الظابط الصارم و الجريئة الجزء الثالث

عمر: شكون؟!

الشخص: فتح الباب معك البوليس

عمر: ياك لاباس؟! ياكما غالطين؟

صوفيا: عتقوني!!!!

عمر ضربها حتى طاحت للأرض، اختفى الصوت: نوضي تكعدي تفو على مرض ما يخلو حد يتهنى

صوفيا كتنتر منو: بعد مني!!

بقيت مدابزة معاه حتى تفتح علينا الباب، ما متيقاتش عينيا هو جا فالوقت المناسب: شنو كدير للبنت؟!!

عمر مخلوع: والو أسيدي ما درت والو هي جات معايا بخاطرها

صوفيا: كداب!! هو اختطفني و جابني هنا و فرض عليا نلبس هدشي

عمر: لا كتكدب عليك انا.. ما جا فين يكملها حتى ضربو صلاح بكروشية دار ليه المينوط: انت متهم بالخطف و محاولة الاغتصاب

عمر: والله إلا ما درت والو!!

البنت الي فتحت الباب: نتي بخير؟

حركت ليها راسي بلا و بديت نبكي: ششش صافي ما تبكيش، غطاتني بايزار

صلاح: انسة صوفيا خاصك تمشي معايا باش ناخد اقوالك

صوفيا: وخا عطيني دقيقة وحدة عفاك

صلاح: اوك خودي راحتك

لبست لباسي غسلت وجهي ولد الكلبة زرق ليا حنكي شغدي ندير دبا؟ خرجت لقيت صلاح كيتسناني فاللوطو ديالو: طلعي

طلعت درت السمطة، ديمارا اللوطو، بقينا ساكتين شوية هدر صلاح: نتي بخير؟

صوفيا: مغديش نكون بخير حتى ينال هداك الحقير عقابو

صلاح: كوني هانية من هاد الناحية

صوفيا: فين لقيتك عند الاستقبال فرحت بزاف حيت غدي تعتقني، مي نتا مشيتي

صلاح: وي كان كيسحاب ليا جاية معاه بارادتك و لكن من بعد قررت نرجع حيت كتبقاي أخت صاحبي و ما بغيتش ليك الفضيحة، فين قربت للباب سمعتك كتغوتي و هو ضربك، قلت مع رأسي القضية فيها ان، عيطت للبنت الي فالاستقبال طلبت ليها الساروت و الباقي فراسك

صوفيا: و هو دبا فين؟

صلاح: صيفطتو للكوميساريا، غدي نمشو دبا نفتحو محضر

صوفيا: قلتها لخويا؟

صلاح: لا مزال

صوفيا: أوف خليت البنات فالاوطيل دبا غيكونو مخلوعات عليا

صلاح: هاكي صوني ليهم

صوفيا: شكرا، خديت من عندو التلفون و صونيت لاحسان: الو إحسان هدي انا صوفيا

احسان: صوفيا؟!! فينك اصاحبتي من قبيلة و حنا نقلبو عليك

صوفيا: قصة طويلة حتى من بعد و نعاودها ليك؛ دبا بغيتك تهزي صاكي و تمشي لداركم نتي و سارة انا بخير ما تخافوش

احسان: صوفيا ممكن تفهميني شنو كاين؟

صوفيا: غدا نشرح ليك دبا ديري دكشي الي قلت ليك اه و متجاوبيش على تلفوني اوك؟

احسان: اوك المهم ردي البال لراسك عفاك

صوفيا: اوك تصبحي على خير، هاك شكرا مرة أخرى كون مكنتيش نتا أعلم الله شنو كان غدي يوقع ليا

صلاح: هدا واجبي، و دبا مغديش تخبري عائلتك

صوفيا: لا ما بغيتهمش يتخلعو، واعدني هدشي يبقا بيناتنا

صلاح: هدشي الي كديري غلط ضروري خاصهم يعرفو

صوفيا: لا ماشي دبا، المهم انا عارفة شكندير

صلاح: اوك دكشي كيعنيك

وصلنا للكوميساريا و تفتح محضر، جابو هداك الحمار، مكرهتش نطير عليه مي تمالكت نفسي، بقا كيكدب عليهم تماك و صلاح ما متيقوش عارف بلي كيكدب، كمل معاه و شاف فيا: و دبا انسة نوبتك تعاودي ليا شنو وقع بالتفصيل

عاودت ليه كلشي، قلت ليه على الي وقع فالبحر حتى هو: متأكدة بلي هادي هي القصة كاملة؟

صوفيا: اه انا معنديش علاش نكدب

صلاح: مزيان، دبا يمكن ليك تمشي للدار انا نشوف ليك شي حد يوصلك، حميد وصل انسة صوفيا للدار

حميد: حاضر سيدي، تفضلي الالة

صوفيا: دبا شنو غدي دير معاه

صلاح: غدي نشوف المهم غدي ينال عقابو

صوفيا: اوك شكرا

مشيت مع حميد ركبنا اللوطو وصلني للدار، دخلت لقيت بابا و ماما كيتسناوني فالصالون و باينة فيهم مخلوعين عليا

سعاد: فين كنتي يا هاد البنت و علاش مكتجاوبي على تلفونك؟

سي يوسف: بنتي خلعتينا عليك

صوفيا: بابا ماما انا بخير غير الموسيقى كانت مجهدة و ما سمعتش التلفون

سعاد: و فين هو تلفونك دبا؟

صوفيا: اه.. التلفون.. امم.. اه التلفون نسيتو عند سارة هو و الصاك ديالي

سعاد: صوفيا تنسا تلفونها؟ تقدري تنسايني انا و باباك و متنسايش تلفونك

صوفيا: ماما ماشي لهاد الدرجة كيبقى غير تلفون، المهم انا عييت نطلع ننعس

سعاد: اجي فين غادية؟ مغديش تمشي حتى تعاود ليا الحقيقة حاسة بلي كتكدبي عليا

سي يوسف: بنتي مكتكدبش خليها عليك ترتاح غدا نهدرو

سعاد: الحاج راك دصرتيها بزاف واه البنت ولات كدير الي بغات و حتى حد ما يهدر ما تنساش نهار الكوميسارية

سي يوسف: بنتي و عارفها انا كنتيق فيها و هي مغديش تخون تيقتي فيها ياك؟

صوفيا حركت براسها بلا: ابدا، تصبحو على خير، بست بابا و ماما و طلعت بدلت لباسي و تكيت حلف النعاس لا جاني، ما عمري غدي ننسى هاد الليلة حياتي كاملة، وصل الفجر عاد باش قدرت ننعس

الغد ليه فقت مع 3 ديال النهار، نضت دوشت لبست كسوة صيفية فالموف، جمعت شعري كوب شوفال هزيت صاكي و هبطت، لقيت ماما هي و إيناس فالصالون و بابا خارج: هاي

ماما باستهزاء: أصحاب الكهف فقتو؟ على سلامتكم، واش ابنتي كاع هدا نعاس راه غير حشمت أما نخوي عليك سطل ديال الما بارد

صوفيا: ماما البارح ما نعست حتى 5 ديال الصباح

سعاد: جالسة كتشاطي مكافتكش الحفلة قلتي مع رأسك تكمليها فالدار

صوفيا: لا انا مشاطيت ما بوكرت غير طار نعاسي، المهم انا خارجة

سعاد: ايوا شغدي نقول مزال و أنا حتى حد مكيسمع لهدرتي، لكن الخطأ فباباك خلاك على هواك تخرجي امتى بغيتي و تدخلي امتى بغيتي، ياك خوك مروان راجل عندو 31 عام ميديرش بحالك 7 تلقايه فالدار

صوفيا: هداك متزوج عندو مرتو يجي عندها ماشي جاي عندك نتي أو حبا فالجلسة فالدار

سعاد: ايوا الله ينعل الي ما يحشم

صوفيا: مقبولة منك الحب باي 😉، خرجت بان ليا بابا و سي علي واقفين حدا البارك و كيهدرو، مشيت سلمت على بابا: بنتي فين هي اللوطو ديالك؟ علي قالي ماشفهاش فالبارك

صوفيا توتر ت: اه خليتها يغسلوها فstation و دارو مع الصباح غير انا يلاه فقت دكشي علاش

سي علي: بنتي علاش مقلتيها ليا نديها لاش معذبة راسك؟

صوفيا: انا كنت البارح خارجة خارجة قلت نديها، المهم انا غدي نشد طاكسي يلاه باي

سي يوسف: ايوا تهلاي ابنتي و حاولي ترجعي بكري

صوفيا: اوك

خديت طاكسي و مشيت عند دار احسان، صونيت فالباب فتحت الخدامة دخلت لقيتها بوحدها كتقرا فكتاب: أوو الناس المثقفة

ناضت سلمت عليا: الزين صفا؟ واش نتي بخير؟ البارح خلعتيني

صوفيا: انا بخير جلسي نعاودها لك بحال الخرافة، عاودت ليها كلشي من طقطق حتى السلام عليكم: واو و جا البطل المغوار و أنقذ الأميرة من يد الشرير، هه و الله إلا حاسة براسي كنتفرج فشي فيلم، و صلاح شكان كيدير تماك؟

صوفيا: شعرفني؟ بغيتيني نسولو شكنتي كدير تماك؟ تي راه البارح ما بقيت ديتها فحتى حاجة خفت لا توقع ليا شي حاجة

احسان: و دبا شنو غدي ديري؟ ألا ساق خوك الأخبار مع هو كيما قلتي صاحب صلاح

صوفيا: اه مي انا قلت ليه ما يقول والو، فين هو تلفوني توحشتو

احسان: راهو فصاكك فبيتي، عيطت للخدامة جابت الصاك لقيت فيه كلشي، لقيت التلفون عامر مكالمات و مساجات: و دبا بقات غير اللوطو نجيبها من الاوطيل

احسان: تهناي من هديك القضية راه قلت للشيفور يجيبها ليك هنا و هو دبا فالطريق

عنقتها: شكرا نتي طوب

احسان: وايلي على شكرا اصاحبتي تي راه حنا خواتات، و دبا شنو نديرو نعيطو لسارة تجي عندنا هنا و لا نطرقوها نمشو لشي بلاصة

صوفيا: اول حاجة غدي ديري فيا هي تعطيني ما نأكل راه حاسة بمصارني كيعزفو السيمفونية من الصباح ما كليت والو

احسان: ههه وايلي هي اللولة الحب

جابت احسان الماكلة كليت حتى عركتها، جات سارة و عاودنا ليها شنو: ناري اصكعة غير شي معجزة هادي

صوفيا: وي غير سكتي للحظة فقدت الأمل

سارة: الحقير الآخر تفو على مكبوت، و شنو دار معاه صلاح، قاطعنا تلفون احسان: الو وي سي الكوميسير ها هي حدايا ندوزها ليك؟ اوك ها هي

صوفيا: واش صلاح؟

احسان: اه هاكي بغاك

صوفيا: الو وي؟

صلاح: انسة صوفيا خاصك تجي عندي دبا باش توقعي على المحضر، المدعي عليه كلف محامي و كيطالب بحضورك، حتى نتي خاصك تجيبي محامي القضية تطورات

صوفيا: لا عفاك ممكن تعاقبو بلا محاكم راه ما بغيتش هدشي يطور مبغيتش الصداع و خيطي بيطي على المحاكم

صلاح: لا بد من المحكمة حيت نتي اتهمتيه و هو ما بغاش يعترف

صوفيا: و دبا شنو غدي ندير؟

صلاح: عندك جوج حلول يا إما تعاودي كلشي على عائلتك و تحاكميه يا إما نسدو المحضر

صوفيا: كيفاش زعمة؟ نخليه يفلت منها بهاد السهولة؟ مكاين حل آخر؟

صلاح: للأسف هدو هوما الحلول الي كاينين

صوفيا: شحال عطاك؟

صلاح: شنو؟!!

صوفيا: شوف الي عطاك انا نضوبلو ليك المهم هو تربيه

صلاح: عارفة رأسك شكتقولي؟!! جمعي رأسك الالة ايوا هاك اللعب الخاوي، تفاهمي معاه رأسك، قطع عليها

صوفيا: الو الو؟ تفو الزمر الآخر كلهم متافقين رباعة الطماعة

احسان: اويلي واش تسطيتي السيد عتقك البارح و نتي درتي فيها ما يتصلح حشومة

صوفيا: قالك الالة خاصني ندعيه فالمحكمة و لا نسدو المحضر علاش نتا شنو خدمتك

احسان: هو خدمتو غير يشد المجرمين ماشي يحاكمهم مبقيتيش كتعرفي هدي

سارة: اه وخا انا مكنفهم فالقانون مي المحكمة هي الي غدي تقرر مصير عمر ماشي هو

صوفيا: اوف انفعلت و صافي

احسان: خاصك تعتذري منو

صوفيا: اممم، صونا التلفون لقيتو حسن: الو وي حسن؟

حسن: صوفيا مالك مكتجاوبيش على تلفونك ياك درنا اليوم نتغداو فبلاصة؟

صوفيا: اه حسن انا مرضت و كنت ناعسة دكشي علاش ما جاوبت سمحلي

حسن: مالك شنو ضارك؟

صوفيا: والو غير رواح

حسن: ما يكون عندك بأس، مكرهتش نجيب نطل عليك مي عارفك مغتبغيش

صوفيا: لا مكاين لاش انا غدي نولي مزيان ميغسي على كل حال

حسن: ما بينتناش، اوك نخليك ترتاحي غدي نبقى نهدر معك كل شوية

صوفيا: اوك باي، أوف نسيتو صافي

احسان: صراحة هاد حسن مدخلش ليا لخاطري

سارة: مالو مسكين شنو دار ليك؟

احسان: ماشي على شنو دار ليا، غير خاطري هاربة منو محملتوش

صوفيا: كيبان ظريف معمري شفت منو شي عيب، رجل محترم انيق و بعقلو

احسان: انا غير ممرتاحاش ليه، المهم هو يبقى شعور ما تفهمينيش غلط

صوفيا: المهم نتلقاو من بعد، نمشي نحاول نفكر فحريرتي باي

سارة: باي بيب تهلاي

ركبت اللوطو ديالي و رجعت للدار كانت جواية 7ديال العشية، شافوني الدار و استغربو، طلعت لبيتي بدلت لباسي و تكيت كنحاول نستوعب الأحداث و نقلب على حل

بعد ساعتين من التفكير، دورت لاحسان: الو إحسان صيفطي ليا نمرة صلاح

احسان: ok att

صيفطت ليا النمرة و صونيت ليه: الو سي الكوميسير معك صوفيا

صلاح: شنو بغيتي؟

صوفيا: صافي غير طلق الزمر، و سد المحضر

صلاح: واش خدام عند باك انا؟ هدري بأدب

صوفيا: مالي شنو قلت؟

صلاح: لا والو ما قلتي حتى حاجة انا الي مني لافوت، المهم شغلك هداك، انا دبا نخليه يمشي مي و الله نعلم بيك درت شي حاجة من ورايا غدي تندمي

صوفيا: لا غير تهنا معندي مندير بسلامة

قطعت معاه و هبطت نشوف العائلة الكريمة شكيديرو، لقيت عمتي يمنى عندنا جالسة هي و ماما فالصالون سلمت عليها و جلست معاهم: الله يكمل عليها بالخير و الله إلا فرحتيني

يمنى: امين و العقوبة لصوفيا

صوفيا: بلاتي شكون هدي الي غدي تتزوج

يمنى: شيماء ابنتي و خطبتها بعد غدا

صوفيا: وايلي مي شيماء مزال صغيرة، عندها يلاه 21 عام

يمنى: هذا هو سن الزواج ابنتي وزيدون هي الي جابتو حتى حد ما فرضو عليها

سعاد: هالعار لما فهميها بلي الزواج عندو سن محدد و الا مشا صافي البنت متبقاش عندها قيمة

صوفيا: وايلي اماما شحال فيك، واش حنا مزال فالعصر الحجري؟ فين كتجيبي هاد الهدرة؟

يمنى: بنتي ماماك عندها الصح الزواج زين و خصوصا على صغر

صوفيا: اوف عفاكم بدلو هاد الموضوع، و لا عرفتو شنو انا نمشي نشوف دادا حورية

مشيت للكوزينة لقيتها كتوجد العشا: هاي الزين

دادا حورية: بنتي ماشي من عادتك تكوني فالدار هاد الوقت

صوفيا: اه غير اليوم حاسة براسي عيانة و معنديش الكانة للخروج، دادا فراسك هديك البرهوشة ديال شيماء بنت عمتي يمنى غدي تتزوج

دادا حورية: بصح؟ ايوا مبروك، العقوبة ليك ابنتي حتى حنا نفرحو بيك

صوفيا: انا مبغيتش نتزوج و مكنفكرش فيه كيجيني تافه

دادا حورية: بالعكس ابنتي الزواج زين

صوفيا: اشنو الي زين فيه؟ كتكوني فداركم معززة و مكرمة و تمشي عند واحد مكتعرفي عليه والو يقلب ليك رأسك بالطلبات و النكير و المشاكل مع عائلتو، اللهم خلي بالي مرتاح من هدشي، نخرج ايمتا بغيت و ندخل فالوقت الي بغيت ماشي يجي قمقوم يتحكم فيك

دادا حورية: ههه نتي كلشي واخداه خطأ هدشي مكاين، إلا كنتو متفاهمين و كتبغو بعضياتكم جميع المراحل غدي تخطاو منها بسلام

صوفيا: انا اصلا مكنبغي حد و مغديش نبغي كنبغي غير ماما و بابا و رأسي

دادا حورية: وانا مكتبغيني؟

صوفيا: وايلي على مكنبغيك، نتي راك الفنون نتي هي كلشي

دادا حورية: الله يخليك ليا ابنتي، هي قلت مكاين حد فحياتك؟.😉

صوفيا: صراحة كاين واحد السيد مي غير علاقة عابرة ماشي شي حاجة جدية

دادا حورية: مكتحسيش بشي حاجة من جيهتو؟

صوفيا: لا ابدا

دادا حورية: والو كاع؟

صوفيا: قلت ليك لا؛ عفاك بدلي عليا هاد الموضوع مليت منو

دادا حورية: وخا أنا دبا ما مسالياش خاصني نكمل توجاد العشا

صوفيا: كتجري عليا دبا؟

دادا حورية: لا جلسي تفرجي تعلمي كيفاش الطياب باش تبقاي تطيبي لراجلك

صوفيا: والله لا حلم نطيب ليه ايوا هاك

دادا حورية: هه الله يكون فعوان هدا الي غدي يتزوجك مسكين

سميرة: ههه وييه مسخوط الوالدين

صوفيا: بزاف عليكم انا، شتي هدا الي غدي يتزوجني غدي يبقى يحمد الله و يشكرو ليل و نهار حيت لاقاه بيا

دادا حورية: اممم الله يجعلني نتيق

صوفيا: 😐 انا غدي نطلع لبيتي إلا وجد العشا عيطو ليا

طلعت للبيت و صونيت للبنات: الو صفا عليكم؟

احسان و سارة: صفا الحمدلله و نتي شكديري دبا؟

صوفيا: والو غير جالسة فالدار، نتوما فين؟

احسان: حنا دبا فماكدو، صراحة الخرجة بلا بيك خايبة كون غير جيتي

سارة: اه مملة بلا بيك

صوفيا: و الله غير ما فيا، المهم انا هدرت معكم غير باش نقولكم على واحد الفكرة بغيت نطبقها باش ننتقم من داك الحمار ديال عمر

احسان و سارة بلهفة: شناهيا؟

صوفيا: تقدرو تجو عندي للدار؟

احسان: وي اكيد

سارة كتاكل: مي بلاتي حتى نكملو ماكلتنا

صوفيا: اوك البقرة مي متعطلوش

احسان: اوك ساعة و نكونو عندك

بعد ساعة جاو البنات، هبطت عندهم لقيتهم كيسلمو على بابا و ماما و عمتي و حادرات الرأس الأدب زعمة احم احم 😜

كملو السلام و جريتهم للبيت، احسان: ايوا شنو هاد الفكرة؟

صوفيا: سارة؟ مزال عندك نمرة هديك البنت الي عاونتني نفترق مع ياسين؟

سارة: هدى؟ اه عندي علاش؟

صوفيا: غدي تهدري معاها دبا و تقوليلها غدا نتلقاو معاها فكافي الأصدقاء

سارة: اوك، مي علاش بغيتي تلقاي معاها؟

صوفيا: غير ديري دكشي الي قلت ليك حتى من بعد و تعرفي

احسان: وأنا شنو هي مهمتي؟

صوفيا: جاية فالطريق

هدرت سارة مع البنت و اتافقت معاها نتلقاو غدا، و دبا بقات البارتي الصعبة خاصني نعرف مكان عمر

احسان: دبا شنو؟

صوفيا: احسان نتي مهمتك تمشي للبار و تسوليهم على عمر، بلاتي نسيفط ليك تصويرتو، باش توريها للسرباية الي كاينين تماك

احسان: اوك نمشي دبا؟

صوفيا: اه من دبا أحسن

احسان: اوك

فالبار دخلت احسان و مشات عند السيرفور: سلام خويا

السيرفور: وي ختي اشحب الخاطر؟

احسان: خويا واش كتعرف عمر، راه كيجي هنا بزاف، بلاتي نوريك تصويرتو

شافها و هو يقول: اه عرفتو، هو كيجي كل ليلة هنا ديما مع 9 و دبا 10 و مزال ما جا

احسان: اهاه يعني كيجي كل ليلة ما عمرو زكل و لا ليلة وحدة؟

السيرفور: لا ديما كيجي واش بغيتيه فشي حاجة؟

احسان: صراحة انا بغيت نتلقاه و ما عرفت كيفاش؟

السيرفور: انا مكنعرفوش مزيان الي كنعرف عليه هو كيجي هنا يسكر يصيد شي بنت و يديها معاه مكيهدر كاع مع حد

احسان: قلتي يديه معاه البنات؟ اممم مزيان المهم انا عندي ليك طلب بسيط، غدي غير نعطيك نمرة ديالي فين يجي غدا عيط ليا اوك؟ مدت ليه 1000 درهم

السيرفور: اوك كوني هانية

احسان: هدشي يبقى بيناتنا إلا سواك حد قولو ما عرفت و حتى الي خدامين معاك وياك تقولها ليهم

السيرفور: كوني هانية الالة

احسان: شكرا

خرجت احسان و صونات لصوفيا: الو صوفيا راه هدرت مع السيرفور و وصيتو يصوني ليا إلا جا هداك

صوفيا: ميغسي بيب معندي منسالك، اجي عندي هديك البقرة ديال سارة مشات

احسان: حتى انا خاصني نرجع للدار بابا قالي ما نفوت 11

صوفيا: اوك تلاحي غدا فالعشية نتلقاو فالكافي متنسايش

احسان: اوك بيب تصبحي على خير

قطعت مع احسان و هبطت نتعشا، تعشيت و جلست مع بابا فالصالون بقينا كنهدرو حتى طلع ينعس، و حتى انا طلعت

الغد ليه فالعشية، لبست سروال دجين و تيشرت فالبيض مع اديداس، جمعت شعري و خرجت، ركبت اللوطو و مشيت عند الكافي الي درنا مع هدى، لقيت سارة هي و إحسان جالسين فواحد الطبلة جلست معاهم: هاي مزال ما جات هدى؟

سارة: ها هي جاية فالطريق

احسان: شنو تشربي اصوفيا؟

صوفيا: كوكتيل يكون بارد

جا السيرفور خدا طلباتنا، شوية جات هدى: هاي بنات كيدايرين؟

سلمنا عليها: صفا الحمدلله وانت؟

هدى: الحمدلله صوفيا هداك حبيبك ما بقاش دار بساحتك؟

صوفيا: صافي فضيت معاه

هدى: مزيان، ايوا غدي تشربونا شي حاجة؟

صوفيا: هي اللولة ازين شنو بغيتي؟

هدى: jus d'orange و شي حلوة ناكلها مزال مدرت الكوتي

جاب السيرفور دكشي الي طلبت، كلات هدى و دبا وقت الجد

هدى: لا لا ختي هدي منقدرش نديرها

صوفيا: و علاش؟

هدى: حيت القضية فيها البوليس

صوفيا: و شكون قالك فيها البوليس؟

هدى: حيت باينة، و إلا مشا شكا بيا هداك شندير؟

صوفيا: متخافيش مغديش يرضى يقول شنو وقع ليه

هدى: باش قلتيها؟

صوفيا: حيت انا كنعرف بحال هدوك الأشكال،و دبا شنو قلتي؟

هدى بعد تفكير: اوك مي علاش باغية دير فيه هدشي؟ شنو دار ليك

صوفيا: هداك الحقير كان غدي يغتصبني كون مجاوش البوليس، و البوليس مخداوش ليا حقي قلت ناخدو راسي

هدى: أو اغتصاب كاع؟

صوفيا: وي الالة

هدى: و الا كان هكاك صراحة يستاهل اوك امتى تبدأ الخطة؟

احسان: الليلة تقريبا، المهم غدي نمشو معك نشرو ليك شي غوب و ندوك لbeauty centre و من بعد نبداو الخطة

هدى: هي دبا، حيت دبا 6

صوفيا: اه عندها الحق يلاه البنات، مشينا لbeauty centre دارت هدى سوان فيزاج قادت حجبانها و شعرها، مكياج سموكي و حنا مشينا شرينا ليها غوب فالكحل قصيرة، لبستها دارت اللمسات الأخيرة، وصلت 9 جلسنا كنتسناو اتصال السيرفور، شوية صونا جاوبتو احسان: وي خويا؛ جا ياك؟ اوك شكرا بزاف المهم نتا بقا مراقبو عندك يمشي، اوك باي، قطعت معاه و شافت فينا: جات الضحية مواهاهاها

صوفيا: اوك the moment of the truth، هاكي فلوس الطاكسي bon courage

هدى: اوك يلاه انا نبقا نتواصل معاكم مساج

مشات هدى و حنا مشينا لواحد الريسطو، رزيرفينا فيه من 9 حتى 12 و عطيت للسيرفور الفلوس باش يقول بلي من 9 و حنا هنا، تعشينا خلصنا، شوية سيفطت لينا هدى مساج بلي غاديين للأوطيل، دبا بدا الصح، ركبنا اللوطو و الطريق كلها و حنا ساكتين، وصلنا الاوطيل و وقفت اللوطو: البنات بلاتي متخرجوش دبا

احسان سدت الباب: وي حبيبة مالك؟

صوفيا: واش نتوما مستعدات تخاطرو معايا هاد المخاطرة؟ انا ما بغيتش نضغط عليكم

احسان: حنا معك للموت، الصديق وقت الضيق و لا لا؟

سارة: حتى حد ما يتجرأ يمس صديقتنا بسوء حنا ديما غدي نكونو ليه بالمرصاد

عنقتهم: نتوما فعلا رائعين ما عمري ننسا وقفتكم معايا

احسان: حنا ديما واحد و غدي نبقاو واحد طول العمر

صوفيا: وي حبيباتي love you

سارة: يلاه نربيو داك الحمار

دخلنا مشات سارة للاستقبال: مسا الخير

البنت: مسا النور مدموزيل

سارة: اه بغيتك عفاك تقولي ليا شنو هي الخدمات الي كاينة فهاد الاوطيل

بينما سارة كتهدر مع البنت حنا تسلتنا بلاما يشوفنا حد للشومبر الي فيه هدى و عمر

هدى: شنو رأيك لعبو لعبة

عمر: لا ما بغيتش نلعب، قرب ليها بغا يبوسها هي تملصت منو بالفن: نو بيب على خاطري متأكدة غدي تعجبك

عمر: اوك نشوفو

تكاتو فالناموسية ربطت ايديه بايزار: ههه شنو كديري باغية تغتاصبيني زعمة؟

هدى: ههه اه عندك مشكل و دبا سكت خليني نكمل شغلي، ربطات ايديه و رجليه مزيان و غمضت ليه عينيه: لاش مغمضة ليا عينيا؟

هدى: مفاجأة حبيبي غدي تعجبك

مشات بشوية حلت الباب و دخلت صوفيا و إحسان، حطت صوفيا صبعها على فمها باش ما تهدر و أشارت ليها باش تمشي

عمر: أحلام فين مشيتي؟

قربت ليه صوفيا و هي قاطعة الحس عطاتو تصرفيقة: شنو درتي؟ واش تسطيتي ولا مالك؟

زادتو وحدة من ورا وحدة و هو كيغوت و إحسان حارسة الباب، بقات كضرب فيه و تقمش و تعض و هو ما عرف باش تبلى، و صوفيا كتحاول ما تهدر، بقات عليه هدي تنفع هدي تضر، حتى بردت غدايدها، هزت كونطاكط اللوطو ديالو و مشات هي و إحسان خرجو بنفس الطريقة و تبعاتهم سارة: امدرى ياك ما شافكم حد؟

احسان: لا صوفيا نتي صفا؟

صوفيا: اه دبا وليت مزيان بقات حجة اخرى، جبدت كلينيكس هزت بيه كونطاكط لوطو عمر الي كانت فالبارك ركبت هي و البنات فيها و داوها لواحد الخلا، سارة: صوفيا لاش جبتي اللوطو هنا؟

صوفيا: غدي نكسروها كاملة جمعو عدد ممكن من الحجار و أراك للفراجة، هزت حجرة و ضربت بيها اللوطو و بقيت كنضحك بهستيرية جاتني زوينة، بقيت كنلوح حجرة مورا حجرة و حتى البنات حتى كسرناها كاملة لحت الكونطاكط، تم تنفيذ العملية بلا ما نخلو حتى أدلة ورانا و دبا حسيت براسي مزيان، رديت الاعتبار لراسي و كرامتي، ما كرهتش نواجهو فين كنت نضربو مي خفت يشكي بيا و نصدق فالمشاكل، عنقت البنات مرة أخرى حيت فعلا الصديق الحقيقي عمرو يتخلى عليك

سارة: و دبا خاصنا نحتافلو، كاين واحد السهرة فالبحر نمشو ليها؟

صوفيا: اه علاش لا؟ مي خاصنا نبدلو لباسنا

احسان: اوك يلاه للدار نعطيكم ما تلبسو

صوفيا: لا انا نمشي للدار ندوش و نبدل ساعة و نخلط عليكم

احسان: اوك حتى حنا نمشو نوجدو راسنا

مشيت للدار سلمت على بابا و ماما: بنتي تعطلتي هدي 11

صوفيا: اه ماما انا غير جيت ندوش و نبدل لباسي كاين واحد السهرة فالبحر اتافقت انا و البنات نمشيو ليها

ماما: لا و الله لا مشيتي باقي الله يجعل براكة جيتي دبا سيري نعسي و لا شوفي شديري براكة من التسركيل فالشوارع حشومة

صوفيا: بابا ممكن نمشي مع 1 نرجع عفاك؟

بابا: سعاد خلي البنت تمشي تفوج هدي عطلة و كاع ناس خارجين ماشي غير هي

ماما: شفت هاد الفشوش ديالك هو الي غدي يخرج على البنت و شي نهار غدي تندم عليه، ديرو الي بغيتو انا اصلا غير زايدة ناقصة فهاد الدار، طلعت معصبة

صوفيا: اوف بابا هانتا كتشوف معرفت مالها معايا واش انا عمري درت ليكم شي مشكل؟

بابا: غير سيري ابنتي و لكن متعطليش

عنقتو و بست راسو: اوك يا احسن أب فالعالم، طلعت لبيتي دوشت لبست كسوة فالبلو مارين جنيدات كتبين صدري شوية مع طالون فالكحل، أما شعري طلقتو و درت مكياج خفيف، هزيت صاكي و خرجت، درت مع البنات نتلقاو فالسهرة، سارة هي الي دبرت فبطاقات VIP، وصلت لقيت البنات كيتسناوني، ورينا البطاقات للسيكيريتي و دخلنا للسهرة، كان بنادم كثير مع الصيف عامرة الدنيا، جابو مطربين من داخل و خارج المغرب، واحد مورا واحد، و حنا عاطيينها للشطيح و الرديح، سالات السهرة مع 2، احسان: واو دازت سهرة طوب

صوفيا: وي، يلاه البنات انا واعدت بابا ما نتعطلش باي

سارة: صافي مشيتي، اوك غدا نتلقاو دوزو النهار فبلاصة

احسان: اه عرفتو مشهية نفطرو فبلاصة فالبحر شنو رأيكم؟

صوفيا: فكرة زوينة غدا مع 10 نتلقاو فشي كافي هنا

سارة: وي غدي نحاول نفيق بكري

صوفيا: كاع كلنا هكاك يلاه تصبحو على خير

احسان: و نتي من أهل الخير

رجعت للدار لقيت كلشي نعس، شوية سمعت التقرقيب فالكوزينة تخلعت، هزيت فاز كانت فوق الطبلة و دخلت كنتسلت، كان الظلام بانت ليا غير التلاجة مفتوحة، بقيت كنقرب ليه شوية بشوية و هو يهدر حد من ورايا انا مع الخلعة ضربتو بالفاز و طاح للارض، شعلت الضو و يا ريتني ما شعلتو

ناري مشيت فيها كانت إيناس مرت خويا طايحة فالأرض و الدم خارج ليها من الرأس، بقيت كنحاول نفيقها و والو جبت الما رشيتها بيه، طلعت عند مروان فيقتو ناض مخلوع، سمعنا بابا و ناض حتى هو، هزها مروان داها للوطو ديالو و ماما يلاه فاقت على الصداع: مالكم شنو واقع؟

بقيت كنترعد معرفت شنو نقول، ركبت ماما مع مروان و انا و بابا تبعناهم باللوطو ديالو، وصلنا السبيطار، داوها للمستعجلات و حنا بقينا واقفين فالاستقبال، مروان بغا يهبل، بقا غادي و جاي من التوتر، شوية هدرت ماما: شنو وقع لأيناس ممكن تفهموني

كلشي تلفت عندي، مروان: اجي نتي شنو درتي لمرتي نتي كنتي معاها للكوزينة!!!

بابا: بدل ما تشكر ختك حيت عتقاتها جالس كتتهم فيها

مروان: بابا هي الي ضرباتها باينة للعمى

صوفيا: اه انا و مقصدتش مجيت نكملها حتى ضرباتني ماما: ياك ابنت الحرام، باغة تقتلي مرت خوك وولدو

صوفيا: انا مقصدت كنت كنسحابها شفار دخلت للدار سمعت التقرقيب فالكوزينة مشيت قلت مع رأسي هدا ما يكون غير شي شفار هزيت الفاز و هي تخلعني كانت من ورايا و ضربتها حيت تخلعت والله إلا هدشي الي وقع، مالي انا شبيني و بينها باش نضربها

سعاد كتولول: ويلي ويلي بنت الحرام قتلت المرة صافي مشات مشات

مروان بالغوات: ماما عفاك بلا ما تزيدي عليا!! و نتي و الله لا بقات فدين مك غير بلاتي نخرجو من هنا غدي نقتلك

تمخششت فبابا و هو كيحاول يهديني: بنتي عذريه هو مخلوع على مرتو انا تايق فيك ابنتي، عنقتو و جلست؛ دازت نص ساعة خرج عندنا الطبيب، ناضو كيجرو عندو انا شادة ركينة و كنسمع شكيقولو، مروان: دكتور عفاك طمني

الدكتور: الحمدلله الضربة كانت سطحية هي نزفت بزاف، مي عوضنا ليها الدم لي خسرت بالنسبة لبيبي فهو مزيان

مروان: الحمدلله ممكن ندخل نشوفها؟

الدكتور: دبا خاصها ترتاح مزال البنج شاد فيها، مي من بعد تقدر تدخل عندها

مروان: شكرا بزاف ادكتور

مشا الدكتور و مروان عاد باش ارتاح خنزر فيا واحد التخنزيرة باينة فيه ناوي على اخزيت، كمدتها و سكت أصلا مكيخلعنيش و ما هامنيش حيت ما عنديش علاش نخاف

يتبع