أقوى مما أدرك الجزء 28 والأخير

شبعاتو معيور ومشاو فالطوموبيلات مخلينو كيبخ الدم والى الناس ستمتعات بالسبوع الفاخر فعبدو كان كارديان حاضي لي داخل ولي خارج وكيف حلف وفى..مكاينش حس شي ذكر مشا لتم..

بلبستها المغربية تأنقات لحفل وليداتها قرة أعينها..رفقة خيرة لي ضاربة الحطة بالملحفة الصحراوية بثوب فخم وماشي اي ملحفة ..كلشي تأنق وكتشوف من بعيد مزيج من الانوثة والاناقة والصحراويات وحدة حاطة على الاخرى بجمالها وبشعوراتهم وكذلك بادابهم وصوابهم..

هزات هدى شامة وخيرة عبد الله مبسميين فوجه الناس من حبابها وحباب عبدو وعيالات خوالها غي كيشوفو فالخير لي عايشة فيه والغوض لي عوضها ربي

كانت فابهى حلة وشطحات بالثباثة والرزانة مع نساء العائلة وكترحب بالجميع...خيرة مفارقاتها دارت دور الحماة الحقيقية وماشي الحماة لي ولات دابا

دوزو لحظات جميلة بين الاحباب والصحاب محتافلين بقدوم التوأم ولي محضرش راه ضيع فرص كثيرة..مشافش شنو تدار فالسبوع ومصيفت لي يدي تبركيكة..

مجاش فين توصل العشرة تالليل بدا بنادم كيتفرق لي عندو شي دار وصلها ولي عندو شي طريق شدها..قلبل لي هبطو معاهم للدار..صونات لعبدو عطاتو عبد الله وعطات لعمها شامة وخرجات كتضرب بالطالون زادت شعلات فيه العافية كثر من زينها..طلعات لو حداهم ومعاها خيرى وهو كينكر على اللباس ..ممسوقاش ليه يطبل يغيط المهم دوزات يوم زويين

طلعات لغرفتها كتهز جلايلها ومعاها وهيبة وعليا هازين الدراري..حطوهم بلاصتهم فايقين وستاغلات هدوءهم بدات كتحيط التكشيطة حتى بقات غي بالسوتيانات فالابيض ..وهو يدخل مزال مخدم نفس الكاسيطة ...عصبها وهي تضرب بالديماكيون وقالت:واش مغتبعددش منييي؟؟؟باغي تفقصني وانا نافسة!!

عبدو:غنضرب مك ونتي نافسة...هذاا هو المغرب لي كضلي فاضحاني بييه!!!جايا تزوقي وتخرجي وتضوري!!! هاد المغرب باااح وجدي راسك راجعيين فحالنا الاربع

هدى:(خرجات فيه عينيها)اشنووو!!!واش حماقيتي مزال مكملت الربعيين

عبدو:كمليها لهيييه..

بدا كيحيد حوايجو بعصببة وكيسوط كي الرابوز غي بوو تقوليه مالك يقوليك مالها فداك الزيين كولو...بدل عليه ومشا كيتكيف فالبالكون مخليها ساقلة وفكرة مغادرة المغرب كتلعب على نفسيتها...مسخاتش وولفات ناسو والحياة هنا وللغربة جاتها قاسحة

بدلات عليها ومسحات راسها مزيان ومشات لدراي هزات شامة لي بدات كتنين كترضع فيها حتى دخل كيقلب بريحة الكارو وتخشا ففراشوو كيلعب فالتيلي حتى حطات حداه شامة وناضت هزات لاخر لي بدا كيبكي كترضع فيه هو الاخر..تحنا باس لبنتو رجليها وقال:أ بابا امتا غتكبري

هدى:الى غتدير ليها بحالي غا بلاش (ساطت)خايفة عليها هاد البنت غتعقد فحياتها

عبدو:نتوما غي لي كان رااجل وكيحضي حراامو ردوووه ممزيااانش(كيبوس فشامة)

هدى:الهضرى معاك حرااام

عبدو:نتي راه ضساريتي ضسراتك خيرة وليت نهصر معاك تصيفتيها ليا!!!من امتا ولينا كنحلو مشاكلنا مع الناس

هدى:ملي وليتي اصلا كتغوت حدا الناس(غوبشات فيه)غا بوحدك لي مزوج

عبدو:نعسي نعسي الى باغيا تنعسي...غنصدقو غي مخاارييين

هدى:متحسرش الهضرة قداامهم راه ملائكة(بعصبية)

عبدو:غي صعريني وخرجي مزوقة كي الشيخة وقولي متخسرش الهضرة

******

عصبها غددهاوفقصها وفلخر ركدات شويا وناصت للحراسة الليلية كيفيق واحد وينعس لاخر هي راه كيتعطلو باش يفيقو لكن هي ياله كيشد فيها النعاس

فاليوم الموالي فاق هو لول على صوت شامة ناض مغوبش وعاقدهم كيشوف فيها ناعسة بتعب..هزها بين يديه وقال:أ بابا خليوها تنعس شويا

مشا طرف عليه ورجع بدل ليها ليكوش وحوايجها مخليهم ناعسيين حيت عبد الله غافي وهدى كذلك

هبط بها لتحت كتحل عوينها متاجه للصالة فين كانو باقي افراد العائلة كيفطرو..تبسم وقال:صباج النور

الحاج:صباح الربح ..ارا ليا بنتي اراا

عطاها ليه شدها بحب وقال:فايقة بكري الحادكة!!

عبدو:سهروها لبارح بزاااف خلبتها كاو(شاف فمو)شي قهيوة

كباتها ليه بغير نفس حيت مزال معصبها على لبارح ومداتها شدها جغم منها وهي تنطق وهيبة:ضروري السهير فللول

عليا:يديها بوحدها وجوج قاااسحة عليها انا غي واحد وهلكني

عبدو:غتولف..

العمة:الصبر وصافي حتى حد مكيتزاد مقااد(تبسمات)شامة غي نتي اخيرة

خيرة:كانت كتوحم علي هدى ههههه

الحاج:زينة البنات هادي فين تبان لالة خيرة هههعهه

ضحكو عليه حيت كيعزهم بزاافوهو بنطق عبدو:عليا امتا راجعة!!

عليا:شي دوجوغ هاكاك

عبدو:غنرجعو معاااك

تلقاو الخبر بصدمة رغم انه كلشي عارف بلي غيرجعو اكيد ومافيهاش جدل لكن كانو متناسيينو مع الاحداث الاخيرة..خيرة شافت فيه بحسرة وحطات كاس ديال اتاي من يديها وكلشي لاحظها..شي كيقول تعلقات بهدى وشي كيقول بالدراري

الحاج:(مستفسر)مزال الحال!!بغينا زعما نفرحو بعبد الله ونديرو ليه ختانة

عبدو:الوليد تزاد على سبع شهور قاسحة عليه ندير ليه ختانة نخلي غي واحد ثلث شهور ونهبطو عاود نديرو الختانة

وهيبة:مسخنيااش اخويا بيكم(بابتسامة)ماما مسخاتش بهدى

خيرة:(بتذمر)غتخوا علي الدار

عبدو:(تبسم)تمشيو معانا!!!

الحاج:نلحقو نن بعد اما دابا لا...أ ولدي.حياتك ومستقبلك لهيه ..الله يسخر اسبانيا مابعيداش ساعتين ديال الطيارة وهاحنا عندكم

عليا:ولى عندكم lvol رخييص ههههه

عبدو:كنخدمو على الفلوس اللهم نخسروهم ههه مهم ديري بحسابك غنمشييو مجموعين(باس محمد لي هازا)

عليا:ان شاء الله

من ساعة ماعطاهم خبر وخيرة غي كتسوط غي بوحدها الشغل تلف ليها ..شقاها تلفاتو وحتى الهضرة مبقا عندها ليها خاطر

طلعات خيرة هازا عبد الله لي نزلاتو وهيبة الله مداتو لهدى لي كانت كتمشط شعرها وقالت:كيغوت باغي يرضع

هدى:أ جي اماما أجي احنوني(باستو)مالو ولدي ديالي

خيرة:(جلسات حداها كتسوط)ففففف

هدى:(كتخرج صدرها)مالك اخالتي!!

خيرة:غتمشييو وتخويو علي الدار

هدى:ياله معايا نتي وعمي ونسووناا

خيرة:ماشي وقتو دابا

هدى:مشكل ديال الوراق؟؟

خيرة:لالا ..الفلوس كيحلو كلشي ابنتي غي هو مسخيييتش بالدراري(لمسات جبهة عبد الله)عمرو عليي ونساوني همي شويا

هدى:الهم اخالتي غي باغيا تخلقييه..دابا غا بيناتنا مكيبقاش فيك عبدوو(شافت فيها بتساؤل)نساي واش انا مراتو!!!مكيعزش عليك؟؟الوقت اخالتي راه كتفوت والدنيا غدارة معرفنا شكون السابق ..وربي كيحنت

خيرة:(تنهدات)نقوليك حاجة وثيقي بيا..منهار ولدتي وانا همي على ولدي عبد الله تنقص..حسيت بشامة وعبد الله الصغيور عمروو علي بلاصتو

هدى:(بابتسامة)عز من الولد غي ولدو..حنا غاديين وغنرجعو ضروري غي مبغيتكش تبقاي هازا من جهتو..عبدو راه ولدك وعندو نتي عزيزة بزاااف وحاطك لفوق..لي غلب يعف اخالتي

خيرة:يكون خير...

هدى:غي رطبي شويا من جهتو راه كيتحرق من جهتك

خيرة:واصافي قلت ليك يكون خير هههه نجيبو الحناية تحني ليك!!

هدى:لااا بلاش..مرة خرا

****

حان وقت الرحيل ..بعد.يومان دوزاتها هدى غي فجميع الباكاج وباكاج ولادها..هزات كاع لي تحتاج ليهم وهنا فيم كيوقع التغيير..تخلات على حقيبة اليد الانثوية وعوضاتها بصاك فيه مستلزماتهم من حفاظات وبيبرون ولانجيت..وبلاصة الحرير والاناقة رجعات بحال شي عسكري كتلبس حوايج مريحين باش ترتاح وهي كتعتاني بيهم .السفر بوحدك ماشي بحال الى معاك البز

هبطو ليهم كلشي للتحت دارو فالطوموبيل وقررو يرافقوهم حتى للمطار..طول الطريق وخيرة تهز عبد الله وتدوز لشامة..تبوس وتعاود تتحضن غتسطاا حابسة الدمعة بزز

نزلو فالباركيينغ..عليا هازا ولدها قدامها بحمالة وجارا باكاجها..اما التوام راه داروهم فبوسيت صغيرة ديال ليبيببي.حتى يدوزو من خدمة الباكاج..

عنقات هدى خيرة مزيرة عليها وقالت:خيرك عمري ننساه..الله يخلي ليك صحيحتك اخالتي وسمحي ليا بزاااف(باست يديها بجوج)

خيرة:الله يرضي عليك..تهلاي فراسك وفوليداتك..وردي البال ردي

الحاج:تهلاو فريووسكم وفولادكم..ان شاء الله نزوروكم قريب

هدى عنقاتو هو الاخر وباست يديه وراسو على كل ما هو جميل شافت منو ..شكراتهم جزيل الشكر على وقفتهم معاها

عبدو:الواليد رد لباال لرااسك ..وللواليدة

الحاج:كون هاني..نقص شويا من الغوات ودير بحساب راه وليتي مولا وليدات

عبدو:هههه نفكر

داز لمو لي معرف واش يسلم ولا يرجع اللور ..شد يديها باسها من الفوق وقال:تهلاي فراسك الواليدة

بقات شحال كتشوف فيه وعينيها كيضورو فوجهو صور ليها الله بحالا أخر مرة غتشوفو..قلبها بدا كيضرب على جهد..كلام ففمها وعلى طرف لسانها لكنو تشلل ومقدرش ينطق..باغيا تقول كلام كثير لكن الاحرف خانتها ..باغيا تخرج شنو فقلبها لكن الابجدية ديالها غدراتها .بصعوبة جمعات كلمات خفيفة وقالت:الله يرضي عليك اولدي

كمش عينيه ممثيقش نهائيا شنو سمع..اخر مرة سمع منها "ولدي"كانت قبل موت عبد الله ..واخر مرة خدا رضاها كانت سنين طويلة لدرجة طبلة وذنيه مبقاتش متعودة تسمعها وذاكرتو مسحات الجملة..لكن فأجزاء من الثانية عيونو كتلمح وجهها الهادئ ولي مافيه لاطنز لا سخرية لا غضب لا كره..كيشوف خيرة ديال ماقبل الحادثة لي قلبات حياتهم..خيرة الحنونة لي حنات فالجميع وهو لا

لاول مرة فحياتو عينيه تضببو كانو الدموع لي تجمعو فعينيه بحال شي دري صغير مشتاق يشوف مو او يشري شي لعبة ..بقا ماسك يديها ومزير عليها كيتسنا شي حد يفيقو من حلمو او يقرصو ويقوليه نووض راه غي كتخايل

لكن فاش حتى هي وركات على يديه خلاتو يرمش مرارا وتكرارا حتى نزلو قطرات خفييفة من عيونو على وجهو بدون مايتحرك فيه والو..جراتو بشويا لعندها مبغات حد.يشوف دموعو واخا تكون مراتو..شدات وجههو بين يديها محاولة توصل لمستواه حيت طويل عليها وقالت:شششش ..تهبطهم نهبط ليك راسك بين رجليييك

شد يديها بجوج باااسهم بحرارة وتحنى بكل طولتو رامي راسو فحضنها..حضن الام لي لا يضاهي شيئا..الام لي منها تخلقنا ومعاها كبرنا..لي واخا تخدمها عمرك كامل مغتعوضها ولو نسية واحد فالمية على شنو دارت عليك

فاش كتكون عيان ومسخسخ وكيبان ليك غي السداري ترمي عليه تعب يومك وكتحي كتلاح وكتنهد براحة باغي غي تنعس هذا هو حال عبدو..انه متعب لسنين طويلة ومالقا الراحة حتى شفعات ليه خيرة على ذنب مداروش...دوزات يديها على جسموو معنقاه عندها اما هو راه خنقها..جمعها بين يديه بتعنيقة خلاها تخنق وسط جسمو لي شهدات عليه طول عمرها فنموو

فلقطة مؤثرة جدا كيبان عبدو معنق منو مزير عليها وهي الاخرى معنقاه مبسمة وكتخرج تنهييدات قوية كانها كتخرج شنو فداخلها ولي هزاتو معاها لسنين من جهة اول اولادها واولى فرحاتها...دوزات وقت طويل ماشي باش تفهم انما باش تصالح مع ذاتها وتخلي امرها لله

البعض منا ماشي خصو الايمان او خصو يتقرب من الله باش يفهم..خصو يتصالح مع ذاتو ..يتقبل واقعو وحياتو ومصائبو وحتى مسراتو كيفما هوما..لقيتي ماتبدل للاحسن توكل على الله مالقيتش قول الحمد لله

خيرة دوزات مدة طويلة مريضة نفسيا لا جسديا..مريضة مرض يمكن نسميوه القاء اللوم..متقبلاتش قدر الله وهذا خطأ فادح لان الله اذا أ حب عبدا ابتلاه ومقدراتش تستوعب انه غلطات فتربية ولدها الثاني فبمجرد مالقات الشخص الضحية لقات عليه اللوم وبرءات راسها..فضلات تعيش بضمير مرتاح وتلصق دقة الحياة فولدها وتبقا تلوم فيه ولو تبرد غي شويا من حرقة فقدانها لفلذة كبدها

وبفضل هدى قدرات تصالح مع ذاتها..يمكن حيت عاشو نفس المأساة غير هدى كانت هي الملامة من طرف الزوبير وواجهات الامر..جلسات مع راسها ولقات انه معندها حتى ذنب وديك البنت كانت غتموت سواء خرجات سواء بقاات لكن خيرة بتاتا واش ستوعبات لعدة عوامل منها المحيط..العمر وحتى الشخصيات ونسبة الايمان بالقدر

الحاج تضهشر اما عليا مشا لبها الريق الا هدى لي مبسمة وقلبها كيضرب بجهد ..كتحس براسها غتسطا بالفرحة حيت عارفة حرقتو على مو مكتنسااش ليه

خيرة:الله يرضي عليك اولدي انا راااضية عليييك

خرجها من حضنو زشد وجهها كيبوووس فراسها وفحنووكها وفيديها وففمو غي كلمة وحدة:سمحي ليا ..سمحييي ليا

خيرة:صافي اولدي..صافي مديرش فراسك هاكا(كتمسح ليه على لحيتو مبسمة)تهلا فراسك وفمراتك وفولادك

عبدو:مبقيتش غنمشيي.

خيرة:لا طيارتك كتسناك..سير اولدي انا رااضية عليك

يالفرحة من جديد عنقها كيبوس على راسها وكيشم فريحة جسدها العطر...وحتى هي كتبسم وترضي عليه فرحانة به

خيرة:تهلا فراااسك اولدي(باستو فحنووكو بجوج بحال شي دري صغير)وسع خاطرك نقص من الغوات

عبدو:منبقاااش نغووت نتي غي امري الواليدة

الحاج:(جا عنق خيرة من كتافها)الله يخليكم لبعصيااتكم

هدى:(باست خيرة)اوا يالالة خيررة هههه

خيرة:تهلاي فبعضيااتكم الغربة قااسحة بزااف

هدى:كوني هانياااا ههههه

عليا:الله يدومها ياربي

عبدو:مبغييت نمشييي

هدى:هههههه اويلي تا زيييد

عبدو:تلحقو علينا الوليد(جر مو حداه معنقها وكيبوس فحنوكها مساخيش)

الحاج:أ طلق ليا من مراتي وسير هههه غنلحقوو

عبدو:كلمة تالرجال

الحاج:كلمة ديال الرجال

عاودو عناق حااار ومشا عبدو فاتجاه لمطار رفقتهم غير عبدو لي جا..لايح عليه هم كبيييروفرحان بزااف برجوع المياه لمجاريها..شغفو دابا هو يبدا يعاود لمووو على شنو داز عليه وشنو دوز وشنو كيعيش بحال شي بنت شحال مشافت صاحبتها شحال وخصها تسرسرليها خبيرات

هدى:(داخلين للمطار)فرحتي

عبدو:(كيمسح على لحيتو والابتسامة مفرقاتش محياه)حااس براسي غنموووت بالفرحة ههههه(ذرعها)

هدى:على سلامتكم..خالتي القلب الكبير الله يخليها ليك يارب

عبدو:ويخليكم ليا حتى نتوما

طلعو للطيارة وجلسو جنب بعض مريرفي فالفيرست كلاص بزبالة ديال الفلوس لظروف الراحة حيت السفر مع وليدات صغار ماشي ساهل بتاتا..والطيارة فيها بزاف ديال الركاب لي ممكن ينزاعجو داكشي باش شرا راحتو

جلسو حدا بعض وهو فمو غي مترع مبسم للفراغ وقلبو كيضرب بالجهد هاز عبد الله فيديه لي ناعس وكل شويا يبوس فيه

هدى:(ضحكات)غيطير ليك العقل أ مجمر الغمة

عبدو:ولادي هوما لي صالحوني مع مي (عاود باسو)

هدى:نعاود نولد !!!

عبدو:ومالك غتحبسي ههههه

هدى:(قلزات ليه)ولدهم نتا نبيت ههههه براكة جوج

عبدو:حتى تصفاي ويحن الله ههههه علاه مالي لي نولد بنت وولد

هدى:حلم حلم هههه(هزات نيليفونها بيد ويد شادة بها شامة)ضحك

ضحك وصوراتهم ورسلاتها لخيرة وقالت:سوفونيير ههه

عبدو:فرحان دابا لدرجة تقولي ليا لي بغيتي نقول اه

هدى:غندير لصال

عبدو:(جمع الضحكة)ضساريتي

مسافة الطريق بين المغرب واسبانيا دازت عليهم متعبة ماشي كيف موالفين يجيو كي الحميمات شابعين جلاس وراحة وهضرة دابا شابعيين رضاعة وتبدال ويراريو تمحنو وعليا شبعات عليهم ضحك

هبطات طيارتهم واخيرا ونزلو هوما عياانيين كثر ..دوزو الاجراءات وخداو باكاجهم وتاجهو لسيارتو لي خىلى فالمطار..والوجهة بيتهم

متنكرش هدى بلي توحشات دارها مع عبدو حيت عاشت فيها لحظات كثيرة زوينة معاه..بالاخص الحميمية منهم..بمجرد مادخلو هازين التوأم تبسمو بجوج حيت توجشو الدار..رغم انه دازو فيها خلافات كثيرة لكن الاحلى ديما كيبقا راسخ فعقوولهم

بدات حياتها فالغربة لكن هاد المرة مكاينش ملل..التوأم مكيخليش ليها فين تمل ولا تقنط ولا تمشي عند عليا كتبقا مقابلاهم النهار كامل كيجي هو دغيا ويسالي شغالو باش يدوز معاهم وقت طويل

دخل بعد قدومهم بشهرين للدار هاز فيدو السوارت والتيلي كيلقا هدى هازا شامة قدامها لي كتخرج لسانها ليه وقالت بصوت طفولي:بابا ديالي جيتي

عبدو:(باس هدى ففمها)الحب(شد شامة)

هدى:هههه كاينا خميسة

عبدو:مزال ممشاتش(باس شامة)بابا ديالي اشنو !!!فاتها شويا الحال

هدى:غي كتضور فعينيها اما لاخر غي نااعس النهار كامل وفليل يسهرني

عبدو:هذااك سكايري بحال بااه هههه

جات خميسة المساعدة المغربية لي أصر انها تكون مغربية كتشقا ليها وتطيب ليها وتجمع الرواين وهدى شغلها هو تربي ولادها وترتاح فقط

خميسة:ختي هدى ساليت

هدى:شكرا بزااف احبيبة

عبدو:شكرا اختييي

خميسة:بسلامة

عبدو:كاين شي عشا!!

هدى:سي طيباتو خميسة هههه انا مقدرتش كاع ندير شي حاجة كيسهرني عبد الله

عبدو:هضرت مع الواليدة سلمات عليك

هدى:قويتي علي من هضرت مع الواليدة

عبدو:(خمس ليها كيضحك)مباغيانش نهضر مع مي

هدى:هههههه وليت كنلقا اش كلينا عندها...صدقتي ولد مك

عبدو:(مفتاخر)باغياني نكون ولد مك نتي هههههههه راه مي

وبالفعل عبدو ومو علاقة حب لا تنتهي..بالقطيعة لي قطعاتو سنين خلاتو يمسي ويصبح ويتغدا ويتعشا بها..كيفيق فالصباح يفطر مع هدى يعطيها وقت هي وولادو وغي يخرج يصوني لمو ابيل فيديو من الطوموبيل..ها اش فطرنا ها اش درنا ها شنو غندير ها فين غنمشي ومع هي بعادتها كتفيق بكري كتبقا كتهضر معاه وتشد معاه جماعة..مزال مكتعيط ليها هدى كتلقاه سرسب ليها كلشي..ولادو يضل يصور ويصيفت ليها وحتى هي لبيبة وحلوة فتعاملها مكتبخلش باتصالاتها عليهم

يوم ورا يوم وتلاتها الشهور كيدوزو على مجمر الغمة وميكروبتو فالغربة ..الامومة والابوة بدلات فيهم بزاف..اكيد ديما المخاصمات على نفس السبب..الشك ديال عبدو وخريج هدى..مزالو كيفما هو..يجي فلبل ويقلب تيليفونها الكاميرات فالدار ضروري منقصش لكن كيعوضها فبلاصة خرا ..كيحن فيها وهادي هي نقطة ضعفها..مبقاش كيسهر نهائيا غي يسالي يجي لعند ولادو مرتاح عارف راسو رابطها بالولاد

الدراري دارو تسع شهور وبداو ملامح وجههم كيتفرزو..شامة نسخة من خيرة اما عبد الله مكيشبه لحد لي شافو يشبهو لشي عم باه ولا خالو ملامحو مكيشبهو لحد..فالصحة شامة جايباها عليه هو دغيا كتحركو المرضة..

فتقلباتهم وفتربيتهم وحتى فحياتهم ولات معنى...الدار لي كانت بستيل عصري فيه اي حاجة تعجبك وتونسك ولات عبارة عن غرفة ألعاب...المساعدة ضرورية ليها هي مكتشقاش كاع مقابلة عي الدراري وعليا..تمشي وتجي عندها..كتنوضها مع عبدو ويتغاوتو ويخرج عارفها معندهاش فين تمشي زيرها بالولاد

فليلة صيفية بامتياز جالسة هدى ببجامة بيتية هازا عبد الله عندها كتوكلو بحكم فاتو الستة أشهر يقدرو يوكلووهم وعبدو حداها كيتفرج ورجلييه كتحرك الكونة ديال شامة لي دايرا سكاتة ففمها وكتشخر...صونات عليا وناض حل عليها هازا محمد لي كبر وولى غي كيتخرك باغي يكتاشف

عليا:سخفني هههه

هدى:نتي غي واحد انا جوووج(كتعطيه ياكل)هذاا راه معندوش مع الخضرة

عبدو:عطييه اتاي صحراوي..فين راجلك!!

عليا:ديبلاصمون (شافت فشامة)خامرة عاود

عبدو:نعيييسة هادي بحال مها هههه

سمع الصونيت وقال:جاي وراك شي حد!!

عليا:لا

مشا حل الباب على نيتو حتى كيلقا مو وباه..عينيه تشرعو بالفرحة وبسرعة البرق عنق مووو لي الضحكة مرسومة على ثغرها وقلبها فنفس الوقت..وقفات هدى كتضحك ممثيقاش وكذلك عليا حيت مفراسهوومش واش جايين

عنق مو بحرارة وبدا كيبوس فراسها ويديها وداز للباه..عاد هدى وعليا تسالمو معاهم بحب وحراراة...مدات لخيرة عبد الله نزولا عند رغبتها

خيرة'(بشوق كتعنق فيه)الله الله على ولدي...ولديي مسكييين الله على حبيبي(كتبوووسوو بشغف)

الحاج:(شدو منها)ولديي تبارك الله على الزييين ههههه

شاف فيهم عبد الله وضور وجهو عند مو كيتجبد عندها كيجمع فالبكية حيت معرفهمش...دخلو كامليين للصالة وهزو ولد عليا كيبوسو فيه..

الحاج:هاد الحادكة ناعسة!!كاع هاد الهضرة ومزال ناعسة

هدى:نعاسها ثقيل بحالي هههه

دورو عبد الله بناتهم فانتظار تفيق شامة...والاحاديث كضوور عليهم من هنا ولهيه عن الحال والاحوال ..عبدو لصق حدا مو معنقها ويضور ضورة ويبوووسها فحنووكها

ناصت هدى بمساعدة عليا وجدو عشيوة ليهم بلا زواق بلا احراج عائلة بيناتهم وعارفين بعضهم..والدراري كينغنغو عند رااسهم

تعشاو وسلاو وعمرو اتاي وتجمعو عليه من جديد ..حتىنطق الحاج:انا غي قلتي ليا اشنو ناوي هبطت دغيا

خيرة:اشنو ناوي!!!

عبدو:انا غي نويت..نفذ صعييب

الحاج:ماصعييب والو..الغربة لي صعيبة راه دوزتيها

هدى:شنو ناوي!!!

عبدو:غنرجعو فحالنا للمغرب

عليا:(خرجات عينيها)شنوووو!!!وانا لمن تخليوني!!

عبدو:فكرت وعاودت..تولد ولادك وتربيهم فالغربة أكبر غلط..كيكبرو فالمغرب وكيطلعو حاشية

عليا:وانا!!!

عبدو:نتي أ عليا راجلك ميمكنش يخلي بلادو..انا عشت وتغربت بزاااف مبغيتش نبقا بعيد على والييديا

الحاج:أحسن ماقررتي

خيرة:(الابتسامة عمرات وجهها)والله الى أحسن حاجة..الغربة صعيبة باك دوز قيها نص عمرو اش ربح!!!الفلوس!!!ايييه ومدوز معاكم والو...انا المباركة يعيشو معايا حفايدي(باست شامة)ياك الميمة

شامة:ممنننننننن

هدى:احسن حاجة ههههههه المغرب ممبحالو حتى بلاصة ولكن علاش معلمتيني بوالو

عبدو:حيت نتي غي غنقولها ليك غتبقاي كل صباح امتا نمشيو!!امتا نمشيييو

هدى:هههههه باااز

الحاج:بيع كلشي ونزل للبلاد...دير المشروع لي بغيتي وقابل شغلك وشغلي انا راه عيييت باغي غي نصبح ناعس ونفيق نلقا ولادك عند راااسي

حطات ليه هدى عبد الله فوق راسو شاداه مزيان ليطيح وقالت:هاني أ با سيدي

ضحك وشدو منها وقال:شفتي هههههه

عليا:(بحزن)عاد غنحس بالغربة مزيااان...الله يسهل علييكم

عبدو:(ناض باسها فراسها)الحياة هي هادي..ديما خصنا نزيدو للقدام

هدى:انا مغنسخاااش بييك والله

عليا:(طاحت دمعتها)كون تشوفي انا وبهاد المعجنة ديال بنتك هءهء

مشات عليا لدارها هازها فقلبها حزن كبير..حيت ولفات عبدو ومراتو اما هوما ناضت هدى كتنعس شامة وحتى الحاج مشا نعس بقا غي عبدو لي هز ولدو عندو حطو على صدرو كيحاول ينعس فيه..حط راسو على رجلين خيرة وولدو فوق صدرو..غمض عيينييه وقال:الواليدة حكي ليا شعري

خيرة:من صغيراتك ههه حتى درتي الدراري عاد بديتي تفشش

عبدو:مزال غنتفشش(كيطل بشويا على عبد الله)هذاا راه عساس غيبقا سهران تاني ويسهرها ليا عاود

خيرة:مالك مسموم!؟؟كتعاود ليا مسكينة اش كدير ليها

عبدو:غا كتزيد فيه مدرت والو

خيرة:نقص شويا واش باغيها طج!!

عبدو:معندها فين طج!!ثقلتها بالدراري ههههه

ضحكات خيرة ويدات كتحك فراسو حتى غفا هو وتبعو ولدو لي محطوط على صدرو فمنظر زويين بزااف لقاتهم هدى لي نعسات بنتها..ضحكات وقالت:راسو قد الصخر وحاطو عليك

خيرة:خلييه يرتاااح شوفي حتى عبد الله نعس

هدى:دابا يفيق نعاسو خفيف بحال باباه..علاش مجاتش وهيبة!!

خيرة:راجلها هههه ملي بدات كتوحم وهو كيخاف عليها

هدى:الله يفكها على خير..مافيكش النعاس

خيرة:شويا ونوووض

****"*

دوزو معاهم بعض الايام لي دازت كلها فرحة وسعادة وأنس وألفة..مسخاوش ببعضهم لكن خصهم يرجعو..والقرار تخااد لي هو العودة للمغرب🇲🇦🇲🇦

هي فقط مسألة وقت باش يلقا الشاري لمشاريعو ويصفي بعض حساباتو ويرجع لبلادو وبالفعل مجاتش فين تدوز ثلاثة أشهر حتى كان باع كلشي خلى غي الدار بوحدها..جمع الحصيصة او بالاحرى مقابل الغربة وجمع حوايجو مخلى حتى شروييطة وبالبكا توادعات معاهم عليا لي مسخاتش وقصدو البلد الحبيب"المغرب" بعدما ولادهم وصلو للعام وبدات رحلة الاكتشاف والمشي عندهم

فالمغرب كانت خيرة عاطياهم طبقة وفبيت ابنها عبد الله عاودات الفراش والاصلاح ودارتو بيت لحفايدها بكل حب..فقلبها غيبقا الابن لكن الاحفاد لي حيين اولى..فرشاتو كيف حبات وزيناتو ومخلات مدارت ليهم وتسما بيتهم..الفرحة فرحتين عند هدى اولا تهنات من الغربة ثانيا لقات لي يفكها من عبدو ولي يضور فيه

وبالفعل كانو كتخاصمو وتصالح خيرة..وطبقتهم راه مكيوصلها حد عايشين فيها حياتهم الزوجية لي ماتبدل فيها والو...بقا نفس الحب ونفس المعزة والاحترام بقا عبدو كيفما هو كيحبها حيت هي هدى وكيغيى عليها بنفس الشكل وحرم على دراهم يعتب البراني عتبتهم وهي كاينة داير ليهم الحصار...كتعيا تهضر خيرة ويهضر الحاج ولي فراسو فراسو

الدراري كيكيرو شويا بشويا هنا عندهم عام وهاهيا عامين وها ثلث سنين حتى وصلو ست سنيين..توأم غير حقيقي مكيتشابهو فوالو كاع..ست سنين عاشوها مع واليديه مشافو منهم غي الخير عاوناتعا خيرة فالتربية والسهير وفوقت الفراغ كتعلمها الطياب اما العشية راه كدير بها السبة للصال...فحين عبدو راه حل ريسطو ديالو وشد شغال باه هو لي مكلف بهم بالاضافة لاجونص ديال لوكاسيون ديال الطوموبيلات الاوت كام..باختصار فلوسو حطها فمشاريع صحيحة

ست سنين دازت برمشة عيين كبرو فيها التوأم وزادو ملامحهم باينين خالقين جو زوين فبيتهم..هوما لي منورين على خيرة وللحاج الدار

دخل فالعشية شاد فشامة..ابنتو الوحيدة لابسة كسيوة بليية وطالقة الشعر كحل طايح على عينيها بلقة ووجها غي خيرة والحزن مكتاسي وجهها الطفولي باينا معندها خاطر..شادا فيد باها بغير خاطر ...تلقات ليها خيرة بايتسامة قايلة:بنتييي

طلقها مشات عندها وهي تهزها معنقاها وقالت:مزيانة!!وليتي شويا!!

حركات راسها بطفولية بالسلب والدميعات قربو ينقزو من عينيها وقالت بصوت كيقطع فالقلب:لا

عبدو:(ساط)هادشي لي مبغيييتش

داز فيهم مخلي خيرة كتحزر وتبزر حتى تبعو عبد الله لي ضعيف ومكيشيه لحتى واحد فيهم زينو بوحدو ولكن باااسل بزااف كيطير مع الطيور جار شكارة ديالهم بجوح وقال كينهج بصوت طفولي:عففففف عييييت

خيرة:اجي اولدي اجي نعطيك كاسكرووطة ديالكم...صايبت قراشل زوييينيين

عبد الله:نتي الميمة(صيفت ليها بوسة)حلوة

خيرة:الله يرضي عليك

طلع عبدو مخنزر ماعاجبو حال للفوق لقاها كتنشف شعرها الفازك..مزادتها السنين غي جمال عمرات وقادات الفورمة مع مداوما لصال رجعات رشيقة كيف الاول..تبسمات ليه وقالت:جيتو!!فين الدراري

عبدو:مع الولليدة

هدى:مالك.كتسوط؟؟

عبدو:نهار باقي تقولي ليا نجيب ليها شي مشة ولا لفعا نتفاهم معاك

هدى:مزالا مقلقة!!!

عبدو:مهضراتش الطريق كاملة والبكية مشدودة فيها غي خافت مني تطلقهم..اش بيني وبين شي مشة تربييها

هدى:واراه عادي المشاش كيموووتووو

عبدو:الالة منربيييوش..ماشي مشة تموت وبنتي تفقص

هدى:انا كاع مقلتي ليا هاكا فاش ماتت عويشة خسرتي علي غي نجيب ليك وحدة خراا

عبدو:هادي راااه بنتييييي

لاحت الفوطة كتضحك عليه حتى كيتهزو حنيكاتها وجات تلاحت عليه جالسة فوق رجلييه وسرعان مادور عليها يديه وهي تقول:ياك !!!شامة عز عليك مني

عبدو:هاديك بنتي ونتي نتي

هدى:ههههه كنشوفك كيضرك خاطرك عليها بزااف

عبدو:الى نتي ملاحظتيهاش بنتك هشيشة رطبة بزااف مشبهاتك فوالو..شامة الى تقلقات كتبقا تبكي غي بوحدها وكتيان فوجهها

هدى:هههههههه مشبهاتني فوالو...كتجيني حنينة بزاااف

عبدو:(تبسم)أحسن شااامة هي بنتي هههههه نوضي شوفيها خليتها مع الواليدة الى بغات نخرجهم يلعبو شويا

هدى:(باستو فحنكو)واخ

ناضت من عليه وتمات هابطة كتجر رجليها الحميمرين طالقا شعرها نصف مبلل على كتافها وكتنادي:شااامة شامة

خرج عبد الله امامها هاز كاس ديال اتاي فيديه وكرص فاليد لوخرا قايل:ماماتي

هدى:(تحنات باستو )الحب دبال ماما...كي ضليتي مزيان؟؟

عبد الله:مزيان..ذووقي المبمة صايبات ليا قراشل

هدى:بصحة ولدي ديالي..فين ختك

عبد الله :كدمع على الميمة

تنهدات وقصدات بلاصتهم لقاتها فعلا فحضن خيرة لي كتحزر وتبزر باش تاكل وهي تقول:شامة(بصوت حنون)اجي أماما عندي

هبطات من عند جداها وهزاتها هدى فحضنها وجلسات بها كتهضر معاها بالهداوة:أبنتي واش ماعيتيش...كتفقصي راسك ..

شامة:(مدلية شفايفها)مشيشتي ماتت ليا

هدى:الله يرحمها..وشنو تبقاي هاكا مفقصة!!!باباك مقلق حت نتي مقلقة

شامة:مبغيتش بابا يكون مقلق

هدى:سيري عندو دابا بووسيه وقوليه يخرك تمشي تلعبي شويا فالالعاب باش حتى نتي تولي مزيان

شامة:(بغير خاطر غي كتحرك راسها)واخا

طلقاتها ومشات فاتجاه طبقتهم وهي تنهد هدى'كتخلعني فيها هاد الرطوبية فيها

خيرة:حنينة بنتي مسكيينة دغيا كتهرس

هدى:مصالحش ليها هاكا..معرفتها شكون شبهات..!!!(ضحكات لعبد الله)ونتا اداك الجن!!!قريتي مزيان

عبد الله:كي.ديما

خيرة:غتكبر تولي طبيب ديال الركابي تداوي الميمة ديالك

عبد الله:(تخشا حداها)زيديني اتاي الميمة ونولي طبيب

طلعات شامة بشويا عليه فالدروج وكتعيط بصوت طفولي حنين "بابا بابا" هاد الاخير كان كيكمي طفاه بزربة وتوجه لعندها:شاامة(نزل للارض معرض ليها هزها بين يديه)مالك ابابا!!

شامة:(الراس مخشي بين كتافها)نمشيو للالعاب

عبدو:دابا ابابا(كيمسح على وجهها)شوف بنتي شحال زوينة(باسها فحنكها)ندي بنتي للالعاب

شامة:وتلعب معايا!!

عبدو:نعلب معاك غي متقلقيش ليا ابنتي...مشات مشيشة نجيبو وحدة خراا

شامة:الله يرحمها مشيشتي(هبطات دميعات كي الجوهر طاحو جمرة فقلبو)

خشاها فحصنو مزير عليها وكيهدن فيها بكلمات عذبة وطيبة عمرو فحياتو ظن يخرجهم من فمو مع شي بنت...ولكن اشنو بيديه يدير..هادي" الابوة"

بالفعل خرجها هي وعبد الله وهدى اما خيرة عتاذرات بحكم غادية تشوف صحاباتها..خداوهم للالعاب..عبد الله راه كينقز بحالا مركبين ليه البريز اما هي راه كتلعب بالهداوة والتاويل كتمشي غي للالعاب الساهلة ولي مافيها تنقاز بزااف

ومن بعيد حاضيينهم عاصر على قهوة مكرهش يجبد معاها كارو وحشم من ولادو..وهي تنطق:مالك!!

عبدو:كنخمم (تبسم)اشنو الميكروبة مافيكش لي يولد

هدى:ولد هاد المرة نتا ههههه (شافت ناحية عبد الله)غيحي على راسو

عبدو:هذااك؟؟لالا حاضي رااسو كنخاف على شامة كثر

هدى:هاد الساعة خاف عليها من راسك..واش وليتي غي حاضيها!!بعد من الدرية

عبدو:انا اصلا تخلقت غا باش نحضيك نتي وياها

وصلها ميساج فالسناب دخلات تشوفو لقات سناب تاع ختها من سيارتها لي شرا ليها علي وقالت:شووف..

عبدو:ختك ولات غا كتسوق مكتعمرش الدار

هدى:(ميقات فيه)شفتييه بعدا جاب ليها طوموببل ونتا عزيتيها فيا!!

عبدو:(هز حاجبو)نتي ندير ليك الطوموبيل منلقاكش فالدار..اللهم خلييك هاكا انا نديك ونجيبك

هدى:غاديين فسبع سنين ديال الزواج ومزال مكثيقش فيا

عبدو:غتعاودي تخربقي ليا عقاي بهضرتك!!اش جاب الطوموبيل للثقة!!!

هدى:شوف نتا

عبدو:من غدا ننزل ليك اخر مكاين ولكن نتي هضرة جوج تهزي ولادك وتزيدي ونتخور انا؟؟لالا ههههههه

هدى:بشااار كي.داير

جا عبد الله كينهج قايل:بغيت نشرب

عبدو:بشويا عليك معامن مسابق!!(كيمسح ليه وجهو)

عبد الله:مع داك الولد رااه لهيه

هدى:لعب مع ختك شويا!!!

عبد الله:لا..مكتعرفش

مشا كيجري من جديد مزنك بالحركة والعرق مخليهم كيشوفو فيهم بحب وراحة

*****

الوقت كيدوز والسنين كتجري ورا بعضها لي تزاد البارح اليوم كبر وولى راجل ولي مات البارح اليوم ولى ذكرى وهذا حال هدى مع أسرتها الحنونة كيف كتسميها بحكم عايشة فحب مع حماتها وشيخها لي مشافت منهم غي الخير والاحسان..وكتنعاكس معاملتهم كذلك مع ولادها

عبد الله ..شامة...ياقوت وعبد الرحيم هوما ولادهم...ياقوت لي حملات بها ورا التوأم واليوم راها ف عمر 15سنوات...عبد الرحيم لي فعمر 9 سنوات..الاحفاد الاربعة لعائلة رزقي ولي معمرين على الحاج دارو ومونسينو فشرفو ولي تخيلة راه وقع..كان متخيل حياة زوينة فيها عائلتو وولادو وولادهم وعاشها بالفعل..دارمافيهاش السكات نهائيا ديما الهضرة مع الاحفاد والخصام ديال عبدو وهدى لي عاد مزال تطور

كدير عكر لفمها وهو طالق كاسيطتو كيف العادة..بداه الشيب ولحمو كولو بيييض ..نفس الضخامة ونفس الوقفة واكيد نفس الشوفة ديال مجمر الغمة مكتبدلش ..لاحت العكر بانزعاج وقالت:مغتساليش!!! براكة انا عييت ونتا لا

عبدو:اش غتمشي ديري فهاد العراضة!!

هدى:نشووف وجاه الناس ..حشومة مك مغتمشيش وميمشس حد اش غيقولو الناس

عبدو:يقولو لي بغاوو حنا مالنا...

هدى:واش باغي تفقصني..خرجتي فيا الشيب بلا وقت

عبدو:سيري تجلسي مكاينش خرووج

هدى:والله وماتحيد.من قدامي حتى نجمع عليك النااس(بصوت عالي)خاللتييييي

جات خيرة كتعجز فرجليها..شرفات والزمان خدا منها الزين وبقاو حروفو ..وقالت :أ مالكم!!

عبدو:نتي مولات هاد البلانات الواليدة؛!!

خيرة:واش مغتوووبش فففف سيري سيري ابنتي الله يرضي عليك وقولي ليها تسمح ليا ماجيتش

هدى:(كترش ريحتها)مبلغ اخالتي..حضي ولادك حتى نجي

خيرة:غتمشي معاك شامة

هدى:ضروري

خرجات خلاتو كيتكردد ومو كتهدن فيه وتشرح ليه وهو غي مكيغوت..متسوقاتش كاع نهائيا لهضرتو حييت حفاتها على مر السنين..مشات دقات فبيت شامة قايلة:شااامة خرجي قبل مايجي يحبسنا

بصوت انثوي وبحة نطقات:هاني جااياا ..طاحو ليا حلقاتي

خرجات من غرفتها كتقاد فحلقتها ديال الذهب لي على شكل فراشة صغيرة ..شابة عشرينية فمقتبل العمر..بعيون سوداء وشفيرات كثاف مع شعر أسود فايت كتافها طالقاه براحتو منسادل عليها..بماكياج خفيف برز ملامحها لي كانو نسخة على خيرة...الفرق البسيط شامة رشيقة مغليضاش بحالها...سبقاتها ريحتها وقالت:هاني

هدى:(بابتسامة حب)جيتي فنة الله يحفظك من العين

شامة:(باست مها)نتي أحلى الميكروبة هههه

تشداتو الايدي وتمو خارجين مخلينو غيبخ الدم..مع حلو الباب تلاقاو ياقوت المراهقة الجميلة لي نسخة طبق الاصل من هدى..هازا صاك ديال لصال وبلباس رياضي بتاسمات:الزاز شي عراضة عاود

هدى:(باستها)الياقوتة ديال قلبي...كي دازت الحصة!!

ياقوت:غززالة ..حيدت الستريس

شامة:بصحتك...امتا غتلعبي!!

ياقوت:اخر الشهر ..الميمة كاينة!!

هدى:سي راه كاينة..جدك راه لتحت متكي..وباباك محيح ههههه

ياقوت:على وديت العراضة!!!كاع هذا حب فيك

هدى:(كتقلب فشفارها بعيون البن لي مزالين محافظين على نفس البريق)بحلاوتي هههه حتى نجي ونحزرو

ياقوت:ياله باي ههه

دخلات وخرجو هوما..جبدات الكونطاكت من صاكها الصغبر لي متناسب مع جلابتها فاللون الخزي مطرزة من اليدين فقط ..بليطالون والاناقة كتقطر منها..حلات السيارة وطلعو وهي تنطق هدى:شفتي كون دابا انا عندي حتى انا حديدي

شامة:(بابتسامة)هههه بابا مسكين

هدى:انا لي مسكيينة ههههه معرفتش خوك واش وصل!!

شامة:(مركزة فالسياقة)منظنش..(طلقات الراديو)مممم

هدى:نخلي ليه ميساج

شدوها نيشان للعراضة ديال صديقة خيرة ولي مشاو باش ينوبو عليها بحكم مؤخرا ولات كتعيا وجهدها تقادا مبقات كتقدر على صداع كتصيفت عروستها تنوب عليها وكينوض هو يحيح مكيعجبووش الحال..مرة يحبسها حتى كتبكي ومرة يخليها وينكد عليها...دخلو ورحبو بهم اشد الترحيب وحتى هوما بالكبرانية مشااو..وسط صالون تقليدي مغربي جلسو منهم من النساء لي البعض منهم كيعرفوهم والبعض الاخر لا

كانت عراضة نسائية مع اللعابات لي نشطو ليهم الدعوة نيت ..بقات فيها هدى بلاصتها اما شامة شطحات بالتاويل شويا ورجعات لبلاصتها وفالختام سالاو عراضتهم وخرجو فحالهم فالعشية مع جوايه الستة ناشطين ماشطين ومجمر الغمة كيتركدد

وصلو للدار دخلو كيسمعو السقيل حتة تلاقاو خيرة لي قالت:حيح حتى عيا وسكت

هدى:نمشي نشوفو ههههه

شامة:ههه سيري انا غندوش نبدل علي ونخرج عندي كووغ مع الثمنية

هدى:فراس باباك؟؟

شامة:اه

خيرة:سيري ابنتي الله يرضي عليك(بقلق)وليدي عبد الله وصل ولا مزال؟؟

هدى:(ذرعاتها غاديين للصالة)وصل خلا ليا ميساج قبيل علمني بلي وصل غي هني بالك

خيرة:(بقلق)ولدي مسكين متبوع بالعين ..كنخاف يسافر بوحدو

هدى:ياراه عندو 21 سنة قربنا نزوجوه وباقي كتخافي عليه

خيرة:ولاد عبد الدائم معزتهم بوحدها

هدى:الله يخليك لينا اخالتيياربي حتى نتي عزيزة عليهم كثر مني هههع

خيرة:هههههه

هدى:نطلع نشوف مجمر الغمة واش تفش

خيرة:بلا صداع..غي بشويا

طلعات كضرب بطالونها والزين كيعطي منها ..كتشم ريحة الكارو فالطبقة ..دورات عينها بان ليها فبيتهم كيكمي...دخلات وقالت بهدوء:السلام

عبدو:(بنرفزة)على سلامتك..ديك ساعة باتي

حطات صاكها بهدوء وقالت:عفااك أعبدوو

توجهات حداه جلسات وشدات فيديه كتمسكن:متنكدهاش علي...شفتي راه دغيا جيييت

عبدو:كانو الرجال؟؟(بتشكيك)

هدى:ويلي لا

عبدو:حلفي

هدى:والله (باستو فحنكو)نشطنا شويا وجينا وحتى شامة رتاحت وفرحات شويا بدلات الجو والله

عبدو:وعلاش ياقوت لا!!علاش مكتدييش ياقوت معاك!!ولا حيت باغيا تزوجي البنت ياك!

ضحكات بجهد وقالت:ميكرووب نتااا ههههه نتا ميكرووب..ياقوت صغيرة على هاد الجماايع ..شامة براسها مكنديهاش حتى كبرات..وياقوت راه عندها مسابقة كتريني ممسالياش ليا ولا لعراضاتي..مركزة فمسابقتها

جلس كيمص فشفايفو ويعاود مقنعاتوش وقال:وفين شامة؟

هدى:غتمشي عندها كور مع الثمنية

عبدو:انا لي غنديها(وقف)

هدى:عبدو رخف رخف شويا على البنت

مجاوبهاش ناض بدل عليه قدامها وهي غي كتشوف تتحبس الضحكة..مباغيش يتبدل كاع حتى حس بالحركة فالطبقة ديالهم عرفها شامة..خرج عندها كي العسكري..طلعها ونزلها مسكانيها ..لقاها لابسة كسوة فالاحمر صيفية نص كوم مزينة بوريدات بيضين هازا صاكها فيديها وصنيدلة بلا فرجليها صابغاهم بالحمر ..نبسمات ومشات عندو نيشان باستو فحنكو كتعلى بحكم طويل عليها وقالت:بابا ديالي

عبدو:الله يرضي غليك..غتمشي للكور!!

عبدو:طريقي هاديك ندييك

شامة:(عايقة به)واخا

تأبطات ذراعو وخرجات هي وياه مبسمة طلعات حداه وبدا كيسول فيها وهي كتسرسر ليه حابسة الضحكة"اش دارت ماماك فالعراضة..غنيتو!!!شطحتو!! شكون كان"

حتى وصلو امام المركز ديال الموسيقى وقال:تسالي صوني ليا نجيبك

شامة:(باستو فحنكو)واخا

نزلات كتمشى بشويا عليها حتى دخلات للسونطر بكل هدوء كتحس بها ناعمة كالقطن..وهادئة بحال الظلام..تبسمات لاحد زملائها لي هاز العود ديالو فيديه وقالت:جا البروف!!

...:يس

دخلات رفقتو ولقاو مجموعة من المتدربين كل واحد عندو الة ديالو خاصة بالموسيقى لي كيحتارف...حيات استاذها ومشات شدات بلاصتها على البيانو بجلسة مستقيمية..الظهر واقف والاكتاف مهزوزةبالقرب منها الميكرو ..نطق الاستاذ:شامة بداي بمقطوعة"*****"

بدون ماتجاوبوو بداو اصابعها كيعزو ببراعة على البياانو ووذنيها مطلوقين كيسمعو العزف بحب وشغف ..كتحرك فيهم كي الفراشة..كتغازل البيانو بمعزوقة اقل مايمكن القول عنها انها روعة❤️❤️

بأناملها الخفيفة بدات كتعزف مقطووعة زوينة مركزة مع العزف وكتسمع للانغام لي كتخرج من يديها او بالاحرى كتغازل البيانو فليلة صيفية عابرة..البقية كانو كيسمعو ليها باهتمام بأذن موسيقية جميلة ...وفنفس الوقت بداو حبالها الصوتية كيغنيو أغنية الرائعة "ADELE" تحت عنوان "set fire the rain"

شامة:

I let it fall, my heart

And as it fell, you rose to claim it

It was dark and I was over

Until you kissed my lips and you saved me

My hands, they're strong

But my knees were far too weak

To stand in your arms

Without falling to your feet

But there's a side to you

That I never knew, never knew

All the things you'd say

They were never true, never true

And the games you play

You would always win, always win

But I set fire to the rain

Watched it pour as I touched your face

Well, it burned while I cried

'Cause I heard it screaming out your name

Your name

كانت كتغني بصوت دافي بزاف وخفيف رغم انه الاغنية قوية بزااف هي رحعاتها بصوتها الناعم هادئة...خلات كلشي يتفاعل معاها بالتصفيقات..دازو لدروس اخرى بالات اخرى..كتشوف الناي والكمان كيلعبو رفقة البيانو فحصة تدريبية اقل مايقال عنها انها روعة..خففات فيها توترها وحيدات تعبها من الدراسة لي كتهلكها..محساتش براسها حتى دازت ساعة ونصف ...هزات اغراضها وخرجات حتى سمعات اسمها بصوت رجولي:شامة

شامة:(بابتسامة)منعم لباس!!

منعم:(شاب فمقتبل العمر مسرار )صافا ونتي!!

شامة:حمد لله

منعم:بغيت نقوليك بلي صوتك زويين بزاااف

شامة:(ضحكات بحياء)ديما فينما كنغني كتقولها

منعم:هههه حيت كل نهار كيزيد يزياان هههه (بالفرنسية)عندك وقت نشربو شي حاجة؟

شامة:لا غي سمح ليا (بأسف)بابا كيتسناني

منعم:معلييش مرة خراا..تقدري تخلي ليا نمرتك(شافها غتحجج)عفاك

شامة:(حشمات تقول لا)اوك *******

سجلها وهي تودعو كتسوط ماشي حيت محملاتوش انما حيت توترات بوقفتها معاه وهي كتحس بيه كيكن ليها مشاعر اعجااب..خرجات برا كترحع شعرها جنب حتى كتشوف سيارة باباها الفخمة..تبسمات براحة ومشات طلعات حداه..باستو فحنكها وقال:كي دازت الحصة!!

شامة:غزاالة

عبد الرحيم:(الاخ الاصغر)الشيخة ديالنا!!!

ضحكات بعفوية وقرب منها باسها فحنكها مراهق بنكهة مجمر الغمة كيشبه ليه غي هو فيه الضحك والتكركير ..قالت:والشيخة سهلتيها!!!

عبدو:(تحرك)هذا راه مكيفهمش فالفن أ بابا هههه

شامة:دوزنا خصة زوينة بزااف(حبدات التيلي كتوريه شنو صورو وشنو كيصيفتو ليها)شوف غنييت اليوم تاني

عين معاها وعين مع الطريق لكن وذنيه كلهم مع الصوت العذب مبسم مكمش عينيه كيتنغم ..وبحب قال:صوتك زوين من ديما كنقولها ليك..فوتي ليا غي الشعبي

شامة:علاش ابابا!!راه حتى هذاك فن..كيبقا art من الفنون فالمغرب..ثقافة ديالنا

عبدو:كيبقا شعبي هههه غني ليا الملحون والغربي

شامة:المغني الواعر كيغني كلشي يقدر يغني الراي..والراي..الغربي وحتى الشرقي ويتحكم فمقامات صوتو لراسو

عبد الرحيم:وعلاش كنقرا انا!!نخدم مغني

عبدو:بصوتك اولدي غتهرب الناس هههه

كملو طريقهم فحديث حميمي جدا..من ديما عبدو قريب لولادو..شامة وعبد الله كانو اول الاولاد كان التركيز عليهم مباغي يفلت حتى تفصيل لسبب واحد هو يبقاو تحت سيطرتو..وملي تزادو لوخرين كملات عندو الباهية..هو لي كتاشف كل واحد فيهم لشنو كيميل

عبد الله القراي ديال العائلة عطيه بيرو وكتوبة ووراق وخليه يحفظ ليك المقرر السنوي فسيمانة...شامة الغناء وهي اصلا من صغرها كتلعب بالطعريجة وكتغني مع اي حاجة سمعاتها وتزادها حتى الحس الموسيقي...اما ياقوت هاديك كيف كيسميوها"الجرانة"حيت هوايتها السباحة..من صغرهل عزيز عليها الما تعلمات تعوم فسن صغيرة كيعجبها تدخل فالماج وتتحارب...اما عبد الرحيم هذاك هو الكيدار ديال الدار..ميقرا مايحفظ مايدير هواية عطيه الضحك والتكركير مع العيالات وخرج وخليه

وصلو للدار ونزلو كامليين لقاو خيرة ومساعداتها الاثنثين وجدو العشا..وهدى بلباس بيتي طالقة شعرها طبيعية كتحط فالطبلة..مشات شامة تبدل والباقي للصالة فين كان الحاج ..لي مخدا منو العمر غي الصحة ..والشرف تزادو..شاد عجازو وجالس فقاع البيت كيتسنا قدوم البقية ..كيفرح فتجمعاتهم الليلية لي ولى اجباري عليهم يتعشاو مجموعين

ياقوت:(كتفوت)غنموت بالنعاس أ سيدي با

الحاج:تعشاي ابنتي ونعسي(كيلعب فشعرها)شعرك مزال فازك غتمرضي

ياقوت:(بابتسامة ديال هدى)أنا بنت الما هههه

عبدو:لالةياقوت

ناضت باستو وتخشات فحضنو قايلة:بابا ديالي..

عبدو:صافا !!كيضليتي

ياقوت:لونتريما..مبقاش بزااف ونبدااو

عبدو:ان شاء الله خير ابنتي(دخلات هدى وشاف فيها)الواليدة فينها

هدى'هاهيا جايا كتوصل غي فاطمة وهنية للباب

حرك راسو بتفهم وجلسو كاملين مجموعين على الطبلة حتى دخلات شامة وخيرة دقة وحدة..نسختيين من بعض بفرق بسيط هو العمر والحجم..وفجو عائلي بامتياز كيتعشاو وكيتبادلو أخبار نهارهم كل واحد.كيعاود على شنو دوز

خيرة:وليدي عبد الله عزيز عليه هاد الطاجين

عبد الرحيم:كنغير الميمة كنغييير

هدى:خالتي تموت على داك الشطابة ههههه

شامة:الميمة راه كديري الفرزيات!!

خيرة:سيرو بعدو مني..لي غاب فيكم كيعز علي

ياقوت:كتبغيه كثر منا هههه سيدي با لا هههه

خيرة:بااز ليكم

عبدو:انا مبقيتش كاع كنبان ليها..ولادي خداو البلاصة

خيرة:الكبدة المعاودة هههه

تعشاو بنفس المنوال..جلسو شربو اتاي وبعدها ناضو الدراري ينعسو وتبعوهم البقية..طالعة هدى جارا عبد الرحيم :نعس بكري نلقاك هاز التيليفون نتخاصم معاك

عبد الرحيم:كوني هانيا أ ماما(باسها)تهلاي فمجمر غمتك

ضحكات من كلامو ومشات لبيتها لقاتو كيستاعد ينعس..هزات كريم ديال يديها كدهن ومشات تخشات فيه كتمحكك عليه :مالو مجمر الغمة

عبدو:غا مبرزطاني الخدمة

هدى:توحشتك

عبدو:مكنبان ليك حتى كتسالي العرايض هههه

*****

فغرفتها متكية ففراشها هازا تيليفونها حتى كيوصلها ميساج من نمرة ممعروفاش..دخلات لقااتو منعم كاتب ليها:شامة

شامة:(كتكتب)اهلا لباس

منعم:(فالبلاصة)لباس ونتي وصلتي مزيان!!

شامة:مزيان

منعم:(بارطاجا معاها ليان)دخلي شوفي

دخلات بهدوء كتشوف الليان لي فيه اعلان عن بداية مسابقة فبرنامج عربي مشهور فالعالم العربي للبحث عن المواهب..خرجات منو وكتبات ليه :شنو هادشي

منعم:دخلي شاركي

شامة:لالا انا غي كنشوف من بعيد ههه مكنبغيش نغني بحال هاكا

ننعم:علاش!!فرصة زوينة ليك ..منها نيت تعرفي كثر والناس تعرف صوتك

شامة:يكون خير

فالصباح بكري فاق هو لول ملابس والو شاف هدى حداه كانت شبه عريانة..باسها فحنكها وناض مغوبش من بلاصتو لبس اول مالقى حداه ومشا للدوش..دوش صحصح وخصو كارو باش يتحلو عينيه..قصد بيتو هز كارو وبيت شامة طل عليها لقاها غارقا فالنعاس ..قاد عليها الفراش شاف تيليفونها هزو دارو فجيبو وخرج للبالكون شعل كارو يحل بيه عينيه ويديه كتضور فتيليفوتها كيف العادة..كيقلب معامن كتهضر حتى بانت ليه اخر نمرة ممسجلاش..دخل لميساجات قرا شنو كاين وشاف الليان ودخل ليه عرفو ديال شي مسابقة ..رحع حطو ليها عند راسها وداز لياقوت قلبوو ليها حتى هي عاد.خرج من تما نازل لتحت يفطر مع والديه حيت ولادو عطلة مكيفيقوش بكري

مع العشرة عاد.بدات كتحرك ففراشها وكتعكز بهدوء..كل حركاتها هادئة مثل النسمة..دارت روتينها الصباحي وهبطات لتحت كتجر فصندالة خفيفة ديال الصبع كيبانو منها ضفيراتها نقيين..كتلة من الانوثة كتمشي على رجليها ..كتسمع الهضرة عرفات مها وجداها صبحات عليهم وبدات نهارها معاهم وبهم فانتظار يفيقو لوخرين

فالعشاء كيف العادة تجمعو من جديد عليه كيتهاضرو حتى نطق عبدو:غتشاركي فشي مسابقة!!!

شامة:انا!!لا

عبدو:وشنو داك الليان لي وصلك!!

عقدات ملامحها باستغراب وقالت:فين وصلني!!

عبدو'فتيليفونك

حطات الدغمة من يديها وقالت بهدوء:قلبتي ليا تيليفوني!!

عبدو:ماشي هذا هو السؤال..سولتك واش باغيا تشاركي فشي حاجة!!

شامة:(يادوب كتجمع الكلمات حيت مكتقدرش تواجهو)ديما كتقلبوو!!هادوك خصوصياتي

عبدو:اتا باباك!!!

شامة:معندكش الحق تقلب ليا تيليفوني(جبداتو حطاتو فوق الطبلة)هاهو مابغييتووش

ناضت ببرود من حداهم والدمعة واقفة ليها فعينيها..كتكره لي يتطفل عليها وعلى خصوصياتها..خزرات فيه هدى وقالت:عيقتيي بزااااف...عيقتيييي

خيرة:بزاااف اولدي نتا وللله

الحاج:هادشي لي كدير فيه مامزيانش..البنت بلارة ومربية وكتشك فيها

عبدو:بنتييي عندي الحق نقلب ونشوف اش كدير

هدى:بنتك مبقاتش صغيرة(بعصبية)متدوزش ليا على بنتي شنو دوزتي علي..انا الى صابرة حيت مراتك بنتي ماعندهاش علاش تصبر وتمرض فخاطرها

عبدو:(بعتاب)هدىىىىى

خيرة'عندها الصح..حشووومة تقلب ليها تيليفونها

ياقوت:(نقزات)حتى انا كيقلبو ليا

ضرب فيها تخنزيرة وهي تصقل فحين هو كيضور فعينيه معاجبوش الحال حيت قلقها وهو ينطق:كنت باغي غي نشوف اش كدير..كون ماقلبتش معرفتهاش باغيا تدفع ل the voice

هدى:واش نتا البنت كتدير ليها لونكيط ملي كتدخل وحاضيها فالدخلة والخرجة وتزيد حتى التيليفون...هاهو ربح بيييه

الحاج:حشووومة هادشي(ناض بتعب)انا نطل عليها(هز تيليفونها)

مشات شامة لبيتها كتكبح دموعها داخلها..بقدر ماهو اب زوين وكيهتم بيهم بقدر ماخانقها هي وياقوت..لونكيط فين مشيتي منين جيتي علاش خرجتي شكون صحابك!!معامن متخرجي شكون كيقريك..نفس الديسك ديال هدى كيطبقو عليها بفرق بسيط هدى ميكروبة قدرات تعامل مع شكو وشامة لا...شامة بنت هشيشة مشاعرها هش من الحلوة ديال الغريبة..بكلمة تقلقهاوبكلمة تقدر تجبر بخاطرها...مكتقدرش على الصداعات والغوات..مربية تربية كالم ومغعندهاش مع تجعويق وتكون عيشورية..لدرجة عمر كانت عندها شي صاحبتها من غير خيرة وهدى

دخل الحاج عندها هضر معاها شويا وجبر بخاطرها وخلاها تخشات ففراشها بغير خاطر وهي انسانة الى تعصبات سوا كتعزف سوا كتنعس ...وفحالتها معندهاش بيانو ديالها الخاص فققرات تنعس مخلية عبدو جاه تأنيب الضمير

سمعاتهم ليه هدى وحتى هو خلاوه غا كيشوف ويسوط.مكيبغيش يقلق البنات اما الدراري عاطيهم القاسح..عبد الله سلخو مرة وحدة اما عبد الرحيم راه ديما مسلوخ حيت كيدير علاش..كيبغي الفرصة فين باه يخرج ولا مو تمشي عند وهيبة شي ايام كيبرد فيه غدايدو حيت ديما كيفكوه

بعد مرور يومان

عاد.هبطات شامة للفطور معاهم لقاتو مزال كابن ممشاش كيف عادتو..سلمات غي بفمها وجلسات حدا هدى كتكب ليها قهيوة ونو ينطق:معندكش كور اليوم!!

شامة:(بهدوء)عندي

عبدو:امتا؟؟

شامة:مع الحداش

عبدو:اوك انا نديك

مهضراتش مزال غتقوليه نمشي فطوموبيلتي غيقول ليها لا ونديك...سكتات وكملات فطورها بهدوء وحتى هو جلس تما كيلعب على اعصابها..سالات وقال:نوضي لبسي ندييك

ناضت يدون ماتجاوبو وهي تنطق هدى:العار الى مارخف واش باغي تقتلها!!!البنت يوماين وهي مغيرة

عبدو:مغيرى من جيست!!!

هدى:مليون مرة كنقوليك شامة ماشي هي ياقوت..شامة هشيشة

عبدو:حيت هشيشة مغنغوتش عليها

هدى:لا غي كتفقص فيها..بهاد الشك ديالك شي نهار دير ليك شي مصيبة وديك الساعة ضبر راسك

عبدو:(بعتاب)هددىى

ساطت بنرفزة مخلياه ينكر راسو حيت غتخرج هي وياه فحيط لانه للنقاش معاه عقيم..جهزات نفسها بلباسها البسيط جدا..تقدر تشوفها ماتقولش باها غني وميسوور ..كتعتامد البساطة والاناقة فلباسها وكتشري بالغلا لكن عنوانعا البساطة..وقفات وسبقاتها ريحتها وقالت:انا واجدة

ناض كيقاد حوايجو..خرمز لهدى وجهها قايل:وااشووفيي

ميقات فيه وزاد مدوز يدو على كتاف بنتو حتى خرجو لطوموبيلتو ومشاو فصمت مهضراتوش ومهضرهاش حتى هو مخليها براحتها..غي وقف وقال:غتسالي ونجي ليك

شامة:واخا

بالفعل دوزات حصتها وخرجات لقاتو برا كيتسناها طلعات خداه وشدها نيشان حسابها الدار لكن خداهم لقهوة وقال:هبطي أ بابا

شامة:مغنمشيوش للدار!!

عبدو:لا...نتقهوا انا وياك

نزلات مسلمة أمرها لله كتجر فرجليها بجنبو..خداو طبلة وطلبو شنو بغاو وفانتظار توصلهم قهوتهم..هز كارو شعلو وقال:ندويو شويا ابابا!؟

شامة:فشنو!!

عبدو:فهاد الغضيب ليي ولى فيك على ابسط حاجة!

شامة:الغضيب!!ابسط حاجة!!!هادوك خصوصياتي لي كتقلب

عبدو:كنبقا باباك!!

شامة:سي بابا غلى راسي وعيني ولكن فحدود...معمري عقلت تدخلت فشي واحد ولا درت شي حاجة خايبة لي تخليك تشك وتقلب ليا تيليفوني وماكفاكش غي انا حتى ياقوت لي صغيرة

عبدو:كتبقاو بناتي

شامة:هاد الهضرة كنسمعها ابابا ملي عقلت على راسي...اي حاجة درتيها كتبررها ببناتي..كلشي عندو البنات أ بابا ومكيديروش ليهم هاكا..

عبدو:(تبسم)ماشي كلشي عندو ياقوت وشامة...يقدر زدت فيه شويا ولكن انا كنشوف الحياة من جهة خرا...من جهة فيها غي الكلاب لي يقدرو يطمعو فيكم ويضحكو عليكم

شامة:ونتا ربيتينا على هاكا؟؟؟عارفنا غنديرو شي حاجة طيح بيك!!

عبدو:لا

تحطات لكونصوماصيون وقال:نهار غتولدي حتى نتي غاحسي بيا

شامة:علاش ماما مكتقلبش!!وحتى سيدي با معمرو قلب

عبدو:كلها وكيفاش كيشوف الامور ماعليناا(طفا الكارو)

جبد من حيبو ظرف أحمر صغير مدو ليها وقال:هاكي

شامة:شنو!!

عبدو:حليه

هزات بيديها الناعمة المزينة بخاتم واحد خفيف حلاتو وبدات كتقرا وهي توسااع ابتسامتها وقالت :casting ديال the voice

عبدو:سي..ميروك عليك عيطو ليك باش دوزي

شامة:(ضحكات)كتهضر بصح!!!نتا لي كنتي ضد انني نغني قدام الناس

عبدو:دابا كنقوليك غني ابنتي...وعلاش لا تدي اللقب

شامة:(ناضت عنقاتو فبلاصتو وباستوو فحنوكو قايلة بالاسبانية)شكرا شكراا بزاااف ابابا

الفرحة مقاداهاش..هي انسانة كتعشق تغني وتعزف..والحس الموسيقي عندها من الصغر..ماشي اي حاجة كتطربها ..تقدر تسمع لام كلثوم فشي اغنية ومتعحبهاش وتمشي تسنط للراي وتلقا راحتها..كتسنط لكلشي وكتغني لكلشي..وبين الحباب وللصحاب راه كتشيخ بحال مها وتغني الشعبي لي كيكرهو باها خوفا تولي تغني ليه فالعراسات حيت راسو راسم الشيخة عيب

وبقدر مكيعحبها تغني بقدر مكيعحبها تعزف فالبيانو ورغم مسارها الدراسي لي لاعلاقة بالفن مقدراتش تغيب على الموسيقى لي كتمشي ليها مع الدم

حديث الساعة ولى هو "the voice" وامتا غتمشي وكيفاش وشكون فيمشي معاها وبالفعل تقرر شكون يمشي مها وباها وعبد الله لي ميمكنش يخلي توأمتو وحدها..

بعد شهر باش عطاها الظرف كان السفر عندها اليوم باش يلتاحقو بالمسابقة لي غتشارك فيها "شامة"

جالسين فالطيارة هي وخوها لي حرام واش كيبانو توام..هو مكيشبه لحتى حد..زينو بوحدو حدو الطولة جايبها من باه..وهي تنطق بالاسبانية:مستريسية بزاف

عبد الله:نوغمال اول مرة تغني قدام مغنيين كبار والعالم كيشوفك

شامة:ياربي ندوووز هههه انا باغيا غا نغني مابغيتش نربح

عبد الله:نتي هي the voice,

برداء أحمر كلاص لاصق عليها مبين ليها ليهونش ديالها ىي وارثاهم من خيرة ولي كيبانو فقط الى لبسات شي حاجة لاصقة..مع حذاء من عصر الاميرات وبماكياج.خفيف ناعم كانت شادة الميكرو فالكواليس كتسنا نوبتها توصل والستريس شادها من جميع اطرافها..من بعيد تقدر تعرفها مستريسيا وكذلك تقدر تقرا بلي هي بنت عائلة من لباسها وطريقة مشيها..جا عندها واحد من الطاقم وقال بالانجليزية:جوج.دقايق وتكوني لداخل

حركات ليه راسها وزيرات على المايك كتمتم بكلمات الاغنية خايفة يتنساو ليها رغم انه حافظاها عن ظهر قلب

دخلات بخطوات ثابثة عكس خطوط قلبها لي قرب يولي خط واحد..مزيرة على المايك وكتشوف غي الظلام من غير بعص الاضواء...تسمع one two three وهي تبدا الفرقة الموسيقية العزف لاغنية"بعشق روحك والكلمات"ديال مروان خوري..جمعات طاقتها وخرجات اول مخرج موسيقي ليها وهو يتشعل عليها الضو وبدات كتغني بسلاسة"بعشق روحك والكلمات بعشق احساسك بالذات كيف بتمشي كيف بتحكي

باقي مسالاتهاش لف ليها واحد من اللجنة وهي تبسم وتحنات كتحيه عاد.رجعات ليها الثقة فراسها اكثر وكملات:

من اول مرة تلاقينا احساسي من جوا تغير

حبيتك ما بقدر قلك لو بعرف بوصفلك اكتر

انت مش بس بتعجبني نظرة منك بتدوبني

بعيش حبك وبموت

جبدات ديك وبموووت حتى دار واحد اخر وهو يتبدل اللحن ديم الساعة وكملات مبسمة حيت عارفا شنو غتغني وبدات كتنشد عليهم بالمغربية:عندو الزين عندو الحمام دايرو في دارو وانا الحب وانا الغرام جابني تالدااار

بصوت بحال ديال المنور غنات قايلة:وانا وانا جاني على الكانة امتا غيجيني وانا لي جاني على الكانة صحة يبغيني وعندو الزين عندو الحمام دايرو في داروو

كملات اغنيتها بحب وابتسامة ونتاقلات بيهم من لحن لاخر من مود لمود اخر خلات بقية اللجنة تدوور ليها فرحانين ومتهافتيين تنظام ليهم

سالات اغنيتها كتضحك بكل انوثة والجمهو كيصفق وكذلك أهلها فالكواليس فرحانين بيها...

...:ناشاء الله شو هاد الصوت..من وين انتي ياا (كيقرا اسمها)شاامة

شامة:من المغرب ههههه

نطقات المغنية المغربية:هاااا بنت بلدي اكيد راح تنظم لفريقي

شامة:(بالفرنسية)sans doute...انا من المعجبات بيك بزااف

...:مرحبا بيك..صوتك روعة ماشاء الله

عطاوها تعاليقهم ورحبو بها وخرجات فرحانة عند عائلتها كتضحك وتعاود وتعنق وتعاود والتيليفونات مسكتووش من عائلة باها ومها فرحانين ليها حيت تقبلات

بعد أسبوع الحلقة تعرضات وكلشي تفرج فيها لقات اعجاب بزااف ديال الناس وبزاف ديال الصفحات نقلو فيديواتها ومرروها فالبرنامج

فنفس الوقت وفمكان اخر..فاحد العمارات بمدينة طنجة عروسة الشمال المغربي..كان هو جالس فأريكة هاز كارو كيتكيف داير رجليه على الطبلة وراسو حارقو بحهد وحداه ختو الصغيرة شاعلة التلفازة دايرا نفس البرنامج..لقطو عيونو وجهها ثم صوتها ثم حديثها مع اللحنة..فلحظة مرورها وغناءها قدر انه يقراها ويتبع معاها وفنفس الوقت قدرات تخطف أنظارو ماشي بجمالها انما بصوتها وهي كتغني اغنية اصلا معارفهاش ديالمن وعمر سمعها حتى غناتها..كمش عينيه فيها وفحركاتها وركزهم على جسمها الرشيق مرورا بعنقها لي كيتحرك.كل ماخرجات كلمات الاغنية منو..وميمكنش يفلت حركات يديها وهي كتعبر وتعاود..بلا الرداء لي جاها عبار..شدات انتباهو فوقت قصير..شافها كيفاش هضرات ةكيفاش الادب والحياء باين عليها..زاد.كمش عينيه ملي تعرض اسمها الكامل..وهو يتمتم بين شفاهو:شامة رزقي

انتهت والحمد لله❤️❤️❤️