صفحة القصةقصة إغفر يا تميم
مؤلف القصةقصص Ghazal trust
سلمى تقلبات معدتها حتى هي وجهاد حصل فيها حصلة عالمية..مكتوقف لا ساحية لاسكرانا.. هوا شارب وهي اكثر وقف ونوضها بزز لبسها المونطو وهزها كلها خرجها وداها للطموبيل ..غير طلعات فالطموبيل نعسات مافاقتش الطريق كلها ،وصل لفيلا كبيرة فاحد الاحياء الراقية ..دخل بسيارتو للكراج ونزل هزها بزز دخلها مباشرة لبيت النعاس وحطها سخفان ورجع اللور حيد حوايجو من الصهد .. لاحهم فوق واحد الكرسي وخرج من تما خلاها غارقة فسابع نومة ومشا لواحد البيت اخر ترما على واحد الناموسية ونعس .
بعد يوم وليلة حافل بالاحداث صبح صباح جديد ويوم الاحد .. الثامنة صباحا خرجات بهية من بيتها بكري مستعدة العمل بحكم ان خدمتها متعلقة بالويكاند بزاف ، خرجات بكل اناقة ورقة من البيت زربانة ومشات طل على تميم فبيتو ودورات البوانييه لاكن لقات البيت مسدود.. عاودات جربات مرة اخرى ونفس الشيء البيت مسدود من الداخل..بقات كتشوف باستغراب ويالاه تلفتات وراها لقات واحد الفردة ديال الصندالة ديال بنت مرمية حدا واحد الكنبة .. سدات عينيها وهزات راسها بغضب وسدات عينيها كمداتهم وخرجات من الدار زدحات الباب ومشات نازلة وكتصوني فالتيلفون لمدام سارة اللي حتى هي كانت كتلبس المونطو ديالها باش تخرج من بيتها وردت باستغراب
مدام سارة: صباح الخير مدام بهية..خير ان شاء الله
مدام بهية: والو غيررر..بغيت نسولك واششش..بيان فالدار؟
تلفتات مدام سارة متفاجأة وقالت: بلاتي نشوف
خرجات من بيتها ومشات حلات بيت بيان لقاتها ناعسة فبلاصتها وردات الباب بشوية وقالت
اه فالدار كاين شي مشكل؟
مدام بهية: لا غير كنسول وصافي..سمحي ليا الى صدعتك
تنهدات مدام سارة وقالت: عرفتك علاش كتسولي..حيت لبارح خرجات هي وتميم ياك..
مدام بهية:بصراحة ماعنديش هبار معامن خرج اللي عارفة هوا انه خرج مع صحابو .. مقاليش شكون بالضبط
مدام. سارة: ايوا راه جا عندها حتى لهنا وخرجات هي وياه ..مدام سارة.. كنتمنى المشاكيل اللي كيديروها ولادنا متأثرش علينا وعلى الخدمة اللي كتجمعنا
بهية: مغتأثرش الى كنا حنا مالين العقل
سارة: هادشي اللي كنتمنى .. لقيتيني غادية للاوتيل
مدام بهية: حتا انا .. يالاه نتلاقاو تما
قطعات مدام سارة ونزلات مع الدروج عند الخادمة وقالت
معاياش دخلات بيان لبارح؟
الخادمة.: مع الربعة
مدام سارة: جات شاربة عاوتاني ياك
الخادمة: شوية وصافي
ساطت مدام سارة بنفاد الصبر وخرجات مشات في حين ناضت بيان كتهز راسها بزز والمكياج سايح وعينيها بحال البانضة بالكحول
جلسات والسخفة فيها شدات راسها وشعرها مدلي على وجهها كتعيط بصوت مرتفع
سعيداااااا…سعيدااااا
دخلات سعيدة الخدامة كتجري عندها لقاتها وسط النموسية جالسة بلاغوب واصلة ليها حتى للكرش وتكمشات ووجها حالتو العكار رجل بحال اللحية والشعر مشتنف .. بيان: صاوبي ليا تيرموس دالقهوة دغيااا..بلاتي وجدي ليا الحمام هوا اللول..راسي غيتشق
مشات الخدامة بالزربة وجدات ليها حمامها وعاوناتها حتى دخلات فالماء والرغوة وخلاتها كتغسل بوحدها
خرجات من الحمام بالبينوار والفوطة على راسها لقات سعيدة قدامها هازة القهوى
اهيرا رجع فيها الضوء ورجع وجهها لنضارتو ولونو الطبيعي وتنضف من الحالة اللي كان فيها .. جلسات على الكرسي كنشرب قهوتها وهزات تيليفونها كتصوني على تميم لاكن مكجاوبش ..شربات الكاس دالقهوى وقالت لسعيدة
قولي ليهم يوجدو ليا طموبيلتي برا خارجة دابا
مشات للدريسينغ حيدات البينوار وجبدات سورفيت اديداس ديال البنات مستيلية لبساتها ولبسات دودون غليضة من لفوق وقصيدة وحداء رياضي ونزلات منشقة شعرها وجامعاه كوب شوافال فالاعلى وهزات نضارات كحلة دارتهم وبزطتم مربع لويفيتون ونزلات كطير مشات ركبات سيارتها وانطلقات .
سبمى كذلك وقع ليها نفس الشيء فاش فاقت .. راسها مقسوم وكملات الباهية فاش لقات راسها فبيت النعاس..هزات وجهها وغوتات فالسمى حتى دخل جهاد كيجري عندها ويشوق فالبيت اش واقع وقال
سلمى.. مالكي؟ شنو واقع
ردت مخلوعة كتبكي وتشوف قدامها
اويييلي فيين اناااا
جهاد: فداري .. لبارح نعستي وجبتك للدار
شافت فراسها وقالت: ماقستينيش ؟؟؟
جهاد: نقيسك؟؟؟
سلمى: رجعني لدارنا … رجعني كحلتهاااااا
بدات كتفتف وتقلب على عكازها مخلوعة وشافت فالساعة قدامها وقالت: اوييلي الوحدة..اوييلي مشيت فيها
ناضات كتمايل وهوا شاد فيها وقفها ماخلاتوش حتى يهضر نوضات فيه الرعب .هبطها كيجري بيها هاز ليها حوايجها وخرجها ركبها وقال
كن تسنيتي حتى نفطرو بجوج و ..
قاطعاتو : اوييلي كوراه البوليس كيقلبو عليا ونتا كتقولي نفطرو ..اويييلي شدرت. سربي طييير طييير وصلني فالوقت
كسيرا بالجهد كيطير ..وحتا بيان وصلات كطييير وفرانات قدام باب تميم وتسليفون فيدها كتصوني وتعاود. طلعات للدار كتصوني ودق متأكدة انه لداخل لانها شافت سيارتو برا وبقات مصرة كتصوني حتى تفتح الباب فجأة وضهر قدامها بسروال واسع وشعرو مخربق وصدرو عريان وعينيه مجدبين بالنعاس ..شافها ورجع اللور قال
بيان!!
دازت فيه ودخلات كضحك قائلة
صباح الخير مالك مكتجاوبش فتيليفون كنتي ناعس
سد عينيه وحلهم غادي جنبها كيشوف فيها ويشوف وراه وقال معنقها وغادي بيها جهت البالكون
اجي نجلسو هنا… الجو زوين ليوم
رجعات اللور وقالت :غيضربك البرد غير خليه مسدود انا اصلا جيت حيت البارح ..
سمعات صوت جاي من البيت ديالو ديال شي حاجة كتقرقب وسكتات شافت جهة البيت وقالت
معاك شي واحد فالبيت؟!!!
رتابك وقال : لا غيرررر ..قطة .. قطة ديال الوالدة
حلات عينيها كضحك وقالت : هاااه قطة .. كنحماق على لقطوط
دارت فيه بغات تمشي لاكن وقف قدامها كلاها بيديها ورجليه وقال
انا غنجيبها ليك .. تسناي.. اجي نطلبو لفطور انا وياك ولا نهبطو لتحت نفطرو ..سبقيني انا غنجي موراك
عقدات حجبانها كتشوف فيه وقالت: مالك كتفتف؟؟ وريني هاد القطة اللي عندك فالبيت حتى باغا نشوفها
غفلاتو ومشات حلات الباب بالجهد لقات البنت وسط الفراش عريانة ومغطية بالغطا ديالو وقفات مصذومة فقلب
وقفات مصدومة كتشوف فالناموسية وفالبنت اللي جالسة تما والبنت حتى هي خزجات عينيها كتشوف فيها ..اما تميم بقا برا عاض على سنانو مابغاش يوقع اللي وقع .. حركات بيان راسها بالايجاب وقالت
القطة … خرجات من البيت نيشان مشات عندو وهوا قالب وجهو وقالت
القطة… قطة احتياطية ياك .. اوكي
زفرات بغضب من مناخرها ورجعات باللور مشات غضبانة وهوا موراها كيعيط ليها لاكن نزلات خلاتو فالباب ..
وجهها رجع احمر وتزيرات حتى غرغرو عينيها وخرجات من العمارة ويدها على نيفها مخنوقة ودايخة .. لقات جاد واقف قدامها مربع يديه كملها ليها الباقي وكمل ليها على الصدمة وقال هاز راسو
هادشي علاش بدلتيني؟؟؟
الفيرمة.. الديسكو .. وكتجي عندو حتى للدار.. هادا هوا السبب؟؟
دارت فيه بغضب بغات تمشي وقالت والدموع فعينيها
ماناقصاكش حتى نتا .. شدها من دراعها بقوة وغضب شديد وقال : غتزدي معاايا دااابا .. ولا غنفرجك اللي عمرك شفتيه
نترات يدها ركبات فالسيارة ديالها وركب فسيارتو ومشا تبعها وهي غادية كتهضر بوحدها وتعاتب راسها
انا مالي.. انا علاش اصلا يبقا فيا الحال ؟؟ حياتو هوا حر فيها علاش انا نتقلق علاااش؟ شهااد لخراا
بدات كتبكي بدون شعور ماعرفاتش اصلا علاش كتبكي وشنو السبب اللي يخليها تبكي..
كانت غدير حادثة وشدات الفران بسرعة ومشات وقفات فالجنب كتبكي بوحدها .. صف وراها جاد ونزل حل عليها الباب جرها من دراعها هبطها وهي كتمسح مناخرها وداها ركبها حداه فالسيارة ومشا مباشرة حتى لقدام البحر ووقف . تلفت شاف فيها وهي مرفوعة مربعة يدها ونيفها حمر وقال
كغتهضريش؟
بقات ساكتة ماهضراتش ونزل من السيارة خرجها من تما وقفها مقابلة مع البحر وقال بغضب
تصاحبتي نتي وتميم ؟
نترات يدها وقالت بغضب: ماشي سوقك .. بعد مني ماشغلللكش فياا
رن الهاتف فجيبها وخشا يدو جبدو وقال : ماعندكش تيليفون .. هوا اللي كيعيط ليك ..جاوبيه ..ياباه جاوبيه قدامي
طيرات ليه تيليفون من يدو طفاتو وقالت ليه
كادخلش راسك فشي حاجة بعيدة عليك ..فهمتي.. ومسالي مع راسك تابعني ماعندك مايدار فحياتك !! هاا؟
جاد بغضب : تفارقتي معايا على قبلووو ياك .. هاااا دوي .
ردت بغضب: مابيني وبينو وااالو ..اصلا عندو صاحبتو .. بعدمني اجاد عفاك انا عييت ..بغيت نمشي بحالي
سكت كيشوف فيها وقرب عنقها وقال
غنرجعو انا وياك.. اصلا نتي بلا والو ..وانا بلا بيك والو .. غنرجعو ونساو كلشي
عنقاتو كتبكي غير بوحدها وقالت
انا ماعندي الزهر مع حتى واحد
رجعات اللور كتمسح عينيها وقالت : رجعني لطموبيلتي..
جاد: ليوم الخد يالاه نمشيو ندوزو النهار فشي بلاصة
بيان: مافياش..الصراحة عييت بزااف بغيت نرتاح
جاد: وغير يالاه مالكي.. نمشيو نبدلو الروتين شوية مافيها والو..يالاه
جرها من يهدا كتنهد ركبها حداه ومشا .
طلعات سلمى للدار مخلوعة كتفتف دقات وحلات ليها الهام بوجهها اصفر .
سلمى: ماتغوتي ما والو ..اصلا انا عارفة راسي زبلتها وغنعاود ليك كلشي بلا متخلعي
الهام: زيدي المسخوطة زيدي.. اوييلي تسيق مك الخبار لهادشي.. زيدي زيدي
خلاتها وجلسات كتعاود ليها كولشي كدوب فكدوب حتى كملات وشافت فيها الهام بنص عين وقالت
زعما هادا ماكان ..مشيتي بتي مع ديك بيان اللي مكتحمليش؟
سلمى: هي قالت ليا يالاه نمشيو ومشيت..اما جهاد عيط ليه باه خلانا ومشا وبقا معانا غير تميم جلس شوية وبغا يمشي بحالو .الهام: الله يجعلني نتيق.. اخر مرة تعاوديها ..سمعتي..اااخر مرة ..نوضي بدلي هاد الحالة نوضي حالتك حالة تقول بايتة مع البهايم ..الله ينجينا ما تسيق لينا مك لخبار
دورات سلمى عينيها يمين وشمال وناضت مشات لبيتها سدات عليها وتنفسات الصعداء.اما بيان وصلات للدار البيضاء وعرض عليها جاد لجلسة استجمام ساخنة فإحدى افخم الاوتيلات فين كيقصي اغلب ابناء الاثرياء ارقاتهم بعيدا عن الاضواء . فعلا كانت جلسة دايزها الكلام فمسبح مستوحى من الطبيعة على شكل حجرة كبيرة عامرة بالماء دافي وشلال نازل قدامهم قدامهم بمياه ساخنة .. جلسو مقابلين مع بعضياتهم وسط المياه ومعاه بنات كيدلكو ليهم كتافهم وحداهم على سطح الارض بلاطو كبير عامر مشروبات من اغلى انواع الخمر .
شدات كاسها فيدها مرخية وقالت
شكون قاليك انا مشيت للفيرما لبارح ؟كتبعني؟
هز كاسو ليها وقال: كنتبع ديالي.. ماشي من حقي
دورات وجهها وقالت: مابانش ليك باللي زدتي فيه.. عادي كاع الناس كيتصاحبو ويتفارقو ..فين كاين المشكل
جاد: ياك طفيتي تيليفون .. وطفيت تيليفوني..وجينا لهنا نبدلو الجو .. فبلاش هاد المواضيع .خلينا نديرو شي بروكرام يكون زوين . ااه بروكرام غيجي مع عيد ميلادك ..ياك بقات ليه شي اسبوع
بيان: عيد ميلادي هه…فخبارك نسيتو
جاد: انا غنتكلف ليك بالحفلة دعيد الميلاد ..ماتفكريش بزاف خلي هادشي عليا
بيان: وفين غديرو ليا وفوق سطح القمر
جاد: فوق سطح الارض بشي طريقة مختالفة على العادي
شافت فيه ساهية وقالت: علاش نتوما الدراري مكتفهموش..
هز حاجبو بسخرية وقال: منسحمش ليك تقولي عليا دراري.. الرجال الاللة بيان واش هاد اللحية كلها ومزال كتحسبيني من الدراري
ردت بميوعة : ههمم.. ديك اللحية نتا بغيتي تخليها اما الموس كيدير درهم .
جاد: دابا شنو ..نعتابرو راسنا بدينا صفحة جديدة ؟
بيان: مانقدرش نعتابر معاك الصراحة حيت مامقتانعاش.. يقدر قربات تجيني العادة وهرموناتي مخربقة..تسنا تفوت ونشوفو
جاد: العادة ماجاتك من نعار رجعتي من سويسرا؟ ..ماتكونيش حاملة لينا بشي فلوس
حاملة ليكم بديناصور. قريب نبيض ليكم
قدام طيارة خاصة وقفات بيان وجاد ومترددة كتشوف فيها ويديها على خصرها قائلة
متأكد؟؟ ماقلت والو لماما وماجامعاش حوايجي
جاد وا غيرر يالاه مالنا غنسكنو تما غندوزو واحد السيمانة ونرجعو ..يالاه طلعي .. ياك عزيزة عليك ديزني لاند واطلقينا دغيا
بيان: والجامعة
جاد: غنغيبو غير اربع ايام والباقي اصلا ويكاند تنين نمشيو ليها ..يالاه زيدي
طلع فالطيارة ومخرجة لسانها كدو زو على شفاها وتفكر وضحكات طلعات موراه
واقلعت الطائرة طايرة فالسما
فالجهة الاخرى عند سلمى والهام اللي كانو كيوجدو لعيد الميلاد .. مشاو للمقهى الي ختارو يدوزو فيه العشية وبلا حجز بلا والو شراو حلوة عادية وكتبو عليها السمية وجلسو بجوجات كيشوفو فيها
الهام: مزال مكيجاوب؟. كن قلتيها ليه لبارح علاش ماقلتيهاش ليه؟؟
سلمى: لبارح هه..خليني ساكتة خليني.. غنعاود نصوني ليه .
جات تصوني لاكن صونا جهاد قبل منها وشافت فالهام وقالت
هادا جهاد .. شنو نجاوب؟
الهام: خلينا دابا كنو عيطي ليا لولدي بقاي تصوني حتى يجاوب
سلمى: غنجاوب حتى جهاد..هاكا يجي عيد الميلاد حسن ماشي غير انا ونتي ومعيطين لتميم لاصحاب لا هم يحزامون
ردت على جهاد خبراتو بعيد ميلادها وعطاتو العنوان وربعات يديها جالسة كتشوف فديك الحلوة وكل شوية تصوني على تميم وتقول يا ربي يجاوب.
وصل عندهم جهاد بابتسامة وسلم على الهام من وجهها وعلى سلمى وعطاها كادو صغير فعلبة وقال
عيد ميلاد سعيد..
شداتو سلمى مخرجة عينيها وقالت: شكرا.. ههه جلس
جلس معاهم شاف فيهم وقال: غير بجوج؟؟ انا قدت غتكون معاك بيان وتميم
سلمى: لا من لبارح ماشفتهمش.. اصلا غير طاطا اللي دارت ليا هاد عيد ميلاد مفاجأة انا كنت نسيت
جهاد: ااه .. ماشي مشكل.. هادي طاطاك؟
سلمى: اه
جهاد : متشرفين امدام
الهام بابتسامة: متشرفة بيك
تنهدات سلمى وقالت: كنصوني هلى تميم مكيجاوبش.. ماعرفتش علاش من الصباح تيليفون كيصوني و والو
جهاد: غيكون صبح ناعس.
سلمى: اوففف
ربعات يديها كتشوف وعيات تجرب لاكن لا من مجيب.. طفات الشمعة غير بيناتهم وقطعات الكعك وشربو العصير وهزات الهام الحلوة مغلفة فكارطونة وقالت
سلمى: نمشيو ؟ مشا الحال
سلمى: ااه واخا يالاه
جهاد نوصلكم ؟
الهام: لا مكاينش لا جينا فطموبيل
جهاد: سلمى عندك شي حاجة هاد العشية ؟
سلمى: غنمشي نراجع شوية.. غدا ونتلاقاو فالجامعة
جهاد اوكي يالاه .
سلم عليهم بجوج ومشا خلاهم فالمقهى .. بسرعة جبدات سلمى الهدية بحماس حلاتها وقالت : انشوف غيكون شي كادو وااعر
حلاتها لقات فيها ساعة يدوية ثمينة.. حلات عينيها مصدومة وقالت
هااا!!! رولكس !!!! غتكون اوريجينال ياكي
الهام: انشوف،.. ولاهيلا هي !! ايوا هانتي ربحتي ساعة شكون بحالك ..لقليلة غتكون واحد ربعة دالمليون
سلمى: ناااري مامتيقااش
الهام: سمعي دابا سمعي.. شدي. هاد الطرف وسيري عند تميم لدارهم .. الى فتح ليك الباب قوليه جبت ليك حقك ديال الحلوى .. عييت نعيط ليك وماجاوبتيش.
سلمى: مكنعرفش دارهم بالضبط
سلمى: سولي غتعرفي..يالاه سيري
هزات سلمى الحلوى ومشات كتعرج حتى للعمارة ..دخلات لقات العساس تما ووقفات بابتسامة سولاتو ..شاف فيها متسائل وقال
شكون نتي ابنتي اللي كتسولي عليه؟
سلمى: انا كنقرا معاه .. وهوا كيتسناني. دابا
رد العساس بالايجاب ووراها الدار وطلعات فالاسانسور حتى للباب ..سمعات الصوت لداخل ديال الهضرة وصونات حلات ليها مدام بهية وقالت بابتسامة ومجاملة
امم.. صديقة تميم؟
سلمى: انا سلمى ..تميم كاين
دارت ليها مدام بهية الطريق وقالت: تفضلي..
دخلات سلمى كتشوف فالدار بابتسامة وفيدها علبة فيها الحلوة.. سدات مدام بهية الباب وقالت: كي بقات رجلك ؟ شوية؟
سلمى: مزيانة. دابا الحمد لله .شكرا
سلمى: الله يشافيك ..جلسي
جلسات سلمى بخجل كتشوف فالدار وتميم خارج من البيت بحوايج الدار والبلاطو فيدو فيه الماكلة قائلا
انا الخدامة ديال الدار حتى تلقاي خدامة
تفاجئ بسلمى وهي جالسة وسط الدار واستغرب كيشوف فيها وقال
سلمى!!
ابتسمت سلمى وقالت: تميم ..كنصوني ليك مكتجاوبش
تنهدات بهية وقالت : انا خارجة تميم ماطفيش تيليفونك اوكي
رد والبلاطو مزال فيدو : وماتنسايش تفكي المشكل فأقرب وقت
دورات سلمى عينيها يمين وشمال وبهية كتقول
ليوم غنتاصل بشي وكالة يسيفطو لينا شي وحدة مؤقتة
تدخلات سلمى وقالت: مدام بهية.. الى كنتي كتقلبي على خدامة انا نوريك وحدة كانت خدامة عندنا مدة طويلة .. عمرنا شفنا منها شي حاجة خايبة
رد تميم وهوا فطريقو للمطبخ : قوليها تجي .. ليوم الى كان ممكن
مدام بهية: هادشي شغلي انا اتميم ماتدخلش فيه الله يخليك
تميم: هاد الساعة انا اللي شغلي كيبان ليا ..
افأفات مدام بهية. وقالت: نشوفو هاد الخدامة ويكون خير
سلمى: غتعجبك انا متأكدة.. قضي بيها الى ماعجباتكش بدليها
مدام بهية: اوكي قولي ليها تجي ونشوفو .. يالاه نخليكم
خرجات سدات الباب وراها وخلاتها جالسة .. مدات لتميم الحلوى وقالت: ليوم كان عيد ميلادي.. صونيت عليك ماجاوبتينيض قلت نجيب ليك كاطو دعيد ميلادي
رد بابتسامة وخدا منها الحلوى وقال: ااه هابي بيرداي مكانش فخباري
سلمى: ماشي مهم .. انا جبت ليك حقك
تميم: تانك يو
خداه منها داه للكوزينة حطو وقال : غتسمحي ليا نبدل حوايجي ..
دارت يديها على رجليها وقالت: ماشي مشكل خود راحتك
دخل للبيت بدل عليه وقاد حالتو وخرج عندها كيفوح بالروايح لابس دجينز زرق وبوط بروطكات بالسيور كحل وتريكو صوف بلو مرين كول في وفيدو مونطو كحل .. الشعر كبري وقال
نمشيو
سلمى : اوكي .. شنو عندك شي بلان ؟
تميم: كنصوني على بيان مكتجاوبش .. نتي جربي صوني ليها
هزات سلمى تيليفون كتصوني والو وقالت
تيليفون طافي
تميم: مهم .. انا غادي لكازينو ولا نقدر نعيط لجهاد ونديرو شي بلان
سلمى: عاد كان معايا ومشا
تميم: ااه .. اوكي .. يالاه
نزل هوا وياها كيهضرو ومشا حدا الطموبيل يالاه فتح الباب وسلمى حداه سمع سميتو بنبرة مؤلوفة وبقا تابت فبلاصتو ..
نزل هوا وياها كيهضرو ومشا حدا الطموبيل يالاه فتح الباب وسلمى حداه سمع سميتو بنبرة مؤلوفة وبقا تابت فبلاصتو .. تلفت هوا وسلمى فدقة لقا بنت موراه طويلة لابسة ميني جلد وليبة موص وبوط تحت الركبة بالسيور بلا .. كول مونطي كحل خفيف ومونطو كراميل اللون كاشمير طويل محلول وشعرها بني ..فاتنة وابتسامة جدابة كتقدم نحوه بتقة فالنفس وخطوات تابتة ..تبسمو عينيه وبرقو وقال
لجين!!
سلمى بقات مصمرة كتشوف فيها وكتشوفيه كيفاش فتح يديه ليها وعنقاتو وقربات منو باستو فمو ويديها على رقبتو ..
تبسم كيشوف فتعابير لجين وقال
شهاد المفاجأة !!
عاودات باستو ببطىئ على شفاهه وسلمى كترمش وتشرف فجنابها وقالت
لجين: جيت ليوم الصباح.. توحشتك
عاودات باستو مرة تخرى وبادلها نفس القبلة قدام سلمى عاد انتابه لوجودها وقال معنق لجين من خصرها : سلمى .. حنا جيران
ابتسمت لجين وقالت : متشرفين .. انا لجين .. انا حبيبة تميم
سلمى : متشرفين
فتح تميم باب سيارتو وقال : جيتي فطاكسي ؟؟
لجين: لا جيت فسيارتي.. راها
تلفت لقا سيارة فيراري حمرا وقفة وقال
بدلتي طموبيلتك؟
لجين: كادو دبابا .. ديال النجاح ديالي جبتها معايا..
تلفت شاف فسلمى وقال: سلمى .. نشوفك غدا ..
لوح ليها بيدو وركب فسيارتو وركبات حداه لجين وعنقاتو قائلة: حتا نتا بدلتي طموبيلتك؟
تميم: كادو باش نبقا فالمغرب .. كيفاش وقع حتى جييتي؟
لجين: نتا كنتي مقتانع بالبعد ديالنا.؟؟ زعما مدوزو عام كامل بعاد كل واحد كيقرا فبلاد
هز حاجبو تلفت وقال: ماتقوليييش ليا..!!
باستو فعنقو وهوا كيسوق وقالت: تماما.. نتاقلت لهنا .. تعطلت شوية ولاكن ماعليش.. المهم انا هنا دابا ..وغنقرا اما وياك فنفس الصف
فتح عينيه وقال: وفنفس الصف !! ههه ميمكنش نتي بزاف
شافت فيه كضحك وقالت: مالك مافرحانش؟
رد بالنفي: لا بلعكس.. حاجة زوينة درتيها . غير ماكنتش متوقعها وصافي
طول عنقو عندها باسها على شفاها ومشا هوا وياها بوحدهم في حين سلمى رجعات ساهية كتشوف قدامها بيأس.. هزات عينيها كتأمل فالشوارع والطاكسيات دايزين
ركبات فطاكسي غادية مرفوعة ويديها مربعين كتخمم ورجعات للدار طلعات ودخلات ببرودة وهدوء والهام متبعة ليه العين كتشوف فيها باستغراب ..جلسات سلمى على واحد الكرسي قدام الطبلة وقالت فسهوة
سلمى: هما فييين وحنا فييين… كان يحسابني كاط كاط وفيلا هما اعلى درجة الغنى .. كان كيحسابني راسي ساكنة في فيلا فاس وكنركب فطموبيل راني همة وشان… صدقت كنبان قدامهم افقر وحدة.. شوووف هما كيفاش عايشييين.. طموبيلات كنشوفهم غير فالتلفازة والتصاور.. حياتهم هاربة علينا بزااااف…(تنهدات) كولشي عندهم .. معارفين حتى حاجة على حياتنا… معارفينش احساس تبغي تشري غير لبسة وماتقدرش.. ولا تركب فطاكسي وحاضي لكونتور لا يزيد عليك… ولا تبغي تشري تيليفون زوين وماعندكش فلوسو.. انا عمرني حلمت شي نهار نقرا فجامعة بحالي هادي.. ولا ندخل لحياتهم ونتصاحب معاهم.. شنو غيوقع فاش تبرا رجلي؟؟؟ نبقا نمشي ونجي فطاكسي حتى انا.. ولا نركب الطوبيس.. الركبة مع تميم بحال الحلامة غيجي نهار ونفيق منها . ويقدر منعاودش نركب فديك الطموبيل مرة اخرى .. نتي كيفاش حتى تعرفتي على هاد الناس؟؟ كيفاش حتى تعاملتي معاهم وعطيتيهم ولدك ؟
دورات الهام وجهها وقالت: دابا خلينا من هادشي.. المفيد واللي طالع عليه الفيلم كامل هوا تميم.. قلتي ليا دخليني لجامعة نجمعك بولدك .. هانا درت بهضرتك .. ونتي مزال مادرتي والو
شافت فيها سلمى وقالت: انا درت بهضرتي..
الهام: فين اختي ماشفت والو.. لحد دابا مزالة صابرة وعاضة فالصبر كنتسنى
سلمى: انا قضيت ليك الغرض.. تقدري تشوفي ولدك كل نهار وتقربي منو اكثر مني كاع
الهام: مافهمتيش كيفاش؟
سلمى: انا ليوم سمعتهم كيهضرو على خدامة ما خدامة.. محتاجين خدامة وتدخلت قلت ليهم كانت عندنا وحدة ..شكرتها وقالت ليا مدام بهية جيبيها نجربوها .. سيري خدمي عندهم نتي
الهام: انا !! انا كتعرفني كيفاش غنمشي عندها؟؟
سلمى: ايوا سيفطي ماما .. اصلا مكاينش اللي ينفعك من غيرها .. المهم انا وصلتك حتى لقلب الدار دابا كملي نتي ..
الهام: شميرة زعما؟!!! اهاه وعلاش لا
سلمى: فأقرب رقت قبل مايلقار وحدة اخرى
ناضت الهام بالزربة هزات. تيليفون تاصلات بسميرة وقالت
شوفي.. شدي الكار شدي الطاكسي المهم الليلة اجي .. راني فهمتك مزيان .. ماعندي حتى حل اخر .. قوليها ليهم دابا ..كيفاش مي وبا مابغاوش؟؟ شكيخربقو هادو؟؟ شوفي دوزي ليا مي نتفاهم معاها .. الو مي.. مكاين ما ولاكن بغيتو تجيو معاها اجيو مابيغتوش عيطي لولدك يجلس معاك ولا سيرو جلسو معاه ماتزيدونيش بهمكم تا نتوما.. اصلا شنو جالسين كديرو تما لا شغل لا مشغالة .. كريو طاكسي تهزكم واجيو لهنا وبا الى مابغاش يمشي عند واحد فولادو يجلس معاهم .. فاش كلن كيحسب الفلوس كان فرحان وعاجبو الحال . نزيان تبارك الله . اري ليا سميرة.. الو سميرة.. الى قصحو راسهم جمعي حوايجك واجي خليهم منهم لولادهم . بقاو ليا دابا غير هما فالحساب نفكر ليهم فاش ولدت الولد مابغاوش يدخلوه ولا يشوفو فيه .. دابا كيتمسنو.. سمحي فيهم تما يضبرو راسهم نشوف اش غيديرو ..يالاه الليلة تكوني هنا ماتعطليش ولا غنبيع جدها ديك الفيلا وكل واحد يقلب فين يمشي ( قطعات)
بحال السهم كان كلام الهام وحسمات فالموضوع .
وصلات الطاكسي من فاس جايبة عائلتها كلها .. نزلات تعرضات ليهم وهما شادين باها مريض بزز باش كيوقف طلعوه للدار وكانت الهام موجدة ليه بلاصتو فالصالون فين ينعس كما كيبغي باش يبقا يشوف الداخل والخارج ومايقنطش.. دخلات مها هارة نيفها ووجها مكمش ومعبسة كتشوف فالدار واخا الدار موديرن وفراش جديد وكبيرة وزوينة لاكن ولفات الفيلا .. تلاتة وعشرين عام وهي عايشة فيها جاها الديق فالبرطمة وقالت
غنباتو مزاحمين كاملين فهاد الديق
ردت الهام بنرفزة وهي هارة الشنطات ديالهم .
ديك الساعة بقاي مع ولادك ففاس.. يهزوك ويصرفو عليك ..
الام: وانا شنو قدت ياك ماقلت والو .. جايبانا امشحي فينا رجليك ولاشنو
الهام: ماباغا نمسح رجلي فحتى واحد.. ومابغاش ينكر عليا شي واحد.. اللي فيا كافيني ونتي عارفاني اللهم كل واحد يشد تيقارو
الام: نتي ابنيتي درتيها راسك .. مانجيش تبردي فينا هوايشك.. يك الساعة مللي باغا ولد بقاي حداه.. ربيه وكبريه .. نتي اللي عطيتيه ومشيتي دوري مع داخنز البيطان فاللخر خلاك وزاد للطاليان . ماتجيش تبكي علينا
دارت من حداها الهام كتنفخ وقالت
انا هانا ساكتة.. واتا نتي بعدي مني ما ليني راني قلت ليك اللي فيا كافيني
دارت امها يديها على جنابها غادية وقالت : وانتي اللي شفتك بحالا بغيتي تلسقي لينا كولشي.. هاحنا ساكتين تا حنا .. جايبانا تالهنا مخليين ماقرنا وعائلتنا وتابعينك على هواك .. دابا نشوفو فين غتوصلي نتي وهاد خياتي هادو اللي تابعة ليا .. شهرين دابا باش جيتي مادرتي تا طايلة غا الهضرة وتنفخي علينا
ردت سميرة كتحيد الجلابة : وصاافي.. بديتو دابا مغنساليوش.
مشات تبعات الهام للكوزينة ووقفات قائلة: دابا فهميني شنو طاري.. (شافت فسلمى) ونتي كيفاش حتى تهرستي من رجلك؟ علاش ماقلتو ليا والو ؟!
الهام: اللي كاين هوا سلمى كتعرف تميم ومو وسمعاتهم كيقلبو على خدامة ودابا دخلناك نتي .. غدا مع الصباح غتمشي تخدمي عندهم من بعد نقوليك اش ديرو
سميرة: عاودو ليا من اللول كيفاش عرفتيهم نتي؟ كيفاش قربتو منهم باش نفهم
الهام: حتااا لليل تنعس شعيبية تهنينا ونعاودو ليك .. دابا سلكي حتى لمن بعد
الشتا صبحات كطيح .. فزكات الارض ونضفات الاماكن كلشي صبح قاري مع الثمنية فداك الجو الممطر حتى للعشرة عاد تهزات وشرقات الشميشة واخا مخبية مور الغيمة .
الطلبة شي خارج شي داخل. والدنيا عامرة وكل واحد فين واقف مجمع
وصل تميم وصف سيارتو قدام الباب الرئيسي لاصحاب السيارات وفجنبو صفات لجين بسيارتها الفارهة الحمرا اللي لفتات عيون جميع الطلبة وكلشي تلفت يشوف شكون صاحب هاد السيارة اللي عمرها بانت عندهم فالكلية .
مزلات لجين لاحت شعرها اللور لابسة مونطو قصير فوق الركبة وليبة مشبكة وبوط عالي حد الركبة ديال الجلد ..الشعر مطلوق والمكياج والنضارات والطولة والتجريدة خطفات الاضواء والكل ركز عليها .. وكملات الباهية فاش مد ليها تميم يدو فيها قفازة واحدة قصيرة من الجلد شدات فيه وتمات داخلة بكل ثقة فالنفس هي وياه والكل كيخوي الطريق ليهم تحت انضار الجميع والكل كيتساؤل . شكون هادي؟ باينة جديدة فالجامعة .. غتكون طالبة جديدة.. اش هاد الكاريزما وهاد الثقة كلها ؟!!.. لا وزوينة وحاسة براسها.. شوفو معامن؟!! لا وخطفات ليك تميم البيستي !! لا غيكون هوا جابها؟!! تكون حبيبتو زعما وجات تقرا معاه!!! ولاكن راه جاو مع بعضياتهم .. باينة طالبة جديدة عندنا فالجامعة وغنشوفو معاها قصص مثييرة.. متشوقة نشوف بيان فاش تعرف بهاد الطالبة الجديدة… هه جات اللي تحدهم ليها وترجعها اللور . باينة من مشيتها شوفي كيفاش غادة ..شادة فيه .. وتايقة فراسها. هادي اللخرة لبيان غادي تنتاحر هاد المرة .. ضاروري خاصنا نعلموها بشي طريقة اللي تسكت ليها القلب.. ليوم مغندخلوش للمحاضرة حتى نشوفو لقائها ببيان كيفاش غادي يكون . اوفف اخيرا عشنا وشفنا اللي يهبط لبيان نيفها . متشوقة ومتحمسة للي جاي. صافي تميم دار صاحبتو ..خلات على اللي معلقين آمال عليه - من بينهم بيان حتى هي .. ماشفتيش كيفاش سمحات فجاد و دغيا ضارت عند تميم كيحساب ليها راسها غير هي اللي كاينة .. هاد العام هادا ديال هاد الكوبل .. جاد وبيان صافي غيرجعو للجنب ويبقاو يافرجو بحالنا
وصلو للكافيتيريا وحتى تما فاجئو الجميع بديك الدخلة والشدة فاليد.. جهاد وسلمى كانو جالسين على طاولة القهوى وغير شافوهم جايين هزو راسهم بجوج .. ضحكات سلمى بسخرية وربعات يديها كتشوف وقالت
الفراجة غتبدا .. الله معاك ابيان جاب ليك ربي قتالك .. كي درتي لجاد غيرقع ليك هه
وقف جهاد بدهشة وضحكة واستغراب ليهم وشلم على تميم وعينو على لجين .. غمز تميم بنص عين ولجين كتحيد نضارها وهنا تميم عرفو على لجين وقال: لجين ..
غمزو جهاد كيضحك وقال: لجين لجين ..اننمم اا هاه ههه
حرك ليه تميم راسو كيضحك وقال: تماما .. جات من ايطاليا عندي لهنا ..وغتثرا معانا فنفس الصف
مد جهاد يدو بلباقة كيضحك وقال
مرحبااا.. اطاليا نوراتنا مادموزيل لجين
مدات يديها باسها وقالت: شكرا
تميم: جهاد..صاحبي..كيقرا معانا حتى هوا ..وسلمى كتعرفيها
شافت فيها لجين وقالت بهدوء: مايكون عندك باس
تميم: سلمى ؟ جيتي بوحدك فطاكسي؟
تنهدات ودورات وجهها قائلة.. جابني جهاد.. عيط ليا الصباح حيت بقيت كنتسناك حتى عييت .. وهوا جابني
جمع تميم الضحكة وقال: اا؟؟ ااسمحي ليا ..نسيت منقولها ليك لبارح ماتديش عليا
ردت سلمى بالايجاب كتشرف فلجين
انا كنت حاسة ..داكشي علاش حتى انا قلت لجهاد يجيبني.. يمكن ماشفتيش الشتا كيفاش كانت الصباح
بقا تميم ساكت شافها ورمش ورجع قلب الكلام وقال
ماعليش.. نخلص ليك الحق
جر الكرسي للجين جلسات وجلس حداها .. جرو جهاد كيضحك وقال بيناتهم
ايطاليا شخصيا اصاحبي ههه
نخزو تميم وقال كيشوف يمين يسار .. ايوا راه كنغير .. ماشفتيش بيان مابانتش ليا هاد كدور فالجامعة ؟!
جهاد : عاد كنتي كتغير ركز فحاجة وحدة.
تميم : ملبارح مكتجاوبش فتيليفون وطافياه
جهاد: والله مللي غتشوف هاد الحورية اللي جبتي ليها لافاك قلبها اللي غيطفا .. هادشي الى مطفاتوش لينا كاملين بلحماق ديالها
جبد تميم تيليفون وقال: هانا راجع
وقف ودوزات لجين يدها على يدو قائلة
فين غادي؟!
تميم: هانا جاي دابا.. تشربي قهوى
لجين: اوكي جيب ليا معاك
مشا يجيب القهوى وفنفس الوقت كيشوف فتيليفون ويصوني على بيان لاكن بدون رد
لا رد.. هز تميم القهوى ورجع بحالو عند لجين جلس ، شافت فيه سلمى وقالت
راني عطيت العنوان الخدامة باش تمشي عندكم هاد الصباح
تلفتات لجين وقالت
تميم.. كنتي كتقضي اشعال الدار راسك هه
هز كتفر: تقريبا .. مزال مكنعرفو حتى واحد هنا .. علاقاتنا محدودة .
دورات سلمى راسها وقالت: واحد بيان كاع ماجات ليوم !!.. غريبة
قالتها وتبسمات ابتسامة صفرا للجين .. شاف تميم فالساعة وقال : حداش .. مولفة كتجي فالوقت
ابتسمت لجين وقالت: شكون بيان ؟؟
ضحك ليها جهاد وقال: واحد البنت بحال المشة.. دفارها طوال ماضيين اللي قالها صب كطير عليه ههي
تميم: جهااااد.. ياكما طارت ليك على وجهك وبدلتيه !
رجع جهاد اللور وقال: كطير غير على البنات .. باختصار.. بيان هي البولة اللي كتشعل قهاد الجامعة .. الصراحة بلاصتها بقات وبفنا النشاط معاها
شدات لجين فتميم وقالت: جاني فضول نتعرف على هاد بيان .. هي معاكم فلكليكة ؟
سلمى: هي عنصر مهم .. غادي تعرفيها هادشي مامنو هروب
فهاد الاثناء وقفات سميرة قذام باب مدام بهية كتأكد من العنوان اللي فيدها وصونات كتسنا
فتحات مدام بهية الباب لقاتها واقفة قدامها .. ابتسمت سميرة وقالت
سلام لاللة .. انا من طرف سلمى
استغربات مدام بهية وقالت: سلمى؟؟ شكون سلمى؟
سميرة: كنتو باغيين خدامة ؟.. انا من طرف سلمى اللي كتقرا مع ولدك ..تميم
مدام بهية : ااه .. اوكي تفضلي
خلات سميرة هازة عينها فالدار والرقي والفخامة اللي فحد داتها بساطة ووقفات فقلب الدار قدام مدام بهية .
جبتي معاك بطاقة تعريف ديالك. والعنوان الحالي فين كتسكني
سميرة: الصراحة ماجبتهم..ولاكن نمشي نجيبهم. ليك
شافت بهية فالدار كانت مقلوبة وقالت: من بعد وتجيبيهم ليا اوك ..دابا جمعي هادشي وحاولي باش متهرسي حتى حاجة.. كتعرفي طبخي
سميرة: اه اه كنعرف
مدام بهية : المهم .. نني غتكلفي بالدار .. الترتيب وداكشي راكي عارفة خدمتك
سميرة: اهاه عارفة هادشي متعودة عليه الاللة
مدام بهية: مدام.. مدام بهية.. الطبخ حاليا غتخليه على جنب.. غتصاوبي ديطوكس وخليه صافي .. بالنسبة لمسيو تميم اللي هوا ولدي وكيجي فلعشية تقدري تشوفيه وانا مكايناش.. فاش يدخل ماتحركي حتى حاجة ..كيبغي السكات والهدوء ومكيبغيش يشم ريحة المنضفات.. حاولي تنضفي بلا معطرات وبالماء يكون سخون .. تفاهمنا.. حتى معطر مايترش وحتى منضف فيه الريحة ماتستعمليه..فقط قلبي هاد الاعواد مرة مرة هما كافيين باش يعطرو الدار بالقدر المناسب.وبخصوص الماكلة ماتوجدي ليه حتى حاجة هوا متبع نضام غدائي خاص ماكلتو كيوجدها راسو.. ااه اهم حاجة .. ماتهضريش معاه نهائيا وماتسوليهش.. من غير الى سولك خلي كل حاجة بلاصتها وماتبدليهاش تافقنا . خصاتك شي حاجة تقدري تستعيني بالعساس يجيبها ليك .
سميرة: واخا مدام بهية
مدام بهية: غنمشي دابا .. وماتنسايش انو قلت ليك
حرجات مدام بهية وسدات سميرة الباب وهزات راسها كتشوف فالدار وباستنشاق
الله .. الله ياختي الناس اللي عايشين .. حنا عندنا فيييلا ياحسرة وكيحشتبنا راحنا لاباس علينا .. اودي… نمشي نجمع وبشوية لايكونو دايرين ليا الكامرات هنا .. هادو يديروها ويفوتوها لهيه
ضربات دورة فالدار عاضة على شفافهها وبدات كت مع وتمسح قائلة: هادي هي الروينة عندكم ؟ هاد الروينة هي التاويل والحداكة عندما ..اودي قالك روينة ..مخدة مايلة قالك روينة
بدات تمسح ودوز ودور من قنت لقنت ومشات لكوزينة زربات عليها دغيا ومسحات الارض الخشبية عاد حلات باب بيتو بشوية كطل ودخلات ليه كان بيت كبير وديكور خفيف رجالي وعطور رجالية .. شرحات عينيها كتشوف فداك البيت جا شوكة كيطل على جوج جوايج.. جهة كطل على الوداية وجهة كطل على اليخوت وصومعة حسان
بقات كدور فراسها قدام الحائط الزجاجي اللي عندو شرفة كبيرة مدورة على الدار كلها من برا .. لقات حوايجو محطوطين تما وهزاتهم طواتهم وبدات ترتب حتى وصلات لواحد البلاكار طويل فيه السوايع والروايح ديالو والسماطي ديال السروال وفجنبو انواع الاحدية مستفين.. تراجعات اللور خافت تقيسهم وقالت
لااالا..شداني اختي.. مانقيسهم مانمسهم تمشي طيح شي ريحة ولا ساعة يسيفطوني للحبس.. خليني بعيدة على هادشي .
بعدات كل حاجة ثمينة وحساسة ودخلات للحمام غسلاتو ومسحاتو وجات خارجة والفوطة فيديها ..سمعات باب الدار تحل
توخرجات من البيت شافت تميم داخل ومعاه لجين موراه وبقات مصمرة كتشوف فيه .. الدهشة والصدمة والاميهار كلشي تجمع فديك اللحضة اللي شافتو فيها لاول مرة خلاوها تابتة فبلاصتها وعينيها تابتين عليه .. وقف قدامها كيشوف فيها وقال
نتي المديرة ديال الدار الجديدة؟
قالت ببلاهة :اا؟ اه اه.. انا
تميم: امم .. اوكي.. صاوبي لينا كافي .. وحدة بلا سكر
سميرة: اهاه .. واخا هي اللولة
مشات بالزربة للكوزينة لي كانت محلولة على الدار كلها كتفتف ماعرافتش كيفاش تخدم الماكينة وبقات كترون وتشوف فيهم .. جلسات لجين على الكنبي دايرة رجل على رجل والحوار كامل انجليزي وقالت
مابيهاش الجامعة ديالك.
حيد المونطو وجلس على رجل الكنبي وقال : مزال ماولفت عليها .. كنحاول نتأقلم
هزات راسها عندو وهبط باسها تحت انضار سميرة اللي مخرجة عينيها فيهم حتى طيحات الكاس فالارض وتلفت شاف فيها وهي كتفتف وتجمعو ورجع جلس حدا لجين كيبوس فعنقها وشفاهها وهي كذلك .. ناض شد ليها فيدها دخلها للبيت وبقات سميرة واقفة مخرجة عينيها كتردد
اويييلي!! اوييلي شنو مشاو يديرو . مييمتي على ولدك ا الهام فين نتي وفين هوا بعد السما السابعة على الارض السابعة
سميرة واخا تحيلات الخدمة عندهم قدماغها ماتوقعاتش طلع اكبر من داكشي اللي تخيلات..ضنات انها تقدر تنساحم بسهولة حسب المحيط ديالها ومعرفتها .. لاكن الواقع طلع حاجة اخرى .. وواخا حطات ليها بهية الشروط فالاول قالت غادي نتطلق معاهم صعيبة غير البدية .
وحلات فالقهوى ماعرفات كي. دير ليها وكيفاش كيشربوها ولقات تما انواع واشكال ديال القهوى .. صاوبات واحد جوج كيسان وحطاتهم فالجنب وبدات كدور وتسنا فيهم يخرجو..طولات فالانتضار فالاخير تحل الباب وخرج تميم بوحدو وخلا الباب مايل .. كانت سميرة واقفة جهة البالكون فاش شافتو ودخلات بالزربة دازت جنب البيت بلعاني تسرق الشوفة شمات ريحة الكارو خارجة ولمحات لجين فوق الناموسية جالسة طالقة رجليها والفراش داير بيها و مغطية صدرها بطرف من الغطا الاسود . مشهد كان كافي يتلف سميرة على المشية وزادها تميم فاش شافتو فتح واحد البلاكار زجاجي جنب المطبخ جبد منو قنينة خمر طويلة .. طلعاتو من رجليه حتى للشورط اللي لابس والبطن المنحوتة وعليها شعر مشتت ناعم وعلى صدرو العريض والوشام فرقبتو .. تلفت قاليها
ممكن تجيبي لكيسان
ودت بالايجاب تالفة ومشات كتفتف هزات كيسان وتلفت قاليها : ماشي هادوك.. روك كًلاص
تزيرات كتفتف قدام الكيسان المعلقين قدامها وهوا كيشوف فيها .. سد عينيه وحلهم ومشا جبد جوج هزهم فيديه ودخل بحالو للبيت وشد الباب .
اش هادشي اسميرة.. حساب ليك المسألة ساهلة.. لا ماشي بهاد السهولة.. واش كان يحساب ليك الخدمة غتكون غير مسح وشطب ونضف .. اكيد لا … خاصك دروس باش تقدري تفاهمي معاهم والا ديري بناقص وخليك فالمستوى ديالك . لا لا وشكون القضية ماشي قضية خدمة .. القضية فيها ولد ختها دابا وخاصها تشرف طريقة تدير بيها امورها اما الى بقات على هاد الحال ماتفهمهم مايفهوما فقريبا غيسيقوها مع الدروج ويقوليها ليها مع السلامة.
دخلات كتجري لليوتوب وتقلب وفنفس الرقت كتردد
هادشي ماهواش كما ضنيت.. اوو حتى ليكاس ولا عندهم اسماء؟؟ انا كنعرف كاس الماء وكاس العصير وكاس العنبة.. هاد روك ولا ريك عمرني سمعت بيه! ايوا مدام الكيسان عندهم سميات حتى الطباسل والمعالق بالسميات !؟ وانا جالسة نقول لمولات الشي متعوودة لا نتي متعودة على خدمة القصور
النهار الاول عند سميرة فالخدمة داز على خير وداكشي اللي عرفات ليه دارتو دارت اكثر من مجهودها ..شافت راسها سالات ولبسات حوايجها ومشات خرجات بحالها رجعات فالطاكسي للدار . لقات الهام كتسناها على اخر من الجمر .. سداتها جلساتها بجلابتها وحتو مها تقابلات معاهم تسمع
سميرة: هتي شغنقول ليك وباش نبدا ليك.. انا كن جيتي عليا سييرري عندها قولي ليها عطيني طرف ديال الفلوس نمشي بحالي حسن ليييك حيت موحال واش يقدر ول ك يرجع ليك .. مابغيتش نضرك ولاكن الحقيقة هي هادي الولد عايش فواحد العالم اخر سحاب ليك دابا غيقول هادي مي ولداتني ولا الجنة تحت اقدام الامهات ويخاف من السخط ..لااالا … الولد و الوشام و كيشرب والشراب محطوط فالدار اشكال انواع ومدخل صاحبتو حتى للبيت حساب ليك عبرني ولا حشم ولا قال معانا الزايد.. هاكا عيني عينك سد عليه الباب هوا وياها ..اش غتشرحي ليه وشنو غتفهميه وواش غيفهمك ولا يزيد يحقد عليك .. حياتو وعقلو فجهة ونتي فجهة
ضارت الهام كتبكي عندها مها بغضب وقالت: نتييي اللي قلتي ليا يكير ويقلب عليييك نتي.. نتي اللي طمعتيني كلكم طمعتوني حتى عطيت ولدي .. نتوما السبب
لاحت مها يديها وقالت: سيري اختي تحيبي مسبتك علينا قالك حنا طمعناك .. نتي بغيتي ديعي ومابغيتي لا حمد لا محمد يبقا متقل عليك .. عطيتيه ومشيتي دعتي نتي وهاداك اش اسمو حتى طبيتي ورجعتي يد اللور يد لقدام عاد تنادم معاك الحال مالك ديك الساعة ما فكرتي فيه ماسولتي فيه ديك الساعة كان عاجبك الحال دابا عاد جايا تبكي وتشكي حقا ولدي.. ديك الساعة شديه وديه ربيه نعرفك مرا ونص.. الملاكات اللي كانو عندك فداااك الوقت راه يعيشوه ولبسوه ويوكلوه بلا فلوس هاد بهية ولا اش سمها .. زوينة هادي قالك حنا السبب حنى حطينا عليك الموس
سميرة: وااامي وااامي راه مايدوم حااال طلبي السلامة …
مها : انا طالبة السلامة مالي شنو شفتيني كندير.. صافي كي قلتي نتي تمشي عندها تخلعها وتاهد منها طرف ديال الفلوس وتغبر كي غبرات هادي عشرين عام مالو نوا كبر حداها ولا كلا معاها باش يقوليها مي.. راه مو ديال بصح حاطة ليه البنات والشراب كيف بغا وكبراتو فالخاريج ميعرف لا ديدي لاحب ملوك ..صااافي (مسحات يديها) الدري عقلو تتت..توالف مع داكشي كيعوف باه الكاوري ومو الفاسية والفيلات والبنات ميعرف لوبيا ميعرف عدس ماكلا عصا بعلاقة ما جلس فراس الدرب .. تخربيق
الهام بغات تموت شدات حناكها وقالت: اويييلي كي غنعييييش؟؟ كي غندير نعيش انا وانا عارفة عندي ولد قدو قداش .. ديرو راسكم بلاصتي كيفاش غنعيش وانا ولدي معارفينش
الام: وحاسييين بيه راك كي نتي ولدك تا حنا ولدنا .. مشويين عليه.. ولاكن ماعندنا ماانديرو تا حنا محرقين عليك .. دابا حسابك ساهلة نشوفوك هاكا وحنا عندنا ولد مكيعرف تا واحد فينا .. جاتك ساهلة. شغاتقولي ليه فاش يقوليك علاش بعيتيني؟ هااا ؟ يالاه جاوبي
هبطات العام وجهها شاداه كتكمدها وكل واحد فين مربع كيشوف.. هزات عينيها شافت فيهم وقالت : انا ماعندي جهد للصبر.. عييت مابقيتش قادة .. سميرة. شوفي ليا ديك الورقة فين حاطها ..موتي حيااي جبديها وجيبيها ليا
سميرة: اويلي منين غنجييها ليك انا تسطيتي؟؟ باش عرفتها عندها ولا عند راجلها ولا فالمغرب ولا فشي بلاد… حسابك انا جن … هي النهار اللول قتلات معايا المش بقا ليا غير نقلب ليك على الورقة فين كاينة
الهام : غير حاولي.. ياك دابا هما رجعو للمغرب غايكونو جايو معاهم وراقهم حتى هما فين عمرك شفتي شي واحد رحل وخلا وراقو ؟؟ قلبي مزيان غير قلبي
سميرة: لااالالا هادشي خطير .. هادشي اللي كتقولي اختي صعيب فيه الحبس .. نمشي نحصل فيها تسيفطني للحبس
الهام باصرار: جيبي ليا الورقة ونعطيك اللي بغيتي..
سميرة: اويييلي واش هي ساهلة.. واش غير اجي وخود الورقة انا كن عرفت راسي قادة نجيبها راه غنجيب بلا والو
الهام: دابا غير حطيها فدماغك .. ركزي ليا عليها وخليك كتنبشي لقيتها مزيان مالقيتيهاش نقلبو على حل اخر .. المهم نتي ماتميكيش وركزي عليها ماحدك دخلتي لديك الدار نستاقدو بعدا من شي حاجة
الام: وهانتي شديتي الورقة يالاه اش فجهد ماديري كاع؟
الهام : ديك الساعة غتشوفي شغندير.. وتشوفي الى مارديت ولدي هانا هانتوما
سميرة بتردد: ايوا انا غنجرب.. ونشوف.. المهم غندير جهدي ولاكن متعوليش عليا
دخلات سلمى كتعرج. ابتاسمات وجلسات معاهم لقاتهم كيديرو كاسكروط وقالت
غدا غنخيد الكبص.. اوووف على سلامتي.. محنني
شافت فيها الهام كتنهد وقالت: كترو عليا المصاريف .. دابا مقلبو ليك على شي جامعة تحولي ليها هنا بزاف عليا بنتي نخلص عليك كل شهر زبالة دالفلوس
وحلات النعمة لسلمى وبقات كتشوف فيها مصمرة وقالت
وعلاااش؟ ياك قلتي ليا غنبقا نقرا تما وتخلصي عليا ؟؟
الهام: هادا جهدي ابنتي مابقا عندي جهد…
شافت فيها سميرة بنص عين وشافت فسلمى والدموع تحجرو فعينيها وقالت
غتبقاي تقراي تم … الى بغات نجيب ليها الورقة تخلص عليك الجامعة
شافت فيها الهام مصدومة وقالت: ايااه كديري ليا شنوطاج دابا؟
سميرة: واختي ماعندي ماندير ليك انا مغامرة معاك غامري معايا.. تا انا راه لا الاه الا الله. هانتي كتشوفي مجرجرين معاك فحريريتك وصابرين وماقلنا والو ها العار غير يرجع ليك ولدك
ربعات الهام يدها وقلبات وجهها وسميرة كتاكل الزيتون وتشير وتمد بعينيها لسلمى قائلة
كولي… هاكي
النهار داز والليل يا الليل.. بهية داخلة وتميم لابس وخارج هوا ولجين .. هزات فيه مدام بهية عينها وهوا كيطلع السنسلة دالجاكيط وشافت فلجين متفاجأة وقالت
لجين!!!
مدات لجين وجهها سلمات عليها وقالت: مفاجأة
مدام بهية: كفاجئة نيت!!
تميم: حتى نرجع تا نرجع
ردات عليه مدام بهية كتلوي راسها وطلع فيه : رجعتي للاللة ومالي .
سد الباب مع غميزة ونزل هوا واجين داير القب على راسو من البرد وهبط فواحد البرد بحال السم كيدخل فالعضم
بسرعة طلع فسيارتو هوا ولجين وقال
تميم:نوصلك لطموبيلتك
لجين: ماسخيتش بيك علاش مانمشيش نسهرو انا وياك
تميم: عندي شي شغل .. خلي حتى لغدا ونسهرو
لجين: بحالاش هاد الشغل؟
تميم: غير شي حاجة وصافي.. ماشي مهم . غدا نتلاقاو فلافاك
لجين : صافي واخا .. ماشي مشكل
حطها قدام سيارتها وتوادع معاها بقبلة نارية وانطلق فطريقو وتيليفون فيدو كيصوني ويعاود على بيان .. وصل لملتقى الطرق ومشا عكس الطريق اللي كتديه لدارهم مباشرة لبيت بيان ووقف كيشوف من السيارة النوافد والاضواء.. .. نزل من السيارة مشا دق الباب فتحات ليه الخدامة سعيدة وسولها وهوا كيشوف وراه فالدار
بيان هنا
سعيدة: لا مكايناش
تميم: مقالتش ليك فين مشات؟
سعيدة: من لبارح الصباح ماشفتها مللي خرجات مع الطناش
تميم: مع الطناش كتقصدي ملي خرجات مارجعاتش.. متبدلات لا حوايج لا والو
سعيدة: خرجات بواحد سورفيت ديال اديداس صافي من تما ماشفتها.
حرك راسو بالايجاب كيشوف قجنابو ويفكر وتلفت شافيها وقال
ماماها عارفة بغيابها ؟ ماسولاتكش؟
سعيدة: مدام سارة كتجي معطلة بالليل والصباح كتخرج بكري.. وليوم قالت ليا غتسافر واحد اليوماين عندها الشغل .. خدات الشنطة ديالها ومشات
استغرب وقال: وماسولاتكش على بيان؟
سعيدة: لا الصراحة ماسولاتنيش جات مزروبة ومشات .. هي هاكا
تنفس بعمق كيحرك راسو بالايجاب وقال: اوكي شكرا.. تقدري تعلميني في حالة ما جات بيان .. نخلي ليك نمرتي اوكي
سعيدة: واخا مسيو نعلمك
خلى ليها النمرة ديالو ومشا بحال فالسيارة كيصوني ويحاول مرارا وتكرارا حتى وصل للدار وطلع لقا مدام بهية فالصالون جالسة مسرحة رجليها وفيديها كتاب كتقرى . سولها مباشرة وقال
مدام سارة سافرات؟
استغربات مدام بهية وقالت: اه ؟؟ وكيفاش عرفتي؟
تميم: واش مشات خدمة ؟
مدام بهية : طبعا وهادشي عادي علاش هاد السؤال؟
رد وهوا كيقلع الجاكيط عليه: والو ..غير كنسول واش مقالت ليك والو على بيان ؟
حطات مدام بهية الكتاب وشافت فيه بتركيز قائلة: شغاتقولي ولا نقولها ونتا بعدا شنو قصتك مع لجين؟ كيفاش حتى جات وعلاش رجعتي لعادتك لقديمة؟ حتى رتاحينا من الصحاب والسهير حتى للصباح
دور عنقو بتعب وقال داخل لبيتو
صافي صافي.. صافي ماتبدايش
حيدات النضاضر وتبعاتو للبيت قائلة
شنو نبدا ولا مانبداش لا خاصني نعرف اي حاجة متعلقة بيك اتميم
تلفت عندها هاد حاجبو كيحرك راسو وقال بيرودة وهدوء
ماشي كلشي خلي عليك خصوصياتي
مدام بهية: لا خاصني نعرف لجين علاش جات وشنو كانت كدير هنا؟
تميم: بيان لا لجين لا … وشنو اللي اه؟
م بهية: بيان بنت الشريكة ديالنا وعلاقتك معاها غتفسد هاد الشراكة
تميم: وانا قلت ليك واخا وتفهمتك ..ولجين علاش؟
م بهية: لا لجين لا بيان لا غيرهم … صافي ركز فقرايتك بقا ليك هاد العام غتبدا تخدم وغتحون مسؤول والمسؤول كيكون معقول .. وماتقولش انا كنكر عليك ديما وتبدا تدمر .
تنفسات بعنق وخرجات كتلوح براسها يمين وشمال خلاتو ورجعات لقرايتها
النهار الثاني عند سميرة فالخدمة ومدام بهية خارجة مزروبة للخدمة .. فضات الساحة لسميرة ودخلات ارت راسها كتمسح وتنقي فبيت مدام بهية وفنفس الوقت كتقلب فين حاطة اوراقها .. بدات تعلق الحوايج اللي خلات وراها فالبلاكار وفجأة بان ليها كوفر حديدي طويل وسط البلاكاو وتما عرفات انهم يقدرو يكون الاوراق وكاع داكشي اللي مهم .. سداتو بميوعة ورجعات كضحك بسخرية على راسها وهلى الهام اللي قالت ليها جيبي الورقة . ورجعات للكوزينة تشوف شغلها باش تمشي قبل متوجع مدام بهية وتسولها على بطاقة التعريف ديالها
يوم ملل فالجامعة وفالكافيتيريا.. الشتا خيط من السما حتى واحد ماقدر يخرج وكلشي تجمع لداخل وكل مجموعة فين جالسة .. دخلات سلمى كتعرج برجلها لاكن محيدة الجبص وكضحك مشات فاتجاه لجين وتميم وجهاد .. وقف الاخير جر ليها الكرسي وقال
جهاد: على سلامتك .. شنو رتاحيتي دابا
سلمى: اوف كنحس براسي خفيفة
تميم: على سلامتك سلمى اخيرا تهنيتي من الجبص
لجين: ا وففف سولوني انا على العداب ديالو فاش درت حادثة اخر مرة .. ميمكنش شحال كيعدب ميمكنش
تميم: ان شاء الله تكون اخر مرة ديريه اسلمى
سلمى: شكرااا
جلسات ربعات يديها وقالت كتسوح عينيها
حتى ليوم مجاتش بيان؟؟ فشكل
تميم: مامولفاش ليها تغبر بحال هاكا
جهاد: ماتكونش مريضة؟
تميم: لالا مكايناش اصلا فالدار في ريعان
شافت فيه لجين باستغراب وقالت : كيفاش عرفتي؟
شاف فيها كيرمش وقال: عرفت
جهاد: مشيتي شفتيها فالدار؟
شاف فيه تميم بارتباك وقال: اا ماماها .. ماماها حنا وماماها شركاء فالاوتيل هادشي باش عرفت
تصدمو كاملين وقالو : شركاء؟؟
جهاد : هادشي جديد هه مكانش فخبارنا
لجين: بصح؟؟ لالا بصح انا بغيت نتعرف عليها وفضولي كبر بزااف
شلمى باستفزاز: كن تشوفي شحال زوينة… بيضاااا وخدودها موردة .. عيونها كبار وزوينين بزااف.. وشعرها حرير ذهبي وكلشي كيحماق عليها فلافاك ..ياك اتميم
ضحك جهاد بسخرية وقال: نسيتي واحد الحاجة .. ضريفة مع كولشي وكتحشم بزااااف ..
سلمى: اجي ملاحضتوش واحد الحاجة؟ جاد حتى هوا مكاينش ..
تقاد جهاد فالجلسة وقال: بصح جاد من الاثنين مابانش؟؟
شاف فيهم تميم بجوج وقال: زعما يكونو مشاو لشي بلاصة بجوج؟
لجين: وشكون هوا هاد جاد حتى هوا؟؟ بانت ليا الشلة ديالكم ناقصة ناس اخرين
سلمى: جاد هوا التيتيز ديال لافاك ومصاحب مع بيان
جهاد: بلاتي انا غنجيب ليكم خبارهم دااابا
جبد تيليفون دخل الانستا كيقلب فحسابها لاكن بيأس قال
ماحطات والو .. مامولفاش ليها مولفة كتصبغ غير دفر كتصورو وتحطو كيفاش غبرات على السوشل ميديا ؟؟…..سمعو سمعو ضريبة الشهرة .. قالك القاء القبض على قاتل بتهمة القتل والحب والغيرة هوا السيف اللذي مزق جسد الفتاة في ريعان شبابها
خبر هز الصخر .. خطف تميم تيليفون من يدو بسرعة وكلشي متفاجأ من ردة فعلو وبدا يقرا الخبر ويقلب بينما لجين ساكتة كتشوف فيهم مصدومة
لجين: مالك تهزيتي هاكا ؟؟ شنو واقع؟
عطا لجهاد التيليفون وجبد هوا تيليفونو كيقلب وجهاد كيتنهر ويشوف فتيليفون ..ماهي الا لحضات حتى تنشرات الصورة دبيان وعليها عنوان مفزع طويل عريض فإحدى الصفحات هزهم كاملين من بلايصهم مخلوعين .. الخبر بسرعة انتاشر وجات بنت من الجامعة كتجري لمجلسهم وقالت
واش شفتو شنو تنشر ؟؟ قال لقاو جثة بيان مقطعة واش شفتوها
جهاد: مقادرش نتيق .. لالا هادي شي اشاعة من الاشاعات ديال السوشل ميديا
سلمى: ناري مامتيقااش
لجين: انشوف؟؟
تميم: ميمكنش… مستحيل.. ميمكنش تكون بيان ..
سلمى: وعلاش غبرات علاااش ؟؟
جهاد: انا غنتكلف .. الا كان الخبر كادب ديك الساعة غتشوفو شنو غندير مع هادا الصفحات وهاد الصحافة دالصرف الصحي
جبد جهاد التيليفون كيهضر مع باه وتميم تاصل بمو والدنيا تقلبات فالجامعة كلشي كيهضر على خبر بيان وكولشي مصدوم والدكاترة كلهم جتامعو وحتى واحد ماقرا ديك الساعة كاع اللي عندو معارف ولا اقارب جبد تيليفون كيحاول يعرف من مصاره الخاصة على صحة الخبر .. اما السوشل ميديا تقلبات سفاها على علاها .
تلقات مدام بهية الخبر من البيرو ووقفات مخلوعة ومصدومة قائلة
كيفاش؟؟؟ ميمكنش سيفط لي هادشي نشوف ؟؟ يالاه دغيا يمكن تكون اشاعة …. وانا منقدر ليك والو اتميم دابا كيفاش بغيتي نعرف واش الخبر صحيح ولالا ؟… واخا واخا انا غنشوف ونرد عليك .. واعطيني شوية دالوقت صبر عليا غير نستوعب بعدا ..يالاه صافي صافي قطع قطع
قطعات وتاصلات مباشرة بمدام سارة قائلة
الو مدام سارة .. واش سمعتي اخر الاخبار؟ .. قالوها ليك ؟ متخلعيش ماتخافيش غادي تكون غير اشاعة غير بشوية عليك. بشوية عفاك .. نتي جايا دابا !!! ولاكن بشوية عليك ان شاء الله مايكون والو ..ماتخافيش. ااه هضرتي مع معارفك من السلطات يبحثو فالقضية… مزيان باش نعرفو مصدر الخبر وكيفاش عرفو بهادشي. اوك مدام سارة انا كنتسناك
قطعات وجلسات متوثرة كتصوني على تميم وتردد
اش هاد الموصيبة يا ربييي.. شهادشي ياربي يكون كدوب ياربي .الو تميم… الوو . دابا هضرت مع مدام سارة غادي نعرفو مصدر الخبر وغيبدا التحقيق والبحث فهادشي .. اي جديد غنعلمك نتا اللول
قطعات وقطع حتى تميم اللي كان فالجامعة وسط الطلبة كلهم مجموعين فالكافيتيريا وكلشي مهول وباغي يعرف شنو واقع والخبر كيزيد ينتاشر عبر المواقع حتى رجع سيرة فكل سطوري. فجأة قطع جهاد التيليفون وهز يديه قائلا :
العشراااان…كلشي يتهدن ..كولشي يجلس ماوقع والو .. الخبر كادب مجرد بوز وصافي
تميم: كيفاش مجرد بوز فين هياااا بيان دابا ؟؟ فين غبرات وجهاد حتى هوا مكاينش.
جهاد: تهدن .. دابا طلع لينا من شي بلاصة غير تهدن انا دابا عرفت من مصادري الخاصة باللي الخبر كادب.. ماتخلعوش.
هز واحد نن الطلبة تيليفون وقال
نزل خبر اخر كيكدب الخبر اللول.. قال مجرد اشاعة ..الخبر كادب
جلس الجميع وكل واحد مشا يشوف شغلو والجميع كيردد
والله هاد بيان حمقة وكتعاطا لشي حاجة
البنت ماشي عادية واش كاين شي واحد كيدير البوز بهاد الطريقة!!
كنت حاس انها لعبة من العابها ولاكن هاد المرة سطاج الوحش
خلعاتنا ومادخلنا للمحاضرات ديالنا مامشينا لديورنا نرتاحو
جهاد: والله هاد بيان نمرة واشمن نمرة.. قلت ليكم راه غيكون الخبر كادب..هااا. هاهوا بدا ينتاشر
تميم: بلاتي … تيليفونها شعل كيصوني.. كتقطع ..مافهمتش ..مابقيت فاهم والو على الاقل تبان نشوفوها
جهاد كيضحك: تسنا عليها دابا تم جايا كتنقز وتقول ليكم. سوربرااااايز
الحارس: جهاد… الدكاترة فاجتماع بغاو يتكلمو معاك .
جهاد: يالاه … سير دابا شرح ليهم كيفاش وعلاش ومنين .مشكيلة هادي
عافية شعلات وطفات .. تنهدنات الاوضاع وخرج جهاد من الاجتماع رجع لبلاصتو جلس معاهم وقال
مشاكيييل… هاد بيان ماعرفتش مناش مصنوعة . وهاهيا لدابا مزال كابانتش!
شدات سلمى فحنكها وقالت: اويييلي ..انا لدابا مزال مامتيقاش
جهاد: غير تيقي احبي .. مزال تشوفي الاكشن والدراما حتى ماتبقايش تخلعي..باقي لعام طويل وغنشوفو ابداعات بيان اللامنتهية
وقفات لجين وشدات لتميم فيدو وقالت
تميم..اجي معايا بغيت نهضر معاك
بعد هوا وياها فجهة منعزلة ووقفو
لجين: مالك هاكا تخلعتي وتقلبتي؟؟ اشنو كاين؟
تميم: كيفاش شنو كاين؟؟ هادشي جاك عادي؟
لجين: ولاكن ردة الفعل ديالك نتا زايدة على هاد بيان!.
تميم: كيفاش بغيتي ردة الفعل ديالي تكون والقتل نتاشر على بنت كنعرفها وفوق هادشي بنت الشركاء ديالنا فالخدمة. جاك هادشي مبالغ؟؟ نضحك ونقول ماشي ماشي مشكل؟؟
لجين: عندي احساس .. احساس فشكل..
قاطعها وقال:خلي احاسيسك عندك دابا مللي نتي ماحركاتش فيك هاد القضية حتى حاجة ماتناقشيش معايا..
مشا خلاها واقفة وداز على طاولة سلمى وجهاد وقال:انا مشيت فحالي
خرج بحالو ركب سيارتو ومشا عمد مدام بهية للكازينو لقاها فالبيرو جالسة ويدها على جبهتها ..دق ودخل عندها جلس قدامها باريتاح كيتنفس بعمق
مدام بهية: حتى نتا عرفتي؟ عاد دابا قطعت مع مدام سارة.. قالت ليا باللي الخبر غير كدوب..وباللي تاصلات بيها بيان وقالت ليها ماتعمل حتى بحث وماتفتح حتى قضية.. وباللي هادشي متعلق بعلاقتها مع السوشل ميديا وغبرات شوية اضطرت باش تعمل بوز
تميم: هي قالت ليك باللي هضرات معاها؟؟
مدام بهية: اه هي قالتها ليا..وصافي وقفات كلشي … عقلي مقادرش يستوعب !!! كيفاش البنت قدرات تهز قلوب الناس وقلوب عائلتها على قبل البوز!! .. هادشي مكيدخلش للعقل
تميم: انا غادي للدار .
جبدات فلوس من الكوفر فواحد الشنطة وقالت : هادو خودهم معاك فطريقك وحطهم فالكوفر فور اوكي؟ هاك حتى هاد الشيكات ..وانتابه راك غتولي مسؤول وهادشي غتبقا ديرو راسك
تميم: باقي الكود هوا هوا
مدام بهية: باقي هوا نفسو.. عنداك الشيكات يمشيو ليك ..بيهم باش شادة كل قمار جا لعب هنا وخسر.
تميم: اوكي ..كوني هانية
هز الصاك داه معاه وركب فسيارتو حطو حداه ومشا للدار مباشرة دخل لقا سميرة كتمسح الزاج . ماهضرش معاها ومشا ودخل للبيت سد عليه الباب وفتح الكوفر وبدا كينزل فيه الفلوس والشيكات ..صونا ليه تيليفون وجبدو من الجيب لقا بيان كتتاصل وبسرعة رد عليها قائلا
بياان!!! ..
بيان: مالك ؟؟ تخلعتي عليا؟
تميم: شهاد التبرهييش هادا. وعلاش طافية التيليفون ؟
بيان: ومن بعد فين كاين المشكل؟ لهاد الدرجة
رد بغضب: اش هاد الفعايل هادو واش حماقيييتي؟؟. فينك دابا فييين ؟
بيان: انا فباغيي
تميم: باغي؟!!!
بيان: علاش جاتك عجب؟؟
حط يدو على جنبو وقال بغضب وباستغراب: انا مافهمتكش!!… يوماين طافية تيليفون شوية طاع خبر عليك خلعنا كلنا شوية نتي فباغي؟؟ شنو كتحاولي ديري بالضبط؟؟ مابقيت فاهم والو فيك ماعارفش راسي حتى معامن كنتعامل اصلا
زفر بغضب ومشا جهة البشرفة وقف كيطل ويتنفس وقال
باغي ياك؟
بيان: امم .. الى بغيتي تجي اجي انا فضلت ندوز عيد ميلادي هنا
تميم: عيد ميلادك!!! اهاه ومعامن ؟
بيان: داكشي كيخصني
تميم: وعلاش دابا عاد عيطتي ليا؟؟ شنو غنزيدك انا
بيان: غير بغيت نشوف شنو باغي حيت لقيت مليون اتصال منك
تميم: عرفتي شنو … انا كنسحب كاع اتصالات ديالي .. مكانش كيحسابلي نتي هاكا..باي
قطع عليها ورجع دخل لاح داك تيليفون فوق الناموسية ومسح على راسو كيزفر وخرج دخل لبيتو حيد حوايجو ومشا للدوش سد عليه
هنا سميرة كانت كتمسح الراج وعينيها وعقلها معاه ودخلات وراها كتفتف وتمسح حتى وصلات للبيت ديال مدام بهية ولقات البلاكار محلول .. طلات عليه لقات الكوفر ختى هوا مايل. مامسدودش وخرجات عينيها وبدات دورهم ومشات بالزربة للبيت ديالو شمعاتو كيدوش ورجعات كتمسح وتفتف لبيت مدام بهية وحلات لكوفر لقاتو عامر فلوس ومجوهرات وملفات ماعرفات باش تبدا
جبال ديال الفلوس مستفين شي على شي .. وشي فوق شي.. مزاحمين وسميرة كتقلب بسرعة بيناتهم .. جبدات واحد الملف عامر اوراق كتقلب وكلشي تشتت فالارض وحتى حاجة مامكتوبة بالعربية وماعرفاتش الورقة اللي غتاخد كيفاش دايرة وهي مقارياش الانجليزية والفرنسية.. كان كوفر صغير مسدود وسط الكوفر الكبير وهنا شكات تكون ديك الورقة تما .. حاولات عما تحلو او تجرب ودورات الساعة ديالو لاكن كاتحلش بلعكس الخطأ طلق اندار ماعرفات صوتو من جاي. بالخلعة بدات كتجمع وتخشي كولشي والاوراق عاد كيزيدو يزلقو ويطيحو ولسوء حضها دخل تميم بسرعة للغرفة حصلها ويديها فالكوفر.. والاوراق فالارض والفلوس فالبلاكار محطوطين .. سميرة شكت ليها القلب وبقات واقفة كتشوف فيه وجسدها كامل كيترعد.. كان عريان ملوي عليه الفوطة تقدم كيشوف فيها بغضب وشار بيدو قاليها
جلسي هنا ..وخليك جالسة .. بلا مانستعمل معاك العنف
سميرة: انا .. غير بلاتي انا. مكنسرقش .. انا ..
هز تيليفونو اللي خلا فوق الناموسية محطوط وقال: سكتي دابا وهادشي شرحيه للبوليس
تاصل بمدام بيان وقال: كاينة محاولة سرقة فالدار.. لخدامة اللي جبتي .. اوكي
قطع وسميرة كترعد وتبوس ليه يدو وهوا كيهربها وقال
ماتقيسينيش عفاك .. خليك بلاصتك ماتحركيش
سميرة بغات تسطا وطاحت فالارض كتبكي وتلاح حدا رجلو وعقلها خرج من بلاصتو.. وصلو البوليس بسرعة ومشا فتح ليهم تميم الباب دخلو شدوها وهازينها من الارض وهي كتبكي وتسخف وتنوض خرجوها وتميم وراهم بالفوطة
تميم: غنبدل حوايجي ونلحقكم
ممكن العنوان ؟
عطاه واحد الشرطة العنوان ودخل بدل حوايجو بسرعة ونزل تبعهم كيهضر فتيليفون مع امه اللي بدورها كانت فطريقها لكوميسارية
وصلات بهية وتميم فنفس الوقت تلاقاو قدام باب الكوميسارية ونزلو فدقة وحدة ،ومشات عندو بهية كتجري وعينيها سابقينها
م.بهية : اش وقع؟؟. كيفاش كتسرق فهمني..
تميم: واخا ..دخلي وغتفهمي كولشي ها البوليس غيفهموك.. ويعرفوك حتى على الشفارة اللي جبتي لينا
دخلات بهية كتجري وتبعها تميم وفالباب عرفات براسها وقيل ماتعرف بنفسها شكلها وهندهامها الراقي والثمين دارو ليها كرسي جلسات واستقبلوها بكل احترام وتقدير وجابو لولدها كرسي. لاكن رفض يجلس وبقا واقف داير يديه فجيابو . دخلو سميرة كتبكي ووجهها احمر وعينيها منفوخين وجسدها مرهق من شدة التعب والبكا .. شافت فيها مدام بهية باشمأزاز وهنا الضابط شرح كولشي لمدام بهية وكيفاش لقاوها متلبسة قدام الكوفر فور ..استغربت مدام بهية وقالت
وكيفاش حتى حلات الكوفر فور ؟؟ هي جديدة غير يوماين هادي باش ب ات تخدم عندي
حنحن تميم وهبط راسو كيرمش وقال : انا … اانا ..نسيتو محلول
وقفات مدام بهية قدامو نسات اللي وراها واللي قدامها وخرجات عينيها مصدومة فيه وقالت
شنوو؟؟؟ عاود اشنو قلتي؟؟
هضر معاها تميم بعينيه واشارة من يديه باش ماديرش ليه فضيحة تما لاكن هي طفشات وقالت
كييًكك ككييفاش؟ نسيتي الكوفر الفور محللووولل؟؟؟؟ ياك؟
الضابط: هادو هما اقوالو اللي دلى بيهم فالدار قبلو مانجيبو المتهمة
سميرة بترجي: انا ماشي متهمة.. انا والله مادرت شي حاجة.. انا ماشي شفارة
شافت فيها بهية وقالت: لااا.. نتي بصح ماشي شفارة .. علاش نتي مشيتي حليتي شي حاجة بيديك ؟ نتي لقيتي الكوفر محلول بطبيعة الحال تهزي اللي بغيتي… علاش هي كتشمى سرقة!!!ً لا…ماشي نتا اللي سراقة هااادا اللي مستهتر… ماتعولش عليه نهااااائيا … انا اللي غالطة.. انا اللي غالطة تقت فيك وقلت كبر ونقدر نعول عليه ..شوفو شنو دار… الكوفر فوووور!!! كوفر فووور اتميم ليوم نسيتي بكوفر فور غدا شنو تقدر تنساااا؟؟ انا. انا اللي غالطة .. هادي ولا غيرها ولا شكون ماكان قدم ليه واحد بحالك مغارة فيها كنز غيمد يدو ..الحق عليك
عليك وفالدار غنتفاهمو على هادشي..غنتفاهمو مزياااان
تميم سكت دور وجهه كيسمع مانطقش وبهية تعصبات .. شافت فالضابط وقالت
انا هاد الاماكن عمرني وصلت ليهم ولا دزت من قدامهم.. ومامزياناش فحقي ابدا نكون هنا .. ولاكن مدام ولدي وصلني لهنا غدا نتوقع يوصلني لما اكثر. المحامي ديالي غيتكلف وينوب عليا فهاد القضية وهاد السراقة غتنال جزاؤها .. زيد قدامي
فوتات سميرة كترجاها وتعيط قائلة
دقيقة نهضر معاك … مدام بهية دقيقة بغيت نشرح ليك
لاكن مدام بهية خرجات وتميم وراها مشات فطريقها معصبة كتلبس النضاضر وفالخرجة ترصداتها كامرات الصحافة وصوروها ويلاه بغات تركب قشعاتهم وكملات الباهية.. هزات يديها بغضب وقالت
صافي.. صافي هادشي اللي بغيتي.. عطيتيهم فرصة فين يفضحونا شكرا
تلفت شاف واحد كيصورهم ونقز بين السيارات مشا كيجري تبعو ولا خر هارب وبهية فبلاصتها واقفة كتعيط ليه يرجع وكتخفض صوتها وعينيها كيدورو حشمانة من الناس..ركبات اللور وقالت للشيفور
تبعو .. تبعو غادي يحمقني .. غيسطيني تبعو
تبعاتو بالطموبيل لقاتو راجع كيزفر وموراه كاميرا مشتتة والصحفي فالارض كينوضو فيه الناس.
هبطات الزاج وهوا دايز حداها وقالت. بغيض
سسسسسييرر هززز طموبيلتك من قدام لكوميسارية وتبعني للدار… عنننداك تمشي لشي بلاصة اخرى
طلعات الزاج مشات ورجع تميم عند سيارتو ركب فيها وانطلق بغضب ضرب فالمقود بعصبية ومشا كيطير للدار لقاها يالاه نارلة من السيارة . طلعات هي وهي ومع الدخلة لا ت الصاك للجنب بغضب وضارت عندو قائلة
دابا شنو غندير معااك؟ هااا؟ شنووووو؟ لمن كنخدمو ؟؟ لمن جاوبني؟. لمن كنخدمو انا وباباك ؟ لمن كنصنع المستقبل؟. حنا الى جات علينا هادشي اللي عندنا كافينا حتى نموتو .. ولاكن حنا كنستتمترو ونكبرو ونسوعو الثروة ديالنا باش نتااا تعيش فأحسن مستوى وحتى واحد ميتكبر عليك. ولا يقول انا حسن من ول فلان .. ونتا سيادتك شنو كدير؟. ضدي..ياك ضدي ضد كاع هاد المجهود اللي كندير انا وباباك.. ماعاطي قيمة لحتى حاااجة.. لدرجة انك خليتي الكوفر فور محلول..الكوفر فور اللي الناس كيسدو ويبقاو شااكين واش سدوه.. هه لا والسي تميم خلاه مفرررع . .. قولي فيين كان عقلك؟؟ فااش كنتي كتفكر هضر.. شنو هي هاد الحاجة المهمة اكثر من الوثائق والمستلزمات ديالنا ..كتر من شغلنا ؟؟ جاوبني
بقا ساكت شحال فاللخر بدا يتدمر وقال
نتي جبتي شفارة للدار ..حتى ماقدرتي تاخدي من عندها كارط ناسيونال ديالها ماشي بوحدي اللي مستهتر نتي كتر مني!!
دارت بهية يد على فم ويد على جنب وقالت كتمشي وتجي
عندك الحق.. حتى انا نستاهل .. هادي جات قاصداني مية فالمية .. مدام ماعطاتنيش لاكارط النهار الاول واستغلت الشطنة ديالي فراسها فيه شي حاجة (شافت فيه) ولاكن هادشي مكيبررش الزبلة ديالك نتا.. انا الى جاني الزهيييمر علامن غنعول؟. هااا علامن ؟. شكون عندي من غيرك نعول عليه ؟؟؟. لا … وباباك كاتب ليك الكازينو ولهيلي كوبتر وفاتح ليك حساب فالبورصة وزيد وزييد وزييد ..بلا الطموبيلات والفيلات هادو منهضروش عليهم .. والسيهم تميم فاتح رزقو لمن والا ومقادرش حتى يحافظ على رزقو .. سمعني مززززيان.. الاولاد اللي بحالك مدينين بالنجاحهم المالي للأسر ديالهم فهمتي.. حيت ماشي كلشي عايش نفس العيشة وماشي كلشي عندو ثروة .. والعالم كيحلم بهادشي فاش نتا عايش.. القدرات الداتية مكتحققش هادشي كامل.. تحقق ليك جزء بسيط اما هاد الثروة كلها مستحيل تحققها .. هاد الثروة كيحققوها الاجيال.. كتوارث من جيل لجيل .. وهادشي حطو فراسك حيت هاد الثر حاضفو عليها اجيااال لعقوود وماشي منحقك دمرها وتخسرها بأتفه الاسباب.. داكشي كامل اللي كنملك انا ..واللي كيملك باباك كامل ديالك مستقبلا ..فمضربش تعبنا فالخوا وتذكر اننا دابا كل واحد فبلاد .. وسول راسك علاش.. حاول تستوعب هادشي والى كنتي كتبع الاخبار فتيليفون غتعرف شحال من واحد كيغرق فالبحر وكاره حياتو بسبب الفقر وعلى قبل مياكل وكيشوفك نتا عندك فوق داكشي اللي كيتوقع .. كيشوفك كانك حلم عمرو يتحقق .. ناس.. باعو اعضائهم وكرامتهم ودمهم على قبل الريال و العالم كيتمحور على هادشي . حيت الى ماعندكش ماتعيشش.. ولا تقدر تعيش ونتا معدب مقهور مغلوب وكل همك تحسن ماكلتك . فكر اتميم و كون مسؤول ..كن مسؤول وخلي عليك الاستهتار وركز فمصلاحتك اولا عاد الشي لاخر
بقا تميم ساكت ماهضرش كيسمع وكيحاول يستوعب كلامها ..سخفات بالهضرة ودارت يدها عبى جبهتها كترتاح وجلسات هلى الفوطوي وقالت ليه
سير جيب ليا كاس دالماء..نشفتي ليا حلقي
رن هاتفها وهوا كيخوي ليها الماء وردت قائلة
نعام؟؟ هادشي اللي كان ناقصني.. اوكي شكرا تكلف نتا بيهم ..ماخصناش مشاكل وداكشي ديال الاعلام يبقا بعيد الله يخليك.. شكرا
قطعات وناضت عندو وهوا هاز كاس دالماء جايبو ليها وقالت بنفاد الصبر وتعب
شداك لشي صحفي ضربو؟؟. شداك ليه علاش تابعو ؟؟ ياك ديما كنقوليك خليك بعيد على المشاكيل
بنرفزة رد: هوا شنو كان كيدير تما اصلا؟؟ علاش كان كيصورنا؟؟
مدام بهية: كيصورنا حيت هاديك خدمتو .. نتا اللي مكانش خاصك توصلنا لتما ونتا عاارف هادشي وعييت نفركك فيه. ونقوليك. خليك بعيييد على المشاكيل.. الاعلام لااا.. عمرك شفتيني انا ولا باباك منشورين فشي جريدة ك ولا كيهضرو علينا ؟؟ واش معارفش باللي الصحافة كتخلص الفلوس و كتقلب غير على اللي بحالنا تنشر فضايحهم واسرارهم ؟؟؟ واش معارفش باللي شحال من واحد يقدر يبيعك على درهم ولو يكون بوليسي !! اكيد واحد من اللي كان فلكوميسارية باع ليهم خبارنا حتى جاو كيصورونا خارجين من تما باش يخليونا سين وجيم والناس كتحلل فينا واللي ماعرفنا يعرفنا وهاحنا ولينا هدف لشحال من واحد .
سد عينيه بنفاد الصبر وهبط على داك الكاس دالماء اللي فيدو شربو ومشا لبيتو فجر فيه الغضب ديالو ويدا يتنتر بوحدو وبهية فالصالون جالسة كتهضر مع جان وتعاود ليك شنو واقع
م.بهية
كن هاني صافي غادي نحلو مشكل الصحافة .. حتى الصحفي ماشكا شبيه انا كلفت اللي يفك المشكل مع مدير الجريدة اصلا هادي جريدة رخيصة اليكترونية كتقلب باش دير البوز وكتبغي الجديد ….كلفت المحامي هوا ادرى بالقضية وديك السراقة عادي تاخد الجزاء ديالها.. هادشي انا غنتكلف كون هاني …هاا!! هه قلتي غتجي ؟؟ واو احسن حاجة حتى حنا توحشناك…اممم ههه توحشتك .. كنتسناك ماتعطلش عليا ..بيزو
كيد الشيطان عضيم.. لاكن كيد النساء اعضم. وكما ذكر في قصة الشيطان ..على انه كانه بغا يرحل من مكان كان ساكن فيه هوا وعائلتو وشاف خيمة وقال ..منغاد هاد المكان حتى نفعل بيهم الافاعيل ، وفعلا مشا ليها ولقا بقرة مربوطة بوتد وحداها مرى كتحلب وجنبها ولدها صغير كيلعب. مشا حرك الوتد وخافت البقرة وهاجت وزلعات سطل الحليب فالارض ودهسات الولد الصغير بقوة وقتلاتو ..غضبات المرى وهاجت وضرباتها وطعناتها بالموس حتى قتلاتها ، جا راجلها ولقا البقرة والولد ميتين على الارض وضرب المرا حتى قضى على صحتها وطاقتها وطلقها ورسلها عند عائلتها،جاو القوم ديالها وضربوه وجاو القوم ديالو وناضت القتيلة وشي قتل شي. فتعجب ابناء ابليس من فعلة ابيهم فقالو له وحيك ماللذي فعلته ؟ رد. ابليس ببساطة وقال .. مادرت والو ..فقط حركت الوتد.
وكانت هاد العبارة مكتعني والو لينا لاكن هي فالحقيقة نتائجها خطيرة وخطيرة جدا.
وهادشي اللي قامت بيه بيان تماما . فقط حركت الوتد ..والوتد هوا عبارة عن. اتصال طلبات ينشرو عليها خبر زائف!!
وشنو وقع من هاد الطلب؟؟ كان سبب باش تقلبات الكلية سفاها على علاها .. وسبب فالشطنة ديال تميم عليها واللي خلاتو يخاصم لجين ومايطيقش الجلسة فالجامعة ويخرج ويمشي عند مو .. وسبب باش خدا الامانة داها للدار وكانت اكبر سبب اللي خلاه ينسا الكوفر محلول واللي تسبب فمشكلة كبيرة لسميرة ..وليه هوا ومو وحتى الصحفي اللي كلا العصى ومز ال ماحبسات هنا ومزال نعرفو شنو مجرور وحتى لفين غتوصل..
والى رجعو ليها وقالو ليها كما قالو ابناء ابليس لباهم وسولوها اشنو درتي؟؟ غتقوليهم والو ..انا غير بغيت البوز..اولا بغيت نلعب معاكم شوية. فعبى الرغم من بساطة فعلتها الا انها قلبات الموازين رأسا على عقب
<اياك وتحريك الوتد " عبارة سطحية لاكن بمفهوم عميق.
تعاشات العشية وسلمى رجعات للدار ..دخلات طلقات عينيها ماشمعاتش حس امها وسولاتهم قائلة
فين ماما باقا ماجات؟
قالت الهام وهي كتجمع الطبلة
تعطلات ليوم
جبدات سلمى تيليفونها كتصوني لاكن لقاتو مقفول .. استغرابات ومشات جلسات قالت ليهم
تيليفونها طافي!
الام: كوراه عندهم ضياف ولا بقات تما خدامة
سلمى: وكانت تعلم بعدا ماشي تخلينا كنتسناو
الهام: دابا تجي
جات السبعة ماجاتش..وجات التمنية ماجاتش.. جات العشرة وحتى الطناش وهي مازال ماجات . كلهم نعسو الا سلمى اللي بقات فايقة وكتصوني وتسلسفون مشطون .. تشطنات عليها وماقدراتش ترتاح و فكرات مزيان من بعد تاصلات بتميم.. حتى هوا ماردتش عليها .
صبح الحال وصبح المل فايق ..فاش مالقاوش سميرة فالدار عاد بداو يسولو بعضياتهم فين مشات؟. علاش ماجاتش شنو واقع . ياكما تكون حصلات ؟؟
هاد السؤال بالضبط خلاهم يفيقو وحطوه اول احتمال .. كلهم تخلعو وماعرفو منين يجيبو الخبار
الويكاند كله وهما كيتسناو ولا حس لا خبر .. تأكدو ان شي حاجة واقعة وبقات ليهم غير سلمى تجيب الخبار من عند تميم اللي اصلا مكيجاوبش فالتيليفون .
صباح يوم الاثنين صبحات هي اللولة فالجامعة واقفة كتسنى تميم .. دار من قدامها بخال البرق وقف سيارتو ونزل طالع ليه الدم دخل للجامعة تلاقا مع جهاد فالكافيتيريا .. تبعاتو سلمى وكتفكر كيفاش تسولو وتجيد ليه الموضوع بلا متخليه يسول علاش وكيفاش . وقفات حداهم بابتسامة صبحات عليهم وجلسات بيانتهم كتسنى يهضر ولا يقول شي كلمة اللي تقدر من خلالها تشط طرف الخط . دخلات لجين كعادتها لفتات الانضار بلباسها وشخصيتها خلات كلشي متبع ليها العين ومشات باشت تميم من حنكو وشامات على جهاد وسلمى وجلسات قائلة
صباح زويين ..شميشة ليوم .. ايوا كيدوزتو الويكاند
جهاد: انا دوزتو غير فاخربيق.. الى جيت نشوف نلقى راسي مادرت تا حاجة هاد الويكاند
سكت جهاد وعم الصمت والكل شاف فتميم وتعابير وجهه وهنا ضحك جهاد وقال
شي ناس باينة دوزو الويكاند كحل .. اش تما مستر تميم
شافت فيه سلمى بفضول كتسنا ها يهضر ولجين بابتسامة قالت
خوي قلبك حنا مستاعدين نتحملوك ههه
تميم: اكفس ويكاند دوزت فحياتي..
جلس جهاد مقاد وقال: اوووه ههه!!! ياكما نوضتيها مع ماماك وجرات عليك
تميم: كانت غتجري عليا نييت.. بسبب الخدامة الملعونة دورت يوماين ماكنهضرش انا وياها
حلات سلمى عينيها شافت فين وفمهها كيتقرقب وقالت : لخدامة؟؟ علاش شنو وقع ؟
تلفت شاف فيها وصغر عينيه وقال: فين عرفتي هاد الخدامة هادي؟؟ بصح كانت خدامة عندكم؟
لجين: شنو كاين شرحو لينا حتى حنا معاكم
جهاد: واايلي حتى نتا .. ماتبقاش تفتح مجال للخدامات اصلا كيقلبو على السبة باش يبداو يشكيو ويبكيو وكاع شواهد الضعف كيجبدوهم ليك والى بداو مكيساليو ش.. حنا مرة تعاوننا مع خدامة كانت عندنا مافحالهاش على قبل بنتها مريضة ودرنا معاها الواجب .. بعد اسبوع جات مها عند الواليدة كتشكي وتبكي عليها باش نعاونو ليها ولدها حتى هوا مريض.. عاوناتها ومع ذلك رجعات كتشكي وتبكي حقا العواشر حقا العيد حقا منعرف شنو وحنا مضطرين نشمعو لقصتها والطاقة السلبية ديالها ..فالاخير الواليدة خوجات هاد الخدامة وتهنينا منها ومن مها وعائلتها كلها وسدينا باب الضسارة
تميم: كن جات على المساعدة المادية هانيا ماشي مشكل..ولاكن باش تمشي تسرق وتمد يدها على لكوفر فور هادي راه تعدات لحدود وتستاحق الحبس
تصذمو كلهم واكثرهم سلمى رجعات صفرا وتبلوكات بلاصتها وجهاد ضحك بسخرية وقال
اووو ه!! لهاد الدرجة ؟!! هادي راه زعيمة
تميم: بزااففففف… معانا شفارة فالدار وحنا ماعارفينش..استغلات الوقت اللي نسيت فيه الكوفر محلول ومشات دارت خدمتها .. بالزهر فضحاتها لالارم وحصلتها متلبسة وجبنا ليها البوليس داوها.. غادي تربا باش عمرها تعاود تفكر مرة اخرى تسرق
وقفات سلمى بدون شعور والدموع كيطيحو من عينيها قالت ليه
كيفاش كتقول عليها سراقة؟؟ كيفاش جبتي ليها البوليس !!!
تفاجئو من ردة فعلها ووقفو كلهم كيشوفو فيها
لجين: عادي وحدة سراقة غتعاقب على فعلتها الى بقات فيك راه حتى نتي بحالها
دفعاتها سلمى بقوة وبهستيرية وقالت
حنا مشاي سراقين.. حنى بزااف عليك باش نكونو سراقين ..
لجين كانت غطيح وشدات فتميم مصدومة والكل تصدم .. بغات سلمى تمشي لاكن ردها تميم وشدها من دراعها شاف فيها مزيان وقال
عندك بيها علاقة ؟ هضرييي جاوبي
نترات يدها والدموع كيطيحو ووجهها حمر قالت ليه: طلق منيي.. بعد مني
مشات كتجري وجهاد كيشوف هنا ولهيه ماقهم والو ومشا تبعها كيجري .. هما خارجين وبيان داخلة بأحدث صيحة عي وجاد والضحكة مسرحة من الودن حتى للودن وحولشي متبع ليها العين وكيتناخزو عليها .. تعرضات ليها لصاحبتها وقفاتها وقالت ليها
بيان!!!! فين كنتي غابرة
بيان: غبرت ودابا جيت … كي جاتك اللبسة ديالي اخر ما خرج فايفسان لورو
صاحبتها: زوينة !!
بيان: اشنو لجديد شفت سلمى غادية كتبكي وجهاد تابعها
ضحكات صاحبتها وقالت : هه ..فاتك بزااف .. ضيف جديد كيتسناك فالكافيتيريا
ضارت عند جاد وجراتو من يدو وقالت
يالاه ندخلو ..نشوفو هاد الضيف اللي كيتسنانا
اد معاها خلفة وقال: عرفتي الى خرجتيني بشي تصرف منكم .. ماتلومي غير راسك
بيان: وصاافييي.. اش غنديير كااع
مشات هي وياه للكافيتيريا وتما شافت تميم جالس ومعاه بيان كتفطر قدامها فطور كامل .. وقفات عليهم هي وجاد وبحركاتها وقاعدتها ضحكات وقالت
شوربرااااايزز
تلفت تميم شاف فيها متفاجأ ووقف وشاف فجاد اللي رافع راسو بكبرياء .. وبدا يحدق فيهم بجوج بنضرات استغراب ومفجأة وعدم ارتياح.. اما لجين هزات راسها شافت فيهم وابتسمات ابتسامة خفيفة وتار انتباهها ستايل بيان ولباسها وحتى تسريحة شعرها وحسات بنوع من الغيرة منها ..كذلك بيان بادلاتها نفس الشعور اللي ان من عينيها وقالت
اهمم.. ماتعرفنيش؟
ضحك تميم بسخرية وقال: نعرفك؟؟!!هه..واخا مرحباا
شار بيدو للجين وقال: لجين .. حبيبتي
جمعات بيان الضحكة وهرب اللون من وجهها وهي كتشوف فيهم وفلجين اللي وقات وشدات ليه فيدو حتى هي ..شاف فيها تميم وقال: باشارة
بيان
وقفات النفس فحلق لجين ومدات يدها قائلة كتشوف فيها : بياان؟…اهاه … متشرفين
سلمات عليها بيان والدهشة فعينيها لاكن سرعان مابلعاتها وضارت عند جاد جراتو عندها شدات فيه وقالت
جاد…حبي .. الاول والاخير
جاد تصدم فيها تقول مكانش متوقعها .. حتى داك الكبرياء طار وبرقو عينيه فجأة وعنقها وقال للجين
متشرفين .. مرحبا بيك فالجامعة ديالنا
لجين ارتاحت ورجعات ليها الضحكة لاكن بيان رسماتها غير بزز وكتشوف فعينين تميم اللي بحال النسر كيشوفو فيها هي وياه .
شدات جاد وقالت بضحكة صفرا
خليت ليكم الراحة
عطاتهم بالضهر وطلعات فتميم ومشات شادة فجاد اللي عض على شفاهه وضحك وهز راسو فالسما مشا معاها حتى خرجو برا وطلقات منو ودورات وجها سادة فمها وكتنفرر من نيفها
يتبع...
عفاك إمتا كتلوحي رواية