تاج العرائس الجزء الخامس

سارة صافي ميغيسي انا غنشوف وناخذ قتي ونرجع ليك ..ميغسي بوكو

خرجات من تما وبقات السيدة متبعة ليها العين مستغربة من تصرفاتها ، اما سارة شدات الطاكسي رجعات لدارها ومع الدخلة لقات اسية هازة البلاطو فيدها شافت فيها وخرجات عينيها كتمشطها بنضراتها

اسية: فين مشيتي؟؟ منين جيتي

؟

سارة: كنت عند مول تيليفونات تهرس ليا تيليفوني

اسية: قولي هرستيه ماشي تهرس ليك… واش دابا نتي مرى نتي؟؟ تخلي راجلك ناعس وسط الدار مالو كلب؟؟

سارة: هوا اللي بغا ينعس تما اما انا مشيت عندو قلت ليه رجع بلاصتك مابغاشيرجع

اسية: بنص عين) بااز ولاهيلا بااز

مشات للكوزينة خلاتها كدور فعينيها حتى عيطات ليها

اسية: ايوا اجي دوزي على هاد الماعن هادو

سارة:طلات عليها) منال وهند مزالين ناعسين؟

اسية: جاتها الضحكة) دوزي دوزي هه.. دوزي غسلي ميعناتك واش البنات خدامين عندك .. مانعسو لبارح حتى جمعو الكوزينة دالعشا اللي درنا لباك ومك عاد نعسو..دوزي عليهم يالاه ودوزي الجفاف لارض

شافت فيها سارة بنص عين وبدات كتنهد ومشات للكوزينة كتشوف فداكشي..مكانوش اواني كثيرة دغيا زربات عليهم ودوزات على الارض لاكن اسية ماخلاتهاش تجلس بغات توريها حق النعاس اللي نعس ولدها وسط الدار وهي فبيت النعاس.

اسية: الى ساليتي اجي نخملو هاد الصالة هادي.. تبزطات بالجلاس

سارة: لاالا غير خليها حتى تجي شي مرى تخملها

اسية: وحنا شنو كنديرو هنا ؟؟

سارة: انا كنبغي نرتاح لويكاند

اسية: غير اجي انا نعاونك ..يالاه اجي راه حتى الطبيبة كتشقى وتخمل

قالتها وخرجات لسانها كضحك وتسناها حتى تمات جايا بالبيجامة كدور فعينيها وبدات اسية تهز سدادر ودفع ليها وسارة كدور وسط الروينة داخت لاكن سكتات وطبقات داكشي اللي قالت ليها اسية بالحرف واخا سخفات وعرقات .. كانت غادية مزيان مابيها ماعليها حتى بانت ليها سوكي نقزات على الطبلة وهي تخطف ومشات عندها دفعاتها حتى جاتها فالارض وبدات كتجري عليها ولسوء الحظ شافتها اسية وناضت ليها نوضة خيالية على القطة وناض الصدع والغوات وناضو البنات كيجريو لقاو الدار مقلوبة واسية دايرة حالة وسارة كتبكي مابغاتش القطة تبقا فالدار.. بداو يهدنو الوضع حتى دخل غالي لقا الروينة فالدار ومع الدخلة قطعات اسية الحس تقول ماشي هي اللي كانت كتجدب ..اما سارة كتحلف ماتبقا ديك القطة فالدار كدور ومشات للبيت وزدحات الباب.. زاد غالي جوج خلفات لداخل كيشوف فيهم وقال

غالي: اش كاين؟.

اسية: واالو.. ناضت قالت ليك سوكي ماتبقاش فهاد الدار.. اش دارت ليها هاد البكمة بغات تخرجها مع الباب؟؟

منال جات تهضر وضار هز صبعو وخررج فيها عينيه حتى دخلات فبعضياتها مافهماتو والو وقال بنضرة قاسية عمرها شافتها عندو ولا عرفاتها

غالي: نتي غتسكتي ومانسمعش صوتك

اسية:مادارت والو هي اش دارت ؟

هند: اوييلي غالي!! راه مادارت ليها والو

منال تحقنات فيها النفسيقات كتشوف فيه عمرها توقعات منو يقمعها او يدور فيها بحال ديك الدورة وغرغرو عينيها بقات ساكتة وهوا قالب وجهه وهاز راسو مشا للمطبخ ووقف كيشعل الشوفو وتبعاتو منال كتشرح ليه باسى وحزن وهوا ساكت عاطيها بالضهر

منال: والله مادرت ليها شي حاجة اغالي تيق بياونعل الشيطان.. واش انا غندخل فيها انا جيت غير نفك

غالي: ضار عندها كيحرك راسو بالايجاب) نتي كنت غاالط فيك..

منال: علاش اشنو درت؟. (كتبكي) غير قولي شنو درت

غالي: بغضب) مايجيش صوتك على صوتي.. منشوفش خيالك قدامي

منال: شدات فيه) غير قولي اشنو درت والله ماتشوف وجهي

غالي: بغضب قلب وجهه) ماعرفتيشاش درتي. سيري شوفي اشنو كتخرجي على فمك ولمن …لواحد يأمنك على اسرارو

منال: والله متفهمت علاش كتهضر والله متقلت ليها شي حاجة

غالي: شكون عارف سوكي من غيرك؟ لمن قلتها من غيرك؟ يالاه جاوبي(داز من قدامها) صافي سالينا… (ضار شار بيدو) خليك تما وبقاي بعيدة هانا علمتك

غالي دخل للدوش ومنال جلسات مع الحيط فلكوزينة بغات تحماق وشدات راسها كتبكي واسية ومنال كيدورو بيها ويسكتوها بقات فيهم وقطعات ليهم فالقلب

منال: انا شداني حتى نفتح فمي شدااااني…باش هي عرفات القطة جات من هنا ولا من تما ياسيدي ربي الحبييييب

اسية: وصافي تعرف ولا نجلس ماتققسيش راسك العرس قريب ونتي كتمرضي راسك ..اللي بغا يوقع يوقع

هند: وا مديريش فراسك هاد الحالة عرسك قريب

منال: ماخصني عرس ما بغيت والو انا باشمن وجه غادي نشوف فغالي مابقااااش عندي الوجه ياربي كن مت قبل ما نفتح فمي… شكون قاليها شي حاجة باش غتعرف باااش؟ هوا عاود ليا غير انا وانا اللي خماتاًة انا انا انا (كضرب فراسها) انا اللي حمارة

جاتها السخفة بالبكا وهند كتشد ليها يديها واسية مفقوصة ..مشات دفعات الباب على سارة لقاتها كتهضر فتيليفون وناضت ليها

اسية: مالك مع القطة نتي واش خرج ليك العقل ؟؟؟ اش بغيتي عندها ؟؟

سارة: يا انا يا ديك القطة فهاد الدار

اسية: ها الباب وها الطريق يالاه تبعي مك

سارة: غادي تخرج ديك القطة

لاحت الهضرة وربعات يديها واسية كتغدد وتشوف فيها حتى خرج غالي عاوتاني الصدع و دخل للبيت خرج مو وشد الباب وخرج عينيه والفوطة على كتفو كحلة شاف فسارة

غالي: بغضب؟ شكاين؟؟ مالك على هاد الروينة اشمن مشكل عندك؟؟

سارة: دورات وجهها ) هاديك القطة تخرج ماتبقاش هنا

غالي: علاش غتخرج جالسة ليك على راسك؟ مالك قلبتي لينا الراس هاد السيمانة ياك لاباس

سارة: منين جبتي القطة؟ جاوبني

غالي: بغضب) نهار جيتي لقيتيها هنا قلت ليك كادو علاش كتنبشي دابا ؟ فين باغا توصلي؟

سارة: القطة عطاتها ليك صاحبتك كادو ياك..صاحبتك اللي سميتها سكينة وكنتي غتسطا عليييها ياااك(بدات كتبكي) علاش تزوجتي بيا اناااا ؟؟؟ علااااش؟

غالي: بغضب) واش نتي مريضة ولا مالك؟؟؟ منين جبتي هادشي

سارة: بالبكا والغوات) ودني كيسمعو.. انا ماشي حمقة غاتحطني فالدار وتخرج دير اللي عجبك ونبقا نتفرج فيك.

غالي: دابا فين عندك المشكل؟؟؟؟ ورييسني المشكل فيين كاين؟!!!

سارة: تخرج القطة من الدار

غالي: ماعندهاش فين تمشي..نرميوها !!

سارة: ماشي شغلي المهم ماتبقاش هنا

غالي: زفر بغضب) مابغاش تفهمي؟ ،،، شكون ما كان عطاها لياااا شكو ما بغا يكون راه صافي داااز(لاح يدو وراه) داااز ودابا الهضرة كووولها على حيوان… واش كتفهمي ماشي على شكون جابو ولا شكون عطاه ليا.. حيوااان هادا عاش فهاد الدار وسط هاد الناس مكيعرف لازنقة لا كيفاش يصيد ومربي فدااار فدااار فهمني فدااار مغنرميهش ويوثع االي بغا يوقع..عجبك الحال مرحبا ماعجبكش اللي عجبك نديروه..هادشي هادا طلع ليا فالراس والصدع نايض من والو ..واااالو مكاين والو (نفض يديه) داكشي كامل اللي كيدور ليك فالراس من الصباح حتى للعشية مامنو حتى حاجة غير فريع الراس

سارة: كتمسح عينيها)ماشي حيت عطاتها ليك ديك البنت

غالي: بملل) بففففف… اخر مرة غنجاوبك وندمت اللي هضرت معاك عليها وحسابني بعقلك غتجاوزي هضرتي ونعيشو بيخير… حلي ودنيك مزيااان.. هاديك مشاات.صاافي سالينا ومكاينش مشروع للرجوع ولا تخطيط سالينا كتفهمي سالينا.. صااافي فاات اللي فات ومشا اللي مشا

سارة: كتنخصص)باقي كتبغيها؟

غالي: مسح ع وجهه وشاف فالارض ساد عينيه مطولا بتعب ورجع مسح يديه)مكاين لا كنبغيها لا تا وزة..صافي؟ دابا نقدرو نعيشو مرتاحين وتخلي عليك ديك القطة تعيش

سارة: عطيها ليا نديها لدارنا حسن

غالي: سمعتي اش قلت ليك…هضرت بزاف وراسي ضرني..هاذ الموضوع مانعاودش نسمعو ..ولا غنوصولو لشي حوايج خااايبين

لاح الفوطة وقلي وجهه خرج وزدح الباب خلاها كتمسمح عينيها وتفكر وتعاود هضرتو فراسه

الايام كحلة كدوز عند سكينة تحت.الضضغط من اصعب الايام اللي كتعيش فدارهم واخا ماكلات عصا ما سمعات هضرة لاكن انقلاب بناصر عليها والتهميش واللي كتعيش مرضها وكمل عليها ..زيد عليها المحل اللي سد ليها بالفقصة ديال الدار اللي شرات بلا خبارو وخلاها جالسة كتبكي صباح وعشية وتندب حضها وخايفة شي نهار تحل المحل تلقا راسها تهرسات والكليان هرب.. هادي اكثر حاجة كتخليها تحقد على بناصر وتكرهو هوا السدان اللي كيسد عليها المحل ومعارفش باللي فكل مرة سدو ليها وعاود حلو كيهرسها وكتبدا دير فبلاصة الجهد جهدين باش ترجع توقفع رجليها.. فكل مرة كتقول صافي غادي انطالق ونبدا نحقق احلامي كتجي شي حاجة اللي تقسمها وتخليها تعاود من اللول وتعطي من طاقتها وتفسيتها وجهدها .

هاد المرة الفقصة ك طعناتهم بجوج ..هوا تشل من الخبر وماصدقش وكأنه كيحلم وعمرو توقعها وهي تشوطات بالجلسة اللي جلسات فالدار والكونط عندها خاوي مافيه حتى دوهم وجلسات ماتكسابما تعلام تقول عمرها ضارت عندها شي درهم..مجرد التفكير انها مكتملك حتى فلس كيخليها تقج راسها وتشعل فيها العافية وتكره وجود بناصر وشي مرات كتمنى ليه الموت ويغبر من حياتها الى الابد باش تقدر تهز راسها وطلق الجناح.. كان موتو كيخلعها ومكتقدرش تصور المنضر لاكن فالآونة الاخيرة حسات بقلبها بدا يكحال من جيهتو وبدات تشوف فيه بنضرة خايبة ورجعات كتفكر غير الحوايج الخايبين اللي دار ليها ونسات كل ما هوا جميل ومابقاتش قادرة تتحكم فمشاعرها اتجاهه ..اما هوا نقولو حطها سطل بلا تقرقيب..كيف كاينة كيف مكايناش.. المهم تجلس فالدار وممنوع الخروج وفنفس الوقت مابقات عندها بلاصة ومابقا عندها اعتبار وكأنها منبودة .

دوزات الشهر اللول كحل وفاش دخل الشهر التاني لقات راسها ماعندها ريال وخصها تبدا تجمع للدار .. اما بناصر سكت حتى عيا وتفركع كينكر وهي كتسمع واخا مكيوجههشليها الكلام مباشرة وكيهضر مع مونية وسط الدار

بناصر: من نهار دخل علينا داك الحانوت وحنا فالهم والمشاكيل ماشفنا النهار الزوين.. ماربحنا منو والو من غير الصداع يخخ.. هاهوا مارد حتى ريال هاد الشهر

غززات سكينة دفرها فالبيت وشافت فرانيا كتفقص وقالت

سكينة: ساد عليا هنا ومطرق الحانوت وبغاه يدخل مافهمتش كيفاش كيفكر .. قالك من نهار دخل علينا ماشفنا النهار الزوين .. كل شهر كيشد فلوس الكرا وعاجبو المشروع ودابا نكر كلشي نسا كاع داكشي الزوين

رانيا: شادة تيليفون متكية) واطلقيييي ليه حانوتو وعطيه التيساع..ماحدكم مشاركين فين والله ماتهناو عطيه سوارتو وهنيونا من صداعكم هادشي طع لينا فالراس

سكينة: ياك كيشد فلوس الكرا اش بغا

رانيا: ونتي اللي مشيتي بعتي وشريتي نتي يدير فيك شيواحد التيقة؟؟ عايشة معانا ودايرة شرع يديك ماعندك واليدين بحال الى باك زعما زايد ناقص

سكينة: وا هوا اللي مابغاش ياك قلتها ليه

رانيا: صافي غير قاليك لا مشيتي درتي اللي قالك راسك..باااز… راه ولي امرك هوا المسؤول عليك ماعندكش الحق ديري شي حاجة بلا خبارو..البنت ماحدها فدار باها كتبقا تحت السلطة دباها حتى كتزوج وكترجع تحت العصمة دراجلها وعمررها مكدير داكشي اللي بغات هي واللي قاليها راسها

سكينة: صافي سكتي شداني كاع نهضر معاك .. خرا .

دورات وجهها وربعات يديها كتحاك وتخمم اش دير والشهر داز عندها بحال العام .. عيات تفكر وتبلانيباش تخرج من داك الحبس وداك الضيق فاللخر هزات تيليفون ومشات للطواليط سيفطات لانوار ابيل موا وغير عيط ليها طلبات ليه روشارج ..من بعد ما وصلاتها عيطات بسرعة ..

سكينة: الو فوز…..سمعي عطيني نمرة ديك ختنا اللي كتدي للامارات….،،،، غير عطيها ليا ولا هضري معاها قولي ليهت عليا ….صافي اختي غير تديني طلع ليا لخرا كرهت مها هاد الحياة فهاد الدار (بدات كتبكي) اختي الموت ولا هاد العيشة دالمرض …. لالالالا صافي يمشيو يتق٠٠دو كاملين من عندي انا و الله منعقل على جد امو شي واحد فيهم ….. غا دوي معاها تشوف كي دير ليا راه كاااع فلوسي حطيتها فالدار كلللها مابقا عندي حتى ريال وخاصني نجمع باش نكملها فاش نبغيو ناخدو السوارت.. وانا دابا جلسني (مسحات عينها) جلسني فالدار وسد ليا الحانوت ضد فيا…. بغيت نموت …عاطياها للبكا والمرض تفووو.. يالاه ختي شكرا

قطعات تيليفون كتنخصص وغسلات وجهها ومشات خرجات لقاتو مزال كينكر وكيقول لمونية نكريه بحوايجو الشيء اللي خلا سكينة كتشوط وهي كتسمع حتى مشا ينعس وناضت للكوزينة عند مونية كترعد

سكينة: كيفاش غيكريه وانا ؟؟

مونية: كنشات فمها) بيناتكم انا ماشي شغلي

سكينة: هضري معاه قولي ليه داك الماطيرياال انا اللي شريتو

مونية: منقوليه مايقول ليا انا بعدو مني ماتصدعونيش فراسي..طبختوني.. بيناتكم وشغلكم هاداك

بقات سكينة كتشوف فيها بنضرات الكره والحقد وكتغزز سنانها وقالت بحرقة

سكينة: عنداك شي نهار تبكي عليا.. وا عندااك .. عنداك تسخفي ليهم هنا وتبداي

مونية: شدات راسها) واقهرتووني.. ماشي شغليوا بيناتانكم بعدو مني..منقوليه ميقوليا

سكينة: واخا

ضارت جهة البيت ومشات كتتحاك وتاكل فراسها بغات تموت بالفقصة وبغات دير شي حاجة تبرد بيها على قلبها..المهم اي حاجة كما بغات تكون تكون .. طفاو الاضواءوكلشي تقلب نعس الا هي اللي مخرجة عينيها فتيليفون كتحرت فالميساجات وتكتب وصبعانها كيطيرو

سكينة: شووف. الى بغيتيني اجي خطبني من دارنا انا مابغيت لا خاتم لا فلوس اجي خطبني بعدا عاد نشوفو داكشي لاخر

انوار: مزال مواجدش احبيبة جيتيني على غفلة

سكينة: قلتي باغي المعقول ياك؟ وايالاه جيب داركم واجي الى ماجيتيش ضربعاى هاد النمرة فمرة ماعنديش الوقت اللي نجلس كنضييع معاك

انوار: وصلنا لهاد الهضرة!!

سكينة: شوف اخويا عرفتي شدير .. ضرب على نمرتي مالنا على هاد الفيلم هادا كاامل.. ماناوي زواج صافيالله يعاون .

بلوكاتو معصبة وبدات كتشطح برجلها والنعاس طار ليها بغات تفش خلقها مالقات معامن ..بقات هاكاك كتقلب وتخمم حتى ضرها راسها وبدا النهار يطلع عاد فاقت وكان يوم الاحد… الاحد اكفسايلم حياتها فيها كيجلسبناصر راحة وكيقابلهم غير هما بحال الى راهم فالعسكر.. يفيق مع التمنية ويبدا يفيق فيهم وخاصو يشوف كولشي موكض وكلشي كيتحرك باش ميقنطش ويجيه اكتآب وكأنهم بداك الحركة كيفوجو عليه. حط ليهم السطل وعطاهم يحكو السراجم وينقيو ويسيقو وخرج يجيب الحوت وخلا مونية فالموزينة كطيب الغدا مع التسعود ورانيا كتحك الزليج وسكينة واقفةكتشوففداك المنضر وتنفس بسرعة والمعدة واقفةليها كتردد بلسانها

سكينة: وااخا.. كيحساب ليه غادي يقول ليا شا شا را را.. انا نورييكم كاملين

هزات راسها وبدات كترعد ماقدراتش تردخ لداك الامر ومشات هزات القرعة دجافيل قدام مونية وهبطات عليها شرباتها بالزربة حتى طيراتها مونية من يديها وغوتات مخلوعة

مونية: اويييلي واش هبلتي

سكينة: والله حتى نخرج عليكم بيا ولابيكم فهاد الدار

مونية: كضرب فخادها ) اش درتااا ليكاش درناااا ليك

سكينة: اش درتو ليا!! وكنكرههههكم ومكنحملكوووومش نموت ومانعيش معاكم

بدات كتغوت وعينيها خارجين حتى شوية بدات تكرع وبدات تشد فكرشها ورجعات حمرا ،، مونية تخلعات بدات كتشد فيها ورانيا كتغوت وتسول اش واقع امت سكينة دفعات مونية وقالت مخرجة عينيهت

سكينة: بعدييي مني… ماتقيسيش فياااا بعدي مني خليني نموت ولا نبقا عايشة معاكم

كان مرتاح وسط الشارع بين الناس كيتسنا مول الحوت يجمع ليه الميكة حتى جرو انس من سروالو كينهج سخفان عطاه الخبر لكحل اللي خلاه جر الميكة ومشا كيجري للدار ..دخل وزطم فالماء والصابون صفر بالخلعة لقاهم شادينها فالارض كتقيا ومقلوبة على وجهها والكشاكش خارجة تقول غير ماكينة دصابون كانت كدور وتحلات،، رجع وجهها صفر وعروق عنقها خرجو ومونية كضرب فخدادها وبناصر كيسول اش واقع .. تلف بدا كيتفتف على السوارت ويلعن النهار الليفكر فيه يتزوج ويولد وهزوها كيجريو بيها للطموبيل كيتفتفو بالخلعة داوها للمستشفى غسلو ليها مسارنها وردو فيها الروح وحطو ليها الاكسيجين وخلاوها ناعسة تقول مانعساتش ميات عام،اما مونية وقفات مع الحيط مربعة يديها حدا بناصر بجلابة كلها مكمشة تحت منها السروال دالبيجامة خارج ملون والصباط والشال فالليموني وحالتها حالة

مونية: خلي للدمر الحانوت ابناصر انا مزاوكة فيك… خلي ليها هاد الحانوت اللي بغات طيح لينا عليه الروح اللهم الحانوت ولا توقع شي كارتة … عطيها الزمر وخليهت تشري الدار ولا تجلس ضبر لمحاينها ياك فلوسها ايوا خليها ضبر راسها الله يرحم الواليدين… يخ م هاد الحانوت وهاد الويل اللي من نهار حليتوه ونتوما مشادين عليه

شدات راسها ودورات وجهها كارهة الحياة وبناصر واقفةيشوف فنقطة وحدة وساكت وحجبانو فالسمى .. دوزو داك النهار فالمستشفى بلاصة ما يدوزه فالدار كيتغداو بالحوت وشي منفخ على شي ،، تفشو كاملين وكل واحد دخل سوق راسو وخرجوها فلعشية ردوها للدار وفيدها صاك ديال الدوايات ووجهها اصفر ماهضرو معاها ماتكلمو معاها حطوها فبلاصتها وحتى هي تقلبات نعسات وعينيها معقلوبين سخفانة وكتنفس بزز ..

كانت هاديك السبب اللي خلاهم يدورو وجههم عليها ماتحاسبو معاها ما جبدو الموضوع ..كل واحد هاز همو ومتكي عليه حتى بدات توقف شوية عاد مشات مونية مدات ليها السوارت ليدها دالحانوت ونزلات ليه حلاتو وبدات من جديد عاوتاني كتشوف فيه وتخمم كيفاش دير تبدا الخدمة .. حتى من الحانوت الجديد اللي خططو ليه يحلو وقفو الفكرة بسبب اللي وقع ورجعو من جديد كيخططو وناضت كتعزل التكاشط اللي يحطو فيه وتفرق السلعة بينما سارة كتخمل وتنقي .. شدات واحد الكرسي كتفكر وبدات تصوني على النماري اللي عندها واحد واحد.. ها مول القاعة ها المصور ها تريتور ودارت معاهم بيع ومقال اي الليسيفط ليها عروسة وشداتها تعطيه واحد خمس ميات درهم .. اما ليلى دارت معاها باك مجموع فيه التنكاف والمكياج والشعر بثمن مناسب باش دور الحركة من جديد.. حتى من البنات اللي كتعرف والكليان علماتهم انه اي وحدة جابت ليها عروسة دور معاها مزيان وهاكا بدات كدور الناعورة من جديد وبداو المصورين كيسيفطو ليها والسمسارة دالقاعات دالحفالات والمعارفاللي كتعرف والممولين دالحفلات والدقايقية وزيدوزيد .. اي واحد فالميدان دار يدو حسب كلمتها وفعلا بدات تهبط الاثمنة وتعمر التواريخ ودور مع هادا ومع هاداك ومكانش كيهمها الثمن بقدر ماكيهمها تشد اكبر عدد من العراسات . شقات بزاف ديال الطرقان من اجل الربح والتعويض وشعلات فيها النار وماحد الحساب ديالها مزال ما طلع للمستوى اللي يخليها ترتاح نفسيا وفكريا فمكاين لا خروج لا دروج لا حتى حاجة من غير المحل وتقابل الكليان واحد واحد وتسنا فيهم على احر من الجمر وهي كلها خوف وهم وغم بسبب قلة المال .. حتى مابقات كتفكر فحتى حاجةمن غير الفلوس وتشوف الحساب عمر وترجع كيف كانت .. اما مجرد الفكرة ديال انها عمرها ترجع كيف كانت كتخنقها وكتختر فيها الدم وتسكت ليها القلب والدماغ

الاسبوع اللول من الخدمة دازو فيه جوج عراسات واخا ماشي شي عراسات حيت غالبا فالاول كيكونو مناشبات خفيفة غير فالديور وكيكريو الماطيريال فقط بحال الحنة .. لاكن اللي مرال عاطيها امل هوا العراسات اللي مخجوزين عندها باشهر قبل ما توقف الخدمة وتعلم العرايس اللي حاجزين عندها انها متقدرش تخدم ليهم وبقاو كيتسالوها الفلوس وكان خاصها ترجع لكل وحدة فيهم التسبيق ديالها وكانو عرايسات كثار بحكم انها كانت غادية فالخدمة وفأوج العطاء وفشهر سبعة اللي كيكونو فيه العراسات بزاف وهي معروفة ..كانت شادة فداك الشهر اكثر من عشرين عرس منهم الكبار والصغار وحتى واحد فيهم ماخدماتو ومجبرة ترجع التسبيق اللي شدات .. فكان واجب عليها تخدم على التسبيق اولا باش تردو عاد تخدم على المدخول كتحاول تجلب العرايسات وخايفة تكون شاعت عليها صمعة خايبة فداك الشهر ويقولو ماعندها كلمة وتفقد المصداقية و ماتبقاش كيف كانت ..فكرات مرارا وتكرارا وبغات تدخل لباسي جداد لاكن الجهد فالمدخول قليل وعاد بدات كطلع الدروج درجة بدرجة ،، خدات الدرس من اللي وقع وتشبتات بفكرة المحل الثاني اكثر باش حتى الى وقع ليها نفس المشكل على الاقل تلقا مصدر رزق اخر وتخدم بلاصتها سارة .. والا فهاد المرة غتودع الميدان الا الابد الى عاودات نفس التعامل مع عرايس جداد ميعاود حتى واحد يدور عندها او يتيق فيها..هاد المرة لقات ليها تخريجة وتحجات بالسرقة وقالت انه دخلو عليها الشفارة وسرقو ليها المحل ومابقا عندها باش تخدم لاكن المرة الجاية حتى واحد مايلتامسليها العذر.

سبقات من افتتاح المحل هوا الاول وسارة كانت واجدة وباغا حتى دخل شريكة وتبدل من وضعها وجمعات الفلوس باش يبداو .. لاكن الخطأ كيتكرر من جديد وسكينة كانت عارفة راسها كتعاود نفس الخطأ مع بناصر وغادير شرع يدها بلا خبارو واخا تمنات تقولها ليه ويخططو بجوج باش تبعد من المشاكيل لاكن ماشي وقتو وماشي فوضع اللي تجلس تهضر ويسمع ليها ويعطيها الخاطر وهما فوضع حساس كل واحد محسوس من لاخر . فضلات تسكت ومايجيب خبار حسن ومشات هي وسارة تكاتبو مع مول المحل ودارو معاه عقد كرا بحي كريمة فسلا.. احد الاحياء المشهورة بالتنكاف والشارع طالع كامل بالمحلات بحال شي شارع ديال الذهايبيبة..تعمدو يحلو تما لان داك المكان هوا الص كيقصدو العرايس بزاف حيت فيه كاينين بزاف دالمحلات وبزاف دالاختيارات وحطو راسهم بين الريوس حتى هما وعولات سكينة دخل معاهم فمنافسة وكانت متأكدة انها غادي طيح عليهم البق حيت اللي كيصمم ماشي هوا اللي كيشري ويعلق.. وهي كانت كتصمم وتخيط بدوقها اما الباقي فداك الحي كانو كيشريو ملابس جاهزة ويضيفو عليها تحسينات بحال التنبات مثلا وكانو كاملين عيالات حرايفيات وقدامات فالحرفة لاكم الدوق ماشي حتى لهيه عكس سكينة بنت الوقت وكتعرف لعجب وحاضية غير شكون لبس شكون شرا واشمن موضة واشمن لوان وعزيز عليها الاختلاف والفصالات المميزة . دخلو على المحل مهجور على الشارع مقابلين مع جوج نكافات وعلى ليمين نكافة وتلى ليسير كذلك والشارع كما طالع عامر بالبلدي.. زربو عليه بسرعة سيقوه ولسقو ليه بابيي بان كلاسيكي عطا منضر وترية صغيرة لوسط ولسقو العلاقات فالحيوط وريدو للتبدال ومرايا فقط.. مكانش مصلوح كفاية نضرا لقلة المال لاكن اكتفاو بداكشي اللي يحتاجو ومشاو هزو من المحل اللول غير الملابس الزوينة العاطية العين باش يتشهرو حتى هما وبداو الخدمة وتفرقو كل وحدة شدات محل وجلسات مقابلاه .

الحياة صراعات وكل واحد فين كيصارع ، شي كيصارع على الفلوس وهمو الوحيد الحساب البنكي ديالو ،، شي كيصارع على شريك الحياة واللي فيه مامهنيه ومقادرش يشوف الراحة ولا يستمتع بالحياة ،، وشي يالاه يستاعد ويشق الطريق باش يدخل للقفص الذهبي بحال هشام ورانيا اللي من بعد نقاشات و اخد ورد تافقو على الخطوبة الرسمية اللي غتشد ليهم عماين عاد يديرو العرس بقرار من بناصر..وطبعا هاد الاخير متشبت شدّ التشبث بالعدات والتقاليد والاعراف ديالو وكيمشي حسب الاصول باش ميخليش الفام تتحل عليه ..وفالعادات ديالو كيعرف حاجة وحدة ووهي الخطوبة خاصها دوز بالاشهار وبالعائلة وبالطبل والبندير باش يوري للناسان بنتو راه مخطوبة وراه الداخل والخارج عندهم ماشي براني واللي هضر على بنتو يسمع خل ودنيه هادي من جهة وامام الناس اما بينو وبين نفسه فهوا لا يعترف لا بخطوبة رسمية ولا بخطوبة غير رسمية وممنوع كليا الانفراد مع الخطيب او يعتابروه اصبح فرد منهم ويرخيو العنان لبنتهم فقط لانها مخطوبة بيه والناس كلها فراسها.. بالنسبة ليه قدم للناس الواجب اللي خاصو يتقدم لاكن فالحقيقة وحسب تفكيرو هوا فالخطوبة مكتسوا عندو والو قدام العقد والزواج وممنوع على الخطيب يقرب ليه لبنتو ولو بلمسة يد.. وهادشي اللي كيضل يشرحو لرانيا ويخرج فعينيه ويهدد باش يزيح ديك الفكرة يديال الخطيب اللي كضسر شحال من بنت وكتمشي تعطي راسها تحت ما يسمى الخطوبة فالاخير كيخليها الخطيب ويمشي وكتبدا كتقلب على حل لراسها وتجمع التصاور وتجمع الشهود وطلع وتهبط فالمحاكم زائد الفضيحة والصورة كتبدل وكيرجعو اللي كانو كيقولو ليها راه خطيبك هما نفسهم كيقولو ليها واخا خطيبك ماتعطيهش راسك .. كيكون فالخطوبة كلشي زوين وكلشي جميل والامور طيبة ومباحة وبعد فك الخطوبة كترجع اللومة للبنت وكتحمل مسؤوليتها بوحدها وجميع الاصابع كتشير ليها هي فقط وزيد حتى عائلتها .

جا النهار ديال الخطوبة ومونية تالفة وراسها دايخ معارفة لا شنو تسبق لا شنو توخر .. تقول غير كسدة بلا عقل وغير كتتغبن وتشد فراسها فكل مرة مشا بناصر عندها كيتناقش معاها على شي حاجة .. مابغا لا صدع لا نقاش لا اسئلة لا حتى حاجة وكلشي داكشي اللي كيدوز فوق المبتغى ديالها وراحتها وفنفس الوقت باغا دير الخطوبة وباغا تحمع الناس وباغا الاشهار وعاجبها الحال كتزوج بنتها وكتحققحلم من احلامها لاكن ماقدراتش على التوجاد وماعارفات منين تبداه ..شدات راسها زيرات عليه كأنها باغا تبكي والضيم طايح عليها تكات على واحد الحيط وبناصر كيطير وينزل وكيتقلق على كاشي اي بمعنى فيه الزربة والخفة وكينوض الروينة فالناس وهوا غير واقف فبلاصتو

بناصر: ياك قلت ليك طحني العصير فين العصير اللي غنديو دابا للناس يالاه (رجع احمر ) من الصباح وانا كنقوليك طحني العصيير طحني العصيير طحني العصيير وحضري معايا عقلك ولا راه غنتقلب عليك شي قلبة نطليك هادالنهار قدام هاد الناس اللي. راهم برا جالسين

مونية: مزيرة على راسها) وراني دخت ابناااصر دخت كل واحد منين كيجر كل واحد اش بغا ها كاسكروط ها اتاي ها القهوى

بناصر :بغضب زعزع الكوزينة) الاللة قلت ليك طحني العصير سبقووه هوا اللول يتحط يبرد فالثلاجة ماتقولي ليا لا كاسكروط لا زمر .. قلت ليك سبقي العصيير سبقي العصيير شوف شحال فالساعة دابا واش حنا فكاسكروط؟؟؟ وهاد الدار اللي كرينا وهاد الماكلة اللي كنوجدو لمن كنوجدووهااا؟؟؟ خويو عليا الدار كلشي يخرج عليا من هنا يمشيو بلاصة الحفلة اش مزااال كيديرو عندي هنا …دااااابا يتطحن داك العصير ولا والله حتى ندير فيكم شي موصيبة

خرج من المطبخ ومشاشكشو خارجين وراسو فالسما كيبلع الريق دار قدام العائلة اللي مجمعثن فالصالة وكلشي مهبط راسو وكيشوفو فيه بنص عين ويتهامسو وشادين ولادهم عندهم وشي كينخز شي باش ينوضو .. اما مونية بدات كتبكي ودخلو عندها خوتاتو اللي هما لوايساتها وكانو نعمة اللويسات عمر عيبهم بان تقول ماعندهم عيب ،، مشاو للصنادق ديال الديسير بداو كيغسلو ويشللو ويطحنو وكانو بنات البادية حارات وقافزات ولاكن العين فالارض الا وحدة فيهم وهي الكبيرة طبق الاصل لبناصر وكبر منو وعندها وشمة تحت فمها وبيضا كتشعل وحروفها كوحل وحارة والراس فالسما ديما والنفخة فالنيف هي وجوج خواتاتها وحدين اخرين .. هزات جلايلها من الارض فالحزام كمشاتهم ووقفات مستقيمة بدات كتقطع بالزربة وكتهضر بخصام وخفوت مع مونية

يامنة: قاليك طحن العصير طحن العصير بهد من الصداع امونية اش خاصك بشي كاسكروط.. الى جينا نشوفو راه عندو الحق ياك جابهم مع الصباااح غير باش يطحنوهم..فوقاش غيبردو وفوقاش غيديوهم .. خلي عليك كاسكروط واش دابا نتي مساليا؟؟؟ شوف غير الحالة ديالك كيفاش دايرة غيشوفوك الناس يعيبو عليك .. سيري دابا غييري سيري لبس عليك وقاد راسك ها حنا غنطحنو هادشي غير سير

مونية: كتمسح عينيها) اودي شمن خاطر بقا

كلتوم:الاخت اللي مور بناصر ) ماتقوليش (بصرامة) .. شكنديرو حنا هنا واش جينا نربعو يدينا ؟؟ جينا نعاونوك ولاكن فيق شوية وكوني حاارة.. كون حارة ووقفمع بنتك قدام ناسها الى شافوك هاكا غيركبو عليها هيااا .. توكضي راك نتي اللي ولدتي وكبرتي وربتيي

يامنة: كتعصر بالزربة) نجمع راسي ونحل عيني نسبق الموهييم .. مالهم هادوك الى ماكلاو كاسكروط غادي يموتو تبقاي مقابلة غير شكون كلا شكون ماكلاش لايبقا فيهم الحال !! ها الماكلة كتوجد اللي جا يبدل عليه ويزيد مع الطريق

كلتوم: الى حطيتي ليهم كاسكروط هنا غيباقاو بسيف ميجلسو.. واش دابا نتي فالخطوبة ولا فالضياف! جمع راسك شوية وشوف اش خاصاش ناقص اراه لينا حنا ناقدوه شوف غير اشنو ناقصك وشنو نديرو نديروه

حليمة:الاخت الصغرى اللي البسمة مكتخطاهاش) ارالي نعاونك شنو بغيتي ندير ليك

مونية: بأسى) هادوك البلاطوات دالحلوى الله يرحم ليك الواليدين

حليمة: فيين؟ هادو؟؟

مونية: كتنهد) لا بنات يعاونو لا خوت يعانونو لا الاه الاه وصافي

حليمة:يامنة ) البنات مغيعرفوشاااي لهادشي .. لعروسة راه مقابلة شغلها وسكينة ياربي تعطيك التيساع .. زيدها على باها حتى هاديك كتمشي مخرجة لعينين وتجي مخرجة لعينين

كلتوم كضحك: ولاهيلا الى كتعبر على باباهم ههه.. سخرها بناصر ماعرفت اش قاليها جيبي واقيلا شي بولة ناقصة مشات جابت ليه مول ديك الفيلا قالت ليه اجي صاوب الضو عطيتينا الفيلا ناقصة خخهخخخ ..ولاهيلا ماعندك ماتسالها

حليمة: وااه اوي هي حاارة مكتحشمش

يامنة: رمات راسها) خليها.. تحشم ترجع بحال مونية..هاهما خووتها دخلو لداك البيت ماسولو فيها اش خاصها ..رااهم كيلبسو ويعاودو

حليمة: مانعرف مال سكينة مع سميرة واقيلا مدابزين

مونية: كدور راسها ويدها على فمها) هييه غير سكت راها على سبة باغا تشاد مع سميرة حسن تبقا برا بعيدة ما يديرو لينا شي فضيحة

في فيلا متسوطة الحجم مت كبيرة ما صغيرة خاصة بالمناسبات .. و اقفة سكينة بالجلابة والشعر مكمش اللور كتهضر مع شاب ثلاتيني من اصحاب الفيلا وكتوريه البولات بصبعها

سكينة: البولة ديال الطواليط حتى هي احمد

احمد: خدامة عاد السيمانة اللي فاتت بدلناها

سكينة: واسير شوف واش خدامة .. والدروج حتى هما ..غتشعل لينا لبروجيكتور ديال الضو

احمد: ماتافقتش انا والحاج عليه!

سكينة: واشعلو لينا دابا زعما تا جيت انا عاد تافقتو ماتافقتوش

احمد: كيهز الضو عرفتي شحال من واط فيه قنبووولة

سكينة: وا صافي دير زوين دير اصلا التصاور مغيجيوش زوينين.

احمد: كيحك لحيتو) وماعرفت شغنقوليك

سكينة: شافت البرزة) احمد غشيتييني

احمد: دور وجهه)فااش؟

سكينة: فين هوا الديكور اللي كيكون ورا البرزة دييما كنجي كنلقاها زعما تا جيت انا وحيدتو

احمد: في حيرة) كيتكراو هادوك اسكينة العروسة اللي كتكريهم

سكينة: امم…. ابا تكري لينا ؟

احمد: بحرج) صاافي بغيتيهم غنهزوهم لسقوهم بقاي على خاطرك

سكينة: مالك اصاحبي على هاد الحسابات ناااري كن البراني مايديرش معايا هاكا

احمد: داكشي اللي تافقت مع باك النهار اللول درتو صافي

سكينة: وصافي دابا غا نسا داك با تا هوا هضر معايا اناااا.. قاد ليا البرزة داك الديكور المدهب ماشي التوب.. عنداك دير لنا التوب!!!

احمد: صاافي صافي

كانت كتهضر مع احمد حتى دخل بناصر على غفلة لقاهم كيهضرو وقفزها مخرج عينيه قدام احمد

بناصر: شنو كديري هنااا؟؟؟

سكينة: كتفتف) والو كنصاوبو هادشي

بناصر: مخرج عينيه) الاللة سيري عند العيالات اش جابك عند الراجل لهنا سخرتك تشري البولات سيري شري البولات ماشي تجي تجمعي ليا هنا غير والراجل بوحدكم

بناصر خرجو كشاشكو وسكينة رجعات حمرا واحمد تزير هبط راسو ومشا كحز اللور اما هي مارضاتش بغات تشرح ليه وجرا عليها خرجات كتبكي من تما تالفة ودايخة كدور يمين وشمال وتسليفون كيضوني فتحات الخط كتبكي

سكينة: الو ليلى

ليلى: خالتك تا هيا قالت ليا غتصايبعلى حسابها ولا شنو؟؟ بغات مشطة ومكياج ماعرفت اش نقوليها

سكينة: بغضب ) وعلااااش تمشي معاها للصالون علااااش هاد بنت الق٠٠٠ درانيا … شكون مشا معاها؟؟؟

ليلى: جاو معاها جوج بنات وهاد خالتك ..جوج بنات صايبو وخلصو ولاكن خالتك دخلني فيها الشك اختي

سكينة: تخلص على كرها ولا تعاود راسها مع رانيا تخلص عليها ولا دور. تق٠٠٠ ود قطعي نعيط لهاد القح.

قطعات مغددة وصونات على رانيا كترعد وصوتها فالشارع كيسمعو الغادي والجاي وهي واقفة حتى خرج بناصر زربان لقاها مزال واقفة ومشا كيجري ويتفتف

بناصر: عيط عيط لداك المصور قوليه اجي دااابا .. دااااقا يكون هنا يصور الناس داخلين كيشربو الحليب والتمر دغياااا ها الناس جايين

دوزات المصور وعطاتو لبناصر زرب عليه وبسرعة مد ليها السوارت ديال السيارة وقال

بناصر: بصرامة وقلق) سير جيب كااااع هادوك اللي مسرحين ليا تما فالدار قوليهم اللي مانزلش يركب دااابا تما يبقا واجي رجع ليا الطموبيل غنحتاجها يالاه

شدات السوارت وركبات هزات الجلابة والعرق نازل مع الجبهة والشعر لاسق عليهت متكية على المقود كتهضر مع ليلى معصبة وليلى كتشرح ليها باللي سميرة مابغات حتى واحد يصاوب ليها وكتسناها حتى تسالي وتبدا ليها .. سخطات سكينة واخا دارت معاها جميع الحلول فاللخر قالت

سكينة: قالت ليا منقدرش نحضر بشعري مشعكك وووجهي زرق قلت ندوزوها لكنزة تسربي ليها مللي دابا بدات كتشرط خليها تما انا غندوز نهزكم فاش تسالي لرانيا وخليها تجلس بلاش هااي هاي هاي على تصاوب ليا ليلى زعامة كبيرة هادي..قولي ليها كنصايب بالف درهم قوليها ليها باش تجمع كرها

ليلى: نتي واش مغنصايبيش؟!!!

سكينة: انا اختي مزااالة عاد غادة نجمع داك بورباج اللي عندنا فالدار نديه للفيلا وعندي شي جوج فياجات ولا ثلاتة ماعندهمش طومبيلات عاد خاصني ندوش كنقطر وجهي حمر غيتفركع ماعرفت اش ندير وشادني ستريس تفووو كن ماكنتش كنعرف هاد القواد دهشام وخوه كاع مانتسوق لهاد اق٠٠وي

ليلى: اجي دوشي هنا ها الدوش جيبي حوايجك واجي

سكينة: انا غنشوف اش ندير يالاه تهلاي فديك لخرية درانيا قاديها واخا متبغيش

ليلى: بسسستة وستين الف كشيفة باش خلاتني نركب ليها الشفار وماشي شي شفاااار تقولي شطاطب

سكينة: ماتسوقيش ليها ديري خدمتك خليها دوي كن كتعرف وتفهم كاع متقبل على داك الكيدار دهشام

ليلى: مهم حنا دابا فالشعر قربنا نساليو

سكينة:صافي مزيان انا غنسيفط ليها النكافة تلبسها

قطعات ووقفات قدام باب الدار قبل متنزل صونات للنكافة

سكينة: خديجة صافي هزي اللبسة درانيا اللي حطيت فالصندوق ديها ليها راه قريبة تسالي واللبسة الثانية ديوها تقطع فيها الحلوة دالخطوبة .. انا غنجي نوصلك جمعي داكشي بالزربة يالاه

قطعات وطلعات للدار دفعات الباب سخفانة كتنهج كطل هنا ولهيه وبدات

سكينة: عائلة العريس جاين اللي غيمشي يهبط دااابا غنمشي مغنرجعش فين ماما؟؟ ماما؟؟

مشات كتقلب على مونية لقاتها محنية كتقلب على فردة ديال الصندالة ونزلات كتقلب معاها حتى لقاوها ودخلاتها بزز منها بالنكير والدفيع طرفات حالتها وشالات ورجعات للبيت لبسات وتقادات وطلعات مونية شنوة منها بتكشيطة بيضاء داتها ليها سكينة والشال والصابو ومقادة ومتولة وكحلو ليها عينيها حتى بدات كضحك ويدها على فمها حشمانة ..بانت عليها النخوة والهمة والشان وحتى تعابير وجهها تبدلو تقول لبسات مونية اخرى ماشي لبسة اخرى .. جمعاتهم سكينة فالطموبيل وداتهه كاملين الفيلا شدو بلايصهم واللي عندو شي طموبيل حتى هوا مشا فيها وبقاو غير العمات فالدار كملو شغلهم وكيتسناو سكينة ترجع ليهم في حين رجعات عند النكافة وصلاتها لباب الصالون وعاودات مشات للفيلا عند بناصر اللي لقاها من الجنة والناس كتسخر ليه عاود سيفطها عند الطيابة للدار ومن الطيابة مشات جايت لكيك دالخطوبة وهي غادية جايا من قنت لقنت حتى خوات الدار وكلشي مشا الفيلا عاد هزات صاكها ومشات للصالون كتجري لقات رانية جالسة كيلبسوها ويقادوها وهي كضحك فرحانة وتسول كي جيت تقول غير اميرة وكتسول على راسها

سكينة: حيدتي الفولار هه

رانيا: امم.. جيت زوينة؟

سكينة: تبارك الله واااعرة (سهات فيها)

ليلى: بتعب) سربي دخلي دوشي

سكينة: غاا بشوية عليا دابا اصلا مغندخلش معاها ومغنلحقش تا نلحقو عليها..شوفي مابغيتش ماكيااااج …داكشي خفيف ضريف ماعنديش مع الالوان راك عارفاني..وشعري سااامبل لا مشطة لا جوج جمعي ليا جناب ولا ديري ليا شي لعيبة خفيفة(شافت فرانيا(ماهضرش معاك هشام؟

رانيا: بحماس) هضر معايا قاليا راهم واجدين كيتسنا خوه غالي دا الطموبيل تغسل

سكينة: جاتها الضحكة) اممم…شحال بيهم؟

رانيا: شي ثلاتة طبلات ولا ربعة قاليا هوا وخوتو وشي خوالاتو ولا منعرف مهم عائلة بحالنا.

الصالون على كبرو وقدو عامر بالنسا شي كيبدل شي لابس وواجد وفالحمام واقفة منال وهند.. اشمنك يا دوق رفيع لا يعلى عليه .. الزين والشعور والمكياج ما قل ودل والتاويل والانوثة فكل حاجة..اليدين بالمجوهرات الرفيعة والاصابع مزينة والقفاطن عصرية شهوة منها ..منال طالقة الشعر زعر ملوي على طولو وهند موراها كتقاد شعرها اللي لاسق فالحلاقات..العيون مكحلة براقة والقد والفصالة شهوة منهم كيشهيو فديك الوقفة والكتاف التابتة ..العطور فايحة على بعد امتار وكل وحدة كتفتن على لاخرى ..خرجو عند العائلة واجدين ومركزين غير مع شغالهم وصبابطهم العالية ..وهاهيا سارة خارجة من البيت كي الوردة مفتحة ..هاد خلات الصالون دار خدمتو وماتدخلاتش ،،برزو ليها الملامح وبان جمالها وعيونها الخضرا وشفافيها الممتلئة ولبسات قفطانها المفتوح من الامام ديال عرسها المخدوم على اليد بالاتقان والخدمة الرفيعة ..مزينة بمجوهراتها وطالقة شعرها الاشقر اللي عطا فوليم اكثر مع تسريحة كنتفخة جات اية من الجمال واكثر فالحياء والخجل .. هزات صاكها ووقفات عاجبها راسها كل شوية كتشوف موراها فواحد المرايا كبيرة فالحيط بينما ونيسة جالسة فوق السداري كطل عليها بنص عين لابسة حجابها ومتولة ومقادة والدبالج فيدها وشادة بنتها غيرة فيدها ففمها سكاتة وحاضياهم بنص عين شكون لابس شكون جا حسن منها شكون جا قل منها وكدور عينيها غير من تحت لتحت ..اما اسية لخصات الوص كاملواالي شافها يحلف عليها ويعاود بالقسم ما والدة ..كتبان صغيرة والوجه مجبد والعينين محلولين وكملات بالمكياج زاد بينها احسن وخفا ليها عيوبها والشعر ضفا على جمالها ونقص من عمرها النص ..اما الوقفة ماعليها كلام ، الضهر منتصب والرقبة واقفة وكملات بالطالون العالي تقول مولفة تمشي بيه وتنعس فيه ..الراس فالسما وتابتة الحضور ديالها وحاضية الكبيرة والصغيرة والورد فوق الطبلة محطوط والهدايا مغلفة وكلشي على ما يرام .. اما الرجال كلهم لتحت قدام باب العمارة واقفين كيضحكو بيناتهم وكلهم جد عاديين مادايرينش مجهود كبير ..اناقة بسيطة واللي عمدو شي كاريزما راه باينة عليه الا سمير.. تقول غادي للقهوى ومامسوقش لا لصباطو اللي تغبر لا قميجتو اللي لابس مكمشة..شاد كارو فيدو وقالبو للور كيتجمع مع باه مولاي رشيد كما كيناديو هما واللي كان اشيك منو واحسن منو تقول ماشي باه ..السروال انيق ديال التوب والقميجة بيضاء ولافيست فالبني غامق ديال الدان والصباط مسيري والكريشة خارجة والطول والوقفة والهبة كتبان عليه شخصة واخا راسو ابيض كامل لاكن شعرو قوي ووجهه عامر مكيبانوش فيه التجاعيد عكس سمير اللي وجهه ضعيف كيقان شارف والترهلات هبطو ليه الحناك والعينين..اما مولاي السلطان مجبد تقول بوحدو اللي غيخطب .. عاقدهم وكيبان معقول وناشر الجدية عليهم وعلى عمومو وخوالو اللي شادين فيه و فغالي اللي واقف حداه بسروال بلومارين والقميجة زرقاء سماوية وسبادري بيضاء وعامر وواقف وقفة منتصبة كتبان عليه رياضي غير من الحركات ديالو وتضاريسه المتساوية ..كيضحك ويلعب بالسوارت فيدو طالق قشابتو مع عمومو واخا شادين فيه دغيا كيقلبها عليهم غير بالعقل ويضحك حتى بداو العيالات نازلين شي مور شي وفتح ليهم الابواب يطلعو بلا ميركز معاهم..بدات سارة كتسابق على البلاصة الاولى قدام غالي خوفا من اسية تشدها ليها والى شداتها تموت بالفقصة وهي باغا تبان فالجلسة حداه لاكن اسية هاد المرة مشات هازة راسها ركبات جنب هشام اللي كيسوق سيارة باه وتزاحمات مع رشيد قبل مايجلس وخاصها تبان هي ام العريس والكل فالكل..اما رشيد ماداهاش فيها خلا ليه الطموبيل ومشا ركب جنب سمير اللي مرتو هازة البنت وبزز منها ترجع اللور وبنتها فيدها .

ركب الجميع وضار غالي مع السيارة يالاه دخل شاف سارة حداه كتبسم وتكمش فمها حشمانة وكتشوف فيه بنص عين وضحك تلقائيا وقال

غالي: هايي هاي هاي..كاع هادشي حيت غاديين نخطبو!

دورات وجهها كضحك وترمش وقلب وجهه كيضحك عجباتو لاكن حتارم اللي جالسين وراه وديمارا السيارة تبع هشام حتى للفيلا اللي فيها الخطوبة ونزلو تحمعو كاملين دخلو مجموعين واسية مع رشيد فالمقدمة دايرين هشام لوسط هاز الورد لقاو مونية ويامنة وكلتوم وبناصر وميمون فالباب استقبلوهم وسلمو عليهم ودخلو مجموعين كيشوفو فالعائلة اللي جالسين وشي كيتعرف على شي في حين لاسقة سارة على دراع غالي وداخلة شادة فيه وراسها مايل كتشوف بنصعين فالناس وتميع

العريس جلس فالبرزة واخا ماشي شي بردة كبيرة ..كانت متولة عبارة عن فوطوي طويل مفرش وحداه الورد اللي جاب والهدايا والطبالي مدورين فالجناب جالسين فيهم الناس وشي كيشوف ..كانت عائلة سكينة بلديين بحكم انهم من البادية وكيحضمو وباين عليهم المعقول ودايرين مجهود لاكن مكيكريوش وكل وحدة كتلبس تكشيطتها واخا قديمة ..لاكن باينة عليهم حارين وعندهم نفس الهزة دالراس والنفخة دالنيفوالمضاهر اخر حاجة كتهمهم ومكيفهموش فيها.. اما عائلة هشام كانو مختالفين بزاف وحتى المحيط كيلعب دور يحكم مدينتهم واصولهم العريقة فمدينة مكناس كيفهمو فالتاويل والنخوة وعندهم لكنة وحدة فالهضرة متشابهة ونغمة وحدة فالحواو نسا ورجال وكيتشابهو فالطباع تقول عرق واحد شاركهم كاملين .

بقا شي كيشوف فشي والموسيقى بالطري الاندلسي وشي كيهضر على شي ويحلل فشي الا سارة اللي جلسات دارت رجل على رجل وقلبات القفطان على رجلها وشدات فدراع غالي متكية عليه ومو مقابلة معاه كتشوف بنص وتهضر مع ختها كلتوم وتعلق وتنفخ ..اما غالي تحرج وماصلاح ليه كي يدير وباغيي يتحرر من قبضبتها وبقا كيرجع باللور على الكرسي حتى تفك ونشر يديه خلاها جالسة وحاطة يدها على ركبتو وكتشوف فالحضور مابانت ليها منافسة ولا بنات عاطيين للعين حيت فالحضور دالعروسة مكانوش البنات بزاف وكلشي مزوج وكيشوف قدامو وغير شي وحدة ولا جوج لي جالسين وداخلين سوق راسهم وبدات كدندن مع الموسيقى وتتبسم حسات براسها ملكة الحفلة وعجبها الحال كل شوية كدور عند غالي ضحك معاه وحتى هوا كيهضر معاها ويضحك حتى دخلات العروسة بتكشيطة بيضاء والزغارت والنكافة حداها وناضو كلهم استقبلوها وكانو معاها البنات اللي مشاو للصالون وسميرة الشيء اللي خلا سارة تهز عينيها فغالي وتشوفو فين كيشوف

العروسة بلارة وداخلة على رجليها حشمانة والوجه مزير وهشام كيفرنس حشمان حتى وقفوها حداه وجبلسوهم وبداو السربايا غاديين جايين كيفرقو اتاي بينما سميرة جلسات مقابلة مع الطبلة ديال سارة وخواتاتو ومو وماجات عينها غير عليه بقات كتشوف فيه ساهية وكتشوف فسارة اللي حاضيا القاعة من الباب حتى للقاع لاكن مانتابهاتش لسميرة .. نضرات سميرة المطولة خلاو غالي ينتابه وبدا كيرمش بعد عينو وكل شوية يتلفت كيلقاها كتبسم وتهضر مع اللي حاداها وتشوفيه عرفها ناشرة الجمال عليه ورامية الشباك باغا تبفت انتباهه وكتقاد فالجلسة ودير حركات رزينة وتقيلة .. سخنو بلاصتهم عاد ناضو بشوية بداو كيشطحو بالرزانة والتقالة وكلنت كتتقن البروطوكولات والتباتة والنضرات والتعبير بلوجه بلا مبالغة .. كتلوح يديها بشوية وتشطح بالنخوة والشيكي وتحرك جسدها بشوية على نغمات اندلسية وكتقيس شعرها برقة وكل مرة تخطف نضرة من غالي وهي كتشطح حتى قربات من بنت خال سكينة ورانيا اللي كتشطح معاها وكانت اكبر منهم باربع سنوات وقالت

سميرة: شكون هاداك اللي جالس لهيييه ؟؟

ايناس: ماعرفتش علاش؟

سميرة: عضات شنايفها ) من الصباح وهوا حاط عينو عليا …غزاااال شفتي كي داير

ايناس: عنداك تكون مراتو هههه هاديك اللي حداه

سميرة: كيدير فيا شي شوفاااات… داخ داخ داخ

ايناس: هههه ويلي ويلي مسخوطة.. ولاكن غزال شو كيداير .

الهمس عليه وبناصر داخل خارج تالف اللي دار حداه كيوقفو

بناصر: فين سكيناااا!!؟ كاع مابانتلي

ميمون: واقيلا مزالة فالصالون

بناصر: عيط. عيط عيط ليها تجي عند هاد الحلوى اللي قالت ليك حتى تجي تقطعها عاد نفرقوها عيط ليها قوليها اجي دااااابا غنفرقو العصير

ميمون: كيصوني) فينك ؟؟ فيين غين وصلتي باك واه مكشكش راكي كتعرفيه…يالاه (قطع) هاهيا .. هاهيا قالت لك برا

خرج بناصر كيزرب شافها نازلة من سيارة مرسيديس كحلة وهازة جنب القفطام الزهري مدخلاه فالسمطة وركبتها كتبان والصندالة اعلى منها مكاين طالونها رقيق وعالي والشعر مطلوق على طولو دايرة بوندو كحل مرضع بالاحجار على راسها فارقة بيه الشعر اللوراني واقصيصة لخفيفة اللي على جبهتها وحلقات مدورين كيبريو وموراها ليلى واحلة فجلايلها ومقاتلين مع الباليزة والماتيريال كيخرجو فيه .. ماداهاش بناصر لا فالشكل لا فالزين مشا زربان كيغوت على الحلوى بينما ميمون عاونهم فالتقل ورجعات ليلى للسيارة كطير ضربات الدورة بالزربة رجعات بلاصاتها ونزلات كتجري دخلات تابعة ميمون اللي هاز الشنطة طلعها مع الدروج وسكينة قدامو كتزرب تابعة بناصر ومهبطة راسها شادة الضحكة ويدها على نيفها وليلى موراها حتى هي باغا ضحك وكتقلب بعينيها على غالي ومرتو تشوف ردة فعلو

دوزهم بناصر قدام الحضور اللي جالسين كيشربو اتاي وهما تابعينو وحدة مور وحدة والكل تلفت كيشوف شكون البنات اللي دخلو جداد ومنهم سارة اللي غير شافتهم مشا الدم من وجهها وجمعات الضحكة وعينيها تعلقو بقات متبعة ليهم العين وهما دايزين في حين كان غالي مهبط راسو على تيليفون ماهزوش كاع ..اما منال جات عينيها سكينة ودغيا هزات راسها متبعة ليها العين والقلب ضرب ماجات غير صورتها فبالها لاكن متصدقاتش تكون هي ومستحيل واشنو غيجيبها لتما ..ضارت شافت فغالي لقاتو مهبط راسو ومتكي على الكرسي ورجعات شافت فسكينة اللي ماضارتش نهائيا لا يمين لا يسار بقات كتشوف قدامها وليلى وراها غادية وكتقرا فالحضور حتى جات عينها على سمير اللي حل فمو وضار فيها نضرة اعجاب وهي تقلب عينيها وتهدو قنانفها ماحملاتوش ومشاو غبرو من امام الحضور خلاو هشام جالس مصدوم وكيشوف قدامو بحال الصنم عاد بدا كيرمش وتلفت عند رانيا بخفوت وقال

هشام: شكون البنات اللي جاو مع باباك؟ نكافات!

رانيا:بابتسامة) ههه لا اللي لابسة الغوز هاديك هي ختي سكينة واللي لابسة لكحل ليلى صابحتها اللي قادات لي مزوجة

تبلوكا هشام وبقا فبلاصتو شحال كيرمش وقال يخفوت

هشام: ختك!

رانيا: اه

باع الريق ورجه بعد وجهه تلف ونسا راسو راه عريس وتكا على جنبو فشل حتى شيرات ليه هند عاد رجع تقاد فالجلسة وداخ حس براسو مابقاش عادي وهمس فودنها

هشام:غنمشيو للطواليط ونجي صافي

ناض من حداها هاز راسو مزير غبر وبقات منال جالسة ومتكية على فكها كتخمم وقالت لهند

منال: احمم..هييند..بانت ليا واحد البنت دابا دخلات ليا الشك.. جاتني بحال البنت اللي عاود ليا غالي عليها

هند: بحماس وفضول) شكوون؟؟ فين؟

منال: مشات مشااات بلاتي الى عاودات بانت نوريها ليك..ياختي جاتني بحالها ..الشعر والوجه !!! دخلي الشك

هند: هييه حلفي..منين دازت فين مشات؟

منال: ماعرفتش دخلو من هنا …جاني غالي عادي يمكن ماشافهاش .. (بسرعة ضرباتها ليدها) هيييه هاهيا هاهيااا هاهيا راجعة شوفي شوفي

هند: بسرعة) غالي شحال فالساعة

سمع سميتو هز راسو ورجع التيليفون شاف الساعة وشاف فهند رد عليها بعفوية وهز عينيه قدامو ويالاه غيهبطهم رمش وعاود هز عينيه بلفت الانتباه شاف فيها دايزة كتبسم وهازة القفطان فيدها ومشات جلسات فالطبلة المقابلة معاهم ..كاشي داز فنضرة وحدة ورجع هبط عينيه عادي ومنال وهند كيشوفو فيه بنص عين كيحللو ويناقشو بينما سارة هادة راسها والنفس مقطوعة فيها باينة من شفايفها المكمشة

منال: هي والله حتى هي!!! اويلي ميمكنش هاد الصدفة

هند: يفضول) كن كانت هي كن بانت على وجهه متأكدة؟

منال: والللله حتى هي والله ماتخفا عليا صورتها ..نفس الشعر نفس الوجه اصلا باش تكون وحدة كتشبه ليها صعيييب لفيراج ديالها ماشي مؤلوف اصاحبتي ..هي ماتقوليييش ليا الدورة دوجهها ديال شي كورية وداك الفم حتى هوا والنيف .. عينيها ..باقا عاقلة عليهم قدام عيني بزااااف على الشبه!!

هند: كضحك)حيدي نشوف !! ولاهيييلا الصراحة ماااشي عادية نقولو كاين شبه بزاف منها ..بلحق زوينة بنت الحرام (بنص عين) سارة تقرصات ..

منال: غالي جاني عادي مادار حتى ردة فعل يكون عارفها كتجيهم ولا شي حاجة؟

هند: مكتشوفش كاع هنا

كان مهبط راسو على تيليفون وحجبانو معقودين ماهزش الراس حتى لواحد اللحضة سدو وهز سوارتو وقال لسارة وهوا نايض

غالي: انا راجع

سارة:هزات راسها شدات فيه) فين غادي؟

خرج من المجمع جهة الباب بينما منال وهند متبعين ليه العين حتى فات الباب وسارة مربعة يديها كدور عينيها

سميرة: بخفوت) مللي دخلللللت…وهوا عينو عليا والى كانت هاديك مرتو راه تكون طرطقات من لداخل.. غير حاضيني حاضيني حاضيني كندور كنلقاه كيشوف فيا السيد صافي تلف

سكينة: هازة حاجبها) ربي ربي!!

ليلى: عجبتيه المسخوطة

مونية:وقفات عليهم) اجي تكلمي لباك

ناضت كترمش شافت جهة الطبلة فين جالس مالقاتوش وتبعات مونية لبرا وسارة متبعة ليها العين وعاقدة حجبانها حتى خرجو لقات بناصر برا واقف كيتفتف

بناصر: سيري سيري دي عمك للدار راهم نساو الخبز سير وصلهم

مد ليها السوارت زرب عليها ومشات كتهز جلايلها عاوتاني وتعلقهم ركبات هي وياهم داتهم الدار بينما وقفات سارة فالباب دالفيلا شادة تيليفون فيدها كتصوني وتقلب بعينيها

سارة: غالي فينك ؟ فين مشيتي؟

في حيرة وقلق كتمشي وتجي حدا الباب وتدخل وتخرج وتيليفون فيدها كتسوط وتصوني وتعاود

سارة: غااالي…الو غااالي فين مشيتي

غالي: بنرفزة) شكاين اسارة ياك لاباس شنو خاصك؟

سارة: بتعلثم)والو غير كنسول عليك فين مشيتي وصافي؟؟

غالي: نمشي فين مابغيت نمشي مالك لاسقة فيا فين مشيت فين جيت بووحدك اللي فيك الدودة ياك لاباس!!

جمعات شفايفها لداخل وتخنقات بقات كتبلع الريق ويدها فتيليفون كترعد مالقات باش تجاوب وعمرو هضر معاها بهاد الطريقة ولا طيح معاها الهضرة ..مارضاتش وحقنات فيها النفس وقطع عليها خلاها واقفة والارض كتمشي وتجي بيها شدات الدوخة وراسها تزير والدموع هبطو مع الخدود كيجريو.. دارت يدها على وجهها خباتو وبعدات على الباب وقفات كتفتف وتشد فالحيط كترعد جاها انهيار من الدموع وبقات كتبكي وتنخصص بوحدها..اما هند ومنال جالسين لداخل متحمسين لشنو كيدور وشنو واقع والهمس بيناتهم متقطعش

منال: شتها غبرات ياكما هي النكافة؟؟

هند: عقلي مع سارة حتى هي خرجات تبعات غالي

منال: كانت كتبقا فيا وكنلقاها ليها عذر ولاكن دابا كرهتهاااااا من اعماق قلبي … تفوووو غير طالقة ودنيها وكتلقط وتسنط..وانا تا انا خصني لعصا وهانا دابا خسرت مع خاي وقلب عليا وجهه فمرة

هند: ساهيا) ماعرفت فين تبعاتو

فالطبلة المقابلة جالسة سميرة كتهامس مع ايناس وتقلب بعينيها

سميرة: خرج هوا هاديك اللي كانت حداه… بغيت غييير نعرف شكيجيهم

ايناس: يقدر يكون خوه ولا صاحبو

سميرة: كيشوف فيا وفاش كنشوف فيه كيدير ديك هاااه (كتهبط عينيها) كيحشم..هوا راااه باااغي يشوف مالقا كي يدير هه

ايناس: ياختي قولي ليا شنو فيك كيطيحو فيك غير الزين

سميرة: ههههه ولاكن الزهر مكاينش… دايرين ليا شي حاجة متقوليش ليا انا عارفة راسي.. حيت كيبغيييوني وغيخمااااقو عليا ولاكن داكشي كيشدهم مكيهليهمش يوصلو عندي… دابا هادا هانتي.. لاحضي فاش يدخل شوفي كيكيدير فيا …ولاكن باش يجي عندي ويفاتحني فالموضوع ميقدرش حيت داكشي اللي مديور ليا كيحبسهم عليا

ايناس: خاصك تجري اصاحبتي على راسك ..ماتبقايش هاكا

سميرة: راني كنحاول.

رجعات سكينة بالطموبيل عامرة بالخبر هي وعمها ووقفات خلاتهم كيخرجوه ونزلات مدات السوارت لباها اللي هاز راسو فالسمو ومكمش فمو راشقة ليه

بناصر: اودي الله يعطيك الصحة…. ايييهاااايييهييييهييييهييي كي جاتك هاد التكشييطة … كتعرفي تشنننعي بعدا

شافت فيه مصدومة وبدات كضحك بزز منها عارفاه كيتقلب ويقدر ديك الساعة يتفكر شي حاجة ولا يشوف شي حاجة ويقلب عليها ، مدات ليه الساروت وتمات داخلة مع الباب دالجردة والمصور تابعها كيجري ويعيط

عثمان: سكينااا..واسكيناااا..بلاتي بلاتي

سكينة: ضارت عندو كتفتف) بابا بابا..سير عند بابا

هربات من المصور قبل ميوقفها ومشات كتزرب تقول غادية حفيانة ماشي لابسة صندالة عالية كي برج ايفل، يالاه بغات تدخل تصادفات مع هشام خارج وتبسمات بزز منها وحدرات راسها ، اما هوا ماعرف يضحك ولا يسلم ولا يدير راسو ماشي هوا بقا كيحرك راسو بالايجاب والابتسامة كتمشي وتجي فمو وخرج كيرمش شاد تيليفون فيدو كيقلب على غالي ونزل مع الدروج مشا للطموبيل لقاه جالس تما ونزل عندو عاقد حجبانو وراسو فالسما تقول واكل الحار وعنقو مزير ..اما هشام جميع تعابير الدهشة والصدمة وعدم التصديق باينين على وجهه

هشام: بتساؤل) واش كان فخبارك باللي سكينة خت رانيا؟؟ ياك سكينة كانت سميتها

ماردش عليه غالي فال يك الساعة بقا كيحرك راسو بالايجاب ويشوف هنا ولهيه ساكت حتى عاود هشام سولو لاكن تفاجئ فجأة برد غالي اللي شاف فيه وحمر فيه مزيان وقال بعصبية

غالي: واش نتا غادي خاااطب ختها وسااكت؟؟؟ سااكت جاي كتسولي؟؟ (كمش وجهه بقرف) شهاد السؤال؟؟ شهاد …؟!!

هشام: بتعجب) كيفاش؟؟؟ واش ماكنتش عارفها زعما؟؟؟

غالي: بغضب)واش باغي تحمقني اصاحبي ولا مالك !!! واش نتا غادي تخطب البنت معارف لا شكون خوها لاشكون ختها ؟؟؟ سيير اصاحبي سيير براكة منن…

سد فمو وقلب وجهه وهشام طاح فسوء التفاهم مع غالي حتى كانو غيدخلو فمشكل وبدا هشام كيحلف باللي معارفش لاكن غالي ما خلاتش ليه لراسو نهائيا

غالي: شحااال دابا ونتا كتعرفها؟؟ عام عام ونص؟؟ ماعرفتيهاش فهاد المدة كلها !!!

هشام: واااماكنتش عاارف انا راه تشووكيييت!!!

غالي:هز يديه؟ وهي نتا ماشي طبيعي !!! هادشي اللي كتقول مكيصدقوش انسان بالغ اصاحبي!! شحال ونتا كتهضر معاها معارفش ختهااا؟؟!!! هادا راه الحماااق

هشام: يمكن هي مابغاتش تقول ليا ولا مابغاتنيش نعرفها مزال غنهضر معاها ونشوفو هادشي،،، دابا فين عندك المشكل

شاف فيه غالي شوفة ناقصة وقلب وجهه لجهة اخرى وهز يدو

غالي: ماعرفتش كيفاش كتفهم وكيفاش غنتفاهم انا وياك… غير مللي معارفهمش خواتات راه صافي مابقا عندي مانشرح ليك … مابغاتش دخل ليا هادي راسي.. تجي سكينة طلع خت رانيا!! ماشي لحماق هادا!! (شد لحيتو) مشاكييييل

هشام: صافي ماطرا والو تكون ختها ولا بنت عمها فين كاين المشكل

غالي: هز واحد اليد وقلب ضهرو)مكاين حتى مشكل .. صافي

جمع الدفلة لاحها بعيد وربع يديه كيرتاح من التوثر ويتنفس ومابغاش يدخل فنقاش مع هشام او شرح مغصل او تفاصيل .. ماعندو لاش وغيصدع راسو ويبح حلقو وداكشي اللي بغا يعرف عرفو وعرفها خت العروسة ومابيديه مايدير وماعندوش علاش يعرف تفاصيل اخرى ..اكتفى بداكشي اللي كيعرف وبقا واقف جبد تيليفون كيصوني على سارة بينما هشام رجع للفيلا

غالي: الو سارة.. اجي عندي للطموبيل يالاه انا كنتسناك

خرجات سارة كتزرب من القاعة وتنخصصمن لداخل هازة هم والدنيا والدين وزاد كملات فاش تلاقات بسكينة لوجه فلوجه فالباب وشافت فيها بينما سكينة دورات وجهها دخلات وبقات سارة واقفة مصدومة كتشوف قدامها وتشوف وراها ومشات كتجري عند غالي والقفطان فيدها مهزوز على الارض حلات الباب ودخلات لقاتو جالس ويدو على النافدة متكي وكيخمم وقبل مايهضر قفزات بلا عقل مخرجة عينيها وكتنهج ومخلوعة ومصدومة وجميع ومتوثرة

سارة: كدخل وتخرج فالهضرة) هاديك اللي كانت فالقهوى ديك المرى اللي تلاقينا لقيتها فالباب هي ..واللهيلا هياااا شكون هاديك كتعرفها.. هي اللي جات عندنا فالقهوى وانا عاااقلة عاااقلة عليها هي نفسها هي نفض البنت كتعرفك كتعرفها

شد جبهتو وسد عينيه كيتسنط لودنيه كيطوطو وعيا كترهق كأنه دار مجهود كبير ووصل لاخر قطرة من طاقتو

غالي: حرك راسو بالايجاب ساهي قدامو) هاااديك هي سكينة

تقطع فيها الحس ومشا ليها الصوت وتبلوكات ..بقات مصمرة كتشوف فيه وهوا قلب وجهه للجهة لاخرى ودار يدو على لحيتو ومررها على فمو والحيرة والاسف على وجهه وعينيه كيرمشو ويشوفو هنا ولهيه اللي شافو يقولكيتأمل لاكن عقلو فجهة اخرى .. قبل ماتستوعب سارة كلامو وتفتح قمهايكلمة دور وجهه كيهر بدون مايشوف فيها وقال بهدوء

غالي: هادشي علا عيطت ليك… دابا غنهضرو نيييشااان انا ونتي … عطيني عقلك وسمعي ليا باش يتسد هاد الموضوع فمرة وحدة وميعاود يتجبد(مسح يدو) … اما الى بقينا هاكا ماعمرنا مغنساليو ومعمرنت مغنزيدو لقدام

سارة: الدموع محجرين فعينيها) دابا هاديك هي اللي كنتي كتعرف!! (كتمتم) كي كيكيفاش!! شكون ؟؟ وماقلتيلي والو فاش كنا فالقهوى وخبيتي عليا..كدبتي عليا

غالي: هز صبعو بتحدير ) مكدبتش عليك.. ماتخرجيش شي هضرة ماخرجاتش من فمي واصلا ماسولتيش..نضتي بغيتي تمشي ومشينا..دابا الى بغيتي نهضرو ونوضحو الامور غتسكتي من البكى باش نحطو النقط على الحروف ونرتاحو فدماغنا

سارة: بغيت نعرفكووولشي… كووولشي

غالي: حتا انا هادشي علاش عيطت ليك.. هاديك البنت كانت بيني وبينها علاقة ..(بهدوء وتركيز) كنا فكرنا نتزوجو وماكتابش وعرفتها قبل منك .. من بعد ماكتابش…صافي كل واحد مشا شاف شغلو وسدينا الموضوع فمرة لا انا قلبت عليها ولا هي قلبات عليا

سارة: كتنخصص) هيا اللي مابغاتشتزوج بيك ياك

غالي: ودابا سمعيمن فمي اش كاين الى بغيتي تعرفي حقيقة هاد السوجي واسمعي

سارة: ربعات يديها )واخا كمل

غالي: الزواج رزق.. وكل واحدورزقو فهاد الدنيا..وهي ماشي فرزقي وانا ماشي فرزقها ودار الله الاسباب والسلااام..

سارة: بغيت نعرف علاااش جات للقهوى عندنا كنتي كتهضر معاها

غالي: الى بقيتي كترمي عليا هاد الاتهامات غنسكت ومنزيدش معاك الهضرة.. هادي قلة الاحترام ثانيا وقاحة و الى زدتي شي كلمة غندير فيك راسي و غنوليو دراري

سارة: دورات وجهها) اوكي يالاه كمل

دور وجهه حتى هوا تنهد بتعب ورجع شاف قدامو كيهضر بشوية ويعبر بيديه بتقالة والرزانة تقول راجل فعمرو ستين عام .. الطريقة باش كيهضر وكيخلي مساحة بين الجملة والجملة للاستيعاب وخروج الكلمات واضحة تقول جالس فوقشي منصة كيلقي شي خطاب.

غالي: العلاقة حبسات ..

سارة: شدات جبهتها بتعب) ماتبقاش تقولي العلاقة اغالي … صافي دوز

غالي: واخا .. مهم نهار سالينا مابقا جامعنا لا اتصال لا صداقة لا حتى حاجة والنهار اللي كنا فالقهوى وجات انا براسي تفاجئت !!..

سارة: وعلاش جات؟؟ شنو بغات

غالي: بتحليل كيخمم) يمكن تعمدات تفاجئني.. يمكن ماعارفاش راني تزوجت حيت وقالت غير شي آمي ولا شي حاجة … متقدرش تعرف بالضبط .. ولا بغات تلعب.. (صغر عينو) فيها هاد الخصايل كتبغي تلعب وجات قاصداني انا غير باش تكوني عارفة .. ماقصداتكش نتي وبغات دير ليا هاكاك ربما بغات غير تلعب وتمشي وراه مشات من ديك الساعة ما بانت.. كن كانت باغا شي حاجة ولا فنيتها شي حاجة راه غتلقا الطرقان منين دوز ..(بتأكيد)شوفي.. بااينة كانت مع صحاباتها وتلاقاتنا وبانت ليها دير شي حركة وتزيد وهادشي اللي دارت

سارة: بحرقة) وعلاااش؟ علاش… نتا علاش ماقلتيليا والو

غالي: شغانقوليك واش انا عارفها شنو فنيتها؟؟ خاصك كولشي تعرفيه سوا يفيدك ولا مايفيدكش مالكي عزيز عليك تشطني بالك؟ الناس كيتهربو من الحاجة اللي ديرينجيهوم ونتيكتحفري عليها بيديك !

سارة: من حقي نعرف!

غالي: من حقك تعرفي اه ولا كن تعرفي المسائل اللي جامعانا انا وياك .. اما هي جات ومشات وقصة قديمة وسالات ماشي من حقك !! هاداك ماضي ديالي بقا اللور ودابا تجمعنا انا وياك ومن حقك تعرفي حاضرنا..اما هي راه تقدر تكون هي ولا غيرها .. مدام ما عاوداتش بانت ولا فنيتها شي حاجة فصافي مكاين لاش نعقدو الامور

سارة: بنفس عميق) واخا كمل

غالي: مهم…(هز صبعو)اولا ماكنتش عارف عليها بزااف وهادي نقطة مهمة غتفهمي علاش قلتها.. كنت عارف عندها واحد ختها وخوها صغير ولاكن عمري شفتهم .. دابا اللي وقع هوا هشام ماعرفتش كيفاش وفوقاش(كيحك جيهتو) تعرف على ختها وقررو يتزوجو هادشي ماقدرتش نفهمو

سارة: بصدمة) شنووو!!! دابا هي والعروسة خوون!!!(لاقات صبعانها(

غالي: ببرائة) هادشي اللي وقع ومافخباري والو!!.. (رجع للجدية) ماعرفتش كيفاش تلاقا بيها وماتوقعتهااش … هادشي علاش دابا هي كاينة تما حيت خت الخطيبة دهشام

دورات سارة وجهها وشدات راسها وتكات على الزاجة كتخمم ونوا قلب وجهه ويدو حدا فمو كيفكر وعم الصمت.. سارة قطعات الحس وغالي كذلك حتى تلفت شاف فيها وطبطب على كتفها وقال

غالي: ماديري فراسك والو..مكاين واالو وكاع هاد الصدف غيدوزو حتى حاجة مغتبدل، الله يسهل على ديك بنت الناس والله يكملعلى هشام بالخير وحنا راحنا الحمد الله مزيانين غير نتي الله يهديك التيقة واالو منعادمة عندك… اساس اي علاقة زوجية هي الثقة.. (هز صبعانو)الثقةوالاحترام هادو الى مكانوش كتهدم ديك العلاقة… انا كنتيق فيك .. وحتى نتيخاصك تيقي فيا واش خايفة نخونك؟

سارة: بأسى) عييت

غالي: جرها عندو) خايفة نخونك؟؟؟ انا كن بغيت نخون علاش غنتزوج اصلا؟؟ شنو راكي كديري ؟؟كطيبي؟؟ مقابلة شي دار ؟؟ وااالو حتى حاجة من هادو مكديريها باش نقول مزوج بيك على على هاد الاساس.. وعلاش غادي نخونك؟ وعلاش مزوج بيك ؟؟ مانتزوجش بيك ونعيش كما بغيت

سارة: وعلاش تزوجتي بيا؟

غالي: كيرمش) كيفاش علاش؟؟ علاش كيتزوجو الناس؟؟

سارة:قوليا علاش؟

غالي: الانسان كيتزوج باش يتفادا الحرام ..الله يسمح لينا مكنبغيش كااع نتفكر شنو داز ولا نهضر عليه ولاكن دابا الحمد لله مرتاح واخا كتمرضيني بالغيرة ديالك .. اما الخيانة راه منخوونكش وانا فكامل قوايا العقلية غير تهناي..ماتزوجت الا ومقتانع بهادشي والانسان كيدير لحلال ويزيد يتقرب من الله عز وجل ويقوي امانو ويطلب الله يعفر ليه..ماتزوناش عن حب ولاكن كولشي كيتبدل وكيجي مع الوقت

سارة: وعلاش كدير احتياطاتك …مابغيتيش اولاد؟

غالي: داخلت عليك بالله واش حنا دابا فالاولاد؟؟ نتي وانا واش واجدين لهاد لولاد؟ تطلقتي حتى فالفراش بقاو غير الولاد ينفخو لينا الراس نزيدو السهير على والو

سارة: عطاتو يدها) واعدني مادورش بديك خيتي

غالي: هانا لاللة كنواعدك.. وتا ونتي واعديني هادشي يبقا هنا مدوريش بيها ولا تجبدي سيرتها لشي واحد

سارة: صافي كنواعدك(عطاتو يدها)

غالي: دابا شنو ؟؟ ترجعي لداخل ولا شنو؟

سارة: انا وياك . يالاه

تهدنات الاوضاع نسبيا ورجعات سارة مع راجلها كأي زوجين متفاهمين ومعروضين لمناسبة..شادة ليه فدراعو وهوا مدخل يدو فالجيب كيشوف قدامو ، جلسو بلايصهم وسميرة كتشوف فيهم بنص عين وتهمس لإيناس

سميرة: غير هي والبغلة اللي تزوجو

ايناس: باش عرفتيها مرتو ههه

سمي: ايوا باينة(يدها عبى خدها) الشدة اللي دايرة ليه ديال القعد

كانت ليلى فهاد الاثناء كتقلب على سكينة وخرجات وقفات فالباب حتى سمعات همس حدا ودنها " الزين تبارك.. الله يحجبك " ماجات فين دور حتى داز حداها سمير مهبط راسو وكحزات من وسط الباب كتشوف فيه بقفرف ودورات وجهها لقت سكينة واقفة مع عثمان المصور وهازة جلايل التكشيطة مع السمطة وركابيهت كيطلو

سكينة: شحال قالك من تصويرة؟؟

عثمان: قاليا ربعين صافي

سكينة: صافي دابا حتى يدوز هاد الشي ونعزلو دوك الربعين

ليلى: بصوت مرفع) سكيناااا

ضارت سكينة عند ليليى وهزات يدها مشات عندها وقفات حداها كتسوط

سكينة: يخخ بغيت غا نجلس نشوف ونتشااف كل شوية سكينة سكينة سكينة الننم

ليلى: داك راس الدينامو شكيجيكم؟

سكينة: كتقلب بعينيها)شكون؟!!!

ليلى: رااه واقف لهيه شاد كارو

سكينة: معرفتش اختي يمكن من عائلة العريس.. اجي اجي ندخلو انا يالاه غنحط قزيبتي نبركك فطاسلة غالي هه

جات دور مع الدورة وشدها عمها زربان

ميمون: فين درتي الصاك دباك فيه الشارجور تيليفون طفا ليه

سكينة: اينااصاك؟؟ راه دخلو كولشي بداك البيت

ميمون: واجي جبدي ليه الشارجور راه كيقلب عليه قالك الصاك يحضر

كمشات جلايلها كتنفخ ومشات تبعاتو وعاودات رجعات كتزرب ومشات نيشان للطبلة اللي فيها البنات جلسات ودارت رجل على رجل وصبعها على خدها كتشوف فالناس وهند منال كيشوفو فيها بنص عين وهي حاضية غالي اللي محني على تيليفون وسارة حداه كتشد فيه من هنا ومن لهيه كضحك وكل شوية كدور تشوف فيها

سكينة: بخفوت ليليى) خراا كي دايرة ..تقحبين العور

ليلى: هااههاها ماشفتي وااالو…

سكينة: كتتأمل)عمتي غادية عندهم ينوضو يتصورو ..عتقيها كي كتعوج

سميرة: قربات عند سكينة) اجي شكون هاداك شكيجيه ؟؟

سكينة: هزات حاجها) هاداك،،،، خوه .. انجينيور

سميرة: ااااممم…وهاديك شكون اللي معاه

سكينة: بنص عين هازة راسها) هاديك….. مرتو طبيبة دسنان

سميرة: حلات عينيها) اااهمممم.. ايوا عينيه غير كيدورو

سكينة: غا حيت عجبتيه اما تروونكيل

جلسات سارة حدا رانيا وابتسمت ابتسامة صفرا وهزات راسها بينما غالي جلس جنب هشام وخداو صورة وبدات العائلة كتنوض تتصور وجات مونية وبناصر ختى هما واسية وراجلها وخواتات هشام وكلشي تصور بقات سكينة وسميرة وليلى ناضو بثلات ورجعو بلاصتهم حتى بداو تركاب الخواتم والحليب والتمر ومشات النكافة كثقاد ليهم الامور وكلشي على مايرام .. هند جاتها الكانة على سكينة بغات تتقرب منها وناضت كتشطح دارت راسها مافخبارها والو حتى وصلات عند سكينة ووقفات حداهم كتبسم وشوية بشوية بدات كتشطح معاهم ..هز غالي عينو وبقا متبع هند وتلفت عند منال عاقذ حجبانو وقال بخفوت

غالي: قلتي ليها شي حاجة؟

منال: بارتباك ) لاالا ..

غالي: بتحذير: ها ودني منك .

هبطات منال راسها بأسى وبقات ساكتة واسية كتشوف فيها بنص عين وقالت

اسية: شنو كيوقليك؟ مالو معاك؟

منال: لالا والو.. غير شي حاجة

اسية: ومالكم كتوشوشو جيتوني فشكل

منال: والو والو

ربعات يديها وبقات حاضية هند اللي دخلات فالدردشة والضحك مع سكينة وجبدو تيليفونات وعطاوها للتصاور وسارة متبعة ليهم العين

سارة: علاش هضر مع ختك تجي تجلس علاش مشات كضحك معاهم!! واش كتقلب على الصدع

غالي: وحنا مالنا .

سارة: لا متهضرش معاهم .. قوليها تجي تجلس.

غالي: لا رد

هي راسو ماردش عليها وتلفتات عند منال مربعة يديها وهزات حاجبها وقالت

سارة: عيطي على هند تجي تجلس

منال: هزات حاجبها) ماشي شغلي

سارة: ماشي شغلك!! كتعرفي هاديك خيتي كتعرفيها؟؟ واقولي ليها تجي تجلس حسن ليها ماخصنا صداع

منال: سيري قوليها ليها نتي انا ماعرفتكش علاش كتهضري

قلبات وجهها وعطاتها بالضهر منفخة ورجعات سارة ربعات يديها كتفرج وكل شوية تشوف فغالي كتقلاه كيشوف فتيليفون حتى رجعات هند كضحك فوجات على قلبها وجلسات على الكرسي وكحزات سارة بكتفها عندها وقالت بابتسامة صفرة وجدية

سارة: هادوك الناس ماعندنا منديرو بيهم حسن لينا بقاو بعاد هادشي فيه المشاكيل اوكي.. وهاديك اصلا ماشي من المستوى ديالك شوفي ليك بنات قاريين واعيين مثقفين ماحدك كتهبطي لتحت غير كتزيدي تغرقي فالوحل ومانسابينكش

هند: هزات كتقها) اويلي مالي شفتيني غادية نسكن معاهم غير ضحكنا شوية وصافي(بنص عين) وزايدون ضريييفة كدخل لخاطر

سارة: رتبات على كتفها) حتى نتي ضريفة االضرييفة راني عاايقة بيك

هند دخلات ليها الهضرة من ودن وخرجات من ودن وكملات ملي عاودو تصورو مع العرسان وجلسات معاهم على الطبلة كضحك وفمها محلول وكتجمع معاهم كأنها كتعرفهم من شحال هادي

هند: اوييلي مكناس مقناااط والموت ديال الرباط زوييين كتحسي براسك فالمستقبل هه

ليلى: غيير كتقولي غير حيت جديدة هنا داابا يطلع ليك فراسك وتقولي عليه مقنااط حتى هوا

هند: كتلعب بالسنسلة فعنقه) لاالا اويلي يكون كما كان ميوصلش لمكناس لا فالصهد واا فالبرد!! هنا بعدا كااين مايتشاف وفين تخرجي وفين تجلسي غير مارينا كترد النفس.. اما مكناس اش فيه؟؟ لهديم وحمرية !!! لالالا لا علاقة واخا تشري اللي شريتي ماتلقاي فين تلبسيه وتفرحي بيه وحتى القهاوي ماشي شي حاااجة

سكينة: انا بعدا منقدرش نعيش فمدينة صغيرة .. من غير طنجة والرباط وكازا ومراكش منقدرش نعيش فحتى مدينة اخرى واخا يعدموني

ليلى: و أكادير حتى هي

سكينة: ماعرفتهاش كي دايرة

هند: اكادير حتى هي زوينة وكبيرة وفيها مايدار.. مكناس راه الموت فيها الموت البطيئ

سكينة: دابا صافي غتسكنو هنا فمرة؟

هند: انا بعدا منرجعش هههه وماما حتى هي مابغاتش ترجع اما منال عندها لعرس الشهر الجاي وغتمشي لطنجة

سكينة: اااه .. الله يكمل عليها بالخير.. نتي اللي غتصايبي ليها فالعرس؟

هند: لاالا انا عااد كنتعلم..دابا مللي ولينا هنا فالرباط عاد غنكمل فشي مدرسة ديال التجميل .

ليلى: وايالاه تكملي عند حفيضة اللي قريت عندها انا وااعرة .. كتعللم مزيان ومدرسة كبيرة

هند: صافي حتى توريني فين جات .. (شافت فسكينة) حتى نتي دايرة التجميل؟

سكينة: لا انا دايرة تنكاف ..انا اللي ملبسة رانيا

هند: تبارك الله وااعر هادشي.. ماكناش عارفين دابا عطيينت لعربون لواحد النكافة فمكناس.. كديبلاصاي؟

سكينة: نمشي معاك احبيبةحتى القمر هههه وسكيييمو على قلبي

هند: هههه كيفاش سكيمو ههه هضرتكم فشكل

ليلى: لاكلاص هوا سكيمو ههه

سكينة: شحال دابا ونتي هنا؟

هند: شي ست شهور دابا .. ولاكن مكنعرف حتى واحد كنخرج غير انا وماما وندخل انا واياها

سكينة: لعلا يمحنك حنا نخرجوك ندورو بيك الازقة زنقة زنقة

هند: بحماس)فين كتخرجو كاينين بلايص زويينين ياك

سكينة: خسارة جيتي تا بعت الطموبيل

ليلى: كاينة فوز .. وانا مرة مرة نسرق طموبيل لميسيو ههه

سكينة: ااه نسيت فوز عندها طموبيل.. تا ترجع من سعودية فوقاش قالت غتجي

ليلى: غير شي سيمانة وصافي

هند: طموبيل كااتنفع الصراحة

سكينة: تنهدات)وايييه كانت هازة ليا رجليا ..بقات فيا الصراحة

هند: وعلاش بعتيها كن خليتيها الصيف دابا

سكينة: دابا نشري شي وحدة صغيرة .. دابا الدار اهم من الطموبيل

هند: شريتي دار بلاصة طموبيل؟

سكينة: بااقا فالبلان عاد كيتبناو

هند: ااه لا مزيان الدار حسن..قالك ياجورة فالحيط حسن من جوهرة فالخيط

منال حاضية هند بنص عين واسية كتفرج فيهم كيضحكو ويتجمعو اما سارة ماحيداتش نضراتها عليهم وماعاجبهاش الحال .ك كل شوية كدور تشوف فغالي اللي حاط تيليفون قدامو كيتفرج فالكورة ومربع يديه حتى حطو الماكلة وبقات هند معاهم وكل شوية يتصورو ويتجمعو داهم التعاويد والضحك وكانت هند من نفس الفصيلة عزيز عليها تلبس وتبان وتخرج وفايقة باغا تعيش باغا تفدي الحياة الكحلة اللي عاشت فمكناس وتحلو عينيها فاش بدات كتسمع ليلى وسكينة كيعاودو على الدوران والخروج وكيضحكو

ليلى: قرب لانيف ديالك اسكينة فين نديروه ليك ؟؟

سكينة: غاديرو ليا مفاجأة؟ههه …علموني باش نجي مقادة

ليلى: ضاروري ههه مهم نتي نهار لانيف تقادي لأي امر طارئ

سكينة: اجي نكريو يخت ؟(دورات وجهه) لالالا اختي انا خاصني نسد فمي تابعني لكريدي .. كنقلب على خليان دار عشي هه.. عاد قلت خاصني نشد الارض ونخدم

ليلى: دابا تنفستي شوية ماشي بحال اللول ههه جالسة تتغبني وتبكي وتشكي ونااري يااختي بااز ليك

سكينة: اختي انا الى زويت كنمرض ..الصراحة وبلا نفاق فاش طبيت كاع الفلوس شدني القلب واحق الله مابقاتش النعمة كدوز ليا وكنت غندخل فاكتآب بقيت كنقول صافي ضعت وحياتي ضاعت

ليلى: كطيريني ههه(ضرباتها للكتف)

سكينة: انا عقلي طار بغيت نجبد الفلوسمن الحيوط هههخخخ..

ليلى: دابا رتاحيتي غتبان ليه فالدهو عاوتاني

سكينة: واضاروري ههه مع مع ههه طرت لليخت نيشان

ليلى: غالي اصاحبتي .. اجي نمشيو للشمال؟

سكينة: هزات راسها) هاي هاااي!!! ميخلينيش بابا مالقيتي متقولي غير الشمال

ليلى: قولي ليه نسافر مع البنات

سكينة: والله لا فت قنيطرة ..(كتاكل الحلوى) الشمال نمشي ليه مع بابا ويكري لينا شي برتوش ونعس حدا البوطة الصغيرة وانس يدخل وفمو عامر بالرملة وبابا يتوسط شي دلاحة باااردة ههههه هادا هوا السفر اللي كيعرف بابا ويرتاح فيه

هند: دورات وجهها) يخخ كنكره السفر مع العائلة

ليلى: حتى انا .. تا حنا الى سافرنا مع بابا هادا هوا حالنا ..ندوزو على الروايح دااماكلة فالزنقة ونرجعو للدار نطيبو ههه

سكينة: خرااا حيدي عليا جبتي ليا الضيقة.. غير كنتخيل كنمرض

ليلى: انا تهنيييت اختي من سفر القوافل

هند: ولاهيلا سفر القوافل.. الدراري اللي جات معاهم كيسافرو بوحدهم ويعيشو الحياة

سكينة: ليلى: تا حنا اختي نسافرو .. الى سافرنا منديروش هاد الحالة

سكينة: اوييلي واحد المرة مشيت مع مريم واسماء للبحر وجابو خوتهم تفووو على ديكور .. دايين معاهم شوارما من الدار وجالسين كييقسموها ويتحاسبو ويفرقو بالنص والدبار يخخ على مرض

هند: حتى الرباط زوين ماشي ضاروري تسافرو بلاصة اخرى

سكينة: حنا راحنا ساكنين هنا سنين ومنين وكبرنا هنا من الاروض طلع لينا فراسنا .. نتي غيعجبك حيت عاد كتكتاشفي اما انا كتعجبني فيه غير الماكلة والحديد ههههه هبطتي لحي الرياض؟

هند: لا (يدها على خدها)

ليلى: هههه خاصك تهبطي ضاروووري

هند: نمشيو كاملين؟

سكينة: شافت فليلى) غدا عندنا شي عرس ياك

ليلى: ااه

سكينة: صافي نمشيو بعد غدا

هند: عنداكم تنساوني

يتبع...