خضوعي الجزء التاسع

فبلاصة بعيدة باميال و اميال بصحراء ورمال وببحور و انهار فارض ودنيا اخرى..

كتمشي وتجي ويدها فوق قلبها :" عيب عليك واش مكفاكمش تشويت فولدي و البكر ديالي غتزيدو تشويوني فالروح لي مازال كضور فيا "

كتبكي :" حرام عليكم "

كيطبطب فوق ظهرها :" ايليزابيت خاصك تكوني فرحانة "

قاطعاتو :" فرحانة واناا معرفتش فين سيفطتو ولدي "

كتغوت :" كرهتكم كرهت هاد البلاد وهاد الحكم "

كضرب فصدرها :" كرهت راسييي كرهت "

كتبكي وتدوي حتى الصوت بح ومبقاش مسموع :" ولدي تحركت منو وهو باقي.."

كتعبر بيديها على حجمو صغير وسط دراعها ولكلمات كيخونوها :" هءءء.. باقي كميشة صغيرة "

غمضات عينيها كيحرقوها بالبكاء لي بكاتو طول حياتها :" طلبتهم تنفيوني انا و ولدي مبغيتش نخسر رافاييل "

سهات وقواها خارت :" كتنتاقمو مني بعدتو عليا الاول ودابا بعدنو التاني "

رد عليها بصوت عالي :" سينيورا ايليزابيت ماشي بخااطرنااا حتى حناا مكناش باغيين هادشي يوقع ديك الليلة.."

قاطعاتو وصوتها كيتقطع :"س.. سكت"

عينيها بداو ينزلو دموع بلاما تحس :" سكت "

شداتها دوخة وكانت شوية وتطيح قبل ميشدها من من كتافها :" سينيورة !"

كيحركها بشوية :" واش نتي لاباس "

هي عينيها بداو يتقلبو :" ايسى ولد..ي !"

بدات ذاكرتها تفتح جروح الماضي لي مازال مبراوش وباقي كينزفو احزان و آلام كتوجعها من نهار فقدات البكر ديالها حياتها رجعات سواد تماما وقلبها رجع رماد باقي فيه شوية العافية كيقتل فيها شوية بشوية..

وفليلة ماشي فحال كاع الليالي قبل خمسة وعشرين عام، اسبانيا ، العاصمة قلب المدينة فوسط قصر الملك اردونيو فيليب الاسباني الفسيح مساحة كبيرة وشاسعة و طول السقف مكتحدوش العين صوت الاطفال كيتردد

فالارجاء :" ايسى غطيح أ ماما "

مكانش كيسمع كينقز من هنا لهيه و فيدو سيف الخشب :" لورانس غنكبر وغنغلبك ونطيح سيفك"

الملك كيضحك بشهامة :" لورانس حرفية اش هاد الاداب "

حك فوق راس عيسى :" الامير الصغير "

هز عيسى كتافو :" عمي لورانس "

وشاف فلورانس :" ولكن نهار نغلبك غتولي لورانس"

بدا كيدير اداب المبارزة اولا قبل ميبدا يعرض المهارات لي تعلمها من عند سفير فنون السيف و القتال لي جاي من بلاد ثانية خصيصا على قبل تدريب اولاد الاسرة الملكية :" ايسى معلم العلوم جا "

تنفخ فاش هزاتو الخدامة غادية بيه لغرفة التعلم لقات المعلم كيتسناه :" الامير الصغير شنو بغيتينا نقراو اليوم "

عيسى مشا يجري طل باب الغرفة قبل ميسدها عليهم :" مبغيتش نقرا ليوم "

جر معلم من يدو :" نخرجو برا للجردة ديال القصر "

فعلا خداو اللوازم الخدم للحديقة لي كانت جنة فوق الارض كلها خضراء ومزوقة بورود من كل شكل ونوع و اخصان اشجارها دايرة ظل طويل وكبير وتحت مساحة مصاوبة بالخشب مخطية وملكية خاصة جلسو عيسى كان واخد ورقة و ريشة كيرسم معلم ديالو :" متتحركش "

غمض عين كيركز فيه بلعين التانية :" قربت نكمل "

ومخرج لسانو وهو كيحاول يعبر ملامح وجهو حتى كيسمع :" حضرة الملك اردونيو فيليب "

هنا نقز مقاد فلحلسة بعدما كان مفسح دابا ظهرو مستقيم وراسو عالي ورجليه ضامهم عندو و المعلم كيسولو وحاط ليه ورقة الاجابة كيجاوبها من لورقة والمعلم كيخششو :" الملك الخامس.."

تحرك شوية البرد والنسيم ضرب تهزات وطارت الورقة وجات فوق وجه الملك لي كان قريب ليهم شوية خدا الورقة كيقرا الاجابات وفنفس الوقت كان عيسى ساكت تلفو عليه الإجابات حيت محافظش قرب الملك وخداه من وذنو :" كنتي كترسم عاوتاني "

عيسى كيتحرك :" ااا اييي اااا اااييي "

جرو معاه :" كتعصى اوامر الملك ؟"

حرك راسو بلا وهو حامع يدو عندو كيتغبن بطريقة عفوية طفولية :" لا بغيت نولي رسام فحال بابا "

تحنى عندو الملك و حط راسو بين يديه :" ولدي باباك قرا و جال العالم كامل تعرف على ثقافات وعلوم قبل ميولي رسام ، الرسم هواية "

وعيسى كان كيشوف بعويناتو فالارض وجدو باقي كيدوي :" نت ولد بنت الملك السابع ، ولد اميرة اسبانيا حياتك مربوطة ببلادك "

كيهز فكتافو :" بغيت نمشي مع بابا "

كينفخ :" رافاييل هو لي مهني غير كياكل وينعس ويلعب "

ضحك الملك من حماقة حفيدو :" حتى هو غيولي راجل بمسؤولية "

جبد من تحت سلهامو الملكي حلوة :" هادي ديالك "

نقز عيسى معنقو وباسو فوق خدو :" شكرا جدو "

و بزا كيفتح فيها بزربة :" ماما مكتبغيش تخليني ناكلها "

خبعو الملك تحت سلهامو بمزحة :" يالله كولها قبل متشوفنا "

بدا كينقز تحت سلهامى بلفرحة وهو كياكلها خلاه و غادر لاجتماع مع رؤساء المقاطعات لوقت لي كيلقاه كيخطفو وييجي يشوف عيسى كان فرحة القصر و النور لي مشعلو حيت الملك كان وحيد عندو بنت وحدة كانت ضوء عينيه تزوجات رحَّال مغربي عن حب وعشق كبير وكان عيسى ثمرة حبهم الاولى و مصدر سعادة الملك بولد بكر اعتابرو ولدو ماشي حفيدو وكان اقرب ليه من خوتو كان الايسر ديالو •قلبو• ،

كان كيضفي على القصر جو المرح و الفرح على الصغير والكبير على الوزراء و الخدم كان محبوب عند الكل وكان رفيق الملك فكل حدث مهم

كيجري و الكلب تابعو فساحة القصر :" يالاه تبعني "

بقا يجري و السلهام لي ملبسينو طويل كيعكلو حتى تلوى على رجلو وطاح و غير بصرخة صغيرة منو القصر كامل تزعزع وكلشي جا كيجري حيت الخبشة مكانتش تقيس حفيد الملك جاو

مخلوعين لقاوه كيضحك و لكلب كيلعق وجهو :" ههه اووه لوراانس "

ايليزابيت :" لورانس ؟"

شاف فيها :" حيت كيشبه للورانس كيبقا تابعني ديما "

نوضاتو شادة فيدو كتسوس فحوايجو :" مشاغب غيتقلق عليك عمو لورانس "

حط يدو فوق شفايفو :" كيشبهلو بصح ولورانس كيقلقو غير الكذوب انا مكدبتش "

باسها فوق خدها وهي مازال كتسوس فحوايجو :" ماما عافاك بغيت نلعب مع رافاييل "

كتدوز يدها فوق شعرو :" رافاييل باقي صغير ا ماما "

جمع يدو منفخ :" علاش كلشي كيلعب معاه و انا لا "

ايليزابيت خنزرات فيه :" اخر مرة خليت معاه باش تقابلو علاما جبت ليه ماكلة ديالو جيت لقيتها موقفو و عاطيه العقيق ديالك "

عيسى كيشوف فيها ببراءة :" هو لي قالي اعطيه ليا "

ايليزابيت مخرجة فيه عينيها :" رافايييل قالها ؟"

حرك راسو باه وكيدوي من نيتو :" اه شدو وكيقولي اا ااه ناا ناا "

ايليزابيت كتضحك :" ونت فهمتيه "

عنقاتو كضحك :" روح ماما "

دخلو مع لقصر بزوج وهو مطلع عينو فيها :" بغيت باباا "

شافت فيه :" حتى هو توحشك "

كيهز فحاجبو :" لا كون توحشني ميسافرش عاوتاني "

حتى حس بدي قبضة شداتو من تحت يدو وهزاتو كتبوس فيه من اللور وعلقو فوق كتافو غووت بلفرحة :" بااابااا "

كيشطح بيه :" نعام اديال بابا "

عيسى :" رسمتي شي حاجة جديدة ا بابا"

حرك راسو بلا :" مشيت لمهمة اعطاهالي الملك ودابا حيت نرسم انا وياك "

عيسى كينقز باغي ينزل :" نوريك رسمي وليت كنعرف نرسم حسن من لول "

هبطو كيشعكك فشعرو :" ا نشوف البطل "

مشا كيجري و هو جر ايليزابيت من خصرها لعندو كيبوس فيها وهي كتبعدو بخجل :" مالك غيشوفنا عيسى "

باقي كيبوسها :" مالي منبوسش مرتي "

طلقها بزربة فاش شافو جاي كيغوت من بعيد :" متبوسهااش "

وجا عنقها هو و بقا يضحك عليه :" رافاييل ناعس ؟"

حركات راسها باه :" يالله نعس "

عنقاتو وهي مسبقة عيسى قدامها :" جلسو انا نمشي نشوف العشا فين وصل "

جلس فالفسحة فوق طارلة كبيرة وطويلة فيها ثلاتين مقعد و الكرسي النتقدم ملكي خاص بلملك طلع كيتشعبط فوق منو عيسى :" عيسى هذا كرسي الملك "

عيسى :" حتى انا غنكون ملك "

مد لو كتاب رسومات ديالو :" هاهماا "

بدا كيدور فيهم مالك باهتمام و اثارة :" نت لي رسمتي هادو "

حرك راسو باه :" اه اناا "

حرك فمو مالك :" امم "

وقف و حنى لو راسو :" تبارك الله على خليفتي فالرسم "

عيسى :" نت باغيني خليفة فرسم و جدو باغيني خليفة فلقانون و الزراعة وماما باغياني نرجع خليفة فالطبخ والعزف "

تنهد مطول :" و لورانس باغيني خليفة فنون السيف و جاكلينا باغياني خليفة فترويض الخيول "

عاود نطق بخيبة امل :" وانا باغيي نلعب مع رافاييل "

ضحك مالك وقرب ليه :" ملي نبغي نشوفو يالله معايا "

غمزو :" ونخليك تلعب معاه "

طار عليه من بلاصتو :" يااايييي "

سد ليه فمو:" شووو لاسمعاتنا الاميرة مغيعجبهاش لحال و تاخدو منا بزوج "

كانت ساعت رجوع الملك و تجمعو على طاولة العشاء كل افراد عائلة فيليب من خوتو وخواتاتو كانت فيدو اليسرى حفيدو الصغير و الجهة الاخرى بنتو الوحيدة ايليزابيت حداها راجلها و حداه لورانس وجاكلينا مراتو و خوتو الامراء و

خواتاتو برغم خوه فوسط وذن الاخ الاخر :" لبرهوش مجلسو حداه وحنا دافعنا هنا "

شافو كيشوف فيه ابتسم وهو كياكل بشوية و عيسى داير صداع فطبلة بوحدو :" جدي "

ملي شاف طبلة عامرة ولخدم فكل بلاصة :" الملك "

مجاوبوش ورجع نطق :" حضرة الملك "

مجاوبوش ونطق بضجر و صوت رقيق مغبن :" جدووو"

شاف فيه بود :" هانا احفيدي "

شير ليه لطبسيل ديال لحلوة وحاط صبعو وسط فمو كيطلع عويناتو بمشاكسة فايليزابيت لي قدامو :" ايسى اش قلناا الحلوة لا السنينات ايحرقوك "

هز كتافو بملل ولا مبالاة

هز مالك شوية قليل وخطو ليه فوسط الطبق ديالو :" بصحة "

دفع طبسيل :" هذا رافاييل ومغيشبعوش "

عوج فمو :" جدووو "

شاف الملك فبنتو بعينيه حتى هو كيتوسلها دير لحفيدو لخاطر تنهدات :" غلبتيني المشاغب "

ضحك :" عموو لوراانس "

شاف فيه بنص عين :" نكثر الشكلاط كي ديما "

حرك راسو باه كيحك يدو مع بعض بحماس حيت غياكل الحلوى لي كيبغي

عن الصنت وغير صوت عيسى لي مسموع فالقاعة الملكية حتى بداو كيسمعو صوت خطوات الجنود تتعالى وصرخات الخدم و الزنار كيزمر

تلفتات ايليزابيت :" شنو واقع هنا ؟"

وقف الملك :" معرفتش "

كلشي ناض كيستفسر على سبب الضجة قبل ميبداو يسمعو الصوت الزاج كيتهرس و الخدم كيتقتلو بسيف وسهام والجنود كيتقتلو بالسهام النارية من برا كيجيو السهام النارية من باخرة فالبحر لي مقابل مع ابواب القصر

العافية تولعات والدخان كثار كلشي كيجري هربان الامراء كلهم هربانين و الملك خرج يقاد الامور ايليزابيت كانت شادة قيد عيسى وكتبكي :" مالك "

مالك معنقها :" بقاي مع عيسى منقدروش نخليو لملك بوحدو "

خرج وسد عليهم الباب :" سدي من لداخل باش ميقدر تا حد يفتح عليك لباب "

باس فوق راسها :" متخليش عيسى بوحدو رضي لبال لراسك "

شدات فيدو :" مالك "

بهمس :" انا مرعوبة "

و عيسى مكان فاهم والو وصغير :" متخافيش ا ماما لورانس و بابا غيقتلوهم "

ابتسم وباسو لاخر مرة :" كون بطل وحضي ماماك "

ايليزابيت :" شنو واقع "

مالك :" غيكون شي انقلاب فالقصر وشي خيانة "

وغادرها سد عليها وهي بقات معنقة عيسى ومزيرة عليه :" ولدي "

وكتقرا وتردد فهاطرها ايات من الانجيل وعيسى كيلعب فشعرها مهدن حيت مفراسو ميتعاود غاديا جايا كطل من سرجم كتشوف الدنيا ترونات و الجثت كتيرة بزاف و الحريق طالع مع القصر كتشوف الدخان من تحت لباب وعيسى بدا يتخنق حطات يدها فوق قلبها :" رافاايييل"

حطات عيسى و اعطاتو شرويط :" حط هادي فوق نيفك "

عيسى :" فين غاديا كح كح.."

باستو وكتعنق فيه :" رافاييل غنحيب رافاييل ونجي ناخدك "

شد فيديها كيحرك راسو بلا وكيبكي :" انا هايف ا ماما متخلينيش بوحدي عافاك "

حيدات يدو من يدها :" ثيق بيا وبقا مخبي هنا "

خرجات وسدات وراها طلعات تاخد رافاييل ولدها الصغير لي ميقدر يدير والو بلا بيها لقات العافيا شاعلة كتلتهم كل مايجي قدامها وضاي بلكونة ديال رافاييل غوتات فاش طاحت عليها خشبة ديال الماريو سخونة و مع ذلك صبرات وناضت كتكح هزات رافاييل لي كيبكي ويغوت تاهو مخنوق خرجات كتعرج و و الدخان خنقها تسلل لريتها وجيفها طاحت على وقفتها شعرها الاشقر طايح على رافاييل لي كيبكي ووجهو حمر وهي جثة جنبو مخطياه بنصها مانعة اي حاجة تآذيه

عيسى بقى كيتخنق و متوتر كيسمع صوت الخطوات كيقربو قلبو ميضرب غيخرج من بلاصتو كلو معرق هرب تحت طابلة كيبكي فصمت عاض على يديه :" ماما متخلينيهش هء"

كيتنخصص بشوية وكيشهق لداخل حتى صدرو كيتهز :" ماما بور فاڤور •عافاك• نو ديجيس •متخلينيش•"

حط يدو فوق عينيه و وقف وبدا يجري معارفش فين ولكن غير كيجري و القصر مرون كلشي كيجري وشي كيضرب فشي

فلقبيلة كان قالب الدنيا سفاها على علااها :" علاش قلت قبل ميطيب نعااسي نلقا الدهيل تحت رجلي "

كيغوت :" عاااابد "

حاني راسي ومقدرش يدوي حيت موفاش بكلمتو :" فيناهوا "

عابد شاف فرؤساء الجيش :" خرجو "

خرجو كاملين طالبين عليها خايفين يزيدو دقيقة ويصدقو مقتولين على يد عيسى فاللخر

قرب عابد لعيسى و ركع :" مولاي "

عيسى كان كيترعد لا شعوريا مكيحسش بالامان قلبو كيترعد :" عابد "

شد فسلهامو و حطو فوق فمو :" مولاي نفديك بحياتي مغيوقع والو و الدخيل غيكون ميت فشي جبل ميقدرش يوصل للقصر ولا لزينب "

جلس فوق كرسي ديالو حاط راسو اللور و عابد ميماصي ليه دراعو بشوية كيكالميه كل مرة كيكون دخيل فلقبيلة كيوقع ليه نفس الشيء كأنها نذبة مطارداه من الماضي وكيعاني من رهاب الدخيل..

يخشى الدخيل كثر من الصداع لي كينفاجر فوسط منو وكيحرق فيه على نار مهيلة :" مولاي غنعزز الرجال فالقصر و عيني مغتغمضش غنكون باب بيتك لي بغا يدوز ليك خاصو يتخطاني "

حط يدو فوق يد عابد لي فكتفو ونطق بصوت باح :" زينب"

عابد كيطمئنو :" حتى زينب غتكون قدام عينيك "

كيزيد يأكد :" ثيق فيا "

غير نطق بهاد الكلمة عابد عيسى فحالا خويتي ليه الملح فعينيه و راسو رجع كيحرقو بزاف شد فراسو مغمض عينيه حيت هي نفس الكلمة لي نطقات مو قبل متتخلى عليه طاح فالارض وهو شاد فراسو و كيبعد منو عابد لي كيحاول يعاونو :" متقربش "

ولكن عابد عمرو سمع ليه فهاد الحالات :" مولاي "

هز الڤاز لي حداه وزف بيه عليه داز نن حدا وذن عابد حتى حرح وذنو وبدات تسيل :" متقربش "

كان كيترعد وكلو عرق وعينيه فالتين :" متقربش "

شاد فراسو :" نو نوو "

كيحرك راسو و وذنيه كيصفرو بصوت الغوات فمخيلتو وصوت صرخات النسا و غوات رجال و صوت الاجسام الثقيلة كتردخ مع الارض

حاول عيسى يقرب منو مرة اخرى باش يوقفو وغوت وسط وجهو :" متقربش غنقتلك "

عابد مسمعش لكلامو و ضربو عيسى بقيضة وسط كرشو حتى تأوه ومع ذلك مبعدش دفعو عيسى بعيد عليه :" متقيسنيش "

و هز السيف و شهرو عليه وهو خارج على منطق ديالو مكيشوفش فلي قدامو عابد كيشوف غير ناس كتجري و شي حد قاصدو عايش وسط مخيلتو و صوت الغوات كيختارق طبل وذنيه

عابد بخوف :" مولاي غتآذي راسك "

كان شاد فراسو :" اا ااه "

كيسمع صوت البكا وصوت الانجيل وسط وذنيه صوت الضحك مخلط بلغوات دخلات زينب فنفس اللحظة واخا كانت مانعاها ام الغيث خرجات على هضرتها وذخلات على غفلة لغرفة مرونة وعابد كينزف من وذنو وعيسى هاز السيف فيدو و فديك لحالة كترهب..

نطقات بشوية :" عيسى "

كان على نفس الحالة شاد فراسو و السيف مازال فيدو وتاني رجلو علاين يطيح ويفقد توازن ديالو

قربات شوية كتشوف فعابد :" شنو واقع ليه ؟"

عابد مقدرش يدوي :" يقدر يآذي راسو "

رجعات ناداتو :" عييسى "

قفز فاش سمع صوت كيعيط باسمو و شهر السيف جهتها و هزو ناوي ينزل عليهاا ولكن بخفة عابد ضار عليها حاميها بظهرو دار دورة و جات الضربة فدراعو تقطع لباسو وسال دمو وتكا على الحيط :" متقربيييش ليه غيضربك"

شافت فيه :" عمرو اذاني "

عابد :" مولاي ماشي على طبيعتو "

حطات يدها فوق فمها كتشوف دم عابد وعين عيسى الحمرة :" عييسى "

قربات وحطات يدها فوق يدوو هو بلاما يحس غير حطات يدها عليه تكاها على الحيط خانقها بيديه حتى تقجات ورجعات زرقة الدم تقطع و التنفس تحبس فيها و حاط ليها السيف فوق جنبها تماما بحركة وحدة ينهي حياتها

حطات يدها فوق يدو لي خانقاها و يد التانية فوق يدو لي فيها السيف كتشوف فعينيه وعينيها مغرغرين حيت خانقها و بريقهم كيلمع بزاف و كتحاربا باش تنطق :" عيسى انا زينب"

كتركل بشوية :" انا زينب متمردتك "

رمى السيف فالارض وتسمع الصدى ديالو طلق منها و هو مصدوم معارفش شنو كيدير قربات والخوف فعويناتها شدات فيديه ضمها ليه تلاح عليها معنقها بجهد راسو فوق عنقها متكي عليها حيت طويل القامة مقانة بقامتها القصيرة وهي لاول مرة تبادلو شي حاجة بادلاتو عناق..

بقا معنقها لدقائق كتحس بصدرو كيتهز و اطرافو كترتاحف بدا كيهدا شوية بشوية بحال شي ولد صغير كيتنخصص حتى كيسكت شوية بشوية وهي بدات كتطبطب فوق ظهرو بشوية حاطة راسها فوق دراعو ، كان كيتنفس بجهد فحالا كان يجري ولا يتعارك رجع تنفس ديالو عادي من مورا العناق الطويل بعد منها وشد فيديها كيتصفح فيها:" موقع ليك والو ؟"

خدات ملحفها كتمسح عرق جبينو :" نت لي شنو وقع ليك "

تلفت :" كنقول بغيت نبقا بوحدي "

شافو فديك لحالة شاد دراعو كتنزف سخفان وكيبتسم حيت عيسى رجع اطبيعتو :" واش باغي تموت "

تنفس عابد براحة :" مغنموت حتى نجيب الدخيل تحت رجلك "

خدا خرقة و جمعها على دراعو :" علاش مكتسمعش "

عابد حنى راسو :" سمح ليا ا مولاي حياتك فوق اوامرك "

وخرج وخلاه هو وياها بوحدهم جلساتو فوق السرير واعطاتو كاس ديال الماء :" شوية دابا ؟"

نزل على داك لكاس مرجع راسو للور وجلسات جنبو :" هادشي وقع ليك اخر مرة "

بفضول :" واش مريض ؟"

تنهد :" اه مريض "

شاف ليها فعويناتهو لواسعة بعويناتو التعبانة :" فرحانة ؟"

مجاوباتوش قرب ليها :" فرحانة حيت لمرض غيقتلني "

ضحكات بسخرية لتلطيف الجو :" نت ؟ مغتموت ختى تدفن ناس القبيلة تحت الارض "

ابتسم :" مزيان ملي عرفتيها "

قادات لوسايد و دفعاتو بطراف صبيعاتها من كتفو :" ارتاح "

تكى و سمعات دقان كانت ام الغيث جابت للبيت اللويزة حطاتها عند راسو و جابت الماء دافيء و الفوطة مدات ليه لكاس :" شربها غتزيد ترخيك"

حرك راسو بلا :" ماشي وقت الراحة خاصني نلقا الدخيل.."

قاطعاتو :" ماشي اي واحد كيظلم ويآذي فحالك الدخيل ممكن يكون واحد تقطعات بيه لحبال ولا قاصد دار ضيافة ولا باغي يعيش من خير الارض "

شافت فيه :" ولا خفتي يكون واحد من ولاد ولا عائلات الناس لي قتلتيهم "

هزات كتافها :" متقدرش تعرف حيت ظلمتي بلا عدد "

كان نايض مباقيش باغي يسمعها كتزنزن وسط وذنيه وكتزيد تنفخ راسو ولكن مخلاتوش رجعات دفعاتو يتكى و خدات رجلو كتغسلها ليه بالماء وسط اناء ديال التراب كبير كتعصر فوقو

الحامض و الورد باش يرخيه :" ترخى متبقاش معصب ذاتك "

غمض عينو وهو كيحس بحركات صبيعاتها الرقيقة فوق منو نطقات وعينيها عليه :" مشفتيش لحكيم مبغاش عابد يجيبو باش قلتهالو "

مجاوبهاش ورجعات كتسول :" نت لي مبغيتيش ؟"

تنهد وفتح عينو فسقف :" باغيا شي روح تطيح "

خنزرات فيه :" خليك تموت حسن "

مجاوبهاش غمض عينو كيحاول يوقف تفكيرو لي كلو مصب فالدخيل لي فالقبيلة

نطقات وهي كتماصي فرجلو :" ضروري تقتلو ؟"

باقي مغمض عينيه بدون اي حركة نطق :" الخاجم يموت شرع "

زينب :" ولكن علاش الى كان باغي يعيش فوق ارضك "

حل عينو :" الارض ارضي انا لي كنختار النسل والدم لي غيعيش فيها "

تنهدات بغيض :" غيجي نهار لي غتعيش فيها بوحدك "

ابتسم كيغيضها :" انا وولادي معاك "

زينب :" اللفعة لي غتولد معاك اما لمراة مديرهاش "

ناض مقرب ليها :" متاكدة ؟"

ساط فوق من عنقها حتى وقف شعر جسمها كاملة :" لغلة الجايا غيكون عندنا اول ولد "

ابتسم بمكر ايتسامة جانبية :" وعرفتي اخر مرة عاندتيني شنو وقع ؟"

كتتهرب منو حيت اخر مرة قال غيتزوجها وتزوجها فالتاريخ لي اعطاها

وقفات كتبعد :" انا خارجة "

نزل حاجب :" معندك فين تخرجي الغريب فالقبيلة ومرت القايد كضور ؟"

زينب :" سيفط معايت لعبيد ضروري نشوف مي مريضة "

هي غير كتختالق فالاعذار حيت تخنقات بلجلسة فالقصر :" لا معندك فين تمشي "

مشات جهة الباب :" فين غاديا ؟"

تلفتات جامعة فمها :" ربطني فهاد لبيت بغيت نشوف الهواء ديال سيدي ربي "

خرج ويدو فوق راسو :" يعقوب الخيل مرحعش للكوري ؟"

حرك راسو بلا :"ملقيتوش حتى هاد الصباح "

بشك :" تكون دارتها بيا "

حرك راسو بلا :" هاديك لكاملة بنت الكبير "

بقلق رجع كيدوي بوحدو وكيفكر بجهد :" تكون وقعات ليها شي حاجة ؟"

يعقوب مطلع حاجبو كيشوف فيه قبل ميخنزر فيه اسماعيل :" سير قايل شغالك الى مجبتيش الدخيل الليلة غدوزعا فلقبر "

تحرك يعقوب بزربة عارف شنو تابعو فمنصبو جديد الى مبانش الغريب هو اول واحد مهدد من طرف عيسى

وبقا اسماعيل من وراه غادي جاي قبل ميتفكر شي حاجة مشا كيجري ورا الكوري لقا الخيل مسرح فالارض وفوقو شواري قصير عليه و قدامو فتات ديال الفصة كلاها كاملة وناعس حتى وقف

شحطو و وقف الخيل داك ساع :" اش هاد لحالة اسي سرحان سيفطناك سلطان رجعتي سرّاح ؟"

حيد فوقو شواري رماه فالارض وهو كيسوس فشعرو من الفصة و الخيل كيصدر صوت :" فين خليتي لكاملة ؟"

حك تحت راسو :" تكون بلعاني حطات لفصة فشواري باش متجوعش حتى توصل لعندي ؟"

ابتسم :" زينة وبنت عائلة و كتراعي وتفكر ليا "

دخل الخيل للكوري يتغسل وهو كيفكر فيها تنهد مطول :" غير نسالي مع الدخيل و نهني بال مولاي ونجي ناخدك ليا لبال ولا مريض بلا بيك "

ضرب فوق لخيل وهو كيدور عليه و دخل عند اماندا واقفة بشموخ وسط بلاصتها وشعرها نازل

عليها قاسها وهي تبعد عليه :" معرفتش كيفاش قدر مولاي يروض متمردة بحالك "

هز كتافو باستغراب :" الخيل لي محنات وحيرات كل فرسان القبايل الشداد جات حتى لبين يدين مولاي ورجعات قطة وديعة "

بغا يجرب يركب عليها حط فوق منها السرج ديالها و لجامها تعذب باش يركبو ليها عمس حالها مع عيسى غير كتشوفو هاز اللجام كتفتح فمها بكل بساطة خرجها و جا يركب وهي تنهر بقوة وبعدات منو بخطوتين طاح ورجع وقف و قابلها معاه بغا يزرب عليها ويركب تلاح عليها و هي تبدا توقف على رجليها بزوج فمحاولة لاسقاطو و رجعات كترمي بيه للجهة الاخرة و تهبط بيه حتى طيحاتو وهو باقي متمسك بلجامها

كينهج من كثرة ماقاومها :" امانداا "

جاها من اللور بغا يركب و الخيول كعادتها كتخاف الى جيتيها من اللور وهي تهز رجليها حتى للسماء واعطاتو لصدرو برجليها القوية حتى طاح للارض بقوة وراسو جا فالارض وخرج منو دم حط يدو تحت راسو :" ااا اماندا العنيفة "

كيضحك وسط المو :" مولاي كيعشق اي حاجة عنيفة "

حرك راسو وهو مغمض عينيه مقصح :"عرفت دابا علاش كيشبهك بزينب "

بدا كيكحب بشوية مقصح فصدرو و رجع دخلها لبلاصتها :" اماندا العنيدة "

و خرج كيضرب فصدرو مقصح ، اماندا ملكة الاسطبل وملكة الخيول فالسباق و السرعة و الجمال وعزة النفس الهبة والشموخ اماندا لي مكتتقارنش ومكتجمعش كقريناتها وشبيهاتها مع باقي الخيول

حيت كانت متمردة عيسى الثانية و معشوقتو بعد زينب كانت خلوتو بيها حلوة

كيلقا راسو معاها كيتفكر زينب عنادها و تمردها فالاول رفضات تخضع ليه وكانت عنيفة معاه ميف عنيفة مع كلشي مكتخلي حتى واحد يقرب عليها ولا يركب فوقها ولا يآمرها من غير عيسى لي غير كتشوفو كتبدا تصدر اصوات المرح و الفرح كتحسها عايشة معاه انثى القايد فالخيالة و سيدة السباق ديما ،

والخيل اقرب لصاحبو كيحس بمشاعرو و احساسو كيتبادلو مشاعرهم بلاما يحسو تماما كعلاقة اماندا بعيسى..

فدار لكاملة كانت ناعسة ولكاملة حاطة ليها حريرة ديال الشعير حدا راسها :" مريم اداك المعزة الكذابة نوضي تفطري عتقي ليك "

كتحيد عليها لغطاء :" نوضي راك وليتي صفرة وغضعافي و ميبغيك حد نوضي كولي و كبريها باش تناسبينا مع شي همة وشان "

شافت فزينب مكرفصة وخارجة :" دخلي ديري فوق راسك تارازة غتحرقي وجهك "

شافت فيهم :" واش ناويين تنبتو حداياا "

كتحرك فمريم :" وا نوضي وزيدي معايا نشوفو ديك الزغيبية فين وصلات "

كتركل :" واا ميي واش هما كيتزوجو وحنا غي لاصقينهم "

لكاملة :" نهار نكون غاديا عند زينب تسبقيني و غير نجبد ليك دار لغالية تبغي تاكليني "

جراتها من شعرها :" ونووضييي قدامي "

كتعيط :" شااامة وجدي داك اللبن ناخدو منو للغالية "

قفزات فاطمة :" بغيت منو "

لكاملة شافت فيها :" ياك دار لك سهال مبقيتي حملتيه "

فاطمة كضور فعينيها :" وباش غندوز هاد العدس لي اعطيتي اللهم هو يقتل ليا العطش "

لكاملة كتغوت :" شاامة عزلي لفاطمة معاك شي قرعة "

فاطمة خرجات راسها من لباب كتتراد مع شامة من لبيت :" وكتري اللبا • كيشبه للزبدة •"

خرجات هازة القفة و كتضرب النعاج باش يتقادو فطريق و هي طالعة مع الجبل وكتلفت فطريق رحال عيسى معمرين الطريق كاملة مستفين فكل مكان فينما تحرك راسها تلقا العبيد واقف و

العسكر مسلح :" مشا فيها الزغيبي "

بقات مسرحة رجليها حتى وصلات لقمة الجبل وباقي كتلفت محسوسة من راسها لايكون تابعها شي واحد

طلقات النعاج كياكلو ربيع لي حدا الغار وهي تتسلت :" بس.. بسس"

مكان حتى رد وهي تتقدم بخطوات صغيرة بشوية كتتسلت :" وااا واا"

كتضور فراسها :" واا كحل السعد "

وصلاتها حجرة صغيرة حدا رجليها عرفاتو لداخل دخلات شاعلة فتيلة جمعاتها بتخبية من دار الكاملة لقاتو باقي مرتي وشاد فالجرح

حطات القفة وشافت فيه :" كي بقيتي ؟"

مفهم والو كان غير كيشوف فيها :" واش مكتسمعش "

مكان فاهم والو غير كيبتسم ليها كانه كيشكرها على المساعدة :" موتشيز كراثياس •شكرا بزاف• "

خسرات ملامح وجهها مخرجة وذنيها من تحت لملحف :" هااء ؟"

ابتسم ليها مرة اخرى قبل ميغنض عينو مقصح تحنات عليه و قلبات الجرح كان كينزف حيدات اللحاف باش جمعاتو ليه و جبدات من قفة العشوب مدقوقين وجداتهم من الدار و رجعات عالجاتو و زيرات خروق جداد فوق الجرح

ومدات ليه القلة ديال الماء قبلها بسرعة فتحها وبدا يشرب والماء دايز من صدرو وعنقو بطريقة مغرية تفاحة ادم كانت كتتحرك معاه فوق وتحت خلاها تحل فمها فيه ويديها تحت عنقها توسع بؤبؤ عينيها وهي كتشوف الوشام لي فوق كتفو و

كتتأمل فملامح وجهو وهي مبتاسمة نطقات :" بالصحة "

و حطات ليه الماكلة و كتحاول تدوي وتدير اشارة فنفس الوقت بيدياتها :" كول شوية "

حرك راسو تاهوا كيحاول يشرح ليها باشارة يدو :" شكرا "

رجعات كتسولو بالاشارات كأنها بكماء :" منين جيتي "

هو كيشير ليها :" من بلاد بعيدة "

هي كتموج فصبيعاتها :" وعلاش ؟"

هو كيحاول يوصل ليها الفكرة بصعوبة وهي مقدرات تفهم والو و غير كتعوج فراسها حيرانة دار ليها اشارة تتسنا وجبد من جيبو ديال السروال السنسلة لي فيها صورة عائلة :" ايسى "

كيشرح ليها بلي كيقلب على هاد الولد وهي تقفز :" كتقلب على هذااا "

حطات يدها فوق فمها بصدمة :" يعني كاين غريب اخر فلقبيلة "

عضات على شنايفها :" ياربي ترحمنا مولاي غيصفيها ليا معاك "

شافت بيه بشفقة :" غيكون قتلو وغينبعك ليه"

رجع كيدير ليهااشارة مفاهم والو من كلامها :" منلقاش لي يعاوني ؟"

حط يدو فوق سروالو قدامها خاشيه جهة عضوو هنا نقزات حاطة يديها فوث وحهها مغطية عويناتها

جبد من سروالو خنيشة صغيرة كتبان فحال بويضاتو وفتحها كان لؤلؤ ومرجان كيلمع عمر العين شافت فحالو :" واااااو "

شداتو كتشوفو وتعضو كتتاكد بلي ماشي مزيف :" شنو هادشي كيضر فلعينين "

شدو من يدها كيحاول يفهمها :" الى لقيت لي يعاوني غنعطيه كثر من هاكا "

كتحرك راسها بلا وبخيبة امل فهمها من تعابير وجهها :" قائد ديالنا كيقتل كل دخيل "

وهو كيرجع يشرح واخا مفاهمش كلامها ولكن متاكد من ملامح وجهها كيحاول يفهم :" جاتنا خبار بلي خويا كبر هنا "

كيدير حركات وتعابير :" وغنكرمو كل واحد عاونا نوصلو ليه ولا رعاه لهاد السن "

هي مفاهمة والو كتشوف كيف عينيه كيبريو هو غير حيت عيونو فلون كتخليك تحني عينيك وتحشم وهي يصحابلها بريق الدموع :" متبكي متبكيش ان شاء الله مولاي يقطع راسك بلا ميعذبك "

قسمات ليه الخبز :" قول بسم الله "

و اعطاتو اللبن هو فرح فاش شاف اللبن باينة عجبو من لبارح

بدا كياكل فلخبز لي عامر بلعدس بلهفة وهي مقابلاه :" لكاملة غتقتلك ليا غا بلعدس ا حنيني "

تنهدات وهو طلع عينو فيها كتشوف فيه مد ليها

شوية و رجعاتو :" غا كول بصحة انا طلعليا العدس فصحتي "

ورجع كياكل فيه ويدوز باللبن و كيتبسم

خرجات جابت ليه غلة اخرى ديال الماء حطاتها

حداه و نص خبزة كتشير ليه :" هادو الى جعتي ولا عطشتي "

وجات نايضة وهو يشدها من يديها تلفتات فيه بشوية وهو يهبطها عندو عنقها :" موتشيز كراثياس "

هي تزنغات ورجعات حمرة كيف الجمرة :" كوري ديال مولاي عيسى "

سمع اسم عيسى ووسع عينيه بفضول :" ايسى "

كيحرك راسو باه :" ايسى "

وكيحركها من دراعها وتعابير وحهو متحمسة :" ايسى "

هي نزلات عينيها دايبة من ديك تعنيقة حشمانة و مزنغة حنيكاتها موردة بزاف و شعيرها نازل من تحت لحاف فوق عويناتها

هو من وراء ماسمع اسم عيسى وقف وهو كيتوجع وصوت انينو مسموع وقفات كتعاونو :" فين غادي بهاد لحال "

كتسولو بيديها وهو ففمو كلمة وحدة :" ايسى "

كيلبس حوايجو لمقطعين فوق منو وهي كتعاونو :" واش غتمشي ؟"

هو كيشرح ليها وهي مقادرة تفهم والو :" ايسى "

كتحرك راسها باه :" اه خاصك تهرب قبل ميلقاك مولاي عيسى "

هو كيردد وراها :" ايسى "

وكينطق بكلمات وجمل مكتفهمهمش غير حالة فيه فمها وهو كيسولها :" شنو اسمك "

هي مفاهماش غير كتشوف فيه و كيشير ليها بيديه :" انا رافااييل "

هي حركات راسها :" اه هذا الريف واش نت جاي من بلاد اخرى "

ضحك واخا مفاهمش :" رافاييل "

كيحاول يشرح ليها :" انا رافاييل "

وكيسولها بيديه :" ونتي ؟"

مفهماتش ورجع كيشير :" هو ايسى ، انا رافاييل ونتي ؟"

حركات راسها :" اه "

كضحك بحرج :" انا فاطمة "

كيحاول يردد وهو كيتمتم معارفش ينطقها :" فاتن ؟"

كتحرك راسها بلا :" قزبتي ليا السمية "

كتعاودها بشوية :" فاا"

وهو كيردد :" فاا "

كتكمل :" فاطي"

كيردد وراها :" فاتي "

كتعاود تكمل :" فاطمة "

كيحرك راسو باه :" فاا.. تم "

بفرحة حيت حفظها :" فاتم "

حطات يدها فوق راسها :" مك هي فاتم "

وكيفرنس ليها حتى طاح لملحف فوق راسها وطاح شعرها قدامو هي تلفات بدات تجمع فشعرها مع فلقبيلة عيب البنت تعري على شعرها قدام الراجل وهو تبهط وحل عينيه من جمال شعرها عمرو شاف شعر بداك الطول و الحجم فاسبانيا حتى بنات لملوك شعرهم كيكون قصير جاه غريب و حط يد فوق يدها خداه من يديها بقا كيقيس فيه فحالا كيقلب فلحرير

وهي حطات يدها فوق فمها حشمانة وهي كتشوف كيف كيقيسو كيضحك وكيف هزو حطو فوق نسفو كيشم ريحة النعومة فيه وكتلاحظ كيف كان عاجبو عينيه كيبريو

جبدات الموس ماضي و قطعات خصلة صغيرة منو هي فاطمة بنت لكاملة لي قبسيها فعينيها

ومتقيسيهاش فشعرها هدات منو خصلة و

خلاتها فيديك :" الى قدرتي تهرب خليه عندك "

هو مفهمش كلامها ولكن فهم نظراتها و ابتسم جبد من جيبو فيلول •كنزوقو بيه شعر• و ركبو ليها جنب شعرها كيبري فوق شعرها الناعم

الاسود :" كان مِلك ايليزابيت "

ابتسم ابتسامة كبيرة :" اكثر امراة تفتن بجمالها قبل منشوفك "

خرجات كتلفت فيه حتى هو خارج مشات فطريقها وحناكها حمرين كتقيس وجهها سخون و كضحك غير بوحدها كتجري مسرعة فخطواتها وهو داز من الجهة الاخرة كيمشي بشوية حيت جنبو مقصح

النهار كامل وهي كترض وتجي على راسها :" ياربي "

حطات الغربال فوق الطبلة كتغربل الدقيق :" مّا واش نسمن دابا ؟"

كتبرغم عليها من لبيت :" واش غنوريك مديري امرا ولدي ؟"

سكتات كتخنزر و هي تنوض حطات لماء يسخن

و كتغني غير بشوية فخاطرها :" وحبيبي مادار فيا كواني و.."

حتى سمعات الدقان حلات لقاتها لكاملة مع خواتاتها شامة ومريم :" مرحبا والف مرحبا ببنات الكاملة عندي "

كضحك وكتخشي معاني فيهم حيت عمرهم حاو عندها مريم دخلات ومات لقفة :" نتي ومحاملات العقوزة بقا تحملنا حنا تجمعنا معاك "

قرصاتها لكاملة :" سكتي يعطيك دقة راها كاينة فدار "

ضحكات لكاملة بجهدباش ميتسمع صوت بنتها دخلو و جلسو حداها هي تغربل و شامة كتخلط العجينة وتدلك ومريم حاطة الغدرة كتحط القوام و الدجاج فيها ولكاملة جالسة تشوف فيهم :" اش خبار سيدي عابد ؟"

وهي تغوت مريم بجهد :" اش خباار مووولااا دارك "

وهي تغمزها شامة كتقلي السم لمينة :" اش خباار راجلك سيد الرجال "

وهي تطلقها مريم بواحد الضحكة حتى جمعاتها معاها لكاملة من لقرفادة :" اسكتي اديك الهيشة "

خرجات مينة وخالتها كيضحكو ضحكة صفرة كيتسالمو معاهم شامة ومريم كيتسالمو ويعبرو فمينة ولكاملة نطقات :" اش خبار صحتك اختي "

ردات ام عابد :" الحمد لله الكاملة ونتي اش خبار دارك ومولا دارك •راجلك•"

لكاملة :" يسول فيك لخير "

جراتها عندها بشوية :" بغيت نوريك شي حاجة "

ابتاسمات بزز ليها :" اياه اختي لكاملة "

شافت فلبنات :" ماشي هنا نخرجو لربيعة •جردة•"

فلول بقات كتشوف وهي تنوض لفصول ايقتلها شافت فمينة :" عاونيهم تا نجيو "

وخرجات هي ولكاملة لي بعداتها على الدار شوية وخلات مينة بين شامة ومريم لي حطوها وسط منهم :" ايوا الالة مينة "

طلعات راسها فمريم وابتاسمات :" نعام الالة مريم "

بادلاتها مريم ابتسامة شر كتعري على نيابها :" ضيافة المبي ثلات ايام ولازدتي كتسمى بسالة "

نقزات شامة :" ونتي ولات ويحتك دور فدار الراجل "

مريم بلعات ريقها حيت زيروها بيناتهم باش متدويش ورجعات دوات مريم :" مازال مناوية تمشي لدار باك ؟"

شامة :" امتى ناوية تمشي "

ضحكات لغالية :" بغاو يسيفطو معاك الكعك و القريشلات "

مريم :" مغنسيفطوش بيديك خاويين "

شامة كتجمع فكمام كسوتها :" الله ا ودي مسمعتيش على كرم بنات الخماس ؟"

كضحك مينة بخوف :" هيهي اه الغالية كرماتني الله يعطيها لخير وهاد الرفيسة كنت عاشقاها "

ضحكات مريم قبل متجبد مينة للارض من شعرها :" الرفيسة غنديروها عليك اليوم "

بدات تحركها يمين وشمال و شامة كتعض ليها فوذنيها :" اييييي "

مريم كتغرس فيها ظفارها :" تحطي يدك على لالااااااك الغالية "

كتطول فكلامها :" بنت لالااااك لكاممملة "

شامة كتخبط بقبضة يديها فظهر مينة :" هالي يزعم على بنات الخماس "

مريم :" والله ياا بنت الحطاب حتى نسييك حليب موك "

و كتجبد بوطها بقرصة ومينة كتغوت :" لغاالية "

ليعاتها بقرصة من حشونها حتى طلقات البولة فبلاصتها و مريم رجعات تخبط راسها مع الطبلة :" باقي تحطي عينك على راجل لمراة ؟"

هزات ليها مريم راسها للسماء :" نخسر ليك لوجه لي فرحانة بيه "

حطات ليها الموس فوق حنكها :" منرجعش نلقا ريحتك كتضور فالدار حيت كتخنقنيييي"

شافت فلغالية لي كضحك و كتقطع فلمسمن :" اه حتى انا كتخنقني "

مع سمعو صوت لباب تحل وهما يطلقوها شعرها طالع للسماء و ذنيها نازفة شوية لكاملة ابتاسمات عرفات بناتها قضاو الغرض..

قادات شعرها حابسة البكية وجلسات خالتها قدامها :" مينة مال حالتك ابنتي "

وكتخنزر فمريم لي مطمرة :" لا ا خالتي غير الغراب داز رمى عليها طير ميت عمرها دماياات "

شافت فمينة :" ياك اختي ديالي ؟"

حركات راسها باه كيخلعوها شوفات مريم لمسمتلين :" اه اه اخالتي "

لغالية ضحكات قبل متشد فمعدتها وهي تنوض تجري ترض تلفتات فيها لكاملة :" لغالية اش هادشي ؟"

شافت فيها مفاهمة والو شادة فصدرها سخفانةوهي تشوف فام عاابد :" اش كتسناااي؟"

حركات شاامة:" زغردييي ياااااا الحمارة العودة ولدااات "

و هي تطلقها شامة بواحد التزغريدة حركات الطير من بلاصتووو و مريم تاهي مخلاتش من

حقهاا :" هااا سيديي عابد جاي فالطرييق "

لغالية كحبات وسعات عينيها قبل متنطق رجعات كترض و مصارنها غيخرو ليها من بلاصتهم..

هبطات كتشم الهواء غير باب القصر و العبيد كيهزو فالخناش ديال القمح و الدرة للخزينة لي تحت الارض و نصهم مكاينش شافت عددهم قلال مقارنة بالايام العادية كلشي مقلوب بالبحث على الدخيل فلقبيلة..

تنهدات تاواحد مادايها فيها بقات بوحدها وكاع لعبيد كيتجنبوها مخافة من شي عقاب من عيسى مساخيينش بروحهم

بقات كتتمشى حدا الكوري و كتسمع صوت اماندا كتطلع اصوات دخلات بداخل كتشوف الخيول الخاصة بالنخبة ديال عيسى فالمقدمة اماندا المتمردة و خيول عابد واسماعيل و

الجنود قربات كتلعب فشعرها :" حتى نتي ضدي "

نفخات حنيكاتها :" زعما بصح كتبغي عيسى ؟"

كتطل عليها و كتلعب ففمها :" مارابطكش حداه بالسيف "

رحعات كتدوي معاها فحال شي بنادم :" حتى نتي مربوطة معاه بالسيف "

كتحرك راسها باه :" انا حاسة بيك "

كتحك ليها فشعرها بودية :" غير استسلمتي بسهولة "

حلات ليها لباب كتخرج فيها :" خرجي خودي حريتك "

كدفعها بشوية جهة لباب براا :" سيريي لقاي خريتك باش حتى انا نلقاها "

خرجات المهرة ديال عيسى كتلعب وتجري وتنقز وهي وراها حاضياها من بعيد

كتجري جهة ديال لباب القصر و تاواحد ماراض ليها لباب حيت كلهم كانو داخليه للخزنة كيدخلو الخناشي فيه ونصهم فوسط السهل وخرجات من القصر..

اماندا مدللة القايد وكيعطيها حربتها وسط الفيرمة ولكن برا يقدرو يقطعوهاا ولا تتلف و ميعرفوش شنو يقدر يوقع ليها شهقات زينب وتبعاتها تجري حيت الو اماندا تآذات عيسى غيحرق القبيلة فوق راسهم و يعصر من دمهم

خرجات تجري وراها لعودة تجي وهي تجري طلعات ليها للجبل و رينب تعيط :" امااندااا "

كتغوت :" اماندا .."

حطات يدها وسط فمها كتصفر لعلها تستاجب ليها ولكن هي من تصفيرة عيسى متردعش غير كتجري و زينب تابعاها سخفات و وقفات محنية فحالا غتركع حاطة يدها فوق ركابيها كتلهت وترجع النفس

ملي علات عينيها مبانتش ليها غوتات ومشات تجري كانت نهاية تل قدامها و طلات رامية عينيها لتحت وكتندب بقلق وخوف كبير :" تكون طاحت "

كتعيط بجهد ورجليها فشلو عليها :" اماندا "

تمشات خطوة للقدام محطاتش رجليها مزيان وكانت الحجرة راشية وهي تزلق بيها طاحت زلقات للتحت وهي تغوت ربي لي خلقها حتى حساب بقبضة شداتها من كوعها مزيرة عليها حتى توجعات :" اااه "

علات راسها مكتشوفش بشمس دارت يدها فوق عويناتها مانعة الشعا باش تقدر تشوف كان رجل اشقر عينيه كيفتنووو نسات همها وهي كتشوف فيه :" ش..شكون نت "

عاونها وهو مزير عليها حتى طلعها لعندو بشوية بشوية حطها فوق الصخر وهو كيتأمل فيها

بغرابة :" كومو ايسطاس ؟" •واش لاباس•

هي مسمعاتوش كانت غارقة فلون عينيه الغريب البلوري الزمردي لي غراها حتى طاح على ركابيه والرمح اختارق دراعو وغوت شاد فدراعو كتنزف جاو لعبيد و متقدهم عابد و اسماعيل ووراهم عيسى لي حس بغياب زينب و هدوء لقصر وشافها كتجري برا القصر وتبعها..

ضرب عابد رافاييل برجلو لكتفو :" كلب "

طاح فالارض رافاييل كينين بالالم و اسماعيل كيخبط فيه بوجلو لكرشو :" تحط يديك على مرت لقايد "

بشوية :" الجرد "

هي وقفات كتجري عند عيسى :" متفهمش غلط"

كانت عاقد حجبانو وصاب كامل اهتمامو جهة الجثة لي طايحة فالارض وهي كتحركو :" هوو هو"

كتنعت فيه :" هو عتقنيييي "

شاداه من يدو :" والله كون ماشي هو كنت غنموت هو.."

قاطعها وهو عادي جارها :" قتلوه "

وهما يهزوه مجلسينو على وكابيه شادو يعقوب من شعرو مطلع راسو للفوق وحاط السيف فوق حنجرة ديال رافاييل يبلع ريقو يتجرح

خدا نفس مطلعهاش ونطق :" بور فاڤور "

تكلم بالاسبانية :" انا هنا ماشي باش نآذيكم ،انا كنقلب على خويا "

تلفت عيسى بقوة جهتو موسع عينيه فيه من شدة الصدمة رخا يد زينب

عابد و اسماعيل كانو فصدمة اخرى وهما كيشوفو فبعضهم و يعقوب كيستاعد غيدوز عليه لدرجة ان دمو بدا كيسيل شوية من عنقو من حدة السيف..

عابد و اسماعيل مفاهمين والو من غير ان اللغة باش نطق الغريب نفسها اللغة لي كينطق بيها عيسى

الوقت كيداهمهم و ميقدروش يوقفو يعقوب لانه زير السيف فيدو باحكام واخا يبغي يحبس مغيقدرش تدخل عابد بدون اي امر من عيسى هز رجليه للسماء و ضرب يعقوب لكتفو بكامل قوتو حتى تحرك و رمى السيف من يدو وطاح فالارض

وشد يعقوب فدراعو مقصح نطق عابد :" متتحركش "

تقدم عيسى خطوات جهة الغريب لي كان كيلعب ويلتاقط انفاسو من دهشتو و خوفو من الموت لي كان كيواجه ، طلع عينيه البلورية بصدمة قوية فاش جاوبو عيسى بنفس اللغة ديالو :"شكون نت ؟"

حل فمو بصدمة وعينيه عامياها الشمس مغمض وحدة وفاتح وحدة :" رافاييل فيليب "

هبط عليه عابد بعصا لظهرو حتى تأوه بقوة و كتافو نزلو :" حدر عينيك ونت كتدوي مع مولاي"

مفهم والو ولكن تلقائيا حدر راسو حيت الدقة جات بين عنقو وكتافو ميقدرش يحرك راسو باقي :" ماجيتش نآديكم انا غنكرمكم بغيت غير نلقا خويا "

شدو عيسى من شعرو طلع راسو فيه و لسانو ولا فصيح فالاسبانية كيفهم ويرد بطلاقة فحالا كيقرا الحروف قدام عينيه :" منين جيتي "

رافاييل :" اسبانيا واش حتى نت اسباني ؟"

رماه عيسى حيت مالقا باش يجاوبو :" فين جات اسبانيا ؟"

عمرو عرف بلي كاينة بلاد بهاد الاسم رغم الرحلات لي قام بيها وسيفط رجالو كانو كيتعرفو على بلاد الشرق و البلدان الشقيقة العربية عمرهم عرفو الضفة الاخرى فالعالم

زحف رافاييل عند رجليه وهو مستغرب لان لسان عيسى كان شديد فاللغة ومعارفش فين جات بلاد هاد اللغة :" عروسة الغرب اسبانيا الى عاونتوني نلقا خويا لي قالولي عايش فوق هاد الارض ليكم منها ماتتشهو من مال و الماس وياقوت واحجار عمر عينكم شافتها نعطيوك ارض منها وقصر فنعيمها "

جمع يدو عندو كيترجاه :" مابغيت منكم والو من غير نلقا خويا "

حط عيسى يدو تحت ذقنو كيشوف فرافاييل بشك :" وعلاش غنتيق بيك ؟"

جبد من حوايجو الرزمة وفتحها :" انا امير من اسبانيا حياتي كتسواا بزاف الى لقيت خويا تقدر تملك سيادة اسبانيا بين يديك كرهينة وتاخد منهم لي بغيتي "

قرب عيسى بفضول وخدا دوك المجوهرات ومع خبرتو فمجال المجوهرات والاحجار الكريمة فتنوه حيت فعلا عمر عينو شافت فحالهم كانو اثريين و لامعين كان اللؤلؤ و المرجان و الياقوت

مد رافاييل يدو لحيب سروالو وكلشي تأهب مستعد ليكون غيغدر عيسى لي واقف قدامو جبد السنسلة لي فيها صورة العائلة وفتحها ومدها ليه كانت صورة جماعية للعائلة الملكية الصغيرة ايليزابيت و مالك هي هازة رافاييل لي صغير لحيمة و مالك هاز عيسى فوق كتافو كيضحك حتى تغمضو عويناتو نطق رافاييل

بالاسبانية :" كنقلب على ايسى "

وكيشير ليه فصورتو عابد كان واقف جنبو و وسع عينيه خرجو و فمو تحل بصدمة حيت هو ادرى بشكل عيسى وهو صغير مافهم والو وهو كيشوف صورتو بين هادوك الناس وحتى عيسى مافهم

والو وهو كيشوف راسو فاش كان صغير وطرح سؤال كيتأكد من مسامعو :" علامن كتقلب قلتيلي ؟"

رافاييل :" ايسى خويا "

بقا شاد الصورة كيتحقق فيها و من ملابسهم الغريبة و عينيه مركزة على المراة بزاف طريقة لبسها تماما فحال المراة لي كيحلم بيها مرارا وتكرارا فنعاسو و مكيقدرش يشوف وجهها :" و علاش كتقلب عليه دابا ؟"

رافاييل :" قلبنا الغرب كامل ولكن عمرنا عرفنا ولا تخيلنا غيوصل لهنا "

عيسى مازال ممتيقش وكيشوف فيه فشك :" وعلاش كتقلب عليه ؟"

رافاييل :" باش يرجع لانتماءو بلاصتو فاسبانيا ، حاكم عروسة الغرب و صاحب العرش "

ضحك عيسى بسخرية وتكلم بالعربية موجه كلامو للعبيد :" هزو عليا هاد الجيفة "

تجمعو على رافاييل هازينو من تحت كتافو وهو مازال كيشوف فعيسى :" عاونوني ناقا ايسى "

خداوه سابقينو للقصر ينزلو للحفرة فين كيحطو السجناء المتمردين والخونة لي محسوبين على رؤوس الاصابع وقلال حيت فعهد عيسى لي غلط كيخلص بحياتو مكانش محتاج يبني سجن فين يجمعهم

صفر و خرجات اماندا كتجري وهو ميدوي معاها بنفس اللغة لي كان كيخاطب بيها الغريب و زينب غير كتضور فعينيها مفاهمة حتى حاجة رمى فوق منها سلهامو حيت خرجات بحوايج ديال دار وهزها من تحت يدها و ركبها فوق اماندا وضرب فخصر اماندا وعينيه على اماندا وخطابو موجه لزينب :" مازال غنتفاهمو "

وهي تنطلق اماندا سابقاهم للقصر و زينب بالها كلو مع الفاتن الغريب لي تسلل للقبيلة كتتلفت فيه كانو رابطين يدو وعابد فوق الخيل جارو وهو تابعو كيتمشى على رحلو مقيد بالحبال و مكرفص وكينزف الدم من يدو ورجليه مقصحة كيعرج بيها شوية و كيبغي يمشي بشوية حتى كيجرو بجهد وكيبغي يطيح وكيرجع يتمشى بجرى وهو حفيان رجليه كتنزف بالدم بسبب حدة الطريق لي محفرة وكلها حجر وزاج وهو رجلو كانت مولفة غير بالجلد الثمين

وصلو و هبطوه للحفرة قبر الظلمات و جهنم الدنيوية بالنسبة لناس القبيلة حيت عارفين شنو كيدوز عليك فيها رماو رافاييل على وقفتو فيها حا على يديه تهرسات ليه

وسدو عليه..

عيسى كان واقف باب لقصر حاضيه بنظرات كي الصقر شوية وينقض عليها حتى طلعات لبيتهم حرك عينيه اتجاه عابد لي كان جنبو كيدوي :"مولاي ، امرك "

مشافش فيه كيلعب فلخاتم فصبعو وكيفكر :" انا ماشي مريض "

حرك عابد راسو :" كاين لي كيدوي بحالك باش تآمر ا مولاي ؟"

نطق عابد قبل ميجاوب عيسى :" خلينا نعرفو اصلو و فصلو "

كان كيشوف بعيد وكيتكلم معاه وتعابيرو جامدة معندهاش تفسير :" مغنقتلو حتى نعرف اصل الكلام و راس الخيط "

دخل للقصر طلع مع دروج لقا سلهامو فالارض رماتو قبل ماتطلع تخطاه حيت ميمكنش للقايد يتحنى..

دخل لقاها جالسة فالشرفة كطل و حاضية الغادي ولحاي كتسنا تسمع شي صوت وشي خبر على الغريب حتى قفزها صوتو وراها :" مازال ماماتش "

تلفتات فيه :" علاش مقتلتيهش ؟"

وقفات جايا اتجاهو :" كل غريب تخطى حدود لقبيلة مات بلا انذار "

طلعات حاجبها بفضول :" علاش هو متقتلش ؟"

ضحك ضحكة فاتنة و بسخرية:" نهار مكنقتلتش تسولي علاش !"

حركات راسها بلا :" انا كنعرفك "

قربات ليه بشوية :" كنعرفك مزيان ميمكنش دير شي حاجة هاكاك "

حطات يدها فوق كتفو :" مترحمش في وجه الله"

نزل عينو بشوية فيدها لي فوقو وابتسم ابتسامة جانبية كيستهزء بيها :" وكنقتل هاكاك ؟"

حيدات يدها بزربة :" اه "

شافت فيه :" شنو بغيتي منو ؟ "

رجعات كتخنزر فيه :" وكيفاش دويتي معاه علاش مفهمناش ؟"

تمشى جهتها وعينيه عليها نظراتو لي كيختارقوها خوفوها ترددات وهي كترجع باللور :" مدخليش فسواقات الناس "

بجدية وبنبرة تهديد :" كتحرقي لغلة لي كتاكلي منها "

بلعات ريقها وهي كتسمع ليه :" مدخليش فيه غيموت قبل من وقتو "

حطات يديها وراها كتتجبد :" علاش غتقتلو الى مكانش ناوي الغدر ؟"

بحدة نبرة صوتو علات :" هاد شغال شغالي "

حنات راسها حيت خرج فيها عينيه وهاد النبرة ديال الصوت كتفزعها حيت مكيدويش معاها هاكاك عمرو هز عليها صوتو :" زينب"

نطق بشوية خلاها تتبورش حيت مموالفش يعيط عليها بسميتها وبهاد النبرة الرقيقة قبل ميطلع عينيه فيها وهو عاقد حجبانو :" ديري عقلك متخلينيش نشريه ليك "

وصلاتها المعنى من كلامو و فهمات بلي غيندمها الى مدارتش عقلها :" انا مدرت والو غير.."

كتلعب بصباعها وهي عارفة راسها زبلاتها :" بغيت نلعب مع اماندا وهي.."

قاطعها بالسهم لي فيدو تخطاها لدرجة انها حسات بقوة الرمية لي ريحها قاس عنقها وشهقات :" مكنحملش لكذوب"

طلعات ليها الصفورية مع وجهها ولكن باقي واقفة ومطلعة راسها وعينيها وسط عينيه مبغاتش تبين على ضعفها

قرب ليها كتر و سلل يدو فوق من كرشها طالع مع صدرها حتى وصل لعنقها انقض عليها ودور يدو على عنقها خنقها ملاصقها مع لباب الخشبي الكبير لي وراها حتى بدات النفس تقطع فيها وعينيه مفيكسيين على عينيها رجعو عينيه

حمرة و خارجين :" نتي حية حيت انا بغيتك "

مازال مزيرها وكينطق تحت سنانو :" عايشة حيت انا عاشقك "

بدات تتجيف وهو بدا ميرخي منها بشوية ومازال كيدوي بنفس النبرة :" تخلقتي ليا "

كياكد كلامو :" وغتموتو بلا بيا "

طلق منها وهي طاحت فالارض لاوية يديها على

عنقها كتقيس فيه وهو واقف عاطيها بظهر :" حمدي الله حيت انا باغيك وعاشقك "

و زاد وهلاها طايحة فالارض حامعة رحليها عندها وهي كتقيس فعنقها وكتكحب :" منك لله ا الظالم "

و عينيها خرجو ليها و الدموع نزلو ليها حيت تخنقات :" الله يعطيك الهرس و الضر لي ميبراش "

خرج لقاه كيتسناه باب لباب :" مولاي "

و كيلبسو فسلهام :" رجعات خاطر مولاي ؟"

كيسولو واش ارتاح من بعد ما لقى الغريب ،حرك راسو و هو يضرب عابد :" كون كنتسناه من يديك ماشي من يد زينب "

حدر راسو :" سمحليا ا مولاي "

جا كينقز علي الولد الصغير عند رجليه :" مولاي "

وقف وحنو راسو :" مخليت حتى واحد يعتب فلكوزينة و صينية ديالك ذقتها "

حرك ليه يديه بحماس :" ومافيها والو مأمنة "

لعب عابد فوق شعر علي :" غتولي خادم مولاي الغالي "

بداو كيخرجو لقلوبة من عينين علي :" بصح ا مولاي "

نفض بسلهامو :" اش كتتسنى "

بلفرحة طاح علي على رجليه و خدا سلهام عيسى بين يديه و حطها فوق فمو كيقبلها باحترام :" الله يزيد فرزقك و جاهك وملكك ا مولاي "

ورجع كمل :" مولاي كنتمنى يجي شي نهار نكون واحد من احجارك القوية "

عوج عيسى فمو بطريقة رجولية :" خاصك تهز السيف و تحكم الخيل و تكون طالب العلم وخاتم القرآن "

حرك راسو بحماس :" مولاي انا طالب علم الله و حافظ كتاب الله غنهز السيف ونقطع راس الظالم غننصر المظلوم ونمجد حكمك ا مولاي "

شاف بنص عين جهة بيت فين كاينة زينب وتحنى على علي و داك ساع نزل حتى عابد احتراما لعيسى :" دابا صفي خاطر لالاك زينب "

حرك راسو :" امرك ا مولاي "

هز علي راسو فعابد وغمزو :" بحال هاكا كتقول ياك "

ضحك بزز عابد ممبينش قدام عيسى وهبتو و نطقها بصوت حرش :" امرك ا مولاي "

جابو صينية و كيحنيو راسهم لعيسى :" دخل معاهم ومتخويش لبيت الا بامري "

ربط فوق كتفو :" و كون ظلها فاي خطوة دارتها "

حرك راسو :" سمعا وطاعة ا مولاي "

و سبق علي صينية داخل لبيت زينب..

و رجع تقدم عيسى وعابد وراه :" مولاي "

تلفت فيه بشوية :" اش كاين تم ؟"

هز عابد يد عيسى باس فوقها وحطها فوق كتفو :" سمحليا ا مولاي غرت من عبدك الصغير "

طأطأ راسو :" وبغيت نرجع عبدك الصغير "

ضحك عيسى وكينطق بتهكم :" عابد يا عابد "

حط يديه بزوج فوق كتافو :" نت ماشي عبيد نت العين باش كنشوف و الوذن باش كنسمع نت اليقين ديالي "

عابد حدر راسو بفخر :" ونت هو ملكي ومالكي و سلطاني ، عمري نرضا نعيش من غير تحت ظلك و رحمتك "

ربط فوق كتافو :" خلينا نشوفو بلان هاد الدخيل "

عابد :" خليني نتكلف ا مولاي خفتو يكون واحد من الخونة لي ناويين الغدر ليك "

حرك عيسى راسو بلا :" حتى واحد معارف بالهضرة لي كندوي و.."

عابد :" الصورة لي عندو "

نطق عيسى وهو ساهي :" المراة لي فالصورة كنعرفها "

عابد بتردد :" فالحلم ؟"

حرك عيسى راسو باه بشوية :" غنخليه تحت يديا دابا حتى نشوف "

كيسمعو غواتو من القصر كان اسماعيل ويعقوب حاطينو فعذاب كبير الجلد بالسوط حتى رجع ضهرو رطب من كرشو و خسر الدم ورجع لونو صفر و عويناتو البلورية رجعو منغمين بلعروق حمرين من كثرة الارهاق و الالم

وفاش كيترخى كيخويو عليه سطل ديال لماء بارد بالملحة كيتفلحو حروحو كثر وكيعمرو بالملحة كتخليه يطلع وينزل بالعاافية

و كيلويو ليه صباعو حتى عروق عنقو كيبرزو وكيغوت بجهد :" ااااااااه "

وصوتو كيتردد فلقصر كامل حيت طالع من تحت ،تعمد عيسى تكون لحفرة هاكاك باش اي خائن تعذب يسمعو عذابو وميقدر يتجرا تا واحد على خيانتو

طلعوه ورماوه حدا رجلين عيسى :" شكون نت ؟"

رافاييل بالسيف كيطلع النفس :" ر.."

مقادرش ينطق :" راافاييل.."

كيزيد يتاكد وهو كيسولو :" منين جيتي "

رافاييل مرمي على رجل عيسى :" ا.."

يلهث :" اسبانيا "

الدم كيخرج من فمو وكيطيح فوق رجل عيسى :" ايسى كنقلب على ايسى.."

شاف فعابد بوحدو لي عارف معنى كلام رافاييل حيت عيسى شرح ليه من قبل

رجع عيسى كيتحاور مع رافاييل بالاسبانية :" غنعاونك تقلب على خوك "

ضحك رافاايل وآلامو كتتعدى فرحتو :" شكرا شكرا غنكرمكم "

عيسى بعدو منو :" ولكن بشرط "

رافاييل كيتحرك بالسيف :" انا موافق قبل مانسمع ايسى غالي عند اسبانيا "

عيسى مستغرب من هاد الاهتمام :" غتكون عبيد عندي حتى تلقاه "

حرك راسو باه :" انا موافق "

شاف فعابد وحرك ليه راسو بايجاب تعمدو يربطو رافاييل مع رجلو باش يعرف تحركاتو ملامو و طريقة عيشو و يتاكد مت صدقو وماهيتو ويكتاشف لغز لغتو

وقفوه وخداه اسماعيل يلبس و يغسل ويداوي جروحو :" نت عبيد عند عيسى دابا "

رافاييل بالاسبانية فهم غير كلمة وحدة هي عيسى وشد اسماعيل من دراعو وكيشوف فيه بفضول :" ايسى ؟"

اسماعيل حمر فيه :" مولاااي عيسى "

مفهم والو من غير كلمة عيسى :" ايسى !!"

اسماعيل دفعو :" نت مغتتهنى حتى يتقطع لسانك "

لبس و قادوليه لحسانة وخرجوه عند عيسى واها باقي كيعرج و كيتوعت فجروحو نطق عيسى بالاسبانية :" غترجع رفيقي و تابعي فاي بلاصة نمشي ليها "

حرك يديه :" انا هو حاكم هاد الارض "

تحنى ليه بشوية كيقلد العبيد :" الحاكم "

عابد قرب وهمس فوذن عيسى :" مولاي متنفردش بيه "

عيسى كيشوف فرافاييل وكيجاوب عابد :" عابد دخل سوق شغالك "

ورجع شاف فيه :" ولا غتنزل بلاصتو "

كيقصد بلي غيهبطو للحفرة جمع عابد الطم

كلهم تحركو لشغالهم وعابد لاصق فعيسى :" عابد سير لدارك "

عابد حاضي غير رافاييل :" مولاي منقدرش نخليك مع الدخيل "

عيسى :" بغيتي تبات فلحفرة ؟"

حرك راسو بلا كيبعد :" مولاي "

عيسى قاطعو بجدية :" تحرك من قدامي "

انصرف وهو مازال كيتلفت بخوف وقلق فرافاييل هايف على عيسى منو خرج عيسى للفيرمة فالليل و الحال بدا يطلام والشمس كتغيب ورافاييل حاضيها :" كنكره مغيب الشمس "

عيسى مجاوبوش وهو كازال كيدوي :" حيت فكل ليلة ايليزابيت كتجيها حالة خايبة و مرضية مكتقدرش تنعس ولا تسكت غير كتبكي حتى تبغي تعمى عينيها و تغوت حتى يبح صوتها وهي معنقة وسادة ديال ايسى و ثيابو لي عمرهم تصبنو باش تبقى ريحتو مزامناها "

شاف فيه بنص عين :" شكون هاد ايليزابيت ؟"

ابتسم رافاييل :" الملكة ايليزابيت كانت اميرة القرن بنت ملك اسبانيا فيليب الخامس "

عيسى بفضول :" وشكون ايسى ؟"

رافاييل :" ايسى هو حاكمها اسبانيا اليوم هو مالكها وهو محبوب الامة "

ابتسم بسعادة :" هو بكر فيليب و ولد ايليزابيت لي كتموت وتحارب فكرة عيشو "

وقف عيسى ويديه تحت ظهرو :" كيفاش سمحتو فهاد عيسى ؟"

تنهد رافاييل بضيق :" كان اثمن حاجة زخرات بيه اسبانيا كيفاش تقدر تسمح فيه ، "

حدر راسو وهو كيتكلم :" كان انقلاب وثورة كبيرة ضد الحكم ديال فيليب الخامس لحد الان معرفناش الخاين لي بيعنا الدم "

تمشى قرب عيسى :" بسباب الليلة السوداء ولا الخميس الاسود فتاريخ اسبانيا ليلة فقدان بكر العائلة الملكية ، واخا كانو عندو خوتو لي غيتولاو الحكم من بعد الملك ولكن هو مانع وقرر يطبق لاول مرة وعمرها سبق وقعات يعطي لعرش لحفيدو ولد بنتو وهادشي كيخالف العرش الاسباني لي كيتورث علو النسل ولكن ايسى كان ولد ايليزابيت من رجل مغربي اجنبي ماشي حتى اسباني خلا الثورة تنوض ضد الحكم وحتو الامراء خوت الملك كانت ليهم السد فهادشي"

عيسى غير ساعي كيسمع لكلامو وعقلو مرفوع :" ايليزابيت هي ام ايسى ؟"

حرك رافاييل راسو باه ، و حنحن عيسى بتردد :" عند صورتها ؟"

رافاييل :" الصورة لي اعطيتك هي لي خديت معايا "

عيسى :" باقي حية ؟"

زفر بضيق و قلق وحيرة من امرو :" لا حيت قلبها خداوه منها قلبها مشا مع ايسى "

شاف فيه و قلبو تزير وهو كيسمع حديثو على ايليزابيت خس برابطة كتحمعو بيها واخا مازال مشافهاش :" عاوني نلقا ايسى ، ايليزابيت غتفتح كاع لبيبان عليك الخير المال و الجاه اي حاجة تمناتها خاطرك "

حرك راسو عيسى بلاما يتكلم بمعنى موافق و رافاييل كيشكرو :" شكرا شكرا "

حط عيسى رجلو فوق يد رافاييل لي كان محني عندو كيدوي بلاما يشوف فيه ورافااييل تقصح و عينو تحجرو بالحريق :" الى حاولتي دير هاه ولاهاه"

قبل ميكمل نطق رافاييل :" جيت باش ناخد ايسى مبغيت منكم والو "

كيرددها :" بغيت ايسى اعطيوني ايسى نعطيكم كلشي "

طلق منو :" نت عارف شنو غيوقع الى حاولتي تغدر "

نزل عينو فيه :" لي رشني بالما كنرشو بالدم "

وزاد وخلاه تنهد مطول وهو شاد فيديه :" ماما مغنرجعش غير وانا يدي فيد ايسى "

وحط يدو فوق كتافو وصدرو كيبدي تحية للصليب لي كيآمن بيه و كيدعي يعاونو يلقا عيسى..

طلع مع دريجات بشوية وبثقالة خطواتو بطيئة وموزونة كيسمع صوت ضحك علي من دروج :" هههه هههههه ااا لاااا هههه "

شاد فكرشو :" لاااا لااالة زينب "

وزينب عاجبها لحال كتزيد تهروو :" باقي تعاود "

و كتزيد تحرك فاطرافو :" باقي هاااءءء باقي ؟"

وحتى هي كتضحك :" هذا هو عقابك "

وهو كيدمع بالضحك :" ههه لالة زينب "

بعد كيسترج انفاسو :" هه لاا لا "

وقف كيرتب فحوايجو :" اش غيقول مولاي لاشافني فهاد لحالة "

عقد حجبانو :" كنلعب مع النساا "

جمع يدو كيفكر :" عابد مكانش كيدوي مع النسا ياك ؟"

كيهز فكتافو :" خاصني نكون فحالو نهز السيف اما اللعب مع النسا مغيحميش مولاي"

حطات يدها نحت ذقنها بصدمة :" تحمييه ؟"

كانت فدهشة :" غير لبارح كان غيقتلك ودابا باغي تفديه بخدمتك ؟"

علي :" مولاي مكيآذيش المظلوم مولاي كيحاوب الظالم "

زينب بسخرية :" هو الظالم "

هزات يديها كضحك باستهزاء :" صراحة مايعرف للظالم غير ظالم فحالو "

غوبش علي :" لاااء مولاي ماشي ظالم مولاي حاكم "

زينب بعصبية :" علي كان غيقتلك ويقتلك ماماك "

غوت كيضرب باطرافو :" لااا مولاي كاان كي.."

قبل ميكمل فتح لباب عيسى ودخل عينيه على علي لي غير شافو تبلع لسانو وحط يدو فوق فمو :" مولاي "

مشافش فيه :" خاص لسانك يتقطع "

حدر راسو بحرج :" خويدمك كان غيفشي السر ا مولاي.."

تقدم ناحيتو عيسى :"وحتى روحك مكانتش تفديه "

دفعو برفق :" تحرك الخويدم لسانو طول من قامتو "

خرج علي كيجري وكيعطر فلحوايج لي كبر منو وهي توقف زينب :" واش حتى واد قد هذا رجعتي منو عبيد ماخليتي لا صغير ولا لكبير "

تلاح عيسى فوق سرير وخدا السبسي كيشعل فيه راسو كان مرفوه وهمو كان كبير و الدنيا دايرة بيه حس براسو كان وسط لعبة وكان بيدق كيتمشى فيها معارف اصلو من فصلو ومقادرش يتيق..

خرجات زينب معصبة كتفور مبانت ليها غير ان الغيث قدامها مشافتهاش وخوات فوقها شوية ديال الماء :" سمحيليااا "

كتمسح ليها فيه :" سمحيليا ابنتي "

وهي تدفعها بشوية زينب وغوتات فوجهها:" مكتشوفيش ولا كيفاش؟"

ام الغيث حدرات راسها للارض وعينيها فالارض مفيسكيين سكتات جامعة الخروق فيديها

تنهدات زينب وقربات عنقاتها فالاول متحركاتش الام الغيث حتى سمعات صوت شهقاتها :" بنتي مالك ؟"

كتحرك فيها و زينب معنقاها :" اش قلق خاطر مرت القايد ؟"

انفاجرات بالبكاء زينب :" عييت ادادا عييت .."

كتبكي :" هءء عيييت تخنقت "

كتحل فالكسوة وكتنفس :" خنقني كنتعذب فحالا انا كنعذب داك لعبيد لي ماليهم حتى دخل كنحس بذنوبهم فوق رقبتي "

بللات ملابس ان الغيث بالبكاء :" عيسى عمرو غيتوب ا دادا ،"

مخشية فيها وكتنطق :"عيسى عاد مكيتمادا "

تنهدات ام الغيث وخداتها من يديها وجلساتها فوسط الكوزينة :" خرجو من هناا "

كاع الخدم خرج وبقات غير هي وياها الراس فالراس حطات يدها فوق راس زينب كدوز عليها :" زينب بنتي مولاي عيسى اعظم حاكم و اصدقهم و احكمهم "

ضحكات زينب ودموع فعينيها وختمات ام الغيت :" آمني بيه ابنتي "

شدات فيديها :" كتشوفيه كيظلم الناس ؟"

حركات زينب راسها باه :" شكون خلا فظلمو ؟"

ام الغيث :" ولا اعطيتك حل ظلم سلطان الشام لي كان قبح و طغا و تجبر ؟"

شافت فيها بفضول :" رجم بالحجر ؟"

حركات ام الغيث راسها بلا ورجعات نطقات زينب :" خرجو كبدتو وفصلو قلبو على جثتو ؟"

ام الغيث غمضات عينيها :" لا وسمعي حكاية هاد الظالم لي تجبر و ظلم "

تقادات فلجلسة و طلقات وذيناتها :" هانا ا دادا وذيناتي ديالك "

ام الغيث ابتاسمات :" الحل هو قلبو ،كان قلب هاد الحاكم صلب من الحجر و جمر من بركان الخقد والغضب كانت نار الانتقام مغمضة عينيه قتل و تكرفص على العباد فوق الارض حتى.."

سكتات وبدات تحرك فيها زينب :" كمليليي ا دادااا "

ضحكات وهي كتكمل بصوت هامس :" جات حورية عاشت فقلبو وسقات جنان فؤادو رجعاتو جنة ورود وربيع بعدما كان ارض ميتة ومحروقة زرعات فيه الامان و الحب و الحنان علماتو يحب وحبها وهباتو الدنيا وهباتو نفسها وثمرة ونسخة منها هي لي علماتو يحن ويحس و يراعي قدرات تخلق منو حاكم عظيم.."

زينب :" شنو بغيتي تقولي الحل هو.."

حركات ليها راسها ام الغيث باه :" لحل هو تسقي قلبو ، عرفي مرض الارض باش تعالجيها تا واحد فينا ماتخلق قاسي و حاقد"

زينب بتردد :" ولكن عيسى.."

قاطعاتها :" حتى مولاي كان ولد صغير قد يدي ربيتو و كبرتو انا لي غسلتو ومشطلو ووكلتو "

تنهدات و تحجرو عويناتها بدموع :" انا لي عالجت حروقو وانا لي سقيت جروح السيف لي اختارقات لحمو ومزقاتو فعمر عشر سنين "

كتمسح دموعها بشوية بطرف يديها :" كدافعي على لوليدات و حتى مولاي كان واحد النهار ولد صغير محتاج لي يدافع عليه "

زينب سكتات وهي كتشوف ام الغيث كي كتبكي كانهو ولدها ولا طرف منها :" دادا واش مكتخافيش من عيسى واش كتبكي حيت كتبغيه ماشي حيت كتخافي منو ؟"

حركات ام الغيث راسها :" مولاي عمرو خلعنا مولاي احتارمناه بكينا لحالو بكينا وحنا كنشوفو دمو و جراحو "

ورجعات كتبكي من جديد :" كنبكي حيت ولد عشر سنين قدر يحرر عبيد ضعيف من دار دعارة حررني من عيشة المنكر علمني كلام الله و قراني القران ورجعني لطريق الصحيح حرر ولادي وجمعني معاهم تحت سقف واحد ، ولد عشر سنين دافع عليا بكولشي عندو سد فام القبيلة علو الشيخة لباهية •ام الغيث كانت شيخة وعاهرة اسمها لباهية• و رجع لينا اعتبار و خلا نسبنا من نسبو "

هزات عينيها مكمشين ومدمعين فزينب لي غير كتسمع :" كان بمتابة الاب الروحي لاسماعيل و غيث "

ضحكات بعفوية :" غيث كتعيط ليه بابا دابا "

زينب مازال منتيقاش :" كتدوي على عيسى ؟"

حركات راسها :" مووولاااي عيسى تاج فوق ريوسنا "

تعجبات زينب و حدرات راسها كتلعب بيديها :" مازال ممتيقاش بلي.."

قاطعاتها ام الغيث :" حاولي تكتاشفي البلاصة الزوينة فيه "

وناضت كتجمع فلكوزينة وكتعيط على لبنات مخلية زينب فحيرة من امرها ناضت رامية فوق منها ملحف و جالسة فدريجات لي باب القصر حتى سمعات صوت حداها :" سينيورة "

تلفتات ببطء وابتاسمات فاش لقاتو :" ريف ؟"

مفهمهاش واخا هي كانت كتحاول تنطق اسمو و عينيها محيدوش من عينيه :" خرجتي من الحفرة على سلامتك "

مكانش كيفهم ولكن كيبادلها الابتسامة و نطق :" ايسى "

وهي ترجع نطقات :" عيسى ؟"

حرك راسو باه كيخرج فعينيه بمعنى اه :" مال عيسى ؟"

مفهمهاش وكيحاول يشرح ليها من دون جدوى هز عود وبدا كيخطط فالارض وهي كانت كتفهم رسم ومكتفهمش عشرة ناضت كتجري وجراتو للمراح فين كاينين رسومات عيسى هزات لوح و مداد وضارت ملقاتوش وراها كان مبهور فرسومات و كيقلب فيهم وحاط يدو فوق رسمة ديال كلب كان نفس كلب عيسى تماما و نفس الطريقة باش رسمو وهو صغير حيت عيسى كان كيرسم حلمو و حلمو كان عبارة عن رسمة كلب عاودها وبنفس الالوان

رافاييل هز اللوحة كيحرك فزينب :" اييسى "

غيخرج ليه العقل :" اييسى اييسى "

هي مفهمات والو غير كتاخد منو اللوح بزز :" طلق راه لاشافك عيسى غنكوت الليلة انا وياك "

وهو حلف ميطلق من اللوح كيحرك راسو بلا وكيردد :" ايسى هادي رسمة ايسى "

زينب كتندب :" اخوياا لعااارر لما تطلق "

سمعات وقع اقدام عيسى وهي تهز ملحفها واعطات رحليها للريح تخبعات وخلاتو بوحدو حيت عارفة الى لقاها معاه فداك الليل ووسط المراح غتشوف الظلم عليها

شافو هاز اللوحة و خداها منو :" شنو كدير "

رافاييل فرح فاش شافو حيت هو لي كيفهم لغتو :" هذاا هذاا"

كيدوي متحمس وفرحان وخايف :" هاد الرسم ديالمن ؟"

محاوبوش عيسى غير كيشوف فتعابير وجهو قرب يبكي بلفرحة :" هذا راه رسم خويا ايسى "

بقا كيشوف فيه عيسى كيفاش قادر يميز هاد الرسم ونطق :" علاش رسم خوك ؟"

رافاييل كينعت فالرسم :" هذا مكسيموس "

كيبتاسم :" مكسيموس كلب ايسى "

شاف فيه وهو كيتردد اسم مكسيموس كتوضاح صورة حلمو وهو كيجري وكيعيط باسم مكسيموس

رافاييل :" مات من مورا خمس سنين ولكن كانت حالتو من خالة ايليزابيت دخل فحالة حزن على مالكو "

تنهد :" ايسى كان مالك قلوب الكل فالقصر كان محبوب اسبانيا "

عيسى كان مقابل ملامح رافاييل وهو كيدوي عليه بواحد طريقة شغوفة وحماسية وبنبرة فخر وحزن فنفس الوقت

رافاييل جمع يدو كيتوسل عيسى :" وصلني لمول الرسمة"

رد لبال لباقي الرسومات :" غيكونو رسومات ايسى ؟"

بقا كيقيسهم :" قالولي بلي كان مولوع بالرسم ويمكن غيكون دابا فنان فحال المرحوم بابا "

شاف عيسى فرافاييل بفضول :" لمرحوم بابا ؟"

حرك راسو باه :" مالك بن شهاب كان رسام فنان و ايسى كان خليفتو فالرسم "

عيسى ضور راسو فلوحاتو وكيفكر ان الرسم كان ولع بنسبة ليه وكان كيحس بيه وراثة وطلع فعلا وارثو وعلى اقرب الناس ليه

رافاييل :" فين نقدر نلقا الرسام ؟"

حيد من يدو اللوحة :" سير تنعس "

شد فيها رافاييل مزير عليها :" عافاك خليها معايا "

كيترجاه يعيونو :" عافاك بغيت نطمئن بلي لقيت ايسى "

تنهد عيسى و رماها ليه :" يالله سير تنعس وحيد من قدامي "

هزها رافاييل معنق اللوح :" وايسى فيناهوا ؟"

عيسى خنزر فيه :" فالقبر "

حل فمو رافاييل بصدمة :" ا "

عيسى :" سير تنعس قبل منسيفطك عندو "

و مشا وخلاه طلع لبيتو و كيدور راسو كيقلب عليها وهو طالع ، خلاتو حتى غبر وهي تخرج عند رافاييل مفاهمة والو فكلامهم :" اش كان كيدير معاك عيسى "

شافت اللوحة فيدو :" وخلاهم ليك ؟"

باستغراب وتعجب :" كان يقطع راس الطير لي تتحط فوقهم عاد بنادم "

طلعات رافاييل ونزلاتو :" لا لا لا حالك ماعجبنيش "

قربات ليه :" اش بينك وبين عيسى ؟"

حطات يدها فوق فمها :" اويلي ميقتلكش ميمكنش"

كتخنزر :" ياكماااا.."

كضور فعينيها وكتهمس :" قوم لوط "

كتدفل بشوية وسط حوايجها :" استغفر الله "

رافاييل مكان فاهم والو ولكن كيضحك من تعابيرها و هاز اللوح فيدو كينعت ليها :" شكون لي رسمهم "

كيحاول يعبر ليها بلي عجبوه وزوينين باش تقولو الرسام وهي مبخلاتش عليه :" هاادوو ديال عيسى "

غي نطقات بيها وهو ينقز شد فيها شدة العمى فالظلمة كيحرك راسو باه :" ايسى فيناهواا ؟"

وكيحرك بيدوو :" ايسى كتعرفيه ؟"

هي مفاهماهش غير كتنتر منو :" انا معارفاكش اش كتقول واش نت حمق ؟"

هربات بالسيف منو و طلعات تجري فدروج وكتلفت :" اويلي واش هذا هبل ؟"

طلعات كتصاوب فحوايجها لي خسر ليها رافاييل وهو كيحرك فيها طلعات ودخلات تتسلت لقاتو كيتسناها وهو جالس فوق المكتب مقابل مع الشرفة :" فين كنتي ا مرت الراجل ؟"

بلعات ريقها :" ا كنت.. مع دادا "

تلفت فيها بنص ضورة :" هي نيت لي جابت ليك هاد كاس اللويزة "

فهمات بلي عرفها كتكذب وهي تقرب :" كنت كنشم الهواء ديال سيدي ربي "

بسخرية :" عارفك فاش كتشمي لهواء كتولي تفكري بزاف "

قربات و جلسات حداه متكيين على المكتب :" عيسى !"

تنهد حيت هاد الكلمة من بين شفايفها كتفشلو :" اش كاين اش صدقتي هاد لمرة ؟"

زينب بنبرة مختالفة عن المعتاد :" بغيت نسولك "

وقف :" الى كانت شي حاجة غتعصبني بلاما تسولي "

سبقاتو وجات قدامو حطات يدها فوق صدرو حتى تهز صدرو و شاف فيها و عينيه توسعو وسط الظلمة نطقات بشوية:" شنو سر الحروق لي فيك ؟"

يتبع...