قصة إغفر يا تميم

وتذكر  انك تملك بداخلك كنز   وهو المحبة والطيبة 

على المحبة والاخلاص نلتقي في كل قصة 

حروف صغيرة تكتب .. لكنها تدخل القلب 

بمودة واخوة  تكتب ..لنتيادل السلام والتحية  🖖  

   اغفر يا تميم     

✍️G.T

القاضي: مكايناش شي محاولة صلح بيناتكم ؟

الزوجة : لا سيدي مكاينش

الزوج : لا سيدي

تم الطلاق. ورجعات المطلقة لدار وليديها وتجمعات العائلة كلها فبيتهم الشعبي المتواضع وكل واحد يلغي بلغاه فوق طبلة العشا

الام: كن ستنيتي بعدا حتى تولدي وتسمي الولد وتسبع ليه عاد طلقو .. ماطلقوش بلا ريال لا وجوج

الصمت…

الام : واا الهاام .. اابنتي ..معاك كنهضر.

تنهدات الهام ومسحات يديها بنرفزة وقالت

ماباقيش تجبدلي دابا حسو صافي سالينا .. غنولدو نديه لو يهزو ولا يضبر معاه انا غنمشي نشوف حياتي واش غنبقا مربطة وانا فعمري خمسة وعشرين عام

ضار عندها خوها مصدوم وقال: صاافي !! غتسمحي فالولد!! عاين باين كتقوليها لينا فالوجه .. طلقتي باش تخرجي طريق

شافت فيه بصرامة وقالت : هادي حياتي وهادا شغلي.. عندك حياتك وعندك مراتك ديها فشغلك وخليني نشوف شغلي.. حتى واحد ماعندو الحق يدخل ليا فحياتي

لاحت سربيتة من يدها وناضت خلاتهم شي كيشوف فشي .. بغا خوها الكبير ينوض عندها لاكن مو شداتو من يدو وقالت

صافي خليها .. الليل هادا ماعندنا مايسمعو فينا الجيران فهاد الليل.. دابا كولشي يتقاد مع الوقت صافي.. طاحت الفاس فالراس ماعندنا مانديرو

ناض وقف ونفض يدو وقال للجميع

انا من ليوووم ..مابقات عندي خت سميتها الهام ..مابقات عندي شي وحدة فحياتي تعنيني.. وهانا فين كنقولها ليكم فوق هاد الطبلة.. ديك المخلوقة مابقات ختي ومايجي حتى واحد يهضر لي عليها ولا يدكرها لي .. انا تبريت منها ومانتبعها ماتبعني

هز راسو وخرج من المجمع مشا لباب الدار خرج وزدح الباب خلاهم يابسين شي كيشوف قدامو شي واحلة ليه اللقمة فمو وشي ناض مشا ينعس دار بناقص.

بقات الام والاب على ديك الطبلة جالسين كيشوفو فصمت فالاخير ناض الاب تنهد وقال

ماعندنا مانديرو .. صافي وقعات الفاس فالراس اش بيدينا منعملو … تولد ويحن الله فداكشي اللي غتولد صافي جمعو علينا هاد الروينة كل واحد يشوف شغلو

الهام شافت طريق جديدة ..واخا الطريق الحقيقية اللي فكرشها نساتها .. لاكن الايام دوارة .

كرشها لفمها وهي فالسطح كتنشر الحوايج والشمس ضاربة فعينيها . جاها اتصال وجبدات تيليفونها الصغير بازرار صغيرة ردت بابتسامة

الو لحبيب ديالي.. الحمد لله … ههه منقدرش نتلاقاك دابا راك عارف كرشي لفمي قريبة نولد غيشوفوني الناس معاك يحلو عليا فامهم ..باركة عليا غير الهضرة اللي مابغاتش تسالي فمرة نزيد عليا هضرة اخرى …صافي هاحنا كنهضرو فتيليفون حتى يحن الله و….

قطعات هضرتها وهي كتشوف الماء نازل مع رجليها.. تصدمات وبدات ترعد وقالت

قطع قطع صافي .. غنولد غنولد …

قطعات بالزربة ونزلات شادة فالدروج كتعيط

حبيبة …اااحبيبااا ..واميي..مييي

جات مها مع الباب كتمسح يديها فالفواطة وتشوف اش. واقع قائلة

مالك ياك لاباس مالك كتعيط ؟؟

الهام برجفة: غنولد…كنولد عتقييني غنولد

شدات فيها مها وقالت: بشوي بشوية فيك الوجع؟؟

الهام: لا ولاكن الماء هواد

الام: ايوا بااقي غير بشوية عليك.. سيري جلسي غنعيط لباك يجي يدينا يالاه

الهام: غنمشيو نبدل عليا ونوجد حوايجي دغيا

بسرعة هزوها فطاكسي..باها لقدام ومها اللور معاها داوها سبيطار شعبي ودخلوها وجلسو برا كيتسناو..لحقات عليها ختها مباشرة من لكلية لعندها وتسناوها حتى ولدات وخرج الطبيب عندهم بشرهم وقال

مبروك الاللة ..مبروك اسيدي تزاد عندكم العزري

تنهدات الام وشدات فمها وقالت: ايوا الحمدلله …الحمد لله يا ربي

الاب: غنخرج نعيط لباه نعلمو

شداتو الام وقالت: عنداك تغاوت نتا وياه ..بشوية صافي ؟

الاب: منغوت عليه مايغوت عليا غنعلم ليه ويعاود راسو

خرج الاب من سبيطار كيقلب على تيليبوتيك .. دخل لواحد فيهم سرف فلوسو وتاصل بالاب قائلا

عليكم السلاام:. المرى ديالك راها ولدت ولد.. عيطت ليك نعلم ليك …اسيدي شغلك هاداك هانا علمت ليك .. بيناتنا المحاكم .

قطع عليه ورجع بحالو لقا مرتو وبنتو دخلو عند الهام يشوفوها ووقف حدا تربية اللي حداها كيشوف فيه وفملامحه البريئة وقال

دابا شنو غنديرو فهاد الترابي؟؟ باه قالك ماشي ولدي طليوه !!

الام: ماشي وقتو دابا هاد الهضرة.. ديك الساعة الا مابغاش ندعيوه

شافت فيهم الهام بغضب وقالت: هوا قالك ماشي ولدو !؟؟؟ ايوا دااابا نشوفو واش ولدو ولا ماشي ولدو.

حبيبة: هاداك راه خاصو اللي يمشي يهرس ليه ضلوعو .. دابا تحل ليه الفم

الهام: وغاا بلاتي ..غا بلاتي غا نرد صحتي وهانا وراه .. يا انا ياهوا

الاب: نتي درتيها رااسك .. نتي سبب فهادشي اللي نتي فيه

دورات الهام وجهها للحيط ومها مربعة يديها كتشوف فيه وتقول: صاافي … صاافي دابا حتى هوا مساهلش..حتى هوا ماخلا فيها غير اللي نسا ..

نتر الاب يديه بنرفزة وخرج كيردد

ايوا دابا نشوفو فين غتوصلو معاه .. ها ترابي جا .. يالاه جريو طوالكم

ضيف جديد جا وجيتو غير مرحب بيها .. استعمر دارهم بكل ما فيها ..بصوتها وريحتها ..وحتى اجوائها، الشيء اللي خلا اب الاسرة ينفر من الدار ومابقاش كاع باغي يدخل ليها غير باش ميسمعش صوتو او يشم ريحتو.. اما خوت اكرام الرجال حتى واحد مابان عندها او بارك ليها .. وحتى العائلة حتى واحد مايعط او تجرأ يبارك ..لحاصول قصة الهام دار بووم في فاس.

الولد كمل ربعين يوم ومزال مادبحو ليه ما سماو ليه..كلهم مشطونين مع المشاكل..وطالعين نازلين فالمحاكم .

دخلات الهام بالجلابة والطالون والشعر مطلوق منفوخ عند المحامية سلمات وجلسات قدامها

المحامية: طليقك الاللة رافض بشكل قاطع يعطيك النفقة او يعتارف بالولد .. وكيقول انه ماشي ولدو .

ردت الهام بغيض وقالت: كيعرف غير يولد وينسا.. داك الكركور ديال الفلوس اللي عندو مقادر يعطي منو حتى جوج دالريال .

المحامية: من الاول قلت ليك تبعي كلامي.. خليك معايا فالسياق..نتي الغضب ديالك دغيا خلاك تغوتي وتنفاعلي..هاهوا شاد عليك دليل صحيح وداير عليك الشهود …كاع الجيران اللي فدارك القديمة شاهدين على شنو قلتي ليه .. ودابا كيهدد قالك غادي نرفع عليك دعوة الخيانة الزوجية وبالشهود وغيدخلك فقضية اخرى ماليها لا تالي ولا اول

الهام: غير كيهضر .. ماعندو والو باغي غيير يخلعني.

المحامية: دابا نتي نهار مشيتي عندو شنو قلتي ليه بالضبط؟

الهام: ماقلت ليه واالو .. قالي خنتيني فعلتيلي قلت ليه غزييت فيك حتى نتا خنتيني وكنتي كتجيب البنات وتنزلهم قدام باب الدار قدام عيني باش تفقصني

ضحكات المحامية بسخرية وقالت ليها: صاافي هادشي وماقلتيليه والو!! هادا راه اعتراف منك ا الهام مكانش عليك تخلي الغضب يسيطر عليك .

الهام: عصبني.. انا خنتو مع واحد اما هوا واه خاني مع عشرين.. ها السمرة. ها الصفرة ها الحمرة .. وكان كيهبطهم قدام باب الدار بلعاااني.. وزايدون انا متبغيتوش ماعندي مندير بيه طلع لي فراسي.. انا غنتزوج واحد اخر هوا يعطيني حقي وحق ولدي والله يعطيه شي مصيبة

المحامية: المهم اللي نوصيك .. قدام القاضي حاولي تحكمي فراسك .. الغضب ماعندو باش ينفعك ..عنداك تنفاعلي وتقولي شي كلمة تخرج ضدك

ناضت الهام هزات صاكها وقالت ليها :المهم انا كنت ناوية نجي عندك وعوالة نمشي عندو حتى هوا

المحامية: للمرة لمليون كنقوليك تحكمي فراسك ..وبلاش متمشي عندو حسن ليك

الهام: لا ضاروري نمشي نعرق لبك شوية.. والله منمشي للدار هاكا مضغوطة غنمشي نوريه شغلو ولاكن مانقوليه والو لاش مايلويش ليا يدي… براكة غير ديك المرة حرش عليا لكوميسير كان غيسرفقني.. فاش كيبغي يشكي بيا كيمشي يشكي بيا لصاحبو فلكوميسارية …داير عليا محمية كاع البوليس حرشهم عليا وشراهم بالفلوس

المهم هانا مشيت نشوف عند من غنوصل انا وياه هاد النهار

نزلات الهام من طاكسي قدام باب فيلا فحي راقي ووقفات يدها على جنبها كتصوني وتعاود بالجهد حتى فرعات الصونيت ..ماسكتاتها غير مرسيديس مية وتسعين كحلة وقفات وراها وشدات الفران ونزل منها راجل بسروال توب وقميجة وسيم الملامح طويل القامة مخرج عينيه قصدها نيشان وقال

اش كديري هنااا ..اش جابك اوجه الويل حيدي عليا من هنا زيدي

جرها من دراعها وهي كتعكل فالطالون وتردد :طلق مني..طلق اول لحرام طلق مني

بقاو عطيني نعطيك قدام الباب حتى نترها وقال بغضب

اش جايا كدير ي هنا .. ياك طلقتك ..عطيتك براتك ؟ اش بغيتي عندي

خرجات دوك العينين عندها طرطقاتهم فيه حتى رجع اللور وقالت ليه

عمداااك يحسابك انا حيط قصيير تنقز عليه …راه واللله حتى نشطحك سمعتي… راه الهااام واجرك على الله كتشمع اولد عيشة ولا مكتسمعش

هز يديه وقاليها: كتر من هاد الشطيح اللي شطحتو معاك ..الله يجعل البركة ..انا شبعت وعييت بغيت نجلس… انا بغيت غير نعرف اش عجبني فيك نهاو الاول… جنية وكتسيفي كي بغيتي ودخلتيني بحلاوة اللسان .. ياك خديتي اللي بغيتي.. كشطتيني وشريتي دار على ضهري..اشنو بغيتي عندي مزال ؟؟

دارت يدها على جنبها وقالت: اسيدي عتاارف ليا بولدي.. عطيني حقي وحق ولدي وللجايحة اللي ضربك

ضحك وقال: ااشمن حق؟؟ خدييتي حقك وبالزايد من لفوق!! وانا لو كان ماتاقيتش فيك الله وشفعات ليك مي حتى هي لوكان راني محنتك فالمحاكم .. ونوريك الحق كيف داير.. ودابا وحدة من جوج .. يا إما تمشي تعطيني تيساع ..يا إما غادي نعرف شغلي معاك ..وداك الولد سيري قلبي ليه على باه من غيري..انا راه ماعندي باااش نفعك كتسمعي

دفعها ودخل خلاها كطير وتنزل وزدح الباب ومشا .. بقات كترعد وتقرب قدام الباب وتتحلف وكتحل الصاك وتردد بغضب

واخا .. واخا هانتا غتشوف بعينيك .. الا ما حمقتك مانتسماش انا الهام .

جبدات واحد البزطام بعصبية كترعد حلاتو ومشات كدور بجناب الطموبيل من لتحت وتحنا ودور حتى سالات وناضت نفضات حوايجها كتشرف فجنابها ياكما شافها شي واحد ومشات بحالها..

كان فديك الاثناء. العساس ديال الحي حاضيها من بعيد وكيشوف شنو كدير وخلاها حتى غبرات ومشات كيجري ويصوني على طليقها فالفيلا حتى فتح ليه وخرج عندو يسوط قاليه

ها دا نتا السي عباس.. يحساب لي غير ديك المسخوطة عاوتاني كتصوني

العساس: راني شفتها كدور بجناب طنوبيل مانعرف اش بغات دير وجيت علمتك

استغرب الراجل ومشا بسرعة كيقلب ويدور لقاها لحجابات والحروزة ملسقين فجناب سيارتو وجبدهم كيشوف فيهم وقال

وشوف دابا هادي اش غندير معاها .. اش بغات عندي

العساس: بيييع ورحل …رحل السي كمال …لعيالات الى حطوك فالراس يديوك يا للحبس يا للقبر ..انا نقولك

بييع عليك وخوي حسن ما تبقا بلا صحة بلا عقل

رجعات الهام للدار ودخلات مدرمة بحال تران عند مها للكوزينة ونفضات يديها

الام : عاوتاني مشيتي عندو !

الهام: مشيت لسقت ليه داكشي .. ماقدرتش ندخل للدار خلاني فالباب لسقتهم ليه فالطموبير وجيت

ربعات مها يديها وقالت : دابا حنا مشينا حتااا لاكادير على دوك الحجابات فاللخر مشيتي لسقتيهم ليه فطموبيل

الهام: وفين بغيتيني نلسقهم ليه فين؟؟ مالقيت فين نلسقهم . المهم انا غنمشي نجمع حوايجي دابا غنمشي نجلس فداري بوحدي ..حسن ليا مانبقا هنا اللي جا يرمي ليا كلمة

الام: دابا الدري شنو غديري ليه ؟؟ حتا لين غنبقا حنا هاكا؟

الهام: خليه معاك انا منقدرش نربيه

الام: نخليه معايت؟؟ ايورا مزيان تبارك ونتي تمشي دوري؟؟.. لالا دي ولدك انا ماعندي عقل نربي ليك ولا باك حتى هوا .. هوا ماباغيش يدخل كاع للدار بسبابو ونتي كتقولي لي نخليه معاك داكشي اللي بقا

الهام: ودابا شنوو غندير يالاه!! سعيد قالي يانا يا ولدك .. الى بغيتي نتزوجو عطيه لباه ولا مك

الام: ايوا انا معندي مندير ليك ..ضبري راسك نتي درتي هادشي راسك من الاول متحمليش وهنينا

خرجات من لكوزينة مهمومة مشات للبيت خلطات ليه الرضاعة ودخلات عندو هزاتو كترضع فيه وتشوف فيه كيرضع وساد عينيه ..الشعر كحل والجه ابيض كأنه ملاك وناسع.. بقات ساهية كتخمم حتى دخلات عليها صاحبتها كضحك وقالت

امالكي ساهية..هههه حلات ليا مك الباب قالت ليا راها فالبيت

سلمات عليها من الوجه وجلسات حداها بابتسامة قالت ليها :اريه نهزو شوية

شداتو عندها كتكرعو والهام حداها شادة راسها كتشكي

ماعرفت ماندير …. سعيد قالي ولدك يبقا مع باه ..انا كنعرفك غير نتي..ومي قالت ليا مانشدوش ماعندي ماندير بيه وبا مكيدخلش للدار اصلا على قبلو.دخت اختي سهام والله

تنهدات سهام وشافت فيه مطولا وقالت: ياختي شكون يقدر يسخا بكبدتو ..انا كن جيتي عليا سمحي فالزمر كاع وسيري لدارك نتي وولدك وربيه حسن ليك من شي سعيد ولا سعدية

شافت فيها الهام مخرجة عينيها وقالت :اييه ونفني عمري وشبابي كامل فالترابي..انا اختي كنبغي سعيد هوا نساني فكلشي منقدرش نتفارق معاه .. غنشوف كي ندير وصافي

ضحكات صاحبتها وقالت ليها : ايوا عطيه ليا نربيه ..انا عزاز عليا الدراري الصغار

الهام: بقيتي ليا غير نتي دابا والطنز ديالك ..خليني عليك اختي الله يعطيك الستر نشوف شي كل لحريرتي..سعيد عطاني مهلة نرد عليه فأقرب وقت قالي عييت منصبر ..خفت غير ينفر مني

اخر جلسة من بعد الطلاق خرجات منها الهام فاشلة وكتغدد ووراها طليقها كمال كيضحك هوا والمحامي ديالو حتى خرجو لبرا قدام الشارع وضار عندها قاليها

هانتي خسرتي بحال ديما ..واسيري دبا عند صاحبك قوليه ينفعك

ضارت عندو قالت ليه :مزال غنستأنف .. ونزيدك ماتنساش الدعوة التانية ديال النسب والابوة ..

قرب عندها باستفزاز وقال: جري طوالك… ارا مترفعي فالدعوات والقضايا .. وارا ماتستأنفي وطلعي وتهبطي..راك مغتصوري مني والو ..حتى الحبس قادر ندوزو ..وداك الولد ديه لباك ومك يربيوه الى مابغاش صاحبك يعتارفلك بيه

مشا وخلاها واقفة كتفقص بوحدها مالقات ليه جهد قانوني.. من باب المحكمة نيشان عند الشوافة ..شكات ليها وبكات عليها وخدمات ليه من كل نوع سحر وخرجات رجعات بحالها .بقات هاكاك بين المحاكم والمحاميين وطلع وهبط حتى قربات تشدو فضية تبوت النسب لاكن صدمها بالرد والرد كان صادم .. وهاد المرة هوا اللي رفع عليها قضية الخيانة الزوجية وبأدلة قاطعة الشيء اللي خلاها تراجع على هجومها وسحبات الدعوة ديالها وحتى هوا سحب الدعوة وخرجو من دوامة المحاكم وتراجع كل واحد

فيهم من بعد ما وصلو لاعلى قمة فالحرب اللي بيناتهم .

جلسات الهام هي وسهام فمقهى حتشوف قدامها وقالت

شنو غندير دابا؟

الدري بقا بلا سمية ..با مابغاش يشوفو

سهام: راني قلت ليك هزيه وسيري ربيه فدارك ..كن غير مكان عندك فين تمشي بعدا نقولو مسكينة… نتي بدارك وبرزقك ولاسقة ليا فداك سعيد دالويل.. كن بغاك بصح كن قبل عليك بولدك

كان صعيب على الالهام تاخد قرار حاسم وكانت كتشوف فولدها كأنه لعنة ونزل عليها رون ليها حياتها ومشات عكس التيار اللي كانت باغا هي وراسمة .. وكما كانت كتشوفو نقمة فناس كتار كيشوفو الدرية نعمة .. وكتمناو ولو غير يشمو ريحتها .. دارو مجهود ودارو الممستحيل وتحداو الصعاب وفكل مرة كيفشلو كينوضو يحاولو من جديد

الحوار بالاطالية

ماعليش ماشي مشكل ..نحاولو مرة اخرى

ردت فسهوة كتشوف فالحائط: ماسمعتيش الطبيب اشنو قال… صافي انا عمري نكون ام .. عمرني مغنهزو فكرشي

شدها من كتافها ودورها عندو وقال : هادا مكيعنيش انكي عمرك تكوني ام … كل واحد والقسمة ديالو فالحياة .. وانا عمرني نتخلا عليك

مشحات الدمعة على عينها وقالت: كان عندي امل شي نهار نكون ام ..شي نهار نسمع ديك الكلمة .. ولاكن داك الامل الوحيد اللي كتن عندي تبخر .. ومشا فمهب الريح . وانا صافي فقدت الامل ..غنعيش عمري كله وحيدة

تبسم وقال : نتي ماشي وحيدة .. انا معاك وعمري نتخلا عليك.. انا ونتي متفرقنا غير الموت

عنقها بقوة ودرف دمعة من عيونو الزرقاء ورجع شد ليها فوجها وفشعرها الاسود اللامع وقال: ماتخليش الحزن يتغلب عليك.. غنمشي نسافرو انا ونتي نبدلو الجو .. ونساو جميع المشاكل اللي عشنا ونبداو صفحة جديدة. على قبلك لغيت جميع المواعيد ديالي والانشطة ديالي وخديت اجازة باش نجددو فيها شهر العسل ديالنا ..اشنو قلتي

تنهدات وبقات ساكتة ثم حركات راسها بالايجاب وابتسامة حزينة ولبت الدعوة .

كانت امرأة طويلة رشيقة وجميلة وانيقة ..كجميلات ايطاليا لاكن بحروف وملامح عربية .. لابسة تنورة كلاسيكية قصيرة مع مونطو وحداء بكعب عالي اسود وضارات سوداء وقفازات سوداء و قدامها زوجها المحب جان بكل وسامته وشعره الاشقر بلباس كلاسيكي وقفازات بنية وهم خارجين من بيت فخم وكأنه لوحة فنية مزدوجة بين الحداثة والطبيعة وجدرانها من رجاج اسود وتصميها عبارة عن شكل هندسي فخم

فتح ليهم السائق باب السيارخ الفاخرة السوداء وركبو نب بعض مباشرة نحو طائرتهم الخاصة اللي كانت في انتضارهم للاقلاع

نزل الزوج هوا الاول وشد ليها فيدها حتى نزلات من بعد ركبو فالطائرة ..حيدات المونطو عليها وجلسات حداها جنبو حاطة رجل على رجل بكل انوثة وقالت

من بعد سفرنا لهونغ كونغ ماكرهتش نمشي للمغرب شي ايام .. توحشت بلادي وعائلتي وبغيت نشوف ماما

عنقها بيدو وقال : طلباتك اوامر اميرتي

تكات على كتفو بابتسامة وتنهدات سادة عينيها بارتياح

فهاد الاثناء كانت الهام كتبكي فبيتها قدام ولدها اللي كيبكي وماقدرة دير ليه والو .. شادة الرضاعة فيدها وتيليفون فاليد الاخرى وكتهضر مع سعيد بغضب

شنو بغيتيني ندير ..انا واحلة بوحدي ..باه مابغاش يشدو ومي مابغاتش تشدو فين غنديه انا فيين ؟؟ رحمني ولو غير شوية .. حتى انا عييت عييت وتخربقت ماعرفت شنو ندير ..بزاف عليا هادشي اسعيد نتا بلاصت ما تكون فجنبي زايدني بالضغوطوات ..علامن كندير انا هادشي هادا علاامن ؟.. كلو عليك

الصونيت فالباب وهي مزال كتهضر ..ناضت وتيليفون فودنها فتحات الباب وكانت سهام اللي كتصوني..دخلات سمعات صوت الصغير كيبكي ومشات فاتجاه الصوت مباشرة لقاتو مسرح على الناموسية وجهه حمر وحلقو تقطع بالبكى والدموع نازلين ..هزاتو بالزربة كتسكتو والهام مزالة كتهضر وغادية فاتجاه الكوزينة

اما سهام عيات تسكت فالولد مسكين مابغاش يسكت ليها وصوتو كيزيد يعلى حتى كيتقطع فيه النفس.. فجأة غاب على وعيي بين يدين سهام الشيء اللي خلاها تخلع ومشات كتجري بيه عند الهام وتغوت

عتقي عتقي اويلي الدري تقطع حسوو.. عتقي مالو عتقييي

قطعات الهام تيليفون بسرعة وشافت فيه مخلوعة كتحرك فيه وتقول

مالو عاد كتن كيبكي ماالو !! ااويييلي مالو

سهام: جري دغيا نديوه سبيطار طيييري

هزوه للمستعجلات فطاكسي كيجريو وعطاوه لاطباء فالمستشفى وجلسو وحدة حدة وحدة كيتسناو .. هنا ناضت سهام نفاجرات لاول مرة على الهام بغضب وقالت ليها

واخا تكوني لاقياااه فالزنقة …واخا تكوني جبتيه من زبالة ما ديريش ليه هاد الاهمال وتخليه هااكاك كيبكي ونتي كتهضري فتيليفون …شكون غيكون هاد سعيد هادا شكوون .. حسن من ولدك!!! تفكري فاش كنتي كتقطعي..فاش كنتي كتوجعي.. فاش كنتي حاملة بيه ..تفكري..واش هاد الدري ماقدر يحرك فيك حتى حاجة ؟؟ واش ماكيبقاش فيك

شدات الهام راسها سادة عينيها وقال : نتي محاساش بيااا.. محاساش بيا انا اللي بين ليلة ونهار تقلبات حياتي.. راه بقا فيااا وقلبي كيتقطع عليه ..ولاكن مسؤوليتو ماقديتش عليها .. انا منقدرش نهملو وهوا بين يدي وفنفس الوقت مابغيتش نتحمل هاد المسؤولية .. حتى انا بشر ..حتى انا بنادم

سهام: من الاول متحمليش بيه .. من الاول اختي فاش لقيتي راسك حاملة سيري نزليه ماتجيبيهش لهاد الدنيا ..ولا نتي بغيتي تشدي بيه باه ساعا ماصدقش ليك البلان ..بغيتي ديريه طريق باش تجري باه فاش طار ليك من يدك شديتي فسعيد ..انا عيييت منك ا الهام ..عييت منك ومن طيشك واستهتارك ..

ناضت الهام ودورات وجهها بنرفزة وقالت : صافي سكتيني صدعتيني فراسي حتى نتي.. براكة عليا غير اللي انا فيه .. هادشي اللي فيا يكفيني

خرج الطبيب عندهم ماعاجبو حال ..عاقد حجبانو وشاف فيهم بجوج وقال

شكون الام ديالو

وقفات قدامو الهام صفرا وقالت :انا هي مو مالو شنو بيه؟

الطبيب: الولد الاللة راه عندو ميكروب فالرية ..وحرارتو ارتافعات بزاف وكن تعطلتي بيه غير شوية كان غيتوفى .. دابا غيجلس معانا هنا شي ايام حتى تصفا ريتو و وكنتمناو مايكون عندو والو بسبب الحرارة اللي رتافعات ليه ..المهم كلشي غيبان ملي يرجع لوعيو ..ديك الساعة غنشوفو الاعضاء ديالو واش تأثرات من درجة الحرارة اللي وصل ليها ولالا .

شاف فيها بنص وصرامة وزاد خلاها واقفة كتشوف فسهام مصدومة

سهام: اوييلي هادشي اللي كان ناقص..اويلي الدري غيتشلل ..اوييلي وحدي فين كنتي فاش كانت السخانة طالعة ليه ..

غوتات الهام بغضب وقالت :سكتييي…سكتيييي مغيرقع والو … غيولي لاباس وغيتحرك وغنرجعو بحالنا للدار ..صافي سكتيييي

طلو عليه من خلال رجاج فاصل لقاوه كتلة صغيرة من اللحم ناعس والاكسيجين على فمو و وعينيه مفتوحة نصف فتحة وعاري الجسد ضعيف الحجم

ربعات سهام يديها كتشوف فيه وقالت

الى ماكنتيش قادرة تربيه عطيه ليا انا نربيه ..على الاقل منوصلوش لهاد الحالة اللي وصل ليها

لزمت الهام الصمت فمرة واكتفت بالمراقبة وتأنيب الضمير على الاهمال ديالها ليه ..رن هاتفها وردت كتنخصص

الو سعيد… عتقناه الحمد لله .. لالا بلا متجي صافي كلشي غيولي مزيان .. مانقدرش نشوفك دابا خصني نرتاح ..من بعد ونهضرو ..بسلامة

قطعات وبعدات شوية وطلعات رقم طليقها كتصوني عليه لاكن الرقم مغلق.. تلفتات عند سهام وقالت

انا غنمشي نقضي واحد الغرض ونرجع مغنتعطلش

خرجات كتجري مشات مباشرة شدات طاكسي حتى الفيلا ديال طليقها ونزلات كتصوني وتعاود لاكن لا من مجيب.. مشا عندها العساس كيشوف فيها بنص عين وقال

علامن كتسولي

دورات وجهها وقالت : ماشي شغلك .. نتا ديها غير فخدمتك وفدنوبك يا شاهد الزور ..

ضحك وقال: الى كنتي كتسولي على سي كمال ..راه بااع الدار ورحل من هنا ..ومن نهار باع ماتلا بان

الهام: وبغيتيني نتيق بيك ! ايوا باز

رجعات كتصوني حتى عيات والعساس كيشوف فيها هاز واحد الزرواطة فالاخير قاليها

راني قلت ليك بااع وزاد فحالو مابقاش هنا .. الى متقتيش بيا ايوا خليك كتصوني

مشا وخلاها واقفة كتشوف فالدار بتشكيك ورجعات شدات طاكسي مباشرة للشانيتو ديال واحد المعمل في طور البناء ونزلات قدامو لقات العمال خدامين .. غير شافها واحد من المسؤلين تما ومشا وقف قدامها وقال

علامن كتسولي؟

سرحات عينيها فداك البني وقالت : على كمال راجلي..بغيت نقول طليقي.

حرك راسو بالايجاب وقال: السي كمال مابقاش هنا الاللة الهام .. رحل من هنا وهز كاع الماطريال ..حتى البيرو ديالو سدو وسلم المارشي لواحد سبليوني دابا هوا اللي شرا هاد الصفقة باش يكمل البني

خرجات فيه الهام عينيها وقالت : واش متافقين عليا… كيفاش رحل اش كتخربق؟؟ غيهز طراكس والهرامات والرافعات ويرحل واش بنت ليك عندي لكرون

رد عليها بهدوء وقال: لماكن لكبار باعهم لهاد سبليوني ..سلم ليه كلشي وتبايع وتشارا هوا وياه وزاد لكندا ..هاهواك دابا السبليوني سوليه

بقات كتشوف فيه بغيض متاقاتش ومشات كتجري شدات طاكسي للمقر فين عندو المكتب فإحدى العمارات ووطلعات كتستكشف فإدى بيها كتفاجأ لقات تما اصلاحات جديدة ..فاش سولات وسرحات عينيها عرفاتها عيادة طبية في طور الانجاز ونزلات من تما بغات طرطق..تسارات على كاع معارفها والديور اللي كيملك وحدة بوحدة لقاتو باع كلشي وغبر ليه الاثر ..بقات ليها غير دار مو ومشات ليها نوضاتها معاهم حتى كانت غتناتف مع خواتاتو .

لقات راسها بوحدها وشدات فوجهها عرفات باللي داك الولد منها وليها ولا مفر منه

رجعات بحالها لمستشفى لقات لسهام باقا جالسة تما وتعرضات ليها بالتوبيخ عاوتاني

الهام : باقا هنا حسابني غتكوني مشيتي

شافت فيها سهام باشمأزاز وقالت: واش ماحشمتيش!! فيين غنمشي فيين؟ فين غنمشي ونخلي هاد الولد اللي مو ماحنانش فيه ..هاهما بغاو غير ليكوش يبدلو ليه مالقاوكش حاضرة..بغاو غير لحليب للدري مالقاوكش.. ومكملاها ومجملاها ماجالبة ليه مادايرة ليه دفتر صحي ما دايرة ليه سمية … انا تسالاو ليا .. مالقيت منقوليهم حشمت منهم وهما كيشوفو فيا بشي شوفات ناقصين .

خرجات وحدة من الطبيبات عندهم بابتسامة وقالت

شكون ماماه؟

ردت الهام انا

الطبيبة تفضلي معايا

سهام :نجي معاكم حتى انا ؟

الهام:اه غير اجي

جراتها معاها ودخلو للبيرو مع الطبيبة اللي سدات الباب والسراجم وجلسات قدامهم بابتسامة وتردد كتشوف فيهم ومن نضراتها فهمات علاقتهم اتجاه الولد وقالت

مدام الهام : غنفتح معاك واحد الموضوع وكنتمنى تفهميني ..الرأي الاول والاخير كيبقا ليك نتي..

الهام : شنو كاين خلعتيني !! شنو واقع

تنهدات الطبيبة وقالت بأسى: الولد عندك عندو فقر فالدم حاد .. وعندو الكلاوي ناشفين ودقات القلب مامتازنينش.. هادشي كتسببو الحرارة المفرطة .. وهادشي غيشكل ليه صعوبة حتى فالتنفس من بعد

سهام: واش كيتحرك ؟

الطبيبة : المهم حاليا كيتحرك لاكن البيبي بحاجة لعناية ورعاية وتتبع وعلاج مستمر ووقت اكثر ومجهود مضاعف

سدات الهام عينيها وشدات فراسها والطبيبة كتشوف فيها وسهام كتمسح فخادها وتردد

هادشي اللي كان ناقص.. الولد وحتى مو خصهم الرعاية والعناية دابا

الطبيبة: احمم.. مدام الهام الله يخليك ركزي معايا مزيان …انا دكتورة وعندي معارفي ..نقدر نعاونك الى كنتي فورطة..

الهام: عاونيني راني ماشي غير فورطة.. فوحلة

الطبيبة: بصفتي طبيبة وعندي علاقة مع جميع الفئات من الناس والطبقات .. كنعرف واحد العائلة عايشة فإطاليا عندهم كولشي اللي يخطر ليك. على بالك ..الا الولاد..

استغربات الهام وقالت: مافهمتش اش جاب شي لشي

الطبيبة: انا غنفسر ليك.. هاد الناس لاباس عليهم لاكن السيدة وقع ليها مشكل ..حملات وطيحات عدة مرات وفالاخير مرضات واظطرت تحيد الوالدة ..الشيء اللي خلاها تفقد الامل فالانجاب فمرة .. وحاليا دخلات للمغرب عند عائلتها وباقتراح من واليديها والعائلة ديالها خدات قرار باش تبنى شي وليد ولا بنيتة .. وحاليا مستعدة تتبنى من دار الايتام وليد يكون يالاه خلق ..مالقاتش عندهم اقل من ثلات اشهر ورجعات كتفكر تبنى طفل واخا يكون اكبر من ثلاتة اشهر .. الوالدة ديالها وصاتني الى بانت عندنا شي حالة حديثي الولادة هنا فالمستشفى نعلمهم قبل مايتبناو من دار الايثام. وانا كنشوف انك بنت باقا صغيرة باقا الحياة قدامك ..شفت وحيدة وماقدراش على المسؤولية الشيء اللي هلا البيبي يوصل عندنا فهاد الحالة .. فلما لا تعطيه لهاد الناس يربيوه ..انا كنضمن ليك انه غيتربا امير .. بالمقابل يعطيوك واحد طرف ديال الفلوس اللي يعيشك مدى الحياة ..اشنو قلتي؟

الهضرة بقات كتروج فراس الهام وتتعاود وهي جالسة بوحدها حدا الباب دالانعاش .. جلسات حداها سهام بتعب ومدات ليها قرعة دالعصير وقالت

شربي.. نديرو فيك خير واخا مافيك خير

صغرات الهام عينيها وقالت ليها

علاش زعما كتقولي ليا هاكا مالي اشنو درت ؟

سهام: كاع داكشي اللي درتي ومادرتي والو ؟ نحسب ليك؟.. خنتي راجلك ودرتي عليه الصاحب بالتخبية .. مو كتجي حتى لباب دارك وكتخليها مكتحليش ليها الباب .. خليتيه حتى خرج ومشيتي نتي وباك ومك خويتو ليه الدار كلها باللي فيها وسرقتي ليه الفلوس اللي كان كيحط فدار … بعتي الاثات اللي مابغيتيش فكراج خوك بجوج دريال زكارة فيه .. نزيد ولا صافي؟. دابا ولدتي ومابغيتيش تربي ولدك تابعك الحب !!

الهام: اهاه مزيان .. وا ملي حسبتي حسبتي حسبي معاك حتى فعايلو هوا وشنو دار ليا .. العصا الي كان كيعطيني .. والخيانات مع البنات باعالي عالي قبالت عيني

سهام: دابا من هادشي كامل .. شوفي غير فهاد الولد اللي مرمي هنا معدب.. شديه اصاحبتي عنقيه عندك خليه يحس بشوية دالحنان والاهتمام .. شوفي كي زراق مسكين واش مابقاش فيك !

بقات الهام ساكتة ودورات وجهها وقالت : صافي اختي سكتي شوية.. انا عيييت من لبارح مانعست ..غنمشي للدار نبدل ونرتاح شوية ونرجع غتبقاي هنا ؟

بقات سهام مصدومة كتشوف فيها وفمها محلول مالقات ماتقول .. اما الهام ناضت رجعات بحالها للدارها الجديدة ..دوشات وبدلات وجلسات تاكل ..بينما هي كتشرب كاسها دالقهوة جاها اتصال من رقم فير معروف وردت باستغراب

الو ..

الو مدام الهام .. معاك دكتور سناء لاباس ؟ كي بقيتي؟

تنهدات الهام وقالت : شوية كنفكر فالكلام ديالك اللي قلتي لي

د.سناء: وشنو قررتي؟ انا راني علمت دوك الناس .. وقالو لي واخا مريض ماشي مشكل مستاعدين يعالجوه ..من الاحسن خودي قرارق فأقرب وقت لان السيدة متلهفة باش تحضن ولدها فأقرب وقت .. ونزيدك ..ولدك راه غيعيش امير وسط عائلة منقولكش كيف دايرة ..ألد موني ماشي كبرو فالفقر وعاد دارو لاباس.. هادو راه اغنياء ابا عن جد ومنقولكش كي مثقفين وقارين وواعيين والاداب والمبادئ ديالهم كيف عاملة ..ولدك غيعيش احسن حياة ..ونتي بطبيعة الحال غتعيشي داكشي اللي باغا ..تشري دار ..تشري طموبيل احر ماكاين ديكا بوطابل .. وتسافري لاحسن الدول..وتلبسي احسن لباس..وتشري فالذهب مع راساتك حتى تشبعي.. المهم حياتك وحياة ولدك غتبدل للافضل..فكري فراسك ..وفولدك ..الحياة قدامك ونتي مزالة صغيرة

واش شيطان اللي بدا يلعب بعقل الهام ؟ واش نفسها اللي مالت لمتاع الدنيا ؟ واش طيشها وقلة عقلها؟

تخيل ليها فعقلها كاع الحياة الملونة اللي كانت كتشوفها بعيدة ليوم رجعات قريبة .. بدات كتبان ليها تشري فيلا حتى هي وتركب فسيارة فاخرة و وتلبس اللباس اللي تمنات تلبسو وتعيش الحياة اللي كتحلم بيها كيف بغات .. واخا عندها دارها وفلوسها اللي خدات بشطارتها وكيدها من طليقها لاكن رجعو كيبانو ليها لاشيىء قدام داكشي اللي غتاخد..فكرات حتى عيات وكل عقل اش كيقول ليها ..عقل كيقول ليها غتندمي على ولدك.. وعقل كيقول ليها عيشي حياتك الولاد ماشي هما كلشي فالدنيا.. ومدام انه غيعيش امير كي قالت الطبيبة فاحسن ليه يعيش مع هاد العائلة .

بعد تفكير طويل وعميق قالت نستاشر مع مالين الدار نشوف رأيهم حتى هما .

تماما داكشي اللي دارت .. مشات لداهم فوقت الغدا .. اي يعني فالوقيتة اللي كيتجمعو فيها كاملين .. جلسات وسطهم والكل استغرب وتسائل فين خلات ولدها ..عاودات ليهم شنو وقع ليه باختصار وباللي خلاتو فالمشتفى ومعاه صاحبتها سهام. وحكات ليهم على العرض اللي تقدم ليها .. كلشي تفاجىء.. مها وباها وحتى ختها اللي كانت جالسة على الطبلة معاهم اما خوتها الرجال فحت واحد مكان حاضر وحت واحد ما كيرافقها الرأي وبجوج هجروها من نهار خانت راجلها قطعو معاها الصلة واخا قريبة منهم .

بعد ماسمعو لكلامها شافو فبعضياتهم وتكلم الاب وقال بيقين : عطيه … ماعندك ماديري بيه .. غير نتي وياه والعداب .. ها باه فين سمح فيه خلاه وزاد غبر ليه الاثار .. غتبقاي نتي تصرفي عليه ويكبر يمشي يقلب على باه . انا كن جات عليا عطيه وهني راسك ساك لاباس عليهم

شافت فيها مها وقالت ليها بغمزة: غا عطيه دابا يكبر ويقلب عليك يقوليهم بغيت مي.. نيت راه خاص اللي يعاونا لي ا خوك جالس بلا خدمة كيدور .. وختك مالاقيا حتى ماتلبس وباك بوحدو اللي كيصرف علينا

هزات الهام حاجبها وقالت: ايااه نبيع ولدي باش ولادك نتي يعيشو؟ زوينة هادي

الاب: ايوا مللي ولدك جلس مع باه ولسقي حداه شداك تخرجي من دارك .. خلينا ساكتين على فضايحك حسن ليك .. انا داك الولد مانعرفوش من هنا لهنا .. ما هوا حفيدي مانت جدو .. ماتجيبيهش ليا هنا .. بغيتيه تبقاي دوري نتي وياه طليه

الام : شبغيتي بيه؟؟؟ بغيت غا نعرف ؟ ماتعرفيش ليه ما تقدي عليه ..تحسابيه ساهل فالتربية ..اخرتو يخرج مسخوط.. عطيه ليهم وتهناي وهنينا من هضرة الناس..

وقف باها وقال ليها : اسمعي شيجيك مليح.. الناس راه حلو فامهم وشرعوهم وانا مابقيتش قادر نسكن هنا .. منين مادزت يلوحو ليا الهضرة فالقهاوي.. ماباين شكون باه .. وبداتو مع للراجل .. لا ولداتو مع الصاحب.. وشلاااا مايتقال سمعتي.. انا هاد الحومة وليت نحشم نخرج فيها بوجهي باين

الام: وخوك شي نهار يقتل شي واحد بسبب الهضرة .. بصح ابنتي ولاهيلا عيينا صافي بغينا نخرجو من هنا

تا هوا مغيعيش مزيان وسط عائلتنا .. حنا ماباغيينوش نقوليك اللي كاين ..غيبقا بوحدو مكروه سبب البلا.. باه مشا وتهنا وحنا وحلنا فيه .. هاهوا فين مرض ليك وخاصو شلا دوايات وسبيطارات عمرك غيمشي هاكا كتجري وراه .

نخزاتها ختها وقالت : صافي عطيه .. ومرا مرا سيري بقاي تشوفيه وهانتي مهنية. ولاباس عليك

ربعات يديها تنهدات وقالت: نعيط للطبيبة؟

الاب:سيري عيطي ليها دغيا تلقي راسك .. قولي ليها نشوفو بعدا هاد الناس نعرفوهم ونتفاهمو معاهم فالطبلة ..انا غنمشي معاك

ناضت الام وقالت: تا انا غنمشي معاكم

ناضت الاخت وقالت: نمشي معاكم؟

شار الاب بصيعو وقال: جلسو تا نجيو .. غنمشي انا وياها .. نوضي طلقي راسك ياك خليتيه فسبيطار .. ويالاه عندو تما ونتلاقاو هاد الطبيبة

ناس تحيا وناس تموت .. سبحان اللي خلق وفرق..

فاش وصلات الهام وباها للمستشفى ولقاو اسهام مزالة جالسك والنعاس كيطيح فيها واخا ماشي مو لاكن ماعطاتهاش خاطرها تخليه وتمشي .. بالرغم من وقفتها جنبو حبا فيه ماشي حبا فالهام .. شافتهم وصلو عنددها زربانين على وجه السرعة مافهمات فيهم والو ..حتى هما ماخلاوش ليها الفرصة فين تسول ولا تعرف شنو واخا تبعاتهم باغا تفهم اش كيوقع لاكن خلاوها بعيدة قدر الامكان. دخلو عند الطبيبة وكان اب الهام على عجلة وزربان باغي يقضي كلشي فدققة ..اما الهام كتفت بالصمت وخلاتو هضر مع الطبيبة اللي فرحات وكانت غطير من الفرحة بقرارهم ..وحتى هي ماعطلاتهمش . فالحين هزات الهاتف اتصلات بالمعنيين بالامر خبراتهم بآخر الاخبار وقطعات تيليفون بكل سعادة وسرور وقالت

كنأكد ليك امدام الهام انك مغاديش تندمي.. حاالا غيجي السائق باش يدينا عند عائلة ولدك الجديدة ..كما كتعرفي هاد الامور مكتناقش على برا وانما ضاروري من شوية دالخصوصية

اشافت الهام فباها وهي كتفرد اصابعها بتوتر وقالت: كن جات معانا مي تبقا مع الولد بعدا

رفعات الطبيبة السماعة وقالت: مك عندها تيليفون ؟

عطيني نمرتها

الهام :ماعندناش تيليفون اصلا فالدار ..شكون هادا اللي عندو تيليفون غير شكون وشكون

الطبيبة : صاحبتك ولا ختك اللي معاك هنا؟؟

الهام: ماقدرتش نتيق فيها خفت دير شي حاجة

الطبيبة: على العموم .. انا غنوصي عليه الممرضات يبقاو حداه حتى نرجعو .. ماتخافيش انا دابا رجعت خايفة عليه اكثر منك امدام ..ومن الاحسن ماتقولي والو لشي واحد خلي هادشي بيناتنا .

حركات الهام راسها بالايجاب وقلبها كيضرب فكل خطوة كتخطيها لقدام .. مع الحطة اللولة درجلها فطموبل دالسائق اللي جا عندهم شدات فقلبها وعضات على فمها وكأنها كترتاكب جريمة .. بلعات ربقها وهزات راسها باصرار ومشات الطريق كلها وهي متوثرة كتفكر حاى وقفات الطموبيل.

لقات راسها قدام طريق من تراب والكياس جنب المدينة كلها طبيعة وقدامها صور عالي وابواب كبيرة من حديد..تفتح الباب ببطئ ودخلات السيارة وصط صف من الاشجار والخصات ديال الماء حتى وقفات قدام باب من الخشب التقليدي.. انها فيلا مغربية تقليدية من الطراز القديم كلها نقش وخشب وعود . نزلات هي وباها تابعين فصمت غادين مع الطبيبة اللي ابتسمتت فوجه احدى الخادمات اللي كانت فالباب واقفة دايرة تزارة وطربوش ابيض وقالت ليهم

مرحبا امداام .. لاللة بهية كتسناكم

تقدمات قدماهم كترشدهم وهما كيشوفو فجمالية الفيلا والخشب المنقوش فالسقف والزليج الفاسي المغربي والزجاج المحيط بالنوافد الملون .. افرشة تقليدية وصالونات مغربية باتواب حرة وديكورات نحاسية اقل ما يقال عنها روعة .

تلفت الاب عند بنتو وقال بهمس

ماتزربيش وتقول شحال خليهم هما نشوفو علاش قادين

رشداتهم الخادمة لصالون عصري بجلد اسود وطاولة مربعة من العود قدامها نمر منحوت من العود ..كانت العائلة المكونة من الزوجين وام الزوجة وااخت الكبرى والاخ الاكبر جالسين في الانتضار ، فور ما وصلو وقفو ليهم بابتسامة وترحيب ..

تبسمات الطبيبة وقالت

عندك

كنقدم ليكم مدام بهية البيتسي ..والزوج ديالها مسيو جان البيتسي.

مدام آلبيتسي .. ها مدام الهام والاب ديالها

حركات ليها مدام بهية راسها من بعيد بابتسامة والهام كتشوف فيها وتشوف فشكلها ولباسها وقالت

متشرفين

جلس الجميع وبدا المعقول ..دخلات الطبيبة مباشرة فالموضوع وقالت

دابا ملي تعرفتو على بعضياتكم نخليكم تفاهمو بيناتكم .. مدام البيتسي.. مدام الهام مستعدة تعطيك البيبي

ناضت مدام بهية من بلاصتها بكل رقة وجلسات جنب الهام وشدات فيدها بحنان ولطف وقالت

كوني متأكدة ..غنديرو فعينيا ..غنعطيه الدنيا بكل مافيها .

هبطات الهام راسها وبلعات ريقها بتردد وقالت

انا ما مم..

قاطعها باها وقال: حتى حنا هادشي علاش جينا.. عارفينكم غتهلاو فيه وديروه فعينيكم ..داكشي علاش بغينا نعطويه ليكم ..ومساخيينش بيه راه كبدتنا كتحرق عليه .. الله مطالع علينا

مدام بهية: طلبي اللي بغيتي.. انا رهن الاشارة

تلفتات عند الزوج ديالها وشارت ليه براسها ..جبد من الفيستة ديالو دفتر الشيكات وقلم وحلو كيتسنا الجواب ..تكلم الاب وقال

وشغانقوليكم .. دابا نتوما وباش سخاكم الله

تكلم اخ بهية اللي كان جالس جنبهم وقال

ميتين مزيانة؟

الاب: ميتين. اش؟

اخ بهية:ميتين مليون

تصدم اب بهية وحتى هي تصدمات وقاليهم مزيانة الله اودي

طرطق مسيو جان الستيلو كيعمر الشيك ويالاه بغا يكتب الرقم نطقات تلهام بتردد وخوف وقالت

بلاتي..اناا

تلفتات مدام بهية عند مسيو جان مقاطعاها وقالت

ربعمية مليون

حركات راسها بالايجاب وبتتاقل وتلفتات عند الهام اللي لزمت الصمت ..

قطع مسيو جان الشيك ومدو لبهية اللي بدورها عطاتو لإلهام وقالت

الولد من هاد اللحضة انا المسؤلة عليه

شدات الهام السيك كتشوف فيه وقالت

وهاد الشيك هادا تيقة ؟

بهية: تقدري تجربي من هاد اللحضة الى بغيتي..يوصلك الشيفور للبنك والاب ديالك يبقا هنا حتا نكملو الاجرائات

شافت فيها الهام باستغراب وقالت: اشمن اجرائات

قاطعوها خطوات حداء كيقتارب منهم وتلفتات لقات راجل بالكوستيم والمحفضة وقف ولقا التحية عليهم كاملين

مدام بهية : المحامي .. اللي غيكمل الاجرائات القانوينة ديالنا

الهام : مافهمتش؟؟ شنو كتقصدي

تنهدات اخت الهام وقالت بهدوء وجدية

قبل كلشي امدام غيخصك توقعي لينا على واحد الوتيقة.. هاكا كل واحد يضمن حقو

فتح المحامي المحفضة وجبد الوثيقة المعلومة وستيلو وقال

هادي وثيقة تنازل ديالك امدام .. غتعطينا التنازل ..مقابل المبلغ المدكور فالشيك

وقفات الهام بسرعة وقالت: هادشي ماتافقناش عليه!! ماقلتوش ليا غادي نتنازل عليه فمرة !!

وقفات كدام بهية حتى هي وقالت : غتنازلي غليه مكيعنيش باللي غترميه .. راه غنتبادلو الادوار انا ونتي.. غيرجع ولدي وانا اللي غنربيه وانا اللي غنكبرو ونقريه .. ونهز المسؤولية ديالو كلها .. وخاصني نضمن راسي حتى انا بهاد الوثيقة

شاف فيها باها وقال بصرامة : واش غنباتو هنا سربي الناس نمشيو فحالنا باقي تابعنا مايدار

بترثو وارتباك بقات الهام واقفة كتشوف فداك الشيك اللي فيدها وفالستيلو اللي ماد ليها المحامي مطولا فاللخير خدات قرار وضغطات على قلبها وزطمات على كبدتها ووقعات على الوثيقة بسرعة ثم عطاها المحامي بصمات ليه وهزات راسها وقالت

نقدر نشوفو مرة مرة؟

توجه الكلام لبهية لاكن بهية كانت مصدومة وكتشوف فالوثيقة مامصدقاش حتى عمدرو عينيها بالدموع وتلفتات بسرعة عند جان قالت ليه بالايطالية :

نشوف ولدي..ودااابا

ردات اخت بهية على الهام وقالت ليها : ان شاء الله علاش لا

سلم الاب براسو وجر الهام قالهم : اللع يعاونكم .. على سلامتكم

خرج والهام فيدو جارها وكيردد: تهنييناا.. زيدي نمشيو لبنكة داغيا نشوفو هاد الشيك ..سربي

فتح ليهم الشيفور الباب وقال : فين بغيتو نوصلكم ؟

فالمستشفى وبقلوب تنبض شوق ومحبة ولهفة دخلات مدام بهية والاسرة كلها كيتسابقو يشوفو البيبي.. وصلو للانعاش ووقفو كلهم كيشوفو فيه من بعيد وعلى الفور نقلوه من تما فسيارة اسعاف لمستشفى اخر وخلاو بلاصتو خاوية .رجعات اثنائها سهام وفيدها عصير صغير لبلاصتها ومشات وقفات بغات طل عليه لاكن لقات بلاصتو خاوية وبدات كتغوت وتقلب حتى دخلات الهام كتجري مشات جهة الزجاجة مالقاتوش وضارت عندها سهام قالت ليها فين مشا؟؟ واش داوه؟؟. هضري واش داوه؟

سهام: شكون اللي غيديه ؟؟. فين الولد اويلي فين مشا؟

شدات سهام فراحد الفرملية من تما كتسول وردات عليها الممرضة قائلة

جاو شي ناس معاه قرار ومحامي قالك هما عائلتو وطيروه فرمشة عين .. شوفو مع المدير هوا اللي يقدر يفيدكم

شنقات سهام على الهام مخرجة عينيها وقالت بجنون : بعتي الدري… بعتيه اينت الحرااام ..هضري بعتييييه .. بعتيه الكلبة على قبل تق٠٠٠ ين وعلى قبل سعيد ..

دفعاتها الهام وقالت بصراخ: ماشي شغلك … ولدي هاداك نبيعو نعطيه نتي مالك اش دخلك

شداتها سهام من حوايجها كتبكي وقالت ليها بغضب: من ليوووًم ماتعرفيني منعرفك .. ياك قلت ليك نربيه انا ونديرو بحال ولدي ويكبر قدامك .. بغيتي الفلوس..ربحي بيهم .. من ليوم مانتي صاحبتي مانا صاحبتك الله ياخد فيك الحق

ارتاحت الهام نسبيا وحسات بالحرية شيئا ما وقالت لامها وهي فالكوزينة واقفة

على الاقل رتاحيت من جيهتو ..ديك السيدة غتربيه حسن مني غيتبرا فطبقتهم ويكون واحد منهم ميعرف لا ميزيرية لا فقر لا تهميش .

الام: ايوا دابا هضرتي.. زايدون مزال يقلب عليك فين. ما كنتي عقلي فين قلتها .

الهام: بابا قالي غنرحلو .. غدا غنمشي نشوف فيلا حتى انا لينا ونمشيو نسكنو فيها كاملين .. وديك الدار اللي عندي غنكريها ونجلس معاكم . وندير شي مشروع وشي حاجة راسي لدواير الزمان

تبسمات الام وقالت : وباك ماعطيتيه والو ؟

ضحكات بسخرية وقالت: فالبنكة قالي عطيني باش ندير بومبا دليصانص ولافاج والقهوى !! واش كيهضر من نيتو شغيبقا ليا انا الى عطيتو باش يدير هادشي كامل!!

خرجات من لكوزينة ومشات كتخطط لحياتها من جديد..

صبحات صباح من ايامها الجديدة طالقة الشعر و وقفات قدام المرايا فدارها المستقلة لابسة ميني مزيرة وكوستيم ديالها وهزات صاكها بابتسامة وصباط عالي .. تعكيرة بالكرونة مصات بيها شفايفها قدام المرايا وضحكات كتجرب الابتسامة . نزلات كتقرقب مع دروج العمارة وخرجات دايرة نضاضر صغار كوحل وطلعات فسيارة رمادية اللون صغيرة مربعة كان فيها شاب شعرو اسود لابس كوستيم بني ونضارات رقاق فالاسود.. سلمات عليه من الوجه وقالت

تعطلتي عليا سعييد .. اخر مرة تخليني كنتسنا

ضحك معاها وقال: نمشيو لشي قهيوة نفطرو فيها

الهام : علاش لا…ونيت نكملو كلامنا اللي بدينا فتيليفون

جلسو فمقهى على برا مقابل مع الشارع وكل واحد خدا قهوة ودخلو فالنقاش بمباشرة

الهام : اشنو قلتي دابا فوقاش غتجي تخطبني ؟

سعيد : غنعاود نقول ليك نفس الكلام اللي خليتو فتيليفون.. معنديش الدار فين غنسكنو انا وياك من غير دار مي.. والصداق مغنعطيكش نتي شبق ليك وتزوجتي وطلقتي.. وغنتعاونو انا وياك فالمصاريف ديال الدار يدي بيدك

ضارت عندو كضحك وقالت: وانا علاش غنتزوج بيك ؟؟. واش عارف العز اللي كنت عايشة فيه مع طليقي ولا معارفش ؟؟ يدي مكنحطهاش فالماء والفيلا بالخدامة واللي طلبتها كتوجد

ضحك بسخرية وقال: عليها بغيتي طلقي وماعجبك حال

خزرات فيه وقالت: سمع اخر كلامي اسعيد.. انا كنبغيك اه ولاكن متكونش عز ليا من راسي فهمتي.. قد ما بغيتك وضحيت معاك كتبقا نفسي اولا من ونضحي معاك فكلشي لاكن نفسي تعيش فوق التضحية ديالي ماشي تحتها .. وهاديك الدار اللي طامع فيها غادي نكريها والى كنتي ناوي سيادتك تسكن معايا فيها غتخلصليا كراتها حيت ماجبتهاش ساهلة … والى ماعجبكش الحال كل واحد فينا يشد طريقو

ربعات يديها وقلبات وجهها لجهة اخرى ..اما سعيد دغيا برد معاها وشد ليها فيدها كيضحك وقال

ومالكي دغيا كتقلقي وتخرجي للعيب واش انا هبيل نفرط فيك .. انا نسكن معاك فوق السطوح ومنفرطش فيك

هزات كتفها وقالت ليه : ايوا هي الا قلبتي على شي دار فالمستوى نسكنو فيها .. اما لا داري لا دار مك صالحة ليا وليك ونتا عارفني كيف دايرة .. ما انا صالحة لمك ما هي صالحة ليا وداري تبقا فالتيقار الا الى كنتي غتعطيني كراتها.. وتعطيني صداقي وهديتي ودير ليا العرس نسد بيه فام عباد الله

عقد حجبانو وقال: عاوتاني الصداق والعرس!! منين غنجيبهم ؟

هزات يدها وقال: حتى انا بحالي بحالك ماعندي منين الريال منكسابوش.. الى مابغيتيش خليني اسيدي حتى يجي اللي يستاهلني

تنهد ودور وجهه كيشوط لقا واحد من اللي كيبيعو الجرائد واقف حداه وكارو فودنو معلق وماد ليه جريدة وقال

هانا اسيدي..الصباح .. عيش نهار تسمع اخبار

شد من عندو سعيد الجريدة وعطاه الصرف وحلها داير رجل على رجل بينما الهام قالية وجهها لجهة اخرى معبسة .. ضحك بسخرية وقال كيقرا الاخبار فالجريدة

سمع الناس اللي عايشة انا حنا غير كنتنفسو ..قالك حياة جديدة تكتب لحفيد السياسي عمور بن موسى من ابنته بهية بن موسى وزوجها الالستقراطي الايطالي جان البيتسي .

شيد ليلة امس الخميس بفيلا بن موسى حفل عيقيقة اسطوري حياها المع النجوم المغاربة بحضور ابرز الشخصيات المغربية ، تميم بن موسى البيستي المولود الجديد اللذي انضم حديثا لاحدى عوائل النبلاء الاطاليين واشع فرحة وسرورا في قلوب ال بن موسى …

ميلانو ارقى الاحياء السكنية الهادئية في جنب الطبيعة .. في بيت عبارة عن تحفة فنية وشكل هندسي رائع بمزيج بين الحداثة والطبيعة ..وفي احد الشرف لهاد البيت الاسود الراقي والعالي كانت مدام بهية جالسة بملابس نوم وشعر مطلوق كتشرب قهوتها وتيليفونها الحديث فيدها كتشوف فيه وتقرا منو الاخبار . جاها اتصال وردت بالايطالية وبصوت هادئ

حبيبي… مزال مامشيت لابد نمشيو بجوج اولا؟ .. نتسناك ولا نتلاقاو تما ؟ واخا يالاه بيزو

قطعات ودخلات لغرفتها الراقية مباشرة في اتجاه غرفتها الواسعة المليئة بأحدث الملابس الفاخرة المجوهرات الثمينة .. حطت لباسها الراقي قدامها وجلسات قدام مرايتها زينات خدات مقويات ومنشطات باش تبدا نهارها، فديك الاثناء حضرت مجموعة من الشباب عندها حاملين شنط وحقائب وبداو فتسريح شعرها ولعمل على هندامها بالكامل. اخيرا انتهت مباشرة مع وصول زوجها جان البيستي اللي دخل فاتح يديه بملابس راقية وقفازات سوداء رجالية من الجفد متقبة من ضهر اليد وتقدم بابتسامة وقال

كنتمنى منكونش تعطلت عليك..درت المستحيل باش نوصل فالوقت واخا تمنين تعفيني من هاد المهرجان حيت كنحس بالضيق فيه .

مشات بخطوات مرتبة مرتدية فستان اسود فوق الركبة وفرو اسود قصير وقفازات من دونتيل ..كعب عالي بموديل جريئء اسود واحمر شفاه فاقع وتسريحة كلاسيكية مرافقة بعطور فخمة راقية.. قادات ليه الجيب ديال البدلة فالجنب وقالت

انا درت ليه خاطرك كما طلبتي مني وقنعت ليك تميم باش يمشي للمغرب معانا ونحضرو جميع افتتاح للكازينو .. ودابا نوبتك دير ليا خاطري نحضرو هاد المهرجان الدولي للموضة .. واخا الاجواء مختلفة ماشي بحال فالكازينوهات ولاكن غيعجبك الحال وتبدل الجو ..مشينا ؟

ايطاليا..ميلانو .. اكبر عاصمة للموضة والتصميم على المستوى العالم..ليوم تستضيف احدى اكبر المهرجانات العالمية للموضة ..بدعوات من ادارة المهرجان لشخصات العالمية المشهورة والعاوئل الثرية والنبلاء.. تشرفت عائلة البيستي النبيلة بدعوة خاصة vip لحضور المهرجان ..لبت مدام بهية الدعوة ورافقها زوجها فسياراتهم الفارهة الى باب المهرجان وتلقاو احسن اتقبال بعد مرور على السجادة الحمراء مباشرة لمكانهم الخاص جنب الشخصيات النبيلة . شيء فخم وارقى وابعد واكبر من الخيال.. تصاميم وديكور واضائة واجواء رائعة عاشتها مدام بهية قبل سفرها .. اقتنت بعض الملابس اللي شافت فالعرض وحملت راسها قبل نهاية الحفل ورجعات هي وزوجها بحالها باش تستعد للسفر فاليوم الموالي. اول حاجة دارتها بعد رجوعها هوا اللي زم باقي امتعتها جنب امتعة زوجها . وبينما كتوصي الخدم على الدار وقوانينها نزل زوجها جان من الاعلى والتيليفون فيدو قائلا

تميم مكيردش فتيليفون ؟؟ مزال مارجعش لدابا .. هادي تسعود ديال الليل وهوا من الصباح مابانش هادشي بدا كيخلعني

ردت بهدوء : غيكون دابا جالس مع صحابو مساخيش بيهم .. كان باغي يدوز الصيف كامل معاهم وماصدقش ليه المخطط ديالو. دابا غيكون كيستغل الوقت باش يبقا معاهم اكثر

مس جان: ولاكن بزااف..ماشي حتى لدابا هادشي بزاف .

بهية: ماشفتيش من جهاز ترقب السيارة فين يقدر يكون؟

مس جان: سيارتو حدا الكازينو ولاكن ماشي فالكازينو ومادخلش ليه من الاساس.

وقفات بهية مخلوعة وقالت: بديتي كتخلعني .. كيفاش سيارتو قدام الكازينو وهوا مكاينش؟

كان قلب بهية غيطيح بين رجليها من الخلعة فلحضة ادراك لاكن رجعات فيها الروح فاش سمعات صوت السيارة وقف قدام الباب وقالت

صافي هاهوا رجع ..

تلفت جان بغضب كان غادي يمشي عندو لاكن شدات ليه مدام بهية فدراعو وقالت بتبات

بالمعروف.. بالمعروووف صافي رجع خليه. حسن ميتمرد علينا وحنا غاديين غدا للمغرب.. مافينا مايعاود كلشي من الزيرو صافي تهدن ..تهدن

تنفس مس جان وقال : نتي فشتتيه بلا قياس ..

قاطعاتو: مزال صغير .. مزااال ماشرب عقلو غيجي شي نهار يولي حتى هوا مسؤول صافي سايس هادا هوا السن الصعيب خصوصا عند الاولاد

مس جام: ثلاتة وعشرين عام .. ثلاااتة وعشرين عام ابهية خاصو يضرب حساب العواقب

بهية: اوومزاال صغير ..مزاال مغيدير عقلو كما نتا وانا باغيين ..على الاقل حسن من بزاف اللي قدو واللي كيعرف..تفكر انه دوز المراهقة بعيد على الادمان وعلى المدرات واخا صحابو بزاف مشاو فديك الطريق.. على الاقل عندو عقل كيفكر لمصلحتو ومابهدلناش من هاد الناحية .. وقرايتو غادية مزيانة وديما كان من الاوائل..هادشي كيشفع ليه ولزبايلو ..اييه متااافقة معاك كيديرها يحول فيها رئيس بشلاغمو ولاكن فيه حوايج اخرى زوينين..صافي خليه ينعس حتى للصباح

تراجع مس جان ماتلفتش وراه ومشا لبيتو في حين كملات مدام بهية شغالها حتى بدات تحس بالتعب وطلعات للطابق العلوي مشات حلات باب الغرفة الخاصة بتميم وطلات بشوية لقات البيت مضلم كامل..لقات نضرة فوق سريرو وهوا ناعس على كرشو وشط الفراس كيبان فيه غير الضهر . سدات الباب بشوية ومشات لبيتها نعسات .

صبح الصباح فالبيت الرائع وصبحات مدام بهية جاهزة بحلتها ورقيها للسفر

نزلات بابتسامة كضحك شادة فيد مس جان وركبات سيارتها الفخمة هي وياه وجلسات دايرة رجل على رجل ..شاف مس جان فالساعة فيدو وقال

ديما معطل .. بالليل بالنهار. المهم ديما معطل…

مع الكلمة الاخيرة طلع تميم فالسيارة بدجينز وتيشورط سوداء جلس مقابل معاهم لاكن مشافش فيهم بسرعة قلب عيونو للجنب وجبد الهاتف من الجيب ولزم الصمت .

جلسات مدام بهية فطائرتهم الخاصة جنب زوجها وحيدات الشال على كتافها بقات بكسوة ناعمة سوداء بالخيوط من لكتاف وحيدات نضاراتها الشمسية وحدائها من رجليها وطلقاتهم قدامها كترتاح

اما مسيو جان هز واحد الكتاب فيدو ولبس نضارات كيقرا في حين كان تميم مستلقي فكرسي اخر واسع وعريض بحال الكنبة وطالق رجل وطاوي رجل وشاد تيليفون فيدو فصمت . فجأة رخا ليه لاحو قدامو ونفخ قائلا

تقطعات كونيكسيون

دور وجهه كيشوف فالسحاب بينما جاوبو مس جان ببرودة وعينيه فالكتاب وقال

ماتلقاش حسن من هاد الفرصة فحياتك تقرا فيها كتاب يتقفك

قلب تميم عينين مردش عليه ولزم الصمت كيشوف فالنافدة وصبعو الصغير حدا فمو كيخمم .. جات المضيفة بابتسامة حاملة بلاطو فيه مشروبات فرقاتو عليهم ومشات خلاهم في حوار

م بهية: غيعجبك المغرب اتميم بلا متدمر ..اصلا ماهي غير عشر ايام وترجع بحالك .. مخاصكش تقنط من بلادك

رد وعينيه على برا فالسحاب : درت ليك خاطرك وصافي

مدام بهية: خاصك تعرف على مك لالاك ..وخوالك وعائلتك .. ماعقلتيش عليهم فاش كنت كنديك ليهم صغير ..غيفرحو بيك وكيتسناو غير فوقاش يشوفوك

حرك راسو بالايجاب وبقا ساكت ..تكلم جان وقال ليها: ماتصدعيش راسك معاه هاداك مدام ماجاتش معاه رباعتو بلا ماتزوقي ليه الحياة

تلفت تميم عمدو وقال : مللي عارف حتى حاجة مكتفرحني من غير رباعتي خليني معاهم علاش المغرب بالضبط ؟؟ ايطاليا عامرة مدن كبيرة فين تفتح مليون كازينو

بهية: تميم.. هادا استتمار والمغرب ماشي كيف ما كتخيل فدماغك ..المغرب كيجيو ليه اكبر رجال ال اعمال كيستتمرو فيه ونسبة السياحة فيه مرتفعة وسلسلة الكازينوهات ديال باباك خاصها ضم المغرب حتى لقائمة الدول اللي فاتح فيهم..نتا مكتفكرش فالفائدة والشهرة والاسم يبقا لامع وساطع

مس جان: من ليوم غتبقا ترافقني فجميع المشاوير ديالي ..ومانساش نتا الوريث الوحيد اللي بقا من سلالتنا واللي غيخلي اسمنا لامع ..هادشي حطو فبالك وماتستاهنش بيه ..نتا ولي عهدي اللي غيبقا حامل اسمي ليه ولاولادو ولاولاد اولادو كما استمر هاد الاسم عبر قرون ..ومن نجاح لجناح تحققات هاد الثروة اللي كل واحد فوق هاد الارض كيحلم بالربع ديالها

نزلات اخيرا طيارتهم فوق ارض الوطن ولاول مرة غيحط فيها تميم رجلو وهوا كبير عاقل . كانت سيارة مرسيديس في انتضارهم بالسائق .. ركب مس جان لقدام جنب السائق وركب تيميم في الوراء جنب م د بهية غادي فالطريق وكيشوف من النافدة الاجواء والمناضر .

شاف الطريق طولات شوية وتلفت قائلا ..

طريق طولاات!! شحال ديال الوقت خاص باش نوصلو؟

ود مس جان من لقدام وقال

عندك الزهر غنمشيو مدينة قريبة للمدينة اللي نزلنا فيها.. ماماك كانت غتدينا مباشرة عند الهام جداتك حتى لفاس

تميم: دابا فين غاديين مافهمتش؟ ماشي عند مي لاللة ؟

بهية: غنمشيو للعاصمة سميتها الرباط… نحطو حويجاتنا ونرتاحو شوية من بعد عاد نمشيو لفاس عند مك لالاك.. حيت الطريق بعيدة بزاف … بغيت تشوف الدار اللي خدينا ..وااو غتعجبك والمنضر اقل مايقال عليه رووعة .. شيحاجة تاريخية

تبسمات بحماس وتنهدات حتى قربات وطلات من النافدة قائلة

كي جاتك البلاصة اللي خدينا فيها الدار ؟ زوينة؟

تلفت كيشوف فالبني جديد جنب البحر واليوخوت مستفة والمقاهي فمارينا والمنضر رائع مع غروب الشمس..دازت السيارة وشط مارينا حدا اليوخوت والناس كيتصورو والبعض كيتسارا دوزاتهم على ديك المنطقة كلها حتى للبناية المحيطة يالحديقة وديكوات الطبيعية .. تعرض بيهم العساس كيجري هز مع السائق الحقائب في حين. طلعات العائلة فالمصعد للبيت ودخلو فرحانين

كيشوفو فالدار كلها مفرشة ومرتبة وفيها مرى بالطابلية واقفة كتسانهم وترحب بيهم وفيدها منديل اصفر

تبسمت بهية وشافت فيها قائلة

شكرا ليك .. تعبناك معانا

حنات المرى راسها وقالت بخجل: تتهناو فيها ان شاء الله ..مرحبا بيكم.. انا لتحت الى حتاجيتو اي حاجة كلميني .

تنهد تميم وهوا كيدور ويشووف فالدار اللي كانت محلولة كلها وعندها جوج شرفات كبار بالزاج .. ومضوية من كل الجهات ..جراتو بهية من يدو وقالت بحماس

اجي نوريك المنضر .. اللي ميتباع مايتشرا بثمن

خرجاتو لشرفة كبيرة كلها محيطة بالبيت ومنض الوداية مقابل معاها مضيئء مع غروب الشمس وصومعة حسان مقابلة معاها منه جهة بأنوارها البهيجة .. البحر قدامهم لامع والفلوكات غاديين جايين واسفلهم الناس كتنزع جنب المقاهي …الهوا بارد ومريح ونضيف كيضرب فديك. البلاصة

شافت فيه بهية وقالت : كي جاتك لوحة فنية ولا ماشي لوحة فنية ؟ هانتا اسيدي قدام التاريخ مباشرة .. الوداية … وها صومعة حسان…والضريح كيبان من هنا ..فين تلقا بحال هاد المنضر ؟ والبحر من لفوق .. موقع جمع كولشي بين الطبيعة والحضارة والتاريخ

استنشق جان النفي وقال : وااو .. انا بعدا ماعندي منقول..حسيت بالراحة وانا كنشوف هاد المنضر

بقاو كيشوفو فتميم والرأي ديالو لاكن فاجئهم وقال: امم.. مابيهش .. مقبول

مشا ببرودة كيدور ويستكشف البيت وخلاهم كيشوفو فبعضياتهم ..ضحك جان على وجه بهية وقال

شنو كنتي كتسناي منو زعما يقول وااو عمري شفتو بحالو كأنك اول مرة تعرفيه مالك مصدومة ههه

كانو كلهم فالشرفة جالسين كيستمتعو بالجو ديال الصيف والمنضر الرائع بالليل.. كانت مد. بهية جالسة مرتاح فكسوة خفيفة كحلة من لحرير بخيوط رقاق من لكتاف ولحمها برونز كيبري وشعرها اسود لامع جمعاتو بمقبط .. وحداها جان بشورط قصير والباقي عريان ودرعانو وضهرو بالوشام وشعرو اشقر مخلط بشوية ديال الشيب وحاط رجليه فوق صندالة وفيدو كاس مشروب وقدامو قرعة .. بيناتهم كان جالس تميم فشورط كحل نايك وصدر رياضي مملوء واكتاف وضهر مزدوج وعلى رقبتو ومعصم يدو وشام خفيف وساعة يدوية كحلة ثمينة وخاتم مربع فصبعو لكبير واليد لاخرى فيها لسلسلة رقيقة من الالماس كتلمع وتلىءلء مع كل حركة ..كان لابس لسلسلة رقيقة فعنقو شبه السلسة اللي لابس مس جان وجالسين متكين كل واحد على كنبي فيدو كاس طويل ورقيق كيتجمعو

تفوه تميم وقال كيدوز يدو على شعرو

واخا الجو زوين مريح ولاكن كيجيب النعاس.. غنهبط لتحت نتحرك شوية

حطات م بهية الكاس وقالت ..حتى انا بغيت نتمشا فكورنيش شوية .. غنجي معاك

مس جان: انا غندوش ونعس حاس براسي عيان

تفرقو كل واحد فين ناض..نزلات مد بهية فسروال فضفاض طويل بالسيوروديباردور اسود من الحرير واسع وشعر مطلوق وصندلة خفبفة وكونها رقيقة كتبان بحال شي بنت صغيرة واصلة لتميم فلكتف وهب كتمشى حداه شادة ليه فيدو ويتهضر هي وياه جنب المقاهي والناس كاملين متبعين بيهم العين .. بقاو غاديين كيتمشاو حتى وصلو جنب اليخوت وفتح ليهم سيكوريتي السنسلة دخلو كيتفرجو

بهية : شوف هاد اليخت شحال زوين .. ديال ماليهم

شار تميم ببدو وقال: هادك اللي لهيه اللي حسن مولاه يمكن من بانكلاديش ..معلقة الراية تما

وقف حداهم العساس وقال بابتسامة : تبغيو تكريو شي يخت امدام ؟

تلفتات متفاجئة عند تميم وقالت :علاش لا

العساس: شوفو فين اللي بغيتو

م.بهية: علاش كلهم متاحين للكراء!!!

العساس: لا غير هادا وهاداك ولاخر

تميم: ونركبو فيه واخا ديال ماليه؟!!

بهية: مافهمتش؟؟ ولاكن علاش لا نجربو ياك كيكريوهم غيكونو ماليهم اللي بغاو

تميم: الى كان هاكا قوليه يخلي لينا هاداك ديال بنكلاديش زوين

تلفتات بهية تفاهمات هي والعساس وطلعو فاليخت .. شافت تميم كيضحك عجبو اليخت وقالت ليه

ماحسابنيش نتا من عشاق

اليخت اسيدي ..ايوا بالصحة

جلس كيضحك جنب القبطان اللي دخل بيهم للبحر وطلب منو تميم يجرب يسوق اليخت ..جلس بلاصة القبطان وجلسات جنبو بهية والريح كيضرب فيهم قوي وهما غاديين كيدورو فالبحر ووقفو شوية كيتمتعو بالمنضر..حيد تميم تيشورط وتلاح وسط الضلام وبهية مخلوعة غفلها وغطس ورجع طلع لاح شعرو لور وقال

يالاه ..نقزي. الماء سخون هنا

دارت يدها على خدها وقالت: انا !! اويلي ؟ لالا ماعولتش

تميم: يالاه جربي مالكي..صافي خرجي من القواعد والمثالية جربي تغامري.. يالاه

بقات كتشوف فيه وها كيزعمها حتى نقزات فالماء وطلعات دوزات يدها على شعرها للور وقالت كتسبح

واو .. زوينة السباحة بالليل

مشا كيسبح حداها وقال

ميمكنش تكوني مامجرباهاش هاد العمر كلو وعمرك جربتي تعومي بالليل

بهية :كنخاف

تميم:ودابا

بهية: احساس زويين ..باباك كيعوم بالليل ولاكن لا

بدات كضحك وعامت هي وياه حتى شبعات وطلعو رجعو بحالهم فازكين للبر ..شد ليها فيدها حتى نزلات كتقطر وقالت

وييلي واش غنمشي هاكا فازكة قدام الناس

عطاها القبطان واحد الفوطة كبيرة لاحتها عليها وحشمات تمشي للدار هاكاك لاكن جرها تميم وتيشورط على كتفو وقال

الناس الناس الناس صافي براكة يالاه حسبيهم مكاينينش كاع ..مع الوقت غتولفي

شدات فيه وقالت :اممم هادشي اللي كيخليك دير الزبايل بلا متخمم فحتى واحد

شد فيها كيضحك ومشاو بجوج فازكين قدام العادي والبادي والناس حاضياهم ..شافت كلشي كيشوف فيها وبدات تهبط راسها لاكن تميم عنقها وقال

عمتي وستمتعي ..صافي خلي الناس ضرب راسها مع الحيط..المهم نتي درتي اللي بغيتي(مع غميزة)

وجعو للدار دوشو وكل واحد مشا يرتاح والصباح شدو الطريق مباشرة لفاس . وصلو للفيلا الكبيرة العائلية لعائلة بهية اللي كتحيطها الاشجار والطبيعة جنب المدينة ونزلو لقاو العائلة كلها واقفة برا كيتسناوهم بشوق واهتمام ..مع النزلة اللولة ديال تميم تخلع وحل فمو تنفس وضار قال لمو

ووو شهاد الصهد ..مكاينش احسيجين

تلفتت كضحك وقالت : غتعود مع الوقت هادا الجو اصلا صحي .

تخنق تميم وداخ اما مس جان جان عارف الجو جا مستاعد كيشرب الماء اما تميم لسوء حضو خدا مشروب فالدار قبل مينطالق سخنو وتلاقا مع صهد فاس سكت ليه القلب مكانش متوقع غادي يتلاقا مع ديك الحرارة كلها خصوصا وان السيارة مجهزة باجهزة تبريد مشا مرتاح الطريق كاملة . تلف دوخو الصهد وبهية كتقدم ليه. العائلة اللي فرحات بيه. وبدات توريه هادا خالك ..هادا خالك الصغير ..هادي مك لالاك ديما كتهضر معاها . كانت واقفة فالجنب بنت بشعر اسود رقيقة فالجنب لابسة كسوة قصيرة وصندالة تقدمات سلمات عليه بالوجه وبادلها السلام بابتسامة

بهية: سلمى بنت خالتك مريم

رد بالدارجة معكلة وقال

متشرفين

عنقاتو جداتو وقالت

فرحاتي بولدي جا عندي فرحاتي بالكبدة. المعاودة كيهضر العربية

بهية : معلوم .. كيلقط شي شوية داكشي اللي قريتو. ههه

خلو لداخل وكانت الكليمة كتبرد ..مشا تميم تقابل معاها هوا وباه وجلسو كيشربو فالماء

تميم بهمس: عمرني شفت بحال هاد الصهد فحياتي

جان: هادا غير الصباح بلاتي توصل جوج وتشوف الصهد الحقيقي

دوز تميم يدو على صدرو وقال: ميمكنش هادشي بزاف.. كن بقينا فرباط حسن

جلسات سلمى حداه بابتسامة وقالت: تميم صافا .. مرحبا بيك في فاس.

تميم بابتسامة: شكرا ختي

خرجاتو سلمى من المجمع وداتو للحديقة كدور معاه وتجمع وهوا كيحل فمو ويسدو من الصهد

سلمى: كيقول ليك واحد المثل الله ينجيك من كلام الناس وصهد فاس ههه

مسح على وجهو بتعب وقال بكلمات متقطعة

شنو كديرو باش تغلبو الصهد هنا؟

سلمى: كندوشو بماء بارد ..سبراي مرة مرة ..صافي ..ولفنا .. فإيطاليا ماعندكمش صهد بحال هادا

تميم: ماعرفتش مهم البلاصة فين حنا ماشي بحال هاكا

دارت يديها بخجل وراها وقالت: امم. قالت ليا ماما باللي كتقرا على ادارة الاعمال .

تميم: هاد العام اخر عام بقا ليا

سلمى: كتقرا فلندن ياك

تميم: امم

سلمى: انا كنقرا فكندا ..كيجاتك قرايا فلندن زوينة

تبسم وقال: عادي نفس الروتين

سلمى : علاش مكتجيش للمغرب واش مكيعجبكش؟

تميم: لا غير فالصيف كنشافر مع صحابي مكيبقاش ليا الوقت نجي

سلمى: امم وفين كدوز الصيف؟

دخل اصابعه فجيب سروالو دجينز وقال ليها : كل عام كنتافقو انا وصحابي وكنسافرو .. شفر اتفاقي

تبسمات وقالت: اممم ههه غير نتا وصحابك زعما ههه ميمكنش تكون حياتك فارغة فيها غير صحابك ههه

هز كتافو بابتسامة وقال: زعما هه

طلات عليه كضحك وقالت: اممم خليني نحزر …إيطالية ؟ ههه

هز راسو كيضحك وقال: تقريبا..

سلمى:تقريبا يعني ميكست

تميم: تقريبا بحالي… اب مغربي وام ايطالية

ردت سلمى باستغراب : شهاد الزهر كامل !! طلعات مغربية يعني؟

هز كتافو وقال : كتآمني بالصدف ؟ هادشي بصح اللي كاين ..وكتقرا معايا فلندن

سلمى: لالا بزاف على الزهر ..ميكونش عند ميول للمغربيات ههه

رد كيضحك: لالل بصح مكانتش عارف اصلا باللي مغربية.

سلمى : وماتقوليش حتى قرايتها فلندن صدفة! ايطاليا ..المغرب..لندن!! ماشي بزاف على الصدف

ضحك وقال: من بعد ما تلاقينا هي بغات تكمل قرايتها معايا

سلمى: وحتى قرايتها معاك صدفة ههه؟ ميمكنش

هز حواجبو وقال كيضحك: كنتي ديري التحقيق غتنجحي فيه. هه

الدجاج مدغمر يا لاللة والشلايض مغربية. ها الزعلوك ها خيزو ها بطاطة ها الباربة. كل حاجة مشرملة فطبيسلها .. الفلفلة مشوية فالطباسل والتكتوكة فطويجنات صغار ..الريحة كتعطي من برا كتشهي..تجمعو كاملين على الطبلة دالغدا كيتغداو والمعالق والفراشط والسكاكين كيتقرقبو ..حطات الجدة يدها على ضهر تميم وقالت

واش كيطيبو ليك شي طويجنات وشي لحيمات بالبرقوق ودجيوجات مدغمرين ولا والو فديك ليطالي

ضحكات بهية وقالت: كولشي الحاجة كنوجدوه حتى الدارجة كنهضرو بيها.. والطباخة اللي عندنا تبارك الله عليها حتى هي مغربية وحتى كسكسو والحريرة كتوجدو لينا

تبسمات الجدة وقالت: ايوا هاكاك كنبغيك..ماتعملشي بحال شي وحدين مشاو للخارج ومابقاوش كيهضرو العربية مراا مع ولادهم ..تقول كتحشم بيهم ! خلاوهم كيهضرو لغة اجنبية وماعلموهمشي العربية ..هاهوا تبارك الله رجع بلادو ..على الاقل كيفهم شنو كنقولو وكيعرف يجاوب واخا كيعثر ماشي مشكل دابا مع الوقت يتسرح ليه اللسان ..ياك اولدي تميم. الكبيدة

تلفت شاف فيها كيضحك وحرك راسو وقال

بصح

طبطبات عليه وقالت :يخليلي ترابي الغزالة .. منخافشي على بهية ربات وعرفات شنو ربات ..يخليلي الزين

الحاجة مابغاش تسكت ..مادا بيها تجمعات عندها العائلة وعمرات عليها الدار .. اما سلمى حاولات تكون صداقة مع تميم قدر الامكان .. النهار كامل وتميم داخل خارج للدوش..يدوش ويجلس ساعة ويرجع يدوش حتى طفش ..اما بالليل حلف النعاس مايجيه .. ماخلا حتى بلاصة منعس فيها ..فالسفلي..فلاكاف.. فوق كنبي.. فالجردة ..البالكون فوق الارض..والو وتقول واش داك الوحش ديال الصهد بغا يخفاف..عطاوه كاع الفرفارات ديال الدار والشوم مازال كيضرب..فاق الصباح عرقان كيقطر ودايخ مشا نيشان للحمام خوا عليه المام وهبط لقاهم كيفطرو .ماقدر لا يهضر لا يفطر جلس على الماء هوا وباه هاك بالاك سخفانين فالاخير قررو يرجعو للرباط . دارت بهية السبة باغتتاح الكازينو وقالت انها خاصها توجد ليه وخصهم يرجعو .وفعلا شدو الطريق نيشان رجعو لدارهم عاد رجعات فيهم الروح وتنفسو مع تول خطوة خطوة خطاوها فالدار

جان: هاداك الجحيم ماشي فاس..كيفاش الناس قادرين يعيشو تما

عض تميم على شفاهه وقال كيصفر: ووووو ووو بزااف على الصهد الاكسيجين مكاينش!! احسن حاجة شريتو الدار هنا شو الجو هنا اه متافق معاكم ولاكن فاس!! فووووو

كانت زيارة غير موفقة لمدينة فاس وماخداتش حقها كما يجب وبهية ماشبعاتش من عائلتها كما كانت باغا ولاكن بحكم تعاملها السياسي مع تميم باش مينفرش ويقوليها نرجع بحالي لإيطاليا فضلات انها تردو للرباط مدام انه رتاح فيها وعجباتو المدينة وخصوصا الدار وموقعها .. الصباح كيهبطو لاحدى المقاهي اللي تحت منهم يفطرو والغدا كذلك فإحدى المطاعم اللي حداهم فمارينا والعشية كيهبطو لليخت يجلسو فيه او يدورو بالليل .. كانت اجواء رائعة دوزوها فالايام الاولى حتى لهنار افتتاح اكبر كازينو من سلسلة كازينوهات البيستي . وكان هاد الكازينو بشراكة مع اكبر واشهر اوتيل بالرباط وبحضور نخبة ومن الشخصيات والطبقات الراقية ومجموعة من المشاهير والمغنيني اللي قامو بافتتاح هاد الحفل الرائع .

من بين الحضور كانت مدام بهية ومي جان كيرحبو بالحضور وكل شوية يوقفو مع واحد حتى وصلو لسيدة شقراء الشعر انيقة ورشيقة خمسينينة وعلى وجهها اثار عملية التجميل ..توقف مس جان بابتسامة وبالانجليزية خاطب السيدة وقال

مدام سارة ‏علوي

هيط راسو باحترام وابتسامة وشاف مد بهية وقال: حبيبة .. نعرفك على شريكتنا صاحبة الاوتيل مدام سارة العلوي

تبسمات مد سارة وقربات شلمات على بهية من الوجه وقالت

مدام بهية بن موسى البيستي..تشرفت بمعرفتك ..

طبطب مس جان على يد مد بهية وقال بابتسامة

نخليكم تعرفو اكثر على بعضياتكم حبيبة ديالي

مشا وخلاهم بجوج مع بعضياتهم جلسو على كنبة بيضاء حدى بعضهم وبدا يتعرفو اكثر ..

مدام بهية: عاود ليا عليك راجلي جان بزاف .. الصمعة ديالكم سابقاكم

تبسمات مد سارة وقالت: بصراحة ليا الشرف نعقد معاكم هاد الصفقة .. كما شفتي الاوتيل كبير ومشهور كان مفتاقد لشي حاجة تحييه اكثر .. وكنت كنفكر فشنو اللي يزيد بيه للقدام اكثر ويزود شهرة وارباح .. ومللي سمعت باللي كنتو كتفكرو تفتحو كازينو فالمغرب ساعتها ماترددتش نهائيا وتاصل وكيل اعمالي بوكيل اعمال مسيو البيستي ..قترحت عليه هاد الشراكة ..وقتاوحت عليه يفتح عندنا هنا فالاوتيل نضرا لبزاف ديال الاغنياء كينزلو عندنا هنا .. وفرحت بزاف ملي وافق على هاد العرض عادي تكون صفقة ناجحة

تبسمات بهية وقالت : كنحييك نعمة المرأة .. سيدة ناجحة ومتوقفاتش حياتها فنقطة وحدة بلعكس كطمح لماهوا اكثر

ابتسمت سارة وقالت: بصراحة منخبيش عليك ..حنا النساء حساسات بزاف ..خصوصا فاش توفى الزوج ديالي وخلا ليا هاد الاوتيل هادا باللي فيه ..وخلا ليا بنت مراهقة هازة مسؤوليتها بوحدي .. كان خاصني ضاروري نوقف حيت المسؤوليات مكتسناش.. وانا عندي مسؤولية كبيرة

تنهدات مدام بهية وقالت: المراهقة اصعب سن.. يكون ليك فالعون واخا البنات كيقولو حنان ومهدنات

ضحكات مدام سارة وقالت: كيقولو ولاكن خصهم يجربو..بنتي انا بنت لفشوش اكثر من اللي كتخيلي..وكانت متعلقة بباها بزاف .. لدرجة ماقدرناش نرسلوها تقرا فلندن كما هي بغات فضلت تبقا تحت المراقبة ديالي ..ودابا مللي هزيت مسؤولية الاوتيل غتزيد تصعاب عليا الحياة اكثر

بهية:هي فترة وغتفوت ..شحال عندها بنتك دابا ؟

مد سارة: عندها تسعطاش لعام ..هاد العام قولي راه غادية فالعشرين

بهية: فكرتيني فولدي فاش كان قدها .. كنت كنتبعو فين ما مشا وكنخلي كل شغلاتي..دابا شوية تهدن داكشي علاش كنقوليك مرحلة وغتفوت

وقفات عليهم نادل هاز حلوى مدها ليهم وخداو الحلوى وبدلو الموضوع ..تبادلو الارقام دالهواتف وبينما هما كيهضرو مشا عندهم تميم بدجينز وتيشورط بيضاء كيخاطب ماماها ..تلفتات بهية بسرور ووقفات قائلة ..تيميم ..اجي نعرفك على مدام سارة .. شريكتنا وصاحبة الاوتيل

مد يدو بابتسامة سلم عليها وردت عليه حتى هي بابتسامة قائلة

اووه ماحسابنيش هاد الوسيم هادا هوا ولدك !!

رد عليها تميم وقال: هادا من دوقك امدام

بهية: شفتي شحال كبر مشاء الله ..الوقت كيطير

تستفات قدامهم الصحافة بسرعة كتصور وحتى هما وقفو ولف تميم يدو بابتسامة وراء ضهر مو وتخادت ليهم صورة مع سارة الى جانب الصور اللي تخادت فداك الحفل للجميع ولاحضور حتى هما .الشيء اللي عمل ضجة كبيرة وانتشرات بزاف عبر المواقع واصبحت خبر فيد متداول وتحليلات ونقاشات فيد كل واحد حامل هاتف دكي

ولأن المواقع والتطبيقات عامرة بالشباب والمراهقين عملت صورة تميم ضجة ولقات شهرة واثارت جدال العديد من الصفحات واصبح حديث الساعة .. ثار اعجاب الفتيات وبقات الصورة تنتاشر حتى وصلات لفتاة مراهقة جالسة فبيتها هي وصاحبتها على البيرو كيراجعو دروسهم ..شدو التيليفون كيضحكو وقالت وحدة لوحدة

ناري شوفي شحال غزال !! علاش مكنتلاقاوش حنا بحال هادو علاش اصاحبتي ..

ردت: واش عرفتي هاداك احبيبة ولد من هاداك باه طالياني عندهم كازينوهات وارتينهم ابا عن جد..ومو بنت شي واحد سياسي ولا ماعرفت تاهي عندها الحبة ..هاداك راه ماشي غير لاباس عليه فات لاباس عليه لهيه واخا يكون خايب يرجع زوين

قالت: اوييلي اشمن يرجع خايب مالو اش لابس كاع كلها دجين وتيشورط.. بقات فلداخال اصاحبتي شوفي الفورمة والوقفة والزين والضحيكة ..اي واحد راه كيلبس سروال وتيشورط وعلق سنسلة ومكامة ماشي ضاروري تكون غالية . المهم بقات فالتاويل والشخصية

ردت: تي نوووضي راه الفلوس اللي كتوقف بنادم هاكاك هههه ضربي على ديك لعيبة اللي فيديه كتشقشق بالديامند بالسيف مايحس براسو ويوقف مقاد

قالت: يااختي فنن .. غا واحد بحالو والى بغات تجي الموت غير تجي ..

دخلات عليها مها على غفلة لقاتهم كيتفرجو فتيليفون ومشات ليهم قائلة

هادي هي غنراجعو غنخلص انا السوايع ان لين فير هاكاك ..باغا تتعاودي العام. اري داك تيليفون لهنا

نتراتو ليها لقاتهم كيشوفو فصورة جامعة بين تميم ومدام. سارة ومدام بهية وعبسات بقات كتشوف وتكبر وتلفتات عندهم قالت ليهم منين جبتو هاد الصورة ؟

هضرات البنت تانية وقالت: هاديك ديال واحد الميليالدير باه فتح كازينو فالرباط ..

كبرات الصورة مزيان كتشوف ووجهها غادي وكيصفار وخرجات من تما بالزربة مشات للبيت كتجري دوزات اتصال فتيليفون بينما بنتها شكات فشي حاجة ماشي هي هاديك ومشات تبعاتها يالاه بغات تحل ليها الباب تقوليها مالكي سكمعتنها كتهضر فتيليفون وتقول

شوفي انا غنسيفط ليك واحد الصورة دابا شوفي واش هي ديك بهية بن موسى ..دابا دابا غنسيفطها ليك شوفي واقيلا اختي ولدك بان

هزات المرى راسها تخلعات وقالت : علاااش تابعاني ؟؟ فين صاحبتك؟

ردت البنت مصدومة وقالت: سمعتك كتقولي لطاطا. الهام ولدك بان !! كيفاش ولدك بان ؟؟

هزات السيدة صبعها شارت للباب وقالت: خرجي وسدي الباب تحركي يالاه

جلسات بنتها قدامها وقالت: والله منتحرك من هنا حتى انا بغيت نعرف

ردت المرى فتيليفون كتقول: الوو الووو ..الهااام

سمعات صوت فتيليفون كيقول..عتقيني عتقييني

طارت كتفتف هزات جلابتها وبنتها حتى هي تبعاتها كتجري بالبيجامة مشات جرات صاحبتها خرجاتها وقالت ليها على وجه السرعة

سيري دابا حتى نعيط ليك سيري

البنت: اويلي مالكي اش واقع؟؟

رد ت : صافي سيري تا نتي شحال فيك من بعد نعاود ليك

خرجاتها وسورتات الباب اما معا مشات كاع ماتسناتها حتى لحقات عليها فطاكسي لباب احدى الفلل فاجأتاها ..تلفتات المرى كتندب وقالت :اويييلي تابعاني بنت لحرااام ..والله لا بقات فيك

خزات بنتها كتافها وقالت :بغيت نشرف با سيدي ونتي مالكي

مشات مها كتولول وتردد: باك سيدك الهودية واخا والله لا بقات فيك

دخلو كيجريو ويدقو حلات ليهم مرى بالفواطة مخلوعة شافتهم داخلين مدرمين وقالت

ياك لاباس اش واقع ؟؟

ردت المرى: فين مي؟؟ فين مشات والهام فين هي؟

الخادمة: مك فالحمام باقي ماجات والهام قالت ليك غندخل ندوش

ردت المرى بسرعة وقالت : صافي صافي غير شوفي با لايبغي شي حاجة خليك هنا

طلعو للبيت حلوه ودخلو لقاو الهام طايحة على واحد الكرسي بواحد الديباردور وصدرها كبير خارج من الجناب وواحد لكولوم كحل سخفانة وفيدها تيليفون كتشهق..غير شافتهم وطاحت على ختها بكل تقلها وتجبدات فالارض كترعد

ولديييي ياختي ولدييي..ولديييي ياسميرة ختي ..ولدي تلاتة وعشرين عام ماشتو ماعرفتو ..

شداتها سميرة كتنوضها وتبكي حتى هي وتعنق فيها وبداو يعدو بجوج والبنت واقفة مصدومة كتشوف فيهم وتسول هنا ولهيه مافاهمة والو

شكون هوا شكوون فين شافتو؟؟ هضري وماما وامييييي واغتسطيني

دفعاتها مها فشلانة كتنخصص وقالت

واسيري بعدي مني علاش تابعاااني بعدي مني

وصلات مهم الكبيرة سمعات النواح من لتحت والعكسة على راسها ودخلات لقاتهم بجوج طايحين فالارض مشادين كيتجابدو ويتلواو والبكا تقول كنارة

بدات كتجر فيهم وتسول شكون اللي مات شكون؟؟ شكون

جرات سميرة تيليفون وراتها التصويرة وقالت

ولدها اللي داو ليها صلاتة وعشرية عام هادي

شدات الام تيليفون كتشوف وقالت فين واش هادا

طلات البنت المراهقة حتى هي وقالت بصوت مرتفع

اويلاااي تميم البيستي هوا ولدهاااااا!!!

ضربات الام تيليفون على صدرها بالجهد ويبسات وضربات السنة مع السنة وطاحت فالارض

اممممممممممممممممعععععع

دارت مدام بهية رجل على رجل فالشرفة ديال الدار المطلة هلى الوداية وقالت

ايوا مبروك علينا ن جاح الافتتاح

تكا تميم على ركابيه وهوا جالس قدامها ودار ضحكة صفرا وقال

هي غنرجعو بحالنا دابا

هبطات حاجبها وقالت كضحك

ومالك زربان ماعجبكش المغرب؟ سير سافر مع راستك ها مراكش ها اكادير ها طنجة ..هطا الله البلايص زوينين فين دور

تميم: ولقرايا اللي بقات ليها سيمانة حتى هي ندورها معايا؟

دورات وجهها كضحك وقالت: ايوا اللي شمعك يقول ميت عليها ..باغي ترجع باش تقرا

رن ليه الهاتف وناض من حداها وهي كتبعة ليه العين وكتردد

امم ..لقرايا كتعيط تعطلتي عليها مسكينية..ماخلاك تتهنى بحتى دقيقة

قلبات عينيها وشافت قدامها كتلوح برجلها وتمنضر ، جا جلس قدامها مس جان وتيليفون فيدو وقال بجدية

فين تميم؟

شارت براسها للور

هبط يمكن لقهوى

حط يدو على ركبتها وقال بجدية

سمعيني: المدير اللي غنعين للكازينو لبارح طاح بكريز.. غادي ندخلك معايا هاد المرة فشغلي ولاكن راه ماعندي مندير.. بنا ان اصلا مدام سارة واقفة على شغلها فالاوتيل ونتي وهي مفاهمين بغيتك نتي ديري الكازينو هنا فالرباط.. حتى نشوفو مدير اخر ولا يبرا هاد المدير حيت ميمكنش نلقى مدير نتيق فيه فسيمانة ولا شهر ..نتي عشتي معايا ووقفتي معايا وعارفة الشغل كيفاش كيمشي ..هادا علاش غتبقاي نتي وتميم هنا وانا غنرجع لإيطاليا وطبعا غنبقا نجي ديما

خرجات عينيها وقادات الجلسة وقالت ليه

هيههممم…انا وتميم!! كي درتي ليها هادي وهوا عاد دابا قالي نرجع بحالي وناض مشا ..من سابع المستحيلات يخلي لندن ويجي يقرا هنا راك كتعرفو كتر مني

سد جان عينيه وقال: عارفو كتر من راسي وعارفك قادة عليه فاش كتبغي .. غنعرل عليك ومن الاحسن يكمل قرايتو هنا حسن من المشاكل اللي عشنا معاه ..شنو دوز علينا وانا وياك مجموعين اما دابا غنتفرقو كل واحد فبلاد ترقعي الاسوء..من الاحسن باش نشوفو شغالنا ويرتاح بالنا يجي يكمل لعام اللي بقا ليه هنا .. كما كان الحال المغرب ماشي هوا لندن وكاين شوية دالامان

تنهدات سادة عينيها وقالت: جان راه المسألة كبر من هاكا ..ماتنساش العاىق الكبير اللي خلاني مامجيبوش كاع ..نتا راك كتقولي خسري ولدك .. انا متبغيتش يبقا اصلا هنا مابغيتش شي مشكلة تخرج ليا من الجنب

جان: كولشي غيكون مزيان ..انا تايق فيك ..وتايق فيه حبيبة اصلا ميمكنش نعيشو هربانين بيه طول عمرنا

وقفات بهية رقالت بجدية

انا مستعدة نكمل حياتي كلها هربانة بيه من ارض لارض

تميم: كون هادا اللي مستاعدة تكملي حياتك هربانين ومن ارض لارض؟

تلفتات بسرعة لقاتو جاي عندها وقالت فدهول وتوثر

والو غير كنت كنضحك انا وباباك ..ههه

ناض جان وبط راسو كيشوف فيها بعينينه وقال

نعول عليك ..اوك

بلعات ريقها وحركات راسها ليه مشا وجلسات كترمش وقالت

احمم: تميم حبيب ديالي..اجي حدايا بغيت نهضر معاك

يتبع...