غالي: سيري عطيني تيساع اهشام وماشي شغلك دخل سوق راسك …
شدات لبيت ماخرجاتش منو لعشية كلها .. الفقصة خلاتها تعاود اش طرا لفوز و ليلى على الله تبرد يوريوها اش دير لاكن حتى هنما من شدة الصدمة ماعرفو ما يقولو من غير وصاوها ماتعاود لرانيا حتى حتى وماتعطيها والو فهاد الساعة من اجل سلامتها الصحية حتى ترتاح وتكون مستاعدة تستقبلشي صدمة اخرى او خيبة امل، وداكشي لي كان نيت تراجعات على قرارها حتى دوز هاد المحنة واحتافضات بتسجيلات الصوتية فتيليفونها وبقات مكمشة فالبيت حتى ضربات العشرة ودخل غالي هاز خنافرو فيدو بيتزا وكانيطا دلموناضة حطها فوق الطبلة وخرج سد لباب.. اما هي صبرات حتى عيات على ديك البيتزا وريحتها اللي كتوصل حتى لعندها وناضت فالاخير عندها حلاتها وجلسات عليها كتاكل حتى وصلها مسج من عند مونيه فالواتساب تلهات فيه على اخر قطعة بقات من ديك البيتزا
مونيه: سيفطي ليا نشوف اش داكشي بغيتي تورينا
سكينه: واخا
مونيه: يالاه دغيا
بدات كتسيفط ليها حتى كملات جميع التسجيلات الصوتيه وانتبهت لطريقة الكتابه تبدلات وشكات انها رانيا حيت مونيه كتابتها مختالفة
سكينه: مخلوعة) شوفي راه هوا من الاول هاكا بلاااا متصدمي راه غير مكنتيش عارفاه اش كيسوا
رانيا: انا لي حمارة .. انا اللي عقلي كان غايب وهادشي حل ليا عيني .. هاكي شوفي شنو كان كيقول فيك وفغالي وفباه وعائلتو .. غنفضحو سيفطي لغالي هادشي هوا وباه يعرفوه اش كان كيقول عليهم فاش كان كيتحمس ولا فاش كان. كيجييشكي عليا .
سكينه: حلفي!!! سيفطي سيفطي
رانيا: غير بلاتي هانا طالعة كنحمع ليك
سكينه: اري نشوف دغيا
سيفطات ليها رانيا جرائد ديال المحادثات والتسجيلات الصوتيه حتى تكهمات ومن الصدمة بقات حالة فمها وحضر شيطانها ومقاليها راسها غير نوضي حلي كروب فالواتساب بنمرة اخرى وجمعي فيه غالي وهشام وباه واي واحد عندك نمرتو فديك العائلة وبداي تحطي ليهم الضواسا ميعرفو منين جاو وشكون جمعهم وها الفرصة جات بين يديك بردي قلبك كي بغيتي
فديك الليلة فتحات كونط فالواتساب وحطات فيه النوامر لي كتعرف كلهم وبدات كتلوح فالاودويوات والرسائل بحقد وكراهية حتى فجأة تحل عليها الباب ودرم عليها غالي مخرج عينيه مد يدو نيشان ليها وقال بخفوت وعصبية
غالي: اري داك تيليفون
سكينه: اشمن تيليفون؟؟
غالي: اري تيليفون
حيد ليها تيليفون من يدها ووقفات ربعات يديها كتشوف فيه وتشطح برجلها وهوا كيحرك راسو وكل مرة يهز عينو فيها . مسح داك لكروب ولاح تيليفون فوق نموسية وقال بتحدير
غالي: جمعي راسك .. هاودني منك
بغا يمشي لاكن قطعات طريقو وقالت باستفزاز
سكينه: ويلا ماجمعتش راسي ؟؟ ااش غديركااع؟
غالي: راني هضرت .. دنوبك على راس
سكينه: مغنمعش راسي يالاه شنو غدير
غالي: غتجمعي حوايجك وترجعي لداركم
رجعاتلو كتشوف فيه متوقعاتش يقول ليها ديك لكلمة ومن الصدمة بقات كضحك وقالت
سكينه: دااابا نييت
خرج خلاها فالبيت كتهز وتحط معصبة وكتحلف عليه حت هوا وتردد
سكينه: هااي هااي هااي على جمعي حوايجك ..واخا الكيدار دابا نوريك جمعي حوايجك .. انا لي عاطياك وقت وقيمة اما انا نجيبك سيدك
مافقصهاش لخروج من الدار او فكرة الطلاق قد ما فقصها الرجوع عند بناصر والدار لي معولة عليها مزال ماوجدات ومافيها لي يمشي لدارهم ويجلس يسمع هضرتهم وكارهة الجو ديالهم وماقادراتش تخيل راسها حتى بايتة فبلاصتها كما كانت ..ديك البلاصة المشؤومة لي فين ما تنعس فيها تبول !! علاش الله واعلم .. بلا متهضر على الصباح كي كيدوز ولعشية حتى هي كي كدوز. وحتى قالت تهنات من. ديك الحياة دلويل والنكير ولحسابات وشي حاضي وشي حاط على شي والصدع كينوض على ملعقة
سكينه: ليلى ..صافا؟؟ منين اختي انا صافي جمعتي حزاقي وغنخرج من هنا مابغيتش نمشي لدارنا ..واش نجي عندك؟… الى ماجيتش عندك غنمشي للحانوت اما دارنا منمشيش ليها… صافي واخا انا نتسناكم تجيو غنمشي دابا للحانوت نجلس تما تا تجي عندي.. يالاه بسلامة
قطعات ولاحت عليها كتبيتوش ديالها وحلات الباب جارة باليزتها
تسمعو روايض الباليزة فالارض وكان باه فالصالة ناعس وخوه متكي على واحد سداري شاد تيليفون ، اما هوا كان جالس فالطرف ديال واحد الفوطوي بوحدو محني على تيليفون وغير سمعها جارة شنطتها ناض مشا عندها قبل متوصل عندهم خدا الشنطة ردها للبيت وقال
غالي: اجي نهضر معاك
سكينه: نترات يدها ) بعد مني
غالي: جرها كيهضر بخفوت ) غير اجيي اجي
لطف الهضرة وكانت فصوتو نخصة كطلع حصات بيه مقصح بزاف وكانت باينة عينيه ، بقات كتشوف فيه بغيض ويالاه دخلات للبيت سد لباب وعنقها بقوة لاكن دفعاتو بلا قلب وقالت مهرجة عينيها
سكينه: بعد مني.. انا اصلا حنت غادية فحالي بلا متقولها ليا
غالي: بتعب وترجي) صافي انا كنسحب هضرتي.. صافي
كان باغيها تبقا وتفهمو بلا ميهضر .. او بالاحرى مكانش الا عارف يهضر ولا يعبر لاكن كان كيشوف فيها بنضرات حزينه باش تحس بلا متفهم المهم يوصل ليها احساسو .. حسات بيه ندم وقال ديك الكلمة فلحضة غضب او يمكن قالها باش يردعها حتى صدقات بصح.. قصحات راسها وعجبها الحال تشوفو هاكاك كيترجاها بعينيه وكانت باغاه يرغبها لاكن التعبير ماعندوش ..عاود عنقها وباسها فراسها ويديها ومسح على راسها بحال شي بنت صغيرة وتبسم
غالي: صافي؟؟
بقات كتشوف فيه بنص عين حشمات تزيد فتعفارها وبقات واقفة مع الحيط وهوا كيطبطب على ضهرها
غالي: اجي اجي…اجي نجلسو ونهضرو
جلس على طرف الناموسية كيتنهد بتعب وجلسات مربعة يديها حداه كتسمع ليه كيهضر بطريقة الاباب والاجداد وكأنه كيهضر مع شي ولدو ولا بنتو او شي شخص قريب ليه وعزيز عليه ..كان فهضرتو احترام كبير حسات براسها عندها قيمة
غالي: هادشي كاامل دابا يدوز و أي حاجة عندها الحل.. اي مشكل عندو حل ..
سكينه: علاش فاش جيت قلت ليك خوك دار ودار ودار ماسمعتيش؟؟ علاش حنا شايطين على راسنا واش كيحساب ليك با شايطين عليه بناتو؟؟
غالي: شوفي انا راه ماعندي حتااا دخل فهادشي كوولوو.. ماشي سوقي وماباغيش ندخل فيه ومابغيتش كااع يحسبوني كاين ويفكو المشكل ديالهم رااسهم.. انا ما خطبت ما واعدت ما مشيت وخليت .. ختك تضلمات فعلا ماقلناش لا.. وهشام ماصدقش ودار لي دار ..انا شنو غندير ليهم ؟؟ نمشي نربيه؟؟ رأيي شنو غيزيدهم ..صافي الكلمة دالحق راني قلتها وماعندي فين نزيد.. جيت بين نسابي وبين با وخويا.. ومافيا لي يجي مع شي جهة فيهم وبغيت غير يبعدو مني ماعندي مندير بحريق الراس من بعد
سكينه: فالاول مادرتي حتى ردة فعل واخا جيت قلت ليك شنو كاين تسيفتي عليا
غالي: ماشي تسيفت عليك على هادشي رديت عليك بشي طريقة يمكن فشكل حيت كنت كنقرا وشاد مع داكشي اللي قدامي .. ها نتي دابا شفتي كثرة التحكار بزاف شوف فين وصلنا حنا .. ومالنا حنا ومال هادشي
سكينه: وراه ختييي.. ماشفتيهش ستافزني قبيلا راه بغيت نعضوووو
غالي: ماتبقايش تخلي بنادم يستافزك .. وختك خدات درس ماعندنا حنا باش نفيدوها، هانتي كااع فضحتيه وشوهتيه اش غيطرا؟؟ تشوه وسط باه ومو غتقطعي عليه الرضى! راه عائلتو وعارفينو زعما نتي عاد غتوريه ليهم
سكينه: ونتا عادي ماخلا ماقال فيك ما جاتكش النفس
غالي: هه !! اشمن نفس؟؟ كول واحد عندو فمو يقول بيه لي بغا ..الى جينا نشوفو اش كيتقال مور ضهرنا من واليدينا براسهم راه مصيبة.. صاافي قال ولا مقالش يضبر راسو واش غنبقا انا حاضي اش قال عليا .. بيني وبينو الاحترام وقدامي راه مكيهضرش كااع راه فاش كنوض معاه كيسكت وكيحشم ..شنو بغيتي كتر ؟
سكينه: انا بعدا منقدرش
غالي: تنهد) اييوا كل واحد وكي داير .. (ضرب على رجلها)واش صافي؟ سالينا هاد الموضوع؟
سكينه: وغدا غتمشي معاهم للخطوبة؟
غالي: مانعرف ..المهم باك راه قادوها معاه ..بقات ختك ومك انا بيدي ماعندي مندير ليهم بغيتي حتا دوز واحد الفترة عااد تقولي لباك راه خطب ولا متقوليش ليه كااع ماعندو علاش عرف اصلا.. دابا متبقاي تقولي ليا لا باك لا خوك … مزوجة بيا انا خليك مركزة غير معايا ..بغيتي تهضري مع عشام هضري بغيتي تسدي عليه سدي نتي حرة مع البشار المهم انا الله يعطيك الستر خليني نرتاح ماتجبدي ليا حتى واحد براكة هاد ليوماين ديال تبرزيط خليني دابا نعاود لميزاجوغ لراسي راني والله حتى ترونت
قنعها بكلامو وكان حوارهم طويل بزاف هضرو فشحال من موضوع حتى مابقا ليهم فين يزيدو .. ومن بعد هاد التخصيمة عاد تفكر ليها العضة والسبان وبقا كيشوف فيها ويدور راسو حتى فهمات راسها وقالت
سكينه: كنت معصبة .. صافي دابا بلا منهضرو يا قلتي نسدو هادشي كاامل
فهاد الاثناء كانت رانيا كتعيش اسوء لحضات فحياتها.. العذاب الاليم اللي مابعده عذاب.. عذاب كينهش النفس والصحة وفواحد اللحضة من دوك اللحضات الصادمة حسات بعقلها كان غيمشي ..لاكن ربي لطف وتبتها وعاونها على التبات ..كانت قدامها غير سجادتها اللي كتصلي عليها وكتبكي وتدعي لله حتى صبح الحال وكانت عيات ونشفات من الدموع وتهدات وبغات ترتاح وتنفس..وقبل متمشي تنعس جمعات سجادتها من بعد صلاة الفجر وقلبها عامر كره وحقد على هشام .. وكاع داك الحب تحول لحقد وكره شديد وبان ليها وجهه وعرفات راسها تخدعات وعطات وقت لواحد لي ميستاهلش.. وفعلا الانسان كيبان فالاوقات الصعبة.. شكون قال رانيا غضرب عليه فديك الليلة وتنزعو من قلبها بالقوة وترميه برا.. وفعلا خرجاتو فمرة من اعماق قلبها وقلعاتو من الاحشاء ولاحتو وواعدات راسها غادي تكمل حياتها وغادي تخرج من داك الضلام الدامس وداك الكآبة وغادي تحقق نجاح فحياتها لي يكون در عليه وعلى مو وعلى طاسيلتو كلها. كان وعد قاطع بينها وبين نفسها ومشات نعسات والصباح فاقت كأن شيئا لم يكن.. او بالاحرى كانت ليلة لجنازة رانيا.. كانت جنازة بكمل ما تحمل الكلمة من معنى .. من مشاعر من حزن من سداجة وشخصية صبحات رانيا كتكرهها.. دفنات ديك الشخصية فمرة وحدة وناضت فطرات معاهم على الطبلة واخا علامات السهر والتعب والاثار دالبكاء عل وجهها لاكن الداخل كان كيحكي قصة اخرى
صبحات سكينه الصباح كتلوى فبلاصتها..ماناضت ماشافوها وجات لغالي على قلبو نيت يوفي بوعدو .. خرج عندهم وهما واجدين باش يمشيو لهاد الخطبة المنحوسة وكيتسناو غير اسية توصل هي وولدها ومرتو من مكناس. اما هشام خرج مشا شرا الحلوى وشرا كل ما كيخص لهاد الخطبة وحطو فالسيارة وطلع عندهم لبس حوايجو وتقاد ووقف راشقة ليه قدام غالي لي كان كيهر مع باه وتفاجئء بالحوار
غالي : غير سيرو ابا صافي قلت ليك شنو كاين
عاوتاني وقف هشام بحال المصدوم مخرج عينيه بحال الى كيقول ليه كيفاش !!! مغتمشيش معااانا!! زعما راه مصذوم من شنو دار خوه كأنه كيقوليه جينا حتى لعندك وخوك باغي يخطب ومابغيتيش تمشي معاه وكبر الموضوع بديك الشوفة اللي بقا كيشوف كأنه ماوقع والو وداكشي لي كيدير فيه غالي كله غالط. لاكن الاخير ماعطاش اهتمام للانر وقال لي عندو والسبب ماكدبش فيه وباه بقا ساكت خدا الموضوع بعقلانية ومابغاش يكبر الموضوع كتر ويبقا يسول وخرج كيرضي عليه وغالي معاهم حتى وصلو لباب مشاو ورجع بحالو كيسوط مشا نيشان شعل شوفو وطل على سكينه فالبيت
غالي: غندخل ندوش دخلي؟؟
سكينه: بتعب) فين غندخل وكنموووت كنمووووت
غالي: وصافي هانا داخل
تجبد بإرهاق وماعطاش للوجع ديالها اهمية لاكن هي تزاد عليها الحال وبدات كتشوف النجوم وبانت فوجهها . ناضت كتموت مقوسة مشات تقيات فواحد طوالط ثناوية ورجعات كترحف وترعد للفراش تخشات تما وبدات كتعرق وتنين وتقلب من جهة لجهة وكتعض فالمخدة والدموع نازلين مع عينيها حتى حوالت
خرج من دوش لقاها مزالة فالفراش مكمدة وقال
غالي: انا غادي نجيب لفطور
مارداتش عليه وحساب ليه راه ناعسة وهبط للمخبزة لي تحت منو لقا اشهى المؤكولات.. رجع للدار وداز للمطبخ نيشان عمر لقهوى كما كيعجبو يعصرها راسو وحط دوك المملحات معمرين وبتي بيان والشكلاط واملو والعسل وهي حط ليها سطل ديال لفرماج باش كتفطر والبيض وبدا كيغني ويدندن وما عندها للبيت تلاح عليها كيضحك وعضها من ودنها
غالي: حبيبييي.. وانوضي راه غتبرذ القهوى
سكينه: برك ليا هنا برك
غالي: مالكي؟؟
سكينه: برك برك
تقلبات على جنبها تقول شاربة شي مخدر .. تحت عينيها منفوخ وعينيها مقلوبين وعرقانة كتنين وحناكها حومر تقول داخلاها الموت والمرض باين عليها. . تعجب وبقا كيبرك وهي كتعض فالمخدة وتجر حتى تهرس ليها الدفر ولاحتى بلا مبالات
غالي: واش كااع هاد الوجع من ليغيكل؟؟
سكينه: بألم) شووووو…-ششششششش متهضرش ششششش
بقا كيشوف ويبرك حتى شيرات ليه بيدها يحبس وطلعات عليها لغطا مابغاتش تفطر.. مشا فطر بوحدو وغطا داكشي خلاه بلاصتو ورجع لقاها ناعسة بحال الى راكعة وكتمايل وتنين ومغطية كلها حتى حاجة فيها مكتبان وقرب كيشوف فيها باستغراب
غالي: سكيناا؟؟ وااا سكيناا؟؟ وا سافا؟؟
سكينه: جيب فاش نتقيا
غالي: تقياي؟؟؟
شيرات ليه بيدها من تحت الغطا يمشي وما جاب ليها سطل حطو فالارض قدامها وعرات على راسها سخفانة تقلبات على داك السطل كتعصر وتقيا لمرار والخضورية والماء كيهبط من فمها بحال روبيني حتى شبعات تقيا . ويااريتها ماتقياتش يااارييت صبرات على ديك تقية ماخرجاتهاش.. معدتها من مور ديك تقية تقول تبرمجات بالوقت وبدات كطلع لفوق كل خمسة دقايق كتقلب وتنفخ وكتبدا ترد بزز منها واخا مافيها لي يرد لاكن اصمرت غلى ديك الحالة حتى بدا غالي كيتخلع من المنضر وبدات هي كتبكي من خر الردان والوجع وبغات غير تفك من تقيا وتقلباتها لدرجة فاش كتبدا تقيا كتقلب بحال شي تقشرية تقول جسمها الداخلي كامل غيتقلق على برا ..كيخرجو عينيها وكتزير وكيضرها راسها وكدير مجهود فداك تعصاو مضاعف وماعندها جهد حتى بدات كتسخف
غالي: نديك للطبيب …. واش نديك للطبيب؟؟
سكينة: عيط لماما
غالي: نعيط ليها تجي؟
سكينه: عيط عيط
ناض عيط لمها فتيليفون لقاها فالمدينة خرجات هي ورانيا وسميرة وكانو خارجين باش رانيا تبدل الجو شوية وماعندهم كي. يديرو يرجعو .. قطع ورجع عند سكينه جلس حدا رجليها كيبرك ليها على جنابها ويتسخر ليها وناض طلع على ركابيه فوق ناموسية وحيد داك لغطا عليها وبدا كيدير ليها شوية درياضة لرجليها وهي كتغوت وتقوليه فيا لمواس فركابيا.. لاكن مع لحركات السريعة لي بدا كيدير وكيمشي ليها رجليها فلهوا بدات كترتاح شوية وترخات وغمضات عينيها وبقا على نفس ريتم كيحرك ليها رجليها حتى سخف وغطاها وتكا حداها عليها وتوسد مؤخرتها ساد عينيه وفنفس الوقت كيدوز يدو على رجليها ويبرك ختى نعس
تسهطات سهطة وحدة تقول ماتت وجبدات عليها جبدة وحدة تقول عمرها مانعسات . واخد الراحة من بعد داك العذاب الاليم لا مثيل لها فالدنيا ..سبحان الله الانسان مكيعرف بنعمة الراحة حتى كيبرا من شي مرضة ولا يخرج من شي عذاب دوز عليه المحاين العضيمة، ثماما بحال وجع العادة الشهرية ومن لا يعرفه . الراحة لي كتجي فديك النعسة من بعد ساعات التعذيب ميعرف بطعمها غير المجربها.
فاقت من السهطة حمرا تقول كانت فالفران . طبعا فهي غطات راسها كامل وحتى و جهها غبراتو حتى مابقا كيبان ليها الراس من الرجلين. اما الشعر فزك بالعرق والصهد اللي صهدات . على سلامتها خرجات منها سالمة غانمة ورجعو عينيها بلاصتهم ورجع فيها الدم ورجعات حياة من جديد
ناضت عرقانة وطايبة وعينيها محلولين تحلف عليها ما كانت مريضة كتموت . طاقة جديدة وباغا تاكل وباغا تحرك وجاها واحد النشاط رهيب والوجع مشا تقول عمرو ماكان . ضرات فالدار مالقات حتى واحد ومشات للكوزينه كدور لقاتها السبعة دلعشية ! اوااه نعسات نهار كامل ! يعني السهرة لكم هاد ليلة ومغيجيهاش النعاس .
ضربات دورة فلكوزينة لقات واحد الطاجين فيه كفتة كويرات بمطيشة وحداه طبسيل دلفرثت صغير مغطي وهزاتو جلسات على الطبلة كلات حتى شبعات وناضت للدوش طرفات حالتها بقرف وميوعة لقات راسها متختخة دمايات وخرجو ليها فحوايجها واضطررت تحيد كولشي وطرف نصها بما سخون ومشات لبسات لبسات واحد لكولون مزير باش يجمع ليها جنابها ولبسات معاه تقاشر طالعين حتى للركبة ديال نايك ولاحت واحد تريكو بالقب وجياب ديال غالي سخون ونازل على مؤخرتها ومشات جلسات فواحد الركنة كتفرج فتلفازة وكتكتب مساجات لغالي فالواتساب
سكينه: جيب ليا ليكوش ديال دراري صغار اصغر نمرة
غالي: فقتي ؟ وا علا سلامتك
سكينه: الله يسلمك عنداك تنسا ليكوش
غالي: انا فلاصال حتى نكون جاي
سكينه: جيب معاك شي بكية دلويزة
غالي: اوك
لاحت تيليفون ويالاه بغات تكا رجعات هزاتو عيطات للمراكشية كتسول على شنو واقع فالمحل وموراها عيطات لمونيه كتسول على رانيا ولقات مونيه طايبة كتر من اي واحد اخر . شكات حتى بردات وقطعات .
بعد ساعتاين وهي متكية من حلقة حلقة فمسلسل تركي تحل الباب ودخل غالي هاز صاك السبور على كتفو والقب على راسو وفيدو صيكان لبلاصتيك
سكينه: هزات راسها)شنو فدوك لميكات؟
غالي: حطهم على الطبلة) والو غير نعناع… ها ليكوش ديالك (مدهم ليها) ماتخرايش فيهم راه غير صغار
سكينه: على باسل
غالي: وشنو بغيتي؟؟ تخراي فيهم؟ ميهزوش ليك خريتك
سكينه: على خرااا ععع
غالي: ها لويزة ..لوزي وعاودي راه تما خير الله
سكينه: صافي؟ هادشي؟
غالي: صغر عينو ) هاااا شنو جبت ليك
جبد صاك اخر من وسط الميكة فيه كارطونة وكيشوف فيها بنص كتفرنس
غالي: عجباااك الحال دابا
سكينه: خطفاتها )انشوف(حلاتها ) شوارماااا ناااري كنت مشهيااااها علمك لله
غالي: عشر ايام .. عرفتي جات مع لبوناني غيعجبااااك لحال
سكينه: بحماس) نااري غنطيير .. (طارت عليه عنقاتو) ناااري غنطييير .. غنمشيو فرنسا
غالي: وادابا لي شافك يقول عمرك مشيتي ليها
سكينه: لا راه المفاجأة لي شي حاااجة .. وسط هاد مكاين مايدار والشتا والسقيع طحتي عليا من السما وصدقنا غنشافرو وندوزو راس لعام تما !! راه ماشي غير. غنطير.. نسيت اصلا واش كاين شي راس لعام
طارت بالفرحة ومن الساعة لي قالها ليها وهي كتحلم وتخايل وعقلها غير مع فرنسا..اما فاش قاليها على ديزني لاند كملات الباهية وقلبات الاتجاه جهة ديزني لاند كتفرج فاليديوهات ومقابلاهم غير هما و وتوري فيل وشوارع فرنسا ومابقا عندها شغل لا مشغلة .
كان عيان ومسخسخ وبغا غير ياكل وينعس. وحتى هي من الفرحة تكاتو وجابت الزيت وبدات كتماصي ليه عنقو وكتافو وعينيها فتلفازة متبعة الرحلات والسفريات ديال فرنسا وعينيها خارجين كتسنا غير فوقاش تجي نوبتها حتى هي ودير لي مادارو حتى واحد
بقات هاكاك ليل كامل عينيها فتلفازة .. وحتى هوا داتو عينو ونعس حداها وزادت غطاتو وبقا هاكاك متحركش حتى تقلبو عينيها مع الفجر وهي سهرانة وتقلبات تخشات حداه ونعسات.
وخلات الطبلة قدامهم كما هي بكيسانها وكراطنها حتى صبح لحال وحضات بيه باسها فخدها ومشا
فاقت موراه حتى لطناش وحلات عينيها على الطبلة مباشرة .. شافت بلاطو زايد على داكشي دلبارح فيه رايب مسدود ولحرشة حداه فكاغيط وناضت مسخسخة وعنقها عوج بالنعاس هزات تيليفون وسبقات بغالي هوا الاول فالواتساب
سكينه: بب صافا؟
غالي: صافا بب ونتي؟
سكينه: سافا للحمد لله الدار صبحات مقلوبة
عيط لماما قوليها تعطيك النمرة ديال ديك المرى لي كتعرف وعيط ليها قوليها تجي تجمع هادشي
غالي: ماعندكش صولد؟
سكينه: عندي غير مافيا لي يعيط لماما غتبقا تنكر عليا .. راك عارف
غالي: اوك يالاه انا نعيط ليها .
حطات تيليفون ومشات للدوش طلقات الماء سخون كيغلي ويفور ميقدرش انسان عادي يدخل تحتو ومع ذلك دخلات وبدات كتشطح فالاول وتردح من بعد كمدات لحمها وولفات لما
خرجات حمرا من لحمام والفوطة على راسها ومكمشة فالبينوار عاد رجعات فيها الروح وضحكات ليها الحياة . مشات حلات الباب لقات المرى دلميناج فالباب وتبسمات ليها ورحبات بيها ودخلاتها
كليانه 2 : حتى انا حتى واحد ميبرد ليا الشقا قد يديا
سكينه: اختي يبرد ولا يجلس انا مافياش ومامسالياش اصلا
جاوها فالمحل وكليانات وماصلاحش ليها ترد عليهم كما ينبغي وسكتات خلاتهم كيهضرو وكان حوارهم كامل كيدور على شنو طيبو شنو وجدو وجري عليا نجري عليك حتى خرجو بحالهم وبقات غير سكينه والمراكشية جالسين متبعين ليهم لعين
المراكشية: زعما راني حادكة
سكينه: شو غير كي دايرة يا ربي السلامة .. واش هاديك هي انا!! شو حالتها مسكينه كي دايرة كيحساب ليها عاادي وصبعها ملوية عليه فاصمة
مراكشية: زعما داز فيا موس
سكينه: بطلة ههه ناري على بشار .. قالت لك مكيبقاش ليا الوقت حتى نحك راسي.. الدار نقية وراسها فيه القمل وطوابگها يدوخو مدينه بريحة الصنان ديال الشقا
المراكشية: هههه يخخخ
سكينه: دايزة على جلابة وصندالة وجايا كتجر زعما نقضي غراض ..مسكينه ماعندهاش الوقت دوش وتحيد موسطاشها وزغبها وتمشط شعرها .. عندها الوقت تسيق وتغسل ماعن وهي هانيا ماشي مشكل..ماشي شي حاجة راه نقية واخا ينوض فيها الدود ههه
مراكشية: عيفتيني يخخخ خلينا نشربو هاد كاس داتاي
سكينه: فيها واحد ريحة بحال الكافور ياربي سلامة موحال واش كتشم ريحتها ، كتعطي منها واحد الريحة فشكل..ويديها طايبين بجافيل صبعانها منفوخين ..تسلخ الجلدة وماتجيبش لي يعاونها الله يستر
مراكشية: واحد جارتنا كتقول لراجلها عطيني باش نجيب مرى دلميناج تخمل ليا وفاش كيعطيها مكتجيبهاش ومكتخملش وكتشد لفلوس وتسكت حتى مابقاش كيعطيها دابا واخا مرضات مابقاتش كتقدر توقف بالضهر وكتقوليه عطيني نجيب لي يعاوني كيقوليها ديري داكشي علاش قديتي
سكينه: واخا تبغي تجيبها بصح ميعتقهاش دابا
مراكشية: واييه.. حيت كانت كتفلا عليه كيحساب ليه غيلقا بصح الدار مخملة .. فاللخر مكتخمل ما والو كتشد لفلوس وتبقا تخسرهم غير فالماعن كل مرة شارية طبسيل فشكل
سكينه: فلحضة ادراك) فخبارك عمري شريت شي كاس ولا شفت جهة الماعن
مراكشية: انا كيسطيوني الماعن عرفتي شحال كنشري
سكينه: انا عاوتاني كيسطينوني الحوايج وهاد المرة عمرت واااحد الشاريو لغالي من واحد الموقع خلصو هوا كاامل
مراكشية: انا لا كنشري الماعن بزاف
سكينه: شنو كديري بيهم؟ كتلبسيهم؟
مراكشية:لا ههه كنحطهم وصافي كيعجبني نحطهم فوق الطبلة
مراكشية: ايوا صاافي تا نتي موجود لي يقابلو ..راه راجل كريمة الجبلية بغا يطلق المحل ديالو لي فالقيسارية طالب فيه سبعين الفريال ، جا الوسط
سكينه: هاداك هوا ثمن الكرا اصلا
مراكشية: واسيري دخلي عليه .
عمرها فكرات فشي مشروع ديال لحوايج او طاح فبالها وخصوصا فهاد الازمة لي كتمر منها والدار لي خصها تكمل خلاصها فاش يعيطو ليها وكتحمع الريال على خوه . لاكن بعد نقاش عميق وامثلة دازو قدامها ديال بنات كيبيعو ويشريو فكرات تشوف هاد المحل وتعرف التفاصيل واخا ماتكونش باغا تشدو لاكن حبها للمشاريع والفلوس دفعها تعرف ، ناضت هي والمراكشية مشاو لهاد القسارية اللي كانت معروفة وكلشي كيتقدا منها وفيها من كل نوع طرب ، ها الحوايج ها المكياج ها اللباس ها الماكلة المهم تقول سوق والكل كيمشي ليه . وبحكم معرفتها بهاد القسارية اللي فيها الرواج اكثر من اي مكان اخر فقالت علاش لا نعرف وصافي
وصلو للقسارية وداتها المراكشية عند راجل كريمة ، كريمة كانت بنت الحومة حتى هي وراجلها عسكري وفنفس الوقت فاتح محل داير فيه السوايع والنضاضر وكان المحل ديالو مقابل مع الدخلة اللي كتكون ديما عامرة . وقفات عليه كتسول وتستفسر لاكن هايهات ثم هيهات ماشي اي حاجة كنسمعوها كتجينا ساهلة فهي فالواقع ساهلة. لقات المحل فعلا بسبعين الف ريال للكرا لاكن باش يخويو ليها المحل وتشدو هي خاصها تحط واحد الخمسة دالمليون حلاوة للشخص اللي كاريه عاد يخرج ليها من تما وديك الساعة تعمرو هي وتشد بلاصتو .. وبما ان القيصارية عامرة ومابقاوش فيها المحلات للكراء وكلشي شاد فيها بيديه ورجليه وعليها اقبال كبير فكان صعيب باش تبيع وتشري تما الا اذا بغا شي واحد يخرج من المحل ويسلمو ليك وهادشي طبعا عندو ثمنو. بقات كتشاير وتناقش والمراكشية مصدومة فيها شافتها دخلات فالشطارة تقول غتكريه من غدا وكتزير مع مول المحل وشادة ليه فثلاتة دالمليون حلاوة لاكن هوا شد فثمنو وخرجات من تما متحمسة ودخلات ليها الفكرة للدماغ وعجبها الموقع و حتى المحل وشعلات فيها النار عاوتاني كما كتشعل فيها فاش كتبغي شي حاجة كتبدا طير وتزرب بلا متخمم . المهم هوا انها عاجبها وباغاها وباغا تخشا معاهم فالقسارية حتى هي وكان بالنسبة ليها حلم صغيب يتحقق خصوصا فاش كانت باغا محل وكتقلب دير فيه تنكاف ديالها ولقات انه المحل فالقسارية مستحيل حيت عليها العين والطلب والعرض اصلا مكاينش ولي دخل كيلسق مكيبغيش يخرج . زائد خايفة يبان شي واحد ويسبقها ليه حيت من السهل انه يبان كليان اخر ويعطي ما اكثر المهم يخويو ليه محل تما ويدخل يخدم لانه الرواج كاين واي مشروع تحل تما كيتمشا خصوصا البيع والشرا .
مشات كطير والمراكشية تابعاها كتجري وتعيط وسكينه العقل مشا ومابقاتش كتبت وزربانة باغا تشدو بأي وجه كان
مراكشية: اااجي بلاتي.. وا ش باغا بصح تشدي المحل
سكينه: على عجلة) اويلي عاد كتسوليني كن طلب ليا سبعة كن مشيت نموت ليه فيها ونجيبها واخا نحيدها من فلوس الدار .. واش بحال داك المحل كيضيعوه الناس اصاحبتي وانا مامتيقاش لقيتو باغي يخرج
مراكشية: منين غتجيبي ليه خمسة دلمليون؟
سكينه: غنضبر فيها واخا نبيع كلوتي سيري للحانوت نا غادية لدار سيري تا نجي
مشات كطير طلعات للدار بلا متحسب الدروج ودخلات كتجري لقات غالي يالاه حط لبيسي والكتوبا يقرا شوية ساعا بعتات عليه من السما كتنهج جايبة ليه لخبار سخونه ولسقات حداه كي لمسكة
سكينه: شنو دابا ؟؟ شنو بان ليك فهاد البلان ؟ والله ال واااعر
غالي: صبري راسك الله يسخر
سكينه: ندخلو فيه انا وياك؟؟
غالي: انا ماعندي باش ندخل معاك دابا بغيتي دخليني نتي الله يكتر خيرك
سكينه: باصرار) هاد المحل انا راه مغضيعوش واخا نعرف نهز كريدي من لبنكة
غالي: ريبة حرام
سكينه: سلفني خمسة دلمليون نعطيها ليه حلاوة يخوج يق٠٠٠د عليا من تما
سكينه: لا غير عطيني ولا يالاه معايا اصلا غتكون معايا نتا باش نقادو داكشي قانوني ميضحكش عليا
غالي: وباك قلتيها ليه؟
سكينه: اوييلي لا !! با مكيعرفش هادشي غيسبني اللهم خليني الى خسرت نكمدها ماساق ليا حتى واحد لخبار
غالي: ايوا الله يسخر
سكينه: سلفني خمسة دلمليون
غالي: فين هي خمسة دالمليون؟؟ ههه حساب ليك راه عندي لفلوس مطوية فالبنكة
سكينه: اوييلي ماعندكش؟؟
غالي: واش كتهضري بصح؟؟
سكينه: وفين كدير فلوسك؟؟
غالي: كناكلوها فين غنديرها(دار يدو على فمو مستغرب فيها) حساب ليك الماكلة فابور ولا؟
سكينه: اويلي الصالير كله كناكلوه ميمكنش!!
غالي: هادا هوا لي كاين كامل كيمشي فهاد تخربيق هادا.. ها شريليمن علي اكسبريس ها خرجني ها كل مرة جايبين ماكلة من برا مكطيبيش كااع فدار .. لويفي لابونمو زيد لكرا ثلاتالاف درهم كتمشي هاكاك غير فالكرا .. بلا جيب جيب جيب والشاريو كيعمر بسقاطة غير ديالك نتي فاش كنمشيو لمرجان .. نزيدك ؟ هاد الشهر جبنا ليك الشوفاج قلتي كنموت بالبرد .. زيد المازوط حتى هوا .. الماء. والضو منهضرش عليه كيبقا شاعل ليل كامل وتلفازة خدامة
سكينه: مكيشيط ليك والو؟؟
غالي: واخا يشيط كااع شحال كيشيط؟ خمسة دلمليون؟ هههه اوديي
سكينه: دابا شحال عندك قولي الصراحة
غالي: واحد خمسطاش الف درهم راها فلكونط بوحدها قلنا نديوها لفرنسا فهاد السفر ندورو بيها
سكينه: ايوا عرفتي شنو عطيها لي حتى نردها ليك
غالي: ياك جامعة لفلوس مزال مكملتي فلوس الدار؟
سكينه: لا كملت صافي غير مزال ماجامعة والو دابا واصلا غنحيد منهم هاديك لخمسة (هزات يديها ) اويا ماعندي مندير ماعندي حتى حل
غالي: وا نتي تعرفي
سكينه: صافي خلي ليا ديك خمسطاشالف درهم حتى ندير ونعطيها ليك.. اصلا غنردها فجوج عراسات ولا شهراين كااع غنخدم فيها نردها هيا وماحسن منها غير دابا شطبت كلشي باش نكمل ديك الدار تا هيا شحفاتني.. مابغاتش كاع تجمع
بيتات غالي كيخمم ويحسب ويقلب فتيليفون على معلومات لي متخليهش يطيح فالنصب . اما هي ضرباتها بنعسة حداه فوق واحد الفوتوي .
الصباح ناضت ركبات حداه زربانة هازةبزطامها ودايرة نضاضر مربعين كبار ولابسة كولون وتريكو رقيق ولايحة عليها كاي كحل كبير وحداء رياضي وهوا كان بكوستيم عوال من بعد يمشي للخدمة ، داها للبنكة خرجات خمسة دلمليون شدها غالي حسبها ليها ومشا معاها يريكل ليها امورها اما هي تابعها وساكتة لي قاليها ديريها كديرها معولة عليه فكلشي .
طلع وهبط معاها على داك المحل وكاليزا ليها الاوراق وداز ليها الساروت قانونيا وشدات وراقها عندها كضحك بوحدها ومشات جلسات فطموبيل حتى رجع غالي من بعد طلع حداها لقاها كتفرنس وتنهد بتعب
غالي: فرحانة
سكينه: لهلا يوريك قداش هههه
غالي: ايوا مبروك .. قاليك هاداك واش تشري منو ديك السلعة لي تما بالجملة بغا غير يتفك منها
غالي: راه هادشي فيه الفلووووس اسكينه واش كيحساب ليك غير اجي ودير مشروع ! المشاريع ساهلين
المحل ها هوا خوا ليها ،، ايوا فين فلوس السلعة وفين وفلوس الاصلاح وشنو غدير وكيفاش تبدا ومنين غتجيب لفلوس والى حصلات غطب في فلوس الدار كاملين. كمداتها وسكتات وناضت كتقلب على السلف ومنين تجيب لفلوس وبدا تسلف من سارة لي شاركة معاها التنكاف خدات منها واحد الف وخمس مية درهم وتسلفات من ليلى واحد الفين درهم وتسلفات من المراكشية حتى هي واحد الفين درهم ومشات هي وغالي فالويكاند لكازا كدور وتقلب وتسول على محلات الجملة فالاخير حطات كاع لي عندها فالبيجامات ورجعات بحالها لداك المحل فالقيسارية بليل هي وغالي وبداو يلسقو علاقات ديال بلاستيك فلحيوط وعلقات فيهم البيجامات كلهم ومشات سخفانة هي وياه للدار مع الفجر طاحو نعسو .فالصباح فاقت قبل منو نزلات حلات المحل ودوزات الجفاف وبقات كتشوف فيه وراضية بيه واخا مبهدل ومازوينش وما عامرش ومافيه لا مانكات لا زواق من غير صباغة عادية غوز ضربوها للحيط كامل فقط وزينها السقف لي كان بالجبص وليسبوط. وقفات كدور فيه وبدات تصوني على كاع لي كتعرف وكتصر عليهم باش يمشيو عندها للمحل حتى جابتهم وبدات بصحاباتها هما للولين لي كانو ناويين غير يشوفو
سكينه: كي جاكم ؟
فوز: كتسرح عينيها) مابيهش مهم فالبدية قضي حاجة وصافي..ولاكن الموقع زوين خطيير
سكينه: فوز هاكي قيسي هادي
فوز: شدات البيجامة) شنو هادي؟
سكينه: قيسيها غير قيسيها راه مرايا لور وريدو
مشات فوز كتقيس وشدات ليلى كتوريها لبيحامات حتى هي وبدات تجبدوتمد ليها
سكينه: شدي اصاحبتي شدي راجلك غيخمقوه هاد الالوان
ليلى: واناااري باغا تبيع ليا صحة
سكينه: اويييلي علاش نتوما متشريوش من عندي؟؟ نتوما لولين خاصكم تشريو مني اصاحبتي.. غنقص ليكم شي عشرة دراهم غير قيسو
ليلى: بقات غير كتشوف) زوينين الصراحة غير انا عندي يالاه شريت جوج بيجامات
سكينه: ماشي بحال هادو هادو راه اخر مكاين هه..قيسيها تانتي
ليلى: سكتي نتي مسولتكش غا سكتي..فوز هضري نتي كي جات
فوز: زوينه والله تا زوينة
سكينه: ماتقتيشبيا؟؟ نتي عارفة دوقي زعما كي داير
ليلى: صافي يالاه شحال هادي
سكينه: غير ثلت ميات درهم
ليلى: هاد بنت لق٠٠٠ هادي باغا تكزرنا قالتلك غير ثلت ميات درهم مسبقامنا حنا لولين
سكينه: وصافي دابا كتحكرووو بزاف انا نقص ليكم شوية
باعت ليهم البيجامات هما لولين بزز منهم ودازت لسارة والمراكشية حتى هما دات ليهم لبيجامات حتى لعندهم وبقات عليهم هادي زوينه هادي واعرة حتى شراوهم ورجعات للمحل جلسات كتصوني وتعلم الناس يمشيو عندها ولي حطات رجلها تما كتخرج هازة بيجامة من قوة ما كتشكر فيهم سكينه وتعاود وباغا تبيع كلشي فنهار وتعاود تجيب سلعة جديدة باش تقدر دور الحركة .
دوقها كان زوين وباعت الخير والبركة ومشات بحالها فلعشية جمعات فلوسها من المخل ودازت للدار عند غالي لي يالاه دخلات عندو بدا كيشد فيها
غالي: بنتي ليا مابعتي والو جيتي بكري
سكينه: اممم.. بااااعت النص فراسك
غالي: واسيييري شكون غيديها فشي بيجامات والقيسارية عامرة غير بيهم
سكينه: نتا لي سير اما انا جبت لكليان تا للمحل وكل وحدة شرات ليها وها لي شرات لبناتها ولي شرات لخوتها .. بقات عندي غير شي حاجة
غالي: ربع يديه) وشحال باش بعتيهم؟
سكينه: كل وحدة بشحال
غالي: شحال كااع؟ شحال دابا جمعتي؟
سكينه: دابا جمعت ثلاتالاف وسبع مية وخمسين ليوم
غالي: باستغراب)كي درتي ليها؟؟ شحال بعتي من بياسة بسلامة؟
سكينه: شي عشرة ولا طناش دبياساات
غالي: شارياهم ب تمانين درهم وبايعاههم بميتين وخمسين درهم؟؟؟
سكينه: هزات كتفها ومشات كتنفض) وشنو غندير راه مزييرة خصني نتفك راه كيسالوني ناس
غالي: بقا مصدوم ) اجي اجي
سكينه: عييت فيا جووع متهضرش معايا دابا
غالي: اجي لهنا اشمن متهضرش معايا.. اااجي
رجعات عمدو كتسوط وربعات يديها
سكينه: هاني
غالي: حرام هادشي لي درتي راه رابحة فيهم كتر من نص
سكينه: خليني نصبر راسي نتا مالك
غالي: عادي معندكش مشكل؟؟؟
سكينه: غير خليني حتى نفك حريرتي ونقاد الثمن دابا مزيرة
غالي: هز يدو) وا شغنقوليك.. نتي تعرفي
دخلات لكوزينه كتقلب على ماتاكل وطلات كتسول عليه
سكينه: تعشيتي؟؟
غالي: مزال
سكينه: شنو نديرو؟
غالي: ديري لي عجبك
سكينه: نديرو انا ؟!!!
غالي: وا غير ديري لي درتيها قابلين عليها
بقات كتشوف في حيرة ودور فعينيها ومشات كتقلب ودور فلكوزينه دايخة ولحسن حضها الدنيا نقية ومجموعه كتفتح النفس وعيشة كتجي نهار اه نهار لا كتجمع ليها وتمشي بحالها .
بدات كترون حتى قلبات لكوزينه ، اما غاليكان جالس كيقرا ما بيه ما عليه حتى تفكر واحد طابليط عندو فالبلاكار وناض كيقلب عليها وعلى الاوراقديالها ومارطونتها وجمعها وداها لسكينه للكوزينه كيوريها ليها
غالي: اجي ماتبيعيش ليا هادي؟
سكينه: شنو هاديك؟؟
غالي: طابليط كنت شريتها وما خدمتش كاع بيها
سكينه: عطيها ليا
غالي: شديري بيها؟؟ انا بغيتك تبعينيها. زعما
مسحات يديها ومشات عندو كتشوف كي دايرة
سكينه: وااعرة بشحال شريتيها؟
غالي: شي ربع ميات درهم برومو كديري سبع مية
سكينه: شحال باش بغيتي تبعيها؟
غالي: هز يدو ورجع لور تكا على حرف الباب كيشوف فيها
غالي: جيبي ليا غير باش شريتها براكة عليا.. بقات محطوطة تما من الاحسن بعيعا الا تبعات ليك
سكينه: صافي خليها حتى لغدا
جمعها وقادها وعطاها ليها ورجع يقرا بينما رونات واحد المقلة ماباين ليها الراس من رجلين وداتها ليه حطاتها كلاوها ساكتين ماعيبوها ماشكروها ومشاو ينعسو .
صبحات الصباح هازة الطابليط وغادية بيها كتفكر لمن تبيعها حتى جات فبالها سارة شريكتها ومشات شدات الطريق عندها ودخلات كتفرنس وتسلم
سكينه: فيين.. كاين شي خدمة
سارة: اوييلي اصاحبتي نشفات
سكينه: حتى حنا .. شوفي جبتليك واحد طابليط وااعرة جابها غالي من برا باش تخدمي بيها.. تجبديها قدام ناس وتحطيها يشوفوك كتحسبي فيها وكدا.. وخدامة بيها تباني كلاص
سكينه: تبااعت ولاكن انا خصني لي يقابل ليا ويبيع ويشري
مراكشية: ويكون تييقة (تنهدات) القضية نشفات كانت على الاقل كنبان كليانة ولا جوج وسط سيمانة دابا والو كيخليو حتى لويكاند ويتمو جايين يتخاطفو
سكينه: وا حيت البرد دابا شوفي شحال كنا كنخرجو فالصيف نخدمو وشحال ديال اللباسي كيخرجو .. كتقلااال الخدمة فالبرد راه سينورغمال ماشي غير حنا .. حتى ليلى هضرت معاها لقيتها كتشكي تل هيا وسارة نشيت الصباح عندها لقيتها مكمشة فواحد المونطو متكية
المراكشية: سارة تبارك داارت من داك المحل
سكينه: وا سلا هاديك ابنتي راه الاكتضاض عندهم تما خدامين شتا وصيف تبارك الله
مراكشية: وتيقة زعما سارة ؟
سكينه: انا كنتيق فيها بعدا وحتا الى خدات شي حاجة راه غيير شي حاجة قليلة المهم انا نصيبي كااين عمرها قالت ليا مكاين والو.. الحمد لله كل شهر كنشد حقي وكنحسبو داكشي بالستيلو والورقة وديما جايبين راس المال باش ندخلو سلعة جديدة وديما رابحة انا وهي رابحة ماشي مكاين والو فمرة
مراكشية: حيت اختي شفتها مزرزرة بالذهب تبااارك الله واحد الخاتم بعدا دايرة ضربك بيه تغيبي
سكينه: عطا الله تا نتي لي يشد اصلا مغطلقوش حيت كيدخل هاداك فلوس صحيحة ومعروف بسميتي انا كاشي كيعرف غير سكينه واخا زادت حداه فالبلاكة سميتها هههه طيراتني فاش لقيتها زايداها ولات سميتو قفطان سكينه عند سارة كتباتها تحتو
مراكشية: ايوا هانتي بدات من والو شوف فين وصلات
سكينه: شوفي انا معنديش ديك القضية ديال بديتي من زيرو خصك تبقاي فيه راه من لول كنت ضاربة حسابي عارفاه غدخل معايا وغتحمع فلوس وغتبغي تا هيا دير ديالها واي واحد كيبغي يزيد لقدام المهم هوا كلينا وشربنا وجمعنا منو وراه غادي خدام ولي كنشدو انا كتشدو هي غير انا كنحطهم فالدار وهي كتشري الذهب وترقع حياتها تا هيا بشوية بشوية وحنا غادين.. راه كتخدم ماشي زعما ناعسة راه كطيير تا هيا فالصيف مكتسافرش كتبقا من عرس لعرس وتقابل لكرا وتقابل العراسات واخا قبييحة كتسيف على البشار ولاكن فلداخل مزيانة
مراكشية: هي الصراحة صعيبة اختي كان كيحساب ليا سويسهلة
سكينه: كااانت درويشة دابا راه ضربك تلوحك دغيا كتسخط والبنات مكيجلسوش عندها فالمحل كيهربو ليها ..ولاكن لعرايس كيمشيو عندها ..واخا هاكاك عندها الكلمة واخا مصعورة، انا بعدا سارة كتعجبني قد لسانها قد دراعها
مراكشية: وانا ؟؟
سكينه: تا نتي بدراعك راه الناس كيشكروك وعزيزة عليا..كن ماكنتش مرتاحة معاك كوراه فرتكناها شحااال هادي… الله يسهل عليك تا نتي ديري مشروعك
مراكشية: انا اختي بغيت هي نتزوج داك ولد عمي ولد لحرام مابغاش كاع يجي كل مرة كيقوليا غنجي غنجي
سكينه: قلبي على اخرا قوليه سير تتت… انا غنمشي لدارنا نشوفهم راه قررت نقوليهم على المحل الجديد.. غنقولها ولي ليها ليها
دخلات لدارهم كدور فعينيها فالوقيتة لي كيكون فيها باها فالدار باش تخبرهم بالحانوت الجديد
سكتات فالاول حتى عيات فالاخير طرطقات ليهم الرمانة وقالت
سكينه: ايوا راني حليت واحد المحل فالقيسارية انا وغالي نجربو فيه البيع والشرا
تافت بناصر لي كان متكي وهبذ النضاضر شاف فيها
بناصر: اشنو؟؟
سكينه: حليت واحد المحل صغير انا وغالي نجربو فيه البيع والشرا
بناصر: رجع تكا كي كان) الله يكمل بلخير
سكينه: بتعجب) ما عجبكش الخبر ؟
بناصر: وا الله يكمل بلخيييير المهم ديرو شي طايلة
سكينه: بخفوت) اميين
سكتات وماعاودش سولها وحتى هي ماعاوداتش هضرات .. لاكن السكوت ماطالش وعيا ساكت شافها معاودات ما جيدات هضرة وناض كيبحث ويسول وهي كتجاوب بالعبار خايفة من شي قمعة وكضحك وتلطف الجو حتى جلسات مونية عاجبها الحال وقالت
مونيه: مزياان مزياان الله يسخر البيجامات كيتمشاو
سكينه: ااه ولاهيلا جربتهم دغيا تباعو
بناصر: كيرمش) دي معاك مك تقابل لك لحانوت غير حالسة جالسة عطيها واحد عشرين الف ريال وتجلس ليك تما
مونيه: الى كنتي غتعطيني بصح نمشي نقابلو (قالتها وكتفرنس حشمانه) شكون لي كره الفلوس
سكينه: صافي غدا سيري
بناصر: سيري تعلمي وخدمي براكة عليك من النعاس كيجيب غير المرض… خدمو خدمو راه الخدمة كطول لعمر
سكينه: فين رانيا؟؟
مونيه: فالبيت كتحفض
سكينه: انا غنمشي دابا حتى لغدا
مونيه: هاكي دي معاك لحريرة لغالي بلاتي
ناضت مونيه عمرات ليها واحد سوبيرا بلحريرة ورغايف معمرين ونزلات بحالها للدار .. جات تحل الباب بالساروت مابغاش الساروت يدور حيت سوارت غالي من لداخل ساد بيهم الباب وبدات كدق وتعاود حتى بغات تفرع الباب..عيات تصوني ودق وتصوني فتيليفون وضرب الباب تقول العسكر لي كيدقو وحتى رد مكاين .. عيات تحاول مع السراوت باش يدورو مابغاوش وعرفاتو سد الباب من لداخل وخلا سوارت معلقين فبلاصتهم ومابغاش ساروتها هي يدور وسخطات على الحالة وتعصبات و عيات دفع وضرب وتزدح فالباب ولاكن والو مع العلم كاين لداخل .. فالاول تعصبات وضنات يكون كيدوش وقالت نجلس نتسنا شوية ومن بعد رجعات كدق وزادت تعصبات اكثر وبدات تشك يكون سخف ولا دوخو الشوفو وطاح ولا وقعات ليه شي حاجة.. تخلعات وتزاد معاها الزايد وعيطات على باها جا كيجري عندها مخلوع وكيتأكد واش بصح كاين !! ميمكنش يكون لداخل وهما دارو حالة ومسمعهمش اذا كاينة شي حاجة واقعة مافيها شك .
تخلعو عليه وزدحو الباب وماخلار مادارو حتى جيران خرجو كيسولو اش واقع وجربو يحلو الباب بكاع انواع السوارت الميكانيكية
مابغاتش الباب تتحل فالاخير طلع سيكيريتي هاز لامون باش يفرعو الباب وكل واحد كيلغي بلغاه والخوف والهلع راكب سكينه وباها وعندهم عقدة من الشوفو خايفين يكون طاح بالغاز . يالاه ديمار لامون بالجهد وهوا يتحل الباب من لداخل قبل مايقيسو لامون وخرج غالي كيحل عينيه بزز ويشوف فيهم مصدوم لقاهم مجموعين عند الباب بالجيران والمعدات وكلشي وسكينه صفرا وباها مخلوع حداها كيشوفو فيه حتى هما مصدومين وكيطلعو ويهبطو باش يعرفو مالو من حالتو بان ليهم بلي كان غير ناعس ومزال دايخ وكيتبسم وفنفس الوقت منفاجئ من دوك العرام لث لقا فالباب ومافاهم والو ، دغيا تفرقو الناس ودخلات هي وباها هازة السوبيرة والرغايففطبسيل مغطي وكتشوفيه بنص عين بغات ضربو بديك سوبيرا ومالقات كي دير قدام باها من غير تسكت وتحها على الطبلة وقالت والنفس مرعودة بالغدايد فحلقها
بناصر: لالا راني كنت مشغول خليت شي وراق ديالي عبى الطبلة وجيت المهم هانا نشيت تصبحو عىلى خير
خرج بناصر باش ميحضرش للنكير ويتحط فشي موقفغير محترم وزاد مع الطريق وخلاهم يتناقرو . مع خرج وسد الباب ضارت عندو سكينه مخرجة عينيها وهزات سوبيرا وقالت معصبة
سكينه: والله كن ما با اللي دخل معايا كن خويت هاد الحريرة على راسك قدام دوك الجيران
غالي: ههه والله ماسمعت شي حاجة
سكينه: الشروووهة!!! اوييلي نتا الوحيد لي مغينوض يوم القيامة .. تشعل لعافية ولا يدخلو الشفارة ولا يضرب الزلزال نتا اصلا مييت
جلس كيمسح على راسو وكان فعلا نعاسو تقيل بزاف وكيغلب عليه وحتى سكينه لاحضات فيه هادشي من نهار تزوجات بيه كينعس وكتبقا هي كتجمع فتيليفون حدا راسو الليل كامل ولا طلق الموسيقى فالبيت ولا تشعل تلفازة ولا تنوض للصندوق ديالها تقدا تفصل وتصمم صفحات جداد من داكشي لي كدير وكيعجبها وكتبقا سهرانة بوحدها غادية جاية واحيانا كتنوض دير عرض الازياء والمكياج فنصاص الليل والضو مصعصع وهوا مكاينش فداك العالم وناعس وسط روينتها تقول شارب البنج .
حطو العشا كيتعشاو وكل شوية يشوف فيها بنص عين وهي مخنزرة قدامها وكيضحك
سكينه: كضحك… حثت ماشي نتا لي تشنايريزيساتش
طارت ليها الماكلة من فمها ومابقاتش مفهومة هضرتها وهوا كيضحك حتى سخف ويلعات ماكلتها وقالت كتمسح فمها وتمسح الطبلة
سكينة: نشرتيني ساعة ونص وانا برا والبررررد قلت صافي هادا وقعات ليه شي حاجة ، واش درتي لكيت ؟؟
غالي: كنت دايرو ولاكن فاش نعست طاح من ودني
سكينه: بزاااف والله حتى بزااف!!! عرفتي شحال ضربنا فالباب حتى بغينا نقلعوها !!!! وا ما سمعتي حتا حاااجة ؟؟؟! ميمكنش!!
سكينه: مقابل مع الباب وماسمعتي والو!!! هيييه!!!!(تيليفونها كيصوني) ماما(فتخات الخط) الو ماما
مونية: لاباس كلشي بيخير ؟؟ ياك مكاين باس؟
سكينه: لالا والو مكاين والو
مونيه: ماب غالي واش ياكما كان طاح ليه طونسيو
سكينه: شافت فيه بنص عين) لالا غير كان داير لكاسك والصوت مجهد وناعس مسمعناش
مونيه: ااه يوا على سلامة بعدا ..سلمي عليه تصبحو هلى خير
سكينه: مباغ تصبحي على خير
قطعات وشافت فيه كتسوط
سكينه: حتى واحد مادخل ليه لدماغو كنتي غير ناعس.. با يقوليا زيدي ابنتي بحالك زيدي عولتا عليه بكري يشد الشفار!! الشفار يهرب بيا وانا كنغرت حداك ونتا نيبا لا
غالي: خبا الضحك بالجدية) راه كنت فلاصال تسخست ودوشت طحت سخفان
سكينه: وااابلااااش من لاصال الى كنتي غتجي منو وطيح كاو ويجي الشفار يجبد ليا انا كلاوييا حدا راسك ونتا ناعس.. غا بلاش منو مغيزيدنا حتى حاجة
هبط راسو كيضحك حتى مابقاش قادر يهضر وبقات هي كتنكر حتى عيات فاللخر تكمشات لور بغا تشد بلاصتو ويالاه بغات تكا تلاح مور ضهرا سبقها وقال كيجر الكاشة
غالي: بلاصتي
سكينه: ناضت ) والله لا نعستي فيها
غالي: كيجر) بلاصتي انا كنت ناعس فيها كيفاش والله نعستي فيها
سكينه: حييد انا لي كنعس هنا راها بلاصتك لهيه
غالي: لااااا انا لي سبقت ليوم مكاينش بلاصتي وبلاصتك دابا انا لي سبقت
بقاو مني منك مدابزين على ديك البلاصة لي جات مركز زوين قدام تلفازة نيشان وسخونة وبقاو كيتجارو فالاخير تخشار بجوج تكمشو فالكاشة وهوا موراها كيحيد الشعر من فمو وهي كتجر شعرها وتنكر
سكينه: نتفيتني راه كتكا ليا على شعري
غالي: جمعيه دخل ليا ففمي
سكينه: غير بشوية
غالي: هبطي راسك مكتبانش ليا تلفازة
يالاه بدا لفيلم مور لكتابة بدا كيشخر ليها فودنيها برزطها وبدات كتنخزو وتحركو كل شوية فاللخر ناضت قادات ليه المخدة وهوا غايب وناضت جاها الحماس عاوتاني ديال لليل وتوكضات وعاد بدا كيبان ليها البلان فالمكياج . جبدات كلشي حطاتو فوق الطبلة وشعلات اليوتوب وبدات كتبع معاه وتماكي وتجرب فراسها وناضت جبدات اغراضها كلهم على الطبلة وبدات كتلعب فشعرها وهي مربعة والشوفاج حداه قزيبتها شاعل حتى جاها الصهد وحيدات تريكو وجلسات بديباردور وبدات كتصور كل مرة بلوك وكل مرة بتسريحة وكل شوية تجرب شي مشطة فشعرها ومكياج على وجهها .. شافت راسها ملات من القصة على عينيها وطلع ليها راسها فراسها وققرات متقطعهاش هاد المرة وتخليها طوال وترجع لور ..شوية بدا كيبان ليها دير ليميش لشعرها وبدات كتقلب على البنات الزعرات وكتصور بسناب شات وتجرب الالوان على شعرها وكل مرة طيح عليها فكرة حتى تحرك غالي من بلاصتو وراها وهز راسو حالين عينيه شافها قدامو مدورة بيها الماطيريال ومزوقة تقول ماشي هي . شاف ورجع تقلب نعس عرفاتو مادا ماجاب وياما حل عينيه لقا ماكفس وعمرو سولها ولا بقا عاقل. وحتى فاش كتسولو الصباح كتلقاه ما شاد والو.
غالي: هانا خديت ليك ميتين درهم صافي؟ مافيا لي يدوز للبانكة تا لعشية
خرجات يدها من تحت المانطة كتشير ليه يمشي يبعد منها وشدها باسها وقال كيأكد
غالي: صافي؟؟ هانا خديتها..يالاه جوتيك
صبح الحال وصبحات كتغسل وجهها وتجمع روينتها ومادات ماجابت فالفلوس واش نقصات ولا منقصاتش .. لبسات خوايجها ومشات دازت على مها وداتها للحانوت وراتها كيفاش تبيع وبشحال وخلاتها تما ومشات تشوف شغالها، كان عندها بزاف مايدار ومابقاتش كتحك راسها ووقتها عمر وخصها تاخد شوية من الحاجة باش تقدر تنحز كل المهام، كان عندها موعد مع الخياط ودات ليه شي تكاشط باش تبدا توجد دفعة جديدة لي تخرج فالربيع وجلسات كتحفي دماغها مع التصميم وتعصر باش تهرج بشي كوليكشن زوينة وجديدة تخدم بيها فالمحل ديالها وفالمحل لي مشاركة هي وسارة ولي كان فال الخير على سارة ودارت منو الزرع والزريعة حتى هي، شرات طوينيبيلة صغيرة ودارت الذهب التقيل ومشات سافرات لتركيا ورجعات حتى هي همة وشان وعندها الثقة فالنفس وشربات الحرفة ورجعات كتخلي البنات فالمحل وتبع الخياطات والطرازات حتى هي.. مشات سارة الدريويشة الحشومية وجات بلاصتها سارة لي حكها الزمان والحرفة ناضية وماضية فين تبان سكينه، على الاقل سكينه كتراعي ومكتبغيش تخصر مع لكليان اما سارة كلمة جوج تجري عليهم ومدوزة على البنات لي عندها دكاكة وكاع النكافات لي كيخدمو معاها كيخافو منها ولحد الساعة مزال مافاهمينش كيفاش كتفاهم مع سكينه!! سكينه فالشرق وسارة فالغرب!! سارة بلدية وگارحة بحال شي عونية ولا شيخة اما سكينه كتبان كيوت من لبعيد وخاطيها المرايشات والمضاربات وتاشلواطيت. كيفاش هاد جوج تفاهمو لعجب!! وكيفاش سارة كتهز الكلمة لسكينه وكيفا سكينه صابرة على سارة وكَروحيتها .
نهار كامل مكاين غير جري عليا نجري عليك في حين مونية فالحانوت جااالسة كتبيع وتشري مع لكليان وعندها واحد الخاطر لي ماعند حتى واحد وبانت شخصيتها المخبية.. مونية لي تقول كابرة فشي عائلة هاي كلاس واخا مكتعرفش تلبس ولاكن كتعرف تهضر ومصوابة وكضحك مع كولشي وكتبيع غير بطيبة قلبها ولسانها لحلو والخاطر والثمن لي عطاتها سكينه متنزلش عليه هوا لي باعت بيه
ضربات لخمسة دلعشية وبناصر هاهوا راجع من الخدمة مكرفط وداز على لقيسارية لي حداهم يشوف هاد المحل لي كراو كي داير وبقا كيدور ويتسارا بلا ميعلمهم حتى لقاه ولقا مونية لداخل بالجلابة كطوي لحوايج وتردهم بلاصتهم ردخل كيسرح عينيه
بناصر: سلام عليكم.. لاباس
مونية: باست ليه يدو) لاباس لحمد لله
دخل كيسرح عينيه ويحرك راسو وقال
بناصر: مزيان مزيان.. مابيهش واخا صغير
مونية: هااء!! راه غير قيسارية هادي كلشي فيها صغير
بناصر: كيلقي نضرة) وكاين شي رواج رلا والو
مونيه: كتبسم)لالا كاين كاين الحمد لله راه مابقا عندها هنا والو ها شنو بقا غير هادشي
سكينه: لق٠٠٠وي على عينيك قالك كاينه انا غنمشي انا وياك
غالي: صافي سكتي باغي نعس (بعد صمت) لسانك شحاللل…
عقدات حواجبها مارداتش عليه وهزات تيليفون حطاتو فوق مؤخرتو دارت اليوتوب كتفرج وجالسة كتمسد وتعاود حتى بدا كيشخر وعفا عليها الله ناضت غطاتو وطاحت كاو حداه فوق الفوطوي تغطاا بالكاشة ونعسات لاول مرة فحياتها مع لحداش
غالي حسبها غيرة لاكن فالحقيقة مكانتش غيرة.. او مكانتش مدركة لشنو كيوقع فداك السن وبداك العقل لي كان عندها والثقة الزايدة فراسها بزاف ، مكانتش كتفكر بزاف او تلاحظ او تغير ! كان كتشوف راسها غير هي لي كاينة ومن المستحيل غالي يشوف بنضرة اعجاب لشي وخدة غيرها وهادشي خلاها ترتاح وتعيش بلا حس الغيرة وكانت كتلقا مبرر صادق لكل افعاله بالرغم من انه مكانش كيدير شي تصرفات صبيانية وكان بعقلو كيعرف اش كيدير عكسها هي.. كان كيغير لاكن فالحقيقة عمرو عبر ليها او خلاها تحس،، وكان كيشك ويبحث وراها لاكن عمرها لاحضات شي حاجة او حسات بيه مراقبها واخا مكانش بنيتو يسيء فيها الضن لاكن حسب معرفتو بيها كيقول ربما تغلط ومزالة طايشة ومزالة مامستوعباش انها تزوجات وخصها تحدف شحال من حاجة من حياتها كانت كديرها، كان متأكد انها متقدرش تخون خيانة مقصودة لاكن عندو تخوف طيح فشي فخ او تمشي فالهاوية ويتضحك عليها وتخرب حياتها بيدها . هي حانت كتشوف تيقتو فيها عمياء.. بحكم الحرية المطلقة لي كان مخلي ليها،، تخرج ودور وتمشي فين بغات من غير دخول لديور الناس واخا يكونو صحاباتها كان شرطو الوحيد باش يرتاح فدماغو وكان كيأكد عليه فكل مرة سمعها كتعاود على صحاباتها وشنو دارو وفين مشاو. لاكن واخا كانت عايشة الحرية ومكانتش حاسة بمسؤولية الزواج بثاثا والفرق اللي وقع فحياتها زاد بيها للافضل. رتاحت نفسيتها وسكنات بوحدها وكدير لي بغات وكتسهر كما بغات وكما كان كيعجبها وحتى واحد مكينكر عليها.. كان النكير منعادم عندهم فالدار وكان همو الوحيد متعطلش بليل ودخل فالوقت وتفوت عليها ديور الناس وتلبس محتارم ولو غير شوية. مسألة اللباس رتاح من جهتها بحكم دخلو فالشتا وكتلبس حوايج غلاض عليها لاكن التعطال بليل كان كيخلق ليهم مشاكيل بعد المرات .
بدون علمها كان لعب بتيليفونها ودماغها شوية باش تفهم والو وهاكا يبقاو الرسائل كلها اللي كيوصلو ليها والمكالمات كلها كتوصل ليه حتى هوا فتيليفونو وكان كيتجسس عليها وعمرها لاحضات هادشي ولو غير شوية، وحسب خبرتها فتيكنولووجية قليلة كان كيدوز عليها شحال من حاجة بلا متحس ولا تفهم بحال مو اللي بلوكاها ليها من لفايس ديالها باش متكونش تحت المراقبة دمو وهي عزيز عليها تنشر تصاورها وتبان فالفايسبوك .. بلوكا بزاف من عائلتو هاكا يتهنا من رياحهم حتى هما وكان من لحين للاخر كيراقب تيليفونها وحساباتها كلها بلا ميخليها تشك ولو صفر ، واحد فالمية. وهادشي خلاها ترتاح وتعيش وتصرف باريحية وكتشوف تقتو فيها عميا وعمرو واجهها او بين ليها انها تحت المراقبة واخة واخدة حريتها فالتصرف.
حياة ثانية الجزء السابع
محتوى القصة
سكينه: اري داك تيليفون وخرجات مشات رجعات للدار ودفعات الباب لقات غالي فالمطبخ وهشام جالس وسط الدار والسكات ..دازت قدامو ودارت براسها انها جايا تنتاقم منو ت حتى دخلو الشك وبقا كيدور فعينيه ويتفتف وناض مشا للصالون فين حاطين صياكانهم وجلس حداهم . اما هي مشات للبيت نيشان خلات غالي كيشوف فيها بنص عين وزدحات الباب تى كان غيطير ورجعات حلاتو باش تسمع حيت كانت عارفة هشام غيهضر
هشام: بينو وبين غالي فباب المطبخ ) كتخليها تزدح عليك البيبان …
قبل ميكمل ضار عندو غااي معصب
غالي: سيري عطيني تيساع اهشام وماشي شغلك دخل سوق راسك …
شدات لبيت ماخرجاتش منو لعشية كلها .. الفقصة خلاتها تعاود اش طرا لفوز و ليلى على الله تبرد يوريوها اش دير لاكن حتى هنما من شدة الصدمة ماعرفو ما يقولو من غير وصاوها ماتعاود لرانيا حتى حتى وماتعطيها والو فهاد الساعة من اجل سلامتها الصحية حتى ترتاح وتكون مستاعدة تستقبلشي صدمة اخرى او خيبة امل، وداكشي لي كان نيت تراجعات على قرارها حتى دوز هاد المحنة واحتافضات بتسجيلات الصوتية فتيليفونها وبقات مكمشة فالبيت حتى ضربات العشرة ودخل غالي هاز خنافرو فيدو بيتزا وكانيطا دلموناضة حطها فوق الطبلة وخرج سد لباب.. اما هي صبرات حتى عيات على ديك البيتزا وريحتها اللي كتوصل حتى لعندها وناضت فالاخير عندها حلاتها وجلسات عليها كتاكل حتى وصلها مسج من عند مونيه فالواتساب تلهات فيه على اخر قطعة بقات من ديك البيتزا
مونيه: سيفطي ليا نشوف اش داكشي بغيتي تورينا
سكينه: واخا
مونيه: يالاه دغيا
بدات كتسيفط ليها حتى كملات جميع التسجيلات الصوتيه وانتبهت لطريقة الكتابه تبدلات وشكات انها رانيا حيت مونيه كتابتها مختالفة
سكينه: ماشي ماما
مونيه: ههه رانيا .. ولاكن مزياان انا كنت محتاجة نسمع هادشي.. واخا غيضرني ولاكن خصني نسمعو
سكينه: مخلوعة) شوفي راه هوا من الاول هاكا بلاااا متصدمي راه غير مكنتيش عارفاه اش كيسوا
رانيا: انا لي حمارة .. انا اللي عقلي كان غايب وهادشي حل ليا عيني .. هاكي شوفي شنو كان كيقول فيك وفغالي وفباه وعائلتو .. غنفضحو سيفطي لغالي هادشي هوا وباه يعرفوه اش كان كيقول عليهم فاش كان كيتحمس ولا فاش كان. كيجييشكي عليا .
سكينه: حلفي!!! سيفطي سيفطي
رانيا: غير بلاتي هانا طالعة كنحمع ليك
سكينه: اري نشوف دغيا
سيفطات ليها رانيا جرائد ديال المحادثات والتسجيلات الصوتيه حتى تكهمات ومن الصدمة بقات حالة فمها وحضر شيطانها ومقاليها راسها غير نوضي حلي كروب فالواتساب بنمرة اخرى وجمعي فيه غالي وهشام وباه واي واحد عندك نمرتو فديك العائلة وبداي تحطي ليهم الضواسا ميعرفو منين جاو وشكون جمعهم وها الفرصة جات بين يديك بردي قلبك كي بغيتي
فديك الليلة فتحات كونط فالواتساب وحطات فيه النوامر لي كتعرف كلهم وبدات كتلوح فالاودويوات والرسائل بحقد وكراهية حتى فجأة تحل عليها الباب ودرم عليها غالي مخرج عينيه مد يدو نيشان ليها وقال بخفوت وعصبية
غالي: اري داك تيليفون
سكينه: اشمن تيليفون؟؟
غالي: اري تيليفون
حيد ليها تيليفون من يدها ووقفات ربعات يديها كتشوف فيه وتشطح برجلها وهوا كيحرك راسو وكل مرة يهز عينو فيها . مسح داك لكروب ولاح تيليفون فوق نموسية وقال بتحدير
غالي: جمعي راسك .. هاودني منك
بغا يمشي لاكن قطعات طريقو وقالت باستفزاز
سكينه: ويلا ماجمعتش راسي ؟؟ ااش غديركااع؟
غالي: راني هضرت .. دنوبك على راس
سكينه: مغنمعش راسي يالاه شنو غدير
غالي: غتجمعي حوايجك وترجعي لداركم
رجعاتلو كتشوف فيه متوقعاتش يقول ليها ديك لكلمة ومن الصدمة بقات كضحك وقالت
سكينه: دااابا نييت
خرج خلاها فالبيت كتهز وتحط معصبة وكتحلف عليه حت هوا وتردد
سكينه: هااي هااي هااي على جمعي حوايجك ..واخا الكيدار دابا نوريك جمعي حوايجك .. انا لي عاطياك وقت وقيمة اما انا نجيبك سيدك
مافقصهاش لخروج من الدار او فكرة الطلاق قد ما فقصها الرجوع عند بناصر والدار لي معولة عليها مزال ماوجدات ومافيها لي يمشي لدارهم ويجلس يسمع هضرتهم وكارهة الجو ديالهم وماقادراتش تخيل راسها حتى بايتة فبلاصتها كما كانت ..ديك البلاصة المشؤومة لي فين ما تنعس فيها تبول !! علاش الله واعلم .. بلا متهضر على الصباح كي كيدوز ولعشية حتى هي كي كدوز. وحتى قالت تهنات من. ديك الحياة دلويل والنكير ولحسابات وشي حاضي وشي حاط على شي والصدع كينوض على ملعقة
جمعات ديك الشنطة وبقات واقفة قدامها مغددة وادك تيليفون كتصوني على ليلى
سكينه: ليلى ..صافا؟؟ منين اختي انا صافي جمعتي حزاقي وغنخرج من هنا مابغيتش نمشي لدارنا ..واش نجي عندك؟… الى ماجيتش عندك غنمشي للحانوت اما دارنا منمشيش ليها… صافي واخا انا نتسناكم تجيو غنمشي دابا للحانوت نجلس تما تا تجي عندي.. يالاه بسلامة
قطعات ولاحت عليها كتبيتوش ديالها وحلات الباب جارة باليزتها
تسمعو روايض الباليزة فالارض وكان باه فالصالة ناعس وخوه متكي على واحد سداري شاد تيليفون ، اما هوا كان جالس فالطرف ديال واحد الفوطوي بوحدو محني على تيليفون وغير سمعها جارة شنطتها ناض مشا عندها قبل متوصل عندهم خدا الشنطة ردها للبيت وقال
غالي: اجي نهضر معاك
سكينه: نترات يدها ) بعد مني
غالي: جرها كيهضر بخفوت ) غير اجيي اجي
لطف الهضرة وكانت فصوتو نخصة كطلع حصات بيه مقصح بزاف وكانت باينة عينيه ، بقات كتشوف فيه بغيض ويالاه دخلات للبيت سد لباب وعنقها بقوة لاكن دفعاتو بلا قلب وقالت مهرجة عينيها
سكينه: بعد مني.. انا اصلا حنت غادية فحالي بلا متقولها ليا
غالي: بتعب وترجي) صافي انا كنسحب هضرتي.. صافي
كان باغيها تبقا وتفهمو بلا ميهضر .. او بالاحرى مكانش الا عارف يهضر ولا يعبر لاكن كان كيشوف فيها بنضرات حزينه باش تحس بلا متفهم المهم يوصل ليها احساسو .. حسات بيه ندم وقال ديك الكلمة فلحضة غضب او يمكن قالها باش يردعها حتى صدقات بصح.. قصحات راسها وعجبها الحال تشوفو هاكاك كيترجاها بعينيه وكانت باغاه يرغبها لاكن التعبير ماعندوش ..عاود عنقها وباسها فراسها ويديها ومسح على راسها بحال شي بنت صغيرة وتبسم
غالي: صافي؟؟
بقات كتشوف فيه بنص عين حشمات تزيد فتعفارها وبقات واقفة مع الحيط وهوا كيطبطب على ضهرها
غالي: اجي اجي…اجي نجلسو ونهضرو
جلس على طرف الناموسية كيتنهد بتعب وجلسات مربعة يديها حداه كتسمع ليه كيهضر بطريقة الاباب والاجداد وكأنه كيهضر مع شي ولدو ولا بنتو او شي شخص قريب ليه وعزيز عليه ..كان فهضرتو احترام كبير حسات براسها عندها قيمة
غالي: هادشي كاامل دابا يدوز و أي حاجة عندها الحل.. اي مشكل عندو حل ..
سكينه: علاش فاش جيت قلت ليك خوك دار ودار ودار ماسمعتيش؟؟ علاش حنا شايطين على راسنا واش كيحساب ليك با شايطين عليه بناتو؟؟
غالي: شوفي انا راه ماعندي حتااا دخل فهادشي كوولوو.. ماشي سوقي وماباغيش ندخل فيه ومابغيتش كااع يحسبوني كاين ويفكو المشكل ديالهم رااسهم.. انا ما خطبت ما واعدت ما مشيت وخليت .. ختك تضلمات فعلا ماقلناش لا.. وهشام ماصدقش ودار لي دار ..انا شنو غندير ليهم ؟؟ نمشي نربيه؟؟ رأيي شنو غيزيدهم ..صافي الكلمة دالحق راني قلتها وماعندي فين نزيد.. جيت بين نسابي وبين با وخويا.. ومافيا لي يجي مع شي جهة فيهم وبغيت غير يبعدو مني ماعندي مندير بحريق الراس من بعد
سكينه: فالاول مادرتي حتى ردة فعل واخا جيت قلت ليك شنو كاين تسيفتي عليا
غالي: ماشي تسيفت عليك على هادشي رديت عليك بشي طريقة يمكن فشكل حيت كنت كنقرا وشاد مع داكشي اللي قدامي .. ها نتي دابا شفتي كثرة التحكار بزاف شوف فين وصلنا حنا .. ومالنا حنا ومال هادشي
سكينه: وراه ختييي.. ماشفتيهش ستافزني قبيلا راه بغيت نعضوووو
غالي: ماتبقايش تخلي بنادم يستافزك .. وختك خدات درس ماعندنا حنا باش نفيدوها، هانتي كااع فضحتيه وشوهتيه اش غيطرا؟؟ تشوه وسط باه ومو غتقطعي عليه الرضى! راه عائلتو وعارفينو زعما نتي عاد غتوريه ليهم
سكينه: ونتا عادي ماخلا ماقال فيك ما جاتكش النفس
غالي: هه !! اشمن نفس؟؟ كول واحد عندو فمو يقول بيه لي بغا ..الى جينا نشوفو اش كيتقال مور ضهرنا من واليدينا براسهم راه مصيبة.. صاافي قال ولا مقالش يضبر راسو واش غنبقا انا حاضي اش قال عليا .. بيني وبينو الاحترام وقدامي راه مكيهضرش كااع راه فاش كنوض معاه كيسكت وكيحشم ..شنو بغيتي كتر ؟
سكينه: انا بعدا منقدرش
غالي: تنهد) اييوا كل واحد وكي داير .. (ضرب على رجلها)واش صافي؟ سالينا هاد الموضوع؟
سكينه: وغدا غتمشي معاهم للخطوبة؟
غالي: مانعرف ..المهم باك راه قادوها معاه ..بقات ختك ومك انا بيدي ماعندي مندير ليهم بغيتي حتا دوز واحد الفترة عااد تقولي لباك راه خطب ولا متقوليش ليه كااع ماعندو علاش عرف اصلا.. دابا متبقاي تقولي ليا لا باك لا خوك … مزوجة بيا انا خليك مركزة غير معايا ..بغيتي تهضري مع عشام هضري بغيتي تسدي عليه سدي نتي حرة مع البشار المهم انا الله يعطيك الستر خليني نرتاح ماتجبدي ليا حتى واحد براكة هاد ليوماين ديال تبرزيط خليني دابا نعاود لميزاجوغ لراسي راني والله حتى ترونت
قنعها بكلامو وكان حوارهم طويل بزاف هضرو فشحال من موضوع حتى مابقا ليهم فين يزيدو .. ومن بعد هاد التخصيمة عاد تفكر ليها العضة والسبان وبقا كيشوف فيها ويدور راسو حتى فهمات راسها وقالت
سكينه: كنت معصبة .. صافي دابا بلا منهضرو يا قلتي نسدو هادشي كاامل
غالي: نسدو هادشي كاامل!! يالاه اجي ن٠٠٠ك باش يتسد هاد الموضوع فمرة
سكينه: طارت من بلاصتها) باااك وخووك..
غالي: راني مزوج الزين
سكينه: ولاكن غدا متمشيش تخطب معاهم
غالي: غدا يحن لله
سكينه: لاا ماتمشيش انا غنمرض ياك قلتي نسدو الموضوع
غالي: جرها)يالاه اجي نسدوه .
فهاد الاثناء كانت رانيا كتعيش اسوء لحضات فحياتها.. العذاب الاليم اللي مابعده عذاب.. عذاب كينهش النفس والصحة وفواحد اللحضة من دوك اللحضات الصادمة حسات بعقلها كان غيمشي ..لاكن ربي لطف وتبتها وعاونها على التبات ..كانت قدامها غير سجادتها اللي كتصلي عليها وكتبكي وتدعي لله حتى صبح الحال وكانت عيات ونشفات من الدموع وتهدات وبغات ترتاح وتنفس..وقبل متمشي تنعس جمعات سجادتها من بعد صلاة الفجر وقلبها عامر كره وحقد على هشام .. وكاع داك الحب تحول لحقد وكره شديد وبان ليها وجهه وعرفات راسها تخدعات وعطات وقت لواحد لي ميستاهلش.. وفعلا الانسان كيبان فالاوقات الصعبة.. شكون قال رانيا غضرب عليه فديك الليلة وتنزعو من قلبها بالقوة وترميه برا.. وفعلا خرجاتو فمرة من اعماق قلبها وقلعاتو من الاحشاء ولاحتو وواعدات راسها غادي تكمل حياتها وغادي تخرج من داك الضلام الدامس وداك الكآبة وغادي تحقق نجاح فحياتها لي يكون در عليه وعلى مو وعلى طاسيلتو كلها. كان وعد قاطع بينها وبين نفسها ومشات نعسات والصباح فاقت كأن شيئا لم يكن.. او بالاحرى كانت ليلة لجنازة رانيا.. كانت جنازة بكمل ما تحمل الكلمة من معنى .. من مشاعر من حزن من سداجة وشخصية صبحات رانيا كتكرهها.. دفنات ديك الشخصية فمرة وحدة وناضت فطرات معاهم على الطبلة واخا علامات السهر والتعب والاثار دالبكاء عل وجهها لاكن الداخل كان كيحكي قصة اخرى
صبحات سكينه الصباح كتلوى فبلاصتها..ماناضت ماشافوها وجات لغالي على قلبو نيت يوفي بوعدو .. خرج عندهم وهما واجدين باش يمشيو لهاد الخطبة المنحوسة وكيتسناو غير اسية توصل هي وولدها ومرتو من مكناس. اما هشام خرج مشا شرا الحلوى وشرا كل ما كيخص لهاد الخطبة وحطو فالسيارة وطلع عندهم لبس حوايجو وتقاد ووقف راشقة ليه قدام غالي لي كان كيهر مع باه وتفاجئء بالحوار
غالي : غير سيرو ابا صافي قلت ليك شنو كاين
عاوتاني وقف هشام بحال المصدوم مخرج عينيه بحال الى كيقول ليه كيفاش !!! مغتمشيش معااانا!! زعما راه مصذوم من شنو دار خوه كأنه كيقوليه جينا حتى لعندك وخوك باغي يخطب ومابغيتيش تمشي معاه وكبر الموضوع بديك الشوفة اللي بقا كيشوف كأنه ماوقع والو وداكشي لي كيدير فيه غالي كله غالط. لاكن الاخير ماعطاش اهتمام للانر وقال لي عندو والسبب ماكدبش فيه وباه بقا ساكت خدا الموضوع بعقلانية ومابغاش يكبر الموضوع كتر ويبقا يسول وخرج كيرضي عليه وغالي معاهم حتى وصلو لباب مشاو ورجع بحالو كيسوط مشا نيشان شعل شوفو وطل على سكينه فالبيت
غالي: غندخل ندوش دخلي؟؟
سكينه: بتعب) فين غندخل وكنموووت كنمووووت
غالي: وصافي هانا داخل
تجبد بإرهاق وماعطاش للوجع ديالها اهمية لاكن هي تزاد عليها الحال وبدات كتشوف النجوم وبانت فوجهها . ناضت كتموت مقوسة مشات تقيات فواحد طوالط ثناوية ورجعات كترحف وترعد للفراش تخشات تما وبدات كتعرق وتنين وتقلب من جهة لجهة وكتعض فالمخدة والدموع نازلين مع عينيها حتى حوالت
خرج من دوش لقاها مزالة فالفراش مكمدة وقال
غالي: انا غادي نجيب لفطور
مارداتش عليه وحساب ليه راه ناعسة وهبط للمخبزة لي تحت منو لقا اشهى المؤكولات.. رجع للدار وداز للمطبخ نيشان عمر لقهوى كما كيعجبو يعصرها راسو وحط دوك المملحات معمرين وبتي بيان والشكلاط واملو والعسل وهي حط ليها سطل ديال لفرماج باش كتفطر والبيض وبدا كيغني ويدندن وما عندها للبيت تلاح عليها كيضحك وعضها من ودنها
غالي: حبيبييي.. وانوضي راه غتبرذ القهوى
سكينه: برك ليا هنا برك
غالي: مالكي؟؟
سكينه: برك برك
تقلبات على جنبها تقول شاربة شي مخدر .. تحت عينيها منفوخ وعينيها مقلوبين وعرقانة كتنين وحناكها حومر تقول داخلاها الموت والمرض باين عليها. . تعجب وبقا كيبرك وهي كتعض فالمخدة وتجر حتى تهرس ليها الدفر ولاحتى بلا مبالات
غالي: واش كااع هاد الوجع من ليغيكل؟؟
سكينه: بألم) شووووو…-ششششششش متهضرش ششششش
بقا كيشوف ويبرك حتى شيرات ليه بيدها يحبس وطلعات عليها لغطا مابغاتش تفطر.. مشا فطر بوحدو وغطا داكشي خلاه بلاصتو ورجع لقاها ناعسة بحال الى راكعة وكتمايل وتنين ومغطية كلها حتى حاجة فيها مكتبان وقرب كيشوف فيها باستغراب
غالي: سكيناا؟؟ وااا سكيناا؟؟ وا سافا؟؟
سكينه: جيب فاش نتقيا
غالي: تقياي؟؟؟
شيرات ليه بيدها من تحت الغطا يمشي وما جاب ليها سطل حطو فالارض قدامها وعرات على راسها سخفانة تقلبات على داك السطل كتعصر وتقيا لمرار والخضورية والماء كيهبط من فمها بحال روبيني حتى شبعات تقيا . ويااريتها ماتقياتش يااارييت صبرات على ديك تقية ماخرجاتهاش.. معدتها من مور ديك تقية تقول تبرمجات بالوقت وبدات كطلع لفوق كل خمسة دقايق كتقلب وتنفخ وكتبدا ترد بزز منها واخا مافيها لي يرد لاكن اصمرت غلى ديك الحالة حتى بدا غالي كيتخلع من المنضر وبدات هي كتبكي من خر الردان والوجع وبغات غير تفك من تقيا وتقلباتها لدرجة فاش كتبدا تقيا كتقلب بحال شي تقشرية تقول جسمها الداخلي كامل غيتقلق على برا ..كيخرجو عينيها وكتزير وكيضرها راسها وكدير مجهود فداك تعصاو مضاعف وماعندها جهد حتى بدات كتسخف
غالي: نديك للطبيب …. واش نديك للطبيب؟؟
سكينة: عيط لماما
غالي: نعيط ليها تجي؟
سكينه: عيط عيط
ناض عيط لمها فتيليفون لقاها فالمدينة خرجات هي ورانيا وسميرة وكانو خارجين باش رانيا تبدل الجو شوية وماعندهم كي. يديرو يرجعو .. قطع ورجع عند سكينه جلس حدا رجليها كيبرك ليها على جنابها ويتسخر ليها وناض طلع على ركابيه فوق ناموسية وحيد داك لغطا عليها وبدا كيدير ليها شوية درياضة لرجليها وهي كتغوت وتقوليه فيا لمواس فركابيا.. لاكن مع لحركات السريعة لي بدا كيدير وكيمشي ليها رجليها فلهوا بدات كترتاح شوية وترخات وغمضات عينيها وبقا على نفس ريتم كيحرك ليها رجليها حتى سخف وغطاها وتكا حداها عليها وتوسد مؤخرتها ساد عينيه وفنفس الوقت كيدوز يدو على رجليها ويبرك ختى نعس
تسهطات سهطة وحدة تقول ماتت وجبدات عليها جبدة وحدة تقول عمرها مانعسات . واخد الراحة من بعد داك العذاب الاليم لا مثيل لها فالدنيا ..سبحان الله الانسان مكيعرف بنعمة الراحة حتى كيبرا من شي مرضة ولا يخرج من شي عذاب دوز عليه المحاين العضيمة، ثماما بحال وجع العادة الشهرية ومن لا يعرفه . الراحة لي كتجي فديك النعسة من بعد ساعات التعذيب ميعرف بطعمها غير المجربها.
فاقت من السهطة حمرا تقول كانت فالفران . طبعا فهي غطات راسها كامل وحتى و جهها غبراتو حتى مابقا كيبان ليها الراس من الرجلين. اما الشعر فزك بالعرق والصهد اللي صهدات . على سلامتها خرجات منها سالمة غانمة ورجعو عينيها بلاصتهم ورجع فيها الدم ورجعات حياة من جديد
ناضت عرقانة وطايبة وعينيها محلولين تحلف عليها ما كانت مريضة كتموت . طاقة جديدة وباغا تاكل وباغا تحرك وجاها واحد النشاط رهيب والوجع مشا تقول عمرو ماكان . ضرات فالدار مالقات حتى واحد ومشات للكوزينه كدور لقاتها السبعة دلعشية ! اوااه نعسات نهار كامل ! يعني السهرة لكم هاد ليلة ومغيجيهاش النعاس .
ضربات دورة فلكوزينة لقات واحد الطاجين فيه كفتة كويرات بمطيشة وحداه طبسيل دلفرثت صغير مغطي وهزاتو جلسات على الطبلة كلات حتى شبعات وناضت للدوش طرفات حالتها بقرف وميوعة لقات راسها متختخة دمايات وخرجو ليها فحوايجها واضطررت تحيد كولشي وطرف نصها بما سخون ومشات لبسات لبسات واحد لكولون مزير باش يجمع ليها جنابها ولبسات معاه تقاشر طالعين حتى للركبة ديال نايك ولاحت واحد تريكو بالقب وجياب ديال غالي سخون ونازل على مؤخرتها ومشات جلسات فواحد الركنة كتفرج فتلفازة وكتكتب مساجات لغالي فالواتساب
سكينه: جيب ليا ليكوش ديال دراري صغار اصغر نمرة
غالي: فقتي ؟ وا علا سلامتك
سكينه: الله يسلمك عنداك تنسا ليكوش
غالي: انا فلاصال حتى نكون جاي
سكينه: جيب معاك شي بكية دلويزة
غالي: اوك
لاحت تيليفون ويالاه بغات تكا رجعات هزاتو عيطات للمراكشية كتسول على شنو واقع فالمحل وموراها عيطات لمونيه كتسول على رانيا ولقات مونيه طايبة كتر من اي واحد اخر . شكات حتى بردات وقطعات .
بعد ساعتاين وهي متكية من حلقة حلقة فمسلسل تركي تحل الباب ودخل غالي هاز صاك السبور على كتفو والقب على راسو وفيدو صيكان لبلاصتيك
سكينه: هزات راسها)شنو فدوك لميكات؟
غالي: حطهم على الطبلة) والو غير نعناع… ها ليكوش ديالك (مدهم ليها) ماتخرايش فيهم راه غير صغار
سكينه: على باسل
غالي: وشنو بغيتي؟؟ تخراي فيهم؟ ميهزوش ليك خريتك
سكينه: على خرااا ععع
غالي: ها لويزة ..لوزي وعاودي راه تما خير الله
سكينه: صافي؟ هادشي؟
غالي: صغر عينو ) هاااا شنو جبت ليك
جبد صاك اخر من وسط الميكة فيه كارطونة وكيشوف فيها بنص كتفرنس
غالي: عجباااك الحال دابا
سكينه: خطفاتها )انشوف(حلاتها ) شوارماااا ناااري كنت مشهيااااها علمك لله
غالي: قلب وجهه) لا شكرا على واجب
سكينه: شكرا الزين .. الحب.. واا البوكوص.. غضبتي ؟ واجي الزين
غالي: غادي للكوزينه)واسييري
سكينه: راه كنت غنموت متديش عليا
غالي: دابا بريتي؟
سكينه: نااري دازت عليا
غالي: فيك مايدير ليا واحد لبراد دتاي
سكينه: اوييلي والله ميدوز لك هههه
غالي: ديري غير لما يغلي راه جبت غريبة باقا سخووونة لقيتهم يالاه حطوها
تحطات الطبلة وحط البراد هوا اللخر وجلس كيسوط ويجبد عنقو
غالي: دكدكت والله لعضيم
سكينه: دوشتي تما؟
غالي: بتعب) اه وصليت عاد جيت.. احسن حاجة وكيكون الدم فيك سخون ماشي بحال فاش كنجي وكنبرد كنعكزز..
سكينه: مزيان..بنينه هاد شوارما وعامرة
غالي: بتذكير)ااه فكرتيني.. الشهر اللي جاي غنمشيو فرنسا ان شاء الله
سكينه: ضارت عندو بلهفة) حلف!!! بصح ؟؟؟ غنسافرو لفرنسا ؟ وشحال غنجلسو؟
غالي: عشر ايام .. عرفتي جات مع لبوناني غيعجبااااك لحال
سكينه: بحماس) نااري غنطيير .. (طارت عليه عنقاتو) ناااري غنطييير .. غنمشيو فرنسا
غالي: وادابا لي شافك يقول عمرك مشيتي ليها
سكينه: لا راه المفاجأة لي شي حاااجة .. وسط هاد مكاين مايدار والشتا والسقيع طحتي عليا من السما وصدقنا غنشافرو وندوزو راس لعام تما !! راه ماشي غير. غنطير.. نسيت اصلا واش كاين شي راس لعام
طارت بالفرحة ومن الساعة لي قالها ليها وهي كتحلم وتخايل وعقلها غير مع فرنسا..اما فاش قاليها على ديزني لاند كملات الباهية وقلبات الاتجاه جهة ديزني لاند كتفرج فاليديوهات ومقابلاهم غير هما و وتوري فيل وشوارع فرنسا ومابقا عندها شغل لا مشغلة .
كان عيان ومسخسخ وبغا غير ياكل وينعس. وحتى هي من الفرحة تكاتو وجابت الزيت وبدات كتماصي ليه عنقو وكتافو وعينيها فتلفازة متبعة الرحلات والسفريات ديال فرنسا وعينيها خارجين كتسنا غير فوقاش تجي نوبتها حتى هي ودير لي مادارو حتى واحد
بقات هاكاك ليل كامل عينيها فتلفازة .. وحتى هوا داتو عينو ونعس حداها وزادت غطاتو وبقا هاكاك متحركش حتى تقلبو عينيها مع الفجر وهي سهرانة وتقلبات تخشات حداه ونعسات.
وخلات الطبلة قدامهم كما هي بكيسانها وكراطنها حتى صبح لحال وحضات بيه باسها فخدها ومشا
فاقت موراه حتى لطناش وحلات عينيها على الطبلة مباشرة .. شافت بلاطو زايد على داكشي دلبارح فيه رايب مسدود ولحرشة حداه فكاغيط وناضت مسخسخة وعنقها عوج بالنعاس هزات تيليفون وسبقات بغالي هوا الاول فالواتساب
سكينه: بب صافا؟
غالي: صافا بب ونتي؟
سكينه: سافا للحمد لله الدار صبحات مقلوبة
عيط لماما قوليها تعطيك النمرة ديال ديك المرى لي كتعرف وعيط ليها قوليها تجي تجمع هادشي
غالي: ماعندكش صولد؟
سكينه: عندي غير مافيا لي يعيط لماما غتبقا تنكر عليا .. راك عارف
غالي: اوك يالاه انا نعيط ليها .
حطات تيليفون ومشات للدوش طلقات الماء سخون كيغلي ويفور ميقدرش انسان عادي يدخل تحتو ومع ذلك دخلات وبدات كتشطح فالاول وتردح من بعد كمدات لحمها وولفات لما
خرجات حمرا من لحمام والفوطة على راسها ومكمشة فالبينوار عاد رجعات فيها الروح وضحكات ليها الحياة . مشات حلات الباب لقات المرى دلميناج فالباب وتبسمات ليها ورحبات بيها ودخلاتها
سكينه: خالتي عيشة سمحي لينا على هاد روينة
عيشة: ماكاين مشكل ابنتي ونتي بحال بنتي حتى بنتي سميتها سكينه
سكينه: الله يخليها ليك
مشات للكوزينه كدور تالفة ورجعات عند عيشة قائلة
سكينه: الى بغيتي تفطري فطري كلشي فالثلاجة ما تحشميش .
رحبات بيها ومشات للبيت جبدات واحد السوشوار فيه الموت ديال غالي وصغير كينشف بيه غير شعرو فالدار وبدات كتنشف بيه وتعاود حتى طاحو يديها ودارت بناقص حطاتو ولبسات سورفيت بلو مارين كتحمق وواسعة من لفوق ولوات شعرها ودازت على بانطوفتها ومشات للصالون لي حداها كتنشف شعرها وتيليفون فيدها كتهضر مع غالي وتكتب ليه فالواتساب
سكينه: ماسوشوار ما تالعبة سخفني جالس كيعطس عليا
غالي: ههههه
سكينه: شعري ماشي ديال داك سوشوار انا خصني تنين يسوط عليا ههه
غالي: دابا خليتي لمرى فالدار بوحدها؟
سكينه: اه. خليتها وغندوز للحانوت راه عطيتها الساروت غير تسالي دوزو ليا للمحل
غالي: وبانت ليك مزيانة ؟ تيقة ؟
سكينه: لا باينه اصلا بعقلها دوريشة باغا تخدم على راسها ومعروفة ديك المرى زعما حتى فوجهها باينه
غالي: نتي تعرفي
سكينه: سديت بيت نعاس وصافي صونيت ليك قبيلا ماجاوبتينيش
غالي: كنت ف اجتماع شوية ونعيط ليك
سكينه: اوك حتى انا غندخل دابا للاجتماع يالاه تهلا الزين بيزو
حطات تيليفون وناضت دازت دفرة دسبولة ومشات بحالها للمحل وهازة معاها زيتون مشرمل والخبز وبتيبان والحرشة فيها الفرماج ودخلات على المراكشية لقاتها متكية كتسنط لعضامها ومغطية بواحد الكاشة خفيفة
سكينه: هييه !! ناري غتجيبي لعكز للحانوت بهاد النعاس اصاحبتي نوضي نوضي
مراكشية: اختي المرت تلبرد مكاين لي غيعرس فهاد السم
سكينه: وانوضي ديري اتاي هانا جبت باش نسخنو
مراكشية: لبرد داخل دابا مكاين غير نعاس
سكينه: الله ينجيني اختي اش بغيتي عندي!! الله يجيب ليا شي رزييق سااهل ماهل ياربي
المراكشية : امييين ..لينا كاملين
ومع النوضة اللي غتنوض المراكشية لقات واحد ميتين درهم طايحة فالحانوت وطارت عليها
مراكشية: هييه!!! ميتين درهم
سكينه: فيين!!!(كتقلب) انشوف
مراكشية: رزقييي اختي رزقي هههه
سكينه: ااري لمك راه انا لي مرزاقة هههه قسميها
تشادو على ديك ميتين درهم بالضحك وغالبا طاحت لشي وخدة دخلات عندهم وبحكم سكينه ماعندها كامرات والمحل عادي ماعرفوهاش دايلمن شدوها وقسموها وجلسو كيضحكو حتى دخلو شي كليانات كيدورو فعينيهم شي جلس وشي كيشوف تكاشط وسكينه كتجمع معاهم بحمكم معرفتها بيهم حتى دخلات عيشة لاحت السلام كضحك وناضت سكينه مشات لاكيص جبدات لفلوس خلصاتها وخدات السوارت ورجعات جلسات
لكليانه: عيشة الله يعمرها دار كتجي عندك ؟
سكينه: اه
لكليانه 2: ومالك نتي ماعندك يدين اويلي؟
سكينه: ههه عندي غير رجلين كيدورو
كليانه 2: اوييلي انا مندخلش مرى لداري تشقا ليا مالي ماعندي دراع
سكينه: دار راجلك اصلا واش دارك كاتبها ليك؟
كليانه1: دارها مراتو كتسما دارها
كليانه 2 : حتى انا حتى واحد ميبرد ليا الشقا قد يديا
سكينه: اختي يبرد ولا يجلس انا مافياش ومامسالياش اصلا
جاوها فالمحل وكليانات وماصلاحش ليها ترد عليهم كما ينبغي وسكتات خلاتهم كيهضرو وكان حوارهم كامل كيدور على شنو طيبو شنو وجدو وجري عليا نجري عليك حتى خرجو بحالهم وبقات غير سكينه والمراكشية جالسين متبعين ليهم لعين
المراكشية: زعما راني حادكة
سكينه: شو غير كي دايرة يا ربي السلامة .. واش هاديك هي انا!! شو حالتها مسكينه كي دايرة كيحساب ليها عاادي وصبعها ملوية عليه فاصمة
مراكشية: زعما داز فيا موس
سكينه: بطلة ههه ناري على بشار .. قالت لك مكيبقاش ليا الوقت حتى نحك راسي.. الدار نقية وراسها فيه القمل وطوابگها يدوخو مدينه بريحة الصنان ديال الشقا
المراكشية: هههه يخخخ
سكينه: دايزة على جلابة وصندالة وجايا كتجر زعما نقضي غراض ..مسكينه ماعندهاش الوقت دوش وتحيد موسطاشها وزغبها وتمشط شعرها .. عندها الوقت تسيق وتغسل ماعن وهي هانيا ماشي مشكل..ماشي شي حاجة راه نقية واخا ينوض فيها الدود ههه
مراكشية: عيفتيني يخخخ خلينا نشربو هاد كاس داتاي
سكينه: فيها واحد ريحة بحال الكافور ياربي سلامة موحال واش كتشم ريحتها ، كتعطي منها واحد الريحة فشكل..ويديها طايبين بجافيل صبعانها منفوخين ..تسلخ الجلدة وماتجيبش لي يعاونها الله يستر
مراكشية: واحد جارتنا كتقول لراجلها عطيني باش نجيب مرى دلميناج تخمل ليا وفاش كيعطيها مكتجيبهاش ومكتخملش وكتشد لفلوس وتسكت حتى مابقاش كيعطيها دابا واخا مرضات مابقاتش كتقدر توقف بالضهر وكتقوليه عطيني نجيب لي يعاوني كيقوليها ديري داكشي علاش قديتي
سكينه: واخا تبغي تجيبها بصح ميعتقهاش دابا
مراكشية: واييه.. حيت كانت كتفلا عليه كيحساب ليه غيلقا بصح الدار مخملة .. فاللخر مكتخمل ما والو كتشد لفلوس وتبقا تخسرهم غير فالماعن كل مرة شارية طبسيل فشكل
سكينه: فلحضة ادراك) فخبارك عمري شريت شي كاس ولا شفت جهة الماعن
مراكشية: انا كيسطيوني الماعن عرفتي شحال كنشري
سكينه: انا عاوتاني كيسطينوني الحوايج وهاد المرة عمرت واااحد الشاريو لغالي من واحد الموقع خلصو هوا كاامل
مراكشية: انا لا كنشري الماعن بزاف
سكينه: شنو كديري بيهم؟ كتلبسيهم؟
مراكشية:لا ههه كنحطهم وصافي كيعجبني نحطهم فوق الطبلة
سكينه: انا اختي واخا ناكل فبابي اليمينيوم ماعنديش مشكل..نسالي ونكمشو نلوحو فزبل المهم عندي لحوايج ماكرهتش يكون عندي محل ديال لحوايج
مراكشية: علاش مادرتيش شي حانوت ديال لحوايج ؟؟
سكينه: حانوت!! ماعرفتش مااا..!! مافكرتش فيه
مراكشية: كن درتي شي محل واخا غير صغير فالقيصارية
سكينه: اويييلي خاصو لفلوووس!! ولي يقابلو
مراكشية: ايوا صاافي تا نتي موجود لي يقابلو ..راه راجل كريمة الجبلية بغا يطلق المحل ديالو لي فالقيسارية طالب فيه سبعين الفريال ، جا الوسط
سكينه: هاداك هوا ثمن الكرا اصلا
مراكشية: واسيري دخلي عليه .
عمرها فكرات فشي مشروع ديال لحوايج او طاح فبالها وخصوصا فهاد الازمة لي كتمر منها والدار لي خصها تكمل خلاصها فاش يعيطو ليها وكتحمع الريال على خوه . لاكن بعد نقاش عميق وامثلة دازو قدامها ديال بنات كيبيعو ويشريو فكرات تشوف هاد المحل وتعرف التفاصيل واخا ماتكونش باغا تشدو لاكن حبها للمشاريع والفلوس دفعها تعرف ، ناضت هي والمراكشية مشاو لهاد القسارية اللي كانت معروفة وكلشي كيتقدا منها وفيها من كل نوع طرب ، ها الحوايج ها المكياج ها اللباس ها الماكلة المهم تقول سوق والكل كيمشي ليه . وبحكم معرفتها بهاد القسارية اللي فيها الرواج اكثر من اي مكان اخر فقالت علاش لا نعرف وصافي
وصلو للقسارية وداتها المراكشية عند راجل كريمة ، كريمة كانت بنت الحومة حتى هي وراجلها عسكري وفنفس الوقت فاتح محل داير فيه السوايع والنضاضر وكان المحل ديالو مقابل مع الدخلة اللي كتكون ديما عامرة . وقفات عليه كتسول وتستفسر لاكن هايهات ثم هيهات ماشي اي حاجة كنسمعوها كتجينا ساهلة فهي فالواقع ساهلة. لقات المحل فعلا بسبعين الف ريال للكرا لاكن باش يخويو ليها المحل وتشدو هي خاصها تحط واحد الخمسة دالمليون حلاوة للشخص اللي كاريه عاد يخرج ليها من تما وديك الساعة تعمرو هي وتشد بلاصتو .. وبما ان القيصارية عامرة ومابقاوش فيها المحلات للكراء وكلشي شاد فيها بيديه ورجليه وعليها اقبال كبير فكان صعيب باش تبيع وتشري تما الا اذا بغا شي واحد يخرج من المحل ويسلمو ليك وهادشي طبعا عندو ثمنو. بقات كتشاير وتناقش والمراكشية مصدومة فيها شافتها دخلات فالشطارة تقول غتكريه من غدا وكتزير مع مول المحل وشادة ليه فثلاتة دالمليون حلاوة لاكن هوا شد فثمنو وخرجات من تما متحمسة ودخلات ليها الفكرة للدماغ وعجبها الموقع و حتى المحل وشعلات فيها النار عاوتاني كما كتشعل فيها فاش كتبغي شي حاجة كتبدا طير وتزرب بلا متخمم . المهم هوا انها عاجبها وباغاها وباغا تخشا معاهم فالقسارية حتى هي وكان بالنسبة ليها حلم صغيب يتحقق خصوصا فاش كانت باغا محل وكتقلب دير فيه تنكاف ديالها ولقات انه المحل فالقسارية مستحيل حيت عليها العين والطلب والعرض اصلا مكاينش ولي دخل كيلسق مكيبغيش يخرج . زائد خايفة يبان شي واحد ويسبقها ليه حيت من السهل انه يبان كليان اخر ويعطي ما اكثر المهم يخويو ليه محل تما ويدخل يخدم لانه الرواج كاين واي مشروع تحل تما كيتمشا خصوصا البيع والشرا .
مشات كطير والمراكشية تابعاها كتجري وتعيط وسكينه العقل مشا ومابقاتش كتبت وزربانة باغا تشدو بأي وجه كان
مراكشية: اااجي بلاتي.. وا ش باغا بصح تشدي المحل
سكينه: على عجلة) اويلي عاد كتسوليني كن طلب ليا سبعة كن مشيت نموت ليه فيها ونجيبها واخا نحيدها من فلوس الدار .. واش بحال داك المحل كيضيعوه الناس اصاحبتي وانا مامتيقاش لقيتو باغي يخرج
مراكشية: منين غتجيبي ليه خمسة دلمليون؟
سكينه: غنضبر فيها واخا نبيع كلوتي سيري للحانوت نا غادية لدار سيري تا نجي
مشات كطير طلعات للدار بلا متحسب الدروج ودخلات كتجري لقات غالي يالاه حط لبيسي والكتوبا يقرا شوية ساعا بعتات عليه من السما كتنهج جايبة ليه لخبار سخونه ولسقات حداه كي لمسكة
سكينه: شنو دابا ؟؟ شنو بان ليك فهاد البلان ؟ والله ال واااعر
غالي: صبري راسك الله يسخر
سكينه: ندخلو فيه انا وياك؟؟
غالي: انا ماعندي باش ندخل معاك دابا بغيتي دخليني نتي الله يكتر خيرك
سكينه: باصرار) هاد المحل انا راه مغضيعوش واخا نعرف نهز كريدي من لبنكة
غالي: ريبة حرام
سكينه: سلفني خمسة دلمليون نعطيها ليه حلاوة يخوج يق٠٠٠د عليا من تما
غالي: ههه كيضحكو عليك الهبيلة.. زوينه هادي عطيني خمسة حلاوة ونخوي ليك
سكينه: لا غير عطيني ولا يالاه معايا اصلا غتكون معايا نتا باش نقادو داكشي قانوني ميضحكش عليا
غالي: وباك قلتيها ليه؟
سكينه: اوييلي لا !! با مكيعرفش هادشي غيسبني اللهم خليني الى خسرت نكمدها ماساق ليا حتى واحد لخبار
غالي: ايوا الله يسخر
سكينه: سلفني خمسة دلمليون
غالي: فين هي خمسة دالمليون؟؟ ههه حساب ليك راه عندي لفلوس مطوية فالبنكة
سكينه: اوييلي ماعندكش؟؟
غالي: واش كتهضري بصح؟؟
سكينه: وفين كدير فلوسك؟؟
غالي: كناكلوها فين غنديرها(دار يدو على فمو مستغرب فيها) حساب ليك الماكلة فابور ولا؟
سكينه: اويلي الصالير كله كناكلوه ميمكنش!!
غالي: هادا هوا لي كاين كامل كيمشي فهاد تخربيق هادا.. ها شريليمن علي اكسبريس ها خرجني ها كل مرة جايبين ماكلة من برا مكطيبيش كااع فدار .. لويفي لابونمو زيد لكرا ثلاتالاف درهم كتمشي هاكاك غير فالكرا .. بلا جيب جيب جيب والشاريو كيعمر بسقاطة غير ديالك نتي فاش كنمشيو لمرجان .. نزيدك ؟ هاد الشهر جبنا ليك الشوفاج قلتي كنموت بالبرد .. زيد المازوط حتى هوا .. الماء. والضو منهضرش عليه كيبقا شاعل ليل كامل وتلفازة خدامة
سكينه: مكيشيط ليك والو؟؟
غالي: واخا يشيط كااع شحال كيشيط؟ خمسة دلمليون؟ هههه اوديي
سكينه: دابا شحال عندك قولي الصراحة
غالي: واحد خمسطاش الف درهم راها فلكونط بوحدها قلنا نديوها لفرنسا فهاد السفر ندورو بيها
سكينه: ايوا عرفتي شنو عطيها لي حتى نردها ليك
غالي: ياك جامعة لفلوس مزال مكملتي فلوس الدار؟
سكينه: لا كملت صافي غير مزال ماجامعة والو دابا واصلا غنحيد منهم هاديك لخمسة (هزات يديها ) اويا ماعندي مندير ماعندي حتى حل
غالي: وا نتي تعرفي
سكينه: صافي خلي ليا ديك خمسطاشالف درهم حتى ندير ونعطيها ليك.. اصلا غنردها فجوج عراسات ولا شهراين كااع غنخدم فيها نردها هيا وماحسن منها غير دابا شطبت كلشي باش نكمل ديك الدار تا هيا شحفاتني.. مابغاتش كاع تجمع
بيتات غالي كيخمم ويحسب ويقلب فتيليفون على معلومات لي متخليهش يطيح فالنصب . اما هي ضرباتها بنعسة حداه فوق واحد الفوتوي .
الصباح ناضت ركبات حداه زربانة هازةبزطامها ودايرة نضاضر مربعين كبار ولابسة كولون وتريكو رقيق ولايحة عليها كاي كحل كبير وحداء رياضي وهوا كان بكوستيم عوال من بعد يمشي للخدمة ، داها للبنكة خرجات خمسة دلمليون شدها غالي حسبها ليها ومشا معاها يريكل ليها امورها اما هي تابعها وساكتة لي قاليها ديريها كديرها معولة عليه فكلشي .
طلع وهبط معاها على داك المحل وكاليزا ليها الاوراق وداز ليها الساروت قانونيا وشدات وراقها عندها كضحك بوحدها ومشات جلسات فطموبيل حتى رجع غالي من بعد طلع حداها لقاها كتفرنس وتنهد بتعب
غالي: فرحانة
سكينه: لهلا يوريك قداش هههه
غالي: ايوا مبروك .. قاليك هاداك واش تشري منو ديك السلعة لي تما بالجملة بغا غير يتفك منها
سكينه: اويلي. باش غنشريها وانا كنسعا لي يسلفني
غالي: ايوا صافي غنقوليه يخوي ليك الحانوت ديالك.. دابا شنو غديري فيه لحوايج نيت؟
سكينه: بارتياح) اه اخويا هما لي غيتمشاو ليا تما
غالي: وعارفة بعدا منين تجيبيهم وكيفاش
سكينه: عندك شي فكرة مثلا
غالي: دور وجهه) انا ماعندي باش نفيدك من غير داكشي دالاوراق وشي حاجة متعلقة بالبنكة .. اما داكشي لاخر ديالك مكنفهمش فيه
سكينه: غنمشي لكازا ونقلب تما … ها هيا مليون ونص ديالك يالاه خلصات ليا ثلت شهور دلكرا شتي لفلوس كي كطيير
غالي: راه هادشي فيه الفلووووس اسكينه واش كيحساب ليك غير اجي ودير مشروع ! المشاريع ساهلين
المحل ها هوا خوا ليها ،، ايوا فين فلوس السلعة وفين وفلوس الاصلاح وشنو غدير وكيفاش تبدا ومنين غتجيب لفلوس والى حصلات غطب في فلوس الدار كاملين. كمداتها وسكتات وناضت كتقلب على السلف ومنين تجيب لفلوس وبدا تسلف من سارة لي شاركة معاها التنكاف خدات منها واحد الف وخمس مية درهم وتسلفات من ليلى واحد الفين درهم وتسلفات من المراكشية حتى هي واحد الفين درهم ومشات هي وغالي فالويكاند لكازا كدور وتقلب وتسول على محلات الجملة فالاخير حطات كاع لي عندها فالبيجامات ورجعات بحالها لداك المحل فالقيسارية بليل هي وغالي وبداو يلسقو علاقات ديال بلاستيك فلحيوط وعلقات فيهم البيجامات كلهم ومشات سخفانة هي وياه للدار مع الفجر طاحو نعسو .فالصباح فاقت قبل منو نزلات حلات المحل ودوزات الجفاف وبقات كتشوف فيه وراضية بيه واخا مبهدل ومازوينش وما عامرش ومافيه لا مانكات لا زواق من غير صباغة عادية غوز ضربوها للحيط كامل فقط وزينها السقف لي كان بالجبص وليسبوط. وقفات كدور فيه وبدات تصوني على كاع لي كتعرف وكتصر عليهم باش يمشيو عندها للمحل حتى جابتهم وبدات بصحاباتها هما للولين لي كانو ناويين غير يشوفو
سكينه: كي جاكم ؟
فوز: كتسرح عينيها) مابيهش مهم فالبدية قضي حاجة وصافي..ولاكن الموقع زوين خطيير
سكينه: فوز هاكي قيسي هادي
فوز: شدات البيجامة) شنو هادي؟
سكينه: قيسيها غير قيسيها راه مرايا لور وريدو
مشات فوز كتقيس وشدات ليلى كتوريها لبيحامات حتى هي وبدات تجبدوتمد ليها
سكينه: شدي اصاحبتي شدي راجلك غيخمقوه هاد الالوان
ليلى: واناااري باغا تبيع ليا صحة
سكينه: اويييلي علاش نتوما متشريوش من عندي؟؟ نتوما لولين خاصكم تشريو مني اصاحبتي.. غنقص ليكم شي عشرة دراهم غير قيسو
ليلى: بقات غير كتشوف) زوينين الصراحة غير انا عندي يالاه شريت جوج بيجامات
سكينه: ماشي بحال هادو هادو راه اخر مكاين هه..قيسيها تانتي
مشات ليلى هازة جوج فيدها دخلات على فوز كضحك لقاتها لابساها وكتشوففالمرايا
فوز: جاتني زوينه؟
ليلى: جاتك وااعرة واقيلا شرات طاية و خدة شفتهم كاملين نفس لاطاي مافيهمش لكبار
فوز: جاتني هي هاديك عجباتني
ليلى: واعرة غير خوديها
خرجات فوز كدور فجنابها وتشوف وسكينه واقفة وكتجبد وليلى لداخل كتلبس
سكينه: عرفتي كيًبيناتك !! عبااار
فوز: جبتي طاي وحدة ؟؟؟
سكينه: اه ختي جبت طاي وحدة حتى الى ماتباعوش نلبسهم انا بعدا منوحلش فيهم
… قيسي حتى هاد الكحلة غتجيك وااعرة
ليلى: خرجات بالبيجامة) كي جاتني
سكينه: هيييه!! جاتك نق٠٠٠٠دة اليلى الى ماخديتيهاشغير سيري تخراي.. بينااااتك اصاحبتي
ليلى: سكتي نتي مسولتكش غا سكتي..فوز هضري نتي كي جات
فوز: زوينه والله تا زوينة
سكينه: ماتقتيشبيا؟؟ نتي عارفة دوقي زعما كي داير
ليلى: صافي يالاه شحال هادي
سكينه: غير ثلت ميات درهم
ليلى: هاد بنت لق٠٠٠ هادي باغا تكزرنا قالتلك غير ثلت ميات درهم مسبقامنا حنا لولين
سكينه: وصافي دابا كتحكرووو بزاف انا نقص ليكم شوية
باعت ليهم البيجامات هما لولين بزز منهم ودازت لسارة والمراكشية حتى هما دات ليهم لبيجامات حتى لعندهم وبقات عليهم هادي زوينه هادي واعرة حتى شراوهم ورجعات للمحل جلسات كتصوني وتعلم الناس يمشيو عندها ولي حطات رجلها تما كتخرج هازة بيجامة من قوة ما كتشكر فيهم سكينه وتعاود وباغا تبيع كلشي فنهار وتعاود تجيب سلعة جديدة باش تقدر دور الحركة .
دوقها كان زوين وباعت الخير والبركة ومشات بحالها فلعشية جمعات فلوسها من المخل ودازت للدار عند غالي لي يالاه دخلات عندو بدا كيشد فيها
غالي: بنتي ليا مابعتي والو جيتي بكري
سكينه: اممم.. بااااعت النص فراسك
غالي: واسيييري شكون غيديها فشي بيجامات والقيسارية عامرة غير بيهم
سكينه: نتا لي سير اما انا جبت لكليان تا للمحل وكل وحدة شرات ليها وها لي شرات لبناتها ولي شرات لخوتها .. بقات عندي غير شي حاجة
غالي: ربع يديه) وشحال باش بعتيهم؟
سكينه: كل وحدة بشحال
غالي: شحال كااع؟ شحال دابا جمعتي؟
سكينه: دابا جمعت ثلاتالاف وسبع مية وخمسين ليوم
غالي: باستغراب)كي درتي ليها؟؟ شحال بعتي من بياسة بسلامة؟
سكينه: شي عشرة ولا طناش دبياساات
غالي: شارياهم ب تمانين درهم وبايعاههم بميتين وخمسين درهم؟؟؟
سكينه: هزات كتفها ومشات كتنفض) وشنو غندير راه مزييرة خصني نتفك راه كيسالوني ناس
غالي: بقا مصدوم ) اجي اجي
سكينه: عييت فيا جووع متهضرش معايا دابا
غالي: اجي لهنا اشمن متهضرش معايا.. اااجي
رجعات عمدو كتسوط وربعات يديها
سكينه: هاني
غالي: حرام هادشي لي درتي راه رابحة فيهم كتر من نص
سكينه: خليني نصبر راسي نتا مالك
غالي: عادي معندكش مشكل؟؟؟
سكينه: غير خليني حتى نفك حريرتي ونقاد الثمن دابا مزيرة
غالي: هز يدو) وا شغنقوليك.. نتي تعرفي
دخلات لكوزينه كتقلب على ماتاكل وطلات كتسول عليه
سكينه: تعشيتي؟؟
غالي: مزال
سكينه: شنو نديرو؟
غالي: ديري لي عجبك
سكينه: نديرو انا ؟!!!
غالي: وا غير ديري لي درتيها قابلين عليها
بقات كتشوف في حيرة ودور فعينيها ومشات كتقلب ودور فلكوزينه دايخة ولحسن حضها الدنيا نقية ومجموعه كتفتح النفس وعيشة كتجي نهار اه نهار لا كتجمع ليها وتمشي بحالها .
بدات كترون حتى قلبات لكوزينه ، اما غاليكان جالس كيقرا ما بيه ما عليه حتى تفكر واحد طابليط عندو فالبلاكار وناض كيقلب عليها وعلى الاوراقديالها ومارطونتها وجمعها وداها لسكينه للكوزينه كيوريها ليها
غالي: اجي ماتبيعيش ليا هادي؟
سكينه: شنو هاديك؟؟
غالي: طابليط كنت شريتها وما خدمتش كاع بيها
سكينه: عطيها ليا
غالي: شديري بيها؟؟ انا بغيتك تبعينيها. زعما
مسحات يديها ومشات عندو كتشوف كي دايرة
سكينه: وااعرة بشحال شريتيها؟
غالي: شي ربع ميات درهم برومو كديري سبع مية
سكينه: شحال باش بغيتي تبعيها؟
غالي: هز يدو ورجع لور تكا على حرف الباب كيشوف فيها
غالي: جيبي ليا غير باش شريتها براكة عليا.. بقات محطوطة تما من الاحسن بعيعا الا تبعات ليك
سكينه: صافي خليها حتى لغدا
جمعها وقادها وعطاها ليها ورجع يقرا بينما رونات واحد المقلة ماباين ليها الراس من رجلين وداتها ليه حطاتها كلاوها ساكتين ماعيبوها ماشكروها ومشاو ينعسو .
صبحات الصباح هازة الطابليط وغادية بيها كتفكر لمن تبيعها حتى جات فبالها سارة شريكتها ومشات شدات الطريق عندها ودخلات كتفرنس وتسلم
سكينه: فيين.. كاين شي خدمة
سارة: اوييلي اصاحبتي نشفات
سكينه: حتى حنا .. شوفي جبتليك واحد طابليط وااعرة جابها غالي من برا باش تخدمي بيها.. تجبديها قدام ناس وتحطيها يشوفوك كتحسبي فيها وكدا.. وخدامة بيها تباني كلاص
سارة: كتشوف) جديدة؟
سكينه: هاهي بميكتها ليكخون ديالها جديدة.. فيها كامرة لور كتصور وكلشي ..ديال برا اصاحبتي راه عندي بحالها كنخدم بيها فالمحل كنبينها قدام بنادم كيزيد يحتارمك ويقدرك ..كتباني هاي كلاص
سارة؛ برضى)امم واش بغا يبيعها
سكينه: اه كان غيبيعها لصاحبو وقلت ليه لا غنديها لسارة خصها طابليط..حسن ماتمشي تشريها بثلاتالاف درهم يزدحوك خودي هادي دايرة غير الف درهم ودوينه وبيبضة كلااص بقاي تخدمي بيها قدام لكليان باش يزيد يحتارمك ودخلي فيها تصاور اللباسي بقاي توريهم فيها ..بنادم راه غيبغي هاد لعيبات وكدا كيقدرك ويعطيك قيمة ويقدر ميتشطرش كاع معاك ..انا فكرت فيك نتي لولة حيت اصاحبتي خصك تباني كلااص قدام بنادم حيدي عليا هاد الكتاب من هنايا متبقايش تبينيه كاع هادا ..خبيه لتحت قيدي فيه غير بينك وبين نفسك وحطي طابليط قدام الناس بيني ليهم بلي كتقيدي فيها التوارخ وكلشي وفاش تكوني بوحدك عاد قيدي فالكتاب..الناس واه عندهم بيسي دابا مابقاش هادشي هادا ديال روجيستر مكمش كامل محفر بالكتابة وداكشي عشوائي..شدي شدي هاكي
سارة: وريني كيفاش نخدم بيها
سكينه: اجي يالاه نوريك باش نمشي دغيا راني تعطلت … فراسك راه كدير شي الفين درهم ولا كتر غير مابغيتش نشحطك ههه.. كن مكنتش مزيرة نعطيها ليك فابور تخدميها على عينين الناس مي جيتني يالاه حليت داك المحل..
واصلا بلا متخلصيني اصلا راك مسلفاني الف وخمس مية قطعيها منها حتى نعطيك خمس ميات درهم
طرقات المسمار ديال طابليط ومشات بحالها للقيسارية تبيع ماتبقا من لبيجامات ولي دخلات عندها كتلسق ليها بياسة حتى قربات تكمل السلعة لي عندها وحسات براسها تزيرات وتقيدات من يديها ورجليها ومامولفاش تبقا مقابلة حاجة وحدة وبدات كتقلب على شكون يشد ليها لحانوت
خرجات ديك لعشية مهمومة كتفكر فشكون يقابل ليها لمشروع ودازت عند لمراكشية للحانوت وجلسات كتخمم ساهية
سكينه: بغيت شي واحد يقابل لحانوت… هانا غادية غدا لكازا شكون غادي يقابل ليا لحانوت
المراكشية: تباعت ليك السلعة بعدا
سكينه: تبااعت ولاكن انا خصني لي يقابل ليا ويبيع ويشري
مراكشية: ويكون تييقة (تنهدات) القضية نشفات كانت على الاقل كنبان كليانة ولا جوج وسط سيمانة دابا والو كيخليو حتى لويكاند ويتمو جايين يتخاطفو
سكينه: وا حيت البرد دابا شوفي شحال كنا كنخرجو فالصيف نخدمو وشحال ديال اللباسي كيخرجو .. كتقلااال الخدمة فالبرد راه سينورغمال ماشي غير حنا .. حتى ليلى هضرت معاها لقيتها كتشكي تل هيا وسارة نشيت الصباح عندها لقيتها مكمشة فواحد المونطو متكية
المراكشية: سارة تبارك داارت من داك المحل
سكينه: وا سلا هاديك ابنتي راه الاكتضاض عندهم تما خدامين شتا وصيف تبارك الله
مراكشية: وتيقة زعما سارة ؟
سكينه: انا كنتيق فيها بعدا وحتا الى خدات شي حاجة راه غيير شي حاجة قليلة المهم انا نصيبي كااين عمرها قالت ليا مكاين والو.. الحمد لله كل شهر كنشد حقي وكنحسبو داكشي بالستيلو والورقة وديما جايبين راس المال باش ندخلو سلعة جديدة وديما رابحة انا وهي رابحة ماشي مكاين والو فمرة
مراكشية: حيت اختي شفتها مزرزرة بالذهب تبااارك الله واحد الخاتم بعدا دايرة ضربك بيه تغيبي
سكينه: هههه مبلية بالذهب راه ماعندهاش غا هاداك عندها شي ثلاتة اخرين
مراكشية: مكتخافش يتعرض ليها شي شفار يكريسيها
سكينه: اوييلي على يكريسيها راه شرات واحد طوينيبيلة مابقاتش كتمشي على رجليها ..ومشات سافرات ليك لتركيا حتى هياااا ههه وباغا تحل محل ديالها ديال تنكاف
مراكشية: لعااار!!!!
سكينه: ايييه قالها ليا المصور ههه عنداك تقوليها ليها صافي غا خليها بغات تحل اللع يسهل عليها
مراكشية: وشكون يشد المحل لي مشاركين؟
سكينه: عطا الله تا نتي لي يشد اصلا مغطلقوش حيت كيدخل هاداك فلوس صحيحة ومعروف بسميتي انا كاشي كيعرف غير سكينه واخا زادت حداه فالبلاكة سميتها هههه طيراتني فاش لقيتها زايداها ولات سميتو قفطان سكينه عند سارة كتباتها تحتو
مراكشية: ايوا هانتي بدات من والو شوف فين وصلات
سكينه: شوفي انا معنديش ديك القضية ديال بديتي من زيرو خصك تبقاي فيه راه من لول كنت ضاربة حسابي عارفاه غدخل معايا وغتحمع فلوس وغتبغي تا هيا دير ديالها واي واحد كيبغي يزيد لقدام المهم هوا كلينا وشربنا وجمعنا منو وراه غادي خدام ولي كنشدو انا كتشدو هي غير انا كنحطهم فالدار وهي كتشري الذهب وترقع حياتها تا هيا بشوية بشوية وحنا غادين.. راه كتخدم ماشي زعما ناعسة راه كطيير تا هيا فالصيف مكتسافرش كتبقا من عرس لعرس وتقابل لكرا وتقابل العراسات واخا قبييحة كتسيف على البشار ولاكن فلداخل مزيانة
مراكشية: هي الصراحة صعيبة اختي كان كيحساب ليا سويسهلة
سكينه: كااانت درويشة دابا راه ضربك تلوحك دغيا كتسخط والبنات مكيجلسوش عندها فالمحل كيهربو ليها ..ولاكن لعرايس كيمشيو عندها ..واخا هاكاك عندها الكلمة واخا مصعورة، انا بعدا سارة كتعجبني قد لسانها قد دراعها
مراكشية: وانا ؟؟
سكينه: تا نتي بدراعك راه الناس كيشكروك وعزيزة عليا..كن ماكنتش مرتاحة معاك كوراه فرتكناها شحااال هادي… الله يسهل عليك تا نتي ديري مشروعك
مراكشية: انا اختي بغيت هي نتزوج داك ولد عمي ولد لحرام مابغاش كاع يجي كل مرة كيقوليا غنجي غنجي
سكينه: قلبي على اخرا قوليه سير تتت… انا غنمشي لدارنا نشوفهم راه قررت نقوليهم على المحل الجديد.. غنقولها ولي ليها ليها
دخلات لدارهم كدور فعينيها فالوقيتة لي كيكون فيها باها فالدار باش تخبرهم بالحانوت الجديد
سكتات فالاول حتى عيات فالاخير طرطقات ليهم الرمانة وقالت
سكينه: ايوا راني حليت واحد المحل فالقيسارية انا وغالي نجربو فيه البيع والشرا
تافت بناصر لي كان متكي وهبذ النضاضر شاف فيها
بناصر: اشنو؟؟
سكينه: حليت واحد المحل صغير انا وغالي نجربو فيه البيع والشرا
بناصر: رجع تكا كي كان) الله يكمل بلخير
سكينه: بتعجب) ما عجبكش الخبر ؟
بناصر: وا الله يكمل بلخيييير المهم ديرو شي طايلة
سكينه: بخفوت) اميين
سكتات وماعاودش سولها وحتى هي ماعاوداتش هضرات .. لاكن السكوت ماطالش وعيا ساكت شافها معاودات ما جيدات هضرة وناض كيبحث ويسول وهي كتجاوب بالعبار خايفة من شي قمعة وكضحك وتلطف الجو حتى جلسات مونية عاجبها الحال وقالت
مونيه: مزياان مزياان الله يسخر البيجامات كيتمشاو
سكينه: ااه ولاهيلا جربتهم دغيا تباعو
بناصر: كيرمش) دي معاك مك تقابل لك لحانوت غير حالسة جالسة عطيها واحد عشرين الف ريال وتجلس ليك تما
سكينه:بدهشة)بصح؟؟؟؟(شافت فمونية) بصح تقابلي المحل؟
مونيه: بخجل وقبول ) ايوا نقابلو علاش منقابلوش
بناصر: ولاكن تخلصيها ماتجلسش ليك تما فابور
سكينه: غنخلصها
مونيه: الى كنتي غتعطيني بصح نمشي نقابلو (قالتها وكتفرنس حشمانه) شكون لي كره الفلوس
سكينه: صافي غدا سيري
بناصر: سيري تعلمي وخدمي براكة عليك من النعاس كيجيب غير المرض… خدمو خدمو راه الخدمة كطول لعمر
سكينه: فين رانيا؟؟
مونيه: فالبيت كتحفض
سكينه: انا غنمشي دابا حتى لغدا
مونيه: هاكي دي معاك لحريرة لغالي بلاتي
ناضت مونيه عمرات ليها واحد سوبيرا بلحريرة ورغايف معمرين ونزلات بحالها للدار .. جات تحل الباب بالساروت مابغاش الساروت يدور حيت سوارت غالي من لداخل ساد بيهم الباب وبدات كدق وتعاود حتى بغات تفرع الباب..عيات تصوني ودق وتصوني فتيليفون وضرب الباب تقول العسكر لي كيدقو وحتى رد مكاين .. عيات تحاول مع السراوت باش يدورو مابغاوش وعرفاتو سد الباب من لداخل وخلا سوارت معلقين فبلاصتهم ومابغاش ساروتها هي يدور وسخطات على الحالة وتعصبات و عيات دفع وضرب وتزدح فالباب ولاكن والو مع العلم كاين لداخل .. فالاول تعصبات وضنات يكون كيدوش وقالت نجلس نتسنا شوية ومن بعد رجعات كدق وزادت تعصبات اكثر وبدات تشك يكون سخف ولا دوخو الشوفو وطاح ولا وقعات ليه شي حاجة.. تخلعات وتزاد معاها الزايد وعيطات على باها جا كيجري عندها مخلوع وكيتأكد واش بصح كاين !! ميمكنش يكون لداخل وهما دارو حالة ومسمعهمش اذا كاينة شي حاجة واقعة مافيها شك .
تخلعو عليه وزدحو الباب وماخلار مادارو حتى جيران خرجو كيسولو اش واقع وجربو يحلو الباب بكاع انواع السوارت الميكانيكية
مابغاتش الباب تتحل فالاخير طلع سيكيريتي هاز لامون باش يفرعو الباب وكل واحد كيلغي بلغاه والخوف والهلع راكب سكينه وباها وعندهم عقدة من الشوفو خايفين يكون طاح بالغاز . يالاه ديمار لامون بالجهد وهوا يتحل الباب من لداخل قبل مايقيسو لامون وخرج غالي كيحل عينيه بزز ويشوف فيهم مصدوم لقاهم مجموعين عند الباب بالجيران والمعدات وكلشي وسكينه صفرا وباها مخلوع حداها كيشوفو فيه حتى هما مصدومين وكيطلعو ويهبطو باش يعرفو مالو من حالتو بان ليهم بلي كان غير ناعس ومزال دايخ وكيتبسم وفنفس الوقت منفاجئ من دوك العرام لث لقا فالباب ومافاهم والو ، دغيا تفرقو الناس ودخلات هي وباها هازة السوبيرة والرغايففطبسيل مغطي وكتشوفيه بنص عين بغات ضربو بديك سوبيرا ومالقات كي دير قدام باها من غير تسكت وتحها على الطبلة وقالت والنفس مرعودة بالغدايد فحلقها
سكينه: واش مسمعتيناش كنفرعو فالباب
غالي: مشح على شعرو باحراج) لاء!!
سكينه: وكي درتي عقتي ؟؟ اوييلي اخا تكون مييت !! القياامة ناضت ونتا ناعس
بناصر: المهم هانا مشيت الحمد لله غير على السلامة
غالي: جلس اعمي جلس
بناصر: لالا راني كنت مشغول خليت شي وراق ديالي عبى الطبلة وجيت المهم هانا نشيت تصبحو عىلى خير
خرج بناصر باش ميحضرش للنكير ويتحط فشي موقفغير محترم وزاد مع الطريق وخلاهم يتناقرو . مع خرج وسد الباب ضارت عندو سكينه مخرجة عينيها وهزات سوبيرا وقالت معصبة
سكينه: والله كن ما با اللي دخل معايا كن خويت هاد الحريرة على راسك قدام دوك الجيران
غالي: ههه والله ماسمعت شي حاجة
سكينه: الشروووهة!!! اوييلي نتا الوحيد لي مغينوض يوم القيامة .. تشعل لعافية ولا يدخلو الشفارة ولا يضرب الزلزال نتا اصلا مييت
جلس كيمسح على راسو وكان فعلا نعاسو تقيل بزاف وكيغلب عليه وحتى سكينه لاحضات فيه هادشي من نهار تزوجات بيه كينعس وكتبقا هي كتجمع فتيليفون حدا راسو الليل كامل ولا طلق الموسيقى فالبيت ولا تشعل تلفازة ولا تنوض للصندوق ديالها تقدا تفصل وتصمم صفحات جداد من داكشي لي كدير وكيعجبها وكتبقا سهرانة بوحدها غادية جاية واحيانا كتنوض دير عرض الازياء والمكياج فنصاص الليل والضو مصعصع وهوا مكاينش فداك العالم وناعس وسط روينتها تقول شارب البنج .
حطو العشا كيتعشاو وكل شوية يشوف فيها بنص عين وهي مخنزرة قدامها وكيضحك
سكينه: كضحك… حثت ماشي نتا لي تشنايريزيساتش
طارت ليها الماكلة من فمها ومابقاتش مفهومة هضرتها وهوا كيضحك حتى سخف ويلعات ماكلتها وقالت كتمسح فمها وتمسح الطبلة
سكينة: نشرتيني ساعة ونص وانا برا والبررررد قلت صافي هادا وقعات ليه شي حاجة ، واش درتي لكيت ؟؟
غالي: كنت دايرو ولاكن فاش نعست طاح من ودني
سكينه: بزاااف والله حتى بزااف!!! عرفتي شحال ضربنا فالباب حتى بغينا نقلعوها !!!! وا ما سمعتي حتا حاااجة ؟؟؟! ميمكنش!!
غالي: كيضحك). ماوصلني حتى صوت
سكينه: فين كنتي ناعس فبيت نعاس؟
غالي: بالنفي) لا هنا
شار بعينو لبلاصتو فين كلن ناعس وزاد صدمها دارت يديها على حناكها مصدومة وهوا رجع حمر ومهبط راسو كيضحك ويشرب لحريرة
سكينه: مقابل مع الباب وماسمعتي والو!!! هيييه!!!!(تيليفونها كيصوني) ماما(فتخات الخط) الو ماما
مونية: لاباس كلشي بيخير ؟؟ ياك مكاين باس؟
سكينه: لالا والو مكاين والو
مونيه: ماب غالي واش ياكما كان طاح ليه طونسيو
سكينه: شافت فيه بنص عين) لالا غير كان داير لكاسك والصوت مجهد وناعس مسمعناش
مونيه: ااه يوا على سلامة بعدا ..سلمي عليه تصبحو هلى خير
سكينه: مباغ تصبحي على خير
قطعات وشافت فيه كتسوط
سكينه: حتى واحد مادخل ليه لدماغو كنتي غير ناعس.. با يقوليا زيدي ابنتي بحالك زيدي عولتا عليه بكري يشد الشفار!! الشفار يهرب بيا وانا كنغرت حداك ونتا نيبا لا
غالي: خبا الضحك بالجدية) راه كنت فلاصال تسخست ودوشت طحت سخفان
سكينه: وااابلااااش من لاصال الى كنتي غتجي منو وطيح كاو ويجي الشفار يجبد ليا انا كلاوييا حدا راسك ونتا ناعس.. غا بلاش منو مغيزيدنا حتى حاجة
هبط راسو كيضحك حتى مابقاش قادر يهضر وبقات هي كتنكر حتى عيات فاللخر تكمشات لور بغا تشد بلاصتو ويالاه بغات تكا تلاح مور ضهرا سبقها وقال كيجر الكاشة
غالي: بلاصتي
سكينه: ناضت ) والله لا نعستي فيها
غالي: كيجر) بلاصتي انا كنت ناعس فيها كيفاش والله نعستي فيها
سكينه: حييد انا لي كنعس هنا راها بلاصتك لهيه
غالي: لااااا انا لي سبقت ليوم مكاينش بلاصتي وبلاصتك دابا انا لي سبقت
بقاو مني منك مدابزين على ديك البلاصة لي جات مركز زوين قدام تلفازة نيشان وسخونة وبقاو كيتجارو فالاخير تخشار بجوج تكمشو فالكاشة وهوا موراها كيحيد الشعر من فمو وهي كتجر شعرها وتنكر
سكينه: نتفيتني راه كتكا ليا على شعري
غالي: جمعيه دخل ليا ففمي
سكينه: غير بشوية
غالي: هبطي راسك مكتبانش ليا تلفازة
يالاه بدا لفيلم مور لكتابة بدا كيشخر ليها فودنيها برزطها وبدات كتنخزو وتحركو كل شوية فاللخر ناضت قادات ليه المخدة وهوا غايب وناضت جاها الحماس عاوتاني ديال لليل وتوكضات وعاد بدا كيبان ليها البلان فالمكياج . جبدات كلشي حطاتو فوق الطبلة وشعلات اليوتوب وبدات كتبع معاه وتماكي وتجرب فراسها وناضت جبدات اغراضها كلهم على الطبلة وبدات كتلعب فشعرها وهي مربعة والشوفاج حداه قزيبتها شاعل حتى جاها الصهد وحيدات تريكو وجلسات بديباردور وبدات كتصور كل مرة بلوك وكل مرة بتسريحة وكل شوية تجرب شي مشطة فشعرها ومكياج على وجهها .. شافت راسها ملات من القصة على عينيها وطلع ليها راسها فراسها وققرات متقطعهاش هاد المرة وتخليها طوال وترجع لور ..شوية بدا كيبان ليها دير ليميش لشعرها وبدات كتقلب على البنات الزعرات وكتصور بسناب شات وتجرب الالوان على شعرها وكل مرة طيح عليها فكرة حتى تحرك غالي من بلاصتو وراها وهز راسو حالين عينيه شافها قدامو مدورة بيها الماطيريال ومزوقة تقول ماشي هي . شاف ورجع تقلب نعس عرفاتو مادا ماجاب وياما حل عينيه لقا ماكفس وعمرو سولها ولا بقا عاقل. وحتى فاش كتسولو الصباح كتلقاه ما شاد والو.
ضربات الربعة دالصباح وناضت خلات كلشي محطوط فبلاصتو ودخلات تخشات حداه نعسات كما بقات بداك المكياج وعكزات تغسل وجهها .صبح الحال وناض يمشي للخدمة وماشافهاش واخا ناض ولقا ديك روينه قدامو وسوتيامات مليوحين والطالون والمكياج والكساوي مشتتين والمقابط وكاع اغراض البنات .. دفع لاتروسة لي فالارض برجلو ومشا .
رجع لابس لكوستيم وماشط ومريح باش يبوسها فالصباح بحال ديما ويقول ليها فودنها راني مشيت ويالاه وصل عندها بان ليه وجهها مطروز بكاع الالوان وعقد حجبانو بقا كيشوف فيها وباسها فودنها وقال
غالي: سكينه) هانا مشيت
حركات راسها بالايجاب فقط وتلفت بغا يدوز رجلو على دوك الاغراض وبان ليه بزطامها مرمي والفلوس مدكسة خارجة منو وهزو كيرمش خدا ميتين درهم ورجع عندها حدا ودنها
غالي: هانا خديت ليك ميتين درهم صافي؟ مافيا لي يدوز للبانكة تا لعشية
خرجات يدها من تحت المانطة كتشير ليه يمشي يبعد منها وشدها باسها وقال كيأكد
غالي: صافي؟؟ هانا خديتها..يالاه جوتيك
صبح الحال وصبحات كتغسل وجهها وتجمع روينتها ومادات ماجابت فالفلوس واش نقصات ولا منقصاتش .. لبسات خوايجها ومشات دازت على مها وداتها للحانوت وراتها كيفاش تبيع وبشحال وخلاتها تما ومشات تشوف شغالها، كان عندها بزاف مايدار ومابقاتش كتحك راسها ووقتها عمر وخصها تاخد شوية من الحاجة باش تقدر تنحز كل المهام، كان عندها موعد مع الخياط ودات ليه شي تكاشط باش تبدا توجد دفعة جديدة لي تخرج فالربيع وجلسات كتحفي دماغها مع التصميم وتعصر باش تهرج بشي كوليكشن زوينة وجديدة تخدم بيها فالمحل ديالها وفالمحل لي مشاركة هي وسارة ولي كان فال الخير على سارة ودارت منو الزرع والزريعة حتى هي، شرات طوينيبيلة صغيرة ودارت الذهب التقيل ومشات سافرات لتركيا ورجعات حتى هي همة وشان وعندها الثقة فالنفس وشربات الحرفة ورجعات كتخلي البنات فالمحل وتبع الخياطات والطرازات حتى هي.. مشات سارة الدريويشة الحشومية وجات بلاصتها سارة لي حكها الزمان والحرفة ناضية وماضية فين تبان سكينه، على الاقل سكينه كتراعي ومكتبغيش تخصر مع لكليان اما سارة كلمة جوج تجري عليهم ومدوزة على البنات لي عندها دكاكة وكاع النكافات لي كيخدمو معاها كيخافو منها ولحد الساعة مزال مافاهمينش كيفاش كتفاهم مع سكينه!! سكينه فالشرق وسارة فالغرب!! سارة بلدية وگارحة بحال شي عونية ولا شيخة اما سكينه كتبان كيوت من لبعيد وخاطيها المرايشات والمضاربات وتاشلواطيت. كيفاش هاد جوج تفاهمو لعجب!! وكيفاش سارة كتهز الكلمة لسكينه وكيفا سكينه صابرة على سارة وكَروحيتها .
نهار كامل مكاين غير جري عليا نجري عليك في حين مونية فالحانوت جااالسة كتبيع وتشري مع لكليان وعندها واحد الخاطر لي ماعند حتى واحد وبانت شخصيتها المخبية.. مونية لي تقول كابرة فشي عائلة هاي كلاس واخا مكتعرفش تلبس ولاكن كتعرف تهضر ومصوابة وكضحك مع كولشي وكتبيع غير بطيبة قلبها ولسانها لحلو والخاطر والثمن لي عطاتها سكينه متنزلش عليه هوا لي باعت بيه
ضربات لخمسة دلعشية وبناصر هاهوا راجع من الخدمة مكرفط وداز على لقيسارية لي حداهم يشوف هاد المحل لي كراو كي داير وبقا كيدور ويتسارا بلا ميعلمهم حتى لقاه ولقا مونية لداخل بالجلابة كطوي لحوايج وتردهم بلاصتهم ردخل كيسرح عينيه
بناصر: سلام عليكم.. لاباس
مونية: باست ليه يدو) لاباس لحمد لله
دخل كيسرح عينيه ويحرك راسو وقال
بناصر: مزيان مزيان.. مابيهش واخا صغير
مونية: هااء!! راه غير قيسارية هادي كلشي فيها صغير
بناصر: كيلقي نضرة) وكاين شي رواج رلا والو
مونيه: كتبسم)لالا كاين كاين الحمد لله راه مابقا عندها هنا والو ها شنو بقا غير هادشي
مشا كيشوف اش كتبيع وقلب دوك لبيجامات بيدو كيشوف توبهم وقال
بناصر: كي والو هاد لبيجامات رهااف.. خصها تجيب شي حاجة سخوونة للبرد وملونة (كيتحسس بيدو) ناس كيبغيو لوان ..شوية دالصفر شوية دزرق وشوية دلفانيدي
مونية: خليها ضبر راسها المهم كيتباعو
بناصر: واخا هاكاك خصها تنوع شوية باش يرجعو عندها الناس ماتبيعش بالدوق ديالها ماشي هي لي غتلبسهم….(تنهد ) مهم الله يسخر(سكت شوية كيتمنضر) فين مشات ؟؟
مونيه: مشات قالت لك عند لخياط دفعات ليه شي تكاشط
بناصر: عاوتاني لخياط وطراز ؟؟ نخزيها شوية تديها فالدار ديالها وطيب وتجمع حالتها .. راه ماكايناش غير لخدمة ولفلوس … راه غير صابر ليها لغالي ،،، عندها الزهر لقاتو ولد الناس..ولاهيلا الى عندها الزهر … كنبقا شي مرات نسول راسي كيفاش دارت ليه جابتو وفين طاحت عليه (كيهضر ويتسرح عينيه فالمحل ) انا كنت خايف يضحك عليها شي واحد ولا تجيب شي مسخوط الواليدين..ساعا ربي وقف معاها
مونية: ايوا صافي دابا نعل شيطان خلي عليك البنت
بناصر: انا لوكان تهلا فالدار ديالها غتزييد تعجبني.. لقات وبد ناس دريوييش مكيهضرش بغات تركب عليه
مونية:ي اسيدي خليهم بيناتهم
بناصر/: نخز نخر شوية راك مها .. وريها شدير
طاحت رعدة ديال الشتا جرات على كلشي ومنهم سكينه مشات بحالها للدار فازكة كتقطر ودخلات نيشان هازة بيجامة فيدها من لحانوت طرطقاتها ولبساتها سخنات فيها وهزات تيليفون عيطات ليه
سكينه: غالي فينك تعطلتي؟؟
غالي: عندي لونكلي نسيتي؟
سكينه: جيب ليا ماكدو معاك
غالي: واخا
سكينه: طاحت علياااا وااااحد الرعععدة منقووولكش
كبرات الصوت وحطاتو كتهضر معاه غادية جايا
غالي: فين كنتي؟؟
سكينه: كنت كندور على تكاشط. ااه حقا خصني نتقدا عاوتاني السلعة طارت تباارك لله
غالي: ااه مزيان وديك طابليت بعتيها؟
سكينه: هههه بعتها اا
غالي: ماعندي منتسالك
سكينه: تا تجي ونعطيك فلوسك
غالي: غتعطيني غير ميتين درهم
سكينه: علاش؟؟ بغيتي تقسم معايا
غالي: لاا راه قلت ليك غناخد ميتين درهم الصباح
سكينه: واش من عندي خديتيها؟
غالي: زعما كديريها راسك نسيتي
سكينه: والله ماعقلت !!
غالي: وراني قلتها لييك غير كنتي دايخة بنعاس
سكينه: ماشي مشكل تا تجي تاتجي
غالي: وا وجدي ليا شي حاجة لكاسكروط
سكينه: شنو غنوجد ليك؟؟؟
غالي: لي درتي
سكينه: نصايب ليك قهوة؟؟
غالي: صااايبي قهوة يالاه
سكينه: يالاه تهلا
غالي: مشات ليغيكل؟؟
سكينه: ههههه كطيرني ههه
غالي: ههه… باش نجي نتهلا فيك
سكينه: مزالة
غالي: واا. ماعندي مندير لك غير شوفي كي ديري
سكينه: تا تجي ننن نضرب ليك. مص٠٠٠٠ ههههاااااااههههههه
هبطات كتموت بالضحك وهوا كيضحك من تيليفون
غالي: تا هادي زوينه ههه..
سكينه: واقول ليا شكون اللي كيريحك ويسكن ليك لآلاام. ممم؟؟
غالي: ماعنديش الآلاااام
سكينه: يااااك!!!!!!
غالي: انني مؤمن بالله
سكينه: الله يقوي ايمانك.. سير سير مكتعرفش تتعامل مع النسوان
غالي: تا نجي ونوريك
سكينه: اسييير
غالي: غندخل دابا يالاه جوتيم
سكينه: الله يعطيني وجهك هههه
قطعات
مع ديك الشتى والقنط ماكرهاتش شي سهرة ولا شي قصارة بحال دوك لقصاير لي كيعجبوها .ضارت ليها طن فالراس وناضت لبسات جاكيط ديالها ونزلات كتجر بانطوفتها للحانوت لي تحت العمارة فين ساكنة ودازت عند مول الزريعة شرات التقاوت والعواصر حتى عمرات واحد الصاك ودازت للباتيسري خدات واحد الحلوى وطيرات واحد جوج وردات وهي طالعة للدار ومشات لديك الطبلة ستفات داكشي ووشعلات الشمع ولاحت الورد ومشات طرفات بالماء دافي وشعلات الشوفاج ولبسات واحد ليبك مشبكة كحلة وكسوة من لكساوي لي كانت كتخرجم بيهم مقزبة كحلة والصدر كيطل وصباط عالي هزاتو فيدها ومشات تخشات فالكاشة كتسناه حتى سمعات الساروت كيدور وناضت بالزربة لبسات صباطها وطلقات شعرها وتعرضات ليه حيدات السوارت من لباب باش يقدر يفتح الباب من برا وطفات الضو حتى دخل ويلاه بغات طرطق المفرقعات على وجهه تشعل الضو وشافها قدامو وهوا فالباب فدهشة هاز صاك ماكدو والبيسي تحت يدو ولافيست منقطة عليها الشتا ونيفو حمر. شافها كتعصر مابغاتش ديك القنبرلة طرطق وهي كتمايل بالطالون وضحك وكتقاتل معاها ..دخل كيشوف فيها ويضحك وشاف الطبلة مزوقة والشمع شاعل وحط داكشي لي هاز حتى هوا عليها وعنقها وهي مزالة متكركر وتميل بالطالون وتقرقرب .. باسها فعنقها وهي مزنكة زعما درت ليك مفاجأة
سكينه: مابغاتش طرطق ههه بغيت نخلعك
غالي: اييوا شتي على نية عندك
خداها من عندها وبقا كيزير عليها حتى طرطقات فالسما وتشتتات عليهم بجوج وهي كضحك
غالي: عنقها من خصرها) دابا كيفاش غندير ليك هاا؟؟
سكينه: شنو غدير ههههه ناري كتهربنيي
غالي: فيك ليغيكل
سكينه: واخا فياا ومن بعد
غالي: وكي غديري؟؟ كننن.. علمتيني نجيب معايا بريزيرفاتيف
سكينه: ولاا واش كيحساب ليك درت ليك زعما هادشي حيت باغا ننن
غالي: وشنو؟؟
سكينه: اويلي لاا.. نبدلو الروتين ماشي عليا انا
غالي: اااه
جرها من يدها ومشا جلس كيرتاح قدام ديك الطبلة وهي كدور بيه
سكينه: غنلعبو واحد اللعبة اغالي عندها ربعة وعشرين ساعة من دابا حتى لغدا بحال هاد لوقيتة اش قلتي
غالي: وشنو هي هاد اللعبة؟
عنقاتو من لور وهوا جالس: وا قوليا بعدا متافق تلعب .. هاد اللعبة سميتها تاج وبلغة
سكينه: احممم هههه غتجيك فشكل ولاكن غير فالاول مع المدة غتولف وتجيك عااادي
غالي: بفضول ) ي قولي نشوفو هاد اللعبة؟
جلسات حداه كضحك وتشدها بزز وقربات من الطبلة كتشرح ليه وهوا كيحيد لافيست عليه
سكينه: هانتا .. تاااج.. وبلغااااا.. تاج هوا الملك.. وبلغا هوا العبد ولا لي كيخدمو،، الى جات فيك نتا تاج غادي تكون تا هوا السيد ديالي وانا لهادم ديالك وغادي نفد ليك كاااااااع داكشي لي كتآمر بيه وممنووووع كلمة لا .. يعني انا لمدة ربعة وعشرين ساعة غنكون ديااالك نتا عيييش مع راسك .. بغيتي تكايس معايا ودير معايا زوين شغلك هاداك .. وانا عاوتاني الى جات فيا تاج نتا اسيدي غتكووون لخااادم ديالي واراا برررع عاوتاني
غالي: بشقاوة) صافي..سيير.. (هز صبعو) غير متقوليش ليا شري ليا شي حاااجة ما عرفت منين راه للخر دالشهر هادا
سكينه: مافيهاش الماديات فيها تقديم خدمة الزين ماتعطيني فلوس منعطيك فلوس غنحرت عليك وتحرت عليا رتاحيتي ؟؟ شنو قلتي دابا؟
غالي: واخا سيير
سكينه: يالاه جبد درهم نشوفو
جبد من جيبو درهم كيشوف فيها بنص عين بشقاوة ويضحك ولاحها فالسما ولسقها مع الطبلة حاط يدو عليها وهما كيفرنسو بجوج
غالي: قلتي راس؟
سكينه: اه ونتا تاج يالاه نشوفو
غالي: غندكدك مممك ضبرتي عليها ههه
سكينه: دورات راسها) هممم ما انا ساهلة ليك طلع طلع نشوفو فيمن جات
غالي: ياربي تخسر
هز يدو وجات فيه هوا الربحة وهي خسرات!!
ناض من بلاصتو جمع بونية بالقوة تعبير على الفرحة وضار عندها كيوجد لها
غالي: كحلتيييييها ،،، بلانااااتك ههه متقولييش كنضلمك هادو كلهم افكارك
سكينه: بنص عين) جاتك على قلبك غير بين بين شنو مخبي فداك القلب عليا
غالي: شد راسو) وا ناااري علاش ضبرتي اسكينه هههه كنتي بيخير
سكينه: ههه.. كنتي كتسنا هاد الفرصة
غالي: فتح القميجة) اولا بعدا غادي نصلي قبل متلاقا ليا المغرب مع العشا.. (طرطق صبعانو) نوضي نوضي شعلي ليا الشوفو نرضي يالاه
ناضت كدور عينيها فشلانة باحباط: تكايس عليا باش حتى انا فاش تجي نوبتي نتكايص عليك
غالي: وانوضي يالاه تحركي متزيديش الهضرة تكعدي
وقفات غتمشي وكان كيدور فبلاصتو كيحيد صبادو وعطاها واحد الدقة للمؤخرة مشات كتحك ها
غالي: سربي راسك
سكينه: من بعيد) وا بلاتي نحيد حوايجي غيفرعني البرد
مشات لبسات بيجامتها لي كانت لابسة بالقب وعندها لودنين طوال فالرمادي ودازت للمطبخ شعلات ليه الشوفو وسمعاتو كيعيط من البيت مشات عندو طلات عليه معبسة
غالي:شار بعينو ) جبدي ليا توني الازرق ديه علقيه فالدوش وواري ليا الفوطة ديالك الحمرة
سكينه: وعلاش فوطتي؟؟! كاينه الفوطة معلقة
غالي: مابغيتش هاديك اري ليا فوطتك
مشات كتسوط جبداتها من المجر مطوية نااعمة شهوة منها داتها ليه بالغبينة وبدات كتسخر عليه غادة جايا حتى دخل للدوش وجرها كيآمو ويخرج فعينيه دوشات ليه وهوا جالس على الكرسي وغسلات ليه راسو ومدات ليه الفوطة وهوا كيشوف فيها ويضحك
غالي: لله شحال رطباااااا
سكينه: دابا تجي نوبتي غير بلاتي
غالي: سكتي ماتهضريييش..سيري سخني ليا القهوة تكون بردات
مشات كتهبط كمامها فازكة ومشنتفة تقول كانت مع لقطوط وغسلات فمها بسينيال وسخنات ليه القهوة حطاتها ليه وجلسات كدوز يدها على حلقها وهوا كيدير كاسكروط
سكينه: درتي ليا لحلاااقم
غالي: شووو متنكرييش .. تانتي تا جاوك ليغيكل عاد طاحو عليك الافكار
سكينه: نيت باش تبان على حقيقتك نعرفك شنو مخبي ليا
غالي: شار بيدو) غتمشي تسخني تسخني زيت لعود وتجي دلكي ليا عضامي
بدلات حوايجها من جديد وحالتها ومشات هازة الزيت سخونة فالمقلة داتها ليه حطاتها فوق الطبلة وهوا وجالس متكي كيشوف فالتلفازة ويفرنس
غالي: زعما ماتكونيش هاكا مطيعة بلا قوالب
سكينه: بعبوس)غادي نسبك اغالي
غالي: على هاد الهضرة جري الطبلة لهيه وفرشي ليا فراش مقااد فالارض نتكا فالارض ودلكي ليا عضامي فالارض وقربي الشوفاج
سكينه: تنهدات كتخزر فيه
غالي: كنتعدب فوق هاد الوطوي باغي نتسرح
سكينه: غتبقا طير حتى تقلب عليك هاد المقلة دزيت ايوا غير نقز
جرات الطبلة بزز وفرشات ليه وقادات ليه البلاصة بين الفوطوي والتلفازة وحطات ليه المخدة وتلاح ختى تكواناسا شاد جنبو وتقلب على ضهرو
غالي: مسدي ليا ضهري مزياااان وعنقي … تهلاي فيا … اه متحبسيش حتى منبقاش نتحرك كاع وغطيني
زفرات كتشوف فيه وجمعات كمامها قربات الزيت وجلسات حداه كتمسد والشوفاج حداها حتى قالت صافي واقيلا نعس ونطق قال
غالي: والله تا خصني لعصا كنمشي نخسر لفلوس فالمساج وانا عندي فيليبينية فالدار
سكينه: كتمشي دير المساج!!!! فين؟
غالي: كنت كنت مابقيتش
سكينه: حلف مابقيتي كتمشي ديرو ؟!!
غالي: شي مرة وحدة صافي
سكينه: اييييييه !!!! كتمشي دير المساج وانا لا؟؟ ماعمرك ديتيني!!!
تلفت شاف فيها مصدوم وبدا كيرمش ورجع ضحك وتكا مخبي وجهه
غالي: واش باغا تمشي؟؟
سكينه: ومالي منمشيش علاش ماقلتيهاش ليا كتمشي بتخبية زعما
غالي: ماكانش فراسك
سكينه: عرفتي ديال لي ضربك بهاد المقلة والله… يا نعيشو بجوج يا نموتو بحوج نتا دير المساج وانا عمرك فحياتك درتيها ليا تا بضحك
غالي: كندير ليك انا المساج
سكينه: انا بغيت نمشي لسونطر عندهم فوق البياص ويديروه ليا فيليبينيات
غالي: وصافي دابا تا لشي نهار اصلا مغنبقاش نمشي كاينة نتي
سكينه: لق٠٠٠وي على عينيك قالك كاينه انا غنمشي انا وياك
غالي: صافي سكتي باغي نعس (بعد صمت) لسانك شحاللل…
عقدات حواجبها مارداتش عليه وهزات تيليفون حطاتو فوق مؤخرتو دارت اليوتوب كتفرج وجالسة كتمسد وتعاود حتى بدا كيشخر وعفا عليها الله ناضت غطاتو وطاحت كاو حداه فوق الفوطوي تغطاا بالكاشة ونعسات لاول مرة فحياتها مع لحداش
غالي حسبها غيرة لاكن فالحقيقة مكانتش غيرة.. او مكانتش مدركة لشنو كيوقع فداك السن وبداك العقل لي كان عندها والثقة الزايدة فراسها بزاف ، مكانتش كتفكر بزاف او تلاحظ او تغير ! كان كتشوف راسها غير هي لي كاينة ومن المستحيل غالي يشوف بنضرة اعجاب لشي وخدة غيرها وهادشي خلاها ترتاح وتعيش بلا حس الغيرة وكانت كتلقا مبرر صادق لكل افعاله بالرغم من انه مكانش كيدير شي تصرفات صبيانية وكان بعقلو كيعرف اش كيدير عكسها هي.. كان كيغير لاكن فالحقيقة عمرو عبر ليها او خلاها تحس،، وكان كيشك ويبحث وراها لاكن عمرها لاحضات شي حاجة او حسات بيه مراقبها واخا مكانش بنيتو يسيء فيها الضن لاكن حسب معرفتو بيها كيقول ربما تغلط ومزالة طايشة ومزالة مامستوعباش انها تزوجات وخصها تحدف شحال من حاجة من حياتها كانت كديرها، كان متأكد انها متقدرش تخون خيانة مقصودة لاكن عندو تخوف طيح فشي فخ او تمشي فالهاوية ويتضحك عليها وتخرب حياتها بيدها . هي حانت كتشوف تيقتو فيها عمياء.. بحكم الحرية المطلقة لي كان مخلي ليها،، تخرج ودور وتمشي فين بغات من غير دخول لديور الناس واخا يكونو صحاباتها كان شرطو الوحيد باش يرتاح فدماغو وكان كيأكد عليه فكل مرة سمعها كتعاود على صحاباتها وشنو دارو وفين مشاو. لاكن واخا كانت عايشة الحرية ومكانتش حاسة بمسؤولية الزواج بثاثا والفرق اللي وقع فحياتها زاد بيها للافضل. رتاحت نفسيتها وسكنات بوحدها وكدير لي بغات وكتسهر كما بغات وكما كان كيعجبها وحتى واحد مكينكر عليها.. كان النكير منعادم عندهم فالدار وكان همو الوحيد متعطلش بليل ودخل فالوقت وتفوت عليها ديور الناس وتلبس محتارم ولو غير شوية. مسألة اللباس رتاح من جهتها بحكم دخلو فالشتا وكتلبس حوايج غلاض عليها لاكن التعطال بليل كان كيخلق ليهم مشاكيل بعد المرات .
بدون علمها كان لعب بتيليفونها ودماغها شوية باش تفهم والو وهاكا يبقاو الرسائل كلها اللي كيوصلو ليها والمكالمات كلها كتوصل ليه حتى هوا فتيليفونو وكان كيتجسس عليها وعمرها لاحضات هادشي ولو غير شوية، وحسب خبرتها فتيكنولووجية قليلة كان كيدوز عليها شحال من حاجة بلا متحس ولا تفهم بحال مو اللي بلوكاها ليها من لفايس ديالها باش متكونش تحت المراقبة دمو وهي عزيز عليها تنشر تصاورها وتبان فالفايسبوك .. بلوكا بزاف من عائلتو هاكا يتهنا من رياحهم حتى هما وكان من لحين للاخر كيراقب تيليفونها وحساباتها كلها بلا ميخليها تشك ولو صفر ، واحد فالمية. وهادشي خلاها ترتاح وتعيش وتصرف باريحية وكتشوف تقتو فيها عميا وعمرو واجهها او بين ليها انها تحت المراقبة واخة واخدة حريتها فالتصرف.
يتبع...
التنقل بين الأجزاء