صفحة القصةقصة إغفر يا تميم
مؤلف القصةقصص Ghazal trust
مدام بهية ماحليتها لجان اللي مكيجاوبش ولا تميم اللي طالي ليها فيلا .. حضرات ليه فيلا كبيرة ومشا بوحدو شافها لقاها ويط الشارع والطريق كتدي وتجيب.. شاف فيها بخيبة امل ماعجباتوش ومشا كيقلب راسو.. عيط لجهاد ولقاه واجد عارف كل قنت قنت بقنت .. عطاه احسن فيلا من الفيلات ديالهم بعيدة وسط الطبيعة والغابات وكبيرة جات فوق الجبل كطل على بحيرة لتحت …. رسل ليه تصاورها وتافق هوا وياه يتلاقاو وقدام باب الفيلا تلاقاو بجوج بسيارتهم ونزلو .. مع النزلة لاح جهاد السوارت فالسما لتاقطهم تميم وقال
المنضر ناضي..
جهاد: النضى كاين لداخل..دخل
تميم: الكالم بعدا .. عنداك يبعت علينا باك
جهاد. ههه با ففرنسا اصاحبي والواليدة فسويسرا موت هنا حتى واحد مايجيب خبارك
تميم: مزيان.. ندخلو نشوفو
دخلو للفيلا كانت كبيرة بزاف بحدائق ومسبح وفراش وزليج تقليدي وكلشي ثراتي فأيهى حلة لاكن ناقصها تنضيق
جهاد: غدا تلقاوها كتلقلق
تميم: شبعانة غبرة اصاحبي.. واش مكتجيوش ليها؟
جهاد. من الصيف للصيف اصلا خمس سنين وهي مسدودة
كاين فيلات اخرين كنمشيو ليهم هادي جات هنا مابقا حتى واحد مسوق ليها .. نتا اصاحبي غتبقا فمارينا مكتفكرش تبدل
تميم وهوا كيشرح عينيه: شغنبدل وانا راجع فحالي .. غير درت للخاطر الواليدة وصافي ..وبيني وبينك داك القنت فين شراو الدار ناضي بالجهد.. ماكرهتش كن مشينا لتما ولاكن الواليدة كاينة والبيوت قلال .
جهاد : المهم .. ها العروسة ..غدا تلقاوها واجدة
تميم: شكرا.. وتا نتا غتكون معانا ماجاتش اصاحبي ندوز العطلة بلا بيك
جهاد: ماتسناش الاختبار .. بقا هاد العام نودعو خلينا نودعو على خير ..يالاه طلع نوريك الباقي
كانت مدام بهية فهاد الاثناء فالاوتيل .. جلسات فالبيرو كتشطح برجلها وكتصوني وتعاود على جان ..
اخيرا شد ليها وجاوبات بجنون
جان… فينك .. واش عرفتي شحال وانا كنصوني؟؟ …. دابا ماتشرح ليا منشرح ليك .. بيان خاصك تلقا ليها حل الموضوع كبر وبدات كتحاول تبين الحقيقة.. انا مابقيتش غنزيد نسكت تميم خاصو يعرف… كيفاش ماخاصوش يعرف دابا ؟؟ كنقوليك كولشي تفرش .. كولشي وشي نهار غيعرف .. مابغيتش يعرف بشي طريقة ضيع ليه حياتو .. انا غنقوليه الحقيقة … جااان .. انا معدبة .. واش مكيهمكش ؟؟ … ماعندي منتسنا .. جوج حوايج خاصك تلقا ليهم حل.. عندك بيان دابا..وتميم.. اوكي نتسناك حتى تجي.. ولاكن فوقاش غتجي؟؟ شحال غنتسنا؟؟ …. الموضوع خطيير .. راك عارف… افففف… شنو هاد الحاجة اللي اهم من موضوعنا هادا؟؟؟. حاسة بيك مخبي عليا شي حاجة… الى ماعندك والو اجييي… متأ … واخا .. غنتسناك ..غنتسنا … انا صابرة ..ولاكن صبري عندو حدود.. اوكي..يالاه باي
توادع جهاد مع تميم من بعد ما تكلف كلف اللي ينضف ليه الفيلا ومشا تميم رجع عند صحابو وجهاد مشا للفيلا اللي عايش فيها .. دخل كيشرح عينيه بابتسامة ويعيط
سلمى ..سلمى
خرجات عندو من لكوزينة هازة تكشيطة وقالت
تعطلتي.. خاصني نمشي الستة هادي
حط السوارت وقال
تمشي دابا؟؟ حنا يالاه بغينا نجلسو
جرها من يدها جلس وجلسها على رجلو معنقها وهي كتشوف فالساعة
سلمى : تعطلت اجهاد ماما غتكون كتسناني
جهاد: دابا نتي باقا صغيرة باش تبقا ماماك تحضيك!.. صافي غنجلسو شوية ونوصلك
جرها على صدرو تكاها كيتبادلو القبل وقبلة مور قبلة حتى ناض هزها طلعها للبيت وهي كطل وتقول
فين غادي
جهاد: ششش..
باسها كيضحك وهي حشمانة دخلها للبيت حطها على الناموسية وتكا عليها كملو القبل وحدة مور وحدة .. حيد ليها تكشيطة وبدا يقبل عنقها من كل جهة وهي مترددة مرة تجاريه مرة ترفض .. كانت عايشة اللحضة باستمتتاع حتى وصل للمنطقة المحضورة مسها عاد نتابهات وقالت باحراج
جهاد.. منقدرش.. منقدرش
حيد القميجة اللي لابس بين ليها المفاتن الرجالية خلاها كتشوف وعنقها كيقبل فيها بشغف وقال
علاش متقدريش
ميلات راسها وقالت
باقا بنت اجهاد
جهاد: واخا بنت
سلمى خايفة
حيد ليها باقي ملابسها بشهوة وبدا معاها ممراسة سطحية .. استحلات الوضعية وعجبها الحال تجاوبات معاه حتى انتهت العشية وجلسو رتاحو فترة معانقين عاد ناض لبس حوايجو ولبسات هي التكشيطة فاش جات واخا ترونات فحالتها .. جمعات شعرها ومشات دوزها على بيان مالقاتهاش وحيدات التكشيطة خلاتها ليها وهزات صاكها لبسات فقلي الفيلا حوايجها وخرجات عند جهاد اللي ضحك فاش شافها بدلات وقال
النيو لوك
سلمى: تكاشط ديال واحد المصممة .. انا خليت صاكي عندها .. يالاه نمشيو ناري العشرة هادي
طار بيها جهاد وصلها للعمارة وباسها ..نزلات كدور عينها لا يشوفها شي واحد دخلات للعمارة وحطات الصاك فالدروج بدات تقاد حالتها بالزربة وتشوف فواحد المرايا فالدخلة لقات فيها طبعة زرقاء فالعنق..خرجات عينيها كتمسحها مابغاش تمحى وقلبات شعرها درقاتها وبدات تشوف واش باينة شي حاجة عاد طلعات للدار ، حلات الباب بشوية لقاتهم حاطين العشا ومها كطل من السرجم كل شوية
بخفوت: سلام
ردت الجدة بصوت مرتفع : اش هاااد الوقت؟؟؟ هااا؟ هادا وقت كيرجعو فيه بنات الاصل
جات عندها سميرة كتجري وهي مكمشة حدا الباب
سميرة: شحال دابا فالساعة؟؟ هااا؟ شحال هادي فالساعة؟ شوفي؟ شوفي معاياش جايا هادي هي غنرجع فالوقت
سلمى: وراه عاد حطو الماكلة حطوها معطلين .. ماشي غير انا
الجدة: مالكي عمرك كليتي فحياتك ؟؟ تسناي حتى يحطو الماكلة ؟؟ اقليلة الترابي
.. ككل باك فيك عرفك غتخرجي رجليك الشواري زاد وخلاك
ضارت عندها سميرة وقالت : شهاد الهضرة امي!!! واش نتي طفرتيه بانت ليك شي وحدة فينا مقادة ؟؟
مشات سلمى كتجري للبيت دخلات سدات عليها وبدات كتبكي وجداتها واقفة ويدها على جنبها كتسمم فسميرة بصبعانها وتقول
دابا كتعايريني.. ايوا دابا نشوفو تربيتك !! هاهيا داخلة مع العشرة غدا غدخل مع الجوج ايوا بعدو تبات مع الصاحب.. دابا تجيب ليك شي كرش وديك الساعة هزي الراس .. ياربي تفضحك باش تعلمي تعايريني
لاحت سلمى الصاك فالقنت وجبدات مرايا كتشوف فديك الطبعة وكتمشح عينها وتردد بحقد
الله يعطيك الموت العاقسة .. الله يعطيك شي موصيية … الهاترة الله يعطيك الزهيمر كن غير كنتي مجبدة بلاصة جدي
حلات عليها سميرة الباب مغوبشة قفزاتها وقالت
نوضي تعشاي.. راه حقك دالحريرة فالكوكوت
دورات سلمى وجهها وقالت: ماخصنيش.. كليت فالقاعة
سميرة: هانتي جبتي لينا حريق الراس اجا ماسد ليها داك الفم دابا
بقات الجدة جالسة وتنكر غادية وتنكر غير كدور وتنكر وسميرة كضرب الماعن مع بعضياتهم بالزعفة فيقو الهام اللي فالركنة وغوتات بصوت مرتفع
الله يحرق جد جد جد مكم كاااملين.. كاااملين
هزات راسها كتنهج وكملات مللي ماقدراتش تتحرك بالفقة بقات كتغوت ومها غادية جايا كتبرد وتردد
صافي صافي.. صافي ها حنا ساكتين
الحريرة كانت عند تميم وصحابو وهما فالاوتيل مجموعين والزلايف ضايرين .. الماكلة المغربية وطريجنات صغار كب مرة يحطو ليهم طبق من اختايرهم .
تميم: فخباركم انا عمرني دقت هاد لاسوب
اديب: وااايلي
تميم: من نهاد جيت لهنا مرة وحدة كليت فيها ماكلة مغربية. عند ميمة
سدات جيداء عينيها كتاكل اللحم بالبرقوق وقالت
اممممم… بنييين مييممكنششش .. شحااااال ما كليت طاجين
هز تميم وبراد الشوكات كلاو من داك الطاجين حتى هما أيدوها نفس الرأي
براد: ماعندهمش مشروب
هز اديب راسو وقال : وايلي ماعندهمش اصاحبي ميمكنش !! ارا لنا ننن .. ندوزو
تميم ميمكنش مايكونش السياح هنا كتار
طلبو مشروبات وفعلا جابو ليهم كاع الانواع اللي طلبو وقالت جيداء
دابا ااه
تميم: دكتور اديب.. شخبار باك باقي تابعك تشد ليه لكلينيك
اديب: غ نخلو واحد اخر اصاحبي ميمكنش شحال الضغط .. غنظطر نقرا ونجيري لكلينيك فنفس الوقت .. ونتا .. اجي كي دايرة مدام بهية .. باقا تابعاك
تميم: وهادشي عندك فيه الشك؟؟ هه
جيداء: صافي دابا كبرتو مافهمتش علاش مزال كتعيشو مع واليديكم
تميم: اااا اااااطونسيو .. تسمعك تحدفك هه.. كنضحك معاك .. الواليدة ديالي انا ماعندهاش من غيري حتى الصحاب خلاتهم وكتخاف عليا.. كنحاول ندير ليها خاطرها شوية
اديب: سعداتك .. الرالدية ديالي انا فدانمارك ماشفتهاش من نهار انفاصلات هي والواليد.. اما واحد خويا الصغير ماعرفتو لمن كيشبه ..ماعليش اصلا فيين هوا الوقت كتر الضغط بزااف .. مالاحضتوش باللي بدينا كنكبرو ؟؟ امم؟
جيداء: نتوما اما انا نوو.. كنفضل نعيش بوووحدي مايضغط عليا حتى واحد
تميم: باقا عايشة الحب؟
جيداء: بدلت .. بدلت شحال هادي اصلا مزال مالقيت الحب الحقيقي ..
تميم: انا غنخليكم ترتاحو .. غدا نتلاقاو فالفيلا غنسفط ليكم العنوان
جيداء: ماتنساش تعرفنا على صحابك. اتميم.. متشوقة نتعرف عليهم
تميم: اوك غدا وتشاوفو.. يالاه
شار بيدو وحط الكاس خرج خلاهم كيتعشاو مجموعين ويضحكو
صبح الحال وصبحات مدام بهية فالاوتيل داخلة ، سولات عبى مدام سارة خبروها انها فالسويت الملكي .. استغربات مدام بهية وقالت بابتسامة
ااه .. نسيت قالت لي غتبات هنا ..ياك باتت هنا
الموضف: نعم امدام .. نتاصل بيها دابا نخبرها ؟؟
مدام بهية: لالا تقدر تكون مشغولة شكرا
ضارت كضحك وقالت : اممم.. قولي نتي بايتة هنا مع حبيب القلب !.. وانا كنقول مالكي مابقيتيش كتخوي لاوتيل وتمشي تباتي فالفيلا.. اوكي..سمحي ليا سارة غنحطك فموقف محرج مع بنتك لاكن ماعندي مندير..مظطرة نبعدها عليا ونلهيها شوية حتى يجي وقتها
كانت بيان فهاد الاثناء ناعسة ومغطية عينيها .. صونا ليها تيليفون وعاود صونا وناضت بتعب عرات على عينيها وهزات تيليفون لقات الرقم مجهول . وصلاتها رسالة من رقم غير معروف فيقاتها مزيان من ناعسها وخرجات عينيها فتيليفون ولاحت الغطا بسرعة وناضت
وصلات بسورفيت عيارة عن كولون بديالو مزير وحداء رياضي وشعرها مطلوق وجاكيط قصيرة مزغبة محلولة وناضرات شمسية.. مع الدخلة للارتيل طيرات النضارات على عينيها ومشات نيشان للاسانسور طلعات واتاجهات مباشرة للسويت المعلوم .. هزات راسها وصدرها كيطلع ويهبط وبلعات ريقها طقات الباب جوج مرات ..فتحات مدام سارة الباب وهي كتعقد حزام البينوار لقاتها قدامها و تصدمات قالت
بيان!!!!!!!!!!!
دفعات بيان الباب ودخلات لقات معاها نفس الراجل متكي فالنموسية بصذرو عريان ونصو مغطي بالغطا .. وقفات مصدومة كتشوف فيه وهوا بنفسو تصدم هز راسو ومدام سارة واقفة ويدها على فمها والدموع هابطين .. اما بيان بقات ساكتة والدموع تحجرو فعينيها كتشوف فداك المنضر وماهضراتش ..خرجات من تما كتهلت غادية وكتوقف والدموع هابطين شلال شدات فالحيط وجلسات معاه فالارض وبدات كتبكي بحرقة ويدها على قلبها والنار شاعلة فيها .. شافتها وحدة من عاملات النضافة ومشات عندها شدات فيها وقفاتها لاكن بيان هزات يدها بعدات ومشات كتبكي. بلاعقل.. نزلات فالاسانسور بديك النار والدموع وخرجات مصدومة مكتشوفش قدامها .. وصلات لباب الاوتيل وتما كان تميم بسيارتو كيهضر مع مدام بهية اللي عينها على الباب دالاوتيل .. بعفوية تلفت تميم شاف بيان خارجة مكسورة دابلة كتبكي غادية بلا روح لسيارتها في حين مدام بهية كتبسم ببرودة وقالت
هانتا فطرتي معايا اشنو وقع ليك ؟؟ ديما زربان ديما تابع صحابك
حيد النضارات على عين كيشوف فبيان وقال
بيان!!
سمح فبهية اللي تلونات بغات تشدو لاكن مشا خلاها وهي كتعيط معصبة بلا ماترفع الصوت .. مشا كيجري شد لبيان فدراعها وهي مصذومة كتبكي سولها مالكي وضارت منهارة عنقاتو قدام بهية اللي سدات عينيها تشوات شوية خلاتها ذور وجهها لجهة اخرى قطعات فيها النفس ومشات دخلات للاوتيل قالبة وجهها مابغااش تشرف داك المشهد
اما تميم بقا فبلاصتو وهي يابسة على حوايجو كتموت .. عنقها بيديها كيتنهد وقال
شنو وقع ؟؟ بيان؟
ردت بصوت مبحوح
بعدني من هنا…بعدنيييي
عنقها داها لسيارتو فتح ليها الباب وقبل مايركبها خرجات مدام سارة كتجري بالطالون للمكان الخاص بالسيارات كتقلب وعيطات بصوت مرتقع ومشات كتجري عندها
وقفات كتبكي وتردد
بيااا… بيااان انا نشرح ليك
حيدات بيان يدها على باب السيارة وضارت بتتاقل كترعد شاف فيها وقالت
شنو غنشرحي ليا؟؟ شنو غتشرحي
طارت فجأة من يدين تميم بحال الفرخ كتغوت وهوا كيشدها من هنا ومن لهيه كانت باغا طير على امها والصاك فيدها كتديه وتجيبو والجاكيط طاحت على لكتاف والشعر هبط على لوجه .. تخلعات مدام سارة ورجعات اللور مشات كتجري في حين بقات بيان كتبكي وتلوى حدا الباب وتميم كيهدن فيها وينوضها بزز باش دخلها فالطموبيل بالزربة وسد عليها وطلع كيجري ديمارا السيارة وخرج كيطير
شذ الطريق غادي وكيشوف فيها كل شوية وهي كتبكي متبغاتش تسكت.. تيليفونو كيصوني فرع ليه راسو ورد
تميم: الوو ..
م بهية: فيينك؟؟ فين مشيتي مع هاديك قلت ليك مانشوفكش معاها قلت ليك تفرق عليها واش نفكرك فالزبلة ديالك اخير مرة هااا
تميم: من بعد نعيط ليك .. يالاه ماشي وقتو من بعد جاني اتصال
مدام بهية: تميم .. متقطعش الو
قطع عليها ورد اديب
تميم: اديب سمحو ليا تعطلت انا غنسيفط ليكم العنوان .. غتلقاو تما كلشي .. انا شوية ونلحق عليكم
قطع ورسل العنوان وعينو على بيان. اللي مسحات وجهها بتعب وقالت
ديني عند بابا.. ديني عند بابا
قلب الطريق ديك الساعة وصلها للمقبرة ونزل معاها شد ليها فدراعها دخلها بشوية .. لاحت القب على راسها كتبكي ومشات عند قبر باها وجلسات متكية على راسو كتبكي وراسها على سميتو وتميم حداها جالس القرفصاء مهبط راسو كيسمع ليها كتنين وتشكي وتبكي
بيان: ان ابقيت بووحدي…بقيت بوحدي ابابا… خليتيني بوحدييييي… ماعندي حتى واحد فهاد الدنيااااا… علاش مشيتي وخليتيني.. علاش ابابا علااااااااااش
جرها تميم عنقها كيسكتها وهي طايحة على ركبتو كتبكي
انا عيييييت… عيت بزااف بغيت نمشي عند بابا… بغيت بااباااا…خلاني يووحدي اتميم..خلاني بووحدي فهاد الدنياااا..خلاني بوحدي كنتعدب.. بوحدي كنعانيييي
مالقا تميم باش يجاوبها بقا ساكت شاد فيها خلاها يكات حتى فشات صدرها مزيان عاد نوضها بشوية خرجها من تما وشد ليها فيدها بشوية داها لبطموبيل جلسها فبلاصتها ومد ليها قرعة الماء كيشوف فيها بأسى وهوا جالس القرفصاء حدا باب السيارة المفتوح ..رجعات حمرا ونيفها حمر وفمها كذلك .. شربات جفمة دالماء بشوية وقالت كتمسح وجها بيدها وكضحك بسخرية
دابا نتا كتشفى فياا..وتشفق عليااا
مد ليها كلينيكس ليدها وقال: مكنتشفاش فيك..ومكنشفقش عليك
شدات من عندو كلينيكس وقالت
نقي؟
هبط وجهه كيضحك وقال: جديد
مسحات عينيها وقالت: غير ذير فبالك حتى واحد ماكامل..انا بعدا عارفة مشاكيلي وكنواجههم .. كنطيح ونوض
بقا ساكت مطولا كيشوف فيها وقال: شنو ماكان المشكل اللي عندك.. غتلقاي ليه الحل
شافت فيه كتنخصص وقالت: ماعندوش حل.. المشكل اللي عندي معندوش حل
تميم: ياك نتي زعما قوية..ومالكي دابا دغيا ستسلمتي..يالاه عندك عشرين عام
بيان: انا فعشرين عام عشت اللي ماعاشوش واحد فربعين عام..عشت الفراق.. عشت الخيبة ..عشت الخيانة.. عشت كولشي..شنو باقي ليا نعيش دابا؟؟
تميم: غتعيشي الامومة..غتعيشي الاستقرار ..غتعيشي الحب. مزال حياة تانية كتسناك
عضات على شفايفها كضحك وتشوف قدامها وقالت
الامومة…امم انا الامومة اللي شفت لحد الساعة كلها مزييفة.. حتى حاجة ماحقيقية .. كيفاش انا غنكون ام واللي قدامي كلهم امهات مزيفات. هههه..قالك الامومة ..ماماك بعدا علماتك تنصح
ناض وقف وقال: الى بردتي خلينا نتحركو ..بلا مازدحنا البرد فهاد القنت
سد عليها وضارت كضحك بسخرية لقات قرعة دالشراب بينها وبينو وهزاتها شربات منها ..ركب حداها ديمارا السيارة وقال: بلا متشربي دابا كيتقلب عليك الشراب
سهات قدامها غادية وقالت: يتقلب عليا هه
طلق ليها موسيقى تبدل الجو ومشا وهي كتشرب فالطريق حتى سكرات وبدات كضحك بوحدها
تلفت شاف فيها وقال : نوصلك للدار ولا لاوتيل؟
دورات راسها كضحك وقالت: لاوتييييل…اااه الاوتيييل .. اوتيل الخونة
ضحك وقال: سكرتيييي
حيد ليها القرعة من يدها بعدها وورد على تيليفونو اللي كيصوني
تميم: الوو..اديب.. عارف عارف المهم شكرا تسنيتوني..انا غجي دابا
قطع تيليفون وشاف فبيان غادية هازة رجليها قدامها سكرانة وكتغني بصوت مبحوح . داها معاه للفيلا عند صحابو وقف بسيارتو قدام الباب ونزل قاليها كتعيشي ربعة دالفصول فوقت واحد
بيان: فين حنا ؟؟
فتح عليها الباب وجات تنزل ساعة مالقات جهد كانت غطيح ..شدها وقفها كيضحك وقال
مشيييتي هه..خاصك تنعسي وماتفيقي تا لغدا
سد الباب عنقها ودخل هوا وياها شادها كتميل وضحك خلها عند صحابو
كانو صحابو كلهم كيفطرو فطور مغرييي والخدم كيتسخر عليهم فالفيلا حتى دخل تميم شاد بيان صبح عليهم وعطاوه انتباههم كاملين.. وقفات بيان هازة راسها وعينيها ناعسين شادة فتميم وكتحقق فيهم وقالت
شكون هادو
جرها تميم للطبلة وهي كتحاول توقف بزز وكل شوية يخويو بيها رجليها وقفات كتشوف فيهم واحد واحد
تميم: بياان شريكتنا فالاوتيل.
يلاه يغات تمد يدها جاتها التقية ودارت يدها على فمها وزرب عليها تميم دغيا داها لواحد الحمام بلدي فتح الباب وشد ليها شعرها الاشقر خلاها كترد الماء مع الشراب .. هزات راسها سخفانة وبدات كتبكي وتشكي وتنين. دارت حالة
قبطها من جلسها على كرسي وقال : قلت ليك غيقلب عليك مسامعتيش
بيان: انا عيييت
بدات من جديد الردان والبكا وهوا شادها معاونها حتى خوات كاع داكشب كامل اللي شربات وتكاها على لافابو غسلات وجهها وشللات فمها وهزات الفوطة قالت ليه
هادي جديدة
قاب وجهه كيضحك وقال
مانعرف
خلاتها معلقة ومشات هاكاك حتى نشف وجهها راسو .. تمشي جوج خطوات وتميل عليه كضحك حتى للطبلة دالفطور عند صحابو عاد جلس بيناتهم على واحد الفوطوي بلدي وشد فيها جلسها حداه .. كحزات عندو لسقات فيه ولاح يدو وراها عنقها وهي كتشوف فصخابو وصحابو كيشوفو فيها ..
جيداء: تميم..امممم امم؟ اممم!
شاف اديب فجيداء وقال: امممممم!!! ام ام
امممممم!
بيان: امم؟؟؟
اديب: شركاء!!
تميم: اه ههه
جيداء: واضح هادشي
هز يدو كيلعب فشعرها ويردو اللور وقال
بيان كتقرا معايا.. هي المجتهدة فالجامعة كلها..اجتهاد من نوع خاص
ضارت بيان عندو وقال: شكون هادوو؟؟
مد اديب يدو والزيتونة ففمو وقال: احمم..اديب.. سنة خامسة كلية الطب.
ابتسمت جيداء وقالت: جيداء.. سنة خامسة ادارة اعمال..هادا براد ..ادارة اعمال حتى هوا ..
تميم: حنا صحاب من الابتدائي..
بيان: من الابتدائي !! اااه
دخل عندهم جهاد فجأة والنضارات فعينيه وتلفت تميم وقال : هااه..هادا جهاد.
جهاد: صباح الخيير .
بدا سلام من واحد لواحد وجلس سرح رجليه وشاف فبيان اللي متكية على تميم وقال كيضحك
بيااااان!!! كل يوم فحال! اش وقع عاد لبارح كنتو مدابزين
جيداء: اوووو!!
حل تميم عينيه ودور صبعو حدا راسو دورات دائري وغمزو .. حرك ليه جهاد راسو وقال
ااااه!! هههه.. مهم عرفنا على صحابك
تميم: اديب ..جيداء براد اصدقاء الطفولة ..جهاد صاحبي وكيقرا معايا فنفس الوقت و مول هاد الفيلا
بدا التعارف بيناتهم وبداو كيتجمعو وبيان قاطعة الحس غير كتسمع ودايخة . ناض جهاد تاصل بسلمى اللي كانت كطوي حوايجها وتنفخ كارهة الجلسة فالدار وصوتهم وهما كيهضرو وولفات كل يوم تمشي للجامعة وتفطر . خلات ليهم داك الفطور هاكاك محطوط مقاستوش ومشات هزات ايليفونها ردت
الى جهاد
جهاد:شنو كديري؟
سلمى: والو كنطوي حوايجي
جهاد: ندوز عليك
دورات عينيها وقالت: واخا..يالاه
قطعات وبدات تفكر شنو تقوليهم وخرجات عندها امها كتجري قفزاتها
ماما ماما عيطات ليا بيان دابا نمشي معاها مها هزوها لكلينيك وهي بوحدها
سميرة: حنا مالنا ؟؟ جلسي للارض قالك تمشي معاها دابا مكاينة قرايا
سلمى: هي مسكينة شحال وقفات معايا فاش كنتي فالحبس
سميرة: ردتيني معيورة!!
سلمى: وصاافي خليني نمشي كتسناني مسكينة بوحدها شوفي هي شحال تعاونات معايا ! خدات مني الشاعة وعاودات رجعاتها ليا وعطاتني حوايجها وبقات فعايا فلكوميسارية وهي اللي خرجاتك ودابا نكرتي خيرها !!!
سميرة بقات ساكتة كدور عينيها وتفكر فالاخير قالت ليها
سيري.. ماتعطليييش هاني علمتك وانساي راسك
مشات سلمى كتجري هبطات الحوايج اللي طوات كتقيس وتبدل وبدات بالزربة تببس وهزات صاكها عنراتو مكياج ومشات سلتات مع الباب خرجات كطلق شعرها وتجبد فالكعار
ضارت سلمى مور العمارة ومشات كتعري على الصدر وتقاد السنسلة الوسط وترش فالريحة .. قربات وستفات شعرها مزيان و حلات الباب كدور فعينيها طلعات حداه بكياتة. عض شفاهه كيشوف فيها وباسها من عنقها وقال
توحشتك
شدات السمطة ضوراتها عليها كضحك بخجل وقالت
فين غنمشيو ؟
جهاد: غنديك معايا .. غنخطفك
سلمى: المهم عندي هوا منتعطلش على الدار
جهاد: معاياش خاصك ترجعي؟
سلمى: منتعطلش بالليل ديك التمنية نرجع
جهاد: صافي التمنية نردك
مشا بيها للفيلا ونزلات هازة عينيها وكتشوف لقات غير الطبيعة والهضورية والحس مقطوع ..صوت الاشجار والعصافير ومكاينش الحس دبنادم كيدور شافت فيه مخلوعةوقالت
علا جينا لهنا
عنقها داخل بيها وقال: يالاه ندخلو مالك خفتي..كاين تميم وكاينة بيان وصحاب تميم من لندن لداخل
سلمى: بصح!!! كاينة حتى بيان!!
تحمسات ودخلات لقاتهم كاملين مجموعين الوسط بمزال الفطور محطوط والقراعي دالشراب والشيشة بالالوان محطوطة وغير الطبلة دالماكلة كتشهي.. انواع الفرماج انواع الحلويات ديال الدار العواصر والمشروبات الساخنة كاع اللي يتشهاه الخاطر.
تبسمات وشدات فجهاد حشمانة ومشات سلمو عليها من الوجه وجلسات حدى بيان كضحك .
بيان: سلمى !!
سلمى: لقيتي تكشيطة اللي خليت ليك لبارح فالدار ؟؟
بقات بيان كتشوف فيها وقالت: تكشيطة!!!واشمن تكشيطة علاش كتهضري شكتقول هادي..!!! بغيت نبول !
دور جهاد وجهه كيضحك وسلمى كتشوف فيها مافهاهمة والو .. اما بيان ناضت كتميل وقالت ليهم
وابغيييت نبوووووول هههه
وقف تميم كيضحك وكاع صحابو كيضحكو الى الكاوري اللي عاد كتشرح ليه جيداء .
اديب: عادي عادي كيديرها الشراب
تميم: اجي تبولي ..اجي ماشي تما
داها شادها من دراعها وكيشوف موراه فصحابو كيضحك وهما اللور كيموتو بالضحك . داها للطواليط دخلها لقاتها طواليط بلدية ووقفات كتشوف فيها
بيان: اوييلي!! انبول هنا
تميم: وفين اتبولي!!
بيان: كي غندير!!! شد فيا
هبطات سروال بزز بغات تجلس ماعرفاتش وناضت هزات سروالها قالت ليه لالالا هادي ديال لكلاب !!!
تميم: مغتبوليش؟؟ صافي قضي
بيان: فيييين!! هادي طواليط دالكلاب
شار بيدو عندو وقال: واجي بولي ليا فحجري!! منين غنجيب ليك طواليط
خرج عند جهاد عيط ليه من بعيد
تميم: واش معندكمش طواليط!!!
ضار غندو جهاد شاف فيه وقال كيشير بيدو
لالالا ماشي تما ..زييد زييد سير للخرى
جات واحد الخدامة كتجري عندهم عاقات الموقف وشدات فيها داتها للطواليط في حين مشا تميم رجع بلاصتو جلس وقال لجهاد
واش هاديك طواليط!!!
جهاد: وماانعرف انا مكنجيش اصلا لهنا
تميم: مشاكييل ههه
رجعات بيان والخدامة شادة فيها كتميل وشد فيها جهاد دوزها لتميم وتميم دوزها لبلاصتها جلسات وقال
فشيتي نبولة
تكات كضحك وسلمى كتشوق فالطبلة حشمات تاكل.. جات الخدامة جمعاتها خلات ليهم غير الحلوى والمشروبات ومشات هي وخدامة اخرى دخلو داكشي للمطبخ .. دورات سلمى عينيها وقالت لجهاد
غنمشي طواليط
هزات صاكها مشات للكوزينة كدور عينيها ودخلات ابتسمت للخدامات وقالت
بغيت كاس جديد
ضارت كيمسحو ليها الكاس وهي تحل الصاك جمعاك اللي قدرات عليه بالزربة وخدات الكاس ومشا ت رجعات جلسات لقات جهاد عمر ليها كاس دالشرا مدو ليها لاكن حطاتو وقالت
منقدرش نشربو على الخوى مافطرتش
جهاد: وعلاش ماقلتيهاش بلاتي نعيط ليهم يجيبو ليك تفطري
هزات بيان راسها شافتهم جايبين الماكلة وقالت
حتى انا .. بغيت نفطر فيا الجوع
شمات ريحة البيض ودورات وجهها سادة نيفها وقالت
على ريحة .. حيدوه حيدوه.. غنمووت حيدوه
هبطات وجهها شداتو ويعدو جهاد عطاه بلخدامة وقاليها
رديه بلاش من هادا
تلفت اديب شاف فيها وقال
السكرة عندك خايبة
جيداء : عقلتي فاش مشينا لفرنسا فراس لعام وسكرت كانت هاديك اخر لقاء ليا مع سامي…
تميم: نتوما اصلا ماكنتوش فعلاقة
جيداء: اصلا الى قلت ليك السبب غتصدم
اديب: صدمينا !!
دورات عينيها فيهم وقالت : عادي نقولهاا!!
اديب: قولي عااادي مالو اش غيكون
جيداء: اصلا مزيان نتا نيت تشرح ليا حيت حرت .. المهم قبل بعدا سمحو ليا الموضوع مقرف.. لاكن ضاهرة طبيعية
فالسيكس..مثلا مثلا مع احترامي ههه.. كيبقا يخرج واحد الصوت فحال شي حزيقات ههه
دور تميم وجهه كيضحك وقال
ياا علا موضووع
اديب: اهاه كملي كملي..واقيلا فهمتك اشنو بغييتي تقولي..النفس اللي كيخرج مالو؟
جيداء: ماش مننن.. من المنطقة اللي..فهمتي.. كدير النفس .. قاليك فيك مشكل وديما كيعلق عليها زعما انا مريضة ولا فيا شي حاجة
جهاد : هاداك الهوا تيدخل من برا
اديب: تماااما .. ماكاين حتى مشكل سامي مريض فراسو
حطات سلمى يدها على نيفها حشمات كتشوف فيهم وبدات كتبرق .. اما بيان ناضت هزات راسها كتساؤل وقالت
اينا هوا ؟؟ مافهمتش؟؟ حتى انا كتوقع ليا واش عندي مسارن منفوخين
حتى انا هادشي اللي كنقول ومشيت للطبيب على المسارن قالي ماعندكش مشكل
سلمى : وحتى اللي باقا بنت. !! ا وييلي !!!
تميم: وعااادي بنت ماشي بنت عادي داكشي ماتحمقوش راسكم
جيداء: وعلاش كيعيب عليا انا يعني فيه مشكل؟؟
تميم: على الحسب لبوزيسون كيعمر لهوا ويخرج وكيدير الصوت
جهاد: هاادا هوا اللي كاين ومافيها والو ماعندك علاش تحشمي
بيان: ولاكن انا مكانش كيوقع ليا هاكا فاش كنت بنت
شافت فيها سلمى وقالت مخلوعة : اوييلي متقوليهاش غنحماق
اديب: ومكاينش مشكل مالكم !!! عادي مكاين لا مصارن لا والو فرقو بين المسارن والرحم ..
انا درت واحد الدوا حسابني المسارن
اديب: الرحم بووحدو قناة معزولة ومسدودة ماعندو حتى علاقة لا بالمسران لا بالمعدة ولا بالنبولة.. بووحدو يحال شي بالون وخشيتيه فالكرش ماعندوش اتصال بشي حاجة اخرى والمدخل ديالو بوحدو اللي هوا المهبل .. والنفس كتدخل من برا وتخرج عادي فاش كيتوسع بشي وضعية ..سامي معارف لحتى حاجة وبغا يعيبك نتي
سلمى : حتى البنت !!!
اديب: حتى البنت .. عادي الى تكيتي هاكا وترخيتي متبقيتيش مكمشة راه غيدخل معاك الهوا وفاش تجلس غيخرج بداك الصوت .. كي بنت كي ماشي بنت
بيان: لالااااا انا ماكانش كيوقع ليا هاكا !!
تميم: نتي غير سكتي كتنوي البنت
بيان: حتى نتي ديفييغج هههه
سلمى رجعات صفرا وشافت فجهاد اللي بدا كيرمش فبيان وقال
بيان خصك تسحاي.. لالا ضاروري تفيقي
اديب: ماكين والو دابا هي كتخيل تا تفيق وعاودي سوليها ..اصلا عادي فييغج ماشي فييغج فين كاين المشكل؟؟ باقا شي وحدة دابا فييغج!!
تخلعات سلمى وكملات عليها بيان اللي كضحك وي ها على فمها .. بدل ليهم جهاد الموضوع وقال كيشوف فالساعة وقال
حداش دابا شنو بان ليكم نركبو على الخيل
جيداء: فكرة رااائعة..دبا؟
جهاد: دابا شنو غنتسناو
اديب: ماعندنا منتسناو جينا نشطو نبدلو الروتين
جهاد: يالاه نتحركو
ناض ونوض سلمى حتى هي وناضت بيان معاهم اخر وحدة خرجو لفيرما كانت قريبة ليهم عامرة بالخيل ودخلو كيمتعو نضرهم بالطبيعة
بيان: بحال الفيرما ديالنا
جهاد: كاع العائلات اللي عندهم الخيل حاطينهم هنا ..
شد لسلمى فيدها ومشاو كيدورو ويتصورو مع بعض عجباتهم المنطقة .. كل واحد جر خيل فيدو والمدرب كيسول على اللي مكيعرفش يركب لقا غير سلمى بوحدها لاكن تكفل بيها جهاد ركبها معاه ، اما بيان بعفوية شدات فأديب وقالت
طلعني..طلعني معاك
تلفت تميم شافها حاطة رجلها باغا طلع ومشا جرها غمز اديب وداها ركبها وركب وراها وشدها مزيان وهي كتحل عينيها وتسدهم قائلة
جاتني الدوخة هه
تميم سدي عينيك يالاه
عنقها من كرشها وخرج مع الجماعة فوق الخيل كل واحد راكب بوحدو الا جهاد وسلمى .. مشاو كيتساراو فالطبيعة ويتمتعو بالمناضر حتى وصلو لواحد الارض كبيرة واطية فيها غيير الربيعة فالارض و بغاو يتسابقو الدراري بيناتهم واللي خسر يتكلف بالنشاط التالي
نزلو البنات جنب البحيرة اللي كانو كيشوفو فيها من الفيلا وجلسو فالربيع كيتشمشو ويتفرجو فالسباق. فالاول بدا اديب وبراد السباق من بعيد وتميم وجهاد واقفين قدام الخط اللي رسمو ليهم كيشوفو شنو السابق. انطلق اديب وبراد واقفين على الخيل وبدا الجري بأصى سرعة وحوايجهم كيطيرو اللور دازو قدام جهاد وتميم بحال البرق ..هز جهاد واحد القصبة فيذو وقال
براد.. نتا الرابح ..اديب خسرتي
رجع الخير كيشطح بشوية وبدات القرعة بواحد الدرهم يشوفو شكون غيلعب الجولة الثانية .
كانت سلمى جالسة حدا بيان اللي كضحك بوحدها وقالت
واش بصح كان كيخرج منك النفس من القدام فاش كنتي بنت !
بيان: لاااههه متخافيش صافي عييييشي الحياااااة
سلمى: اوييييلي وحدي على نعيش الحياة !!
ضارت عند جيداء وقالت: قولي لي الصراحة واش ماكنتيش كتنفسي من لقدام فاش كنتي بنت
هزات جيداء كتافها وقالت: الصراحة ماعقلتش!! شحالي هادي باش ودعت العزوبية
ضارت سلمى وبعات يديها مهمومة كتخمم طارت ليها ، اما بيان ناضت عند كتميل وتميم واقف مع براد فالسباق ..انطلقو باقصى سرعة كيستابقو واقفين والخيل كيجري ..غفلات جهاد ومشات خلات فالطريق لاكن لقفها اديب بسرعة جرها فالوقت المناسب من قدام تميم اللي داز كيطير كان غيدخل فيها . وقفو مصدومين كلهم واديب كينهج بالخلعة وجهاد شاد راسو .. اما تميم نزل مباشرة فاش وصل مشا عمدو مطرطق عينيه كلهت وغوت عليها بغضب
شنو بغيتي ديري ؟؟ شنوووو قاليك راسك ؟؟؟ واش تسطييييتي
جلس جهاد فالارض وشد راسو اما اديب عنق تميم كيهدن الوضع وقال
صافي ماوقع والو.. صافي
اما بيان بقات غير كتشوف وعقدات حجبانها رجعات اللور وشدات فأديب .. وقف كل واحد فجهة فين كيشوف ويرد استعابو للخطر اللي تعرضات ليه بيان والكارتة اللي كانت غتوقع وتقلب الموازين رأسا على عقب.
مشات جيداء وسلمى كيبردو فيهم حتى بدا يتهدن الوضع وهز جهاد القصبة وقال
صافي .. ماوقع والو صافي خلينا نكملو. .. صافي العشراااان غيروها ماطرا والو خليونا نكملو
رجع تميم اللور وقال: لعبو نتوما انا صافي مغنقدرش نكمل
جرو اديب وقال: وصاافي .. ماوقع والو ماتخليوش النهار يضيع .. خليونا نساو هادشي
تلفت تميم عند بيان وقال: اااخر مرة غتعاودي تشربي فاش نكون انا حاضر ..فاش تكوني بوحدك شربي تا تموتي
مشات عندو دفعاتو وقالت : ونتا شكوون؟؟؟ هاا؟ شكون نتا اصلا اللي تقرر فبلاصتي يااه!
ردو اديب اللور كيهدنو وقال: صافي نساااو نساو كتوقع
تميم: كنت غنقتلهااا واش كتستوعبوو!!
اديب: وصاافي حنا اصلا كنا حاضيين ورادين البال صافي خليونا نساو هادشي يالاه
جهاد: غتعاودو ماشفناش شكون اللول
هز براد يدو وقال: تميم.. تميم اللي سبق انا شفت
جهاد: صافي غنلعب انا مع تميم
تلفت عندو لقاها جالس القرفصاء وكيشوف فالارض بنفس عميق ..مشا جهاد ضرب على كتفو وقال
صافي : صافي يالاه … يالاه غنلعب انا وياك نوض اصاحبي غنبقاو هاكا..صافي نوض يالاه
حاولو ينساو والخطر كان كبير لاكن ماوقع والو لحسن الحظ ولطف الله .. والضاهر ان عمر بيان مزال طويل وهادشي كيفرح.
اطلق السباق واديب واقف هاد المرة وعين فبيان وعين فالخط حاضي معاها .
اديب هاز القصبة: تميم.. هوا اللي غالب.. الخيل اللي راكب عليه تميم مجهد على لخرين
نزل تميم مخرج لسانو وقال كيضحك
الخيل كتعرف اصاحبها
جهاد: اووو هادا تكبر اخ تميم
تميم بافتخار مسطنع كيحضحك: الحقيقة اصديقي هه
جهاد: تفرجو ..
جر للخيل لجامها ووقف بيه طلق واحد الصوت مسموع وتعاود الصدى ديالو ..
جهاد: كي جاتكم هادي
سفق ليه تميم وقال بسخرية : اووه !! عمرني شتها هه
جهاد: يالاه نعاودوها كاملين.. نتسابقو
دار اديب يديه على جنابو وقال: اه باش ندخلو كاملين فبيان
تميم: هاد المرة غترجع كفتة
شاف فيها وقلب عينيه .. ركبو يكملو الرحلة اللي بداوها لاكن بيان مابغاتش تركب مع تميم وعطاتو بالضهر ..ركب وقال
خليها على خاطرها
راد وخلاها واقفة كضحك في حين مشات عندها جيداء مدات ليها يدها من فوق العود وقالت
اجي تركبي معايا
شافت فيها بيان بابتسامة وشارت بصبعها وقالت
انا نركب مع اديب
خرجات سلمى عينيها و جهاد بقا غير كيشوف.. كلهم بقاو يشوفو فبعضياتهم .. تبسم اديب كيحك فرقبتو وقال كيشك فراسو
اناا!!
مشات عندو بيان شدات فيه وقالت : اه نتا ركبني
هز اديب راسو عيط لتميم اللي سبقو بالخيل وقال
تميييم…
تلفت شاف فيه تميم وشاف كيفاش شاة فيه ورجلها على السرج وقلب عينيه كمل طريقو ببرودة
شار ليه جهاد بيدو وميوعة بمعنى هزها خلينا نتحركو وشد فيدها طلعها وطلع وراها شاد اللجام وغادي متوثر .. داز حدا تميم اللي ماشافش نهائيا جيهتهم وببرودة قال
اشمن نشاط تبغيو هاد المرة؟؟ بما انني انا اللي غلبت
جهاد: علاش منديروش البراشيت العشران؟؟ نمشيو الصباح لمراكش
تميم: مراكش؟؟ شحال كتبعد على هنا ؟
جهاد: خليو الترونسبور عليا… غنوجد ليكم واحد المفاجأة
قال تميم وهوا كيشوف قدامو بهدوء : اوكي ..غدا نتلاقاو .. يالاه تهلاو
ضرب الخيل برجلو ووقف مشا كيجري وهما كيشوفو فيه مافهمو والو.. كملو طريقهم للفيرما حطو الخيل وهنا جر جهاد بيان من دراعها وقال: زيدي قدامي… زيدي
نترات يدها مشات شدات فسلمى وتكات عليها كضحك .. بقا جهاد واديب شادين الخيل يدخلوه و سول اديب جهاد وقال
بيان وتميم فعلاقة؟
جهاد: بحلاش؟
اديب: شنو نوع العلاقة اللي بين تميم وبيان؟ حيت اللي عارف انا تميم فعلاقة مع لجين!..علاش مابانتش معاكم
جهاد: بحالي بحالك حتى انا مافاهم والو.. لا علاقة تميم بلجين ولا علاقة بيان بتميم. .. ماقدرتش نفهم
رد اديب بالايجاب وسكت طلق الخيل لخيالها وخرجو رجعو للفيلا لقاو سيارة تميم مكايناش .. تبسم جهاد وقال
كنت باغي نبقا معاكم اكثر ولاكن خاصني نوصل بيان لدارهم قبل مادير شي كارتة ..
اديب: ماشي مشكل على العموم شكرا درتي مجهود معانا ..وتشرقنا بمعرفتك جهاد
جر جهاد بيان ركبها فسيارتو وركبات سلمى حتى هي وانطلقو شدو الطريق
وصلها جهاد للفيلا وطلبات منو سلمى يوصلها لدارهم واخا عيا يطلب فيها تزيد معاه كتر ، وصلها للدار وقبل متنزل باسها فخدها وقال
غندوز عليك غدا نمشيو لمراكش..اوكي
سلمى: ان شاء الله
باسها فشفايفها وخرجات شافت الساعة كانت الستة .. طلعات كتسد على صدرها وتمسح العكار كتردد
هانا وصلت بكرييي..نيت باش تخليني نخرج حتى غدا
هزات الراس ومشات طلعات فحالها للدار .. اما تميم متكي على نموسيتو والتلفازة قدامو كبيرة شاد المانيطة وكيلعب الكورة بوحدو من وقت طويل الى حين وصلات مدام بهية ودخلات لقات الحس مقطوع والضلام فالدار .. حركات راسها كتسنط ومشات حلات لبيتو حلات الباب بشوية سمعات صوت الكورة فالتلفازة وطلات لقاتو متكي ففراشو كيلعب ومركز مع الماتش
تبسمات وقالت: تميم!! من امتى رجتي ؟
رد بتركيز مع الماتش: شي ساعة دابا
بيان: اه.. مزيان ..تغديتي؟
رد براسو: تأ
مدام بهية: علاش؟ ماتغديتيش؟. نصاوب ليك شي حاجة
رد بتركيز: متأ لالللللاااا لاح المانيطة وشاف فيها وقال
انا نوض ندير شي لعيبة
شحكات مستغربة وقالت: لعيبة! جديدة عندك هادي هه صحيح اللي قال من عاشر قوما اربعين يوما اصيح منهم
تميم: انا غنمشي لاصال
مدام بهية: دابا ؟
تميم اه يالاه التمنية .. كيوقف لاصال مع العشرة.
مدام بهية: ايوا كول شي حاجة بعدا
ناض طفا التلفازة ولوا السلوكة جمعهم ومشا للكوزينة حل التلاجة وتكا كيتفرح ويقشر شفاهه بسنانو. كيفكر وجبد واحد الطرف ديال الصدر نقي واجد مهبر مغلف لاحو على البوطاجي وبدا يحط ويرمي داكشي اللي خاصو ومشا جبد واحد الموس كبير داز على الصدر قطعو بالزربة لاحو فالمقلة مع زرب عليه وتبع ليه الروز صلقو ورافقو بشوية دالخضرة كانت مقطعة مجموعة فالتلاجة وطحن معاه كاس دالعصير كله مع البروتين ومشا هز كلشي للطبلة جلس كلاه كامل .
مدام بهية خارجة من البيت: لقيتي داكشي ديالك واجد بعدا.. ايوا بالصحة
تبسم كيمضغ وناض عمر التيرموس ديالو ومشا هز شكارتو خرج لايح القب على راسو ونزل فتح باب سيارتو ركب وجا يحط حداه شكارتو ولقا الصاك دييان حداه .
قلب وجهه كيأفأف وسمع تيليفون كيصوني لداخل وحلو لقاه عامر بالمكياج والرواح صغار وجبد تيليفون بزز من وسط داكشي لقا مدام سارة كتصوني مكتوب عليها mom
تردد فالاول مابغاش يرد لاكن ملي صونا وعاود فتح الخط وجاوب
الو ..مدام سارة .. اا بيان نست صاكها عندي.. ماعرفتش فين غتكون الصباح كانت معايا من بعد تفارقنا وبقا صاكها عندي..ماشي مشكل..بسلامة
قطعات ولاح تيليفون بعفوية حداه كيسوط وشد طريقو لاصال مباشرة
ساعة ديال الرياضة دوزها كلها بجدية خدات منو جهد قوي وتركيز وعمل كثير.. خرج من تما كامل عرقان وسخفان مشا هز شكارتو وداز للدوش شلل بالماء وهبط للابيسين كان فيه غير جوج دراري قديك الوقيتة كيعومو .. لاح الفوطة ونقز ضربها طولة وحدة تحت الماء حتى للراس وهز راسو تنفس ووقف رتاح وعاود رجع عاودها بالضهر ذهابا وايابا وصع صدرو مزيان ومشا عاود شلل ونشف ولبس سورفيت بلو مارين رجالية ولاح عليه القب وخرج هاز شكارتو على كتافو مشا طلع فسيارتو جلس وعاود بغا يحط الشكارة وشاف الصاك حداه ..هز راسو تكاه كيسوط بتعب وتمرد وشد عليه الباب مشا عند بيان للفيلا ونزل هز الصاك دخل للفيلا حلات ليه سعيدة .. شاف فيها بقرف وقال
باينة هنا؟؟
سعيدة: مادموزيل بيان ناعسة
لاح ليها الصاك وقال: عطيها صاكها
خرج بحالو مغين فتح الباب ويالاه جا يطلع بحالو حس بشي حاجة ماضية تطحات على جنبو وصون حدا ودنو قال
طلع اللي عندك اعشيري بلا مانغرس ف٠٠٠٠٠٠ هاد الريعطاش
كالاه واحد اخر من الجنب لاخر وقال بخفوت
طلقنا.
بقا تميم واقف كيشوف قدامو متحركش ..دخل يدو فالجيب جبد تيليفون بشوية وهما دايرين بيه بجوج طوال ودايرين القب والشارع فيه غير الفيلات خاوي حتى واحد مكيدور تما .. بغا يدور لاكن زيروه بتهديد وخدا منو واحد تيليفون ومول الموس دخل يدو فجيبو كيقلب .. بلمح البصر شد ليه تميم ديك اليد اللي فالجيب هبطو للتحت وعطاه باليد للوجه نيشان وجر الثاني معاه حتى هوا لاقاهم على الطموبيل .. واحد جاتو الضربة فالكرش طاح مع الارض وهرب من يدو ومول الموس تضرب مع الطموبيل ضربة وحدة وطاح فالارض متحركش.. هز تميم تيليفونو وضرب ليه يدو برجلو حيدها من طريقو وركب مشا فحالو رجع للدار .. وطلع فحالو نعس
الصباح صبحات بيان جالسة كتقلب على تيليفون فالصاك وهزاتو قدام سعيدة خواتو كامل فالارض بتوثر وقالت
فين تيليفون ؟؟؟. فين تيليفون ؟؟
سعيدة: ماعرفتش امادمودزيل لبارح جا بالليل عطاني الصاك ومشا !! مقالي والو
بيان: ميمكنش .. كيفاش عطاك الصاك وماعطاكش تيليفون واش بغيتي تحمقيني عنداك تكوني خديتيه غنغبر. ليك الشقف سمعتي
سعيدة: والله ماشفت شي حاجة امدام انا خديت الصاك وحطيتو ليك فالبيت مابغيتش نفيقك
رن الصونيت ديال الدار وردت بيان بغضب: سيري شوفي شكون .. سيري حلي غيكون هوا سيري
هبطات سعيدة كتجري وبيان كتمشي وتجي بوحدها فالبيت .. طلعات عندها سعيدة مخلوعة وقالت
البوليس امدموزيل .. كيسولو عليك
حلات بيان عينيها مخلوعة وقالت: البوليس!!! اويلي !
مسحات على وجهها وسدات عينيها كتبررد راسها وهبطات عندهم بواحد الكولون ابيض رياضي والفوقاني ديالو مزير بالسنسلة ويديه طوال والسبرديلة مبتاسمة وقالت
انا مادموزيل بيان. العلوي.. كاين شي مشكل اسيدي
رد عليها باحترام وقال: متشرفين امدموزيل .. بغينا غير نطرحو عليك شي اسئلة الى كان ممكن
شارت بيدها بابتسامة وقالت : تفضلو .. مرحبا
جلساتهم فوق الاريكة وشارت بعينها لسعيدة سيفطاتها للكوزينة وقالت
فاشنقذر نعاونكم. اسيدي
الضابط: مع العشرة وتلاتين دقيقة.. فين كنتي؟
استغربات وقالت: كيفاش فين كنت !! كنت هنا .. فهاد الوقت بالضبط كنت ناعسة علاش كاين شي مشكل؟
الضابظ: ماسمعتي والو ماحسيتي بوالو على برا؟
بيان: مافهمتش فهمني بعدا شنو واقع بخصوص شنو؟
الضابط: لبارح وقعات جريمة قتل قدام الباب ديال الفيلا ديالك ..شكون اللي خرج من عندك فهاد الساعة ؟
خرجات عينيها ودارت يدها على فمها ووقفات مخلوعة وقالت
شكون اللي مات ؟؟؟ شكون ؟؟
الضابط: اللي تقتل سميتو العربي بلعيد .. ومات قدام باب الفيلا البارح ..قولي لينا بالضبط شكون كان عندك فهاد الوقت
دارت يدها على قلبها دورات عينيها مزيان وقالت كتلهت مخلوعة
كما قلت ليك.. كنت ناعسة ماشفت حتى واحد..ماجا عندي حتى واحد
الضابط : واخا نقدرو نشوفو الخدامة ديالك ؟ بما انكي كنتي ناعسة
خركات بيان راسها ومشات عندها للكوزينة لقاتها كتشنط وغرسات دفارها فيها وقالت يخفوت
تنطقي ولا تخرجي شي حرف نصفيها ليك . ماشفتي ماسمعتي ماجا حتى واحد يالاه تحركي قدامي
هزات راسها ومشات بابتسامة وسعيدة موراها كترعد وقفات قدامهم حانية الراس في حين بيان جلسات كترخي يديها بهدوء تام ودارت رجل على رجل كتشوف فسعيدة كل شوية. والضابط كيحقق معاهم
نفس الاسئلة وجههم لسعيدة وكيطلع فيها ويهبط
سعيدة: ماعرفتش اسيدي.. لبارح كنا نااعسين
الضابط: ومعاياش مولفة كتنعسي ؟ مع العشرة؟
سعيدة: كل مرة معاياش.. الا مكان اللي يسخرني كنعس بكري
تبسمات بيان وقالت: كما قلت ليك اسيدي .. لبارح نعست بكري شوية وانا فاش كنعس كنبغي السكات فالدار
الضابط: بوحدك عايشة فهاد الدار ؟
بيان: هانتا كتشوف .. بوحدي.. من غير ماما اللي شحال هادي مابقاتش كتجي
الضابط: علاش مابقاتش كتجي؟
بيان: مشاكل شخصية اسيدي..معندها حتى علاقة بهاد الجريمة ..حنا مكنعرفو حتى واحد بهاد السمية وماعندنا حتى علاقة
الضابط: واخا ممكن نشوفو التسجيل دالكامرة اللي اللي عندك على برا
جمعات الابتسامة بهدوء ورجعات قالت بأسف
الكامرة اللي على برا ماخداماش.. الايام اللي فاتو كانت الشتا بزاف .. وسكتات مابقات كتسجل حتى حاجة وانا ماساليتش باش نبدلها ولا نشوف مالها .. اصلا متقوعتش توقع جريمة فباب داري ..حنا هنا فهاد الحي آمن عمرها طرات شي حاجة عندنا ولا سمعنا شي حاجة بحال هاكا .
وقف الضابط حرك راسو يالايجاب وقال: واخا مدموزيل بيان.. المهم ماتمشيو حتى بلاصة نقدرو نستدعيوكم
شاف فسعيدة بحدة وقال: خصوصا نتي غنعيطو ليك فأي لحضة ..خلينا ليكم الراحة
رذت بيان بابتسامة: زارتنا البركة ..شرفتونا
خرجو مع الباب مشاو وناضت بيان جمعات النوضة مشات كطير للحاسوب اللي خاص بالكامرات جلسات وجبدات التسجيل بلهفة وقلق رجعات للساعة اللي قال عليها الضابط وشافت مشاهد غريبة .. بدات كترجع اللور شافت اللحضة اللي وصل فيها تميم ودخل ورجع خرج والشفارة كيتربصو ليه وقربو منو بحدر كيشوفو شكون حاضيهم يامين يسار وجبدو الموس ولسقو عليه قذام باب الطموبيل .. تفرجات فالمشهد كامل ويدها على فمها مخلوعة وشافت العراك ديالو العنيف معاهم بجوج حتى للحضة اللي ركب فيها مشا وخلا الشفار مرمي فالارض وموراه بوقت قصير جا عندو العساس ديال الحي بزرواطة طل عليه وحركو بيها لقاه مكتحركش وتاصل بالبوليس اللي حضرو فالحال مع سيارة الاسعاف طوقو المكان بشريط اصفر والشرطة العلمية لتاقطات السلاح و معاهم مصور صور جميع اللقطات عاد هزو القتيل فالاسعاف وبحتو فالمكان من بعد انتهاء المهمة ومشاو بحالهم .
رجعات اللور مخرجة عينيها مصدومة وقربات من التسجيل قطعاتو كامل احتافضات بيه فملف مقفل وحدفاتو من م بلاصتو قمرة وحيدات اليوسبي هزاتها وناضت كطير لبيتها هدات جاكيطتها ونزلات عند سعيدة دخلات كتخزر فيها يخطوات تقيلة خلعاتها وقالت
الى مشيتي حتى خرجتي شي حرف مع حلق..ولا جبتي سيرة ديال تميم غنخرج ليك على حياتك..ماتنسايش راه عندك ولد مزال صغير كيقرا ومحتاج ليك … اوكي
ردت سعيدة بخوف: لالالا مدموزيل بيان… منقول حتى كلمة غير كوني هانية.. ماشفت ماسمعت واخا يحطو ليا السيف على عنقي
بيان: ايوا خليك صمكة وعمية حسن ليك
سعيدة: هانا امدموزيل بيان
سدات سعيدة فمها كتقفق وبدات ضرب وجهها وتندب من بعد مامشات بيان وتردد
اويلي شداني..شدخلني… اش دخلني انا غير دريويشة اش داني ليهم .. شداني درتها راسي ااانا درتها اويلي يا وييلي يا ويلي شداني نخدم انا كاع شداني لشي حاجة ماشي قدها .. ياربي.. ياربي فكني غير هادي والتوبة.. غير هادي ياربي حبيبي والتوبة
زيرات على يديها حدا وجهها يبسات قدام لافابو كترعد مابقات عاقلة لا على شقا لا على حتى حاجة
اما بيان خرجات ركبات سيارتها ولبسات نضاضرها وخرجات بشوية مع الشارع دازت حدى الكاريطة دالعساس وهبطات السرجم بهذوء كلماتو من النافدة قائلة
بونجووغ
ناض وقف كيطير عندها وسهبط راسو وقال: صباح الخير امدوموزيل
ردت كطلع فيه: سمعت شي هضرة قتيلة ما قتيلة لبارح اشنو وقع
العساس: علمي علمك الاللة حتى انا ماعرفتش.. داتني عيني واحد السويعة مع البرد والشتا كتنقط دخلت غا لكاريطة.. مافهمت والو خرجت موراها تا لقيت واحد مجبد فالارض حركتو بعصية ماتحركش عيطت للبوليس !!
بيان : امم.. وماشفتي والوو!! ماسمعتي حس؟؟
العساس: مافهمتش انا ماسمعت تا صوت!! مااا..فهمتش امدموزيل غا تا لقيتو مجبد قدام الباب ديالكم
بيان: اممم .. وشنو دارو البوليس عرفو شكون؟
العساس: ماعرفتش انا سولوني قلت ليهم ماشفت والو .. الحس ماضااارش كاع بحالا جا شي واحد رماه تم و زاد مع الطريق !! مابقيت فاهم والو انا .. حيت الحس ماتسمعش حدي سمعت صو واش طموبيل واش موطور صوت مجهد ماعرفو طموبيل ولا شناهوا ..
بيان: وماشفتيش ديالاش الصوت؟
العساس: مالحقتش مع هزيت راسي نطل مابان ليا والو .. تا نضت قلت ليك جيت الدورة عاد بان لينا هاداك مجبد حداه جنوية.. لادم لا والو كيفاش مات مافهتش واش شي واحد خبطو للراس واش كان نوي يقتلو بديك جنوية مابقيت فاهم والو انايا
بيان: ماستجوبوش شي واحد هنا ؟؟
العساس: وا سولو على اللي ساكنين هنا قلت ليهم علدى الفيلا اللي قدامك ..هاديك خاوية مافيها تا واحد وديك السيدة اللي حداك اصلا شهر دابا باش مشات عند ولا ها لفرانسا..الحي خاوي غا هداك اللي لهيه اللي ساكن ولاكن بعيد
بيان: واخا شكرا… المهم الى عرفتي شي حاجة ماتنساش تعلمني حتى انا بغيت نعرف شنو وقع ..
العساس: واخا مدموزيل اللي عرفتها نجي نعلمك بيها
تبسمات وطلعات الزاج كملات. طريقها
وصلات بيان للفيلا عند تميم وطلعات كتجري وتصوني بالجهد حتى فتح ليها الباب وكان لابس حوايجو ناوي يخرج .. دخلات عليه بسرعة داهماتو وبعفوية شدات فيه كتهضر لاكن هوا هز يديه وشاف فيها نفور وقال
ماتقيسينييش.. ماتيقينيش حيد يدك ..
رجع اللور بعد منها في حين خرجات مدام بهية من بيتها كتلبس المونطو ديالها شافتها وقالت بغضب
شنو ح كديري هنا ؟؟ اشنو بغيتي
ردت بيان بتوثر: البوليس.. البوليس كيقلبو عليك اتميم
استغرب وقال : البوليس!!
شافت فيه مدام بهية وقالت: بوليس!!! علاش غيقلبو عليه البوليس اشنو دار ؟؟
جبدات بيان اليوسبي من جيبها وقالت
البوليس كيقلبو عليه حيت … حيت متهم بجريمة قتل
حطات بهية يدها على صدرها وقالت: قتل!!! اش كتقولي؟؟
تميم: واش هادو شي وحدة من فعايلك !! هاا؟ مالقيتي ماديري
رجعات اللور شافت فيه بإحباط شافت فيه وقالت
علاش انا غنتاهمك ؟؟ علاش غنلعب عليك اشنو كتقول
تميم: نفكرك لبارح اشنو درتي فالحفلة دالجامعة ؟؟ امم؟؟ دغيا كتنساي!! كل يوم عندك سيناريو ماكتعيايش!!
لاحت ليه اليوسبي على وجهه وقالت : شد … شد وفك عليك حريرتك بوحدك الله يجعلك تدخل للحبس كاع انا مالي
خرجات من الدار هازة فقلبها مشات كتجري ركبات فسيارتها خلاتو فالدار بوحدو مع بهية.. نزلات هزات اليوسبي من الارض كتشوف فيها وهزات عينها فتميم وقالت
اشنو درتي؟؟ قول ليا شنو درتي وشنو فهاد اليوسبي
تميم في حيرة : اشنو غندييير اش غندير ماقتلت حتى واحد كاعرفتش شنو كاين فهاد اليوسبي
مشا للبيت كيسوط خرج البيسي لاحو على الطبلة وشد ديك اليوسبي دخلها وشعلو كيتسنا ومدام بهية حداه واقفة .. دخل للتسجيل مباشرة وغير شافت بهية الحي قالت. مخرجة عينيها
هادي دار بيان شكدير تما !!! شهادشي؟؟؟؟ ا ويلي ويلي ويلي شهادشي
عقد حجبانو وخرج عينيه وهوا متكي على الطاولة قدام الحاسوب وبدا كيحرك راسو بالنفي ماقدرش يصدق فاش شاف البوليس والاسعاف والروينة وقال
ميمكنش… ميمكنش
سدات مدام بهية عينيها وطاحت على واحد الفوطوي ويدها على حلقها مخنوقة كتحاول تتنفس .. خبط داك الحاسوب سدو بالجهد وناض دار يدو على فمو مغزز سنانو كيرد
فااااك…فااااك
ضارت عندو كتولول وقالت: عييت عليك.. عييت عليك بعد من بيان.. بعد منهاااا ..بعد منها شداك ليها قلتي ليا غنمشي لاصال اش داك ليها
شار بيدو معصب وقال: ديك ليها لللل….. صصصصاك ديالها نساتو عندي
بهية: اشمن صااك؟؟؟ هااا اشنو كيدير صاكها عندك دوي؟؟؟. نطق .. نطق غتجلطني .. غتسيفطني صافي تقادا جهدي .. غتقتلني
ناضت مدات ليها يدها بالزربة وكتفتف على تيليفونها وقالت
طلق .. طلق سوارت الطموبيل .. سربي راسك طلق لهنا السوارت
لاح ليها السوارت وضار كيسخط غادي جاي فالدار وهي كتصوني وتعاود..
مدام بهية: الو.. سعيد.. طلع عندي للدار دابا سربي راسك
قطعات وجلسات كتشوف فالارض عاضة شفاهها وكتفكر
تميم: انا دافعت على راسي… ماشي من حقي؟؟ واش ماشي من حقي ندافع على راسي
مدام بهية: دافع على راسك .. ولاكن ماشي بالقتل
تميم: باش عرفتو غيموت اصلا .. ماعطيتوش شي دقة اللي تقتلو
مدام بهية: ايوا هاهوا مات … يالاه دابا شنو غندير انا ؟؟ شنوووو
رن الصونيت فالباب وناضت مشات حلات للشيفور اللي دخل عندها فالحال وسدات البا
بهية: هبط دابا للطموبيل دتميم جمع كاع داكشي اللي فيها فشي صاك خويها وديه لفاس للفيرما حطها تما فشي بلاصة غبرها ..سربي دغيا ورد بالك فالطريق مع البوليس
هبط الشيفور بسرعة وبقات هي كتمشي رتجي وهوا جالس كيشرف قدامو وقال
انا علاش انهرب ولا نتخبا؟؟ دافعت على راسي من حقييي
جا ينوض ورداتو بلاصتو قائلة
جلس للارض… واش انا عاد غنتسنا القضاء يحكم ليا بالبراءة . جلس ويسكت هادشي مابغيتش شي واحد اخر يجيب خبارو ولا يشير لينا شي صبع بالاتهام . جلس غادي تمشي للطاليان عند باباك.. غتمشي ليوم ج راسك ووجد حوايجك ليوم غتمشي غنعيط للبيلوط يوجد الطيارة . يالاه نوض
دخل تميم للبيت ديالو تالف معرف هاد المصيبة منين نزلات عليه و لاح واحد الشنطة بالجهد على نموسيتو
اما بيان حتى وصلات لنص الطريق وتفكرات تيليفونها ورجعات كتجري حتى لعندو للدار كتصوني . فتحات ليها مدام بهية ودخلات عليهم بصرامة قائلة
جيت بغيت تيليفوني..
هزات بهية راسها بنفاد الصبر وقالت: منين خرجتي ليا نتي. منيين؟؟ منين بغيت نعرف
ردت بيان بصوت مرتفع .. بغيت تيليفوني .. ناخد تيليفوني ونمشي بحالي.. تميييييم ..تمييييم
فتح الباب بالجهد خرج عندها وقالت ليها بجدية
عطيني تيليفوني.. تيليفوني
نفخ كيدور وجهه وقال: واش انا دابا فتيليفونك .. اشمن تيليفون ؟؟
بيان: تيليفوني .. لبارح فاش جبتي ليا الصاك مكانش فيه التيليفون
تميم بغضب: ماعرفتش فين تيليفونك وتفكيري مشتت دابا من بعد نشوفو هاد التيليفون
بيان: مغنمشي من هنا حتو ناخد تيليفوني.. دابا
تميم: شري واحد اخر وهنينا مامساليش ليك دابا
مشا دخل لبيتو زدح الباب وضرب واحد الحيط بلكمة حتى تسمع عندهم على برا قفزهم ومشات بهية كتجري حلات الباب لقاتو كيفض حوايجو بغضب فالحقيبة ورجعات عند بيان بترثر وترجي
شوفي.. حنا دابا فمشكلة كبيرة ..شكرا حيت نبهتينا .. قضية تيليفون من بعد ونشوفوها .. الله يخليك سيري دابا
هزات بيان صبعها وحاجبها باصرار وقالت
تيليفوني يحضضضر دابا… مغنتحركش حتى ناخد تيليفوني
سدات مدام بهية عينيها بنفاد الصبر وقالت : سمعي ابيان.. الى عندك شي مشكل معايا بالضبظ ماشي وقتو .. ماشي وقت النقاش دابا ولا النزاع .. الله يخليك ..حنا فواحد الوضع ماشي عادي .. للى كان تميم كيعني ليك شي حاجة ..وقفي معاه ..وقفي معاه يتخطا هاد المصيبة وصفي حسابك معايا من بعد .. اللع يخليك ..الى كان كيعني ليك شي حاجة
هبطات بيان صبعها وحواجبها ملاقيين كتنفس وتبرد. وقالت
انا غنمشي دابا.. ولاكن غنرجع .. وتيليفوني الى مالقيتوش حاضر ديك الساعة عاد غنتفاهمو
عطات بضهرها بغات تخرج لاكن وقفات مدام بيان بحدر وقالت:
البوليس جاو عندك؟
ضارت بيان شافت فيها مزيان ولسانها كيدور لداخل وقالت كتقلب فعينيها
جاو… ونكرت .. قلت ليهم ماجا حتى واحد.. ماشفت …ماسمعت
لاحت شعرها وزادت مع الطريق غادية وتفرد يديها مع بعض غادية كتردد
فيين غيكون هاد تيليفون؟؟ فيين ؟؟ تكون سعيدة خداتو ؟؟. والله وتكوني نتي اسعيدة حتى نسيفطك لجهنم تشواي
مشات ركبات سيارتها كطير .. اما مدام بهية هزات تيليفون تاصلات يخوها عاودات ليه على قضية ولدها وقالت
شوف .. انا مابغيتش نهائيا هاد التهمة هاد تنسب ليا.. مابغيتش نهائيا سميتنا تذكر.. شوف ليا شكون هادا اللي مات وشكون عائلتو .. وماكرهتش تلسق هاد الجريمة لشي واحد اخر المهم ولدي انا مايتذكرش نهائيا… شكون ما بغا يكون… انا ماشي شغلي يتعفن فداك الحبس المهم ولدي مايتذكرش..لسقها لاي واحد ماشي سوقي.. والى جات على الفلوس انا غنعطيهم اللي بغاو المهم اد الملف مايتحلش بمرة .. يالاه بسلامة
قطعات وضارت لقات تميم وراها واقف والشنطة واقفة حداه كيشوف فيها .. بسرعة هزات صاكها والمونطو وقالت
يالاه دغيا .. سربي راسك يالاه نمشيو
جات تشد فيه تجرو لاكن هز يدو وقال مصغر عينيه فيها
عاودي الهضرة اللي سمعت دابا
ردت على عجلة: اشمن هضرة ؟؟ يالاه تمشي الطيارة كتسنا
هز رجلو دفع ديك الشنطة مشات بعيد مع الارض وقال
باغا تلسقي التهمة لواحد اخر ؟؟
شدات فيه بغات تجرو وقالت : ماشي شغلي انا فشي واحد انا كيهمني ولدي.
رفعي يديه بعد منها وقال
وشكون هوا هاد ولدك!! شكون ملاك. ؟؟ تلسقي تهمة القتل لواحد بريئ يتحاسب على شي حاجة مادارهاش؟؟ واش بصح هادشي اللي كنسمع
ردت بغضب: وشنو بغيتي تمشي للحبس؟؟ هااا تمشي للحبس
تميم: وشكون اللي بغيتي يمشي واحد بريئ؟؟ انا كيفاش غنعس وكيفاش غنعيش وانا قاتل وواحد اخر كيتحاسب على جريمتي؟؟ انا دافعت على راسي .. دافعت على راسي ماتهجمت على حتى واحد وكلشي مصور وبادليل
بع: تميم راك غير كتهضر.. المحتمع هنا مكيرحمش … ماشي فحال ايطاليا كل واحد عايش ماكيفكرش فواحد اخر … هنا كولشي كيحلل كولشي كيبحث كولشي كيحاسب كولشي كيقرر كولشي كيسير حياة شي .. شي لاسق شي شي معصب على شي شي كيبكي على شي والى هاد القضية خرجات للعلن مغيتعاطفوش معاك واخا دافعتي على راسك … هنا كيتعاطفو مع المسكين والدرويش والبكاي اللي كيخرج يبكي … اما حنا بالنسبة ليهم فير شفارة وكروش حرام وواكلين حقهم والثروة ديالنا هي ديالهم وخديناها منهم هادا علاش خليهم يتحاسبو هما ويبكيو على بغضياتهم هما وهادشي اللي يصلاح لهاد الطبقةات الفقيرة والمهمشة خليهم ياكلو بعضياتهم وخلينا حنا بعاد على هاد المستنقع ديالهم
بقا مصذوم كيشوف فيها وقال بالنفي: ماعمري ترقعتك تكوني فحال هاكا.. كتقولي على ناس فقراء مساكين مستنقع!! لهاد الدرجة قلبك كحل !! وعندك الناس بحال الحشرات!!واش الضلم عندك ساهل!! هادشي اللي بغيتي ديري سميتو الضلم ..وغير اللي ماعندوش ضمير ومافقلبوش الانسانية و الرحمة اللي كيدير هادشي
سدات عينيها بصبر ويدها على نيفها وقالت
تميم: نتا مكتعرفش علاش كنهضر.. هادو راه مراض نفسيا .. نتا كتشوفهم يهاد المنضور الزوين هما غيشوفوك شفار واكل حقهم ورزقهم .. وغتسمعهم كيوقولو يستاهل.. وغيتمناو ليك الموت والحبس وكاع انواع العذاب.. حتى واحد مغيقول الحق لمجرد انك ثري وماشي بحالهم .. هما كيتعاطفو مع مسخ بحالهم واللي كيخرج يبكي
رد بغضب: مكيهمنيش كيفاش يشوفوني ولا شنو كيقولو ولا حتى شنو كيدعيو.. انا كنتحمل مسؤوليتي .. انا ضربتو غنمشي نسلم راسي وغنحلي العذالة تحقق الى كان خاصني نتحاسب نتحاسب ولاكن مايتحاسبش واحد اخر بلاصتي
فشلها وجلسات كترعد وقالت:
تميم…فكر فيا.. فكر فشنو فسرقع ليا ماتفكرش غير فراسك.. سير دابا لايطاليا ونا غنتكلف نلقا حل لهادشي.. والى دعات الضارورة كاع نتلاقا مع عائلتو ونفكها معاهم حبيا.. بلا فضايح
جلس على الاريكة وقال:
مغنمشيش.. غنبقا هنا والى كان شي واحد اللي معني بالامر فهوا انا .. اكبر هطأ كنت غنرتاحبو هوا الهروب.. مغنهربش .. غنجلس هنا وغنعتارف بكلشي
رن الصونيت ومشات بهية تخل والدموع فعينها لقات رجال السلطة قدامها ونفس الضابط اللي ستجوب بيان كيسألها بادب
مدام .. عندنا امر بالقبض على تميم البيستي
حلات عينيها فيهم وقالت : شكون عطاكم هاد الامر ؟؟ شكون ؟؟
تكلم تميم من وراها وقال: انا هوا تميم البيستي
الضابط: تفضل معانا الله يخليك
شاف بنص عين فبهية اللي كانت على نقشة غطيح فالارض وهبط راسو خرج معاهم وهي كترعد وتشوف فيه وتردد
تميم… لا تميم.. لاااا ..
سد عينيه بصبر وبلع ريقو ماقدرش يشوف فيها ونزل مشا معاهم خلاها فالباب مصدومة وقلبها غيسكت
وصلات بيان للفيلا ونزلات كتوعد سعيدة ودخلات كتعيط ودور فالفيلا مالقاتهاش..مشات للبيت اللي كتبات فيه لقات حوايجها مجموعين. وهنا انفاجرات بيان بالغضب حد الانفجار عرفاتها هربات.
اما تميم وصل لمركز الشرطة بخاطرو ودخل لمكتب التحقيق لقا سعيدة واقفة تما مهبطة راسها كترمش.
صغر عينيه وبقا كي حدق فيها مزيان وقال
نتي هنا!!
شار ليه الضابط قائلا : تفضل مسيو البيستي
دخل للمكتب جلس على الكرسي ودخلو سعيدة وقفوها مهبطة راسها وبداو معاه الاستجواب بهدوء وادب
الضابط: السيدة سعيدة العروي ..الخادمة ديال انسة بيان العلوي.. كتقول باللي جيتي فديك الليلة وعطيتيها الصاك ومن بعد مشيتي.. اشنو كتقول فهادشي
تميم: مشيت وعطيتها الصاك ..
دق المحامي ودخل قائلا
انا المحامي دمسيو تميم البيستي
عطاهم البطاقة وقال
ممكن نتكلمو على انفراد سعادة الضابط
تلفت تميم شاف فيه وقال
انا هنا باش نعطي اقوالي مامحتاجش لحتى واحد يهضر بلاصتي
المحامي: مشيو تميم.. الى سمحتي انا فالكافية
رفض تميم وتلفت عند الضابط اللي كان جاهز ينفارد بالمحامي قال
هاد السيدة خدات مني الصاك .. وفاش رجعت لطموبيلتي تعرضو ليا جوج شفارة بالموس وتشاديت معاهم ..واحد هرب واحد طاح .. ماحسابلياش ضربة وحدة غتقتلو
الضابط: الضربة جاتو فالراس ووقع ليه نزيف داخليه .. هوا لي ادى للوفاة
تميم: انا دافعت على راسي .. وعندي دليل كيتبت هادشي .. كنضن دابا كولشي واضح والاعتراف ديالي كافي
قرب منو المحامي وقال: من الاحسن خليني نتكلف .. نشدو الموضوع هنا بلا صدع بلا ضجيج.
تميم: لا .. هاد القضية ديالي .. وانا اللي خاصني نتحمل المسؤولية
وحل معاه المحامي اللي مالقا ليه جهد .. اما الضابظ كان كيتسنا غير يتافقو على كلمة وحدة .
فهاد الاثناء اللي كان تميم كيسدي بأقوالو كانت القضية انتشرت .. وخرجات ام الضحية فالعلن وقدام الكامرة كتبكي ومصورة قهاد الدار مقشرة وكتشكي وتحولات القضية لقضية رأي عام .
تنشر الفيديو وبقا من واحد لواحد وشي كيسيفطو لشي ودار ضجة بدا كولشي كيهضر كل واحد خارج يعبر يوحدو وكل واحد حاط العنوان اللي بغا .. انتشرت انتشار سريع ووصلات لجهاد اللي تصدم بالخبر ولسلمى اللي تصدمات فاش شافتو وصدمات معاها مالين الدار كاملين .
استدعاو بيان اللي كان كل همها تلقى سعيدة وماجايبا خبار وماعندها تيليفون اصلا تعرف من خلالو الاخبار مشاو لمركز الشرطة حتى هي مخنزرة كارهة تشوف البوليس ودخلوها جلسات دارت رجل على رجل غير هي والضابط و معاه محقق اخر فالمكتب
الضابط: عيطنا ليك على تسجيل الكامرة اللي خرجات بيه مدام بهية بن موسى كتبرأ بيه ولدها .. علاش نكرتي فاش زرناك فدارك وقلتي باللي مكتعرفي حتى حاجة والكامرات خاسرين .
ضحكات بسخرية وقالت: انا مكنعرف حتى تسجيل.. ماعرفتش علاش كتهضرو .. والخدامة ديالي اللي بلغاتكم غادي نرفع عليها دعوة قضائية حيت تبلات عليا
الضابط: الخادمة ديالك ماتبلاتش عليك ومادكراتكش اصلا امدموزيل بيان
دورات عينيها كتشوف يمين يسار وقالت
انا ماعندي حتى علاقة .. معارفة والو
بقات بيان مصرة على كلامها ونكرات كلشي وخرجات من تما بحال الشعرة من العجين .. لاكن ماشي بنكرانها .. انما القضية همدات من جهتها ومعاودوش استدعاوها للمركز مرة اخرى . خرجات من مركز الشرطة لقات الكامرات مصافين كيتسناوها صدموها ووقفات بابتسامة شافت فيهم وهما كيطرحو الاسئلة
- شنو علاقتك بقضية تميم البيستي امادموزيل بيان ؟
يمكن ليك تقولي لينا شنو علاقتك بتميم البيستي وعلاش لقاو الضحية مقتول قدام باب دارك
- اشنو رأيك فتصريح ام الضحية .. وشنو الرد ديالك على كلامها
واش صحيح داكشي اللي كيتقال. على التسجيل ؟ قالو باللي كاين تسجيل كامرة ممكن تقولي لينا شنو كاين فداك التسجيل
وقفاتهم بيان ماخلاتتهمش يكملو وقالت
انا قلت اللي عندي لرجال السلطة … ماعندي حتى علاقة بهادشي وتميم بريئ من كاع هاد التهم .. شي واحد ورا هادشي كامل انا متأكدة .. كاينة يد خفية كتحاول بشتى الطرق تغرق تميم لاكن مغاديش ينجح والبرائة ديال تميم غتبان
اللي خافت منو بهية طاحت فيه. القضية انتشرت واللي زاد صعبها على مدام بهية هوا اعترافات تميم كل مرة اللي كتجيب الجلطة لبهية وكطيح ليها اليد مع الرجل.. حتى اعوان السلطة اللي دارو يدهم مع بهية وبغاو يفكو القضية فصمت مالقاو جهد قدام اعترافات تميم واصراره على تحمل المسؤولية . من جهة اخرى تصاريح عائلة الضحية كل مرة مع جميع انواع واسماء الصحافة الللكترونية خلات الشعب يتعاطف بالرغم ان الضحية شفار والفمحضر مكتوبة الا انهم تعاطفو مع الحالة العائلية للضحية واللي زاد من تعاطفوهم هوا انتشار فيديوهات ولقطات يوم الجنازة والصحافة كلها مجموعة قدام بيت الضحية فإحدى الاحياء الشعبية .. تصويرهم للميت وهوا خارج يتدفن وامه كتبكي وطيح فالارض وخوتو كيغوتو وشي كيعنق شي والحومة عامرة من اولها لاخرها والبوليس فكل جهة وعاد الصحافيين المنشطيين اللي يخلقو الحماس والدراما ويزيدو من تضخم الحدث كيستجوبو اي واحد عندو قرابة مع الضحية ..
- ولدالحومة : اخويا كان عزيز علينا.. كيبقا ولد دربنا تربا معانا درويش بحالنا بحالو. ترزا فشبابو
اخت القتيل وهي حازمة راسها كتكبي وتغوت : حق خويا مغيضييعش.. حنا تابعين حقو حتى ناخدوه بالقااانون بلا رشوة بلا فلوس ومغنقبلوش على سكاتنا يتشرا بالفلوس واخا يعطيونا مال الدنيا… حنا بغينا اللي قتلو يتحاسب بحالو بحال اولاد الششششعب.. حنااااا (كضرب فصدرها) حنا درااااوش اااه ماعندنااااش وكنتاقتلو على طرف دالخبز..ولاكن مانبيعوش حق خوووناااا..منبيعووووش واخا بي الملاااير
ام القتيل شادة راسها: اااه وليدي مشيتي وخليتين .. اوليييدي خلا يتامى صغار ..ااا وليدي خليتي وليداتك ومشيتي .. الله ياااخد الحق.. الله ياااخد الحق حقنا عند الله…. وليدي كان عزييييز وغالي على ولادحومتو .. كان يتعاون معاهم .. يهز معاهم القفة .. يحامي على بنات حومتو وولاد حومتو ..
الصحافي: طبعا طبعا الله يرحمو ويواليه برحمة الله ولاكن حتى هوا تهجم بالسلاح شنو كتقولي فهادشي
الام : لااا وليدي مايديرهااااش..وليدي مرضي بي دارو ومراتو وربلادو.. وليدي مشا غا يحامي عليه .. مااشي هوا اللي هجم عليه مشا عا يحامي كي كيحامي على ولاد حومتو تا جات فيه الضربة قتلاتو .. انا وليدي رااضية عليه.. يخرج بالرضا ويدخل بالرضى ..
الزوجة وهي لابسة الابيض شادة ولادها قدامها حادرة راسها كتبكي وسط العيالات
تعداو عليه .. حكرونا حيت دراوش وبغاو يشريو سكاتنا.. حنا ماعندناش ولاكن لينا الله .. عندنا الله والحق والقانون في البلاد هوا غياااخد لينا حقنا .. مغنسكتوش ومغنشدوووش الفلوس.. من هنا كنقولها ليك اختي.. اديك اللي باغا تسكتنا بي الفلوس.. حنااااا نموتو ونحياو ومنسكتوش على حقنا … كنطاليو بالشعب يوقف معانا حتى ناخدو حقنا بالقانون.
اختو : كنطالبو بي ج ٠٠٠٠٠٠٠لك … ياخد لينا حقنا من الضااالمييين .. يشوف حال هاد المسكين وحقو اللي كيتكال بين ضراس هاد الناس اللي مكيخافوش الله .. خويا مضلوووم .. درويش . عاش درويش ومات درويش . ولاكن حناااا…حنا منسكتوش على حقو وحق ولادو فيه باغيين يخبيو الحقيقة .. كيخبيو كاع الادلة وكاع اللي مشاركين فهاد الجريمة خاصهم يبانو .. علاش مابانش مول التسجيل..علاش حيدوه من القضية خاص يبان داك التسجيل منين جاي وشكون مولاه .. وديك الخدامة عارفة شي حاجة ومابغاتش تقولها .. مابغاتش تهضر وطلعوها بريئة حتى هي
خوه اللي فمو كامل طايح وكله مضروب: اخويا الملف سادين عليه مابغاوش يحركوه وكيعطلو فينا .. قالك حقا شديناه ولاكن البحث واقف.. كنمشيو نهضرو على حقنا كيقولو لينا دايرين خدمتهم ! شي خدمة ماشناها
لاحت بيان تيليفون وهي فالفيلا اللي فالغابة والطبيعة مع جهاد والبقية وقالت شادة راسها
كيفاش بغيتي دابا الناس ميتيقوش .. كيفااااش بغيتي دابا الشعب مايتضامنش مع هاد الهمج
وقفات شادة جبهتها مشات خلات الفيدو مزال هدام وكلهم كيتفرجو مغددين وناض اديب وقال
تميم معكس..معكس اصاحبي بزاااف على العكس كن غير بقا ساكت
جهاد: غنتبعو كلام مو ياك قالت ليك خليه يمشي للحبس .. صافي خليه يدخل شي يوماين باش بنادم يسد فمو شوية وهي عارفة كي غطلعو من تما والقضية تبقا مفتوحة .. خليهم يغوتو تا لعام جاي مللي مابغاوش يشدو الفلوس
اديب: شحال عطاوهم ؟
جهاد: فالارل عطاوهم مية مابغاوش.. زادوهم مية اخرى مابغاوش.. باه جا عطا عليه الفلوس وقفو البحث فمرة ..ليوم غيمشي للحبس
بيان: اوييييلي!!
جهاد: مغيبقاش تما غيدخل ويخرج غا ينادم يسكت مينوضش علينا الصداع ويبدا علينا بالهاشطاق والنم تفووو
ناضت ومابغاتش طفا.. التأثير السوشل ميديا على السلطات قوي واخا كلشي خدام على ضمس القضية بشتى الطرق .
بين قضبان الزنزانات والعلم الغريب على تميم وبأمر من مدير السجن تم ادخال فراش جديد وتنضيف الغرفة المشتركة للسجناء وترتيب سرير بافرشة جديدة خلات السجناء يتساؤلو على هاد التغيير اللي ماسبقش ليهم وشافوه بتاتا واطلاقا. كانو مجموعين تما غير وجوه الشر .. اوسخ منهم مكاين والزواق على الخنونة .. لوشامات والسناسل وتونيات ديال الدراري وفراشهم مرون واخا جمعو ليهم الزنزانة ورتبوها عاودو رونوها وواحد كيقول للاخر شي بزناس كبير فالبلاد اللي جاي.
تحل الباب وكل كيتسنا يشوف شكون اللي غيدخل عليهم ..
مع الحلة دالباب دخل تميم وكل واحد من الحباسا مركن فبلاصتو كيفتخ جوان ولا كيدير شي حاجة طلعوه من سيرديلتو الكوتشي اللي كلشي حسابو شاريها من القيسارية ..سورفيت كوتشي ناضية لفتات انتباههم و كورميط فيدو كلشي حسابها نقرة منتبة وساعة يدوية عمرهم شافو بحالها ويديه انضف من الشرف وادافره صفا من الماء وعاد طلعو لوجهه اللي مافيه حتى ضربة وفمو صغير صافي من الزروقية وسنانو بيضين كيبريو وشهرو نقي كيلمع ريحتو عطات فديك الزنزانة .. طويل ومجبد الرقفة تابتة وجسدو مخفي فالسورفيت الواسعة عليه مختالف عليهم تماما وكليا وبيان عليه خاطيه البلية والوسخ وكاير فبيئة نقية . لقا نضرة عليهم وهوا واقف ومعاه المدير شخصيا جنبو .. عبس وحرك نيفو من الرائحة الكريهة اللي شم تما مخلطة بالتقاشر مع الكارو مع الحشيش مع الحزاق مع ريحة الحوايج ديال الحباسا وشتى انواع اخرى من الروائع ناهيك على العطور المقرفة اللي راشين كتخنق وكتشم سخونة عن بعد. فتح عينيه وحرك وجهه للجنب ماقدرش على ديك الريحة . المدير: الحس منسمعوش هنا.. اللي سخن عليه راسو ونوا غيدوز يكمد عضامو فالانفرادي.
شاف فيهم بنص ورجع مشا وتسدو الابواب وهنا بدا شي كيهمس لشي والحباسا اللي مولفين الحبس والجرائم حتى تهديد مكيمشي عليهم
تكلم واحد فيهم وجهو كامل مخطط من الحناك والودنين كيخلع. قاليه
ناااضية عندك ديك السبرديلة .. عطيني نقيسها
شاف فيه تميم بنص عرفهم غيبداو يجبدوه ويحرشو بيه وكما وصاه المدير وعطاه صورة مسبقة على المكان واللي فيه مشا دار راسو ماسمعش.. كان سريرو عالي منو للسقف والوحيد اللي مكيميش.. طلع لفوق تكا مشافش فيهم وطلع السنسلة على نيفو وسد عينيه ساكت حتى شم ريحة الكارو طالعة وطل لقا اللي تحتو شاعل كارو وقاليه
سير كمي لهيه
هز لاخر راسو شاف فيه والدهشة على وجهه من هاد الجرأة وشاف فصحابو اللي كلشي بدا كيشوف فشي بضحكة مستفزة وناض اخطر واحد فيهم مشا حداه شعل كارو وشد ليه فالكورميط وقال
زواااينة عندك اعشيري هاد لعيبة انشوووف
ساط عليه الكارو على وجهه وناض تميم فالبلاصة شد داك الكارو طفاه ليه فجبهتو ودفعو دفعة وحدة مشا طاح قدام صحابو وناض نزل عرفهم غيمرضوه وشعل شعلة وحدة صدمهم وشد هاداك اللي طفا ليه الكارو طواه قدامهم كاملين عوج ليه ضهرو وهوا كيغوت ويميل حدا رجليه وقال كيخزر فيهم
غيعاود شي واحد يشعل شي كارو هنا غنطفيه ليه فعينو .. سمعتو… وراه مكنضحكش.. اللي زنزن عليه راسو يشعل كارو ويكميه هنا وغيشوف اش غيوقع ليه .. والواعر فيكم غيرجع كلب فهاد البيت ..
لاح ليهم الحباس اللي فيدو وكلهم شافو فيه بجدية لاكن واحد فيهم تلاح عليهم بموس وشد ليه ديك اليد كرضها قدامهم تا تسمعات وقاليه بغضب
قلت ليك مكنضحكش..
هز الموس وشاف فيهم وقال: هادا مكيخلعنيش… واللي قاليه راسو يعاود يجبدو غيندم . والللللللللي قال مع راسو نغدرو غيشوف الغدر دبصح اللي غيجيه من برا .. ماشي من هنا
طلع لبلاصتو رجع سد عينيه والحباسا كيدقو فالباب باش يعتقو اللي مهرس ..دخلو خرجوه وسدو الباب عليهم وكل واحد كحز لبلاصتو وهبط راسو كيشوف فيه بنص عين ..وحتى اللي كان شاعل كارو طفاه وجمع البكية فالجيب.
جلسو الاصدقاء بالليل فالفيلا كل واحد كيفكر ويحلل ويناقش جهاد اديب جيداء براد وبيان .
بيان: شكون دابا غيكدب الهضرة ديال هادو؟؟ الناس كتيق بداكشي اللي كتشوف عينيهم ولحد الساعة غير هما اللي خارجين كيهضرو.. الرأي العام كيأثر هلى السلطات بزاف
جهاد: اللي كان فنا منو طحنا فيه.. الهاشتاق فين مشيتي الفايس الانستا حتى بنادم داخل فاليوتوب دايرها كونسيبت وكل واحد كيقولك عندي مصادري الخاصة.. منين كيجيبو بحال هاذ الاخبار مافهتش
جيداء: علاش مدام بهية ماديرش ندوة صحفية تشرح فيها للناس وماتبقاش مخبية .. ماحداها كتصد الصحافة وهي كتزيد تأكد للناس صحة كلام عائلة داك المجرم
اديب: لالالا ميمكنش.. مغتخرجش ومغتشرحش مغتنزلش لهاد المستوى باش تبرر للناس ولصحافة الصرف الصحي برائة ولدها
جمعات بيان النفس وقالت كتحرك راسها بالايجاب.. انا اللي غنخرج نهضر نعطي ليهادم على ودنيه.. ولكاع اللي طالع كيهضر ودايرنا كونسيبط
جبدات تيليفون جديد من صاكها لاكن وقفها جهاد من يدها وقال
شنو غتقولي؟؟؟ انا كنعرفك فاش كتحمسي كتبدا غير كتزطمي
اديب: الى كانت هي معروفة كما قالت خليها تهضر وتسمع صوتها على الاقل هي طرف من هاد الضجة
بيان: انا عندي مليون ونص فحسابي وفاش غنطلع غيرجعو جوج دالمليون .. بنادم كيقلب غير على الشوهة والفضيحة وتميم ضرب البوز اللي ماضربو حتى واحد.. تخيلي معايا واحد فبرنامج خاص لا علاقة ليه بينا وكيهضر كأنه كيعرف تميم وكان مصاحب معاه!! كلشي كيتلسق كولشي باغي يبان
جيداء: عاادي هادشي كاع خاد المكلخين اللي دون المستوى كيبغيو يتلسقو باش يبينو للناس على انهم من الطبقة البرجوازية ومن محيط الاغنياء بففف
جمعات بيان النفس وقالت: غنفتح لايف…وجدو راسكم
جهاد: بلاتي بعدا حتى نعرفو شنو غتقولي؟؟ مادخليش فالناس طول وعرض وتقلبي كولشي ضدك ماتنسايش هادو ضدنا وضد اي واحد ناجح ومع اي واحد فاشل وفقير..
بيان: ماشي كلهم .. اللي واعي اصلا متلقاهاش كيعلق هادو كاملين اللي دايرين هاد الحملة دالهاشتاق غير المكلخين ..واش فنضرك كاين شي واحد واعي كينوض يبدا يكومونطي بلا ميسمع من الطرف الثاني !! سامع ومفاهمش
اديب: عندها الحق المهم حنا دابا ماخاصناش نستهدفو الفئة الغنية اللي متبعة الاخبار .. اصلا هادو عارفين شنو كاين وحتى هما بحالنا كيخافو على صمعتهم. وبعاد على السوشل.. دابا خاصنا نستهدفو الفئة الغبية اللي مصدعة لينا راسنا بالهاشتاق والمؤثرين اللي طالعين راكبين على الموجة وحتى الصحفة ..سمعي بيان… حاولي ديري البوز ..حاولي تجري ليك الصحافة وحتى هاد الطبقة هادي. حاولي قدر الامكان
جهاد: بصح شوفي كي ديري تخليهم يتعاطفو معاك
ردات شعرها للور كتستاعد وحيدات الجاكيط وقالت
اللي مابغاش يبان يمشي قدامي ميجلس حدايا.. انا غنوريكم كيفاش غنفركع هاد اللايف حتى يوصل للعالم العربي. مستاعدين
جهاد: انا ماخصنيش نبان بلا مندخل فالصداع مع الواليد وهوا كل شوية يوصيني
اديب: حتى انا ماخصنيش نبان ولاكن مرة مرة شوفي فينا بلا متعيقي .. نشدو معاك التوازن باش متغلطيش
بيان: قطعو الحس متقرقبوش الكيسان.. ماضحكوش راه المباشر هادا غتفرشوني ..اللي حس براسو بغا يضحك ينوض بلا منحس انا ونتلف.. خاصني نعيش الدور
حكات عينيها مزيان حتى حمارو وقالت
واحد جوج ثلاتة ..اكسيون
يتبع...
Khti ghazal 9isask zwinin mathbssich bghina dima thtilna ljadid 9isask kanstmt3o bihom wkant3lmo mnhom
Afdal ghazal❤️❤️