قصة موشومة الصدر

جاية من الخدمة حاسة بظهرها تقوس من كثرة العياء .. عينيها تتحلهم و تسدهم بالسيف .. رجليها غادية و تتجرهم كانو كيف الهلام فهاد اللحظة .. كلثوم من البنات لي ما تيشوفو لا هنا ولا هنا ملي تيحطها الطوبيس تتوجه نيشان لدار تتجي مهدودة بالخدمة ما عندها وقت لا للجيران ولا دير معارف فالحي .. معارفها كاع خارج الحي و بعاد على سيكتور لي عايشة فيه ..

بمجرد ما وصلات للباب خشات يدها بالثقاالة جبدات السوارت فتحات الباب الأول لي مشاركاه مع الجيران لي فوق منها و عاد فتحات بابها .. مدات يدها تتكسل شعلات الضوء لكن ما تشعلش .. عقدات حواجبها داخلة تتنگر ..

_ مال هاد زمر تاني .. شكون صووطاك جنون غا انا وياهم لي فدار !!..

رمات سبرديلة و دخلات للكوزينة شعلات الضوء لكن تا هو ما تشعلش زيرات على سنانها بغيض و هي كضوور على كااع مصابيح البيت تتشعل و طفي .. لكن واضح ان الضوء مقطوع.. خرجات زعفانة للزنقة كطل على ديور الجيران لكن كوولهم عندهم الضوء حتى لي فوق منها .. شعلات فلاش التيليفون و دخلات تتضرب برجليها طلعات راسها للديجانكتور تتقلب واش طايح حتى تفاجأت بيه ما كاينش .. لقات غير الحفرة يديها و الريح .. وسعات عينيها بصدمة ما فاهمة اش واقع

_ اويلي شكون نتگو ؟؟

اتصلت في الحين على مول الدار يديها تيترعدو بالعصااب ما فاهمة اش واقع و شكون زول الديجانكتور و علاش !! اتصلت مرة و زووج و تلاثة .. لكن لا مجيب .. و بمجرد ما اتصلت المرة الرابعة طفا عليها التيليفون .. زيرات على شفايفها باسنانها و نطقاات بغل كلها تتغلي ..

_تطفييي عليا تيلييفووون اولد الحرااام!!... بغيتييي الشووهة ؟

خرجات تتضرب فرجليها كاع الطاقة لي مشات مع الخدمة عاود رجعات من جديد بقوة ما تعصبات .. زيرات على يديها و بدات تسرسر فالسرسار ديال دارو و تدق حتى طلات عليها بنتو ..

-مالك اختي فارعة علينا الباب ؟ غا بشوييية غاتهرسيه ..

طلعات وجهها لعندها مناخرها تيصووطو و ودنيها حماارو رووحها واقفة لها فالحلق بقوة الاعصاب

- نواال كلمي ليا بااك ..

قلبات فيها عينيها و دخلاات تتعيط عليه .. خلاتها واقفة تتضرب فرجلها مع الارض و تعض شفايفها طاالعة ليها الگنااوية .. جاية للدار مهلوكة من الخدمة ترتااح حتى لقات راسها قدام صدمة الضوء حتى هو ..!

طلعات عينيها بان لها الباب تفتح و خارج منه مول الدار داير فيها نظرة حادة كرشو سابقاه و راسو صلع هاز فيده باكية تالگارو و اليد الاخرى تيليفون .. شاف فيها من التحت للفوق و نطق بنفوور ..

بوجمعة : ياك لباس ؟؟

وسعات عينيها و ضحكت بغضب ..ما كرهاتش طير عليه بقجة ...

كلثوم : شنو هادشي ( اشارت للدار ) شنو هادشي درتي ليا اسي بوجمعة ؟؟

بوجمعة: ( هز حواجبه كيتصنع عدم الفهم) شنو نتي دقيتي عليا ؟

كلثوم : (نطقت بانفعال) فين الضوو ! علاااش قاطع عليا الضو؟؟

بوجمعة : ياك الالة نتي لي قلتي بغيتي مگانة بوحدك ؟ سيري ديريها دابا !!

كلثوم : ( وسعات عينيها) يااااك؟؟ هذااا كلامك

بوجمعة : ( حرك راسو بالايجاب) اايه هادشي لي عندي .. عجبك الحال مرحبا ما عجبكش سيري شووفي الحل لراسك ..

حسات بالدنيا ضارت بيها فهاد اللحظة .. حسات بالشمتة و قلة الاصل لي خدم معاها و هي مصرفة فيه كل خير .

كلثوم: ياك اتفقنا ؟؟ ياك اتفقنا غانجددو الكونطرا و نزيدلك مية درهم

بوجمعة : ( نطق ببرود ) هذاك البلان ما مخرجنيش ..

كلثوم : (ضحكت بعصبية) و دابا نتا رااا. جل نتا؟؟

بوجمعة: الالة انا مااشي را. جل و معاك نتي مااشي را. جل ...

كلثوم : ( كتشاالي بيديها و تعلي فصوتها) نيييت مااشي راا. جل لي بااغي تحگر على بنت صغر من بنااتك راك مااشي را. جل .. بااغي تشفرني عين باااين .. عاطياااك سبعة تالمليوون ديال الرهييين و بااغي تشفرني الشلاااهبي ..

بوجمعة: (شد لها يدها البيضاء زير عليها ) .. هاد اليد لي تهز عليا نقطع مها .. جمعي راااسك لا ندخل نرمي لك حوايجك تباتي هاد لليلة فالزنقة ..

كلثوم : ( نطرات يديها ) حدددك تم تقييس فيا ندير صبعي فودني و نجمع عليك أمة لا إله الا الله ( شافت فالدرب) .. هاهوما نيت تيتجمعو .. تلووح ليا حوايجي للزنقة مكاين قانون فالبلاد ولا شفتينا عيالات وحدانيااات بغيتي تحگر علينا هاهاااي و الله تا نخرجوك من عين الابرة ..

يالله غايرد و نزلو بناتو كي العونيات كل وحدة ماتخرج من باب بقوة الغلض وقفو ورا باهم باغيين يتحاماو ..

نوال : (دافعة صدرها لقدام) .. مالك اختي ما نخافووش .. بان لك بّا درويش ما كيهضرش بديتي تعلي عليه فصووتك تخلعيينا ولا شنو ؟

كلثوم : (شافت فيهم كلثوم و ضحكات )..جيتييوو العصاابة جاييين تحامااو تريكة الشفاارة ماخلييتو مول حاانوت ماخلييتو مول الحووت ماخلييتو خضاار و بااغيين تكملو بياا ..

وحدة منهم بغات طير عليها و رجعها باها بيدو عارف المشكل غايكبر..

نوال : ( تدفع فيد باها) .. خليني مني ليييها اباا طلع نتاا... خليني نشتف على مهااا الكلبة ..

أميمة : (تتجر فيها) .. خلي الخانزة ما تستااهلش تحطي فيها يديك ما عرفت اااش يصحابها عند راسها دايرة لنا فيها سيدة اعمال داخلة منفخة خاارجة منفخة .

كلثوم : ( خلات فمها بصدمة رجليها بدااو يترعدو بالفقصة) .. هادشي بااش سخااكم الله؟؟ تنزلو تحاماو عليا كاملين ؟؟ ( شافت فيه) هادي اخرتها معاكم ابوجمعة فينما تجي عندي نمد لك ؟؟ مزال گاع مارضيتي ليا الف و خمس مية درهم لي مسلفاك و قاطع عليا ضوو !

أميمة : (خرجات فيها عينيها) شناااهي .. الف و خمسمية درهم .... هاهااي منين اختي بااغة تلسقي لنا مونتيف ! ..

كلثوم : ( ما جاوباتهاش شافت فيه غير هو لي قلب وجهو ما تيشوفش فيها ) فين ضميرك فين غاتمشي بيهم غدا قداام الله راك مرييض رجل هنا و رجل لهيه اتقي لي خلقك بقى تاابع هااادو حتى يخرجو عليك اما انا الضوو ندخلو ندخلو كيتك نتا لي ديتي الدنووب فهاد شعبان ...

نوال: (دفعاتها على الباب) وااسيري تمووتي .. ااايه دينا لك فلووسك لا عندك شي اتباث سيري دعينا .. (دخلاتهم و سدات الباب)

كلثوم : ( تجمعو دمووع فعينيها و غوتت بحر جهدها و بدات كضرب فالباب برجليها ) .. غاندعييك لله ياخد فيك الحق .. الله يااخد فيكم الحق اتريكة الشفااارة اشلااهبية .. ان شاااء الله تصرفو دووك الفلووس فالسم لي يدووز فعرووقكم ياااربي رااك تتشوف ...الله يعطيكم البلا تبلاااو بين و تبعدو من عبااد الله ..

أول مرة تعيش هاد الإحساس بين ليلة و ضحاها لقات راسها جالسة وسط الظلام .. ماعندها لا سند و ضهر يحميها .. هي وحدها وسط الذياب .. وسط ناس باغيين ينهشو فيها بدون وجه حق .. شدات قلبها لي حساتو تزير و جلسات فوق سداري تتبكي و تنخصص .. الدنيا ضارت بيها ما عرفات ما تقدم ولا ما توخر .. كيقول لك الى تلفتي شد الارض .. هذا هو المثل لي مشات بيه فهاد اللحظة .. شنو غادير فهاد الليل شنو عندها ما دير غير تجلس تتسنى الصباح يصبح عليها حتى التفكير ما بقاتش قادة تفكر ..

كلثوم : ( شادة راسها) .. حسبي الله و نعم الوكيل فيكم الشلاهبية .. العصاابة ...

جلسات فالسيجور تتسمع ضحكهم باصوات عالية و هي دمووع فعينيها شلال .. خرجات تتبطش فالظلام و سدات الباب مباشرة توجهات للحانوت لي ما سلماتش من أسئلته الفضولية و لا حتى الاشخاص لي كانو عندو لأنها بااين علينا شاابعة بكاء ..خذات منو الشمع و رجعات تتعتر فجلايلها حتى حسات بشي حد وقف قدامها ...

كلثوم : (طلعات عينينا تتشوف فيه) .. نعام ؟

- مالك أختي سمعتك كضاربي مع السيد لي كارية عندو

كلثوم : ( دموعها بداو ينزلو من جديد) شكون نتا ؟؟

- ( رفع عواجبه) .. ما عرفتينيش ؟؟ انا جارك ساكن فراس درب .. الدار لي فيها قهوة التحت..

كلثوم : ( تتمسح دموعها) .. اه اش بغيتي ؟

- (تنحنح باحراج) .. سمحي ليا ما ديريهاش مني قلة صواب .. كنت جاي من لاصال بنتي ليا تتغاوتي مع بوجمعة .. گلت لا كاين فاش نعاونك ( ضرب على عنقو) .. رگبتي ليك ..

كلثوم : ( شهقت شهقة حارة و نطقات بصوت مغنعن) .. بغاو يحگرو عليا .. راهنة عندو بسبعة تالمليون بغا يديها لي .. بغاني نجدد معاه الكونطرا و يدير فيها شروطو هو يعلم الله ااش بغا يدير قلت له عطيني غا فلوسي ما بغاش ( تتمسح دموعها) .. اليوم جيت من الخدمة لقيتو قاطع عليا ضو و قال ليا سيري ديري مكانتك ..

- ولد الكل. ب .. ( مسح على وجهه) هادي رجلة يتقاوا على درية ..!.. فين الواليدة ديالك ماكايناش؟؟

كلثوم : ( حركات راسها بنفي).. هاديك خالتي .. عايشة معاها هي و بنتها ... و لكن انا لي متعاقدة معاه .. ولد الحرام خدا ليا فلوسي و بغا يشفر ليا حتى فلوس رهين بغا ينكرني

- ( جبد تيليفونو) مشاكل صافي .. هذاك معرووف فالسيكتور شفار .. هذا لي واقف قدامك كان تيجي عندي للقهوة تيشرب و یگول للدري قيد حتى جمع حصيصة مابغاش يخلص ليومنا هذا ..

كلثوم: ( تتمسح دموعها) .. ماعندو فين يمشي بهادشي رااه مريض بالكلاوي رجل هنا و رجل لهيه نتحاسبو غدا قدام الله ..

- ( تيدوز يده على لحيته) .. عرفتي اش ديري دابا .. ماتبقايش مريحة فالدار بوحدك فضلام .. سيري دقي على الواليدة ..( اشر لها للدار ) ديك الدار اللخرة .. انا را ما بايتش تما اليوم كاينة غير هي و الخوادرية و مرات الخوادري

كلثوم : واش نتا ولد الحاجة أسماء ؟؟

- ( حرك راسو بالايجاب) ايه سميتي منير .. انا لي شاد ديك القهوة دالتيرسي لي فالطرف ..

كلثوم : ( حركات راسها) .. اه مزيان .. غا سمح ليا ما نقدرش تنرتاح غا فداري .. هاني بت كااع اليوم اش ندير غدا ؟

-غدا يفكها لي وحلها .. نمشيو ليه ولا نشوفو شي تخريجة ( حرك راسو تيفكر).. عندي واحد عشيري خدام ف هادشي ديال تسمسارت كيقضي الاغراض عندو المعارف فينما مشا .. نشوف معاه لا كان ممكن تدخلي الضو ديالك كاع نتي و تهناي !

كلثوم: ( بلعات ريقها و نطقات بأمل فعينيها) .. زعما نقدر ؟؟ كنت عوالة نمشي صباح للمحكمة ..

- (حك ذقنه) .. عرفتي اش غاديري .. سيري دابا رتاحي ما تفكري فوالو الحل عند عشيري هو يقضي لنا الغرض نعسي على جنب الراحة ..

كلثوم : ( تنهدات) الله يرحم ليك الواليدين اخويا منير .. شكرا بزاف ..

- بلا جميل اختي .. (مد لها تيليفون) .. كتبي ليا نمرتك .. غدا نعيط ليه يجي عندي للقهوة و نعيط ليك نلاقيكم و إن شاء الله يكون عندو الحل هو كيفهم فهادشي ..

كلثوم : ( كتباتها ).. شكرا اخويا لهلا يخطيك ...

رجعات للدار تتنهد نوعا ما براحة .. مسحات دموعها و خذات تيليفون تتصل بخالتها لكن لا مُجيب .. اتصلات حتى على بنتها لكن لقات تيليفونها طافي .. شدات فراسها ما عارفة اش دير .. واش تخرج تبات عند صاحبتها و تخلي ليهم الدار الشك غايبقى ياكلها و لا تنعس فالظلام و الله مدبر حكيم و شنو غايطرا لها اكثر من هاد الفقصة لي تفقصات اليوم .؟

تنهدة بقنوط هزات تيليفونها شعلات الفلاش تتشوف فين تحط رجليها فينما ضورات راسها تلقى الظلام .. دخلات للكوزينة كيبان لها كركور ديال الماعن ماعندها كي دير تغسلهم.. شعلات الشمع لي شرات ...جبدات ايندومي تطيبها و قلبها غايطرطق بالفقصة و الشمتة..

كلثوم : ( حطات طبيسيل ايندومي قدامها ) ..انا بغيت ربي يطفي عليك ضو عينييك ان شااء الله ...

في احدى البيوت لي كيتردد عليها من الحين للااخر .. جالس فوق كنابي ديال الجلد قهوي عريض مفرق رجليه و جوان بين يديه كيسف منو و يبخ فالهوا ... قدامو طبلة من الطبالي لي محطوطين فالبيت .. عامرة قراعي دالشراب و القطعة باش يدوزو القريعات محطوطة فطبيسلات صغار .. ما كانش وحدو و انما كانو مجموعة ديال الصحاب .. صحاب القصاارات و الجلسات لي موالف يديرهم عند سميرة و الملقبة ب "سمر" ..

سمر : (حطات راسها على كتفو ) غبرتي عليا المنشار !

أيوب : (دور يدو مور خصرها كيتلمس فيها) الخدمة خلاتنا بلا قصارة ازين ...

سمر : ( تتلوى بدلال بين يديه) ... توحشتك ابو عيوون سود ..

أيوب : ( كينطر من الكارو ) .. آودي ما شناشي ..!! ما هزيتي حتى تيليفون تسولي علينا !

سمر : (تتحلون عليه ) .. ديما مشغول .. حتى لا صونيت عليك ما تردش داكشي علاش تنخليك حتى تسالي و مرجوعك لسمورة (قبلاتو فخده)

تحنى حتى طفى الكارو فالطفاية و طلع راسو شاف فصاحبو كيبان له معنق صاحبتو و كيتعاود معاها خاشي فيها وجهو

أيوب : عبد الحق واحد منير ما بانش .. الق*** كنتسنا فيه غا هو عندي مايدار !

سمر : ( شدات فيده زيرات عليه و نطقت بانفعال) كيفاش ماغاتباتش ؟

أيوب : ( علا حاجبو فيها).. بغيتيني نبات ازين؟

سمر: (بدلال) فاش ما تكونش هنا الواليدة الداار داارك احبي ..

أيوب : ( ضحكك بخشونة ) مالها الحنانة ما عارفاش بنتها گالبة دار بورديل ؟؟

سمر : ( علات فيه حواجبها و هزات كتافها) زعما راك عارفني ما كيدخل لداري غيرك ..!!( شافت فصاحبو) .. و صحابك لي تتجيب !

أيوب: ( قرب لودنها عاض على شفته) كون كانو حيوط هاد الدار يشهدو كون مسخوك ..

جبد كارو حطو ففمو و شعلو.. شافها حتى هي جبداتو .. شعل بريكة و قربها لفمها حتى شعلات ..

أيوب : (كينطر و يدوي) .. داك سونطر ديالك ديكلاريتي ليه الضريبة ولا ناعسة على ودنيك تا تجيك خطية ؟؟

سمر: ( تأففت) .. ما ديكلاريتش .. العام دغيا كيطير .. و داز منو شهرين .. ايمتا يضربوني بخطية !

أيوب : ( ضكك بالجنب) .. انوضي على سلامتك جاتك الخطية .. اخر اجل فات .. درت معاك باات المزيان نهار گاديت لك المسائل تتجيك غا الفين درهم فالعام و عاگزة عليها زعما ما كدخليهمش؟

سمر : ( تكات على الكنبة) .. و راني كنسا ..

أيوب: ( نطر من الكارو و خذا كاسو كيدوز بيه) ماتجيش تشكاي ...

سمر : ( سمعات دقان) .. ها صاحبكم جا ..

ناضت تتمختر قدامو و تبرز مؤ. خرتها بحكم كانت غليضة من جهة الفخاض و الصيگان شعرها قصير مقطعاه كاري و صابغاه بالبوردو بحال العكر لي ففمها ..

سمر : ( سلمات عليه بالوجه) .. مرحبا بسي منير ...

منير : اش اوا هاد الزين كلو فتح ليا الباب .. !

أيوب: فين كنتي اولد الك..لب ..راهني هنا ساعة !

منير : سديت المحال و جيت .. كب كب شي كاس ..

أيوب : (كب ليه كاس مدو ليه).. اشمن مونتيف جايب لينا تاني اسي منير ؟؟

منير : ( شرب من كاسو ) وحق هاد النعمة لي مشاركين و شعباان قرب نقطعووها ما مونتيف .. واحد الخير الى بغيتي ديرو !

أيوب : ( دوز يده على لحيته و حطهم على ركبته) .. اتينا ..!

منير : سمع امعلم.. درية جارتي مول الكرا قطع عليها الضو بغا يدي لها فلوس رهين اش دير معاه؟

ايوب : ما كاينش المخزن فالبلاد؟؟

منير : ( حرك راسو) الدرية ماشي ديال التكرفيص اصاحبي .. و المخزن طريقو طويلة و الدرية بوفرية منين غاتجيب المصاريف .. ما يدخل ليها الضو حتى تحطهم صحاح !

أيوب : ( نطق بتساؤل).. تدخل المكانة ديالها من حقها ..

منير : توقف معاها؟؟ ..عندك المعارف فين ما مشيتي .. كنعرف انا الدرية دخل ضو داك ولد الق*** ديال بوجمعة شافر ولدو بقى غا هي ..

أيوب : ( ضحك و شاف فيه) .. بوجمعة لي فدربكم ؟ ( كيدوز يده على ذقنه) .. البارح جا عندي نگاليزي ليه واحد الوكالة قديمة ولد الق*** مخلوييض ..

منير : مهم دابا اتقضي ليا الغرض ؟؟ نعول عليك.؟

أيوب : ( ناض وقف) غدا نقضيو الغرض كون هاني ابا منير ..

منير : ( شاف فيه ).. و فين غادي اصاحبي جاي باغين زعما نريحو معاك؟

ايوب: واش تصحاب لديلمكم انا مسااالي ك*** بحالكم ؟

منير : ( شرب من كاسو) اودي ما تنسالنااش غا بلان الدرية ..!!

ايوب : ( نزل عندو) .. شي تيتيزة بعدا ؟؟

على صوت الصداع و الغوات فاقت مفزووعة .. تتبرق فعينيها .. فايقة خاسرة عاقدة حواجبها مافاهمة لا شكون هي ولا فين هي ولا اش واقع .. ودنيها تيتسمع فيهم غير الطنييين و قلبها كيضرب بعنف تتحاول تسمع ...

_ وااا حاااط الق**** أولد الق**** الله ينعل ز**** ابربي لا دازت لك تشفرني انا......

ناضت تتخبط فخطواتها و تقاد شعرها الأسود .. رجعاتو ورا وذنها و فتحت النافذة طل شكون داير هاد الصداع .. مع طلات مع بان لها قوة الهجيج تقول سووق .. زوج براهش مضاربين واحد هاز سيف قدو فالطوول و الثاني هاز سنسلة .. كاتسمع السباان و تخسار الهضرة على الجهد .. حطات يديها على فمها لي كان محلول من الصدمة .. .. حققت فالولد لي كان مضارب عرفاتو مزيان من نهار سكنات فهاد الدار و هي تتشوفو واقف فراس الدرب كيبيع كارو بالديطاي و معروف عليه انه بزناس تيبيع حتى الحشيش و الاكسطا ..تقريبا اغلب المشاكل فداك الحي كيجيو غا منو ..

كلثوم: (حركات راسها يمين و شمال ) ماتهنى حتى طير لك شي وذن ولا عين ..

ضربات بيبان السرجم و رجعات دخلات للكوزينة غسلات ماعنها لي باتو البارح و بدات توجد فطورها، هازة تيليفون فيديها .. عمرات أتاي و جلسات تتسناه يتشحر .. عينيها مزال مبوقلين من البارح .. دماغها مزال تيفكر و يخمم فشي حل ولا مخرج خصوصا انها جاتها مع السبت و الاحد ما تتخدمش و ما عارفاش كيفاش غاتبقى يومين هكذا بلا ضوء ما عارفاش كيف غاتعامل مع الوضع ...

كلثوم : (هزات تيليفون تضور لخالتها) ... واخالتي حليمة صونيت على وزير الخارجية جاوبني و نتي ما جاوبتيش !!

حليمة : صباح الخير .. راك عارفة الريزو هنا فالبلاد والو ميت ..

كلثوم : ( تنهدات و رماتها لها فوجهها ديريكت) .. بوجمعة قطع عليا الضوء ..

حليمة : ( شهقت و ضربات صدرها بيدها).. اويلي على قطع عليك ضو ياك مخلصين ليه داكشي لي جانا فنصيبنا؟

كلثوم: ( بغات تبكي حسات بالتغنغينة طالعة معاها) ولد الحرام الحگار .. بغا ياكلنا ففلوسنا ديك جدريال لي عرقنا و نشفنا عليهم بغا يديها هو باردة

حليمة : ولد الحرام ولد الحراام الله اوا شنو دابا بقيتي فالضلام .. اش غاديري ضروك ؟؟

كلثوم : (تتمسح عينيها ) كيفاش واش نتي ما جاياش نبقى هنا بووحدي الباارح ما نعستش ؟؟

حليمة : ما نقدرش نجي دابا اكلثوم .. يالله جيت و بَّا مريض ما نقدش نجي .. اجي نتي ..

كلثوم : (ناضت وقفات طفات على اتاي) .. ياك اختي نجي و نخلي خدمتي و نخلي ليه الدار يدير فيها ما بغا ..؟

حليمة : و جي غا سيمانة الدار ما يقدرش يدخل ليها ..

كلثوم: ( تنهدات) .. لي عطاتو خاطرو يقطع الضو تعطييه يدخل و يدير ماعجبو فالدار .. ولكن و الله لا كانت ليه.. (جبدات الخبز لي دارتو يسخن فوق المقلاة حتى تگرمل .. دهناتو بالفرماج و جلسات تتاكل و دوي ) كيقول ليا واحد الراس نهز حوايجي و نمشي هاد الويكاند عند آسية ..حسن ما يطرطق ليا القلب هنا بوحدي .

حليمة : ( تنهدات) .. سيري عندها سيري ما تجلسيش بووحدك حسبي الله و نعم الوكيل فيه..

طالت المكالمة .بقاو شادين الجموع فطرات و جمعات الماعن غسلاتهم عاد قطعت الاتصال و دخلات لبيتها لبسات جلابة مخزانية سوداء مع صندالة بلا و مشطات شعرها للوراء خلاتو مرمي على كتافها براحتو هزات صويك فيه زوج تبديلات مع غاتخرج من الدار تفكرات التلاجة لي ما فتحاتهاش .. حطات الصاك و رجعات تتجري مع حلات الفريگو مع ضربات فيها ريحة الخنز .. معمرة الثلاجة باللحم و الحوت و الدجاج دايرة فيه تقضية الشهر حسات براسها داخ فاش شاافت دااكشي كلو ضايع قدامها و هي يالله مقضياه ..

كلثوم : الله يااخد فيك الحق ابوجمعة انا بغيت لك الكووونصير مااشي الكلاوي بغييت لك الكوونصيير يجري فدمك ماتلقى ليه دوااا ..

جمعات داك اللحم كلو فميكة كبيرة و مسحات الفريگو بالخل خلاتو مفتوح باش مايغمالش .. هزات داك البلاستيكة غادية و تتحصر عليها خرجات من الدار ردخات الباب حتى تهزات الدار و سمعات سبانهم من الفوق .. سورتاتو و خرجات من الباب الاخر حتى هو ردخاتو بحر جهدها مخلياهم تيتشواو موراها .. توجهات للبرگاصة فتحات ديك البلاستيكة للقطوط و الكلاب لي تيكونو تيضورو تما و رجعات لراس الدرب شيرات على طاكسي و ركبات عطاتو العنوان ماهي الا لحظات وقفات امام برطمة صاحبتها تدق حتى حلات عليها ..

كلثوم : رمي عليك جلابة و زيدي معايا عند البوليس

شافت فيها آسية باستغراب لي كانت لابسة بيجاما و عاگدة زيف حياتي على راسها كانت تتجفف حتى طاحت عليها كلثوم فحال الباطل ..

آسية : اويلي مالك ؟؟

كلثوم : ( شااعلة يديها كيترعدو و سنانها كيتقرقبو بالفقصة).. يا غاتزيدي معايا ا آسية يا غانمشي رااسي .. مول الدار قطع عليا الضو الز***

آسية : ( شهقت و حطات يدها على فمها) .. اويلي علاش ما مخلصاش؟

كلثوم : ( حطات يديها على خصرها معصبة مدورة وجهها ) .. فحال لا ما عارفانيش اصاحبتي ريال ديالو ماتبقى عندي .!

آسية : ( جراتها تدخل) و زيدي بعداا دخلي نبقاو نتعاودو قدام لي طالع و لي نازل؟

كلثوم : (تتشوف فجانابها) كاينة مك ؟

آسية ..(غادية بيها للغرفة ) ما كيناش مشات لحمام ..اجي عاودي ليا اش طرا .

كلثوم : (جلسات فوق سداري).. يا ختي جيت البارح من الخدمة لقيت ضو ما كاينش .. خرجت لقيت ديجانكتور سيد طيرها من بلاصتها و طلعها لفوق قطع عليا انا الضو.. علااش و علاش قالك بغا نجددو الكونطرا بشروطو لي عجبو يديرو فيها ..

آسية : مرييض فك*** .. ما عندوش الحق يقطع الضو يمشي فيها جبد النحل على راسو .

كلثوم : غانمشي ليه عند البووليس هوما يفكو جرتي معاه .. فاش سالات الكونطرا قلت له عطيني فلوسي نقلب فين نسكن كان يقول لي حقاا ما عنديش حقااا غير جلسي دار دارك و دابا نكرني ..

آسية : ( جرات زيف حياتي من راسها).. ياك عندك العقد ديالك ديال الرهين ؟

كلثوم : ( حركات راسها بنفي) .. عندي عقد الكراء و عقد ااخر ديال اعتراف بالدين فحال لا انا مسلفاه ..

آسية : هاا اوا مزيان عندك بعدا وراقيك .. دابا ما عندهم مايديرو ليك البوليس ... نهار الاثنين صبحي على المحكمة ..

كلثوم : (رجعات شعرها للوراء و جبدات تيليفونها و شارجور) ديريه لي يتشارجا .. انا راني جاية عوالة ندوز الويكاند عندك ..

آسية : (شعلات التلفاز و دارت تيليفون فالشارج) بالفرحة مرحبا و الف مرحبا الدار دارك .

كلثوم : عارفة لي كاين الله يكبر بيك اختي ..( وقفات زولات جلابتها) .. كاين فاش نعاونك .؟

آسية : (جراتها من يدها جلساتها).. تي ريحي الارض .. كنت غا تنجفف لقيتيني كملت ..

كلثوم : (حطات يدها على راسها) .. تقضية ديال شهر مشات ليا اصاحبتي غير اللحم بوحدها حاطة فيها سبعمية درهم بلا دجاج و الحوت .. بغيت نطج من حوايجي ..

آسية : ( تنهدت بأسف ) .. الله ياخد فيه الحق .. ولد الحرام من فعايلو .. (هزات تيليفونها) .. تعقلي نهار كنت معاك و جا دق عليك قالك مريض .. جبدتي الف و خمس مية درهم حطيتيها ليه فيديه .. عقلتي ااش قلت لك؟؟

كلثوم : (غرغرو عينيها بالدموع) .. انا كنت معمرة فيه النية ماكنتش عارفاه شفار .. الله ياخد فيه الحق كلاني فرزقي كنشد غا جدريال بغاا يرزيني فيهم ..

آسية : (طبطبت لها على رجلها) دابا خلينا من هادشي .. كي غاديري نهار الاثنين مع الخدمة ؟

كلثوم : ( دزات يدها على جبينها ) .. و الله ما عرفت .. غا سكتي نمنك يتريو عليا ..!

آسية : ( ضحكت تتشالي بيدها) وايلي كاين سيدي عاالي كلو و يتريو عليك ..

كلثوم : ( ضحكت) سكتي عليا البارح ضل يصوني عليا كنت غانجاوبو و نبرد فيه سم بوجمعة ..

آسية : ( تضحك حتى تغمضو عينيها ) احترمي شاف ديالك .. اجي عاودي ليه يقدر يعاونك ؟

كلثوم : ( تنهدات) اش يعاوني اختي ما يحس بالمزود غا لي مضروب بيه .. واحد جارنا خذا مني نمرة قال لي كيعرف شي واحد يعاوني هاهو نهار قرب يكمل و ما تصل بيا حد ..

آسية : (قربات حداها).. شوفي هو الضو ديالك ترضيه ترضيه .. بالخاطر بالمخزن غايرجع حيت مااشي قانوني يقطع عليك الضو .. راه جريمة هاديك ..!

كلثوم : ( حسات بصاحبتها تتعطيها طاقة اكثر) .. نهار الاثنين نصبح ليه على المحكمة .. و الله حتى نطوفو غا بلاتي ..!

آسية : ( ناضت وقفات) و عرفتي دابا اش ديري غاتنووضي نلحگو على مَّي فالحمام و نخرجو منو نيشان لصالون تبدلي شوية المورال ..

كلثوم : ( ترخات عگزانة ) .. و الله ما فيا لي يمشي لشي حمام .. و ما جبتش معايا حوايج بزاف ..

آسية : ( تحنات عليها جراتها من يديها) .. نووضي تگعدي انا نعطيك بيجاما و عباية و زيف حياتي ..

تنندات و ناضت معاها للبيت يجمعو حوايج الحمام عارفة آسية ماتفاكش معاها خصوصا ملي شافت المورال عندها طايح عارفة صاحبتها ما تتبغيش تخليها مقلقة .. دقايق معدودة جمعو حوايج الحمام و خرجو متوجهين ليه .. و مع وقفو فالباب خرجات أم آسية ..

آسية : مي مالك زربانة اختي عاد مشيتي ؟

أم آسية : ( تتكلم بداريجة مكسرة بالسوسية) اختي الحماا الحماا سخفت ايلِّي

كلثوم: ( سلمات عليها بالوجه و تكلمت معاها بالسوسية).. خالتي مانزاكمين ( كيف دايرة) .؟

أم آسية : هاياح أيلي أرنتسلاك .. إما كمين خالتيم مانزاتين لباس دارس؟ (هاحنا أبنتي تنسلكو .. و نتي خالتك كيدايرة لباس عليها )

كلثوم : ( ضحكت بخفة) هوتين غتمازيرت تفجيج دوگايونس ( راهي فالبلاد مفججة مع راسها)..

آم آسية : اوا اجييت اتسبادل الجو ولانتات ( اوا خليها تاهي تبدل الجو ) (شافت فآسية ) ياك بنت الهم ملي گلو ليك رواح معايا لحمام مبغيتي ..

آسية : ( تحنات عليها باست ليها راسها) .. اري داك الراس نبوسو الله يسمح ليا منك ..

أم آسية : ( شيرات ليهم للباب) .. دخلو ماحد ماعمر .. ..

"بعد مرور يومين"

كيقولك زوج بلايص لهلا يدي لهم شي مومن .. المحكمة و السبيطار ... داخلين من باب المحكمة ضاربين الحطة .. كلثوم جاية بكسوة قصيرة حد الركبة وليباموس مع الگاط طويل و مونطو فوق منهم .. طالقة شعرها الأسود للوراء بأريحية .. و ناشرة جمالها السوسي الطبيعي .. وجه دائري و خدوود بارزين حمرين بالبرد .. و شفايف منفوخين معكراهم بغوز بارد .. عيون كبار مجبدين بالكحل و الماسكرا .. شادة فيد آسية لي كانت كذلك لا تقل جمالا .. شعرها قصير نوعا ما صابغاه بالأشقر حروفها شهبين بعيون عسلية مشفرين .. بمجرد ما دخلو للمحكمة وقفو فالاستقبال ..

كلثوم : ( تتكلم مع المخزني) الله يخليك نسولك .. بغيت نرفع دعوة فين نمشي ؟؟

المخزني : ( شاف فيها) .. اش عندك ؟

كلثوم .. مول دار قطع ليا الضوء و بغيت نرفع بيه دعوة ..

المخزني : لا حول .. خصك ترفعي دعوة استعجالية .. باش يحكمو ليك فسيمانة ..اري نشوف الاوراق !

كلثوم : ( شافت فأسية ) .. شمن اوراق ؟

المخزني : لي غادفعي .. باش غاترفعي هاد الدعوة بالدعاء؟

كلثوم : ( خذات نفس ) .. راني ما عارفاش اش نجيب جاية نسول عاد باش نعرف ..

المخزني .. غاتمشي تشوفي شي عون قضائي يدير ليك معاينة الحالة ديال الدار .. و غاتمشي لعند كاتب عمومي تكتبي الطلب ديالك ..جيبيهم و انا نديك تا للمكتب فين غاترفعي الدعوة ديالك ..

كلثوم : (حركات راسها) شكرا ربي يخليك ..(كانت غاتمشي و رجعات ) .. الله يخليك و الى بغيت نشوف وكيل الملك؟

المخزني : غاطلعي للنيابة العامة الفوق فمكتب الشكايات... ولكن سيري ديري هادشي لي گلت لك بعدا ..

آسية : كيبان ليا هادشي فيه سير و ااجي و صدااع ..

كلثوم : ( شكراتو و جرات آسية ) .. يالله نشوفو شي عون قضائي

الوقت بدا يفوت و الخدمة تابعاها .. بالخف نزلو من دروج كيجريو بأقصى سرعة ممكنة ، شعرها متطاير فالهواء و آسية تابعاها حتى هي .. تمنات لو هزها شي حد و نزلها مباشرة فالطريق الصحيح ..

بمجرد ما تتدخل للمحكمة باش تاخد حقك كتولي نتا لي فموضع اتهام .. حتى تتكره داك الحق لي كنتي جاي تقلب عليه .. دارت المعاينة و خلصات عون القضاء لي جاب لها الصور و المحضر ديالو .. دوزاتهم لكاتب عمومي كتب لها مقالة فيها مطالبها .. دارت للوتائق ديالها كاملين فوطو كوبي جمعات الضوسيي ديالها و توجهات للمحكمة من جديد .. دفعت الدعوة ديالها و مشات خلصات عليها فالصندوق .. عطاوها فالحين الاستدعاء .. ديالها و ديالو..

الموضف : هادي الاستدعاد ديالو غاتمشي تشوفي شي مفوض قضائي خلصيه يمشي يعطيها ليه ..

كلثوم .. ( تنهدات و شداتها منو ) .. واخة شكرا ..

الموضف : مرحبا امدموزيل .. عندكم الجلسة بعد يومين مع العشرة و نص..

انصرفت من مكتبه من جديد شدات طريقها للمفوض القضائي عطاتو الاستدعاء .. و رجعات للدار هي و آسية ..

آسية : ( مدات لها كاس الماء ) .. الخلصة مشات الصكعة ..

كلثوم : ( شربات و حطاتو) .. مايجي الشهر فين يكمل حتى تلقايني مادة يدي كنسعى ..

آسية : ( طبطبت لها على ضهرها).. كوولشي غايفوت .. انشاء الله ..

كلثوم : ( حركات راسها).. الحصيصة لي كنت جامعة باينة غاتمشي لي فالمحكمة .. حگرني ولد الحرام حگرني ..

آسية : الله ياخد فيه الحق ..

كلثوم : ( تلفتات لها) .. لقاني يتيمة .. كون كان عندي با يوقف معايا كاع ميكون هذا مالي ..

اسية : ( جلسات حداها عنقاتها ) الله يرحمو .. خليه دابا يخلص .. دابا يخلص كاع هادشي لي دار لك ..

كلثوم : ( سمعات دقان و ناضت تطل فالسرجم).. هاهو جاب لهم الاستدعاء ..

آسية : بغيت غا نشووف وجههم فهاد اللحظة ..

كلثوم : (طالقة ودنيها ).. هادي شاطا ماطة ديال أميمة .. بنتو الصغيرة .. قالت ليه ما يقدرش ينزل مريض ..

آسية : ( ضحكت بتهكم) .. ملي بغا يقطع الضو ما كانش مريض ؟

كلثوم : (شافت فآسية) ما بغاتش توقع بلاصتو ..

آسية .. (هزات كتافها) .. غايديرو لهم رفض التوقيع .. خليهم هادي راه ضربة قااضية ليهم ما توقعوكش توصلي للمحكمة ..

كلثوم : ( رجعات جلسات ) ..ايه تيتسناوني نحزرهم

آسية : ( شافت فالضواية طالقة ودنيها تتسنط) .. اسمعي قطعو الحس هههههه ..

_ بنت الحرااااام من فعاايلهاااا ..

كلثوم : ( وسعات عينيها ملي سمعات صرخة من وحدة من بناتو و خمات الضحكة )... بلغها البارد ...

نهار جديد .. فاقت كلثوم تتجبد فبلاصتها .. رجعات لدارها الجلاس فديور الناس مااشي هو الحل لحالتها ، بالرغم من ان آسية و أمها ما خلاوهاش ترجع لكن اي واحد فمكانها ما يقدرش يخلي الدار فيها حوايجها و اوراقها اكيد غاتخاف عليهم من شر الناس لي ظلموها ..

حطات صينية فيها فطورها و جلسات تتفطر بشوية اللقمة مابغاتش تهبط لها .. الشهية تسدات ما بقااتش .. حطات كاس الحليب و هزات تيليفونها تتخربق فيه.. اتصلات بخالتها عطاتها المستجدات ديالها و رجعات لغرفتها بدلات حوايجها .. هزات الملفات ديالها و خرجات مباشرة شدات طاكسي لمكان عملها ..لي كان فرصة و يستحيل تفوتها و ضيعها من يدها بعد معانات باش تقدر تحصل على وظيفة مكتبية ، بالرغم من أنها ما كانتش شي حاجة كبيرة مجرد كاتبة مهمتها هي النسخ و كتابة التقارير لكن أهم حاجة انها لقاتها بعد عناء طويل فبلاد الخدمة فيها أصبحت شيء أشبه بالمستحيل ..!!

كلثوم : ( وقفات فالاستقبال ) نجلاء صباح الخير اختي ..

نجلاء: صباح الورد ... فين اختي غبرتي خير يا طير ؟

كلثوم : (تنهدت تتحرك راسها ) اخلي داك الجمل راگد المشاكل طاحو عليا كي الشتا ..

نجلاء : (باستفهام) ياك لباس ؟

كلثوم : من بعد اختي و نعاود لك دابا زربانة .. قولي ليا سي علي كاين؟

نجلاء : كاين الداخل .. ولكن داك العقرووشة راها محلفة فيك حيت منكتي البارح ..

كلثوم : الله يا ربي .. اليوم مافيا ما يضارب .. واحد فينا يمشي لصبيطار و واحد لكوميسارية الى مشات تا تعرضات لي ..

نجلاء : شوفي سيري دخلي عند سي على بلا ماتستأذني منها قبل ما تعمرو عليك راك عارفاها جلااخة..

كلثوم : ( هزات الملف ديالها ) .. داكشي لي غاندير يالله الله يعاونك ..

طلعات مباشرة لدروج الي كيديو لمكتب المدير .. هو غالبا ما كيكونش لان خدمتو كاع على برا .. و من حظها انه كاين اليوم .. يالله غاتدخل و وقفها صوت أنثوي غض .. كانت الكاتبة ديال المدير .. .. دورات راسها شافت فيها .. كانت سيدة أربعينية .. غليضة لابسة جلابة و دايرة الدرة خانقة بيها راسها و مزيراااها حتى خرجو خدودها فوق الشال و عندها زبيبة فخدها الشمال ،

كلثوم : (قلبات وجهها).. صباح الخير اختي سليمة .. كاين الاستاذ علي ؟

سليمة : ( حاطة يديها على المكتب تطلع و تنزل فيها) .. تبارك الله على الهندام ديال الخدمة !!

كلثوم : ( شافت فراسها كانت لابسة سروال جينز مشرگ و تيشرت مع فيست حمراء) مالي اختي جاية بحوايج الدار ؟

سليمة : ( رفعات حاجب ) .. اختي سبحان الله غير نتي و ديك نجلاء لي فالريسيبسيون و صاحبتك اسية لي ملاقيات على هاد حوايج سم شركة كاملة لباسهم محترم ..

كلثوم : (تتجمع غضبها داخلها و وقفات امام المكتب ديالها) .. ما فهمتش فاش كيأثر لباسي على خدمتي اختي اللباس حرية شخصية و ما بانش ليا شي مسخ فحوايجي لابسة سروال طويل و فيست اش بغيتي نتي بحوايجي ؟؟

سليمة : ( مصمصت الحامض) كاسيات عاريات .. اعوذ بالله ..الاستاذ علي ما كاينش

كلثوم : (جمعات يديها و قربات لها حتى وقفات قدام البيرو) .. سليمة خليني كنحتارمك ! نتي هنا ماشي شاف ديالي راك هنا بحاالك بحالي غا كاتبة !! و الى شفتيني تنسكت لك شحال من مرة و ندوز الهضرة الناقصة غير حيت قد ماما و تنحترمك .. سبحان الله سي عبد الجليل راجلك الله يعمرها دار واخة اعلى منك مرتبة فهاد الشركة ما تيتعاملش معانا من الفوق كيما تديري نتي !

سليمة : ( تتغلي و تفوور من كلام كلثوم) .. اش دااك اختي لرااجلي ؟؟ و شكون هادي لي قد مك اناااا .. راك بديييتي تقبي معايا الورقة اكلثووم بعدي من راجلي و لا نديرك فراسي !

كلثوم : ( ضحكت بخفة).. من نيتك اختي اش ندير براجلك .. سيري الله يشافيك .. بعدي من ساحتي راني المشاكل لي عندي دابا تغرقي فيهم نتي شخصيا ..! ( رجعات لقدام البيرو الثاني ) و غاندخل عند الاستاذ علي ..

بدون ماتسنى كلمة اخرى من سليمة .. دقات ثلاث طرقات على الباب و دخلات مخلياها تتاكل جنابها..

كلثوم : ( رمات شعرها وراء ضهرها بأنثوية و دلال داخلة مبتسمة ليه) ..صباح النوور سي عاالي .. كي صبحتي ؟

علي : ( بادلها البتسامة بعيون لامعة ) .. صباح زين هذا لي تفكراتنا لالة كلثومة ! اجي جلسي .

كلثوم : ( جلسات قدامو مبتسمة عطرها فايح فالمكان) ربي يخليك .. راني حشمانة منك و الله .. عندي شي مشاكل هاد الايام .. داكشي علاش منكت البارح و جريت معايا حتى آسية ..

علي : ( ناض وقف ضار على المكتب و جلس قدامها تيحك فذقنه) .. ماتكتبش بيكم تقرير حيت اول مرة تغيبو ..

كلثوم : ( حركات راسها بتفهم) و مدات له ورقة الاستدعاء) .. عندي مشاكل مع مول الدار و قاطع عليا الضوء .. بغيت ناخد هاد الاسبوع حيت غايكون عندي الجرا تالمحكمة ..

علي : ( برقت عيناه) محتاجة شي مساعدة ؟؟ شنو ندير لك !

كلثوم : ( ذبلات عينيها) بغيت غير تسمحلي فكونجي هاد سيمانة .. اليوم عندي جلسة مع العشرة و نص ..

علي: (طبطب على يدها) خودي راحتك .. واش خصك محامي؟؟

كللثوم : ( ردت بنفي) لا هادي دعوة استعجالية ما خصنيش فيها محامي ..

علي: الى خصاتك اي حاجة اتصلي بيا .. تفاهمنا ؟

كلثوم: ( ابتسمت بود) لهلا يخطيك اسي علي .. خيرك سابق ..

علي : (زير على اصابعها) .. ماتقوليش هاد الهضرة .. بغيتي عيني نعطيهم لك راك معارفة والو ..

كلثوم : ( ردات شعرها للوراء بدلال و سحبت يدها بلباقة ) لا غير خلي عويناتك باش تبقى تشوفني ..

وقفات قدام المحكمة كتردد آية الكرسي .. قلبها غايوقف كانت اول مرة تحط رجليها فالمحكمة .. واقفة بوحدها لا سند و لا ضهر ولا من يواسيها .. تنهدت بعد ما كملات الاية و خذات نفس عميق تطلب من الله يسهل عليها و يفك هاد الجرة على خير ..

وقفات فالاستقبال هازة فيدها الاوراق ديالها و اليد الاخرى صاك اسود صغير و تيليفونها بين اصابعها المصبوغين بالاحمر .. ابتسمت للمخزني لي امامها و طلعات نضاضر الشمس فوق راسها ..

المخزني: اش حب الخاطر استاذة ..؟

كلثوم : الله يخليك قاعة واحد فين نلقاها ؟

المخزني: قاعة القضايا الاستعجالية ؟ ( اشار لها بيده ) سيري نيشان ضوري على الليسر اول قاعة هي هاديك ..

كلثوم : شكراا ...

تخطاتو و توجهت مباشرة للقاعة لي غاتكون فيها الجلسة .. .. وقفات على برا تتسنى .. حتى فتحو الباب .. دخلات شدات بلاصتها تتفرك فيديها و دور فراسها تيبانو لها المحامون تيدخلو واحد مور واحد عمرو القاعة كانت غير هي و أشخاص قلااال لي مدنيين .. بقات مدة تتسنى حتى دخل القاضي و بداو تيدوزو فالقضايا حتى وصلو للقضية ديالها ..

القاضي : ( نده باسمها) كلثوم أمغار ..بوجمعة البرنوصي

وقفات شاداها الرجفة من رجليها .. تنحنحت و قربات وقفت في المكان المخصص لها ..

القاضي : الحكم الاسبوع المقبل يوم الأربعاء ..

كلثوم : ( غير قال ديك الهضرة هبطاات الدموووع الشلال) .. ميمكنش ليا نبقى بلا ضو اسبوع كامل !

القاضي : ( علا فيها حواجبه) اشنو الالة بغيتينا نحكمو ليك اليوم ؟؟

كلثوم : ( تتمسح عيونها) صعيب الانسان يبقى بلا ضوء و هاد السيد حگرني تعدى عليا

القاضي : ( تنهد بملل ) هاد القضايا الاستعجااية تيتحكمو على اسبوع استاذة ..

كلثوم : (حنات راسها) شكرا ..

هزات صاكها و خرجات مباشرة بانو لها شي كراسا جلست عليهم حطات راسها بين يديها و تفرگعات بالبكاء .. حاسة بقلبها تزير عليها و بغات غا تبكي و تفرغ الطاقة السلبية لي فيها حتى وقف عليها رجل كبير فالعمر ..

*****: ماتبكيش ابنتي .. مالك؟ اش عندك

كلثوم: ( طلعات فيه راسها تتمسح عينيها شافت فيه لابس لبسة سوداء خاصةعرفاتو شاوش ) عندي قلة الزهر .. عندي النحس ..

الشاوش : لا حول ولا قوة الا بالله ..گولي اعوذ بالله من الشيطان الرجيم ..

كلثوم: ( شهقت) الله ينعلو و يخزيه .. بناادم هو الشيطان أعمي ..

الشاوش : ما تبكيش و گولي ليا اش عندك هنا نقدر نعاون بنتي ..

كلثوم : مول الدار لي راهنة عندو قاطع عليا الضوو و داي ليا رزقي .. و دابا كانت عندي جلسة قاليا القاضي الحكم تا للسيمانة جاية هادي غيير دعوة استعجالية .. كي ندير انا دابا نعيش سيمانة فالظلام ؟

الشاوش : الخير فيما اختاره الله ابنتي .. ما تعرفي شنو حكمة ربي من هادشي ..

كلثوم: ( تتمسح الدموع).. واش كاين شي حد يقدر مزال يعيش بلا ضو فهاد زمان ..صعيييب اعمي صعيب ..

الشاوش : لا حول ولا قوة الا بالله .. عرفتي اش غاديري .. غايخرج القاضي سي سفيان و ندخلك عندو للبيرو .. لعل و عسى يلقى ليك شي حل ..

كلثوم : ( ابتسمت ) .. شكرا الله يعطيك الخير ..

الشاوش : .. ماشي مشكل ابنتي .. بغينا غير الخير الحمد لله ..

انصرف الشاوش و بقات كلثوم جالسة في مكانها تتسنى ايمتا تسالى الجلسة .. تلفات ما بقات عرفات ما دير .. ما عرفات واش هاد الراجل فعلا غايدخلها لعند القاضي ولا غير دار بخاطرها .. تنهدات و بقات تتسنى ما عندها ما تخسر

لوقت طوييلة بقات تتسنى .. فاتت ساعة و نصف .. .. بداو المحامون كيخرجو من قاعة الجلسة و تسدات .. بان لها القاضي غادي لجهة مكتبه من باب ااخر .. تنهدات و ريحات ضهرها فوق داك الكرسي تتسنى الشاوش ماهي الا دقايق و تم جاي و معاه المستشار لي كان مع القاضي فالجلسة ..

الشاوش : اجي ابنتي ..هذا سي نور الدين المستشار ديال القاضي ..

م : اجي ابنتي اشنو عندك؟

كلثوم : ( تتفرك فأصابعها) .. انا هي لي عندي دعوة ديال الضوء .. مول دار قاطعو عليا ..

م : علاش واش ما تتخلصيش؟

كلثوم : ( طاحو دموع من عينيها) والله حتى مخلصة كوولشي و هو عندو باقي فلوسي تالرهين ما بغاش يعطيهم لي ..

م : صافي ما تبكيش على وجه هاد البركة عمي العربي غانشوفو شي حل ..اجي معايا ..

كلثوم : ( شافت فالشاوش ) .. الله يرحم ليك الواليدين الله يعطيك الخيير اعمي ..

هزات ملفها و مشات تبعاتو تتجري .. وقفات قدام البيرو حتى سمح لها تدخل .. غير حطات رجليها فالمكتب شافت تخنزيرة دالقاضي حسات بركابيها تحشوو .. اشار لها تجلس و شاف فيها مطول ..

القاضي: نعام الالة اش عندك ؟

كلثوم : (جلسات تتشوف فيه ) .. ما يمكنش ليا اسيادة القاضي نبقى بلا ضوء اسبوع كامل ( نزلو دموعها ) ..

القاضي : ( رفع يديه) حتى انا راه ما عندي كي ندير نحكم لك اليوم ! خاصني نسمع للطرفين بزوج و هو ما حضرش

كلثوم : ( تنهدات) الضوء را مادة حيوية صعيب الانسان يعيش بلا بيها اي حاجة حطيتي عليها يدك تتخدم غير بالضوء .. انا ضعت فبزاف ديال الحوايج ...

القاضي : سمعيني .. دابا نتي درتي واحد المشكل .. و جيتي عندنا حنا باش نحلوه لك .. خلينا نديرو خدمتنا هاد العجلة ما تتجيب حتى نتيجة ..

كلثوم : ( تتبكي و تقول مابكيت).. انا ما درت حتى مشكل .. انا جيت من خدمتي فحال ايها الناس لقيت الضوء فداري مقطوع مع اني كنأدي الواجبات ديالي كاملين ..

القاضي : ( ضرب باصابعه فوق المكتب ) .. المشكل لي درتي هو نهار بغيتي تكري الدار ما دخلتيش المكانة ديالك و عطيتي لواحد الحق انه يتحكم فالضوء لي مشاركينو .. اذا غاتتحملي العواقب ..

كلثوم : ( شهقت و مسحت دموعها) اذا انا لي وليت مذنبة دابا ؟؟

القاضي : ( تنهد و شاف فيها).. شوفي السيد لي نتي داعياه دار محامي كينوب عليه كنتسناوه تا هو يدلي بالمذكرة الجوابية ديالو .. انا ما عرفتش هاد السيد علاش قطع عليك الضوء .. شكون قالنا حنا اشنو درتي ليه فدارو !

كلثوم : ( شدات فراسها) .. ما بقيت فاهمة والو ..

القاضي : ( رفع حواجبه) القانون لا يحمي جاهله ..شوفي نتي داخلة لمحاكمة بدون محامي و هادي نقطة ضعف عندك سيري ديري محامي ينوب عليك .. هادشي باش نقدر ننصحك .. وكلي محامي و كمراعات للوضعية ديالك غانديرو ليكم جلسة مغلقة نشوفو الى كانت شي امكانية الصلح الى ما كانتش غانطقو الحكم ديالنا (رفع يديه و حطهم فوق المكتب سد الملف لي قدامو ) هذا جهدي عليك ..

كلثوم : ( تنهدت و ناضت وقفات) شكرا بزاف سمح ليا ..

خرجات تالفة عقلها مغيب .. الدموع فعينيها ما بغاوش يحبسو .. دارت بيها الدنيا ما حساتش براسها ايمتا شدات طاكسي متوجهة للدار تقلب مزاجها و هي لي كان عندها امل كبيييير يتفك المشكل اليوم قبل غدا مدام لجئت للقانون ..

وقفات الطاكسي فراس الدرب .. خلصاتو و خرجات غادية مرفووعة مرت بسرعة الضوء من أمام مقهى الحي .. يمكن هذاك أكبر مقهى فالمنطقة من نهار سكنات فهاد الحي .. و لي معروف عليه ( قهوة التيرسي ) .. كان شخص خدام فيها كيحط الطوابل على برا و زوج آخرين مشغولين بالتسياق الداخل .. ماحسات حتى تضربات فيه جا مرمي قدامها هو و زوج كراسا كان هازهم بين يديه ..

منير : (غوت بحرر جهدو) .. الخراا ما كتشوووفيش ؟

كلثوم : ( رفعات يديها لشفايفها بصدمة ) .. سمح ليااا عافاك سمحلي ما درتهاش بلعاني ..

منير: ( ناض كيسوس حوايجو من الماء موسع عينيه كي سمع صوتها و شافها واقفة امامه ) ختي كلثووم نتي هادي .. سمحي لياا ما يصحاابليش نتي ..( جر لها كرسي ) .. جلسي رتاحي .. سمحي ليا فايق مقندش ..

كلثوم : ( دمعتها قريبة) .. ماشي مشكل .. غير خليني نمشي .. ما قاداش نجلس

منير : ( قرب عندها رفع حواجبه) اش درتي باقي فمشكل ؟

كلثوم : ( زيرات على صاكها) .. ما درت والو .. عاد جيت من المحكمة ..كنت عوالة نجيب معايا الحكم جيت بيدي خاويين..

منير : (دوز يده على لحيته) .. المحكمة طريقها طويلة .. اوا شنو گالو ليك دابا ؟

كلثوم : ( ضحكت بالجنب) قالو ليا سيري تا تجيبي محامي ينوب عليك ..

منير : (حرك راسو ) .. محكمة ضروري تديري محامي فجنبك .. هو لي يعرف شغلو تاهوما ولاد الك..لاب گزاراا ..( دوز يده على جبهته) . حگاا واحد عشيري ماتصلش بيك؟

كلثوم : ( حركات راسها بنفي) .. لا ماتصل بيا حد ..

منير : ( تأفف بصخط) بفف .. تا هو من هادي لهادي غايكون نسا .. دخلي الداخل انا غانجيبو دابا تا لعندك .. دخلي الكليان ديال هاد القهوة مكيبانو تال ستة تالعشية غير دخلي ..

كلثوم : ( حركات راسها) .. واخة انا نتسناك اخويا يعطيك الخير ..

دخلات للقهوة و دخلات مباشرة للحمام وقفات امام المراية تتشوف فوجهها .. عينيها تنفخو بالبكاء .. غسلات وجهها و فزكات عنقها شوية تتنش على وجهها يبرد من البكااء .. شفايفها بقوة ما عضاتهم اليوم من توثرها رجعوو طايبيين و حمرين زاادو تنفخو .. رجعات شعرها للوراء كتقاد فحالتها في هاد الحين كان منير كيتصل و يعاود بأيوب حتى شد ليه ..

📞منير : وا فينك اصاحبي فينك عولنا عليك بكري ..!

📞أيوب : اش تم ؟ اش خصك ..

📞منير : (خرج تيهضر على برا) عولنا عليك بكري فكيتي لنا مشكل الدرية .. سيدة وصلات المحاكم كيجرجرو فيها .

📞أيوب : (ضرب جبهته بيده) وا نسيييتها اعشيري برب الى مشاات من بالي ..راني طايح فشي بلانات مقو. دين ..

📞منير: ما شغليش انا .. مهم قضي لنا الغرض للدرية .. بلاناتك ما كيتقاضاوش .. اجي عندي دابا للقهوة هاهي معايا ..

📞أيوب : (حرك السيارة) هاني جاي ..

باركا الطونوبيل امام المقهى قاطع طريق على لي جا ولي غادي داير دوبل سينيال و نزل من رونو كليو ديالو .. شاب في بداية الثلاثينيات ..اسمر وحروفو كحلين.. ملامحه مغربية قحة .. عندو فحقو من الوسامة ما يكفيه ملامح عادية لكن نظراته الحادة المظلمة عاطيينو هيبة و سر .. حواجبه السوداء كثيفة و لحيته المرتبة زايداه وسامة

دخل للمقهى هاز فيدو الكونطاكت و باكية تالكارو .. داير كاسكيط و نظارات سوداء فوق راسو و ضارب الحطة .. سروال اسود و تيشورت فوق منهم كويرة و فرجلو سبادري گوتشي و تقاشر بويض كيشعلو باينين من تحت سروال .. بمجرد ما دخل لعندهم ضربات فيها رائحة عطره الجذاب خلاتها طلع راسها تلقائيا تابعة ريحة ..

ايوب : (تسالم مع منير بالكتف) افين اعشيري .. هانية ؟

منير : هو هذاك يحفضك ..( اشار ليها) .. هادي هي جارتي .. كلثوم .. هذا صاحبي ايوب ..

شاف فيها من تحت النظاظر ... ماشي غير هو لي كان معطر هي كذلك ضرباتو ريحتها .. ريحة باردة و خفيفة معطرة بالياسمين و الخزامة مخلطين مع فاكهة مسكرة حلوة .. و بمجرد ما طلعات فيه عينيها الكبار رمشااتهم برمووشها الثقال وسااع بؤبؤ عينيه كأنه شاف لؤلؤ من اللآلئ السوداء النادر الحصول عليها .. طلعها و نزلها من الفوق للتحت كيحقق فيها .. لابسة العصري و سروال مشرگ من القدام باين شوية لحمها .. و صندالة عالية مصبغة اضافرها بالاحمر و صبيعات يديها كذلك .. فعنقها سنسلة ديال الذهب رقيقة مكتوب عليها تلخيص اسمها بتلاث حروف صغار .. رمات شعرها الاسود للجنب قبل ما تمد له يدها بابتسامة سحراتو كي فتحات فمها و بانو سنيناتها البويض مستفين .. بقى ساااهي كيشووف فيها حتى تنحنح منير ..

أيوب : ( مد لها يدو سلم ) متشرفين..

كلثوم : ( حركات راسها محافضة على ابتسامتها) .. الشرف ليا ..

جر كرسي و جلس عليه بالمقلوب حط فوق الطبلة الباكية تالكارو و سوارت طونوبيل .. شاف فمنير و دور وجهو لكلثوم ..

أيوب : كاين مانقضيو اختي؟

كلثوم : ( تنحنحت و خرجات من هالة الاعجاب لي ضارت بيها) عندي مشكل مع مول دار قطع عليا الضوء .. و مشيت دعيتو ..

منير : اليوم كانت عندها جلسة فالمحكمة و گالو لها اوبليجي محامي ..

أيوب : ( ميل شفته باستهزاء) كاينة شي محكمة بلا محامي ( معلي حاجب) اري نشوف الوراق ديالك ..

كلثوم : ( مدات له الاوراق) .. قالو لي دعوى استعجالية ما تحتاجش محامي ندوي على راسي .. و ملي دخلت عند القاضي قال لي اوبليجي محامي ..

أيوب : ( جبد تيليفونو ) ..وي فاطمة .. صافا ختي هانية .. كولشي مزيان ؟ .. عندي واحد القضية .. واحد سيدة من العائلة عندها مشكل مع مول دار قطع عليها الضوء... كاين هو ؟؟ العشية يكون فالبيرو .. الى جا علميني الله يحفضك..( ضحك خلاها غير تتشوف فتقاسيم وجهه) سيري اختي تلبسينا مونتيف دابا نعرض عليك غير تهناي ... ( قطع الاتصال و شاف فيها) .. هاد المحامي يشد القضية ديالك الحكم فيدك مضمون .. العشية غايكون فالبيرو نمشيو عندو..

كلثوم : ( تنهدات براحة ) .. لهلا يخطيك شكرا بزاف ..

أيوب : ( جبد كارو حطو ففمو و شاف فيها) ماشي مشكل نكمي حداك ؟

كلثوم : ( اشارت بالايجاب) .. عادي خود راحتك ..

أيوب : ( شعلو نطر منو و بخ للجهة الثانية ) الى شديتي الحكم ديالك سيري ديريكت الواينو (O.N.E.E) .. ندخلو ليك المكانة ديالك .. خصنا نشوفو اش غايديرو ليكم فالحكم واش يرجع ليك الضو ولا نتي لي ديريها بسميتك ..

كلثوم : ( تتشوف فوجهو تتحس براحة) ..يعني الحكم غايكون لصالحي .. ما كرهتش يعطيوني انا ندخلو بسميتي ..

ايوب : ( حرك راسو) .. على حسب اش طلبتي نتي فالدعوة ...

كلثوم : انا طلبت الضو يرجع لي و صافي اصلا كاتب عمومي لي كتب داكشي

.

ايوب : ( مد لها وراقها) .. هادشي بديتيه عوج .. ( دوز يده على لحيته) ماشي مشكل غانحاولو نصلحو داكشي ..( ناض وقف) .. مهم ضوسي ديالك فيدي كوني هانية ..

كلثوم : ( هزات صاكها و وقفات) .. بصح شكرا بزاف ..( شافت فمنير) .. مانساش خيرك اخويا منير ..

منير : ( ابتسم لها) .. ماتگوليش هاد الهضرة .. راك فحال ختي ..

ايوب: ( عطى اشارة غير بعينيه لمنير يجلس بلاصتو و شدها من يدها مخرجها معاه لبرا و نطق بصوته الخشن) .. خلي ليا نمرتك .. غانتصل بيك العشية نتحركو عند المحامي ..

كلثوم : (خذات تيليفونو كتبات نمرتها) .. هاهي ..

ايوب : ( شاف فيها ) فكريني فسميتك ؟

كلثوم : ( قلبت عينيها و ابتسمت ) سماني بَّا كلثوم و فاش مشى يقيدني فالحالة المدنية طاحو ليه جوج حروف ، ( بنبرة دلع ) اللام و الميم و سماني كْتُّو

وقف مسند على باب القهوة كيشوف فيها تتقطع الطريق للضفة الثانية لي فيها دارها حاضي مشيتها و تمايلات جسدها من الوراء و شعرها الاسود كيتراقص فوق ضهرها .. دوز لساانه على شفته و نطق بصوت خشن و ضحك ..

أيوب : كثوو يا كثوو ..

منير : ( قرب عندو ضربو لكتفو) .. سد فمك الموت تضور ..

أيوب : ( غمزو و شير جهة الباب).. وا بيااسة اعشيري .. اول مرة ديرها مزيانه ..

منير : ( حرك راسو بنفاذ صير) .. واقلة غاتحشمني مع الجيران ..البنت اصاحبي ساكنة مع خالتها غير الوليات و خدامة على راسها

أيوب : ( علا فيه حاجبو) ياكما طايح معاها؟ فين خدامة ؟

منير : ( هز يديه و رجع لور ) .. لالا الجيران موقرهم كانلعب بعييد ..والله ماعرفت فين خدامة بضبظ ، ولكن البنت نقية عمرني ضربت فيها فشي للعبة هاك ولا هاك

أيوب : ( دوز يده على لحيته) .. خليني انا نلعب حدا الباب اخاي الزين ..( تنهد بحسرة ) وايلي مع بنات ليوم آش ضرب والله تيصدموك

منير : وا فضي لنا البلان بعداا و داك ساع ضبر ك*** ، البنت دريويشة

أيوب : ( رجع دخل و جر كرسي جلس عليه) .. البلان مقضي اصاحبي واش نتا مريض القانون فصفها ، ممنوع يقطع عليها الضو ، راه الكاري الفيدور لي فالدرب لوراني عرفتيه ؟

منير : اياااه !

ايوب : راه ضارب مول الدار بستة شهور الكرا مامخلصو ، وتواصلو للمحكمة ، ناض مول الدار سخن عليه كر* خلاه خرج ، وخرج ليه حوايجو للزنقة

منير : فرع الباب ؟

ايوب : شكون عرف ليه ، ولكن هاد الخصلة ديال خرج ليه الحوايج راه مول الدار دخل فيها الحبس و الكاري خدا تعويض ، تجي انت تكولي يقطع عليها الضو !؟ لقاها بنت وصافي

منير : ( جلس قدامو) .. اصااحبي هاد بوجمعة دمو يهو.. *ودي ..

أيوب : ( ضحك صدره كيتهز) .. هذااك التخلويض لي كيدير كلو كيدوز تحت يدي .. نمشي ندوي معاه دابا نخريه فسروالو ولكن خلينا نقضيو الغرض بالقانون حسن ليها ..

منير : حگر على درية صغر من بناتو انا هادشي لي بقى فيا ..

أيوب : ( شعل سيجارته) .. اايه و داك الزين يخليوه الناس فالضلام ( دوز يده على لحيته) فالحقيقة هي مضوية بلا ضو

منير : ( كيحرك راسه بنفاذ صبر عارف طبع صاحبو..طقطق أصابعه على الطبلة) خلينا من هادشي و گول ليا اش درتي فبلان الحاج عْلام ؟

جبد رجليه و تأفف بملل مخزز .. بخ الدخان فالهواء و شاف فصااحبو ..

أيوب : الحاج عْلام فجيبي .. مزال محتاجني ولكن جليلة هي لي عليها العمدة و ضايرة عليها النغزة ..

منير : ( حرك له اصبعه بتحذير ) .. ضبرتي على الحاج عْلاام .. هاااودني منك طيير البريكول من يديك يجيوك منو الملاين ..!

أيوب : ( ضحك بالجنب) شفتي تشد ليا غير جليلة ؟ ينعل بو العلام ! الخير لي ورثات من الحاج الذْهبي يغرق فيه عْلام المارشي كلو ..

منير : ( بتحذير ) هااودني منك هاديك بنت الق.... تشم كر* ها و ماتشم من عندها السانتيم ..

قلب عينه لجهة الأخرى و رمى البينتة زطم عليها برجلو حتى طفات

أيوب : ( كيدوز أصابعه على موسطاشو) .. فخبارك بلان الحاج عْلام .. بغا يوسع النشاط ديالو ههه .. مشا عند جليلة طلب منها زواج ، بغى يدير مادار الحاج متولي فمصر ، دلمو صحاب ليه تنضربو تبن

منير : فراسك مزوج زوج عيالات ؟

أيوب : ( كيلعب بتيليفونو) .. عرفتي داك ولد الوا*** فينما كاينة مصلحتو تلقاه كينبش .. فاش جرات عليه كيقلب دابا كيدير يطيحها من سوق ،

.

منير : ( هز يديه) .. السلامات .. نوض اخويا فحالك خلينا نترزقو الله ..

أيوب : ( كيضحك بخشونة ) كتعرف الله اولد الق** .. عرگ كتافك من تيرسي

منير : سير اخا عطيني تساع ، راه واقفين معايا غير دعاوي المساكين بحالي ..

ايوب : هاهو غادي .. ( وقف و رجع ضار ) ااااه ..الا داك بوجمعة هبط عند كلثوم ولا شي للعبة علمني ..

دخلات للدار تتفكر بالها مشغول و صورة أيوب مزالة بين عينيها .. باينة عليه راجل و قد كلمتو ماشي برهوش و رمى كلمة و صافي و انما رجل افعال ..

جلسات فوق السداري زولات الفيست ديالها و رمات شعرها للورت تتنهد بصوت مسموع عيات بقوة الجرا فالمحكمة و سير واجي الاوراق قلبو لها راسها و هي غير بوحدها ما كاين لي يوقف معاها .. خذات تيليفونها و اتصلت مباشرة على آسية ..

اسية : الو .. اختي من صباح و انا نساين امضرا؟

كلثوم : ( نفخت نفس من فمها) ..خلي داك جمل راگد .. مشيت قالو لي سيري جيبي محامي ينوب عليك ..

اسية : ( شدات راسها) .. المحامي غاتحطي لو على الاقل واحد الفين و خمسمية درهم .. مصيبة هادي ..

كلثوم : ( برقو عينيها بدموع) .. باين ليا ديك البركة لي كنت تنجمع غاتمشي ليا فالمحاكم ..

آسية : اجي نقولك دخلي معانا فالقرعة لي كنجمعو دابا .. نشوف لك مع البنات تشديها نتي الاولى قضي الغرض بيها ما تقيسيش فلوسك ..

كلثوم : ( مدات يديها فوق ركبتها) .. ما عرفتش اصاحبتي .. خفت نتزير بيها ..

آسية .. توكلي على الله اصاحبتي ما غاتزيري والو .. مهم لا بغيتيها ردي عليا الاخبار اليوم بالليل ..

كلثوم : ( تنهدات ) واخة .. مهم انا العشية غانمشي نشوف محامي ..

آسية : نمشي معاك ؟

كلثوم: تعقلي على داك جاري لي قلت لك عندو صاحبو عندو معارف .. و قال ليا هو يوقف معايا .. اوا تلاقيت معاهم اليوم .. هو لي غايديني عند شي محامي تيعرفو ..

آسية : اممم القضية فيها العزارا .. اوا شووفي خلي ليا حقي ..

كلثوم : ( ضحكت بخفوث) .. سيري اختي بعدي مني نتي راك مساالية ، وخ نكون مشتاقة فالرجال مانشوف سمسار ، المهم عندي يطرق ليا المسمار

اسية : عرفينا عليه اختي مااااتعرفي الوقت شنو جايبة

كلثوم : شفتي الا غير المحاكم لهلا يكتبهم على شي مسلم ، انا راه تنضرب على شغلي تايقضي ليا الغرض ..

اسية : قضي اختي قضي

قطعت الاتصال و ناضت لغرفتها فتحات سراجم يدخل لها الضوء ..جا فبالها أيوب و ملامحه الرجالية .. ضحكته حواجبه المكرونين .. ابتسمت تلقائيا بخفوث و توجهت للبلاكار تشوف شنو غاتلبس .. جبدات جلابة سوداء مخزانية مع صندالة ديالها بلا و صاك .. لبيسة بلدية متناسقة و انيقة ..جلسات فوق السرير و جرات مجر الكومود .. جبدات منو فلوس و حطاتهم فصاكها و خذات تيليفونها دخلات لابليكاسيون glovo تتقلب على شنو تطلب تاكل .. لانها ما كانت لا فمود الطياب ولا عندها ماطيب اصلا .. تنهدات و رمات تيليفونها بعد ما دوزات الطلبية .. و طلع لها ميساج من أيوب ..

📨 أيوب : واحد ساعة و نص نلگاك واجدة غاندوز عليك بطونوبيل ..

📨كلثوم:واخة توصل حدا القهوة صوني عليا نخرج عندك ..

ما عاودش جاوبها .. جلسات تتسنى حتى جاب لها ليفرور ماكلة خلصاتو و دخلات تغدات غداها و جمعات زبل رماتو .. طرفات الكوزينة و مشات مباشرة لغرفتها لبسات عليها الجلابة لي جاية قصيرة شوية و عريضة و قادات حالتها بقات غير نصف ساعة .. دارت مكياج خفيف و رشات بارفانها الجذاب و رمات شعرها للوراء .. لبسات صنيديلة بلا حمراء باينين فيها رجيلاتها البويض مصبغين بالاحمر .. ماهي الا دقائق .. سمعات تيليفونها تيصوني .. ما جاوباتش .. هزات صاكها و وراقها فالحين .. سورتات الباب ما جات فين تقطع لجهة القهوة حتى وقف حدا رجليها و نزل الزاج ..

أيوب : ( تيشوف فيها من تحت النضاضر) .. طلعي ..

كلثوم : ( ابتسمت و رمات شعرها للوراء بدلال و طلعات حاطة يدها على صدرها) اهياااا ناري منين خرجتي !

ايوب : ( ديمارا بسرعة ) ديري صمطة ! هادي هيا عادتك خارجة و عينيك تالفين ؟

كلثوم : كنت تنقلب عليك ..!

ايوب : ( هزز راسو بتفهم و دار مقرب لوجها بغفلة حتى ضربت ريحتو عندها ) و شفتيني ااكثُّو ؟!

كلثوم : ( خرجت عينيها بدهشة ) شفتتتك اخويااا والله حتى شفتك..!

بمجرد ما جلسات فجنبو ضرباتو ريحتها .. استنشقها و زفر نفس سخوونة من مناخرو .. تيطلع و يهبط فيها حاطة رجل على رجل صیگانها عريانين من فتيحات جلابة السوداء لي لابسة .. حاطة يديها البويض مصبغين بالاحمر فوق رجليها و الصاك بجنبها .. طلع راسو تيشوف فوجهها .. عندها خالة فخدها الأيسر ما كرهش ينوض يقبلها .. ضحك و ميل راسو نازل بعينيه من وجهها لعنقها كانت مزيناه سنسلة ذهبية فيها فراشات صغار لاسقة على عنقها و الاخرى فوق منها مدلية داخلة بين فتحة الصدر ديال جلابة .. تحركات شوية حتى بانت فتحة صدرها و فجنب بانت له طبيعة كحلة ما ميزهاش مزيان لأنها دغيا قادات الجلابة و نطقات بصوتها رقيق فيقه من سهوته ..

كلثوم : غاتبقى تشوف فيا بزاف ما غانمشيوش ؟

أيوب : ( طلع عينيه لعينيها) ..نمشيو ازين نمشيو ..

كلثوم : ( تتلعب بشعرها) .. هاد المحامي لي غادين عندو، عندو ما يقول بعدا ؟ راني خايفة

أيوب : ( ضحك بجنب و شاف فيها) .. الى دخل ليك ايوب فالخط ما عندك مناش تخافي الالة كثو ..

كلثوم: الله يسهل عليك اخويا .. !

وقف السيارة فباركينگ جاي فشارع أمام سوق نموذجي ..اشار لها بعيونه تنزل .. هزات صاكها و خرجات بقى متبعها بعينيه و حاضي مفاتنها بالرغم من ان الجلابة لي لابسة مخزانية و واسعة الا انها كانت تتجمعها بصبيعاتها من الامام مخلياه يشوف على خاطرو و يملي عينه و زادتو الريح حتى هي تطير لها جلابة و الشعر خلاتو يشوفها من اجمل النساء لي شاف ..

خرج تبعها حاط كارو ورا ودنو و تيعدل فسرواله و الجاكيط ديالو .. هاز فيده السوارت و الكونطاكت و باكية ماربورو .. حط نضاضر الشمس فعينيه و قرب منها شير لها تتمشى قدامو..

كلثوم : ( شافت فيه ) فين كاين هاد المحامي ؟

أيوب : (دوز على لحيتو و شير على موبل عالي ) .. داك الموبل ..

كلثوم: ( بلعات ريقها تتشوف فالموبل كلو زاج و باين عليه شكون و شكون لي تيمشي له) يعلم الله شحال يقول ليا باش يشد هاد القضية ؟

أيوب: (وضع يده اسفل ضهرها مبعدها على مجموعة من الشباب كانو فالباب و داز هو لجهتهم) .. ما تهزيش هم الفلوس المهم هو القضية مربوحة ..

كلثوم : (تضايقت من لمسته و بعدات شوية ).. اودي خلصتي على قدي غاتمشي لي فالمحاكم ...

أيوب : ( ضحك بخفوت ) انا من جهتي تهناي ما غانشد منك حتى ريال .. نشوفو مع المحامي هذاك راه ديالنا غايدير معانا المزيان ..

كلثوم : (عضات على شفتها) لواه .. غاتجري معايا فابور؟؟

أيوب : ( حرك راسو ) .. جيتيني من جهة عشيري وتگول واش نشد ريال ..

كلثوم: ( بابتسامة كلها دلال ) لهلا يخطيك .. ( دورات راسها) غانطلعو فدروج ولا سانسور؟

أيوب : ( شير لها بيديه طلع فالدروج) كاين فالبرومير ايطاج ما كاين لاش سانسور ..

كلثوم : ( جمعات جلابة بين صبيعاتها و طلعات قدامو ) ..عيت بالطلوع و النزول فدروج هاد نهار ..

أيوب : ( كيدور فالبريكة بين صباعو و حاضيها من اللور ).. جاات عليك الجلابة ..

كلثوم : (ضارت عندو شافت فيه معلية حواجبها و متضايقة من نظراتو لي كيتفحصوها بكل جرأة).. سي ايوب نعل شيطان !! نسيتي علاش جايين ولا ؟

أيوب : ( ضحك بخشونة و نطق) .. ههه اودي تلفي بنادم على القبلة اودي أكثو ..

وقفو امام المكتب المحامي لي لقات بلاكة كبيرة ذهبية فوق الباب مكتوب عليها بالأسود اسمه و معلوماته .. مد يده دق الجرس تفتح له الباب تلقائيا و دخل مبتسم للسيدة لي كانت فالاستقبال ..

ايوب : لالة فاتيييمة ..

فاطمة : اهلاان اودي المنشار عاش من شافك غبرتي علينا يا خويا !

أيوب : ( ضحك و شاف فيها).. زگي معانا افاطمة شمن منشار ..

فاطمة : ( شافت فكلثوم و ابتسمت لها) وانا نفهم ..ايمتا تزوجتي اولد الحرام كاعما عرضتينا؟

أيوب : ( شاف فكلثوم لي كانت تتضحك بخفوث) .. ماكرهناش اودي افاطمة .. ولكن مزال هاد ساعة ..

فاطمة : يالله نويت نزغرت اخويا .. ( شافت فكلثوم) .. مرحبا اختي ..

كلثوم: ( ابتسامة زينت شفايفها خلاتو يسها فيها) الله يكبر بيك احبيبة ..

فاطمة : ( شافت فيه) .. ماقالو منشاار تااا راك منشار نيت .. دخل الاستاذ تيتسناك يالله جا من المحكمة ..

أيوب : (حياها بزوج أصابع) يحفضااك افاتييمة ... (شاف فكلثوم) .. يالله

دخلو بعدما فتحات لهم الكاتبة الباب .. تسالم مع المحامي و جلس ..

أيوب : أستاذ مجيد هاد السيدة من العائلة .. مداعيا مع مول دار.. و بغات محامي جبتها لعندك ..

م : ( مد يده خذا منها الاوراق ) .. علاش مداعيين ؟

كلثوم : جيت من الخدمة لقيت دار مافيهاش ضو.. لقيتو قاطعو عليا ..

م : ( خذا زوج وراق بين يديه ).. هذا عقد الكراء .. و هذا اعتراف بالدين .. هذا رهين .. ( شاف فكلثوم) .. علاش ما درتوش عقد الرهين عند محامي ؟

كلثوم : (هزات كتافها) .. ما عرفتش هو قال لي هكذا موالف يدير مع الناس لي قبل مني ..

م : ( شاف فأيوب) .. هذا غالبا الدار غاتكون مرهونة للبنك مزال ما كملوش الخلاص .. حيت لي تيكونو مرهونين للبنك ممنوع عليهم يبيتو دار و ممنوع يرهنو ..

أيوب : ( كيدوز يده على ذقنه) .. كولشي ممكن داك خينا نصاب .. مهم دابا القضية ديال الضوء اش غانديرو فيها ..

م : ( خذا الوراق حطهم عندو) القضية ديال الضو مافيهاش نقاش الحكم لصالحها ..

أيوب : ( شاف فکلثوم ) .. هادشي لي گلت ليها .. ما عندوش الحق يقطع عليك الضو ..

كلثوم : ( تنهدات براحة) ... هي غير نتهنى صافي ..

م : ما عندوش شي سبب علاش يقطع عليك الضوء .. حتى لو قلنا ما كتخلصيش غايقطعهم لك من فلوس الرهين ..

كلثوم : اودي استاذ انا والله حتى مخلصة كاع الشهورة ديالي .. ما عندو ما يقطع ليا .. كون عطاني غا فلوسي

م : ان شاء الله نساليو هاد القضية و رفعي عليه دعوة يرض لك فلوسك ..

كلثوم : (حركات راسها بالايجاب).. واخة انشاء الله اهم حاجة يرجعو لي الضوء دابا ..

م : ( ابتسامة) .. ان شاء الله غانرضو الضوء .. دابا غانديرو تصحيح لهاد المقالة عامرة اغلاط .. و غدا انشاء الله غانحضر معاك للجلسة ..

كلثوم : ( بابتسامة عريضة ) الله يعطيك الخير استاذ شكرا بزاف (هزات صاكها) و قول ليا شحال الاتعاب ديالك !

م : ( شاف فأيوب) .. جيتي من طرف سي أيوب .. الف و خمس مية درهم و حتى حاجة ما خاسرة فيكم ..

أيوب: ( وقف سلم عليه و شكرو) .. الله يحفضك استاذ ..

كلثوم : (شافت فأيوب و سلمات على المحامي ) اهم حاجة عندي هو الضو يرجع ..

م : ههه غايرجع ان شاء الله .. غير كوني هانية ..

شكروه و خرجو كيف العادة هي قدامو و هو موراها.. عطات المعلومات ديالها للكاتبة و خلصاتها اتعاب المحامي ..

أيوب: ( سلك على الكاتبة) الله يحفضك اودي افاطمة

فاطمة : هههه تنتسالك عراضة .. والله لازگلتها ..

أيوب : (ضحك بخشونة) .. الالة تستاهلي كون ما كنتي خدامة دابا كون ديتك تضربي الحوت ..

فاطمة : وا نعوضوها ان شاء الله .. سير ما تخليش الزين يتسنى ..

خرج ضاحك تبع كلثوم لي كانت تتسنى قدام الباب .. كيشوف فيها من الداخل ضاربة فيها الشمس كتشعشع و الجلابة زايدة مزيناها .. ميل راسو تيشوف فيها و عاض على شفته

ايوب : ( قرب لها حتى ضرب كتفو بكتفها) مشينا؟

كلثوم : ( رمات شعرها ورا ضهرها و ضحكت بدلال باغية تغريه عاجبها زينها) .. مشينا ..

توجهو للسيارة ركبو ديمارا مباشرة شد الطريق الكبيرة ... شاف فيها بنص عين ..

أيوب : تغديتي ؟

كلثوم : ( شافت فيه) كليت واحد صوندويش و صافي ..

أيوب : ( تيحك فلحيته) .. تمشي تغداي ؟

كلثوم : ( علات حواجبها) فين ؟ ( شاف فالساعة ) دابا ؟ الربعة هادي ..

أيوب : ( شاف فيها معلي حواجبه) علاه الماكلة عندها وقت .. غانديك ضربي احسن حوت فالعالم وعلى حسابي الالة ..

وقف السيارة فالباركينغ ديال المرصى .. خرجات كلثوم هازة صاكها الهواء كايطير لها الجلابة خلات لاطاي ديالها مطراسية و الشعر طاير فالسماء .. ريحة البحر تضرب فيها .. غمضات عينيها و استنشقات الريحة مبتسمة .. خرج ايوب تاهو تابعها خشى تيليفون فجيبو و هاز باكية ديال ماربورو فيده ..

أيوب: ( حط يده على ضهرها كيوريها منين دوز).. كيعجبك بعدا الحوت ؟

كلثوم : ( ضحكت بخفوت) و شكون لي ما يعجبوش الحوت و البحر ؟

أيوب : اليوم تاكلي الحوت لي عمرك كليتيه .. ( شاف فيها) .. كتجي للمرصى ؟

كلثوم: ( ردت بنفي) .. عهدي بيها من زمان ..

أيوب : احسن بلاصة فأكادير هيا هادي اودي الالة كثو ..

اكتفت بالابتسامة و سرحات عينيها فالمكان كان ساحة كبييرة كلها قهاوي ديال الحوت .. و الطبالي ديال بلاستيك مكان شعبي لكن كيف كيقولو تاكل فيه ذهب بثمن الذهايبي .. و الى ما حضيتيش راسك الگيادة يديرو معاك خدمتهم و تحط الثمن الصحيح فوق الطبلة ...

.أيوب: ( كيشير لبعض الاشخاص لي كيعرفهم بيديه).. كريم ..

***: افيين ابا ايوب ( تسالم معاه بالكتف) عاش من شافك اصاحبي

أيوب : ( دوز يده على راسه) .. غير الجرا و الخدمة..

****:ربي عويين اخاي .. كيف ديما ؟

أيوب: شي طبلة مشكلة الله يرضي عليك ..

***: الزبدة اباا أيووب .. جيتي مع النيوو

. أيوب : ( اشار لكلثوم تجلس) .. واحد حميدة ما بانش ..؟

****: موجود راه مع الگيادة التحت ..

أيوب : ( ضرب ليه على كتفه) .. ما تعطلش جيب معاك شي كوكا باردة .. زوج ايطرو

تخطى الكرسي لي قدامو و جر الكرسي لي جنب كلثوم .. جلس عليه و دوز يده ورا ضهر الكرسي ديالها .. خذا كارو من الباكية دارو ففمو ..

أيوب : هانية نكمي حداك؟؟

كلثوم: ( هزات كتافها) .. عادي ..

أيوب : (كينطر من الكارو و يسوط للجهة ثانية شادو بزوج صباع ) .. اوا الالة كثو اليوم تعمريها حوت ..

كلثوم : ( علات فيه راسها) .. الحوت مقلي دغيا تيگهمني

ایوب : بغيتي شواية?

كلثوم : ( بنفي ).. لا ما عنديش معاها؟

ايوب : (قرب ليها كيشوف فتقاسيم وجهها من الجنب) .. معاياش عندك ازين؟؟ ماكلة كيليميني سندويتشات و دانون ..كولي ماينفعك و ربي الصحة مولاها ربي ...

كلثوم : ( طلقات ضحيكة بخفوث و علات فيه عينيها) هههه واش نتا ديما هكذا ؟ لي بغيتي تقضي لو شي غرض تجيبو توكلو الحوت ؟

أيوب : ( طفى الكارو مدوز لسانه على شفته التحتية و عيونه تيتفحصوها من راسها لصدرها ) بغينا نتهلاو فيك زعما ..!

كلثوم : ( حلات عينيها و شافت فيه ) ربي يخلييك ...

جذباتو بالضحيكة الخفيفة .. و الصوت الرقيوق .. ديك النبرة السوسية المخلطة مع العربية لي تتكلم بيها .. العيون الواسعين المجبدين بالكحل .. و الشعر الأسود لي كل شوية تضرب بيه و تضرب فيه ريحتو المسكرة المنعشة .. تنهد و دور راسو للجهة الاخرى هز تيليفونه و تيدوز يده على صدره .. و حتى هي كانت شادة تيليفونها تتخربق فيه حتى وصلات الطلبية و نزلو ليهم ما لذ و طاب من الأطباق البحرية المقلية و الشلايض و الفريت عمرو لهم الطبلة من الطرف للطرف ..

كلثوم : ( تتشوف فداكشي مصدومة) .. شكون غاياكل هادشي كلو ؟

أيوب : ( قهقه بخشونة) .. نتيي اللالة كثو ..!

كلثوم : ( ضحكت و قربات لها طبسيل ديال شلاضة ) ..انا ماكلتي غا على قد الحال ..

أيوب : ( شاف جهة صدرها و نزل عينه على فورمتها لي عامرة شوية ) .. باينة عليك ازين .. ضربي الحوت ضربي ..

كلثوم من النوع لي تتدخل فالطبسيل طول و عرض .. تتبغي بحال هاد الأجواء تتعجبها الماكلة ديال الزنقة لكن قدام أيوب خصوصا أنها أول مرة تخرج معاه ما متعوداش عليه ما قدراتش تاكل على راحتها بالرغم أنها غلقات و ماحرماتش راسها.. أما هو كان عكسها تماما كي تحطو الاطباق قدامو دخل فالحوت ياكل من هنا و من هنا ما مسوقش ..

شاف فيها معلي حواجبه و هي تتهز بطراف صباعها شوية من الصول فطبسيل بعيد عليها شوية .. جر لها طبسيل شلاضة حيدها من قدامها و دفع لها طبسيل حوت مشكل ..

أيوب : أكولي من طنز دوالو ..

كلثوم : ( حسات بكرشها تگوفلات ).. صافي شبعت .. تگهمت ..

أيوب ( قشر لها كروفيتا) .. شدي شدي .. مهبرة بحالك ازين ..

كلثوم : ( ضحكت بدلال و خدات من عندو ).. صافي الله يخلف ...

أيوب : (جر قدامو مقلاة ديال الكلمار بلاصوص غمس فيه و مد لها ) حلي فمك كولي ما ينفعك ..

علات حواجبها مصدومة من جرأته معاها ماعطاهاش فرصة تزيد تعجب قرب لها اللقمة لفمها مباشرة حلاتو خذاتها من عندو تتمدغ فيها ..

كلثوم : ( حطات يدها على فمها اللقمة جاتها كبيرة ).. صافي والله مانزيد ..

أيوب : ( شاف فيها كيضحك) .. مافيدكش .. شربي المونادا

كلثوم : ( خوات كاس الكوكا.. تتشرب رجعات للور تسندات على الكرسي ديالها) ..بالي مشغووول مع القضية و الدار ..

أيوب : ( كياكل و يهضر) ..اودي گلنا لك تهناي .. بلان بوجمعة عندي لا ما قضاتش فيه المحكمة نقضي فيه أنا ..

كلثوم : ( تگعدات مخلوعة) .. كيفاش زعما ممكن ما تقضيش فيه المحكمة ؟

أيوب ( ضحك كيحرك راسو).. المحكمة لي ما تجيب ليك حقك ندعيوها هي براسها ..! كنلعبو هنا .. كووني هانية دوينا ما تعاود غير الصلاة على النبي ..

كلثوم : ( تنهدات زفرت بضيق) .. خايفة غا ينزلو يتحاماو عليا وليت تنخاف ندخل للدار يتلقاو لي .. ديك نهار بغاو ياكلوني ..

أيوب : (علا فيها حواجبه و دفع المقلاة لي قدامو).. الى كان راجل يديرها .. داك الساعة گول ليه يوجد كر** للقرعة (وسعات عينيها بصدمة من تخصار الهضرة خصوصا انه أول لقاء.. ضحك و شاف فيها ) سمحي لنا فمي خاسر ..

كلثوم : ( حكات راسها) اه عادي ..

أيوب : (خذا كلينيكس مسح يديه ) المهم نتي تهناي ما تمرضيش راسك بهادشي .. الى دواو معاك صوني عليا داك الساع نكون عندك ..

كلثوم : ( تتمسح يديها و الابتسامة على وجهها عريضة) شكرا بزاف على هادشي لي تدير معايا واخا ما كتعرفنيش ..

أيوب : ( شرب كاس كوكا دقة وحدة) الدرب كلو عارفني سولي عليا اي واحد بنادم يقصدني واخة ما نعرفوش نقضي ليه الغرض .. و ما عندييش مع التعدو ..

كلثوم: ( حركات راسها) .. تا حد ما يبغي الظلم و التعدو الله ياخد الحق ..

ايوب : ( شاف فساعته) اه حاجة اخرى.. نتي عندك عقد الكراء و عقد اعتراف بالدين ياك؟

كلثوم : ( حركات راسها بالايجاب) .. اه ..

أيوب : (حرك راسو و ابتسم).. مزيانة كاع ..

كلثوم : ( رفعت راسها) علاش ؟

أيوب : ما تخرجيلوش من ديك الدار .. عندك عقد الكرا مايدي منك تا..(سكت و رجع تكلم) معندو ما يدي منك .. و نهار تبغي تخرجي طلبي ليه شي عشرة تالمليون باش تخوي ليه الدار .. تعويض نيت صحيح

كلثوم :(علات حواجبها) كيفاش زعما ..

أيوب : هو غايبغي دارو من هنا القدام غايدير جميع الوسائل باش يخرجك غير وجدي راسك مزال تشوفي معاهم شلا بلانات ولكن ما تخرجييش ليه منها طوفي الك.لب كيما طوفك و انا معاك.. و نهار تبغي تخرجي طلبي ليه شي عشرة تالمليون فوق فلوس الرهين عاد خرجي الى بغا دارو و الى ما بغاش يمشي يق.ود..

شافت فيه موسعة عيونها البنية و رمشات رموشها بسرعة كل شوية تتزيد تصدم من جرأته تخسار الهضرة عندو فكلامو داخل عادي بدون شعور

كلثوم : ااه واخة .. انا كنبغي كولشي قانوني باش ما يلقى بنادم فين يشدني ..

أيوب : ( ناض وقف ) و حنا كنمشيو غير بالقانون .. ( غمزها) نوضي تغسلي ازوينة ..

يتبع...