وفعلا كانت اشارة واضحة وكانت القدر معاونهم باش يتجمعو ، وفهدا الاثناء اللي كانت فيها هي معاه فالدار كان بناصر كيناقشالموضوع هوا ومونية فبيت النعاس وهوا مزال مربع فوق السجادة اللي صلى عليها ومونية جالسة وكتسمع فرحانة
بناصر: هادشي اللي قال ماجبرت مانقولو فديك الساعة قلت ليه خلي حتى وكان نشوفو اش يدير الله .. دابا الى قلتي ليهم لا مشكيلةوالى قلتي ليهم اه مشكيلة كن غير مخاطبينش بعدا رانيا ماشي مشكل
مونية: ايوا فين المشكل ياك غيتوانسو حسن ماتجي شي مسخوطة اخرى تحرر العيشة فرانيا وهي غير درويشية
بناصر: وا حتى نتوما طحتو على هاد العائلة مابغيتوش كااع تنوضو.. هما مابيهمش سكينة بيهم انا اللى شافوني راجل مزيان كلهم بغاو يتناسبو معايا.. اما كن جات عليهم مايخطبوهاش على زين ديك التبهديلة باش كتخرج .. نقولو هادا ك اللولاني شافها فالعرس بتكشيطة ماشي مشكل والثاني؟ وهادا حتى هوا ؟ فين شافها وكيفاش الله وعلم
مونية: ايوا سيدي راه هي اللي جابتو .. راه سبق منها قالت ليه اجي باش ميمشيش عقلك بعيد
بناصر: هييه!! شداها لهادوك واش هادي خاص باباها شي عقل غادية تبهدل بينا مع النسايب وشوووف لهاد المسخوطة مابغاتشاي تحشم
مونية: مادارت وااالو ياك بغا المعقول ايوا صافي راه قلب عليها قاليها افلانة انا ناوي المعقول واش قايلة قالت ليه صافي سير عند با شنو بغيتيها تقوليه؟
بناصر: متأكدة قابلة؟
مونية: قاابلة الى بغيتي تسولها سولها
بناصر: غادي نسولها بطبيعة الحال نشوفو شنو هادشي…واخا مابانشلي فزواج لخوت خايب وزوين فنفس الوقت.. هي صعييبة الى هضر معاها شي واحدودا قاليهاغير شي كلمة دير شي فضيحةوغيحقدو عليها هي وحتى ختها معاها
مونية: ايوا ضبر راسك
بناصر: انا بعدا كن جات عليا نزوج سكينة لهاد المهندس ومنزوجش رانيا لداك خيينا .. ماهنانيش خااطري كااع من جيهتو .. هاد المهندس بعدا راه مهندس .. تلاقيتو فداك العرس ديالهم كيبان مزيان وكيحشم مافيهش الهضرة بزاف وباش زدت رتاحيت فاش كانو حاو يخطبوها وقالك عطيه شي سجادة يصلي ومشا صلى تما وسط الدار
مونية: ايوا الرزق. ديالو وديالها عند الله
بناصر: ماعرفتيش علاش طلق؟
مونية: رانيا قالت ليك طلق مرتو بسبب الصدع والغيرة .. بغات هي تحكم وكتقطع بيه حوايجو .. سولتها قلت ليها واش صافي هادا هوا السبب قالت لي راه صبر ليها حتى تقادا الصبر حتى وصلاتو للشوهة قدام الناس صافي تما قاليها الله يعاون ابنت الناس
بناصر : دابا هادا اللي ماصبرش للطبيبة اللييصبرو عليها الناس يصبر لسكينة اللي غير نكافة وقبيحة واخا تقباح هاد الطبيبة حتى تعيا ماتوصلش لسكينة
مع الدخلة للدار لقاتو متكي كيتسناها ، واكيد مادخلاتش بنفس الحوايج وبدلات فالمحلعاد طلعات وفوق هادشي طلعات بكري ومابقات لا حرية لا هم يحزانون كلشي رجع كي كان بالزيار وبالسربيس دالعسكر .
دازت من حداه بغات تمشي للبيت لاكن كم قنانفو من الجناب متبع ليها العين وقال
بناصر: سووكايناااعععع… مالك متسلللتي اجي لهنا.
سكينة:ضارت شافت فيه بارتباك) اا؟؟ انا؟
بناصر: اييه شحال من سكينة عنداا؟؟ اجي ياجي.. زيدي لعندي
هبطات راسها ومشات جلسات قدامو مربعة يديها وناض هوا جلس جمعرجليه ويديه شاف فيها مصغر واحد العين كي حديدان
سكينة: لا باقي ولاكن قادر يشري الدار غير مازال مااا عول
بناصر: اممم
بناصر عرفها دات وجابت معاه فالهضرة وصافي فتحات ليه الباب وقابلة عليه وحتى هوا رجع اللور هز راسو وقال
بناصر: ايوا قوليه يدوز نشوفوه كي داير.. بلاش ماتفرحي دابا حتى نشوفو نشوف اش تحت راسو
حركات ليه راسها بالايجاب وناضت مشات للبيت لقات رانيا واقفة كتسنط عليها وماعاجبهاش الحال وقالت بغضبوخفوت
رانيا: مابانت ليك غير عاد العائلة باغا تشوهيني. ياك ؟ فين مايدورو يقولو خت رانيا انا عاطاهم وجه ونتي جايا عندي ضربي ليا كولشي فزيرو وتخيبي ليا صورتي قدامهم يحساب ليهم انا بحالك
سكينة: بنص عين ) باش حسن مني نتي هههه كضحكيني والله راه كي خطبوك نتي خطبوني انا مالك نتي زايدة عليا الجناح ..سيري سيري
كانو غيتشادو لاكن ماصلاحش ليهم وبناصر حاضر، اكتفت رانيا بحسبي الله ونعم الوكيل ومشات عطات وجهها للحيط كتبكي ماعجبهاش الحال وماعجبهاش الوضع ومابغاتش سكينة تدخل معاها لنفس العائلة او يعرفوها . تفقصات وتطعنات في حين سكينة فرحانة وعاجبها الحال وماقاداها فرحة وسيفطات لغالي مسج علماتر باش يتاصل بباعا ويتلاقاه .
وصبح الحال بنهار السبت وفاقو بحال العشكر على التخمال وبناصر غادي جاي على راسهم حتى للربعك دلعشية عاد جاء الفرج على الجيميع وكان اتصال من غالي لبناصر الليكانو رجليه غاطسين فالرغوة حتى هوا كيشتف على واحد الكاشة فالبانيو ويعاونهم ، مشات سكينة تجيب ليه تيليفون وغير طلعات النمرة دغالي خرجات عينيها وداتو ليه كتجري ورجعات اللور دارت راسها كتعمر السطل من الطواليط في حين بناصر بقا كيحقق فتيليفون وهوا واقف فوك المانطة وسروالو مكفض
بناصر: ماعرت ديالمن هاد النمرة هادي( ربط الغوباشة) االو السلام عليكم …. اييه اسيدي هوا هادا شكون معايا؟… (تبسم) ااه اييه ايه كي دابر لاباس كولشي بيخير العائلة؟،،،،، اييه مرحبا .. ماشي مشكل انا غنكون تما قريبة ليا قريبة ،، الله الموعد االله يتهناك مع السلامة
قطع وكمش قنانفو لقدام كيشوف فتيليفون ماتلفتش وقال كيعيط لمونية
مونية: طلا عليه من باب كوزينة) فين غادي شكون عيط ليك؟
بناصر: اري دابا اري الله يهديك كتبغي تعرفي كولشي
خرج بناصر مفركس ومونية متبعة ليه العين من السرجم كتحقق وتسائل غير بوحدها في حين طلعات سكينة للسطح كتجري صونات على غالي بسرعة
سكينة: خرجتي؟
غالي: بهدوء)عاد خارج
سكينة: مهم بابا خرج دابا بغيت نعلمك وصافي اي كلمة قالها ماتديش عليه راه هضرتو قاصحة وهاكاك دايرة فهمتي.. راه قااصح فهضرتو وفكلشي مكيحشمش غير سلك معاه اللي قالها قوليه واخا هي اللولة
غالي: وصاافي صافي يالاه انا خارج(على عجلة) حتى نعيط لك
سكينة: عنداك تقوليه شي كلمة ولا تبغي تفهم عليه
غالي: وصاف اسكينة كتعطليني راه اصلا معطل ( على عجلة) يالاه بسلامة
قطع عليها ونزلات للدار متوثرة لقات مونية راجعة من البيت اللث كانت كطل منو وتسول ختى قالت ليها سكينة ها شنو وهاشنو قدام رانيا اللي كانت قدام البانيو معصبة كتشوف فيهم وقالت
رانيا: انا ماعرفت شنو درت فحياااتي حتى ربي كيجمعني معا ك… واعباد الله وابغيت نتفك منك ومن فضايحك ونتي لاسقاني حتى فالزواج .. اختي شنو بغيتي عندي الله ياخد فيك الحق
سكينة: واش نتي حمقة واسيري سيري راه ااصلا كنعرفو قبااال ما يجي هشام ديالك وقلتها لمي وديجا هضر مع مي فتيليفون نتي عاد صبح عليك الحاا ل
رانيا: ماشي شغلي اصلا تزوج وانا كن كنت بلاصتك منقبلش ومنتشاركش معاك فنفس العائلة ، نتي كاع منتشرف بيك انا قدام الناس شوفي راسك قداش ومزالة كتبولي فالفراش ولباسك مشوه ومكتخشمييييش وااالو ماعندكش كرام ديال الحشمة من شي واحد، وماشي ديال الزواج اااصلا.. شنو غيقولو عليا فاش يلقاوم مزال ناعسة حتى للوحدة ومكتجمعي طبلة ما تغسلي ماعن ماطيبي ماديري والو ..غيوقولو عليا ختك ..واخا نبغي ندااافع على راسي يعايروني بختك ختك ختك ومايبقا حتى واحد يحتارمني
سكينة: بنص عين) ماغنديش عليك ومنديهاش فيك انا ماكتهميني لا نتي لا هادوك اللي دايرة عليهم هاد الحال كلها
رانيا: هاااا ها شنو قلنا(شافت غمونية) شفتي علاش كنهضر شفتي.. مغتحتارم حتى واحد غتشوهنييييي كن بقات بعيدة عليا ما ساق ليها حتى واحد الخبار
شداتها مونية جلسات مخلوعة وسكينة حتى هي مخلوعة بداو كيتجاراو يعطيوها الما وهي يابسة تقول غتموت ومخلوعة مارجعات فيها النفس حتى تطلقات شوية وفاتها الحال وقالت سخفانة
غالي: بخجل كيرمش) شنقوليك اعمي انا جيت طالب راغب ههه.. الى قبلتي عليا فسكينة بنتك
بناصر: بصرامة) ماقلتي عيب.. ولاكن باش نفهمك مزياان ماتجيش شي نهار تشكي عليا.. على ما بان ليا هي راضية عليك ونتا راضي عليها ايوا سمع مزياان الله يرضي عليك .. سكينة ماشب هي رانيا باش بلااا متقارن بيناتهم ،، الراس قااااصح واللسان شوية ماضي والشقى على قد الحال والطياب زيرو ، والجلاس فالدار مغتجلسش ليك فالدار وتقول زعما تقابل ليك الدار بحال العيالات راه الخدمة مغتجلسش منها والى قدرتي تصبر عليها صبر ماقدرتيش من هنا راني كنعلمك
غالي: حدر راسو كيضحك ) اييه ايوا ضاروري خاص الصبر
بناصر: نتا واك مطلق وعااارف الزواج اش فيه بلا منوريك .. ايوا الى فيك مايصبر هوا هاداك مافيك اللي يصبر من دابا دير بناقص من شي زواج ،،، اشنو السبب علاش طلقتي اللولة باش نعرف اش كاين؟ ياك من حقي نعرف
غالي: من حقك بطبيعة الحال راه بنتك وخايف عليها
بناصر: هااا ههه باش بلا منزوقو الهضرة
غالي: كاينة… الطلاق مكانش ختياري لولا الضروف اللي كانت اجبارية ماكنتش ناوي نطلق.. انا تزوجت زواج تقليدي .. زواج الواليدين كما كتعرف وشوف واش يصدق ولا لا .. خصوصا فاش المشاكل كيتجاوزو الخطوط الحمرا مرة وجوج وثلاثة وكتعيا تصبر وتعطي انذار راه اخرتها كتسالي بالطلاق
بناصر: ايواا هاحنا مزالين فيها وعاد انا كنقوليك سكينة راه ماشي ديال الزواج فهاد السن راه عقلها باقي صغير دغيا كتعصب دغيا كتنفاعل موحاال واش تقدر تصبر لهبالها
هبط غالي راسو كيضحك حشمان وقال
غالي: غنصبرو معاها حتى دير عقلها راه اغلب بنات ديال دابا هاكاك
بناصر: ايوا اللي بغيتي… ومن ناحية السكن فين ناوي تسكنها
غالي: حاليا راني ساكن بوحدي كاري دار غير هنا وان شاء الله راه ضاروري نشري الدار غير نشوف فين غنستاقر بالضبط
بناصر: علاش واش كيحولوكم ؟
غالي: لا ماشي مكنتحولوش ولاكن كنسافر على برا تقريبا جوج مرات فالعام .. ماركزتش مع الدار
بناصر: ايوا مزيان الله يسهل الامور … غير هوا نوصيك وصية.. السكنة مع الواليدين راه ماصالحاش.. باش نكون معاك صرييييييح ..بغيتي تتهنا فالدماغ ديالك ماتسكنها مع حد وخليها غير هي والحيوط(دور وجهه كيتأمل) لحيوط ويا ربي يتهناو راه غير بوحدها كتقلب وتشقلب
بقا غالي ساكت ومهبط راسو واللي قالها بناصر كيقوليه اه حتى عطاه البنت وخرجو بجوج كيتجمعو ويتناقشو باش يقدر بناصر يقرب من غالي شوية ويعرف شخصيتو وكيفاش كيفكر مشا معاه على رجليه كيهضرو فمواضيع متنوعة حتى بدا كيطيح الضلام ووقفو فالحومة قدام باب العمارة يتوادعو
بناصر: ايوا هوا هادا ..
غالي: دابا بقاو الواليدين يجيو معايا وصافي، الى جات على خاطرك مكاين لاش نطولو فالخطوبة انا واجد نديرو زعما شي خطبة صغيرة فالقريب العاجل صافي ونديرو العقد نيشان بلا زعما منطولو راه ديجا داز تعارف بيناتنا
طلع بناصر راشقة ليه وغالي دخل ليه الخاطر ورتاح ليه ، لقا مونية فالسرحم كطل وتسنا حتى دخل هاز خنافرو مطلع شلاقمو من القنات وهاز حجبانو وساد عينيه كيعيط
بناصر: مونياااعععع
خرجات من البيت كتفرنس فرحانة شافتو عرفاتو راضي مرتاح من داك التعبير وديك التعييطة كتعرفو راشقة ليه
مونية: امضراااا شنو درتو؟
بناصر: صافي طرقنا المسمار غدا غنقلب عليه ونبحث عليه نعرفو اش كيدير اش كيخدم
مونية: برقو عينيها) بصح؟؟ هي صافي تافقتو
بناصر: على هي خلاتنا نتاققو .. صااافي تافقات هي وياه توريني فيها .. راه كااتهضر معاااه ،، الى كانت طمعاتو بالكدوب بعدا راني فرشت ليها كووولشي باش ميجيش غدا ولا بعدو يكشي علينا ولا يعيب عليها ولا يقوليها شوفي ختك
مونية: هيييه!!! ويلي شقلتي ليه
بناصر: داكشي اللي كاين راني قلتو باش الى بغا يزيد يزيد الى ماعجبوش الحال يرجع اللور مانتعايبمعاه مايتعايب معايا
مونية: باهتمام) ايوا وشنو قال؟
بناصر: مقال وااالو صافي قالي نديرو الخطوبة نيشان مكاين لا تعارف لا يحزانون والعقد ديريكت
مونية: هييه دغيا ؟؟
بناصر: وشنو غنتسناو؟؟ تبقا دي دي. دي ديديدي هي وياه فتيليفون ولا تسلت تمشي تخرج عندو ؟ ااش غنتسناو؟ صافي جا قالك الزواج غدا نقلبو عليه الى كان مزيان ماعندو حتى مشكل صافي الله يسخر .. ماعندها ماتزيد دير هنا ومايصلاحش لجلاس بلا عقد صافي سالينا
طرق بناصر المسمار لسكينة ومابغاش حتى هوا يتعطل، كيعرف بناتو مزيان وعارف كل وحدة وتربيتها وبخصوص سكينة عارفها كطير فماشي لمصلاحتو يعطيها لشي راجل ويطول ليها فالخطبة وفوق هادشي يبقا حاضيها، عارف راسو يحضي حتى يعيىى. ودوز ليه من شي جهة فقال اللهم مادام صافي قررت نعطيها فيضربو الكحل فالابيض نيشان ويوقع اللي بغا يوقع ديك الساعة ، من جهة اخرى كيشوف انه ماعندها حتى حاجة تحبسها على الزواج والضروف والاخوال كلها مناسبة وكيشوفها غير كدور وصافي وحاضية المحل ديالها اللهم تمشي لدار راجلها وتكمل مشوارها .
اما هي كانت فالحانوت غادية جايا ، وغير سمعات تيليفون كيصوني ناضت كطيير جاوباتو ولقاتو قدام المحل واقف ومشات كتجري ركبات معاه متلهفة تعرف التفاصيل
حلات الباب وهوا كيعيط لاكن زدحاتو ومشات وعينيها مغرغرين ماعجبهاش الحال وماعجباتهاش ردة فعلو وبقات كتلون راسها بندم شديد وتردد فنفسها
انا اللي حمارة نستاهل .. لويتي ليا يدي اللي كضرني دابا وماعندي كي ندير نرجع اللور بزز مني غنتزوج .. اما كن خليتك بعيد ماتقربش ليا ونشوفو واش غتنفخ وتهز مناخرك بحال هاكا.. ولاكن انا اللي نستاهل وخاصني نسكت حتى يدوز هاد الزمر وعاد نتفاهمو
تفكعات وقطعات الحس ومابغاتش تسمع على موضوع الخطبة ولا الزواج اللي كيوثرها. اما بناصر مابغاش كاع يسكت هوا ومونية وكيتناقشو كلشي قدامهم وقدام رانيا اللي معالم بيها غير الله وقاطعة فيها النفس وكتشوف وماراضياش ولاكن متقدرش تهضر فحضرة بناصر،
ديك الليلة دازت كحلة .. لا على سكينة لا على رانيا ،، كل وحدة قالبة وجهها للحيط كتخمم فمستقبالها حسب عقليتها وشخصيتها .. اما غالي ماتاصل ما سيفط مسج وهادشي زاد اكد لسكينة انها هي الطرف الضعيف فهاد الساعة وخاصها تصبر مدام عطاتو يدها يلويها ليها،، فنفس الوقت ماتبينش ليه انها خايفة ومرعودة ولاسقة فيه باش ميزيدش يتمادى وياخد راحتو اكثر خصوصا مللي وصل للموضوع لبناصر ودوز الكلمة والموضوع داخلة فيه العائلة فأي خطأ غيضيع كولشي ويخسر الخواطر ويمشي فيها جاو ومجرور لا هيا لا ختها .
صبح الحال وصبحات رانيا فالسطح كتهضر مع هشام وكتعاود ليه ماسمعات ودنيها وهوا كيسمع ومن صوتو باين عليه مخنوق باغي قلبو يسكت وكيهضر بدون رضى
هشام: دابا باك صافي عطاه الكلمة
رانيا: صافي قاليه اجيو نديرو خطوبة
هشام: انا قلت ليك راه الى غالي خطب سكينة مانقدروش انا وياك نكملو
رانيا: بغيض) وشنو غندير ليهم انا منقدرش نهضر مع بابا
هشام: شرحي لختك وهضري معاها
رانيا: علاش ماهضرتيش نتا مع غالي انا بعدا هضرت مع سكينة ماسمعاتش ليا نتا مادرتي حتى محاولة
هشام: حنا الرجال ماشي بحالكم نتوما حنا مكندخلوش فهادشي كل واحد كيضبر راسو ..واش غنقوليه لا متزوجش بيها؟ دابا صافي وصل ختى لباك وعطاه الكلمة كاع واش هاد باك حتى هوا مكيفكرش دغيا قاليه هاك
رانيا: بغضب) انا الا بابا ماتهضرش عليه هاكا اهشام وزايدون الى مابقيتيش باغيني صافي الله يعاونك مغنبزز عليك حتى حاجة وانا درت لي عليا وماعجبنيش الحال ولاكن ماشي انا اللي كنتحكم وماعنديش السلطة على ختي ولا على بابا
هشام: وهضري مع ماماك علاش ماهضرتيش معاها انا عرفتي شنو درت لبا؟؟ درت ليه فضيحة .. وتكلخ فهادي ولا ماعرفتش واش مكيفهمش ولا مالو ..كنحس بيه كيفضل غالي عليا مكيخسرش ليه خاطرو واخا انا اللي جالس معاه ومونسو هنا وعايش معاه جميع الضروف، وغالي اللي كيجي مرة فشحال ومكيسيفط ليه حتى ريال كيتعامل معاه باحترام ومكيقدرش يخسر ليه،، مافهمتش علاش هادشي مابغاش يتفهم ليا وعلاش كيميز بيناتنا .. انا كن كنت اصلا كنهمو مكانش كاع يدير هاد المشاكيل وهوا قادر يمنع هاد الزواج والى بغا يمنعو غيمنعو ولاكن هوا متسوقش ليا وتبع غالي فريوو
تنهدات رانيا بأسى وبقا فيها هشام والطريقة باش شكا عليها حتى حزنات عليه وقالت
رانيا: علاش كتقول هاد الهضرة واش كاين شي اب كيميز بين ولادو ؟ بلعكس انا كنشوف باك داير ليك خاطرك اكثر منهم كاملين
هشام: لاالا غير كيبان ليك انا وغالي كيميز بيناتنا،، لخرين مكنهضرش عليهم ولاكن انا وغالي كيدير بيناتنا تمييز بزااف
هشام: مقالهاش ليا انا غير فهمت منو انه ماغيخلينيش بلاش فهمتي،، غيقدر يبيع هاد الدار ويشري لي برطمة ولاكن فوقاش مزال مابين ليا والو..وباك دابا معكس لينا كيتسناك تكملي قرايتك وانا اصلا مغنخليكش تخدمي يعني كنضيعو الوقت وصافي، كن دابا باك تساهل معانا كن راحنا مزوجين وساكنين مع با وبيخيير.. اصلا با غير بوحدو والدار خاوية .. هاد القرايا دوالو اللي دايرة لينا هاد المشاكيل
رانيا؛ مابقا والو بقا غير لعام الجاي ها عماين دازت طايرة، انا نيت مابغيتش نخدم ومافيا اللي يخدم غير دايرة لخاير لبابا
وهادي هي الاجواء اللي ولات فدار بناصر وفحياة سكينة اللي داخلة فصدمة ومقادراش تستوعب وكتشوف كأنه كولشي كيدور على شي بنت اخرى ماشي هي.. ماشي هي اللي تزوج وتعيش دوك الاجواء لالا مستحيل ،، جالسة وكتقول اوييلي واش صافي غالي هوا شريك حياتي فهاد الدنيا؟؟ يعني صافي هوا اللي غنتزوج بيه هوا اللي مكتاب لي؟!! وكيفاش غتكون الحياة معاه وكيف دايرة عاد الحياة الزوجية ! يعني مغنحققش حلمي ونسكن بوحدي وندير اللي بغيت ونربي كلب ونلبس اللي بغيت ونشري بيجامات معريين وبانطوفات فالالوان وناعب بشعري كما بغيت وناكل فوق النموسية ونفطر بالعصير ونعمر ثلاجة بدانون وندير البينوار ونجلس فالرغوة ونشعل الشمع ونطلق الموسقى!! يعني كاع احلامي تبخرات كاع داكشي اللي حلمت بيه نديرو صافي تبخر !! العيشة بوحدي بلا حتى شي قمقوم صافي تبخرات !!
بغات تبكي وداق عليها الحال ودخلات فاكتآب ورجعات مهمومة واللي هضر معاه كتبقا غير تشوف فيه وتنخصص وتنهد ،، ندمات على النهار اللي عرفات فيه غالي ومشات معاه حتى وقع اللي وقع وبقات كتلوم راسها وتزيد تغرق راسها وتاكل فنفسها وتعدبها وكتحداها وتقول نستاهل حيت درتها بيدي .
شكات وبكات حتى بغات تموت ومابقا عندها خاطر لحتى حاجة،، اول مرة توصل بيها الحالة لهاد المرحلة ومايبقا ليها خاطر ولا كانة وتروع معدتها وتسد ليها الشهية ويتقلب مزاجها رأسا على عقب.. بردات قلبها على ليلى وفوز اللي جالسين قدامها وكيشوفو فيها مافهمو واش يواسيوها ولا يباركو ليها ولا شنو يديرو؟ هي فالعادة الانسان كيفرح ليك بالزواج كأنك درتي انجاز عضيم ويبارك ليك لاكن هما حشمو حتى يباركو ليها وهي قدامهم مغبونة ومكضحكش ومكتفلاش وكتهضر بجدية وحالتها حالة
فوز: دابا مابغيتيش تزوجي صافي شكون بزز عليك؟
ليلى: اوييلي من نيتك !! تحمد لله اللي طلع معاها راجل وجا خطبها وناوي يتزوج بيها اما كن شي برهوش ولا كلب كن راه هرب وخلاها وكن راها دايرة هاد الحالة على الشمتة اللي شمتها ، اما دابا راه خصها تكون مرتاحة وفرحانة !! اوييلي عمرني شفت شي وحدة واقع ليها هاكا فحيااااتي!! واش تنادم معاك الحال ؟ باك عاجبك غالي!
سكينة: اختي الزواج لا … عاجبني حاجة ونعيش معاه حياتي كلها حاجة اخرى .. مباغيتش الزواج مابغيتش كااع ديك الحياة دلخرا يبقا يكوي فيا فوق ما بغا ونصبح عليه يوميا
فوز: وطيبي ليه نسيتيها؟
سكينة: لق٠٠وي(مسحات نيفها بكلينيكس) داكشي اللي بقا… (بحزن) انا اختي كنت باغا نعيش واحد الحياة وحدااا خرا.. نشري دار ونفرشها على دوقي مانديرش فيها الصالون مغريبي كااع .. يكون عندها بالكون كبييير محلول على وسط الدار وقدامو فطويات زويينين فالابيض وتلفازة وزربية بيضا وشميعات .. والبالكون كبيييير(فتحات يديها) بالزاج والباب دلكوليس مفرش فيه طابي خضر والغرس والشجر طبييعي والتراب …شي فوطوي بطبيلة مع القصب وداكشي طبيعي ونبقا نفطر فيه بوووحدي.. بوووحدي مانشوف حتى كمارة كدور قدامي وانا لابسة بينوار رطييييطب حد الركبة وجامعة شعري وكنشوف الشتا كطيح على برا وكترش على الزاج اللي قدامي وفيدي كابوتشينو ولا كافي كخييم سخووونة وريحة التراب طالعة .. ونتكا فليييييل بوووحديتي بشي بيجامة كيووت وطيييطبية وتقيشرات سخاان وسي مانطة بيضافيها ريحة زويييينة ونشعل شميعات وفايوزات ونتكااااااا نبقا غييير كنشوف على برا ونطلق موسيقى كاااالم وزوييينة… ونبغي نعس نمشي لبلاصتي فبيت النعاس ونطلق موسيقى هاادية ونرش ريحة مرييييحة ونتغطا بمانطة سخوونة ورطيييطبة بوووحدي والنقااا وريحة فنة فين مامشيت.. ونفيق الصباح بكرييييي مع الثمنية ونقلي بيضة ونصاوب عصير وطوسط بلافوكا حتى انا ونديه معايا للبيت نفطر بيه مايقول ليا حتى واحد غتوسخي ولا غتخراي…منسمعش صوت بنادم فودنيا كيمرضنيييي مابغيت نسمع حس حتى ق٠٠اد.. وشي كليب صغيور ينقز نربيه ونبقا نخرجو الصباح يشم الهواء وندوز انا وياه عند لكزار ناخدو لحميات ونطلعو نصاوبو ستيك ونتغداو غيير بجوج … نلبس بيجامات مقييزبين وبابيون فشعري كبيرة وتقاشر طالعين حتى للركبة بالبايون وبانطوفة خفيفة وزوينة ونبقا غادية جايا بووووحدي ندير ماسك ندبر كريم ندير مكياج ..(تنهدات وهبطات وجهها كتبكي) مرضت البنات واحق الله
هبطو دموعها حارين والبنات كيواسيوها وقولو ليها غتعيشي نفس الشيء ونتي مزوجة وماشي شي حياة مستحييلة بلعكس ساهلة تحقق وتقدري تعيشيها ونتي مزوجة.. لاكن هي كلمة مزوجة مقادراش تتقبلها وكتكرها وكتكره كل وحدة كتكون بنت زوينة وكيوت وكتزوج كتولي باينة عليها مرى من كل النواحي وكتبدا فهضرتها فلباسها فشوفاتها فتعاملها فكل حاجة وزيد عليها داك الخاتم دالمارياج المذهب اللي كتشوف فصباعنهم كيزيد يجيب ليها القرف ومكتقدرش تتقبل الوضع بتاثا.. وخصوصا المسطلحات المغربية بحال مرت الراجل " راجلي" "زماني" نتي مرى مزوجة" هاد المسطلحات كيروعوها وغير محببين عندها ومكتبغيش تسمعهم وكتشمأز من حالة الزواج بصفة عامة .
داز عندها لنفس المقهى فين كانت جالسة مع البنات وناضت ودعاتهم ومشات عندو ساكتة لقاتو فالسيارة كيتسناها وعاقد حجبانو وغير طلعات ماسلمات عليه ما قربات ليه .. شافتو ونفراتو ماحملاتوش وكمل عليها فاش قال
غالي: ماعلمتينيش .. ماقلتيش ليا خارجة مع صحاباتك
دورات وجهها بضيق ماحملاتش تشوف فيه ومارداتش عليه، ربعات يديها وحتى هوا ماهضرش بقا ساكت لاكن تعابير وجهه منزعجة،، زادت شوية فالطريق وحبس فالجنب نزل بالقميجة بلو سييل ودجينز ومشا بالزربة وبخطوات جدية للكيشي تيرا الفلوس وتم راجع بنفس دوك التعابير وهي كتشوف من النافدة باشمأزاز وكتردد فخاطرها
زعما غادي تشري ليا خاتم داير فيها الحاكم.. سير غير تخرا نتا وخاتمك .. كن ما كنت مجبرة نتزوج بيك وخايفة من الشوهة ومن بابا يدور فيا ويديني يقلبني مانزيد حداك حتى دقيقة.. تفووو على بنادم
ركب حداها ودورات وجهها الجهة لاخرى وهوا غادي ساكت حتى وصلو لواحد القيسارية ديال الذهب ونزلو بجوج واحد مكيهضر مع لاخر وغير كيدورو وكل واحد فين كيشوف حتى شار بيدو لواحد وقال
غالي: اجي نشوفو هادا؟
تبعاتو ودخلات ساكتة كتشوف بالنفخة والذهايبي كيجبد ليها الطابلوات دالهوانم دزواج وهي غير مكتزيد تنفر وتقرف وكيزيد يتأكد ليها ان الزواج ما فيه مايتشاف حتى خواتمو حالتهم حالة وزواقهم لا علاقة. عيات تشوف ودور ماهجباتها حتى حاجة ووقفات مربعة يديها كتشوف هنا ولهيه وغالي قدامها
غالي: بهدوء) ماعجباتك حتى حاجة هنا ؟
سكينة: هزات كتفها) ماعجبونيش ماعرفتش.. مازوينيش
ميعات فمها بقرف ودورات وجهها وهوا ساكت كيتنهد ويشوف بعينو حتى بان ليه واحد مادخلوش عندو وقال
غالي: اجي نشوفو هادا
تبعاتو بنفس الحالة ودخلات بدات كتشوف وذهاببي كيجبد ليها
غالي: شار بيدو) شوفي هادا.. زوين هاداك …. اا؟
سكينة: دورات وجهها ) لا ماعجبنيش..
غالي: واا لي بغيتي نتي تعرفي
ماحملات حتى خاتم لاكن كان خاصها ضاروري خاتم واظطرت تشري واحد قريب شوية لدوقها لاكن مامقتانعاش بيه مية فالمية.. خداو الخاتم وجاو خارجين ودازو قدام واحد الزاجة ديال الذهب وشافت واحد حسن من اللي خدات وقالت
سكينة؛ هادا حسسن نردو لدهايبي الخاتم ونشريو هادا
غالي: بصرامة) واش بعقلك ؟؟ الذهايبي غيبدل ليك صافي شريتي خاتم راه من الصباح وحنا كندورو حتى هادا زوين
قلب وجهه عاقد حجبانو وخلاها غير كتشوف وقامعة فيها النفس.. ماجاوباتوش لاكن من شدة الضغط فرفرو عينيها بالدموع ولاحت داك الخاتم فالصاك بنفور وطلعات حداه فالطموبيل قالبة وجهها وقاطعة الحس كتنخصص.. عرف راسو جرحها وبدا كيساوي ويشرح بشوية وبالهداوة وباغي يضحك معاها ويشد ليها فيدها لاكن هي قلبات عليه وجهها قلبة وحدة وعطاتو بالضهر ، مابقاتش ليه الفرصة خصوصا فاش صونا تيليفون وكانت اسية المتصلة كتخبرو باللي راها فالدار هي وهند وخاصو يمشي باش يفتح ليهم الباب.. قلب الطريق بسرعة كيشرح لسكينة انهم فالدروج كيتسناو لاكن هي تجاهلاتو وبقات ساكتة حتى وصلات ونزلات وزدحات داك الباب وطلعات بحالها
طلعات للدار وغير دخلات لقات مونية كتسناها وتبسم فرحانة
مشات كتبكي للبيت ومونية تابعاها وشادة الخاتم كتسول اش واقع لاكن كالعادة سكينة ماتعاود ليها حتى حاجة .
اما غالي كان كيتسناه صراع مع مو وجات عوالة عليه ..لقاها واقفة والشنطة قدامها وهند حداها حتى هي كتبسم ..سلم عادي ورحب بيهم ودخلو للدار كاملين..يالاه سد الباب ضار لقا اسية واقفة ويديها على جنابها كانت لابسة سروال دجينز مزيير وواسع شوية من لتحت وصندالة عالية كحلك وقميجة مدلية شوية من اللور بيضا وشعرها مطلوق والنضاضر فوق الراس ومعبسة زادو بانو تجاعيد اللي فطراف عينيها وبين خجبانها وقالت
اسية: ماحشوماش عليك درتي شرع يديه؟ ماشاورتينا ما علمتينا
غالي: هقد حجبانو) اشنو درت؟
اسية: كيفاش شنو درتي؟؟ مشيتي هضرتي مع بات البنت واش وافقنا عليها ؟؟ واش قبلنا بيها؟
هز واحد اليد بصرامة وهدوء وقفها وقال
غالي: غيير بشوية بلا متهكمي ولا تعصبي عليا انا الى كنا غنتفاهمو بشوية راه غناقشو الموضوع اما الى كنا غير غندابزو على والو من الاحسن نسدو الموضوع من الاول
اسية: بانفعال وتوثر) مغتزوجش بييها ماحدي حية ولبه هاد الزواج مغيدوز وكن تفهم تاخد العبرة من اللي فاتو قبل منك بلا منشرح ليك ولا تخلي باك يقلل معاك الحيا ويبدا يشرح ليك بالتفصيل
غالي: شوف الوالدة انا ماتبززيش عليا شي قرار من القرارات ديالك عفاك راني ماشي دري صغير كنرضع صبعي.. درت ليك خاطرك تزوجت اللي بغيتي نتي وماسهلش الله ايوا صافي ،، دابا عطييت للسيد لكلمة وقات ليه هاد السيمانة ان شاء الله غنجيب الواليدين ونجيو وخليتو داير فراسو باللي غنمشيو عندهم ونخطبو البنت.
اسية: انا مغنمشيش الى بغيتي تمشي سير مغنمشيش وانا ماراضياش على هاد الزواج
غالي: بتعب) وا زعما الى كنتي كتفكري هاكا راه مشكيييلة .. راه ميمكنش نتفاهمو وحشومة ماتمشيش عند الناس حت هشام خايبة فحقو غتبين ليهم ماراضياش وغيهزو فخاطرهم من جيهتنا.. ولاهيلا حشوومة .. الناس مادارو واااالو ياك المشكل عندك معايا وهادوك ديجا نسابك .. خاصك تمشي عندهم وتخلي مشاكيلنا بعييدة عليهم وصورتنا مزيانة قدامهم ..وا زعما صدمتيني بهاد الرد !!
ماكماوش الحوار تفاديا للمشاكيل ولاح اخر جملة وهوا فطريقو لبيتو مشا حيد سبرديلتو حطها فالجنب وناض يصلي وخلاها هي واقفة مربعة يديها فاكوزينة ماعجبهاش الحال وهند كتحاول تقنعها بالحسنى وخايفة دور فيها ولا تخرج فيها عينيها خصوصا مللي كتعصب اسية كيولي لسانها ينقط عسل وسكر وتكره الواحد فعيشتو
هند: زعما شنو فيها الى تزوجها ياك بنت ضريفة وزوينة وصغيرة بلعكس سااهلة ديريها فيدك
اسية: انا قلت لا هي لا .. واش الزواج بزز؟ صافي هضرت وكلمتي خرجات من فمي وهاديك العائل غنديو منهم وحدة هي رانيا.. صلاة على النبي
هند: تنهدات) ياك قلنا اا ليك ماشي هي اللي كان كيعرف وراه مكانش كاااع كيعرف هادي وغيكون شافها فالعرس دمنال
اسية: اولا جوج خواتات عمممرك دخلي بيناتهم والى وقع مشكل مع وحدة تنوض لخرى تحامي وتحرش راجلها ..لخواتات كيتافقو ويتحاماو ويقلبو لعنيني للرجال بجوح ماتقدري كااع تاخدي راحتك مع خوتك وغيبغيو يغلبو عليا غنوليو ماحنا بهشام ما حنا بغالي ..واش ولادي انا لاقياهم فالزنقة !! واش ماعندهم ام يضربو ليها حساب! فاخر ايامي ندخل عندي لخواتات نحصل معاهم …. ماشي بحال لعرايسات كل وحدة من جهة وحدة مكتعرف وحدة واخا يتافقو حتى يعياو كتبقا المنافسة بيناتهم على شكون اللي حسن من لخرى وحتى خوتك يبقاو ليك ماشي يتزوجو ويعطيونا بالضهر يتبعو لخواتات ويديرو عائلة غير بيناتهم .. مزيان تبارك الله
هند: اااه !! فهمتك ،، ولاكن انا كتجيني رانيا درويشة بزااف بحال هادوك بنات الجبل لقدااام فالعقلية.. واخا نقولو سكينة بنت الوقت باينة فيها مجبدة
اسية: اسيييري نتي اللي بنت الجبل اما الزواج كيحل لعينين للعور ماشي غير لبنات الجبل.. وهانتي قلتيها بفمك راه ختها مجبدة .. بااينة من داك النوع باغي يبان وعاجبها راسها … لالالا متقوليش ليا ماعندهاش يد فطلاق غالي.. واخا كااع تكون ماشي هي وسارة مطيحة عليها الباطل كااع.. كيفاش زعما شافها نهار لعرس عقل عليها وهوا كان مزوج.. لالا متقوليش ليا دارت ليه شي حاجة ولا بدات تحلون ليه حتى طاح ليها فالشبكة وناض طلق سارة
هند: هيييه! لالالالا اوييلي لا كن غير ما كنتش معاها نقولو يمكن ! انا كنت معاها فالعرس كامل والله ماقربات ليه ولا ضارت عندو بقااي تيقي فديك المسطية سطاها غالي ولات كتشوف شي حوايج مكاينيش… زايدون البنت زويونة راه سينوووغمال يشوف بحالو بحال كاع الناس ..وفاش طلق راه تفكرها وبانت ليه فالبلان
ربعات يديها وبدات كدور عينيها هافت تقوليها راه اانا اللي قلت ليه صورنا وجات سار دارت لينا فضيحة ومن تما مشات لدارهم ماعاوداتش رجعات عندو. سكتات خوفا من شي فضيحة ولا قيامة تنوض عليها ويردوها هي السبب وهي اللي شتتات شمل خوها وتبقا عليها تعاويدة وغناية طول حياتها . اللهم تهني راسها واسد فمها مادام حتى واحد ما جايب لخبار مكاين لاش تحبد حريق الراس والمشاكيل لراسها
اسية قالت الهضرة وماعاوداتهاش.. وهادا طبعها من زمان وولفات ليهم الى فالت الكلمة وكانت جادة فشنو كتقول بلا ما يناقشوها وغير يطبقوها بلا تعاويد.. لاكن غالي كان حالة خاصة .. ربما لانه عمرو ماطاح معاها فشي نقاش ولا فشي قرار مشترك وحياتو اصلا دازت هااادية مهدنة نكيجيب صداع ما كيدير مشاكيل ماكيتسمعش حسو حتى كينساو واش عندهم شي ولد سميتو غالي.. ماعمرو رفع صبعو باش يبان وعمرو عطا رأيو وكان بحال الامانة ميهضر ماينطق الى الى مرض ولا كان عندو شي مشكل مدرسي كيتدخل حينها باه .. حتى مو كانت مبعدة عليه حيت كان هوا الصغير فالدراري ومنسي من نهار مشا عند باه ورباتو جداتو من تما ما هزات ليه مو الهم وكانت كتشوف ولادها اللي قبل منو شابعين مشاكيل وصدع الراس وكثرة الطلبات لاهما لا لبنات.. وتشطنات غير معاهم وخلات غالي ساكت عمرها سولاتو شنو خاصك ولا مالك غير باش متفتحش ليه باب الشكاوي والطلبات حتى هوا ويرجع يتخل ليه الفم ويرونهوم حتا هوا. اللهم خليه ساكت هاهوا ماخاصو خير وراضي باللي كان وكيشد ويقول شكرا مكيتشرط ما كيعيب .. واخا باه كان مهلي فيه بلا ميحتاج يطلب ولا يقول عطيني وكان كيتيق فيه ومخلي ليه الحرية يدير لي بغا .. لاكن بقا تحت مراقبة باه وشافوه واخا عطاه الحرية مادار بيها والو .. بلعكس مكان لا كيلعب فالزنقة مع الدراري ولا يمشي يغبر ويبداو يقلبو عليه ولا يجيب ليه شي شكوى من سي واحد.. كان كيفضل يبقا فالبيت ديالو فدار باه غير هوا والبليستيشن اللي كان فديك الوقت كيشريه غير شكون وشكون وحتى بيتو هوا وهشام اللي كانو كينعسو فيه كان مقوم ومفرش ومجهز باحسن فراش واحدث خشب وديكورات اللي مزالين لدابا الناس كيصاوبو بحال دوك الغرف لولادهم . اما سمير كان ملهوف على مو وتابعها وكان كيجيبو عند باه غير لفلوس وماباغي يبقا حتى عند شي واحد فيهم باش حتى واحد ميعرفو شنو كيدير ويدير اللي بغا .. يخرج ويكمي ويشرب ويغبر والى نوضها مع باه كيمشي عند مو يحزر ويشكي والى نوضاتها معاه مو كيرجع لباه يشكي وكان مستاغل طلاقهم لصالحو وكيبين ليهم انه اللي تهلا فيه ودار ليه خاطرو هوا اللي يكون عزيز باش يبقاو يتنافسو عليه ويعيش مرتاح وداير مابغا .. حتى فالاخير خرج على راسو لا قرايا لا خدمة لا فلوس وزايدها بالكارو والشراب والعاهرات ، فين ما كانت شي عاهرة بيتات ليه مؤخرتها كيحوالو عينيه ويتبعها ويحط عليها كاع اللي عندو ويرجع يطلب ويشكي باش يعطيوه .. وشحال من مرة زبلها حتى كيشوف بيبان الحبس على عينيه وكيخرجو باه بكفالة .. لاكن لا حياة لمن تنادي اللي كبر على تاحراميات والانانية صعيب يتبدل .
علاقتو بغالي كانت بعد السما على الارض تقول ماشي خوت .. حدهم السلام وعمرهم شركو الهضرة ولا الطريق وعمر غالي جلس معاه ولا تناقش هوا وياه .. كيشوف شنو كيوقع وساكت وعارف هوه مفلس وكيجيب غير المشاكيل وخارج الطريق.. وكذلك سمير كيشوف غالي الدرويش السكوتي او الغبي كما كيبان ليه او بليد حيت عمرو دار سي زبلة يبان فيها راه وااعر وخطيير وذكي.. من ديما كيبان كيليميني وعمرهم غارو منو ولا حسدوه ولا عرفوه اش كيدير فحياتو حتى غفلهم غفلة وحدة فاش صدمهم بالماستر وبقرايتو فاحسن الجامعات فديك الوقت .. عاد حلو عينيهم جيهتو وتفكرو بلي عندهم واحد خوهم غااابر واخا عايش بيناتهم
الموضوع معاودش تجبد عند غالي فالدار .. وحتى هوا كيتصرف عادي مكاين حتى مشكل والهدنة واسية كذلك مبرردة ومتأكدة ان الكلمة اللي قالت غادي تطبق.
صبح الحال من اسبوع داز كله توثر وقلق عند سكينة وهم وغم وزيد عليها العادة الشهرية كرفساتها بالمعقول .. ها الردان ها العروقات ها السخفة ناهيك على الوجع ولألم وتفركيل فالفراش تحت المانطة ومابغاش تمشي للطبيب واخا عياو فيها يديوها يضربو ليها الشوكة بحال كل مرة لاكن هي من خوفها يوصلوها حتى اتما ودور ليهم فالخوى ويقولو يقلبوها دارت بناقص ودوزات اكفس اسبوع فحياتها ماشافتش فيه الضو وحتى غالي مكطولش معاه فالهضرة .. حدها كتجاوبو وتقوليه عيانة وكتقطع .. واخا عيا فيها يخرجها ولا غير تنزل يشوفها لاكن والو .. حتى من الماكلة اللي كل مرة كيجيب ليها كتسيفط خوها يطلعها وتجلس تاكل هث وياه ومونية كتشوف بنص عين وشلاقمها من الحناب مدليين عاجبها الحال بداكشي اللي كتشوفو كيدير على بنتها .
بعد هاد الاسبوع دالقهرة رجعات شوية لاباس ورجعو عينيها لبلاصتهم وبدا كيرجع فيها الدم شوية عاد ناضت مشات للحمام وغسلات منها وتهنات من حريقها لي خلا آصار الالم فضهرها وجنابها ،، كمدات عضامها فلحمام ديال الحومة ورجعات بحالها للمحل حازمة راسها بزيف حياتي وبيضا بحال الحليب وحناكها حومر ويديها مكمشين بالمشا لابسة سورفيت كحلة جديدة وكتشوف فدافرها لاصليين كاملين تهرسو ودكدو مابقا فيهم حتى دفر صحيح .. تكات ترتاح شادة قرعة درايب وبتبانة فيدها كتعتق وتسوط حتى صونا ليها تيليفون وردت بتعب
سكينة: االو
غالي: وافين..صافا؟؟؟ خرجتي من لحمام ؟
سكينة: كتلهت ) عاد دابا جلست فالحانوت كنرتاح
غالي: بالصحة والراحة لاللة.. شنو دابا ندوز عندك ؟
سكينة: لااالا بللاااتي
غالي: وصافي ماتعيقيش ياك نتي فالحانوت؟
سكينة: ااه فلحانوت
غالي: يالاه هانا جاي
تنهدات وحطات تيليفون كتشوط وكتشوف فواخد المرايا حداها بالجنب ماعرفات كي دير لراسها، شعرها باقي فازك وملفوف فزيف حياتي ومربوط اللور على السفنجة اللي وراها وعينيها مبلقين هما اكثر حاجة كبيرة فوجهها ومجبدين والمساحة بين الحاجب والعين واضحة وواسعة وشفاوها كوحل مقلوبين .. اما الوجه مجبد بالنشوفية دلحمام وحناكها حومر طايبين وفمها كيتقشر .. وجهها من كثرة ما طاب فالحمام خرج كيبري وناصع ضارب فيه الضو . هزات كتافها بلا مبالات كتردد
شكون غيكون كاع باش نوض نطير نتقاد ليه.. يمشي يق٠٠. (عضات بتيبانة) يقبل عليا كما انا .. زمر طلع لي فراسي
خرجات عندو كما هي والرايب وخنشة ديال بتيبان فيدها طلعات حداه تابتة كتشوف غير بعينيها .. اما هوا تفاجأ جاتو بحال الى خارج عريانة مامولفش يشوف وجهها كامل وجبهتها وحجبانها والدورك دوجهها كلها .. تبدلات عليه بقا غير كيشوف فيها ويدو على فمو ساكت وشاد الضحكة بلسانو .. مولف كيشوف القصة نازلة والشعر كحل ضاير بالوجه بحال لحوايج ساترها ماشي بحال دابا بانت ليه شي حاج ماشي هي هاديك .. جاتو عيب تخرج بوحهها عريان وقال
مشكل عويص طاحت فيه سكينة والمشكل هوا انها عارفة باها كيف داير يعني حتى الحوار بينها وبينو مكيكونش وصعيب تتواصل معاه باش تشرح ليه ولا تفهمو ولا تدخل ليه شي فكرة لراسو ..
بقات مصدومة وتقطع فيها الحس وبدا عقلها يبلاني وتقلب اشنو تقول وكيفاش تقادها وعلاش اصلا مابغاتش تجي وشنو السبب.. داخت وتشطنات في حين كان غالي كيدور فالمدينة ووقف قدام محل دالخلويات معروف وكبير وتلفت شافيها وتنهد
غالي: يالاه نزلي نشوفو الحلوى
حلات الباب نزلات ولاحت القب على راسها غيات بيه العكسة ودخلات معاه كتشوف المحل والطاولات ..كان محل مشهور ومعروف وعندو فروع ..رحبو بيهم وجلسو وعطاوه كتاب فيه انواع الحلويات وبقات كتشوف وتقلب وهوا كيشوف معاها ، ختارت حلوى باط داموند على شكل كتاب محلول مزينة باللؤلؤ وحتى غالي أيدها فختيارها وطاحت الحلوى بثمن الف وسبع مية فديك الوقت .. كانت من ارقى الحلويات وحتى العبار وافي والشكل رائع . من موراها خرجو رحعو للسيارة من بعد ما عطا فيها تسبيق وطلعو هوا وياها لبلاس بيتري تما فالرباط.. ساحة خاصة بالورد ومحلات الورد ودخلو عند واحد كيشوفو الورد وراهم باقات الورد لاكن هربات منهم بنفور وقالت
سكينة: اوييلي على ورد لالالا ماتجيبش ليا هاد الديكور فين ما مشيت كنشوفو .. موقفينو فسبيطارات فالعراسات فالولادات .. ديكور واحد مكيبدلهوش كيعيف
غالي: وشنو بغيتي هادو اللي كاينين
سكينة: لااالا لا بلا كاع من الورد الى غتجيب ليا هاد الطابلو بحال هاكا طلع ليا فراسي كرهتو بقوك مكنشوفو غير هوا العراسات..مكيبدلو فيه حتى حاجة.. انا بغيت شي حاجة وااعرة جديدة
مول الورد: ماشي مشكل عطيني الشكل انا نصايبو ليك على دوقك
سكينة: الى كان هاكا مزيان
غالي: صافي يالاه وريه شنو بغيتي
سكينة: انا بغيت ورد يجي فبواطة كبيرة على شكل قلب
بدات كتوري لمول الورد وتشرح ليه كيفاش بغاتو يكون وهوا كيسمع ويوريهم انواع الور اللي عندو واحجامهم حتى تافقو على الشكل اللي بغات هي وعلى دوقها وحط فيها غالي الف درهم تسبيق وبقات الف درهم يرجع يكملها فاش يبغي يديه . وبالضحك عطاها وردة حمرا كيضحك شداتها شماتها وخرجات من تما كضحك عاجبينها دوك الاجواء ديال الحلوى والورد حسات براسها كتعيش اجواء جديدة حماسية .. لاكن فكل مرة كتفكر ام غالي اللي مغتجيش كيقبط عليها قلبها وكترجع تيأس
كيفاش غتقول لباها راه ام العريس مغتجيش؟ اشمن سبب واشمن مبرر غتعطيه وكيفاش غتفكها باش باها يقبل.
دارت اخر جلسة مع صحاباتها فمقهى غثر حداهم فالحي زوينة وراقية وكانو مجموعين بثلاتة فواحد القنت على اريكات مريحة اقول جالسين فديورهم . كل وحدة فين متكية وكيخممو ليها على حل وطريقة تشلك بيها هاد الجرة، انا هي هزات فقلقها من جيهة اسية وبدا كيتكون داخلها واحد الحقد والكراهية لدرجة بان فعيونها وتردد على انفاسها
سكينة: فسهوة) علاش زعما مابغاتش تجي شنو درت ليها انا؟؟ فاش ضريتها ولا وصلتها ..عمرني شفت شي ام مكتمشيش تخطب لولدها واخا تكون كاارهة هاد البنت
ليلى: شنو غيقول ؟ البنت اصلا مستقلة وبعقلها باها غير مستشار ديالها راه كبيرة هي اللي كتقرر فحياتها..شفتي واحد الحاجة هصك تعرفيها،، البنت اينفوا كتستاقل ماديا صافي كتخرج من سيطرة باها كتتحمل مسؤولية راسها.. ماشي بحال اللي جالسة فالدار كيصرف عليها باها هاديك كيخاف عليها طيح فشي موصيبة وترجع ليه يوحل فيها داكشي علاش كيقررو فمصيرها ويقولوها شنو دير.. اما المستقلة بنفسها راه هازة راسها ماديا ومعنويا مغتسناش باها يعطيها ولا يوحل فيها
سكينة: بابا انا واخا يكون ساكن معايا وكنصرف عليه غيدخل فيا
ليلى: المشكلة ديالك نتي هوا ختك .. جاو عند ختك دابا المشكلة (تنهدات) بفففف.. كن ماجاتش عند ختك نقولو راه سمحات فولادها وكبرو مع باهم وقاطعين معاها من الصغر.. ولاكن دابا هي جاات وكلات وشربات وضحكات ومشات والثاني مابغاتش تمشي معاه
فوز: الحل اللي عندك هوا تقولي لباك باللي غالي عندو مشاكل مع مو من الصغر ومبااغدين وكبر مع باه
ليلى: ماعندكش حل اخر.. غتقولي ليه مريضة؟!! غيقولك ماشي مشكلولاكن نهار لعرس مغتجيش اش غتقولي ليه؟؟ غتقوديها مع باك عاوتاني يقوليك كدابة ينوضها معاك وسط العرس
سكينة: غنقوليه بغات تزوجو شي بنت من العائلة وصافي وفاش مابغاش يدير ليها خاطرها مابغاتش تخطب ليه.. هادشي اللث غنقوليه ومغنقولوش حتى دوز الخطبة ويسولني عليها
ليلى: هضري مع غالي باش يهضر مع باه وباه غيقلد ليكم الامور مع باك ووصيه باش يقوليه راه بغات تزوجو وكدا ومابغاش
سكينة: القوادة هي با غيقوليه ماجاش مك تخطب بنتي اذا متزطمش عندها فالدار وعمرها ما توصلها ولا توصل دارها.. انا عااارفة بابا والله تايقولها ليه ولا يقوليه بناقص
سكينة: وراه هادشي اللي غيقوليه بابا راني حااافضااه توريني فيه
ليلى: خلييه يشرطها عليه راه خايبة فحقك ماتجيش مو تخطبك .. علاش مشات خطبات لولادها الا نتي اذا حتى نتي ماتعرفيهاش وماتزطميش عندها صافي سالينا
سكينة: دابا عارفااه غيقول هادشي ولاكن غالي واش يقبل بهاد الشرط(راسي ضرني وغدا جايين ماعنديش الخاطر والله حطاتني فموقف خاااامج الله ياخد فيها الحق
راسها تنفخ وخاطرها تزير وهزات الهم ومابقا عندها خاطر، رجعات للدار لقاتهم فرحانين كيوجدو ويعاودو للخطوبة ومرقدين الدجاج وموجدين اللحم والشلايض مصلوقين فالثلاجة.. المهم مها ومرت عمها الصغير اللي ديما كتمشي تحضر معاهم واقفين فلكوزينة وكيوجدو ويطيبو وناشطين فرحانين.. غير بانت ليهم سكينة دايزة وماعليهاش حالة لعروسة ولا وحدة جايينها الخطاب فداك اللباس اللي لابسة .. كانت لابسة سروال توني واسع رمادي من لفوق للتحت ومزير بالسيور على الكرش وتيشورط مزيرة ولاسقة داخلة فالسورال فصلات تداريس جسمها الجميل من الاعلى وشعرها مطلوق للجنب ولايحة عليها شال غليض رمادي ورطب مدوراه على شعرها بعشوائية وكتافها
فاطمة:مرات العم) هااي هااي هاي على سكينة غتزوج. هههه
قالتها وخشات راسها بين كتافها مزنكة كضحك وسكينة كتشوف فيها بنص عين جامعة الضحكة بينما مونية كتشتف الحلوة وتبسم فصمت .. مامولفاش ضحك مع بناتها وبيناتهم الوقار والحياء.
خلاتهم ومشات للبيت لقات رانيا شادة تيليفون وخنافرها فالسما وغير شافتها شارت للحيط وقلبات وجهها مكتهضرش . لاكن سرعان ما صارت عندها طلعات فيها وهبطات وسكينة كتبدل حوايجها وقالت باحتقار
رانيا: مو مجاياش عندك تخطبك ونتي قابلة
سكينة: بلا متشوف فيها) ديها فكرك ارانيا حسن ليه ماعنديش ليك لخاطر هاد الساعة.. وقولي لداك الرقاص دهشام يجمع فمو بلا مايبقا يجبد ملتي ولا غنق٠٠د معاه السوايع
بناصر: واش هاد السيد باغياه ولا مابغايهاش؟ جاوبيييين نييشان (خرج فيها عينيه) ماتفتفيييش عليا الى حشمتي تهضري ماتزوجيش حنا ماشي فحشومة دابا .. جااوبي
سكينة: بتوثر) باغ باغيا
بناصر: ايوا حلي ودنيييك.. مو قالك مغتجيش… ماكبراتوش ليك .. واش دابا قادرة تزوجي ودخلي لديك العائلة ولالا؟ ماشي غدا ولا بعدو تسمعي شي كلمة من شي واحد واجي تبكي عليا.. هاااودني منك… غتبغي غير شي وحدة تمرضك تقوليك جيتي غير بزز ولا ماحاشها ليك حد وجيتي ولا تعايرك يا المدلولة وتبقاي تبكي .. من هنا كنعلمك … الى فيك مايسمع بخال هاد الهضور ايوا هاد عليا نسد فمي
بناصر: مهم بعدا راه شرطت عليه واحد الشرط قااصح خليتو كيتمتم
سكينة: ها؟ شنو قلتي ليه؟
بناصر: قلت ليه الى ماجاتش مك كبرات بالبنت عمرها تجي وعمر بنتي تزطم عندها الى الابد.. حتى بدا كتفتف فالهضرة قالي صافي اللي قلتيها هي اللي تكون .. ماقال عيب بعدا راه قالي من حقكم …. ولاكن قلت ليه يرحل من ديك الدار اللي ساكن فيها.. يشوف ليك دار اخرى جديدة تمشي ليها نتي اللولة باش ماتلقاي فيها لا مو لا شي حد خور راني قلتها ليه نيشان.. قلت ليه دير ليها دارها جديدة مادخل ليها حد.. باش نوريهم انا الزواج كي داير .. (هز يديه) اللي عليا انا هوا هادا .. حااولت نكبر بيك وندير ليك العز واخا مو مادارت فيها متيصلاح وطيحات بيك.. ولاكن الباقي عليك نتي.. يا ديري لعز راسك يا ديري دل وتبهديلة راسك.. مكاين اللي كيبهدل بالواحد قد راسو.. ولوكان جيتي عليا كن درتي بناقص واخا هاد السيد مزياان وماجبد عيب ولاكن حسن كن درتي بناقص
سكينة: بالايجاب) صافي
جات نوض وبقا بنتصر نتبع ليها عينو فدهشة وقال
بناصر: صافي درتي بناقص؟
سكينة: لا نسكن بوحدي ماتجي عندي مانمشي عندها
بناصر: بفشل) هاكاك.. ايوا الله يسهل هادشي اللي غنقول… (تنهد بأسف) انا جاني والله واعلم هاد الراجل درويش .. ماشي شي واحد قليل ترابي.. غير كيفاش مو عكسات ليه الله واعلم،، انا بعدا جاني مزيان .. مالقيت منعيب فيه
المسمار واخا تطرق لاكن مامطرقش مزيان وفأي لحضة يمكن لهاد الخطوبة تتبخر .. اي خطأ يقدر ينهي كلشي خصوصا وبناصر على سبة كيقلبعلى لعيب فغالي. اما غالي العيب ماخرجشمن فمو .. واللي قالها بناصر هي اللي تكون ،، حتى انه ما جبدش الموضوع لمو باش ميوقعششي مشكل ولا ينوض شي صدع وتكون عندها شي ردة فعل غير متوقعة، سكت ولزم الصمت وسد عليه فبيتو بينما اسية فالدار جالسة دايرة رجلعلى رجل كتقشر الزريعة وحداها هند كتشوف فيها بنص عين مستغربة
هند: واش بصح مغتمشيش!! ماقادراش نتيق
اسية: ببرودة) كلمة وحدة راني قلتها،، انا مغنمشيش نخطب هاديك هي مغنمشيش
هند: وغيمشي يخطب بووحدو؟؟
اسية: ايوا هاحنا غنشوفو
مزال ماكملاها هرج من بيتو بالبيجامة ديال الدار مشا نيشان عندها جلس وهبط راسو كيخمم وقال بجدية وهدوء
غالي: دابا غنهضرو نيشان… انا غدا غادي نخطب ان شاء الله.. ماكرهتش تمشي معايا وتكبري بالناس واخا مابغيتيش.. ماشي مشكل المهم غير تجلسي بيناتنا حتى دوز هاد الخطبة على خير… انا ماكرهتش وكنتمنى تراجعي على القرار ديالك . (شاف فيها بأسى) شنو قلتي؟
عقدات حجبانها وكانت طريقتو فالهضرة كغداءتغدات عليه باش تقدر تفرض سيطرتها عليه وقوتها بحال خوتو وبان ليها بحال الى بدا كيتقاد فالطريق مع خوتو مدام تحاور معاها وشاف فيها بدوك النضرات الحزينة اللي عمرو شاف فيها بيهم .. بان ليها الضعف فعينيه الشيء اللث خلاها تستقوى اكثر وقالت بكبرياء وراسها لفوق
اسية: شتي الزواج اللي كيمشي بلا خاطر الوليدين عمرو مكينجح ومكيسهلش فيه الله
غالي: متاافق معاك .. الى فعلا فيه ضرر ولا اذى للوالدين ولا غيرصلهم بشي حاجة.. اما الزواج بنية صافية والبنت مزيانة وواليديها مزيانين وكلشي مزيان .. بلعكس الله ميبغيش اللي يوقف فطريق الزواج .. اولالا؟
سكينة:هاد تق٠٠٠بين هادا نيت .. لا عروسة لا راجلي لا ديرو ليا لا فعلو ليا لا مرت الراجل لا لق٠٠وي … ماشي تقح٠٠بين!!
ليلى: وشنو دابا نسيفطو كنزة تبرز بلاصتك
سكينة: ماكرهتش يعطيوني ديك الورقة نسيني عليها ونهز باليزتي ونزيد.. بلا تق٠٠بين لعور دلعيالات كل وحدة تلحس من جهة كيحسسوك انك كتزوجي ..يموتو على الزواج وسيكس ويديرو فيها شريفات
ليلى: ونااري على عقلية شداك اصلا من للول لهاد لخرا كاململلي ماعندكش معاه
سكينة: ماعنديش مع هاد التبعصيص وتقح٠٠بين دوالو صاافي كنتزوجو ولا كنخراو وا بنادم يجمع عليا كروو،، كيباركو ليا بحالا غادة للجنة..مافهمتش انا هاد البشار عندهم الزواج شي لعبااا.. فرحانين يهزو رجليهم .. تفوو كاع اللي عمرو عيط ليا عيط ليوم جالسين عليا فرحنا ليك ما فرحنا ليك بحالا كنت منسوا بصلة عاد دابا حيت غنتزوج وليت كنسوا
مكانش عندها خاطر ومكانتش فرحانة ومكانش عاجبها دور العروسة بتاتا.. صايبات الشعر والدفار كما موالفة والمكياج صاوباتو ليلى خفيف ضريفومن تما دازت نيشان للحانوت هزات قفطان محلولمن الجنابحتى للركبة والسفيفة غليضة من لقدام من لفوق حتى للتحت ونازلة مع الجناب والفتحات والسمطة ديالو خفيفة وبلغة دالصم وطلعات فحالها للدار لقاتهم كيوجدو .. مع الدخلة بقا عليها بناصر تعطلتي ما تعطلتي وكيسول على العريس فين وصل حتى عصبها ودخلات لواحد البيت صونات على غالي منرفزة
سكينة: فيينك راه الربعة هاديياك درنا الجوج ماشي الربعة
غالي: وراني حاصل هنا معا الورد ديالك راه عاد كنقلبو على هوندة نهزوه فيها
سكينة: هزو خشيه فالطموبيل!!
غالي: ميدخلش ليا فالطموبيل راه عرفتي قداش ولا!! كبير بزاف
سكينة:دابا شحال ديال والقوقت كاع
غالي: على عجلة من صوتو) ها الهوندة جات صافي قطعي انا غنتحرك دابا
سكينة: اوييلي على هوندة غتجيب ليا الورد فالهوندة!!
غالي: فاش غنجيبو فالطوبيس !! مداخلش فطموبيل عيينا كنتاقتلو معاه انا وبا مادخل لا فطموبيلتي لا فطموبيلتو الهوندة اللي غتهزو
سكينة: هييه!! واسربي سربي دغيا راكم تعطلتو
غالي: صافي يالاه قطعي قطعي
قطعات وبعات يديها كتسوط وتسنا ومرت عمها كل مرة طل عليها وتبدا ضحك غير بوحدها وتحمار حتى كيتنفخو خدودها .. ماهيا غير نص ساعة حتى تم بناصر طالع مع الدروج كيرحب بالجهد وحل الباب زربان كيستقبل فالناس ويدير ليهم الطريق بلا ميعلم مالين الدار اللي تشتتو كلهم تخباو مابقا حتى واحد كيدور رسط الدار وكل واحد منين كيطل عاد بداو كيخرجو ويتبسمو حشمانين واحد مور واحد ويسلمو على العائلة ، كان اولهم السي رشيد.. اييه يا لكلاص كيبان من لبعيد تبارك الله قلدة والوقفة وحتمع راسو مرجل وموكض كيسلم ويتبسم وموراه غالي بالبذلة بلو مارين وهشام حتى هوا هازين الورد بجوج وسكينة كطل من مور الحيط ويدها على حنكها كتشوف فداك الورد اللي صايب ليها مول الورد ماشي كااع نفس التصميم اللي بغات .. هوا فعلا على شكل قلب كبير وزوين فالكل ومقاد على حقو وطريقو ومكتوبة لوسط بالورد ابيض سكينة ولاكن المشكل هوا داك القلب وقفوه على واحد الخبة طويلة وعريضة بحال الشجرة زعما ولسقو القلب مع داك الجدع باش يجي واقف وعالي .. عاد فهمات علاش ماصلاحش ليهم يدخلوه فالطموبيل.. كانت باغا غير القلب ويجيبوه هازينو فيديهم لاكن مول الورد تفنن ليها ودار ليه رجل طويلة ودور عليها العروش فالخضر وغير شافتو داخل بداك الشكل شدات راسها كانت غتسخف ماحملاتوش علاش يركبليه رجل ويوقفو بداك الشكل جا طول ديالو بحال طول دبنادم وماعطاش منضر زوين .. كن خلاوه قلب يتحط فوق الطبلة كان يكون احسن من انهم يلسقوه مع الخشبة ويجي واقف. لحاصول مالقات مادير وجاها الضحك فاش شافتهم ماقالين معاه مدخلينو ليها بحال الشجرة كيقادوه حتى وقفوه فالصالة وخلاوه عاد تنفسو الصعداء من تمارة اللي دوز عليهم فالدروج وبداو كيسلمو
نشفو من بعد ما عرقو وسخفو فهز حط وجلسو كاملين فالصالون مع بناصر اللي كيقشب مع السي رشيد ويتجمعو في حين العائلة لخرى جالسين وكل مرة يشكرو مونية على الترحيب.. كانت عائلة السي رشيد فقط اللي جات من بينهم ختو لكبيرة وراجلها وبنتها اللي مزوجة وساكنة فنفس الحي دغالي وراجل بنتها واخ السي مصطفى ومرتو المهم العائلة القريبة ليه وهشام وخوه سمير حتى هوا والجد اب اسية .. اما اسية وبناتها وعائلتها حتى واحد ماحضر.. او بالاحرى حتى واحد ماقدر يحضر بنا ان اسية ماكايناش والموضوع حساس فحتى واحد ماقدر يخالف كلمتها ويحضر من غير باها اللي جاي ضدها وماراضيش على شنو كدير وماعندها عليه سلطة.. اما سمير مشا معاهم بلا خبارها وماجايبة ليه خبار فقط السي رشيد فرض عليه يمشي مع خوه اما مرتو ماقدراتش تزيد خلفة وتمشي معاه كونها من صف اسية وماتقدرش تصرف بلا اذن من اسية واخا يكون راجلها فارض عليها ماتقدرش حيت عارفة ليوم ولا غدا غيتصالح مع مو وغتبقا هي فالتوض وتكرهها اسية فحياتها.. لاكن فكلتا الحالتين كانت باغا تحضر وتشوف وتعرف الشادة والفادة وتبركك ختى هيوترضي فضولها ..
كان الصالة عامرة والخلوى كدور ورانيا كتسخر وتسلم حشمانة وتمص شنايفها وتبسم لهشام مزنكةوعاجبها الحال كتبين الحداكة وغادة جايا كتسخر حتى خرجات سكينة من البيت ومع الخرجة خواو بيها رجليها وشدات فمرت عمها مخرجة عينيها وقالت
سكينة: ناريي هادشي بصح!!! ناري حلفي تا بصح !! انا هي العروسة
جاراتها فاطمة كضحك وسكينة كترعد وبدات كتعرق ودور عينيها مكانتش متوقعة يطلع معاها داك الاحساس لغريب اللي مافهمات فيه حتى حاجة.. علاش وكيفاش ماقداتش تعرف مالها وعلاش جاها داك الشعور دالخوف مع الحشمة مع التوثر وقلبها بدا كيضرب بالجهد وجاتها البكية وغرغرو عينيها .. بقات واقفة شحال قاطعة النفس وكتنفس ومونية كتقرا عليها المعودات وكتقوليها راه العين العين وبدا يبردو فيها عاد دخلو معاها للصالون وهي مزيرة ويدها كترعد بدات كتسلم ومعارفة علامن كتسلم حتى وصلات لغالي ومدات يدها سلمات عليه بالزربة وخطفاتها ولقات حداه بناصر وسلمات عليه حتى هوا كتفتف ومشات جلسات حدا مونية هازة راسها وقاطعة فيها النفس مابغاتش تبين الخلعة والتوثر وماشافتش جهة غالي بتاتا.. بقات كتشوف فداك الورد وتلف وتهضر مع راسها على الورد والكل كيهضر ويشوفو فيها ، اللي سامع عليها جاتو الفرصة فين يحقق واللي كيعرفها راه كيشوف فيها ويطلع ويهبط باغي يعرف شنو فيها ماكاينش فغيرها اللي يخلي غالي ياشبت بيها ويخطبها بلا حضور رضى مو، اما السي رشيد كان جالس وكيشوف فيها ويطلع بنص عين كأنه كيوزنها وبشوف بينت غيتزوج ولدو وشكون هاد سكينة اللي لسق عليها لسقة وحدة .
بقات جالسة شوية ومن بعد ناضت رجعات بحالها للبيت وجلسات كتشوط عاد تنفسات وردات النفس وهزات تيليفون سيفطات مسج لغالي
سكينة: عطيني النمرة دمول الورد
غالي: علاش بغيتيها ؟
سكينة: غير عطيها ليا
سيفط ليها النمرة وصونات عليه خرجات فيه كاع داك التوثر على داك الورد اللي سيفط ليها واقف بديك الرجل مشوه بحال البودا بقا ناقصو غير الشمع يدور بيه ويرجع عندهم معبد فالصالون
فشات خليفتها مزيان وحيدات داك القفطان ومشات جلسات فوق ناموسيتها مابغات لا تاكل لا تشرب حتى حطو الدجاج محمر وناضت بزز منها تاكل مع الناس ومشات جلسات وسطهم متوثرة عاوتاني كتغمس دمغة وتوجع اللور تبقا تشوف، اما غالي كان حداها تقول خوها .. مقابل مع الطبلة نيشان وكياكل بحال الى جالس فدارهم ما عليه حشمة ولا حيا وباها كيزيد يدفع ليه ويعطيه ويرحب بيهم حتى لواحد اللحضة ضار شاف فيها كتمضغ بشوية وقال
دور وجهه حتى هوا وسكت ولاكن سرعان ما نسا راسو ورجع دار عندها وقال
غالي: واكولي
دورات وجهها عاوتاني حدور عينيها وكتشوف شون يشوف فيهم لقات كولشي حاضيهم غير هما وكيشوفوفثه كيحط ليها قدامها باش تاكل وكيتبسمو ليها .. كذلك فالبسطيلة اللي حطو حتى هي قطع وعطاها ومونية كتشوف فيه بنص عين مكنشة فمها من الجناب وكتبسم فخاطرها حشمانة بلاصتهم تقول كتفوج فشي فيلم ميكسيكي رمنسي.. اما بناصر لا تخفا عليه خفية ودار راسو عور مكيفهمش ومكيشوفش كاع جيهتهم حتى كملو داك العشا وا وقت الخواتم والحليب والتمر وهاد اللطقوس مكروهة عند سكينة خصوصا وكلني نوكلك ، كيجيوها حامضين وماشي ديال الوقت وطقوس قديمة ابتاكروها الجدود باش يديرو شوية درمنسية وكانت عندهم الرمنسية هي وكلني بيدك نوكلك بيدي، ماحملاتهمش سكينة ولاكن دوزاتهم بزز منها مالقات مفر من غير تشرب الحليب وتعض التمر .. اما هوا غير حطات ليه الكاس فمو بقا سادو مابغاش يشرب وكيقيس ويرجع اللور وهي كتسناه يشرب حتى بعد وجهه وقال
غالي: مكنشربش لحليب
شافت فيه بنص عين وخطات الكاس وقالت بخفوت كدور عينيها
سكينة: قولها فاللول مانديروش هاد هادشي
غالي: وا مهم هاهيا فراسك
عطاتو تمرة عضها وجاو الخواتم وبداو كيلبسو لخواتم وبنت عمتو كتصور اللقطات حتى لبسو لخواتم وحطو ليهم الكيك اللي على شكل كتاب ووقفو كيقطعو الكيك وقالت عمتو كتبسم
العمة: ايوا مكاين زغاريت هههه
وقفات مونية كضحك وبداو يصليو على النبي ويزغرتو وسكينة كضحك مزنكة وبداو التصاور وشي كيتصور من هنا شي من هنا حتى تصور الجميع وتصورات رانيا وهشام حداهم حتى هما وجا وقت الوداع بدا كلشي خارج وعاطيهم بالضهر حتى بقاو غير بجوج اللور وجاها غالي من اللور عنقها وسط الصالة باسها فحنكها حتى قفزات مخلوعة كدور فجنابها وتبعدو
سكينة: وبابا وبابا ويلي ويلي وييلي
غالي : باك هبط مع الدروج هوا با مالك كتخافي منو لعاد الدرجة كاع
سكينة: كن كان با هوا باك عاد غتعرف علاش.. اجي نتصورو قدام هاد الورد اجي
جراتو من يدو وعيطات لرانيا تصورهم وبدات كتبوزا وضحك وتعنق فيه من هنا ومن هنا كتصور من بعد مشا تحنا على صباطو الاسود كيلبس وقال
غالي: عندي الكلمة ولا ماعنديش (غمز رانيا بالضحك)
سكينة: ههه عندك
غالي: ايوا نقصي الهضرة شوية
قلبات عينيها ورانيا كتشوف فيهم بنص عين مافاهمة والو جاوها تصرفاتهم غريبة وماعرفات علاياش كيهضرو اصلا حتى جمع الوقفة وقال
غالي: اجي بوسيني نمشي فحالي
سلمات عليه كضحك وحشمانة قدام رانيا اللي حاضياهم ومرت عمها اللي كطل من المطبخ وكضحك بوحدها.. مد يدو لرانيا صافحها كما صافحها هشام اللي ودعها وراسو محني قدام باها ونزل تبعهم بينما مشات سكينة جهة السرجم كطل عليهم هي وختها وخرت عمها ومونية حتى هي اللي دخلات كتجري وطل معاهم شافهم غاديين بسياراتهم واحد ورا واحد
فاطمة: مرات العم) هاديك الطموبيل البيضا ديالو ولا ديال باه ؟
حياة ثانية الجزء الثاني
محتوى القصة
وفعلا كانت اشارة واضحة وكانت القدر معاونهم باش يتجمعو ، وفهدا الاثناء اللي كانت فيها هي معاه فالدار كان بناصر كيناقشالموضوع هوا ومونية فبيت النعاس وهوا مزال مربع فوق السجادة اللي صلى عليها ومونية جالسة وكتسمع فرحانة
بناصر: هادشي اللي قال ماجبرت مانقولو فديك الساعة قلت ليه خلي حتى وكان نشوفو اش يدير الله .. دابا الى قلتي ليهم لا مشكيلةوالى قلتي ليهم اه مشكيلة كن غير مخاطبينش بعدا رانيا ماشي مشكل
مونية: ايوا فين المشكل ياك غيتوانسو حسن ماتجي شي مسخوطة اخرى تحرر العيشة فرانيا وهي غير درويشية
بناصر: وا حتى نتوما طحتو على هاد العائلة مابغيتوش كااع تنوضو.. هما مابيهمش سكينة بيهم انا اللى شافوني راجل مزيان كلهم بغاو يتناسبو معايا.. اما كن جات عليهم مايخطبوهاش على زين ديك التبهديلة باش كتخرج .. نقولو هادا ك اللولاني شافها فالعرس بتكشيطة ماشي مشكل والثاني؟ وهادا حتى هوا ؟ فين شافها وكيفاش الله وعلم
مونية: ايوا سيدي راه هي اللي جابتو .. راه سبق منها قالت ليه اجي باش ميمشيش عقلك بعيد
بناصر: هييه!! شداها لهادوك واش هادي خاص باباها شي عقل غادية تبهدل بينا مع النسايب وشوووف لهاد المسخوطة مابغاتشاي تحشم
مونية: مادارت وااالو ياك بغا المعقول ايوا صافي راه قلب عليها قاليها افلانة انا ناوي المعقول واش قايلة قالت ليه صافي سير عند با شنو بغيتيها تقوليه؟
بناصر: متأكدة قابلة؟
مونية: قاابلة الى بغيتي تسولها سولها
بناصر: غادي نسولها بطبيعة الحال نشوفو شنو هادشي…واخا مابانشلي فزواج لخوت خايب وزوين فنفس الوقت.. هي صعييبة الى هضر معاها شي واحدودا قاليهاغير شي كلمة دير شي فضيحةوغيحقدو عليها هي وحتى ختها معاها
مونية: ايوا ضبر راسك
بناصر: انا بعدا كن جات عليا نزوج سكينة لهاد المهندس ومنزوجش رانيا لداك خيينا .. ماهنانيش خااطري كااع من جيهتو .. هاد المهندس بعدا راه مهندس .. تلاقيتو فداك العرس ديالهم كيبان مزيان وكيحشم مافيهش الهضرة بزاف وباش زدت رتاحيت فاش كانو حاو يخطبوها وقالك عطيه شي سجادة يصلي ومشا صلى تما وسط الدار
مونية: ايوا الرزق. ديالو وديالها عند الله
بناصر: ماعرفتيش علاش طلق؟
مونية: رانيا قالت ليك طلق مرتو بسبب الصدع والغيرة .. بغات هي تحكم وكتقطع بيه حوايجو .. سولتها قلت ليها واش صافي هادا هوا السبب قالت لي راه صبر ليها حتى تقادا الصبر حتى وصلاتو للشوهة قدام الناس صافي تما قاليها الله يعاون ابنت الناس
بناصر : دابا هادا اللي ماصبرش للطبيبة اللييصبرو عليها الناس يصبر لسكينة اللي غير نكافة وقبيحة واخا تقباح هاد الطبيبة حتى تعيا ماتوصلش لسكينة
مونية: ايوا هادا ماكان (تنهدات) اللي بصلاحليك ديرو
بناصر: خليها حتى تجي ونشوفو هادشي
مع الدخلة للدار لقاتو متكي كيتسناها ، واكيد مادخلاتش بنفس الحوايج وبدلات فالمحلعاد طلعات وفوق هادشي طلعات بكري ومابقات لا حرية لا هم يحزانون كلشي رجع كي كان بالزيار وبالسربيس دالعسكر .
دازت من حداه بغات تمشي للبيت لاكن كم قنانفو من الجناب متبع ليها العين وقال
بناصر: سووكايناااعععع… مالك متسلللتي اجي لهنا.
سكينة:ضارت شافت فيه بارتباك) اا؟؟ انا؟
بناصر: اييه شحال من سكينة عنداا؟؟ اجي ياجي.. زيدي لعندي
هبطات راسها ومشات جلسات قدامو مربعة يديها وناض هوا جلس جمعرجليه ويديه شاف فيها مصغر واحد العين كي حديدان
بناصر: فين عرفتي هو هشاام ؟ اا؟؟
سكينة: بتوثر) ماعرفتوش!! هوا تلاقاني فالزنقة حدا الحانوت
بناصر: امم ايوا زيدي؟
سكينة: كتفتف) صافي هادشي لي كاين
بناصر: اممم.. ونتي دابا قابلة تزوج بيه
سكينة:بنص عين) و. وو وا .. مزيان كيبان
بناصر، هااكاك.. هي درتي عقلك
سكينة: الصمت
بناصر: اش كيدير فاش خدام بعدا ؟؟
سكينة: انجينيور وخدام فالمالية
بناصر: هااكاك..مزيان عندو شي دار ؟
سكينة: لا باقي ولاكن قادر يشري الدار غير مازال مااا عول
بناصر: اممم
بناصر عرفها دات وجابت معاه فالهضرة وصافي فتحات ليه الباب وقابلة عليه وحتى هوا رجع اللور هز راسو وقال
بناصر: ايوا قوليه يدوز نشوفوه كي داير.. بلاش ماتفرحي دابا حتى نشوفو نشوف اش تحت راسو
حركات ليه راسها بالايجاب وناضت مشات للبيت لقات رانيا واقفة كتسنط عليها وماعاجبهاش الحال وقالت بغضبوخفوت
رانيا: مابانت ليك غير عاد العائلة باغا تشوهيني. ياك ؟ فين مايدورو يقولو خت رانيا انا عاطاهم وجه ونتي جايا عندي ضربي ليا كولشي فزيرو وتخيبي ليا صورتي قدامهم يحساب ليهم انا بحالك
سكينة: بنص عين ) باش حسن مني نتي هههه كضحكيني والله راه كي خطبوك نتي خطبوني انا مالك نتي زايدة عليا الجناح ..سيري سيري
كانو غيتشادو لاكن ماصلاحش ليهم وبناصر حاضر، اكتفت رانيا بحسبي الله ونعم الوكيل ومشات عطات وجهها للحيط كتبكي ماعجبهاش الحال وماعجبهاش الوضع ومابغاتش سكينة تدخل معاها لنفس العائلة او يعرفوها . تفقصات وتطعنات في حين سكينة فرحانة وعاجبها الحال وماقاداها فرحة وسيفطات لغالي مسج علماتر باش يتاصل بباعا ويتلاقاه .
وصبح الحال بنهار السبت وفاقو بحال العشكر على التخمال وبناصر غادي جاي على راسهم حتى للربعك دلعشية عاد جاء الفرج على الجيميع وكان اتصال من غالي لبناصر الليكانو رجليه غاطسين فالرغوة حتى هوا كيشتف على واحد الكاشة فالبانيو ويعاونهم ، مشات سكينة تجيب ليه تيليفون وغير طلعات النمرة دغالي خرجات عينيها وداتو ليه كتجري ورجعات اللور دارت راسها كتعمر السطل من الطواليط في حين بناصر بقا كيحقق فتيليفون وهوا واقف فوك المانطة وسروالو مكفض
بناصر: ماعرت ديالمن هاد النمرة هادي( ربط الغوباشة) االو السلام عليكم …. اييه اسيدي هوا هادا شكون معايا؟… (تبسم) ااه اييه ايه كي دابر لاباس كولشي بيخير العائلة؟،،،،، اييه مرحبا .. ماشي مشكل انا غنكون تما قريبة ليا قريبة ،، الله الموعد االله يتهناك مع السلامة
قطع وكمش قنانفو لقدام كيشوف فتيليفون ماتلفتش وقال كيعيط لمونية
بناصر: ارا مونية داك السروال وديك القميجة نمشي نخرج
مونية: طلا عليه من باب كوزينة) فين غادي شكون عيط ليك؟
بناصر: اري دابا اري الله يهديك كتبغي تعرفي كولشي
خرج بناصر مفركس ومونية متبعة ليه العين من السرجم كتحقق وتسائل غير بوحدها في حين طلعات سكينة للسطح كتجري صونات على غالي بسرعة
سكينة: خرجتي؟
غالي: بهدوء)عاد خارج
سكينة: مهم بابا خرج دابا بغيت نعلمك وصافي اي كلمة قالها ماتديش عليه راه هضرتو قاصحة وهاكاك دايرة فهمتي.. راه قااصح فهضرتو وفكلشي مكيحشمش غير سلك معاه اللي قالها قوليه واخا هي اللولة
غالي: وصاافي صافي يالاه انا خارج(على عجلة) حتى نعيط لك
سكينة: عنداك تقوليه شي كلمة ولا تبغي تفهم عليه
غالي: وصاف اسكينة كتعطليني راه اصلا معطل ( على عجلة) يالاه بسلامة
قطع عليها ونزلات للدار متوثرة لقات مونية راجعة من البيت اللث كانت كطل منو وتسول ختى قالت ليها سكينة ها شنو وهاشنو قدام رانيا اللي كانت قدام البانيو معصبة كتشوف فيهم وقالت
رانيا: انا ماعرفت شنو درت فحياااتي حتى ربي كيجمعني معا ك… واعباد الله وابغيت نتفك منك ومن فضايحك ونتي لاسقاني حتى فالزواج .. اختي شنو بغيتي عندي الله ياخد فيك الحق
سكينة: واش نتي حمقة واسيري سيري راه ااصلا كنعرفو قبااال ما يجي هشام ديالك وقلتها لمي وديجا هضر مع مي فتيليفون نتي عاد صبح عليك الحاا ل
رانيا: ماشي شغلي اصلا تزوج وانا كن كنت بلاصتك منقبلش ومنتشاركش معاك فنفس العائلة ، نتي كاع منتشرف بيك انا قدام الناس شوفي راسك قداش ومزالة كتبولي فالفراش ولباسك مشوه ومكتخشمييييش وااالو ماعندكش كرام ديال الحشمة من شي واحد، وماشي ديال الزواج اااصلا.. شنو غيقولو عليا فاش يلقاوم مزال ناعسة حتى للوحدة ومكتجمعي طبلة ما تغسلي ماعن ماطيبي ماديري والو ..غيوقولو عليا ختك ..واخا نبغي ندااافع على راسي يعايروني بختك ختك ختك ومايبقا حتى واحد يحتارمني
سكينة: بنص عين) ماغنديش عليك ومنديهاش فيك انا ماكتهميني لا نتي لا هادوك اللي دايرة عليهم هاد الحال كلها
رانيا: هاااا ها شنو قلنا(شافت غمونية) شفتي علاش كنهضر شفتي.. مغتحتارم حتى واحد غتشوهنييييي كن بقات بعيدة عليا ما ساق ليها حتى واحد الخبار
سكينة: واسيييري مالك بينن مزوجة اصلا شكون هاودو اللي باغا تبان ليهم نتي وااعرة اش يكونو ؟ سيري سيري
رانيا: بغيض بغات تبكي) وابعديي منييييي ماشي سوقك ندير اللي بغيت انا حرة سيري قلبي ليك على شي عائلة اخرى تخشاي فيها وعطيني تيساع مالك باغا تشاركي معايا اللوسات والعكوزة وكولشي
سكينة: وا غا نتي بوووحدك اللي غتخشاي فديك العائلة غييير تهناي اما انا مغنتخشاش انا غندي غا واحد لخرين خليتهم ليك
رانيا: بالفقصة) واش باغا تحمقيييني(شدات قلبها) مي .. مي شديني شديني
شداتها مونية جلسات مخلوعة وسكينة حتى هي مخلوعة بداو كيتجاراو يعطيوها الما وهي يابسة تقول غتموت ومخلوعة مارجعات فيها النفس حتى تطلقات شوية وفاتها الحال وقالت سخفانة
رانيا: بعدي مني غتقتليني مرضتيني فهاد اليوماين ماشفتش النعاس.. بغدي مني اختي الله يرحم ليك الواليدين نبوس ليك راسك كاع.. بعدي مني وديري اللي عجبك خليني نعيش كي بغيت ياك انا اللي سبقت .. خليني نعيش ونكون كنا انا بغيت ماضربيش ليا كولشي فالزيرو راه قربت نحماق بهادشي (شدات راسها) بغيت نتسطا مامتخيلاش راسي انا وياك فعائلة وحدة
غالي وصل للمقهى كيزرب لقا بناصر فالباب واقف ومن شدة الخجل حدر راسو وتبسم ومد يدو صافحو في حين بتاصر دافع صدرو معاق. حجبانو كيبين الهبة والصرامة
غالي: ياكما تعطلت عليك اعميز
بناصر: ماتعطلتي والو غير طلقني للمعقول
سمع غالي ردة فعلو وزاد دخل فبعضياتو وحشم ومشا جلس هو ا وياه فطاولة وحدة كيتعاودو على الحال والاحوال حتى قال بناصر كيضحم هز يديه بجو ج
بناصر: ايوا الاحوال مزيانة كلشي مزيان اوا ليا ماعندك دغيا
غالي: بخجل كيرمش) شنقوليك اعمي انا جيت طالب راغب ههه.. الى قبلتي عليا فسكينة بنتك
بناصر: بصرامة) ماقلتي عيب.. ولاكن باش نفهمك مزياان ماتجيش شي نهار تشكي عليا.. على ما بان ليا هي راضية عليك ونتا راضي عليها ايوا سمع مزياان الله يرضي عليك .. سكينة ماشب هي رانيا باش بلااا متقارن بيناتهم ،، الراس قااااصح واللسان شوية ماضي والشقى على قد الحال والطياب زيرو ، والجلاس فالدار مغتجلسش ليك فالدار وتقول زعما تقابل ليك الدار بحال العيالات راه الخدمة مغتجلسش منها والى قدرتي تصبر عليها صبر ماقدرتيش من هنا راني كنعلمك
غالي: حدر راسو كيضحك ) اييه ايوا ضاروري خاص الصبر
بناصر: نتا واك مطلق وعااارف الزواج اش فيه بلا منوريك .. ايوا الى فيك مايصبر هوا هاداك مافيك اللي يصبر من دابا دير بناقص من شي زواج ،،، اشنو السبب علاش طلقتي اللولة باش نعرف اش كاين؟ ياك من حقي نعرف
غالي: من حقك بطبيعة الحال راه بنتك وخايف عليها
بناصر: هااا ههه باش بلا منزوقو الهضرة
غالي: كاينة… الطلاق مكانش ختياري لولا الضروف اللي كانت اجبارية ماكنتش ناوي نطلق.. انا تزوجت زواج تقليدي .. زواج الواليدين كما كتعرف وشوف واش يصدق ولا لا .. خصوصا فاش المشاكل كيتجاوزو الخطوط الحمرا مرة وجوج وثلاثة وكتعيا تصبر وتعطي انذار راه اخرتها كتسالي بالطلاق
بناصر: ايواا هاحنا مزالين فيها وعاد انا كنقوليك سكينة راه ماشي ديال الزواج فهاد السن راه عقلها باقي صغير دغيا كتعصب دغيا كتنفاعل موحاال واش تقدر تصبر لهبالها
هبط غالي راسو كيضحك حشمان وقال
غالي: غنصبرو معاها حتى دير عقلها راه اغلب بنات ديال دابا هاكاك
بناصر: ايوا اللي بغيتي… ومن ناحية السكن فين ناوي تسكنها
غالي: حاليا راني ساكن بوحدي كاري دار غير هنا وان شاء الله راه ضاروري نشري الدار غير نشوف فين غنستاقر بالضبط
بناصر: علاش واش كيحولوكم ؟
غالي: لا ماشي مكنتحولوش ولاكن كنسافر على برا تقريبا جوج مرات فالعام .. ماركزتش مع الدار
بناصر: ايوا مزيان الله يسهل الامور … غير هوا نوصيك وصية.. السكنة مع الواليدين راه ماصالحاش.. باش نكون معاك صرييييييح ..بغيتي تتهنا فالدماغ ديالك ماتسكنها مع حد وخليها غير هي والحيوط(دور وجهه كيتأمل) لحيوط ويا ربي يتهناو راه غير بوحدها كتقلب وتشقلب
بقا غالي ساكت ومهبط راسو واللي قالها بناصر كيقوليه اه حتى عطاه البنت وخرجو بجوج كيتجمعو ويتناقشو باش يقدر بناصر يقرب من غالي شوية ويعرف شخصيتو وكيفاش كيفكر مشا معاه على رجليه كيهضرو فمواضيع متنوعة حتى بدا كيطيح الضلام ووقفو فالحومة قدام باب العمارة يتوادعو
بناصر: ايوا هوا هادا ..
غالي: دابا بقاو الواليدين يجيو معايا وصافي، الى جات على خاطرك مكاين لاش نطولو فالخطوبة انا واجد نديرو زعما شي خطبة صغيرة فالقريب العاجل صافي ونديرو العقد نيشان بلا زعما منطولو راه ديجا داز تعارف بيناتنا
بناصر: ماقلتي عيب.. الواليدين راني كنعرفهم .. فاش تنوي تجيبهم علمني باش نديرو شي خطوبة وكدا
طلع بناصر راشقة ليه وغالي دخل ليه الخاطر ورتاح ليه ، لقا مونية فالسرحم كطل وتسنا حتى دخل هاز خنافرو مطلع شلاقمو من القنات وهاز حجبانو وساد عينيه كيعيط
بناصر: مونياااعععع
خرجات من البيت كتفرنس فرحانة شافتو عرفاتو راضي مرتاح من داك التعبير وديك التعييطة كتعرفو راشقة ليه
مونية: امضراااا شنو درتو؟
بناصر: صافي طرقنا المسمار غدا غنقلب عليه ونبحث عليه نعرفو اش كيدير اش كيخدم
مونية: برقو عينيها) بصح؟؟ هي صافي تافقتو
بناصر: على هي خلاتنا نتاققو .. صااافي تافقات هي وياه توريني فيها .. راه كااتهضر معاااه ،، الى كانت طمعاتو بالكدوب بعدا راني فرشت ليها كووولشي باش ميجيش غدا ولا بعدو يكشي علينا ولا يعيب عليها ولا يقوليها شوفي ختك
مونية: هيييه!!! ويلي شقلتي ليه
بناصر: داكشي اللي كاين راني قلتو باش الى بغا يزيد يزيد الى ماعجبوش الحال يرجع اللور مانتعايبمعاه مايتعايب معايا
مونية: باهتمام) ايوا وشنو قال؟
بناصر: مقال وااالو صافي قالي نديرو الخطوبة نيشان مكاين لا تعارف لا يحزانون والعقد ديريكت
مونية: هييه دغيا ؟؟
بناصر: وشنو غنتسناو؟؟ تبقا دي دي. دي ديديدي هي وياه فتيليفون ولا تسلت تمشي تخرج عندو ؟ ااش غنتسناو؟ صافي جا قالك الزواج غدا نقلبو عليه الى كان مزيان ماعندو حتى مشكل صافي الله يسخر .. ماعندها ماتزيد دير هنا ومايصلاحش لجلاس بلا عقد صافي سالينا
طرق بناصر المسمار لسكينة ومابغاش حتى هوا يتعطل، كيعرف بناتو مزيان وعارف كل وحدة وتربيتها وبخصوص سكينة عارفها كطير فماشي لمصلاحتو يعطيها لشي راجل ويطول ليها فالخطبة وفوق هادشي يبقا حاضيها، عارف راسو يحضي حتى يعيىى. ودوز ليه من شي جهة فقال اللهم مادام صافي قررت نعطيها فيضربو الكحل فالابيض نيشان ويوقع اللي بغا يوقع ديك الساعة ، من جهة اخرى كيشوف انه ماعندها حتى حاجة تحبسها على الزواج والضروف والاخوال كلها مناسبة وكيشوفها غير كدور وصافي وحاضية المحل ديالها اللهم تمشي لدار راجلها وتكمل مشوارها .
اما هي كانت فالحانوت غادية جايا ، وغير سمعات تيليفون كيصوني ناضت كطيير جاوباتو ولقاتو قدام المحل واقف ومشات كتجري ركبات معاه متلهفة تعرف التفاصيل
سكينة: شنو درتو؟
غالي: بهدوء) صاافي هضرت معاه مقال والو
سكينة: يعني بغا؟
غالي: وعلاش مغيبغيش؟
سكينة: دابا جاوبني بغا ولا مابغاش
غالي: ا نوووضي اشريفة وجدي راسك راه مابقا ليك والو للخطوبة
سكينة: هييه!! اوييلي حلف
غالي: مالك ماعجبكش الحال؟
سكينة: كمشات يديها) ناااري شداتني الخلعة … صافي زعما وصلت للزواج
غالي: هز حاجبو) دابا واش باغا تزوجي ولا لا؟ الى مافيك اللي تزوج قوليها من هنا
سكينة: باستغراب) دابا شنو بغيتي تقول؟؟
غالي: ومالكي كتفيبري؟
سكينة: راه عاادي تجيني الخلعة !! عرفتي شنو انا غنهبط دابا مافياش اللي يهضر
حلات الباب وهوا كيعيط لاكن زدحاتو ومشات وعينيها مغرغرين ماعجبهاش الحال وماعجباتهاش ردة فعلو وبقات كتلون راسها بندم شديد وتردد فنفسها
انا اللي حمارة نستاهل .. لويتي ليا يدي اللي كضرني دابا وماعندي كي ندير نرجع اللور بزز مني غنتزوج .. اما كن خليتك بعيد ماتقربش ليا ونشوفو واش غتنفخ وتهز مناخرك بحال هاكا.. ولاكن انا اللي نستاهل وخاصني نسكت حتى يدوز هاد الزمر وعاد نتفاهمو
تفكعات وقطعات الحس ومابغاتش تسمع على موضوع الخطبة ولا الزواج اللي كيوثرها. اما بناصر مابغاش كاع يسكت هوا ومونية وكيتناقشو كلشي قدامهم وقدام رانيا اللي معالم بيها غير الله وقاطعة فيها النفس وكتشوف وماراضياش ولاكن متقدرش تهضر فحضرة بناصر،
ديك الليلة دازت كحلة .. لا على سكينة لا على رانيا ،، كل وحدة قالبة وجهها للحيط كتخمم فمستقبالها حسب عقليتها وشخصيتها .. اما غالي ماتاصل ما سيفط مسج وهادشي زاد اكد لسكينة انها هي الطرف الضعيف فهاد الساعة وخاصها تصبر مدام عطاتو يدها يلويها ليها،، فنفس الوقت ماتبينش ليه انها خايفة ومرعودة ولاسقة فيه باش ميزيدش يتمادى وياخد راحتو اكثر خصوصا مللي وصل للموضوع لبناصر ودوز الكلمة والموضوع داخلة فيه العائلة فأي خطأ غيضيع كولشي ويخسر الخواطر ويمشي فيها جاو ومجرور لا هيا لا ختها .
صبح الحال وصبحات رانيا فالسطح كتهضر مع هشام وكتعاود ليه ماسمعات ودنيها وهوا كيسمع ومن صوتو باين عليه مخنوق باغي قلبو يسكت وكيهضر بدون رضى
هشام: دابا باك صافي عطاه الكلمة
رانيا: صافي قاليه اجيو نديرو خطوبة
هشام: انا قلت ليك راه الى غالي خطب سكينة مانقدروش انا وياك نكملو
رانيا: بغيض) وشنو غندير ليهم انا منقدرش نهضر مع بابا
هشام: شرحي لختك وهضري معاها
رانيا: علاش ماهضرتيش نتا مع غالي انا بعدا هضرت مع سكينة ماسمعاتش ليا نتا مادرتي حتى محاولة
هشام: حنا الرجال ماشي بحالكم نتوما حنا مكندخلوش فهادشي كل واحد كيضبر راسو ..واش غنقوليه لا متزوجش بيها؟ دابا صافي وصل ختى لباك وعطاه الكلمة كاع واش هاد باك حتى هوا مكيفكرش دغيا قاليه هاك
رانيا: بغضب) انا الا بابا ماتهضرش عليه هاكا اهشام وزايدون الى مابقيتيش باغيني صافي الله يعاونك مغنبزز عليك حتى حاجة وانا درت لي عليا وماعجبنيش الحال ولاكن ماشي انا اللي كنتحكم وماعنديش السلطة على ختي ولا على بابا
هشام: وهضري مع ماماك علاش ماهضرتيش معاها انا عرفتي شنو درت لبا؟؟ درت ليه فضيحة .. وتكلخ فهادي ولا ماعرفتش واش مكيفهمش ولا مالو ..كنحس بيه كيفضل غالي عليا مكيخسرش ليه خاطرو واخا انا اللي جالس معاه ومونسو هنا وعايش معاه جميع الضروف، وغالي اللي كيجي مرة فشحال ومكيسيفط ليه حتى ريال كيتعامل معاه باحترام ومكيقدرش يخسر ليه،، مافهمتش علاش هادشي مابغاش يتفهم ليا وعلاش كيميز بيناتنا .. انا كن كنت اصلا كنهمو مكانش كاع يدير هاد المشاكيل وهوا قادر يمنع هاد الزواج والى بغا يمنعو غيمنعو ولاكن هوا متسوقش ليا وتبع غالي فريوو
تنهدات رانيا بأسى وبقا فيها هشام والطريقة باش شكا عليها حتى حزنات عليه وقالت
رانيا: علاش كتقول هاد الهضرة واش كاين شي اب كيميز بين ولادو ؟ بلعكس انا كنشوف باك داير ليك خاطرك اكثر منهم كاملين
هشام: لاالا غير كيبان ليك انا وغالي كيميز بيناتنا،، لخرين مكنهضرش عليهم ولاكن انا وغالي كيدير بيناتنا تمييز بزااف
رانيا: بحالاش شرح ليا؟
هشام: بحال فاش كيهضر عليه كيبقا يشكرو بزاف وكيتعامل معاه مزيان كيقول ليا متقوليهش مادير ليهش ،، كيهز ليه الهم كتر مني وانا اللي حداه مكيتسوقش ليا
رانيا: ياك قلتي غادي يبيع الدار ويشري ليك برطما مابانش ليك باللي كيفكر ليك؟
هشام: مقالهاش ليا انا غير فهمت منو انه ماغيخلينيش بلاش فهمتي،، غيقدر يبيع هاد الدار ويشري لي برطمة ولاكن فوقاش مزال مابين ليا والو..وباك دابا معكس لينا كيتسناك تكملي قرايتك وانا اصلا مغنخليكش تخدمي يعني كنضيعو الوقت وصافي، كن دابا باك تساهل معانا كن راحنا مزوجين وساكنين مع با وبيخيير.. اصلا با غير بوحدو والدار خاوية .. هاد القرايا دوالو اللي دايرة لينا هاد المشاكيل
رانيا؛ مابقا والو بقا غير لعام الجاي ها عماين دازت طايرة، انا نيت مابغيتش نخدم ومافيا اللي يخدم غير دايرة لخاير لبابا
وهادي هي الاجواء اللي ولات فدار بناصر وفحياة سكينة اللي داخلة فصدمة ومقادراش تستوعب وكتشوف كأنه كولشي كيدور على شي بنت اخرى ماشي هي.. ماشي هي اللي تزوج وتعيش دوك الاجواء لالا مستحيل ،، جالسة وكتقول اوييلي واش صافي غالي هوا شريك حياتي فهاد الدنيا؟؟ يعني صافي هوا اللي غنتزوج بيه هوا اللي مكتاب لي؟!! وكيفاش غتكون الحياة معاه وكيف دايرة عاد الحياة الزوجية ! يعني مغنحققش حلمي ونسكن بوحدي وندير اللي بغيت ونربي كلب ونلبس اللي بغيت ونشري بيجامات معريين وبانطوفات فالالوان وناعب بشعري كما بغيت وناكل فوق النموسية ونفطر بالعصير ونعمر ثلاجة بدانون وندير البينوار ونجلس فالرغوة ونشعل الشمع ونطلق الموسقى!! يعني كاع احلامي تبخرات كاع داكشي اللي حلمت بيه نديرو صافي تبخر !! العيشة بوحدي بلا حتى شي قمقوم صافي تبخرات !!
بغات تبكي وداق عليها الحال ودخلات فاكتآب ورجعات مهمومة واللي هضر معاه كتبقا غير تشوف فيه وتنخصص وتنهد ،، ندمات على النهار اللي عرفات فيه غالي ومشات معاه حتى وقع اللي وقع وبقات كتلوم راسها وتزيد تغرق راسها وتاكل فنفسها وتعدبها وكتحداها وتقول نستاهل حيت درتها بيدي .
شكات وبكات حتى بغات تموت ومابقا عندها خاطر لحتى حاجة،، اول مرة توصل بيها الحالة لهاد المرحلة ومايبقا ليها خاطر ولا كانة وتروع معدتها وتسد ليها الشهية ويتقلب مزاجها رأسا على عقب.. بردات قلبها على ليلى وفوز اللي جالسين قدامها وكيشوفو فيها مافهمو واش يواسيوها ولا يباركو ليها ولا شنو يديرو؟ هي فالعادة الانسان كيفرح ليك بالزواج كأنك درتي انجاز عضيم ويبارك ليك لاكن هما حشمو حتى يباركو ليها وهي قدامهم مغبونة ومكضحكش ومكتفلاش وكتهضر بجدية وحالتها حالة
فوز: دابا مابغيتيش تزوجي صافي شكون بزز عليك؟
ليلى: اوييلي من نيتك !! تحمد لله اللي طلع معاها راجل وجا خطبها وناوي يتزوج بيها اما كن شي برهوش ولا كلب كن راه هرب وخلاها وكن راها دايرة هاد الحالة على الشمتة اللي شمتها ، اما دابا راه خصها تكون مرتاحة وفرحانة !! اوييلي عمرني شفت شي وحدة واقع ليها هاكا فحيااااتي!! واش تنادم معاك الحال ؟ باك عاجبك غالي!
سكينة: اختي الزواج لا … عاجبني حاجة ونعيش معاه حياتي كلها حاجة اخرى .. مباغيتش الزواج مابغيتش كااع ديك الحياة دلخرا يبقا يكوي فيا فوق ما بغا ونصبح عليه يوميا
فوز: وطيبي ليه نسيتيها؟
سكينة: لق٠٠وي(مسحات نيفها بكلينيكس) داكشي اللي بقا… (بحزن) انا اختي كنت باغا نعيش واحد الحياة وحدااا خرا.. نشري دار ونفرشها على دوقي مانديرش فيها الصالون مغريبي كااع .. يكون عندها بالكون كبييير محلول على وسط الدار وقدامو فطويات زويينين فالابيض وتلفازة وزربية بيضا وشميعات .. والبالكون كبيييير(فتحات يديها) بالزاج والباب دلكوليس مفرش فيه طابي خضر والغرس والشجر طبييعي والتراب …شي فوطوي بطبيلة مع القصب وداكشي طبيعي ونبقا نفطر فيه بوووحدي.. بوووحدي مانشوف حتى كمارة كدور قدامي وانا لابسة بينوار رطييييطب حد الركبة وجامعة شعري وكنشوف الشتا كطيح على برا وكترش على الزاج اللي قدامي وفيدي كابوتشينو ولا كافي كخييم سخووونة وريحة التراب طالعة .. ونتكا فليييييل بوووحديتي بشي بيجامة كيووت وطيييطبية وتقيشرات سخاان وسي مانطة بيضافيها ريحة زويييينة ونشعل شميعات وفايوزات ونتكااااااا نبقا غييير كنشوف على برا ونطلق موسيقى كاااالم وزوييينة… ونبغي نعس نمشي لبلاصتي فبيت النعاس ونطلق موسيقى هاادية ونرش ريحة مرييييحة ونتغطا بمانطة سخوونة ورطيييطبة بوووحدي والنقااا وريحة فنة فين مامشيت.. ونفيق الصباح بكرييييي مع الثمنية ونقلي بيضة ونصاوب عصير وطوسط بلافوكا حتى انا ونديه معايا للبيت نفطر بيه مايقول ليا حتى واحد غتوسخي ولا غتخراي…منسمعش صوت بنادم فودنيا كيمرضنيييي مابغيت نسمع حس حتى ق٠٠اد.. وشي كليب صغيور ينقز نربيه ونبقا نخرجو الصباح يشم الهواء وندوز انا وياه عند لكزار ناخدو لحميات ونطلعو نصاوبو ستيك ونتغداو غيير بجوج … نلبس بيجامات مقييزبين وبابيون فشعري كبيرة وتقاشر طالعين حتى للركبة بالبايون وبانطوفة خفيفة وزوينة ونبقا غادية جايا بووووحدي ندير ماسك ندبر كريم ندير مكياج ..(تنهدات وهبطات وجهها كتبكي) مرضت البنات واحق الله
هبطو دموعها حارين والبنات كيواسيوها وقولو ليها غتعيشي نفس الشيء ونتي مزوجة وماشي شي حياة مستحييلة بلعكس ساهلة تحقق وتقدري تعيشيها ونتي مزوجة.. لاكن هي كلمة مزوجة مقادراش تتقبلها وكتكرها وكتكره كل وحدة كتكون بنت زوينة وكيوت وكتزوج كتولي باينة عليها مرى من كل النواحي وكتبدا فهضرتها فلباسها فشوفاتها فتعاملها فكل حاجة وزيد عليها داك الخاتم دالمارياج المذهب اللي كتشوف فصباعنهم كيزيد يجيب ليها القرف ومكتقدرش تتقبل الوضع بتاثا.. وخصوصا المسطلحات المغربية بحال مرت الراجل " راجلي" "زماني" نتي مرى مزوجة" هاد المسطلحات كيروعوها وغير محببين عندها ومكتبغيش تسمعهم وكتشمأز من حالة الزواج بصفة عامة .
كملات الباهية فاش تاصل بيها غالي وخبرها باللي غيمشي هوا وياها يشريو لخواتم اللي غيجيب معاه نهار الخطبة . تفقصات فاش سمعات الخواتم وحاولو البنات يزينو ليها الزواج ويشجعوها وقدرو يأثرو على دماغها شوي لاكن ماقدروش يأثرو على احساسها وشعورها
داز عندها لنفس المقهى فين كانت جالسة مع البنات وناضت ودعاتهم ومشات عندو ساكتة لقاتو فالسيارة كيتسناها وعاقد حجبانو وغير طلعات ماسلمات عليه ما قربات ليه .. شافتو ونفراتو ماحملاتوش وكمل عليها فاش قال
غالي: ماعلمتينيش .. ماقلتيش ليا خارجة مع صحاباتك
دورات وجهها بضيق ماحملاتش تشوف فيه ومارداتش عليه، ربعات يديها وحتى هوا ماهضرش بقا ساكت لاكن تعابير وجهه منزعجة،، زادت شوية فالطريق وحبس فالجنب نزل بالقميجة بلو سييل ودجينز ومشا بالزربة وبخطوات جدية للكيشي تيرا الفلوس وتم راجع بنفس دوك التعابير وهي كتشوف من النافدة باشمأزاز وكتردد فخاطرها
زعما غادي تشري ليا خاتم داير فيها الحاكم.. سير غير تخرا نتا وخاتمك .. كن ما كنت مجبرة نتزوج بيك وخايفة من الشوهة ومن بابا يدور فيا ويديني يقلبني مانزيد حداك حتى دقيقة.. تفووو على بنادم
ركب حداها ودورات وجهها الجهة لاخرى وهوا غادي ساكت حتى وصلو لواحد القيسارية ديال الذهب ونزلو بجوج واحد مكيهضر مع لاخر وغير كيدورو وكل واحد فين كيشوف حتى شار بيدو لواحد وقال
غالي: اجي نشوفو هادا؟
تبعاتو ودخلات ساكتة كتشوف بالنفخة والذهايبي كيجبد ليها الطابلوات دالهوانم دزواج وهي غير مكتزيد تنفر وتقرف وكيزيد يتأكد ليها ان الزواج ما فيه مايتشاف حتى خواتمو حالتهم حالة وزواقهم لا علاقة. عيات تشوف ودور ماهجباتها حتى حاجة ووقفات مربعة يديها كتشوف هنا ولهيه وغالي قدامها
غالي: بهدوء) ماعجباتك حتى حاجة هنا ؟
سكينة: هزات كتفها) ماعجبونيش ماعرفتش.. مازوينيش
ميعات فمها بقرف ودورات وجهها وهوا ساكت كيتنهد ويشوف بعينو حتى بان ليه واحد مادخلوش عندو وقال
غالي: اجي نشوفو هادا
تبعاتو بنفس الحالة ودخلات بدات كتشوف وذهاببي كيجبد ليها
غالي: شار بيدو) شوفي هادا.. زوين هاداك …. اا؟
سكينة: دورات وجهها ) لا ماعجبنيش..
غالي: واا لي بغيتي نتي تعرفي
ماحملات حتى خاتم لاكن كان خاصها ضاروري خاتم واظطرت تشري واحد قريب شوية لدوقها لاكن مامقتانعاش بيه مية فالمية.. خداو الخاتم وجاو خارجين ودازو قدام واحد الزاجة ديال الذهب وشافت واحد حسن من اللي خدات وقالت
سكينة؛ هادا حسسن نردو لدهايبي الخاتم ونشريو هادا
غالي: بصرامة) واش بعقلك ؟؟ الذهايبي غيبدل ليك صافي شريتي خاتم راه من الصباح وحنا كندورو حتى هادا زوين
قلب وجهه عاقد حجبانو وخلاها غير كتشوف وقامعة فيها النفس.. ماجاوباتوش لاكن من شدة الضغط فرفرو عينيها بالدموع ولاحت داك الخاتم فالصاك بنفور وطلعات حداه فالطموبيل قالبة وجهها وقاطعة الحس كتنخصص.. عرف راسو جرحها وبدا كيساوي ويشرح بشوية وبالهداوة وباغي يضحك معاها ويشد ليها فيدها لاكن هي قلبات عليه وجهها قلبة وحدة وعطاتو بالضهر ، مابقاتش ليه الفرصة خصوصا فاش صونا تيليفون وكانت اسية المتصلة كتخبرو باللي راها فالدار هي وهند وخاصو يمشي باش يفتح ليهم الباب.. قلب الطريق بسرعة كيشرح لسكينة انهم فالدروج كيتسناو لاكن هي تجاهلاتو وبقات ساكتة حتى وصلات ونزلات وزدحات داك الباب وطلعات بحالها
طلعات للدار وغير دخلات لقات مونية كتسناها وتبسم فرحانة
مونية: ايوا امضرا شريتو الخاتم؟
سكينة: ها الخاتم (جبداتو من الصاك) انا ماعرفتش اصلا شداني لشي زواج
مشات كتبكي للبيت ومونية تابعاها وشادة الخاتم كتسول اش واقع لاكن كالعادة سكينة ماتعاود ليها حتى حاجة .
اما غالي كان كيتسناه صراع مع مو وجات عوالة عليه ..لقاها واقفة والشنطة قدامها وهند حداها حتى هي كتبسم ..سلم عادي ورحب بيهم ودخلو للدار كاملين..يالاه سد الباب ضار لقا اسية واقفة ويديها على جنابها كانت لابسة سروال دجينز مزيير وواسع شوية من لتحت وصندالة عالية كحلك وقميجة مدلية شوية من اللور بيضا وشعرها مطلوق والنضاضر فوق الراس ومعبسة زادو بانو تجاعيد اللي فطراف عينيها وبين خجبانها وقالت
اسية: ماحشوماش عليك درتي شرع يديه؟ ماشاورتينا ما علمتينا
غالي: هقد حجبانو) اشنو درت؟
اسية: كيفاش شنو درتي؟؟ مشيتي هضرتي مع بات البنت واش وافقنا عليها ؟؟ واش قبلنا بيها؟
هز واحد اليد بصرامة وهدوء وقفها وقال
غالي: غيير بشوية بلا متهكمي ولا تعصبي عليا انا الى كنا غنتفاهمو بشوية راه غناقشو الموضوع اما الى كنا غير غندابزو على والو من الاحسن نسدو الموضوع من الاول
اسية: بغيض) هانا ..يالاه ناقش معايا هاد الموضوع(جلسات ) علاش مشيتي هضرتي مع باها وحنا مزال فالمشاورات
جاس مقابل معاها كيشوف فيها وقال بهدوء
غالي: اشمن مشاورات؟ ياك اللي غيتزوج هوا انا؟ اشمن مشكيل عندكم ؟؟ والبنت مزيانة مافيها مايتعاب وبنت الناس وعائلتها كنعرفوهم ،، شنو اللي لا وعلاش؟
اسية: درتي اللي فراسك ياك!!
غالي: ههه كيفاشدرت اللي فراسي ياك جيت حتى لعندكم وعلمتكم فين كاين المشكل دابا؟
اسية: بانفعال وتوثر) مغتزوجش بييها ماحدي حية ولبه هاد الزواج مغيدوز وكن تفهم تاخد العبرة من اللي فاتو قبل منك بلا منشرح ليك ولا تخلي باك يقلل معاك الحيا ويبدا يشرح ليك بالتفصيل
غالي: شوف الوالدة انا ماتبززيش عليا شي قرار من القرارات ديالك عفاك راني ماشي دري صغير كنرضع صبعي.. درت ليك خاطرك تزوجت اللي بغيتي نتي وماسهلش الله ايوا صافي ،، دابا عطييت للسيد لكلمة وقات ليه هاد السيمانة ان شاء الله غنجيب الواليدين ونجيو وخليتو داير فراسو باللي غنمشيو عندهم ونخطبو البنت.
اسية: انا مغنمشيش الى بغيتي تمشي سير مغنمشيش وانا ماراضياش على هاد الزواج
غالي: بتعب) وا زعما الى كنتي كتفكري هاكا راه مشكيييلة .. راه ميمكنش نتفاهمو وحشومة ماتمشيش عند الناس حت هشام خايبة فحقو غتبين ليهم ماراضياش وغيهزو فخاطرهم من جيهتنا.. ولاهيلا حشوومة .. الناس مادارو واااالو ياك المشكل عندك معايا وهادوك ديجا نسابك .. خاصك تمشي عندهم وتخلي مشاكيلنا بعييدة عليهم وصورتنا مزيانة قدامهم ..وا زعما صدمتيني بهاد الرد !!
ماكماوش الحوار تفاديا للمشاكيل ولاح اخر جملة وهوا فطريقو لبيتو مشا حيد سبرديلتو حطها فالجنب وناض يصلي وخلاها هي واقفة مربعة يديها فاكوزينة ماعجبهاش الحال وهند كتحاول تقنعها بالحسنى وخايفة دور فيها ولا تخرج فيها عينيها خصوصا مللي كتعصب اسية كيولي لسانها ينقط عسل وسكر وتكره الواحد فعيشتو
هند: زعما شنو فيها الى تزوجها ياك بنت ضريفة وزوينة وصغيرة بلعكس سااهلة ديريها فيدك
اسية: انا قلت لا هي لا .. واش الزواج بزز؟ صافي هضرت وكلمتي خرجات من فمي وهاديك العائل غنديو منهم وحدة هي رانيا.. صلاة على النبي
هند: تنهدات) ياك قلنا اا ليك ماشي هي اللي كان كيعرف وراه مكانش كاااع كيعرف هادي وغيكون شافها فالعرس دمنال
اسية: الاللة جوج خواتات عندي فالعائلة ماعندي مندير بيهم .. ماقابلاش انا لخواتات يدخلو عندي للعائلة الى نتي مكلخك وسايط ليك الريح فراسك انا راني كنشوف بعيييد
هند: وعلاش واقولي ليا باش نفهم
اسية: اولا جوج خواتات عمممرك دخلي بيناتهم والى وقع مشكل مع وحدة تنوض لخرى تحامي وتحرش راجلها ..لخواتات كيتافقو ويتحاماو ويقلبو لعنيني للرجال بجوح ماتقدري كااع تاخدي راحتك مع خوتك وغيبغيو يغلبو عليا غنوليو ماحنا بهشام ما حنا بغالي ..واش ولادي انا لاقياهم فالزنقة !! واش ماعندهم ام يضربو ليها حساب! فاخر ايامي ندخل عندي لخواتات نحصل معاهم …. ماشي بحال لعرايسات كل وحدة من جهة وحدة مكتعرف وحدة واخا يتافقو حتى يعياو كتبقا المنافسة بيناتهم على شكون اللي حسن من لخرى وحتى خوتك يبقاو ليك ماشي يتزوجو ويعطيونا بالضهر يتبعو لخواتات ويديرو عائلة غير بيناتهم .. مزيان تبارك الله
هند: اااه !! فهمتك ،، ولاكن انا كتجيني رانيا درويشة بزااف بحال هادوك بنات الجبل لقدااام فالعقلية.. واخا نقولو سكينة بنت الوقت باينة فيها مجبدة
اسية: اسيييري نتي اللي بنت الجبل اما الزواج كيحل لعينين للعور ماشي غير لبنات الجبل.. وهانتي قلتيها بفمك راه ختها مجبدة .. بااينة من داك النوع باغي يبان وعاجبها راسها … لالالا متقوليش ليا ماعندهاش يد فطلاق غالي.. واخا كااع تكون ماشي هي وسارة مطيحة عليها الباطل كااع.. كيفاش زعما شافها نهار لعرس عقل عليها وهوا كان مزوج.. لالا متقوليش ليا دارت ليه شي حاجة ولا بدات تحلون ليه حتى طاح ليها فالشبكة وناض طلق سارة
هند: هيييه! لالالالا اوييلي لا كن غير ما كنتش معاها نقولو يمكن ! انا كنت معاها فالعرس كامل والله ماقربات ليه ولا ضارت عندو بقااي تيقي فديك المسطية سطاها غالي ولات كتشوف شي حوايج مكاينيش… زايدون البنت زويونة راه سينوووغمال يشوف بحالو بحال كاع الناس ..وفاش طلق راه تفكرها وبانت ليه فالبلان
ربعات يديها وبدات كدور عينيها هافت تقوليها راه اانا اللي قلت ليه صورنا وجات سار دارت لينا فضيحة ومن تما مشات لدارهم ماعاوداتش رجعات عندو. سكتات خوفا من شي فضيحة ولا قيامة تنوض عليها ويردوها هي السبب وهي اللي شتتات شمل خوها وتبقا عليها تعاويدة وغناية طول حياتها . اللهم تهني راسها واسد فمها مادام حتى واحد ما جايب لخبار مكاين لاش تحبد حريق الراس والمشاكيل لراسها
اسية قالت الهضرة وماعاوداتهاش.. وهادا طبعها من زمان وولفات ليهم الى فالت الكلمة وكانت جادة فشنو كتقول بلا ما يناقشوها وغير يطبقوها بلا تعاويد.. لاكن غالي كان حالة خاصة .. ربما لانه عمرو ماطاح معاها فشي نقاش ولا فشي قرار مشترك وحياتو اصلا دازت هااادية مهدنة نكيجيب صداع ما كيدير مشاكيل ماكيتسمعش حسو حتى كينساو واش عندهم شي ولد سميتو غالي.. ماعمرو رفع صبعو باش يبان وعمرو عطا رأيو وكان بحال الامانة ميهضر ماينطق الى الى مرض ولا كان عندو شي مشكل مدرسي كيتدخل حينها باه .. حتى مو كانت مبعدة عليه حيت كان هوا الصغير فالدراري ومنسي من نهار مشا عند باه ورباتو جداتو من تما ما هزات ليه مو الهم وكانت كتشوف ولادها اللي قبل منو شابعين مشاكيل وصدع الراس وكثرة الطلبات لاهما لا لبنات.. وتشطنات غير معاهم وخلات غالي ساكت عمرها سولاتو شنو خاصك ولا مالك غير باش متفتحش ليه باب الشكاوي والطلبات حتى هوا ويرجع يتخل ليه الفم ويرونهوم حتا هوا. اللهم خليه ساكت هاهوا ماخاصو خير وراضي باللي كان وكيشد ويقول شكرا مكيتشرط ما كيعيب .. واخا باه كان مهلي فيه بلا ميحتاج يطلب ولا يقول عطيني وكان كيتيق فيه ومخلي ليه الحرية يدير لي بغا .. لاكن بقا تحت مراقبة باه وشافوه واخا عطاه الحرية مادار بيها والو .. بلعكس مكان لا كيلعب فالزنقة مع الدراري ولا يمشي يغبر ويبداو يقلبو عليه ولا يجيب ليه شي شكوى من سي واحد.. كان كيفضل يبقا فالبيت ديالو فدار باه غير هوا والبليستيشن اللي كان فديك الوقت كيشريه غير شكون وشكون وحتى بيتو هوا وهشام اللي كانو كينعسو فيه كان مقوم ومفرش ومجهز باحسن فراش واحدث خشب وديكورات اللي مزالين لدابا الناس كيصاوبو بحال دوك الغرف لولادهم . اما سمير كان ملهوف على مو وتابعها وكان كيجيبو عند باه غير لفلوس وماباغي يبقا حتى عند شي واحد فيهم باش حتى واحد ميعرفو شنو كيدير ويدير اللي بغا .. يخرج ويكمي ويشرب ويغبر والى نوضها مع باه كيمشي عند مو يحزر ويشكي والى نوضاتها معاه مو كيرجع لباه يشكي وكان مستاغل طلاقهم لصالحو وكيبين ليهم انه اللي تهلا فيه ودار ليه خاطرو هوا اللي يكون عزيز باش يبقاو يتنافسو عليه ويعيش مرتاح وداير مابغا .. حتى فالاخير خرج على راسو لا قرايا لا خدمة لا فلوس وزايدها بالكارو والشراب والعاهرات ، فين ما كانت شي عاهرة بيتات ليه مؤخرتها كيحوالو عينيه ويتبعها ويحط عليها كاع اللي عندو ويرجع يطلب ويشكي باش يعطيوه .. وشحال من مرة زبلها حتى كيشوف بيبان الحبس على عينيه وكيخرجو باه بكفالة .. لاكن لا حياة لمن تنادي اللي كبر على تاحراميات والانانية صعيب يتبدل .
علاقتو بغالي كانت بعد السما على الارض تقول ماشي خوت .. حدهم السلام وعمرهم شركو الهضرة ولا الطريق وعمر غالي جلس معاه ولا تناقش هوا وياه .. كيشوف شنو كيوقع وساكت وعارف هوه مفلس وكيجيب غير المشاكيل وخارج الطريق.. وكذلك سمير كيشوف غالي الدرويش السكوتي او الغبي كما كيبان ليه او بليد حيت عمرو دار سي زبلة يبان فيها راه وااعر وخطيير وذكي.. من ديما كيبان كيليميني وعمرهم غارو منو ولا حسدوه ولا عرفوه اش كيدير فحياتو حتى غفلهم غفلة وحدة فاش صدمهم بالماستر وبقرايتو فاحسن الجامعات فديك الوقت .. عاد حلو عينيهم جيهتو وتفكرو بلي عندهم واحد خوهم غااابر واخا عايش بيناتهم
الموضوع معاودش تجبد عند غالي فالدار .. وحتى هوا كيتصرف عادي مكاين حتى مشكل والهدنة واسية كذلك مبرردة ومتأكدة ان الكلمة اللي قالت غادي تطبق.
صبح الحال من اسبوع داز كله توثر وقلق عند سكينة وهم وغم وزيد عليها العادة الشهرية كرفساتها بالمعقول .. ها الردان ها العروقات ها السخفة ناهيك على الوجع ولألم وتفركيل فالفراش تحت المانطة ومابغاش تمشي للطبيب واخا عياو فيها يديوها يضربو ليها الشوكة بحال كل مرة لاكن هي من خوفها يوصلوها حتى اتما ودور ليهم فالخوى ويقولو يقلبوها دارت بناقص ودوزات اكفس اسبوع فحياتها ماشافتش فيه الضو وحتى غالي مكطولش معاه فالهضرة .. حدها كتجاوبو وتقوليه عيانة وكتقطع .. واخا عيا فيها يخرجها ولا غير تنزل يشوفها لاكن والو .. حتى من الماكلة اللي كل مرة كيجيب ليها كتسيفط خوها يطلعها وتجلس تاكل هث وياه ومونية كتشوف بنص عين وشلاقمها من الحناب مدليين عاجبها الحال بداكشي اللي كتشوفو كيدير على بنتها .
بعد هاد الاسبوع دالقهرة رجعات شوية لاباس ورجعو عينيها لبلاصتهم وبدا كيرجع فيها الدم شوية عاد ناضت مشات للحمام وغسلات منها وتهنات من حريقها لي خلا آصار الالم فضهرها وجنابها ،، كمدات عضامها فلحمام ديال الحومة ورجعات بحالها للمحل حازمة راسها بزيف حياتي وبيضا بحال الحليب وحناكها حومر ويديها مكمشين بالمشا لابسة سورفيت كحلة جديدة وكتشوف فدافرها لاصليين كاملين تهرسو ودكدو مابقا فيهم حتى دفر صحيح .. تكات ترتاح شادة قرعة درايب وبتبانة فيدها كتعتق وتسوط حتى صونا ليها تيليفون وردت بتعب
سكينة: االو
غالي: وافين..صافا؟؟؟ خرجتي من لحمام ؟
سكينة: كتلهت ) عاد دابا جلست فالحانوت كنرتاح
غالي: بالصحة والراحة لاللة.. شنو دابا ندوز عندك ؟
سكينة: لااالا بللاااتي
غالي: وصافي ماتعيقيش ياك نتي فالحانوت؟
سكينة: ااه فلحانوت
غالي: يالاه هانا جاي
تنهدات وحطات تيليفون كتشوط وكتشوف فواخد المرايا حداها بالجنب ماعرفات كي دير لراسها، شعرها باقي فازك وملفوف فزيف حياتي ومربوط اللور على السفنجة اللي وراها وعينيها مبلقين هما اكثر حاجة كبيرة فوجهها ومجبدين والمساحة بين الحاجب والعين واضحة وواسعة وشفاوها كوحل مقلوبين .. اما الوجه مجبد بالنشوفية دلحمام وحناكها حومر طايبين وفمها كيتقشر .. وجهها من كثرة ما طاب فالحمام خرج كيبري وناصع ضارب فيه الضو . هزات كتافها بلا مبالات كتردد
شكون غيكون كاع باش نوض نطير نتقاد ليه.. يمشي يق٠٠. (عضات بتيبانة) يقبل عليا كما انا .. زمر طلع لي فراسي
خرجات عندو كما هي والرايب وخنشة ديال بتيبان فيدها طلعات حداه تابتة كتشوف غير بعينيها .. اما هوا تفاجأ جاتو بحال الى خارج عريانة مامولفش يشوف وجهها كامل وجبهتها وحجبانها والدورك دوجهها كلها .. تبدلات عليه بقا غير كيشوف فيها ويدو على فمو ساكت وشاد الضحكة بلسانو .. مولف كيشوف القصة نازلة والشعر كحل ضاير بالوجه بحال لحوايج ساترها ماشي بحال دابا بانت ليه شي حاج ماشي هي هاديك .. جاتو عيب تخرج بوحهها عريان وقال
غالي : مالكي؟؟
سكينة: كتمضغ) ماماليش؟؟!! نتا اللي مالك
غالي: ماعرفتش.. وجههك جاني عريان
سكينة: وشنو غندير ليه نلبسو جلابة ؟
غالي: ضحكاتو) لااالا ههههه.:. جاتني فشكل تخرجي بوجهك هاكا مامغطيطش… شنو هادي؟
سكينة: اوييلي لعكسة مكتعرفاش؟
غالي: والله مكنعرفها!!
سكينة: ماعندكمش شي واحد كيديرها اويلي!!
غالي: لا!!
سكينة: واغير ماعشتيش مع البنات
غالي: بان فيك الضو ( كيتهز بالضحك ) ههه
سكينة: امم(بميوعة) راني كنت مرييضة كنت غنموت
غالي: واييه داكشي اللي بان ليا.. تزاديتي من جديد( جر ليها حنكها) لحنيكات..ااه سخونة!
سكينة: عاد خرجت غير دابا
غالي: يالاه نديك تاكلي شي حاجة.. بنتي ليا فيك الجوع
ربعات يديها ساكت وخشات داكشي اللي كانت كتاكل فيه فصاك ورقي دمول لحانوت مع بتيبان باش متشبعش وبدات كتقلب فطوموبيلتو على مقص حتى لقاتو وجلسات كتقطع دفارها بواحد المقص دلوراق حيداتهم كاملين ورماتهم من النافدة باش ميبقاش شي طالع شي هابط ، بغات تربع يديها لاكن جر ليها يدها شاف فيها وقال بارتياح
غالي: هااكا حساااان ليك من دوك الدفار طوال .. شوفي يدك كتبان زوينة وكييوت
سكينة: جمعات يدها) انا كيعبوني الدفار دنسر
غالي: واري يدك على خطفتيها
نفخات عليه ومدات ليه يدها شدها وهوا سايق كيشوف هنا ولهيه وقال
غالي: صافي دويت مع باك ماقاليك والو؟
سكينة: مزال ماطلعت للدار اشنو قلتي ليه!!
غالي: صافي تافقنا انا وياه على النهار راه قلت ليه دييك المرة سيمانة جايا غنجيو
سكينة: ايوا؟؟؟!!
غالي: صافي درت معاه بعد غدا نجيو نشوفوكم راه قاليا ديك المرة غيدير بحساب غنجيو السيمانة جايا على هاد سيمانة فين حنا دابا
سكينة: هيييه!!! دغيا!!
غالي: كيفاش دغيا؟؟ واش كنلعبو؟
سكينة: لا زعما الوقت طار
غالي: الوقت كيطييير.. دابا شنو غنجيبو وشنو عندكم نتوما فخطوباتكم ؟ شنو كتديو؟ ماتنسايش حنا ماشي بحال رانيا وهشام يعني لخطوبة غير بيناتنا وتصيورات وخويتمات صافي مغنديروش داك العرس اللي دار هشام وختك.. ختى ندوزو هاد الخطبة وغندبرو العرس فهمتي.
سكينة: وعلاش زعما كتقول ليا هاكا زعما باش منقولش ليك جيب جيب جيب
غالي: لاااا ماشي هاكاك انا ماعنديش مكشل اللي قلتي نجيبو غنجيبو .. كنهضر على الطقوس وداكشي فهمتي؟
سكينة: ايوا منعرف!
غالي: مالك على سبة؟ مزالة فيك ليغيكل؟
سكينة: ماشتينيش جايا من جهنم!!
دور وجهه كيضحك بوحدو وهي كتشوف فيه بنص عين وطلع وتهبط .. حتى دخل للمدينة بالسيارة وقال
غالي: دابا كنهضر معاك بصح شنو غنجيب؟ ضومين ديالك هادا نتي اللي كتفهمي فيه
سكينة: بتخمين) امم.. جيب لحليب.. التمر معمر لكركاع،،، اممم.. الحنة وداكشي فكمامس راه كيتباع طالع ..والحلوى والورد صافي هادشي .. لخواتم كاينين
غالي: صافي غير هادشي
سكينة: هادشي اللي كنعرف كيمشي فالخطوبة.. غير خطوبة
غالي: هشام علاش جاب لحواي وتفاصل وداكشي؟؟
سكينة: هشام حيت مطووول حنا غنديرو خطبة عادية صغيرة هادشي اللي كيتعطا فيها .. بغيتي تجيبو جيبو
غالي: لااالا انا غنعطيك باش تشري داكشي اما انا منفهمش فهادشي ديالكم ،،، نجيب شي حاجة متعجبكش تعيبيها
سكينة: وتبلاش اصلا راه غير خطبة ياك مور الخطبة لعرس ولعقد..صافي تا لتما ونشري دهاز وداك تخربيق كامل
غالي: نتي تعرفي … دابا خاصني ندفع لحلوى يالاه يوجدوها ياك؟
سكينة: ااه دابا دفعها .. قلتيها لباك ؟
غالي: معلووم
سكينة: وماماك؟
غالي: حتى هي
سكينة: ايوا صافي
غالي: تنهد) مهم.. غنشرح ليك شنو كاين باش نتفاهمو مايوقع حتى مشكل… الواليدة ماعرفتش واش غتجي ولالا حيت عارضات الزواج ..قلت ليها غنمشيو نخطبو بعد غدا قالت لي مغنمشيش .. جات داكشي اللي بغينا .. ماجاتش مايبقاش فيك الحال
سكينة: بصدمة) اوييلي!!! علاش؟
غالي: بهدوء) داكشي قناعات .. انا قلت ليها تجي بغات مزيان مابغاتش على خاطرها المهم الواليد هضرت معاه قلت ليه شنو كاين قالي غيجي هوا وغيجي هشام وعمتي لكبيرة وبنتها وراجل بنتها راهم ساكنين هنا فحي الفتح حتى هما .. وهند ماعرفتش واش غتجي حتى هي ولالا مهم اللي جا مرحبا بيه اللي ماجاش راه ماعندنا منديرو هادشي اللي كاين
سكينة: هييه!! شنو غنقول لبابا؟ والى مابغاش ؟ وسولني؟
غالي: قولي ليه اي حاجة اللي سلكاتك قوليها نتي غتعرفي لباك حسن مني
سكينة: وعلاش مابغاتش تجي ياك جات عند رانيا!!
غالي: دابا علاش وكيفاش حنا ماشي سوقنا .. كل واحد كيدير داكشي اللث حيرتاح فيه
سكينة: بارتباك) ولاكن انا غطيحني فمشكل!! بابا على نقشة وشافها جات عند رانيا!!
غالي: نتي قولي ليه شي سبب والى مسلكش انا غنعيط ليك ديك الساعة وغنهضر معاه فين ما بغات توصل توصل(تنهد) هادشي اللي عطا الله اسكينة انا براسي معاك فنفس المشكل ولاكن ماعندي مندير .. ماكرهتش .. لغالي الله.. المهم با غيجي وقالي ااانا غنجي والى بغيتي العائلة كلها نجيبها ليك..قلت ليه نتا وعمتي كااافين.. بلا منزيدو نكترو على باك
سكينة: شدات حنكها) وييييلي مشكيلة هادي عاوتاني!!!!!!
مشكل عويص طاحت فيه سكينة والمشكل هوا انها عارفة باها كيف داير يعني حتى الحوار بينها وبينو مكيكونش وصعيب تتواصل معاه باش تشرح ليه ولا تفهمو ولا تدخل ليه شي فكرة لراسو ..
بقات مصدومة وتقطع فيها الحس وبدا عقلها يبلاني وتقلب اشنو تقول وكيفاش تقادها وعلاش اصلا مابغاتش تجي وشنو السبب.. داخت وتشطنات في حين كان غالي كيدور فالمدينة ووقف قدام محل دالخلويات معروف وكبير وتلفت شافيها وتنهد
غالي: يالاه نزلي نشوفو الحلوى
حلات الباب نزلات ولاحت القب على راسها غيات بيه العكسة ودخلات معاه كتشوف المحل والطاولات ..كان محل مشهور ومعروف وعندو فروع ..رحبو بيهم وجلسو وعطاوه كتاب فيه انواع الحلويات وبقات كتشوف وتقلب وهوا كيشوف معاها ، ختارت حلوى باط داموند على شكل كتاب محلول مزينة باللؤلؤ وحتى غالي أيدها فختيارها وطاحت الحلوى بثمن الف وسبع مية فديك الوقت .. كانت من ارقى الحلويات وحتى العبار وافي والشكل رائع . من موراها خرجو رحعو للسيارة من بعد ما عطا فيها تسبيق وطلعو هوا وياها لبلاس بيتري تما فالرباط.. ساحة خاصة بالورد ومحلات الورد ودخلو عند واحد كيشوفو الورد وراهم باقات الورد لاكن هربات منهم بنفور وقالت
سكينة: اوييلي على ورد لالالا ماتجيبش ليا هاد الديكور فين ما مشيت كنشوفو .. موقفينو فسبيطارات فالعراسات فالولادات .. ديكور واحد مكيبدلهوش كيعيف
غالي: وشنو بغيتي هادو اللي كاينين
سكينة: لااالا لا بلا كاع من الورد الى غتجيب ليا هاد الطابلو بحال هاكا طلع ليا فراسي كرهتو بقوك مكنشوفو غير هوا العراسات..مكيبدلو فيه حتى حاجة.. انا بغيت شي حاجة وااعرة جديدة
مول الورد: ماشي مشكل عطيني الشكل انا نصايبو ليك على دوقك
سكينة: الى كان هاكا مزيان
غالي: صافي يالاه وريه شنو بغيتي
سكينة: انا بغيت ورد يجي فبواطة كبيرة على شكل قلب
بدات كتوري لمول الورد وتشرح ليه كيفاش بغاتو يكون وهوا كيسمع ويوريهم انواع الور اللي عندو واحجامهم حتى تافقو على الشكل اللي بغات هي وعلى دوقها وحط فيها غالي الف درهم تسبيق وبقات الف درهم يرجع يكملها فاش يبغي يديه . وبالضحك عطاها وردة حمرا كيضحك شداتها شماتها وخرجات من تما كضحك عاجبينها دوك الاجواء ديال الحلوى والورد حسات براسها كتعيش اجواء جديدة حماسية .. لاكن فكل مرة كتفكر ام غالي اللي مغتجيش كيقبط عليها قلبها وكترجع تيأس
كيفاش غتقول لباها راه ام العريس مغتجيش؟ اشمن سبب واشمن مبرر غتعطيه وكيفاش غتفكها باش باها يقبل.
دارت اخر جلسة مع صحاباتها فمقهى غثر حداهم فالحي زوينة وراقية وكانو مجموعين بثلاتة فواحد القنت على اريكات مريحة اقول جالسين فديورهم . كل وحدة فين متكية وكيخممو ليها على حل وطريقة تشلك بيها هاد الجرة، انا هي هزات فقلقها من جيهة اسية وبدا كيتكون داخلها واحد الحقد والكراهية لدرجة بان فعيونها وتردد على انفاسها
سكينة: فسهوة) علاش زعما مابغاتش تجي شنو درت ليها انا؟؟ فاش ضريتها ولا وصلتها ..عمرني شفت شي ام مكتمشيش تخطب لولدها واخا تكون كاارهة هاد البنت
ليلى: كتقاد حوايجها بثقة) كاينييين احبيبة .. هااء!! موجوودين .. صاااحب راجلي شخصيا مامشاتش معاه مو ومابغاتش تخطب ليه وكانت بغات تزوجو من عائلتها .. هوا بغا واحد البنت خدامة نوتيير وبرزقها وبدارها وغزالة ومابغاتش ليه ومامشاتش معاه مشا بوحدو هوا وعائلتو وعادي
سكينة: اوييلي على عادي!! وباها مقال والو؟
ليلى: شنو غيقول ؟ البنت اصلا مستقلة وبعقلها باها غير مستشار ديالها راه كبيرة هي اللي كتقرر فحياتها..شفتي واحد الحاجة هصك تعرفيها،، البنت اينفوا كتستاقل ماديا صافي كتخرج من سيطرة باها كتتحمل مسؤولية راسها.. ماشي بحال اللي جالسة فالدار كيصرف عليها باها هاديك كيخاف عليها طيح فشي موصيبة وترجع ليه يوحل فيها داكشي علاش كيقررو فمصيرها ويقولوها شنو دير.. اما المستقلة بنفسها راه هازة راسها ماديا ومعنويا مغتسناش باها يعطيها ولا يوحل فيها
سكينة: بابا انا واخا يكون ساكن معايا وكنصرف عليه غيدخل فيا
ليلى: المشكلة ديالك نتي هوا ختك .. جاو عند ختك دابا المشكلة (تنهدات) بفففف.. كن ماجاتش عند ختك نقولو راه سمحات فولادها وكبرو مع باهم وقاطعين معاها من الصغر.. ولاكن دابا هي جاات وكلات وشربات وضحكات ومشات والثاني مابغاتش تمشي معاه
فوز: الحل اللي عندك هوا تقولي لباك باللي غالي عندو مشاكل مع مو من الصغر ومبااغدين وكبر مع باه
سكينة: ماااشي مبرر .. ماشي مبرر اصاحبتي واخا تكون عدوتو غتمشي تخطب معاه
ليلى: ماعندكش حل اخر.. غتقولي ليه مريضة؟!! غيقولك ماشي مشكلولاكن نهار لعرس مغتجيش اش غتقولي ليه؟؟ غتقوديها مع باك عاوتاني يقوليك كدابة ينوضها معاك وسط العرس
سكينة: غنقوليه بغات تزوجو شي بنت من العائلة وصافي وفاش مابغاش يدير ليها خاطرها مابغاتش تخطب ليه.. هادشي اللث غنقوليه ومغنقولوش حتى دوز الخطبة ويسولني عليها
ليلى: هضري مع غالي باش يهضر مع باه وباه غيقلد ليكم الامور مع باك ووصيه باش يقوليه راه بغات تزوجو وكدا ومابغاش
سكينة: القوادة هي با غيقوليه ماجاش مك تخطب بنتي اذا متزطمش عندها فالدار وعمرها ما توصلها ولا توصل دارها.. انا عااارفة بابا والله تايقولها ليه ولا يقوليه بناقص
فوز: ايلى قالها ليه منحقوو.. واش هي ماتخطبش ليه ومتحضرش لعرسو ولاكن مرتو تمشي عندها لدارها!!! اش غدير عندها فالدار.. ولدها الى بغاتو يمشي عندها هادا هوا المعقول
سكينة: وراه هادشي اللي غيقوليه بابا راني حااافضااه توريني فيه
ليلى: خلييه يشرطها عليه راه خايبة فحقك ماتجيش مو تخطبك .. علاش مشات خطبات لولادها الا نتي اذا حتى نتي ماتعرفيهاش وماتزطميش عندها صافي سالينا
سكينة: دابا عارفااه غيقول هادشي ولاكن غالي واش يقبل بهاد الشرط(راسي ضرني وغدا جايين ماعنديش الخاطر والله حطاتني فموقف خاااامج الله ياخد فيها الحق
راسها تنفخ وخاطرها تزير وهزات الهم ومابقا عندها خاطر، رجعات للدار لقاتهم فرحانين كيوجدو ويعاودو للخطوبة ومرقدين الدجاج وموجدين اللحم والشلايض مصلوقين فالثلاجة.. المهم مها ومرت عمها الصغير اللي ديما كتمشي تحضر معاهم واقفين فلكوزينة وكيوجدو ويطيبو وناشطين فرحانين.. غير بانت ليهم سكينة دايزة وماعليهاش حالة لعروسة ولا وحدة جايينها الخطاب فداك اللباس اللي لابسة .. كانت لابسة سروال توني واسع رمادي من لفوق للتحت ومزير بالسيور على الكرش وتيشورط مزيرة ولاسقة داخلة فالسورال فصلات تداريس جسمها الجميل من الاعلى وشعرها مطلوق للجنب ولايحة عليها شال غليض رمادي ورطب مدوراه على شعرها بعشوائية وكتافها
فاطمة:مرات العم) هااي هااي هاي على سكينة غتزوج. هههه
قالتها وخشات راسها بين كتافها مزنكة كضحك وسكينة كتشوف فيها بنص عين جامعة الضحكة بينما مونية كتشتف الحلوة وتبسم فصمت .. مامولفاش ضحك مع بناتها وبيناتهم الوقار والحياء.
خلاتهم ومشات للبيت لقات رانيا شادة تيليفون وخنافرها فالسما وغير شافتها شارت للحيط وقلبات وجهها مكتهضرش . لاكن سرعان ما صارت عندها طلعات فيها وهبطات وسكينة كتبدل حوايجها وقالت باحتقار
رانيا: مو مجاياش عندك تخطبك ونتي قابلة
سكينة: بلا متشوف فيها) ديها فكرك ارانيا حسن ليه ماعنديش ليك لخاطر هاد الساعة.. وقولي لداك الرقاص دهشام يجمع فمو بلا مايبقا يجبد ملتي ولا غنق٠٠د معاه السوايع
رانيا: ياختي بااز انا والله مانرضى (قلبات وجهها)
سكينة: غتزيدي كلمة نكبتها معاك هاد الليلة وفين مابغات توصل توصل
قلبات رانيا عينيها جيهة الحيط مازادت حتى كلمة ، انا سكينة كمشات لحوايج فالماريو معصبة ولبسات بيجامة ومشات للسرجم تجاوب فتيليفون على اتصال غالي اللي كيصوني
سكينة: الو
غالي: امالكي على هاد الو
سكينة: بنرفزة) صافي عفاك ماعنديش الكانة طالع ليا لخرا .. خرك وصلها لرانيا طايبة قاليها مك مغتجيش
غالي: ههه .. اودييي..
سكينة؛ كضحااك…هي مك جايا ؟
غالي: ونساااي نساي دابا مي انا غي نسايها.. الواليد هضر مع باك فتيليفون قاليه راه مغتجيش ..علمو باش ميوقع حتى احراج غدا وسط لافامي وعيطت ليه باش نفسر ليه شنو كاين
سكينة: اوييلي وشنو قلتي ليه وشنو قاليه باك وشنو قاليك هوا؟
غالي: مكاين واالو صافي هضرنا تفهم مقال والو
سكينة: اش قلتي ليه؟؟؟
غالي: قلت ليه بغيت نتزوج اللي باغي انا بخاطري ماشي اللي غيفرضو عليا الوالدين وانا ماشي لهاطري ماعندي حتى ذنب فهادشي الى الواليدة تعكسات ليا فهاد الزواج
سكينة: هيييه!!!( دارت يدها على فمها) هيييه!! وشنو قاليك؟
غالي: قالي مالي باغي البنت ومك مابغاتش تجي معاك ماعندنا منديرو ليها ولاكن يبقا التيقار والتيساع شي ميمشي عند شي
سكين: هيييه!!! كنت عااارفاااها والله تا كنت عارفاها( ضارت وراها) صافي قطع بابا دخل بسلامة بسلامة
بناصر دخل ضارب مية وحداش على جبهتو وهاز خنافرو وشلاقمو مكمشين وماعندو خاطر.. دخل نيشان للبيت كيخمم وجلس وفجأة عيط بصوت قوي
بناصر: سكينااا
طارت من بلاصتها جات واقفة ومشات كتفتف حانية الراس وشابكة اليدين قدامها طلات عليه وقالت بخفوت
سكينة: عيطتي عليا؟؟
بناصر: اجي عندي لهنا زيدي
مشات كترمش وتفتف جلسات قدامو مهبطة الراس وهوا كيشوف فيها بصرامة وجديةوقال
بناصر: واش هاد السيد باغياه ولا مابغايهاش؟ جاوبيييين نييشان (خرج فيها عينيه) ماتفتفيييش عليا الى حشمتي تهضري ماتزوجيش حنا ماشي فحشومة دابا .. جااوبي
سكينة: بتوثر) باغ باغيا
بناصر: ايوا حلي ودنيييك.. مو قالك مغتجيش… ماكبراتوش ليك .. واش دابا قادرة تزوجي ودخلي لديك العائلة ولالا؟ ماشي غدا ولا بعدو تسمعي شي كلمة من شي واحد واجي تبكي عليا.. هاااودني منك… غتبغي غير شي وحدة تمرضك تقوليك جيتي غير بزز ولا ماحاشها ليك حد وجيتي ولا تعايرك يا المدلولة وتبقاي تبكي .. من هنا كنعلمك … الى فيك مايسمع بخال هاد الهضور ايوا هاد عليا نسد فمي
سكينة: الصمت)
بناصر: عنداك يحساب ليك غتزوجي وتمشي عندهم لتما تلقايهم موجدين ليك الحنة والمشطة … راه مابااغيينكش عائلتو وغيمرضوووك فصحتك .
سكينة : الصمت
بناصر: اشنو دابا؟؟ تمشي؟
سكينة: حركات راسها بالايجاب) ماشي مشكل نمشي
بناصر: ايوا الله يسخر .. انا ماعندي منقول(هز يديه) منعطيك منقلع ليك … الولد مزياان مافيه مايتعاب ولاكن العيب لكبير كاين فعائلتو.. واللي عليا راني درتو وحيدت على رقبتي ونتي تعرفي مصلاحتك
سكينة: الصمت
بقا ساكت شحال وفاللخر تنهد وقال بعفوية
بناصر: مهم بعدا راه شرطت عليه واحد الشرط قااصح خليتو كيتمتم
سكينة: ها؟ شنو قلتي ليه؟
بناصر: قلت ليه الى ماجاتش مك كبرات بالبنت عمرها تجي وعمر بنتي تزطم عندها الى الابد.. حتى بدا كتفتف فالهضرة قالي صافي اللي قلتيها هي اللي تكون .. ماقال عيب بعدا راه قالي من حقكم …. ولاكن قلت ليه يرحل من ديك الدار اللي ساكن فيها.. يشوف ليك دار اخرى جديدة تمشي ليها نتي اللولة باش ماتلقاي فيها لا مو لا شي حد خور راني قلتها ليه نيشان.. قلت ليه دير ليها دارها جديدة مادخل ليها حد.. باش نوريهم انا الزواج كي داير .. (هز يديه) اللي عليا انا هوا هادا .. حااولت نكبر بيك وندير ليك العز واخا مو مادارت فيها متيصلاح وطيحات بيك.. ولاكن الباقي عليك نتي.. يا ديري لعز راسك يا ديري دل وتبهديلة راسك.. مكاين اللي كيبهدل بالواحد قد راسو.. ولوكان جيتي عليا كن درتي بناقص واخا هاد السيد مزياان وماجبد عيب ولاكن حسن كن درتي بناقص
سكينة: بالايجاب) صافي
جات نوض وبقا بنتصر نتبع ليها عينو فدهشة وقال
بناصر: صافي درتي بناقص؟
سكينة: لا نسكن بوحدي ماتجي عندي مانمشي عندها
بناصر: بفشل) هاكاك.. ايوا الله يسهل هادشي اللي غنقول… (تنهد بأسف) انا جاني والله واعلم هاد الراجل درويش .. ماشي شي واحد قليل ترابي.. غير كيفاش مو عكسات ليه الله واعلم،، انا بعدا جاني مزيان .. مالقيت منعيب فيه
المسمار واخا تطرق لاكن مامطرقش مزيان وفأي لحضة يمكن لهاد الخطوبة تتبخر .. اي خطأ يقدر ينهي كلشي خصوصا وبناصر على سبة كيقلبعلى لعيب فغالي. اما غالي العيب ماخرجشمن فمو .. واللي قالها بناصر هي اللي تكون ،، حتى انه ما جبدش الموضوع لمو باش ميوقعششي مشكل ولا ينوض شي صدع وتكون عندها شي ردة فعل غير متوقعة، سكت ولزم الصمت وسد عليه فبيتو بينما اسية فالدار جالسة دايرة رجلعلى رجل كتقشر الزريعة وحداها هند كتشوف فيها بنص عين مستغربة
هند: واش بصح مغتمشيش!! ماقادراش نتيق
اسية: ببرودة) كلمة وحدة راني قلتها،، انا مغنمشيش نخطب هاديك هي مغنمشيش
هند: وغيمشي يخطب بووحدو؟؟
اسية: ايوا هاحنا غنشوفو
مزال ماكملاها هرج من بيتو بالبيجامة ديال الدار مشا نيشان عندها جلس وهبط راسو كيخمم وقال بجدية وهدوء
غالي: دابا غنهضرو نيشان… انا غدا غادي نخطب ان شاء الله.. ماكرهتش تمشي معايا وتكبري بالناس واخا مابغيتيش.. ماشي مشكل المهم غير تجلسي بيناتنا حتى دوز هاد الخطبة على خير… انا ماكرهتش وكنتمنى تراجعي على القرار ديالك . (شاف فيها بأسى) شنو قلتي؟
عقدات حجبانها وكانت طريقتو فالهضرة كغداءتغدات عليه باش تقدر تفرض سيطرتها عليه وقوتها بحال خوتو وبان ليها بحال الى بدا كيتقاد فالطريق مع خوتو مدام تحاور معاها وشاف فيها بدوك النضرات الحزينة اللي عمرو شاف فيها بيهم .. بان ليها الضعف فعينيه الشيء اللث خلاها تستقوى اكثر وقالت بكبرياء وراسها لفوق
اسية: شتي الزواج اللي كيمشي بلا خاطر الوليدين عمرو مكينجح ومكيسهلش فيه الله
غالي: متاافق معاك .. الى فعلا فيه ضرر ولا اذى للوالدين ولا غيرصلهم بشي حاجة.. اما الزواج بنية صافية والبنت مزيانة وواليديها مزيانين وكلشي مزيان .. بلعكس الله ميبغيش اللي يوقف فطريق الزواج .. اولالا؟
اسية: انا كنشوف ان هاد البنت ماتصلاحش ليك وانا مك عارفة مصلاحتك
غالي: واش عندك نتي مشكل؟ خلييني انا دابا من الهضرة.. نتي واش عندك اشكال الى تزوجت بيها؟ عندك شي ضرر فهاد الزواج؟
اسية: ااايه .. غتشتت الشمل لخوك الى وقع بينكم شي مشكل وهوا كذلك
غالي: ياك بعدا ماشي حرام؟ حلال لخوت يتزوجو لخوت ياك ربي ماحرموش
اسية: ولاكن حنا دزنا م تجربة خايبة وراك عارف كلشي
غالي: كل واحد يتحاسب على افعالو وعلى حياتو.. ربي ماحرمش زواج لخوت يعني مافيها حتى اشكال.. المهم عندي نتي مايكون عندك حتى ضرر من هاد الزواج
اسية: انا قلت ليك الضرر.. وقلت ماقابلاش بلا مدخلني بالدين
غالي: ناض كيتنهد) ايوا على خاطرك هادشي اللي غنقوليك.. بغيتي تشرفينا وتمشي معانا غدا ان شاء الله راه ماكرهناش.. مابغيتيش على خاطرك .. حتى حاجة ما بزز
دار يديه فجيابو كيسوط ويتنهد ومشا للكوزينة هز واحد القرعة دالما داها معاه للبيت وخلاها جالسة كتشطح برجلها وراسها عالي
اسية: ايوا سير بلا مك نشوفو اش غيقولو عليك الناس
هند: راع غيديرها واش مكتعرفيهش!!
اسية: خلييه يديرها يتزو بلا خاطر مو
هند: اوييلي اماما واش بصح كتهضري!! راه غيمشي يخطب.. والى مشا ماعندو فين يرجع
اسية: وهاد الخانزة اللي غتقبل بيه قلا مو عندها شي نفس؟؟ها؟
هند: تيليفونك كيوصني
اسية: هشام غير خليه.. غيفرع ليا راسي حتى هوا من صباح مابغاش يسكت .. خايف نسابو يدير عليه نضرة خايبة.. تقول خاطب بنت الرئيس
ها النهار المنتضر وصل.. وشكون قال سكينة غتقبل اخيرا فكرة الزواج … كيوجدو ليها الخطوبة ومامصدقينش انهم اخييرا غيشوفو النهار الابيض معاها وتزوج بحال قراناتها ويتهناو عليها ويتعناو منها ومن مشاكلها ومن والطيران ديالها اللي كانو خايفين يجيب ليهم شي نهار سي فضيحة يغرق فيها جمل.
صبحات فالحمام ومن الحمام للصالون ودايخة بالنعاس مافيها اللي يحضر ولا لي يدوز داك النهار.. ناشرة يديها كيتصبغو ومتكية على كتفها والفوطة علك راسها وكتشكي وتهضر بزز
سكينة: كنمووت اعباد الله باغا غا نعس
ليلى: جالسة حداها) اوييلي راك عروسة زعما
سكينة: بعدي مني اختي الله يرحم باك كنكره هاد اللقب وداك التق٠٠ بين لحلال
ليلى: اوييلي قولي استغفر الله لعضيم .. شمن تقح٠٠ين نتي عاود!!
سكينة:هاد تق٠٠٠بين هادا نيت .. لا عروسة لا راجلي لا ديرو ليا لا فعلو ليا لا مرت الراجل لا لق٠٠وي … ماشي تقح٠٠بين!!
ليلى: وشنو دابا نسيفطو كنزة تبرز بلاصتك
سكينة: ماكرهتش يعطيوني ديك الورقة نسيني عليها ونهز باليزتي ونزيد.. بلا تق٠٠بين لعور دلعيالات كل وحدة تلحس من جهة كيحسسوك انك كتزوجي ..يموتو على الزواج وسيكس ويديرو فيها شريفات
ليلى: ونااري على عقلية شداك اصلا من للول لهاد لخرا كاململلي ماعندكش معاه
سكينة: ماعنديش مع هاد التبعصيص وتقح٠٠بين دوالو صاافي كنتزوجو ولا كنخراو وا بنادم يجمع عليا كروو،، كيباركو ليا بحالا غادة للجنة..مافهمتش انا هاد البشار عندهم الزواج شي لعبااا.. فرحانين يهزو رجليهم .. تفوو كاع اللي عمرو عيط ليا عيط ليوم جالسين عليا فرحنا ليك ما فرحنا ليك بحالا كنت منسوا بصلة عاد دابا حيت غنتزوج وليت كنسوا
مكانش عندها خاطر ومكانتش فرحانة ومكانش عاجبها دور العروسة بتاتا.. صايبات الشعر والدفار كما موالفة والمكياج صاوباتو ليلى خفيف ضريفومن تما دازت نيشان للحانوت هزات قفطان محلولمن الجنابحتى للركبة والسفيفة غليضة من لقدام من لفوق حتى للتحت ونازلة مع الجناب والفتحات والسمطة ديالو خفيفة وبلغة دالصم وطلعات فحالها للدار لقاتهم كيوجدو .. مع الدخلة بقا عليها بناصر تعطلتي ما تعطلتي وكيسول على العريس فين وصل حتى عصبها ودخلات لواحد البيت صونات على غالي منرفزة
سكينة: فيينك راه الربعة هاديياك درنا الجوج ماشي الربعة
غالي: وراني حاصل هنا معا الورد ديالك راه عاد كنقلبو على هوندة نهزوه فيها
سكينة: هزو خشيه فالطموبيل!!
غالي: ميدخلش ليا فالطموبيل راه عرفتي قداش ولا!! كبير بزاف
سكينة:دابا شحال ديال والقوقت كاع
غالي: على عجلة من صوتو) ها الهوندة جات صافي قطعي انا غنتحرك دابا
سكينة: اوييلي على هوندة غتجيب ليا الورد فالهوندة!!
غالي: فاش غنجيبو فالطوبيس !! مداخلش فطموبيل عيينا كنتاقتلو معاه انا وبا مادخل لا فطموبيلتي لا فطموبيلتو الهوندة اللي غتهزو
سكينة: هييه!! واسربي سربي دغيا راكم تعطلتو
غالي: صافي يالاه قطعي قطعي
قطعات وبعات يديها كتسوط وتسنا ومرت عمها كل مرة طل عليها وتبدا ضحك غير بوحدها وتحمار حتى كيتنفخو خدودها .. ماهيا غير نص ساعة حتى تم بناصر طالع مع الدروج كيرحب بالجهد وحل الباب زربان كيستقبل فالناس ويدير ليهم الطريق بلا ميعلم مالين الدار اللي تشتتو كلهم تخباو مابقا حتى واحد كيدور رسط الدار وكل واحد منين كيطل عاد بداو كيخرجو ويتبسمو حشمانين واحد مور واحد ويسلمو على العائلة ، كان اولهم السي رشيد.. اييه يا لكلاص كيبان من لبعيد تبارك الله قلدة والوقفة وحتمع راسو مرجل وموكض كيسلم ويتبسم وموراه غالي بالبذلة بلو مارين وهشام حتى هوا هازين الورد بجوج وسكينة كطل من مور الحيط ويدها على حنكها كتشوف فداك الورد اللي صايب ليها مول الورد ماشي كااع نفس التصميم اللي بغات .. هوا فعلا على شكل قلب كبير وزوين فالكل ومقاد على حقو وطريقو ومكتوبة لوسط بالورد ابيض سكينة ولاكن المشكل هوا داك القلب وقفوه على واحد الخبة طويلة وعريضة بحال الشجرة زعما ولسقو القلب مع داك الجدع باش يجي واقف وعالي .. عاد فهمات علاش ماصلاحش ليهم يدخلوه فالطموبيل.. كانت باغا غير القلب ويجيبوه هازينو فيديهم لاكن مول الورد تفنن ليها ودار ليه رجل طويلة ودور عليها العروش فالخضر وغير شافتو داخل بداك الشكل شدات راسها كانت غتسخف ماحملاتوش علاش يركبليه رجل ويوقفو بداك الشكل جا طول ديالو بحال طول دبنادم وماعطاش منضر زوين .. كن خلاوه قلب يتحط فوق الطبلة كان يكون احسن من انهم يلسقوه مع الخشبة ويجي واقف. لحاصول مالقات مادير وجاها الضحك فاش شافتهم ماقالين معاه مدخلينو ليها بحال الشجرة كيقادوه حتى وقفوه فالصالة وخلاوه عاد تنفسو الصعداء من تمارة اللي دوز عليهم فالدروج وبداو كيسلمو
نشفو من بعد ما عرقو وسخفو فهز حط وجلسو كاملين فالصالون مع بناصر اللي كيقشب مع السي رشيد ويتجمعو في حين العائلة لخرى جالسين وكل مرة يشكرو مونية على الترحيب.. كانت عائلة السي رشيد فقط اللي جات من بينهم ختو لكبيرة وراجلها وبنتها اللي مزوجة وساكنة فنفس الحي دغالي وراجل بنتها واخ السي مصطفى ومرتو المهم العائلة القريبة ليه وهشام وخوه سمير حتى هوا والجد اب اسية .. اما اسية وبناتها وعائلتها حتى واحد ماحضر.. او بالاحرى حتى واحد ماقدر يحضر بنا ان اسية ماكايناش والموضوع حساس فحتى واحد ماقدر يخالف كلمتها ويحضر من غير باها اللي جاي ضدها وماراضيش على شنو كدير وماعندها عليه سلطة.. اما سمير مشا معاهم بلا خبارها وماجايبة ليه خبار فقط السي رشيد فرض عليه يمشي مع خوه اما مرتو ماقدراتش تزيد خلفة وتمشي معاه كونها من صف اسية وماتقدرش تصرف بلا اذن من اسية واخا يكون راجلها فارض عليها ماتقدرش حيت عارفة ليوم ولا غدا غيتصالح مع مو وغتبقا هي فالتوض وتكرهها اسية فحياتها.. لاكن فكلتا الحالتين كانت باغا تحضر وتشوف وتعرف الشادة والفادة وتبركك ختى هيوترضي فضولها ..
كان الصالة عامرة والخلوى كدور ورانيا كتسخر وتسلم حشمانة وتمص شنايفها وتبسم لهشام مزنكةوعاجبها الحال كتبين الحداكة وغادة جايا كتسخر حتى خرجات سكينة من البيت ومع الخرجة خواو بيها رجليها وشدات فمرت عمها مخرجة عينيها وقالت
سكينة: ناريي هادشي بصح!!! ناري حلفي تا بصح !! انا هي العروسة
جاراتها فاطمة كضحك وسكينة كترعد وبدات كتعرق ودور عينيها مكانتش متوقعة يطلع معاها داك الاحساس لغريب اللي مافهمات فيه حتى حاجة.. علاش وكيفاش ماقداتش تعرف مالها وعلاش جاها داك الشعور دالخوف مع الحشمة مع التوثر وقلبها بدا كيضرب بالجهد وجاتها البكية وغرغرو عينيها .. بقات واقفة شحال قاطعة النفس وكتنفس ومونية كتقرا عليها المعودات وكتقوليها راه العين العين وبدا يبردو فيها عاد دخلو معاها للصالون وهي مزيرة ويدها كترعد بدات كتسلم ومعارفة علامن كتسلم حتى وصلات لغالي ومدات يدها سلمات عليه بالزربة وخطفاتها ولقات حداه بناصر وسلمات عليه حتى هوا كتفتف ومشات جلسات حدا مونية هازة راسها وقاطعة فيها النفس مابغاتش تبين الخلعة والتوثر وماشافتش جهة غالي بتاتا.. بقات كتشوف فداك الورد وتلف وتهضر مع راسها على الورد والكل كيهضر ويشوفو فيها ، اللي سامع عليها جاتو الفرصة فين يحقق واللي كيعرفها راه كيشوف فيها ويطلع ويهبط باغي يعرف شنو فيها ماكاينش فغيرها اللي يخلي غالي ياشبت بيها ويخطبها بلا حضور رضى مو، اما السي رشيد كان جالس وكيشوف فيها ويطلع بنص عين كأنه كيوزنها وبشوف بينت غيتزوج ولدو وشكون هاد سكينة اللي لسق عليها لسقة وحدة .
بقات جالسة شوية ومن بعد ناضت رجعات بحالها للبيت وجلسات كتشوط عاد تنفسات وردات النفس وهزات تيليفون سيفطات مسج لغالي
سكينة: عطيني النمرة دمول الورد
غالي: علاش بغيتيها ؟
سكينة: غير عطيها ليا
سيفط ليها النمرة وصونات عليه خرجات فيه كاع داك التوثر على داك الورد اللي سيفط ليها واقف بديك الرجل مشوه بحال البودا بقا ناقصو غير الشمع يدور بيه ويرجع عندهم معبد فالصالون
فشات خليفتها مزيان وحيدات داك القفطان ومشات جلسات فوق ناموسيتها مابغات لا تاكل لا تشرب حتى حطو الدجاج محمر وناضت بزز منها تاكل مع الناس ومشات جلسات وسطهم متوثرة عاوتاني كتغمس دمغة وتوجع اللور تبقا تشوف، اما غالي كان حداها تقول خوها .. مقابل مع الطبلة نيشان وكياكل بحال الى جالس فدارهم ما عليه حشمة ولا حيا وباها كيزيد يدفع ليه ويعطيه ويرحب بيهم حتى لواحد اللحضة ضار شاف فيها كتمضغ بشوية وقال
غالي: كولي مالك مكتاكليش؟؟
خرجات فيه عينيها كترمش وقلبات وجهها حمرا بقات كتلون بوحدها وهبطات راسها قربات للطبسيل وقالت بخفوت كتشوف فالدجاج
سكينة: ماتهضرررش معايا الله يرحم باك غا خليني
دور وجهه حتى هوا وسكت ولاكن سرعان ما نسا راسو ورجع دار عندها وقال
غالي: واكولي
دورات وجهها عاوتاني حدور عينيها وكتشوف شون يشوف فيهم لقات كولشي حاضيهم غير هما وكيشوفوفثه كيحط ليها قدامها باش تاكل وكيتبسمو ليها .. كذلك فالبسطيلة اللي حطو حتى هي قطع وعطاها ومونية كتشوف فيه بنص عين مكنشة فمها من الجناب وكتبسم فخاطرها حشمانة بلاصتهم تقول كتفوج فشي فيلم ميكسيكي رمنسي.. اما بناصر لا تخفا عليه خفية ودار راسو عور مكيفهمش ومكيشوفش كاع جيهتهم حتى كملو داك العشا وا وقت الخواتم والحليب والتمر وهاد اللطقوس مكروهة عند سكينة خصوصا وكلني نوكلك ، كيجيوها حامضين وماشي ديال الوقت وطقوس قديمة ابتاكروها الجدود باش يديرو شوية درمنسية وكانت عندهم الرمنسية هي وكلني بيدك نوكلك بيدي، ماحملاتهمش سكينة ولاكن دوزاتهم بزز منها مالقات مفر من غير تشرب الحليب وتعض التمر .. اما هوا غير حطات ليه الكاس فمو بقا سادو مابغاش يشرب وكيقيس ويرجع اللور وهي كتسناه يشرب حتى بعد وجهه وقال
غالي: مكنشربش لحليب
شافت فيه بنص عين وخطات الكاس وقالت بخفوت كدور عينيها
سكينة: قولها فاللول مانديروش هاد هادشي
غالي: وا مهم هاهيا فراسك
عطاتو تمرة عضها وجاو الخواتم وبداو كيلبسو لخواتم وبنت عمتو كتصور اللقطات حتى لبسو لخواتم وحطو ليهم الكيك اللي على شكل كتاب ووقفو كيقطعو الكيك وقالت عمتو كتبسم
العمة: ايوا مكاين زغاريت هههه
وقفات مونية كضحك وبداو يصليو على النبي ويزغرتو وسكينة كضحك مزنكة وبداو التصاور وشي كيتصور من هنا شي من هنا حتى تصور الجميع وتصورات رانيا وهشام حداهم حتى هما وجا وقت الوداع بدا كلشي خارج وعاطيهم بالضهر حتى بقاو غير بجوج اللور وجاها غالي من اللور عنقها وسط الصالة باسها فحنكها حتى قفزات مخلوعة كدور فجنابها وتبعدو
سكينة: وبابا وبابا ويلي ويلي وييلي
غالي : باك هبط مع الدروج هوا با مالك كتخافي منو لعاد الدرجة كاع
سكينة: كن كان با هوا باك عاد غتعرف علاش.. اجي نتصورو قدام هاد الورد اجي
جراتو من يدو وعيطات لرانيا تصورهم وبدات كتبوزا وضحك وتعنق فيه من هنا ومن هنا كتصور من بعد مشا تحنا على صباطو الاسود كيلبس وقال
غالي: عندي الكلمة ولا ماعنديش (غمز رانيا بالضحك)
سكينة: ههه عندك
غالي: ايوا نقصي الهضرة شوية
قلبات عينيها ورانيا كتشوف فيهم بنص عين مافاهمة والو جاوها تصرفاتهم غريبة وماعرفات علاياش كيهضرو اصلا حتى جمع الوقفة وقال
غالي: اجي بوسيني نمشي فحالي
سلمات عليه كضحك وحشمانة قدام رانيا اللي حاضياهم ومرت عمها اللي كطل من المطبخ وكضحك بوحدها.. مد يدو لرانيا صافحها كما صافحها هشام اللي ودعها وراسو محني قدام باها ونزل تبعهم بينما مشات سكينة جهة السرجم كطل عليهم هي وختها وخرت عمها ومونية حتى هي اللي دخلات كتجري وطل معاهم شافهم غاديين بسياراتهم واحد ورا واحد
فاطمة: مرات العم) هاديك الطموبيل البيضا ديالو ولا ديال باه ؟
سكينة: لا ديالو هاديك الكلحة كاط كاط ديال باه
رانيا: اشمن ديال باه ديال هشام
سكينة: ها هشام !! (عطاتها صبع) ديال باه قالها ليا غالي
رانيا: فين كتعرفي هاد غالي شفتك مضااااسرة نتي وياه.. مكتحشمي مكتستحياي باااز لوجهك
سكينة: ديها فراسك ماشي شغلك
رانيا: داااباها فراسي نتي اللي شوفي راسك شنو كديري جالسة كتعنقيه بقا ليك غير تبوسيه
يتبع...
التنقل بين الأجزاء