خضوعي الجزء 11

هنا راسها تشتت و شداتها الدوخة بدات كتقرب منو بشوية وبخطوات ثقيلة و دايخة وكلها كترجع كتقرب وكتحقق فملامحها شوية بشوية

 صورتو كتوضاح عينيه هما هما حطات يديها فوق فمها كتحبس صوت بكاها

كتزيد تقرب و هي كتحقق فملامحو كثر وتراسيم وجهو :" ايسى "

كتدوي بصوت باح متقطع :" ايــســى "

وكتشهق قربات ليه و بعد خطوة منها متخوف مقادرش يشوف فيها ولا يخلي اي تلامس يوقع بيناتهم خايف يضعاف خايف يخضع لانثى اخرى من غير معشوقتو

طأطأ ليه رافاييل راسو وغمض عينيه باش يدوزها ليها ويخليها تقرب ليه تلاحت عليه عنقاتو بجهد مزيرة عليها فحالا غيهرب حتى حسات بعضلاتو الصخرية كتوجعها فصدرها ويديها فوق كتافو كتدوز على عنقو ووجهو هبطات راسو عندها وتاهوا تبعها بلاما يمانع ولا يعاند حطات عينيها فعينيه مغرغرين ويديها كيرجفو فوق وجهو :" ولدي !"

طبعات قبلة فوق خدو وحس بطعم ملوحة دمعها فوق فمو :" ولديييي "

بدات تضحك و تشهق فنفس لوقت :" اييسى "

كتشدو كن كتافو و كتقلبو وكتضور فيه وهو كالصخرة واقف كيشوف فيها :" كبرتي وليتي راجل "

ضحكات :" وليتيي ملك الملوك "

كتمسح فدموعها :" رجعتي حاكم لقبيلة واخا بعدتي على اصلك عمرك نسيتي هويتك "

همسات :" الحاكم "

ابتسم رافاييل من وراها :" اعظم حاكم "

عيسى مكانش فاهم مشاعرو اتجاه هاد الغريبين لي دخلو حياتو لبارح وبداو كيخسرو توازنها و كيخلقو دبدبات فمشاعرو

عابد كان واقف جنب عيسى هو واسماعيل :" هزوه للقصر "

داك ساع لورانس هزو عابد بوحدو فوق كتفو عمرو دمايات وشاف فرافاييل :" تحرك دخل ناسك "

رافاييل هز حاجبو :" هادوك ناسك دخلهم ولا خليهم "

ايليزابيت شافت فجيشها :" ليوم غيكون تتويج ملك اسبانيا "

كلشي حط سيفو قدامو بزربة وركع حاني راسو :" فداك ملكنا "

وخدات السيف من الارض و شدات يد عيسى و جرحاتها غير شوية من راحة يدو حتى سال الدم :" هاد الدماء من اصول اسباانيااا ملكية "

وحرات ولدها رافاييل و دارت نفس العملية حتى سال دموو و جمعات يديهم بزوج :" شحال تسنيت هاد نهار "

رافاييل كيمسح دموعها :" متبكيش اسينيورة "

هي عينيها على عيسى لي مكيشوفش فيها :" هادو دموع لي كتمت اعوام هادو دموع فرحتي بولدي "

شافت فيهم :" ملكنااا اييييسى "

وجميع الجنود كيرددو فنفس الوقت :" فداااء ملكنا اييسى "

كتهتف بصوت قوي حتى كتبح :" عرش اسبانيا يهتز "

كيرددو :" ارضنا ولادنا و اروااحنااا لخدمتك فخامتك "

كيهفتو بصوت اقوى :" بالقلب بالروح بالسيوف "

هزو يديهم اليسرى دقة وحدة :" كنقسم منرضى بملك غيرك ومنخضع لغيرك و منخون ومنتمرد "

حدرو راسهم باحترام :" ملكنا ايسى "

عيسى كان واقف مدهشر ومصدوم من داك الالف لي متدربة ومتمرسة كتنطق دقة وحدة بكلمات زعزعو عرش كيانو وعرجو احساس السيادة والقيادة فيه تبورش وهو كيشوف حيش كامل راكع عندو و كيتمنى وكيتسنا قيادتو و مامس ايليزابيت الناعم وسط يدو وهو عمرو قرب ولا قاس يد من غير يد زينب تلفت بشوية فيها فاش كانت كتهتف كيحقق فملامحها الغربية وعيونها شبيهة رافاييل تماما فلون و الترسيمة كيشوف فمها كي كيتحرك كيحس بحبها ليه و شوقها لي عمرو حس بيه من حهة شي واحد اتجاهو حركات فيه شي حاجة وخلات عقلو يتبنج

شافت فيه :" مغيسمعوش غير امرك "

رافاييل :" الى مآمرتيهمش غيموتو وهما راكعين كيتسناو امرك "

هو حنحن متوتر من نظرات مو فيه :" وقف.."

قبل ميكمل حيش كامل وقف تسمع صوت نوضة القوية ديال اجسادهم وسيوفهم تحركات :" امرك ملكناا "

بقا غير كيشوف :" دخلو "

تقادو فصفوف طويلة وهما مسبقين خيولهم وشاف فعابد :" من بعد "

باش ميسولش بزاف سكتو و طار سابقهم بجثة لورانس للقصر و اسماعيل بقا غادي معاهم فنفس الموكب وهي غير حاضية عيسى ولاصقاه :" كيف عشتي اولدي ؟"

حطات يدها فوق رجلو وهو فوق لخيل :" واش تعذبتي كي تعذبت فبعادك ؟"

مشافش فيها نطق بنبرة جافة :" لا "

رافاييل حرك مو :" ماما ايسى متوتر شوية و جديد عليه يشوفك اعطيه شوية ديال لوقت "

ابتاسمات :" غير نشوففو بين عينيا هاديك هي الجنة "

زينب خرجات لباب لفيرمة كتشوف عابد كلو دمايات فصدرو ووجهو و دراعو وحتى من شعرو مبلل بالدم حيت كان حامل لورانس فوق ظهرو مشات تجري و لملحف طاح عليها :" عييسىىى ؟"

حلات يديها :" وقف شنوو هاداا "

كتقيس فرحلو الدم :" دممم ؟"

كتلمح جثة وراه كتشوف غي رجليه :" واش واش عيسى ؟"

داخت و شدات فلخيل :" عيسى بيخير ؟"

عينيها كانت مملوؤة بالخوف والقلق تخطاها ونطق :" لبسي لحافك لقايد قريب غيوصل ومغيجبوش لحال "

وزاد وخلاها حطات يديها فوق قلبها كان كيضرب بجهد غيخرج من بلاصتو وفيه رعشة الخوف

فجهة الاخرى دخلو للقبيلة و وصلو للقصر :" هادي هي داري "

ايليزابيت :" دارك هي اسبانيا "

شاف زينب جايا من بعيد :" وهادي مرتي "

تلفتات ايليزابيت فيها وابتاسمات :" زوينة "

ابتسم بلاما تشوفو فحالا حس بلفخر بزينب لي نالت اعجاب ملكة اسبانيا و ديما الرجل كيفتاهر بالمراة لي تعجب مو

و لمترجم كان معاهم مفاتهمش شافت فيع ايليزابيت :" ترجم ليها اعجابي بيها كتبان وردة وسط قصر حاكمنا "

كي وقفات ديريكت عند عيسى مشافتش الغرباء لي معاه :" شنو وقع ليك ؟"

كتتصفح جسمو ووجهو كتتاكد من سلامتو :" فين كنتي ؟"

شافت فالناس معاه :" وشكون هادو ؟"

ابتاسمات فاش شافت ايليزابيت كتبتاسم ليها و نطق المترجم كيترجم ليها اعجاب ايليزابيت بيها ابتاسمات :" حتى هي زوينة بزاف وعينيها كيفكروني فجنان وقت الربيع والبحر فصيف "

طرجمو ليها و ابتاسمات ليها ايليزابيت :" شكون هادي ؟"

كتشوف فيها :" كتشبه.."

ورجعات شافت فرافاييل :" ليه بزاف "

عيسى نزل فوق من خيل وشد فيها :" هادي "

شاف فيها و معرفش كيفاش يسميها ولا ينطقها :" ملكة اسبانيا ايليزابيت "

و المترجم طرجم كلام عيسى و بان واحد الضجر وقلق على تعابير ايليزابيت حيت مقدمهاش على اساس مو :" غيكونو ضيوف عندنا شي يامات "

ابتاسمات ليهم :" مرحبا بيهم "

ورحعات شافت فيه بفضول :" وشنو كيديرو عندنا ؟"

حط يدو فوق خصرها مدخلها :" متسوليش بزاف غيدوزو وقتهم وغيميشيو "

حركات راسها بواخا :" ياك ماوقع والو ؟"

باسها فوق خدها :" باغي نرتاح "

وزاد وخلاها خرجات عندهم :" دخلو عافاك متبقاوش فلباب "

عاونوها نزلات من فوق الخيل و زينب كتشوف الحنود ديالهم كيف تفرقو جنب القصر واقفين تابتين بنيتهم قوية وصلابتهم من صلابة صخور وطولتهم من طولة النخيل والجريد

قربات ايليزابيت و شدات فيدها ولمترجم كينطق وراها :" نتي مرت ولدي عيسى "

حركات راسها باه قبل مترد لبال لكلامها لمترجم كيترجم لايليزابيت :" ولدك ؟"

ابتاسمات ولمترجم كيترجم فنفس الوقت :" اه عيسى ولدي "

زينب بصدمة طلقات من يدها :" كيفاش ؟"

ايليزابيت :" القصة طويلة خلينا نجلسو ونعاود ليك "

دخلاتهم وجلسو فلمراح و ايليزابيت كضور راسها فلمكان فين كبر ولدها :" هنا كبر عيسى ؟"

شافت فزينب :" عاوديلي "

بحماس قربات ليها :" كيفاش كبر وكيفاش عاش ؟ ، واش عمرو تظلم ولا قاسو شي حد "

زينب بسخرية :" شحال ظلم ماشي تظلم "

ابتاسمات ليها زينب :" عيسى كبر حاكم و عاش فالخير "

تنهدات براحة ايليزابيت :" كنت خايفة بزاف "

ورجعات شدات فزينب :" كيفاش تزوجتو "

كتشوف فالقصر وكتسرق سمع :" مسمعتش صوت اللعب واش معندكمش ولاد ؟"

زينب حدرات راسها حشمانة :" لا "

دوزات ايليزابيت يدها فوق فخض زينب بشوية :" مازال نشوف ولادكم "

شافت لوحات عيسى محطوطين تم :" باقي كيرسم "

ابتاسمات :" كان مالك غيكون فرحان دابا "

زينب بفضول :" شكون مالك ؟"

ايليزابيت :" بابات عيسى "

زينب حرقها راسها وطلقات سؤال :" نتي ملكة بلاد اخرى "

كتفكر عليها :" اس..اس"

نطقات ايليزابيت :" اسبانيا "

زينب ميلات راسها :" كيفاش عيسى ولدك وهو كان عبيد ؟"

تنهدات قبل متبدا تسرد عليها القصة كاملة من اولها لحتى لهاد النهار لي خطات رجلها فارض عيسى و رافاييل كيكمل ليها شي اخداث لا سهات عليهم

زينب تنفسات الصعداء وهي مقلقة على ماضي عيسى المرير وفراقو مع عائلتو شدات فايليزابيت :" تعذبتي بزاف "

مسحات ليها دمعة من عينها :" ماشي ساعل تعيشي بعيدة على ولدك "

تنهدات ايليزابيت بوجع :" صعيبة بزاف عمرني خسيت براسي عايشة "

شافت فرافاييل :" وحتى من ولدي قصرت فتربيتو بزاف حيت بالي كان كلو مع عيسى وكنت حابسة وقامعة رافاييل حيت خايفة عليه "

زينب بفرحة :" هانتي تجمعني معاه دابا "

ايليزابيت :" لفضل كيرجع لياسوع تقبل دعائي"

زينب مفهمات والو بقات كتشوف وهي ترحع تنطق ايليزابيت :" و غيرجع لاسبانيا يحكمها "

زينب بصدمة :" غيمشي لاسبانيا "

ايليزابيت :" نت وياه ولادكم غيتزادو فبلادهم

زينب تزيرات و خاطرها خسرات :" نخليكم دابا "

ابتاسمات بزز :" خودو راحتكم ديرو راسكم فداركم "

وطلعات كتجري :" شفتي شحال زوينة "

ايليزابيت :" ولدي ذوقو متبدلش زينب كتشبه لاناستازيا "

حرك راسو :" غير عينيها "

ايليزابيت :" يكون شاف فيها اناستازيا ؟"

رافاييل :" مكايتشابهوش اناستازيا بنت عائلة وزارية رقيقة بزاف عكس مرت عيسى قوية و عنيدة لخوف كاين فعينين كولشي الا عينيها كنشوف تحدي فيهم جهة عيسى ، اناستازيا الى وقف عيسى قدامها دابا "

ضحكات ايليزابيت :" غتسخف "

رافاييل :" حب طفولة "

زينب طلعات للبيت ديريكت كان ناعس وحاط يدو تحت راسو مغمض عينيه مناعسش ولكن كيفكر فلكالم حركاتو بجهد حتى تزعزع :" عييسى "

كضرب فيه :" شوف فياا "

ناض بشوية جالس :" اش كاين ؟"

زينب :" كيفاش اسبانياا ؟"

كتشوف فعينيه :" كيفاش ملك اسباانياا ؟"

بنبرة مرتافعة :" كيفاش غتمشي تحكم اسبانيا"

كيستفزها ببرود :" نخلي ارضك وناسك تتهنى من ظلمي "

و هز حواجبو كيشوف ردة فعلها :" من مورا ماهلكتي ناسهااا و قتلتي رجالها و اغتصبتي نساها و يتمتي ولادها ختمشي "

كتدوي مفقصة :"لاااا ماشي بهاد سهولة خاصك تخلص وتكرس حياتك ليها و.."

قبل متكمل قلبها منعسها فوق رجيلاتو تا ترمى شعرها فوق وحهها وقرب ليها نفسها فعنقو حيت محني عندها و فمو جهة فمها وعينيه فوق صدرها نطق ببحة رجولية وصوت قوي :" علاش كتصعبيها ؟"

كتحس بفمو فوق شفايفها كيتحركو وكيحرقو شفايفها معاه فلكلام :" قولي ليا بغيتك تبقا معايا وغنبقا "

حطات اطراف صبيعاتها فوق صدرو كتبعدو بشوية و كتهمس كتخاول متحركش شفايفها :" بعد مني "

دورات راسها كتنهج حيت كانت قاطعة انفاسها وكتسخ بسخونية نفسو فوق عنقها :" غتبقا حيت خاصك تخلص اثمك "

ابتسم بشيطانية :" اثمي ولا.."

قرب لعنقها كيستنشق عبير عطرها الفوّاح :" عشقي المتيم بيك "

دوخاتها ريحة البن لي منباعثة من بين فكيه عويناتها ثقالو و شفايفها تحلو :" هااء "

بعد شوية وعينيه باقي عليها كيتحقق من ملامحها ابتسم ومفهماتش السر وراء ابتسامتو قبل مينزل فغفلة منها وهي سارحة فابتسامتو سرق قبلة منها فوق فمها بشوية وطلقها وهي بقات فنفس الحركة متحركاتش باقي غير كتشوف فيه وسارحة قرب بشوية ليها كثر عند وذنيها زيرات على يديها وغمضات عويناتها كارزك عليهم بجهد و جمعات فمها مكمشاه تحنى لعند شحمة وذنيها حتو قرصاتها لحيتو :" شنو كتسناي ؟"

قفزات حتى تساطحات معاه و ناضت كتجري كتسوس وترتب فحويجاتها :" اا مم مك... مكنتسنا والو "

غوتات بتوتر :" ونت شنو كديييير هنااا اصلاا ؟"

شاف فيها بنص شوفة :" بغيتي نخرج نظلم ليك.."

سكت لبرهة كيقرا تعابيرها قبل مينطق :" ناسك ؟"

تهدنات و التوتر تحول لقلق وخوف مخفي ونطقات بصوت منخافض و هادئ :" علاش هادو مبقاوش ناسك ؟"

حرك راسو بلا ميعيرها اهتمام :" عمرهم كانو ناسي "

شاف فيها :" ياك كنت ظالم العباد !ومعدي على بلادات الناس ؟"

كيكرر نفس كلماتها وشاف تعابيرها كي خابت ومالت وشفايفها تعوجو وصدرها تنفخ بالغصة لي ماقادراش تعبر عليها و حتى من صوتها تغنن وكتحاول تخفي ديك نبرة تقادات فلوقة و رجعات يديعا وراها مزيرة على قبضتها على شكل لكمة :" اه "

كتضغط على مخارج حروف نطقها :" مممزياااان "

كتكتم جرحها و كتحاول تلبس قناع القوة :" مزيان "

كتحرك راسها :" يالله غنتهناو ظلمك وطغيانك و وو.."

سكتات فاش حسات بالدموع بداو كيتجمعو فعويناتها :" وو منك "

حرك راسو باه :" مزيان "

شافت فيه باستغراب وهي غتاكل راسها وتبلعو وراها بداك برود الدم لي كيدوي بيها معاها :" مزيان "

خرجات على سيطرتها ؛" كيفاش مزيااان ؟؟"

عينيها تحجرو بالدموع وصوتها بانت فيه نبرة البكاء :" واخا سير "

تلفتات جهة الباب وكتدوي بصوت عالي ومسموع فحالا كتخاصم :" واخااا سيير.."

كتدعي بهمس بالسم :"سير لهلاااا يسهل عليك "

وخرجات ردخاات داك لباااب من وراها بجهد لي فيها ولكن عابد كان داخل و رضو بيديه باش ميتردخش طلعات عينيها مدمعين فعابد :" وا خرج فيا عينيك "

بداك السم والفقصة بغات غير معامن تشدها ولكن عابد مجاوبهاش و منزلش حتى لعين فيها دخل :" مولاي "

لقاه مازال متكي :" شنو خبار ضيفنا ؟"

كيسول على لورانس :" حيدنا السهام و عالجناه كنتسناو ردة فعلو وكي آمرتي ا مولاي مخليناش جنودهم يحطو يدهم فيه "

حرك راسو عيسى :" فارضي غيتعالج من طيني ويتسقا من بلتي ولا يموت معفن "

عابد كيسول بتردد :" مولاي "

تنهد عيسى :" غنجاوب على سؤال واحد "

ابتسم عابد حاني راسو بلاما يشوفو عيسى :" علاش جاو ؟ شكون داك ناس كيفاش وصلو لينا ؟وعلاش كيدويو بحال مولاي ؟ واش هاداك شعب ؟ اخر بلاد اخرى ؟"

رجع حط يدو تحت راسو وغمض عينيه كيفكر.. قبل مينطق بجفاء :" ملكة اسبانيا وولدها ضيوف عندنا "

عابد داز من سمعو كلمات المترجم :" وكلام راجل.."

فتح عينو بشوية :" رباني الزمان و طلعو كتافي حيوط الجنانات ، كبرت ولد الارض وسقيت من لبن بعيرها "

عابد فهم قصدو وبغا يتأكد :" مولاي مغترجعش معاهم لاسبانيا "

بقلق كيسولو :" غتسمح فشعبك ؟"

و جا قدامو جهة السرير و حيد عمامة من فوق راسو حط السيف و حيد الدرع ديالو و ركع قدامو حاط يديه فوق ركابيه و منزل راسو :" مولاي ، كلامك كبر مني و مقامك على مني و امرك فوق راسي "

بتوسل كيفرك فصباعو متوتر :" وهاد الارض كيف قلتيلي تهلقتي باش تحكمها و تعدل ناسها "

وعيسى مازال ميسمع كلامو :" لواليدين منزلتهم بوحدها وعرقك فخر لينا ولكن.."

بخيبة نطق بشوية :" متسمحش فينا "

وخرج حتى عابد مخلي عيسى غارق فبحر افكارو وصلات لعشية وبدا كيظلام لحال وطلعات ان الغيث لبيت عيسى :" مولاي لعشا واجد نجيبو لعندك !"

تحرك بشوية كيفرك فعينيه ونطق ببحة صوت باين فيها نعاس :" انا نازل "

و هبطات لقات عابد خارج راجع للدار تابدات كتعيط عليه :" سيييدي عابد "

كتجري وراه وهي عامرة بزاف و قصيرة كتجري كي بطريق و سخفات :" سيد.."

كتنهج :" سيدي عابد "

تلفت فيها وحط لعمامة فوق راسو من بعد ماكان كيلعب بيها فيديه :" دادا ؟"

رجع عندها :" مالكي ياك لاباس "

شدات فيديه كتتنفس بجهد كترجع الروح :" تسنا اولدي "

وقف مشات ورجعات فيديها واحد القفة مداتها ليه :" هادي"

كتبتاسم :" لبنتي لغالية وقوليها تتشها وتحل فمها نحضرو ليها "

و دوزات يديها فوق دراعو :" راك فمقام ولادي ولغالية راه فحال غيث "

ابتسم و باس فوق راسها :" الله يطول ليها فعمرك ادادا "

غمضات عينيها كضحك :" امين حتى نشوف ولادك وولاد مولاي "

تنهد عابد هاز فقلبو ماهاز الحمال فوق كتافو :" ان شاء الله ادادا "

وباس فوق يديها :" تصبحي على خير "

دوزات يدها فوق كتفو :" الله يوصلك على خير اودي "

وبقات حاضياه حتى ركب خيلو و غبر مبقاش كيبان فظلام الليل مشا مقلق من جهة هاد الاخداث الجديدة و خايف يخسر عيسى حيت كيحس بلي تزاد تابع ليه و وفي ،مخلص ليه فقط ولكن غير تفكرها وتفكر ضحيتها وابتاسم وهو كيستنشق الغربي النسيم البارد كيتخيل ريحتها كتشق بلعومو باش تستقر فرئتيه وتفيض رجولتو

وصل ودخل كيسمع السكات مكاين حس حتى واحد :"مّا "

دخل مبتاسم وفيديع القفيفة لي جايبها يفرح بيها لغالية حيت كتحماق على طياب ام الغيث

لقا مو حالسة فلمراح ويدها فوق خدها جامعة راسها بلخروق حارقها :" ما ياك لاباس ؟"

وكيشوف فالشاكوش •محفظة كبيرة• لي حاطة عليه رجلييها ومعمراه بلحوايج :" ما فين غاديا شنو واقع ؟"

كتحرك فراسها :" مغنتجمعش مع ديك عدو الله فدار وحدة "

هز حاجبو :" لغالية ؟"

دوز يدو فوق شعرو :" اش كاين ا ما واش مندهلش شي نهار نلقاكم كيف الناس ؟"

رمى بديك القفة :" اش دارت عاوتاني "

ضحكات مفقوصة :" سير الى قدرات تجاوبك "

شاف فمينة جالسة مقنتة كتضور فعينيها :" شنو درتو ليها ؟"

وقفات مو وهزات صاكها :" زيدي ابنت ختي وليت انا اناااا لي درت ليها "

وكتغوت باش تسمعها من بيتها :" الى سمح ليك ربي راه ختى انا مسامحاك ابنت الخماس "

وخرجات ومينة وراها شد مينة من دراعها غارس فيها صباعو حتى تأوهات من الوجع وخرج فيها عينيه :" الى لقيتك حطيتي فيها يديك "

بلعات ريقو وهو كينطق بجدية :" الذياب غتعيد عليك ليوم "

ودخل خايف عليها سمع صوت شهقاتها من باب لبيت :" لغاليه !"

قلبو تخطف و تزير عليه فحال شي واحد ضاغط عليه جاها من اللور فوق السرير وجبدها عندو بشوية :" اش واقع ؟"

كيشوف وجهها عرفان و حمر كيف ماطيشة بدا كيمرر يديه فوق وجهها :" شكون قرب ليك ؟"

عينيها كانو حمرين شلال فوق خدها :" سيفطني لدار با "

من صدمة طلق منها بزربة وهي تغوت :" سيفطنيي لدااار بااااا "

جا ينوض من حداها باغي يبدل ساعة باخرى ولكن شداتو من يدو :" خليني نمشي لدار با"

كتدوي بشوية وبنبرة سخفانة :" خلينا نساليو هاد جهنم "

تلفت فيها بزربة مصدوم من التعبير لي استعملات :" منقدرش نزيد نعيش معاك "

مازال شادة فيديه :" صبرت بزاف حاولت "

كتبكي بجهد :" حاولت ولكن مقدرتش "

عابد رجع جسمو كامل كيرجف ورجليه خواو بيه جلس حداها وحط يدو فوق وجهها كيترعد :" لا لا"

نزل يديه على كتافها ممحكمش فيديه كيترعدو مبغاوش يوقفو خرجو على سيطرتو وصوتو رجع فحال شي حمق معارفش ميقول :" لا لغالية لااا"

كيحاول يتحكم فراسو و كيدوي وهو كيبلع ريقو : شنو محتاجة نحضرو ليك "

كيطل عليها :" شنو ناقصك ؟ اشنو مقلقك ومخسر خاطرك نحيدو ؟"

شد فيديها مزيرهم حيت كتبغي تنتر :" يقطع اليد لي تتحط عليك واللسان لي يجهر بيك•يعني يغوت عليك•"

حط يدو فوق كرشها :" ودابا بيناتنا ولد ميمكنش.."

قاطعاتو :" مابقاش "

طلع عينيه فيها وهي كتدوي :" انا قتلتو "

كتزيد فلبكاء :" انا قتلتو حيت كرهتك وكرهت اي حاجة تربطني بيك "

هنا لسان عابد لي تربط ومقدرش ينطق :" قتلتو حيت بغيت نتهنا منو ومنك "

رخى من يديها وهي تجرهم :" سيفطي لدار با ا عابد سيفطنييي راه حرارة العيشة معاك سيفطني را.."

قبل متكمل نطق :" نت مطلقة "

هزات عينيها لقات دمعة نزلات من طرق عينيه اليسار :" العيشة حرامت معاك "

كينطق وكيحس بقلبو كيتعصر بين صدرو وكينزف مرارة عشق كان حار من الاول وهي مكانتش من لعاقزين ناضت كتعرج وهو كيشوف فيها طبعة دم من اللور باقي كتنزف شوية كتعرج ولحريق كيقطع فيها جمعات حويجزتها فشاكوش ورجعات حطاتهم :" غنخرج من هاد الدار خاوية كي دخلت ليها "

شافت فيه بنص عين :" الله يجيب ليك بنت الناس "

هو كان فحالة صدمة كاع دوك براكين الغضب و نار لي كانت كتشعل طفات ورجعات رماد مشتت و بارد بزاف قلبو تجمد من مور مكان لين و اعطاه ليها تلعب بيه كي بغا ، كانت كيشوفها ملاك واها هي شيطان فسيفة انسان كان يمكن يتعامل مع كلشي الا مع خبر اجهاض لحمو لي مازال مافرح بيه وحدة مارحماتش حتى احشاءها مابغاتش حتى واحد من لحمها ودمها من صلبها اشمن خير غيلقا فيها واشمن حب غيلقا عندها

مكلفش راسو يتبعها حيت غير خطات من لباب و هز السرير ضربو مع الارض حتى تهرس و نزل البيت كامل كيضرب باي حاجة جات قدامو كان فحالة هيستيرية مكيشوف والو قدامو هز العصا لي تهرسات من السرير ونزلها على كتفو حتى تفك وغووت بالحريق و طاح على ركابيه فالارض و الزاج اخترق ركبتاه و اعجز جسمو على الوقوف مرة اخرى

رجع فحالة وكوض مرة اخرى مقادرش يحس هز زاجة من الارض و نزلها على صدرو تقطعات القاميجة لي كان لابس و تقطر شوية ديال الدم من صدرو و نزل مكمش فراسو و كيبكي فحال شي ولد صغير كيبكي بشوية هز راسو لفوق و طلق صرخة بجهد لي فيه قوية ترددات فارجاء البيت و صداها وصل لبرا

لغالية خرجات كتجري وكتعرج برجل وحدة وكتتلفت وراها مخافة يتنادم معاه لحال ويتبعها يدفنها فديك الارض كتمشى جنب الحيط شافت واحد من لعبيد ديال عيسى لي كيبقا بجوار دار عابد لايحتاجو هو لي خدات خيلو ووصلها لدار باها

كانت لكاملة كتتوضا حدا لباب شافتها قفزات مخلوعة :" بسم الله "

شافتها كتعرج وشادة تحت كرشها :" اويلي مالك يا هاد البنت "

دخلات جلسات كتتوجع :" بنتك رجعات ا لكاملة"

ابراهيم غير سمع كلامها وخرج مخلوع :" اس كديري فهاد لوقت برا دار راجلك ابنتي ؟"

مطلعاتش عينيها فيه :" مابقات عندي دار من غير دار با "

لكاملة طاح فيها نص وحلسات شداتها دوخة :" هاويلي باغيا تقتلني "

كضور فراسها :" باغيا تصفيها ليا وتسيفطني للروضة"

لغالية حطات يدها تحت ظهرها كتتوجع :" اا "

شافت لكاملة الدم دايز تحت منها وووقفات مخلوعة :" لغاليييية "

قربات كتعاون فيها ولغالية عينيها مغرغرين بدموع الحريق :" مي كنموت "

وعنقات مها من جنبها :" مي كنمووت "

كتبكي :" مي قتلت ولدي "

لكاملة بدات تضرب ففخاضها ماحيلتها احرقة بنتها ولا اهم بنتها ماحيلتها لطلاق بنتها ولا اجهاضها شدات فراسها حارقها و ابراهيم لبس خارج لدار عابد حتى وقفاتو لغالية :" با قتلني انا راضية بحكم الله ولكن ديم الدار لي منرجعش ليها "

مخبعة فمها وكتدوي :" حرارة العيشة بيني وبين داك الراجل وربي كي دار الزواج دار الطلاق ولا مبغيتينيش خرجني من دارك ارض الله واسعة "

ابراهيم كشاكشوو غيخرجو وشد فقلبو لي كان كيحرقو شداتو نخصة كانت غطيحو :" لعار لي كنت خايفو توسخت بيه "

تكى على الخيط :" داكشي لي مبغيتش اعطاه ليا ربي "

لغالية كانت كتبكي حيت كلام ابراهيم جرحها وزيرات على صدر مها فاش حسات بدموع مها فوق من خدها كتقطر و خواتاتها كيطلو من التقيبات الى خرجو قدام باهم غيجمعهم تاهما

فاطمة بحزن :" مامشات حتى دارتها ورجعات لدار با "

مريم بعصبية :" معرفتش اش عاجبها فهاد قبر الطوبة لي عايشيين فيييه "

كضرب بالصينية لي كانت فوق حجرها تا تطاير منها الجنجلان لي كانت كتنقي فيه :" عابد كان دراع مولاي المال و الجاه السمعة "

كتنفخ :" ماناقصاه لا يد لارجل وكاع بنات لقبيلة كانو يموتو غير يدوز من حداهم "

فاطمة كانت شادة واحد الركنة وهمها كبر منها نطقات بشوية و بقلب موجع :" مايعرف بحق الضربة غير لي مخبوط بيها "

تنهدات فاطمة :" منتقلدوش معرفناش اش بيناتهم لغالية من لول مبغاتوش "

شافت فيهم :" لهلا يعطينا مكتوب مابغيناهش "

نفضات مريم :" دعي على راسك بالعدم اختي انا لاجا فيا عابد الليلة نبات فدارو "

فاطمة :" الله يحفظ منك قلبك قاصح "

مريم خرجات فيها عينيها :" قاصح ، هي لي راسها قاصح جابولها سيد عشاقة و"

قاطعاتهم شامة :" هنيونا راه حرقتوني فراسي "

تلفتو فيها ورجعو ختمو كلامهم و نقزات فاطمة :" علاش مشفتيهش كي كان كيسيفطها مزوقة عصااا "

مريم :" قول علينا وجيو علينا ، حنا عارفين لعالية اش ساوية مغيضربهاش هاكاك باينة دارت لي ميتغفرش "

تنهدات فاطمة :" صراحة حتى لغالية مكتخليش من حقها "

فلقصر كان نازل و السلهام فوق منو كيحركو الريح :" ولدي "

مشافش فيها ومتلفتش محركاتوش الكلمة حيت ممولفش عليها و معارفش واش ليه :" عيسى ولدي "

طلع عينو فيها و هضرات :" مكرهتش اول سفرة •مائدة• تجمعنا تكون فاسبانيا فوسط قصرك "

مجاوبهاش جلس كيقلب بعينيه عليها و جلس حداه رافاييل بلعاني باش يزاحمو مع ايليزابيت ويجلسوه بيناتهم :" خويا "

طلع حاجبو وضرب فيه شوفة بنص عين رهباتو شوية :" ملك اسبانيا "

قلب عيسى عينيه حيت كل مرة كيجبدو اسبانيا كيتزير

حطو الطبلة عامرة باطباق مغربية و روائح شهية فايحة رافاييل مد يدو بدا كينقب :" اممم ماما دوقي هادي "

ومد ليها حلوة افتتاحية :" واعرة "

وتاهي خداتها :" كتحمق "

وغمضات عينيها كتبتاسم :" مع ولدي لي كليتها مذاقها تحلى "

وقفات ام الغيث كتبتاسم :" صاوباتها لالة زينب "

وترجم ليها المترجم عند راسها ووسعات عينيها لخوضر :" واااه بنت ولدي كتعرف لهادشي "

حركات ام الغيث راسها :" اشمنك يا طواجن واشمنك يا قصاعي سكسكو مدفون ولحريرة حامضة "

كيترجم ليها وهي كتضحك :" عيسى من صغرو كرشو غالباه وطاح على لي تبرعو شهيوات "

رافاييل كيضحك :" اه و زوينة شعرها "

كيوصف بيديه مصدوم ومدهشر من جمالو فمهيلتو صورة فاطمة :" شعرها طويل و "

شاف فعيسى كي كيشوف فيه وهو يجمع الطم و ليانو فحالا تبلع حيت كيحس بالموجات الكهوغيرة لي كضرب من جهتو :" فيناهيا زينب "

مازال مكملاتهاش هاهي جايا هازة فيديها صينية ديال اتاي و لعصير و الابتسامة على وجهها جلسات و الملحف نازل على شعرها شاف فرافااييل مكانش كيشوف فيها اما كان غيغرس ليه السكينة وسط قلبو ناض من بيناتهم و جلس حداها مقابل معاهم و هي مستغرقة كتخوي اتاي هو كان كيغطي ليها شعرها وينزل ليها الملحف على عنقها مخبي اي جزء مكشوف من لحمها

شافت فيهم :" بسم الله "

مفهموش ولكن كانو كياكلو و ايليزابيت كتعامل عيسى فحال شي ولد صغير وكتحط فالماكلة قدامو و كتنقيلو فالدجاج و تقرب ليه :" باقي عندك لحساسية ؟"

طرجم المترجم وجاوبات ام الغيث مع كتبقا حدا راسهم باش تخوي العصير والماء وتقرب ليهم اي حاجة :" عندو حساسية من لحوت وعمرو حا وسط فمو نهار ياكلو كيبغي يموت "

حلات زينب فمها وتلفتات فيه مصدومة :" و.."

كتستوعب كلامها :" وكيفاش كنتي كتاكل الحوت لي كنطيب ؟"

هز كتفو بلاما يوعاو وهز عين غمزها :" الموت على يديك راحة "

وخدا يديها لي كانت فوق رجلو شادها من تحت طبلة مكانش مسوق للي ضايرين بيه حيت مكيعتابرهمش :" كانت اول حاجة طيبتيها "

ابتاسمات وهي كتتفكر داك نهار :" وكان محروق ومالح "

خنزرات فيه :" معرفتش كيفاش كليتيه "

ورجعات الذكرى بيها لداك النهار كانت فعمر 09 سنين وكانت اول مرة تطيب حيت هي قبل صغيرة كانت مفششة غير تسرح و تجمع وتصبن مكانتش تدخل اكوزينة حيت كاينين خواتاتها فيها طيبات الحوت وحرقاتو وكلات ما كلا الطبل نهار لعيد و جمعات داك لحوت كامل فطاجين :" نعم ربي تضيع "

و خرجاتها وجلسات فجنان :" نشوف كاع هادشي لي كيعايرولي فيه "

جبدات حوتة حيدات جلفة و بدات تاكل مع حطات الدغمة ففمها مع بدات ترد :" يعطي الهرس لليد لي طيباتو "

وبدات تدفل :" ماااالح "

و كانت كلو محروق وكحل :" مغرمل ماشي محروق "

كتدفل :" تففف تففف "

هزات راسها وبان ليها عيسى كيباشر ديك الارض المرهونة ناسها مخلصوش ضرائب و الارض غتسلب منهم وهي تمشي تجري عندو :" عييسى عيسى "

كان شاب فعمر الشباب و المراهقة ببنية جسدية رياضية و كتافو ترسمو وعراضو و طوال و رجلو تهز التراب تلفت بشوية ملي سمع حسها :" تحركو من هنا "

وكاع الرجال غبرو :" اش كديري هنا ؟"

ابتاسمات مخبية يديها وراها :" جبت ليك واحد لحاجة "

طلع حاجبو :" انا ؟"

حركات راسها وكتغبن بانوثة وكتلوى ببراءة :" اه طيبتو على قبلك "

حرك راسو وهي تجبد القفة و حطات الطاجين عراتو وشاف الحوت بلاما يحس بدا كيحك :" مالك "

ضرب فوق عنقو وضور راسو :" لا غي الناموس فهاد جنان بزاف "

كتحرك عويناتها وكترمش :" لااء مكاين والو "

حطات ليه ملحفها :" جلس جلس "

جلس و حلات الطاجين و مداتولو كان كيبتاسم بالسيف وهو كيقيس داك الحوت وهي كتنقيه ليه بحماس وتعطيه وتاهوا مكيقولش لا و كياكل وشوية بشوية الحمورية كتطلع معاه

حطات يديها فوق راسو :" واش مريض ؟ لونك تبدل "

حرك راسو بلا وهو مازال كيمضغ وهي كتعجن فيدياتها :" انا سمحت ليك دابا حيت كليتي ماكلتي "

عيسى :" بصح "

حركات راسها بحماس وبراءة كبيرة :" مرة جايا متبقاش تغوت عليا "

شد فيدياتها صغيورة وزوينة واخا حرشة شوية بالسرحة والحشان و ضور عليها واحد لبراسلي زوين فذهبي وباسها فوقها :" عمر صوتي يعلى على صوتك "