد

شدو بالفعل حيت راه يعيا يسد مكيعرفش ليهم كاع..وهو من النوع تاناس لي مكيعرفش يدير حوايج ساهلين عند الناس العاديين..تحنات كيف أول مرة حتى عقداتهم عاد شدات صاكها وقالت:لي شاف الوقفة يقول صافي هذا هو العقل نتا السيور كيعثرووك

عبدو:(حط يدو على ظهرها بشويا )ماشي بالضروري نكون كنعرف ندير كلشي

ضحكات بخفة وسكتات تتحس بيديه كدوز ورا ظهرها لكن مكتقيسهاش بنسبة كبيرة بحالا غي كيحركها حداه..دخلو للمطعم الزوين والراقي وشدو بلاصة معزولة كي جلسو قالت:فيا الجوع

عبدو:حتى أنا..من الفطور

هدى:(هزات الموني)ومالك عليها؟؟امتا جيتي بالضبط

عبدو:(كيشوف فالموني ويحك لحيتو) البارح بالليل مشيت نيشان للكلينيك

هدى:مريض شي حد؟؟

عبدو:(هز راسو ودار ابتسامة فرحة)ولدات ختي

هدى:بصح هههه مبروك عليها اش ولدات؟؟

عبدو:بنت

هدى:على سلامتها أنا كيحسابني جاي على ودي ههههه مسكينة أنا

عبدو:(هز حاجبو فيها وسد الموني وبنظرة ذكاء)ماتستاهليش زعما؟؟

هدى:منظنش ديرها على قبلي..

عبدو:ماحدي ماشفتكش كديري ردة فعل على اشنو كنعيشو مزال ماندير والو..

هدى:مخلص ليا الكرا وكتعاملني زوين ونهار جا خليل عاونتيني حتى تفكيت هذا كولو ومدرتي والو

عبدو:باقي مشفتي والو...(بنبرة صريحة)الى شديتي معايا الطريق غا تشوفي..

هدى:(ضحكات)هههه علاش انا؟؟

عبدو:مافيكش تخاور.

هدى:شي وحدة هادي خوراتك خلاتها ليك متورخة ههههههه

جا السرباي خدا طلبهم ونطق:خليتها ليها متورخة..هي لي خسرات

هدى:ههههه أش خسرات؟؟هي الصراحة لي مشات بكري خلاتني أنا نحصل هههههه(شداتها الضحكة)

عبدو:(لمح فكلامها بلي حسباتهم بجوج)حصلتي حصلة مقودة غي صبري نسالي ليك وتفرجي

هدى:(كضحكها هضرتو حيت عارفا معندو مايصور منها)ماعندك مادير غي رتاح

عبدو:مباغياش تفهمي ليا..نتي عارفاني ماطالب منك والو..باغيك غي تكوني معايا

هدى:(بهدوء)شنو كتعني نكون معاك؟؟

عبدو:اشنو كتفهمي فيها؟؟

هدى:فيها بزااف..فيها نتلاقاو بزاف فيها تشد فيا فيها تمد يديك عليا

قاطعها:هادشي ديال البراهش أنا معنديش...أنا يا نح&*&وي وحدة يا منقيسهاش..أما مرة بوسة مرة تعنيقة داكشي غي كيعصبني

خرجات فيه عينيها قايلة بصوت منخافض:سكت الناس كتسمع

عبدو:اوا نتي لي جالسة كتشرحي شي حوايج مكاينينش..

هدى:وفيها هاد تخسار الهضرة لي فيك كيعصبني

عبدو:ماعنديش مع نهضر عادي..كلشي عندي بتخصار الهضرة كنحس بيها تخلقات ليا الهضرة الخاسرة ههههههه

هدى:حيت نتا خاااسر..شويا ديال الإحترام بعدا راه حدااك بنت زعما

عبدو:اوا البنت متحنيش الرااس شويا وتنقصي تعفار

هدى:(عوجات فيه فمها)مامعفراش نتا لي ميكروووب..خلينا نتعشااو وخلي بلانك مزال وقتوو..غدا خدامة؟؟

هدى:لا

عبدو:ندوزو النهار مجموعين

هدى:(بأسف)عندي عراضة خصني ضروري نمشي

عيدو:عند من؟؟

هدى:خو غزلان تزوج هههه وعارضاني

عبدو:هو خو غزلان اش كيجيك؟؟ماشي خوك ولا عمك علاش تمشي

هدى:(على نيتها)حيت قنطت ماكنخرج فين مكنمشي فين غي الدار والخدمة ومعنديش معامن نخرج..غزلان مبرزطة بالخدمة وأنا كثر منها نهار كنجلس هي خدامة كنبقا غي فالدار كنضور فعينيا

عبدو:أنا جيت نخرجو دابا

هدى:نخرجو واخا ولكن خصني نحضر..مها مسكينة عيطات ليا وعرضاتني

عبدو:غا بغيتي ترونيني بهاد العراضة

هدى:ونتا مالك؟؟غادي تبرز بلاصتو ولا؟؟خلينا نشطوو

عبدو:امتا عندك؟؟

هدى:العرس بالنهار مدايرينش شي حاحة غي جليسة وجامعين الناس دايرين اللامة وصافي..

سكت مادواش عارفة الى هضر غيسمعها قطران مقطر وغيبقا عليها بزابوور مالو نهاية..تحطات الماكلة وبداو كياكلو مجمعين فمواضيع اخرى وهضرتهم فالابيل ترجموها فاص حتى سالاو العشا وهو يقول:تحلي؟؟

هدى:لا مافخاطري والو..خود نتا

عبدو:خاطري مشهي شي بوسة من عندك وينعل بو لي ماتشدو السكرة معاك المرضية..

بقات كتشوف فيه بصدمة وهي تنطق:شويا لباس؟؟عاد قلتي معندك مادير بالبوسان

عبدو:(شير للسرباي طلب الحساب)نتي حالة خاصة هه

هدى:أنا لي عارضااك

عبدو:(جبد الكاش)ان شاء الله مرة اخرى

حط الحساب وناض برفقتها دار ليها الطريق وبقا لاصق حداها وعينيه كيضورو كي النمس فحين هي كتشوف فاص..طلعو للطونوبيل وقال:نتقهواو؟؟

هدى:اشمن قهوة ههه مشا الحال(شافت فتيلي)خصني ندخل لدار

عبدو:باقي الحال خليك معايا شويا(جبد كارو وحل ليها الشرجم)

هدى:مرة خرا..نيت ترتاح شويا نتا كتبان عياان

عبدو:كثرة المطارق كتعيني

هدى:امتا غتمشي؟؟

عبدو:(شاف فيها)كتسخاي بيا دغيا؟؟

هدى:(حسات براسها زادت فيه)مقصدتش..غي بغيت نعرف

عبدو:بعد غدا بالليل جيت غي نشوف ختي

هدى:مجية على غفلة وصافي ممحسوباش..

عبدو:الصيف هاني معاك نحرر فيك تاني الصيف ههعه

هدى:بعداا عارف راسك كدير الكوارث هههه

عبدو:رخفي معايا راسك تشوفي عبد الدائم واحد اخر

سكتات مهضراتش مخلية برد خفيف كيلفح وجهها لدرجة نيفها كزز عليها ونيفها كيلقط ربحة النيكوتين ..أما هو مد يدو طلق موسيقى راي كي ديما لا علاقة ليه بالجو لي هوما فيه..ماوقف حتال حدا العمارة وقال:هانتي وصلتي

هدى:نخليك دابا..

عبدو:امتا غتسالي العرس ديالك

هدى:والله معرفت..السبعة هاكاك حيت غيديروه بالنهار

عبدو:ضروري تمشي؟؟

هدى:متزيدش فيه عرس عادي وبغيت نفوج

عبدو:بغيت ندوز معاك النهار..كنت مخطط ندوزوه فخرجة كازا نديرو شي اكتيفيتي نديفولاو شويا

هدى:كون علمتيني مانعطيش الكلمة ليها..

عبدو:واخا..لي بغيتي

هدى:تصبح على خير

مجاوبهاش بانت فيه مفكووع من هضرتها وحتى هي مبغاتش تحكر حيت غا دخل معاه فنقاش هي في غنى عنه وماغتوصل لحتى نتيجة..هزات أغراضها بهدوء ونزلات راسمة ملامح الراحة على وجهها..دخلات للعمارة وهو يصوني تيلي شافت سمتيو وهي تشد الخط ضاحكة:هههههههههههه

عبدو:ماتبقايش ديري الماكياج..كتباني زوينة بلا بيه

هدى:هههههههه جيتك اليوما كي الاستدعاء هههه

عبدو:(هاز عكرها فيديه)السر عندك غي كتبغي تزيدي على راسك

هدى:علاش هادشي ماقلتيهش فاص ولا خايف تنزل منك ضلعة

عبدو:نطلع نقولو ليك فقاع دارك الى بغيتي

هدى:(خافتو يديرها)سير فحالك ..ويلي

عبدو:تصبحي على خير

قطع مخلاش ليها الفرصة فين تجاوب وهي تفرنس قايلة:مسطي

دخلات لدارها مبسمة ونازلة واحد السكينة على قلبها ليها زمان محساتش بيها..مايمكنش تنكر فرحات فاش شافتو حيت ولى جزء صغير من حياتتها..لقاها متفرغة ومعندها حد بتاتا وعمر داك الوقت لي عندها..حيدات حوايجها ومشات كتحيد كتغسل وجهها وكتراقب ملامح وجهها بلا ماكياج وكتحاول تفكر واش هضرتو بصح ولاا لاء

اما هو راه شدها نيشان لدارهم..مع توقف رش ريحتو ودار معطر الفم..لاح مسكة ففمو ونزل..حلات ليه مريم سلم ودخل نيشان لبيت ختو فين لقاها مسندة هازا تربية كترضع فيها وحيت مافيهش الآداب دخل مدرم ما دق ماحنحن حتى خرجات فيه خيرة عينيها صايحة:أ بنادم ..فين داخل؟؟

عبدو:سمحي ليا الواليدة

خيرة الله:شهاد الترابي؟؟فين راك كابر؟(صايحة بصوت مرتافع)

عبدو:(حنى راسو)مقصدتش

وهيبة:(بنت غلييضة نييت صحراوية قح هازا تربية فيديها)ماشي مشكل أ ماما..

خيرة:مشكل ملي ولى البراني يدخل ليا لداري بلا اذني بلا كلمتي

عبدو:أنا براني الواليدة؟؟

خيرة:(بملامح جامدة ولا ذرة رحمة فيها)أنا ماشي مك..سير قلب على مك فين خليتيها..والى باقي كدخل لهاد الدار راه غي على وجه الحاج أما أنا راه مكتسوا عندي وسخ الناقة

سكت وقلبو كيتعصر كيضور فعينيه ويديه مزيرين باغي ينفاجر وهي تنطق وهيبة بعتاب:ماما

عبدو:خليت ليك الراحة

خيرة:لي شاف طيفك مايشوف الرااحة..خرج عليا من داري

حرك راسو وخرج حانيه متوقع ديما ردود أفعالها وشحال ضراتو بهضرتها حتى ولفها وكيردها لقلبو وفالاخير كيقول نستاهل..

وهيبة:ماما حرام هادشي لي صايرة ديري

خيرة؛(شدات منها التربية مبسمة)خيري بببنتي وبحبيبتي وبزينة العايلة

وهيبة:ماماا

خيرة:مالك؟؟

وهيبة:واش مزال ماهداك الله..حني فولدك

خيرة:انا معندي ذكورة كرشي ولدات غي البنات وهذاك راه الى ماسمحت عليه ماعمر. يعيش مرتااح..

وهيبة:ماما راه مقصدش

خيرة:(مبدلة الموضوه)فين راجلك

ساطت وهيبة بنفاذ صبر وقالت:معرررفتتتش

معارتش اهتمام بتاتا حيت قلبها مات على عبدو ..تشوفو دايز قدامها متحرك فيها حتى حاجة..هي عند بالها دفناتو وهو راه مدفون فالحياة كل نهار

فاليوم الموالي..ناضت على خاطرها ملقاتش اتصالو وهي تعيط ليه وفيديها كاس تالقهوة..عدة رنات ولا من مجيب وهي تحطو وبدات كتساءل علاش صونات ليه أصلا

فطرات على خاطرها وخرجات للحمام ناسية تيلي فالدار حتى سالات عاد رجعات لقاتو غيطرطق بليزابيل..دوزات نمرتو :الو

عبدو:(ببرود)فين كنتي؟؟

هدى:فالحمام

عبدو:الصباح كولو حمام..خدامة فيه ولا(بدا كيرفع صوتو)

هدى:مالك؟؟درت شي حاجة؟؟

عبدو:بقاي تجاوبي على تيليفونك تخلي دلمي مرون

هدى:(ماعجبهاش الحال)مالك كتغوت؟؟ياك لباس؟؟دايرا معاك شي كونطرا

عبدو:(ستافزاتو هضرتها)تجمعي شويا ونتي باغيا طيري

هدى:والله منجاوبك..وحتى دابا منبقاش نجاوبك

قطعات عليه وخلاتو كيصوني كيصوني كي الحمق..هزات حوايجها ومشات كتزرب لعند غزلان غتمشي هي وياها للكوافورة دايرا ليه سيلونصيو

غزلان:(لابسة جلابة جاتها لاصقة برزات ليها المؤخرة حيت غلاضت مؤخرا)اصاحبتي فين هاد التعطيلة

هدى:غي سكتي مالقيت طاكسي حتى بغيت نموت(بسمات ليها)شهاد الزين نتي العروسة ولا؟؟

غزلان:ههههه يخليك ليلي..زيدي زيدي نقادو دغيا..جبتي حوايجك

هدى:جبتهم ههه زيدي(شافت تيلي)ياختي راني غيسطيني هذاا

غزلان:جاوبيه ههه

هدى:راه جا لبارح شفتو

غزلان :حلفي هههه وجاوبيه

هدى:جاي كيغوت عليا فين كنتي؟؟(شدات الخط)نعام

عبدو:(كيكمي فجوان)قيدي عندك اش كديري..ملي نشوفك وبقاي تخرجي فيا حلوقك

هدى:(بانزعاج)سير اعبدو بدل ساعة بخرا ..خليني ندوز ساعتي ترونكيل

عبدو:(بغضب)وساعتي أنا؟؟ندوزها بوحدي ؟

هدى:(كضور فعينيها)واش شوية لباس؟؟واش هازا ليك البزولة؟؟اويلييي

عبدو:غي خرجي فالصباح معرفتك فين مشيتي وكمليها بعرس معرفتو ديالمن وقولي شويا لباس..انا شكون يبقا معايا

هدى:(بغات تفقصو)معاك الله

عبدو:ياك؟؟واش انا نستاهل منك هاكا؟؟جاي نشوفك منين ومنين وكتخليني بوحدي

هدى:(مبغاش يتفهم ليها)عبدووو(ساطت)راه حشومة نخوي بصاحبني

عبدو:وانا محشوماش تخوي بيا؟؟رجعي ياله ماتمشيش

هدى:(ضحكها)ههههههههه اوا يا عبدو ههههههههههههه

بقات كضحك ليه فوذنيه وهو ينطق معصب:نتي فوجي وانا خليني

هدى:كيعجبك تنكدها علي؟؟

عبدو:منكدتش عليك..عومي بحرك

قطع عليها وهي طرطق بالضحك وقالت:وناري شحال كيعجبو نجلس فاادار ومنخرجش

غزلان:(مضاربة غي مع الطاكسي)ههههههههه مغبن ياختي

هدى:مجمر الغمة هذاا والله هههههه

خداو طاكسي ومشاو لسونطر قادو وجههم وهي أصرات على ماكياج لاعب على العيون خلاوها القدام لي عندو فشي بلاصة يبنيو..وفضلات تلبس غي كسوة فالبلونكاصي طويلة دافية ولايحة فوقها كيمونو ديالها مخيط دافي فالاسود مع فولار لايحاه فوق شعرها مبين شويا من شعرها مع ماكياج ناعم من الفم ومخدوم من العينين

غزلان:(هازا كدير سناب)ضحكي ههههه

هدى:(ضحكات)هادي فخاطر مجمر الغمة هههخخخ

شداتو وحطاتو فسطوري بلا صوت ومشاو فحالهم للدار فين كانت الحيحة نايضة وشي داخل شي خارج ..شدات بلاصة حدا المدعوين شافت سطوري غزلان ودارت حتى هي تصيورات وحطاتهم قصدا دايرا قليب أسود..شافها فالبلاصة وكتب ليها:جيتي خايبة

ضحكات وكتبات:شكراا ..عينيك لي زوينين

عبدو:(جاوبها فالبلاصة)نص فشعرك عريان..باقي مدخلش للإسلام

هدى :محقش عليه(ضحكات)

عبدو:صيفطي ليا تشوفم

هدى:راه فسطوري

عبدو:شي حاجة مشافها حتى واحد

ضحكات وكتبات:راك شويا لباس؟؟مالك مغبن كي الدري الصغير

عبدو:(صور ليها جالس فالاوطو فاص مع البحر)خاصاني غا نتي

هدى:نوض عوووم هههه

عبدو:كضحكي علي ياك؟؟

بغات تجاوبو جراتها غزلان يشطحو وبدات كتحرك بشويا عليها كتحرك يديها بالتويل والعونيات كيضربو جابو ليها الهويش محسات غي هي هازا معاهم البندير وكتضرب بكل مافجهدها محيحة تحلفي عليها شيييخة لا فالصوت لا فالضريب اما هو شافها قراتو ومجاوباتش وهو يكتب ليها:كاينين الرجال؟

.علاش مجاوبتينش؟؟

شكون كاين؟؟

مخلياني بوحدي

غادية ضبري على راسك

باغيا تزوجي من العرس

جاوبيني ولا نجي نشوهك تما

وبزاف تالميساحات مرة معصب مرة كيرخف فيه النفس المهم ينكدها عليها ولباس مباغيش تسرط ليه علاش تخليه بوحدو...

عبدو من النوع لي كيبغي الإهتمام..وكلشي ديريه معاه دك ديال تمشي ضوري تسافري بوحدك وتخرجي تفوجي معندوش ديك الثقافة..تقولي ليه راني ياغيا مساحة لي يقوليك لا انا هو المساحة والمحيط ..وفاش عرف هدى غتمشي بقا عليها بالهضرة حتى طيبها

كملات الطرح عرقانة وعطاتهم البندير ضاحكة ورجعات لبلاصتها هزات تيلي كتقرا ميساجات وكتموت بالضحك وهي تكتب ليه :نجيب ليك حقك من الدجاج عالله تفوتك الصعرة

شاف ميساجها غي من الفوق ولاح تيلي كيكمي ومنشوي حدا البحر ضارب دنيا بركلة بعدما برد غدايدو فالميساجات

قحين غزلان صوراتها ونشرات السطوري ديالها هي زياها كيغنيو وهي كضرب محيحة والابتسامة واصلة ليها فين وفين..دازت نصف ساعة دخل للواتساب طلعات ليه سطوري غزلان حيت محتافظ بنمرتها..شافها وعاود وعاود وعينيه كيتعقدو وهو يكتب لغزلان بلا حشمة بلا حيا:مسحي القلاوي

مشافتش غزلان الميساج بتاتا حيت كانت مشغولة كتشطح وتردح مع الناس وتسربي مع دارهم..من غير هدى لي جلسات ترتاح وكتضحك عليه حيت مغرقها مسيجاتها..فالعادة كتعصب لكن مني شافتو كيتصرف كي الدري الصغير جاها الضحك..صونات لختها وراتها الاجواء عاد ناضو كلاو وشربو وحلات بكعب غزال..شافت ساعة كانت ثمنية وناضت مودعه غزلان ومها وعاطياهم هدية على شكل فلوس ..

غزلان:(واقفة معاها قدام الباب)شدي طاكسي وسيري

هدى:كوني هانيا

غزلان:(شعلات تيلي تشوف الساعة)ويلي شوفي(وراتها )ميساج من عبدو

هدى:حلي نشوف ههه

حلوه ومع قراوه وهي تزيد غزلان كتضحك اما هدى غوبشات وبدات كتنكر:قليل الادب حيواان ممربيييش..اش كيحساب ليه رااسو

غزلان:قتلنييي هههه(مشات مسحات السطوري)

هدى:علاش مسحتيييه خليييه

غزلان:لا اختي منخسرش الضواسا مع عزيزي

هدى:(ميقات فيها)عزيزك؟؟مجمر الغمة هذااك(صونا التيلي) الو

عبدو:ساليتي؟؟

هدى:اش داك الميساج مصيفت لغزلان؟؟محشمتيش

عبدو:وهي اشدوك الفيديوات لايحة..وجالسة حتى نتي كتضربي فرحانة مكانش كيحسابني شيخة

هدى:(ببرود عكس العافية لي شاعلة فيها)هانتا عارفتيها...وقيد عندك هاد الفعايل ديال الدراري الصغار لي كدير

غزلان:(شيرات ليها)بسلامة ههه

حركات ليها غي راسها ورجعات كتهضر معاه:درتي ليا بحالا مشيييت نقصر فشي بااار

عبدو:باش نحش لمك رجلييك..ضسااريتي نتي

هدى:دخل سووق راسك

عبدو:فين كاينة؟؟

هدى:فالجايحة ليمنشوفش فيها وجهك..نكدتي علي فرحتي

عبدو:وليت انا دابا نكدي؟؟ياك؟؟

هدى:ااه

عبدو:فين كاينة؟؟

هدى:ماشي شغلك..وقيد هاد الفعايل

قطعات عليه ومشات كتقلب على طاكسي بحرا مالقاتو عطاتو فين ساكنة وشد بيها الطريق وهي كتشوف فالتصاور ديال العرس وتفرنس عجبها راسها..حطها طاكسي خلصاتو ونزلات كتقاد شالها والبرد محرك شوياا داير الحال على الشتا..مع تمشات جوج خطوات وقف عليها كي قباض الرواح قايل:دوزي تحركي

هزات فيه عينيها شافت فيه بنفاذ صبر:مكتسالاش نتا؟؟

عبدو:(طلعها ونزلها)دلمها قول هي العروسة

هدى:(كتقلب ليه شفارها)بصحتي وبراااحتيي

عبدو:تحركي..ساليتي ليا دابا؟؟

هدى:نتا مسموم..مباغينش نمشي ننشط

عبدو:أنا؟؟مخلياني ومشيتي ..واخا نكون محاسبانيش

هدى:واش حتى العرس حرام راه غي مبغيتش نخرج فيك عيني اما نقوليك ماشي شغلك

قرب ليها شدها بشويا من ذراعها وحاني راسو لعندها قايل:مفكرتيش زعما مع راسك راه توحشني

شافت فيه بعويناتها لي كيطيرو ليه العقل الى تكحلو..مجبدة عليه الشفيرات لجمات ليه فمو معرف باقي ميقول..عوجات فمها بشويا خافية ابتسامتها:وشكون قاليك أنا لا؟؟ولكن يكون فيك شويا ديال الصبر

هبط يديه من ذراعها لامس صبيعات يديها المزينين بخواتم صغار كاملين..ملي حس بيها مدارتش حركة رفض وخدا راحتو..داعب بصباعو صبيعاتها كأنه كيشري هدنتها بيهم عكس العصبية لي فداخلو..

عبدو:قولي ليا توحشتك وبرديني راه شادني عليك الصعر

هدى:(تبسمات وعينيها نزال فعينيه بجرأة لقات راسها ملي شافت فين تهدن وهي تختارها طريق)ضروري نقولها؟؟خليني نبينها

عبدو:لا غي قوليها(تمكن من يديها شبكهم مع يديه و قربها منو)ياله معايا

هدى:(حسات بيديه كتضم يديها ومجراتهاش)نبدل علي

عبدو:الناس يشوفوك هاكا وانا لا..(يدو لوخرا دخلات ليها شعرها)ياله معايا هاكا

هدى:(حنات عينيها حتى شاف الشفيرات من الفوق)واخا

جرها بشويا مشابكين اليدين وحل ليها الباب مساخييش يطلقهم..هو لي من عادتو انه ميحلش ليها الباب اليوم حلو ليها حيت مبغاش يطلق يديها وهو بحرا ماشدها..طلعات وهي كتساءل مع راسها واش هو لي كان معصب؟؟واش هي براسها لي خلاتو يشد ليها يديها..مجاتش فين تحلل كان طلع حداها..طلق ليا الشوفاج وخلاها تدفا..

هدى:محشوماش الميساج لي صيفتي لغزلان

عبدو:عزيز عليك الشوهة

هدى:شوفو شكون كيهضر..واش نتا حمق؟؟(بهدوء)انا ولفتيني خلاص تخسار الهضرة والبنت شنو دارت؟؟

عبدز:وااصااافي كنت معصب وهي حطات داكشي(تحرك)فين بغيتي تمشي

هدى:(تنهدات)فينما بغيتي(حيدات صباطها)عيييت

شاف فيها ورجع شاف فالطريق:غدا غنمشي

هدى:دغيا؟؟

عبدو:خليت شغلي وخصني نرجع

هدى:مزيان..(بدات كتحيد خواتمها)معاش عندك الفول؟؟

عبدو:العشرة تصباح

هدى:نمشي معاك للمطار؟؟

تلفت ليها مستغرب وقال:زعما؟؟

هدى:نديرو الصواب معاك ولكن فاش غنرجع؟؟

عبدو:نخلي ليك الطونوبيل وسيري للخدمة وغنوصي عمر يجي يديها لاجونص

هدى:صافي واخا

عبدو:زعمتي؟؟

هدى:وياربي غي سلاكة معاك نتا وصافي..غا كتنكر وتصعر على والو

عبدو:مخلياني بوحدي كي الجن وغادية تحيحي

هدى:الله يعفو عليك داير كي.دري الصغير

مجاوبهاش شعل كارو وبدات تتسوك وتنفخ مهضرتنش وحتى هو مدارش شي حركة حتى وقفو امام قهوة زوينة تاني..وباش كيعجبها كيجيبها غي لبلايص الزوينين

نزل وتبعاتو محسات بيه حتى شدها من يديا مشابك صباعهم وهي تقول:ولفتيها؟؟

عبدو:(هز يديها باسها)بدينا كنأفونصييو..خلينا زوينين

هدى:واخا

دخلو وخداو بلاصة .المطعم كانو فيه ليفوتوي..حشرها فالقنت وجلس حداها قاطع عليها الما والضو ..طلبو شنو بغاو وهو ينطق:اري نشوف التصاور

هدى:شد يديك عندك ونوريك

جبدات كتوريه التصاور هي وغزلان وهي بوحدها وحتى فيدواتها وهي كضرب وتغني..جا ففيدو فيه كتغني:بزز منو نمشي للعرس بزز منو وتضحك والشال معذبها

عبدو:غا مابغيتش نخسر ليك خاطرك اما والله متعتبيها

هدى:من نيتك؟؟شوف داك الحكام الخاوي انا راه منقبلوش ليك ..حكم فختك فمك اما انا راه منتسناش واحد يجي يوريني شنو لي صحيح وشنو لي غلط..الضسارة والطيران دوزتهم صغيرة دابا راني بعقلي

عبدو:الله الله على الزين كان كيطير(جرها من ذراعها مقربها)انا راه مكاينش لي مطير لمي العقل قد هاد الثباتة ديالك

هدى:(عجبها الحال وضحكات)تخيل كون كنت كنطير

عبدو:منشوفش فيك ولصقك كوني حو&ي&*^تك ورميتك وهنيت راسي ماشي بحال دابا

هدى:(قرصاتو)قليل الترابي

عبدو:(ضحك)مكتبغيش الصراحة المرضية ههههههه

حط السرباي الماكلة وتبسم ليهم وهو يتبعو بعينيه وقال:نوضي بوووسيييه

هدى:كون غنبوس نبووسك نتا لي شاد العسة علي

عبدو:(فرنس)حلفي؟؟بوووسييي(مد ليها حنكو)

قرصاتووو بيديها فحنكو بشوياا وقاست اللحية قايلة:ديال يشدك الواحد يعطييك قتلة

عبدو:(ستحلى قرصتها)عطيني بوسة المرضية مرة وحدة صافي منبقاش نطلبها

هدى:(ضحكات)هههههههه والله لشمتيها واخا تكون غتموووت..راه وليتي باااسل هاا ههههه(جاب ليها الضحكة)

عبدو:(مبسم لضحكتها)خايبة فحقي..وليت نطلب بووسة...بوووسة

قلبات وجهها كتحيد خواتمها من جديد:كول كول هعهه بوسة قاليك ..انا مك باش نبوووسك

عبدو:مي كاع مكتبوووسنييي غا تهناي..ولكن عقلي(ضرب بصبعو الطبلة)شحال مابقينا غنبوووسك غنبووووسك

هدى:تما عرف صافي انا وياك..بخاطري ولا بلاش

عبدو:بخاطرك الزين..وغتبوسي وتعاودي

هدى:(قلزات ليه بشويا)هاااك ها بوسة هههههه

شدو دغيا لواه ليها وهبط يديها لتحت قايل:ضسرتيي ضسرتيييي

هدى:هههههه بشوي هههه كتلويي صبعيي(حطات يديها على ذراعو ونطقات بالم)وااعبدووو

عبدو:(زير )كتقلزي ليا هههه

مع بغات تغوت وهو يوقف عليهم شاب طويل عريض وتيتيز قايل:عبدووو

عبدو:(هز فيه راسو)اهلا اهلا

ناض عندو سلم عليه بوجهو وتعانقو فحين هدى رجعات كتاكل بدون ماتعيرو اهتمام:هانيا اخويا

..:حمد الله ونتا صافا؟؟

عبدو:الله يحفظك..حتى نتا راك داخل؟؟

..:واه جيت نشوف الواليدة(شاف فهدى)سلام ختي

عبدو:(حط يدو على ذراعو)مكتسلمش محيدو ليها الطبيب ههه(جرو)

..:اش هادشي؟؟هههه الحجاب كاع تزوجتي؟؟

عبدو:لا..غي مكتسلمش

..:سبحان الله..متغبرش اخويا راني نريح لهيه مع دراري وقلت نسلم عليك

عبدو:الله يكبر بييك اخويا

توادع معاه ورجع لبلاصتو وهي تنطق:انا محيد ليا الطبيب السلام؟؟

عبدو:انا طبيب غا حيديه..اش ليك تسلمي عليه

هدى:معندي ماندير بيه غا سولت هههه واش انا عاد كليت فالعرس وكناكل دابا؟؟

عبدو:كولي مالك(لمس حناكها)تغلاضي ليا

هدى:(عاودات قلزات ليه)سير قللاك ليا

ضحك على عفويتها وشدها من قرفادتها :راه غنهرسوو ليك هههه

هدى:طلق غيتفرجو فينا الناااس هههههههه حرام عليك

طلق منها كتكحب ورجع كياكل كتهربو ليه كتدير ليه حركات بلا متفكر

كملو خلص وناضو فحالهم مشااديين وضاحكيني ناشطين وصلها فحالها ودارت معاه لغد ليه تمشي معاه للمطاار

عبدو:جاوبي على التيليفون

هدى:واخا بسلامة

عبدو:يهديك الله اري بوسة

ضحكات ونزلات مخلياه كيضحك عليها وشد الطريق لدار والديه يشووفهم قبل مايمشي واخا عارف راسو غيلقا البرود ..

دخل لقا الدار عامرة هادي عمتو وهادي ينت خالو وغي الصحراوية تنسيك فلوخرا..الاغلبية لابسين ملاحف وهازين وراهم خيورات هي..كلشي مكحلات ومنورات بالملحفو الصحرازية المغربية مستمتعين بجوهم العائلي وفرحتهم لوهيبة البنت الوحيدة عند الحاج ..

سلم على بعض بنات خوالو بالوجه معندوش السوق ..قلب على باه ومشا سلم عليه

الخاح:(بفخر)الله يرضي عليك اولدي..رااجل تبارك الله

عبدو:(باس راسو)الله يحفظك الواليد..حم مي فينها

الحاج:خليها منها لراسها غتمشي بلا خاطر بلا متهضر معاها

عبدو:(تنهد)هضر معاها الواليد راه ميمكنش هادشي..كتعذبني معاها وأنا مداير والو

الحاج:كلشي عارف اش وقع غي هي راسها قاااسح بحالك ..وسع خاطرك

عبدو:عيييت والله حتى عيييت

تسمع صوتها بفرحة كتنادي على الحاج:سيد الحاج..خالي يسول عليك

تلفت ليها عبدو شافها بقفطانها كتبان فعينيه ملكة..دير لي دير راه كيعشقها حيت مو خاصة علاقتو معاها كانت زوينة بزاف وفليلة تقلب كلشي..رغم انها والداهم الا انها مهلية فراسها مزال كتيان زويينة حيت حروفها مزينين بالزين الصحراوي

شافتو تلغات بتسامتها وزادت مهضراتش باقي خلاتو غي كيشوف ومشوق غي يعنقها..

الحاج:الله يهديها هذا مانقولو..جلس تعشاا

عبدو:لا كليت مع شي ناس

الحاج:بالنفع ان شاء الله

مشا عبدو ودع باااه وداز لختو عنقها وحتى هي عنقاتو فرحانة بيه كيف لا وهو خوها الوحيد..السند ديالها بعد الاب ولي معمرو خسر ليها الخاطر..

سالات الرواين فدارهم وكلشي تفرق..دخلات خيرة الله كتبدل حوايجها وتغسل وجهها..لبسات بيجامة قصيرة كيبانو رجليها مطبزيين ..تخشات ففراشها حدا الحاج لي كيقرا شويت تالقرءان وقال؛خيرة الله

خيرة:مممم

الحاج:مزال مهداكش الله تنعلي الشيطان وتحني فداك الولد

خيرة الله:انا معندي ولاد عندي بنية وحدة

الحاج:غتحاسبي على هادشي أخيرة..كل نهار نقول غيهديها الله ونتي مقسحة رااسك..قساحت كبدتك على ولدك؟؟وعبد الدائم مزااال نسيتي اش كديري على قبلو

خيرة:كون عرفتو غيعيشني داكشي منولدووش من كرشي (عنييها فاص)

الحاج:اش دار الدري كاع؟؟قضاء وقدر داكشي كان غيوقع

خيرة:متقولش ليا قضاء وقدر..هو السباب طلبتو ورغبتووو وبكيت قداامو ومسمعش ليا وفلخر خرج علي وعلى راسو

الحاج:ان الله غفور رحيييم

خيرة:وانا مغنسمحش ليه والى غي سخطي راني ساخطة عليه

تقلبات عاكياه بالظهر سامحة لدموعها ينزلو مسبسبين على خدها بصمت وهي كتفكر فقط نهار واحد لي تقلبات فيها حياتها رأسا على عقب..

"فلاش باك"

"هدى"

خيرة الله..مرا صحراوية مئة بالمئة..من أم واب صحراوي بنت النخلة والجمل..كبرات فالصحراء حتى وصلات سن الزواج وتزوجات بأب عبد الدائم لي خداها بالصفا وجاتو فرصة يهاجر للديار الاسبانية والهولندية مترددش انه يمشي بعدما خلاها والدة عبد الدائم ووهيبة وعبد الله

بقات عايشة مع دارهم بخير وعلى خير..متحطش يديها فالخايب وكانت مدللة من طرف دار ناسها حيت هي الزوجة الاولى وأول عرووسة وحتى هي انسانة لطيفة جدا وكانت هازاهم فوق كفوف الراحة..جات ظروف خلات الاهل يتوفاو والاب مقدرش يخلي ولادو وحدهم فالصحراء فا جابهم للمدينة الييضاء قرب خوه عبد المولى باش يرد البال ليهم وفعلا عاشت خيرة فدارها معززة مكرمة مع ولادها كتربي وتسهر وتكلف بكلشي فحين الاب فالديار الاسبانية كيدير مستقبل ولادهم..كان عبد الدائم أكبرهم وفرحتها الاولى وكان العزيز عليها حيت قريب ليها ومرضي كيسمع ليها وميخسرش ليها ثم وهيبة البنت الوحيدة عندها ولي كانت معمرة عليها فراغها ومونساها فوحدتها..عاد اخر العنقود عبد الله لي كان مشيبها على قولة ناس زمان كل دار فيها كيدار. والكيدار هو عبد الله لي كان صاعر ومجهد باغي غي يضور ويسهر ويلعب مباغي لا يقرا لا يخدم من صغرو كان كيطير كثر من عبد الدائم...هاد الاخير لي بمحرد مابدا كيكبر وكيستوعب ان باه برا يعني هو الراجل ديال الدار..خصو يعاون مو فالترابي ديال عبد الله لي كان بشهادة الجميع قبييح ومباغي يدير والو..ومع بدا يكبر كان عبد الدائم كيزيرو يقرا وغي خاضيه..

علاش ممشاش للمدرسة؟؟

علاش مدخلش؟؟

فين كان؟؟

شكون صحابو؟

معامن كيمشي

والدري كيكبر وعاد مكيضسار باه برا لي بغاها كيصيفتها ليه الفلوس موجودة وهوعايش الحياة..وصل 18 ومخداش الباك وشدو سلخو مزيان حيت كتاشفو بلي ممشاش يدوزو اصلا وكان غي كيوهمهم وديما خيرة الله كتصدى ليه..ديما كتفكو وتجي من جهتو حتى ولى كيحط عليها الراس..وديما هي وعي الدائم مشاكلهم على عبد الله...هي أم وكيعز عليها فاش كيضربو ضريب ديال المخزن..مرة فادعو مرة نافخ ليه عينيه حيت مل مرة خارج ليه ببلان

هاهو مشدود يوماين تلكاب..هاهو تشد على السكر العلني هاهو مضارب مع هذا هاهو مبسل على هاد البنت ..كان مشيب عبدو حيت مشاكلو مكيسالييوش..كيفكو اه مي كيسلخو باش يتقاد

وفليلة من اليليالي الباردة..كانت خيرة الله كتسناه يدخل..مجبدة فالصالة حاطة اتاي والساعة تشير الى الواحدة وعبد الله مزال مدخلش قلبها واكلها عليه حيت كيضور حتى كيعيا وكيجي يبات فالدار. وهاد المرة راه يوماين باش غايب وعبدو كان مسافر عاد جا وقالتها ليه..كتصوني وتعاود فنمرتو ولا من مجيب كيكون طافي ولا مشغول..

دخل عبدو كولو فازك بالما تالشتا ووجهو معصب بلا عروقو لي بارزيين..بعصببة سولها:مجاش؟؟

خيرة:لا..اويلي فين غيكون مشا؟؟نمشيو للبوليس؟؟

عبدو:خليك فالدار نخرح نقلب مزال ففففف اليوم نشرب من دم و والى فكيتييه متلومي غي راسك

خيرة الله:يرجع ليا بني على خير

حل لباب خارج وهو يلقاه واقف فالباب مقلوب بريحة الشراب..شاب مزال وصلش تلعشرينات من عمرو ضسروه الفلوس ولى باغي يعيش شي حوايج كبر من عمرو..ريحة الكارو والشراب كتعطعط منو..وغي مفرنس كانت عندو ضحيكة خطيرة ومسرار بزااف جايب الزين من مو والفسورية تقول ماشي خو عبدو لي غي مغوبش..رغم انه ضاسر لكن كان ضحوكي بزااف طالقها تسرح والعقل الله يجيب

غي شافو عبدو بحالا شاف الجنون..محس غي بيديه كتجرو من حوايجو مدخلو والاعصاب راكبينو باغي غي فمن يحطهم..ولاخر ممسوفش جايب الكاو

شافتهم خيرة بخوف عارفاه غيضربو وهي كأي ام مكتبغيش واحد من ولادها يتقاس..باغيا تربيه لكن كبدتها هشيشة عليه كتخاف عليه من ضريبو..

خيرة:(جرات عبد الله)عفااك أولدي خليه غي حتى يسحى وتفاهم معاه

بعدها بيديه وجرو عاطيه تصرفيقة خلاتو مشيتو تختل كثر ماهي مزاكياش..

خيرة:(شقهات)عبد الدااائم(مشات كتبعد عبد الله وديرو وراها)نعل الشيطان الليل هذاا

عبد الدائم:(طلق صوتو الغليض ولي فيه بحة غضب)وااااش باغياني نمووووت ولا شنووو؟؟واش مكتشوفيهش اش كيدير؟؟نبقاو حنا كل ليلة خارجين نقلبو عليه(حيدو ليها بسرعة وردخ ليه راسو مع اقرب حيط)مال الحمار لي ولدك مباغيش دير ه

عقلك؟؟حاسب رااسك راااجل(شد راسو وكيزدحو ليه مع الحيط)فرعنتي وليتي كتجي لدار شاارب

خيرة:(طاحو دموعها)طلق من خووووك عفااااك

عبد الله:ماما ماما(سخفان دوخاتو الدقة)

عبد الدائم (عطاه بونية لكرشوو)عاد بانت ليك مك؟؟فين كنتيييي(كشاكشو خارجييين)هضرر جاوبني كون راجل وجاوبنيي...فين كنتييي؟؟فييين شربتي؟؟كيدوووك دااوك خسرتي عليهم رزقك وجيتي سكرااان فرحان زعما؟

خيرة:(دموهها محبسوش شادة فعبد الله)طلق منووو واش باغي تقتلوو هءهءهءهء هالعااار طلق منووو

مسمعش ليها حيت كان معصب..شدو منها مزير جارو وكيهضر بالغوات:باغي السهير؟؟باغي الضوران والبلية خرج قاااود عليييي ودير لي بغيييتييي

خيرة:(كتجرو)وااانعل الشيطان طلق من ولدي هءهءهءهء عبد الدائم هءهءهءهء وا ولديييي

عبد الله:طلق الكحااار..نعيط لبابا نقولللها ايييه

على اثرها صرفقو تاني بيديه لي كي البالات تا داخ وهزو من الارض لاخو برا الدار وصاح فوجههو:تعاود ترجع ننحي دلمك..سير يضربوووك القنوت ويخوروووك القحاب باش تولي راااجل..بزاااف على مك صحرااواا(جر مو)زيدي دخلي خلي دلمو يمووووت

خيرة:(كتعافر باغيا تخرج)ولدي هءهءهء العار اوليدي خوك صفير معارفش(كتبكي وتنطر وتنخصص)هذهءهءهء على وجهي اوليدي وعلى وجه باااك

عبدو:متطلبينيييييش(صاح فوجهها)نتي لي ضسرتيه وخليتيه يطلع لينا فراسنا بهاد الفشوش

خيرة:واااش تسطيتي غتخليه يبات برااا؟؟راااه خوووك(بغات تحل)منخلييييهش يبات براا

جرها بزربة وصاح بالغوات:والله ميدخل خلي دلمو يبات فالزناقي باش يعرف اش مطاكييين عليييه والله وتحلي ليييه مباقي غتشوفي وجهي

زاد بعدما ضرب فالباب حيت مرضو فحياتو كيخافو تطرا ليه شي حاجة ولا يوكلوه شي حاجة..كبر كيشوف مو كتفششو حيت هو الصغير حتى خرجو رجليه شواري ولى عاطيها غي القصاير..خلى خيرة الله حاطة يديها على وجهها كتبكي وتنخصص تحطات بين نارييين.ولادها بجوج ومعرفات اش دير حتى الى بغات تعارضو راه ميمكنش تحل حيت سد وهز الساروت..طاحت حدا الارض كتبكي وتنخصص قلبها واكلها وميممكنش تصبر تخلي كبدتها يبات برا..كيديرهم كاملييين ومكيباتش برا كيرجع ديما وهي ديما مطاكية عليه

بكات حتى عيات ونشفو دموعها وناضت جالسة كتسنا الصباح يطلع باش تمشي تقلب عليه..راسها كيزدح عليها مع بان ضو تالصباح ناضت كتعرج بصحتها لي تهدات عليها بالمشاكل..دقات على عبد الدائم لقاتو فايق وهاز كيف ديما دفتر وكيرسم

خيرة:نوص اولدي قلب على خوك شوفو فين بات(تشد عليها قلبها)

عبدو:سيري تنعسي الواليدة..هذاك البرهوش تما غيبقا حتى يتربى

خيرة:واش ماكترحمش؟؟خوووك واحد لي عندك تبيتو فالزنقة؟؟مضركش خاطرك؟؟(زادت كتبكي)مابغيتش ضبر راسك خليني نخرج نلقا ولدي

زفر ولاح قلم الرصاص بعصبية:مغنقلبش ولهلا يقلب بيه..يمشي يترجل ويجي عندي انا درت جهدي معاه

خيرة:(بعصبية وكتبكي)باقر صغيييير بااااقي صغيييير معارفش واش نتا غي جيتي وكبرتي؟؟حتى نتا عذبتيني

عبدو:(صاعر بحالا ماشي هو لي كان كيريم بهدوء)عذبنك؟؟عمري سهرتك؟؟عمري جيتك حيط يلوحني لحييط؟؟عمري خليتك تففصي علي هااا؟؟

خيرة:كل واحد دوز حقو فيكم..حل ليا بغيت نشوف ولدي فين زاد حتى تولدهم وبيتهم فين بغيتي

ياله غيهضر سمعو الصونيط فالباب محهد..هي حسابها عبد الله مشات كتجري ناحية الباب حلات كترجا تلقاه هو ساعا لقات صاحبو الوحيد كيصوني مخلوع

...:خالتييي

خيرة:مالك؟؟فين خوك؟؟

...:عبد الله دار كسيدة لبارح بموطور

خيرة:(غوتات)أويليييي؟؟؟ولديييي فين ولدي؟؟ولديييي ولدييي (كتغوت)عبد الدائم

جا كيجريييي لقط الخبار تهز قلبو وتحط وقال:فين كاين؟؟

ف******

خيرة:(طاحت الارض)وا ولدي ولدي اش طرا ليه؟؟اش وقع لولديييي قوليا اولدي اش طرا لعبد الله

عبدو:(هبط حتى وقفها وقلبو قرب يوقف لدرجة فمو يبس بالخلعة)الواليدة وكضي معاياا غنمشي نشوف اش كاين

خيرة:ديني معاك ديني معاااك هءهءءهء(جات خارجة)زييييد

خرجات فعلا هاكاك ببيجامتها وشعرها عريان مفكرات والو ..حيت كبدتها هاديك نسات كلشي باغيا غي تطمأن عليه وهذا احساس غيعرفوه الامهات لي واخا اش يدير كيبقا ولدك منك معندك ماديري

ركبات مع عبد الدائم ولاخر لور كيوريهم فين داوه...طول الطريث كتبكي وتنخصص وتعدد بولدي اما عبدو راه مرفوووع قلبو غيسكت باغي غي يطمأن عليه..دخلو لسبيطار الدولة مع الصباح باقي فيه غي لي بايتين من صحاب الحوادث والمطايفات ها لي محلول ليه راسو ها لي نص وحهو مشا..منظر تقشعر له الابدان..سولووو عليه وتسنااو شويا لي كان بالنسبة ليهم عمر..حتى جا فرملي عندهم قايل:خويا

عبد الدائم:امدرا؟؟كي بقا

الفرملي:اش غنقوليك..الدري مات ليهم فالبلاصة طحنو الكاميو مللقاو مايجمعوو فيه

قفزات خيرة الله من فراشها بعد الكابوس لي جاها وصاحت بصوت مرتافع:ولديييييي..

قفز معاها الحاج شعل الضو وكتبان ليه شادة على صدرها وكتغوت ..ولى حافض حالتها غي كتفكرو ولا كتشوف عبدو كترجع تحلم بنهار مات ودفنوه..

الحاج:(ذرعها)خيرة أعوذ بالله..نعلي الشيطان غي كتحلمي

خيرة:(ستوعبات وبدات تتبكي شادة راسها)حلمت بولدي الحاج هءهءهءه ولدي عبد الله..

الحاج:(حافض السيناريو)الله يرحمو ياربي ويوسع عليه ياربي ضيقة القبور..أنا راضي عليه دنيا واخرة نفرشو ومغطيه بالرضا والله يرحمو ياربي

خيرة:(ناضت)تخنقن هنا هءهءهء غنموت ياربي

الحاح:(تبعها)رجعي نعسي فين غتمشي

خيرة:نتوضا نصلي جوج ركعات (كتبكي)وندعي مع ولدي

تنهد مستغفر الله عارفها حالتها جاتها وخصها دير لي قاليها رسها..مدة تسع سنين راه ولف هادشي وفهم حالتها النفسية كي دايرا ومناش كتعاني..عرفها منساتش وجرحها معمرو يتنساا

خلاها على راحتها فحين هي مشات نيشان كتشهق طلات على وهيبة لقاتها غتنوض وهي تقول كتسمح وجهها:نعسي نعسي ابنتي..(مشات طلات على حفيدتها)ياكما فاقت؟؟

وهيبة:مالكي أماما؟؟

خيرة:حلمت بعبد الله (طاحو دموعها من جديد)

وهيبة:الله يرحموو ياربي فهاد النهار

خيرة:امييين ياربي الى كانت عندي شي حسنة درتها هي لي تشفع لولدي حبيبي

زهيبة:امين

خرجات و مشات توضات وتوجهات للقبلة صلات ودعات مع عبد الله حتى بداو شهقاتها كيتسمعو فالدار كاملة جاتها حالتها من جديد كتبقا تبكي تبكي تبكي حتى كتسخف..حتى حد ماقرب ليها حيت ولفو ولاو كيخليوها على راحتها حيت الغد كتنوض مابيها والو

كل واحد فيهم حال عينيه مقرقهم فالسقف وكيسمع لبكاها لي متبدلاتش نبرتو لمدة تسع سنين متتالية..كيتها على ولدها متنساتش ليها كتلوم راسها وكتلوم عبدو

محسات غي براسها كتجبد من اليوم تصاور فيه عبد الله من لي كان صغير كتشوف ومرة تبكي مرة تضحك ..وكتفكر شقاوتو وتبسم وملي تشوف تصاورو مع عبدو كتزيد تبكي وقلبها يتعصر

حتى صبح الصباح و ناضت دوشات وغسلات وجهها وجدات الفطور عادي وصبحات عليهم بحالا موقع والو هازا حفيدتها وكتبوس فيها وتضحك معاهم حتى هوما داو على عقلها وسايروها

أما عبدو راه كان فاق بكري دوش ولبس عليه وشد الطريق عند هدى لي كانت حتى هي فايقة عارفة راسها واعداتو..جهزات نفسها بصايا تالجلد طويلة وعريضة خاشية فيها بودي فالبوردو سخيخن ودايرا فولار بطريقة عصرية مع لي بوط فرجليها..هزات صاكها ورشات ريحتها وفيدها التيلي ديالها كيصوني بنمرتو

هدى:هاني نازلة

قطع فالبلاصة وتسناها حتى بانت ليه هابطة دايرا شال سخون على كتافها مدفيها..طلعات حداه قايلة مبسمة:صباح الخير

جر يديها باسها من الوسط وقال بصوت مبحبح:صباح الزيييين

هدى:هههه صابح ناشط

عبدو:نتي كلك غادية معايا..تقدم ملحووظ

هدى:(جرات يديها بشويا)اوا شنو نديرو الصواب باش ماتبقاش تقول كتقمعيني

عبدو:باقي كتقمعيني غا رتاحي

هدى:فطرتي؟؟

عبدو:لا..حتى نوصلو ونمشيو نفطرو راه باقي الحال

هدىواخا

شد طريق المطار وكيوريها منين ترجع والطريق لي تسلك جابدين احاديث عادية بيناتهم خالقيين هدنة غريبة..حتى وصلو ..حط ليها الاوطو

عبدو:ياله نفطرو عاد نهز حوايجي

هدى:واخا

بالفعل هبطات هي وياه والجو بارد زويين مع نقيطات صغار ديال الشتا..محسات غي بيديه الخشنة حضنات يدها الرطبة لي على ايامها كانت كي ظهر القنفود..

هدى:(كيشدها هر فاش كيقيسها)يديك سخان

عبدو:الشراب

هدى:نسيت نتا سكايري هههه

عبدو:كتعايريني؟؟ههه

هدى:ومالي كذبت؟؟(شيرات بصباعها)ديك الكافي زوينة

عبدو:واخا

عجبها الحال حيت دار ليها خاطرها حيت هي مومو عينيها لي يشد ليها الخاطر ويدير ليها اش بغات..وفرحات حيت خداها لفين بغات وهو راه مكيحكرش نهائيا فينما جلس هو هذاك..دخلو كانت شبه خاوية حيت قريبة للمطار كيجلسو فيها غي الاجانب بزااف..خداو بلاصة وحيدات الشال على كتافها كتحك يديها مع بعضهم:السم فالزنقة

شافها مزيان اش لابسة مطلعة ومنزلها وقال:هاد الفولار لي كديري راه مافوولارش

هدى:مفهمتش

عبدو:كنعرف انا الحجاب كيتلوا على الراس مكيبان والو

هدى:وانا اش كيبان فيا؟؟

عبدو:غي لايحاه فوق راسك كتخليه مرخوف الى تحرك البرد وطيرو..كاع شعرك يبان

هدى:(ضحكات)هههههههه غي تهنا(حيدات الفولار وبانت بوني دايراها من لتحت مغطية الشعر كامل بالاضافة لتريكو لي كان كولو طالع يعني مكيبان والو..

عبدو:دايرا احتيااط(شد الفولار رجعو ليها)ردي ردي

هدى:نتسناك انا حتى تقولها

عبدو:امتا درتيه؟؟

هدى:(بعفوية)ورا الطلاق جاني فشكل نحيدو وانا كنت دايرا النقاب

عبدو:(خرج عينيه)كنتي دايرا النقاب؟؟

حركات راسها بالايجاب:ممممم

عبدو:كتهضري بصح؟؟

هدى:والله ههههه كنت منتقبة ومكنصلييش باش تعرفني كنت منافقة

عبدو:(ضحك)ههههه دابا كتصلي

هدى:ياربي تسمح ليا مرة مرة كنبدا ونقطع..وكنتمنى نشد فيها

غبدو:جاتني بيزاغ كل مرة مكتاشف فيك حاجة جديدة..زيدي كملي اش اخر

هدى:عادي ههههه فترة ودازت درت النقاب ودوزت حتى تقزااب ودوزت تشرميل دوزت الضوران فالدروبا والسانطروا

عبدو:(بفضول)تما فين عرفتي خونا؟؟(شافها قطبات حجبانها باستغراب)لي كنتي مزوجة بيه

هدى:لالا(بهدو٣ذ)هذاك جابوه ليا غي ناس..تزوجت زواج تقليدي

عبدو:بيزااغ..مكتعرفيهش وخديتيه؟؟

هدى:عقل الصغر وصافي هههه ونتا معمرك تزوجتي؟؟

عبدو:لا..(لمحها بنظرة اعجاب)مزال مالقيتش لي غتقبل على كراكر طيري

هدى:شوف شي سبيطار الحماق غتلقا شي وحدة تما هههه لي معندهاش العقل غتقبل عليك

ضحك بشويا وهز الموني:والله عندك الصح..طبعي خاايب ولي كتكون معايا كتخنق

هدى:(بتأكيد)نكأدها ليك هههههه كتخنق

عبدو:نتي غي باقي مساليتش ليك مزيان

هدى:(كتشوف اش تاكل)هادشي غي باقي مساليتيش ليا نهار تسالي شنو دير هههه

عبدو:(سد الموني)غتكوني لاحظتيها مغيااار بزاااف ومكنبغيش لي شفتو انا يشوفو غيري

هدى:اش شفتي الشريف ههههههه نعل الشيطان مغتشوف لا نتا لا غيرك

عبدو:شفت شفت (سها فيها)نهار شفتك بديك الكسوة البيضة وانا كنقول دابا هادي الى خرجات هاكا راه غيطيرو ليا بيها

هدى:(ضحكات)هههههههههههههههه مع انا ساهلة نطير

عبدو:هادشي لي مصبرني ههه (زعم)صيفطي لي شي تصويرة يلا فولار

هدى:(قلزات ليه)هاهو هههههههه مكتحشمش

عبدو:(مسح على وجهو)ههههههههه تفو على ميكروووبة (ضربها لذراعها)

هدى:(تقسحات وضرباتو لقرفادتو حتى تسمعات)ريييح يا مجمر الغمة

هو غي شافها زعمات وهو يعطيها دقة خرا لذراعها وحتى هي ماشي من العاكزين نزلات عليه للقرفادة عاود..بقاو دقة فيا دقة فيك بالضحك كيشد ليها يديها بجوج ويبقا يعطيها فالدق غي بالضحك وهي ميتة بالضحك.كتعافر باغيا غي ترجع ليه الدقات حتى صلاتها معاه للحنك وقالت:الله هههههه ياله شد (بعدات شويا)ريح

عبدو:(شدها من قرفادتها)ريحي نصرفق مك ههههههه(عطاها تصرفيقة لجبهتها)

بغات ترجعها ليه وهو يوقف السرباي طلبو الماكلة مع مشا قرصاتو فعنقو مغددة:شد ههههههه

صافي جبدات معاه الضحك ديال العصا وبدا عليها دقة هنا دقة لهيه وهي كتجمعهم كتنزل عليه للقرفادة وصوت ضحكهم مسموع منين ومنين حتى فطرو ضاحكييين ناشطين عاد ناض خلص..خرجو مدور ذراعو على عنقها مهبطها لتحت باغي يسلخها وهي كتنطر ليه حتى عطاتو لكرشو:هههههههه راه جعتيني منتوفة اعبدو براكة ههههه

عبدو؛قاسحة لدلمك ههههه

وقفو حدا الاوطو هو جبد شوانطو وهي وقفات كتقاد فولارها حتى حط فاليز وشكارة دارها فظهرو

هدى:صفي غي هادشي لي جبتي

عبدو:(وقف حداها )حيت على غفلة ..(شد يديها)مجبت ليك والو معايا

هدى:مكنتش غنشد اصلا هههه(هزات عينيها كتشوف فيه)امتا غتعاود تجي

عبدو:(زاد كيضحك)هههههههههه من امتا غادي حتال امتا غتجي هههههههه لالا وليتي متواضعة

هدى:واشوف ليك هاد الميكروب هذاا كيفما درت وحلة

عبدو:(شد وجهها بين يديه)والله مكاين شي ميكروبة قدك ههههههه غتوحشيني؟؟فرحيني وقوليها ليا؟؟

هدى:(كتحس بوجهها مشدود بين يديه بجوج وعينيه كيشوفو فيها)حمممم غتخلي بلاصتك

عبدو:نفمهمها هي توحشتيني

هدى:(حشمانة)وااصااافي ههههه سير ياله تحط وراقك وباكاجك

تبسم مخليها على خاطرها حيت هو براسو معندوش مع التعبير..محس براسو غي مقرب راسها وطابع قبلة حنينة على جبهتها..قبلة بعثات فيها الامان فداخلها ودفات عظامها بيهم..خلاتها تحس بلي عندها علامن تكى وتسند وتشكي ..غمضات عينيها منتاشية بداك الحنان لي بعث داخلها ..حطات يديها على ذراعو وقالت:الله يديك على خير

عبدو:امين..تهلاي فراسك..الى خصاتك شي حاجة صوني ليا

هدى:(كتلمس فهضرتو الاهتمام)لهلا يخطييك..تهلا فرااسك

تبسم وعاود باسها من راسها:ياله سيري(مد ليها السوارت)بشويا عليك فالطريق

شداتهم مساخيااش بيه بتاتا فداخلها مركهاتش تشدو يبقا معاها حيت معمر عليها وحدتها ووقتها وهو كذلك مكرهش مزال يجلس معاها..لكن الوضع والوقت والظروف كتحكم

جر اغراضو وزاد كيقلب فتيلي داخل للمطار مخليها واقفة كتشوفيه حتى غبر عاد.طلعات شادة الطريق لكازا من جديد مودعة شخص بان فحياتها ودار فيها فرق

|ثم يأتي العوض من الله كأنك لم تكسر يوما|

هادي هي فكرة هدى لي ترسخات ليها فبالها ورا مدخلات فمرحلة التصالح مع الذات..هدى ديال البارح بتاتا واش هي ديال اليوم عندها العقل والقلب فكفتين متوازيين لكن كل مرة كيغلب العقل..وهدى ديال اليوم متصالحة مع راسها..كتعرف انها هي هاكاك ومتقبلة نفسها كيفما هي الى بانت ليها شي حاجة غتبدل كتبدلها حيت هي باغيا اما تبدلها على شي حد بتاتا..دايرا احترام لراسها وفارضة راسها

وهادو صفات خلاو عبدو ينجادب ليها هو لي تابع غي الزهو والنشاط بعدما كان الكارو مكيحطووش ففمو لكن بعد موت عبد الله تغرب وتبلى ولقى فالبلية ونيس ليه فالغربة وكتنسيه الالم لي كيعانيه من طرف مو..رغم انه عمر الحرام مكان كينسي الهموم

*****

رجعات علاقتهم أقوى مكيزابيوش المرحل غاديين دقة دقة..كل مرحلة راه كيعيشها معاها بشويا..مكتعطييهش كلشي عليها كل مرة مخلياه مشوق يعرف عليها شي حاجة..كتحاول تندامج مع طبعوو المغيار بزااف ولي ديما مشكل ليها مشكل معاه

اليوم كانت دايرا فولارها مجمعة معاه وصوتها كيعلى حيت عصبها فحين هو كيكمي كاروه مبرد مدوز بكويس فليلة باردة من الليالي الاسبانية

هدى:نتا ميكروب

عبدو:ميكروب حيت مباغيكش تسافري بوحدك

هدى:ممسافراش بوحدي مسافرة مع غزلان

عبدو:نتي وياها الراس فالراس وبوحدكم؟؟جاتك عادي؟؟

هدى:أصلا انا علاش كنتشاور معاك غنمشي ونتا سير سطح راسك مع الحيط والى سميتك عبدو قطع تيكي وتبعني

عبدو:(طفا الكارو)أقسم برب الكعبة حتى نديرها

هدى:(بتحدي)ديريها الى لقيتيني هنا غي حبسني و راه غنسااافر(قشعات شعر كيتمايل وراه )شكون معاك

عبدو:(تلفت وراه كانت فام دميناج باين غي نص جسمها بشعر اشقر طويل وباقي صغيرة)فام دميناج؟؟

هدى:(صهدات وبانت فحنوكها لدرجة نيفها خشاتو فاليكرون)فام دميناج؟؟(بصوت معصب)يااك؟؟هادو هوما فعايلك

عبدو:براكة القلا **وي من الفريع راه قلت ليك فام دميناج راه...

هدى:(قاطعاتو)براكة حبسس..هادو هوما فعايلك؟؟انا داير ليا الحصار ونتا حاضي ليا الشهبات

قطعات عليه فابلاصة خلاتو مضهشر وملامح وجهو مبلوكيين..هو فعلا مكذبش فام دميناج لي كتجمع وهوما تما ماشي بضرورة تكون كبيرة فالعمر...مغاديش ينكر انه كيدير علاقات كيتعرف على بنات تما بغاية الجنس رغم علاقتو بيها لكنه كيسهر وكيدوز ليلة مع شي وحدة

دوز ليها الاتصال من جديد رنة وجوج وعدة رنات ولا من مجيب عرفها دارتها بصح..لاح تيلي وناض كيطيب ميااكل مخليها حتى تبرد فحين هي لاحت تيلي معوجة فكها قايلة:الله لقيت ليه السبة ههههه

كملات جميع شانطتها كتحط الاساسيات محيدة فولارها وهي دوز الاتصال لغزلان:امدرا؟؟

هدى:ساليت ونتي؟؟

غزلان: مكنهضرش على الجميع كنهضر على مجمر الغمة

هدى:يعطيه غمة ولد الهم..قلبت عليه يمشي يعاود لراسو كيحسابو غيحكم فيا

غزلان:واش مبغاش؟؟

هدى:وا يبغي ولا مايبغيش مضاربش بيا العقد باش يحكم فيا..راه كان مكوغطني ومكيقولش ليا ويجي هو غي لبارح ويقولي ماتمشيش والواعرة(ضحكات)قاليك تسناي نجي ونسفرك

غزلان:ياختي سعداااتك ههههه كون انا قالها ليا والله حتى نتسنا

هدى:واش كتهضري من نيتك؟؟واش نتي شويا لباس؟؟ايييه عزيز علي وبغيت ولا كرهت راني معاه فغولاصيون ولكن فحدود حيت انا معمرني قلت ليه فين غادي ومنين جاي ..يجي هو يقوليا نسفرك؟؟من هادي للناموسية

غزلان:أصلا طالب عليها

هدى:هو أصلا مكرهش يتكيني واقفة ههههه ممربيش

غزلان:حلفي عمرو قالها ليك

هدى:ومالو غيحشم راه غي كنضور فيه اما هو زلايلي..عندو دوك الشوفات كيمركو كنحس بيه كيحيد ليا حوايجي غي بعينيه

غزلان:اش دار هههه

"فلاش باك"

شادة ابيل ياله كتطيب لابسة بيجامة سخونة وفولارها كي ديما وهو فدارو كيطيب كذلك حاضيها فالمشية والمجية وكيسمع بعيد صوتها كتعاود ليه شي حاجة حتى نطق وسط الحديث:أديك الميكروبة

هدى:اش بغيتي

عبدو:واش هاديك ترمتك ولا مسلفاها؟؟

خرجات فيه عينيها مصدومة وقطعات خلاتو ميت بالضحك

"باك"

غزلان:ههههههههههههههه مقالو مجمر الغمة حتى كان هاكاك

هدى:يمشي يعاود راسو كنعيا نشد فالخاطر وكيصدق كيزيكزاكي معايا

غزلان:دابا سييغ غادييين

هدى:وا غادييين والى كيعرف با يدعيييه(شافت تيلي)هاهو كيصوني

غزلان:جاوبيه

هدى:قطعي

فطعات وشدات اببل ديالو وهو يصوط فوذنيها:معامن مجمعة؟؟ربع ساعة وانا كنصوني ومشغول

هدى:(باستفزاز)داك لي غيديني لافران؟؟

عبدو:(بعصببة)هدىىىى

هدى:الله يعطيني العما اش خصك؟سير شد ديك الشهبة لي جايب

عبدو:فام دميناج واش حسابك غنحشم منك؟؟راه كنديررر ولكن هادي مدياليش

هدى:(نوغشاتها ديك كندير)انا غادية بالنية ونتا الى كتغدر فيا الله يسمح ليك

عبدو:(ساط )دابا مالكي معكسة؟؟اش غتشوفي فهاد افران؟؟

هدى:القرود

عبدو:بربي لمشيتي

هدى:أقسم بالله حتى نمشي حيت ممزوجش بيا باش تحبسني راه با لي هو با ومكيحبسنيش

عبدو:(بتحذير)عارفا راسك معايانيش قيمة هاكا؟؟

هدى:وعارف راسك كتحكرني وكتخنقني هاكا

عبدو:(بالغوات)مال عدوكم لي عرفتها تقولي كنخنقها

هدى:(بالغوات)متقارنيش بشي خانزة..كتفهم؟؟وعفااك خليني علييك سمعت اليوم لي يقدني..من الصباح ونتا كتنكر علي متلبسيش متخرجيش..الى غي بغيت نخرج نشرب قهوة كتحرمها فيا وتبقا تصوني حتى كنحشم وكنوض من حدا بنااادم

عبدو:متمشيش ليا انا للقهوة وتنشري فيها رجليك لي غادي وليدايز يشوف فيك

هدى:نتا فين كتمشي؟؟ولا حرام عليا وحلال عليك

عبدو:وليتي ضااسرة؟؟(بتحذير)افران ومغتمشيش ليه وبربي ماغتمشي

هدى:اوا شفتي داك افران هو لي غنمشي ليه غي زكارة فيك باش تفهم بلي انا مكنتحكمشش

عبدو:(عرف راسو بعيد)هدىىىى(ساط)كيعجبك تعصبيني؟؟صبري تسنايني نجي ونديييك فينما بغيتي

هدى:موالفة كنسافر بوحدي ممحتاجاش وعاد ميمكنش نسافر معاك غي بوحدي

عبدو:منقيسكش منقربش ليك غي متمشيش غتخليني منوي

هدى:كتشك فياا؟؟

عبدو:(بدون تردد)اه

كانت كتسناه يقول لا نتي مديالش هادشي ولا شي حاجة لي تخليها تلغي ديك فكرة كيشك لكنو صدمها..عضات على شفتها وعقدات حجبانها وسطل من العرق تكب عليها..

هدى:ياك؟؟واخا..معرفتش اشنو تصرفت حتى خليتك تشك فيا ولكن اولد الناس مخلاقش هذا لي يشك فيا وأنا بنت دارنا بزز عليك

عبدو:مكنشكش فيك كنشك فلي دايرين بيييك وخفتك تغري وتزيدي

هدى:(ببرود)الله يخلف عليك اولد الناس هذا هو اخرة لي عطاك وقت وتعامل بالصفا معاك..

بغا يهضر وهي تقطع وتنهدات بحزن..ضراتها هضرتو..حيت باش الطرف الاخر فعلاقة يقوليك اه كنشك فيك يعني مبقاش اسس للعلاقة..مغتنكرش تنوغش خاطرها وكاع ديك الفرحة لي جايت للسفر نكدها عليها فالاخير..حطات تيلي دارتو صامت ومشات كتحرك باليزتها ببرود والصدمة لاعبة عليها لداخل.

ولى مؤخرا كيعمر عليها وحدتها وهو ونيسها وهي كذلك ونيستو فالغربة رغم أن علاقاتو كثار لكن كتبقا هي ديك القطعة النقية لي كيحافظ عليها متزيدش ساعا كفسها بهضرتو

ساط بعصبية وزير على تيلي عرف راسو زبلها ومشا بدل ساعة بخرا عرف الى هضر معاها دابا غتعصب عليه ويزيدو يطلعو كاطريام فضل يخليها حتى تهدن واخا فالداخل ديالو راه العافية شاعلة فيه فاش عارفها غتسافر

أما هي راه تخشات ففراشها وهزات تيلي كتلعب فيه مالقاتش رسالة او إتصال منو وبقا فيها الحال مولفة منو الحزارة..دارت لالاغم ومشات تنعس عوالة لغد ليه تسافر ولي بغا يطرا يطرا

******

طل صباح بارد فمدينة الدار البيضاء جايب معاه غيمة كتدل على اقتراب تساقطات مطرية تروي الارض وتسقي العباد..غسلات وجهها وسنانها ولبسات عليها سورفيت دافية مع فولارها ومونطو وجرات شانطتها مدايرا والو فوجهها من غير واقي شمسي ومورد الخدود..

صونات لغزلان ودارو يتلاقاو فالساتياام حيت ديجا مقطعييين..وفعلا مسافة الطريق وتلاقاو لقاتها ضاربة الحطة..تسالمو ومشاو فطرو فاقرب محلبة كيهضرو عادي كتحاول تناسا انها مخاصمة معاه..

غزلان:صافي وتفارقتو؟؟

هدى:يمكن(شافت فاص ليها)معرفتش..هضرتو ضراتني واش أنا يشك فيا؟؟يعني كنبان ليه قح*&^بة؟؟

غزلان:نساي الهم وياله نفوجوو حسن اما بوركابي غيشبعك غي فقصة

هدى:أنا اش ليا فهادشي هذاا؟؟كنت ترونكييل نسيت غاع كي كنهضرو مع الرجال حتى دخل لحياتي

طلعو فالكار وشدو الطريق لافران العاصمة السويسرية فالمغرب..المدينة الانقى والاجمل شكلا وقالبا..مدينة الرومانسية..دارو سناب بجوج وحطاتو غزلان فالبلاصة شافو عبدو قول حاضيها..شافو وبقا شحال كيبركك فالتصويرة حتى قشعو كار وحتى شاف نسبيا شنو لابسة

حط تيلي ورجع لحساباتو فالسوبر مارشي كيحاول يتناساها وميحكرش وهو راه دمو حامي عليها كون يلقا كون راه مشا يحرمها عليها...

دازو ساعات طويلة مخلاو مدارو فيها جهد ست ساعات عاود وصلو ومحدهم كيقربو والبرد كيتجهد حيت مشاو مع الثلج كيطيح..حماقو على الجو والمناظر وتيلي تغزلان محبسش من التصاور..كي وصلو خداو طاكسي صغير للدار لي كراو توسطات ليهم ماجدة لي خو راجلها عندو الدار تما وكراها ليهم بثمن معقول. شدو السوارت ودخلو ناشطين فرحانين ..طلقو المدفئة حيت ميمكنش تبقا تما بلا تدفئة رتاحو وخرجو ياكلو شويا حيت كان باقي الحال باش يطيح الظلام

طلبات هدى من غزلان تصورها مع منظر الأشجار والطبيعة صوراتها بعفوية بكسوة طويلة فالاموطارد وفولار بالاضافة للتجاكيط لي جات مع الكسوة اسوختي..حطاتها فسطوري دايرا عليها قليب صفر..وشافها فالبلاصة ..عيا يشد صباعو وهو يكتب ليها:بصحتك احبيبتي

مع قراتو وحل ليها الما حيت كانو مريحيين فسناك فالسوق ديال المدينة الصغير

غزلان:(كضربها فظهرها)مالكي

هدى:كح كح جيفني ههههههه اويلي واش هذا تخوطر

غزلان:مالك

هدى:(شوفي)انا يقوليا حبيبتي

غزلان:ايهاي على مجمر الغمة ههههه واش مكيقولهاش؟؟

هدى:هههههههه كيقول المرضية حبيبتي ؟لالا مسحوووور ههههههه بغاني ننسا ليه اش قال(كتبات ليه)شكرا اخويا

عبدو:(كتب بعصببة حيت قال ليها ديك بصحة بزز)واش أنا ناوي نعصر عليه بشي نعسة مقودة وتقولي ليا خويااا

طلعات ليه vu وحطات تيلي باش متحرجش وتسولها غزلان اشنو قال وتوريها..كلاو حتى شبعو وناضو مخلصين كل وحدة مخلصة على راسها عاد خرجو واخديين قهيوة سخونة يدفيو بيها حالهم غاديين غي كيتمشااو ويضحكو ويضربو تصيورات حتى عياو رجعو لدار كيقفقفو بالبرد

غزلان:غنموووت بالبرد

هدى:ههههه طلقي الشوفاج دغيا تسخن الدار..انا غنمشي ندوش

غزلان:(خرجات عينيها)اويلي فهاد البرد

هدى:غاتسخن الدار شويا دابا(لبسات بانطوفة)مغندوش حتى تدفا الدار وندخل معايا حوايجي

غزلان:(تخشات نيشان فالفراش مغطية بجوج مانط)اختي غا خليني انا باغيا غي نطرف ههههه شوفي نرتاحو شويا ونمشيو للاوطيل لي قلت ليك فيه كافي زوييينة

هدى:(بحماس)واخا..نصوني لختي وندوش

مشات تخشات حتى هي فمانطة فوق سرير ودوزات الابيل لاكرام مجمعة معاها وكتعاود ليها الجو

اكرام:اش خبار عبدو؟؟

هدى:مخاصميين ههه مريض هذااك بالشك

اكرام:كيبان ولد الناس؟؟

هدى:مختالفناش..ولد الناس وضريف وعندو عزيزة اه مي مشكاك خلينت اختي منو

دخلات عليها غزلان هازا تيلي كتهضر قالت:هدى عبدو بغاك

هدى:نعام؟؟قطعي اكرام

غزلان:(مدات ليها تيلي)هاهو بغا يهضر معاك

تنهدات وشدات التيلي قايلة:الو

عبدو:شنو زعما؟؟كتعفري عليا ولا شنو

هدى:نتا اكثر واحد عارفني مافياش التعفار..نتا ضريتيني بهضرتك

عبدو:ونتي كضريني بفعايلك

هدى:(خرجات عينيها)اشنو درت؟؟سول اي واحد وقوليه اش كندير الى قاليك غلطت لي بغيتيها نديرها..افلان راك فاهم الدنيا غلط..انا ماشي بحال لي عرفتيهم قبل..انا ماشي مرا لي تجي تبغي تحكم فيا ونفرح ونقول ويينو كيغير عليا ناري كيحكمني يعني راه راجل حرش (كتميع صوتها كتعيب البنات)ويينو ياختي راه كيغير عليا مكيبغيش يخليني نخرج(رجعات لنبرة صوتها العادية)أنا ماشي هاكاك..الى هاكا كيحسابلك راك كتبين ليا بلي راه كنهمك أنا هاكا كنحس راسي عبدة عندك..با لي هو با عمرو فحياتو مسولني اش كديري؟؟حيت عارف اش والد وعارفني كي دايرا نتا كتشوف كلشي على عينيك وكتزيد تقولها ليا فاص افلانة كنشك فيك؟؟

شافتو سقل وهي تزيد تعطيه:معرفتش اش وصلت ليك بتصرفاتي لي مافيها والو ولكن نتا فيك عقد نفسية وباغي تخرجهم فيا؟؟كون كنت شي وحدة خفيفة مبلية بالتصاحيب عندك الصح أما انا راسي مكنهزوش وتقوليا كنشك فيك

عبدو:دابا غي فهميني راه(ساااط بعصببة)المشكل ماشي فيك..المشكل فيا

هدى:اوا سير حتى تحلو واجي عندي الى لقيتيني باقي

عبدو:هاد الهضرة هي لي كتعصبني...كيفاش الى لقيتيني؟؟

ساطت بعصبية وقالت:عبدو راك كتعصبنيييي هاكا واش حالف حتى تحرر فيا هاد السفر

عبدو:الالة متسافرييش ...متسافريييش بوحدك

هدى:حتى ضرب بيا خط زناتي واجي قوليا اش ندير..وعفاك نساني وضرب على نمرتي حيت كتمرضني وانا مكندير ليك والو

عبدو:هاهو غينساااك

قطع عليها وهي تعطيها تيلي هي لي واقفة كتشوف فيهم مبلقة عينيها مفهمات والو..حدها كتلاحظ ان هدى بدات كتعصب

غزلان:ناري اصاحبتي غرقتي ليه حشوومة

هدى:وهو محشوماش..هلكني بالحكام والشك غيخليني نكذب واخا مدايرا والو..نشد الخاطر حتى نبقا انا بلا خاطر عيييق عليا غاع

غزلان:واهو الصراحة راه بزااف تاني عيق واش صافي تفارقتو؟؟

هدى:(ضرها خاطرها)معرفتش

غزلان:نوضي دوشي مولاها ربي ..

هدى:(باسف)مكنبغيش نتخاصم معاه ولكن هو لي كيبقا يخنق فيا

غزلان:(ضحكات)ههههه ياكما كتبغيه؟؟

هدى:(بتأكيد)لا..عزيز عليا وكيعاملني زوييين بزاااف وديما معمر ليا وقتي

غزلان:هههههه غادي يعيط ليك يحزرك

سكتات قالبة عينيها والجو عندها تقلب..هزات قشها ودخلات طالقا الما فالحمام باش يسخن مسخن حتى كانت غتموت بالبرد دوزات غي صابون ولبسات تما مزيان وخرجات مخشية ففراشها كدوز فالتصاور بملل حتى رتاحو وخرجو يجولو فالمدينة..تناسات شويا وديفولات

فحين هو راه طلعات ليه الدم بهضرتها وحقد وكره راسو لي كيبقا يدخل فيها حيت هو مكيوصل مرحلة يدخل حتى كيكون الطرف الاخر كيعني ليه شي حاجة..حتى فحياتو مكيدخلش فاي واحد ولا يعطي رأيو الا لي عزيز عليه

كان مريح فكافي شاد بيرا كيشرب ويكمي حتى دخلات عليا وراجلها ..سلم عليهم وجلسو كيهضرو مجمعين غي بجوج حيت راجل عليا مكيهضرش..كيتفاهم غي بالاشارات

عليا:شنو المشكل؟؟كتبان معصب؟

عبدو:غا المطارق وصافي

عليا:(ضحكات)مخاصم مع الميكروبة ديالك؟؟

عبدو:(حرك راسو)كعيييتها

عليا:كي ديما اشنو المشكل

عبدو:معرفتش..واش انا ولا هي

عليا:نتا نتا هههههه حصلات شي حاجة؟؟

عبدو:اش غتحصل؟؟تحصل القح&*اب ميسواو والو قدامها

عليا:وشنو؟؟

عبدو:خنقتها

عليا:هههههه متخرجيش فين غادية منين جايا علاش مشيتي شكون معاك ههههههه(جاها ضحك)السيناريو ديال نجمة كيتعاود

عبدو:متقارنيش ليا ديك القح*&^بة بهدى..متوصلهااااش

عليا:(صفقات بشويا)لالا راك ناضي ههههه(تلفات لراجلها كتشرح ليه بالاشارة ولاخر كيضحك)

دوا معاه بالاشارات وعبدو متبعو كيفهم اشنو باغي يقول حيت راه تسع سنين وهو معاهم فالغربة لقاها مزوجة بيه ..تزوجو عن حب رغم أنه مكيهضرش ومكيسمعش لكن لقاتو هو الإنسان لي ممكن تكمل معاه حياتها ..ميحتاجش يهضر ولا يسمعها إنما فقط كيحس بيها

عبدو:(كيدير ليه اشارات )مكنبغيهاش غي راني معاها فغولاصيون

عليا:واش هاد هدى تستاهل؟؟كدير شي حاجة ؟؟

عبدو: و راه ميكروبة مكضسرش عليها بناادم..ولكن انا منوغش..كتقوليا خارجة كنبقا نقول خرجات وشحال واحد شافها وشاف عينيها وشحال من واحد عجباتو ولاو ولاد الق&*^حاب بكثرة الخانزات كيتزعطو فالمحجبات وهي ماشي غي كدير فولار عادي هي كتزوق وتلبس وعاطية لعين(بعصبية)وأنا بعيد اش ندير؟؟

عليا:هههههه رخف عليها مالك؟؟راه الى غتخونك غتخونك غي تهنا ولكن بفعايلك غتطيرها

عبدو:طيرتها..قالت ليا نساني وقلت ليها هاهو غينساك هههه

عليا:هههههههههه مهم نساها خليها عليك

عبدو:نخليها؟؟واش هي مسافرة لافران؟؟عامر وتقولي نخليها..كي والو تلقاني واقف عليها كي قباض الرواح

عليا:مالك اخويا وليتي داير المغرب كي الدار ههههه نعل الشيطان خليها ترتاح ونتا نيت تبرد وهضر معاها

عبدو:مممممم(جبد كاروو كيكمي)العصااب صافي

ضحكات عليه عليا حيت ديما هي لمن كيعاود وكيفرغ قلبو حيت بنت خالو و ونيستو فالغربة..وجارتو فنفس الحي يعني كيدوز معاها الأعياد ومر الغربة ودايرها ختو الكبيرة هي وراجلها لي كيعاملو زوييين..

يتبع...