قصة أقوى مما أدرك

أقوى مِمّا أُدرك، و أجملُ مِمّا أظن.

-فوسط بيت مظلم كان جسد فوق السرير مخشي وسط ليزور..جسد أنثى ناعسة على كرشها وفمها محلول كتبان ضرسة العقل وكتخرج منو ريحة نتنة بحال ديال القادوس..غارقة فنعاسها محاساش بشنو ضاير بيها حتى تحل الباب ودخل نور قليل من برا ضوا ليها فعينيها نيشان..

...:ففففف آش هاد الرييحة..(كيناادي بصوت عالي)مي مي

جات إمرأة غليضة لابسة بيجامة خفيفة وجامعة شعرها فوسط زيف حياتي كيبانو نواضرها شايبين ومصبوغين بالحنة..مع دخلات للبيت خسرات سيفتها من الريحة الخانزة لي شمات وصاحت

..... :شهااادشي..أويلييي رييحة القوادس هادي(مشات مغددة لهاديك لي ناعسة فالسرير كترعد فيها عايفة وبيد خرا سادة نيفها)وااااتييي نووووضي نوضضي ينوضو جنونك ان شاء الله يالموسخة (شافتها تتحرك فمها بحالا كتاكل)نووووضييييييي.

كان الصوت العالي كيوصلها لغرق أحلامها مبرزطها..خسرات ملامح وجهها ونطقات بصوت باااح:بعدييي منيييي

...:أحمد حل الشراااجم رااه الموت هادي

حل حمد الشرجم ونيفو تخنق بريحة الخنز والصنان لي منباعث من لي ناعسة..وقال:مي بغيت حوايجي.

ربيعة:(بصوت مرتافع)هزز هز حوااايجك وخرج

(كتحرك فلوخراا بيديها)واتي نوضي واش ميتة

تفافات الأميرة لي ناعسة وبدات كتجمع ففمها لي بمثابة قادوس إلا فات حتى تنهدات ليك عند وجهك تدوخ كازا كاملة..وبشويا حلات عينيها والصوت فارع ليها وذنيها..مع توضحات ليها الصورة نطقات بصوت ناعس:بعدي مني صباح الله

محسات غي بشخطة لفخاضها قاسحة خلاتها تقفز وغوات مها مستامر وتهلالها ماوقفش:نوضي المعفونة ريحتك عطات معرفناك ميتة ولا حية.

...:(بغضب قفزات)مالكي؟؟آش بغيتي عندي(عينيها يادوب كتحلهم)بعدييي منييي ولا ندير ليك الشوهة مبقا حد ينعس فهاد الدار..

ربيعة:(بالسم لي فيها مشات شداتها من شعرها كتنتف فيها)أويلي يا غدايدي على النعاس..الآذان أذن والناس صلات الجمعة ونتي باقي جابدة ليا علييييه معاش نعستييي تاني؟؟شادة ليا المشقوف تال صبيحة ربي وناعسة تال زوك النهار

بإنفعال كبير ناضت البنت كدفع فمها وكتصيح بصوت عالي:وا بعدييي مني ماشي شغلك ننعس وقتما بغيت ونفيق وقتما بغيييت ..شغلي هذااك طلقي منييييي(دفعاتها)

حمد:(خايف)صافي اماما عفاااك ياله نخرجو خليها تضبر رااااسهاا

...:(كترعد واقفة على ركابيها)سيري الله ياخد فيك الحق ديما محررة فيا العيشة معرفتش واش بنتك ولا عدوتك

ربيعة:(كتهدد فيها من بعيد حيت أحمد شادها)يالخانزة المطوطة ريحتك عطاات ناعسة ليا لا شغل لا مشغالة

...:بصحتييييي(بدات كتبكي )سيري بعدي مني ماشيي شغلك

ربيعة:(دفلات فالأرض مغددة)الله ينعلك المسخة قولي آميييين الكلبة لوخرا

جرها حمد مخرجها وسدو عليها بيتها لي ممكن نسميوه قاادوس بالريحة النتنة لي فيه..ريحة الصنان وماشي حتى عرق خفيف ريحة صنان تدوخ المحمدية والنواحي

بقات البنت كتشوف فالباب وعمرو عينيها القهويين بالدموع كتحس براسها محكورة ..رجعات تكات على ظهرها وهزات من جنب راسها تيلي مشققة ليه شويا الزاجة فالأبيض حلاتو ودخلات لزيرو فيسبوك كدمع و تتنخصص وبدات فالتصفح اليومي ديالها..من بوسط لبوسط تجاوب هاد البنت وترياكطي لهادي..داخلة بكونط "أميرة نفسي"

واحد اللحظة فاش شافت كاع الناس كيحطو بوسطات مشات للكروب ديال البنات وكتبات فيه بوسط قد الخلا مفاده:

________

سلام البنات نتمنى تكوتو بخير

انا سميتي هدى ساكنة فكازا عايشة مع مي لي هي جدة وخوتي منهار عقلت على راسي ومي مكتحملنيش ديما كتفضل خوتي علي وكتعاملهم حسن مني رغم أنني مكندير ليها والو(كتكتب وتدمع)أنا محرومة من حنان الأب والأم وهي مامعوضانيش كاع..ديما كتغوت و تتدعي فيا وتسخط عليا وتعايرني واخا مندير ليها والو وتبقا تقارني بختي و ببنات الناس وأنا عيييت من هاد الوضع نهار على نهار كنمرض فصحتي..نصحوني اشنو ندير"

_________

كتباتو وبوسطاتو وهي كتمسح دموعها وفانتظار يتقبل مشات تاني كتجاوب على بوسطات البنات الحاصول السيدة مبلية..وماهيا إلا ساعة حتى تقبل البوسط واراك للتعاليق

"مديريش فبالك اختي"

"كاينين شي أمهات ميصلاحوش يكونو أمهات"

"الله يهديها عليك اختي"

"كتبقا مك معندك ماديري"

وغيرها من التعليقات لي لا أساس لها كيعطيها القارئ من وجهة نظر مبينة على شنو تحط فالبوسط..

أغلبية البوسطات على الفايسبوك ديال المشاكل كيتطرحو فقط وجهات نظر لي كتب البوسط ولي كيحاول دائما يبين راسو الضحية مكيعطيش وجهات النظر الاخرى وللأسف حتى القارئ كيحكم انطلاقا من ديك الهضرة..

هدى عاودات ليهم لي بغات ونشرات لي بغات وخلات ليهم الكلافي كيواسيو فيها ولي سولها شنو كديري ليها كتقول والو هي هاكا معايا...

بعد ساعة أخرى عاد حطات تيلي..تفوهات ورجعات تكات تنعس مامسوقاش لديك الكاسيطة لي سمعات ولا الصداع لي ناض ولا حتى الهضرة...جبدات عليه تال الربعة تالعشية عاد فاقت كتفوه وعاودات هزات التيلي كتقرا التعاليق وتجاوب ماناضت تال الخمسة..مع وقفات كيبان جسد متوسط الحجم ماغليض مارقيق ..لابسة بيجامة كاشفة جمعات شعرها نص جمعة غي من الفوق حيت مخبل ماتدوزش فيه المشطة..وناضت حالا باب البيت لي كتضرب منو ريحة نتنة..مع خرجات لبرا كتشم ريحة النقا وجافيل والدار كتشعل مشطبة مسيقة مرتبة ..توجهات للطواليط ودازت على مها لي جالسة شادة التلفازة..رمقاتها بنص عين ومهضراتهاش وهي تنطق ربيعة:على سلامة العروسة

عطاتها مشي غضبانة ومشات للطواليط حيدات سروالها واراك لريحة الإفرازات والبول لي كتعطي من بعيد..بالت وناضت بدون ماتمسح ولا تغسل لأنها مولفة..نيفها عتاد على ديك الريحة..مشات غسلات وجهها وشللات فمها لي غي تقووول اححح تدوخ سراق الزيت بلا بقايا الأكل لي فسنانها..مسحات ببيجامتها وجها وبانو الهالات السوداء لي تحت من عينيها مطرااسييين ..نفسهم نفس الحبوب لي بقات ليها حبة وتربح بومادا مطرطق حبوب وممسوقاش ليه..فݣسات جوج ومشات للكوزينة كتقلب متاكل..لقات طبسيل مسݣي ديال كسكسو وهزاتو غادية بيه للبيت فين كاينة مها..حطاتو معفرة مكتشوفش فيها ومشات جابت تيلي..يد فالطبسيل يد فالتيلي ممسوقاش لهاديك لي حداها مدوخاها بريحة الصنان..حتى صونا الباب وهي تنطق ربيعة:نوضييي حلييي

ساطت بنرفزة وناضت كتبقشش فتيلي حلات لباب وللحظة هزات راسها بانت ليها بنت كتشبه ليها شويا وعامرة لابسة دجين وتيشروت وسبرديلة وكتعطي منها ريحة باخفان زوينة مع ماكياج خفيف..

هدى:(راجعة للبيت وراسها مخشي فالتيليفون)ياك عندك الساروت؟

إكرام:نسيييتها...عاد فايقة ولا؟؟

هدى:(بلا مبالاة)ماشي شغلك

دخلات اكرام سلمات على جداها وجلسات بتعب:اححح عييييت أماما

ربيعة:(بلطافة)عييتي ابنتي تمارة كتعيي ربي عوينك

إكرام:آمين غناكل ونمشي للحمام..هدى تمشي؟

هدى:لالا(مكونسونطريا)تالغدا.

ربيعة:خليها راه باقي الدود مخرجش منها..تي نوضي سيري الحمام غسلي حالتك راه ريحتك عاطية

هدى:مامسالياش اليوم

إكرام:مقابلة ليا المشاريع..دوزي تغسلي عظامك

ربيعة:خليها راها ولفات ريحة الخنز

إكرام:ديك البيجامة راه مبغاتش تحيدها عليها مافهمتش علاش؟؟

هدى:(كتقلب شفارها)بصحتي ورااحتي ولي حسدني يدير بحالي

إكرام:(ضحكات بسخرية)علاش غنسحدوك أختي؟؟على الخدمة ولا على النقا ولا على الزين..فيقي من الݣلبة أختي

ربيعة:خليها خليها خرتها يعيطو ليها المعيفينة

هدى:(عصبوها وغرغرو عينيها ماتقبلاتش هضرتهم)واش أنا عدوتكم؟؟علاش كتبقاو تهضرو معايا هاكة

إكرام:نوضي أبنيتي من هضرة المسلسلات وجمعي حوايجك ياله للحمام نشد ليك كسالة تغسل ليك وحيدي العفن

هدى:ماشي شغلكم أنا عاجبني راااسييي هاكا

ربيعة:خلي بوها هاكاك..سيري نتي غسلي عظامك

إكرام :غندوز نييت ندير لاصيغ هو لول غوفلت ههه

ربعية:بصحتك أبنتي

هدى:(ميقات فيها)مقابلة غي لاصيغ والماكياج...نهار يخطاك تباني بحال علال القادوس ههههه

إكرام:اوا بعدا بعدا أنا كنحاول أرا ليك لي مكدير والو..

ميقات فيهم هدى وقالت معفرة:بصحتي وبراحتي..أنا نهار كنمشي للحمام راه كنبان حسن منك..

إكرام:ههههه يالالة غي نوضي ياله بغيتك تباني حسن مني، (خسرات سيفتها) واش أصاحبتي مكتضيقكش ريحتك وداك الشعر لي كيبان بيض بالقشرة..نوضي ياله للحمام

هدى:(رجعات عينيها لتيلي ممسوقاش)داكشي لي غتخلصي عليا فالحمام عطيه ليا نشارجي بيه وغندخل نغسل غي هنا

ربيعة:(قندشات)نوضي أبنتي لحمام هادي راه ولفات العفن ومسلكها

إكرام:وليت كنحشم يجي عندنا شي حد راه غيشمك من الباب

هدى:(وقفات مرضاتش)بعدوووو منيي ماشي شغلكم حياتي هادي ندير لي بغيييت فففففف بشااار كيداير مبقا حد يلقا راحتو

إكرام:(بنرفزة)بغيت ليك موصيبة ياربي منين جبتي هاد العفن

ربيعة:خليها راه شبهات تريكة باها كلهم غالمعفون على خوه

هدى:(بإنفعال)متعايريش ليا بابا

ربيعة:(عطاتها صبع)هاكي هذاا ليك ولباك لي كالسا تحامي عليه قول كيضل يدخل عليك فالقفاف

هدى:(بصوت عالي مفرعنة)ماشي شغلك المهم بابا ودخلي سوق راسك الشارفة ونتي قدك راه شاد التسبيح ونتي مزال كتعاطاي معايا.

ناضت ليها إكرام شداتها من شعرها ناتفاها وصرخات فوجها:تحل ليك الفم البرهوووشة وليتي تعايري لي رباتك على قبل مووسخ تاع الخلا..ولايني راه شابهااه الوسخ والعفن فيكم ورااثة!

طلقات هدى حلوقها الرقيق وشدات إكرام من شعرها تاهيا كيتناتفو وجلسو كيتجارو ويتغاوتو وربيعة كتفك فيهم..تعالا الغوات والصداع وهدى تنتف وتجر و إكرام تنتف لكن حكماتها فلخر لاحتها فوق السداري وشداتها كتصرفق فيها وتقمش فيها وتعض ولوخرا كتغوت لربي لي خلقها وتجبد لإكرام وجهها وربيعة كتفك وتغوت ...

جراتها على هدى لي دغيا ناضت كلها منتوفة و وجها حمر بالتصرفييق بلا شعرها لي شاد الريزو وعنقها كولو مجروود و وجهها كذلك تفكسو ليها الحبوب حيت كانو على سبة..

هدى:(كتغوت لربي لي خلقها)الله يعطيكم شي موووصيبة الق**ااب اتريكة القحاااب بغيييت ليكم موووصيبة حكرتوووني حيت بوووحدي والله حتى ندعيييكم. .

إكرام:(شاداها ربيعة وباغيا تطير عليها)أجي نورييك لق***اب بشحال مقيوومييين..بزاااف على جد مك حناا سمعتيييها حنا حاارييين عليييك وعيالات عليييك يالمعفوووونة ...يالقادوس الخااانز(خسرات ملامحها عايفة)الله يعطيييك فاش تلاهااي..العفن وقلة العقل وقلة النقااا عوووو

ربيعة:(كتنهج)سيري بغيت ليك هزة إن شاء الله يا بنت الحرااام...ياالتريكة الناقصة بغيت ليك شي موصيبة إن شاء الله خرجتي ليا من الجنب

هدى:(كتبكي وتقابح)الله يعطيييكم شي موصيبة محررين فيا العيشة تفووووووو إلا ماخويت ليكم هاد الدار راني بنت الحرااام

مشات لبيتها ...-لا عفوا "لمزبلتها" كتنهج ردحات الباب وسورتاتو وجلسات فالأرض كتبكي وتعطي لصحتها بصوت عالي وتسب مزال وتعاااير كلها كترعد وكلها عرقانة وزادت الريحة تاني كثر وكتسمع مزال إكرام كتعاير فيها مسكتاتش..

هزات تيليفونها تترعد دخلات للميساجات مشات لواحد البنت كتبات ليها:

"Cc majda cv kolchi mzn 3afak akhti bghit ntlbk laysehl 3lik sifti liya recharge ghi 5dh wlh hta nrj3ha lik rani wa9fa 3liha"

صيفطاتو كترعد ويد كتمسح بيا وجهها ويد كتصفح الفيسبوك والبوسطات والدمعة واقفة فعينيها عايشة دور الضحية حاسة براسها هي لي على حق وأنها مظلومة ومدايرا لا برجلها لا بيديها

كل شويا تطل تشوف واش شافت الميساج و والو السيدة اونلين ومكتجاوبهاش وكتزيد تصيفط ليها ميساجات "عفاك اختي...بليز الله يحفظك راني كنموت...جاوبيني أماجدة"

مجاوباتها تا دازت ساعة خسرات عليها"كنت فالخدمة اختي مكنساليش"

هدى:(فنفس بلاصتها باقي جالسة وريحتها عاطية فالبيت)واخا اختي عفااك صيفطيها ليا والله حتى نردها ليك

مرت خمس دقائق وصيفطات ليها اوك..وبقات مصمرة فبلاصتها من بوسط لبوسط وكتعلق واخدة راحتها بحالا ماشي هي لي عاد كانت تتضارب..

مع وصلها الميساج ديال الروشارج تبسمات بفرحة تا تطراسات ثقبة تالزين لي مخفية بالحبوب فوجهها..دوزات فورا أبيل كانت محتاجة تدوزها وتنهدات براااحة ثم مسحات ماتبقى من دموعها قايلة:دابا نشووفو دابا واش غتقدرو عليا ..إلا ماركبت فيكم الفقصة راني بنت الحراام

فاليوم الموالي..كان أحمد الأخ الصغير جالس فالبيت ديال التلفازة لي منظم وكيحفض بعدما رجع من المدرسة مع الحضاش مركز مع قرايتو بجدية تا سمع الباب صونا ناض حل حتى كيتفاجأ بوجه مغريبش عليه أكيد كيعرفو و مايخفاش عليه لكن بقلة لقاءو بيه جاتو فشكل يصبح عليه

كان راجل ضعيف لابس سروال ثوب وبلوزة قصيرة تتبان من تحتها قاميجة زرقة فيها شلا طبايع ديال ليدام والسمطة مطلعها تاللبوط لابس صباط مسخ بالتراب..فرنس تابانو سنانو لي نصهم مضروب بكثرة الشقوفا..نطق بلكنة عروبية:تااا حمممد هذاااو

أحمد:(رجع خطوة لور )بابا

باعدي:(دخل مفرنس وشدو عنقو تا خنقو)أتبااارك الله تبااارك الله كبرتي وليتي راااجل(عاود عنقو)تاا مالك واقف كي الصمعة..عنق بوووك هاااو

أحمد:(باقي مصدوم)لباس؟

دخل باعدي كيضور عينيه فالدار وقال:لبااس؟؟تا كيداير كي دايرا إكراام وهوودا وحناااك

أحمد:(سد لباب)لباس علاش جيتي؟؟

تلفت باعدي ليه وخشا يدو فجيوب السروال:توما مابقيتو تسولو فبووكم وا قلت أنا نسول..فين هوووداا؟؟

أحمد:ناعسة

باعدي؛سير عيط ليها ياله(شافو واقف باقي)تا دووز تحرك ونتا ساير تشوف فيا

مهضرش أحمد مشا ديركت للمزبلة مع حلها كتضربو ريحة المرصى..سد نيفو ومشا كينغز فيها تفيييق غي حلات عينيها مغوبشة وهو ينطق:نوضي تكلمي لبااك

ناضت قاافزة ونطقات بكلمات خرجو ملحنيين بنفس خانز:فينووو؟؟

أحمد:برا

خرجات مشععكة بداك الشعر لي ماشاف المشطة على جوج سيمانات..تبسمات فور مالمحات طيف باها..مشات كتجري عنقاتو ودار حتى هو عنقها قايل:تي هوداا هادي..تبارك الله تبارك الله زيانيتي

هدى:(بابتسامة بسنان صفرين عامرين ببقايا الماكلة)توحشتك أبابا

باعدي:واتوما غبرتو مابقيتو تسولو مبقيتو تجيو

هدى:(بتذمر)مبقيتش بغيت نبقا هنا..بغيت نمشي نعييش معاك(غرغرو عينيها)كيحكروني هنا أبابا..كضل تضرب فيا إكرام ومي غي كدعي عليا..مبقيتش بغيت نبقا هنا

باعدي:(عقدهم)تي مال بوهم جاهم الجهل ولا؟؟مالكي شايطة ليهم..مزيان تبارك الله..سيري جمعي حوايجك ياله معايا لدار بوووك ماحالك

أحمد:(تدخل حيت كان كيسمع الهضرة)واش نتي حمقة فين غتمشي معاه؟؟

هدى:دخل سوق راسك البرهوش..بابا أنا غنجمع حوايجي ونجي

شد فيها أحمد بترجي:فين غتمشي معاه ؟؟غنقولها لمي

هدى:(تنطرات منو)بعد مني وعطيوني بالتيساع قول لمك وختك يزرعو بلاصتي الكيف

باعدي:(تمرح وسط السداري)تا سير براكة من الهضرة عمر شي كاس تأتاي وجيب شي كيلو تشفنج نفطرو ونتا حادك غي فالهضرة

مزادش معاه الهضرة خرج كيجري وعينيه كيرمقو هدى كتجمع فحوايجها فصاك...بالخوف لي فيه مسدش الباب مشا كيجري فالشارع ويعطي لصحتو شاد طريق الحمام فين خدامة جداه "ربيعة"

وقف كيلهث وكيهضر مع لي فالاكيص:كلم ليا مي عفاااك دغيا

تكلف السيد ونادا ليها خرجات ببيجامتها كتسائل:مالك؟؟

أحمد:عتقي أمّي بابا جا وهدى غتمشي معاه

خبطات فخاضها و بسرعة عتالات وجهها ملامح الصدمة و ما حسات تا كانت كتجري ببيجامتها و العروقات كيتكبو منها حيت ياله خرجات من السخون ..كتجري وتعجز بحكم العمر وتابعها أحمد لي شافهم يقول شاعلة فيهم العافية..مع كتقرب للدار رمقات جسم هدى من بعيد واقف قدام الدار رفقة باها لي ميمكنش متعرفوش ربيعة ..غوتات بصوتها الباح:هدىىىى

تلفتات هدى لمصدر الصوت وتقدات ملامحها ليباقي فيهم أثار للنوم والعمش..غوبشات معفرة وقالت موجهة لكلام لباها:ياله أبابا

باعدي:(مبرد وكيشوف ربيعة كتجري كتلهث)تي هادي مالها؟؟

هدى:(بإصرار) ياله نمشيو أبابا

وقفات ربيعة كتنهج قايلة:فين غادية؟؟(شافت الصاك)

هدى:(معفرة)خليتها ليك زرعي بلاصتي البطاطا..أنا غي مسخوطة منصلاح لوالو غنمشي نعيش مع بابا

نطرات ليها الصاك من يديها ولاحتو الأرض وصاحت بصوت عالي حتى لي غادي ولي جاي كيتفرج فيها:غتمشي تجلسي فالدار ولا غنعاود ليك الترابي..كبرتي وليتي تعرفي باباا عاد بان ليك بابا

باعدي:أسبحان الله وتقول واش تبدلي يا ربييعة عدوووك منك..مدا منك الزمان تا قد هوك(عبر ليها بصبعو)

ربيعة:(واقفة وقفة شامخة..وحمرة حيت كانت تتجري أما ريقها راه ناشف وعينيها كتحمل نظرة إمرأة ديال الزمان) الزمان كيهد بحالك ..(خزرات فهدى)سيري تبركي فداركم ونتا الطريق لي جابتك تدييك

زيرات هدى على باها:والله منعيش معاكم باقي مبغيييتش غنمشي نعيييش مع بابا

جراتها من يديها بنرفزة وقالت:هدى بلا مانسلخك فالزنقة راه نشوهك سيري تجلسي شمن باك لي غتمشي عندو..صاب تا ماياكل هو بقا غي يوكلك..

باعدي:(جر بنتو)ربيعة سيري بسعي من الدرية طججتيها مبقاتش حاملاك يعلم الله اش مدوزة عليها..بنتي غنديها تعيش مع جدااها الحنينة

ربيعة:(مزيرة على سنانها)بغيت ليك موصيبة نتا ومك الحنينة توما فين كنتو ملي كانو لحيمة لا حنين لا رحيييم حتى كبرات عاد بغيتيها(صرخات فوجهها )دوزي تجلسي

هدى:(ببرود)والله منبقا معاكم فيها..كرهتكم مبقيتش بغيت نبقا معاكم..

بدات ربيعة كتجر فهدى بعنف وكتحلف عليها ولوخرا طالقا حلوقها :وابعدييي مني مبغييييتش نعيييش معاك بغيت نمشي عند بابا

الغوات كثر ربيعة تجر وباعدي يجر وهدى محيحة باغيا تمشي والجدة متشبتة بيها مباغياش تخليها تمشي..لي غادي ولي جاي كيتفرج والأغلبية كيفك كيحسابهم كيضاربو..فلتات هدى من ربيعة وهزات صاكها معصبة وكتغوت:والله منجلس معاك باقي كتحكريني وتسلخيني دايراني خدامتك

لي كاين ولي مكاين قالتو ضربات لجداها الطر ولوخرا مامسوقاش باغا مزال تجرها وكتغوت:والله لا مشيتي معاااه نتوما ولادي أنا...غتكرفصي يا بنت الحراااام واش حسابك غيفرش ليك الحرير

باعدي:(طلع فالبيكوب)الله يغبر ليك الشقف يا ربيعة..هوداا زيدي طلعي ابنتي خليها تنبح كي الكل**بة

وبالفعل بكل أنانية طلعات هدى المعيفينة بدييك الريحة النتنة للبيكوب وجداها شاديينها الناس تغوت وتطلب ليها ماتمشييش..ولات كلها حمرة و كترعد..مايمكنش يضيع مجهودها فتربيتها هاكاك

تحركات السيارة وباقي ربيعة كتغوت بسمية هدى وتضرب فراسها ولوخرا بكل برود رسمات إبتسامة راحة ملي بعداات ماتسوقاتش بتاتا لديك السيدة لي كتغوت وتنطر وتضرب فجنابها :وااا دااا ليا بنتييي...هدىىىى

فالتالي سخفات تتبكي وتنوح والجيران مجموعين عليهل كلها كيلغي بلغاه وكلها علاش بنى توقعاتو..شي كيقول البنت معذبة وشي كيقول نكرات خير جداها لي رباتها

ومابين كلتا الحالتين كانت الواقعة وقعات وهدى دارت لي فراسها ومشات مع باها لي كان كيخطب عليها:شتي ابنتي جداك منهارها مكتحمل فيا الشعرة ملي خديت المرحومة ..كنبغي نشوفكم نصوني ليها تقطع عليا...كنصيفط ليها فلوس المصروف ومتقبلهمش تقوليا أنا ممحتاجاش لريالاتك..(تنهد متصنع الحزن)الله يسمح ليها كرهاتكم فيا

هدى:(بتأييد)صعييبة وكتضل تغاوت معايا عمري شفت معاها النهار الزين ..ديما كتحكرني هي و إكرام وكيعايرووني بيك وبعماتي..(شداتها البكية)معديين عليا أبابا

باعدي:الله على بنيتي الله باك باقي عايش ونتي مكرفصة...لهلا يطول ليها فالعمر..دابا تشوفي ابنتي كي غنعيشك نساي عليا ربيعة وعيشتها

هدى:(حسات بشويا تالإطمئنان )إن شاء الله ابابا

سكتات مباقيش هضرات مراقبة الطريق بصمت غير مبالية لديك لي خلات منشورة طايحة والجيران كيرشو عليها الما..تعاونو عليها دخلوها للدار واقفين عليها كيفيقو فيها معيطين للسيدة لي فالفرماسيان كتعبر ليها فالطونسيو وهي فمها كتهتهت غي بهدى..أحمد مقنت كيبكي وكيشوف فيها بحسرة مالقا مايدييير

وكدات شويا وجلسات تتبكي بحسرة وتنخصص وجاراتها مجموعين عليها:أويلي أعباد الله كلا للبنت عقلها وداها ليا هءهءهءهء دا ليا بنتيي بغيت ليه موصيبة ياريييي(كضرب ففخاضها)ربيت وسهرت وخدمت وتكرفصت وفلخر تمشي مع باها..معمرو سول فيها تا بدرهم هءهءهءهء لاحهم ليا باقي معارفينش تا يقولو نعااام اعباااد الله...جريييت على عيالات ولادي باش ولاد خديجة يعيشووو وفلخر زادت وخلاتني هءهءهءهءهءه(كتبكي بحسرة)الله ياربي لله

أثرات فالجيران بزاف حيت كلهم قداام وعاقليين على ربيعة ملي كانت مزال ساكنة مع ولادها وعيالاتهم.. وملي ماتت خديجة شدات ولادها حضنات عليهم ورباتهم أحسن تربية وبقات كتضرب عليهم فتمارة فالحمامات باش تقريهم وفلخر هدى بكل برود مشات مع باها..

هدى..ثاني أبناء خديجة وباعدي...لي كانو ولاد الخالات تزوج بيها يامات كانت خديجة عايشة فالفيلاج باقي مجاوش لكازا..مشات خديجة البنت الزوينة واللبيبة والحنينة عروسة لدار خالتها واخدة ولد خالتها..ولدات معاه اكرام وهدى وأخر واحد أحمد لي توفات ورا ولادتو بخمس أيام..

الأيام لي دوزاتهم خديجة مع باعدي وعائلتو يمكن توصف بكلمة واحدة "الجحيم" دوزات عليها العجوزة الدكاكة منها كلشي الكوزينة والزريبة..تفيق مع النبوري تعجن وتطيب الخبز والفطور وتمشي تحلب البقر وتنقي الكوري وتحطب..كرشها لفمها وتزيدها خالتها للعجينة تحت شعار "كلنا حملنا و ولدنا"

كرفصاتها وعذباتها ومحسباتهاش بحال بنتها بتاتا وتا الراجل لي يهضر كان زيزون ..خارج سوق العيالات كيف لا وهو كابر فجو هاكاك كيعاملو المرا...غضبات خديجة مرارا وتكرارا وكيردها باها بحجة "معندناش بنات كيطلقو"

صبرات وعضات فالصبر..مرة تغضب مرة تصبر مرة تبكي مرة تغوت مرة تخاصم مع العدوزة والدم ولى ما ..تعادات ربيعة مع ختها على وديت بنتها حتى ولدات أحمد ودازت خمس يام وماتت خديجة نفيسة مودعة الدنيا مخليا وراها ثلاثة تالنفاس كان باها ياله مات بشي شهورا وتحولو لكازا ..بقاو ولادها مع جداهم لي ماتربي ماتحني مادني حالة غي فمها وتجبد فالعيب وأحمد مليوح ماهو من المفطومين ماهو من الراضعيين..

هزاتو عمتو شي أيام وتقهرات وفكرو يزوجو باعدي لكن أي مرا من الفيلاج كتسمع اسمو وكتعرف شنو مدوز على خديجة كدير بالناقص حتى مشات ربيعة شداتهم وداتهم معاها للمدينة تاهو معطلهاش خلاهم ليها وعاش حياتو..مرة يسول مرة لا...عائلتو بتاتا واش يهزو تيليفون يسولو..

كبرو الدراري مع ربيعة ..الجدة الحنونة لي فضلات تشد ولاد بنتها ومتخليهمش لباعدي ومو حيت غيتكرفصو .. ماقبلوهمش خوالهم بتاتا كلها هاز راسو و ولادو وكلشي خرج كرا وقلب على مستقبل ولادو وبقات ربيعة حاضنة عليهم..ضربات عليهم تمارة فالميناج تاتقسم ظهرها..كانت مزالا بصحتها حيت خديجة تزوجات صغيرة بزاف وكانت مها براسها صغيرة..يعني مكانش فارق سن كبير بيناتهم عشرين عام

تكرفصات ربيعة وخرجات ولادها من الدار باش يبقاو ولاد خديجة..قرات وكبرات وتولات ورقعات وصبنات باش غي يكونو كي الناس...لكن هدى خرجات ليها من الجنب من صغرها قبيحة و واعرة وكترد الهضرة وتجاوب.. تعطيها دقة لفمها وتجاوب..تقولي ليها مديريش هادي وهي لي غدير باختصار "كديرالزبلة وتعطي لعربون لوخرا"

وبسبب تمردها وردان تالهضرة والوعورية كانو عائلة مها نافرينها..هي إنسانة غير قابلة للنقاش مكتعرفش تهضر مكتعرفش تصرف وكيجيها كلشي محاملهاش وكلشي نافرها غير دارية أنها كدير علاش ينفروها الناس

قرات تال الكاطريام وبداتها الضسارة...تصاحبات مع شي زنداقيات معندهم مايدار لاقيينها باردة تعشرات معاهم سقطات وعاودات وفنص العام خرجات مابقاتش بغات تقرا..عيات فيها ربيعة والو السيدة مبغاتش تقرا وشدات الركنة فالدار..مقابلة غي التيليفون نهار، كامل ولي زاد الطين بلة هو العفن

غي تذكر ريحة خانزة ذكر هدى..إنسانة منعدمة الإحساس..تقدر تجلس 20 يوم بلا حمام بلا دوش..السليب يمكن متبدلوش على سيمانة ..وتقدر سنانها تحكهم من العواشر للعواشر أما مزيل العرق راه مكيضورش عندها تا بالضحك..الزغب إلا مقالو ليها حسنييه ونكرات ربيعة واكرام عليه مايتحيد..الشعر كان شهوة رجعاتو بقلة المشيط باهت..خصها إلا بغات تفكو لتر من الزيت وياله يتفك..باختصار معفوونة وممسوقاش..ماتقولش تنوض كي البنات وتدوش وتضور براسها..تطلي ماسك ولا تدوش تحيد العرق لا..خصها تا تسمع السبان والملة عاد تنوض وبكثرى مامولفا مبقاتش كتضايقها ريحتها..

داخلييين للفيلاج لي فيه دار باعدي وهدى مبتاسمة كتشوف من الشرجم حاضنة صاكها تالحوايج وباها مخدم الشعبي مكونسونطري معاه..كيدوزو على محلات الحوايج بساط وعلى شي قهاوي فالشارع مريحين فيهم ناس الفيلاج..محسات تا وقف قدام دار بعيدة على الفيلاج وسط أرض خصبة مبنية على حقها وطريقها وضايرين بيها شلا شجر..فرنسات قايلة:شحال ماجيت لهنا..كلشي تبدل

باعدي:(كينزل)واتي راه تبدلات الوقت..زيدي زيدي حنااك موحشاااك

نزلات تاهيا كضور فعينيها وتبعات باها للدار عاجبها الحال كيبان ليها داكشي زوين الزليج والصليح وريحة سانيكروا كضرب منين ومنين..كتبان الدار نقية تا دخل باعدي بصباطو هاكاك وسخها وصوتو كيصيح فالداار :وااااميييي وااامييي اتي فينك تعالي تشوووفي هووودا(كيجر ديك هووو)

خرجات إمرأة فالأربعين من عمرها لابسة بيجامة مطلعاها حازماها على خصرها لابسة صندالة تالميكة لرجليها لي فيهم بقايا الحناء وكيبانو مشققين..مكمشة شويا وبيضة نيييت والعوينات كحلييين دايرا عكافة وهازا كراطة وصاحت بلكنة عرووبية:تا أنا نضل نجمع ونتا تجي توسخ..سير مسح رجليك فالجفاف

باعدي:(فرنس تا بانو سنانو رايبين بالشقوفا)واتي الفرحة غلباااتني(جر هدى)هادي بنتييي هووودااا

طلعاتها المرا ونزلاتها وتبسماات مرحبة بيها:واتي هووودا هادي(جراااتها عنقاااااتها تا كنفاتها ريحة العرق وخسرات سيفتها)تبارك الله تبارك الله كبرتييي هاااا بااعدي راك والد الزيين هااا وصلاتك النوبة فالنسيب

هدى:(عجبها الحال)شكرا اخالتيييي

باعدي:هادي خالتك نعيمة مرات عمك المكي هههههه واااامييي وتيي فينك

نعيمة:سير غا حيد عليا داك الصباط أنا ندي هدى تشوف حناها

باعدي:واخا

مشا باعدي وهي تبسم نعيمة لهدى وقالت:مرحبا بيك ابنيتي مرحبا بيييك داركم هادي

هدى:شكر اخالتي

جراتها معاها داتها البيت فالسفلي فين كانت الجدة هازا تسبيح ومجهدة تلفازة بالأخبار وعينيها مكمشين فيها قول كتفهم..الزمان خدا منها الزين والصحة لكن اللسان مزال خدام

نعيمة:خالتي شوفي شكووون جااا

هدى:الميمة

دغيا عرفااتها حيت كان عالمهم باعدي بلي غيجيبها..عتالات وجهها فرحة وحلات يديها مرحبة بيها مفرنسة:زيدي زيدي ياا بنيتي زيدي عند حناااك(عنقااتها)الله ياربي الله على بنتي الله ياربي الله(كتبوس فراسها خانقاها بالبوسان)اخحح اربي على الكبدة المعاودة...تي كيدايرا لباس عليك؟؟

هدى:الحمد لله(باست يديها)كي دايرا نتي؟؟

الجدة:بنيتيي عدي ومنكونش بخييير...مرحبا مرحبااا بيك والله مداني النعااااس ملي قاليا باعدي يجيبك تعيشي هنا(كطبطب على ظهرها)حرقتكم يا بنيتي مزال تطلع فيا وتنزل..منسااااش نهار قطعاتكم علينا ربييعة بغيت ليها قطعة من الدنيا ان شاء الله

هدى:صافي الميمة هاني جيييت دابا..غنعيش معاكم

الجدة:(مفرنسة)مرحباااا بيكك الدار داركم..(خاطبات نعيمة)شتك سايرا تفرجي فينا..غبري عمري أتاي وحطي

لبنيتي متاكل..

فرنسات نعيمة وخرجات مع فاتت الباب جمعاتها ومشات مغوبشة للكوزينة وفمها تيبركم بصوت كتسمعو غي هي..ردات المقراج يسخن وبدات تتحرك فراسها وتهضر غي بوحدها تا دخلات بنت شابة قد هدى فالعمر بيضة حليييب وجها مافيهش نبشة لابسة بيجامة بالسروال عرييضة وطويلة ومكفضة بحال يماها هازا طبك ملوي فيه خبز ياله طايب ودايرا عكافة..ونطقات بلكنة عروبية:واامي تي مالك سايرة تدوي وحدك؟؟

نعيمة:(ضارت شافت فيها)غنتخووطر أنا فهاد الدار..

مريم:(كتحط الطبك )تي اش واقع؟؟مالك(مشات كتشرب الما)

نعيمة:تي شتي شكون جا؟؟بنت عمك باعدي؟؟

مريم:(توقفات على الحركة)لا تقوليهااااش...شكون فيهم؟؟

نعيمة:(ضحكات بالفقصة)هووودا الصغيرة فيهم

مريم:(تبسات)واش فيها أمي..مرحبا بيها نيت نلقا معامن نتوانس كنقنط

نعيمة:(حركات راسها محسرة)سيري هزي هزي دوك الطباسل وسيري شوفيها(ضحكات)ميمتي نهنهههه

تبسمات مريم وهزات بلاطو فيه طباسل صغار وجداتهم مها فيهم زيت الزيتون عسل وفرماج وزبدة وغادية متحمسة تشوف بنت عمها حيت هي وحيدة والدييها لا خوت لا خواتات مورا ولادتها مها مبقاتش ولدات..

مع دخلات للبيت وخطات الخطوة لولة لقطوها عينين هدى لي مزالا بحوايجها وحداها صاكها طلعاتها ونزلاتها وأول مضربات عليه هو وجهها لي صااافي مافيه نبشة..رسمات مريم بتسامة خفيفة وحطات شنو هازا ومشات تسلم عليها مع تقاربو الأوجه مع طلعاتها ريحة الصنان المصننة لي غتطلع ليك مع قاع نيييفك بلهلا يطريه ليك

خسرات سيفتها ورا ظهرها وقالت محاولة تبرد:وامرحبا مرحبااا ببنت عمي..مرحبااا بيك(رغم الرائحة كتبوس فيها)نهار كبيير هذااا

هدى:(مبسمة حتى هي)الله يبارك فيك..واش مريم ياك؟؟

مريم:ااااه اخويتي ههههه مشفتك ملي كنا صغاار تبارك الله كبرتي

هدى:حتا نتي كبرتييي(كتحقق فيها)وزيانيتي

الجدة:(مفرحاها شوفتهم)تبارك الله على بنياتي كبرو وتجمعو ليا الله يرضي عليكم

هدى:آمييين

مريم:مهم مرحبا بيك معانا ..نمشي نجيب أتاي

ناضت مريم تمشي وتبعات ليها هدى العين..غليضة عليها وعندها الهردوسية وافية كتقلب مع كل مشية ليها وبدات كتقارنها براسها وتشوف فحالتها لكن سرعان ماخرجاتها جداها من تفكيرها ملي قالت:تي ديك المسخوطة ديال ربيعة كي خليتيها؟؟

هدى:كي الويل الميمة..كيتعداو عليا بالعصا مكرفصااني بزاااف

الجدة:بغيت ليها دقة بويا لي مشا ماجا..منهارها مسخوطة مي وبا متحن ماتقول عيييب..بعداتكم علينا الله يتبعها البلا

هدى:كون تشوفي كي كتعامل معايا

الجدة:توريها ليا؟؟عارفاها ماتسوا بصلة ياربي ياخد فيها الحق

هدى:آمييين

-فالكوزينة

نعيمة:(شافت فمريم)تي كيجاتك بنت عمك؟؟

مريم:(باستغراب)مي واش شميتي اش شميت؟؟تي البيت راه مقلوب بريحة العرق

نعيمة:(ضحكات وهي كتقلب فاتاي)هههههههه ميمتي لي خلاتو العدوزة تكملو ليا بنت باعدي ههههه شدي شدي هزي ودي ليهم والله يخرج يامنا على خير

مريم:آمييين ههه

بالفعل تحطات الماكلة مشكلة ومنوعة قدام هدى لي تحلات ليها الشهية وبدات كتاكل مبسمة وفكل مرة كتحرك يديها كتعطي منها الريحة مجهدة

دخل باعدي مفرنس مبدل عليه وقال:توما تهليتو ليا فبنتي اووو؟؟

الجدة:ماتوصيناش..دايرينها فعينينا النهار الكبير هذا لي رجعات لي فيه هدى ..لعقوبة لإكرام ولحمد

هدى:(بتذمر)هادوك عاجباهم عيشة ربيعة خليهم معاها

نعيمة:نوض نكدي للحمام..هودا تبغي تغسلي

هدى:مافياش اخالتي والله فيا غي النعاس

نعيمى:لا ويلي حشوومة نوضي الحمام يكون سخون غسلي ورتاحي وتغداي ونعسي

مريم:ااه حتى أنا غنغسل اختي ندخل انا وياك

هدى:(عجزانة)مجبتش معايا حوايجي

مريم:لي خصاتك نعطيها ليك اختي. حاجتي بحال حاجتك حنا دابا بحال الخواتات

الجدة:عندها الحق ابنيتي..غا نوضي غسلي وحيدي عليك وسخ المدينة

هدى:(مالقات متقول)واخا ..

وبالفعل هزو الماعن وهي منشورة حدا جداها كتعلب فالتيليفون ممسوقاش لحالتها..

نعيمة:(خبطات الصينية فوق البوطاجي)تي هادي باغيا تنعس ليا ففراشي هوكاك؟؟عيفاااتني بغيت ليها النقا اميييمتييي مكديتش نسرط الدغمة

مريم:تقدر تكون كيتعداو عليها تما ومكيخليوهاش تمشي للحمام..راك سمعتيها اش كتعاود عليهم

نعيمة:(زفرات)منعرف ففففف عطيها من عندك تانخرجو ونشريو ليها اش خصها

مريم:ان شاء الله..حيدي لهيه انا نغسلهم سيري كدي لينا الحمام

مشات نعيمة خارجة من الدار لوراها..حيت بانيين دار وصالحينها ومقادينها ومخليين جو البادية برا..ورا الدار كاين الحمام التقليدي البلدي المعروف عند المغاربة لي ساكنيين فالبوادي كيكون بحال شي قوس ومبني بالقصب ومطلي بالسيمة كبيير نييت سخناتو وخلاتو يتكدا والعوافي شاعليين فيه والدخاخن خارجين تا سمعات صوت كينادي بإسمها عرفاتو راجلها

المكي:تي واش صماكيتي اووو

نعيمة:مالك ساير تبرح بسميتي ..ياك لباس؟؟(دايرا يديها من الشمش ومكفضة جلايلها)

المكي:ساير نابي علييك منين ومنين ونتي منخلاني اووو

نعيمة:مسمعتكش..

المكي:الصمك ان شاء الله..باعدي هنااااو؟؟

نعيمة:(تنهدات)جاا وجاب معاه بنتوو

المكي:(فرنس وبانو سنانو رايبيين)تي شكون فيهم؟؟

نعيمة:(عطاتو بالظهر كتزيد العواد للحمام)هووودااا

المكي:مزيااان اندخل نشوووفها ونجي نغسل

نعيمة:غيسبقوو البنااات

دخل المكي تاهو بحالتو بدون مايغسل ولا والو ومشا نيشان للبيت لقا باعدي وهدى ومو..فرنس وهو ينطق باعدي لي جالس جلسة ديال سليمان القانوني..مسند على مرفقو وناشر رجلييه:نوضي سلمي على عمك المكي

المكي:(مفرنس ليها وفمو بحالا مفركعة فيه بوطة صغيرة)اتي زيدي زيدي(عنقها)تبارك الله تبارك الله وا كبرتيييي تي كيدايرا(شاف فخوه)يا وصلك النسيييب اباعدي..

باعدي:(بافتخار)واااييييه شنو كنلعبو هنا...عام عاميين نزوجها وتشووف

هدى:هههههه كي داير اعمي؟؟

المكي:الحمد لله تي بخيير شسايرا تعاودي..خوتك لباس عليهم

هدى:الحمد لله

دخلات مريم باست يد باها وقالت:هدى ياله نغسلو

هدى:واخا

خرجات مخلياهم كيهضرو جامعاهم عليها الجدة بحال اللفعة والبيض ديالها كيتعاودو معاها ويعطيوها الشادة والفادة عليهم..باختصار "ولاد مهم"

أما هدى راها تابعا مريم فالدار الكبيرة محمقاها حيت مصلوحة ومفرشة رغم أن ذوق الفراش معربن لكن مفرشة مزيان..وحاضية طرف مريم لي كيتحرك ويعاود..دخلو لبيت صغير فيه ناموسية مغطية بكاشميرا فالموف وماريو خشبي عادي ..وفيه كوافوز ومراية فيها بعض مستحضرات مريم التجميلية

مريم:انعطيك بيجامة تبدلي بيها ..(جبدات وحدة فالصفر وطويلة واصلة الركبة مع سروالها)بغيتي هادي؟؟

هدى:لا لا طويلة بزااف

مريم:عندي غي الطوال..اتجيك زويينة غي لبسيها

هدى:واخا مع خرجت مزروبة مهزيتش حوايجي

مريم:ماشي مشكل نعطييك من عندي..هاكي ها ماتلبسي لداخل

مدات ليها كلشي من لول للخر ولوخرا غي كتشد وتشوف معجبوهاش جاوها معربنيين بحالا هي عندها ماحسن..سوتيان فالحمر السليب فلبيض وبيرميدا فالزرق..

بدات كتهز فحوايجها تا هيا وهي تهز زيت جونسوون وخرجو مخنوقة بريحة العرق..خرجو برا الدار لقاو نعيمة دخلات وهي تقول:زيدي

هدى:(دخلات)نااري سخووون غنتخنق هنا

مريم:شويا ويتنفس فيه الحال شويا غا زيدي

سكتات متذمرة وبداو كيحيدو حوايجهم..مع بدات تتحيد مريم تخنقات بالريحة لي لا تحتمل زائد صهد الحمام..كيحيدو ويلوحو برا فشبيكة تما تا بقات غي بالسليب هي وياها وهنا تبدأ المقارنة..مريم بلقة تقيسيها توسخيها..هدى بيضة بياض عادي لكن لحمها قرب يتذبغ...مريم صدرها وافي ولوخرا عندها صغيور..بدات كتقاد الما فالسطل وتخلطو بالما سخون وهدى حاضياها تتقارن بينها وبين راسها وهي تقول:هاكي هزي ديري صابون

بداو كيديرو الصابون ومريم حاضياها بنص عين..البيطان عامريين زغب وجناب السليب كذلك الركابي تدبغو ومزغبة فلحمها كولو..مع بدات كتسخن بدا لحمها كياكلها وكيتفرتت بالوسخ

مريم:(دوزات حكة لولة)محالش يخرج ليا الوسخ..غا داك السيمانة غسلت

هدى:(دوزات الكيس تبعاتها الشعرية)واااه حتى أنا واقلة غي البارح دوشت

مريم:(فخاطرها:بااين)حكي حكي حمامنا زيين كيفسخ الجلدة

معامن هي مع اكبر معفونة واكبر معجازة..ضفار رجليها شي طويل شي قصير شي محيدا منهم الصباغة شي لا..القدام جامعيين جلد ميت ديال عام الفيل..كتحك متذمرة كتافها كيطيحو عليها محاملاش تحك فحين لوخرا كتدوز على راسها وتكرد حارة فحكانها

مريم:اري نحك ليك ظهرك

عطاتها الكيس مع دوزات مع الشعرية تتخرج وتعاود..مريم بالنفس لي فيها كردات ليها ظهرها وجنابها وهي تقول:اري يديك ندوز لي دغياا كتباني عييتي مع الطريق

هدى:(لقاتها من الجنة والناس)اه اختي وعاد منعست ماشفتو غي مبغيتش نخسر ليكم الخاطر

مريم:غا زيدي ندوز ليك دغيا وتخرجي

وبالفعل شداتها مريم كسلاتها حكات ليها مزياااان كتبرد حر الخنز لي فيها مخلات فيها غي لي نسات تا ولات كتنهج وتعاود..عطاتها الكيس وقالت:سخفت هههه شللي وعاودي هاكي دوزي ليا ظهري

شدات هدى الكيس وبدات كتبعصص عليها فالحكان كدوز بشويا عليها يديها فاشلين محكات تال راسها عساك ليها هي..فقصاتها ومبيناتش وهي تقوليها :براكة اختي كنحك غي شويا

مدات ليها الكيس بلا عجز جاتها من الجنة والناس..وهي تقول:أنا كملت غنغسل شعري

مريم:حتى أنا(مدات ليها شامبوان كادوم)هاكي

هدى:(شداتو)مكنغسلش بهذا معندكش elseve

مريم:شي شمبوان هذا؟؟معرفتووش

هدى:ااه كنغسل بيه فكازا..زوييين

مريم:أنا هذا باش كتغسل زوين للشعر

هدى:معندي ماندير نعدي بيه

فكات مريم الشعر وطاح مسبسب كحل شابع تهلية هوما أصلا شعرهم رطب..هدى براسها عندها الشعر زوييين ورطب غي خرجات عليه..

فالأصل هدى لحمها بيض والشعر كحل وعطاها ربي ثقيبة تزين فحنكها وفوق مؤخرتها..لكن الإهمال كيقتل الزين..بقات عاطياها للعفن وقلة الذراع تا تدبغ لحمها والشعر ولى حالتو

كملو قد قد مع فات المغرب وبدات نعيمة كتعطيهم يلبسو عليهم..خرجات هي وياها حنوكهم مطرطقين بالحمورية طاح عليهم سر الحمام خاصة مريم..

نعيمة:بصحتكم الحمام..بان فيكم(شافت فهدى)تي منين جاك هاد الحبوب فوجهك؟

هدى:الفقصة والقهرة لي عشت فيهم طرطقاتو فيا..غا شي سيمانة يرجع وجهي يشعل بحال ديال مريم..

هدى:الفقصة والقهرة لي عشت فيهم طرطقاتو فيا..غا شي سيمانة يرجع وجهي يشعل بحال ديال مريم

مريم:اييييه أختي..مي فيا الجوع

نعيمة:زيدو نتعشاو باش يدخل باك وعمك يغسلو

بالفعل دخلو للدار عند الجدة نيشان لقاوها بوحدها هازة تسبيح ولكن الفم لي يستغفر مكاينش..غا هازاه ديكور..تستغفر مرة وتنكر عشرين

الجدة:تبااارك الله تبارك الله غا عرييسااات وصافي

هدى:ربي بخليك

الجدة:ياله تيي حطي العشا

ميقات فيها ومشات وهي تنوض مريم قالت:نمشي نعاونها

هدى:جلسي رتاحي ياله خرجتي من الحمام

مريم:منصيبش نوض نعاون مي

بالفعل مشات مخلياها متبعة ليها العين لمؤخرتها..فحين مريم غي دخلات للكوزية وهي تقول:تي كون تشوفي اش خرج منها ههههههه وا الدود تي هادو فالدارلبيضا معدهمش الما فالقوادس

نعيمة:ههههههههه منعرف ليها..

مريم:حشمت وحكييت ليها..وتشوفي بيطانها عامرين شعوورات ...اما شعرها مفكاتو تا بغات تهرنن

طلقو ضحكة بجوج بيهم وجلسو شادين بيها النميمة وكيوجدو فالعشا وبالفعل ماهي إلا ربع ساعة حتى وجد وتجمعوو عليه كاملييين ومكاين غي هاكي اهدى..كولي أهدى جري لحيييمات اهدى

التنكاف على الجهد خداتو هدى الشيء لي عجبها وخلاها متفكرش ولو ثانية فجداها لي بقات مفقووصة وسخفانة ..

_____

مجبدة ربيعة فقاع دارها و حداها جاراتها ها لي تمسح الدموع ها لي تصبرها وتواسيها..وفاص ليها إكرام شادة وجهها وكتهزز فرجليها بعصبية عيطو ليها غي الجيران جايا كتجري طاح منها النص..وأحمد راه كيبكي فالقنت

إكرام:الخاااانزة لوووخرا مامشات حتى دارتها..بغات غي تريكة باها الله يطليها بيهم والله متبقا تعتبها عندي هنا ..الكل***بة لوخرا(كتهزز رجليها)ميي نديك للسبيطار

ربيعة:(بتعب)لا لا...بغيت غا هدى ترجع

إكرام:خليها خليها دابا يضربوها قنوت عماتها وباها وديك جدااها وغترجع وديك الساعة (كتحلف) إلا مكليتها بسناني راني بنت الحرام

يوم كئيب داز على ربيعة لي همها غي هدى..هي عارفا ختها وعارفا تريكتها ميسواو بصلة وخافتها تكرفص..

أما هدى فمورا متعشات حيت هوما كيتعشاو بكري على حساب كيفيقو بكري داتها مريم لبيتها قايلة:نعسي شويا اختي ترتاحي كتباني ليا عييتيي

هدى:ااه بزاااف..عفاك ديري ليا تيليفوني فالشارج

شداتو دارتو ومشات مخلياها كضور عينيها فالبيت والفضول قاتلها باغيا تكتاشف بيتها وتفليه ..وحيت التيلي فالشارج ..لقاتها سبة وناضت بلا حشمة بلا حيا كتبقشش فماريوها لي منظم كثر من حياتها..اي نعم ماريو صغير وعادي من الخشب لكن متول..معزولين البيجامات بوحدهم والسليبات بوحدهم..و واحد الرف فيه ماكياج عادي..قلم وماسكارا ممعروفاش وعكر خفيف حلاتو وهي تخسر سيفتها وقالت:بيريمي

بقششات مزيان ومشات كتفوه تنشرات فوق سرير مريم براحة سرعان ماغمضات عينيها لدقائق جات مريم لي فيقاتها قايلة:نوضي نوضي جات عمتي نجية

هدى:(كتفوه وريحة فمها تدوخ بوزنيقة والنواحي)شكون فيهم؟؟

مريم:عمتي الكبيرة وبغات تشوفك

ناضت كتعجز ونطقات:فينو تيليفوني؟؟

مريم:راه فالشارج اختي..أنا سبقتك

خرجات وخلاتها كتعجز ناضت بشويا عليها كتحيد الدرة عليها وكطلق فشعرها ينشف وهازا خنافرها غادية تشوف عمتها لي المرات القليلة لي شافتها فيهم تعد على رأس الأصابع

وماحدها كتقرب للبيت وهي كتسمع صوات نسا كثار كيهضرو بلكنة عروبية قحة كتشهد على تاريخ طويل من اللهجات المختلفة فالمغرب

وقفات فباب البيت كتشوف نسا كثار شي عقلات عليه شي لا..شي عرفاتو شي لا..الأنظار تاجهات ليها كيف لا وهي موضوع الساعة لأن الأم خبرات بناتها وعريساتهم بشنو وقع كأنه إنتصار ليها حيت فالأخير هدى رجعات فانتظار يرجعو لوخرين

العداوة تكونات بين ربيعة وختها ملي هزات الدراري ومبقات بغات ترجع خاصة فاش طالباتها الجدة أنها تزوج إكرام لولد وحدة فبناتها..فرجوع هدى كان بمثابة إنتصار ليهم على ربيعة

تبسمات هدى تا بانت ثقيبة تزين وسط جمالها المخفي وراء ستار العفن وقلة الإهتمام كلشي كيطلعها وينزلها مبسميين ليها وهي كذلك حاسة براسها مرتاحة وهادو هوما عائلتها

ناضت مرا وافية وعامرة لدرجة الجلابة مزيرة عليها وكتبين جنابها..بيضة وعينيها معمراهم كحل ويديها فيهم بقايا نقيش..تبسمات ونطقات بلهجة عروبية:وااتي زيدي زييدييي يا الحنينة زيدي يااا بنت خويااا زيدييي

خداتها فحضنها عنفجاتها وزيرات عليها بالمحبة والاشتياق وكتبوس فيها وتهضر:يااو تبارك الله على بت خوياااا واهيا سيدي ياربي بت خويا ولات عزبة(كتبوس فيها ولوخرا كتفرنس)تبااارك الله

هدى عجبها الحال وتسالمات معاها بحب ودارت سلمات على البقية فيهم عريسات نجية وبناتها وولادهم باختصار عائلة كبيرة متفايشين بحبهم لبعض..نضامات ليهم وسط أتاي وداوزو لي موجداه نعيمة لي منها كراص وغطا الراس فديك الدار..العروسة الوحيدة ولي قدرات تصبر لحر العدوزة

كنزة:(شابة هازة كترضع فولدها صغير )تبارك الله شحال فعمرك

هدى:18

الجدة:بنتي ولات عزبة غدا ولا بعدو نعرضوكم للعرس ههههه

نجية:اييييه ومالها؟؟الزين وكاين ..الله يحفظها كتشبه لينا غي ختي راضية فالصغر

نعيمة:(جبدات حنكها بصبعها)تي نعلي الشيطان..هودا غا خديجة

نجية:(ميقات)إكرام لي شابهة مها..شتي غا هووداا وغا ختيي راضية محطوطة

نعيمة:ياتي راني عاقلة على خديجة اويلي حاااي..

الجدة:نوضي جيبي تصاورها نوووضي

هدى:(بحماس)عندكم تصاور ماما

نعمية:عدي تاع عرسها غا تي..بلاتي نجيبهم

ناضت نعيمة خلات قلب هدى يرفرف بالفرحة..صور مها قلال وأغلبهم مواضحيينش عند ربيعة..لكن أغلب الناس كيقولو بلي هي نسخة طبق الأصل من مها فكانت ديما كيعجبها تشوف تصاورها...ماهي الا لحظات حتى جات نعيمة هازا ألبوم حمر تتصاور وبداو بيناتهم كيدوزو التصاور حتى وصلو لعرس باعدي وخديجة..كانت فيه هاد الأخيرة ضعيفة وكتبان صغيرة مقارنة بباعدي لي متبدل فيه والو من غير الشيب لي تزادو..وكيف كلشي عارف نسخة طبق الأصل من مها..

بفقطان قديم كتبان خديجة بارزة رفقة باعدي لي خارج عليه الحشيش مبسمة وكأنها قطعة من هدى..هاد الأخيرة لي عينيها دمعو وهي كتشوف مها..خدات التصوريرة وسط يديها لي صباغة ضفارهم مقشرة وقالت:ماما زوينة كتشبه ليا

نجية:(ميقات)توما عواريتووو

مريم:(كتشوف معاها)زوينة..عينيها زوينين(شافت فيها)بحال دياولك

هدى:(تبسمات بدون متزيح عينيها على صورة مها)اه.

الجدة:اوا العقوبة منزوجك ونفرح بيك حتى نتي مورا مريم

هدى:(وعات على راسها)علاه مربم مخطوبة؟؟

نعيمة:وايييه..تي خاطب فيها ولد القايد(بافتخار)تبااارك الله

هدى:وماشي صغيرة؟؟

نجية:تي اويلي على صغيرة..البنت كبرات بزازلها كبرو اش تجعد دير؟؟

الجدة:حتى نتي نزوجوك ونفرحو بيكم

هدى:(بتعالي)لالا أنا باقي صغيرة..مكنفكرش فالزواج

الجدة:لا ابنيتي هذا ماهو كلام..البنت سرها دار راجلها غطا راسها ويسترها

هدى:مالي عوجة تا يسترني ههههه

ضحكو كاملين وكملو جمعاتهم ضاحكين ناشطييين مدلعيين هدى على الآخر ومكاين غي هدى محطوطة ومهزوزة الشيء لي خلاها تحس بقيمتها عندهم وتفرح وسطهم أكثر..

طاح الليل وخواتات باعدي وتريكتهم ماتقلعو من تم تا تعشاو عاوتاني كتى فقصو نعيمة عاد تسرسبو..هزات الماعن هي وبنتها والعيا كينيل منهم..ودخلو للكوزينة

نعيمة:يا تي أنا آش بغيت ليهم..بغيت ليهم العدم..تي هادو طلقو رجليهم ماتلاو بغاو ينوضو اويلي حاااي..كلاو وعاودو وهوما مشبحات ليا حدا العكرب الكبيرة

مريم:(كتغسل الماعن)هههههه عماتي زوينات امي معرفتش مالك معاهم

نعيمة:(خسرات فيها كمارتها)ياااك اخويتي..عماتك زيينات..على زين فعلهم ولا حيت تي بنتهم يبقاو يراريو بيك ويهزوك فوق كفوف الراحة ..

مريم:ههههه اوا عماتي

نعيمة:غسلي غسلي دوك المشاقف..عماااتي ..غا بصحتك معبرات غا خديجة سمحات ليهم فالدنيا بكري ومشاات..شتي غا دوك عماتك راه لا ما سحمات ليهم خديجة راه معدهم فين يركدو

مريم:اش كانو كيديرو ليها؟؟

نعيمة:واش نقوليك؟؟لي لحقتو أنا قليل ولايني كلها يخلصو ربي..غسلي غسلي نمشي نمسح الطبلة

تسالا الشقا وانتهى اليوم فدار باعدي وناضو البنات ينعسوو وكلها شد بلاصة ينعس فيها..

دخلو للبيت وقالت مريم:هاتي نعسي ففراشي أنا نفرش فالأرض غدا يجيبو ليك ناموسية

هدى:شكرااا..كولي ليا فين عرفتي خطيبك؟؟

مريم:هههههه معرفتو فين تي عدنا عيب غا شافني فالسوق وتبعني

هدى:(هزات حاجبها)هي شي مول البيجامات؟؟

مريم:(كتعاود على نيتها)أتي لا..راه ولد القايد ..عندهم خيورات وكطاراتهم يجري فيهم الخيل(كتسرح شعرها الجميل)

هدى:مممم مزيان..خصو غي يعيشك مزيان..ويكون قاد بيك

مريم:الحمد لله ربي عاطيهم من خيرو

هدى:وامتا العرس؟

مريم:الصيف جاي ولعقبة ليك حتى نتي

هدى:(بتعالي)لالا اختي الله ينجيني أنا باقي صغيرة باقي باغيا نتمتع

مريم:ياتي مكتقراي مخدامة اش تبركي ديري؟؟تضفري الشيب

هدى:اللهم نضفر الشيب ولا نتزوج من والا..شتي أنا والله ومكان سيدي ومولاي ويعيشني قايدة لخديتو

مريم:ههههههه تي مبوكرة لا..كيداير هذا لي غيعيشك قايدة..خصو يكون قايد

هدى:ههههههه ومالها ناخدو قايد..مالو زيني ميجيبش ليا قايد

مريم:(كاتمة الضحكة عليها وهي كتشوف وجهها)لالا يستاهل ماحسن ..نعسي نعسي

هدى:تصبحي على خير أنا باقي غنشد التيليفون

مريم:واخا

بالفعل فرشات مريم ونعسات لانها كتفيق بكري أما هدى راها شادة التيلي من بوسط لبوسط من تعليق لتعليق والعسة قابطاها فليل..تا هلل الهلال عاد حطات تيلي وتقلبات تنعس معلابالهااش نهائيا

وهاد الروتين هو لي عتامدات هدى فدار باها لمدة شهر..تفيق تال الطناش تفطر وتنقز الماعن وريحتها عاطية متبدل على شحال تا تحشي فيها نعيمة الهضرة..شادة التيليفون وخاصة ملي كيشارجي ليها باعدي راها لقات راحتها تضل هازاه وعينيها تعماو بيه..تاكل وتشرب وتنقز الماكلة عايشة الرفاهية ونعيمة وبنتها يشقاو..ولسان الجدة لي يهضر مكاينش

شهر كان كافي باش لي دايرين بيها يعرفو هدى على طبيعتها..هدى المعفونة لي اخر همها هو تهلى فراسها..

دخلات مريم لبيتها ونيفها تسد بريحة العرق لي خارجة من هدى لي مبقاوش عاقلين امتا غسلات..مشات نيشان حلات الشرجم وقالت:هدى نوضي غنخرجو نمشيو للسوق

هدى:(مركزة فتيليفون)لالا غي سيرو مافيا لي يخرج

مربم:(كتنش بيديها)بلا عكس نوضي اصاحبتي غنخرجو نشريو الحوايج

هدى:حلفي؟؟اش غنشريو؟؟

مريم:واغي نوضي دوشي دغيا وياله نمشيو

هدى:علاش غندوش؟؟نلبس علي ونخرج

مريم:(ضارت عندها مخرجة عينيها)واش ماكتشميش؟؟

هدى:اش غنشم؟؟عطيني شي جلابة ديالك نلبسها

مريم تصدمات ومبغاتش تعطيها جلابتها تلبسها على الوسخ والعفن وهي حوايجها عزاز عليها. حشمات فنفس الوقت تقوليها را ريحتك عاطية.. تنهدات و قالت مخاطباها هي لي عينيها فالتيليفون: نوضي ندوشو بعدا عاد نخرجو، را عرقنا اليوم..

هدى:وانتي لي ضليتي كتخملي أما أنا ماعرقتش

مريم:حممم هانتي هدى..(مشات جلسات حداها والريحة مدوخاها)شوفي اختي أنا راه بحال ختك وغنبغي ليك غي الخير ..بغيت نسولك وما تديريهاش مني قلة الصواب

هدى:(عينيها فتيلي)سولي

مريم:(جمعات شجاعتها حيت تقهرات بريحتها)واش اختي مكتشميش فراسك ريحة العرق؟؟

جملة خلات هدى تقلب عينيها لناحية مريم بالزربة عاقدة السبعة فالربعة متسائلة:كيفاش؟؟(دارت نيفها جيهة باطها وشماتها )لا مافيا والو..واش فيا شي حاجة؟؟

مريم:(معرفاتها كتستهبل ولا مالها)فيك شويا اختي..نوضي دوشي ياك وديري ريحة ونمشيو للسوق

هدى:(بقا فيها الحال)لالا غي سيرو اختي..أنا غندوش ونجلس غي فالدار

مريم:(حسات براسها بحالا جرحاتها)لا ماشي هاكاك..شوفي ماشي كنعايرك بيها ولكن راه البنت هي النقا..أنا عارفاك كبرتي بلا مك ومعندكش لي يقوليك غسلي وديري وعادي حيت أنا بنت عمك بحال ختك..غنوريك آش وراتني ميمتي باش ميحلش عليك بنادم فمو

هدى:(معجبهاش الحال)أنا حتى حد ماغيحل عليا فمو اختي غي تهناي. إلا مافراسكش أنا راه مريضة عندي مرض كيخليني نعرق بزااف ونخرج ريحة العرق خايبة وعيييت مانداوي ومندير ووالو هادشي ديال الله

مريم:(تيقاتها) سمحي ليا اختي أنا غي قلت ليك...ياله نوضي دابا دوشي ونمشيو نخرجو وملي نجيو نصايب ليك الشبة راها دقة بطلة

هدى:مافياااش غي سيري

مريم:واصافي أهدى نووووضي نوضي عفاااك راه غنتلاقاو مع سمحمد

هدى:(هزات حاجبها)خطيبك؟؟علاش؟؟

مريم:غيشري ليا التفكيدة..راه العواشر قربوو

هدى:(بنفخة)واخا ..

لبسات الجلابة لي مسخاتها مجاتهاش نهائيا جاتها عريضة وهي تبسم مريم:جيتي زوينة

هدى:شكرا حتى نتي(كطلعها وتهبطها)واخا مجاتنيش بحالك..أنا ضعيفة

مريم:دابا تغلاضي حتى نتي..ونتي أصلا مضعيفاش هدا هو قياسك

هدى:مبغيتش نغلاض اختي..عاجبني راسي هاكا فصالتي تاع البنات ماشي تاع العيالات

مريم:اوا راه الرجال كيبغيو لغلض وفاش يشدو

هدى:ممممم تيقتك

دخلات عليهم نعيمة لابسة جلابتها وصابوها وشالها وقالت:ياله زيدو

هدى:تسناوني نمشط شعري

نعيمة:تي لا بقيتي مقابلة داك الشعر لي متفكش من جوج حمامات تما بقينا..لوحي زيف وزيدي

هدى:مكنديرش الزيف أنا(عوجات فيها فمها)

نعيمة:اتي زيدي مزينو شعر لي تبينيه ..زيدي زيدي قراناتك مكيعريوش شعرهم راكي كبرتي..عطيها شي زيف

عطاتها زيف دارتو بالفقصة حيت عارفة عندها الصح إلا بقات مقاابلة شعرها مغيتفك تالغدا فالصباح حيت باختصار ماعاقلاش امتا فكاتو اخر مرة..حشاو فيها الهضرة مزيان وطلعات ونزلات فيها وتبعاتهم مغوبشة لايحة عليها زيف وجارا بلغة كيبانو كدامها قاسحين تضربي بيهم الكافر يسلم

غادية معاهم هدى معاجبها حال شادين طريق السوق لي مابعيدش بزاف ..مسافة عشرين دقيقة ويوصلو..منفخة وهازا قنانفها للسما دايرا الدور ديال ديك بنت المدينة لي كتمشي للبادية باش تبان كلاس..كتسمع فمريم ومها مجمعين وكيهضرو على اللباس وشنو غيشريو كي الصحابات حتى نطقات هدى:واش هو غيجيب ليك تفكيدة ولا غتشريها؟؟

نعيمة:غنتلاقوه دابا ويدينا نشريو لي بغات هي

هدى:مممم(شافت فمريم)كون غي درتي شويا تالماكياج

مريم:اتي ويلي راه عيب ..عيب عدنا باش يطيح عليا السر فالعرس

هدى:لي زين زييين

وصلو للسوق لي عامر بالمحلات تالحوايج دراري صغار ونسا ورجال وبين كل محل ومحل كتلقا بلاصة للماكلة..العروبية معروفين بالشوا والزرود..كيشوفو بعينيهم ويتشاورو بجوج بيهم وهي غي كتميق تاحاجة معجباتها كيجيها داكشي لا علاقة وهي راه بنفسها لا علاقة

هدى:فيناهو هاد خطيبك ؟؟

نعيمة:وادرنا معاه هناااو (كتلفت) ماعرفتو فين صد

مريم:(تزنكات)ناري يا مي قلبي غيسكت بالخلعة هههه

هدى:هههههه مالو محمد السادس راه غي رااجل

نعيمة:تي توكدي معايا لاش غيسكت..هاااه نقوليك متهضريش معاه حدري راسك وسكتي أنا ندوي نتي غا سوكتي يمشي يقول عليك خفيفة.. راه غتجي حتى مو

مريم:كوني هانيا

لوات فيهم عينيها معاجبها حال وكتسنى تشوف سي السيد وكضور عينيها فالمحيط..كلشي بحال بحال الرجال لابسين نفس اللباس والعيالات كذلك حتى سمعات صوت نعيمة كتعيط:واااا فاطمة وااااختي فااطيييمة وهاحناااو هناااا

تلفتات بسرعة وهي تشوف مرا رفقة شاب غزاال وسيم جدا..حروفو كحلين ماتهزي من العزار غي هو..الوقفة والطولة والتجريدة والزين..عينيها خرجو ممصدقاش بتاتا أنه هو خطيب مريم..هاد الأخيرة لي حشمات وحنات راسها كتعض فحنكها من الداخل فحين هدى باقي تحت تأثير الصدمة..صدمة أنه مريم غتزوج لواحد زوين بحال هذا..او بالأحرى السم والحسد شدها حيت ديما كتشوف مريم قل منها وهذا هو مشكل البنات مكيشوفوش حدبتهم كيشوفو حذبة الغير

الكثير من البنات كتلقايها لا زين لا فورمة لا قراية لا عقل لا هضرة لا صواب وكتبقا تعجب فالناس وتعيب فيهم وتقلل منهم وهي راه الحيط ممحاشيهش ليها دافعة النفخا على الخوا..وهذا حال هدى ملي جات لعند باها..هي بطبعها بتاتا واش محسادة..مكتحسد مكتغير مي فاش نتاقلات عند باها لقات راسها وسط محيط آخر حل ليها عينيها و وراها أنها كانت غالطة فشنو عايشة و أن الناس كتعيش وكتزيان وكتقاد وكتقلب على راسها

وقف عليهم الوسيم مع مو مبسميين وتسالمو العيالات اما الخطيب فراه مد يدو بحياء لمريم لي مهزاتش راسها من الأرض حشمانة..باست لعدوزتها راسها ولوخرا كترضي عليها..وفاش وصلات النوبة فهدى..تبسمات ليه باعجاب وقالت:سلام

حرك ليها راسو وجر يديه وهي تدوز بابتسامة سلمات على العدوزة لي فور ماشفتها نطقات:بنت لوسك؟؟

نعيمة:اه..بنت باعدي مع خديجة الصغيرة..جات مع مريم تونسها شويا

...:مافيها بااس..ياله نمشيو نقضيو غرض باش نرجعو بكري..التيباري خارج ويوصي منتعطلوووش

وبالفعل تحركو والخطيب حدا مو ومريم حدا مها وهدى جنبها باقي مصدومة..حتا نطقات بهمس:زوين راجلك

مريم:(التفرنيسة هاربة ليها)بصح ههه ناري غنجي على كادومتي ههه

سمحمد:مي اجي نشوفو هنا

دازو معاه عند أكبر محل ديال البيجامات حاط الشكال والنواع كيضورو راسهم حايرين كلشي زوين بالنسبة ليهم..

سمحمد:(قرب لمريم بشوية)كيدايرا؟؟

بمجرد ماسمعات صوتو تبسمات حشمانة وقالت بهمس: الحمد لله ونتا

سمحمد:حمد لله..شوفي شنو بغيتي

ياله هزات فيه عينيها وهي تسمع صوت العدوزة تتقلب فبيجامة هي ونعيمة قايلة:مريم تي زيدي تشووفي

مشات بسرعة هاربة من نظراتو هو لي عاجباه..فحين هدى كتشوف فيهم بنظرة دونية ..وبقات واقفة لور كتسناهم يكملو محاشاوهاش ليها بتاتا..بقات غي حاضية سمحمد لي عاطيها بالضهر داير يديه فجيابو ومتبع معاهم وكيختار ليها..بلاصة البيجامة جاب ليها جوج وهي غطير بالفرحة..من محل لمحل كي الوردة كتشوف شنو بغات وتشاور مع مها وهو يخلص على قدو مبين بلي مهلي فيها مسالاو تا هدى سالات نفسها كامل بالسوطان..وكون غي شي نفس نقي نفس زافر بقلة غسيل السنان

سمحمد:(هاز ساشيات)ياله ناكلو شي حاجة

نعيمة:(حشمانة من النسيب)ياويلي حي غا خلينا نمشيو للدار مرة خرا

هدى:أنا عيييت

العدوزة :مسمعناش صوتك يا بنيتي(تبسمات)عاقلة على مك..كانت بحالك..عندها شي عينين تبارك الله مكاينش لي شافت فيه ومفهاش فيها

هدى:(تبسمات)الله يرحمها

مريم:حتى هدى عينيها زوينين

نعيمة:ايييه ياله نمشيو المكي غيصيفطني لدار بويا نههه

توادعو معاهم حشمانين وزادو خلفة

نعيمة ومريم مسكتوش من الهضرة والتعاويد والضحك وهدى معاجبها حال..كي دخلو بدات كتسرسر للعدوزة:يا خالتي وكي تهلا فيها كون يصيب يشري ليها السوق كولو

هدى:(ميقات)نعلي الشيطان امرات عمي

نعيمة:ومالك مشتهيش؟؟تشوفي اخالتي شحال ختار. وعزل..غيتهلا ليا فبنيتي

الجدة:واحتى حنا عطيناه الزينة فالعايلة..بنتي زيينة وحادكة(بابتسامة)العقبة لهدى حتى هي بشي سعد زييين

نعيمة:امين ياربييي

مريم:وياربي قبل عرسي باش نديرو عرس واحد

هدى:لالا اختي غا بصحتك بزواج أنا باقي صغيرة ماقادا على هم(ناضت)

خرجات خلاتهم كيشوفو وهي تهمس نعيمة للعدوزة:شتي أخالتي اش كلت ليك؟؟البنت غايرة من بنتي

مريم:وااامي(بعتاب)

نعيمة:سكتي يسكت لبوك الحس..شتعرفي تيا..واش شتي اخالتي؟؟

الجدة:واقلة عدك الصح..الدرية مقروصة خصها تاهيا دير دارها

نعيمة:(حشات ليها الهضرة)واماجا فيها حد..ياك ديما تخرج معانا للسوق وكل جمعة تالعيالات نديوها مدوا فيها حد..خصها شويا تتهلية

مريم:واامي واتي نعلي الشيطان

الجدة أتي سكتي نوضي هزي درابلك وحيدي من حدايا

جمعات قشها وخرجات كتسوط فحين نعيمة نطقات:اوا اخالتي الله يجيب ليها رزقها تاهيا

الجدة:اميين

فالمغرب كتقدر قيمة البنت بشحال الناس لي خطبوها ولا شحال لي عجبتهم ولا شحال من واحد تبعها فالزنقة..كنتي الخطاب عليك خيطي بيطي راكي "غزالة ومعشوقة" مسول فيك حد راك "مسكينة"..

مع العلم الى جينا نحللو الوضعية فراه ممكن كثرة الخطاب تاحد فيهم مكيحمر الوجه وفمحيط هدى فعائلة باها البنت مع تصوم مع يبداو يبانو مؤهلاتها خصها تطير وخصها يكثرو عليها العروض

دخلات على هدى للبيت لقاتها بدلات عليها ومنشورة هازا تيليفون ماعاجبها حال ونطقات:زوينين بيجاماتي

هدى :ممم بصحتك اختي زوينين

مريم:(بابتسامة خجولة)كي جاك سيمحمد

هدى :مزياان

هدى:ياويلي هههه واتي واش عجبك؟؟

هدى:زويين جيتو مع بعضياتكم ..واش مكتهضروش فالتيليفون؟؟

مريم:مرة مرة وصافي

هدى:عندو فيسبوك؟؟

مريم:واقلة ..تنسمع بيه عدو

هدى :نقلبو عليه؟؟

مريم:كيفاش؟؟أنا مكنفهمش فهادشي بزااف

هدى:اش سميتو وكنيتو؟

مريم:سمحمد*****

ناضت هدى بحماس كتكتب وتقلب وتبحث وتخندش وتقلب فسميات حتى طاحت عليه وقالت:هاا هاهو هههه ولاهيلا

مريم:(بفرحة)اري نشوف اري هههه

هدى:تي اجي تشوفي اش حاط؟؟ويلي شوفي شحال تالبنات؟؟

مريم:كيفاش البنات؟؟

هدى:(بحالا لقات منين تشدها)وااشنو يالحبيبة حسابك كيصلي على هيضورة السبع راه غيكون شابع بنات

مريم:(تقلبو ملامحها)وراه راجل ..مهم أنا لي غياخد

هدى:ياك امسكينة(ميقات فيها)زيدي زيدي تشوفي تصاورو

بداو كيدوزو تصاور ومريم كتشوفهم بحب وتقوليها ديت الزين تا كملو هي مسخاتش وقالت:بطا عليا غا امتا نتزوجو

هدى:ميتة على الزواج؟؟تي راه غاتاخديه غا تهناي

مريم:ومالكي تي ماميتاش عليه؟؟

هدى:(خرجات عينيها)مالي مسطية؟؟اختي انا باقي صغيرة وإلا كان غي زواج دمق وقضي من عندك ماعندي ماندير بيه

مريم:وانتي تعرفي

******

الأيام كتمشي وتجي وهدى ولو نهار سولات فربيعة لي كبدتها مشوية عليها..كطيح فبالها مرة مرة وصافي وكتناسا الموضوع..عايشة الراحة والسياحة فدار باها..ماتشقا ماتنوض ماتغسل ماتصبن غا الصريط والمريط وشي مايشيط..والعفن أكيد عادة مستمرة عندها..تشوف مريم تاتعيا وتعطيها فوجها

باش تنوض تنقي راسها لكن لي معفينية معيفينة

واحد الليلة من الليالي ..تحرك البرد والشتا مرة مرة كتصب..الناس تخشات فحوايج الشتوا وتخلاو على حوايج الصيف..مخشية هدى لابسة بيجامة متختخة بالعروقات وكتلعب فتيلي بعيون شبه ميتة حيت عامرين بالهالات السوداء وحداها مريم غارقة فالنعاس..قال ليها راسها سيري لكونط خطيب مريم وصيفطي انفيتاسيون ..عضات شفايفها وشيطانها ورا الطناش تليل وسوس ليها وفلحظة نعلاتو ...مسحات على وجهها وخمدات تنعس وعقلها كيدي وكيجيب فموضوع واحد "الراجل"

"الرجل" كلمة ذكورية نوعا ما..كتمسعها فمجتمع عربي كتجيك الهبة علاش حيت مرسخيين فأذهاننا انه شحال ما حققتي شحال ما نجزتي الا مكانش عندك الراجل كي والو..فكثيرمن الأحيان كتلقى مرا قارية واعية وزوينة وواصلة وعندها رزقها يحسد عليه وكيبقا عليها مجتمعنا "اوا هاهيا بقات بلا راجل" كيرسخو فأذهاننا أنه الرجل هو الإنجاز إلى لقيتي راجل وتزوجتي بيه راك درتي انجاز عظيم

كيتعتابر إنجاز الى لقيتي رجل كيتاقي فيك الله كيبغيك..كيحن عليك..كيحتارمك وكيحتارم قراراتك وعاطيك قيمة ومرتبة فحياتو غير هادشي راه غي محسوب عليك باطلا..تحت شعار "كاين لي مزوج وكاين لي مدوز الفريضة"

هدى طول مدة سكنها مع دار باها وهي كتشوف محيط كولو كيهضر على الدار و الوليدات والراجل والزواج وسنة الحياة.. مواضيع ومفاهيم كلها ترسخ نفس الفكرة "خصك تزوجي"

كل مجمع كتسمع "فلانة تخطبات..فلانة تزوجات..فلانة كضل يتبعوها الناس..." وغيرها من الجمل كتشوف راسها هي تاحد ممسول فيها كيجيها نقص شديد ماشي حيت هي مازويناش إنما المحيط لي هي فيه كيأثر عليها..لو تبدل المحيط شوية يبانو ليها أهداف أخرى

ومحيطنا دائما هو لي كيغير قراراتنا

فاقت لغد ليه معطلة كي ديما كتسمع الهضرة فالدار تعجزات على أقل من مهلها وناضت كتجر فرجليها وتحك فالكبة لي فوق راسها حاشا واش شعر هذاك بقلة المشيط وتتفوه برائحة مبيد الحشرات..دازت غسلات وجهها. .. مشات بيه كيقطر كوزينة كتقلب على ماتفطر وهي تسمع حوار كيدور بين نعيمة ووحدة فخواتاتها لي الظاهر أنه جات عندها

نعمية:وزعما زوين؟؟. .

وقفات بعيد كتسمع هضرتهم ..فرزات من الصوت بلي صوت مرات عمها وختها ..حوارهم خلا وذنيها يقلشو ويوقفو يسترقو السمع..

نعيمة:واش زين؟؟

فاطنة:أ متعزلي من العزارة غير هو

نعيمة:وفين شافها؟؟والبنت مكتخرج مكدرج غي معانا

فاطنة:وامنعرف..

نعيمة:وا نجيك للمعقول بنتي أنا عطيتها و ولد القايد مابحالو حد..غا قوليه يشوف الرزق فقنت اخر

تلغات بتسامة هدى لي كانت راسماها ظنا منها بلي كيديو عليها..وبلي هي لي جاوها الخطاب لكن صدقاات بنت عمتها..بقا فيها الحال وبزاف حيت كتشوف راسها خايبة او بالأحرى كتعطي لزينها قيمة بعدد الناس لي جاو فيها..كيف لا وهي منهار جات وهي كتسمع فلانة شافوها فالسوق وتبعوها ...فلانة تخطبات..فلانة دقو بابها فلانة دارت العقد..هادو جمل وضعيات كيخليوها تحس براسها ناقصة بالجهد..زفرات وتمات داخلة للكوزينة وريحتها سابقاها

هدى:صباح الخير

نعمية:تي اشمن صباح الظهر هذا هههه(كطنز)

هدى:اوا مزيااان(منفخة)

فاطنة:كيدايرا لباس؟؟

هدى:الحمد لله..خالتي كاين شي فطور؟؟

نعيمة:الغذا هذا ابنتيني..راه كلشي قدامك كولي وشربي تي معامن جات

هدى:(هزات البراد)ومالها إلى مجاتش معايا..بصحتي وبراحتي غا خليني كناكل ونشرب اش خصاني

نعيمة:(لاحت ليها القرطاس)وكون غا كان يبان فيك..معرفناك غادية ولا جايا ههههههه

فاطنة:ههههه تي واقلة فيك السينتة

هدى:(غوبشات)بغيتي نولي كد البكرة ولاشنو؟؟هذا قياسي(كتهز فحجبانها)وعاجبني راسي

نعيمة:(كتفقص فيها)اوا لواه البنت هي لي تكون بصحتها..شادة راسها شويا تبان نتي يا بنيتي مشبهتيش مك

هدى:(خبطات كاس مع الطبلة)صباح الله

خرجات مخنزرة وهضرتها كتحفر فيها..فحين نعيمة كتضحك قايلة:تي المعيفينة مالها؟؟

فاطنة:منعرف هههه مهم خليتك على خير نمشي لميحالي غيجي المهيدي ميلقانيش

دخلات هدى للطواليط وهي تعطي الضو الأخضر لعينيها باش يبكيو شويا..شافت راسها فللمراية أبدا واش ضعيفة هذاك هو جهدها..يمكن حيت باقي صغيرة..وبدات كتعبر فراسها وتشوف فراسها كيفاش دايرا وتاحاجة معاجباها

المجتمع المغربي عندو لكنتي فيك ميترو ونص خص تكون فيك مية كيلو باش ياله تكوني بنت..كيشوفو وحدة ضعيفة ويعطيوها نيشان فوجهها:مالكي ضعيفة ؟؟واش كيسدو عليك حتى كياكلو؟؟اويلي ضعافيتي؟؟خصك تاكلي شويا..

"خلطي الشكلاط والمكسرات"

"شربي السيرو"

"كولي دردرك باش تباني شوية"

تحت شعار الى مغلاضيتيش مكاينش لي يشوف فيك...مشكلة الضعف فمجتمعنا راه مشكل عويص الى مقلناش عليه حفرة خصها تردم..كتكون البنت بصحيحتها مناقصها خير وكتجي وحدة أصلا فورمتها كي اورنجينا مقلوبة عندها الفوق كثر من لتحت ..بزازلها قد البقرة وترمتها قافزة باغيا تسابق مع كتافها شكون يبان لول وتقوليك:غلاضي شويا غي تباني

على أساس أنه الى غلاضت وبانت غتقضي شي لعبة..مفهومهم أنه البنت الغليوضة كيطيرو بيها حيت عقلهم محصور فرجل...وكتلقاي وحدة خاسرة زبالة الفلوس فاللحسة وفالقويلبات..مؤخرتها طابت بكثرة القويلبات فيهم فينما كانت شي عشبة خامجة...ومعدتها طيباتها باللحسات لي كيخرجو الكرش والحناك قد طبل ويعطيوك فصالة المرا لي والدة ومعاودة

كنتي غليضة ولا ضعيفة راكي زوينة..كل وحدة فينا عندها زين فشكل وكل وحدة عطاها ربي نقطة الزين فبلاصة..ومكيعنيش. أنك كنتي غليضة راكي زوينة لأنه حتى الغلاضات كيتعرضو للتنمر أكثر...بجملة "خصك تضعافي"

غلاضتي ولا ضعافتي راه خصك ديريها راسك ماشي باش ترضي المجتمع لي أصلا كيفما درتي معاه وحلة..معمر الغلض ولا الضعف كان معيار الجمال الا عند أصحاب

العقول الخامجة وضحايا هاد التنمر هوما البنات لي كيطيحو فبير كولو سلبيات وكيفقدو ثقتهم فنفسهم مع العلم لو جلسات مع راسها غتلقا فيها محاسن كثيرة

وهذا حال هدى لي رغم أنها مضعيفاش بزاف لكن بكثرة هضرة المحيط ديالها فراها تأثرات ولا كيبان ليها راسها خصها تغلاض وباشما كان باش حتى هي يكون عندها الطرف لغرض واحد هو تجذب الراجل ناسية بلي لي خداك على طرفك نهار يمشي يلوحك.. زفرات بضيق نفس وخرجات للكوزينة عاود جلسات كتفكر وعقلها كيضرب فأخماس وأسداس باغية دير حل لراسها ..فطرات على خاطرها ونعيمة كتمشي وتجي عليها مدواتها موالو ولفاتها متحني مادني..

فجأة مشات لتيليفونها أو كيفما كيقولو ليه مجبد البلا..حطات بوسط فكروب بنات مساليات قبهم كثر منها

"سلام البنات نتمنى تكونو بخير..عفاكم البنات أنا ضعيفة بزااف بغيت شي حاجة تغلضني دغيا عندي مناسبة وخصني نعلاض عفاكم"

يتبع...