خضوعي الجزء الثالث

هزات كتافها باهمال :" وانا مالي هادي هي الفرصة فين يموت "

حطات رجل على رجل وهي كتسمعو كينين و كيدوي بكلام ممفهومش وعمرها سمعاتو فحياتها تلافتات فيه بشوية ولقاتو كيصارع تنهدات بقوة :" مفهمتش انا مالي "

شافت حتى عيات و جمعات لوقفة حيدات عليها لملحف حيت غيعذبها و عمرات غلة ديال التراب بالماء باش يبرد حطات شرويط مبلل فوق راسو وهي مبعدة منو فحالا كدير هادشي فوق من خاطرها

قطرات ليه الماء وسط فمو وهزات لحافها كتخشيه وسط الماء هزات يديه وبدات تمسح فيهم من راحة يدو الكبيرة

حتى لدراعو كامل وهي مسرحاهم فوق فخيضاتها و كتمسح وجهو من لعرق و عنقو نازلة لصدرو زادت

وسعات البلاصة لي مقطعة فحوايجو حتى رجع صدرو كامل عريان وهي مغمضة عينيها ومرة مرة كتفتحهم تسرق النظرة

حتى لمحات اتار حمراء و طبايع بيضاء فوق صدرو فتحات عينيها بزربة و عرات صدرو كامل لقاتو كامل

مزوق بطبايع حطات يديها كتتلمس :"شنو قصة هاد الجروح ؟"

وعضلاتو بارزين كتمسح ويديها كتحسس بقوة عضلاتو القاصحين دوزات لملحف فوق دراعو وفكتفو لمحات حروف حطات يدها فوق كتفو كتحسس الحروف الغريبة لي كانت اول مرة تشوفها كتلمسها محاولة تعرفها :"ااا"

صغرات عينيها وهي كتحاول تهجاها ولكن بدون جدوى

و نزلات بلملحف كرشو المشدودة وهو كيقفز مرة وكيترعد جسمو كيتبورش بالكامل جبدات لغطاء سرحاتو عليه وجابت لماء فيه خل التفاح لي لقات قدامها كتدوزو فوق رجليه فحالا كتغسلهم ليه و موسداهم لفخاضها حتى رجعو حوايجها كلهم مبللين ولصقو عليها تنهدات بفراغ صبر :"معرفتش اش درت فحياتي حتى كنتعاقب هاكا "

سرحات عينيها فالبيت لمحات شي غرس واعشاب طبية طبيعية مشات كتقلب فيهم بين يديها وكتشم ريحتهم وشكلهم باش تقدر تفرزهم

خدات اناء تراب

وبدات كدق فيهم بحجرة حتى طحناتهم مزيان وعصرات منهم الماء ديالهم

خدات زيف لخروق وداك لعشرب لمطحونة دارتهم على راسو

وعقداتهم بلخروق دورات يديها على عنقو كتحاول تنوضو نزل راسو بين صدرها هنا خرجات عينيها

وحلات فمها وتكوانسات مقدراتش تحرك بالصدمة صاوبات لوسايد و وقفاتو بيهم فتحات لو فمو وشرباتو الدواء

شد فيديها وهو مقجوج تعابير وجهو تلميح على الم كبير كيعانيه وهو كيضور فراسو يمين وشمال وكيغوت ويردد كلمات

مكتفهمهمش :" بووو فاڤوور ..بوور فاڤور !"

بقات غير كتشوف فيه وهو شاد يديها بقا مزير عليها قبل ميتوسد يديها تحت راسو وشاد فمرفقها صغير بيديه لكبار حاولات تجر يديها منو ولكن كان حاكمها وهو كيردد نفس التعبير

وكيغوت مرة مرة بنبرة صوت ضعيفة :" نوو نووو بور فاڤور "

جلسات حداه فوق سرير حطات يديها تانية تحت راسها وهي مقابلة مع وجهو وكتقرا تعابيرها حتى لقات راسها كتفحص ملامح وجهو حطات صبيعاتها الرقيقة فوق وجههو

كتمسح العرق وكتفحص حرارة من جبينو بقات مراقباه فحال شي بيبي صغير ناعس مغوبش حيت عايش مع كوابيس ارتفاع الحرارة

ولعرق نازل مع وجهو وشفارو الكثيفة كتتحرك بسرعة وفمو ناشف

كيتمتم بكلمات مرات كيزير على يديها فحال ولد صغير خايف يضيع طريق رجوعو للدار ومرات كيترخا ويرخي منها

محساتش براسها امتى نعسات وهي معنقة رجليها بيد وليد التانية موسدها عيسـى..

وعابد كان وراء لباب طول هاد الوقت متكي عليه وهو جالس على اعصابو فالارض متوتر وخايف توقع ليه شي حاجة ومتردد يعيط على لحكيم ويعصى امر من اوامر عيسى القطعية ورجع يتنادم معاه لحال على زينب لي جابها واخا كان متاكد انها السبيل للخلاص الوحيد

فتح لباب بشوية كيطل لقاها جالسة حداه وشعرها نازل عليها مخربق ومعذبة وناعسة وعيسى موسد يدها بطريقة لطيفة ودنيا مرونة حداها لعشوب مقلوبين و الاواني طايحين و لماء مزلع فالارض و الخروق ولحافها حتى هو فالارض وكلها مبللة ..

وهو مبقاش فحالة الهيستيرية لي كان فيها وحتى نظام التنفس رجع طبيعي ومبقاش كيتمم

قرب بشوية حط يدو فوق راسو لقا الحرارة كتنخفض ابتسم براحة كبيرة جبد غطاء و غطا بيه زينب وتمشى جهة لباب تلفت وغمز عيسى

لي فعمق نعاسو :" تصبح على خير ا مولاي "

صوت طيور كتغرد و ريح كيهز اوراق الشجر و الماء دايز من لواد.. و دجاج كيجري ولخيول كتتسابق ،اللغا "الكلام" ديال الخدم فالقصر و روائح الشهية طالعة من الكوزينة بدا كيحرك فرموشو بشوية ثقاال والصورة مضببة فتح عيونو على لوحة فنية مزخرفة بالوان البراءة

و العناد ابتسم بجنب :" الى كان هذا حلم مبغيتش نفيق "

لقا راسو موسد يدها هزها بشوية وحطها فوق فمو كيقبلها وكيحرك شعرها فوق وجهها بليد التانية مبتاسم وهو كيتصفح وجهها الملائكي دوز صبيعاتو فوق بشرتها لبيضاء الناعمة وقرب ليها بشوية حتى رجعات نفسو كتضرب فوق وجهها و عينيه على شنييفاتها لموردين حط فمو فوقهم بشوية محاول يتحكم فراسو ويخليها قبلة خفيفة متحسش بيها بعد راسو عليها بالسيف

كانت كتتحرك رجع لبلاصتو بنفس الوضعية موسد يديها

قفزات بجهد حتى كانت غطيح من فوق السرير حطات يديها فوق قلبها مفزوعة :" كنت غير كنحلم "

تنفسات الصعداء :" الحمد لله كان غير حلم "

حطات يديها فوق فمها وهي كتخنزر جهتو :" كنت غير كنحلم ميمكنش غير كنحلم "

حطات يديها فوق راسو لقات الحرارة انخافضات :" هاهو غيرجع يصعصع غير لبارح كان كيف لكلب ليهودي "

وردات للبال للغطاء لي مدفيها رماتو بزربة كضور فعينيها و جرات لحاف لي فوق من دراعو باغيا تخرج خلاص حتى جرها من اللحاف جات طايحة فوق صدرو ويديها على عنقو وجسمها ملاصق مع جسمو كتحس بعضلاتو وصلابتو

عويناتها عسليين فوسط عينيه كبار البؤبؤ ديال عينيها بالدهشة والصدمة ،وجها كان قريب لوجهو بزاف نطق

بصوت باح من تعب ومرض لبارح :" صباح لخير"

بدات كتضرب بيديها فعنقو وكتبعد وهو جامعها لعندو بدراع وحدة وراء خصرها حاكمها وليد لاخرة طلعها كيبعد بيها خصلات شعرها الحريرية وهي كتحرك راسها باش تمنعو ميقيسها :" طلق مني "

وكتنتر ديرونجاتو ومخلاتوش يقيس فيها بحركة غير متوقعة قلبها تحت منو وهو واقف على يدو مانع ثقل جسمو عليها ومحاصرها تحت منو

دورات راسها للجهة لاخرة جامعة فمها بسخط وهو كيتسارا بيديه فوق خدها براحة :" علاه دخول لحمام بحال خروجو ؟"

شدات يدو باش ميقيسهاش وعينيها وسط عينيه :" دجاجة غسلات رجليها ونسات ماداز عليها ، غير لبارح كنتي بحال.."

وقبل متدوي حط صبعو فوق فمها :" شووت .."

سكتات مخرجة عينيها وعاقدة حجبانها :" واش هذا قلبك لي كيضرب "

نزل راسو وحطو فوق صدرها وهو شابك يديها بزوج باش مديرش شي حركة غبية هي مقدراتش تدوي ولا تتحرك من كترك الحرج عمر شي واحد تجرأ يقرب ليها فحال هاك ولا توقع اي ملامسة

جسدية بينها وبين شي واحد تنفس بعمق من بعد مارجع للحياه مره اخرى :" خلينا هاك شوية"

هي تكوانسات وشعر راسها شوك عليها وقطعات النفس فيها ،دقان فلباب :" مولاي كبار لقبيلة كيتسناوك "

ناض فوق منها بلا كلمة بلا زوج وهي باقيا على نفس الحركة مقدراتش تتحرك خلاتو حتى غبر فلحمام و هزات لحافها وخرجات تجري من لبيت تساطحات مع عابد :" هاكا نبغيك المراة هي لي توقف مع راجلها "

جنون بداو يشطحو فوق راسها داكشي لي خلا فيها لداخل جا عابد يكملو :" واش نت مرييض اش كتخربق اشمن مراة واشمن راجل ،ودابا حيد من قدامي غندير عين شافت وعين ماشافت"

عابد :" معندك فين تمشي "

ضارت كتضحك بالفقصة :" كثرة الهم كضحك "

عابد عيط على وحدة من العبيد :" سيري معاها تبدل عليها وجيبي ليها لفطور "

وزاد وخلاها غتفتارسو بنظراتها تبعات لخدامة وعابد كمل لبيت عيسـى :" مولاي "

اعطاه بقبضة يدو حتى سال الدم من فمو وهو

حادر عينيه الارض :" سمحليا كنت متهور.."

شدو من دراعو مزير :" كنتي غبي خليتي القبيلة كاملة وجبتي زينب لي منقدر نقتلها واش كتنتاقم مني ؟"

تحنا على رجلو :" يقطع الراس لي ينوي لغدر وليد لي تتمد يقطع نفسي لي تتمرد امولاي ، حسيت بلي زينب هي الحل "

نزل عليه بضربة اخرى :" ولات عارفة ضعفي "

دوز يدو فوق راسو :" نت عارف نهاية اي واحد يعرف ضعفي "

عابد :" كيتقطع لسانو قبل راسو "

دفعو برجليه من كتفو حتى تلاح :" غنقطع روحك "

كان مازال بلفوطة ديال لحمام بدا يجبد فحوايجو وعابد وراه كيرتبهم ليه باش يلبسهم فحالا موقع والو هادي عادة عيسـى يخرج اعصابو فيه ، وعادة عابد يكون خزان لاعصابو عابد الفارس المغوار كيهابو صغير ولكبير فلقبيلة ومعروف بالصيادة ودقة الملاحظة و الخفة فالغابة و القبايل المجاورة ، وخصم صعب فالفروسية..،

ملك المبارزة و القتال بالمقص والسيف وحامل الدرع

كيجي حتى لجناح عيسـى وكيرجع قط صغير هو لوحيد لي مكيخافش منو على العكس كيحتارمو وكيعتابرو بر الامن والامان ومركز قوة ونقطة ضعف لي يقدر يضحي بالغالي والنفيس على قبلو :" مولاي "

شاف فيه بنص عين :" اخر مرة تدخل زينب ولاغتدخل تشوف جهنم "

حرك راسو بالايجاب وهو كيرشو بالمريشة لي فيها العطر :" مولاي عيسـى امتى نسيفط لمخازنية لدار البنات لخماس بدا يتمادى ودينو كيكبر ؟"

عيسـى :" جوع الكلب يتبعك .."

وخرج وهو تابعو نزلو ولقا كبار القبيلة مجموعين على لالة ومالي كيفطرو وكيضحكو شافوه وقفو كيسلمو ليه على يدو حلس معاهم على الطبلة ديال لفطور :"مولاي رسمنا الاراضي بينا وبين قبيلة حمادشة "

هو غير كيسمع وعينيه على واحد فيهم :" و نوينا نقسمو لغلة و لعبيد بالنص "

كان لموس فالقبضة ديالو زير عليه حتى بدا يجرح فيه وعينيه مازال مفيكسية على واحد منهم :" كولشي ديالي الارض ديالي ولي عليهاا ديالي "

كيورك على مخارج الحروف :" وحتى هاديك ديالي "

رجع كيتفتف :" مولاي كلشي ديالك وانا دابا غنبدل شروط وغنسيفط جنود للحرب "

عابد تلفت وراه :" تاواحد فيكم ميطلع عينو على طبلة "

وناض ردخ عليهم ديك الطبلة وتزلع كلشي فالارض زاد وخلاهم وعابد وراه :" مولاي ماشي فمنوالو ليوم غنجيبو غلتنا وغلتهم والغنم والعبيد ونسيحو الدم والاراضي ديال مولاي عيسـى مافيهم ترسيم "

عابد :" مولاي يدك كتقطر دم "

عيسـى :" ليوم تجيبليا عينيه غنخليها تسيل حتى نقطرو وسط عينيه "

كانت كتتسارا فلمراح و شعرها باين من تحت لحاف مكشوف كيضرب فخصرها لمنحوث كانت لكسوة مزيرة عليها حيت صغيرة عليها و لحاف كان ثوبو فاضح وحاضية الخدامات مخرجين

صواني ديال بقايا الطعام للزبل وقفاتهم :" فين مخرجين هادشي ؟"

لخدامة :" هذا زبل "

زينب :"شاط الخير على زعير ،"

وجراتو من يدها :" عيطيلهم يجيبولي داكشي كامل كاين لي ملاقي باش ينجر سنانو ونتوما تضيعو فنعمة ربي "

فغرق محاضرتها حسات بيد اختارقات لحمها جرها من دراعها بزز وخشاها فواحد لحفرة ديال بيت لخزين لي قريبة لهم و عابد جرا على الخدم يغبرو من تما حيد سلهامو من فوق كتافو وحطو

فوق راسها :" باغيا تخرجيني على طوعي ؟"

حيداتو من فوق راسها :"مادرت عيب ماخطيت صواب "

عاود رجعو فوق راسها وحنكو بيها :" بعتي حرمتي "

عاودات نزلاتو :" حيد عليا هادشي لمكسي بديال الناس عريان "

لمغزى ان فلوسو و مالو من ديال الناس

رجع حطو عليها :" ترجعي تحيديه غنحكمك ونحملك هنا قبل ماتغيب "

غمزها:" تبتي وخلي الزرع ينبت "

رجعات مزنغة حنيكاتها موردين بزاف وعينيها كيلعبو فلهواء حط يدو فوق ذقنها ودور وجهها

حتى تقابلو عينيه مع عويناتها :" منرجعش نلقا عين كلب عليك ولا غنعصر الدم وسطهم "

كان كلامو على محمل الجدية واخا بارد حسات بلغة الجدية و برودة الصرامة مد يدو من الظلام كانت رزمة فتحها ولقنديل فوق منهم كانو عينين مقتالعين ، عينين واحد من كبار القبيلة لي قالو عليه ناس زماننا " دخلناه ياكل اللبن طمع لينا فالغنم " دخلو يفطر حط عينو على البنت

غمضات عينيها بزربة وغوتات بشوية جمعات يديها فوق فمها مكمشاهم وصورة عينين

مقتلعين بين عينيها وخاطرها تروعات :" حلي عينيك شوفي اخرة كل واحد يهز فيك عينيه "

مبغاتش ولكن حيد يديها على وجهها بالسيف وكيحرك فيها :" شوفي باش تتعلمي تفكري قبل متلبسي و توزني قبل متنطقي وتعبري قبل متحركي حيت كلشي فيك فتنة ولمفتون واحد من بعدو الزوال "

و هز يدو المجروحة زير قبضة يدو حتى نزفات وقطرهم وسط عينيه وحطهم قبالة وجهها

هي مقدراتش تحكم فراسها وهبطات كترد وتفرغ معدتها حيت صورة روعاتها مسحات فمها بسخط وعينيها غرغرو من حسرتها على الميت :" قتلتيه اعدو الله قتلتيه "

هبطات دمعة لي حابساها :" منك لله ا عيسـى منك لله يا الظالم ليوم ليك وغذا عليك "

ضرباتو بقبضة يدياتها صغار على صدرو لعريض :" واش مكتخافش الله فالناس ؟ واش معييتييش واش تسحب القيادة للدوام غتموت مرجوم بالحجر و منسي على الارض"

ببرود :" مغنموت حتى تكوني ديالي "

برودو كيعصبها و كيقتلها :" عمري مغنكون ليك واخا تجمع السماء مع الارض و يتصاحب القط مع الفار و يطلع الماء و العافية ولاد لعمام ودير موكة عرسها مع بلارج "

حط يدو تحت ذقنها :" قبل ميوذنو ليك قالولك نتي ديال عيسى "

رمات يدو بعيد عليها :" ومن وراء مغيكفنوك غيقولولك زينب عمرها كانت ولاغتكون ديالك "

نظراتها كي الشهاب باغيا تشعل فيه نيران الظلم والقهرة بغات تخرج حيت محاصرها زاد دار عليها الظل بجسمو مانعها تخرج ويديه محاصرينها من ليمين وليسار و عينيه عليها :" نتي ديالي "

طلعات فيه تخنزيرة :" المخير فخيلك ركبو انا خارجة على طاعتك "

كتحاول تقلد برودو :" قتلني دابا انا كنعصاك مغنديرش لي بغيتي وغنتمرد وغنطغاا "

ظهرات ابتسامة جانبية وطلع حاجبو :" قصح الراس كيدوز من المهراز ، غترجعي لطاعتي وغتخضعي ليا "

قلدات ابتسامتو لباردة :" الناس كتحلم ناعسة ونت كتحلم فايق "

حيدات سلهام ورماتو للارض وبغات تتخطاه ولغريب انه خلاها تتجاوزو بسهولة قبل مينطق بجمود :" لي غيطلع فيك لعين غيتقطع راسو وتدفن عينو ويتعفن بطانتو ولا سميتك ابنت لخماس خطوي برا بلا سلهام "

وقفات وزاد وخلاها وراه نيفها ولا حمر بالسم والغصة وكتنجر سنانها مع بعضهم وعينيها تغرغرو بدموع الحرقة نزلات وهي كتترعد كمشات عليه يديها بقوة كتكره حالتها فوقت ضعف والضعف بالنسبة ليها هو خصوعها وامتتالها لاوامر عيسـى

تمشى وموراه عابد كيبتاسم ويديه ورا ظهرو دار نص ضورة لقاها خارجة وفوق منها السلهام ديالو ملحفة بيه :" سيفط الجنازة لدار لمقدم "

عابد :" تعرضو ليه قطاع الطرق وحيدو عينيه حيت طلع زهري ، هادشي لي طلقت لبراح يبرح بيه "

كيمسح يدو من الدم :" منبقاش نشوف دوك عينين لغدر كيضورو حدايا وحتى واحد ميدخل للقصر منبغيش شي واحد يرجع يشوف فيها "

وجدو لخيل ركع واحد من لعبيد باش يطلع عيسى و عابد جار الخيل وخيل وراه راكبو واحد وهاز عليه المظل

ويمنع اشعة الشمس الحارقة تقيس عيسـى وكيشوفو فالارض وغلتها ولخدمة ديال لعبيد لي كان واقف عليهم واحد وكيسوط اي واحد فيهم تهاون ولا غفل

وغير كيشوفو عيسـى كينزلو راسهم حتى كيرجع قريب يتغطس فالارض باحترام وخشية وخوف وهو راسو لفوق

ونسيم خفيف كيموج شعرو الناعم الاسود كسواد قلبو وعابد كيشرح ليه مراحل وعمليات الانتاجية كي كتوصل

يمد يدو يجبد تمرة ٠فاكهة ولا خضرا٠ ويغسلها فلواد ويمسحها بلباسو ويمدها ليه يتذوق

منها :"هادي امولاي بذرة من الشام "

شد اللجام ديال الخيل منو :" متتبعنيش "

عابد خرج عينيه :" مولاي طريق خالية ويدك مافيها سلاح خليني نكون سلاحك "

عيسى :" غندفنك ونرجع متتبعنيش "

تلفت ليه وهو فوق لعود لي طالع لفوق وكيصدر اصوات متحمس :" سير قابل دارك هاد لعشية ونتلاقاو صباح فلعرصة "

انفاعل من خوفو عليه ونزل داك لعبيد طيحو للارض وخدا منو المظل :" تبعو من بعيد متغفلش عليه "

مشا يجري :" نعام اسيدي "

ركب لخيل وساق للدار كانت الظهيرة دخل لقاها طايحة فشلانة فالارض شافتو وبدات كتقرب شاحبة بزاف بلخوف ليلة البارح و تحت عينيها ضاية بالسواد من قلة النوم وفمها ناشف بزاف نطقات بصوت ناشف :" الم.. الماا "

شاف فيها بنص عين :" باغيا تشربي انا غنشربك السم "

بدات كتبكي :" عافاك بغيت نشرب "

هز لغلة ديال التراب عامرة بالماء بارد فديك لحرارة فلمراح وكيشرب مخليه سايح وكيتدفق على صدرو :" اا على نعمة "

لغالية :" بغيت لماء "

كتبلع ريقها وهي كتشوف الماء مزلع وكتتخيل راسها كتشرب ومنتعشة قرب ليها :" بغيتي لما ؟"

حركات راسها باه بزربة قرب ليها وهي كتهز راسها حتى غيعواج وكتنقز باش توصل خوا شوية على يدو كيغسلها فوق منها وهي فاتحة فمها يوصلوها قطرات :" عابد عافاك "

حيد من حداها :" سيدك عابد "

كتنخصص فحاجة ماسة للماء :" سيدي عابد عافاك اعطيني لماء "

خوا عليها ديك لغلة ديال لماء كاملة وهي كتشعبط وحالة فمها مخرجة لسانها

تحنا عليها وفتح رباطها :" وجدي ليا مناكل "

ناضت كتجري وكتعطر فجلايلها وتلاحت على سقاية صغيرة كتشرب حتى كتسخف وكتنهج تقطعات فيها النفس

كان كيسلت فالبوط ديالو و كيحيد فحزام السيف :" ديري عقلك امرت عابد قبل منخرج عقلي "

شاف فيها :" معنديش مع حاجة الزحام حيت دايرة كي ماكلة الحمام "

دخلات لكوزينة ماشي حيت عاشقة طيب ليه ولكن كانت غتموت بالجوع بدات بلعجينة وفمها خيزو ٠الجزر٠ كتغزز فيه و حاطة لغاميلة فوق العافية

حطات لماكلة وجلسات كتاكل بشراهة ميتة بجوع وهو غير مقابلها كيف كتاكل بزربة وكتعمر فمها :" شفتك مهزيتيش شطايطك لدار باك "

دوات وفمها عامر :" غيرجعني ونرجع دليلة اللهم نرضا بالدم من لول "

شافت فيه :" معرفتش شنو لمشكل فاش غلطت معاك انا "

عابد :"هاد لحالة مبقاتش عاجباني مزوج فحالا ممزوجش "

لغالية :" ياك لماكلة وديما كتلقاها موجودة ورجلي مكتعتبش باب دارك "

عابد :" الزواج شركة للطعام و موضع للنعاس وانا باغي نشوف ولادي معاك "

طلعات عينها فيه ومدير فيها راسها مفاهمة والو :" مفهمتش "

نزل على كاس الماء :" الحر بالغمزة والعبد بالدبزة "

دفلات داكشي لي فمها :" كيفاش ؟"

عابد نطق بسخرية :" كيف سمعتي ولا غنسيفطك لدار باك طيبي ليه "

شدات فراسها وخلاوها ناسها "مقدو فيل زادوه فيلة " ،

جمعات طبلة كتغسل فلماعن وعقلها غايب حتى الى جمعات حوايجها ومشات لدار باها اشنو غتقوليه مبغيتش نعس مع راجلي ولاراجلي تعدى عليا تلفات والدنيا بدات تضور بيها

زينب كانت باب لقصر فرحبة كبيرة وواسعة مفرشة كلها زرابي ووسايد وقدامها مساحة كبيرة مفرشين فيها الزرع كينشف ولعيالات العبد مجموعين كينقيو فيه وولادهم مبرزطينهم كيلعبو فيه وهما مقاتلين كيجريو عليهم صفرات على لوليدات الصغار :" شكون بغااا يسمع حكااية ؟"

ضورات عينيها وهي كتسمع صوت الخيل جاي كيتسابق مع الريح وقف كينزل وعينيه عليها من بعيييد ودراري كيشوفو فيها :" اشمن حكاية ؟"

عوجات قنينفاتها :" حكاية واحد لحاكم ظالم "

وبداو كيتجاراو ويتجمعو عليها :" اه اه بغيناا نسمعوها "

كتسرد وتحكي وهو كيقرب بشوية وحاضيها فحال اسد ملك لغابة وهو كيحاول ينقص على فريسة وهي كتشرح بيدياتها وكتدوي بطريقة مثيرة و بصوت عالي باش يسمع :" كان يا مكان وكان حتى كان فبلاصة بعيييدة وقبيلة صغيرة حاكم ظالم كيظلم الناس و كيتعدا عليهم وكياخد مالهم وكيسرق حرمتهم "

كلشي كان مذهول ومتبع معاها وهي باقي كتشوف فيه :" كيعرف غير يقتل ويآمر "

وباش تضفي جانب المرح فحكايتها خدات لحافها وصاوباتو ونفخات صدرها فمحاولة

لتقليدو وخنزرات عاقدة حجبانها مزيان :" مكانش كيضحك "

وقفات كتتمشى فحالو ودراري صغار غيموتو بضحك فاش كتطلق عليه طرائف مضحكة شافت

فيهم :" عرفتو شنو طرا لهاد الظالم ؟"

ورجعات طلعات عينو لقاتو جامع يديه ومتبع معاها كيتسناها تكمل :"جات بنت قوية وشجاعة وكاع ناس ولاو شجعان فحالهااا "

كدير حركات رياضية تبرز قوتها زعما :" خدات حجرة قوية "

هزات حجرة من الارض باستها و اعطاتها لولد صغير حداها يبوسها وعلات عينيها فيه وغمزاتو

بتحدي :" ورجعو يرميوها عليه ويرجموه حتى غرق فالحجر ومات معفن "

غوتات بحماس :" يالله يالله هزو حجيراتكم ورميو معايا نرجمو الظالم "

رمات الحجرة جات حدا رجل عيسـى تماما ودراري كيتناقزو ويغوتو جمعو لحجر وتلفتو يرميو لحجر فاين رمات بيه شافو عيسـى منهم لي طاح راكع وحاني راسو كيف تربى ومنهم لي بال فسروالو من الخوف حيت مكيخرجوهمش الى كان فلفيرمة مخافة منو ومن مزاجو الحاد، ومنهم لي جرى بعيد وواحد منهم تخشى تحت تبن ومنهم لي كيغطس راسو فبراز البقر غير يسلك مع غضب عيسـى وشي وحدين تخبعو واراها غيموتو بالخوف

قرب و جلس قبالتها :" كملي ابنت لخماس شنو طرا "

ضحك باستهزاء :" لهاد بنت الخماس "

علات حاجبها :" رجعات على كل لسان ومقامها علا وشانها زاد وكثار عليها اللغا من قبيلة لقبيلة ، لحثيت ولا غير فبنت الخماس لي رجعات بنت وزير حتى وصل اللغا لقبيلة الحق وحكم امير معروف فكل مكان تفتن بشجاعة بنت الخماس وركب خيلو وسافر الليالي باش تحكم معاه تزوجو وكان ليهم نصيب من البنين والبنون من السلطة الجاه و الاحترام وعاشو فس..."

قاطعها قبل متكمل :" يعقوووب "

طار وراه حاني راسو :" امرك امولاي "

شاف فيها وكيدوي :" رسل مرسول يقلب فكل بلاد لي حاكمها امير غيتقتل "

قفزات :" اويلي كيفاش غيتقتل "

حكم عينيه فعينيها :" حتى لامات الحاكم الظالم عمر بنت الخماس غتكون لشي واحد "

بعناد نطقات :" الى مكانش امير غيكون خماس "

ابتسم :" يعقووب سيفط لبراح ليوم جنازة كاع الخماسة غيتدفنو الليلة "

يعقوب بقا غير كيشوف :" طاعتك امولاي "

وانساحب يطبق اوامر عيسـى قبل متنوض زينب تابعة يعقوب ولد عمها وقبل متقيسو بعد عليها بزربة حادر راسو :" لالة زينب "

بعد عليها حيت مساخيش بعمرو يقدر يصفيها لاي واحد كان قريب منها من الذكورة شافت فعيسـى :" واش خرج ليك لعقل "

غادي ومخليها :" نقدر ندفن رجال القبيلة فليلة وحدة "

زينب :" عرفتك قاطع يدك من الله "

هزات كتافها غيكون كيخوف فيها حطات يدها تحت حنكها و تفكرات واقعة الصباح جاب ليها عينيه حتى لقدام وجهها قفزات وهي مغمضة عينيها من بشاعة الصورة لي تخيلاتها عرفاتو قادر يدير اي حاجة فبالو وماشي بعيد يكون لبراح فلقبيلة دابا ولمرسول شاد طريق جرات كتقلب عليه فجنب القصر..

يتبع...