غيرك ما يحلالي الجزء 19

نسيم ودعات حميدة و شدات الطريق لدارها مع عبد الله....بقى معاها داك النهار تيرتاح من تعب الطريق نعسات ولادها و تحزمات للشقا ..نقات الدار و فتحات ليها السراجم تهوا و الشمش تدخل و جلسات ترتاح كاتبة رسالة ليحيى تتعلمو بلي وصلو....

داز النهار و شد عبد الله طريق الرجعة .. هزات نسيم وليداتها و مشات للرياض عند حسنية مع الدخلة تتسمع الضحك و النشاط و الولاد كيتقزو و يجيريو و غي الولاد ماكاينش تما البنات صغار بنت وحدة لي كاينة هي أزهار ....

...ابتسمات و تمات داخلة شادة فيد امير و ازهار مدوخة بالنعاس تتمشى كي المبوقة تلاقاتها رحمة بفرحة تترحب بيها...

_ والله ماكان يسحابلي جيتي لالة حسنية غتخرج ليها الفرحة من ودنيها...

نسيم ( بابتسامة ) ماعلماتهاش جاية شكون هنا كنسمع الصداع....

رحمة :هنا الحباب محموعين لبنى و راجلها و نادية و نجلاء و يوسف و سي صفوان ...الدار عامرة...

نسيم ( تتسول بصوتها الهادي ) ماكاينش عمي حميد وخالتي زاينة ؟

رحمة ( تتهز فراسها حابسة الضحكة ) لا هزها و مشاو مسافرين الراس فالراس مخلين لالة حسنية غتموت بالفقصة قالك علاش كيفششها غي هي و دايما كيتهلا فيها ياك كيقول مكيحملهاش و كتعصبو و ملي كيبغي يفوج فشي قنت كيديها معاه غي هي ....

نسيم ( تتضحك ) اودي هادشي كيفقص كثار ماكيضحك ماعندها مادير ...عمي حميد معروف كيموت على زاينة وخا كيتحلف فيها حتى يعيا و يحلف بلي كيكرهها و ماتجي عينو فيها كتلقى داك الكلام كاع تبخر ....

رحمة ( تتبسم ) و صعييب الحال ....زيدي ويدي دخلي شوف ازهار غتموت بالنعاس مسيكنة...

دخلات معاها لوسط الرياض و الورد محطوط فالدخلة مستف على طول تيفتح العين و يصفي الجو و الخصة فوسط الرياض بلدية مغربية مية فمية و الربيع خضر مدور عليها ...

شافتها حسنية عينيها تفتحو بالفرحة ناضت لعندها و جراتها تتسلم فيها و فحفايدها فرحانة...

_ لالا كنحلم انا ماعلمتي ماخبرتي نهار كبير هذا...

لي جالس تما هزو عينيهم فيها مبتسمين طلقات ليها حسنية و دازت سلمات عليهم كاملين وصلات عند صفوان حنات عينيها و سلمات علبه بطراف صبعانها تيسولها بجدية و عينبه ماعلاهمش فيها..

_ وصلتو مزيان تعدبتو مع الطريق ؟ فين البعالك ...

جلسات حداه خالقة مسافة احترام بيناتهم ..

_ كيلعبو مع جاد و ياسين و صعيبة و سكتي ! عييت و تسخست ...مد ليا داك مخدة حداك ظهري مشا بالحريق...

مد ليها المخدة دارتها ورا ظهرها شكراتو بلطف تتبسم مع نادية و لبنى و حسنية فرحانة ...

_ كي دازت خطبة حلا و سبوع خلود ماصيفتايش ليا التصيورات..

نسيم : كلشي داز مزيان الحمد لله .....حلا دارت ضريب الصداق ماشي غي خطبة هههه بقات بلاصتك معانا ...

حسنية ( تتضحك ) و سبحان الله ...عزيزة عليا بزاف ديك حلا سبحان الله كتعحني و بخفة كدخل للخاطر والله الئسم ...

صفوان ( عينيه مبسمين ) لسانها حار الواليدة اشمن كدخل للخاطر...شواتنا ...

نسيم ( ضحكات ) و كانت صغيرة بلا عقل دابا تبدلات ...

حسنية ( ناضت واقفة ) نوض بدل غليك غتباتي معانا ياك ؟

نسيم : ان شاء الله اخالتي...نخرج نجيب حوايجي من الطموبيل و نبدل و هانا معاك نفرجك التصاور ....

انسحبت من قدامهم جامعة شعرها الاسود بدلات عليها ملابس منزلية مريحة و جلسات معاهم تيهدرو و الحساسية بينها و بين صفوان واضحة ماتيهدروش مع بعض بزاف و الضحك بيناتهم نقص و حتى عينيه تيهربهم منها اذا جات علبها صدفة واضعين حدود لعلاقتهم كزوجة الاخ و اخ الزوج مابغاو صداع مرة أخرى....تلهات معاهم نسيم و شاركاتهم الكلام و الحديث ...سمعات امير كيبكي و ناضت طايرة لعندو لقاتو محكور وسط ولاد العاىلة و ازهار تتدافع عليه ..هزاتو تتسكت فيه و رجعات جلسات تتنهد..

_ كيحكروك اماما ديالي...

صفوان ( مد ليه يديه) عموو ...حتى هو باغي يكبر قبل الوقت شد الزعرة فيديك و تكمش اصاحبي....

مشا عند عمو تيلاهيه و يتسمع غا الضحك دصفوان و التكركير امير...

نطقات نادية تتوف فساعتها الانيقة...

_ نسيم قلتي غتقطعي شعرك ...نمشيو دابا ..

نسيم : دويت معاهم قبل نتغدااو و نمشيو ...

حسنية ( غوبشات ) علاش غتئطع شعرك حمئة نتيا....

نسيم : باغية نبدل شوية اخالتي مليت شعري هكاك غنقطعو ديكرادي ...

لبنى بابتسامة صفراء...

_ و الصراحة خصكي تبدلي شعرك طويل بزاف مافيه حتى فورمة تيفكرني فشعر لالة شحال هادي كان عندها واحد السالف قد ديالك ( تتضحك و ترحع شعرها القصير اللور ) و شوف دابا لالة زعما دقة قديمة و قطعات ليك الشعر و صبغاتو ماتعقليهاش....

نسيم ماعجبهاش كلامها سكتات ماجاوبتهاش هدرات غا حسنية بعفوية تتشكر فيها قدام مسمع صفوان و يوسف ابن عم يحيى نساتهم من بالها و مافكراتش ...

_ غزال شهوة منو كيعجبني انا و رطب مهلية فيه و غي تئرب منو كتطلع مع نيوفك بحال ريحة الورد ولا الئرنفل فشيشكل داك الريحة مانعرفهاش شنو هي...

يوسف خلاهم كيهدرو و انسحب باحترام و صفوان سمع و هز عينيه بعفوية لشعرها و رجع هبط عينيه لتليفونو مامسوقش و امير طالع ليه على كتافو تيجرو من السنسلة حتى تتبغي تقطع .....

تغداو و خرجات نسيم مع نادية خدات معاها ازهار و خلات أمير لصفوان و حسنية ...تهلات فشعرها و قطعاتو و ديكرادي لاسفل ظهرها مع شعرها ثقيل و خااثر جى معاها زوين كلشي شكرو و عجباتو ...حتى قالت نادية غتقطعو بحالها ...

جلسات نسيم دايرو رجل على رجل تتشوف فالمجلة و تشرب من عصيرها تتسنى نادية و حاضية مع ازهار ..هزات تليفونها تتصور راسها و شعرها و طلبات من بنت تما صوراتو ليها من اللور شكراتها و رجعات جلسات هازة ازهار تتبكي ليها باغية تقطع حتى هي و تزوق حتى حمرات فيها عبنيها..

_ لااا اخر مرة غناخدك معايا غتبقاي مع حلا و غنخليك معاها بوحدك...

ازهار ( كمشات فمها كدمع )نو امامي

تتقيس شعرها و تدلي شفايفها ببرائة باغية دير بحال مها و تزوق حتى هي تتشوف الالوان و الشعورات مابغاتش تسكت ليها طلقاتها ببكية .. ناضت تتسكت فيها و تسايس ووالو حتى طلبات منهم يديرو لبها خصلة شعر زهرية لصقاتو ليها مع شعرها عاد تهنات لالاهم ازهار و عجبها راسها تتفرنس ...

تنهدات نسيم بتعب

_ تهنيتي دابا عجبك راسك الغوات عاطياه قتلة ...دايرة فيها صعصع...

ازهار تتميل عنقها بحال المشة و تصور عجبها راسها و فرحات ...حتى حيدات ليها نسيم التليفون

_ صافي اري نوري تصاورك لميمة حميدة و طاطا خلود من..

ازهار ( تتعري سيناتها تتفرنس) و بابي امامي...

نسيم : و حتى بابي و عمو صفوان و ميمة حسنية و زاينة كلشي كلشي...

صيفطات التصاور لخوتها و لحميدة ..حطاتو و رجعات هزاتو باصابع مترددة دخلات عند يحيى و صيفطات صورتة شعرها ليحيى بدون اي كلمة..غي شافت الصورة مشات و طلعات ليها جوج شراط قلبات التليفون على وجهو تترمش و تهز فرجليها ..سمعاتو تهز على صوت رسالة تهز قلبها معاها وخلاتو هكاك مافتحاتش و ماقراتش و ماشافتش واش هو لي مصيفط ولا غيرو ...خبات التليفون فصاكها و خرجات شادة فيد ازهار ضارب فيهم الريح حتى لحقات عليهم نادية....

مشاو دارو الشوبينك .. نادية خدات جوج لبيسات جداد و نسيم عينيها تفيكساو على شوميز فالتركواز عاطية العين و داك اللون كيجدب اول مرة تزعم عليه عجباتها و شراتها بلا ماتسول ولا تشوف الثمن يحيى مامخليهاش ناقصة فلوس تيعطيها لي يكفيها و يشيط شرات داك الشوميز الفخمة من ثوبها البراق و الراقي قشعات نادية الثمن لقاتها ساوية 700 درهم ..أماا نسيم طلعات للطابق الثاني تتختار البنطلون لي يجيها مع داك الشوميز و ازهار تتخشى ليها بين الحوايج و تخرج ليها مع الجنب و فين ماكانت شي مراية تتوقف ليها تما و تشوف الخصلة الزهرية فشعرها فرحانة بيها.....

نادية : خودي دجيينز يجيك زوين...

نسيم ( تتشوف ناحية السراول ) غيجي حسن مع سروال بيض ثوب الواسع ....

نادية : جربي شي مرة تلبسي الجينز مزير نتي عندك لي هونش يجيك زوين و حتى يحيى ماعندو مايقول نتي ماشي محجبة زعما ياك عندو عادي و بدلي شوية الستايل جربي الحمر يجيك غزال...

نسيم : لا اصحبتي عندي شوميز قصار كيعجبني نلبسهم مع الواسع كنكون فيهم مرتاحة ...الطراويز كنلبسهم هكا اذا شي حاحة طويلة ولا جاكيط و ماعنديش معاه بزاف...

كملات تجوالها حتى لمحات قميص أحمر فاقع عجبها وزعمات على داك الحمر خداتو حتى هو تحت تشجيع نادية سالات و جرات ازهار معاها بعد ماخدات لي بغات ....اتصل بيها يحيى ملي كانو خارجين بعدات على نادية شوية و ردات ..

_ آلو يحيى...

يحيى : ا نسيم... جيتي للدار ...

نسيم ( تترمش ): لا مشيت مع نادية شرينا شي حوايج غادين دابا ...

يحيى بقى ساكت شحال عاد نطق..

_ توصلي غنصوني ليك ابيل فيديو باغي نشوفك....

دق قلبها و بانت على وجهها ..

_ وخا غنطلع دابا للطموبيل بسلامة...

قطعات الاتصال و من وجهها بان التغير من جملة وحدة منو...دخلات تتشوف فالواتساب لقاتو فعلا هو لي صيفط ليها ...لقاتو مصيفط قلب كبيير احمر فقط بلا كلمة لا جوج و داك القلب جاها فشكل و غريب منو هو خصوصا مابينااتهم داكشي فحديثهم العادي ...ظهرت ابتسامة صافية على ثغرها و فهمات بلي عحبو شعرها هكاك ..خبات تليفونها و ركبات طموبيلتها....

دخلات نسيم لبيتها هازة أمير ناعس فيديها و أزهار تتجرها من رجليها و تبكي معصبة و مبرزطة بالنعاس..

نسيم ( بهمس )شش غتفيقيه...نعسوه و نجي نعس حداك اجبيبة دياالي...

أزهار تتحك نيفها و تفوه معصبة تتبكي و امير غا حطاتو فاق و جرها من شعرها تيرمش مخلوع عاد فاق ...شافتو فاقت و ناضت ازهار كتبكي و امير يبكي فنفس الوقت مالقات شكون تهز شكون تسكت حسنية سمعاتهم و دخلات

_ الله الله اش كاين ..اجي المرصية ديالي اكي تنعس معايا..

ازهار لصقات فمها لصقة وحدة تتبكي و تمسح نيفها حميمر بالدموع و الخناين و الحالة و امير فاق من نعاسو مخسر و الغوات فالبيت عاطي كل واحد منين كيجر فنسيم... عيات حسنية تسايس ووالو بقاو لاصقين فنسبم لي هي بديها مقتولة بالعياء و النعاس...تنهدات واحد التنهيدة من القلب عياات و خاطرها بدا يمشي...جلسات نسيم فاشلة شادة راسها بتعب تتبكي في صمت مخلياهم كيبكيو و يغوتو و حسنية تتهز فراسها

_ و الصبر دابا يكبرو و تهناي...الله يهدي ماخلق ...

سمع حميد اابكاء ديالهم و على صوتو معصب عاد جا من السفر ...

_ حسنية مالهم الولاد علاش كتغوتو علبهم ...

خرجات لعندو حسنية تتهز و تسوط...

_ ماغوت علبهم حد الولاد هذا حالهم ....

مسحات نسيم دموعها بقلة حيلة مخلياهم يبكيبو على خاطرهم مالقات ليهم جهد ...امير بقى يبكي يبكي حتى غلبو النعاس و تقلب على كرشو ناعس بقات ازهار معصبة مع الشعر لصق ليها مع وجهها بالعرق و الدموع ...دخلاتها دوشات ليها و نعساتها فحضنها تبوس فيها وتسكتها و طبطب على ظهرها حتى دوخها النعاس و نعسات و مانعسو بجوج حتى تهلكات نسيم و مابقى ليها الوقت لا دوش ولا تمسح وجهها ولا تبدل نعسات هكاك حتى تليفونها ماهزاتوش تتسمع صوت اتصال و عرفاتو يحيى ومااعندهاش الجهد تهزو دوخها النعاس و نعسات بعد تعب شدييد و شي راحة مالقاتها مابين النعاس و الفياق...تتحلم راسها دوشات و بدلات و تنقات و نعسات معطرة خفيفة نقية تتفتح عينيها فاشلة تتلقى راسها بحوايج الخروج.. النعاس دوخها و العقل خدام مامرتاحاش هاهي طاحت من فوق السطح ها أمي نقز من الدروج ... تتغيب و ترجع تتسمع صوت التليفون كيصوني تيجيها داك الصوت بعيد و تتهدر فنفسها و تتخايل راها كتهدر بالجهد و غيسمعها شداتها الهلوسة و التعب و عدم الراحة ...

_ ماتصونيش...غيفيقو ...غيفيقو ...

دوزات ليلة عداب و الراحة ماقاستهاش حتى دقيقة..و مافاقت فالصباح الا على صوت أمير عند راسها و أزهار تتشمها بشعرها محنين عليها تيبوسو فيها شابعين نعاس تيضحكو و ينقزو فوق الناموسية و يطيحو جنبها و ساعة ساعة تيتحناو على وجه نسيم كيبوسوه و يفيقوها..

_ مااامييي....هيي ماااميتاااا.....

فتحات عينيها صبيعات ازهار على وجهها و امير جالس ليها عند راسها تيموت على شعرها عندو مايجر فيه ويخشي ففمو ...جلسات جالسة تتشوف فيهم ماشابعاش نعاس...

_ شبعتو نعاس ....

أمير تعلق فيها كيبوس و يضحك راشقة ليه...و ازهار قلباتها تنقاز.....لعبات مع امير وترسمات الضحكة معاهم نسات تمارة الليل و البكاءديال البارح تتشوفهم ضاحكين و صحتهم ممتازة و صورتهم مكمولة و ماناقصهم حتى خير تترتاح و تحمد لله...تكمش فيها أمير خاشي يديه مع البزولة فيه قاعدة مابغاتش تحيد تيشوف فيها و يضحك و يكركر حتى ضحكها بزز منها...

_ علاش كضحك مم الشارف البارح البكاي الصباح كتكركر علينا...ناكلك انا همم ؟

خشات راسها فكرشو و هو كيموت بالضحك حريفاتو تيشبهو ليها و بطبعو حنين ...

_ ااا...ماااااما....ااام....نوو احح...

....دخلات عندهم حسنية بعد مادقات لقاتهم فايقين محمعين على نسيم بحال القطة مع ولادها....

_ اصباح الخير فقتو الفطور واجد...

نسيم هزاات راسها فيها مشككعة و حوايجها مرونين ...

_ و سولي واش نعست اما هوما نعسو تبارك الله و صبحو كينقزو فوق راسي ماناقصهم خير...

ضحكات حسنية و هزات أمير تتبوس فيه ...

_ الحبيب المرضي الغزييول الفن نتايا الفن ....( شافت فأزهار ) يلااه الحبيبة ديالي نهبطو عند عمو صفوان. جدو نشوفوه هاا....نمشيوو.

ازهار ( بفرحة )زدوو....

نسيم ( ضحكات ) ايه جدو سيرو انا غنوض ندوش عاد غننزل ردي البال معاهم اخالتي راه كيغفلو ...

هبطو الولاد مع حسنية و ناضت نسيم دوشات و خرجات تتنشف شعرها و تجر فسندالة بيتية ...هزات تليفونها تتشوف اتصالات يحيى لقاتو صونا ثلاثة مرات و شي جوج ساعات صيفط ليها رسالة صوتية ...فتحاتها تتسمع صوتو الرخيم ..

_ غنشد طريق اليوم باليل راجع...غدا مع الغداء نكون ففاس ان شاء الله....

رمات الفوطة و عينبها برقو جلسات و اصابعها تيتحركو بهدوء و رزانة سجلات ليه اوديو بصوتها الانثوي الصباحي...

_صباح الخير...البارح نعست ماسمعتش الصوني ديالك ...

صيفطاتو طلعات ليها شرطة وحدة...ناضت بحماس قدام المراية تتنشف شعرها و خدات وقتهاا الكامل ....عطرات شعرها هاد المرة بعطر فلانتينو خاص للشعر لبسات جلابية خفيفة حسبية عادية و طلقات شعرها على كتافها اسود براق و تسريحة عطاتها لمسة غير....لبسات بليغة مودرن و هبطات كدور فالرياض و تصبح عليهم...و لي ماشافش لاكوب شافها دابا و شكرها فطرات تحت تقشاب و ضحك صفوان و حسنية...علماتهم غدا غيحي يحيى و فرحو لمجيتو ...نعسات نسيم داك اليلة مع هلكة الولاد و فاقت بحماس فطرات و ناضو تيوحدو الغداء على حساب ييحيى...دارت نسيم يديها معاهم تتعاونهم و تقاد و تزوق ...حتى دخلات عندها ازهار تتبكي عليها...حطات من يديها تتنهد و شافت فرحمة ...

_ كنلي اختي والله لا خلاتني ندير شي حاحة كيديرو النوبة مرة هي مرة خوها.....

رحمة : و حمري فيهم العين يوليو يخافو منك فششتيهم بزاف ...

هزات نسبم بنتها و جلسو فوسط الرياض محمعين مع العائلة و أمير شادو صفواان مهنية من ناحيتو ....حتى سمعات بلي يحيى جا واهتز قلبها و الولاد طارو من بلاصتهم ناحية الباب غيتسطاو بالفرحة ماعرفات تنوض ولا تجلس تخرج تلاقاه ولا تكمش بلاصتها مع ناديى و صفوان....اختارت تجلس بلاصتها ... اما حسنية و ولادو دارو الواجب تلاقاوه من ااباب...خارج من رونج روفر ايفوك نواغ عاد دخلها جديدة...ضحك ملي شاف ولادو جايين كيطيرو عندو ...تحنى لعندهم فاتح يديه سبقات ازهار ترمات عندو تتدرعو و تبكي و تشهق و امير كيتجبد باغي يهزو حتى هو....ضمو عندو يحيى كيبوس فيهم و يضحك فرحان بيهم مربين الصحة و نقيين و متهلين عند نسيم ...

امير ( بفرحة ) بااباااا.....

يحيى ( زير عليه كيبوس فيه ) بااابا ديالي ...فين اصااحبو ...

بقى كيبوس و يعاود مزير عليهم توحشهم بلا قياس و ازهار تتبكي و تشهق حلفات لا طلقات منو غا امير لي شدو من رقبتو كيضحك ... ووحسنية تتهز فراسها و تعجب...

_ و شوف البكاية كتبكي و تشهق تئول ئتلناها...دخلو دخلو من الشموسات ....

هاز ازهار لعندو مابغاتش تفك منو و امير شاد ليه فيديه ...حسنية تتشوف فالطموبيل و تصلي على النبي ...

_ تبارك الله و الصلاة على النبي غزالة حسن من الئديمة...

حميد خرج لعندو تيسلم عليه و شاف فالطنوبيل بتعابير باين اعجابو ..

_و حديدة و شمن حديدة ...

يحيى ( تيكمش عينيه من الشمس ) شنو بان ليك الحاج كا ولا ماكا....

الحاج ضرب على الطموبيل يديه تيضحك...

_ سمكة.....

ضحكات حسنية تتهز فراسها وهوما بقاو واقفين حدا الطموبيل تيتناقشو على موضوع السيارة و وراقيها و العشور و الثمن ...تفقدها الحاج بعين خبييرة و خداتهم الهدرة تما جهد ربع ساعة حتى جات زاينة تتسلم عليه و تتنكر عليهم يدخلو من الشمس.....دخل يحيى و العين عليه تقول غا العريس داخل عريس محمل بجوج ولاد شادين فيه بيديهم و رجليهم فرحانين...حطهم بزز و سلم على نادية و نجلاء و ناض صفوان لعندو تسالمو عادي سلام رحولي خشن ...عاد لمحات عينيه نسيم لي تقدمات لعندو حشمانة من الحاج...تسالمات معاه بالوجه و بعدات...

_ على سلامتك ...

رد عليها بهدوء قدام الحاج و بقات يديه على ظهرها حتى ضمها لصدرو بدون مايخلق حميمية كبيرة فالضمة احتراما لوجود الحاج و العائلة.....ابتسمو عيون نسيم و مشات تتعاون رحمة فالتوجاد و جلس يحيى تيجاوب البقية و كل واحد منين كيسول و يبارك الطموبيل الجديدة ....

طلعو النساء لدار العمة فالجبل الفوق ضاربين الطريق على الرجل و الجو ماهو سخون و ماهو بارد حنين و زوين ...غا التراب و الحجر تحت الرجلين ...صفاء و حلا عجبهم الحال و حسو براسهم فمغامرة نيت قاليها عبد الصمد ماتمشيش و بعناد تبعات لي فراسها و زطمات على كلمتو ....

حلا : واش فايتلك جيتي لهنا...

صفاء : مرة وحدة عرفتي الفوق بحال الجنة كتحمق ...و كتزيد شوية كتجبر فيرمة قدها قداش ....

حلا قطعات ورقة من الشجرة تتلعب بيها مكملين الطريق تيشوفو سكينة و عيشة فاتوهم و الشجار مظللين البلاصة و الهدوء و الصفاوة ...و الدنيا شبه خاوية ...وصلو لدار العمة و جلسو تما شوية حتى جراتهم صفاء و داتهم لدار اخرى مابعيداش بزاف ديال العائلة لكن خاوية ديال ولاد عم عبد الصمد مزوحين و النساء ديالهم باقين فالكنازة وهوما تحمعو فدار العم و الحاج فين جالسين عبد الصمد و سعيد...تبعوها تيشوفو فالطريق و يضحكو حتى و قفات حلا تتنهج و عينها مستغربين فشكل الدار ...ماهي دار على شكل عادي ولا فيلا بقوامها ...عندها الدروج من برا و السطاح تتطلع ليه من برا و من ورا الدار فيها الدروووج طوووال تكون شي عشرة درجات تتوصل التحت فين كاينين بلاصة الدجاج و الشجار د الهندي و واحد شجرة قدها فداش واخدة نص ديك اابلاصة باينة قديمة و عريقة...تعجبات من داك المنظر و عجبها ..حتى نغزاتها صفاء بهمس...

_ماتشفوش هكاك كيخافو من العين و عاد نتينا عينيك ملونين كملات اذا ماتت غا شي دجاجة يقولو عينيك السباب....

حلا ( ميقات فيها ) شنيي ! مشوقة فالخلا و الشجر...كنشوف غا ديك الشجرة جاتني فشكل...

صفاء ( بهمس ) هاديك شجرة د مواليها...

حلا ( هزات حجبانها ) و عرفنا ديال مواليها ...

صفاء ( قربات نتها تترمش بخوف ) و لاااا احلا....هاديك الشجرة حاضينها الجنون .....

حلا ( عقدات ححبانها ) بسم الله الرحمام الرحيم ...ماسلكنا مع بنادم بقى لينا غا الجنون ...

صفاء : بسم الله الرحمان الرحيم...

شافتهم من بعييد هزات جلايلها و تبعاتهم تتنهج و قزبيتها تتهز قدها قد فم البرميل ..وصلات لعندها و غوتات حتى قفزاتتهم ..

_ شنو كديىو تما شنو كطيىوو ...عاملين بحال توام الحمبيير حاااشا السامعين ...

صفاء ( بضيق ) حااشاك اخالتي...

حلا قلبات منها وجهها ماجاوبتهاش اما سكينة طالبة غا السلامة و شادة فمها و لسانها...سلتو ليها مرة اخرى و طلعو مع دروج السطح قشعاتهم و تبعاتهم تتمشى بحال داك الفروج كيتمختر و يفرش جناحو بغرور قدام الدحاجة....

خشات حلا يديها فصاكها تتجبد تليفونها تصور المنظر مالقاتوش...فتحات عبنبها بدعر تتقلب

_ وقيلة طاحلي التليفون ...

صفاء : تكوني نسيتيه التحت فين بقاو الرجال جالسين....

حلا : ماعقلتش فين درتو ..انا ماعندي زهر مع التليفونات تخايل يكون طاح ... نهبطو التحت و صوني عليه اصفاء ...

صفاء : ماكاينش الريزو هنا حتى لا صونا شي حد مايشدش عندك اتصالات...

حلا : لا اورونج ....

صفاء : مغيخدمش هنا.....

سكينة : و يلاه نطلعو للسطح نتوما وقفتو فنص الدروج....

عيشة واقفة حداهم هازة ورقة الشجر تتقطع فيها و دورفعينيها .....

طلعو للسطح ..و تفتحات عيون حلا على العشبة مستفة تما ربطة حدا ختها ..

_ هيي شنووو هادشييبي....

صفاء : كيف كتشوفي بعويناتك...خودي لك شي ربطة ....

حلا رمشات تتشوف فيها و المنطقة تتبان لبها كاملة من تما ...حنات راسها تتشوف الارتفاع و ترجع طل من جهة اخرى و وقفات عند الدروج لي كيهبطو للمنطقة السفلية فين كاينين الاشجار و الدجاج....سمعو صوت عيشة من وراهم مخنزرة...

_ ارا الصاك ديالك اصافي نشوف التليفون ديالي عاود قولي طاحلي. ...

صفاء جات تفتح صاكها تجبد ليها التلبفون جراتو ليها عيشة بالغوات مخرحة فبها عينيها بزز باغية تنوض الصداع...قفزاتهم كاملين ووقفو عند الدروج تيشوفو عيشة تتعرعر على صفاء...

_ انا بغيت نهزو بيدي شنو غنخطفلك رزقك من الصاك انا سراقة ؟ رجعتي بعاه د الراجل سراقة شنيي ربات فيك يماك ماعرفتشااي انا ...الحلوق د الفرارح و الشعر د المونيكة منتوف صفر بحال الزعفراان تفووو يخليها سلعة...

صفاء مارضاتش و ماحملتتش تعيبها فدام حلا حرات ليها الصاك من يديها بعناد تتغوت علبها ...

_ دييها فراسك شوف الكمارة ديالك كيفاش عاملة. الشارفة...فين تبان نتينا وبناتك ..حسن منك و من تاصيلتك كااملة و صفاء لالاك نتي و بناتك ...طلق الصاك ديالي والله ولا ديتيه ...

عيشة ( كتغوت صدماتها ) هااااا شفتو ...سمعتو...ملي نشكي و نبكي نكروني...انا الشارفة كتعيب عليا و على بنات ديالي اللفعة ....شعندك فهاد الصاك هاا...عندك فيك الكنز....

جرااتو ليها من يديها و حلا و سكينة تدخلو مصدومين تيفارقو طيحات ليها الصاك فالارض و طاح مكياجها و تليفون عيشة وو ديال صفاء و قشعو حتى تليفون حلا...تصدمات حلا و سكينة و عيشة تتغوت طارت هازة التلبفون ....

_ قولي عليها المجعورة كابرة فالجوع ياقليلة الترابي خاطفة تليفون هالة و قارمة بحال النمسة اتفووو المحوااع ...

صفاء ( تعصبات و الدموع فعيها ) والله ماانا ماشي انا بزاف على يماك الشارفة انا كرهتك و كرهت كمارة ديالك الله يعطيك الموووت تفووو...

حلا ( تترمش مصدومة ) اويبلي صااافي ماوقع والو ...يلاه بحالنا هاد البلاصة كتخلع ...حتى التحت و نهدرو الدار د الناس يلاااه...

عيشة دفعات حلا و هجمات على صفاء من داك الشعر و صفاء معصبة و مجننة و مارضاتش و عضات عيشة من كتافها تصدمات عيشة حتى بغاو عينيها يخرجو مامتيقاتش ...الصدمة شللات حتى سكينة و حلا عضات شفايفها و دخلات وسطهم تتفك ...بقاو مني منك و عيشة ولاو منها عشرة وصفاء تتعض و تغرس فسنانها ماعمرها غتجيها هاد الفرصة غتبرد غدايد سنين بىدات و لي بغى يوقع يوقع ..بغاات عيشة تطير عليها بقفصة لفخاضها دفعاتها بالجهالة من عليها حتى تلواو رجلين عيشة و خواو عليها و طاحت ليهم مكركبة فداك الدروج تتغوت و تكور بحال الكورة حات تحت الدار وسط براز الدجاج و اوراق الشجر تقطع حسها و يبسات يبسة وحدة بحال الجثة....

شهفو البنات برعب و ركابيهم فشلو ...هبططو كيجريو عندها صفاء شعرها طالع للسماء و وجها مقموش تدورو فعينبهم مخلوعيين...

_ اواعدي عندا تكون مااتت....

حلا ( خايفة من ديك الشجرة ) بسم الله الرحمان الرحيم....انا ماقستها ماشفتها ماريتها يانا اصلا عاد عروسة حتى العرس مادرتو غنمشي بحالي ....

جراتها صفاء من رجليها تترعد و حلا باغية غا تسلت....

_اجي اجيي نشوفو واش سخفانة ماتموتشي ماماتشي ماتموتش ....انا عندي العيال غنعطي راسي للواد الراجل ديالي صعييب غيدبحني...

حلا : صعييب سعيد صعييب...و شنو غنقول انا عبد الصمد غيرميني وسط الشوك مايشوفشي فيا ...( بغات تطلع فالدروح هاربة جروها عندها وهي تتغوت ) بعدو مني ها سكينة حداك انا قلبي غيوقف كنخاف ....

سكينة لسانها مقطوع كتبكي و تشهق...

_ شوف واش ماتت مانقدرشي نشوف فيها غنمووت بالخلعة الحبس الحبس و راجلي غيطقلني....يمة قلبي ...

حلا ( شافت فيها معصبة ) و ماماتش ماماتش عندها سبع رواح زعما طاححت من فوق عمارة هاديك ماتموتش ... غنموت انا بالخلعة الا الجنون مانتفاهمش معاكم.....

نقز عليهم واحد الفروج و طااارو كيغوتو سكينة سخفاااات قلبها ضعيف و كتموت بالخلعة من راجلها ...بقاو غي حلا و صفاء شادين على قلبهم ...طلعات حلا فالدورج حفاينة و شعرها تطلق باغية تهرب و لصقات فيها صفاء من رحليها تتبكي و تحلف. ..

_ والله لا مشيتي اجييي غنموووت انا عندي حوح ولاااد ..

حلا ( بالغوات ) و انا مادرت لا واحد لا جوح و مادرت والو غا تنزهق فالمشاكل ...عبد الصمد قلت على يماه بوتا كان غيرميني من الجبل دابا غيدبحني و يرميني وسط الهندي.....

صفاء ( تتبكي ) و شنو غندير انا شنو....

حلا : عطيها عطيها جوج تصرفيقات و غتنوض ولا عري على رجليك و هرب دابا يبول عليها كلب و تفيق راسها....

صفاء وجحها مطبوع و البكاء دخلات معاها الخلعة و ندمات حتى بغات تعض فالتراب طاحت على ركابيها تتضرب وجهها و تبكي...

_ سعيد غيطلقني مشيت فيها عضيت يماه و طيحتا من الدروج والله احلا الا خرجت على راسي ايمة الحبيبة غنمووت ....

ماداتهاش فيها حلا لبسات فرجليها و طلعات تتجري هاربة بحالها سامحة فصفاء و سكينة...غوتات صفاء و ناضت لبها مشععكة جراتها من يديها بززز تتبكي و حلا تعرعر...

_ وبعد مني...طلقي منيبي....رجلي كيضروني ايي...

صفاء : والله لا مشيتي كاملين غنمشيو فيها...( قلباتها بكاء ) نتينا عاد عروسة مايديرلك والو انا و سكينة لي مشينا فيها....زيد نشوفوها غي واش ميتة ااا الزمر شنو وقعلا...

حلا : ولااا الا الجنون مالاعباشيي....الا هوما...ديك الشجرة كتخلعني و انا مرعوبة انا مانخافش من بنادم ولايني الحنو ن انا كنموت منهم.....

بقاو كيتغاوتو تما و صفاء تتجر فيها و حلا رجليها مقطعين فيها اللحم تتندب و تولول اش داني علاش مشيت..العشبة لي كانت فالسطح طاحت و تفرتاات برجلين حلا...شهقاات صفاء و طلقاتها ببكية غتسخف...

_ و العشبة ساوووية الفلوووس مشااات برجلييك احلا....ايمة الحبيبة على نهارىى...

حلا : و ماشفتهاش ماسفتهاش....

تحنات تترجها بلاصتها و تقيس فيها بيديها و عاوناتها صفاء مخلوعين مرعبوبين بحال الى تيقتلو شي حد ...جات الريح و البرد و طار شعر حلا لوجهها حتى تعورات عينيها و هزات يديها لعينيها تتحك و شوطات ليها حتى غوتاات صفاء...

_ عندااك لاااا مامزياناش للعين غتشوطهم اواعدي على نهار....

تشوكات عيون و طاحت تتبكي عينبها شلال دموع مشااات صفاء تتجري لبراميل الماء التحت هزات سطيلة و طلعات تتنهج

_ هاك هاك غسل يديك عاد وجهك...

غساات حلا وجهها و عينبها تترمش و الشوفة مضببة بغات تعض فالتراب ندمانة علاش جات من الاصل...هبطو هي و صفاء التحت تيشوفو فسكينة مطيحة سخفانة و عيشة ماعليهاهدرة ...

حلا هزات شعرها و بعداتو من على وجههاو تحنات عند سكينة تتفيق فيها و تضرب ليها وجهها

_ سكينة...سكيبنة...صفاء اري نرش عليها الماء...

قربات منها صفاء بالزربة رشات الماء على سكينة حتى ماضت قافزة مرعوبة و ناضت سالتة تتبكي و جراتها صفاء ..

_ فاين هاربة فايين..كاملين عملنا يدينا يانفلتو كاملين يانهربو كاملين...

سكينة ( تترعب و تزاوك ) حرام عليك اصفاء خليوني نمشي عارفة راجل ديالي صعيب و كيضربني ماشي بحال سعيد...

مابغاتش صفاء و حلا و عياات ترغب و تعاود و حتى وحدة ماحنات فيها كاملين حصلو ...الرغغيب مانفع معاهم خدمات الحيلة ...خلاتهم محنين عند عيشة كيهزو فيها و سلتات هارربة مكتشوفش وراها....مخلية صفاء تتغوت و تبكي

_ الغداارة ...و عقل فيها....

حلا ( عقدات حجبانها تتزير تتحاول ترفع راس عبشة من الارض ) و ربيييي ثقييلة ثقييلة ...هز نحيدوها من العواد....و يلاه نمشيو بحالنا نقولو سخفات و طاحت ...

صفاء : واش ميتة ولا حية ..

حلا : و حية شمن ميتة نصي تقسم مابقيتش كنحس بيه ..جرر...

بعدوها بزز من داك عواد الشجر و الشوك و الدحاج تيطيرو قدامها تتضربهم حلا بالحجر حتى كيطيرو كيغوتو من حداها و يرفرفو بالجناوح..

كبات عليها صفاء الماء و تتضرب وجهها بشوية خايفة منها..مابغاتش تفيق...ناضت صفاء واقفة شادة شعرها الاشقر ...

_ مابغاتشي تفيق احلا...مابغاش اواعدي يانا...بقى ضرب على وجهها حتى نعمر السطلة د الماء و نجي...

تملت سالتة كتجرب جراتها حلا بعيون حمراء باكية...

_ عرفتي و تغدرني حتى ندمك على الساعة لي خلقتي فيها اصفاء ..

صفا : و طلق نعمر الماء نفكو هاد الحريرة الله يخليها نهار...

حلا : الاااء هوز ظهر هاد الشارفة و يانا غنعمر الماء...

صفتء : ولااا انا ماعندي جهد فيا فقر الدم مانقدرشي .بقى انا نعمر الماء....

سلتات صفاء و غبرات من قدام عيون حلا و رمات السطلة هرباتتت شادة الطريق تتجري بقات حلا واحلة تما مع عيشة شافتها تعطلات طلقتها للبكاء و الغدايد تتحلف فيها..،

_ وخا الغدارة و تفووو عليكم. كاملين ...و تفووو...انا معاشرة الشمايت الخوافات وخا على باباكم....

شافوهم الناس من الفوق و قشعو البراني فدار الخوت و العشبة تحركات طلعو لبلاصة الريزو و اتصلو بموالين الدار ....

مشات صفاء تتجري و شعرها مريش و الحجر فالطريق و الغبرة ...شافت وحدة هابطة بالحمارة تتكركب فداك العقبة عيطات لبها تتنهج....

_ اختي خيلاه وصلني معااك غي التحت المغرب قربات خصني نوصل خيلاه عييت قربت نسخف ...

طلعات صفاء ركبات فوق الحمارة تتشطج بيها فالعقبة حتى صعرات الحمارة و طلقها اصواتها قفزات صفاء من صواها بغات تهبط جرات الحبل و لواتو مع ذيل الحمااارة ...حتى علااات رجلييها الللور و بدات تركل و تدور وطلقاتها بجرية و صفاء فوقها جالسة مايلة تتغوت ..

وااااااعععع....و غنطيييبح......

اابنت من وراها كتجري...

_ و نقز نقز عندا ترميك قشي وااد ااواعدي ....

بكات صفاء الدم و ندمات حتى عضات يديها تتغوت ماحساتتش براسها...تكركبات من فوق الحمارة و طاحت على التبن ورجليها تخشاو فشوك التوت .....

اما حلا شبعات صفاء سبان و غوات...

_ يالحمارة يالمكلخة و غتحصال غي نتينا مشي حسابليك فلتي حتى مانكونش بنت حميدة تشمتني انا ....الجبلية وخا على يماك ...قلت زعما نديرو يد فيد ما شفنا مارينا ساعة معاشرة الخوافين الحماااراتت..

فكرات شحال حتى طلقات لعيشة فالارض ومشات عمرات الماء رشات على عيشة و ضرباتها ضربة حارة لكمارتها حتى فاقت و فتحات فيها عبنبها المدورين بالكحل جعرااتها..و كملها الفروج الجالس على حرف السطح فوقها تيدير شغلو و حطها سخوونة جارية على شعر حلا الحريري...طلقاتها بغوووتة غطرطق حتى صمكااات عيشة لي جلسات مدوخة راسها ثقييل عليها تتشوف فكل حاجة جوج...

_ يااااااربيييي انا مسخوطة...مسحوووطة....و حميييدة......

هزات الحجر تتضرب فالدحاج و الفرارج و تحنات هزات عيشة من الارض تتعاونهاو شعرها حالتو و وحهها حمر...

_ و عقل على الخير اعيشة عقل....يانا الوحيدة لي ماقدرتش نمشي و نخليك ماعطانيشي خاطري ...كيفاش كتحس ها...راسك ثقيل فيك الدوخة...اجي نطلعك فالدروج نحيدو من هاد الجيفة...

عيشة مرخية فيد حلا عظامها مدكدين و جبهتا مجروحة لي يشوفها تبقى فيه تقول محكرو ة و درويشة...تتنين مقصحة و ملي طاحت جاو سنانها على لسانها حتى عضاتو وولى يسيل بالدم ...

_ اييااا...اييي....رااسي....لييي رااسي ....

جلسات عيشة شادة فظهرها ماقادرة نوقف ولا تدوي راسها دايخ و لسانها ميت عليها ومجروح و لحمها مدكدكة....جراتها حلا بشوية تتهدر بالزربة...

_ بشوية عليك...و الله يخليها ترابي فشي ناس اخالتي قد يماها كتهز عليك يديها و تعضك انا شاهدة بعيني و مانرضاش نسكت على هاد الفضيحة وخا المرا بالراجل ديالا و العيال الا هاد الحالة ليدارت مانسكتش عليها...

عيشة بالها مع لسانها و الدوخة هلكاتها تسخسات بالمعقول....صفاء و سكينة وصلو للدار لقاو فيها غي سعيد و راجل سكينة اما عبد الصمد طلع طاير بعد ماوصلات ليه سنو وقع ...صاوبو حالتهم و جمعو الشعر عاد دخلو ولايني الربحة فيهم تتعبق و طلع القلب ...!

طلع عبد الصمد للدار فين كاينة حلا و عيشة و المغرب ادنات و تسمعات الله اكبر ...و الظلام قرب يطيح...عين عبد الصمد مظلمة و حجبانو ملاقيين ...هز عينبه فالرجال الفوق تيشوفو و بلا هدرة بلا جوج هز يماه و رجع مع الطريق تابعاه حلا تتجري هازة صاك صفاء و التليفونات...غادية وراه تتبيض فعينيها...وصلو للدار عند الحاج لقاوه خرج يصلي فالجامع مع العم....تحمعو كاملين فالصالة وعيشة جالسة تتشكي و تبكي...

_اييي...ظهري تقسم...

دارو بيها ولادها تيسولوها مهتمين لحالتها معصبين و مغددين ماعرفو شنو وقع ولا كيفاش بالهم مع عيشة لي جاتها الدوخة... سمعو غا الناس الغوات و العريسات مدافنين قبل مايسولو هوما ويعرعرو تما حركات عيشة لسانها بزز تتبكي و تشكي ..

_ زوجتكم باللفعات...حتر وحدة مافيها المسق...عضاتني عضة غدايد فكتافي و طيحوني فالدروج مانسمحلكم لا نتونا لا هوما ...ابيي...

سعيد ( بغضب ) شكووون لي عضك ايما...صفاااء حتى هي ...

عبد الصمد دور عينبه المظلمة لحلا و خرجاتهم فيه مسنطحة زعما مالك تتشوف فيا...سكت قارم جامع يديه فوق ركابيه و حجبانو كحلين ملاقين تيدير شوفات تتحس فيهم تيرسلو العافية....غا خوتو لي تكلفو تيسولو ويفهمو. هو كيسمع ...اما صفاء بغات تضربها بنكرة ...

_ و شوف اعيباد الله شوف...لاحولا ولاقوة الا بالله هاذا مانقول صافي ماعندي مانزيد ....

راجل سكينة هتف بعصيية تيدفع فالطابلي...

_ والله حتى نفرع دي**ها شكون هادي لي عضاتك ...

سكينة سمعاتو اش قال رجعات رجليها اللور تتبكي ...و صفاء البول بغاوو يهبطو ليها حلا مربعة يديها تتشوف فيهم و شعرها موسخ و الريحة منها تتقتل ....

_ ماشي انا بعدا....

سعيد ( بغضب ) زيد الواليدة زيد عاود كتسمعو ...والله الا كانت صفاء لافلتات و دوزاتها هانية...تضرب يما انا والله لا كانت لباباها....

صفاء ( ببكاء ) سعيييد ماشي انا منييتك اوااعدييي...

عيشة ( مرخية تتدوي بزز ) كاملين حلفانين فيا بغاو يقتلوني ...صفا عضاتني حتى خرج الدم و دفعاتني حتى طيحت خلاوني مرمية فالشوك بحال الجيفة....

حلا ( تدخلات تتبسم و تفتف ) الا انا اخالتي...مانقدرش....انا نقولكم شنو كاين و شفت و سمعت...مانزيد ماننقص...

عبد الصمد خنزر فيها و نطق بلسان ثقييل...

_ شدي فمك ....

حلا ( غوبشات فيه ) علااش نسكت ...انا كنت تما و شهدت...خالتي عيشة ضربات صفاء و سباتها و عايراتها و جراتها من شعرها و ناضو دابزو وماشفتش العضة سمعت غي الغوات و كنشوف لالة عيشة مكركبة من الدروج جات طايحة تما فالشوك...سكينة مشات تعلمكم و انا بقيت عاونتها حتى فاقت ووقفتها ولا مكتخافش الله تكدبني. ..

عيشة ( خنزرات فيهم ) سكوت الكدابة سكوت نعلة الله عليك.... دخلو عليا اللفعات للدار...مافيهم مسق بثلاثة و كبيرة ديالوم هاديك صفااء ماعمرني ندوزا هيدا كتكحل فقلبي اسعيد ربيتك و كبرتك باش تزوج وحدة تعضني حسبي الله و نعم الوكيل....

ناض الصداع و بكاء صفاء وولادها و سكينة بغات تسخف بالبكاء وخا فلتات منها اما حلا قارنة وسطهم مغوبشة ..سعيد كمش فمو مغدد و راجل سكينة دفع الطبااي و خرج برا كيسب ...عبد الصمد حمع الوففة و نطق..

_ غنشدو الطريق اليلة نشوفو الطبيب لالة يما......

الخوت بثلاثة جامعين الكلام على طرف الاسان حيت فديور البراني.....قلبهم كحل و عمر و خاصة سعيد مايبرد حتى يبقى الراس فالراس مع صفاء و ماعمرو ينساها ليها...الطريق كلها وهي تتبكي حتى انها ركبات مع عبد الصمد و حلا ضامة بنتها لعندها تتبكي و تشهق....حلا معصبة غي مع حالتها باغية دوش...و الطريق طوييلة ومتعبة نعسات فالطريق و وصلو حتى كان قرب الصباح لتطوان ....سلتات حلا لدارها فتطوان مخلية عبد الصمد و خوتو فدار لالة عيشة...غا وصلو سعيد دخل صفاء البيت و تأكد فعلا عضاتها عطاها قتلة د الدق تيسمعو الغوات و البكاء و عيشة تتغزز فمها تتسمع غوات صفاء حتى نطقات تتنفخ....

_ و صافي الله يسامح قولو بركة ...اسعيد خليها الله يسامح....

....صفاء كتاكل الدق و سكينة شادة قلبها ماعرفات كي دارت فلتات منها...معروف راجلها عصبي و يديه طويلة و هي نية و خوافة ...عكس سعيد ماكيضربش و ضحوكي ولكن الامر متعلق بيماه مراتو عضات يماه و طيحاتها بغى يتسطى ......ناضت عيشة تتعرح و دقات عليه تتغوت بزز تتخرج الهدرة تتنفخ....

_و سعيد خلييها صافي خليييها ماضرباااش غوت عليها صافي خليييها و سعييد خلي اللفعة ماضرباشي.....

ضربها سعيد حتى تكمشات تتبكي و خرج ساخط من الدار كيدور بحال الحمق على الصباح....!

وصلات التمنية د الصباح و خدا عبد الصمد عيشة للطبيب ...!!

اما حلا فاقت حتى للظهر واخدة راحتها فدارها فتحات تليفونها و صيفطات رسالة صوتية لحميدة بصوتها الصباحي...

_ انا وصلت لتطوان اماما ...

حميدة : صباح الخير فوقاش جيتو ..واش فدارك معاك عبد الصمد...

حلا ( تتفوه ) سي فداري...لااا عبد الصمد مع يماه عندهم شي مشاكل...غننوض نبدل عليا و نمشي نشوف الخدمة فالعشية غنجي للدار....

صيفطاتو ليها و جاوبات رسائل نسيم و تتشوف فتصاور نسيم و ازهار لي صيفطاتهم ليها ...ابتسمت و سجلات اوديو تتجاوبها...

_ بصحتك لاكوب هاي هاي جاتك كتحمق ...و شوفلك الفيرفيرة الصغيرة لونات ليك الشعورات بالوردي طالعة كتشبه لخالتها....

جاوبات الرسائل لي قدات و ناضت دارت بحالتها دغيا ومشات سالتة لخدمتها مافيها ماتلاقى بعبد الصمد ولا تناقش معاه ....

وصلو للدار و الولاد طارو لبيتهم موحشين فيه...يحيى دوش و نعس عيان بتمارة الطريق لي ضرب.....بقات نسيم كدور فالدار تجمعها و تدوي مع حميدة...

_ اه وصل اليوم مع الغداء..

حميدة : و على سلامتو تهلى فراسك الغزالة ديالي...شنو كدير دابا

نسيم : والو جمعت الدار و غندخل ندور براسي شحال مارخيت راسي فالحمام...

حميدة : و رد البال كنعرفك يالزغبية كدخل عوالة على ربع ساعة كتصدق ناعسة وسط الماء...ماتشعلشي الشموع انسيم هانا كنوصيك شي نهار غيطلع معاك شي جن...

نسيم ( ضحكات ) بسم الله الرحمان الرحيم ...و ضروري من الشموع بلا بيهم كي والو اماما...

حميدة : و يلاه باك جا شوية و نعاودلك...

نسيم : ..يلاه اماما نخليك....

قطعات معاها و مشات حيدات حوايجها داخلة للحمام ...فرقات شعرها على جوج و بدات تتدهن فيه مخلطة زيت الورد و زيت الخزامة مع روح الفانيليا و دلكات بيه شعرها مزيان و خلاتو ...و مشات ثاني لرجليها هزات حجر الرجلين تتنقي فيهم و تحك تيخرج العجب المعجب من الرجلين و تينقيهم حتى يوليو بيضين صافيين ...حكات و عاودات و قدامها ولاو كيشعلو....استغلت الفرصة انه كلشي ناعس و خدات راحتها و دوشات ... تغلغل الورد بين خصلات شعرها و جسمها بقات شي ربع ساعة مرخية فحمام الورد سخووون و السكات فالدار الولاد نعسو و يحيى نعس واخدة راحتها و تتنهد بين كل دقيقة مرخية عاحبها الحال ....ناضت صافية و نقية مبتسمة تتحس بالراحة فاش تتلقى وقت لراسها و تترتاح و تتسترخى و تنور وجهها هاد اللحضات عندها قلال مكيتعاودوش و كملاتها ببخار الخزامة تتعطر المنطقة الحساسة و السخونية طالعة معاها من التحت ...ريحة الورد فايحة منها من زغب راسها لاصابيع رجليها.....دورات الفوطة على لحمها و وحدة اخرى على شعرها وركزات على وجهها نشفاتو مزيان من الماء ماخلات حتى قنت عاد هزات ماء الورد تترش فوجهها و مانشفااتوش خلاتو ينشف راسو و الماء يدخل فعمق بشرتها....!

خرجات من الحمام بلارة و ريحتها عاطية...القدمين نقيين و معطرين حكات باباهم حكة د الغدايد ملوية فوطة بيضة و شعرها حيدات من عليه الفوطة و خلاتو مطلوق فازك ينشف لراسو ...دخلات لبيتها تتمشى بلاصوت لقات يحيى بين الفياق و النعاس....دازت من حداه تتقلب على معطر الفم لقاتو تسالا ...وبلا عجز مشات للكوزينة تتزرب قبل مايفيق شي حد فيهم قلبات على القرنفل لقاتو مابقاش عوضااتو بالنعناع و الفانيليا ...هزات كاسرولة دارت فيها الماء و خلاتهم يغلييو مزياان و زادت عليهم النعناع و الفانيليا غطاتهم و خلاتهم يغلييو شوية وو طفات عليهم يلا ماتحيد الغطاء حتى برد و صفاتو فقريعة زاج كانت عندها ديال الزيوت ...غسلات سنانها بالفرشاة و المعحون و صفات لسانها عاد شربات من داك الماء غسلات بيه فمها و غرغرات فقط مابلعاتوش عاودات العملية جوج مرات عاد تهنات و رضات على راسها بالروايح الزكية و النقية و لبسات بيجامة منزلية رطبة ديال ساتان و طلقات الشعر على راحتو ...بانت فيها الراحة و تنور وجهها و منين مادازت ريحتها فايحة حتى من الرجيلات كيشهيو ...دور دورو تشوف فيهم و تبسم مع راسها ناسية الولاد و ناسية يحيى و نسات كلشي ...وخا عيانة و فيها النعاس كان عندها جوج خيارات يا تضربها بنعسة بحالها بحالهم و ملي تفيق تلقى راسها مانقياش و ماتقدرش تنقى حيت الولاد فاقو باغين ياكلو و الخاطر و الوقت والو ....و يا الخيار الثاني تسمح فنعاسها و تعطي وقت لراسها تنقى فيه و دور بحالتها تولي تتظوي فضلات النقاوة على النعاس و ماندماتش......

دخلات للبيت عند يحيى و تكات حداه رامية شعرها وراها كان ناعس على كرشو وهي على جنبها هزات يديها بتردد حطاتها وسط شعرو الاسود تتدوز صبيعاتها عليه و تلعب لبه فشعرو و البسمة فعينبها باينة تتملي عيويناتها بشوفتو حسات بيه فاق و استحلى ريحتها و نعومة يديها و بدون سابق اندار هز راسو من فوق المخدة وحطو على صدرها تيحك نيفو بين ثدييها

ابتسمت عيونها و زادت غطسات يديها فشعرو وهو مدوخ بالنعاس...طلات عليهم ازهار عيينيها مجبدين و شعرها مرون تتقلب و تسول على باباها ببرائة و خوف يكون مشى...

_ بااااباااااا...

دورات نسيم وجهها لعندها مبتسمة ناطقة بهمس...

_ شش ناعس ....

ازهار تحول خوفها لفرحة و دخلات كتجري تتجبد طالعة للناموسية تتشوفو خاشي وجهو فصدر نسيم ناعس نطقاات ببرائة و بهمس...

_ فيكو اماما....

نسيم : غيفيق دابا غي خليه ناعس ...

سمعات ازهار كلام نسيم وسكتات و ماتهنات حتى طلعات بشقاوة و نعسات فوق ظهرو تتبسم طبوزة و زادت عمارت و طبزات...فاق يحيى على شقاوتها و قلبها من فوق ظهرو لصدرو ضاحك و صوتو مبيبح بالنعاس...

_ فرعتي لينا ظهرنا البطبوطة...

ضحكات ازهار تتحاول تعاودها وراه...

_ طبوطة ...

يحيى : لاا بطبوطبة ...

ازهار ( غتسطى بالضحك جاتها فشكل ) نو ابابي بطوطة بطوطة....

ضحكاتهم بديك الضحكة و الشعر مرون و الخدود مطبزين كلسي تيقول زينها تيشبه لزاينة و غتطلع زوينة بحالها بقى تيدوي مع بنتو و يعلمها تنطق و تسرح الهدرة و نقزات لتليفون نسيم وراتو تصاورها فرحانة و لي جا فعقلها تتقولو و تخوي و تشكي .....ساف فنسبم و نطق...

_ أمير مزال ناعس لدابا ؟!

نسيم ( حاضية مع ازهار تتدوز التصاور فالتليفون وتوري ليحيى ) سي كيبقى ناعس ساعة و ربع عاد كيفيق ....

جرات أزهار وجه يحيى قلباتو لعندها تتوربه التليفون..

_ هادي مامي و طاطا حلا ابابا...و هادي ميمة حونية ...

يحيى : انا بغيت نشوفك نتي ماشي هما طلقينا خلاص ...

عيات تقلب و تنفخ و تعصبات ملي مالقات تصاورها ضحكات نسبم و قربات منها تتقلب معاها وشعرها تيطيح على وجه يحيى حسات بيديه جروها لعندو من خصرها و نيفو مع عنقها كمشات عنقها تتدوي تالفة...

_ و كلشي شافو مابقاش ليك التصاور جداد دابا نصورك وحدين اخرين...

حيدات ليها التليفون و بقات ازهار لاصقة لبهم تما يد يحيى حاوطو خصر نسيم و خشاها فيه برعبة واضحة و مالقاو جهد مع أزهار لصقات فيه لصقة وحدة فين مامشى تابعاه و فاق حتى امير بعد مامشى للحمام و قلبو كامل سفاه على علاه كيموت على الروينة وعلى الحمام خاصة غا جر و كركب دخل للبيت عندهم و عاد شاف يحيى طلع ليه جالس فوق الراس حتى هو شادينو بجوج ......عطاهم الخاطر و ناضت نسيم واقفة تتجمع شعرها ...

_ ماكاين والو فالدار مايتكال ايحيى...

يحيى : كتبي ليا شنو ناقص نجيبو ..

مشات نسيم تتقلب فالكوزينة شنو ناقص و ضربات دويرة على داك الحمام تتجمع اش دار سي امير ...سلت يحيى من قدامهم و شد السراجم وحيد الاكسسوراات الزجاجية من قدام الاولاد .... خرج و مخلينهم كيتفرحو فالتليفون مخشعين و ملاهيين ...لقى نسيم فالحمام تتجمع فيه و تنقي شاف فيها برغبة و شد الباب وراه باحكمااام...