أقوى مما أدرك الجزء 11

جر يديه بشويا وقال:لهيه

فعلا توجه هو وياها لطبلة حطو فيها قدامهم وأنظار الرجال عليها حيت جايبة العييين الا هدى لي كانت عاطية بجنب مشافتوش نهائيا منغامسة فالهضرة مع ماجدة لي شافتهم ودورات عبنيها عادي مع معقلاتش عليه

مدة نصف ساعة كلها مشافتوش وحتى هو مشافهاش كان كيسمع للسيدة اش كتقول واش كتهضر مغوبش كيتسنا ياخد المفيد..

كملات جلستهم وطلبو الحساب وهي تقول ماجدة:انا لي عارضاك

هدى:اوا لا هههه كلها تخلص على راسها الحساب كيطول العشرة

ماجدة:هدي هي هدى مكتبدلش

هدى:انا نجي من الطواليط

ناضن على نيتها غادية للطواليط وحتى رجعات هزات عينيها هبطاتهم وعاودات طلعاتهم بسرعة تالبرق كتحاول تسوعب شكون هذا؟؟واش هبدو ولا عينيها خانوها..فور ماقشعات البرص زاد يقينها بلي هو هذاك..قلبها بدا كيضرب بجهد وهي كتشوف الزين لي حداه..وتخنقات فيها النفس لدرجة تبلوكات بلاصتها وبلابز عينيها كيضورو منها ليه..ملامح وجهها كانت باينة عليهم الصدمة..قلبها كيضرب هلى الجهد..سرطات ريقها وعينيا تفيكساو على البنت كتشوفها قمة الجمال وللانوثة..سرطات الريق وحاولات تبرد راسها متسرعش..هزات تيلي من بعيد.دوزات نمرتو وكتشوف فيه كيفاش حرك تيلي وشاف نمرتها وشد الخط قايل:الو

هدى:فينك؟؟

عبدو:فكافي

هدى:نتا ومن؟؟

عبدو:مع صحابي

كانت كلمتو كفيلة باش انها تحصل عليه الكذوب..الكذوب لي هو كيضل ينبهها عليهم وكيقوليها نحصل الكذوب منعقلش عليك هاهو حصلاتهم عليه..لو جاوبها وقاليها مع بنت من بعد ونعاود ليك غتفهم مي فاش سمعات كلمتو حدها قالت:بالصحة

قطعات فالبلاصة خلاتو مستغرب مجاش فين يبغي يحط تيلي حتى عينيه لمحوها من بعيد غادية لبلاصتها ببرود..بدون ماتشوف فيه..عض على شفايفو عرف راسو حصل حصلة خايبة.

عبدو:انا جاي

شافتو حتى ناض وتوجه لطبلتهة هي لي كانت كتحط فلوس الكونصوماصيون مبردة عكس العافية لي شعلات داخلها معرفاتش راسها واش غارت؟؟ولا حسات بشمتة ولا تخورات ولا شنو..لي عارفاه هو قلبها ضرها بزااف فاش شافتو مع وحدة خرا

هدى:ماجدة نوضي فحالنا

ماجدة:واخا(حطات خلاصها)

مجاتش فين تهز صاكها حتى وقف عليها شدها من ذراعها وقال بوجه قاسح:شكديري هنا؟؟

شافت فاص ليها بملامح جامدة وجرات يديها ناطراها قايلة:ماشي شغلك

دازت فيه عرفها شافت وفهمات شنو بغات..خطات جوج خطوات بزربة وهي تحس بيده جروها من ذراعها حتى جابها قريبة ليه ..وجها دخل فصدروحتى عينيه شافو حجبانها كيفاش عاقداهم..عض على شفايفو وقال بصوت منخافض:متفهميش غلط..خليني نشرح ليك

كتحاول تحيد يديها من يديه وعينيها ضربو فيه تخنزيرة ديال الغدايد وقالت:متشرحش ليا..نبغيت نفهم والو دير لي بغيتي معامن بغيتي شغلك هذااك..وانا ندير لي بغيييت..طلق من يدي

ماجدة:هدى كتعرفيه؟؟

هدى:(عينيها فعينيه بصرامة)لا..مكنعرفوش(دفعاتو بشويا وجرات يديها)بعععد.منييي

عبدو:(غوبش فيها)ريحي الارض بلا طيران خليني غي نشرح ليك

هدى:(ضارت شافت فالبنت لي معاه لي بدورها كتشوف فيهم دارت ابتسامة استهزاء ورجعات شافت فيه)معليكش بدلتيني بوحدة زويينة علي ..ميبقاش فيا الحال

داك الشوية ديال الجهد مبقاش عندو..جرها من ذراعها وقال:دوزي تريحي نشرح ليك تبقاي تلعببها عليا دراما كوين

جرات يديها بعصبية من يدو وهزات صبعها فيدو قايلة:معمرك تعاود تحط علي يديك..نيفوك راه معرووف اما بنات الناس بزاااف عليييك(كترعد)لي ضرني هو ثقت بيك

عبدو:(رفع صوتو حتى الناس كيشوفو فيهم)مابيني وبينها والو بلا خراا

هدى:(متسوقاتش للناس)ماشي شغللليييي...متعاودش ليااا..ومتبقاااش تجي تسول فيا

زادت مخلياه عاقد حجبانو معصب عارف راسها قاسح والى كانت واخدة فكرة راه غتبقا فبالها واخا يجيب المسامر مغتحيدش..تبعاتها ماجدة مافاهما والو وتيعها حتى هو مع خرجات مع شقمها من عنقها شادها غادي بيها لطونوبيل وهي تنطر ليه وطلقات عليه حلوقها لي شحال ماطلقاتو عليييه:بعععد.منييي...طلق منييي ابنادم

شافها غوتات صافي عرف راسو غيتشوه هو وياها تما وهو يبدا كيعرعر:ريحييي لنضرب دلمك...مالكي فهاد الصعرة

هدى:(كتغوت والناس لي داز كيشوف فيهم) الى سميتك راجل ومزغرتة عليك مك جرب حط فيا يديك ولا عاود قرب لياا..لي مولف الخانزات غيبقا حياتو كاملة هاكاك..دخل كمل تقصارك معاها

سد ليها فمو بيديه مزير عليها ونص ففولاؤها قرب يزلق قايل معصب:سكتييييي ودوزي قدامي غندير فيك يدي ميعجبك حااال

هدى:جربب جرررب حط فياا يدييك وتفرج..

ماجدة:(شدات فهدى)هدى صافي براكة..عفاك اخويا طلقها خليها تمشي راه معصبة دابا طيح

عبدو:(زفر)سمعيني غيير

هدى:(غوتات معصبة )واامتعاودش ليااااا سير فحالك رجع عند الزين لي حاط حدااك

دازت فيه كترعد كتقاد شالها شيرات لطاكسي صغير طلعو فيه بجوج مخلياه كيغلي واقف مصمر كيمص فشفايفو ..فحين هي مشافتش فيه بقات كتنهج وترعد طول الطريق وحتى ماجدة مفاهماش

ماجدة:اش واقع

هدى:(بعصبية)سدي علي الهضرة عفااك مافياش لي يهضر

سكتات ماجدة عارفة هدى الى طلع ليها الخز مكتهضرش حيت كتبقا تدربز فالهضرة..حدها كتشوف رجليها كيتحركو بتوتر ويديها محيداتش من فمها بلا شفايفها لي طلبو الشرع كتعض فيهم وتعاود مغددة..كل مكتفكر بلي هاديك ممكن تكون صاحبتو كتشعل فيها العافية..مغتنكرش غارت وبزاااف علاش معرفاتش...كيفاش جالس مع وحدة خرا وهي مفراسهاش..كون علمها يقدر تفهم بلي خدمة ولا كتجييه شي حاجة مي فاش حسات بلي الما دايز تحت منها مرضاتش حسات براسها تخورات بهاد المفهوم

كي وصلات هبطات نسات مخلصاتش مخلية ماجدة تكلف هاد الاخيرة محكراتش خلاتها براحتها..طلعات لدارها معصبة..كي حلات الباب ردخاتو بعصببة ولاحت الصاك والشال كتحس بالصهدة شاداها ..قلعات حوايجها بتنطار فالبيت وفمها كيبركم وكتدعي فيه والشمتة طالعا معاها..شافت اتصالاتو لي محبسووش وهي تطفي التيلي ولاحتو..مشات للطواليط بغات دير بيبي مع جلسات حاطا يديها على ركابيها مع حسات بالما نازل من عينيها مستوعباتش بلي دموووع حتى وصلو لذقنها..مسحاتهم بزربة كتخاطب راسها:لا أهدى..لا متبكييش عليه لا أهدى ماشي نتي لي يبكيك راجل أهدى...ينعل بوووه هذاا لي يبكيييك

رغم يديها لي كيمسحو بالجهالة وفمها لي رافض يردخ للدموع كان لعيونها رأي اخر ...محبسوش من الدموع نهائيا حتى ستسلمات..ناضت مسحات ومشات لفابو كتغسل يديها وكتبكي فصمت بحالا هازا الراية البيضة مع عينيها لي خانو عقلها فصراع مع واش تبكي ولالا

مشات لبيتها حايرة معرفات فين تصد حتى حسات برجليها فاشلين وجلسات فالارض كتبكي وتنخصص..كتحس بصدرها كل مرة مطلع شهقة والدموع وصلو حتى لعنقها..ماشي عليه انما على الشمتة..كتكره يخورها شي حد ولا يديرها بيها كتحس بالقيمة الداخلية ديالها نقصات..

فشات غليلها فالبكا حتى عينيها حمارو ولاو فيهم خطوط حمرة بمجرد ماشافت فالمرايا تخلعات منهم..غسلات وجهها وصدرها باقي كيتهز بتنخصيصة..دارت ليهم ما ورد ومشات تكات على جنبها ومن جنب عيونها نازلة دمعة خيبة دايرا وضعية الجنين حاسة بالفقد والتعب

سمعات الدقان والسرسار فالباب عرفاتو غيكون هو مدة نصف ساعة كتسمع وتقول واش تحركات فيها شي حاجة..مناضتش وكتخلعاتش كيف موالفة حيت بصريح العبارة دخلات فصدمة لحظية..مبقاتش كتسمع ولا كتشوف شي حاجة حدها كتفكر جميع الاحداث الخايبة لي دوزات فحياتها وزادو على مابيها حتى غرقات وسط الدموع ..نيوفها تسدو غي بالبكا وجيهة صدرها كتحس فيه بحال شي نخصة كتنغزها

حبس الدقان عرفاتو مشا وناضت غسلات وجهها من جديد وشغلات تيليفونها لقات اتصالاتو كثار مسحات نمرتو ببرود ومشات جاويات ختها وخوها مبغاتش تشغلهم ..طلقات الرقية الشرعية وتخشات ففراشها كتقلب على النعاس وعقلها كيقوليها واش غتفيق فالصباح ناسية

فأي علاقة كيفما بغا يكون نوعها كيكونو نفس الأسس كتعاود..الثقة ..الإحترام..والمحبة كيتخص واحد فيهم كتخسر العلاقة كيفما بغات تكون

الثقة أساس كل علاقة الى واحد ماكيتيقش فلاخر مكاين لاش يكملو سوا صحاب سوا حباب..وهذا حال عبدو وهدى..

عبدو السيد المشكاك لي مكيتيقش نهائيا واخا هدى فكاع المواقف كانت كتثبت ليه بلي هي غادية بنيتها وعفويتها وكل مرة كيتأكد أنه الى بغات دير شي حاجة غديرها وبزز عليه اما هي راه مكانش عندها داك المشكل بتاتا طالقاها تسرح ..معمرها شكات فيه حيت مامعمراش راسها بشي حاجة لي غتمرضها

فاقت على التيلي كيصوني ويعاود خسرات ملامحها وكتحس بجفونها ثقال عليها..هزات تيلي كتبان ليها نمرة أحمد جاوباتو وطمناتو عليها وناضت من بلاصتها بملامح مغوبشة..منساتش اشنو وقع البارح وباقي محفور فدماغها..مشات تغسل وجهها لقات عينيها منفوخيين..زفرات بعصبية وغسلاتو بما بارد عالله يتفشو..مشات لبيتها ببرود هزات تيلي دوزات أبيل لرشيد

هدى:الو

رشيد:وي هدى صباح الخير

هدى:(بلا مقدمات)مغنجيش اليوم عيانة

رشيد:ياك لباس؟؟

هدى:مريضة شويا ضاربني البرد

رشيد:كثرتي فهاد مريضة هههه

هدى:(على سبة)جري عليا وتهنا

رشيد:غا ضاحكييين..سيري اختي حتى تبراي غنعلم البنت

مجاوباتوش قطعات نيشان لاحت التيلي باهمال باغيا تعيش حزنها راسها وتعطي الوقت لنفسيتها تقبل شنو وقع..هي انسانة مكتعرفش النفاق الاجتماعي ميمكنش يكونو عندها مشاكل وتخرج بحالا موقع والو وتفرنس للناس وتخبي مشاكلها..كيخصها وقت باش تقبل ..بغات تعيش حزنها الخفيف مع راسها وتستجمع لي كسرو عبدو فيها عاد ترجع واخا غي نهار

مشات صايبات لراسها قهيوة بحليب والبرود مكتاسي وجهها..كتسمع غي تقرقيب الماعن لي كتحرك بحالا كتفرج فشي فيديو صغير ديال روتين يومي هادئ..الى شفتيها من بعيد مغتقرا حتى تعبير من غير البرود..كاع الصعرة لي ركباتها البارح رجعات عليها بالبرود داخليا وخارجيا..كتشوف الشتا كتنقط والجو كئيب معاون نفسيتها انها تزيد تأزم..

جلسات كتشرب فقهيوة وكتشوف فاص ليها حتى الجهد تهز التيلي مكاينش غي كتفكر...رن هاتفها كانت نمرة مكتعرفهاش عرفاتها ديالو مجاوباتش..لاحتو باهمال وناضت رجعات لفراشها مكملة قهيوتها والسقيل فالداخل كيقتل فيها كيبعث فيها احساس الوحدة لي ديما شادها من نهار ماتت مها وتغربات ختها..

جهد ساعة وهي غي كتشوف وكتقرطط على داك الكاس تالقهوة وكل مرة تخرج تنهيدة من قلبها ..هزات تيلي كتلعب فيه مدخلاتش للواتساب نهائيا كضور فيوتوب تلاهي راسها حتى دازت ربعة تسوايع لقات راسها شادة فيلم كوميدي كيضحك لكن هي مضحكهاش غي كتفرج وصافي كأنها مجبرة تكمل الحلقات خوفا من الاستاذة تعاقبها

جاها الجوع وناضت بتثاقل قلات بيضة بصمت جات تقلب الخبز مكاين..زفرات ومشات لاحت عليها كاب طويل فوق البيجامة ولاحت فولارها بعشوائية هازا بزطامها وخرجات تجيب الخبز مامسوقاش واش غتلقاه ولالا

هبطات تجيب الخبز ولقات الفام دميناج كتسيق العمارة..مهضراتش دازت عادي ومشات تقدات وتمات راجعا طالعا مع الدروج وكتسمع الهضرة بصوت غليض وظنات أنه هو ..هزات راسها للفوق كأنها كتحاول تقشع الأصوات باش تشوف واش تزيد للقدام ولا ترجع لور حيت وجهو محاملاش تشوفو وفنفس الوقت كانت الفام دميناج كتمسح الدروج من دربووز وكتخوي فالما وجافيل وتحك غافلة على هدى لي كانت فالطبقة لي تحت من الطبقة لي كتسيق السيدة وكتخوي الما مخلط مع غتهز راسها مع غتخوييه نيشان من فوقها جا فعينيها نيشان ..طاح ليها جافيل نيشان مخلط بالما فعينيها وحيت عينيها حساسين حرقها فالبلاصة..حتى شهقات مخلوووعة مغمضة عينيها وطالقة الخبز من يديها مع صرخة تسمع صداها فالعمارة حيت الدروج خاوييين

هدى:عينيييي عينيييي هذهءهء اويلي(مغمضاهم مقادراش تحلهم)

هبطات السيدة كدردك حيت سمعات غواتها وقالت:مالكي؟؟اش وقع ليك ابنتييي

هدى:(كتحاول تشد راسها)معرفتش..طاح ليا الما فعيني وكيحرقنييي هءهءهء (بدات كتبكي)اش هادشي فيه

المرا:(خبطات جنابها)اويليييي فيه جاافيل اميميتي اش درت..

هدى:(تخلعات)اويلي على جافييل(كتحك عينيها وكيزيدو يحرقوها)كيحرقوووني اش هادشي؟؟(مكتشوف والو حيت مغمضاهم)

المرا:(طاح منها النص ولات صفرا)بلاتي نعيط للحاجة ...الحاااجة(كتنادي بصوت عالي وغادية كتزرب للطبقة ديالها)الحااااجة

دقات الباب بجهد وحلات الحاجة متسائلة:رقية مالكي

رقية:عتقيني الحاجة عتقيني مشيييت فيها...خويت الما على واحد السيدة وفيه جااافيل حرق ليها عينيها

صفية:(صفارت)اويليييي..شكون شكون

رقية:هاهيا خليتها لتحت

هبطو بجوج غي شافتها هدى تخلعات كثر..شدات فيها قايلة:هدى..اش كيضرك ابنتي

هدى:(مغمضة عينيها وكتهضر)عيني عيني كيحرقوووني، عطيوني الما عفاااك هءهءهء(كتبكي والدموع كيكملو عليها)

صفية:(شدات فيها)رقية طيري دقي على عمرررر طيري...نديو البنت للسبيطار

مشات كتزرب نادات ليه مخلياها كطلعها لطبقتها تكب ليها الما..حتى تصادفو بعمر لي خارج كيزرب حتى كيشوفها هدى كتبكي وعينيها مغمضين كي العمية غي صفية لي مكيداها

عمر:اش وقع ليها؟؟(شد فيها من ذراعها)ختي مالكي

هدى:عتقوووني بالمااا

دخلوها لدار صفية وداوها للمغسل كتخوي الما بدون ماتحل عينيها كتحاول تشلل عينيها والحريق عاد متجهد..كتخوي وتبكي وعاد كتحرق كثر...

عمر:ختي خصنا الطبيب(شافت فيه بزز كتحل عينيها لي فيهم حمورية كي جغمة تالدم)عينيك ماشي نوغمال

هدى:(كتبكي ساردة بالما)تعميييت؟؟هءهءهء غي قوليااا

عمر:متعميتي والو..زيدي للسبيطار

صفية:نجيي جلابتي و نمشييو

عمر:دغيا الحاجة

مشات كتزرب واخا صحتها مكتسمحش ليها لبسات جلابتها بلا فولار شدات فهدى لي كتموت بالحريق وهبطوها لطونوبيلتو والوجهة أقرب سبيطار يديرو ليها العلاجات الأولية حيت جافيل مادة كيماوية خطيرة وممنوع يقيس العين..

الطريق كلها كتبكي وتنخصص على عينيها لي عاطينها الحريق مكتشوف والو حيت ماكتقدرش تحلهم حتى وصلو نزلوها شاديين فيها واقرب فرملية بقا كيشرح ليها الوضعية داتها معاها

صفية:اميميتي خفتها تعما

عمر:(جبد التيلي كيدوز نمرة عبدو)ماشي لديك الدرجة

صفية:مشفتيش عينيها اولدي(جلسات فكرسي)ياربي سترتك يربي

بعد شويا صونا لعبدو قايل:الساط..هدى ديالك فالسببطار

عبدو:(قفز من وسط فراشه)كيفاااش؟؟اش وقع ليها مالها

عمر:تخوا عليها جافيل لعينيها وجبناها

عبدو:فين؟؟كيفاش وقع ليها؟؟اشمن سبيطار كاينين

عمر:ف *******

عبدو:هاني جاااي

بقا واقف عمر على راس الحاجة كيمشي ويجي يتسنا يخرجو يعطيوه خبار حتى بان ليه عبدو داخل كيزرب ..كي شافو مشا طار عليه:فينها

عمر:برد..دخلوها لداخل

عبدو:كي وقع ليها؟؟(كيهز فيديه) قاسها شي حد فالزنقة!!

صفية:لا أوليدي غي السيدة كانت كتسيق و هي وتخوي الما من الفوق ديال الدروج وجا فيها جافيل

عبدو:كتسيق؟؟(بعصبية)ومالقات غي هي تكب عليها الخرااااا

عمر:عبدو بشويا..السيدة مقصداتش..غي بالغلط ديما كتسيق فداك الصباح وميكون حد

عبدو:(زفر)اش قال الطبيب؟؟مكرفصين ليها عينيها؟

عمر:مكتقدرش تحلهم تحرقات بزااف..غي يخرج الطبيب نعرفو اش كاين(بصوت منخافض)ثبت راسك الحاجة كتسمع

عبدو:(بنرفزة)فرق جرتي عليك..الحاجة ولا القلاوي

تزنكات الحاجة صفية من هضرتو هي عارفاه جلاخة مي معمرو خسر قدامها الهضرة..ضربات الطم كتشوف فيه كي الرابوز غي كيسوط .. و يمشي ويجي ويهزز فرجليه..

نصف ساعة عاد جا الطبيب عندهم فالمستعجلات قايل:نتوما عائلة المريضة

عبدو:كي بقات؟؟

الطبيب:غسلنا ليها عينيها بوغ لانستون راها صافا غيبقا فيها شويا تالحريق

عبدو:مكايناش شي حاجة خايبة؟؟

الطبيب:الحمد لله جافيل كان مخفف بالما ومأثرش عليها

عمر:وملي مخفف علاش تحرقات

الطبيب:على حسب ما السيدة قالت لينا بلي ديجا متبعة تريتمون لعينيها على وديت الحساسية لي كتعاني منها وحتى لاحظنا بلي عندها لحمية العين

عبدو:شنو هادي؟؟(قلبو تزير )

الطبيب:فالأوساط الشعبية كيقولو ليها الظفر فالعين

الحاجة:(نقزات)اايييه عرفتوو حتى انا كان عندي وحيدتو

الطبيب:هذاك..عندها فعينيها بجوج وخصو يتحيد

عبدو:نحيدوه علاش لا

الطببب:بعد موافقة المريضة خصو يتحيد حيت الدوا مغينفعش معاه..من الأفضل يتحيد..لحد الساعة خليوها ترتاح شويا ديجا كتبت ليها الدوا تبعو حتى يصفاو عينيها..ومن بعد خصها تشوف اختصاصي باش تدير اوبيراسيون

عبدو:(زفر)كتكون صعيبة؟؟

الطبيب:بتاتا..من الاحسن تحيدو وهي صغيرة باش تهنى..وغيخصها اكيد نظارات تحمي بيهم عينيها وتبعد على اي مستحضر تجميلي

عمر:يكون خير نقدرو نشوفوها

الطبيب:اكيد..سولو فلاغيسبسيون يعطيوكم شومبر ديالها

مشا طبيب خلاه كيمسح على وجهو بنرفزة ..فحين صفية نطقات باسى:الله يشافيها..نمشيو نشوفوها

عمر:واخا

عبدو:(بزز باش كيهضر)سير شوف المصاريف(مد ليه فلوس كثيرة)خلص

مشاو كاملين للاستقبال خداو رقم الغرفة وتاجه هو وصفية يشوفوها...هي لي كانت دايرين ليها ضمادات على عينيها بعدما سواناوهم ليها وغسلهم ..خف الحريق شويا لكن فاش كتبغي تحاول تحلهم كيعطيوها حريق بحالا مخوي فيهم الما القاطع

قلبو تزير كل ما كيقرب للبيت فين كاينة..معندوش الوجه باش يشوف فيها ..دخلو نيشان كانت جالسة فوق السرير وعينيها مضمضين مدايراش فولار..شادة شعرها باهمال وباينين حلقات معمرة بيهم وذنيها..رمقاتها عينيه اول شيء..كانت ثاني مرة يشوفها بلا فولار وكانه معمرو شافها حيت كتسيف عليه..لكن الوضع ابدا واش كيسمح ليه يحقق فيها ولا يشوف اش بيها...ضرو خاطرو على العوينات لي سلبوه النهار لول ..وعلى حالتها كتبان ليه من مصيبة لوحدة اخرى..حسات بالغاشي وهي طلع فولارها وقالت:شكون

صفية:غي حنا ابنتي(قربات ليها شدات فيديها)كي بقيتي؟؟شويا

هدى:شويا..مبقاوش كيحرقوني حسابني صافي مشاو ليا عينيا..عمر مكاينش

ياله بغات تهضر تقول معايا عبد الدائم وهو ينغزها تا شافت فيه ودار بصبعو على فمو مانعها تهضر

صفية:لا مكاينش مشا يخلص

هدى:حتى نوصل لداري ونعطيييه(حيدات الفولار وفكات شعرها كتجمع فيه)خرجات مني قلت صافي مشاو ليا عيني

صفية:الله يحفظك ابنتي..من وحدة لوحدة كتشد فيك العين

هدى:(بحسرة)على زيني ولا على فلوسي..الزهر هو لخر معنديش(تفكرات عبدو)حتى فبنادم

صفية:الزهر فالله ابنتي..رقي راسك وصلي وقراي الأذكار يصونوك نتي من وحدة لوحدة

هدى:الله يدير لي فها الخير

هادشي كولو داز تحت انظارو هو لي كيشوف شكلا هدى اخرى غي لي موالف بالفولار كتبان كيووت بزاف حيت مولف يشوفها بالحجاب كتبان كبيرة..بدون ماينسى حالتها لي كتبين أنه فعلا مسخسخة...بغا يتنهد خافها تسمعو..مكرهش يقرب ليها يحضنها يزير عليها ويقوليها سمحي ليا

فديك اللحظة دخل عمر مدرم وهي بلا فولار محس حتى نطق واقف مدرقها:فين داخل اصاحبي مدايراش فولارها

سمعات صوتو وهي تقفز وبدات كتحرك راسها بحال الهبيلة مستعملة وذنيها كتحاول تيقن واش هو ولالا؟؟..مدازووش ثواني كثار حتى رجعات فولارها وقالت:اش كدير هنا

عبدو:(واقف على راسها كي قباض الرواح مدرقها)عمر خرج

عمر:واخا

صفية:أنا برا..الى خصاتك شي حاجة

هدى:(وقفات بسرعة)خالتي بغيت نخرج عاونيني

عبدو:الحاجة خليني معاها(عاقد حجبانو)

خرجات مخلياهم ملاحظة الوضع متوتر بينهم ..فحين هدى معارتش هضرتو اهتمام بدات كتحرك يديها كي البصيرة كتقلب باغيا تحرك بدون ماتزيح الضمادات حتى كتقيس جسدو بيدها ورجعات لور عايفة:حيد من قداامي

شد يديها لي كتحرك بجوج قايل بهدوء:عطي الراحة راسك..عينيك كيضروك

تنطرات منو وبغات تحرك ولكن مكتشوفش مزيان كيبان ليها غي الضباب..عاود شدها قايل:هدى..براكة من قصوحية الراااس ريحي رتاحي عينيك مرااض

هدى:خرج عليا ..بعد منييي(كتنادي)خالتيييي خالتييي عمرر

سد ليها فمها بيديه وقال:مكاينش لي يبعدني عليك..لا عمر ولا القلاوي..ريحي الأرض راك مريضة المشكل لي بيني وبينك نسايه من بعد نهضرو فيه دابا المهم عينيك

هدى:(ببرود)نسيتك نتا ونسيت مشكلتك وهضرتك..وغنمسحك من بالي بحالا عمري عرفتك

تنهد مراعي بحالتها وقرب منها شادها بغفلة من وجههة جامعو بيديه بجوج كيبان كي النقطة وسط يديه وقال:ماشي ساهل ننسا وحدة بحالك(داعب حنوكها بحنان بصباعو)المرا لي كتطربني وتخليني جاي عليها الطرقان وقلبي يتهز عليها منساهااش

من ديما هضرتو وردود أفعالو كتجيب ليها الفقصة حيت كيكونو كيدويو فموضوع حتى كيلقاو راسهم فموضوع اخر..كيف لا وهو سيد الانتقال من موضوع لاخر..رغم ان هضرتو كانت جميلة نوعا ما لكن بالنسبة ليها هي فهاد الوضع راه مغديش نبرد العافية لي فيها..نطرات يديه بزربة راجعة لور ملاصقة مع حافة السرير وكتقاد فولارها:هضرتك خليها عندك..بعد مني وخليني عليك لي فيا كافيني

عبدو:(بدا كيغوت)واش انا هضرتك؟؟قلت ليك نساي من بعد ونهضرو دابا صحتك

هدى:(رفعات صوتهت كثى منو)وا متهضرش معايا الكذاااب..متهضرش معايا. بعد مني ماشي شغلك فيا ولا فصحتي نتا غي كذاااب ومنافق

عبدو:منافق كااع؟؟(كشاكشو خارجين)فاش نافقتك؟؟فين عمري نافقتك

هدى:متكذبيش أ هدى ..هدى كنكره الكذوب مخليني معاك انه مكتكذببش ..هدى منلقاش التخاور وفلخر(ضحكات بسخرية)نلقاك كاذب علي

عبدو:ممصاحبش معاها (ببرود)

هدى:واش انا قلتها ليك؟؟عيطت ليك قلت ليك افلان فينك قلتي فقهوة معامن؟؟مع صحابي؟؟علاش متقولش ليا كنقضي غرض ومن بعد عاود ليا علاش الكذووب؟؟علاش تكذب علي وتحسسني بلي انا بنت الزنقة(بغا يهضر وقاطعاتو)شوف أعبدو انا عيييت منك ومن فعايلك ومن هضرتك ومن تصرفاتك انا طلعتي ليا فصحتي ومبقيتش بغيت نشم ريحتك كضور جيهتي..بغيت نرتااااح(كتهضر وترعد)بغيييت منشوفش وجهك باقي

عبدو:(حاضي غي فمها لي كيهضر حيت عينيها مغطييين)غي اجي وتفرق؟؟اجي وتفرق؟؟بكانتك؟؟الفراق ماهو منك ماهو مني داكشي ديال الله ماشي انا درت خير يرجع ليا بالعار

هدى:(كتنادي)خالتييييي عمر عمررر

عبدو:(صعر)علاش كتعيطي لعمر؟؟اش باغاه؟؟

هدى:حسابك انا بحالك(كتحسس السرير باغا تشوف اش حداها باش تمشي)حسابك انا معندي شرف بحالك...خالتييييي

دخلات صفية قايلة:بنتي

خالتي:(مادا يديها للقدام)عفاك اخالتي بغيت نمشي فحالي..عيطي ليا لطبيب يحيد ليا هادشي

عمر:(دخل)ختي غي صبري دابا يجي(جر عبدو)خليها ترتاح

عبدو:أنا برا

هدى:الجايحة لي ضربك

لصقاتها ليه فوجهو حتى كمش يديه بعصبية ..جرو عمر مخليها كتغلي باغيا تمضي فيه سنانها

صفية:تكاي ابنتي(شدات فيها)علاش كتغاوتو؟؟

هدى:الله يعطيه العذاب..بغيت نمشي غي فحالي منشوفش وجهو

صفية:نعلو الشيطان ابنتي.

هدى:الشيطان هو بنادم ففففففف(تنهدات)ياااربي شي تاويل تالخير

****

عمر:(شعل ليه كارو)شويا وغطرطق غا بوحدك

عبدو:عقل كيقوليا ندخل نضرب مها حتى تنسى اش شافت

عمر:أش شافت؟؟

عبدو:الزهر هو لي معنديش انا مع هاد هدى...كاع الناس مقادة معاهم الا انا

عمر:(ضحك)ومالها غي هدى لي كاينة؟؟كاين منها عشرة

جر جرة طويلة من الكارو وخرجها ببطء كيفكر وبدون مايحس قال:هدى وحدة لي كاينة ومنها نخلاق

عمر:(طانز)دابا تعمات غا تهنا ههههههه

عبدو:نطيح فهاد بنت القحبة لي خوات عليها الزمر نحيد ليها السروال

عمر:المرا كبيرة اصاحبي مقصداتش

عبدو:قصدات ولا مقصداتش ضراتها(بعصبية)كون تعمات؟؟

عمر:الله يعطيه ليا انا لي معيط ليك هههههههه اش غدير للفول؟؟

عبدو:(بتأكيد)مبقا vol هنا غنبقا حتى تبرا ونمشي...انا حداها ومكتشدش عساك الى مشييت

عمر:الله يخليها ليك اعشيري هههههه

عبدو:(ضار فيه )ونتا سوقك تخليها ليا ولالا؟؟منسيتش ليك الدخلة لي داخل بحالا فداركم..

عمر:وانا باش غنعرف هههه زيد زيد نشوفو اش دير فخروجها

عمر:غتطلع وغتقوليها توصلها وغتخليها مع الحاجة صفية

عمر:مرحبا (مسخو الضحك)هههههههههههه كتبان ماعندكش الهيبة ونتا شاد الخاطر لبنت المرا

عبدو:(باقي كيكمي)الخلعة باقي حاكماني عليه

"هدى"

بقات متكية وعينيها مغمضين وراسها غيطرطق عليها بالافكار..كل تفكيرها على كيفاش تخلص منو وترجع لحياتها الطبيعية حيت شافت وقنعات منو فاش حصلات الكذوب..حداها صفية كتردد بعض الادعية بصوت خفيف ختارق قلبها وخلاها تنهد بحسرة والدموع معمرين عينيها كتحبسهم تحسبا للحريق

حتى دخل الطبيب فحصها من جديد محيد ليها الفاصمات وخبرها بالعملية حدها قالت ان شاء الله..قادات فولارها وخرجات رفقة صفية عينيها شبه محلولين حانية راسها للارض وكتمنى متشوفش وجهو وبالفعل غي خرجات لقات عمر فانتظارهم وهو مكاينش ومسولاتش عليه بتاتا

طلعو فسيارتو فاش جاو كتسنا غي توصل باش تمشي تكوانا راسها وترتاح من ضجيج العالم..كرشها كتغوت بالجوع حيت مواكلة والو حاطة بديها على كرشها كتسنط للصوت الخارج منها

وصلو للعمارة وطلعات رفقة صفية لي وجهات ليها الكلام:بنتي ياله بقاي معايا اليوم

هدى:شكرا اخالتي سمحي ليا عذبتك معايا غنمشي لداري نرتاح

صفية:علاش كتقسحي راسك؟؟نتي مريضة ومعندك لي يجلس معاك..انا بوحدي بقاي معايا غي حتى تولي مزيان غدا طلعي لداارك(بترجي)مترديهاش ليا فوجهي

هدى:واخا ..

حلات دارها ودخلات رفقتها غي بشويا عليها حيت عينيها مزال فيهم حريق..كتفحص فين غتحط رجليها

صفية:اجي رتاحي ليك شويا

داتها لبيت لي فيه التلفازة عطاتها مانطة وقالت:تغطاي تدفاي شويا

هدى:سمحي ليا عذبتك اخالتي

صفية:ماكاين عذاب ابنتي..نيت تونسيني معندي حد كنبقا غي كنشوف فالدار بوحدي حتى كيجي عمر يونسني

هدى:معندكش الولاد؟؟

صفية:(كتحيد جلابتها)لا ولاد لا بنات..عندي ولاد خوتي بحال ولادي

هدى:(مسندة وعينيها دامعيين)معمرك تزوجتي اخالتي؟؟

ثفية:(ضحكات)ههههههههه اش نقوليك ابنتي..أنا قصتي قصة

هدى:عاودي ليا

صفية:يا بنتي انا كنت انا زخوتي كثار انا الكبيرة ماتت مي خلاتهم ليا فرقبتي كنت عاد لحقت الصيام بعام..لقيت راسي فعنقي ربعة تدراري وجوج بنات كلشب صغير كلشي خاصاه مو...اش ندير؟؟شمرت على ذراعي وتحزمت ونضت ربيتهم وكبرتهم..خرقت وطيبت وعجنت وسيقت وقريت وسهرت حتى كلشي كبر ودار دارو ومستقبلو ووليداتي ولقيت راسي انا بوحدي..عندي خمسة وربعين عام بقيت فدار باا كيجيو عندي من السيمانة للسيمانة

هدى:علاش متزوجتيش

صفية:تزوجت علاه هاد الديور منين؟؟خلاهم ليا المرحووم

هدى:مات مسكين

صفية:مات سيدي العربي..كان صحراوي تاجر معروف المرا لي يتزوج بيها تموت ليه هههه حتى جابني انا وهو يموت هو نيت هههههههه(كضحك)

هدى:(تبسمات بشويا)معندوش الدراري؟؟

صفية:عندو..ولادو كلهم على برا كاع محارو فهادشي لي خلى..حيت برزقهم تما كيجيو فالصيف وصافي

هدى:وخوتك؟؟

صفية:(تنهدات)تلهاو فحياتهم ونساو ختهم..كلها عندو مراتو كلها عندها راجلها وولادها

هدى:(كتفكر فهضرتها)صعيب تعيشي بوحدك...كتقنطي كتبغي غي علامن تحطي الراس

صفية:الوحدانية صعيبة...كتلقاي راسك مخارجة بحتى ولد ولا بنت فالدنيا تعيشي على ودو

هدى:كنشوف عمر ديما عندك

صفية:ههههه هذاك الشلاهبي كانت مو كتخدم وكتخليه ليا انا لي ربيتو ملي كبر مبقاش كيبغي يمشي من عندي..راه خوالو معانا فالعمارة غي مكنشوفهمش بزاف كيخرجو بكري لخداميهم ويجيو معطلييين

هدى:الله يدير ليك لي فيه الخير

صفية:(ناضت )امييين ابنتي..نوض نحطو طويجين ناكلوه ونديرو اتاي ندفاو بيه

مشات خلات هدى غي كتشوف وكتساءل واش حتى هي غتعيش بوحدها؟؟حتى هي خوتها شافو حياتهم وهي راها بوحدها كتمرض مكتلقاش حتى لي يمد ليها كاس تالما..كلشي كيديرو راسها..اي نعم باها كاين مي بحالا مكاينش حيت معايشاش معاه..كتقول واش حتى انا غنكون بحال صفية بوحدي وتلى ليا بين ربعة تالحيوط

جات هازا طويجين والخبز حطات كلشي وقالت:كنت ياله غنحطو نتغدا بيه حتى جات رقية

هدى:عذبتك معايا اخالتي

صفية:مرحبا بيك ابنتي

تغداو فجو هادئ كيهضرو مرة مرة ويتحدثو حتى كملو ورجعات نعسات بلاصتها حتى غفااات محساتش براسها امتا داتها عينيها وغرقات فسبات عمييق ناسية فيه العالم

طاح الليل ومعاه طاحت شتيوة زوينة سقات الارض..صفية راه فالبيت مع هدى كتسبح وطالقا التلفازة بصوت خفيف باش متفيقهاش حتى تسمع السرسار ناضت حلات كتلقا فوجهها عبد الدائم هاز فيديه صاشية ديال الفارماسي

صفية:ولدي

عبدو:الحاجة مزيانة؟؟

صفية:(ضحكات )انا ولا هدى؟؟

عبدو:(حك على راسو من لور)بجوج

صفية:راه ناعسة مسكينة تغدات ونعسات مفاقتش باقي

عبدو:بغيت نشوفها

صفية:زيد اولدي زيد

دخل حتى هو مدرم لقاها من الجنة والناس ممشاتش لدارها باش يلقا كي يشوفها..بتساؤل نطق:فينها؟؟

صفية:لهيه

تبع خطاويها ومشا للبيت فين كانت باقي ناعسة والشال ملوي على شعرها محيداتوش..حيد صباطو ودخل نيشان لجيهتها..قلبو كيضرو عليها حيت كتبان فيها مريضة تحنى على رجليه ومد يديه لمس حنوكها لقاهم سخونين..كيشوف شفيراتها وبشرتها الرطبة كتبري مع قليل من اثار الحبوب لي باقي متخلصاتش منو

عبدو:(بصوت غليض)ياكما عاودو ضروها؟؟

صفية:غي تغدات نعسات مقالتش ليا اولدي اش ضرها

عبدو:ها الدوا جبتو ليها..مكتوب فيه كيفاش تستعملو

صفية:عبد الدائم واش اولدي هاد بنت الناس فاش ضريتيها؟؟

عبدو:هضرة كثيرة(باسها فحنكها)متقوليش ليها جيت

صفية:واخا

غمق عليها وخرج راجع منين جا مخليها مزال ناعسة مفاقت حتى دازت ساعة باش خرج..كتعحز وتعاود..شكرات صفية على ضيافتها ويغات تمشي لدارها

صفية:خودي دواك هاهو جابو عمر

هدى:شكرا بزااف حتى نعطييه الفلوس

هزات خنيشة دوا ومشات لدارها شابعة نعاس..كي دخلات قلبات تيليفونها لقاتو غيطرطق بالمكالمات من ختها وخوها ورشيد وحتى غزلان..دوزات الخط لختها عاودات ليها تش طاري ومع خصها غي علاش بقات كتبكي وتنخصص وتشكي عليها

اكرام:دابا علاش كتبكي؟؟غتمرضي عينيك اصاحبتي

هدى:خايفة..واش انا ديال ندير عملية لعيني بوحدي هنا

اكرام:ومالي انا غنخليك راه غنجي عندك نبقا معاك...امتا غديريها؟؟

هدى:معرفتش غي غنرتاح شويا وغنمشي لطبيب نشوف اش كاين

اكرام:متبقايش تبكي اصاحبتي..غنجي وغيجي احمد ونعيطو لباااك

هدى:خايب تحسي براسك بوحدك والله

اكرام:مالنا متنا..ونتي راك عندك مجمر الغمة مونسك ههههه

هدى:(كتمسح دموعها)متبقايش تجبديه ليا..مبقيناش بجوج

اكرام:ههههه خنزتوها تاني ههههه صبري نطلع احمد

طلعات احمد لي كان غي بالفوطة ياله مدوش قال:واش مكتعرفوش الوقت؟؟

اكرام:شوف الهبرة حتى هو ربا الكتاف هههههههه

احمد:هههههه كنت هبرة

عاودو ليه اش وقع وبقا كيهضى معاهم كيقادو بلانهم على قبل ختهم لي غدير اوبيراسيون حتى سمعات هي الدقان فالباب..وقالت:هادي غتكون الحاجة صفية

اكرام:صافي سيري بسلامة

قطعات معاهم وناضت كتجر رجليها والشعر مطلوق على كتافها حلات الباب وهي تلقاه واقف ليها عند بابها تاني بلا حشمة بلا حياا مقرق عينيه فيه..غي شاف الشعر رتاحو ملامحو حيت كيحمقو يشوفها بلا فولار كيحس براسو ملكها..اما هي شرعات فمها وردخات عليه الباب مصدومة وصاحت:واش مريييض؟؟؟

مهضرش نهائيا حدو طرق من جديد مرة وجوج وثلاثة وقال:حلي جلي بلا منصدق مغوت ومشوهك

مشات دارت فولارها وحلات لباب مغوبشة معولة تسمعو قطرانها ونطقات بالغوات:وااا بعد منييي واش مافيك نفففس؟؟(كدفع فيه )عطيني بالتيقار

دفعها ودخل وسد الباب قايل:هبطي صووتك وديري بحسااب مريضة

هدى:علاه نتا كتعرف اش ناهيا مريضة؟؟كتعرف غي راسك تهضر ويسمع ليك الواحد ميناقشش..علاش ساد علي الباب؟؟شفتي هاد الدار لي كتعرف الى مبدلتها وبدلت المدينة كاملة راني بنت الحراااام

عبدو:علاش مياغياش تسمعيني..ديما وقتما وقع مشكل كتبقاي تغوتي ونغوت ومعمر المشكل كيتحل

هدى؛(ربعات يديها وخزرات فيه)شفتي نتا واحد مريض معقد خصك تداوى..انا شادة معاك الطريق ونتا جالس مع وحدة فقهوة

عبدو:زعما كنغدرك؟؟ممصاحبس معاها السيدة غي قاضي معاها غرض..راجلها فاسبانيا مداعية معاه باغاني دير ليا وكالة باش طلق بلا ماتمشي

هدى:هادشيديالك غا سير عاودو لشي حد اخر..انا مباغياش نعرف ومباغياش نثيق

عبدو:علاش كتصعبيها على راسك؟؟باغية السبة باش تفرقي

هدى:اه..ولقيتها ياله بسلامة عليك (بغات تحل ليه الباب وحبسها)طلق مني

عبدو:باغيا تلصقي ليا منتيف وصافي..مال مك مصعورة

هدى:المشكل ماشي فالبنت..كون عيطت ليك وقلتي ليا مع بنت فقهوة نجي ونعاود ليك هانيا نتا لا عيطت ليك وقلتي ليا مع صحابي...هي اش؟؟هي كتكذب علي..كدير داكشي لي مباغينيش نديرو...ولا نتا هانيا تكذب انا لا..نتا تكذب وتغدر وتمشي مع الخانزات وانا تبقا علي بالمحاضرات فالثقة..اش كيحسااب ليك رااسك؟؟غنموت الى حصلت شي حاجة؟؟غتطرا فيا شي حاجة...نعطيك ثلث ايام ومنحسبش ربي واش دوزك فحياااتييي...بنتيييي وموقفاتش الحياة عليها عساااك نتااا

خلاها تكرعات عليه حيت ولى حافضها كيخصها تغوت وتحيح وتنكر وتخرج اش فداخلها باش تفرغ خاطرها يلقى مايعمر عاود..رمقها بنظرات فارغة كيتسناها تكمل باش يهضر ساعا مبغاتش تسكت مزال..بقات كتقطر عليه حتى بدات كتنهج..سمحات فيه ودازت للكوزينة كتشرب الما وكترعد معصبة كتحس بعروق راسها غيطرطقو معاه..تبعها مهول عليها..شد فيها من ذراعها وهضر بصوت خفيف:هدى عفااك براااكاا

هدى:(بدون ماتشوف فيه حيت عينيها دمعو)نتا لي براكةخليني عليك..منهار عرفتك ونتا غي كتعصبنيي حتى عروق عيني طرطقو

وقف ليها مبند كي عصي ربي وقال:عينيك كانو كيضروك قبل بلا متهمي فيا..لصقتي ليا مونتيف ختنا وعينيك ..عنداك غي شي نهار تجي عندي تقولي ليا حاملة منك

تلفتات شافت فيه مخنزرة:حتى نكون ميتة ونعطيها لواحد بحالك

عبدو:(خزر فلبلاصة)هاد الساعة ريحي كرك مغتعطيها لحد...سمعي نقوليك(هز فوجهها صبعو)غنمشي لاسبانيا سيمانة نقاد اموري ونجي باش ديري الاوبيراسيون..يقوليك راسك تبدلي السكنة نجي نريبها عليييك...عيييت نشرح ليك بالهضرة ونتي ماباغياش تفهمي ..مكنعرفهاش هي مكنعرفهاش..كون كنت حمار مغنجيبش وحدة نعرفها فالمغرب وانا معاك .. تبعي دوااك وعطي الراحة لكرك ملي نرجع هضرة اخرى

ياله بغات تجاوبو لقاتو زاد غادي فحالو مخليها كتغلي تقيسها تفركع حدها غوتات مسمعة ليه هضرتها:الى لقيتيني راني خانزة من دوك لي كتعرف

الى قالو الراس القاسح راه عند هدى وعبد الدائم..بجوجهم راسهم صخرة وملي تلاقاو بجوج كيتصارعو شكون لي كلمتو تمشي الاول..

وملي حلفات راه حلفات وهي مكتحنتش ..وجلسات مع راسها كتفكر واش تهز قشها الى هزاتو غيسيق ليها عمر الخبار وغيجي معندو مايخسر عرفاتو ماشي شي واحد لي كيهز الهم للفلوس والى بقات غتحس براسها ماعندهاش كلمة

دوزات ابيل لخوها وبعد اخد ورد نطقات طالباه:خويا واش غتجي ياك

أحمد:معلوم ..يوماين نجي عندك نمشيو للطبيب ونشوفو اش كاين بيدما تجي اكرام

هدى:بغيت نطلبك..هنا فالعمارة كيعرفوني الناس بزااف وغيعرفوني درت اوبيراسيون غيجيو عندي وانا منقدرش على الصداع وحتى اكرام مبغيتش نعذبها

أحمد:باغيا تمشي عند الواليد؟؟

هدى:لا غنبرزطو..قلت نشدو دار صاحبك نجلس فيها غي سيمانة ولا نكرييو

احمد:نشدوها ماشي مشكل..أنا نهضر معاه

هدى:صافي مشات ..أنا نتسناك ونهضر مع رشيد

احمد:غيبغي؟؟

هدى:معرفتش كنفكر نحبس الخدمة

احمد:منصحكش لقاي ما حسن وجلسي

هدى:يكون خير

قطعات معاه ومشات كتفكر فحريرتها..دارت تقاطر بعدما قرات طريقة الإستعمال ومشات تكات مهازاش تيلي غي مغمضة عينيها كتسنط لعظامها

أما هو راه بالفعل مشا فحالو اليوم الموالي لإسبانيا بعدما وصى عمر عليها وبالو مشغول من جيهتها. . قبل كان عارف راسو عندو مو وباه وختو ومخليهم لباه يعني مكانش كيتشوش عليهم اليوم لقا راسو مخلي هدى وراه وهاز ليها الهم حيت عارفها بوحدها معارفش بلي هي أصلا ولفات

محاولش بتاتا يتاصل بها ولا يتواصل معاها عارف مغتجاوبوش مخليها ترتاح علاما يقضي شغالو ويرجع

أما هي دوزات يوماين غي فالدار من بيت لبيت من حيط لحيط كتاكل وتشرب وتنعس متبعا تقاطرها كتسنط لعظامها..خرجات فواحد العشية تيرات فلوس ومشات قاصدة صفية دقات عليها وبعد الأخذ والرد مدات ليها مبلغ قايلة:خالتي عطي هذا لعمر فلوس الكلينيك ديك النهار والدوا

صفية:لا ابنتي راه مافيها والو

هدى:(حطاتهم ليها فيديها)فيها اخالتي..مكنبغيش يتسالني شي حد..غي عطيهم ليه

ودعاتها وطلعات لدارها كتحط التقدية حتى صونا لباب مشات مبسمة حلات وهي طير عليه بتعنيييقة وكتبوووس فحنوكو بحالا باقي صغيور نسات بلي ولى جوندارم..حتى هو من ديما حنين فيهم وكيبقا الهبيرة ديالهم

جلسات هي وياه جلسة اخوية محبوبة كيهضرو ويتعاودو رابطين الإتصال مع اكرام مرجعين ذكريات قديمة لايام فاش كانو مجموعين

فالعشية لبسو عليهم وخرجو يتقهوا هو وياها يستمتعو شويا لأنه كان حريص باش يونسها وملي خرجو وعمر شافهم كتب ليه نيشان ميساج فيه:هدى ديالك خارجة مع واحد خونا من عندها فالدار

جاه الرد فالبلاصة عاض شفايفو: وصفو ليا

عمر:(فاوديو)طويل وعامر مي كيبان صغير فالعمر

عبدو:بيض ؟؟

عمر:اه

عبدو :خوها هذااك

عمر:مأكد؟؟

عبدو:خليني متأكد مباغيش نشك نصدق شاد الطيارة على والو ونزيد نقودها كثر ماهيا مقودة

دوزات عشية مع خوها زويينة بزاف ورجعو للدار تعشاو وجبدو عليه حيت فالغد خصها تمشي عند الطبيب لي خدات رونديفو فالتيليفون وبالفعل رافقها للطبيب

جلسات فاص ليه كيفحص عينيها حتى سالا وقال:تفضلي معايا ابنتي

ناضت معاه للمكتب فين كان احمد كيتسنا ونطق:أمدرا ا دكتور

الطبيب:الحمد لله غيان دو كغاف..اوبيراسيون خفيفة للعينين دغيا

هدى:بجوج دقة وحدة؟؟

الطبيب:لا غنديرو وحدة ولي هي ليمينة حيت هي لي فيها الضرر أكثر ورا ست شهور غنديرو الثانية

أحمد:تنصحنا بشي كلينيك ادكتور

الطبيب :بيان سيغ..كلينيك فاش كنخدم وأنا لي نتكلف بعمليتها حيت أنا لي شخصت الحالة

هدى:واخا عطيني سمية تالكلينك وأنا غي نكون واجدة نجي

أحمد:واجدين من دابا...امتا تقدر ديرها؟؟

الطبيب:من هنا تخوا جوغ

هدى:ان شاء الله

خرجو من عندو شاداها البكية غي طلعات لسيارة خوها دارن نظارات شمسية وطلقات العنان لدموعها كتبكي وتشهق واحمد غي كيشوف كيحاول يهدن فيها

أحمد:(سايق)دابا علاش كتبكي؟؟راه غي اوبيراسيون خفيفة علاش خايفة؟؟

هدى:معنديش الزهر هءهذههء باقي صغيرة على ندير اوبيراسيون.

أحمد:(جرها عنقها)واش المرض كيعرف صغير ولا كبير..متهزيش الهم راها غي شي حاجة خفيفة دغيا تبراي

هدى:(زيرات عليه)خايفا بزاف هءهءهءهء

توقف فالطريق وخلاها كتبكي وتنخصص بحالا هوو لي كبير ماشي هي. جابت ليه الضحك ولى غي كيعنق فيها ويحزر ويبرز..عارفها خوافة فيها غي الفم والا لقات علامن تفشش كتجيب فشوشها وتزيد فيخرات...سكتها بزز عاد مشاو للدار مكمليين نهارهم عادي وعالمييين اكرام بلي كاين وحتى هي قررات بلي غتنزل

*****

بعد مرور ثلاث ايام..فاقت هدى بكري موجدة صاكها لي غتدي معاها لكلينك وعند صفية هو لي مطافتش بيه..سدات الدار وزادت خلات عمر مفاهم والو وحتى صفية مرداتش البال لغبورها لأنه نادرا فاش كتلاقاها..لبسات عليها سورفيت وقادات شالها مع بغات تهز التيلي مع دخلات إكرام لابسة عليها هي الاخرى وقالت:واجدة

هدى:اه..(عنقاتها)دعي معايا

اكرام:ان شاء الله كلشي يكون بيخير ودغيا تنوضي منها باش يلقا مجمر غمتك فين يفقص فيك

هدى:فاقصني اختي ..متبقايش تجبديه ليا كنتعصب

اكرام:زيدي زيدي ههههه

خرجو برا فين لقاو احمد ومشاو بثلاثة بيهم كيف خلاتهم ربيعة وكيف كبراتهم...يتغاوتو يتضاربو لكن كيبقاو خوت وميفوتوش بعضهم..توجهو نيشان للكلينك والخلعة شاداها بحالا معرت اش غدير...دازت من الفحوصات العادية وتسناو الطبيب حتى جا عاد مشات معاهم وعينيها مغرغرين...دارو ليها بعض الإجراءات ودخلات للعملية

بعد مدة من الزمن كانت هدى بفاصمة مغطية عينيها مبنجة كلها فالشومبر ديالها معاقلاش ومواعياش وحداها اكرام واحمد كيتسناوها تفيق بعدما دوزات عميلتها بخيير وعلى خير محسات بوالو نهائيا..البيت شبه مظلم باش متشوفش الضو وهي مغيبة

وهوما فالانتظار دخلات غزلان ورشيد ومراتو لي جاو خصيصا يشوفوها وتحت طلبها هي كانت دايرا بوني مديكال لشعرها ومحاسا بوالو من شنو لي كيضور حداها..سولو على حالتها عادي..وناضت غزلان صوراتها من بعيد وحيدات كلشي من السطوري خصيصا باش يشوفها هو حيت عارفا المشكل لي بيناتهم ...حطاتها وكتبات عليها الله يشافيك اكبيدة

فاقت هدى على حريق خطير فراسها وعروق عينيها كيتجبدو من لداخل بحالا دماغها باش خدامين..كتسمع الأصوات لكن الألم فعينيها ممخليهاش تركز..كتحاول تحل وحدة بشويا وتستوعب فين هي حتى جات ووقفات عليها اكرام كطمن عليها حدها حركات ليهم راسها ويديها حتى فات وقت عاد طلقها البنج وبداها حريق الراااس ..طمنو عليها و خلاوها ترتاح بقات مع خوتها لي عاد احمد قرر يخبر الأب ديالو باش يجي يشوفها

-فهولندا

كان واقف على الدراري كيتحاسب معاهم بعد سفر من اسبانيا لهولندا حتى كيدخل للواتساب كيلقا غزلان حاطة سطوري فيه الله يشافيك..تهز قلبو وزير على تيلي كيزومي تصويرة ..ناض من حداهم صونا لغزلان ومجاوباتوش وصونا لهدى غي عالله حتى تشد الخط حتى تسمع صوت غريب فوذنيه :الو

عبدو:هدى؟

إكرام:لا أنا ختها..عبدو ياك؟؟

عبدو:سي..كي بقات

إكرام:صافا راه خرجات

عبدو:تعذبات؟؟

إكرام:مالها غتولد هههههه شوياا وصافي

عبدو:سلمي عليها ..أنا دوجوغ ونجي

إكرام:فراسي مخاصميين

عبدو:لا غي كتكذب

إكرام:نعل الشيطان هههه

عبدو:مكاين والو غي بغات ترتاح وخليتها..أنا دوجوغ وننزل ..خودي نمرتي من التيلي عندها غنبقا نسول فيها عندك

إكرام:واخا

عبدو:تهلاي فيها والى خصاتكم شي حاجة صوني ليا فالبلاصة تحضر

إكرام:واخا اخويا

دازو يوماين

دوزاتهم هدى فالسبيطار بالحريق فراسها الناس داخلة عليها هادي عمتها هادي بنت عمها هادو خوالها هي براسها متوقعاتش يجيو ناس هاكا حيت مكتعرف حد..لكن بمجرد ما أحمد خبر باهم نتاشر الخبر وكلشي كيعيط كلشي كيصوني جاو معاه..دارو الواجب ومشاو مودعيينها

اليوم الموالي جا الطبيب فحصها والممرضة دارت ليها الدوا وقال:راك مزيانة تقدري تخرجي

باعدي:(بلكنة عروبية)مغتعماش

الطبيب:لا..عملية خفيفة..لي نوصيك هو ضروري تديري نظارات طبية باش نحافضي على عينيك..بعدي ما أمكن على الضو ديال التيلي والبيسي..حتى لاتيليفزيون حتى تبرت عينيك

اكرام:الكونترول الجاي امتا؟؟

الطبيب:فالعيادة ديالي من بعد سيمانة

اكرام:شكرا بزااف ادكتوغ..نقدرو نديوها دابا

الطبيب:أكيد..الله يشافيك

شكروه زخرج مخليها متكية مغمضة ليها عين والعين لوخرا مكتبغيش تحلها حيت كتعيا وهي كتشوف غي بوحدة

باعدي:اوا ابنيتي الله يشااافيك(باسها فراسها)تهلاي فرااسك وكولي شويا وتي وليتي كي الكصبة

هدى:ههه حتى هاكا زوينة

باعدي:والزين زييينااات(شاف فاكرام)غاتي عاقدة علي غوباشتك تقول ماشي بووك

اكرام:هانتا غتبقا تاني تعصبني..واش قلت شي حاجة

باعدي:(بمزح خبطها لظهرها)المسخوطة هههههههههه

اكرام:واااظهرييييي

هدى:(جاتها الضحكة)هههههههههه

باعدي:انا غنمشي وغنعاود رجع..تهلاو فراسكم(خشا يدو فجيبو وجبد الفين درهم)هاكي(مدهم لاكرام)شديي باش تصرفي

اكرام:(شداتهم)ارااا

هدى:لا ابابا راه عندنا

باعدي:تي شدي وسكتي..تهلاي فختك لديك ااه

اكرام:(ميقات فيه)مع كنتي نتا لي مهلي فيها

مداهاش فيها وزاد خلاهم كيبرقو عينيه وهي تنطق هدى:علاش شديتيهم منو؟؟حشوومة

اكرام:(كتحسبهم)حشوومة؟؟مرات الشيطان اختي ..الصغر كولو عمرنا شمينا منو الريال..حقك هذاا حقك دابا تولد ليه المرا يولي يصرف عليه ونتي ضربك تران

هدى:واش نتي طامعة فباك؟؟

اكرام:أ حقي هذااك وحقكم اشمن طمع

هدى:ونتي خاصك؟؟ياك راجلك مهلي فيك

اكرام:غي زكارة فييه حيت مكانش كيصرف علينا فالصغر ههههه(خشاتهم ليها فبزطامها)هاهوما غتحركي بيهم..وزيدي نمشييو للدار

هدى:بااااززز...عطيني حوايجي

سدات لباب وعاوناتها حتى لبسات ودارت شالها مدوراه خفيف..جمعو الصاك وهي تنطق:أحمد وصل؟؟

اكرام:وصل ..دويت معاه الله يسهل على شحيمة ديالي الهبرة المعجنة

هدى:يكبر حتى يعيا كيبقا الغلييض لي كنت كنتريني فيه هههههه

خرجو بجوج فمنظر جميل جدا..خواتات بجوج وحدة تحط الراس على لوخرا ووحدة تهز لوخرا الى طاحت..

اكرام:غناخدو طاكسي وفلعشية نمشي نشد الاوطو ديال لوكاسيون نتحرك بيها

هدى:(شادا فيها دايرا نظارات شمسية)مابقيتي ساهلة تختي وليتي الطونوببل كاع

اكرام:اختي مبقيتش قادة على الطلكسيات راه كازا هادي

وقفو قدام لكلينيك ياله باغيين يشيرو لطاكسي بحكم كيكونز بزاف حيت كيجيو ناس بزااف حتى كيوقف عليهم خيالو العريض وكيحجب عليها هي الرؤية..دورات وجهها فور ماحسات بشي حد حداها باش تفاجأ بوجهو كيف ديما بملامح باردة كيشوف فيها وواقف حداها كي مشحاط جهنم بحالا ماداير والو

اكرام:(عرفتاتو)على سلامتك اخويا

مد ليها يديه بادب بعدما زاحهم عليها:ختي لباس؟؟

اكرام:الحمد لله..نتا مزيان؟؟

عبدو:الله يكبر بيك..(شاف فهدى لي زيرات على ذراع ختها وتتشوف فاص ليها)مزيانة؟؟

هدى:(ببرود)الحمد الله

عبدو:ياله نديكم

اكرام:لقيتينا كتتسناو طاكسي

عبدو:غتعذب فالطاكسي ..انا نديكم(شد الصاك م اكرام)

هدى؛(شافتها فاش عطاتو ليه)لا (بغات تشدو منو)نمشيو فطاكسي

عبدو:واش نتي حتى ونتي مريضة راسك قاسح

هدى:(شافت فيه ببرود)واش نتا مغتبعدش مني وتمشي تكذب فحاجة خرا

عبدو:ياله تاني واهضر معاها(شاف فاكرام)شفتي اختي كي كتهضر..غي كتعصب

هدى:شكون كيعصبني؟؟نتا..سير عطيني بالتقار

اكرام:بلا غوات..دويو بشويا

عبدو:(شدها من ذراعها)زيدي براكة من قسوحية الراس نوصلك

هدى:(حبدات ليه يديه)مابغييييتش واش بزز؟؟

عبدو:(شاف فاكرام)ختي خليني معاها واحد.جوج دقايق نهضر معاها

هدى:(شدات فختها مكنززة)لي باغي تقولو قولو قدام ختي

عبدو:(بدات كتعصبو)باغي ندير انا مابغيش نقول

هدى:(مسحات عى وجهها)وامييي واش باغي تسطينيي

اكرام:هدى نعلي الشيطان واش ااسيد ضارب الطريق من برا وجاي على قبلك ونتي كتعاملييه هاكا

هدى:(شافتها جات من جهتو)هذاا اختي هو نفسو لي لقيتو مريح مع وحدة فقهوة وكنصوني ليه كيقوليا صحاابي

اكرام:(بعدات شويا)هضرو

هدى:(شافت فيه )عبدو راه كتعصبني

عبدو:(قرب ليها شد.يديها من الصببعات)هدى..نتي مريصة مباغيش تعصبي..كيضرني قلبي عليك فاش كنشوفك.مريضة..غي براي وانا وياك والزمن طويل..

هدى؛ضرييتيني بزااف..كون انا لي كذبت؟؟كنتي غتقلب علي وتسمعني الهضرة

عبدو:كذبت غي ديك الساعة من بعد كنت غنعاود ليك كلشيي(هز يديها قربها لفمو باسها من القاع)رخفي فيك النفس غي تبراي اجي نتحارب انا وياك ونتشوهو كيف ديما

هدى؛(جرات يديها)غي سير عند صاحبتك

عبدو:(ضحك)واش هادي كاع غيرة فيك؟؟

هدى؛(باستهزاء)نغير عليك؟؟الى قبلات شي وحدة لهاد التمكريب ديالك غي سير

عبدو:وهانتي عرفتيني مكايناش لي تقبل علي من غيرك..وسعي خاطرك معايا

بقات ساكتة الجهد باش تناقش معاه ويبقاو يتغاوتو مكاينش..باقي عيانة من العملية ومن جو السبيطارات..هو حسابو راه رطابت ليه وهو يزيد يقرب كيشوف فيها بجنب ووجهو قرب يلصق فوجهها كتبان ليه غي فحنكها ينزل عليه بشي بوسة وديك الساعة تطرطق...مد يدو بشويا تحسس حنكها بصبعو وقال:توحشتك الميكروبة

بعدات وجهها بشويا وقالت بصوت منخافض:حتى العينين لي نخرج فيك.مكاينينش..شد يديك عندك ختي كتشوف

عبدو:عيطي لختك نقوليها توحشتك..

هدى؛عييييت بالوقفة وعيني كضرني خليني نمشي

عبدو:نوصلك

هدى:(زفرات)هالعار مرة وحدة خليني بخاطري ندير لي بغيت راه خنقتنيي

عبدو:(عض على شفايفو)حيت مباغيكش تكرفصي؟؟

هدى:أنا مرتاحة هاكا غي خليني..ضراتني عيني

عبدو:واخا ناخد ليك طاكسي..وجاوبيني..الى مجاوبتينيش هضرة خراا

هدى:كتهدد فيا؟؟

شد وجهها بين يديه بسرعة وقبل راسها وقال:كنطلبك...جاوبيني

شافت اصرارو عليها بعين وحدة وقالت:يكون خير

سمعها وعرفها بردات شويا..تبسم بتسامة خفيفة ياذوب تقشعها ..وهو يحط يدو على ظهرها من لتحت ونادا لختها قايل:غتمشيو فطاكشي(شير لواحد)

طلعات هي بلا متسنا حيت وقف حدا رجلييهم وتبعاتها ختها..خلص الطاكسي وزاد بيهم مخليه كيشووف متيعها بعينيه حتى غبرات عاد ركب فالاوطو

فالطاكسي

اكرام:ياختي بااز على تعفارك

هدى:واش كيحسابكم كنتعفر باش يطلبني كثر..راه مافايقاش ليه من النعاس انا باغيا نرتاح

اكرام:ضارب على ودك الطريق وجاي يحزر فيك وتقولي ليا مكتعفريش..تواضعي شويا هههه السيد ضريييف وباينا كيبغيك

هدى:ياله واسمع ليا هادي اش كتقول..بقا ليه غي يبغيني الى مشا حتى عرفني فين جالسة غيجي يشوهني نتي راه مكتعرفيهش

اكرام:دابا كاينين معاك حنا هههههه مسكين نسيبي شحال ضريف وحنييين

هدى:(حابسة الضحكة)شكون لي ختك انا ولى هو ..اجي باش عرفتيه جاي

عبدو:صونا مسكين عندك وجاوبتو وقاليا دوجوغ انا معاكم

هدى:وبلا شك.عطيتيه عنوان لكلينك وحتى الدار

اكرام:لا والله معطيييتو معرفتش منين جابهم

هدى:(ضحكات مفقصة)غزلااااان...غنشدها نااكلها بسناني

اكرام:دارت فيك خير..شوفي وجهك كي منووور ملي شفتيه

هدى:(بانكار)الله يمسخك..انا أصلا منورة

اكرام:ههههه معرفتش شكون قالها ليك ونتي صفرة كي خرية المريض

هدى:حلفي؟؟(شعلات كاميرا تيليفونها)ويلي ويلي على الصفورية حتى لابيلو مدايراااه...صافي هادي اللخرة ليه ميعاودش يرجع

اكرام:ياك بغيتيه يبعد منك خههه

هدى؛(لوات فكها وتكات على كتفها)لا

وصلات للدار دايرا نظارات شمسبة ودخلات بزربة تقادات فسريرها دايرا الدوا وجابدة عليه عاطية لعظامها الراحة لكن التفكير كولو مشغول بيه وشكون من غيرو"عبدو"

الشخص لي عيات تصد فيه وتهرب منو ولصقها باصرار وعطاها اهتمام شحال هذا ماشافتو من شي راجل..قبل اكيد.كيجيوها فرص تعارف او فرص علاقات لكن كانت ديما كتسد الباب الشيء لي كيخلي الرجال يبعدو من طريقها لكن عبدو بقسوحية راسو تشبت بها لاسباب كثيرة أولها انجدابو ليها نهار الجريمة فاش خرجات عينيها فالبوليسي واخا عارفا عواقب خطيرة غتبعها ..ثاني حاجة هو عزة النفس والقيمة لي عاطية لراسها..كان قاصدها بنية التعارف ويدوز وقيتة حتى لقى راسو معاها فعلاقة جدية مادخلش ليها منذ سنين..كاع علاقاتو كانو عابرين كيتعارف ويدوز وقيت وينشط ويزهى ويدوز لوحدة خرا من نهار نجمة ماربا لكبدة على شي بنت المرا الا هدى..كانت بالنسبة ليه حالة خاصة..كل مرة كتصدو فيها كان كيزيد يتشبث بها باغي يعرف عليها كثر وباغي يشوف منها جوانب اخرى وكيف كيسميها هو"حارة"

عدوه البنت المبعككة لي كتكون كتصنع الانوثة وعيونو البنت لي كتكون الانوثة ديالها مخبية كي الكنز مكتوريهاش لاي واحد خصك الى بغيتي تشوفها تحفر عليها وهادي هي علاقتو بهدى..مشافش منها الانوثة حتى تعمق معاها فالعلاقة وبتاتا واش مفهمومها هو التزين او التبرج او حتى العناية بالنفس..الانوثة عند عبدو هي حركات او ردود افعال كيشوفهم هو بوحدو فالمرا لي معاها ..هو جمال خاص كيلمحو غي هو وكيعجبو يستمتع به

دوزات يوم اخر غي فبيتها مضلم عليها اغلبية نااعسة كتسنط لعظامها واكرام معاها فالدار اكيد حتى جا اليوم الموالي جاها اتصال من صفية..جات اكرام عطاتها التيلي وقالت:الو خالتي

صفية:ابنتي..وكي بقيتي؟؟

هدى:(جاها اتصالها غريب)الحمد لله اخالتي ونتي

صفية:الحمد لله..حشومة عليك معلمتينيش بلي غتعمل العملية كنت غا نوقف معاك

هدى:غي كلشي جا بزربة وصافي

صفية:فين راك نجي نشوفك

هدى:بلا متعذبي راسك اخالتي راني وليت شويا

صفية:لا مكاين حتى عذاب ..زيارة المريض واجبة هههه فين كاينة

هدى:ف****** عمارة ***** الطبقة لولة

صفية:العشية الحبيبة نجي نشوفك..

هدى:مرحبا بيييك اخالتي

قطعات معاها ومدات التيلي لختها قايلة:غتجي السيدة لي كارية ليا

اكرام:مرحبا بيها..نمشي نوجد مانحط ليها

هدى:واخا..انا قنطت

اكرام:(خارجة كتضحك)صوني لمجمر الغمة يفاجيها

جابت ليها الضحكة وهي تطلقها بلا متحس وختالس قلبها احساس بالاشتياق جيهتو..مغتنكرش خلى بلاصتو لكن فعلتو مكاتشفعش ليه

فالعشية

كانت هي واكرام مريحين كيهضرو عادي حتى صونا الباب وقالت:يمكن الحاجة..انا نمشي نحيد هاد البيجامة

مشات بالفعل فحين اكرام حلات الباب كتلقا صفية وعبدو واقف كي المجمر لي ياله زند..فرنسات ليهم وقالت:اوا نهار كبير هذاا

صفية:لباس ابنتي؟؟

اكرام:مرحبا بيك اخالتي (حابسة الضحكة)زيدوو

عبدو:هدى كاينة؟

اكرام:كاينة هههه زيدو

دخلو للصالة الصغيرة وريحات معاهم ختها باغيا غي تشوف ردة فعلها ملي تشوفو..هاد الاخيرة لي سمعات صوتو ومتصدماتش حيت ولفات منو هاد الفعايل تحمد لله انه جا مع الحاجة اما راه توقعاتو يجي راسو...دارت فولار على راسها وخرجات بفاصمة على عينيها كتبدلها وقتما داوات خوفا من انه تضرر ليها العين

كي وصلات لقاتو ناشر جسدو الضخم فوق السداري وغي عاقدهم بحالا جاي ياخد فلوس الكرا..غي شافها تطلقو ملامحو وطلعها وهبطها بالبيجامة فالرمادي فاينة المؤخرة بشويا لكن بفولارها اكيد..كيفحصها بعينه كيحاول يطمن عليها ..فحين هي مشافتش فيه مشات سلمات على صفية عاد حشمات ومشات ليه مدات يديها ليه لي غي شدها ضمها بيديه بجوج وقال وعينيه معليين فيها:صافا العوينات

هدى:الحمد لله..

عبدو:جلسي حدايا

هدى:شش حشوومة(مشات ريحات حدا ختها)

عبدو:(متبعها بعينيه كتبان ليه البيجامة ممرخوفاش كي موالف يشوفها)كتحسي براسك مزيانة؟

هدى:شويا

صفية:كيف دازت العملية

هدى:مزيانة غي مليفقت كان فيا الحريق بزااف فراسي ومكنقدرش دابا نحني راسي

اكرام:شحال هذا كنقوليها داوي عينيك معامن كنهضر انا خلاتهم حتى خصها اوبيراسيون

صفية:اوا كتاب ليها وقتها(ضحكات)هههه معلمتكش بلي جاي معايا عبد الدائم..مسكين حشم يجي راسو وجينا بجوج

هدى:(شافت فيه)كيحشم مسكييين وجهو ديال الحشمة

اكرام:ههه نوض نجيب اتاي

صفية:انا نعاونك ابنتي

اكرام:لا اخالتي ويلي نتي ضيفتنا

صفية:ماكاين ضياف حنا جيران ..(جراتها)

فهماتها اكرام بلي بغات تخليهم بجوج وحتى هي معاضارتش عارفة ختها كيعجبها اما هو راه غي مشاو زاحو ليه الطريق وهو يقول:اجي جلسي حدايا

هدى:نتا راه مكتحشمش..لي شافنا يقول غي الرؤية الشرعية هادي

عبدو:(تبسم)لالا انا وياك مديالش داكشي..تهنيتي من صداعي

هدى:(بتأكيد)بردو ليا وذني ..وحتى نتا خويت ليك الطريق دير مايغيتي

عبدو:علاش ماباغاش ثيقيني بلي غي غنعاونها

هدى:واش حسابك انا هماتني البرهوشة لي معاك..لي ضرني هو كذبتي درتي داكشي لي مكتحملش..علاش معرفتش

عبدو:ماكنتش باغي نكذب غي مايغيتش نبرزطك..ونتي كبرتي راسك

هدى:كبرها تصغار خليتك براحتك معاها

ناض من بلاصتو وتنشر حداها حتى كحزات من حداه خالعها:ويلي جهلتي

عبدو:كتجهليني أهدى على والو..واش مكنبقاش فيك؟؟مخلياني مشوش عليك مكتجاوبيني موالو

هدى:عمرك صونيتي ليا قبل ومجاوبنكش؟؟ياك كنت عاطياك وقت وكنت كنجاوبك وكنسول فيك نهار درتي علاش كلاصيتك كي كنتي النهار لول

عبدو:واشوف مع هادي القرطاس لي كتعطي(زفر)هادشي ماشي مهم دابا..عينيك لي مهميين

هدى؛(شافت أمامها بتذمر)فيناهوما العينين؟؟مشااو ليا عويناتك هوما لي كانو فيا

تبسم ليها بشويا وقال:باقي باقي(دور ليها وحهها عندو بصبعو )باقا عوينة وحدة

هدى:حتى هي غندير ليها اوبيراسيون...معندي زهر

عبدو:عندك انا كولي ومعندك زهر؟؟

خسرات فيه سيفتها وقلزات ليه:هاك هاهو

عبدو:(شد صبعها باسو )هاد التقليزة عندك.كطلع ليا المورال كنعرفك مبقيتيش مقلقة مني

هدى:حسابك غدوز ليك ساهلة؟؟

عبدو:نفهمها تصالحنا

هدى؛(عوجات فمها)لا

عبدو:(ضحك ودوز يديه على عنقها)تصالحنا الميكروبة...(صرفقها بشويا)متبقايش تعفري لدلمك ونتي فيك غي كيلو تاللحم

هدى؛(قرصاتو)اوا سير عند سبعين كيييلو...اما أنا غي شويا

عبدو:نوضي أ شوية نعطيك واحد الحاجة جبتها ليك

هدى:(شافت فيه)باغي تحزرني بكادو؟؟

عبدو:مغتشديش من عندي ولكن هادشي لي حايب ليك غيعجبك

هدى:(بجدية)عبدو نقص علي الكذووب

عبدو:مكذبتش غي مبغيتش نبرزطك..خليني انا نهز الهم والمشاكل ونتي خليك فالراحة

هدى:مولفتش نرتاح

شد يديها ضمهم وباسهم بحب من الوسط وقال:ولفي ليا الفشوش أحبيبة..تسناي انا جاي

هدى:واخا

مشا خرج مخليها كتفكر اشنو دارت؟؟واش سامحات ليه؟؟كتخاطب نفسها بحال شي صاحبتها كتعاود ليها..

واش سمحتي ليه بسهولة؟؟

لعب بعقلك؟؟

ياكما كضحكي على راسك؟؟

حتى عاود دخل حيت خلى الباب محلول هاز فيديه مشيشة زويونة كيوووت فالبيض والعوينات خوضر كيبريو داير ليها جرس فعنقها كتباان زوييينة بزاااف وقال:هاكي

هدى:(شافتو جاتها الضحكة وطلقاتها)ههههههههههههههههههه جايب ليا موش

عبدو:(مدو ليها)قطة هادي أعوينات القطة..تونسك شوياا

هدى:(شداتها بحب)اربيي شحال زوييينة(هزاتها فيديها وباستها)واش ديالي؟؟

عبدو:ديالك ..ربيها راه مفاكسينيا وكلشي بوراقها..تهلاي فيها

هدى:ههههه فكرة زويييينة صرااحة تونسني نييت كنقنط(عنقاتها)اربي شحال خنفوسة كي شي بانطوفة(باستها)

عبدو:(حاضيها)وانا متبوسينيش بحالها زعما؟؟واخا غا وحيدة فالفم

شافت فيه حابسة الضحكة وهي تصليها معاه لقرفادتو وقالت:ها بوسة وغي لقيتيني مريضة أما نبرد فيك جنوني

عبدو:(تبسم عرفها بردات شويا)قيدي عندك ماباغيش نحكر عليك حيت مريضة

هدى:جرب وتشوف الى مجمعت عليك الجيرااان(عنقات المشيشة)واش منخاف والو على عيني

عبدو:(كيدخل ليها الشعر تحت الشال)لالا مفاكسينيا وكلشي مزيان

هدى:أش غنسميها؟؟

عبدو:سميها مجمر الغمة

هدى:(ضحكات )هههههه لا مجمر الغمة واحد هو نتا ههه هادي غنسميها عويشة

عبدو:هههههه سميها لي بغيتي(حط يديه على عنقها من لور)فيك مايخرج شويا؟؟

هدى:(شافت فيه)صعيب عليا الضو دابا..واش نتا بقيتي فالمغرب

عبدو:(مسح على وجهو)لا كنت فهولندا خرج ليا بلان ومشيت

هدى:وشكون قاليك درت اوبيراسيون؟؟

عبدو:كنت عارفك غديريها وغتشدي الزكير وغتخرجي من الدار

هدى:باش تعرف راه ماكنحنتش الى حلفت(كتمرر يدها على المشيشة)

عبدو:علاش كتقسحي راسك؟؟كتجيبيها غي فراسك

هدى:مكنحملش لي يحكرني ونتا ديما كتنقص مني فاش كتبقا تأمرني

عبدو:نتي عارفاني ماعنديش مع نطلب شي حد..قلت ليك ديري ديري حيت عارف مصلاحتك

هدى:هذا هو مشكلك انه كيحساب ليك راسك عارف كلشي ونتا كتعرف غي شنو مسلكك كون أنا لي ريحت عاونت شي راجل فقهوة كنتي غتيقني؟؟

عبدو:نتي مافيكش الشك أنا كنشك فحوايجي

هدى:مغنخلصش أنا ذنب وحدة خراا

لاحتها ليه بجرأة كتسناه يجاوبها ويبرد جوفها على الشك لي ولى فيه جيهة النسا وجيهة الناس عامة وهو ينطق:مكايناش وحدة خرا..كون عارفك غي شويا فيك التقحبين منطوفش بيك..

هدى:هاد الساعة نتا لي فيك هاد الفعايل ..حيت كتطلب شي حاجة لي نتا مدايرهاش

عبدو:أنا مكذبتش داك النهار غي وقع بلان ومفهمتيش اش كاين

هدى:حسابك شكيت فيك؟؟؟أنا راه لقاك معاها فالفراش ندفل عليك ونزيد والله ميترعد قلبي عليك لي ضرني هو كذبتيييي

عبدو:اش هاد هضرة الز****

خرجات فيه عين وحدة وصاحت فوجهو:وااا سكتتتت واش بقات غي ختي معرفاتكش فمك خاسر

عبدو:(عقد فيها حجبانو)واسمعي نتي هضرتك اشناهيا..تلقايني مع وحدة ..

هدى:أنا غي قلت ليك...الى اليوما رطبت راسي حيت بيني وبينك دازو حوايج زوينين مبغيتش نخسرهم

عبدو:(طلعات عليه بهضرتها)عرفي اش كتقولي..خلينا زوينين

هدى:(هزات مشيشة لحضنها)خليك نتا زوييين اما انا زويييينة(مداتها ليه)شد ندير تقطيرة

عبدو:سيري جيبي نديرها ليك

حركات راسها ومشات بقا متبعها كيطلع ويهبط ولي فيه ماهناه..تبعها نيت من رجليها كيقلب يقشع شي حاجة ساعا لقا غي البرد كلشي عريض

من غير الطول تالبيجامة لي شويا قصير..مسح على وجهو طارد أفكار شيطانية من بالو عليها...أما هي جابت التقطيرة ولقات صفية وإكرام حاطيين صينية ودواز اتاي..ريحات وقال:اري

مداتها ليه سندات راسها وحيدات ليه الفاصمة حلات ليه عينيها بشويا حتى تهز قلبو من عينيها قطر ليها ورجع الفاصمة قايل:امتا عندك كونترول؟؟

إكرام:شكون جاب هاد القطة؟؟

هدى:مشيشة ديالي جابها ليا عبدو

إكرام:(كتخوي اتاي)هانتي لقيتي لي يونسك

صفية:الوحدانية صعيبة

مدات ليهم أتاي وهو غي ساكت مرة مرة يشوفيها كيلقاها مغمضة عينيها والمشة مكمشة فوق كرشها كيشوف غي يديها كيدوزو عليها ..

عبدو:امتا الكونترول ؟؟

هدى:الجمعة..ناري غنولي ندير نظاظر

إكرام:غنهزك ونحطك بالعورة ههههه

صفية:اوا تبقا ليها غي صحيحتها والعوينات يبراو ان شاء الله

حديث نسائي بامتياز فيه اصوات نسائية ضروه فراسو ..هو حاضيها غي هي لي متكية مغمضة عينيها ورجليها عند فخاضو..شاف رجيلاتها عجبوه ضرب على القديمات كأي راجل لقاهم مافيهمش حس الجلد الميت بتاتا كيف لا وهي قبل مادير العملية مشات دارت روتين لرجليها ولوجهها عارفة مع المرض غتشغل بزااف..ماحسش براسو حتى لمسهم بشويا وقال:انا غنمشي

هدى:(كتحس بيديه دافية على رجليها حتى تزنكات)علاش؟؟

عبدو:(قرب حداها كثر مستاغل لوخرين مجمعين)بغيت نريح معاك الراس فالراس

هدى:علاش(حلات العين السليمة)توحشتيني ولا؟؟

عبدو:(تبسم شويا)ياله نوضي معايا

هدى:(ناضت تقادات)منقدرش نخرج لبرا

عبدو:غي حدا الباب(شاف فصفية)الحاجة تمشي؟؟

صفية:غيجي ليا عمر اوليدي نيت باغي يشوف هدى

عبدو:(عقدهم بعدم فهم)مفهمتش؟؟

صفية:غي بغا يشوفها كي بقات

هدى:(عرفاتو غيبدا يعطيها)يجيه الخير مسكيين بحال خويا..(وقفات)نوض نوض الى غادي

ناض عاقدهم مقالش حتى بسلامة لاكرام فمو شادو بزز ليغرق ليها ولعمر ..خرج معصب من هضرتها ولى على القرص من جيهتها..تبعاتو حيت فالسفلي خرجات مع برا الباب تالدار وقالت:على شويا غتسلخها

عبدو:(عقدهم فيها)تخرجي عندو نخرج فمك شي عاهة خراا

هدى:(غوبشات)بدينا عاود

عبدو:(جبد التيلي)ولد القح*&&بة أنا مخليه حاضيك وهو باغي يجي يشوفك ..معرض نتي

هدى:والله وتعيط ليه حتى نتشوه أنا وياك...ويلي واش السيد مسكيين واقف معايا

عبدو:ميوقفش معاااك أنا لي درتها لكري اما بنادم مافيهش الثقة

هدى:(حيدات ليه التيلي)عبدو نعل الشيطان واش صاحبك غتشك فيه؟؟تلقاه باغي غي يدير الصواب

عبدو:يسولني علييييك

هدى:(جاتها الضحكة)كون سولك كون علقتيه ههههه تعلم تسكت شويا هههههه(ضرباتو لحجبانو لي معقودين)واضحك راه جاي تشوف وحدة مريضة

عبدو:(مسح على وجهو باستسلام)عيييييت دماغي غيطرطق عليا بكثرة التفكير

هدى:(قربات منو)اش عياك؟؟اشمن تفكير

عبدو:فيك

هدى:(تبسمات)لهاد الدرجة كنهمك؟؟ههه

عبدو:هاهيا بغاتني نقوليها وشنو احبيبة ونتي حياتي ونتي عمري(كيعوج صوتو )ونتي الهوا لي كنتنفس ..غا تهناي هادشي مغتسمعييهش

هدى:(ضحكها)وحدة ياله محزرها قول شيحاجة زوييينة

عبدو:باغي نبوووسك هههه هادي زوييينة

هدى:مباغيش سلخة هههههه امتا راجع

عبدو:تولي شويا ونمشي

هدى:واش عادي عندك تمشي وتجي؟؟

عبدو:عادي..المغرب كندخل فالصيف اما فالايام العادية راه كنضل كنضور من بلاد لبلاد

هدى:سعداتك

شد يديها باسها:حتى نتي سعداتك هه(شاف يديها)فيناهوما الخويتمات

هدى:نديرهم فالدار؟؟

عبدو:(كيتحسس صباعها)الى جبتهم ليك تلبسيهم ليا؟؟

هدى:ههه لا مغنشدش هههه براكة غي مشيشة لي جبتي

عبدو:براحتك كلشي ديالك(باسها فراسها)تهلاي فراسك ورتاحي ليا شويا أنا نعيط ليك

هدى: واخا..تهلا

نبسم ليها وعاود باسها فجبهتها قايل:بسلامة..

بعد هاد اللقاء ديالهم لي صفات فيه الخواطر وحلو جزئيا مشكلهم ودعاوتو ورجعات مجمعى معاهم كتحاول تناسى الحريق لي فيها..وبالها هاني من جيهتو اما هو راه قلبو رتاح حيت تصالح معاها وحيت صفاو الخواطر حيت هدى ماشي شي حاجة عادية عندو ..هي امرأة مميزة بعنادها وعزة نفسها الجميلة

كي طلع لطونوبيل صونا لعمر وهو كيديماري داير الايربود مع شد الخط قايل:العاود

عبدو:ياك اولد القحبة باغي تمشي تشوفها ليا على قلة العيالات

عمر:شكون غنشووف؟؟واش هدى؟؟وا غي قلت ندير الصواب

عبدو:تبان كدامي نحيد ليك سروالك ...تشوفها؟؟عمر شفتي المكاريب حتى تشوفها

عمر:(باغي يعصبو)واغي نطمنو على الامانة

عبدو:ديها فمك..نلقاك كضور بساحتها تشوف لي ميعجبك

عمر:(زاد.كيضحك)من صغرك كتبغي حاجتك مايقيسها حد

عبدو :دلمو قاليك يشوفها..معرض هي؟؟

عمر:علم الشاف هههههه غا قلت ندير الصواب ساعا غا خلينا شادين التيقار

قطع عليه كيسب ويغرق ليه وشد الطريق ينعس حيت كيحس بعينيه طافيييين بكثرة العيا ومحاسش براسو مزيان

******

دوزو ليلة كاملة بدون مايعيط ليها وبقات كتسنا اتصالو لكن متاصلش يتاتا واليد لي دوز اتصال ليه معندهاش كتساه هو يعيط طالما باقي ففترة المصالحة ديالهم..لكن معيطش وخلاتو حتى هي ملهية مع ختها وكتحاول تستمتع بايام ااراحة

فاليوم الموالي كذلك معيطش حتى وصلات العشية وهي تشوش قايلة لختها:اكرام عبدو ماعيطش

اكرام:عيطي نتي

هدى:وعادي زعما؟؟

اكرام:عادي متعرفي اش كاين

هدى:عنداك تكون وقعات ليه شي حاجة؟؟

اكرام:غي صوني ليه

هزات تيلي دوزات نمرتو صونا جوج مرات وقطع وهي تقطب حجبانها؛كيقطع

اكرام:يقدر يكون مشغول

هدى:اش غيشغلوو؟؟(عاودات صونات)الووو

عبدو:الميكروبة

هدى:(بتردد)مالك؟؟

عبدو:حسيتي بيا عندي شي حاجة؟؟

هدى:أش عندك(قلبها كيضرب)

عبدو:انا تحت الدار خرجي عندي

هدى:واخا هاني جايا

قطعات وقالت بخوف:انا غنمشي نشوفو راه برا

اكرام:وقعات شيحاجة ؟؟

هدى:معرفتش قاليا حسيتي بيا وقعات شي حاجة خلعني(قادات شالها ومشات هزات عبايتها بلا فاصمة داؤت نظارات شمسية )انا مشيت

اكرام:ردي البال

خرجات بسرعة وعقلهل كيقول وقعات شي حاجة..غي خرحات كتضور فراسها بان ليها قاطع شانطي وهاز يديه ببانضة بحالت مهرس...طاح منهل النص لدرجة مشات غتقطع عندو بزربة وكيشبى ليها كيمنعها حيت قاطع أصلا..كيبان ليها هاز يدوو مفهماات والو..موصل عندها حتى ولات صفرة بالخلعة والهضرة حلفات لخرجات ليها

عبدو:فين جايا؟؟(وقف حاجب عليها الشمس)

هدى:ويلي مالك(شدات فيديه لي مقيوسة)اش طرا؟؟مهرس ولا مالك

عبدو:كسيدة ورا مامشيت مت عندك

هدى:(سدات على فمها مصدومة وبعدات)اويييلييي ويلي ويلي(قربات من جديد كتقيس يديه)هرس؟؟ولا شنوو

عبدو:(تبسم ليها عاجبو الخوف لي فيها عليه)غي تقسحت وصافي(حط يدو على حنوكهها)نتي مزيانة؟؟

هدى:(شداتو من ذراعو بجوج)علاش مصونيتش ليا؟؟عاود ليا كي وقع ليك

عبدو:غي كسيدة دخلت فواحد وصافي

هدى:ياااربي على مصيييبة...غي يديك لي مقيوووس(قشعات جرحة حدا عينيه قاستهة بيديها)شووف هادي قداااش

عبدو:(شد يديها باش قاستو باسها من الداخل)مواقع والو احبيبة غي جرحة خفيفة

هدى:نتا ميكرووووب..عيط لياا ديك ساعة

عبدو:اش غديري ليا؟؟

هدى:معرفتش(يدون ماتحس حطات يديها على وجههو وبنظرة حنونة شافت فيه)نكون غي معاك

تبسم ليها وقلبو تحرك على هاد الخوف لي عمرو شافو فشي مرا من قبل...هو انسان فقد طعم الخوف والحنان من تسع سنوات وهاهو كيشوفو فالانسانة لي معاه..محس غي براسو كذرعها بيد وحدة دايرها فحضنو بحب وباس راسها من فوق الشال قايل:ماشي شي حاجة

هدى:(دوزات يديها ورا ظهرو)تخلعت والله

عبدو:(جاتو فشكل وهي حنينة)موقع والو(زيرها بذراعو)مابغيتش نبرزطك

هدى:(وجهها صفار بالخلعة)كون غي صونيتي ليا...واشنو درتي مع لي دخلتي فيه؟؟(هزات فيه راسها)

عبدو:(حيد ليها النظاظر تا شاف عينيها مدرق عليها الضو)قيدنا كوسطا وصافي

بعدات عليه شويا ومسحات على وجهها كتحاول ترجع النفس تحت نظراتو وقال:كاغ هذا خوف علي

هدى:مكنقدرش انا على هاد الاخبار...كنفشل والله

عبدو:ماشي شي حاجة..ريحي دماغك الكسايد كيوقعو

هدى"(قاست يدو)مقصح؟؟

عبدو:ضروري

هدى:عبدو كنتي شارب؟؟

عبدو:لالا..غي عيان وصافي مشربتش

هدى:حلف

عبدو:(ضحك)وا ها اللعب هههه حمقة نتي ولا..الى شارب راه شارب بغيتي ولا كرهتي ههه

هدى:ففففف الحمد لله خرجات خفيفة...

عبدو:واييه..سيري طلعي ترتاحي كثرة الضو واعرة عليك

هدى:واخا..رد البال لراسك(قاست يديه)غنصوني ليك

عبدو:(باس راسها)ردي لبال لراسك

هدى:متخلعنيش عليك أعبدو

عبدو:(مسح على وجهو والابتسامة مفرقاتش محياه)كون عرفت اتخافي علي هاكا كون شحال هادي درتها هههه كوني ليا غي نتي بخير الباقي كلشي كيتحل

هدى:(لمسات الحب فكلامو)خصنا بجوج نكونو بخييير

بدون وعي منها قربات منو وطبعات قبلة حنينة على خدو بزربة مخلاتوش حتى يستشعرها بعدات دغيا حابسة الحشمة لي بانت على محياها..ومشات كتزرب دخلات لدارها باقي فيها الخوف عليه بجهد وعيون من بعيد كتراقبها مثل الصقر كيحاول يستوعب واش هي هدى نيت ولا شي حد اخر

دخلات للدار شادة على قلبها لقات ختها كتسناها قشعاتها صفرة ..وهي تتطق:مالو

هدى:عطيني الما راني شويا ونطيح

مدات ليها الما شربات وجلسات عاضة على فمها كتعاود ليها ولوخرا كتضحك عليها

اكرام:مسكينة خافت عليه

هدى:راه عزيز علي..شوفي هو مسكين اش كيدير على قبلي ..والله حتى ضرني خاطري عليه

اكرام:الله يشافيه..وليتي صفرة ابنتي ههههه(صونا لباب)هاهو تبعك

هدى:محال

مشات اكرام تحل لقات أحمد لي جا هاز فيديه التقدية..تبسمات ليه وعنقاتو يحالا ولدها قايلة:على سلامتك احبيبي

احمد:(باسها فحنكها)مزيانة؟؟

اكرام:دخل ...علاش عذبتي راسك

احمد:ماشي شيحاجة

ناضت هدى عنقاتو حتى هي مسلمة عليه..هوما البعد خلاهم يكونو متحابين اكثر حيت عارفين معندهم حد من غيرهم..سلم عليها ببرود وجلس كيسول فيها كي بقات

هدى:الحمد لله شوياا باقي مكنقدرش نهبط عيني لتحت ولكن الحمد لله

احمد:الحمد لله...(سكت شويا ونطق حشمان)هدى شكون هذاك لي كان معاك لتحت؟؟

صدمها سؤالو ومبيناتش نهائيا حيت هي راه مكتخاف من حتى واحد.كدير داكشي لي كيبان ليها مزيان على حسب المنطق لي فعقلها..لاحظات من طريقة سؤالو انه معاجبوش الحال

اكرام:غي واحد السيد كتعرفو

احمد:السيد غتعنقو؟؟شكون هذااك؟؟صاحبك؟؟

هدى:أحمد...(بعتاب)

أحمد:سولتك جاوبيني(عقد.حجبانو)شكون خونا لي كان معاك

هدى:(كتلوي ففمها)بغيتي الصراحة؟؟السيد تعرفت عليه مؤخرا

احمد:وتعرفتي عليه يجي ليك حتال الدار وتعنقيه

هدى:غي حيت تخلعت عليه دار كسيدة

احمد:نتي مو؟؟زعما وليتي بعقلك شغل العيالات معندكش..من امتا وليتي كتصاحبي

اكرام:أحمد..خليو هاد الموضوع لمن بعد

نتا ياله جيتي

أحمد:دابا غيتناقش(ضرب بصباعة فالطبلة)

هدى:قبل ديما كنتو كتقولو ليا متبقايش سادة على راسك..تعرفي وبداي حياة جديدة ودابا كتحاسب معايا

أحمد:تعرفي ماشي تمعشقي ليا وتعنقي...شداك المستوى

خزرات فيه هدى وناضت متجاهلاه:متنساش انا لي كبر منك ماشي نتا..عرف كيفاش كتهضر معايا

أحمد:(وقف)اش جاب كبر ولا صغر للهضرة؟؟كتعرفيه فهمتها مي شنو معناها يعنقك؟؟شويا لباس؟؟حاسبك بعقلك؟؟

هدى:انا عارفا اش كندير وماشي درية صغيرة باش يضحك علي شي واحد..سولتيني وكنت معاك صريحة وقلت ليك كنعرفووو

أحمد:سمعي أهدى..ثايقين فيك وعايشة بوحدك فمدينة ومخلينك ديري مايغيتي ميحسابكش راه ديري كلشي ونسكتو؟؟

هدى:(معجباتهاش طريقة هضرتو)ثايقين فيا؟؟شكون نتوما؟؟غي باش نفكرك أ خويا الصغير انا بعقلي وشارباه مزيان مكنديرش شي حاجة غلط ومحتارمة راسي بيك ولا بلا بيك..و

قاطعاتها ااكرام:هدىىىىى

هدى:(بجدية)سمعيه هو اش كيقول..ياكما حسابك غتحكم فيا؟؟راه كبر منك ماشي العكس..وعارفا اش كندير وماشي شي وحدة لي كتقلب توسخ سمعتها راه بابا لي والدني وميورينيش اش ندير

أحمد:هضر معاها هضرة تجبد ليا باعدي لي حتى طفات عليه الشمعة عاد كيسول..هاد المرة هاني هضرة مرة جايا نخلطك نتي وياه

هدى:(زادت وخلاتو)كبرتي اولدي كبرتي

احمد:سمعتيها اش كتقول؟؟ماشي قلة الحيا هادي

اكرام:جلس ونتا شااعل عارفها هي كي دايرا مكتبغيش لي يأمرها ويبقا يوريها اش دير راه بعقلها

احمد:(بعصبية)لي بعقلها كيحي صاحبها تال دارها

اكرام:جا حدا الدار..السيد ديما كيوقف معاها وكيعاونها كان فيه الخير غيكملو مافيهش الله يعاون..خليها ..انا ثايقة فيها مديرش شي حاجة خايبة..هدى ديال شحال هادي ماشي هي ديال دابا

احمد:خاايف عليها..يغروها الشيطان وو

اكرام:(قاطعاتو)هي مكتعرفش هدى..هدى لحمها عزيز ومتبغيش لي يحط عليها يديه غي هاكاك..انا ثايقة فيها

احمد:انا نيت ثايق فيها غي محملتش نشوف داك المنظر..شكون داك السخط لي كانت معاه

اكرام:كتعرفو وصافي..جلس جلس نحطو الغدا ونتوما خصكم غي علاش تشادو

أحمد:ها حنا غنشوفو

يتبع...